{"collection":"Bible & Christianity","html_url":"https://unchartedknowledge.5gfusion.net/browse/bib/wb/alb/exo.htm","path":"bib/wb/alb/exo.htm","source_url":"https://sacred-texts.com/bib/wb/alb/exo.htm","text":"1:1 K\u00ebta jan\u00eb emrat e bijve t\u00eb Izraelit q\u00eb erdh\u00ebn n\u00eb Egjipt me Jakobin. Secili prej tyre erdhi me familjen e tij:\n1:2 Rubeni, Simeoni, Levi dhe Juda,\n1:3 Isakari, Zabuloni dhe Beniamini,\n1:4 Dani dhe Naftali, Gadi dhe Asheri.\n1:5 T\u00ebr\u00eb njer\u00ebzit q\u00eb kishin dal\u00eb nga gjaku i Jakobit arrinin shtat\u00ebdhjet\u00eb veta (Jozefi ndodhej tashm\u00eb n\u00eb Egjipt).\n1:6 Pastaj Jozefi vdiq, dhe po ashtu vdiq\u00ebn t\u00ebr\u00eb v\u00ebllez\u00ebrit e tij dhe gjith\u00eb ai brez.\n1:7 Dhe bijt\u00eb e Izraelit qen\u00eb frytdh\u00ebn\u00ebs, u shum\u00ebzuan fort dhe u b\u00ebn\u00eb t\u00eb shumt\u00eb, u b\u00ebn\u00eb jasht\u00ebzakonisht t\u00eb fort\u00eb; dhe vendi u mbush me ta.\n1:8 Por tani doli n\u00eb Egjipt nj\u00eb mbret i ri, q\u00eb nuk e kishte njohur Jozefin.\n1:9 Ai i tha popullit t\u00eb tij: \"Ja, populli i bijve t\u00eb Izraelit \u00ebsht\u00eb m\u00eb i shumt\u00eb dhe m\u00eb i fort\u00eb se ne.\n1:10 T\u00eb p\u00ebrdorim, pra, dinak\u00ebri ndaj tyre, me q\u00ebllim q\u00eb t\u00eb mos shum\u00ebzohen dhe, n\u00eb rast lufte t\u00eb mos bashkohen me armiqt\u00eb tan\u00eb dhe t\u00eb luftojn\u00eb kund\u00ebr nesh, dhe pastaj t\u00eb largohen nga vendi\".\n1:11 Vun\u00eb, pra, kryeintendent\u00eb t\u00eb punimeve mbi ta, me q\u00ebllim q\u00eb t'i shtypnin me angarit\u00eb e tyre. K\u00ebshtu ata i nd\u00ebrtuan Faraonit qytetet-depozit\u00eb Pitom dhe Raamses.\n1:12 Por sa m\u00eb tep\u00ebr i shtypnin, aq m\u00eb shum\u00eb shtoheshin dhe p\u00ebrhapeshin; prandaj Egjiptasit arrit\u00ebn t\u00eb ken\u00eb shum\u00eb frik\u00eb nga bijt\u00eb e Izraelit,\n1:13 dhe Egjiptasit i detyruan bijt\u00eb e Izraelit t'u sh\u00ebrbenin me ashp\u00ebrsi,\n1:14 dhe ua nxin\u00eb jet\u00ebn me nj\u00eb skllav\u00ebri t\u00eb vrazhd\u00eb, duke i futur n\u00eb punimin e argjil\u00ebs dhe t\u00eb tullave si dhe n\u00eb \u00e7do lloj pune n\u00eb ara. I detyronin t'i b\u00ebnin t\u00ebr\u00eb k\u00ebto pun\u00eb me ashp\u00ebrsi.\n1:15 Mbreti i Egjiptit u foli edhe mamive hebre, nga t\u00eb cilat nj\u00ebra quhej Shifrah dhe tjetra Puah, dhe u tha:\n1:16 \"Kur do t\u00eb ndihmoni grat\u00eb hebre lind\u00ebse, dhe do t'i shihni t\u00eb ulura n\u00eb ndenj\u00ebsen e lindjes, n\u00eb rast se f\u00ebmija \u00ebsht\u00eb mashkull, vriteni; po t\u00eb jet\u00eb fem\u00ebr, l\u00ebreni t\u00eb jetoj\u00eb\".\n1:17 Por mamit\u00eb pat\u00ebn frik\u00eb nga Per\u00ebndia dhe nuk b\u00ebn\u00eb ashtu si\u00e7 i kishte urdh\u00ebruar mbreti i Egjiptit, por i lan\u00eb gjall\u00eb f\u00ebmij\u00ebt meshkuj.\n1:18 At\u00ebher\u00eb mbreti i Egjiptit thirri mamit\u00eb dhe u tha: \"Pse e b\u00ebt\u00eb k\u00ebt\u00eb dhe i lat\u00eb gjall\u00eb f\u00ebmij\u00ebt meshkuj?\".\n1:19 Mamit\u00eb iu p\u00ebrgjigj\u00ebn Faraonit: \"Sepse grat\u00eb hebre nuk jan\u00eb si grat\u00eb egjiptase, por jan\u00eb t\u00eb fuqishme dhe lindin para se t'u vij\u00eb mamia pran\u00eb\".\n1:20 Dhe Per\u00ebndia u b\u00ebri t\u00eb mir\u00eb k\u00ebtyre mamive; dhe populli u shtua dhe u b\u00eb jasht\u00ebzakonisht i fort\u00eb.\n1:21 K\u00ebshtu, duke qen\u00eb se ato mami kishin frik\u00eb nga Per\u00ebndia, ky u dha familje m\u00eb vete.\n1:22 At\u00ebher\u00eb Faraoni i dha k\u00ebt\u00eb urdh\u00ebr t\u00ebr\u00eb popullit t\u00eb tij duke th\u00ebn\u00eb: \"\u00c7do mashkull q\u00eb lind, hidheni n\u00eb lum\u00eb; por lini gjall\u00eb t\u00ebr\u00eb femrat\".\n2:1 Por nj\u00eb njeri i sht\u00ebpis\u00eb s\u00eb Levit shkoi e mori p\u00ebr grua nj\u00eb bij\u00eb t\u00eb Levit.\n2:2 Dhe gruaja u ngjiz dhe lindi nj\u00eb bir; dhe, duke par\u00eb q\u00eb ishte i bukur, e mbajti fshehur tre muaj.\n2:3 Por, kur nuk mundi ta mbante m\u00eb t\u00eb fshehur, mori nj\u00eb kanist\u00ebr prej xunkthi, e leu me bitum dhe katran, vendosi n\u00eb t\u00eb f\u00ebmij\u00ebn dhe e la n\u00eb kallamisht\u00ebn n\u00eb bregun e lumit.\n2:4 Motra e f\u00ebmij\u00ebs rrinte n\u00eb nj\u00eb far\u00eb larg\u00ebsie p\u00ebr t\u00eb m\u00ebsuar se \u00e7far\u00eb do t'i ndodhte.\n2:5 Por vajza e Faraonit zbriti p\u00ebr t'u lar\u00eb n\u00eb lum\u00eb, nd\u00ebrsa sh\u00ebrb\u00ebtoret e saj sh\u00ebtisnin buz\u00eb lumit. Ajo pa kanistr\u00ebn n\u00eb kallamishte dhe d\u00ebrgoi sh\u00ebrb\u00ebtoren e saj ta marr\u00eb.\n2:6 E hapi dhe pa f\u00ebmij\u00ebn; dhe ja, i vogli po qante; asaj iu dhimbs dhe tha: \"Ky \u00ebsht\u00eb nj\u00eb f\u00ebmij\u00eb hebre\".\n2:7 At\u00ebher\u00eb motra e f\u00ebmij\u00ebs i tha bij\u00ebs s\u00eb Faraonit: \"A duhet t\u00eb shkoj t\u00eb th\u00ebrras nj\u00eb taj\u00eb nga grat\u00eb hebre q\u00eb ta m\u00ebnd\u00eb k\u00ebt\u00eb f\u00ebmij\u00eb p\u00ebr ty?\".\n2:8 E bija e Faraonit iu p\u00ebrgjegj: \"Shko\". Dhe vajza shkoi t\u00eb th\u00ebrras\u00eb n\u00ebn\u00ebn e f\u00ebmij\u00ebs.\n2:9 Dhe bija e Faraonit i tha: \"Merre me vete k\u00ebt\u00eb f\u00ebmij\u00eb, m\u00ebnde p\u00ebr mua, dhe un\u00eb do t\u00eb t\u00eb jap pag\u00ebn t\u00ebnde\". K\u00ebshtu gruaja e mori f\u00ebmij\u00ebn dhe e m\u00ebndi.\n2:10 Kur f\u00ebmija u rrit, ajo ia \u00e7oi bij\u00ebs s\u00eb Faraonit; ai u b\u00eb bir i saj dhe ajo e quajti Moisi, duke th\u00ebn\u00eb: \"Sepse un\u00eb e nxora nga uji\".\n2:11 N\u00eb ato dit\u00eb, kur Moisiu ishte rritur, ndodhi q\u00eb ai doli p\u00ebr t\u00eb gjetur v\u00ebllez\u00ebrit e tij dhe vuri re se b\u00ebnin pun\u00eb t\u00eb r\u00ebnda; dhe pa nj\u00eb Egjiptas q\u00eb po rrihte nj\u00eb burr\u00eb hebre, nj\u00eb nga v\u00ebllez\u00ebrit e tij.\n2:12 Dhe v\u00ebshtroi andej e k\u00ebtej dhe, duke par\u00eb se nuk kishte njeri, e vrau Egjiptasin dhe e fshehu pastaj n\u00ebn r\u00ebr\u00eb.\n2:13 Dit\u00ebn e nes\u00ebrme doli dhe pa dy burra hebrenj q\u00eb po grindeshin; ai i tha atij q\u00eb kishte faj: \"Pse e rreh shokun t\u00ebnd?\".\n2:14 Por ai iu p\u00ebrgjigj: \"Kush t\u00eb ka v\u00ebn\u00eb prij\u00ebs dhe gjykat\u00ebs mbi ne? Mos do t\u00eb m\u00eb vras\u00ebsh si\u00e7 vrave Egjiptasin?\". At\u00ebher\u00eb Moisiu u tremb, dhe tha: \"Me siguri kjo gj\u00eb dihet nga t\u00eb gjith\u00eb\".\n2:15 Kur Faraoni d\u00ebgjoi t\u00eb flitej p\u00ebr ngjarjen, k\u00ebrkoi t\u00eb vras\u00eb Moisiun; por Moisiu iku nga prania e Faraonit dhe u vendos n\u00eb vendin e Madianit; dhe u ul af\u00ebr nj\u00eb pusi.\n2:16 Por prifti i Madianit kishte shtat\u00eb bija; dhe ato erdh\u00ebn p\u00ebr t\u00eb mbushur uj\u00eb dhe p\u00ebr t\u00eb mbushur koritat p\u00ebr t'i dh\u00ebn\u00eb t\u00eb pij\u00eb kopes\u00eb s\u00eb atit t\u00eb tyre.\n2:17 Por erdh\u00ebn disa barinj dhe i p\u00ebrzun\u00eb. At\u00ebher\u00eb Moisiu u ngrit dhe u erdhi n\u00eb ndihm\u00eb, duke i dh\u00ebn\u00eb t\u00eb pij\u00eb kopes\u00eb s\u00eb tyre.\n2:18 Kur shkuan te Reueli, ati i tyre, ai u tha: \"Vall\u00eb si u kthyet kaq shpejt sot?\".\n2:19 Ato u p\u00ebrgjigj\u00ebn: \"Nj\u00eb Egjiptas na liroi nga duart e barinjve; p\u00ebrve\u00e7 k\u00ebsaj mbushi uj\u00eb p\u00ebr ne dhe i dha t\u00eb pij\u00eb kopes\u00eb\".\n2:20 At\u00ebher\u00eb ai u tha bijave t\u00eb tij: \"Po ai ku \u00ebsht\u00eb? Pse e lat\u00eb k\u00ebt\u00eb njeri? Thirreni, t\u00eb vij\u00eb t\u00eb haj\u00eb\".\n2:21 Dhe Moisiu pranoi t\u00eb banoj\u00eb tek ai njeri; dhe ai i dha Moisiut p\u00ebr grua bij\u00ebn e tij, Sefor\u00ebn.\n2:22 Pastaj ajo lindi nj\u00eb bir q\u00eb ai e quajti Gershom, sepse tha: \"Un\u00eb jam mik n\u00eb dhe t\u00eb huaj\".\n2:23 Por ndodhi q\u00eb, mbas nj\u00eb kohe t\u00eb gjat\u00eb vdiq mbreti i Egjiptit, dhe bijt\u00eb e Izraelit r\u00ebnkonin p\u00ebr shkak t\u00eb skllav\u00ebris\u00eb; ata b\u00ebrtit\u00ebn dhe britma e tyre p\u00ebr shkak t\u00eb skllav\u00ebris\u00eb u ngjit deri tek Per\u00ebndia.\n2:24 K\u00ebshtu Per\u00ebndia d\u00ebgjoi r\u00ebnkimin e tyre, dhe Per\u00ebndis\u00eb iu kujtua bes\u00eblidhja q\u00eb kishte p\u00ebrfunduar me Abrahamin, me Isakun dhe me Jakobin.\n2:25 Dhe Per\u00ebndia shikoi bijt\u00eb e Izraelit, dhe Per\u00ebndia u kujdes p\u00ebr ta.\n3:1 Nd\u00ebrkaq Moisiu po kulloste kopen\u00eb e Jethros, vjehrrit t\u00eb tij dhe prift i Madianit; ai e \u00e7oi kopen\u00eb matan\u00eb shkret\u00ebtir\u00ebs dhe arriti n\u00eb malin e Per\u00ebndis\u00eb, n\u00eb Horeb.\n3:2 Dhe Engj\u00eblli i Zotit iu shfaq n\u00eb nj\u00eb flak\u00eb zjarri, n\u00eb mes t\u00eb nj\u00eb ferrishtjeje. Moisiu v\u00ebshtroi dhe ja q\u00eb ferrishtja po digjej nga zjarri, por nuk konsumohej.\n3:3 At\u00ebher\u00eb Moisiu tha: \"Tani do t\u00eb zhvendosem p\u00ebr t\u00eb par\u00eb k\u00ebt\u00eb shfaqje madh\u00ebshtore: pse ferrishtja nuk po konsumohet!\".\n3:4 Zoti vuri re q\u00eb ai ishte zhvendosur p\u00ebr t\u00eb par\u00eb, dhe Per\u00ebndia e thirri nga mesi i ferrishtes dhe i tha: \"Moisi, Moisi!\". Ai u p\u00ebrgjigj: \"Ja ku jam\".\n3:5 Per\u00ebndia tha: \"Mos u afro k\u00ebtu: hiq sandalet nga k\u00ebmb\u00ebt, sepse vendi n\u00eb t\u00eb cilin ndodhesh \u00ebsht\u00eb vend i shenjt\u00eb\".\n3:6 Pastaj tha dhe k\u00ebto fjal\u00eb: \"Un\u00eb jam Per\u00ebndia i atit t\u00ebnd, Per\u00ebndia i Abrahamit, Per\u00ebndia i Isakut dhe Per\u00ebndia i Jakobit\". Dhe Moisiu fshehu fytyr\u00ebn e tij, sepse kishte frik\u00eb t\u00eb shikonte Per\u00ebndin\u00eb.\n3:7 Pastaj Zoti tha: \"Sigurisht q\u00eb e kam par\u00eb pik\u00ebllimin e popullit tim q\u00eb ndodhet n\u00eb Egjipt dhe e kam d\u00ebgjuar britm\u00ebn e tij p\u00ebr shkak t\u00eb shtyp\u00ebsve t\u00eb tij, sepse i njoh vuajtjet e tij.\n3:8 K\u00ebshtu zbrita p\u00ebr ta \u00e7liruar nga dora e Egjiptasve dhe p\u00ebr ta \u00e7uar nga ky vend n\u00eb nj\u00eb vend t\u00eb mir\u00eb dhe t\u00eb hapur, n\u00eb nj\u00eb vend ku rrjedh qum\u00ebshti dhe mjalti, n\u00eb vendin ku ndodhen Kananejt\u00eb, Hitejt\u00eb, Amorejt\u00eb, Perezejt\u00eb, Hivejt\u00eb dhe Jebusejt\u00eb.\n3:9 Dhe tani, ja britma e bijve t\u00eb Izraelit ka arritur deri tek un\u00eb, dhe kam par\u00eb gjithashtu se si Egjiptasit i shtypin.\n3:10 Prandaj eja dhe un\u00eb do t\u00eb t\u00eb d\u00ebrgoj te Faraoni me q\u00ebllim q\u00eb ta nxjerr\u00ebsh popullin tim, bijt\u00eb e Izraelit, nga Egjipti\".\n3:11 Por Moisiu i tha Per\u00ebndis\u00eb: \"Kush jam un\u00eb q\u00eb t\u00eb shkoj te Faraoni dhe t'i nxjerr bijt\u00eb e Izraelit nga Egjipti?\".\n3:12 Per\u00ebndia tha: \"Un\u00eb do t\u00eb jem me ty, dhe kjo do t\u00eb jet\u00eb p\u00ebr ty shenja q\u00eb t\u00eb kam d\u00ebrguar un\u00eb: Kur ta kesh nxjerr\u00eb popullin nga Egjipti, ju do t'i sh\u00ebrbeni Per\u00ebndis\u00eb mbi k\u00ebt\u00eb mal\".\n3:13 At\u00ebher\u00eb Moisiu i tha Per\u00ebndis\u00eb: \"Ja, kur t\u00eb shkoj te bijt\u00eb e Izraelit dhe t'u them: \"Per\u00ebndia i et\u00ebrve tuaj m\u00eb ka d\u00ebrguar te ju\", po t\u00eb jet\u00eb se ata m\u00eb thon\u00eb: \"Cili \u00ebsht\u00eb emri i tij?\", \u00e7'p\u00ebrgjigje duhet t'u jap?\".\n3:14 Per\u00ebndia i tha Moisiut: \"UN\u00c9 JAM AI Q\u00c9 JAM\". Pastaj tha: \"Do t'u thuash k\u00ebshtu bijve t\u00eb Izraelit: \"UN\u00c9 JAM-i m\u00eb ka d\u00ebrguar tek ju\"\".\n3:15 Per\u00ebndia i tha akoma Moisiut: \"Do t'u thuash k\u00ebshtu bijve t\u00eb Izraelit: \"Zoti, Per\u00ebndia i et\u00ebrve tuaj, Per\u00ebndia i Abrahamit, Per\u00ebndia i Isakut dhe Per\u00ebndia i Jakobit m\u00eb ka d\u00ebrguar tek ju. Ky \u00ebsht\u00eb emri im p\u00ebrjet\u00eb. Ky ka p\u00ebr t\u00eb qen\u00eb gjithnj\u00eb emri im me t\u00eb cilin do t\u00eb kujtohem nga t\u00eb gjitha breznit\u00eb\".\n3:16 Shko dhe mblidh pleqt\u00eb e Izraelit dhe u thuaj atyre: \"Zoti, Per\u00ebndia i et\u00ebrve tuaj, Per\u00ebndia i Abrahamit, i Isakut dhe i Jakobit m'u shfaq, duke th\u00ebn\u00eb: Un\u00eb patjet\u00ebr ju kam vizituar dhe kam par\u00eb at\u00eb q\u00eb ju b\u00ebjn\u00eb n\u00eb Egjipt;\n3:17 dhe kam th\u00ebn\u00eb: Nga shtypja e Egjiptit do t'ju \u00e7oj n\u00eb vendin e Kananejve, t\u00eb Hitejve, t\u00eb Amorejve, t\u00eb Perezejve, t\u00eb Hivejve dhe t\u00eb Jebusejve, n\u00eb nj\u00eb vend ku rrjedh qum\u00ebsht dhe mjalt\u00eb\".\n3:18 Dhe ata do t'i binden z\u00ebrit t\u00ebnd; dhe ti dhe pleqt\u00eb e Izraelit do t\u00eb shkoni te mbreti i Egjiptit dhe do t'i thoni: \"Zoti, Per\u00ebndia i Hebrenjve na doli p\u00ebrpara; dhe tani na l\u00ebr t\u00eb shkojm\u00eb dhe t\u00eb b\u00ebjm\u00eb tri dit\u00eb rrug\u00eb n\u00eb shkret\u00ebtir\u00eb, q\u00eb t'i b\u00ebjm\u00eb fli Zotit, Per\u00ebndis\u00eb ton\u00eb\".\n3:19 Por un\u00eb e di q\u00eb mbreti i Egjiptit nuk do t'ju lejoj\u00eb t\u00eb shkoni, ve\u00e7 po t\u00eb jet\u00eb i shtr\u00ebnguar nga nj\u00eb dor\u00eb e fuqishme.\n3:20 At\u00ebher\u00eb un\u00eb do t\u00eb shtrij dor\u00ebn time dhe do t\u00eb godas Egjiptin me t\u00eb gjitha mrekullit\u00eb q\u00eb un\u00eb do t\u00eb b\u00ebj n\u00eb mes tyre; pas k\u00ebsaj ai do t'ju l\u00ebr\u00eb t\u00eb ikni.\n3:21 Dhe do t'i jap k\u00ebtij populli t\u00eb mira para syve t\u00eb Egjiptasve; dhe do t\u00eb ndodh\u00eb q\u00eb kur t\u00eb niseni, nuk do t\u00eb shkoni duarbosh;\n3:22 por \u00e7do grua do t'i k\u00ebrkoj\u00eb fqinj\u00ebs s\u00eb saj dhe gruas q\u00eb banon n\u00eb sht\u00ebpin\u00eb e saj sende argjendi, sende ari dhe rroba; dhe ju do t'ua vini n\u00eb shtat bijve dhe bijave tuaja; k\u00ebshtu do t'i zhvishni Egjiptasit\".\n4:1 Moisiu u p\u00ebrgjigj dhe tha: \"Por ja, ata nuk do t\u00eb m\u00eb besojn\u00eb as do t'i binden z\u00ebrit tim, sepse do t\u00eb thon\u00eb: \"Zoti nuk t\u00eb \u00ebsht\u00eb shfaqur\"\".\n4:2 At\u00ebher\u00eb Zoti i tha: \"\u00c7'\u00ebsht\u00eb ajo q\u00eb ke n\u00eb dor\u00eb?\". Ai u p\u00ebrgjegj: \"Nj\u00eb bastun\".\n4:3 Zoti tha: \"Hidhe p\u00ebr tok\u00eb\". Ai e hodhi p\u00ebr tok\u00eb, dhe ai u b\u00eb nj\u00eb gjarp\u00ebr, para t\u00eb cilit Moisiu iku me vrap.\n4:4 At\u00ebher\u00eb Zoti i tha Moisiut: \"Zgjate dor\u00ebn dhe kape nga bishti\". (Ai zgjati dor\u00ebn dhe e mori, dhe n\u00eb dor\u00ebn e tij ai u b\u00eb nj\u00eb bastun).\n4:5 \"K\u00ebt\u00eb ke p\u00ebr t\u00eb b\u00ebr\u00eb\", tha Zoti, \"me q\u00ebllim q\u00eb t\u00eb besojn\u00eb se Zoti, Per\u00ebndia i et\u00ebrve t\u00eb tyre, Per\u00ebndia i Abrahamit, Per\u00ebndia i Isakut dhe Per\u00ebndia i Jakobit t\u00eb \u00ebsht\u00eb shfaqur\".\n4:6 Zoti i tha akoma: \"Tani v\u00ebr dor\u00ebn n\u00eb gjirin t\u00ebnd\". Dhe ai vuri dor\u00ebn e tij n\u00eb gji dhe pastaj e t\u00ebrhoqi, dhe ja, dora ishte lebrosur, e bardh\u00eb si bora.\n4:7 Zoti i tha akoma: \"V\u00ebre p\u00ebrs\u00ebri dor\u00ebn n\u00eb gjirin t\u00ebnd\". Ai e vuri p\u00ebrs\u00ebri dor\u00ebn e tij n\u00eb gji dhe pastaj e t\u00ebrhoqi nga gjiri, dhe ja, ajo ishte b\u00ebr\u00eb nj\u00eblloj si mishi i tij.\n4:8 \"Tani ka p\u00ebr t\u00eb ndodhur q\u00eb, po t\u00eb jet\u00eb se nuk t\u00eb besojn\u00eb dhe nuk e d\u00ebgjojn\u00eb z\u00ebrin e shenj\u00ebs s\u00eb par\u00eb, do t\u00eb besojn\u00eb z\u00ebrin e shenj\u00ebs s\u00eb dyt\u00eb.\n4:9 Por, n\u00eb rast se ata nuk do t'u besojn\u00eb as k\u00ebtyre dy shenjave dhe nuk do t'i binden z\u00ebrit t\u00ebnd, ti at\u00ebhere merr uj\u00eb nga lumi dhe derdhe mbi tok\u00eb t\u00eb that\u00eb; dhe uji q\u00eb do t\u00eb kesh marr\u00eb nga lumi do t\u00eb b\u00ebhet gjak mbi tok\u00ebn e that\u00eb\".\n4:10 At\u00ebher\u00eb Moisiu i tha Zotit: \"Mjerisht, o Zot, un\u00eb nuk jam njeri i goj\u00ebs; nuk isha i till\u00eb n\u00eb t\u00eb kaluar\u00ebn dhe nuk jam i till\u00eb q\u00eb kur i ke folur sh\u00ebrb\u00ebtorit t\u00ebnd, sepse jam i ngath\u00ebt n\u00eb fjal\u00eb dhe kuvend\".\n4:11 Zoti i tha: \"Kush e ka b\u00ebr\u00eb goj\u00ebn e njeriut, ose kush e b\u00ebn njeriun t\u00eb pagoj\u00eb, t\u00eb shurdh\u00ebr, me sy ose t\u00eb verb\u00ebr? A nuk jam un\u00eb vall\u00eb, Zoti?\n4:12 Dhe tani shko, un\u00eb do t\u00eb jem me goj\u00ebn t\u00ebnde dhe do t\u00eb t\u00eb m\u00ebsoj at\u00eb q\u00eb duhet t\u00eb thuash\".\n4:13 Por Moisiu tha: \"Oh! Zot, d\u00ebrgo mesazhin t\u00ebnd n\u00ebp\u00ebrmjet kujt t\u00eb duash!\".\n4:14 At\u00ebher\u00eb zem\u00ebrimi i Zotit u ndez kund\u00ebr Moisiut, dhe i tha: \"A nuk \u00ebsht\u00eb ndofta Aaroni v\u00ebllai yt, Leviti? Un\u00eb e di q\u00eb ai flet bukur. Ja tani, ai po del t\u00eb t\u00eb takoj\u00eb; sa t\u00eb t\u00eb shoh\u00eb do t\u00eb ndjej\u00eb g\u00ebzim n\u00eb zem\u00ebr t\u00eb vet.\n4:15 Ti do t'i flas\u00ebsh dhe do t'i v\u00ebsh fjal\u00ebt n\u00eb goj\u00ebn e tij, dhe un\u00eb do t\u00eb jem me goj\u00ebn t\u00ebnde dhe me goj\u00ebn e tij dhe do t'ju m\u00ebsoj at\u00eb q\u00eb duhet t\u00eb b\u00ebni.\n4:16 Ai do t\u00eb jet\u00eb z\u00ebdh\u00ebn\u00ebsi yt n\u00eb popull; k\u00ebshtu ai p\u00ebr ty do t\u00eb jet\u00eb goja dhe ti p\u00ebr t\u00eb do t\u00eb jesh si Per\u00ebndia.\n4:17 Tani merr n\u00eb dor\u00eb k\u00ebt\u00eb bastun me t\u00eb cilin ke p\u00ebr t\u00eb b\u00ebr\u00eb mrekullit\u00eb\".\n4:18 At\u00ebher\u00eb Moisiu iku, u kthye te Jethro, vjehrri i tij, dhe i tha: \"Oh, l\u00ebrm\u00eb t\u00eb shkoj dhe t\u00eb kthehem te v\u00ebllez\u00ebrit e mi q\u00eb jan\u00eb n\u00eb Egjipt, p\u00ebr t\u00eb par\u00eb n\u00eb se ende jan\u00eb gjall\u00eb\". Dhe Jethro i tha Moisiut: \"Shko n\u00eb paqe\".\n4:19 Zoti i tha Moisiut n\u00eb Madian: \"Shko, kthehu n\u00eb Egjipt sepse t\u00eb gjith\u00eb ata q\u00eb k\u00ebrkonin jet\u00ebn t\u00ebnde kan\u00eb vdekur\".\n4:20 K\u00ebshtu Moisiu mori t\u00eb shoqen dhe bijt\u00eb e tij, i hipi mbi gomar dhe u kthye n\u00eb vendin e Egjiptit. Dhe Moisiu mori n\u00eb dor\u00eb bastunin e Per\u00ebndis\u00eb.\n4:21 Zoti i tha pastaj Moisiut: \"Kur t\u00eb jesh kthyer n\u00eb Egjipt, do t\u00eb kujdesesh t\u00eb b\u00ebsh para Faraonit t\u00ebr\u00eb mrekullit\u00eb q\u00eb t\u00eb kam dh\u00ebn\u00eb pushtet t\u00eb kryesh; por un\u00eb do ta ngurt\u00ebsoj zemr\u00ebn e tij dhe ai nuk do ta l\u00ebr\u00eb popullin t\u00eb shkoj\u00eb.\n4:22 Dhe ti do t'i thuash Faraonit: \"K\u00ebshtu thot\u00eb Zoti: Izraeli \u00ebsht\u00eb biri im, i par\u00eblinduri im\".\n4:23 Prandaj un\u00eb t\u00eb them: L\u00ebre birin tim t\u00eb shkoj\u00eb, q\u00eb t\u00eb m\u00eb sh\u00ebrbej\u00eb; por n\u00eb qoft\u00eb se ti nuk e l\u00eb t\u00eb shkoj\u00eb, ja, un\u00eb do t\u00eb vras birin t\u00ebnd, t\u00eb par\u00eblindurin t\u00ebnd\".\n4:24 Por gjat\u00eb udh\u00ebtimit, n\u00eb vendin ku kishin fushuar, Zoti shkoi t\u00eb takoj\u00eb Moisiun dhe u p\u00ebrpoq ta b\u00ebnte t\u00eb vdiste.\n4:25 At\u00ebher\u00eb Sefora mori nj\u00eb strall t\u00eb mpreht\u00eb dhe preu prepucin e birit t\u00eb saj dhe e hodhi n\u00eb k\u00ebmb\u00ebt e Moisiut, duke th\u00ebn\u00eb: \"Ti p\u00ebr mua je nj\u00eb dh\u00ebnd\u00ebr n\u00eb gjak!\".\n4:26 K\u00ebshtu Zoti e la. At\u00ebher\u00eb ajo tha: \"Ti je nj\u00eb dh\u00ebnd\u00ebr gjakatar\", p\u00ebr shkak t\u00eb rrethprerjes.\n4:27 Zoti i tha Aaronit: \"Shko n\u00eb shkret\u00ebtir\u00eb t\u00eb takosh Moisiun\". Dhe ai shkoi, e takoi at\u00eb n\u00eb malin e Per\u00ebndis\u00eb dhe e puthi.\n4:28 Dhe Moisiu i tregoi Aaronit t\u00ebr\u00eb fjal\u00ebt q\u00eb Zoti e kishte porositur t\u00eb thoshte, dhe t\u00ebr\u00eb shenjat e mahnitshme q\u00eb i kishte urdh\u00ebruar t\u00eb b\u00ebnte.\n4:29 At\u00ebher\u00eb Moisiu dhe Aaroni shkuan dhe mblodh\u00ebn t\u00ebr\u00eb pleqt\u00eb e bijve t\u00eb Izraelit.\n4:30 Dhe Aaroni tregoi t\u00ebr\u00eb fjal\u00ebt q\u00eb Zoti i kishte th\u00ebn\u00eb Moisiut, dhe b\u00ebri mrekullit\u00eb n\u00eb sy t\u00eb popullit.\n4:31 K\u00ebshtu populli i besoi. Ata kuptuan q\u00eb Zoti kishte vizituar bijt\u00eb e Izraelit dhe kishte par\u00eb d\u00ebshp\u00ebrimin e tyre; dhe u p\u00ebrkul\u00ebn dhe e adhuruan.\n5:1 Pas k\u00ebsaj, Moisiu dhe Aaroni shkuan te Faraoni dhe i than\u00eb: \"K\u00ebshtu thot\u00eb Zoti, Per\u00ebndia i Izraelit: \"L\u00ebre popullin tim t\u00eb shkoj\u00eb, me q\u00ebllim q\u00eb t\u00eb kremtoj\u00eb p\u00ebr mua nj\u00eb fest\u00eb n\u00eb shkret\u00ebtir\u00eb\"\".\n5:2 Por Faraoni u p\u00ebrgjigj: \"Kush \u00ebsht\u00eb Zoti q\u00eb un\u00eb duhet t'i bindem z\u00ebrit t\u00eb tij dhe ta l\u00eb Izraelin t\u00eb shkoj\u00eb? Un\u00eb nuk e njoh Zotin dhe nuk kam p\u00ebr ta l\u00ebn\u00eb Izraelin t\u00eb shkoj\u00eb\".\n5:3 At\u00ebher\u00eb ata i than\u00eb: \"Per\u00ebndia i Hebrenjve na doli p\u00ebrball\u00eb; tani na l\u00ebr t\u00eb ecim tri dit\u00eb me radh\u00eb n\u00eb shkret\u00ebtir\u00eb q\u00eb t\u00eb b\u00ebjm\u00eb nj\u00eb flijim p\u00ebr Zotin, q\u00eb \u00ebsht\u00eb Per\u00ebndia yn\u00eb, q\u00eb ai t\u00eb mos na godas\u00eb me murtaj\u00eb ose me shpat\u00eb\".\n5:4 Mbreti i Egjiptit u tha atyre: \"Pse vall\u00eb Moisiu dhe Aaroni e largojn\u00eb popullin nga puna e tij? Kthehuni n\u00eb mundimet tuaja!\".\n5:5 Faraoni tha p\u00ebrs\u00ebri: \"Ja, tani populli i vendit \u00ebsht\u00eb i shumt\u00eb, dhe ju doni q\u00eb ai t\u00eb nd\u00ebrpres\u00eb mundimet e tij\".\n5:6 K\u00ebshtu po at\u00eb dit\u00eb Faraoni i urdh\u00ebroi shtyp\u00ebsit e popullit dhe kryeintendent\u00ebt e tij, duke th\u00ebn\u00eb:\n5:7 \"Mos i jepni m\u00eb kasht\u00eb popullit p\u00ebr t\u00eb b\u00ebr\u00eb tulla, si m\u00eb par\u00eb; le t\u00eb shkojn\u00eb ata vet\u00eb t\u00eb mbledhin kasht\u00ebn!\n5:8 Por i detyroni t\u00eb prodhojn\u00eb t\u00eb nj\u00ebjt\u00ebn sasi tullash q\u00eb b\u00ebnin m\u00eb par\u00eb, pa asnj\u00eb pak\u00ebsim; sepse ata jan\u00eb p\u00ebrtac\u00eb, dhe p\u00ebr k\u00ebt\u00eb arsye ata b\u00ebrtasin, duke th\u00ebn\u00eb: \"T\u00eb shkojm\u00eb t\u00eb b\u00ebjm\u00eb fli p\u00ebr Per\u00ebndin\u00eb ton\u00eb!\".\n5:9 I mbingarkoni me pun\u00eb t\u00eb r\u00ebnd\u00eb k\u00ebta njer\u00ebz, dhe ata ta kryejn\u00eb pa u v\u00ebn\u00eb veshin fjal\u00ebve mashtruese\".\n5:10 At\u00ebher\u00eb shtyp\u00ebsit e popullit dhe kryeintendent\u00ebt e tij dol\u00ebn dhe i than\u00eb popullit: \"K\u00ebshtu thot\u00eb Faraoni: \"Un\u00eb nuk do t'ju jap m\u00eb kasht\u00eb.\n5:11 Shkoni vet\u00eb ta gjeni kasht\u00ebn ku mund t\u00eb jet\u00eb, sepse puna juaj nuk do t\u00eb pak\u00ebsohet aspak\"\".\n5:12 K\u00ebshtu populli u shp\u00ebrnda n\u00eb t\u00eb gjith\u00eb vendin e Egjiptit, p\u00ebr t\u00eb mbledhur kallamishte n\u00eb vend t\u00eb kasht\u00ebs.\n5:13 Dhe kontrollor\u00ebt i nxisnin duke th\u00ebn\u00eb: \"P\u00ebrfundoni pun\u00ebn tuaj \u00e7do dit\u00eb si n\u00eb koh\u00ebn kur kishte kasht\u00eb!\".\n5:14 Dhe kryepun\u00ebtor\u00ebt e skuadrave t\u00eb bijve t\u00eb Izraelit, t\u00eb caktuar mbi ta nga kontrollor\u00ebt e Faraonit, i rrah\u00ebn dhe i pyet\u00ebn: \"Pse nuk e keni p\u00ebrfunduar, dje dhe sot si m\u00eb par\u00eb, sasin\u00eb e caktuar t\u00eb tullave?\".\n5:15 At\u00ebher\u00eb kryepun\u00ebtor\u00ebt e skuadrave t\u00eb bijve t\u00eb Izraelit erdh\u00ebn p\u00ebr t\u00eb protestuar te Faraoni, duke th\u00ebn\u00eb: \"Pse sillesh k\u00ebshtu me sh\u00ebrb\u00ebtor\u00ebt e tu?\n5:16 Nuk u jepet m\u00eb kasht\u00eb sh\u00ebrb\u00ebtor\u00ebve t\u00eb tu, dhe na thuhet: \"B\u00ebni tulla!\". Dhe ja, sh\u00ebrb\u00ebtor\u00ebt e tu i rrahin, por faji \u00ebsht\u00eb i popullit t\u00ebnd\".\n5:17 At\u00ebher\u00eb ai u p\u00ebrgjigj: \"Jeni p\u00ebrtac\u00eb, shum\u00eb p\u00ebrtac\u00eb! P\u00ebr k\u00ebt\u00eb arsye thoni: \"T\u00eb b\u00ebjm\u00eb fli p\u00ebr Zotin\".\n5:18 Shkoni, pra, t\u00eb punoni! Nuk do t'ju jepet kasht\u00eb, por do t\u00eb dor\u00ebzoni po at\u00eb sasi tullash\".\n5:19 Kryepun\u00ebtor\u00ebt e skuadrave t\u00eb bijve t\u00eb Izraelit u bind\u00ebn se i gjeti halli, sepse u thuhej: \"Mos e pak\u00ebsoni n\u00eb asnj\u00eb m\u00ebnyr\u00eb numrin e caktuar t\u00eb tullave p\u00ebr \u00e7do dit\u00eb\".\n5:20 Pastaj, si dol\u00ebn nga Faraoni, takuan Moisiun dhe Aaronin, q\u00eb po i prisnin,\n5:21 dhe u than\u00eb atyre: \"Le t'i hedh\u00eb syt\u00eb Zoti mbi ju dhe le t\u00eb gjykoj\u00eb, sepse na keni b\u00ebr\u00eb t\u00eb urryer n\u00eb syt\u00eb e Faraonit dhe n\u00eb syt\u00eb e sh\u00ebrb\u00ebtor\u00ebve t\u00eb tij duke v\u00ebn\u00eb n\u00eb duart e tyre shpat\u00ebn p\u00ebr t\u00eb na vrar\u00eb\".\n5:22 At\u00ebher\u00eb Moisiu u kthye te Zoti dhe i tha: \"O Per\u00ebndi, pse e fute n\u00eb halle k\u00ebt\u00eb popull? Pse pra m\u00eb d\u00ebrgove?\n5:23 Sepse, qysh prej dit\u00ebs q\u00eb vajta te Faraoni, p\u00ebr t'i folur n\u00eb emrin t\u00ebnd, ai i ka b\u00ebr\u00eb t\u00eb keqe k\u00ebtij populli dhe ti nuk e \u00e7lirove aspak popullin t\u00ebnd\".\n6:1 Zoti i tha Moisiut: \"Tani ke p\u00ebr t\u00eb par\u00eb \u00e7far\u00eb kam p\u00ebr t'i b\u00ebr\u00eb Faraonit; sepse i detyruar nga nj\u00eb dor\u00eb e fuqishme ai do t'i l\u00ebr\u00eb t\u00eb shkojn\u00eb; po, i detyruar nga nj\u00eb dor\u00eb e fuqishme do t'i d\u00ebboj\u00eb nga vendi i tij\".\n6:2 Pastaj Zoti i foli Moisiut dhe i tha: \"Un\u00eb jam Zoti,\n6:3 dhe i jam shfaqur Abrahamit, Isakut dhe Jakobit, si Per\u00ebndi i plotfuqish\u00ebm; por ata nuk m\u00eb kishin njohur kurr\u00eb me emrin tim, Zot.\n6:4 Kam caktuar gjithashtu bes\u00eblidhjen time me ta, duke u premtuar se do t'u jap vendin e Kanaanit, vendin ku q\u00ebndruan si t\u00eb huaj.\n6:5 D\u00ebgjova edhe kuj\u00ebn e bijve t\u00eb Izraelit q\u00eb Egjiptasit i mbajn\u00eb n\u00eb skllav\u00ebri dhe m'u kujtua bes\u00eblidhja ime.\n6:6 Prandaj u thuaj bijve t\u00eb Izraelit: \"Un\u00eb jam Zoti; do t'ju heq nga pun\u00ebt e r\u00ebnda q\u00eb ju kan\u00eb imponuar Egjiptasit, do t'ju \u00e7liroj nga skllav\u00ebrimi i tyre dhe do t'ju \u00e7liroj me krah t\u00eb shtrir\u00eb dhe nd\u00ebshkime t\u00eb m\u00ebdha.\n6:7 Do t'ju marr si popullin tim, dhe do t\u00eb jem Per\u00ebndia juaj; dhe ju do t\u00eb m\u00ebsoni q\u00eb un\u00eb jam Zoti, Per\u00ebndia juaj, q\u00eb ju heq nga pun\u00ebt e r\u00ebnda t\u00eb imponuara nga Egjiptasit.\n6:8 Dhe do t'ju b\u00ebj t\u00eb hyni n\u00eb vendin, q\u00eb u betova t'i jap Abrahamit, Isakut dhe Jakobit; dhe do t'jua jap at\u00eb n\u00eb trash\u00ebgimi. Un\u00eb jam Zoti\"\".\n6:9 K\u00ebshtu u foli Moisiu bijve t\u00eb Izraelit; por ata nuk ia vun\u00eb veshin Moisiut, nga shkaku i ankthit dhe i skllav\u00ebrise s\u00eb r\u00ebnd\u00eb.\n6:10 Zoti i foli edhe m\u00eb Moisiut, duke i th\u00ebn\u00eb:\n6:11 \"Shko, foli Faraonit, mbretit t\u00eb Egjiptit, q\u00eb t\u00eb lejoj\u00eb bijt\u00eb e Izraelit t\u00eb dalin nga vendi i tij\".\n6:12 Por Moisiu foli p\u00ebrpara Zotit dhe i tha: \"Ja, bijt\u00eb e Izraelit nuk m\u00eb d\u00ebgjuan; si mundet Faraoni t\u00eb m\u00eb d\u00ebgjoj\u00eb mua, q\u00eb jam i parrethprer\u00eb n\u00eb buz\u00eb?\".\n6:13 Por Zoti i foli Moisiut dhe Aaronit dhe i urdh\u00ebroi t\u00eb shkonin te bijt\u00eb e Izraelit dhe te Faraoni mbret i Egjiptit, me q\u00ebllim q\u00eb t'i nxirrnin bijt\u00eb e Izraelit nga vendi i Egjiptit.\n6:14 K\u00ebta jan\u00eb kryetar\u00ebt e familjeve t\u00eb tyre. Bijt\u00eb e Rubenit, t\u00eb par\u00eblindurit t\u00eb Izraelit qen\u00eb: Hanoku dhe Pallu, Hetsroni dhe Karmi. K\u00ebto qen\u00eb familjet e Rubenit.\n6:15 Bijt\u00eb e Simeonit qen\u00eb: Jemueli, Jamini, Ohadi, Jakini, Tsohari dhe Sauli, bir i Kananeases. K\u00ebto qen\u00eb familjet e Simeonit.\n6:16 K\u00ebta jan\u00eb emrat e bijve t\u00eb Levit, sipas brezave t\u00eb tyre: Gershomi, Kehathi dhe Merari. Levi jetoi nj\u00ebqind e tridhjet\u00eb e shtat\u00eb vjet.\n6:17 Bijt\u00eb e Gershomit qen\u00eb: Libni dhe Shimej, bashk\u00eb me familjet e tyre.\n6:18 Bijt\u00eb e Kehathit qen\u00eb: Amrami, Jitshari, Hebroni dhe Ucieli. Kehathi jetoi nj\u00ebqind e tridhjet\u00eb e tre vjet.\n6:19 Bijt\u00eb e Merarit qen\u00eb: Mahli dhe Mushi. K\u00ebto qen\u00eb edhe familjet e Levit\u00ebve sipas brezave t\u00eb tyre.\n6:20 Amrami mori p\u00ebr grua Jokebed\u00ebn, motr\u00ebn e atit t\u00eb tij; dhe ajo i lindi Aaronin dhe Moisiun. Amrami jetoi nj\u00ebqind e tridhjet\u00eb e shtat\u00eb vjet.\n6:21 Bijt\u00eb e Itsharit qen\u00eb: Koreu, Nefegu dhe Zikri.\n6:22 Bijt\u00eb e Ucielit qen\u00eb: Mishaeli, Eltsafani dhe Sitri.\n6:23 Aaroni mori p\u00ebr grua Elisheb\u00ebn, t\u00eb bij\u00ebn e Aminadabit dhe mot\u00ebr e Nahashonit; dhe ajo i lindi Nadabin, Abihun, Eleazarin dhe Ithamarin.\n6:24 Bijt\u00eb e Koreut qen\u00eb: Asiri, Elkanahu dhe Abiasafi. K\u00ebto qen\u00eb familjet e Koreut.\n6:25 Eleazari, bir i Aaronit, mori p\u00ebr grua nj\u00eb nga bijat e Putielit; dhe ajo i lindi Fineasin. K\u00ebta qen\u00eb t\u00eb par\u00ebt e et\u00ebrve t\u00eb Levit\u00ebve n\u00eb familjet e tyre.\n6:26 Dhe k\u00ebta jan\u00eb vet Aaroni dhe Moisiu, t\u00eb cil\u00ebve Zoti u tha: \"Nxirrini bijt\u00eb e Izraelit nga vendi i Egjiptit, sipas rendit t\u00eb tyre\".\n6:27 K\u00ebta jan\u00eb ata q\u00eb i fol\u00ebn Faraonit mbretit t\u00eb Egjiptit p\u00ebr t\u00eb nxjerr\u00eb bijt\u00eb e Izraelit nga Egjipti; ata jan\u00eb vet\u00eb Moisiu dhe Aaroni.\n6:28 Por erdhi dita kur Zoti i foli Moisiut n\u00eb vendin e Egjiptit,\n6:29 kur Zoti iu drejtua Moisiut dhe i tha: \"Un\u00eb jam Zoti! Thuaji Faraonit, mbretit t\u00eb Egjiptit, t\u00ebr\u00eb ato q\u00eb po t\u00eb them\".\n6:30 At\u00ebher\u00eb Moisiu u p\u00ebrgjigj k\u00ebshtu para Zotit: \"Ja, un\u00eb jam i parrethprer\u00eb n\u00eb buz\u00eb; prandaj si mund t\u00eb m\u00eb d\u00ebgjoj\u00eb Faraoni?\".\n7:1 Zoti i tha Moisiut: \"Shiko, un\u00eb po t\u00eb b\u00ebj si per\u00ebndi p\u00ebr Faraonin, dhe v\u00ebllai yt Aaroni do t\u00eb jet\u00eb profeti yt.