{"collection":"Bible & Christianity","html_url":"https://unchartedknowledge.5gfusion.net/browse/bib/wb/cmr/act.htm","path":"bib/wb/cmr/act.htm","source_url":"https://sacred-texts.com/bib/wb/cmr/act.htm","text":"1:1 Y finenana na sinangan, jutugue, O Teofilo, pot todo ayo sija, na si Jesus jatutujon fumatinas, yan mamanag\u00fce.\n1:2 Asta y jaane anae maresibe gui sanjilo, despues di munjayan jatago pot y Espiritu Santo y apostoles sija ni y inayeg\u00f1a:\n1:3 Ni ayo locue y jafanue nu g\u00fciya lal\u00e2l\u00e2, anae munjayan mapinito pot y megae na se\u00f1at, linii\u00f1ija cuarenta na jaane yan manguecuentos g\u00fcinaja sija ni y mangaegue gui raenon Yuus:\n1:4 Ya manda\u00f1a yan sija, ya jatago sija na cha\u00f1ija fanjajanao Jerusalem, lao ujanangga y promesan y Tata ni y, ileg\u00f1a, injingog guiya guajo:\n1:5 Sa si Juan magajet na managpapange ni y janom: lao jamyo infanmatagpange ni y Espiritu Santo ti megae na jaane desde pago.\n1:6 \u00b6 Enao mina, ayo sija y manda\u00f1a, finaesen g\u00fce, ileg\u00f1ija: Se\u00f1ot, malago jao unnatalo guato y raeno guiya Israel?\n1:7 Ya g\u00fciya ileg\u00f1a nu sija: Ti para jamyo intingo y jaane yan y tiempo sija, ni y pinelon y Tata gui ninasi\u00f1a\u00f1aja.\n1:8 Lao jamyo infanmanresibe y ninasi\u00f1a anae si Espiritu Santo ufato gui jilo miyo: yan jamyo utestigojo sija, iya Jerusalem yan todo iya Judea yan Samaria, yan asta y uttimon y tano.\n1:9 Ya anae munjayan jasangan este na g\u00fcinaja, mientras maaatan g\u00fce, machule g\u00fce gui sanjilo; ya y mapagajes rinesibe g\u00fce, guinen linii\u00f1ija.\n1:10 Ya anae maaatan fitme y langet, anae mapos g\u00fce, estag\u00fce dos taotao na minagagon \u00e1paca, manotojgue jijot guiya sija.\n1:11 Ni y ileg\u00f1ija locue: Jamyo taotao Galilea, jafa na manotojgue jamyo ya inaatan julo y langet? este mismo si Jesus ni y maresibe gui sanjilo guinen iya jamyo para y langet, umamaela talo taeg\u00fcijeja anae inlie g\u00fce jumanao para y langet.\n1:12 \u00b6 Ayo nae sija manalo guato Jerusalem guinen y egso Olibo, ni y jijot Jerusalem, gui sabado na jaana na jinanao.\n1:13 Ya anae sija manjalom, manjanao julo gui sanjilo na cuarto anae ma\u00f1asaga todos, si Pedro yan si Juan yan si Santiago yan si Andres yan si Felipe yan si Tomas yan si Bartolome yan si Mateo yan si Santiago lajin Alfeo yan si Simon Selote yan si Judas chelun Santiago.\n1:14 Estesija todo ma\u00f1asagaja gui un jinasoja na tinaetae, yan manmangagagao fitme, yan y palo famalaoan sija yan si Maria nanan Jesus, yan y ma\u00f1elu\u00f1a lalaje sija.\n1:15 \u00b6 Ya ayo sija na jaane, si Pedro tumojgue julo gui entalo y ma\u00f1elo, ya y numeron y manda\u00f1a guaja siento y bente. Ya ileg\u00f1a:\n1:16 Lalaje an ma\u00f1elo, nesesita umacumple este na tinigue ni y jasangan antes y Espiritu Santo gui pachot David pot si Judas ni umesgaejon ayo sija y cumone si Jesus.\n1:17 Sa g\u00fciya estaba matufong guiya jita, yan guaja patte\u00f1a g\u00fcine na sinetbe.\n1:18 Este na taotao, mamajan un fangualuan ni y apas y tinaelaye\u00f1a; ya japodong papa y mapta tiyan\u00f1a, ya malagnos todo tilipas\u00f1a.\n1:19 Ya este matungo todo ni y ma\u00f1asaga guiya Jerusalem; ya pot enao na mafanaan ayo na fangualuan ni y fino\u00f1ija: Aqueldama, comequeileg\u00f1a, Fangualuan j\u00e2g\u00e2.\n1:20 Sa esta matugue gui leblon y Salmos: Polo ya y saga\u00f1a umayulang ya taya taotao sumagaye: ya y ofisio\u00f1a otro chumule.\n1:21 Gui entalo estesija na taotao y mangachochongta todo y tiempo anae y Se\u00f1ot Jesus jumalom yan jumuyong guiya jita,\n1:22 Matutujon guinen y tinagpangen Juan asta ayo na jaane anae maresibe gui sanjilo guinen iya jita, nesesita uno gui entalo sija umatancho testigo yan jita ni y quinajulu\u00f1a.\n1:23 Ya matancho dos, si Jos\u00e9 ni y mafanaan Barsabas ni y apiyidu\u00f1a Justo, yan si Matias.\n1:24 Ya manmanaetae ileg\u00f1ija: Jago Se\u00f1ot ni y tumungo y corason y taotao todo, famanue jaye g\u00fcine gui dos unayeg.\n1:25 Para usaouao g\u00fcine na sinetbe, yan y chechon apostoles anae si Judas ni y podong pot y tinaelaye\u00f1a, ya g\u00fciya ujanao para y saga\u00f1a.\n1:26 Ya manmanae ni y suerten\u00f1ija; ya y suerte podong gui as Matias; ya g\u00fciya matufong gui onse na apostoles.\n2:1 YA anae mato y jaanen y Pentecostes, estaba todos na mandada\u00f1a gui un sagayan.\n2:2 Ya enseguidas mato y boruca guinen y langet, taeg\u00fcije y g\u00fcinaefen y dangculo na manglo, ya ninabula todo y guima anae manmatatachong sija.\n2:3 Ya ayo nae manmato gui jilo\u00f1ija dinga na jula sija, taeg\u00fcije y guafe, ya sumaga gui jilo cada uno guiya sija.\n2:4 Ya sija todo manbula ni y Espiritu Santo, yan jatutujon sumangan y otro na finijo, taeg\u00fcijija y Espiritu numae sija na ujasangan.\n2:5 Ya ma\u00f1asaga g\u00fcije guiya Jerusalem, Judio sija, na mandeboto na taotao, guinen todo y nasion ni y mangaegue gui papa y langet.\n2:6 Ya anae majungog esta na boruca, manda\u00f1a y linajyan taotao, ya sija manyinalaca, sa cada taotao jajungog sija na manguecuentos ni y fino\u00f1ijaja.\n2:7 Ya sija todos ninafanlujan, yan ninafanmanman, ileg\u00f1ija y uno ni y otro: Ada ti todo Galileo estesija y manguecuentos?\n2:8 Ya jafa muna tajujungog cada taotao ni y finotaja gui anae manmafa\u00f1agojit?\n2:9 Partos, yan Medos, yan Elamitas, yan sija y ma\u00f1asaga guiya Mesopotamia, yan Judea, yan Capadosia, yan Ponto, yan Asia,\n2:10 Yan Phrygia, yan Pamfilia, yan Egipto, yan iya Libia ni y gaegue gui otro bandan Sirene, yan y manaotao juyong guiya Roma, Judio sija yan proselitos,\n2:11 Cretensija, yan Arabsija: tajujungog sija manguecuentos ni y finota, y namanman na checho Yuus sija.\n2:12 Ya sija todos ninafanmanman, ya manbuebuenteja ileg\u00f1ija uno yan y otro: Jafa este na taeg\u00fcine?\n2:13 Lao y palo sija manmanbotlelea ileg\u00f1ija: Estesija na taotao manbula nuebo na bino.\n2:14 \u00b6 Lao si Pedro tumojgue julo gui entalo onse, ya jajatsa julo y inagang\u00f1a, ya ileg\u00f1a nu sija: Jamyo taotao Judea, yan todo y ma\u00f1asaga guiya Jerusalem, polo ya este umatungo guiya jamyo, yan ecungog y sinanganjo.\n2:15 Sa estesija ti manbulacho, taeg\u00fcenao y pinelonmiyo, sa pago y mina tresja na ora gui jaane.\n2:16 Lao este ayo y guinen masangan pot y profeta Joel:\n2:17 Na umasusede gui uttimo jaane sija, ileg\u00f1a si Yuus, juchuda y Espiritujo gui jilo todo y catne; ya y famaguonmiyo lalaje yan famaguonmiyo famalaoan ufanmanprofetisa, ya patgonmiyo lalaje ujalie y linii\u00f1ija, ya y manbijo sija guiya jamyo, ufanmang\u00fcife ni y g\u00fcinife sija;\n2:18 Magajet na y jilo y tentagojo lalaje, yan y tentagojo famalaoan nae bae juchuda g\u00fcije na jaane y Espiritujo; ya sija ujaprofetisa.\n2:19 Ya bae jufanue ni y na manman gui sanjilo gui langet, yan se\u00f1at gui sanpapa gui tano; j\u00e2g\u00e2 yan guafe yan y asgon y aso:\n2:20 Y atdao umatolaeca mafajomjom, ya y pilan mafaj\u00e2g\u00e2; antes di ufato y jaanin y Se\u00f1ot, ayo na jaane dangculo yan magas.\n2:21 Ya umasusede na masquesea jaye ni y umagang y naan y Se\u00f1ot, ufansatbo.\n2:22 \u00b6 Jamyo taotao Israel sija, jingog estesija finojo; si Jesus, taotao Nasaret, un taotao maasegura na g\u00fcinaeyan Yuus g\u00fce guiya jamyo pot y ninasi\u00f1a sija yan y namanman, yan y se\u00f1at ni y finatinas Yuus pot g\u00fciya gui entalo miyo, taeg\u00fcijeja jamyo locue intingoja;\n2:23 G\u00fciya manaen\u00f1aejon pot tinancho pinagat yan antes na tiningo Yuus, jamyo inquene, ni y manaelaye sija na canae ya inatane gui quiluus ya inpino.\n2:24 Ya si Yuus janacajulo, ya japula y piniten finatae; sa ayo ti si\u00f1a maguut g\u00fce.\n2:25 Sa si David sumangan pot g\u00fciya: Guajo julie siempre y Se\u00f1ot gui menan matajo; sa g\u00fciya gaegue agapa na canaejo, para ti si\u00f1a junacalamten:\n2:26 Enao mina y corasonjo mumagof, yan y jilajo senmagof; yan y catneco locue usaga gui ninangga.\n2:27 Sa ti undingo y antijo gui naftan, ni ti unnae y Santosmo para ulie y minitong.\n2:28 Jago guinen munatungoyo ni y chalan lin\u00e2l\u00e2: yan unnabulayo minagof gui menamo.\n2:29 Ma\u00f1elujo lalaje, si\u00f1ayo libre na jusangane jamyo ni y patriarca David, na matae ya majafot, ya y naftan\u00f1a gaegue guiya jita asta pago na jaane.\n2:30 Taeg\u00fcine, na g\u00fciya profeta, ya jatungo na si Yuus manjula ni y juramento pot g\u00fciya, na y tinegcha y lomo\u00f1a ya unafatachong Uno gui tronu\u00f1a.\n2:31 Sa guinen jalie este antes, na jasangan y quinajulo Cristo, na y anti\u00f1a ti mapolo gui naftan; ni y catne\u00f1a ulie y minitong.\n2:32 Este y as Jesus ni y ninacajulo as Yuus, ya enaomina jita todos mantestigo.\n2:33 Taeg\u00fcine na majatsa gui agapa na canae Yuus, ya guinen jaresibe guine y Tata y promesan Espiritu Santo, g\u00fciya chumuda este y inlie pago yan y injingog.\n2:34 Sa si David ti cajulo gui langet; lao ileg\u00f1a nu g\u00fciyaja: Y Se\u00f1ot ileg\u00f1a ni y Se\u00f1otjo, fatachong gui agapa na canaejo,\n2:35 Asta que jupolo y enemigumo para fa\u00f1ajangan y adengmo.\n2:36 Polo ya todo y guima Israel ujatungo magajet, na si Yuus fumatinas g\u00fce y Se\u00f1ot yan Cristo; este uje y inatane gui quiluus.\n2:37 Ya anae sija jajungog este, manma\u00f1iente gui corason\u00f1ija, ya ileg\u00f1ija as Pedro yan y palo na apostoles sija: Ma\u00f1elujo lalaje, jafajam infatinas?\n2:38 Ayo nae si Pedro ileg\u00f1a nu sija: Fanma\u00f1otsot, ya infanmatagpange cada uno guiya jamyo, ni y naan Jesucristo, para inasiin y isaomiyo, yan inresibe y ninaen y Espiritu Santo.\n2:39 Sa y promesa para jamyo, yan para y famaguonmiyo, yan para todos, asta ayo sija y mangaegue gui chago, jayeja y inagang ni y Se\u00f1ot Yuusta.\n2:40 Yan megae otro na finijo janae testimonio, yan jasangane ileg\u00f1a: Satba jamyo g\u00fcine gui managuaguat na generasion.\n2:41 \u00b6 Ya ayo sija y manmagof rumesibe y fino\u00f1a, manmatagpange: ya ayo na jaane, maaumenta guiya sija buente tres mit na taotao.\n2:42 Ya sija sisigueja fitme gui finanag\u00fcen y apostoles sija, yan mandada\u00f1aja yan maipe y pan, yan an manmaetae.\n2:43 Ya minaa\u00f1ao mato gui jilo todo y ante: yan megae na namanman yan se\u00f1at manmafatinas pot y apostoles sija.\n2:44 Ya todo ayo sija y manmanjonggue, mandada\u00f1aja, yan manguaja todo g\u00fcinaja para uiyon todo;\n2:45 Ya jabende iyon\u00f1ija y g\u00fcinaja\u00f1ija, yan ya manmapapatte y taotao sija cada uno taemanoja y nesesitao\u00f1a.\n2:46 Ya sija sisigueja fitme, yan unoja corason\u00f1ija todo y jaane, gui guimayuus, yan an maipe y pan sija gui iyasija, ya jacano na\u00f1ija ni y mainagof, yan sensiyo y corason\u00f1ija.\n2:47 Manmanalaba as Yuus, yan mangaefabot ni y todo y taotao sija. Ya y Se\u00f1ot jaaumenta sija cada jaane, ni ayo sija y mansasatbo.\n3:1 SI Pedro yan Juan, duma\u00f1a jumanao julo gui guimayuus para ujafanaetae, gui oran a las nuebe.\n3:2 Ya un taotao na coja desde y jalom y tiyan nana\u00f1a, ya machuchule, ya mapopolo cada jaane gui pettan y guimayuus, ni y mafanaan Bonita, para ufangagao limosna ni y manjajalom gui guimayuus.\n3:3 Ya jalie si Pedro yan Juan na jumajalom gui guimayuus, ya jagagao limosna.\n3:4 Ya inataug\u00fce as Pedro yan Juan, ya ileg\u00f1ija: Atanjam.\n3:5 Ya g\u00fciya jaecungog sija, yan jananangga na uresibe jafa na g\u00fcinaja guiya sija.\n3:6 Ayo nae si Pedro ileg\u00f1a: Salape yan oro, tayayo; lao jafa y g\u00fcinajajo junae jao. Pot y naan Jesucristo Nasareno, cajulo ya unfamocat.\n3:7 Ya jamantiene y agapa na canae\u00f1a, ya jajatsa julo; ya enseguidas y adeng\u00f1a yan y telang y bayogu\u00f1a mumetgot.\n3:8 Ya g\u00fciya tumayog julo, ya tumojgue, ya jatutujon mamocat; ya jumalom yan sija gui jalom y guimayuus, mamomocat yan tumatayog, yan jaalalaba si Yuus;\n3:9 Ya todo y taotao lumie g\u00fci na mamomocat, yan jaalalaba si Yuus;\n3:10 Ya sija matungoja na g\u00fciya ayo y matatachong, ni y umogagao limosna gui Bonita na Petta gui guimayuus: ya sija manbula ni y namanman, yan minaa\u00f1ao, ni ayo y jumuyong guiya g\u00fciya.\n3:11 \u00b6 Ya y anae g\u00fciya quinequene as Pedro yan Juan, todo y taotao manmalago ya manda\u00f1a guiya sija gui coridot ni y mafanaan Salomon ya dangculo na ninamanman\u00f1ija.\n3:12 Ya anae si Pedro jalie ayo, jaope y taotao sija ileg\u00f1a: Taotao Israel, sa jafa na ninafanmanman jamyo ni este? pat jafa na ingueguesatanjam taeg\u00fcije y pot ninasi\u00f1anmameja, pat pot y dinebotonmameja na innafamocat este na taotao?\n3:13 Si Yuus Abraham, yan Ysaac, yan Jacob, y Yuus y tatata ni y janamalago y Tentago\u00f1a as Jesus; ni y inentrega yan inpine gui menan Pilatos, anae jadetetmina ya japolo g\u00fce na ujanao.\n3:14 Lao jamyo inpine Ayo y Santos yan Tunas, yan ingagagao na infanmanae un taotao ni y pegno;\n3:15 Yan inpino y prinsipen lin\u00e2l\u00e2, ni y si Yuus janacajulo guinen y manmatae; ni y jame mantestigo.\n3:16 Ya y naan\u00f1a, pot y jinenggue y naan\u00f1a, janametgot este na taotao ni y liniimiyo, yan y tiningomiyo; junggan, y jinenggue, ni y pot g\u00fciya, mannae g\u00fce ni este na cabales na jinemlo gui menan miyo todos.\n3:17 Lao pago, ma\u00f1elujo, nae jutungo na pot y taya tiningomiyo na infatinas ayo, taeg\u00fcije y finatinas y magalajenmiyo locue.\n3:18 Lao ayo na g\u00fcinaja y janamatungo si Yuus antes, pot y pachot todo sija y profeta, na si Cristo\u00f1a ufamadese, ya taeg\u00fcije ucumple.\n3:19 Enaomina fanma\u00f1otsot, ya inbira talo jamyo, ya y isaomiyo ufanmafunas, para si\u00f1a ufato y tiempon y refresco guinen menan Yuus;\n3:20 Ya para g\u00fciya umatago ayo Cristo, ni y esta matancho antes para jamyo; g\u00fciya si Jesus.\n3:21 Ni y langet nesesita uresibe asta y tiempo sija anae todo y g\u00fcinaja mannanalo mauleg talo, ni y jasangan si Yuus gui pachot y santos na profeta\u00f1a sija, ni jagas mangaegue desde qui matutujon y tano.\n3:22 Sa magajet na si Moises ileg\u00f1a: Y Se\u00f1ot Yuus, unacajulo un profeta guiya jamyo, gui entalo ma\u00f1elunmiyo, taeg\u00fcine iya guajo; iya guiya nae injingog todo y g\u00fcinaja ni y mansinangane jamyo.\n3:23 Ya umasusede na todo y ante ni y ti malago umecungog ayo na profeta, umaguefyulang gui entalo y taotao sija.\n3:24 Magajet na todo sija y profeta desde as Samuel yan ayo sija y manatate, todos ni y manma\u00f1angan, taeg\u00fcine masangan g\u00fcine sija na jaane.\n3:25 Ya jamyo sija y famaguon y profeta sija, yan y trato ni y si Yuus jafatinas gui ma\u00f1aenata, ileg\u00f1a as Abraham: Ya y semiyamo nae todo y familia sija gui tano ufanbendise.\n3:26 Iya jamyo nae finena, si Yuus, janacajulo y Tentago\u00f1a, ya jatago na infanbinendise, ya ubira cada uno guiya jamyo guinin y tinaelayenmiyo.\n4:1 YA anae manguecuentos yan y taotao sija, y magas na mamale yan y magas y templo, yan y Saduseosija, manmato guiya sija,\n4:2 Ya guesinestotba, sa sija jafananag\u00fce y taotao sija, ya japredidica y quinajulo guinin y manmatae, pot si Jesus.\n4:3 Ya manmapolo canae gui jilo\u00f1ija, ya manmapreso asta y inagpa\u00f1a, sa estaba esta pupuenge.\n4:4 Lao megae sija y jumungog y sinangan majonggue; ya y numeron y taotao sija, buente sinco mit.\n4:5 \u00b6 Ya y inagpa\u00f1a g\u00fcije, y magas\u00f1ija yan y manamco, yan y escriba sija manda\u00f1a guiya Jerusalem;\n4:6 Yan mangaegue si Annas, magas y mamale, yan si Caefas, yan si Juan, yan si Alejandro, yan ayosija parientes y magas mamale,\n4:7 Ya anae munjayan japlanta sija gui talo, jafaesen: Pot jafa na ninasi\u00f1a, pat jaye na naan na infatinas este?\n4:8 Ya si Pedro, bula ni y Espiritu Santo, ileg\u00f1a nu sija: Jamyo ni y magas y taotao, yan y manamco guiya Israel,\n4:9 Yaguin manmachaguejam pago na jaane pot y mauleg finatinas para y malango na taotao, sa jafa muna manajomlo;\n4:10 Intingo todo jamyo, yan todo y taotao guiya Israel, na pot y naan Jesucristo, y Nasareno, ni y inatane gui quiluus, ni y ninacajulo as Yuus guinin y manmatae; pot g\u00fciyaja este na taotao na tumojgue gui menan miyo ya jomlo.\n4:11 G\u00fciya yuje na acho y innataebale jamyo ni y manmanjatsa, na jumuyong cabesan esquina.\n4:12 Ya ni uguaja satbasion gui otro; sa taya otro naan gui papa y langet, manmanae y taotao sija, para usi\u00f1a utafansatbo.\n4:13 \u00b6 Ya anae malie y minatatngan Pedro yan Juan, ya jinason\u00f1ija na manaetiningo ya manlanga na taotao, ninafanmanman, ya ayonae matungo na guinin ma\u00f1isija yan si Jesus.\n4:14 Ya anae malie y taotao ni y manajomlo na ma\u00f1isija manojgue, taya jafa si\u00f1a ujasangan contra ayo.\n4:15 Lao anae jatago sija na ufanjuyong gui dina\u00f1a, manasangane entre sija,\n4:16 Ileg\u00f1ija: Jafa tafatinas ni este sija na taotao? sa magajet na afamao na milagro mafatinas pot sija, ya manmamatungo esta ni todo ayo sija y ma\u00f1asaga Jerusalem; ya ti si\u00f1a tapune.\n4:17 Lao trabia mientras ti chachago matala\u00f1a gui entalo y taotao sija; nije taencatga sija, ya cha\u00f1ija fanma\u00f1angangane ni este na naan desde pago.\n4:18 Ya jaagang sija, ya jaencatga na sencha\u00f1ija sumasangan, ni ufanmamanag\u00fce ni y naan Jesus.\n4:19 Lao si Pedro yan Juan manope ileg\u00f1ija: Jusga, cao tunas gui menan Yuus na inosgue\u00f1a jamyo qui si Yuus;\n4:20 Sa tisi\u00f1a inpelo na ti insangan y liniimame yan y jiningogmame.\n4:21 Ya anae esta jaencatga sija mas, jasotta, sa taya si\u00f1a jafa ujasoda para ujacastiga, pot causa y taotaosija; sa todo mumalag si Yuus pot ayo y mafatinas.\n4:22 Sa y taotao ni y anae mafatinas este y milagron y jinelo, mas di cuarenta a\u00f1os inamco\u00f1a.\n4:23 \u00b6 Ya anae masotta na ujanao, manjanao para y mangachong\u00f1ija, ya jasangane todo ni y mansinangane sija ni y magas mamale yan y manamco.\n4:24 Ya anae jajungog sija ayo, jajatsa y inagang\u00f1ija para as Yuus, ileg\u00f1ija: O Se\u00f1ot, jago Yuus, ni y fumatinas y langet, yan y tano, yan y tase, yan todo y mangae gui sanjalom\u00f1ija;\n4:25 Ni y pot Espiritu Santo ni y pachot y tentagomo as David ilegmo: Sa jafa y Gentiles na manlalalo, ya y taotao sija manmanjaso ni y taebale na g\u00fcinaja?\n4:26 Y ray sija gui tano manotojgue julo, ya y magalaje sija manda\u00f1a contra y Se\u00f1ot, yan contra si Cristo\u00f1a.