{"collection":"Bible & Christianity","html_url":"https://unchartedknowledge.5gfusion.net/browse/bib/vul/th1002.htm","path":"bib/vul/th1002.htm","source_url":"https://sacred-texts.com/bib/vul/th1002.htm","text":"1 Nam ipsi scitis, fratres, introitum nostrum ad vos, quia non inanis fuit:\n2 sed ante passi, et contumeliis affecti (sicut scitis) in Philippis, fiduciam habuimus in Deo nostro, loqui ad vos Evangelium Dei in multa sollicitudine.\n3 Exhortatio enim nostra non de errore, neque de immunditia, neque in dolo,\n4 sed sicut probati sumus a Deo ut crederetur nobis Evangelium: ita loquimur non quasi hominibus placentes, sed Deo, qui probat corda nostra.\n5 Neque enim aliquando fuimus in sermone adulationis, sicut scitis: neque in occasione avariti\u00e6: Deus testis est:\n6 nec qu\u00e6rentes ab hominibus gloriam, neque a vobis, neque ab aliis.\n7 Cum possemus vobis oneri esse ut Christi apostoli: sed facti sumus parvuli in medio vestrum, tamquam si nutrix foveat filios suos.\n8 Ita desiderantes vos, cupide volebamus tradere vobis non solum Evangelium Dei, sed etiam animas nostras: quoniam carissimi nobis facti estis.\n9 Memores enim estis, fratres, laboris nostri, et fatigationis: nocte ac die operantes, ne quem vestrum gravaremus, pr\u00e6dicavimus in vobis Evangelium Dei.\n10 Vos testes estis, et Deus, quam sancte, et juste, et sine querela, vobis, qui credidistis, fuimus:\n11 sicut scitis, qualiter unumquemque vestrum (sicut pater filios suos)\n12\u00a0deprecantes vos, et consolantes, testificati sumus, ut ambularetis digne Deo, qui vocavit vos in suum regnum et gloriam.\n \n13 Ideo et nos gratias agimus Deo sine intermissione: quoniam cum accepissetis a nobis verbum auditus Dei, accepistis illud, non ut verbum hominum, sed (sicut est vere) verbum Dei, qui operatur in vobis, qui credidistis:\n14 vos enim imitatores facti estis, fratres, ecclesiarum Dei, qu\u00e6 sunt in Jud\u00e6a in Christo Jesu: quia eadem passi estis et vos a contribulibus vestris, sicut et ipsi a Jud\u00e6is:\n15 qui et Dominum occiderunt Jesum, et prophetas, et nos persecuti sunt, et Deo non placent, et omnibus hominibus adversantur,\n16 prohibentes nos gentibus loqui ut salv\u00e6 fiant, ut impleant peccata sua semper: pervenit enim ira Dei super illos usque in finem.\n17 Nos autem fratres desolati a vobis ad tempus hor\u00e6, aspectu, non corde, abundantius festinavimus faciem vestram videre cum multo desiderio:\n18 quoniam voluimus venire ad vos, ego quidem Paulus, et semel, et iterum: sed impedivit nos Satanas.\n19 Qu\u00e6 est enim nostra spes aut gaudium, aut corona glori\u00e6? nonne vos ante Dominum nostrum Jesum Christum estis in adventu ejus?\n20 vos enim estis gloria nostra et gaudium.","title":"Vulgate: 1 Thessalonians: 1 Thessalonians Chapter 2","type":"page"}