{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac006.htm","path":"bib/vul/zac006.htm","source_url":"https://sacred-texts.com/bib/vul/zac006.htm","text":"1 Et conversus sum, et levavi oculos meos, et vidi: et ecce quatuor quadrig\u00e6 egredientes de medio duorum montium: et montes, montes \u00e6rei.\n2 In quadriga prima equi rufi, et in quadriga secunda equi nigri,\n3 et in quadriga tertia equi albi, et in quadriga quarta equi varii et fortes.\n4 Et respondi, et dixi ad angelum qui loquebatur in me: Quid sunt h\u00e6c, domine mi?\n5 Et respondit angelus, et ait ad me: Isti sunt quatuor venti c\u00e6li, qui egrediuntur ut stent coram Dominatore omnis terr\u00e6.\n6 In qua erant equi nigri, egrediebantur in terram aquilonis: et albi egressi sunt post eos, et varii egressi sunt ad terram austri.\n7 Qui autem erant robustissimi, exierunt, et qu\u00e6rebant ire et discurrere per omnem terram. Et dixit: Ite, perambulate terram: et perambulaverunt terram.\n8\u00a0Et vocavit me, et locutus est ad me, dicens: Ecce qui egrediuntur in terram aquilonis, requiescere fecerunt spiritum meum in terra aquilonis.\n \n9 Et factum est verbum Domini ad me, dicens:\n10 Sume a transmigratione, ab Holdai, et a Tobia, et ab Idaia: et venies tu in die illa, et intrabis domum Josi\u00e6 filii Sophoni\u00e6, qui venerunt de Babylone.\n11 Et sumes aurum et argentum, et facies coronas, et pones in capite Jesu filii Josedec, sacerdotis magni:\n12 et loqueris ad eum, dicens: H\u00e6c ait Dominus exercituum, dicens: Ecce vir, Oriens nomen ejus, et subter eum orietur, et \u00e6dificabit templum Domino.\n13 Et ipse exstruet templum Domino: et ipse portabit gloriam, et sedebit, et dominabitur super solio suo: et erit sacerdos super solio suo, et consilium pacis erit inter illos duos.\n14 Et coron\u00e6 erunt Helem, et Tobi\u00e6, et Idai\u00e6, et Hem filio Sophoni\u00e6, memoriale in templo Domini.\n15 Et qui procul sunt, venient, et \u00e6dificabunt in templo Domini: et scietis quia Dominus exercituum misit me ad vos. Erit autem hoc, si auditu audieritis vocem Domini Dei vestri.","title":"Vulgate: Zechariah: Zechariah Chapter 6","type":"page"}