{"collection":"Bible & Christianity","html_url":"https://unchartedknowledge.5gfusion.net/browse/bib/wb/alb/rom.htm","path":"bib/wb/alb/rom.htm","source_url":"https://sacred-texts.com/bib/wb/alb/rom.htm","text":"1:1 Pali, sh\u00ebrb\u00ebtor i Jezu Krishtit, i thirrur p\u00ebr t\u00eb qen\u00eb apostull, i ve\u00e7uar p\u00ebr ungjillin e Per\u00ebndis\u00eb,\n1:2 si\u00e7 i kishte premtuar ai me an\u00eb t\u00eb profet\u00ebve t\u00eb tij n\u00eb Shkrimet e shenjta,\n1:3 lidhur me Birin e tij, t\u00eb lindur nga fara e Davidit sipas mishit,\n1:4 i deklaruar Biri i Per\u00ebndis\u00eb n\u00eb fuqi, sipas Frym\u00ebs s\u00eb shenjt\u00ebris\u00eb n\u00ebp\u00ebrmjet ringjalljes prej s\u00eb vdekurit: Jezu Krishti Zoti yn\u00eb,\n1:5 me an\u00eb t\u00eb t\u00eb cilit ne kemi marr\u00eb hir dhe apostullim, p\u00ebr bindje n\u00eb besim midis t\u00eb gjith\u00eb kombeve p\u00ebr hir t\u00eb emrit t\u00eb tij,\n1:6 nd\u00ebr t\u00eb cil\u00ebt edhe ju jeni t\u00eb thirrur nga Jezu Krishti;\n1:7 p\u00ebr ju t\u00eb gjith\u00eb q\u00eb jeni n\u00eb Rom\u00eb, t\u00eb dashur nga Per\u00ebndia, t\u00eb thirrur shenjtor\u00eb: hir dhe paqe nga Per\u00ebndia, Ati yn\u00eb, e nga Zoti Jezu Krishti.\n1:8 Para s\u00eb gjithash, fal\u00ebnderoj Per\u00ebndin\u00eb tim me an\u00eb t\u00eb Jezu Krishtit p\u00ebr t\u00eb gjith\u00eb ju, sepse p\u00ebr besimin tuaj \u00ebsht\u00eb folur n\u00eb gjith\u00eb bot\u00ebn.\n1:9 Sepse Per\u00ebndia, t\u00eb cilit un\u00eb i sh\u00ebrbej me frym\u00ebn time n\u00ebp\u00ebrmjet ungjillit t\u00eb Birit t\u00eb tij, \u00ebsht\u00eb d\u00ebshmitari im q\u00eb un\u00eb nuk pushoj kurr\u00eb t'ju kujtoj,\n1:10 duke k\u00ebrkuar vazhdimisht n\u00eb lutjet e mia q\u00eb t\u00eb m\u00eb lejohet m\u00eb n\u00eb fund nga vullneti i Per\u00ebndis\u00eb mund\u00ebsia p\u00ebr t\u00eb ardhur tek ju,\n1:11 sepse un\u00eb d\u00ebshiroj fort t'ju shoh p\u00ebr t'ju komunikuar ndonj\u00eb dhun\u00ebti frym\u00ebror, q\u00eb t\u00eb fort\u00ebsoheni.\n1:12 Dhe kjo \u00ebsht\u00eb q\u00eb un\u00eb t\u00eb ngush\u00ebllohem bashk\u00eb me ju me an\u00eb t\u00eb besimit q\u00eb e kemi t\u00eb p\u00ebrbashk\u00ebt, tuajin dhe timin.\n1:13 Tani, v\u00ebllez\u00ebr, un\u00eb nuk dua q\u00eb t\u00eb mos e dini se shum\u00eb her\u00eb kisha vendosur t\u00eb vija tek ju q\u00eb t\u00eb mund t\u00eb kem ndonj\u00eb fryt midis jush si\u00e7 kam pasur midis johebrenjve t\u00eb tjer\u00eb, por deri tash kam qen\u00eb i penguar.\n1:14 Un\u00eb u jam borxhli Grek\u00ebve dhe barbar\u00ebve, t\u00eb diturve dhe t\u00eb paditurve.\n1:15 K\u00ebshtu, aq sa varet nga un\u00eb, jam gati t'ju predikoj ungjillin edhe juve q\u00eb jeni n\u00eb Rom\u00eb.\n1:16 N\u00eb fakt un\u00eb nuk kam turp p\u00ebr ungjillin e Krishtit, sepse ai \u00ebsht\u00eb fuqia e Per\u00ebndis\u00eb p\u00ebr shp\u00ebtimin e cilitdo q\u00eb beson, m\u00eb par\u00eb Judeun e pastaj Grekun.\n1:17 Sepse drejt\u00ebsia e Per\u00ebndis\u00eb \u00ebsht\u00eb zbuluar n\u00eb t\u00eb nga besimi n\u00eb besim si\u00e7 \u00ebsht\u00eb shkruar: ''I drejti do t\u00eb jetoj\u00eb me an\u00eb t\u00eb besimit''.\n1:18 Sepse zem\u00ebrimi i Per\u00ebndis\u00eb zbulohet nga qielli p\u00ebr \u00e7do pabesi e padrejt\u00ebsi t\u00eb njer\u00ebzve, q\u00eb mbysin t\u00eb v\u00ebrtet\u00ebn n\u00eb padrejt\u00ebsi,\n1:19 meqen\u00ebse ajo q\u00eb mund t\u00eb njihet prej Per\u00ebndis\u00eb \u00ebsht\u00eb b\u00ebr\u00eb e dukshme n\u00eb ta, sepse Per\u00ebndia ua ka shfaqur atyre.\n1:20 N\u00eb fakt cil\u00ebsit\u00eb e tij t\u00eb padukshme, fuqia e tij e p\u00ebrjetshme dhe hyjnia e tij, duke qen\u00eb t\u00eb dukshme n\u00ebp\u00ebrmjet veprave t\u00eb tij q\u00eb nga krijimi i bot\u00ebs, shihen qart\u00eb, me q\u00ebllim q\u00eb ata t\u00eb jen\u00eb t\u00eb pafalsh\u00ebm.\n1:21 Sepse, megjith\u00ebse e njoh\u00ebn Per\u00ebndin\u00eb, nuk e p\u00ebrl\u00ebvduan as e fal\u00ebnderuan si Per\u00ebndi, p\u00ebrkundrazi u b\u00ebn\u00eb t\u00eb pamend n\u00eb arsyetimet e tyre dhe zemra e tyre pa gjykim u err\u00ebsua.\n1:22 Duke e deklaruar veten t\u00eb urt\u00eb, u b\u00ebn\u00eb t\u00eb marr\u00eb,\n1:23 dhe e shnd\u00ebrruan lavdin\u00eb e Per\u00ebndis\u00eb s\u00eb pakalbsh\u00ebm n\u00eb nj\u00eb sh\u00ebmb\u00ebllim t\u00eb ngjash\u00ebm me at\u00eb t\u00eb nj\u00eb njeriu t\u00eb kalbsh\u00ebm, t\u00eb shpend\u00ebve, t\u00eb kafsh\u00ebve kat\u00ebrk\u00ebmb\u00ebshe dhe t\u00eb rr\u00ebshqanor\u00ebve.\n1:24 Prandaj Per\u00ebndia ia dor\u00ebzoi papast\u00ebrts\u00eb n\u00eb epshet e zemrave t\u00eb tyre, p\u00ebr t\u00eb \u00e7nderuar trupat e tyre n\u00eb mes vet\u00eb atyre,\n1:25 q\u00eb e ndryshuan t\u00eb v\u00ebrtet\u00ebn e Per\u00ebndis\u00eb n\u00eb g\u00ebnjesht\u00ebr dhe adhuruan dhe i sh\u00ebrbyen krijes\u00ebs n\u00eb vend t\u00eb Krijuesit, q\u00eb \u00ebsht\u00eb i bekuar p\u00ebrjet\u00eb. Amen.\n1:26 Prandaj Per\u00ebndia i dor\u00ebzoi ata n\u00eb pasioneve t\u00eb ul\u00ebta, sepse edhe grat\u00eb e tyre i shnd\u00ebrruan marr\u00ebdh\u00ebniet natyrore n\u00eb at\u00eb q\u00eb \u00ebsht\u00eb kund\u00ebr natyr\u00ebs.\n1:27 N\u00eb t\u00eb njejt\u00ebn m\u00ebnyr\u00eb burrat, duke l\u00ebn\u00eb marr\u00ebdheniet e natyrshme me gruan, u ndez\u00ebn n\u00eb epshin e tyre p\u00ebr nj\u00ebri-tjetrin, duke kryer akte t\u00eb pandershme burra me burra, duke marr\u00eb n\u00eb vetvete shpagimin e duhur p\u00ebr gabimin e tyre.\n1:28 Dhe meqen\u00ebse nuk e quajt\u00ebn me vend t\u00eb njihnin Per\u00ebndin\u00eb, Per\u00ebndia i dor\u00ebzoi n\u00eb nj\u00eb mendje t\u00eb \u00e7oroditur, p\u00ebr t\u00eb b\u00ebr\u00eb gj\u00ebra t\u00eb pahijshme,\n1:29 duke qen\u00eb t\u00eb mbushur plot me \u00e7do padrejt\u00ebsi, kurv\u00ebrim, mbrapsht\u00ebsi, lakmi, lig\u00ebsi; plot smir\u00eb, vrasje, grindje, mashtrim, posht\u00ebrsi,\n1:30 mashtrues, shpif\u00ebs, armiq t\u00eb Per\u00ebndis\u00eb, fyes, krenar\u00eb, mburravec\u00eb, trillues lig\u00ebsish, t\u00eb pabindur ndaj prind\u00ebrve,\n1:31 t\u00eb paarsyesh\u00ebm, t\u00eb pabes\u00eb, pa dashuri t\u00eb natyrshme, t\u00eb papajtuesh\u00ebm, t\u00eb pam\u00ebshirsh\u00ebm.\n1:32 Por ata, ndon\u00ebse e kan\u00eb njohur dekretin e Per\u00ebndis\u00eb sipas t\u00eb cilit ata q\u00eb b\u00ebjn\u00eb gj\u00ebra t\u00eb tilla meritojn\u00eb vdekjen, jo vet\u00ebm i b\u00ebjn\u00eb, por miratojn\u00eb edhe ata q\u00eb i kryejn\u00eb.\n2:1 Prandaj, o njeri, cilido t\u00eb jesh ti q\u00eb e gjykon, je i pafalsh\u00ebm sepse n\u00eb k\u00ebt\u00eb q\u00eb gjykon tjetrin, d\u00ebnon vetveten, sepse ti q\u00eb gjykon b\u00ebn t\u00eb nj\u00ebjtat gj\u00ebra.\n2:2 Por ne e dim\u00eb se gjykimi i Per\u00ebndis\u00eb \u00ebsht\u00eb sipas s\u00eb v\u00ebrtet\u00ebs mbi ata q\u00eb b\u00ebjn\u00eb gj\u00ebra t\u00eb tilla.\n2:3 Dhe mendon, vall\u00eb, o njeri q\u00eb gjykon ata q\u00eb b\u00ebjn\u00eb t\u00eb tilla gj\u00ebra q\u00eb edhe ti i b\u00ebn, t'i shp\u00ebtosh gjykimit t\u00eb Per\u00ebndis\u00eb?\n2:4 Apo i p\u00ebr\u00e7mon pasurit\u00eb e mir\u00ebsis\u00eb s\u00eb tij, t\u00eb durimit dhe zem\u00ebrgjer\u00ebsis\u00eb s\u00eb tij, duke mos njohur q\u00eb mir\u00ebsia e Per\u00ebndis\u00eb t\u00eb prin n\u00eb pendim?\n2:5 Por ti, p\u00ebr shkak t\u00eb ashp\u00ebrsis\u00eb sate dhe t\u00eb zemr\u00ebs s\u00eb papenduar, po mbledh p\u00ebr veten t\u00ebnde zem\u00ebrim p\u00ebr dit\u00ebn e zem\u00ebrimit dhe t\u00eb zbules\u00ebs s\u00eb gjykimit t\u00eb drejt\u00eb t\u00eb Per\u00ebndis\u00eb,\n2:6 q\u00eb do ta shpaguaj\u00eb secilin sipas veprave t\u00eb tij:\n2:7 jet\u00eb t\u00eb p\u00ebrjetshme atyre q\u00eb k\u00ebrkojn\u00eb lavdi, nder e pavdek\u00ebsi, duke ngulmuar n\u00eb veprat e mira;\n2:8 nd\u00ebrsa atyre q\u00eb kund\u00ebrshtojn\u00eb e nuk i binden s\u00eb v\u00ebrtet\u00ebs, por i binden padrejt\u00ebsis\u00eb, indinjat\u00eb dhe zem\u00ebrim.\n2:9 Mundim dhe ankth mbi \u00e7do shpirt njeriu q\u00eb b\u00ebn t\u00eb lig\u00ebn, Judeut m\u00eb par\u00eb e pastaj Grekut;\n2:10 por lavdi, nder e paqe cilitdo q\u00eb b\u00ebn t\u00eb mir\u00ebn, Judeut m\u00eb par\u00eb e pastaj Grekut.\n2:11 Sepse te Per\u00ebndia nuk ka an\u00ebsi.\n2:12 N\u00eb fakt t\u00eb gjith\u00eb ata q\u00eb kan\u00eb m\u00ebkatuar pa ligjin, do t\u00eb humbasin gjithashtu pa ligj; dhe t\u00eb gjith\u00eb ata q\u00eb kan\u00eb m\u00ebkatuar n\u00ebn ligjin do t\u00eb gjykohen sipas ligjit,\n2:13 sepse jo ata q\u00eb d\u00ebgjojn\u00eb ligjin jan\u00eb t\u00eb drejt\u00eb para Per\u00ebndis\u00eb, por ata q\u00eb e zbatojn\u00eb ligjin do t\u00eb shfaj\u00ebsohen.\n2:14 N\u00eb fakt kur johebrenjt\u00eb, q\u00eb s'kan\u00eb ligjin, nga natyra b\u00ebjn\u00eb pun\u00ebt e ligjit, ata, megjith\u00ebse s'kan\u00eb ligjin, jan\u00eb ligj p\u00ebr vetveten;\n2:15 k\u00ebta tregojn\u00eb vepr\u00ebn e ligjit t\u00eb shkruar n\u00eb zemrat e tyre p\u00ebr d\u00ebshmin\u00eb q\u00eb jep nd\u00ebrgjegja e tyre, dhe sepse mendimet e tyre shfaj\u00ebsojn\u00eb ose edhe akuzojn\u00eb nj\u00ebri-tjetrin,\n2:16 dit\u00ebn n\u00eb t\u00eb cil\u00ebn Per\u00ebndia do t\u00eb gjykoj\u00eb t\u00eb fshehtat e njer\u00ebzve me an\u00eb t\u00eb Jezu Krishtit, sipas ungjillit tim.\n2:17 Ja, ti quhesh Jude, bazohesh mbi ligjin dhe l\u00ebvdohesh n\u00eb Per\u00ebndin\u00eb,\n2:18 njeh vullnetin e tij dhe dallon gj\u00ebrat e r\u00ebnd\u00ebsishme, duke qen\u00eb i m\u00ebsuar prej ligjit,\n2:19 dhe je i bindur se je prij\u00ebsi i t\u00eb verb\u00ebrve, drita e atyre q\u00eb jan\u00eb n\u00eb err\u00ebsir\u00eb,\n2:20 udh\u00ebzues i t\u00eb marr\u00ebve, m\u00ebsues i t\u00eb miturve, sepse ke form\u00ebn e njohuris\u00eb dhe t\u00eb s\u00eb v\u00ebrtet\u00ebs n\u00eb ligj.