\n4:27 Sa magajet na gui este siuda contra y santos na Tentagomo as Jesus, ni y unpalalae; todo si Herodes, yan Poncio Pilato, yan y Gentiles yan y taotao guiya Israel, manda\u00f1a,\n4:28 Para ujafatinas jafa y tinancho antes y canaemo, yan y consejumo para ususede.\n4:29 Ya pago, O Se\u00f1ot, lie y amenaso\u00f1ija: ya unnae y tentagomo sija, na contodo y minatatnga ujasangan y sinanganmo,\n4:30 Mientras unjujuto mona y canaemo para umajomlo; ya para y se\u00f1at yan mannamanman umafatinas pot y naan y santos na Tentagomo as Jesus.\n4:31 Ya anae munjayan manmanaetae, y lugat anae mandada\u00f1a mayengyong; ya todos manbula ni y Espiritu Santo, ya manmatatnga jasangan y sinangan Yuus.\n4:32 \u00b6 Ya y inetnon g\u00fcije sija ni y manmanjonggue, manunoja na corason yan unoja na ante: ni uno guiya sija ualog iyo\u00f1a ayo y jasagagaye; lao todo y g\u00fcinaja manparejo iyon\u00f1ija.\n4:33 Yan dangculo na ninasi\u00f1a na manmannae y apostoles testimonio ni y quinajulo y Se\u00f1ot Jesus: ya megae na grasia gaegue gui jilo\u00f1ija todos.\n4:34 Ya ni uno guiya sija nesesitao; sa todo ayo sija y mangaeiyo tano pat guma, jabende ya jachule y balen ayo y binenden\u00f1ija,\n4:35 Ya japolo gui adeng y apostoles sija: ya manmapapatte cada taotao jafataemano y janesesita.\n4:36 \u00b6 Ayonae si Jos\u00e9, ni y mafanaan ni y apostoles Barnab\u00e9 (ni y comoqueileg\u00f1a, lajin consuelo) ni y Lebita, taotao Chipre,\n4:37 Guaja tano\u00f1a, ya jabende, ya jachule y salape, ya japolo gui adeng apostoles sija.\n5:1 LAO un taotao naan\u00f1a si Ananias, yan si Safira asagua\u00f1a, na jabende g\u00fcinajan\u00f1ija,\n5:2 Ya janana palo gui bali\u00f1a, ya y asagua\u00f1a jatungo ja locue ayo, ya jachule un patteja ya japolo gui adeng y apostoles.\n5:3 Lao si Pedro ileg\u00f1a: Ananias, sa jafa na janabula si Satanas y corasonmo para undague y Espiritu Santo, yan unnana palo gui balen y tano?\n5:4 Mientras sumasaga, ada ti iyomo? ya anae munjayan mabende, ada taeg\u00fce gui ninasi\u00f1amo? sa jafa na unjaso este gui corasonmo? ti y taotao undague, na si Yuus.\n5:5 Ya anae jajungog si Ananias este na finijo, podong papa ya matae: ya dangculon minaa\u00f1ao mato gui jilo ayo sija todo y jumujungog este na g\u00fcinaja.\n5:6 Ya mabalutan ni y manfamaguon na lalaje, ya machule juyong y majafot.\n5:7 \u00b6 Ya anae malofan buente tres oras, jumalom y asagua\u00f1a, ti jatungo jafa guinin mafatinas.\n5:8 Ya si Pedro ileg\u00f1a nu g\u00fciya: Sanganeyo cao inbende y tanomiyo pot un tanto. Ya g\u00fciya ileg\u00f1a: Junggan pot ayo na tanto.\n5:9 Ayonae si Pedro ileg\u00f1a: Jafa na umatungo jamyo para intienta y Espiritu y Se\u00f1ot! estag\u00fciyaja gui petta y adeng ayo sija y jumafot y asaguamo, ya umachule jaojuyong.\n5:10 Ayonae enseguidas podong papa gui adeng\u00f1a ya matae; ya y manfamaguon na lalaje manjalom ya masoda g\u00fce na matae, ya machule ya majafot gui oriyan y asagua\u00f1a.\n5:11 Ya mato dangculon minaa\u00f1ao gui jilo todo y iglesia, yan y jilo todo ayo sija y jumujungog estesija.\n5:12 \u00b6 Ya pot y canae y apostoles sija, megae na se\u00f1at yan mannamanman manmafatinas gui entalo taotao; ya sija todos manda\u00f1a gui un jinasoja gui coridot Salomon.\n5:13 Ya y palo sija, ni un taotao malago duma\u00f1ae sija; lao y taotao manafandangculo sija.\n5:14 Ya y manmanjonggue gui Se\u00f1ot, mas maaumenta y linajyan parejoja y lalaje yan y famalaoan;\n5:15 Ya enao na sija manmangongone malango gui chalan sija, ya manmapopolo gui cama yan y camiya, na para, yaguin malofan si Pedro, y anineng\u00f1a ufanjinemeja palo guiya sija.\n5:16 Ya ayonae manmato locue linajyan taotao guinin y siuda, gui oriyan Jerusalem, manmangongone megae na manmalango, yan ayo sija y ninafa\u00f1achatsaga ni y man\u00e1placha na espiritu: yan manafanjomlo sija.\n5:17 \u00b6 Ya anae y magas na pale tomojgue julo, yan todo ayo sija y mangachochong\u00f1a (ni y inetnon Saduseo) ya manbula inigo.\n5:18 Ya japolo canae gui jilo y apostoles, ya jacone gui calaboson y publico.\n5:19 Lao y angjet y Se\u00f1ot anae esta puenge, jababa y pettan y calaboso ya manquinene sija, ya ileg\u00f1a:\n5:20 Janao fanojgue gui jalom y guimayuus, ya insangane y taotao todo y sinangan este na Lin\u00e2l\u00e2.\n5:21 Ya anae jajungog sija ayo, manjalom gui guimayuus, taftataf gui egaan, ya manmamanag\u00fce. Lao anae mato y magas mamale, yan ayo sija y mangachochong\u00f1a, janafanmaagange y sinedrio yan todo y compa\u00f1ia ni mamapagot ni y famaguon Israel, ya jatago para y calaboso para ujacone sija.\n5:22 Lao anae manmato y ofisiat sija gui calaboso, ti manmasoda sija; ya manalo tate ya manma\u00f1angane,\n5:23 Ileg\u00f1ija: Y calaboso, magajet na inseda majujuchomja todo, ya y manmamamumulan manestabaja na manotojgue gui jiyong potta: lao anae inbaba, taya taotao inseda gui sanjalom.\n5:24 Anae y capitan y guimayuus, yan y manmagas mamale, jajungog este na sinangan ninafanestotba sa ti jatungo manonae ufanjuyong.\n5:25 Lao mato uno ya mansinangane sija, ileg\u00f1a: Ayo sija na taotao y inpelo gui calaboso, mangaegue gui guimayuus na manmamananag\u00fce ni y taotao sija.\n5:26 Ayonae jumanao y capitan yan y manmagas sija, ya manmacone sija, ti manmaafuetsas, sa manmaa\u00f1ao ni y taotao sija, sa noseaja ufanmadago ni acho.\n5:27 Ya anae manmacone sija, manmapolo gui menan y sinedrio ya manfinaesen ni y magas na pale,\n5:28 Ileg\u00f1a: Inguesencatga jamyo na chamiyo fanmamananag\u00fce ni este na naan. Ya estag\u00fce inbula Jerusalem ni y finanag\u00fcenmiyo. Ya jinasonmiyo na inchile y j\u00e2g\u00e2n este taotao gui jilomame.\n5:29 Ya manope si Pedro, yan y palo na apostoles, ileg\u00f1ija: Nesesita na taosgue\u00f1a si Yuus finena qui y taotao sija.\n5:30 Y Yuus y ma\u00f1aenata sija, janacajulo si Jesus ni ayo y inpino, yan incana gui trongcon jayo.\n5:31 Guiya jinatsa as Yuus gui agapa na canae\u00f1a, para u-Prinsipe yan u-Satbadot, para unae sinetsot iya Israel, yan inasiin y isao.\n5:32 Ya jame testigo ni este sija na g\u00fcinaja; yan y Espiritu Santo locue, ni y si Yuus numae ayo sija y umosgue gue.\n5:33 \u00b6 Ya anae jajungog sija ayo, manchinachat asta y corason\u00f1ija, ya manaseyo para ufanmapuno sija.\n5:34 Ayonae tumojgue julo uno gui sinedrio, un Fariseo, ni y naan\u00f1a si Gamaliel, na magas y lay, ya maonra ni y taotao todo; ya manago na umanafanlasuja didide ayo sija taotao.\n5:35 Ya ileg\u00f1a nu sija: Jamyo lalajen, Israel, adaje jamyo jafa jinasonmimiyo para infatinas ni este sija na taotao.\n5:36 Sa antes di este sija na jaane cajulo si Teudas, janabanidoso g\u00fci taeg\u00fcije y jaye na taotao; ya iya guiya nae manguaguato un manadan lalaje, guaja buente cuatro sientos manda\u00f1a sijaja; ni y mapuno; yan todo ayo sija y umosgue g\u00fce manmachalapon ya manjuyong sin jafa.\n5:37 Ya despues di este na taotao, cajulo si Judas na taotao Galileo, gui jaanen y manmaempadrona; ya jacone un manada gui tate\u00f1a: ya g\u00fciya locue malingo; yan todo ayo sija y umosgue g\u00fce manmachalapon.\n5:38 Lao pago jusangane jamyo: Insetta este sija na taotao, ya inpelo sijaja; sa este na pinagat, pat este na chocho, yaguin guinin y taotao, ufanmayute,\n5:39 Lao yaguin as Yuus, ti si\u00f1a inyilang, sa noseaja infanmumo contra si Yuus.\n5:40 Ya manafamaulegja, ya anae manmaagang y apostoles guiya sija, manmasaulag ya manmatago na cha\u00f1ija sumasangan y naan Jesus, ya manmapolo na ujafanjanao.\n5:41 Enao mina manjanao gui menan y sinedrio, mansenmagof sa japolo na ujamerese pumadese y minamajlao pot y naan Jesus.\n5:42 Ya todo y jaane sija, ti mandescacansa manmamanag\u00fce yan manma\u00f1angane as Jesus ni y Cristog\u00fce, gui guimayuus, yan y iyasija.\n6:1 YA ayo sija na jaane anae lumamegae y disipulo sija, mangogonggong y Helenitas sija contra y Hebreo sija, sa y manbiuda guiya sija, ti manmaatiende gui sinetbe\u00f1ija cada jaane.\n6:2 Ayonae y dose, jaagang y manadan disipulo guato guiya sija, ya ileg\u00f1ija: Ti tunas na tapolo y sinangan Yuus, ya tasetbe y lamasa sija.\n6:3 Enaomina ma\u00f1elo, aligao entre jamyo siete na taotao ni y manmauleg, ni y manbula Espiritu, yan minejnalom, ya tapolo para este na chocho.\n6:4 Lao jita, tasigueja fitme y manmanaetae, yan y sinetbe y sinangan.\n6:5 Ya ayo na sinangan, ninafanmagof y manada todo; ya maayeg si Esteban, un taotao na bula jinenggue yan Espiritu Santo, yan si Felipe, yan si Pr\u00f3coro, yan si Nicanor, yan si Tim\u00f3n, yan si Parmenas, yan si Nicol\u00e1s proseliton Antioquia.\n6:6 Ya manmaplanta gui menan y apostoles: ya anae munjayan manmanaetae, japolo y canae\u00f1ija gui jilo\u00f1ija.\n6:7 Ya y sinangan Yuus lumalamegae; ya y disipulo megae manmaumenta\u00f1a guiya Jerusalem; ya dangculon manadan mamale locue, manmanosgue ni y jinenggue.\n6:8 \u00b6 Ya si Esteban, bula y grasia yan ninasifia, jafatinas namanman na milagro yan se\u00f1at gui entalo y taotao sija.\n6:9 Lao guaja mangajulo g\u00fcije gui sinagoga ni y manmafanaan sinagogan Libertinos, yan Sireneo sija, yan Alejandrino sija, yan ayo sija iya Silisia, yan Asia, managuaguat yan si Esteban.\n6:10 Lao tisi\u00f1a macontra y tiningo, yan y Espiritu ni y jasangan.\n6:11 Ya manmasusuug y taotao sija na ujaalog: Injingogja g\u00fce na jasangan y chinatfino contra si Moises, yan contra si Yuus.\n6:12 Ya manafangalamten y taotao sija, yan y manamco, yan y escribasija; ya manmato guiya g\u00fciya, ya macone g\u00fce guato gui sinedrio,\n6:13 Ya manmamalo testigo na ti magajet, ni ileg\u00f1ija: Este na taotao ti malago bumasta cumuentos chinatfino contra este y santos na lugat, yan contra y tinago:\n6:14 Sa injingogja gue ileg\u00f1a, na este y as Jesus taotao Nasaret uyulang este na lugat, yan utulaeca, y costumbre ni y jaentregajit si Moises.\n6:15 Ya todo ayo sija y manmatatachong gui sinedrio, maaatan g\u00fce, ya malie y mata\u00f1a na calang matan angjet.\n7:1 AYONAE ileg\u00f1a y magas mamale: Taeg\u00fcine este sija?\n7:2 Ya g\u00fciya ileg\u00f1a: Ma\u00f1elujo lalaje yan ma\u00f1aena, ecungog. Si Yuus y minalag fumatoig\u00fce y tatata as Abraham anae estatabaja guiya Mesopotamia, antes di usaga Charran.\n7:3 Ya ileg\u00f1a nu g\u00fciya: Suja gui tanomo yan y manparientesmo, ya maela jalom gui tano ni y finanuejo nu jago.\n7:4 Ya g\u00fciya jumanao juyong gui tano y Chaldeosija, ya sumaga Charran: ya desde ayo, anae matae si tata\u00f1a, ninamalofang\u00fce as Yuus g\u00fcine mague na tano anae ma\u00f1asaga jamyo pago.\n7:5 Ya ti ninae g\u00fce jafa na erensia\u00f1a g\u00fcije, aje, taya ni para upolo y adeng\u00f1a gui jilo\u00f1a: lao prinemete g\u00fce na uninae para g\u00fcinaja\u00f1a, yan y semiya\u00f1a despues di g\u00fciya, sa g\u00fciyaja trabia tataepatgon.\n7:6 Ya si Yuus jasangan taeg\u00fcine, Na y semiya\u00f1a utaotao juyong gui ti tano\u00f1a; yan manmacone ya manmancautiba, ya manmatrata taelaye cuatro sientes a\u00f1os.\n7:7 Ya y nasion ni y manmancautiba, bae jujusga, ileg\u00f1a si Yuus; na despues di ayo, ufanmamaela juyong ya guajo jumasetbe g\u00fcine na lugat.\n7:8 Yan manae g\u00fce ni y traton sirconsision: ya si Abraham jalilis si Ysaac, ya masirconsida g\u00fce gui mina ocho na jaane; ya si Ysaac jalilis si Jacob; ya si Jacob jalilis y dose na patriarcasija.\n7:9 Ya y patriarca sija pot y inigo\u00f1ija, mabende si Jos\u00e9 guiya Egipto: lao si Yuus estaba guiya g\u00fciya,\n7:10 Ya ninalibre g\u00fce todo gui chinatsaga, yan ninae g\u00fce finaborese yan tiningo, gui menan Faraon, ray guiya Egipto; yan ninamagalaje g\u00fce guiya Egipto, yan todo y guima\u00f1a.\n7:11 Ayonae mato ni\u00f1alang todo gui tano Egipto yan Charran, yan dangculon chinatsaga: ya y ma\u00f1aenata ti manma\u00f1oda nengcano\u00f1ija.\n7:12 Lao anae si Jacob jajungog na guaja trigo guiya Egipto, jatago y ma\u00f1aenata finenana na biaje.\n7:13 Ya y mina dos biaje, matungo si Jos\u00e9 ni y ma\u00f1elu\u00f1a: ya y parientes Jos\u00e9 janatungo si Faraon.\n7:14 Ya manago si Jos\u00e9 na umaagange si tata\u00f1a as Jacob para iya g\u00fciya, yan todo y manparientes\u00f1a, setentaisinco na taotao.\n7:15 Ya si Jacob jumanao papa Egipto, ya matae g\u00fcije yan y ma\u00f1aenata sija.\n7:16 Ya manmachule guato Siquem, ya manmapolo gui naftan, ni y finajan Abraham pot salape, gui famaguon Emmor guiya Siquem.\n7:17 Lao anae esta jijot y tiempon y promesa, ni y si Yuus manjula as Abraham, ya y taotao lumamegae, yan manlajyan guiya Egipto,\n7:18 Asta qui y otro ray cajulo, ya ti jatungo si Jos\u00e9.\n7:19 Este jausa y malama\u00f1a\u00f1a gui manparientesta, yan jatrata taelaye y ma\u00f1aenata, sa janafanmayute y famaguon\u00f1ija ni y pago fina\u00f1ago para cha\u00f1ija fanlal\u00e2l\u00e2.\n7:20 Ya ayo na tiempo nae mafa\u00f1ago si Moises, ya sumenbonito; ya mapogsae gui guima tata\u00f1a tres meses.\n7:21 Ya anae mayute, y jagan Faraon jumoca, ya pinegsae para laji\u00f1a.\n7:22 Ya si Moises, maeyag ni y todo y tiningo y taotao Egipto, ya mangaeninasi\u00f1a\u00f1a y fino\u00f1a yan y checho\u00f1a sija.\n7:23 Ya anae cana jacumple cuarenta a\u00f1os y saca\u00f1a, mato gui corason\u00f1a na ubisita y ma\u00f1elu\u00f1a ni y famaguon Israel.\n7:24 Ya jalie uno guiya sija ni y japadese y maltrato, ya jadefiende y mumatrata, ya japuno y taotao Egipto.\n7:25 Sa pinelu\u00f1a na jatungo y ma\u00f1elu\u00f1a na uninafanlibre as Yuus ni y canae\u00f1a; lao ti jatungo sija.\n7:26 Ya y inagpa\u00f1a na jaane, jafanue sija nu g\u00fciya anae managuaguat, ya malago na unaunoja talo sija, ileg\u00f1a: Se\u00f1ores, jamyo ma\u00f1elo; jafa na mananataelaye y uno yan y otro?\n7:27 Lao ayo y minalalamen y tiguang\u00f1a, jachoneg\u00f1aejon, ileg\u00f1a: Jaye munamagas jao gui jilo mame?\n7:28 Malago jao unpunoyo taeg\u00fcije anae unpuno nigap y taotao Egipto?\n7:29 Ya ninafalago si Moises ni este na sinangan, ya tumaotao juyong gui tano Madian, gui anae jalilis y dos na laji\u00f1a.\n7:30 Ya anae jacumple cuarenta a\u00f1os, mato guiya g\u00fciya un angjet gui jalomtano gui egso Sinae, gui ma\u00f1ila y guafe gui jalom y trongcon chaguan.\n7:31 Ya anae jalie ayo si Moises, ninagosmanman ni y linii\u00f1a; ya anae lumajijot para ugueslie, y inagang y Se\u00f1ot mato guiya g\u00fciya,\n7:32 Ileg\u00f1a: Guajo y Yuus y ma\u00f1aenamo, y Yuus Abraham, yan y Yuus Ysaac, yan y Yuus Jacob. Lao si Moises manlalaolao, ya ti si\u00f1a jaatan.\n7:33 Ya y Se\u00f1ot ileg\u00f1a nu g\u00fciya: Pula y sapatosmo gui adengmo; sa y lugat anae tumotojgue jao, santos na oda.\n7:34 Sa seguro julie, y manmasapet y taotaojo guiya Egipto, yan jujungog y inigong\u00f1i\u00f1ija, ya tumunogyo para junafanlibre sija. Ya pago maela jao, sa jutago jao guato Egipto.\n7:35 Este y as Moises ni y jarechasa ileg\u00f1ija: Jaye munamagas jao yan unjues? G\u00fciya tinago as Yuus na umagas yan uninafanlibre pot y canae y angjet ni y mafato guiya g\u00fciya gui jalomtano.\n7:36 G\u00fciya chumule sija juyong, ya despues manfinanue ni y namanman, yan se\u00f1at sija gui tano Egipto, yan y Tasen Agaga, yan y jalomtano cuarenta anos.\n7:37 Este ayo y as Moises, ni y ileg\u00f1a ni y famaguon Israel: Y Yuusmiyo janacajulo un profeta guiya jamyo gui ma\u00f1elunmiyo taeg\u00fcine iya guajo.\n7:38 Este ayo y estaba gui inetnon, gui jalomtano, yan y angjet ni y cumuentuse g\u00fce gui egso Sinae, yan y ma\u00f1aenata; ni y rumesibe y nal\u00e2l\u00e2 na tinago para ufanmanaejit.\n7:39 Ni y ma\u00f1aenata ti manmalago jaosgue lao mayute juyong guiya sija, ya y corason\u00f1ija manalo tate Egipto,\n7:40 Ileg\u00f1ija as Aaron: Fatinasejam Yuus para ujanao gui menanmame, as este y as Moises ni y cumonejam juyong gui tano Egipto, ti intingo jafa ujuyong.\n7:41 Ya sija manmamatinas un tatnero, ya machule y inefrese para idolo sija, g\u00fcije sija na jaane, ya ninafansenmagof ni y checho y canae\u00f1ija.\n7:42 Ayonae jabira si Yuus, ya japolo na ujaadora y inetnon y langet; taeg\u00fcije esta matugue gui leblon y profeta: O jamyo ni y guima Israel, inofreseyo pinino g\u00e2g\u00e2 sija yan inefrese sija gui cuarenta a\u00f1os gui jalomtano?\n7:43 Yan injatsa y tabemaculon Moloc, yan y estreyas y Yuus Ref\u00e1n, jechura sija ni y infatinas para inadora sija; ya guajo juchule jamyo mas chago qui Babilonia.\n7:44 Y ma\u00f1aenata, guaja ni y tabernaculon y testimonio gui jalomtano, taeg\u00fcije tinancho\u00f1a ni ileg\u00f1a as Moises na ufatinas taemanoja na jechura y linii\u00f1a.\n7:45 Ni y ma\u00f1aenata locue gui tiempo\u00f1ija a machule jalom yan si Josu\u00e9 anae jumalom gui erensian y Gentiles, ni y si Yuus yumute juyong gui menan y ma\u00f1aenata, asta y jaanen David;\n7:46 Ni y sumoda finaborese gui menan Yuus, yan jagagao na ualiligao tabernaculo para si Yuus Jacob.\n7:47 Lao si Salomon fumatinase g\u00fce un guma.\n7:48 Sa y Gueftaquilo, ti sumasaga gui guima sija ni y finatinas canae; taeg\u00fcije y sinangan y profeta.\n7:49 Y langet tronujo, ya y tano fa\u00f1ajangan y papa adengjo; jafa na guma injatsayeyo? ileg\u00f1a y Se\u00f1ot; pat jafa na sagayan nae jusaga?\n7:50 Ada ti y canaejo fumatinas todo este sija na g\u00fcinaja?\n7:51 Jamyo ni y gaetongjo tiso, yan ti manmasirconsida y corason yan y talanga, sa siempre incontra y Espiritu Santo; taeg\u00fcije y checho y ma\u00f1aenanmiyo inchecheg\u00fce.\n7:52 Jaye gui profeta ti japetsigue y ma\u00f1aenanmiyo? ya japuno ayo sija y manma\u00f1angangane antes ni y mamamaela Uno na Tunas; ya jamyo pago inentrega, yan inpino;\n7:53 Ni y inresibe y tinago pot y inareglan y angjet, ya ti inadaje.\n7:54 \u00b6 Ya anae jajungog estesija, manchinachat asta y corason\u00f1ija, ya janafa\u00f1egcheg y nifen\u00f1ija guiya g\u00fciya.\n7:55 Lao g\u00fciya, bula ni y Espiritu Santo, ya jaatan meton y langet, ya jalie y minalag Yuus, yan si Jesus na tumotojgue gui agapa na canae Yuus.\n7:56 Ya ileg\u00f1a, Estag\u00fce na julie y langet na mababa, ya y Lajin taotao tumotojgue gui agapa na canae Yuus.\n7:57 Ayonae sija managang ni y dangculo na inagang\u00f1ija, yan jatampe y talangan\u00f1ija, ya manmalago guato guiya g\u00fciya;\n7:58 Ya mayute juyong gui siuda, ya mafagas ni y acho: ya y testigo sija, japolo papa y magago\u00f1ija gui adeng un patgon na taotao na y naan\u00f1a si Saulo.\n7:59 Ya mafagas ni y acho si Esteban, ya jaaagang ni Yuus, ileg\u00f1a: Se\u00f1ot, Jesus, resibe y Espiritujo.