{"collection":"Bible & Christianity","html_url":"https://unchartedknowledge.5gfusion.net/browse/bib/wb/cmr/psa.htm","path":"bib/wb/cmr/psa.htm","source_url":"https://sacred-texts.com/bib/wb/cmr/psa.htm","text":"1:1 DICHOSO y taotao, ni ti mamomocat gui pinagat y manaelaye, ni y ti sumasaga gui chalan manisao, ni y ti matatachong gui siyan ayo sija y manmanmofefea.\n1:2 Lao guiya lay Jeova, ayo y minagof\u00f1a, ya y lay\u00f1a jajaso, jaane yan puenge.\n1:3 Ya taeg\u00fcijeja y trongcon jayo ni y matanme gui oriyan sadog, ya guaja tinegcha\u00f1a gui tiempo\u00f1a, ya y jagon\u00f1a ti umalayo; ya todo y finatinas\u00f1a mumemegae.\n1:4 Lao ti taeg\u00fcine y manaelaye; lao parejo yan y paja ni y g\u00fcinaefe ni y manglo.\n1:5 Sa enao na ti mangajujulo y manaelaye gui sentensia; ni y manisao gui y inetnon manunas.\n1:6 Sa si Jeova jatungo y chalan manunas: lao y chalan manaelaye ufanmalingo.\n2:1 SA jafa na manlalalo y nasion sija, ya y taotao sija manmanjaso y banida?\n2:2 Manotojgue y ray sija gui tano, ya y prinsipe sija manafaesen entalo sija contra si Jeova, yan contra y pinalae\u00f1a, ileg\u00f1ija:\n2:3 Nita yulang y guinide\u00f1a, ya nasuja guiya jita y gode\u00f1a.\n2:4 Ya y sumasaga gui langet uchumachaleg: ya y Se\u00f1ot jamofefea sija.\n2:5 Ayo nae cumuentos yan sija yan y linalalo\u00f1a: ya y binibu\u00f1a ninafa\u00f1atsaga sija.\n2:6 Lao guajo japolo y rayjo gui jilo Sion, gui santos na egsojo.\n2:7 Guajo bae jusangan y tinagojo: si Jeova ileg\u00f1a nu guajo: Lajijo jao; ya guajo julilis jao pago na jaane.\n2:8 Gagaoyo ya guajo junaejao ni y nasion sija pot y erensiamo ya y uttimon patte y tano, uiyomo.\n2:9 Ya unyulang sija ni y baran lulog; taeg\u00fcije y bason y yero unyogyog sija.\n2:10 Ya pago, tingo, O ray sija: resibe finanag\u00fce, jamyo man jues gui tano.\n2:11 Setbe si Jeova ni y minaa\u00f1ao, yan fanmagof ni minayengyong.\n2:12 Chico y laje, no sea ulal\u00e1lalo, ya unfanmalingo jamyo gui chalan, sa gusisija y linalalo\u00f1a sinenggue. Mandichoso todos y umangoco sija guiya g\u00fciya.\n3:1 JEOVA, jafa muna manlajyan y enimigujo! Megae mangajulo contra guajo.\n3:2 Megae umaalog ni y antijo: Taya inayuda para g\u00fciya, gui as Yuus. Sila.\n3:3 Lao jago, O Jeova, jago y patang gui oriyajo; y minalagjo yan ayo ni y janacajulo y ilujo.\n3:4 Ya y inagangjo juagang si Jeova, ya g\u00fciyaja umopeyo gui santos na ogso\u00f1a. Sila.\n3:5 Bae juason ya maegoyo; ya magmatayo; sa si Jeova gumuguutyo.\n3:6 Ti maa\u00f1aoyo nu y dies mit na taotao, ni y mapolo sija gui oriyajo contra guajo.\n3:7 Cajulo, O Jeova; nalibre yo, O Yuusso: sa jago manalamen todo y enimigujo ni y guijadas; y nifen y manaelaye unyamag.\n3:8 Gui as Jeova nae gaegue y satbasion: ya y taotaomo nae gaegue y bendisonmo. Sila.\n4:1 ANAE juagangjao, opeyo, O Yuus y tininasso: anae chatsagayo jago munadangculoyo: maase nu guajo ya jungog y tinaetaejo.\n4:2 Jamyo, famaguon taotao, asta \u00f1gaean nae innanalo y onraco gui minamajlao? Asta \u00f1gaean yanmiyo y banida ya inaliligao y dinague? Sila.\n4:3 Tingoja, na si Jeova japolo apatte y deboto para g\u00fciya namaesa: si Jeova jajungog yo, anae juagang g\u00fce.\n4:4 Fangalamten ya chatmiyo faniisao: fanmanjaso nu y corasonmiyo gui jilo camanmiyo, ya famacaca. Sila.\n4:5 Nae y tunas na inefresen ya angoco si Jeova.\n4:6 Megae umaalog: Jaye ufanuejit jafa minauleg? Jatsa gui jilonmame, O Jeova, y minalag y matamo.\n4:7 Jago numae minagof y corasonjo, megae\u00f1a qui uguaja sija anae umemegae y maeis\u00f1ija yan y bino\u00f1ija.\n4:8 Ya y pas nae umason yo ya taeg\u00fcijeja maegoyo: sa jagoja Jeova, unnasagayo seguro.\n5:1 JUNGOG, O Jeova, y sinanganjo, ecungog y jinasoco.\n5:2 Ecungog y vos y inagangjo, Ray jo, yan Yuusso: sa jago jutaetaetaye.\n5:3 O Jeova, y egaan unjungog y vosso; y egaan juguaguato y tinaetaejo guiya jago, ya jub\u00e9bela.\n5:4 Sa ti jago na Yuus ni y gumaeya y tinaelaye: y taelaye ti usaga guiya jago.\n5:5 Ti manasaga y mangaduco gui menan matamo: ya ti yamo todo y fumatitinas y taelaye.\n5:6 Jago yumulang y manguecuentos mandague: ya y taotao caj\u00e2g\u00e2 yan y dinague, si Jeova jaguefchatlie.\n5:7 Ya guajoja, yan y megagae y minaasemo, bae jalom gui guimamo: ya juadora anae juatan y santo templomo ni y ninamaa\u00f1aomo.\n5:8 O Jeova, esgaejonyo gui tininasmo, pot causa ya enimigujo; natunas gui menajo y chalanmo.\n5:9 Sa taya finitme gui pachot\u00f1ija; ya sanjalom\u00f1ija senmanaelaye: naftan mababa y agaga\u00f1ija; yan y jila\u00f1ija finande:\n5:10 Condena sija, O Yuus, polo y ufamodong pot y pinagat\u00f1ija: gui minegae y isao\u00f1ija nasuja sija sa managuaguat contra jago.\n5:11 Nafanmagof todos y umangngocojao, polo para taejinecog ya ufanagang pot y minagof\u00f1ija sa undefiende sija, polo ya ufanmagof ni jago, y gumaeya y naanmo.\n5:12 Sa jago bumendise y manunas; O Jeova, parejoja yan un patang unpolo gui oriya\u00f1a y finaborese.\n6:1 JEOVA chamoyo lumalalatde ni y binibumo: chamoyo cumastitiga nu y dangculo na linalalomo.\n6:2 Gaease nu guajo, O Jeova, sa estag\u00fce yo namasogsog: amte yo, O Jeova, sa y tolangjo esta mananatchatsaga.\n6:3 Ya y antijo esta senchatsaga: Ya jago, O Jeova, asta ngaean?\n6:4 Nanalo, O Jeova, nalibre y antijo: satbayo pot causa y minaasemo.\n6:5 Sa y finatae nae taya jinaso guiya jago: ya y naftan nae jaye numannae jao grasias?\n6:6 Yayasyo nu y todo y siningonjo: todo y puenge junamamaya y camajo ni lagojo: junafotgon y catreco nu y lagojo.\n6:7 Y atadogjo esta magasta nu y pinite: ninafanbijo pot todo ayo y munachachatsaga yo.\n6:8 Nafanjanao guiya guajo todo ayo y fumatitinas y taelaye: sa si Jeova jajungog y vos y casaojo.\n6:9 Si Jeova jajungog y guinagaojo: si Jeova uresibe y tinaetaejo.\n6:10 Manmamajlao ya ninafa\u00f1atsaga megae, todo y enimigujo: sija manalo, sija manmamajlao gusise.\n7:1 O Jeova, Yuusso, yya jago nae gaegue y inangococo: Satbayo todo gui pumetsisigue yo, ya nalibre yo.\n7:2 Para cha\u00f1a pumedasitos y antijo taeg\u00fcije y leon, ni jayulang, anae taya jaye uninalibre.\n7:3 O Jeova, Yuusso, yaguin jufatinas este: yaguin guaja gui canaejo taelaye;\n7:4 Yan juapase taelaye y sumaga guiya guajo yan pas, (magajet na junalibre y pumetsisigue yo pot taya causa:)\n7:5 Japetsisigue y enimigujo y antijo, ya jachule; magajet, na jagacha gui tano y jaanijo: ya y onraco japolo gui eda. Sila.\n7:6 Cajulo, O Jeova, yan y linalalomo; jatsa namaesa contra y binibon y munachachatsagayo: ya magmata pot guajo untago y sentensia.\n7:7 Polo ya y inetnon taotao unineriyaye jao: ya gui san jilo\u00f1ija natalo jao guato gui san jilo.\n7:8 Si Jeova jajusga y taotao: jusgayo, O Jeova, taemanoja y tininasso: taemanoja y minaulegmo ni y gaegue guiya guajo.\n7:9 Polo ya ujocog y taelayen manaelaye, lao nafitme y manunas: sa si Yuus, ni tinas, jachachague y corason yan y jinaso gui sanjalom.\n7:10 Y patangjo gaegue gui as Yuus, g\u00fciya munalibre y manunas gui corason.\n7:11 Si Yuus y tinas na jues: magajet na si Yuus lalalalo todo na jaane.\n7:12 Yaguin y taotao ti jabira g\u00fce, g\u00fciya janamalagtos y espada\u00f1a: janaregla y atcos\u00f1a ya janalisto.\n7:13 Ya jafatinas para g\u00fciya y atmas y finatae: janafa\u00f1ila y flecha\u00f1a.\n7:14 Estag\u00fce na uguaja piniten ma\u00f1ago tinaelaye: magajet na mapotgue y inacacha ya ma\u00f1ago dinague.\n7:15 Jaguadog y tipo, ya janatadong: ya esta podong gui joyo na y finatinas\u00f1aja.\n7:16 Polo ya y inacacha\u00f1a ubira g\u00fci jilo y ilu\u00f1a: ya y binibu\u00f1a upodong gui jilo c\u00e1cagong\u00f1a.\n7:17 Bae junae si Jeova gracias taemanoja y tininas\u00f1a: ya jucantaye ni y tinina y naan Jeova Gueftaquilo.\n8:1 O Jeova, Se\u00f1otmame, jafa muna mauleg y naanmo gui todo y tano: ni y unpolo y minalagmo gui jilo y langet.\n8:2 Guinin pachot y mandiquique yan y ma\u00f1ususo nae unpolo y minetgot? Pot y enimigumo sija: sa para unnasuja y enimigo yan y umeemog.\n8:3 Anae julie y langetmo, ni y checho y calolotmo, y pilan yan y pution, ni jago pumolo;\n8:4 Jaye y taotao, para uguaja guiya g\u00fciya jinaso? yan lajin taotao para ubinesita g\u00fce.\n8:5 Sa unfatinas didide diquique\u00f1a qui y angjeles, ya uncorona g\u00fce ni y minalag yan inenra.\n8:6 Unnafanmagas todo ni checho y canaemo: todo unpolo gui papa y adeng\u00f1a.\n8:7 Y quinilo yan y nobiyo todo ayo: taeg\u00fcenaoja y g\u00e2g\u00e2 ni gaegue gui fangualuan.\n8:8 Y pajaro gui langet, yan y g\u00fcijan gui tase: ya jafaja ni manmalolofan gui chalan y tase.\n8:9 O Jeova, Se\u00f1otmame: jafa muna mauleg y naanmo gui todo y tano.\n9:1 BAE junae grasias si Jeova contodo y corasonjo: bae jufanue todo ni ninamanman na chechomo.\n9:2 Bae jumagof, ya unnasenmagofyo guiya jago: jucantaye ni y tinina y naanmo O jago Gueftaquilo.\n9:3 Anae y enimiguja unnabira sija tate: manbasnag, ya manmalingo gui menamo.\n9:4 Sa jago fumatinas y jinasoco yan y causaco: unfatachong gui trono, ya unjusga y tinas.\n9:5 Guinin unlalatde y nasion sija, guinin unyulang y manaelaye, guinin unfunas y naan\u00f1ija para siempre taejinecog.\n9:6 Esta malachae y enimigo; esta mayulang para siempre: yan y siuda ni y inyilang, y jinaso\u00f1ija manachamalingo yan sija.\n9:7 Ya si Jeova sumaga calang ray para siempre, ya janalisto y tronu\u00f1a para usentensia.\n9:8 Ya g\u00fciya jumusga y tano ni tininas, ujajusga y taotao sija yan y minagajet.\n9:9 Ya si Jeova locue y taquilo na tore para y manmachiguit, y taquilo na tore gui tiempon chinatsaga.\n9:10 Ya jaangoco sija guiya jago y tumungo y naanmo; sa jago, Jeova, ti unyute ayo y umaliligao jao.\n9:11 Cantaye si Jeova ni y tinina ni sumasaga gui Sion: namatungo gui entalo taotao sija y checo\u00f1a.\n9:12 Sa anae jacocobla y j\u00e2g\u00e2 jajaso sija: ya ti malefa ni inagang y mamoble.\n9:13 Gaease nu guajo, O Jeova; atan y pinitejo ni jususungonja y chumatlie yo, jago y munacajulo yo gui pettan finatae:\n9:14 Para jufamanue todo ni y tininamo gui trangcan y jagan Sion: ya umagof yo gui satbasionmo.\n9:15 Unnafanmafondo y nasion gui joyo ni y finatinas\u00f1ija: ya y casiyas nae ni janaaatog, y patas\u00f1ija esta mangodon.\n9:16 Si Jeova janamatungo g\u00fce ni y sentensia ni jafatinas; ya jalaso y taelaye ni y checho y canaena: Jinaso. Sila.\n9:17 Ufanmanalo guato y manaelaye gui sasalaguan: yan todo y taotao ni manmalefa as Yuus.\n9:18 Sa ti para siempre umamalefan\u00f1aejon y nesesitao: ni y ninanggan y mamoble ufanmalingo para siempre.\n9:19 Cajulo, O Jeova: chamo munamametgot y taotao: ya ufanmajusga y nasion gui menamo.\n9:20 Polo, O Jeova, y minaa\u00f1ao guiya sija: polo ya utungo y nasion na sija taotaoja.\n10:1 JAFA na tumojgue jao na chago, O Jeova? jafa na umatogjao gui tiempon chinatsaga.\n10:2 Sa pot sobetbia y taelaye na japetsisigue y pebble; ufanmachule gui finababa y manmajajaso.\n10:3 Sa enao mina jatunanmaesag\u00fce y taelaye, ni y minalago y anti\u00f1a: ya y manlagga jarechasa; junggan, jadespresia si Jeova.\n10:4 Y taelaye pot y sobetbia y mata\u00f1a, ileg\u00f1a: ti jaaliligao si Yuus: Gui todo y jinaso\u00f1a, jasangan: Taya Yuus.\n10:5 Y chalan\u00f1a chatsaga todo y tiempo; y juisiomo goschago gui linie\u00f1a: ya todo y enimigu\u00f1a, g\u00fciya jaguaefe sija.\n10:6 Ileg\u00f1a gui corason\u00f1a: Ti jucalamten: gui todo y generasion sija, ti jufalag y chinatsaga.\n10:7 Y matdision bula y pachot\u00f1a yan dinague yan chiniguit: y papa y jila\u00f1a inacacha yan tinaelaye.\n10:8 Gaegue matatachong y lugat ti matungo gui sengsong: ya y umatog na lugat japupuno y taeisao: y atadog\u00f1a manaatanja contra y pebble.\n10:9 Jananangga gui lugat ti matungo, taeg\u00fcije y leon gui liyang\u00f1a: jananangga para ucone y pebble: jacone y pebble anae jayotte ni y laso\u00f1a.\n10:10 Jacojajatg\u00fce, janatunog, megae na manaeninasi\u00f1a mamodong gui gaesisi\u00f1a na iyo\u00f1a.\n10:11 Yleg\u00f1a gui corason\u00f1a: Si Yuus esta malefa: janaatog y mata\u00f1a; taya nae jalie.\n10:12 Cajulo, O Jeova; O Yuus, jatsa y canaemo: chamo malelefa ni y mamoble.\n10:13 Pot jafa jadespresia y taelaye si Yuus; ya ileg\u00f1a gui corason\u00f1o: Jago ti ugagao.\n10:14 Jago lumie: sa jago umatan y inacacha yan y minattrata, para uchule gui canaemo: yya jago nae manda\u00f1a y mamoble: y manaesaena, jago umayuyuda.\n10:15 Yulang y canae y manaelaye: ya ayo y taelaye, aliligao jao y tinailaye\u00f1a asta qui ti unsoda.\n10:16 Si Jeova Ray na para taejinecog yan taejinecog: ya y nasion esta manmalachae gui tano\u00f1a.\n10:17 Y minalago y manumitde jago jumungog, O Jeova: jago dumespopone y corason\u00f1ija, ungueguesecungog ni y talangamo:\n10:18 Para unjusga y manaesaena yan y mamoble: para chamo tumatalo munamaa\u00f1ao y taotao gui tano.\n11:1 AS Jeova nae juangocoyo: jafa na ilegmo ni antijo: Gupo gui egsomo calang pajaro?\n11:2 Sa, estag\u00fce, y manaelaye na jaaregla y atcos: jafamauleg y flecha gui tali\u00f1a para uflecha gui jinemjom y manunas na corason.\n11:3 Yaguin y plinanta sija esta mayulang: jafa si\u00f1a y manunas ujafatinas.\n11:4 Si Jeova gaegue gui santos na templo\u00f1a; si Jeova, y tronu\u00f1a gaegue gui langet; y atadog\u00f1a manlilie yan y babali\u00f1a jachachague y famaguon y taotao.\n11:5 Si Jeova jachachague y manunas: lao y manaelaye, ya y gumaeya mandague, y anti\u00f1a chumatlie.\n11:6 Uuchan y casiyas gui jilo y manaelaye: guafe yan asufre ya y manglo na ma\u00f1ila y patte\u00f1a gui basu\u00f1a.\n11:7 Sa y tinas Jeova; ya\u00f1a y tinas: ya jaatan y manunas y mata\u00f1a.\n12:1 AYUDA, O Jeova, sa jocog mandeboto: sa jocog y manmauleg gui entalo y famaguon taotao.\n12:2 Masasangang taebale cada uno gui tiguang\u00f1a: yan labios na jaande, yan doble na corason jasasangan.\n12:3 Si Jeova uutut todo y labios na jaande, yan y jila ni cumuecuentos mandangculo:\n12:4 Ayo na ujaalog: Pot y jilata na utagana; y labiosta iyota: jaye si\u00f1a se\u00f1ot gui jilota?\n12:5 Sa y chiniguit y mamoble y an y inigong y mannesesitao: pago bae cajulo, ileg\u00f1a si Jeova: guajo jupolo g\u00fci na seguro, ni y jaguaefeye.\n12:6 Sa y finijo Jeova, gasgas na finijo: calang salape na managasgas gui jotno gui jilo y tano: managasgas siete biaje.\n12:7 Jago, O Jeova, ni umadadaje sija, jago umantiene para taejinecog, guine este na generasion.\n12:8 Jijot gui oriya manjajanao y manaelaye: anae esta nacajulo y tinaelaye gui entalo y famaguon taotao.\n13:1 ASTA ngaean, O Jeova, nae, umalefa jao guajo para taejinecog? asta ngaean nae unnaatog y matamo guiya guajo.\n13:2 Asta ngaean nae jujaso y pinagat gui antijo, anae guaja pinite gui corasonjo todo y jaane? Asta ngaean nae ufangajulo y enimigujo guiya guajo?\n13:3 Jaso ya jungogyo, O Jeova, Yuusso: ina y atadogjo sija para mungayo maego gui maego finatae.\n13:4 Sa cha\u00f1a umaalog y enimigujo: Jugana g\u00fce: sa cha\u00f1a y enimigujo fanmamagof yaguin calamtenyo.\n13:5 Lao guajo, y minaasemo nae juangocoyo: ya umagof y corasonjo gui satbasionmo.\n13:6 Bae cantaye si Jeova: sa jafatinas y mauleg guiya guajo.\n14:1 YLEG\u00d1A y taetiningo gui corason\u00f1a: Taya Yuus: sija manpotlilo, jafatinas y chatliion na chocho: taya ni uno ni y fumatitinas y mauleg.\n14:2 Si Jeova jaaatan desde y langet y jilo y famaguon taotao, para ulie cao guaja uno malate, yan jaaliligao si Yuus.\n14:3 Todos manlache; manjuyong potlilo todo; taya jaye fumatitinas y mauleg, taya ni uno.\n14:4 Ada ti jatungo todo y fumatitinas y taelaye? ni y jacacano y taotaojo, taeg\u00fcije y chumochocho pan? ya si Jeova ti jaaagang.\n14:5 Ayo nae manlaolao ni minaa\u00f1ao: sa si Yuus gaegue gui rasan y manunas.\n14:6 Ya y pinagat y pebble innamamajlao, sa si Jeova guineg\u00fce\u00f1a.\n14:7 Malago, y satbasion Israel mato guinin Sion! Anae jatalo si Jeova quinautiba y taotao\u00f1a, ayo nae magof si Jacob yan magof Israel.\n15:1 JEOVA, jaye usaga gue tabernaculumo? jaye usaga gui santos na ogsomo.\n15:2 Y jumanao gui minauleg, ya y fumatitinas y tininas, yan y cumuecuentos magajet gui jalom corason\u00f1a.\n15:3 Y ti fafajiyunge ni jila\u00f1a, ni ti jafatitinas taelaye gui amigu\u00f1a, ni usigue sumangan y minamajlao contra y tiguang\u00f1a.\n15:4 Gui atadog\u00f1a ninadespresiao ni y taotao \u00e1placha, lao y maa\u00f1ao as Jeova jaonra: y manjula para da\u00f1o\u00f1a namaesa ya ti jatolaeca.\n15:5 Y salape\u00f1a ti mannanae para ufangana, ni uchule y apas contra y taeisao: ya y fumatinas estesija ti si\u00f1a cumalamten.\n16:1 ADAJE yo, O Yuus: sa iya jago nae gaegue y inangococo.\n16:2 Ylegmo, O antijo, as Jeova: jago Se\u00f1otto: taya minaulegco yaguin taeg\u00fce guiya jago.\n16:3 Ya y ma\u00f1antos ni mangaegue gui tano, sija manmagas ya todo y minalagojo gaegue guiya sija.