{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac008.htm","path":"bib/vul/zac008.htm","source_url":"https://sacred-texts.com/bib/vul/zac008.htm","text":"1 Et factum est verbum Domini exercituum, dicens:\n2 H\u00e6c dicit Dominus exercituum: Zelatus sum Sion zelo magno, et indignatione magna zelatus sum eam.\n3 H\u00e6c dicit Dominus exercituum: Reversus sum ad Sion, et habitabo in medio Jerusalem: et vocabitur Jerusalem civitas veritatis, et mons Domini exercituum mons sanctificatus.\n4 H\u00e6c dicit Dominus exercituum: Adhuc habitabunt senes et anus in plateis Jerusalem, et viri baculus in manu ejus pr\u00e6 multitudine dierum.\n5 Et plate\u00e6 civitatis complebuntur infantibus et puellis, ludentibus in plateis ejus.\n6 H\u00e6c dicit Dominus exercituum: Si videbitur difficile in oculis reliquiarum populi hujus in diebus illis, numquid in oculis meis difficile erit? dicit Dominus exercituum.\n7 H\u00e6c dicit Dominus exercituum: Ecce ego salvabo populum meum de terra orientis et de terra occasus solis.\n8\u00a0Et adducam eos, et habitabunt in medio Jerusalem: et erunt mihi in populum, et ego ero eis in Deum, in veritate et in justitia.\n \n9 H\u00e6c dicit Dominus exercituum: Confortentur manus vestr\u00e6, qui auditis in his diebus sermones istos per os prophetarum, in die qua fundata est domus Domini exercituum, ut templum \u00e6dificaretur.\n10 Siquidem ante dies illos merces hominum non erat, nec merces jumentorum erat: neque intro\u00ebunti, neque exeunti erat pax pr\u00e6 tribulatione: et dimisi omnes homines, unumquemque contra proximum suum.\n11 Nunc autem non juxta dies priores ego faciam reliquiis populi hujus, dicit Dominus exercituum,\n12 sed semen pacis erit: vinea dabit fructum suum, et terra dabit germen suum, et c\u00e6li dabunt rorem suum: et possidere faciam reliquias populi hujus universa h\u00e6c.\n13 Et erit: sicut eratis maledictio in gentibus, domus Juda et domus Isra\u00ebl, sic salvabo vos, et eritis benedictio. Nolite timere; confortentur manus vestr\u00e6.\n14 Quia h\u00e6c dicit Dominus exercituum: Sicut cogitavi ut affligerem vos, cum ad iracundiam provocassent patres vestri me, dicit Dominus,\n15 et non sum misertus: sic conversus cogitavi, in diebus istis, ut benefaciam domui Juda et Jerusalem. Nolite timere.\n16 H\u00e6c sunt ergo verba qu\u00e6 facietis: loquimini veritatem unusquisque cum proximo suo: veritatem et judicium pacis judicate in portis vestris.\n17\u00a0Et unusquisque malum contra amicum suum ne cogitetis in cordibus vestris, et juramentum mendax ne diligatis: omnia enim h\u00e6c sunt qu\u00e6 odi, dicit Dominus.\n \n18 Et factum est verbum Domini exercituum ad me, dicens:\n19 H\u00e6c dicit Dominus exercituum: Jejunium quarti, et jejunium quinti, et jejunium septimi, et jejunium decimi erit domui Juda in gaudium et l\u00e6titiam et in solemnitates pr\u00e6claras. Veritatem tantum et pacem diligite.\n20 H\u00e6c dicit Dominus exercituum, usquequo veniant populi et habitent in civitatibus multis:\n21 et vadant habitatores, unus ad alterum, dicentes: Eamus, et deprecemur faciem Domini, et qu\u00e6ramus Dominum exercituum: vadam etiam ego.\n22 Et venient populi multi, et gentes robust\u00e6, ad qu\u00e6rendum Dominum exercituum in Jerusalem, et deprecandam faciem Domini.\n23 H\u00e6c dicit Dominus exercituum: In diebus illis, in quibus apprehendent decem homines ex omnibus linguis gentium, et apprehendent fimbriam viri Jud\u00e6i, dicentes: Ibimus vobiscum: audivimus enim quoniam Deus vobiscum est.","title":"Vulgate: Zechariah: Zechariah Chapter 8","type":"page"}