{"collection":"Bible & Christianity","html_url":"https://unchartedknowledge.5gfusion.net/browse/bib/wb/cmr/mar.htm","path":"bib/wb/cmr/mar.htm","source_url":"https://sacred-texts.com/bib/wb/cmr/mar.htm","text":"1:1 TUTUJON y ibangelion Jesucristo, Lajin Yuus.\n1:2 Jaftaemano esta matugue gui profeta Isaias: Estag\u00fce, guajo tumago y tentagojo gui menan matamo, para ufamauleg y chalanmo gui menamo.\n1:3 Ynagang ni umaagang gui desierto: Fanmauleg y chalan y Se\u00f1ot: natunas y cayejon\u00f1a.\n1:4 Si Juan managpange gui desierto, ya jasetmon y tinagpangen mina\u00f1otsot para inasiin isao sija.\n1:5 Ya manjanao guiya g\u00fciya guato todo y tano Judea, yan todo sija guiya Jerusalem; ya todo sija mantinagpange gui sadog Jordan, ya jaconfesat\u00f1aejon y isao\u00f1ija.\n1:6 Ya si Juan minagagon pulon cameyo, yan sinturon cuero gui sentura\u00f1a; ya y na\u00f1a, apacha yan miet monte.\n1:7 Ya mansesetmon, ileg\u00f1a: Ufato gui tateco uno na masgaeninasi\u00f1a qui guajo, y coreas y sapatos\u00f1a, ti digno yo nu jutecon ya jupula.\n1:8 Guajo magajet na jutagpange jamyo yan janom; lao g\u00fciya infantinagpange ni Espiritu Santo.\n1:9 \u00b6 Ya susede ayo sija na jaane, na si Jesus mato guine Nasaret Galilea, ya tinagpange as Juan gui Jordan.\n1:10 Ya enseguidas nae cajulo gui janom, jalie na mababa y langet, ya y Espiritu, calang paluma tumunog gui jilo\u00f1a,\n1:11 Ya mato un inagang guine y langet na ileg\u00f1a: Jago y lajijo ni yajo, iya jago nae gosmagof yo.\n1:12 Ya enseguidas ninafalag y desierto ni Espiritu.\n1:13 Ya sumaga g\u00fcije cuarenta na jaane, ya tinienta as Satanas; yan ma\u00f1isija y manmachaleg na g\u00e2g\u00e2 sija; ya y angjet sija masetbe g\u00fce.\n1:14 \u00b6 Anae munjayan si Juan mapreso, mato si Jesus guiya Galilea, jasesetmon y ibangelion Yuus.\n1:15 Ya ileg\u00f1a: Y tiempo esta macumple; ya y raenon Yuus esta jijot: fanma\u00f1otsot, ya injenggue y ibangelio.\n1:16 \u00b6 Ya mamomocat gui oriyan tasen Galilea, jalie si Simon, yan si Andres chelun Simon, na jayuyute y lagua gui tase, sa sija manpescadot.\n1:17 Ya si Jesus ileg\u00f1a nu sija: Maela dalalagyo, ya junafanpescadot taotao jamyo.\n1:18 Enseguidas japolo y lagua\u00f1ija ya madalalag g\u00fce.\n1:19 Anae malofan talo didide mona, jalie si Santiago, lajin Sebedeo, yan si Juan chelu\u00f1a, na manestaba locue gui batco na jalememenda y lagua\u00f1ija.\n1:20 Ya enseguidas jaagang; ya jadingo si tatan\u00f1ija as Sebedeo gui batco yan y manmachocho sija, ya madalalag g\u00fce.\n1:21 \u00b6 Ya manjalom Capernaum; ya enseguidas, gui s\u00e1bado na jaane, jumalom gui sinagoga ya mamanag\u00fce.\n1:22 Ya sija ninafanmanman ni finanag\u00fce\u00f1a; sa jafananag\u00fce sija calang uno ni gaeninasi\u00f1a, ya ti calang y escriba sija.\n1:23 Ya enseguidas guaja g\u00fcije gui sinagoga\u00f1ija un taotao na guaja \u00e1placha na espiritu, ya g\u00fciya umagang,\n1:24 Yleg\u00f1a: Parajafa jam nu jago, Jesus taotao Nasaret? Matojao para unnafanaelayejam? Jutungoja jayejao, jago y Santos guine as Yuus.\n1:25 Ya si Jesus jalalatde ileg\u00f1a: Pacaca, ya maela juyong guiya g\u00fciya.\n1:26 Ya anae y \u00e1placha na espiritu tiniteg g\u00fce, ya ninaagang gosdangculo na inagang, jumuyong guiya g\u00fciya.\n1:27 Ya todo sija ninafanmanman, pot este manafaesen entre sija, ileg\u00f1ija: Jafa este? Jafa na nuebo finanag\u00fce este! yan ninasi\u00f1a jatago y man\u00e1placha na espiritu, ya maosgueja g\u00fce?\n1:28 Enseguidas y fama\u00f1a manamamta todo gui tano oriyan Galilea.\n1:29 \u00b6 Ya enseguidas anae jumuyong gui sinagoga, mato gui guima Simon yan si Andres, yan si Santiago yan si Juan.\n1:30 Ya y suegran Simon estaba na umaason sa malango yan calentura: ya masangane g\u00fce enseguidas nu y palaoan.\n1:31 Ayo nae mato g\u00fce, ya jamantiene canae\u00f1a, ya jajatsa julo; ya pinelo ni calentura, ya g\u00fciya sumetbe sija.\n1:32 \u00b6 Ya anae estaba esta pupuenge, anae machom y atdao, maconiig\u00fce todo ni manma\u00f1etnot yan y maninanite.\n1:33 Ya todo y siuda manda\u00f1a gui petta.\n1:34 Ya janafanjomlo megae ni manestaba manmalango todo clasen chetnot sija; ya jayute juyong megae na anite sija; ya ti japolo nu y anite sija cumuentos sa matungo g\u00fce.\n1:35 \u00b6 Ya y egaan g\u00fcije, cajulo gostaftaf, jojomjomja trabia, ya jumuyong, ya malag y un lugat desierto, ya manaetae g\u00fcije.\n1:36 Ya tinatiye g\u00fce as Simon, yan y mangachochong\u00f1a.\n1:37 Ya anae masoda g\u00fce, ileg\u00f1ija nu g\u00fciya: Todo umaliligaojao.\n1:38 G\u00fciya ileg\u00f1a nu sija: Nije tafanmalag y otro lugat gui sengsong ni jijot, ya jufansetmon locue g\u00fcije; sa pot este na matoyo.\n1:39 Ya jumalom gui sinagoga\u00f1ija todo Galilea, sesetmon ya jayuyute juyong y anite sija.\n1:40 \u00b6 Ya un ategtog mato guiya g\u00fciya, tinayuyut g\u00fci ya dumimo, ya ileg\u00f1a: Yaguin malagojao, si\u00f1a unnagasgasyo.\n1:41 Ya si Jesus ninamaase ya jaestira y canae\u00f1a, ya japacha, ya ileg\u00f1a: Malagoyo, ungasgas.\n1:42 Ya enseguidas y chetnot y ategtog mapos guiya g\u00fciya ya gasgas g\u00fce.\n1:43 Ya jagosencatga, ya jatago na ujanao,\n1:44 Ya ileg\u00f1a nu g\u00fciya: Atan ya chamo sumangangane ni jaye jafa; lao sigueja gui jinanaomo ya unfanue y pale nu jago, ya unofrese ni guinasgasmo ni si Moises manago, para testimonio\u00f1ija.\n1:45 Lao g\u00fciya mapos, ya jatutujon munamatungo, yan janagosmamta y checho; pot este, si Jesus ti si\u00f1a jumalom matungo nu g\u00fciya gui siuda; lao sumasagaja gui sumanjiyong gui lugat desierto sija, ya manmato guiya g\u00fciya guinin todo y patte sija.\n2:1 YA otro biaje g\u00fciya jumalom guiya Capernaum, despues di malofan ti megae na jaane sija; ya majungog na gaegue g\u00fce gui jalom guma.\n2:2 Ya manda\u00f1a megae, ya ti manulag, ni gui oriyan y petta; ya jasetmon y sinangan guiya sija.\n2:3 Ayo nae manmato guiya g\u00fciya manmangongone un paralitico, na macocone ni cuatro.\n2:4 Ya anae ti si\u00f1a manmato guiya g\u00fciya pot y linajyan taotao, manajanao y atof anae estaba g\u00fce, ya anae munjayan mababa, manatunog y cama anae mapopolo y paralitico.\n2:5 Ya anae jalie si Jesus y jinenggue\u00f1ija, ileg\u00f1a ni paralitico: Lajijo, y isaomo unmaasie.\n2:6 Ya estaba g\u00fcije manmatatachong palo escriba sija, ya manmanjajaso gui corason\u00f1ija, ileg\u00f1ija:\n2:7 Jafa na cumuecuentos este na taotao chatfino contra si Yuus? Jaye si\u00f1a manasie isao, solo si Yuusja?\n2:8 Ya jatungo si Jesus enseguidas gui espiritu\u00f1a na manmanjajaso gui sumanjalom\u00f1ija, ya ileg\u00f1a nu sija: Jafa muna injajaso este sija gui corasonmiyo?\n2:9 Jafa mas guse taalog y paralitico: Y isaomo unmaasie; pat taalog: Cajulo, chule y camamo, ya unjanao?\n2:10 Lao para intingo na y Lajin taotao guaja ninasi\u00f1a\u00f1a gui jilo tano manasie isao (ileg\u00f1a ni paralitico),\n2:11 Jualog nu jago: Cajulo, ya unchule y camamo ya janao falag iyajamyo.\n2:12 Ayo nae cajulo g\u00fce enseguidas, ya jachule y cama\u00f1a, ya mapos gui menan todo; enao muna todo ninafanmanman, ya manamalag si Yuus, ileg\u00f1ija: Taya nae inlie ayo.\n2:13 \u00b6 Ya jumanao talo gui oriyan tase, ya todo y linajyan taotao manmato guiya g\u00fciya, ya jafanag\u00fce sija.\n2:14 Ya anae malofan jalie si Levi, lajin Alfeo, na matatachong gui bancon y tributo sija, ya ileg\u00f1a nu g\u00fciya: Dalalagyo. Ya cajulo ya dinalalag g\u00fce.\n2:15 Ya susede na estaba g\u00fce matachong para uchocho gui lamasa gui guima ayo, ya megae sija na publicano yan manisao sija manmatatachong ma\u00f1isija locue yan si Jesus, yan y disipolu\u00f1a sija; sa guaja megae dumadalalag g\u00fce.\n2:16 Ya y escriba sija gui entalo y Fariseo sija, anae jalie na ma\u00f1ochocho yan y manisao yan y publicano sija, ileg\u00f1ija ni disipolu\u00f1a sija: Jafa este na g\u00fciya chomocho yan gumiguimen, yan y publicano sija yan y manisao?\n2:17 Ya anae jajungog si Jesus, ileg\u00f1a nu sija: Y manjomlo ti janesesita medico, na y manmalango. Ti matoyo para juagang y manunas, na y manisao sija.\n2:18 \u00b6 Ya y disipulon Juan, yan y disipulon Fariseo sija manayunat: ya manmato, ya ileg\u00f1ija nu g\u00fciya: Jafa muna y disipulon Juan yan y disipulon Fariseo sija manayuyunat; ya y disipulumo ti manayuyunat?\n2:19 Si Jesus ileg\u00f1a nu sija: Si\u00f1a manayunat y mangaegue gui guipot umasagua, yaguin ma\u00f1isija yan y nobio? Y tiempo nae ma\u00f1isijaja yan y nobio, ti si\u00f1a manayunat.\n2:20 Lao ufato y jaane sija, na y nobio umanajanao guiya sija; ya ayo sija na jaane nae ufanayunat.\n2:21 Taya ni uno lumimendan\u00f1a\u00f1aejon y nuebo na magago gui bijo na bestido; sa ayo y nuebo na limenda ujanao gui bijo, ya mas taelaye y matiteg.\n2:22 Ya taya ni uno umasajguane y nuebo na bino gui bijo na boteyan cuero: sa y nuebo na bino uyamag y boteyan cuero sija, ya umachuda y bino, ya y boteyan cuero manmalingo; lao y nuebo na bino, y nuebo na boteyan cuero nae umasajguane.\n2:23 \u00b6 Ya manmapos este, malolofan g\u00fce gui jalom fangualuan trigo gui sabado na jaane; ya y disipolu\u00f1a sijas igue di manmanjala ni espiga sija.\n2:24 Ya y Fariseo sija, ileg\u00f1ija: Atanja, jafa na jafatitinas gui sabado na jaane y ti mauleg para umafatinas?\n2:25 Ya g\u00fciya ileg\u00f1a nu sija: Taya nae intaetae jafa checho David anae janesesita, ya \u00f1alang yan y mangachong\u00f1a?\n2:26 Jafa taemano jalom\u00f1a gui guimayuus anae si Abiatar magas na pale, ya jacano y pan ni inefrese, ni ti para macano, na para y pale sija; ya janae locue y mangachong\u00f1a sija?\n2:27 Yleg\u00f1a talo nu sija: Y sabado pot y taotao na mafatinas: ti y taotao pot y sabado.\n2:28 Enaomina y Lajin taotao Se\u00f1ot locue gui sabado.\n3:1 YA jumalom talo gui sinagoga; ya guaja g\u00fcije un taotao na anglo un canae\u00f1a.\n3:2 Ya sija maaatanja g\u00fce cao unajomlo gui sabado na jaane; para umafaaela.\n3:3 Ayo nae ileg\u00f1a ni ayo na taotao y anglo un canae\u00f1a: Tojgue julo gui entalo.\n3:4 Ya ileg\u00f1a nu sija: Si\u00f1a tafatinas mauleg gui sabado na jaane pat taelaye? nalibre y lin\u00e2l\u00e2 pat puno? Lao sija manmamatquiquiloja.\n3:5 Ya anae jaatan gui oriya sija yan y linalalo, ninapinite pot y majetog coraso\u00f1\u00f1ija, ya ileg\u00f1a nu y taotao: Estira mona y canaemo. Ya jaestira, ya y canae\u00f1a tumalo mauleg parejo yan y otro.\n3:6 Ayo nae manmapos y Fariseo sija, ya manaconseja yan y taotao Herodes sija, contra g\u00fciya, para umapuno.\n3:7 Lao si Jesus sumuja para y tase yan y disipulu\u00f1a sija; ya madalalag un dangculon linajyan taotao guine Galilea, yan guine Judea,\n3:8 Yan guine Jerusalem, yan guine Idumea, yan y otro bandan Jordan, yan guine oriyan Tiro yan Sidon, dangculo na linajyan taotao anae majungog y dangculon finatinas\u00f1a sija, manmato guiya g\u00fciya.\n3:9 Ya jasangane y disipolu\u00f1a sija, na un diquique na batco uninananggaja g\u00fce, pot y linajyan taotao para munga g\u00fce manachatsaga,\n3:10 Sa guaja megae janafanjomlo; ya pot ayo na manpodong gui jilo\u00f1a, todo y mangaechetnot para umapacha,\n3:11 Ya y man\u00e1placha sija na espiritu locue, anae malie g\u00fce, manpodong papa gui mena\u00f1a, ya managang, ileg\u00f1ija: Jago y Lajin Yuus.