{"collection":"Bible & Christianity","html_url":"https://unchartedknowledge.5gfusion.net/browse/bib/wb/cmr/luk.htm","path":"bib/wb/cmr/luk.htm","source_url":"https://sacred-texts.com/bib/wb/cmr/luk.htm","text":"1:1 POT y guaja megae y umapolo y canae\u00f1ija para ufannaregla y cuentos nu y ayo na g\u00fcinaja na esta guefmaasegura gui entalo jame,\n1:2 Jaftaemanoja ninaejam ni guine y tutujo\u00f1a y testigojam ni y malie, nu y yan y ministrojam y sinangan;\n1:3 Y jinasoco mauleg locue nu guajo, sa juguefegaga sinengcabales todo y g\u00fcinaja guine y tutujon\u00f1a, na jutuguie jao pot y inaregla, jago guesmagas na Teofilo;\n1:4 Para untungo sija y magajet ayosija mano nae unresibe y finanag\u00fce.\n1:5 \u00b6 Guaja gui jaanin Herodes, ray guiya Judea, un pale, naan\u00f1a si Sacharias, y clasen Abias; y asagua\u00f1a guinin sija jagan Aaron ya y naa\u00f1a si Elisabet.\n1:6 Este na dos mauleg gui sanmenan Yuus, jajananao gui todo y lay yan y tinago Se\u00f1ot, ti lalatdiyon.\n1:7 Ya taya patgon\u00f1ija; sa si Elisabet tif\u00e1fa\u00f1ago; yan y dos megae jaani\u00f1ija.\n1:8 \u00b6 Ya jumuyong, anae ma\u00f1e\u00f1etbe si Sacharias, gui ofisio y pale gui menan Yuus, gui chechon y clasi\u00f1a,\n1:9 Jaftaemanoja y costumbren y ofisio y pale, y checho\u00f1a na jumalom gui guimayuus ya jasonggue y paopao.\n1:10 Ya todo y linajyan taotao mangaegue gui sanjiyong manmananaetae gui oran paopao.\n1:11 Ya mato guiya g\u00fciya y angjet y Se\u00f1ot, na gaegue gui agapa y attat y paopao.\n1:12 Ya inestotba si Sacharias anae jalie, ya mato minaa\u00f1ao gui jilo\u00f1a.\n1:13 Lao y angjet ileg\u00f1a nu g\u00fciya: Sacharias, chamo maaa\u00f1ao; sa y tinaetaemo este majungog; ya y asaguamo as Elisabet ufa\u00f1ago y patgon laje, ya umafanaan naan\u00f1a si Juan.\n1:14 Ya uguaja jao minagof yan alegria; ya y megae umagof nu y mafa\u00f1agu\u00f1a.\n1:15 Sa udangculo g\u00fce gui menan Se\u00f1ot; ya ti uguimen bino ni metgot na guinem ya ubulag\u00fce Espiritu Santo, guinin y tiyan nana\u00f1a.\n1:16 Ya megae gui famaguon Israel, ujabira nu y Se\u00f1ot, Yuus\u00f1ija.\n1:17 Ya ujanaog\u00fce gui menan y mata\u00f1a nu y espiritu yan y ninasi\u00f1an Elias, para unanalo y corason\u00f1ija y ma\u00f1aena guiya y famaguon, yan y manch\u00e1tmatago ni y tiningo y manunas; para ufamauleg nu y Se\u00f1ot y taotao, ni y esta fanmauleg para g\u00fciya.\n1:18 Ya ileg\u00f1a si Sacharias nu y angjet: Jaftaemano jutungo este? sa guajo bijoyo ya y asaguajo megae jaani\u00f1a.\n1:19 Ya manope y angjet ya ileg\u00f1a nu g\u00fciya: Guajo si Gabriel, na gaegue yo tumotojgue gui menan Yuus; ya guajo esta matago na jucuentusejao, ya junaejao ni este mauleg na sinangan.\n1:20 Ya estag\u00fce, na jago udojao ya ti si\u00f1a uncuentos, asta y jaane nae este macumple estesija; sa y ti unjongue y sinanganjo, ni umacumple y tiempo\u00f1a.\n1:21 Ya y taotao sija manmannanangga as Sacharias, ya ninafanmanman ni y inapmam\u00f1a gui guimayuus.\n1:22 Ya anae jumuyong, ti si\u00f1a umadingane sija; ya matungo na manlie un linie gui guimayuus; lao g\u00fciya sigue di fumatinas y se\u00f1atja; ya sumaga udo.\n1:23 Ya anae esta munjayan y jaanin y ministro\u00f1a, jumanao para y guima\u00f1a.\n1:24 \u00b6 Ya despues di ayo sija na jaane mapotgue y asagua\u00f1a as Elisabet, ya janana sinco na meses, ya ileg\u00f1a:\n1:25 Taemanoja y Se\u00f1ot jafatinas para guajo, este sija na jaane nae jaatanyo para unajanao y mamajlaojo gui entalo taotao sija.\n1:26 Y mina saes na mes, y angjet Gabriel esta tumago guine as Yuus, para un siuda guiya Galilea, ni y naan\u00f1a y Nasaret,\n1:27 Guiya un bitgen, nobia y un laje naan\u00f1a si Jos\u00e9, familian David; ya y naan y bitgen si Maria.\n1:28 Ya jumalom manu nae estaba g\u00fce, ya ileg\u00f1a: Jafa tatatmana jao na guefmaborese jao; y Se\u00f1ot gaegue guiya\n1:29 Lao pot este na sinangan, ninaestotba g\u00fce, ya jajajaso na jaftaemano este na sinaluda.\n1:30 Entonses y angjet ileg\u00f1a nu g\u00fciya: Maria, chamo maaa\u00f1ao; sa unsoda y finaborese gui menan Yuus.\n1:31 Ya estag\u00fce, na unmapotgue gui tiyanmo ya unfa\u00f1ago un patgon laje, ya umafanaan y naaa\u00f1a si Jesus.\n1:32 Ya udangculo g\u00fce, ya umafanaan Lajin Gueftaquilo: ya y Se\u00f1ot Yuus ufannae g\u00fce y tronon David tata\u00f1a.\n1:33 Ya ugobietna gui guima Jacob siesiempreja; ya y raeno\u00f1a ugagaegue taejinecog.\n1:34 Entonses si Maria ileg\u00f1a ni y angjet: Jafa jumuyong este? sa ti jutungo laje.\n1:35 Ya manope y angjet, ya ileg\u00f1a nu g\u00fciya: Y Espiritu Santo umamaela guiya jago, ya y ninasi\u00f1a y Gueftaquilo jafatinas y anineng gui jilomo; enaomina ayo na Santos na umafa\u00f1ago, umafanaan Lajin Yuus.\n1:36 Ya, estag\u00fce, si Elisabet, parentesmo, locue g\u00fciya mapotgue un laje gui inamco\u00f1a; ya este y mina saes na mes nu g\u00fciya na mafanaan tif\u00e1fa\u00f1ago.\n1:37 Sa y sinangan Yuus, taya uno na taeninasi\u00f1a.\n1:38 Entonses si Maria ileg\u00f1a: Estag\u00fce y tentagon Se\u00f1ot; ufatinas guiya guajo taemanoja y sinanganmo. Ya y angjet mapos guiya g\u00fciya.\n1:39 \u00b6 Ya ayo na jaane sija, cajulo si Maria ya jumanao gusise para un tano taquilo, guiya un siudan Juda;\n1:40 Ya jumalom gui guima Sacharias ya jasaluda si Elisabet.\n1:41 Ya jumuyong taeg\u00fcije na anae jajungog si Elisabet y sinaludan Maria, y patgon tumayog gui jalom tiyan\u00f1a; si Elisabet bula Espiritu Santo,\n1:42 Ya umagang ni dangculo na inagang ya ileg\u00f1a: Dichosojao gui entalo y famalaoan, ya dichoso y tinegchan tiyanmo.\n1:43 Ya guine manu este guiya guajo, na mato guiya guajo y nanan y Se\u00f1otto.\n1:44 Sa estag\u00fce, na anae mato y inagang y sinaludamo gui talangajo, y patgon, gui jalom tiyanjo, tumayog ni minagof\u00f1a.\n1:45 Ya dichosog\u00fce y jumonggue; sa uguaja y quinimple gui g\u00fcinaja, ni esta masangane g\u00fce ni guinin y Se\u00f1ot.\n1:46 \u00b6 Entonses ileg\u00f1a si Maria: Janadangculo y antijo y Se\u00f1ot,\n1:47 Ya y espiritujo ninamagof gui as Yuus y Satbadotto.\n1:48 Sa jaatan y dinespresiao\u00f1a y tentgo\u00f1a; sa estag\u00fce na desde pago jumafanaan dichosa ni todo y generasion.\n1:49 Sa ayo na guaja ninasi\u00f1a, jafatinas guiya guajo dangculo na g\u00fcinaja; ya santos y naan\u00f1a.\n1:50 Ya y minaase\u00f1a gaegue gui generasion taotao sija, gui jilo\u00f1ija ni manmaa\u00f1ao nu g\u00fciya.\n1:51 Ya pot y canae\u00f1a jafanue minetgot; janafa\u00f1uja y sobetbio sija gui jinason y corason\u00f1ija.\n1:52 Ya jayute papa y magas gui trono\u00f1ija, ya jajatsa y manumitde.\n1:53 Ya y man\u00f1alang janafanbula ni y minauleg; ya y manmig\u00fcinaja janafanjanao yan y tae sinajguan.\n1:54 Ya jaayuda si Israel tentago\u00f1a, para ufanjaso y mi\u00f1aase,\n1:55 (Taemano y jasangane y ma\u00f1aenata), as Abraham yan y semiya\u00f1a para todo y tiempo.\n1:56 Si Maria sumaga yan g\u00fciya calang tres meses ya despues jumanao asto iyasija.\n1:57 \u00b6 Ya si Elisabet jacumple y tiempo nae para ufa\u00f1ago; ya ma\u00f1ago un patgon laje.\n1:58 Ya anae majungog ni tiguang\u00f1a yan y parientes\u00f1a, na si Yuus janadangculo y minaase\u00f1a guiya g\u00fciya; ya manmagof yan g\u00fciya.\n1:59 Ya susede na y mina ocho na jaane manmato para umasircunsida y patgon: ya malago\u00f1ija umafanaan ni y naan tata\u00f1a as Sacharias.\n1:60 Ya manope y nana\u00f1a ya ileg\u00f1a: Aje, sa umafanaan si Juan.\n1:61 Ya ileg\u00f1ija nu g\u00fciya: Taya gui manparientesmo mafanaan nu este na naan.\n1:62 Ya mase\u00f1at y tata\u00f1a, ya mafaesen jafa malago\u00f1a umafanaan.\n1:63 Ya mangagao un diquique na tabla ya jatugue ileg\u00f1a: Si Juan naan\u00f1a. Ya todo sija ninafanmanman.\n1:64 Ya enseguidas mababa y pachot\u00f1a, ya mapula y jila\u00f1a, ya cumuentos, jabendise si Yuus.\n1:65 Ya guaja minaa\u00f1ao gui jilo\u00f1ija todo y ma\u00f1asaga gui oriya\u00f1ija: ya gui todo y tano taquilo guiya Judea, masasangan este sija na sinangan.\n1:66 Ya todosija y jumujungog jaadaje gui corason\u00f1ija ya ileg\u00f1ija: Jafa jumuyong este na patgon? Sa y canae Yuus gaegue guiya g\u00fciya.\n1:67 \u00b6 Ya si Sacharias, tata\u00f1a, bula Espiritu Santo ya japrofetisa, ileg\u00f1a:\n1:68 Bendito y Se\u00f1ot, y Yuus y Israel; sa jabisita ya jafatinas y redension, para taotao\u00f1a,\n1:69 Ya janacajulo para jita un canggelon y satbasion, gui guima y tentago\u00f1a as David,\n1:70 (Taeg\u00fcijija na jasasangan gui pachot y ma\u00f1antos na profeta\u00f1a, ni esta gaegue guinin tutujon\u00f1a y tano),\n1:71 Satbasion gui y enemiguta yan gui canae todo y chumatliijit;\n1:72 Para umafanue y minaase\u00f1a gui ma\u00f1aenata, ya umajaso y santos na trato\u00f1a;\n1:73 Y juramento ni manjula as Abraham ni tatata,\n1:74 Na g\u00fciya unaejit linibreta gui canae y enemiguta ya utasetbe g\u00fce sin minaa\u00f1ao,\n1:75 Y sinantos yan y tinunas gui mena\u00f1a todo y jaanita.\n1:76 Ya, jago, patgon, unmafanaan profetan y Gueftaquilo; sa unjanao gui menan y Se\u00f1ot para unfamauleg y chalan\u00f1a;\n1:77 Para ufanamatungo y satbasion gui taotao\u00f1a ni y maasiin y isao\u00f1ija,\n1:78 Pot causa y corason y minaase\u00f1a y Yuusta, anae y candit ogaan guinin taquilo, jabisitajit,\n1:79 Para junae inina y manmatatachong gui jemjom yan y anineng y finatae; para ufanue y patasta gui chalan y pas.\n1:80 Ya y patgon lumala ya mumetgot gui espiritu ya sumaga gui desierto asta y jaane anae esta matungo guiya Israel.\n2:1 YA susede na ayo sija na jaane, jumuyong un bando guinen as Augusto Sesat, para todo y tano na mataotag\u00fce, na y naan\u00f1ija ufanmatugue gui padron.\n2:2 Este finenana na padron esta fumatinas, anae si Sirenio y magalaje guiya Siria.\n2:3 Ya manjanao todo y taotao para ninatugue y naan\u00f1ija gui padron, cada uno gui siuda\u00f1a.\n2:4 Ya jumanao si Jos\u00e9 guinin Galilea, guinin un siuda na naan\u00f1a Nasaret, para ufalag Judea, gui siudan David, na mafanaan Betlehem, sa g\u00fciya y guima y familian David;\n2:5 Para ufanmatugue gui padron yan si Maria, asagua\u00f1a umacamo yan g\u00fciya, anae estaba dangculo sa mapotgue,\n2:6 Ya susede, anae gaegue sija g\u00fcije, y jaani\u00f1a ni para ufa\u00f1ago esta macumple;\n2:7 Ya ma\u00f1ago un laje finenana na patgon; ya mabalutan ni y pa\u00f1ales, ya manaason qui cajon sacate; sa taya saga\u00f1ija gui guima.\n2:8 \u00b6 Ya guaja pastot sija g\u00fcije na tano, na ma\u00f1aga gui fangualuan, ya jaadadaje y manadan quinilo gui puenge.\n2:9 Ya estag\u00fce y angjet y se\u00f1ot tumotojgue guiya sija; y minalag Yuus jaina gui oriya\u00f1ija; ya guaja dangculo na minaa\u00f1ao.\n2:10 Lao y angjet ileg\u00f1a nu sija: Chamiyo fanmaa\u00f1ao; sa, estag\u00fce, na juchule para jamyo mauleg na sinangan dangculo na minagof, para todo y taotao:\n2:11 Sa esta mafa\u00f1ago para jamyo gui siudan David, pago na jaane, un Satbadot, na g\u00fciya si Cristo, y Se\u00f1ot.\n2:12 Ya este y se\u00f1atmiyo: Inseda y patgon mabalutan ni y pa\u00f1ales, ya umaason gui cajon sacate.\n2:13 Ya enseguidas anog yan y angjet y linajyan y sendalo gui langet, na manmantutuna as Yuus, ya ileg\u00f1ija:\n2:14 Minalag gui y Gueftaquilo as Yuus, ya y tano pas gui entalo taotao ni y minagof\u00f1a dangculo.\n2:15 Ya jumuyong anae y angjet sija manmamapos guiya sija para y langet, y pastot sija manasangane. uno yan otro: Nije tafanmalag pues, asta Betlehem, ya talie este na g\u00fcinaja ni esta jumuyong, na si Yuus jafanuejit.\n2:16 Ya manmato chadeg, ya jasoda si Maria yan Jos\u00e9, yan y diquique na patgon umaason gui cajon sacate.\n2:17 Ya anae esta malie, janatungo y sinangan na mansinangane sija nu y diquique na patgon.\n2:18 Ya todo y manmanjungog, ninafanmanman pot y pastot sija, ni y sinangan\u00f1ija.\n2:19 Lao si Maria jananana todo este sija na sinangan, jajasosoye gui corason\u00f1a.\n2:20 Ya manato guato y pastot sija yan manmagof ya matuna si Yuus pot todo y g\u00fcinaja ni munjayan jajungog yan jalie, jaftaemano y esta jasangane sija.\n2:21 \u00b6 Ya anae esta macumple y ocho na jaane, para umasirconsida g\u00fce mafanaan naan\u00f1a si Jesus, taeg\u00fcije y finanaan nu y angjet antes qui umamapotgue\u00f1aejon gui tiyan nana\u00f1a.\n2:22 Ya anae esta macumple y jaanin y guinasgas, jaftaemanoja y lay Moises, sija macone g\u00fce guiya Jerusalem para umanae gui Se\u00f1ot.\n2:23 (Jaftaemanoja y matuque gui lay y Se\u00f1ot: todo laje na jababa y tiyan, umafanaan santos para y Se\u00f1ot);\n2:24 Ya para umanae inefrese jaftaemanoja y masangan y lay y Se\u00f1ot, un pares na tortola pat dos patgon na paluma.\n2:25 Ya, estag\u00fce, guaja un taotao guiya Jerusalem, na naan\u00f1a si Simeon, ya este na taotao, cabales ya guefmanjonggue na jananangga y quinensuela y Israel: ya y Espiritu Santo gaegue gui jilo\u00f1a.\n2:26 Ya esta mafanue g\u00fce nu y Espiritu Santo, na ti ulie finatae, antes na ulie Cristo, y Se\u00f1ot.\n2:27 Ya mato g\u00fce pot y Espiritu gui templo, ya anae machule, nu si tata\u00f1a, y patgon Jesus gui templo para umafatinas pot guiya, taemanoja y costumbren y lay,\n2:28 Ayo nae g\u00fciya jajogue gui canae\u00f1a ya jabendise si Yuus ya ileg\u00f1a:\n2:29 Pago polo, Se\u00f1ot, y tentagomo ya jumanao yan pas, taemanoja y sinanganmo.\n2:30 Sa jalie y matajo y satbasionmo,\n2:31 Ni esta unfamauleg gui menan todo y taotao;\n2:32 Y candit para ufanmatungo y nasion sija, yan y minalag para y taotaomo, Israel.\n2:33 \u00b6 Ya si Jos\u00e9 yan y nana\u00f1a ninafanmanman nu ayo sija y jasasangan nu g\u00fciya;\n2:34 Ya jabendise si Simeon ya ileg\u00f1a ni nana\u00f1a as Maria: Estag\u00fce na patgon esta mapolo para pinedong yan para ufanjinatsa y megae guiya Israel; yan para y se\u00f1at ni y ninachatsaga,\n2:35 Yan y jago locue, sa y antimo na umadotgan nu y espada, ya para jinaso\u00f1ija y megae na corason nae umatungo.\n2:36 Gaegue locue g\u00fcije, si Ana y profeta palaoan, jagan Fanuel gui tribun Aser (na g\u00fciya guaja megae na jaani\u00f1a, yan sumaga yan y asagua\u00f1a siete a\u00f1os desde y binitgen\u00f1a;\n2:37 Ya bumiuda asta ochenta y cuatro a\u00f1os) ya ti jafapos gui templo, ya jaadodora si Yuus, puenge yan jaane nu y umayuyunat yan manaenaetae.\n2:38 Ya este mato g\u00fcijija na ora ya janae si Yuus maase, ya jacumuentuse pot g\u00fciya todo sija y manmannangga ni linibre guiya Jerusalem.\n2:39 Lao anae esta jacumple todo sija, taemanoja y gaegue gui lay y Se\u00f1ot, manalo guato Galilea gui siuda\u00f1ija guiya Nasaret.\n2:40 Ya y patgon dumangculo yan ninamatatnga ya bulag\u00fce tiningo: ya y grasian Yuus gaegue gui jilo\u00f1a.\n2:41 \u00b6 Ya manjajanao sija tata\u00f1a todo y sacan asta Jerusalem gui guipot y pascua.\n2:42 Ya anae guaja esta dose na a\u00f1os, sija mangajulo guiya Jerusalem taemanoja y costumbren y guipot.\n2:43 Ya anae jocog y jaane sija, manalo sija, ya sumaga y patgon, Jesus, guiya Jerusalem taetiningo nu y tata\u00f1a sija.\n2:44 Ya jinaso\u00f1ija na gaegue gui mangachong\u00f1ija, ya un jaane na manjajanaoja; ya maaliligao g\u00fce gui entalo y parientes\u00f1ija yan y manatungo\u00f1ija.\n2:45 Lao anae ti masoda g\u00fce, manalo guato Jerusalem maaliligao g\u00fce.\n2:46 Ya susede anae esta malofan tres na jaane, inseda g\u00fce gui templo matatachong gui entalo y manfaye maecungog yan mafafaesen.\n2:47 Ya todo sija y jumujungog ninafanmanman ni tiningo\u00f1a yan y inepe\u00f1a.\n2:48 Ya anae malie manmajngan ya ileg\u00f1a nu g\u00fciya si nana\u00f1a: Patgon, jafa na unfatinasjam taeguenao? Estag\u00fce si tatamo yan guajo na inaliligao jao yan y pinitinmame!\n2:49 Ayo nae ileg\u00f1a nu sija: Pot jafa yo na inaliligao? Ti intingo na y checho y tatajo nesesita yo na fatinas?\n2:50 Lao sija ti jatungo ayo na sinangan y mansinangane.\n2:51 Ya tumunog yan sija ya manjanao. guato Nasaret ya mansinejeta sija. Ya si nana\u00f1a jaadaje este todo sija gui coraso\u00f1a.\n2:52 Ya si Jesus lum\u00e1lamodong gui tiningo\u00f1a yan y lineca\u00f1a yan y grasia gui as Yuus yan y taotao sija.\n3:1 Y mina quinse na a\u00f1o gui tiempo anae si Tiberio Sesat jagobietna, ya si Ponsio Pilato, g\u00fciya magalaje guiya Judea; ya si Herodes, g\u00fciya magalaje tetrarca guiya Galilea; ya y chelu\u00f1a as Felipe, g\u00fciya magalaje tetrarca guiya Iturea yan y ya tanon Traconite; ya si Lisanias, g\u00fciya magalaje tetrarca guiya Abilinia;\n3:2 Ya y dangculo na mamale si Annas yan si Caefas, este na tiempo, mato y sinangan Yuus gui as Juan, lajin Sacharias, gui jalomtano.\n3:3 Ya g\u00fciya mato gui todo y tano gui oriyan Jordan, jasesetmon y managpang en sinetsot para y maasiin isao.\n3:4 Taeg\u00fcije esta matugue gui leblo ni y sinangan y profeta Isaias, na ileg\u00f1a: Inagang\u00f1a ni y umaagang gui jalomtano: Famauleg y chalan y Se\u00f1ot, y cayejon\u00f1a natutunas.\n3:5 Todo y finaca\u00f1ada umanafanbula, yan todo y tano boca yan y manloca na ogso umanafanagpapa; yan y manechong umanafanunas, yan y chalan farangca unamafanyano.\n3:6 Ya todo y catne ulie y satbasion Yuus.\n3:7 Enaomina ileg\u00f1a ni y linajyan taotao na manmato para ufanmatagpange pot g\u00fciya: Rasan culebla, jaye jamyo fumanag\u00fce na insuaye y binibo ni y mamamaela?\n3:8 Chile tinegchanmiyo ni y magajet na sinetsot, ya chamiyo insigue di sumasangan nu jamyoja: Guaja tatanmame si Abraham; sa jusanganejamyo na si\u00f1a, si Yuus g\u00fcine gui acho janafangajulo y famaguon Abraham.\n3:9 Ya pagoja y gachae gaegueja gui jale y trongcon jayo sija: todo y trongcon jayo na ti mauleg tinegcha\u00f1ija, umautut ya umayute gui guafe.\n3:10 Ya y linajyan taotao mafaesen g\u00fce ya ileg\u00f1ija: Pues jafajam infatinas?\n3:11 Ya manope, ileg\u00f1a nu sija: Y guaja dos magagu\u00f1a, unae y taya iyo\u00f1a: ya y guaja na\u00f1a ufatinas taeg\u00fcijija.\n3:12 Ya manmato locue y publicano sija para ufanmatatagpange, ya ileg\u00f1ija: Maestro jafa infatinasjam?\n3:13 Ya ileg\u00f1a nu sija: Chamiyo gumagagao mas ni y esta jamyo manmatago.\n3:14 Ya mafaesen g\u00fce locue nu y sendalo sija, ileg\u00f1ija: Ya jame, jafajam infatinas? Ya mansinangane: Chamiyo mumatratrata ni jaye ni infanmanchiguit, ya magof jamyo nu y apasmiyo.\n3:15 \u00b6 Ya y taotao sija jananangga ya manmanjajajaso todo sija as Juan gui corason\u00f1ija, cao g\u00fciya si Jesucristo.\n3:16 Manope si Juan ya ileg\u00f1a nu todosija: Guajo magajet managpapange jamyo an janom; lao mamamaela uno na mas gaeninasi\u00f1a qui guajo, ya ti si\u00f1a yo manmerese na jupula y coreas y sapatos\u00f1a: g\u00fciya managpapange an Espiritu Santo yan guafe.\n3:17 Ya abanicu\u00f1a gaegueja gui canae\u00f1a para unagasgas y guineco\u00f1a, ya janafanda\u00f1a y trigo gui camalen\u00f1a; lao usonggue y ngasan gui guafe ni ti si\u00f1a upuno.\n3:18 \u00b6 Ya mamagat megae na sinangan ya japredica y taotao sija ni ibangelio.