\n7:2 Ti do t\u00eb thuash t\u00ebr\u00eb ato q\u00eb do t\u00eb t\u00eb urdh\u00ebroj un\u00eb dhe v\u00ebllai yt Aaroni do t'i flas\u00eb Faraonit, q\u00eb t'i l\u00ebr\u00eb t\u00eb shkojn\u00eb bijt\u00eb e Izraelit nga vendi i tij.\n7:3 Por un\u00eb do ta ngurt\u00ebsoj edhe m\u00eb tep\u00ebr zemr\u00ebn e Faraonit dhe do t'i shum\u00ebzoj shenjat dhe mrekullit\u00eb e mia n\u00eb vendin e Egjiptit.\n7:4 Prandaj Faraoni nuk do t'jua v\u00ebr\u00eb veshin, dhe k\u00ebshtu un\u00eb do ta zgjas dor\u00ebn mbi Egjipt dhe do t\u00eb nxjerr nga vendi i Egjiptit radh\u00ebt e mia, popullin tim, bijt\u00eb e Izraelit, duke dh\u00ebn\u00eb nd\u00ebshkime t\u00eb m\u00ebdha.\n7:5 Egjiptasit do t\u00eb marrin vesh at\u00ebher\u00eb q\u00eb un\u00eb jam Zoti, kur do t\u00eb shtrij dor\u00ebn time mbi Egjipt dhe do t\u00eb nxjerr nga mesi i tyre bijt\u00eb e Izraelit\".\n7:6 Dhe Moisiu dhe Aaroni vepruan k\u00ebshtu; ata b\u00ebn\u00eb pik\u00ebrisht ashtusi\u00e7 i kishte urdh\u00ebruar Zoti.\n7:7 Kur i fol\u00ebn Faraonit, Moisiu ishte tet\u00ebdhjet\u00eb vje\u00e7 dhe Aaroni tet\u00ebdhjet\u00eb e tre.\n7:8 Zoti i foli Moisiut dhe Aaronit, duke u th\u00ebn\u00eb:\n7:9 \"Kur Faraoni t'ju flas\u00eb dhe t'ju thot\u00eb: \"B\u00ebni nj\u00eb mrekulli\", ti do t'i thuash Aaronit: \"Merr bastunin t\u00ebnd dhe hidhe para Faraonit, q\u00eb t\u00eb b\u00ebhet gjarp\u00ebr\"\".\n7:10 Moisiu dhe Aaroni vajt\u00ebn pra te Faraoni dhe vepruan ashtu, pik\u00ebrisht si\u00e7 i kishte urdh\u00ebruar Zoti. Aaroni e hodhi bastunin e tij p\u00ebrpara Faraonit dhe sh\u00ebrb\u00ebtor\u00ebve t\u00eb tij, dhe ai u b\u00eb gjarp\u00ebr.\n7:11 At\u00ebher\u00eb edhe Faraoni thirri t\u00eb diturit dhe ysht\u00ebsit; dhe magjistar\u00ebt e Egjiptit me artin e tyre t\u00eb fsheht\u00eb b\u00ebn\u00eb edhe ata t\u00eb nj\u00ebjt\u00ebn gj\u00eb.\n7:12 Secili prej tyre hodhi bastunin e tij, dhe bastun\u00ebt u b\u00ebn\u00eb gjarp\u00ebrinj; por bastuni i Aaronit i p\u00ebrpiu bastun\u00ebt e tyre.\n7:13 Por zemra e Faraonit u ngurt\u00ebsua dhe ai nuk i d\u00ebgjoi ata, ashtu si\u00e7 kishte th\u00ebn\u00eb Zoti.\n7:14 Zoti i tha Moisiut: \"Zemra e Faraonit \u00ebsht\u00eb ngulmuese;\n7:15 ai nuk pranon ta l\u00ebr\u00eb popullin t\u00eb shkoj\u00eb. Shko te Faraoni nes\u00ebr n\u00eb m\u00ebngjes, kur ai ka p\u00ebr t\u00eb dal\u00eb p\u00ebr t\u00eb vajtur drejt ujit. Ti do t\u00eb q\u00ebndrosh ta pres\u00ebsh n\u00eb breg t\u00eb lumit dhe do t\u00eb marr\u00ebsh n\u00eb dor\u00eb bastunin q\u00eb \u00ebsht\u00eb shnd\u00ebrruar n\u00eb gjarp\u00ebr.\n7:16 Dhe do t'i thuash: \"Zoti, Per\u00ebndia i Hebrenjve, m\u00eb ka d\u00ebrguar te ti q\u00eb t\u00eb t\u00eb them: L\u00ebre popullin tim t\u00eb shkoj\u00eb q\u00eb t\u00eb m\u00eb sh\u00ebrbej\u00eb n\u00eb shkret\u00ebtir\u00eb; por ja, deri tani nuk ke d\u00ebgjuar\".\n7:17 K\u00ebshtu thot\u00eb Zoti: \"Nga kjo do t\u00eb kuptosh q\u00eb un\u00eb jam Zoti; ja, me bastunin q\u00eb kam n\u00eb dor\u00eb un\u00eb do t\u00eb rrah uj\u00ebrat q\u00eb jan\u00eb n\u00eb lum\u00eb, dhe ato do t\u00eb shnd\u00ebrrohen n\u00eb gjak.\n7:18 Dhe peshqit q\u00eb jan\u00eb n\u00eb lum\u00eb do t\u00eb ngordhin, lumi do t\u00eb mbaj\u00eb er\u00eb t\u00eb keqe, dhe Egjiptasve do t'u vij\u00eb ndot t\u00eb pin\u00eb ujin e lumit\"\".\n7:19 Dhe Zoti i tha Moisiut: \"Thuaji Aaronit: \"Merr bastunin t\u00ebnd dhe shtrije dor\u00ebn mbi uj\u00ebrat e Egjiptit, mbi lumenjt\u00eb e tij, mbi kanalet e tij, mbi pellgjet e tij dhe mbi t\u00eb gjitha depot e ujit; k\u00ebshtu ato do t\u00eb b\u00ebhen gjak. Dhe do t\u00eb ket\u00eb gjak n\u00eb t\u00eb gjith\u00eb vendin e Egjiptit, si n\u00eb en\u00ebt prej druri ashtu dhe n\u00eb en\u00ebt prej guri\"\".\n7:20 Moisiu dhe Aaroni vepruan ashtu, pik\u00ebrisht si\u00e7 i kishte urdh\u00ebruar Zoti. K\u00ebshtu ai ngriti bastunin dhe rrahu uj\u00ebrat q\u00eb ndodheshin n\u00eb lum\u00eb, para syve t\u00eb Faraonit dhe para syve t\u00eb sh\u00ebrb\u00ebtor\u00ebve t\u00eb tij; dhe t\u00eb gjitha uj\u00ebrat q\u00eb ishin n\u00eb lum\u00eb u shnd\u00ebrruan n\u00eb gjak.\n7:21 Dhe peshqit q\u00eb ishin n\u00eb lum\u00eb ngordh\u00ebn; dhe lumi u qelb, k\u00ebshtu q\u00eb Egjiptasit nuk mund t\u00eb pinin m\u00eb uj\u00ebt e lumit. K\u00ebshtu pati gjak n\u00eb t\u00ebr\u00eb vendin e Egjiptit.\n7:22 Por magjistar\u00ebt e Egjiptit b\u00ebn\u00eb t\u00eb nj\u00ebjt\u00ebn gj\u00eb me artet e tyre t\u00eb fshehta; dhe zemra e Faraonit u ngurt\u00ebsua dhe ai nuk i d\u00ebgjoi ata, ashtu si\u00e7 kishte th\u00ebn\u00eb Zoti.\n7:23 Pas k\u00ebsaj Faraoni ktheu krah\u00ebt dhe u drejtua nga sht\u00ebpia e tij; dhe nuk i dha r\u00ebnd\u00ebsi as k\u00ebsaj gj\u00ebje.\n7:24 Dhe t\u00ebr\u00eb Egjiptasit g\u00ebrmuan n\u00eb af\u00ebrsi t\u00eb lumit p\u00ebr t\u00eb k\u00ebrkuar uj\u00eb t\u00eb pijsh\u00ebm, sepse nuk mund t\u00eb pinin ujin e lumit.\n7:25 Kaluan k\u00ebshtu shtat\u00eb dit\u00eb, q\u00eb kur Zoti kishte rrahur lumin.\n8:1 Pastaj Zoti i tha Moisiut: \"Shko te Faraoni dhe thuaji: \"K\u00ebshtu thot\u00eb Zoti: L\u00ebre popullin tim t\u00eb shkoj\u00eb me q\u00ebllim q\u00eb t\u00eb m\u00eb sh\u00ebrbej\u00eb.\n8:2 Dhe n\u00eb qoft\u00eb se nuk pranon ta l\u00ebsh t\u00eb shkoj\u00eb, ja, un\u00eb do ta godas gjith\u00eb vendin t\u00ebnd me kamxhikun e bretkosave.\n8:3 K\u00ebshtu lumi do t\u00eb mbushet me bretkosa, dhe ato do t\u00eb ngjiten dhe do t\u00eb hyjn\u00eb n\u00eb sht\u00ebpin\u00eb t\u00ebnde, n\u00eb dhom\u00ebn ku fle ti, mbi shtratin t\u00ebnd, n\u00eb sht\u00ebpit\u00eb e sh\u00ebrb\u00ebtor\u00ebve t\u00eb tu dhe midis popullit, n\u00eb furrat e tua dhe n\u00eb magjet e buk\u00ebs.\n8:4 Dhe bretkosat do t\u00eb vijn\u00eb kund\u00ebr teje, kund\u00ebr popullit t\u00ebnd dhe kund\u00ebr t\u00ebr\u00eb sh\u00ebrb\u00ebtor\u00ebve t\u00eb tu\"\".\n8:5 Pastaj Zoti i tha Moisiut: \"I thuaj Aaronit: \"Shtri dor\u00ebn t\u00ebnde me bastunin t\u00ebnd mbi lumenjt\u00eb, mbi kanalet dhe pellgjet dhe b\u00ebj q\u00eb t\u00eb ngjiten bretkosat mbi vendin e Egjiptit\"\".\n8:6 K\u00ebshtu Aaroni shtriu dor\u00ebn e tij mbi uj\u00ebrat e Egjiptit, dhe bretkosat u ngjit\u00ebn dhe mbuluan vendin e Egjiptit.\n8:7 Por magjistar\u00ebt b\u00ebn\u00eb t\u00eb nj\u00ebjt\u00ebn gj\u00eb me artet e tyre t\u00eb fshehta dhe i b\u00ebn\u00eb bretkosat t\u00eb ngjiten n\u00eb vendin e Egjiptit.\n8:8 At\u00ebher\u00eb Faraoni thirri Moisiun dhe Aaronin dhe u tha: \"Lutjuni Zotit q\u00eb t'i largoj\u00eb bretkosat nga un\u00eb, nga populli im, dhe un\u00eb do ta lejoj popullin t\u00eb shkoj\u00eb, q\u00eb t\u00eb b\u00ebj\u00eb fli p\u00ebr Zotin\".\n8:9 Moisiu i tha Faraonit: \"B\u00ebm\u00eb nderin t\u00eb m\u00eb thuash kur t\u00eb nd\u00ebrhyj p\u00ebr ty, p\u00ebr sh\u00ebrb\u00ebtor\u00ebt e tu dhe p\u00ebr popullin t\u00ebnd, pran\u00eb Zotit me q\u00ebllim q\u00eb ai t\u00eb zhduk\u00eb bretkosat q\u00eb ndodhen rreth teje dhe sht\u00ebpive t\u00eb tua, dhe t\u00eb mbeten vet\u00ebm n\u00eb lum\u00eb\".\n8:10 Ai u p\u00ebrgjigj: \"Nes\u00ebr\". Dhe Moisiu tha: \"Do t\u00eb b\u00ebhet si\u00e7 thua ti, k\u00ebshtu q\u00eb ti t\u00eb dish se askush nuk \u00ebsht\u00eb si Zoti, Per\u00ebndia yn\u00eb.\n8:11 Dhe bretkosat do t\u00eb largohen nga ti, nga sht\u00ebpit\u00eb e tua, nga sh\u00ebrb\u00ebtor\u00ebt e tu dhe nga populli yt; ato do t\u00eb mbeten vet\u00ebm n\u00eb lum\u00eb\".\n8:12 Moisiu dhe Aaroni dol\u00ebn nga Faraoni; dhe Moisiu iu lut Zotit p\u00ebr bretkosat q\u00eb kishte d\u00ebrguar kund\u00ebr Faraonit.\n8:13 Dhe Zoti veproi sipas fjal\u00ebs s\u00eb Moisiut, dhe bretkosat ngordh\u00ebn n\u00eb sht\u00ebpit\u00eb, n\u00eb oborret dhe n\u00eb arat.\n8:14 I grumbulluan pastaj n\u00eb togje dhe vendi filloi t\u00eb mbaj\u00eb er\u00eb t\u00eb keqe.\n8:15 Po kur Faraoni pa q\u00eb kishte pak leht\u00ebsim, e ngurt\u00ebsoi zemr\u00ebn e tij dhe nuk i d\u00ebgjoi m\u00eb, ashtu si\u00e7 kishte th\u00ebn\u00eb Zoti.\n8:16 Pastaj Zoti i tha Moisiut: \"I thuaj Aaronit: \"Zgjate bastunin t\u00ebnd dhe rrih pluhurin e tok\u00ebs, dhe ai do t\u00eb b\u00ebhet mushkonja p\u00ebr t\u00ebr\u00eb vendin e Egjiptit\"\".\n8:17 Dhe ata k\u00ebshtu vepruan. Aaroni shtriu dor\u00ebn me bastunin e tij, rrahu pluhurin e tok\u00ebs dhe njer\u00ebzit e kafsh\u00ebt u mbuluan nga mushkonja; t\u00ebr\u00eb pluhuri i tok\u00ebs u shnd\u00ebrrua n\u00eb mushkonja n\u00eb t\u00eb gjith\u00eb vendin e Egjiptit.\n8:18 Magjistar\u00ebt u p\u00ebrpoq\u00ebn t\u00eb b\u00ebnin t\u00eb nj\u00ebjt\u00ebn gj\u00eb me an\u00eb t\u00eb arteve t\u00eb tyre t\u00eb fshehta p\u00ebr t\u00eb prodhuar mushkonja, por nuk ia dol\u00ebn dot. Mushkonjat mbuluan, pra, njer\u00ebzit dhe kafsh\u00ebt.\n8:19 At\u00ebher\u00eb magjistar\u00ebt i than\u00eb Faraonit: \"Ky \u00ebsht\u00eb gishti i Per\u00ebndis\u00eb\". Por zemra e Faraonit u ngurt\u00ebsua dhe ai nuk i d\u00ebgjoi m\u00eb, ashtu si kishte th\u00ebn\u00eb Zoti.\n8:20 Pastaj Zoti i tha Moisiut: \"\u00c7ohu her\u00ebt n\u00eb m\u00ebngjes dhe paraqitu tek Faraoni, kur ai del p\u00ebr t\u00eb vajtur drejt ujit; dhe i thuaj: \"K\u00ebshtu thot\u00eb Zoti: L\u00ebre popullin tim q\u00eb t\u00eb mund t\u00eb m\u00eb sh\u00ebrbej\u00eb.\n8:21 Por n\u00eb rast se ti nuk e l\u00eb popullin tim t\u00eb shkoj\u00eb, ja un\u00eb do t\u00eb d\u00ebrgoj kund\u00ebr teje, mbi sh\u00ebrb\u00ebtor\u00ebt e tu, mbi popullin t\u00ebnd e brenda sht\u00ebpive t\u00eb tua mori mizash; sht\u00ebpit\u00eb e Egjiptasve do t\u00eb jen\u00eb plot me mori mizash, dhe k\u00ebshtu do t\u00eb jet\u00eb toka mbi t\u00eb cil\u00ebn ndodhen.\n8:22 Por at\u00eb dit\u00eb un\u00eb do ta ve\u00e7oj vendin e Goshenit, ku banon populli im; dhe atje nuk do t\u00eb ket\u00eb mori mizash, q\u00eb ti t\u00eb dish q\u00eb un\u00eb jam Zoti n\u00eb mes t\u00eb vendit.\n8:23 Un\u00eb do t\u00eb b\u00ebj nj\u00eb dallim midis popullit tim dhe popullit t\u00ebnd. Nes\u00ebr ka p\u00ebr t\u00eb ndodhur kjo mrekulli\"\".\n8:24 Dhe Zoti ashtu veproi; erdh\u00ebn grumbuj t\u00eb dendur mizash n\u00eb sht\u00ebpin\u00eb e Faraonit dhe n\u00eb sht\u00ebpit\u00eb e sh\u00ebrb\u00ebtor\u00ebve t\u00eb tij, dhe n\u00eb gjith\u00eb vendin e Egjiptit toka u shkretua nga moria e mizave.\n8:25 At\u00ebher\u00eb Faraoni thirri Moisiun dhe Aaronin dhe u tha: \"Shkoni, b\u00ebni fli p\u00ebr Per\u00ebndin\u00eb tuaj n\u00eb vend\".\n8:26 Por Moisiu u p\u00ebrgjigj: \"Kjo s'ka si b\u00ebhet, sepse do t'i b\u00ebnim Zotit, Per\u00ebndis\u00eb ton\u00eb, fli q\u00eb jan\u00eb t\u00eb neveritshme p\u00ebr Egjiptasit. Ja, duke b\u00ebr\u00eb para syve t\u00eb tyre fli q\u00eb jan\u00eb t\u00eb neveritshme p\u00ebr Egjiptasit, a nuk do t\u00eb na vrasin me gur\u00eb?\n8:27 Do t\u00eb shkojm\u00eb n\u00eb shkret\u00ebtir\u00eb duke ecur tri dit\u00eb me radh\u00eb dhe do t\u00eb b\u00ebjm\u00eb fli p\u00ebr Zotin, Per\u00ebndin\u00eb ton\u00eb, ashtu si do t\u00eb na urdh\u00ebroj\u00eb Ai\".\n8:28 Faraoni tha: \"Un\u00eb do t'ju l\u00eb t\u00eb shkoni, q\u00eb t\u00eb b\u00ebni fli p\u00ebr Zotin, Per\u00ebndin\u00eb tuaj, n\u00eb shkret\u00ebtir\u00eb; vet\u00ebm, mos shkoni shum\u00eb larg. lutuni p\u00ebr mua\".\n8:29 Moisiu tha: \"Ja, un\u00eb po dal nga ti dhe do t'i lutem Zotit dhe nes\u00ebr moria e mizave do t\u00eb largohet nga Faraoni, nga sh\u00ebrb\u00ebtor\u00ebt e tij dhe nga populli i tij; mjafton q\u00eb Faraoni t\u00eb mos tallet me ne, duke e penguar popullin t\u00eb shkoj\u00eb e t\u00eb b\u00ebj\u00eb fli p\u00ebr Zotin\".\n8:30 Moisiu u largua pastaj nga prania e Faraonit dhe iu lut Zotit.\n8:31 Dhe Zoti veproi simbas fjal\u00ebs s\u00eb Moisiut dhe largoi morin\u00eb e mizave nga Faraoni, nga sh\u00ebrb\u00ebtor\u00ebt e tij dhe nga populli i tij; nuk mbeti as edhe nj\u00eb miz\u00eb.\n8:32 Por edhe k\u00ebt\u00eb her\u00eb Faraoni e fort\u00ebsoi zemr\u00ebn e tij dhe nuk e la popullin t\u00eb shkoj\u00eb.\n9:1 At\u00ebher\u00eb Zoti i tha Moisiut: \"Shko te Faraoni dhe i thuaj: \"K\u00ebshtu thot\u00eb Zoti, Per\u00ebndia i Hebrenjve: L\u00ebre popullin tim t\u00eb shkoj\u00eb, q\u00eb t\u00eb mund t\u00eb m\u00eb sh\u00ebrbej\u00eb.\n9:2 Por n\u00eb rast se nuk pranon ta l\u00ebsh t\u00eb shkoj\u00eb dhe e mban akoma,\n9:3 ja, dora e Zotit do t\u00eb jet\u00eb mbi bag\u00ebtin\u00eb t\u00ebnde, q\u00eb \u00ebsht\u00eb n\u00ebp\u00ebr fusha, mbi kuajt, mbi gomar\u00ebt, mbi devet\u00eb, mbi bag\u00ebtin\u00eb e trash\u00eb dhe t\u00eb im\u00ebt, dhe do t\u00eb ket\u00eb gj\u00ebm\u00eb t\u00eb madhe.\n9:4 Por Zoti do t\u00eb b\u00ebj\u00eb dallim midis bag\u00ebtis\u00eb s\u00eb Izraelit dhe asaj t\u00eb Egjiptit; k\u00ebshtu asnj\u00eb ngordhje nuk do t\u00eb ket\u00eb n\u00eb gjith\u00e7ka q\u00eb u p\u00ebrket bijve t\u00eb Izraelit\"\".\n9:5 Pastaj Zoti caktoi nj\u00eb afat, duke th\u00ebn\u00eb: \"Nes\u00ebr Zoti do ta b\u00ebj\u00eb k\u00ebt\u00eb n\u00eb vend\".\n9:6 Dhe Zoti e b\u00ebri at\u00eb t\u00eb nes\u00ebrmen, dhe t\u00ebr\u00eb bag\u00ebtia e Egjiptit ngordhi; por nga bag\u00ebtia e bijve t\u00eb Izraelit nuk ngordhi as edhe nj\u00eb kok\u00eb.\n9:7 Faraoni d\u00ebrgoi njer\u00ebz p\u00ebr t\u00eb par\u00eb, dhe ja asnj\u00eb kok\u00eb bag\u00ebtie e Izraelit\u00ebve s'kishte ngordhur. Por zemra e Faraonit u fort\u00ebsua dhe ai nuk e la popullin t\u00eb shkoj\u00eb.\n9:8 Pastaj Zoti u tha Moisiut dhe Aaronit: \"Merrni ca grushte hi furre, dhe Moisiu ta shp\u00ebrndaj\u00eb at\u00eb drejt qiellit n\u00eb syt\u00eb e Faraonit.\n9:9 Ai do t\u00eb b\u00ebhet nj\u00eb pluhur i im\u00ebt n\u00eb t\u00eb gjith\u00eb vendin e Egjiptit, dhe do t\u00eb shkaktoj\u00eb ulcera q\u00eb do t\u00eb p\u00ebrftojn\u00eb pu\u00e7rra me qelb te njer\u00ebzit dhe te kafsh\u00ebt n\u00eb t\u00eb gjith\u00eb vendin e Egjiptit\".\n9:10 At\u00ebher\u00eb ata mor\u00ebn hi furre dhe u paraqit\u00ebn para Faraonit; dhe Moisiu e shp\u00ebrndau drejt qiellit, dhe ai shkaktoi ulcera q\u00eb p\u00ebrftuan pu\u00e7rra te njer\u00ebzit dhe te kafsh\u00ebt.\n9:11 Dhe magjistar\u00ebt nuk mund\u00ebn t\u00eb q\u00ebndronin para Moisiut p\u00ebr shkak t\u00eb ulcerave, sepse magjistar\u00ebt dhe t\u00ebr\u00eb Egjiptasit ishin prekur nga ulcerat.\n9:12 Por Zoti e ngurt\u00ebsoi zemr\u00ebn e Faraonit, dhe ky nuk i d\u00ebgjoi ata, ashtu si\u00e7 i kishte th\u00ebn\u00eb Zoti Moisiut.\n9:13 Pas k\u00ebsaj Zoti i tha Moisiut: \"\u00c7ohu her\u00ebt n\u00eb m\u00ebngjes, paraqitu para Faraonit dhe thuaji: \"K\u00ebshtu thot\u00eb Zoti, Per\u00ebndia i Hebrenjve: L\u00ebre popullin tim t\u00eb shkoj\u00eb, q\u00eb t\u00eb ket\u00eb mund\u00ebsi t\u00eb m\u00eb sh\u00ebrbej\u00eb.\n9:14 Sepse k\u00ebt\u00eb her\u00eb do t'i d\u00ebrgoj t\u00ebr\u00eb plag\u00ebt e mia pik\u00ebrisht mbi ty, mbi sh\u00ebrb\u00ebtor\u00ebt e tu dhe mbi popullin t\u00ebnd, q\u00eb t\u00eb m\u00ebsosh se nuk ka asnj\u00eb t\u00eb ngjash\u00ebm me mua n\u00eb gjith\u00eb dheun.\n9:15 N\u00eb fakt, n\u00eb qoft\u00eb se tani un\u00eb do ta kisha shtrir\u00eb dor\u00ebn dhe do t\u00eb kisha goditur me murtaj\u00eb ty dhe popullin t\u00ebnd, ti do t\u00eb ishe fshir\u00eb nga faqja e dheut.\n9:16 Por, pik\u00ebrisht p\u00ebr k\u00ebt\u00eb arsye, t\u00eb kam falur, p\u00ebr t\u00eb t\u00eb treguar fuqin\u00eb time dhe q\u00eb emri im t\u00eb shpallet n\u00eb gjith\u00eb dheun.\n9:17 Dhe ti akoma i kund\u00ebrvihesh popullit tim dhe nuk e l\u00eb t\u00eb shkoj\u00eb?\n9:18 Ja, nes\u00ebr n\u00eb k\u00ebt\u00eb or\u00eb, un\u00eb do t\u00eb b\u00ebj q\u00eb t\u00eb bjer\u00eb nj\u00eb bresh\u00ebr aq i fort\u00eb, q\u00eb Egjipti nuk e ka par\u00eb prej dit\u00ebs s\u00eb krijimit t\u00eb tij deri tani.\n9:19 Dhe tani d\u00ebrgo njeri q\u00eb t\u00eb sigurosh bag\u00ebtin\u00eb t\u00ebnde dhe t\u00ebr\u00eb ato q\u00eb ke n\u00ebp\u00ebr fusha. Sepse t\u00ebr\u00eb njer\u00ebzit dhe kafsh\u00ebt, q\u00eb ndodhen n\u00ebp\u00ebr fushat dhe nuk jan\u00eb \u00e7uar n\u00eb sht\u00ebpi, do t\u00eb goditen nga bresh\u00ebri dhe do t\u00eb vdesin\"\".\n9:20 Nd\u00ebr sh\u00ebrb\u00ebtor\u00ebt e Faraonit, ata q\u00eb pat\u00ebn frik\u00eb nga fjal\u00ebt e Zotit i strehuan n\u00eb sht\u00ebpit\u00eb e tyre sh\u00ebrb\u00ebtor\u00ebt dhe bag\u00ebtin\u00eb e tyre;\n9:21 por ata q\u00eb nuk i morr\u00ebn parasysh fjal\u00ebt e Zotit i lan\u00eb sh\u00ebrb\u00ebtor\u00ebt dhe bag\u00ebtin\u00eb e tyre n\u00eb fusha.\n9:22 At\u00ebher\u00eb Zoti i tha Moisiut: \"Shtrije dor\u00ebn drejt qiellit, q\u00eb t\u00eb bjer\u00eb bresh\u00ebr n\u00eb t\u00ebr\u00eb vendin e Egjiptit, mbi njer\u00ebzit, mbi kafsh\u00ebt dhe mbi \u00e7do lloj bim\u00ebsie t\u00eb fushave n\u00eb vendin e Egjiptit\".\n9:23 Dhe Moisiu e shtriu bastunin e tij drejt qiellit; dhe Zoti d\u00ebrgoi bubullima dhe bresh\u00ebr, dhe zjarri ra duke goditur me rrufe n\u00eb tok\u00eb; dhe Zoti b\u00ebri q\u00eb t\u00eb bjer\u00eb bresh\u00ebr mbi vendin e Egjiptit.\n9:24 K\u00ebshtu ra bresh\u00ebr dhe pati nj\u00eb zjarr t\u00eb p\u00ebrzier me breshrin; dhe ky ishte aq i fort\u00eb, sa nuk ishte par\u00eb ndonj\u00eb her\u00eb n\u00eb t\u00eb gjith\u00eb vendin e Egjiptit, q\u00eb dit\u00ebn q\u00eb ishte b\u00ebr\u00eb komb.\n9:25 Dhe breshri goditi n\u00eb t\u00eb gjith\u00eb vendin e Egjiptit gjith\u00e7ka q\u00eb ishte n\u00eb fushat, si njer\u00ebzit ashtu dhe kafsh\u00ebt; breshri goditi \u00e7do lloj bim\u00ebsie n\u00eb fushat dhe b\u00ebri cop\u00eb cop\u00eb \u00e7do pem\u00eb q\u00eb ndodhej n\u00eb fush\u00eb.\n9:26 Vet\u00ebm n\u00eb vendin e Goshenit, ku ishin bijt\u00eb e Izraelit nuk ra bresh\u00ebr.\n9:27 At\u00ebher\u00eb Faraoni d\u00ebrgoi e thirri Moisiun dhe Aaronin dhe u tha atyre: \"K\u00ebt\u00eb her\u00eb un\u00eb m\u00ebkatova; Zoti \u00ebsht\u00eb i drejt\u00eb, nd\u00ebrsa un\u00eb dhe populli im jemi t\u00eb k\u00ebqij.\n9:28 Lutjuni Zotit q\u00eb t\u00eb mbarojn\u00eb bubullimat e Per\u00ebndis\u00eb dhe breshri; un\u00eb do t'ju l\u00eb t\u00eb shkoni dhe nuk do t\u00eb jeni t\u00eb detyruar t\u00eb rrini m\u00eb k\u00ebtu\".\n9:29 Moisiu i tha: \"Mbasi t\u00eb dal nga qyteti, do t'i shtrij duart nga Zoti; bubullimat do t\u00eb pushojn\u00eb dhe nuk do t\u00eb ket\u00eb m\u00eb bresh\u00ebr, q\u00eb ti t\u00eb m\u00ebsosh q\u00eb toka i p\u00ebrket Zotit.\n9:30 Por un\u00eb e di q\u00eb ti dhe sh\u00ebrb\u00ebtor\u00ebt e tu, nuk do t\u00eb keni frik\u00eb akoma nga Zoti Per\u00ebndi\".\n9:31 Tani liri dhe elbi u prek\u00ebn, sepse elbi ishte n\u00eb kalli dhe liri kishte lul\u00ebzuar;\n9:32 por gruri dhe gruri i fort\u00eb nuk u prek\u00ebn, sepse jan\u00eb t\u00eb vonsh\u00ebm.\n9:33 K\u00ebshtu Moisiu, pasi la Faraonin, doli nga qyteti dhe i shtriu duart drejt Zotit; at\u00ebher\u00eb bubullimat dhe breshri pushuan dhe nuk ra m\u00eb shi mbi tok\u00eb.\n9:34 Kur Faraoni pa q\u00eb shiu, breshri dhe bubullimat pushuan, vazhdoi t\u00eb m\u00ebkatoj\u00eb dhe e ngurt\u00ebsoi zemr\u00ebn e tij, ai dhe sh\u00ebrb\u00ebtor\u00ebt e tij.\n9:35 K\u00ebshtu zemra e Faraonit u ngurt\u00ebsua dhe ai nuk i la t\u00eb bijt\u00eb e Izraelit t\u00eb shkojn\u00eb, ashtu si i kishte th\u00ebn\u00eb Zoti n\u00ebp\u00ebrmjet Moisiut.\n10:1 Pastaj Zoti i tha Moisiut: \"Shko te Faraoni; sepse e kam fort\u00ebsuar zemr\u00ebn e tij dhe zemr\u00ebn e sh\u00ebrb\u00ebtor\u00ebve t\u00eb tij, me q\u00ebllim q\u00eb un\u00eb t\u00eb mund t\u00eb tregoj k\u00ebto shenjat e mia n\u00eb mes tyre,\n10:2 dhe me q\u00ebllim q\u00eb ti t\u00eb mund\u00ebsh t'u tregosh bijve t\u00eb tu dhe bijve t\u00eb bijve t\u00eb tu gj\u00ebrat e m\u00ebdha q\u00eb kam b\u00ebr\u00eb, duke v\u00ebn\u00eb n\u00eb loj\u00eb Egjiptasit, dhe shenjat e mia q\u00eb kam b\u00ebr\u00eb midis tyre, q\u00eb t\u00eb dini se un\u00eb jam Zoti\".\n10:3 Moisiu dhe Aaroni shkuan te Faraoni dhe i than\u00eb: \"K\u00ebshtu thot\u00eb Zoti, Per\u00ebndia i Hebrenjve: \"Deri kur do t\u00eb refuzosh t\u00eb ul\u00ebsh kok\u00ebn para meje? L\u00ebre popullin tim t\u00eb shkoj\u00eb q\u00eb t\u00eb mund t\u00eb m\u00eb sh\u00ebrbej\u00eb.\n10:4 Sepse po refuzove ta l\u00ebsh popullin tim t\u00eb shkoj\u00eb, q\u00eb nes\u00ebr do t\u00eb sjell karkaleca n\u00eb territorin t\u00ebnd.\n10:5 Dhe ato do t\u00eb mbulojn\u00eb faqen e dheut, k\u00ebshtu q\u00eb asnjeri nuk do t\u00eb mund ta shoh\u00eb tok\u00ebn; dhe ato do t\u00eb p\u00ebrpijn\u00eb edhe at\u00eb q\u00eb ka mbetur, at\u00eb q\u00eb ju ka l\u00ebn\u00eb breshri, dhe do t\u00eb p\u00ebrpin\u00eb \u00e7do pem\u00eb q\u00eb rritet p\u00ebr ju n\u00eb fusha.\n10:6 Dhe do t'i mbushin sht\u00ebpit\u00eb tuaja, sht\u00ebpit\u00eb e t\u00ebr\u00eb sh\u00ebrb\u00ebtor\u00ebve t\u00eb tu dhe sht\u00ebpit\u00eb e t\u00ebr\u00eb Egjiptasve, di\u00e7ka q\u00eb as et\u00ebrit e tu as et\u00ebrit e et\u00ebrve t\u00eb tu nuk e kan\u00eb par\u00eb kurr\u00eb, nga dita q\u00eb qen\u00eb mbi dhe deri n\u00eb k\u00ebt\u00eb dit\u00eb\"\". Me t'i th\u00ebn\u00eb k\u00ebto fjal\u00eb ktheu kurrizin dhe doli nga prania e Faraonit.\n10:7 Pastaj sh\u00ebrb\u00ebtor\u00ebt e Faraonit i than\u00eb: \"Deri kur ky njeri do t\u00eb jet\u00eb penges\u00eb p\u00ebr ne? L\u00ebri k\u00ebta njer\u00ebz t\u00eb ikin, q\u00eb t'i sh\u00ebrbejn\u00eb Zotit Per\u00ebndis\u00eb t\u00eb tyre! Nuk e ke kuptuar akoma q\u00eb Egjipti \u00ebsht\u00eb shkat\u00ebrruar?\".\n10:8 K\u00ebshtu Moisiu dhe Aaroni u rikthyen te Faraoni; dhe ky u tha atyre: \"Shkoni, sh\u00ebrbejini Zotit, Per\u00ebndis\u00eb tuaj. Por kush jan\u00eb ata q\u00eb do t\u00eb shkojn\u00eb?\". Moisiu tha:\n10:9 \"Ne do t\u00eb shkojm\u00eb me f\u00ebmij\u00ebt tan\u00eb dhe me pleqt\u00eb tan\u00eb, me bijt\u00eb tan\u00eb dhe bijat tona; do t\u00eb shkojm\u00eb me kopet\u00eb tona t\u00eb bag\u00ebtive t\u00eb imta dhe t\u00eb trasha, sepse duhet t\u00eb kremtojm\u00eb nj\u00eb fest\u00eb kushtuar Zotit\".\n10:10 Faraoni u tha atyre: \"Zoti qoft\u00eb me ju, kur un\u00eb do t'ju l\u00eb t\u00eb ikni bashk\u00eb me f\u00ebmij\u00ebt tuaj! Por kini kujdes se mos keni q\u00ebllime t\u00eb k\u00ebqia!\n10:11 Jo, jo! Shkoni ju, burra, t'i sh\u00ebrbeni Zotit; sepse kjo \u00ebsht\u00eb ajo q\u00eb k\u00ebrkoni\". Dhe i d\u00ebbuan nga prania e Faraonit.\n10:12 At\u00ebher\u00eb Zoti i tha Moisiut: \"Shtrije dor\u00ebn t\u00ebnde mbi vendin e Egjiptit p\u00ebr karkalecat, me q\u00ebllim q\u00eb ato t\u00eb ngjiten dhe t\u00eb mbulojn\u00eb vendin e Egjiptit dhe t\u00eb p\u00ebrpijn\u00eb t\u00ebr\u00eb bim\u00ebsin\u00eb e vendit, t\u00ebr\u00eb ato q\u00eb ka l\u00ebn\u00eb breshri\".\n10:13 At\u00ebher\u00eb Moisiu zgjati bastunin e tij mbi vendin e Egjiptit; dhe Zoti ngriti nj\u00eb er\u00eb nga lindja mbi vendin t\u00ebr\u00eb at\u00eb dit\u00eb dhe t\u00ebr\u00eb nat\u00ebn; sa erdhi m\u00ebngjesi, era e lindjes solli karkalecat.\n10:14 Dhe karkalecat u ngjit\u00ebn n\u00eb t\u00ebr\u00eb vendin e Egjiptit dhe u ul\u00ebn n\u00eb t\u00ebr\u00eb territorin e tij n\u00eb num\u00ebr t\u00eb madh. Nuk kishte pasur kurr\u00eb nj\u00eb murtaj\u00eb t\u00eb till\u00eb karkalecash m\u00eb par\u00eb dhe nuk do t\u00eb ndodh\u00eb ndonj\u00eb tjet\u00ebr.\n10:15 Ato mbuluan faqen e t\u00ebr\u00eb dheut, aq sa e nxin\u00eb dheun; p\u00ebrpin\u00eb t\u00ebr\u00eb bim\u00ebsin\u00eb e vendit dhe t\u00ebr\u00eb pem\u00ebt e drur\u00ebve q\u00eb breshri kishte l\u00ebn\u00eb; dhe nuk mbeti asgj\u00eb e blert\u00eb mbi drur\u00ebt dhe shkurr\u00ebzat e fush\u00ebs, n\u00eb t\u00ebr\u00eb vendin e Egjiptit.\n10:16 At\u00ebher\u00eb Faraoni thirri me nxitim Moisiun dhe Aaronin dhe u tha: \"Un\u00eb kam m\u00ebkatuar kund\u00ebr Zotit, Per\u00ebndis\u00eb tuaj, dhe kund\u00ebr jush.\n10:17 Por tani t\u00eb lutem, falmani m\u00ebkatin edhe nj\u00eb her\u00eb; dhe lutjuni Zotit, Per\u00ebndis\u00eb tuaj, q\u00eb t\u00eb largoj\u00eb nga un\u00eb k\u00ebt\u00eb mynxyr\u00eb vdekjeprur\u00ebse\".\n10:18 Dhe Moisiu doli nga Faraoni, dhe iu lut Zotit.\n10:19 Pastaj Zoti ngriti nj\u00eb er\u00eb t\u00eb kund\u00ebrt, nj\u00eb er\u00eb nga per\u00ebndimi shum\u00eb t\u00eb fort\u00eb, q\u00eb i largoi karkalecat dhe i hodhi n\u00eb Detin e Kuq. Nuk mbeti asnj\u00eb karkalec n\u00eb t\u00ebr\u00eb territorin e Egjiptit.\n10:20 Por Zoti e fort\u00ebsoi zemr\u00ebn e Faraonit dhe ai nuk i la bijt\u00eb e Izraelit t\u00eb ikin.\n10:21 At\u00ebher\u00eb Zoti i tha Moisiut: \"Shtrije dor\u00ebn drejt qiellit, me q\u00ebllim q\u00eb t\u00eb jet\u00eb err\u00ebsir\u00eb n\u00eb vendin e Egjiptit, err\u00ebsir\u00eb q\u00eb t\u00eb mund t\u00eb preket me dor\u00eb\".\n10:22 Dhe Moisiu e shtriu dor\u00ebn e tij drejt qiellit, dhe u b\u00eb err\u00ebsir\u00eb e madhe n\u00eb t\u00ebr\u00eb vendin e Egjiptit p\u00ebr tri dit\u00eb.\n10:23 Nj\u00ebri nuk shikonte tjetrin dhe asnjeri nuk l\u00ebvizi nga vendi ku ndodhej p\u00ebr tri dit\u00eb; por p\u00ebr t\u00eb gjith\u00eb bijt\u00eb e Izraelit kishte drit\u00eb n\u00eb banesat e tyre.\n10:24 At\u00ebher\u00eb Faraoni thirri Moisiun dhe i tha: \"Shkoni, sh\u00ebrbejini Zotit, le t\u00eb mbeten vet\u00ebm kopet\u00eb tuaja me bag\u00ebti t\u00eb im\u00ebt dhe t\u00eb trash\u00eb; edhe f\u00ebmij\u00ebt tuaj mund t\u00eb vin\u00eb me ju\".\n10:25 Moisiu tha: \"Ti duhet t\u00eb na lejosh gjithashtu t\u00eb marrim dhe disa fli dhe olokauste, q\u00eb t'ia ofrojm\u00eb Zotit, Per\u00ebndis\u00eb ton\u00eb.\n10:26 Edhe bag\u00ebtia jon\u00eb do t\u00eb vij\u00eb me ne; nuk do t\u00eb l\u00ebm\u00eb k\u00ebtu as edhe nj\u00eb thua t\u00eb saj, sepse do t\u00eb marrim disa krer\u00eb p\u00ebr t'i sh\u00ebrbyer Zotit, Per\u00ebndis\u00eb ton\u00eb; dhe nuk e dim\u00eb me se do t'i sh\u00ebrbejm\u00eb Zotit, deri sa t\u00eb arrijm\u00eb atje posht\u00eb\".\n10:27 Por Zoti e fort\u00ebsoi zemr\u00ebn e Faraonit dhe ai nuk deshi t'i linte t\u00eb shkonin.\n10:28 At\u00ebher\u00eb Faraoni i tha Moisiut: \"Q\u00ebrohu nga un\u00eb! Ruhu se m\u00eb del p\u00ebrpara, sepse dit\u00ebn q\u00eb do t\u00eb m\u00eb dal\u00ebsh p\u00ebrpara do t\u00eb vdes\u00ebsh!\".\n10:29 Moisiu iu p\u00ebrgjigj: \"Mir\u00eb e the; un\u00eb nuk do t\u00eb t\u00eb dal m\u00eb p\u00ebrpara\".\n11:1 Pastaj Zoti i tha Moisiut: \"Un\u00eb do t\u00eb sjell edhe nj\u00eb plag\u00eb tjet\u00ebr mbi Faraonin dhe Egjiptin; pas k\u00ebsaj ai do t'ju lejoj\u00eb t\u00eb ikni prej k\u00ebtej. Kur do t'ju lejoj\u00eb t\u00eb shkoni, ai do t'ju d\u00ebboj\u00eb p\u00ebrfundimisht prej k\u00ebtej.\n11:2 Tani foli popullit n\u00eb m\u00ebnyr\u00eb q\u00eb \u00e7do burr\u00eb t'i k\u00ebrkoj\u00eb fqinjit t\u00eb tij dhe \u00e7do grua fqinj\u00ebs s\u00eb saj sende argjendi dhe ari\".\n11:3 Dhe Zoti e b\u00ebri popullin t\u00eb ket\u00eb hir n\u00eb syt\u00eb e Egjiptasve; edhe Moisiu g\u00ebzonte konsiderat\u00eb t\u00eb madhe n\u00eb vendin e Egjiptit, n\u00eb syt\u00eb e sh\u00ebrb\u00ebtor\u00ebve t\u00eb Faraonit dhe n\u00eb syt\u00eb e popullit.\n11:4 Pastaj Moisiu tha: \"K\u00ebshtu thot\u00eb Zoti: \"Aty nga mesnata, un\u00eb do t\u00eb kaloj p\u00ebrmes Egjiptit;\n11:5 dhe \u00e7do i par\u00eblindur n\u00eb vendin e Egjiptit do t\u00eb vdes\u00eb, nga i par\u00eblinduri i Faraonit q\u00eb rri mbi fron, tek i par\u00eblinduri i sh\u00ebrb\u00ebtores q\u00eb rri pas mokr\u00ebs, si dhe pjellja e par\u00eb e bag\u00ebtis\u00eb.\n11:6 At\u00ebher\u00eb n\u00eb vendin e Egjiptit do t\u00eb ket\u00eb nj\u00eb britm\u00eb t\u00eb madhe, q\u00eb nuk \u00ebsht\u00eb d\u00ebgjuar kurr\u00eb m\u00eb par\u00eb dhe q\u00eb nuk do t\u00eb d\u00ebgjohet asnj\u00ebher\u00eb tjet\u00ebr.\n11:7 Por kund\u00ebr asnj\u00ebrit prej bijve t\u00eb Izraelit, qofshin ata njer\u00ebz apo kafsh\u00eb, asnj\u00eb qen s'ka p\u00ebr t\u00eb l\u00ebvizur gjuh\u00ebn, me q\u00ebllim q\u00eb t\u00eb dini se Zoti b\u00ebn dallimin midis Egjiptasve dhe Izraelit.\n11:8 Dhe t\u00ebr\u00eb k\u00ebta sh\u00ebrb\u00ebtor\u00ebt e tu do t\u00eb zbresin tek un\u00eb dhe do t\u00eb p\u00ebrkulen para meje, duke th\u00ebn\u00eb: \"Nisu, ti dhe populli yt q\u00eb t\u00eb ndjek nga pas!\". Mbas k\u00ebsaj un\u00eb do t\u00eb nisem\"\". Dhe Moisiu u largua nga Faraoni t\u00ebr\u00eb zem\u00ebrim.\n11:9 Pastaj Zoti i tha Moisiut: \"Faraoni nuk do t'jua v\u00ebr\u00eb veshin, me q\u00ebllim q\u00eb mrekullit\u00eb e mia t\u00eb shum\u00ebzohen n\u00eb vendin e Egjiptit\".\n11:10 Dhe Moisiu dhe Aaroni b\u00ebn\u00eb t\u00ebr\u00eb ato mrekulli para Faraonit; por Zoti e ngurt\u00ebsoi zemr\u00ebn e Faraonit dhe ky nuk i la bijt\u00eb e Izraelit t\u00eb dalin nga vendi i tij.\n12:1 Zoti u foli Moisiut dhe Aaronit n\u00eb vendin e Egjiptit, duke u th\u00ebn\u00eb:\n12:2 \"Ky muaj do t\u00eb jet\u00eb p\u00ebr ju muaji m\u00eb i r\u00ebnd\u00ebsish\u00ebm, do t\u00eb jet\u00eb p\u00ebr ju muaji i par\u00eb i vitit.\n12:3 I thoni gjith\u00eb asambles\u00eb s\u00eb Izraelit: \"Dit\u00ebn e dhjet\u00eb t\u00eb k\u00ebtij muaji, \u00e7do burr\u00eb t\u00eb marr\u00eb p\u00ebr vete nj\u00eb qengj, sipas madh\u00ebsis\u00eb s\u00eb familjes t\u00eb t\u00eb atit, nj\u00eb qengj p\u00ebr sht\u00ebpi.\n12:4 Por n\u00eb qoft\u00eb se sht\u00ebpia \u00ebsht\u00eb tep\u00ebr e vog\u00ebl p\u00ebr nj\u00eb qengj, le t\u00eb marr\u00eb nj\u00eb s\u00eb bashku me fqinjin m\u00eb t\u00eb af\u00ebrt, duke llogaritur numrin e personave; ju do t\u00eb p\u00ebrcaktoni sasin\u00eb e qengjit t\u00eb nevojsh\u00ebm, n\u00eb baz\u00eb t\u00eb asaj q\u00eb \u00e7donj\u00ebri mund t\u00ebhaj\u00eb.\n12:5 Qengji juaj duhet t\u00eb jet\u00eb pa t\u00eb meta, mashkull, motak; mund t\u00eb merrni nj\u00eb qengj ose nj\u00eb kec.\n12:6 Do ta ruani deri n\u00eb dit\u00ebn e kat\u00ebrmb\u00ebdhjet\u00eb t\u00eb k\u00ebtij muaji, dhe t\u00ebr\u00eb asambleja e popullit t\u00eb Izraelit do ta ther\u00eb at\u00eb n\u00eb t\u00eb ngrysur.\n12:7 Pastaj do t\u00eb marrin nga ai gjak dhe do ta v\u00ebn\u00eb mbi dy shtalkat dhe mbi arkitraun e sht\u00ebpive ku do ta han\u00eb.