\n2:21 Ti, pra, q\u00eb m\u00ebson t\u00eb tjer\u00ebt, nuk m\u00ebson veten? Ti q\u00eb predikon se nuk duhet vjedhur, vjedh?\n2:22 Ti q\u00eb thua se nuk duhet shkelur kurora, shkel kuror\u00ebn? Ti q\u00eb ke neveri p\u00ebr idhujt, pse i pla\u00e7kit tempujt?\n2:23 Ti q\u00eb l\u00ebvdohesh me ligjin, e \u00e7nderon Per\u00ebndin\u00eb duke e shkelur ligjin?\n2:24 N\u00eb fakt, si\u00e7 \u00ebsht\u00eb shkruar: ''P\u00ebr shkakun tuaj, emri i Per\u00ebndis\u00eb blasfemohet nd\u00ebr johebrenj''.\n2:25 Sepse rrethprerja \u00ebsht\u00eb e dobishme n\u00eb qoft\u00eb se ti respekton ligjin, por n\u00eb qoft\u00eb se je shkel\u00ebs i ligjit, rrethprerja jote b\u00ebhet mosrrethprerje.\n2:26 Prandaj n\u00eb qoft\u00eb se nj\u00eb i parrethprer\u00eb respekton statutet e ligjit, a nuk do t\u00eb \u00e7mohet parrethprerja e tij si rrethprerje?\n2:27 Dhe, n\u00eb qoft\u00eb se ai q\u00eb prej natyr\u00ebs \u00ebsht\u00eb i parrethprer\u00eb e plot\u00ebson ligjin, a nuk do t\u00eb t\u00eb gjykoj\u00eb ai ty q\u00eb me shkronj\u00ebn dhe me rrethprerjen je shkel\u00ebs i ligjit?\n2:28 N\u00eb fakt Jude nuk \u00ebsht\u00eb ai q\u00eb duket i till\u00eb nga jasht\u00eb, dhe rrethprerja nuk \u00ebsht\u00eb ajo q\u00eb duket n\u00eb mish;\n2:29 por Jude \u00ebsht\u00eb ai q\u00eb \u00ebsht\u00eb i till\u00eb p\u00ebrbrenda, dhe rrethprerja \u00ebsht\u00eb ajo e zemr\u00ebs, n\u00eb frym\u00eb dhe jo n\u00eb shkronj\u00eb; dhe p\u00ebr nj\u00eb Jude t\u00eb till\u00eb lavd\u00ebrimi nuk buron nga njer\u00ebzit, por nga Per\u00ebndia.\n3:1 Cila \u00ebsht\u00eb, pra, p\u00ebrpar\u00ebsia e Judeut, ose cila \u00ebsht\u00eb dobia e rrethprerjes?\n3:2 E madhe n\u00eb \u00e7do m\u00ebnyr\u00eb; para s\u00eb gjithash sepse orakujt e Per\u00ebndis\u00eb iu besuan atyre.\n3:3 \u00c7't\u00eb thuash at\u00ebher\u00eb? N\u00eb qoft\u00eb se disa nuk besuan, mosbesimi i tyre do ta anuloj\u00eb, vall\u00eb, besnik\u00ebrin\u00eb e Per\u00ebndis\u00eb?\n3:4 Kurr\u00eb mos qoft\u00eb; p\u00ebrkundrazi, qoft\u00eb Per\u00ebndia i v\u00ebrtet\u00eb dhe \u00e7do njeri g\u00ebnjeshtar, si\u00e7 \u00ebsht\u00eb shkruar: ''Q\u00eb ti t\u00eb shfaj\u00ebsohesh n\u00eb fjal\u00ebt e tua dhe t\u00eb ngadh\u00ebnjesh kur t\u00eb gjykohesh''.\n3:5 Po n\u00eb qoft\u00eb se padrejt\u00ebsia jon\u00eb e v\u00eb n\u00eb pah drejt\u00ebsin\u00eb e Per\u00ebndis\u00eb, \u00e7'do t\u00eb themi? Per\u00ebndia q\u00ebnka i padrejt\u00eb kur shfren zem\u00ebrimin e tij? (Un\u00eb flas si njeri).\n3:6 Kurr\u00eb mos qoft\u00eb! Sepse at\u00ebher\u00eb, si do ta gjykonte Zoti bot\u00ebn?\n3:7 Prandaj n\u00eb qoft\u00eb se me an\u00eb t\u00eb g\u00ebnjeshtr\u00ebs sime e v\u00ebrteta e Per\u00ebndis\u00eb e lart\u00ebson lavdin\u00eb e tij, p\u00ebrse un\u00eb gjykohem akoma si m\u00ebkatar?\n3:8 E p\u00ebrse t\u00eb mos themi si disa q\u00eb, duke shpifur, pohojn\u00eb se ne themi: ''T\u00eb b\u00ebjm\u00eb t\u00eb keqen q\u00eb t\u00eb vij\u00eb e mira''? D\u00ebnimi i k\u00ebtyre \u00ebsht\u00eb i drejt\u00eb.\n3:9 E \u00e7far\u00eb pra? A kemi ne ndonj\u00eb ep\u00ebrsi? Aspak! E kemi treguar n\u00eb fakt q\u00eb m\u00eb p\u00ebrpara se si Judenjt\u00eb ashtu edhe Grek\u00ebt jan\u00eb t\u00eb gjith\u00eb n\u00ebn m\u00ebkat,\n3:10 si\u00e7 \u00ebsht\u00eb shkruar: ''Nuk ka asnjeri t\u00eb drejt\u00eb, as edhe nj\u00eb.\n3:11 Nuk ka asnjeri q\u00eb t\u00eb kuptoj\u00eb, nuk ka asnjeri q\u00eb t\u00eb k\u00ebrkoj\u00eb Per\u00ebndin\u00eb.\n3:12 T\u00eb gjith\u00eb kan\u00eb dal\u00eb nga udha e tij, q\u00eb t\u00eb gjith\u00eb jan\u00eb b\u00ebr\u00eb t\u00eb padobish\u00ebm, nuk ka asnj\u00eb q\u00eb t\u00eb b\u00ebj\u00eb t\u00eb mir\u00ebn, as edhe nj\u00eb.\n3:13 Gryka e tyre \u00ebsht\u00eb nj\u00eb varr i hapur, me gjuh\u00ebt e tyre kan\u00eb thurur mashtrime, ka helm gjarp\u00ebrinjsh n\u00ebn buz\u00ebt e tyre;\n3:14 goja e tyre \u00ebsht\u00eb plot mallkim dhe hidh\u00ebsi;\n3:15 k\u00ebmb\u00ebt e tyre jan\u00eb t\u00eb shpejta p\u00ebr t\u00eb derdhur gjak;\n3:16 n\u00eb udh\u00ebt e tyre ka rr\u00ebnim dhe gj\u00ebm\u00eb,\n3:17 dhe nuk e kan\u00eb njohur udh\u00ebn e paqes;\n3:18 nuk ka druajtja e Per\u00ebndis\u00eb para syve t\u00eb tyre''.\n3:19 Por ne e dim\u00eb se gjith\u00e7ka q\u00eb thot\u00eb ligji, e thot\u00eb p\u00ebr ata q\u00eb jan\u00eb n\u00ebn ligj, me q\u00ebllim q\u00eb \u00e7do goj\u00eb t\u00eb hesht\u00eb dhe gjith\u00eb bota t'i jet\u00eb n\u00ebnshtruar gjykimit t\u00eb Per\u00ebndis\u00eb,\n3:20 sepse asnj\u00eb mish nuk do t\u00eb shfaj\u00ebsohet para tij p\u00ebr veprat e ligjit; me an\u00eb t\u00eb ligjit n\u00eb fakt arrihet njohja e m\u00ebkatit.\n3:21 Por tani, pavar\u00ebsisht nga ligji, \u00ebsht\u00eb manifestuar drejt\u00ebsia e Per\u00ebndis\u00eb, p\u00ebr t\u00eb cil\u00ebn d\u00ebshmojn\u00eb ligji dhe profet\u00ebt,\n3:22 madje drejt\u00ebsia e Per\u00ebndis\u00eb n\u00ebp\u00ebrmjet besimit n\u00eb Jezu Krishtin p\u00ebr t\u00eb gjith\u00eb e mbi t\u00eb gjith\u00eb ata q\u00eb besojn\u00eb, sepse nuk ka dallim;\n3:23 sepse t\u00eb gjith\u00eb m\u00ebkatuan dhe u privuan nga lavdia e Per\u00ebndis\u00eb,\n3:24 por jan\u00eb shfaj\u00ebsuar falas me an\u00eb t\u00eb hirit t\u00eb tij, n\u00ebp\u00ebrmjet shpengimit q\u00eb \u00ebsht\u00eb n\u00eb Krishtin Jezus.\n3:25 At\u00eb ka paracaktuar Per\u00ebndia p\u00ebr t\u00eb b\u00ebr\u00eb shlyerjen n\u00ebp\u00ebrmjet besimit n\u00eb gjakun e tij, p\u00ebr t\u00eb treguar k\u00ebshtu drejt\u00ebsin\u00eb e tij p\u00ebr faljen e m\u00ebkateve, q\u00eb jan\u00eb kryer m\u00eb par\u00eb gjat\u00eb koh\u00ebs s\u00eb durimit t\u00eb Per\u00ebndis\u00eb,\n3:26 p\u00ebr t\u00eb treguar drejt\u00ebsin\u00eb e tij n\u00eb koh\u00ebn e tanishme, me q\u00ebllim q\u00eb ai t\u00eb jet\u00eb i drejt\u00eb dhe shfaj\u00ebsues i atij q\u00eb ka besimin e Jezusit.\n3:27 Ku \u00ebsht\u00eb, pra, mburrja? \u00c9sht\u00eb p\u00ebrjashtuar. Nga cili ligj? Ai i veprave? Jo, por nga ligji i besimit.\n3:28 Ne, pra, konkludojm\u00eb se njeriu \u00ebsht\u00eb i shfaj\u00ebsuar n\u00ebp\u00ebrmjet besimit pa veprat e ligjit.\n3:29 A \u00ebsht\u00eb vall\u00eb Per\u00ebndia vet\u00ebm Per\u00ebndia i Judenjve? A nuk \u00ebsht\u00eb edhe i johebrenjve? Sigurisht, \u00ebsht\u00eb edhe Per\u00ebndia i johebrenjve.\n3:30 Sepse ka vet\u00ebm nj\u00eb Per\u00ebndi, q\u00eb do t\u00eb shfaj\u00ebsoj\u00eb t\u00eb rrethprerin n\u00ebp\u00ebrmjet besimit, dhe t\u00eb parrethprerin me an\u00eb t\u00eb besimit.\n3:31 Anulojm\u00eb ne, pra, ligjin n\u00ebp\u00ebrmjet besimit? K\u00ebshtu mos qoft\u00eb; p\u00ebrkundrazi e forcojm\u00eb ligjin.\n4:1 \u00c7far\u00eb do t\u00eb themi, pra, n\u00eb lidhje me at\u00eb q\u00eb ati yn\u00eb Abrahami, ka p\u00ebrfituar sipas mishit?\n4:2 Sepse n\u00ebse Abrahami ishte shfaj\u00ebsuar n\u00ebp\u00ebrmjet veprave, ai ka p\u00ebrse t\u00eb l\u00ebvdohet; nd\u00ebrsa p\u00ebrpara Per\u00ebndis\u00eb ai nuk ka asgj\u00eb p\u00ebr t'u l\u00ebvduar.\n4:3 N\u00eb fakt, \u00e7far\u00eb thot\u00eb Shkrimi? ''Por Abrahami i besoi Per\u00ebndis\u00eb dhe kjo iu num\u00ebrua p\u00ebr drejt\u00ebsi''.\n4:4 Edhe atij q\u00eb vepron, shp\u00ebrblimi nuk i konsiderohet si hir por si borxh;\n4:5 nd\u00ebrsa atij q\u00eb nuk vepron, por beson n\u00eb at\u00eb q\u00eb shfaj\u00ebson t\u00eb paudhin, besimi i tij i num\u00ebrohet p\u00ebr drejt\u00ebsi.\n4:6 Sikurse Davidi shpall lumturin\u00eb e njeriut t\u00eb cilit Per\u00ebndia num\u00ebron drejt\u00ebsi pa vepra, duke th\u00ebn\u00eb:\n4:7 ''Lum ata t\u00eb cil\u00ebve u jan\u00eb falur paudh\u00ebsit\u00eb dhe t\u00eb cil\u00ebve m\u00ebkatet u jan\u00eb mbuluar.\n4:8 Lum njeriu t\u00eb cilit Zoti nuk do t'ia num\u00ebroj\u00eb m\u00ebkatin''.\n4:9 Por kjo lumturi a vlen vet\u00ebm p\u00ebr t\u00eb rrethprer\u00ebt, apo edhe p\u00ebr t\u00eb parrethprer\u00ebt? Sepse ne themi se besimi iu num\u00ebrua Abrahamit si drejt\u00ebsi.\n4:10 N\u00eb \u00e7'm\u00ebnyr\u00eb, pra, iu num\u00ebrua? Kur ai ishte i rrethprer\u00eb apo i parrethprer\u00eb? Jo nd\u00ebrsa ishte i rrethprer\u00eb, por kur ishte i parrethprer\u00eb.\n4:11 Pastaj mori shenj\u00ebn e rrethprerjes, si vul\u00eb t\u00eb drejt\u00ebsis\u00eb p\u00ebr besimin q\u00eb kishte patur kur ishte akoma i parrethprer\u00eb, me q\u00ebllim q\u00eb t\u00eb ishte ati i gjith\u00eb atyre q\u00eb besojn\u00eb edhe se jan\u00eb t\u00eb parrethprer\u00eb, me q\u00ebllim q\u00eb edhe atyre t'u num\u00ebrohet drejt\u00ebsia,\n4:12 dhe t\u00eb ishte at\u00eb i t\u00eb rrethprer\u00ebve t\u00eb v\u00ebrtet\u00eb, pra i atyre q\u00eb jo vet\u00ebm jan\u00eb t\u00eb rrethprer\u00eb, por q\u00eb ndjekin edhe gjurm\u00ebt e besimit t\u00eb atit ton\u00eb Abrahamit, q\u00eb ai pati nd\u00ebrsa ishte i parrethprer\u00eb.\n4:13 N\u00eb fakt premtimi p\u00ebr t\u00eb qen\u00eb trash\u00ebgimtar i bot\u00ebs nuk iu b\u00eb Abrahamit dhe pasardh\u00ebsve t\u00eb tij n\u00ebp\u00ebrmjet ligjit, por n\u00ebp\u00ebrmjet drejt\u00ebsis\u00eb s\u00eb besimit.\n4:14 Sepse n\u00ebse jan\u00eb trash\u00ebgimtar\u00eb ata q\u00eb jan\u00eb t\u00eb ligjit, besimi b\u00ebhet i kot\u00eb dhe premtimi anulohet,\n4:15 sepse ligji prodhon zem\u00ebrimin; n\u00eb fakt atje ku nuk ka ligj, nuk ka as shkelje.\n4:16 Prandaj trash\u00ebgimia \u00ebsht\u00eb n\u00ebp\u00ebrmjet besimit; n\u00eb k\u00ebt\u00eb m\u00ebnyr\u00eb ajo \u00ebsht\u00eb n\u00ebp\u00ebrmjet hirit, me q\u00ebllim q\u00eb premtimi t\u00eb jet\u00eb i siguruar p\u00ebr t\u00eb gjith\u00eb pasardh\u00ebsit, jo vet\u00ebm p\u00ebr at\u00eb q\u00eb \u00ebsht\u00eb nga ligji, por edhe p\u00ebr at\u00eb q\u00eb vjen nga besimi i Abrahamit, i cili\n4:17 (si\u00e7 \u00ebsht\u00eb shkruar: ''Un\u00eb t\u00eb kam caktuar atin e shum\u00eb kombeve''), \u00ebsht\u00eb ati i t\u00eb gjith\u00eb neve para Per\u00ebndis\u00eb q\u00eb ai besoi, i cili i jep jet\u00eb t\u00eb vdekurve dhe th\u00ebrret gj\u00ebrat q\u00eb nuk jan\u00eb sikur t\u00eb ishin.