\n3:19 Lao si Herodes, ayo magalaje tetrarca, linalatde as Juan, pot si Herodias, asaguan y chelu\u00f1a as Felipe, yan pot todo y tinaelaye sija ni jafatinas si Herodes,\n3:20 Ya jafatinas este mas taelaye qui todo, ya maponggle si Juan gui catset.\n3:21 \u00b6 Ya susede, anae todo y taotao manmatagpange, si Jesus locue matagpange; ya anae manaetaeg\u00fce, mababa y langet;\n3:22 Ya tumunog gui jilo\u00f1a y Espiritu Santo na gaejechura\u00f1a calang paluma, ya mato un inagang guine y langet na ileg\u00f1a: Jago y lajijo ni juguaeya; iyajago nae gaegue minagofjo.\n3:23 Ya si Jesus namaesa anae jatutujon sumetnon, g\u00fciya treinta a\u00f1os, ya g\u00fciya lajin Jos\u00e9 (calang jinason taotao), nu y lajin Eli,\n3:24 Nu y lajin Matat nu y lajin Levi, nu y lajin Metqui, nu y lajin Jan\u00e9, nu y lajin Jos\u00e9,\n3:25 Nu y lajin Matatias nu y lajin Amos, nu y lajin Nalum, nu y lajin Esl\u00ed, nu y lajin Nag\u00e9,\n3:26 Nu y lajin Maat, nu y lajin Matatias, nu y lajin Simei, nu y lajin Jos\u00e9, nu y lajin Juda,\n3:27 Nu y lajin Joana, nu y lajin Resa, nu y lajin Sorobabel, nu y lajin Salatiel, nu y lajin Neri,\n3:28 Nu y lajin Metqui, nu y lajin Ad\u00ed, nu y lajin Cosam, nu y lajin Elmodan, nu y lajin Er,\n3:29 Nu y lajin Jesus, nu y lajin Elieser, nu y lajin Jorim, nu y lajin Mata, nu y lajin Levi,\n3:30 Nu y lajin Simeon, nu y lajin Juda, nu y lajin Jos\u00e9, nu y lajin Jonan, nu y lajin Eliaquim,\n3:31 Nu y lajin Melea, nu y lajin Mena, nu y lajin Matata, nu y lajin Natan, nu y lajin David,\n3:32 Nu y lajin Jesse, nu y lajin Obed, nu y lajin Boos, nu y lajin Salmon, nu y lajin Naason,\n3:33 Nu y lajin Aminadab, nu y lajin Aram, nu y lajin Esrom, nu y lajin Fares, nu y lajin Juda,\n3:34 Nu y lajin Jacob, nu y lajin Ysaac, nu y lajin Abraham, nu y lajin Tar\u00e9, nu y lajin Nacor,\n3:35 Nu y lajin Serug, nu y lajin Ragau, nu y lajin Peleg, nu y lajin Heber, nu y lajin Sela,\n3:36 Nu y lajin Cainan, nu y lajin Arfaxat, nu y lajin Sem, nu y lajin Noe, nu y lajin Lameg,\n3:37 Nu y lajin Matusalem, nu y lajin Enog, nu y lajin Jared, nu y lajin Mahalaleel, nu y lajin Cainan,\n3:38 Nu y lajin Enos, nu y lajin Set, nu y lajin Adam, nu y lajin Yuus.\n4:1 YA si Jesus, bula Espirita Santo, tumato guato gui Jordan, ya quinene ni Espiritu asta y desierto.\n4:2 Ya sumaga g\u00fcije cuarenta na jaane ya tinienta nu y anite. Ya ti chumocho ni jafa, g\u00fcije sija na jaane; ya anae esta macumple, \u00f1alang g\u00fce.\n4:3 Ya ileg\u00f1a nu g\u00fciya y anite: Yaguin jago Lajin Yuus, tago este y acho ya ufamapan.\n4:4 Ya si Jesus manope q\u00fce: Esta mamatugue, na ti y panja munal\u00e2l\u00e2 y taotao.\n4:5 Ya jacone g\u00fce quinene julo, ya finanue g\u00fce todo y raeno gui jilo y tano gui un momento y tiempo,\n4:6 Ya y anite ileg\u00f1a nu g\u00fciya: Bae junae jao ni este na ninasi\u00f1a todo, yan y minalag\u00f1ija; sa guajo maentrega, ya jaye y malagojo, junae.\n4:7 Enaomina jago, yaguin unadora gui menajo, todosija iyomo.\n4:8 Ya manope si Jesus, ya ileg\u00f1a: Esta matugue na y Se\u00f1ot Yuusmo unadora, ya g\u00fciyaja unsetbe.\n4:9 Ya quinene talo guiya Jerusalem ya pinelo gui sumanjilo y templo, ya ileg\u00f1a nu g\u00fciya: Yaguin jago Lajin Yuus, yutejao g\u00fcine papa:\n4:10 Sa esta matugue, na y angjet\u00f1a sija jaencatga nu jago para unmaadaje,\n4:11 Ya y canae\u00f1ija unquilile sa chamo matompo y adengmo gui acho.\n4:12 Manope si Jesus ya ileg\u00f1a: Esta masangan: Chamo tietienta y Se\u00f1ot Yuusmo.\n4:13 Anae esta munjayan todo y tentasion\u00f1a y anite mapos guiya g\u00fciya un rato.\n4:14 \u00b6 Si Jesus tumato gui ninasi\u00f1an y Espiritu asta Galilea: ya jumanao y fama\u00f1a guiya todo y tano gui oriya\u00f1a.\n4:15 Ya g\u00fciya mamananag\u00fce gui guimayuus\u00f1ija, ya ninafanonra nu y todo.\n4:16 \u00b6 Ya mato guiya Nasaret anae jagas mapogsae: ya jumalom taemanoja y costumbre\u00f1a gui jaanin sabado, gui guimayuus ya cajulo para utaetae.\n4:17 Ya manaeg\u00fce y leblon y profeta Isaias. Ya anae jababa y leblo, jasoda anae esta matugue:\n4:18 Y Espiritun y Se\u00f1ot gaegue gui jilojo, sa japalae yo para jupredica y mauleg na sinangan gui mamobble: ya matago yo para jusangane mancautibo, linibre, ya para y manbachet ufanmanlie, ya para junafanlibre y manchiguit,\n4:19 Para jusagan\u00f1aejon y guaeyayon na a\u00f1o y Se\u00f1ot.\n4:20 \u00b6 Ya jajuchom y leblo ya anae janatalo y ministro, matachong; ya todo y mangaegue gui guimayuus, g\u00fciyaja manatan.\n4:21 Ya jatutujon sumangane sija: Pago esta macumple este na tinigue gui talanganmiyo.\n4:22 Ya todoja manmannae testimonio ya esta ninafanmanman nu minauleg sinangan ni manjujuyong, gui pachot\u00f1a; ya ileg\u00f1ija: Ti g\u00fciya ini y lajin Jos\u00e9.\n4:23 Ya ileg\u00f1a nu sija: Magajet insanganeyo nu este na sinangan: Medico, amte namaesajaoja: todo sija injingog na unfatinas guiya Capernaum, fatinas locue g\u00fcine gui tanomo.\n4:24 Ya ileg\u00f1a: Magajet na jusangane jamyo, na ni un profeta guaegayon gui tano\u00f1a.\n4:25 Lao magajet jusangane jamyo: Megae na biuda sija guaja gui Israel gui jaanin Elias, anae y langet majuchom tres a\u00f1os yan saes mesas, anae guaja dangculo na \u00f1inalang gui todo y tano;\n4:26 Lao ni uno guiya sija nae, esta matago si Elias, na as Sarepta, guiya tanon Sidon, guiya un palaoan biuda.\n4:27 Ya megae na ategtog locue guaja guiya Israel gui tiempon y profeta Eliseo; lao taya guiya sija esta magasgas, na si Naaman taotao Siro.\n4:28 Ayo nae todo y taotao gui guimayuus manbula y linalalo, anae jajungog estesija;\n4:29 Ya mangajulo, ya chumuleg\u00fce gui sanjiyong y siuda, ya macone asta gui sanjilo y egso, anae esta maplanta y siuda\u00f1ija, para ufanyute gui papa.\n4:30 Lao g\u00fciya, malofan gui entalo\u00f1ija, ya mapos.\n4:31 \u00b6 Ya mato papa guiya Capernaum, siudan Galilea, ya ayo nae mamananag\u00fce gui sabado na jaane:\n4:32 Ya sija ninafanmanman nu y finanag\u00fce\u00f1a; sa y sinangan\u00f1a gaeninasi\u00f1a.\n4:33 Ya gaegue gui guimayuus un taotao na guaja anite in\u00e1placha; ya umagang dangculo na inagang.\n4:34 Jei! pelojam! para jafajam nu jago, Jesus Nasareno? Matojao para unyulangjam? jutungojao jayejao; jago ayo na Santos gui as Yuus!\n4:35 Ya si Jesus jalalatde ya ileg\u00f1a: Pacaca ya maela juyong guiya g\u00fciya. Ya anae y anite mayute g\u00fce gui entalo\u00f1ija, jumuyong guiya g\u00fciya; ya taya ninalamen.\n4:36 Ya minamanman mato gui jilo todo sija, ya manadingan uno yan otro, ileg\u00f1ija: Jafa na cuentos este? Sa nu y gobietna\u00f1a yan y ninasi\u00f1a\u00f1a jatago y \u00e1placha na anite sija ya unfanjuyong?\n4:37 Ya y fama\u00f1a masangan\u00f1aejon todo y lugat sija gui oriya\u00f1a ayona.\n4:38 \u00b6 Ya jacajulo jumanao juyong gui guimayuus ya jumalom gui guiman Simon; ya y suegran Simon esta umaason, malingo nu y dangculo na calentura\u00f1a; ya matayuyutg\u00fce pot g\u00fciya.\n4:39 Ya jatojgue gui jijut\u00f1a, ya jalalatde y calentura ya y calentura pinelo; ya g\u00fciya cajulo ensiguidas ya jasetbe.\n4:40 \u00b6 Ya y tiempo y minachom y atdao nae, todo y mangaemalango ni y megae na chetnot, manmaconie guiya g\u00fciya; ya japolo y canae\u00f1a gui jilo cada uno guiya sija, ya janafanjomlo sija.\n4:41 Ya anite sija manjuyong locue guiya megae, na manaagang ya ileg\u00f1ija: Jago, y Lajin Yuus! Lao g\u00fciya jalalatde ya ti japolo ya ufanguentos, sa matungo g\u00fce na g\u00fciya si Cristo.\n4:42 \u00b6 Ya anae esta taftaf y jaane, jumanao para un jalomtano: ya y linajyan taotao sija maaliligao g\u00fce ya manmafato guiya g\u00fciya ya manmalago sija ufanmantiene g\u00fce para munga mapos guiya sija.\n4:43 Ya g\u00fciya ileg\u00f1a nu sija: Nesesitayo locue gui palo siuda umapredica y raenon Yuus: sa para este na matagoyo.\n4:44 Ya japredidica gui guimayuus sija guiya Galilea.\n5:1 YA susede anae y linajyan taotao manoriya yan machichiguet g\u00fce ya jaecungog y sinangan Yuus, na g\u00fciya gaegue tumotojgue gui oriyan jagoe Genesaret.\n5:2 Ya jalie dos batco na estaba jijot gui oriyan y jagoe; ya y manpescadot manunog g\u00fcije, ya jafagase y lagua\u00f1ija.\n5:3 Ya jumalom g\u00fcine gui un batco ya y iyon Simon; ya jagagao na unafalag y tano didide. Ya matachong ya mamanag\u00fce desde y batco ni linajyan taotao.\n5:4 Ya anae munjayan cumuentos, ileg\u00f1a as Simon: Juyong gui tadong na tase ya innatunog y laguanmiyo para un quinene.\n5:5 Ya manope si Simon ya ileg\u00f1a: Maestro estajam manmachocho todo puenge ya taya quinenemame; lao pot y sinanganmo bae innatunog y lagua.\n5:6 Ya anae manmatinas este, japongle un dangculo na quinenen g\u00fcijan; ya esta tiniteg y laguan\u00f1ija.\n5:7 Ayo nae jase\u00f1at y mangachong\u00f1ija ni mangaegue gui otro batco, para ufanmato ya ufaninayuda. Ya manmato, ya janabulaja y dos batco, ya jatutujon manma\u00f1o\u00f1og\u00f1og.\n5:8 Ya anae jalie este si Simon Pedro, dumimo papa gui as Jesus ya ileg\u00f1a: Suja guiya guajo, Se\u00f1ot; sa taotao isaoyo.\n5:9 Sa ninamaa\u00f1ao yan todos y mangaegue guiya g\u00fciya, pot causa de y quinenen g\u00fcijan ni y inquene;\n5:10 Ya taeg\u00fcije ja locue as Santiago yan si Juan, famaguon Sebedeo, ya sija mangachong Simon. Ya ileg\u00f1a si Jesus as Simon: Chamo maaa\u00f1o: sa desde pago ufangone jao y taotao.\n5:11 Ya anae esta ma\u00f1ule gui tano y batco\u00f1ija; todo jayute ya madalagg\u00fce.\n5:12 \u00b6 Ya susede anae gaegue g\u00fce gui uno gui siuda sija, estag\u00fce un taotao na bula ategtog: g\u00fciya anae jalie si Jesus, podong gui mata\u00f1a gui mena\u00f1a ya jagagao, ileg\u00f1a: Se\u00f1ot, yaguin malagojao, si\u00f1ajao unnagasgasyo?\n5:13 Ya jaestira y canae\u00f1a ya japacha, ileg\u00f1a: Malagoyo, gasgasjao; ya enseguidas y ategtog jumanao guiya g\u00fciya.\n5:14 Ya tinago g\u00fce, na cha\u00f1a sangangane ni jaye: lao janao, unfanue y pale nu jago ya unofrese ni y guinasgasmo, taemanoja y tinagon Moises para testimonio nu sija.\n5:15 Lao y masangan\u00f1a jumanao megae; ya manda\u00f1a y dangculon linajyan taotao para umajungog yan para ufanmagong y chetnot\u00f1ija.\n5:16 Lao g\u00fciya jaapatta g\u00fce asta y jalomtano ya manaetae.\n5:17 \u00b6 Ya susede gui un jaane na estabag\u00fce mamanag\u00fce; ya mangaegue y Fariseo sija yan y magas y lay, manmatatachong, sa sija manmato guinen y sengsong Galilea, yan Judea, yan y ya Jerusalem; ya y ninasi\u00f1an y Se\u00f1ot gaegue g\u00fcije para unamagong.\n5:18 Ya estag\u00fce sija taotao na macocone un taotao gui jilo un cama na paralitico; ya maaliligao mano nae ma\u00f1ule jalom para umapolo gui mena\u00f1a.\n5:19 Ya anae ti masoda mano nae umapolo pot causa y linajyan taotao, mangajulo gui jilo guma ya guinin y atof nae manatunog yan cama\u00f1a gui entalo, asta y gui menan Jesus.\n5:20 Ya anae jalie y jinengguen\u00f1ija yuje sija, ileg\u00f1a: Taotao, y isaomo umaasie.\n5:21 Ya y escriba yan y Fariseo sija jatutujon manmanjaso, ya ileg\u00f1ija: Jaye g\u00fce este na usangan chatfino contra si Yuus? Jaye si\u00f1a manasie isao, na si Yuusja?\n5:22 Lao si Jesus jatungo y jinason\u00f1ija; manope ya ileg\u00f1a nu sija: Jafa injajaso gui corasonmiyo?\n5:23 Jafa sen taeminapot masangan: Y isaomo unmaasie; pat masangan: Cajulo ya unfanmocat?\n5:24 Lao para intingoja na y Lajin taotao guaja ninasi\u00f1a\u00f1a gui tano para umasie isao (ileg\u00f1a nu y paralitico), jusanganejao: Cajulo, chule y camamo ya unjanao para iyajamyo.\n5:25 Ya enseguidas g\u00fciya cajulo gui menan\u00f1ija, ya jachule ayo anae umaasong\u00fce ya jumanao para y guima\u00f1a, ya jatuna si Yuus,\n5:26 Ya ninafanmanman todosija, ya matuna si Yuus; ya manbula y minaa\u00f1ao, ileg\u00f1ija: Inlie n\u00e1manman sija pago.\n5:27 \u00b6 Ya despues di estesija, jumanao, ya jalie un publicano na y naan\u00f1a si Levi, matatachong gui bancon y tributo ya ileg\u00f1a: Dalalagyo.\n5:28 Ya japolo todo y g\u00fcinaja\u00f1a ya cajulo ya jadalalagg\u00fce.\n5:29 Ya jafatinas si Levi un dangculon gupot gui guima\u00f1a: ya guaja un dangculon linajyan publicano sija, yan otro sija manmatachong gui lamasa yan sija.\n5:30 Ya y Fariseo sija yan y escriba\u00f1ija, mangogonggong contra y disipulu\u00f1a sija, ileg\u00f1ija: Sajafa na manjajamyo ma\u00f1ocho yan manguimen yan y publicanosija yan y manisao?\n5:31 Ya manope si Jesus ya ileg\u00f1a nu sija: Y manaechetnot ti janesesita medico; lao y manmalango.\n5:32 Ti matoyo para juagang y manunas, lao y manisao para ufanma\u00f1otsot.\n5:33 \u00b6 Ya ileg\u00f1ija nu g\u00fciya: Y disipulon Juan manayuyunat megae na biaje, ya jafatitinas tinayuyut; parejoja yan y disipulon Fariseo sija; ya iyoco ma\u00f1ochocho yan manguiguimen?\n5:34 Ya si Jesus ileg\u00f1a nu sija: Si\u00f1a innaayunat y mangaegue gui guipot uma sagua anae ma\u00f1isijaja yan y nobio?\n5:35 Lao ufato jaane na y nobio umana suja; ayo nae ufanayunat g\u00fcije na jaane sija.\n5:36 Ya mansinangane sija locue un acomparasion: Taya taotao janajanao pidason magago gui nuebo na bestido ya japolo gui bijo na bestido; no sea ujatiteg y nuebo ya locue y magago guinin nuebo ti parejo yan y bijo.\n5:37 Ya taya mananaye nuebo na bino gui bijo na boteyan cuero: ya no sea, y bino ni nuebo uyinamag y boteyan cuero, ya y bino umachuda, ya y boteyan cuero ufalingo.\n5:38 Lao y nuebo bino na nasesita y nuebo na boteyan cuero nae umapolo.\n5:39 Ya ni un taotao ni gumimen y bijo na bino umalago ni nuebo; sa ualog: Y bijo mauleg\u00f1a.\n6:1 YA susede y un sabado, jumajanao si Jesus gui fangualuan maies; ya y disipulu\u00f1a sija, manmanjajala ni y masotcan maies, ya jacano, jagugugan ni y canae\u00f1ija.\n6:2 Ya y Fariseo sija ileg\u00f1ija: Jafa na infatitinas y ti tunas na umafatinas gui sabado na jaane:\n6:3 Ya maninepe as Jesus ilig\u00f1a: Taya nae intaetae este y finatinas David anae \u00f1alang yan y mangachong\u00f1a?\n6:4 Anae jumalom gui guimayuus, ya jachule ya jacano y pan ni y mafamamauleg, yan janae locue y mangachong\u00f1a: ni y ti tunas na ucano na para y mamaleja?\n6:5 Ya ileg\u00f1a nu sija: Y Lajin Taotao locue Se\u00f1ot y sabado.\n6:6 \u00b6 Ya susede y otro sabado, na jumalom gui guimayuus ya mamanag\u00fce: ya estaba g\u00fcije un taotao na anglo y agapa na canae\u00f1a.\n6:7 Ya y escriba yan y Fariseo sija maaatan g\u00fce, cao unajomlo gui sabado na jaane; para uquefanma\u00f1oda jafa ya umafaaela.\n6:8 Lao jatungoja y jinason\u00f1ija; ya ileg\u00f1a ni ayo na taotao y anglo canae\u00f1a: Cajulo ya untojgue gui t\u00e1lolo! ya tumojgue julo.\n6:9 Ya ileg\u00f1a si Jesus nu sija: Jufafaesen jamyo uno. Tunas gui sabado na umafatinas y mauleg pat y taelaye? numalibre lin\u00e2l\u00e2 pat mamuno?\n6:10 Ya jaatan todos y oriya\u00f1ija ya ileg\u00f1a nu g\u00fciya: Estira mona y canaemo. Ya guiya jafatinas taeg\u00fcije, ya y canae\u00f1a numalo ya magong taeg\u00fcije y otro.\n6:11 Ya sija mans\u00e9nbubo, ya manguecuentos uno yan otro, jafa mojon ujafatinas gui as Jesus.\n6:12 \u00b6 Ya susede gui ayo sija na jaane, jumanao para ufanaetae gui un ogso ya todo y puenge jasigue di manaetaeja para as Yuus.\n6:13 Ya anae manana, jaagang y disipulu\u00f1a sija; ya jaayig dose guiya sija, ni manmafanaan locue apostoles.\n6:14 Si Simon ni jafanaan locue Pedro, yan si Andres chelu\u00f1a, yan si Santiago, yan si Juan, si Felipe, yan si Bartolome,\n6:15 Yan si Mateo, yan si Tomas, yan si Santiago, lajin Alfeo, yan si Simon ni mafanaan Selote,\n6:16 Yan si Judas chelun Santiago, yan si Judas Iscariote ni y traidot;\n6:17 Ya manunog yan sija ya tumojgue gui un lugat ni yano; yan y dangculon linajyan disipulu\u00f1a sija, yan y dangculon linajyan taotao, guinin todo yya Judea, yan yya Jerusalem, yan y tano Tiro yan yya Sidon, ni manmato para umaecungog, yan para uninafanmagong y chetnot\u00f1ija;\n6:18 Yan manafanmagong ayo sija y munafanachatsaga ni y espiritun \u00e1placha.\n6:19 Ya manmalago pumapacha g\u00fce y linajyan taotao: sa manjujuyong guiya g\u00fciya ninasi\u00f1a ya janafanmamagong todo sija.\n6:20 \u00b6 Ya g\u00fciya manatan julo gui disipulu\u00f1a, ya ileg\u00f1a: Mandichoso jamyo ni mamobble; sa iyonmiyo y raenon Yuus.\n6:21 Mandichoso jamyo ni y man\u00f1alang pago: sa ufanjaspog. Mandichoso y manatanges: sa ufa\u00f1aleg.\n6:22 Mandichoso jamyo yaguin y taotao sija infanchinatlie, yan ujaapatta sija guiya jamyo ya ujalalatde jamyo ya ujayute juyong y naanmiyo pot taelaye pot causa y Lajin taotao.\n6:23 Fansenmagof g\u00fcije na jaane; yan infanayog ni minagofmiyo: sa, estag\u00fce, y premionmiyo dangculo gui langet; sa taeg\u00fcenaoja jafatitinas y tata\u00f1ija ni y profeta sija.\n6:24 Lao ay jamyo ni manrico! sa esta guaja consuelonmiyo.\n6:25 Ay jamyo ni esta manjaspog pago! sa infan\u00f1alang. Ay jamyo ni ma\u00f1achaleg pago! sa jamyo infanugong yan infananges.\n6:26 Ay jamyo yaguin todo y taotao sija manguecuentos mauleg nu jamyo! sa taeg\u00fcenaoja ujafatinas y tata\u00f1ija ni y manfatso na profeta.\n6:27 \u00b6 Lao jusangangane jamyo ni jumujungog: G\u00fcaeya y enemigonmiyo; fatinas mauleg ni y chumatlie jamyo,\n6:28 Bendise y mumatdise jamyo, ya infanmanaetae pot y namamajlao jamyo.\n6:29 Ya pumatmada y un banda fasumo, naeja locue ni y otro, ya y chumule y capamo, chamo chumochoma na uchule y chininamo locue.\n6:30 Ya cada uno ni y gumagaojao, nae; ya y chumule y g\u00fcinajamo, chamo tumalulugua gumagao.\n6:31 Ya jafa y malagomiyo ni y taotao jafatinas nu jamyo; taeg\u00fcijija fatinas locue nu sija:\n6:32 Sa yaguin inguaeya y gumaeya jamyo, jafa na grasia guajanmiyo? sa y manisao locue jaguaeya y gumaeya sija.\n6:33 Yaguin infatinas mauleg ni y fumamamauleg jamyo, jafa na grasia guajanmiyo? sa y manisao locue jafatitinasja taeg\u00fcenao.\n6:34 Yanguin innaayao na ayo sija ni y guaja ninanggamo para infanresibe, jafa na grasia guajanmiyo: sa y manisao janaayao y manisao para ufanmanresibe taeg\u00fcije talo.\n6:35 Lao guaeya jamyo y enimigunmiyo ya infatinas mauleg nu sija: ya innaaayao, ya chamiyo fantataeninangga, ya udangculo y premionmiyo yan infanfamaguon y Gueftaguilo: sa g\u00fciya cari\u00f1oso nu y ingrato sija, yan y taelaye.\n6:36 Jamyo locue fany\u00f3ase, taeg\u00fcije y tatanmiyo ni y gaegue gui langet y\u00f3ase.\n6:37 Chamiyo jumusga, sa ti infanjinisga: chamiyo sumetetensia, sa ti infansinentensia: nafanlibre, ya y ninafanlibre:\n6:38 Fanmanae, ya infanmanae; mauleg na medida y majo\u00f1o papa, ya umachaochao ya umach\u00fachuda, ufanmannae y taotao sija gui jalom pechonmiyo; sa ayoja na medida y anae manmide jamyo: infanmamediye talo jamyo.\n6:39 \u00b6 Ya jasangane sija un acomparasion ileg\u00f1a: Si\u00f1a y bachet jaosgaejon y otro bachet? ti ujaachapodong y dos gui joyo?\n6:40 Y disipulo ti taquilo\u00f1a qui y maestro: lao cada uno ni y cabales, g\u00fciya utaeg\u00fcijija y maestro\u00f1a.