\n12:8 Do t\u00eb han\u00eb mishin e pjekur n\u00eb zjarr, po at\u00eb nat\u00eb, do ta han\u00eb at\u00eb me buk\u00eb pa maja dhe me barishte t\u00eb hidhura.\n12:9 Nuk do t\u00eb hani fare mish t\u00eb gjall\u00eb apo t\u00eb zier n\u00eb uj\u00eb, por t\u00eb pjekur n\u00eb zjarr me kok\u00ebn, k\u00ebmb\u00ebt dhe t\u00eb brendshmet.\n12:10 Dhe nuk do t\u00eb lini asnj\u00eb mbetje deri n\u00eb m\u00ebngjes; dhe \u00e7't\u00eb mbetet deri n\u00eb m\u00ebngjes, do ta digjni n\u00eb zjarr.\n12:11 Do ta hani n\u00eb k\u00ebt\u00eb m\u00ebnyr\u00eb: ijengjeshur, sandalembathur dhe me bastunin tuaj n\u00eb dor\u00eb; do t\u00eb hani me nxitim: se \u00ebsht\u00eb Pashka e Zotit.\n12:12 At\u00eb nat\u00eb un\u00eb do t\u00eb kaloj n\u00ebp\u00ebr vendin e Egjiptit dhe do t\u00eb godas \u00e7do t\u00eb par\u00eblindur n\u00eb vendin e Egjiptit, qoft\u00eb njeri apo kafsh\u00eb, dhe do t'i jap hakun gjith\u00eb per\u00ebndive t\u00eb Egjiptit. Un\u00eb jam Zoti.\n12:13 Dhe gjaku do t\u00eb jet\u00eb p\u00ebr ju nj\u00eb shenj\u00eb mbi sht\u00ebpit\u00eb ku ndodheni; kur un\u00eb t\u00eb shoh gjakun do t\u00eb kaloj tutje dhe nuk do t\u00eb ket\u00eb plag\u00eb mbi ju p\u00ebr t'ju zhdukur, kur t\u00eb godas vendin e Egjiptit.\n12:14 Ajo dit\u00eb do t\u00eb jet\u00eb p\u00ebr ju nj\u00eb dit\u00eb p\u00ebr t'u mbajtur mend dhe ta kremtoni si fest\u00eb kushtuar Zotit; do ta kremtoni n\u00ebp\u00ebr koh\u00ebra si ligj t\u00eb p\u00ebrjetsh\u00ebm.\n12:15 P\u00ebr shtat\u00eb dit\u00eb do t\u00eb hani buk\u00eb t\u00eb ndorme. Dit\u00ebn e par\u00eb do t\u00eb kujdeseni t\u00eb hiqni \u00e7do maja nga sht\u00ebpit\u00eb tuaja, sepse kushdo q\u00eb do t\u00eb haj\u00eb buk\u00eb t\u00eb mbrujtur, nga dita e par\u00eb deri n\u00eb t\u00eb shtat\u00ebn, do t\u00eb k\u00ebputet nga Izraeli.\n12:16 Dit\u00ebn e par\u00eb do t\u00eb keni nj\u00eb mbledhje t\u00eb shenjt\u00eb, dhe nj\u00eb mbledhje t\u00eb shenjt\u00eb edhe dit\u00ebn e shtat\u00eb. T\u00eb mos b\u00ebhet asnj\u00eb pun\u00eb ato dit\u00eb; t\u00eb p\u00ebrgatitet vet\u00ebm ajo q\u00eb do t\u00eb haj\u00eb secili dhe asgj\u00eb tjet\u00ebr.\n12:17 Do t\u00eb kremtoni, pra, fest\u00ebn e t\u00eb ndorm\u00ebve, sepse pik\u00ebrisht n\u00eb k\u00ebt\u00eb dit\u00eb b\u00ebra t\u00eb dalin radh\u00ebt tuaja nga vendi i Egjiptit; do ta kremtoni, pra, k\u00ebt\u00eb dit\u00eb n\u00ebp\u00ebr koh\u00ebra si ligj t\u00eb p\u00ebrjetsh\u00ebm.\n12:18 Gjat\u00eb muajit t\u00eb par\u00eb, nga dita e kat\u00ebrmb\u00ebdhjet\u00eb e muajit, n\u00eb mbr\u00ebmje, deri dit\u00ebn e nj\u00ebzetenj\u00ebt\u00eb, n\u00eb mbr\u00ebmje, do t\u00eb hani buk\u00eb t\u00eb ndorme.\n12:19 P\u00ebr shtat\u00eb dit\u00eb t\u00eb mos gjendet maja n\u00eb sht\u00ebpit\u00eb tuaja, sepse kushdo q\u00eb do t\u00eb haj\u00eb di\u00e7ka t\u00eb mbrujtur, do t\u00eb k\u00ebputet nga asambleja e Izraelit, qoft\u00eb ai i huaj apo i lindur n\u00eb vend.\n12:20 Nuk do t\u00eb hani asgj\u00eb t\u00eb mbrujtur; n\u00eb t\u00eb gjitha banesat tuaja do t\u00eb hani buk\u00eb t\u00eb ndorme\"\".\n12:21 Moisiu, pra, thirri gjith\u00eb pleqt\u00eb e Izraelit dhe u tha atyre: \"Shkoni dhe merrni qengja p\u00ebr ju dhe p\u00ebr familjet tuaja, dhe flijoni Pashk\u00ebt.\n12:22 Pastaj do t\u00eb merrni nj\u00eb tuf\u00ebz hisopi, do ta ngjyeni n\u00eb gjakun q\u00eb \u00ebsht\u00eb n\u00eb legen, dhe me gjakun q\u00eb \u00ebsht\u00eb n\u00eb legen do t\u00eb sp\u00ebrkatni arkitraun dhe t\u00eb dy shtalkat e dyerve; dhe asnj\u00eb prej jush nuk do t\u00eb dal\u00eb nga dera e sht\u00ebpis\u00eb s\u00eb tij deri n\u00eb m\u00ebngjes.\n12:23 Sepse Zoti do t\u00eb kaloj\u00eb p\u00ebr t\u00eb goditur Egjiptasit; po, kur do t\u00eb shoh\u00eb gjakun mbi arkitraun dhe mbi dy shtalkat, Zoti do t\u00eb kaloj\u00eb m\u00eb tej der\u00ebs dhe nuk do ta lejoj\u00eb shkat\u00ebrruesin t\u00eb hyj\u00eb n\u00eb sht\u00ebpit\u00eb tuaja p\u00ebr t'ju goditur.\n12:24 Zbatojeni, pra, k\u00ebt\u00eb si nj\u00eb porosi t\u00eb p\u00ebrjetshme p\u00ebr ju dhe p\u00ebr bijt\u00eb tuaj.\n12:25 Kur t\u00eb hyni n\u00eb vendin q\u00eb do t'ju jap\u00eb Zoti, si\u00e7 e ka th\u00ebn\u00eb, zbatoni k\u00ebt\u00eb rit.\n12:26 Kur bijt\u00eb tuaj do t'ju pyesin: \"\u00c7'kuptim ka ky rit p\u00ebr ju?\",\n12:27 ju do t'u p\u00ebrgjigjeni: \"Kjo \u00ebsht\u00eb flija e Pashk\u00ebs s\u00eb Zotit, q\u00eb kaloi tej sht\u00ebpive t\u00eb bijve t\u00eb Izraelit n\u00eb Egjipt, kur goditi Egjiptasit dhe i fali sht\u00ebpit\u00eb tona\"\". Dhe populli u p\u00ebrkul dhe adhuroi.\n12:28 At\u00ebher\u00eb bijt\u00eb e Izraelit shkuan dhe vepruan ashtu; ata b\u00ebn\u00eb ashtu si i kishte urdh\u00ebruar Zoti Moisiun dhe Aaronin.\n12:29 Prandaj ndodhi q\u00eb n\u00eb mesnat\u00eb Zoti goditi t\u00ebr\u00eb t\u00eb par\u00eblindurit n\u00eb vendin e Egjiptit, q\u00eb nga i par\u00eblinduri i Faraonit q\u00eb rrinte mbi fronin e tij, deri te i par\u00eblinduri i t\u00eb burgosurit q\u00eb ishte n\u00eb burg, si dhe \u00e7do pjell\u00eb e par\u00eb e bag\u00ebtive.\n12:30 K\u00ebshtu Faraoni u ngrit nat\u00ebn, ai me gjith\u00eb sh\u00ebrb\u00ebtor\u00ebt e tij dhe gjith\u00eb Egjiptasit; dhe u d\u00ebgjua nj\u00eb klithm\u00eb e madhe n\u00eb Egjipt, sepse nuk kishte sht\u00ebpi ku t\u00eb mos kishte nj\u00eb t\u00eb vdekur.\n12:31 At\u00ebher\u00eb ai thirri Moisiun dhe Aaronin nat\u00ebn dhe u tha: \"\u00c7ohuni dhe largohuni nga mesi i popullit tim, ju dhe bijt\u00eb e Izraelit; dhe shkoni t'i sh\u00ebrbeni Zotit, si\u00e7 e keni th\u00ebn\u00eb.\n12:32 Merrni me vete kopet\u00eb e bag\u00ebtive t\u00eb imta dhe t\u00eb trasha, si\u00e7 keni th\u00ebn\u00eb, dhe shkoni; dhe m\u00eb bekoni edhe mua!\".\n12:33 Dhe Egjiptasit e nxisnin popullin p\u00ebr t\u00eb shpejtuar nisjen nga vendi, sepse thonin: \"Do t\u00eb vdesim t\u00eb gjith\u00eb\".\n12:34 Populli mori me vete brumin e buk\u00ebs para se ai t\u00eb vinte; i mb\u00ebshtolli magjet e tij me rroba trupi dhe i vuri mbi kurriz.\n12:35 Dhe bijt\u00eb e Izraelit b\u00ebn\u00eb ashtu si\u00e7 i kishte th\u00ebn\u00eb Moisiu dhe u k\u00ebrkuan Egjiptasve sende argjendi, sende ari dhe rroba;\n12:36 dhe Zoti b\u00ebri q\u00eb Egjiptasit ta shikonin me sy t\u00eb mir\u00eb popullin dhe t'i jepnin at\u00eb q\u00eb k\u00ebrkonte. K\u00ebshtu i zhvesh\u00ebn Egjiptasit.\n12:37 Bijt\u00eb e Izraelit u nis\u00ebn nga Ramsesi p\u00ebr n\u00eb Sukoth, ishin rreth gjasht\u00ebqind mij\u00eb njer\u00ebz m\u00eb k\u00ebmb\u00eb, pa llogaritur f\u00ebmij\u00ebt.\n12:38 Dhe me ta iku gjithashtu nj\u00eb p\u00ebrzierje e madhe njer\u00ebzish, bashk\u00eb me kopet\u00eb e tyre t\u00eb bag\u00ebtive t\u00eb imta dhe t\u00eb trasha, nj\u00eb num\u00ebr i madh kafsh\u00ebsh.\n12:39 Dhe ata e poq\u00ebn brumin q\u00eb kishin sjell\u00eb nga Egjipti, duke b\u00ebr\u00eb kule\u00e7\u00eb t\u00eb ndorm\u00eb; n\u00eb fakt brumi nuk kishte maja, sepse ata u d\u00ebbuan nga Egjipti dhe nuk mund\u00ebn t\u00eb m\u00ebnojn\u00eb, as t\u00eb p\u00ebrgatisin rezerva p\u00ebr udh\u00ebtimin.\n12:40 Koha q\u00eb bijt\u00eb e Izraelit kaluan n\u00eb Egjipt qe kat\u00ebrqind e tridhjet\u00eb vjet.\n12:41 N\u00eb fund t\u00eb kat\u00ebrqind e tridhjet\u00eb vjet\u00ebve, pik\u00ebrisht at\u00eb dit\u00eb, ndodhi q\u00eb t\u00eb gjitha radh\u00ebt e Zotit dol\u00ebn nga vendi i Egjiptit.\n12:42 Kjo \u00ebsht\u00eb nj\u00eb nat\u00eb p\u00ebr t'u kremtuar p\u00ebr nder t\u00eb Zotit, sepse ai i nxori nga vendi i Egjiptit; kjo nat\u00eb do t\u00eb jet\u00eb nj\u00eb kremtim solemn ndaj Zotit, p\u00ebr t\u00eb gjith\u00eb bijt\u00eb e Izraelit brez pas brezi.\n12:43 Pastaj Zoti i tha Moisiut dhe Aaronit: \"Ky \u00ebsht\u00eb rregulli i Pashk\u00ebve: asnj\u00eb i huaj nuk do t\u00eb haj\u00eb;\n12:44 por \u00e7do skllav, i bler\u00eb me para, mbasi t\u00eb jet\u00eb rrethprer\u00eb, mund t\u00eb haj\u00eb.\n12:45 T\u00eb ardhurit dhe mercenar\u00ebt nuk do t\u00eb han\u00eb.\n12:46 Qengji do t\u00eb hahet vet\u00ebm n\u00eb nj\u00eb sht\u00ebpi; asnj\u00eb pjes\u00eb t\u00eb mishit t\u00eb tij nuk do ta nxirrni jasht\u00eb sht\u00ebpis\u00eb dhe nuk do t\u00eb thyeni asnj\u00eb kock\u00eb t\u00eb tij.\n12:47 T\u00ebr\u00eb asambleja e Izraelit do ta kremtoj\u00eb at\u00eb.\n12:48 Dhe kur nj\u00eb i huaj do t\u00eb banoj\u00eb me ty do t\u00eb doj\u00eb t\u00eb kremtoj\u00eb Pashk\u00ebt p\u00ebr nder t\u00eb Zotit, t\u00ebr\u00eb meshkujt e familjes s\u00eb tij duhet t\u00eb rrethpriten m\u00eb par\u00eb dhe pastaj ai le t\u00eb afrohet p\u00ebr t\u00eb kremtuar k\u00ebt\u00eb dit\u00eb, ai do t\u00eb konsiderohet si i lindur n\u00eb vend; por asnj\u00eb i parrethprer\u00eb s'ka p\u00ebr t\u00eb ngr\u00ebn\u00eb.\n12:49 Do t\u00eb ket\u00eb nj\u00eb ligj t\u00eb vet\u00ebm p\u00ebr at\u00eb q\u00eb ka lindur n\u00eb vend dhe p\u00ebr t\u00eb huajin q\u00eb banon me ju\".\n12:50 T\u00ebr\u00eb bijt\u00eb e Izraelit vepruan n\u00eb k\u00ebt\u00eb m\u00ebnyr\u00eb; ata b\u00ebn\u00eb pik\u00ebrisht at\u00eb q\u00eb Zoti i kishte urdh\u00ebruar Moisiut dhe Aaronit.\n12:51 K\u00ebshtu ndodhi q\u00eb pik\u00ebrisht at\u00eb dit\u00eb Zoti i b\u00ebri bijt\u00eb e Izraelit t\u00eb dalin nga vendi i Egjiptit, simbas radh\u00ebve t\u00eb tyre.\n13:1 Zoti i foli Moisiut duke i th\u00ebn\u00eb:\n13:2 \"M\u00eb shenjt\u00ebro \u00e7do t\u00eb par\u00eblindur, ai q\u00eb \u00e7el barkun nd\u00ebr bijt\u00eb e Izraelit, qofshin njer\u00ebz apo kafsh\u00eb; m\u00eb takon mua\".\n13:3 Pastaj Moisiu i tha popullit: \"Mbajeni mend k\u00ebt\u00eb dit\u00eb, gjat\u00eb s\u00eb cil\u00ebs dol\u00ebt nga Egjipti, nga sht\u00ebpia e skllav\u00ebris\u00eb; sepse Zoti ju nxori nga ky vend me dor\u00eb t\u00eb fuqishme; nuk do t\u00eb hahet buk\u00eb me maja.\n13:4 Ju po dilni sot, n\u00eb muajin e Abibit.\n13:5 At\u00ebher\u00eb pra kur Zoti do t\u00eb b\u00ebj\u00eb q\u00eb t\u00eb hyni n\u00eb vendin e Kananejve, t\u00eb Hitejve, t\u00eb Amorejve, t\u00eb Hivejve dhe t\u00eb Jebusejve q\u00eb u \u00ebsht\u00eb betuar et\u00ebrve t\u00eb tu t\u00eb t\u00eb jap\u00eb, vend ku rrjedh qum\u00ebshti dhe mjalti, do t\u00eb kryesh k\u00ebt\u00eb rit gjat\u00eb k\u00ebtij muaji.\n13:6 Shtat\u00eb dit\u00eb me radh\u00eb do t\u00eb hash buk\u00eb t\u00eb ndorme; dhe dit\u00ebn e shtat\u00eb do t\u00eb b\u00ebhet nj\u00eb fest\u00eb p\u00ebr Zotin.\n13:7 Do t\u00eb hahet buk\u00eb e ndorme gjat\u00eb shtat\u00eb dit\u00ebve; dhe nuk do t\u00eb duket buk\u00eb me maja tek ju, as do t\u00eb duket maja pran\u00eb teje, brenda t\u00ebr\u00eb kufijve t\u00eb tu.\n13:8 At\u00eb dit\u00eb do t'ia shpjegosh k\u00ebt\u00eb gj\u00eb birit t\u00ebnd, duke i th\u00ebn\u00eb: \"Veprohet k\u00ebshtu p\u00ebr shkak t\u00eb asaj q\u00eb b\u00ebri Zoti p\u00ebr mua kur dola nga Egjipti\".\n13:9 Dhe do t\u00eb jet\u00eb p\u00ebr ty si nj\u00eb shenj\u00eb mbi dor\u00ebn t\u00ebnde dhe si nj\u00eb kujtim nd\u00ebr syt\u00eb e tu, me q\u00ebllim q\u00eb ligji i Zotit t\u00eb jet\u00eb n\u00eb goj\u00ebn t\u00ebnde; sepse Zoti t\u00eb b\u00ebri t\u00eb dal\u00ebsh nga Egjipti me dor\u00eb t\u00eb fuqishme.\n13:10 Zbatoje pra k\u00ebt\u00eb rregull n\u00eb koh\u00ebn e caktuar, vit pas viti.\n13:11 Kur Zoti do t\u00eb ket\u00eb b\u00ebr\u00eb q\u00eb t\u00eb hysh n\u00eb vendin e Kananejve, ashtu si\u00e7 t\u00eb \u00ebsht\u00eb betuar ty dhe et\u00ebrve t\u00eb tu, dhe do t\u00eb ta ket\u00eb dh\u00ebn\u00eb at\u00eb,\n13:12 do t'i shenjt\u00ebrosh Zotit t\u00ebr\u00eb ata q\u00eb \u00e7elin barkun dhe \u00e7do pjellje t\u00eb par\u00eb t\u00eb bag\u00ebtis\u00eb q\u00eb ti zot\u00ebron: meshkujt do t'i takojn\u00eb Zotit.\n13:13 K\u00ebshtu do t\u00eb shpengosh \u00e7do pjellje t\u00eb par\u00eb t\u00eb gomarit me nj\u00eb qengj; por n\u00eb qoft\u00eb se nuk d\u00ebshiron ta shpengosh, at\u00ebher\u00eb thyeja qaf\u00ebn; k\u00ebshtu do t\u00eb shpengosh \u00e7do t\u00eb par\u00eblindur t\u00eb njeriut nd\u00ebr bijt\u00eb e tu.\n13:14 Kur n\u00eb t\u00eb ardhmen biri yt do t\u00eb t\u00eb pyes\u00eb, duke th\u00ebn\u00eb: \"\u00c7far\u00eb do t\u00eb thot\u00eb kjo?\", ti do t'i p\u00ebrgjigjesh: \"Zoti na b\u00ebri t\u00eb dalim nga Egjipti, nga sht\u00ebpia e skllav\u00ebris\u00eb, me dor\u00eb t\u00eb fuqishme;\n13:15 dhe ndodhi q\u00eb, kur Faraoni nguli k\u00ebmb\u00eb t\u00eb mos na linte t\u00eb shkonim, Zoti vrau t\u00ebr\u00eb t\u00eb par\u00eblindurit n\u00eb vendin e Egjiptit, si t\u00eb par\u00eblindurit e njer\u00ebzve ashtu dhe t\u00eb par\u00eblindurit e kafsh\u00ebve. Prandaj un\u00eb i b\u00ebj fli Zotit t\u00ebr\u00eb meshkujt q\u00eb \u00e7elin barkun, por shpengoj \u00e7do t\u00eb par\u00eblindur t\u00eb bijve t\u00eb mi\".\n13:16 Kjo do t\u00eb jet\u00eb si nj\u00eb shenj\u00eb mbi dor\u00ebn t\u00ebnde dhe nj\u00eb ballore midis syve t\u00eb tu, sepse Zoti na b\u00ebri t\u00eb dalim nga Egjipti me dor\u00eb t\u00eb fuqishme\".\n13:17 Kur Faraoni e la popullin t\u00eb shkoj\u00eb, Per\u00ebndia nuk e \u00e7oi n\u00ebp\u00ebr rrug\u00ebn e vendit t\u00eb Filistejve, megjith\u00ebse kjo ishte m\u00eb e shkurt\u00ebra, sepse Per\u00ebndia tha: \"Q\u00eb t\u00eb mos pendohet populli, kur t\u00eb shoh\u00eb luft\u00ebn, dhe t\u00eb mos kthehet n\u00eb Egjipt\".\n13:18 Por Per\u00ebndia b\u00ebri q\u00eb populli t\u00eb vinte nj\u00eb her\u00eb p\u00ebrqark, n\u00ebp\u00ebr rrug\u00ebn e shkret\u00ebtir\u00ebs, drejt Detit t\u00eb Kuq. Dhe bijt\u00eb e Izraelit dol\u00ebn t\u00eb armatosur nga vendi i Egjiptit.\n13:19 Dhe Moisiu mori me vete eshtrat e Jozefit, sepse i kishte v\u00ebn\u00eb bijt\u00eb e Izraelit t\u00eb betoheshin shprehimisht, duke th\u00ebn\u00eb: \"Me siguri Per\u00ebndia do t'ju vizitoj\u00eb; at\u00ebhere i bartni me vete eshtrat e mia\".\n13:20 K\u00ebshtu ata u nis\u00ebn nga Sukothi dhe fushuan n\u00eb Etham, buz\u00eb shkret\u00ebtir\u00ebs.\n13:21 Dhe Zoti shkonte para tyre, dit\u00ebn n\u00eb nj\u00eb kolon\u00eb resh p\u00ebr t'i udh\u00ebhequr n\u00eb rrug\u00eb, dhe nat\u00ebn n\u00eb nj\u00eb kolon\u00eb zjarri p\u00ebr t'u b\u00ebr\u00eb atyre drit\u00eb, q\u00eb t\u00eb mund t\u00eb ecnin dit\u00ebn dhe nat\u00ebn.\n13:22 Kolona e reve nuk t\u00ebrhiqej kurr\u00eb dit\u00ebn p\u00ebrpara popullit, as kolona e zjarrit nat\u00ebn.\n14:1 Pastaj Zoti i foli Moisiut, duke i th\u00ebn\u00eb:\n14:2 \"U thuaj bijve t\u00eb Izraelit t\u00eb kthehen prapa dhe t\u00eb vendosin kampin e tyre p\u00ebrball\u00eb Pi-Hahirothit, midis Migdolit dhe detit, p\u00ebrball\u00eb Baal-Tsefonit; vendosni kampin tuaj p\u00ebrpara k\u00ebtij vendi pran\u00eb detit.\n14:3 At\u00ebher\u00eb Faraoni do t\u00eb thot\u00eb p\u00ebr bijt\u00eb e Izraelit: \"Ata po enden si t\u00eb humbur n\u00eb vend; shkret\u00ebtira i mban t\u00eb mbyllur\".\n14:4 Dhe un\u00eb do ta ngurt\u00ebsoj zemr\u00ebn e Faraonit, dhe ai do t'i ndjek\u00eb ata; por un\u00eb do t\u00eb siguroj lavdi nga Faraoni dhe nga gjith\u00eb ushtria e tij, dhe Egjiptasit do t\u00eb m\u00ebsojn\u00eb q\u00eb un\u00eb jam Zoti\". Dhe ata ashtu vepruan.\n14:5 Pastaj iu njoftua mbretit t\u00eb Egjiptit q\u00eb populli kishte ikur; dhe zemra e Faraonit dhe e sh\u00ebrb\u00ebtor\u00ebve t\u00eb tij ndryshoi kundrejt popullit, dhe ata than\u00eb: \"\u00c7'b\u00ebm\u00eb q\u00eb e lam\u00eb Izraelin t\u00eb ik\u00eb nga sh\u00ebrbimi yn\u00eb?\".\n14:6 K\u00ebshtu Faraoni b\u00ebri q\u00eb t\u00eb p\u00ebrgatitej qerrja e tij dhe mori me vete popullin e tij.\n14:7 Mori dhe gjasht\u00ebqind qerre t\u00eb zgjedhura dhe t\u00ebr\u00eb qerret e Egjiptit, me luft\u00ebtar\u00eb n\u00eb secilin prej tyre.\n14:8 Dhe Zoti e ngurt\u00ebsoi zemr\u00ebn e Faraonit, mbretit t\u00eb Egjiptit, dhe ai i ndoqi bijt\u00eb e Izraelit, q\u00eb dilnin plot trim\u00ebri.\n14:9 Egjiptasit i ndoq\u00ebn; dhe t\u00ebr\u00eb kuajt, qerret e Faraonit, kalor\u00ebsit e tij dhe ushtria e tij i arrit\u00ebn kur kishin fushuar pran\u00eb detit, n\u00eb af\u00ebrsi t\u00eb Pi-Hahirothit, p\u00ebrball\u00eb Baal-Tsefonit.\n14:10 Nd\u00ebrsa Faraoni po afrohej, bijt\u00eb e Izraelit ngrit\u00ebn syt\u00eb; dhe ja, Egjiptasit marshonin prapa tyre, prandaj pat\u00ebn shum\u00eb frik\u00eb; dhe bijt\u00eb e Izraelit i klith\u00ebn Zotit,\n14:11 dhe i than\u00eb Moisiut: \"Pse, nuk kishte varre n\u00eb Egjipt, q\u00eb na solle t\u00eb vdesim n\u00eb shkret\u00ebtir\u00eb? Pse e b\u00ebre k\u00ebt\u00eb gj\u00eb me ne, duke na nxjerr\u00eb nga Egjipti?\n14:12 A nuk ishte vall\u00eb kjo p\u00ebr t\u00eb cil\u00ebn t\u00eb flisnim n\u00eb Egjipt, duke t\u00eb th\u00ebn\u00eb: \"Na l\u00ebr rehat, k\u00ebshtu do t\u00eb mund t'u sh\u00ebrbejm\u00eb Egjiptasve\"? Sepse p\u00ebr ne do t\u00eb qe m\u00eb mir\u00eb t'u sh\u00ebrbenim Egjiptasve se sa t\u00eb vdesim n\u00eb shkret\u00ebtir\u00eb\".\n14:13 Por Moisiu i tha popullit: \"Mos kini frik\u00eb, q\u00ebndroni dhe \u00e7lirimi do t\u00eb vij\u00eb nga Zoti, i cili do ta b\u00ebj\u00eb sot p\u00ebr ju; sepse Egjiptasit q\u00eb shihni sot, nuk do t'i shihni m\u00eb kurr\u00eb.\n14:14 Zoti do t\u00eb luftoj\u00eb p\u00ebr ju, dhe ju do t\u00eb rrini t\u00eb qet\u00eb\".\n14:15 Pastaj Zoti i tha Moisiut: \"Pse m\u00eb b\u00ebrtet mua? U thuaj bijve t\u00eb Izraelit t\u00eb shkojn\u00eb p\u00ebrpara.\n14:16 Dhe ti \u00e7o lart bastunin t\u00ebnd, shtrije dor\u00ebn mbi det dhe ndaje at\u00eb, n\u00eb m\u00ebnyr\u00eb q\u00eb bijt\u00eb e Izraelit t\u00eb mund t\u00eb kalojn\u00eb n\u00eb mes t\u00eb detit n\u00eb t\u00eb that\u00eb.\n14:17 Sa p\u00ebr mua, un\u00eb do ta ngurt\u00ebsoj zemr\u00ebn e Egjiptasve, dhe k\u00ebta do t'i ndjekin ata. K\u00ebshtu un\u00eb do t\u00eb fitoj lavdi nga Faraoni, nga t\u00ebr\u00eb ushtria e tij, nga qerret dhe kalor\u00ebsit e tij.\n14:18 Dhe Egjiptasit do t\u00eb din\u00eb q\u00eb un\u00eb jam Zoti, kur un\u00eb do t\u00eb fitoj lavdi nga Faraoni, nga qerret e tij dhe nga kalor\u00ebsit e tij\".\n14:19 At\u00ebher\u00eb Engj\u00eblli i Per\u00ebndis\u00eb, q\u00eb ecte p\u00ebrpara kampit t\u00eb Izraelit, u zhvendos dhe shkoi e u vu prapa tyre; edhe kolona e reve l\u00ebvizi nga p\u00ebrpara dhe shkoi e u vu prapa tyre.\n14:20 Dhe k\u00ebshtu vajti e u vendos midis fushimit t\u00eb Egjiptit dhe fushimit t\u00eb Izraelit; dhe reja prodhonte err\u00ebsir\u00eb p\u00ebr nj\u00ebr\u00ebn pal\u00eb, nd\u00ebrsa u jepte drit\u00eb t\u00eb tjer\u00ebve nat\u00ebn. K\u00ebshtu t\u00ebr\u00eb nat\u00ebn kurrkush nuk iu afrua tjetrit.\n14:21 At\u00ebher\u00eb Moisiu shtriu dor\u00ebn e tij mbi detin; dhe Zoti b\u00ebri q\u00eb t\u00eb t\u00ebrhiqet deti nga nj\u00eb er\u00eb e fort\u00eb nga lindja q\u00eb fryu t\u00ebr\u00eb at\u00eb nat\u00eb dhe e shnd\u00ebrroi detin n\u00eb tok\u00eb t\u00eb that\u00eb; dhe uj\u00ebrat u ndan\u00eb.\n14:22 K\u00ebshtu bijt\u00eb e Izraelit hyn\u00eb n\u00eb mes t\u00eb detit n\u00eb t\u00eb that\u00eb; dhe uj\u00ebrat formonin si nj\u00eb mur n\u00eb t\u00eb djatht\u00eb dhe t\u00eb majt\u00eb t\u00eb tyre.\n14:23 Dhe Egjiptasit i ndoq\u00ebn; dhe t\u00ebr\u00eb kuajt e Faraonit, qerret e tij dhe kalor\u00ebsit e tij hyn\u00eb pas tyre n\u00eb mes t\u00eb detit.\n14:24 Aty nga agimi i m\u00ebngjesit ndodhi q\u00eb Zoti i hodhi syt\u00eb n\u00eb kampin e Egjiptasve nga kolona e zjarrit dhe nga reja, dhe i dha d\u00ebrm\u00ebn.\n14:25 Ai b\u00ebri t\u00eb shk\u00ebputen rotat e qerreve t\u00eb tyre dhe e b\u00ebri t\u00eb v\u00ebshtir\u00eb p\u00ebrparimin e tyre. K\u00ebshtu Egjiptasit than\u00eb: \"T'ia mbathim para Izraelit, sepse Zoti lufton bashk\u00eb me ta kund\u00ebr Egjiptasve\".\n14:26 Pastaj Zoti i tha Moisiut: \"Shtrije dor\u00ebn t\u00ebnde mbi detin, me q\u00ebllim q\u00eb uj\u00ebrat e tij t\u00eb kthehen mbi Egjiptasit, mbi qerret dhe kalor\u00ebsit e tyre\".\n14:27 At\u00ebher\u00eb Moisiu shtriu dor\u00ebn e tij mbi detin; k\u00ebshtu n\u00eb t\u00eb gdhir\u00eb, deti u kthye n\u00eb vendin e tij t\u00eb zakonsh\u00ebm; Egjiptasit ik\u00ebn para tij; dhe Zoti i p\u00ebrlau Egjiptasit n\u00eb mes t\u00eb detit.\n14:28 Uj\u00ebrat u kthyen dhe mbuluan qerret, kalor\u00ebsit dhe t\u00ebr\u00eb ushtrin\u00eb e Faraonit q\u00eb kishin hyr\u00eb n\u00eb det p\u00ebr t\u00eb ndjekur Izraelit\u00ebt; dhe nuk shp\u00ebtoi asnj\u00eb prej tyre.\n14:29 Por bijt\u00eb e Izraelit vazhduan t\u00eb ecnin n\u00eb tok\u00eb t\u00eb that\u00eb n\u00eb mes t\u00eb detit, dhe uj\u00ebrat qen\u00eb p\u00ebr ta si nj\u00eb mur, n\u00eb t\u00eb djatht\u00eb t\u00eb tyre dhe n\u00eb t\u00eb majt\u00eb t\u00eb tyre.\n14:30 K\u00ebshtu, at\u00eb dit\u00eb, Zoti e shp\u00ebtoi Izraelin nga dora e Egjiptasve, dhe Izraeli pa mbi bregun e detit Egjiptasit e vdekur.\n14:31 Izraeli pa fuqin\u00eb e madhe q\u00eb Zoti kishte treguar kund\u00ebr Egjiptasve, dhe populli pati frik\u00eb nga Zoti dhe besoi te Zoti dhe te Moisiu sh\u00ebrb\u00ebtor i tij.\n15:1 At\u00ebher\u00eb Moisiu dhe bijt\u00eb e Izraelit i k\u00ebnduan k\u00ebt\u00eb kantik Zotit dhe fol\u00ebn duke th\u00ebn\u00eb: \"Un\u00eb do t'i k\u00ebndoj Zotit, sepse u lart\u00ebsua shum\u00eb; hodhi n\u00eb det kuaj dhe kalor\u00ebs.\n15:2 Zoti \u00ebsht\u00eb forca ime dhe kantiku im, ka q\u00ebn\u00eb shp\u00ebtimi im. Ky \u00ebsht\u00eb Per\u00ebndia im, un\u00eb do ta p\u00ebrl\u00ebvdoj; \u00ebsht\u00eb Per\u00ebndia i atit tim, un\u00eb do ta lart\u00ebsoj.\n15:3 Zoti \u00ebsht\u00eb nj\u00eb luft\u00ebtar, emri i tij \u00ebsht\u00eb Zoti.\n15:4 Ai hodhi n\u00eb det qerret e Faraonit dhe ushtrin\u00eb e tij, luft\u00ebtar\u00ebt m\u00eb t\u00eb mir\u00eb t\u00eb tij u mbyt\u00ebn n\u00eb Detin e Kuq.\n15:5 Ata mbulohen nga humnera; ran\u00eb n\u00eb fund si nj\u00eb gur.\n15:6 E djathta jote, o Zot, \u00ebsht\u00eb e mrekullueshme n\u00eb fuqin\u00eb e saj. E djathta jote, o Zot, i d\u00ebrmoi armiqt\u00eb.\n15:7 Me madh\u00ebshtin\u00eb e madh\u00ebris\u00eb sate, ti i p\u00ebrmbys ata q\u00eb ngrihen kund\u00ebr teje; ti nxjer jasht\u00eb zem\u00ebrimin t\u00ebnd, ai i prish ata sikur t\u00eb ishin kallamishte.\n15:8 Sa t\u00eb shfrysh nga vrimat e hund\u00ebve, uj\u00ebrat jan\u00eb grumbulluar, val\u00ebt jan\u00eb ngritur si nj\u00eb mur, dhe dallg\u00ebt jan\u00eb p\u00ebrforcuar n\u00eb zemr\u00ebn e detit.\n15:9 Armiku thoshte: \"Do t'i ndjek, do t'i arrij, do t\u00eb ndaj kufomat, lakmia ime do t\u00eb ngopet mbi ta; do t\u00eb zhvesh shpat\u00ebn time, dora ime do t'i shfaros\u00eb\".\n15:10 Po ti d\u00ebrgove jasht\u00eb frym\u00ebn t\u00ebnde dhe deti i mbuloi; u mbyt\u00ebn si plumbi n\u00eb uj\u00ebrat e fuqishme.\n15:11 Kush barazohet me ty midis per\u00ebndive, o Zot? Kush barazohet me ty, i mrekulluesh\u00ebm n\u00eb shenjt\u00ebri, i madh\u00ebrish\u00ebm n\u00eb l\u00ebvdata, o \u00e7udib\u00ebr\u00ebs?\n15:12 Ti shtrive dor\u00ebn e djatht\u00eb, dhe toka i g\u00eblltiti.\n15:13 Me m\u00ebshir\u00ebn t\u00ebnde, ke udh\u00ebhequr popullin q\u00eb e ke shpenguar; me forc\u00ebn t\u00ebnde e ke \u00e7uar drejt banes\u00ebs sate t\u00eb shenjt\u00eb.\n15:14 Popujt e kan\u00eb d\u00ebgjuar k\u00ebt\u00eb dhe dridhen. Ankthi ka mb\u00ebrthyer banor\u00ebt e Filistin\u00ebs.\n15:15 Q\u00eb tani krer\u00ebt e Edomit e kan\u00eb humbur, t\u00eb fuqishmit e Moabit i ka z\u00ebn\u00eb frika, t\u00ebr\u00eb banor\u00ebt e Kanaanit po shkrihen.\n15:16 Frika dhe tmerri do t\u00eb bier\u00eb mbi ta. Fal\u00eb forc\u00ebs s\u00eb krahut t\u00ebnd do t\u00eb b\u00ebhen t\u00eb pal\u00ebvizsh\u00ebm si guri, deri sa populli yt, o Zot, t\u00eb kaloj\u00eb, deri sa t\u00eb kaloj\u00eb populli q\u00eb ti ke bler\u00eb.\n15:17 Ti do t'i fut\u00ebsh dhe do t'i vendos\u00ebsh n\u00eb malin e trash\u00ebgimis\u00eb sate, n\u00eb vendin q\u00eb ke p\u00ebrgatitur, o Zot, p\u00ebr banes\u00ebn t\u00ebnde, n\u00eb shenjt\u00ebroren q\u00eb duart e tua, o Per\u00ebndi, kan\u00eb vendosur.\n15:18 Zoti do t\u00eb mbret\u00ebroj\u00eb gjithnj\u00eb, p\u00ebrjet\u00eb\".\n15:19 Pasi kuajt e Faraonit me qerret e tij dhe kalor\u00ebsit e tij kishin hyr\u00eb n\u00eb det, dhe Zoti kishte kthyer mbi ta uj\u00ebrat e detit, por bijt\u00eb e Izraelit kishin ecur n\u00eb mes t\u00eb detit, n\u00eb t\u00eb that\u00eb.\n15:20 At\u00ebher\u00eb profetesha Miriam, motra e Aaronit, mori n\u00eb dor\u00eb dajren, dhe t\u00eb gjitha grat\u00eb e ndoq\u00ebn nga pas me dajre dhe me valle.\n15:21 Dhe Miriami u k\u00ebndonte atyre: \"K\u00ebndojini Zotit, sepse u lart\u00ebsua shum\u00eb; hodhi n\u00eb det kuaj dhe kalor\u00ebs\".\n15:22 Pastaj Moisiu i nisi Izraelit\u00ebt nga Deti i Kuq dhe k\u00ebta u drejtuan nga shkret\u00ebtira e Shurit; ec\u00ebn tri dit\u00eb n\u00eb shkret\u00ebtir\u00eb dhe nuk gjet\u00ebn uj\u00eb.\n15:23 Kur arrit\u00ebn n\u00eb Mara nuk mund\u00ebn t\u00eb pin\u00eb uj\u00ebrat e Mar\u00ebs sepse ishin t\u00eb hidhura; prandaj ky vend u quajt Mara.\n15:24 At\u00ebher\u00eb populli murmuriti kund\u00ebr Moisiut, duke th\u00ebn\u00eb: \"\u00c7'do t\u00eb pim\u00eb?\".\n15:25 K\u00ebshtu ai i b\u00ebrtiti Zotit; dhe Zoti i tregoi nj\u00eb dru; ai e hodhi at\u00eb n\u00eb uj\u00eb, dhe uj\u00ebrat u b\u00ebn\u00eb t\u00eb \u00ebmbla. Atje Zoti i dha popullit nj\u00eb ligj dhe nj\u00eb dekret, dhe e vuri k\u00ebshtu popullin n\u00eb prov\u00eb,\n15:26 dhe tha: \"N\u00eb qoft\u00eb se ti d\u00ebgjon me v\u00ebm\u00ebndje z\u00ebrin e Zotit, Per\u00ebndis\u00eb t\u00ebnd, dhe b\u00ebn at\u00eb q\u00eb \u00ebsht\u00eb e drejt\u00eb n\u00eb syt\u00eb e tij dhe d\u00ebgjon urdh\u00ebrimet e tij dhe respekton t\u00ebr\u00eb ligjet e tij, un\u00eb nuk do t\u00eb jap asnj\u00eb nga ato s\u00ebmundje q\u00eb u kam dh\u00ebn\u00eb Egjiptasve, sepse un\u00eb jam Zoti q\u00eb t\u00eb sh\u00ebron\".\n15:27 K\u00ebshtu arrit\u00ebn n\u00eb Elim, ku kishte dymb\u00ebdhjet\u00eb burime uji dhe shtat\u00ebdhjet\u00eb palma; dhe e ngrit\u00ebn kampin e tyre pran\u00eb uj\u00ebrave.\n16:1 Pastaj ata u nis\u00ebn nga Elimi dhe t\u00ebr\u00eb asambleja e bijve t\u00eb Izraelit arriti n\u00eb shkret\u00ebtir\u00ebn e Sinit, q\u00eb ndodhet midis Elimit dhe Sinait, dit\u00ebn e pes\u00ebmb\u00ebdhjet\u00eb t\u00eb muajit t\u00eb dyt\u00eb mbas nisjes s\u00eb tyre nga vendi i Egjiptit.\n16:2 Dhe t\u00ebr\u00eb asambleja e bijve t\u00eb Izraelit murmuriti kund\u00ebr Moisiut dhe Aaronit n\u00eb shkret\u00ebtir\u00eb.\n16:3 Bijt\u00eb e Izraelit u than\u00eb atyre: \"Ah, le t\u00eb kishim vdekur nga dora e Zotit n\u00eb vendin e Egjiptit, ku uleshim pran\u00eb tenxhereve me mish dhe hanim buk\u00eb sa ngopeshim! Sepse ju na \u00e7uat n\u00eb k\u00ebt\u00eb shkret\u00ebtir\u00eb q\u00eb t\u00eb vdes\u00eb nga uria t\u00ebr\u00eb kjo asamble\".\n16:4 Zoti i tha Moisiut: \"Ja, un\u00eb do t\u00eb b\u00ebj q\u00eb t\u00eb bjer\u00eb man\u00eb mbi juve nga qielli; dhe populli do t\u00eb dal\u00eb \u00e7do dit\u00eb p\u00ebr t\u00eb mbledhur racionin e dit\u00ebs, sepse un\u00eb dua ta v\u00eb n\u00eb prov\u00eb p\u00ebr t\u00eb par\u00eb n\u00eb se do t\u00eb ec\u00eb ose jo simbas ligjit tim.\n16:5 Por dit\u00ebn e gjasht\u00eb, kur do t\u00eb p\u00ebrgatisin nozullimin q\u00eb duhet t\u00eb \u00e7ojn\u00eb n\u00eb sht\u00ebpi, ai do t\u00eb jet\u00eb dyfishi i atij q\u00eb mbledhin \u00e7do dit\u00eb\".\n16:6 At\u00ebher\u00eb Moisiu dhe Aaroni u than\u00eb gjith\u00eb bijve t\u00eb Izraelit: \"N\u00eb mbr\u00ebmje do t\u00eb m\u00ebsoni q\u00eb Zoti \u00ebsht\u00eb ai q\u00eb ju nxori nga vendi i Egjiptit;\n16:7 dhe n\u00eb m\u00ebngjes keni p\u00ebr t\u00eb par\u00eb lavdin\u00eb e Zotit, sepse ai i ka d\u00ebgjuar murmuritjet tuaja kund\u00ebr Zotit; por ne \u00e7far\u00eb jemi q\u00eb murmurisni kund\u00ebr nesh?\".\n16:8 Moisiu tha akoma: \"Kjo ka p\u00ebr t\u00eb ndodhur, kur Zoti do t'ju jap\u00eb mish p\u00ebr t\u00eb ngr\u00ebn\u00eb n\u00eb mbr\u00ebmje dhe buk\u00eb q\u00eb t\u00eb ngopeni n\u00eb m\u00ebngjes, sepse Zoti i d\u00ebgjoi murmuritjet tuaja kund\u00ebr tij. Po ne \u00e7far\u00eb jemi? Murmuritjet tuaja nuk jan\u00eb kund\u00ebr nesh, por kund\u00ebr Zotit\".\n16:9 Pastaj Moisiu i tha Aaronit: \"Thuaji gjith\u00eb asambles\u00eb s\u00eb bijve t\u00eb Izraelit: \"Afrohuni para Zotit, sepse ai i d\u00ebgjoi murmuritjet tuaja\"\".\n16:10 Nd\u00ebrsa Aaroni i fliste t\u00ebr\u00eb asambles\u00eb s\u00eb bijve t\u00eb Izraelit, ata u soll\u00ebn drejt shkret\u00ebtir\u00ebs; dhe ja lavdia e Zotit u shfaq n\u00eb re.\n16:11 Dhe Zoti i foli Moisiut, duke i th\u00ebn\u00eb:\n16:12 \"Un\u00eb i d\u00ebgjova murmuritjet e bijve t\u00eb Izraelit; folu atyre, duke th\u00ebn\u00eb: \"N\u00eb t\u00eb ngrysur do t\u00eb hani mish dhe n\u00eb m\u00ebngjes do t\u00eb ngopeni me buk\u00eb; dhe do t\u00eb m\u00ebsoni q\u00eb un\u00eb jam Zoti, Per\u00ebndia juaj\"\".\n16:13 Dhe k\u00ebshtu, aty nga mbr\u00ebmja ndodhi q\u00eb shkurtat u ngrit\u00ebn dhe mbuluan kampin; dhe n\u00eb m\u00ebngjes kishte nj\u00eb shtres\u00eb vese rreth kampit.\n16:14 Pastaj shtresa e ves\u00ebs u zhduk, dhe ja, mbi sip\u00ebrfaqen e shkret\u00ebtir\u00ebs u duk nj\u00eb gj\u00eb e holl\u00eb dhe e rrumbullak\u00ebt, e holl\u00eb si bryma mbi tok\u00eb.\n16:15 Kur bijt\u00eb e Izraelit e pan\u00eb, i than\u00eb njeri tjetrit: \"\u00c7far\u00eb \u00ebsht\u00eb?\", sepse nuk e dinin se \u00e7'ishte. Dhe Moisiu u tha atyre: \"Kjo \u00ebsht\u00eb buka q\u00eb Zoti iu dha p\u00ebr t\u00eb ngr\u00ebn\u00eb.\n16:16 Ja \u00e7far\u00eb ka urdh\u00ebruar Zoti: Secili t\u00eb mbledh\u00eb aq sa i duhet p\u00ebr ushqimin e tij, nj\u00eb omer p\u00ebr frym\u00eb, sipas numrit t\u00eb personave q\u00eb jeni; secili nga ju t\u00eb marr\u00eb p\u00ebr ata q\u00eb jan\u00eb n\u00eb \u00e7adr\u00ebn e tij\".\n16:17 Bijt\u00eb e Izraelit vepruan k\u00ebshtu; disa prej tyre mblodh\u00ebn m\u00eb tep\u00ebr dhe t\u00eb tjer\u00ebt m\u00eb pak.