{"collection":"Bible & Christianity","html_url":"https://unchartedknowledge.5gfusion.net/browse/bib/wb/alb/est.htm","path":"bib/wb/alb/est.htm","source_url":"https://sacred-texts.com/bib/wb/alb/est.htm","text":"1:1 N\u00eb koh\u00ebn e Asueros, (ai Asuero q\u00eb mbret\u00ebronte nga Indija deri n\u00eb Etiopi mbi nj\u00ebqind e nj\u00ebzet e shtat\u00eb krahina),\n1:2 n\u00eb at\u00eb koh\u00eb, kur mbreti Asuero rrinte n\u00eb fronin e mbret\u00ebris\u00eb s\u00eb tij q\u00eb ishte n\u00eb k\u00ebshtjell\u00ebn e Suz\u00ebs,\n1:3 n\u00eb vitin e tret\u00eb t\u00eb mbret\u00ebrimit t\u00eb tij shtroi nj\u00eb banket p\u00ebr t\u00eb gjith\u00eb princat dhe sh\u00ebrb\u00ebtor\u00ebt e tij; komandant\u00ebt e ushtris\u00eb s\u00eb Persis\u00eb dhe t\u00eb Medis\u00eb, fisnik\u00ebt dhe princat e krahinave u mblodh\u00ebn para tij.\n1:4 At\u00ebher\u00eb ai tregoi pasurit\u00eb dhe lavdin\u00eb e mbret\u00ebris\u00eb s\u00eb tij, madh\u00ebshtin\u00eb dhe ep\u00ebrsin\u00eb e saj p\u00ebr shum\u00eb dit\u00eb, nj\u00ebqind e tet\u00ebdhjet\u00eb dit\u00eb.\n1:5 Mbasi kaluan k\u00ebto dit\u00eb, mbreti shtroi nj\u00eb banket tjet\u00ebr prej shtat\u00eb dit\u00ebsh, n\u00eb oborrin e kopshtit t\u00eb pallatit mbret\u00ebror, p\u00ebr t\u00ebr\u00eb popullin q\u00eb ndodhej n\u00eb k\u00ebshtjell\u00ebn e Suz\u00ebs, nga m\u00eb i madhi deri te m\u00eb i vogli.\n1:6 Kishte \u00e7adra t\u00eb bardha dhe ngjyr\u00eb vjollce, q\u00eb vareshin me kordon\u00eb t\u00eb kuq flak\u00eb n\u00eb unaza prej argjendi dhe n\u00eb shtylla prej mermeri. Kishte divan\u00eb prej ari dhe prej argjendi mbi nj\u00eb dysheme prej mermeri t\u00eb kuq dhe t\u00eb bardh\u00eb, prej sedefi dhe alabastri.\n1:7 Jepej p\u00ebr t\u00eb pir\u00eb n\u00eb en\u00eb ari, nj\u00ebra e ndryshme nga tjetra, dhe kishte ver\u00eb mbret\u00ebrore me shumic\u00eb p\u00ebr hir t\u00eb bujaris\u00eb s\u00eb mbretit.\n1:8 N\u00eb baz\u00eb t\u00eb ligjit, askush nuk ishte i detyruar t\u00eb pinte; n\u00eb fakt mbreti kishte udh\u00ebruar t\u00ebr\u00eb funksionar\u00ebt e sht\u00ebpis\u00eb s\u00eb tij t'i sh\u00ebrbenin secilit at\u00eb q\u00eb d\u00ebshironte.\n1:9 Edhe mbret\u00ebresha Vashti shtroi nj\u00eb banket p\u00ebr grat\u00eb n\u00eb pallatin e mbretit Asuero.\n1:10 Dit\u00ebn e shtat\u00eb, kur zemra e mbretit ishte e g\u00ebzuar p\u00ebr shkak t\u00eb ver\u00ebs, ai urdh\u00ebroi Mehumanin, Bizthan, Harbonan, Bigthan, Abagthan, Zetharin dhe Karkasin, t\u00eb shtat\u00eb eunuk\u00ebt q\u00eb sh\u00ebrb\u00ebnin n\u00eb prani t\u00eb mbretit Asuero,\n1:11 t\u00eb sillnin para mbretit mbret\u00ebresh\u00ebn Vashti me kuror\u00ebn mbret\u00ebrore, p\u00ebr t'i treguar popullit dhe princave bukurin\u00eb e saj; n\u00eb t\u00eb v\u00ebrtet\u00eb ajo kishte nj\u00eb pamje t\u00eb hijshme.\n1:12 Por mbret\u00ebresha Vashti nuk pranoi t\u00eb vinte sipas urdhrit t\u00eb mbretit q\u00eb iu njoftua me an\u00eb t\u00eb eunuk\u00ebve; mbreti u pezmatua shum\u00eb dhe zem\u00ebrimi i tij i ziente p\u00ebrbrenda.\n1:13 At\u00ebher\u00eb mbreti pyeti dijetar\u00ebt q\u00eb njihnin koh\u00ebrat (kjo ishte n\u00eb fakt m\u00ebnyra e veprimit t\u00eb mbretit me gjith\u00eb ata q\u00eb njihnin ligjin dhe drejt\u00ebsin\u00eb;\n1:14 me t\u00eb af\u00ebrt p\u00ebr t\u00eb ishin Karshena, Shethari, Admatha, Tarshishi, Meresi, Marsena dhe Memukani, shtat\u00eb princa t\u00eb Persis\u00eb dhe t\u00eb Medis\u00eb q\u00eb pranoheshin t\u00eb rrinin para mbretit dhe zinin postet e para n\u00eb mbret\u00ebri):\n1:15 \"Simbas ligjit \u00e7far\u00eb duhet t'i b\u00ebhet mbret\u00ebresh\u00ebs Vashti, q\u00eb nuk zbatoi urdhrin e mbretit Asuero q\u00eb iu transmetua me an\u00eb t\u00eb eunuk\u00ebve?\".\n1:16 Memukami u p\u00ebrgjigj para mbretit dhe princave: \"Mbret\u00ebresha Vashti nuk ka vepruar drejt vet\u00ebm ndaj mbretit, por edhe ndaj gjith\u00eb princave dhe t\u00ebr\u00eb popujve q\u00eb jan\u00eb n\u00eb t\u00eb gjitha krahinat e mbretit Asuero.\n1:17 Sjellja e mbret\u00ebresh\u00ebs do t\u00eb merret vesh nga t\u00eb gjitha grat\u00eb q\u00eb do t\u00eb nxiten t\u00eb p\u00ebr\u00e7mojn\u00eb burrat e tyre dhe t\u00eb thon\u00eb: \"Mbreti Asuero kishte urdh\u00ebruar q\u00eb t\u00eb sillnin para tij mbret\u00ebresh\u00ebn Vashti, por ajo nuk i vajti\".\n1:18 Madje q\u00eb sot princeshat e Persis\u00eb dhe t\u00eb Medis\u00eb q\u00eb kan\u00eb marr\u00eb vesh sjelljen e mbret\u00ebresh\u00ebs, do t'u flasin gjith\u00eb princave t\u00eb mbretit dhe nga kjo do t\u00eb lind\u00eb shum\u00eb p\u00ebr\u00e7mim dhe zem\u00ebrim.\n1:19 N\u00eb qoft\u00eb se mbretit i duket me vend, le t\u00eb nxjerr\u00eb ai nj\u00eb udh\u00ebres\u00eb mbret\u00ebrore q\u00eb t\u00eb p\u00ebrfshihet n\u00eb ligjet e Persis\u00eb dhe t\u00eb Medis\u00eb dhe t\u00eb jet\u00eb e parevokueshme, n\u00eb baz\u00eb t\u00eb s\u00eb cil\u00ebs Vashti t\u00eb mos dal\u00eb m\u00eb n\u00eb prani t\u00eb mbretit Asuero; mbreti ti jap\u00eb pastaj pozit\u00ebn e saj mbret\u00ebrore nj\u00eb tjetre m\u00eb t\u00eb mir\u00eb se ajo.\n1:20 Kur urdh\u00ebresa e nxjerr\u00eb nga mbreti do t\u00eb njoftohet n\u00eb t\u00ebr\u00eb mbret\u00ebrin\u00eb e tij, q\u00eb \u00ebsht\u00eb e gjer\u00eb, t\u00ebr\u00eb grat\u00eb do t\u00eb nderojn\u00eb bashk\u00ebshort\u00ebt e tyre, nga m\u00eb i madhi deri te m\u00eb i vogli\".