{"collection":"Bible & Christianity","html_url":"https://unchartedknowledge.5gfusion.net/browse/bib/wb/cmr/mat.htm","path":"bib/wb/cmr/mat.htm","source_url":"https://sacred-texts.com/bib/wb/cmr/mat.htm","text":"1:1 LEBLON y rasan Jesucristo lajin David, lajin Abraham.\n1:2 Si Abraham jalilis si Ysaac; ya si Ysaac jalilis si Jacob; ya si Jacob jalilis si Judas yan y ma\u00f1elu\u00f1a.\n1:3 Ya si Judas jalilis, gui as Tamar, si Fares yan si Sara; ya si Fares jalilis si Esrom; ya si Esrom jalilis si Aram;\n1:4 Ya si Aram jalilis si Aminadab; ya si Aminadab jalilis si Naason; ya si Naason jalilis si Salmon;\n1:5 Ya si Salmon jalilis, gui as Rahab, si Boos; ya si Boos jalilis, gui as Rut, si Obed; ya si Obed jalilis si Isai;\n1:6 Ya si Isai jalilis si ray David; ya si ray David jalilis si Salomon ni guinin g\u00fciya nii ampmam palaoan Urias;\n1:7 Ya si Salomon jalilis si Roboam; ya si Roboam jalilis si Abias; ya si Abias jalilis si Asa;\n1:8 Ya si Asa jalilis si Josafat; ya si Josafat jalilis si Joram; ya si Joram jalilis si Osias;\n1:9 Ya si Osias jalilis si Joatam; ya si Joatam jalilis si Acas; ya si Acas jalilis si Esequias;\n1:10 Ya si Esequias jalilis si Manases; si Manases jalilis si Amon; ya si Amon jalilis si Josias;\n1:11 Ya si Josias jalilis si Joaquim; si Joaquim jalilis si Jeconias, yan y ma\u00f1elu\u00f1a anae manmacone guiya Babilonia.\n1:12 Ya mapos y manmacone guiya Babilonia, si Jeconias jalilis si Salatiel; si Salatiel jalilis si Sorobabel;\n1:13 Ya si Sorobabel jalilis si Abiud; si Abiud jalilis si Eliaquim; si Eliaquim jalilis si Asor;\n1:14 Si Asor jalilis si Sadog; si Sadog jalilis si Achim; si Achim si Eliud;\n1:15 Si Eliud jalilis si Eleasar; si Eleasar jalilis si Matan; si Matan jalilis si Jacob;\n1:16 Si Jacob jalilis si Jos\u00e9, asaguan Maria, na fina\u00f1ago si Jesus na mafanaan si Cristo.\n1:17 Enao mina todo y generasion desde as Abraham asta as David, catotse sija na generasion; ya desde as David asta manmacone guiya Babilonia, catotse na generasion; ya desde qui manmacone guiya Babilonia asta as Cristo, catotse na generasion.\n1:18 \u00b6 Y mafa\u00f1agon Jesucristo taeg\u00fcine: Y nana\u00f1a as Maria, nobian Jos\u00e9, antes de ujada\u00f1a, g\u00fciya esta masoda mapotgue pot y Espiritu Santo.\n1:19 Ya si Jos\u00e9 asagua\u00f1a, sa mauleg na taotao, ti malago pinelo g\u00fce gui ninamamajlao, lao malago\u00f1a upinelo g\u00fce gui secreto.\n1:20 Ya anae jajajaso este, mato para g\u00fciya y angjet Se\u00f1ot, anae jag\u00fcife gui minaego\u00f1a, na ileg\u00f1a: Jos\u00e9, lajin David, chamo maa\u00f1ao na unresibe si Maria asaguamo, sa y gaegue guiya g\u00fciya y linilis Espiritu Santo.\n1:21 Ya ufa\u00f1ago un laje ya ufanaan si Jesus; sa g\u00fciya unafanlibre y taotao\u00f1a nu y isao\u00f1ija.\n1:22 Todo sija masusede para umacumple y esta jasangan y Se\u00f1ot pot y profeta, ni ileg\u00f1a:\n1:23 Estag\u00fce, un vitgen na umapotgue, ya ufa\u00f1ago un laje ya ufanaan si Emanuel, na comoqueileg\u00f1a na si Yuus gaegue guiya jita.\n1:24 Anae magmata si Jos\u00e9 gui minaego\u00f1a, jafatinas taeg\u00fcije y tinago y angjet, ya jaresibe y asagua\u00f1a.\n1:25 Ya ti matungo asta qui ma\u00f1ago ni laji\u00f1a finenana; ya nae y naan\u00f1a si Jesus.\n2:1 YA mafa\u00f1ago si Jesus guiya Betlehem Judea gui jaanin ray Herodes, estag\u00fce y manfaye na manmato guinin y sancatan para Jerusalem,\n2:2 Yleg\u00f1ija: mangue y ray Judios, ni mafa\u00f1ago? Sa y estreyas\u00f1a inlie gui sancatan ya manmatojam para inadorag\u00fce.\n2:3 Ya anae jajungog este, si ray Herodes, inistotba yan todo y taotao Jerusalem locue.\n2:4 Ya anae maagange todo y prinsipen mamale yan y escriba sija g\u00fcije na tano, manfinaesen mano nae mafa\u00f1ago si Cristo.\n2:5 Sija ileg\u00f1ija: Iya Betlehem Judea; sa taeg\u00fcine y munjayan matugue pot y profeta:\n2:6 Ya jago Betlehem, tano Juda, ada ti sendiquique jao gui entalo y prinsipen Juda, sa iya jago nae ujuyong y magalaje, para upasto y taotaojo, Israel.\n2:7 Entonses si Herodes, anae jaagang y manfaye gui secreto, jaquequetungo guiya sija, ngaean y estreyas nae malie.\n2:8 Ya Jatago sija para Betlehem, ileg\u00f1a: Janao fanmalag ayo guato ya inalula manmamaesen pot y patgon; yaguin esta inseda, insangane yo; ya jufato locue ya juadora g\u00fce.\n2:9 Ya anae munjayan jajungog y sinangan ray, manmapos; ya estag\u00fce y estreyas ni y jalie gui sancatan, na mofona gui mena\u00f1ija asta qui mato ya sumaga gui anae estaba y patgon.\n2:10 Anae malie y estreyas, gosdangculo minagof\u00f1ija.\n2:11 \u00b6 Anae manjalom gui guima, jasoda y patgon yan y nana\u00f1a, as Maria, ya mandimo ya maadora; ya mababa y g\u00fcinaja\u00f1ija ya manae g\u00fce: oro, insenso, yan mira.\n2:12 Ya manmasangane pot si Yuus gui g\u00fcinife, na ti ufanmalag as Herodes, manjanao para y tano\u00f1ija gui otro chalan.\n2:13 \u00b6 Ya anae manmapos sija, y angjet y Se\u00f1ot mato gui as Jos\u00e9 gui g\u00fcinife, ya ileg\u00f1a: Cajulo ya uncone y patgon yan si nana\u00f1a, ya infanjanao para Egipto, ya infa\u00f1aga g\u00fcije, asta qui guajojao sumangane; sa si Herodes jaaligao y patgon para umapuno.\n2:14 Ya cajulo g\u00fce, ya jacone y patgon yan si nana\u00f1a gui puenge ya manjanao para Egipto;\n2:15 Ya sumaga g\u00fcije asta que matae si Herodes, sa para umacumple y sinangan y Se\u00f1ot pot y profeta, na ileg\u00f1a: Iya Egipto nae, juagang y Lajijo.\n2:16 \u00b6 Si Herodes, anae jalie na mamofea g\u00fce ni manfaye, gueflalalo ya manago na ufanmapuno todo y famaguon ni guaja guiya Betlehem yan gui todo oriya\u00f1a ni dos a\u00f1os sacan\u00f1ija para papa, jaftaemanoja y tiempo anae ninatungo ni y manfaye.\n2:17 Ayo nae macumple esta, ni y guinin masangan pot y profeta Jeremias, na ileg\u00f1a:\n2:18 Inagang na majungog guiya Rama umagang, tumangis yan cumasao na dangculo; si Raquel cumasao pot y famaguon\u00f1a, ya ti malago maconsuela sa manaeg\u00fce.\n2:19 \u00b6 Anae esta matae si Herodes, mato y angjet y Se\u00f1ot gui as Jos\u00e9 gui g\u00fcinife, guiya Egipto,\n2:20 Ya ileg\u00f1a: Cajulo, cone y patgon yan si nana\u00f1a, ya infanjanao para y tano Israel; sa matae y cumequepuno y patgon.\n2:21 Ayo nae cajulo ya jacone y patgon yan si nana\u00f1a ya manmalag y tano Israel.\n2:22 Ya jajungog na si Arquelao, g\u00fciya y ray guiya Judea gui sagan tata\u00f1a as Herodes, maa\u00f1ao malag guato; lao pot si Yuus ninatungo g\u00fce claro gui g\u00fcinife\u00f1a, mapos malag y tanon Galilea.\n2:23 Ya anae mato, sumaga gui siuda na mafanaan Nasaret; para ucumple y masangan\u00f1a pot y profeta sija, na umafanaan taotao Nasaret.\n3:1 AYO sija na jaane, mato si Juan Bautista ya sumetmon gui desierton Judea,\n3:2 Yleg\u00f1a: Fanma\u00f1otsot sa y raenon langet jumijijot.\n3:3 Sa esta g\u00fciya uje y guinin jasangan y profeta Isaias, na ileg\u00f1a: Inagang ni umagang gui desierto: Famauleg y chalan y Se\u00f1ot, natunas y chalan\u00f1a.\n3:4 Y magagu\u00f1a si Juan y pilon cameyo yan y gode\u00f1a cuero na jachaflileg gui sentura\u00f1a, ya y na\u00f1a y apacha sija yan y miet jalom tano.\n3:5 Ayo nae mapos malag para g\u00fciya, Jerusalem yan Judea yan todo y tano gui oriyan Jordan,\n3:6 Ya esta manmatagpange pot g\u00fciya, guiya Jordan, jasangan claro y isao\u00f1ija.\n3:7 \u00b6 Ya jalie megae na Fariseo yan Saduseo sija na manmamaela para y tinagpange\u00f1a ya ileg\u00f1a: Rasan culebla, jaye jamyo fumanag\u00fce na insujaye y binibo ni mamaela?\n3:8 Fanmamatinas tinegcha digno ni y sinetsot.\n3:9 Ya chamiyo jumajaso sumangan gui sanjalommiyo, na si Abraham tatata; ya guajo sumangane jamyo, na si\u00f1a si Yuus janacajulo este sija na acho famaguon gui as Abraham.\n3:10 Pago, esta locue y gachae gaegue na mapolo gui jale y trongcon jayo sija; ya todo y trongcon jayo ni ti manogcha mauleg, umautut ya umapolo gui guafe.\n3:11 Guajo magajet jutagpange jamyo nu y janom para mina\u00f1otsot, lao y mamamaela gui tateco, mas guaja ninasi\u00f1a\u00f1a qui guajo: y sapatos\u00f1a ti mauleg yo na jupula; g\u00fciya infantinagpange ni Espiritu Santo yan y guafe.\n3:12 Y abanico\u00f1a gaegue gui canae\u00f1a, ya unagasgas y tabla\u00f1a, ya unaetnon y trigu\u00f1a jalom gui jalom camalin, ya usonggue y pajan trigo gui taejinecog na guafe.\n3:13 \u00b6 Anae mato si Jesus guinin Galilea, malag Jordan gui as Juan para utinagpange.\n3:14 Lao si Juan ti malago, ileg\u00f1a: Nesesita yo matagpange pot jago, enaojao na mamaela guiya guajo?\n3:15 Inepe as Jesus ileg\u00f1a: Diejaloja, sa taeg\u00fcenao mauleg para utacumple y todo na tininas. Ayo nae pinelo.\n3:16 Ya si Jesus, anae munjayan matagpange, cajulo gusisija guine y janom, y langet mababa pot g\u00fciya ya malie y Espiritun Yuus tumunog calang paluma y sumaga gui jilo\u00f1a.\n3:17 Ya estag\u00fce, un vos guinin y langet na ileg\u00f1a: Estag\u00fciya y lajijo ni y guefyajo.\n4:1 AYO nae quinene si Jesus ni Espiritu para y jalomtano para umatienta ni anite;\n4:2 Ya estaba umayunat cuarenta na jaane yan cuarenta na puenge ya despues \u00f1alang.\n4:3 Ya mato guiya g\u00fciya y manienienta, ya ileg\u00f1a: Yaguin jago lajin Yuus, tago este y acho ya ufamapan.\n4:4 G\u00fciya manope ileg\u00f1a: Matugue esta: Ti y panja uninal\u00e2l\u00e2 y taotao, lao y todo y sinangan ni y jumuyong gui pachot Yuus.\n4:5 Ayo nae ninamalofan ni anite gui santa na siuda; pinelo gui jilo torren diquique, iyon y templo.\n4:6 Y ileg\u00f1a: Yaguin jago lajin Yuus, yutejao g\u00fcine papa, sa matugue esta: Y angjet sija uninadje ya unquinajat ni canae\u00f1ija, para cha\u00f1a y adengmo umatotpe contra y acho.\n4:7 Si Jesus ileg\u00f1a: Locue esta matugue, chamo tietienta y Se\u00f1ot, Yuusmo.\n4:8 Tumalo ninamalofan ni anite gui un sabana na sent\u00e1quilo ya jafanue todo y raeno sija gui jilo y tano yan y minagof\u00f1ija,\n4:9 Ya ileg\u00f1a: Todo este sija junaejao yaguin dumimojao ya unadora yo.\n4:10 Ayonae si Jesus ileg\u00f1a nu g\u00fciya: Janao Satanas, sa matugue esta, y Se\u00f1ot Yuusmo na g\u00fciyaja unadora yan g\u00fciyaja unsetbe.\n4:11 Ayo nae diningo ni anite, ya y angjet sija manmato ya masetbe g\u00fce.\n4:12 \u00b6 Anae jajungog si Jesus na si Juan esta mapongle, tumalo guato Galilea.\n4:13 Ya jadingo Nasaret, mato Capernaum ya sumaga gui oriyan tase gui oriyan tanon Sabulon yan Neftalim.\n4:14 Para umacumple y guinin jasangan y profeta Isaias, na ileg\u00f1a:\n4:15 Y tano Sabulon yan y tano Neftalim, chalan tase yan para otro banda guiya Jordan, Galilea y Gentiles.\n4:16 Ya y taotao sija nu y ma\u00f1asaga gui jemjom, dangculo na manana linii\u00f1ija; y ayo sija nu y ma\u00f1asaga tanon anineng y finatae, candet ufaninina.\n4:17 \u00b6 Desde ayo jatutujon si Jesus sumetmon ya ileg\u00f1a: Fanma\u00f1otsot, sa y raenon langet jijijot.\n4:18 \u00b6 Ya anae jumajanao si Jesus gui tasen Galilea, jalie dos chumelo; si Simon mafanaan Pedro yan si Andres chelu\u00f1a, na janatutunog y lagua gui tase sa manpescadot.\n4:19 Ya ileg\u00f1a nu sija: Dalalag yo ya junafanpescadot taotao jamyo.\n4:20 Sija japolo y lagua sija ya madalalag g\u00fce.\n4:21 Anae jumanao g\u00fcije, jalie otro dos chumelo, si Santiago lajin Sebedeo, yan si Juan chelu\u00f1a, gui sajyan yan si tata\u00f1ija as Sebedeo na jalememenda y lagua\u00f1ija; ya jaagang.\n4:22 Sija enseguidas japolo y sajyan yan si tata\u00f1ija ya madalalag g\u00fce.\n4:23 \u00b6 Ya jalilicue si Jesus iya Galilea mamanag\u00fce gui sinagoga sija ya sumetmetmon ni raenon y evangelio, ya janafanjomlo todo y chetnot yan todo y pinite gui taotao;\n4:24 Ya y matuna\u00f1a matungo todo guiya Siria; ya maquenenee g\u00fce guato todo manmalango, ni guaja todo clasen chetnot yan pinite; y maninanite yan y manbababa yan y manparalitico; ya janafanjomlo.\n4:25 Ya madalalag g\u00fce linajyan taotao, guinin Galilea, yan guinin Decapolis, yan guinin Jerusalem, yan guinin Judea, yan y otro banda guiya Jordan.\n5:1 ANAE jalie si Jesus y linajyan taotao, cajulo gui un sabana, ya matachong; ya y disipulu\u00f1a manmato guiya g\u00fciya.\n5:2 Ya jababa y pachot\u00f1a ya jafanag\u00fce, ileg\u00f1a:\n5:3 Mandichoso y mamoble gui Espiritu, sa uiyon\u00f1ija y raenon langet.\n5:4 Mandichoso y mantriste, sa sija umanafanmagof.\n5:5 Mandichoso y manmanso, sa sija ufanmaereda ni y tano.\n5:6 Mandichoso y man\u00f1alang yan manmajo ni tininas, sa sija umanafanjaspog.\n5:7 Mandichoso y many\u00f3ase, sa sija ufantinaca ni minaase.\n5:8 Mandichoso y mangasgas corason\u00f1ija, sa sija ujalie si Yuus.\n5:9 Mandichoso y fumatitinas y pas, sa sija ufanmafanaan famaguon Yuus.\n5:10 Mandichoso y manmapetsigue pot causa y tininas; sa uiyon\u00f1ija y raenon langet.\n5:11 Mandichoso jamyo, yaguin manmamatdise jamyo, yan manmapetsigue jamyo, yan manmasangane jamyo todo taelaye pot y naanjo, ya manmandague.\n5:12 Fanmagof, ya infansenmagof, sa y premionmiyo gui langet sendangculo: sa taeg\u00fcenaoja locue manmapetsigue\u00f1ija y profeta sija ni y antes di jamyo.\n5:13 \u00b6 Jamyo y asigan y tano; ya yaguin y asiga malingo y maase\u00f1a, jafa taemano manasne? taya bali\u00f1a, na umayute juyong ya umagacha ni y taotao.\n5:14 Jamyo y candet y tano. Y siuda ni maplanta gui jilo y tano t\u00e1quilo ti si\u00f1a umatog.\n5:15 Taya candet umasonggue ya umapolo gui papa un medida; lao umapolo gui candelero, ya umanainina todo y mangaegue gui jalom guma.\n5:16 Polo ya umanina y candetmiyo gui menan y taotao sija, para ujalie y mauleg chechonmiyo, ya innamagof y tatanmiyo ni y gaegue gui langet.\n5:17 \u00b6 Chamiyo jumajaso na mato yo para juyulang y tinago pat y profeta sija; ti mato yo para juyulang, lao para jucumple.\n5:18 Sa magajet jusangane jamyo, nu y langet yan y tano ufalingo; lao ni un punto ni un pongpong gui tinago ufalingo, asta qui g\u00fciya todo macumple.\n5:19 Ya jayeja y yumulang uno g\u00fcine gui sendiquique na tinago, ya mamanag\u00fce ni taotao, diquique umafanaan gui raenon langet; lao jayeja y fumatinas ya mamanag\u00fce umafanaan dangculo gui raenon langet.\n5:20 Sa guajo sumangane jamyo: na y tininasmiyo yaguin ti mudong\u00f1a qui y tininas y escriba yan y Fariseo sija, ti si\u00f1a jamyo manjalom gui raenon langet.\n5:21 \u00b6 Injingogja y munjayan masangane sija gui manmalofan na tiempo: Chamo famumuno, ya jayeja y mamuno, peligro\u00f1a gui juisio.\n5:22 Lao guajo sumangane jamyo na jayeja y lalalo ni chelu\u00f1a, peligro\u00f1a gui juisio, na jayeja y umalog ni chelu\u00f1a, taetiningo jao, peligro\u00f1a gui tribunal, lao jayeja y umalog bababa jao, peligro\u00f1a gui guafen sasalaguan.\n5:23 Yaguin unchule y ninaimo guato gui attat, ya ayo nae unjaso na guaja linachimo gui chelumo;\n5:24 Polo g\u00fcije y ninaimo gui menan y attat, ya unjanao finena ya inatungo yan y chelumo, ya ayo nae untalo guato ya unnaen\u00f1aejon y ninaimo.\n5:25 Atungo yan y contrariumo enseguidas, mientros gaegue jamyo gui chalanmiyo, noseaja, y cotrariumo unenentrega gui jues, ya y jues unenentrega gui ofisiat ya unmapolo gui preso.\n5:26 Magajet jusangane jamyo: Seguro na ti unjuyong g\u00fcije, asta qui anapase y uttimo na coble.\n5:27 \u00b6 Injingogja y munjayan masangan: Munga um\u00e1bale,\n5:28 Ya guajo sumangane jamyo, na jayeja y umatan y palaoan nu \u00e1bale na minalago\u00f1a, jafatinas yan g\u00fciya y \u00e1bale gui jalom corason\u00f1a.\n5:29 Yaguin y agapa na atadogmo uninapodong jao, chule ya yute guiya jago; sa mauleg\u00f1a na ufalingo un pidaso guiya jago, qui todo y tataotaomo umayute guiya sasalaguan.\n5:30 Ya yaguin y agapa na canaemo uninapodong jao, utut ya yute guiya jago; sa mauleg\u00f1a, na ufalingo un pidaso guiya jago, qui todo y tataotaomo umayute guiya sasalag\u00fcan.\n5:31 \u00b6 Munjayan locue masangan: Jayeja y dumingo y asagua\u00f1a, umatugue y papet y inapattan umasagua.\n5:32 Lao guajo sumangane jamyo, na y dumingo y asagua\u00f1a ya ti pot in\u00e1bale, jafatinas y \u00e1bale; ya jayeja y umasagua ayo y umadingo, jafatinas y \u00e1bale.\n5:33 \u00b6 Injingogja locue y munjayan masangane sija gui manmalofan na tiempo: Munga manjula pot namaesa jao; lao unfatinas ni y Se\u00f1ot gui jinilamo.\n5:34 Lao guajo sumangane jamyo: Chamiyo fanmanjujula pot jafa; ti pot y langet, sa raenon Yuus;\n5:35 Ni pot y tano, sa sagan y adeng\u00f1a; ni pot Jerusalem, sa siuda y dangculo na Ray;\n5:36 Ni pot y ilumo unfanjula; sa ti si\u00f1a y gaponulo uno naapaca, ni uno naatulong.\n5:37 Lao yaguin manguentos jamyo, alog: Junggan, junggan; Aje, aje; sa yaguin mas qui este, taelaye jumuyong.\n5:38 \u00b6 Injingogja y munjayan masangan: Atadog yan atadog, nifen yan nifen,\n5:39 Lao guajo sumangane jamyo: Chamiyo fumatinas jafa contra y tinaelaye; yaguin jayejao pumatmada gui agapa na fasumo, birayeja ni y otro.\n5:40 Ya jayeja y munaquequemumojao ya jachule y magagomo, nae locue y capamo.\n5:41 Ya jayeja y umafuetsas jao na unjanao yan g\u00fciya un miya; unjanao yan g\u00fciya dos.\n5:42 Y gumagao jao, nae; ya y mumalago umayao jao, chamo jao rumiuusa.\n5:43 \u00b6 Injingogja y munjayan masangan: Guaeya y tiguangmo ya chatlie y enemigomo.\n5:44 Lao guajo sumangane jamyo: Guaeya y enemigonmiyo; bendise y mumatdidise jamyo; fantinas mauleg ni y chumatlie jamyo, tayuyute sija as Yuus ni y munamamajlao jamyo yan y pumetsigue jamyo,\n5:45 Para infanfamaguon y tatanmiyo ni y gaegue gui langet, nu y janafanina y atdao gui jilo y manaelaye yan y manmauleg; ya janauchan gui jilo y manunas yan y timanunas.\n5:46 Sa yaguin inguaeya ayo y gumaeya jamyo, jafa premionmiyo? Ada ti jafatinas locue taeg\u00fcenao y publicano sija?