\n3:12 Lao guiya jagosencatga sija, na cha\u00f1ija munamatutungo g\u00fce.\n3:13 \u00b6 Ya cajulo gui egso, ya jaagang guiya g\u00fciya ayo sija y malago\u00f1a, ya sija manmato guiya g\u00fciya.\n3:14 Ya jaayig y dose, na ufa\u00f1isijaja, yan para unafanjanao ya ujafanmansetmon;\n3:15 Yan ufangaeninasi\u00f1a para ujayute juyong y anite sija.\n3:16 Sija si Simon, ni japolo sobrenaa\u00f1a si Pedro;\n3:17 Yan si Santiago, lajin Sebedeo, yan si Juan chelun Santiago; ni japolo sobrenaa\u00f1ija si Boanerges ni comoqueileg\u00f1a lalajin julo.\n3:18 Yan si Andres, yan si Felipe, yan si Bartolome, yan si Mateo, yan si Tomas yan si Santiago, lajin Alfeo, yan si Tadeo, yan si Simon y Cananeo;\n3:19 Yan si Judas Iscariote ni y locue umentrega g\u00fce: ya manjalom talo gui guima.\n3:20 \u00b6 Ya y linajyan taotao manda\u00f1a talo, ya pot este sija ti si\u00f1a ni ufa\u00f1ochocho pan.\n3:21 Ya anae majungog na familia\u00f1a sija, manmato para umaguot; sa ileg\u00f1ija: Esta ti guiya g\u00fce.\n3:22 Ya y escriba sija ni manmato guine Jerusalem, ileg\u00f1ija, na guaja g\u00fce as Beetsebub, ya pot y prinsipen anite na manyuyute juyong anite sija.\n3:23 Lao g\u00fciya umagang sija, ya ileg\u00f1a nu sija pot acomparasion: Jafataemano si\u00f1a si Satanas jayute juyong si Satanas?\n3:24 Yaguin un raeno madibide contra g\u00fciyaja, ayo na raeno ti si\u00f1a sumaga.\n3:25 Yaguin un guma madibide contra g\u00fciyaja, ayo na guma ti si\u00f1a sumaga.\n3:26 Yaguin si Satanas cajulo contra g\u00fciyaja, ya madibide ti si\u00f1a sumaga: lao gae jinecog.\n3:27 Taya ni un taotao si\u00f1a jumalom gui guima y matatnga na taotao, ya unataelaye y g\u00fcinaja\u00f1a sija, yaguin ti jagode finena y matatnga na taotao; ya ayo nae unataelaye y g\u00fcinaja\u00f1a.\n3:28 Magajet jusangane jamyo, na todo y isao sija ufanmaasie gui lalajin taotao sija, yan y chinatfino contra cuatquieraja sija na chinatfinue.\n3:29 Lao jayeja y chumatfino contra y Espiritu Santo, taemaasie ni ngaean; ya peligro\u00f1a y taejinecog na isao:\n3:30 Sa ileg\u00f1ija, g\u00fciya guaja \u00e1placha na espiritu.\n3:31 Ya manmato si nana\u00f1a, yan y ma\u00f1elu\u00f1a, ya manestaba gui sumanjiyong, manmanago na umaagang g\u00fce.\n3:32 Ya y linajyan taotao estaba manmatatachong gui oriya\u00f1a; ya ileg\u00f1ija nu g\u00fciya: Estag\u00fce si nanamo yan y ma\u00f1elumo gui sumanjiyong na maaliligaojao.\n3:33 Ya g\u00fciya jaope sija, ileg\u00f1a: Jaye nanajo yan jaye ma\u00f1elujo?\n3:34 Ya manaatan gui oriya anae manestaba manmatatachong gui oriya\u00f1a, ya ileg\u00f1a: Estag\u00fce y nanajo, yan y ma\u00f1elujo!\n3:35 Sa jayeja y fumatinas y minalago Yuus, g\u00fciya chelujo laje, yan chelujo palaoan, yan nanajo.\n4:1 YA jatutujon otro biaje mananag\u00fce gui oriyan tase; ya manda\u00f1a guiya g\u00fciya dangculo na linajyan taotao, enao mina jumalom gui un batco, ya matachong gui tase; ya todo y linajyan taotao manestaba gui jilo tano gui oriyan tase.\n4:2 Ya jafanag\u00fce sija megae pot acomparasion, ya ileg\u00f1a nu sija gui finanag\u00fce\u00f1a.\n4:3 Ecungog: Estag\u00fce y tatanom na jumuyong para ufananom.\n4:4 Ya anae manananom, palo mamodong gui oriyan chalan; ya mato y pajaron y aire ya macano.\n4:5 Ya y palo mamodong gui jilo acho, anae ti megae na oda; ya enseguidas mandoco, sa ti tadong gui eda.\n4:6 Lao anae cajulo y atdao, sinenggue, sa taejale\u00f1ija manmalayo.\n4:7 Ya y palo mamodong gui entalo tituca sija; ya mandoco y tituca sija, ya chiniguet, ya ti manogcha.\n4:8 Ya y palo mamodong gui mauleg na tano, ya manmanogcha, ya mangajulo ya manmegae; ya uno manogcha treinta, y otro sesenta, y otro ciento.\n4:9 Ayo nae ileg\u00f1a nu sija: Y gae talanga para ufanjungog, g\u00fciya uecungog.\n4:10 \u00b6 Ya anae estaba g\u00fce g\u00fciyaja, y manestaba gue oriya\u00f1a yan y dose, mafaesen g\u00fci ni y acomparasion sija.\n4:11 Ya ileg\u00f1a nu sija: Jamyo manmanae y misterion raenon Yuus; lao y mangaegue gui sumanjiyong, pot acomparasion nae umafatinas todo estesija;\n4:12 Para y manlilie, jalie ya ti jasiente; ya y manecungog, manmanjungog, lao ti jatungo; sa no sea ufanmabra talo, ya ufanmmaasie ni isao\u00f1ija.\n4:13 Ya ileg\u00f1a nu sija: Ti intingo este na acomparasion? Jafa taemano nae, tungonmiyo todo ni acomparasion sija?\n4:14 Y tatanom jatanme y finijo.\n4:15 Ya este yuje sija y oriyan chalan, anae manmatanme y finijo; lao despues di jajungog, mato si Satanas, enseguidas, ya janajanao y finijo ni matanme gui corason\u00f1ija.\n4:16 Parejoja locue yan este sija y manmatanme gui jilo acho; anae majungog y finijo, enseguidas maresibe todo ni y minagof\u00f1ija;\n4:17 Lao taya jale\u00f1ija, ya ti jadura apmam; sa anae cajulo y triniste, pat y pinetsigue pot y finijo, enseguidas maninefende.\n4:18 Ya este yuje sija y manmatanme gui entalo tituca sija; y jumungog y finijo;\n4:19 Lao y inadajen este y tano, yan y dinaguen y g\u00fcinaja sija, yan y minalago ni guaja gui palo g\u00fcinaja sija, manjalom ya machiguet y finijo ya jumuyong ti manogcha.\n4:20 Ya este yuje sija y manmatanme gui mauleg na tano; y jumungog y finijo ya maresibe, ya manmanogcha, ya uno treinta y otro sesenta, y otro siento.\n4:21 \u00b6 Yleg\u00f1a nu sija locue: Esta machule y candet para umapolo gui papa medida, pat gui papa cama? Ya ti para umapolo gui jilo lamasa?\n4:22 Sa taya na manaatog, ti umafatan\u00f1aejon; ni gae gui secreto ya ti umababa.\n4:23 Yaguin guaja gaetalanga para ufanjungog, g\u00fciya uecungog.\n4:24 Yleg\u00f1a nu sija locue: Adaje jafa y jiningogmiyo. Y medida anae inmediye sija, ayoja nae infanmamidiye jamyo; ya infanmanae jamyo mas.\n4:25 Sa y guaja, umanae: ya y taya, esta y g\u00fcinaja\u00f1a, unajanao.\n4:26 \u00b6 Ya ileg\u00f1a: Taeg\u00fcine y raenon Yuus, yaguin un taotao manyute semiya gui jalom oda;\n4:27 Ya maego, ya cajulo gui puenge yan jaane, ya semiya mapta ya doco, ti jatungo jafataemano.\n4:28 Sa y tano g\u00fciyaja manogcha, finena jagon, enseguidas y espiga, despues y grano bula gui espiga.\n4:29 Ya yaguin y tinegcha dumangculo, enseguidas mapolo y sese para mangoco, sa mato y cosecha.\n4:30 \u00b6 Ya ileg\u00f1a: Jafajit nae tanaparejo y raenon Yuus? pat jafa na acomparasion nae taacompara?\n4:31 Parejo yan un granon mostasa, ni y anae matanme gui tano, achogja g\u00fciya mas diquique gui entalo todo y semiya sija ni y guaja gui jilo y tano.\n4:32 Lao anae matanme, doco, ya g\u00fciya mas dangculo qui todo na golae, ya manramas ni mandangculo na ramas\u00f1a; ya pot este y pajaron y aire si\u00f1a ma\u00f1aga gui papa y nijong\u00f1a.\n4:33 \u00b6 Yan megae sija na acomparasion parejo yan este sija, jasangane sija finijo, jaftaemano y si\u00f1a jajungog.\n4:34 Ya sin acomparasion ti jasangane sija; lao y disipolu\u00f1a sija anae ma\u00f1isijaja janaclaruye todo.\n4:35 Ya ileg\u00f1a nu sija g\u00fcijija na jaane, anae esta pupuenge: Nije tafanmalofan gui otro banda.\n4:36 Ya jadingo y linajyan taotao, ya macone g\u00fce ma\u00f1ija, anae gaegue g\u00fce sui jalom batco. Ya guaja locue palo diquique na batco ma\u00f1isija.\n4:37 Ya cajulo un dangculon pagyon manglo, ya jinatme ni napo sija y jalom batco, ya ninabula.\n4:38 Ya g\u00fciya gaegue gui popa na mamaego gui jilo alunan; ya mayajo, ya ileg\u00f1ija nu g\u00fciya: Maestro, taya unadadaje na infanmatae?\n4:39 Ya cajulo g\u00fce, ya jalalatde y manglo, ya ileg\u00f1a ni tase: Pacaca famatquilo. Ya bumasta y manglo, ya guaja dangculo na catma.\n4:40 Ya ileg\u00f1a nu sija: Jafa jamyo na gosmanmaa\u00f1ao? Taye jinengguenmiyo trabia?\n4:41 Ya mangosmanmaa\u00f1ao, ya ileg\u00f1ija entre sija: Jaye este, na asta y manglo yan y tase maosgue g\u00fce?\n5:1 YA manmato gui otro bandan tase gui tano y taotao Gadara sija.\n5:2 Ya anae jumuyong g\u00fce gui batco, enseguidas umasoda yan un taotao gui naftan sija ni guaja un \u00e1placha na espiritu.\n5:3 Ya guaja saga\u00f1a gui jalom naftan sija, ya taya si\u00f1a gumode g\u00fce nu y cadenaja:\n5:4 Sa megae na biaje nae magode nu y tale sija yan cadena sija, lao y cadena sija esta manmayamag pot guiya; ya y tale sija manmagtos, ya taya si\u00f1a munamanso g\u00fce.\n5:5 Ya siempre yan puenge yan jaane, jumajanao ya umaagang gui entalo naftan sija, yan gui jalomtano sija, ya janalalamen g\u00fce ni acho sija.\n5:6 Ya anae jalie si Jesus gui chago, malago, ya jaadora g\u00fce.\n5:7 Ya umagang gosdangculo na inagang, ileg\u00f1a: Para jafayo ni jago, Jesus, Lajin y Gueftaquilo na Yuus? Jufanjula nu jago pot si Yuus na chamoyo munachachatsaga.\n5:8 Sa ileg\u00f1a nu g\u00fciya: Juyong g\u00fcine na taotao, \u00e1placha na espiritu.\n5:9 Ya jafaesen: Jaye naanmo? Ya inepe, ileg\u00f1a: Linajyan naanjo: sa manmegaejam.\n5:10 Ya jatayuyut megae, para cha\u00f1a yiniyite juyong g\u00fcije na tano.\n5:11 Ya gaegue g\u00fcije, jijot gui jalomtano sija, un dangculo na manadan babue na ma\u00f1ochocho.\n5:12 Ya matayuyut g\u00fce ni ayo todo sija na anite, ileg\u00f1ija: Tagojam para y babue sija para infanjalom guiya sija.\n5:13 Ya manpinetmite as Jesus. Ya manjuyong ayo sija y man\u00e1placha na espiritu, ya manjalom gui babue sija; ya y manada manmalago papa gui un didog na lugat asta y jalom tase, ya guaja sija dos mit; ya manmatmos gui tase.\n5:14 Ya y munafa\u00f1ochocho y babue sija manmalago ya manma\u00f1angane gui siuda yan y fangualuan sija. Ya manjanao sija para ujalie jafa ayo y guinin mafatinas.\n5:15 Ya manmato gui as Jesus, ya malie y guinin ninachatsaga ni anite, matatachong, ya minagagago, ya jatungo ayo y guaja ni linajyan; ya manmaa\u00f1ao.\n5:16 Ya mansinagane ni ayo sija y lumie; jafa taemano mato\u00f1a ayo y guinin guaja anite, yan y babue sija.\n5:17 Ya matutujon matayuyut g\u00fce na ujanao gui tano\u00f1ija.\n5:18 Ya anae jumalom g\u00fce gui batco, tinayuyut g\u00fce ni ayo y guinin guaja anite, para ujasija.\n5:19 Ya si Jesus ti pinetmite, lao ileg\u00f1a un g\u00fciya: Janao falag iyajamyo gui amigumo sija; ya unsangane sija na dangculon g\u00fcinaja y Se\u00f1ot finatinas\u00f1a nu jago, yan guaja minaase\u00f1a nu jago.\n5:20 Ya maposg\u00fce ya jatutujon sumangan\u00f1aejon guiya Decapolis na dangculon g\u00fcinaja y finatinas Jesus nu g\u00fciya: ya todo ninafanmanman.\n5:21 Ya anae malofan otro biaje si Jesus gui un batco para y otro banda, manda\u00f1a guiya g\u00fciya un dangculo na linajyan taotao; ya gaegue g\u00fce gui oriyan tase.\n5:22 Ya mato uno gui prinsipe sija gui sinagoga, y naan\u00f1a si Jairo; ya anae linie g\u00fce, podong gui adeng\u00f1a;\n5:23 Ya tinayuyut g\u00fce megae, ileg\u00f1a: Y jagajo cumequematae. Nije ya unpolo y canaemo gui jilo\u00f1a, para ujomlo, yan ul\u00e2l\u00e2.\n5:24 Ya jumanao yan Jesus, ya megae na taotao sija madalalag g\u00fce, ya machiguet g\u00fce.\n5:25 Ya un palaoan na numanajuyong j\u00e2g\u00e2 esta dose a\u00f1os.