\n4:18 Ai, duke shpresuar kund\u00ebr \u00e7do shprese, besoi p\u00ebr t'u b\u00ebr\u00eb ati i shum\u00eb kombeve sipas asaj q\u00eb i ishte th\u00ebn\u00eb: ''K\u00ebshtu do t\u00eb jet\u00eb pasardhja jot\u00eb''.\n4:19 Dhe, duke mos qen\u00eb aspak i dob\u00ebt n\u00eb besim, nuk i kushtoi kujdes trupit t\u00eb tij, i b\u00ebr\u00eb tashm\u00eb si i vdekur (ishte pothuaj nj\u00ebqind vje\u00e7) as barkut t\u00eb vdekur t\u00eb Sar\u00ebs.\n4:20 Madje as nuk dyshoi nga mosbesimi n\u00eb lidhje me premtimin e Per\u00ebndis\u00eb, por u p\u00ebrforcua n\u00eb besim duke i dh\u00ebn\u00eb lavdi Per\u00ebndis\u00eb,\n4:21 plot\u00ebsisht i bindur se at\u00eb q\u00eb ai kishte premtuar ishte edhe i fuqish\u00ebm ta b\u00ebnte.\n4:22 Prandaj edhe kjo iu num\u00ebrua atij p\u00ebr drejt\u00ebsi.\n4:23 E po nuk u shkrua vet\u00ebm p\u00ebr t\u00eb, q\u00eb kjo i ishte num\u00ebruar,\n4:24 por edhe p\u00ebr ne, t\u00eb cil\u00ebve do t\u00eb na num\u00ebrohet, neve q\u00eb besojm\u00eb n\u00eb at\u00eb q\u00eb ka ringjallur prej t\u00eb vdekurve Jezusin, Zotin ton\u00eb,\n4:25 i cili u dha p\u00ebr shkak t\u00eb fyerjeve tona dhe u ringjall p\u00ebr justifikimin ton\u00eb.\n5:1 T\u00eb shfaj\u00ebsuar, pra, me an\u00eb t\u00eb besimit, kemi paqe me Per\u00ebndin\u00eb n\u00ebp\u00ebrmjet Jezu Krishtit, Zotit ton\u00eb,\n5:2 me an\u00eb t\u00eb t\u00eb cilit edhe pat\u00ebm, n\u00ebp\u00ebrmjet besimit, hyrjen n\u00eb k\u00ebt\u00eb hir n\u00eb t\u00eb cilin q\u00ebndrojm\u00eb t\u00eb patundur dhe mburremi n\u00eb shpres\u00ebn e lavdis\u00eb s\u00eb Per\u00ebndis\u00eb.\n5:3 Dhe jo vet\u00ebm kaq, por mburremi edhe n\u00eb shtr\u00ebngimet, duke ditur q\u00eb shtr\u00ebngimi prodhon k\u00ebmb\u00ebnguljen,\n5:4 k\u00ebmb\u00ebngulja p\u00ebrvoj\u00ebn dhe p\u00ebrvoja shpres\u00ebn.\n5:5 Por shpresa nuk turp\u00ebron, sepse dashuria e Per\u00ebndis\u00eb \u00ebsht\u00eb derdhur n\u00eb zemrat tona me an\u00eb t\u00eb Frym\u00ebs s\u00eb Shenjt\u00eb q\u00eb na \u00ebsht\u00eb dh\u00ebn\u00eb.\n5:6 Sepse, nd\u00ebrsa ishin akoma pa forc\u00eb, Krishti vdiq n\u00eb koh\u00ebn e tij p\u00ebr t\u00eb paudh\u00ebt.\n5:7 V\u00ebshtir\u00eb n\u00eb fakt se vdes dikush p\u00ebr nj\u00eb t\u00eb drejt\u00eb; mbase ndonj\u00eb do t\u00eb guxonte t\u00eb vdiste p\u00ebr nj\u00eb njeri t\u00eb mir\u00eb.\n5:8 Por Per\u00ebndia e tregon dashurin\u00eb e tij ndaj nesh n\u00eb at\u00eb q\u00eb, kur ende ishim m\u00ebkatar\u00eb, Krishti vdiq p\u00ebr ne.\n5:9 Shum\u00eb m\u00eb tep\u00ebr, pra, duke qen\u00eb tani t\u00eb shfaj\u00ebsuar n\u00eb gjakun e tij, do t\u00eb shp\u00ebtojm\u00eb nga zem\u00ebrimi me an\u00eb t\u00eb tij.\n5:10 N\u00eb fakt, nd\u00ebrsa ishim armiq, u pajtuam me Per\u00ebndin\u00eb n\u00ebp\u00ebrmjet vdekjes s\u00eb Birit t\u00eb tij, akoma m\u00eb shum\u00eb tani, q\u00eb jemi pajtuar, do t\u00eb shp\u00ebtohemi n\u00ebp\u00ebrmjet jet\u00ebs s\u00eb tij.\n5:11 E jo vet\u00ebm kaq, por edhe mburremi n\u00eb Per\u00ebndin\u00eb, n\u00ebp\u00ebrmjet Zotit ton\u00eb Jezu Krisht, me an\u00eb t\u00eb t\u00eb cilit tani kemi marr\u00eb pajtimin.\n5:12 Prandaj, ashtu si me an\u00eb t\u00eb nj\u00eb njeriu t\u00eb vet\u00ebm m\u00ebkati hyri n\u00eb bot\u00eb dhe me an\u00eb t\u00eb m\u00ebkatit vdekja, po ashtu vdekja u shtri tek t\u00eb gjith\u00eb njer\u00ebzit, sepse t\u00eb gjith\u00eb m\u00ebkatuan;\n5:13 sepse, derisa u shpall ligji, m\u00ebkati ekzistonte n\u00eb bot\u00eb; por m\u00ebkati nuk num\u00ebrohet n\u00ebse nuk ka ligj;\n5:14 por vdekja mbret\u00ebroi nga Adami deri te Moisiu edhe mbi ata q\u00eb nuk kishin m\u00ebkatuar me nj\u00eb shkelje t\u00eb ngjashme nga ajo e Adamit, q\u00eb \u00ebsht\u00eb figura e atij q\u00eb duhej t\u00eb vinte.\n5:15 Mir\u00ebpo hiri nuk \u00ebsht\u00eb si shkelja; n\u00ebse n\u00eb fakt p\u00ebr shkak t\u00eb shkeljes s\u00eb nj\u00eb njeriu t\u00eb vet\u00ebm vdiq\u00ebn shum\u00eb, shum\u00eb m\u00eb tep\u00ebr hiri i Per\u00ebndis\u00eb dhe dhurata me an\u00eb t\u00eb hirit e nj\u00eb njeriu, Jezu Krishtit, i teproi p\u00ebr shum\u00eb t\u00eb tjer\u00eb.\n5:16 Sa p\u00ebr dhuntin\u00eb, nuk ndodhi si p\u00ebr at\u00eb nj\u00eb q\u00eb m\u00ebkatoi, sepse gjykimi prodhoi d\u00ebnimin nga nj\u00eb shkelje e vetme, por hiri prodhoi shfaj\u00ebsimin nga shum\u00eb shkelje.\n5:17 N\u00eb fakt, n\u00eb qoft\u00eb se prej shkeljes s\u00eb k\u00ebtij nj\u00ebrit vet\u00ebm vdekja mbret\u00ebroi p\u00ebr shkak t\u00eb atij nj\u00ebrit, akoma m\u00eb shum\u00eb ata q\u00eb marrin boll\u00ebkun e hirit dhe t\u00eb dhurat\u00ebs se drejt\u00ebsis\u00eb do t\u00eb mbret\u00ebrojn\u00eb n\u00eb jet\u00eb me an\u00eb t\u00eb atij nj\u00ebrit, q\u00eb \u00ebsht\u00eb Jezu Krishtit.\n5:18 Prandaj, ashtu si p\u00ebr nj\u00eb shkelje t\u00eb vetme d\u00ebnimi u shtri mbi t\u00eb gjith\u00eb njer\u00ebzit, ashtu edhe me nj\u00eb akt t\u00eb vet\u00ebm drejt\u00ebsie, hiri u shtri mbi gjith\u00eb njer\u00ebzit p\u00ebr shfaj\u00ebsimin e jet\u00ebs.\n5:19 N\u00eb fakt, ashtu si nga mosbindja e nj\u00eb njeriu t\u00eb vet\u00ebm t\u00eb shumt\u00ebt u b\u00ebn\u00eb m\u00ebkatar\u00eb, ashtu edhe nga bindja e nj\u00eb t\u00eb vetmi t\u00eb shumt\u00ebt do t\u00eb b\u00ebhen t\u00eb drejt\u00eb.\n5:20 Por ligj i nd\u00ebrhyri me q\u00ebllim q\u00eb shkelja t\u00eb teprohej; por aty ku m\u00ebkati \u00ebsht\u00eb i tepruar, hiri \u00ebsht\u00eb akoma m\u00eb i tep\u00ebrt,\n5:21 me q\u00ebllim q\u00eb ashtu si m\u00ebkati ka mbret\u00ebruar te vdekja, ashtu edhe hiri t\u00eb mbret\u00ebroj\u00eb me an\u00eb t\u00eb drejt\u00ebsis\u00eb n\u00eb jet\u00ebn e p\u00ebrjetshme n\u00ebp\u00ebrmjet Jezu Krishtit, Zotit ton\u00eb.\n6:1 \u00c7far\u00eb t\u00eb themi, pra? A t\u00eb mbetemi n\u00eb m\u00ebkat, q\u00eb t\u00eb teproj\u00eb hiri?\n6:2 Aspak! Ne q\u00eb jemi t\u00eb vdekur p\u00ebr m\u00ebkatin, si do t\u00eb jetojm\u00eb akoma n\u00eb t\u00eb?\n6:3 Po a nuk e dini se ne t\u00eb gjith\u00eb q\u00eb u pag\u00ebzuam n\u00eb Jezu Krishtin, u pag\u00ebzuam n\u00eb vdekjen e tij?\n6:4 Ne, pra, u varros\u00ebm me t\u00eb me an\u00eb t\u00eb pag\u00ebzimit n\u00eb vdekje, q\u00eb, ashtu si Krishti u ringjall prej s\u00eb vdekurish me an\u00eb t\u00eb lavdis\u00eb s\u00eb Atit, k\u00ebshtu edhe ne gjithashtu t\u00eb ecim n\u00eb risin\u00eb e jet\u00ebs.\n6:5 Sepse, n\u00ebse u bashkuam me Krishtin n\u00eb nj\u00eb vdekje t\u00eb ngjashme me t\u00eb tij\u00ebn, do t\u00eb jemi edhe e ringjalljes s\u00eb tij,\n6:6 duke ditur k\u00ebt\u00eb: se njeriu yn\u00eb i vjet\u00ebr u kryq\u00ebzua me t\u00eb, q\u00eb trupi i m\u00ebkatit mund t\u00eb jet\u00eb anuluar dhe q\u00eb ne t\u00eb mos i sh\u00ebrbejm\u00eb m\u00eb m\u00ebkatit.\n6:7 N\u00eb fakt, ai q\u00eb ka vdekur \u00ebsht\u00eb shfaj\u00ebsuar nga m\u00ebkati.\n6:8 Tani n\u00ebse vdiq\u00ebm me Krishtin, ne besojm\u00eb gjithashtu q\u00eb do t\u00eb jetojm\u00eb me t\u00eb,\n6:9 duke ditur se Krishti, q\u00eb u ringjall prej s\u00eb vdekurish, nuk vdes m\u00eb; vdekja s'ka m\u00eb pushtet mbi t\u00eb.\n6:10 Sepse n\u00eb at\u00eb q\u00eb vdiq, vdiq p\u00ebr m\u00ebkatin nj\u00eb her\u00eb e p\u00ebr gjithmon\u00eb; por n\u00eb at\u00eb q\u00eb rron, rron p\u00ebr Per\u00ebndin\u00eb.\n6:11 K\u00ebshtu edhe ju, konsideroheni veten t\u00eb vdekur p\u00ebr m\u00ebkatin, por t\u00eb gjall\u00eb p\u00ebr Per\u00ebndin\u00eb, n\u00eb Jezu Krishtin, Zotin ton\u00eb.\n6:12 Le t\u00eb mos mbret\u00ebroj\u00eb, pra, m\u00ebkati n\u00eb trupin tuaj t\u00eb vdeksh\u00ebm, q\u00eb t'i bindeni atij n\u00eb epshet e veta.\n6:13 As mos i jepni gjymtyr\u00ebt tuaja n\u00eb sh\u00ebrbim t\u00eb m\u00ebkatit si mjete paudh\u00ebsie, por tregoni veten tuaj te Per\u00ebndia, si t\u00eb gjall\u00eb prej s\u00eb vdekurish, dhe gjymtyr\u00ebt tuaja si mjete drejt\u00ebsie p\u00ebr Per\u00ebndin\u00eb.\n6:14 N\u00eb fakt m\u00ebkati nuk do t\u00eb ket\u00eb m\u00eb pushtet mbi ju, sepse nuk jeni n\u00ebn ligj, por n\u00ebn hir.\n6:15 At\u00ebher\u00eb, \u00e7far\u00eb? T\u00eb m\u00ebkatojm\u00eb sepse nuk jemi n\u00ebn ligj, por n\u00ebn hir? K\u00ebshtu mos qoft\u00eb!\n6:16 A nuk e dini ju se n\u00ebse e tregoni veten sh\u00ebrb\u00ebtor\u00eb t\u00eb atij q\u00eb i bindeni, jeni sh\u00ebrb\u00ebtor\u00eb t\u00eb atij q\u00eb i bindeni, qoft\u00eb m\u00ebkatit p\u00ebr vdekje, qoft\u00eb d\u00ebgjes\u00ebs p\u00ebr drejt\u00ebsi?\n6:17 Por qoft\u00eb falenderuar Per\u00ebndia, sepse ishit sh\u00ebrb\u00ebtor\u00eb t\u00eb m\u00ebkatit, por iu bind\u00ebt me zem\u00ebr atij m\u00ebsimi q\u00eb iu \u00ebsht\u00eb transmetuar.\n6:18 Dhe, mbasi u liruat nga m\u00ebkati, u b\u00ebt\u00eb sh\u00ebrb\u00ebtor\u00eb t\u00eb drejt\u00ebsis\u00eb.\n6:19 Un\u00eb po flas njer\u00ebzisht p\u00ebr shkak t\u00eb dob\u00ebsis\u00eb s\u00eb mishit tuaj. Sepse ashtu si nj\u00eb koh\u00eb i kishit p\u00ebrkushtuar gjymtyr\u00ebt tuaja p\u00ebr t\u00eb qen\u00eb sh\u00ebrb\u00ebtor\u00eb t\u00eb papast\u00ebrtis\u00eb dhe t\u00eb paudh\u00ebsis\u00eb p\u00ebr t\u00eb b\u00ebr\u00eb paudh\u00ebsin\u00eb, k\u00ebshtu tani p\u00ebrkushtoni gjymtyr\u00ebt tuaj p\u00ebr t\u00eb q\u00ebn\u00eb sh\u00ebrb\u00ebtor\u00eb t\u00eb drejt\u00ebsis\u00eb p\u00ebr shenjt\u00ebrim.\n6:20 Sepse, kur ishit sh\u00ebrb\u00ebtor\u00eb t\u00eb m\u00ebkatit, ishit t\u00eb lir\u00eb n\u00eb lidhje me drejt\u00ebsin\u00eb.\n6:21 Dhe \u00e7far\u00eb fryt kishit, pra, at\u00ebher\u00eb, nga ato gj\u00ebra, p\u00ebr t\u00eb cilat tani keni turp? Sepse fundi i tyre \u00ebsht\u00eb vdekja.