\n5:47 Yaguin unsaluda y ma\u00f1elunmiyo, jafa unfatinas mauleg? Ada ti jafatinas locue taeg\u00fcenao y ti mangilisyano?\n5:48 Nafangabales jamyo taeg\u00fcije y tatanmiyo ni y gaegue gui langet, cabales.\n6:1 ADAJE ya chamiyo fumatitinas y limosnanmiyo gui menan y taotao sija, para infanlinie; sa yaguin ti taeg\u00fcenao, taya premionmiyo gui tatanmiyo ni gaegue gui langet.\n6:2 Yaguin unfatitinas y limosnamo, chamo na catitiye trompeta gui menamo taeg\u00fcije y jafatitinas y hipocrita sija gui sinagoga, yan y plasa para uguaja minalag\u00f1ija nu y taotao sija. Magajet jusangane jamyo na esta guaja premio\u00f1ija.\n6:3 Lao jago, yaguin unfatitinas y limosnamo, chamo natutungo y canaemo acag\u00fce jafa checho y canaemo agapa.\n6:4 Para ugaegue y limosnamo gui secreto, sa y tatamo ni jalilie gui secreto, g\u00fciya umapase jao gui publico.\n6:5 \u00b6 Ya yaguin manaetaejao, munga taeg\u00fcije y hipocrita, sa sija yan\u00f1ija manmanaetae gui sinagoga yan y esquinan chalan manotojgue para ufanmalie nu y taotao sija. Magajet na esta guaja premio\u00f1ija.\n6:6 Lao jago, yaguin manaetaejao, jalom gui aposentomo, ya juchum y pettamo, ya taetaye y tatamo ni y gaegue gui secreto; sa y tatamo ni y jalilie gui secreto, g\u00fciya umapase jao gui publico.\n6:7 Yan manaetaejao chamo sumasangan un sinangan megae na biaje na taebale, taeg\u00fcije y Gentiles; jinaso\u00f1ija na ufanmajungog pot y megae sinangan\u00f1ija.\n6:8 Chamiyo fumatitinas taeg\u00fcije iya sija; sa y tatanmiyo jatungoja jafa innesesita antes qui ingagao g\u00fce.\n6:9 Lao an manmanaetae jamyo taeg\u00fcine: Tatanmame na gaegue jao gui langet: umatuna y naanmo.\n6:10 Umamaela y raenomo, umafatinas y minalagomo jaftaemano gui langet taeg\u00fcijija gui tano;\n6:11 Naejam pago nu y cada jaane na agonmame;\n6:12 Ya asiijam nu y dibenmame, taeg\u00fcije yan inasisie y dumidibejam sija;\n6:13 Ya chamojam pum\u00f3polo na infanbasnag gui tentasion, lao nafanlibrejam nu y taelaye; sa iyomo y raeno, yan y ninasi\u00f1a, yan y minalag para taejinecog na jaane; Amen.\n6:14 Sa yaguin inasie y umisag\u00fce jamyo: maninasiija locue jamyo as tatanmiyo ni gaegue gui langet.\n6:15 Lao yaguin ti unasie ayo sija y umisag\u00fce jamyo, ti infaninasie locue ni tatanmiyo nu y isaomiyo.\n6:16 \u00b6 Yaguin umayuyunatjao, munga taeg\u00fcije y hipocrita nu y triste na mata, jaago y mata\u00f1ija, para ufanmatungo ni taotao sija na manayunat. Magajet jusangane jamyo, na esta guaja premio\u00f1ija.\n6:17 Lao jago, yaguin umayunat jao, palalae y ilumo, ya unfagase y matamo;\n6:18 Para munga malilie nu y taotao sija na umayuyunat jao, lao si tatamoja ni y gaegue gui secreto; ya si tatamo, ni jalilie gui secreto, g\u00fciya uninapase gui publico.\n6:19 \u00b6 Chamiyo fannanaetnon g\u00fcinaja para jamyo gui tano, mano nae y poliya yan y lamas uyinamag, yan y saque sija uyulang yan uchule;\n6:20 Lao fannaetnon g\u00fcinaja para jamyo gui langet, mano nae ni y poliya ni y lamas ti uyinamag, ya ni y saque sija ti uyulang yan ti uchule.\n6:21 Sa manoja nae gaegue y g\u00fcinajanmiyo, ayoja nae gaegue locue y corasonmiyo.\n6:22 Y candet y tataotao y atadog; yaguin y gasgas atadogmo, todo y tataotaomo ubula y manana.\n6:23 Lao yaguin y taelaye na atadogmo, todo y tataotaomo jomjom, Sa yaguin y manana ni y gaegue guiya jago jomjom, jafa na gosdangculo na jinemjom!\n6:24 \u00b6 Taya ni uno si\u00f1a sumetbe dos amo; sa jachatlie y uno, ya jaguflie y otro; pat jadalalag y uno ya jadespresia y otro. Ti si\u00f1a jamyo insetbe si Yuus yan y g\u00fcinaja.\n6:25 Enao mina jusangane jamyo: Chamiyo fanmanjajaso pot y jaaninmiyo; jafa para incano, pat jafa para inguimen; ni pot para innaminagago y tataotaomiyo. Ada ti bale mas y lin\u00e2l\u00e2mo qui y nengcano, yan y tataotaomo qui y magago?\n6:26 Atanja y pajaro gui langet; ti manmanananon, ni ti manmangongoco, ni ti manmanrecocoje jalom gui camalin; sa si tatamoja gui langet munafa\u00f1ochocho. Ada ti mangaebalot\u00f1a jamyo qui sija?\n6:27 Ya jaye guiya jamyo, yaguin manjaso, si\u00f1a jataluye y lineca\u00f1a un codo?\n6:28 Ya jafa jamyo na manmanjajaso pot magago? Jasoja y lirio sija gui fangualuan, jaftaemano manl\u00e2l\u00e2\u00f1i\u00f1ija; ti manmachochocho ya ti manmajijila.\n6:29 Lao jusangane jamyo, na si Salomon yan todo y minalag\u00f1a, ti minagago parejo yan uno g\u00fcine sija.\n6:30 Yanguin si Yuus janaminagago y chaguan gui fangualuan; sa pago gaegue, ya agupa machule ya mapolo gui jetno, ada ti mas jamyo inninaminagago, taotao jamyo na didide jinengguenmiyo?\n6:31 Enao mina, chamiyo jumajaso umalog: Jafajit tacano, pat jafajit taguimen, pat jafajit magaguta?\n6:32 Sa todo este sija na g\u00fcinaja, jaaliligao y Gentiles; ya y tatanmiyo gui langet jatungoja na innesesita todo este sija na g\u00fcinaja.\n6:33 Lao aligao fenena y raenon Yuus, yan y tininas\u00f1a; ya despues todo este sija na g\u00fcinaja infanmataluye.\n6:34 Chamiyo jumajaso y para agupa, sa y para agupa g\u00fciyaja g\u00fce ujaso. Basta para y cada y jaane y inalulaye.\n7:1 CHAMIYO fanmanjusga para ti infanmajusga.\n7:2 Sa taemanoja yan manmajusga yan manma\u00f1ogne jamyo, taeg\u00fcijija locue infanmajusga; ya taemanoja y minedidamiyo, taeg\u00fcijija locue infanmamediye.\n7:3 Sa jafa muna unlilie y migo gui atadog y chelumo, ya ti unjajaso y jayo gui atadogmo?\n7:4 Jafa taemano unalog nu y chelumo: Maela ya junajanao enao y migo gui atadogmo; ya enag\u00fcija y jayo gui atadogmo?\n7:5 Hipocrita! Najanao finenana y jayo gui atadogmo? ya ayo nae si\u00f1a ungueflie yan para unnajanao y migo gui atadog y chelumo.\n7:6 \u00b6 Chamiyo numanae y galago nu y santos, ni inpelo y perlasmiyo gui menan y babue; sa no seaja ujagacha nu y patas\u00f1ija ya ujabira sija ya infanyenabalag jamyo.\n7:7 \u00b6 Gagao ya infanmanae; aligao ya inseda; yajo ya infanmababaye.\n7:8 Sa jayeja y mangagao, uresibe; ya y manaligao, usoda; ya y manyajo, umababaye.\n7:9 Ya jayeja guiya jamyo, yaguin uguinagao nu y laji\u00f1a pan, ada unnae acho?\n7:10 Pat yaguin uguinagao un g\u00fcijan, ada unnae un serpiente?\n7:11 Ombre manaelaye jamyo, intingo numae mauleg na ninae y famaguonmiyo; ada ti mas y tatanmiyo, ni y gaegue gui langet, unnae mauleg na g\u00fcinaja todo ayo y gumagaog\u00fce?\n7:12 Enao mina, jaftaemano y malagomiyo na y taotao ufatitinas nu jamyo, taeg\u00fcijija infatitinas locue nu sija; sa este y lay yan y profeta sija.\n7:13 \u00b6 Jalom gui maiot na potta, sa y feda na potta ya micanpo y chalan nu y jumananaog\u00fce y finalingo, ya megae sija y fumapoposg\u00fce.\n7:14 Sa y maiot na potta ya dalalae na chalan y jumananaog\u00fce y lin\u00e2l\u00e2, ya didide sija y sumosoda.\n7:15 \u00b6 Adaje jamyo nu y ti manmagajet na profeta, ni ufanmato guiya jamyo maninagagon quininilo, lao y sanjalom\u00f1ija mangaegue lobo na ma\u00f1aque.\n7:16 Injatingo pot y tinegcha\u00f1ija. Ada y taotao ufa\u00f1ule ubas guine y t\u00edtucan jayo, pat igos guine y t\u00edtucan chaguan?\n7:17 Taeg\u00fcijija todo y mauleg na trongcon jayo, siempre mauleg tinegcha\u00f1a; lao y taelaye na trongcon jayo, siempre taelaye tinegcha\u00f1a.\n7:18 Ti si\u00f1a y mauleg na trongcon jayo manogcha taelaye; ni y taelaye na trongcon jayo manogcha mauleg.\n7:19 Todo y trongcon jayo ni ti manogcha mauleg, umautut ya umayute gui guafe,\n7:20 Enao mina pot y tinegcha\u00f1ija, injatingo.\n7:21 \u00b6 Ti todo y umalog nu guajo: Se\u00f1ot! Se\u00f1ot! ujalom gui raenon langet; lao ayo y fumatinas y minalago y tatajo, ni y gaegue gui langet.\n7:22 Megae, g\u00fcije na jaane, ualog nu guajo: Se\u00f1ot! Se\u00f1ot! ada ti inprofetisa pot y naanmo, yan innajanao y anite pot y naanmo, yan infatinas megae n\u00e1manman na chocho pot y naanmo?\n7:23 Ya ayo nae jusangane sija, ni y magajet ti jutungo jamyo, fanjanao guiya guajo, jamyo manmamatitinas inechong.\n7:24 \u00b6 Enao mina jayeja y jumungog este sija y sinanganjo ya fumatinas, g\u00fciya parejo yan y m\u00e9jnalom na taotao, na jafatinas y guima\u00f1a gui jilo acho;\n7:25 Ya utunog y ichan, yan ufanmato y sadog, yan ufanmanguaefe y manglo, ya ubinate ayo na guma ya ti upodong, sa mafatinas gui jilo acho.\n7:26 Lao jayeja y jumungog este sija y sinanganjo, ya ti fumatinas, g\u00fciya parejo yan y b\u00e1baba na taotao na jafatinas y guima\u00f1a gui jilo unae;\n7:27 Ya utunog y ichan yan ufanmato y sadog, yan ufanmanguaefe y manglo ya ubinate ayo na guma, ya upodong; ya gosdangculo y pinedong\u00f1a.\n7:28 Ya susede, anae munjayan este sija jasangan si Jesus, ninafanmanman y linajyan taotao sija nu y doctrina\u00f1a.\n7:29 Sa jafanag\u00fce sija, calang uno ni gaeninasi\u00f1a, lao ti calang y escriba sija.\n8:1 YA anae tumunog g\u00fce guinin y sabana, madalalag g\u00fce dangculo na linajyan taotao.\n8:2 Ya estag\u00fce na mato un ategtog ya tinayuyut g\u00fce ileg\u00f1a: Se\u00f1ot, yaguin malagojao, si\u00f1a unnagasgas yo.\n8:3 Ya jaestira y canae\u00f1a ya japacha ya ileg\u00f1a: malagoyo, gasgasjao! Ya enseguidas y ategtog gasgas.\n8:4 Ayo nae ileg\u00f1a si Jesus: Adaje ya chamo fa\u00f1angangane ni jaye; lao falag y pale ya unfanue nu jago, ya unchule y ninae ni manago si Moises para testimonio\u00f1ija.\n8:5 \u00b6 Ya anae jumalom si Jesus guiya Capernaum, mato guiya g\u00fciya un senturion guinagao g\u00fce,\n8:6 Ya ileg\u00f1a: Se\u00f1ot, y tentagojo gaegue guiyajame na umaason sa malango paralitico, ya gogosninachatsaga sa adit.\n8:7 Ya ileg\u00f1a nui guiya: Bae jufato ya junajomlo.\n8:8 Lao senturion manope ya ileg\u00f1a: Se\u00f1ot, ti si\u00f1a na guajojao junafato gui papa atufjo, lao sanganja un palabra ya ujomlo y tentagojo.\n8:9 Sa guajo locue un taotao gui papa ninasi\u00f1a, ya guaja sendalojo gui papa ninasi\u00f1ajo; ya yaguin ilegco nu este na taotao: Janao, ya jumanao; yan ilegco ni otro: Maela, ya mamaela, yan ilegco ni tentagojo: Chog\u00fce este, ya jachog\u00fce.\n8:10 Ya anae jajungog si Jesus, ninamanman, ya ileg\u00f1a nu y dumadalalag g\u00fce: Magajet jusangane jamyo, na tayayo nae ma\u00f1oda ni este na dangculon jinenggue guiya Israel!\n8:11 Ya guajo sumangane jamyo, na ufanmato megae guine y sancatan, yan guine y sanlichan; ya ufanmatachong yan si Abraham yan si Ysaac yan si Jacob gui raenon langet;\n8:12 Lao y famaguon y raeno ufanmayute gui sumanjiyong gui jemjom; ya ayo nae uguaja cumasao yan checheg nifen.\n8:13 Entonses si Jesus ileg\u00f1a nu y senturion: Janao, parejoja y unjonggue, umafatinas guiya jago; ya y tentago\u00f1a jumonlo g\u00fcije na ora.\n8:14 \u00b6 Ya anae mato si Jesus gui guiman Pedro, jalie y suegran Pedro na umaason gui cama, sa guaja calentura\u00f1a.\n8:15 Ya japacha canae\u00f1a; ya pinelo ni calentura: ya cajulo ya jasetbe sija.\n8:16 Ya anae esta pupuenge, maconie g\u00fce megae na maninanite, ya janajanao guiya sija todo y anite pot y sinangan\u00f1a, yan janafanjomlo todo y manmalango.\n8:17 Para umacumple y esta masangan pot y profeta Isaias, na ileg\u00f1a: G\u00fciya chumule y chetnotta yan cumacatga y pinitita.\n8:18 \u00b6 Ya anae jalie si Jesus y linajyan taotao gui oriya\u00f1a, manago na ufanmalag y otro banda y sadog.\n8:19 Ya mato un escriba ya ileg\u00f1a nu g\u00fciya: Maestro, judalalag jao mano y malagomo guato.\n8:20 Ya si Jesus ileg\u00f1a nu g\u00fciya: Y sora sija guaja liyang\u00f1ija, ya y pajaro gui langet guaja chenchon\u00f1ija: lao y Lajin taotao taya mano nae unaason y ilu\u00f1a.\n8:21 Ya otro uno gui disipulu\u00f1a ileg\u00f1a nu g\u00fciya: Se\u00f1ot, nae yo lisensia ya jujanao finena ya jujafot y tatajo.\n8:22 Ya si Jesus ileg\u00f1a nu g\u00fciya: Dalalag yo; ya polo ya y manmatae ufanjinafot ni y mangaematae.\n8:23 \u00b6 Ya anae jumalom gui un sajyan, y disipulu\u00f1a sija madalalag g\u00fce.\n8:24 Ya dangculo na pagyo mato gui tase ya y sajyan tinatampe nu y napo sija; ya g\u00fciya mamaegoja.\n8:25 Ya manmato guiya g\u00fciya y disipulu\u00f1a ya mayajog\u00fce ileg\u00f1ija: Se\u00f1ot, nafanlibrejam sa manmalingojam!\n8:26 G\u00fciya ileg\u00f1a nu sija: Jafa na manmaa\u00f1ao jamyo, taotao na didide jinengguenmiyo? Ayo nae cajulo ya jachoma y manglo yan y tase, ya dangculo na minalinao guaja.\n8:27 Ya y taotao sija manmanman, ya ileg\u00f1ija; jafa este na taotao na y manglo yan y tase maoosgueja g\u00fce?\n8:28 \u00b6 Ya anae mato gui otro banda gui tano y taotao Gadara sija, umasoda yan dos na gaemanganite na manguine y naftan, yan mangosnamaa\u00f1ao y jechura\u00f1ija; ya taya si\u00f1a malofan g\u00fcije na chalan.\n8:29 Ya estag\u00fce, na manaagang ileg\u00f1ija: Para jafajam nu jago Lajin Yuus? Matojao g\u00fcine para usapetjam antes di y tiempo?\n8:30 Ya chago guiya sija estaba un manada na gosmegae na babue ma\u00f1ochocho.\n8:31 Y anite sija matayuyutg\u00fce ileg\u00f1ija: Yaguin unyutejam juyong, najanaojam na fanmalag ayo y babue sija.\n8:32 Ya ileg\u00f1a nu sija: Janao. Ya sija manjuyong ya, manmalag gui jalom y manadan babue; ya, estag\u00fce, todo y babue manmalago papa gui un didog na lugat, asta y jalom tase, ya manmatae gui janom tase.\n8:33 Y munafa\u00f1ochocho y babue manmalago ya manmalag y siuda, ya jasangan todo y guaja, ya jafa susede yan y mangaemanganite.\n8:34 Ya, estag\u00fce, todo y siuda manjanao para ufanasoda yan si Jesus, ya anae maliig\u00fce, matayuyutg\u00fce na ujanao gui tano\u00f1ija.\n9:1 YA jumalom gui un batco, mapos g\u00fce, ya malag y otro banda ya mato gui suida\u00f1a.\n9:2 Ya, estag\u00fce, sija na manmangongone g\u00fce un malango, umaason gui cama sa paralitico; ya anae jalie si Jesus y jinenggue\u00f1ija, ileg\u00f1a nu y paralitico: Angoco lajijo; y isaomo unmaasie.\n9:3 Ya estag\u00fce sija palo escriba na ileg\u00f1ija gui sanjalom\u00f1ija: Este chumatfino contra si Yuus.\n9:4 Ya anae jatungo si Jesus y jinaso\u00f1ija, ileg\u00f1a: Jafa na manmanjajaso jamyo taelaye gui corasonmiyo?\n9:5 Sa jafa mas guse masangan: Y isaomo unmaasie: pat masangan: Cajulo ya unfamocat?\n9:6 Lao para intingoja na y Lajin taotao guaja ninasi\u00f1a\u00f1a, gui jilo tano, para umaasie isao; (ayo nae ileg\u00f1a nu y paralitico), Cajulo, chule y camamo ya unjanao para iyajamyo.\n9:7 Ayo nae cajulo ya mapos para iyasija.\n9:8 Ya anae malie nu y linajyan taotao, ninafanmanman, ya manamalag si Yuus, sa mannae nu ayo na ninasi\u00f1a gui taotao sija.\n9:9 \u00b6 Ya anae malofan si Jesus g\u00fcije, jalie un taotao na matatachong gui bancon y tributo, na y naan\u00f1a si Mateo, ya ileg\u00f1a nu g\u00fciya, Dalalagyo. Ya cajulo ya dinalalag g\u00fce.\n9:10 Ya susede anae estaba g\u00fce, matachong chumochocho gui jalom guma, estag\u00fce, sija megae na publicano yan manisao, manmato ya ma\u00f1ija manmatachong gui lamasa yan si Jesus yan y disipulu\u00f1a sija.\n9:11 Ya anae malie este nu y Fariseo sija, ileg\u00f1ija nu y disipulu\u00f1a: Sa jafa y maestronmiyo na ma\u00f1isija ma\u00f1ocho yan y publicano yan y manisao?\n9:12 Lao anae jajungog ayo, ileg\u00f1a: Y manaechetnot ti janesesita medico: lao y manmalango.\n9:13 Janao ya inquetungo jafa este: Minaase malagojo, ya ti inefrese; sa ti mato yo para juaagang y manunas, lao y manisao para ufanma\u00f1otsot.\n9:14 \u00b6 Ayo nae y disipulon Juan manmato guiya g\u00fciya ya ileg\u00f1ija: Jafa jame yan y Fariseo sija na manayuyunat megae; ya y disipulumo ti manayuyunat?\n9:15 Ya ileg\u00f1a si Jesus nu sija: Si\u00f1a y mangachong y nobio, mantriste yaguin ma\u00f1isijaja yan y nobio? Lao ufato y jaane, na y nobio umacone guiya sija, ya ayo nae ufanayunat.\n9:16 Taya ni un taotao lumimendan\u00f1aejon y nuebo na magago gui mamagagon\u00f1a\u00f1ajeon ni y bijo; sa ayo na lemenda usuja gui magago, ya y minatiteg\u00f1a sentaelaye.\n9:17 Ni umasajguane locue y nuebo na bino gui bijo na boteyan cuero sa y boteyan cuero umafag ya umachuda y bino, ya manmalingo y boteyan cuero; lao umasajguane y nuebo na bino gui nuebo na boteyan cuero, ya uchamaog y dos.\n9:18 \u00b6 Mientras jasangangane sija ni este, estag\u00fce, un magas na mato ya inadorag\u00fce ileg\u00f1a: Y jagajo matae tiampmanja; lao nije ya maela ya unpolo y canaemo gui jilo\u00f1a ya ul\u00e2l\u00e2.\n9:19 Ya cajulo si Jesus ya dinalalag g\u00fce, yan y disipulu\u00f1a locue.\n9:20 \u00b6 Ya, estag\u00fce, un palaoan na malango nu y minilalag y j\u00e2g\u00e2, esta dose a\u00f1os, mato gui tate\u00f1a ya japacha y madoblan y magagu\u00f1a;\n9:21 Sa ileg\u00f1a gui sumanjalom\u00f1a: Yaguin jupachaja y magagu\u00f1a, jujomlo.\n9:22 Lao si Jesus jabirag\u00fce ya anae malie g\u00fce ileg\u00f1a: Jagajo, angoco, y jinengguemo unninajomlo. Ya y palaoan ninajomlo desde ayo na ora.\n9:23 Ya anae mato si Jesus gui guima ayo na magas, ya jalie y mandadandan nu y flauta yan y taotao sija manboruruca,\n9:24 Yleg\u00f1a: Fa\u00f1uja; sa y patgon palaoan ti mamatae, lao mamaego. Ya mabutleag\u00fce.\n9:25 Lao y taotao sija anae ma\u00f1uja, g\u00fciya mapos jalom, ya jamantiene canae\u00f1a; ya y patgon palaoan cajulo.\n9:26 Ya malofan este na fama todo g\u00fcije na tano.\n9:27 \u00b6 Anae mafapos si Jesus g\u00fcije, madalalag g\u00fce dos taotao na bachet na umaagang ileg\u00f1ija: Gaease nu jame, jago, Lajin David.\n9:28 Ya anae mato guato gui jalom guma, manmato guiya g\u00fciya y dos bachet, ya si Jesus ileg\u00f1a nu sija: Injenggue na guajo si\u00f1a jufatinas este? Ya sija ileg\u00f1ija: Junggan Se\u00f1ot.\n9:29 Ayo nae japacha y atadog\u00f1ija ya ileg\u00f1a: Parejoja y jinengguenmiyo umafatinas.\n9:30 Ya y atadog\u00f1ija manmababa. Ya si Jesus jagosencatga ileg\u00f1a. Adaje ya chamiyo munatutungo ni uno.