{"collection":"Bible & Christianity","html_url":"https://unchartedknowledge.5gfusion.net/browse/bib/wb/alb/nah.htm","path":"bib/wb/alb/nah.htm","source_url":"https://sacred-texts.com/bib/wb/alb/nah.htm","text":"1:1 Profecia mbi Niniven. Libri i vegimit t\u00eb Nahumit nga Elkoshi.\n1:2 Zoti \u00ebsht\u00eb nj\u00eb Per\u00ebndi xheloz dhe hakmarr\u00ebs; Zoti \u00ebsht\u00eb hakmarr\u00ebs dhe plot t\u00ebrbim. Zoti hakmerret me kund\u00ebrshtar\u00ebt e tij dhe e ruan zem\u00ebrimin p\u00ebr armiqt\u00eb e tij.\n1:3 Zoti \u00ebsht\u00eb i ngadalsh\u00ebm n\u00eb zem\u00ebrim dhe pushtetmadh, por nuk e l\u00eb pa e nd\u00ebshkuar aspak t\u00eb ligun. Zoti vazhdon rrug\u00ebn e tij n\u00eb shakullim\u00eb dhe n\u00eb furtun\u00eb dhe ret\u00eb jan\u00eb pluhuri i k\u00ebmb\u00ebve t\u00eb tij.\n1:4 Ai e qorton r\u00ebnd\u00eb detin dhe e than, i b\u00ebn t\u00eb thahen t\u00eb gjith\u00eb lumenjt\u00eb. Bashani dhe Karmeli thahen dhe lulja e Libanit fishket.\n1:5 Malet dridhen para tij, kodrat treten; n\u00eb prani t\u00eb tij toka ngrihet, po, bota dhe t\u00ebr\u00eb banor\u00ebt e saj.\n1:6 Kush mund t'i rezistoj\u00eb indinjat\u00ebs s\u00eb tij dhe kush mund t\u00eb duroj\u00eb zjarrin e zem\u00ebrimit t\u00eb tij? T\u00ebrbimi i tij derdhet si zjarr dhe shk\u00ebmbinjt\u00eb jan\u00eb prej tij t\u00eb th\u00ebrmuara.\n1:7 Zoti \u00ebsht\u00eb i mir\u00eb, \u00ebsht\u00eb nj\u00eb fortes\u00eb n\u00eb dit\u00ebn e fatkeq\u00ebsis\u00eb; ai i njeh ata q\u00eb k\u00ebrkojn\u00eb streh\u00eb tek ai.\n1:8 Por me nj\u00eb p\u00ebrmbytje t\u00eb madhe ai do t\u00eb kryej\u00eb nj\u00eb shkat\u00ebrrim t\u00eb plot\u00eb t\u00eb vendit t\u00eb tij dhe armiqt\u00eb e tij do t\u00eb p\u00ebrndiqen nga terri.\n1:9 \u00c7far\u00eb projektoni kund\u00ebr Zotit? Ai do t\u00eb kryej\u00eb nj\u00eb shkat\u00ebrrim t\u00eb plot\u00eb: fatkeq\u00ebsia nuk do t\u00eb ndodh\u00eb dy her\u00eb.\n1:10 Edhe sikur t\u00eb ishin si ferrat e dendura edhe t\u00eb dehur nga vera q\u00eb kan\u00eb pir\u00eb, ata do t\u00eb gllab\u00ebrohen si kashta fare e that\u00eb.\n1:11 Prej teje doli ai q\u00eb ka kurdisur t\u00eb keqen kund\u00ebr Zotit, ai q\u00eb ka konceptuar lig\u00ebsin\u00eb.\n1:12 K\u00ebshtu thot\u00eb Zoti: \"Edhe sikur t\u00eb ishin plot forc\u00eb dhe t\u00eb shumt\u00eb, do t\u00eb kositen dhe do t\u00eb zhduken. Ndon\u00ebse t\u00eb kam pik\u00eblluar, nuk do t\u00eb pik\u00eblloj m\u00eb.