\n5:26 Ya japadese megae medico, ya jagasta todo y g\u00fcinaja\u00f1a, ya taya jaaprobecha; lao lumala adid,\n5:27 Ya anae jajungog ayosija na cumuentos si Jesus, jumalom gui entalo y taotao sija gui sumantate, ya japacha y magagu\u00f1a.\n5:28 Sa ileg\u00f1a: Yaguin jupacha y magagu\u00f1aja, uguajayo jinemlo.\n5:29 Ya enseguidas y menegae y j\u00e2g\u00e2\u00f1a umanglo, ya jasiente y tataotao\u00f1a na esta jomlo ni ayo na chetnot.\n5:30 Ya si Jesus enseguidas jatungo guiya g\u00fciyaja, na ninasi\u00f1a jumuyong guiya g\u00fciya, jabira g\u00fce guato gui linajyan taotao, ya ileg\u00f1a: Jaye pumacha y magagujo?\n5:31 Ya y disipulu\u00f1a sija ileg\u00f1ija nu g\u00fciya: Unlie y linayan taotao na machichiguetjao, ya ilegmo: Jaye pumachayo?\n5:32 Ya g\u00fciya manatan gui oriya para ulie y fumatinas este.\n5:33 Lao ayo nae y palaoan maa\u00f1ao ya manlaloalao, jatungo na iyag\u00fciya nae mafatinas, mato ya podong gui mena\u00f1a, ya jasangane todo ni magajet.\n5:34 Ya g\u00fciya ileg\u00f1a: Jagajo, y jinengguemo unninajomlo; janao yan minagof, ya unjomio ni chetnotmo.\n5:35 \u00b6 Y tiempo nae cumuecuentos g\u00fce, manmato guine y guima y prinsipen sinagoga ya ileg\u00f1ija: Y jagamo matae: para jafa di unnachachatsaga mas y Maestro?\n5:36 Lao si Jesus, anae jajungog este na sinangan, ileg\u00f1a ni prinsipen sinagoga: Chamo maaa\u00f1ao; jonggueja.\n5:37 Ya ti japetmite ni uno na ud\u00e1lalag g\u00fce, solo si Pedro, yan si Santiago, yan si Juan, chelun Santiago.\n5:38 Ya mato gui guima y prinsipen y sinagoga, ya jalie y atboroto yan y manatanges yan y manugung.\n5:39 Ya anae jumalom, ileg\u00f1a nu sija: Jafa na manatborotao jamyo, yan manatanges jamyo? Y patgon na palaoan ti matae, na mamaego.\n5:40 Ya mamofea g\u00fce. Lao g\u00fciya janafanjuyong todo, ya jacone y tata yan y nanan y patgon na palaoan, yan y mangachochong\u00f1a, ya manjalom anae gaegue y patgon na palaoan.\n5:41 Ya jamantiene y canae y patgon palaoan, ya ileg\u00f1a: Talitha cumi; cumequeileg\u00f1a: Patgon palaoan, jago jucuentutuse, cajulo.\n5:42 Ya enseguidas ayo na patgon palaoan cajulo, ya mamocat; sa saca\u00f1a y dose a\u00f1os. Ya enseguidas ninafanmanman ni gosdangculo na namanman.\n5:43 Lao g\u00fciya jagosencatga sija na taya ujanatungo: ya manago na umanachocho y patgon palaoan.\n6:1 YA anae jumanao g\u00fcije mato gui tano\u00f1a; ya y disipulu\u00f1a sija madalalag g\u00fce.\n6:2 Ya anae mato y s\u00e1bado na jaane, jatutujon mamanag\u00fce gui sinagoga; ya megae ni jumungog g\u00fce ninafanmanman, ya ileg\u00f1ija: Mano nae guaja este taotao este sija na g\u00fcinaja? Yan jafa este na tiningo y esta manae g\u00fce? ya jaftaemano este sija na nin\u00e1manman ni mafatinas ni canae\u00f1a?\n6:3 Ada ti este y catpintero, lajin Maria, chelun Santiago, yan si Joses, yan si Juda, yan si Simon? Ada ti manjijita yan y ma\u00f1elu\u00f1a famalaoan g\u00fcine? Ya maninefefende nu g\u00fciya.\n6:4 Lao si Jesus ileg\u00f1a nu sija: Taya profeta sin onra\u00f1a lao y tano\u00f1aja, yan entre y parientes\u00f1a sija, ya y guima\u00f1a.\n6:5 Ya ti si\u00f1a jafatinas g\u00fcije jafa na n\u00e1manman, na japolo y canae\u00f1a gui jilo palo manmalango sija, ya janajomlo.\n6:6 Ya g\u00fciya nin\u00e1manman ni ti manmanjongguen\u00f1ija; ya malilicue gui y sengsong sija mananag\u00fce.\n6:7 \u00b6 Ya jaagang y dose sija, y jatutujon tumago dos en dos, ya janae ninasi\u00f1a\u00f1ija gui jilo man\u00e1placha na espiritu sija;\n6:8 Ya jatago sija na cha\u00f1ija fanma\u00f1u\u00f1ule ni jafa para y chalan, na un basto\u00f1ija; ni costat, ni pan, ni salape gui betsan\u00f1ija;\n6:9 Lao ufanchenancleta; ya munga manminagago dos na magago.\n6:10 Ya ileg\u00f1a nu sija: Manoja na guma nae manjalom jamyo; fa\u00f1aga g\u00fcije, asta gui manjanao jamyo g\u00fcije na lugat.\n6:11 Ya todo ayo sija y ti rumesibe jamyo, ni ti maninecungog jamyo, fanjanao g\u00fcije, sacude y petbos ni gaegue gui papa adengmiyo para testimonio contra sija. Magajet jusangane jamyo, na mas sungunon na castigon Sodoma, yan Gomora gui jaanin y sentensia, qui ayo na sidua.\n6:12 Ya manmapos jasetmon na y taotao sija ufanma\u00f1otsot.\n6:13 Ya jayute juyong megae na anite sija, ya japapalae la\u00f1a megae na manmalango sija, ya janafanjomlo.\n6:14 \u00b6 Ya jajungog y ray Herodes y faman Jesus (sa afamao y naan\u00f1a), ya ileg\u00f1a: Si Juan Bautista cajulo guine y manmatae sija; ya pot este mangaeninasi\u00f1a na chocho, esta fumatinas nu g\u00fciya.\n6:15 Palo ileg\u00f1ija: Si Elias. Y palo ileg\u00f1ija: Profeta g\u00fce, pat uno gui profeta sija.\n6:16 Ya anae jajungog si Herodes, ileg\u00f1a: Este si Juan ni guine judeg\u00fceya: g\u00fciya cajulo guine y manmatae sija.\n6:17 Sa g\u00fciyaja si Herodes manago na umamantiene si Juan, ya umapreso gui catset pot si Herodias, asaguan y chelu\u00f1a as Felipe, sa jacone para asagua\u00f1a.\n6:18 Sa si Juan ileg\u00f1a as Herodes: Ti cabales na uncone y asaguan y chelumo.\n6:19 Ya pot este si Herodias uninaguaguat contra g\u00fciya, ya jadesesao na upuno, lao ti janasi\u00f1a.\n6:20 Sa si Herodes maa\u00f1ao as Juan, jatungo na tunas yan Santos na taotao ya jaguefadaje. Ya anae jajungog, gosbumuebuente gui corason\u00f1a; ya jaecungogjao ni minagof\u00f1a.\n6:21 Ya anae mato un jaane na si Herodes gumupot ni mafa\u00f1agu\u00f1a, ya mamatinas sena para y prinsipe\u00f1a sija yan y capitan sija, yan y manmagas sija guiya Galilea;\n6:22 Ya jumalom y jagan Herodias, ya bumaela, ya janamagof si Herodes, yan ayo sija y mangachochong\u00f1a gui lamasa; ya y ray ileg\u00f1a ni patgon na palaoan: Gagaoyo ni malagomo, ya junaejao.\n6:23 Ya manjula: Todo y ungagaoyo, junae asta lamita gui raenoco.\n6:24 Ya mapos g\u00fce, ya ileg\u00f1a as nana\u00f1a: Jafa jugagao? Si nana\u00f1a ileg\u00f1a: Y ilun Juan Bautista.\n6:25 Ayo nae jumalom enseguidas gui ray ya jagagao, ileg\u00f1a: Malagoyo pago na unnaeyo gui un plato ni ilun Juan Bautista.\n6:26 Ya y ray ninagostriste; lao pot y juramento\u00f1a, yan ayo sija y mangachong\u00f1a gui lamasa, ti malago japune.\n6:27 Ya enseguidas y ray manago uno gui guatdia, jatago na ujanao ya uchinilie ni ilu\u00f1a. Ya mapos, ya jadeg\u00fceya gui jalom catset.\n6:28 Ya machule guato y ilu\u00f1a gui un plato, ya manae y patgon palaoan, ya y patgon palaoan janae y nana\u00f1a.\n6:29 Ya anae majungog ni disipulu\u00f1a sija, manmato, ya machule y tataotao\u00f1a, ya mapolo gui un naftan.\n6:30 \u00b6 Ya y apostoles manda\u00f1a gui as Jesus, ya masangane g\u00fce todo ni checho\u00f1ija, yan y finanag\u00fcen\u00f1ija.\n6:31 Ya g\u00fciya ileg\u00f1a su sija: Maela jamyo apatte gui un lugat desierto, ya infandescansa didide; sa megae sija manjajanao, yan manmafato, ya manaelugat ma\u00f1ocho.\n6:32 Ya manmapos gui un batco gui un lugat desierto apatte.\n6:33 Ya y lumie sija na manjanao megae, ya matungo g\u00fce; ya manmalalago para ayo megae manmamomocat gui siuda sija, ya manmato antes qui sija, ya manda\u00f1a guiya g\u00fciya.\n6:34 Ya anae jumuyong si Jesus jalie y linajyan taotao ya ninamaase nu sija, sa manparejoja yan y quinilo sija ni taya pastot\u00f1ija; ya jatutujon fumanag\u00fce megae na g\u00fcinaja.\n6:35 Ya anae estaba pupuenge, y disipulu\u00f1a sija manmato guiya g\u00fciya, ileg\u00f1ija: Y lugat desierto este, ya esta pupuenge.\n6:36 Najanao sija para ufanmalag y campo yan y sengsong sija gui oriya, ya ujafanmamajan pan para sija.\n6:37 Lao manope, ileg\u00f1a nu sija: Nae sija ma\u00f1ija. Ya sija ileg\u00f1ija nu g\u00fciya: Infanjanao ya infanmamajan pan pot dosientos na denario, para innae sija na\u00f1ija?\n6:38 Ya g\u00fciya ileg\u00f1a nu sija: Cuanto na pan guaja jamyo? Janao, ya inlie. Ya anae jatungo sija, ileg\u00f1ija: Sinco, yan dos na g\u00fcijan.\n6:39 Ya jatago, sija na ujanafanmatachong todos pot mangachong gui jilo y manbetde na chaguan.\n6:40 Ya manmatachong pot mangachong, siento yan siento, yan sincuenta yan sincuenta.\n6:41 Ya jachule y sinco na pan yan y dos na g\u00fcijan, ya manatan julo gui langet, ya jabendise, ya jaipe y pan sija; ya janae y disipulu\u00f1a sija para ujaplanta gui sanmena\u00f1ija; ya y dos na g\u00fciyan manmapatte todos.\n6:42 Ya ma\u00f1ocho todos, ya manjaspog.\n6:43 Ya jajatsa y pedaso sija dose na canastra manbula; yan pedaso y g\u00fcijan sija locue.\n6:44 Ya ayo sija y ma\u00f1ocho ni pan, sinco mit na lalaje sija.\n6:45 \u00b6 Ya enseguidas jaapura y disipulu\u00f1a sija na ufangajulo gui batco, ya ufanjanao gui mena\u00f1a gui otro banda guiya Betsaida, mientras janajanao y linajyan taotao.\n6:46 Ya despues, anae munjayan janajanao sija, mapos malag y egso para ufanaetae.\n6:47 Ya anae esta pupuenge, y batco estaba gui talo gui tase, ya g\u00fciyaja namaesa gui tano.\n6:48 Ya jalie sija na manmachochocho mapot manmam\u00f3mogsae, sa y manglo contrario para sija; ya jijot gui mina cuatro na guatdia gui puenge, mato g\u00fce guiya sija, mam\u00f3mocat gui jilo tase; ya malago na ufalofan gui oriya\u00f1ija.\n6:49 Ya anae malie nu sija, na mam\u00f3mocat gui jilo tase, jinaso\u00f1ija na pantasma, ya managang;\n6:50 Sa todos lumie g\u00fce, ya ninafa\u00f1atsaga. Lao enseguidas jacuentuse sija, ya ileg\u00f1a nu sija: Angoco jamyo, guajoyo; chamiyo fanmaaa\u00f1ao.\n6:51 Ya cajulo guiya sija gui batco, ya y manglo mapos: ya sija ninafangosmanman;\n6:52 Sa sija ti jatungo y milagron y pan sija; sa y corason\u00f1ija estaba mangosmajetog.\n6:53 \u00b6 Ya anae manmalofan para y otro banda, manmato gui tano Genesaret, ya manmalag y puetto.\n6:54 Ya anae manjuyong sija gui batco, enseguidas matungo g\u00fce.\n6:55 Ya manmalago gui oriyan todo ayo na tano, ya matutujon ma\u00f1ule gui todo y patte, manmalango sija gui cama, mano nae majungog na estaba g\u00fcije.\n6:56 Ya manuja nae jumalom, songsong, pat suida, pat fangualuan, mapolo papa y malango sija gui chalan, y matayuyut g\u00fce na upacha y canton y magagu\u00f1a, ya todo ayo sija y japacha, manjomlo.\n7:1 YA manda\u00f1a guiya g\u00fciya y Fariseo sija, yan palo gui escriba sija ni manmato guine Jerusalem,\n7:2 Ya malie palo gui disipulu\u00f1a na ma\u00f1ochocho pan yan \u00e1placha na canae, ni comequeileg\u00f1a na pot ti jafagase.\n7:3 Sa y Fariseo sija, yan toda y Judio sija, jaadadaje y tradision manamco sija, yaguin megae nae ti jafagase y canae\u00f1ija, ti ufa\u00f1ocho.\n7:4 Ya anae manmato guine y metcado, yaguin ti jafagase sija, ti ufa\u00f1ocho; yan megae sija na g\u00fcinaja rinesibe\u00f1ija para ujaadaje, parejoja yan mafagase y copa sija, yan y jara sija, yan y bason coble sija.\n7:5 Ya mafaesen ni Fariseo sija yan y escriba sija: Jafa y disipulumo sija na ti manmam\u00f3mocat taemano y tradision manamco sija; ma\u00f1ochochoja pan yan aplacha y canae\u00f1ija?\n7:6 Ya ileg\u00f1a nu sija: Hipocrita jamyo; mauleg sinangan\u00f1a si Isaias, ni y esta matugue: Este sija na taotao y labios\u00f1ija nae maonrayo, lao y corason\u00f1ija chago guiya guajo.\n7:7 Lao taebale jaadorayo, manmamananag\u00fce ni finanag\u00fce ni tinago taotao sija.