\n6:41 Ya jafa muna unlilie y migo gui atadog y chelumo; ya ti unlilie y jayo gui atadogmo?\n6:42 Ya jafa muna si\u00f1a unalog ni y chelumo: Chelujo, maela ya junajanao y migo gui atadogmo, yanguin jago ti unlilie y jayo gui atadogmo? Hipocrita jao, yute juyong finena y jayo gui atadogmo, ya ayo nae unlie claro para unnajanao y migo gui atadog y chelumo.\n6:43 Sa taya mauleg na trongco, ni y fanogcha taelaye, ni y taelaye na trongco ni y fanogcha mauleg.\n6:44 Sa cada trongco matungoja pot y tinegcha\u00f1a. Sa ti ufanmanrecoje y taotao sija igos gui manituca ni ufanmanrecoje ubas gui jalom gadon.\n6:45 Y mauleg na taotao, ni y mauleg na guinaja gui corason\u00f1a, ma\u00f1u\u00f1ule mauleg; ya y taelaye na taotao, ni y taelaye na g\u00fcinaja gui corason\u00f1a, ma\u00f1u\u00f1ule taelaye: sa y minegae y corason jasasangan y pachot\u00f1a.\n6:46 \u00b6 Ya jafa na infananaanyo Se\u00f1ot, Se\u00f1ot, ya ti infatitinas y jusangangane jamyo?\n6:47 Jaye y mato guiya guajo ya jaecungog y sinanganjo ya jafatinas; jufanue jaye pareju\u00f1a:\n6:48 Parejo yan un taotao ni y manjatsa guma, ya jaguadog tadong ya japolo y simiento gui jilo y fitme na acho; ya yanguin cajulo y manadan janom, ya milag y sadog chineneg ayo na guma; lao ti umayengyong, sa maplanta gui jilo y acho.\n6:49 Lao ayo y umeecungog ya ti jafatinas; parejo yan y taotao ni y manjatsa guma gui jilo oda ya ti janaye simiento; ya anae milag y sadog ya chineneg, enseguidas upodong; ya dangculo y yinilang ayo na guma.\n7:1 YA despues di munjayan todo y finanag\u00fce\u00f1a si Jesucristo gui talangan taotao sija, g\u00fciya jumalom guiya Capernaum.\n7:2 Ya y tentago un senturion ni y guefya\u00f1a, estaba malango, ya esta para umatae.\n7:3 Lao anae y senturion jajungog na masasangan si Jesus, jatago y manamco na Judios, para umagagao na ufato ya unajomlo y tentago\u00f1a.\n7:4 Ya anae manmato as Jesus, guefmagagao ileg\u00f1ija: Dignog\u00fce na unfatinas este pot g\u00fciya:\n7:5 Sa jag\u00fcaeya y nasionmame ya japlantaye jam sinagoganmame.\n7:6 Ya manjanao yan si Jesus. Ya anae esta manjijot gui guima y senturion jatago y amigu\u00f1a sija para ualog as Jesus: Se\u00f1ot chamo ninachachatsaga; sa ti dignoyo na junajalom jao gui papa atofjo;\n7:7 Pot este ti jujaso na dignoyo na jufato guiya jago; lao sanganja ya ujomlo y tentagojo.\n7:8 Sa guajo locue na taotao gaegeuyo gui papa y ninasi\u00f1a, ya guaja gui papajo sendalo sija; yan ileco nu este: Janao, ya mapos; ya y otro: Maela, ya mato; ya y tentagojo: Fatinas este, ya jafatinas.\n7:9 Ya anae jajungog si Jesus este, ninamanman nu g\u00fciya, ya jabirag\u00fce ileg\u00f1a ni y linajyan taotao ni y dumalalag g\u00fce: Jusangane jamyo na ti jusoda taeg\u00fcije na dinangculon jinenggue ni iya Israel.\n7:10 Ya anae manalo sija guato gui guima y manmanago, jasoda na jomlo y tentago ni estaba malango.\n7:11 \u00b6 Ya susede un rato despues di este na, si Jesus jumanao asta un siuda ni mafanaan Nain; ya ma\u00f1isija yan y disipulu\u00f1a yan y dangculon manadan taotao.\n7:12 Ya anae esta jijot gui pettan y siuda, estag\u00fce na macocone un matae, g\u00fciyaja lajin nana\u00f1a, ya biuda locue, ya linajyan taotao siuda mangachongchong\u00f1a.\n7:13 Ya anae linie ni y Se\u00f1ot ninamaase nu g\u00fciya, ya ileg\u00f1a nu g\u00fciya: Chamo cumacasao.\n7:14 Ya lumatguato ya japacha y andas; ya y chumuchule ma\u00f1aga. Ya ileg\u00f1a: Patgon, guajo jao sumangane, cajulo.\n7:15 Ya y estaba matae matachong ya jatutujon cumuentos, ya inentrega as Jesus gui as nana\u00f1a.\n7:16 Ya ninafanmaaa\u00f1ao todosija, ya maalaba si Yuus ileg\u00f1ija: Dangculo na profeta esta cajulo entre yya jita: ya, si Yuus jagas jabisita taotao\u00f1a.\n7:17 Ya jumanao este na fama\u00f1a gui todo yya Judea yan todo oriya y tano.\n7:18 \u00b6 Ya y disipulon Juan masangane g\u00fce todo estesija.\n7:19 Ya jaagang si Juan dos gui disipulu\u00f1a ya jatago para as Jesus, ileg\u00f1a: Cao jago yuje y para ufato pat infanmannangga jam otro?\n7:20 Ya anae manmato y taotao sija guiya g\u00fciya, ileg\u00f1ija: Si Juan Bautista tumagojam para yya jago, ileg\u00f1a: Cao jago yuje y para ufato pat infanmannangga jam otro?\n7:21 Ya ayo mismo na ora, janafanjomlo megae ni y manmalango yan y mangaechetnotsija yan espiritun manaelaye; yan megae na manbachet ninafanmanlie.\n7:22 Ya maninepe as Jesus ya ileg\u00f1a nu sija: Janao yan sangane si Juan ni y liniimiyo yan y jiningogmiyo; sa y manbachet manmanlie, ya y mangojo manmamocat, ya y manategtog mangasgas, ya y mananga manmanjungog, y manmatae manafangajulo, ya umapredica y ibangelio gui mamobble.\n7:23 Ya dichoso ayo y ti sumosoda y lugat para umatompo guiya guajo.\n7:24 \u00b6 Ya anae manmapos y mantinago as Juan, jatutujon cumuentuse y taotao sija pot si Juan: Jafa injanag\u00fce jamyo para inlie gui desierto? un piao ni y yinengyong ni y manglo?\n7:25 Lao jafa injanag\u00fce jamyo para inlie? un taotao na puru suabe magagu\u00f1a? Estag\u00fce, ayo sija y manminagagago ni y malagno magago yan manlal\u00e2l\u00e2 gui guinatbo, gui palasyon y ray nae ma\u00f1asaga.\n7:26 Lao jafa injanag\u00fce para inlie? un profeta? magajet, jusangane jamyo na mas que un profeta.\n7:27 Este yuje y esta matugue: Estag\u00fce na jatago y tentagojo gui menan matamo, ni para ufamauleg y chalanmo gui menamo.\n7:28 Jusangane jamyo, na entre ayo sija y manmafa\u00f1ago gui famalaoan, taya dangculo\u00f1a qui si Juan; lao y diquiqueja gui raenon Yuus dangculo\u00f1a qui g\u00fciya.\n7:29 Ya todo y taotao anae majungog g\u00fce, yan y publicano sija, jajustifica si Yuus ya manmatagpange ni y tinagpangen Juan.\n7:30 Lao y Fariseo yan y manmagas y lay, jarechasa y consejon Yuus contra sijaja; sa ti manmatagpange pot g\u00fciya.\n7:31 Ya ileg\u00f1a: Jafa nae juacompara y taotao este na generasion? ya jafa parejon\u00f1ija?\n7:32 Manparejo yan y famaguon ni manmatatachong gui plasa ya manaagang uno yan otro ya ileg\u00f1ija: Indadane jamyo flauta, y ti manbaela jamyo, manuugonge jamyo, ya ti manatanges jamyo.\n7:33 Sa mato si Juan Bautista ni uchocho pan ni uguimen bino, ya ilelegmiyo: Guaja aniti\u00f1a.\n7:34 Mato y Lajin taotao, ya chumocho yan gumimen, ya ilelegmiyo: Estag\u00fce, un taotao na gachumocho yan gagumimen bino, yan amigon y publicano sija, yan y manisao.\n7:35 Lao y tiningo manacabales ni y todo famaguon\u00f1a.\n7:36 \u00b6 Ya malago uno gui Fariseo sija na ufa\u00f1ija ma\u00f1ocho. Ya jumalom gui guima y Fariseo ya matachong gui lamasa.\n7:37 Ya estag\u00fce, un palaoan gui siuda, na miisao, ya anae jatungo na gaegue si Jesus matatachong gui lamasa gui guima y Fariseo, ma\u00f1ule un boteyan alabastro na ing\u00fcente.\n7:38 Ya tumojgue gui taten Jesus, ya cumasao; ya jatutujon munafotgon ni lago\u00f1a y adeng Jesus, ya jasaosao ni y gapunilu\u00f1a; ya jachichico y adeng\u00f1a ya japapalae ni y ingg\u00fcente.\n7:39 Ya anae jalie este y Fariseo ni y umagange g\u00fce, cumuentos gui sumanjalom\u00f1a, ileleg\u00f1a: Este na taotao yaguin profeta g\u00fce, jatungo jafa este na palaoan y pumapacha g\u00fce sa g\u00fciya miisao.\n7:40 Ya manope si Jesus ya ileg\u00f1a nu g\u00fciya: Simon, guaja para jasangane jao. Ya g\u00fciya ileg\u00f1a: Sangan Maestro.\n7:41 Un taotao guaja dos dum\u00eddibe: ya y uno mandidibe quinientos monedan denario, ya y otro sincuenta.\n7:42 Ya anae taya apas\u00f1ija, inasie todo y dos. Enao mina, jaye guiya sija mas g\u00fcinaeya?\n7:43 Manope si Simon, ya ileg\u00f1a: Y pineloco na ayo y mas maasie; ya g\u00fciya ileg\u00f1a: Tunas jinisgamo.\n7:44 Ya jabira g\u00fce guato gui palaoan, ya ileg\u00f1a as Simon: Unlilie este na palaoan? Jumalomyo gui guimamo, ti unnaeyo janom para y adengjo; lao este janafotgon y adengjo ni lago\u00f1a, ya jasaosao ni y gapunilu\u00f1a.\n7:45 Jago ti unnaeyo un chico: lao este na palaoan desde que jumalomyo ti pumapara jachico y adengjo.\n7:46 Ti unpalae y ilujo ni la\u00f1a, lao este japalae y adengjom ingg\u00fcente.\n7:47 Enao mina jusangane jao, na y isao\u00f1a, ni y megae, umaasie; sa g\u00fciya megae maguaeya\u00f1a; lao y didide maasii\u00f1a, didide maguaeya\u00f1a.\n7:48 Ya ileg\u00f1a nu g\u00fciya: Y isaomo maasie.\n7:49 Ya y mangachochong\u00f1a manmatachong gui lamasa, jatutujon sumangan gui sumanjalom\u00f1ija: Jaye este na ufanasie locue isao?\n7:50 Ya ileg\u00f1a ni palaoan: Y jinengguemo unsinatba; janao yan pas.\n8:1 YA susede un rato despues na jajanaog\u00fce y siuda sija yan y sengsong sija manpredidica, yan numanafanungo nu y ibangelion y raenon Yuus; ya ma\u00f1isija yan y dose,\n8:2 Ya palo sija famalaoan ni guinin nanafanmagong ni manaelayen espiritu yan y chetnot sija; si Maria ni mafanaan magdalena ni jumuyong guiya g\u00fciya siete na manganite,\n8:3 Ya si Juana, asaguan Chusa, mayetdomon Herodes; yan si Susana yan megae ni pumalo ni jasesetbe ni g\u00fcinaja\u00f1ija:\n8:4 \u00b6 Ya anae manda\u00f1a y dangculon linajyan taotao, yan y manestaba cada siuda manmato guiya g\u00fciya, jacuentuse pot un acomparasion.\n8:5 Un t\u00e1tanom jumanao para ufananom y semiya\u00f1a; ya anae manmananom, palo podong gui oriyan chalan; ya todo magacha, ya manmato sija y pajaro gui langet ya macano.\n8:6 Yan palo mamodong gui jilo acho; ya anae lachog, ninamalayo sa ti fofotgon.\n8:7 Yan palo mamodong gui jalom tituca; ya mandoco ma\u00f1ija y tituca, ya chiniguit.\n8:8 Yan palo mamodong gui mauleg y tano; ya mandoco, ya manogcha siento pot uno. Ya anae esta jasangan estesija umagang: Y gaetalanga para ufanjungog, uecungog.\n8:9 \u00b6 Ya y disipulu\u00f1a sija mafaesen g\u00fce: Jafa este na acomparasion?\n8:10 Ya guiya ileg\u00f1a: Esta manmannae jamyo para intingo y misterion y raenon Yuus lao y pumalo pot acomparasion; para ujaaatanja ya ti ujalie, yan ujaecungogja ya ti ujatungo.\n8:11 Pues este ayo na acomparasion: Y semiya y sinangan Yuus.\n8:12 Y gui oriyan chalan ayo sija y jagas jumungog; ya despues mato y manganite ya janasuja y sinangan gui corason\u00f1ija sa ti mojon ufanmanjonggue ya ufanmasatba.\n8:13 Ya y jilo acho, ayo sija y anae jajungog, jaresibe y sinangan nu y minagof; lao estesija manaejale; sa jajonggue un ratoja, lao anae mato tentasion mamodong.\n8:14 Ya y pedong gui jalom tituca, este sija y jumungog; ya mientras jumanao gui chalan\u00f1ija, manchiniguit ni inadaje\u00f1i\u00f1ija, yan y g\u00fcinaja, yan y minagof tano gui este lin\u00e2l\u00e2, ya ti jumuyong tinegcha\u00f1ija cabales.\n8:15 Lao ayo y mangaegue gui mauleg na tano, este sija na guinin jumungog y sinangan gui corason ni mauleg yan tunas, jamantietiene, ya manogcha yan manpasensia.\n8:16 \u00b6 Ni uno ni ma\u00f1o\u00f1onggue candet, utampe nu y batde pat upolo gui papa catre, lao upolo gui jilo lamasa para y jumajalom ulie y manana.\n8:17 Sa taya manaatog ya ti umafatan\u00f1aejon; ni gae gui secreto ya ti umatungo, ujuyong gui manana.\n8:18 Guesadaje jaftaemano y jiningogmiyo: sa masquesea jaye y guaja, umanae; lao masquesea jaye y taya, unajanao ayo y pinelo\u00f1a na uguaja.\n8:19 \u00b6 Ayonae manmato guiya g\u00fciya si nana\u00f1a yan y ma\u00f1elu\u00f1a, lao tisi\u00f1a manlatguato guiya g\u00fciya pot y linajyan taotao.\n8:20 Ya masangane, ileg\u00f1ija nu g\u00fciya: Si nanamo yan y ma\u00f1elumo manmatotojgue gui sanjiyong na manmalago na unmalie.\n8:21 Ya manope ya ileg\u00f1a nu sija: Y nanajo yan y ma\u00f1elujo, ayosija y jumungog y sinangan Yuus ya jafatinas.\n8:22 \u00b6 Ya susede y uno gui ayosija jaane nae, na jumalom gui un batco, g\u00fciya yan y disipolu\u00f1a sija; ya ileg\u00f1a nu sija: Nije tafanjanao y otro banda jagoe; ya manjanao.\n8:23 Ya anae mumamayama sija, g\u00fciya maego; ya manguaefe un dangculon, pagyo y manglo gui jagoe; ya bula y batco janom ya mangaegue sija gui peligro.\n8:24 Ya manmato guiya g\u00fciya, ya mapangon, ileg\u00f1ija: Maestro, maestro, tafanmalingo. Ya magmata, ya jalalatde y manglo yan y chaochao y janom; ya pumara, ya jumuyong malinao.\n8:25 Ya ileg\u00f1a nu sija: Mano nae gaegue jinengguenmiyo? Ya sija manmaa\u00f1ao ya ninafanmanman, ileg\u00f1ija uno yan otro: Jaye este, na asta y manglo yan y janom jatago ya maoosgueja?\n8:26 \u00b6 Ya manmato asta, y tano y taotao Gadara sija, ni gaegue gui sanmenan y Galilea.\n8:27 Ya anae jumanao para y tano, umasoda yan un taotao gui jiyong y siuda na gaemanganite; ya apmam na tiempo ti minagagago ni usaga gui guima, na y naftanja.\n8:28 Ya anae jalie si Jesus, umagang, ya jatombag\u00fce gui mena\u00f1a ya ileg\u00f1a ni dangculo na inagang: Para jafayo nu jago Jesus, Lajin Yuus Gueftaquilo? Jusuplica jao na chamoyo sumasapet.\n8:29 Sa jatago y espiritun \u00e1placha na ufanjanao gui taotao; sa apmam na tiempo na maguot g\u00fce: mamantiene g\u00fce preso ya magode nu y cadena yan tale sija; ya jayamag y guinede ya quinene ni y manganite asta y desierto sija.\n8:30 Ya finaesen as Jesus: Jaye naanmo? Ya g\u00fciya ileg\u00f1a: Linajyan; sa megae na manganite manjalom guiya g\u00fciya.\n8:31 Ya masuplica g\u00fce na cha\u00f1a tumatago na ufanjanao para y tadong na joyo.\n8:32 Ya estaba g\u00fcije un inetnon babue na lajyan na ma\u00f1ochocho gui jalom tano: ya masuplica g\u00fce na ufanpinelo ya ufanjalom g\u00fcije sija. Ya manpinelo.\n8:33 Ya anae manjuyong y manganite gui taotao, manjalom gui babue ya y inetnon manmanunugo sajyao guato gui un didog gui jagoe ya manmatmos.\n8:34 Ya ayo sija munafa\u00f1ochocho y babue anae jalie y mafatinas, manmapos ya jasangane y taotao siuda yan gui fangualuan.\n8:35 Ya manjanao para ujalie y mafatinas; ya manmato gui as Jesus; ya masoda y taotao ni anae guinin jumuyong y manganite, na minagagago ya guaja jinaso\u00f1a cabales, ya matatachong gui adeng Jesus; ya ninafanmaa\u00f1ao.\n8:36 Ya mansinangane ni lumie, jafa taemano manamagong\u00f1a ayo y guinin jinatme manganite.\n8:37 \u00b6 Ayonae todo y taotao gui tano y Gadarenos yan todo y oriyan, magagao na ujanao guiya sija; sa mansenmaa\u00f1ao; ya g\u00fciya cajulo gui batco ya tumalo tate.\n8:38 Lao ayo na taotao anae guinun manjuyong y manganite, siniplica g\u00fce para usaga guiya g\u00fciya; lao janajanao ya ileg\u00f1a:\n8:39 Talo guato guiya jamyo ya unfa\u00f1angane jaftaemano na dangculon g\u00fcinaja finatinas\u00f1a si Yuus nu jago. Ya gui\u00f1a jumanao, ya jasangan\u00f1aejon todo gui siuda jaftaemano finatinas\u00f1a si Jesus nu g\u00fciya.\n8:40 \u00b6 Ya anae tumalo guato si Jesus maresibe ni y linajyan taotao sija ya mangosmagof; sa todoja numananggaja.\n8:41 Ya estag\u00fce, un taotao na y naan\u00f1a si Jairo, ya g\u00fciya locue magas y sinagoga; mato ya jatombag\u00fce papa gui adeng Jesus, ya jagagao na ujalom gui guima\u00f1a.\n8:42 Sa guaja unoja jaga\u00f1a na esta guaja dose a\u00f1os, ya estaba jijot na umatae. Ya anae jumanao maapupura g\u00fce ni linajyan taotao sija.\n8:43 \u00b6 Ya un palaoan na numanajuyong j\u00e2g\u00e2 esta dose a\u00f1os, esta jalachae gumasta todo y g\u00fcinaja\u00f1a ni jaapase\u00f1aejon medico, lao taya si\u00f1a munamagong,\n8:44 Mato gui tate\u00f1a ya japacha y madoblan magagu\u00f1a, ya enseguidas esta bumasta y j\u00e2g\u00e2\u00f1a.\n8:45 Ayonae si Jesus ileg\u00f1a: Jayeyo pumacha? Lao anae todos japune ileg\u00f1a si Pedro yan y mangachong\u00f1a: Maestro, y linajyan taotao umanoriya jao yan machichiguit jao,\n8:46 Lao si Jesus ileg\u00f1a: Guajayo pumacha; sa guajo jutungo na guaja ninasi\u00f1a jumuyong guiya guajo.\n8:47 Ayonae y palaoan anae jalie na ti si\u00f1a janaatog, mato ya manlalaolao, ya jatombag\u00fce gui mena\u00f1a, ya jasangan gui menan y taotao sija todos, pot jafa na japacha, yan jaftaemano na ninajomlo enseguidas.\n8:48 Ya ileg\u00f1a nu g\u00fciya: Hija, y jinengguemo unninajomlo; janao ya upas.\n8:49 \u00b6 Ya mientras cumuecuentos, mato uno ni taotao y magas y sinagoga ya ileg\u00f1a: Y jagamo matae, chamo umestototba y Maestro.\n8:50 Ya anae jajungog si Jesus manopeg\u00fce: Chamo maaa\u00f1ao; jonggueja sa g\u00fciya ujomlo.\n8:51 Ya anae mato gui guima, taya japolo na ujalom yan g\u00fciya na si Pedro, si Juan, yan si Santiago, yan y tatan y patgon, yan y nana\u00f1a.\n8:52 Ya todos mangacasao, yan malamementag\u00fce; lao ileg\u00f1a: Chamiyo fangacasao; sa ti matae, lao mamaego.\n8:53 Ya mach\u00e1chatgue g\u00fce, sa matungoja na esta matae.\n8:54 Lao g\u00fciya jamantiene y canae\u00f1a ya jaagang ileg\u00f1a: Patgon palaoan, cajulo.\n8:55 Ya mato y espiritu\u00f1a talo, ya enseguidas cajulo; ya manago na umanachocho.\n8:56 Ya ninafanmanman y ma\u00f1aena\u00f1a: lao jaencatga na cha\u00f1ija sumangangane ni un taotao jafa y mafatinas.\n9:1 YA jaagang ya manda\u00f1a y dose disipulu\u00f1a ya janae ninasi\u00f1a gui jilo y manganite todo, yan para ufanmanamte nu y chetnot sija.\n9:2 Ya jatago na ujapredica y raenon Yuus, yan unafanjomlo y manmalango.\n9:3 Ya ileg\u00f1a nu sija: Chamiyo fanma\u00f1u\u00f1ule ni jafa para y chalan, ni baston, ni botsa, ni pan, ni salape; ni infangaemagago dos.\n9:4 Ya cuatquiera na guma nae manjalom jamyo, fa\u00f1aga g\u00fcije asta que manjanao jamyo.\n9:5 Ya todo ayo sija y ti rumesibe jamyo, anae manjanao jamyo g\u00fcije na siuda, sacude y petbos gui adengmiyo para testimonio contra sija.\n9:6 Ya manjanao sija, ya manmalofan sija gui sengsong, mapredidica y ibangelio, yan mannanajomlo gui todo y lugat.\n9:7 Lao si Herodes tetrarca jajungog masangan este sija na finatinas, ya estaba guefinestotba ni y sina\u00f1gan palo na si Juan esta cumajulo guinin manmatae.\n9:8 Ya y pumalo ileg\u00f1ija: Si Elias jumuyong talo; ya otros umalog; na uno gui manamco na profeta l\u00e2l\u00e2 talo.\n9:9 Ya ileg\u00f1a si Herodes: Si Juan guajo dumeg\u00fceya; ya jaye este nae jujungog sija na g\u00fcinaja? Ya japrocura lumie g\u00fce.\n9:10 \u00b6 Ya anae manalo guato y apostoles sija, masangane g\u00fce todo ni y finatinas\u00f1ija. Ya jacone sija ya ma\u00f1uja asta un banda, gui un siuda ni mafanaan Betsaida.\n9:11 Ya anae esta matungo ni y linajyan taotao sija, mad\u00e1lalag g\u00fce; ya g\u00fciya jaresibe, ya jasangane ni y raenon Yuus; ya janafanjomlo y numesesita manmaamte.\n9:12 Ya y jaane jatutujon pumuenge; ya mafatoig\u00fce nu y dose ya ileg\u00f1ija nu g\u00fciya: Nafanjanao, y linajyan taotao, para ufanjanao asta y sengsong yan y fangualuan gui oriya, ya ufa\u00f1aga ya ufanmanaligao na\u00f1ija; sa mangaeguejit g\u00fcine gui desierto na lugat.\n9:13 Ya ileg\u00f1a nu sija: Jamyo innafa\u00f1ocho. Ya ileg\u00f1ija: Taya guajata na sincoja na pan yan dos g\u00fcijan, patsino nije tafanjanao tafanmamajan nengcano para todo este sija na taotao.\n9:14 Ya guaja buente sinco mit na taotao. Ya ileg\u00f1a ni disipulu\u00f1a: Nafanmatachong pot compania, cada compania sincuenta.\n9:15 Ya taeg\u00fcije mafatinas, ya mannafamatachong todos.