\n9:31 Lao anae manmapos sija, manafamta y fama\u00f1a todo g\u00fcije na tano.\n9:32 \u00b6 Ya anae manmapos sija; estag\u00fce, machule guiya g\u00fciya un taotao na udo, na gaeanite.\n9:33 Anae ninajanao y anite y udo cumuentos. Ya y linajyan taotao ninafanmanman ya ileg\u00f1ija: Taya este nae malie guiya Israel.\n9:34 Lao y Fariseo sija ileg\u00f1ija: Pot y ninasi\u00f1a y prinsipen anite, janajanao y anite sija.\n9:35 Ya jalilicue si Jesus todo y siuda sija yan y sengsong, mamananag\u00fce gui guima Yuus\u00f1ija, ya jasesetmon y ebangelion y raeno, yan janafanmamagong todo y chetnot yan todo y pinite gui taotao sija.\n9:36 \u00b6 Anae jalie y linajyan taotao, ninamaase nu sija, sa manadingo ya manmachalapon calang y quinilo nu y taya pastot\u00f1ija.\n9:37 Ayo nae ileg\u00f1a nu y disipulu\u00f1a: Magajet na y cosecha megae: lao y manf\u00e1fachocho didide.\n9:38 Tayuyut y Se\u00f1ot y cosecha ya utago y manf\u00e1fachocho gui cosecha\u00f1a.\n10:1 AYO nae jaagang y dose na disipulu\u00f1a, ya janae ninasi\u00f1a\u00f1ija contra y manaplacha na espiritu, para ujayute juyong; yan unafanmagong todo y chetnot, yan todo y manpinite.\n10:2 Ya y naan y dose apostoles sija este sija: Y finenana, si Simon na mafanaan si Pedro, yan si Andres chelu\u00f1a: si Santiago, lajin Sebedeo, yan si Juan chelu\u00f1a;\n10:3 Si Felipe, yan si Bartolome; si Tomas, yan si Mateo y publicano; si Santiago, lajin Alfeo, yan si Lebeo, na y apiyidu\u00f1a si Tadeo;\n10:4 Si Simon Selote, yan si Judas Iscariote, ni y umintrega g\u00fce locue.\n10:5 Este y dose sija mantinago as Jesus na ufanjanao ya maninencatga ileg\u00f1a: Chamiyo fanmalag y chalan y Gentiles; yan y siuda y Samaritano sija chamiyo fanjajalom:\n10:6 Lao gosmauleg para ufanmalag y malingo na quinilo gui guima Israel.\n10:7 Anae manjanao jamyo, setmon ya alog: Y raenon langet mato jijot.\n10:8 Nafanjomlo y manmalango, nafan gasgas y manategtog, nafangajulo y manmatae, nafanjanao y anite sija: pot grasia na inresibe, fanmannae pot grasia.\n10:9 Chamiyo fannanaetnon oro ni salape ni coble gui betsanmiyo;\n10:10 Ni tengguang para y chalan, ni dos na magago ni sapatos, ni baston; sa y faf\u00e1chocho jamerese y nengcano\u00f1a.\n10:11 Yan todo na siuda, pat songsong na manjalom jamyo, guesaligao jaye mumerese, ya fa\u00f1aga g\u00fcije asta qui para infanjanao.\n10:12 Yaguin manjalom jamyo gui guima, saluda.\n10:13 Yaguin y guima jamerese, y pasmiyo usaga guiya g\u00fciya; lao yaguin ti jamerese, y pasmiyo utaloja guato guiya jamyo.\n10:14 Ya jayeja y ti rumesibe jamyo, yan ti jaecungog y sinanganmiyo, fanjanao g\u00fcije na guma pat suida, ya insacude contra sija todo y petbos gui adengmiyo.\n10:15 Magajet jusangane jamyo: Y mas mauleg para y tano Sodoma yan Gomora gui jaanin sentensia, qui para ayo na siuda.\n10:16 \u00b6 Estag\u00fce, na guajo jamyo tumago, calang quinilo gui entalo lobo sija; fanmalate calang y serpiente sija, yan y fanmanso calang y paluma sija.\n10:17 Adaje jamyo nu y taotao sija; sa infaninentrega gui inetnon ofisiat, ya infanmasaolag gui sinagoga\u00f1ija;\n10:18 Ya infanmacone guato gui menan magalaje yan ray pot y naanjo, para testimonio contra sija yan y Gentiles.\n10:19 Lao yaguin manmaentrega jamyo, chamiyo jumajaso jafa para insangan; so ayoja na ora infanmanae jafa para insangan.\n10:20 Sa ti jamyo infanguentos, lao y Espiritun y Tatanmiyo ni y cumuecuentos gui jalommiyo.\n10:21 Y cheloja uinentrega y chelu\u00f1a para umapuno, ya y tata y laji\u00f1a: ya y famaguon ufangajulo contra tata\u00f1ija, ujanamapuno.\n10:22 Ya todo infanchinatlie pot y naanjo; lao y sumigue asta y uttimo, g\u00fciya ucajulo gui langet.\n10:23 Lao yaguin manmapetsigue jamyo gui un suida, fanmalag y otro: sa magajet jusangane jamyo, na ti infanmunjayan manjanao todo gui siudan Israel, asta qui mato y Lajin taotao.\n10:24 Y disipulo, ti dangculo\u00f1a qui y maestro, yan y tentago qui y amu\u00f1a.\n10:25 Bastaja y disipulo yaguin parejoja y maestru\u00f1a, ya y tentago yaguin parejoja y amu\u00f1a. Sa yaguin y tata gui guima mafanaan Beetsebub, cuanto mas y familiana?\n10:26 Chamiyo fanmaa\u00f1ao; sa taya matatampe, para ti umalie: yan manaatog para ti umatungo.\n10:27 Todo sija y jusangane jamyo gui jemjom, sangan\u00f1aejon gui manana: ya todo sija y injingog gui talanga, sangan\u00f1aejon desde y jilo guma.\n10:28 Ya chamiyo fanmaa\u00f1ao ni upinino y tataotao; sa ti si\u00f1a japuno y ante: lao fanmaa\u00f1ao\u00f1ao ni ayo y si\u00f1a yumute y tataotao yan y ante guato guiya sasalaguan.\n10:29 Ada ti mabende dos gorri\u00f3n na p\u00e1jaro pot un coble? yan ni uno guiya sija upodong gui tano sin utungo si tatanmiyo.\n10:30 Y gaponulonmiyo locue esta todo manmatufong.\n10:31 Chamiyo fanmaa\u00f1ao; sa mas manbali\u00f1aja jamyo qui y megae na p\u00e1jaro.\n10:32 Jayeja y sumanganyo gui menan taotao, g\u00fcajo locue jusangang\u00fce gui menam y tatajo ni gaegue gui langet.\n10:33 Ya jayeja y pumuneyo gui menan taotao sija, guajo locue jupune g\u00fce gui menan y tatajo ni y gaegue gui langet.\n10:34 \u00b6 Chamiyo jumajaso na mato yo para jupolo pas gui tano: ti matoyo para jupolo pas, lao espada.\n10:35 Sa mato yo para jupolo inaguaguat y laje contra y tata\u00f1a, ya y jaga contra y nana\u00f1a, ya y yetna contra y suegra\u00f1a.\n10:36 Ya y enemigo\u00f1ija mangaegueja guiya sija.\n10:37 Y gumaeya y tata\u00f1a pat y nana\u00f1a mas qui guajo, ti ufanmerese nu guajo; ya y gumaeya y laji\u00f1a pat y jaga\u00f1a mas qui guajo, ti ufanmerese nu guajo.\n10:38 Ya, y ti chumule y quiluus\u00f1a ya udalalagyo, ti ufanmerese nu guajo.\n10:39 Y sumoda y lin\u00e2l\u00e2\u00f1a, ufinalingaeguan; ya y finalingaeguan ni y lin\u00e2l\u00e2\u00f1a pot y naanjo, g\u00fciya usoda.\n10:40 \u00b6 Y rumisibe jamyo, jaresibeja yo; ya y rumisibeyo, jaresibeja y tumagoyo.\n10:41 Y rumesibe un profeta pot y naan profeta, uresibe y premion profeta; ya y rumesibe y taotao tunas pot y naan y taotao tunas, uresibe y premion y taotao tunas.\n10:42 Ya masquesea jayeja y numae uno g\u00fcine nu este sija y mandiquique, unoja bason janom ni y fresco, pot y naan y disipulo, magajet jusangane jamyo na ti ufalingo y premiu\u00f1a.\n11:1 YA anae munjayan jatago si Jesus y dose disipulu\u00f1a, jumanao para ufamanag\u00fce, yan usetmom gui siuda\u00f1ija.\n11:2 Anae jajungog si Juan, gui guima presu\u00f1a, y finatinas Jesucristo; jatago. dos gui disipulu\u00f1a,\n11:3 Ya ileg\u00f1a: Jago ayo y para ufato pat infanmannanggajam otro?\n11:4 Ya manope si Jesus ileg\u00f1a: Janao ya innatungo si Juan todo ni y liniimiyo yan y jiningogmiyo.\n11:5 Y bachet manmanlie, y mancojo manmamocat, y manategtog mangasgas, y mananga manmanjungog: y manmatae manafangajulo ya y mamoble manmasangane ni y evangelio.\n11:6 Ya dichoso y ti sumasoda lugat para umatompo guiya guajo.\n11:7 \u00b6 Anae manmapos sija, jatutujon si Jesus sumangan si Juan gui linajyan taotao. Jafa injanag\u00fce jamyo para inlie gui desierto? un trongcon piao na ninamayeyengyong ni y manglo?\n11:8 Pat, jafa injanag\u00fce jamyo para inlie? un taotao na minagagon fino na magago? Estag\u00fce, sija y manminagagon fino na magago, mangaegue gui guima y ray sija.\n11:9 Lao pot jafa injanag\u00fce jamyo? Para inlie un profeta? Junggan, jusangane jamyo, mas qui y profeta.\n11:10 Sa este yuje y munjayan matugue: Estag\u00fce na junajanao y taotao y tinagojo gui menan matamo, para ufamauleg y chalanmo gui menamo.\n11:11 Magajet jusangane jamyo, na ti ucajulo gui entalo y manmafa\u00f1a\u00f1ago gui famalaoan, uno mas dangculo qui si Juan Bautista; lao y mas diquique gui raenon langet mas dangculo qui g\u00fciya.\n11:12 Ya desde y jaanin Juan Bautista asta pago, y raenon langet gaeninasi\u00f1a; ya y manmatatnga sija uamot.\n11:13 Sa todo y profeta sija, yan y lay, japrofetisa asta si Juan.\n11:14 An manmalago jamyo inresibe; g\u00fciya si Ilias ni y umamaela.\n11:15 Y gaetalanga para unfanjungog, g\u00fciya ujungog.\n11:16 \u00b6 Lao jaye nae juacompara este na rasa? Manparejo yan y famaguon ni manmatatachong gui plasa ya jaagang y mangachong\u00f1ija,\n11:17 Ya ileg\u00f1ija: Indandane jamyo flauta, ya ti manbaela jamyo, manuugong jamyo lao ti manatanges jamyo.\n11:18 Sa mato si Juan ya ti chumocho ni gunimen, ya ileg\u00f1ija: Gaeanite g\u00fce.\n11:19 Ya mato y Lajin taotao ya chumocho yan gumimen, ya ileg\u00f1ija: Estag\u00fce un taotao na gachumocho, yan gagumimem, amigon y publicano sija yan y manisao; lao y tiningo manacabales ni y finatinas\u00f1a.\n11:20 \u00b6 Ayo nae jatutujon lumalalatde y siuda sija nae guinin jafatinas sumenmegae na namanman Sa ti manmanjonggue, ileg\u00f1a:\n11:21 Ayjao, Corasin! Ayjao, Betsaida! sa yaguin iya Tiro yan Sidon nae mafatinas ayo y mannamanman ni y mafatinas guiya jamyo, esta jagas manma\u00f1otsot gui silisio yan apo.\n11:22 Lao guajo sumangane jamyo, na mas songunon Tiro yan Sidon qui para jamyo gui jaanin y sentensia.\n11:23 Ya jago, Capernaum, ni y jagas manataquito jao asta y langet; unmayute jao papa sasalaguan; sa yaguin iya Sodoma nae mojon mafatinas todo ayo y mannamanman ni jagas mafatinas guiya jago, mangagaegueja mojon asta pago na jaane.\n11:24 Lao guajo sumangane jamyo; na y mas songunon tano Sodoma, qui para jago gui jaanin y sentensia.\n11:25 \u00b6 Ayo na tiempo nae, manope si Jesus ileg\u00f1a: Grasias junaejao, Tata, Se\u00f1ot y langet yan y tano, sa unnafanatog estesija gui manmalate yan manmejnalom, ya unfanue y famaguon.\n11:26 Taeg\u00fcenaoja Tata: sa taeg\u00fcenao y mauleg gui liniimo.\n11:27 Todo y g\u00fcinaja jaentrega yo si Tata; ya taya tumungo y Laji\u00f1a na si Tataja: ni taya tumungo, si Tata na y laji\u00f1aja, ya ayoja y laji\u00f1a malago\u00f1a unafanungo.\n11:28 \u00b6 Maela guiya guajo todo y manyayas, yan y menoson, ya guajo junafandescansa.\n11:29 Polo y yugojo gui jilomiyo, ya infaneyag guiya guajo, sa guajo manso yan umitde gui corasonjo; ya infanma\u00f1oda descanso para y antinmiyo.\n11:30 Sa y yugojo ma\u00f1ana, ya y catgaco \u00f1ajlalang.\n12:1 AYO na tiempo nae jumajanao si Jesus un sabalo na jaane gui entalo mais ya y disipulu\u00f1a man\u00f1alang, ya jatutujon manma\u00f1ule ni espiga ya jacano.\n12:2 Ya anae jalie y Fariseo sija, ileg\u00f1ija: Estag\u00fce y disipulumo na jafatitinas y ti mauleg para umafatinas gui sabalo na jaane.\n12:3 Ya g\u00fciya ileg\u00f1a nu sija: Ada ti untaetae, jafa finatinas\u00f1a si David, anae \u00f1alang yan y mangachog\u00f1a?\n12:4 Jaftaemano jumalom gui guimayuus, ya jacano y pan proposision sija, na ti cabales g\u00fciya ucano, ni y mangachong\u00f1a; lao para y mamaleja?\n12:5 Pat, ada ti untaetae gui lay, na y jaanin y sabado, gui templo y mamale sija japrofana y sabado, ya taya isao\u00f1ija?\n12:6 Guajo sumangane jamyo, uno mas dangculo qui y templo gaegue g\u00fcine.\n12:7 Lao yaguin intingo jafa este ileleg\u00f1a, Minaase malagojo, ti inefrese, ti insangan mojon contra y manaeisao.\n12:8 Sa y Se\u00f1ot y sabado y Lajin taotao.\n12:9 \u00b6 Ya anae jumanao g\u00fcije malag y gumayus\u00f1ija;\n12:10 Ya estag\u00fce un taotao na majlog y canae\u00f1a; ya mafaesen ileg\u00f1ija: Ada mauleg para jita na infanamte gui sabado? para umafaaela g\u00fce.\n12:11 Ya g\u00fciya ilegna: Jafa taotao guaja gui entalo miyo yaguin guaja un quinilo na podong gui joyo, gui jaanin sabalo, ada ti uestira y canae\u00f1a ya jochule?\n12:12 Ada ti mas bali\u00f1a un taotao qui un quinilo? Pot este, cabales na umafatinas mauleg gui jaanin sabado.\n12:13 Ayo nae ileg\u00f1a ni y ayo na taotao: Juto y canaemo; ya jajuto ya finamauleg talo parejo yan y otro.\n12:14 \u00b6 Ayo nae y Fariseo sija manjanao, ya manafaesen entre sija contra g\u00fciya para umapuno g\u00fce.\n12:15 Lao anae jatungo ai Jesus, mapos g\u00fcije; ya madalalag g\u00fce linajyan taotao, ya janafanjomlo todosija.\n12:16 Ya g\u00fciya guefmanencatga, na cha\u00f1ija munamatutungo g\u00fce.\n12:17 Para umacumple y esta munjayan masangan pot y profeta Isaias, ileg\u00f1a:\n12:18 Estag\u00fciya y tentagojo ni y juayig, y g\u00fcinaeyaco ni y janamagof y antijo: na jupoluye ni y Espiritujo gui jilo\u00f1a, ya jasangane Gentiles y juisio.\n12:19 Ti upotfia, ni uagang; ya taya ni uno ujiningog y inagang\u00f1a gui chalan.\n12:20 Ti umayulang y piao ni mayamag ni umapuno y mechan dangis ni y aasa asta qui machule y juisio para y guinana.\n12:21 Ya pot y naan\u00f1a, manmannanangga y Gentiles.\n12:22 \u00b6 Ya machulieg\u00fce guato un inanite, na bachet yan udo, ya janajomlo; ayo nae cumuentos y udo yan manlie.\n12:23 Ya todo y taotao sija ninafanmanman, ya ileg\u00f1ija: Ada ti este yuje y lajin David?\n12:24 Lao y Fariseo sija jajungog ya ileg\u00f1ija: Este ti uyute juyong y anite, yaguin ti pot Beetsebub, magas y anite sija.\n12:25 Ya si Jesus, anae jatungo y jinaso\u00f1ija, ileg\u00f1a: Todo y raeno umadibide contra g\u00fciyaja uyulang; ya cada guma, pat siuda, umadibide contra g\u00fciyaja, ti usaga.\n12:26 Yaguin si Satanas jayute juyong si Satanas, g\u00fciya umadibide contra g\u00fciyaja, ya jaftaemano y raeno\u00f1a sumaga?\n12:27 Yanguin guajo pot si Beetsebub juyuyute juyong y anite sija; pot jaye y famaguonmiyo, fanyinite sija juyong? Pot ayo, sija ufanjuesmiyo.\n12:28 Yanguin pot y Espiritun Yuus, juyute juyong y anite sija, magajet na esta mato guiya jamyo y raenon Yuus.\n12:29 Sajafa? Jaftaemano si\u00f1a un taotao jumalom gui guima y matatnga na taotao ya uyulang todo y g\u00fcinaja\u00f1a, yanguin ti jagode finenana y matatnga? Ayo nae si\u00f1a jayulang y guima\u00f1a.\n12:30 Y ti jumajame, contrariujo g\u00fce; ya y ti rumecoje g\u00fce guiya guajo, g\u00fciya umachalapon.\n12:31 \u00b6 Pot enao na jusangane jamyo: Todo isao yan y chatfino contra si Yuus, umasie y taotao sija; lao y chatfino contra y Espiritu, ti umaasie y taotao.\n12:32 Ya jayeja y cumuentos contra y Lajin taotao, umaasie; lao jayeja y cumuentos contra y Espiritu Santo, ti umaasie, ni este na tiempo, ni y ayo na mamamaela.\n12:33 Fatinas mauleg na trongcon jayo, yan y tinegcha\u00f1a mauleg; pat fatinas taelaye na trongcon jayo, yan taelaye y tinegcha\u00f1a; sa pot y tinegcha\u00f1a, y jayo esta matungo.\n12:34 O rasan culebla! jafa taemano jamyo na manaelaye si\u00f1a manguentos mauleg, lo sa gui minegae y guaja gui corason, sinasangan y pachot.\n12:35 Y mauleg na taotao, nu y mauleg na g\u00fcinaja gui corason\u00f1a, mauleg chinilele\u00f1a; lao y taelaye na taotao, nu y taelaye na g\u00fcinaja gui corason\u00f1a, taelaye chinilele\u00f1a.\n12:36 Lao guajo sumangane jamyo, na todo y finijo na taesetbe ya jasasangan y taotao sija, janesesita ufanmannae cuenta gui jaanin y sentensia.\n12:37 Sa pot y finomo na unmanatunas jao, yan pot y finomo na unmasentensia jao.\n12:38 \u00b6 Ayo nae manmanope y escriba yan y Fariseo sija ileg\u00f1ija: Maestro manmalagojam na inlie un se\u00f1atmo.\n12:39 Ya g\u00fciya manope ileg\u00f1a nu sija: y generasion manaelaye yan man\u00e1bale manmanaliligao y se\u00f1at, lao taya se\u00f1at ufanmanae, na y se\u00f1at Jonas profeta.\n12:40 Sa taeg\u00fcenaoja si Jonas sumaga tres na jaane yan tres na puenge gui jalom y tiyan y bayena, ayo locue mina y Lajin taotao, usaga tres na jaane yan tres na puenge gui jalom corason y tano.\n12:41 Y taotao Ninibe ufangajulo gui juisio yan este na generasion, ya ufanmasentensia, sa sija manma\u00f1otsot ni y setmon Jonas; ya estag\u00fceja, uno g\u00fcine na lugat na mas dangculo qui si Jonas.\n12:42 Y raena gui sancatan ucajulo gui juisio yan este na generasion ya ufanmasentensia, sa mato guine y uttimon tano, para uecungog y tiningo Salomon, ya estag\u00fceja uno g\u00fcine na lugat na mas dangculo qui si Salomon.\n12:43 Yanguin y \u00e1placha na espiritu jumanao gui taotao, mamomocat gui anglo na lugat, ya jaaliligao nae udescansa, lao ti ma\u00f1oda.\n12:44 Ayo nae ileg\u00f1a: Jutalo guato para y iyajame ni anae guine ayoyo. Ya anae mato guato, jasoda taesinajguan, binale yan maadotna.\n12:45 Ayo nae mapos, ya mangone talo gachong\u00f1a siete na espiritu na mas taelaye qui g\u00fciya, ya manjalom ya ma\u00f1aga g\u00fcije; ya mas taelaye uttimo\u00f1a yuje na taotao qui y finena\u00f1a. Taeg\u00fcineja locue ujumuyong este na generasion y manaelaye.\n12:46 \u00b6 Ya anae estaba g\u00fce cumuecuentos yan y taotao sija; estag\u00fce, si nana\u00f1a, yan y ma\u00f1elu\u00f1a mangaegue gui sumanjiyong, na manmalago na umacuentuse g\u00fce.\n12:47 Ya ileg\u00f1a uno: Estag\u00fce, si nanamo, yan y ma\u00f1elumo gui sumanjiyong, na manmalago na umacuentuse jao.\n12:48 Ya g\u00fciya jaope ayo y sumangan este, ya ileg\u00f1a: Jaye nanajo yan jaye ma\u00f1elujo?\n12:49 Ya jajuto y canae\u00f1a gui disipulu\u00f1a, ya ileg\u00f1a: Estag\u00fce, y nanajo yan y ma\u00f1elujo.\n12:50 Sa todo ayo y fumatinas y minalago y Tatajo ni y gaegue gui langet, este g\u00fciya chelujo laje, yan chelujo palaoan, yan nanajo.\n13:1 AYO na jaane, jinanao\u00f1a si Jesus gui guima, matachong gui oriyan tase.\n13:2 Ya mato guiya g\u00fciya dangculo na linajyan taotao; ya jumalom g\u00fce gui un batco, ya matachong; ya todo y linajyan taotao manmatachong gui oriyan unae.\n13:3 Ya jacuentuse sija megae na acomparasion, ileg\u00f1a: Estag\u00fce y t\u00e1tanom na jumuyong para ufananom.\n13:4 Ya anae manananom, palo gui semiya manpodong gui oriyan chalan, ya manmato y p\u00e1jaro sija ya macano.\n13:5 Palo gui semiya manpodong gui jilo acho na lugat, na ti megae oda\u00f1a; ya doco ti apmam, sa ti tadong papa gui eda.\n13:6 Lao anae manina y atdao, mansinenggue sa taejale, ya ninamalayo.