\n1:21 Ky propozim i p\u00eblqeu mbretit dhe princave, dhe mbreti b\u00ebri ashtu si kishte th\u00ebn\u00eb Memukani;\n1:22 d\u00ebrgoi letra n\u00eb t\u00eb gjitha krahinat e mbret\u00ebris\u00eb, \u00e7do krahine sipas shkrimit t\u00eb saj dhe, \u00e7do populli sipas gjuh\u00ebs s\u00eb tij, n\u00eb m\u00ebnyr\u00eb q\u00eb \u00e7do burr\u00eb t\u00eb ishte zot n\u00eb sht\u00ebpin\u00eb e tij dhe t\u00eb fliste gjuh\u00ebn e popullit t\u00eb tij.\n2:1 Mbas k\u00ebtyre ngjarjeve, kur zem\u00ebrimi i mbretit Asuero u qet\u00ebsua, atij iu kujtua Vashti, at\u00eb q\u00eb kishte b\u00ebr\u00eb ajo dhe \u00e7far\u00eb kishte vendosur lidhur me t\u00eb.\n2:2 At\u00ebher\u00eb sh\u00ebrb\u00ebtor\u00ebt e mbretit q\u00eb ishin n\u00eb sh\u00ebrbim t\u00eb tij i than\u00eb: \"T\u00eb k\u00ebrkohen p\u00ebr mbretin vajza t\u00eb virgj\u00ebra dhe t\u00eb hijshme;\n2:3 mbreti le t\u00eb caktoj\u00eb n\u00eb t\u00ebr\u00eb krahinat e mbret\u00ebris\u00eb s\u00eb tij komisar\u00eb, t\u00eb cil\u00ebt t\u00eb mbledhin t\u00ebr\u00eb vajzat e virgj\u00ebra t\u00eb hijshme n\u00eb qytetin e Suz\u00ebs, n\u00eb sht\u00ebpin\u00eb e grave n\u00ebn mbikqyrjen e Hegait, eunukut t\u00eb mbretit dhe rojtar i grave, q\u00eb do t'u jap\u00eb atyre melhemet p\u00ebr t'u pastruar.\n2:4 Vajza q\u00eb do t'i p\u00eblqej\u00eb mbretit t\u00eb b\u00ebhet mbret\u00ebresh\u00eb n\u00eb vend t\u00eb Vashtit\". Ky propozim u p\u00eblqye nga mbreti dhe k\u00ebshtu u veprua.\n2:5 N\u00eb qytetin e Suz\u00ebs ishte nj\u00eb jude i quajtur Mardoke, bir i Jairit, bir i Shimeit, bir i Kishit, nj\u00eb Beniaminit,\n2:6 q\u00eb e kishin internuar nga Jeruzalemi bashk\u00eb me m\u00ebrgimtar\u00ebt e sjell\u00eb n\u00eb rob\u00ebri me Jekoniahun, mbretin e Jud\u00ebs, nga Nebukadnetsari, mbret i Babilonis\u00eb.\n2:7 Ai e kishte rritur Hadasahun, dometh\u00ebn\u00eb Esterin, bij\u00ebn e ungjit t\u00eb tij, sepse ajo nuk kishte as baba as n\u00ebn\u00eb. Vajza ishte e hijshme dhe kishte trup t\u00eb bukur; pas vdekjes s\u00eb atit dhe t\u00eb n\u00ebnes s\u00eb saj, Mardokeu e mori si bij\u00ebn e tij.\n2:8 Kur urdh\u00ebri i mbretit dhe dekreti i tij u p\u00ebrhap\u00ebn, dhe shum\u00eb vajza u mblodh\u00ebn n\u00eb qytetin e Suz\u00ebs n\u00ebn mbikqyrjen e Hegait, edhe Esterin e \u00e7uan n\u00eb pallatin e mbretit n\u00ebn mbik\u00ebqyrjen e Hegait, rojtarit t\u00eb grave.\n2:9 Vajza i p\u00eblqeu dhe fitoi simpatin\u00eb e tij; k\u00ebshtu ai u shpejtua t'i jap\u00eb melhemet p\u00ebr pastrimin dhe ushqimin e saj; i dha gjithashtu shtat\u00eb vajza t\u00eb reja t\u00eb zgjedhura n\u00eb pallatin e mbretit dhe e zhvendosi bashk\u00eb me to n\u00eb apartamentin m\u00eb t\u00eb mir\u00eb t\u00eb sht\u00ebpis\u00eb s\u00eb grave.\n2:10 Esteri nuk kishte treguar asgj\u00eb as p\u00ebr popullin e saj as p\u00ebr vendin e prejardhjes s\u00eb saj, sepse Mardokeu e kishte urdh\u00ebruar t\u00eb mos tregonte.\n2:11 \u00c7do dit\u00eb Mardokeu sh\u00ebtiste p\u00ebrpara oborrit t\u00eb sht\u00ebpis\u00eb s\u00eb grave p\u00ebr t\u00eb marr\u00eb vesh si ishte Esteri dhe \u00e7'po b\u00ebhej me t\u00eb.\n2:12 Kur i vinte radha \u00e7do vajz\u00eb t\u00eb hynte te mbreti Asuero, mbasi kishte b\u00ebr\u00eb dymb\u00ebdhjet\u00eb muaj p\u00ebrgatitjesh, sipas rregulloreve t\u00eb grave, sepse k\u00ebshtu plot\u00ebsoheshin dit\u00ebt e pastrimit t\u00eb tyre; gjasht\u00eb muaj p\u00ebr t'u lyer me vaj t\u00eb mirr\u00ebs dhe gjasht\u00eb muaj me aroma dhe melheme t\u00eb grave p\u00ebr t'u pastruar,\n2:13 vajza shkonte te mbreti; i lejohej t\u00eb merrte me vete nga sht\u00ebpia e grave n\u00eb pallatin e mbretit t\u00ebr\u00eb ato q\u00eb donte.\n2:14 Atje ajo shkonte n\u00eb mbr\u00ebmje dhe t\u00eb nes\u00ebrmen n\u00eb m\u00ebngjes kalonte n\u00eb sht\u00ebpin\u00eb e dyt\u00eb t\u00eb grave, n\u00ebn mbik\u00ebqyrjen e Shaashgazit, eunukut t\u00eb mbretit dhe rojtar i konkubinave. Ajo nuk kthehej m\u00eb te mbreti, ve\u00e7se po ta k\u00ebrkonte mbreti dhe ta th\u00ebrrisnin me em\u00ebr.\n2:15 Kur i erdhi radha p\u00ebr t\u00eb shkuar te mbreti Esterit, bij\u00ebs s\u00eb Abihailit, ungji i Mardokeut, q\u00eb e kishte marr\u00eb me vete si bij\u00ebn e tij, ajo nuk k\u00ebrkoi asgj\u00eb ve\u00e7 asaj q\u00eb i tregoi Hegai, eunuku i mbretit, rojtari i grave. Dhe Esteri fitoi simpatin\u00eb e t\u00eb gjith\u00eb atyre q\u00eb e shihnin.\n2:16 Esterin e \u00e7uan te mbreti Asuero n\u00eb pallatin e tij mbret\u00ebror muajin e dhjet\u00eb, dometh\u00ebn\u00eb n\u00eb muajin e Tebethit, n\u00eb vitin e shtat\u00eb t\u00eb mbret\u00ebrimit t\u00eb tij.\n2:17 Mbreti e dashuroi Esterin m\u00eb tep\u00ebr se gjith\u00eb grat\u00eb e tjera, dhe ajo gjeti hir dhe mir\u00ebdashje n\u00eb syt\u00eb e tij m\u00eb tep\u00ebr se t\u00ebr\u00eb vajzat e tjera. K\u00ebshtu ai i vuri mbi kok\u00eb kuror\u00ebn mbret\u00ebrore dhe e b\u00ebri mbret\u00ebresh\u00eb n\u00eb vend t\u00eb Vashtit.\n2:18 Pastaj mbreti shtroi nj\u00eb banket t\u00eb madh p\u00ebr t\u00ebr\u00eb princat dhe sh\u00ebrb\u00ebtor\u00ebt e tij, banketin e Esterit; p\u00ebrve\u00e7 k\u00ebsaj ai u dha nj\u00eb dit\u00eb pushimi krahinave dhe b\u00ebri dhurata me bujari mbret\u00ebrore.\n2:19 Kur vajzat u mblodh\u00ebn her\u00ebn e dyt\u00eb, Mardokeu rrinte ulur te porta e mbretit.