\n7:60 Ya dumimo papa, ya umagang ni y dangculo na inagang\u00f1a, ileg\u00f1a: Se\u00f1ot, chamo pumopolo este na isao gui cuentan\u00f1ija; ya anae munjayan jasangan este, maego.\n8:1 YA si Saulo jaconsiente gui finatae\u00f1a. Ya ayo ni tiempo, guaja dangculon pinetsigue contra y iglesia guiya Jerusalem; ya todo sija, ni ti apostoles, manmachalapon gui tano Judea, yan Samaria;\n8:2 Ya y mandeboto na taotao, macatga si Esteban para umajafot, ya dangculo inigung\u00f1ija pot g\u00fciya.\n8:3 Ya si Saulo jayulang y inetnon mangilisyano, ya jumalom gui cada guma, ya jabatatangga y lalaje yan y famalaoan para ufanmapreso.\n8:4 Enaomina ayo sija y manmachalapon, manjanao para todo y lugat, ya japredidica y sinangan.\n8:5 Ayonae si Felipe mapos papa gui siuda Samaria, ya japredica guiya sija si Cristo.\n8:6 Ya y linajyan taotao sija, manunoja, ya maatituye ayo sija y sinangan Felipe, anae malie yan majungog y se\u00f1at ni y finatinas\u00f1a.\n8:7 Sa megae y man\u00e1placha na espiritu, manaagang ni y dangculo na inagang, yan manjujuyong g\u00fcije todo gui anae ma\u00f1asaga; yan megae na manparalitico, yan mancojo, manafanjomlo.\n8:8 Ya guaja un dangculon minagof g\u00fcije na siuda.\n8:9 \u00b6 Lao guaja un taotao g\u00fcije na siuda, na y naan\u00f1a si Simon; ya antes ni tiempo, jaencanta yan jafababa y taotao sija ni y magica\u00f1a guiya Samaria, japolo g\u00fce na g\u00fciya uno dangculo.\n8:10 Ya todo umatituye, desde y diquique asta y dangculo, ileg\u00f1ija: Este na taotao, y dangculo na ninasi\u00f1an Yuus.\n8:11 Ya mantituye, sa apmam na tiempo na numamanman ni y magica\u00f1a.\n8:12 Lao anae manmanjonggue as Felipe ni y japredica y ebangelio y raenon Yuus, yan y naan Jesucristo, manmatagpange todo, lalaje yan famalaoan.\n8:13 Ya si Simon manjonggue locue; ya anae matagpange, sumisijaja yan Felipe, ya ninamanman anae jalie y milagro yan y se\u00f1at sija ni y manmafatinas.\n8:14 \u00b6 Ya y apostoles, ni y manestataba Jerusalem anae majungog na iya Samaria jaresibe y sinangan Yuus, matago guato si Pedro yan si Juan;\n8:15 Ya anae manmato guato, jatayuyute sija, para ujaresibe y Espiritu Santo:\n8:16 (Sa trabia ti tumutunog gui jilo una guiya sija; sa manmatagpangeja pot y naan y Se\u00f1ot Jesus).\n8:17 Ayonae japolo y canae\u00f1ija gui jilo\u00f1ija, ya maresibe y Espiritu Santo.\n8:18 Ya anae jalie si Simon na pot y japolo y canae\u00f1ija y apostoles, manmannae ni y Espiritu Santo, jaofrese sija salape,\n8:19 Ileg\u00f1a: Naeyo locue ni este na ninasi\u00f1a, ya masqueseaja jaye nae jupolo y canaejo, uresibe y Espiritu Santo.\n8:20 Lao si Pedro, ileg\u00f1a nu g\u00fciya: Y salapemo ufalingo yan jago, sa jinasomo na y ninaen Yuus mafafajan salape.\n8:21 Taya pattemo ni suertemo g\u00fcine, sa y corasonmo ti tunas gui menan Yuus.\n8:22 Enaomina fa\u00f1otsot ni este y tinaelayemo, ya untayuyute si Yuus, yaguin si\u00f1a maasie jao ni y jinason y corasonmo.\n8:23 Sa julie na gaegue jao gui lalaet y minalaet, yan y guineden y tinaelaye.\n8:24 Ayonae manope si Simon, ya ileg\u00f1a: Tayuyuteyo gui Se\u00f1ot, ya cha\u00f1ija fanmafato guiya guajo ni uno gui este sija sinanganmiyo.\n8:25 \u00b6 Enao mina sija, anae guinin janae testimonio yan jasangan y sinangan y Se\u00f1ot, manalo guato Jerusalem, y japredica y ebangelio gui megae na sengsong y taotao Samaria sija.\n8:26 Ya y angjet y Se\u00f1ot jacuentuse si Felipe ileg\u00f1a: Cajulo, ya unjanao guato gui sanjaya gui chalan ni y jumajanao desde Jerusalem, asta Gasa ni y desierto.\n8:27 Ya cajulo, ya mapos; ya estag\u00fce un taotao Etiopia na eunuco na gaeninasi\u00f1a na dangculo gui papa Candase raynan taotao Etiopia sija, ya g\u00fciya encatgao todo ni y g\u00fcinajan y ray na, ya mato Jerusalem para ufanadora.\n8:28 Ya tumalo guato, ya matachong gui jilo y iyo\u00f1a carruaje ya jataetae y profeta Isaias.\n8:29 Ya y Espiritu ileg\u00f1a as Felipe: Janao jijot ya unda\u00f1ae y carruaje.\n8:30 Ya malago guato guiya g\u00fciya si Felipe, ya anae jajungog na jatataetae y profeta Isaias, ileg\u00f1a: Untungo jafa tinaetataemo?\n8:31 Ya ileg\u00f1a: Jafa taemano si\u00f1ayo yaguin taya fumanag\u00fceyo? ya jagaogao na ucajulo ya ujasija matachong.\n8:32 Ya y lugat gui Tinigue ni y jatataetae, taeg\u00fcine: Macone taeg\u00fcije y quinilo yaguin macone para umapuno; yan parejo yan y cotdero ni y ti cumecuentos gui menan y dumadasae, taeg\u00fcejeja ti jabababa y pachot\u00f1a.\n8:33 Ya y inimitde\u00f1a nae y juisio\u00f1a munajanao; ya jaye usinangan claro y generasion\u00f1a? sa y lin\u00e2l\u00e2fia machule gui tano.\n8:34 \u00b6 Ya y eunuco jaope si Felipe ileg\u00f1a: Jutayuyut jao, jaye jasangangane y profeta ni este? g\u00fciyaja, pat otro taotao?\n8:35 Ayonae jababa si Felipe y pachot\u00f1a, ya jatutujon gui este na tinigue sigue di mapredica g\u00fce si Jesus.\n8:36 Ya mientras jumajanao gui jinanao\u00f1ija, manmato gui un janom; ya ileg\u00f1a y eunuco: Estag\u00fce janom; jafa uchomayo para jumatagpange?\n8:37 Ileg\u00f1a si Felipe: Yaguin unjonggue contodo y corasonmo, si\u00f1aja jao. Ya manope ileg\u00f1a: Jujonggue na si Jesucristo y Lajin Yuus.\n8:38 Ya manago na umanasaga y carruaje; ya tumunog y dos gui jalom janom, si Felipe yan y eunuco; ya tinagpange g\u00fce.\n8:39 Ya anae jumuyong guinin y janom, quinene si Felipe ni y Espiritun y Se\u00f1ot, ya ti linie ni y eunuco mas, lao jasigue y jinanao\u00f1a sumenmagof.\n8:40 Lao si Felipe esta masoda guiya Asoto; ya malofan inanaco todo manpredidica ebangelio gui siuda todos, asta qui mato g\u00fce guiya Sesarea.\n9:1 YA si Saulo, sisigueja di jumagong juyong y amenaso yan matadura contra y disipulon y Se\u00f1ot, ya mapos para y magas mamale,\n9:2 Ya jagagao catta, para Damasco gui sinagoga, para yaguin jasoda jaye g\u00fcine na Jinanao\u00f1a, masqueseaja, laje pat palaoan, si\u00f1a ucone preso para Jerusalem.\n9:3 Ya y jinanao\u00f1a, susede na matog\u00fce jijot Damasco; ya enseguidas manina gui oriya\u00f1a y candet guinen y langet;\n9:4 Ya podongg\u00fce gui jilo oda, ya jajungog y inagang na ileg\u00f1a nu g\u00fciya: Saulo, Saulo, sa jafa na unpetsisiguejayo?\n9:5 Ya ileg\u00f1a: Jaye jao Se\u00f1ot? ya ileg\u00f1a: Guajo si Jesus ni y unpetsisigue:\n9:6 Lao cajulo ya janao falag y siuda, ya ayonae unmasangane jafa unfatinas.\n9:7 Ya y taotao sija ni y mangachochong\u00f1a manojgue ya taya cuentos\u00f1ija; jajujungogja y inagang, lao taya taotao linii\u00f1ija.\n9:8 Ya si Saulo cajulo guinin y jilo oda; ya anae mababa y atadog\u00f1a taya jalie, lao mamantiene canae\u00f1a, ya macone guato Damasco.\n9:9 Ya sumaga g\u00fcije tres na jaane, ni manatan, yan ni chumocho, yan ni gumimen.\n9:10 \u00b6 Ya estaba g\u00fcije un disipulo guiya Damasco, na y naan\u00f1a si Ananias; sa g\u00fciya sinangane ni y Se\u00f1ot gui vision, ileg\u00f1a: Ananias; ya g\u00fciya ileg\u00f1a: Estag\u00fciyajayo Se\u00f1ot.\n9:11 Ya y Se\u00f1ot ileg\u00f1a nu g\u00fciya: Cajulo ya janao falag y caye ni y mafanaan tunas, ya unaligao y guima Judas, uno na y naan\u00f1a Saulo, taotao Tarso, sa estag\u00fce na mananaetae,\n9:12 Ya guinin jalie gui vision un taotao na y naan\u00f1a si Ananias, na mato ya japolo y canae\u00f1a guiya g\u00fciya para uninafanlie.\n9:13 Ya si Ananias, manope ileg\u00f1a: Se\u00f1ot, megae jujungog ni este na taotao, na megae na taelaye finatinas\u00f1a gui ma\u00f1antosmo guiya Jerusalem.\n9:14 Ya g\u00fcine na gaeninasi\u00f1a guinin y magas mamale, para ugode todo ayo sija y umaagang y naanmo.\n9:15 Lao y Se\u00f1ot ileg\u00f1a nu g\u00fciya: Janao unjanao; sa g\u00fciya y inayeg na nayan guiya guajo, para uchule y naanjo gui menan y Gentiles, yan y ray sija, yan y famaguon Israel:\n9:16 Sa guajo fumanue g\u00fce cuanto mandangculon g\u00fcinaja, na janesesita umasapet pot y naanjo.\n9:17 Ya si Ananias jumanao, ya jumalom gui guima; ya japolo y canae\u00f1a guiya g\u00fciya, ileg\u00f1a: Chelujo Saulo, y Se\u00f1ot as Jesus ni y mato guiya jago gui chalan anae mamamaela jao, jatagoyo para usi\u00f1a unlie, yan unbula ni y Espiritu Santo.\n9:18 Ya enseguidas manbasnag guinin y mata\u00f1a taeg\u00fcije y guenaf sija: ya manlie, ya cajulo ya matagpange.\n9:19 Ya anae chumocho ninametgot. Ya si Saulo g\u00fcije sija na jaane dumisipulo guiya Damasco.\n9:20 \u00b6 Ya enseguidas japredica gui sinagoga na si Jesus g\u00fciya y Lajin Yuus.\n9:21 Lao todo y jumungog g\u00fce, ninafanmanman ya ileg\u00f1ija: Ada ti este ayo y yumulang ayo sija y umagang este na naan guiya Jerusalem? ya guinin mato g\u00fcine pot enao na jinaso, para ucone ya ugode guato gui magas mamale.\n9:22 Lao si Saulo lumalametgotja, yan janafangadon y Judio sija ni y ma\u00f1asaga Damasco, sa jafanue na este si Cristo.\n9:23 \u00b6 Ya anae manmalofan megae na jaane, manda\u00f1a y Judio sija para umapuno g\u00fce.\n9:24 Lao y ninangga\u00f1i\u00f1ija, matungo gui as Saulo. Ya sija japupulanja y trangcasija, jaane yan puenge para umaquepuno g\u00fci.\n9:25 Ayonae macone puenge ni y disipulo, ya masajguane gui un canastra, ya manatunog gui quelat.\n9:26 \u00b6 Ya anae mato g\u00fce Jerusalem, malago na uda\u00f1ae y disipulo sija; lao sija manmaa\u00f1ao nu g\u00fciya, ya ti majonggue na disipulo g\u00fce.\n9:27 Lao quinene as Barnab\u00e9 guato gui disipulo sija, ya jasangane sija jaftaemano y linii\u00f1a ni y Se\u00f1ot gui chalan ya jacuentuse nu g\u00fciya, ya jaftaemano manpredica matatnga si Saulo g\u00fciya Damasco ni y naan Jesus.\n9:28 Ya ma\u00f1isijaja manjuyong yan manjalom guiya Jerusalem.\n9:29 Ya japredica matatnga ni y naan Se\u00f1ot Jesus: ya jasangan managuaguat yan y Helenista sija; lao maquequepunoja g\u00fce nu sija.\n9:30 Ya anae matungo ni y ma\u00f1elo, macone g\u00fce para Sesarea, ya matago para Tarso.\n9:31 \u00b6 Ya mangaepas todo y iglesia sija guiya Judea, yan Galilea, yan Samaria, ya manmamanag\u00fce, ya manmamomocat gui minaa\u00f1ao as Se\u00f1ot, yan y minagof y Espiritu Santo, lumamegae.\n9:32 \u00b6 Ya susede anae malofan si Pedro gui todo y lugat, na matog\u00fce locue gui ma\u00f1antos ni y ma\u00f1asaga Lydda.\n9:33 Ya ma\u00f1oda g\u00fcije un taotao na y naan\u00f1a si Eneas, na esta ocho a\u00f1os gui cama, sa malango paralitico.\n9:34 Ya ileg\u00f1a si Pedro nu g\u00fciya: Eneas, si Jesucristo unninajomlo: cajulo ya unfamauleg y camamo. Ya enseguidas cajulo.\n9:35 Ya todo y ma\u00f1asaga guiya Lyyda yan. Saron, malie g\u00fce; ya jabira sija para y Se\u00f1ot.\n9:36 \u00b6 Ya guaja un disipulo guiya Joppe, na y naan\u00f1a Tabita: na comequeileg\u00f1a Dorcas; este na palaoan bula manmauleg na chocho, yan limosna sija ni y finatinas\u00f1a.\n9:37 Ya ayo sija na jaane, mumalango, ya matae; ya anae munjayan mafagase, mapolo gui aposento gui san jilo.\n9:38 Ya como jijot Lydda guiya Joppe, ya majungog ni y disipulo sija na gaegue g\u00fcije si Pedro, matago dos taotao para iya g\u00fciya, para umagagao: munga atrasao na ufato guiya jame.\n9:39 Ayonae cajulo si Pedro, ya jumanao ma\u00f1isija. Ya anae matog\u00fce, macone guato gui aposento gui san jilo; ya todo y manbiuda manotojgue gui oriya\u00f1a ya manatanges ya mafanue ni y magago sija ni y finatinas Dorcas anae manisija.\n9:40 Lao ninafa\u00f1uja as Pedro, ya dumimo ya manaetae; ya jabira g\u00fce guato gui tataotao, ya ileg\u00f1a: Tabita, cajulo. Ya jababa y atadog\u00f1a: ya anae jalie si Pedro matachong julo.\n9:41 Ya janae si Pedro ni y canae\u00f1a, ya jinatsa g\u00fce julo; ya si Pedro jaagang todo y ma\u00f1antos yan y manbiuda, ya japresenta na l\u00e2l\u00e2.\n9:42 Ya matungo todo guiya Joppe; ya megae manmanjonggue ni y Se\u00f1ot.\n9:43 Ya susede na sumaga si Pedro guiya Joppe megae na jaane gui guima un taotao na y naan\u00f1a si Simon titumo.\n10:1 YA estaba g\u00fcije un taotao guiya Sesarea na y naan\u00f1a si Cornelio, ya senturion y inetnon sendalo na mafanaan, inetnon Italiano.\n10:2 Deboto na taotao, yan maa\u00f1ao as Yuus contodo y guima\u00f1a, ni y janae limosna gui taotao, yan jatatayuyutja siempre si Yuus.\n10:3 Jalie gui vision claroja y angjet Yuus na mamamaela guiya g\u00fciya gui mina nuebe na ora gui jaane, ya ileleg\u00f1a nu g\u00fciya: Cornelio.\n10:4 Ya anae jaatan, ninamaa\u00f1ao, ya ileg\u00f1a: Jafa Se\u00f1ot? Ya ileg\u00f1a nu g\u00fciya: Y tinayuyutmo yan y limosnamo, manmato julo para umajaso gui menan Yuus.\n10:5 Ya pago, fanago lalaje para Joppe, ya umacone mague si Simon ni y apeyidu\u00f1a Pedro:\n10:6 G\u00fciya sumasaga yan un Simon titumo, na y guima\u00f1a gaegue gui oriyan tase.\n10:7 Ya anae mapos y augjet ni y cumuentutuse g\u00fce jaagang dos gui tentago\u00f1a gui guima\u00f1a yan un sendalo na deboto guiya sija, ni y maayuyuda g\u00fce siempre;\n10:8 Ya anae jasangane sija todo ni este na g\u00fcinaja, jatago sija para Joppe.\n10:9 \u00b6 Ya y inagpa\u00f1a anae manjajanao gui jinanao\u00f1ija, ya manjijot gui siuda, cajulo si Pedro gui jilo guma para ufanaetae, gui mina saes na ora.\n10:10 Ya mato y ni\u00f1alang\u00f1a, ya malago na uchocho: ya mientras mafamaulilique na\u00f1a nu sija, malingo y jinaso\u00f1a.\n10:11 Ya jalie y langet na mababa, yan un nayan na tumunog para iya g\u00fciya, taeg\u00fcije y dangculon sabanas na magogode y cuatro punta ya mapolo papa, gui jilo tano;\n10:12 Ya ma\u00f1a\u00f1ajguan todo clasen g\u00e2g\u00e2 ni y cuatro patas\u00f1ija, yan y g\u00e2g\u00e2 ni y mangucunanaf gui jilo y tano, yan y pajaro sija gui aire.\n10:13 Ya mato un inagang guiya g\u00fciya, ileg\u00f1a: Cajulo Pedro: puno ya uncano.\n10:14 Lao si Pedro ileg\u00f1a: Aje Se\u00f1ot; sa guajo ti guinen juchocho ni jafa na g\u00fcinaja ni y comun pat \u00e1placha.\n10:15 Ya y inagang mato guiya g\u00fciya talo gui mina dos biaje, ileg\u00f1a: Jafa y janagasgas si Yuus, chamo fumatitinas comun.\n10:16 Ya este mafatinas pot tres biaje; ya enseguidas y nayan machule julo talo gui langet.\n10:17 \u00b6 Ya mientras bumuebuente gui sumenjalom si Pedro ni y jafa linii\u00f1a na vision, estag\u00fciya sija y taotao ni y manmatago guinin as Cornelio, na manmamamaesen ni y guima Simon ya manotojgue gui trangca.\n10:18 Ya managang, ya manmamaesen cao sumasaga g\u00fcije si Simon ni y apiyidu\u00f1a Pedro.\n10:19 Ya mientras jajajaso si Pedro y vision, y Espiritu ileg\u00f1a nu g\u00fciya: Estag\u00fce tres taotao na maaliligao jao.\n10:20 Cajulo ya tunog papa, chamo bumuebuente na unjanao yan sija, sa guajo tumago sija.\n10:21 Ya si Pedro tumunog papa para ayo taotao sija ya ileg\u00f1a: Estag\u00fciyayo ni y inaliligao; jafa guaja na inaliligaoyo?\n10:22 Ya sija ileg\u00f1ija: Si Cornelio ni y senturion, un taotao na tunas yan maa\u00f1ao as Yuus, yan guaja mauleg na testimonio gui entalo todo y nasion y Judio sija, sa ninatungo as Yuus pot y Santos na angjet ni y tinago jao na unjalom gui guima\u00f1a, ya ufanjungog finijo guiya jago.\n10:23 \u00b6 Ya jaagang sija na ufanjalom, ya ufa\u00f1aga. Ya y inagpa\u00f1a jumanao si Pedro yan sija, yan palo gui ma\u00f1elo ni y manguinin Joppe maosgaejon g\u00fce,\n10:24 Ya y inagpa\u00f1a talo na jaane, manjalom Sesarea. Ya manninanangga as Cornelio, ya jaagange y manparientes\u00f1a yan y amigu\u00f1a sija ni y guesmanatungo.\n10:25 Ya susede anae jumalom si Pedro, na tinagam as Cornelio, ya dumimo papa ya inadora g\u00fce.\n10:26 Lao jinatsa as Pedro, ya ileg\u00f1a: Tojgue julo, sa guajo taotaojayo locue.\n10:27 Ya anae cumuecuentos y dos, jumalom, ya jasoda megae ni y manmato ya manda\u00f1a;\n10:28 Ya si Pedro ileg\u00f1a nu sija: Intingoja na ti combiene y Judios na taotao na uda\u00f1a patseno ufato gui otro na nasion; lao jasanganeyo si Yuus na chajo umaalog ni jaye na taotao na \u00e1placha, pat comun:\n10:29 Enaomina matoyo guiya jamyo, sin jafa na sinangan, enseguidas qui matagoyo. Ya jufaesen jamyo jafa malagonmiyo na innamaagangeyo?\n10:30 Ya si Cornelio ileg\u00f1a: Cuatro na jaane asta este na ora, estabayo juadadaje y mina nuebe na oran tinayuyut gui jalom gumajo, ya estaba un taotao na tumotojgue gui menajo na malag magagu\u00f1a.\n10:31 Ya ileleg\u00f1a: Cornelio, y tinayuyutmo majungog, yan y limosnamo manmajaso gui menan Yuus.\n10:32 Fanago para Joppe, ya umaagange si Simon, ni y apiyidu\u00f1a Pedro: na sumasaga gui guima un Simon titumo, gui oriyan tase;\n10:33 Enaomina enseguidas junamaagange jao; ya mauleg finatinasmo sa mato jao. Pago estag\u00fcejit todos gui menan Yuus, para injingog todo y tinago jao as Se\u00f1ot.\n10:34 \u00b6 Ayonae si Pedro, jababa y pachot\u00f1a, ya ileg\u00f1a: Jutungo magajet na si Yuus taya janasasajnge taotao.\n10:35 Lao gui todo na nasion masqueseaja jaye ni y maaa\u00f1ao nu g\u00fciya, yan jafatitinas y tininas, ayo jaguaeya.\n10:36 Y sinangan ni y janamanajanao si Yuus para y famaguon Israel, mapredica y pas pot si Jesucristo: (g\u00fciya y Se\u00f1ot para todo)--\n10:37 Ayo na sinangan, jamyo intingoja y masangan\u00f1aejon todo guiya Judea, ya matutujon guiya Galilea, despues di y tinagpange ni y japredica si Juan:\n10:38 G\u00fciya si Jesus Nasareno; jaftaemano si Yuus japalae ni y Espiritu Santo yan y ninasi\u00f1a: ya jumajanao ya jafatitinas y mauleg, yan janafanjomlo todo ayo sija y manchinichiguet ni y anite; sa sumisija yan Yuus.\n10:39 Ya jame mantestigo todo y g\u00fcinaja ni y finatinas\u00f1a gui tano Judios, yan iya Jerusalem; ayo y japuno sija, ya jacana gui trongcon jayo:\n10:40 G\u00fciya ninacajulo as Yuus gui mina tres na jaane, ya japolo ya ufinanue g\u00fce senclaroja,\n10:41 Ti para todo y taotao, lao para y testigo sija ni y manmaayeg antes as Yuus; junggan, para jita, ni y guinin manjita ma\u00f1ocho yan manguimen despues di cajulo guinin y manmatae.\n10:42 Ya jatagojit na tapredica gui taotao sija, yan tanamatungo na g\u00fciya tinancho as Yuus para ujuyong Jues y manlal\u00e2l\u00e2 yan y manmatae.\n10:43 Pot g\u00fciya na manmannae todo y profeta testimonio, na pot y naan\u00f1a, jayeja y jumongue g\u00fce uresibe inasiin y isao.\n10:44 \u00b6 Ya mientras jasanganja trabia si Pedro este sija na sinangan, y Espiritu Santo podong gui jilo ayo sija todo y jumujungog y sinangan.\n10:45 Ya ayo sija y manmasirconsida ni y manmanjonggue, ninafanmanman, ya megae manmato as Pedro, sa asta y Gentiles locue manmachudae ni y ninaen y Espiritu Santo.