\n16:18 E mat\u00ebn me omerin; dhe kush kishte mbledhur shum\u00eb nuk pati tepric\u00eb; dhe kush kishte mbledhur m\u00eb pak nuk pati mangut. Gjithkush mblodhi simbas nevoj\u00ebs s\u00eb tij p\u00ebr ushqim.\n16:19 Pastaj Moisiu u tha atyre: \"Asnjeri t\u00eb mos e l\u00ebr\u00eb t\u00eb teproj\u00eb p\u00ebr nes\u00ebr n\u00eb m\u00ebngjes\".\n16:20 Por ata nuk iu bind\u00ebn Moisiut dhe disa prej tyre lan\u00eb teprica edhe p\u00ebr t\u00eb nes\u00ebrmen; ajo u kalb duke prodhuar krimba dhe doli nj\u00eb er\u00eb e keqe; dhe Moisiu u zem\u00ebrua me ta.\n16:21 K\u00ebshtu e mblidhnin \u00e7do m\u00ebngjes; secili sipas nevoj\u00ebs s\u00eb tij p\u00ebr ushqim; por kur dielli b\u00ebhej i nxeht\u00eb, mana e mbledhur shkrihej.\n16:22 K\u00ebshtu dit\u00ebn e gjasht\u00eb mblodh\u00ebn nj\u00eb racion t\u00eb dyfisht\u00eb buke, dy omer\u00eb p\u00ebr secilin prej tyre. Dhe t\u00eb gjith\u00eb krer\u00ebt e asambles\u00eb erdh\u00ebn p\u00ebr t'ia referuar Moisiut.\n16:23 At\u00ebher\u00eb ai u tha: \"Kjo \u00ebsht\u00eb ajo q\u00eb ka th\u00ebn\u00eb Zoti: Nes\u00ebr \u00ebsht\u00eb nj\u00eb dit\u00eb solemne pushimi, nj\u00eb e shtun\u00eb e shenjt\u00eb p\u00ebr Zotin; piqni sot at\u00eb q\u00eb duhet t\u00eb piqni dhe zieni at\u00eb q\u00eb duhet t\u00eb zieni; dhe \u00e7do gj\u00eb q\u00eb ju tepron, v\u00ebreni m\u00ebnjan\u00eb dhe ruajeni deri nes\u00ebr\".\n16:24 Ata pra e ruajt\u00ebn deri t\u00eb nes\u00ebrmen, ashtu si kishte urdh\u00ebruar Moisiu; dhe ushqimet e ruajtura nuk l\u00ebshuan er\u00eb t\u00eb keqe dhe nuk prodhuan krimba.\n16:25 Moisiu tha: \"Hajeni sot, se sot \u00ebsht\u00eb e shtuna e shenjt\u00eb e Zotit; sot nuk do ta gjeni n\u00ebp\u00ebr fushat.\n16:26 Mblidhni gjat\u00eb gjasht\u00eb dit\u00ebve; sepse dit\u00ebn e shtat\u00eb nuk do ta gjeni m\u00eb\".\n16:27 Dhe dit\u00ebn e shtat\u00eb ndodhi q\u00eb disa njer\u00ebz nga populli dol\u00ebn p\u00ebr ta mbledhur, por nuk e gjet\u00ebn.\n16:28 At\u00ebher\u00eb Zoti i tha Moisiut: \"Deri kur do t\u00eb kund\u00ebrshtoni t\u00eb zbatoni urdh\u00ebrimet e mia dhe ligjet e mia?\n16:29 Mos harroni q\u00eb Zoti ju ka dh\u00ebn\u00eb t\u00eb shtun\u00ebn; p\u00ebr k\u00ebt\u00eb ar\u00ebsye dit\u00ebn e gjasht\u00eb ju jep buk\u00eb p\u00ebr dy dit\u00eb. Secili t\u00eb q\u00ebndroj\u00eb n\u00eb vendin e tij; asnjeri t\u00eb mos dal\u00eb nga \u00e7adra e tij dit\u00ebn e shtat\u00eb\".\n16:30 K\u00ebshtu populli pushoi dit\u00ebn e shtat\u00eb.\n16:31 Dhe sht\u00ebpia e Izraelit e quajti Mana; ajo ishte e ngjashme me far\u00ebn e koriandrit, e bardh\u00eb dhe me shijen e revanis\u00eb q\u00eb b\u00ebhet me mjalt\u00eb.\n16:32 Pastaj Moisiu tha: \"Kjo \u00ebsht\u00eb ajo q\u00eb Zoti ka urdh\u00ebruar: \"Mbush me t\u00eb nj\u00eb omer, me q\u00ebllim q\u00eb t\u00eb ruhet p\u00ebr pasardh\u00ebsit tuaj, q\u00eb ata t\u00eb shohin buk\u00ebn q\u00eb ju b\u00ebra t\u00eb hani n\u00eb shkret\u00ebtir\u00eb, kur ju nxora nga vendi i Egjiptit\"\".\n16:33 Moisiu i tha pastaj Aaronit: \"Merr nj\u00eb en\u00eb, v\u00ebr brenda saj nj\u00eb omer t\u00eb plot\u00eb mane dhe vendose para Zotit, me q\u00ebllim q\u00eb t\u00eb ruhet p\u00ebr pasardh\u00ebsit tuaj\".\n16:34 Ashtu si e kishte urdh\u00ebruar Zoti Moisiun, Aaroni e vendosi para D\u00ebshmis\u00eb, q\u00eb t\u00eb ruhej.\n16:35 Dhe bijt\u00eb e Izraelit h\u00ebngr\u00ebn man\u00ebn dyzet vjet, deri sa arrit\u00ebn n\u00eb nj\u00eb vend t\u00eb banuar; h\u00ebngr\u00ebn man\u00ebn deri sa arrit\u00ebn n\u00eb kufirin e vendit t\u00eb Kanaanit.\n16:36 Omeri \u00ebsht\u00eb e dhjeta pjes\u00eb e ef\u00ebs.\n17:1 Pastaj t\u00ebr\u00eb asambleja e bijve t\u00eb Izraelit u nis nga shkret\u00ebtira e Sinit, duke marshuar me etapa sipas urdhrave t\u00eb Zotit, dhe u vendos n\u00eb Redifim. Por nuk kishte uj\u00eb t\u00eb pijsh\u00ebm p\u00ebr popullin.\n17:2 At\u00ebher\u00eb populli u grind me Moisiun dhe i tha: \"Na jep uj\u00eb p\u00ebr t\u00eb pir\u00eb\". Moisiu u p\u00ebrgjigj: \"Pse grindeni me mua? Pse tundoni Zotin?\".\n17:3 Atje populli pati etje p\u00ebr uj\u00eb dhe murmuriti kund\u00ebr Moisiut, duke th\u00ebn\u00eb: \"Pse na b\u00ebre t\u00eb ikim nga Egjipti q\u00eb t\u00eb vdesim nga etja ne, bijt\u00eb tan\u00eb dhe bag\u00ebtia jon\u00eb?\".\n17:4 K\u00ebshtu Moisiu i thirri Zotit, duke i th\u00ebn\u00eb: \"\u00c7far\u00eb t\u00eb b\u00ebj p\u00ebr k\u00ebt\u00eb popull? Edhe pak dhe ata do t\u00eb m\u00eb vrasin me gur\u00eb\".\n17:5 Zoti i tha Moisiut: \"Kalo para popullit dhe merr me vete disa pleq nga Izraeli; merr n\u00eb dor\u00eb edhe bastunin me t\u00eb cilin rrahe lumin, dhe nisu.\n17:6 Ja, un\u00eb do t\u00eb rri p\u00ebrpara teje, atje mbi shk\u00ebmbin n\u00eb Horeb; ti do t\u00eb rrah\u00ebsh shk\u00ebmbin, prej t\u00eb cilit do t\u00eb buroj\u00eb uj\u00eb dhe populli do t\u00eb pij\u00eb\". K\u00ebshtu b\u00ebri Moisiu para syve t\u00eb pleqve t\u00eb Izraelit.\n17:7 Prandaj e quajti k\u00ebt\u00eb vend Masa dhe Meriba p\u00ebr shkak t\u00eb grindjeve q\u00eb pati me bijt\u00eb e Izraelit, dhe sepse kishin tunduar Zotin, duke th\u00ebn\u00eb: \"A \u00ebsht\u00eb vall\u00eb Zoti n\u00eb mes nesh, apo jo?\".\n17:8 At\u00ebher\u00eb erdhi Amaleku p\u00ebr t\u00eb luftuar kund\u00ebr Izraelit n\u00eb Refidim.\n17:9 Dhe Moisiu i tha Jozueut: \"Zgjidh p\u00ebr ne disa burra dhe dil p\u00ebr t\u00eb luftuar kund\u00ebr Amalekut; nes\u00ebr do t\u00eb jem n\u00eb maj\u00eb t\u00eb kodr\u00ebs me shkopin e Per\u00ebndis\u00eb n\u00eb dor\u00eb\".\n17:10 Jozueu b\u00ebri ashtu si\u00e7 i kishte th\u00ebn\u00eb Moisiu dhe luftoi kund\u00ebr Amalekut, nd\u00ebrsa Moisiu, Aaroni dhe Huri u ngjit\u00ebn n\u00eb maj\u00eb t\u00eb kodr\u00ebs.\n17:11 Dhe ndodhi q\u00eb, kur Moisiu ngrinte dor\u00ebn e tij, Izraeli fitonte; p\u00ebrkundrazi, kur e ulte dor\u00ebn, fitonte Amaleku.\n17:12 Por duart e Moisiut ishin r\u00ebnduar, k\u00ebshtu q\u00eb ata mor\u00ebn nj\u00eb gur dhe ia vun\u00eb posht\u00eb, ai u ul mbi t\u00eb nd\u00ebrsa Aaroni dhe Huri ia mbanin duart, nj\u00ebri nga nj\u00eb krah, tjetri nga krahu tjet\u00ebr; k\u00ebshtu duart e tij mbet\u00ebn t\u00eb pal\u00ebvizura deri n\u00eb per\u00ebndimin e diellit.\n17:13 Prandaj Jozueu mundi Amalekun dhe njer\u00ebzit e tij, duke i prer\u00eb me shpata.\n17:14 Pastaj Zoti i tha Moisiut: \"Shkruaje k\u00ebt\u00eb ngjarje n\u00eb nj\u00eb lib\u00ebr, q\u00eb t\u00eb mos harrohet kurr\u00eb, dhe njofto Jozueun q\u00eb un\u00eb do ta fshij fare kujtimin e Amalekut n\u00ebn qiellin\".\n17:15 Moisiu nd\u00ebrtoi pastaj nj\u00eb altar, t\u00eb cilit i vuri emrin: \"Zoti \u00ebsht\u00eb flamuri im\"; dhe tha:\n17:16 \"Dora u ngrit kund\u00ebr fronit t\u00eb Zotit, dhe Zoti do t'i b\u00ebj\u00eb luft\u00eb Amalekut brez pas brezi\".\n18:1 Jethro, prift i Madianit, vjehrri i Moisiut, d\u00ebgjoi t\u00eb gjitha ato q\u00eb Per\u00ebndia kishte b\u00ebr\u00eb p\u00ebr Moisiun dhe p\u00ebr Izraelin popullin e tij: si e kishte nxjerr\u00eb Zoti Izraelin nga Egjipti.\n18:2 At\u00ebher\u00eb Jethro, vjehrri i Moisiut, mori Seforan, gruan e Moisiut,\n18:3 e cila i ishte kthyer, dhe dy bijt\u00eb e saj, prej t\u00eb cil\u00ebve nj\u00ebri quhej Gershom, (sepse Moisiu kishte th\u00ebn\u00eb: \"Kam qen\u00eb mik n\u00eb tok\u00eb t\u00eb huaj\")\n18:4 dhe tjetri Eliezer (sepse ai kishte th\u00ebn\u00eb: \"Per\u00ebndia i atit tim ka qen\u00eb ndihm\u00ebsi im dhe m\u00eb ka shp\u00ebtuar nga shpata e Faraonit\").\n18:5 Jethro, pra, vjehrri i Moisiut, erdhi te Moisiu bashk\u00eb me bijt\u00eb e tij dhe bashk\u00ebshorten e tij, n\u00eb shkret\u00ebtir\u00eb ku ishte vendosur ai, n\u00eb malin e Per\u00ebndis\u00eb.\n18:6 I kishte \u00e7uar fjal\u00eb Moisiut: \"Un\u00eb, Jethro, vjehrri yt, po vij te ti bashk\u00eb me gruan t\u00ebnde dhe dy bijt\u00eb e saj\".\n18:7 K\u00ebshtu Moisiu doli p\u00ebr t\u00eb takuar vjehrrin e tij, u p\u00ebrkul dhe e puthi; pyet\u00ebn nj\u00ebri tjetrin p\u00ebr sh\u00ebndetin e tyre, pastaj hyn\u00eb n\u00eb \u00e7ad\u00ebr.\n18:8 At\u00ebher\u00eb Moisiu i tregoi vjehrrit t\u00eb tij t\u00eb gjitha ato q\u00eb Zoti u kishte b\u00ebr\u00eb Faraonit dhe Egjiptasve p\u00ebr shkak t\u00eb Izraelit, t\u00eb gjitha fatkeq\u00ebsit\u00eb e p\u00ebsuara gjat\u00eb udh\u00ebtimit, dhe si i kishte shp\u00ebtuar Zoti.\n18:9 Dhe Jethro u g\u00ebzua p\u00ebr t\u00eb gjitha t\u00eb mirat q\u00eb Zoti i kishte b\u00ebr\u00eb Izraelit, duke e shp\u00ebtuar nga dora e Egjiptasve.\n18:10 Pastaj Jethro i tha: \"Bekuar qoft\u00eb Zoti, q\u00eb ju \u00e7liroi nga dora e Egjiptasve dhe nga dora e Faraonit, dhe \u00e7liroi popullin nga zgjedha e Egjiptasve!\n18:11 Tani e di q\u00eb Zoti \u00ebsht\u00eb m\u00eb i madhi nga t\u00ebr\u00eb per\u00ebndit\u00eb; po, ai ua v\u00ebrtetoi atyre me sa krenari, kur vepruan me kryelart\u00ebsi kund\u00ebr Izraelit\".\n18:12 Pastaj Jethro, vjehrri i Moisiut, mori nj\u00eb olokaust dhe disa fli p\u00ebr t'ia ofruar Per\u00ebndis\u00eb; dhe Aaroni dhe t\u00ebr\u00eb pleqt\u00eb e Izraelit erdh\u00ebn t\u00eb han\u00eb me vjehrrin e Moisiut p\u00ebrpara Per\u00ebndis\u00eb.\n18:13 Por ndodhi q\u00eb, t\u00eb nes\u00ebrmen, Moisiu u ul p\u00ebr t\u00eb gjykuar popullin; populli u mblodh rreth Moisiut q\u00eb nga m\u00ebngjesi deri n\u00eb mbr\u00ebmje.\n18:14 Kur vjehrri i Moisiut pa t\u00eb gjitha ato q\u00eb ky b\u00ebnte p\u00ebr popullin, tha: \"\u00c7'\u00ebsht\u00eb kjo q\u00eb b\u00ebn ti me popullin? Pse ulesh vet\u00ebm, dhe t\u00ebr\u00eb populli t\u00eb rri p\u00ebrqark nga m\u00ebngjesi deri n\u00eb mbr\u00ebmje?\".\n18:15 Moisiu iu p\u00ebrgjigj vjehrrit t\u00eb tij: \"Sepse populli vjen tek un\u00eb p\u00ebr t'u k\u00ebshilluar me Per\u00ebndin\u00eb.\n18:16 Kur ata kan\u00eb ndonj\u00eb problem, vin\u00eb tek un\u00eb, dhe un\u00eb gjykoj nj\u00ebrin dhe tjetrin dhe u b\u00ebj t\u00eb njohur kanunet e Per\u00ebndis\u00eb dhe ligjet e tij\".\n18:17 Por vjehrri i Moisiut i tha: \"Ajo q\u00eb b\u00ebn ti nuk shkon mir\u00eb.\n18:18 Do t\u00eb rraskapitesh m\u00eb n\u00eb fund, ti dhe ky popull q\u00eb \u00ebsht\u00eb me ty, sepse detyra q\u00eb ke marr\u00eb p\u00ebrsip\u00ebr \u00ebsht\u00eb shum\u00eb e v\u00ebshtir\u00eb. Nuk mund t'ia dal\u00ebsh n\u00eb krye vet\u00ebm.\n18:19 Tani d\u00ebgjom\u00eb; un\u00eb do t\u00eb t\u00eb jap nj\u00eb k\u00ebshill\u00eb dhe Per\u00ebndia qoft\u00eb me ty: p\u00ebrfaq\u00ebsoje ti popullin p\u00ebrpara Per\u00ebndis\u00eb dhe paraqitja Per\u00ebndis\u00eb problemet e tyre.\n18:20 M\u00ebsoju atyre statutet dhe ligjet dhe tregohu rrug\u00ebn n\u00ebp\u00ebr t\u00eb cil\u00ebn duhet t\u00eb ecin dhe at\u00eb q\u00eb duhet t\u00eb b\u00ebjn\u00eb.\n18:21 Por zgjidh n\u00eb mes t\u00eb t\u00eb gjith\u00eb popullit disa njer\u00ebz t\u00eb aft\u00eb q\u00eb kan\u00eb frik\u00eb nga Per\u00ebndia, njer\u00ebz t\u00eb besuar, q\u00eb e urrejn\u00eb fitimin e padrejt\u00eb dhe vendosi mbi popullin si krer\u00eb t\u00eb mij\u00ebrave, krer\u00eb t\u00eb qindrave, krer\u00eb t\u00eb pes\u00ebdhjetrave dhe krer\u00eb t\u00eb dhjetrave.\n18:22 Dhe lejo q\u00eb t\u00eb jen\u00eb ata q\u00eb do ta gjykojn\u00eb popullin n\u00eb \u00e7do koh\u00eb; ata do t\u00eb t\u00eb parashtrojn\u00eb \u00e7do problem me r\u00ebnd\u00ebsi t\u00eb madhe, nd\u00ebrsa p\u00ebr probleme t\u00eb vogla do t\u00eb vendosin vet\u00eb. K\u00ebshtu do t\u00eb jet\u00eb m\u00eb leht\u00eb p\u00ebr ty, dhe ata do ta mbajn\u00eb pesh\u00ebn bashk\u00eb me ty.\n18:23 N\u00eb qoft\u00eb se ti vepron k\u00ebshtu, dhe k\u00ebshtu t\u00eb urdh\u00ebron Per\u00ebndia, mund t\u00eb mbahesh; dhe t\u00ebr\u00eb ky popull do t\u00eb arrij\u00eb faqebardh\u00eb n\u00eb vendin e caktuar p\u00ebr t\u00eb\".\n18:24 Moisiu e d\u00ebgjoi z\u00ebrin e vjehrrit t\u00eb tij, dhe b\u00ebri gjith\u00e7ka q\u00eb i kishte th\u00ebn\u00eb.\n18:25 K\u00ebshtu Moisiu zgjodhi n\u00eb t\u00ebr\u00eb Izraelin disa njer\u00ebz t\u00eb aft\u00eb dhe i vuri si krer\u00eb t\u00eb popullit: krer\u00eb t\u00eb mij\u00ebrave, krer\u00eb t\u00eb qindrave, krer\u00eb t\u00eb pes\u00ebdhjetrave dhe krer\u00eb t\u00eb dhjetrave.\n18:26 K\u00ebshtu ata e gjykonin popullin n\u00eb \u00e7do koh\u00eb; \u00e7\u00ebshtjet e v\u00ebshtira ia parashtronin Moisiut, por \u00e7do problem t\u00eb vog\u00ebl e zgjidhnin vet\u00eb.\n18:27 Pastaj Moisiu u nda nga vjehrri i tij, i cili u kthye n\u00eb vendin e vet.\n19:1 Dit\u00ebn e par\u00eb t\u00eb muajit t\u00eb tret\u00eb nga dalja prej vendit t\u00eb Egjiptit, po at\u00eb dit\u00eb, bijt\u00eb e Izraelit arrit\u00ebn n\u00eb shkret\u00ebtir\u00ebn e Sinait.\n19:2 T\u00eb nisur nga Refidimi, ata arrit\u00ebn n\u00eb shkret\u00ebtir\u00ebn e Sinait dhe fushuan aty; Izraeli e ngriti kampin e tij p\u00ebrball\u00eb malit.\n19:3 Pastaj Moisiu u ngjit drejt Per\u00ebndis\u00eb; dhe Zoti i thirri nga mali, duke i th\u00ebn\u00eb: \"K\u00ebshtu do t'i thuash sht\u00ebpis\u00eb s\u00eb Jakobit dhe k\u00ebt\u00eb do t'u njoftosh bijve t\u00eb Izraelit:\n19:4 \"Ju e pat\u00eb at\u00eb q\u00eb u b\u00ebra Egjiptasve, dhe si ju solla mbi krah\u00eb shqiponje pran\u00eb meje.\n19:5 Prandaj, n\u00eb qoft\u00eb se do ta d\u00ebgjoni me v\u00ebmendje z\u00ebrin tim dhe zbatoni bes\u00eblidhjen time, do t\u00eb jeni thesari im i ve\u00e7ant\u00eb nd\u00ebrmjet t\u00ebr\u00eb popujve, sepse gjith\u00eb toka \u00ebsht\u00eb imja.\n19:6 Dhe do t\u00eb jeni p\u00ebr mua nj\u00eb mbret\u00ebri prift\u00ebrinjsh dhe nj\u00eb komb i shenjt\u00eb. K\u00ebto jan\u00eb fjal\u00ebt q\u00eb do t'u thuash bijve t\u00eb Izraelit\"\".\n19:7 At\u00ebher\u00eb Moisiu d\u00ebrgoi e thirri pleqt\u00eb e popullit, dhe u tha t\u00ebr\u00eb k\u00ebto fjal\u00eb q\u00eb Zoti kishte urdh\u00ebruar t\u00eb thoshte.\n19:8 Dhe t\u00ebr\u00eb populli u p\u00ebrgjigj bashk\u00eb dhe tha: \"Ne do t\u00eb b\u00ebjm\u00eb gjith\u00e7ka q\u00eb ka th\u00ebn\u00eb Zoti\". K\u00ebshtu Moisiu i raportoi Zotit fjal\u00ebt e popullit.\n19:9 Dhe Zoti i tha Moisiut: \"Ja, un\u00eb do t\u00eb vij te ti n\u00eb nj\u00eb re t\u00eb dendur, me q\u00ebllim q\u00eb populli t\u00eb d\u00ebgjoj\u00eb kur un\u00eb do t\u00eb flas me ty, dhe t\u00eb t\u00eb besoj\u00eb p\u00ebr gjithnj\u00eb\". Pastaj Moisiu i tregoi Zotit fjal\u00ebt e popullit.\n19:10 At\u00ebher\u00eb Zoti i tha Moisiut: \"Shko te populli, shenjt\u00ebroje at\u00eb sot dhe nes\u00ebr, dhe b\u00ebj q\u00eb t\u00eb laj\u00eb rrobat.\n19:11 Dhe t\u00eb jen\u00eb gati p\u00ebr dit\u00ebn e tret\u00eb, sepse dit\u00ebn e tret\u00eb Zoti do t\u00eb zbres\u00eb mbi malin e Sinait para syve t\u00eb t\u00ebr\u00eb popullit.\n19:12 Ti do t\u00eb p\u00ebrcaktosh rreth e qark kufij p\u00ebr popullin dhe do t\u00eb thuash: Ruhuni se ngjiteni n\u00eb mal ose prekni skajet e tij. Kushdo q\u00eb do t\u00eb prek\u00eb malin do t\u00eb d\u00ebnohet me vdekje.\n19:13 Asnj\u00eb dor\u00eb nuk do ta prek\u00eb, por do t\u00eb vritet me gur\u00eb ose do t\u00eb shpohet me shigjeta, qoft\u00eb njeri ose kafsh\u00eb; nuk do t\u00eb mbetet gjall\u00eb. Kur briri t\u00eb d\u00ebgjohet shtruar, at\u00ebher\u00eb t\u00eb ngjiten mbi mal\".\n19:14 K\u00ebshtu Moisiu zbriti nga mali drejt popullit; shenjt\u00ebroi popullin dhe ata i lan\u00eb rrobat e tyre.\n19:15 Pastaj i tha popullit: \"B\u00ebhuni gati brenda tri dit\u00ebve; mos iu afroni grave\".\n19:16 Dit\u00ebn e tret\u00eb, sa u b\u00eb m\u00ebngjes, pati bubullima dhe vet\u00ebtima; mbi mal doli nj\u00eb re e dendur dhe u d\u00ebgjua nj\u00eb z\u00eb shum\u00eb i fort\u00eb borie; dhe t\u00ebr\u00eb populli q\u00eb ishte n\u00eb kamp u drodh.\n19:17 Pastaj Moisiu e nxori popullin nga kampi p\u00ebr ta \u00e7uar p\u00ebrball\u00eb Per\u00ebndis\u00eb; dhe ata q\u00ebndruan n\u00eb k\u00ebmb\u00ebt e malit.\n19:18 Mali i Sinait ishte t\u00ebr\u00eb tym, sepse Zoti kishte zbritur mbi t\u00eb n\u00eb zjarr; tymi i tij ngrihej si tymi i nj\u00eb furre, dhe t\u00ebr\u00eb mali dridhej fort.\n19:19 Nd\u00ebrsa z\u00ebri i boris\u00eb po b\u00ebhej gjithnj\u00eb m\u00eb i fort\u00eb, Moisiu fliste, dhe Per\u00ebndia i p\u00ebrgjigjej me nj\u00eb z\u00eb gj\u00ebmues.\n19:20 Zoti zbriti pra mbi malin e Sinait, n\u00eb maj\u00eb t\u00eb tij; pastaj Zoti thirri Moisiun n\u00eb maj\u00eb t\u00eb malit dhe Moisiu u ngjit atje.\n19:21 Dhe Zoti i tha Moisiut: \"Zbrit dhe paralajm\u00ebro popullin solemnisht, q\u00eb t\u00eb mos sulet drejt Zotit p\u00ebr ta par\u00eb, dhe k\u00ebshtu shum\u00eb prej tyre t\u00eb gjejn\u00eb vdekjen.\n19:22 Edhe prift\u00ebrinjt\u00eb q\u00eb do t'i afrohen Zotit t\u00eb shenjt\u00ebrohen, q\u00eb Zoti t\u00eb mos sulet kund\u00ebr tyre\".\n19:23 Moisiu i tha Zotit: \"Populli nuk mund t\u00eb ngjitej mbi malin e Sinait, sepse ti na ke urdh\u00ebruar solemnisht, duke th\u00ebn\u00eb: \"V\u00ebr kufi rreth malit dhe shenjt\u00ebroje\"\".\n19:24 Por Zoti i tha: \"Shko, zbrit posht\u00eb; pastaj ngjitu, ti edhe Aaroni bashk\u00eb me ty; por prift\u00ebrinjt\u00eb dhe populli t\u00eb mos sulen p\u00ebr t'u ngjitur te Zoti, q\u00eb ai t\u00eb mos u sulet atyre\".\n19:25 K\u00ebshtu Moisiu zbriti te populli dhe i foli atij.\n20:1 At\u00ebher\u00eb Per\u00ebndia shqiptoi t\u00ebr\u00eb k\u00ebto fjal\u00eb, duke th\u00ebn\u00eb:\n20:2 \"Un\u00eb jam Zoti, Per\u00ebndia yt, q\u00eb t\u00eb nxori nga vendi i Egjiptit, nga sht\u00ebpia e skllav\u00ebris\u00eb.\n20:3 Nuk do t\u00eb kesh per\u00ebndi t\u00eb tjer\u00eb para meje.\n20:4 Nuk do t\u00eb b\u00ebsh skulptur\u00eb ose sh\u00ebmb\u00eblltyr\u00eb t\u00eb asnj\u00eb gj\u00ebje q\u00eb ndodhet aty n\u00eb qiejt ose k\u00ebtu posht\u00eb n\u00eb tok\u00eb ose n\u00eb uj\u00ebrat n\u00ebn tok\u00eb.\n20:5 Nuk do t\u00eb p\u00ebrkulesh para tyre dhe as do t'i sh\u00ebrbesh, sepse un\u00eb, Zoti, Per\u00ebndia yt, jam nj\u00eb Per\u00ebndi xheloz q\u00eb d\u00ebnon padrejt\u00ebsin\u00eb e et\u00ebrve mbi f\u00ebmijve t\u00eb tyre deri n\u00eb brezin e tret\u00eb dhe t\u00eb kat\u00ebrt t\u00eb atyre q\u00eb m\u00eb urrejn\u00eb,\n20:6 dhe un\u00eb p\u00ebrdor dashamir\u00ebsi p\u00ebr mij\u00ebra, p\u00ebr ata q\u00eb m\u00eb duan dhe q\u00eb zbatojn\u00eb urdh\u00ebrimet e mia.\n20:7 Nuk do ta p\u00ebrdor\u00ebsh emrin e Zotit, t\u00eb Per\u00ebndis\u00eb t\u00ebnd, kot, sepse Zoti nuk do t\u00eb l\u00ebr\u00eb t\u00eb pand\u00ebshkuar at\u00eb q\u00eb p\u00ebrdor kot emrin e tij.\n20:8 Mbaje mend dit\u00ebn e shtun\u00eb p\u00ebr ta shenjt\u00ebruar.\n20:9 Do t\u00eb punosh gjasht\u00eb dit\u00eb dhe n\u00eb ato do t\u00eb b\u00ebsh t\u00eb gjith\u00eb pun\u00ebn t\u00ebnde;\n20:10 por dita e shtat\u00eb \u00ebsht\u00eb e shtuna, e shenjt\u00eb p\u00ebr Zotin, Per\u00ebndin\u00eb t\u00ebnd; nuk do t\u00eb b\u00ebsh n\u00eb at\u00eb dit\u00eb asnj\u00eb pun\u00eb, as ti, as biri yt, as bija jote, as sh\u00ebrb\u00ebtori yt, as sh\u00ebrb\u00ebtorja jote, as kafsh\u00ebt e tua, as i huaji q\u00eb ndodhet brenda portave t\u00eb tua;\n20:11 sepse n\u00eb gjasht\u00eb dit\u00eb Zoti krijoi qiejt dhe tok\u00ebn, detin dhe gjith\u00e7ka q\u00eb \u00ebsht\u00eb n\u00eb to, dhe dit\u00ebn e shtun\u00eb ai pushoi; prandaj Zoti e ka bekuar dit\u00ebn e shabatit dhe e ka shenjt\u00ebruar at\u00eb.\n20:12 Do t\u00eb nderosh atin t\u00ebnd dhe n\u00ebn\u00ebn t\u00ebnde, me q\u00ebllim q\u00eb dit\u00ebt e tua t\u00eb jen\u00eb t\u00eb gjata mbi tok\u00ebn q\u00eb Zoti, Per\u00ebndia yt, po t\u00eb jep.\n20:13 Nuk do t\u00eb vras\u00ebsh.\n20:14 Nuk do t\u00eb shkel\u00ebsh besnik\u00ebrin\u00eb bashk\u00ebshortore.\n20:15 Nuk do t\u00eb vjedh\u00ebsh.\n20:16 Nuk do t\u00eb b\u00ebsh d\u00ebshmi t\u00eb rreme kund\u00ebr t\u00eb af\u00ebrmit t\u00ebnd.\n20:17 Nuk do t\u00eb d\u00ebshirosh sht\u00ebpin\u00eb e t\u00eb af\u00ebrmit t\u00ebnd; nuk do t\u00eb d\u00ebshirosh gruan e t\u00eb af\u00ebrmit t\u00ebnd, as sh\u00ebrb\u00ebtorin e tij, as sh\u00ebrb\u00ebtoren e tij, as lop\u00ebn e tij, as gomarin e tij, as asgj\u00eb tjet\u00ebr q\u00eb \u00ebsht\u00eb e t\u00eb af\u00ebrmit t\u00ebnd\".\n20:18 Tani t\u00ebr\u00eb populli d\u00ebgjonte bubullimat, tingullin e boris\u00eb dhe shihte shkreptimat dhe malin q\u00eb nxirrte tym. Para k\u00ebsaj pamjeje, populli dridhej dhe q\u00ebndronte larg.\n20:19 Prandaj ata i than\u00eb Moisiut: \"Fol ti me ne dhe ne do t\u00eb t\u00eb d\u00ebgjojm\u00eb, por t\u00eb mos na flas\u00eb Per\u00ebndia q\u00eb t\u00eb mos vdesim\".\n20:20 Moisiu i tha popullit: \"Mos u trembni, sepse Per\u00ebndia erdhi q\u00eb t'ju provoj\u00eb, dhe me q\u00ebllim q\u00eb frika e tij t\u00eb jet\u00eb gjithmon\u00eb para jush, dhe k\u00ebshtu t\u00eb mos m\u00ebkatoni\".\n20:21 Populli, pra, q\u00ebndronte larg, por Moisiu iu afrua err\u00ebsir\u00ebs s\u00eb dendur ku ndodhej Per\u00ebndia.\n20:22 Pastaj Zoti i tha Moisiut: \"Do t'u thuash k\u00ebshtu bijve t\u00eb Izraelit: \"Ju vet\u00eb e pat\u00eb q\u00eb kam folur me ju nga qielli.\n20:23 Nuk do t\u00eb b\u00ebni per\u00ebndi t\u00eb tjera af\u00ebr meje; nuk do t\u00eb b\u00ebni per\u00ebndi prej argjendi ose prej ari.\n20:24 Do t\u00eb b\u00ebsh p\u00ebr mua nj\u00eb altar prej dheu dhe mbi t\u00eb do t\u00eb ofrosh olokaustet e tua, flit\u00eb e tua t\u00eb fal\u00ebnderimit, delet dhe qet\u00eb e tua; n\u00eb \u00e7do vend ku do t\u00eb b\u00ebj q\u00eb emri im t\u00eb kujtohet, do t\u00eb vij te ti dhe do t\u00eb t\u00eb bekoj.\n20:25 Dhe n\u00eb rast se do t\u00eb nd\u00ebrtosh p\u00ebr mua nj\u00eb altar me gur\u00eb, nuk do ta nd\u00ebrtosh me gur\u00eb t\u00eb latuar; sepse duke ngritur mbi to dalt\u00ebn do t'i ndot\u00ebsh.\n20:26 Dhe nuk do t\u00eb ngjitesh n\u00eb altarin tim me an\u00eb shkallaresh, me q\u00ebllim q\u00eb mbi t\u00eb t\u00eb mos zbulohet lakuriq\u00ebsia jote\"\".\n21:1 \"Tani k\u00ebto jan\u00eb ligjet q\u00eb do t'u v\u00ebsh para tyre:\n21:2 N\u00eb rast se blen nj\u00eb skllav hebre, ai do t\u00eb t\u00eb sh\u00ebrbej\u00eb gjasht\u00eb vjet; por vitin e shtat\u00eb do t\u00eb shkoj\u00eb i lir\u00eb, pa paguar asgj\u00eb.\n21:3 N\u00eb rast se ka ardhur vet\u00ebm, do t\u00eb shkoj\u00eb vet\u00ebm; po t\u00eb kishte grua, e shoqja do t\u00eb shkoj\u00eb bashk\u00eb me t\u00eb.\n21:4 N\u00eb qoft\u00eb se zot\u00ebria e tij i jep grua dhe kjo i lind bij e bija, gruaja dhe f\u00ebmij\u00ebt e saj do t\u00eb jen\u00eb t\u00eb zot\u00ebris\u00eb, dhe ai do t\u00eb shkoj\u00eb vet\u00ebm.\n21:5 Por n\u00eb qoft\u00eb se skllavi thot\u00eb haptazi: \"Un\u00eb e dua zot\u00ebrin\u00eb time, gruan time dhe f\u00ebmij\u00ebt e mi, dhe nuk dua t\u00eb shkoj i lir\u00eb\",\n21:6 at\u00ebher\u00eb pronari e tij do t'ia afroj\u00eb Per\u00ebndis\u00eb dhe do ta avit\u00eb te dera ose te shtalka; pastaj pronari e tij do t'i shpoj\u00eb veshin me nj\u00eb f\u00ebndyell; dhe ai do t'i sh\u00ebrbej\u00eb p\u00ebr gjithnj\u00eb.\n21:7 N\u00eb rast se dikush shet bij\u00ebn e tij si sh\u00ebrb\u00ebtore, ajo nuk do t\u00eb shkoj\u00eb ashtu si shkojn\u00eb skllev\u00ebrit.\n21:8 N\u00eb qoft\u00eb se ajo nuk i p\u00eblqen zot\u00ebris\u00eb s\u00eb saj, q\u00eb e kishte marr\u00eb p\u00ebr vete, ai do ta l\u00ebr\u00eb t\u00eb shpengohet; por nuk do t\u00eb ket\u00eb t\u00eb drejt\u00ebn tua shes\u00eb njer\u00ebzve t\u00eb huaj, sepse kjo do t'ishte ta trajtosh me mashtrim.\n21:9 Dhe n\u00eb qoft\u00eb se e marton me birin e tij, do ta trajtoj\u00eb n\u00eb baz\u00eb t\u00eb s\u00eb drejt\u00ebs t\u00eb t\u00eb bijave.\n21:10 N\u00eb rast se merr nj\u00eb grua tjet\u00ebr, ai nuk do t\u00eb pak\u00ebsoj\u00eb ushqimin dhe veshmbathjen e saj, as edhe bashk\u00ebbanimin e saj.\n21:11 N\u00eb rast se nuk b\u00ebn k\u00ebto tri gj\u00ebra p\u00ebr t\u00eb, ajo do t\u00eb shkoj\u00eb pa dh\u00ebn\u00eb asgj\u00eb, pa paguar \u00e7mim.\n21:12 Kush rreh nj\u00eb njeri dhe p\u00ebr k\u00ebt\u00eb shkak ky vdes, do t\u00eb d\u00ebnohet me vdekje.\n21:13 N\u00eb qoft\u00eb se nuk i ka ngritur kurrfar\u00eb prite, por Per\u00ebndia ka b\u00ebr\u00eb q\u00eb t'i bjer\u00eb n\u00eb dor\u00eb, un\u00eb do t\u00eb caktoj nj\u00eb vend ku ai mund t\u00eb gjej\u00eb streh\u00eb.\n21:14 N\u00eb qoft\u00eb se ndokush vepron me paramendim kund\u00ebr t\u00eb af\u00ebrmit t\u00eb tij p\u00ebr ta vrar\u00eb me mashtrim, ti do ta shk\u00ebput\u00ebsh edhe nga altari im, p\u00ebr t\u00eb siguruar vdekjen e tij.\n21:15 Kush rreh atin ose n\u00ebn\u00ebn e tij do t\u00eb d\u00ebnohet me vdekje.\n21:16 Kush rr\u00ebmben nj\u00eb njeri dhe e shet, ose gjendet n\u00eb duart e tij, do t\u00eb d\u00ebnohet me vdekje.\n21:17 Kush mallkon t\u00eb atin ose t\u00eb \u00ebm\u00ebn do t\u00eb d\u00ebnohet me vdekje.\n21:18 N\u00eb qoft\u00eb se dy njer\u00ebz zihen dhe nj\u00ebri prej tyre godet tjetrin me gur ose me grusht dhe ky nuk vdes, por duhet t\u00eb q\u00ebndroj\u00eb n\u00eb shtrat,\n21:19 dhe n\u00eb se pastaj ngrihet dhe ec\u00ebn jasht\u00eb duke u mb\u00ebshtetur me bastun, ai q\u00eb e ka goditur do t\u00eb nxirret i pafajsh\u00ebm; do ta zhd\u00ebmtoj\u00eb vet\u00ebm p\u00ebr koh\u00ebn e humbur dhe do ta kuroj\u00eb deri n\u00eb sh\u00ebrim t\u00eb plot\u00eb.\n21:20 N\u00eb qoft\u00eb se dikush rreh skllavin ose skllaven e tij me bastun, dhe ai ose ajo i vdesin n\u00eb dor\u00eb, zot\u00ebria do t\u00eb d\u00ebnohet;\n21:21 por n\u00eb rast se mbijeton nj\u00eb ose dy dit\u00eb, nuk do t\u00eb d\u00ebnohet, sepse \u00ebsht\u00eb pron\u00eb e tij.\n21:22 N\u00eb rast se disa grinden dhe rrahin nj\u00eb grua me barr\u00eb aq sa ajo t\u00eb d\u00ebshtoj\u00eb, por nuk p\u00ebson d\u00ebme t\u00eb tjera, rrah\u00ebsi do t\u00eb gjobitet aq sa t'i k\u00ebrkoj\u00eb bashk\u00ebshorti i gruas; ai do t\u00eb paguaj\u00eb zhd\u00ebmtimin simbas p\u00ebrcaktimit t\u00eb gjykat\u00ebsve;\n21:23 por po t\u00eb jet\u00eb se rrjedh ndonj\u00eb d\u00ebm, do t\u00eb jap\u00ebsh jet\u00eb p\u00ebr jet\u00eb,\n21:24 sy p\u00ebr sy, dh\u00ebmb p\u00ebr dh\u00ebmb, dor\u00eb p\u00ebr dor\u00eb, k\u00ebmb\u00eb p\u00ebr k\u00ebmb\u00eb,\n21:25 djegie p\u00ebr djegie, plag\u00eb p\u00ebr plag\u00eb, mbretje p\u00ebr mbretje.\n21:26 N\u00eb rast se dikush godet syrin e skllavit ose t\u00eb skllaves s\u00eb tij dhe ai humbet, do t'i l\u00ebr\u00eb t\u00eb shkojn\u00eb t\u00eb lir\u00eb si kompensim p\u00ebr syrin e humbur.\n21:27 Dhe n\u00eb rast se shkakton r\u00ebnien e nj\u00eb dh\u00ebmbi skllavit ose skllaves s\u00eb tij, do t'i l\u00ebr\u00eb t\u00eb shkojn\u00eb t\u00eb lir\u00eb si kompensim p\u00ebr dh\u00ebmbin e humbur.\n21:28 N\u00eb rast se nj\u00eb ka godet p\u00ebr vdekje me brir\u00ebt e tij nj\u00eb burr\u00eb ose nj\u00eb grua, kau duhet t\u00eb vritet me gur\u00eb dhe mishi i tij nuk do t\u00eb hahet; por i zoti i kaut do t\u00eb konsiderohet i pafajsh\u00ebm.\n21:29 Por n\u00eb qoft\u00eb se kau e kishte zakon prej koh\u00ebsh t\u00eb plagoste me brir\u00ebt e tij dhe i zoti ishte paralajm\u00ebruar, por nuk e kishte mbajtur t\u00eb mbyllur, dhe kau pastaj vret nj\u00eb burr\u00eb o nj\u00eb grua, kau do t\u00eb vritet me gur\u00eb dhe i zoti gjithashtu do t\u00eb vritet.\n21:30 N\u00eb qoft\u00eb se i caktohet nj\u00eb \u00e7mim p\u00ebr shpengim, ai duhet t\u00eb jap\u00eb p\u00ebr t\u00eb shpenguar jet\u00ebn e tij aq sa i kan\u00eb caktuar.\n21:31 N\u00eb qoft\u00eb se kau godet nj\u00eb bir ose nj\u00eb bij\u00eb, do t\u00eb veprohet ndaj tij sipas po k\u00ebtij ligji.\n21:32 N\u00eb qoft\u00eb se kau godet nj\u00eb skllav ose nj\u00eb skllave, i zoti i kaut do t'i paguaj\u00eb t\u00eb zotit t\u00eb skllavit tridhjet\u00eb sikla argjendi dhe kau do t\u00eb vritet me gur\u00eb.\n21:33 N\u00eb qoft\u00eb se dikush hap nj\u00eb grop\u00eb, ose dikush g\u00ebrmon nj\u00eb grop\u00eb dhe nuk e mbulon, dhe nj\u00eb ka ose nj\u00eb gomar bien brenda,\n21:34 pronari i grop\u00ebs do ta paguaj\u00eb zhd\u00ebmtimin; ai do t'i paguaj\u00eb me para pronarit vleft\u00ebn e kafsh\u00ebs dhe kafsha e ngordhur do t\u00eb jet\u00eb e tij.\n21:35 N\u00eb qoft\u00eb se kau i nj\u00eb njeriu godet p\u00ebr vdekje kaun e nj\u00eb tjetri, do t\u00eb shitet kau i gjall\u00eb dhe do t\u00eb ndahet \u00e7mimi i tij; edhe kau i ngordhur do t\u00eb ndahet midis tyre.\n21:36 Por n\u00eb qoft\u00eb se dihet se ky ka e kishte zakon prej kohe t\u00eb godiste me brir\u00ebt, dhe i zoti nuk e ka mbajtur t\u00eb mbyllur, ky do t\u00eb paguaj\u00eb ka p\u00ebr ka dhe kafsha e ngordhur do t\u00eb jet\u00eb e tij\".\n22:1 \"N\u00eb rast se ndokush vjedh nj\u00eb ka a nj\u00eb dele dhe i vret ose i shet, do t\u00eb kthej\u00eb pes\u00eb qe p\u00ebr kaun dhe kat\u00ebr dele p\u00ebr delen.\n22:2 N\u00eb rast se vjedh\u00ebsi, i kapur kur po b\u00ebn nj\u00eb thyerje, rrihet dhe vdes, pronari nuk \u00ebsht\u00eb fajtor p\u00ebr vrasjen e tij.\n22:3 N\u00eb rast se dielli ishte ngritur kur ndodhi ngjarja, ai \u00ebsht\u00eb fajtor p\u00ebr vrasje. Hajduti duhet ta laj\u00eb d\u00ebmin; dhe po t\u00eb jet\u00eb se nuk ka me se ta laj\u00eb, shitet p\u00ebr vjedhjen e kryer prej tij.\n22:4 N\u00eb rast se gj\u00ebja e vjedhur, qoft\u00eb ka ose gomar ose dele, gjendet e gjall\u00eb n\u00eb duart e tij, do t\u00eb kthej\u00eb dyfishin e saj.\n22:5 N\u00eb rast se ndokush d\u00ebmton nj\u00eb ar\u00eb ose nj\u00eb vresht, duke i l\u00ebshuar kafsh\u00ebt e tij t\u00eb kullosin n\u00eb ar\u00ebn e nj\u00eb tjetri, do ta laj\u00eb d\u00ebmin e b\u00ebr\u00eb me at\u00eb q\u00eb ka m\u00eb t\u00eb mir\u00eb n\u00eb ar\u00ebn dhe n\u00eb vreshtin e tij.\n22:6 N\u00eb rast se nj\u00eb zjarr p\u00ebrhapet dhe shtrihet deri te ferrat k\u00ebshtu q\u00eb digjet gruri n\u00eb duaj ose gruri n\u00eb k\u00ebmb\u00eb ose ara, ai q\u00eb ka ndezur zjarrin do ta laj\u00eb d\u00ebmin.\n22:7 N\u00eb rast se dikush i jep fqinjit t\u00eb vet para ose sende p\u00ebr ruajtje, dhe k\u00ebto vidhen nga sht\u00ebpia e k\u00ebtij, n\u00eb rast se gjendet vjedh\u00ebsi, ai do t\u00eb kthej\u00eb dyfishin.