\n2:20 Esteri, sipas urdhrit q\u00eb Mardokeu i kishte dh\u00ebn\u00eb, nuk kishte treguar asgj\u00eb as p\u00ebr vendin e prejardhjes s\u00eb saj, as p\u00ebr popullin e saj. N\u00eb t\u00eb v\u00ebrtet\u00eb Esteri zbatonte urdh\u00ebrat e Mardokeut, ashtu si n\u00eb koh\u00ebn kur ishte n\u00ebn kujdestarin\u00eb e tij.\n2:21 N\u00eb ato dit\u00eb, nd\u00ebrsa Mardokeu rrinte ulur te porta e mbretit, Bigtani dhe Tereshi, dy eunuk\u00eb t\u00eb mbretit dhe rojtar\u00eb t\u00eb pragut, u zem\u00ebruan dhe k\u00ebrkuan t\u00eb shtrinin dor\u00ebn kund\u00ebr mbretit Asuero.\n2:22 I njoftuar p\u00ebr k\u00ebt\u00eb gj\u00eb, Mardokeu lajm\u00ebroi mbret\u00ebresh\u00ebn Ester, dhe Esteri informoi mbretin n\u00eb em\u00ebr t\u00eb Mardokeut.\n2:23 U b\u00ebn\u00eb hetime dhe u provua se gj\u00ebja ishte e v\u00ebrtet\u00eb, t\u00eb dy eunuk\u00ebt u var\u00ebn n\u00eb trek\u00ebmb\u00ebsh; pastaj kjo ngjarje u regjistrua n\u00eb librin e Kronikave, n\u00eb prani t\u00eb mbretit.\n3:1 Mbas k\u00ebtyre ngjarjeve, mbreti Asuero e gradoi Hamanin, birin e Hamedathas, Agagitit, e ngriti n\u00eb rang dhe e vuri karrigen e tij mbi at\u00eb t\u00eb t\u00eb gjith\u00eb princave q\u00eb ishin me t\u00eb.\n3:2 T\u00ebr\u00eb sh\u00ebrb\u00ebtor\u00ebt e mbretit q\u00eb rrinin te porta e mbretit p\u00ebrkuleshin dhe binin p\u00ebrmbys para Hamanit, sepse k\u00ebshtu kishte urdh\u00ebruar mbreti p\u00ebr t\u00eb. Por Mardokeu as p\u00ebrkulej, as binte p\u00ebrmbys.\n3:3 At\u00ebher\u00eb sh\u00ebrb\u00ebtor\u00ebt e mbretit q\u00eb rrinin te porta e tij i than\u00eb Mardokeut: \"Pse e shkel urdhrin e mbretit?\".\n3:4 Por, me gjith\u00eb se ia p\u00ebrs\u00ebrsnin \u00e7do dit\u00eb k\u00ebt\u00eb urdh\u00ebr, ai nuk i d\u00ebgjonte; prandaj ata ia njoftuan k\u00ebt\u00eb gj\u00eb Hamanit, p\u00ebr t\u00eb par\u00eb n\u00eb se Mardokeu do t\u00eb ngulte k\u00ebmb\u00eb n\u00eb q\u00ebndrimin e tij. Ai n\u00eb fakt u kishte th\u00ebn\u00eb atyre s\u00eb ishte jude.\n3:5 Kur Hamani pa q\u00eb Mardokeu nuk p\u00ebrkulej as binte p\u00ebrmbys para tij, u zem\u00ebrua shum\u00eb;\n3:6 por nuk denjoi t\u00eb shtrij\u00eb dor\u00ebn e tij vet\u00ebm kund\u00ebr Mardokeut, sepse e kishin njoftuar cilit popull i p\u00ebrkiste Mardokeu; k\u00ebshtu Hamani vendosi t\u00eb shkat\u00ebrroj\u00eb t\u00ebr\u00eb Judejt\u00eb, popullin e Mardokeut, q\u00eb gjendeshin n\u00eb t\u00ebr\u00eb mbret\u00ebrin\u00eb e Asueros.\n3:7 N\u00eb muajin e par\u00eb, q\u00eb \u00ebsht\u00eb muaji i Nisanit, n\u00eb vitin e dymb\u00ebdhjet\u00eb t\u00eb mbretit Asuero, n\u00eb prani t\u00eb Hamanit, u hodh Puri (dometh\u00ebn\u00eb u hodh shorti), p\u00ebr t\u00eb vendosur dit\u00ebn dhe muajin; dhe shorti ra mbi\n3:8 At\u00ebher\u00eb Hamani i tha mbretit Asuero: \"Ka nj\u00eb popull t\u00eb shp\u00ebrndar\u00eb dhe t\u00eb ve\u00e7uar nga popujt e t\u00eb gjitha krahinave t\u00eb mbret\u00ebris\u00eb sate, ligjet e t\u00eb cilit ndryshojn\u00eb nga ato t\u00eb cilitdo populli tjet\u00ebr dhe q\u00eb nuk respekton ligjet e mbretit; prandaj mbreti nuk ka asnj\u00eb p\u00ebrfitim t'i l\u00ebr\u00eb t\u00eb gjall\u00eb.\n3:9 N\u00eb rast se kjo i p\u00eblqen mbretit, t\u00eb p\u00ebrpilohet nj\u00eb dekret p\u00ebr shkat\u00ebrimin e tyre; dhe un\u00eb do t\u00eb paguaj dhjet\u00eb mij\u00eb talenta argjendi n\u00eb duart e atyre q\u00eb kryejn\u00eb pun\u00ebn, me q\u00ebllim q\u00eb t\u00eb derdhen n\u00eb thesaret e mbretit\".\n3:10 At\u00ebher\u00eb mbreti hoqi nga dora unaz\u00ebn me vul\u00ebn dhe ia dha Hamanit, Agagitit, birit t\u00eb Hamedathas dhe armikut t\u00eb Judejve.\n3:11 Pastaj mbreti i tha Hamanit: \"Parat\u00eb t'u dhan\u00eb, po k\u00ebshtu t\u00eb jepet populli; b\u00ebj me t\u00eb \u00e7far\u00eb t\u00eb duash\".\n3:12 Dit\u00ebn e tremb\u00ebdhjet\u00eb t\u00eb muajit t\u00eb par\u00eb u thirr\u00ebn sekretar\u00ebt e mbretit dhe u redaktua nj\u00eb dekret, n\u00eb baz\u00eb t\u00eb t\u00eb gjitha gj\u00ebrave q\u00eb kishte urdh\u00ebruar Hamani, p\u00ebr t'ua d\u00ebrguar satrap\u00ebve t\u00eb mbretit, qeveritar\u00ebve t\u00eb \u00e7do krahine dhe krer\u00ebve t\u00eb \u00e7do populli, \u00e7do krahine sipas shkrimit t\u00eb saj dhe \u00e7do populli sipas gjuh\u00ebs s\u00eb tij. Dekreti u redaktua n\u00eb em\u00ebr t\u00eb mbretit Asuero dhe u vulos me vul\u00ebn e mbretit.\n3:13 K\u00ebto dokumente u d\u00ebrguan me an\u00eb korier\u00ebsh n\u00eb t\u00eb gjitha krahinat e mbretit, me q\u00ebllim q\u00eb t\u00eb shkat\u00ebrroheshin, t\u00eb vriteshin dhe t\u00eb shfaroseshin t\u00ebr\u00eb Judejt\u00eb, t\u00eb rinj dhe pleq, f\u00ebmij\u00eb dhe gra, n\u00eb nj\u00eb dit\u00eb t\u00eb vetme, m\u00eb tremb\u00ebdhjet\u00eb t\u00eb muajit t\u00eb dymb\u00ebdhjet\u00eb, q\u00eb \u00ebsht\u00eb muaji i Adarit, dhe t\u00eb pla\u00e7kiteshin pasurit\u00eb e tyre.\n3:14 Nj\u00eb kopje e dekretit duhet t\u00eb nxirrej si ligj n\u00eb \u00e7do krahin\u00eb dhe t\u00eb shpallej p\u00ebr t\u00eb gjith\u00eb popujt, me q\u00ebllim q\u00eb t\u00eb ishin gati p\u00ebr at\u00eb dit\u00eb.\n3:15 Korier\u00ebt u nis\u00ebn me t\u00eb shpejt\u00eb sipas urdhrit t\u00eb mbretit, dhe dekreti u shpall n\u00eb qytetin e Suz\u00ebs. Mbreti dhe Hamani ishin ulur dhe pinin, por qyteti i Suz\u00ebs ishte tmerruar.