\n13:7 Ya palo mamodong gui entalo t\u00edtuca sija ya mandoco y t\u00edtuca ya chiniguet.\n13:8 Ya palo manpodong gui mauleg na oda, ya manmanogcha; y uno siento, y otro sesenta, y otro treinta.\n13:9 Y gaetalanga para ufanjungog, g\u00fciya ujungog.\n13:10 Ayo nae manmato y disipulu\u00f1a sija ya ileg\u00f1ija: Jafajao na cumuecuentuse sija pot acomparasion sija?\n13:11 Ya g\u00fciya manope ileg\u00f1a. Sa esta manmanae jamyo, para intingo y misterion y raenon langet, lao sija ti ufanmanae.\n13:12 Sa jayeja y guaja, umanae para uguaja mas; lao ayo y taya iyo\u00f1a, achog uguaja y iyo\u00f1a, umachule.\n13:13 Enaomina jucuentuse sija pot acomparasion; sa y manmanaatan, ya ti manmanlie, ya manecungog, ya ti manmanjujungog, ni ujatungo.\n13:14 Y ya sija nae umacumple y sinangan Isaias ni ileg\u00f1a: Anae manmanjujungog, ujungog ya ti utungo; ya anae manmanaatan, ufanmanlie, ya ti ujasiente.\n13:15 Sa y corason\u00f1ija este na taotao sija manmacat, ya y talanga\u00f1ija mapot manmanjungog, ya y atadog\u00f1ija jajujuchom; para cha\u00f1ija fanmanlilie ni atadog\u00f1ija, yan ufanmanjungog ni talanga\u00f1ija, ya ujatungo ni corason\u00f1ija, ya ujatolaeca sija, ya guajo junajomlo sija.\n13:16 Lao mandichoso y atadogmiyo, sa manmanlie, yan y talanganmiyo sa manmanjungog.\n13:17 Sa magajet jusangane jamyo, na megae na profeta, yan manunas na taotao jagasja manmalago na ujalie y liniinmiyo, ya ti jalie; yan ujajungog y jiningogmiyo, ya ti jajungog.\n13:18 \u00b6 Ecungog jamyo y acomparision y t\u00e1tanom.\n13:19 Jayeja y umecungog y sinangan y raeno, ya ti jatungo, mato y Taelaye ya janajanao y esta matanme gui corason\u00f1a. Este yuje semiya ni y pedong gui oriyan chalan.\n13:20 Ya ayo y matanme gui jilo acho na lugat, este yuje y jumungog y sinangan, ya jaresibe ni y minagof\u00f1a.\n13:21 Lao taya jale guiya g\u00fciya, ya gaegue un ratoja; sa anae mato y triniste yan minamajlao pot causan di y sinangan, ti apmam matompo gui isao.\n13:22 Ya ayo y matanme gui entalo t\u00edtuca sija; este yuje y jumungog y sinangan; lao y inadaji\u00f1a ni y tano, yan dinague ni g\u00fcinaja, ja\u00f1ucot y sinangan ya sumaga sin tinegcha\u00f1a.\n13:23 Lao ayo y matanme gui mauleg na oda; este yuje y jumungog y sinangan ya jatungo, ya manogcha locue; ya y tinegcha\u00f1a y uno siento, ya y otro sesenta, ya y otro treinta.\n13:24 \u00b6 Otro acomparasion jasangane sija ileg\u00f1a: Y raenon langet parejoja yan un taotao ni manananom gui fangualuan\u00f1a, mauleg na semiya.\n13:25 Ya y tiempo nae manmamaego y taotao sija, mato y enemigo ya jatanme y taelaye na chaguan gui entalo y trigo, ya mapos.\n13:26 Ya anae mandoco y trigo ya manmanogcha, y taelaye na chaguan mandoco locue.\n13:27 Ya manmato y tentago y tatan familia ya ileg\u00f1ija nu g\u00fciya: Se\u00f1ot, ada ti mauleg na semiya tinanommo gui fangualuanmo? Jafa mina guaja taelaye na chaguan?\n13:28 Yleg\u00f1a nu sija: Un enemigo fumatinas este. Ya y tentago\u00f1a ileg\u00f1ija nu g\u00fciya: Malagojao ya infanjanao ya inchile?\n13:29 Yleg\u00f1a: Munga, sa no sea yaguin inchile y taelaye na chaguan, innabineog locue y trigo.\n13:30 Polo ya ufanda\u00f1a mandoco sija na dos asta y quineco; an mato y tiempon quineco, bae jualog ni para ufanmangoco: Chile finena y taelaye na chaguan, ya inguede famanojo para umasonggue; ya y trigo polo gui jalom y camalinjo.\n13:31 \u00b6 Otro acomparasion sinangane sija ileg\u00f1a: Y raenon langet parejoja yan y pepitas y mostasa, ni jachule un taotao ya jatanme gui fangualuan\u00f1a.\n13:32 Magajet na g\u00fciya mas diquique gui todo y semiya sija; lao anae esta mandoco, g\u00fciya mas dangculo gui manmagogulae, ya mamatrongconjayo, ya manmato sija y p\u00e1jaron y aire, ya manmamatinas y chenchon gui ramas\u00f1a.\n13:33 \u00b6 Otro acomparasion sinangane sija ileg\u00f1a: Y raenon langet, parejoja yan y libadura, ni y un palaoan jachule ya janana gui tres medidan arina, asta qui todo manbolacho.\n13:34 Todo estesija jasangan si Jesus pot acomparasion gui linajyan taotao; ya taya jasangane sija sin acomparasion.\n13:35 Para umacumple y munjayan masangan pot y profeta na ileg\u00f1a: Jubaba y pachotto pot acomparasion: ya jusangan g\u00fcinaja sija ni manafanatog desde y plinantan y tano.\n13:36 Ayo nae jadingo y linajyan taotao ya mapos, ya jumalon gui guima; ya manmato guiya g\u00fciya y disipulu\u00f1a sija, ya ileg\u00f1ija: Naclaruyejam ni y acomparasion y taelaye na chaguan gui fangualuan.\n13:37 Ya manope sija ileg\u00f1a: Ayo y mananom mauleg na semiya y Lajin taotao yuje.\n13:38 Y fangualuan, y tano; y manmauleg na semiya, y famaguon y raeno, ya y taelaye na chaguan y famaguon y Maligno.\n13:39 Y enemigo, ni y tumanme, y aniteg\u00fce; ya y quineco, y jinecog y siglo; ya y para ufanmangone, y angjet sija.\n13:40 Sa taeg\u00fcenao machule y taelaye na chaguan ya masonggue gui guafe, taeg\u00fcijija locue y jinecog y siglo.\n13:41 Ya utago y Lajin taotao y angjet\u00f1a sija; ya urecoje todo ayo sija y fumatitinas y tinempo, yan y fumatitinas y tinaelaye;\n13:42 Ya uyute gui jetnon guafe; ya ayo nae uguaja tumanges, yan chegcheg nifen.\n13:43 Ayo nae y manunas, ufanmanina calang y atdao, gui raenon y Tatan\u00f1ija. Y gaetalanga para ufanjungog, g\u00fciya ujungog.\n13:44 \u00b6 Y raenon langet locue, parejoja yan un senguaguan na g\u00fcinaja ni y mananana gui un fangualuan, ya un taotao, anae jasoda, janana, ya mapos yan pot y minagof\u00f1a jabende todo y iyo\u00f1a ya jafajan ayo na fangualuan.\n13:45 \u00b6 Y raenon langet parejoja locue yan un taotao ni manbebende, na manaliligao bonito na petlas:\n13:46 Ya anae ma\u00f1oda un petlas na senguaguan, mapos ya jabende todo y g\u00fcinaja\u00f1a ya jafajan ayo.\n13:47 \u00b6 Y raenon langet parejoja locue, yan un lagua ni y mayute guato gui tase, ya mangone todo clase:\n13:48 Ya anae esta bula, majala guato gui oriyan unae; ya manmatachong, ya majoca y manmauleg ya masajguane gui sajguan\u00f1ija, ya y manaelaye mayute juyong.\n13:49 Taeg\u00fcinija locue y jinecog y siglo: ufato y angiet sija ya ujanafanjanao y manaelaye gui entalo y manunas;\n13:50 Ya ujayute gui jetnon guafe; ya ayo nae uguaja g\u00fcije tumanges, yan chegcheg nifen.\n13:51 Ayo nae si Jesus ileg\u00f1a nu sija: Intingo todo estesija? Sija ileg\u00f1ija nu guiya: Junggan.\n13:52 Ya g\u00fciya ileg\u00f1a nu sija: Pot este todo escriba ni mafatinas disipulo gui raenon langet, parejoja yan y tatan un familia, ni y jachuchule gui g\u00fcinaja\u00f1a bijo sija, yan nuebo sija.\n13:53 \u00b6 Ya anae janafonjayan si Jesus todo este sija na acomparasion, mapos g\u00fcije.\n13:54 Ya anae mato gui tano\u00f1a, mamanag\u00fce gui guimayuus\u00f1ija, ya sija ninafanmanman, ya ileg\u00f1ija: Guine mano nae jumuyong este na tiningo\u00f1a, ya este sija mandangculo na ninasi\u00f1a?\n13:55 Ada ti g\u00fciya este y lajin y catpintero? Ada si nana\u00f1a ti mafanaan si Maria? yan y ma\u00f1elu\u00f1a, ti sija si Santiago, si Jos\u00e9, si Simon, yan si Judas?\n13:56 Ya ada ti manjijita yan y ma\u00f1elu\u00f1a palaoan? Guine mano nae uguaja este na taotao todo estesija? Ya guaja guiya g\u00fciya disgusto.\n13:57 Lao si Jesus ileg\u00f1a nu sija: Y profeta taya onra\u00f1a, gui tano\u00f1a yan y guima\u00f1a; lao gaeonra\u00f1a gui otro lugat.\n13:58 Ya ti jafatinas g\u00fcije megae na mannamanman, sa taya jinengguen\u00f1ija.\n14:1 AYO na tiempo si Herodes y tetrarca jajungog y faman Jesus;\n14:2 Ya ileg\u00f1a nu y tentago\u00f1a sija: Este si Juan Bautista: g\u00fciya cajulo gui entalo y manmatae, enao mina mandangculo na mannamanman jafatitinas guiya g\u00fciya.\n14:3 \u00b6 Sa si Herodes esta jacone si Juan, ya jagode, ya japolo gui calaboso, pot si Herodias, asaguan Felipe y chelu\u00f1a.\n14:4 Sa si Juan ileg\u00f1a nu g\u00fciya: Ti tunas na un guaja jao nu este na palaoan.\n14:5 Ya anae malago na upinino g\u00fce, maa\u00f1ao ni y linajyan taotao; sa pinelo\u00f1ija na si Juan profeta g\u00fce.\n14:6 Ya anae mato y jaanin y mafa\u00f1agon Herodes, y jagan Herodias bumaela gui talo, ya ninamagof si Herodes,\n14:7 Ya pot este japromete ya manjula na uninae todo y guinagao\u00f1a.\n14:8 Ya g\u00fciya guinin umatungo finena an nana\u00f1a, ya ileg\u00f1a: Naeyo g\u00fcine gui un plato ni y ilon Juan Bautista.\n14:9 Ayo nae y ray ninatriste; lao pot causa y juramento\u00f1a yan y mangachong\u00f1a na mangaegue gui lamasa, manago na umanae.\n14:10 Ya, manago na umautot y ilon Juan gui calaboso.\n14:11 Ya machule guato y ilo gui un plato, ya manae y patgon palaoan, ya g\u00fciya chumule para si nana\u00f1a.\n14:12 Ya y disipulu\u00f1a sija, manmato ya machule y tataotao\u00f1a, ya majafot, ya manmapos, ya masangane si Jesus.\n14:13 \u00b6 Ya anae jajungog este si Jesus, mapos g\u00fcije gui un batco para y desierto na lugat na sumajnge: ya anae majungog ni y linajyan taotao sija, madalalague g\u00fce, manmamocatja desde siuda sija.\n14:14 Ya jumanao si Jesus, ya jalie y dangculo na linajyan taotao: ya ninamaase ni ayo sija, ya janafanjomlo y manmalango sija.\n14:15 \u00b6 Ya anae estaba pupnenge g\u00fcije na jaane, manmato guiya g\u00fciya y disipulu\u00f1a sija ya ileg\u00f1ija; Este na lugat desierto ya y tiempo esta ufalofan; tago y linajyan taotao ya ufanjanao, ya ufanmalag y sengsong sija, ya ufanmamajan na\u00f1ija.\n14:16 Lao si Jesus ileg\u00f1a nu sija: Taya nesesida na sija ufanjanao: jamyo innae na\u00f1ija.\n14:17 Sija ileg\u00f1ija nu g\u00fciya: Taya g\u00fcine guaja na sincoja na pan, ya dos na g\u00fcijan.\n14:18 G\u00fciya ileg\u00f1a: Chulieyofan g\u00fcine mague.\n14:19 Ya jatago y linajyan taotao na ufanmatachong gui jilo chaguan, jachule y sinco na pan yan dos na g\u00fcijan ya jaatan julo y langet, ya jabendise: ya jaipe y pan ya janae y disipulo sija, ya y disipulo janae y linajyan taotao.\n14:20 Ya ma\u00f1ocho todos, ya manjaspog; ya anae majoca y sebblan pedaso sija na maipe, bula dose na canastra.\n14:21 Ya y ma\u00f1ocho sija, sinco mit na lalaje, ti matufong y famalaoan yan y famaguon.\n14:22 \u00b6 Enseguidas si Jesus janafanjalom y disipulu\u00f1a sija gui un batco, ya manjanao manmofona, manmalag y otro bandan sadog, y tiempo nae g\u00fciya janafanjanao y linajyan taotao.\n14:23 Ya anae munjayan jadespide y linajyan taotao, cajulo gui un ogso na sumajnge, ya manaetae. Ya estaba gui puenge, ya sumasaga g\u00fcig\u00fciyaja namaesa.\n14:24 Lao y batco pago estaba gui talo gui tase, pinapada ni napo, sa y manglo contra.\n14:25 Ya y mina cuatro na guatdia gui puenge, si Jesus jumanao para iyasija mamomocat gui jilo tase.\n14:26 Ya anae malie ni disipulu\u00f1a sija na mamomocat gui jilo tase, ninafa\u00f1atsaga, ya ileg\u00f1ija: Fafa\u00f1ag\u00fce este; ya managang ni y minaa\u00f1ao\u00f1ija.\n14:27 Enseguidas si Jesus cumuentos, ileg\u00f1a nu sija: Angoco jamyo; guajoyo; chamiyo fanmaaa\u00f1ao.\n14:28 Ayo nae manope si Pedro ileg\u00f1a: Se\u00f1ot, yaguin jago, tago yo ya jufalag iyajago gui jilo janom.\n14:29 G\u00fciya ileg\u00f1a: Maela. Ya tumunog si Pedro gui batco, ya mamocat gui jilo janom para uguaguato gui as Jesus.\n14:30 Lao anae jalie na dangculo na manglo, ninamaa\u00f1ao; ya anae jatutujon dimafondo, jaagang, ileg\u00f1a: Se\u00f1ot, nalibreyo.\n14:31 Ya enseguidas si Jesus jajuto mona y canae\u00f1a, ya guiniut g\u00fce, ya ileg\u00f1a nu g\u00fciya: Taotao na didide jinengguemo! Sa jafa ti unjonggue?\n14:32 Ya anae manjalom julo gui batco, y manglo quieto.\n14:33 Ayo nae y mangaegue gui batco, maadora g\u00fce ileg\u00f1ija: Magajet na jago Lajin Yuus.\n14:34 \u00b6 Ya anae manmalofan gui tase, manmato gui tano Genesaret.\n14:35 Ya y taotao ayo na lugat anae matungo g\u00fce, manmanago y oriyan todo ayo na tano, na umacone guato todo y manmalango.\n14:36 Ya magagao g\u00fce na upolo na umapacha y madobbla y magagu\u00f1a; ya todo y pumacha g\u00fce, guefjomlo sija.\n15:1 AYO nae manmato gui as Jesus escriba yan Fariseo sija, guiya Jerusalem, ya ileg\u00f1ija:\n15:2 Jafa disipulomo na ti jaosgue y tradision y manbijo? sa ti jafagagase y canae\u00f1ija anae ma\u00f1ocho pan?\n15:3 Ya g\u00fciya jaope sija ileg\u00f1a: Jafa locue jamyo na ti inesgue y tinago Yuus pot tradisionmiyo?\n15:4 Sa si Yuus manago, ileg\u00f1a: Onra si tatamo, yan si nanamo; ya y mumatdise si tata\u00f1a, pat si nana\u00f1a, magajet na umatae.\n15:5 Lao jamyo ilegmiyo: Jayeja y umalog ni tata\u00f1a, pat si nana\u00f1a: Y ninae para si Yuus, ayo na probechonmiyo guiya guajo;\n15:6 Ya ti guaelaye na ujaonra si tata\u00f1a. Enaomina innataelaye y Sinangan Yuus pot y tradisionmiyo.\n15:7 Hipocritas! Cabales y sinangan nu jamyo as Isaias anae ileg\u00f1a:\n15:8 Este na taotao sija, nu y labios\u00f1ija jaonrayo; lao y corason\u00f1ija chago guiya guajo.\n15:9 Lao taesetbe y inadodorayo, manmamananag\u00fce y finanag\u00fcen\u00f1ija ni y sinangan taotao.\n15:10 \u00b6 Ya jaagang y linajyan taotao, ya ileg\u00f1a nu sija: Ecungog ya intingo.\n15:11 Ti y jumajalom gui pachot, muna natataelaye y taotao; na ayo y jumujuyong gui pachot, ayo muna natataelaye y taotao.\n15:12 Ayo nae manmato y disipulu\u00f1a sija, ya ilegnija nu g\u00fciya: Untungo na y Fariseo sija ninafandisgustao anae jajungog este na sinangan?\n15:13 Lao g\u00fciya jaope sija ileg\u00f1a: Todo tinanom ni y ti jatanom y Tatajo na gaegue gui langet, umajajleg.\n15:14 Polo sija: y bachet ya uguia y bachet; yaguin y bachet uguia y bachet, sija na dos uchapodongja gui joyo.\n15:15 Ya manope si Pedro, ileg\u00f1a: Sanganejam nu este na acomparasion.\n15:16 Ya si Jesus ileg\u00f1a: Ada locue trabia jamyo ti intitingoja?\n15:17 Ti intingo na todo y jumalom gui pachot, jumajanao para y tiyan, ya mayuyute gui lugat umatog.\n15:18 Lao todo y jumuyong gui pachot, estesija guine y corason, ya estesija muna natataelaye y taotao.\n15:19 Sa gui corason nae manjujuyong y taelaye na jinaso, manpegno taotao, adulterio, inabale, saque, ti manmagajet na testimonio, chatfino contra si Yuus.\n15:20 Estesija muna fanataelaye y taotao; lao y chumocho yan y ti mafagase canae\u00f1a, ti ninatataelaye y taotao.\n15:21 Ya jumanao si Jesus g\u00fcije, malag y oriyan Tiro yan Sidon.\n15:22 Ya estag\u00fce un palaoan, taotao Cananea, na jumanao gui ayo sija na oriya, ya umaagang, ileg\u00f1a: Se\u00f1ot, Lajin David, gaemaase nu guajo; y jagajo ninachatsaga fefman ni anite.\n15:23 Lao g\u00fciya ti jaope sinangan: Ayo nae manmato y disipulu\u00f1a sija, ya magagao g\u00fce ileg\u00f1ija: Tago g\u00fce ya ujanao, sa esta jame jaagang.\n15:24 Ya g\u00fciya jaope ileg\u00f1a: Ti guajo matago na y manmalingo na quinilo gui guima Israel.\n15:25 Ayo nae y palaoan mato, ya jaadoro g\u00fce, ileg\u00f1a: Se\u00f1ot, ayudayo.\n15:26 Ya manope g\u00fci ileg\u00f1a: Ti mauleg na tachule y pan y famaguon ya tayute y galago sija.\n15:27 Ya y palaoan manope: Magajet Se\u00f1ot; lao y galago sija, ma\u00f1ochochoja ni andesmorona ni mamopodong gui lamasan y amu\u00f1ijo.\n15:28 Ayo nae manope si Jesus, ileg\u00f1a: Palaoan! dangculo jinengguemo: umafatinas guiya jago jafa y malagomo. Ya jomlo y jaga\u00f1a desde ayo na ora.\n15:29 Ya si Jesus mapos g\u00fcije, ya mato jijot gui tasen Galilea: ya cajulo gui jilo un finabeca, ya matachong g\u00fcije.\n15:30 Ya manmato guiya g\u00fciya linajyan taotao, na guaja guiya sija cojo, bachet, udo, mangco, yan palo sija megae na manmalango, ya manmapolo gui adeng Jesus; ya janafanjomlo.\n15:31 Pot este mina y linajyan taotao ninafanmanman, anae jalie na y udo manguentos, ya y mangco manjomlo, ya y cojo manmamocat, ya y bachet manmanlie; ya ninamaonra si Yuus Israel.\n15:32 Ya si Jesus jaagang y disipulu\u00f1a sija, ileg\u00f1a: Janamaaseyo y linajyan taotao, sa esta tres na jaane na manjame, ya taya na\u00f1ija: ya mungayo munafanjanao sin ufa\u00f1ocho, sa no seaja ufanlalango gui chalan.\n15:33 Ayo nae y disipulu\u00f1a sija ileg\u00f1ija nu g\u00fciya: Amano nae uguaja megae na pan g\u00fcine gui desierto para utanafanjaspog este y dangculo na linajyan taotao.\n15:34 Si Jesus ileg\u00f1a nu sija: Cuanto na pan guajata? Ya sija ileg\u00f1ija: Siete, yan didide g\u00fcijan diquique.\n15:35 Ya jatago y linajyan taotao na ufanmatachong gui jilo oda.\n15:36 Ya jachule y siete na pan yan y g\u00fcijan sija, ya janae grasias, ya jaipe, ya janae y disipulu\u00f1a sija, ya y disipulu\u00f1a janae y linajyan taotao.\n15:37 Ya ma\u00f1ocho todos, ya manjaspog; ya anae majoca y pedaso sija na maipe ni y sebbla; bula siete na canastra.\n15:38 Ya y ma\u00f1ocho sija, cuatro mit, ti matufong y famalaoan yan y famaguon.\n15:39 Ya anae jadespide y linajyan taotao, cajulo gui un batco, ya mato gui origan Magdala.\n16:1 YA manmato y Fariseo yan y Saduseo sija, ya matienta g\u00fce, magagagao na ufanfinanue un se\u00f1at gui langet.\n16:2 Lao g\u00fciya jaope ileg\u00f1a nu sija: Yanguin esta pupnenge y jaane, ilegmiyo: Mauleg na tiempo pago, sa y langet agaga.\n16:3 Ya y egaan: Pago uguaja pinagyo, sa managaga y langet ya didide na mapagajes. Jamyo tumungo jumusga y matan y langet; lao y se\u00f1at y tiempo sija ti innasi\u00f1a.\n16:4 Y taelaye yan adulterio na rasa jagueguefaliligao un se\u00f1at, lao taya ufanmanae atgun se\u00f1at, na y se\u00f1at Jonas profeta. Ya jadingo sija, ya mapos.\n16:5 Ya anae manmato gui otro bandan jagoi y disipulu\u00f1a sija jajaso na manmalefa ya ti manma\u00f1ule pan.\n16:6 Ya si Jesus ileg\u00f1a nu sija: Atan, ya inadaje jamyo ni y lebaduran y Fariseo yan y Saduseo sija.\n16:7 Ya sija manmanjaso gui sanjalom\u00f1ija, ileg\u00f1ija: Buente pot y ti manma\u00f1ulejam pan.