\n22:8 N\u00eb rast se nuk gjendet vjedh\u00ebsi, i zoti i sht\u00ebpis\u00eb do t\u00eb d\u00ebrgohet para Per\u00ebndis\u00eb p\u00ebr t'u betuar se nuk ka v\u00ebn\u00eb dor\u00eb mbi pasurin\u00eb e fqinjit t\u00eb tij.\n22:9 P\u00ebr \u00e7far\u00ebdo lloj krimi, fjala vjen qoft\u00eb edhe p\u00ebr nj\u00eb ka, nj\u00eb gomar, nj\u00eb dele, nj\u00eb veshje apo \u00e7far\u00ebdo sendi t\u00eb humbur q\u00eb nj\u00eb tjet\u00ebr thot\u00eb se \u00ebsht\u00eb i tij, \u00e7\u00ebshtja e t\u00eb dy pal\u00ebve do t\u00eb shtrohet para Per\u00ebndis\u00eb; ai q\u00eb Per\u00ebndia do t\u00eb d\u00ebnoj\u00eb, do t'i kthej\u00eb dyfishin fqinjit t\u00eb tij.\n22:10 N\u00eb qoft\u00eb se ndokush i jep p\u00ebr ruajtje fqinjit t\u00eb tij nj\u00eb gomar, nj\u00eb ka, nj\u00eb dele apo \u00e7far\u00ebdo lloj tjet\u00ebr kafshe, dhe kjo ngordh ose plagoset ose dhe merret pa e par\u00eb njeri,\n22:11 t\u00eb dy pal\u00ebt do t\u00eb betohen para Zotit p\u00ebr t\u00eb m\u00ebsuar n\u00eb se marr\u00ebsi n\u00eb dor\u00ebzim nuk ka v\u00ebn\u00eb dor\u00eb mbi pasurin\u00eb e fqinjit t\u00eb tij. I zoti i gj\u00ebs\u00eb do t\u00eb pranoj\u00eb betimin, dhe tjetri nuk do t\u00eb jet\u00eb i detyruar t\u00eb laj\u00eb d\u00ebmet.\n22:12 Por n\u00eb qoft\u00eb se gj\u00ebja i \u00ebsht\u00eb vjedhur, ai duhet ta laj\u00eb d\u00ebmin q\u00eb ka p\u00ebsuar i zoti.\n22:13 N\u00eb qoft\u00eb se kafsha \u00ebsht\u00eb shqyer, do ta \u00e7oj\u00eb si prov\u00eb, dhe nuk do t\u00eb jet\u00eb i detyruar t\u00eb d\u00ebmshp\u00ebrblej\u00eb kafsh\u00ebn e shqyer.\n22:14 N\u00eb qoft\u00eb se dikush merr hua nga fqinji i tij nj\u00eb kafsh\u00eb, dhe kjo plagoset apo ngordh kur i zoti nuk \u00ebsht\u00eb i pranish\u00ebm, ai duhet t\u00eb d\u00ebmshp\u00ebrblej\u00eb d\u00ebmin.\n22:15 N\u00eb qoft\u00eb se i zoti \u00ebsht\u00eb i pranish\u00ebm, nuk do t\u00eb d\u00ebmshp\u00ebrblej\u00eb d\u00ebmin; n\u00eb qoft\u00eb se kafsha \u00ebsht\u00eb marr\u00eb me qira, ajo p\u00ebrfshihet n\u00eb \u00e7mimin e qiras\u00eb.\n22:16 N\u00eb qoft\u00eb se dikush mashtron nj\u00eb vajz\u00eb ende t\u00eb pafejuar dhe bie n\u00eb shtrat me t\u00eb, duhet t\u00eb paguaj\u00eb p\u00ebr paj\u00ebn e saj dhe ta marr\u00eb p\u00ebr grua.\n22:17 N\u00eb qoft\u00eb se ati refuzon prerazi t'ia jap\u00eb, ai do t\u00eb paguaj\u00eb shum\u00ebn e k\u00ebrkuar p\u00ebr paj\u00ebn e vajzave t\u00eb virgj\u00ebra.\n22:18 Nuk do ta l\u00ebsh t\u00eb jetoj\u00eb shtrig\u00ebn.\n22:19 Kush \u00e7ift\u00ebzohet me nj\u00eb kafsh\u00eb do t\u00eb d\u00ebnohet me vdekje.\n22:20 Kush i b\u00ebn flijime nj\u00eb per\u00ebndie tjet\u00ebr, ve\u00e7 Zotit, do t\u00eb shfaroset.\n22:21 Mos keqtrajto t\u00eb huajin dhe mos e mundo, sepse edhe ju ishit t\u00eb huaj n\u00eb vendin e Egjiptit.\n22:22 Nuk do t\u00eb mundosh asnj\u00eb grua t\u00eb ve, as asnj\u00eb jetim.\n22:23 N\u00eb rast se i mundon ata n\u00eb nj\u00eb far\u00eb m\u00ebnyre dhe ata b\u00ebrtasin n\u00eb drejtimin tim, un\u00eb do ta d\u00ebgjoj pa tjet\u00ebr britm\u00ebn e tyre;\n22:24 do t\u00eb zem\u00ebrohem dhe do t'ju vras me shpat\u00eb; grat\u00eb tuaja do t\u00eb mbeten t\u00eb veja dhe bijt\u00eb tuaj jetim\u00eb.\n22:25 N\u00eb rast se ti i jep para hua dikujt nga populli yt, t\u00eb varfrin q\u00eb \u00ebsht\u00eb me ty, nuk do ta trajtosh si fajdexhi; nuk do t'i imponosh asnj\u00eb kamat\u00eb.\n22:26 N\u00eb qoft\u00eb se merr peng rrob\u00ebn e fqinjit t\u00ebnd, do t'ia kthesh para se t\u00eb per\u00ebndoj\u00eb dielli,\n22:27 sepse ajo \u00ebsht\u00eb e vetmja mbules\u00eb e tij dhe veshja me t\u00eb cil\u00ebn mb\u00ebshtjell trupin. Me se tjet\u00ebr mund t\u00eb flinte ai? Dhe po t\u00eb ndodh\u00eb q\u00eb ai t\u00eb m\u00eb drejtohet mua, un\u00eb do ta d\u00ebgjoj, sepse jam m\u00ebshir\u00ebplot\u00eb.\n22:28 Mos blasfemo Per\u00ebndin\u00eb dhe mos mallko princin e popullit t\u00ebnd.\n22:29 Mos ngurro t\u00eb m\u00eb jap\u00ebsh detyrimin nga korrja jote dhe nga ajo q\u00eb rrjedh nga mokrrat e tua. Do t\u00eb m\u00eb jap\u00ebsh t\u00eb par\u00eblindurin e bijve t\u00eb tu.\n22:30 Do t\u00eb veprosh nj\u00eblloj me lop\u00ebn dhe me delen t\u00ebnde: pjella e tyre e par\u00eb do t\u00eb rrij\u00eb shtat\u00eb dit\u00eb pran\u00eb n\u00ebn\u00ebs; dit\u00ebn e tet\u00eb do t\u00eb ma jap\u00ebsh mua.\n22:31 Ju do t\u00eb jeni p\u00ebr mua njer\u00ebz t\u00eb shenjt\u00eb; nuk do t\u00eb hani mish t\u00eb asnj\u00eb kafshe t\u00eb shqyer n\u00eb fusha; hidhuani at\u00eb qenve\".\n23:1 \"Nuk do t\u00eb hap\u00ebsh asnj\u00eb fjal\u00eb t\u00eb rreme dhe nuk do t'i jap\u00ebsh asnj\u00eb ndihm\u00eb t\u00eb pabesit p\u00ebr t'u b\u00ebr\u00eb d\u00ebshmitar i ansh\u00ebm.\n23:2 Nuk do t\u00eb shkosh pas shumic\u00ebs p\u00ebr t\u00eb b\u00ebr\u00eb t\u00eb keqen; dhe nuk do t\u00eb d\u00ebshmosh n\u00eb nj\u00eb \u00e7\u00ebshtje gjyq\u00ebsore duke u radhitur nga ana e shumic\u00ebs p\u00ebr t\u00eb prishur drejt\u00ebsin\u00eb.\n23:3 Nuk do t\u00eb favorizosh as t\u00eb varfrin n\u00eb gjyqin e tij.\n23:4 N\u00eb rast se takon kaun e armikut t\u00ebnd ose gomarin e tij q\u00eb ka humbur rrug\u00ebn, do t'ia kthesh atij.\n23:5 N\u00eb rast se sheh gomarin e atij q\u00eb t\u00eb urren t\u00eb shtrir\u00eb p\u00ebr tok\u00eb n\u00ebn barr\u00ebn, ruhu se e braktis, por ndihmo t\u00eb zotin ta zgjidh\u00eb.\n23:6 Mos shkel t\u00eb drejt\u00ebn e t\u00eb varfrit t\u00ebnd n\u00eb gjyqin e tij.\n23:7 Shmangu nga \u00e7do pav\u00ebrtet\u00ebsi; mos vrit t\u00eb pafajshmin dhe t\u00eb drejtin, sepse un\u00eb nuk do ta fal t\u00eb ligun.\n23:8 Mos prano asnj\u00eb dhurat\u00eb, sepse dhurata verbon at\u00eb q\u00eb sheh dhe prap\u00ebson fjal\u00ebt e njer\u00ebzve t\u00eb drejt\u00eb.\n23:9 Mos shtyp t\u00eb huajin, sepse ju e njihni shpirtin e t\u00eb huajit, sepse keni qen\u00eb t\u00eb huaj n\u00eb vendin e Egjiptit.\n23:10 Gjasht\u00eb vjet me radh\u00eb do t\u00eb mbjell\u00ebsh tok\u00ebn t\u00ebnde dhe do t\u00eb korr\u00ebsh frytet e saj;\n23:11 por vitin e shtat\u00eb do ta l\u00ebsh t\u00eb pushoj\u00eb dhe ajo do t\u00eb mbetet djerr, me q\u00ebllim q\u00eb ta g\u00ebzojn\u00eb t\u00eb varfrit e popullit t\u00ebnd; dhe gj\u00ebja e fshatit do t\u00eb haj\u00eb at\u00eb q\u00eb kan\u00eb p\u00ebr t\u00eb l\u00ebn\u00eb ata. Po ashtu do t\u00eb veprosh me vreshtin t\u00ebnd dhe ullinjt\u00eb e tu.\n23:12 Gjasht\u00eb dit\u00eb do t\u00eb b\u00ebsh pun\u00ebn t\u00ebnde por dit\u00ebn e shtat\u00eb do t\u00eb pushosh, me q\u00ebllim q\u00eb kau yt dhe gomari yt t\u00eb mund t\u00eb pushojn\u00eb, dhe biri i sh\u00ebrb\u00ebtores sate dhe i huaji t\u00eb mund ta marrin veten.\n23:13 Do t'u kushtoni kujdes t\u00ebr\u00eb gj\u00ebrave q\u00eb ju kam th\u00ebn\u00eb dhe nuk do ta shqiptoni emrin e per\u00ebndive t\u00eb tjer\u00eb; t\u00eb mos d\u00ebgjohet t\u00eb dal\u00eb nga goja juaj.\n23:14 Tri her\u00eb n\u00eb vit do t\u00eb m\u00eb kremtosh nj\u00eb fest\u00eb.\n23:15 Do t\u00eb kremtosh fest\u00ebn e t\u00eb ndorm\u00ebve. Shtat\u00eb dit\u00eb do t\u00eb hash buk\u00eb pa maja, si\u00e7 t\u00eb kam urdh\u00ebruar, n\u00eb koh\u00ebn e caktuar n\u00eb muajin e Abibit, sepse n\u00eb at\u00eb muaj ti dole nga Egjipti; dhe askush nuk do t\u00eb paraqitet para meje duarbosh.\n23:16 Do t\u00eb kremtosh edhe fest\u00ebn e korrjes, t\u00eb prodhimit t\u00eb hersh\u00ebm t\u00eb pun\u00ebs sate, t\u00eb asaj q\u00eb ke mbjell\u00eb n\u00eb ara; si dhe fest\u00ebn e t\u00eb vjelave, n\u00eb fund t\u00eb vitit, kur do t\u00eb mbledh\u00ebsh nga arat frytet e pun\u00ebs sate.\n23:17 Tri her\u00eb n\u00eb vit t\u00ebr\u00eb meshkujt do t\u00eb paraqiten para Per\u00ebndis\u00eb, Zotit.\n23:18 Nuk do t\u00eb ofrosh gjakun e flis\u00eb sime bashk\u00eb me buk\u00ebn e mbrujtur; dhe yndyra e flive t\u00eb fest\u00ebs sime nuk do t\u00eb teproj\u00eb deri n\u00eb m\u00ebngjes.\n23:19 Do t\u00eb \u00e7osh n\u00eb sht\u00ebpin\u00eb e Zotit, Per\u00ebndis\u00eb t\u00ebnd, t\u00eb parat fruta t\u00eb tok\u00ebs. Nuk do ta ziesh kecin me qum\u00ebshtin e n\u00ebn\u00ebs s\u00eb tij.\n23:20 Ja, pra, un\u00eb po d\u00ebrgoj nj\u00eb Engj\u00ebll para teje q\u00eb t\u00eb t\u00eb ruaj\u00eb gjat\u00eb rrug\u00ebs, dhe t\u00eb t\u00eb fut\u00eb n\u00eb vendin q\u00eb kam p\u00ebrgatitur.\n23:21 Ki kujdes para tij dhe bindju z\u00ebrit t\u00eb tij; mos ngri krye kund\u00ebr tij, sepse ai nuk do t'i fal\u00eb shkeljet tuaja, sepse emri im gjendet n\u00eb t\u00eb.\n23:22 Por n\u00eb qoft\u00eb se i bindesh plot\u00ebsisht z\u00ebrit t\u00eb tij dhe b\u00ebn t\u00eb gjitha ato q\u00eb do t\u00eb them, un\u00eb do t\u00eb jem armiku i armiqve t\u00eb tu dhe kund\u00ebrshtari i kund\u00ebrshtar\u00ebve t\u00eb tu;\n23:23 sepse Engj\u00eblli im do t\u00eb shkoj\u00eb para teje dhe do t\u00eb t\u00eb fut\u00eb n\u00eb vendin e Amorejve, t\u00eb Hitejve, t\u00eb Perezejve, t\u00eb Kananejve, t\u00eb Hivejve dhe t\u00eb Jebusejve, dhe un\u00eb do t'i shfaros ata.\n23:24 Nuk do p\u00ebrkulesh para per\u00ebndive t\u00eb tyre, dhe nuk do t'u sh\u00ebrbesh. Nuk do t\u00eb b\u00ebsh at\u00eb q\u00eb b\u00ebjn\u00eb ato; por do t'i shkat\u00ebrrosh plot\u00ebsisht dhe do t\u00eb thyesh shtyllat e tyre.\n23:25 Sh\u00ebrbejini Zotit, Per\u00ebndis\u00eb tuaj, ai do t\u00eb bekoj\u00eb buk\u00ebn t\u00ebnde dhe ujin t\u00ebnd; dhe un\u00eb do t\u00eb largoj s\u00ebmundjen nga ti.\n23:26 N\u00eb vendin t\u00ebnd nuk do t\u00eb ket\u00eb asnj\u00eb grua q\u00eb t\u00eb d\u00ebshtoj\u00eb, asnj\u00eb grua shterp\u00eb. Un\u00eb do ta plot\u00ebsoj numrin e dit\u00ebve t\u00eb tua.\n23:27 Un\u00eb do t\u00eb d\u00ebrgoj para teje tmerrin tim dhe do t'i jap d\u00ebrm\u00ebn \u00e7do populli pran\u00eb t\u00eb cilit do t\u00eb arrish, do t\u00eb b\u00ebj q\u00eb t\u00eb gjith\u00eb armiqt\u00eb e tu t\u00eb t\u00eb kthejn\u00eb kurrizin.\n23:28 Dhe do t\u00eb d\u00ebrgoj para teje grer\u00ebza, q\u00eb do t'i p\u00ebrz\u00ebn\u00eb Hivejt\u00eb, Kananejt\u00eb dhe Hitejt\u00eb para syve t\u00eb tu.\n23:29 Nuk do t'i p\u00ebrz\u00eb ata para teje brenda nj\u00eb viti, me q\u00ebllim q\u00eb vendi t\u00eb mos kthehet n\u00eb nj\u00eb shkrer\u00ebtir\u00eb dhe kafsh\u00ebt e fushave t\u00eb mos shum\u00ebzohen kund\u00ebr teje.\n23:30 Do t'i p\u00ebrz\u00eb para teje pak e nga pak, n\u00eb m\u00ebnyr\u00eb q\u00eb ti t\u00eb rritesh n\u00eb num\u00ebr dhe t\u00eb shtiesh n\u00eb dor\u00eb vendin.\n23:31 Dhe un\u00eb do t'i caktoj kufijt\u00eb e tu nga Deti i Kuq n\u00eb detin e Filistejve dhe nga shkret\u00ebtira deri te Lumi; sepse un\u00eb do t\u00eb l\u00eb n\u00eb duart e tua banor\u00ebt e vendit dhe ti do t'i d\u00ebbosh para syve t\u00eb tu.\n23:32 Nuk do t\u00eb lidh\u00ebsh asnj\u00eb aleanc\u00eb me ta, as edhe me per\u00ebndit\u00eb e tyre.\n23:33 Ata nuk do t\u00eb banojn\u00eb n\u00eb vendin t\u00ebnd, q\u00eb t\u00eb mos t\u00eb b\u00ebjn\u00eb t\u00eb m\u00ebkatosh kund\u00ebr meje: ti do t'u sh\u00ebrbeje per\u00ebndive t\u00eb tyre, dhe kjo do t\u00eb ishte nj\u00eb lak\".\n24:1 Pastaj Per\u00ebndia i tha Moisiut: \"Ngjitu te Zoti, ti dhe Aaroni, Nadabi dhe Abihu si dhe shtat\u00ebdhjet\u00eb nga pleqt\u00eb e Izraelit, dhe adhuroni nga larg;\n24:2 pastaj Moisiu do t'i afrohet Zotit; por t\u00eb tjer\u00ebt nuk do t'i afrohen, as populli nuk ka p\u00ebr t'u ngjitur bashk\u00eb me at\u00eb\".\n24:3 At\u00ebher\u00eb Moisiu erdhi dhe i tregoi popullit t\u00ebr\u00eb fjal\u00ebt e Zotit dhe t\u00ebr\u00eb ligjet. Dhe gjith\u00eb populli u p\u00ebrgjigj me nj\u00eb z\u00eb dhe tha: \"Ne do t\u00eb b\u00ebjm\u00eb t\u00ebr\u00eb gj\u00ebrat q\u00eb Zoti ka th\u00ebn\u00eb\".\n24:4 Dhe Moisiu i shkroi t\u00ebr\u00eb fjal\u00ebt e Zotit; pastaj u ngrit her\u00ebt n\u00eb m\u00ebngjes dhe ngriti n\u00eb k\u00ebmb\u00ebt e malit nj\u00eb altar dhe dymb\u00ebdhjet\u00eb shtylla p\u00ebr t\u00eb dymb\u00ebdhjet\u00eb fiset e Izraelit.\n24:5 Pastaj d\u00ebrgoi bij t\u00eb rinj t\u00eb Izraelit p\u00ebr t\u00eb ofruar olokauste dhe p\u00ebr t\u00eb flijuar dema t\u00eb rinj si theror fal\u00ebnderimi ndaj Zotit.\n24:6 Dhe Moisiu mori gjysm\u00ebn e gjakut dhe e vuri n\u00eb legen\u00eb; dhe gjysm\u00ebn tjet\u00ebr t\u00eb gjakut e shp\u00ebrndau mbi altar.\n24:7 Pastaj mori librin e bes\u00eblidhjes dhe ia lexoi popullit, i cili tha: \"Ne do t\u00eb b\u00ebjm\u00eb t\u00ebr\u00eb ato q\u00eb ka th\u00ebn\u00eb Zoti, dhe do t'i bindemi\".\n24:8 Pastaj Moisiu mori gjakun, sp\u00ebrkati popullin me t\u00eb dhe tha: \"Ja gjaku i bes\u00eblidhjes q\u00eb Zoti ka lidhur me ju sipas t\u00ebr\u00eb k\u00ebtyre fjal\u00ebve\".\n24:9 Pastaj Moisiu dhe Aaroni, Nadabi dhe Abihu dhe shtat\u00ebdhjet\u00eb nga pleqt\u00eb e Izraelit u ngjit\u00ebn,\n24:10 dhe pan\u00eb Per\u00ebndin\u00eb e Izraelit. N\u00ebn k\u00ebmb\u00ebt e tij ishte si nj\u00eb dysheme e punuar me safir, e qart\u00eb si qielli vet\u00eb.\n24:11 Por ai nuk e shtriu dor\u00ebn kund\u00ebr krer\u00ebve t\u00eb bijve t\u00eb Izraelit; dhe ata e pan\u00eb Per\u00ebndin\u00eb, dhe h\u00ebngr\u00ebn dhe pin\u00eb.\n24:12 Pastaj Zoti i tha Moisiut: \"Ngjitu tek un\u00eb n\u00eb mal dhe q\u00ebndro aty; dhe un\u00eb do t\u00eb jap disa pllaka prej guri, ligjin dhe urdh\u00ebrimet q\u00eb kam shkruar, me q\u00ebllim q\u00eb ti t'ua m\u00ebsosh atyre\".\n24:13 Pas k\u00ebsaj Moisiu u ngrit bashk\u00eb me Jozueun zbatuesin e tij; dhe Moisiu u ngjit n\u00eb malin e Per\u00ebndis\u00eb.\n24:14 Por pleqve u tha: \"Na prisni k\u00ebtu, deri sa t\u00eb kthehemi tek ju. Ja, Aaroni dhe Huri jan\u00eb me ju; kushdo q\u00eb ka probleme le t'u drejtohet atyre\".\n24:15 Moisiu, pra, u ngjit n\u00eb mal dhe reja e mbuloi p\u00ebrs\u00ebri malin.\n24:16 Tani lavdia e Zotit mbeti n\u00eb malin e Sinait dhe reja e mbuloi at\u00eb gjasht\u00eb dit\u00eb; dit\u00ebn e shtat\u00eb Zoti thirri Moisiun nga mesi i res\u00eb.\n24:17 Dhe pamja e lavdis\u00eb s\u00eb Zotit dukej n\u00eb syt\u00eb e bijve t\u00eb Izraelit si nj\u00eb zjarr q\u00eb digjej n\u00eb maj\u00ebn e malit.\n24:18 K\u00ebshtu Moisiu hyri n\u00eb mes t\u00eb res\u00eb dhe u ngjit n\u00eb mal; dhe Moisiu mbeti n\u00eb mal dyzet dit\u00eb dhe dyzet net.\n25:1 Zoti i foli Moisiut duke th\u00ebn\u00eb:\n25:2 \"U thuaj bijve t\u00eb Izraelit q\u00eb t\u00eb m\u00eb b\u00ebjn\u00eb nj\u00eb ofert\u00eb; do ta pranoni ofert\u00ebn nga \u00e7do njeri q\u00eb e b\u00ebn i shtyr\u00eb nga zemra e tij.\n25:3 Dhe kjo \u00ebsht\u00eb oferta q\u00eb do t\u00eb pranoni prej tyre: ar, argjend dhe bronz;\n25:4 stofa me ngjyr\u00eb vjollce, t\u00eb purpurt, t\u00eb kuqe flak\u00eb; li t\u00eb holl\u00eb dhe lesh dhie;\n25:5 l\u00ebkura dashi t\u00eb ngjyrosura n\u00eb t\u00eb kuq, l\u00ebkur\u00eb baldose dhe dru akacie;\n25:6 vaj p\u00ebr drit\u00ebn e shandanit, aroma p\u00ebr vajin e vajosjes dhe p\u00ebr temianin er\u00ebmir\u00eb;\n25:7 gur\u00eb oniksi dhe gur\u00eb p\u00ebr t\u00eb ngallmuar n\u00eb petkun e prift\u00ebrinjve dhe n\u00eb gjoksore.\n25:8 Le t\u00eb m\u00eb b\u00ebjn\u00eb nj\u00eb shenjt\u00ebrore, q\u00eb un\u00eb t\u00eb banoj n\u00eb mes tyre.\n25:9 Ju do ta b\u00ebni at\u00eb sipas t\u00ebr\u00eb asaj q\u00eb un\u00eb do t'iu tregoj, si p\u00ebr modelin e tabernakullit ashtu edhe p\u00ebr modelin e t\u00eb gjitha orendive.\n25:10 Do t\u00eb b\u00ebjn\u00eb, pra, nj\u00eb ark\u00eb prej druri t\u00eb akacies, i gjat\u00eb dy kubit\u00eb e gjysm\u00eb, i gj\u00ebr\u00eb nj\u00eb kubit e gjysm\u00eb dhe i lart\u00eb nj\u00eb kubit e gjysm\u00eb.\n25:11 Do ta vesh\u00ebsh nga brenda dhe nga jasht\u00eb; me ar safi dhe sip\u00ebr do t'i b\u00ebsh nj\u00eb kuror\u00eb ari, q\u00eb t\u00eb sillet p\u00ebrqark.\n25:12 Do t\u00eb shkrish p\u00ebr t\u00eb kat\u00ebr unaza ari dhe do t'i v\u00ebsh n\u00eb kat\u00ebr k\u00ebmb\u00ebt e saj: dy unaza nga nj\u00eb an\u00eb dhe dy unaza nga ana tjet\u00ebr.\n25:13 Do t\u00eb b\u00ebsh edhe disa shtiza prej druri t\u00eb akacies dhe do t'i vesh\u00ebsh me ar.\n25:14 Pastaj do t'i kalosh shtizat n\u00ebp\u00ebr unazat e ark\u00ebs, p\u00ebr ta mbajtur.\n25:15 Shtizat do t\u00eb q\u00ebndrojn\u00eb n\u00eb unazat e ark\u00ebs; nuk do t\u00eb hiqen prej asaj.\n25:16 Dhe n\u00eb ark\u00eb do t\u00eb v\u00ebsh D\u00ebshmin\u00eb q\u00eb do t\u00eb t\u00eb jap.\n25:17 Do t\u00eb b\u00ebsh edhe nj\u00eb pajtues prej ari safi; gjat\u00ebsia e tij do t\u00eb jet\u00eb dy kubit\u00eb e gjysm\u00eb, dhe gjer\u00ebsia e tij nj\u00eb kubit e gjysm\u00eb.\n25:18 Do t\u00eb b\u00ebsh pastaj dy kerubin\u00eb prej ari; k\u00ebta do t\u00eb punohen me \u00e7eki\u00e7 n\u00eb t\u00eb dy skajet e pajtuesit;\n25:19 b\u00ebje nj\u00eb kerubin n\u00eb nj\u00eb nga skajet dhe nj\u00eb kerubin n\u00eb skajin tjet\u00ebr; kerubin\u00ebt do t'i b\u00ebni prej nj\u00eb cope t\u00eb vetme me pajtuesin n\u00eb skajet e tij.\n25:20 Dhe kerubin\u00ebt do t'i ken\u00eb krah\u00ebt e hapura me drejtim lart, n\u00eb m\u00ebnyr\u00eb q\u00eb t\u00eb mbulojn\u00eb pajtuesin me krah\u00ebt e tyre; do t\u00eb ken\u00eb drejtim nga nj\u00ebri tjetri, nd\u00ebrsa fytyrat e kerubin\u00ebve do t\u00eb jen\u00eb t\u00eb kthyera n\u00eb drejtim t\u00eb pajtuesit.\n25:21 Do ta v\u00ebsh pastaj pajtuesin lart, mbi ark\u00ebn; dhe n\u00eb ark\u00eb do t\u00eb fut\u00ebsh D\u00ebshmin\u00eb q\u00eb do t\u00eb t\u00eb jap.\n25:22 Aty un\u00eb do t\u00eb t\u00eb takoj, nga lart, mbi pajtuesin, midis dy kerubin\u00ebve q\u00eb jan\u00eb mbi ark\u00ebn e d\u00ebshmis\u00eb, do t\u00eb t\u00eb njoftoj t\u00ebr\u00eb urdh\u00ebrat q\u00eb do t\u00eb t\u00eb jap p\u00ebr bijt\u00eb e Izraelit.\n25:23 Do t\u00eb b\u00ebsh edhe nj\u00eb tryez\u00eb prej druri t\u00eb akacies, e gjat\u00eb dy kubit\u00eb, e gj\u00ebr\u00eb nj\u00eb kubit dhe e lart\u00eb nj\u00eb kubit e gjysm\u00eb.\n25:24 Do ta vesh\u00ebsh me ar safi dhe do t'i b\u00ebsh rreth e qark nj\u00eb kuror\u00eb prej ari.\n25:25 Do t'i b\u00ebsh rreth e p\u00ebrqark nj\u00eb buz\u00eb t\u00eb lart\u00eb nj\u00eb p\u00ebll\u00ebmb\u00eb dore dhe rreth k\u00ebsaj buze nj\u00eb kuror\u00eb prej ari.\n25:26 Do t'i b\u00ebsh gjithashtu kat\u00ebr unaza ari dhe do t'i v\u00ebsh unazat n\u00eb kat\u00ebr qoshet, q\u00eb ndodhen n\u00eb kat\u00ebr k\u00ebmb\u00ebt e tryez\u00ebs.\n25:27 Unazat do t\u00eb jen\u00eb pran\u00eb buz\u00ebs p\u00ebr t\u00eb kaluar shufrat e caktuara q\u00eb do ta mbajn\u00eb tryez\u00ebn.\n25:28 Shufrat do t'i b\u00ebsh me dru t\u00eb akacies dhe do t'i vesh\u00ebsh me ar; ato do t\u00eb sh\u00ebrbejn\u00eb p\u00ebr t\u00eb mbajtur tryez\u00ebn.\n25:29 Do t\u00eb p\u00ebrgatis\u00ebsh edhe pjatat e tij, gotat e tij, kupat e tij dhe filxhan\u00ebt e tij me t\u00eb cil\u00ebt b\u00ebhen libacionet; dhe do t'i b\u00ebsh me ar safi.\n25:30 Dhe do t\u00eb v\u00ebsh mbi tryez\u00eb buk\u00ebn e paraqitjes, q\u00eb do t\u00eb rrij\u00eb vazhdimisht para meje.\n25:31 Do t\u00eb p\u00ebrgatis\u00ebsh nj\u00eb shandan prej ari safi; shandani, k\u00ebmba dhe trungu i tij do t\u00eb punohen me \u00e7eki\u00e7; kupat, moll\u00ebt dhe lulet e tij do t\u00eb jen\u00eb nj\u00eb cop\u00eb.\n25:32 Nga an\u00ebt e tij do t\u00eb dalin gjasht\u00eb krah\u00eb: tre krah\u00eb nga nj\u00ebra an\u00eb e shandanit dhe tre krah\u00eb nga ana tjet\u00ebr e tij;\n25:33 mbi njerin krah do t\u00eb modelohen tri kupa n\u00eb form\u00eb t\u00eb bajames, me nj\u00eb moll\u00eb dhe nj\u00eb lule, dhe mbi krahun tjet\u00ebr tri kupa n\u00eb form\u00eb t\u00eb bajames, me nj\u00eb moll\u00eb dhe nj\u00eb lule. K\u00ebshtu do t\u00eb veprohet p\u00ebr gjasht\u00eb krah\u00ebt q\u00eb dalin nga shandani.\n25:34 N\u00eb trungun e shandanit do t\u00eb ket\u00eb kat\u00ebr kupa n\u00eb form\u00eb t\u00eb bajames, me moll\u00ebt dhe lulet e tyre.\n25:35 Do t\u00eb ket\u00eb nj\u00eb moll\u00eb posht\u00eb dy krah\u00ebve t\u00eb par\u00eb q\u00eb dalin prej tij, nj\u00eb moll\u00eb posht\u00eb dy krah\u00ebve t\u00eb tjer\u00eb q\u00eb dalin jasht\u00eb tij, dhe nj\u00eb moll\u00eb posht\u00eb dy krah\u00ebve t\u00eb fundit q\u00eb dalin prej shandanit: k\u00ebshtu do t\u00eb b\u00ebhet p\u00ebr t\u00eb gjasht\u00eb krah\u00ebt q\u00eb dalin nga shandani.\n25:36 K\u00ebto moll\u00eb dhe k\u00ebta krah\u00eb, do t\u00eb p\u00ebrb\u00ebjn\u00eb t\u00ebr\u00ebsin\u00eb, shandani do t\u00eb jet\u00eb prej ari safi dhe i punuar me \u00e7eki\u00e7.\n25:37 Do t\u00eb b\u00ebsh edhe shtat\u00eb llambat e tij, t\u00eb cilat duhet t\u00eb vendosen n\u00eb m\u00ebnyr\u00eb q\u00eb t\u00eb ndri\u00e7ojn\u00eb pjes\u00ebn e p\u00ebrparme t\u00eb shandanit.\n25:38 Dhe t\u00ebr\u00eb veglat p\u00ebr t\u00eb l\u00ebvizur qiririn dhe mbajt\u00ebsin e tij do t\u00eb jen\u00eb prej ari safi.\n25:39 Shandani dhe veglat e tij do t\u00eb b\u00ebhen me nj\u00eb talent prej ari t\u00eb pap\u00ebrzier.\n25:40 Dhe shiko t\u00eb b\u00ebsh \u00e7do gj\u00eb simbas modelit q\u00eb t'u tregua n\u00eb mal\".\n26:1 \"Do t\u00eb b\u00ebsh pastaj tabernakullin me dhjet\u00eb p\u00eblhura prej liri t\u00eb holl\u00eb t\u00eb p\u00ebrdredhur, me fije ngjyr\u00eb vjollce, t\u00eb purpurt dhe flak\u00eb t\u00eb kuqe, s\u00eb bashku me kerubin\u00eb t\u00eb punuar artistikisht.\n26:2 Gjat\u00ebsia e \u00e7do p\u00eblhure do t\u00eb jet\u00eb nj\u00ebzet e tet\u00eb kubit\u00eb dhe gjer\u00ebsia e \u00e7do p\u00eblhure kat\u00ebr kubit\u00eb; t\u00eb gjitha p\u00eblhurat do t\u00eb ken\u00eb po at\u00eb mas\u00eb.\n26:3 Pes\u00eb p\u00eblhura do t\u00eb bashkohen midis tyre dhe pes\u00eb p\u00eblhurat e tjera do t\u00eb bashkohen gjithashtu midis tyre.\n26:4 Do t\u00eb b\u00ebsh sythe ngjyr\u00eb vjollce mbi buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb par\u00eb; t\u00eb nj\u00ebjt\u00ebn gj\u00eb do t\u00eb b\u00ebsh n\u00eb buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb dyt\u00eb.\n26:5 Do t\u00eb b\u00ebsh pes\u00ebdhjet\u00eb sythe mbi p\u00eblhur\u00ebn e par\u00eb dhe pes\u00ebdhjet\u00eb sythe mbi buz\u00ebn e p\u00eblhur\u00ebs s\u00eb jashtme: k\u00ebto sythe do t\u00eb korrespondojn\u00eb me nj\u00ebri-tjetrin.\n26:6 Dhe do t\u00eb b\u00ebsh pes\u00ebdhjet\u00eb kap\u00ebse ari dhe do t'i bashkosh p\u00eblhurat nj\u00ebra me tjetr\u00ebn me an\u00eb t\u00eb kap\u00ebseve, n\u00eb m\u00ebnyr\u00eb q\u00eb tabernakulli t\u00eb formoj\u00eb nj\u00eb t\u00eb t\u00ebr\u00eb.\n26:7 Do t\u00eb b\u00ebsh gjithashtu p\u00eblhur\u00eb me lesh dhie, q\u00eb t\u00eb sh\u00ebrbejn\u00eb si \u00e7ad\u00ebr mbi tabernakullin: do t\u00eb b\u00ebsh nj\u00ebmb\u00ebdhjet\u00eb p\u00eblhura t\u00eb tilla.\n26:8 Gjat\u00ebsia e \u00e7do p\u00eblhure do t\u00eb jet\u00eb tridhjet\u00eb kubit\u00eb dhe gjer\u00ebsia e \u00e7do p\u00eblhure kat\u00ebr kubit\u00eb; t\u00eb nj\u00ebmb\u00ebdhjet\u00eb p\u00eblhurat do t\u00eb ken\u00eb t\u00eb gjitha po at\u00eb mas\u00eb.\n26:9 Do t\u00eb bashkosh pes\u00eb p\u00eblhurat midis tyre, dhe gjasht\u00eb t\u00eb tjerat midis tyre; do ta ripalos\u00ebsh mbi vetveten p\u00eblhur\u00ebn e gjasht\u00eb n\u00eb pjes\u00ebn e p\u00ebrparme t\u00eb \u00e7adr\u00ebs.\n26:10 Do t\u00eb b\u00ebsh gjithashtu pes\u00ebdhjet\u00eb sythe mbi buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb par\u00eb dhe pes\u00ebdhjet\u00eb sythe n\u00eb buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb dyt\u00eb t\u00eb p\u00eblhurave.\n26:11 Do t\u00eb b\u00ebsh edhe pes\u00ebdhjet\u00eb kap\u00ebse prej bronzi dhe do t'i fut\u00ebsh kap\u00ebset n\u00eb sythet, duke e bashkuar k\u00ebshtu \u00e7adr\u00ebn n\u00eb m\u00ebnyr\u00eb q\u00eb t\u00eb formojn\u00eb nj\u00eb t\u00eb t\u00ebr\u00eb.\n26:12 Nga pjesa q\u00eb tepron nga p\u00eblhurat e \u00e7adr\u00ebs, gjysma e p\u00eblhur\u00ebs s\u00eb tep\u00ebrt do t\u00eb bjer\u00eb mbi pjes\u00ebn e poshtme t\u00eb tabernakullit;\n26:13 dhe kubiti nga nj\u00eb an\u00eb dhe kubiti nga ana tjet\u00ebr q\u00eb jan\u00eb t\u00eb tep\u00ebrt n\u00eb gjat\u00ebsin\u00eb e p\u00eblhurave t\u00eb \u00e7adr\u00ebs, do t\u00eb bien mbi t\u00eb dy an\u00ebt e tabernakullit, nj\u00ebri nga nj\u00eb krah dhe tjetri n\u00eb krahun tjet\u00ebr p\u00ebr ta mbuluar at\u00eb.\n26:14 Do t\u00eb b\u00ebsh gjithashtu nj\u00eb mbules\u00eb p\u00ebr \u00e7adr\u00ebn me l\u00ebkura dashi t\u00eb ngjyrosura n\u00eb t\u00eb kuq, dhe mbi k\u00ebt\u00eb nj\u00eb tjet\u00ebr mbules\u00eb me l\u00ebkura baldose.\n26:15 Do t\u00eb b\u00ebsh p\u00ebr tabernakullin disa d\u00ebrrasa prej druri t\u00eb akacies, t\u00eb vendosura m\u00eb k\u00ebmb\u00eb.\n26:16 Gjat\u00ebsia e nj\u00eb d\u00ebrrase do t\u00eb jet\u00eb dhjet\u00eb kubit\u00eb dhe gjer\u00ebsia e saj nj\u00eb kubit\u00eb e gjys\u00ebm.\n26:17 \u00c7do d\u00ebrras\u00eb do t\u00eb ket\u00eb dy kllapa p\u00ebr t\u00eb bashkuar nj\u00eb d\u00ebrras\u00eb me tjetr\u00ebn; k\u00ebshtu do t\u00eb veprosh p\u00ebr t\u00eb gjitha d\u00ebrrasat e tabernakullit.\n26:18 Do t\u00eb b\u00ebsh k\u00ebshtu d\u00ebrrasat e tabernakullit, nj\u00ebzet d\u00ebrrasa p\u00ebr an\u00ebn jugore.\n26:19 Do t\u00eb v\u00ebsh dyzet baza argjendi posht\u00eb nj\u00ebzet d\u00ebrrasave: dy baza posht\u00eb secil\u00ebs d\u00ebrras\u00eb p\u00ebr t\u00eb dy kllapat e veta.\n26:20 Do t\u00eb b\u00ebsh edhe nj\u00ebzet d\u00ebrrasa p\u00ebr krahun e dyt\u00eb t\u00eb tabernakullit, p\u00ebr an\u00ebn e tij veriore,\n26:21 dhe dyzet bazat e tyre prej argjendi, dy baza n\u00ebn \u00e7do d\u00ebrras\u00eb.\n26:22 P\u00ebr krahun e pasm\u00eb t\u00eb tabernakullit, n\u00eb drejtim t\u00eb per\u00ebndimit, do t\u00eb b\u00ebsh gjasht\u00eb d\u00ebrrasa.\n26:23 Do t\u00eb b\u00ebsh edhe dy d\u00ebrrasa p\u00ebr t\u00eb dy qoshet e pasme t\u00eb tabernakullit.\n26:24 Ato do t\u00eb \u00e7ift\u00ebzohen posht\u00eb dhe do t\u00eb bashkohen lart me nj\u00eb unaz\u00eb. K\u00ebshtu ka p\u00ebr t\u00eb ndodhur me t\u00eb dyja d\u00ebrrasat, q\u00eb ndodhen n\u00eb t\u00eb dy qoshet.\n26:25 Do t\u00eb ket\u00eb, pra, tet\u00eb d\u00ebrrasa me bazat e tyre prej argjendi: gjasht\u00ebmb\u00ebdhjet\u00eb baza, dy baza posht\u00eb \u00e7do d\u00ebrrase.\n26:26 Do t\u00eb b\u00ebsh edhe disa traversa prej druri t\u00eb akacies: pes\u00eb p\u00ebr d\u00ebrrasat e nj\u00ebr\u00ebs an\u00eb t\u00eb tabernakullit,\n26:27 pes\u00eb traversa p\u00ebr d\u00ebrrasat e an\u00ebs tjet\u00ebr t\u00eb tabernakullit dhe pes\u00eb traversa p\u00ebr d\u00ebrrasat e pjes\u00ebs s\u00eb pasme t\u00eb tabernakullit, n\u00eb drejtim t\u00eb per\u00ebndimit.\n26:28 Traversa q\u00ebndrore, n\u00eb mes t\u00eb d\u00ebrrasave, do t\u00eb kaloj\u00eb nga nj\u00ebra an\u00eb n\u00eb tjetr\u00ebn.\n26:29 Do t'i vesh\u00ebsh me ar d\u00ebrrasat dhe do t'i b\u00ebsh prej ari unazat e tyre n\u00ebp\u00ebr t\u00eb cilat do t\u00eb kalojn\u00eb traversat, dhe do t'i vesh\u00ebsh me ar traversat.\n26:30 Do ta ngresh tabernakullin me trajt\u00ebn e p\u00ebrpikt\u00eb q\u00eb t'u tregua n\u00eb mal.\n26:31 Do t\u00eb b\u00ebsh nj\u00eb vel me fije n\u00eb ngjyr\u00eb vjollce, t\u00eb purpurt, flak\u00eb t\u00eb kuqe dhe me li t\u00eb holl\u00eb dhe t\u00eb p\u00ebrdredhur, t\u00eb stolisur me kerubin\u00eb t\u00eb punuar artistikisht,\n26:32 dhe do ta var\u00ebsh n\u00eb kat\u00ebr shtylla prej akacieje t\u00eb veshura me ar, me grrem\u00e7at e tyre t\u00eb arta t\u00eb v\u00ebna mbi baza argjendi.\n26:33 Do ta var\u00ebsh velin n\u00eb kap\u00ebset; dhe aty, n\u00eb an\u00ebn e brendshme t\u00eb velit, do t\u00eb fut\u00ebsh ark\u00ebn e d\u00ebshmis\u00eb; veli do t'ju sh\u00ebrbej\u00eb si ndar\u00ebs midis vendit t\u00eb shenjt\u00eb dhe vendit shum\u00eb t\u00eb shenjt\u00eb.\n26:34 Pastaj do ta v\u00ebsh pajtuesin mbi ark\u00ebn e d\u00ebshmis\u00eb n\u00eb vendin shum\u00eb t\u00eb shenjt\u00eb.\n26:35 Jasht\u00eb velit do t\u00eb v\u00ebsh p\u00ebrkundrazi tryez\u00ebn, nd\u00ebrsa shandani do t\u00eb shkoj\u00eb p\u00ebrball\u00eb tryez\u00ebs n\u00eb krahun jugor t\u00eb tabernakullit, dhe do ta vendos\u00ebsh tryez\u00ebn n\u00eb krahun verior.\n26:36 Do t\u00eb b\u00ebsh gjithashtu p\u00ebr hyrjen e \u00e7adr\u00ebs nj\u00eb perde me fije n\u00eb ngjyr\u00eb vjollce, t\u00eb purpurt, flak\u00eb t\u00eb kuqe dhe prej liri t\u00eb p\u00ebrdredhur, puna e nj\u00eb q\u00ebndistari.\n26:37 Do t\u00eb b\u00ebsh gjithashtu pes\u00eb shtylla akacieje p\u00ebr perden dhe do t'i vesh\u00ebsh me ar; grrem\u00e7at e tyre do t\u00eb jen\u00eb prej ari dhe do t\u00eb shkrish p\u00ebr to pes\u00eb baza prej bronzi\".\n27:1 \"Do t\u00eb b\u00ebsh edhe nj\u00eb altar prej druri t\u00eb akacies, i gjat\u00eb pes\u00eb kubit\u00eb dhe i gjer\u00eb pes\u00eb kubit\u00eb; altari do t\u00eb jet\u00eb katror dhe do t\u00eb ket\u00eb tre kubit\u00eb lart\u00ebsi.\n27:2 N\u00eb kat\u00ebr qoshet e tij do t\u00eb b\u00ebsh brinj, q\u00eb do t\u00eb formojn\u00eb nj\u00eb t\u00ebr\u00ebsi me t\u00eb; dhe do ta vesh\u00ebsh at\u00eb me bronz.\n27:3 Do t\u00eb b\u00ebsh edhe en\u00ebt e tij p\u00ebr t\u00eb mbledhur hirin, lopat\u00ebzat e tij, legen\u00ebt e tij, pirunjt\u00eb e tij dhe mangall\u00ebt e tij; t\u00eb gjitha veglat e tij do t'i b\u00ebsh prej bronzi.\n27:4 Do t'i b\u00ebsh gjithashtu nj\u00eb gril\u00eb prej bronzi n\u00eb form\u00eb rrjete dhe mbi rrjet\u00eb, n\u00eb kat\u00ebr qoshet e tij, do t\u00eb b\u00ebsh kat\u00ebr unaza prej bronzi;\n27:5 dhe do ta v\u00ebsh n\u00ebn korniz\u00ebn e altarit, n\u00eb pjes\u00ebn e poshtme, n\u00eb m\u00ebnyr\u00eb q\u00eb rrjeta t\u00eb ndodhet n\u00eb gjysm\u00ebn e lart\u00ebsis\u00eb s\u00eb altarit.\n27:6 Do t\u00eb b\u00ebsh edhe disa shufra p\u00ebr altarin, shufra me drurin e akacies, dhe do t'i vesh\u00ebsh me bronz.\n27:7 Shufrat do t\u00eb kalojn\u00eb n\u00ebp\u00ebr unazat; dhe shufrat do t\u00eb jen\u00eb n\u00eb t\u00eb dy an\u00ebt e altarit, kur ky do t\u00eb duhet t\u00eb bartet.