\n7:8 Sa inpelo jamyo y tinago Yuus, ya mantietiene fitme y tradision taotao sija: (ni y mafagase y jara sija, yan y copa sija, yan infatinas megae sija na g\u00fcinaja parejo yan este.)\n7:9 Ya ileg\u00f1a nu sija: Magajet jamyo yumute y tinago Yuus para inadaje y tradisionmiyo.\n7:10 Sa si Moises ileg\u00f1a: Onra si tatamo yan si nanamo; ya y mumatdise y tata pat y nana, seguro na umatae.\n7:11 Lao jamyo ilegmiyo: Yaguin y taotao ileg\u00f1a ni tata\u00f1a pat nana\u00f1a: Y Cotban (cumequeileg\u00f1a y ninae) na jago umaprobecha pot guajo, g\u00fciya sumaga libre.\n7:12 Ya inpelo g\u00fce na ufatinas taya para si tata\u00f1a pat si nana\u00f1a;\n7:13 Inrechasa y sinangan Yuus ni ninaenmiyo na tradision; yan megae sija na g\u00fcinaja finatinasmiyo parejo yan este.\n7:14 \u00b6 Ya jaagang talo guiya g\u00fciya todo y linajyan taotao ya ileg\u00f1a: Ecungog jamyo todos, ya intingo.\n7:15 Taya gui sumanjiyong gui taotao ni y janajalom, si\u00f1a numataelaye, lao y janajujuyong gui jinalom\u00f1a, ayo sija munatataelaye y taotao\n7:16 (Yaguin guaja gaetalanga para ufanjungog, uecungog)\n7:17 Ya anae jumalom gui guima, jadingo y linajyan taotao, y disipulu\u00f1a sija mafaesen g\u00fce ni acomparasion.\n7:18 Ya ileg\u00f1a nu sija: Taeg\u00fcenaja jamyo locue manaetiningo? Ti intingo na todo y guine jiyong ni jumajalom y taotao ti si\u00f1a ninataelaye?\n7:19 Sa ti jumajalom gui corason\u00f1a na y tiyan\u00f1a ya malolofan gui secreto; taeg\u00fcenao janagasgas todo y nengcano.\n7:20 Yan ileg\u00f1a: Y jumujuyong gui taotao, ayo munatataelaye y taotao.\n7:21 Sa y gui jinalom\u00f1a gui corason y taotao sija nae, manjujuyong y manaelaye na jinaso sija, y manadulterio, y man\u00e1bale yan y manpegno,\n7:22 Y ma\u00f1aque sija, y manlatga, y manaelaye, y dinague, y in\u00e1bale, y taelaye na atadog, y chinatfino contra si Yuus, y sobetbio, y bababa:\n7:23 Todo este sija na tinaelaye, manguine jalom ya janatataelaye y taotao.\n7:24 \u00b6 Ya cajulo g\u00fcije, mapos para y oriyan Tiro yan Sidon; ya jumalom gui guima, malago\u00f1a na taya utiningo; lao ti si\u00f1a unatog.\n7:25 Sa jajungog masasangan g\u00fce un palaoan na y diquique na jaga\u00f1a, guaja un \u00e1placha na espiritu, mato ya jatomba g\u00fce gui adeng\u00f1a:\n7:26 Ya y palaoan Griega, gui tano Sirofenisa, y tinayuyut g\u00fce na uyute juyong gui jaga\u00f1a y anite.\n7:27 Lao ileg\u00f1a nu guiya: Polo finena ya ufanjaspog y famaguon sija; sa ti mauleg machule y pan y famaguon, ya ufanmayotte y galago sija.\n7:28 Ya manope y palaoan, ileg\u00f1a: Junggan, Se\u00f1ot; lao y galago sija, gui papa lamasa, jacacanoja y andesmoronan y famaguon sija.\n7:29 Ayo nae ileg\u00f1a ni palaoan: Pot este na sinangan, janao y anite jumanao gui jagamo.\n7:30 Ya anae jumanao para iyasija, jasoda na y jaga\u00f1a umaason gui jilo cama, ya y anite esta jumanao.\n7:31 \u00b6 Ya tumalo jumanao gui oriyan Tiro yan malofan guiya Sidon, ya mato gui tasen Galilea; ya malofan gui entalo y oriyan Decapolis.\n7:32 Ya maconie g\u00fce un tanga ya udo, ya matayuyut g\u00fce na upolo y canae\u00f1a gui jilo\u00f1a.\n7:33 Ya janasajnge g\u00fce gui linajyan taotao, ya japolo y calolot\u00f1a gui talangan y tanga, ya tumola ya japacha y jila\u00f1a;\n7:34 Ya jaatan julo y langet sumospiros, ya ileg\u00f1a: Efatha, cumequeileg\u00f1a, mababa!\n7:35 Ya mababa y talanga\u00f1a; ya mapula y gumogode y jila\u00f1a, ya cumuentos mauleg.\n7:36 Ya jaencatga sija, na cha\u00f1ija sumangangane ni jaye; lao mientras mas jaencatga, mas manamamto;\n7:37 Ya ninafangosmanman, ileg\u00f1ija: Mauleg finatinas\u00f1a todo: janafanmanjungog y mananga, ya y manudo janafanguentos.\n8:1 AYO sija na jaane, anae guaja talo un dangculon linajyan taotao ya taya jafa na\u00f1ija, si Jesus jaagang y disipulu\u00f1a sija, ya ileg\u00f1a nu sija:\n8:2 Maase yo ni linajyan taotao sa esta tres jaane na manjame; ya taya jafa na\u00f1ija.\n8:3 Yaguin junafanjanao sin ma\u00f1ocho para iyasija, ufanlalango gui chalan; sa palo guiya sija manmato guine y chago.\n8:4 Ya y disipulu\u00f1a sija, maope g\u00fce: Guine mano nae si\u00f1a manafanjaspog este taotao sija pan, g\u00fcine gui desierto?\n8:5 Guiya jafaesen sija: Cuanto na pan guaja jamyo? Yleg\u00f1ija, siete.\n8:6 Ayo nae jatago y linajyan taotao na ufanason gui jilo oda; ya jachule y siete na pan, ya janae Yuus maase ya jaipe, ya janae y disipulu\u00f1a sija para ujaplanta gui menan\u00f1ija; ya sija japlanta gui menan y linajyan taotao.\n8:7 Yan guaja locue palo mandiquique na g\u00fcijan sija; ya anae jabendise, jatago na ujaplanta locue gui menan\u00f1ija.\n8:8 Pues ma\u00f1ocho, ya manjaspog; ya majatsa y pidaso sija ni sebbla, siete canastra.\n8:9 Ya y ma\u00f1ocho sija, buente cuatro mit; ya jadespide.\n8:10 Ya enseguidas jumalom gui batco yan y disipulu\u00f1a sija, ya manmato gui oriyan Dalmanuta.\n8:11 \u00b6 Ya manmato y Fariseo sija, ya matutujon manafaesen yan g\u00fciya, manmanaliligao guiya g\u00fciya un se\u00f1at guine y langet, matietienta g\u00fce.\n8:12 Ya sumospiros gostadong gui espiritu\u00f1a, ya ileg\u00f1a: Jafa na mangagagao se\u00f1at este na generasion? Magajet jusangane jamyo, na ti umanae se\u00f1at este na generasion.\n8:13 Ya jadingo sija, ya jumalom talo gui batco, ya mapos para y otro banda.\n8:14 \u00b6 Ya manmalefa ti manma\u00f1ule pan, ya taya na unoja na pan gui batco.\n8:15 Ya jaencatga sija, ileg\u00f1a: Atan, adaje jamyo ni lebaduran y Fariseo sija, yan y lebaduran Herodes.\n8:16 Ya manafaesen gui entalo sija, ileg\u00f1a: Pot y taya panta.\n8:17 Ya anae jatungo si Jesus ileg\u00f1a nu sija: Jafa manafaesen gui entalomiyo pot y taya panmiyo? Ti injaso ni ti intingo? Majejetogja trabia y corasonmiyo?\n8:18 Guaja atadogmiyo, lao ti manmanlilie jamyo? Guaja talanganmiyo, ya ti manmanjujungogja jamyo? Ya ti injajasoja?\n8:19 Anae juipe y sinco na pan sija entalo y sinco mit, cuanto na canastra injatsa bula ni pidaso sija ni sebbla? Yleg\u00f1ija: Dose.\n8:20 Ya anae y siete na pan sija entalo y cuatro mit, cuanto na canastra injatsa bula ni pidaso sija ni sebbla? Yleg\u00f1ija: Siete.\n8:21 G\u00fciya ileg\u00f1a nu sija: Ti intingo asta pago?\n8:22 \u00b6 Ya mato guiya Betsaida; ya maconie g\u00fce guato un bachet, ya matayuyut g\u00fce na upacha g\u00fce.\n8:23 Ayo nae jamantiene y canae y bachet, ya jacone asta y jiyong y siuda; ya anae jatolae y atadog\u00f1a, japolo y canae\u00f1a gui jilo\u00f1a, ya jafaesen: Unlie jafa?\n8:24 Ya g\u00fciya manatan ya, ileg\u00f1a: Julie taotao sija; lao julie sija calang trongconjayo na manmam\u00f3mocat.\n8:25 Entonses japolo ya canae\u00f1a talo gui atadog\u00f1a ya jaguefatan; ya jomlo, ya manlie claro todo.\n8:26 Ya jatago para iyasija, ileg\u00f1a: Chamo jumajalom gui sengsong (ni usangane jaye gui siuda).\n8:27 \u00b6 Ya mapos si Jesus yan y disipulu\u00f1a sija gui sensong sija y Cesarean Felipe: ya y chalan jafaesen y disipulu\u00f1a sija, ileg\u00f1a nu sija: Jaye ileg\u00f1ija y taotao sija nu guajo?\n8:28 Ya sija masangane g\u00fce, ileg\u00f1ija: Si Juan Bautista; y palo ileg\u00f1ija: Si Elias; y palo ileg\u00f1ija: Uno gui profeta sija.\n8:29 Ayo nae jafaesen sija: Ya jamyo, jaye ilegmiyo nu guajo? Inepe as Pedro ileg\u00f1a: Jago si Cristo jao.\n8:30 Ya jaencatga sija na cha\u00f1ija sumangangane ni jaye pot g\u00fciya.\n8:31 Ya jatutujon fumanag\u00fce sija na y Lajin taotao janesesita upadese megae, ya umarechasa ni manamco sija, yan y prinsipen y mamale sija, yan y escriba sija, ya umapuno; ya ucajulo talo gui mina tres na jaane.\n8:32 Ya claroja nae jasangan este na sinangan. Ayo nae si Pedro quinene g\u00fce, ya tinitujon g\u00fce rineprende.\n8:33 Lao anae jabira g\u00fce, ya jaatan y disipulu\u00f1a sija, jalalatde si Pedro ileg\u00f1a: Suja guiya guajo, Satanas; sa ti unadadaje y g\u00fcinaja sija ni para si Yuus, na y g\u00fcinajan taotao sija.\n8:34 Ya jaagang y linajyan taotao yan y disipulu\u00f1a sija, ya ileg\u00f1a nu sija; Jaye y malago tumatiye yo, upune maesa g\u00fce, ya uchule y quiluus\u00f1a ya udalalagyo.\n8:35 Sa y malago sumatba y lin\u00e2l\u00e2\u00f1a, ufinalingaeguan; lao y finalingaeguan ni lin\u00e2l\u00e2\u00f1a pot guajo, yan y ibangelio, este usatba y lin\u00e2l\u00e2\u00f1a.\n8:36 Sa, jafa uaprobecha y taotao, yaguin jagana todo y tano, ya finalingaeguan ni lin\u00e2l\u00e2\u00f1a?\n8:37 Pat jafa na apas ufannae y taotao pot y lin\u00e2l\u00e2\u00f1a?\n8:38 Sa y mamajlao nu guajo yan y sinaganjo, gui sanmenan este y generasion \u00e1bale yan gaeisao, unimamajlaog\u00fce locue ni Lajin taotao y tiempo nae mato gui minalag y Tata\u00f1a, yan y ma\u00f1antos na angjet\u00f1a sija.\n9:1 YA ileg\u00f1a nu sija: Magajet jusangane jamyo, na guaja palo sija ni mangaegue g\u00fcine na ti ujaguaeya finatae, asta que jalie y raenon Yuus na mato yan ninasi\u00f1a.\n9:2 \u00b6 Anae esta malofan y sais na jaane, si Jesus jacone si Pedro, yan si Santiago, yan si Juan, janafa\u00f1ajnge sijaja gui un taquilo na ogso; ya jaago g\u00fce gui menan\u00f1ija.\n9:3 Ya y magagu\u00f1a manma\u00f1ila, gosapaca calang niebe, taya ni un fafagas gui tano si\u00f1a munaapaca taeg\u00fcine.\n9:4 Ya manalie na mato guiya g\u00fciya si Elias yan Moises, na manguecuentos yan si Jesus.\n9:5 Ayo nae manope si Pedro, ileg\u00f1a as Jesus: Maestro mauleg utafa\u00f1agajit g\u00fcine, ya tafanmamatinas tres tabetn\u00e1culo; para jago y uno, para si Moises y otro, yan para si Elias y otro.\n9:6 Si ti jatungo jafa usangan, sa estaba mangosmaa\u00f1ao.\n9:7 Ya mato un mapagajes y manjineme sija, ya un inagang gui mapagajes, ileg\u00f1a: Este y g\u00fcinaeyaco na Lajijo, jingog g\u00fce.\n9:8 Ya derepente jaatan gui oriya\u00f1ija, ti manmanlie ni jaye, na si Jesusja yan sija.\n9:9 Ya anae manunog sija guine y egso, jaencatga sija na cha\u00f1ija sumangangane ni jaye ni linii\u00f1ija, asta que y Lajin taotao esta cajulo guine entalo y manmatae.\n9:10 Ya sija jaadaje ayo na sinangan guiya sijaja, manafaesen gui entalo\u00f1ija: Jafa ayo y cajulo guine entalo y manmatae cumequeileg\u00f1a.\n9:11 Ya mafaesen g\u00fce, ileg\u00f1ija: Y escriba sija ileg\u00f1ija, si Elias nesesita ufato finenana.\n9:12 G\u00fciya manope ileg\u00f1a nu sija: Si Elias magajet nesesita ufato finenana, ya jafatinas talo todo y g\u00fcinaja: Jafa esta matugue gui Lajin taotao na upadese megae ya manataya guaelaye\u00f1a?\n9:13 Lao jusangane jamyo na si Elias esta mato ya esta mafatinas guiya g\u00fciya todo y malago\u00f1ija, taeg\u00fcine esta matugue nu g\u00fciya.\n9:14 \u00b6 Ya anae mato gui disipulu\u00f1a sija, jalie un dangculon linajyan taotao gui oriya\u00f1ija, yan y escriba sija ni manafaesen yan sija.\n9:15 Ya enseguidas todo y linajyan taotao, anae malie g\u00fce, ninafangosmanman, ya manmalago guato guiya g\u00fciya ya masaluda g\u00fce.\n9:16 Ya jafaesen sija, ileg\u00f1a! Jafana manafaesen jamyo yan sija?\n9:17 Ya manope uno gui linajyan taotao, ileg\u00f1a: Maestro juconie jao mague na lajijo, na guaja un espiritun udo;\n9:18 Ya manoja nae quinene g\u00fce, japedadasos; ya b\u00f3boan, ya janachechegcheg y nifen\u00f1a, ya ninayafae; ya jusangane y disipulumo sija, na ujayute juyong, lao ti manasi\u00f1a.