\n16:4 Mumegae y pinite\u00f1ija ni tumolaeca si Jeova pot otro Yuus: ti juofrese ni y inefrese\u00f1ija na j\u00e2g\u00e2, ni juchule y naan\u00f1ija gui labiosso.\n16:5 Si Jeova y patten ni y ineredajo, yan y basujo: jago mumantietiene y fottunajo.\n16:6 Ya, y fottunajo upodong gui lugat na magof: magajet na bonito na ineredajo.\n16:7 Jubendise si Jeova, ni y japagat yo: ya an puenge nae jafananag\u00fce yo y jinasoco gui san jalomjo.\n16:8 Si Jeova jupolo gui menajo para siempre: sa yaguin gaegue g\u00fce gui agapajo, ti si\u00f1a yo manacalamten.\n16:9 Enao mina magof y corasonjo ya magof y inenrajo: locue y catneco sumaga seguro.\n16:10 Sa ti undingo y antijo gui naftan: ni unnae y santosmo para ulie y minitong.\n16:11 Unnatungoyo ni y chalan y lin\u00e2l\u00e2: binilan minagof y gaegue gui menamo: ya y agapa na canaemo guaja minagof para siempre.\n17:1 JUNGOG, O Jeova, y taotao tunas: atituye y casaojo; guefecungog y tinaetaejo, na ti jumajanao gui labios dinag\u00fce.\n17:2 Polo y menamo nae ya ujuyong y sentensiajo: lie ni y atadogmo y tininas.\n17:3 Jago guinin chumague y corasonjo; guinin unbisitayo gui puenge; guinin unchagueyo ya taya sinedamo: y jinasoco na ti manisag\u00fce y pachotto.\n17:4 Para y finatinas y taotao, pot y finijo ni guinin y labiosmo, jumantiene yo gui san juyong y chalan ni y manyuyulang.\n17:5 Y pinecatto guiniut gui chalanmo, ya y adengjo ti susulong.\n17:6 Jagasja juagang jao, sa jago unope yo, O Yuus: naegueng guiya guajo y talangamo, ya jungog y sinanganjo.\n17:7 Fanue ni y minaasemo ni namanman, jago na unnalibre y umangoco sija guiya jago, guinin y ayosija ni mangajulo contra y agapa na canaemo.\n17:8 Adaje yo, taeg\u00fcije y atilong y ni\u00f1on mata, naatog yo gui papa y anineng papamo,\n17:9 Y menan y manaelaye ni y jumojo\u00f1o yo: y gostaelaye y enimigujo ni majijujute yo.\n17:10 Manmaafuyot ni y linedo\u00f1ija: ya y pachot\u00f1ija cumuecuentos sobetbio.\n17:11 Y pinecatmame nae maoriyayejam pago: japolo y atadog\u00f1ija para ujayutejam gui tano.\n17:12 Taeg\u00fcije y le\u00f3n ni y gosmalago ni y na\u00f1a: ya y le\u00f3n diquique ni y gaegue gui saga na umaalog.\n17:13 Cajulo, O Jeova, polo jao gui mena\u00f1a, yute papa: libre y antijo gui manaelaye nu y espadamo.\n17:14 Gui taotao sija nu y canaemo, O Jeova, gui taotao ni y iyon tano, ayo na g\u00fcinaja\u00f1a gaegue gui estisija na jaane: ayo y tiyan\u00f1a unabula nu y tesorumo: sija manjaspog y famaguon, ya polo y sebla y g\u00fcinaja gui mandiquique na patgon\u00f1ija.\n17:15 Guajo, yan y tininas julie y matamo: najong yo anae magmata yo gui pinarejumo.\n18:1 JUGUAEYAJAO, O Jeova, y minetgotto.\n18:2 Si Jeova y achojo, y castiyujo, yan y nanalibrijo: Yuusso, metgot y achojo, juangoco yo guiya g\u00fciya; patangjo yan y c\u00e1nggilon y satbasionjo, y leca na torijo.\n18:3 Bae juagang si Jeova, ni combiene na mannae todo ni y alabansa: taeg\u00fcije bae julibre gui enimigujo.\n18:4 Mato guiya guajo y piniten finatae, ya y minilalag y tinaelaye janamaa\u00f1aoyo.\n18:5 Y piniten naftan gaegue gui oriyajo, y lason finatae mato guiya guajo.\n18:6 Y chinatsagaco nae juagang si Jeova, ya juagang y Yuusso: g\u00fciya jajungog gui templo\u00f1a y vosso, ya y inagangjo gui mena\u00f1a, jumalom y talanga\u00f1a.\n18:7 Ayo nae y tano calamten ya mayengyong, ya y simiento sija y egso manmanyengyong yan mangalamten, sa g\u00fciya lalalo.\n18:8 Cajulo aso gui g\u00fciing\u00f1a, ya guinin pachot\u00f1a guafe manonggue y pinigan ma\u00f1ila pot este.\n18:9 Y janamangag y langet ya tumunog: ya teog na jinemjom gaegue gui sampapa y adeng\u00f1a.\n18:10 Ya maudae g\u00fce gui jilo un querubin, ya gumupo g\u00fce; magajet na gumupo g\u00fce gui jilo y papan y manglo.\n18:11 Japolo jinemjom para fanatugan\u00f1a; para y tabernaculu\u00f1a gui oriya\u00f1a; jinemjom y janom, teog na mapagajes guinin y langet.\n18:12 Pot y minalag gui mena\u00f1a y teog na mapagajes\u00f1a malofan: graniso yan pinigan guafe.\n18:13 Jajulo locue si Jeova gui langet, ya y Gueftaquilo jasangan ni y inagang\u00f1a: graniso yan pinigan guafe.\n18:14 Ya jatago y flecha\u00f1a ya manchinalapon: ya magajet, megae na lamlam ya manyinilang.\n18:15 Ayonae esta malie y tinadong y janom, ya janamababa y simiento y tano sija pot y linalatdemo, O Jeova, pot y g\u00fcinaefen y jinagong gui g\u00fciingmo.\n18:16 Jatago desde sanjilo, jachuleyo; ya jaatoyo guinin y megae na janom.\n18:17 Janalibrego gui manmetgot na enimigujo, yan y chumatli\u00e9yo, sa sija mas manmetgot qui guajo.\n18:18 Sija manmato guiya guajo gui un jaanen y chinatsagaco: lao si Jeova, g\u00fciya y fanapojo.\n18:19 Ya jachuleyo locue gui anae ancho na lugat: janalibreyo sa ninamagof ni guajo.\n18:20 Si Jeova jaapaseyo taemanoja y y tininasso: taemanoja y guinasgas y canaejo unaeyo.\n18:21 Sa juadaje y chalan Jeova: ya ti taelaye yo na juapattayo gui as Yuusso.\n18:22 Sa todo y jinaso\u00f1a mangaegue gui menajo: ya ti junajanao guiya guajo y tinago\u00f1a.\n18:23 Ya guajo cabales guiya g\u00fciya: ya juadaje yo guinin y tinaelayeco.\n18:24 Pot este jaapaseyo si Jeova taemanoja y tininasso: taemanoja y guinasgas y canaejo gui menan atadog\u00f1a.\n18:25 Ya y gaemaase unfanue na gaemaasejao: ya y taotao ni y cabales, unfanue na cabales jao.\n18:26 Ya y gasgas unfanue na gasgasjao: ya y camten unfanue na camtenjao.\n18:27 Sa jago munalibre y mangaepinite na taotao; ya y sobetbio na atadog jago munatunog.\n18:28 Sa jago munamalag y candetto: si Jeova, Yuusso, namanana y jemjom guiya guajo.\n18:29 Sa pot jago na jufalag\u00fce y inetnon sendalo: ya pot y Yuusso jugope y quelat.\n18:30 Ya si Yuus, cabales y chalan\u00f1a: y fino Jeova esta machague: patang g\u00fce para todo y numanangga g\u00fce.\n18:31 Jaye si Yuus yaguin ti si Jeova g\u00fce? ya jaye y acho, jaguin ti si Yuusta?\n18:32 Si Yuus jagogode yo ni y minetgot: ya jafatitinas cabales y chalanjo?\n18:33 Jafatitinas y adengjo taeg\u00fcije y adeng y benado: ya janasagayo gui taquilo na sagajo sija.\n18:34 Jafanag\u00fce y canaejo para y guera: ya enaomina y canaejo judobla y atcas bronse.\n18:35 Ya unnaeyo locue ni y patang gui satbasionmo: ya y agapa na canaemo mumantietieneyo; ya y minansomo munamegaeyo.\n18:36 Unnadangculo y pinecatto gui papajo; ya y adengjo ti usulong.\n18:37 Judulalag y enimigujo sija, ya jug\u00e2ch\u00e2: ya ti jubirago talo asta que jocog.\n18:38 Junafanma\u00f1etnot, ya ti si\u00f1a mangajulo: mamodong sija gui papa adengjo.\n18:39 Sa guinin ungode yo ni y minetgot para y guera: unnafanecon y enimigujo gui papajo.\n18:40 Guinin unfatinas ni y enimigujo na unaeyo ni y tatalo\u00f1ija, para juyulang y chumatliiyo.\n18:41 Manaagang, ya taya jaye ufansinatba: manaagange si Jeova ya ti manjiningog.\n18:42 Ayonae juguleg sija taeg\u00fcije y petbos gui menan y manglo; taeg\u00fcije y fache gui chalan ni y manmachalapon.\n18:43 Guinin unnalibre yo gui y inaguaguat y taotao: guinin unadaje yo para jumagas gui nasion sija: y taotao sija ni ti jutungo ujasesetbeyo.\n18:44 Ya anae jajungog guiya guajo ujaosgueyo: ya y taotao juyong ujaosgueyo ni y dinague.\n18:45 Ya taotao juyong manlinachae ya manmamamaela ya manlalaolao guinin manmapongle.\n18:46 L\u00e2l\u00e2 si Jeova; ya ubendito y achojo: ya umanataquilo na Yuus y satbasionjo.\n18:47 Si Yuus ni y numae yo y inemog, ya jasujeta y taotao gui papajo.\n18:48 Janalibre yo gui enimigujo: magajet na unnasanjiloyo gui ayo sija y mangajulo contra guajo: ya janalibre yo gui taotao ni y matatnga.\n18:49 Pot este junae jao grasias gui entalo y nasion sija, O Jeova; ya jucanta y alabansa para y naanmo.\n18:50 Dangculo na linibre janae y ray\u00f1a; ya jafanue minaase ni y pinalae\u00f1a; as David ya y semiya\u00f1a para taejinecog.\n19:1 Y langet munaclaro y minalag Yuus; ya y fineda mamanue y checho canae\u00f1a.\n19:2 Y un jaane yan y otro jaane masangang y finijo, ya y un puenge ya y otro puenge mamanue tiningo.\n19:3 Taya sinangan, ni finijo; ti si\u00f1a umajungog y vos\u00f1ija.\n19:4 Ya gui todo y tano jumanao y raya\u00f1a, ya asta uttimon y tano y fino\u00f1a: ya japolo tabernaculo para atdao guiya sija.\n19:5 Ya g\u00fciya taeg\u00fcije y nobio ni jumujuyong guinin y cuatto\u00f1a, ya jamagof taeg\u00fcije y matatnga na taotao, para ufalago gui finalago.\n19:6 Y jinanao\u00f1a guinin un punta gui langet, ya y linilico\u00f1a asta y uttimo\u00f1a: ya taya jaye uatog ni y minaepe\u00f1a.\n19:7 Y lay Jeova cabales, jafamauleg y ante; y testimonion Jeova seguro, janafanmalalate y manaeisao.\n19:8 Y fina\u00f1ag\u00fce Jeova tunas, janafanmamagof y corason: y tinago Jeova claro, janafanmalag y atadogsija.\n19:9 Y minaa\u00f1ao as Jeova gasgas, sumaga para taejinecog; y sentensian Jeova magajet, ya todo tunas.\n19:10 Na malago mas que y oro, magajet mas que y megae na oro ni y manfino: mames mas que y miet, que y titijo gui sagan miet.\n19:11 Y tentagomo locue mapagat yan sija: ya yaguin jaadaje sija y uguaja dangculo na apas.\n19:12 Ya y linachi\u00f1a jaye utiningo? ya y linache na ti jutungo, nalibreyo.\n19:13 Unmantiene locue y tentagomo guinin y sobetbio na isao: ya munga mangae ninasi\u00f1a\u00f1ija guiya guajo: ayo nae cabalesyo ya gasgas yo guinin y dangculo na quinebrantan y tinago.\n19:14 Polo ya y sinangang y pachotto ya y jinason y corasonjo umauleg gui menamo, O Jeova, minetgotto yan y munalilibreyo.\n20:1 SI Jeova uninepejao y jaanen chinatsaga: y naan y Yuus Jacob ninacajulojao.\n20:2 Utago y para uinayudajao guinin y santuario, ya guinin y Sion unninametgotjao.\n20:3 Ujaso todo y ninaemo, ya uchajlao y inefresimo sinenggue.\n20:4 Nae jao taemanoja y minalago y corasonmo, ya cumple todo y pinagatmo.\n20:5 Utafangana gui satbasionmo, ya y naan y Yuusmame injatsa julo y banderanmame: ucumple si Jeova todo y guinagaomo.\n20:6 Pago jutungo na si Jeova jaadadaje y pinalae\u00f1a: g\u00fciya uinepe gue guinin santos y langet\u00f1a yan y minetgot y satbasion gui agapa\u00f1a.\n20:7 Estesija gui caretasija, ya ayosija gui cabayosija nae jaangocosija: lao jita y naan Jeova, ni y Yuusta, utajajasoja.\n20:8 Estesija mandimo ya mamodong: lao jita tafangajulo ya tafanogue tunas.\n20:9 Jeova, nalibre: polo y Ray ya uopejam anae inagang.\n21:1 O Jeova, gui minetgotmo ninamagof y ray; ya gui satbasionmo ninamagof megae!\n21:2 Y minalago y corason\u00f1a, jago numae: ya ti unpune ni y guinagao y labios\u00f1a.\n21:3 Sa untagam g\u00fce nu y bendision y minauleg: y coronan oro nu y fino, unpolo gui jilo y ilu\u00f1a.\n21:4 Lin\u00e2l\u00e2 na guinagao\u00f1a unnae: y anaco na jaane, para siempre taejinecog.\n21:5 Dangculo y minalag\u00f1a gui satbasionmo: onra yan minagas unpolo gui jilo\u00f1a.\n21:6 Sa jago bumendise para taejinecog: unnamagof g\u00fce yan minagof gui menamo.\n21:7 Sa y ray jaangongoco si Jeova: ya pot y minaase y Gueftaquilo ti calamten.\n21:8 Y canaemo usoda todo y enimigumo: y agapa na canaemo usoda todo y chumatlie jao.\n21:9 Jago pumolo sija taeg\u00fcije y jetnon guafe gui tiempon binibumo: si Jeova yumulang sija anae lalalo, ya y guafe ufanlinachae.\n21:10 Ya y tinegcha\u00f1a unyulang gui jilo y tano, ya y semiya\u00f1a gui entalo y famaguon y taotao.\n21:11 Sa jagasja majasuye y taelaye contra jago: jagasja majaso y dinague ni y ti si\u00f1a mafatinas.\n21:12 Sa jago fumatinas na jabira y tatalo\u00f1ija ya unnalisto y jalon y atcosmo contra y mata\u00f1ija.\n21:13 Taquilo jao, O Jeova, yan y minetgotmo: incantaye yan inalabaye y ninasi\u00f1amo.\n22:1 YUUSSO, Yuusso, sa jafa na undingo yo? sa jafa chago jao gui inayudajo yan y finijo gui inigongjo.\n22:2 O Yuusso, juagang gui jaane ya ti unope: ya gui puenge lao jusoda y descanso.\n22:3 Ya y santos jao, O jago ni y sumasaga gui alabansan Israel.\n22:4 Yya jago nae manangoco y tatanmame: manangoco ya unnafanlibre sija.\n22:5 Maaagang jao ya ninafanlibre: manmanangoco nu jago ya ti manmamajlao.\n22:6 Ya guajo y g\u00e2g\u00e2 ilo ya ti taotao: namamajlao gui lalaje ya madespresia gui taotao.\n22:7 Todo y lumiiyo manatchatgue pot guajo mamuyuyueyo ya jayeyengyong y ilon\u00f1ija.\n22:8 Angoco jao as Jeova; polo ya ulibre gue: polo ya ulibre g\u00fce sa g\u00fcinaeya g\u00fce.\n22:9 Sa jago y chumule yo gui tiyan: ya unnafanangoco anae gaegue yo gui jaof nanajo.\n22:10 Gui jilomo mayute yo guinin y tiyan: desde y tiyan nanajo jago Yuusso.\n22:11 Chamo chachago guiya guajo; sa y chinatsagaco esta jijot, sa taya jaye yo uayuda.\n22:12 Megae na toro jaoriyayeyo: manmetgot na toron B\u00e1san jumijujuteyo.\n22:13 Ya jabababa y pachot\u00f1ija guiya guajo taeg\u00fcije y le\u00f3n ni tegcho yan cumate.\n22:14 Janamachuda yo taeg\u00fcije y janom, todo y telangjo man\u00e1pula: y corasonjo taeg\u00fcije y danges; esta madirite gui talo gui sanjalomjo.\n22:15 Anglo y minetgotto taeg\u00fcije y pedason an mafag: ya y jilajo cheton gui paladatto: ya gui petbos finatae nae unpoloyo.\n22:16 Sa maoriyayayeyo y galago sija: majijujuteyo y inetnon y manaelaye; ya manadochon gui canaejo yan y adengjo.\n22:17 Mojon jusangan todo ni y telangjo: sija jaatanyo ya jaconsidedera.\n22:18 Maipe gui entalo\u00f1ija todo y bestidujo: ya y magagujo marifa.\n22:19 Lao jago, O Jeova, chamo chachago: O jago, minetgotto, chadig yan unayudayo.\n22:20 Nalibre gui espada y antijo: y beyan corasonjo, guinin y ninasi\u00f1an y galago.\n22:21 Nalibreyo gui pachot y le\u00f3n; magajet, guinin y canggilon y nubiyo ni titogcha, unope yo.\n22:22 Bae jusaasgane y ma\u00f1elujo y naanmo: ya gui entalo gui inetnon taotao bae jualalabajao.\n22:23 Ya y manmaa\u00f1ao as Jeova, fanmanalaba nu g\u00fciya: todo y semiyan Jacob fanmanonra nu g\u00fciya: ya fanmaa\u00f1ao nu g\u00fciya todo y semiyan Israel.\n22:24 Sa ti guinin jadespresia ni jachatlie y pinadesen y pebble; ni unaatog y mata\u00f1a guiya g\u00fciya: ya anae jaagang guiya g\u00fciya, jajungog.\n22:25 Ya iya jago nae mamaela y alabansajo gui dangculon inetnon: ya y promesajo juapase gui menan y manmaa\u00f1ao g\u00fce.\n22:26 Ufa\u00f1ocho y manmanso ya ufanjaspog: ufanmanalaba as Jeova y umaliligao g\u00fce: polo ya ufanmanl\u00e2l\u00e2 y corasonmiyo para taejinecog.\n22:27 Ujajaso ya ufanalo guato as Jeova todo y uttimon y tano: ya ufamnanadora gui menamo todo y familian y nasion sija.\n22:28 Sa as Jeova y raeno: ya g\u00fciya umagas gui todo nasion.\n22:29 Ufa\u00f1ocho ya ufanmanadora todo y yinemog y tano: gui menan\u00f1a ufandimo, todo y manunog gui eda: g\u00fciyaja ni y tisi\u00f1a unalala y anti\u00f1a.\n22:30 Un semiya usinetbe g\u00fce: ya umasangan si Jeova asta y uttimo generasion.\n22:31 Ufanmato ya ufanmasangan y tininas\u00f1a ni y taotao na umafa\u00f1ago, na g\u00fciya fumatinas este.\n23:1 SI Jeova g\u00fciya y pastotjo: tayayo unafatta.\n23:2 Y manbetde na chaguan nae janaason yo: ya y quieto na janom nae jaosgaejon yo.\n23:3 Jananalo y antijo: jaosgaejon yo gui chalan tininas pot y naan\u00f1a.\n23:4 Yaguin jufamocat gui chalan y anineng y finatae, ti maa\u00f1ao yo ni jafa na taelaye, sa jago gaegue guiya guajo: y baramo yan y bastonmo unnae yo minagof.\n23:5 Unfamauleg y lamasa gui menajo yan y menan y enimigujo sija: naye la\u00f1a y ilujo, ya y copajo esta mach\u00fachuda.\n23:6 Sen magajet y minauleg yan y minaase madalalagyo todo nu sija gui jaanen lin\u00e2l\u00e2jo: ya y guima Jeova jusaga para taejinecog na jaane.\n24:1 Y tano iyon Jeova yan y binila\u00f1a: y tano yan y manasaga gui sanjalom\u00f1a.\n24:2 Sa g\u00fciya fumatinas gui jilo y tase: ya gui jilo y janom nae japolo fitme.\n24:3 Jaye ucajulo gui egso Jeova? ya jaye ugaegue gui sagan y sinantos\u00f1a.\n24:4 Ayo y gasgas canae\u00f1a yan y gasgas corason\u00f1a: ni ti pumopolo gui taebale y anti\u00f1a ni ufanjula ni y dinague.\n24:5 G\u00fciya uresibe y bendision Jeova: yan y tininas guine as Yuus satbasion\u00f1a.\n24:6 Este na generasion y umaliligao g\u00fce: y umaliligao y matamo, O Yuus Jacob. Sila.\n24:7 Jatsa julo y ilonmiyo, O jamyo trangco sija ya umajatsa julo y taejinecog na potta sija, ya y Ray langet ujalom.\n24:8 Jaye este na Ray langet? Si Jeova, metgot yan matatnga: si Jeova matatnga gui guera.\n24:9 Jatsa julo y ilonmiyo, O jamyo trangca sija ya umajatsa julo y taejinecog na potta sija ya y Ray langet ujalom.\n24:10 Jaye este na Bay langet? Si Jeova gui inetnon sendalo, g\u00fciya ayo y Ray langet. Sila.\n25:1 YYAJAGO, O Jeova, nae jujatsa y antijo.\n25:2 O Yuusso, iyajago nae juangocoyo: chamo yo munamamamajlao; chamo pumopolo y enimigujo na ugana gui jilojo.\n25:3 Magajet, na todo y mumananggajao ti ufanmamajlao: sija ufanmamajlao ni y chumog\u00fce dinague sin jafa.\n25:4 Y chalanmo, O Jeova, fanueyo; fanag\u00fce yo, ni y chalanmo.