{"collection":"Bible & Christianity","html_url":"https://unchartedknowledge.5gfusion.net/browse/bib/vul/tob009.htm","path":"bib/vul/tob009.htm","source_url":"https://sacred-texts.com/bib/vul/tob009.htm","text":"1 Tunc vocavit Tobias angelum ad se, quem quidem hominem existimabat, dixitque ei: Azaria frater, peto ut auscultes verba mea.\n2 Si meipsum tradam tibi servum, non ero condignus providenti\u00e6 tu\u00e6:\n3 tamen obsecro te ut assumas tibi animalia sive servitia, et vadas ad Gabelum in Rages civitatem Medorum, reddasque ei chirographum suum, et recipias ab eo pecuniam, et roges eum venire ad nuptias meas.\n4 Scis enim ipse quoniam numerat pater meus dies, et si tardavero una die plus, contristatur anima ejus.\n5 Et certe vides quomodo adjuravit me Raguel, cujus adjuramentum spernere non possum.\n6 Tunc Rapha\u00ebl assumens quatuor ex servis Raguelis, et duos camelos, in Rages civitatem Medorum perrexit: et inveniens Gabelum, reddidit ei chirographum suum, et recepit ab eo omnem pecuniam.\n7 Indicavitque ei de Tobia filio Tobi\u00e6 omnia qu\u00e6 gesta sunt, fecitque eum secum venire ad nuptias.\n8 Cumque ingressus esset domum Raguelis, invenit Tobiam discumbentem: et exiliens, osculati sunt se invicem: et flevit Gabelus, benedixitque Deum,\n9 et dixit: Benedicat te Deus Isra\u00ebl, quia filius es optimi viri et justi, et timentis Deum, et eleemosynas facientis:\n10 et dicatur benedictio super uxorem tuam, et super parentes vestros,\n11 et videatis filios vestros, et filios filiorum vestrorum, usque in tertiam et quartam generationem: et sit semen vestrum benedictum a Deo Isra\u00ebl, qui regnat in s\u00e6cula s\u00e6culorum.\n12 Cumque omnes dixissent: Amen: accesserunt ad convivium: sed et cum timore Domini nuptiarum convivium exercebant.","title":"Vulgate: Tobias: Tobias Chapter 9","type":"page"}