{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac013.htm","path":"bib/vul/zac013.htm","source_url":"https://sacred-texts.com/bib/vul/zac013.htm","text":"1\u00a0[In die illa erit fons patens domui David et habitantibus Jerusalem,\n in ablutionem peccatoris et menstruat\u00e6.\n2\u00a0Et erit in die illa, dicit Dominus exercituum:\n disperdam nomina idolorum de terra,\n et non memorabuntur ultra:\n et pseudoprophetas, et spiritum immundum auferam de terra.\n3\u00a0Et erit: cum prophetaverit quispiam ultra,\n dicent ei pater ejus et mater ejus, qui genuerunt eum:\n Non vives, quia mendacium locutus es in nomine Domini:\n et configent eum pater ejus et mater ejus, genitores ejus,\n cum prophetaverit.\n4\u00a0Et erit: in die illa confundentur prophet\u00e6,\n unusquisque ex visione sua cum prophetaverit:\n nec operientur pallio saccino, ut mentiantur:\n5\u00a0sed dicet: Non sum propheta:\n homo agricola ego sum,\n quoniam Adam exemplum meum ab adolescentia mea.\n6\u00a0Et dicetur ei: Quid sunt plag\u00e6 ist\u00e6 in medio manuum tuarum?\n Et dicet: His plagatus sum in domo eorum qui diligebant me.]\n \n7 Framea, suscitare super pastorem meum, et super virum coh\u00e6rentem mihi, dicit Dominus exercituum: percute pastorem, et dispergentur oves: et convertam manum meam ad parvulos.\n8 Et erunt in omni terra, dicit Dominus: partes du\u00e6 in ea dispergentur, et deficient: et tertia pars relinquetur in ea.\n9 Et ducam tertiam partem per ignem, et uram eos sicut uritur argentum, et probabo eos sicut probatur aurum. Ipse vocabit nomen meum, et ego exaudiam eum. Dicam: Populus meus es: et ipse dicet: Dominus Deus meus.","title":"Vulgate: Zechariah: Zechariah Chapter 13","type":"page"}