\n25:5 Osgaejonyo gui minagajetmo ya unfanag\u00fceyo; sa jago y Yuus ni y satbasionjo: iyajago nae jufannangga todotdia.\n25:6 Jaso, O Jeova, y mauleg na minaasemo; yan y mauleg na g\u00fcinaeyamo, sa sija guinin apmam na tiempo.\n25:7 Chamo jumajaso y isao y pinatgonjo, ni y quinebrantaco ni y tinago: segun y g\u00fcinaeyamo jasoyo, pot y minauleg y naanmo, O Jeova.\n25:8 Mauleg yan tunas si Jeova: pot enao na jafanag\u00fce y maniisao ni y chalan.\n25:9 Y manmanso ufanfinanag\u00fce gui juisio: yan y manmanso ufanguinia gui chalan.\n25:10 Todo y chalan Jeova g\u00fcinaeya yan minagajet ni y ayo y umadadaje y tratu\u00f1a yan y testimoniu\u00f1a.\n25:11 Pot y naanmo, O Jeova, asie y isaojo sa gosdangculo.\n25:12 Jaye ayo na taotao y maa\u00f1ao as Jeova? g\u00fciya ufinanag\u00fce ni y chalan mano y inayeg\u00f1a.\n25:13 Y anti\u00f1a usaga gui mauleg: ya y semiya\u00f1a uereda y tano.\n25:14 Y secreton Jeova gaegue guiya sija y mumaa\u00f1aog\u00fce g\u00fce; ya g\u00fciya ufanag\u00fce sija ni y tratu\u00f1a.\n25:15 Y atadogjo siempre juatan si Jeova; sa g\u00fciya ujala y adengjo juyong gui laso.\n25:16 Atanyo, ya gaease ni guajo: sa guajo taeconsueloyo yan piniteyo.\n25:17 Y chinatsagan y corasonjo lumalamegae: najuyongyo gui pinitijo.\n25:18 Atan y trinesteco yan y pinitijo; ya unasie todo y isaojo.\n25:19 Atan y enimigujo, sa sija manmegae, ya sija chumatliiyo ni y fejman na chinatlie.\n25:20 Adaje y antijo ya nalibreyo: ya chajo mamamajlao, sa iyajago nae juangocoyo.\n25:21 Y minauleg yan y tininas juad\u00e1dajeyo: sa jago junanangga.\n25:22 Nalibre, O Yuus, y iya Israel gui todo y chinatsaga\u00f1a.\n26:1 JUSGAYO, O Jeova, sa guajo jumajanao yo gui tininasso: juangocoyo locue gui as Jeova: pot enao na ti jusulong.\n26:2 Ecsamina yo, O Jeova, ya chagueyo: chague y jinasojo gui jinalomjo yan y corasonjo.\n26:3 Sa y g\u00fcinaeyamo gaegue gui menan atadogjo; ya gui minagajetmo nae jumajanaoyo.\n26:4 Ti jagasja matachongyo yan y ti manmagajet na taotao; ni jujalom yan y lumilipa.\n26:5 Juchatlie y inetnon y chumog\u00fce taelaye: ya ti jufatachong yan y manaelaye.\n26:6 Jufagase y canaejo ni y tinaeisao: taeg\u00fcije juoriya gui attatmo, O Jeova.\n26:7 Para junajungog y inagang y grasias yan para jusangan todo y ninamanmanmo.\n26:8 Jeova, yajo y sagan y guimamo: yan y lugat nae sumasaga minalagmo.\n26:9 Chamo na fandada\u00f1a yan y maniisao y antijo, ni y jaanijo yan y taotao c\u00e1jaga.\n26:10 Sa ayosija na canae\u00f1ija mangaegue y nacacha: ya y agapa y canae\u00f1ija bula ni y catnada.\n26:11 Lao guajo jumajanao yo yan y tininasso: nalibreyo, ya gaease ni guajo.\n26:12 Y adengjo gaegue gui lugat ni yano: ya gui inetnon taotao nae jubendise si Jeova.\n27:1 SI Jeova y candetto yan y satbasionjo? ya jaye jumaa\u00f1ag\u00fceyo? si Jeova y minetgot y lin\u00e2l\u00e2jo, ya jaye yo nae jumaa\u00f1ao?\n27:2 Anae manmato guiya guajo y chumog\u00fce taelaye para u jacano y catneco, y contrariojo yan y enimigujo, sija manmatompo ya manmatomba.\n27:3 Achogja ujapolo un inetnon sendalo contra guajo ti maa\u00f1ao y corasonjo: achogja ucajulo y guera contra guajo, este nae juangocoyo.\n27:4 Unoja na g\u00fcinaja jugagao gui as Jeova, este jualiligao; na jugaegue gui guima Jeova todo y jaanen lin\u00e2l\u00e2jo, para julie y guinatbon Jeova ya para jualigao gui templo\u00f1a.\n27:5 Sa g\u00fciya munaatogyo gui tabernacolu\u00f1a gui jaanen pinite: ya janaatogyo gui fanatog y tabernacolu\u00f1a: ya japoloyo julo gui jilo y acho.\n27:6 Ya pago janataquiloyo y ilujo gui jilo y enimigujo gui oriyajo: ya junae gui tabernacolu\u00f1a inefresen minagof; bae jucantae, magajet, jucantaye alabansa sija si Jeova.\n27:7 Jungog, O Jeova, anae juagang ni inagangjo, gaease locue ni guajo ya unopeyo.\n27:8 Anae ilegmo: Aligao jamyo y matajo; y corasonjo ileg\u00f1a nu jago: O Jeova, y matamo jualiligao.\n27:9 Chamo munaaatog y matamo guiya guajo; chamo munasusuja yan y binibumo y tentagomo: jago guinin ayudajo; chamoyo yumuyute ya chamoyo dumidingo, O Yuus gui satbasionjo.\n27:10 Anae si tatajo yan nanajo yumuteyo: si Jeova jumocayo.\n27:11 Fanag\u00fceyo, O Jeova, ni y chalanmo: ya osgaejonyo, gui chalan yano, pot rason y enimigujo.\n27:12 Chamoyo pumopolo gui minalago y contrariojo: sa mangajujulo contra guajo mandacon na testigo, ya jaye usinangang y taease.\n27:13 Guinin lalangoyo yaguin ti jujonggue na guaja nae julie y minauleg Jeova gui tano ni y manl\u00e2l\u00e2l\u00e2.\n27:14 Nangga si Jeova: nametgotjao ya polo ya unamatatnga y corasonmo: magajet, na nangga jao si Jeova.\n28:1 YYAJAGO, O Jeova, juaagang; achojo, chamo fatil\u00faluye yo: yaguin infatiluye yo, guajo uparejo yan y man\u00fatunog gui tadong y joyo.\n28:2 Jungog y inagang y guinagaojo anae juagang jao: anae jujatsa y canaejo gui sinantos templomo.\n28:3 Chamoyo cumocone guato gui manaelaye yan y chumog\u00fce y taelaye: ya jasasangan y pas gui tiguang\u00f1a ya y inacacha gaegue gui corason\u00f1ija.\n28:4 Nae sija taemanoja y checho\u00f1ija: ya taemanoja y taelayen checho\u00f1a. Nae sija taemanoja y finatinas y canae\u00f1ija: apase ni y para ujamarese.\n28:5 Sa timanmalago jalie y checho Jeova, ni y finatinas y canae\u00f1a, ufanyinilang sija ya ti uninafangajulo.\n28:6 Bendito si Jeova, sa jajungong y inagang y guinagaojo.\n28:7 Si Jeova y minetgotto yan y patangjo; y iyag\u00fciya nae manangoco y corasonjo, ya guajo uayuda: Enao mina senmagof y corasonjo; ya y quinantaco nae jualabag\u00fce.\n28:8 Si Jeova y minetgot\u00f1ija: ya g\u00fciya y minetgot y satbasion para y pinalae\u00f1a.\n28:9 Nalibre y taotaomo ya bendise y erensiamo: ya nafa\u00f1ocho sija ya unmantiene sija para taejinecog.\n29:1 NAE si Jeova, O famaguon manmetgot, nae si Jeova ni inenra yan y minetgot.\n29:2 Nae si Jeova y inenra ni mauleg para y naan\u00f1a: adora si Jeova ni guinatbon y sinantos\u00f1a.\n29:3 Y inagang Jeova gaegue gui jilo y janomsija: ya y Yuus langet janajujulo: junggan, si Jeova, gui jilo y megae na janom.\n29:4 Y inagang Jeova y ninasi\u00f1a: y inagang Jeova bula y minagas.\n29:5 Y inagang Jeova yumuyulang y trongcon y sedrosija: magajet na jayulang si Jeova y trongcon sedrosija y L\u00edbano.\n29:6 Ya janafanayog sija locue taeg\u00fcije y tatnero: y L\u00edbano yan y Sirion taeg\u00fcije y patgon y dadao na nubiyo.\n29:7 Y inagang Jeova umuutut y ma\u00f1ila y guafe.\n29:8 Y inagang Jeova munamayengyong y jalomtano: janameyeyengyong si Jeova y jalomtano guiya Cades.\n29:9 Y inagang Jeova munafanma\u00f1a\u00f1ago y binado sija ya janafanquesnuda y jalomtano: ya y templo\u00f1a nae todo y g\u00fcinaja ileg\u00f1a: Minalag.\n29:10 Si Jeova anae guaja delubio matachong calang un ray; magajet na matatachong si Jeova calang ray na taejinecog.\n29:11 Si Jeova unae minetgot y taotao\u00f1a: si Jeova jabendise y taotao\u00f1a ni y pas.\n30:1 JUNATAQUILO jao, O Jeova; sa jago unnajatsa yo julo: ya ti unnafanmagof y enimigujo guiya guajo.\n30:2 O Jeova, Yuusso, juagangjao ya unnajomloyo.\n30:3 O Jeova, jago munacajulo y antijo gui naftan: unadajeyo na l\u00e2l\u00e2yo para mungayo tumunog gui naftan.\n30:4 Cantaye si Jeova, O jamyo ma\u00f1antos\u00f1a: ya innae grasias y santos na naa\u00f1a.\n30:5 Sa pot didideja guaja linalalo\u00f1a; gui finaborese\u00f1a nae guaja lin\u00e2l\u00e2: yaguin y pupuenge majon sumaga y tinanges; y egaan mato y minagof.\n30:6 Ya guajo jagas ileco anae lum\u00e1laguaja yo: ti jucalamten talo taejinecog.\n30:7 Sa jago, Jeova, pot y finaboresemo jagasja unnafitme y egsojo: lao unnana y matamo, ya guajo chumatsaga.\n30:8 Yya jago, O Jeova, juaagangjao: ya si Jeova jutayuyut.\n30:9 Jafayo probechoco gui j\u00e2g\u00e2jo, anae tumunog yo gui naftan? Ada uinalabajao ni y petbos? Ada usangan y minagajetmo?\n30:10 Jungog, O Jeova, ya gaease ni guajo: Jeova, jago para inayudajo.\n30:11 Jago bumira y inigongjo gui baela: ya unpula y lutojo ya unnaquinereasyo ni y minagof;\n30:12 Para jucantaye jao inenra ya ti jufamatquilo: O Jeova, Yuusso, junaejao grasias para taejinecog.\n31:1 YYAJAGO, O Jeova, nae juangoco: chamoyo munamamamajlao para taejinecog: nalibreyo gui tininasmo.\n31:2 Egueng papa guiya guajo y talangamo, nalibreyo guse: jago y para guajo acho ni y fitme, pot y guima lumijing nae para unnalibreyo.\n31:3 Sa jago y achojo yan y castiyujo; enao mina pot y naanmo esgaejonyo ya chachalalaneyo.\n31:4 Chuleyo gui lagua ni y munanaaatogyo gui ti umatungo: sa jago y seguro na sagajo.\n31:5 Y canaemo nae, junae ni y espiritujo: unnalibreyo, O Jeova, jago Yuus minagajet.\n31:6 Juchatlie ayo sija y numanangga y taebale na dinague: lao guajo si Jeova juangongoco.\n31:7 Jumagof ya jusenmagof gui minaasemo: sa jagas unlie y pinitijo: ya jagas untungo y antijo gui chinatsaga.\n31:8 Ya jago ti jumujuchomyo gui canae y enimigujo: jagas unpolo y adengjo gui dangculo na sagayan.\n31:9 Gaease ni guajo, O Jeova, sa estag\u00fce yo gui chinatsaga: sa y atadogjo linachae ni y pinite, junggan, y antijo yan y tataotaojo.\n31:10 Sa y jaanijo linachae ni y trinestico, ya y sacanjo ni y suspiros: linalachae y minetgotto pot y tinaelayeco: ya y telangjo mananglo.\n31:11 Pot todo y enimigujo, jumuyongyo mamajlao, magajet na sentaeg\u00fcijeja a para y tiguangjo yan y minaa\u00f1ao ni y manatungoyo: ya y lumiliiyo gui sanjiyong ma\u00f1uja guiya guajo.\n31:12 Sa esta malefayo taeg\u00fcije y matae ni ti manjaso: taeg\u00fcijeyo y an mafag baso.\n31:13 Sa jujungog y dinisonran y lajyayan: minaa\u00f1ao sija gui todo oriya: anae manafaesen entresija contra guajo, ya majasusuye para umacone y antijo.\n31:14 Lao guajo, iya jago nae juangocoyo, O Jeova: ileco: Jago y Yuusso.\n31:15 Y canaemo nae gaegue y tiempoco: nalibre yo gui canae y enimigujo yan y pumetsisigueyo.\n31:16 Nafanina y matamo gui jilo y tentagomo: nalibreyo ni y g\u00fcinaeyamo.\n31:17 O Jeova, chamo yo munam\u00e1mamajlao; sa jagasja juaagangjao: polo y manaelaye ya ufanmamajlao: polo sija ya ufanmamatquilo gui naftan.\n31:18 Nafanmamatquilo y labios ni y manmandadague; sa manguecuentos saguat contra y manunas, yan sobetbia yan despresio.\n31:19 Jafa muna dangculo y minaulegmo ni unadadaje para y mumaa\u00f1aog\u00fce jao, na unfatinas para y umangocojao gui menan y famaguon y taotao.\n31:20 Jago nae ufanatog sija na ti umatungo gui menamo guinin y taelaye na contraton taotao; jago unadaje sija gui guima lumijing guinin y inaguaguat y jila sija.\n31:21 Bendito si Jeova: sa jafanueyo ninamanman gui minaase\u00f1a gui siudan manmetgot.\n31:22 Ya guajo ileco y nalulajo: Juutut yo gui menan atadogmo; lao magajet na jago jumungog y vos y guinagaojo anae juagangjao.\n31:23 Guaeya si Jeova todo jamyo ma\u00f1antos; ya y manmauleg adaje si Jeova, ya apase megagae y fumatitinas ni y sobetbia.\n31:24 Nafanmetgot jamyo, ya inafanmatatnga y corasonmiyo, todo y numanangga si Jeova.\n32:1 DICHOSO y maasie ni y taelayen finatinas\u00f1a, ya y isao\u00f1a matampe.\n32:2 Dichoso y taotao ni y ti jacatgaye si Jeova ni tinaelaye, ni uguaja gui espiritu\u00f1a dinague.\n32:3 Anae mamatquiloyo, y telangjo ninafanbijo, ni y inigongjo todotdia.\n32:4 Sa y jaane yan y puenge y canaemo macat guiya guajo; ya y finetgonjo mabira para y inanglo gui tiempon maepe. Sila.\n32:5 Y isaojo junatungo jao ya y tinaelayeco ti junaatog; ya ileco: Guajo bae juconfesat\u00f1aejon y tinaelayen finatinasso as Jeova; ya jago unasie y taelayen y isaojo. Sila.\n32:6 Sa este nae umatayuyut jao y mandeboto todos gui tiempo anae mojon si\u00f1a ujasoda: senmagajet anae machuchuda inetnon y janom, ti ufato guiya g\u00fciya.\n32:7 Jago y fanatugco; ya gui chinatsaga jago unadajeyo: ya nu y cantan linibre, jago unoriyayeyo.\n32:8 Junatungo jao ya jufanag\u00fce jao ni y chalan anae jumajanao: jupagat jao nu y atadogco.\n32:9 Chamo pumar\u00e9rejo yan y cabayo, pat y mula ni taya tiningo\u00f1ija: na nesesita y modasa yan y freno para umantiene; yaguin taya estesija ti malago guaguato guiya jago.\n32:10 Megae na triniste para y manaelaye: lao y numaangongoco si Jeova, minaase umoriyayayeg\u00fce.\n32:11 Fanmagof as Jeova, ya infansenmagof, O jamyo manunas; ya fanagang ni y minagof, todo y manunas na corason.\n33:1 FANMAGOF gui as Jeova jamyo manunas: sa y manunas bonito na alabansa.\n33:2 Fanmannae grasias indandane si Jeova ni atpa: cantaye g\u00fce ni alabansa nu y guitala ni y gaecuetdas dies.\n33:3 Cantaye g\u00fce ni y nuebo na canta: dandan mauleg ni y agang.\n33:4 Sa y fino Jeova tunas: ya todo y checho\u00f1a esta mafatinas ni y minagajet.\n33:5 G\u00fciya ya\u00f1a y tininas yan y juisio; ya cari\u00f1o na g\u00fcinaeya gui as Jeova, bula y tano.\n33:6 Pot y fino Jeova esta mafatinas y langetsija: ya pot y jajaja ni y pachot\u00f1a, todo y inetnon\u00f1ija.\n33:7 G\u00fciya munada\u00f1a gui un monton y janom gui tase: g\u00fciya pumolo gui atmas\u00e9n y tinadongsija.\n33:8 Manmaa\u00f1ao as Jeova todo y tano: manmaa\u00f1ao nu g\u00fciya todo ma\u00f1asaga gui tano.\n33:9 Sa g\u00fciya umalog ya jumuyong: g\u00fciya manago ya sumaga fitme.\n33:10 Si Jeova munataesetbe y pinagat y nasion; ya g\u00fciya munataebale y jinaso y taotao.\n33:11 Y pinagat Jeova sumaga para taejinecog: y jinason y corason\u00f1a para todo y generasion.\n33:12 Dichoso y nasion ni si Jeova Yuus\u00f1a: yan y taotao ni y jaayeg pot erensia para g\u00fciya.\n33:13 Desde y langet jaatan si Jeova: jalilie todos y famaguon Adam.\n33:14 Desde y saga\u00f1a na lugat jaatan; jaatitutuye todo y ma\u00f1asaga gui jilo y tano.\n33:15 G\u00fciya fumatinas y corason\u00f1ija todos: yan jaatitutuye todo y checho\u00f1ija.\n33:16 Y ray ti umalibre pot y dangculon inetnon sendalo\u00f1a: y matatnga na taotao ti umasatba pot y dangculon minetgot\u00f1a.\n33:17 Y cabayo taebale para useguro: sa g\u00fciya ti unalibre ni uno nu y dangculon jinilat\u00f1a.\n33:18 Estag\u00fceja, y atadog Jeova gui jilo y manmaa\u00f1ag\u00fce g\u00fce: gui jilo\u00f1ija y numanangga y minaase\u00f1a.\n33:19 Para unalibre gui finatae y anti\u00f1ija: ya para unae lin\u00e2l\u00e2 gui \u00f1inalang.\n33:20 Y antita jagas jananangga si Jeova: y ayudata yan y patangta g\u00fciya.\n33:21 Pot g\u00fciya manmagof y corasonta, sa y sinantos naan\u00f1a nae jagas taangocojit.\n33:22 Polo y minaasemo, O Jeova, ugaegue guiya jame, seg\u00fan ninangganmamame guiya jago.\n34:1 JUBENDISE si Jeova gui todo y tiempo: y alabansa\u00f1a si\u00e9siempreja sumaga gui pachotto.\n34:2 Si Jeova umalaba y antijo: man manjungog y manmanso ya ninafanmagof.\n34:3 Junadangculo si Jeova guiya guajo: ya nita tanataquilo y naan\u00f1a gui un vos.\n34:4 Jualigao si Jeova ya g\u00fciya jajungogyo: ya todo y minaa\u00f1aojo janalibreyo.\n34:5 Sija inatang\u00fce ya infaninina: ya y mata\u00f1ija ti ufanmamajlao.\n34:6 Este y namase na taotao umagang, ya si Jeova jumungog, ya ninalibre todo gui chinatsaga\u00f1a.\n34:7 Y angjet Jeova jaoriyaye sija y manmaa\u00f1ao nu g\u00fciya ya janalibre sija.\n34:8 Chague ya unlie na mauleg si Jeova: dichoso y taotao ni umangocog\u00fce guiya g\u00fciya.\n34:9 Fanmaa\u00f1ao as Jeova, jamyo ma\u00f1antos\u00f1a: sa taya ufatta para y manmaa\u00f1ao nu g\u00fciya.\n34:10 Y mandiquique na le\u00f3n mannamase ya man\u00f1alang; ya y umaliligao si Jeova ti ufatta ni jafa na minauleg.\n34:11 Maela jamyo famaguon, ecungog yo: ya jufanag\u00fce jamyo ni y minaa\u00f1ao as Jeova.\n34:12 Jaye enao na taotao y tum\u00e1tana y lin\u00e2l\u00e2, ya ya\u00f1a megae na jaane para ulie y minauleg?\n34:13 Adaje y jilamo gui taelaye, yan y labiosmo na ucuentos mandague.\n34:14 Suja gui taelaye ya fatinas y mauleg; aligao y pas ya dalalag.\n34:15 Y atadog Jeova gaegue gui jilo y manunas: ya y talanga\u00f1a esta mababa pot y inagang\u00f1ija.\n34:16 Y matan Jeova contra y fumatitinas y taelaye para uutut gui tano y jinaso\u00f1ija.\n34:17 Managang y manunas ya si Jeova jumungog: ya todo y chinatsaga\u00f1ija ninafanlibre.\n34:18 Jijot esta si Jeova gui manmaque branta na corason: yan y manma\u00f1etnot na espiritu janalibre.\n34:19 Megae y piniti\u00f1i\u00f1ija y manunas: lao todo ayo si Jeova munafanlibre.\n34:20 Jaadaje todo y telang\u00f1ija: ya ni uno guiya sija umayamag.\n34:21 Y tinaelaye upinino y taotao ni taelaye: ya y chumatlie y manunas ufansinentensia.\n34:22 Janalilibre si Jeova y lin\u00e2l\u00e2 y tentago\u00f1a: ya taya ni uno ni umangoco g\u00fce usinentensia.\n35:1 AGUAGUATE, O Jeova, ayo y umaguaguaguateyo; mumo yan ayo y amumumujo.\n35:2 Mantiene y patang yan guineg\u00fce, ya tojgue para unayudayo.\n35:3 Ya chule y lansa ya patang y chalan contra ayo y pumetsisigueyo: alog ni antijo: Guajo y satbasionmo.\n35:4 Polo ya ufanmamajlao, ya ufanquinenfunde y umaliligao y antijo: polo ya ufanalo tate ya ufanmamajlao y jumajaso y taelayejo.