\n4:1 Kur Mardokeu m\u00ebsoi t\u00eb gjitha ato q\u00eb kishin ndodhur, grisi rrobat e tij, u mbulua me nj\u00eb thes dhe me hi dhe doli n\u00ebp\u00ebr qytet, duke l\u00ebshuar britma t\u00eb forta dhe plot hidh\u00ebrim;\n4:2 dhe arriti deri te porta e mbretit, sepse nuk lejohej q\u00eb asnjeri i mbuluar me thes t\u00eb hynte te porta e mbretit.\n4:3 N\u00eb \u00e7do krahin\u00eb, ku arrit\u00ebn urdh\u00ebri i mbretit dhe dekreti i tij, pati nj\u00eb keqardhje t\u00eb madhe p\u00ebr Judejt\u00eb, me agjerime, me t\u00eb qara dhe vajtime; dhe shum\u00eb njer\u00ebz u mbuluan me nj\u00eb thes dhe me hi.\n4:4 Vajzat e Esterit dhe eunuk\u00ebt e saj erdh\u00ebn t'ia njoftojn\u00eb ngjarjen, dhe mbret\u00ebresha u ang\u00ebshtua shum\u00eb; pastaj i d\u00ebrgoi rroba Mardokeut, q\u00eb t'i vishte dhe t\u00eb hiqte nga trupi i tij thesin, por ai nuk i pranoi.\n4:5 At\u00ebher\u00eb Esteri thirri Hathakun, njerin nga eunuk\u00ebt e mbretit t\u00eb caktuar prej tij t'i sh\u00ebrbenin asaj dhe e urdh\u00ebroi t\u00eb shkonte te Mardokeu p\u00ebr t\u00eb m\u00ebsuar se \u00e7far\u00eb gj\u00eb e brengoste dhe p\u00ebr \u00e7'ar\u00ebsye.\n4:6 K\u00ebshtu Hathaku shkoi te Mardokeu n\u00eb sheshin e qytetit, q\u00eb ndodhej p\u00ebrball\u00eb port\u00ebs s\u00eb mbretit.\n4:7 Mardokeu i tregoi t\u00ebr\u00eb ato q\u00eb i kishin ndodhur dhe p\u00ebrm\u00ebndi gjithashtu shum\u00ebn e parave q\u00eb Hamani kishte premtuar t\u00eb derdhte n\u00eb thesarin mbret\u00ebror p\u00ebr t\u00eb siguruar shkat\u00ebrrimin e Judejve;\n4:8 i dha gjithashtu nj\u00eb kopje t\u00eb tekstit t\u00eb dekretit q\u00eb ishte shpallur n\u00eb Suz\u00eb p\u00ebr shfarosjen e tyre, me q\u00ebllim q\u00eb t'ia tregonte Esterit, t'ia shpjegonte asaj dhe ta urdh\u00ebronte t\u00eb shkonte te mbreti p\u00ebr ta lutur me t\u00eb madhe dhe p\u00ebr t\u00eb nd\u00ebrhyr\u00eb pran\u00eb tij n\u00eb favor t\u00eb popullit t\u00eb tij.\n4:9 K\u00ebshtu Hathaku u kthye tek Esteri dhe i njoftoi fjal\u00ebt e Mardokeut.\n4:10 At\u00ebher\u00eb Esteri i foli Hathakut dhe e urdh\u00ebroi t\u00eb shkonte e t'i thoshte Mardokeut:\n4:11 \"T\u00ebr\u00eb sh\u00ebrb\u00ebtor\u00ebt e mbretit dhe populli i krahinave t\u00eb tij e din\u00eb q\u00eb cilido burr\u00eb ose grua q\u00eb hyn n\u00eb oborrin e brendsh\u00ebm p\u00ebr t\u00eb shkuar te mbreti, pa qen\u00eb i thirrur, duhet t\u00eb d\u00ebnohet me vdekje, n\u00eb baz\u00eb t\u00eb nj\u00eb ligji t\u00eb ve\u00e7ant\u00eb, ve\u00e7 po t\u00eb jet\u00eb se mbreti shtrin ndaj tij skeptrin e tij prej ari; vet\u00ebm k\u00ebshtu ai do t\u00eb shp\u00ebtoj\u00eb jet\u00ebn e tij. Dhe kaluan tanim\u00eb tridhjet\u00eb dit\u00eb q\u00eb nuk jam thirrur p\u00ebr t\u00eb shkuar te mbreti\".\n4:12 K\u00ebshtu ia njoftuan Mardokeut fjal\u00ebt e Esterit,\n4:13 dhe Mardokeu iu p\u00ebrgjigj Esterit: \"Mos mendo se do t\u00eb shp\u00ebtosh vet\u00ebm ti nga gjith\u00eb Judejt\u00eb, sepse ndodhesh n\u00eb pallatin e mbretit.\n4:14 Sepse po t\u00eb jet\u00eb se ti hesht n\u00eb k\u00ebt\u00eb moment, ndihma dhe \u00e7lirimi do t\u00eb vijn\u00eb p\u00ebr Judejt\u00eb nga nj\u00eb an\u00eb tjet\u00ebr; por ti dhe sht\u00ebpia e atit t\u00ebnd do t\u00eb shuheni. P\u00ebrve\u00e7 k\u00ebsaj, kush e di n\u00ebse \u00ebsht\u00eb pik\u00ebrisht p\u00ebr nj\u00eb koh\u00eb t\u00eb till\u00eb q\u00eb ti ke arritur n\u00eb pozit\u00eb mbret\u00ebrore?\".\n4:15 At\u00ebher\u00eb Esteri urdh\u00ebroi t'i p\u00ebrgjigjeshin Mardokeut k\u00ebshtu:\n4:16 \"Shko, mblidh t\u00ebr\u00eb Judejt\u00eb q\u00eb ndodhen n\u00eb Suz\u00eb, dhe agjeroni p\u00ebr mua; rrini pa ngr\u00ebn\u00eb dhe pa pir\u00eb tri dit\u00eb, nat\u00eb e dit\u00eb. Edhe un\u00eb me vajzat e mia do t\u00eb agjerojm\u00eb n\u00eb t\u00eb nj\u00ebjt\u00ebn m\u00ebnyr\u00eb; pastaj do t\u00eb hyj te mbreti; megjith\u00ebse nj\u00eb gj\u00eb e till\u00eb \u00ebsht\u00eb kund\u00ebr ligjit; dhe n\u00eb qoft\u00eb se duhet t\u00eb vdes, do t\u00eb vdes\".\n4:17 Mardokeu iku dhe b\u00ebri t\u00eb gjitha gj\u00ebrat q\u00eb Esteri kishte urdh\u00ebruar.\n5:1 Dit\u00ebn e tret\u00eb, Esteri veshi rrob\u00ebn mbret\u00ebrore dhe u paraqit n\u00eb oborrin e brendsh\u00ebm t\u00eb pallatit t\u00eb mbretit, p\u00ebrball\u00eb apartamentit t\u00eb mbretit. Mbreti ishte ulur mbi fronin mbret\u00ebror n\u00eb pallatin mbret\u00ebror, p\u00ebrball\u00eb hyrjes s\u00eb pallatit.\n5:2 Sa e pa mbreti mbret\u00ebresh\u00ebn Ester m\u00eb k\u00ebmb\u00eb n\u00eb oborr, ajo fitoi simpatin\u00eb e tij. K\u00ebshtu mbreti zgjati n\u00eb drejtim t\u00eb Esterit skeptrin prej ari q\u00eb mbante n\u00eb dor\u00eb, dhe Esteri u afrua dhe preku maj\u00ebn e skeptrit.\n5:3 At\u00ebher\u00eb mbreti i tha: \"\u00c7far\u00eb do, mbret\u00ebresh\u00eb Ester? Cila \u00ebsht\u00eb k\u00ebrkesa jote? Edhe sikur t\u00eb jet\u00eb gjysma e mbret\u00ebris\u00eb sime, do t\u00eb t\u00eb jepet\".\n5:4 Esteri u p\u00ebrgjigj: \"N\u00eb qoft\u00eb se k\u00ebshtu i p\u00eblqen mbretit, le t\u00eb vij\u00eb sot mbreti me Hamanin n\u00eb banketin q\u00eb i kam p\u00ebrgatitur\".\n5:5 At\u00ebher\u00eb mbreti tha: \"Silleni shpejt Hamanin, q\u00eb t\u00eb b\u00ebhet \u00e7'ka th\u00ebn\u00eb Esteri\". K\u00ebshtu mbreti dhe Hamani shkuan n\u00eb banketin q\u00eb Esteri kishte p\u00ebrgatitur.