\n1:13 Tani do t\u00eb thyej zgjedh\u00ebn e saj nga trupi yt dhe do t'i shkul lidhjet e tua\".\n1:14 Por lidhur me ty Zoti ka dh\u00ebn\u00eb k\u00ebt\u00eb urdh\u00ebr: \"Emri yt nuk do t\u00eb p\u00ebrjet\u00ebsohet m\u00eb. Nga tempulli i per\u00ebndive t\u00eb tua do t\u00eb zhduk figurat e gdhendura dhe ato t\u00eb derdhura. Do t\u00eb t\u00eb p\u00ebrgatis varrin se je i neveritsh\u00ebm\".\n1:15 Ja mbi male k\u00ebmb\u00ebt e atij q\u00eb njofton lajme t\u00eb mira dhe q\u00eb shpall paqen! Kremto festat e tua solemne, o Jud\u00eb, plot\u00ebso betimet e tua, sepse i ligu nuk do t\u00eb kaloj\u00eb m\u00eb n\u00eb mes teje; ai do t\u00eb shfaroset krejt.\n2:1 Ka dal\u00eb kund\u00ebr teje nj\u00eb shkat\u00ebrrues. Ruaje mir\u00eb fortes\u00ebn, mbikqyr rrug\u00ebn, forco ij\u00ebt e tua, mblidh t\u00ebr\u00eb forcat e tua.\n2:2 Sepse Zoti do t\u00eb rivendos\u00eb lavdin\u00eb e Jakobit dhe lavdin\u00eb e Izraelit, sepse cubat i kan\u00eb pla\u00e7kitur dhe kan\u00eb shkat\u00ebrruar shermendet e tyre.\n2:3 Mburoja e trimave t\u00eb tij \u00ebsht\u00eb ngjyrosur me t\u00eb kuq, trimat e tij jan\u00eb veshur me rroba t\u00eb kuqe; dit\u00ebn q\u00eb ai p\u00ebrgatit hekuri i qerreve do t\u00eb nxjerr\u00eb shk\u00ebndi si zjarri dhe do t\u00eb vring\u00ebllojn\u00eb ushtat e qiparisit.\n2:4 Qerret do t\u00eb l\u00ebshohen me t\u00ebrbim n\u00ebp\u00ebr rrug\u00eb do t'u bien kryq e t\u00ebrthor shesheve; do t\u00eb duken si pishtar\u00eb, do t\u00eb vet\u00ebtijn\u00eb si rrufe.\n2:5 Ai do t\u00eb kujtoj\u00eb burrat e tij t\u00eb fuqish\u00ebm, por ata do t\u00eb pengohen n\u00eb marshimin e tyre, do t\u00eb sulen drejt mureve dhe mbrojtja do t\u00eb p\u00ebrgatitet.\n2:6 Portat e lumenjve do t\u00eb hapen dhe pallati do t\u00eb shembet.\n2:7 At\u00eb q\u00eb rrinte pal\u00ebvizur do ta zhveshin dhe do ta marrin; sh\u00ebrb\u00ebtoret e saj do t\u00eb vajtojn\u00eb me z\u00eb si t\u00eb p\u00ebllumbesh\u00ebs, duke i r\u00ebn\u00eb gjoksit.\n2:8 Ndon\u00ebse Ninive i koh\u00ebve t\u00eb kaluara ishte si nj\u00eb rezervuar uji, tani ata ikin. \"Ndaluni, ndaluni!\", b\u00ebrtasin, por askush nuk kthehet.\n2:9 Pla\u00e7kitni argjendin, pla\u00e7kitni arin! Ka thesare pa fund, pasuri t\u00eb \u00e7far\u00ebdo sendi t\u00eb \u00e7muar.