\n9:19 Manope g\u00fce, ileg\u00f1a nu sija: O generasion ni ti manjonggue! asta ngaean nae utafanjijitaja? asta ngaean nae jususungonja jamyo? maelayofan mague.\n9:20 Ya maconie guato guiya g\u00fciya; ya anae jalie, enseguidas y espiritu manl\u00e1laolao g\u00fce; ya g\u00fciya podong gui jilo oda gumagalileg ya b\u00f3boan.\n9:21 Ya jafaesen y tata\u00f1a; cuanto tiempo esta desde qui mato este guiya g\u00fciya? G\u00fciya ileg\u00f1a: Desde qui diquique:\n9:22 Ya megae na biaje nae yinite gui jalom guafe, yan y jalom janom para upinino; lao yaguin si\u00f1a jao ayudajam, gaemaase nu jame.\n9:23 Si Jesus, ileg\u00f1a nu g\u00fciya: Yaguin si\u00f1a jao, todo si\u00f1a para y manjonggue.\n9:24 Enseguidas y tatan y patgon, jaagang yan y lago\u00f1a, ya eleg\u00f1a: Jujonggue; ayuda y taejinenggueco.\n9:25 Ya anae si Jesus jalie na manmalalago y linajyan taotao, jalalatde y \u00e1placha na espiritu, ileg\u00f1a: Espiritun udo yan tanga, guajo jao tumago, juyong guiya g\u00fciya, ya chamo jumajalom talo guiya g\u00fciya.\n9:26 Ayo nae y espiritu umagang, ya manlalaolao g\u00fce megae, ya jumuyong; ya g\u00fciya sumaga calang matae, enaomina megae ileg\u00f1ija, na esta matae.\n9:27 Lao si Jesus jamantiene canae\u00f1a, ya jinatsa g\u00fce; ya cajulo.\n9:28 Ya anae jumalom g\u00fce gui jalom guma, y disipulu\u00f1a sija mafaesen g\u00fce en secreto, ileg\u00f1ija: Jafajam na ti innasi\u00f1a yumute juyong?\n9:29 Ya ileg\u00f1a nu sija: Este na rasan anite sija, taya si\u00f1a munajanao, na y tinayuyut.\n9:30 \u00b6 Ya manmapos g\u00fcije, manmalofan inanaco Galilea; ya ti malago na guaja utiningo g\u00fce.\n9:31 Sa jafanag\u00fce y disipulu\u00f1a sija ya ileg\u00f1a nu sija: Y Lajin taotao umaentrega gui canae taotao sija, ya umapuno; lao yaguin este matae, ucajulo talo despues di tres na jaane.\n9:32 Lao sija ti jatungo este na sinangan, ya manmaa\u00f1ao na ujafaesen g\u00fce.\n9:33 \u00b6 Ya mato guiya Capernaum; ya anae mato gui guima, jafaesen sija: Jafa jamyo na manafaesen entalomiyoja gui chalan?\n9:34 Lao sija manmamatquiquiloja; sa guine manafaesen gui chalan uno y otro, jaye guiya sija udangculo.\n9:35 Ayo nae manmatachong, ya jaagang y dose ya ileg\u00f1a nu sija: Y malago fuminenana, uuttimon gui tododos, yan utentagon tododos.\n9:36 Ya jacone un patgon, ya japolo gui entalo\u00f1ija; ya jajog\u00fce gui canae\u00f1a, ya ileg\u00f1a nu sija:\n9:37 Y rumesibe pot y naanjo uno ni manaeg\u00fcine na famaguon, jaresibe yo, ya y rumesibe yo, ti guajo jaresibe, na y tumago yo.\n9:38 Si Juan, ileg\u00f1a nu g\u00fciya: Maestro, inlie uno na manyute juyong anite sija pot y naanmo, ya inchema, sa ti jadadalalagjit.\n9:39 Ya si Jesus ileg\u00f1a: Chamiyo chumochoma; sa ni uno ni fumatinas milagro pot y naanjo, si\u00f1a gusisija jasangan taelaye guiya guajo.\n9:40 Sa ayo y ti contra jita, manjijitaja.\n9:41 Sa jayeja y numae jamyo un copan janom, sa iyon Cristo jamyo, magajet jusangane jamyo, na sen ti ufalingo y apas\u00f1a.\n9:42 Ya jayeja y ninaquepodong uno guine sija gui mandiquique ni jumonggue yo; mauleg para g\u00fciya, umagode gui agaga\u00f1a un acho atutong, ya umayute gui jalom tase.\n9:43 Lao yaguin y canaemo ninaquepodong jao, utut; mauleg\u00f1a na unjalom gui lin\u00e2l\u00e2 mangco, qui uguaja dos canaemo, ya unjanao para sasalaguan, y guafe ni ti si\u00f1a mapuno.\n9:44 (Anae y ilo\u00f1ija ti ufanmatae; ya y guafe taejinecog nae umapuno.)\n9:45 Ya yaguin y adengmo ninaquepodong jao, utut: mauleg\u00f1a na unjalom gui lin\u00e2l\u00e2 cojo, qui uguaja dos adengmo ya unyenite para sasalaguan;\n9:46 (Anae y ilo\u00f1ija ti ufanmatae, ya y guafe taejinecog nae umapuno.)\n9:47 Ya yaguin y atadogmo ninaquepodong jao, lagnos; mauleg\u00f1a na unjalom gui raenon Yuus, yan un atadogja, qui uguaja dos atadogmo ya unyenite para sasalaguan.\n9:48 (Anae y ilo\u00f1ija ti ufanmatae, ya y guafe taejinecog na umapuno.)\n9:49 Sa todos ufanmaasne yan guafe; (ya todo y inefrese ufanmaasne yan asiga).\n9:50 Mauleg y asiga; lao yaguin y asiga malingo y maasen\u00f1a, jaftaemano numamaasen? Guaja asiganmiyo guiya jamyoja; yan guaja pas gui entalomiyo.\n10:1 YA cajulo g\u00fcije, mato qui oriyan Judea, gui otro bandan Jordan; ya manalo y linajyan taotao manda\u00f1a guiya g\u00fciya; ya jatalo fumanag\u00fce, taeg\u00fcije, y costumbre\u00f1a.\n10:2 Ya manmato y Fariseo sija guiya g\u00fciya, ya mafaesen g\u00fce cao tunas y laje uyute y asagua\u00f1a? matietienta g\u00fce.\n10:3 Lao g\u00fciya manope, ileg\u00f1a nu sija: Jafa mantinago jamyo as Moises?\n10:4 Ya sija ileg\u00f1ija: Si Moises japetmite na umatugue papet inapattan umasagua ya uyute.\n10:5 Ya si Jesus manope, ileg\u00f1a nu sija: Pot y majetog corasonmiyo na mantiniguie jamyo ni este na tinago.\n10:6 Lao desde tutujon y jiniyong, Laje yan palaoan fumatinas sija Yuus.\n10:7 Pot este na rason y laje udingo si tata\u00f1a yan si nana\u00f1a, ya uda\u00f1a yan y asagua\u00f1a.\n10:8 Ya y este y dos, umana unoja na catne; ya esta ti udos mas, na unoja na catne.\n10:9 Jafaja si Yuus munada\u00f1a, y taotao ti unadesapatta.\n10:10 Ya y jalom guma, y disipulo sija mafaesen g\u00fce talo ni ayoja.\n10:11 Ya ileg\u00f1a nu sija: Jayeja y yumute y asagua\u00f1a, ya umasagua yan otro, jafatinas y adulterio contra y palaoan.\n10:12 Ya yaguin y palaoan yumute y asagua\u00f1a, ya umasagua yan otro, jafatinas adulterio.\n10:13 \u00b6 Ya machulie guato guiya g\u00fciya diquique na famaguon para upacha: ya y disipulo sija jalalatde ayo sija.\n10:14 Ya anae jalie si Jesus, sen ti ninamagof ya ileg\u00f1a nu sija: Polo y diquique na famaguon ya ufanmamaela guiya guajo; chamiyo chumochoma; sa iyon este sija y raenon Yuus.\n10:15 Magajet jusangane jamyo, na y ti rumesibe y raenon Yuus calang un patgon, ti ujalom gui jalom ayo.\n10:16 Ya jajog\u00fce sija ya japolo y canae\u00f1a gui jilo\u00f1ija, ya jabendise sija.\n10:17 \u00b6 Ya anae jumanao gui chalan, mato uno malalago ya dinimuye g\u00fce gui mena\u00f1a ya finaesen g\u00fce: Mauleg na Maestro, jafa jufatinas para juereda y taejinecog na lin\u00e2l\u00e2?\n10:18 Si Jesus ileg\u00f1a nu g\u00fciya: Jafa na ilegmo nu guajo mauleg? Taya mauleg, na unoja, si Yuus.\n10:19 Untungo y tinago sija: Chamofamumuno; chamo fumatinas adulterio; chamo fa\u00f1a\u00f1aque; chamo sumangan\u00f1aejon y ti magajet na testimonio; chamo chumu y ti iyomo; onra si tatamo yan si nanamo.\n10:20 G\u00fciya manope ileg\u00f1a: Maestro, todo este juadadaje desde nae patgonyo.\n10:21 Ayo nae matan g\u00fce as Jesus, g\u00fcinaeya g\u00fce, ya ileg\u00f1a nu g\u00fciya: Fatta jao uno: Janao ya ufajan todo y g\u00fcinajamo, ya unnae y mamobble sija, ya uguaja g\u00fcinajamo gui langet: ya maela, ya undalalag yo.\n10:22 Lao g\u00fciya ninamatolaeca y mata\u00f1a ni este na sinangan ya mapos ninatriste; sa guaja megae g\u00fcinaja\u00f1a.\n10:23 Ayo nae si Jesus manatan gui oriya, ya ileg\u00f1a ni disipulu\u00f1a sija: Na minapot manjalom gui raenon Yuus ayo sija y mangaeg\u00fcinaja!\n10:24 Ya y disipulo sija ninafanmanman ni sinangan\u00f1a: Lao si Jesus manope ileg\u00f1a talo: Famaguon, na minapot manjalom, gui raenon Yuus y umangongoco sija gui g\u00fcinaja!\n10:25 Mas guse malofan un cameyo gui matan un jaguja, qui y gaeg\u00fcinaja ujalom gui raenon Yuus.\n10:26 Ya sija ninagos fanmanmanman, ya ileg\u00f1ija nu g\u00fciya: Ayo nae, jaye si\u00f1a satbo?\n10:27 Ayo nae si Jesus jaatan sija, ya ileg\u00f1a: Para y taotao sija, este ti si\u00f1a, lao para si Yuus ti taeg\u00fcine; sa para si Yuus todo ninasi\u00f1a.\n10:28 Ayonae si Pedro jatutujon ileg\u00f1a nu g\u00fciya: Estag\u00fcejamja na indingo todo, ya indadalalagjao.\n10:29 Inepe as Jesus ileg\u00f1a. Magajet jusanganejao: Taya ni un taotao ni y dumingo guma\u00f1a, pat ma\u00f1elu\u00f1a lalaje, pat ma\u00f1elu\u00f1a famalaoan, pat nana\u00f1a, pat tata\u00f1a, pat famaguon\u00f1a, pat fangualua\u00f1a, pot guajo, yan y ibangelio;\n10:30 Na ti uresibe pagoja sienbiaje: guma sija, yan ma\u00f1elu\u00f1a lalaje, yan ma\u00f1elu\u00f1a famalaoan, yan nana\u00f1a, yan famaguon\u00f1a, yan fangualuan sija, yan umapetsigue; ya y m\u00e1mamaela na siglo, taejinecog na lin\u00e2l\u00e2.\n10:31 Lao megae na manfinenana, ufanuttimo, ya y manuttimo, ufanfinenana.\n10:32 \u00b6 Ya anae mangaegue gui chalan, mangajulo guiya Jerusalem; ya si Jesus malag y mena\u00f1ija; ya ninafanmanman: ya y dumadalalag mangosmaa\u00f1ao. Ya jacone talo y dose, ya jatutujon sumangane sija jafa ususede g\u00fce.\n10:33 Yleg\u00f1a: Estag\u00fcejit na mangajulo guiya Jerusalem, ya y Lajin taotao umaentrega gui magas mamale, yan y escriba sija, ya umasentensia para umapuno, ya umaentrega gui Gentiles.\n10:34 Ya umamofea, yan umatolae, yan umasaulag, yan umapuno; ya y despues di tres na jaane ucajulo talo.\n10:35 \u00b6 Ya si Santiago yan si Juan, lalajin Sebedeo, manmato jijot guiya g\u00fciya ya ileg\u00f1ija nu g\u00fciya: Maestro, manmalagojam na unfatinas guiyajame jafa y malagomame.\n10:36 Ya ileg\u00f1a nu sija: Jafa malagonmiyo na jufatinas guiya jamyo?\n10:37 Ileg\u00f1ija nu g\u00fciya: Nafanmatachongjam, y uno gui agapamo, ya y otro gui acag\u00fcemo, gui minalagmo.\n10:38 Si Jesus ileg\u00f1a nu sija: Ti intingo jafa ingagagao. Si\u00f1a jamyo manguimen gui copa anae gumiguimenyo? yan infanmatagpange ni y matagpangeco?\n10:39 Ya ileg\u00f1ija nu g\u00fciya: Mansi\u00f1ajam. Ayonae ileg\u00f1a si Jesus nu sija: infanguimen gui copa anae gumiguimenyo, yan infanmatagpange ni y ma tagpangeco;\n10:40 Lao y infanmatachong gui agapajo, yan y acag\u00fceco; ti guajo jufannae; lao para ayo sija ufanmanae y manmapreparaye.\n10:41 Ya anae majungog este ni y dies, ninafanlalalo as Santiago yan Juan.\n10:42 Lao maninagang as Jesus ya ileg\u00f1a nu sija: Intingo na ayo y manmanafanmagas gui Gentiles, jafatinas minagas gui jilo\u00f1ija; ya y manmagas, jafatinas ninasi\u00f1a gui jilo\u00f1ija.\n10:43 Lao ti utaeg\u00fcenao guiya jamyo; sa jaye y malago dumangculo guiya jamyo; g\u00fciya ufa\u00f1e\u00f1etbe.\n10:44 Ya jaye guiya jamyo y malago mumagas; utentago para todo.\n10:45 Sa magajet ni y Lajin taotao ti mato para umasetbe, lao para ufa\u00f1etbe, ya para ufannae y jaani\u00f1a ni un rescate para unafanlibre megae.\n10:46 \u00b6 Ya manmato Jerico. Ya anae manjanao gui Jerico, yan y disipulu\u00f1a yan un dangculon linajyan taotao, si Bartimeo lajin Timeo, na bachet, matatachong gui oriyan chalan, ya umegagao.\n10:47 Ya anae jajungog na si Jesus Nasareno, jatutujon umagang ileg\u00f1a: Jesus, Lajin David, gaease nu guajo.\n10:48 Ya megae mumomye para ufamatquilo: lao mas umagang gosagang: Jago ni y Lajin David, gaease nu guajo.\n10:49 Ya si Jesus tumojg\u00fce ya ileg\u00f1a: Agang g\u00fce. Ya maagang y bachet ileg\u00f1ija nu g\u00fciya: Magofjao; cajulo sa inaagangjao.\n10:50 Ya janasuja y capa\u00f1a, y cajulo, ya malag as Jesus.