\n5:6 Nd\u00ebrsa po sh\u00ebrbehej vera gjat\u00eb banketit, mbreti i tha Esterit: \"Cila \u00ebsht\u00eb k\u00ebrkesa jote? Do t\u00eb t\u00eb plot\u00ebsohet. \u00c7far\u00eb k\u00ebrkon? Qoft\u00eb edhe gjysma e mbret\u00ebris\u00eb sime, do t\u00eb b\u00ebhet\".\n5:7 Esteri u p\u00ebrgjigj dhe tha: \"Ja, k\u00ebrkesa ime ajo q\u00eb po k\u00ebrkoj:\n5:8 N\u00eb qoft\u00eb se kam gjetur hir n\u00eb syt\u00eb e mbretit dhe n\u00eb qoft\u00eb se mbretit i p\u00eblqen t\u00eb plot\u00ebsoj\u00eb k\u00ebrkes\u00ebn time dhe t\u00eb m\u00eb jap\u00eb at\u00eb q\u00eb k\u00ebrkoj, le t\u00eb vij\u00eb mbreti me Hamanin n\u00eb banketin q\u00eb un\u00eb do t'u p\u00ebrgatis atyre, dhe nes\u00ebr kam p\u00ebr t\u00eb b\u00ebr\u00eb ashtu si ka th\u00ebn\u00eb mbreti\".\n5:9 At\u00eb dit\u00eb Hamani doli gjith\u00eb qejf dhe me zem\u00ebr t\u00eb k\u00ebnaqur, por kur Hamani n\u00eb port\u00ebn e mbretit pa Mardokeun q\u00eb as ngrihej as l\u00ebvizte para tij, u zem\u00ebrua shum\u00eb me t\u00eb.\n5:10 Megjithat\u00eb Hamani e mbajti veten, shkoi n\u00eb sht\u00ebpi dhe d\u00ebrgoi t\u00eb th\u00ebrrasin miqt\u00eb e tij dhe Zereshin, bashk\u00ebshorten e tij.\n5:11 Pastaj Hamani u foli atyre mbi shk\u00eblqimin e pasurive t\u00eb tij, mbi numrin e madh t\u00eb bijve t\u00eb tij, mbi t\u00eb gjitha gj\u00ebrat me t\u00eb cilat mbreti e kishte nderuar, dhe si e kishte ngritur mbi princat dhe sh\u00ebrb\u00ebtor\u00ebt e mbretit.\n5:12 Hamani shtoi gjithashtu: \"Edhe mbret\u00ebresha Ester nuk ka sjell\u00eb bashk\u00eb me mbretin n\u00eb banket ask\u00ebnd tjet\u00ebr ve\u00e7 meje; edhe nes\u00ebr m\u00eb ka ftuar ajo bashk\u00eb me mbretin.\n5:13 Por t\u00ebr\u00eb kjo nuk m\u00eb mjafton deri sa do t\u00eb shoh Mardokeun Judeun t\u00eb ulur para port\u00ebs s\u00eb mbretit\".\n5:14 A\u00ebher\u00eb bashk\u00ebshortja e tij Zeresh dhe t\u00ebr\u00eb miqt\u00eb e tij i than\u00eb: \"T\u00eb p\u00ebrgatitet nj\u00eb trek\u00ebmb\u00ebsh i lart\u00eb pes\u00ebdhjet\u00eb kubit\u00eb; nes\u00ebr n\u00eb m\u00ebngjes i thuaj mbretit q\u00eb aty t\u00eb varet Mardokeu; pastaj shko i k\u00ebnaqur n\u00eb banket me mbretin\". Kjo gj\u00eb i p\u00eblqeu Hamanit, q\u00eb b\u00ebri t\u00eb p\u00ebrgatitet trek\u00ebmb\u00ebshi.\n6:1 At\u00eb nat\u00eb mbretin nuk e zinte gjumi. At\u00ebher\u00eb urdh\u00ebroi q\u00eb t'i sillnin librin e ngjarjeve p\u00ebr t'u mbajtur mend, Kronikat; dhe u lexua para mbretit.\n6:2 U gjet e shkruar q\u00eb Mardokeu kishte denoncuar Bigthanan dhe Tereshin, dy eunuk\u00ebt e mbretit midis der\u00ebtar\u00ebve, q\u00eb kishin k\u00ebrkuar t\u00eb shtrinin dor\u00ebn kund\u00ebr mbretit Asuero.\n6:3 At\u00ebher\u00eb mbreti pyeti: \"\u00c7far\u00eb nderimi dhe shp\u00ebrblimi iu dha Mardokeu p\u00ebr k\u00ebt\u00eb?\". Sh\u00ebrb\u00ebtor\u00ebt e mbretit q\u00eb i sh\u00ebrbenin u p\u00ebrgjigj\u00ebn: \"Nuk u b\u00eb asgj\u00eb p\u00ebr t\u00eb\".\n6:4 At\u00ebher\u00eb mbreti tha: \"Kush \u00ebsht\u00eb n\u00eb oborr?\". (Hamani sapo kishte hyr\u00eb n\u00eb oborrin e jasht\u00ebm t\u00eb pallatit t\u00eb mbretit, p\u00ebr t'i k\u00ebrkuar mbretit q\u00eb ta varte Mardokeun n\u00eb trek\u00ebmb\u00ebshin q\u00eb kishte p\u00ebrgatitur p\u00ebr t\u00eb).\n6:5 Sh\u00ebrb\u00ebtor\u00ebt e mbretit iu p\u00ebrgjigj\u00ebn: \"Ja, Hamani \u00ebsht\u00eb n\u00eb oborr\". Mbreti tha: \"L\u00ebreni t\u00eb hyj\u00eb\".\n6:6 At\u00ebher\u00eb Hamani hyri dhe mbreti i tha: \"\u00c7far\u00eb duhet t'i b\u00ebhet nj\u00eb njeriu q\u00eb mbreti d\u00ebshiron ta nderoj\u00eb?\". Hamani mendoi n\u00eb zem\u00ebr t\u00eb vet: \"Cilin do t\u00eb donte t\u00eb nderonte mbretin m\u00eb shum\u00eb se mua?\".\n6:7 Hamani iu p\u00ebrgjigj mbretit: \"P\u00ebr njeriun q\u00eb mbreti d\u00ebshiron t\u00eb nderoj\u00eb,\n6:8 t\u00eb merret rroba mbret\u00ebrore q\u00eb ka veshur mbreti dhe kali mbi t\u00eb cilin ka hipur dhe t\u00eb vihet mbi kok\u00ebn e tij nj\u00eb kuror\u00eb mbret\u00ebrore.\n6:9 T'i dor\u00ebzohet rrobja dhe kali njerit prej princave m\u00eb fisnik\u00eb t\u00eb mbretit dhe t'i vishen rrobat njeriut q\u00eb mbreti d\u00ebshiron t\u00eb nderoj\u00eb; pastaj t\u00eb \u00e7ohet me kal\u00eb n\u00ebp\u00ebr rrug\u00ebt e qytetit dhe t\u00eb shpallet para tij: \"K\u00ebshtu veprohet me njeriun q\u00eb mbreti d\u00ebsh\u00ebron t\u00eb nderoj\u00eb!\"\".\n6:10 At\u00ebher\u00eb mbreti i tha Hamanit: \"Shpejto, merr rroben dhe kalin, si\u00e7 e the, dhe vepro k\u00ebshtu me Judeun Mardoke, q\u00eb rri ulur pran\u00eb port\u00ebs s\u00eb mbretit, mos l\u00ebr pa kryer asgj\u00eb nga ato q\u00eb ke th\u00ebn\u00eb\".\n6:11 Hamani mori, pra, rroben dhe kalin, ia veshi Mardokeut rroben dhe e \u00e7oi me kal\u00eb n\u00ebp\u00ebr rrug\u00ebt e qytetit, duke shpallur para tij: \"K\u00ebshtu veprohet me njeriun q\u00eb mbreti d\u00ebsh\u00ebron t\u00eb nderoj\u00eb!\".\n6:12 Pastaj Mardokeu u kthye te porta e mbretit, por Hamani nxitoi t\u00eb kthehet n\u00eb sht\u00ebpin\u00eb e vet, i pik\u00eblluar dhe kok\u00ebmbuluar.\n6:13 Hamani i tregoi bashk\u00ebshortes s\u00eb tij Zeresh dhe gjith\u00eb miqve t\u00eb tij t\u00eb gjitha sa i kishin ngjar\u00eb. At\u00ebher\u00eb njer\u00ebzit e urt\u00eb dhe gruaja e tij Zeresh i than\u00eb: \"N\u00eb qoft\u00eb se Mardokeu para t\u00eb cilit ke filluar t\u00eb biesh \u00ebsht\u00eb nga fisi i Judejve, ti nuk do t\u00eb arrish t\u00eb fitosh kund\u00ebr tij, por do t\u00eb rr\u00ebzohesh plot\u00ebsisht para tij\".