\n9:16 Ya jachule y sinco na pan yan y dos g\u00fcijan, ya jaatan julo y langet ya jabendise ya jaipe; ya janae y disipolu\u00f1a para upolo gui menan y linajyan taotao.\n9:17 Ya ma\u00f1ocho ya manjaspog todos; ya esta majatsa y sebla y pedaso sija, dose canastra.\n9:18 \u00b6 Ya susede, anae mananaetae g\u00fciyaja namaesa, estabaja mangaegue guiya g\u00fciya y disipulu\u00f1a, ya jafaesensija, ileg\u00f1a: Jaye ileg\u00f1i\u00f1ija y taotao nu guajo?\n9:19 Ya sija manmanope ya ileg\u00f1ija: Si Juan Bautista; lao guaja umalog: Si Elias; yan palo umalog na uno gui manamco na profeta l\u00e2l\u00e2 talo.\n9:20 Ya ileg\u00f1a nu sija: Lao jamyo, jaye ilegmimiyo nu guajo? Ya manope si Simon Pedro ya ileg\u00f1a: Si Cristo, gui as Yuus.\n9:21 Ya manguenesencatga sija ya jatago na cha\u00f1ija sumangangane ni jaye nu este;\n9:22 Ileg\u00f1a: Y Lajin taotao nesesita ufamadese megae, ya umarechasa ni y manamco sija, yan y manmagas y mamale yan y escriba sija, ya umapuno ya umanacajulo gui mina tres na jaane.\n9:23 Ya ileg\u00f1a nu sija todos: Yaguin guaja y malago tumatiyego, upunenaesa g\u00fce, ya uchule y quiluus\u00f1a cada jaane ya udalalagyo.\n9:24 Sa masqueseaja jaye y malago na usatba y lin\u00e2l\u00e2\u00f1a, ufinalingaeguan; ya masquesea jaye y malingo y lin\u00e2l\u00e2\u00f1a pot y naanjo, g\u00fciya usatba.\n9:25 Sa jafa probecho\u00f1a y taotao yaguin jagana todo y tano, ya g\u00fciya unafalingo maesa g\u00fce pat uyulang maesa gue?\n9:26 Sa masqueseaja jaye pot y mamajlao guajo yan pot y sinanganjo, mamajlao locue nu este y Lajin taotao, yaguin mato gui minalag\u00f1a yan y minalag tata yan y ma\u00f1antos na angjet sija.\n9:27 Lao magajet jusangane jamyo: Na guaja palo gui mangaegue g\u00fcine, na ti uchague y finatae asta que ujalie y raenon Yuus.\n9:28 \u00b6 Ya susede mina ocho na jaane, despues di estesija na sinangan, jacone ma\u00f1ija yan Pedro, yan si Juan, yan si Santiago, ya cajulo gui egso ni taquilo para ufanaetae.\n9:29 Ya mientras mananaetae g\u00fce, y jechuran mata\u00f1a tolaeca; ya y magagu\u00f1a jumuyong apaca ya malag.\n9:30 Ya, estag\u00fce, dos taotao na cumuecuentos yan g\u00fciya; ya si Moises, yan Elias,\n9:31 Ya manjuyong yan y minalag\u00f1ija, ya manguecuentos pot y jinanao\u00f1a, na para ucumple guiya Jerusalem.\n9:32 Lao si Pedro yan y mangachog\u00f1a, mansenmatujog; ya anae manmagmata, malie y minalag\u00f1a yan ayo na dos taotao ni mangachong\u00f1a.\n9:33 Ya susede, mientras sumusuja sija guiya g\u00fciya, si Pedro ileg\u00f1a as Jesus: Maestro, mauleg\u00f1aja tafa\u00f1aga g\u00fcine; ya nije tafanmamatinas tres na tabetnaculo; uno para jago, uno para si Moises, yan uno para si Elias; ti jatungo jafa jasasangan.\n9:34 Ya mientras jasasangan este, mato un mapagajes ya mantinampe; ya ninafanguefmaa\u00f1ao anae manjalom gui mapagajes.\n9:35 Ya mato un inagang gui mapagajes na ileg\u00f1a: Este y lajijo, inayigco; ecungog g\u00fce.\n9:36 Ya anae malofan ayo na inagang, esta masoda si Jesucristo g\u00fcig\u00fciyaja namaesa; ya sija manmamatquiloja, ya g\u00fcije sija na jaane, taya jasangane ni jaye pot y linii\u00f1ija.\n9:37 \u00b6 Ya susede inagpa\u00f1a g\u00fcije na jaane, anae manunog guinin y egso, ya y dangculon linajyan taotao masoda g\u00fce.\n9:38 Ya, estag\u00fce, un taotao gui entalo y linajyan, na umagang ileg\u00f1a: Maestro jutayuyut jao na unlie y lajijo; sa y unoja patgonjo:\n9:39 Sa, estag\u00fce, un espiritu na quinene, ya enseguidas umagang; ya ninalaolao g\u00fce ya numanajuyong buo, ya aapmam na pinadese na sumuja guiya g\u00fciya, na ninalalamenja,\n9:40 Ya guinin jutayuyut y disipulumo na ujayute juyong; ya ti manasi\u00f1a.\n9:41 Ya manope si Jesus ya ileg\u00f1a: O generasion na ti manjonggue, yan manchatpayon! asta ngaean nae utafanjijita, ya jujasusungon jamyo? conieyo fan mague ni y lajimo.\n9:42 Lao anae m\u00e1mamamaela, y anite yinite papa ya guefninalaolao. Lao si Jesus jalalatde y espiritun \u00e1placha ya janajomlo y patgon ya janatalo guato as tata\u00f1a.\n9:43 Ya todos ninafanman nu y minagas Yuus, lao mientras manmamanman todos pot todo estesija ni y jafatinas, ileg\u00f1a ni disipulu\u00f1a;\n9:44 Polo ya utatcalon gui talanganmiyo este sija na sinangan: sa umaentrega y Lajin taotao gui canae taotao sija.\n9:45 Lao sija ti jatungo este na sinangan, ya manafaninatog\u00fce para cha\u00f1ija tumutungo: ya manmaa\u00f1ao mafaesen g\u00fce ni ayo na sinangan.\n9:46 \u00b6 Ya jumuyong manafaesen entre sija, jaye guiya sija udangculo\u00f1a.\n9:47 Lao si Jesus anae jaliija y jinason y corason\u00f1ija, jacone un patgon ya japolo gui banda\u00f1a,\n9:48 Ya ileg\u00f1a nu sija: Jaye y rumesibe este na patgon pot naanjo jaresibeyo; ya y rumesibeyo, jaresibe y tumagoyo; sa jaye y mas diquique guiya jamyo, ayo dangculo.\n9:49 \u00b6 Ya manope si Juan ya ileg\u00f1a: Maestro inlie uno na manyuyute juyong y manganite pot y naanmo; ya inchema sa ti jadadalalagjit.\n9:50 Ya ileg\u00f1a si Jesus ni sija; chamiyo chumochoma, sa ayo ni ti contra jamyo, guiya para jamyo.\n9:51 \u00b6 Ya susede, anae mato y jaane nae jijot para umaresibe gui sanjilo; janameton y mata\u00f1a para ujanao para Jerusalem,\n9:52 Ya manago tentago sija na ufanmofona gui mena\u00f1a; ya majanao manjalom gui un songsong Samaritano, para umanalistuye g\u00fce g\u00fcije.\n9:53 Ya ti maresibe g\u00fce, sa y mata\u00f1a meton para ujananao para Jerusalem.\n9:54 Ya anae malie este ni disipulu\u00f1a, si Santiago, yan si Juan, ileg\u00f1ija: Se\u00f1ot, malago jao ya utafanmanago ya utunog guafe guinin y langet, ya ufanlinachae?\n9:55 Ayonae jabira g\u00fce ya manlinalatde.\n9:56 Ya manjanao para y otro songsong.\n9:57 \u00b6 Ya anae manjajanao sija, un taotao ileg\u00f1a nu g\u00fciya gui chalan: Se\u00f1ot, bae judalalagjao manoja y unjanao guato.\n9:58 Ya ileg\u00f1a si Jesus nu g\u00fciya: Y sora sija mangaeliyang, ya y pajaro sija gui langet mangaechenchon; lao y Lajin taotao taya sanga\u00f1a ni anae para upolo y ilu\u00f1a.\n9:59 Ya ileg\u00f1a ni otro: Dalalagyo. Ya g\u00fciya ileg\u00f1a; Se\u00f1ot, sottayo naya ya finenana jujanao ya jujafot si tatamo.\n9:60 Lao ileg\u00f1a nu g\u00fciya: Polo y manmatae ya ufanajafot y manmatae\u00f1ija; lao jago janao ya unpredica y raenon Yuus.\n9:61 Ya ileg\u00f1a locue otro; judalalagja jao Se\u00f1ot; lao sottayo naya ya judespideyo ni y mangaegue guiya jame.\n9:62 Ya ileg\u00f1a si Jesus: Ni uno ni pumopolo y canae gui alado ya uatan tate\u00f1a ni y digno para y raenon Yuus.\n10:1 ANAE munjayan este sija na g\u00fcinaja, jaayig y Se\u00f1ot otro setenta, ya jatago dos en dos gui mena\u00f1a para todo y siuda yan ayo na lugat anae para ufato g\u00fce.\n10:2 Ya ileg\u00f1a nu sija: Y cosecha megae, lao y manmachochocho didide; enaomina gagao y Se\u00f1ot y cosecha, ya ufanago ni manmachochocho para y cosecha\u00f1a.\n10:3 Fanjanao gui chalanmiyo; estag\u00fce na jutago jamyo taeg\u00fcije quinilo gui entalo y lobo sija.\n10:4 Chamiyo fanma\u00f1u\u00f1ule botsa ni maleta, ni sapatos: ni jaye insaluda gui jinanaonmiyo.\n10:5 Masqueseaja mano na guma nae manjalom jamyo, finenana in alog: Pas para este na guma.\n10:6 Yaguin guaja g\u00fcije patgon y pas, y pasmiyo usaga guiya g\u00fciya; yaguin taya, utalo guato guiya jamyo.\n10:7 Fa\u00f1aga g\u00fcije na guma, fa\u00f1ocho yan infanguimen todo y manmanaenmiyo; sa y machochoeho ufanmerese nu y apas\u00f1a. Chamiyo fanjajanao guma pot guma.\n10:8 Ya masquesea mano na siuda nae manjalom jamyo, ya manmaresibe jamyo, cano jafa y manmasajyane jamyo.\n10:9 Ya nafanjomlo y manmalango ni guaja g\u00fcije, ya inalog nu sija: y raenon Yuus esta mato guiya jamyo.\n10:10 Lao masqueseaja mano na suida nae manjalom jamyo, ya ti manmaresibe jamyo, fanjanao gui caye\u00f1ija, ya inalog:\n10:11 Asta y petbos ni jachetune y adengmame g\u00fcine gui siudanmiyo, insacude contra jamyo; lao tingo este na y raenon Yuus mato jijot guiya jamyo.\n10:12 Ya jusangane jamyo: mas sungunon Sodoma g\u00fcije na jaane qui ayo na siuda.\n10:13 Ay! ay! jao Corasin: ay! ay! jao Betsaida! sa yaguin guiya Tiro yan Sidon nae manmafatinas este sija na mannamanman y manmafatinas guiya jamyo, jagas sen amco manma\u00f1otsot, infanmatachong gui silisio yan y apo.\n10:14 Enaomina mas sungunon Tiro yan Sidon qui para jamyo gui jaanin y sentensia.\n10:15 Ya jago Capernaum, unacajulo jao asta y langet? umachule papa asta sasalaguan.\n10:16 Y jumungog jamyo, jajungogyo; ya y dumesecha jamyo, jadesechayo; ya y dumesechayo, jadesecha y tumagoyo.\n10:17 \u00b6 Ya manalo guato y setenta yan y minagof\u00f1ija, ya ileg\u00f1ija: Se\u00f1ot, asta y manganite insujejeta pot y naanmo.\n10:18 Ya ileg\u00f1a nu sija: Julie si Satanas taeg\u00fcije y lamlam ni y pedong guinin y langet.\n10:19 Estag\u00fce, na junae jamyo ninasi\u00f1a para ingacha y culebla, yan y alacran, yan y jilo todo y ninasi\u00f1an y enemigo, ya taya si\u00f1a munafanlamen jamyo.\n10:20 Lao chamiyo ninafanmamagof pot este, pot y espiritu sija ni insujejeta; lao fanmagof jamyo pot y naanmiyo ni esta matugue gui langet.\n10:21 \u00b6 Ya ayoja na ora magof si Jesus gui Espiritu Santo ya ileg\u00f1a: Junae jao grasia, O Tata, Se\u00f1ot y langet yan y tano, sa unana este sija na g\u00fcinaja gui manmejnalom yan manmanungo, ya unfanue gui mandiquique; junggan Tata, sa taeg\u00fcine nae senmagof gui menamo.\n10:22 Todo y g\u00fcinaja sija jagasja jaentregayo y Tatajo; ya taya tumungo jaye y Laji\u00f1a, na y Tataja; ya jaye y Tata, na y Laji\u00f1aja, yan ayo y minalago y laji\u00f1a ufinanue.\n10:23 Ya jabirag\u00fce guato gui disipulo sija, ya ileg\u00f1a: Mandichoso y atadog ni manmanlie nu estesija ni y liniinmiyo:\n10:24 Sa jusangane jamyo, na megae na profeta yan ray sija, dumesesea na ulie nu estesija ni y liniinmiyo, ya ti malie; yan ujajungog nu estesija ni y jiningogmiyo ya ti jajungog.\n10:25 \u00b6 Ya, estag\u00fce, un magas y lay na tumojgue julo ya tinietientag\u00fce, ya ileg\u00f1a: Maestro, jafa jufatinas para juereda y taejinecog na lin\u00e2l\u00e2?\n10:26 Ya ileg\u00f1a nu g\u00fciya: Jafa matugue gui tinago? jafa untataetae?\n10:27 Ya g\u00fciya manope, ileg\u00f1a: Guaeya y Se\u00f1ot Yuosmo contodo gui corasonmo, yan contodo y antimo, yan contodo y minetgotmo, yan contodo y tiningomo; yan y tiguangmo taeg\u00fcije iya jago namaesa.\n10:28 Ya ileg\u00f1a nu g\u00fciya: Mauleg inepemo: fatinas este, ya unl\u00e2l\u00e2.\n10:29 Lao g\u00fciya, malago na unatunas maesa g\u00fce, ileg\u00f1a as Jesus: Ya jaye tiguangjo?\n10:30 Ya inepe as Jesus ya ileg\u00f1a: Un taotao tumunog guinin Jerusalem asta Jerico, ya podong gui entalo y manaque; y machule y magagu\u00f1a ya manachetnudan g\u00fce, ya manjanao ya mapolo cana matae.\n10:31 Ya susede na un pale tumunog g\u00fcijeja na chalan; ya anae jalie malofanja gui otro banda.\n10:32 Taeg\u00fcijeja locue un Lebita, anae mato jijot g\u00fcije na lugat, ya jaatanja, ya malofanja gui otro banda.\n10:33 Ya un Samaritano, anae jumajanao g\u00fcije na chalan, mato lugat nae gaegue g\u00fce, ya anae jalie, ninamaase,\n10:34 Ya mato guato guiya g\u00fciya jabee y chetnot sija ya janaye la\u00f1a yan bino; ya janamaudae gui ga\u00f1a g\u00e2g\u00e2, ya jacone asta y guima publico ya jaadaje.\n10:35 Ya y inagpa\u00f1a g\u00fcije anae para ujanao jachule dos denarion salape ya janae y magas y guima, ya ileg\u00f1a nu g\u00fciya: Guesadaje g\u00fce; ya todo y palo na gastomo despues, yaguin tumaloyo mague, juapase jao.\n10:36 Ya jaye y tiguang entre y tres, pot ayo y pedong gui entalo y manaque?\n10:37 Ya g\u00fciya ileg\u00f1a: Ayo y maase nu g\u00fciya. Ayonae ileg\u00f1a Janao ya unfatinas locue taeg\u00fcije.\n10:38 \u00b6 Ya anae jumajanao, jumalom gui un songsong; ya un palaoan na y naan\u00f1a si Marta rinesibeg\u00fce gui guima\u00f1a.\n10:39 Ya guaja uno chelu\u00f1a palaoan na y naan\u00f1a si Maria, na locue matatachongja gui adeng Jesus, ya jaecungogja y sinangan\u00f1a.\n10:40 Lao si Marta esta inestotba pot megae sinetbe\u00f1a, ya mato guiya g\u00fciya, ya ileg\u00f1a: Se\u00f1ot, ada ti unlie y chelujo na upaloyo ya jufa\u00f1e\u00f1etbeja na maesa? Tago ya uayudayo.\n10:41 Ya inepe as Jesus ileg\u00f1a nu g\u00fciya: Marta, Marta, esta jago inestotba ya guesmanadaje jao, pot megae na g\u00fcinaja:\n10:42 Lao unoja manesesita; ya si Maria jaayig ayo mauleg na patte ni ti umachule guiya g\u00fciya.\n11:1 YA susede anae mananaetae g\u00fce gui un lugat, ya magpo, uno gui disipulu\u00f1a ileg\u00f1a nu g\u00fciya: Se\u00f1ot, fanag\u00fcejam manmanaetae, taeg\u00fcije locue as Juan ni jafanag\u00fce y disipulu\u00f1a!\n11:2 Ya ileg\u00f1a na sija: Yaguin manmanaetae jamyo alog: Tata, Umatuna y naanmo. Umamaela y raenomo,\n11:3 Naejam pago cada jaane ni y nengcanomame.\n11:4 Ya unasiijam ni isaomame; sa jame locue inasisie todo ayo y dumidibe jam. Ya chamojam pumopolo gui tentasion.\n11:5 \u00b6 Ya ileg\u00f1a nu sija: Jaye guiya jamyo y gaeamigo uno, ya ufinatoig\u00fce gui tatalopuenge, ya ualog nu g\u00fciya: Amigo naayaoyo tres pan;\n11:6 Sa un amigojo mato guiya guajo guinin bumiaje, ya taya ni jafa para juplantaye gui mena\u00f1a;\n11:7 Ya ayo y gaegue gui sumanjalom ufanope, ya ualog: Chamo umatbororotayo; sa esta majuchom y petta, ya estag\u00fcejam gui cama yan y famaguonjo; ti si\u00f1ayo cajulo ya junae jao.\n11:8 Ya jusangane jamyo: Achogja ti ucajulo ya uninae pot y amigu\u00f1a: lao pot y magagao\u00f1a, ucajulo ya unae jaftaemano y janesesita.\n11:9 Ya jusangane jamyo: Gagao, ya infanmanae; aligao ya inseda; yajo, ya infanmababaye.\n11:10 Sa jayeja y mangagao uresibe; ya y manaligao usoda; ya y manayajo, umababaye.\n11:11 Pat jaye guiya jamyo na tata, yan uguinagao ni y laji\u00f1a un pan, ya unnae un acho? pat un g\u00fcijan ya enbes di g\u00fcijan unnae culebla?\n11:12 Pat yan guinagao un chada, ada unnae un alacran?\n11:13 Pues ombre jamyo, ni y manaelaye, intingo numae mauleg na ninae y famaguonmiyo, cuanto mas y Tatanmiyo gui langet unae ni y Espiritu Santo todo ayo y gumagao g\u00fce?\n11:14 \u00b6 Ya jayute juyong un anite na udo. Ya susede anae jumuyong este y anite, y ido cumuentos, ya y linajyan taotao sija ninafanmanman.\n11:15 Ya palo guiya sija ileg\u00f1ija: Pot si Beetsebub, ni magas y manganite, na jayuyuteja juyong y manganite sija.\n11:16 Lao y pumalo matietientag\u00fce, magagagao un se\u00f1at gui langet.\n11:17 Lao g\u00fciya jatungo y jinason ayo sija ya ileg\u00f1a nu sija: Todo y raeno umadibide contra g\u00fciyaja, uyulang; ya y guima umadibide contra guma, upodong.\n11:18 Yaguin si Satanas locue madibide contra g\u00fciya namaesa, jaftaemano y raeno\u00f1a sumaga? Sa ilegmiyo na juyuyute juyong y manganite pot si Beetsebub.\n11:19 Lao yaguin junajujuyong y manganite pot si Beetsebub, pot jaye y famaguonmiyo ufanyinite sija juyong? Enaomina sija ufanjues para jamyo.\n11:20 Lao yaguin pot y calulot Yuus nae, juyuyute juyong y manganite, magajet na y raenon Yuus mato guiya jamyo.\n11:21 Yaguin un taotao ni matatnga, ya jafamauleg y atmas\u00f1a, ya japulan y guima\u00f1a: todo g\u00fcinaja\u00f1a, manseguro.\n11:22 Lao anae mato otro na matatnga\u00f1a qui g\u00fciya ya ina\u00f1ao, inamot ni atmas\u00f1a anae jaangoco g\u00fce ya jafacae y g\u00fcinaja\u00f1a.\n11:23 Ayo y ti jumujame, contra guajo yuje; ya ayo y ti rumecocoge guiya guajo machalapon.\n11:24 Ya y espiritun \u00e1placha, anae jumuyong gui taotao, jumajanao gui anglo na lugat, manaliligao dinescansa; ya anae ti ma\u00f1oda, ileg\u00f1a: Bae talo guato gui guimajo anae jumanaoyo.\n11:25 Ya anae mato, jasoda mabale yan maadotna.\n11:26 Ya jumanao ya mangone yan g\u00fciya otro siete espiritu mas manaelaye\u00f1a qui g\u00fciya, ya jumalom ya sumaga g\u00fcije: ya taelaye\u00f1a y uttimo\u00f1a ayo na taotao qui y finena.\n11:27 \u00b6 Ya susede anae jasangan estesija, un palaoan gui linajyan taotao, umagang ileg\u00f1a nu g\u00fciya: Dichoso ayo na tuyan y chumuchulejao, yan ayo na pecho y anae sumususo jao.\n11:28 Lao g\u00fciya ileg\u00f1a: junggan, lao dichosu\u00f1a ayo y jumungog y sinangan Yuus, ya jaadaje.\n11:29 \u00b6 Ya anae manetnon y linajyan taotao guiya g\u00fciya, jatutujon sumangan: Este na generasion manaelaye: manmanaliligao se\u00f1at; lao ti ufanmannae nu se\u00f1at mas na ayoja y se\u00f1at Jonas.\n11:30 Sa taeg\u00fcije si Jonas y se\u00f1at para y taotao Ninibe taeg\u00fcijeja locue y Lajin taotao para g\u00fcine na generasion.\n11:31 Y raenan sanjaya cumajulo gui jaanin juisio yan y taotao este na generasion ya manquinendena; sa mato guinin y uttimon y tano para uecungog y minalate Salomon; ya estag\u00fceja uno dangculo\u00f1a qui si Salomon gaegue guine na lugat.\n11:32 Y taotao sija guiya Ninibe, ufangajulo gui jaanin juisio yan este na generasion ya manquinendena; sa manma\u00f1otsot pot y prenedican Jonas; ya estag\u00fce uno mas dangculo\u00f1a qui si Jonas gaegue g\u00fcine na lugat.\n11:33 \u00b6 Taya ni un taotao munaaatog gui bedega y candet ni esta masonggue, ni upolo gui papa ganta, sino y candelero para todo y manjajalom ujalie y manana.\n11:34 Y candet y taotao, y atadog; yaguin y atadogmo sensiyo todo y tataotaomo maninina; lao yaguin taelaye, y tataotaomo locue bula jomjom.\n11:35 Atan pues sa y manana ni y gaegue guiya jago, munga jomjom.\n11:36 Enao mina yaguin todo y tataotaomo bula manana, ni mano na lugat nae guaja jomjom, cabales na ubula manana, taeg\u00fcije y yanguin malag inina\u00f1a y candet ya inina jao.\n11:37 \u00b6 Ya mientras cumuecuentos, un Fariseo siniplicag\u00fce na usija chumocho, ya jumalom ya matachong gui lamasa.\n11:38 Lao y Fariseo ninamanman anae jalie este, pot y ti jafagase g\u00fce finena antes di uchocho.\n11:39 Ya y Se\u00f1ot ileg\u00f1a nu g\u00fciya: Pago jamyo ni Fariseo, y sumanjiyongja gui copa yan plato innagagasgas, lao y sumanjalommiyo bula inamot an tinaelaye.\n11:40 Manaejinaso jamyo, ada ayo y fumatinas gui sumanjiyong, ti g\u00fciya locue y fumatinas gui sumanjalom?\n11:41 Lao todo y guajanmiyo naen\u00f1aejon limos\u00f1a; ya estag\u00fce na todo ufangasgas para jamyo.\n11:42 \u00b6 Lao ay, ay jamyo Fariseo! ni infanmannae diesmos nu y yetba buena yan laruda yan todo golae; ya innafapos y tininas yan y g\u00fcinaeyan Yuus. Estesija nesesita infatinas, sin pelo y pumalo.\n11:43 Ay, ay jamyo Fariseo! sa ing\u00fcaeya etmas manaquilo na tachong gui sinagoga, yan y sinaluda sija gui metcado.\n11:44 Ay ay jamyo! sa calang jamyo naftan ni ti malilie; ya y taotao sija manmalolofanja gui sumanjilo ya ti matungo.\n11:45 \u00b6 Ya manope un magas y lay, ileg\u00f1a nu g\u00fciya: Maestro, yaguin unsangan estesija unlatdejam locue.\n11:46 Lao g\u00fciya ileg\u00f1a: Ay ay jamyo locue y manmagas y lay! sa innafanmangangatga y taotao sija ni ayo na catga y macat para uchule, ya ni un calolotmiyo innainete para inayuda.