{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac004.htm","path":"bib/vul/zac004.htm","source_url":"https://sacred-texts.com/bib/vul/zac004.htm","text":"1 Et reversus est angelus qui loquebatur in me, et suscitavit me quasi virum qui suscitatur de somno suo.\n2 Et dixit ad me: Quid tu vides? Et dixi: Vidi, et ecce candelabrum aureum totum, et lampas ejus super caput ipsius, et septem lucern\u00e6 ejus super illud, et septem infusoria lucernis qu\u00e6 erant super caput ejus.\n3 Et du\u00e6 oliv\u00e6 super illud: una a dextris lampadis, et una a sinistris ejus.\n4 Et respondi, et aio ad angelum qui loquebatur in me, dicens: Quid sunt h\u00e6c, domine mi?\n5 Et respondit angelus qui loquebatur in me, et dixit ad me: Numquid nescis quid sunt h\u00e6c? Et dixi: Non, domine mi.\n6 Et respondit, et ait ad me, dicens: Hoc est verbum Domini ad Zorobabel, dicens: Non in exercitu, nec in robore, sed in spiritu meo, dicit Dominus exercituum.\n7 Quis tu, mons magne, coram Zorobabel? In planum: et educet lapidem primarium, et ex\u00e6quabit gratiam grati\u00e6 ejus.\n8 Et factum est verbum Domini ad me, dicens:\n9 Manus Zorobabel fundaverunt domum istam, et manus ejus perficient eam: et scietis quia Dominus exercituum misit me ad vos.\n10 Quis enim despexit dies parvos? Et l\u00e6tabuntur, et videbunt lapidem stanneum in manu Zorobabel. Septem isti oculi sunt Domini, qui discurrunt in universam terram.\n11 Et respondi, et dixi ad eum: Quid sunt du\u00e6 oliv\u00e6 ist\u00e6, ad dexteram candelabri, et ad sinistram ejus?\n12 Et respondi secundo, et dixi ad eum: Quid sunt du\u00e6 spic\u00e6 olivarum qu\u00e6 sunt juxta duo rostra aurea in quibus sunt suffusoria ex auro?\n13 Et ait ad me, dicens: Numquid nescis quid sunt h\u00e6c? Et dixi: Non, domine mi.\n14 Et dixit: Isti sunt duo filii olei, qui assistunt Dominatori univers\u00e6 terr\u00e6.","title":"Vulgate: Zechariah: Zechariah Chapter 4","type":"page"}