{"collection":"Bible & Christianity","html_url":"https://unchartedknowledge.5gfusion.net/browse/bib/vul/zep002.htm","path":"bib/vul/zep002.htm","source_url":"https://sacred-texts.com/bib/vul/zep002.htm","text":"1\u00a0[Convenite, congregamini, gens non amabilis,\n2\u00a0priusquam pariat jussio quasi pulverem transeuntem diem,\n antequam veniat super vos ira furoris Domini,\n antequam veniat super vos dies indignationis Domini.\n3\u00a0Qu\u00e6rite Dominum, omnes mansueti terr\u00e6,\n qui judicium ejus estis operati;\n qu\u00e6rite justum, qu\u00e6rite mansuetum,\n si quomodo abscondamini in die furoris Domini.\n4\u00a0Quia Gaza destructa erit,\n et Ascalon in desertum:\n Azotum in meridie ejicient,\n et Accaron eradicabitur.\n5\u00a0V\u00e6 qui habitatis funiculum maris, gens perditorum!\n verbum Domini super vos, Chanaan, terra Philisthinorum;\n et disperdam te, ita ut non sit inhabitator.\n6\u00a0Et erit funiculus maris requies pastorum, et caul\u00e6 pecorum;\n7\u00a0et erit funiculus ejus qui remanserit de domo Juda: ibi pascentur,\n in domibus Ascalonis ad vesperam requiescent,\n quia visitabit eos Dominus Deus eorum,\n et avertet captivitatem eorum.\n8\u00a0Audivi opprobrium Moab,\n et blasphemias filiorum Ammon,\n qu\u00e6 exprobraverunt populo meo,\n et magnificati sunt super terminos eorum.\n9\u00a0Propterea vivo ego, dicit Dominus exercituum, Deus Isra\u00ebl,\n quia Moab ut Sodoma erit,\n et filii Ammon quasi Gomorrha:\n siccitas spinarum, et acervi salis,\n et desertum usque in \u00e6ternum:\n reliqui\u00e6 populi mei diripient eos,\n et residui gentis me\u00e6 possidebunt illos.\n10\u00a0Hoc eis eveniet pro superbia sua,\n quia blasphemaverunt et magnificati sunt\n super populum Domini exercituum.\n11\u00a0Horribilis Dominus super eos,\n et attenuabit omnes deos terr\u00e6:\n et adorabunt eum viri de loco suo,\n omnes insul\u00e6 gentium.\n12\u00a0Sed et vos, \u00c6thiopes, interfecti gladio meo eritis.\n13\u00a0Et extendet manum suam super aquilonem, et perdet Assur,\n et ponet speciosam in solitudinem,\n et in invium, et quasi desertum.\n14\u00a0Et accubabunt in medio ejus greges, omnes besti\u00e6 gentium;\n et onocrotalus et ericius in liminibus ejus morabuntur:\n vox cantantis in fenestra,\n corvus in superliminari,\n quoniam attenuabo robur ejus.\n15\u00a0H\u00e6c est civitas gloriosa habitans in confidentia,\n qu\u00e6 dicebat in corde suo:\n Ego sum, et extra me non est alia amplius:\n quomodo facta est in desertum cubile besti\u00e6?\n omnis qui transit per eam sibilabit,\n et movebit manum suam.]","title":"Vulgate: Zephaniah: Zephaniah Chapter 2","type":"page"}