\n11:47 Ay, ay jamyo! sa infatinas y naftan, y profeta sija, ya y tatanmiyo pumuno.\n11:48 Taeg\u00fcine mantestigo jamyo, ya inconsienteja y checho y tatanmiyo; sa sija magajet pumuno, ya jamyo fumatinas y naftan\u00f1ija.\n11:49 Enaomina ileg\u00f1a y minalate Yuus: Bae managoyo profeta yan apostoles para sija; ya megae guiya sija inpino yan inpetsigue:\n11:50 Sa guinin este na generasion manesesita machule y j\u00e2g\u00e2 todo y profeta, ni manmachuda desde y tutujon y tano;\n11:51 Desde j\u00e2g\u00e2 Abel, asta y j\u00e2g\u00e2 Sacharias, ni y matae gui entalo y attat yan y templo; magajet, jusangane jamyo na umanesesita machule guinin este na generasion.\n11:52 Ay ay jamyo y manmagas y lay! sa innajanao y yaben tiningo; ya ti infanjalom jamyo yan y mangequejalom inchechema.\n11:53 \u00b6 Ya anae jumuyong g\u00fcije, y escribas yan y Fariseos sija, matutujon ma afuefuetsas ya macacase para usigue cumuentos megae;\n11:54 Maespipia, para umaquechule jafa guinin y pachot\u00f1a.\n12:1 YA ayo na tiempo, anae manda\u00f1a megae na mit na linajyan taotao, asta managacha uno yan otro; ya jatutujon sumangane y disipulu\u00f1a sija finenana: Adaje jamyo ni y libaduran y Fariseo sija ni y hipocresia.\n12:2 Sa taya na matatampe na ti umababa; pat mananana, na ti umatungo.\n12:3 Enaomina jafa guinin sinanganmiyo gui jemjom, umajungog gui manana; ya jafa y incuentuse gui talanga gui jalom aposento, umaagangnaejon gui jilo guma.\n12:4 Ya jusangane jamyo ni y amigujo sija: Chamiyo fanmaaa\u00f1ao ni ayo sija y pumuno y tataotao, sa an munjayan ayo, taya jafa si\u00f1a ujafatinas.\n12:5 Lao jusangane jamyo jaye inmaa\u00f1ag\u00fce: Fanmaa\u00f1ao jamyo ni ayo y yanguin munjayan japuno, guaja ninasi\u00f1a\u00f1a na uyute asta sasalaguan: Junggan, jusanga\u00f1e jamyo: Fanmaa\u00f1ao jamyo nu g\u00fciya.\n12:6 Ada ti mabende sinco na pajaro, pot dos na octabo? ya ni uno guiya sija mamalefa\u00f1aejon gui menan Yuus?\n12:7 Lao asta y gaponulonmiyo esta manmatufong. Chamiyo fanmaaa\u00f1ao: sa manbali\u00f1a jamyo qui y megae pajaro.\n12:8 \u00b6 Ya jusangane jamyo: Jayeja y comonfesat\u00f1aejonyo gui menan y taotao sija; uquinenfesat\u00f1aejon locue ni y Lajin taotao gui menan y angjet Yuus.\n12:9 Lao ayo y pumuneyo gui menan taotao sija, siempre pune g\u00fce gui menan y angjet Yuus.\n12:10 Ya jayeja y cumuentos contra y Lajin taotao, umaasie; lao y chumatfino contra Espiritu Santo, ti umaasie.\n12:11 Ya anae manmacone jamyo gui menan y sinagoga sija, yan y manmagas, yan y gaesisi\u00f1a, chamiyo madadaje jaftaemano yan jafa para inepe, ni jafa para insangan;\n12:12 Sa y Espiritu Santo infanfinanag\u00fce g\u00fcije na ora jafa para insangan.\n12:13 \u00b6 Ya uno gui linajyan taotao ileg\u00f1a nu g\u00fciya: Maestro, tayo y chelujo ya ufacaeyo ni y erensia.\n12:14 Lao ileg\u00f1a nu g\u00fciya: Taotao, jaye pumoloyo gui jilomo para jues, pat para mamacae?\n12:15 Ya ileg\u00f1a nu sija: Atan, ya inguesadaje jamyo ni y linagga: sa y lin\u00e2l\u00e2 y taotao, ti guinin y manadan g\u00fcinaja sija ni y jasagagaye.\n12:16 Ya mansinangane un parabola, ileg\u00f1a: y fangualuan un taotao na rico, jumujuyong megae na quineco.\n12:17 Ya manjaso gui sumanjalom\u00f1a, ileg\u00f1a: Jafa jufatinas, sa taya mano nae jupolo y quinecojo.\n12:18 Ya ileg\u00f1a: Este bae jufatinas: bae jujala papa y lanchoco, ya jujatsa y mas dangculo; ya ayo nae jupolo todo y maiisso yan y g\u00fcinajajo.\n12:19 Ya jualog ni y antijo: Ante, megae g\u00fcinajamo, para megae na sacan; descansa, ya unchocho, yan unguimen, yan unmagof.\n12:20 Lao si Yuus ileg\u00f1a nu g\u00fciya: Taejinaso jao! pago na puenge nesesita umachule y antimo: ya para jaye ayo sija na g\u00fcinaja ni unnaetnon?\n12:21 Taeg\u00fcenaoja y manaetnon y g\u00fcinaja para g\u00fciyaja, ya ti urico para si Yuus.\n12:22 \u00b6 Ya ileg\u00f1a ni y disipolu\u00f1a sija: Enaomina jusangane jamyo, Chamiyo madadaje pot y lin\u00e2l\u00e2nmiyo, jafa para incano; ni y tataotaonmiyo, jafa para innaminagago.\n12:23 Sa y lin\u00e2l\u00e2 mas qui y nengcano, ya y tataotao mas qui y magago.\n12:24 Jaso y aga sija, na ti manmanananom, ni ufanmangoco; ni uguaja sagannengcano\u00f1ija ni lancho; ya si Yuus janachocho sija; ya cuanto mas manmauleg jamyo qui y pajaro!\n12:25 Yan jaye guiya jamyo pot inadaje si\u00f1a uaumenta un codo y lineca\u00f1a?\n12:26 Yanguin ti si\u00f1a incheg\u00fce y mas diquique, para jafa inadadaje y pumalo?\n12:27 Jaso y lirio sija, jaftaemano mandoco\u00f1i\u00f1ija! ti manmachochocho, ni ufanmanjila; ya jusangane jamyo na si Salomon contodo y minalag\u00f1a, ti minagago parejo yan uno guiya sija.\n12:28 Yanguin si Yuus janafanminagago y chaguan qui fangualuan ni y gaegue pago, ya agupa esta mayute guato gui jetno; ti mas magajet na inninafanminagago jamyo, O jamyo didide na jinenggue?\n12:29 Ya chamiyo umaliligao jafa para incano, ni jafa para inguimen, ni infanbu\u00e9buente gui jinasonmiyo.\n12:30 Sa todo este sija na g\u00fcinaja manmaaliligao ni y nasion sija gui tano: lao y tatanmiyo jatungoja na innesesita estesija na g\u00fcinaja.\n12:31 Lao aligao finena y raeno\u00f1a; ya todo este sija na g\u00fcinaja umanafanda\u00f1a para jamyo.\n12:32 Chamiyo fanmaaa\u00f1ao, jamyo diquique na manada; sa este minagof y tatanmiyo, na infanninae ni y raeno.\n12:33 Bende y g\u00fcinajamo, ya unfannae. limosna; fanmamamauleg botsa ni ti ubijo, un g\u00fcinaja gui langet na ti ufatta, anae ti usineda ni y saque, ni ti upotliya.\n12:34 Sa manoja nae gaegue y g\u00fcinajamo, ayoja nae gaegue locue y corasonmo.\n12:35 \u00b6 Polo ya esta madudog y senturanmiyo, ya esta masonggue y candet miyo;\n12:36 Ya infanparejo yan ayo na taotao sija y jananangga y se\u00f1ot\u00f1ija, yanguin tumalo guato guinin y guipot umasagua; sa para yanguin mato ya manyajo, umababaye enseguidas.\n12:37 Mandichoso ayo sija na tentago, yanguin mato y se\u00f1ot, mansineda manbebela; magajet jusangane jamyo, na ududog g\u00fce, ya unafanmatachong para ufa\u00f1ocho, ya ufalag y sumanmena ya usetbe sija.\n12:38 Ya yanguin ufato gui segundo na bela ya gui tetsero, ya mansineda sija taeg\u00fcijeja, mandichoso ayo sija na tentago.\n12:39 Este tingo na yanguin y tata gui guima mojon jatungo jafa na ora nae ufato y saque, upulan ya ti upolo na umayulang y guima\u00f1a.\n12:40 Enaomina nafanlisto jamyo locue, sa ufato y Lajin taotao, g\u00fcije na ora gui anae ti injajaso.\n12:41 \u00b6 Ayonae ileg\u00f1a si Pedro: Se\u00f1ot, unsangan este na acomparasion para jame, pat para todos?\n12:42 Ya y Se\u00f1ot ileg\u00f1a: Jaye nae ayo y mauleg yan mejnalom na mayetdomo, ni y ninamagas ni y se\u00f1ot\u00f1a gui g\u00fcinajana, para uninanae na\u00f1a gui tiempo\u00f1a?\n12:43 Dichoso ayo na tentago y yanguin mato y se\u00f1ot\u00f1a, sineda na jachochog\u00fce taeg\u00fcije.\n12:44 Magajet jusangane jamyo; na uninamagas gui jilo y g\u00fcinaja\u00f1a, todo.\n12:45 Lao yanguin ayo na tentago y ileg\u00f1a gui jalom corason\u00f1a: Y se\u00f1otjo caeja mato; ya jatutujon pumanag y famalaoan na tentago, yan y lalaje; ya chumocho, yan gumimen, ya bumolacho;\n12:46 Y se\u00f1ot ayo na tentago, ufato g\u00fcije na jaane gui anae ti jananangga, yan gui ora anae ti jatungo, ya uninasuja, ya uninafanda\u00f1a y patte\u00f1a yan y ti manmanjonggue.\n12:47 Ya ayo na tentago y jatungo y minalago y se\u00f1ot\u00f1a; ya ti jalisto g\u00fce, ni jafatinas jaftaemano y minalago\u00f1a, umasaulag megae.\n12:48 Lao ayo y ti jatungo, ya jafatinas digno na umasauleg, lao didide masaulag\u00f1a. Sa jayeja y megae manai\u00f1a, siempre megae uchule, ya jaye y megae catgo\u00f1a, mas megae magagao\u00f1a.\n12:49 \u00b6 Matoyo para juyute y guafe gui jilo tano: ya jafa malagojo yanguin esta todo ma\u00f1i\u00f1ila?\n12:50 Lao guaja tagpangeco para jumatagpange; ya jafa chachatsagajayo asta qui umacumple!\n12:51 Injajaso jamyo na matoyo para junae pas y tano? Jusangane jamyo, na aje; lao mas para inaguaguat.\n12:52 Sa desde pago sigue mona, uguaja gui un guma sinco na ti manparejo, y tres contra y dos, ya y dos contra y tres.\n12:53 Y tata uaguaguat contra y laji\u00f1a, ya y laje contra y tata; ya y nana contra y jaga\u00f1a, ya y jaga contra y nana; y suegra contra y yetna, ya y yetna contra y suegra\u00f1a.\n12:54 \u00b6 Ya ileg\u00f1a locue ni y taotao sija: Yanguin inlilie y mapagajes na cajulo gui sumanlichan, siempre ilelegmiyo: Mamamaela y ichan; ya magajet.\n12:55 Ya yanguin manguaefe y manglo sanjaya, ilelegmiyo: Uguaja maepe; ya ufato.\n12:56 Manhipocrita jamyo; intingo umegsamina y langet, yan y tano; ya jafa na ti intingo umegsamina y tiempo pago?\n12:57 Ya jafa na ni jamyo ti injisga jafa y tinas?\n12:58 Ya mientras jumanao jao yan y enemigumo para y magas, procura munaquelibre jao gui jinanaomo; na noseaja uninarastra guato gui jues, ya y jues uninentrega gui ofisiat, ya y ofisiat unpinelo gui calaboso.\n12:59 Jusangane jao: Ti unjanao juyong g\u00fcije, asta qui unapase y uttimo na marabidi.\n13:1 YA mangaegue g\u00fcije na tiempo taotao sija, ni masangane g\u00fce pot y Galileo sija, ni si Pilatos janada\u00f1a y j\u00e2g\u00e2\u00f1ija yan y inefresen\u00f1ija.\n13:2 Ya si Jesus manope ya ileg\u00f1a nu sija: Jinasonmiyo na este sija na Galileo, mas manisao qui todo Galileo sija na japadese ayo sija?\n13:3 Jusangane jamyo na aje; sa yanguin ti manma\u00f1otsot jamyo, manparejoja jamyo man\u00e1chamalingo.\n13:4 Pat ayo sija y diesiocho ni y podong y tore gui jilo\u00f1ija guiya Siloe ya manpinino, jinasonmiyo na mas manisao ayo sija qui todo y taotao ni y ma\u00f1asaga Jerusalem?\n13:5 Jusangane jamyo na aje; sa yanguin ti manma\u00f1otsot jamyo, manparejoja jamyo man\u00e1chamalingo.\n13:6 \u00b6 Ya jasangan este na acomparasion: Un taotao guaja y trongcon igos na matanme gui fangualuan\u00f1a; ya anae mato para uegaga cao guaja tinegcha\u00f1a, ti ma\u00f1oda.\n13:7 Ya ileg\u00f1a ni y lancheru\u00f1a: Esta guaja tres a\u00f1os ni matoyo g\u00fcine na trongcon igos, manegagayo tinegcha, ya taya nae ma\u00f1odayo; utut papa; para jafa na jaocucupa y tano?\n13:8 Ya manope ileleg\u00f1a nu g\u00fciya: Se\u00f1ot, polo pago na a\u00f1o ya juguadog y oriya\u00f1a, ya junaye estietcot:\n13:9 Ya yanguin ufanogcha, mauleg; yanguin aje, siempre, unutut.\n13:10 \u00b6 Ya estaba na mamananag\u00fce gui un sinagoga, gui sabado na jaane.\n13:11 Ya estag\u00fce un palaoan, na guaja un espiritun malango guiya g\u00fciya esta diesiocho a\u00f1os, ya esta ninaojlo, ya tisi\u00f1a tumacho.\n13:12 Ya anae linie as Jesus, inagang ya ileg\u00f1a nu g\u00fciya: Palaoan, libre jao gui malangumo.\n13:13 Ya japolo y canae\u00f1a gui jilo\u00f1a; ya enseguidas ninatunas, ya jaalaba si Yuus.\n13:14 Lao y magas sinagoga lalalo sa si Jesus, numanajomlo gui sabado na jaane, ya manope ileg\u00f1a nu y linajyan taotao sija: Guaja saes na jaane para ufanmachocho y taotao sija: ya este nae mauleg mato para numajomlo; lao ti y sabado na jaane.\n13:15 Ayonae inepe ni y Se\u00f1ot, ya ileg\u00f1a: Hipocrita jamyo, ada ti si\u00f1a cada uno guiya jamyo upula y ga\u00f1a guaca, pat asno gui pesebre, ya ucone ya unaguimen gui sabado na jaane?\n13:16 Ya ti si\u00f1a este na palaoan, ni y jagan Abraham, ni guinede as Satanas diesiocho a\u00f1os, manalibre gui magode\u00f1a, gui sabado na jaane?\n13:17 Ya anae jasangan estesija, todo y enemigu\u00f1a ninafan mamajlao; ya todo y taotao sija ninafanmagof, pot todo y sennamagof na g\u00fcinaja ni y machog\u00fce pot g\u00fciya.\n13:18 \u00b6 Pot enao ileg\u00f1a: Jafa pareju\u00f1a y raenon Yuus? yan jafa nae juacompara?\n13:19 Parejo yan y granon y semiyan mustasa, ni y jachule y taotao, ya jatanme gui jalom jardin\u00f1a; ya doc\u00f3, ya jumuyong trongcon jayo; ya esta y pajaro sija gui langet ma\u00f1aga gui ramas\u00f1a.\n13:20 Ya ileg\u00f1a talo: Jafa nae juacompara y raenon Yuus.\n13:21 Parejo yan y libadura, ni jachule un palaoan, ya janaatog gui tres medidan arina, asta qui todo manespongja.\n13:22 \u00b6 Ya jumajanao gin chala\u00f1a, malag y siuda sija, yan y sengsong mamananag\u00fce, ya jumajananao para Jerusalem.\n13:23 Ya ileg\u00f1a uno nu g\u00fciya: Se\u00f1ot, didide manmasatba? si Jesus ileg\u00f1a nu sija,\n13:24 Guefprocura mangejalom gui maiot na potta; sa jusangane jamyo na megae prumocucura mangejalom, lao ti mansi\u00f1a.\n13:25 Yanguin y magas y guima jayasja cajulo ya jajuchom y petta, ya intitujon jamyo manmanojgue gui sumanjiyong ya inyajo y petta, ya ilegmi miyo: Se\u00f1ot, babayejam: ya ufanope ya ualog nu jamyo: Ti jutungo manguinemano jamyo:\n13:26 Ya intitujon umalog: Guinin ma\u00f1ochojam yan manguimenjam gui menamo, yan mamanag\u00fce jam gui cayenmame.\n13:27 Lao g\u00fciya ualog: Jusangane jamyo, na ti jutungo manguinemano jamyo: fa\u00f1uja guiya guajo, todos jamyo ni y chumog\u00fce y tinaelaye.\n13:28 Ya ayonae uguaja cumasao, yan chegcheg nifen, yanguin inlie si Abraham, yan si Ysaac, yan si Jacob, yan todo y profeta sija, gui raenon Yuus; ya jamyo infanmachoneg juyong.\n13:29 Ya ufanmato manguinen y sancatan yan y sanlichan, yan y sanlago yan y sanjaya; ya ufanmatachong gui raenon Yuus.\n13:30 Ya estag\u00fce na guaja manuttimo ya ufanfinenana, y guaja manfinenana ya ufanuttimo.\n13:31 \u00b6 Ya ayo na ora, manmato Fariseo sija ya ileg\u00f1ija nu g\u00fciya: Janao ya unsuja g\u00fcine; sa malago si Herodes na unpinino.\n13:32 Ya ileg\u00f1a nu sija: Janao, sangane ayo na sora, na estag\u00fce, na juyute juyong y anite sija, yan manaamteyo pago na jaane yan agupa, ya y mina tres na jaane ufonjayanyo.\n13:33 Lao nesesita jufamocat pago yan agupa yan y inagpa\u00f1a, sa ti si\u00f1a na ufalingo y profeta gui Jerusalem.\n13:34 O Jerusalem! Jerusalem! ni y unpuno y profeta sija, yan unfagas ni acho ayo sija y manmatago para g\u00fciya! cuanto biaje malagoyo na junafanda\u00f1a y famaguonmo, taeg\u00fcije y ponidera janafanda\u00f1a y poyitas\u00f1a gui papa papa\u00f1a, ya timalago jamyo!\n13:35 Estag\u00fce na manmapoluye jamyo ni y guimanmiyo taetaotao; ya jusangane jamyo: Ti inliiyo, asta qui mato ayo na tiempo anae inalog: Dichoso ayo y mamamaela ni y naan y Se\u00f1ot.\n14:1 YA susede na anae jumalom gui guima un magas Fariseo, para uchocho pan, gui sabado na jaane, ya sija maespipiaja.\n14:2 Ya, estag\u00fce, un taotao gaegue gui mena\u00f1a na malango binaya.\n14:3 Ya manope si Jesus, ya jacuentuse manmagas y lay, yan y Fariseo sija, ileg\u00f1a: Tunas numajomlo gui sabado na jaane pat aje?\n14:4 Ya sija manmamatquiquiloja. Ayonae jacone g\u00fce, ya janajomlo, ya jasotta na ujanao.\n14:5 Ya jaope sija ileg\u00f1a: Jaye guiya jamyo, yanguin guaja ga\u00f1a asno pat guaca, podong gui jalom tupo, ada ti enseguidas ujatsa gui sabado na jaane?\n14:6 Ya ti si\u00f1a talo manmanope ni estesija.\n14:7 \u00b6 Ya jasangan un acomparasion ni y manmaconbida, anae jaatituye ni y jaayig y mas managquilo na tachong gui lamasa; ya ileg\u00f1a nu sija:\n14:8 Yanguin quinenbida jao ni un taotao para y guipot, chamo fatatachong gui mas tagquilo na tachong; sa ufato otro na mas onrao qui jago, ni y quinenbida\u00f1a locue;\n14:9 Ya ufato y cumonbida jao ya ualog nu jago: Nae este lugat y este taotao; ya ayonae untutujon mumamajlao yanguin sumaga jao gui mas uttimo na lugat.\n14:10 Lao yanguin quinenbida jao, janao ya fatachong gui mas tagpapa na lugat; sa yanguin mato y cumonbida jao, ualog nu jago: Amigo, janao falag iya jululo; ya ayonae unguaja inenra gui menan ayo sija y mangachongmo ni y manmatachong gui lamasa.\n14:11 Sa jayeja y manataquilo maesa g\u00fce, unaumitde g\u00fce ya y umunaumitde g\u00fce, umanataquilo.\n14:12 \u00b6 Ya ileg\u00f1a nu ayo y guinin cumonbida g\u00fce: Yanguin mamatinas jao nataloane pat sena, chamo umagagange y manamigumo sija, ni y ma\u00f1elumo, ni y manparientesmo, ni y manrico na tiguangmo; sa noseaja unmaconbida locue talo, ya unmaapase.\n14:13 Lao yanguin gumupot jao, agange y mamoble, yan y manmanco yan y mancojo, yan y manbachet;\n14:14 Ya undichoso; sa ti si\u00f1a maapase jao; lao unmaapase gui quinajulo y manunas.\n14:15 \u00b6 Ya anae jajungog este, uno gui mangachong\u00f1a ni y manmatachong gui lamasa, ileg\u00f1a nu g\u00fciya: Dichoso ayo y uchocho pan gui raenon Yuus.\n14:16 Lao ileg\u00f1a nu g\u00fciya: un taotao jafatinas un dangculon sena, ya mangonbida megae:\n14:17 Ya jatago y tentago\u00f1a gui oran sena, na ualog ni ayo sija y manmaconbida: Nije; sa esta todo listo.\n14:18 Ya jatutujon cada uno umescusa g\u00fce. Y fenenana ileg\u00f1a: Mamajanyo un pidason tano, ya nesesitayo jujanao ya julie; jugagao jao na unescusayo.\n14:19 Ya y otro ileg\u00f1a: Mamajanyo sinco pares na nobiyo para mancareta, ya bae jujanao ya juchague: jugagao jao na unescusayo.\n14:20 Ya y otro ileg\u00f1a: Umasaguayo, ya enaomina ti si\u00f1ayo mato.\n14:21 Ya tumalo guato y tentago, ya janatungo y senot\u00f1a nu este sija. Ayo nae y magas y guima ninagoslalalo, ya ileg\u00f1a ni y tentago\u00f1a: Janao, lasajyao falag y caye sija yan y chalan gui siudad, ya uncone mague y mamoble, yan y mancojo, yan y manbachet, yan y manmanco.\n14:22 Ya ileg\u00f1a y tentago: Se\u00f1ot, esta mafatinas y tinagomo, ya trabia guaguajaja lugat.\n14:23 Ya y se\u00f1ot ileg\u00f1a ni y tentago\u00f1a: Janao falag y dangculo na chalan yan y lugat ni y guaja ngangao, ya unafuetsas sija, ya ufanjalom para ubula y guimajo.\n14:24 Sa jusangane jamyo, na ni uno g\u00fcije sija gui guinin manmaconbida, uchague y senajo.\n14:25 \u00b6 Ya ma\u00f1isija mangaegue yan un dangculon manadan taotao; ya jabira g\u00fce, ya ileg\u00f1a nu sija:\n14:26 Achogja un taotao mato guiya guajo, ya ti jachatlie si tata\u00f1a, yan si nana\u00f1a, yan y asagua\u00f1a, yan y famaguon\u00f1a, yan ma\u00f1elu\u00f1a lalaje, yan y ma\u00f1elu\u00f1a famalaoan, yan y lin\u00e2l\u00e2\u00f1a locue, ti si\u00f1ag\u00fce disipulujo.\n14:27 Ya jayeja y ti cumatga y quiluus\u00f1a, ya dumalalag yo; ti si\u00f1ag\u00fce disipulojo.\n14:28 Sa jaye guiya jamyo, ujaso manjatsa un tore, ya ti ufatachong finena ya utufong y para gasto\u00f1a cao si\u00f1a uninafunjayan?\n14:29 Sa noseaja yanguin esta japolo y simiento, ya ti si\u00f1a janafunjayan; todo y lumie jatutujon manmanbotlea nu g\u00fciya,\n14:30 Yleg\u00f1ija: Este na taotao jatutujon manjatsa, ya ti si\u00f1a janafunjayan.\n14:31 Pat jaye y ray, anae jajanao para uguera contra y otro ray, ti ufatachong finena, ya ufa\u00f1angane cao si\u00f1a g\u00fce yan y dies mit, utagam y mamamaela yan veinte mit contra g\u00fciya?\n14:32 Patseno, mientras chachagoja y otro trabia, janajanao un compa\u00f1ia, ya ufangagao pas.\n14:33 Taeg\u00fcenaoja locue; masquesea jaye guiya jamyo y ti rumechasa todo y g\u00fcinaja\u00f1a; ti si\u00f1ag\u00fce disipulujo.