{"collection":"Bible & Christianity","html_url":"https://unchartedknowledge.5gfusion.net/browse/bib/wb/alb/mic.htm","path":"bib/wb/alb/mic.htm","source_url":"https://sacred-texts.com/bib/wb/alb/mic.htm","text":"1:1 Fjala e Zotit q\u00eb iu drejtua Mikeas, Morashtitit, n\u00eb dit\u00ebt e Jothamit, t\u00eb A\u00e7azit dhe t\u00eb Ezekias, mbret\u00ebr t\u00eb Jud\u00ebs, dhe i cili pati vegim rreth Samarias dhe Jeruzalemit.\n1:2 D\u00ebgjoni, o mbar\u00eb popuj! Kushtoji kujdes, o tok\u00eb, me t\u00ebr\u00eb at\u00eb q\u00eb ti p\u00ebrmban! Zoti, Zoti, qoft\u00eb d\u00ebshmitar kund\u00ebr jush, Zoti, nga tempulli i tij i shenjt\u00eb.\n1:3 Sepse ja, Zoti del nga banesa e tij, zbret dhe ec\u00ebn mbi lart\u00ebsit\u00eb e tok\u00ebs;\n1:4 malet shkrihen posht\u00eb tij, dhe luginat treten si dylli para zjarrit, si uj\u00ebrat q\u00eb rrjedhin n\u00eb nj\u00eb brinj\u00eb.\n1:5 E t\u00ebr\u00eb kjo p\u00ebr shkak t\u00eb shkeljes s\u00eb Jakobit dhe p\u00ebr m\u00ebkatet e sht\u00ebpis\u00eb s\u00eb Izraelit. Cila \u00ebsht\u00eb shkelja e Jakobit? Mos vall\u00eb Samaria? Cilat jan\u00eb vendet e larta t\u00eb Jud\u00ebs? A mos vall\u00eb Jeruzalemi?\n1:6 Prandaj do ta katandis Samarian n\u00eb nj\u00eb grumbull rr\u00ebnimesh n\u00eb fush\u00eb, n\u00eb nj\u00eb vend p\u00ebr t\u00eb mbjell\u00eb hardhi. Do t'i rrokullis gur\u00ebt e saj n\u00eb lugin\u00eb dhe do t\u00eb nxjerr\u00eb n\u00eb shesh themelet e saj.\n1:7 T\u00eb gjitha figurat e saj t\u00eb gdhendura do t\u00eb cop\u00ebtohen, t\u00ebr\u00eb fitimet e saj t\u00eb prostitucionit do t\u00eb digjen n\u00eb zjarr dhe t\u00ebr\u00eb idhujt e saj do t'i katandis n\u00eb shkreti, sepse jan\u00eb mbledhur me fitimet e prostitucionit, ato do t\u00eb kthehen n\u00eb fitime t\u00eb prostitucionit.\n1:8 P\u00ebr k\u00ebt\u00eb arsye un\u00eb do t\u00eb nxjerr vajtime dhe r\u00ebnkime, do t\u00eb shkoj i zhveshur dhe lakuriq; do t\u00eb nxjerr ankime angullima si \u00e7akalli, klithma t\u00eb kobshme si t\u00eb strucit.\n1:9 Plag\u00ebt e tij n\u00eb fakt jan\u00eb t\u00eb pash\u00ebrueshme, sepse kan\u00eb arritur deri n\u00eb Jud\u00eb, kan\u00eb arritur deri te porta popullit tim, n\u00eb vet\u00eb Jeruzalemin.\n1:10 Mos e shpallni n\u00eb Gath, mos qani aspak n\u00eb Beth-le-Afrah, rrotullohuni n\u00eb pluhur.\n1:11 Kalo tutje me lakuriq\u00ebsi t\u00eb turpshme, o banore e Shafirit; banorja e Tsaananit nuk del m\u00eb; zija e Beth-Haetselit do t'ju heq\u00eb vendin mbi t\u00eb cilin rri.\n1:12 Banorja e Marothit me t\u00eb drejt\u00eb hidh\u00ebrohet, sepse nj\u00eb fatkeq\u00ebsi ka zbritur nga ana e Zotit deri te porta e Jeruzalemit.\n1:13 Lidhi kuajt te qerrja, o banore e Lakishit! Ajo ka q\u00ebn\u00eb fillimi i m\u00ebkatit p\u00ebr bij\u00ebn e Sionit, sepse te ti jan\u00eb gjetur shkeljet e Izraelit.\n1:14 Prandaj ti do t'i jap\u00ebsh nj\u00eb dhurat\u00eb lamtumire Moresheth-Gathit; sht\u00ebpit\u00eb e Akzibit do t\u00eb jen\u00eb nj\u00eb zhg\u00ebnjim p\u00ebr mbret\u00ebrit e Izraelit.