\n6:22 Por tani, pasi u liruat nga m\u00ebkati dhe u b\u00ebt\u00eb sh\u00ebrb\u00ebtor\u00eb t\u00eb Per\u00ebndis\u00eb keni p\u00ebr frytin tuaj shenjt\u00ebrimin dhe p\u00ebr fund jeta e p\u00ebrjetshme.\n6:23 Sepse paga e m\u00ebkatit \u00ebsht\u00eb vdekja, por dhuntia e Per\u00ebndis\u00eb \u00ebsht\u00eb jeta e p\u00ebrjetshme n\u00eb Jezu Krishtin, Zotin ton\u00eb.\n7:1 Apo nuk e dini o v\u00ebllez\u00ebr, (sepse un\u00eb po u flas njer\u00ebzve q\u00eb e njohin ligjin), se ligji ka pushtet mbi njeriun p\u00ebr sa koh\u00eb ai rron?\n7:2 Sepse gruaja e martuar \u00ebsht\u00eb e lidhur nga ligji me burrin deri sa ai rron, por, po i vdiq burri, lirohet nga ligji i burrit.\n7:3 Prandaj, n\u00ebse, kur i rron burri, ajo bashkohet me nj\u00eb burr\u00eb tjet\u00ebr, do t\u00eb quhet shkel\u00ebse e kuror\u00ebs; por kur i vdes burri ajo \u00ebsht\u00eb e liruar nga ligji, q\u00eb t\u00eb mos jet\u00eb shkel\u00ebse e kuror\u00ebs, po u b\u00eb gruaja e nj\u00eb burr\u00eb tjet\u00ebr.\n7:4 K\u00ebshtu, pra, v\u00ebllez\u00ebr t\u00eb mi, edhe ju jeni t\u00eb vdekur p\u00ebr ligjin me an\u00eb t\u00eb trupit t\u00eb Jezu Krishtit q\u00eb t\u00eb bashkoheni me nj\u00eb tjet\u00ebr, q\u00eb u ringjall prej t\u00eb vdekurit, q\u00eb t'i japim fryte Per\u00ebndis\u00eb.\n7:5 Sepse, kur ishim n\u00eb mish, pasionet m\u00ebkatare q\u00eb ishin me an\u00eb t\u00eb ligjit, vepronin n\u00eb gjymtyr\u00ebt tona, duke sjell\u00eb fryte vdekjeje,\n7:6 por tani jemi zgjidhur nga ligji duke q\u00ebn\u00eb t\u00eb vdekur nga \u00e7'ka na mbante t\u00eb lidhur, prandaj sh\u00ebrbejm\u00eb n\u00eb risin\u00eb e frym\u00ebs dhe jo n\u00eb vjet\u00ebrsin\u00eb e shkronj\u00ebs.\n7:7 \u00c7far\u00eb t\u00eb themi, pra? Se ligji \u00ebsht\u00eb m\u00ebkat? Ashtu mos qoft\u00eb! M\u00ebkatin un\u00eb nuk do ta kisha njohur, ve\u00e7 se me an\u00eb t\u00eb ligjit; sepse un\u00eb nuk do ta kisha njohur lakmin\u00eb, po t\u00eb mos thoshte ligji: ''Mos lakmo!''.\n7:8 Por m\u00ebkati, duke marr\u00eb shkas nga ky urdh\u00ebrim, ngjalli n\u00eb mua \u00e7do lakmi,\n7:9 sepse, pa ligj, m\u00ebkati \u00ebsht\u00eb i vdekur. Dikur un\u00eb jetoja pa ligj, por, kur erdhi urdh\u00ebrimi, m\u00ebkati u ngjall dhe un\u00eb vdiqa,\n7:10 dhe urdh\u00ebrimi q\u00eb u dha p\u00ebr jet\u00eb, m\u00eb solli vdekjen.\n7:11 Sepse m\u00ebkati, duke gjetur rastin me an\u00eb t\u00eb urdh\u00ebrit, m\u00eb mashtroj\u00eb dhe me an\u00eb t\u00eb tij m\u00eb vrau.\n7:12 K\u00ebshtu ligji \u00ebsht\u00eb i shenjt\u00eb, dhe urdh\u00ebrimi i shenjt\u00eb, i drejt\u00eb dhe i mir\u00eb.\n7:13 Ajo gj\u00eb, pra, q\u00eb \u00ebsht\u00eb e mir\u00eb u b\u00eb vdekje p\u00ebr mua? Ashtu mos qoft\u00eb; por m\u00ebkati, q\u00eb t\u00eb duket m\u00ebkat, me an\u00eb t\u00eb s\u00eb mir\u00ebs m\u00eb pruri vdekjen, q\u00eb m\u00ebkati t\u00eb b\u00ebhet edhe m\u00eb tep\u00ebr m\u00ebkat n\u00ebp\u00ebrmjet urdh\u00ebrimit.\n7:14 Sepse ne e dim\u00eb se ligji \u00ebsht\u00eb frym\u00ebror, por un\u00eb jam i mish\u00eb, i shitur m\u00ebkatit si skllav.\n7:15 Sepse un\u00eb nuk kuptoj at\u00eb q\u00eb b\u00ebj, sepse nuk b\u00ebj at\u00eb q\u00eb dua, por b\u00ebj at\u00eb q\u00eb urrej.\n7:16 Edhe, n\u00ebse b\u00ebj at\u00eb q\u00eb nuk dua, un\u00eb pranoj q\u00eb ligji \u00ebsht\u00eb i mir\u00eb.\n7:17 Por tani nuk jam m\u00eb un\u00eb q\u00eb veproj, por m\u00ebkati q\u00eb banon n\u00eb mua.\n7:18 N\u00eb fakt un\u00eb e di se n\u00eb mua dom\u00ebth\u00ebn\u00eb n\u00eb mishin tim nuk banon asgj\u00eb e mir\u00eb, sepse, ndon\u00ebse e kam d\u00ebshir\u00ebn p\u00ebr t\u00eb b\u00ebr\u00eb t\u00eb mir\u00ebn, nuk ia gjej m\u00ebnyr\u00ebn.\n7:19 N\u00eb fakt t\u00eb mir\u00ebn q\u00eb un\u00eb e dua nuk e b\u00ebj; por t\u00eb keqen q\u00eb s'dua, at\u00eb b\u00ebj.\n7:20 Edhe, n\u00eb qoft\u00eb se b\u00ebj at\u00eb q\u00eb nuk dua, s'jam m\u00eb vet\u00eb ai q\u00eb e b\u00ebj, por \u00ebsht\u00eb m\u00ebkati q\u00eb banon n\u00eb mua.\n7:21 Un\u00eb, pra, po zbuloj k\u00ebt\u00eb ligj: duke dashur t\u00eb b\u00ebj t\u00eb mir\u00ebn, e keqja gjindet n\u00eb mua.\n7:22 N\u00eb fakt un\u00eb gjej k\u00ebnaq\u00ebsi n\u00eb ligjin e Per\u00ebndis\u00eb sipas njeriut t\u00eb brendsh\u00ebm,\n7:23 por shoh nj\u00eb ligj tjet\u00ebr n\u00eb gjymtyr\u00ebt e mia, q\u00eb lufton kund\u00ebr ligjit t\u00eb mendjes sime dhe q\u00eb m\u00eb b\u00ebn skllav t\u00eb ligjit t\u00eb m\u00ebkatit q\u00eb \u00ebsht\u00eb n\u00eb gjymtyr\u00ebt e mia.\n7:24 Oh, njeri i mjer\u00eb q\u00eb jam! Kush do t\u00eb m\u00eb \u00e7liroj\u00eb nga ky trup i vdekjes?\n7:25 I falem nderit Per\u00ebndis\u00eb me an\u00eb t\u00eb Jezu Krishtit, Zotit ton\u00eb. Un\u00eb vet\u00eb, pra, me mendjen, i sh\u00ebrbej ligjit t\u00eb Per\u00ebndis\u00eb, por, me mishin ligjit t\u00eb m\u00ebkatit.\n8:1 Tani, pra, nuk ka asnj\u00eb d\u00ebnim p\u00ebr ata q\u00eb jan\u00eb n\u00eb Krishtin Jezu, q\u00eb nuk ecin sipas mishit, por sipas Frym\u00ebs,\n8:2 sepse ligji i Frym\u00ebs i jet\u00ebs n\u00eb Jezu Krishtin m\u00eb \u00e7liroi nga ligji i m\u00ebkatit dhe i vdekjes.\n8:3 Sepse at\u00eb q\u00eb ishte e pamundur p\u00ebr ligjin, sepse ishte pa forc\u00eb p\u00ebr shkak t\u00eb mishit, Per\u00ebndia, duke d\u00ebrguar birin e vet n\u00eb sh\u00ebmb\u00ebllim mishi m\u00ebkatar, edhe p\u00ebr m\u00ebkat, e d\u00ebnoi m\u00ebkatin n\u00eb mish,\n8:4 q\u00eb t\u00eb p\u00ebrmbushet drejt\u00ebsia e ligjit n\u00eb ne, q\u00eb nuk ecim sipas mishit, por sipas Frym\u00ebs.\n8:5 Sepse ata q\u00eb rrojn\u00eb sipas mishit e \u00e7ojn\u00eb mendjen n\u00eb gj\u00ebrat e mishit, por ata q\u00eb rrojn\u00eb sipas Frym\u00ebs n\u00eb gj\u00ebrat e Frym\u00ebs.\n8:6 N\u00eb fakt mendja e kontrolluar nga mishi prodhon vdekje, por mendja e kontro-lluar nga Fryma prodhon jet\u00eb dhe paqe.\n8:7 N\u00eb fakt mendja e kontrolluar nga mishi \u00ebsht\u00eb armiq\u00ebsi kund\u00ebr Per\u00ebndis\u00eb, sepse nuk i n\u00ebnshtrohet ligjit t\u00eb Per\u00ebndis\u00eb dhe as nuk mundet.\n8:8 Prandaj ata q\u00eb jan\u00eb n\u00eb mish nuk mund t'i p\u00eblqejn\u00eb Per\u00ebndis\u00eb.\n8:9 N\u00ebse Fryma e Per\u00ebndis\u00eb banon n\u00eb ju, ju nuk jeni m\u00eb n\u00eb mish, por n\u00eb Frym\u00eb. Por n\u00eb qoft\u00eb se ndokush nuk ka Frym\u00ebn e Krishtit, ai nuk i p\u00ebrket atij.\n8:10 N\u00ebse Krishti \u00ebsht\u00eb n\u00eb ju, trupi pa tjet\u00ebr \u00ebsht\u00eb i vdekur p\u00ebr shkak t\u00eb m\u00ebkatit, por Fryma \u00ebsht\u00eb jet\u00eb p\u00ebr shkak t\u00eb drejt\u00ebsis\u00eb.\n8:11 Dhe n\u00eb qoft\u00eb se Fryma i atij q\u00eb ringjalli Krishtin prej s\u00eb vdekurish banon n\u00eb ju, ai q\u00eb e ringjalli Krishtin prej s\u00eb vdekurish do t'u jap\u00eb jet\u00eb edhe trupave tuaj vdekatar\u00eb me an\u00eb t\u00eb Frym\u00ebs s\u00eb tij q\u00eb banon n\u00eb ju.\n8:12 Prandaj, v\u00ebllez\u00ebr, ne jemi debitor\u00eb jo t\u00eb mishit, q\u00eb t\u00eb rrojm\u00eb sipas mishit,\n8:13 sepse, po t\u00eb rroni sipas mishit, ju do t\u00eb vdisni; por, n\u00ebse me an\u00eb t\u00eb Frym\u00ebs i b\u00ebni t\u00eb vdesin veprat e trupit, ju do t\u00eb rroni.\n8:14 Sepse t\u00eb gjith\u00eb ata q\u00eb udh\u00ebhiqen nga Fryma e Per\u00ebndis\u00eb jan\u00eb bij t\u00eb Per\u00ebndis\u00eb.\n8:15 Sepse ju nuk keni marr\u00eb nj\u00eb frym\u00eb rob\u00ebrie, q\u00eb t\u00eb keni p\u00ebrs\u00ebri frik\u00eb, po keni marr\u00eb frym\u00ebn e bir\u00ebris\u00eb, me an\u00eb t\u00eb s\u00eb cil\u00ebs ne th\u00ebrrasim: ''Aba, o At\u00eb!''.\n8:16 Vet\u00eb Fryma i d\u00ebshmon frym\u00ebs son\u00eb se ne jemi bij t\u00eb Per\u00ebndis\u00eb.\n8:17 Dhe n\u00ebse jemi bij, jemi dhe trash\u00ebgimtar\u00eb, trash\u00ebgimtar\u00eb t\u00eb Per\u00ebndis\u00eb dhe bashk\u00ebtrash\u00ebgimtar\u00eb t\u00eb Krishtit, n\u00ebse vuajm\u00eb m\u00eb t\u00eb dhe lavdohemi me t\u00eb.\n8:18 Un\u00eb mendoj n\u00eb fakt, se vuajtjet e koh\u00ebs s\u00eb tanishme nuk vlejn\u00eb aspak t\u00eb krahasohen me lavdin\u00eb q\u00eb do t\u00eb shfaqet n\u00eb ne.\n8:19 Sepse d\u00ebshira e flakt\u00eb e krijes\u00ebs pret me padurim shfaqjen e bijve t\u00eb Per\u00ebndis\u00eb,\n8:20 sepse krijesa iu n\u00ebnshtrua kot\u00ebsis\u00eb, jo me vullnetin e vet, po p\u00ebr shkak t\u00eb atij q\u00eb e n\u00ebnshtroi,\n8:21 me shpres\u00eb q\u00eb vet\u00eb krijesa t\u00eb \u00e7lirohet nga skllav\u00ebria e prishjes p\u00ebr t\u00eb hyr\u00eb n\u00eb lirin\u00eb e lavdis\u00eb s\u00eb bijve t\u00eb Per\u00ebndis\u00eb.\n8:22 Sepse e dim\u00eb se deri tani mbar\u00eb bota e krijuar r\u00ebnkon dhe \u00ebsht\u00eb n\u00eb mundim.\n8:23 Dhe jo vet\u00ebm kaq, por edhe ne vet\u00eb q\u00eb kemi frytet e para t\u00eb Frym\u00ebs, vajtojm\u00eb n\u00eb veten ton\u00eb, duke pritur flak\u00ebt bir\u00ebrimin, shpengimin e trupit ton\u00eb.\n8:24 Sepse me shpres\u00eb ne shp\u00ebtuam; por shpresa q\u00eb duket nuk \u00ebsht\u00eb shpres\u00eb, sepse at\u00eb q\u00eb dikush e sheh si mundet edhe ta shpresoj\u00eb?\n8:25 Por n\u00eb qoft\u00eb se ne shpresojm\u00eb at\u00eb q\u00eb s'e shohim, at\u00eb gj\u00eb e presim me durim.\n8:26 K\u00ebshtu, pra, edhe Fryma na ndihmon n\u00eb dob\u00ebsit\u00eb tona, sepse ne nuk dim\u00eb \u00e7far\u00eb t\u00eb k\u00ebrkojm\u00eb n\u00eb lutjet tona, sikurse duhet; por vet\u00eb Fryma nd\u00ebrhyn p\u00ebr ne me psher\u00ebtima t\u00eb patregueshme.\n8:27 Dhe ai q\u00eb heton zemrat e di cila \u00ebsht\u00eb mendja e Frym\u00ebs, sepse ai nd\u00ebrhyn p\u00ebr shenjtor\u00ebt, sipas Per\u00ebndis\u00eb.\n8:28 Dhe ne e dim\u00eb se t\u00eb gjitha gj\u00ebra bashk\u00ebveprojn\u00eb p\u00ebr t\u00eb mir\u00eb p\u00ebr ata q\u00eb e duan Per\u00ebndin\u00eb, p\u00ebr ata q\u00eb jan\u00eb t\u00eb thirrur sipas q\u00ebllimit t\u00eb tij.