\n6:14 Ata po flisnin akoma me t\u00eb, kur arrit\u00ebn eunuk\u00ebt e mbretit, t\u00eb cil\u00ebt nxituan ta \u00e7onin Hamanin n\u00eb banketin q\u00eb Ester i kishte p\u00ebrgatitur.\n7:1 Mbreti dhe Hamani shkuan, pra, n\u00eb banketin bashk\u00eb me mbret\u00ebresh\u00ebn Ester.\n7:2 Edhe dit\u00ebn e dyt\u00eb, nd\u00ebrsa gjat\u00eb banketit po sh\u00ebrbehej vera, mbreti i tha Esterit: \"Cila \u00ebsht\u00eb k\u00ebrkesa jote, o mbret\u00ebresh\u00eb Ester? Do t\u00eb t\u00eb plot\u00ebsohet. \u00c7far\u00eb k\u00ebrkon? Edhe sikur t\u00eb jet\u00eb gjysma e mbret\u00ebris\u00eb sime, do t\u00eb b\u00ebhet\".\n7:3 At\u00ebher\u00eb mbret\u00ebresha Ester u p\u00ebrgjigj: \"N\u00eb rast se kam gjetur hir n\u00eb syt\u00eb e tu, o mbret, dhe n\u00eb qoft\u00eb se k\u00ebshtu i p\u00eblqen mbretit, k\u00ebrkesa ime \u00ebsht\u00eb q\u00eb t\u00eb m\u00eb jepet jeta; dhe k\u00ebrkoj q\u00eb populli im t\u00eb falet.\n7:4 Sepse un\u00eb dhe populli im kemi qen\u00eb t\u00eb shitur p\u00ebr t'u prishur, p\u00ebr t'u vrar\u00eb dhe p\u00ebr t'u shfarosur. Po t\u00eb ishim shitur p\u00ebr t'u b\u00ebr\u00eb skllev\u00ebr dhe skllave do t\u00eb kisha heshtur; por armiku nuk mund ta kompensoj\u00eb kurr\u00eb d\u00ebmin q\u00eb do t'i shkaktohej mbretit\".\n7:5 Mbreti Asuero i tha mbret\u00ebresh\u00ebs Ester: \"Kush \u00ebsht\u00eb dhe ku ndodhet ai q\u00eb ka guximin t\u00eb b\u00ebj\u00eb nj\u00eb gj\u00eb t\u00eb till\u00eb?\".\n7:6 Esteri u p\u00ebrgjigj: Armiku dhe kund\u00ebrshtari \u00ebsht\u00eb ai i keqi Haman\". At\u00ebher\u00eb Hamanit i hyri tmerri n\u00eb prani t\u00eb mbretit dhe t\u00eb mbret\u00ebresh\u00ebs.\n7:7 Mbreti u ngrit shum\u00eb i zem\u00ebruar nga banketi n\u00eb t\u00eb cilin sh\u00ebrbehej vera dhe shkoi n\u00eb kopshtin e pallatit, nd\u00ebrsa Hamani q\u00ebndroi p\u00ebr t'iu lutur me t\u00eb madhe mbret\u00ebresh\u00ebs Ester p\u00ebr jet\u00ebn e tij, sepse\n7:8 Pastaj mbreti u kthye nga kopshti i pallatit, n\u00eb vendin e banketit ku sh\u00ebrbehej vera; nd\u00ebrkaq Hamani kishte r\u00ebn\u00eb mbi divanin n\u00eb t\u00eb cilin rrinte Esteri. At\u00ebher\u00eb mbreti thirri: \"Dashke gjithashtu t\u00eb dhunosh mbret\u00ebresh\u00ebn, nd\u00ebrsa un\u00eb vet\u00eb jam n\u00eb sht\u00ebpi?\". Sa dol\u00ebn k\u00ebto fjal\u00eb nga goja e mbretit, ia mbuluan fytyr\u00ebn Hamanit.\n7:9 Pastaj Harbonahu, nj\u00eb nga eunuk\u00ebt, tha p\u00ebrpara mbretit: \"Ja, n\u00eb sht\u00ebpin\u00eb e vet\u00eb Hamanit \u00ebsht\u00eb ngritur nj\u00eb trek\u00ebmb\u00ebsh, i lart\u00eb pes\u00ebdhjet\u00eb kubit\u00eb, q\u00eb Hamani kishte p\u00ebrgatitur p\u00ebr Mardokeun, i cili kishte folur p\u00ebr t\u00eb mir\u00ebn e mbretit\". Mbreti tha: \"Vareni aty k\u00ebt\u00eb!\".\n7:10 K\u00ebshtu Hamanin e var\u00ebn n\u00eb trek\u00ebmb\u00ebshin q\u00eb kishte p\u00ebrgatitur p\u00ebr Mardokeun. Dhe zem\u00ebrimi i mbretit u qet\u00ebsua.\n8:1 Po at\u00eb dit\u00eb mbreti Asuero i dha mbret\u00ebresh\u00ebs Ester sht\u00ebpin\u00eb e Hamanit, armikut t\u00eb Judejve; dhe Mardokeu erdhi para mbretit, t\u00eb cilit Esteri i kishte shpjeguar se \u00e7'ishte ai p\u00ebr t\u00eb.\n8:2 K\u00ebshtu mbreti hoqi unaz\u00ebn q\u00eb i kishte rimarr\u00eb Hamanit dhe ia dhe Mardokeut. Pastaj Esteri e caktoi Mardokeun mbi sht\u00ebpin\u00eb e Hamanit.\n8:3 Esteri foli akoma para mbretit, ra n\u00eb k\u00ebmb\u00ebt e tij dhe iu lut me lot nd\u00ebr sy q\u00eb t\u00eb pengonte komplotin e keq t\u00eb Hamanit, Agagitit, dhe planin q\u00eb ai kishte menduar kund\u00ebr Judejve.\n8:4 At\u00ebher\u00eb mbreti zgjati skeptrin prej ari n\u00eb drejtim t\u00eb Esterit; k\u00ebshtu Esteri u ngrit, mbeti n\u00eb k\u00ebmb\u00eb para mbretit\n8:5 dhe tha: \"N\u00eb se i duket mir\u00eb mbretit, n\u00eb rast se kam gjetur hir n\u00eb syt\u00eb e tij, n\u00eb rast se \u00e7\u00ebshtja i duket gjithashtu e drejt\u00eb mbretit dhe n\u00eb rast se gjej p\u00eblqim nga syt\u00eb e tij, t\u00eb shkruhet p\u00ebr t\u00eb revokuar dokumentet e hartuara nga Hamani, bir i Hamedathas, Agagitit, q\u00eb ai shkroi p\u00ebr t\u00eb shkat\u00ebrruar Judejt\u00eb q\u00eb jan\u00eb n\u00eb t\u00eb gjitha krahinat e mbretit.\n8:6 Si do t\u00eb mund t\u00eb rezistoja n\u00eb fakt duke par\u00eb fatkeq\u00ebsin\u00eb q\u00eb do t\u00eb godiste popullin tim? Ose si do t\u00eb mund t\u00eb rezistoja duke par\u00eb shkat\u00ebrrimin e fisit tim?\".\n8:7 At\u00ebher\u00eb mbreti Asuero i tha mbret\u00ebresh\u00ebs Ester dhe Judeut Mardoke: \"Ja, un\u00eb i dhash\u00eb Esterit sht\u00ebpin\u00eb e Hamanit, dhe k\u00ebt\u00eb e var\u00ebn n\u00eb trek\u00ebmb\u00ebsh, sepse kishte dashur t\u00eb shtrinte dor\u00ebn e tij mbi Judejt\u00eb.\n8:8 Ju vet\u00eb shkruani nj\u00eb dekret n\u00eb favor t\u00eb Judejve n\u00eb em\u00ebr t\u00eb mbretit, si t'ju duket m\u00eb mir\u00eb, dhe vuloseni me unaz\u00ebn mbret\u00ebrore, sepse vendimi i shkruar n\u00eb em\u00ebr t\u00eb mbretit dhe i vulosur me unaz\u00ebn mbret\u00ebrore \u00ebsht\u00eb i prer\u00eb\".