\n1:15 Do t\u00eb t\u00eb sjell nj\u00eb trash\u00ebgimtar t\u00eb ri, o banore e Mareshahut; lavdia e Izraelit do t\u00eb arrij\u00eb deri n\u00eb Adullam.\n1:16 Pri flok\u00ebt dhe rruaj kok\u00ebn p\u00ebr shkak t\u00eb bijve t\u00eb k\u00ebnaq\u00ebsive t\u00eb tua. Zgjero shog\u00ebn t\u00ebnde si huta, sepse ata do t\u00eb shkojn\u00eb n\u00eb rob\u00ebri larg teje.\n2:1 Mjer\u00eb ata q\u00eb bluajn\u00eb n\u00eb mendje paudh\u00ebsi dhe projektojn\u00eb t\u00eb keqen mbi shtret\u00ebrit e tyre; n\u00eb drit\u00ebn e m\u00ebngjesit e kryejn\u00eb, sepse pushteti \u00ebsht\u00eb n\u00eb duart e tyre.\n2:2 D\u00ebshirojn\u00eb me t\u00eb madhe arat dhe i marrin me dhun\u00eb, sht\u00ebpit\u00eb dhe i marrin; k\u00ebshtu shtypin me hile njeriun dhe sht\u00ebpin\u00eb e tij, individin dhe pron\u00ebn e tij.\n2:3 Prandaj k\u00ebshtu thot\u00eb Zoti: \"Ja, un\u00eb po kurdis kund\u00ebr k\u00ebtij fisi nj\u00eb fatkeq\u00ebsi, prej s\u00eb cil\u00ebs nuk mund t\u00eb largoni qaf\u00ebn tuaj, as do t\u00eb ecni me kok\u00ebn lart, sepse do t\u00eb jet\u00eb nj\u00eb koh\u00eb fatkeq\u00ebsie.\n2:4 At\u00eb dit\u00eb do t\u00eb dal\u00eb nj\u00eb proverb rreth jush, do t\u00eb ngren\u00eb nj\u00eb vajtim t\u00eb zem\u00ebrl\u00ebnduar dhe do t\u00eb thon\u00eb: \"Jemi plot\u00ebsisht t\u00eb shkat\u00ebrruar\". Ai ka ndryshuar trash\u00ebgimin\u00eb e popullit tim. Ah, si ma mori! Arat tona ua shp\u00ebrndau t\u00eb pabes\u00ebve\".\n2:5 Prandaj nuk do t\u00eb ket\u00eb m\u00eb njeri q\u00eb ta heq\u00eb litarin p\u00ebr ty, p\u00ebr t\u00eb hedhur shortin n\u00eb kuvendin e Zotit.\n2:6 \"Mos profetizoni\", u thon\u00eb profet\u00ebve t\u00eb tyre. K\u00ebshtu ata nuk do t\u00eb profetizojn\u00eb p\u00ebr k\u00ebto gj\u00ebra, por nuk do ta largojn\u00eb turpin e tyre.\n2:7 \u00c9sht\u00eb th\u00ebn\u00eb, o sht\u00ebpi e Jakobit: \"A \u00ebsht\u00eb i kufizuar Fryma e Zotit, apo k\u00ebto jan\u00eb veprat e tij? A nuk e b\u00ebjn\u00eb vall\u00eb rrezatues fjal\u00ebt e mia at\u00eb q\u00eb ec me ndershm\u00ebri?\n2:8 Por koh\u00ebt e fundit populli im ngriti krye si nj\u00eb armik; ju u merrni mantelin dhe rroben kalimtar\u00ebve q\u00eb e ndjejn\u00eb veten t\u00eb sigurt, atyre q\u00eb kthehen nga lufta.\n2:9 Ju i d\u00ebboni grat\u00eb e popullit tim nga sht\u00ebpit\u00eb tyre t\u00eb mrekullueshme dhe u rr\u00ebmbeni p\u00ebr gjithnj\u00eb lavdin\u00eb time f\u00ebmij\u00ebve t\u00eb tyre.\n2:10 \u00c7ohuni dhe ikni, sepse ky nuk \u00ebsht\u00eb nj\u00eb vend prehjeje; duke qen\u00eb i ndotur do t'ju shkat\u00ebrroj me nj\u00eb shkat\u00ebrrim t\u00eb llahtarsh\u00ebm.\n2:11 Edhe sikur nj\u00eb njeri t\u00eb ecte me nj\u00eb frym\u00eb falsiteti dhe t\u00eb p\u00ebrhapte g\u00ebnjeshtra, duke th\u00ebn\u00eb: \"Un\u00eb do t\u00eb parathem p\u00ebr ty ver\u00eb dhe pije deh\u00ebse\", ai do t\u00eb ishte nj\u00eb profet p\u00ebr k\u00ebt\u00eb popull\".