\n8:29 Sepse ata q\u00eb ai i ka njohur q\u00eb m\u00eb par\u00eb, edhe i ka paracaktuar q\u00eb t\u00eb jen\u00eb t\u00eb ngjash\u00ebm me sh\u00ebmb\u00eblltyr\u00ebn e Birit t\u00eb tij, k\u00ebshtu q\u00eb ai t\u00eb jet\u00eb i par\u00eblinduri n\u00eb mes t\u00eb shum\u00eb v\u00ebllez\u00ebrve.\n8:30 Dhe ata q\u00eb ai i paracaktoi edhe i thirri; dhe ata q\u00eb i thirri edhe i shfaj\u00ebsoi; dhe ata q\u00eb i shfaj\u00ebsoi, ata edhe i p\u00ebrl\u00ebvdoi.\n8:31 \u00c7far\u00eb t\u00eb themi, pra, p\u00ebr k\u00ebto gj\u00ebra? N\u00eb qoft\u00eb se Per\u00ebndia \u00ebsht\u00eb me ne, kush mund t\u00eb jet\u00eb kund\u00ebr nesh?\n8:32 Sepse ai q\u00eb nuk e kurseu Birin e vet, por e dha p\u00ebr t\u00eb gjith\u00eb ne, qysh nuk do t\u00eb na dhuroj\u00eb t\u00eb gjitha gj\u00ebra bashk\u00eb me t\u00eb?\n8:33 Kush do t'i padis\u00eb t\u00eb zgjedhurit e Per\u00ebndis\u00eb? Per\u00ebndia \u00ebsht\u00eb ai q\u00eb i shfaj\u00ebson.\n8:34 Kush \u00ebsht\u00eb ai q\u00eb do t'i d\u00ebnoj\u00eb? Krishti \u00ebsht\u00eb ai q\u00eb vdiq, po p\u00ebr m\u00eb tep\u00ebr ai u ringjall; ai \u00ebsht\u00eb n\u00eb t\u00eb djatht\u00eb t\u00eb Per\u00ebndis\u00eb dhe ai nd\u00ebrmjet\u00ebson p\u00ebr ne.\n8:35 Kush do t\u00eb na ndaj\u00eb nga dashuria e Krishtit? Pik\u00ebllimi, a ngushtica, a p\u00ebrndjekja, a uria, a t\u00eb zhveshurit, a rreziku, a shpata?\n8:36 Si\u00e7 \u00ebsht\u00eb shkruar: ''P\u00ebr ty po vritemi gjith\u00eb dit\u00ebn; u num\u00ebruam si dele p\u00ebr therje''.\n8:37 Por n\u00eb t\u00eb gjitha k\u00ebto gj\u00ebra ne jemi m\u00eb shum\u00eb se fitimtar\u00eb p\u00ebr hir t\u00eb atij q\u00eb na deshi.\n8:38 Sepse un\u00eb jam i bindur se as vdekja, as jeta, as engj\u00ebjt, as pushtetet, as fuqia dhe as gj\u00ebrat e tashme as gj\u00ebrat e ardhshme,\n8:39 as lart\u00ebsit\u00eb, as thell\u00ebsit\u00eb, as ndonj\u00eb tjet\u00ebr krijes\u00eb, nuk do t\u00eb mund t\u00eb na ndaj\u00eb nga dashuria e Per\u00ebndis\u00eb q\u00eb \u00ebsht\u00eb n\u00eb Jezu Krishtin, Zotin ton\u00eb.\n9:1 Un\u00eb them t\u00eb v\u00ebrtet\u00ebn n\u00eb Krishtin, nuk g\u00ebnjej dhe jep d\u00ebshmi me mua nd\u00ebrgjegja ime me an\u00eb t\u00eb Frym\u00ebs s\u00eb Shenjt\u00eb;\n9:2 kam nj\u00eb trishtim t\u00eb madh dhe nj\u00eb dhembje t\u00eb vazhdueshme n\u00eb zemr\u00ebn time.\n9:3 Sepse do t\u00eb doja t\u00eb isha vet\u00eb i ma-llkuar, i ndar\u00eb nga Krishti, p\u00ebr v\u00ebllez\u00ebrit e mi, p\u00ebr farefisin tim sipas mishit,\n9:4 t\u00eb cil\u00ebt jan\u00eb Izraelit\u00eb dhe atyre u p\u00ebrket bir\u00ebria, lavdia, bes\u00eblidhjet, shpallja e ligjit, sh\u00ebrbimi hyjnor dhe premtimet;\n9:5 t\u00eb tyre jan\u00eb edhe et\u00ebrit, prej t\u00eb cil\u00ebve rrjedh sipas mishit Krishti, i cili \u00ebsht\u00eb p\u00ebrmbi \u00e7do gj\u00eb Per\u00ebndi, i bekuar p\u00ebrjet\u00eb. Amen.\n9:6 Por kjo nuk do t\u00eb thot\u00eb se fjala e Per\u00ebndis\u00eb ra posht\u00eb, sepse jo t\u00eb gjith\u00eb q\u00eb jan\u00eb nga Izraeli jan\u00eb Izrael.\n9:7 As sepse jan\u00eb pasardh\u00ebs e Abrahamit jan\u00eb t\u00eb gjith\u00eb bij; por: ''N\u00eb Isakun do t\u00eb quhet pasardhja jote''.\n9:8 Do t\u00eb thot\u00eb: nuk jan\u00eb bijt\u00eb e Per\u00ebndis\u00eb ata q\u00eb lindin prej mishi, por vet\u00ebm bijt\u00eb e premtimit num\u00ebrohen si pasardh\u00ebs.\n9:9 Sepse kjo \u00ebsht\u00eb fjala e premtimit: ''N\u00eb k\u00ebt\u00eb koh\u00eb do t\u00eb vij dhe Sara do t\u00eb ket\u00eb nj\u00eb bir''.\n9:10 Dhe jo vet\u00ebm kaq, por edhe Rebeka mbeti shtatz\u00ebn\u00eb nga nj\u00eb njeri i vet\u00ebm, Isakun, atin ton\u00eb,\n9:11 (sepse para se t'i lindnin f\u00ebmij\u00ebt dhe para se t\u00eb b\u00ebnin ndonj\u00eb t\u00eb mir\u00eb a t\u00eb keqe, q\u00eb t\u00eb mbetej i patundur propozimi i Per\u00ebndis\u00eb p\u00ebr t\u00eb zgjedhur jo sipas veprave, po prej atij q\u00eb th\u00ebrret),\n9:12 iu tha asaj: ''M\u00eb i madhi do t'i sh\u00ebrbej\u00eb m\u00eb t\u00eb voglit'',\n9:13 si\u00e7 \u00ebsht\u00eb shkruar: ''E desha Jakobin dhe e urreva Ezaun''.\n9:14 \u00c7far\u00eb t\u00eb themi, pra? Mos ka padrejt\u00ebsi te Per\u00ebndia? Aspak!\n9:15 Ai i thot\u00eb n\u00eb fakt Moisiut: ''Do t\u00eb kem m\u00ebshir\u00eb p\u00ebr at\u00eb q\u00eb t\u00eb kem m\u00ebshir\u00eb, dhe do t\u00eb kem dhembshuri p\u00ebr at\u00eb q\u00eb do t\u00eb kem dhembshuri''.\n9:16 K\u00ebshtu, pra, kjo nuk varet as prej atij q\u00eb do, as prej atij q\u00eb vrapon, por nga Per\u00ebndia q\u00eb shfaq m\u00ebshir\u00eb.\n9:17 Sepse Shkrimi i thot\u00eb Faraonit: ''Pik\u00ebrisht p\u00ebr k\u00ebt\u00eb gj\u00eb t\u00eb ngrita, q\u00eb t\u00eb tregoj te ti fuqin\u00eb time dhe q\u00eb t\u00eb shpallet emri im mbi mbar\u00eb dheun''.\n9:18 K\u00ebshtu ai ka m\u00ebshir\u00eb p\u00ebr at\u00eb q\u00eb do dhe e ngurt\u00ebson at\u00eb q\u00eb do.\n9:19 Ti do t\u00eb m\u00eb thuash, pra: ''Pse vazhdon t\u00eb ankohet? Kush mund, n\u00eb fakt, t'i rezistoj\u00eb vullnetit t\u00eb tij?''.\n9:20 Po kush je ti, o njeri, q\u00eb i kund\u00ebrp\u00ebrgjigjesh Per\u00ebndis\u00eb? A mund t'i thot\u00eb ena mjeshtrit: ''P\u00ebrse m\u00eb b\u00ebr\u00eb k\u00ebshtu?''.\n9:21 A nuk ka vall\u00eb fuqi po\u00e7ari mbi argjit\u00ebn p\u00ebr t\u00eb b\u00ebr\u00eb nga po ai brum\u00eb nj\u00eb en\u00eb p\u00ebr nderim, edhe nj\u00eb tjet\u00ebr p\u00ebr \u00e7nderim?\n9:22 Dhe \u00e7far\u00eb t\u00eb thuash n\u00ebse Per\u00ebndia, duke dashur t\u00eb tregoj\u00eb zem\u00ebrimin e tij dhe t\u00eb b\u00ebj\u00eb t\u00eb njohur pushtetin e tij duroi me shum\u00eb zem\u00ebrgj\u00ebr\u00ebsi en\u00ebt e zem\u00ebrimit q\u00eb qen\u00eb b\u00ebr\u00eb p\u00ebr prishje?\n9:23 Dhe q\u00eb t\u00eb b\u00ebj\u00eb t\u00eb njohur pasurit\u00eb e lavdis\u00eb s\u00eb tij ndaj en\u00ebve t\u00eb m\u00ebshir\u00ebs, t\u00eb cilat i p\u00ebrgatiti p\u00ebr lavdi,\n9:24 mbi ne, q\u00eb edhe na thirri, jo vet\u00ebm nga Judenjt\u00eb, por edhe nga johebrenjt\u00eb?\n9:25 Ashtu si thot\u00eb ai te Osea: ''Un\u00eb do ta quaj popullin tim at\u00eb q\u00eb s'ka qen\u00eb populli im dhe t\u00eb dashur at\u00eb t\u00eb mosdashurin.\n9:26 Dhe do t\u00eb ndodh\u00eb q\u00eb atje ku u \u00ebsht\u00eb th\u00ebn\u00eb atyre: \"Ju nuk jeni populli im\", atje do t\u00eb quheni bij t\u00eb Per\u00ebndis\u00eb s\u00eb gjall\u00eb''.\n9:27 Por Isaia th\u00ebrret p\u00ebr Izraelin: ''Edhe sikur t\u00eb ishte numri i bijve t\u00eb Izraelit si r\u00ebra e detit, vet\u00ebm mbetja e tij do t\u00eb shp\u00ebtohet''.\n9:28 N\u00eb fakt ai do ta realizoj\u00eb vendimin e tij me drejt\u00ebsi, sepse Zoti do ta realizoj\u00eb dhe do ta p\u00ebrshpejtoj\u00eb vendimin e tij mbi tok\u00eb.\n9:29 Dhe ashtu si profetizoi Isaia: ''N\u00eb qoft\u00eb se Per\u00ebndia i ushtrive nuk do t\u00eb na kishte l\u00ebn\u00eb far\u00eb, do t\u00eb ishim b\u00ebr\u00eb si Sodoma dhe do t'i kishim ngjar\u00eb Gomor\u00ebs''.\n9:30 \u00c7far\u00eb t\u00eb themi, pra? Se johebrenjt\u00eb, q\u00eb nuk k\u00ebrkuan drejt\u00ebsin\u00eb, e fituan drejt\u00ebsin\u00eb, por at\u00eb drejt\u00ebsi q\u00eb vjen nga besimi,\n9:31 nd\u00ebrsa Izraeli, q\u00eb k\u00ebrkonte ligjin e drejt\u00ebsis\u00eb, nuk arriti n\u00eb ligjin e drejt\u00ebsis\u00eb.\n9:32 P\u00ebrse? Sepse e k\u00ebrkonte jo me an\u00eb t\u00eb besimit, por me an\u00eb t\u00eb veprave t\u00eb ligjit; sepse ata u penguan n\u00eb gurin e penges\u00ebs,\n9:33 ashtu si\u00e7 \u00ebsht\u00eb shkruar: ''Ja, un\u00eb po v\u00eb n\u00eb Sion nj\u00eb gur pengese dhe nj\u00eb shk\u00ebmb skandali, dhe kushdo q\u00eb i beson atij nuk do t\u00eb turp\u00ebrohet''.\n10:1 V\u00ebllez\u00ebr, d\u00ebshira e zemr\u00ebs sime dhe lutja q\u00eb i drejtoj Per\u00ebndis\u00eb p\u00ebr Izraelin \u00ebsht\u00eb p\u00ebr shp\u00ebtim t\u00eb tij.\n10:2 Sepse un\u00eb d\u00ebshmoj p\u00ebr ta se kan\u00eb zell p\u00ebr Per\u00ebndin\u00eb, por jo sipas njohuris\u00eb.\n10:3 Sepse duke mos njohur drejt\u00ebsin\u00eb e Per\u00ebndis\u00eb dhe duke k\u00ebrkuar t\u00eb vendosin drejt\u00ebsin\u00eb e vet, nuk iu n\u00ebnshtruan drejt\u00ebsis\u00eb s\u00eb Per\u00ebndis\u00eb,\n10:4 sepse p\u00ebrfundimi i ligjit \u00ebsht\u00eb Krishti, p\u00ebr shfaj\u00ebsimin e kujtdo q\u00eb beson.\n10:5 Sepse Moisiu k\u00ebshtu e p\u00ebrshkruan drejt\u00ebsin\u00eb q\u00eb vjen nga ligji: ''Njeriu q\u00eb b\u00ebn k\u00ebto gj\u00ebra, do t\u00eb rroj\u00eb me an\u00eb t\u00eb tyre''.\n10:6 Por drejt\u00ebsia q\u00eb vjen nga besimi thot\u00eb k\u00ebshtu: ''Mos thuaj n\u00eb zemr\u00ebn t\u00ebnde: ''Kush do t\u00eb ngjitet n\u00eb qiell?''. Kjo do t\u00eb thot\u00eb q\u00eb t\u00eb zbres\u00eb Krishti.\n10:7 Ose: ''Kush do t\u00eb zbres\u00eb n\u00eb humner\u00eb?''. Kjo do t\u00eb thot\u00eb q\u00eb t\u00eb sjell\u00eb lart Krishtin prej s\u00eb vdekurish.\n10:8 Po \u00e7'thot\u00eb, pra? ''Fjala \u00ebsht\u00eb pran\u00eb teje, n\u00eb goj\u00ebn t\u00ebnde dhe n\u00eb zemr\u00ebn t\u00ebnde''. Kjo \u00ebsht\u00eb fjala e besimit, q\u00eb ne predikojm\u00eb;\n10:9 sepse, po t\u00eb rr\u00ebfesh me goj\u00ebn t\u00ebnde Zotin Jezus, dhe po t\u00eb besosh n\u00eb zemr\u00ebn t\u00ebnde se Per\u00ebndia e ngjalli prej s\u00eb vdekurish, do t\u00eb shp\u00ebtohesh.\n10:10 Sepse me zem\u00ebr, njeriu beson n\u00eb drejt\u00ebsi dhe me goj\u00eb b\u00ebhet rr\u00ebfim p\u00ebr shp\u00ebtim,\n10:11 sepse Shkrimi thot\u00eb: ''Kushdo q\u00eb beson n\u00eb t\u00eb, nuk do t\u00eb turp\u00ebrohet''.\n10:12 Sepse nuk ka dallim n\u00eb mes Judeut dhe Grekut, sepse nj\u00eb i vet\u00ebm \u00ebsht\u00eb Per\u00ebndia i t\u00eb gjith\u00ebve, i pasur ndaj t\u00eb gjith\u00eb atyre q\u00eb e th\u00ebrrasin.