\n10:51 Ya si Jesus manopeg\u00fce ya ileg\u00f1a: Jafa malagomo jufatinas guiya jago? Y bachet ileg\u00f1a nu g\u00fciya: Raboni, nafanliiyo.\n10:52 Si Jesus ileg\u00f1a: Janao, y jinengguemo munajomlojao. Ya enseguidas manlie, ya jadalalag si Jesus gui jinanao\u00f1a.\n11:1 YA anae esta manjijijot Jerusalem, yan Betfage, yan Betania, gui egso Olibo, jatago dos gui disipulu\u00f1a,\n11:2 Ya ileg\u00f1a nu sija: Janao fanmalag y sengsong gui menanmiyo: ya enseguidas qui manjalom jamyo, inseda un patgon bulico, na magogode, na taya nae matachonge; pila ya inquene mague.\n11:3 Ya yanguin jaye na taotao umalog nu jamyo; Jafa na infatinas este? Sangane: Se\u00f1ot janesesita: ya enseguidas umanajanao mague.\n11:4 Ya manmapos, ya masoda nu patgon bulico gui caye na magogode gui jiyong potta ya mapula g\u00fce.\n11:5 Ya palo ni y mangaegue g\u00fcije ileg\u00f1ija nu sija: Jafa na inpila enao y patgon bulico?\n11:6 Ya masangane jaftaemano y mansinangane as Jesus: ya japolo na ufanjanao.\n11:7 Ya macone guato y patgon bulico gui as Jesus, ya japolo magago\u00f1ija g\u00fci jilo\u00f1a ya maudae si Jesus.\n11:8 Ya megae jajuto magago\u00f1ija gui chalan: yan palo y ramas jayo na manmanuutot gui fangualuan.\n11:9 Ya ayo sija y manmofona gui mena\u00f1a, yan y madalalag gui tatte\u00f1a, manaagang ileg\u00f1ija: Hosana; Bendito ayo y mato pot y naan y Se\u00f1ot:\n11:10 Bendito y raeno na mamamaela, y raenon y tatata as David, Hosana guiyajululu.\n11:11 Ya si Jesus jumalom Jerusalem, ya jumalom gui templo; ya anae munjayan jalie todo y g\u00fcinaja, ya y pupuenge, mapos yan y dose, manmalag Betania.\n11:12 \u00b6 Ya y inagpa\u00f1a anae manmato guinen Betania, \u00f1alang.\n11:13 Ya anae jalie mona un trongcon igos na gagaejagonja, malag ayo jinaso\u00f1a na ufa\u00f1oda jafa; lao anae mato guato, taya sineda\u00f1a na jagonja; sa ti tiempopo\u00f1a y igos trabia.\n11:14 Ayonae manope ya ileg\u00f1a nu g\u00fciya: Taya ni un taotao uquinano y tinegchamo para siempre. Ya majungog ni y disipulu\u00f1a.\n11:15 \u00b6 Ya manmato Jerusalem; ya jumalom y templo, ya sigue di jayute juyong todo ayo sija y manmanbebende, yan y manmamamajan gui templo, yan janafanalinquin y lamasan salape y manmanulalaeca, yan y tachong y man manbebende paluma:\n11:16 Ya taya ni uno jaconsiente na ufa\u00f1ule baso gui templo.\n11:17 Ya mamanag\u00fce, ileg\u00f1a nu sija: Ada ti matugue na y guimajo umafanaan guma manaetae ni y todo nasion sija? lao jamyo fumatinas y liyang ma\u00f1a\u00f1aque.\n11:18 Ya majungog ni y magas mamale yan y escriba sija, ya maaliligao jaftaemano para umapuno; sa mamaa\u00f1ao nu g\u00fciya, sa janafanmamanman y linajyan taotao ni y finanag\u00fce\u00f1a.\n11:19 Ya cada pupuenge, jumanao juyong gui siuda.\n11:20 Ya y egaan anae manmalolofan, malie y trongcon igos na anglo desde y jale.\n11:21 Ayonae jajaso si Pedro ya ileg\u00f1a nu g\u00fciya: Rabi, estag\u00fce y trongcon igos ni y unmatdise na anglo todo.\n11:22 Ya manope si Jesus ileg\u00f1a nu sija: Jenggue si Yuus.\n11:23 Sa magajet jusangane jamyo: Jayeja y umalog ni este y egso, janao ya unyutejao gui tase; ya ti bumuebuente gui corason\u00f1a, lao jajonggue na umafatinas ayo y sinangan\u00f1a; uguaja.\n11:24 Enaomina jusangane jamyo: Na todo sija ingagao, anae manmanaetae jamyo, jenggue na esta inresibe, ya infanmannae.\n11:25 Ya an manojgue ya mananaetaejamyo, asie yanguin guajajao jafa contra jaye; sa y Tatanmiyo locue ni y gaegue gui langet, uninasie ni y isaomiyo.\n11:26 Lao yanguin ti manasiijamyo, y Tatanmiyo ni y gaegue gui langet ti uninasie ni y isaomiyo.\n11:27 \u00b6 Ya manmato talo Jerusalem, ya anae mamomocat gui templo, manmato y magas mamale, yan y escriba, yan y manamco sija;\n11:28 Ya ileg\u00f1ija nu g\u00fciya: Pot jafa na ninasi\u00f1a na unfatitinas estesija? yan jayejao numae ni este na ninasi\u00f1a, para unfatinas estesija?\n11:29 Ya si Jesus ileg\u00f1a nu sija: Bae jufaesen locue jamyo un finaesen ya inepeyo, ayonae jusangane jamyo pot jafa na ninasi\u00f1a na jufatitinas este sija.\n11:30 Y tinagpangen Juan, guinen y langet, pat guinen y taotao sija? epeyo.\n11:31 Ya jajajaso gui sumanjalom\u00f1ija, ileg\u00f1ija: Yanguin ilegmame, Guinen y langet; ualog: Jafanae na ti injenggue g\u00fce?\n11:32 Yanguin ilegmame guinen y taotao sija--manmaa\u00f1ao ni y taotao, sa pinelo\u00f1ija todo na magajet na profeta si Juan.\n11:33 Ya manmanope, ileg\u00f1ija as Jesus: Ti intingo. Ayonae si Jesus ileg\u00f1a nu sija; ni guajo locue ti jusangane jamyo pot jafa naninasi\u00f1a, na jufatitinas estesija.\n12:1 YA sigue di jacuentuse sija acomparasion sija. Un taotao mananom gui fangualuan ubas, ya jacolat nu trongcon tituca, ya manguadog un joyo para un lagat ya jafatinas un tore, ya jaatquila y manfafachocho, ya mapos g\u00fce malag otro tano.\n12:2 Ya anae esta tiempo, jatago uno gui tentago\u00f1a para ayo y manmachochocho, para ujaresibe guinen manmachochocho y tinegcha y fangualuan ubas.\n12:3 Ya macone y tentago, ya masaulag, ya manajanao taesinajguan.\n12:4 Ya jatago talo y otro tentago\u00f1a; ya mapoca y ilu\u00f1a, ya manataelaye g\u00fce gosdangculo.\n12:5 Ya jatalo tumago y otro, ya mapuno; yan otro megae ya palo manmasaulag yan palo manmapuno.\n12:6 Ya guaja unoja laji\u00f1a na sumenya\u00f1a; ya g\u00fciya uttimo jatago, ileg\u00f1a: Ufangaerespeto ni y lajijo.\n12:7 Ya ayo sija y manmachochocho, ileg\u00f1ija gui sumanjalom\u00f1ija. Estag\u00fce y eredero; nije tapuno, ya y fangualuan uiyota.\n12:8 Ya macone g\u00fce, ya mapuno, ya mayute juyong gui fangualuan.\n12:9 Jafa pago ufatinas y magas y fangualuan? Ufato, ya uyulang todo y manmachochocho, ya ufannae otro ni y fangualuan.\n12:10 Taya nae intaetae este na tinigue: Y acho, ni y jarechasa y manmanmatitinas ni y guima, esteja mapolo cuentan ulo gui esquina.\n12:11 Este finatinas y Se\u00f1ot, ya janafanmanman gui menan atadogta.\n12:12 Ya maaliligao para umagote lao manmaa\u00f1ao ni y linajyan taotao; sa matungo na jasasangan y acomparasion contra sija: ya madingo, ya manmapos gui jinanao\u00f1ija.\n12:13 \u00b6 Ya manmatago guato guiya g\u00fciya palo gui Fariseo sija yan taotao Herodes; para umaquegacha gui sinangan\u00f1a.\n12:14 Ya anae manmato, ileg\u00f1ija nu g\u00fciya: Maestro, intingo na jago magajetjao; ya taya unadadaje ni un taotao; sa ti guaelaye nu jago y finaboresen taotao, lao mamananag\u00fcejao ni y magajet na chalan Yuus. Tunas na infanmanaejam tributo as Sesat, pat aje?\n12:15 Innae, pat mungajam numae? Lao si Jesus jatungoja y quinado\u00f1ija, ya ileg\u00f1a nu sija: Jafa muna na intietientayo? maela un denarion salape ya julie.\n12:16 Ya anae machulie guato, ileg\u00f1a nu sija: Iyon jaye este na imagen yan tinigue? Yleg\u00f1ija nu g\u00fciya: Iyon Sesat.\n12:17 Ayonae si Jesus ileg\u00f1a nu sija: Nae si Sesat ni y iyon Sesat, ya si Yuus ni y iyon Yuus. Ya ninafangosmanman nu g\u00fciya.\n12:18 \u00b6 Ya manmato guiya g\u00fciya y Saduseo sija ni y ileg\u00f1ija, na taya quinajulo y mannatae; ya mafaesen g\u00fce, ileg\u00f1ija:\n12:19 Maestro, jatuguiejam si Moises: Yanguin y chelun un taotao matae, ya y palaoan ni y asagua\u00f1a sumaga ya taya patgon\u00f1a, ayo y laje ni y chelun y matae, uasagua talo y palaoan, ya ufamasemiya gui chelu\u00f1a.\n12:20 Ya guaja seite lalaje na ma\u00f1elu: y finenana umasagua, ya matae ti mapolo semiya:\n12:21 Inasagua talo y palaoan ni y mina dos, ya matae talo taya pinelo\u00f1a semiya: ya y mina tres taeg\u00fcijeja talo.\n12:22 Ya y siete, ti mapolo semiya\u00f1ijo; despues di todos, matae y palaoan locue.\n12:23 Y quinajulo y manmatae, jaye guiya sija ugae asagua y palaoan? sa todo y siete manmasagua.\n12:24 Si Jesus ileg\u00f1a nu sija: Ada ti manlache jamyo, sa ti intingo y tinigue, ni y ninasi\u00f1an Yuus?\n12:25 Sa y mangajulo guinen manmatae, ni ufanasagua, ni umanafanasagua; lao manparejoja yan y angjet sija gui langet.\n12:26 Ya y manmatae ni y ufannacajulo; ti untaetae gui leblon Moises, jaftaemano si Yuus gui jalomtano guiya trongcon jayo ni y ileg\u00f1a as Moises: Guajo si Yuus Abraham, yan si Yuus Ysaac, yan si Yuus Jacob?\n12:27 Ti g\u00fciya si Yuus y manmatae, na si Yuus y manl\u00e2l\u00e2l\u00e2; enaomina ninafangoslache jamyo.\n12:28 \u00b6 Ya uno gui escriba mato, ya jajungog na manafaesen entresija, ya jatungo na mauleg inepe\u00f1a nu sija, finaesen g\u00fce: Jafa y finenana qui todo na tinago?\n12:29 Si Jesus manope: Este y finenana na tinago: Jingog O Israel: Y Se\u00f1ot Yuusta, unoja na Se\u00f1ot:\n12:30 Ya guaeya jamyo y Se\u00f1ot, Yuusmiyo, contodo y corasonmiyo, yan contodo y antenmiyo, yan contodo y jinasonmiyo, yan contodo y minetgotmiyo.\n12:31 Ya este y segundo: Guaeya y tiguangmo parejo yan jago. Taya otro tinago mas, mandangculo qui estesija.\n12:32 Ya y escriba ileg\u00f1a nu g\u00fciya. Magajet Maestro, mauleg na unsangan na g\u00fciya unoja; ya taya otro na g\u00fciyaja.\n12:33 Ya ugumaeya g\u00fce contodo y corason, yan contodo y tiningo, yan contodo y minetgot, yan ugumaeya y tiguang\u00f1a parejo yan g\u00fciya, mas qui todo y inefrese, yan y ninae sija.\n12:34 Ya anae jalie si Jesus ni y minejnalom inepe\u00f1a, ileg\u00f1a nu g\u00fciya: Ti chagojao gui raenon Yuus. Ya taya ni un taotao fumaesen g\u00fce talo desde ayo.\n12:35 \u00b6 Ya maninepe as Jesus gui anae mamananag\u00fce gui templo, ileg\u00f1a: Jafa na ileg\u00f1ija y escriba sija, na si Cristo Lajin David?\n12:36 Sa si David mismo ileg\u00f1a gui Espiritu Santo: Y Se\u00f1ot ileg\u00f1a ni y Se\u00f1otto: Fatachong gui agapa na canaejo, asta qui jupolo y enemigumo sija gui papa y fa\u00f1ajangan adengmo.\n12:37 \u00b6 David jafanaan g\u00fce Se\u00f1ot; ya jaftaemano na y laji\u00f1a? Ya manmagof y dangculon linajyan taotao sija anae majungog.\n12:38 \u00b6 Ya ileg\u00f1a gui finanag\u00fce\u00f1a: Adaje jamyo ni y escriba sija, sa yan\u00f1ija manjanao yan y anaco magago\u00f1ija, yan yan\u00f1ija manmasaluda gui metcado,\n12:39 Yan y manmagas na tachong gui sinagoga, yan y ya jululo na tachong gui guipot;\n12:40 Ni y jatucho y guima y biuda sija, ya janafananaco tinaetae\u00f1ija ni y dinague: este sija ujaresibe dangculo na sentensia.\n12:41 \u00b6 Ya anae matachong si Jesus gui menan y cajon ni y para y ninae; megae na taotao manmato, ya manmanyute jalom salape gui cajon; ya y megae na manrico sija, megae yinite\u00f1ija jalom.\n12:42 Ya mato un pobble na buida; ya manyute jalom dos cobble na bale buente un centavos.\n12:43 Ya si Jesus jaagang y disipulu\u00f1a, ya ileg\u00f1a nu sija: Magajet jusangane jamyo: Este y pebble na biuda, mas megae yinite\u00f1a jalom qui ni todo ayo sija y guinen manmanyute jalom gui cajon.\n12:44 Sa todo y manmanyute jalom, pot y minegae\u00f1ijaja; lao g\u00fciya pot y minalago\u00f1aja na jayute jalom todo y g\u00fcinaja\u00f1a; asta y sustento\u00f1a todo.\n13:1 YA anae jumuyong gui templo; ileg\u00f1a nu g\u00fciya uno gui disipulu\u00f1a: Maestro, liija na jechuran acho, yan guma sija.\n13:2 Ya si Jesus manope ileg\u00f1a nu sija: Unlie este sija na mandangculon guma? taya usobbla ni un acho gui jilo y otro, na ti umayute papa.