{"collection":"Bible & Christianity","html_url":"https://unchartedknowledge.5gfusion.net/browse/bib/vul/wis019.htm","path":"bib/vul/wis019.htm","source_url":"https://sacred-texts.com/bib/vul/wis019.htm","text":"1\u00a0[Impiis autem usque in novissimum\n sine misericordia ira supervenit.\n Pr\u00e6sciebat enim et futura illorum:\n2\u00a0quoniam cum ipsi permisissent ut se educerent,\n et cum magna sollicitudine pr\u00e6misissent illos,\n consequebantur illos, p\u0153nitentia acti.\n3\u00a0Adhuc enim inter manus habentes luctum,\n et deplorantes ad monumenta mortuorum,\n aliam sibi assumpserunt cogitationem inscienti\u00e6,\n et quos rogantes projecerant,\n hos tamquam fugitivos persequebantur.\n4\u00a0Ducebat enim illos ad hunc finem digna necessitas;\n et horum qu\u00e6 acciderant commemorationem amittebant,\n ut qu\u00e6 deerant tormentis repleret punitio:\n5\u00a0et populus quidem tuus mirabiliter transiret,\n illi autem novam mortem invenirent.\n6\u00a0Omnis enim creatura ad suum genus ab initio refigurabatur,\n deserviens tuis pr\u00e6ceptis,\n ut pueri tui custodirentur ill\u00e6si.\n7\u00a0Nam nubes castra eorum obumbrabat,\n et ex aqua qu\u00e6 ante erat, terra arida apparuit,\n et in mari Rubro via sine impedimento,\n et campus germinans de profundo nimio:\n8\u00a0per quem omnis natio transivit qu\u00e6 tegebatur tua manu,\n videntes tua mirabilia et monstra.\n9\u00a0Tamquam enim equi depaverunt escam,\n et tamquam agni exsultaverunt,\n magnificantes te, Domine, qui liberasti illos.\n10\u00a0Memores enim erant adhuc eorum\n qu\u00e6 in incolatu illorum facta fuerant:\n quemadmodum pro natione animalium eduxit terra muscas,\n et pro piscibus eructavit fluvius multitudinem ranarum.\n11\u00a0Novissime autem viderunt novam creaturam avium,\n cum, adducti concupiscentia, postulaverunt escas epulationis.\n12\u00a0In allocutione enim desiderii ascendit illis de mari ortygometra:\n et vexationes peccatoribus supervenerunt,\n non sine illis qu\u00e6 ante facta erant argumentis per vim fulminum:\n juste enim patiebantur secundum suas nequitias.]\n \n13\u00a0[Etenim detestabiliorem inhospitalitatem instituerunt:\n alii quidem ignotos non recipiebant advenas;\n alii autem bonos hospites in servitutem redigebant.\n14\u00a0Et non solum h\u00e6c, sed et alius quidam respectus illorum erat,\n quoniam inviti recipiebant extraneos.\n15\u00a0Qui autem cum l\u00e6titia receperunt hos\n qui eisdem usi erant justitiis,\n s\u00e6vissimis afflixerunt doloribus.\n16\u00a0Percussi sunt autem c\u00e6citate:\n sicut illi in foribus justi,\n cum subitaneis cooperti essent tenebris,\n unusquisque transitum ostii sui qu\u00e6rebat.\n17\u00a0In se enim elementa dum convertuntur,\n sicut in organo qualitatis sonus immutatur,\n et omnia suum sonum custodiunt:\n unde \u00e6stimari ex ipso visu certo potest.\n18\u00a0Agrestia enim in aquatica convertebantur,\n et qu\u00e6cumque erant natantia, in terram transibant.\n19\u00a0Ignis in aqua valebat supra suam virtutem,\n et aqua extinguentis natur\u00e6 obliviscebatur.\n20\u00a0Flamm\u00e6 e contrario corruptibilium animalium\n non vexaverunt carnes coambulantium,\n nec dissolvebant illam, qu\u00e6 facile dissolvebatur sicut glacies, bonam escam.\n In omnibus enim magnificasti populum tuum, Domine,\n et honorasti, et non despexisti,\n in omni tempore et in omni loco assistens eis.]","title":"Vulgate: Wisdom: Wisdom Chapter 19","type":"page"}