\n2:12 \"Do t\u00eb mbledh me siguri gjith\u00e7ka, o Jakob, do t\u00eb mbledh me siguri mbeturin\u00ebn e Izraelit; do t'i v\u00eb bashk\u00eb si delet n\u00eb nj\u00eb vath\u00eb, si nj\u00eb kope n\u00eb mes t\u00eb kullot\u00ebs s\u00eb vet; do t\u00eb b\u00ebjn\u00eb nj\u00eb zhurm\u00eb t\u00eb madhe p\u00ebr shkak t\u00eb moris\u00eb s\u00eb njer\u00ebzve.\n2:13 Kush do t\u00eb hap\u00eb t\u00eb \u00e7ar\u00ebn, do t\u00eb ngjitet para tyre; ata do t\u00eb dep\u00ebrtojn\u00eb, do t\u00eb kalojn\u00eb nga porta dhe prej saj kan\u00eb p\u00ebr t\u00eb dal\u00eb; mbreti i tyre do t\u00eb ec\u00eb para tyre dhe Zoti do t\u00eb jet\u00eb n\u00eb krye t\u00eb tyre\".\n3:1 Un\u00eb thash\u00eb: \"Ah, d\u00ebgjoni, o krer\u00eb t\u00eb Jakobit, dhe ju qeveritar\u00eb t\u00eb sht\u00ebpis\u00eb s\u00eb Izraelit: a nuk ju takon vall\u00eb juve t\u00eb njihni drejt\u00ebsin\u00eb?\n3:2 Ju q\u00eb urreni t\u00eb mir\u00ebn dhe doni t\u00eb keqen, q\u00eb ju hiqni l\u00ebkur\u00ebn nga trupi dhe mishin nga kockat e tyre.\n3:3 Ata han\u00eb mishin e popullit tim, i heqin l\u00ebkur\u00ebn nga trupi, i thyejn\u00eb kockat dhe e presin n\u00eb copa sikur do t\u00eb shkonte n\u00eb tenxhere, si mishi q\u00eb vihet n\u00eb kazan.\n3:4 At\u00ebher\u00eb do t'i k\u00eblthasin Zotit, por ai nuk do t'u p\u00ebrgjigjet; n\u00eb at\u00eb koh\u00eb ai do t'ua fsheh\u00eb fytyr\u00ebn e tij, sepse kan\u00eb qen\u00eb t\u00eb k\u00ebqij n\u00eb veprimet e tyre.\n3:5 K\u00ebshtu thot\u00eb Zoti p\u00ebr profet\u00ebt q\u00eb e b\u00ebjn\u00eb popullin tim t\u00eb largohet nga rruga e tij, q\u00eb b\u00ebrtasin: \"Paqe\", po t\u00eb ken\u00eb di\u00e7ka p\u00ebr t\u00eb kafshuar n\u00ebp\u00ebr dh\u00ebmb\u00eb, por i shpallin luft\u00eb atij q\u00eb nuk u v\u00eb gj\u00eb n\u00eb goj\u00eb.\n3:6 Prandaj do t\u00eb keni net pa vegime, dhe do t\u00eb keni terr pa shortari; dielli do t\u00eb per\u00ebndoj\u00eb mbi k\u00ebta profet\u00eb dhe dita do t\u00eb erret mbi ta.\n3:7 Shikuesit do t\u00eb mbulohen me turp dhe shortar\u00ebt do t\u00eb skuqen; do t\u00eb mbulojn\u00eb t\u00eb gjith\u00eb mjekr\u00ebn e tyre, sepse nuk do t\u00eb ket\u00eb asnj\u00eb p\u00ebrgjigje nga Per\u00ebndia\".\n3:8 Un\u00eb p\u00ebrkundrazi jam plot me forca t\u00eb Frym\u00ebs s\u00eb Zotit, me drejt\u00ebsi dhe forc\u00eb, p\u00ebr t'i b\u00ebr\u00eb t\u00eb njohur Jakobit shkeljen e tij dhe Izraelit m\u00ebkatin e tij.\n3:9 Tani d\u00ebgjoni k\u00ebt\u00eb, o krer\u00eb t\u00eb sht\u00ebpis\u00eb s\u00eb Jakobit dhe qeveritar\u00eb t\u00eb sht\u00ebpis\u00eb s\u00eb Izraelit, q\u00eb urreni drejt\u00ebsin\u00eb dhe shtr\u00ebmb\u00ebroni \u00e7do gj\u00eb q\u00eb \u00ebsht\u00eb e ndershme,\n3:10 q\u00eb nd\u00ebrtoni Sionin me gjak dhe Jeruzalemin me paudh\u00ebsi.