\n27:8 Do ta b\u00ebsh me d\u00ebrrasa dhe bosh nga brenda; duhet ta b\u00ebsh ashtu si\u00e7 t'u tregua n\u00eb mal.\n27:9 Do t\u00eb b\u00ebsh edhe oborrin e tabernakullit; nga ana e jugut, oborri do t\u00eb ket\u00eb perde prej liri t\u00eb holl\u00eb t\u00eb p\u00ebrdredhur, me nj\u00eb gjat\u00ebsi prej nj\u00ebqind kubit\u00ebsh nga nj\u00eb an\u00eb,\n27:10 dhe nj\u00ebzet shtylla me nj\u00ebzet bazat e tyre prej bronzi; grrem\u00e7at e shtyll\u00ebs dhe shtizat e tyre do t\u00eb jen\u00eb prej argjendi.\n27:11 K\u00ebshtu edhe n\u00eb gjat\u00ebsin\u00eb nga ana e veriut, do t\u00eb ket\u00eb perde me nj\u00eb gjat\u00ebsi prej nj\u00ebqind kubit\u00ebsh, me nj\u00ebzet shtylla dhe nj\u00ebzet bazat e tyre prej bronzi; grrem\u00e7at e shtyllave do t\u00eb jen\u00eb prej argjendi.\n27:12 Dhe p\u00ebr gjer\u00ebsin\u00eb e oborrit nga ana e per\u00ebndimit, do t\u00eb ket\u00eb pes\u00ebdhjet\u00eb kubit\u00eb perdesh me dhjet\u00eb shtyllat dhe dhjet\u00eb bazat e tyre.\n27:13 Nga ana lindore gjer\u00ebsia e oborrit do t\u00eb jet\u00eb gjithashtu pes\u00ebdhjet\u00eb kubit\u00eb.\n27:14 Nga nj\u00eb an\u00eb e port\u00ebs s\u00eb hyrjes do t\u00eb ket\u00eb pes\u00ebmb\u00ebdhjet\u00eb kubit\u00eb perde, me tri shtyllat dhe tri bazat e tyre;\n27:15 dhe nga ana tjet\u00ebr do t\u00eb ket\u00eb gjithashtu pes\u00ebmb\u00ebdhjet\u00eb kubit\u00eb perde me tri shtyllat dhe tri bazat e tyre.\n27:16 P\u00ebr port\u00ebn e hyrjes n\u00eb oborr do t\u00eb ket\u00eb nj\u00eb perde prej nj\u00ebzet kubit\u00ebsh, me fill ngjyr\u00eb vjollce, t\u00eb purpurt, flak\u00eb t\u00eb kuqe dhe prej liri t\u00eb holl\u00eb t\u00eb p\u00ebrdredhur, pun\u00eb e nj\u00eb q\u00ebndistari, me kat\u00ebr shtyllat dhe kat\u00ebr bazat e tyre.\n27:17 T\u00ebr\u00eb shtyllat rreth oborrit do t\u00eb bashkohen me shtiza argjendi; grrem\u00e7at e tyre do t\u00eb jen\u00eb prej argjendi dhe bazat e tyre prej bronzi.\n27:18 Gjat\u00ebsia e oborrit do t\u00eb jet\u00eb nj\u00ebqind kubit\u00eb, gjer\u00ebsia pes\u00ebdhjet\u00eb kubit\u00eb dhe lart\u00ebsia pes\u00eb kubit\u00eb, me perde prej liri t\u00eb holl\u00eb t\u00eb p\u00ebrdredhur dhe me bazat prej bronzi.\n27:19 T\u00eb gjitha veglat e caktuara p\u00ebr sh\u00ebrbimin e tabernakullit, t\u00ebr\u00eb kunjat e tij dhe t\u00ebr\u00eb kunjat e oborrit do t\u00eb jen\u00eb prej bronzi.\n27:20 Do t\u00eb urdh\u00ebrosh bijt\u00eb e Izraelit q\u00eb t\u00eb sjellin vaj ulliri safi prej ullinjsh t\u00eb shtypur, p\u00ebr drit\u00ebn e shandanit p\u00ebr t'i mbajtur vazhdimisht t\u00eb ndezura llambat.\n27:21 N\u00eb \u00e7adr\u00ebn e mbledhjes, jasht\u00eb velit q\u00eb ndodhet p\u00ebrpara d\u00ebshmis\u00eb, Aaroni dhe bijt\u00eb e tij do t'i mbajn\u00eb llambat t\u00eb ndezura, n\u00eb m\u00ebnyr\u00eb q\u00eb t\u00eb digjen nga mbr\u00ebmja deri n\u00eb m\u00ebngjes para Zotit. Kjo do t\u00eb jet\u00eb nj\u00eb rregull e p\u00ebrhershme midis bijve t\u00eb Izraelit p\u00ebr t\u00eb gjith\u00eb brezat e ardhsh\u00ebm\".\n28:1 \"Pastaj afro pran\u00eb vetes sate Aaronin, t\u00ebt v\u00eblla, dhe bijt\u00eb e tij s\u00eb bashku me t\u00eb, nga gjiri i bijve t\u00eb Izraelit, q\u00eb t\u00eb m\u00eb sh\u00ebrbejn\u00eb mua si prift; e kam fjal\u00ebn p\u00ebr Aaronin, Nadabin, Eleazarin dhe Ithamarin, bij t\u00eb Aaronit.\n28:2 Dhe do t'i b\u00ebsh Aaronit, v\u00ebllait t\u00ebnd, rroba t\u00eb shenjta, p\u00ebr t'i dh\u00ebn\u00eb nder e hijeshi.\n28:3 Do t\u00eb flas\u00ebsh me t\u00eb gjith\u00eb personat e aft\u00eb, q\u00eb i kam mbushur me frym\u00ebn e dituris\u00eb, dhe ata t'i b\u00ebjn\u00eb rrobat e Aaronit p\u00ebr ta shenjt\u00ebruar, me q\u00ebllim q\u00eb t\u00eb m\u00eb sh\u00ebrbejn\u00eb mua si prift.\n28:4 Dhe k\u00ebto jan\u00eb rrobat q\u00eb do t\u00eb b\u00ebjn\u00eb: nj\u00eb pektoral, nj\u00eb efod, nj\u00eb mantel, nj\u00eb tunik\u00eb e thurur me shtiza, nj\u00eb \u00e7allm\u00eb dhe nj\u00eb brez. Do t\u00eb b\u00ebjn\u00eb, pra, rroba t\u00eb shenjta p\u00ebr Aaronin, v\u00ebllan\u00eb t\u00ebnd dhe p\u00ebr bijt\u00eb e tij, me q\u00ebllim q\u00eb t\u00eb m\u00eb sh\u00ebrbejn\u00eb mua si prift;\n28:5 ata do t\u00eb p\u00ebrdorin ar dhe fill ngjyr\u00eb vjollce, t\u00eb purpurt, flak\u00eb t\u00eb kuqe dhe li t\u00eb holl\u00eb.\n28:6 Do ta b\u00ebsh efodin me ar dhe fill ngjyr\u00eb vjollce, t\u00eb purpurt, t\u00eb kuqe flak\u00eb si dhe me fill liri t\u00eb holl\u00eb dhe t\u00eb p\u00ebrdredhur, t\u00eb punuar artistikisht.\n28:7 N\u00eb dy skajet e tij do t\u00eb ket\u00eb t\u00eb lidhura dy supore, me q\u00ebllim q\u00eb t\u00eb mbahet si nj\u00eb e t\u00ebr\u00eb.\n28:8 Brezi i punuar artistikisht, q\u00eb ndodhet mbi efodin, do t\u00eb ket\u00eb po at\u00eb pun\u00eb t\u00eb efodit: prej ari dhe me fije ngjyr\u00eb vjollce, t\u00eb purpurt, me flak\u00eb t\u00eb kuqe dhe prej liri t\u00eb holl\u00eb t\u00eb p\u00ebrdredhur.\n28:9 Pastaj do t\u00eb marr\u00ebsh dy gur\u00eb oniksi dhe do t\u00eb gdhend\u00ebsh mbi ta emrat e bijve t\u00eb Izraelit:\n28:10 gjasht\u00eb nga emrat e tyre mbi nj\u00eb gur dhe gjasht\u00eb emrat e tjer\u00eb mbi gurin tjet\u00ebr, sipas radh\u00ebs s\u00eb tyre t\u00eb lindjes.\n28:11 Do t\u00eb gdhend\u00ebsh mbi k\u00ebta gur\u00eb emrat e bijve t\u00eb Izraelit ashtu si\u00e7 b\u00ebn prer\u00ebsi i gurit n\u00eb gdhendjen e nj\u00eb vule; do t'i fut\u00ebsh n\u00eb rrath\u00eb ari.\n28:12 Do t'i v\u00ebsh t\u00eb dy gur\u00ebt mbi supet e efodit, si gur\u00eb kujtimore p\u00ebr bijt\u00eb e Izraelit; dhe Aaroni do t'i \u00e7oj\u00eb emrat e tyre si nj\u00eb kujtim para Zotit mbi dy shtyllat e tij.\n28:13 Do t\u00eb b\u00ebsh gjithashtu rrath\u00eb ari\n28:14 dhe dy zinxhir\u00eb prej ari safi, t\u00eb thurur si nj\u00eb litar, dhe do t\u00eb v\u00ebsh n\u00eb rrath\u00ebt zinxhir\u00ebt e thurur n\u00eb k\u00ebt\u00eb m\u00ebnyr\u00eb.\n28:15 Do t\u00eb b\u00ebsh gjithashtu pektoralin e gjykimit, t\u00eb punuar n\u00eb m\u00ebnyr\u00eb artistike; do ta b\u00ebsh pun\u00ebn si p\u00ebr efodin: prej ari, me fill ngjyr\u00eb vjollce, t\u00eb purpurt dhe flak\u00eb t\u00eb kuqe, si dhe me li t\u00eb holl\u00eb t\u00eb p\u00ebrdredhur.\n28:16 Do t\u00eb jet\u00eb katror dhe i palosur m\u00eb dysh; do t\u00eb jet\u00eb nj\u00eb p\u00ebll\u00ebmb\u00eb i gjat\u00eb dhe nj\u00eb p\u00ebll\u00ebmb\u00eb i gjer\u00eb.\n28:17 Dhe do t\u00eb ngallmosh kat\u00ebr radh\u00eb gur\u00ebsh: n\u00eb radh\u00ebn e par\u00eb nj\u00eb sardonio, nj\u00eb topaz dhe nj\u00eb smerald;\n28:18 n\u00eb radh\u00ebn e dyt\u00eb: nj\u00eb bruz, nj\u00eb safir dhe nj\u00eb diamant;\n28:19 n\u00eb radh\u00ebn e tret\u00eb: nj\u00eb hiacint, nj\u00eb agat dhe nj\u00eb ametist;\n28:20 n\u00eb radh\u00ebn e kat\u00ebrt: nj\u00eb grisolist, nj\u00eb oniks dhe nj\u00eb diasp\u00ebr. K\u00ebta gur\u00eb do t\u00eb ngallmohen n\u00eb rrath\u00ebt e tyre t\u00eb art\u00eb.\n28:21 Dhe gur\u00ebt do t'u korrespondojn\u00eb emrave t\u00eb bijve t\u00eb Izraelit: dymb\u00ebdhjet\u00eb, simbas emrave t\u00eb tyre, t\u00eb gdhendur si vula, secila me emrin e fiseve t\u00eb Izraelit.\n28:22 Do t\u00eb b\u00ebsh gjithashtu mbi pektoral zinxhir\u00eb t\u00eb vegj\u00ebl prej ari safi t\u00eb thurur si kordon\u00eb.\n28:23 Pastaj do t\u00eb b\u00ebsh mbi pektoral dyj unaza prej ari, dhe do t'i v\u00ebsh t\u00eb dy unazat n\u00eb dy skajet e pektoralit.\n28:24 Pastaj do t'i fiksosh dy kordonat prej ari n\u00eb dy unazat n\u00eb skajet e pektoralit;\n28:25 dhe dy majat e tjera t\u00eb dy kordon\u00ebve do t'i lidh\u00ebsh me t\u00eb dy rrath\u00ebt dhe do t'i vendos\u00ebsh mbi dy supet e efodit, nga p\u00ebrpara.\n28:26 Do t\u00eb b\u00ebsh edhe dy unaza ari dhe do t'i vendos\u00ebsh n\u00eb dy skajet e pektoralit, mbi pal\u00ebn e tij, q\u00eb ndodhet n\u00eb pjes\u00ebn e brendshme t\u00eb efodit.\n28:27 Do t\u00eb b\u00ebsh dy unaza t\u00eb tjera ari dhe do t'i vendos\u00ebsh mbi t\u00eb dy supet e efodit posht\u00eb, n\u00eb pjes\u00ebn e p\u00ebrparme pran\u00eb pik\u00ebs s\u00eb bashkimit, mbi brezin e punuar artistikisht t\u00eb efodit.\n28:28 Dhe pektorali do t\u00eb fiksohet me an\u00eb t\u00eb dy unazave t\u00eb tij n\u00eb unazat e efodit me nj\u00eb kordon ngjyr\u00eb vjollce, n\u00eb m\u00ebnyr\u00eb q\u00eb pektorali t\u00eb ndodhet mbi brezin e punuar artistikisht t\u00eb efodit dhe t\u00eb mos shk\u00ebputet dot prej k\u00ebtij t\u00eb fundit.\n28:29 K\u00ebshtu Aaroni do t'i \u00e7oj\u00eb emrat e bijve t\u00eb Izraelit t\u00eb skalitur n\u00eb pektoralin e gjykimit, mbi zemr\u00ebn e tij, kur do t\u00eb hyj\u00eb n\u00eb shenjt\u00ebrore, n\u00eb kujtim t\u00eb p\u00ebrjetsh\u00ebm p\u00ebrpara Zotit.\n28:30 Do t\u00eb v\u00ebsh mbi pektoralin e gjykimit Urim-in dhe Thumim-in; dhe do t\u00eb jen\u00eb mbi zemr\u00ebn e Aaronit kur t\u00eb paraqitet p\u00ebrpara Zotit. K\u00ebshtu Aaroni do t\u00eb \u00e7oj\u00eb gjykimin e bijve t\u00eb Izraelit mbi zemr\u00ebn e tij para Zotit, vazhdimisht.\n28:31 Do t\u00eb b\u00ebsh edhe mantelin e efodit, krejt n\u00eb ngjyr\u00eb vjollce.\n28:32 N\u00eb mes t\u00eb tij do t\u00eb ket\u00eb nj\u00eb hapje p\u00ebr t\u00eb kaluar kok\u00ebn; rreth e qark k\u00ebsaj hapjeje do t\u00eb ket\u00eb nj\u00eb buz\u00eb prej stofi t\u00eb punuar, si hapja e nj\u00eb parzmoreje, me q\u00ebllim q\u00eb t\u00eb mos shqyhet.\n28:33 Rreth e qark k\u00ebsaj buze t\u00eb mantelit do t\u00eb b\u00ebsh disa sheg\u00eb ngjyr\u00eb vjollce, t\u00eb purpurt dhe flak\u00eb t\u00eb kuqe, dhe rreth tyre, zile ari;\n28:34 nj\u00eb zile ari dhe nj\u00eb sheg\u00eb, nj\u00eb zile ari dhe nj\u00eb sheg\u00eb, rreth e qark, mbi buz\u00ebn e mantelit.\n28:35 Aaroni do ta p\u00ebrdor\u00eb p\u00ebr t\u00eb kryer sh\u00ebrbimin; dhe tingulli i saj do t\u00eb d\u00ebgjohet kur t\u00eb hyj\u00eb n\u00eb vendin e shenjt\u00eb p\u00ebrpara Zotit dhe kur t\u00eb dal\u00eb andej, me q\u00ebllim q\u00eb ai t\u00eb mos vdes\u00eb.\n28:36 Do t\u00eb b\u00ebsh edhe nj\u00eb pllak\u00eb prej ari safi dhe mbi t\u00eb do t\u00eb gdhend\u00ebsh, ashtu si\u00e7 b\u00ebhet mbi nj\u00eb vul\u00eb, fjal\u00ebt: SHENJT\u00c9RI ZOTIT.\n28:37 Do t'i lidh\u00ebsh asaj nj\u00eb rrip ngjyr\u00eb vjollce, p\u00ebr ta bashkuar me \u00e7allm\u00ebn; ajo duhet t\u00eb ndodhet n\u00eb pjes\u00ebn e p\u00ebrparme t\u00eb \u00e7allm\u00ebs.\n28:38 K\u00ebshtu do t\u00eb q\u00ebndrojn\u00eb mbi ballin e Aaronit, dhe Aaroni do t\u00eb mbaj\u00eb fajin t\u00eb shoq\u00ebruar me gj\u00ebrat e shenjta t\u00eb paraqitura nga bijt\u00eb e Izraelit, n\u00eb \u00e7do lloj ofertash t\u00eb shenjta; ajo do t\u00eb rrij\u00eb vazhdimisht mbi ballin e tij, n\u00eb m\u00ebnyr\u00eb q\u00eb ato t\u00eb jen\u00eb t\u00eb mir\u00ebpritura nga Zoti.\n28:39 Do t\u00eb end\u00ebsh gjithashtu tunik\u00ebn prej liri t\u00eb holl\u00eb, t\u00eb punuar me shtiza; do t\u00eb b\u00ebsh nj\u00eb \u00e7allm\u00eb prej liri t\u00eb holl\u00eb dhe nj\u00eb brez, nj\u00eb pun\u00eb q\u00ebndistari.\n28:40 P\u00ebr bijt\u00eb e Aaronit do t\u00eb b\u00ebsh disa tunika, breza dhe mbulesa koke, me q\u00ebllim q\u00eb t'u jap\u00ebsh atyre nder dhe hijeshi.\n28:41 Me ato do t\u00eb vesh\u00ebsh m\u00eb von\u00eb v\u00ebllan\u00eb t\u00ebnd Aaronin dhe bijt\u00eb e tij bashk\u00eb me t\u00eb; ti do t'i vajos\u00ebsh, do t'i shugurosh dhe do t'i shenjt\u00ebrosh, q\u00eb t\u00eb m\u00eb sh\u00ebrbejn\u00eb si prift\u00ebrinj.\n28:42 Do t'u b\u00ebsh gjithashtu disa pantallona prej liri p\u00ebr t\u00eb mbuluar lakuriq\u00ebsin\u00eb e tyre; ato do t\u00eb shkojn\u00eb nga ij\u00ebt deri te kofsh\u00ebt.\n28:43 Aaroni dhe bijt\u00eb e tij do t'i veshin kur t\u00eb hyjn\u00eb n\u00eb \u00e7adr\u00ebn e mbledhjeve, ose kur t'i afrohen altarit p\u00ebr t\u00eb b\u00ebr\u00eb sh\u00ebrbimin n\u00eb vendin e shenjt\u00eb, me q\u00ebllim q\u00eb mos b\u00ebhen fajtor\u00eb dhe t\u00eb mos vdesin. Ky \u00ebsht\u00eb nj\u00eb statut i p\u00ebrjetsh\u00ebm p\u00ebr t\u00eb dhe p\u00ebr trash\u00ebgimtar\u00ebt e tij\".\n29:1 \"Kjo \u00ebsht\u00eb ajo q\u00eb do t\u00eb b\u00ebsh p\u00ebr t'i shuguruar n\u00eb m\u00ebnyr\u00eb q\u00eb t\u00eb m\u00eb sh\u00ebrbejn\u00eb si prift\u00ebrinj. Merr nj\u00eb dem t\u00eb vog\u00ebl dhe dy desh pa t\u00eb meta,\n29:2 disa buk\u00eb pa maja, \u00ebmb\u00eblsira pa maja t\u00eb z\u00ebna me vaj dhe revani pa maja t\u00eb lyer me vaj; (do t'i b\u00ebsh me maj\u00eb mielli t\u00eb grurit).\n29:3 Do t'i v\u00ebsh n\u00eb nj\u00eb shport\u00eb dhe do t'i \u00e7osh bashk\u00eb me demin e vog\u00ebl dhe dy desht\u00eb.\n29:4 Do ta afrosh Aaronin dhe bijt\u00eb e tij n\u00eb hyrjen e \u00e7adr\u00ebs s\u00eb mbledhjes dhe do t'i lash me uj\u00eb.\n29:5 Pastaj do t\u00eb marr\u00ebsh rrobat dhe do ta rivesh\u00ebsh Aaronin me tunik\u00ebn, me mantelin e efodit, me efodin dhe me pektoralin, dhe do t'i ngjesh\u00ebsh brezin e punuar artistikisht t\u00eb efodit.\n29:6 Do t'i v\u00ebsh mbi krye \u00e7allm\u00ebn dhe mbi \u00e7allm\u00ebn do t\u00eb v\u00ebsh diadem\u00ebn e shenjt\u00eb.\n29:7 Pastaj do t\u00eb marr\u00ebsh vajin e vajosjes, do ta derdh\u00ebsh mbi kryet e tij dhe do ta vajos\u00ebsh.\n29:8 Pastaj do t'i afrosh bijt\u00eb e tij dhe do t'u rivesh\u00ebsh tunikat.\n29:9 Do t'u ngjesh\u00ebsh Aaronit dhe bijve t\u00eb tij brezat dhe do t\u00eb v\u00ebsh mbi ta mbulesa kokash; prift\u00ebria do t'iu p\u00ebrkas\u00eb atyre p\u00ebr gjith\u00eb jet\u00ebn. K\u00ebshtu do t\u00eb shugurosh Aaronin dhe bijt\u00eb e tij.\n29:10 Pastaj do t\u00eb afrosh demin e vog\u00ebl para \u00e7adr\u00ebs s\u00eb mbledhjes; dhe Aaroni dhe bijt\u00eb e tij do t\u00eb v\u00ebn\u00eb duart e tyre mbi kok\u00ebn e demit t\u00eb vog\u00ebl.\n29:11 Dhe do ta ther\u00ebsh demin e vog\u00ebl para Zotit, n\u00eb hyrje t\u00eb \u00e7adr\u00ebs s\u00eb mbledhjes.\n29:12 Do t\u00eb marr\u00ebsh pastaj gjakun e demit t\u00eb vog\u00ebl dhe do ta v\u00ebsh me gishtin t\u00ebnd mbi brir\u00ebt e altarit, dhe gjith\u00eb mbetjen e gjakut do ta derdh\u00ebsh n\u00eb k\u00ebmb\u00ebt e altarit.\n29:13 Do t\u00eb marr\u00ebsh gjithashtu gjith\u00eb dhjamin q\u00eb mbulon zorr\u00ebt, bul\u00ebn e ngjitur me m\u00ebl\u00e7in\u00eb dhe dy veshkat me dhjamin q\u00eb kan\u00eb sip\u00ebr, dhe do t'i tymos\u00ebsh mbi altarin.\n29:14 Por mishin e demit t\u00eb vog\u00ebl, l\u00ebkur\u00ebn dhe f\u00eblliq\u00ebsirat e tij do t'i djeg\u00ebsh me zjarr jasht\u00eb kampit: ky \u00ebsht\u00eb nj\u00eb flijim p\u00ebr m\u00ebkatin.\n29:15 Pastaj do t\u00eb marr\u00ebsh nj\u00eb nga desht\u00eb dhe Aaroni dhe bijt\u00eb e tij do t\u00eb v\u00ebn\u00eb duart e tyre mbi kok\u00ebn e dashit.\n29:16 Pastaj do ta ther\u00ebsh dashin, do t\u00eb marr\u00ebsh gjakun e tij dhe do ta sp\u00ebrkat\u00ebsh p\u00ebrrreth altarit.\n29:17 Pas k\u00ebsaj do ta ndash n\u00eb copa dashin, do t\u00eb lash zorr\u00ebt dhe k\u00ebmb\u00ebt e tij, dhe do t'i v\u00ebsh bashk\u00eb me copat e tij dhe me kok\u00ebn e tij.\n29:18 Pastaj do ta tymos\u00ebsh t\u00ebr\u00eb dashin mbi altar: ky \u00ebsht\u00eb nj\u00eb olokaust p\u00ebr Zotin; \u00ebsht\u00eb nj\u00eb er\u00eb e k\u00ebndshme, nj\u00eb flijim i b\u00ebr\u00eb me an\u00eb t\u00eb zjarrit p\u00ebr Zotin.\n29:19 Pastaj do t\u00eb marr\u00ebsh dashin tjet\u00ebr, dhe Aaroni dhe bijt\u00eb e tij do t\u00eb v\u00ebn\u00eb duart e tyre mbi kok\u00ebn e dashit.\n29:20 Do ta ther\u00ebsh dashin, do t\u00eb marr\u00ebsh prej gjakut t\u00eb tij dhe do ta v\u00ebsh mbi bul\u00ebn e veshit t\u00eb djatht\u00eb t\u00eb Aaronit dhe mbi bul\u00ebn e veshit t\u00eb djatht\u00eb t\u00eb bijve t\u00eb tij, mbi gishtin e madh t\u00eb dor\u00ebs s\u00eb tyre t\u00eb djatht\u00eb dhe mbi gishtin e trash\u00eb t\u00eb k\u00ebmb\u00ebs s\u00eb tyre t\u00eb djatht\u00eb, dhe do ta sp\u00ebrkat\u00ebsh gjakun rreth e qark altarit.\n29:21 Do t\u00eb marr\u00ebsh pastaj nga gjaku q\u00eb \u00ebsht\u00eb mbi altar dhe nga vaji i vajosjes dhe do t\u00eb sp\u00ebrkat\u00ebsh Aaronin dhe rrobat e tij, bijt\u00eb e tij dhe rrobat e tyre. K\u00ebshtu do t\u00eb shenjt\u00ebrohet ai dhe rrobat e tij, bijt\u00eb e tij dhe rrobat e tyre bashk\u00eb me t\u00eb.\n29:22 Do t\u00eb marr\u00ebsh edhe dhjamin e dashit, dhjamin e bishtit, dhjamin q\u00eb mbulon zorr\u00ebt, bul\u00ebn e m\u00ebl\u00e7is\u00eb, dy veshkat dhe dhjamin q\u00eb \u00ebsht\u00eb mbi to dhe kofsh\u00ebn e djatht\u00eb, (sepse \u00ebsht\u00eb nj\u00eb dash shenjt\u00ebrimi);\n29:23 do t\u00eb marr\u00ebsh edhe nj\u00eb buk\u00eb, nj\u00eb \u00ebmb\u00eblsir\u00eb me vaj dhe nj\u00eb revani nga shporta e buk\u00ebs s\u00eb ndorme, q\u00eb \u00ebsht\u00eb para Zotit,\n29:24 dhe t\u00eb gjitha k\u00ebto gj\u00ebra do t'i v\u00ebsh n\u00eb duart e Aaronit dhe n\u00eb duart e bijve t\u00eb tij, dhe do t'i tund\u00ebsh si nj\u00eb ofert\u00eb e b\u00ebr\u00eb p\u00ebrpara Zotit.\n29:25 Pastaj do t'i marr\u00ebsh nga duart e tyre dhe do t'i tymos\u00ebsh mbi altarin, mbi olokaustin, si nj\u00eb er\u00eb e k\u00ebndshme p\u00ebrpara Zotit; \u00ebsht\u00eb nj\u00eb flijim i b\u00ebr\u00eb me an\u00eb t\u00eb zjarrit Zotit.\n29:26 Pas k\u00ebsaj do t\u00eb marr\u00ebsh gjoksin e dashit t\u00eb p\u00ebrdorur p\u00ebr shugurimin e Aaronit dhe do ta tund\u00ebsh si nj\u00eb ofert\u00eb e l\u00ebvizur p\u00ebrpara Zotit; dhe kjo do t\u00eb jet\u00eb pjesa e jote.\n29:27 Dhe nga dashi i p\u00ebrdorur p\u00ebr shenjt\u00ebrim do t\u00eb ruash gjoksin e ofert\u00ebs s\u00eb l\u00ebvizur dhe kofsh\u00ebn e ofert\u00ebs s\u00eb ngritur, q\u00eb u takojn\u00eb Aaronit dhe bijve t\u00eb tij.\n29:28 Ai do t\u00eb jet\u00eb nga ana e bijve t\u00eb Izraelit p\u00ebr Aaronin dhe bijt\u00eb e tij nj\u00eb rregull i p\u00ebrhersh\u00ebm, sepse \u00ebsht\u00eb nj\u00eb ofert\u00eb lart\u00ebsimi. Do t\u00eb jet\u00eb nj\u00eb ofert\u00eb lart\u00ebsimi nga ana e bijve t\u00eb Izraelit q\u00eb \u00ebsht\u00eb marr\u00eb nga flit\u00eb e tyre t\u00eb fal\u00ebnderimit, oferta e tyre p\u00ebr lart\u00ebsim te Zoti.\n29:29 Dhe rrobat e shenjta t\u00eb Aaronit do t'u kalojn\u00eb bijve t\u00eb tij mbas tij, me q\u00ebllim q\u00eb t\u00eb vajosen dhe t\u00eb shenjt\u00ebrohen tek ata.\n29:30 Ai bir q\u00eb b\u00ebhet prift n\u00eb vend t\u00eb tij do t'i vesh\u00eb ato p\u00ebr shtat\u00eb dit\u00eb, kur do t\u00eb hyj\u00eb n\u00eb \u00e7adr\u00ebn e mbledhjes p\u00ebr t\u00eb kryer sh\u00ebrbes\u00ebn n\u00eb vendin e shenjt\u00eb.\n29:31 Pastaj do t\u00eb marr\u00ebsh dashin e shenjt\u00ebrimit dhe do ta gatuash mishin e tij n\u00eb nj\u00eb vend t\u00eb shenjt\u00eb;\n29:32 dhe Aaroni dhe bijt\u00eb e tij do t\u00eb han\u00eb, n\u00eb hyrje t\u00eb \u00e7adr\u00ebs s\u00eb mbledhjes, mishin e dashit dhe buk\u00ebn q\u00eb \u00ebsht\u00eb n\u00eb shport\u00eb.\n29:33 Do t\u00eb han\u00eb gj\u00ebrat q\u00eb kan\u00eb sh\u00ebrbyer p\u00ebr t\u00eb b\u00ebr\u00eb shlyerjen p\u00ebr t'u shuguruar dhe shenjt\u00ebruar; por asnj\u00eb i huaj nuk do t\u00eb haj\u00eb prej tyre, sepse jan\u00eb gj\u00ebra t\u00eb shenjta.\n29:34 Dhe n\u00eb qoft\u00eb se tepron mish i shenjt\u00ebrimit ose buk\u00eb deri n\u00eb m\u00ebngjes, do t\u00eb djeg\u00ebsh at\u00eb q\u00eb mbetet n\u00eb zjarr; nuk do ta hahet, sepse \u00ebsht\u00eb e shenjt\u00eb.\n29:35 Do t\u00eb b\u00ebsh, pra, p\u00ebr Aaronin dhe p\u00ebr bijt\u00eb e tij t\u00eb gjitha ato q\u00eb t\u00eb kam urdh\u00ebruar: do t'i shenjt\u00ebrosh brenda shtat\u00eb dit\u00ebve.\n29:36 Dhe \u00e7do dit\u00eb do t\u00eb ofrosh nj\u00eb dem t\u00eb vog\u00ebl, si flijim p\u00ebr m\u00ebkatin, p\u00ebr t\u00eb lar\u00eb fajin q\u00eb ke b\u00ebr\u00eb dhe do ta vajos\u00ebsh p\u00ebr ta shenjt\u00ebruar.\n29:37 P\u00ebr shtat\u00eb dit\u00eb do t\u00eb b\u00ebsh shlyerjen e fajit p\u00ebr altarin dhe do ta shenjt\u00ebrosh; altari do t\u00eb jet\u00eb nj\u00eb vend shum\u00eb i shenjt\u00eb: \u00e7do gj\u00eb q\u00eb do t\u00eb prek\u00eb altarin do t\u00eb jet\u00eb e shenjt\u00eb.\n29:38 Kjo \u00ebsht\u00eb ajo q\u00eb do t\u00eb ofrosh mbi altar: dy qengja motak\u00eb \u00e7do dit\u00eb, p\u00ebr gjithnj\u00eb.\n29:39 Nj\u00ebrin prej qengjave do ta ofrosh n\u00eb m\u00ebngjes dhe tjetrin n\u00eb t\u00eb ngrysur.\n29:40 Me qengjin e par\u00eb do t\u00eb ofrosh nj\u00eb t\u00eb dhjet\u00ebn e ef\u00ebs t\u00eb maj\u00ebs s\u00eb miellit t\u00eb brumosur me nj\u00eb \u00e7erek hine vaji thjesht ulliri, dhe nj\u00eb libacion me nj\u00eb \u00e7erek hine ver\u00eb.\n29:41 Qengjin e dyt\u00eb do ta ofrosh n\u00eb t\u00eb ngrysur; do ta shoq\u00ebrosh me t\u00eb nj\u00ebjtin blatim dhe me t\u00eb nj\u00ebjtin libacion t\u00eb m\u00ebngjesit; \u00ebsht\u00eb nj\u00eb flijim parfumi t\u00eb k\u00ebndsh\u00ebm i ofruar n\u00ebp\u00ebrmjet zjarrit p\u00ebr Zotin.\n29:42 Do t\u00eb jet\u00eb nj\u00eb olokaust i p\u00ebrjetsh\u00ebm p\u00ebr gjith\u00eb brezat e ardhsh\u00ebm, ti ofruar n\u00eb hyrje t\u00eb \u00e7adr\u00ebs s\u00eb mbledhjes, p\u00ebrpara Zotit, kur un\u00eb do t'ju takoj p\u00ebr t\u00eb folur me ty.\n29:43 Dhe atje do t\u00eb takohem me bijt\u00eb e Izraelit; dhe \u00e7adra do t\u00eb shenjt\u00ebrohet nga lavdia ime.\n29:44 K\u00ebshtu un\u00eb do t\u00eb shenjt\u00ebroj \u00e7adr\u00ebn e mbledhjes dhe altarin; do t\u00eb shenjt\u00ebroj gjithashtu Aaronin dhe bijt\u00eb e tij, q\u00eb t\u00eb m\u00eb sh\u00ebrbejn\u00eb si prift\u00ebrinj.\n29:45 Do t\u00eb banoj n\u00eb mes t\u00eb bijve t\u00eb Izraelit dhe do t\u00eb jem Per\u00ebndia i tyre.\n29:46 Dhe ata do t\u00eb m\u00ebsojn\u00eb q\u00eb un\u00eb jam Zoti, Per\u00ebndia i tyre, q\u00eb i nxori nga vendi i Egjiptit p\u00ebr t\u00eb banuar midis tyre. Un\u00eb jam Zoti, Per\u00ebndia i tyre\".\n30:1 \"Do t\u00eb b\u00ebsh edhe nj\u00eb altar p\u00ebr t\u00eb djegur temjanin; dhe do ta b\u00ebsh prej druri t\u00eb akacies.\n30:2 Do t\u00eb jet\u00eb nj\u00eb kubit i gjat\u00eb dhe nj\u00eb kubit i gjer\u00eb; do t\u00eb jet\u00eb katror dhe do t\u00eb ket\u00eb nj\u00eb lart\u00ebsi dy kubit\u00ebsh; brir\u00ebt e tij do t\u00eb p\u00ebrb\u00ebjn\u00eb nj\u00eb pjes\u00eb t\u00eb vetme me t\u00eb.\n30:3 Do ta vesh\u00ebsh me ar safi: pjes\u00ebn e tij t\u00eb sip\u00ebrme, an\u00ebt e tij rreth e qark dhe brir\u00ebt e tij; do t'i b\u00ebsh edhe nj\u00eb kuror\u00eb ari.\n30:4 Do t'i b\u00ebsh edhe dy unaza ari n\u00ebn kuror\u00eb, n\u00eb t\u00eb dy krah\u00ebt e tij; do t'i v\u00ebsh n\u00eb t\u00eb dy krah\u00ebt e tij p\u00ebr t\u00eb kaluar shtizat, t\u00eb cilat sh\u00ebrbejn\u00eb p\u00ebr ta mbartur.\n30:5 Shtizat do t\u00eb b\u00ebhen me dru t\u00eb akacies dhe do t'i vesh\u00ebsh me ar.\n30:6 Do ta vendos\u00ebsh altarin p\u00ebrpara velit q\u00eb ndodhet p\u00ebrpara ark\u00ebs s\u00eb d\u00ebshmis\u00eb, p\u00ebrball\u00eb pajtuesit q\u00eb ndodhet mbi d\u00ebshmin\u00eb, ku un\u00eb do t\u00eb t\u00eb takoj.\n30:7 Mbi t\u00eb Aaroni do t\u00eb djeg\u00eb temjan t\u00eb parfumuar; do ta djeg\u00eb \u00e7do m\u00ebngjes, kur rregullon llambat.\n30:8 Kur Aaroni ndez llambat n\u00eb t\u00eb ngrysur, do t\u00eb djeg\u00eb temjanin: nj\u00eb temjan i vazhduesh\u00ebm p\u00ebrpara Zotit, p\u00ebr brezat e ardhsh\u00ebm.\n30:9 Nuk do t\u00eb ofroni mbi t\u00eb as temjan t\u00eb huaj, as olokaust, as blatim; dhe mbi t\u00eb nuk do t\u00eb derdhni libacione.\n30:10 Dhe Aaroni do t\u00eb b\u00ebj\u00eb nj\u00eb her\u00eb n\u00eb vit shlyerjen e m\u00ebkatit mbi brir\u00ebt e tij; me gjakun e flis\u00eb s\u00eb shlyerjes s\u00eb m\u00ebkatit do t\u00eb b\u00ebj\u00eb mbi t\u00eb shlyerjen nj\u00eb her\u00eb n\u00eb vit, brez pas brezi. Do t\u00eb jet\u00eb gj\u00eb shum\u00eb e shenjt\u00eb, e shenjt\u00eb p\u00ebr Zotin\".\n30:11 Zoti i foli akoma Moisiut, duke th\u00ebn\u00eb:\n30:12 \"Kur do t\u00eb b\u00ebsh llogarin\u00eb e bijve t\u00eb Izraelit, p\u00ebr regjistrimin e tyre, secili do t'i jap\u00eb Zotit shpengimin e jet\u00ebs s\u00eb tij, kur do t\u00eb num\u00ebrohen, me q\u00ebllim q\u00eb t\u00eb mos goditen nga ndonj\u00eb plag\u00eb, kur do t\u00eb b\u00ebsh regjistrimin e tyre.\n30:13 Kjo \u00ebsht\u00eb ajo q\u00eb do t\u00eb jap\u00eb secili nga ata q\u00eb paguajn\u00eb taks\u00eb: gjysm\u00eb sikli, simbas siklit t\u00eb shenjt\u00ebrores, (sikli \u00ebsht\u00eb baras me nj\u00ebzet gere), nj\u00eb gjysm\u00eb sikli do t\u00eb jet\u00eb oferta q\u00eb duhet t'i b\u00ebhet Zotit.\n30:14 Kushdo q\u00eb do t\u00eb p\u00ebrfshihet nga regjistrimi, nj\u00ebzet vje\u00e7 e lart, do t'i jap\u00eb Zotit k\u00ebt\u00eb ofert\u00eb.\n30:15 I pasuri nuk do t\u00eb jap\u00eb m\u00eb tep\u00ebr, as i varf\u00ebri m\u00eb pak se gjysm\u00eb sikli, kur do t'i b\u00ebhet kjo ofert\u00eb Zotit p\u00ebr t\u00eb shlyer fajet e jet\u00ebs suaj.\n30:16 Do t\u00eb marr\u00ebsh, pra, nga djemt\u00eb e Izraelit k\u00ebto t\u00eb holla t\u00eb sh\u00ebrbimit dhe do t'i p\u00ebrdor\u00ebsh p\u00ebr sh\u00ebrbimin e \u00e7adr\u00ebs s\u00eb mbledhjes: kjo do t\u00eb jet\u00eb p\u00ebr bijt\u00eb e Izraelit nj\u00eb kujtim para Zotit p\u00ebr t\u00eb b\u00ebr\u00eb shlyerjen p\u00ebr jet\u00ebn tuaj\".\n30:17 Zoti i foli akoma Moisiut, duke i th\u00ebn\u00eb:\n30:18 \"Do t\u00eb b\u00ebsh edhe nj\u00eb legen prej bronzi, me baz\u00ebn e tij prej bronzi, p\u00ebr t'u lar\u00eb; do ta vendos\u00ebsh midis \u00e7adr\u00ebs s\u00eb mbledhjes dhe altarit dhe do t\u00eb v\u00ebsh edhe uj\u00eb.\n30:19 Dhe aty Aaroni dhe bijt\u00eb e tij do t\u00eb lajn\u00eb duart dhe k\u00ebmb\u00ebt.\n30:20 Kur do t\u00eb hyjn\u00eb n\u00eb \u00e7adr\u00ebn e mbledhjes, do t\u00eb lahen me uj\u00eb, q\u00eb t\u00eb mos vdesin; k\u00ebshtu edhe kur do t'i afrohen altarit p\u00ebr t\u00eb sh\u00ebrbyer, p\u00ebr t\u00eb tymosur nj\u00eb ofert\u00eb t\u00eb b\u00ebr\u00eb Zotit me an\u00eb t\u00eb zjarrit.\n30:21 Do t\u00eb lajn\u00eb duart dhe k\u00ebmb\u00ebt e tyre, q\u00eb t\u00eb mos vdesin. Ky do t\u00eb jet\u00eb nj\u00eb rregull i p\u00ebrjetsh\u00ebm, p\u00ebr at\u00eb dhe p\u00ebr pasardh\u00ebsit e tij, brez pas brezi\".\n30:22 Zoti i foli akoma Moisiut, duke i th\u00ebn\u00eb:\n30:23 \"Gjej edhe aromat m\u00eb t\u00eb mira: pes\u00ebqind sikla mirr\u00eb t\u00eb l\u00ebng\u00ebt, dyqind e pes\u00ebdhjet\u00eb, dometh\u00ebn\u00eb gjysma, cinamon aromatik dhe dyqind e pes\u00ebdhjet\u00eb kanell\u00eb aromatike,\n30:24 pes\u00ebqind sikla, n\u00eb baz\u00eb t\u00eb siklit t\u00eb shenjt\u00ebrores, kasie dhe nj\u00eb hin vaj ulliri.\n30:25 Me k\u00ebto t\u00eb p\u00ebrgatit\u00ebsh nj\u00eb vaj p\u00ebr vajosjen e shenjt\u00eb, nj\u00eb parfum t\u00eb prodhuar me artin e parfumierit: ky do t\u00eb jet\u00eb vaji i vajosjes s\u00eb shenjt\u00eb.\n30:26 Me t\u00eb do t\u00eb vajos\u00ebsh \u00e7adr\u00ebn e mbledhjes dhe ark\u00ebn e d\u00ebshmis\u00eb,\n30:27 tryez\u00ebn dhe t\u00eb gjitha veglat e tij, shandanin dhe t\u00eb gjitha p\u00ebrdor\u00ebset e tij, altarin e temjanit,\n30:28 altarin e olokausteve dhe t\u00eb gjitha p\u00ebrdor\u00ebset e tij, legenin dhe baz\u00ebn e tij.\n30:29 Do t\u00eb shenjt\u00ebrosh k\u00ebshtu k\u00ebto gj\u00ebra dhe do t\u00eb jen\u00eb shum\u00eb t\u00eb shenjta; t\u00eb gjitha sendet q\u00eb u p\u00ebrkasin, do t\u00eb jen\u00eb t\u00eb shenjta.\n30:30 Do t\u00eb vajos\u00ebsh edhe Aaronin dhe bijt\u00eb e tij dhe do t'i shenjt\u00ebrosh, me q\u00ebllim q\u00eb t\u00eb m\u00eb sh\u00ebrbejn\u00eb si prift\u00ebrinj.\n30:31 Pastaj do t'u flas\u00ebsh bijve t\u00eb Izraelit, duke u th\u00ebn\u00eb: \"Ky do t\u00eb jet\u00eb p\u00ebr mua nj\u00eb vaj p\u00ebr vajosjen e shenjt\u00eb, brez pas brezi.\n30:32 Nuk do ta derdhni mbi mish njeriu dhe nuk do t\u00eb p\u00ebrgatisni tjet\u00ebr po ashtu; ai \u00ebsht\u00eb i shenjt\u00eb, do t\u00eb jet\u00eb i shenjt\u00eb edhe p\u00ebr ju.\n30:33 Kushdo q\u00eb p\u00ebrgatit t\u00eb ngjash\u00ebm, apo kushdo q\u00eb e v\u00eb mbi nj\u00eb t\u00eb huaj, do t\u00eb shfaroset nga populli i tij\"\".\n30:34 Zoti i tha akoma Moisiut: \"Gjej disa aroma, storaks, guaska er\u00ebmira, galban, aroma me temjan t\u00eb kulluar, n\u00eb doza t\u00eb barabarta;\n30:35 do t\u00eb p\u00ebrgatit\u00ebsh me to nj\u00eb parfum simbas artit t\u00eb parfumierit, nj\u00eb parfum t\u00eb kripur, t\u00eb past\u00ebr dhe t\u00eb shenjt\u00eb;\n30:36 do ta kthesh nj\u00eb pjes\u00eb t\u00eb tij n\u00eb pluhur shum\u00eb t\u00eb holl\u00eb dhe do t\u00eb vendos\u00ebsh pak nga ai p\u00ebrpara d\u00ebshmis\u00eb n\u00eb \u00e7adr\u00ebn e mbledhjes, ku un\u00eb do t\u00eb t\u00eb takoj: ai do t\u00eb jet\u00eb p\u00ebr ju nj\u00eb gj\u00eb shum\u00eb e shenjt\u00eb.\n30:37 Por nga temjani q\u00eb ke p\u00ebr t\u00eb b\u00ebr\u00eb, nuk do t\u00eb p\u00ebrgatisni p\u00ebr veten tuaj me t\u00eb nj\u00ebjt\u00ebn p\u00ebrb\u00ebrje; kjo do t\u00eb jet\u00eb p\u00ebr ty nj\u00eb gj\u00eb e shenjt\u00eb kushtuar Zotit.\n30:38 Kushdo q\u00eb do t\u00eb p\u00ebrgatis\u00eb nj\u00eb temjan t\u00eb k\u00ebtij lloji, do t\u00eb shfaroset nga populli i tij\".\n31:1 Zoti i foli akoma Moisiut, duke i th\u00ebn\u00eb:\n31:2 \"Shiko, un\u00eb e thirra me em\u00ebr Betsaleelin, birin e Urit, birin e Hurit, nga fisi i Jud\u00ebs;\n31:3 dhe e mbusha me Frym\u00ebn e Per\u00ebndis\u00eb, me dituri, me zgjuar\u00ebsi, me njohuri dhe \u00e7do shkatht\u00ebsi,\n31:4 q\u00eb t\u00eb jet\u00eb i aft\u00eb t\u00eb p\u00ebrgatis\u00eb vizatime artistike, t\u00eb punoj\u00eb arin, argjendin dhe bronzin,\n31:5 p\u00ebr t\u00eb gdhendur gur\u00eb p\u00ebr t'u ngallmuar, p\u00ebr t\u00eb punuar drurin dhe p\u00ebr t\u00eb kryer \u00e7do lloj punimesh.