{"collection":"Bible & Christianity","html_url":"https://unchartedknowledge.5gfusion.net/browse/bib/vul/wis009.htm","path":"bib/vul/wis009.htm","source_url":"https://sacred-texts.com/bib/vul/wis009.htm","text":"1\u00a0[Deus patrum meorum, et Domine misericordi\u00e6,\n qui fecisti omnia verbo tuo,\n2\u00a0et sapientia tua constituisti hominem,\n ut dominaretur creatur\u00e6 qu\u00e6 a te facta est,\n3\u00a0ut disponat orbem terrarum in \u00e6quitate et justitia,\n et in directione cordis judicium judicet:\n4\u00a0da mihi sedium tuarum assistricem sapientiam,\n et noli me reprobare a pueris tuis:\n5\u00a0quoniam servus tuus sum ego, et filius ancill\u00e6 tu\u00e6;\n homo infirmus, et exigui temporis,\n et minor ad intellectum judicii et legum.\n6\u00a0Nam etsi quis erit consummatus inter filios hominum,\n si ab illo abfuerit sapientia tua, in nihilum computabitur.\n7\u00a0Tu elegisti me regem populo tuo,\n et judicem filiorum tuorum et filiarum:\n8\u00a0et dixisti me \u00e6dificare templum in monte sancto tuo,\n et in civitate habitationis tu\u00e6 altare:\n similitudinem tabernaculi sancti tui quod pr\u00e6parasti ab initio.\n9\u00a0Et tecum sapientia tua, qu\u00e6 novit opera tua,\n qu\u00e6 et affuit tunc cum orbem terrarum faceres,\n et sciebat quid esset placitum oculis tuis,\n et quid directum in pr\u00e6ceptis tuis.\n10\u00a0Mitte illam de c\u00e6lis sanctis tuis,\n et a sede magnitudinis tu\u00e6,\n ut mecum sit et mecum laboret,\n ut sciam quid acceptum sit apud te:\n11\u00a0scit enim illa omnia, et intelligit,\n et deducet me in operibus meis sobrie,\n et custodiet me in sua potentia.\n12\u00a0Et erunt accepta opera mea,\n et disponam populum tuum juste,\n et ero dignus sedium patris mei.\n13\u00a0Quis enim hominum poterit scire consilium Dei?\n aut quis poterit cogitare quid velit Deus?\n14\u00a0Cogitationes enim mortalium timid\u00e6,\n et incert\u00e6 providenti\u00e6 nostr\u00e6;\n15\u00a0corpus enim quod corrumpitur aggravat animam,\n et terrena inhabitatio deprimit sensum multa cogitantem.\n16\u00a0Et difficile \u00e6stimamus qu\u00e6 in terra sunt,\n et qu\u00e6 in prospectu sunt invenimus cum labore:\n qu\u00e6 autem in c\u00e6lis sunt, quis investigabit?\n17\u00a0Sensum autem tuum, quis sciet, nisi tu dederis sapientiam,\n et miseris spiritum sanctum tuum de altissimis,\n18\u00a0et sic correct\u00e6 sint semit\u00e6 eorum qui sunt in terris,\n et qu\u00e6 tibi placent didicerint homines?\n19\u00a0Nam per sapientiam sanati sunt\n quicumque placuerunt tibi, Domine, a principio.]","title":"Vulgate: Wisdom: Wisdom Chapter 9","type":"page"}