\n3:11 Krer\u00ebt e tij gjykojn\u00eb p\u00ebr nj\u00eb dhurat\u00eb, prift\u00ebrinjt\u00eb e tij japin m\u00ebsim p\u00ebr nj\u00eb pages\u00eb, profet\u00ebt e tij kryejn\u00eb shortari p\u00ebr para; megjithat\u00eb mb\u00ebshteten tek Zoti dhe thon\u00eb: \"A nuk \u00ebsht\u00eb vall\u00eb Zoti midis nesh? Nuk do t\u00eb na bjer\u00eb n\u00eb krye asnj\u00eb fatkeq\u00ebsi\".\n3:12 Prandaj, p\u00ebr shkakun tuaj, Sioni do t\u00eb l\u00ebrohet si nj\u00eb ar\u00eb, Jeruzalemi do t\u00eb b\u00ebhet nj\u00eb grumbull rr\u00ebnimesh, dhe mali i tempullit nj\u00eb lart\u00ebsi e pyll\u00ebzuar.\n4:1 Por n\u00eb koh\u00ebt e fundit do t\u00eb ndodh\u00eb q\u00eb mali i sht\u00ebpis\u00eb s\u00eb Zotit do t\u00eb vendoset n\u00eb maj\u00ebn e maleve dhe do ngrihet p\u00ebrmbi kodrat, dhe aty do t\u00eb vijn\u00eb popujt.\n4:2 Do t\u00eb vijn\u00eb shum\u00eb kombe dhe do t\u00eb thon\u00eb: \"Ejani, t\u00eb ngjitemi n\u00eb malin e Zotit dhe n\u00eb sht\u00ebpin\u00eb e Per\u00ebndis\u00eb t\u00eb Jakobit; ai do t\u00eb na m\u00ebsoj\u00eb rrug\u00ebt e tij dhe ne do t\u00eb ecim n\u00eb shtigjet e tij\". Sepse nga Sioni do t\u00eb dal\u00eb ligji dhe nga Jeruzalemi fjala e Zotit.\n4:3 Ai do t\u00eb jet\u00eb gjyqtari midis shum\u00eb popujve dhe do t\u00eb jet\u00eb arbitri midis shum\u00eb kombeve t\u00eb fuqishme dhe t\u00eb larg\u00ebta. Me shpatat e tyre do t\u00eb fark\u00ebtojn\u00eb plore dhe me ushtat e tyre drap\u00ebrinj; nj\u00eb komb nuk do ta ngrer\u00eb m\u00eb shpat\u00ebn kund\u00ebr tjetrit dhe nuk do t\u00eb st\u00ebrviten p\u00ebr luft\u00eb.\n4:4 Do t\u00eb ulet secili n\u00ebn hardhin\u00eb e vet dhe n\u00ebn fikun e vet, dhe askush nuk do t'i tremb\u00eb m\u00eb, sepse goja e Zotit t\u00eb ushtrive foli.\n4:5 Nd\u00ebrsa t\u00ebr\u00eb popujt ecin secili n\u00eb em\u00ebr t\u00eb zotit t\u00eb vet, ne do t\u00eb ecim n\u00eb em\u00ebr t\u00eb Zotit, Per\u00ebndis\u00eb ton\u00eb, p\u00ebrjet\u00eb.\n4:6 \"At\u00eb dit\u00eb\", thot\u00eb Zoti, \"un\u00eb do t\u00eb mbledh \u00e7alaman\u00ebt, do t\u00eb mbledh t\u00eb d\u00ebbuarit dhe ata q\u00eb kisha d\u00ebshp\u00ebruar.\n4:7 Nga \u00e7alaman\u00ebt do t\u00eb b\u00ebj nj\u00eb mbetje dhe nga t\u00eb d\u00ebbuarit nj\u00eb komb t\u00eb fuqish\u00ebm. K\u00ebshtu Zoti do t\u00eb mbret\u00ebroj\u00eb mbi ta n\u00eb malin e Sionit, qysh at\u00ebher\u00eb e p\u00ebrgjithnj\u00eb.\n4:8 Dhe ti, kull\u00eb e kopes\u00eb, kala e bij\u00ebs s\u00eb Sionit, ty do t\u00eb vij\u00eb, pik\u00ebrisht ty do t\u00eb t\u00eb vij\u00eb sundimi i lasht\u00eb, mbret\u00ebria e bij\u00ebs s\u00eb Jeruzalemit\".\n4:9 Tani, pse b\u00ebrtet kaq fort? A nuk ka asnj\u00eb mbret brenda teje? Vall\u00eb ka vdekur k\u00ebshilltari yt, q\u00eb t\u00eb kan\u00eb z\u00ebn\u00eb dhembjet si nj\u00eb grua q\u00eb po lind.