{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac009.htm","path":"bib/vul/zac009.htm","source_url":"https://sacred-texts.com/bib/vul/zac009.htm","text":"1\u00a0[Onus verbi Domini in terra Hadrach\n et Damasci requiei ejus,\n quia Domini est oculus hominis et omnium tribuum Isra\u00ebl.\n2\u00a0Emath quoque in terminis ejus, et Tyrus, et Sidon:\n assumpserunt quippe sibi sapientiam valde.\n3\u00a0Et \u00e6dificavit Tyrus munitionem suam,\n et coacervavit argentum quasi humum,\n et aurum ut lutum platearum.\n4\u00a0Ecce Dominus possidebit eam:\n et percutiet in mari fortitudinem ejus,\n et h\u00e6c igni devorabitur.\n5\u00a0Videbit Ascalon, et timebit,\n et Gaza, et dolebit nimis,\n et Accaron, quoniam confusa est spes ejus:\n et peribit rex de Gaza,\n et Ascalon non habitabitur.\n6\u00a0Et sedebit separator in Azoto,\n et disperdam superbiam Philisthinorum.\n7\u00a0Et auferam sanguinem ejus de ore ejus,\n et abominationes ejus de medio dentium ejus:\n et relinquetur etiam ipse Deo nostro,\n et erit quasi dux in Juda,\n et Accaron quasi Jebus\u00e6us.\n8\u00a0Et circumdabo domum meam\n ex his qui militant mihi euntes et revertentes:\n et non transibit super eos ultra exactor,\n quia nunc vidi in oculis meis.]\n \n9\u00a0[Exsulta satis, filia Sion;\n jubila, filia Jerusalem:\n ecce rex tuus veniet tibi justus, et salvator:\n ipse pauper, et ascendens super asinam\n et super pullum filium asin\u00e6.\n10\u00a0Et disperdam quadrigam ex Ephraim,\n et equum de Jerusalem,\n et dissipabitur arcus belli:\n et loquetur pacem gentibus,\n et potestas ejus a mari usque ad mare,\n et a fluminibus usque ad fines terr\u00e6.\n11\u00a0Tu quoque in sanguine testamenti tui\n emisisti vinctos tuos de lacu in quo non est aqua.\n12\u00a0Convertimini ad munitionem, vincti spei:\n hodie quoque annuntians duplicia reddam tibi.\n13\u00a0Quoniam extendi mihi Judam quasi arcum:\n implevi Ephraim:\n et suscitabo filios tuos, Sion,\n super filios tuos, Gr\u00e6cia:\n et ponam te quasi gladium fortium.\n14\u00a0Et Dominus Deus super eos videbitur,\n et exibit ut fulgur jaculum ejus:\n et Dominus Deus in tuba canet,\n et vadet in turbine austri.\n15\u00a0Dominus exercituum proteget eos:\n et devorabunt, et subjicient lapidibus fund\u00e6:\n et bibentes inebriabuntur quasi a vino,\n et replebuntur ut phial\u00e6,\n et quasi cornua altaris.\n16\u00a0Et salvabit eos Dominus Deus eorum in die illa,\n ut gregem populi sui,\n quia lapides sancti elevabuntur super terram ejus.\n17\u00a0Quid enim bonum ejus est,\n et quid pulchrum ejus,\n nisi frumentum electorum,\n et vinum germinans virgines?]","title":"Vulgate: Zechariah: Zechariah Chapter 9","type":"page"}