\n10:13 N\u00eb fakt: ''Kushdo q\u00eb do ta th\u00ebrras\u00eb emrin e Zotit do t\u00eb shp\u00ebtohet''.\n10:14 Si do ta th\u00ebrrasin, pra, at\u00eb, t\u00eb cilit nuk i besuan? Dhe si do t\u00eb besojn\u00eb tek ai p\u00ebr t\u00eb cilin nuk kan\u00eb d\u00ebgjuar? Dhe si do t\u00eb d\u00ebgjojn\u00eb, kur s'ka kush predikon?\n10:15 Dhe si do t\u00eb predikojn\u00eb pa qen\u00eb d\u00ebrguar? Si\u00e7 \u00ebsht\u00eb shkruar: ''Sa t\u00eb bukura jan\u00eb k\u00ebmb\u00ebt e atyre q\u00eb shpallin paqen, q\u00eb shpallin lajme t\u00eb mira!''.\n10:16 Por jo t\u00eb gjith\u00eb iu bind\u00ebn ungjillit, sepse Isaia thot\u00eb: ''O Per\u00ebndi, kush i besoi predikimit ton\u00eb?''.\n10:17 Besimi, pra, vjen nga d\u00ebgjimi, dhe d\u00ebgjimi vjen nga fjala e Per\u00ebndis\u00eb.\n10:18 Por un\u00eb them: Mos nuk d\u00ebgjuan? Madje, ''Z\u00ebri i tyre mori mbar\u00eb dheun dhe fjal\u00ebt e tyre shkuan deri n\u00eb skajet m\u00eb t\u00eb larg\u00ebta t\u00eb tok\u00ebs''.\n10:19 Por un\u00eb them: ''Mos nuk e kuptoi Izraeli? Moisiu tha i pari: ''Un\u00eb do t'ju shtie n\u00eb xhelozi me nj\u00eb komb q\u00eb s'\u00ebsht\u00eb fare komb; do t'ju b\u00ebj t\u00eb zem\u00ebroheni me an\u00eb t\u00eb nj\u00eb kombi t\u00eb marr\u00eb''.\n10:20 Dhe Isaia me guxim thot\u00eb: ''Un\u00eb u gjeta nga ata q\u00eb nuk m\u00eb k\u00ebrkonin, un\u00eb iu shfaqa atyre q\u00eb nuk pyesnin p\u00ebr mua''.\n10:21 Por lidhur me Izraelin ai thot\u00eb: ''Gjith\u00eb dit\u00ebn i shtriva duart e mia drejt nj\u00eb populli t\u00eb pabindur dhe kund\u00ebrth\u00ebn\u00ebs''.\n11:1 Un\u00eb, pra, them: A thua Per\u00ebndia e hodhi posht\u00eb popullin e vet? Aspak, sepse edhe un\u00eb jam Izraelit, nga pasardhje e Abrahamit, nga fisi i Beniaminit.\n11:2 Per\u00ebndia nuk e hodhi posht\u00eb popullin e vet, t\u00eb cilin e njohu q\u00eb p\u00ebrpara. A nuk e dini ju \u00e7'thot\u00eb Shkrimi p\u00ebr Elian? Si i drejtohet ai Per\u00ebndis\u00eb kund\u00ebr Izraelit, duke th\u00ebn\u00eb:\n11:3 ''O Zot, profet\u00ebt e tu i vran\u00eb dhe altar\u00ebt e tu i prish\u00ebn, dhe un\u00eb mbeta i vet\u00ebm, dhe ata k\u00ebrkojn\u00eb jet\u00ebn time''.\n11:4 Por, \u00e7far\u00eb i tha z\u00ebri hyjnor? ''Kam l\u00ebn\u00eb p\u00ebr veten time shtat\u00eb mij\u00eb burra, q\u00eb nuk kan\u00eb r\u00ebn\u00eb n\u00eb gjunj\u00eb p\u00ebrpara Baalit''.\n11:5 K\u00ebshtu, pra, edhe n\u00eb koh\u00ebn e tanishme ka mbetur nj\u00eb mbetje pas zgjedhjes s\u00eb hirit.\n11:6 Dhe, po t\u00eb jet\u00eb prej hirit, nuk \u00ebsht\u00eb m\u00eb prej veprash, p\u00ebrndryshe hiri nuk do t\u00eb ishte m\u00eb hir, p\u00ebrndryshe vepra nuk do t\u00eb ishte m\u00eb vep\u00ebr.\n11:7 E \u00e7far\u00eb, at\u00ebher\u00eb? Izraeli nuk e mori at\u00eb q\u00eb k\u00ebrkonte, kurse t\u00eb zgjedhurit e mor\u00ebn, dhe t\u00eb tjer\u00ebt u verbuan,\n11:8 si\u00e7 \u00ebsht\u00eb shkruar: ''Per\u00ebndia u dha atyre frym\u00eb hutimi, sy q\u00eb t\u00eb mos shohin dhe vesh\u00eb q\u00eb t\u00eb mos d\u00ebgjojn\u00eb deri n\u00eb dit\u00ebn e sotme''.\n11:9 Dhe Davidi thot\u00eb: ''Tryeza e tyre iu b\u00ebft\u00eb lak, nj\u00eb kurth, nj\u00eb penges\u00eb dhe nj\u00eb shpagim.\n11:10 Syt\u00eb e tyre u err\u00ebsofshin q\u00eb t\u00eb mos shohin, dhe kurrizin e tyre k\u00ebrruse p\u00ebrgjithnj\u00eb''.\n11:11 Un\u00eb them, pra: ''Mos u penguan, q\u00eb t\u00eb rr\u00ebzohen? Aspak; por me an\u00eb t\u00eb rr\u00ebzimit t\u00eb tyre u erdhi shp\u00ebtimi johebrenjve, q\u00eb t'i shtjer\u00eb ata n\u00eb xhelozi.\n11:12 Edhe n\u00ebse rr\u00ebzimi i tyre \u00ebsht\u00eb fitim p\u00ebr bot\u00ebn dhe pak\u00ebsimi i tyre \u00ebsht\u00eb fitim p\u00ebr johebrenjt\u00eb, sa m\u00eb tep\u00ebr do t\u00eb jet\u00eb mbushullia e tyre?\n11:13 Sepse un\u00eb po ju flas juve, johebrenjve, duke qen\u00eb se jam apostulli i johebrenjve; dhe un\u00eb e nderoj sh\u00ebrbes\u00ebn time,\n11:14 p\u00ebr t\u00eb provuar se n\u00eb ndonj\u00eb m\u00ebnyr\u00eb mund t'i provokoj se mos i shtie n\u00eb zili ata q\u00eb jan\u00eb mishi im edhe shp\u00ebtoj disa prej tyre.\n11:15 Sepse, n\u00eb qoft\u00eb se refuzimi i tyre \u00ebsht\u00eb pajtim p\u00ebr bot\u00ebn, \u00e7'do t\u00eb jet\u00eb ripranimi i tyre, p\u00ebrve\u00e7 se kalimi prej vdekjes n\u00eb jet\u00eb?\n11:16 Edhe po t\u00eb jen\u00eb pem\u00ebt e para t\u00eb shenjta, edhe e t\u00ebra \u00ebsht\u00eb e shenjt\u00eb; dhe po t\u00eb jet\u00eb rr\u00ebnja e shenjt\u00eb, edhe deg\u00ebt jan\u00eb t\u00eb shenjta.\n11:17 Edhe sikur t\u00eb k\u00ebputen disa deg\u00eb, ti q\u00eb ishe ullast\u00ebr u shartove n\u00eb vend t\u00eb tyre dhe u b\u00ebre pjestar i rr\u00ebnj\u00ebs dhe i majm\u00ebris\u00eb s\u00eb drurit t\u00eb ullirit,\n11:18 mos u mburr kund\u00ebr deg\u00ebve: por n\u00ebse mburresh kund\u00ebr tyre, mos harro se nuk e mban ti rr\u00ebnj\u00ebn, po rr\u00ebnja t\u00eb mban ty.\n11:19 Do t\u00eb thuash, pra: ''Deg\u00ebt u pren\u00eb q\u00eb t\u00eb shartohem un\u00eb''.\n11:20 Mir\u00eb, ato u pren\u00eb p\u00ebr mosbesimin, por ti q\u00ebndron p\u00ebr shkak t\u00eb besimit; mos u kreno, por druaj.\n11:21 Sepse n\u00ebse Per\u00ebndia nuk i kurseu deg\u00ebt natyrore, shiko se mos nuk t\u00eb kursen edhe ty.\n11:22 Shih, pra, mir\u00ebsin\u00eb dhe rrept\u00ebsin\u00eb e Per\u00ebndis\u00eb: rrept\u00ebsin\u00eb mbi ata q\u00eb u rr\u00ebzuan, dhe mir\u00ebsin\u00eb ndaj teje, n\u00eb qoft\u00eb se ti do t\u00eb ngulmosh n\u00eb mir\u00ebsi, p\u00ebrndryshe edhe ti do t\u00eb k\u00ebputesh.\n11:23 K\u00ebshtu edhe ata, n\u00ebse nuk do t\u00eb q\u00ebndrojn\u00eb n\u00eb mosbesim, do t\u00eb shartohen; sepse Per\u00ebndia \u00ebsht\u00eb i fuqish\u00ebm t'i shartoj\u00eb p\u00ebrs\u00ebri.\n11:24 Sepse, n\u00eb qoft\u00eb se ti u k\u00ebpute nga ulliri i eg\u00ebr prej natyre dhe u shartove kund\u00ebr natyr\u00ebs n\u00eb ulli t\u00eb but\u00eb, aq m\u00eb tep\u00ebr k\u00ebto, q\u00eb jan\u00eb deg\u00eb prej natyre, do t\u00eb shartohen n\u00eb ullirin e vet.\n11:25 Sepse nuk dua, o v\u00ebllez\u00ebr, q\u00eb ju t\u00eb jeni t\u00eb paditur k\u00ebt\u00eb t\u00eb fsheht\u00eb q\u00eb t\u00eb mos mbaheni me t\u00eb madh n\u00eb veten tuaj se i ka ndodhur nj\u00eb ngurt\u00ebsim nj\u00eb pjese t\u00eb Izraelit deri sa t\u00eb ket\u00eb hyr\u00eb t\u00ebr\u00ebsia e johebrenjve,\n11:26 dhe k\u00ebshtu mbar\u00eb Izraeli do t\u00eb shp\u00ebtohet, sikurse \u00ebsht\u00eb shkruar: ''Nga Sioni do t\u00eb vij\u00eb \u00c7lirimtari, dhe do t\u00eb largoj\u00eb pabesin\u00eb nga Jakobi.\n11:27 Dhe kjo do t\u00eb jet\u00eb bes\u00eblidhja ime me ta, kur un\u00eb t'ju heq m\u00ebkatet e tyre''.\n11:28 P\u00ebr sa i p\u00ebrket ungjillit ata jan\u00eb armiq p\u00ebr hirin tuaj, por p\u00ebr sa i p\u00ebrket zgjedhjes, jan\u00eb t\u00eb dashur p\u00ebr hir t\u00eb et\u00ebrve,\n11:29 sepse dhuntit\u00eb dhe thirrja e Per\u00ebndis\u00eb jan\u00eb t\u00eb pakthyeshme.\n11:30 Sepse, sikund\u00ebr dhe ju dikur ishit t\u00eb pabindur ndaj Per\u00ebndis\u00eb, por tani fituat m\u00ebshir\u00ebn p\u00ebr shkak t\u00eb pabindjes s\u00eb tyre,\n11:31 k\u00ebshtu edhe k\u00ebta tani u b\u00ebn\u00eb t\u00eb pad\u00ebgjuesh\u00ebm, q\u00eb, me an\u00eb t\u00eb m\u00ebshir\u00ebs q\u00eb u tregua p\u00ebr ju, t\u00eb fitojn\u00eb edhe ata m\u00ebshir\u00eb.\n11:32 Sepse Per\u00ebndia i mbylli t\u00eb gjith\u00eb n\u00eb pad\u00ebgjes\u00eb, q\u00eb t\u00eb ket\u00eb m\u00ebshir\u00eb p\u00ebr t\u00eb gjith\u00eb.\n11:33 O thell\u00ebsi pasurie, urt\u00ebsie dhe diturie t\u00eb Per\u00ebndis\u00eb! Sa t\u00eb pahulumtueshme jan\u00eb gjykimet e tij dhe t\u00eb pashtershme jan\u00eb udh\u00ebt e tij!\n11:34 ''Sepse kush e njohu mendjen e Zotit? Ose kush u b\u00eb k\u00ebshilltar i tij?\n11:35 Ose kush i dha atij m\u00eb par\u00eb, q\u00eb t\u00eb ket\u00eb p\u00ebr t\u00eb marr\u00eb shpagim?''.\n11:36 Sepse prej tij, me an\u00eb t\u00eb tij dhe p\u00ebr t\u00eb jan\u00eb t\u00eb gjitha gj\u00ebra. Lavdi atij p\u00ebrjet\u00eb! Amen!\n12:1 O v\u00ebllez\u00ebr, po ju b\u00ebj thirrje, n\u00ebp\u00ebrmjet dhembshuris\u00eb s\u00eb Per\u00ebndis\u00eb, ta paraqisni trupin tuaj si fli t\u00eb gjall\u00eb, t\u00eb shenjt\u00ebruar, t\u00eb p\u00eblqyer te Per\u00ebndia, q\u00eb \u00ebsht\u00eb sh\u00ebrbesa juaj e m\u00ebn\u00e7ur.\n12:2 Dhe mos u konformoni me k\u00ebt\u00eb bot\u00eb, por transformohuni me an\u00eb t\u00eb rip\u00ebrt\u00ebritjes s\u00eb mendjes suaj, q\u00eb t\u00eb provoni cili \u00ebsht\u00eb i miri, i p\u00eblqyeri dhe i p\u00ebrsosuri vullnet i Per\u00ebndis\u00eb.\n12:3 Sepse, p\u00ebr hirin q\u00eb m\u00eb \u00ebsht\u00eb dh\u00ebn\u00eb, un\u00eb i them secilit prej jush t\u00eb mos e vler\u00ebsoj\u00eb veten m\u00eb shum\u00eb se sa duhet ta \u00e7moj\u00eb, por t\u00eb ket\u00eb nj\u00eb vler\u00ebsim t\u00eb p\u00ebrkor\u00eb, sipas mas\u00ebs s\u00eb besimit q\u00eb Per\u00ebndia i ndau secilit.\n12:4 Sepse, sikurse n\u00eb nj\u00eb trup kemi shum\u00eb gjymtyr\u00eb dhe t\u00eb gjitha gjymtyr\u00ebt nuk kan\u00eb t\u00eb nj\u00ebjt\u00ebn funksion,\n12:5 k\u00ebshtu edhe ne, megjithse jemi shum\u00eb, jemi nj\u00eb trup n\u00eb Krishtin dhe secili jemi gjymtyr\u00eb t\u00eb njeri tjetrit.\n12:6 Dhe tani, duke pasur dhunti t\u00eb ndryshme sipas hirit q\u00eb na u dha, n\u00ebse kemi profecin\u00eb, t\u00eb profetizojm\u00eb sipas mas\u00ebs s\u00eb besimit;\n12:7 n\u00ebse kemi sh\u00ebrbim, le t'i kushtohemi sh\u00ebrbimit; po k\u00ebshtu m\u00ebsuesi t\u00eb jepet pas m\u00ebsimit;\n12:8 dhe ai q\u00eb nxit, le t'i kushtohet nxitjes; ai q\u00eb ndan, le ta b\u00ebj\u00eb me thjesht\u00ebsi; ai q\u00eb kryeson le t\u00eb kryesoj\u00eb me zell; ai q\u00eb b\u00ebn vepra m\u00ebshir\u00eb, le t'i b\u00ebj\u00eb me g\u00ebzim.