\n16:8 Ya jatungo si Jesus, ileg\u00f1a nu sija: Jafa jinasonmimiyo gui sanjalommiyo, taotao na didide jinengguenmiyo, pot y ti manma\u00f1ule jamyo pan?\n16:9 Ada ti intitingo, ni ti injajaso y sinco na pan, gui sinco mit, ya cuanto na canastra injeca.\n16:10 Ni y siete na pan gui cuatro mit, ya cuanto na canastra injeca?\n16:11 Jafa este na ti intingo, na ti pot y pan na jusangane jamyo? Lao inadaje jamyo ni y lebaduran y Fariseo yan y Saduseo sija.\n16:12 Ayo nae jatungo na ti mansinangane sija na ujaadaje sija ni y lebaduran pan; lao y finanag\u00fcen y Fariseo yan y Saduseo sija.\n16:13 \u00b6 Ya anae mato si Jesus gui Sesarean Filipe, jafaesen y disipulu\u00f1a sija ileg\u00f1a: Jaye ileg\u00f1i\u00f1ija y taotao sija nu y Lajin taotao?\n16:14 Ya sija ileg\u00f1ija: Guaja umalog na jago si Juan Bautista; ya guaja umalog, si Elias; ya guaja umalog, si Jeremias, pat uno gui profeta sija.\n16:15 G\u00fciya ileg\u00f1a nu sija: Ya jamyo, jaye ilegmimiyo nu guajo?\n16:16 Manope si Simon Pedro ileg\u00f1a: Jago si Cristojao, y Lajin Yuus ni y lal\u00e2l\u00e2.\n16:17 Ayo nae inepe as Jesus ileg\u00f1a: Dichosojao, Simon, lajin Jonas; sa ti jufanuejao sensen ni j\u00e2g\u00e2, na y Tatajo ni y gaegue gui langet.\n16:18 Ya guajo locue sumanganejao, na jago si Pedro; ya y jilo este na acho, jufatinas y iglesiamo; ya y pettan sasalaguan taeninasi\u00f1a contra guiya.\n16:19 Ya junaejao ni y yaben y raenon langet; ya todoja y ungode gui tano, umagodeja locue gui langet; ya todoja y unpula gui tano, umapula locue gui langet.\n16:20 Ayo nae jatago y disipulu\u00f1a sija, na cha\u00f1ija fanma\u00f1angangane ni jaye na g\u00fciya si Jesus y Cristo.\n16:21 \u00b6 Desde ayo na tiempo jatutujon si Jesus dumeclaraye y disipulu\u00f1a sija, na guaja nesesida\u00f1a na ujanao para Jerusalem, ya upadese megae sija gui manbijo, yan y prinsipen y mamale sija, yan y escriba sija, ya umapuno, ya umanacajulo gui mina tres na jaane.\n16:22 Ya si Pedro, quinene g\u00fce ya tinitujon g\u00fce rineprende, ileg\u00f1a: Se\u00f1ot, maase nu jago: este ti usi\u00f1a jago.\n16:23 Ayo nae jabirag\u00fce, ya ileg\u00f1a as Pedro: Suja gui menajo, Satanas: jago un tropero para guajo; sa ti untungo y g\u00fcinaja Yuus, na y g\u00fcinajan taotaoja sija.\n16:24 \u00b6 Ayo nae si Jesus, ileg\u00f1a ni y disipulo\u00f1a sija: Yanguin jaye malago dumalalag yo, polo ya upune namaesag\u00fce, ya uchule y quiluus\u00f1a ya udalalag yo.\n16:25 Sa jayeja y malago munalibre y lin\u00e2l\u00e2\u00f1a, ufinalingaeguan; ya jayeja y finalingaeguan ni y lin\u00e2l\u00e2\u00f1a pot guajo, g\u00fciya usoda.\n16:26 Sa jafa probecho\u00f1a y taotao, yanguin jagana todo y tano, ya y lin\u00e2l\u00e2\u00f1a malingo? Pat jafa na apas ufannae y taotao pot y lin\u00e2l\u00e2\u00f1a.\n16:27 Sa y Lajin taotao, ufato gui minalog y Tata\u00f1a yan y angjetna sija; ya ayo nae uapase cada uno taemano y checho\u00f1a.\n16:28 Magajet jusangane jamyo: na guaja palo gui mangaegue g\u00fcine, na ti ujachague finatae, asta qui jalie y Lajin taotao na mato gui raeno\u00f1a.\n17:1 DESPUES di y saes na jaane, si Jesus jacone si Pedro, yan si Santiago, yan si Juan chelu\u00f1a, ya jacone julo gui un taquilo na finabeca, na sumajnge.\n17:2 Ya jaaggo y jechura\u00f1a gui menan\u00f1ija; ya y mata\u00f1a manina calang y atdao; ya y magagu\u00f1a apaca calang y manana.\n17:3 Ya estag\u00fce, na manmato g\u00fciya sija si Moises yan si Elias, na manguecuentos yan g\u00fciya.\n17:4 Ya manope si Pedro, ileg\u00f1a as Jesus: Se\u00f1ot, mauleg na mangaeguejit g\u00fcine: yaguin malagojao, bae jufatinas g\u00fcine tres na tabetnaculo; para jago y uno, para si Moises y uno, yan para si Elias y uno.\n17:5 Anae cumuecuentos g\u00fce, estag\u00fce, un malag na mapagajes jananujong gui jilo\u00f1ija, ya, estag\u00fce, un inagang gui mapagajes na ileg\u00f1a; Estag\u00fciya y Lajijo na maguflie, na guefyajo: ecungog g\u00fce.\n17:6 Ya anae jajungog este y disipulo sija, manpodong gui jilo mata\u00f1ija ya mangosmaa\u00f1ao.\n17:7 Ayo nae si Jesus mato ya manpinacha, ileg\u00f1a: Fangajulo ya chamiyo fanmaaa\u00f1ao.\n17:8 Ya anae jajatsa y atadog\u00f1ija, taya jalie na si Jesusja.\n17:9 Ya anae manunog papa guine y finabeca, si Jesus mantinago ya ileg\u00f1a: Chamiyo fanma\u00f1angangane ni jaye ni liniimiyo, asta qui y Lajin taotao esta cajulo gui entalo manmatae.\n17:10 Ayo nae y disipulu\u00f1a sija mafaesen g\u00fce ya ileg\u00f1ija: Jafa nae na ileg\u00f1ija y escriba sija na si Elias ufato finena?\n17:11 Ya inepe as Jesus, ileg\u00f1a: Magajet na si Elias ufato finena, ya ujananalo todo y g\u00fcinaja.\n17:12 Lao guajo sumangane jamyo, na si Elias esta mato, ya ti matungog\u00fce: lao mafatinas guiya g\u00fciya todo y malago\u00f1ija. Taeg\u00fcenaoja locue y Lajin taotao upadese nu sija.\n17:13 Ayo nae y disipulo sija jatungo na mansinangane sija as Juan Bautista.\n17:14 \u00b6 Ya anae manmato sija gui linajyan taotao, mato guiya g\u00fciya un taotao na dinimumuye g\u00fce ya ileg\u00f1a:\n17:15 Se\u00f1ot, gaease ni lajijo; sa malango baba, ya gogosjapadese; sa megae nae podong gui guafe, yan megae nae podong gui janom.\n17:16 Ya guinin juchulie guato y disipulumo, lao tisi\u00f1a manajomio.\n17:17 Ya manope si Jesus, ileg\u00f1a: O generasion na ti manjonggue yan manchatpayon! asta ngaean nae utafanjijitaja? asta ngaean nae jususungonja jamyo? Chulie yo fan mague.\n17:18 Ya jalalatde si Jesus y anite, ya mapos gui malango, ya y patgon jomlo desde ayo na ora.\n17:19 Ayo nae manmato y disipulo sija gui as Jesus, ya ileg\u00f1ija: Jafajam mina ti si\u00f1a inyite juyong?\n17:20 Si Jesus ileg\u00f1a nu sija: Pot diquique na jinengguenmiyo: sa magajet jusangane jamyo, na yanguin mangaejinenggue jamyo, calang y pepitas mostasa, injaalog ni este na jalom tano: Janao g\u00fcine; ya ujanao, ya taya ti si\u00f1a para jamyo.\n17:21 (Lao este na classe ti jumanao juyong, yaguin ti y minauleg y tinayuyut.)\n17:22 \u00b6 Ya anae manmamocat guiya Galilea, ileg\u00f1a si Jesus nu sija: Y Lajin taotao umaentrega gui canae y taotao sija;\n17:23 Ya umapuno; lao y mina tres na jaane, ucajulo. Ya sija ninafangostriste.\n17:24 \u00b6 Ya anae manmato guiya Capernaum, manmato gui as Pedro ayosija y manmangongobbla y medio siclo, y tributo, ya ileg\u00f1ija: Ada ti manapapase y maestronmiyo y medio siclo y tributo?\n17:25 G\u00fciya ileg\u00f1a: Junggan. Ya anae jumalom g\u00fce gui jalom guma, si Jesus, cuenentuse g\u00fce antes, ileg\u00f1a: Jafa jinasosomo Simon? Y ray y tano sija, jaye jacocobbla tributo pat senso? y famaguon\u00f1ija, pat y taotaojuyong?\n17:26 Ya anae ileg\u00f1a, Y taotaojuyong; si Jesus ileg\u00f1a nu g\u00fciya: Ayo nae y famaguon manlibre.\n17:27 Lao para mungajit fumatinas y tinempo para sija, Janao falag y tase, ya unyute y jag\u00fcet, ya y finenana na g\u00fcijan na mato, cone; ya an unbaba y pachot\u00f1a, unsoda y un siclo; chule este ya nae para guajo yan para jago.\n18:1 AYO na tiempo, manmato y disipulo sija gui as Jesus, ya ileg\u00f1ija: Jaye mas dangculo gui raenon langet?\n18:2 Ya jaagang si Jesus un patgon, ya japolo gui entalo\u00f1ija,\n18:3 Ya ileg\u00f1a: Magajet jusangane jamyo, yaguin ti inbira jamyo, ya ti infanjuyong calang, y diquique na famaguon, sen ti infanjalom gui raenon langet.\n18:4 Ya jayeja y umumitde calang este na patgon, este uguefdangculo gui raenon langet.\n18:5 Ya jayeja y rumesibe un patgon, parejo yan este, pot y naanjo, jaresibeja yo locue.\n18:6 Lao jayeja y munamatompo uno g\u00fcine gui estesija mandiquique ni y jumonggue yo, mas mauleg umagode gui agaga\u00f1a y dangculo na molinon acho, ya umayute gui anae tadodong y tase.\n18:7 \u00b6 Ayay y tano pot y tinempo sija! sa nesesita na ufato y tinempo sija, lao, ayay ayo na taotao, y uminafato y tinempo.\n18:8 \u00b6 Enao mina yaguin y canaemo, pat y adengmo, unninaquepodongjao, utut ya unnajanao guiya jago: sa mauleg\u00f1a na unqueyaojao, pat mangcojao, ya unjalom gui lin\u00e2l\u00e2mo, qui uguaja dos canaemo, yan dos adengmo, ya unmapolo gui taejinecog na guafe.\n18:9 Yaguin y atadogmo unninaquepodongjao, chule ya unnajanao guiya jago; sa mauleg\u00f1a na unjalom gui lin\u00e2l\u00e2mo yan un atadog, qui uguaja dos atadogmo, ya unmapolo gui guafen sasalaguan.\n18:10 \u00b6 Atan ya chamiyo dumesprenesia uno g\u00fcine gui estesija y mandiquique; sa guajo sumangane jamyo, na y angjet\u00f1ija gui langet, siesiempreja jaliliija y matan y Tatajo ni y gaegue gui langet.\n18:11 (Sa y Lajin taotao mato para usatba y manmalingo.)\n18:12 Jafa jinasonmimiyo? Yaguin guaja un taotao na gaega siento na quinilo, ya finalingaeguan uno: Ada ti upolo y noventa y nueve gui jalomtano, ya ujanao ya ujaligao ayo y malingo?\n18:13 Yanguin jasoda, magajet jusangane jamyo, na magof\u00f1a ni ayo, qui y noventa y nueve ni y ti manmalingo.\n18:14 Taeg\u00fcineja, ti minalago Tatanmiyo ni y gaegue gui langet, na uguaja malingo uno g\u00fcine gui estesija y mandiquique.\n18:15 \u00b6 Yaguin y chelumo inisag\u00fcejao, janao, ya unsangane ni y linachi\u00f1a, jamyoja na dos; yanguin inecungogjao, ungana y chelumo.\n18:16 Lao, yaguin ti jaecungogjao, fangone gachongmo uno, pat dos, sa para y pachot dos pat tres na testigo, ucabales todo y sinangan.\n18:17 Yanguin ti jaecungog sija, sangane y inetnon mangilisyano; lao yaguin ti malago jaecungog y inetnon mangilisyano, g\u00fciya para jago parejo yan un taotaojuyong pat publicano.\n18:18 Magajet jusangane jamyo, na todo y inguede gui tano, ufanmagode locue gui langet: ya todo y inpila gui tano, ufanmapula locue gui langet.\n18:19 Jusangane jamyo talo, na yaguin dos guiya jamyo inguaja un corason gui jilo tano, pot jafa na g\u00fcinaja ni ingagao; umafatinas para sija, pot y Tatajo na gaegue gui langet.\n18:20 Sa manoja nae guaja dos pat tres, na mandada\u00f1a pot y naanjo, gaegue yo g\u00fcije gui entalo\u00f1ija.\n18:21 \u00b6 Ayo nae si Pedro mato guiya g\u00fciya ya ileg\u00f1a: Se\u00f1ot, cuanto biaje juasie y chelujo yaguin jaisag\u00fceyo? asta siete biaje?\n18:22 Si Jesus ileg\u00f1a nu g\u00fciya: Ti jualog sieteja na biaje, lao, asta setenta na siete.\n18:23 \u00b6 Enao mina y raenon langet, parejoja yan un ray, na malago na ufatinas cuentas yan y tentago\u00f1a sija.\n18:24 Ya anae jatutujon fumatinas y cuentas sija, maconieg\u00fce guato, uno na mandidibe dies mit talento.\n18:25 Lao anae g\u00fciya ti si\u00f1a jaapase, y amu\u00f1a manago na umabende g\u00fce, yan y asagua\u00f1a, yan y famaguon\u00f1a, yan todo y g\u00fcinaja\u00f1a, ya umaapaseg\u00fce.\n18:26 Ayo na tentago, dumimo papa ya tinayuyutg\u00fce, ileg\u00f1a: Se\u00f1ot, gaesiningon nu guajo, ya juapasejao todo.\n18:27 Y amon ayo na tentago, ninagosmaase, ya pinelog\u00fce, ya inasie ni y dibi\u00f1a.\n18:28 Ya jumanao ayo na tentago, ya umasoda yan uno gui mangachong\u00f1a na dinidibeg\u00fce cien pesetas; ya jamantiene g\u00fce ya ja\u00f1ucut, ya ileg\u00f1a: Apaseyo todo ni dibimo.\n18:29 Ayo nae y gachong\u00f1a dumimo papa, ya tinayuyutg\u00fce ileg\u00f1a: Gaesiningon nu guajo, ya juapasejao.\n18:30 Lao g\u00fciya ti malago, ya mapos ya pinelo gui catset asta qui uinapase ni y dibi\u00f1a.\n18:31 Ya anae malie ni y mangachong\u00f1a, jafa y susede, ninafangostriste, ya manmato, ya masangane y amu\u00f1ija y susede.\n18:32 Ayo nae y amu\u00f1a inagang g\u00fce, ya ileg\u00f1a: Taelayejao na tentago. Juasiijao todo ni y dibimo, sa untayuyutyo:\n18:33 Ada locue ti ninamaase jao ni y gachongmo, calang y maasejo nu jago?\n18:34 Ayo nae y amu\u00f1a ninalalalo, ya inentrega g\u00fce gui mansasapet, asta qui uapase todo y dinidibeg\u00fce.\n18:35 Taeg\u00fcenaoja locue ufatinas nu jamyo y Tatajo ni gaegue gui langet, yaguin ti inasie gui corasonmiyo cada uno gui chelonmiyo nu y dibi\u00f1a.\n19:1 YA malofan anae si Jesus munjayan este sija na finanag\u00fce\u00f1a, jumanao guiya Galilea, ya mato gui oriyan Judea, gui otro bandan Jordan.\n19:2 Ya madalalag g\u00fce ni y dangculo na linajyan taotao, ya janafanjomlo g\u00fcije.\n19:3 \u00b6 Ayo nae manmato guiya g\u00fciya y Fariseo sija, ya matienta g\u00fce ya ileg\u00f1ija nu g\u00fciya: Si\u00f1a y laje jayute y asagua\u00f1a pot jafa na rason?\n19:4 G\u00fciya jaope ya ileg\u00f1a: Ada ti intaetae na y fumatinas desde y tutujon, laje yan palaoan jafatinas sija;\n19:5 Ya ileg\u00f1a: Pot este y laje upolo si tata\u00f1a yan si nana\u00f1a, ya uda\u00f1a yan y asagua\u00f1a, ya sija na dos unoja catne\u00f1ija?\n19:6 Taeg\u00fcenao sija ti udos, na unoja na catne. Pot enao mina y ninada\u00f1a Yuus, ti mauleg y taotao ujanaadesapatta.\n19:7 Yleg\u00f1ija nu g\u00fciya: Pot jaf mina si Moises jatago na umatugue y papet umadesapatta, ya umayute?\n19:8 G\u00fciya ileg\u00f1a: Pot y manmajetog corasonmiyo, si Moises na japetmite na inyite y asaguanmiyo, lao y tutujon\u00f1a ti taeg\u00fcenao.\n19:9 Guajo jamyo sumangane, na jayeja y yumute y asagua\u00f1a ya ti pot y inabale, ya umasagua yan otro, umabale; ya y umasagua yan y umayute, umabaleja.\n19:10 \u00b6 Yleg\u00f1ija y disipulu\u00f1a sija nu g\u00fciya: Yaguin taeg\u00fcenao nu y laje yan y asaguana, ti mauleg na umasagua.\n19:11 Ayo nae ileg\u00f1a: Ti todo si\u00f1a rumesibe este na sinangan: na ayoja sija y manmanae.\n19:12 Sa guaja capon sija na y mafa\u00f1ago capon guine y jalom tuyan nana\u00f1ija; ya guaja capon na ninafancapon ni y taotao sija; ya guaja capon na jacapon maesaja sija pot rason di y raenon langet. Y si\u00f1a rumesibe este, g\u00fciya uresibe.\n19:13 \u00b6 Ayo nae machule guato guiya g\u00fciya famaguon sija, para upolo y canae\u00f1a gui jilo\u00f1ija, ya ufanaetae; lao y disipulo sija manlinalatde y manmangongone guato.\n19:14 Lao si Jesus ileg\u00f1a: Polo y famaguon, ya chamiyo chumochoma, na ufanmamaela guiya guajo; sa iyon este sija y raenon langet.\n19:15 Ya anea munjayan japolo y canae\u00f1a gui jilo\u00f1ija, mapos g\u00fcije.\n19:16 \u00b6 Ya estag\u00fce uno na mato, ya ileg\u00f1a: Maestro, jafa mauleg jufatinas, para juguaja taejinecog na linala?\n19:17 G\u00fciya ileg\u00f1a: Jafa na funaesenyo nu y minauleg? Guaja unoja mauleg: lao yaguin malagojao jumalom gui lin\u00e2l\u00e2, adaje y tinago sija.\n19:18 Yleg\u00f1a nu g\u00fciya: Jafa? Si Jesus ileg\u00f1a: Munga mamuno; munga umabale; munga ma\u00f1aque; munga masangan y ti magajet na testimonio;\n19:19 Onra si tatamo, yan si nanamo; Ya g\u00fcaeya y tiguangmo calang jago maesaja.\n19:20 Y patgon na taotao ileg\u00f1a nu g\u00fciya: Todo este sija juadaje: Jafa trabia fattaco?\n19:21 Yleg\u00f1a si Jesus nu g\u00fciya: Yaguin malagojao na uncabales, janao, ya unbende todo y g\u00fcinajamo, ya unnae y mamobble, ya uguaja g\u00fcinajamo gui langet; ya maela dalalagyo.\n19:22 Lao anae jajungog y patgon na taotao, este na sinangan, ninatriste ya mapos; sa guaja megae iyo\u00f1a na g\u00fcinaja.\n19:23 Ayo nae si Jesus ileg\u00f1a ni disipulu\u00f1a: Magajet jusangane jamyo, na y manrico mapot jumalom gui raenon langet.\n19:24 Ya jusangane jamyo talo, na mas guse un cameyo malofan gui matan jaguja, qui un rico ujalom gui raenon Yuus.\n19:25 Anae jajungog este sija y disipulu\u00f1a, ninafangosmanman, ya ileg\u00f1ija: Jaye nae si\u00f1a satbo?\n19:26 Maninatan as Jesus, ya ileg\u00f1a nu sija: Yan y taotao sija, ti si\u00f1a este; lao yan si Yuus, todo si\u00f1a.\n19:27 Ayo nae manope si Pedro, ileg\u00f1a nu g\u00fciya: Estag\u00fcejamja, na inpelo todo, ya indadalalagjao; jafa nae uguajanmame?\n19:28 Si Jesus ileg\u00f1a nu sija: Magajet jusangane jamyo, na jamyo ni dumadalalagyo, y tiempon finamauleg, anae matachong y Lajin taotao gui tronon y langet\u00f1a, jamyo locue infanmatachong gui jilo y dose na trono para injisga y dose na tribu guiya Israel.\n19:29 Ya jayeja y yumute guma\u00f1a, pat chelu\u00f1a laje, pat chelu\u00f1a palaoan, pat tata\u00f1a, pat nana\u00f1a, pat laji\u00f1a, pat tano\u00f1a pot y naanjo, ufanresibe cien biaje, ya umaereda ni y taejinecog na lin\u00e2l\u00e2.\n19:30 Lao megae na manfinenana ufanuttimo; ya y manuttimo ufanfinenana.\n20:1 SA y raenon langet parejoja yan un taotao, tatan un familia na jumanao taftaf gui egaan para ufantratos manf\u00e1fachocho, para y fangualuan\u00f1a ubas.\n20:2 Ya anae esta manatungopara ufanmachocho pot un peseta gui un jaane, jatago na ufanmalag y fangualuan\u00f1a.\n20:3 Ya y mina tres na ora, jumajanao ya jalile palo na manotojgue gui plasa manaechoco,\n20:4 Ya ileg\u00f1a nu sija: Janao locu fanmalag y fangualuanjo, ya junae jamyo ni y cabales. Ya manmapos.\n20:5 Ya jumanao talo gui mina saes, yan y mina nuebe na ora, ya jafatinasja taeg\u00fcije.\n20:6 Jumanao gui mina onse na ora, ya jasoda palo na manaechocho, ya ileg\u00f1a: Jafa na ma\u00f1asagaja jamyo g\u00fcine todo pago na jaane, ya manaechocho jamyo?\n20:7 Sija ileg\u00f1ija nu g\u00fciya: Sa tayajam tumatratos. G\u00fciya ileg\u00f1a nu sija: Janao locue fanmalag y fangualuanjo.\n20:8 Ya anae estaba pupuenge g\u00fcije na jaane, y magas ni y gaiyo ayo y fangualuan ubas, ileg\u00f1a nu y magas na tentago\u00f1a: Agang todo y manfafachocho, ya unapase ni y checho\u00f1ija, tutujon desde y uttimo asta y finenana.\n20:9 Ya anae manmato ayo y jumanao gui mina onse na ora, cada uno jaresibe un peseta.\n20:10 Anae manmato y jumanao finenana, jinason\u00f1ija na ujaresibe mas; lao manparejoja todo siji cada uno jaresibe un peseta.\n20:11 Ya anae jaresibe, ninafanadingan contra y tatan y familia,\n20:12 Ileg\u00f1ija: Este sija y manuttimo, taya checho\u00f1ija na un oraja, ya unnafanparejoja yan jame, na jame cumatga y catga yan todo y minaepen y jaane.