\n10:46 Sa jajungog na manguecuentos ni y jila\u00f1ija, ya manadangculo si Yuus. Ayonae manope si Pedro, ileg\u00f1a:\n10:47 Jaye si\u00f1a na taotao chumoma y janom para ti ufanmatagpange este sija y rumesibe y Espiritu Santo taeg\u00fcine iya jita?\n10:48 Ya jatago sija na ujafanmatagpange ni y naan Jesucristo. Ya matayuyut g\u00fce na ufa\u00f1aga unos cuantos na jaane.\n11:1 YA y apostoles yan y ma\u00f1elo ni y manestaba Judea, jajungog na y Gentiles jaresibe locue y sinangan Yuus.\n11:2 Ya anae mato si Pedro Jerusalem, managuaguat yan ayo sija y manmansirconsisida,\n11:3 Ileg\u00f1ija: Jago jumajalom jao gui ti manmasirconsida, yan manjajamyo ma\u00f1ocho.\n11:4 Lao si Pedro jasigue sumangane sija claro y sinesede, ileg\u00f1a:\n11:5 Estabayo gui siuda guiya Joppe na mananaetae; ya anae lalangoyo, julie y vision, un nayan tumunog, taeg\u00fcije y dangculo na sabanas, ni mapolo pot cuatro punta ni y tumunog guinin y langet; ya mato guiya guajo:\n11:6 Ya anae juatan ayo, ya jujaso, julie y cuatro patas\u00f1a na g\u00e2g\u00e2 gui tano, yan manmachaleg sija na g\u00e2g\u00e2, yan y mangucunanaf na g\u00e2g\u00e2, yan y pajaro sija gui aire.\n11:7 Ya jujungog locue y inagang na ileg\u00f1a nu guajo: Cajulo Pedro; puno ya uncano.\n11:8 Lao ilegco: Aje, Se\u00f1ot: sa taya comun, pat \u00e1placha guinin jumalom gui jalom pachotjo.\n11:9 Lao jaopeyo talo y inagang guinin y langet, ileg\u00f1a: Jafa y janagasgas si Yuus, chamo fumatitinas comun.\n11:10 Ya este mafatinas tres biaje: ya todo manmachule talo guato gui langet.\n11:11 Ya estag\u00fce enseguidas manotojgue g\u00fcije gui menan guma anae sumasagayo, tres na taotao, manmatago guinin Sesarea para iya guajo.\n11:12 Ya jatagoyo na judalalag sija ya chajo fumatitinas dinesparejo. Ya manjame yan este sija y saes na ma\u00f1elo, ya manjalomjam gui guima y taotao:\n11:13 Ya jasanganejam ni y linii\u00f1a ni y angjet ni y tumotojgue gui jalom guma\u00f1a, ya jaftaemano ileg\u00f1a nu g\u00fciya: Fanago taotao para Joppe, ya uncone si Simon ni y apiyidu\u00f1a Pedro;\n11:14 Ya unsinangane sinangan sija anae unsatbo; jago, yan todo y guimamo.\n11:15 Ya anae sigue di cumuentosyo, podong y Espiritu Santo gui jilo\u00f1ija, taeg\u00fcijeja gui jilota gui tutujon\u00f1a.\n11:16 Ayonae jujaso y sinangan y Se\u00f1ot, ni y ileg\u00f1a: Si Juan, magajet na managpapange ni y janom; lao jamyo infanmatagpange ni y Espiritu Santo.\n11:17 Sa yaguin manninae sija locue as Yuus y ninae, taeg\u00fcije y janaejit anae jumongguejit y Se\u00f1ot Jesucristo, ya jayeyo na si\u00f1a jucontra si Yuus?\n11:18 Ya anae jajungog sija estesija, manmamatquilo, ya manamalag si Yuus, ileg\u00f1ija: Magajet na janae locue si Yuus y Gentiles sinetsot para lin\u00e2l\u00e2.\n11:19 \u00b6 Ya ayo sija y manmachalapon pot y mapetsiguen ni y Esteban, manjanao asta Finesia, yan Chipre, yan Antioquia, ya taya nae japredica y sinangan na ayoja sija y Judios.\n11:20 Ya palo guiya sija taotao Chipre, yan Sirene, ya anae manmato Antioquia, manguentos yan y Griegosija, ya japredica y Se\u00f1ot Jesus.\n11:21 Ya ma\u00f1isijaja yan y canae y Se\u00f1ot; ya megae manmanjonggue ya jabira sija para y Se\u00f1ot.\n11:22 Ya mato este sija na notisia gui iglesia ni y estaba Jerusalem: ya matago si Barnab\u00e9, na ujanao asta Antioquia;\n11:23 Ya anae mato, ya jalie y grasian Yuus, magof g\u00fce; ya jasangane sija todo, na nu sinasuyen y corason\u00f1ija, unafanmeton sija gui Se\u00f1ot:\n11:24 Sa g\u00fciya mauleg na taotao, ya bula ni y Espiritu Santo, yan jinenggue: ya megae na taotao manmafato gui Se\u00f1ot.\n11:25 Ayonae mapos g\u00fce para Tarso, para ualigao si Saulo:\n11:26 Ya anae jasoda, jacone guato Antioquia. Ya un a\u00f1o di mandada\u00f1aja g\u00fcije yan iglesia, ya manmamananag\u00fce megae na taotao; ya y disipulo sija manmafanaan finena mangilisyano guiya Antioquia.\n11:27 \u00b6 Ya este sija na jaane, manmato profeta sija guinin Jerusalem para Antioquia,\n11:28 Ya tumojgue julo uno guiya sija, na y naan\u00f1a Agabo, ya janamatungo pot y Espiritu na uguaja un dangculon ni\u00f1alang gui todo y tano: ya umasusede gui tiempon Claudio Sesat.\n11:29 Ayonae y disipulo sija, cada uno jaftaemano y g\u00fcinaja\u00f1a, jadetetmina para umanamamaela inayuda para y ma\u00f1elo ni y ma\u00f1asaga Judea:\n11:30 Ya sija locue jafatinas, janamaela para y manamco pot y canae Barnab\u00e9 yan Saulo.\n12:1 YA ayoja na tiempo, y ray Herodes jaestira y canae\u00f1a para unafanlamen palo gui taotao iglesia.\n12:2 Ya japuno si Santiago chelun Juan ni y espada.\n12:3 Ya anae jalie na ninafanmagof y Judios, jasigue para ucone si Pedro locue. Ya ayo y jaanen y pan sin lebadura?\n12:4 Ya anae macone g\u00fce, japolo gui calaboso, ya jaentrega y diesisaes na sendalo para upinilan; majasusuye na despues di y pascua umaconie y taotao sija.\n12:5 Enao mina si Pedro mapongle gui calaboso: lao y iglesia ti pumapara manmanayuyut as Yuus pot g\u00fciya.\n12:6 Ya anae si Herodes canaja quinene gue, g\u00fcijeja na puenge anae estaba si Pedro na mamaego gui entalo y dos sendalo, ya magogode ni dos na cadena: ya y manmamumulan gui menan y petta, mapupulan y calaboso:\n12:7 Ya estag\u00fce, un angjet y Se\u00f1ot tumotojgue gui oriya\u00f1a, ya y candet manina gui jalom y cuatton calaboso: ya japanag si Pedro gui calaguag\u00f1a ya yinajo, ileg\u00f1a: Cajulo laguse, ya y cadena\u00f1a manbasnag guinin y canae\u00f1a.\n12:8 Ya y angjet ileg\u00f1a nu g\u00fciya: Dudog jao ya gode y dogamo: ya taeg\u00fcenao finatinas\u00f1a. Ya y angjet ileg\u00f1a nu g\u00fciya: Polo y magagumo guiya jago, ya dalalagyo.\n12:9 Ya jumanao juyong ya jadalalag, ya ti jatungo ayo cao magajet y finatinas y angjet; lao jinaso\u00f1a na manlie g\u00fce vision.\n12:10 Ya anae manmalofan gui finenana yan y mina dos na guatdia, manmato gui trangcan lulug ni y dumalalalaque y siuda; ni y mababa para sija sin jafa; ya manjanao juyong ya manmalofan gui inanaco un chalan; ya enseguidas jumanao y angjet guiya g\u00fciya.\n12:11 Ya anae esta manungo talo si Pedro, ileg\u00f1a: Pago nae jutungo na magajet na y Se\u00f1ot jatago y angjetna, na unalibreyo gui canae Herodes, yan todo y ninanggan y taotao y Judios.\n12:12 Ya anae jajaso este na g\u00fcinaja, mato gui guima Maria nanan Juan, ni y apiyidu\u00f1a Marcos; anae megae mandada\u00f1a ya manmananayuyut.\n12:13 Ya anae manyajo si Pedro gui pettan y trangca, un patgon na palaoan mato para umaope, na y naan\u00f1a si Rode.\n12:14 Ya anae jatungo na y inagang Pedro, ti jababa y trangca pot y minagof\u00f1a, lao malago jalom ya mansinangane na tumotojgue si Pedro gui menan y trangca.\n12:15 Ya ileg\u00f1ija nu guiya: Esta jao caduca. Lao g\u00fciya ileleg\u00f1aja: Junggan, magajet taeg\u00fcenao. Ayonae sija ileg\u00f1ija: Ayo y angjet\u00f1a.\n12:16 Lao si Pedro, sisigueja di manyajo: ya anae jababa malie g\u00fce, ya ninafansenlujan.\n12:17 Lao mansine\u00f1as as Pedro ni y canae\u00f1a na ufamacaca, ya mansinangane jaftaemano y Se\u00f1ot anae quinene g\u00fce juyong gui calaboso. Ya ileg\u00f1a: Janao ya unsangane si Santiago ni este sija na g\u00fcinaja, yan y ma\u00f1elo. Ya mapos ya malag y otro lugat.\n12:18 Ya enseguidas qui manana, ti didide na atboroto gui sendalo sija, manggue si Pedro.\n12:19 Ya anae jaaligao si Herodes si Pedro ya ti jasoda, janafanmaegsamina y manmanmamumulan ya manago na ufanmapuno. Ya jumanao papa guinin Judea para Sesarea, ya sumaga g\u00fcije.\n12:20 \u00b6 Ya si Herodes gosdangculo binibu\u00f1a ni y taotao Tiro yan Sidon: lao si ja manda\u00f1a un jinasoja para iya g\u00fciya, ya manatungo yan Blasto ni y camareron y ray, sa amigon\u00f1ija, ya manmangagao pas; sa y tano\u00f1ija manminantietiene ni y tano y ray.\n12:21 Ya un tinancho na jaane, minagago si Herodes ni y magagon ray, ya matachong gui tronu\u00f1a, ya jacuentuse sija un sinangan.\n12:22 Ya managang y taotao sija, ileg\u00f1ija: Inagang un yuus, ti inagang taotao.\n12:23 Ya enseguidas pinada ni y angjet y Se\u00f1ot, sa ti janae si Yuus minalag: ya quinano ni ilo ya matae.\n12:24 Lao y sinangan Yuus lumadangculo yan mumemegae.\n12:25 Ya si Barnab\u00e9 yan Saulo, tumalo guato guinin Jerusalem, anae munjayan y ministro\u00f1ija, yan jacocone ma\u00f1isija si Juan y apiyidu\u00f1a Marcos.\n13:1 YA estaba g\u00fcije gui ilesia guiya Antioquia, profeta sija yan maestro, sija: Barnab\u00e9, yan si Simeon ni y mafanaan Niger, yan si Lucio, taotao Sirene, yan si Manaen, ni y chamapogsae yan Herodes tetrarca, yan si Saulo.\n13:2 Ya mientras sija sumesetbe y Se\u00f1ot, yan manayuyunat, y Espiritu Santo ileg\u00f1a: Abatta guiya guajo Barnab\u00e9 yan Saulo para y checho anae guinin juagange sija.\n13:3 Ayonae anae esta manayunat yan manmanayuyut yan japolo y canae\u00f1ija gui jilo ayo sija, jatago sija na ufanjanao.\n13:4 \u00b6 Ya manmatago sija pot y Espiritu Santo, ya manunog para Seleusia; ya desde ayo mumamaya para Chipre.\n13:5 Ya anae mangaegue gui Salamina, japredica y sinangan Yuus gui sinagogan y Judiosija: ya ma\u00f1isijaja locue yan si Juan ni y sumesetbe sija.\n13:6 Ya anae jajanag\u00fce todo inanaco y isla asta Pafo, jasoda un taotao na cacana, fatso na profeta, Judio, na y naan\u00f1a si Bar-Jesus:\n13:7 Ni y estaba yan y magalajen y tano, si Sergio Paulo, gaetiningo na taotao; ya jaaagang si Barnab\u00e9 yan Saulo, sa malago na ujungog y sinangan Yuus.\n13:8 Lao manquinentra as Elymas, taotao na cacana (taeg\u00fcine nae comequileg\u00f1a y naan\u00f1a), jaaliligao na unamabira guinin jinenggue y magalaje.\n13:9 Ayonae si Saulo ni y naan\u00f1a locue Pablo, bula ni y Espiritu Santo, inaatanja g\u00fce,\n13:10 Ya ileg\u00f1a: O bula jao todo dinague, yan tinaelaye, jago lajin anite, jago enemigun todo y tininas, ada ti pumapara jao unnataelaye y tinas na chalan y Se\u00f1ot?\n13:11 Ya pago estag\u00fciya y canae y Se\u00f1ot gui jilomo, ya unbachet ya ti unlie y atdao pot un tiempo. Ya enseguidas podong gui jilo\u00f1a y nublado ya jomjom, ya jumanao manaligao jaye uminantiene y canae\u00f1a para uinesgaejong\u00fce.\n13:12 Ya anae jalie y magalaje jafa y mafatinas, jajonggue ya ninasenmanman ni y finanag\u00fcen y Se\u00f1ot.\n13:13 \u00b6 Ya anae si Pablo yan y mangachong\u00f1a jadingo Pafo, ya mumamaya ya manmato Petga guiya Pamfilia, ya si Juan jumanao guiya sija ya tumalo guato Jerusalem.\n13:14 Lao sija manmalofan inanaco guinin Petga, manmato Antioquia guiya Pisidia; ya manjalom gui sinagoga gui sabado na jaane ya manmatachong.\n13:15 Ya anae munjayan jataetae y lay yan y profeta sija, y magas y sinagoga ninafamnaagange sija ileg\u00f1ija: Jamyo ma\u00f1elo, yaguin guaja jafa na finijo para insangane y taotao sija, sangan.\n13:16 Ayonae si Pablo tumojgue julo ya ma\u00f1e\u00f1as ni y canae\u00f1a, ileg\u00f1a: Taotao Israel, yan jamyo ni y manmaa\u00f1ao as Yuus, ecungog.\n13:17 Y Yuus este na taotao iya Israel, jaayeg y ma\u00f1aenata, yan jajatsa y taotao sija anae ma\u00f1asaga taeg\u00fcije y taotao juyong guiya Egipto, ya ni y taquilo na canae\u00f1a jacone sija juyong g\u00fcije.\n13:18 Ya y cuarenta a\u00f1os ni tiempo, jasungon ni y costumbre\u00f1ija gui jalomtano.\n13:19 Ya guinin mujayan jayulang siete na nasion gui tano Cananea, ya japatte y tano\u00f1ija guiya sija para y erensia\u00f1ija nae ma\u00f1asaga, como cuatro siento y sincuenta a\u00f1os;\n13:20 Ya despues di ayo sija, manninae sija jues sija asta qui mato y profeta Samuel.\n13:21 Ya despues manmalago ray: ya manninae as Yuus as Saulo lajin Sis, un taotao gui tribon Benjamin para cuarenta a\u00f1os.\n13:22 Yaanae jarechasa si Saulo, janacajulo guiya sija si David para ray\u00f1ija. Sa si Yuus numae g\u00fce locue testimonio, ileg\u00f1a: Guajo jusoda si David lajin Isai, un taotao na parejoja yan y corasonjo, ya g\u00fciya ucumple todo y malagojo.\n13:23 Ya y semiyan este na taotao nae, unacajulo si Yuus guiya Israel y Satbadot Jesus jaftaemanoja y promesa:\n13:24 Ya si Juan finena prumedica, antes di y finato\u00f1a, y tinagpangen sinetsot para todo y taotao guiya Israel.\n13:25 Ya anae jacumple si Juan y checho\u00f1a, ileg\u00f1a: Jayeyo jinasonmimiyo? Ti guajo g\u00fce. Lao estag\u00fce na mamamaela uno gui tateco, na ni y sapatos gui adeng\u00f1a ti dignoyo na jupula.\n13:26 Ma\u00f1elo lalaje, fumaguon y rasan Abraham, yan jayeja guiya jamyo y maa\u00f1ao as Yuus, sa para jamyo na matago y sinangan este na satbasion.\n13:27 Pot ayo sija y ma\u00f1asaga Jerusalem, yan y magas\u00f1ija sa ti matungo si Yuus, ni y sinangan y profeta ni y jatataetaeja cada sabado, anae masentensia g\u00fce jacumple sija.\n13:28 Ya achogja ti jasoda sija jafa na causa guiya g\u00fciya na umapuno, lao magagao si Pilatos na umapuno.\n13:29 Ya anae macumple todo ayo y esta matugue pot g\u00fciya, machule papa guinin y jayo, ya mapolo gui jalom y naftan.\n13:30 Lao si Yuus munacajulo guinen y manmatae:\n13:31 Ya malie megae na jaane ni ayo sija y mangachochong\u00f1a mangajulo guinin Galilea para Jerusalem, ni y pago testigu\u00f1a sija gui taotao.\n13:32 Ya jame chumule guiya jamyo y mauleg na notisia, ni ayo na promesa y mafatinas gui ma\u00f1aena,\n13:33 Jaftaemano si Yuus cumunple guiya jita, ni y famaguon\u00f1ija, sa ayonae janacajulo si Jesus talo; taeg\u00fcije locue y esta matugue gui mina dos gui Salmos: Jago y Lajijo ya pago na jaane nae julilis jao.\n13:34 Ya ninacajulo guinin y manmatae, ya pago ti utalo guato gui minitong guinin jasangan taeg\u00fcine: Guajo junae jao ni y santos yan magajet na bendisjon David.\n13:35 Enaomina ileg\u00f1a locue y otro Salmo: Na chamo pumopolo y Santosmo na ulie y minitong.\n13:36 Sa si David anae munjayan jasetbe y generasion\u00f1a pot y pinagat Yuus, maego ya mapolo manafanda\u00f1a yan y ma\u00f1aena\u00f1a, ya jalie y minitong.\n13:37 Lao ayo y ninacajulo as Yuus talo ti jalie minitong.\n13:38 Ya umatungo guiya jamyo ma\u00f1elo lalaje, na pot este na taotao na mapredidica guiya jamyo y inasiin y isao:\n13:39 Ya pot g\u00fciya na todo ayo y jumonggue manunas ni todo y g\u00fcinaja, sa ti si\u00f1a jamyo manunas, pot y lay Moises.\n13:40 Adaje na nosea ufato guiya jamyo, y masangan gui profeta sija;\n13:41 Estag\u00fce, jamyo ni y manma\u00f1atlilie, yan infanmanman, yan infanmalingo. Sa machochochoyo ni y checho y jaanemniyo, ayo na chocho y ti injengue, ni jaye na taotao unaclaro guiya jamyo.\n13:42 Ya anae manjuyong gui sinagoga, jagagao na umapredica este na sinangan guiya sija gui siguiente sabado.\n13:43 Ya anae manadingo y inetnon gui sinagoga, megae na Judios yan y deboto na proselito sija dumalalag si Pablo yan Barnab\u00e9; ni y sumangangane siga yan jaeepogna ufa\u00f1aga gui grasian Yuus.\n13:44 \u00b6 Ya y siguiente sabado canaja todo y taotao y siuda manda\u00f1a para ujajungog y sinangan Yuus.\n13:45 Lao anae jalie y Judios y linajyan taotao, manbula linatga, ya manguentos contra ayo y sinangan Pablo ya jachatfino contra si Yuus.\n13:46 Ayonae si Pablo yan Barnab\u00e9 jausa y minatatnga\u00f1ija, ileg\u00f1ija: Nesesita ayo y sinangan Yuus ni y esta manmasangane jamyo finena, lao pot innasuja guiya jamyo, injisganmaesa jamyo na ti dignojamyo y taejinecog na lin\u00e2l\u00e2, ya estag\u00fce na tabirajit para y Gentiles.\n13:47 Sa taeg\u00fcenao tinago\u00f1a si Yuus nu jita, ileg\u00f1a: Jupolo jamyo para candet y Gentiles, na jamyo si\u00f1a para satbasion asta y uttimon patte y tano.\n13:48 Ya anae jajungog este y Gentiles, ninafansenmagof, ya maalaba y sinangan Yuus: ya megae manmanjonggue ni ayo sija y manmatancho para y taejinecog na lin\u00e2l\u00e2.\n13:49 Ya machalapon y sinangan Yuus todo g\u00fcije na tano.\n13:50 \u00b6 Lao y Judio sija, janafangalamten y mandebota yan y manonra na famalaoan, yan y manmagas na taotao sija gui siuda, ya janafangajulo pinetsigue contra si Pablo yan Barnab\u00e9, ya janafanmayute juyong gui tano\u00f1ija.\n13:51 Lao sija, jasacude y petbos gui adeng\u00f1ija contra sija, ya manjanao para Iconio.\n13:52 Ya y disipulo sija, manbula minagof yan y Espiritu Santo.\n14:1 YA susede na manjalom gui sinagogan y Judios guiya Iconio, ya taeg\u00fcenao manguentos na un dangculo na linajyan Judios yan Griegos manman jonggue.\n14:2 Lao ayo sija na Judios y ti manmanosgue, jasuug y anten y Gentil sija, para ufanmanjaso taelaye contra y ma\u00f1elo.\n14:3 Lao ma\u00f1agaja apmam, manguecuentos matatnga ni y Se\u00f1ot, ni y mannae testimonio ni y sinangan y grasia\u00f1a, yan mannae se\u00f1at sija, yan mannamanman sija para ujafatinas ni y canae\u00f1ija.\n14:4 Ya y linajyan taotao gui siuda manmadibide; y un banda ma\u00f1ija yan y Judios, ya y otro banda ma\u00f1ija yan y apostoles.\n14:5 Lao anae manmamatinas insulto y Judios yan y Gentiles, yan y magas\u00f1ija, para ufanmacase sija, yan ufanmafagas ni y ocho,\n14:6 Esta matungo nu sija; ya manmalago guato Listra yan Derbe, siuda iya Licaonia, yan y tano gui oriya.\n14:7 Ya g\u00fcije japredica sija y ibangelio.\n14:8 \u00b6 Ya estaba g\u00fcije guiya Listra un taotao na taeninasi\u00f1a y adeng\u00f1a, sa cojo desde y jalom tuyan nana\u00f1a; ya taya nae mamocat:\n14:9 Ayo na taotao jajungog si Pablo na cumuentos: ya enseguidas na inatan, tiningo na guaja jinenggue\u00f1a para umanajomlo,\n14:10 Jaagang dangculo na inagang ileg\u00f1a: Tojgue julo tunas ni y adengmo. Ya guiya mangope julo, ya mamocat.\n14:11 Ya anae malie ni y linajyan taotao sija y finatinas Pablo, jajatsa y inagang\u00f1ija ileg\u00f1ija gui cuentos Licaonia: Y yuus sija ni manparejo yan taotao, manunog guiya jita.\n14:12 Ya mafanaan si Barnab\u00e9 Jupiter; ya si Pablo mafanaan Mercurio, sa g\u00fciya magas na cuecuentos.\n14:13 Ayonae y pale y Jupiter ni y templo\u00f1a estaba gui menan y siuda, mangone toro sija, yan ma\u00f1ule coronan flores guato gui pettan y trangca, ya malago na ufanmamatinas inefrese, yan y linajyan taotao sija.\n14:14 Lao anae majungog ni y apostoles, si Barnab\u00e9 yan si Pablo, jatiteg y magago\u00f1ija, ya manmalago gui entalo y linajyan taotao ya manaagang,\n14:15 Ileg\u00f1ija: Se\u00f1ot sija, jafa na infatinas este sija? Jame locue manaotaojam, manparejojajit, ya insangane jamyo na inbira jamyo g\u00fcine gui este sija manaesetbe, ya infanmalag y lal\u00e2l\u00e2 na Yuus, ni y jafatinas y langet, yan y tano, yan y tase, yan todo y sinajguan\u00f1a:\n14:16 Ni y manmalofan na generasion sija, japolo todo y nasion na ufanjanao gui minalago\u00f1ija.