\n4:10 Perp\u00eblitu dhe nxirre n\u00eb drit\u00eb, o bij\u00eb e Sionit, si nj\u00eb grua q\u00eb po lind, sepse tani do t\u00eb dal\u00ebsh nga qyteti, do t\u00eb banosh n\u00eb fush\u00eb dhe do t\u00eb shkosh deri n\u00eb Babiloni. Atje do t\u00eb \u00e7lirohesh, atje Zoti do t\u00eb t\u00eb shpengoj\u00eb nga dora e armiqve t\u00eb tu.\n4:11 Tani jan\u00eb mbledhur shum\u00eb kombe kund\u00ebr teje q\u00eb thon\u00eb: \"Le t\u00eb p\u00ebrdhoset dhe syt\u00eb tona le t\u00eb k\u00ebnaqen duke shikuar Sionin\".\n4:12 Por ata nuk i din\u00eb mendimet e Zotit, nuk e kuptojn\u00eb q\u00ebllimin e tij, sepse ai do t'i mbledh\u00eb si duaj n\u00eb l\u00ebm\u00eb.\n4:13 \u00c7ohu dhe shij, o bij\u00eb e Sionit, sepse do ta b\u00ebj bririn t\u00ebnd prej hekuri dhe thonjt\u00eb e tu prej bronzi; ti do t\u00eb d\u00ebrmosh shum\u00eb popuj dhe un\u00eb do t'ia caktoj fitimet e tyre Zotit dhe pasurit\u00eb e tyre Zotit t\u00eb t\u00eb gjith\u00eb dheut.\n5:1 Tani, bashkohu tok, o bij\u00eb e trupave. Na kan\u00eb rrethuar; me shuf\u00ebr godasin mbi faqe gjyqtarin e Izraelit.\n5:2 \"Por ti, o Betlem Efratah, megjith\u00ebse je i vog\u00ebl midis mij\u00ebrave t\u00eb Jud\u00ebs, nga ti do t\u00eb dal\u00eb p\u00ebr mua ai q\u00eb do t\u00eb jet\u00eb sundues n\u00eb Izrael, origjinat e t\u00eb cilit jan\u00eb nga koh\u00ebrat e lashta, nga dit\u00ebt e p\u00ebrjet\u00ebsis\u00eb\".\n5:3 Prandaj ai do t'i braktis\u00eb deri n\u00eb koh\u00ebn n\u00eb t\u00eb cil\u00ebn ajo q\u00eb duhet t\u00eb pjell\u00eb ka p\u00ebr t\u00eb pjellur; at\u00ebher\u00eb kusuri i v\u00ebllez\u00ebrve t\u00eb saj do t'u kthehet bijve t\u00eb Izraelit.\n5:4 Ai do t\u00eb mbetet p\u00ebr t\u00eb kullotur kopen\u00eb e tij me pushtetin e Zotit, n\u00eb madh\u00ebrin\u00eb e emrit t\u00eb Zotit, Per\u00ebndis\u00eb s\u00eb tij. Dhe ata do t\u00eb banojn\u00eb t\u00eb sigurt, sepse at\u00ebher\u00eb ai do t\u00eb jet\u00eb i madh deri n\u00eb skajet e tok\u00ebs.\n5:5 Dhe ai vet\u00eb do t\u00eb jet\u00eb paqja. Kur Asiri do t\u00eb vij\u00eb n\u00eb vendin ton\u00eb dhe do t\u00eb shkel\u00eb n\u00eb pallatet tona, ne do t\u00eb nxjerrim kund\u00ebr tij shtat\u00eb barinj dhe tet\u00eb princa nga njer\u00ebzit e zakonsh\u00ebm.\n5:6 Ata do t\u00eb shkat\u00ebrrojn\u00eb vendin e Asiris\u00eb me shpat\u00eb dhe tok\u00ebn e Nimrodit n\u00eb portat e saj; k\u00ebshtu ai do t\u00eb na \u00e7liroj\u00eb nga Asiri n\u00eb rast se do t\u00eb vij\u00eb n\u00eb vendin ton\u00eb dhe do t\u00eb shkel\u00eb kufijt\u00eb tan\u00eb.\n5:7 Kusuri i Jakobit, n\u00eb mes t\u00eb shum\u00eb popujve, ka p\u00ebr qen\u00eb si nj\u00eb ves\u00eb e d\u00ebrguar nga Zoti, si nj\u00eb shi i dendur mbi barin, q\u00eb nuk pret njeriun dhe nuk shpreson asgj\u00eb nga bijt\u00eb e njer\u00ebzve.\n5:8 Kusuri i Jakobit do t\u00eb jet\u00eb midis kombeve, n\u00eb mes t\u00eb shum\u00eb popujve, si nj\u00eb luan midis kafsh\u00ebve t\u00eb pyllit, si nj\u00eb luan i vog\u00ebl midis kopeve t\u00eb dhenve, i cili, po t\u00eb jet\u00eb se kalon n\u00eb mes, shkel dhe shqyen pa i dh\u00ebn\u00eb mund\u00ebsi askujt t'i shp\u00ebtoj\u00eb.