\n20:13 G\u00fciya jaope uno guiya sija, ileg\u00f1a: Amigo, taya ti tunas jufatinas nu jago. Ada ti matungo jit pot un peseta?\n20:14 Chule y iyomo ya unjanao: guajo malagoyo na junae este y uttimo, parejo yan jago.\n20:15 Ada ti cabales na jufatinas jafa y malagojo ni y iyoco? Pat ada taelaye y atadogmo, sa guajo mauleg?\n20:16 Taeg\u00fcenao y manfinenana ufanuttimo, ya y manuttimo, ufanfinenana.\n20:17 \u00b6 Ya anae si Jesus cajulo guiya Jerusalem, jacone y dose na disipolu\u00f1a gui sumajnge ya ileg\u00f1a nu sija gui chalan:\n20:18 Estag\u00fcijit na mangajulo guiya Jerusalem, ya y Lajin taotao umaentrega gui magas na mamale sija, yan escriba sija; ya umasentensia para umapuno;\n20:19 Ya umaentrega gui Gentiles sija, para umabutlea, yan umasaulag, yan umaatane gui quiluus; lao y mina tres na jaane umacajulo.\n20:20 \u00b6 Ayo nae manmato guiya g\u00fciya y nanan y famaguon Sebedeo, yan y famaguon\u00f1a, ya maadora g\u00fce, ya manmangagagao ni un g\u00fcinaja.\n20:21 Ya ileg\u00f1a nu g\u00fciya: Jafa malagomo? Y palaoan ileg\u00f1a nu g\u00fciya: Tago este y dos lajijo ya ufatachong, y uno gui agapa na canaemo, ya y otro gui acag\u00fcemo, gui raenomo.\n20:22 Ayo nae inepe as Jesus ileg\u00f1a: Ti untungo jafa mangagao. Si\u00f1ajamyo gumimen gui copa anae gumiguimenyo? Sija ileg\u00f1ija, si\u00f1ajam.\n20:23 G\u00fciya ileg\u00f1a nu sija: Magajet na infanguimen gui copajo; lao infanmatachong gui agapa na canaejo pat y acag\u00fce, ti guajo jufannae, na para ayo sija y esta manmaprepara pot y Tatajo.\n20:24 Ya anae majungog este ni y dies, ninafanbubo nu y dos chumelo.\n20:25 Ayo nae si Jesus, inagang sija guiya g\u00fciya ya ileg\u00f1a: Intingo na y magas y taotaojuyong sija, manmamanda gui jilo\u00f1ija; ya mandangculo jafatinas ninasi\u00f1an\u00f1ija gui jilo\u00f1ija.\n20:26 Lao ti utaeg\u00fcine guiya jamyo; ya jayeja y malago dumangculo gui entalonmiyo, g\u00fciya ministronmiyo.\n20:27 Ya y malago ufinenana gui entalo\u00f1miyo, g\u00fciya tentagonmiyo.\n20:28 Sa y Lajin taotao, ti mato para umasetbe, na para ufa\u00f1etbe, ya para ufannae y jaani\u00f1a un rescata para unafanlibre megae.\n20:29 Ya anae manjanao sija guiya Jerico, madalalague g\u00fce dangculo na linajyan taotao.\n20:30 \u00b6 Ya estag\u00fce dos bachet na matatachong gui oriyan chalan, ya anae jajungog na para ufalofan si Jesus, managang, ileg\u00f1ija: Se\u00f1ot, Lajin David, gaease nu jame.\n20:31 Ya y linajyan taotao, manlinalatde, para ufanmamatquilo: lao sija mas managang, ileg\u00f1ija: Se\u00f1ot, Lajin David, gaease nu jame.\n20:32 Ya sumaga si Jesus, ya maninagang, ileg\u00f1a: Jafa malagomiyo na jufatinas para jamyo?\n20:33 Yleg\u00f1ija: Se\u00f1ot, y atadogmame umababa.\n20:34 Ayo nae si Jesus ninamaase, ya japacha y atadog\u00f1ija, ya manmanlie y atadog\u00f1ija, ya madalalague g\u00fce.\n21:1 YA anae esta manjijijot guiya Jerusalem, manmato guiya Betfaye, gui egso Olibo, si Jesus jatago dos gui disipulu\u00f1a,\n21:2 Yleg\u00f1a nu sija: Janao fanmalag y sengsong sa gaeg\u00fcenao gui menanmiyo, sa enseguidas inseda un bulico na magogode, sumisija yan un poyino: pula ya unchulieyo mague.\n21:3 Yaguin guaja jamyo sumangane jafa, alog: Y Se\u00f1ot janesesita; ya infanmanae enseguidas.\n21:4 Ya todo este jumuyong, para umacumple y sinangan y profeta ni y ileg\u00f1a:\n21:5 Sangane y jagan Sion: Estag\u00fce y Raymo na mato guiya jago, mamso, ya matatachong gui jilo un bulico yan un poyino, patgon bulico.\n21:6 Ya y disipulo sija manmapos, ya jafatinas jaftaemano y mantinago as Jesus.\n21:7 Ya machule y bulico, yan y poyino, ya japolo y magagunija gui jilo\u00f1ija, ya matachong gui jilo\u00f1ija.\n21:8 Ya un gosdangculo na linajyan taotao jajuto y magagu\u00f1ija gui chalan; yan palo manmanutot ramas jayo, ya jajuto gui chalan;\n21:9 Ya y linajyan taotao ni y manmofona, yan y manatate, manaagang, ileg\u00f1i\u00f1ija: Hosana y Lajin David: Dichoso y mato pot y naan y Se\u00f1ot; Hosana guiya jilulo.\n21:10 Anae jumalomg\u00fce guiya Jerusalem, todo y siuda manatborotao, ya ileg\u00f1ija: Jaye este?\n21:11 Ya y linajyan taotao ileg\u00f1ija: Este si Jesus, y profetan Nasaret yan Galilea.\n21:12 \u00b6 Ya jumalom si Jesus gui guimayuus, ya jayute juyong todo y manmanbebende, yan y manmamamajan gui guimayuus, ya janaalinquin y lamasan y manmanulalaeca salape, yan y tachong y manmanbebende paluma;\n21:13 Ya ileg\u00f1a nu sija: Esta matugue, y guimajo, guma manaetae umafanaan; lao jamyo fumatinas y liyang y ma\u00f1aque.\n21:14 Ya manmato guiya g\u00fciya manbachet yan mancojo, gui guimayuus, ya janafanjomlo.\n21:15 Lao y magas na mamale sija, yan y escriba sija, ninafalalalo anae jalie y mannamanman sija ni y jafatitinas, yan y famaguon sija ni y manaagang gui guimayuus, ya ileg\u00f1ija: Hosana y Lajin David;\n21:16 Ya ileg\u00f1ija nu g\u00fciya: Ti unjungog jafa este ileg\u00f1i\u00f1ija? Si Jesus ileg\u00f1a nu sija: Junggan. Taya nae untaetae: Guinin pachot y famaguon yan y ma\u00f1ususo, unnacabales y tinina?\n21:17 Ya jadingo sija, jumuyong gui siuda asta Betania; ya sumaga g\u00fcije.\n21:18 \u00b6 Y egaan, anae tumalo guato gui siuda, \u00f1alang.\n21:19 Ya jalie un trongcon igos jijot gui chalan, ya malag ayo, lao taya sineda\u00f1a na jagonja; ya ileg\u00f1a: Ti unfanogcha asta ni ngaean. Ya ti apmam y igos anglo.\n21:20 Anae malie este ni y disipulo sija, ninafanmanman, ya ileg\u00f1ija: Nachinadeg y igos anglo!\n21:21 Ya maninepe as Jesus, ileg\u00f1a: Magajet jusangane jamyo, na yaguin guaja jinengguenmiyo, ya ti buebuente jamyo, infatinas ti esteja ni y mafatinas gui y igos; lao yaguin insangane este na ogso ya ilegmiyo: Janao ya unyutejao gui tase, umafatinas.\n21:22 Sa todosija y ingagao an manmanaetae jamyo ya injenggue, infanmanresibe.\n21:23 Ya anae jumalom gui guimayuus, y magas na mamale sija, yan manamco na taotao sija, manmato guiya g\u00fciya, anae estaba mamananag\u00fce, ya ileg\u00f1ija: Jafa na ninasi\u00f1a na unfatinas estesija? ya jayejao numae nu este na ninasi\u00f1amo?\n21:24 Ya maninepe as Jesus, ileg\u00f1a nu sija: Guajo locue jufaesen jamyo un sinangan; yaguin insangane yo, guajo locue jusangane jamyo jafa na ninasi\u00f1a muna jufatitinas este.\n21:25 Y tinagpangen Juan, guine mano? Guine y langet, pat y taotao sija? Ayo nae sija jajajaso gui sumanjalom\u00f1ija ileg\u00f1ija: Yaguin ilegmame, guine y langet; ualog nu jame: jafa nae na ti injenggue?\n21:26 Yaguin ilegmame: Y taotao sija; manmaa\u00f1aojam ni y taotao sija; sa pinelo\u00f1ija todo na profeta si Juan.\n21:27 Ya manope ileg\u00f1ija as Jesus: Ti intingo. Si Jesus locue ileg\u00f1a nu sija: Ni guajo ti jusangane jamyo, pot jafa na ninasi\u00f1a na jufatinas este.\n21:28 \u00b6 Lao jafa pinelonmimiyo? Un taotao guaja dos laji\u00f1a, ya mato guiya y finena ya ileg\u00f1a: Lajijo, janao fachocho gui fangualuan ubas.\n21:29 Ya manope, ileg\u00f1a: Munga yo; lao despues ma\u00f1otsot ya mapos.\n21:30 Mato guiya y otro, ya jasanganeja talo taeg\u00fcije: Ya inepe ileg\u00f1a: Guajo, se\u00f1ot, bae jujanao, lao ti jumanao.\n21:31 Jaye guiya sija na dos fumatinas y minalago y tata? Sija ileg\u00f1ija: y finenena. Yleg\u00f1a si Jesus nu sija: magajet jusangane jamyo, na y publicano sija, yan y manputa sija, ufanjalom gui raenon Yuus gui menanmiyo.\n21:32 Sa mato si Juan guiya jamyo gui chalan tininas, ya ti injenggue g\u00fce; ya y publicano sija, yan y manputa sija majonggue g\u00fce: lao jamyo, anae inlie, ti manma\u00f1otsot jamyo para injenggue g\u00fce.\n21:33 \u00b6 Ecungog otro acomparasion: Un taotao, tatan un familia, japlanta un fangualuan ubas, y jacolat nu y trongco ni y tituca, ya jaguadog gui entalo un lagat, ya jafatinas un tore, ya janamaatquila gui manfafachocho, ya maposg\u00fce malag otro tano.\n21:34 Ya anae esta jijot y tiempon y tinegcha, jatago y tentago\u00f1a sija para ayo y manfafachocho, para ujaresibe y tinegcha sija.\n21:35 Lao y manfafachocho jacone y tentago sija, y japanag y uno, japuno y otro, ya jatagas nu y acho y otro.\n21:36 Jatago talo y palo tentago\u00f1a sija, mas qui y finenana: ya manmafatinasja talo taeg\u00fcije.\n21:37 Y uttimo jatago y laji\u00f1a, ileg\u00f1a: Ufangaerespeto ni y lajijo.\n21:38 Lao anae malie ni y manfafachocho, na y laji\u00f1a, ileg\u00f1ija gui sumanjalom\u00f1ija: Estag\u00fciya y eredero, maela ya tapuno, ya tachule y fangualuan\u00f1a.\n21:39 Ya macone ya mayute juyong gui fangualuan, ubas, y mapuno.\n21:40 Anae mato y se\u00f1ot y fangualuan ubas, jafa umafatinas contra ayo y manfafachocho?\n21:41 Sija ileg\u00f1ija uguefyulang y manaelaye: ya y fangualuan ubas unamaatquila gui otro manfafachocho na umapaseg\u00fce ni tinegcha gui tiempo.\n21:42 Se Jesus ileg\u00f1a nu sija: Taya nae intaetae y Tinigue sija: Y acho ni y jarechasa y manmamatitinas y guima, esteja mapolo cuentan ulo gui esquina: este finatinas y Se\u00f1ot ya janafanmanman y atadogta?\n21:43 Enao mina jusangane jamyo, na y raenon Yuus umanajanao guiya jamyo, ya ufanmanae ayo sija na taotao y fumatinas para umegae y tinegcha\u00f1a.\n21:44 Ya y pedong gui jilo este na acho, umayulang; ya, yaguin y jilo\u00f1a nae podong, umapedasitos.\n21:45 Ya anae majungog ni y magas na mamale sija yan y Fariseo sija, y acomparasion\u00f1a sija, jinason\u00f1ija na pot sija na jasasangan.\n21:46 Ya anae maaligao para umaconeg\u00fce, manmaa\u00f1ao ni taotao sija, sa maatang\u00fce pot profeta.\n22:1 SI Jesus manope ya jacuentuse sija talo y acomparasion sija ileg\u00f1a,\n22:2 Y raenon langet, parejo yan un ray, na jafatinas gupot umasagua para y laji\u00f1a.\n22:3 Ya jatago y tentago\u00f1a sija, na ujaagange y manmaconbida gui guipot; lao ti manmalago manmato.\n22:4 Jatago talo palo tentago\u00f1a, ileg\u00f1a: Sangane y manmaconbida: Esta jufamauleg y na taloane, y gajo toro yan y manyomog na gajo, esta manmapuno, ya todo esta listo: fanmamaela gui guipot umasagua.\n22:5 Lao sija ti jaatituye, ya manmapos, y uno para y fangualua\u00f1a, y otro para y cometsio\u00f1a.\n22:6 Y palo macone y tentago\u00f1a ya manamamajlao, ya manmapuno.\n22:7 Lao y ray ninalalalo; ya jatago y sendalu\u00f1a sija na ujapuno todo ayo y mamuno sija, ya ujasonggue y siuda\u00f1a.\n22:8 Ayo nae ileg\u00f1a ni y tentago\u00f1a sija: Y guipot umasagua esta listo; lao ayo sija y manmaconbida ti mandigno.\n22:9 Janao fanmalag y mafapoposg\u00fce na chalan, ya inagange para y guipot umasagua todo y inseda.\n22:10 Ya manmapos y tentago sija para y chalan, ya janafanda\u00f1a todo y jasoda, parejo y taelaye yan y mauleg; ya y guipot umasagua bula ni manmaconbida.\n22:11 \u00b6 Ya anae jumalom y ray para ulie y manmaconbida, jalie g\u00fcije un taotao na ti minagago ni y magagon gupot.\n22:12 Ya ileleg\u00f1a nu guiya: Amigo, jafa na jumalomjao g\u00fcine ya taya magagumo magagon gupot? Lao g\u00fciya ti cumuentos.\n22:13 Ayo nae y ray ileg\u00f1a ni y manma\u00f1e\u00f1etbe: Gode y adeng\u00f1a, yan y canae\u00f1a, ya inchile, ya inyite juyong gui jalom jomjom: ayo nae uguaja tumanges, yan chegcheg nifen.\n22:14 Sa megae manmaagang; lao didide manmaayig.\n22:15 \u00b6 Ayo nae manmapos y Fariseo sija, ya manacuentuse jafa taemano ninagadon g\u00fce ni y cuentos\u00f1a.\n22:16 Ya jatago guato guiya g\u00fciya y disipulo\u00f1ija yan iyon Herodes, ileg\u00f1ija: Maestro, intingo na jago magajetjao, ya mamananag\u00fcejao na magajet y chalan Yuus; ya taya unadadaje ni jaye; sa ti uno na guaelaye guiya jago y finaboresen taotao.\n22:17 Sangane jam nae, jafa jinasosomo? Tunas na infanmanaejam tributo as Sesat, pat aje?\n22:18 Lao si Jesus jatungo y tinaelaye\u00f1ija, ya ileg\u00f1a: Jafa muna intientayo, hipocritas?\n22:19 Fanueyofan ni y salape y tributo. Ya sija machulieg\u00fce un dinario.\n22:20 Ayo nae ileg\u00f1a nu sija: Jaye iyo este na imagen yan y tinigue ni y gaigue gui jilo\u00f1a?\n22:21 Sija ileg\u00f1ija nu g\u00fciya: Iyon Sesat. Ayo nae ileg\u00f1a nu sija: Nae si Sesat ni iyon Sesat, ya si Yuus ni iyon Yuus.\n22:22 Ya anae sija jajungog este na sinangan, ninafanmanman, ya madingo g\u00fce ya manmapos.\n22:23 \u00b6 Ayo na jaane, manmato guiya g\u00fciya y Saduseo sija, ni y ileg\u00f1ija na taya quinajulo y manmatae, ya mafaesen g\u00fce,\n22:24 Yleg\u00f1ija: Maestro, si Moises ileg\u00f1a, Yaguin jaye na taotao matae ya taya patgon\u00f1a, y chelu\u00f1a uasagua yan y asagua\u00f1a, ya unacajulo semiya gui chelu\u00f1a.\n22:25 Guaja guiya jame siete na lalaje ma\u00f1elo; ya y finena umasagua ya matae, ya taya patgon\u00f1a, japolo y asagua\u00f1a gui chelu\u00f1a.\n22:26 Parejoja talo y mina dos, yan y mina tres, asta y mina siete.\n22:27 Anae munjayan manmatae todosija, matae y palaoan locue.\n22:28 Y quinajulo y manmatae, jaye gui siete ugaeasagua y palaoan? sa todosija maninasagua.\n22:29 Ayo nae maninepe as Jesus, ileg\u00f1a: Manabag jamyo sa ti intingo y Tinigue sija, ni y ninasi\u00f1an Yuus.\n22:30 Sa y quinajulo y manmatae, ni manasagua ni umanafanasagua, sa manparejoja yan y angjet sija gui langet.\n22:31 Ya y quinajulo y manmatae, ada ti intaetae y esta masangan pot si Yuus nu jamyo na ileg\u00f1a:\n22:32 Guajo si Yuus Abraham, yan si Yuus Ysaac, yan si Yuus Jacob? Ti g\u00fciya si Yuus y manmatae, na Yuus y manl\u00e2l\u00e2l\u00e2.\n22:33 Anae majungog este nu y linajyan taotao, ninafanmanman ni y finanag\u00fce\u00f1a.\n22:34 \u00b6 Lao anae y Fariseo sija majungog na janafanmamatquilo y Saduseo sija, manda\u00f1a gui un lugat.\n22:35 Ya mafaesen g\u00fce, uno guiya sija, ni y magas y lay, tinienta g\u00fce, ileg\u00f1a:\n22:36 Maestro, jafa y mas dangculo na tinago gui lay?\n22:37 Si Jesus ileg\u00f1a nu g\u00fciya: Guaeya y Se\u00f1ot Yuusmo con todo y corasonmo, yan todo y antimo, yan todo y jinasomo.\n22:38 Este y finenana yan y dangculo na tinago.\n22:39 Ya y mina dos parejoja yan este: Guaeya y tiguangmo parejo yan jago.\n22:40 Este y dos na tinago chinileja todo y lay yan y profeta.\n22:41 \u00b6 Ya enae estaba y Fariseo sija mandada\u00f1a, si Jesus manfinaesen sija;\n22:42 Yleg\u00f1a: Jafa jinasonmiyo as Cristo? jaye gaelaje g\u00fce? Sija ileg\u00f1ija: Lajin David.\n22:43 G\u00fciya ileg\u00f1a nu sija: Jafa na si David gui Espiritu finanaan g\u00fce Se\u00f1ot, ileg\u00f1a:\n22:44 Y Se\u00f1ot jasangane y Se\u00f1otjo, fatachong gui agapa na canaejo, asta qui jupolo y enemigumo gui pap\u00e2 adengmo.\n22:45 Yaguin si David finanaan g\u00fce Se\u00f1ot, jafa taemano laji\u00f1a?\n22:46 Ya taya si\u00f1a ni uno umope g\u00fce. Ya desde ayo na jaane taya umatrebe g\u00fce para umafaesesen g\u00fce ni jafa.\n23:1 AYO nae si Jesus, jacuentuse y linajyan taotao, yan y disipulu\u00f1a sija,\n23:2 Yleg\u00f1a: Y escriba yan y Fariseo sija manmatatachong gui tachong Moises;\n23:3 Todo y mansinangane jamyo na inadaje, fatinas yan adaje; lao chamiyo fumatitinas taeg\u00fcije y finatinas\u00f1i\u00f1ija, sa sija jasasangan, lao ti jafatitinas.\n23:4 Sa manmangogode catga sija na manmacat ya mapot machule, ya japolo gui jilo y apagan y taotao sija; lao sija ni y calalot\u00f1ija ti manmalago janacalamten.\n23:5 Lao todo y checho\u00f1ija, jafatinas para umalie ni y taotao sija sa janaancho y filacteria\u00f1ija, ya jajujuto y madoblan y magagon\u00f1ija.\n23:6 Ya ya\u00f1ija y finenana na saga gui guipot, yan y finenana na tachong gui sinagoga;\n23:7 Yan y manmasaluda gui plasa, yan ufanmafanaan ni y taotao sija, Rabi.\n23:8 Lao jamyo chamiyo fanmalalago manmafanaan. Rabi; sa unoja Maestronmiyo, ya todo jamyo ma\u00f1elo.\n23:9 Chamiyo fanmamananaan ni uno tatanmiyo gui tano; sa unoja Tatanmiyo, na gaegue gui langet.\n23:10 Ni infanmamanaan uno amunmiyo; sa unoja amunmiyo, si Cristo.\n23:11 Lao y mas dangculo guiya jamyo, g\u00fciya utentagonmiyo.\n23:12 Sa jayeja y munadangculon namae sag\u00fce, umumitde; ya jayeja y munaumitden namaesag\u00fce, g\u00fciya udangculo.\n23:13 \u00b6 Lao ay ay para jamyo escriba yan Fariseo sija, hipocrita! sa injichom y raenon langet gui menan y taotao sija; ya ni jamyo ti manjalom, ni y para ufanjalom ti inpelo na ufanjalom.\n23:14 (Ay ay para jamyo, escriba yan Fariseo sija, hipocrita! sa inticho y guima y biuda sija yan inag\u00f3 y tinaetae; pot este inresibe dangculo na sentensia.)\n23:15 Ay ay para jamyo, escriba yan Fariseo sija, hipocrita! sa inlilicue y tase yan y tano para infatinas un pros\u00e9lito, ya anae esta infatinas, infatitinas g\u00fce lalajin sasalaguan dosbiaje mas qui jamyo.\n23:16 \u00b6 Ay ay para jamyo, bachet na guia sija ni y ilegmiyo: Jayeja y manjula pot templo, taya este; lao jayeja y manjula pot y oron y templo, gaeisao g\u00fce.\n23:17 Manbababa yan manbachet! Jafa mas dangculo, y oro pat y templo, ni y munasantos y oro?\n23:18 Ya jayeja y manjula pot y attat, taya este; lao jayeja y manjula pot y ninae ni gaegue gui jilo\u00f1a, gaeisao g\u00fce.\n23:19 Manbachet jamyo! Jafa mas dangculo, y ninae pat y attat ni munasantos y ninae?\n23:20 Enao mina y manjula pot y attat, manjula pot ayo yan todo y guaja gui jilo\u00f1a.\n23:21 Ya y manjula pot y templo, manjula pot ayo yan pot g\u00fciya y sumaga gui jinalom\u00f1a.\n23:22 Ya y manjula pot y langet, manjula pot y trono Yuus, yan pot g\u00fciya ni gaegue na matatachong gui jilo\u00f1a.\n23:23 \u00b6 Ay ay para jamyo, escriba yan Fariseo sija, hipocrita! sa manmanapase jamyo diesmo y yetba buena, yan anis yan comino, ya inpelo y mas dangculo gui lay; y juisio, y minaase, yan y jinenggue. Este nesesita umafatinas, ya munga mapolo na ti infatinas y otro sija.\n23:24 Bachet jamyo na guia sija! sa inguicula y \u00f1amo, ya inpapa\u00f1ot y cameyo.