\n14:17 Masquesea g\u00fciya ti jadingo g\u00fce sin testigo, sa mauleg finatinas\u00f1a, ya janaejit uchan guinin y langet, yan megae na tinegcha, janafanbula y corasonta nengcano yan minagof.\n14:18 Ya este sija na sinangan, canamapot jaafuetsas y linajyan taotao na cha\u00f1ija fumatitinas inefrese guiya sija.\n14:19 \u00b6 Ya manmato g\u00fcije Judios guinin Antioquia, yan Iconio, ni y manafanma\u00f1a\u00f1a y linajyan; ya anae munjayan mafagas ni y acho si Pablo, mabatsala juyong gui siuda, jinaso\u00f1ija na matae.\n14:20 Ya mientras manotojgue y disipulo sija gui oriya\u00f1a, cumajulo ya jumalom gui siuda; ya y inagpa\u00f1a g\u00fcije, jumanao yan si Barnab\u00e9 manmalag Derbe.\n14:21 Ya anae munjayan japredica y ibangelio g\u00fcije na siuda, yan mamadisipulo megae; tumalo guato Listra, yan Iconio, yan Antioquia,\n14:22 Ya janafanfitme y anten y disipulo sija, ya jaaconseja na ujasigueja gui jinenggue; sa nesesita megae na pinite sija, ya ayonae si\u00f1ajit manjalom gui raenon Yuus,\n14:23 Ya anae munjayan jatancho y manamco gui cada guimayuus, yan manaetae, yan umayunat, yan jatayuyute sija gui as Yuus ni manmanjonggue.\n14:24 Ya manmalofan y inanaco Pisidia, ya manmato Pamfilia.\n14:25 Ya anae munjayan mapredica y sinangan guiya Petga, manunog guiya Atalia;\n14:26 Ya desde ayo mangagama asta Antioquia, anae manmanae ni y grasian Yuus, para y checho ni y mafatinas.\n14:27 Ya anae manmato ya manda\u00f1a iglesia gui guimayuus, masangan todo sija y finatinas Yuus pot sija; yan jaftaemano jababaye y Gentiles ni y pettan y jinenggue.\n14:28 Ya ma\u00f1aga g\u00fcije yan y disipulo sija, apmam na tiempo.\n15:1 YA manmato palo taotao sija guinin Judea, ya jafanag\u00fce y ma\u00f1elo ileg\u00f1ija: Yaguin ti manmasirconsida jamyo taemano y costumbren Moises, ti si\u00f1a jamyo mansatbo.\n15:2 Ya anae megae na inaguaguat yan finaesen as Pablo yan Barnab\u00e9 yan sija, y maneio jaayeg si Pablo yan si Barnab\u00e9, yan palo guiya sija, para ujafanjanao julo Jerusalem guiya apostoles yan manamco pot este na finaesen.\n15:3 Enao mina anae manmaesgaejon ni y iglesia gui jinanao\u00f1ija, manmalofan y inanaco Finesia, yan Samaria, ya masasangan claro y manma\u00f1otsot y Gentiles; ya ninafangosmagof y ma\u00f1elo todos.\n15:4 Ya anae manmato Jerusalem, manmaresibe gui iglesia yan y apostoles, yan y manamco; ya jadeclara todo y finatinas Yuus pot sija.\n15:5 Lao mangajulo g\u00fcije palo sija y inetnon Fariseo ni y manmanjonggue, ya ilegnija: Nesesita ufanmasirconsida sija, yan ufanmatago ya ujaadaje y tinago Moises.\n15:6 Ya manda\u00f1a y apostoles yan y manamco para ujajasuye este.\n15:7 Ya anae esta megae na finaesen, cumajulo si Pedro ya ileg\u00f1a nu sija: Ma\u00f1elo lalaje, intingoja jafa na manayeg si Yuus guiya jamyo, apmam na tiempo, na y Gentiles ujajungog y sinangan y ibangelio pot y pachotjo, ya ujajonggue.\n15:8 Yan si Yuus, ni y tumungo y corason, janafantestigo sija, yan janae ni y Espiritu Santo, jaftaemanoja y jafatinas guiya jita;\n15:9 Ya taya japolo dinesparejo entre sija yan jita, janafangasgas y corason\u00f1ija ni y jinenggue.\n15:10 Ya jafa pago mina intietienta si Yuus, para inpelo y yugo gui agaga y disipulo sija, na ni y ma\u00f1aenata ni jita tisi\u00f1a jacatga?\n15:11 Lao tajonggue na pot y grasian y Se\u00f1ot Jesus utafansatbo, taeg\u00fcije iya sija.\n15:12 \u00b6 Ayonae manmamatquilo todo y linajyan taotao, ya maatituye si Pablo yan Barnab\u00e9 ni y jasasangan y se\u00f1ot sija yan y mannamanman jafatinas si Yuus gui entalo Gentiles pot sija.\n15:13 Ya anae manmamatquilo, manope si Santiago ileg\u00f1a: Ma\u00f1elo lalaje, ecungogyo.\n15:14 Jasangan si Simeon jaftaemano si Yuus ni y jabisita finena y Gentiles, para ufangone guiya sija taotao para y naan\u00f1a.\n15:15 Yan pot este na manparejo y sinangan y profeta sija, ni y esta manmatugue:\n15:16 Anae esta munjayan estesija, jutalo mague, ya jujatsa y tabernaculon David, ni y podong; yan jujatsa talo y manmayulang g\u00fcije, yan juplanta julo;\n15:17 Para y manetenjan na taotao, ujaaligao yi Se\u00f1ot, yan todo y Gentiles ni y umafanaan y naanjo.\n15:18 Ileg\u00f1a y Se\u00f1ot ni y janamatungo estesija desde y tutujon y tano.\n15:19 Enaomina y jinasoco taeg\u00fcine, na mungajit umatborota ayo sija y manguinin y entalo y Gentiles, ya jabira sija para as Yuus.\n15:20 Lao utatuguie sija, ya ujafa\u00f1uja gui pinetlilon y idolos, yan y in\u00e1bale, yan y ne\u00f1icot na g\u00e2g\u00e2, yan y j\u00e2g\u00e2.\n15:21 Sa si Moises gui manmalofan na generasion, guaja gui cada siuda para ufanpredica g\u00fce ya utaetae lay\u00f1a gui sinagoga cada sabado na jaane.\n15:22 Ayonae ya\u00f1ija y apostoles yan y manamco yan todo y iglesia, na umanafanjanao y manmaayeg na taotao gui inetnon\u00f1ija para Antioquia para ufa\u00f1ija yan si Pablo yan Barnab\u00e9; y naan\u00f1ija, si Judas y apiyidu\u00f1a Barsabas, yan si Silas, manmagas na taotao sija gui entre y ma\u00f1elo:\n15:23 Ya manmangue carta pot sija, taeg\u00fcine: Y apostoles yan manamco na ma\u00f1elo, jasaluda y ma\u00f1elo na Gentiles ni y mangaegue guiya Antioquia yan Siria yan Silisia:\n15:24 Sa injingog na palo ni y manjanao guinin iya jame, maninatborota jamyo ni y sinangan, janataelaye y antenmiyo; lao ti manmannae jam ni enao na tinago:\n15:25 Jinasonmame na manda\u00f1ajam unoja, para innafanjanao y manmaayeg na taotao para jamyo, yan y g\u00fcinaeyanmame as Pablo yan Barnab\u00e9,\n15:26 Taotao sija na janapeligro y jaanen\u00f1ija pot y naan y Se\u00f1ot Jesucristo.\n15:27 Enaomina innajanao si Judas yan Silas, ni y infansinangane locue ni y pachot\u00f1ija taeg\u00fcineja.\n15:28 Sa y jinason y Espiritu Santo, yan jame, na munga mapolo gui jilomiyo mas dangculo na catga qui y manesesita.\n15:29 Na infa\u00f1uja gui nengcano ni y manmaofrese y idolos, yan y j\u00e2g\u00e2, yan y ne\u00f1icot na g\u00e2g\u00e2, yan y in\u00e1bale; ya yaguin inadaje jamyo estesija, infatinas mauleg. Adios jamyo todos.\n15:30 \u00b6 Ya anae manajanao, manmato Antioquia: ya janafanda\u00f1a y linajyan taotao, maentrega y catta;\n15:31 Ni y anae munjayan mataetae, ninafansenmagof, pot y consuelo.\n15:32 Ya si Judas yan Silas manprofeta locue, ya japagat y ma\u00f1elo ni y megae na sinangan, yan janafitme sija.\n15:33 Ya ma\u00f1aga g\u00fcije didide na tiempo, despues manafanjanao en pas ni y ma\u00f1elo, para y manmatago sija.\n15:34 Lao si Silas ninamagof na ufa\u00f1asagaja g\u00fcije.\n15:35 Si Pablo yan si Barnab\u00e9 ma\u00f1asaga gui Antioquia, na mamananag\u00fce, yan manpredidica ni y sinangan y Se\u00f1ot; yan megae palo locue.\n15:36 \u00b6 Ya anae malofan palo jaane, ileg\u00f1a si Pablo as Barnab\u00e9: Nije tajanao talo ya tabisita ya ma\u00f1eluta gui cada siuda anae y guinin tapredica y sinangan y Se\u00f1ot, ya utalie jafa checho\u00f1ija.\n15:37 Ya si Barnab\u00e9 malago na ujacone gachong\u00f1ija si Juan, ni y apiyidu\u00f1a Marcos.\n15:38 Lao y jinaso\u00f1a si Pablo, na ti mauleg na ufa\u00f1ija, sa sumuja guiya sija desde Pamfilia, ya ti mandinalalag sija gui checho.\n15:39 Ya jumuyong dangculon minaguaguat, ya manadisapatta; ya si Barnab\u00e9 jacone si Marcos, ya mangama gui batco para Chipre;\n15:40 Ya si Pablo jayeg si Silas ya mapos, manmaencatga ni y ma\u00f1elo ni y grasian Yuus.\n15:41 Ya jumanao todo inanco Siria yan Silisia, janafanfitme y inetnon mangilisyano sija.\n16:1 YA mato g\u00fce locue Derbe yan Lystra: Ya estag\u00fce, estaba g\u00fcije un disipulo na y naan\u00f1a si Timoteo, lajin un palaoan Judio, ni y manjonggue; lao y tata\u00f1a Griego.\n16:2 Ya gosmauleg y fama\u00f1a gui ma\u00f1elo ni y mangaegue Lystra yan Iconio.\n16:3 G\u00fciya malago Pablo na ujasija jumanao: ya quinene ya ninamasirconsida, sa pot y Judio sija ni y mangaegue g\u00fcije na lugat: sa todoja tumungo na y tata\u00f1a Griego.\n16:4 Ya anae jajanag\u00fce todo y siuda sija, manmanae para ujaadaje, y tinago sija, ni y tinago y apostoles yan y manamco ni y mangaegue guiya Jerusalem.\n16:5 Ayonae y iglesia sija nae mumemetgot y jinenggue, ya lumalamegae y numero cada jaane.\n16:6 \u00b6 Ya anae jajanag\u00fce todo inanacon tanon Frygia, yan Galasia, ya manchinema ni y Espiritu Santo na ujapredica y sinangan guiya Asia;\n16:7 Ya anae manmato jijot y Misia, manmalago na ufanjanao para Bitinia: lao ti manpinelo ni y Espiritun Jesus na ufanjanao;\n16:8 Ya manmalofan oriyan Misia, ya manunog Troas.\n16:9 Ya anae puenge, jalie si Pablo un vision, na un taotao Masedonia, tumotojgue g\u00fcije ya gumagagao g\u00fce ileg\u00f1a: Mamaela mague guiya Masedonia ya unayudajam.\n16:10 Ya anae munjayan jalie y vision, enseguidas manmalagojam na manjanao para Masedonia, ya pinelonmame na y Se\u00f1ot umagangjam para inpredica y ibangelio guiya sija.\n16:11 \u00b6 Ya anae mangagamajam guinin Troas, manmatojam gui tunas na chalan para Samotrasia, ya y inagpa\u00f1a na jaane manmatojam Neapolis;\n16:12 Ya desde ayo asta Filipos, ni y mas dangculo na siuda g\u00fcije na patte guiya Masedonia, yan un colonia romana: ya ma\u00f1agajam g\u00fcije na siuda unos cuantos na jaane.\n16:13 Ya y sabado na jaane, manjanaojam juyong gui siuda gui oriyan sadog, anae pinelonmame un lugat tinayuyut: ya manmatachongjam ya incuentuse y famalaoan sija ni y manda\u00f1a g\u00fcije.\n16:14 Ya un palaoan na y naan\u00f1a si Lydia, na manbebende purpura gui siudad Tiatira, ni y jaadodora si Yuus, jajungogjam; sa binaba y corason\u00f1a ni y Se\u00f1ot para uatituye y jasasangan si Pablo.\n16:15 Ya anae matagpange y palaoan, yan y guima\u00f1a, jagagaojam ileg\u00f1a: Yaguin injisga na fiet yo gui Se\u00f1ot, fanjalom gui guimajo, ya infa\u00f1aga g\u00fcije. Ya jaafuetsasjam.\n16:16 \u00b6 Ya susede anae manjanaojam para lugat tinayuyut, na manasodajam yan un patgon na palaoan na gae espiritu Pitonico, ni y janafangana megae y amu\u00f1a pot y manadibibina:\n16:17 Ya jadadalag si Pablo yan jame, ya umaagang ileg\u00f1a: Este sija na taotao y tentago y Gueftaquilo na Yuus ni y fumanuejit ni y chalan y satbasion.\n16:18 Ya este finatinas\u00f1a y palaoan megae na jaane. Lao si Pablo gosninaestotba ya jabira g\u00fce ya ileg\u00f1a ni y espiritu: Jutago jao pot y naan Jesucristo na unjuyong guiya g\u00fciya. Ya jumuyong g\u00fcijeja na ora.\n16:19 \u00b6 Ya anae jalie y amu\u00f1a na mapos y ninangga\u00f1a para ufangana, maguut si Pablo yan Silas, ya macone guato gui plasa gui menan manmagas,\n16:20 Ya anae manmacone guato gui manmagas y lay, ileg\u00f1a: Este sija na taotao. Judios ya jaatbororota y siudata,\n16:21 Ya manmamananag\u00fce costumbre ni y ti combiene para jita na utaresibe, ni utaadaje, sa jita taotao Roma.\n16:22 Ya mangajulo y linajyan taotao ya manda\u00f1a contra sija: ya y manmagas sija jatiteg guiya sija y magagu\u00f1ija, ya manmanago na ufanmasaulag.\n16:23 Ya anae esta megae na sinaulag ni y manmasaulag\u00f1ija, manmapolo gui jalom calaboso, ya maencatga y atcaede na uguesadje sija.\n16:24 Ya ayo y rumesibe este na tinago, manpinelo sija guiya jalolom na calaboso, ya jaguesgode y adeng\u00f1ija gui sipo.\n16:25 Ya y tatalo puenge manaetae si Pablo yan Silas, yan jacantaye si Yuus alabansa sija: ya manjiningog ni ayo sija y manmaprereso.\n16:26 Ya derepente guaja g\u00fcije un dangculon linao, ya asta y simienton y calaboso yinengyong: ya enseguidas manmababa todo y petta, ya todo y preso manmapula y gueden\u00f1ija.\n16:27 Ya anae magmata y atcaede, ya jalie na mababa y pettan y calaboso, jalagnos y espada\u00f1a ya malago na upuno maesa g\u00fce, sa pinelo\u00f1a na manmalago y preso sija.\n16:28 Lao si Pablo umagang ni y dangculo na inagang, ileg\u00f1a: Chamo munalalamen jao: sa estag\u00fcejamja todos.\n16:29 Ayonae mangagao candet sija, ya tumayog jalom, ya mato manlalaolao ni y minaa\u00f1ao, ya podong gui menan Pablo yan Silas,\n16:30 Ya jacone sija juyong, ya ileg\u00f1a: Se\u00f1ores, jafa jufatinas para jusatbo?\n16:31 Ya sija ileg\u00f1ija: Jenggue y Se\u00f1ot Jesus ya unsatbo yan y iya guimamo.\n16:32 Ya masangane g\u00fce ni y sinangan y Se\u00f1ot, yan todo y ma\u00f1asaga gui guima\u00f1a.\n16:33 Ya ayoja na ora gui puenge nae jacone ya jafagase y sinaulag\u00f1ija: ya matagpange g\u00fce enseguidas yan todo y iyo\u00f1a.\n16:34 Ya jacone sija guato gui guima\u00f1a ya japlantaye na\u00f1ija gui mena\u00f1ija, ya ninasenmagof sa jajonggue si Yuus yan todo y iya guima\u00f1a.\n16:35 \u00b6 Ya anae egaan na jaane, manmanago y manmagas sargento sija ileg\u00f1ija: Setta ayo sija na taotao ya ufanjanao.\n16:36 Ya y atcaede jasangane si Pablo ni este na sinangan, ileg\u00f1a: Manmanago y manmagas na infanmasotta: ya pago fa\u00f1uja ya infanjanao en pas.\n16:37 Lao si Pablo ileg\u00f1a nu sija: Janafanmasaulagjam sin infanmaecungog, yan manmapresojam, ya taotao Roma jamja: ya pago inmanafanjuyong sin infanatungo? Aje: lao nafanmato ya sija unafanjuyongjam.\n16:38 Ya y sargento sija jasangane y manmagas ni este na sinangan: ya ninafanmaa\u00f1ao anae jajungog na taotao Roma sija.\n16:39 Ya manmato ya manmagagao sija, ya anae manatanjuyong, manmagagao na ufanjuyong gui siuda.\n16:40 Ya anae manjuyong gui calaboso, manjalom gui guima Lydia; ya anae jalie y ma\u00f1elo, jaconsuela ya manjanao.\n17:1 YA anae guinen manmalofan inanaco Amfipolis yan Apolonia, manmato Tesal\u00f3nica, anae guaja sinagogan Judios,\n17:2 Ya si Pablo segun costumbre\u00f1a, jumalom g\u00fcije sija, ya tres sabado jaadingane sija ni y Tinigue.\n17:3 Jadeclararayeja sija, na si Cristo nesesita ufamadese, ya ucajulo talo guinin y manmatae: ya este na Jesus ni y jusangane jamyo, g\u00fciya y Cristo.\n17:4 Ya palo guiya sija manmanjonggue, ya manda\u00f1a yan si Pablo yan Silas: yan y mandeboto na Griego un dangculon manada; ya ti didide na manmagas na famalaoan.\n17:5 Lao y Judio sija pot y inigo\u00f1ija, palo manaelaye na taotao gui mancanaya; ya manda\u00f1a un linajyan taotao jaatborota y siuda; ya maataca y guima Jason, ya maprocura manmaquecone sija juyong gui menan taotao.\n17:6 Ya anae ti manmasoda, macone si Jason yan palo gui ma\u00f1elo guato gui manmagas y siuda, ya managang ileg\u00f1ija: Este yuje sija y munafanaatlibes y tano, ya manmato g\u00fcine locue;\n17:7 Ni y jaresibe si Jason; ya todo este sija cumocontra y tinago Sesat; ileg\u00f1ija na guaja otro ray, si Jesus.\n17:8 Ya jaatborota todo y taotao yan y manmagas y siuda anae majungog este sija.\n17:9 Ya anae manma\u00f1ule segurida gui as Jason yan y pumalo, manmasotta.\n17:10 \u00b6 Ya anae puenge enseguidas matago ni y ma\u00f1elo si Pablo yan Silas para Berea; ya anae manmato, manjalom gui sinagogan y Judios.\n17:11 Este sija mas manmauleg qui ayo iya Tesal\u00f3nica, sa rumesibe y sinangan contodo y minalago\u00f1ija, yan matataetae y Tinigue cada jaane, para umalie cao magajet ayo sija.\n17:12 Enaomina megae guiya sija manmanjonggue; yan y manjulon locue na famalaoan Griego, yan y lalaje ti didide.\n17:13 Lao y Judios Tesal\u00f3nica anae jatungo na japredidica si Pablo y sinangan Yuus guiya Berea, manmato locue g\u00fcije, ya manafangalamten yan manafaninestotba y linajyan taotao sija.\n17:14 Ya enseguidas matago ni y ma\u00f1elo si Pablo na ujanao asta y tase; lao si Silas yan Timoteo ma\u00f1agaja g\u00fcije.\n17:15 Ya ayo y umadadaje si Pablo, macone asta Atenas; ya manresibe tinago para si Silas yan Timoteo, na ujalaguse guato guiya g\u00fciya, ya manmapos.\n17:16 \u00b6 Ya mientras manninanangga as Pablo guiya Atenas, calamten y espiritu\u00f1a gui sanjalom\u00f1a anae jalie y siuda na bula y idolos.\n17:17 Enaomina gui sinagoga jaadingane y Judio sija, yan y mandeboto na taotao sija, yan todo y asoda\u00f1a gui plasa todo y jaane.\n17:18 Ya palo ni y manmalate gui finanag\u00fce y Epicureo yan Estoicosija, managuaguat yan g\u00fciya, ya palo ileg\u00f1ija: Jafa cumequeileg\u00f1a este na caducon cuicuentos? Otro palo ileg\u00f1ija: Buente mannae notisia y nuebo na yuus; sa jasangane sija as Jesus, yan y quinajulo talo.\n17:19 Ya macone g\u00fce guato gui as Areopago, ileg\u00f1ija. Si\u00f1ajam intingo este y nuebo na finanag\u00fce ni y unsasangan?\n17:20 Sa uunafanmanjujungogjam ni y g\u00fcinaja ni tatnae injingog, enaomina manmalagojam intingo jafa estesija.\n17:21 (Sa todo iya Atenas, yan y manaotao juyong ni y ma\u00f1asaga g\u00fcije, taya checho\u00f1i\u00f1ija na para ufanguentosja, yan para ufanecungog ni y nuebo na g\u00fcinaja.)\n17:22 Ayonae tumojgue si Pablo gui talo gui Areopago, ya ileg\u00f1a; Jamyo ni y lalajen Atenas, julie na guefdeboto jamyo.\n17:23 Sa anae malofanyo, ya juatan jafa y inadoranmimiyo, jusoda gui un attat este na tinigue: PARA Y TI MATUNGO NA YUUS. Ayo y inadodoraja ni y ti intingo; g\u00fciya jusangangane jamyo.\n17:24 Si Yuus ni y fumatinas y tano yan todo y g\u00fcinaja ni y mangaegue gui sumanjalom\u00f1a; g\u00fciya Se\u00f1ot gui langet yan y tano, ti sumasaga gui templo ni y finatinas canae;\n17:25 Ni umasetbe ni y canae taotao sija, taeg\u00fcije y guaja janesesita; sa g\u00fciya mannae todo lin\u00e2l\u00e2, yan jinagong, yan todo y g\u00fcinaja;\n17:26 Ya g\u00fciya fumatinas unoja na j\u00e2g\u00e2 todo y nasion y taotao sija para ufa\u00f1aga gui jilo y tano, jadetetmina tinancha y tiempo\u00f1ija, yan y uttimon y sagan\u00f1ija;\n17:27 Para ujaaligao y Se\u00f1ot, yaguin si\u00f1a buente masiente ya umasoda g\u00fce, sa ti chago g\u00fce cada uno guiya jita.\n17:28 Sa iya g\u00fciya nae utafanl\u00e2l\u00e2 yan utafangalamten, yan utafanguaja sustansiata; taeg\u00fcije y palo gui poetan miyo, ileg\u00f1ija: Sa jita locue y rasa\u00f1a.\n17:29 Yaguin jita y rasan Yuus, mungajit jumaso na y yiniusan Yuus parejo yan oro, pat salape, pat acho, pat y finatinas y jinason y taotao.\n17:30 Ya ti jaconsidera si Yuus y tiempo anae manaetiningo; lao pago, manago na todo y taotao ufanma\u00f1otsot;\n17:31 Sa jatancho un jaane, ni y anae para ujusga ni y tininas, y tano, ni ayo na taotao y jatago; ni y mannae testimonio todo y taotao, sa janacajulo guinin y manmatae.\n17:32 Ya anae jajungog sija y quinajulo talo guinin y manmatae, palo manmanbotlea; ya y palo ileg\u00f1ija: Injingog jao talo otro biaje, pot este.\n17:33 Ya ayonae mapos si Pablo gui entalo\u00f1ija.