{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac012.htm","path":"bib/vul/zac012.htm","source_url":"https://sacred-texts.com/bib/vul/zac012.htm","text":"1\u00a0Onus verbi Domini super Isra\u00ebl. [Dicit Dominus extendens c\u00e6lum, et fundans terram,\n et fingens spiritum hominis in eo:\n2\u00a0Ecce ego ponam Jerusalem superliminare crapul\u00e6\n omnibus populis in circuitu:\n sed et Juda erit in obsidione contra Jerusalem.\n3\u00a0Et erit: in die illa ponam Jerusalem lapidem oneris cunctis populis:\n omnes qui levabunt eam concisione lacerabuntur,\n et colligentur adversus eam omnia regna terr\u00e6.\n4\u00a0In die illa, dicit Dominus,\n percutiam omnem equum in stuporem,\n et ascensorem ejus in amentiam:\n et super domum Juda aperiam oculos meos,\n et omnem equum populorum percutiam c\u00e6citate.\n5\u00a0Et dicent duces Juda in corde suo:\n Confortentur mihi habitatores Jerusalem\n in Domino exercituum, Deo eorum!\n6\u00a0In die illa ponam duces Juda\n sicut caminum ignis in lignis,\n et sicut facem ignis in f\u0153no:\n et devorabunt ad dexteram et ad sinistram omnes populos in circuitu,\n et habitabitur Jerusalem rursus in loco suo in Jerusalem.\n7\u00a0Et salvabit Dominus tabernacula Juda, sicut in principio,\n ut non magnifice glorietur domus David,\n et gloria habitantium Jerusalem contra Judam.\n8\u00a0In die illa proteget Dominus habitatores Jerusalem:\n et erit qui offenderit ex eis in die illa quasi David,\n et domus David quasi Dei,\n sicut angelus Domini in conspectu eorum.]\n \n9\u00a0[Et erit in die illa:\n qu\u00e6ram conterere omnes gentes qu\u00e6 veniunt contra Jerusalem.\n10\u00a0Et effundam super domum David\n et super habitatores Jerusalem\n spiritum grati\u00e6 et precum:\n et aspicient ad me quem confixerunt,\n et plangent eum planctu quasi super unigenitum,\n et dolebunt super eum,\n ut doleri solet in morte primogeniti.\n11\u00a0In die illa, magnus erit planctus in Jerusalem,\n sicut planctus Adadremmon in campo Mageddon.\n12\u00a0Et planget terra: famili\u00e6 et famili\u00e6 seorsum:\n famili\u00e6 domus David seorsum, et mulieres eorum seorsum:\n13\u00a0famili\u00e6 domus Nathan seorsum, et mulieres eorum seorsum:\n famili\u00e6 domus Levi seorsum, et mulieres eorum seorsum:\n famili\u00e6 Semei seorsum, et mulieres eorum seorsum:\n14\u00a0omnes famili\u00e6 reliqu\u00e6,\n famili\u00e6 et famili\u00e6 seorsum, et mulieres eorum seorsum.]","title":"Vulgate: Zechariah: Zechariah Chapter 12","type":"page"}