\n5:9 Dora jote do t\u00eb ngrihet kund\u00ebr kund\u00ebrshtar\u00ebve t\u00eb tu dhe t\u00ebr\u00eb armiqt\u00eb e tu do t\u00eb shfarosen.\n5:10 \"At\u00eb dit\u00eb do t\u00eb ndodh\u00eb\", thot\u00eb Zoti, \"q\u00eb un\u00eb do t'i zhduk kuajt e tu n\u00eb mes teje dhe do t\u00eb shkat\u00ebrroj qerret e tua;\n5:11 do t\u00eb zhduk qytetet e vendit t\u00ebnd dhe do t\u00eb rr\u00ebzoj t\u00ebr\u00eb fortesat e tua;\n5:12 do t\u00eb zhduk nga dora jote artet magjike dhe ti nuk do t\u00eb kesh m\u00eb shortar\u00eb;\n5:13 do t\u00eb zhduk n\u00eb mes teje figurat e tua t\u00eb gdh\u00ebndura dhe shtyllat e tua t\u00eb shenjta, dhe ti nuk do t\u00eb biesh m\u00eb p\u00ebrmbys p\u00ebrpara vepr\u00ebs s\u00eb duarve t\u00eb tua.\n5:14 Do t\u00eb \u00e7rr\u00ebnjos n\u00eb mes teje Asherah\u00ebt e tu dhe do t\u00eb shkat\u00ebrroj qytetet e tua.\n5:15 Do t\u00eb hakmerrem me zem\u00ebrim dhe me t\u00ebrbim me kombet q\u00eb nuk kan\u00eb dashur t\u00eb d\u00ebgjojn\u00eb\".\n6:1 Ah, d\u00ebgjoni at\u00eb q\u00eb thot\u00eb Zoti: \"\u00c7ohu, mbro kauz\u00ebn t\u00ebnde p\u00ebrpara maleve dhe kodrat le t\u00eb d\u00ebgjojn\u00eb z\u00ebrin t\u00ebnd\".\n6:2 D\u00ebgjoni, o male, kund\u00ebrshtimin e Zotit, dhe ju themele t\u00eb forta t\u00eb tok\u00ebs, sepse Zoti ka nj\u00eb kund\u00ebrshtim me popullin e tij dhe d\u00ebshiron t\u00eb diskutoj\u00eb me Izraelin.\n6:3 \"Populli im, \u00e7far\u00eb t\u00eb kam b\u00ebr\u00eb dhe me \u00e7far\u00eb t\u00eb kam lodhur? D\u00ebshmo kund\u00ebr meje.\n6:4 Sepse un\u00eb t\u00eb nxora nga vendi i Egjiptit, t\u00eb \u00e7lirova nga sht\u00ebpia e skllav\u00ebris\u00eb dhe kam d\u00ebrguar para teje Moisiun, Aaronin dhe Miriamin.\n6:5 O populli im, mbaj mend at\u00eb q\u00eb Balaku, mbreti i Moabit, kurdiste dhe si iu p\u00ebrgjigj Balaami, biri i Beorit, nga Shitimi deri n\u00eb Gilgal me q\u00ebllim q\u00eb ti t\u00eb pranosh drejt\u00ebsin\u00eb e Zotit\".\n6:6 Me se do t\u00eb vij p\u00ebrpara Zotit dhe do t\u00eb p\u00ebrkulem p\u00ebrpara Per\u00ebndis\u00eb s\u00eb lart\u00eb? Do t\u00eb vij para tij me olokauste, me vi\u00e7a motak\u00eb?\n6:7 Do t\u00eb p\u00eblqej Zoti mij\u00ebra desh ose mori rr\u00ebkesh vaji? Do t\u00eb jap t\u00eb par\u00eblindurin tim p\u00ebr shkeljen time, frytin e barkut tim p\u00ebr m\u00ebkatin e shpirtit tim?\n6:8 O njeri, ai t\u00eb ka b\u00ebr\u00eb t\u00eb njohur at\u00eb q\u00eb \u00ebsht\u00eb e mir\u00eb; dhe \u00e7far\u00eb tjet\u00ebr k\u00ebrkon Zoti nga ti, p\u00ebrve\u00e7 se t\u00eb zbatosh drejt\u00ebsin\u00eb, t\u00eb duash m\u00ebshir\u00ebn dhe t\u00eb ec\u00ebsh p\u00ebrul\u00ebsisht me Per\u00ebndin\u00eb t\u00ebnd?\n6:9 Z\u00ebri i Zotit i th\u00ebrret qytetit, dhe kush ka dituri do t\u00eb njoh\u00eb emrin t\u00ebnd: \"Kini kujdes p\u00ebr thupr\u00ebn dhe p\u00ebr at\u00eb q\u00eb e ka caktuar.