{"collection":"Bible & Christianity","html_url":"https://unchartedknowledge.5gfusion.net/browse/bib/vul/tob010.htm","path":"bib/vul/tob010.htm","source_url":"https://sacred-texts.com/bib/vul/tob010.htm","text":"1 Cum vero moras faceret Tobias, causa nuptiarum, sollicitus erat pater ejus Tobias, dicens: Putas quare moratur filius meus, aut quare detentus est ibi?\n2 Putasne Gabelus mortuus est, et nemo reddet illi pecuniam?\n3 C\u0153pit autem contristari nimis ipse, et Anna uxor ejus cum eo: et c\u0153perunt ambo simul flere, eo quod die statuto minime reverteretur filius eorum ad eos.\n4 Flebat igitur mater ejus irremediabilibus lacrimis, atque dicebat: Heu, heu me, fili mi! ut quid te misimus peregrinari, lumen oculorum nostrorum, baculum senectutis nostr\u00e6, solatium vit\u00e6 nostr\u00e6, spem posteritatis nostr\u00e6?\n5 omnia simul in te uno habentes, te non debuimus dimittere a nobis.\n6 Cui dicebat Tobias: Tace, et noli turbari: sanus est filius noster: satis fidelis est vir ille, cum quo misimus eum.\n7 Illa autem nullo modo consolari poterat, sed quotidie exiliens circumspiciebat, et circuibat vias omnes per quas spes remeandi videbatur, ut procul videret eum, si fieri posset, venientem.\n8 At vero Raguel dicebat ad generum suum: Mane hic, et ego mittam nuntium salutis de te ad Tobiam patrem tuum.\n9 Cui Tobias ait: Ego novi quia pater meus et mater mea modo dies computant, et cruciatur spiritus eorum in ipsis.\n10 Cumque verbis multis rogaret Raguel Tobiam, et ille eum nulla ratione vellet audire, tradidit ei Saram, et dimidiam partem omnis substanti\u00e6 su\u00e6 in pueris, in puellis, in pecudibus, in camelis, et in vaccis, et in pecunia multa: et salvum atque gaudentem dimisit eum a se,\n11 dicens: Angelus Domini sanctus sit in itinere vestro, perducatque vos incolumes, et inveniatis omnia recte circa parentes vestros, et videant oculi mei filios vestros priusquam moriar.\n12 Et apprehendentes parentes filiam suam, osculati sunt eam: et dimiserunt ire,\n13 monentes eam honorare soceros, diligere maritum, regere familiam, gubernare domum, et seipsam irreprehensibilem exhibere.","title":"Vulgate: Tobias: Tobias Chapter 10","type":"page"}