\n31:6 Dhe ja, i dhash\u00eb p\u00ebr shok Oholiabin, t\u00eb birin e Ahisamakut, nga fisi i Danve; dhe shtiva dituri n\u00eb mendjen e t\u00eb gjith\u00eb njer\u00ebzve t\u00eb shkath\u00ebt, me q\u00ebllim q\u00eb t\u00eb mund t\u00eb b\u00ebjn\u00eb t\u00eb gjitha ato q\u00eb t\u00eb kam urdh\u00ebruar:\n31:7 \u00e7adr\u00ebn e mbledhjes, ark\u00ebn e d\u00ebshmis\u00eb dhe pajtuesin q\u00eb ndodhet mbi t\u00eb, dhe t\u00eb gjitha orendit\u00eb e \u00e7adr\u00ebs,\n31:8 tryez\u00ebn dhe orendit\u00eb e saj, shandanin prej ari safi dhe t\u00eb gjitha pjes\u00ebt e tij, altarin e temjanit,\n31:9 altarin e olokausteve dhe t\u00ebr\u00eb veglat e tij, en\u00ebn e madhe dhe baz\u00ebn e saj,\n31:10 dhe rrobat e endura holl\u00eb me mjesht\u00ebri, rrobat e shenjta p\u00ebr priftin Aaron dhe rrobat e bijve t\u00eb tij p\u00ebr t\u00eb sh\u00ebrbyer si prift\u00ebrinj,\n31:11 vajin p\u00ebr vajosje dhe temjanin e parfumuar p\u00ebr vendin e shenjt\u00eb. Ata do t\u00eb veprojn\u00eb simbas t\u00eb gjith\u00eb urdhrave q\u00eb t\u00eb kam dh\u00ebn\u00eb ty\".\n31:12 Zoti i foli akoma Moisiut, duke i th\u00ebn\u00eb:\n31:13 \"Fol edhe me bijt\u00eb e Izraelit, duke u th\u00ebn\u00eb: Tregoni kujdes t\u00eb madh p\u00ebr t\u00eb respektuar t\u00eb shtunat e mia, sepse \u00ebsht\u00eb nj\u00eb shenj\u00eb midis meje dhe jush p\u00ebr t\u00eb gjith\u00eb brezat tuaj, n\u00eb m\u00ebnyr\u00eb q\u00eb t\u00eb njihni se un\u00eb jam Zoti q\u00eb ju shenjt\u00ebron.\n31:14 Do t\u00eb respektoni, pra, t\u00eb shtun\u00ebn, sepse \u00ebsht\u00eb p\u00ebr ju nj\u00eb dit\u00eb e shenjt\u00eb; kush e p\u00ebrdhos at\u00eb, do t\u00eb d\u00ebnohet me vdekje; kushdo q\u00eb b\u00ebn at\u00eb dit\u00eb ndonj\u00eb pun\u00eb, do t\u00eb shfaroset nga gjiri i popullit t\u00eb tij.\n31:15 Do t\u00eb punohet gjasht\u00eb dit\u00eb; por dita e shtat\u00eb \u00ebsht\u00eb e shtuna e pushimit, e shenjt\u00eb p\u00ebr Zotin; kushdo q\u00eb do t\u00eb b\u00ebj\u00eb ndonj\u00eb pun\u00eb dit\u00ebn e shtun\u00eb do t\u00eb d\u00ebnohet me vdekje.\n31:16 Andaj bijt\u00eb e Izraelit do ta respektojn\u00eb t\u00eb shtun\u00ebn, duke e kremtuar at\u00eb brez pas brezi, si nj\u00eb bes\u00eblidhje t\u00eb p\u00ebrjetshme.\n31:17 Ajo \u00ebsht\u00eb nj\u00eb shenj\u00eb e p\u00ebrjetshme midis meje dhe bijve t\u00eb Izraelit, sepse n\u00eb gjasht\u00eb dit\u00eb Zoti b\u00ebri qiellin dhe tok\u00ebn, dhe dit\u00ebn e shtat\u00eb pushoi dhe u shlodh\".\n31:18 Kur Zoti mbaroi s\u00eb foluri me Moisiun n\u00eb malin Sinai, i dha dy pllaka t\u00eb d\u00ebshmis\u00eb, pllaka guri, t\u00eb shkruara me gishtin e Per\u00ebndis\u00eb.\n32:1 Por populli, duke par\u00eb q\u00eb Moisiu po vononte t\u00eb zbriste nga mali, u mblodh rreth Aaronit dhe i tha: \"Hajt tani, na b\u00ebj nj\u00eb per\u00ebndi t\u00eb shkoj\u00eb para nesh, sepse sa p\u00ebr Moisiun, njeriun q\u00eb na nxori nga vendi i Egjiptit, nuk dim\u00eb \u00e7far\u00eb i ka ndodhur\".\n32:2 Aaroni iu p\u00ebrgjigj atyre: \"Hiqni unazat prej ari q\u00eb jan\u00eb n\u00eb vesh\u00ebt e grave tuaja, t\u00eb bijve tuaj, dhe t\u00eb bijave tuaja dhe m'i sillni mua\".\n32:3 K\u00ebshtu t\u00ebr\u00eb populli hoqi unazat prej ari q\u00eb kishin n\u00eb vesh\u00ebt dhe ia \u00e7oi Aaronit,\n32:4 i cili i mori nga duart e tyre dhe, mbasi i modeloi me dalt\u00eb, b\u00ebri nj\u00eb vi\u00e7 prej metali t\u00eb shkrir\u00eb. At\u00ebher\u00eb ata than\u00eb: \"O Izrael, ky \u00ebsht\u00eb per\u00ebndia yt q\u00eb t\u00eb nxori nga vendi i Egjiptit!\".\n32:5 Kur Aaroni pa k\u00ebt\u00eb, ngriti nj\u00eb altar p\u00ebrpara tij dhe vuri kasnec\u00eb q\u00eb than\u00eb: \"Nes\u00ebr do t\u00eb jet\u00eb fest\u00eb p\u00ebr nder t\u00eb Zotit!\".\n32:6 T\u00eb nes\u00ebrmen ata u ngrit\u00ebn her\u00ebt, ofruan olokauste dhe \u00e7uan fli fal\u00ebnderimi; populli u ul p\u00ebr t\u00eb ngr\u00ebn\u00eb e p\u00ebr t\u00eb pir\u00eb, pastaj u ngrit p\u00ebr t\u00eb d\u00ebfryer.\n32:7 At\u00ebher\u00eb Zoti i tha Moisiut: \"Tani shko, zbrit, sepse populli yt, q\u00eb ti nxore nga vendi i Egjiptit, \u00ebsht\u00eb korruptuar;\n32:8 u larguan shpejt, jan\u00eb p\u00ebrdal\u00eb nga rruga q\u00eb un\u00eb e kisha urdh\u00ebruar t\u00eb ndiqte; b\u00ebri nj\u00eb vi\u00e7 prej metali t\u00eb shkrir\u00eb, u p\u00ebrkul para tij, i ofroi flijime dhe tha: \"O Izrael, kjo \u00ebsht\u00eb per\u00ebndia jote q\u00eb t\u00eb nxori nga vendi i Egjiptit\"\".\n32:9 Zoti i tha akoma Moisiut: \"E pash\u00eb k\u00ebt\u00eb popull, dhe ja, \u00ebsht\u00eb nj\u00eb popull me qaf\u00eb t\u00eb fort\u00eb.\n32:10 M\u00eb l\u00ebr, pra, t\u00eb veproj, n\u00eb m\u00ebnyr\u00eb q\u00eb zem\u00ebrimi im t\u00eb ndizet kund\u00ebr tyre dhe t'i konsumoj; por nga ti do t\u00eb b\u00ebj nj\u00eb komb t\u00eb madh\".\n32:11 At\u00ebher\u00eb Moisiu e luti Zotin, Per\u00ebndin\u00eb e tij, dhe i tha: \"Pse, o Zot, zem\u00ebrimi yt duhet t\u00eb ndizet kund\u00ebr popullit t\u00ebnd q\u00eb e nxore nga vendi i Egjiptit me fuqi t\u00eb madhe dhe me dor\u00eb t\u00eb fort\u00eb?\n32:12 Pse duhet q\u00eb Egjiptasit t\u00eb thon\u00eb: \"Ai i nxori p\u00ebr t'ju b\u00ebr\u00eb t\u00eb keq, q\u00eb t\u00eb vriten mbi malet dhe p\u00ebr t'i shfarosur nga faqja e dheut\"? Hiq dor\u00eb nga zem\u00ebrimi yt i zjarrt\u00eb dhe nga q\u00ebllimi yt p\u00ebr t'i b\u00ebr\u00eb keq popullit t\u00ebnd.\n32:13 Kujto Abrahamin, Isakun dhe Izraelin, sh\u00ebrb\u00ebtor\u00eb t\u00eb tu, t\u00eb cil\u00ebve u je betuar mbi veten t\u00ebnde, duke u th\u00ebn\u00eb atyre: \"Un\u00eb do t\u00eb shum\u00ebzoj pasardh\u00ebsit tuaj si yjet e qiellit dhe do t'u jap pasardh\u00ebsve tuaj t\u00ebr\u00eb at\u00eb vend p\u00ebr t\u00eb cilin t\u00eb fola, dhe ata do ta zot\u00ebrojn\u00eb p\u00ebrjet\u00eb\"\".\n32:14 K\u00ebshtu Zoti ndryshoi mendim lidhur me t\u00eb keqen q\u00eb kishte th\u00ebn\u00eb se do t'i b\u00ebnte popullit t\u00eb tij.\n32:15 At\u00ebher\u00eb Moisiu u kthye dhe zbriti nga mali me dy pllakat e d\u00ebshmis\u00eb n\u00eb duar, pllaka t\u00eb shkruara nga t\u00eb dy an\u00ebt, si p\u00ebrpara ashtu edhe prapa.\n32:16 Pllakat ishin vep\u00ebr e Per\u00ebndis\u00eb dhe shkrimi i tyre ishte shkrimi i Per\u00ebndis\u00eb, i gdhendur mbi pllakat.\n32:17 Por Jozueu, duke d\u00ebgjuar britm\u00ebn e popullit q\u00eb b\u00ebrtiste, i tha Moisiut: \"Ka nj\u00eb zhurm\u00eb lufte n\u00eb kamp\".\n32:18 Por ai u p\u00ebrgjigj: \"Kjo nuk \u00ebsht\u00eb as nj\u00eb britm\u00eb fitoreje, as nj\u00eb britm\u00eb humbjeje; britma q\u00eb un\u00eb d\u00ebgjoj \u00ebsht\u00eb e njer\u00ebzve q\u00eb k\u00ebndojn\u00eb\".\n32:19 Si iu afrua kampit, pa vi\u00e7in dhe vallet; at\u00ebher\u00eb Moisiu u ndez nga zem\u00ebrimi dhe ai i hodhi pllakat nga duart e tij dhe i theu n\u00eb k\u00ebmb\u00ebt e malit.\n32:20 Pastaj mori vi\u00e7in q\u00eb ata kishin b\u00ebr\u00eb, e dogji n\u00eb zjarr dhe e b\u00ebri pluhur; pastaj e p\u00ebrhapi pluhurin n\u00eb uj\u00eb dhe ia dha p\u00ebr t\u00eb pir\u00eb bijve t\u00eb Izraelit.\n32:21 Pastaj Moisiu i tha Aaronit: \"\u00c7far\u00eb t\u00eb ka b\u00ebr\u00eb ky popull, t\u00eb cilin e ke ngarkuar me nj\u00eb m\u00ebkat kaq t\u00eb madh?\".\n32:22 Aaroni u p\u00ebrgjigj: \"Zem\u00ebrimi i zot\u00ebris\u00eb sime t\u00eb mos ndizet, ti vet\u00eb e njeh k\u00ebt\u00eb popull dhe e di q\u00eb ai \u00ebsht\u00eb i prirur ndaj s\u00eb keqes.\n32:23 Ata m\u00eb kan\u00eb th\u00ebn\u00eb: \"Na b\u00ebj nj\u00eb per\u00ebndi q\u00eb t\u00eb shkoj\u00eb para nesh, sepse Moisiut, njeriut q\u00eb na nxori nga vendi i Egjiptit, nuk dim\u00eb se \u00e7far\u00eb i ka ndodhur\".\n32:24 At\u00ebher\u00eb un\u00eb u thash\u00eb atyre: \"Kush ka ar t\u00eb mos e mbaj\u00eb me vete\". K\u00ebshtu ata ma dhan\u00eb mua dhe un\u00eb e hodha n\u00eb zjarr, dhe na doli ky vi\u00e7\".\n32:25 Kur Moisiu pa q\u00eb populli ishte pa fre (dhe Aaroni e kishte l\u00ebn\u00eb t\u00eb shfrenohej duke e ekspozuar n\u00eb turpin e armiqve t\u00eb tij),\n32:26 u ndal n\u00eb hyrje t\u00eb kampit dhe tha: \"Kushdo q\u00eb \u00ebsht\u00eb me Zotin, le t\u00eb vij\u00eb tek un\u00eb!\". Dhe t\u00eb gjith\u00eb bijt\u00eb e Levit u mblodh\u00ebn pran\u00eb tij.\n32:27 Dhe ai u tha atyre: \"K\u00ebshtu thot\u00eb Zoti, Per\u00ebndia i Izraelit: \"Secili prej jush t\u00eb v\u00ebr\u00eb shpat\u00ebn n\u00eb krahun e tij; kaloni dhe rikaloni nga nj\u00eb hyrje e kampit n\u00eb tjetr\u00ebn, secili t\u00eb vras\u00eb v\u00ebllan\u00eb e tij, mikun e tij, fqinjin e tij!\"\".\n32:28 Bijt\u00eb e Levit b\u00ebn\u00eb ashtu si\u00e7 u kishte th\u00ebn\u00eb Moisiu, dhe at\u00eb dit\u00eb ran\u00eb rreth tre mij\u00eb njer\u00ebz.\n32:29 Pastaj Moisiu tha: \"Shenjt\u00ebrohuni sot Zotit, q\u00eb ai t'ju jap\u00eb nj\u00eb bekim, sepse secili prej jush ka q\u00ebn\u00eb kund\u00ebr birit t\u00eb tij dhe v\u00ebllait t\u00eb tij\".\n32:30 T\u00eb nes\u00ebrmen Moisiu i tha popullit: \"Ju keni b\u00ebr\u00eb nj\u00eb m\u00ebkat t\u00eb madh; por tani un\u00eb do t\u00eb ngjitem tek Zoti; ndofta do t\u00eb mund t\u00eb b\u00ebj shlyerjen p\u00ebr m\u00ebkatin tuaj\".\n32:31 Moisiu u kthye, pra, te Zoti dhe tha: \"Medet, ky popull ka kryer nj\u00eb m\u00ebkat t\u00eb madh dhe ka b\u00ebr\u00eb p\u00ebr vete nj\u00eb per\u00ebndi prej ari.\n32:32 Megjithat\u00eb tani, t\u00eb lutem, falua m\u00ebkatin e tyre; p\u00ebrndryshe, m\u00eb fshi nga libri yt q\u00eb ke shkruar!\".\n32:33 Por Zoti iu p\u00ebrgjegj Moisiut: \"At\u00eb q\u00eb ka b\u00ebr\u00eb m\u00ebkat kund\u00ebr meje, at\u00eb do ta fshij nga libri im!\n32:34 Tani shko, \u00e7oje popullin ku t\u00eb kam th\u00ebn\u00eb. Ja, Engj\u00eblli im do t\u00eb shkoj para teje, por dit\u00ebn q\u00eb do t\u00eb vij p\u00ebr t'i d\u00ebnuar, do t'i d\u00ebnoj p\u00ebr m\u00ebkatin e tyre\".\n32:35 K\u00ebshtu Zoti goditi popullin, sepse kishte b\u00ebr\u00eb vi\u00e7in q\u00eb Aaroni kishte modeluar.\n33:1 Zoti i tha Moisiut: \"Shko, ngjitu q\u00eb k\u00ebtej, ti s\u00eb bashku me popullin q\u00eb nxore nga vendi i Egjiptit, drejt vendit, q\u00eb u premtova me betim Abrahamit, Isakut dhe Jakobit, duke u th\u00ebn\u00eb: \"Un\u00eb do t'ua jap pasardh\u00ebsve t\u00eb tu\".\n33:2 Un\u00eb do t\u00eb d\u00ebrgoj nj\u00eb Engj\u00ebll para teje dhe do t'i d\u00ebboj Kananejt\u00eb, Amorejt\u00eb, Hitejt\u00eb, Perezejt\u00eb, Hivejt\u00eb dhe Jebusejt\u00eb.\n33:3 Ngjitu drejt vendit ku rrjedh qum\u00ebsht dhe mjalt\u00eb, sepse un\u00eb do t\u00eb ngjitem bashk\u00eb me ty, sepse je nj\u00eb popull me qaf\u00eb t\u00eb fort\u00eb, dhe nuk dua t\u00eb t\u00eb shfaros rrug\u00ebs\".\n33:4 Kur populli d\u00ebgjoi k\u00ebto fjal\u00eb t\u00eb kobshme, ndjeu nj\u00eb hidh\u00ebrim t\u00eb thell\u00eb, dhe askush nuk vuri stolit\u00eb e tij.\n33:5 N\u00eb fakt Zoti i kishte th\u00ebn\u00eb Moisiut: \"U thuaj bijve t\u00eb Izraelit: \"Ju jeni nj\u00eb popull me qaf\u00eb t\u00eb fort\u00eb; n\u00eb qoft\u00eb se un\u00eb do t\u00eb ngjitesha edhe p\u00ebr nj\u00eb \u00e7ast t\u00eb vet\u00ebm n\u00eb mesin t\u00ebnd, do t\u00eb t\u00eb konsumoja! Prandaj tani hiqi stolit\u00eb e tua dhe k\u00ebshtu un\u00eb do t\u00eb di \u00e7far\u00eb duhet t\u00eb b\u00ebj me ty\"\".\n33:6 K\u00ebshtu bijt\u00eb e Izraelit i hoq\u00ebn stolit\u00eb e tyre, q\u00eb nga nisja e tyre nga mali Horeb e tutje.\n33:7 Pastaj Moisiu mori \u00e7adr\u00ebn dhe e ngriti jasht\u00eb kampit, larg tij dhe e quajti tenda e mbledhjes; kushdo q\u00eb k\u00ebrkonte Zotin, dilte drejt \u00e7adr\u00ebs s\u00eb mbledhjes, q\u00eb ndodhej jasht\u00eb kampit.\n33:8 Kur Moisiu dilte p\u00ebr t\u00eb shkuar n\u00eb \u00e7ad\u00ebr, t\u00ebr\u00eb populli ngrihej, dhe secili rrinte m\u00eb k\u00ebmb\u00eb n\u00eb hyrje t\u00eb \u00e7adr\u00ebs s\u00eb vet dhe ndiqte me sy Moisiun, deri sa ai t\u00eb hynte n\u00eb \u00e7ad\u00ebr.\n33:9 Dhe kur Moisiu hynte n\u00eb tend\u00eb, shtylla e res\u00eb zbriste dhe ndalej n\u00eb hyrje t\u00eb saj, dhe Zoti fliste me Moisiun.\n33:10 T\u00ebr\u00eb populli e shihte shtyll\u00ebn e res\u00eb s\u00eb ndaluar n\u00eb hyrjen e \u00e7adr\u00ebs; k\u00ebshtu t\u00ebr\u00eb populli ngrihej dhe secili p\u00ebrkulej n\u00eb hyrje t\u00eb \u00e7adr\u00ebs s\u00eb vet.\n33:11 K\u00ebshtu Zoti fliste me Moisiun ball\u00eb p\u00ebr ball\u00eb, ashtu si nj\u00eb njeri flet me mikun e tij; pastaj Moisiu kthehej n\u00eb kamp. Por Jozueu, biri i Nunit, zbatuesi i tij i ri, nuk largohej nga \u00e7adra.\n33:12 Pastaj Moisiu i tha Zotit: \"Pa shiko, ti m\u00eb thua: \"B\u00ebj q\u00eb ky popull t\u00eb ngjitet\". Por ti nuk m\u00eb ke th\u00ebn\u00eb cilin do t\u00eb d\u00ebrgosh me mua. Megjithat\u00eb ke th\u00ebn\u00eb: \"Un\u00eb t\u00eb njoh personalisht dhe ke gjetur hir n\u00eb syt\u00eb e mi\".\n33:13 Prandaj tani, q\u00eb m\u00eb ke me sy t\u00eb mir\u00eb, m\u00eb b\u00ebj t\u00eb njohura rrug\u00ebt e tua, q\u00eb t\u00eb kem mund\u00ebsi t\u00eb t\u00eb njoh dhe t\u00eb fitoj hir n\u00eb syt\u00eb e tu. Merr parasysh gjithashtu se ky komb \u00ebsht\u00eb populli yt\".\n33:14 Zoti u p\u00ebrgjigj: \"Prania ime do t\u00eb shkoj\u00eb me ty, dhe un\u00eb do t\u00eb t\u00eb jap pushim\".\n33:15 At\u00ebher\u00eb Moisiu i tha: \"N\u00eb qoft\u00eb se prania jote nuk vjen me mua, mos na nis q\u00eb k\u00ebtej.\n33:16 Si do t\u00eb mund t\u00eb njihet tani q\u00eb un\u00eb dhe populli yt, kemi gjetur hir n\u00eb syt\u00eb e tu? Ndofta kjo ndodh sepse ti vjen me ne? K\u00ebshtu un\u00eb dhe populli yt do t\u00eb dallohemi nga t\u00ebr\u00eb popujt q\u00eb jetojn\u00eb mbi faqen e dheut\".\n33:17 Zoti i tha Moisiut: \"Do ta b\u00ebj edhe k\u00ebt\u00eb gj\u00eb q\u00eb ke k\u00ebrkuar, sepse ti ke gjetur hir n\u00eb syt\u00eb e mi dhe t\u00eb njoh personalisht\".\n33:18 At\u00ebher\u00eb Moisiu tha: \"Tregom\u00eb lavdin\u00eb t\u00ebnde!\".\n33:19 Zoti iu p\u00ebrgjigj: \"Un\u00eb do t\u00eb b\u00ebj q\u00eb t\u00eb kaloj\u00eb para teje gjith\u00eb mir\u00ebsia ime dhe do t\u00eb shpall emrin e Zotit para teje. Do t\u00eb fal at\u00eb q\u00eb do t\u00eb fal dhe do t\u00eb m\u00ebshiroj at\u00eb q\u00eb do t\u00eb m\u00ebshiroj\".\n33:20 Dhe tha akoma: \"Ti nuk mund t\u00eb shikosh fytyr\u00ebn time, sepse asnj\u00eb njeri nuk mund t\u00eb m\u00eb shikoj\u00eb dhe t\u00eb jetoj\u00eb\".\n33:21 Pastaj Zoti tha: \"Ja nj\u00eb vend af\u00ebr meje; ti do t\u00eb rrish mbi shk\u00ebmbin;\n33:22 dhe nd\u00ebrsa do t\u00eb kaloj\u00eb lavdia ime, un\u00eb do t\u00eb t\u00eb v\u00eb n\u00eb nj\u00eb t\u00eb \u00e7ar\u00eb t\u00eb shk\u00ebmbit dhe do t\u00eb t\u00eb mbuloj me dor\u00ebn time, deri sa t\u00eb kem kaluar;\n33:23 pastaj do ta t\u00ebrheq dor\u00ebn dhe ti do t\u00eb m\u00eb shikosh nga kurrizi; por fytyra ime nuk mund t\u00eb shihet\".\n34:1 Zoti i tha Moisiut: \"Preji dy pllaka guri ashtu si t\u00eb parat; dhe un\u00eb do t\u00eb shkruaj mbi pllakat fjal\u00ebt q\u00eb ishin mbi pllakat e para q\u00eb theve.\n34:2 K\u00ebshtu ji gati n\u00eb m\u00ebngjes dhe ngjitu n\u00eb m\u00ebngjes n\u00eb malin Sinai, dhe q\u00ebndro aty af\u00ebr meje n\u00eb maj\u00eb t\u00eb malit.\n34:3 Askush t\u00eb mos ngjitet bashk\u00eb me ty dhe t\u00eb mos duket asnjeri n\u00eb t\u00ebr\u00eb malin; as kope me bag\u00ebti t\u00eb im\u00ebt a t\u00eb trash\u00eb p\u00ebrreth k\u00ebtij mali\".\n34:4 K\u00ebshtu Moisiu preu dy pllaka guri, si t\u00eb parat; u ngrit her\u00ebt n\u00eb m\u00ebngjes dhe u ngjit n\u00eb malin Sinai ashtu si\u00e7 e kishte urdh\u00ebruar Zoti, dhe mori n\u00eb dor\u00eb t\u00eb dyja pllakat prej guri.\n34:5 At\u00ebher\u00eb Zoti zbriti n\u00eb ren\u00eb dhe u ndal aty pran\u00eb tij, dhe shpalli emrin e Zotit.\n34:6 Dhe Zoti kaloi pran\u00eb tij dhe thirri: \"Zoti, Per\u00ebndia i p\u00ebrjetsh\u00ebm, i m\u00ebshirsh\u00ebm dhe i dhembshur, i ngadalsh\u00ebm n\u00eb zem\u00ebrim, i pasur n\u00eb mir\u00ebsi dhe n\u00eb besnik\u00ebri,\n34:7 q\u00eb p\u00ebrdor m\u00ebshir\u00ebn p\u00ebr mij\u00ebra njer\u00ebz, q\u00eb fal padrejt\u00ebsin\u00eb, shkeljet dhe m\u00ebkatin por nuk e l\u00eb t\u00eb pand\u00ebshkuar fajtorin, dhe q\u00eb viziton padrejt\u00ebsin\u00eb e et\u00ebrve mbi bijt\u00eb dhe mbi bijt\u00eb e bijve deri n\u00eb brezin e tret\u00eb dhe t\u00eb kat\u00ebrt\".\n34:8 Dhe Moisiu nxitoi t\u00eb p\u00ebrkulet deri n\u00eb tok\u00eb, dhe adhuroi.\n34:9 Pastaj tha: \"O Per\u00ebndi, n\u00eb rast se kam gjetur hir n\u00eb syt\u00eb e tu, eja n\u00eb mes nesh, sepse ky \u00ebsht\u00eb nj\u00eb popull me qaf\u00eb t\u00eb fort\u00eb; na fal padrejt\u00ebsin\u00eb ton\u00eb dhe m\u00ebkatin ton\u00eb, dhe na merr si trash\u00ebgimin\u00eb t\u00ebnde\".\n34:10 Zoti u p\u00ebrgjigj: \"Ja, un\u00eb po b\u00ebj nj\u00eb bes\u00eblidhje: Do t\u00eb b\u00ebj para gjith\u00eb popullit mrekulli, q\u00eb nuk jan\u00eb b\u00ebr\u00eb kurr\u00eb mbi t\u00eb gjith\u00eb dheun dhe n\u00eb asnj\u00eb komb tjet\u00ebr; dhe t\u00ebr\u00eb populli n\u00eb mes t\u00eb t\u00eb cilit\n34:11 Kqyr at\u00eb q\u00eb po t\u00eb urdh\u00ebroj sot: Ja un\u00eb do t'i d\u00ebboj para teje Amorejt\u00eb, Kananejt\u00eb, Hitejt\u00eb, Perezejt\u00eb, Hivejt\u00eb dhe Jebusejt\u00eb.\n34:12 Ruhu se b\u00ebn ndonj\u00eb aleanc\u00eb me banor\u00ebt e vendit n\u00eb t\u00eb cilin ke p\u00ebr t\u00eb vajtur, me q\u00ebllim q\u00eb t\u00eb mos jet\u00eb nj\u00eb grack\u00eb p\u00ebr ty;\n34:13 por rr\u00ebzo altar\u00ebt e tyre, cop\u00ebto shtyllat e tyre t\u00eb shenjta dhe rr\u00ebzo sh\u00ebmb\u00eblltyrat e tyre,\n34:14 (sepse nuk do t'i p\u00ebrulesh nj\u00eb per\u00ebndi tjet\u00ebr, sepse Zoti, emri i t\u00eb cilit \u00ebsht\u00eb \"Xhelozi\", \u00ebsht\u00eb nj\u00eb Per\u00ebndi xheloz).\n34:15 Mos b\u00ebj asnj\u00eb aleanc\u00eb me banor\u00ebt e vendit sepse, kur ata kurv\u00ebrohen te idhujt e tyre dhe ofrojn\u00eb fli idhujve t\u00eb tyre, ndokush prej tyre t\u00eb fton dhe ti ha nga flit\u00eb e tyre,\n34:16 dhe merr nga bijat e tyre p\u00ebr bijt\u00eb e tu, dhe vajzat e tyre t\u00eb kurv\u00ebrohen te idhujt e tyre dhe t'i shtyjn\u00eb bijt\u00eb e tu t\u00eb kurv\u00ebrohen te idhujt e tyre.\n34:17 Nuk do t\u00eb b\u00ebsh idhull me metal t\u00eb shkrir\u00eb.\n34:18 Do t\u00eb kremtosh fest\u00ebn e t\u00eb ndormeve. Shtat\u00eb dit\u00eb me radh\u00eb do t\u00eb hash buk\u00eb pa maja, ashtu si\u00e7 t\u00eb kam urdh\u00ebruar n\u00eb koh\u00ebn e caktuar, n\u00eb muajin e Abibit, sepse n\u00eb muajin e Abibit ti ke dal\u00eb nga Egjipti.\n34:19 Kushdo q\u00eb \u00e7el barkun \u00ebsht\u00eb imi; \u00ebsht\u00eb imja \u00e7do pjell\u00eb e par\u00eb mashkull t\u00eb t\u00eb gjith\u00eb bag\u00ebtis\u00eb sate, qoft\u00eb e trash\u00eb ose e im\u00ebt.\n34:20 Do t\u00eb shpengosh me nj\u00eb qengj pjell\u00ebn e par\u00eb mashkull t\u00eb gomarit; po t\u00eb jet\u00eb se nuk do ta shpengosh, do t'i thyesh qaf\u00ebn. Do t\u00eb shpengosh edhe \u00e7do t\u00eb par\u00eblindur t\u00eb bijve t\u00eb tu. Asnjeri nuk do t\u00eb paraqitet para meje duarbosh.\n34:21 Do t\u00eb punosh gjasht\u00eb dit\u00eb; por dit\u00ebn e shtat\u00eb do t\u00eb pushosh: do t\u00eb pushosh edhe n\u00eb koh\u00ebn e l\u00ebrimit dhe t\u00eb korrjes.\n34:22 Do t\u00eb kremtosh fest\u00ebn e jav\u00ebve, dometh\u00ebn\u00eb, t\u00eb prodhimit t\u00eb par\u00eb t\u00eb korrjes s\u00eb grurit dhe fest\u00ebn e t\u00eb vjelave n\u00eb fund t\u00eb vitit.\n34:23 Tri her\u00eb n\u00eb vit do t\u00eb paraqitet \u00e7do mashkull i juaj para Per\u00ebndis\u00eb, Zotit, Per\u00ebndis\u00eb t\u00eb Izraelit.\n34:24 Sepse un\u00eb do t\u00eb d\u00ebboj kombe para teje dhe do t\u00eb zgjeroj kufijt\u00eb e tu, dhe askush nuk do t\u00eb d\u00ebshiroj\u00eb vendin t\u00ebnd, kur do t\u00eb ngjitesh tri her\u00eb n\u00eb vit, p\u00ebr t\u00eb dal\u00eb p\u00ebrpara Zotit, Per\u00ebndis\u00eb t\u00ebnd.\n34:25 Nuk do t\u00eb ofrosh me buk\u00eb t\u00eb mbrujtur gjakun e viktim\u00ebs s\u00eb flijuar p\u00ebr mua; flia e fest\u00ebs s\u00eb Pashk\u00ebs nuk do t\u00eb lihet deri n\u00eb m\u00ebngjes.\n34:26 Do t\u00eb \u00e7osh n\u00eb sht\u00ebpin\u00eb e Zotit, Per\u00ebndis\u00eb t\u00ebnd, prodhimet e para t\u00eb fryteve t\u00eb tok\u00ebs sate. Nuk do ta gatuash kecin n\u00eb qum\u00ebshtin e n\u00ebn\u00ebs s\u00eb tij\".\n34:27 Pastaj Zoti i tha Moisiut: \"Shkruaji k\u00ebto fjal\u00eb, sepse mbi baz\u00ebn e k\u00ebtyre fjal\u00ebve kam p\u00ebrfunduar nj\u00eb aleanc\u00eb me ty dhe me Izraelin\".\n34:28 K\u00ebshtu Moisiu mbeti aty me Zotin dyzet dit\u00eb dhe dyzet net; nuk h\u00ebngri buk\u00eb as piu uj\u00eb. Dhe Zoti shkroi mbi pllakat fjal\u00ebt e bes\u00eblidhjes, dhjet\u00eb urdh\u00ebrimet.\n34:29 Por Moisiu, kur zbriti nga mali i Sinait (duke zbritur nga mali Moisiu kishte n\u00eb dor\u00eb dy pllakat e d\u00ebshmis\u00eb), nuk e dinte q\u00eb l\u00ebkura e fytyr\u00ebs s\u00eb tij qe b\u00ebr\u00eb rr\u00ebz\u00ebllyese, sepse kishte qen\u00eb t\u00eb fliste me Zotin.\n34:30 K\u00ebshtu, kur Aaroni dhe t\u00ebr\u00eb bijt\u00eb e Izraelit pan\u00eb Moisiun, ja, q\u00eb l\u00ebkura e fytyr\u00ebs s\u00eb tij ishte rr\u00ebz\u00ebllyese dhe ata kishin frik\u00eb t'i afroheshin atij.\n34:31 Por Moisiu i thirri dhe Aaroni dhe t\u00ebr\u00eb krer\u00ebt e asambles\u00eb u rikthyen tek ai, dhe Moisiu u foli atyre.\n34:32 Pastaj, t\u00ebr\u00eb bijt\u00eb e Izraelit u afruan, dhe ai i urdh\u00ebroi t\u00eb b\u00ebnin t\u00eb gjitha ato q\u00eb Zoti i kishte th\u00ebn\u00eb n\u00eb malin Sinai.\n34:33 Mbasi Moisiu mbaroi s\u00eb foluri me ta, vuri nj\u00eb vel mbi fytyr\u00ebn e tij.\n34:34 Por kur Moisiu hynte p\u00ebrpara Zotit p\u00ebr t\u00eb biseduar me at\u00eb, hiqte velin deri sa t\u00eb dilte jasht\u00eb; duke dal\u00eb jasht\u00eb, u tregonte bijve t\u00eb Izraelit ato q\u00eb e kishin urdh\u00ebruar t\u00eb b\u00ebnte.\n34:35 Bijt\u00eb e Izraelit, duke par\u00eb fytyr\u00ebn e Moisiut, shihnin se l\u00ebkura e tij rr\u00ebz\u00ebllente; pastaj Moisiu vinte p\u00ebrs\u00ebri velin mbi fytyr\u00ebn e tij, deri sa hynte t\u00eb fliste me Zotin.\n35:1 Moisiu thirri asamblen\u00eb e bijve t\u00eb Izraelit dhe u tha atyre: \"K\u00ebto jan\u00eb gj\u00ebrat q\u00eb Zoti m\u00eb ka urdh\u00ebruar t\u00eb b\u00ebj.\n35:2 Do t\u00eb punohet gjasht\u00eb dit\u00eb, por dita e shtat\u00eb do t\u00eb jet\u00eb p\u00ebr ju nj\u00eb dit\u00eb e shenjt\u00eb, nj\u00eb e shtun\u00eb pushimi, e shenjt\u00ebruar ndaj Zotit. Kushdo q\u00eb b\u00ebn ndonj\u00eb pun\u00eb at\u00eb dit\u00eb do t\u00eb d\u00ebnohet me vdekje.\n35:3 Nuk do t\u00eb ndizni zjarr n\u00eb asnj\u00eb prej banesave tuaja dit\u00ebn e shtun\u00eb\".\n35:4 Pastaj Moisiu i foli t\u00ebr\u00eb asambles\u00eb s\u00eb bijve t\u00eb Izraelit dhe tha: \"Kjo \u00ebsht\u00eb ajo q\u00eb Zoti ka urdh\u00ebruar, duke th\u00ebn\u00eb:\n35:5 \"Merrni nd\u00ebrmjet jush nj\u00eb ofert\u00eb p\u00ebr Zotin; kushdo q\u00eb ka zem\u00ebr bujare do t'i \u00e7oj\u00eb nj\u00eb ofert\u00eb Zotit: ar, argjend dhe bronz,\n35:6 stofa ngjyr\u00eb vjollce, t\u00eb purpurta ose flak\u00eb t\u00eb kuqe, li t\u00eb holl\u00eb dhe lesh dhie,\n35:7 l\u00ebkura dashi t\u00eb ngjyera n\u00eb t\u00eb kuq, l\u00ebkura baldose dhe dru t\u00eb akacies,\n35:8 vaj p\u00ebr ndri\u00e7im t\u00eb shandanit dhe aroma p\u00ebr vajin e vajosjes dhe p\u00ebr temjanin aromatik,\n35:9 gur\u00eb oniksi dhe gur\u00eb p\u00ebr t'u ngallmuar mbi efodin dhe pektoralin.\n35:10 Kushdo nd\u00ebrmjet jush q\u00eb \u00ebsht\u00eb i aft\u00eb, le t\u00eb vij\u00eb dhe t\u00eb b\u00ebj\u00eb t\u00ebr\u00eb ato gj\u00ebra q\u00eb Zoti ka urdh\u00ebruar:\n35:11 tabernakullin, \u00e7adr\u00ebn e tij dhe mbules\u00ebn, kap\u00ebset, d\u00ebrrasat, traversat, shtyllat dhe bazat e tij,\n35:12 ark\u00ebn, shtizat e saj, pajtuesin dhe velin e mbules\u00ebs s\u00eb ark\u00ebs,\n35:13 tryez\u00ebn dhe shtizat e saj, t\u00ebr\u00eb veglat e saj dhe buk\u00ebn e paraqitjes;\n35:14 shandanin p\u00ebr drit\u00eb dhe veglat e tij, llambat e tij dhe vajin p\u00ebr ndri\u00e7im t\u00eb shandanit;\n35:15 altarin e temjanit dhe shtizat e tij, vajin e vajosjes, temjanin aromatik dhe perden e hyrjes n\u00eb tabernakull,\n35:16 altarin e olokausteve me gril\u00ebn e tij prej bronzi, shtizat dhe t\u00ebr\u00eb veglat e tij, legenin dhe baz\u00ebn e tij,\n35:17 perdet e oborrit, shtyllat e tij dhe bazat e tyre, dhe perdja e hyrjes n\u00eb oborr;\n35:18 kunjat e tabernakullit, kunjat e oborrit dhe litar\u00ebt e tyre;\n35:19 rrobat e punuara holl\u00eb p\u00ebr t\u00eb b\u00ebr\u00eb sh\u00ebrbimin n\u00eb vendin e shenjt\u00eb, rrobat e shenjta p\u00ebr priftin Aaron dhe rrobat e bijve t\u00eb tij q\u00eb t\u00eb sh\u00ebrbejn\u00eb si prift\u00ebrinj\"\".\n35:20 At\u00ebher\u00eb gjith\u00eb asambleja e bijve t\u00eb Izraelit u largua nga prania e Moisiut.\n35:21 K\u00ebshtu t\u00ebr\u00eb ata q\u00eb ishin t\u00eb shtyr\u00eb nga zemra e tyre dhe t\u00ebr\u00eb ata q\u00eb ishin t\u00eb shtyr\u00eb nga fryma e tyre, erdh\u00ebn p\u00ebr t'i sjell\u00eb ofert\u00ebn e tyre Zotit p\u00ebr vepr\u00ebn e \u00e7adr\u00ebs s\u00eb mbledhjes, p\u00ebr t\u00eb gjitha sh\u00ebrbimet e tij dhe p\u00ebr rrobat e shenjta.\n35:22 Erdh\u00ebn burra dhe gra, ata q\u00eb kishin zem\u00ebr bujare, dhe soll\u00ebn me vete kap\u00ebse, vath\u00eb, unaza me vul\u00eb dhe byzylyk\u00eb, lloj lloj xhevahiresh prej ari; gjithkush i solli ndonj\u00eb ofert\u00eb prej ari Zotit.\n35:23 Dhe t\u00eb gjith\u00eb ata q\u00eb kishin stofa ngjyr\u00eb vjollce, t\u00eb purpurt, flak\u00eb t\u00eb kuqe, ose li t\u00eb holl\u00eb, apo lesh dhie, ose l\u00ebkura dashi me ngjyr\u00eb t\u00eb kuqe, ose l\u00ebkur\u00eb baldose, i soll\u00ebn.\n35:24 Kushdo q\u00eb mund t\u00eb b\u00ebnte nj\u00eb ofert\u00eb prej argjendi o prej bronzi, e solli ofert\u00ebn e shenjt\u00ebruar p\u00ebr Zotin; dhe kushdo q\u00eb kishte dru prej akacieje p\u00ebr ndonj\u00eb pun\u00eb t\u00eb caktuar p\u00ebr sh\u00ebrbimin, e solli.\n35:25 T\u00eb gjitha grat\u00eb e zonja tor\u00ebn me duart e tyre dhe prun\u00eb fillin ngjyr\u00eb vjollc\u00eb, t\u00eb purpurt dhe flak\u00eb t\u00eb kuqe, si dhe li t\u00eb holl\u00eb.\n35:26 Dhe t\u00eb gjitha grat\u00eb q\u00eb ishin t\u00eb shtyra nga zemra e tyre dhe kishin zhd\u00ebrvjellt\u00ebsi, tor\u00ebn lesh dhie.\n35:27 Krer\u00ebt e popullit soll\u00ebn gur\u00eb oniksi dhe gur\u00eb p\u00ebr t'u ngallmuar n\u00eb efodin dhe n\u00eb pektoralin,\n35:28 aroma dhe vaj p\u00ebr ndri\u00e7im t\u00eb shandanit, vaj p\u00ebr vajosjen dhe p\u00ebr temjanin aromatik.\n35:29 T\u00eb gjith\u00eb bijt\u00eb e Izraelit, burra e gra, q\u00eb ishin t\u00eb shtyr\u00eb nga zemra p\u00ebr t'i \u00e7uar di\u00e7ka p\u00ebr t\u00ebr\u00eb vepr\u00ebn q\u00eb Zoti kishte urdh\u00ebruar t\u00eb b\u00ebnin me an\u00eb t\u00eb Moisiut, i \u00e7uan Zotit oferta vullnetare.\n35:30 Moisiu u tha bijve t\u00eb Izraelit: \"Shikoni, Zoti i thirri me em\u00ebr Betsaleelin, birin e Urit, birin e Hurit, nga fisi i Jud\u00ebs,\n35:31 dhe e mbushi me Frym\u00ebn e Per\u00ebndis\u00eb, me dituri, me zgjuarsi, me njohuri dhe me gjithfar\u00eb aft\u00ebsish,\n35:32 q\u00eb t\u00eb mund t\u00eb krijoj\u00eb vizatime artistike, t\u00eb punoj\u00eb arin, argjendin dhe bronzin,\n35:33 t\u00eb gdhend\u00eb gur\u00eb p\u00ebr t'u ngallmuar, p\u00ebr t\u00eb punuar drurin dhe p\u00ebr t\u00eb kryer \u00e7do lloj punimi artistik.\n35:34 I ka sht\u00ebn\u00eb gjithashtu n\u00eb zem\u00ebr aft\u00ebsin\u00eb p\u00ebr t\u00eb m\u00ebsuar t\u00eb tjer\u00ebt, atij dhe Oholiabit, birit t\u00eb Ahisamakut, nga fisi i Danve.\n35:35 I mbushi me diturin\u00eb e zemr\u00ebs p\u00ebr t\u00eb kryer gjithfar\u00eb punimesh t\u00eb gdhend\u00ebsit, t\u00eb vizatuesit, t\u00eb q\u00ebndistarit dhe t\u00eb end\u00ebsit, n\u00eb ngjyr\u00eb vjollce, t\u00eb purpurt, flak\u00eb t\u00eb kuqe, dhe prej liri t\u00eb holl\u00eb, i aft\u00eb p\u00ebr t\u00eb kryer \u00e7do lloj punimi dhe p\u00ebr t\u00eb krijuar vizatime artistike.\n36:1 Tani Betsaleeli dhe Oholiabi si dhe t\u00eb gjith\u00eb njer\u00ebzit e aft\u00eb, t\u00eb cil\u00ebt Zoti i ka pajisur me dituri dhe zgjuarsi p\u00ebr t\u00eb kryer t\u00eb gjitha punimet p\u00ebr sh\u00ebrbimin e shenjt\u00ebrores, kan\u00eb p\u00ebr t\u00eb vepruar sipas urdhrave t\u00eb Zotit\".\n36:2 Moisiu thirri, pra, Betsaleelin dhe Oholiabin dhe t\u00eb gjith\u00eb njer\u00ebzit e urt\u00eb nga zemra, t\u00eb cil\u00ebt shtyheshin nga zemra p\u00ebr t'i hyr\u00eb pun\u00ebs dhe p\u00ebr ta kryer at\u00eb.\n36:3 Dhe ata mor\u00ebn nga Moisiu t\u00eb gjitha ofertat e sjella nga bijt\u00eb e Izraelit p\u00ebr punimet p\u00ebr nd\u00ebrtimin e shenjt\u00ebrores dhe kryerjen e tyre. Por \u00e7do m\u00ebngjes bijt\u00eb e Izraelit vazhdonin t'i sillnin Moisiut oferta vullnetare.\n36:4 At\u00ebher\u00eb t\u00eb gjith\u00eb njer\u00ebzit e aft\u00eb q\u00eb kryenin punime t\u00eb \u00e7far\u00ebdo lloji n\u00eb shenjt\u00ebrore, duke l\u00ebn\u00eb secili pun\u00ebn q\u00eb b\u00ebnte, erdh\u00ebn\n36:5 dhe i fol\u00ebn Moisiut, duke th\u00ebn\u00eb: \"Populli po sjell shum\u00eb m\u00eb tep\u00ebr nga sa nevojitet p\u00ebr t\u00eb kryer punimet q\u00eb Zoti ka urdh\u00ebruar t\u00eb b\u00ebhen\".\n36:6 At\u00ebher\u00eb Moisiu dha k\u00ebt\u00eb urdh\u00ebr q\u00eb u shpall n\u00ebp\u00ebr kamp, duke th\u00ebn\u00eb: \"Asnj\u00eb burr\u00eb dhe asnj\u00eb grua t\u00eb mos b\u00ebj\u00eb m\u00eb ndonj\u00eb ofert\u00eb p\u00ebr shenjt\u00ebroren\". K\u00ebshtue ndaluan popullin t\u00eb sillte tjet\u00ebr material.\n36:7 Sepse materiali q\u00eb kishin mjaftonte p\u00ebr t\u00eb gjitha punimet q\u00eb kishin p\u00ebr t\u00eb b\u00ebr\u00eb, madje tepronte.\n36:8 T\u00ebr\u00eb njer\u00ebzit e aft\u00eb, midis atyre q\u00eb punonin p\u00ebr nd\u00ebrtimin e tabernakullit, b\u00ebn\u00eb dhjet\u00eb p\u00eblhura prej liri t\u00eb holl\u00eb t\u00eb p\u00ebrdredhur dhe me fill ngjyr\u00eb vjollce, t\u00eb purpurt dhe flak\u00eb t\u00eb kuqe; ai i b\u00ebri me kerubin\u00eb t\u00eb punuar artistikisht.