\n23:25 \u00b6 Ay ay para jamyo, escriba yan Fariseo sija, hipocrita! sa infagagase y sumanjiyeng y posuelo yan y plato; lao y sumanjalom bula inamot yan minampos.\n23:26 Fariseo bachet jao! fagase finena y sumanjalom gui posuelo yan y plato, ya despues y sumanjiyong ugasgas locue.\n23:27 \u00b6 Ay ay para jamyo, escriba yan Fariseo sija, hipocrita! sa manparejo jamyo yan y manmablanquea na naftan na y sanjiyong\u00f1a magajet na mauleg malie: lao y sumanjalom\u00f1a bula tolang manmatae, yan todo y in\u00e1placha.\n23:28 Taeg\u00fcenao locue jamyo y sumanjiyong magajet na manunas malie jamyo ni taotao sija; lao y sumanjalom bula hipocresia yan inechong.\n23:29 \u00b6 Ay ay para jamyo escriba yan Fariseo sija, hipocrita! sa infatinas naftan y profeta sija, ya inadotna y naftan y manunas,\n23:30 Ya ilegmiyo: Yaguin mangaeguejam gui jaanin y tatanmame sija, ti infangachong yan sija gui j\u00e2g\u00e2 y profeta sija.\n23:31 Ayo mina jamyo mismo innae testimonio contra jamyo, na jamyo famaguon ayo sija y pumuno y profeta sija.\n23:32 Jamyo locue innabula y medidan y tatanmiyo.\n23:33 Colebla sija, rasan colebla sija! Jaf taemano jamyo insujaye gui sentensian sasalaguan?\n23:34 \u00b6 Enaomina estag\u00fceyo na junae jamyo profeta sija, yan manmalate yan escribasija; ya palo guiya sija inpino ya inatane gui quiluus; ya y palo guiya sija, inpanag gui sinagoganmiyo, ya inpetsigue sija guinin siuda asta siuda;\n23:35 Para ufato gui jilomiyo todo y tunas na j\u00e2g\u00e2 ni y machuda gui jilo y tano, desde y j\u00e2g\u00e2n Abel y tinas, asta y j\u00e2g\u00e2 Sacharias, lajin Barachias, ni inpino gui entalo templo yan y attat.\n23:36 Magajet jusagane jamyo, na todo estesija ufanmato gui jilo este na generasion.\n23:37 \u00b6 Jerusalem! Jerusalem! ni y pumuno y profeta sija, ni infagas ni acho todo y manmatago para jago, cuanto biaje malagoyo na jurecoje y famaguonmo, calang y ponedera yan jarecoje y poyitas\u00f1a sija gui papa papa\u00f1a, lao ti manmalago jamyo!\n23:38 Estag\u00fce na madingo guiya jamyo y guimanmiyo na ti mataotag\u00fce.\n23:39 Sa guajo jamyo sumangane, na desde pago, ti inliiyo, asta qui ilegmiyo: Dichoso g\u00fce y mato. pot y naan y Se\u00f1ot.\n24:1 YA si Jesus jumuyong gui templo ya mapos; manmato y disipulu\u00f1a sija, para umafanue ni y mafatinas y templo.\n24:2 Si Jesus jaope sija, ileg\u00f1a: Ti inlie todo estesija? Magajet jusangane jamyo, na ti umapolo g\u00fcine un acho gui jilo otro acho, na ti umayulang.\n24:3 Ya anae matatachong g\u00fce gui sabana Olibo, manmato guiya g\u00fciya y disipulo sija, ya ileg\u00f1ija: Sangane jam ngaean ufanjuyong estesija na g\u00fcinaja, yan jafa taemano na se\u00f1at y finatomo, yan y jinecog y tiempo?\n24:4 Ya maninepe as Jesus, ileg\u00f1a: Adaje ya chamiyo fanmadadague ni jaye.\n24:5 Sa megae ufanmato pot y naanjo, ya ujaalog: Guajo si Cristo; ya megae ujadague.\n24:6 Ya infanmanjungog guera yan sinangan nu y guera; atan ya chamiyo ninafa\u00f1achatsaga; sa nesesita na todo este ufanjuyong, lao trabia ti y jinecog.\n24:7 Sa ufangajulo nasion contra nasion, yan raeno contra raeno; ya uguaja \u00f1inalang yan linao gui lugat sija.\n24:8 Ya todo este sija na g\u00fcinaja y tutujon y pininite.\n24:9 Ayo nae infanmaentrega para infanmanapute, ya infanmapuno; ya infanmachatlie gui todo nasion pot y naanjo.\n24:10 Ya megae innafanmatompo; ya ufanaentrega unos y otros, ya ufanachatlie unos y otros.\n24:11 Ya megae ti manmagajet na profeta ufangajulo, ya ujadague megae.\n24:12 Ya pot y janamegae y tinaelaye, y g\u00fcinaeyan y megae janamanenggeng.\n24:13 Lao y sumungon asta y jinecog, este usatba.\n24:14 Ya umapredica este y ebangelion y raeno gui todo y tano, para testimonio gui todo y nasion, ya ayo nae ufato y jinecog.\n24:15 \u00b6 Enaomina an inlie y chinatlie y inginon na yinilang, ni y jasangan si Daniel profeta ni tumotojgue gui santos na lugat; (y tumataetae g\u00fciya utungo).\n24:16 Ayo nae y mangaegue guiya Judea, manmalago para y taquilo na jalomtano;\n24:17 Ya y gaegue gui jilo atof, ti ufanunog ya ujachule jafa gui guima\u00f1a;\n24:18 Ya y gaegue gui fangualuan, ti ufanalo tate ya ujachule y magago\u00f1a.\n24:19 Lao ay ay para y manmapotgue, yan y mannanasuso, g\u00fcije na jaane!\n24:20 Fanmanaetae, sa y jinanaonmiyo, munga gui tiempon manenggeng ni y sabado.\n24:21 Sa ayo na tiempo uguaja dangculo na pininite, ya desde y tutujon y tano asta pago, taya nae guaja; ya taya mas na uguaja asta jinecog.\n24:22 Yaguin ayo na jaane sija ti manafangadada, ni un catne usi\u00f1a ninalibre; lao pot y manmaayig, ayo sija na jaane umanafangadada.\n24:23 Yaguin jaye na taotao umalog nu jago: Estag\u00fce si Cristo, pat ayo; chamo jumojonggue.\n24:24 Sa ufangajulo y ti manmagajet na Cristo yan ti manmagajet na profeta sija; ya ufanmamanue dangculo na se\u00f1at sija, yan mannamanman, ya, yaguin si\u00f1a, ujadagueja asta y manmaayig.\n24:25 Estag\u00fce na jusangane jamyo antes.\n24:26 Yaguin ileg\u00f1ija nu jamyo: Estag\u00fce na gaegue g\u00fci desierto, chamo jumajanao; pat, Estag\u00fce, na gaegue gui sanjalom gui cuatto, chamo jumojonggue.\n24:27 Sa calang y lamlam ni y jumuyong gui sancatan, ya manina gui sanlichan, taeg\u00fcijija locue y minamaela y Lajin taotao.\n24:28 Sa manoja nae ma\u00f1aga y tataotao y matae, ayo locue nae ufanda\u00f1a y aguila sija.\n24:29 \u00b6 Ti apmam despues di y pininiten ayo sija na jaane, y atdao ujomjom, ya y pilan ti ufanina; ya y pution sija ufamodong guine y langet; ya y nina si\u00f1an y langet ufanmayengyong.\n24:30 Ayo nae uanog se\u00f1at y Lajin taotao gui langet; yan ayo nae ufanugung todo y tribu sija gui tano; ya ujalie y Lajin taotao na mamamaela gui jilo y mapagajes sija gui langet, yan y ninasi\u00f1a\u00f1a yan y dangculon minalag\u00f1a.\n24:31 Ya utago y anget\u00f1a sija yan y dangculo na catin y trompeta ya ujanada\u00f1a y inayig\u00f1ija guine y cuatro manglo, desde y un punta gui langet asta y otro.\n24:32 \u00b6 Tingo y acomparasion y trongcon igos. Yanguin y ramas\u00f1a ma\u00f1a\u00f1a ya manjagon, intingo na jijot y fa\u00f1omnagan.\n24:33 Taeg\u00fcenaoja locue jamyo, yaguin inlie todo este sija na g\u00fcinaja, intingoja na esta jijot gui petta sija.\n24:34 Magajet jusangane jamyo, na ti ufanmalofan este na generasion, asta qui todo este sija na g\u00fcinaja manmacumple.\n24:35 Y langet yan y tano ufanmalofan; lao y sinanganjo sija ti ufanmalofan.\n24:36 \u00b6 Lao ayo na jaane yan ayo na ora, taya tumungo, ni y angjet sija gui langet ni y Laji\u00f1a, na y Tatajoja.\n24:37 Lao calang y jaanin Noe, taeg\u00fcijija locue y minamaela y Lajin taotao.\n24:38 Sa ayo na jaane sija y antes di y dilubio, estaba ma\u00f1ochocho yan manguiguimen, ya manasagua, yan manafanaasagua, asta ayo na jaane anae jumalom si Noe gui atca,\n24:39 Ya ti jatungo asta qui mato y dilubio, ya manchinile todos sija; taeg\u00fcijija locue y minamaelan y Lajin taotao.\n24:40 Ya ayo na jaane uguaja dos gui fangualuan; y uno umacone, ya y otro umapolo:\n24:41 Dos palaoan manguguleg gui mitate; y uno umacone, y ya otro umapolo.\n24:42 \u00b6 Fanbela sa ti intingo jafa na jaane nae ufato y Se\u00f1otmiyo.\n24:43 Tingo este na yaguin y gaeguima jatungo ngaean nae ufato y saque, ubelag\u00fce, sa ti upolo na umayulangguan ni iyasija.\n24:44 Enao mina jamyo locue fanlisto, sa y Lajin taotao ufato g\u00fcije na ora gui anae ti injajaso.\n24:45 Jaye y tif\u00e1fababa yan y malate na tentago, ni y se\u00f1ot\u00f1a ninamagasg\u00fce gui guima\u00f1a, para uninanae sija na\u00f1ija gui tiempo?\n24:46 Dichoso ayo na tentago, yaguin mato y amu\u00f1a ya sineda jafatitinas taeg\u00fcije.\n24:47 Magajet jusangane jamyo, na uninamagasg\u00fce todo gui iyo\u00f1a.\n24:48 Lao yaguin ayo y taelaye na tentago ileg\u00f1a gui corason\u00f1a: Y amujo ufato atrasao;\n24:49 Ya sigue di janafanlamen y mangachong\u00f1a, y chumochocho yan gumiguimen yan y manbeglacho:\n24:50 Y se\u00f1ot ayo na tentago ufato g\u00fcije na jaane gui anae ti jananangga yan y ora ni ti jatungo,\n24:51 Ya uyenajo g\u00fce ni latigo yan ufinanue ni y patte\u00f1a yan hipocrita sija ayo nae uguaja tumanges, yan chegcheg nifen.\n25:1 AYO nae y raenon langet parejo yan dies na bitgen, ni jachule y lampara\u00f1ija ya manmapos para ujatagam y nobio.\n25:2 Ya y sinco guiya sija manmejnalom, ya y sinco manaetiningo.\n25:3 Y manaetiningo, jachule y lampara\u00f1ija, ya ti manma\u00f1ule la\u00f1a.\n25:4 Lao y manmejnalom manma\u00f1ule la\u00f1a gui baso, yan y lampara\u00f1ija.\n25:5 Ya anae atrasasao y nobio, manmatujog todo sija, ya manmaego.\n25:6 Ya y tatalopuenge majungog un inagang, na ileg\u00f1a: Estag\u00fce y nobio na mamamaela! fanjuyong ya inresibe!\n25:7 Ayo nae todo y bitgen sija mangajulo ya jafamauleg y lampara\u00f1ija.\n25:8 Ya y manaetiningo ileg\u00f1ija ni manmejnalom: Naejam gui la\u00f1anmiyo sa y lamparanmame manmatae.\n25:9 Ya y manmejnalom manmanope ileg\u00f1ija: Munga sa ti mannajongjit; lao janao fanmalag y manmanbebende ya infanmamajan para jamyo namaesa.\n25:10 Ya anae manmapos sija para ufanmamajan, mato y nobio; ya y estaba manlisto manjalom yan g\u00fciya gui guipot umasagua; ya majuchom y petta.\n25:11 Despues manmato y palo na bitgen ya ileg\u00f1ija: Se\u00f1ot, Se\u00f1ot, babayejam.\n25:12 Lao g\u00fciya manope, ilegna; Magajet jusangane jamyo na ti jutungo jamyo.\n25:13 Fanmagmata sa ti intingo y jaane ni y ora.\n25:14 \u00b6 Sa uguaja parejo yan un taotao ni jumanao chago na tano, ya jaagang antes y tentago\u00f1a sija, ya jaentrega sija ni g\u00fcinaja\u00f1a.\n25:15 Ya y uno janae sinco talento, ya y otro dos, ya y otro uno; ya cada uno taemano y guinefulo\u00f1a; ya enseguidas mapos.\n25:16 Ya y rumesibe y sinco na talento, janacometsio, ya jagana talo sinco na talento.\n25:17 Parejo locue yan y rumesibe dos, mangana talo dos.\n25:18 Lao y rumesibe y uno, jumuyong ya jaguadog y eda, ya janaatog y salape y senot\u00f1a.\n25:19 Despues di apmam na tiempo, mato y se\u00f1ot ayo sija na tentago, ya manacuentas yan sija.\n25:20 Ya mato ayo y rumesibe sinco na talento, yan ma\u00f1u\u00f1ule talo sinco talento, ya ileg\u00f1a: Se\u00f1ot, sinco na talento unnaeyo; estag\u00fce talo sinco na junafangana.\n25:21 Y senot\u00f1a ileg\u00f1a nu g\u00fciya: Mauleg chechomo, jago mauleg na tentago yan guesmanosguejao: guine unfatinas mauleg gui didide, bae jupoluyejao megae: jalom gui minagof y se\u00f1otmo.\n25:22 Mato locue ayo y rumesibe dos na talento, ya ileg\u00f1a: Se\u00f1ot, dos na talento unnaeyo; estag\u00fce talo dos talento na junafangana.\n25:23 Y se\u00f1ot\u00f1a ileg\u00f1a nu g\u00fciya: Mauleg chechomo, jago mauleg na tentago yan guesmanosguejao: guine unfatinas mauleg gui didide, bae jupoluyejao megae; jalom gui minagof y se\u00f1otmo.\n25:24 Mato locue ayo y rumesibe un talento, ya ileg\u00f1a: Se\u00f1ot, guajo jutungo na jago majetogjao na taotao; sa mangongoco jao gui anae ti mananom jao, ya manrecocoje jao gui anae ti ma\u00f1alapon jao;\n25:25 Ya maa\u00f1aoyo, ya maposyo ya junaatog y talentomo gui jalom y tano: estag\u00fce ni iyomo.\n25:26 Lao y se\u00f1ot\u00f1a inepe g\u00fce ileg\u00f1a: Taelayejao na tentago yan gago. Untungoja na mangongoco yo gui anae ti mananom yo, ya manrecocoje yo gui anae ti ma\u00f1alapon yo;\n25:27 Enao mina jago nesesita unnae y banquero sija ni salapejo, ya yaguin matoyo, juresibe y iyoco yan ganansia.\n25:28 Enao mina umanajanao ayo na talento guiya g\u00fciya, ya umannae ayo y guaja dies na talento.\n25:29 Sa jayeja y guaja, umannae g\u00fce, ya uguaja megae; lao y taya iyo\u00f1a, achogja guaja g\u00fcinaja\u00f1a umanajanao.\n25:30 Ya y taebalen\u00f1a na tentago, yute juyong gui jalom jomjom, ayo nae uguaja tumanges yan chegcheg nifen.\n25:31 \u00b6 Yaguin y Lajin taotao mato gui minalag\u00f1a, yan todo y angjet\u00f1a sija, ayo nae ufatachong gui jilo y tachong y minalag\u00f1a;\n25:32 Ya umanafanda\u00f1a gui mena\u00f1a todo y nasion sija; ya umanafa\u00f1ajnge y uno gui otro, calang y pastot yan janasajnge y quinilo sija gui chiba;\n25:33 Ya japolo y quinilo sija gui agapa\u00f1a, ya y chiba gui acag\u00fce\u00f1a.\n25:34 Ayo nae y ray ualog ni mangaegue gui agapa\u00f1a: Maela jamyo mandichoso gui Tatajo, ya inereda y raeno ni esta listo para jamyo desde y mafatinas y tano;\n25:35 Sa anae \u00f1alangyo, innachocho yo; anae majoyo, innaguimen yo; anae taotaojuyong yo, innajalom yo;\n25:36 Anae taya magagojo, innaminagago yo. Anae malangoyo, inbesita yo; anae gaegue yo gui calaboso, manmato jamyo guiya guajo.\n25:37 Ayo nae y manunas manmanope g\u00fce ileg\u00f1ija: Se\u00f1ot, ngaean nae inliijao \u00f1alang, ya innachocho jao? pat majo, ya innaguimen jao?\n25:38 Ngaean nae inliijao taotaojuyong, ya innajalom jao? pat anae taya magagomo, ya innaminagago jao?\n25:39 Pat \u00f1gaean nae inliijao malango, pat y calaboso, ya manmatojam guiya jago?\n25:40 Y ray ujaope ileg\u00f1a nu sija: Magajet jusangane jamyo, taemanoja na y infatinas ni uno g\u00fcine gui mandiquique na ma\u00f1elujo, infatinasja locue nu guajo.\n25:41 Ayo nae ileg\u00f1a locue ni y mangaegue gui acag\u00fce\u00f1a: Fanjanao guiya guajo, jamyo matdito, fanmalag y taejinecog na guafe, ni esta manalisto ni anite yan y anjet\u00f1a sija;\n25:42 Sa anae \u00f1alangyo, ti innachocho yo; anae majoyo, ti innaguimen yo;\n25:43 Anae taotaojuyong yo, ti innajalom yo; anae taya magagojo, ti innaminagago yo; malangoyo, yan gaegue yo gui calaboso, lao ti inbesita yo.\n25:44 Ayo nae ufanmanope locue sija, ileg\u00f1ija: Se\u00f1ot, ngaean nae inliijao \u00f1alang, pat majo, pat taotaojuyong, pat taya magagomo, pat malango, pat gui calaboso, ya ti insetbejao?\n25:45 Ayo nae ujaope sija, ileg\u00f1a: Magajet jusangane jamyo, na taemanoja ti infatinas nu uno g\u00fcine gui mas mandiquique, ti infatinas nu guajo.\n25:46 Ya esta sija manmapos para y taejinecog na minasapet; lao y manunas para y taejinecog na linala.\n26:1 YA susede anae munjayan si Jesus jasangan este sija na sinangan, ileg\u00f1a ni disipulu\u00f1a sija;\n26:2 Intingo na dos na jaane talo umafatinas y guipot; ya y Lajin taotao umaentrega para umatane gui quiluus.\n26:3 Ayo nae y prinsipen y mamale sija, yan y manbijo na taotao sija, manda\u00f1a gui palasyon y magas na pale, y naan\u00f1a si Caefas:\n26:4 Ya manaconseja entresija para ujacone si Jesus pot dinague, ya ujapuno.\n26:5 Lao ileg\u00f1ija: Munga gui jaanin y guipot, sa munga na umafatinas yinaoyao gui taotao sija.\n26:6 Ya anae estaba si Jesus guiya Betania, gui guima Simon y ategtog,\n26:7 Mato guiya g\u00fciya un palaoan, na guaja un boteya alabastron ung\u00fcento na dangculo bali\u00f1a, ya jachuda gui jilo ilu\u00f1a, anae estaba gui lamasa na matatachong:\n26:8 Lao anae malie ni disipulu\u00f1a sija, ninafanlalalo, ya ileg\u00f1ija: Jafa na jagagasta este?\n26:9 Sa este na ung\u00fcento si\u00f1a mabende pot dangculo na presio, ya ufanmanae y mamoble.\n26:10 Anae jatungo si Jesus, ileg\u00f1a nu sija: Jafa na innachatsaga y palaoan? sa jafatinas mauleg na chocho para guajo.\n26:11 Sa jamyo guaja siempre mamoble manjajamyo, lao guajo, siempre taya.\n26:12 Sa jachuda este na ung\u00fcento gui tataotaojo, jafatinas para majafotjo.\n26:13 Magajet jusangane jamyo: Mano nae este na ebangelio na umapredica gui todo y tano, uguajaja locue este y finatinas\u00f1a este na palaoan, masangan para memorias\u00f1a.\n26:14 \u00b6 Ayo nae y uno gui dose, y naan\u00f1a si Judas Iscariote, mapos malag y prinsipen y mamale sija,\n26:15 Ya ileg\u00f1a: Jafa malagomiyo innaeyo, ya juentrega jamyo nu g\u00fciya? Ya manmapesa para g\u00fciya treinta pidason salape.\n26:16 Ya desde ayo, manmanaliligao lugat para umaentrega g\u00fce.\n26:17 \u00b6 Ya y finenana na jaanin gupot pan sin lebadura, manmato y disipulo gui as Jesus, ya ileg\u00f1ija: Mano nae malagojao ya infamaulequejao namo gui guipot?\n26:18 Ya ileg\u00f1a: Janao fanmalag y siuda, gui guima ayo na taotao, y insangane: Y Maestro ileg\u00f1a, y tiempoco esta jijot, iyajamyo nae jufatinas y guipot Pascua yan y disipulojo sija.\n26:19 Ya y disipulo sija jafatinas y mantinago as Jesus, ya manalisto y guipot pascua.\n26:20 Ya anae pupuenge g\u00fcije na jaane, matachong gui lamasa yan y dose na disipulo;\n26:21 Ya anae ma\u00f1ochocho g\u00fciya ileg\u00f1a: Magajet jusangane jamyo, na uno guiya jamyo uentregayo.\n26:22 Sija ninafangostriste, ya sigue di ileg\u00f1ija cada uno nu g\u00fciya: Buente guajo, Se\u00f1ot?\n26:23 Ayo nae manope ileg\u00f1a: Y munajalom y canae\u00f1a yan guajo gui plato, g\u00fciya uentregayo.\n26:24 Magajet na y Lajin taotao ujanao, calang y esta matugue nu g\u00fciya; lao ay ay para ayo na taotao ni y jaentrega y Lajin taotao! mauleg\u00f1a mojon ayo na taotao na ti umafa\u00f1ago.\n26:25 Ayo nae manope si Judas, ni umentrega g\u00fce, ileg\u00f1a: Guajo buente Rabi? Yleg\u00f1a nu g\u00fciya: Jago guinin sumangan.\n26:26 \u00b6 Ya mientras ma\u00f1ochocho, jachule si Jesus y pan, ya jabendise, ya jaipe, ya janae y disipolu\u00f1a sija, ya ileg\u00f1a: Chule, ya cano; este y tataotaojo.\n26:27 Jachule y copa, ya janae si Yuus grasias, ya janae sija ni y copa, ileg\u00f1a: Fanguimen jamyo todo.\n26:28 Sa este y j\u00e2g\u00e2jo gui Nuevo Testamento, ni y machuda para megae, para inasiin y isao.\n26:29 Ya jusangane jamyo, na desde pago ti juguimen mas y tinegcha ubas, asta ayo na jaane anae para juguimen nuebo yan jamyo gui raenon Tata.