\n17:34 Lao palo manda\u00f1a guiya g\u00fciya, manmanjonggue: ya y palo g\u00fcije sija, si Dionisio, taotao Areopago, yan un palaoan na y naan\u00f1a D\u00e1maris, yan palo mangachong\u00f1i\u00f1ija.\n18:1 YA despues di estesija, jumanao si Pablo guiya Atenas ya mato Corinto:\n18:2 Ya jasoda un Judio na naan\u00f1a si Aquila, mafa\u00f1agon Ponto, ni ti apmamam na mato guinin Italia, yan y asagua\u00f1a as Prisila, sa manago si Claudio na todo y Judios ufanjanao Roma; ya mato guiya sija.\n18:3 Sa parejoja checho\u00f1i\u00f1ija, ya sumaga yan sija, ya machochoeho: sa y checho\u00f1i\u00f1ija manmamatitinas y guima tienda.\n18:4 Ya ma\u00f1angangane gui sinagoga cada sabado, ya japrocucura para usuug y Judio yan y Griego sija.\n18:5 \u00b6 Lao anae mato si Silas yan Timoteo guinin Masedonia, si Pablo chineneg ni sinangan na unamatungo gui Judios na si Jesus y Cristo.\n18:6 Ya anae macontra sija yan machatfino nu sija, jasacude y magagu\u00f1a, ya ileg\u00f1a nu sija: Y j\u00e2g\u00e2miyo gui jilo y ilunmiyo: guajo gasgasyo; ya desde pago bae jujanao para y Gentiles.\n18:7 Ya mapos ya jumalom gui guima un taotao na y naan\u00f1a si Tito Justo na manadodora as Yuus, na y guima\u00f1a jijot gui sinagoga.\n18:8 Ya si Crispo magas y sinagoga, jajonggue y Se\u00f1ot, yan todo y guima\u00f1a: ya megae na taotao Corinto jumungog ya manjonggue ya manmatagpange.\n18:9 Ya y Se\u00f1ot jacuentuse si Pablo gui puenge gui vision, ileg\u00f1a: Chamo maaa\u00f1ao, lao cuentos, ya chamo famatquiquilo:\n18:10 Sa gaegueyo guiya jago, ya taya taotao si\u00f1a guaguato guiya jago para unninalamen: sa megae taotaojo g\u00fcine na siuda.\n18:11 Ya sumaga g\u00fcije un a\u00f1o yan saes meses, jafananag\u00fce sija ni y sinangan Yuus.\n18:12 \u00b6 Ya anae si Gali\u00f3n magalajen Acaya, y Judio sija mangajulo, gui un jinasoja, contra si Pablo, ya macone gui menan y tribunal,\n18:13 Ileg\u00f1ija: Este na taotao jasuug y taotao sija para ujaadora si Yuus contra y lay.\n18:14 Ya anae para ubaba si Pablo y pachot\u00f1a, si Gali\u00f3n ileg\u00f1a ni y Judio sija: Yaguin mojon jafa na inechong pat tinaelaye, O jamyo Judios, con rason jusungon jamyo.\n18:15 Lao ya yaguin y finaesen finijoja, yan naan sija, yan y laymiyo, adaje maesa jamyo; sa guajo ti malagoyo ujues ni enao na g\u00fcinaja.\n18:16 Ya janafa\u00f1uja gui tribunal.\n18:17 Ayonae todosija maguut si Sostenes, magas y sinagoga, ya masaulag gui menan y tribunal. Ya si Gali\u00f3n, ti jaatituye ayo sija na g\u00fcinaja.\n18:18 \u00b6 Ya sumaga si Pablo g\u00fcije megae na jaane, ya despues jadingo y ma\u00f1elo, ya mangagama gui batco desde ayo asta Siria, ya sumisija yan si Prisila, yan Aquila; ya maguasguas y ilu\u00f1a guiya Cencrea: sa gae promesa.\n18:19 Ya manmato Efeso ya jadingo sija g\u00fcije: ya g\u00fciyaja jumalom gui sinagoga, ya jaadingane y Judios.\n18:20 Ya anae magagaog\u00fce na usaga apmam yan sija, ti malago;\n18:21 Lao jadingo sija ileg\u00f1a: Bae jutalo mague guiya jamyo, yaguin malago si Yuus. Ya mangama gui batco desde Efeso.\n18:22 Ya anae tumayog gui tano Sesarea, cumajulo, ya jasaluda y iglesia, ya mapos papa Antioquia.\n18:23 Ya despues di sumaga g\u00fcije ti apmam na tiempo, maposg\u00fce ya jajanag\u00fce todo y inanaco tano Galasia, yan Frygia, para unafanmetgot todo y disipulo.\n18:24 \u00b6 Ya mato guiya Efeso un taotao na Judio, na y naan\u00f1a si Apolos, mafa\u00f1agon Alejandria, un taotao na faye, yan gaeninasi\u00f1a gui Tinigue sija.\n18:25 Este na taotao, mafanag\u00fce ni y chalan y Se\u00f1ot; maepe gui Espiritu, jasasangan yan mamananag\u00fce claro ni y chalan y Se\u00f1ot, lao ayoja tinagpangenja Juan tiningo\u00f1a:\n18:26 Ya jatutujon sumangan ni y minatatnga gui sinagoga: ya anae jiningog as Prisila yan Aquila, macone ya mafanag\u00fce mas claro ni y chalan Yuus.\n18:27 Ya anae malago malofan Acaya, y ma\u00f1elo mananima g\u00fce ya manmanugue para y disipulo ya manmaencatga na umaresibe g\u00fce: ya anae mato jaayuda megae ayo sija y manmanjonggue pot y grasia:\n18:28 Sa gosjanasi\u00f1a macontra y Judios, y publico nae jafanunue ni y Tinigue sija, na si Jesus y Cristo.\n19:1 YA susede mientras estataba si Apolos guiya Corinto, si Pablo malofan gui managquilo na costa ya mato Efeso: ya ma\u00f1oda palo disipulo sija g\u00fcije.\n19:2 Ya ileg\u00f1a nu sija: Inresibe y Espiritu Santo desde qui manmanjonggue jamyo? Ya ileg\u00f1ija: Taya nae injingog cao esta manae Espiritu Santo.\n19:3 Ya ileg\u00f1a nu sija: Jafa nae manmatagpangenmiyo? Ya sija ileg\u00f1ija: Y tinagpangen Juan.\n19:4 Ayonae ileg\u00f1a si Pablo: Si Juan, magajet na managpapange ni y tinagpangen sinetsot, ya jasangane y taotao sija, na ujajonggue ayo y ufato despues di g\u00fciya, ayo y as Cristo Jesus.\n19:5 Ya anae jajungog sija este, manmatagpange ni y naan y Se\u00f1ot Jesus.\n19:6 Ya anae munjayan japlanta si Pablo y canae\u00f1a gui jilo\u00f1ija, y Espiritu Santo mato gui jilo\u00f1ija: ya manguentos ni y tifino\u00f1ija, ya manmanprofetisa.\n19:7 Ayo sija todos dose na taotao lalaje.\n19:8 \u00b6 Ya jumalom si Pablo gui sinagoga, ya cumuentos libre tres meses; jasangan yan y animo gui raenon Yuus.\n19:9 Lao anae palo manmajetog, ya ti manmalago manmanjonggue, ya manguecuentos taelaye pot ayo na Chalan gui menan y linajyan taotao, sumuja si Pablo guiya sija, ya janafa\u00f1uja y disipulo sija, ya manadingan cada jaane gui escuelan Tiranno.\n19:10 Ya dos a\u00f1os di mafatinas este: para todo ayo y ma\u00f1asaga Asia ujajungog y sinangan y Se\u00f1ot Jesus, parejoja y Judio yan y Griego sija.\n19:11 Ya jafatinas si Yuus milagro pot y canae Pablo:\n19:12 Para guinin y tataotao\u00f1a nae umachule pa\u00f1o sija para y manmalango, ya y chetnot ufa\u00f1uja guiya sija; yan y manaelaye na espiritu ufanjuyong guiya sija.\n19:13 Ya palo Judios na manaesaga\u00f1ija, taotao binanggelio, japrocura na jasangan nu ayo sija y manguaja taelaye na espiritu y naan y Se\u00f1ot Jesus, ileg\u00f1ija: Innafanjula jao pot si Jesus, ni y japredidica si Pablo.\n19:14 Ya guaja siete na lalaje, famaguon un Judio ni naa\u00f1a si Sceva, ya magas mamale, na jafatinas este sija.\n19:15 Ya manope y taelaye na espiritu, ileg\u00f1a: Si Jesus jutungo, yan si Pablo jutungo; lao jaye jamyo?\n19:16 Ya y taotao ni y guaja taelaye na espiritu, tumayog gui jilo\u00f1ija; ya jagana sija, sa mas gaeninasi\u00f1a\u00f1a qui sija; ya esta manmalago sija g\u00fcije na guma, manerido yan taya magagu\u00f1ija.\n19:17 Ya matungo este todo ni y Judios, yan y Griego sija yan ayo sija y ma\u00f1asaga Efeso; ya podong y minaa\u00f1ao gui jilo\u00f1ija todos, ya manadangculo y naan y Se\u00f1ot Jesus.\n19:18 Ya megae ni y manmanjonggue manmato, ya mangonfesat manma\u00f1angane ni y checho\u00f1ija.\n19:19 Ya megae ni ayo sija locue y umuusa y magica jachule y leblon\u00f1ija, ya jasonggue gui menan todo y taotao: ya matufong y balen\u00f1ija, ya masoda na sincuenta mil na pidason salape,\n19:20 Ya taeg\u00fcenao mumegagae\u00f1a y ninasi\u00f1an y sinangan Yuus.\n19:21 \u00b6 Ya despues di este sija, jajaso si Pablo gui espiritu\u00f1a, anae malofan inanaco Masedonia yan Acaya na ujanao para Jerusalem, ileg\u00f1a: Yaguin esta matoyo g\u00fcije, nesesita yo na julie locue Roma.\n19:22 Ya depues di jatago dos para Masedonia ni y sumesetbe g\u00fce, si Timoteo yan Erasto, g\u00fciya sumagaja Asia un rato.\n19:23 \u00b6 Ya ayo na tiempo guaja g\u00fcije atboroto pot ayo na Chalan.\n19:24 Sa un platero na taotao na y naan\u00f1a si Demetrio, ya mamatitinas attat salape para si Diana, ya ti didide na ganansia chinilele\u00f1a para y manmamatitinas.\n19:25 Ya janaetnon yan todo y manmachochocho ni y taeg\u00fcije, ya ileg\u00f1a: Se\u00f1ores, intingoja na este na chocho nae manma\u00f1o\u00f1odajit g\u00fcinajata.\n19:26 Ya inliija yan injingog, na ti ayoja iya Efeso, lao cana todo iya Asia nae megae na taotao jasuug si Pablo, yan jabira, sa ileg\u00f1a na ti manyuus ayo sija y finatinas canae.\n19:27 Ya ti esteja nae uguaja peligro y chechota na unafanaebale lao asta y templon y dangculo na yuus si Diana umarechasa, ya y tinaquilo\u00f1a umayulang, ni y todo iya Asia yan todo y tano umadodora.\n19:28 \u00b6 Ya anae jajungog sija este na sinangan, ninafangosbubu, ya managang ileg\u00f1ija: Dangculo y Dianan Efesios.\n19:29 Ya y siuda bula atboroto; ya manda\u00f1a unoja ya manjalom gui teatro ya macone si Gayo yan Aristarco, taotao Masedonia mangachong Pablo gui jinanao\u00f1a.\n19:30 Ya malago si Pablo na ufalag y anae mangaegue y taotao sija; lao ti mapolo ni y disipulo.\n19:31 Ya palo ni y manmagas Asia ni y manamigu\u00f1a, manmanago na umasangane na cha\u00f1a jumalom g\u00fce gui teatro.\n19:32 Ya y palo, managang un inagang: ya y palo, otro inagang; sa manatborotao y dinana; ya megae\u00f1a ti tumungo jafa na manda\u00f1a sija.\n19:33 Ya macone si Alejandro gui entre y linajyan taotao, ya mapolo mona ni y Judios, ya ma\u00f1e\u00f1as si Alejandro ni y canae\u00f1a na ufanmamatquilo, sa malago umadingane y taotao sija,\n19:34 Lao anae matungo na Judio g\u00fce, todos managang gui un inagang buente dos oras, ileg\u00f1ija: Dangculo y Dianan Efesios.\n19:35 Ya anae y secretario y inetnon magalalaje munjayan janaquieto y taotao, ileg\u00f1a nu sija: Jamyo ni y taotao Efeso, jafa na taotao ayo y ti jatungo na y siuda Efesios manmanadodora ni y dangculo na yuus Diana, yan y imagen ni y podong guinin y Jupiter?\n19:36 Inlie na estesija ti si\u00f1a macontra, nesesita na infanmamatquilo, ya chamiyo fumatitinas jafa.\n19:37 Sa jamyo cumone mague este sija na taotao, na ti ma\u00f1aque gui guimayuus, ni ujachatfino contra y yuusmiyo.\n19:38 Yaguin si Demetrio yan y palo ni y mangachong\u00f1a guaja quejan\u00f1ija contra y otro taotao: guaja tribunal y lay: ya guaja y jues; polo ya ufanafaaela uno y otro.\n19:39 Lao yaguin inseda jamyo jafa pot otro sija, umafatinas gui inetnon y magalalaje taemanoja y lay.\n19:40 Sa mangaeguejit gui peligro, na utafanmafaesen pot este sija na atboroto, ya taya jafa si\u00f1a urasonta pot este.\n19:41 Ya anae munjayan cumuentos, janajanao y dina\u00f1a.\n20:1 YA anae bumasta y atboroto, jaagang si Pablo y disipulo sija, ya anae jaaconsejo ya jadingo, mapos para Masedonia.\n20:2 Ya anae jajanag\u00fce inanaco ayo sija na lugat, ya janae sija megae na consejo, mapos malag Gresia.\n20:3 Ya sumaga g\u00fcije tres meses, ya manananggaja para ucone ni y Judios, anae maudae gui batco ya janao para Siria, jajaso na utalo guato Masedonia.\n20:4 Ya maosgaejon asta Asia, si Sopater patgon Pirro guiya Berea, yan iya Tesal\u00f3nica, si Aristarcho yan si Segundo, yan si Gayo guiya Derbe, yan si Timoteo: ya iya Asia, si Tiquico yan si Tr\u00f3fimo.\n20:5 Este sija manjanao finena, ya janananggajam Troas,\n20:6 Ya despues di y pan sinlibadura, manmaudaejam gui batco desde Filipos, infatoig\u00fce sija guiya Troas gui mina sinco na jaane; ya ma\u00f1agajam g\u00fcije siete na jaane.\n20:7 \u00b6 Ya y finenana na jaane gui semana, anae manda\u00f1a y disipulo para umaipe y pan, si Pablo japredica guiya sija, sa esta g\u00fce listo para ujanao gui inagpa\u00f1a: ya sisigueja di manpredica asta y tatalopuenge.\n20:8 Ya megae na candet gui sanjilo na cuatto anae estabajam na mandada\u00f1a.\n20:9 Ya estaba g\u00fcije un patgon na taotao na y naan\u00f1a si Eutico, na matatachong sanjilo gui un bentana, ya guesmaego; ya y inanaco y prinedican Pablo, matomba gui maego\u00f1a, ya podong desde y mina tres na piso, ya anae majatsa matae.\n20:10 Ya tumunog papa si Pablo ya dumimo gui jilo\u00f1a, ya jatogtog ileg\u00f1a: Chamiyo ninafa\u00f1achatsaga, sa y lin\u00e2l\u00e2\u00f1a gaegueja gui sanjalom\u00f1a.\n20:11 Ya anae cajulo talo, jaipe y pan ya ma\u00f1ocho, ya cumuentos asta qui manana; ya ayonae jumanao.\n20:12 Ya l\u00e2l\u00e2 patgon na taotao, ya ti didide ninafanmagof.\n20:13 \u00b6 Ya manmaposjam para y batco, ya manmaudaejam guato Asos, sa para ayo nae inquene si Pablo: sa taeg\u00fcije matago\u00f1a, ya malago\u00f1aja ufamocat.\n20:14 Ya anae manasodajam Asos, inquene g\u00fce, ya manmatojam Mitilene.\n20:15 Ya desde ayo, manmaudaejam gui batco, ya manmatojam gui inagpa\u00f1a na jaane gui menan Chio, ya y inagpa\u00f1a talo g\u00fcije na jaane, manmatojam Samo, ya ma\u00f1agajam Trogilio; ya y inagpa\u00f1a na jaane, manjanaojam para Mileto.\n20:16 Sa si Pablo malago\u00f1a umaudae gui batco para Efeso, sa ti malago jagasta y tiempo guiya Asia; sa inalulula, na mano y ninasi\u00f1a\u00f1a, na ufato Jerusalem gui jaanen y Pentecostes.\n20:17 \u00b6 Ya desde Mileto manago guato Efeso na ufanmaagange y manamco gui guimayuus.\n20:18 Ya anae manmato guiya g\u00fciya, ileg\u00f1a nu sija: Injatingo desde y finenenana na jaane anae matoyo Asia, jafa manaemanojit todo y tiempo,\n20:19 Jusetbe y Se\u00f1ot contodo y inimitde na jinaso, yan y minegae lago, yan y tentasion sija ni y manmato guiya guajo pot y ninanggan y Judios.\n20:20 Ya jaftaemano ti maa\u00f1ao yo jusangane jamyo todo y mauleg para jamyo, lao jufanue jamyo yan jufanag\u00fce jamyo, gui publico yan gui guima yan guma.\n20:21 Junamatungo gui Judios yan y Griego sija locue, y sinetsot para as Yuus, yan y jinenggue para y Se\u00f1otta as Jesucristo.\n20:22 Ya pago, estag\u00fce y Espiritu na janajanaoyo para Jerusalem, ti jutungo jafa ufanmato guiya guajo g\u00fcije.\n20:23 Esteja y Espiritu Santo janae yo testimonio na gui cada siudad, ileg\u00f1a, na y guinede yan y pinite ufa\u00f1aga guiya guajo.\n20:24 Lao taya g\u00fcine na g\u00fcinaja unacalamtenyo, ni ti junaguaguan y lin\u00e2l\u00e2jo para guajo, lao guefmalago yo na junafunjayan y chechojo, yan y obligasionjo ni y juresibe gui Se\u00f1ot Jesus, para junamatungo y ebangelion y grasian Yuus.\n20:25 Ya pago, estag\u00fce na jutungo jamyo todos, ya ni uno guiya jamyo ni y anae guinin jupredica y raenon Yuus, ulinie y matajo mas.\n20:26 Enao na jucone jamyo para testigo pago na jaane, na guajo gasgasyo guinin todo y j\u00e2g\u00e2 y taotao sija.\n20:27 Sa trabia ti munjajayan junatungo jamyo todo ni y pinagat Yuus.\n20:28 Guefadaje jamyo, yan todo y manada ni y ninafanmagas jamyo ni y Espiritu Santo, para inapasto inetnon mangilisyano iyon Yuus, ni y jafajan ni y j\u00e2g\u00e2\u00f1aja.\n20:29 Sa jujatungo este, na despues di jumanaoyo, y manaelaye sija na lobo ufanjalom gui entalomiyo, ya ti unasobbla y manada.\n20:30 Ya iya jamyo locue nae ufangajulo sija taotao na jasasangan y manaelaye na g\u00fcinaja sija, para ufanmangone disipulo sija para udalalag sija.\n20:31 Enaomina adaje, ya injaso na pot tres a\u00f1os, ti pumaparayo jusangane cada uno parejoja jaane yan puenge cumacasaoyo.\n20:32 Ya pago ma\u00f1elujo, jutayuyute jamyo as Yuus, yan y sinangan y grasia\u00f1a, ni y si\u00f1a manjinatsa jamyo julo, yan infanninae erensianmiyo yan todo ayo sija y manafangasgas.\n20:33 Sa taya jucodisia ni jaye na taotao, salape pat oro, pat magago.\n20:34 Ya jamyo, intingo este sija na canae y sumesetbeyo gui nesesidajo, yan ayo sija y mangachochongjo.\n20:35 Esta junae jamyo mauleg na ejemplo gui todosija, jaftaemano ya guaja obligasionmiyo na inadaje y manaemetgot yan injaso y sinangan y Se\u00f1ot Jesus, ni y ileg\u00f1a: Mas dichoso y mannae qui y manresibe.\n20:36 \u00b6 Ya anae munjayan jasangan taeg\u00fcine, dumimo papa ya manmanayuyut todos.\n20:37 Ya todosija mananges ya matogtog y ag\u00e2g\u00e2 Pablo ya machico.\n20:38 Ya ninafansenpinite todos pot y sinangan\u00f1a, na ti ujalie y mata\u00f1a mas. Ya maosgaejon gui jinanao\u00f1a asta y batco.\n21:1 YA anae susede na manadingojam, manmaudaejam gui batco, ya manmatojam gui tinas na chalan para Coos, ya y inagpa\u00f1a na jaane manmatojam Rodas, ya desde ayo asta P\u00e1tara.\n21:2 Ya inseda un batco na jumajanao para Finesia, ya manmaudaejam, ya manjanaojam.\n21:3 Ya anae intutujon lumie Chipre inpelo gui acag\u00fce, ya manjanaojam asta Siria, ya manmatojam Tiro: sa para umadescatga g\u00fcije y batco.\n21:4 Ya anae manma\u00f1odajam g\u00fcije disipulo, ma\u00f1agajam siete na jaane; ya ileg\u00f1ija as Pablo pot y Espiritu, na cha\u00f1a jumajanao julo Jerusalem.\n21:5 Ya anae inquimple todo esta ayo sija na jaane, manjanaojam ya insigue y jinanaomame, ya manmaosgaejonjam ni y asaguan\u00f1ija yan y famaguon\u00f1ija, asta qui manjuyongjam gui siuda: ya mandimojam gui oriyan tase ya manmanayuyutjam.\n21:6 Ya, anae manadingojam, uno y otro, manmaudaejam gui batco, ya sija manalo guato guiya sija.\n21:7 \u00b6 Ya anae inquimple y jinanaomame desde Tiro, manmatojam Tolemaida, ya insaluda y ma\u00f1elo, ya ma\u00f1agajam g\u00fcije yan sija un jaane.\n21:8 Ya y inagpa\u00f1a, jame ni y mangachong Pablo, manjanaojam, ya manmatojam Sesarea; ya manjalomjam gui guima Felipe y ebangelista ni y uno gui siete, ya ma\u00f1agajam g\u00fcije yan g\u00fciya.\n21:9 Ya ayo na taotao, guaja cuatro jaga\u00f1a na vitgen na manmanprofetisa.\n21:10 Ya mientras ma\u00f1agajam g\u00fcije megae na jaane, mato papa guinin Judea un profeta na y naan\u00f1a Agabo.\n21:11 Ya anae mato guiya jame, jachule y senturon Pablo, ya jagode g\u00fce canae\u00f1a yan y adeng\u00f1a, ya ileg\u00f1a: Taeg\u00fcine ileg\u00f1a y Espiritu Santo: Taeg\u00fcineja magode\u00f1a y gaeiyo este na senturon, ni y Judios ni mangaegue Jerusalem, ya umaentrega gui canae Gentiles.\n21:12 Ya anae injingog este sija, parejoja jame yan ayo y ma\u00f1asaga g\u00fcije na lugat, matayuyut g\u00fce na cha\u00f1a jumajanao julo Jerusalem.\n21:13 Ayonae manope si Pablo ileg\u00f1a: Jafa na manatanges jamyo, ya inyamag y corasonjo? sa esta listoyo ti para jumagodeja, lao asta jumatae guiya Jerusalem, pot y naan Jesucristo.\n21:14 Ya anae timalago manama\u00f1a\u00f1a, manbastajam ilegmame: Y minalago y Se\u00f1ot umafatinas.\n21:15 \u00b6 Ya despues di ayo sija na jaane, inchile y g\u00fcinajanmame ya manjanaojam papa Jerusalem.\n21:16 Ya manjame locue yan palo disipulon Sesarea, ya manmangongone un Mnason iya Chipre, y bijo na disipulo ya infanjame ma\u00f1aga.\n21:17 Ya anae manmatojam Jerusalem, mangosmagof y ma\u00f1elo jaresibejam.\n21:18 Ya y inagpa\u00f1a, manjanaojam yan si Pablo para as Santiago: ya todo y manamco manestaba.\n21:19 Ya anae munjayan jasaluda sija, jasanganen adumidide ni y finatinas Yuus gui entalo Gentiles pot y checho\u00f1a.