{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac001.htm","path":"bib/vul/zac001.htm","source_url":"https://sacred-texts.com/bib/vul/zac001.htm","text":"1 In mense octavo, in anno secundo Darii regis, factum est verbum Domini ad Zachariam filium Barachi\u00e6 filii Addo prophetam, dicens:\n2 Iratus est Dominus super patres vestros iracundia.\n3\u00a0Et dices ad eos: [H\u00e6c dicit Dominus exercituum:\n Convertimini ad me, ait Dominus exercituum,\n et convertar ad vos, dicit Dominus exercituum.\n4\u00a0Ne sitis sicut patres vestri,\n ad quos clamabant prophet\u00e6 priores, dicentes:\n H\u00e6c dicit Dominus exercituum:\n Convertimini de viis vestris malis,\n et de cogitationibus vestris pessimis:\n et non audierunt, neque attenderunt ad me,\n dicit Dominus.\n5\u00a0Patres vestri, ubi sunt?\n et prophet\u00e6 numquid in sempiternum vivent?\n6\u00a0Verumtamen verba mea, et legitima mea,\n qu\u00e6 mandavi servis meis prophetis,\n numquid non comprehenderunt patres vestros,\n et conversi sunt, et dixerunt:\n Sicut cogitavit Dominus exercituum facere nobis\n secundum vias nostras, et secundum adinventiones nostras,\n fecit nobis?]\n \n7 In die vigesima et quarta undecimi mensis Sabath, in anno secundo Darii, factum est verbum Domini ad Zachariam filium Barachi\u00e6 filii Addo prophetam, dicens:\n8 Vidi per noctem, et ecce vir ascendens super equum rufum, et ipse stabat inter myrteta, qu\u00e6 erant in profundo, et post eum equi rufi, varii, et albi.\n9 Et dixi: Quid sunt isti, domine mi? Et dixit ad me angelus qui loquebatur in me: Ego ostendam tibi quid sint h\u00e6c.\n10 Et respondit vir qui stabat inter myrteta, et dixit: Isti sunt quos misit Dominus ut perambulent terram.\n11 Et responderunt angelo Domini, qui stabat inter myrteta, et dixerunt: Perambulavimus terram, et ecce omnis terra habitatur, et quiescit.\n12 Et respondit angelus Domini, et dixit: Domine exercituum, usquequo tu non misereberis Jerusalem, et urbium Juda, quibus iratus es? iste jam septuagesimus annus est.\n13 Et respondit Dominus angelo qui loquebatur in me verba bona, verba consolatoria.\n14\u00a0Et dixit ad me angelus qui loquebatur in me: Clama, dicens: [H\u00e6c dicit Dominus exercituum:\n Zelatus sum Jerusalem et Sion zelo magno,\n15\u00a0et ira magna ego irascor super gentes opulentas,\n quia ego iratus sum parum,\n ipsi vero adjuverunt in malum.\n16\u00a0Propterea h\u00e6c dicit Dominus:\n Revertar ad Jerusalem in misericordiis,\n et domus mea \u00e6dificabitur in ea, ait Dominus exercituum,\n et perpendiculum extendetur super Jerusalem.]\n17\u00a0Adhuc clama, dicens: [H\u00e6c dicit Dominus exercituum:\n Adhuc affluent civitates me\u00e6 bonis,\n et consolabitur adhuc Dominus Sion, et eliget adhuc Jerusalem.]\n \n18 Et levavi oculos meos, et vidi, et ecce quatuor cornua.\n19 Et dixi ad angelum qui loquebatur in me: Quid sunt h\u00e6c? Et dixit ad me: H\u00e6c sunt cornua qu\u00e6 ventilaverunt Judam, et Isra\u00ebl, et Jerusalem.\n20 Et ostendit mihi Dominus quatuor fabros.\n21 Et dixi: Quid isti veniunt facere? Qui ait, dicens: H\u00e6c sunt cornua qu\u00e6 ventilaverunt Judam per singulos viros, et nemo eorum levavit caput suum: et venerunt isti deterrere ea, ut dejiciant cornua gentium, qu\u00e6 levaverunt cornu super terram Juda ut dispergerent eam.","title":"Vulgate: Zechariah: Zechariah Chapter 1","type":"page"}