\n14:34 Y asiga mauleg; lao yanguin malingo y asiga maasen\u00f1a, jaftaemano manasne?\n14:35 Ti mauleg para y tano, ni para fany\u00fatian basula; masenyuteja ni y taotao. Jaye y gaetalanga para ufanjungog, g\u00fciya uecungog.\n15:1 YA manjijijot guato guiya g\u00fciya, todo y publicano, yan y manisao, para umaecungog g\u00fce.\n15:2 Ya mangogonggong y Fariseo sija, yan y escriba ileleg\u00f1ija: Este na taotao, jaresisibeja y manisao, ya ma\u00f1isijaja ma\u00f1ocho.\n15:3 Ya jasangane sija ni este na acomparasion, ileg\u00f1a:\n15:4 Jaye na taotao guiya jamyo, y yanguin guaja ga\u00f1a siento na quinilo, ya ufinalingaeguan ni y uno, ada ti ujanao ya udingo y nobentainuebe gui desierto asta qui jasoda ayo y malingo?\n15:5 Ya anae jasoda, jaapagaye ya jamagogofg\u00fce.\n15:6 Ya anae mato gui guima\u00f1a, jaagange todo y manamigu\u00f1a, yan y tignang\u00f1a, ya ileleg\u00f1a nu sija: Nije tafanmagof, sa jagasja jusoda y gajo quinilo ni y guinin malingo.\n15:7 Jusangane jamyo, na taeg\u00fcenaoja locue uguaja gui langet, minagof yanguin un taotao na isao ma\u00f1otsot, mas qui y nobentainuebe manunas na taotao ni y ti janesesita manma\u00f1otsot.\n15:8 \u00b6 Pat, jaye na palaoan, y yanguin uguaja iyo\u00f1a dies na pidason salape, ya ufinalingaeguan ni y uno; ada ti usonggue y candet ya ubale y jalom guma, ya uguesaligao asta qui usoda?\n15:9 Ya yanguin esta jasoda, jaagange y manamiga\u00f1a, yan y tiguang\u00f1a ya manda\u00f1a, ya ileleg\u00f1a: Nije tafanmagof, sa jagasja jusoda y pidason salape ni y guinin malingo.\n15:10 Taeg\u00fcenaoja locue jusangane jamyo, na uguaja minagof gui menan y angjet Yuus, pot y un taotao na isao ni y ma\u00f1otsot.\n15:11 \u00b6 Ya ileg\u00f1a: Un taotao guaja dos laji\u00f1a:\n15:12 Ya y mas patgon, ileg\u00f1a as tata\u00f1a: Tata, naeyo ni y patteco gui g\u00fcinaja ni y para guajo. Ya jafacae para sija ni y g\u00fcinaja\u00f1a.\n15:13 Ya ti megae na jaane malofan, anae y mas patgon janafanda\u00f1a todo, ya mapos asta y chago na tano; ya jagasta todo y g\u00fcinaja\u00f1a g\u00fcije gui guipot yan bisio di gula.\n15:14 Ya anae jagasta todo esta: mato un dangculon \u00f1inalang g\u00fcije na tano, ya jatutujon taena.\n15:15 Ya jumanao, ya jatituye gui un taotao g\u00fcije na tano: ya tinago para y fangualuan\u00f1a, para unachocho babue sija.\n15:16 Ya jatatanga na unabula tiyan\u00f1a ni y lasas frijoles ni y jacacano y babue sija; ya taya ni un taotao numanaeg\u00fce.\n15:17 Ya anae numalo y jinaso\u00f1a, ileg\u00f1a: Cuanto na jotnaleron tata, mangaena pan, ya manma\u00f1o\u00f1obblaja, ya guajo g\u00fcine jumatae \u00f1alang!\n15:18 Bae jucajulo ya jujanao para as tata, ya jualog nu g\u00fciya: Tata, umisaoyo contra y langet, yan contra jago,\n15:19 Ti dignoyo mas na jumafanaan lajimo: naparejoyo yan y jotnalerumo sija.\n15:20 Ya cajulo, ya mapos para as tata\u00f1a. Lao chagoja trabia, si tata\u00f1a linie g\u00fce, ya ninamaase, ya finalag\u00fce, ya tinegtog, ya chinicog\u00fce.\n15:21 Ya y patgon ileg\u00f1a as tata\u00f1a: Tata, umisaoyo contra y langet, yan contra jago; ti dignoyo mas na jumafanaan lajimo.\n15:22 Lao y tata ileg\u00f1a ni y tentago\u00f1a sija: Chule y mas mauleg na magago ya umanaminagago; ya umapolo y aniyu gui calolot\u00f1a, yan y sapatos gui adeng\u00f1a:\n15:23 Ya umacone mague un tatnero ni y mas yomog, ya umapuno ya tafa\u00f1ocho ya tafanmagof;\n15:24 Sa este y lajijo guinin matae, ya l\u00e2l\u00e2 talo; guinin malingo, ya masoda. Ya jatutujon sija manmagof.\n15:25 Ya y laji\u00f1a ni y mas amco estaba gui fangualuan; ya anae guaguato ya esta jijot gui guima, jajungog y dandan yan y manbabaila:\n15:26 Ya jaagang uno gui tentago sija, ya jafaesen jafa ayo sija.\n15:27 Ya ileg\u00f1a nu g\u00fciya: Y chelumo mato; ya si tatamo japuno y tatnero ni y mas yomog, sa jaresibe gae seguro yan sano.\n15:28 Ya ninagoslalalo, ya ti malago jumalom: ayonae jumuyong si tata\u00f1a, ya siniplica na ujalom.\n15:29 Ya manope ileg\u00f1a as tata\u00f1a: Estag\u00fce, megae na a\u00f1o nae jusesetbe jao, ya taya nae ti jaosgue jafa na tinagomo: lao taya nae unnaeyo un patgon chiba para infanmagof yan y manamigujo sija:\n15:30 Lao anae mato este na lajimo ni y jalachae todo y g\u00fcinajamo gui manputa sija; unpunueja ni y mas yomog na tatnero.\n15:31 Ya ileg\u00f1a nu g\u00fciya: Lajijo, siempre jumijitaja; ya todo y g\u00fcinajajo iyomo.\n15:32 Lao mauleg para utafanmagof ya utafanalegria: sa este y chelumo guinin matae, ya l\u00e2l\u00e2 talo; yan guinin malingo, ya esta masoda.\n16:1 YA ileg\u00f1a locue ni y disipulu\u00f1a sija: Guaja un taotao na rico, ya guaja mayetdomu\u00f1a; ya este mafaaela guiya g\u00fciya na jagasta y g\u00fcinaja\u00f1a.\n16:2 Ya janamaagange, ya ileg\u00f1a nu g\u00fciya: Jafa este y jujujungog guiya jago? Fannae cuenta pot y mayetdomumo, sa ti si\u00f1a jao mumayetdomo mas.\n16:3 Ayonae y mayetdomo, ileg\u00f1a gui sumanjalom\u00f1a: Jafa jufatinas? sa y se\u00f1otjo unajanaoyo gui mayetdomujo: Taya minetgotto para ufanguadog; mamajlaojo umogagao.\n16:4 Jutungo esta jafa jufatinas, para yanguin manajanaoyo gui mayetdomujo, jumaresibeyo gui guima\u00f1ija.\n16:5 Ya jaagang cada uno gui manmadidibe ni y se\u00f1ot\u00f1a, ya ileg\u00f1a ni y finenana: Cuanto undidibe y se\u00f1otjo?\n16:6 Ya ileg\u00f1a: Siento na medidan la\u00f1a. Ayonae ileg\u00f1a nu g\u00fciya: Chule y cuentamo ya unfatachong guse ya untugue sincuenta.\n16:7 Ya ileg\u00f1a talo ni y otro: Ya jago, cuanto dibimo? Ileg\u00f1a: Siento na medidan trigo. Yleg\u00f1a talo: Chule y cuentamo ya untugue ochenta.\n16:8 Ya jaalaba y se\u00f1ot y taelaye na mayetdomo; sa pot y jagostungo chumog\u00fce: sa y famaguon este na tano, manmejnalom\u00f1a y generasion\u00f1ija, qui y famaguon y manana.\n16:9 Ya jusangane jamyo: Fanmamamauleg amigonmiyo pot y g\u00fcinajan y timanunas; sa yanguin manfatta jamyo, infanrinesibe gui taejinecog na sagan\u00f1ija.\n16:10 Ya y tunas gui didide, tunasja locue gui megae; ya y ti tunas gui didide, ti tunasja locue gui megae.\n16:11 Yanguin ti guinin manunas jamyo gui ti magajet na g\u00fcinaja, jaye infaninangoco gui magajet na g\u00fcinaja?\n16:12 Ya yanguin ti guinin manunas fiet jamyo gui iyon y otro taotao, jaye infanninae ni y iyonmiyo?\n16:13 Ni un tentago si\u00f1a jasetbe dos na se\u00f1ot: sa uchatlie y uno, ya uguaeya y otro; pat atituye gui uno, ya udespresia y otro. Ti si\u00f1a jamyo insetbe si Yuus, yan y g\u00fcinaja.\n16:14 \u00b6 Ya y Fariseo sija locue, ni y mangasalape, majungog este sija; ya mabotlea g\u00fce.\n16:15 Ya ileg\u00f1a si Jesus nu sija: Jamyo yuje sija y innafanunas maesa jamyo gui menan y taotao sija; lao si Yuus jatungoja y corasonmiyo: sa ayo y guesmaguaeya gui entalo y taotao sija y chinatlie para y menan Yuus.\n16:16 Y lay, yan y profeta sija, mangaegue asta as Juan: ya desde ayo na tiempo y raenon Yuus mapredica\u00f1aejon, ya todoja jumalom nu y finijon.\n16:17 Lao guse\u00f1a malofan y langet yan y tano, qui na un pidasito gui lay ufatta.\n16:18 Todo ayo y dumingo y asagua\u00f1a, ya umasagua yan otro, jafatinas y abale; ya y umasagua ayo na palaoan ni y diningo ni y asagua\u00f1alaje, jafatinas y abale.\n16:19 \u00b6 Guaja un taotao na rico, na minagagagoja putpura, yan y guesmauleg na magago apaca, ya cada jaane gumupupot.\n16:20 Ya guaja locue un pobble na um\u00f3gagao limosna, y naan\u00f1a si Lasaro, na bula chetnot, ni y estaba mapolo gui pettan y rico.\n16:21 Ya malagog\u00fce na umanachocho ni ayo y andesmoronan ni y mamopodong gui lamasan y rico; ya asta y galago manmato ya manmanj\u00f3joflag y chetnot\u00f1a.\n16:22 Ya despues, matae y pebble ni y um\u00f3gagao limosna, ya macone ni y angjet sija asta y pechon Abraham; matae locue y rico na taotao, ya majafot;\n16:23 Ya y ya sasalaguan, jajatsa y atadog\u00f1a, anae estaba gui sinapet, ya jalie si Abraham na chago, yan si Lasaro gui pecho\u00f1a.\n16:24 Ya umagang ileg\u00f1a: Tata Abraham, gaease nu guajo, ya tago si Lasaro, para usupog y puntan calolot\u00f1a gui janom ya unafresco y jilajo; sa estag\u00fce na masasapetyo g\u00fcine na ma\u00f1ila.\n16:25 Lao si Abraham ileg\u00f1a: Laje, jaso na anae lal\u00e2l\u00e2 jao unresibe todo y manmauleg na g\u00fcinajamo; taeg\u00fcenaoja locue si Lasaro jaresibe y manaelaye na g\u00fcinaja: lao pago, g\u00fciya mamagof g\u00fcine, ya jago masasapet.\n16:26 Ya gui todo estesija; esta mapolo fitme gui entalota un dangculon joyo na chojfe, para todo y manmalago manmalofan g\u00fcine asta iya jamyo ti ufansi\u00f1a; ni ufanmalofan y manmalago g\u00fcenao manmalag iya jamyo.\n16:27 Ayonae ileg\u00f1a: Pues jutayuyut jao tata, tago g\u00fce para y guima tata;\n16:28 Sa guajayo sinco ma\u00f1elujo lalaje; para usangane sija testimonio; ni noseaja ufanmamaela locue g\u00fcine gui sinapet na lugat.\n16:29 Lao si Abraham ileg\u00f1a: Gaegueja si Moises yan y profeta sija, polo ya ujaecungogja.\n16:30 Ya ileg\u00f1a: Aje, tata Abraham; sa yanguin uno ni y guinin manmatae jumanao para iya sija, ufanma\u00f1otsot.\n16:31 Ya ileg\u00f1a nu g\u00fciya: Yanguin ti maecungog si Moises, yan y profeta sija; ti ufanmaosgon achogja uguaja cajulo guinin y manmatae.\n17:1 YA ileg\u00f1a ni y disipulu\u00f1a sija: Ti si\u00f1a ti ufato y escandalo; lao ay, ay ayo y munafato!\n17:2 Mauleg\u00f1a na umagode gui agaga\u00f1a un alutong, ya umayute gui tase, antes qui uninaquepodong uno g\u00fcine gui mandiquique sija.\n17:3 Adaje jamyo: Yanguin umisao y chelumo contra jago, reprende: y yanguin ma\u00f1otsot, asie.\n17:4 Yanguin siete biaje gui un jaane umisao contra jago, ya siete biaje mafato guiya jago, ya ileleg\u00f1a: Ma\u00f1otsotyo, un asie.\n17:5 \u00b6 Ya y apostoles, ileg\u00f1ija nu y Se\u00f1ot: Aumenta, y jinengguenmame.\n17:6 Ya y Se\u00f1ot ileg\u00f1a: Yanguin mangaejinenggue jamyo taeg\u00fcije y granon mostasa, ya mojon ilegmiyo nu este na sic\u00f3moro trongcon jayo: Chapag jao g\u00fcenao, ya unplanta jao gui tase; ya mojon infaninesgueja.\n17:7 Lao jaye guiya jamyo y guaja tentago\u00f1a, na manalalado, pat mamamasto quinilo, y yanguin mato guinin y fangualuan, ualog nu g\u00fciya; maela enseguidas y fatachong, ya unchocho?\n17:8 Ya ti ualog nu g\u00fciya finena: Nalisto y senajo para juchocho, ya undudog jao, ya unsetbeyo asta qui munjayanyo chumocho, yan gumimen: ya despues nae unchocho, ya unguimen?\n17:9 Numae grasias ayo na tentago, sa jafatinas y matago\u00f1a? Jinasoco na aje.\n17:10 Taeg\u00fcineja locue jamyo, yanguin esta incheg\u00fce todo ayo sija y jutago jamyo, ualog: Maninutil jam na tentago; sa ayoja y para y chechomame incheg\u00fce.\n17:11 \u00b6 Ya susede anae jumanao para Jerusalem, ya malofan gui inanaco Samaria, yan Galilea.\n17:12 Ya anae jumalom gui un songsong, manasoda g\u00fcije yan dies na taotao na manategtog; ya manojgue desde y chago.\n17:13 Ya jajatsa y inagang\u00f1ija, ya ileg\u00f1ija: Jesus, Maestro, gaease nu jame.\n17:14 Ya anae jalie, ileg\u00f1a nu sija: Janao ya infanue y mamale nu jamyo. Ya susede anae manjajanao, manjuyong mangasgas.\n17:15 Ya y uno guiya sija, anae jalie na jomlo g\u00fce, jabira g\u00fce tate, ya janaagagang mannae si Yuus minalag.\n17:16 Ya jatomba g\u00fce papa gui fion adeng si Jesus, ya janae grasias: este na taotao, Samaritano.\n17:17 Ya manope si Jesus, ileg\u00f1a: Ada ti dies y mangasgas? ya manmangue y nuebe?\n17:18 Taya masoda tumalo mague para unae si Yuus grasias, na esteja y taotao juyong.\n17:19 Ya ileg\u00f1a bu g\u00fciya: Cajulo ya unjanao; y jinengguemo munajomlo jao.\n17:20 \u00b6 Ya anae mafaesen ni y Fariseo sija, ngaean nae ufato y raenon Yuus, jaope ileg\u00f1a: Y raenon Yuus, ti matungo finato\u00f1a.\n17:21 Ni ujaalog: Estag\u00fce! pat ayog\u00fce! sa y raenon Yuus, gaegueja gui sumanjalommiyo.\n17:22 \u00b6 Ya ileg\u00f1a ni y disipulu\u00f1a sija: Ufato y jaane sija, na infanmalago na inlie uno gui jaanin y Lajin taotao, ya ti inlie.\n17:23 Ya ujaalog nu jamyo: Estag\u00fce, pat ayog\u00fce; chamiyo tumatitiye, ni indalalaque sija.\n17:24 Sa taeg\u00fcijeja y lamlam, yan ma\u00f1ila gui un lugat gui papa y langet, ya inina y otro banda gui papa y langet; taeg\u00fcineja locue y Lajin taotao, gui jaani\u00f1a.\n17:25 Lao nesesita na ufamadese finena megae, ya umarechasa ni este na generasion.\n17:26 Sa jaftaemanoja y jaanin Noe, taeg\u00fcijeja locue y jaanin y Lajin taotao.\n17:27 Ma\u00f1ocho, yan manguimen, yan manasagua, yan manafanasagua, asta ayo na jaane anae jumalom si Noe gui atca, ya mato y dilubio ya manyinilang sija todo.\n17:28 Taeg\u00fcineja locue jasusede gui jaanin Lot: ma\u00f1ocho, manguimen, manmamajan, manmanbende, manmananom, yan manmanjatsa guma;\n17:29 Lao ayoja na jaane anae jumanao si Lot guiya Sodoma, janauchan guafe, yan asufre guinin y langet, ya manyinilang todo sija.\n17:30 Taeg\u00fcijeja uguaja g\u00fcije na jaane yanguin ufamanue y Lajin taotao.\n17:31 Ayo na jaane, ayo y gaegue gui jilo guma ya y g\u00fcinaja\u00f1a gaegue gui jalom guma, cha\u00f1a tumutunog ya uchule; parejoja locue yan y gaegue gui fangualuan, cha\u00f1a tumatalo tate.\n17:32 Jaso y asaguan Lot.\n17:33 Masquesea jaye y umaliligao na usatba y lin\u00e2l\u00e2\u00f1a, ufinalingaeguan; ya masquesea jaye y finalingaeguan y li\u00e2n\u00e2l\u00f1a umasatba.\n17:34 Jusangane jamyo, na ayo na puenge uguaja dos na taotao gui un catre; y uno umacone ya y otro umapolo.\n17:35 Dos na palaoan dumada\u00f1a manguleg; y uno umacone, ya y otro umapolo.\n17:36 Dos na taotao ugaegue gui fangualuan; y uno umacone, ya y otro umapolo.\n17:37 Ya manmanope ileg\u00f1ija nu g\u00fciya: Manggue Se\u00f1ot? Ya jaope ileg\u00f1a: Manoja nae gaegue y tataotao, ayoja nae manda\u00f1a y pojaro aguila sija.\n18:1 YA jasangane un acomparasion, na y taotao sija janesesita ufanmanayuyut, ya cha\u00f1ija fanataeanima.\n18:2 Ileleg\u00f1a: Guaja gui un siuda un jues, na ti maa\u00f1ao as Yuus, ni urespeta ni jaye na taotao:\n18:3 Ya guaja locue g\u00fcije na siuda un biuda ni y mato guiya g\u00fciya ya ileleg\u00f1a: Areglajam yan y enemigujo.\n18:4 Ya ti malago finena; lao despues ileg\u00f1a gui sumanjalom\u00f1a: Achogja ti maa\u00f1aoyo as Yuus, ni jufanrespeta taotao;\n18:5 Lao pot y jarorobayo este na palaoan, bae juaregla sija, sa noseaja pot y sisigueja mague, uestotbayo.\n18:6 Ya y Se\u00f1ot ileg\u00f1a: Ecungog jafa y ti tunas na jues ileleg\u00f1a.\n18:7 Ada ti unalibre si Yuus y inayig\u00f1a, ni y maaagang g\u00fce jaane, yan puenge, ya apmam na jasungon pot sija?\n18:8 Jusangane jamyo, na enseguidas unafanlibre. Lao anae ufato y Lajin taotao, ufa\u00f1oda jinenggue gui jilo tano?\n18:9 \u00b6 Ya jasangan este na acomparasion ni ayo sija y umangocon maesa sija na manunas, ya jadespresia y pumalo:\n18:10 Dos na taotao jumanao julo gui templo para ujafanaetae: Y un Fariseo, ya y otro publicano.\n18:11 Y Fariseo tumojgue, ya taeg\u00fcine tinaetae\u00f1a gui sumanjalom\u00f1a: Junae jao grasias Yuus, sa ti parejoyo yan y pumalo na taotao, ni y man\u00e1placha, yan man\u00e1bale, ni y este publicano.\n18:12 Umayuyunatyo dos biaje gui semana; mannanaeyo diesmos ni y todo g\u00fcinajajo.\n18:13 Lao y publicano gaegue na tumotojgue gui chago; ya ti jaguesjatsa y atadog\u00f1a julo gui langet; lao jaseseco y pecho\u00f1a, ya ileleg\u00f1a: Yuus, gaease nu guajo, sa taotao isaoyo.\n18:14 Jusangane jamyo, na, este na taotao jumanao papa y guima\u00f1a, ya maasie y isao\u00f1a, mas mauleg qui y otro; sa cada uno y minadangculo g\u00fce, uninaumitde; ya y munamitde g\u00fce, umanadangculo.\n18:15 \u00b6 Ya maconie guato guiya g\u00fciya ni y diquique na famaguon\u00f1ija, para upacha; ya anae manlinie ni y disipulo sija, manmalalatde.\n18:16 Lao si Jesus jaagang sija, ya ileg\u00f1a: Polo y diquique na famaguon ya ufanmamaela guiya guajo, ya chamiyo chumochoma; sa iyon este sija y raenon Yuus.\n18:17 Magajet jusangane jamyo, na y ti rumesibe y raenon Yuus taeg\u00fcije y diquique na patgon, ti ujalom g\u00fcije.\n18:18 \u00b6 Ya un taotao na magas, finaesen g\u00fce ileleg\u00f1a: Mauleg na Maestro, jafa jufatinas para juereda y taejinecog na lin\u00e2l\u00e2?\n18:19 Ya si Jesus ileg\u00f1a nu g\u00fciya: Jafa na ilegmo nu guajo mauleg? taya mauleg na unoja, si Yuus.\n18:20 Utungo y tinago sija: Chamo um\u00e1bale, Chamo famumuno, Chamo fa\u00f1a\u00f1aque, Chamo sumasangan y ti magajet na sinangan, Onra si tatamo, yan nanamo.\n18:21 Ya ileg\u00f1a: Todo este sija juadaje desde y pinatgonjo.\n18:22 Anae jajungog este sija si Jesus, ileg\u00f1a nu g\u00fciya: Guaja uno fattamo trabia: bende todo y g\u00fcinajamo, ya unfacae y mamobble, ya uguaja g\u00fcinajamo gui langet, ya maela dalalagyo.\n18:23 Lao anae jajungog estesija, nin\u00e1gostriste; sa gosrico g\u00fce.\n18:24 Ya anae linie as Jesus, ileg\u00f1a: Namanminapot ayo sija y mangaeg\u00fcinaja manjalom gui raenon Yuus!\n18:25 Sa guse\u00f1a malofan un cameyo gui matan y jaguja, qui ujalom un rico gui raenon Yuus.\n18:26 Ya ayo y jumungog, ileg\u00f1ija: Jaye nae si\u00f1a satbo?\n18:27 Ya ileg\u00f1a: Y g\u00fcinaja ni y ti mansi\u00f1a para y taotao sija; mansi\u00f1a para as Yuus.\n18:28 Ayonae ileg\u00f1a si Pedro: Estag\u00fceja na indingo y iyonmame, ya indalalag jao.\n18:29 Ya ileg\u00f1a nu sija: Magajet jusangane jamyo, na taya ni un taotao ni y dumingo guma, pat asagua, pat ma\u00f1elu, pat ma\u00f1aena, pat famaguon, pot y raenon Yuus,\n18:30 Ya ti uresibe mas megae pago na tiempo, lao y mamamaela na tiempo, taejinecog na lin\u00e2l\u00e2.\n18:31 \u00b6 Ya jacone y dose, ya ileg\u00f1a nu sija: Estag\u00fce, na manjajanaojit julo Jerusalem, ya todosija y tinigue y profeta sija pot y Lajin taotao, ufanmacumple.\n18:32 Sa nesesita na umaentrega gui taotao juyong, ya umabotlea, yan umafaesegnane, yan umatolae:\n18:33 Ya umasaulag, ya umapuno; ya y mina tres na jaane, ucajulo talo.\n18:34 Lao sija ti jatungo ni uno gui este sija: ya este na sinangan manaatog guiya sija, ya ni ti jatungo jafa sija y masangan.\n18:35 \u00b6 Ya susede anae esta jijijot Jerico, estaba un taotao bachet gui oriyan chalan na matatachong, ya um\u00f3gagao:\n18:36 Ya anae jajungog y linajyan taotao na manmalolofan, mamaesen jafa ayo.\n18:37 Ya masangane g\u00fce, na si Jesus Nasareno malolofan.\n18:38 Ya umagang ileleg\u00f1a: Jesus, jago ni y Lajin David, gaease nu guajo.\n18:39 Ya machoma ni y manmofona para ufamatquilo: lao mas umagang megae: Jago ni y Lajin David, gaease nu guajo.\n18:40 Ya tumojgue si Jesus, ya manago na umaconie guato guiya g\u00fciya: ya anae esta jijijot, finaesen:\n18:41 Jafa malagomo jufatinas guiya jago? Ya g\u00fciya ileg\u00f1a: Se\u00f1ot, para jufanlie.\n18:42 Ya ileg\u00f1a si Jesus nu g\u00fciya: Fanlie: y jinengguemo unsinatba.\n18:43 Ya enseguidas jaresibe y linii\u00f1a, ya jadalalag g\u00fce, yan janamalag si Yuus; yan todo y taotao sija, anae malie, maalaba si Yuus.