\n35:5 Polo sija ya calang y paja gui menan y manglo: ya y angjet Jeova ufanchineneg sija.\n35:6 Polo y chalan\u00f1ija ya jomjom yan palagse: ya y angjet Jeova ufanpinetsigue sija.\n35:7 Sa sin causa manatog para guajo y lagua gui joyo: ya sin causa manmanguadog joyo para y antijo.\n35:8 Polo ya ufato guiya g\u00fciya ya yinilang ni ti jatungo: polo ya y lagua ni janaaatog, ucone maesag\u00fce: yan y jalom yinilang nae upodong g\u00fce.\n35:9 Ya umagof y antijo gui as Jeova: ya umagof gui satbasion\u00f1a.\n35:10 Todo y telangjo y ileg\u00f1ija: Jeova, jaye parejumo? ni unalibre y mamoble gui mas manmetgot qui g\u00fciya: magajet na y mamoble yan y mannesesitao, guinin y jachulelejguan?\n35:11 Mangajulo testigon mandague: ya jafaesenyo ni y ti jutungo.\n35:12 Manaeyo ni taelaye pot y mauleg, ya manataelaye y antijo.\n35:13 Lao guajo anae manmalango sija, magagojo y luto: junatriste y antijo yan umayunat: y tinaetaejo tumalo jalom gui pechoco.\n35:14 Mamomocat yo ya ileleco: G\u00fciya buente y gachongjo, pat y chelujo: ya tumecon yo triste calang uno ni y umuugung pot si nana\u00f1a.\n35:15 Lao anae desgrasiaoyo, sija manmagof ya manda\u00f1a: ya y gosnamaase manda\u00f1a contra guajo ya guajo ti jutungo: sija matitegyo ya ti manbasta.\n35:16 Parejo yan y \u00e1placha na minefea gui fandango, janach\u00e9chegcheg y nifen\u00f1ija guiya guajo.\n35:17 Jeova, asta ngaean nae unatan? nalibre y antijo gui yinilang\u00f1a, yan y beya y corasonjo gui le\u00f3n.\n35:18 Junae jao grasias gui dangculon y inetnon taotao: ya jualaba jao gui entalo linajyan taotao.\n35:19 Chamo pumopolo na ufanmamagof guiya guajo y enimigujo sin jafa? ni ayo y chumatlieyo sin causa jaachetgue yo nu y atadog.\n35:20 Sa ti manguecuentos pas: ya contra y manmanso gui tano jajajaso y finijo dinague.\n35:21 Magajet na jabababa y pachot\u00f1ija contra guajo; ileg\u00f1ija: Ja, ja y atadogmameja lumie.\n35:22 Unlie este, O Jeova; chamo famatquiquilo: O Jeova, chamo chachago guiya guajo.\n35:23 Jaso ya fagmata para y juisioco; junggan, para y causaco Yuusso yan y Se\u00f1otto.\n35:24 Jusgayo taemanoja y tininasmo, O Jeova, Yuusso, ya chamo pumopolo na ufanmamagof guiya guajo.\n35:25 Chamo pumopolo na ujaalog gui corason\u00f1ija: Ja, taeg\u00fcije manmalagojit; chamo pumopolo na ujaalog: Jita jagas tacalamot g\u00fce.\n35:26 Polo ya ufanmamajlao ya ufa\u00f1atsaga ayo sija y manmagof pot y manada\u00f1ujo: polo ya ufanminagago ni y minamajlao yan y disonra y munadangculo sija contra guajo.\n35:27 Polo ya ufanagang ni minagof ya ufanmagof y gumaeya y tinas na causaco: junggan, polo ya ujaalog siempre: innadangculo si Jeova, ni y ya\u00f1a na memegae y tentago\u00f1a.\n35:28 Ya y jilajo usangan ni y tininasmo, yan todotdia ni y alabansamo.\n36:1 YINEMBESTE y taelaye, ileg\u00f1a gui corasonjo, taya minaa\u00f1ao as Yuus gui menan atadog\u00f1a.\n36:2 Sa pot enao jafaande maesa g\u00fce gui atadog\u00f1a, ya ti usoda y taelaye\u00f1a ya umachatlie gue.\n36:3 Y finijo gui pachot\u00f1a manaelaye yan finababa: basta g\u00fce ni utungo yan ufatinas y mauleg.\n36:4 Y tinaelaye jajajaso gui jilo cama\u00f1a: japolo maesa g\u00fce gui un chalan ni y ti mauleg: ti jachatlie y inacacha.\n36:5 O Jeova, asta y langet y g\u00fcinaeyamo; y minagajetmo inataca asta y mapagajes.\n36:6 Y tininasmo taeg\u00fcije y egso Yuus; y juisiomo sija dangculo\u00f1a tinadong: y taotao yan y g\u00e2g\u00e2, jago umadadaje, O Jeova.\n36:7 Gosdangculo y balot\u00f1a y g\u00fcinaeyamo, O Yuus! ya y famaguon taotao ufanmagogue gui papa y anineng y papamo.\n36:8 Ufansennajong ni y minegae y guimamo: ya jago unnafanguimen ni y sadog y minagofmo.\n36:9 Sa iyajago nae gaegue y beb\u00f4 y lin\u00e2l\u00e2: ya y ininamo nae infanmalie inina.\n36:10 Sisigueja y g\u00fcinaeyamo para y tumungo jao; ya y tininasmo para manunas na corason.\n36:11 Chamo pumopolo ya ufato contra guajo y patas y sobetbio: ni y canae y manaelaye unasuja yo.\n36:12 Ayo nae mamodong y manmamatitinas ni y taelaye: sija manmachoneg ya ti si\u00f1a ufangajulo.\n37:1 CHAMO umestotban mamaesa jao ni y chumog\u00fce da\u00f1o, ni unguaja embidia, ni y fumatitinas y taelaye.\n37:2 Sa ufanmautut guse taeg\u00fcijeja y chaguan, ya ufanmalayo taeg\u00fcije y chaguan betde.\n37:3 Angocojao as Jeova, ya fatinas y mauleg: saga gui tano ya unchog\u00fce minauleg.\n37:4 Magofjao as Jeova: ya g\u00fciya unninae ni guinagao y corasonmo.\n37:5 Bira y chalanmo para as Jeova: ya angocog\u00fce locue, ya g\u00fciya unajuyong este.\n37:6 Ya janajanao y tininasmo taeg\u00fcije y manana: ya y juisiomo taeg\u00fcije y taloane.\n37:7 Quieto jao as Jeova, ya nanggag\u00fce nu y siningon: chamo umestotban mamaesa jao ni y mumegae, gui chalan\u00f1a ni y taotao ni fumatitinas y dinague.\n37:8 Basta y binibo, ya polo y linalalo; chamo umestotban mamaesa jao para unfatinas y dano.\n37:9 Sa y chumog\u00fce dano ufanmautut: lao y numanangga si Jeova, sija ujaereda y tano.\n37:10 Ya desde este didide ti utaeg\u00fce y taelaye: magajet na jaguefjajaso y saga\u00f1a ya utaeg\u00fce g\u00fce.\n37:11 Lao y manmanso ujaereda y tano: ya ufanmagof maesa sija ni megae na pas.\n37:12 Y taelaye man jajaso dinague contra y manunas ya janachechegcheg y nifen\u00f1ija guiya g\u00fciya.\n37:13 Si Jeova chumachaleg pot g\u00fciya: sa jalilie na ufato gui jaani\u00f1a.\n37:14 Y manaelaye jalagnos y espada, yan janadilog y atcos\u00f1ija para uyute papa y mamoble yan y mannesesitao: para ujapuno sija y manunas gui chalan.\n37:15 Y espada\u00f1ija jumalom gui corason\u00f1ijaja ya y atcos\u00f1ija umayamag.\n37:16 Mauleg\u00f1aja y didide gui manunas, qui y minegae gui megae na manaelaye.\n37:17 Sa y canae y manaelaye ufanmayamag: lao si Jeova jamantietene y manunas.\n37:18 Jatungo si Jeova y jaanen y manunas: ya y erensia\u00f1ija usaga para taejinecog.\n37:19 Sija, ti ufanmamajlao gui taelaye na tiempo: ya y jaanen \u00f1inalang ufanjaspog.\n37:20 Lao y manaelaye ufanmalingo: yan y enimigon Jeova ufanparejo y sebon cotdero sija: sija ufanlinachae, calang aso ufanguelinachae.\n37:21 Y manaelaye ma\u00f1u\u00f1ule inayao ya ti jaapapasetalo: ya y manunas guaja minaase\u00f1ija ya mannae.\n37:22 Sa ayosija y manbendise pot g\u00fciya ujaereda y tano: ya ayosija y manmatdise pot g\u00fciya ufanmautut.\n37:23 Sa y jinanao y mauleg na taotao si Jeova mumantietene; ya g\u00fciya ya\u00f1a y chalan\u00f1a.\n37:24 Yaguin matomba, ti uguefpodong: sa si Jeova mumantietene nu y canae\u00f1a.\n37:25 Guine patgon yo ya estayo bijo; lao tatnae julie y mauleg madingo, ni y semiya\u00f1a manegagao nengcano\u00f1ija.\n37:26 Todotdia guaja minaase yan ninaayao: ya y simiya\u00f1a para bendision.\n37:27 Suja gui taelaye, ya fatinas y mauleg; ya sumasasaga jao para taejinecog.\n37:28 Sa si Jeova ya\u00f1a y juisio, ya ti jadingo y ma\u00f1antos\u00f1a: sija ufanmaadaje para siempre: ya y semiyan y manaelaye ufanmautut.\n37:29 Y manunas ujaereda y tano ya usaga para taejinecog gui jilo\u00f1a.\n37:30 Y pachot y manunas manguecuentos minalate, ya y jila\u00f1a cumuecuentos juisio.\n37:31 Y lay y Yuus\u00f1a gaegue gui corason\u00f1a, pot enao na y adeng\u00f1a ti usulong.\n37:32 Y taelaye jaespipia y tinas ya jaegaga para upuno.\n37:33 Si Jeova ti upinelo gue gui canae\u00f1a: ni usinentensia g\u00fce yan manjusga.\n37:34 Nangga si Jeova ya adaje y chalan\u00f1a, ya g\u00fciya unninataquilo para unereda y tano: anae y manaelaye ufanmautut, jago siempre unlie.\n37:35 Guajo jagas julie y taelaye na dangculo ninasi\u00f1a\u00f1a, ya janamayao g\u00fce, calang y atbot ni betde gui eda\u00f1a.\n37:36 Ya jumalofan ya estag\u00fce, na taeg\u00fce: magajet na jualigao ya tisi\u00f1a masoda.\n37:37 Jaso y cabales, ya atan y tinas na taotao: sa y uttimo\u00f1a ayo na taotao y pas.\n37:38 Lao y manaelaye todo manmayulang: ya y uttimon y manaelaye ufanmautut.\n37:39 Lao y satbasion y manunas gui as Jeova: g\u00fciya y minetgot\u00f1ija gui tiempon y chinatsaga.\n37:40 Ya si Jeova ufaninayuda ya uninafanlibre gui manaelay: ya uninafansatba sa sija numananggag\u00fce.\n38:1 O Jeova, chamoyo lumal\u00e1latde nu y lalalomo, ni uncastigayo nu y binibumo.\n38:2 Sa y flechamo cheton guiya guajo: ya y canaemo macat gui jilojo.\n38:3 Taya jinemlo gui catneco pot y binibumo: ya taya pas gui telangjo pot causa y isaojo.\n38:4 Sa y tinaelayeco malofan gui jilo ilujo: sija sen macat guiya guajo taeg\u00fcije y catga macat.\n38:5 Y chetnotto manmutung yan manpotlilo, pot causa y binabajo.\n38:6 Pinite yo yan gostumecon yo: todotdia jumajanaoyo yan umuugong yo.\n38:7 Sa y atayojo bula sinenggue: ya taya jinemlo gui catneco.\n38:8 Manyafaeyo yan gosmamuteyo: cumate yo pot y atboroto gui corasonjo.\n38:9 Jeova, y menamo nae gaegue todo y tinangajo: ya y inigongjo tiunaatog guiya jago.\n38:10 Y corasonjo bobongbong, y minetgotto malingo: ya y minalag y atadogjo fatta esta.\n38:11 Y gumaeya yo yan y mangachongjo manotojgue chago gui chetnotto; ya parientesso manotojgue gui chago.\n38:12 Ayosija ni y umaliligao y antijo manmaplanta laso para guajo; ya y umaliligao y da\u00f1ujo manguecuentos tinaelaye: ya todotdia manmanajaso ni y finababa.\n38:13 Lao guajo, calang tanga, ti jujungog: ya guajo calang udo ni ti ubaba y pachot\u00f1a.\n38:14 Magajet na guajo calang un taotao ni ti manjujungog: ya taya linalatde gui pachot\u00f1a.\n38:15 Sa iya jago, O Jeova, junanangga: jago unfanope, O Jeova, Yuusso.\n38:16 Sa ileco: Cha\u00f1ija fanmamagof guiya guajo: anae sulong y adengjo manladangculon sija guiya guajo.\n38:17 Sa guajo cana na ugadon: ya y pinitijo gaegue siesiempre gui menajo.\n38:18 Sa bae jusangan y tinaelayeco; bae jutriste pot y isaojo.\n38:19 Sa y enimigujo manl\u00e2l\u00e2 ya manmetgot: ya mumemegaeja y chumatlieyo sin jafa.\n38:20 Ayosija locue ni y jaapapase y mauleg pot y taelaye, sija contrarionjo, sa judadalalag y mauleg.\n38:21 Chamo dumidingoyo, O Jeova: O Yuusso, chamo chachago guiya guajo.\n38:22 Laguse ya unayudayo, O Jeova y satbasionjo.\n39:1 GUAJO ileco bae juadaje y chalanjo, para chajo umiisao pot y jilajo: bae juadaje y pachotto ni freno, anae y manaelaye mangaegue gui menajo.\n39:2 Jugueffamatquilo ya juquieto gui minauleg: ya y pinitijo manatbororota.\n39:3 Y corasonjo maepe gui sanjalomjo: anae jujajaso, y guafe ma\u00f1o\u00f1onggue: ayo nae cumuentos yo yan y jilajo.\n39:4 Natungo yo, Jeova, ni uttimoco, yan y medidan y jaanijo cuanto guaja; natungoyo jafa na checayo.\n39:5 Estag\u00fce na un atafja unnae y jaanijo; ya y sacanjo calangja taya gui menamo: sen magajet na todo y taotao taebale anae guaja mas balot\u00f1a.\n39:6 Senmagajet na calang anineng jumajanao todo y taotao: senmagajet na taesetbe y atboroto\u00f1ija: Sa manrecocoje y g\u00fcinaja ya ti jatungo jaye y chinile.\n39:7 Ya pago, Jeova, jafa junangga? y ninanggaco gaegue guiya jago.\n39:8 Nalibre yo gui todo y tinaelayeco, chamoyo pumopolo na jumanamamajlao gui taetiningo.\n39:9 Guajo mamatquilo, ti jubaba y pachotto: sa jago fumatinas.\n39:10 Najanao guiya guajo y sinaulagmo: sa pot y tinetpen y canaemo lumachaeyo.\n39:11 Anae unnatunas y taotao nu y linalatde, pot y tinaelaye, ninalachae y bonitu\u00f1a taeg\u00fcije y puliya: senmagajet na todo y taotao taebale.\n39:12 Jungog y tinaetaejo, O Jeova, ecungog y inagangjo: chamo famatquilo gui menan y lagojo: sa taotao tumano yo guiya jago: pago finatoyo taeg\u00fceje y ma\u00f1aenajo todos.\n39:13 Poloyo ya jufa\u00f1ule minetgot, antes de jujanao ya ti jutalo.\n40:1 JUNANGGA nu y siningon as Jeova; ya janaegueng maesa g\u00fce guiya guajo, ya jajungog y inagangjo.\n40:2 Ya g\u00fciya chumule yo guinin un joyo chatliion, guinin fache na tadong: ya japolo y adengjo gui jilo acho, ya janafitme y jinanaojo.\n40:3 Ya japolo gui pachotto canta na mannuebo, junggan, y alabansa gui Yuusta. Megae lumie ya manmaa\u00f1ao, ya ufanangoco as Jeova.\n40:4 Dichoso y taotao ni jaangoco gui as Jeova: ya ti jaaatan y mansobetbio ni y manabag manmalag y mandague.\n40:5 Megae O Jeova, y ninamanmanmo ni unfatinas: yan y jinasomo para jame; ti si\u00f1a maaregla sija gui menamo: yaguin guajo judeclara ya jusangang sija, tisi\u00f1a matufong sa gosmegae.\n40:6 Y inefresen ninae ti yamo: y talangajo jagasja unbaba: inefresen sinenggue ya y ninae pot y isao, ti jagasja ungagao.\n40:7 Ayo nae ileco: Estag\u00fce na matoyo: gui finalulon y leblo nae esta matugue pot guajo.\n40:8 Yajo para jufatinas y minalagomo, O Yuusso: magajet na y laymo gaegue gui jalom corasonjo.\n40:9 Guajo jagas jusangan y tininas gui jalom y dangculo na inetnon taotao: estag\u00fce, na ti junaquiequeto y labiosso, O Jeova, jago tumungo.\n40:10 Ti junaatog y tininasmo gui jalom corasonjo; y minagajetmo yan satbasionmo jagas jusangan: ti jupune y minaasemo yan y minaulegmo gui dangculon inetnon taotao.\n40:11 Jago, O Jeova, chamo dumitietietene y minaasemo para guajo: sa y minaasemo yan y minagajetmo juadadaje yo para taejinecog.\n40:12 Sa gaegue gui oriyajo y tinaelaye asta ti tufungon: jajiguef yo y tinaelayeco sija, ya ti si\u00f1a juatan julo; megae\u00f1a mas que y gapotulo gui ilujo, ya y corasonjo yafae esta.\n40:13 Malagojao, O Jeova, unnalibreyo: O Jeova, laguse para unayudayo.\n40:14 Polo ya ufanmamajlao ya ufaninestotba ayo y umaliligao y antijo para uyulang: polo ya ufanalo tate ya ufanmamajlao, ni y ya\u00f1ija y munataelaye yo.\n40:15 Polo ya ufanlapoble sija, pot y minamajlao\u00f1ija, ni y umaalog ni guajo: Ja, ja.\n40:16 Polo ya ufanmagof ya ufansemagof ni jago, todo y umaliligao jao: ya polo ya siesiempreja ujaalog, y gumaeya y satbasionmo: Ladangculo Jeova.\n40:17 Ya guajo pobleyo ya nesesitaoyo; lao si Jeova jajajasoyo. Jago y umayuyudayo yan y munalibre yo: O Yuusso, chamo atrasasao.\n41:1 DICHOSO ayo y maase ni y mamoble; sa y jaanen y tinaelaye nae, si Jeova ulinibre.\n41:2 Si Jeova uinadajeg\u00fce, yan umantiene g\u00fce l\u00e2l\u00e2; ya g\u00fciya udichoso gui tano; ya tiuenentrega g\u00fce gui minalago y enemigu\u00f1a.\n41:3 Si Jeova uinayuda g\u00fce jilo cama\u00f1a ni y piniti\u00f1a; unfatinas todo y cama\u00f1a anae malango.\n41:4 Guajo ilegco: Jeova gaease nu guajo: najomlo y antijo; sa umisaoyo contra jago.\n41:5 y enemigujo jasangan y taelaye contra guajo ileg\u00f1ija: Ngaean umatae, ya ufalingo y naan\u00f1a?\n41:6 Anae mato para uliiyo, jasangan y taebale; y corason\u00f1a nae manda\u00f1a y tinaelaye pot g\u00fciyaja; anae jumanao juyong jasangan ayo.\n41:7 Todo y chumatliiyo mana\u00f1angon entre sija contra guajo; contra guajo nae majaso y tinaelayeco.\n41:8 Ti mauleg na chetnot, ileg\u00f1ija, sumaga guiya g\u00fciya; sa anae umason gui cama ti si\u00f1a ninacajulo talo.\n41:9 Ya ayo y g\u00fcinaeyaco nae juangocoyo, g\u00fciya y cumano y najo pan, jajatsa y dedego\u00f1a contra guajo.\n41:10 Lao jago Jeova, gaease nu guajo, ya unacajuloyo, para juapase sija.\n41:11 Pot este jutungo, na unmagof guiya guajo, sa y enemigujo ti ujagana yo.\n41:12 Ya guajo, gui quinabalesso unmantieneyo; ya unpoloyo gui menamo para taejinecog.\n41:13 Bendesido si Jeova ni y Yuus Israel, ni y taejinecog, yan taejinecog. Amen, Amen.\n42:1 TAEG\u00dcIJE y benabo ni y guija, ni y malago ni y minilalag y janom: taeg\u00fcijeja locue y antijo sumosp\u00edpiros pot jago, O Yuus.\n42:2 Y antijo majo pot si Yuus, pot y lal\u00e2l\u00e2 na Yuus; ngaean nae jufato, ya juanog gui menan Yuus?\n42:3 Y lagojo guinin nengcanojo, jaane yan puenge, ya todo y jaane ileg\u00f1i\u00f1ijaja nu guajo: Manggue y Yuusmo?\n42:4 Anae jujaso estesija, machuda juyong y antijo guiya guajo, anae manmalofan y linajyan taotao, maposyo, ya jucone sija asta y guimayuus; yan y minagof, yan y tinina; un linajyan na umadadaje y guipot na jaane.\n42:5 Jafa na dumilogjao, O antijo? yan jafa na estotbajao gui jinalomjo? Nangga jao si Yuus, sa guajo bae jutuna g\u00fce pot y ayudo gui mena\u00f1a.\n42:6 Yuusso, y antijo esta dumilog gui jinalomjo; pot enao na jujajasojao desde y tano guiya Jordan, yan Hermonitas, desde y egso Misar.\n42:7 Un tinadong, jaagang y otro tinadong, pot palangpang y janommo sija: todo y napomo, yan y langatmo, manmalofan gui jilojo.\n42:8 Jatago si Jeova y minaase\u00f1a gui jaane, ya y puenge y canta\u00f1a guiya guajo, ya y tinaetae para y Yuus a lin\u00e2l\u00e2jo.\n42:9 Jualog as Yuus, y achojo: Jafa na malefajao nu guajo? Jafa mina na tristeyo pot y chiniguit y enemigo?\n42:10 Parejoja yan y espada gui telangjo, y enemigujo mamofeayo, anae ileg\u00f1ija cada jaane nu guajo: Mano nae gaegue y Yuusmo?\n42:11 Jafa na dumilog jao, O antijo? yan jafa na, estotbajao gui jinalomjo? Nangga si Yuus, sa bae jutuna g\u00fce, ni y ayuda nu y matajo, yan y Yuusso.