\n21:20 Ya anae jajungog sija, maalaba y Se\u00f1ot, ya ileg\u00f1ija nu g\u00fciya: Unlie chelujo cuantos miles na Judios y manmanjonggue, yan maneggo ni y tinago:\n21:21 Ya matungo guinin jago, na unfanag\u00fce todo y Judios ni y mangaegue gui Gentiles, na ujafa\u00f1uja gui as Moises, ilegmo, na munga manmasirconsida y famaguon\u00f1ija, ni ujadalalag y costumbre.\n21:22 Ya jafa nae umafatinas? Magajet na ujajungog na mato jao.\n21:23 Enao mina fatinas este y insangane jao: Guajajam cuatro na taotao na manmanpromesa;\n21:24 Cone sija, ya unnagasgas jao yan sija, ya unfangata pot sija ya ufanmadasae ilun\u00f1ija; ya todo utiningo na ayo sija y matungo pot jago taya guaja; lao jago locue dalalag jaftaemano y tinago, ya unadaje y lay.\n21:25 Ya pot y Gentiles ni y manmanjonggue, esta intigue na innafagpo, na cha\u00f1ija umadadaje ni uno g\u00fcine; solo ujaadajeja sija g\u00fcije na g\u00fcinaja y manmaofrese y idolos, yan y j\u00e2g\u00e2, y mamuno, yan y in\u00e1bale.\n21:26 Ayonae si Pablo jacone y taotao sija, ya y inagpa\u00f1a na jaane janagasgas g\u00fce yan sija, jumalom gui templo para usangan y macumplen y jaanen y managasgas, asta qui ufanmaofrese y inefrese cada uno guiya sija.\n21:27 \u00b6 Ya anae esta cana mamagpo y siete na jaane, ni Judios ni y mangaegue Asia, anae malie g\u00fce gui templo, janafangalamten todo y taotao contra g\u00fciya.\n21:28 Ya managang ileg\u00f1ija: Taotao Israel, fanmanayuda: Estag\u00fce yuje na taotao y jafananag\u00fce todo y taotao manoja guato contra y pueblo, yan y lay, yan este na lugat: yan janafanjalom y Gentiles gui templo, ya janataelaye este na lugat.\n21:29 (Sa guinin malie g\u00fce antes yan si Tr\u00f3fimo, un taotao Efeso, gui siuda, ya jinaso\u00f1ija na si Pablo cumone jalom gui templo.)\n21:30 Ya todo manatborotao y siuda, yan todo y taotao manmalago, ya macone si Pablo, ya manajuyong gui templo; ya enseguidas manmajuchom y petta.\n21:31 Ya anae manjajanao para umapuno si Pablo, mato notisia gui magas y inetnon, na todo iya Jerusalem man atborotao.\n21:32 Ya enseguidas mangone sendalo sija yan capitan, ya manmalago guato guiya sija; ya anae malie y magas y inetnon yan y sendalo sija, manbasta masaulag si Pablo.\n21:33 Ayonae y magas y inetnon jumijot, ya quinene g\u00fce, ya manago na umagode dos na cadena: ya mamaesen jaye g\u00fce, yan jafa finatinas\u00f1a.\n21:34 Ya palo manaagang un inagang, ya y palo, otro inagang, gui entre y linajyan taotao: ya anae ti si\u00f1a tumungo y magajet pot y atboroto, manago na umacone guato gui castiyo.\n21:35 Ya anae mato gui guaot, sa macocone ni y sendalo sija, pot y finijom y linajyan taotao;\n21:36 Sa manatateja y linajyan taotao, ya manaagangja ileg\u00f1ija: Fa\u00f1uja yan guiya.\n21:37 \u00b6 Ya anae para umacone si Pablo gui castiyo, ileg\u00f1a nu y magas inetnon: Si\u00f1ajit cumuentos? ya ileg\u00f1a: Untungo Griego?\n21:38 Ti jago ayo y taotao Egipto, ni y antes di este sija na jaane unfatinas jatsamiento, ya uncone guato gui desierto cuatro mil na taotao ni y manpegno?\n21:39 Lao si Pablo ileg\u00f1a: Guajo Judioyo, taotao Tarso, siuda Silisia--taotao un siuda ti diquique: ya jutayuyut jao na unpoloyo ya jucuentuse y taotao sija.\n21:40 Ya anae ninae lisensia, tumojgue si Pablo gui guaot, ya jase\u00f1as y taotao sija ni y canae\u00f1a. Ya anae manmamatquilo jacuentuse sija ni cuentos Hebrea, ileg\u00f1a:\n22:1 LALAJE ma\u00f1elo yan ma\u00f1aena, jingog y dumefiendeyo pago guiya jamyo!\n22:2 (Ya anae majungog na mancuinentuse sija ni y fino Hebreo, ninafanmamatquilo mas;) ya ileg\u00f1a:\n22:3 Guajo magajet taotao na Judio, mafa\u00f1agon Tarso, un siuda guiya Silisia; lao mapogsaeyo g\u00fcine na siuda gui adeng Gamaliel, mafanag\u00fceyo taemanoja y minagajet y lay y ma\u00f1aenata, ya eggoyo para as Yuus, taeg\u00fcenao iya jamyo pago na jaane.\n22:4 Ya jupetsigue sija gui este jinanao asta junafanmapuno, jugogode ya juentrerega gui catset y lalaje yan y famalaoan.\n22:5 Ya parejoja y magas mamale locue numaeyo testimonio, yan todo y manada y manamco: guinin iya sija locue nae manresibeyo catta para y ma\u00f1elo, ya jumanaoyo para Damasco, para jucone ayo sija ni y sinedajo g\u00fcije ya jugode guato Jerusalem para ufanmasapet.\n22:6 Ya susede anae jumajanaoyo, ya esta jijotyo para Damasco gui taloane, enseguidas manina g\u00fcije guinin y langet un dangculon candet gui oriyajo,\n22:7 Ya podongyo gui jilo tano, ya jujungog un inagang na ileg\u00f1a nu guajo: Saulo, Saulo, sa jafa na unpetsisigueyo?\n22:8 Ya juope ilegco: Jayejao Se\u00f1ot? Ya ileg\u00f1a nu g\u00fcajo: Guajo si Jesus Nasareno ni y unpetsisigue.\n22:9 Ya ayo y mangachochongjo jalie magajet y candet, ya ninafanmaa\u00f1ao; lao ti jajungog y inagang ayo y cumuentuseyo.\n22:10 Ya ilegco: Jafa jufatinas Se\u00f1ot? Ya y Se\u00f1ot ileg\u00f1a nu guajo: Cajulo ya janao falag Damasco; ya ayonae umasangane todo g\u00fcinaja ni y matancho para chechomo.\n22:11 Ya anae ti si\u00f1ayo manlie pot y minalag y candet, mapipetyo ni ayo sija y guinin mangachochongjo, ya maconeyo guato Damasco.\n22:12 Ya si Ananias, un taotao na deboto jaftaemanoja y lay, ya guaja mauleg na testimonio para todo y Judios sija ni y ma\u00f1asaga g\u00fcije,\n22:13 Mato guiya guajo, ya tumojgue, ya ileg\u00f1a nu guajo: Chelujo Saulo, resibe y liniemo. Ya ayoja na ora nae juatan g\u00fce.\n22:14 Ya ileg\u00f1a: Y Yuus ma\u00f1aenata umayegjao, na para untungo y minalago\u00f1a, ya unlie Ayo Tunas, yan unjungog y inagang y pachot\u00f1a.\n22:15 Sa jago utestigu\u00f1a todo gui taotao, jafa y liniemo yan y jiningogmo.\n22:16 Ya pago jafa na sumasagajaoja? Cajulo ya unmatagpange, ya ufinagase y isaomo, agang y naan\u00f1a.\n22:17 Ya susede anae tumaloyo guato Jerusalem, ya mientras mananaetaeyo gui templo, malingo y jinasoco,\n22:18 Ya julie g\u00fce, ya ileg\u00f1a nu guajo: Laguse, ya unjanao juyong Jerusalem; sa ti manmalago maresibe y testemoniumo pot guajo.\n22:19 Ya ilegco: Se\u00f1ot, jatungoja sija na manpresoyo yan ma\u00f1aulag gui cada sinagoga ni ayo sija y jumonggue jao;\n22:20 Ya anae machuda y j\u00e2g\u00e2 Esteban ni y testigomo, estabajayo na tumotojgue gui oriya, ya jucousienteja y mapuno\u00f1a, ya juadaje y magagon ayo sija y pumuno g\u00fce.\n22:21 Ya ileg\u00f1a nu guajo: Janao; sa guajo tumagojao chago desde este para y Gentiles.\n22:22 \u00b6 Ya majungog g\u00fce asta este na sinangan, ya entonses jajatsa y inagang\u00f1ija, ya ileg\u00f1ija: Najanao ayo na taotao gui jilo tano, sa ti combiene na ul\u00e2l\u00e2.\n22:23 Ya anae managang, yan jayute y magagon\u00f1ija, ya manmanyute oda gui aire,\n22:24 Y magas inetnon jatago na umacone g\u00fce guato gui jalom castiyo, ya manago na umasaulag para umaegsamina, para utungo pot jafa causa na manaagang contra g\u00fciya.\n22:25 Ya anae magode g\u00fce ni y coreas, ileg\u00f1a si Pablo ni y senturion ni y tumotojgue gui oriya: Tunas para jago na unsaulag un taotao na Romano sin umacondena?\n22:26 Ya anae jajungog ayo y senturion, mapos ya jasangane y magas inetnon ileg\u00f1a: Adaje jafa y unquequechog\u00fce, sa este na taotao Romano.\n22:27 Ayonae y magas inetnon mato ya ileg\u00f1a: Sanganeyo, jago Romano? Ya g\u00fciya ileg\u00f1a: Junggan.\n22:28 Ya y magas inetnon manope ileg\u00f1a: Pot y minegae salape na juchule este na linebre. Ya si Pablo ileg\u00f1a: Lao guajo Romanoyo na fina\u00f1ago.\n22:29 Ayonae manjanao guiya g\u00fciya ayo sija y para umegsamina g\u00fce: ya y magas inetnon ninamaa\u00f1ao locue, despues di jatungo na Romano, sa g\u00fciya munamagode.\n22:30 \u00b6 Ya y inagpa\u00f1a, malago na utungo magajet cao jafa na mafaaela g\u00fce ni y Judios, ya masotta gui mapresu\u00f1a, ya manago na ufanmato y magas mamale, yan y mangachong\u00f1a, ya macone papa si Pablo ya mapolo gui mena\u00f1ija.\n23:1 YA si Pablo jagueguesatan y inetnon, ya ileg\u00f1a: Ma\u00f1elo, lal\u00e2l\u00e2jayo contodo y minauleg y jinasoco asta este na jaane.\n23:2 Ya y magas na pale as Ananias, jatago ayo sija y manotojgue gui fion\u00f1a na umapatmada pachot\u00f1a.\n23:3 Ayonae ileg\u00f1a si Pablo nu g\u00fciya: Si Yuus unpinatmada, apaca na padet: sa matachong jao para unjusgayo pot y lay; ya manago jao na jumapatmada contra y lay?\n23:4 Ya ayo sija y manotojgue gui fion\u00f1a, ileg\u00f1ija: Yyon Yuus y magas na pale unlalalatde?\n23:5 Ayo nae ileg\u00f1a si Pablo: Ti jutungo, ma\u00f1elo cao g\u00fciya y magas na pale: sa esta matugue, Chamo sumasangan taelaye gui magalajen y tanomo.\n23:6 \u00b6 Lao anae jatungo si Pablo na y un patte Saduseo, ya y otro Fariseo, umagang juyong gui inetnon: Ma\u00f1elo, Guajo Fariseo, lajin un Fariseo: gui ninangga yan y quinajulo guinen manmatae na mafafaesenyo.\n23:7 Ya anae munjayan jasangan este, guaja inaguaguat gui entalo y Fariseo yan y Saduseo: ya manmadibide y inetnon taotao.\n23:8 Sa y Saduseo ileg\u00f1ija na taya quinajulo guinin manmatae, ni angjet, ni espiritu; lao y Fariseo jasasanganja todo.\n23:9 Ya ayonae cajulo dangculon inagang: ya y palo escriba ni y manestaba gui Fariseo na patte, mangajulo ya managuaguat, ileg\u00f1ija: Ti inseda tinaelaye g\u00fcine na taotao: lao jafa, yaguin espiritu pat angjet sumangane g\u00fce?\n23:10 Ya anae guaja dangculon inaguaguat, ya y magas y inetnon maa\u00f1ao na nosea umapidaso si Pablo nu sija, manago ni y sendalo na ujafanjanao papa, ya ujacone si Pablo guiya sija fuetsao, ya umacone jalom gui castiyo.\n23:11 \u00b6 Ya anae puenge, y Se\u00f1ot tumojgue gui oriya\u00f1a, ya ileg\u00f1a: Namauleg inangocomo Pablo: sa taemanoja y ninamatungomo nu guajo guiya Jerusalem, taeg\u00fcijeja locue nae unnamatungo guiya Roma.\n23:12 \u00b6 Ya anae manana, palo gui Judios manda\u00f1a, ya manmanjula gui papa y matdision, ileg\u00f1ija na ti ufa\u00f1ocho yan ti ufanguimen astaqui umapuno si Pablo.\n23:13 Ya mas di cuarenta y fumatinas este na juramento.\n23:14 Ya manmalag y magas mamale, yan y manamco, ya ileg\u00f1ija: Esta manmanjulajam gui papa y matdision, na ti infa\u00f1ocho ni jafa astaqui inpino si Pablo.\n23:15 Ya pago jamyo yan y dina\u00f1a, fanatungo yan y magas y inetnon ya infanmaconie agupa, ya inquetungo palo mas magajet pot g\u00fciya; ya jame infamaulegjam para, yaguin esta jijot, inpino.\n23:16 Ya anae jajungog y lajin y chelun Pablo y ninanggan\u00f1i\u00f1ija, mapos ya jumalom gui castiyo, ya jasangane si Pablo.\n23:17 Ayonae si Pablo jaagang uno gui senturion ya ileg\u00f1a: Cone este y patgon na taotao asta y magas y inetnon: sa guaja para usinangane.\n23:18 Ya jamantiene, ya jacone guato gui magas y inetnon, ya ileg\u00f1a: Si Pablo ni y maprereso jaagangyo, ya jatayuyutyo para jucone este y taotao guato guiya jago, sa guaja para unsinangane.\n23:19 Ayonae y magas y inetnon, minantiene canae\u00f1a ya sumuja y dos gui un banda, ya finaesen, ileg\u00f1a: Jafa ayo y para unsanganeyo?\n23:20 Ya g\u00fciya ileg\u00f1a: Y Judios esta manatungo na unmagagao ya uncone agupa papa si Pablo gui inetnon, taeg\u00fcije y malago\u00f1ija, na umaquetungo y magajet guiya g\u00fciya.\n23:21 Lao chamo umangongoco jao nu sija: sa esta y manmannanangga pot g\u00fciya, mas di cuarenta na taotao ni y manmanjula na ti ufa\u00f1ocho, yan ti ufanguimen astaqui mapuno g\u00fce; ya pago umanangga\u00f1i\u00f1ija y promesamo.\n23:22 Ayonae y magas y inetnon, janajanao y patgon na taotao, ya jaencatga, na cha\u00f1a sumangangane ni jaye na taotao na ninatungo g\u00fce ni este na g\u00fcinaja.\n23:23 Ya jaagang dos na senturion, ya ileg\u00f1a: Nalisto dosientos na sendalo para ufanjanao para Sesarea, yan setenta ni y manquinababayo, yan dosientos ni y manmanlalansa, para y mina tres na ora gui puenge;\n23:24 Ya unfamauleque sija g\u00e2g\u00e2 sija para ujanamaudae si Pablo, ya ujacone guato satbo gui as magalaje as Felix.\n23:25 Ya manugue un catta, na taeg\u00fcine mapolo\u00f1a:\n23:26 \u00b6 Claudio Lysias para y mas magas na magalaje as Felix, jusaluda jao.\n23:27 Este na taotao, macone ni y Judios ya para ujapuno: ya matoyo yan y sendalujo ya junalibre g\u00fce, sa jutungo na Romano g\u00fce.\n23:28 Ya malagoyo na jutungo pot jafa na mafaaela g\u00fce, ya jucone guato gui inetnon\u00f1ija:\n23:29 Ya jusoda na mafaaela pot finaesen gui lay\u00f1ija; lao taya isao\u00f1a na jamerese na umapuno, pat umapreso.\n23:30 Ya anae masanganeyo jafa y Judios ninanggan\u00f1i\u00f1ija pot y taotao, enseguidas jutago para iya jago, ya fanago para ayo sija y fumaaela y ujasangan gui menamo jafa guaja guiya sija contra g\u00fciya. Adios.\n23:31 \u00b6 Ayonae y sendalo sija ni y tinago\u00f1a, macone si Pablo gui puenge ya macone guato Antipatris.\n23:32 Ya y inagpa\u00f1a, mapolo y manquinababayo na ujafanjanao yan g\u00fciya, ya manalo guato gui castiyo.\n23:33 Ya anae manmato Sesarea, manae y magalaje ni y catta, ya mapoloja locue si Pablo gui mena\u00f1a.\n23:34 Ya anae munjayan y magalaje jataetae y catta, jafaesen jafa na provinsia g\u00fce; ya jatungo na taotao Silisia.\n23:35 Ya ileg\u00f1a nu g\u00fciya: Jujungog jao yaguin manmato locue ayo sija y fumaaela jao. Ya manago na umaadaje gui tribunal gui palasyo Herodes.\n24:1 YA anae malofan sinco na jaane, si Ananias y mas magas na pale tumunog yan y manamco, yan un gacumuentos na naan\u00f1a si Tertulo; mamacuentos gui magalaje contra si Pablo.\n24:2 Ya anae janamaagange si Tertulo, jatutujon famaaela, ileg\u00f1a: Liija na pot jago na mansenmagofjam ni y dinangculon pas, yan mansenmauleg na chocho y manmachog\u00fce g\u00fcine na nasion pot y minaulegmo,\n24:3 Ya inresisibeja siempre gui todo y lugat sija contodo y minegae y grasia, O gosmauleg Felix.\n24:4 Ya pot ti junasaga jao laapmam, jutayuyut jao na unecungogjam pot y minauleg y didide na finomo.\n24:5 Sa inseda este na taotao na case, yan numanafanenbeste gui entalo y Judios todo y tano; yan y magas y secta y Nasareno sija;\n24:6 G\u00fciya locue jumajanao, ya janafanataelaye y guimayuus: ya inquene g\u00fce sa manmalagojam na injisga jaftaemanoja y layta.\n24:7 Lao y mas magas y inetnon as Lysias mato guiya jame, yan y dangculon linalalo\u00f1a ya jacone gui canaemame;\n24:8 Ya jatago y fumaaela na ufanmato guiya jago ya jagoja si\u00f1a unegsamina ya untungo todo este sija na g\u00fcinaja ni y infaaela g\u00fce.\n24:9 Ya y Judios locue, jaconsienteja este na g\u00fcinaja na utaeg\u00fcine.\n24:10 \u00b6 Ayonae si Pablo, anae sine\u00f1as ni y magalaje na ucuentos; manope ileg\u00f1a: Pot y jutungo na jago guinin jues megae na anos g\u00fcine na nasion, juguesfanope pot guajoja;\n24:11 Para untungo na taya trabia mas di dose a\u00f1os, desde qui cajuloyo Jerusalem para jufanadora.\n24:12 Ya taya nae masodayo gui templo juaguaguaguate ni jaye na taotao, ni junafangalamten y taotao sija; ni y sinagoga, ni mano na siuda;\n24:13 Ya ti si\u00f1a ujaaprueba y g\u00fcinaja ni y mafaaelajo pago.\n24:14 Lao este juconfesat\u00f1aejon guiya jago, na y jinanao ni y mafananaan un Secta, taeg\u00fcenao nae jusesetbe si Yuus ma\u00f1aenata; jujonggue todo y g\u00fcinaja ni y manmatugue gui Lay yan y profeta sija.\n24:15 Ya guaja ninanggaco as Yuus, taeg\u00fcije iya sija locue, na uguaja quinajulo guinin manmatae; parejoja y manmauleg yan y manaelaye.\n24:16 Ya pot este na juprocucura, na uguaja siempre gui jinasoco na chajo umofefende si Yuus, ni y taotao sija.\n24:17 Ya pago megae esta na a\u00f1os manmalofan matoyo para juchulie limosna y nasionjo, yan inefrese sija:\n24:18 Masodayo yan estesija, gasgas gui jalom y guimayuus, ya taya linajyan taotao, ni atboroto; lao guaja palo Judios ni y manguinin Asia:\n24:19 Ya sija, mannesesita ufangaegue g\u00fcine gui menamo, ya ujasangan cao guaja jafa contra guajo.\n24:20 Patseno, sotta este y mangaegue g\u00fcine ya ujasangan, yaguin manma\u00f1oda taelaye na finatinas guiya guajo, mientras tumotojgueyo gui menan y inetnon,\n24:21 Ya pot esteja y un inagang, anae estabayo gui entalo\u00f1ija, ya umagangyo: Pot y quinajulo guinin y manmatae na jumafaesen pago na jaane pot jamyo.\n24:22 \u00b6 Lao si Felix, pot guaja mas magajet tiningo\u00f1a ni ayo na jinanao, janafanmadetiene sija ya ileg\u00f1a: Yaguin tumunog y mas magas y inetnon as Lysias, jutungo tododoja este y chechomiyo.\n24:23 Ya jatago un senturion na uadaje si Pablo, yan unae linibre ya cha\u00f1a chumochoma y manatungo\u00f1a na ufanmato guiya g\u00fciya, pat umasetbe.\n24:24 \u00b6 Ya malofan unos cuantos na jaane, mato si Felix yan y asagua\u00f1a as Drusila na Judia, ya janamaagange si Pablo, ya majungog guiya g\u00fciya pot y jinenggue as Jesucristo.\n24:25 Ya anae jaadingane pot y tininas, yan y minauleg, yan y jinisga ni ufato, ninamaa\u00f1ao si Felix, ya manope ileg\u00f1a: Janao unjanao pago, ya yaguin guaja mauleg na lugat junamaagagange jao.\n24:26 Ya jananangga locue na uninae as Pablo salape para usinetta; enaomina jatago na ufafato cada rato, ya ujaatungo.\n24:27 Lao anae malofan dos a\u00f1os, si Porcio Festo mato gui cuatton Felix: ya si Felix malago na ufanue y Judios minagof, japolo si Pablo na umapreso.\n25:1 AYONAE jumalom si Festo gui provinsia, ya anae malofan tres na jaane cumajulo desde Sesarea asta Jerusalem.\n25:2 Ya y magas mamale yan y magas y Judios manatungo g\u00fce contra si Pablo, ya matayuyut,\n25:3 Magagagao finaborese contra si Pablo, na unajanao para Jerusalem; ya mananangga gui chalan para umapuno.\n25:4 Lao manope si Festo, na si Pablo umanasagaja Sesarea, ya g\u00fciyaja ujanao enseguidas.\n25:5 Ya ileg\u00f1a: Ayo y mansi\u00f1a guiya jamyo, ujadalalagyo papa, ya ujafaaela este na taotao, yaguin guaja taelaye guiya g\u00fciya.\n25:6 \u00b6 Ya anae sumaga g\u00fcije mas di dies na jaane, mapos papa Sesarea; ya y inagpa\u00f1a matachong gui tribunal, ya manago na umaconie as Pablo.\n25:7 Ya anae mato, y Judios ni y manmato guinin Jerusalem, manojgue gui oriya\u00f1a, ya megae finaaela\u00f1ija contra si Pablo, ya ti si\u00f1a manamagajet nu sija.\n25:8 Ya manope si Pablo pot g\u00fciyaja, ileg\u00f1a: Ni contra y lay y Judios, ni contra y templo, ni contra si Sesat, ti juisag\u00fce.\n25:9 Lao malago si Festo na unafanmagof y Judios; jaope si Pablo ileg\u00f1a: Malago jao jumanao julo Jersalem, ya unmajusga pot este sija gui menajo?\n25:10 Ya ileg\u00f1a si Pablo: Gaegueyo gui tribunal Sesat anae debe di jumajusga: para y Judios, taya taelaye na finatinaso; ungostungoja.