\n36:9 \u00c7do p\u00eblhur\u00eb kishte nj\u00eb gjat\u00ebsi dhe nj\u00eb gjer\u00ebsi prej kat\u00ebr kubit\u00ebsh; t\u00eb gjitha p\u00eblhurat kishin t\u00eb nj\u00ebjt\u00ebn mas\u00eb.\n36:10 Ai bashkoi pes\u00eb p\u00eblhura, dhe bashkoi gjithashtu pes\u00eb p\u00eblhurat e tjera.\n36:11 Dhe b\u00ebri sythe ngjyr\u00eb vjollce mbi buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb par\u00eb t\u00eb p\u00eblhurave; b\u00ebri t\u00eb nj\u00ebjt\u00ebn gj\u00eb n\u00eb buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb dyt\u00eb.\n36:12 Ai b\u00ebri pes\u00ebdhjet\u00eb sythe mbi p\u00eblhur\u00ebn e par\u00eb dhe b\u00ebri gjithashtu pes\u00ebdhjet\u00eb sythe mbi buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb dyt\u00eb; sythet korrespondonin nj\u00ebri me tjetrin.\n36:13 Dhe b\u00ebri edhe pes\u00ebdhjet\u00eb kap\u00ebse ari dhe bashkoi p\u00eblhurat nj\u00ebr\u00ebn me tjetr\u00ebn me an\u00eb t\u00eb kap\u00ebseve; k\u00ebshtu tabernakulli p\u00ebrb\u00ebnte nj\u00eb t\u00eb t\u00ebr\u00eb.\n36:14 Ai b\u00ebri gjithashtu p\u00eblhura me leshin e dhive, q\u00eb t\u00eb sh\u00ebrbenin si \u00e7adra mbi tabernakullin; ai b\u00ebri nj\u00ebmb\u00ebdhjet\u00eb nga k\u00ebto p\u00eblhura.\n36:15 \u00c7do p\u00eblhur\u00eb kishte nj\u00eb gjat\u00ebsi prej tridhjet\u00eb kubit\u00ebsh, dhe nj\u00eb gjer\u00ebsi prej kat\u00ebr kubit\u00ebsh; t\u00eb nj\u00ebmb\u00ebdhjet\u00eb p\u00eblhurat kishin t\u00eb nj\u00ebjt\u00ebn mas\u00eb.\n36:16 Ai bashkoi pes\u00eb p\u00eblhura nga nj\u00ebra an\u00eb dhe gjasht\u00eb p\u00eblhura nga ana tjet\u00ebr.\n36:17 B\u00ebri gjithashtu pes\u00ebdhjet\u00eb sythe mbi buz\u00ebn e p\u00eblhur\u00ebs s\u00eb jashtme t\u00eb seris\u00eb s\u00eb par\u00eb t\u00eb p\u00eblhurave dhe pes\u00ebdhjet\u00eb sythe mbi buz\u00ebn e perdes s\u00eb jashtme t\u00eb seris\u00eb s\u00eb dyt\u00eb.\n36:18 Dhe b\u00ebri pes\u00ebdhjet\u00eb kap\u00ebse prej bronzi p\u00ebr ta bashkuar \u00e7adr\u00ebn, me q\u00ebllim q\u00eb t\u00eb p\u00ebrb\u00ebnte nj\u00eb t\u00eb t\u00ebr\u00eb.\n36:19 B\u00ebri gjithashtu p\u00ebr \u00e7adr\u00ebn nj\u00eb mbules\u00eb me l\u00ebkura dashi t\u00eb ngjyera me t\u00eb kuq, dhe mbi t\u00eb nj\u00eb mbules\u00eb me l\u00ebkura baldosash.\n36:20 Pastaj b\u00ebri p\u00ebr tabernakullin d\u00ebrrasat prej druri t\u00eb akacies, t\u00eb vendosura m\u00eb k\u00ebmb\u00eb.\n36:21 Gjat\u00ebsia e nj\u00eb d\u00ebrrase ishte dhjet\u00eb kubit\u00eb dhe gjer\u00ebsia e saj nj\u00eb kubit e gjysm\u00eb.\n36:22 \u00c7do d\u00ebrras\u00eb kishte dy kllapa p\u00ebr t\u00eb bashkuar nj\u00ebr\u00ebn d\u00ebrras\u00eb me tjetr\u00ebn; k\u00ebshtu ai veproi p\u00ebr t\u00eb gjitha d\u00ebrrasat e tabernakullit.\n36:23 Pastaj ai b\u00ebri d\u00ebrrasat p\u00ebr tabernakullin: nj\u00ebzet d\u00ebrrasa p\u00ebr krahun jugor;\n36:24 dhe b\u00ebri dyzet baza prej argjendi n\u00ebn nj\u00ebzet d\u00ebrrasat: dy baza posht\u00eb \u00e7do d\u00ebrrase p\u00ebr t\u00eb dy kllapat e veta.\n36:25 Dhe p\u00ebr an\u00ebn e dyt\u00eb t\u00eb tabernakullit, an\u00ebn veriore, ai b\u00ebri nj\u00ebzet d\u00ebrrasa,\n36:26 me dyzet bazat e tyre prej argjendi, dy baza n\u00ebn \u00e7do d\u00ebrras\u00eb.\n36:27 P\u00ebr pjes\u00ebn e pasme t\u00eb tabernakullit, n\u00eb drejtim t\u00eb per\u00ebndimit, ai b\u00ebri gjasht\u00eb d\u00ebrrasa.\n36:28 B\u00ebri gjithashtu dy d\u00ebrrasa p\u00ebr t\u00eb dy qoshet e pasme t\u00eb tabernakullit.\n36:29 K\u00ebto \u00e7iftoheshin posht\u00eb dhe ishin bashkuar lart me nj\u00eb unaz\u00eb. K\u00ebshtu veproi p\u00ebr t\u00eb dy d\u00ebrrasat, q\u00eb ndodheshin n\u00eb t\u00eb dy qoshet.\n36:30 Kishte, pra, tet\u00eb d\u00ebrrasa me bazat e tyre prej argjendi: gjasht\u00ebmb\u00ebdhjet\u00eb baza, dy baza n\u00ebn \u00e7do d\u00ebrras\u00eb.\n36:31 B\u00ebri gjithashtu disa traversa prej druri t\u00eb akacies: pes\u00eb p\u00ebr d\u00ebrrasat e nj\u00ebrit krah t\u00eb tabernakullit,\n36:32 pes\u00eb traversa p\u00ebr d\u00ebrrasat e krahut tjet\u00ebr t\u00eb tabernakullit, dhe pes\u00eb traversa p\u00ebr d\u00ebrrasat e pjes\u00ebs s\u00eb pasme t\u00eb tabernakullit, n\u00eb per\u00ebndim.\n36:33 Pastaj b\u00ebri q\u00eb traversa e qendr\u00ebs t\u00eb kalonte n\u00eb mes t\u00eb d\u00ebrrasave, nga nj\u00ebra an\u00eb n\u00eb tjetr\u00ebn.\n36:34 I veshi pastaj d\u00ebrrasat me ar dhe i b\u00ebri prej ari unazat e tyre nga do t\u00eb kalonin traversat, dhe i veshi me ar traversat.\n36:35 B\u00ebri gjithashtu velin me fill ngjyr\u00eb vjollce, t\u00eb purpurt dhe flak\u00eb t\u00eb kuqe, dhe me li t\u00eb holl\u00eb t\u00eb p\u00ebrdredhur me kerubin\u00eb t\u00eb punuar artistikisht;\n36:36 B\u00ebri p\u00ebr t\u00eb kat\u00ebr shtylla prej druri t\u00eb akacies me grrem\u00e7at e tyre prej ari; dhe shkriu p\u00ebr shtyllat kat\u00ebr baza prej argjendi.\n36:37 Dhe b\u00ebri p\u00ebr hyrjen e \u00e7adr\u00ebs nj\u00eb perde prej filli ngjyr\u00eb vjollce, t\u00eb purpurt dhe flak\u00eb t\u00eb kuqe, dhe prej liri t\u00eb holl\u00eb t\u00eb p\u00ebrdredhur, shkurt puna e nj\u00eb q\u00ebndistari.\n36:38 B\u00ebri gjithashtu pes\u00eb shtyllat e saj s\u00eb bashku me grrem\u00e7at e tyre i veshi me ar kapitelet dhe d\u00ebrrasat e tyre; por pes\u00eb bazat e tyre ishin prej bronzi.\n37:1 Pastaj Betsaleeli b\u00ebri ark\u00ebn prej druri t\u00eb akacies, ajo ishte e gjat\u00eb dy kubit\u00eb e gjysm\u00eb, e gjer\u00eb nj\u00eb kubit dhe e lart\u00eb nj\u00eb kubit e gjysm\u00eb.\n37:2 E veshi me ar safi nga brenda dhe nga jasht\u00eb, dhe i b\u00ebri nj\u00eb kuror\u00eb q\u00eb i vinte rrotull.\n37:3 Shkriu p\u00ebr k\u00ebt\u00eb q\u00ebllim kat\u00ebr unaza prej ari dhe i vuri n\u00eb kat\u00ebr k\u00ebmb\u00ebt e saj: dy unaza nga nj\u00ebra an\u00eb dhe dy unaza nga ana tjet\u00ebr.\n37:4 B\u00ebri edhe disa shtiza me dru akacieje dhe i veshi me ar.\n37:5 Pastaj i kaloi shtizat n\u00ebp\u00ebr unazat, q\u00eb ishin an\u00ebve t\u00eb ark\u00ebs dhe q\u00eb sh\u00ebrbenin p\u00ebr ta mbartur at\u00eb.\n37:6 B\u00ebri edhe nj\u00eb pajtues prej ari safi, t\u00eb gjat\u00eb dy kubit\u00eb e gjysm\u00eb dhe t\u00eb gjer\u00eb nj\u00eb kubit e gjysm\u00eb.\n37:7 B\u00ebri edhe dy kerubin\u00eb prej ari; k\u00ebto u punuan me \u00e7eki\u00e7 n\u00eb t\u00eb dy skajet e pajtuesit:\n37:8 nj\u00eb kerubin n\u00eb nj\u00ebrin skaj dhe nj\u00eb kerubin n\u00eb skajin tjet\u00ebr; kerubin\u00ebt i b\u00ebri nj\u00ebsh me pajtuesin n\u00eb t\u00eb dy skajet e tij.\n37:9 Kerubin\u00ebt i kishin krah\u00ebt e hapura lart, n\u00eb m\u00ebnyr\u00eb q\u00eb t\u00eb mbulonin pajtuesin me krah\u00ebt e tyre; ishin kthyer nj\u00ebri ndaj tjetrit, nd\u00ebrsa fytyrat e kerubin\u00ebve ishin kthyer nga pajtuesi.\n37:10 B\u00ebri edhe tryez\u00ebn me dru t\u00eb akacies me gjat\u00ebsi dy kubit\u00eb, gjer\u00ebsi nj\u00eb kubit dhe nj\u00eb lart\u00ebsi nj\u00eb kubit e gjysm\u00eb.\n37:11 E veshi me ar safi dhe i b\u00ebri rreth e rrotull nj\u00eb kuror\u00eb prej ari.\n37:12 Dhe i b\u00ebri rreth e qark nj\u00eb buz\u00eb t\u00eb lart\u00eb sa p\u00ebll\u00ebmba e dor\u00ebs dhe rreth e rrotull k\u00ebsaj buze b\u00ebri nj\u00eb kuror\u00eb prej ari.\n37:13 Dhe p\u00ebr k\u00ebt\u00eb q\u00ebllim derdhi kat\u00ebr unaza ari dhe i vuri unazat n\u00eb t\u00eb kat\u00ebr qoshet, q\u00eb jan\u00eb n\u00eb kat\u00ebr k\u00ebmb\u00ebt e tryez\u00ebs.\n37:14 Unazat ishin af\u00ebr buz\u00ebs p\u00ebr t\u00eb kaluar n\u00ebp\u00ebr to shtizat e caktuara p\u00ebr t\u00eb mbartur tryez\u00ebn.\n37:15 I b\u00ebri shtizat me dru t\u00eb akacies dhe i veshi me ar; ato do t\u00eb sh\u00ebrbenin p\u00ebr ta mbartur tryez\u00ebn.\n37:16 I b\u00ebri edhe orendit\u00eb q\u00eb do t\u00eb viheshin mbi tryez\u00eb prej ari safi: pjatat e tij, gotat e tij, filxhan\u00ebt e tij, kupat e tij me t\u00eb cil\u00ebt b\u00ebhen libacionet.\n37:17 Edhe shandanin e b\u00ebri me ar safi; e punuan me \u00e7eki\u00e7; k\u00ebmba, trungu, kupat, moll\u00ebt dhe lulet e tij p\u00ebrb\u00ebnin t\u00eb gjitha nj\u00eb t\u00ebr\u00ebsi t\u00eb vetme.\n37:18 Nga an\u00ebt e tij dilnin gjasht\u00eb krah\u00eb: tre krah\u00eb t\u00eb shandanit nga nj\u00eb an\u00eb dhe tre krah\u00eb t\u00eb shandanit nga ana tjet\u00ebr;\n37:19 mbi nj\u00ebrin krah kishte tri kupa n\u00eb form\u00eb bajameje, me nj\u00eb moll\u00eb dhe nj\u00eb lule; n\u00eb krahun tjet\u00ebr tri kupa n\u00eb form\u00eb t\u00eb bajames me nj\u00eb moll\u00eb dhe nj\u00eb lule. E nj\u00ebjta gj\u00eb ndodhte p\u00ebr t\u00eb gjasht\u00eb krah\u00ebt q\u00eb dilnin nga shandani.\n37:20 Dhe n\u00eb trungun e shandanit kishte kat\u00ebr kupa n\u00eb form\u00eb t\u00eb bajames, me moll\u00ebt dhe lulet e tyre.\n37:21 Kishte nj\u00eb moll\u00eb posht\u00eb dy krah\u00ebve t\u00eb para q\u00eb dilnin prej tij, nj\u00eb moll\u00eb posht\u00eb dy krah\u00ebve t\u00eb tjer\u00eb q\u00eb dilnin prej tij, dhe nj\u00eb moll\u00eb posht\u00eb dy krah\u00ebve t\u00eb fundit q\u00eb dilnin prej tij; k\u00ebshtu ishte p\u00ebr t\u00eb gjasht\u00eb krah\u00ebt q\u00eb dilnin nga shandani.\n37:22 K\u00ebto moll\u00eb dhe k\u00ebto krah\u00eb p\u00ebrb\u00ebnin nj\u00eb t\u00eb t\u00ebr\u00eb t\u00eb vetme me shandanin; gjith\u00e7ka ishte prej ari safi t\u00eb punuar me \u00e7eki\u00e7.\n37:23 Ai i b\u00ebri gjithashtu shtat\u00eb llambat e tij, zbraz\u00ebsit dhe mbajt\u00ebsit e tyre, me ar safi.\n37:24 P\u00ebr t\u00eb b\u00ebr\u00eb shandanin dhe t\u00eb gjitha pjes\u00ebt e tij p\u00ebrdori nj\u00eb talent ari t\u00eb past\u00ebr.\n37:25 Pastaj b\u00ebri altarin e temjanit me dru t\u00eb akacies; ishte i gjat\u00eb nj\u00eb kubit dhe i gjer\u00eb nj\u00eb kubit; ishte katror dhe kishte nj\u00eb lart\u00ebsi prej dy kubit\u00ebsh; brir\u00ebt e tij p\u00ebrb\u00ebnin nj\u00eb t\u00eb t\u00ebr\u00eb t\u00eb vetme me t\u00eb.\n37:26 E veshi me ar safi: pjes\u00ebn e tij t\u00eb sip\u00ebrme, an\u00ebt e tij rreth e qark dhe brir\u00ebt e tij; dhe i b\u00ebri rreth e rrotull nj\u00eb kuror\u00eb prej ari.\n37:27 I b\u00ebri edhe dy unaza ari, n\u00ebn kuror\u00eb, n\u00eb t\u00eb dy krah\u00ebt e tij; i vuri n\u00eb t\u00eb dy krah\u00ebt p\u00ebr t\u00eb kaluar shtizat. K\u00ebto shtiza sh\u00ebrbenin p\u00ebr ta mbartur at\u00eb.\n37:28 Dhe i b\u00ebri shtizat prej druri t\u00eb akacies dhe i veshi me ar.\n37:29 Pastaj p\u00ebrgatiti vajin e shenjt\u00eb p\u00ebr vajosjen dhe temjanin aromatik, t\u00eb past\u00ebr, simbas artit t\u00eb parfumierit.\n38:1 Pastaj b\u00ebri altarin e olokausteve prej druri t\u00eb akacies, i gjat\u00eb pes\u00eb kubit\u00eb dhe i gjer\u00eb po pes\u00eb kubit\u00eb; ishte katror dhe i lart\u00eb tre kubit\u00eb.\n38:2 N\u00eb t\u00eb kat\u00ebr qoshet e tij b\u00ebri disa brir\u00eb, q\u00eb p\u00ebrb\u00ebnin nj\u00eb t\u00eb t\u00ebr\u00eb me t\u00eb, dhe e veshi me bronz.\n38:3 B\u00ebri gjithashtu t\u00eb gjitha p\u00ebrdor\u00ebset e altarit: en\u00ebt p\u00ebr hirin, lopatat e vogla, legenat, mashat dhe mangallet; t\u00eb gjitha veglat e tij i b\u00ebri prej bronzi.\n38:4 Dhe b\u00ebri p\u00ebr altarin nj\u00eb gril\u00eb prej bronzi n\u00eb form\u00ebn e nj\u00eb rrjete n\u00ebn korniz\u00ebn, n\u00eb pjes\u00ebn e poshtme n\u00eb m\u00ebnyr\u00eb q\u00eb rrjeta t\u00eb ndodhej n\u00eb gjysm\u00ebn e lart\u00ebsis\u00eb s\u00eb altarit.\n38:5 Derdhi kat\u00ebr unaza p\u00ebr t\u00eb kat\u00ebr cepat e gril\u00ebs prej bronzi, me q\u00ebllim q\u00eb t\u00eb kalonin shtizat.\n38:6 Pastaj i b\u00ebri shtizat prej druri t\u00eb akacies dhe i veshi me bronz.\n38:7 Pas k\u00ebsaj i kaloi shtizat n\u00ebp\u00ebr unazat q\u00eb ndodheshin an\u00ebve t\u00eb altarit, me t\u00eb cilat do t\u00eb mbartej: e nd\u00ebrtoi me d\u00ebrrasa dhe bosh nga brenda.\n38:8 Pastaj b\u00ebri legenin prej bronzi dhe baz\u00ebn e tij prej bronzi, duke p\u00ebrdorur pasqyrat e grave q\u00eb vinin p\u00ebr t\u00eb b\u00ebr\u00eb sh\u00ebrbime n\u00eb hyrje t\u00eb \u00e7adr\u00ebs s\u00eb mbledhjes.\n38:9 Pastaj b\u00ebri oborrin: nga ana e Negevit, n\u00eb drejtim t\u00eb jugut, perdet e oborrit ishin prej liri t\u00eb holl\u00eb t\u00eb p\u00ebrdredhur dhe me nj\u00eb gjat\u00ebsi prej nj\u00ebqind kubit\u00ebsh,\n38:10 dhe kishin nj\u00ebzet shtyllat e tyre dhe nj\u00ebzet bazat e tyre prej bronzi; grrem\u00e7at e shtyllave dhe shtizat e tyre ishin prej argjendi.\n38:11 N\u00eb krahun verior kishte nj\u00ebqind kubit\u00eb perde me nj\u00ebzet shtyllat e tyre dhe nj\u00ebzet bazat e tyre prej bronzi; grrem\u00e7at e shtyllave dhe shtizat e tyre ishin prej argjendi.\n38:12 N\u00eb krahun per\u00ebndimor kishte pes\u00ebdhjet\u00eb kubit\u00eb perde me dhjet\u00eb shtyllat dhe dhjet\u00eb bazat e tyre; grrem\u00e7at e shtyllave dhe shtizat e tyre ishin prej argjendi.\n38:13 P\u00ebrpara, nga ana e lindjes, kishte pes\u00ebdhjet\u00eb kubit\u00eb:\n38:14 nga nj\u00ebri krah kishte pes\u00ebdhjet\u00eb kubit\u00eb perde, me tri shtyllat dhe tri bazat e tyre;\n38:15 dhe nga ana tjet\u00ebr (si k\u00ebtej ashtu dhe matan\u00eb port\u00ebs s\u00eb hyrjes n\u00eb oborr) kishte pes\u00ebmb\u00ebdhjet\u00eb kubit\u00eb perde, me tri shtyllat dhe tri bazat e tyre.\n38:16 T\u00eb gjitha perdet rreth oborrit ishin prej liri t\u00eb holl\u00eb t\u00eb p\u00ebrdredhur;\n38:17 bazat e shtyllave ishin prej bronzi, grrem\u00e7at e shtyllave dhe shtizat e tyre ishin prej argjendi, kapitelet e shtyllave ishin t\u00eb veshura me argjend dhe t\u00eb gjitha shtyllat e oborrit ishin t\u00eb lidhura me disa shtiza argjendi.\n38:18 Perdja p\u00ebr hyrjen n\u00eb oborr ishte e q\u00ebndisur, me fill ngjyr\u00eb vjollce, t\u00eb purpurt dhe t\u00eb kuq t\u00eb ndezur, dhe me li t\u00eb p\u00ebrdredhur; kishte nj\u00eb gjat\u00ebsi prej nj\u00ebzet kubit\u00ebsh, nj\u00eb lart\u00ebsi prej pes\u00eb kubit\u00ebsh, dhe korrespondonte me perdet e oborrit.\n38:19 Kishte kat\u00ebr shtylla me kat\u00ebr bazat e tyre prej bronzi; grrem\u00e7at e tyre ishin prej argjendi dhe kapitelet e tyre dhe shtizat e tyre ishin t\u00eb veshura me argjend.\n38:20 T\u00eb gjitha kunjat e tabernakullit dhe t\u00eb rrethoj\u00ebs s\u00eb oborrit ishin prej bronzi.\n38:21 Kjo \u00ebsht\u00eb lista e sendeve t\u00eb tabernakullit, t\u00eb tabernakullit t\u00eb d\u00ebshmis\u00eb, q\u00eb u rendit\u00ebn me urdh\u00ebr t\u00eb Moisiut, p\u00ebr sh\u00ebrbimin e Levit\u00ebve, n\u00ebn drejtimin e Ithamarit, birit t\u00eb priftit Aaron.\n38:22 Betsaleeli, bir i Urit, bir i Hurit, nga fisi i Jud\u00ebs, b\u00ebri t\u00eb gjitha ato q\u00eb i kishte urdh\u00ebruar Zoti Moisiut,\n38:23 duke pasur me vete Oholiabin, birin e Ahisamakut, nga fisi i Danit, gdhend\u00ebs, vizatues dhe q\u00ebndistar i stofave ngjyr\u00eb vjollc\u00eb, t\u00eb purpurta, t\u00eb kuqe t\u00eb ndezur dhe prej liri t\u00eb holl\u00eb.\n38:24 Gjith\u00eb ari i p\u00ebrdorur p\u00ebr t\u00eb gjitha punimet p\u00ebr vendin e shenjt\u00eb, dometh\u00ebn\u00eb ari i ofertave, qe nj\u00ebzet e n\u00ebnt\u00eb talente dhe shtat\u00ebqind e tridhjet\u00eb sikla, simbas siklit t\u00eb shenjt\u00ebrores.\n38:25 Dhe argjendi, q\u00eb u mblodh me rastin e regjistrimit t\u00eb asambles\u00eb, ishte nj\u00ebqind talente dhe nj\u00eb mij\u00eb e shtat\u00ebqind e shtat\u00ebdhjet\u00eb e pes\u00eb sikla, simbas siklit t\u00eb shenjt\u00ebrores:\n38:26 nj\u00eb beka p\u00ebr frym\u00eb, (dometh\u00ebn\u00eb nj\u00eb gjysm\u00eb sikli, simbas siklit t\u00eb shenjt\u00ebrores), p\u00ebr \u00e7do burr\u00eb q\u00eb e kapte regjistrimi, nga mosha nj\u00ebzet vje\u00e7 e lart, pra, gjasht\u00ebqind e tre mij\u00eb e pes\u00ebqind e pes\u00ebdhjet\u00eb burra.\n38:27 Nj\u00ebqind talentet prej argjendi sh\u00ebrbyen p\u00ebr t\u00eb shkrir\u00eb bazat e shenjt\u00ebrores dhe bazat e velit: nj\u00ebqind baza p\u00ebr nj\u00ebqind talentet, nj\u00eb talent p\u00ebr baz\u00eb.\n38:28 Dhe me nj\u00eb mij\u00eb e shtat\u00ebqind e shtat\u00ebdhjet\u00eb e pes\u00eb sikla ai b\u00ebri grrem\u00e7at p\u00ebr shtyllat, i veshi kapitelet e tyre dhe b\u00ebri shtizat p\u00ebr shtyllat.\n38:29 Bronzi i ofertave arrinte n\u00eb shtat\u00ebdhjet\u00eb talente dhe dy mij\u00eb e kat\u00ebrqind sikla.\n38:30 Dhe me k\u00ebt\u00eb ai b\u00ebri bazat e hyrjes s\u00eb \u00e7adr\u00ebs s\u00eb mbledhjes, altarin prej bronzi dhe me gril\u00ebn e tij dhe me t\u00eb gjitha orendit\u00eb e altarit,\n38:31 bazat e oborrit, bazat e hyrjes n\u00eb oborr, t\u00eb gjith\u00eb kunjat e tabernakullit dhe t\u00eb gjith\u00eb kunjat e rrethimit t\u00eb oborrit.\n39:1 Pastaj me stofa ngjyr\u00eb vjollce, t\u00eb purpurt dhe flak\u00eb t\u00eb kuqe, b\u00ebri rroba t\u00eb punuara mir\u00eb p\u00ebr t\u00eb sh\u00ebrbyer n\u00eb shenjt\u00ebrore, dhe b\u00ebn\u00eb rrobat e shenjta p\u00ebr Aaronin, ashtu si\u00e7 e kishte urdh\u00ebruar Zoti Moisiun.\n39:2 Ai b\u00ebri efodin prej ari e me fill ngjyr\u00eb vjollce, t\u00eb purpurt dhe flak\u00eb t\u00eb kuqe, dhe me li t\u00eb holl\u00eb t\u00eb p\u00ebrdredhur.\n39:3 Dhe e rrah\u00ebn arin n\u00eb peta dhe e pren\u00eb n\u00eb fije, p\u00ebr ta endur n\u00eb stof\u00ebn ngjyr\u00eb vjollce, t\u00eb purpurt dhe flak\u00eb t\u00eb kuqe dhe n\u00eb lirin e holl\u00eb t\u00eb p\u00ebrdredhur: puna e nj\u00eb artizani t\u00eb shkath\u00ebt.\n39:4 I b\u00ebn\u00eb edhe supore t\u00eb bashkuara; k\u00ebshtu efodi mbahej tok n\u00eb t\u00eb dy skajet e tij.\n39:5 Dhe brezi i punuar artistikisht q\u00eb ishte mbi efodin p\u00ebr ta lidhur kishte po at\u00eb p\u00ebrgatitje: me ar, me fije, ngjyr\u00eb vjollce, t\u00eb purpurt dhe flak\u00eb t\u00eb kuqe, dhe me li t\u00eb holl\u00eb t\u00eb p\u00ebrdredhur, ashtu si e kishte urdh\u00ebruar Zoti Moisiun.\n39:6 Pastaj u punuan gur\u00ebt e oniksit, q\u00eb u ngallmuan n\u00eb rrath\u00eb ari, dhe q\u00eb u gdhend\u00ebn, ashtu si\u00e7 gdhenden vulat e vogla, me emrat e bijve t\u00eb Izraelit.\n39:7 Ai pastaj i vuri mbi suporet e efodit, si gur\u00eb p\u00ebr t\u00eb p\u00ebrkujtuar bijt\u00eb e Izraelit ashtu si\u00e7 e kishte urdh\u00ebruar Zoti Moisiun.\n39:8 Pastaj ai b\u00ebri pektoralin e punuar artistikisht, ashtu si puna e efodit: me ar, me fill ngjyr\u00eb vjollce, t\u00eb purpurt dhe flak\u00eb t\u00eb kuqe, si dhe me li t\u00eb holl\u00eb t\u00eb p\u00ebrdredhur.\n39:9 Pektorali kishte form\u00eb katrore; e b\u00ebn\u00eb t\u00eb palosur m\u00eb dysh, t\u00eb gjat\u00eb sa p\u00ebll\u00ebmba dhe t\u00eb gjer\u00eb po aq, kur ishte i palosur m\u00eb dysh.\n39:10 Dhe u ngallmuan kat\u00ebr radh\u00eb gur\u00ebsh; n\u00eb radh\u00ebn e par\u00eb: nj\u00eb sardon, nj\u00eb topaz dhe nj\u00eb smerald;\n39:11 n\u00eb radh\u00ebn e dyt\u00eb: nj\u00eb rubin, nj\u00eb safir dhe nj\u00eb diamant;\n39:12 n\u00eb radh\u00ebn e tret\u00eb: nj\u00eb hiacint, nj\u00eb agat dhe nj\u00eb ametist;\n39:13 n\u00eb radh\u00ebn e kat\u00ebrt: nj\u00eb grizolit, nj\u00eb oniks dhe nj\u00eb diasp\u00ebr. K\u00ebta gur\u00eb ishin futur n\u00eb rrath\u00ebt e tyre prej ari.\n39:14 Gur\u00ebt u korrespondonin emrave t\u00eb bijve t\u00eb Izraelit: dymb\u00ebdhjet\u00eb, simbas emrave t\u00eb tyre t\u00eb gdhendur si vula, secili me emrin e nj\u00ebrit nga dymb\u00ebdhjet\u00eb fiset.\n39:15 Mbi pektoralin b\u00ebn\u00eb gjithashtu zinxhir\u00eb prej ari safi, t\u00eb lidhur si kordon\u00eb.\n39:16 B\u00ebn\u00eb edhe dy rrath\u00eb t\u00eb art\u00eb dhe dy unaza t\u00eb arta, dhe i vun\u00eb dy unazat n\u00eb dy skajet e pektoralit.\n39:17 Pastaj i fiksuan t\u00eb dy kordon\u00ebt e art\u00eb mbi t\u00eb dy unazat, n\u00eb skajet e pektoralit;\n39:18 pas k\u00ebsaj fiksuan dy majat e dy kordon\u00ebve n\u00eb t\u00eb dy rrath\u00ebt dhe i vendos\u00ebn mbi dy suporet e efodit, n\u00eb pjes\u00ebn e p\u00ebrparme t\u00eb tij.\n39:19 B\u00ebn\u00eb gjithashtu dy unaza ari dhe i vun\u00eb n\u00eb dy skajet e pektoralit, n\u00eb buz\u00ebn e tij, q\u00eb ndodhet n\u00eb pjes\u00ebn e brendshme t\u00eb efodit.\n39:20 B\u00ebn\u00eb gjithashtu dy unaza t\u00eb tjera ari dhe i vun\u00eb mbi dy suporet e efodit posht\u00eb, nga p\u00ebrpara, pran\u00eb pik\u00ebs s\u00eb bashkimit, mbi brezin e punuar artistikisht t\u00eb efodit.\n39:21 Pastaj i lidh\u00ebn unazat e pektoralit me unazat e efodit me nj\u00eb kordon ngjyr\u00eb vjollce, me q\u00ebllim q\u00eb pektorali t\u00eb rrinte mbi brezin e punuar artistikisht t\u00eb efodit, dhe t\u00eb mos shk\u00ebputej prej k\u00ebtij t\u00eb fundit, ashtu si e kishte urdh\u00ebruar Zoti Moisiun.\n39:22 Ai b\u00ebri gjithashtu mantelin e efodit, i t\u00ebri ngjyr\u00eb vjollce, nj\u00eb punim prej end\u00ebsi.\n39:23 N\u00eb mes t\u00eb mantelit kishte nj\u00eb hapje, p\u00ebr t\u00eb futur kok\u00ebn; rreth e qark hapjes kishte nj\u00eb buz\u00eb stofi t\u00eb punuar, ashtu si hapja e nj\u00eb parzmoreje, me q\u00ebllim q\u00eb t\u00eb mos shqyhej.\n39:24 Mbi buz\u00ebn e mantelit b\u00ebn\u00eb disa sheg\u00eb n\u00eb ngjyr\u00eb vjollce, t\u00eb purpurt dhe flak\u00eb t\u00eb kuqe, me fill t\u00eb p\u00ebrdredhur.\n39:25 Dhe b\u00ebn\u00eb disa zile prej ari t\u00eb past\u00ebr; dhe i vun\u00eb n\u00eb mes t\u00eb sheg\u00ebve n\u00eb buz\u00ebn e mantelit, rreth e qark sheg\u00ebve;\n39:26 nj\u00eb zile dhe nj\u00eb sheg\u00eb, nj\u00eb zile dhe nj\u00eb sheg\u00eb, rreth e p\u00ebrqark, mbi buz\u00ebn e mantelit, p\u00ebr t\u00eb b\u00ebr\u00eb sh\u00ebrbimin, ashtu si\u00e7 e kishte urdh\u00ebruar Zoti Moisiun.\n39:27 Ata b\u00ebn\u00eb edhe tunikat prej liri t\u00eb holl\u00eb; nj\u00eb pun\u00eb prej end\u00ebsi, p\u00ebr Aaronin dhe bijt\u00eb e tij,\n39:28 \u00e7allma prej liri t\u00eb holl\u00eb, zbukurimin e mbulesave t\u00eb kok\u00ebs prej liri t\u00eb holl\u00eb dhe pantallonat prej liri t\u00eb holl\u00eb t\u00eb p\u00ebrdredhur,\n39:29 dhe brezin prej liri t\u00eb holl\u00eb t\u00eb p\u00ebrdredhur, n\u00eb ngjyr\u00eb vjollce, t\u00eb purpurt dhe flak\u00eb t\u00eb kuqe, nj\u00eb pun\u00eb prej q\u00ebndistari, ashtu si\u00e7 e kishte urdh\u00ebruar Zoti Moisiun.\n39:30 Pastaj b\u00ebn\u00eb pllak\u00ebn e diadem\u00ebs s\u00eb shenjt\u00eb prej ari safi dhe gdhend\u00ebn mbi t\u00eb si mbi nj\u00eb vul\u00eb fjal\u00ebt: SHENJT\u00c9RI ZOTIT.\n39:31 Dhe mb\u00ebrthyen n\u00eb t\u00eb nj\u00eb kordele ngjyr\u00eb vjollce p\u00ebr ta lidhur n\u00eb maj\u00eb t\u00eb \u00e7allm\u00ebs, ashtu si e kishte urdh\u00ebruar Zoti Moisiun.\n39:32 K\u00ebshtu p\u00ebrfundoi t\u00ebr\u00eb puna e tabernakullit dhe e \u00e7adr\u00ebs s\u00eb mbledhjes. Bijt\u00eb e Izraelit vepruan sipas t\u00eb gjitha urdhrave q\u00eb Zoti i kishte dh\u00ebn\u00eb Moisiut; ata vepruan n\u00eb k\u00ebt\u00eb m\u00ebnyr\u00eb.\n39:33 Pastaj i \u00e7uan Moisiut tabernakullin, \u00e7adr\u00ebn dhe t\u00ebr\u00eb veglat e saj, kap\u00ebset, d\u00ebrrasat, traversat, shtyllat dhe bazat e tyre,\n39:34 mbules\u00ebn me l\u00ebkura dashi t\u00eb ngjyera n\u00eb t\u00eb kuq, mbules\u00ebn me l\u00ebkura baldose dhe velin e perdes,\n39:35 ark\u00ebn e d\u00ebshmis\u00eb me shtizat e saj dhe pajtuesin,\n39:36 tryez\u00ebn me t\u00eb gjitha veglat e saj dhe buk\u00ebn e paraqitjes,\n39:37 shandani prej ari safi me llambat e tij (llambat e vendosura n\u00eb rregull), t\u00eb gjitha orendit\u00eb e tij dhe vajin p\u00ebr drit\u00ebn e shandanit,\n39:38 altarin prej ari, vajin e vajosjes, temjanin e parfumuar dhe perden p\u00ebr hyrjen e \u00e7adr\u00ebs,\n39:39 altarin prej bronzi, gril\u00ebn e tij prej bronzi, shtizat e tij dhe t\u00eb gjitha veglat e tij, legenin me baz\u00ebn e tij,\n39:40 perdet e oborrit, shtyllat e tij me gjith\u00eb bazat, perden p\u00ebr hyrjen e oborrit, kordon\u00ebt e oborrit, kunjat e tij dhe t\u00eb gjitha veglat p\u00ebr sh\u00ebrbimin e tabernakullit, p\u00ebr \u00e7adr\u00ebn e mbledhjes,\n39:41 rrobat e punuara mir\u00eb p\u00ebr t\u00eb sh\u00ebrbyer n\u00eb shenjt\u00ebrore, rrobat e shenjta p\u00ebr priftin Aaron dhe rrobat e bijve t\u00eb tij p\u00ebr t\u00eb sh\u00ebrbyer si prift\u00ebrinj.\n39:42 Bijt\u00eb e Izraelit e kryen t\u00ebr\u00eb pun\u00ebn, sipas t\u00eb gjitha porosive q\u00eb Zoti i kishte dh\u00ebn\u00eb Moisiut.\n39:43 Moisiu, pra, shqyrtoi t\u00ebr\u00eb pun\u00ebn; dhe ja, ata e kishin kryer simbas urdhrave t\u00eb Zotit; ata e kishin b\u00ebr\u00eb k\u00ebshtu. K\u00ebshtu Moisiu i bekoi.\n40:1 Pastaj Zoti i foli Moisiut, duke th\u00ebn\u00eb:\n40:2 \"Dit\u00ebn e par\u00eb t\u00eb muajit t\u00eb par\u00eb do t\u00eb ngresh tabernakullin, \u00e7adr\u00ebn e mbledhjes.\n40:3 Do t\u00eb vendos\u00ebsh atje ark\u00ebn e d\u00ebshmis\u00eb dhe do ta fsheh\u00ebsh ark\u00ebn me nj\u00eb vel.\n40:4 Do t\u00eb sjell\u00ebsh brenda tryez\u00ebn dhe do t\u00eb vendos\u00ebsh mbi t\u00eb gj\u00ebrat q\u00eb duhen; do t\u00eb sjell\u00ebsh gjithashtu shandanin dhe do t\u00eb ndez\u00ebsh llambat e tij.\n40:5 Do t\u00eb vendos\u00ebsh altarin e art\u00eb p\u00ebr temjanin p\u00ebrpara ark\u00ebs s\u00eb d\u00ebshmis\u00eb, dhe do t\u00eb v\u00ebsh perden n\u00eb hyrje t\u00eb tabernakullit.\n40:6 Do ta v\u00ebsh altarin e olokausteve para hyrjes s\u00eb tabernakullit, t\u00eb \u00e7adr\u00ebs s\u00eb mbledhjes.\n40:7 Do ta vendos\u00ebsh legenin midis \u00e7adr\u00ebs s\u00eb mbledhjes dhe altarit dhe do t\u00eb v\u00ebsh uj\u00eb n\u00eb t\u00eb.\n40:8 Do t'i vendos\u00ebsh perdet e oborrit rreth e qark dhe do t\u00eb v\u00ebsh nj\u00eb perde n\u00eb hyrje t\u00eb oborrit.\n40:9 Pastaj do t\u00eb marr\u00ebsh vajin e vajosjes dhe do t\u00eb vajosh tabernakullin dhe t\u00ebr\u00eb gj\u00ebrat q\u00eb ndodhen aty, dhe do ta shenjt\u00ebrosh me t\u00eb gjitha veglat e tij; dhe do t\u00eb jet\u00eb i shenjt\u00eb.\n40:10 Do t\u00eb vajosh altarin e olokausteve dhe t\u00ebr\u00eb orendit\u00eb e tij; do t\u00eb shenjt\u00ebrosh k\u00ebshtu altarin dhe altari do t\u00eb jet\u00eb shum\u00eb i shenjt\u00eb.\n40:11 Do t\u00eb vajosh edhe legenin me t\u00eb gjith\u00eb baz\u00ebn e tij dhe do ta shenjt\u00ebrosh.\n40:12 Pastaj do t\u00eb afrosh Aaronin dhe bijt\u00eb e tij n\u00eb hyrje t\u00eb \u00e7adr\u00ebs s\u00eb mbledhjes dhe do t'i lash me uj\u00eb.\n40:13 Do ta vesh\u00ebsh Aaronin me rrobat e shenjta, do ta vajosh dhe do ta shenjt\u00ebrosh, q\u00eb t\u00eb m\u00eb sh\u00ebrbej\u00eb si prift.\n40:14 Do t\u00eb afrosh edhe bijt\u00eb e tij dhe do t'i vesh\u00ebsh me tunika,\n40:15 do t'i vajosh ashtu si do t\u00eb kesh vajuar atin e tyre, q\u00eb t\u00eb m\u00eb sh\u00ebrbejn\u00eb si prift\u00ebrinj; vajisja e tyre do t'u jap\u00eb prift\u00ebri p\u00ebrjet\u00eb, brez pas brezi\".\n40:16 Moisiu ashtu veproi; b\u00ebri pik\u00ebrisht t\u00eb gjitha ato q\u00eb Zoti i kishte urdh\u00ebruar.\n40:17 K\u00ebshtu dit\u00ebn e par\u00eb t\u00eb muajit t\u00eb par\u00eb t\u00eb vitit t\u00eb dyt\u00eb, u nd\u00ebrtua tabernakulli.\n40:18 Moisiu e ngriti tabernakullin, hodhi bazat e tij, sistemoi d\u00ebrrasat e tij, i vuri traversat e tij dhe ngriti shtyllat e tij.\n40:19 Mbi tabernakullin shtriu perden dhe mbi k\u00ebt\u00eb vendosi mbules\u00ebn e \u00e7adr\u00ebs, ashtu si\u00e7 e kishte urdh\u00ebruar Zoti Moisiun.\n40:20 Pastaj mori d\u00ebshmin\u00eb dhe e vendosi brenda ark\u00ebs, u vuri shtizat unazave t\u00eb ark\u00ebs, dhe e vuri pajtuesin mbi ark\u00eb;\n40:21 e \u00e7oi ark\u00ebn n\u00eb tabernakull, e vari velin e perdes dhe k\u00ebshtu fshehu ark\u00ebn e d\u00ebshmis\u00eb, ashtu si e kishte urdh\u00ebruar Zoti Moisiun.\n40:22 Vendosi gjithashtu tryez\u00ebn n\u00eb \u00e7adr\u00ebn e mbledhjes, n\u00eb krahun verior t\u00eb tabernakullit, jasht\u00eb velit.\n40:23 Vendosi sip\u00ebr me rregull buk\u00ebn p\u00ebrpara Zotit, ashtu si e kishte urdh\u00ebruar Zoti Moisiun.\n40:24 Pastaj vuri shandanin n\u00eb \u00e7adr\u00ebn e mbledhjes, p\u00ebrball\u00eb tryez\u00ebs, nga ana jugore e tabernakullit;\n40:25 dhe ndezi llambat p\u00ebrpara Zotit, ashtu si e kishte urdh\u00ebruar Zoti Moisiun.\n40:26 Pastaj vuri altarin e art\u00eb n\u00eb \u00e7adr\u00ebn e mbledhjes, p\u00ebrpara velit,\n40:27 dhe mbi t\u00eb dogji temjanin e parfumuar, ashtu si\u00e7 e kishte urdh\u00ebruar Zoti Moisiun.\n40:28 Vuri gjithashtu perden n\u00eb hyrje t\u00eb tabernakullit.\n40:29 Pastaj vendosi altarin e olokausteve n\u00eb hyrje t\u00eb tabernakullit, t\u00eb \u00e7adr\u00ebs s\u00eb mbledhjes, dhe mbi t\u00eb ofroi olokaustin dhe blatimin, ashtu si e kishte urdh\u00ebruar Zoti Moisiun.\n40:30 Pastaj vuri legenin midis \u00e7adr\u00ebs s\u00eb mbledhjes dhe altarit dhe e mbushi me uj\u00eb p\u00ebr t'u lar\u00eb.\n40:31 Dhe me k\u00ebt\u00eb uj\u00eb, Moisiu, Aaroni dhe bijt\u00eb e tij lan\u00eb duart dhe k\u00ebmb\u00ebt;\n40:32 kur hynin n\u00eb \u00e7adr\u00ebn e mbledhjes dhe kur i afroheshin altarit, ata laheshin, ashtu si e kishte urdh\u00ebruar Zoti Moisiun.\n40:33 Nd\u00ebrtoi gjithashtu oborrin rreth tabernakullit dhe altarit dhe vuri perden n\u00eb hyrje t\u00eb oborrit. K\u00ebshtu Moisiu e p\u00ebrfundoi pun\u00ebn e tij.\n40:34 At\u00ebher\u00eb reja e mbuloi \u00e7adr\u00ebn e mbledhjes dhe lavdia e Zotit e mbushi tabernakullin.\n40:35 Dhe Moisiu nuk mundi t\u00eb hyj\u00eb n\u00eb \u00e7adr\u00ebn e mbledhjes, sepse reja e kishte mbuluar nga sip\u00ebr dhe lavdia e Zotit mbushte tabernakullin.\n40:36 N\u00eb t\u00eb t\u00ebra zhvendosjet e tyre, kur reja ngrihej mbi tabernakullin, bijt\u00eb e Izraelit niseshin;\n40:37 por n\u00eb rast se reja nuk ngrihej, nuk niseshin deri dit\u00ebn q\u00eb ajo t\u00eb ngrihej.\n40:38 Sepse reja e Zotit q\u00ebndronte mbi tabernakullin gjat\u00eb dit\u00ebs, dhe nat\u00ebn mbi t\u00eb q\u00ebndronte nj\u00eb zjarr, para syve t\u00eb t\u00eb gjith\u00eb sht\u00ebpis\u00eb s\u00eb Izraelit, gjat\u00eb gjith\u00eb zhvendosjeve s\u00eb tyre.?","title":"Albanian Bible: Exodus","type":"page"}