\n43:1 JUSGAYO, O Yuus, ya unsangan y mumujo contra y nasion ni y ti manjonggue: O coneyo gui manmandadague, yan y manaelaye na taotao.\n43:2 Sa jago Yuus y ninasi\u00f1ajo; jafa na unrechasa? ya fafa mina tristeyo pot y chiniguit y enemigo?\n43:3 O tago y mananamo, yan y minagajetmo; ya uesgaejonyo: ya uchuleyo asta y santos na egsomo, yan y tabetnaculumo.\n43:4 Sa bae jujalom gui attat Yuus, y as Yuus nae gaegue y dangculon minagofjo; Ja jutuna jao yan y atpa, O Yuus, Yuusso.\n43:5 Jafa na dumilog jao, O antijo? yan jafa na estotba jao gui jinalomjo? Nangga si Yuus; sa bae jutuna g\u00fce, ni y inayuda nu y matajo, yan y Yuusso.\n44:1 JAME injingog ni y talanganmame, O Yuus, na jasanganejam y tantanmane, ni y finatinasmo gui tiempon\u00f1ija, gui antiguo na tiempo.\n44:2 Nu y canaemoja unyute y nasion, ya unpolo sija; unnafantriste y taotao sija, ya unnafanjanao.\n44:3 Sa ti inchile y tano pot espadan\u00f1ija para iyon\u00f1ija, ni ti unnafanlibre pot y canae\u00f1ija; lao y agapa na canaemo yan y canaemo, yan y minalag y matamo, sa unguaeya sija.\n44:4 Jago y Rayjo, O Yuus: fanago linibre para si Jacob.\n44:5 Pot jago na inyite papa y enemigonmame: pot y naanmo, na ingacha y mangajulo contra jame.\n44:6 Sa ti juangocoyo ni y flechaco, ni y espadajo ti ulibreyo.\n44:7 Sa jago umadadajejam gui enemigonmame; ya y chumatliijam unnafanmamajlao.\n44:8 Ya gui as Yuus tatunanmaesa jit todot dia; ya para taejinecog, intina y naanmo.\n44:9 Lao pago unyute jam, ya unnafanmamajlaojam; ya ti jumanaojao yan y inetnon sendalonmame.\n44:10 Unbirajam tate guinin y enemigonmame; ya ayo sija y chumatliijam, manma\u00f1aque para sija namaesa.\n44:11 Unpolojam taeg\u00fcije y quinilo ni y para umacano; ya janafanmachalaponjam gui entalo y nasion.\n44:12 Unbende y taotaomo pot taya; ya ti mumegae y g\u00fcinajamo pot y balen\u00f1ija.\n44:13 Unnafanmamajlaojam ni y tiguangmame; pot y manmanmofefea, yan manmanbotlelea ni y mangaegue gui oriyanmame.\n44:14 Unnafanmafa y sinanganjam gui entalo y nasion, pot y yinengyong y ilon\u00f1ija gui entalo y taotao sija.\n44:15 Y desenrajo gaegueja gui menajo todot dia; ya y minamajlao y matajo jatampe yo.\n44:16 Sa y inagang ayo y numanamamajlao, yan y chumatfino contra si Yuus; pot y enemigo yan y taotao ni y maneemog.\n44:17 Todo este manmato guiya jame; lao ti manmalelefajam nu jago, ni ti manmatinasjam mandague ni y tratumo.\n44:18 Y corasonmame ti inbira tate; ni y pinecatmame ti sumuja gui chalanmo.\n44:19 Masqueseaja unyamagjam gui sagan y jacal sija, ya untampejam ni y aninen y finatae.\n44:20 Yanguin manmalefajam ni y naan Yuusmame, ya inestira y canaemame pot y otro Yuus;\n44:21 Ada ti ualigaojam si Yuus? Sa jatungoja y secreton y corason.\n44:22 Junggan, pot y jago manmapunojam todo y inanaco y jaane; manmatufongjam taeg\u00fcije y quinilo ni y para umapuno.\n44:23 Fagmata, jafajao na mamaego, Se\u00f1ot? Cajulo, chamojam yumuyute para siempre.\n44:24 Pot jafa nae unnaatog y matamo, ya malefajao ni y pinitenmame yan y chiniguitmame.\n44:25 Y antenmame esta dumilog gui petbos; ya y tiyanmame cheton papa gui tano.\n44:26 Cajulo ya unayudajam, ya unnafanlibrejam gui minaasemo.\n45:1 Y corasonjo mach\u00fachuda nu y mauleg na g\u00fcinaja; jusangan ayo sija y para y ray; y jilajo, calang y pluman y chadeg mangue.\n45:2 Guefpagu\u00f1ajao qui y famaguon y taotao sija: y grasia mach\u00fachuda jalom gui labiosmo; enaomina binendisejao as Yuus, para taejinecog.\n45:3 Gode y espadamo gui ch\u00e1chagamo, O gosbalente jao, yan y langetmo yan y minagasmo.\n45:4 Ya y minagasmo sigue di mumegae, sa pot y minagajet, yan y minanso, yan tininas: ya y agapa na canaemo unfinanag\u00fce ni y mannamaa\u00f1ao na g\u00fcinaja.\n45:5 Y flechamo manacadedog; mamodong y taotao gui papamo; sija gaegue gui corason y enemigon y ray.\n45:6 Y tronumo taejinecog, yan taejinecog, O Yuus: y bariyan y raenomo, tunas na bariya.\n45:7 Unguaeya y tininas, ya unchatlie y tinaelaye; enaomina si Yuus ni y Yuusmo, pinalaejao ni y la\u00f1an minagof, mas qui y mangachongmo.\n45:8 Todo y magagumo mamaopao ni y mira, yan y chaguan na jajatot, yan y casia; manjuyong gui palasyon matfit, anae guinatbon musica manamagofjao.\n45:9 Y jaga sija y ray, mangaegue gui entalo y manonrada na famalaoanmo; ya y rayna mat\u00e1tachong gui agapamo yan y magagu\u00f1a y oron Ofir.\n45:10 Jungog O jaga, jaso ya tecon y talangamo; ya unmalefa ni y ma\u00f1ataotaomo, yan y guima tatamo.\n45:11 Ya ugosmalago y ray ni y bonitamo; sa g\u00fciya y Se\u00f1otmo yanguin unadora g\u00fce.\n45:12 Ya y jagan Tiro yan y ninae ugaegue g\u00fcije; asta y manrico gui entalo y taotao unmagaogao ni y fabotmo.\n45:13 Y jagan y ray, gui palasyo gosbonita g\u00fce: y magagu\u00f1a maadotna ni y oro.\n45:14 Macone guato gui as ray, yan y magagu\u00f1a ni y mabotda: y bitgen sija mangachong\u00f1a ni y tumattitiye, sija unquinenie guato.\n45:15 Sija machulilie guato yan minagof yan alegria: ufanjalom gui palasyon y ray.\n45:16 Gui lugat si tatamo, y ugaegae y famaguonmo; unnafanprinsipe gui todo y tano.\n45:17 Guajo junamajaso y naanmo gui todo y generasion sija: enaomina y taotao sija mannaejao grasias para taejinecog yan taejinecog.\n46:1 SI Yuus, g\u00fciya y guineg\u00fceta yan y minetgotta, enseguidas manayuda gui chinatsaga.\n46:2 Enaomina mungajit manmaa\u00f1ao, achogaja ucalamten y tano, yan y egso umachule asta y talo gui tase sija;\n46:3 Achogaja manapangpang y janom ya chatsaga; achogaja umayeyengyong y egso sija, pot causa y minatatga\u00f1a. Sila.\n46:4 Ayog\u00fceja y sadog yan y minilalag\u00f1a sija janamamagof y siuda Yuus; y santos na sagan y tabetnaculo guiya Gueftaquilo.\n46:5 Si Yuus gaegue gui entalo\u00f1a; ti ucalamten; si Yuus uinayuda y ininan y egaan.\n46:6 Manlalalo y nasion sija, ya mangalamten y raeno sija; umagang, ya maderite y tano.\n46:7 Manjijita yan y Se\u00f1ot y inetnon sendalo. Y Yuus Jacob, g\u00fciya y guineg\u00fceta. Sila.\n46:8 Maela ya inlie y checho Jeova; Jafa na yinilang jafatinas gui jilo tano?\n46:9 G\u00fciya munabasta y guera, asta y uttimon y tano; jayulang y atcos, ya jautut y lansa; g\u00fciya sumonggue y caretan guera gui guafe.\n46:10 Quieto, ya untungo na guajo si Yuus: jutaquilo gui entalo y nasion sija, jutaquilo gui tano.\n46:11 Manjijita yan y Se\u00f1ot y inetnon sendalo. Y Yuus Jacob, g\u00fciya y guineg\u00fceta. Sila.\n47:1 NAFAMAGPAG y canaemiyo todo jamya na taotao; agang si Yuus ni y inagang guinana.\n47:2 Sa si Jeova sentaquilo yan namaa\u00f1ao; G\u00fciya mas dangculo na ray gui jilo todo y tano.\n47:3 G\u00fciya ugana todo y taotao ya upolo gui papata; yan y nasion sija gui papa adengta.\n47:4 G\u00fciya umayig y erensiata ni y para jita: y minagas gui as Jacob ni y g\u00fcinaeya\u00f1a. Sila.\n47:5 Si Yuus mapos julo yan y inagang, si Jeova yan y sonidon y trompeta.\n47:6 Fanganta tinina sija para si Yuus; fanganta tinina sija; fanganta tinina sija para y rayta, fanganta tinina sija.\n47:7 Sa si Yuus g\u00fciya ray todo y tano: fanganta y tinina sija, yan y tiningo.\n47:8 Si Yuus mangobiebietna gui jilo y nasion sija; si Yuus matatachong gui tronon y sinantos\u00f1a.\n47:9 Sa y prinsipen y taotao sija manda\u00f1a ufantaotao y Yuus Abraham; sa y patang y tano, iyon Yuus: G\u00fciya y sentaquilo.\n48:1 DANGCULO si Yuus, ya para umagueftuna, gui siuda y Yuusta, gui egso y sinantos\u00f1a.\n48:2 Bonito na sagayan, y minagof todo gui tano, y egso Sion gui sumanlago na banda, siuda y dangculo na ray.\n48:3 Si Yuus esta matungo gui jalom y palasyo\u00f1a, na para y guineg\u00fce.\n48:4 Sa estag\u00fce y ray sija na manda\u00f1a, manmalofan ya mandada\u00f1aja.\n48:5 Manmalie, ya luego ninafanmanman; ninafa\u00f1atsaga, ya maninalulula manjanao.\n48:6 Y mayengyong gumote sija g\u00fcije; yan y pinite taeg\u00fcije y palaoan yan para ufa\u00f1ago.\n48:7 Jago yumamag y batcon Tarsis, ni y manglo sancatan.\n48:8 Jaftaemanoja y jiningogmame, taeg\u00fcijeja liniimame gui siuda y Se\u00f1ot y inetnon sendalo; gui siuda y Yuusmame: si Yuus plumanta para taejinecog. Sila.\n48:9 Injaso y g\u00fcinaeyamo, O Yuus, gui talo gui templomo.\n48:10 Jaftaemanoja y naanmo, O Yuus, taeg\u00fcijeja y tininamo asta y uttimon y tano: y agapa na canaemo, bula ni y tininas.\n48:11 Namagof y egso Sion, yan sija jagan Juda ufanmagof; pot y jinisgamo sija.\n48:12 Famocat gui Sion, ya unjanag\u00fce y oriya\u00f1a; ya untufong y tore g\u00fcije.\n48:13 Matca y colat\u00f1a ni y munaseguguro, ya injaso y palasyo\u00f1a; para usi\u00f1a jamyo insangane y generasion ni y mamamaela.\n48:14 Sa este na Yuus, y Yuusta para taejinecog, yan taejinecog: g\u00fciya uesgaejonjit, asta y finataeta.\n49:1 JINGOG este todo jamyo ni y taotao; ecungog jamyo todos ni y ma\u00f1asaga. gui tano:\n49:2 Jamyo todo manda\u00f1a, y managpapa, y managquilo, y manrico, yan y mamoble.\n49:3 Y pachotto usangan y minalate; ya y jinason y corasonjo y tiningo.\n49:4 Bae juecungog y parabola; ya jubaba y jemjom sinanganjo gui atpa.\n49:5 Sajafa na maa\u00f1aoyo gui jaanen y tinaelaye, anae y tinaelayen y dedegoco jaoriyayayeyo?\n49:6 Ayo y umangongoco sija ni y g\u00fcinaja\u00f1ija, yan jatunanmaesaja ni y minegae y rinicon\u00f1ija;\n49:7 Taya guiya sija si\u00f1a umapasiye y chelu\u00f1a, ni unae si Yuus ni y rumescata g\u00fce;\n49:8 (Sa y nin\u00e1libre y antin\u00f1ija, dangculo presiu\u00f1a, ya para upolu para siempre.)\n49:9 Para ul\u00e2l\u00e2 asta y taejinecog, ya ti ulie minitong.\n49:10 Sa jalie na y manmalate na taotao sija manmamataeja, y manaejinaso yan y manbababa, manmalingo, ya japolo y g\u00fcinaja\u00f1ija para y palo.\n49:11 Y jinason y sumanjalom\u00f1ija, na y guima\u00f1ija usaga para taejinecog, ya y anae ma\u00f1asaga na lugat para y todo generasion sija; ya jafanaan y tano\u00f1ija, ni y naan\u00f1ijaja.\n49:12 Lao y taotao ti sumaga gui onra\u00f1a, parejoja yan y g\u00e2g\u00e2 na matae.\n49:13 Este y jinanao\u00f1i\u00f1ija, y binaban\u00f1i\u00f1ijaja; ya anae esta manmapos, manmagof y taotao nu y sinangan\u00f1ija. Sila.\n49:14 Sija ufanquinano gui naftan parejoja yan y manadan quinilo y finatae upinasto sija; ya y manunas mangaeninasi\u00f1a gui jilo\u00f1ija gui egaan; ya y boninitu\u00f1ija, para ulachae gui jalom naftan, sa taya saga\u00f1a.\n49:15 Lao si Yuus unalibre y antijo gui ninasi\u00f1an y naftan; sa uresibeyo. Sila.\n49:16 Chamo maaa\u00f1ao, yanguin guaja taotao urico; yanguin y g\u00fcinaja, y guima\u00f1a mum\u00e9megae;\n49:17 Sa yanguin matae, taya uchule; y g\u00fcinaja\u00f1a, ti udinalalagg\u00fce.\n49:18 Achogaja anae lal\u00e2l\u00e2, dichoso y anti\u00f1a; sa matutunajao ni y taotao sija, yanguin unfamauleg mamaesajao.\n49:19 Ujanao para y generasion tata\u00f1a; ti ufanmanlie manana.\n49:20 Y taotao ni y maoonra, ya ti matungo; parejoja yan y g\u00e2g\u00e2 ni y umatae.\n50:1 SI Yuus, junggan, si Yuus, si Jeova sumangan, ya jaagang y tano desde y quinajulo y atdao asta y tumunog\u00f1a papa g\u00fcije.\n50:2 Y sumanjiyong Sion, gosbonito, s\u00ed Yuus umiina.\n50:3 Y Yuusta ufato, ya ti ufamatquilo: y guafe ufanlinachae gui mena\u00f1a, ya uguaja dangculon pinagyo gui oriya\u00f1a.\n50:4 uagang gui taquilo na langet yan y tano, para ujusga y taotao\u00f1a.\n50:5 Nafanda\u00f1a y ma\u00f1antos guiya guajo; ayo sija y fumatinas y tratujo pot y inefrese.\n50:6 Y langet udineclara y tininas\u00f1a: sa si Yuus g\u00fciyaja y jues. Sila.\n50:7 Jingog, O taotaojo, ya jusangan; O Israel, ya bae jusangan testimonio contra jago: guajo si Yuus, ni si Yuusmo.\n50:8 Ti julalatde jao pot y inefresimo, ya y inefresimo sinenggue, para todo y jaane gui menajo.\n50:9 Sa ti jufangone nubiyo gui guimamo, ni laje na chiba gui quelatmo.\n50:10 Sa todo y g\u00e2g\u00e2 gui jalom tano, g\u00e2jo, yan y g\u00e2g\u00e2 sija gui jilo y mit na sabana.\n50:11 Sa jutungo todo y pajaro gui jalom tano; y manmachaleg na g\u00e2g\u00e2 sija gui jalomtano; todo g\u00e2jo.\n50:12 Yanguin \u00f1alangyo, ti jusanganejao; sa iyoco y tano, yan y sinajguan\u00f1a.\n50:13 Juchoco catnen nubiyo, pat jugui. men j\u00e2g\u00e2 chiba?\n50:14 Nae si Yuus inefresen grasia; ya unapase y promesamo gui Gueftaquilo.\n50:15 Ya unagangyo gui jaanen y chinatsaga: junalibrejao, ya siempre unonrayo.\n50:16 Lao ileg\u00f1a si Yuus ni y manaelaye; Jafa unfatinas para undeclara y tina. gojo, pat jagas unchule y tratujo gui pachotmo?\n50:17 Sa jago unchatlie y finanag\u00fce, ya unyute y sinanganjo gui tatemo.\n50:18 Anae unlie y saque, undalalag g\u00fce; yan jagas gaepattejao yan y man\u00e1bale.\n50:19 Sa unnasetbe y pachotmo gui tae laye, ya y jilamo fumatitinas ocodon dinague.\n50:20 Mat\u00e1tachongjao, ya cumuecuentosjao contra y chelumo; undesonra y lajin nanamo.\n50:21 Estesija finatinasmo, lao mamatquiquilojayo: jinasomo na parejojitja: lao bae julalatdejao, ya jupolo tinaelayemo sija gui menan matamo.\n50:22 Pago jaso este, jamyo ni y manmalefa as Yuus; na noseaja jusisi jamyo ya jufapidasos, ya taya unalibre.\n50:23 Y numaeyo inefresen tinina, jaonrayo; ya ayo y munatutunas y sinangan\u00f1a, jufanue ni y satbasion Yuus.\n51:1 GAEASE nu guajo, O Yuus, jaftaemanoja y minauleg g\u00fcinaeyamo, jaftaemanoja y minegae y minaasemo; fu\u00f1as y tinaelayeco.\n51:2 Gosfagaseyo todo ni y tinaelayeco, ya unnagasgasyo ni y isaojo.\n51:3 Sa jutungoja y tinaelayeco: ya y isaojo gaegueja siempre gui menajo.\n51:4 Sa contra jago, jagoja, juisag\u00fce, ya jufatinas y da\u00f1o gui menan matamo: para utunas yanguin cumuentosjao, ya utaefatta yanguin manjusgajao.\n51:5 Estag\u00fceja, na mafatinasyo gui tinaelaye, yan y isao nae si nanajo mumapotguenaejonyo.\n51:6 Estag\u00fceja, na unguaeya y magajet guiya jalolom; ya y umatog na lugat nae unnatungoyo ni y tiningo.\n51:7 Nagasgasyo ni hisopo, ya jumuyong gasgas: fagaseyo ya jumuyong apaca\u00f1a, qui y niebe.\n51:8 Nafanjungogyo minagof yan y alegria para ufanmagof y telangjo ni y unyamag.\n51:9 Naatog y matamo gui isaojo; ya unfunas todo y inechongjo.\n51:10 Fatinas gui sumanjalomjo y gasgas na corason, O Yuus; ya unnanuebo y tinas na espiritu gui sumanjalomjo.\n51:11 Chamo yumuyuteyo gui menamo; yan chamo chumuchule y santos na Espiritumo guiya guajo.\n51:12 Natalo mague guiya guajo y minagof y satbasionmo: ya unmantieneyo ni y libre na Espiritumo.\n51:13 Ayo nae jufanag\u00fce y manaelaye ni y chalanmo: ya y maniisao ufanma\u00f1otsot guiya jago.\n51:14 Nalibreyo gui isao gui j\u00e2g\u00e2, O Yuus, jago Yuus y satbasinojo; ya y jilajo ucanta agang ni y tininasmo.\n51:15 O Jeova, baba y labiosso: ya y pachotto ufamanue ni y matunamo.\n51:16 Sa ti yamo inefrese para junaejao; ti magofjao ni y inefresen sinenggue.\n51:17 Y inefrese para si Yuus, manmayamag na espiritu: y mayamag yan y pinite na corason, O Yuus, jago siempre ti undespresia.\n51:18 Fatinas mauleg, ni y minauleg minagofmo, guiya Sion; fatinas y quelat Jerusalem.\n51:19 Ayo nae unmagof ni y inefresen tininas, y inefresen sinenggue yan y cabales na inefresen sinenggue: Ayo nae unmaofrese nubiyo gui attatmo.\n52:1 JAFA na tunanmaesajao gui inacacha, O matatnga na taotao? y minaasen Yuus sumasagaja cada jaane siempre.\n52:2 Y jilamo fumatitinas ocodon y taelaye: parejo yan y malagtos na inabajan batbas, machochoeho dinague.\n52:3 Unguaeya\u00f1a y da\u00f1o mas qui y mauleg; yan y mandague, mas qui cumuentos ni y tininas. Sila.\n52:4 Unguaeya todo y mannanataelaye na sinangan: O, dacon na jula.\n52:5 Si Yuus unyinilang locue para taejinecog; unquinene, ya unjinala juyong gui guimamo magago; ya unjinale juyong gui tano y lal\u00e2l\u00e2. Sila.\n52:6 Ya umalie ni y manunas; ya umaa\u00f1ao, ya umachatchatgue, ileg\u00f1ija:\n52:7 Estag\u00fce, yuje na taotao y ti japolo si Yuus para minetgot\u00f1a: lao jaangoco g\u00fce ni y manadan g\u00fcinaja\u00f1a, ya janametgot g\u00fce ni y tinaelaye\u00f1a.\n52:8 Lao guajo, parejoyo yan y betde na troncon oliba gui jalom guimayuus; juangongocoyo ni y minaase Yuus para taejinecog, yan taejinecog.\n52:9 Junaejao grasias, para taejinecog, sa unfatinas este; ya junangga y naanmo, sa este mauleg; gui menan y ma\u00f1antosmo.\n53:1 ILEG\u00d1A y taetiningo gui corason\u00f1a: Taya Yuus. Manpotlilo sija, mafatinas y chatliion na tinaelaye; taya ni uno ni fumatitinas mauleg.\n53:2 Si Yuus gui langet tumalag p\u00e1papa y famaguon taotao sija; para ulie cao guaja gaetiningo, ni y umaliligao si Yuus.\n53:3 Todos sija manalo tate; ya manjuyong potlilo sija; taya ni uno ni fumatitinas y mauleg, aje, taya ni uno.\n53:4 Taya tiningo\u00f1ija ni chumog\u00fce inechong? ni y macano y taotaojo sija, taeg\u00fcije yan ma\u00f1ochocho pan: ya ti maagang si Yuus.