\n13:3 \u00b6 Ya anae matachong gui jilo y finabeca na y naan\u00f1a Olibo, gui menan y templo, finaesen gui secreto as Pedro, yan Santiago, yan si Juan, yan si Andres,\n13:4 Ileg\u00f1ija: Sanganejam, ngaean estesija ufanmato? yan jafa na se\u00f1at yanguin para todo estesija nae ufanmacumple?\n13:5 Si Jesus jatutujon ileg\u00f1a nu sija: Adaje jamyo, ya chamiyo fanmafabababa.\n13:6 Sa megae ufanmato pot y naanjo, ya ualog: Guajo g\u00fciya Jesucristo, ya ufababa megae.\n13:7 Yanguin injingog y guera, yan y masangan y guera: chamiyo ninafa\u00f1achatsaga: sa nesesita estesija jumuyong: lao trabia ti y jinecog.\n13:8 Sa y nasion sija ufangajulo contra y nasion, yan y raeno contra raeno: ya uguaja linao gui megae na lugat ya uguaja \u00f1inalang: estesija tutujon y pinite.\n13:9 \u00b6 Lao adaje jamyo: sa infanmaentrega gui tribunal sija; ya infanmasaulag gui sinagoga: yan infanojgue gui menan y manmagas sija yan y ray sija, pot causa de guajo para un testimonio contra sija.\n13:10 Ya y ibangelio nesesita umapredica finenana gui entre todo y nasion.\n13:11 Lao anae maconejamyo, ya maentregajamyo, chamiyo jumajaso jafa para insangan, ni injasuye jafa: sa jafaja y manaejamyo g\u00fcije na ora, ayoja insangan: sa ti jamyo infangcuentos, na y Espiritu Santo.\n13:12 Pago y laje uentrega y chelu\u00f1a laje, para umapuno; ya y tata y laji\u00f1a: ya y famaguon ufangajulo contra y ma\u00f1aenan\u00f1ija: ya uuafanmapuno.\n13:13 Ya jamyo infanmachatlie ni todo y taotao sija, pot y naanjo: lao jaye y sumungon asta y uttimo, umasatba.\n13:14 Lao anae inlie y chinatlie y inginon na yinilang tumotojgue gui anae ti para utojgue, (y mananaetae utungo) ayo sija y mangaegue guiya Judea ufanmalago para y jalomtano:\n13:15 Ya y gaegue gui jilo guma, cha\u00f1a tumutunog ni ujalom ya ufa\u00f1ule jafa na g\u00fcinaja gui jalom guma\u00f1a.\n13:16 Ya y gaegue gui fangualuan, cha\u00f1a tumatalo tate para uchule y magagu\u00f1a.\n13:17 Lao mannamaase ayo sija y manmapotgue yan y mannanasusu, g\u00fcije sija na jaane!\n13:18 Fanmanaetae, ya munga y jinanaomiyo gui tiempon y manenggeng.\n13:19 Sa ayo sija na jaane, uguaja pininite, ni y taya nae guaja desde y matutujon y tano, anae jafatinas si Yuus, asta pago; ni uguaja asta jinecog.\n13:20 Lao yaguin ti janacadada y Se\u00f1ot ayo sija na jaane, taya catne usatba: lao pot y rason y manmaayigja, ni y inayig\u00f1a, janacadada ayo sija na jaane.\n13:21 Ya yanguin guaja umalog nu jago: Estag\u00fce si Cristo: pat ayog\u00fce guato; chamiyo jumojonggue.\n13:22 Sa ufangajulo sija ti manmagajet na Cristo sija, yan ti manmagajet na profeta sija, ya ufanmamanue sija se\u00f1at yan mannamanman, para ufanmamababa, yanguin janasi\u00f1a, asta y manmaayig.\n13:23 Lao adaje jamyo: Sa estag\u00fceja, na jusangane jamyo todos antes.\n13:24 \u00b6 Lao ayo sija na jaane an munjayan y pininite sija; ujomjom y atdao, ya y pilan ti ufanina,\n13:25 Ya y pution sija gui langet ufamodong, ya y ninasifia sija gui langet ufanmayengyong.\n13:26 Ya ayo nae ujalie y Lajin taotao na mamamaela gui sanjalom mapagajes, yan y dangculon ninasi\u00f1a\u00f1a yan y minalag\u00f1a.\n13:27 Ya ayonae utago y angjet\u00f1a sija na ujarecoje y inayig\u00f1a sija, guinen y cuatro na manglo, guinen y uttimon y tano asta y uttimon y langet.\n13:28 \u00b6 Tingo y acomparasion y trongcon igos; Anae mamaulegja trabia y ramas\u00f1a, ya manjajagonja, intingoja na esta jijijot y tiempon maepe.\n13:29 Jamyo locue anae inlie estesija, na manmato, tingoja na g\u00fciya esta jijijot, parejoja yan esta gaegue gui petta.\n13:30 Magajet jusangane jamyo: Este na generasion ti ufanmalofan, asta que todo estesija munjayan manmachog\u00fce.\n13:31 Y langet yan y tano, ufanmalofan, lao y sinanganjo ti ufalofan.\n13:32 Lao ayo na jaane pat ayo na ora, taya ni un taotao tumungo; ni y angjet sija ni mangaegue gui langet, ni y Laje; na y Tata g\u00fciyaja.\n13:33 Adaje jamyo: fanbela, ya infanmanaetae: sa ti intingo ngaean y tiempo.\n13:34 Say y Lajin taotao, parejoja yan un taotao ni y jumajanao chago ya jadingo y guma\u00f1a; ya janae y tentago\u00f1a ninasi\u00f1a\u00f1ija yan cada uno y checho\u00f1a, ya jatago y pottero na ufanbela.\n13:35 Fanbela, sa ti intingo ngaean nae ufato y magas y guima; cao y pupuenge, pat y tatalopuenge, pat y oogayo, pat y egaan;\n13:36 Na, noseaja derepente ufato, ya infansineda manmamaego.\n13:37 Ya jafa y jusangane jamyo, jusanganeja todos: Fanbela.\n14:1 GUAJA dos na jaane antes di guipot y pascua yan y taelibadura na pan: ya y magas mamale sija, yan y escriba sija, maaliligao jaftaemano para umafababa, ya umacone, ya umapuno.\n14:2 Lao ileg\u00f1ija: Munga gui guipot na jaane, sa noseaja uguaja atboroto ni y taotao sija.\n14:3 \u00b6 Ya anae estaba guiya Betania, gui guima Simon y ategtog, ya matachong gui lamasa para uchocho; mato un palaoan ma\u00f1u\u00f1ule un alabastro na boteyan ingg\u00fcenten puro nardo, na gosguaguan; ya mafag y boteya, ya jachuda gui jilo y ilon Jesus.\n14:4 Ya guaja sija ninafanbubo sanjalom\u00f1ija, ya ileg\u00f1ija: Jafa este na ingg\u00fcente na manalalastimaja?\n14:5 Mauleg\u00f1a umabende pot tresientos peseta, ya ufanmanae y mamobble: ya malalatde y palaoan.\n14:6 Lao si Jesus ileg\u00f1a: Polog\u00fce namaesa. Jafaja na inatbororota g\u00fce? Mauleg finatinas\u00f1a nu guajo.\n14:7 Sa manjajamyoja yan y mamobble siempre; ya ngaeanja nae manmalago jamyo, infatinasja mauleg guiya sija: lao guajo ti tafanjijitaja siempre.\n14:8 G\u00fciya jafatinas taemanoja y ninasi\u00f1a\u00f1a: g\u00fciya mato antes, para uingg\u00fcentiye y tataotaojo, para y naftan.\n14:9 Magajet jusangane jamyo: Manoja este na ebangelio nae mapredica, gui todo y tano, este locue y finatinas\u00f1a umasangan, para memorias\u00f1a.\n14:10 \u00b6 Ya si Judas Iscariote, uno gui dose, mapos malag y magas mamale, para umentrega g\u00fce guiya sija.\n14:11 Ya anae majungog, ninafansenmagof, ya mapromete manae g\u00fce salape. Ya jaaliligao jaftaemano para uinentrega.\n14:12 \u00b6 Ya y finenana na jaane y taelibadura na pan, anae maofrese y pascua, y disipulu\u00f1a ileg\u00f1ija nu g\u00fciya; Manojam malagomo guato ya infamauleg nae para unchocho gui pascua?\n14:13 Ya jatago y dos gui disipulu\u00f1a, ya ileg\u00f1a nu sija: Janao fanmalag y siuda, sa infanasoda g\u00fcije yan un taotao na mangangatga un jarran janom: dalalag g\u00fce.\n14:14 Ya amanoja nae jumalom, alog ni y taotao guma: Y Maestro, ileg\u00f1a: Mangue y aposento ni y anae para infa\u00f1ocho gui pascua yan y disipulujo?\n14:15 Ya g\u00fciya infanfinanue un dangculo na cuatto; esta mafamauleg yan listo; ayo nae famauleg para jita.\n14:16 Ya y disipulu\u00f1a sija manmapos, ya manmato gui siuda, ya jasoda jaftaemano y mansinangane sija: ya mafamauleg para y pascua.\n14:17 \u00b6 Ya y pupuenge mato yan y dose.\n14:18 Ya anae manmatatachong ya ma\u00f1ochocho, si Jesus ileg\u00f1a: Magajet jusangane jamyo: Uno guiya jamyo umentregayo; g\u00fciyaja uchumocho yan guajo.\n14:19 Ayo nae ninafangostriste, ya ileg\u00f1ija nu g\u00fciya uno yan otro: Guajo? y otro ileg\u00f1a: Guajo?\n14:20 Ayo nae manope ileg\u00f1a nu sija: Uno gui dose ni y jumajame manotche gui tason.\n14:21 Y Lajin taotao magajet na mapos, ni y esta matugue pot g\u00fciya: lao namaase ayo na taotao ni y jaentrega y Lajin taotao. Mauleg\u00f1a ayo na taotao na ti umafa\u00f1ago.\n14:22 \u00b6 Ya anae ma\u00f1ochocho, jachule si Jesus y pan, ya jabendise, ya jaipe, ya janae sija, ileg\u00f1a: Chile ya incano, sa este y tataotaojo.\n14:23 Ya jachule y posuelo, ya anae munjayan janae grasia, janae sija: ya todos manguimen.\n14:24 Ya ileg\u00f1a nu sija: Este y j\u00e2g\u00e2jo, gui nuebo na testamento, ni machuda pot y megae.\n14:25 Magajet jusangane jamyo, na ti juguimen talo ni y tinegcha ubas, asta ayo na jaane, na juguimen nuebo gui raenon Yuus.\n14:26 Ya anae munjayan macanta un himno, manmapos manmalag y finabeca Olibo.\n14:27 \u00b6 Ya si Jesus ileg\u00f1a nu sija: Todos jamyo infaninefende pot guajo; sa esta matugue: Bae jupanag y pastot, ya y quinilo sija ufanmachalapon.\n14:28 Lao despues di l\u00e2l\u00e2yo talo, ya cumajuloyo, jujanao esta y menanmiyo guiya Galilea.\n14:29 Ayo nae si Pedro ileg\u00f1a: Achogja todos maninefende; lao guajo aje.\n14:30 Ya sinangane as Jesus ileg\u00f1a: Magajet jusanganejao na jago pagoja na puenge, antes qui uoo dos biaje y gayo, unpuneyo tres biaje.\n14:31 Lao guiya janaguefchadeg y cuentos\u00f1a, ileg\u00f1a: Yanguin jumitamatae, ti jupunejao ni jaftaemano. Taeg\u00fcineja locue sinangan\u00f1ija todos.\n14:32 \u00b6 Ya manmato un lugat na y naa\u00f1a Gethsemane: ya ileg\u00f1a ni y disipulu\u00f1a sija: Fanmatatachong g\u00fcine, mientras mananaetaeyo.\n14:33 Ya jacone gachong\u00f1a si Pedro, yan si Santiago, yan si Juan, ya jatutujon manmajalang, yan mangostriste,\n14:34 Ya ileg\u00f1a nu sija: Y antijo sentriste asta qui jumatae; fa\u00f1aga g\u00fcine, ya iafanmamulan.\n14:35 Ya jumanao mona didide, dumimo papa gui jilo oda, ya manaetae, na yanguin si\u00f1a, ufalofan y ora guiya g\u00fciya.\n14:36 Ya ileg\u00f1a: Abba, Tata: todo y g\u00fcinaja mansi\u00f1a para jago; nasuja este y posuelo guiya guajo: lao ti taemanoja minalagojo, na y minalagomo.\n14:37 Ya mato talo guato ya jasoda sija manmaego, ya ileg\u00f1a as Pedro: Simon mamaegojao? ti si\u00f1ajao bumela un oraja?\n14:38 Fanbela, yan infanmanaetae; para chamiyo fanjajalom gui tentasion: Y Espiritu magajet na malago; lao y catne echecho.\n14:39 Ya jumanao talo ya manaetae ya ayoja mismo na sinangan.\n14:40 Ya anae tumalo guato jasoda talo sija na manmamaego: sa y atadog\u00f1ija mangosmacat, ya ti ujatungo jafa umaope g\u00fce.\n14:41 Ya mato talo gui mina tres biaje, ya ileg\u00f1a nu sija: Fanmaego pago, ya infandescansa: esta najong; y ora esta mato; lie y Lajin taotao na maentrega gui canae y manisao sija.\n14:42 Fangajulo ya nije tafanjanao; sa esta y umentregayo jijot.\n14:43 Ya enseguidas, mientras cumuecuentos, mato si Judas, uno gui dose, ya ma\u00f1isija yan un linajyan taotao, manma\u00f1u\u00f1ule espada, yan galute guinen y magas mamale, yan y escriba, yan y manamco sija.\n14:44 Ya ayo y umentrega g\u00fce, mannae se\u00f1at, ileg\u00f1a: Jaye y juchico, g\u00fciya ayo: guiot ya inquene na seguro.\n14:45 Ya enseguidas nae matog\u00fce, jumajanaoja guato guiya g\u00fciya, ya ileg\u00f1a: Maestro; ya jachico.\n14:46 Ya ayonae mapolo canae sija gui jilo\u00f1a ya macone.\n14:47 Ya uno guiya sija ni y tumotojgue gui oriya, jalagnos y espada\u00f1a, ya jataga y tentago y magas mamale, ya jautut talanga\u00f1a.\n14:48 Ya manope si Jesus ileg\u00f1a nu sija: Ada manmato jamyo calang contra y saque, na manma\u00f1u\u00f1ule jamyo espada, yan galute para inguiotyo?\n14:49 Guinen manjijitaja todo y jaane gui templo manmamananag\u00fce, ya ti inquequeneyo? lao mafatinas este para umacumple y tinigue.\n14:50 Ya madingo, ya manmalago todos.