\n26:30 \u00b6 Ya anae munjayan jacanta un himno, manmapos para sabana Olibo,\n26:31 Ayo nae si Jesus ileg\u00f1a nu sija: Todos jamyo ufanma\u00f1oda guiya guajo ocasion inale pago na puenge; sa matugue esta: Junafa\u00f1etnot y pastot, ya y quinilo sija manmachalapon gui manada.\n26:32 Lao despues di unacajuloyo talo gui entalo manmatae, jujanao gui menanmiyo guiyo Galilea.\n26:33 Si Pedro manope, ileg\u00f1a nu g\u00fciya: Yaguin todos ufanma\u00f1oda guiya jago ocasion inale lao guajo ti jusoda para siempre ocasion inale.\n26:34 Si Jesus, ileg\u00f1a: Magajet jusanganejao: na pago na puenge, antes di ucanta y gayo, undagueyo tres biaje.\n26:35 Yleg\u00f1a nu guiya si Pedro: Achogaja junesesita matae yan jago, lao ti judaguejao. Yan todo y palo disipulo sija, taeg\u00fcenaoja ileg\u00f1ija locue.\n26:36 Ayo nae mato si Jesus yan sija gui g\u00fcetta na mafanaan Gethsemane, ya ileg\u00f1a ni disipulu\u00f1a sija: Fanmatachong g\u00fcine, ya jumanaoyo ya j ufanaetae g\u00fcije guato.\n26:37 Ya jacone gachong\u00f1a si Pedro yan y dos lajin Sebedeo, ya jatutujon mantriste yan manmajalang.\n26:38 Ayo nae si Jesus ileg\u00f1a nu sija: Y antijo gostriste asta qui matae: fa\u00f1aga g\u00fcine, ya infanbela yan guajo.\n26:39 Ya mamocat mona didide, tumecon ya manaetae, ileg\u00f1a: Tatajo, yaguin si\u00f1a, nafalofan este na copa guiya guajo: lao ti seg\u00fan y minalagojo, na seg\u00fan y minalagomo.\n26:40 Ya mato gui disipulu\u00f1a sija, ya jasoda sija na manmamaego: ya ileg\u00f1a as Pedro: Jafa, ada ti si\u00f1a jamyo infanbela yan guajo una ora?\n26:41 Fanbela ya infanmanaetae, para chamiyo fanjajalom gui tentasion: y espiritu magajet na malago lao y catne echecho.\n26:42 Mapos talo gui segundo biaje ya manaetae, ileg\u00f1a: Tatajo, yaguin ti si\u00f1a este na copa malofan guiya guajo, yaguin ti juguimen, ufatinas y minalagomo.\n26:43 Ya mato, ya jasoda talo sija na manmamaego; sa y atadog\u00f1ija manmacat.\n26:44 Ya jadingo sija, mapos talo ya manaetae gui mina tres biaje, jasangan ayoja na sinangan.\n26:45 Ayo nae mato gui disipulu\u00f1a sija, ya ileg\u00f1a: Infanmamaegoja, pago, yan infandescacansaja; estag\u00fce na mato y ora, ya y Lajin taotao esta maentrega gui canae y manisao sija.\n26:46 Fangajulo na nije tafanjanao; estag\u00fce esta mato y umentregayo.\n26:47 \u00b6 Ya y tiempoja anae cumuecuentos g\u00fce, estag\u00fce si Judas, uno gui dose, mato ma\u00f1isija yan un dangculon linajyan taotao, manma\u00f1u\u00f1ule espada yan galute, tinago y prinsipen y mamale sija yan y manamco na taotao sija.\n26:48 Yan umentrega g\u00fce, mannae esta se\u00f1at, ileg\u00f1a: Y juchico, g\u00fciya; guesguot.\n26:49 Ya enseguidas matog\u00fce gui as Jesus, ya ileg\u00f1a nu g\u00fciya: Minagof, Maestro! ya jachico.\n26:50 Ya si Jesus, ileg\u00f1a nu g\u00fciya: Amigo, jafajao na mato? Ayo nae manmato sija ya maguot si Jesus, ya macone.\n26:51 Ya, estag\u00fce, uno gui mangachong si Jesus, jajuto y canae\u00f1a, ya jalagnos y espada\u00f1a, y janalamen uno gui tentago y prinsipen y mamale sija, janajanao un talanga.\n26:52 Ayo nae si Jesus ileg\u00f1a nu g\u00fciya: Natalo guato y espadamo gui saga\u00f1a; sa todo y manma\u00f1u\u00f1ule espada, nu y espadaja ufanpinino.\n26:53 Ada jinasomo na ti si\u00f1ayo jutayuyut si Tata pago, ya g\u00fciya unaeyo enseguidas mas di dose legion na angjet sija?\n26:54 Lao jaftaemano macumple y Tinigue sija; sa matugue na taeg\u00fcenao nesesita umafatinas este?\n26:55 Ayo na ora ileg\u00f1a si Jesus ni linajyan taotao: Manmato jamyo parejo yan contra y saque, na manma\u00f1u\u00f1ule jamyo espada yan galute para inqueneyo? Cada jaane manjijitaja guajo matachong gui templo, mamnanag\u00fce nu jamyo, ya ti inqueneyo.\n26:56 Lao todo este umafatinas, para umacumple y Tinigue sija ni y profeta sija. Ayo nae todo y disipulu\u00f1a sija madingo g\u00fce, ya manmalago.\n26:57 \u00b6 Ya ayo sija y cumone si Jesus, macone g\u00fce guato gui as Caefas, magas na pale, anae manestaba y escriba sija yan y manamco na mandada\u00f1a.\n26:58 Lao si Pedro, dinalalag g\u00fce chago asta qui mato gui colat y magas na pale; ya jumalom ya manmatachong yan y tentago sija, para ulie y uttimo.\n26:59 Ya y prinsipen y mamale sija yan todo y inetnon ofisiat, manmanaliligao ni ti magajet na testimonio contra si Jesus, para umapuno.\n26:60 Lao ni uno ma\u00f1oda; achogja mato megae na ti manmagajet na testigo. Lao y uttimo manmato dos,\n26:61 Na ileg\u00f1ija, Este na taotao ileg\u00f1a: Guajo si\u00f1a juyulang papa este na gumayuus, ya junacajulo gui tres na jaane.\n26:62 Ya cajulo y magas y mamale, ya ileg\u00f1a nu g\u00fciya: Ti unfanope ni jafa? Jafa este na testimonio contra jago?\n26:63 Lao si Jesus mamatquiloja. Ya y magas y mamale ileg\u00f1a nu g\u00fciya: Jutayuyutjao pot y lal\u00e2l\u00e2 na Yuus, na unsanganejam cao jago si Cristo, Lajin Yuus.\n26:64 Si Jesus ileg\u00f1a nu g\u00fciya: Jago guinin sumangan. Ya jusangane jamyo na desde pago inlie y Lajin taotao na matatachong gui agapa y ugaeninasi\u00f1a na canae, ya umamaela gui jalom y mapagajes sija gui langet.\n26:65 Ayo nae y magas y mamale, jatiteg y magagu\u00f1a, ya ileg\u00f1a: Cumuentos chatfino contra si Yuus: jafa mas na utanesesita testigo sija? Estag\u00fce esta pago na injingog y chinatfino contra si Yuus.\n26:66 Jafa pinelonmimiyo? Sija manmanope ileg\u00f1ija: Jamerese y finatae.\n26:67 Ayo nae matolae y mata\u00f1a yan patmada g\u00fce; ya y palo manafa\u00f1etnot nu y dinemo;\n26:68 Ya ileg\u00f1ija: Profetisayejam, O Cristo! jayejao munafa\u00f1etnot?\n26:69 \u00b6 Ya ayo na tiempo si Pedro estaba matatachong gui sumanjiyong gui guelat; ya mato guija g\u00fciya un palaoan tentago, ya ileg\u00f1a: Manjajamjo locue yan si Jesus y Galileo.\n26:70 Lao g\u00fciya jadague gui menan todos, ileg\u00f1a: Ti jutungo jafa ilelegmo.\n26:71 Ya anae jumuyong gui petta; linie ni otro palaoan, ya ileg\u00f1a ni ayo y manestaba g\u00fcije: Este locue ma\u00f1isija yan si Jesus Nasareno.\n26:72 Ya jadague talo ya manjula ileg\u00f1a: Ti jutungo ayo na taotao.\n26:73 Ti apmam despues manmato sija y mangaegue g\u00fcije, ya ileg\u00f1ija as Pedro: Magajet na jago locue uno guiya sija; sa y sinanganmo dumiclalara jao.\n26:74 Ayo nae jatutujon mumatdise, yan manjula, ileg\u00f1a: Ti jutungo ayo na taotao. Ya enseguidas cumanta y gayo.\n26:75 Ya jajaso si Pedro y sinangan Jesus ni ileg\u00f1a: Antes di ucanta y gayo, undagueyo tres biaje. Ya mapos juyong ya gueftumanges.\n27:1 YA mato y egaan, todo y prinsipen y mamale, yan y manamco na taotao sija, manda\u00f1a y manaconseja entre sija contra si Jesus, para umapuno g\u00fce.\n27:2 Ya anae munjayan magode g\u00fce, macone ya maentrega gui as Ponsio Pilato y magalaje.\n27:3 \u00b6 Ayo nae si Judas, y umentrega g\u00fce, jalie na esta umayogua, ya ma\u00f1otsot ya jachule talo guato y treinta pidason salape gui prinsipen y mamale yan y manamco na taotao sija,\n27:4 Ya ileg\u00f1a: Guajo isaoyo, juentrega y taeisao na j\u00e2g\u00e2. Lao sija ileg\u00f1ija: Jafa ayo guiyajame? Jagoja adaje.\n27:5 Ya jayute y pidason salape jalom gui jalom y templo, ya mapos ya ja\u00f1aca g\u00fce.\n27:6 Ya y prinsipen y mamale sija, jachule y salape ya ileg\u00f1ija: Ti tunas na tapolo gui tesoro sa bali\u00f1a y j\u00e2g\u00e2.\n27:7 Ya manaconseja entre sija, ya mafajan y fangualuan oyero, para y naftan y taotaojuyong.\n27:8 Ayo mina mafanaan ayo na fangualuan: Fangualuan j\u00e2g\u00e2, asta pago na jaane.\n27:9 Ayo nae macumple y sinangan na pot y profeta Jeremias, ni ileg\u00f1a: Ya sija jachule y treinta pidason salape, presio ayo y gaebale, y presio na mapolo gui jilo\u00f1a y famaguon Israel;\n27:10 Ya manmanae sija, para ujafajan y fangualuan y oyero taeg\u00fcenao, na jatagoyo y Se\u00f1ot.\n27:11 \u00b6 Ya si Jesus estaba tomotojgue gui menan y magalaje, ya y magalaje finaesen g\u00fce, ileg\u00f1a: Jago y Ray Judio sija? Si Jesus ileg\u00f1a: Jago umalog.\n27:12 Ya anae mafaaela ni y prinsipen y mamale, yan y manamco sija, ti manope ni jafa.\n27:13 Ayo nae si Pilato ileg\u00f1a nu g\u00fciya: Ti unjujungog cuanto na g\u00fcinaja nae manmadeclara contra jago?\n27:14 Ya ti manope ni un sinangan; ya ninagosmanman y magalaje.\n27:15 Ya y jaanin y guipot, costumbre\u00f1a y magalaje na usotta pot y taotao sija un preso, jaye y malago\u00f1ija.\n27:16 Ya guaja preso\u00f1ija uno na afamao, na y naan\u00f1a si Barabas.\n27:17 Ya anae manda\u00f1a ileg\u00f1a si Pilato nu sija: Jaye malagonmiyo jusottaye jamyo? Si Barabas pat si Jesus, ni mafanaan Cristo?\n27:18 Sa jatungoja na pot embidia\u00f1ija muna maentrega g\u00fce.\n27:19 \u00b6 Ya anae estaba g\u00fce na matatachong gui tribuna, y asagua\u00f1a manago nu g\u00fciya, ileg\u00f1a: Chamo umeentalo nu enao tunas na taotao; sa pago jupadedese megae sija gui g\u00fcinife pot g\u00fciya.\n27:20 Lao y prisipen y mamale sija, yan y manamco sija jasoyo y taotao sija, na ujagagao si Barabas, ya si Jesus, umapuno.\n27:21 Ya y magalaje manope, ileg\u00f1a nu sija: Jaye gui dos malagonmiyo jusottaye jamyo? Sija ileg\u00f1ija: Si Barabas.\n27:22 Si Pilato ileg\u00f1a nu sija: Ya jafa jufatinas as Jesus ni mafanaan Cristo? Todos sija ileg\u00f1ija: Umatane gui quiluus.\n27:23 Ya ileg\u00f1a: Jafa na taelaye finatinas\u00f1a? Lao sija managang mas duro, ileg\u00f1ija: Umatane gui quiluus.\n27:24 \u00b6 Anae jalie si Pilato na taya jafa na probecho, lao mas y ninafanyaoyao, ma\u00f1ule janom ya jafagase y canae\u00f1a gui menan y taotao sija, ya ileg\u00f1a: Taeisaoyo gui j\u00e2g\u00e2 este y tunas na taotao: lie jamyo.\n27:25 Ya manmanope todo y taotao sija ileg\u00f1ija: Y j\u00e2g\u00e2\u00f1a usaga guiya jame, yan y famaguonmame.\n27:26 Ayo nae masotta si Barabas, ya an munjayan mapanag si Jesus, maentrega para umaatane gui quiluus.\n27:27 Ayo nae y sendalon y magalaje macone si Jesus gui pretorio, ya manda\u00f1a guiya g\u00fciya todo y manadan sendalo sija.\n27:28 Ya mapula y magagu\u00f1a, ya manaminagago agaga na magagon anaco.\n27:29 Ya mapolo gui ilu\u00f1a un corona na mafatinas ni t\u00edtuca sija, yan un piao gui agapa na canae\u00f1a; ya mandimo gui mena\u00f1a, ya mamofefea, ileg\u00f1ija: Jafa talatmanu jao Ray Judio sija!\n27:30 Ya matolae g\u00fce, ya machule y piao ya mapanag y ilu\u00f1a.\n27:31 Ya anae munjayan mamofefea, mapula y magagon anaco, ya manaminagago ni magagu\u00f1a, ya macone para umaatane gui quiluus.\n27:32 \u00b6 Ya anae jumajanao manasoda yan un taotao Sirene na y naan\u00f1a si Simon: este maobliga para uchinilie ni quiluus\u00f1a.\n27:33 \u00b6 Ya anae manmato gui un lugat na mafanaan Golgota, cumequeileg\u00f1a, y sagan calabera,\n27:34 Mannae para uguimen binagle, manada\u00f1a yan lalaet; ya anae jachague, ti malago jaguimen.\n27:35 Anae munjayan maatane gui quiluus, mandesapatta y magagu\u00f1a, mayute suette sija gui jilo\u00f1a; (para umacumple y mumayan masangan pot y profeta: Ujanaadesapatta y magagujo, ya y jilo y magagujo ufanmayute suette sija.)\n27:36 Ya manmatachong, ya maadadaje g\u00fce g\u00fcije.\n27:37 Ya mapolo gui ilu\u00f1a y mafaela\u00f1a, matugue: ESTE SI JESUS RAY Y JUDIO SIJA.\n27:38 Ayo nae maatane yan g\u00fciya gui quiluus yan y dos na saque; y uno gui agapa\u00f1a ya y otro gui acag\u00fce\u00f1a.\n27:39 \u00b6 Ya y taotao na manmalolofan, masangane g\u00fce innataelaye, ya jayeyengyong y ilu\u00f1ija,\n27:40 Ya ileg\u00f1ija: Jago y yumute papa y templo, ya y mina tres na jaane unnacajulo; libre maesajao; yaguin jago Lajin Yuus, tunog papa g\u00fcenao gui quiluus.\n27:41 Taeg\u00fcinija locue mamofefea g\u00fce y prisipen mamale sija, yan y escriba sija, yan y Fariseo sija, yan y manamco na taotao sija, ileg\u00f1ija:\n27:42 Janalibre y palo, ya ti si\u00f1ag\u00fce janalibre na maesa. G\u00fciya y Ray y Israel; polo ya utunog papa pago gui quiluus, ya ayo nae utajonggue g\u00fce.\n27:43 Jaangoco si Yuus; polo ya ulinibre pago, yaguin malago nu g\u00fciya, sa ileg\u00f1a: G\u00fcajo Lajin Yuus.\n27:44 Y ma\u00f1aque locue, ni y manmaatane yan g\u00fciya gui quiluus, manajuyonge g\u00fce locue.\n27:45 \u00b6 Ya desde y mina saes na ora guaja jinemjom todo y jilo y tano, asta y mina nuebe na ora.\n27:46 Ya y mina nuebe na ora, si Jesus umagang nu y dangculon inagang ileg\u00f1a: Eli, Eli, lama sabactani! cumequeileg\u00f1a: Yuusso, Yuusso, jafa na undingo yo?\n27:47 Ya y palo ni manestaba g\u00fcije, majungog g\u00fce, ya ileg\u00f1ija: Si Elias este jaaagang.\n27:48 Ya enseguidas malago uno guiya sija, ya jachule y espongja y janafa\u00f1opchop binagle, ya japolo gui un piao, ya janae g\u00fce para uguimen.\n27:49 Y palo ileg\u00f1ija: Polo ya talie cao ufato si Elias ya uninalibre.\n27:50 \u00b6 Ayo nae si Jesus, anae munjayan umagang talo otro biaje nu y dangculon inagang jaentrega y espiritu.\n27:51 Ya estag\u00fce y cottinan y templo na masise y dos pedaso, guinin sumanjilo asta y sumanpapa; ya y tano mayengyong, ya y acho sija mangoca.\n27:52 Ya y naftan sija manmababa ya megae na tataotao ma\u00f1antos sija ni manmamaego, mangajulo;\n27:53 Ya jumanao gui naftan, despues di quinajilo\u00f1a, ya mato gui santos na siuda, ya manalie ya megae.\n27:54 Ya y senturion, yan y mangaegue yan g\u00fciya na maadadaje si Jesus, anae malie y linao yan todo ayo sija y manmafatinas, mangosmaa\u00f1ao ya ileg\u00f1ija: Sumen magajet na Lajin Yuus este.\n27:55 Ya mangaegue g\u00fcije megae na famalaoan na manmanaatan gui chago, ni jadalalag si Jesus guine Galilea ya jasesetbe.\n27:56 Gui entalo ayo sija si Maria Magdalena, yan si Maria nanan Santiago yan Jos\u00e9, yan y nanan y famaguon Sebedeo.\n27:57 \u00b6 Ya anae este pupuenge g\u00fcije na jaane, mato un taotao Arimatea, na rico, na y naan\u00f1a si Jos\u00e9, na g\u00fciya locue disipulon Jesus.\n27:58 G\u00fciya mato gui as Pilato, ya jagagao y tataotao Jesus. Ayo nae si Pilato manago na umanae.\n27:59 Ya jachule si Jos\u00e9 y tataotao, ya jabalutan ni un sabanas na gasgas,\n27:60 Ya japolo gui nuebo na naftan\u00f1a, ni y finatinas\u00f1aja gui acho ni sacapico; ya janagalileque guato un dangculon acho y pettan y naftan, ya mapos.\n27:61 \u00b6 Ya manestaba g\u00fcije si Maria Magdalena, yan y otro Maria, na manmatatachong gui menan y naftan.\n27:62 \u00b6 Ya y inagpa\u00f1a na jaane, despues di y jaanen finamauleg, manda\u00f1a y prinsipen y mamale sija, yan y Fariseo sija gui as Pilato,\n27:63 Ya ileg\u00f1ija: Se\u00f1ot, injaso na ayo y dacon ileg\u00f1a, anae estaba lal\u00e2l\u00e2: Despues di tres na jaane, jucajulo talo.\n27:64 Enao mina fanago, ya umaasegura y naftan, asta y mina tres na jaane; sa noseaja ufanmato y disipulo sija an puenge ya ujasaque; ya ujaalog ni taotao sija: Cajulo esta gui entalo manmatae: ya y uttimo na linache udangculo\u00f1a qui y finenana.\n27:65 Ileg\u00f1a si Pilato nu sija: Inguaja un guatdianmiyo; janao, ya inasegura todo manu y ninasi\u00f1anmiyo.\n27:66 Ayo nae manmapos sija, ya maadaje y naftan para umaasegura, ya maseyo y acho.\n28:1 YUTTIMO na ora y sabalo, gui egaan anae muman\u00e1nan\u00e1 y fin\u00e9nana na jaane gui semana, mato si Maria Magdalena yan y otro Maria, para ujalie y naftan.\n28:2 Ya, estag\u00fce un dangculon linao; sa y angjet y Se\u00f1ot tumunog guine y langet, ya janagalileg y acho gui petta, ya matachong gui sumanjilo.\n28:3 Ya y jechura\u00f1a parejo yan y lamlam, ya y magagu\u00f1a apaca calang niebe.\n28:4 Ya pot y minaa\u00f1ao nu g\u00fciya, y guatdia sija mayengyong ya sumaga calang manmatae.\n28:5 Ya manope y angjet, ileg\u00f1a ni famalaoan sija: Chamiyo fanmaaa\u00f1ao jamyo; sa jutungoja na inaliligao si Jesus, ni guinin maatane gui quiluus.\n28:6 Taeg\u00fce g\u00fcine; sa esta cajulo, taeg\u00fcine guinin jasangan. Maela ya inlie y lugat anae guinin umaason y Se\u00f1ot;\n28:7 Ya janao fanlagoguse, ya sangane y disipulu\u00f1a sija, na esta cajulo gui entalo y manmatae, ya infanninanangga Galilea: ya ayo nae inlie g\u00fce; estag\u00fce, na esta jusangane jamyo.\n28:8 Ayo nae sija manapos gui naftan, manmaa\u00f1ao yan mangosmagof, yan manmalalago para umannae notisia y disipulu\u00f1a sija.\n28:9 \u00b6 Ya estag\u00fce si Jesus na manasoda ya ileg\u00f1a nu sija: Fanmagof todos! Ya sija manmato, ya manmagote y adeng\u00f1a ya maadora g\u00fce.\n28:10 Ayo nae si Jesus ileg\u00f1a nu sija: Chamiyo fanmaa\u00f1ao; janao ya sangane ma\u00f1elujo na ufanjanao para Galilea; ya ayo nae ujaliiyo g\u00fcije.\n28:11 \u00b6 Anae manmapos sija, estag\u00fce palo gui guatdia sija na manmato gui siuda, ya janatungo y prinsipen y mamale sija, todo y munjayan manmafatinas.\n28:12 Ya anae manda\u00f1a yan y manamco na taotao ya manaconseja entre sija, mannae y sendalo sija megae na salape,\n28:13 Ya ileg\u00f1ija: Alog, y disipulu\u00f1a sija manmato gui anae puenge, ya masaque g\u00fce, anae manmamaegojam.\n28:14 Yaguin jaecungog este y magalaje, jame innamalago g\u00fce ya infanseguro.\n28:15 Ayo nae sija jachule y salape ya jafatinas jafa y manmafanag\u00fce sija: ya esta na sinangan mapublilica ni Judio sija asta pago na jaane.\n28:16 \u00b6 Ya y onse na disipulo sija manmapos para Galilea, gui un ogso anae guinin mantinago as Jesus.\n28:17 Ya anae malie, maadorag\u00fce; lao y palo buebuente.\n28:18 \u00b6 Ya mato guiya sija si Jesus ya jasangane sija, ileg\u00f1a: Todo y ninasi\u00f1a manaeyo, gui langet yan y tano.\n28:19 Fanjanao, ya fannaquilisyano todo y nasion sija, tagpange sija pot y naan y Tata, yan y Laji\u00f1a, yan y Espiritu Santo:\n28:20 Fanag\u00fce sija, na ujaadaje todosija ni jutago jamyo; sa estag\u00fce jugagaegueja guiya jamyo todo y jaane, asta y jinecog y tano. Amen.","title":"Chamorro Bible (partial): Matthew","type":"page"}