\n12:9 Dashuria le t\u00eb mos jet\u00eb me hipokrizi; urreni t\u00eb keqen dhe ngjituni pas s\u00eb mir\u00ebs.\n12:10 Duani njeri tjetrin me dashuri v\u00ebllaz\u00ebrore; n\u00eb nderim tregoni kujdes njeri me tjetrin.\n12:11 Mos u tregoni t\u00eb p\u00ebrtuar n\u00eb zell; jini t\u00eb zjarrt\u00eb n\u00eb frym\u00eb, sh\u00ebrbeni Per\u00ebndis\u00eb,\n12:12 t\u00eb g\u00ebzuar n\u00eb shpres\u00eb, t\u00eb q\u00ebndruesh\u00ebm n\u00eb shtr\u00ebngime, k\u00ebmb\u00ebngul\u00ebs n\u00eb lutje;\n12:13 ndihmoni p\u00ebr nevojat e shenjtor\u00ebve, jini mikprit\u00ebs.\n12:14 Bekoni ata q\u00eb ju p\u00ebrndjekin, bekoni dhe mos mallkoni.\n12:15 G\u00ebzohuni me ata q\u00eb g\u00ebzohen, dhe qani me ata q\u00eb qajn\u00eb.\n12:16 Kini t\u00eb nj\u00ebjtat mendime njeri me tjetrin; mos lakmoni p\u00ebr lart, por rrini me t\u00eb p\u00ebrunjurit; mos e mbani veten p\u00ebr t\u00eb m\u00ebn\u00e7ur.\n12:17 Mos ia ktheni kurrkujt t\u00eb keqen me t\u00eb keqe, k\u00ebrkoni t\u00eb b\u00ebni t\u00eb mir\u00ebn p\u00ebrpara gjith\u00eb njer\u00ebzve.\n12:18 Po t\u00eb jet\u00eb e mundur dhe aq sa varet prej jush, jetoni n\u00eb paqe me gjith\u00eb njer\u00ebzit.\n12:19 Mos u hakmerrni p\u00ebr veten tuaj, o t\u00eb dashur, por i jepni vend zem\u00ebrimit t\u00eb Per\u00ebndis\u00eb, sepse \u00ebsht\u00eb shkruar: ''Mua m\u00eb p\u00ebrket hakmarrja, un\u00eb kam p\u00ebr t\u00eb shpaguar, thot\u00eb Zoti''.\n12:20 ''N\u00eb qoft\u00eb se armiku yt, pra, ka uri, jepi t\u00eb haj\u00eb; n\u00eb past\u00eb etje, jepi t\u00eb pij\u00eb; sepse, duke b\u00ebr\u00eb k\u00ebt\u00eb, do t\u00eb grumbullosh mbi krye t\u00eb tij th\u00ebngjij t\u00eb ndezur''.\n12:21 Mos u mund nga e keqja, por munde t\u00eb keqen me t\u00eb mir\u00ebn.\n13:1 \u00c7do njeri le t'i n\u00ebnshtrohet pushteteve t\u00eb sip\u00ebrm, sepse nuk ka pushtet ve\u00e7se prej Per\u00ebndis\u00eb; dhe pushtetet q\u00eb jan\u00eb, jan\u00eb caktuar nga Per\u00ebndia.\n13:2 Prandaj ai q\u00eb i kund\u00ebrvihet pushtetit, i kund\u00ebrvihet urdh\u00ebrit t\u00eb Per\u00ebndis\u00eb; dhe ata q\u00eb i kund\u00ebrvihen do t\u00eb marrin mbi vete d\u00ebnimin.\n13:3 Sepse epror\u00ebt s'ke pse t'i kesh frik\u00eb p\u00ebr vepra t\u00eb mira, por p\u00ebr t\u00eb k\u00ebqijat; a do, pra, t\u00eb mos i kesh frik\u00eb pushtetit? B\u00ebj t\u00eb mir\u00ebn, dhe do t\u00eb kesh lavd\u00ebrim nga ai,\n13:4 sepse eprori \u00ebsht\u00eb sh\u00ebrb\u00ebtor i Per\u00ebndis\u00eb p\u00ebr ty p\u00ebr t\u00eb mir\u00eb; por, po t\u00eb b\u00ebsh t\u00eb k\u00ebqija, druaj, sepse nuk e mban kot shpat\u00ebn; sepse ai \u00ebsht\u00eb sh\u00ebrb\u00ebtor i Per\u00ebndis\u00eb, hakmarr\u00ebs plot zem\u00ebrim kund\u00ebr atij q\u00eb b\u00ebn t\u00eb keqen.\n13:5 Prandaj \u00ebsht\u00eb e nevojshme t'i n\u00ebnshtroheni, jo vet\u00ebm nga druajtje e zem\u00ebrimit, por edhe p\u00ebr arsye t\u00eb nd\u00ebrgjegjes.\n13:6 Sepse p\u00ebr k\u00ebt\u00eb paguani edhe tatimet, sepse ata jan\u00eb sh\u00ebrb\u00ebtor\u00eb t\u00eb Per\u00ebndis\u00eb, q\u00eb i kushtohen vazhdimisht k\u00ebtij sh\u00ebrbimi.\n13:7 I jepni, pra, secilit at\u00eb q\u00eb i takon: tatimin atij q\u00eb i p\u00ebrket, druajtje atij q\u00eb \u00ebsht\u00eb p\u00ebr t'u druajtur, nderimin atij q\u00eb \u00ebsht\u00eb p\u00ebr nderim.\n13:8 Mos i kini asnj\u00eb detyrim askujt, p\u00ebrve\u00e7 se ta doni nj\u00ebri-tjetrin, sepse ai q\u00eb e do tjetrin e tij e ka p\u00ebrmbushur ligjin.\n13:9 Sepse urdh\u00ebrimet: ''Mos shkel kuror\u00eb, mos vraj, mos vidh, mos thua d\u00ebshmi t\u00eb rreme, mos lakmo'', dhe n\u00eb past\u00eb ndonj\u00eb urdh\u00ebrim tjet\u00ebr, p\u00ebrmblidhen n\u00eb k\u00ebt\u00eb fjal\u00eb: ''Duaje t\u00eb af\u00ebrmin t\u00ebnd porsi vetveten!''.\n13:10 Dashuria nuk i b\u00ebn keq t\u00eb af\u00ebrmit; dashuria, pra, \u00ebsht\u00eb p\u00ebrmbushja e ligjit.\n13:11 Dhe k\u00ebt\u00eb aq m\u00eb shum\u00eb duhet t\u00eb b\u00ebjm\u00eb, duke ditur koh\u00ebn, sepse tanim\u00eb erdhi ora t\u00eb zgjohemi nga gjumi, sepse shp\u00ebtimi yn\u00eb \u00ebsht\u00eb m\u00eb af\u00ebr, se kur besuam.\n13:12 Nata u thye dhe dita u afrua; le t\u00eb flakim, pra, veprat e err\u00ebsir\u00ebs dhe t\u00eb veshim arm\u00ebt e drit\u00ebs.\n13:13 Le t\u00eb ecim me ndershm\u00ebri, si dit\u00ebn, jo n\u00eb orgji dhe n\u00eb dehje, jo n\u00eb imoralitet dhe sensualiz\u00ebm, jo n\u00eb grindje e n\u00eb smir\u00eb.\n13:14 Por vishuni me Zotin Jezu Krisht dhe mos tregoni kujdes p\u00ebr mishin, q\u00eb t'ia k\u00ebnaqni lakmit\u00eb.\n14:1 Pranojeni at\u00eb q\u00eb \u00ebsht\u00eb i dob\u00ebt n\u00eb besim, pa e qortuar p\u00ebr mendimet.\n14:2 Dikush mendon se mund t\u00eb haj\u00eb nga \u00e7do gj\u00eb, nd\u00ebrsa ai q\u00eb \u00ebsht\u00eb i dob\u00ebt ha vet\u00ebm barishte.\n14:3 Ai q\u00eb ha t\u00eb mos e p\u00ebrbuz\u00eb at\u00eb q\u00eb nuk ha, dhe ai q\u00eb nuk ha t\u00eb mos gjykoj\u00eb at\u00eb q\u00eb ha, sepse Per\u00ebndia e ka pranuar.\n14:4 Kush je ti q\u00eb gjykon sh\u00ebrbyesin e tjetrit? A q\u00ebndron mbi k\u00ebmb\u00eb ose rr\u00ebzohet, \u00ebsht\u00eb pun\u00eb e zotit t\u00eb tij, por ai do t\u00eb q\u00ebndroj\u00eb, sepse Per\u00ebndia \u00ebsht\u00eb i zoti ta b\u00ebj\u00eb at\u00eb t\u00eb q\u00ebndroj\u00eb n\u00eb k\u00ebmb\u00eb.\n14:5 Sepse dikush e \u00e7mon nj\u00eb dit\u00eb m\u00eb shum\u00eb se nj\u00eb tjet\u00ebr, dhe tjetri i \u00e7mon t\u00eb gjitha dit\u00ebt nj\u00eblloj; gjithsecili t\u00eb jet\u00eb plot\u00ebsisht i bindur n\u00eb mendjen e tij.\n14:6 Ai q\u00eb e \u00e7mon dit\u00ebn, p\u00ebr Zotin e \u00e7mon; ai q\u00eb nuk e \u00e7mon dit\u00ebn, p\u00ebr Zotin nuk e ruan; kush ha, p\u00ebr Zotin ha dhe i falet nderit Per\u00ebndis\u00eb; dhe kush nuk ha, p\u00ebr Zotin nuk ha dhe i falet nderit Per\u00ebndis\u00eb.\n14:7 Sepse asnj\u00eb nga ne nuk jeton p\u00ebr veten e tij dhe askush nuk vdes p\u00ebr veten e tij,\n14:8 sepse, edhe n\u00ebse rrojm\u00eb, rrojm\u00eb p\u00ebr Zotin; edhe n\u00ebse vdesim, vdesim p\u00ebr Zotin; pra, edhe po t\u00eb rrojm\u00eb ose t\u00eb vdesim, t\u00eb Zotit jemi.\n14:9 Sepse p\u00ebr k\u00ebt\u00eb edhe vdiq Krishti dhe u ngjall e u kthye n\u00eb jet\u00eb: q\u00eb t\u00eb zot\u00ebroj\u00eb edhe mbi t\u00eb vdekurit, edhe mbi t\u00eb gjall\u00ebt.\n14:10 Por ti, pse e gjykon v\u00ebllan\u00eb t\u00ebnd? Ose p\u00ebrse e p\u00ebrbuz v\u00ebllan\u00eb t\u00ebnd? T\u00eb gjith\u00eb, pra, do t\u00eb dalim p\u00ebrpara gjykat\u00ebs s\u00eb Krishtit.\n14:11 Sepse \u00ebsht\u00eb shkruar: ''Rroj un\u00eb, thot\u00eb Per\u00ebndia, se \u00e7do gj\u00eb do t\u00eb ulet para meje, dhe \u00e7do gjuh\u00eb do ta lavd\u00ebroj\u00eb Per\u00ebndin\u00eb!''.\n14:12 K\u00ebshtu, pra, secili nga ne do t'i jap\u00eb llogari Per\u00ebndis\u00eb p\u00ebr veten e vet.\n14:13 Prandaj t\u00eb mos e gjykojm\u00eb m\u00eb njeri tjetrin, por m\u00eb tep\u00ebr gjykoni k\u00ebt\u00eb: mos i vini gur pengese ose skandal v\u00ebllait.\n14:14 Un\u00eb e di dhe jam plot\u00ebsisht i bindur n\u00eb Zotin Jezus, se asnj\u00eb gj\u00eb nuk \u00ebsht\u00eb e ndyr\u00eb n\u00eb vetvete, por p\u00ebr at\u00eb q\u00eb \u00e7mon se di\u00e7ka \u00ebsht\u00eb e ndyr\u00eb, p\u00ebr at\u00eb \u00ebsht\u00eb e ndyr\u00eb.\n14:15 Por n\u00ebse v\u00ebllai yt trishtohet p\u00ebr shkak t\u00eb nj\u00eb ushqimi, ti nuk ec\u00ebn m\u00eb sipas dashuris\u00eb; mos e b\u00ebj at\u00eb t\u00eb humbas\u00eb me ushqimin t\u00ebnd at\u00eb p\u00ebr t\u00eb cilin Krishti vdiq.\n14:16 Prandaj le t\u00eb mos shahet e mira juaj,\n14:17 sepse mbret\u00ebria e Per\u00ebndis\u00eb nuk \u00ebsht\u00eb t\u00eb ngr\u00ebn\u00ebt dhe t\u00eb pir\u00ebt, por drejt\u00ebsia, paqja dhe g\u00ebzimi n\u00eb Frym\u00ebn e Shenjt\u00eb.\n14:18 Sepse ai q\u00eb i sh\u00ebrben Krishtit n\u00eb k\u00ebto gj\u00ebra, \u00ebsht\u00eb i p\u00eblqyer nga Per\u00ebndia dhe i miratuar nga njer\u00ebzit.\n14:19 Le t\u00eb ndjekim, pra, ato q\u00eb ndihmojn\u00eb p\u00ebr paqe dhe p\u00ebr nd\u00ebrtimin e nj\u00ebri-tjetrit.\n14:20 Mos e prish vepr\u00ebn e Per\u00ebndis\u00eb p\u00ebr ushqimin; v\u00ebrtet, t\u00eb gjitha gj\u00ebra jan\u00eb t\u00eb pastra, por b\u00ebn keq kur dikush ha di\u00e7ka q\u00eb i \u00ebsht\u00eb penges\u00eb.\n14:21 \u00c9sht\u00eb mir\u00eb t\u00eb mos haj\u00eb mish njeriu, as t\u00eb mos pij\u00eb ver\u00eb, as t\u00eb mos b\u00ebj\u00eb gj\u00eb q\u00eb mund ta \u00e7oj\u00eb v\u00ebllan\u00eb t\u00ebnd t\u00eb pengohet, ose t\u00eb skandalizohet ose t\u00eb dob\u00ebson.\n14:22 A ke besim ti? Mbaje besimin p\u00ebr veten t\u00ebnde p\u00ebrpara Per\u00ebndis\u00eb; lum ai q\u00eb nuk d\u00ebnon veten e tij n\u00eb at\u00eb q\u00eb miraton.\n14:23 Por ai q\u00eb \u00ebsht\u00eb me dy mendje, edhe sikur t\u00eb haj\u00eb, \u00ebsht\u00eb d\u00ebnuar, sepse nuk ha me besim; dhe \u00e7do gj\u00eb q\u00eb nuk b\u00ebhet me besim, \u00ebsht\u00eb m\u00ebkat.\n15:1 Edhe ne, q\u00eb jemi t\u00eb fort\u00eb, duhet t\u00eb mbajm\u00eb dob\u00ebsit\u00eb e atyre q\u00eb jan\u00eb t\u00eb dob\u00ebt dhe jo t'i p\u00eblqejm\u00eb vetes.\n15:2 Secili nga ne le t'i p\u00eblqej\u00eb t\u00eb af\u00ebrmit p\u00ebr t\u00eb mir\u00eb, p\u00ebr nd\u00ebrtim,\n15:3 sepse edhe Krishti nuk i p\u00eblqeu vetes s\u00eb tij, por sikurse \u00ebsht\u00eb shkruar: ''Sharjet e atyre q\u00eb t\u00eb shanin ty, ran\u00eb mbi mua''.\n15:4 Sepse t\u00eb gjitha gj\u00ebrat q\u00eb u shkruan n\u00eb t\u00eb kaluar\u00ebn u shkruan p\u00ebr m\u00ebsimin ton\u00eb, q\u00eb me an\u00eb t\u00eb k\u00ebmb\u00ebnguljes dhe t\u00eb ngush\u00ebllimit t\u00eb Shkrimeve, t\u00eb kemi shpres\u00eb.