\n14:51 \u00b6 Ya dinalalagg\u00fce un patgon na taotao, na jatatampe g\u00fce un s\u00e1banas, sa taya magagago: ya y mamatgon sija na taotao, maguot g\u00fce.\n14:52 Lao g\u00fciya japolo y s\u00e1banas, ya malago sin magago.\n14:53 \u00b6 Ya macone si Jesus para y magas na pale: ya manda\u00f1a y manmagas mamale yan y manamco, yan y escriba sija.\n14:54 Ya si Pedro dinalalag g\u00fce, lao chago, asta gui sanjalom, sanjalom y palasyon y magas na pale: ya matachong yan y tentago sija, ya janama maope g\u00fce gui guafe.\n14:55 Ya y magas mamale, yan todo y inetnon ofisiat, manmanaliligao testimonio contra si Jesus para umapuno; lao taya masoda.\n14:56 Sa megae manmannae ti manmagajet na testimonio contra g\u00fciya: lao y testimonio\u00f1ija ti manparejo.\n14:57 Ya mangajulo palo ni manmannae contra g\u00fciya y testimonio na ti manmagajet, ileg\u00f1ija:\n14:58 Injingog y ileg\u00f1a: Juyulang este na templo, ni y mafatinas nu canae, ya y tres na jaane, janacajulo talo otro na ti finatinas canae.\n14:59 Lao este na testimonio\u00f1ija, locue ti manparejo.\n14:60 Ya y magas na pale tumojgue julo gui talolo, ya jafaesen si Jesus ileg\u00f1a: Ti unfanope ni jafa? Jafa este sija na testimonio\u00f1ija contra jago?\n14:61 Lao mamatquiquiloja, taya inepe\u00f1a. Tumalo y magas na pale finaesen ileg\u00f1a: Jago si Jesucristo Lajin y Bendito?\n14:62 Ya si Jesus ileg\u00f1a: Guajo; ya umamaela y tiempo anae inlie y Lajin taotao matatachong gui agapa y gaeninasi\u00f1a na canae, ya umamaela gui jalom y mapagajes y langet.\n14:63 Ayonae y magas na pale, jatiteg y magagu\u00f1a, ya ileg\u00f1a: Para jafajit palo testigo sija?\n14:64 Injingogja y chinatfino\u00f1a contra si Yuus: Jafa jinasonmimiyo? Ya todos manma\u00f1entensia para umapuno.\n14:65 Ya y palo matutujon matolae, yan matatampe mata\u00f1a, yan mapatmada, ya ileg\u00f1ija nu g\u00fciya: Profetisa: ya y ofisiat sija rumesibe g\u00fce ya japatmada ni y canae\u00f1ija.\n14:66 \u00b6 Ya anae si Pedro gaegue gue sanpapa gui palasyo, mato un palaoan tentago y magas na pale:\n14:67 Ya anae jalie si Pedro na janamamaepe g\u00fce, jaatan ya ileg\u00f1a: Jago locue manjajamyo yan si Jesus Nasareno?\n14:68 Lao jadague ileg\u00f1a: Ti jutungo, ni jutungo jafa ilelegmo. Ya mapos juyong gui cajida; ya umoo y gayo.\n14:69 Ya linie talo ni y palaoan, ya jatutujon sumangane ayo sija y manotojgue gui oriya\u00f1a: Este uno guiya sija.\n14:70 Ya jadague talo. Ti apmam ayo y manotojgue gui oriya ileg\u00f1ija as Pedro: Magajet na jago uno guiya sija? sa jago taotao Galileajao.\n14:71 Lao jatutujon mamatdise yan manjula ya ileg\u00f1a: Ti jutungo este na taotao y insasangan.\n14:72 Ya enseguidas y mina dos biaje umoo y gayo. Jajaso si Pedro y sinangan, jaftaemano si Jesus nu g\u00fciya ileg\u00f1a: Antes que uoo y gayo dos biaje, undagueyo tres biaje. Ya anae jajaso, tumanges.\n15:1 YA enseguidas y egaan g\u00fcije, y magas mamale yan y manamco, yan y escriba sija, yan todo y inetnon ofisiat manaconseja entalo\u00f1ija, ya magode si Jesus, ya macone, ya maentrega si Pilato.\n15:2 Ya finaesen as Pilato, ileg\u00f1a nu g\u00fciya: Jago y Ray Judios? Ya manope ileg\u00f1a: Jago sumangan.\n15:3 Ya mafaaela ni y magas mamale, megae sija na g\u00fcinaja.\n15:4 Ya finaesen g\u00fce talo as Pilato, ileg\u00f1a: Ti unfanope ni jafa? liija na minegae finaela contra jago.\n15:5 Lao si Jesus ti manope ni jafa; ayo mina ninamanman si Pilato.\n15:6 \u00b6 Ya ayo na gupot, y costumbre masosotta un preso, yanguin jagagao jaye y malago\u00f1ija.\n15:7 Ya guaja g\u00fcije uno, y naan\u00f1a si Barabas, na mapreso yan y mangachong\u00f1a gui un jatsamiento; sija manmamuno anae mangajulo gui jatsamiento.\n15:8 Ya y linajyan taotao manmato jijot, ya jatutujon manmangaogao na ufatinas taeg\u00fcije y guinen jafatinas guiya sija,\n15:9 Lao si Pilato manope sija, ileg\u00f1a: Manmalago jamyo na jusottaye jamyo y Ray Judios?\n15:10 Sa jatungo, na ayo na maentrega ni y magas mamale, pot y embidia.\n15:11 Lao y magas mamale jatago y taotao sija, na ujagagao na si Barabas umasotta.\n15:12 Ya si Pilato manope ileg\u00f1a talo nu sija: Jafanae malagomiyo jufatinas ayo y infananaan Ray Judios?\n15:13 Ya managang talo ileg\u00f1ija: Atane gui quiluus.\n15:14 Ayonae si Pilato, ileg\u00f1a nu sija: Jafa na taelaye finatinas\u00f1a? Ya mas managang, ileg\u00f1ija: Atane gui quiluus.\n15:15 Ya si Pilato, malago na ufanmagof y taotao sija, jasottaye sija si Barabas, ya maentrega si Jesus, anae munjayan masaulag, para umaatane gui quiluus.\n15:16 \u00b6 Ya maosgaejon ni y sendalo sija, guato gui patio mafanaan Pretorio; ya mada\u00f1a todo y mangachong.\n15:17 Ya manaminagago p\u00farpura, ya matufog un coronan tituca.\n15:18 Ya matutujon masaluda, ileg\u00f1ija: Jafa tatatmanojao Ray Judios!\n15:19 Ya mapanag y ilu\u00f1a ni y piao, ya matolae g\u00fce, yan mandidimo, ya maadodora g\u00fce.\n15:20 Ya anae munjayan mamofeag\u00fce, manajanao y p\u00farpura, ya manaminagago ni y magagu\u00f1aja. Ya macone g\u00fce para umaatane gui quiluus.\n15:21 \u00b6 Ya manacatga uno ni y malolofan para ufa\u00f1ija, si Simon Sirineo, tatan Alejandro yan Rufo, na mato guinen y fangualuan, para uquinatgaye ni y quiluus Jesus.\n15:22 Ya macone guato gui un lugat na y naan\u00f1a Golgota: cumequeileg\u00f1a, Sagan calabera.\n15:23 Ya manae guimen\u00f1a, bino manada\u00f1a yan mira, lao ti jaresibe.\n15:24 Ya maatane g\u00fce gui quiluus, manafacae ni magagu\u00f1a; ya manrifa jaye uchinile cada uno.\n15:25 Ya y mina tres na ora, anae maatane g\u00fce gui quiluus.\n15:26 Ya y tinigue y fumaaelag\u00fce, matugue gui sanjilo. Y RAY JUDIOS.\n15:27 Ya maatane dos na saque yan g\u00fciya: y uno gui agapa\u00f1a, ya y otro gui acag\u00fce\u00f1a.\n15:28 (Ya macumple y tinigue ni y ileg\u00f1a: G\u00fciya, usaouao matufong yan y manisao.)\n15:29 Ya macacase todo ni y manmalolofan, ya jayeyengyong y ilon\u00f1ija, ya ileg\u00f1ija: Ay! jago ni y unyulang y templo, ya unjatsa talo gui mina tres na jaane;\n15:30 Satba maesajao, ya maela tunog papa g\u00fcenao gui quiluus.\n15:31 Taeg\u00fcenaoja locue y magas mamale, manmanbotlelea gui entalo\u00f1ija, ya ileg\u00f1ija yan y escriba sija: Jasatba y palo, ya g\u00fciya na maesa ti si\u00f1a g\u00fce jasatba.\n15:32 Si Cristo y Ray Israel, polo ya utunog pago gui quiluus, para utafanlie, ya utafanjonggue g\u00fce. Yan ayo y mangachochong\u00f1a manmaatane gui quiluus madespresia g\u00fce.\n15:33 \u00b6 Ya anae mato y mina saes na ora, jomjom todo y tano asta y mina nuebe na ora.\n15:34 Ya y mina nuebe na ora, janagosagang si Jesus ileg\u00f1a: Eli, Eli, lama sabactani? cumequeileg\u00f1a: Yuusso, Yuusso, jafa muna undingoyo?\n15:35 Ya palo ni y manotojgue gui oriya\u00f1a, anae majungog g\u00fce, ileg\u00f1ija: Estag\u00fce na jaaagang si Elias.\n15:36 Ya malago uno, ya jasupog y espongja gui binagle, ya japolo gui puntan y piao, ya janae para uguimen, ya ileg\u00f1a: Poloja g\u00fce namaesa; ya utafanlie cao ufato si Elias, ya uninatunog.\n15:37 Ya si Jesus umagang gos\u00e1gang, ya jaentrega y espiritu.\n15:38 Ya y cottinan y templo, masisen dos pedaso, y sanjilo asta y sanpapa.\n15:39 Ya anae y senturion ni y tumotojgue gui mena\u00f1a, linie, na taeg\u00fcenao jaentrega y espiritu, ileg\u00f1a: Magajet na este na taotao Lajin Yuus.\n15:40 Ya mangaegue locue sija famalaoan, na maaatan gui chago, ya entre sija estaba si Maria Magdalena, yan si Maria nanan Santiago y patgon, yan si Jos\u00e9, yan si Salome;\n15:41 Ni y anae estaba g\u00fce guiya Galilea, madalalag g\u00fce, ya masetbe g\u00fce; yan megae sija na famalaoan mangachochong\u00f1a julo guiya Jerusalem.\n15:42 \u00b6 Ya anae estaba pupuenge, sa ayo na jaane y Preparasion, cumequeileg\u00f1a y jaane antes di y s\u00e1bado,\n15:43 Mato si Jos\u00e9, taotao Arimatea, mauleg na taotao na p\u00e1pagat, ni y jananangga locue y raenon Yuus; ya mapos yan atrebe malag as Pilato, ya jagagao y tataotao Jesus.\n15:44 Ya ninamanman si Pilato, cao esta matae; ya jaagang y senturion, ya jafaesen cao esta matae algun tiempo.\n15:45 Ya anae jatungo gui senturion; janae si Jos\u00e9 ni y tataotao.\n15:46 Ya g\u00fciya mamajan fino na magagao; ya janatunog y tataotao\u00f1a ya jabalutan ni y fino na magago, ya japolo gui un naftan ni maguadog gui acho, ya janagaliligue guato un acho, gui pettan y naftan.\n15:47 Ya si Maria Magdalena, yan si Maria nanan Jos\u00e9, jalie amano nae mapolo.\n16:1 YA anae esta malofan y sabado, si Maria Magdalena, yan si Maria nanan Santiago, yan si Salome, manmamajan paopao, para ufato ya umapalalae g\u00fce.\n16:2 Ya taftataf gui egaan, gui finenana na jaane gui semana, manmato gui naftan gui quinajulo y atdao.\n16:3 Ya ileg\u00f1ija entre sija: Jaye uninagalileg y acho gui pettan y naftan?\n16:4 Ya anae maaatan, malie na esta managalileg y acho, sa gosdangculo.\n16:5 Ya manjalom gui naftan, malie un patgon na taotao, na matatachong gui agapa na banda, minagagon apaca na anaco; ya ninafangosmaa\u00f1ao.\n16:6 Ya ileg\u00f1a nu sija: Chamiyo fanmaaa\u00f1ao: inaliligao si Jesus Nasareno, ni y maatane gui quiluus: esta cajulo; taeg\u00fce g\u00fcine; liija y lugat anae mapopolo g\u00fce.\n16:7 Janao infanjanao, ya insangane y disipulu\u00f1a, yan si Pedro: G\u00fciya jumanao gui menanmiyo guiya Galilea; ayo nae inlie g\u00fce, ni y guinin mansinangane jamyo.\n16:8 Ya manmapos juyong, ya manmalago gui naftan, sa jumuyong manlalaolao yan manmanman; ya ti ufanmanangane jafa ni y taotao; sa mangosmanmaa\u00f1ao.\n16:9 \u00b6 Lao anae cajulo si Jesus, taftataf gui egaan gui finenana na jaane gui semana, umalie finena, yan Maria Magdalena, ni y guinin janajuyong siete na anite.\n16:10 Ya mapos g\u00fce, ya jasangane ayo y guinin mangachochong\u00f1a, ni y mantriste, yan manatanges.\n16:11 Ya sija, anae jajungog na esta l\u00e2l\u00e2 ya umalie yan Mana, ti majonggue.\n16:12 Ya anae manmalofan estesija, manmalie talo yan dos, lao otro jechura\u00f1a; gui anae manjajanao gui fangualuan.\n16:13 Ya manmapos, ya manmasangane y palo disipulo: lao ti majonggue.\n16:14 \u00b6 Despues di ayo, manmalie yan y onse gui anae ma\u00f1ochocho, ya jalalatde ni y ti manjengguen\u00f1ija, yan y majetog corason\u00f1ija, sa ti majonggue ayo sija y lumie g\u00fce despues di cumajulo.\n16:15 Ya ileg\u00f1a nu sija; Janao fanmalag todo y tano, ya predica y ibangelio todo y ninajuyong sija.\n16:16 Jaye y manjonggue ya matagpange, usatba; lao ayo y ti manjonggue; umasentensia.\n16:17 Ya este sija na se\u00f1at ufantinattitiye ayo sija y manmanjonggue: Pot y naanjo ujayute juyong y anite sija; ufanguentos ni y nuebo na finijo;\n16:18 Ufanmangajat culebla sija, ya, yanguin manguimen jafa na beneno; ti uninafanlamen: ya ujapolo y canae\u00f1ija gui manmalango sija, ya ujanafanjomlo.\n16:19 \u00b6 Enao y Se\u00f1ot, despues di mansinangane sija, rinisibe ni y langet, ya matachong gui agapa Yuus.\n16:20 Ya manmapos, ya mapredica y sinangan gui todo y lugat, ma\u00f1isija manmachocho yan y Se\u00f1ot, ya manafitme y sinangan ni y umatitiye na se\u00f1at. Amen.","title":"Chamorro Bible (partial): Mark","type":"page"}