\n53:5 Mangosmanmaa\u00f1ao sija gui anae taya minaa\u00f1ao: sa si Yuus janafanmachapon adisapatta y telang ayo y tumotojgue contra jago; jago jagas unnafanmamajlao, sa si Yuus manrenechasa sija.\n53:6 O, na y satbasion Israel mojon ujuyong guiya Sion! anae si Yuus janatalo y quinautiba y taotao\u00f1a; ayo nae umagof si Jacob, yan ufanmagof y Israel.\n54:1 SATBAYO, O Yuus, pot y naanmo, ya unjusgayo pot y minetgotmo.\n54:2 Jungog y tinaetaejo, O Yuus; ecungog y sinangan y pachotto.\n54:3 Sa y taotao juyong sija mangajulo contra guajo, yan y taotao ni y fijon y minatatga\u00f1ija maaliligao y antijo; sija jagasja ti japopolo si Yuus gui menan\u00f1ija. Sila.\n54:4 Estag\u00fce na si Yuus umayuyudayo; si Jeova ma\u00f1isija yan ayo y mumantietene y antijo.\n54:5 G\u00fciya uapase taelaye y enemigujo sija; yulang sija gui minagajetmo.\n54:6 Sa inefresijo ni y minalagojo bae junaejao; bae jualaba y naanmo, O Jeova, sa mauleg.\n54:7 Sa g\u00fciya munalibreyo todo gui chinatsaga: sa y atadogjo jagasja jalie y minalagojo contra y enemigujo.\n55:1 JUNGOG y tinaetaejo, O Yuus: ya chamo umaatog maesa jao gui guinagaojo.\n55:2 Atituyeyo, ya opeyo: sa inestotbayo gui trinistieco, ya umugongyo;\n55:3 Sa pot y inagang y enemigo: sa pot y chiniguit y manaelaye; sa mayute y tinaelaye gui jilojo, ya pot y binibo\u00f1ija, na machatliiyo, japetsigueyo.\n55:4 Y corasonjo gospute gui sumanjalomjo: yan y minaa\u00f1ao y finatae podong gui jilojo.\n55:5 Minaa\u00f1ao yan linaolao, manmato guiya guajo; y linijan \u00f1umo\u00f1oyo.\n55:6 Ya ilegco: O mojon yanguin gaepapayo, taeg\u00fcije y paluma! ayo nae jugupo chago, ya judescansa.\n55:7 Estag\u00fce, ayo nae jujanao chago, ya jusaga gui jalomtano. Sila.\n55:8 Mojon bae jualula malag y guineg\u00fce, guinin y duron manglo yan y pinagyo.\n55:9 Yulang, O Jeova, ya ipe y jila\u00f1ija; sa jagasja julie y fijom na manaelaye, ya y manmanpotfifia gui siuda.\n55:10 Jaane yan puenge manjajanao gui sumanjilo y quelat\u00f1a: inechong yan inacacha mangaegue gui entalo\u00f1a.\n55:11 Manaelaye mangaegue gui entalo\u00f1a; chiniguit yan dinague ti usuja gui chalan\u00f1a.\n55:12 Sa ti y enemigo lumalatdeyo; ayo nae si\u00f1a jusungon; ni ti ayo y chumatliiyo ni y munadangculo g\u00fce contra guajo: ayo nae junaatog maesayo guiya g\u00fciya.\n55:13 Lao jagoja, un taotao, ni y parejujo, yan y gachongjo, yan y senjuguflie na amigujo.\n55:14 Sa y mamis na inangoco manasangane jam y jinasonmame; ya tafanmamocat yan linajyan taotao gui guimayuus.\n55:15 Polo sija ya derepente ufanchinile ni y finatae: polosija ya ufansinetta papa manlal\u00e2l\u00e2 guiya sasalaguan; sa guaja y manaelaye gui saga\u00f1ija yan y sanjalom\u00f1ija.\n55:16 Lao guajo, bae juagang si Yuus; ya si Jeova usatbayo.\n55:17 Pupuenge, ogaan, yan taloane, jufanjaso ya juagang duro, ya g\u00fciya ujungog y inaganjo.\n55:18 G\u00fciya jagasja munalibre y antijo qui pas, guinin y guera ni y comontrayo: sa megae pumotfifia yo.\n55:19 Si Yuus ufaninjingog, ya ufaninepe sija; asta ayo y ma\u00f1asaga desde y apmam na tiempo. Sila. Ti taotao sija ni siempre jatulaeca, ya ti manmaa\u00f1ao as Yuus.\n55:20 Jaestira mona y canae\u00f1a contra ayo sija ni y manpas guiya g\u00fciya: jayulang y tratu\u00f1a.\n55:21 Y sinangan y pachot\u00f1a palagse\u00f1a qui y mantica, lao guera gui jalom corason\u00f1a; y sinangan\u00f1a mananana qui y la\u00f1a; lao puro ayo sija espada in malagnos.\n55:22 Polo y catgamo gui as Jeova, ya g\u00fciya uminantiene; sa taya nae jasotta y manunas ya umanacalamten.\n55:23 Lao jago, O Yuus, ufansinetta sija papa gui joyon finatae; sa y manmejg\u00e1, yan manf\u00e1fababa na taotao sija, ti ufanl\u00e2l\u00e2 ni lamita gui jaani\u00f1ija; lao guajo juangocoyo nu jago.\n56:1 GAEASE nu guajo, O Yuus; sa y taotao malago na ujapa\u00f1otyo; mumumo todot dia, ya jachichiguityo.\n56:2 Todot dia y enemigujo manmalago na ujapa\u00f1otyo; sa megae mamumujo ya mansobetbio.\n56:3 Jafaja na tiempo nae maa\u00f1aoyo, juangocojayo guiya jago.\n56:4 Gui as Yuus jualaba y fino\u00f1a; gui as Yuus nae jagasja jupolo y inangococo, ti maa\u00f1aoyo; jafa ufatinas y catne guiya guajo?\n56:5 Todot dia mabira y sinanganjo; sa todo y jinaso\u00f1ija contra guajo para tinaelaye.\n56:6 Manda\u00f1a ya manatog maesasija; ya magueguesatituye y pinecatjo, anae jagas mananangga sija y antijo.\n56:7 Ufanescapa nu y tinaelaye? gui binibo nae unyute papa y taotao sija, O Yuus.\n56:8 Jago sumangan y jinanaojo; polo gui jalom boteyamo y lagojo: manaeg\u00fce sija gui leblomo?\n56:9 Ayo nae, ujabira sija tate y enemigujo y jaane nae juagangjao; este jutungo, na si Yuus para guajo.\n56:10 Gui as Yuus jualaba y fino\u00f1a: gui as Jeova jualaba y finona.\n56:11 Gui as Yuus nae jagasja jupolo y inangococo; ya siempre ti jumaa\u00f1ao; jafa y taotao ufatinas guiya guajo?\n56:12 Y promesamo gaegue guiya guajo, O Yuus: ya juapasejao siempre ni y inefresen grasias.\n56:13 Sa jagasja unnalibre y antijo gui finatae; ti siempre unnalibre y adengjo an podong? para jufamocat gui menan Yuus gui candet y manl\u00e1l\u00e2l\u00e2.\n57:1 GAEASE nu guajo, O Yuus, gaease nu guajo; sa y antijo guineg\u00fce g\u00fce guiya jago: magajet, y anineng y papamo ugog\u00fceyo asta qui manmalofan y chinatsaga.\n57:2 Bae juagang si Yuus Gueftaquilo; si Yuus ni y jafatinas todo y g\u00fcinaja para guajo.\n57:3 Ufanago guinin y langet ya unalibreyo; anae jalalatde ayo y malago puma\u00f1otyo. Sila. Si Yuus utago y minaase\u00f1a yan y minagajet\u00f1a.\n57:4 Y antijo gaegue gui entalo y le\u00f3n sija: ya umaasonyo gui entalo ayo sija y mina\u00f1ila guafe, junggan, yan y lalajin taotao sija ni y nifen\u00f1ija y lansa sija, yan flecha sija, ya y jila\u00f1ija malagtos na espada.\n57:5 Nadangculojao gui jilo y langet, O Yuus; polo y inenramo todo gui sanjilo tano.\n57:6 Jagas mamatinas laso, para y pinecatto; y antijo tumecon papa; jagas manmaguadog joyo gui menajo; ya sija mamodong maesaja gui taloloja. Sila.\n57:7 Y corasonjo, esta meton, O Yuus, y corasonjo esta meton; bae jucanta, magajetja, jucanta alabansa sija.\n57:8 Fagmata, inenrajo; fagmata, guitala yan atpa; guajoja na maesa magmatayo taftaf.\n57:9 Bae junaetjao grasias, O Jeova, gui entalo y taotao sija; jucantayejao alabansa sija gui entalo y nasion sija.\n57:10 Sa asta y langet, dangculo y minaasemo, yan asta y mapagajes y minagajetmo.\n57:11 Nadangculojao gui jilo y langet, O Yuus; polo y minalagmo todo gui sanjilo y tano.\n58:1 MAGAJET na jamyo manudo, anae debe de unfanguentos jamyo tininas? manmanjujusga jamyo tunas, O jamyo, ni y lalajin taotao sija?\n58:2 Magajet, na y jalom corason nae manmachochocho jamyo tinaelaye; intajlang gui canaenmiyo y tinaelaye gui tano.\n58:3 Y manaelaye, manaotao juyong desde y jalom tuyan: enseguidas qui manmafa\u00f1ago, manabag manguecuentos ni y mandague.\n58:4 Y bineno\u00f1ija, parejo yan y binenon y culebbla: sija parejo yan y tangan y serpiente, ni y jajuchum talanga\u00f1a;\n58:5 Ya ti jaecungog y inagang y encantador, ni y gosfaye manencanta.\n58:6 Yamag y nifen\u00f1ija gui jalom pachot\u00f1ija, O Yuus: yamag juyong y dangculo na nifen y patgon leon, O Jeova.\n58:7 Polo ya ufanmadirite taeg\u00fcije y janom ni y malalagoja gui iyo\u00f1a: anae jaachechetg\u00fce y flecha\u00f1a, polo ya calang manutut.\n58:8 Polo ya utaeg\u00fcije y acaleja ni y madirite ya umalofan: taeg\u00fcije y taetiempo na ma\u00f1agon palaoan, ni y ti guinin lumilie y atdao.\n58:9 Antes di usiente y lauyanmiyo y guafen y tituca, uchule sija ya unajanao, nu y remulinon manglo, ayo manbetde taeg\u00fcije mansinenggue,\n58:10 Y manunas ufanmagof yanguin jalilie y inemog; ufagase y adeng\u00f1a gui j\u00e2g\u00e2 y taelaye.\n58:11 Para ualog y taotao: Magajet na guaja apas\u00f1ija y manunas: magajet guaja si Yuus ni y manjujusga gui tano.\n59:1 NALIBREYO gui enemigujo sija, O Yuusso; polo yo gui jilo guinin ayosija ni y mangajujulo contra guajo.\n59:2 Nalibreyo gui chumog\u00fce y tinaelaye, ya satbayo gui manmejga na taotao sija.\n59:3 Sa, estag\u00fce, na mananangga y antijo: y manmetgot manda\u00f1a contra guajo; ti pot y tinaelayeco, ni ti pot y isaojo, O Jeova.\n59:4 Manmalago ya japrepara sija, sin y linachijo; fagmata, ya unayudayo, ya unlie.\n59:5 Jago Jeova, Yuus y inetnon sendalo, si Yuus Israel; fagmata ya unbisita todo y nasion sija; chamo gagaease ni y manaelaye. Sila.\n59:6 Manalo guato yan pupuenge: ya manboruruca taeg\u00fcije y galago, ya malilicucue y siuda.\n59:7 Liija, sa mannutugap juyong guinin y pachot\u00f1ija: espada sija guaja gui jalom labios\u00f1ija; jaye, ileg\u00f1i\u00f1ija, cao jajungog?\n59:8 Lao jago, O Jeova, siempre unchatgue sija; siempre unmofea todo y nasion.\n59:9 O minetgotto, junanangga jao; sa si Yuus y guimajo lumijing.\n59:10 Si Yuusso nu y minaase\u00f1a, ugaegue gui menajo: si Yuus unaliiyo y minalagojo, gui jilo y enemigujo sija.\n59:11 Chamo pumupuno sija, sa trabia ti manmalelefa y taotaojo; chalapon sija pot y ninasi\u00f1amo; ya unchule sija papa, O Jeova, patangmame.\n59:12 Pot y isao y pachot\u00f1ija, yan pot y sinangan y labios\u00f1ija, polo ya ufanmacone, pot y sobetbio\u00f1ija: yan pot y matdision, yan manmandadague ni y sinangan\u00f1ija.\n59:13 Lachae sija ni y binibumo, lachae sija, para sija ti ufangaegue talo: ya ujatungo na si Yuus mangobiebietna gui as Jacob, asta y uttimon y tano. Sila.\n59:14 Ya an pupuenge, polo ya ufanalo guato, ya unfanboruca taeg\u00fcije y galago ya umalilicue y siuda.\n59:15 Nafanjajanao julo yan papa, ya ufanmanaliligao na\u00f1ija; ya usaga todo puenge yanguin ti manjaspog.\n59:16 Lao guajo, jucanta ni y ninasi\u00f1amo; magajet, na jucanta agang ni y minaasemo yan ogaan; sa guinin jago y guimajo lumijing, yan y guineg\u00fceco gui jaanen chinatsagaco.\n59:17 Jago, O minetgotjo, jucantaye y alabansa sija; sa si Yuus y guimajo lumijing, yan y Yuus y minaasejo.\n60:1 O Yuus, jago yumutejam, jago gumapotjam papa; guinin lalalojao; O, natalojam guato.\n60:2 Jago jagasja munamayengyong y tano; jago yumulang; nafanjomlo y yinilang\u00f1a sija, sa manmayeyengyong.\n60:3 Unfanue y taotaomo sija ni y manmajetog na g\u00fcinaja; unnafanguimenjam ni y binon na matulalaejon.\n60:4 Unnae ayo sija ni y manmaa\u00f1ao nu jago, un bandera para ujatsa pot y minagajet. Sila.\n60:5 Sa para ufanlibre y g\u00fcinaeyamo; satba ni y agapa na canaemo, yan opejam.\n60:6 Si Yuus sumangan y sinantos\u00f1a; siempre jumagof; ya siempre judibide iya Siquem, ya jumide y bayen Sucot.\n60:7 Iyoco Galaad, ya iyoco Manases: Efraim y guineg\u00fce y ilujo; Juda y baston minagasso.\n60:8 Moab, y palanggana para jufagagaseyo; y jilo Edom nae juyute y sapatosso: Filistia, agangjao pot guajo.\n60:9 Jaye uchinileyo guato gui fitme na siuda? jaye uesgaejonyo guato Edom?\n60:10 Mungajao, O Yuus, ni y guinin yumutejam? yan jago, O Yuus, ti jumanao yan y inetnon sendalonmame.\n60:11 Naejam inayuda contra y contrario gui chinatsaga; sa taebale y inayudan taotao.\n60:12 Guinin as Yuus nae infatinas y minatatnga; sa g\u00fciyaja ni ugacha papa y contrarionmame.\n61:1 JUNGOG y inaganjo, O Yuus; atituye y tinaetaejo.\n61:2 Desde y uttimon y tano juagang jao, anae taeninasi\u00f1a y corasonjo: chalaneyo asta y acho ni y mas taquilo qui guajo.\n61:3 Sa jago guinin y guineg\u00fceco, yan y guiman lumijing guinin y enemigo.\n61:4 Jusaga gui jalom y tabetnaculumo para taejinecog: ya jugog\u00fceyo gui tinampen y papamo. Sila.\n61:5 Sa jago O Yuus guinin jumungog y promesajo; jago guinin numaeyo ni y erensian ayo sija y manmaa\u00f1ao ni y naanmo.\n61:6 Jago munaanaco y jaanin y ray; y sacan\u00f1a taeg\u00fcije y megae na generasion sija.\n61:7 Usaga gui menan Yuus para taejinecog: O, nalisto y g\u00fcinaeya yan y minagajet, para ufanadaje g\u00fce.\n61:8 Pot este jucantaye y naanmo para taejinecog, para jufatinas y prinimetijo cada jaane.\n62:1 Y antijo janananggaja si Yuus; sa guinin g\u00fciya nae mamaela y satbasionjo.\n62:2 G\u00fciyaja y achojo yan y satbasionjo, g\u00fciya y torejo taquilo: ya ti megae jumanacalamten.\n62:3 Asta ngaen nae intigong contra unoja taotao? todos jamyo infanmapuno; taeg\u00fcije y padet ni y cumba, yan taeg\u00fcije y matomba na colat.\n62:4 Manafaesenja gui entalo\u00f1ija na umayute papa gui ninasi\u00f1a\u00f1a: manmagof ni y dinague sija: manmanbendidise ni y pachot\u00f1ija, lao manmanmatdidise qui sumanjalom\u00f1ija.\n62:5 Si Yuus nanggajao, O antijo; sa guinin g\u00fciya y ninanggaco.\n62:6 G\u00fciyaja y achojo yan y satbasionjo; g\u00fciya y torejo taquilo, ya ti jumanacalamten.\n62:7 Gui as Yuus nae gaegue y satbasionjo yan y minalagjo; y acho y minetgotjo yan y guineg\u00fceco mangaegue gui as Yuus.\n62:8 Angoco gue todo y tiempo, jamyo ni y taotao sija; chuda y corasonmiyo gui mena\u00f1a: si Yuus y guineg\u00fce para jita. Sila.\n62:9 Seguro todo y taotao sija ni y umitde condisio\u00f1ija manjinaja; ya y managquilo condisio\u00f1ija, un dinague; yanguin manmapolo gui balansa, todos man\u00f1ajlalang\u00f1a qui y jinaja.\n62:10 Chamo umangongoco jao gui inamot, yan chamo na gagaebale y sinaque: yanguin y g\u00fcinaja manlalamegae; chamo pum\u00f3polo y corasonmo guiya sija.\n62:11 Guinin jasangan si Yuus un biaje; ya dos biaje jagasja jujungog este; na y ninasi\u00f1a iyon Yuus.\n62:12 Sa iyomoja locue Jeova y minaase: sa unapapaseja cada taotao jaftaemano y chechon\u00e2.\n63:1 O Yuus, jago y Yuusso; taftaf jualigao jao; y antijo majo pot jago, y catneco majalang nu jago, gui anglo an majo na tano, anae taya janom;\n63:2 Taeg\u00fcije juatan jao gui templo para julie y ninasi\u00f1amo yan y minlagmo.\n63:3 Sa y mauleg g\u00fcinaeyamo mauleg\u00f1a qui y lin\u00e2l\u00e2; y labiosso ualabajao.\n63:4 Taeg\u00fcine jubendise jao gui lin\u00e2l\u00e2jo; ya jujatsa julo y canaejo ni y naanmo.\n63:5 Y antijo ujaspog taeg\u00fcije y ujaspog ni y titanos an montica; ya y pachotjo ualabajao yan y minagof y labiosso.\n63:6 Yanguin jujaso jao gui jilo camajo; ya y jinasoco nu jago gui ora nae bumebelayo an puenge.\n63:7 Sa jago guinin umayudayo; enaomina y anineng y papamo nae jumagof.\n63:8 Y antijo dangculo na tinatitiye jao: y agapa na canaemo mumantieteneyo.\n63:9 Lao ayo sija y umaliligao y antijo, para umayulang, sija ufanjanao para y mas tadong na joyo gui tano.\n63:10 Ufanmaentrega gui jinilat y espada; sija ug\u00fcinaja para y sora sija.\n63:11 Lao y ray umagof gui as Yuus; ya todo y manmanjula pot g\u00fciya unfanmagof: sa y pachot ayo sija y manmandadague ufanmajuchom.\n64:1 JUNGOG y inagangjo, O Yuus, gui quejaco: adaje y lin\u00e2l\u00e2jo ni y minaa\u00f1ao\u00f1a ni y enemigo.\n64:2 Naatogyo gui secreto na pinagat y manaelaye; yan y inatborota ni y chumog\u00fce y taelaye.\n64:3 Ni y janafanmalagtos y jila\u00f1ija taeg\u00fcije y espada, yan janafanapunta y flecha\u00f1ija, ni manmalaet na sinangan.\n64:4 Para ujaflecha gui secreto y cabales; ya derepente manflecha g\u00fce, ya ti maa\u00f1ao.\n64:5 Janafanfitmeja sija gui na jinasuye taelaye: manmanafaesen para ujananaplinanta y laso; ya ileg\u00f1ija: Jaye ufanlinie?\n64:6 Manmanaliligao ni y tinaelaye; ileg\u00f1ija na tacumple guse y inaligaota: cada uno guiya sija manacjalom jinason\u00f1ija yan corason\u00f1ija manadong.\n64:7 Lao si Yuus flumecha sija, ya enseguidas ninafanlamen nu y flecha.\n64:8 Ya taeg\u00fcije ninafanmatompo; y jila\u00f1ija contra sija; ya todo y lumie sija ujayengyong y ilon\u00f1ija.\n64:9 Ya todo y taotao sija ufanmaa\u00f1ao; ya ujasangan y checho Yuus: sa ujaguesjaso y finatinas\u00f1a.\n64:10 Y manunas ufanmagof sija gui as Jeova, ya ujaangoco nu g\u00fciya; yan todo y manunas na corason, ufanmalag.\n65:1 Y tinina unanangga jao guiya Sion, O Yuus; iya jago nae umapase y promesa.\n65:2 O jago ni y jumungog y utinaetae, todo y catne ufanmato guiya jago.\n65:3 Jaganayo y tinaelaye sija; lao y isaomame, jago umasie.\n65:4 Dichoso y taotao ni y unayeg, ya unnaguaguato guiya jago, para usaga gui sagamo: manjaspogjam ni y minauleg y guimamo, asta y santos na lugat gui templomo.\n65:5 Pot y namaa\u00f1ao na g\u00fcinaja nae unopejam gui tininas; O Yuus y satbasionmame; jago y ninangga gui uttimon puntan tano todo, yan asta todo ayo sija y manlachago, ni y mangaegue gui jilo y tase.\n65:6 Ayo y pot ninasi\u00f1a\u00f1a japlanta seguro y egso, madudog ni y ninasi\u00f1a\u00f1a;\n65:7 Ni y janaquieto y pala\u00f1gpang y tase sija, y palangpang y napo\u00f1ija yan janafanbasta managuaguat y taotao sija.\n65:8 Ya ayo sija ni y ma\u00f1asaga gui uttimon tano, manmaa\u00f1ao ni se\u00f1atmo: unnamagof y jumuyong y egaan yan y pupuenge.\n65:9 Jago bumisita y tano yan unriega; unnagosrico; y sadog Yuus bula janom: unnafanmauleg y maies para sija yanguin esta unnalisto y tano taeg\u00fcije.