\n15:5 Dhe Per\u00ebndia i durimit dhe i ngush\u00ebllimit ju dh\u00ebnt\u00eb juve t\u00eb keni po ato mendime njeri me tjetrin, sipas Jezu Krishtit,\n15:6 q\u00eb me nj\u00eb mendje t\u00eb vetme dhe nj\u00eb goj\u00eb t\u00eb vetme ta p\u00ebrl\u00ebvdoni Per\u00ebndin\u00eb, Atin e Per\u00ebndis\u00eb ton\u00eb Jezu Krisht.\n15:7 Prandaj pranoni nj\u00ebri-tjetrin, sikurse edhe Krishti na pranoi p\u00ebr lavdin\u00eb e Per\u00ebndis\u00eb.\n15:8 Tani un\u00eb po ju them se Jezu Krishti u b\u00eb sh\u00ebrb\u00ebtor i t\u00eb rrethprer\u00ebve p\u00ebr t\u00eb v\u00ebrtet\u00ebn e Per\u00ebndis\u00eb, p\u00ebr t\u00eb v\u00ebrtetuar premtimet e dh\u00ebna et\u00ebrve,\n15:9 dhe i pranoi johebrenjt\u00eb p\u00ebr m\u00ebshir\u00eb t\u00eb vet, q\u00eb ta l\u00ebvdojn\u00eb Per\u00ebndin\u00eb sikurse \u00ebsht\u00eb shkruar: ''P\u00ebr k\u00ebt\u00eb do t\u00eb t\u00eb p\u00ebrl\u00ebvdoj nd\u00ebr kombe, dhe do t'i k\u00ebndoj lavd\u00ebrime emrit t\u00ebnd!''.\n15:10 Dhe p\u00ebrs\u00ebri ai thot\u00eb: ''G\u00ebzohuni, o njer\u00ebz, me popullin e tij''.\n15:11 Dhe p\u00ebrs\u00ebri: ''Lavd\u00ebroni Zotin, t\u00eb gjith\u00eb njer\u00ebzit; dhe le ta l\u00ebvdojn\u00eb t\u00eb gjith\u00eb popujt''.\n15:12 Dhe p\u00ebrs\u00ebri Isaia thot\u00eb: ''Do t\u00eb mbij\u00eb nj\u00eb filiz nga rr\u00ebnja e Jeseut dhe ai q\u00eb ngrihet p\u00ebr t\u00eb sunduar njer\u00ebzit; kombet do t\u00eb shpresojn\u00eb n\u00eb t\u00eb!''.\n15:13 Dhe Per\u00ebndia i shpres\u00ebs le t'ju mbush\u00eb me \u00e7far\u00ebdo g\u00ebzimi dhe paqe me an\u00eb t\u00eb besimit, q\u00eb t\u00eb keni mbushulli n\u00eb shpres\u00eb, me an\u00eb t\u00eb fuqis\u00eb s\u00eb Frym\u00ebs s\u00eb Shenjt\u00eb!\n15:14 Dhe, sa p\u00ebr ju, o v\u00ebllez\u00ebr, m\u00eb \u00ebsht\u00eb mbushur mendja p\u00ebr ju, se edhe ju jeni plot mir\u00ebsi, plot me \u00e7do njohuri, t\u00eb zot\u00eb t\u00eb k\u00ebshilloni nj\u00ebri-tjetrin.\n15:15 Por un\u00eb ju shkrova n\u00eb nj\u00eb far\u00eb shkalle m\u00eb me guxim q\u00eb t'ju kujtoj p\u00ebr hirin q\u00eb m'u dha prej Per\u00ebndis\u00eb,\n15:16 q\u00eb t\u00eb jem sh\u00ebrb\u00ebtor i Jezu Krishtit pran\u00eb johebrenjve, duke punuar n\u00eb sh\u00ebrbes\u00ebn e shenjt\u00ebruar t\u00eb ungjillit t\u00eb Per\u00ebndis\u00eb, q\u00eb oferta e johebrenjve t\u00eb jet\u00eb e p\u00eblqyer, dhe e shenjt\u00ebruar nga Fryma e Shenjt\u00eb.\n15:17 Kam, pra, me se t\u00eb mburrem n\u00eb Jezu Krishtin p\u00ebr pun\u00ebt q\u00eb kan\u00eb t\u00eb b\u00ebjn\u00eb me Per\u00ebndin\u00eb.\n15:18 Sepse nuk do t\u00eb guxoja t\u00eb flas p\u00ebr ndonj\u00eb nga ato gj\u00ebra t\u00eb cilat Krishti nuk i b\u00ebri n\u00ebp\u00ebrmjet meje, p\u00ebr t'i sjell n\u00eb d\u00ebgjes johebrenjt\u00eb me fjal\u00eb dhe me vep\u00ebr,\n15:19 me fuqi shenjash dhe \u00e7udirash, me fuqi t\u00eb Frym\u00ebs s\u00eb Per\u00ebndis\u00eb; k\u00ebshtu, prej Jeruzalemit e p\u00ebrqark dhe gjer n\u00eb Iliri, kam kryer sh\u00ebrbimin e ungjillit t\u00eb Krishtit,\n15:20 duke u p\u00ebrpjekur t\u00eb ungjill\u00ebzoj atje ku nuk ishte i njohur emri i Krishtit, q\u00eb t\u00eb mos nd\u00ebrtoj mbi themelin e tjet\u00ebrit.\n15:21 Por, sikurse \u00ebsht\u00eb shkruar: ''Ata, nd\u00ebr t\u00eb cil\u00ebt nuk u qe shpallur, do t\u00eb shohin, dhe ata q\u00eb nuk kishin d\u00ebgjuar p\u00ebr t\u00eb, do t\u00eb kuptojn\u00eb''.\n15:22 Edhe p\u00ebr k\u00ebt\u00eb arsye u pengova shum\u00eb her\u00eb t\u00eb vij tek ju.\n15:23 Por tani, duke mos pasur m\u00eb fush\u00eb veprimi p\u00ebr t\u00eb ungjillizuar n\u00eb k\u00ebto vise, dhe duke pasur prej shum\u00eb vjet\u00ebsh mall t\u00eb vij tek ju,\n15:24 kur t\u00eb shkoj n\u00eb Spanj\u00eb, do t\u00eb vij nd\u00ebr ju; sepse shpresoj, pra, t'ju shoh dhe t\u00eb m\u00eb p\u00ebrcillni deri atje, pasi t\u00eb k\u00ebnaqem, sado pak, me ju.\n15:25 Por tani un\u00eb po shkoj n\u00eb Jeruzalem, p\u00ebr t'u sh\u00ebrbyer shenjtor\u00ebve,\n15:26 sepse atyre nga Maqedonia dhe Akaia u p\u00eblqeu t\u00eb japin nj\u00eb ndihmes\u00eb p\u00ebr t\u00eb varf\u00ebrit q\u00eb jan\u00eb nd\u00ebr shenjtor\u00ebt e Jeruzalemit.\n15:27 Kjo u p\u00eblqeu atyre me t\u00eb v\u00ebrtet\u00eb, sepse u jan\u00eb debitor\u00eb; sepse, n\u00eb qoft\u00eb se johebrenjt\u00eb, pra, jan\u00eb b\u00ebr\u00eb pjestar\u00eb bashk\u00eb me ta p\u00ebr t\u00eb mirat frym\u00ebrore, kan\u00eb detyr\u00eb t'u sh\u00ebrbejn\u00eb atyre edhe me t\u00eb mira materiale.\n15:28 Si ta kem kryer k\u00ebt\u00eb pun\u00eb dhe t'ua kem dor\u00ebzuar k\u00ebt\u00eb fryt, do t\u00eb shkoj n\u00eb Spanj\u00eb, duke kaluar nga ju.\n15:29 Dhe un\u00eb e di se, duke ardhur tek ju, do t\u00eb vij n\u00eb t\u00ebr\u00ebsin\u00eb e bekimeve t\u00eb ungjillit t\u00eb Krishtit.\n15:30 Dhe ju b\u00ebj thirrje, o v\u00ebllez\u00ebr, p\u00ebr Zotin ton\u00eb Jezu Krisht dhe p\u00ebr dashurin\u00eb e Frym\u00ebs, t\u00eb luftoni bashk\u00eb me mua n\u00eb lutje te Per\u00ebndia p\u00ebr mua,\n15:31 q\u00eb un\u00eb t\u00eb shp\u00ebtoj nga t\u00eb pabes\u00ebt n\u00eb Jude, dhe q\u00eb sh\u00ebrbesa ime q\u00eb po b\u00ebj p\u00ebr Jeruzalemin t'u p\u00eblqej\u00eb shenjtor\u00ebve,\n15:32 q\u00eb un\u00eb t\u00eb vij tek ju, n\u00eb dasht\u00eb Per\u00ebndia, dhe t\u00eb freskohem bashk\u00eb me ju.\n15:33 Edhe Per\u00ebndia e paqes qoft\u00eb me ju t\u00eb gjith\u00eb. Amen.\n16:1 Dhe un\u00eb po jua rekomandoj Feb\u00ebn, motr\u00ebn ton\u00eb, q\u00eb \u00ebsht\u00eb dhjake e kish\u00ebs q\u00eb ndodhet n\u00eb Kenkrea,\n16:2 q\u00eb ta pranoni n\u00eb Zotin, sikurse u ka hije shenjtor\u00ebve, dhe ta ndihmoni n\u00eb \u00e7do gj\u00eb q\u00eb t\u00eb ket\u00eb nevoj\u00eb nga ju, sepse edhe ajo ka ndihmuar shum\u00eb veta, edhe mua vet\u00eb.\n16:3 U b\u00ebni t\u00eb fala Prishil\u00ebs dhe Akuil\u00ebs, bashk\u00ebpun\u00ebtor\u00eb t\u00eb mi n\u00eb Krishtin Jezus,\n16:4 t\u00eb cil\u00ebt p\u00ebr jet\u00ebn time vun\u00eb kok\u00ebn n\u00eb rrezik; ata i falend\u00ebroj jo vet\u00ebm un\u00eb, por t\u00eb gjitha kishat e johebrenjve.\n16:5 I b\u00ebni t\u00eb fala edhe kish\u00ebs q\u00eb \u00ebsht\u00eb n\u00eb sht\u00ebpin\u00eb e tyre, t\u00eb fala edhe Epenetit tim t\u00eb dashur, i cili \u00ebsht\u00eb fryti i par\u00eb i Akais\u00eb n\u00eb Krishtin.\n16:6 T\u00eb fala Maris\u00eb, e cila u mundua shum\u00eb p\u00ebr ne.\n16:7 T\u00eb fala Andronikut dhe Juni\u00ebs, kush\u00ebrinj t\u00eb mi dhe shok\u00eb burgu, t\u00eb cil\u00ebt jan\u00eb dalluar midis apostujve dhe kan\u00eb qen\u00eb n\u00eb Krishtin p\u00ebrpara meje.\n16:8 T\u00eb fala Ampliut, t\u00eb dashurit tim n\u00eb Zotin.\n16:9 T\u00eb fala Urbanit, bashk\u00ebpun\u00ebtorit ton\u00eb n\u00eb Krishtin dhe Stakit tim t\u00eb dashur.\n16:10 T\u00eb fala Apelit, t\u00eb provuarit n\u00eb Krishtin. T\u00eb fala atyre t\u00eb sht\u00ebpis\u00eb s\u00eb Aristobulit.\n16:11 T\u00eb fala Herodionit, kush\u00ebririt tim. T\u00eb fala atyre t\u00eb sht\u00ebpis\u00eb s\u00eb Narkisit q\u00eb jan\u00eb n\u00eb Zotin.\n16:12 U b\u00ebni t\u00eb fala Trifen\u00ebs dhe Trifoz\u00ebs, t\u00eb cilat mundohen n\u00eb Zotin. T\u00eb fala Persid\u00ebs s\u00eb dashur, e cila \u00ebsht\u00eb munduar shum\u00eb n\u00eb Zotin.\n16:13 T\u00eb fala Rufit, t\u00eb zgjedhurit n\u00eb Zotin, dhe n\u00ebn\u00ebs s\u00eb tij q\u00eb \u00ebsht\u00eb edhe imja.\n16:14 T\u00eb fala Asinkritit, Flegontit, Erm\u00ebs, Patrob\u00ebs, Ermit dhe v\u00ebllez\u00ebrve q\u00eb jan\u00eb me ta.\n16:15 T\u00eb fala Filologut, Julis\u00eb, Nereut dhe motr\u00ebs s\u00eb tij Olimp\u00ebs, dhe gjith\u00eb shenjtor\u00ebve q\u00eb jan\u00eb me ta.\n16:16 P\u00ebrsh\u00ebndetni njeri tjetrin me nj\u00eb t\u00eb puthur t\u00eb shenjt\u00eb; kishat e Krishtit ju p\u00ebrsh\u00ebndesin.\n16:17 Tani un\u00eb ju b\u00ebj thirrje, o v\u00ebllez\u00ebr, t\u00eb ruheni nga ata q\u00eb shkaktojn\u00eb p\u00ebr\u00e7arje dhe skandale kund\u00ebr doktrin\u00ebs q\u00eb keni m\u00ebsuar dhe t\u00eb largoheni nga ata;\n16:18 sepse ata nuk i sh\u00ebrbejn\u00eb Zotit ton\u00eb Jezu Krisht, por barkut t\u00eb tyre, dhe me fjal\u00eb t\u00eb \u00ebmbla dhe t\u00eb bukura g\u00ebnjejn\u00eb zemrat e t\u00eb thjeshtit?.\n16:19 Sepse t\u00eb bindurit tuaj arriti kudo; prandaj un\u00eb g\u00ebzohem p\u00ebr ju; dhe d\u00ebshiroj q\u00eb t\u00eb jeni t\u00eb m\u00ebncur p\u00ebr t\u00eb mir\u00ebn dhe t\u00eb thjesht p\u00ebr t\u00eb keqen.\n16:20 Tani Per\u00ebndia e paqes do ta d\u00ebrmoj\u00eb s\u00eb shpejti Satanan\u00eb n\u00ebn k\u00ebmb\u00ebt tuaja. Hiri i Zotit ton\u00eb Jezu Krisht qoft\u00eb me ju.\n16:21 Timoteu, bashk\u00ebpun\u00ebtori im, Luci, Jasoni dhe Sosipatri, kush\u00ebrinj t\u00eb mi, ju p\u00ebrshendesin.\n16:22 Un\u00eb, Terci, q\u00eb shkrova k\u00ebt\u00eb let\u00ebr ju p\u00ebrsh\u00ebndes n\u00eb Zotin.\n16:23 Gai, mikprit\u00ebsi im dhe i mbar\u00eb kish\u00ebs, ju b\u00ebn t\u00eb fala. Erasti, ark\u00ebtari i qytetit, dhe v\u00ebllai Kuarti, ju d\u00ebrgojn\u00eb t\u00eb fala.\n16:24 Hiri i Zotit ton\u00eb Jezu Krisht qoft\u00eb me ju t\u00eb gjith\u00eb. Amen.\n16:25 Dhe atij q\u00eb mund t'ju forcoj\u00eb juve sipas ungjillit tim dhe predikimit t\u00eb Jezu Krishtit, sipas zbules\u00ebs s\u00eb misterit, t\u00eb mbajtur fshehur prej koh\u00ebsh t\u00eb pasosur,\n16:26 por tani u shfaq e u zbulua me an\u00eb t\u00eb Shkrimeve t\u00eb profet\u00ebve, sipas urdh\u00ebrimit t\u00eb Per\u00ebndis\u00eb t\u00eb p\u00ebrjetshme dhe u njoh nd\u00ebr t\u00eb gjitha kombet, p\u00ebr t'i sjell\u00eb n\u00eb d\u00ebgjes\u00ebn e besimit,\n16:27 Per\u00ebndis\u00eb, t\u00eb vetmin t\u00eb ditsh\u00ebm, i qoft\u00eb lavdi n\u00eb p\u00ebrjet\u00ebsi me an\u00eb t\u00eb Jezu Krishtit. Amen.","title":"Albanian Bible: Romans","type":"page"}