{"collection":"Bible & Christianity","html_url":"https://unchartedknowledge.5gfusion.net/browse/bib/vul/zac014.htm","path":"bib/vul/zac014.htm","source_url":"https://sacred-texts.com/bib/vul/zac014.htm","text":"1 Ecce venient dies Domini, et dividentur spolia tua in medio tui.\n2 Et congregabo omnes gentes ad Jerusalem in pr\u00e6lium: et capietur civitas, et vastabuntur domus, et mulieres violabuntur: et egredietur media pars civitatis in captivitatem, et reliquum populi non auferetur ex urbe.\n3 Et egredietur Dominus, et pr\u00e6liabitur contra gentes illas, sicut pr\u00e6liatus est in die certaminis.\n4 Et stabunt pedes ejus in die illa super montem Olivarum, qui est contra Jerusalem ad orientem: et scindetur mons Olivarum ex media parte sui ad orientem et ad occidentem, pr\u00e6rupto grandi valde: et separabitur medium montis ad aquilonem, et medium ejus ad meridiem.\n5 Et fugietis ad vallem montium eorum, quoniam conjungetur vallis montium usque ad proximum: et fugietis sicut fugistis a facie terr\u00e6motus in diebus Ozi\u00e6 regis Juda: et veniet Dominus Deus meus, omnesque sancti cum eo.\n6 Et erit in die illa: non erit lux, sed frigus et gelu.\n7 Et erit dies una qu\u00e6 nota est Domino, non dies neque nox: et in tempore vesperi erit lux.\n8 Et erit in die illa: exibunt aqu\u00e6 viv\u00e6 de Jerusalem: medium earum ad mare orientale, et medium earum ad mare novissimum: in \u00e6state et in hieme erunt.\n9 Et erit Dominus rex super omnem terram: in die illa erit Dominus unus, et erit nomen ejus unum.\n10 Et revertetur omnis terra usque ad desertum, de colle Remmon ad austrum Jerusalem: et exaltabitur, et habitabit in loco suo, a porta Benjamin usque ad locum port\u00e6 prioris, et usque ad portam angulorum, et a turre Hananeel usque ad torcularia regis.\n11\u00a0Et habitabunt in ea, et anathema non erit amplius, sed sedebit Jerusalem secura.\n \n12 Et h\u00e6c erit plaga qua percutiet Dominus omnes gentes qu\u00e6 pugnaverunt adversus Jerusalem: tabescet caro uniuscujusque stantis super pedes suos: et oculi ejus contabescent in foraminibus suis, et lingua eorum contabescet in ore suo.\n13 In die illa erit tumultus Domini magnus in eis: et apprehendet vir manum proximi sui, et conseretur manus ejus super manum proximi sui.\n14 Sed et Judas pugnabit adversus Jerusalem: et congregabuntur diviti\u00e6 omnium gentium in circuitu, aurum, et argentum, et vestes mult\u00e6 satis.\n15 Et sic erit ruina equi, et muli, et cameli, et asini, et omnium jumentorum qu\u00e6 fuerint in castris illis, sicut ruina h\u00e6c.\n16 Et omnes qui reliqui fuerint de universis gentibus qu\u00e6 venerunt contra Jerusalem, ascendent ab anno in annum ut adorent regem, Dominum exercituum, et celebrent festivitatem tabernaculorum.\n17 Et erit: qui non ascenderit de familiis terr\u00e6 ad Jerusalem ut adoret regem, Dominum exercituum, non erit super eos imber.\n18 Quod etsi familia \u00c6gypti non ascenderit et non venerit, nec super eos erit: sed erit ruina, qua percutiet Dominus omnes gentes qu\u00e6 non ascenderint ad celebrandam festivitatem tabernaculorum.\n19 Hoc erit peccatum \u00c6gypti, et hoc peccatum omnium gentium qu\u00e6 non ascenderint ad celebrandam festivitatem tabernaculorum.\n20 In die illa, erit quod super frenum equi est, sanctum Domino: et erunt lebetes in domo Domini quasi phial\u00e6 coram altari.\n21 Et erit omnis lebes in Jerusalem et in Juda sanctificatus Domino exercituum: et venient omnes immolantes, et sument ex eis, et coquent in eis: et non erit mercator ultra in domo Domini exercituum in die illo.","title":"Vulgate: Zechariah: Zechariah Chapter 14","type":"page"}