\n19:1 YA jumalom si Jesus, ya malofan inanaco Jerico.\n19:2 Ya, estag\u00fce, g\u00fcije un taotao na y naan\u00f1a si Saqueo, magas y publicano, na rico g\u00fce.\n19:3 Ya jaquequeliija jaye si Jesus; lao ti si\u00f1a, pot y linajyan taotao, yan pot y etigo g\u00fce.\n19:4 Ya malago mona, ya umeculo gui trongcon sicomoro para ulie: sa nesesita na ufapos g\u00fcije.\n19:5 Ya anae mato si Jesus g\u00fcije na lugat, manatan julo, ya ileg\u00f1a nu g\u00fciya: Saqueo, tunog lasajyao, sa pago na, jaane nesesita na jusaga gui guimamo.\n19:6 Ya sumajyao papa, ya jaresibe g\u00fce yan y minagof\u00f1a.\n19:7 Ya anae malie este, todos mangonggong, ileg\u00f1ija: Mapos, para usaga gui isao na taotao.\n19:8 Ya si Saqueo tumojgue ya ileg\u00f1a ni y Se\u00f1ot: Estag\u00fce, Se\u00f1ot, y lamita gui g\u00fcinajajo junae y mamobble sija; ya yanguin guaja chinelejo pot finababa bae junae cuatro talo.\n19:9 Ya ileg\u00f1a si Jesus nu g\u00fciya: Pago na jaane mato y satbasion g\u00fcine na guma; sa g\u00fciya locue Lajin Abraham.\n19:10 Sa y Lajin taotao mato para ualigao, yan usatba y manmalingo.\n19:11 \u00b6 Ya mientras majujungog este sija, jaaumenta ya jasangan un acomparasion, sa pot y esta jijijot Jerusalem, yan pot y jinason\u00f1ija na enseguidas ufato y raenon Yuus.\n19:12 Pot este na ileg\u00f1a: Un taotao na magas, jumanao para y chago na tano para uresibe y raeno, yan para utaloja guato.\n19:13 Ya jaagang y dies na tentago\u00f1a, ya jaentrega dies na minan moneda, ya ileg\u00f1a nu sija: Nafangagana asta qui ufato.\n19:14 Lao y taotao\u00f1a gui g\u00fcije na tano machatlie g\u00fce, ya manmanago un compa\u00f1ia guato guiya g\u00fciya, ileg\u00f1ija: Mungajam na ufangobietna este na taotao gui jilo mame.\n19:15 Ya susede anae esta jaresibe y raeno, tumalo guato, ya manago na ufanmaagange y tentago sija ni y janae ni y salape, para utungo cuanto cada uno g\u00fcinana\u00f1a.\n19:16 Ya anae mato y finenana, ileg\u00f1a: Se\u00f1ot, y minamo mangana dies na mina mas.\n19:17 Ya ileg\u00f1a nu g\u00fciya: Mauleg na finatinasmo, mauleg jao na tentago. Pot y tunas jao gui didide, guaja ninasi\u00f1amo gui jilo y dies na siuda.\n19:18 Ya anae mato y mina dos, ileg\u00f1a: Se\u00f1ot, y minamo mangana sinco na mina.\n19:19 Ya locue ileg\u00f1a nu g\u00fciya: Jago gui jilo sinco na siuda.\n19:20 Ya mato y otro ileg\u00f1a: Se\u00f1ot, estag\u00fce y minamo na juadaje ya jupolo gui jalom y setbiyetas:\n19:21 Sa maa\u00f1aoyo nu jago, sa recto jao na taotao: unchuchule y ti unpolo, ya uncococo y ti untanom.\n19:22 Ya ileg\u00f1a nu g\u00fciya: Taelaye jao na tentago, y guinin y pachotmo nae jujusga jao. Untungoja na recto yo na taotao, juchuchuleja y ti jupolo, ya jucococoja y ti jutanme:\n19:23 Jafa na ti unpolo y salapejo gui banco; sa para yanguin matoyo jugagao yan y ganansia?\n19:24 Ya ileg\u00f1a nu ayo sija y manotojgue gui oriya: Nasuja guiya g\u00fciya y minan moneda ya umanae ayo y guaja dies na mina.\n19:25 Ya ileg\u00f1ija nu g\u00fciya: Se\u00f1ot, guajaja g\u00fce dies na mina.\n19:26 Sa jusangane jamyo, na masqueseaja jaye y guaja iyo\u00f1a, umanae; lao y taya iyo\u00f1a, achogja y guaja\u00f1a umanasuja guiya guiya.\n19:27 Lao aya sija y enemigujo, ni y ti manmalago na jufangobietna gui jilo\u00f1ija, cone mague, ya ufanmadeg\u00fceya gui menajo.\n19:28 \u00b6 Ya anae munjayan jasangan este, malag y sumanmena, ya cajulo Jerusalem.\n19:29 \u00b6 Ya susede anae esta jijot Betfage, yan Betania, gui egso ni y mafanaan ogso Olibo, jatago dos gui disipulu\u00f1a,\n19:30 Ileg\u00f1a: Janao fanmalag esta mona y sengsong; ya an manjalom jamyo g\u00fcije, inseda un patgon bulico na magogode, na taya ni un taotao tumachojnge: pula ya inquene mague.\n19:31 Ya yanguin jaye na taotao fumaesen jamyo: Jafa mi\u00f1a inpila? Sangane taeg\u00fcine: Sa janesesita y Se\u00f1ot.\n19:32 Ya manjanao ayo sija y manmatago, ya jasoda jaftaemano y mansinangane sija.\n19:33 Ya anae mapupula y patgon bulico, ileg\u00f1a y gaega nu sija: Jafa muna inp\u00edpila y patgon bulico.\n19:34 Ya ileg\u00f1ija: Janesesita y Se\u00f1ot.\n19:35 Ya macone guato gui as Jesus: ya japolo y magago\u00f1ija gui jilo y patgon bulico, ya manmaudae si Jesus,\n19:36 Ya anae jumajanao, jababa y magago\u00f1ija gui chalan.\n19:37 Ya anae esta jijijot, esta tumutunog gui egso Olibo, todo y manadan disipulo matutujon manmagof ya maalaba si Yuus, yan dangculo inagang, pot y linii\u00f1ija todo ni y finatinas namanman.\n19:38 Yleg\u00f1ija: Dichoso y Ray ni y mato pot y naan y Se\u00f1ot: pas gui langet, yan minalag guiya jululo.\n19:39 Ya palo gui Fariseo sija, manestaba gui entalo y linajyan taotao ileg\u00f1ija nu g\u00fciya: Maestro, reprende y disipulumo sija.\n19:40 Ya manope ileg\u00f1a: Jusangane jamyo, na yanguin manmamatquilo este sija, y acho enseguidas ufanagang.\n19:41 \u00b6 Ya anae esta jijot, ya jalile y siuda, ninacasao pot g\u00fciya.\n19:42 Yleg\u00f1a: Yanguin untungo, pago gui jaanimo, jagoja, y g\u00fcinaja ni y iyon y pas! lao pago esta maatog\u00fce y atadogmo.\n19:43 Sa ufanmato jaane guiya jago, na y enemigumo sija utanmancolat oda gui oriyamo, ya unmaoriyaye, ya unmaadaje cada banda,\n19:44 Ya umayute papa gui jilo oda yan y famaguonmo ni y mangaegue gui sumanjalommo; ya ti unmapoluye un acho gui jilo y otro; sa ti untungo y tiempon y mabisitamo.\n19:45 \u00b6 Ya jumalom gui templo, ya jatutujon yumute juyong todo ayo sija y manmanbebende g\u00fcije;\n19:46 Ya ileg\u00f1a nu sija: Esta matugue: Y gumajo, uguma manaetae; lao jamyo infaliyang saque.\n19:47 \u00b6 Ya mamanag\u00fce gui templo cada jaane. Lao y magas mamale sija, yan y escriba, yan y manmagas y taotao sija, maaliligao para umaqueyulang.\n19:48 Ya ti jajulat sumoda jafa ujachog\u00fce: sa todo y taotao gumeguesecungog g\u00fce.\n20:1 YA susede uno gui g\u00fcije sija na jaane, anae jafananag\u00fce y taotao sija gui templo, ya japredidica y ibangelio; manmato guiya g\u00fciya y magas mamale, yan y escriba, yan y manamco sija;\n20:2 Ya macuentuse, ileg\u00f1ija nu g\u00fciya: Sangane jam, jafa na ninasi\u00f1a na unfatitinas este sija na g\u00fcinaja? Pat jaye numae jao ni este na ninasi\u00f1a?\n20:3 Ya manope si Jesus, ileg\u00f1a nu sija: Jufaesen locue jamyo un finaesen, ya sanganeyo;\n20:4 Y tagpangen Juan, guinin y langet, pat guinin y taotao sija?\n20:5 Ya sija, jajaso gui sumanjalom\u00f1ija, ileg\u00f1ija: Yanguin ilegmame: Guinin y langet; ualog, jafa nae na ti injenggue g\u00fce?\n20:6 Lao yanguin ilegmame: Guinin y taotao sija; infanmamagas nu y acho ni y taotao, sa pinelo\u00f1ija na profeta si Juan.\n20:7 Ya manmanope na ti jatungo guine mano.\n20:8 Ayonae ileg\u00f1a si Jesus nu sija: Ni guajo locue ti jusangane jamyo, jafa na ninasi\u00f1a na jufatitinas este sija na g\u00fcinaja.\n20:9 \u00b6 Ya jatutujon sumangane sija ni este na acomparasion; Un taotao, manplanta un fangualuan ubas, ya japoluye ni manf\u00e1fachocho, ya jumanao para y chago na tano, apmam na tiempo.\n20:10 Ya y tiempon mangoco, jatago un tentago para y manmach\u00f3chocho, para umanae ni y tinegcha y gualo; lao masaulag ni y manmach\u00f3chocho, ya manajanao taesinajguan.\n20:11 Ya jatago talo y otro tentago: ya masaulag locue talo, ya manamamajlao, ya manajanao taesinajguan.\n20:12 Ya jatalo tumago y mina tres na tentago: ya manaerida, ya mayute juyong.\n20:13 Ayonae ileg\u00f1a y se\u00f1ot y fangualuan: Jafa jufatinas? Bae jutago y guefyajo na lajijo, sa buente ufangaerespeto nu g\u00fciya.\n20:14 Lao anae malie ni y manmach\u00f3chocho, manasangane ileg\u00f1ija: Estag\u00fce y heredero; nije tapuno, ya usaga y inereda guiya jita.\n20:15 Ya mayute juyong gui jiyong y fangualuan, ya mapuno. Jafa pago ufatinas y se\u00f1ot y fangualuan nu sija?\n20:16 Ufato, ya uyulang este sija y manmach\u00f3chocho, ya ufannae otro ni y fangualuan. Ya anae majungog ayo, ileg\u00f1ija: Munga este.\n20:17 Lao jaatan sija ya ileg\u00f1a: Jafa nae este y esta matugue: Y acho ni y jarechasa y manmamatitinas y guima, esteja mapolo cuentan ulo gui esquina?\n20:18 Jayeja y pedong gui jilo ayo na acho, umayamag pedasitos; lao jayeja y jinegse, ufinapetbos.\n20:19 \u00b6 Ya y magas mamale, yan y escriba sija, maaliligao para umaqueguot g\u00fcije na ora; lao manmaa\u00f1ao nu y taotao sija, sa matungoja na jasangan este na acomparasion, contra sija.\n20:20 Ya mapupulanja yan manmanago na umaespipia, para ujafaquemanunas sija na taotao, ya uquefanma\u00f1ule ni y sinangan\u00f1a, ya umaqueentrega g\u00fce gui inaregla yan ninasi\u00f1an y gobietno.\n20:21 Ya mafaesen g\u00fce, ileg\u00f1ija: Maestro, intingo na unsasangan yan mamananag\u00fce jao tunas, ya ti numanasajnge jao taotao, lao mamananag\u00fce jao ni y magajet na chalan Yuus.\n20:22 Tunas na infanmanaejam si Sesat tributo, pat aje?\n20:23 Lao jatungoja y ma\u00f1a\u00f1ija, ya ileg\u00f1a nu sija:\n20:24 Fanueyo nu y salape. Jaye gaeimagen este yan este na tinigue? Ya manmanope ileg\u00f1ija: Iyon Sesat.\n20:25 Ya ileg\u00f1a nu sija: Nae si Sesat ni y iyon Sesat, ya innae si Yuus nu y iyon Yuus.\n20:26 Ya ti si\u00f1a maguot pot y sinangan\u00f1a gui menan y taotao sija; ya ninafanmanman ni y inepe\u00f1a ya manmamatquilo.\n20:27 \u00b6 Ya manmato guiya g\u00fciya Saduseo sija, ni y sumangan na taya quinajulon manmatae; ya mafaesen g\u00fce,\n20:28 Yleg\u00f1ija: Maestro, si Moises jatuguiejam, na yanguin dos chumelo na laje, ya y uno guaja asagua\u00f1a, ya matae taya patgon\u00f1a; ayo y chelu\u00f1a uniasagua y palaoan, ya unacajulo semiya gui chelu\u00f1a.\n20:29 Ya guaja siete na lalaje na ma\u00f1elu: ya y finenana umasagua, ya matae taya patgon\u00f1a.\n20:30 Ya inasagua y palaoan ni y min\u00e1 dos;\n20:31 Ya inasagua talo ni y min\u00e1 tres; yan taeg\u00fcenaoja locue todo y siete manmatae ya taya famaguon\u00f1ija.\n20:32 Ya y palaoan uttimo matae locue.\n20:33 Ya y quinajulon manmatae, jaye gaeasagua y palaoan? sa inasagua todo ni y siete.\n20:34 Ya si Jesus ileg\u00f1a nu sija: Y famaguon este na tiempo man\u00e1sagua yan manafan\u00e1sagua:\n20:35 Lao ayo sija y ufanmanmerese g\u00fcije na tiempo, yan y quinajulon manmatae, ni ufanasagua, ni umanafanasagua:\n20:36 Ni ti si\u00f1a manmatae talo: sa manparejoja yan y angjet sija; yan manfamaguon Yuus, sa manfamaguon y quinajulon. manmatae.\n20:37 Ya pot y manmatae ni umanafangajulo, asta si Moises mamanue gui finajalomtano, anae jafanaan y Se\u00f1ot, Yuus Abraham yan Yuus Ysaac yan Yuus Jacob.\n20:38 Sa ti g\u00fciya Yuus manmatae, na manl\u00e2l\u00e2: sa todosija manlala guiya g\u00fciya.\n20:39 Ya manmanope palo gui escriba sija ileg\u00f1ija: Maestro, mauleg sinanganmo.\n20:40 Ya desde ayo, ti matatnga mafaesen g\u00fce talo jafa.\n20:41 \u00b6 Ya ileg\u00f1a nu sija: Jafa na ileg\u00f1ija na si Cristo lajin David?\n20:42 Ya g\u00fciyaja si David umalog gui leblon y Salmos: Y Se\u00f1ot ileg\u00f1a ni y Se\u00f1otjo, Fat\u00e1chong gui agapa na canaejo,\n20:43 Asta qui jupolo y enemigumo sija para fa\u00f1ajangan y adengmo.\n20:44 Enao muna si David finanaan g\u00fce Se\u00f1ot, ya jaftaemano mina ulaji\u00f1a?\n20:45 \u00b6 Ya majujungogja ni y taotao sija, anae ileg\u00f1a ni y disipulu\u00f1a:\n20:46 Adaje jamyo ni y escriba sija, sa yan\u00f1ija manmamocat yan y anaco na magago, yan yan\u00f1ija manmasaluda gui plasa, yan y fin\u00e9nana na tachong gui sinagoga sija; yan y fin\u00e9nana na saga gui guipot;\n20:47 Yan jalachae y guima y biuda sija, yan manmamanunue ni y anaco tinaetae\u00f1ija pot taya; estesija ujaresibe mandangculo na sinentensia.\n21:1 YA anae manatan julo, jalie y manrico na taotao sija, na jayuyute jalom y ninaen\u00f1ija gui cajon salape.\n21:2 Ya jalie locue un pobble na biuda, na manyute jalom g\u00fcije dos coble.\n21:3 Ya ileg\u00f1a: Jusangane jamyo ni y magajet. Este y pebble na biuda, manyute jalom mas qui todo sija:\n21:4 Sa todo estesija, y sebblan\u00f1ijaja manmayute jalom minae\u00f1ija: lao este yan y pinebble\u00f1a, jayute todo jalom y g\u00fcinaja\u00f1a.\n21:5 \u00b6 Yan pot y manguecuentos palo pot y templo, ni y maadotna manbonito na acho sija yan ninae sija, ileg\u00f1a:\n21:6 Este sija na g\u00fcinaja y inlie, estag\u00fce, ufanmato jaane sija, na taya usobbla g\u00fcine un acho gui jilo y otro, na ti umayute papa.\n21:7 \u00b6 Ya mafaesen g\u00fce, ileg\u00f1ija: Maestro, ngaean nae ujuyong estesija? yan jafa na se\u00f1at uguaja, yanguin jijot para ufanmato este sija na g\u00fcinaja?\n21:8 Ayonae ileg\u00f1a: Guesadaje jamyo ya chamiyo fanmafab\u00e1baba: sa megae ufanmato pot y naanjo, ya ujaalog: G\u00fciya yo ya y tiempo esta jijijot; chamiyo dumal\u00e1lalaque sija.\n21:9 Lao yanguin injingog y guera sija, yan y atboroto, chamiyo faninesp\u00e1panta: sa nesesita ufanmato este sija finena; lao y uttimo ti enseguidas.\n21:10 \u00b6 Ayo nae ileg\u00f1a nu sija: Y nasion sija ufangajulo contra y nasion, ya y raeno contra raeno:\n21:11 Ya uguaja dangculon linao, ya y cada lugat \u00f1inalang yan peste; yan uguaja minaa\u00f1ao sija, yan mandangculo na se\u00f1at guinin y langet.\n21:12 Lao antes di todo este sija, ujapolo y canae\u00f1ija gui jilomiyo, ya infanmapetsigue, yan infanmaentrega gui sinagoga sija, yan y catset, yan infanmacone guato gui ray sija, yan y manmagas pot y naanjo.\n21:13 Ya ujuyong este guiya jamyo para testimonio.\n21:14 Polo gui corason miyo, na chamiyo jumajaso finena jafa para inepe:\n21:15 Sa guajo junae jamyo pachot yan tiningo, ni todo y enimigunmiyo ti si\u00f1a macontra ni umachaba.\n21:16 Ya infanenentrega ni y ma\u00f1aenanmiyo, yan y ma\u00f1elunmiyo, yan y parientesmiyo, yan y amigonmiyo; yan guaja guiya jamyo umanamapuno.\n21:17 Ya infanmachatlie ni todo y taotao pot y naanjo.\n21:18 Lao ni uno gui gaponulonmiyo ufalingo.\n21:19 Ya y manpasensianmiyo nae, inganaye y antenmiyo.\n21:20 Ya anae inlie Jerusalem, na esta ineriyaye ni y sendalo sija, intingoja na esta jijijot y mayulang\u00f1a.\n21:21 Ya ayonae y mangaegue guiya Judea, ufanmalago para y egso sija; ya ayo sija y mangaegue gui entalo\u00f1a ufanjuyong; ya y mangaegue gui fangualuan, cha\u00f1ija fanjajalom g\u00fcije.\n21:22 Sa este sija y jaanin inemog, sa para umacumple todo y g\u00fcinaja ni y esta manmatugue.\n21:23 Lao mannamaase ayo sija y manmapotgue, yan y mannanasusu g\u00fcije sija na jaane! sa uguaja dangculon chinatsaga gui jilo tano, yan binibo gui jilo este taotao sija.\n21:24 Ya ufamodong gui jilo y filon y espada, ya ufanmacone preso gui todo y nasion: ya Jerusalem umagacha papa ni y Gentiles, asta qui umacumple y tiempon y Gentiles.\n21:25 \u00b6 Ya uguaja se\u00f1at sija gui atdao yan y pilan, yan y pution sija; yan chinatsagan nasion sija gui jilo tano pot y guinadon pangpang y tase yan y napo.\n21:26 Manlalalango y taotao sija, pot y manmaa\u00f1ao\u00f1ija, yan pot y ninanangga ni ayo sija y manmamamaela para y tano: sa manmayengyong y ninasi\u00f1an y langet sija.\n21:27 Ya ayonae ujalie y Lajin taotao na mamamaela gui y mapagajes yan y ninasi\u00f1a yan y dangculon minalag.\n21:28 Ya anae esta jatutujon sumesede este sija, ayonae infanalag jilo, ya injatsa julo y ilunmiyo; sa esta jijijot y para inmanafanlibre.\n21:29 \u00b6 Ya jasangane sija un acomparasion, ileg\u00f1a: Atanja y trongcon igos, yan todo y trongcon jayo sija.\n21:30 Yanguin esta manma\u00f1\u00fa\u00f1uso, inlie ya intingoja maesa jamyo na esta jijijot y verano.\n21:31 Taeg\u00fcenaoja locue jamyo yanguin inlie esta sija na masusede, tingo na esta jijijot y raenon Yuus.\n21:32 Magajet jusangane jamyo: Ti ufapos este na generasion, asta qui todo sija manmacumple.\n21:33 Y langet yan y tano ufanmalofan, lao y finojo ti ufalofan.\n21:34 \u00b6 Ya inguesadaje jamyo na ufanbula y corasonmiyo ni y pinadog ma\u00f1ocho yan inelacho, yan y inadajen este na lin\u00e2l\u00e2, ya ufato guiya jamyo ayo na jaane derepente,\n21:35 Taeg\u00fcijeja y laso: sa taeg\u00fcijeja ufinato\u00f1a gui jilo todo sija y ma\u00f1asaga gui jilo tano.\n21:36 Enaomina fanbela todo tiempo, ya infanmanaetae, ya para infansi\u00f1a manescapa ni todo estesija y ni ufanmato, yan para infanojgue gui menan y Lajin taotao.\n21:37 \u00b6 Ya mamananag\u00fce cada jaane gui templo; yan cada puenge jumajanao, ya sumasaga gui un ogso na mafanaan ogso Olibo.\n21:38 Ya todo y taotao sija manmafato gui templo, taftaf gui egaan, para umaecungog g\u00fce.\n22:1 AYO nae estaba jijijot y jaanin y guipot y pan ni taelibadura, ni mafanaan pascua.\n22:2 Ya y magas mamale yan y escriba sija maaliligao jaftaemano para umapuno g\u00fce; lao manmaa\u00f1ao ni y taotaosija.\n22:3 \u00b6 Ya jumalom si Satanas gui as Judas y apeyidu\u00f1a Iscariote, uno gui numerou y dose.\n22:4 Ya maposg\u00fce, ya manguentos yan y magas mamale, yan y manmagas, jafataemano para uinentrega guiya sija.\n22:5 Ya ninafanmagof, ya matratos na umanae salape.\n22:6 Ya manpromete ya jaaliligao lugat para uqueentrega guiya sija, yanguin manaeg\u00fce y linajyan taotao.\n22:7 \u00b6 Ya mato y jaanin y taelibadura na pan, anae nesesita umaofrese y pascua.\n22:8 Ya jatago si Pedro yan Juan, ileg\u00f1a: Janao ya innalisto y pascua para jita, para utafa\u00f1ocho.\n22:9 Ya sija ileg\u00f1ija nu g\u00fciya: Mano malagomo nae innalisto?\n22:10 Ya ileg\u00f1a nu sija: Estag\u00fce, anae manjalom jamyo gui siuda, infanasoda g\u00fcije yan un taotao, na ma\u00f1u\u00f1ule un jarran janom; dalalaque g\u00fce jalom mano na guma nae jumalom.\n22:11 Ya inalog ni y ga\u00e9guima: Y Maestro ileg\u00f1a nu jago: Manggue y aposento anae para juchocho gui pascua yan y disipulujo sija?\n22:12 Ya infanfinanue ni y dangculo na aposento gui sanjilo todo cabales: ayonae innalisto.\n22:13 Ya manjanao ya masoda jaftaemano y mansinangane sija; ya manalisto para y pascua.\n22:14 \u00b6 Ya anae mato y ora, matachong papa ma\u00f1ija yan y dose na apostoles.\n22:15 Ya ileg\u00f1a nu sija: Jagasja juguefdesea na utafa\u00f1ocho guine na pascua antes di jufamadese:\n22:16 Sa jusangane jamyo: Ti juchocho mas, asta qui macumple gui raenon Yuus.\n22:17 Ya juresibe y copa ya janae grasia, ya ileg\u00f1a: Chule este, ya infanafacae entre jamyo:\n22:18 Sa jusangane jamyo na ti juguimen otro biaje ni y tinegcha ubas, asta qui ufato y raenon Yuus.\n22:19 Ya jachule y pan, ya anae janae grasia, jaipe, ya janae sija, ileg\u00f1a: Este y tataotaojo, ni y manmanae jamyo: fatitinas este para injajasoyo.\n22:20 Taeg\u00fcijeja locue y copa, anae munjayan ma\u00f1ena ileg\u00f1a: Este na copa y nuebo na trato gui j\u00e2g\u00e2jo, ni y machuda pot jamyo.\n22:21 Lao estag\u00fceja y canae y umentregayo na jumajame gui lamasa.\n22:22 Ya magajet na y Lajin taotao ujanao, ni y esta manfagpo, lao ay ay ayo na taotao uinentrega!\n22:23 Ya jatutujon manafaesen entre sija, jae guiya sija ufinatinas este.