\n8:9 At\u00ebher\u00eb, m\u00eb nj\u00ebzet e tre t\u00eb muajit t\u00eb tret\u00eb, q\u00eb \u00ebsht\u00eb muaji i Sivanit, u thirr\u00ebn sekretar\u00ebt e mbretit dhe sipas gjith\u00eb atyre q\u00eb Mardokeu kishte urdh\u00ebruar, u d\u00ebrguan shkrime Judejve, satrap\u00ebve, qeveritar\u00ebve dhe krer\u00ebve t\u00eb nj\u00ebqind e nj\u00ebzet e shtat\u00eb krahinave, nga India deri n\u00eb Etiopi, \u00e7do krahine sipas shkrimit t\u00eb saj, \u00e7do populli sipas gjuh\u00ebs s\u00eb tij, dhe Judejve sipas shkrimit dhe gjuh\u00ebs s\u00eb tyre.\n8:10 K\u00ebshtu ai shkroi n\u00eb em\u00ebr t\u00eb mbretit Asuero, duke v\u00ebn\u00eb vul\u00ebn me unaz\u00ebn mbret\u00ebrore, dhe i d\u00ebrgoi dokumentet me an\u00eb t\u00eb korier\u00ebve q\u00eb ngisnin kuaj t\u00eb shpejt\u00eb, t\u00eb lindur nga kuaj t\u00eb rac\u00ebs.\n8:11 Me an\u00eb t\u00eb k\u00ebtyre dokumenteve u jepej Judejve, n\u00eb \u00e7far\u00ebdo qyteti q\u00eb t\u00eb ndodheshin, e drejta t\u00eb bashkoheshin dhe t\u00eb mbronin jet\u00ebn e tyre, duke shkat\u00ebrruar, duke vrar\u00eb dhe duke shfarosur t\u00ebr\u00eb njer\u00ebzit e armatosur t\u00eb \u00e7far\u00ebdo populli o krahine q\u00eb t'i sulmonin, duke p\u00ebrfshir\u00eb f\u00ebmij\u00ebt dhe grat\u00eb, dhe t\u00eb pla\u00e7kisnin pasurit\u00eb e tyre,\n8:12 n\u00eb nj\u00eb dit\u00eb t\u00eb vetme, n\u00eb t\u00eb gjitha krahinat e mbretit Asuero: dit\u00ebn e tremb\u00ebdhjet\u00eb t\u00eb muajit t\u00eb dymb\u00ebdhjet\u00eb, q\u00eb \u00ebsht\u00eb muaji i Adarit.\n8:13 Nj\u00eb kopje e dekretit, i shpallur si ligj n\u00eb \u00e7do krahin\u00eb, duhet t\u00eb nxirrej p\u00ebr t\u00eb gjith\u00eb popujt, me q\u00ebllim q\u00eb Judejt\u00eb t\u00eb ishin gati p\u00ebr at\u00eb dit\u00eb t\u00eb hakmerreshin kund\u00ebr armiqve t\u00eb tyre.\n8:14 K\u00ebshtu korier\u00ebt t\u00eb hipur mbi kuaj t\u00eb shpejt\u00eb u nis\u00ebn t\u00eb nxitur dhe t\u00eb shtypur nga urdhri i mbretit; dhe dekreti u nxuar n\u00eb qytetin e Suz\u00ebs.\n8:15 Mardokeu doli nga prania e mbretit me nj\u00eb rrobe mbret\u00ebrore t\u00eb purpurt dhe prej liri t\u00eb bardh\u00eb, me nj\u00eb kuror\u00eb t\u00eb madhe prej ari dhe nj\u00eb mantel prej p\u00eblhure liri n\u00eb ngjyr\u00eb t\u00eb kuqe flak\u00eb; n\u00eb qytetin\n8:16 P\u00ebr Judejt\u00eb ishte drit\u00eb, g\u00ebzim, gaz dhe lavdi.\n8:17 N\u00eb \u00e7do krahin\u00eb dhe n\u00eb \u00e7do qytet, kudo q\u00eb arrinte urdhri i mbretit dhe dekreti i tij, p\u00ebr Judejt\u00eb kishte g\u00ebzim dhe ngaz\u00ebllim, bankete dhe dit\u00eb t\u00eb lumtura. Dhe shum\u00eb nga pjestar\u00ebt e popujve t\u00eb vendit u b\u00ebn\u00eb Judej, sepse tmerri i Judejve i kishte z\u00ebn\u00eb.\n9:1 Muajin e dymb\u00ebdhjet\u00eb, q\u00eb \u00ebsht\u00eb muaji i Adarit, dit\u00ebn e tremb\u00ebdhjet\u00eb t\u00eb muajit, kur duhet t\u00eb zbatoheshin urdhri dhe dekreti i mbretit, dita n\u00eb t\u00eb cil\u00ebn armiqt\u00eb e Judejve shpresonin t\u00eb sundonin mbi\n9:2 Judejt\u00eb u mblodh\u00ebn n\u00eb qytetet e tyre, n\u00eb t\u00eb gjitha krahinat e mbretit Asuero, p\u00ebr t\u00eb shtrir\u00eb dor\u00ebn kund\u00ebr atyre q\u00eb k\u00ebrkonin t'u b\u00ebnin keq; dhe askush nuk mundi t'u rezistonte atyre, sepse tmerri i Judejve i kishte z\u00ebn\u00eb t\u00ebr\u00eb popujt.\n9:3 T\u00ebr\u00eb krer\u00ebt e krahinave, satrap\u00ebt, qeveritar\u00ebt dhe ata q\u00eb merreshin me pun\u00ebt e mbretit i p\u00ebrkrah\u00ebn Judejt\u00eb, sepse tmerri i Mardokeut i kishte z\u00ebn\u00eb.\n9:4 N\u00eb fakt Mardokeu ishte i madh n\u00eb pallatin e mbretit, dhe fama e tij p\u00ebrhapej n\u00eb t\u00eb gjitha krahinat, sepse ky njeri, Mardokeu, b\u00ebhej gjithnj\u00eb m\u00eb i madh.\n9:5 K\u00ebshtu Judejt\u00eb godit\u00ebn t\u00ebr\u00eb armiqt\u00eb e tyre, duke i kaluar n\u00eb tehun e shpat\u00ebs dhe duke kryer nj\u00eb k\u00ebrdi dhe nj\u00eb shkat\u00ebrrim t\u00eb madh; u soll\u00ebn si desh\u00ebn me armiqt\u00eb e tyre.\n9:6 N\u00eb qytetin e Suz\u00ebs Judejt\u00eb vran\u00eb dhe shfaros\u00ebn pes\u00ebqind njer\u00ebz;\n9:7 vran\u00eb edhe Parshandathan, Dalfonin, Aspathan,\n9:8 Porathan, Adalian, Aridathan,\n9:9 Parmashtan, Arisain, Aridain dhe Vajezathan,\n9:10 dhjet\u00eb bijt\u00eb e Hamanit, birit t\u00eb Hamedathas, armiku i Judejve, por nuk u dhan\u00eb pas pla\u00e7kitjes.\n9:11 Po at\u00eb dit\u00eb numri i atyre q\u00eb ishin vrar\u00eb n\u00eb qytetin e Suz\u00ebs iu njoftua mbretit.\n9:12 Mbreti i tha at\u00ebher\u00eb mbret\u00ebresh\u00ebs Ester: \"N\u00eb qytetin e Suz\u00ebs Judejte kan\u00eb vrar\u00eb dhe shfarosur pes\u00ebqind njer\u00ebz dhe dhjet\u00eb bij t\u00eb Hamanit; \u00e7far\u00eb kan\u00eb b\u00ebr\u00eb vall\u00eb n\u00eb krahinat e tjera t\u00eb mbretit? Tani cila \u00ebsht\u00eb k\u00ebrkesa jote? Do t\u00eb t\u00eb plot\u00ebsohet. \u00c7far\u00eb tjet\u00ebr k\u00ebrkon? Do t\u00eb b\u00ebhet\".\n9:13 At\u00ebher\u00eb Esteri tha: \"N\u00eb qoft\u00eb se k\u00ebshtu i p\u00eblqen mbretit, le t\u00eb lejohen Judejt\u00eb q\u00eb jan\u00eb n\u00eb Suz\u00eb t\u00eb b\u00ebjn\u00eb edhe nes\u00ebr at\u00eb q\u00eb \u00ebsht\u00eb dekretuar p\u00ebr sot; dhe t\u00eb varen n\u00eb trek\u00ebmb\u00ebsh t\u00eb dhjet\u00eb bijt\u00eb e Hamanit\".\n9:14 Mbreti urdh\u00ebroi q\u00eb t\u00eb veprohej pik\u00ebrisht k\u00ebshtu. Dekreti u nxuarr n\u00eb Suza dhe dhjet\u00eb bijt\u00eb e Hamanit u var\u00ebn n\u00eb trek\u00ebmb\u00ebsh.