\n6:10 A ka akoma n\u00eb sht\u00ebpin\u00eb e t\u00eb pabesit thesare nga paudh\u00ebsia, dhe efa t\u00eb mang\u00ebta, q\u00eb jan\u00eb nj\u00eb gj\u00eb e neveritshme?\n6:11 Mund ta shpall t\u00eb past\u00ebr njeriun me peshore t\u00eb pasakta dhe me qesk\u00ebn me pesha t\u00eb rreme?\n6:12 Pasanik\u00ebt e tij n\u00eb fakt jan\u00eb plot me dhun\u00eb, banor\u00ebt e tij thon\u00eb g\u00ebnjeshtra dhe gjuha e tyre nuk \u00ebsht\u00eb ve\u00e7se mashtrim n\u00eb goj\u00ebn e tyre.\n6:13 Prandaj edhe un\u00eb do t\u00eb t\u00eb b\u00ebj t\u00eb vuash, duke t\u00eb goditur dhe duke b\u00ebr\u00eb q\u00eb t\u00eb jesh i shkret\u00eb p\u00ebr shkak t\u00eb m\u00ebkateve t\u00eb tua.\n6:14 Ti do t\u00eb hash, por nuk do t\u00eb ngopesh dhe uria do t\u00eb mbetet brenda teje; do t\u00eb v\u00ebsh m\u00ebnjan\u00eb por nuk do t\u00eb shp\u00ebtosh asgj\u00eb, dhe at\u00eb q\u00eb do t\u00eb shp\u00ebtosh do t'ia dor\u00ebzoj shpat\u00ebs.\n6:15 Ti do t\u00eb mbjell\u00ebsh, por nuk do t\u00eb korr\u00ebsh; do t'i shtyp\u00ebsh ullinjt\u00eb, por nuk do t\u00eb lyhesh me vaj; do t\u00eb b\u00ebsh musht, por nuk do t\u00eb pish ver\u00eb.\n6:16 Ju ndiqni statutet e Omrit dhe t\u00ebr\u00eb praktikat e sht\u00ebpis\u00eb s\u00eb Ashabit, dhe ju ecni sipas k\u00ebshillave t\u00eb tyre, q\u00eb un\u00eb t'ju katandis n\u00eb nj\u00eb shkreti, dhe banor\u00ebt e tu n\u00eb nj\u00eb objekt talljeje. K\u00ebshtu ju do t\u00eb mbani turpin e popullit tim!\".\n7:1 Mjer\u00eb un\u00eb! Sepse jam si ata q\u00eb vjelin frutat e ver\u00ebs, si ata q\u00eb mbledhin rrushin e vitit: nuk ka asnj\u00eb vile p\u00ebr t\u00eb ngr\u00ebn\u00eb, shpirti im d\u00ebsh\u00ebron nj\u00eb fik t\u00eb par\u00eb.\n7:2 Njeriu i p\u00ebrshpirtsh\u00ebm \u00ebsht\u00eb zhdukur nga dheu, midis njer\u00ebzve nuk ka m\u00eb njer\u00ebz t\u00eb ndersh\u00ebm; t\u00eb t\u00ebr\u00eb rrin\u00eb n\u00eb prit\u00eb p\u00ebr t\u00eb derdhur gjak, secili gjuan v\u00ebllan\u00eb e vet me rrjet\u00eb.\n7:3 T\u00eb dy duart e tyre jan\u00eb t\u00eb shtrira p\u00ebr t\u00eb b\u00ebr\u00eb t\u00eb keq me zot\u00ebsi; princi pretendon, gjyqtari k\u00ebrkon shp\u00ebrblime, i madhi shfaq lakmin\u00eb e tij; k\u00ebshtu bashkarisht e prishin drejt\u00ebsin\u00eb.\n7:4 M\u00eb i miri i tyre \u00ebsht\u00eb si nj\u00eb ferrishte, m\u00eb i ndershmi \u00ebsht\u00eb m\u00eb i keq se nj\u00eb gardh ferrash. Dita e d\u00ebnimit t\u00ebnd po vjen; tani do t\u00eb jet\u00eb p\u00ebshtjellimi i tyre.\n7:5 Mos e besoni shokun, mos i zini bes\u00eb mikut t\u00eb ngusht\u00eb; ruaji portat e goj\u00ebs sate p\u00ebrpara asaj q\u00eb prehet mbi gjirin t\u00ebnd.\n7:6 Sepse biri turp\u00ebron t\u00eb atin, bija ngre krye kund\u00ebr n\u00ebn\u00ebs, e reja kund\u00ebr vjehrr\u00ebs, armiqt\u00eb e secilit jan\u00eb ata t\u00eb sht\u00ebpis\u00eb s\u00eb tij.\n7:7 Por un\u00eb do t\u00eb shikoj te Zoti, do t\u00eb shpresoj te Per\u00ebndia i shp\u00ebtimit tim; Per\u00ebndia im do t\u00eb m\u00eb d\u00ebgjoj\u00eb.