\n65:10 Unnafangosbula janom y sutco\u00f1ija: unnafitme a puja\u00f1ija g\u00fcije; ya unnama\u00f1a\u00f1a ni y ichan; ya unbendise y siniso\u00f1ija.\n65:11 Uncorona y sacan sija ni y minaulegmo; ya y finaposmo manutujo y mantica.\n65:12 Manutujo gui jilo y pastaje sija gui desierto: ya y mandiquique na sabana madudog ni y minagof.\n65:13 Y pastaje sija manminagago ni y manadan g\u00e2g\u00e2; y baye sija locue mantinampe ni y maies; manesalao ni y minagof\u00f1ija, ya mangacanta locue.\n66:1 FATINAS y minagof na inagang gui as Yuus todo y tano.\n66:2 Canta y minagof gui naan\u00f1a: namalag y tinina\u00f1a.\n66:3 Alog as Yuus: jafa na man\u00e1maa\u00f1ao y chechomo: pot y dinangculon y ninasi\u00f1amo uninaseja y contrarionmo papa.\n66:4 Todo y tano umadodorajao yan macantatayejao: yan macantataye y naanmo. Sila.\n66:5 Maela ya inlie y checho Yuus: na nin\u00e1maa\u00f1ao y checho\u00f1a gui jilo y famaguon y taotao.\n66:6 Jatolaeca y tase y anglo na tano: ya japocacate y sadog: ya ayo nae manmagofjam nu g\u00fciya.\n66:7 G\u00fciya jagobiebietna ni y minetgot\u00f1a para taejinecog: y atadog\u00f1a pumupulan y nasion sija: ya munga y managuaguat na ujajatsa sija. Sila.\n66:8 Fanmanbendise ni y Yuusta jamyo ni y taotao ya namajungog y inagang y tinina\u00f1a:\n66:9 Ayo y mumantiene y antita gui lin\u00e2l\u00e2: ya ti japolo y adengta na usulong.\n66:10 Sa jago chumaguejam, O Yuus; jagasja unchague jam taeg\u00fcije y salape an machague.\n66:11 Jago chumulejam gui jalom y laso: unpolo chinatsaga na catga gui sinturanmame.\n66:12 Jago namaudae y taotao guijilomame: jame infaposg\u00fce y guafe an y janom: lao unchulejam asta y jalom y rico na sagayan.\n66:13 Jujalom gui jalom guimamo yan y sinenggue na inefrese sija: ya bae juapase jao ni y promesajo,\n66:14 Ni y labiosso sumangan, yan y pachotto jagas cumuentos anae estabayo gui chinatsaga.\n66:15 Bae junaejao sinenggue na inefrese ni y yemog yan paopao na tatneron quinilo: bae junaejao nobiyo yan chiba sija. Sila.\n66:16 Maela ya injingong, todo ayo y manma\u00f1ao as Yuus, ya bae jusangane jamyo jafa finatinas\u00f1a ni y antijo.\n66:17 Guajo juagang g\u00fce ni y pachotto: ya g\u00fciya umaalaba ni y jilajo.\n66:18 Yaguin jumantiene y tinaelaye gui corasonjo, si Jeova ti ujungogyo.\n66:19 Lao magajet na si Yuus jajungog: g\u00fciya umadaje y inagang y tinaetaejo.\n66:20 Bendito si Yuus, sa ti jabira y tinaetaejo ni y minaase\u00f1a guiya guajo.\n67:1 O Yuus, gaease ni jame ya unbendisejam: yan janafanmalag y mata\u00f1a gui jilomame. Sila.\n67:2 Para usi\u00f1a matungo y chalanmo gui jilo y tano yan y satbasionmo gui nasion todos:\n67:3 Polo y taotao ya umatuna jao, O Yuus: polo y taotao todo ya umatuna.\n67:4 O, polo y nasion sija ya ufanmagof yan ufanganta ni y minagof: sa jago siempre jumusga y taotao gui tininas yan ungobietna y nasion sija gui jilo y tano. Sila.\n67:5 Polo y taotao ya umatuna jao, O Yuus: polo y taotao todo ya umatuna.\n67:6 Ya y tano jagasja unajuyong megae tinegcha\u00f1a: ya si Yuus ni y Yuusta ubendisejit.\n67:7 Si Yuus ubendisejit: yan todo y uttimon y tano umaa\u00f1ao nu g\u00fciya.\n68:1 POLO si Yuus ya ucajulo, polo y enimigu\u00f1a ya ufanmachalapon: polo ayo sija y chumatlie g\u00fce ya ufanmalago gui mena\u00f1a.\n68:2 Taeg\u00fcije y manajanao y aso, taeg\u00fcijeja yute sija: taeg\u00fcije y maderite y danges gui menan guafe, taeg\u00fcijeja manmalingo\u00f1ija y manaelaye gui menan Yuus.\n68:3 Lao y manunas ufans\u00e9nmagof: ufansenalegre gui menan Yuus: magajet ya usendangculo y minagof\u00f1ija.\n68:4 Cantaye si Yuus, cantaye alabansa sija y naan\u00f1a: nacajulo y chalan para ayo na maudae y inanaco y desierto sija; y naan\u00f1a, si Yah ya fansenmagof gui mena\u00f1a.\n68:5 Tatan y manaetata ya y jues para y manbiuda, si Yuus gui sinantos na saga\u00f1a.\n68:6 Si Yuus munafa\u00f1aga y taeparientes gui familia sija: g\u00fciya chumule juyong preso para umegae: lao y managuaguat ma\u00f1agaja gui anglo na tano.\n68:7 O Yuus, mientras unjanao gui menan y taotao; mientras na unfamocat gui inanaco desierto. Sila.\n68:8 Y tano mayeyengyong, y langet locue manutujo gui menan Yuus: ayo iya Sinae mayengyong gui menan Yuus, ni si Yuus guiya Israel.\n68:9 Jago, O Yuus, tumago megae na uchan, yan jago munafitme y erensiamo na taotao anae yayas.\n68:10 Y inetnon taotaomo ma\u00f1aga g\u00fcije: jago, O Yuus, fumamauleg y minaulegmo para y mamoble.\n68:11 Si Jeova jananae ni finijo: yan mandangculo ayo na inetnon famalaoan ni y munamatungo:\n68:12 Ray sija y inetnon sendalo falago chadig: ya g\u00fciya palaoan ni y sumasaga iya sija mafacae y inamot na g\u00fcinaja.\n68:13 Yaguin manmalago jamyo dumescansa gui quelat quinilo; calang y papan y paluma nii platiao, yan y pilu\u00f1a nii amariyo calang oro.\n68:14 Anae ayo todo janasi\u00f1a manafanmachalapon y ray sija guiya g\u00fciya: taeg\u00fcije anae mamodong nieve guiya Salm\u00f3n.\n68:15 Y egso Yuus y egso Bas\u00e1n: y gostaquilo na ogso y egso Bas\u00e1n.\n68:16 Sa jafa na manaatanseg\u00fcet, jamyo nii manaquilo na osgo guato gui egso g\u00fcinaeyan Yuus para saga\u00f1a: magajet na si Jeova sumaga g\u00fcije para taejinecog.\n68:17 Y caretan Yuus y viente mil, junggan, miyares yan miyares ya si Jeova gui entalo\u00f1ija taeg\u00fcije iya Sinae, iya santos na saga\u00f1a.\n68:18 Jagasja jao cajulo iya jululo, jagas uncone y mamacautiba na megae: jagas unresibe ninae sija entre taotao sija: magajet entre y managuaguat locue, para si Jeova Yuus usi\u00f1a sumaga gui entalo\u00f1ija.\n68:19 Bendito si, Jeova nii todo y jaane jaencatga y catgata, junggan, ayo y Yuus y satbasionta. Sila.\n68:20 Si Yuus g\u00fciya si Yuus satbasion para jita: ya y jinanao guinin y finatae iyon Jeova, Se\u00f1ot.\n68:21 Lao si Yuus janafanlamen y ilon y enimigu\u00f1a yan y c\u00e1cagong y manmipe ayo y sisigueja gui isao\u00f1a.\n68:22 Ya si Jeova ileg\u00f1a: Bae chule talo guinin Bas\u00e1n, bae chule sija talo, guinin y t\u00e1dodong na tase.\n68:23 Ya y adengmo si\u00f1a umanaatunog gui j\u00e2g\u00e2 ya y jila y gamo galago si\u00f1a patten y enimigumo.\n68:24 Sija jalie y jinanaomo, O Yuus; magajet y jinanao y Yuusso, Rayjo gui sinantos na saga\u00f1a.\n68:25 Y mangacanta manjajanao gui menan, y mandadangdang yan y dandan\u00f1ija jatatituye; y entalo\u00f1ija y donseya sija ni y mandadangdang nii pandireta.\n68:26 Fanbendise si Yuus gui jalom y inetnon taotao; junggan, jamyo y tutujon\u00f1a guiya Israel.\n68:27 Ayonae estaba y diquique as Benjamin y magas\u00f1ija, y prinsipen Juda yan y compa\u00f1ia apapagat, y prinsipen Sabulon yan y prinsipen Neftali.\n68:28 Y Yuusmo tumago y minetgotmo; O Yuus, nametgot y chechomo para jame.\n68:29 Pot causa y templomo guiya Jerusalem, y ray sija manma\u00f1u\u00f1ule ninae sija para jago.\n68:30 Lalatde y dadao na g\u00e2g\u00e2 gui piao, y manadan nobiyo yan y tatneron gataotao, nii guinocha papa adeng\u00f1ija y pedason salape sija: jochalapon ayosija taotao nii manmalago manguera.\n68:31 Ufanmato y prinsipe sija guinin Egipto: Etiopia guse ujaestira y canae\u00f1a gui as Yuus.\n68:32 Cantaye si Yuus jamyo nii raenon tano; O canta tinina para y Se\u00f1ot. Sila.\n68:33 Para ayo y maudae gui jilo y langet y langet sija, nii guinin ampman na tiempo; estag\u00fce na g\u00fciya masangan nii inagang; nii gaeninasi\u00f1a na inagang.\n68:34 Sangan y minetgot Yuus: y minagas\u00f1a gaegue gui jilo Israel, yan y minetgot\u00f1a gaegue gui jalom y mapagages.\n68:35 O Yuus, ninamaa\u00f1aojao gui santos na sagamo sija: y Yuus Israel, g\u00fciya numae minetgot yan ninasi\u00f1a y taotao\u00f1a: Bendito si Yuus.\n69:1 NALIBREYO, O Yuus; sa y janom manjalom asta y antijo.\n69:2 Mag\u00f1oyo gui tadong na lu\u00f1o; anae ti si\u00f1ayo tumojgue: guajo mato y jalom tadong na janom anae y milag malofan gui jilojo.\n69:3 Yayasyo ni y inagangjo: y agagajo ninaanglo: y atadogco lin\u00e1lachae mientras junanangga si Yuusso.\n69:4 Ayosija y chumatliiyo pot taya, megae\u00f1a qui y gapotulo gui ilujo: ayosija y manmalago umututyo nii enemigujo sin jafa na linache, mangaeninasi\u00f1a: ayo nae guajo junatalo guato ayo y taya nae juchuleguan.\n69:5 O Yuus, jago tumungo y taetiningojo: yan y isaojo sija ti junaatog guiya jago.\n69:6 Chamo ayo sija y numananggajao munafanmamamajlao pot guajo, O Jeova, Yuus y inetnon sendalo: chamo ayo sija y umaliligaojao umadesonra pot guajo, O Yuus Israel.\n69:7 Sa pot jago jupadese y linalatde: minamajlao tumampe y matajo.\n69:8 Guinin manataotao juyong yo nii ma\u00f1elujo; yan taotao juyongyo gui famaguon nanajo.\n69:9 Sa y inigo y guimamo cumanoyo: ya y linalatde\u00f1ija y ayo sija nii lumalatde jao manbasnag guiya guajo.\n69:10 Anae tumangesyo ya junamajalang y antijo pot ti chumocho, este y para malalatdeco.\n69:11 Anae jufatinas y luto para magagujo, jumuyongyo un cuentos nu sija.\n69:12 Ya ayo y manmatatachong gui petta, manadingan contra guajo: ya guajo y cantasion\u00f1ija anae mangacanta y manbulacho.\n69:13 Lao guajoja, y tinaetaejo guiya jago, O Jeova, gui tiempon y finaboresemo: O Yuus, pot y minegae y minaasemo opeyo gui minagajet y satbasionmo.\n69:14 Nalibreyo gui li\u00f1o ya chajo mamag\u00f1o: polo ya ulibreyo g\u00fcije sija nii chumatliiyo, yan gui y tinadong y janom sija.\n69:15 Chamo pumopolo y minilalag na janom na ufalofan gui jilojo, ni unpolo y tinadong na upa\u00f1otyo; chamo pumopolo y joyo na ujuchom y pachot\u00f1a gui jilojo.\n69:16 Opeyo, O Jeova; sa y minaasemo gosmauleg: taemanoja y minegae y minaasemo, birajao guiya guajo.\n69:17 Chamo na aatog y matamo gui tentagomo; sa gaegue yo gui chinatsaga: opeyo guse.\n69:18 Najijot jao gui antijo ya unnalibre: rescatayo sa juguaja y enimigujo sija.\n69:19 Jago tumungo y malalatdeco, yan y minamajlaojo yan y madesonraco: y contrariojo mangaegue todo gui menamo.\n69:20 Y linalatde yumulang y corasonjo: yan bulayo y pinite: ya manaliligaoyo jaye upinite, lao taya ni uno: yan y numamagofyo lao ti jusoda ni uno.\n69:21 Sija numaeyo locue lalaet para nengcanojo: yan anae majoyo, sija numaeyo binagle para juguimen.\n69:22 Polo ya lamasa\u00f1ija mamalaso gui menan\u00f1ija: polo ya yaguin gaegue sija gui pas, este para ocodo.\n69:23 Polo ya ujomjom y atadog\u00f1ija para cha\u00f1ija fanmalilie; yan janayeyengyong nii sinturan\u00f1ija para todo y tiempo.\n69:24 Basija gui jilo\u00f1ija y binibumo, ya polo y dangculon linalalomo ya ufanjeniguif sija.\n69:25 Polo y saga\u00f1ija ya umayulang: yan taya ni uno si\u00f1a sumaga gui tienda\u00f1ija.\n69:26 Sa sija pumetsigue ayo sija y sinaolagmo: ya sija sumangan y pinitinja ni y ninafanlamenmo.\n69:27 Naye mas taelaye y tinaelaye\u00f1ija, ya chamo munafanjajalom gui tininasmo.\n69:28 Palo ya umafunas sija gui leblon lin\u00e2l\u00e2: ya munga manmatugue sija yan y manunas.\n69:29 Lao guajo pobleyo yan tristeyo: polo y satbasionmo, O Yuus, ya upoloyo guiya jululo.\n69:30 Guajo bae jualaba y naan Yuus nu y cantasion, ya junadangculo g\u00fce nu y inefresen grasias.\n69:31 Ya este munaguefmagof si Jeova mas qui y nobiyo, pat y toro nii mangaec\u00e1ngjilon yan papaquis.\n69:32 Y manmanso, jalie este ya ninafanmagof: ya y corasonmiyo ufanl\u00e2l\u00e2 y unaaliligao si Yuus.\n69:33 Sa si Jeova jajungog y mannesesitao ya ti jachatlie y prenesu\u00f1a sija.\n69:34 Polo y langet yan tano ya umaalaba g\u00fce, yan y tase sija yan todo y g\u00fcinaja nii mangalalamten gui sanjalom\u00f1a.\n69:35 Sa si Yuus ujasatba y Sion yan ujafatinas y siuda sija guiya Juda: para usi\u00f1a sija ma\u00f1aga g\u00fcije yan uguaja para y iyon\u00f1ija.\n69:36 Ya y semiya locue gui tentago\u00f1a uereda ni ayo: ya ayo sija y gumaeya y naan\u00f1a unafa\u00f1aga g\u00fcije.\n70:1 NACHADIG, O Yuus, para unalibreyo: nachadig umayudayo, O Yuus.\n70:2 Polo sija ya ufanmamajlao yan ufaninistotba ni y umaliligao y antijo: polo sija ya ufanalo tate yan ufanmamajlao ni y manmagof nii desonraco.\n70:3 Polo sija ya ufanalo tate para apas y minamajlao\u00f1ija ja ni y ileg\u00f1ija: Aha, Aha.\n70:4 Polo ayo todo y umaliligaojao ya unfanmagof yan ufansenmagof ni jago: ya polo ya ayo y gumaeya y satbasionmo ya ileleg\u00f1ija si\u00e9siempreja: Umanasendangculo si Yuus.\n70:5 Lao guajo pobleyo yan nesesitaoyo: nachadig jao guiya guajo, O Yuus: sa jago umayuyudayo, yan y munalibreyo; O Jeova, chamo umatrasasao.\n71:1 YYAJAGO, O Jeova, nae jupolo y inangococo: ya chajo mam\u00e1majlao para taejinecog.\n71:2 Nalibreyo, nii tininasmo ya rescatayo: naapo y talangamo guiya guajo ya unsatbayo.\n71:3 Jago y acho y saga para guajo, anae mafatoyo todo y tiempo: jago mannae tinago na jumasatbayo: sa jago y finitmeco yan y castiyujo.\n71:4 Rescatayo, O Yuusso, juyong gui canae y manaelaye yan y canae y ti manunas yan y manrecto na taotao.\n71:5 Sa jago y ninanggaco, O Jeova Yuus: jago y inangococo desde y pinatgonjo.\n71:6 Sa jago mumantieneyo desde y jalom tuyan, jago chumuleyo juyong guinin y tiyan nana: ya y tininajo todo y tiempo guiya jago.\n71:7 Guajo taeg\u00fcije y ninamanman gui linajyan; lao jago y megot na guineg\u00fceco.\n71:8 Y pachotto ubula nii tininamo, an y inenramo todot dia.\n71:9 Chamoyo yumuyute gui tiempo y inamcojo: yaguin minetgotto esta jocog chamoyo dumidingo.\n71:10 Sa y enimigujo manadingan contra guajo; yan ayo sija y numanangga y antijo, manafaesen entre sija.\n71:11 Yleg\u00f1ija: Diningog\u00fce as Yuus: petsigue ya enchileg\u00fce; sa taya para ulinibreg\u00fce.\n71:12 O Yuus, chamo chachago guiya guajo; Yuusso, nachadig yan para unayudayo.\n71:13 Polo sija ya ufanmamajlao yan ufanlinachae, ayo y contrarion y antijo; polo sija ya ufantinampe nii minamajlao yan y sinala, y umaliligao y da\u00f1ujo.\n71:14 Lao guajo juananangga todo y tiempo, yan junalala megae y tininajo guiya jago.\n71:15 Y pachotto usinangan y tininasmo, yan y satbasionmo todot dia: sa ti jutungo y minegae\u00f1a.\n71:16 Bae jufalag y minetgot gui as Yuus, Jeova; ya jusangan y tininasmo, magajet, iyomoja namaesa.\n71:17 O Yuus, jago jagasja fumanag\u00fce yo desde y pinatgonjo; yan asta pago jusangan claro nii ninamanman y chechomo.\n71:18 Pago locue anae estayo bijo ya chungeyo, O Yuus chamoyo dumidingo: asta que jusangan claro nii minetgotmo y manm\u00e1mamaela na generasion, yan y ninasi\u00f1amo cada uno ni ayo y ufanmato.\n71:19 Yan y tinasmo locue, O Yuus, sumentaquilo; jagasja unfatinas y mandangculo na g\u00fcinaja sija: O Yuus, jaye uparejumo?\n71:20 Sa jago y fumanuejam mandangculo na pinite yan chinatsaga, siempre unnal\u00e2l\u00e2jam talo, yan unchulejam talo julo guinin y tinadong y tano.\n71:21 Aumenta y dinangculoco; yan birajao ya unamamagofyo.\n71:22 Ya guajo locue bae jualaba jao yan y guitala: magajet, y minagajetmo, O Yuusso: yyajago nae jucantaye yan y atpa, O jagoja na Santos guiya Israel.\n71:23 Y labiosso sendangculo minagof\u00f1a anae jucantayejao tinina; yan y antijo ni jago munalilibre.\n71:24 Y jilajo locue jasasangan y tininasmo todot dia: sa innafanmamajlao yan innafaninestotba ayo y umaliligao y da\u00f1ujo.\n72:1 NAE y ray ni juisiomo, O Yuus, yan y tininasmo gui lajin y ray.\n72:2 Ya g\u00fciya ufanjusga y taotaomo gui tininas, yan y mamoblemo gui juisio.\n72:3 Ya y beca sija chumule y pas gui taotao yan y mandiquique na ogso sija pot y tininas.\n72:4 G\u00fciya ufanjusga y mamoble na taotao, g\u00fciya ufa\u00f1atba y famaguon y mannesesitao, yan ufanyinamag y manmachaleg.\n72:5 Sija ufanmaa\u00f1ao ni jago mientras gagaegue y atdao, yan y pilan gui todo y generasion yan y generasion.\n72:6 G\u00fciya tumunog papa taeg\u00fcije y ichan gui jilo y manmautot na chaguan: taeg\u00fcije minatmon janom ni y nafotgon y tano.\n72:7 Ya y jaani\u00f1a sija, mumamta y tininas; ya y pas sumenmegae asta qui jocog y pilan.\n72:8 G\u00fciya uguaja minagas\u00f1a locue guinin y tase asta y tase, yan guinin y sadog asta y uttimon y tano.\n72:9 Ya ayo y ma\u00f1asaga gui desierto, manecon gui mena\u00f1a; ya y enimigu\u00f1a sija mamanjojoflag gui eda.\n72:10 Y ray sija guiya Tarsis yan isla sija ufanma\u00f1u\u00f1ule ninae: yan y ray sija guiya Sab\u00e1 yan iya Seba ufanmannae ninae.\n72:11 Magajet, y ray todos ujatomba sija gui mena\u00f1a: yan y nasion todos usinetbe g\u00fce.\n72:12 Sa g\u00fciya unalibre y nesesitao an jumagang; yan ayo locue y peble an ni y taya uinayuda.\n72:13 G\u00fciya unafanma\u00f1otbla y mamoble yan y mannesesitao yan ujasatba y anten y mannesesitao.\n72:14 G\u00fciya unafanlibre y anti\u00f1ija guinin y chiniguit yan y finijom: yan ugagaebale y j\u00e2g\u00e2\u00f1ija gui menan atadog\u00f1a.