\n2:10 Ai \u00ebsht\u00eb i shkretuar, bosh dhe i rr\u00ebnuar; zemra lig\u00ebshtohet, gjunj\u00ebt dridhen, ka nj\u00eb dhembje t\u00eb madhe n\u00eb t\u00eb gjitha ij\u00ebt dhe t\u00ebr\u00eb fytyrat e tyre zverdhen.\n2:11 Ku \u00ebsht\u00eb strofka e luan\u00ebve, vendi ku ushqeheshin luan\u00ebt e vegj\u00ebl, ku silleshin luani, luanesha dhe t\u00eb vegj\u00eblit e saj dhe askush nuk i trembte?\n2:12 Luani shqyente p\u00ebr t\u00eb vegj\u00eblit e tij, mbyste p\u00ebr luaneshat e tij dhe mbushte strofkat e tij me gjah dhe strofullat me gj\u00ebn\u00eb e grabitur.\n2:13 \"Ja, un\u00eb jam kund\u00ebr teje\", thot\u00eb Zoti i ushtrive, \"un\u00eb do t'i djeg dhe do t'i b\u00ebj tym qerret e tua dhe shpata do t\u00eb gllab\u00ebroj\u00eb luan\u00ebt e tu t\u00eb vegj\u00ebl; un\u00eb do t\u00eb zhduk grabitjen t\u00ebnde nga dheu dhe z\u00ebri i lajm\u00ebtar\u00ebve t\u00eb tu nuk do t\u00eb d\u00ebgjohet m\u00eb\".\n3:1 Mjer\u00eb qyteti gjakatar, q\u00eb \u00ebsht\u00eb plot me hile dhe me dhun\u00eb dhe q\u00eb nuk po heq dor\u00eb nga grabitjet!\n3:2 K\u00ebrcet kamxhiku, zhurm\u00eb shurdhuese rrotash, kuajsh q\u00eb vrapojn\u00eb dhe qerresh q\u00eb hovin,\n3:3 kalor\u00ebs n\u00eb sulm shpata flak\u00ebruese, ushta q\u00eb shndritin, nj\u00eb shumic\u00eb e madhe t\u00eb vrar\u00ebsh, t\u00eb vdekur t\u00eb shumt\u00eb, kufoma pa fund; pengohesh te kufomat.\n3:4 T\u00eb gjitha k\u00ebto p\u00ebr shkak t\u00eb kurv\u00ebrimeve t\u00eb shumta t\u00eb prostitutes josh\u00ebse, mjeshtre n\u00eb artet magjike q\u00eb i shiste kombet me kurv\u00ebrimet e saj dhe popujt me artet e saj magjike.\n3:5 \"Ja, un\u00eb jam kund\u00ebr teje\", thot\u00eb Zoti i ushtrive, \"un\u00eb do t\u00eb ngre cepat e rrob\u00ebs sate deri n\u00eb fytyr\u00eb dhe do t'u tregoj kombeve lakuriq\u00ebsin\u00eb t\u00ebnde dhe mbret\u00ebrive turpin t\u00ebnd.\n3:6 Do t\u00eb t\u00eb hedh p\u00ebrsip\u00ebr ndyr\u00ebsi, do t\u00eb t\u00eb b\u00ebj t\u00eb neveritshme dhe do t\u00eb t\u00eb nxjerr te shtylla e turpit.\n3:7 Do t\u00eb ndodh\u00eb q\u00eb t\u00eb gjith\u00eb ata q\u00eb do t\u00eb t\u00eb shikojn\u00eb do t\u00eb largohen prej teje dhe do t\u00eb thon\u00eb: \"Ninive \u00ebsht\u00eb shkretuar! Kujt do t'i vij\u00eb keq p\u00ebr t\u00eb?\". Ku t'i k\u00ebrkoj ngush\u00ebllonj\u00ebsit e saj?\".\n3:8 A je m\u00eb e bukur se No-Amoni, q\u00eb ndodhet midis kanaleve t\u00eb Nilit, i rrethuar nga uj\u00ebrat dhe q\u00eb e kishte detin si ledh dhe detin si mur?