\n22:24 \u00b6 Ya guaja locue inaguaguat guiya sija, jaye umasdangculo.\n22:25 Ya ileg\u00f1a nu sija: Y ray y Gentiles, jafatitinas minagas gui jilo\u00f1ija; ya ayo y fumatitinas ninasi\u00f1a gui jilo\u00f1ija, manmafanaan manmauleg na taotao.\n22:26 Lao ti infanaeg\u00fcenao: sa jaye y mas dangculo guiya jamyo, ufamataeg\u00fcije y mas diquique; ya y magas, ufamataeg\u00fcije y ma\u00f1e\u00f1etbe.\n22:27 Sa cao dangculo\u00f1a, ayo y matatachong chumocho, pat ayo y ma\u00f1e\u00f1etbe? ti ayo y matachong chumocho; lao guajo gaegue gui entalonmiyo taeg\u00fcije ayo y ma\u00f1e\u00f1etbe.\n22:28 Jamyo ayo sija y sumisigueja mangachongjo gui tentasionjo.\n22:29 Ya juaregla un raeno para jamyo, taeg\u00fcije y as Tata ni y jaaregla y raeno para guajo.\n22:30 Para infa\u00f1ocho yan infanguimen, gui lamasajo gui raenoco; ya infanmatachong gui trono sija ya injisga y dose na tribo guiya Israel.\n22:31 Simon, Simon, estag\u00fce, si Satanas, na malago nu jago para unquinila gui coladot taeg\u00fcije y trigo;\n22:32 Lao guajo tayuyute jao, para cha\u00f1a fafatta y jinengguemo: ya yanguin umabira jao, nafanfitme y ma\u00f1elumo.\n22:33 Ya ileg\u00f1a nu g\u00fciya: Se\u00f1ot, estayo listo para judalalag jao para y catset yan para y finatae.\n22:34 Ya ileg\u00f1a: Jusangane jao Pedro, na ti uoo y gayo pago na jaane, antes di undagueyo tres biaje na guinin untungoyo.\n22:35 \u00b6 Ya ileg\u00f1a nu sija: Anae jutago jamyo sin botsa, yan sin maleta, yan sin sapatos, guaja fattanmiyo? Ya ileg\u00f1ija: Taya.\n22:36 Ayonae ileg\u00f1a nu sija: Lao pago, y gaebotsa, uchuleja, yan taeg\u00fcenaoja locue y maleta: ya jaye y taya espada\u00f1a, ubende y magagu\u00f1a ya ufamajan uno.\n22:37 Sa jusangane jamyo, na este y esta matugue, nesesita na umacumple guiya guajo: Ya matufong gui entalo y manaelaye sija: sa y g\u00fcinaja sija pot guajo, umanafanfagpo.\n22:38 Ya ileg\u00f1ija: Se\u00f1ot, estag\u00fceja dos na espada. Ya ileg\u00f1a nu sija: Esta najong.\n22:39 Ya jumuyong, ya mapos, taeg\u00fcijeja y costumbre\u00f1a, para y egso Olibo; ya matatiye locue ni y disipulu\u00f1a.\n22:40 Ya anae mato gui lugat, ileg\u00f1a nu sija: Fanmanaetae, ya chamiyo fanjajalom gui tentasion.\n22:41 Ya sumuja guiya sija, gui un inag\u00fcit acho; ya dumimo, ya manaetae,\n22:42 Yleg\u00f1a: Tata, yanguin malago jao, nasuja guiya guajo este y copa: lao munga mafatinas y malagojo, lao y malagomo.\n22:43 Ya finatoig\u00fce g\u00fcije un angjet guinin y langet, ya ninametgot.\n22:44 Ya anae estaba umagoninias, mas fejman manaetae: ya y masajalom\u00f1a taeg\u00fcije y mandangculo na gotan j\u00e2g\u00e2, mamopodong papa gui eda.\n22:45 Ya anae cajulo guinin manaetae, ya mato gui disipulu\u00f1a, jasoda na manmamaego sa mantriste,\n22:46 Ya ileg\u00f1a nu sija: Jafa na manmamaego jamyo? fangajulo ya infanmanaetae, sa noseaja infanjalom gui tentasion.\n22:47 \u00b6 Ya mientras cumuecuentos, estag\u00fce un manadan taotao, yan ayo y mafanaan si Judas, uno gui dose, na mafona gui menan\u00f1ija, ya jumijijot gui as Jesus para uchico.\n22:48 Lao si Jesus ileg\u00f1a nu g\u00fciya: Judas, pot un chicoja na unentrega y Lajin taotao?\n22:49 Ya anae malie, ni ayo sija y mangaegue gui oriya\u00f1a, jafa ujuyong, ileg\u00f1ija: Se\u00f1ot, intaga ni y espada?\n22:50 Ya uno guiya sija jataga y tentago y magas mamale, ya jautut y agapa na talanga\u00f1a.\n22:51 Ya manope si Jesus ileg\u00f1a: Polo este esta. Ya japacha y talanga\u00f1a, ya janamagong.\n22:52 Ayonae ileg\u00f1a si Jesus ni y magas mamale, yan y capitan sija gui templo, yan y manamco sija ni y manmato guiya g\u00fciya: Manmato jamyo yan espada yan galute, taeg\u00fcije y contra y saque?\n22:53 Anae estaba manjijitaja cada jaane gui templo, taya nae inestira y canaenmiyo contra guajo: lao este oranmiyo, yan y ninasi\u00f1an jinemjom.\n22:54 Ya maguot g\u00fce ya macone guato gui guima y magas mamale. Ya tinatitiyeja as Pedro lachago.\n22:55 Ya anae munjayan matotne y guafe gui talo gui patio, ya manda\u00f1a manmatachong, matachong si Pedro gui entalo\u00f1ija.\n22:56 Ya linie ni un criada anae matachong gui ininan guafe, ya guinesatang\u00fce, ya ileg\u00f1a: Este locue na taotao manisija.\n22:57 Ya jadague, ileg\u00f1a: Palaoan, ti jutungo g\u00fce.\n22:58 Ya anae na apmam linie ni otro ya ileg\u00f1a: Mangachochongmo yuje sija? ya ileg\u00f1a si Pedro: Taotao, ti guajo.\n22:59 Ya anae malofan una ora, otro jagosasegura ileg\u00f1a: Magajet na sumisija este yan ayo, sa taotao Galilea locue este.\n22:60 Ya si Pedro ileg\u00f1a: Taotao, ti jutungo jafa ilelegmo. Ya mientras cumecuentos, enseguidas umoo y gayo.\n22:61 Ya jabira g\u00fce y Se\u00f1ot ya jaaatan si Pedro. Ayonae jajaso si Pedro y sinangan y Se\u00f1ot, ni y ileg\u00f1a nu g\u00fciya: Antes que uoo y gayo pago na jaane, undagueyo tres biaje.\n22:62 Ya jumuyong si Pedro ya guefcumasao.\n22:63 \u00b6 Ya y taotao sija ni gumuguot si Jesus, mabotlelea ya manalalamen.\n22:64 Ya anae mabendas y atadog\u00f1a, mafaesen ileleg\u00f1ija: Sangan; jaye jao munalamen?\n22:65 Ya megae sija na chinatfino masasangan contra guiya, manamamajlao g\u00fce.\n22:66 \u00b6 Ya anae manana manda\u00f1a sija y inetnon manamco na taotao sija y magas y mamale yan y escribas: ya macone guato gui tribunat\u00f1ija, ileg\u00f1ija:\n22:67 Yaguin jago si Jesucristo, sangane jam. Lao ileg\u00f1a nu sija: Yaguin jusangane jamyo, ti injenggue yo;\n22:68 Ya yaguin guajo jamyo fumaesen, ti inepeyo.\n22:69 Lao desde pago para mona y Lajin taotao gaegue na matatachong gui agapa gui ninasi\u00f1an Yuus.\n22:70 Ya ileg\u00f1a todos: Ayonae Lajin Yuus jao? Ya ileg\u00f1a nu sija: Jamyo umalog na guajo yo.\n22:71 Ayonae ileg\u00f1ija: Jafa mas na testimonio tanesesita? sa tajungogja esta gui pachot\u00f1a.\n23:1 YA todo y linajyan\u00f1ija mangajulo, ya macone asta as Pilatos.\n23:2 Ya matutujon mafaaela ileg\u00f1ija: Inseda este na taotao na janaquequelache y nasionta, yan ma\u00f1o\u00f1oma na umanae tributo si Sesat, ya ileleg\u00f1a na g\u00fciya si Cristo un ray.\n23:3 Ayonae si Pilatos finaesen ileg\u00f1a: Jago y Ray y Judio sija? ya inepe ya ileg\u00f1a: Jago umalog.\n23:4 Ya si Pilatos ileg\u00f1a ni y magas y mamale, yan y linajyan taotao sija: Taya isao jusoda g\u00fcine na taotao.\n23:5 Lao sija japotfia, ileg\u00f1ija: Jaatbororota y taotao sija, mamananag\u00fce guiya Judea todo, jatutujon desde Galilea asta esteja na lugat.\n23:6 Ya anae jajungog este si Pilatos, mamaesen cao taotao Galilea.\n23:7 Ya anae jatungo na gaegue gui sisi\u00f1an Herodes, janamanajanao asta as Herodes, sa estaba g\u00fce locue guiya Jerusalem g\u00fcije sija na jaane.\n23:8 \u00b6 Ya si Herodes anae jalie si Jesus, ninasenmagof: sa jagasja jadesea na ulie, sa jajujungog guinin g\u00fciya, megae na g\u00fcinaja: ya jananangga na ufanlie guinin g\u00fciya y milagro.\n23:9 Ya jafaesen megae na sinangan: lao taya inepe g\u00fce.\n23:10 Yan mangaegue y magas y mamale yan y escribas na manmatatachong ya mafaaela g\u00fce fijom.\n23:11 Lao si Herodes yan y sendalu\u00f1a, madespresia yan mabotlea, yan manaminagago ni lamlam na magago, ya manatalo guato as Pilatos.\n23:12 Ya umamigo si Pilatos yan Herodes g\u00fcijeja na jaane: sa guinin umachatlie y dos.\n23:13 Ya si Pilatos janaetnon y magas y mamale, yan y magalaje yan y taotao sija,\n23:14 Ya ileg\u00f1a nu sija: Inquene mague guiya guajo este na taotao na janaquequelache y taotao sija; ya, estag\u00fce, na jufaesen gui menanmiyo, ya taya jusoda ni jafa na isao g\u00fcine na taotao pot y finaaelamimiyo sija.\n23:15 Aje, ni si Herodes: sa junafalag iya g\u00fciya, ya, estag\u00fce, ni jafa na ufanmerese na finatae pot y guinin finatinas\u00f1a.\n23:16 Enao mina bae jucastiga ya jusotta.\n23:17 Ya manesesita na umasotta uno gui guipot.\n23:18 Ya managang cada uno, ileg\u00f1ija: Nasuja juyong enao na taotao ya umasotta si Barabas:\n23:19 Sa mapreso pot un jatsamiento yan mamuno ni y jafatinas gui siuda.\n23:20 Ya si Pilatos ileg\u00f1a talo nu sija, Malagomiyo na umasotta si Jesus.\n23:21 Lao managang ileg\u00f1ija: Atane gui quiluus, atane gui quiluus.\n23:22 Ya ileg\u00f1a nu sija gui mina tres biaje: Sa jafa? jafa na taelaye finatinas\u00f1a este na taotao? Taya ni jafa na causa para umapuno jusoda guiya g\u00fciya. Pot este na rason bae jucastigaja ya jusotta.\n23:23 Lao sija enseguidas janadangculo inagang\u00f1ija, ya magagao na umaatane gui quiluus. Ya y inagang\u00f1ija mangana.\n23:24 Ayonae si Pilatos janae sentensia na ufatinas taemano y guinagao\u00f1i\u00f1ija.\n23:25 Ya masotta ayo y guinin mapreso pot jatsamiento yan mamuno, ayo y guinin magagagao: ya manmaentrega as Jesus gui minalago\u00f1ija.\n23:26 \u00b6 Ya anae macocone g\u00fce maguot si Simon, taotao Sirene, ni guinin y fangualuan, ya manae ni quiluus na uapagaye gui taten Jesus.\n23:27 \u00b6 Ya matatitiye ni y dangculon linajyan taotao yan famalaoan sija ni mangacasao yan manatangis pot g\u00fciya.\n23:28 Lao si Jesus jabira g\u00fce tate guiya sija ileg\u00f1a; Famalaoan Jerusalem, chamiyo fangacasao pot guajo, lao fangacasao pot jamyoja yan pot y famaguonmiyo.\n23:29 Sa, estag\u00fce, na ufato sija jaane nae umaalog: Mandichoso sa y manmachora, yan y tiyan sija ni ti manmama\u00f1ago, yan y pecho sija ni ti manmam\u00f3mogsae.\n23:30 Ayonae matutujon maalog ni egso sija: Famodong gui jilonmame; ya y sabana sija: Tampe jam.\n23:31 Sa yaguin y betde na jayo jafatinas estesija, y anglo, jafa uchog\u00fce?\n23:32 \u00b6 Ya macone locue dos palo na taelaye finatinas\u00f1ija para ufanmapuno yan g\u00fciya.\n23:33 Ya anae manmato g\u00fcije na lugat ni mafanaan Calabera, maatane gui quiluus g\u00fcije yan ayo y dos ni y taelaye finatinas\u00f1ija, uno gui agapa ya y otro gui acag\u00fce.\n23:34 Ya si Jesus ileg\u00f1a: Tata, asie estesija; sa ti jatungo jafa jachochog\u00fce. Ya manafacae entre sija y magagu\u00f1a, ya marifa.\n23:35 Ya y taotao sija manotojgue ya maaatanja. Ya mabotlelea ni y magas sija locue, ya ileleg\u00f1ija: Ufa\u00f1atba otrosija: palo ya usatban maesag\u00fce, yaguin este si Cristo, ni guine as Yuus.\n23:36 Ya mamofefea ni y sendalo sija, manmato guiya g\u00fciya, ya mafanunue ni y binagle.\n23:37 Ya ileg\u00f1ija: Yaguin jago Ray y Judio sija, satban maesa jao.\n23:38 Ya guaja locue un tinigue gui jilo\u00f1a: ESTE GUIYA Y RAY Y JUDIO SIJA.\n23:39 Ya uno gui ayo y taelaye finatinas\u00f1ija ilegna: Yaguin jago si Cristojao? Satban maesajao yan jame.\n23:40 Lao inepe ni otro, ya linalatde ileg\u00f1a: Ti maa\u00f1ao jao as Yuus, sa gaegue jao gui mismo sinentensia?\n23:41 Lao jita magajet na tunas; sa utafanresibe pot y finatinasta: lao este na taotao, taya taelaye finatinas\u00f1a.\n23:42 Ya ileg\u00f1a: Jesus, jajaso yo yaguin matojao gui raenomo.\n23:43 Ayonae ileg\u00f1a nu g\u00fciya: Magajet jusangane jao: Pago mismo na jaane utajita na dos guiya Paraiso.\n23:44 Ya anae buente y oran a las sais, jumuyong jomjom todo y jilo y tano asta y oran a las nuebe,\n23:45 Ya y atdao jomjom, ya y cottinan templo maipe gui talo.\n23:46 Ya anae umagang si Jesus, ni dangculo na inagang, ileg\u00f1a: Tata, y canaemo nae jupolo y espiritujo; ya anae munjayan jasangan este, jaentrega y espiritu.\n23:47 \u00b6 Ya anae jalie y senturion estesija y manmalofan, janamalag si Yuus, ileg\u00f1a: Sen magajet este na taotao na tunas.\n23:48 Ya todo y linajyan taotao ni manda\u00f1a anae manmalofan este sija, anae malie y jagas sinesede, natumalo guato ya jaseco pechon\u00f1ija.\n23:49 Lao todo y atungo\u00f1a yan y famalaoan ni tumatitiye g\u00fce desde Galilea, manestaba manlachago maatanja este sija.\n23:50 \u00b6 Ya estag\u00fce, un taotao na y naan\u00f1a si Jos\u00e9, un taotao na p\u00e1pagat, mauleg na taotao yan tunas:\n23:51 (Ti jaconsiente y pinagat\u00f1ija ni y finatinas\u00f1ija:) Taotao Arimatea, gui Siuda y Judiosija, ya g\u00fciya locue jananangga y raenon Yuus.\n23:52 Este mato gui as Pilatos, ya jagagao y tataotao Jesus.\n23:53 Ya janatunog gui quiluus, ya jabalutan gui un sabanas, ya japolo gui un naftan ni maguadog gui acho, ya taya ni uno mapolo g\u00fcije antes.\n23:54 Ya ayo na jaane y inaregla y pascua, ya pago manana gui sabado.\n23:55 Ya manmato locue y famalaoan ni y tumatitiye desde Galilea, ya malie y naftan yan jaftaemano mapolo\u00f1a y tataotao\u00f1a.\n23:56 Ya tumalo guato sija, ya manmamamauleg paopao yan ingg\u00fcente sija: ya mandescansa gui sabado na jaane jaftaemanoja y tinago.\n24:1 LAO y finenana na jaane gui semana, gui taftataf gui egaan, manmato gui naftan, mapma\u00f1u\u00f1ule guato paopao ni y finamauleg\u00f1ija.\n24:2 Ya masoda y acho na esta managalileg gui pettan y naftan.\n24:3 Ya anae manjalom ti masoda y tataotao y Se\u00f1ot Jesus.\n24:4 Ya anae manmajngang nu este, dos taotao tumotojgue gui oriyan\u00f1ija, na minagagago ni y lamlam na magago.\n24:5 Ya anae ninafanmaa\u00f1ao ya manecon papa gui eda, ileg\u00f1ija nu sija: Jafa muna inaliligao y l\u00e2l\u00e2 gui entalo y manmatae?\n24:6 Taeg\u00fce g\u00fcine, lao esta cajulo: jaso y mansinangane jamyo, anae estataba Galilea,\n24:7 Yleg\u00f1a: Na nesesita na y Lajin taotao umaentrega gui canae y taotao sija ni manisao, y umaatane gui quiluus, ya ucajulo talo gui mina tres na jaane.\n24:8 Ayonae jajaso sija y sinangan\u00f1a,\n24:9 Ya manalo guato gui naftan ya jasangane y onse nu este sija, yan todo y pumalo.\n24:10 Ya sija si Maria Magdalena yan si Juana, yan si Maria nanan Santiago; yan y pumalo palaoan ni mangachong\u00f1ija, sumangane y apostoles nu estesija.\n24:11 Lao sija japolo na taetiningo, y sinangan\u00f1ija ya ti majonggue.\n24:12 \u00b6 Ayonae cajulo si Pedro, ya malago asta y naftan: ya anae \u00f1umejon ya jaatan jalom, jalilie y sabanasja gui un lugat, ya mapos g\u00fce iyasija ya ninamanman nu este y manmalofan.\n24:13 \u00b6 Ya, estag\u00fce, dos guiya sija na jumajanao, g\u00fcijeja na jaane, para un songsong ni naan\u00f1a Emmaus, sesenta estadios desde Jerusalem.\n24:14 Ya cumuecuentos y dos mona pot todo estesija y masusede.\n24:15 Ya susede anae cumuecuentos y dos, ya manafaesen entre sija, mato si Jesus ya ma\u00f1isija manjanao.\n24:16 Lao y atadog\u00f1ija calang manmatampe, para cha\u00f1ija tumutungo g\u00fce.\n24:17 Ya ileg\u00f1a nu sija: Jafa na cuentosmimiyo uno yan otro, anae manajanao jamyo, ya ma\u00f1aga ya ninafantriste?\n24:18 Inepe ni ayo y uno ni y naan\u00f1a si Cleofas ya ileg\u00f1a nu g\u00fciya: Ada sumagaja jao guiya Jerusalem, ya ti untungo jafa manmalofan g\u00fcine sija na jaane?\n24:19 Ayonae ileg\u00f1a nu sija: Jafa sija? Ya ileg\u00f1ija nu g\u00fciya: Ayo sija iyon si Jesus Nasareno, ni profeta g\u00fce ni gaeninasi\u00f1a gui checho yan y sinangan gui menan Yuus yan todo y taotao sija;\n24:20 Ya maentrega, gui magas mamale yan y magalajenmame para umasentensia ni y finatae, ya maatane gui quiluus.\n24:21 Lao jame innanangga sa g\u00fciya y para unafanlibre y Israel. Junggan, yan mas qui todo este, pago esta mina tres na jaane desde que masusede estesija.\n24:22 Yan locue palo famalaoan ni mangachongmame janamanman jam sa manmato gui naftan gui taftataf gui egaan;\n24:23 Ya anae ti masoda y tataotao\u00f1a, manmato guiya jame ileg\u00f1ija na manmanlie sija y liniin angjet sija, ni y jasnangane na l\u00e2l\u00e2g\u00fce.\n24:24 Ya mamjanao guato gui naftan palo gui mangachongmame ya masoda taemanoja y sinangan y famalaoan; lao ti malie g\u00fce.\n24:25 Ya ileg\u00f1a nu sija: O taotao manaetiningo jamyo, yan y \u00f1ateng y corasonmiyo para injenggue todo y sinangan y profeta sija!\n24:26 Ada ti nesesita na si Cristo ufamadese nu este sija ya taeg\u00fcine nae ujalom gui minalag\u00f1a?\n24:27 Ya jatutujon desde as Moises, yan y profeta sija, y jasangangane claro todo ni tinigue ni y pot g\u00fciya.\n24:28 Ya manmato gui sengsong ni jajananag\u00fce g\u00fcije; ya jasigue para mas chago jinanao\u00f1a.\n24:29 Lao sija janasaga fuetsao, ileg\u00f1ija: Maela tafa\u00f1aga sa este puenge ya jocog y jaane; ya jumalom para usaga ma\u00f1isija.\n24:30 Ya susede, anae matachong gui lamasa yan sija, jachule y pan ya jabendise, ya jaipe ya manninae.\n24:31 Ayonae manmababa atadog\u00f1ija ya matungo g\u00fce; lao g\u00fciya jamalingoja gui inatan\u00f1ija.\n24:32 Ya ileg\u00f1ija entre y dos: Ada ti sinenggue y corasonta gui sumanjalomta mientras jacuentutusejit gui chalan, yan anae jababayejit ni y tinigue?\n24:33 Ya cumajulo y dos g\u00fcije na ora, ya tumalo guato Jerusalem: ya masoda y onse mandada\u00f1a, yan y manestaba mangachong\u00f1i\u00f1ija,\n24:34 Ya ileleg\u00f1ija: Magajet, esta cajulo y Se\u00f1ot, na umalie yan si Simon.\n24:35 Ayonae sija jasangane nu este sija y masusede gui chalan; yan jafa taemano, tungo\u00f1ija anae jaipe y pan.\n24:36 \u00b6 Ya mientras manguecuentos nu este sija, g\u00fciya tumojgueja gui entalo\u00f1ija, y ileg\u00f1a nu sija: Pas guiya jamyo.\n24:37 Ayonae manmaa\u00f1ao ya manmajngang ya jinason\u00f1ija na manmanlie sija un espiritu.\n24:38 Lao g\u00fciya ileg\u00f1a nu sija: Jafa na ninafanestotba jamyo? Ya jafa na cumajulo y jinasonmiyo gui corasonmiyo?\n24:39 Atanja y canaejo yan y adengjo, sa guajo mismoyo: pacha yan inlie sa y espiritu taecatne ni tolang, taeg\u00fcije inliija na guajayo,\n24:40 Ya anae jasangan este, manfinanue ni y canae\u00f1a yan y adeng\u00f1a.\n24:41 Ya anae ti jajonggue sija pot minagof\u00f1ija, ya ninafanmanman, g\u00fciya ileg\u00f1a nu sija: Guaja g\u00fcine jafa para utacano?\n24:42 Ya sija janae un pedason g\u00fcijan na mapeja.\n24:43 Ya jachule ya jacano gui menan\u00f1ija.\n24:44 \u00b6 Ya ileg\u00f1a nu sija: Este sija na sinangan ni y jusangangane jamyo anae manjijita: taemanoja na nesesita na umacumple todo y esta matugue gui lay Moises yan y profeta sija, yan y Salmos pot guajo.\n24:45 Ayonae manbinaba y jinaso\u00f1ija para ujatungo y tinigue;\n24:46 Ya ileg\u00f1a nu sija: Taeg\u00fcine esta matugue, na si Cristo ufamadese ya ucajulo talo guinin y manmatae gui mina tres na jaane;\n24:47 Ya umapredica gui naan\u00f1a y sinetsot yan inasiin isao, gui todo y nasion sija, umatutujon desde Jerusalem.\n24:48 Ya jamyo testigo nu estesija na g\u00fcinaja.\n24:49 Ya, estag\u00fce, na bae jutago y promesan y Tatajo gui jilo miyo: lao jamyo fa\u00f1aga gui siuda guiya Jerusalem, asta que manminagago jamyo ni y ninasi\u00f1a guinin iya jululo.\n24:50 \u00b6 Ya manquinene juyong asta Betania; ya jajatsa y canae\u00f1a ya manbinendise sija.\n24:51 Ya susede anae manbinendise, jaapatte g\u00fce guiya sija ya machule julo gui Langet.\n24:52 Ya sija jaadora ya manalo guato Jerusalem yan y dangculon minagof\u00f1ija;\n24:53 Ya mangaegue siempre gui templo, manmanbendidise as Yuus. Amen.","title":"Chamorro Bible (partial): Luke","type":"page"}