\n7:8 Mos u g\u00ebzo me mua, o armikja ime! N\u00eb rast se kam r\u00ebn\u00eb, do t\u00eb ngrihem p\u00ebrs\u00ebri; n\u00eb rast se ulem n\u00eb terr, Zoti do t\u00eb jet\u00eb drita ime.\n7:9 Un\u00eb do t\u00eb duroj indinjat\u00ebn e Zotit, sepse kam kryer m\u00ebkate kund\u00ebr tij, deri sa ai do t\u00eb mbroj\u00eb kauz\u00ebn time, dhe do vendos\u00eb drejt\u00ebsi p\u00ebr mua; ai do t\u00eb m\u00eb nxjerr\u00eb n\u00eb drit\u00eb dhe un\u00eb do t\u00eb sodit drejt\u00ebsin\u00eb e tij.\n7:10 At\u00ebher\u00eb armikja ime do ta shoh\u00eb dhe do t\u00eb mbulohet me turp, ajo q\u00eb m\u00eb thoshte: \"Ku \u00ebsht\u00eb Zoti, Per\u00ebndia yt?\". Syt\u00eb e mi do ta shikojn\u00eb me \u00ebndje, nd\u00ebrsa do ta shkelin si balt\u00ebn e rrug\u00ebve.\n7:11 Kur do t\u00eb rind\u00ebrtohen muret e tua, at\u00eb dit\u00eb kufiri yt do t\u00eb zgjerohet shum\u00eb.\n7:12 At\u00eb dit\u00eb do t\u00eb vin\u00eb te ti, nga Asiria dhe nga qytetet e tua t\u00eb fortifikuara, nga qyteti i fortifikuar deri te Lumi, nga deti n\u00eb det dhe nga mali n\u00eb mal.\n7:13 Por vendi do t\u00eb katandiset n\u00eb nj\u00eb shkreti p\u00ebr shkak t\u00eb banor\u00ebve t\u00eb tu, p\u00ebr shkak t\u00eb frytit t\u00eb veprimeve t\u00eb tyre.\n7:14 Kullot popullin t\u00ebnd me shkopin t\u00ebnd, kopen\u00eb e trash\u00ebgimis\u00eb sate, q\u00eb rri i vetmuar n\u00eb pyllin n\u00eb mes t\u00eb Karmelit. Le t\u00eb kullosin n\u00eb Bashan dhe n\u00eb Galaad si n\u00eb koh\u00ebrat e lashta.\n7:15 \"Si n\u00eb dit\u00ebt q\u00eb dole nga vendi i Egjiptit, un\u00eb do t'u tregoj atyre gj\u00ebra t\u00eb mrekullueshme\".\n7:16 Kombet do t\u00eb shohin dhe do t'u vij\u00eb turp p\u00ebr t\u00ebr\u00eb fuqin\u00eb e tyre; do t\u00eb v\u00ebn\u00eb dor\u00ebn te goja, vesh\u00ebt e tyre do t\u00eb mbeten t\u00eb shurdh\u00ebr.\n7:17 Do t\u00eb l\u00ebpijn\u00eb pluhurin si gjarp\u00ebri, si rr\u00ebshqanor\u00ebt e tok\u00ebs, do t\u00eb dalin duke u dridhur nga vendet ku jan\u00eb fshehur; do t\u00eb ken\u00eb frik\u00eb nga Zoti, Per\u00ebndia yn\u00eb, dhe do t\u00eb ken\u00eb frik\u00eb nga ti.\n7:18 Cili Per\u00ebndi \u00ebsht\u00eb si ti, q\u00eb fal paudh\u00ebsin\u00eb dhe e kap\u00ebrcen shkeljen e mbetjes s\u00eb trash\u00ebgimis\u00eb s\u00eb tij? Ai nuk e mban p\u00ebrgjithnj\u00eb zem\u00ebrimin e tij, sepse i p\u00eblqen t\u00eb jet\u00eb i m\u00ebshirsh\u00ebm.\n7:19 Atij do t'i vij\u00eb p\u00ebrs\u00ebri keq p\u00ebr ne, do t\u00eb shkel\u00eb paudh\u00ebsit\u00eb tona, Ti do t\u00eb hedh\u00ebsh n\u00eb fund t\u00eb detit t\u00ebr\u00eb m\u00ebkatet tona.\n7:20 Ti do t'ia tregosh besnik\u00ebrin\u00eb t\u00ebnde Jakobit dhe dhemshurin\u00eb t\u00ebnde Abrahamit, si\u00e7 iu betove et\u00ebrve tan\u00eb qysh n\u00eb koh\u00ebrat e lashta.","title":"Albanian Bible: Micah","type":"page"}