\n3:9 Etiopia dhe Egjipti ishin forca e tij dhe nuk kishin kufi; Puti dhe Libian\u00ebt ishin aleat\u00ebt e tij.\n3:10 Megjithat\u00eb edhe ai u internua, shkoi n\u00eb rob\u00ebri; edhe f\u00ebmij\u00ebt e tij u b\u00ebn\u00eb cop\u00eb-cop\u00eb n\u00eb hyrje t\u00eb \u00e7do rruge; kan\u00eb hedhur shortin mbi fisnik\u00ebt e tij dhe t\u00ebr\u00eb t\u00eb m\u00ebdhenjt\u00eb e tij u lidh\u00ebn me zinxhir\u00eb.\n3:11 Ti gjithashtu do t\u00eb jesh e dehur dhe do t\u00eb fshihesh; ti gjithashtu do t\u00eb k\u00ebrkosh nj\u00eb vend t\u00eb fortifikuar p\u00ebrpara armikut.\n3:12 T\u00ebr\u00eb fortesat e tua do t\u00eb jen\u00eb si druri i fikut me fiq t\u00eb par\u00eb; po t'i shkund\u00ebsh, bien n\u00eb goj\u00eb t\u00eb atij q\u00eb i ha.\n3:13 Ja, trupat e tua n\u00eb mes teje jan\u00eb si gra; portat e vendit t\u00ebnd jan\u00eb t\u00eb hapura p\u00ebrpara armiqve t\u00eb tu; zjarri ka gllab\u00ebruar hekurat e portave t\u00eb tua.\n3:14 Mblidh p\u00ebr vete ujin e nevojsh\u00ebm p\u00ebr rrethimin, p\u00ebrforco fortifikimet e tua, ngjeshe argjil\u00ebn, punoje lla\u00e7in, ndreqe furr\u00ebn p\u00ebr tulla.\n3:15 Atje zjarri do t\u00eb t\u00eb gllab\u00ebroj\u00eb, shpata do t\u00eb t\u00eb shkat\u00ebrroj\u00eb, do t\u00eb t\u00eb haj\u00eb si nj\u00eb larv\u00eb karkaleci; shumohu si larvat e karkalecave, shumohu si karkalecat.\n3:16 I ke shumuar tregjet e tua m\u00eb tep\u00ebr se yjet e qiellit; larvat e karkalecave zhveshin \u00e7do gj\u00eb dhe pastaj fluturojn\u00eb tutje.\n3:17 Princat e tu jan\u00eb si karkalecat, oficer\u00ebt e tu si miz\u00ebri karkalecash q\u00eb ndalen midis gjerdheve n\u00eb dit\u00ebt e ftohta; po, kur del dielli, fluturojn\u00eb tutje, por nuk dihet se ku kan\u00eb shkuar.\n3:18 O mbret i Asiris\u00eb, barinjt\u00eb e tu po flen\u00eb, fisnik\u00ebt e tu pushojn\u00eb; populli yt u shp\u00ebrnda nd\u00ebr male dhe kurrkush nuk po i mbledh.\n3:19 Nuk ka ila\u00e7 p\u00ebr plag\u00ebn t\u00ebnde, plaga jote \u00ebsht\u00eb vdekjeprur\u00ebse; t\u00eb gjith\u00eb ata q\u00eb do t\u00eb d\u00ebgjojn\u00eb t\u00eb flitet p\u00ebr ty, do t\u00eb p\u00ebrplasin duart p\u00ebr fatin t\u00ebnd. Sepse mbi k\u00eb nuk \u00ebsht\u00eb ushtruar vazhdimisht lig\u00ebsia jote?","title":"Albanian Bible: Nahum","type":"page"}