{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac002.htm","path":"bib/vul/zac002.htm","source_url":"https://sacred-texts.com/bib/vul/zac002.htm","text":"1 Et levavi oculos meos, et vidi, et ecce vir, et in manu ejus funiculus mensorum.\n2 Et dixi: Quo tu vadis? Et dixit ad me: Ut metiar Jerusalem, et videam quanta sit latitudo ejus, et quanta longitudo ejus.\n3 Et ecce angelus qui loquebatur in me egrediebatur, et angelus alius egrediebatur in occursum ejus:\n4 et dixit ad eum: Curre, loquere ad puerum istum, dicens: Absque muro habitabitur Jerusalem, pr\u00e6 multitudine hominum et jumentorum in medio ejus.\n5 Et ego ero ei, ait Dominus, murus ignis in circuitu, et in gloria ero in medio ejus.\n6\u00a0[O, o, fugite de terra aquilonis, dicit Dominus,\n quoniam in quatuor ventos c\u00e6li dispersi vos, dicit Dominus.\n7\u00a0O Sion! fuge, qu\u00e6 habitas apud filiam Babylonis:\n8\u00a0quia h\u00e6c dicit Dominus exercituum:\n Post gloriam misit me ad gentes qu\u00e6 spoliaverunt vos:\n qui enim tetigerit vos, tangit pupillam oculi mei:\n9\u00a0quia ecce ego levo manum meam super eos,\n et erunt pr\u00e6d\u00e6 his qui serviebant sibi:\n et cognoscetis quia Dominus exercituum misit me.\n10\u00a0Lauda et l\u00e6tare, filia Sion, quia ecce ego venio,\n et habitabo in medio tui, ait Dominus.\n11\u00a0Et applicabuntur gentes mult\u00e6 ad Dominum in die illa,\n et erunt mihi in populum,\n et habitabo in medio tui:\n et scies quia Dominus exercituum misit me ad te.\n12\u00a0Et possidebit Dominus Judam partem suam in terra sanctificata,\n et eliget adhuc Jerusalem.\n13\u00a0Sileat omnis caro a facie Domini,\n quia consurrexit de habitaculo sancto suo.]","title":"Vulgate: Zechariah: Zechariah Chapter 2","type":"page"}