\n25:11 Sa yaguin taelaye na finatinaso, pat guinin jufatinas jafa na jumerese y finatae, ti jureusayo na jumatae: lao yaguin taya jafa pot este y finaaela\u00f1ija; taya ni un taotao uentregayo guiya sija. Jugagao jinisgajo gui as Sesat.\n25:12 Ya anae munjayan manguentos si Festo yan y taotao inetnon, jaope si Pablo ileg\u00f1a: Gui as Sesat nae malagojao jinisgamo? Unfalag as Sesat.\n25:13 \u00b6 Ya malofan palo jaane, mato si ray Agripa yan Bernise guiya Sesarea para umasaluda si Festo.\n25:14 Ya anae ma\u00f1aga g\u00fcije megae na jaane, si Festo jadeclaraye si ray ni y causan Pablo, ileg\u00f1a: Un taotao maprereso pot si Felix,\n25:15 Ni y anae estabayo Jerusalem, y magas mamale yan y manamco gui Judios mafaesenyo, sa manmalago na umacondena.\n25:16 Ya juope sija, na ti costumbren y Romano na umaentrega un taotao na umapuno, antes di umanaafana yan y fumaaela, ya uguaja lisensia\u00f1a manope pot y mafaaela\u00f1a.\n25:17 Enaomina anae manda\u00f1a guine, sinjufannangga, y inagpa\u00f1a matachongyo gui tribunal, ya managoyo na jumaconie.\n25:18 Ya manestabaja y fumaaela, lao taya finaaela\u00f1ija jafa ni ayo y jinasosoco:\n25:19 Lao guaja finaesen\u00f1ija contra g\u00fciya, pot y superstision\u00f1ija, pot y religion\u00f1ija yan pot y un Jesus ni y matae, ya jaasegura si Pablo na l\u00e2l\u00e2.\n25:20 Ya ti juguestungo ayo sija na finaesen; jufaesen g\u00fce cao malago malag Jerusalem, ya ayo nae umajusga ni este sija.\n25:21 Lao si Pablo, anae jagagao na umanasaga, para y jinisgan Augusto, managoyo na umanasaga asta qui junajanao para as Sesat.\n25:22 Ayonae si Agripa ileg\u00f1a as Festo; Malagoyo locue na jujungog y taotao. Ya ileg\u00f1a: Agupa na unjungog g\u00fce.\n25:23 \u00b6 Ya y inagpa\u00f1a mato si Agripa yan Bernise, yan y minagas\u00f1ija, ya jumalom gui tribunal, yan y mas magas y inetnon yan y mas manmagas gui siuda, ya manago si Festo na umacone si Pablo.\n25:24 Ya ileg\u00f1a si Festo: Ray Agripa, yan todo y taotao ni y mangaegue g\u00fcine na manjijita; inlie este na taotao ni y todo y linajyan Judios maqueja yan guajo guiya Jerusalem yan g\u00fcine, eleg\u00f1ija na ti umanal\u00e2l\u00e2 mas.\n25:25 Lao anae jusoda na taya finatinas\u00f1ajafa na umerese y finatae, ya anae g\u00fciyaja locue malago jinisga\u00f1a gui as Augusto, jujaso na junajanao.\n25:26 Ya taya jafa magajet na g\u00fcinaja\u00f1a para jutugue para y Se\u00f1otjo. Enaomina jucone g\u00fce mona gui menanmiyo, yan y menamo, O Ray Agripa, para yaguin munjayan maegsamina, uguaja jafa para jutugue.\n25:27 Sa y jinasoco na taya rason na umanajanao y presonero, ya ti umanaclaro y isao ni y mapolo contra g\u00fciya.\n26:1 AYONAE si Agripa ileg\u00f1a as Pablo: Jupetmite jao na uncuentos pot jago namaesa. Ayonae si Pablo jaestira mona y canae\u00f1a ya manope pot g\u00fciya namaesa.\n26:2 Magofyo ray, Agripa, sa jufanope pot guajo gui menamo pago na jaane, pot todo y mafaaelajo ni y Judio sija.\n26:3 Yan pot y jutungo na jago untungo todo y costumbre yan y finaesen gui entre y Judios; pot enaomina jutayuyut jao na con pasensiamo umaecungogyo.\n26:4 Y jaanejo desde y pinatgonjo, ni y finenana gui entre y nasionjo yan guiya Jerusalem, todo y Judios tumungo.\n26:5 Matungojayo desde y tutujon\u00f1a, yaguin manmalago masangan, na taemanoja y mas tunas na secta y religionta, jumajanaoyo taeg\u00fcije y Fariseo.\n26:6 Ya pago, tumotojgueyo ya majus gayo pot y ninanggan y promesa ni y jafatinas si Yuus gui ma\u00f1aenata.\n26:7 Ni y manmaprometa y dose tribus, masestbeja si Yuus jaane yan puenge, mananangga na ufato. Ya pot ayo na ninangga ray Agripa, na mafaaelayo ni y Judio sija.\n26:8 Jaftaemano majusga y tijongguiyon entre jamyo, na si Yuus janacajulo y manmatae?\n26:9 Guajo magajet na jujaso gui jinalomjo, na nesesitayo jufatinas megae contra y naan Jesus Nasareno.\n26:10 Ya jufatinas este locue guiya Jerusalem; ya megae na ma\u00f1antos jupreso, anae manresibeyo ninasi\u00f1a guinin y magas mamale; ya anae para ufanmapuno, junae vosso contra sija.\n26:11 Ya jucastiga sija gui sinagoga, ya juprocura na junafanman chatfino contra si Yuus; ya pot gogoslalaloyo contra sija, jupetsigue sija achogja asta otro siuda sija.\n26:12 Ya anae jumajanaoyo para Damasco yan y ninasi\u00f1a guinin y magas mamale sija,\n26:13 Y taloane, O ray, julie gui chalan y candet guinin y langet, na malag\u00f1a qui y ininan y atdao, ya manina gui oriyajo yan ayo y mangachochongjo manjanao.\n26:14 Ya anae mamodongjam todo gui jilo oda, jujungog y inagang na jacuentuseyo gui fino Hebreo, ileg\u00f1a: Saulo, Saulo, jafa na unpetsisigueyo? mapot para jago y unfamateg contra y t\u00edtuca.\n26:15 Ya ilegco: Jaye jao Se\u00f1ot? ya ileg\u00f1a: Guajo si Jesus ni y unpetsisigue.\n26:16 Lao, cajulo ya untojgue; sa jufatoig\u00fce jao pot este na jinaso, para junaministro jao yan untestigo ni este sija na g\u00fcinaja y liniimo, yan ayo sija y pot y jufatoig\u00fce jao;\n26:17 Junalibre jao gui pueblo yan y Gentiles, ya pago junajanao jao para iya sija,\n26:18 Para unbaba y atadog\u00f1ija, yan unbira sija gui jemjom para y manana, yan y ninasi\u00f1an Satanas para as Yuus, ya ujaresibe y inasiin y isao\u00f1ija, yan erensia gui entalo ayo sija y manafangasgas pot y jinenggue ni y gaegue guiya guajo.\n26:19 Ya pot ayo, ti chatmatagoyo, O ray Agripa, para y vision y langet:\n26:20 Lao jusangane finenana ayo sija y mangaegue Damasco, yan iya Jerusalem, yan todo y tano Judea, yan y Gentiles, na ufanma\u00f1otsot ya ujabira sija para as Yuus, yan ufanmachocho y checho\u00f1ija ni y para ma\u00f1otsot.\n26:21 Sa pot este sija na maconeyo ni y Judios gui guimayuus para jumapuno.\n26:22 Lao jatacayo y inayudan Yuus, ya jusisigueja asta pago na jaane, mannanaeyo testimonio parejoja y diquique yan y dangculo; taya jusasangan na ayo y ufato ni y sinangan Moises yan y proteta sija;\n26:23 Na si Cristo, nesesitag\u00fce ufamadese, ya g\u00fciya ufinenana, pot ucajulo guinin y manmatae, ufannae candet gui pueblo yan y Gentiles.\n26:24 \u00b6 Ya anae cumuecuentos, umagang si Festo ni y dangculo na inagang\u00f1a, ileg\u00f1a: Caduco jao Pablo: megae na tiningo ninacaduco jao.\n26:25 Lao si Pablo ileg\u00f1a: Ti caducoyo Festo; lao jusasangan y sinangan ni y magajet yan y tinas.\n26:26 Sa y ray jatungoja estesija, cumuentosyoja gui mena\u00f1a locue libre; sa seguroyo na taya g\u00fcine sija na g\u00fcinaja umanaatog guiya g\u00fciya; sa estesija, ti manmafatinas gui rincon.\n26:27 Ray Agripa, unjonggue y profeta sija? jutungo na unjonggue.\n26:28 Ayonae si Agripa ileg\u00f1a as Pablo, Canaja unnamama\u00f1a\u00f1ayo para juquilisyano.\n26:29 Ya si Pablo ileg\u00f1a. Malagoyo as Yuus, na ti jagoja, lao todo ayo sija y jumungogyo pago na jaane, ufantaeg\u00fcine iya guajo, fuera di y mapresujo.\n26:30 \u00b6 Ya anae munjayan jasangan este, cumajulo y ray yan y magalaje, yan Bernise, yan ayo sija y mangachong\u00f1i\u00f1ija manmatachong.\n26:31 Ya anae ma\u00f1uja, manguentos uno yan y otro, ileg\u00f1ija: Taya finatinas\u00f1a este na taotao, na jamerese y finatae, pat umapreso.\n26:32 Ayonae ileg\u00f1a si Agripa as Festo: Este na taotao, umanalibre, yaguin ti jagagao jinisga\u00f1a gui as Sesat.\n27:1 YA anae esta majasuye na para infanmaudae gui batco para Italia, maentrega si Pablo, yan otro manpreso gui uno na y naan\u00f1a si Julio, senturion gui sendalon Augusto.\n27:2 Ya anae manjalomjam gui batcon Adrumeto, comoque janao para y costan Asia, manjanaojam; ya manjajame yan un Aristarcho, taotao Masedonio na saga\u00f1a Tesal\u00f3nica.\n27:3 Ya y inagpa\u00f1a na jaane, manmatojam Sidon: ya si Julio jagosg\u00fcaeya si Pablo, ya janae linibre na ujanao para y manamigu\u00f1a para unamagof g\u00fce.\n27:4 Ya mamaudaejam gui batco manlayagjam papa jijot Chipre, desde ayo, sa y manglo contra.\n27:5 Ya anae manjanaojam gui tasen jijot Silisia yan Pamfilia, manmatojam Mira, gui siudad Lisia.\n27:6 Ya jasoda g\u00fcije y senturion un batcon Alejandria, na jumajanao para Italia; ya janafanjalomjam.\n27:7 Ya manmaudaejam gui batco megae na jaane, sa mumayayama sen\u00f1ateng, yan canaja ti manmatojam guato Gnido, ti japolojam y manglo, ya manmayama jijot papa Creta, guiya Salmon;\n27:8 Ya gosmapot manmalofanjam umoriya inanaco g\u00fcije na tase, manmatojam gui un lugat na mafanaan Bonito-Puerto, na jijot gui siuda Lasea.\n27:9 \u00b6 Ya anae megae na tiempo malofan, ya senpiligro y jinanaomame, sa y Ayunat esta malofan, ya si Pablo mansinangane sija,\n27:10 Ya ileg\u00f1a nu sija: Se\u00f1ores, julie na este na jinanao, guaja uninalamen yan megae uninafanaelaye, ya ti y catgaja yan y batco, lao asta y jaanita locue.\n27:11 Lao y senturion, jajonggue\u00f1aja y magas batco yan y gaeiyo y batco, qui ayo sija y sinangan Pablo.\n27:12 Sa taya puerto nae si\u00f1a para ufa\u00f1aga y tiempon manenggeng, ya mas megae majaso na ufanmalofan g\u00fcije gui tase locue, para ujaquelie jaftaemano nae si\u00f1a manmato Fenix, ya ayo nae ufa\u00f1aga g\u00fcije y tiempon manenggeng, gui puerton Creta, ni y jadalalalaque y sanjaya gui sanlichan yan y sanlago gui sanlichan.\n27:13 Ya anae manguaefe didide y manglo sanjaya, pinelon\u00f1ija na ujataca y malago\u00f1ija, jadingo ayo ya manjanao guato oriyan Creta.\n27:14 Lao despues ti apmam na tiempo cajulo un dangculon manglo contra y batco, na mafanaan Euroclydon;\n27:15 Ya tinemba y batco ya tisi\u00f1a injanao contra y manglo, inpelo na umachule ni y manglo.\n27:16 Ya malago asta y papa un isla na mafanaan Clauda, ya megae y chechomame pot y bote.\n27:17 Ni y anae manmajatsa julo, ya manmaayuda, magode y batco gui sampapa; ya manmaa\u00f1ao na umayute gui Sirte, manatunog y layag ya ayonae manmachule ni y manglo.\n27:18 Ya janafangoschatsagajam y pinagyo, ya y inagpa\u00f1a na jaane, jayute gui tase y catga, manachadeg y batco,\n27:19 Ya y mina tres na jaane, inyite juyong ni y canaemameja y g\u00fcinajan y batco.\n27:20 Ya megae na jaane na ti anog y atdao, ni y pution sija, ya ti didide na pagyo mato guiya jame, ya todo y ninangganmamame na infansatbo, malingo.\n27:21 Lao despues di apmam na tima\u00f1ocho, tumojgue si Pablo gui entalo\u00f1ija ya ileg\u00f1a: Se\u00f1ores, yaguin inecungogyo, ti tadingo Creta para tagana este na ninalamen yan minalingo.\n27:22 Lao pago juencatga jamyo na namauleg y inangoconmiyo; sa taya ni un taotao gui entre jamyo ufalingo y lin\u00e2l\u00e2\u00f1a, na y batcoja.\n27:23 Sa tumotojgue gui oriyajo pago na puenge y angjet Yuus, ni y jayeyo, yan jaye y jusetbe.\n27:24 Ya ileg\u00f1a: Chamo maaa\u00f1ao Pablo; sa nesesita unmacone guato gui menan Sesat; ya estag\u00fceja na ninae jao as Yuus ni ayo sija y mangachochongmo gui batco.\n27:25 Enaomina se\u00f1ores, namauleg y inangoconmiyo; sa jujonggue na si Yuus, utaeg\u00fcijeja y esta jasanganeyo.\n27:26 Lao nesesita tayutejit gui jilo un isla.\n27:27 \u00b6 Ya anae mato y mina catorse na puenge, taeg\u00fcig\u00fcijeja jachuchulejajam papa yan julo tasen Adratico, ya y buente tatalopuenge, jinason\u00f1ija y marinero sija na esta manjijot gui un tano.\n27:28 Ya masondalea, ya masoda biente brasa; ya anae manjanao didide mona, masondalea talo, ya masoda quinse brasa.\n27:29 Ayonae manmaa\u00f1aojam, na nosea infanbasnag gui jilo y acho, ya mayute cuatro na angcla juyong gui popa, ya madesesea na umanana.\n27:30 Ya y marinero cumequefanmalago gui batco anae esta manatunog y bote gui tase, ya jinason\u00f1ija na si\u00f1a ujayute y angcla gui proa.\n27:31 Ya si Pablo ileg\u00f1a ni y senturion yan y sendalo sija: Yaguin ti ma\u00f1aga estesija gui batco, ti si\u00f1a jamyo mansatbo.\n27:32 Ayonae y sendalo sija, jautot y tale todo gui bote, ya jasotta na upodong.\n27:33 Ya anae manana, si Pablo jagagao sija todos na ujafa\u00f1ocho, ileg\u00f1a: Este y mina catorse na jaane ni y tanananggaja, sisiguejajit di manayunat, ti ma\u00f1ochojit ni jafa.\n27:34 Enaomina jutatayuyut jamyo na infa\u00f1ocho, sa este para lin\u00e2l\u00e2miyo: sa ni uno gui gapon ulonmiyo ufalingo guiya jamyo.\n27:35 Ya anae munjayan jasangan este, jachule y pan ya janae grasia si Yuus gui mena\u00f1ija todos: ya anae jaipe, jatutujon cumano.\n27:36 Ya ayo todo sija y manmauleg minagof\u00f1ija, ma\u00f1ocho locue.\n27:37 Ya jame todos ni y manestaba gui batco, dosientos setenta y saes na taotao sija.\n27:38 Ya anae manjaspog, mana\u00f1ajlalang y batco, ya mayute y trigo gui jalom tase.\n27:39 Ya anae manana, ti matungo y tano: lao masoda un diquique na sadog na guaja oriya\u00f1a; ya jinaso\u00f1ija na ujanajalom y batco.\n27:40 Ya anae manmajatsa y angcla ya masotta gui tase, ya manmapula y tale y timon, ya jajatsa y layag para y manglo, ya jatutujon manjanao para y oriyan tase.\n27:41 Ya podong gui jalom un lugat anae umasoda y dos tase, ya malago y batco gui jilo tano; ya y sanmena na patte cheton, ya sumagaja ti si\u00f1a calamten, lao y santate na patte mayamag ni y finijom y napo sija.\n27:42 Ya manatungo y sendalo sija, na ujapuno todo y preso sija, na nosea uguaja guiya sija tumungo numango ya uescapa.\n27:43 Lao y senturion malago na unasatbo si Pablo, ya jaadaje sija gui jinaso\u00f1ija; ya manago na y si\u00f1a numango uyute sija finena gui tase, ya ujafanjanao para y tano.\n27:44 Ya y manetejnan, palo gui jilo tabbla, yan palo gui pidason mayamag batco, ya taeg\u00fcenao nae manmalofan, ya todo sija mansatbo ya manescapa seguro para y tano.\n28:1 YA anae manescapa esta, ayonae matungo na y isla naan\u00f1a Melita.\n28:2 Ya y taotao ti mangilisyano, jafamaulegjam: sa manmanotne guafe ya jaresibejam cada uno, sa pot y ichan, yan y manenggeng.\n28:3 Ya anae janafanda\u00f1a si Pablo y palitun jayo, ya jamanojo ya japolo gui jilo y guate, jumuyong un vibora guinin y maipe, ya cheton gui canae\u00f1a.\n28:4 Ya anae malie ni y taotao ti mangilisyano y beneno na g\u00e2g\u00e2 na umacalaye gui canae\u00f1a, manasangane ileg\u00f1ija: Este na taotao pegno, masqueseaja umescapa gui tase; lao ti upinelo ni y inenog na ul\u00e2l\u00e2.\n28:5 Ya jasacude y g\u00e2g\u00e2 guato gui jalom guafe, ya ti ninalamen.\n28:6 Ya mataaatanja cao uninapogpog, pat upodong enseguidas ya umatae; lao anae esta laapmam na maatan, ya malie na ti ninalamen, jatulaeca y jinaso\u00f1ija, ya ileg\u00f1ija na yuus g\u00fce.\n28:7 \u00b6 Ayo na lugat, guaja fangualuan\u00f1a sija y magas y isla, na y naan\u00f1a si Publio; ni y rumesibejam, ya janafa\u00f1agajam tres na jaane.\n28:8 Ya y tatan Publio estaba na umaason sa malango calentura, yan jinaga: ya jumalom si Pablo, ya anae munjayan manaetae, japolo y canae\u00f1a gui jilo y malango, ya janajomlo.\n28:9 Ya anae munjayan este, y palo locue gui isla ni y guaja chetnot\u00f1ija, manmato ya uninafanjomlo.\n28:10 Ya gosmegae manmatunanmame; ya anae majanaojam, manmacatgayejam ni ayo sija y innesesita,\n28:11 \u00b6 Ya anae malofan tres meses, manjanaojam gui un batco Alejandrina, ni y estaba gui isla na mannanangga na ufalofan y tiempon manenggeng, na y se\u00f1at\u00f1a Castor yan Polux.\n28:12 Ya anae manmatojam Siracusa, ma\u00f1agajam g\u00fcije tres na jaane.\n28:13 Ya desde ayo manoriyajam, ya manmatojam guiya Regio; ya anae malofan un jaane na manguaefe y manglo sanjaya, manmatojam guiya Puteoli gui inagpa\u00f1a.\n28:14 Ya manma\u00f1odajam ma\u00f1elumame g\u00fcije, ya manmalago na infa\u00f1aga ya infanjame siete na jaane; ya ayonae infanmalag Roma.\n28:15 Ya desde ayo, anae manmajungogjam ni y ma\u00f1elunmame, manmato para ujatagamjam, asta y Metcadon Appio, yan y Tres Taberna; ni y anae jalie si Pablo, janae grasia si Yuus, ya jaangoco.\n28:16 \u00b6 Ya anae manmatojam Roma, y senturuon jaentrega y preso sija gui magas y guatdia: lao si Pablo mapolo na usaga namaesa yan un sendalo ni y umadadaje g\u00fce.\n28:17 Ya susede anae malofan tres na jaane, jaagang si Pablo y manmagas y Judio sija; ya anae manmato ya manda\u00f1a, ileg\u00f1a nu sija: Guajo ma\u00f1elujo lalaje, achogja taya finatinaso contra y taotao sija, ni contra y costumbren y ma\u00f1aenata jumaentrega preso desde Jerusalem asta y canae y taotao Roma:\n28:18 Ni y para yaguin munjayan maegsaminayo, manmalago na jumasotta, sa taya jafa finatinaso para jumapuno.\n28:19 Lao anae macontra ni y Judio sija, nesesitayo na jugagao jinisga gui as Sesat; ti pot para jufaaela y nasionjo.\n28:20 Ya pot este rason juagang jamyo, para julie jamyo, yan para utafanguentos: sa pot y ninanggan Israel na magodeyo ni este na cadena.\n28:21 Ya ileg\u00f1ija nu g\u00fciya: Jame taya rinesibenmame carta guiya Judea pot jago, ni uno gui ma\u00f1elo ni y manmato, cumuentos pat manma\u00f1angane jafa pot jago.\n28:22 Lao manmalagojam na injingog jao, jafa jinasosomo; sa este na secta, intingoja na masqueseaja mano guato masangan contra.\n28:23 \u00b6 Ya anae esta matanchue un jaane, manmato megae guiya g\u00fciya, gui saga\u00f1a; ya jasangane yan janamatungo y raenon Yuus: janafanma\u00f1a\u00f1a sija pot si Jesus, yan pot y tinago Moises, yan pot y profeta sija; desde y egaan asta y pupuenge.\n28:24 Ya palo, manmanjonggue ni y sinangan, palo ti manmanjonggue.\n28:25 Ya anae ti unoja corason\u00f1ija, manjanao anae munjayan jasangan si Pablo un sinangan: Mauleg sinangan\u00f1a y Espiritu Santo pot y profeta Isaias gui ma\u00f1aenata,\n28:26 Ileg\u00f1a: Janao fanmalag este sija na taotao, ya inalog, Inecungog, ya injingog, ya ti incomprende; ya y inquelie, inlie, ya ti intingo.\n28:27 Sa y corason este sija na taotao, manmajetog, ya y talangan\u00f1ija mapot manmanjungog, ya jajuchom y atadog\u00f1ija; sa noseaja ufanmanlie ni y atadog\u00f1ija, yan ufanmanjungog ni y talangan\u00f1ija, yan ujatungo ni y corason\u00f1ija, ya ufanma\u00f1otsot, ya janafanjomlo sija.\n28:28 Enaomina tingo na y este satbasion gui as Yuus manajanao para y Gentiles sija; ya sija ujajungog.\n28:29 (Ya anae munjayan jasangan este sija na sinangan, manjanao y Judio sija, ya gueguesmanafaesen entre sija;)\n28:30 Ya si Pablo sumaga dos a\u00f1os gui inatquila\u00f1a na guma; ya jaresibe todo ayo sija y manmato guiya g\u00fciya,\n28:31 Japredidica y raenon Yuus, yan mamananag\u00fce ni ayo sija y pot y Se\u00f1ot Jesucristo, contodo y linibri\u00f1a, ya taya ni un taotao chumoma.","title":"Chamorro Bible (partial): Acts","type":"page"}