\n9:15 Judejt\u00eb q\u00eb ishin n\u00eb Suza u mblodh\u00ebn edhe dit\u00ebn e kat\u00ebrmb\u00ebdhjet\u00eb t\u00eb muajit t\u00eb Adarit dhe vran\u00eb n\u00eb Suza treqind njer\u00ebz; por nuk u dhan\u00eb pas pla\u00e7kitjes.\n9:16 Edhe Judejt\u00eb e tjer\u00eb q\u00eb ishin n\u00eb krahinat e mbretit u mblodh\u00ebn, p\u00ebr t\u00eb mbrojtur jet\u00ebn e tyre dhe p\u00ebr t\u00eb qen\u00eb t\u00eb sigurt nga sulmet e armiqve t\u00eb tyre; vran\u00eb shtat\u00ebdhjet\u00eb e pes\u00eb mij\u00eb nga ata q\u00eb i urrenin, por nuk u dhan\u00eb pas pla\u00e7kitjes.\n9:17 Kjo ndodhi dit\u00ebn e tremb\u00ebdhjet\u00eb t\u00eb muajit t\u00eb Adarit; dit\u00ebn e kat\u00ebrmb\u00ebdhjet\u00eb u \u00e7lodh\u00ebn dhe e kthyen n\u00eb nj\u00eb dit\u00eb banketi e g\u00ebzimi.\n9:18 Judejt\u00eb q\u00eb ishin n\u00eb Suza u grumbulluan p\u00ebrkundrazi dit\u00ebn e tremb\u00ebdhjet\u00eb dhe t\u00eb kat\u00ebrmb\u00ebdhjet\u00eb; dit\u00ebn e pes\u00ebmb\u00ebdhjet\u00eb t\u00eb muajit u \u00e7lodh\u00ebn, e b\u00ebn\u00eb dit\u00eb banketi dhe g\u00ebzimi.\n9:19 P\u00ebr k\u00ebt\u00eb ar\u00ebsye Judejt\u00eb e fush\u00ebs, q\u00eb banojn\u00eb n\u00eb qytete pa mure, e kan\u00eb b\u00ebr\u00eb dit\u00ebn e kat\u00ebrmb\u00ebdhjet\u00eb t\u00eb muajit t\u00eb Adarit nj\u00eb dit\u00eb g\u00ebzimi, banketesh dhe feste, dhe n\u00eb k\u00ebt\u00eb dit\u00eb i d\u00ebrgojn\u00eb dhurata njeri-tjetrit.\n9:20 Mardokeu i shkroi t\u00ebr\u00eb k\u00ebto gj\u00ebra dhe u d\u00ebrgoi letra t\u00ebr\u00eb Judejve q\u00eb ishin n\u00eb t\u00eb gjitha krahinat e mbretit Asuero, af\u00ebr dhe larg,\n9:21 p\u00ebr t'i urdh\u00ebruar t\u00eb kremtonin \u00e7do vit dit\u00ebn e kat\u00ebrmb\u00ebdhjet\u00eb dhe t\u00eb pes\u00ebmb\u00ebdhjet\u00eb t\u00eb muajit t\u00eb Adarit,\n9:22 si dit\u00ebt gjat\u00eb t\u00eb cilave Judejt\u00eb pat\u00ebn pushim nga sulmet e armiqve t\u00eb tyre, dhe si muaji n\u00eb t\u00eb cilin dhembja e tyre u kthye n\u00eb g\u00ebzim dhe zia n\u00eb fest\u00eb, dhe k\u00ebshtu ato t'i b\u00ebnin dit\u00eb banketi e g\u00ebzimi, gjat\u00eb t\u00eb cilave t'i d\u00ebrgonin dhurata njeri-tjetrit dhe t'u b\u00ebnin dhurata t\u00eb varf\u00ebrve.\n9:23 Judejt\u00eb u zotuan t\u00eb respektonin at\u00eb q\u00eb kishin filluar t\u00eb b\u00ebnin, ashtu si u kishte shkruar atyre Mardokeu.\n9:24 N\u00eb fakt Hamani, bir i Hamedathas, Agagitit, armiku i t\u00eb gjith\u00eb Judejve, kishte komplotuar kund\u00ebr Judejve p\u00ebr t'i shkat\u00ebrruar dhe kishte hedhur Purin (dometh\u00ebn\u00eb kishte hedhur shortin), p\u00ebr t'i shfarosur dhe p\u00ebr t'i shkat\u00ebrruar.\n9:25 Por kur Esteri u paraqit para mbretit, ky urdh\u00ebroi me shkrim q\u00eb komploti i keq q\u00eb Hamani kishte kurdisur kund\u00ebr Judejve t\u00eb binte mbi kryet e tij dhe q\u00eb ai dhe bijt\u00eb e tij t\u00eb vareshin n\u00eb trek\u00ebmb\u00ebsh.\n9:26 Prandaj ato dit\u00eb u quajt\u00ebn Purim, nga fjala Pur. N\u00eb p\u00ebrshtatje, pra, me t\u00eb gjitha ato q\u00eb ishin shkruar n\u00eb at\u00eb let\u00ebr, me t\u00eb gjitha ato q\u00eb kishin par\u00eb lidhur me k\u00ebt\u00eb dhe me ato q\u00eb kishin ndodhur,\n9:27 Judejt\u00eb vendos\u00ebn t\u00eb zotoheshin pa iu shmangur p\u00ebr vete, p\u00ebr pasardh\u00ebsit e tyre dhe p\u00ebr t\u00eb gjith\u00eb ata q\u00eb do t\u00eb bashkoheshin me ta, t\u00eb kremtonin \u00e7do vit k\u00ebto dy dit\u00eb sipas udh\u00ebzimeve t\u00eb shkruara dhe koh\u00ebs s\u00eb caktuar.\n9:28 Ato dit\u00eb duhet t\u00eb kujtoheshin dhe t\u00eb kremtoheshin brez pas brezi, n\u00eb \u00e7do familje, n\u00eb \u00e7do krahin\u00eb, n\u00eb \u00e7do qytet; n\u00eb asnj\u00eb m\u00ebnyr\u00eb Judejt\u00eb nuk duhet t\u00eb hiqnin dor\u00eb nga kremtimi i k\u00ebtyre dit\u00ebve t\u00eb Purimit, dhe kujtimi i tyre nuk duhet t\u00eb zhdukej te pasardh\u00ebsit e tyre.\n9:29 Mbret\u00ebresha Ester, bij\u00eb e Abihailit, dhe Judeu Mardoke shkruan me autoritet t\u00eb plot\u00eb letr\u00ebn e tyre t\u00eb dyt\u00eb lidhur me Purimin.\n9:30 Mardokeu u d\u00ebrgoi letra t\u00ebr\u00eb Judejve n\u00eb nj\u00ebqind e nj\u00ebzet e shtat\u00eb krahina t\u00eb mbret\u00ebris\u00eb s\u00eb Asueros, me fjal\u00eb paqeje dhe t\u00eb s\u00eb v\u00ebrtet\u00ebs.\n9:31 p\u00ebr t'i vendosur ato dit\u00eb t\u00eb Purimit n\u00eb koh\u00ebn e caktuar, si\u00e7 i kishin vendosur atyre Judeu Mardoke dhe mbret\u00ebresha Ester ashtu si kishin vendosur ata vet\u00eb p\u00ebr vete dhe p\u00ebr pasardh\u00ebsit e tyre me rastin e agjerimit t\u00eb tyre dhe t\u00eb britm\u00ebs s\u00eb tyre.\n9:32 K\u00ebshtu dekreti i Esterit fiksoi caktimin e Purimit dhe u shkrua n\u00eb nj\u00eb lib\u00ebr.\n10:1 Mbreti Asuero i vuri nj\u00eb hara\u00e7 vendit dhe ishujve t\u00eb detit.\n10:2 Gjith\u00eb faktet e forc\u00ebs dhe fuqis\u00eb s\u00eb tij dhe p\u00ebrshkrimi i kujdessh\u00ebm i Mardokeut, i cili u ngrit nga mbreti, a nuk jan\u00eb vall\u00eb t\u00eb shkruara n\u00eb librin e Kronikave t\u00eb mbret\u00ebrve t\u00eb Medis\u00eb dhe t\u00eb Persis\u00eb?\n10:3 Judeu Mardoke vinte i dyti n\u00eb fakt mbas mbretit Asuero, i madh midis Judejve dhe i dashur nga moria e v\u00ebllez\u00ebrve t\u00eb tij; ai k\u00ebrkonte t\u00eb mir\u00ebn e popullit t\u00eb tij dhe kishte fjal\u00eb paqeje p\u00ebr gjith\u00eb fisin e tij.","title":"Albanian Bible: Esther","type":"page"}