\n72:15 Ya g\u00fciya lumala, ya para g\u00fciya umanae ni y oron Sab\u00e1; ya y tinayuyut locue mafatitinas pot g\u00fciya todo y tiempo; sa sija ufanbendise g\u00fce todot dia.\n72:16 Sa uguaja megae na maies gui jalom y eda gui sanjilo y puntan y beca sija; ya y tinegcha\u00f1a ufanmayengyong taeg\u00fcije y Libano.; ya sija gui siuda ninafangatbo taeg\u00fcije y chaguan gui eda.\n72:17 Y naan\u00f1a gagaegue para taejinecog: y naan\u00f1a sisigueja taeg\u00fcije y siniguen y atdao: yan todo y taotao ufandichoso guiya g\u00fciya; yan todo y nasion umafanaan g\u00fce dichoso.\n72:18 Bendito si Jeova Yuus, ni si Yuus Israel, sa g\u00fciyaja na maesa fumatinas y mannamanman na g\u00fcinaja.\n72:19 Yan bendito y minalag y naanmo para taejinecog: ya polo todo y tano ya ufanbula ni y minalagmo. Amen yan Amen.\n72:20 Magpo y tinayuyut David ni y lajin Isai.\n73:1 SENMAGAJET si Yuus na mauleg para Israel, ni ayo sija y mangasgas na corason.\n73:2 Ya guajo c\u00e1naja sumuja y adengjo; didideja tentenjan sulon y pinecatta.\n73:3 Sa jumalatgue y mangaduco, anae julie y minauleg y manaelaye.\n73:4 Sa taya pinite gui finatae\u00f1ija: lao y minetgot\u00f1ija fitme.\n73:5 Taya chinatsaga\u00f1ija taeg\u00fcije y otro taotao sija; ni ufanmasapet taeg\u00fcije y palo na taotao sija.\n73:6 Enaomina na sobetbia y cadena nii lisayon y cueyo\u00f1ija; y finijom tumampe sija taeg\u00fcije y magago.\n73:7 Y atadog\u00f1ija mamachom ni y yinemog; guaja\u00f1ija mas qui y corason si\u00f1a umalatgue.\n73:8 Sija manmanbotlelea, yan jasasangan chiniguit gui tinaelaye: jasasangan y mansentaquilo.\n73:9 Japolo y pachot\u00f1ija gui langet, yan y jila\u00f1ija janafanmamocat gui inanaco y tano.\n73:10 Enao mina y taotao\u00f1a manalo mague: yan y binilan y janom gui posuelo umafugo nu sija.\n73:11 Ya ileg\u00f1ija: Jaftaemano tungo\u00f1a si Yuus? Ada guaja tiningo gui Gueftaquilo?\n73:12 Sa estag\u00fce ya sija y manaelaye; ya sija manmegae gui tano, sa taya chinatsaga\u00f1ija todo y jaane.\n73:13 Senmagajet na taebale y junagasgas y corasonjo: yan jufagase y canaejo gui guinasgas.\n73:14 Sa todo y inanaco y jaane chatsagayo, yan y castigojo cada ogaan.\n73:15 Yaguin jagasja jualog, bae jusangan este; este na jagasja judague y generasion: y famaguonmo.\n73:16 Yaguin jujaso jaftaemano na jutungo este, sumenmacat para guajo;\n73:17 Asta que jujalom gui sinantos na sagayan gui as Yuus; ya jujaso y uttimo\u00f1ija.\n73:18 Magajet na jago pumolo sija gui palagse na sagayan; jago yumute sija papa gui jalom y yinilang.\n73:19 Sa jaftaemano na ufanyinilang, gui un rato! sija chadig malimachae ni y minaa\u00f1ao sija.\n73:20 Taeg\u00fcije g\u00fcinife an magmata; taeg\u00fcenaoja, O Se\u00f1ot, yaguin magmatajao, unchatlie y jechura\u00f1ija.\n73:21 Sa y corasonjo estaba triste, ya matogchayo gui sumanjalom.\n73:22 Na taeg\u00fcije taejinasoyo, yan taetiningoyo: taeg\u00fcijeyo y g\u00e2g\u00e2 gui menamo.\n73:23 Masqueseaja gagaegueyo siempre guiya jago; jago mumantiene y agapa na canaejo.\n73:24 Jago umesgaejonyo ni y consejumo, ya despues unresibeyo gui langet.\n73:25 Ya jayeyo guajayo gui langet sino jagoja? ya taya gui jilo y tano g\u00fcinaeyaco, na jagoja.\n73:26 Y catneco yan y corasonjo malachae: lao si Yuus y minetgot y corasonjo, yan y g\u00fcinajajo para taejinecog.\n73:27 Sa, estag\u00fce ya ayo sija y ma\u00f1ago guiya jago, na ufanmalingo: jago yumulang todo ayo sija y manjanao guiya jago para in\u00e1bale.\n73:28 Lao mauleg para guajo y juguaguato jijot gui as Yuus: sa jupolo y inangococo gui Se\u00f1ot Jeova, para usi\u00f1a jusangan todo y chechomo.\n74:1 O Yuus, sajafa na unyutejam para taejinecog? sajafa na y linalomo umasgon contra y quinilo sija gui pastajimo?\n74:2 Jaso y inetnonmo ni y unfajan gui ampmam na tiempo; y tribon y erensiamo, ni y jago sumatba; yan y egso Sion, anae sumasagajao.\n74:3 Jatsa y adengmo para taejinecog na yinilang: sa y enimigo jafatinas y tinaelaye todo gui jalom y sinantos na sagamo.\n74:4 Y contrariumo sija manaagang gui entalo y inetnonmo; ya japolo julo y bandera\u00f1ija para se\u00f1at sija.\n74:5 Parejo yan y taotao y jajatsa julo y gachae sija gui jilo y chemchom na trongco jayo sija.\n74:6 Lao pago sija yumute papa y binetda na chocho un biajeja, ni y gachae yan y mattiyo sija.\n74:7 Sa sija sumangg\u00fce y sinantos na sagamo, yan munainale y sagan y naanmo, sanpapa gui tano.\n74:8 Yleg\u00f1ija gui corason\u00f1ija: Nije tayulang sija ni manda\u00f1o: ya sija sumonggue todo y sinagogan Yuus gui tano.\n74:9 Ti talie y se\u00f1atta sija: ya taya ni uno profeta mas: ni uguaja sija ni utiningo asta ngaean.\n74:10 Asta ngaean, O Yuus, nae y contrario ulalatde? ya y enimigo ufa\u00f1atfino contra y naanmo para taejinecog?\n74:11 Sajafa na unjedo y canaemo, junggan y agapa na canaemo? jala juyong gui pechomo ya unyulang.\n74:12 Sa si Yuus y Rayjo gui ampmam na tiempo, jafatitinas y satbasion gui entalo y tano.\n74:13 Jago dumibide y tase ni y ninasi\u00f1amo: jago yumamag y ilon y alo sija gui tase.\n74:14 Jago yumamag y ilon lebiatan, ni y dadao na g\u00fcijan, an pidasito; yan unnae g\u00fce para nengcano y taotao ni y ma\u00f1asaga gui desierto.\n74:15 Jago bumaba y matan janom yan y minilalag: jago munafananglo y manmetgot na sadog sija.\n74:16 Y jaane iyomo, y puenge locue iyomo: jago fumamauleg y inina yan y atdao.\n74:17 Jago pumolo todo y oriyan y tano: jago fumatinas y tiempon maepe yan y tiempom manengjeng.\n74:18 Jaso este, na y enimigo manmalalatde, O Jeova, ya ayo y mangaduco na taotao jachatfino y naanmo.\n74:19 O, chamo umintrerega y anten y gamo paluma gui dadao na g\u00e2g\u00e2: chamo malelefa ni y dina\u00f1a y mamoblemo para taejinecog.\n74:20 Respeta y trato: sa y jemjom na sagayan sija gui tano manbula y sagan y manmalama\u00f1a.\n74:21 O, Chamo munafanatalo manmamajlao y manmachichiguit: polo y mamoble yan y mannesesitao ya umalalaba y naanmo.\n74:22 Cajulo, O Yuus, gog\u00fce y causamo: jaso jaftaemano y manaejinaso na taotao ni y lumalatdejao cada jaane.\n74:23 Chamo malelefa ni y inangang y contrariumo sija; y borucan ayo sija y mangajulo contra jago, lumala cajuloja siesiempre.\n75:1 YYAJAGO, O Yuus, innae grasia; iyajago innae grasia sa y naanmo esta jijot: sa y ninamanman na chechomo masasangan.\n75:2 Ngaean nae jusoda y tiempo na mamatca, bae jujusga ni y tinas.\n75:3 Y tano yan todo y ma\u00f1asaga mamalachae: guajo chumuchule julo y jaligui\u00f1a. Sila.\n75:4 Ya ileco ni y mansobetbio: Chamiyo fumatitinas y sinebetbio: yan ni y manaelaye, chamiyo jumajatsa julo y canggelon.\n75:5 Chamiyo jumajatsa y canggelonmiyo gui taquilo; chamiyo fanguecuentos ni y tiso na tongjo.\n75:6 Sa y jinatsa ni y ufato ni y guinin y sancatan, ni y guinin y sanlichan, ni y guinin y sajaya.\n75:7 Lao si Yuus y jues: g\u00fciya pumolo papa uno, yan jajatsa julo otro.\n75:8 Sa gaegue gui canae Jeova y copa, yan y bino ni lal\u00e1lalo; bula dina\u00f1a, ya jachuda juyong taeguijeja; lao y asiento gui fondo\u00f1a, todo y manaelaye gui tano jafufugo ya jaguiguimen sija.\n75:9 Lao guajo bae jusangan claro para taejinecog; ya bae jucantaye si Yuus Jacob, y alabansa sija.\n75:10 Todo y canggelon y manaelaye locue bae juutot: lao y canggelon y manunas umanafangajulo.\n76:1 MATUNGO si Yuus esta guiya Juda: y naan\u00f1a manadangculo guiya Israel.\n76:2 Yya Salem nae gaegue y tabetnacolu\u00f1a, ya y saga\u00f1a gaegue guiya Sion.\n76:3 Ayo nae jayamag sija y flechan y atcos; yan y patang yan y espada, yan y guera. Sila.\n76:4 Malagjao yan magas jao mas qui y tadong na jalomtano.\n76:5 Ya y manmajetog na corason manmayulang manafanaelaye; esta jamaego y minaego\u00f1ija; ya taya ni un taotao ni y gaeninasi\u00f1a jasoda y canae\u00f1ija.\n76:6 Pot y chinemamo, O Yuus Jacob, todo careta yan y cabayo manmayute gui minaego y finatae.\n76:7 Jago, junggan jago, para unamaa\u00f1ao: ya jaye si\u00f1a tumogue gui menamo yan lalalojao?\n76:8 Jago munamajungog y sentensia guinin y langet; ya y tano manmaa\u00f1ao, ya manmamatquilo.\n76:9 Anae si Yuus jacajulo gui juisio, para usatba todo y manmanso gui tano. Sila.\n76:10 Magajet na y binibon y taotao uinalabajao: yan y seblan y binibo, jago sumoma.\n76:11 Promete ya inapase si Jeova ni y Yuusmiyo: todo ayo y mangaegue gui oriya\u00f1a manma\u00f1u\u00f1ule ninae para g\u00fciya ni y namaa\u00f1ao.\n76:12 G\u00fciya munamautut y espiriton y prinsipe sija: sa g\u00fciya y namaa\u00f1ao para y ray sija gui tano.\n77:1 BAE juagang si Yuus ni y inagangjo; magajet na si Yuus ni y inagangjo; ya g\u00fciya jumungogyo.\n77:2 Y jaane y chinatsagaco jualigao y Se\u00f1ot: y canaejo maestira gui puenge ya pumapara: y antijo ti malago manamagof.\n77:3 Jujajaso, si Yuus ya janaestotbayo: umuugongyo, sa y espiritujo lalalango. Sila.\n77:4 Jago unadaje y atadogjo ni taemaego: sa taeg\u00fcije chatsagayo na ti si\u00f1ayo cumuentos.\n77:5 Sa guajo jujajaso y jaane ni y ampmam manmalofan, yan y sacan ni y ampmam na tiempo.\n77:6 Jujajaso y cantaco gui puenge: jujajaso ni y corasonjo; ya y espiritujo guine guefaligao?\n77:7 Ada uyute y Se\u00f1ot para taejinecog? ya ti utalo y finaboresi\u00f1a?\n77:8 Cao y minaase\u00f1a usenjanaoja para taejinecog? ya y promesa\u00f1a ufanlingo para taejinecog?\n77:9 Ya malefa si Yuus na uy\u00f3ase? ya pot y linalalo\u00f1a na jajuchom y g\u00fcinaeya\u00f1a? Sila.\n77:10 Ya guajo ileco: Este y dinafejo: lao bae jujaso y sacan sija gui agapa na canae y Gueftaquilo.\n77:11 Bae jusangan y checho Jeova: sa bae jujaso y ninamanmanmo gui ampmam na tiempo.\n77:12 Bae jujaso locue todo y chechomo, yan jusangan sumanjalomjo y finatinasmo.\n77:13 Y chalanmo, O Yuus, gague gui sinantos na sagayan: jaye dangculo na yuus calang y Yuusta?\n77:14 Jago y Yuus ni y fumatinas y mannamanman: jago munamatungo y minetgotmo gui taotao sija.\n77:15 Jago yan y canaemo munafanlibre y taotaomo; ni y famaguon Jacob yan Jos\u00e9. Sila.\n77:16 Y janom malie jao, O Yuus, y janom malie jao, ya sija ninafanmaa\u00f1ao: ya y tinadong locue ninafanmayengyong.\n77:17 Y mapagajes sija manma\u00f1u\u00f1uda janom: ya y langet mannae y inagang: ya y flechamo locue manjanao juyong.\n77:18 Ya y palampan y jilumo estaba gui remolino; ya y lamlam maniiina gui tano: ya y tano manmayengyong yan manlalaolao.\n77:19 Y chalanmo gui tase, ya y finaposmo gui mandangculo na janom, ya y guinachamo ti matungo.\n77:20 Jago umesgaejon y taotaomo taeg\u00fcije y manadang quinilo pot y canae Moises yan Aaron.\n78:1 ECUNGOG, O taotaojo, y tinagojo: na inecungog ni y talanganmo y sinangan y pachotto.\n78:2 Bae jubaba y pachotto gui acomparasion: bae jusangan sinangan na gui jemjom gui ampmam na tiempo.\n78:3 Ayosija ni y injingog yan y intingo, yan y tatanmame ni jasanganejam.\n78:4 Ti innafanatog sija guinin y famaguon\u00f1ija, masangangane y generasion ni y manmamamaela ni y tinina sija gui Se\u00f1ot, yan y minetgot\u00f1a yan y mannamanman na checho\u00f1a ni y jachog\u00fce.\n78:5 Sa g\u00fciya munacajulo y testimonio gui as Jacob, yan japolo tinago guiya Israel, ni y janatungo sija y famaguon\u00f1ija.\n78:6 Para ujatungo y generasion ni y manmamamaela, y famaguonja ni y fina\u00f1agon\u00f1ija; ni y ufangajulo ya ujasangane y famaguon\u00f1ija.\n78:7 Para usi\u00f1a japolo y ninangga\u00f1ija gui as Yuus, ya ti ufanmalefa ni y checho Yuus, lao jaadaje y tinago\u00f1a sija.\n78:8 Ya cha\u00f1ija fanaeg\u00fcig\u00fcije y tata\u00f1ija; un generasion ni managuaguat yan ti manmalago manmanosgue: y generasion ni y ti japolo y corason\u00f1ija gui tinas, yan ayo na espiritu\u00f1ija y ti manfitme gui as Yuus.\n78:9 Y famaguon Efraim, guaja atmas yan manma\u00f1ule y atcos sija, manalo tate gui jaanen y guera.\n78:10 Ti jaadaje y traton Yuus, ya ti manmalago na ufanmamocat gui tinago\u00f1a.\n78:11 Ya manmalefa ni y checho\u00f1a, yan y ninamanman\u00f1a ni y manfinanue sija.\n78:12 Namanman na g\u00fcinaja finatinas\u00f1a gui menan y tata\u00f1ija, gui tano Egipto, gui fangualuan Soan.\n78:13 Jadebide y tase ya janafanmalofan gui inanaco sija todo; yan janafa\u00f1aga y janom taeg\u00fcije y monton.\n78:14 Ya y jaane janafanenesgaegaejonja ni y mapagajes; yan todo puenge y fina\u00f1ila y guafe.\n78:15 Japanag y acho gue desierto, ya janae sija na ufanguinem taeg\u00fcije na jumuyong guinin y dangculon tinadong.\n78:16 Ya ma\u00f1ule minilalag locue guinin y acho, yan janafalalago y janom taeg\u00fcije y sadog.\n78:17 Lao trabia sisigueja mas isag\u00fceg\u00fce, ya manmanembeste contra Gueftaquilo gui desierto.\n78:18 Ya sija jatienta si Yuus gui corason\u00f1ija, yan mangagagao catne pot y g\u00fcinaeya\u00f1ija.\n78:19 Magajet na sija manguentos contra si Yuus; ileg\u00f1ija: Ada si\u00f1a si Yuus jafamaulequejit lamasa gui desierto?\n78:20 Sa, estag\u00fce, na anae japanag y acho, manjuyong y janom, ya y minilalag manmachuchuda. Ada si\u00f1a g\u00fce manae pan locue? umafamauleg catne para y taotao\u00f1a?\n78:21 Enao mina anae jajungog este, y Se\u00f1ot ninabubo: ya umasonggue y guafe contra as Jacob, yan y linalalo locue cajulo contra Israel;\n78:22 Sa ti jajonggue si Yuus, yan ti jaangoco sija gui satbasion\u00f1a.\n78:23 Lao g\u00fciya tumago y mapagajes guinin y sanjilo; yan jababa y pettan langet.\n78:24 Yan janauchan papa y mana gui jilo\u00f1ija para ujacano, yan janae sija ni y maies y langet.\n78:25 Y taotao cumano y na y manmetgot: g\u00fciya numae sija catne para ufanjaspog.\n78:26 Jatago y manglo sancatan na ufanguaefe gui jalom y langet: yan pot y ninasi\u00f1a\u00f1a jachachalane y manglo sanjaya.\n78:27 Janauchan catne locue gui jilo\u00f1ija taeg\u00fcije y petbos; yan y pajaro ni gaepapa taeg\u00fcije inae gui tase;\n78:28 Ya japolo ayo sija na ufanbasnag gui entalo y campo\u00f1ija, ya gui oriyan y saga\u00f1ija.\n78:29 Ya sija jacano, ya mangosjaspog sija; sa g\u00fciya numae sija ni y tinanga\u00f1i\u00f1ija.\n78:30 Lao ti janajanao guiya sija y tinanga\u00f1ija; lao estabaja trabia y catne\u00f1ija gui jalom y pachot\u00f1ija,\n78:31 Ya y binibon Yuus mato gui jilo\u00f1ija, ya japuno y mas manyomog guiya sija, yan jayute papa y patgon na taotao sija guiya Israel.\n78:32 Lao contodo este, sigueja di maaiisao trabia: yan ti majonggue y mamnamanman na chocho\u00f1a.\n78:33 Ya pot este na y jaane\u00f1ija janafanlinachae ni y banid\u00e1; yan y sacan\u00f1ija gui minaa\u00f1ao.\n78:34 Ya anae japuno sija, ayo nae manafaesen pot g\u00fciya yan jabira sija ya maaligao guse si Yuus.\n78:35 Yan jajaso na si Yuus y acho\u00f1ija, yan y Gueftaquilo na Yuus y Satbadot\u00f1ija.\n78:36 Achogja ujafaande g\u00fce ni y pachot\u00f1ija yan ujadague ni y jila\u00f1ija.\n78:37 Sa y corason\u00f1ija ti tunas guiya g\u00fciya: ni ufanfitme gui tratu\u00f1a.\n78:38 Lao g\u00fciya, bula minaase jaasie ni y tinaelaye\u00f1ija, yan ti jayuyulang sija: magajet, megae na tiempo nae jabira y linalalo\u00f1a, yan ti jajatsa julo y binibu\u00f1a.\n78:39 Sa jajaso na sija catneja; y manglo na malofan ya mapos ya ti mamaela talo.\n78:40 Cuanto biaje manmanembeste contra g\u00fciya gui jalomtano yan manatriste g\u00fce gui desierto!\n78:41 Ya manalo tate ya matienta si Yuus; ya macase y Santosg\u00fce guiya Israel.\n78:42 Ya ti jajaso y canae\u00f1a; ni jaane anae ninafanlibre gui contrario.\n78:43 Ni y pinelo\u00f1a na se\u00f1at\u00f1a guiya Egipto: yan y ninamanman\u00f1a gui fangualuan Soan:\n78:44 Yan jatulaeca y Sadog janaj\u00e2g\u00e2; yan y minilalag para cha\u00f1ija fanguiguimen.\n78:45 Janae megae na lalo para ufanquinano; yan rana sija para ufanyinilang.\n78:46 Janae y ilo oruga ni y aumentan tano; ya y finachocho\u00f1ija y apacha.\n78:47 Jayulang y fangualuan\u00f1ija ubas ni y ichan grano; yan y trongco igos sija ni y hielo.\n78:48 Japolo y ga\u00f1ija g\u00e2g\u00e2 locue gui papa y ichan grano, ya y manadan ga\u00f1ija gui minaepen lamlam.\n78:49 Jayute gui jilo\u00f1ija y fijom na binibu\u00f1a; binibo, linalalo, yan chinatsaga; y manadan manaelaye na angjet sija.\n78:50 Mamatinas chalan para y linalalo\u00f1a; ya ti jachoma y anti\u00f1ija guinin y finatae, lao japolo y lin\u00e2l\u00e2\u00f1ija gui peste.\n78:51 Ya japuno todo y finenena na fina\u00f1agon guiya Egipto, y mas magas naminetgot\u00f1ija gui jalom y tiendan Cam!\n78:52 Lao chalane juyong y taotao\u00f1a taeg\u00fcije y quinilo sija, yan jaesgagaejon sija gui desierto taeg\u00fcije y manadan, g\u00e2g\u00e2.\n78:53 Ya jachule sija gui seguro, ya sija ti manmaa\u00f1ao: lao y tase tumampe y enimigo\u00f1ija.\n78:54 Ya jacone sija asta y oriyan y sinantos na saga\u00f1a, g\u00fcineja na ogso ni y guinanan y agapa na canae\u00f1a.\n78:55 Jayute juyong y nasion locue gui mena\u00f1ija, yan jafacae guiya sija y erensia\u00f1ija ya jaraya, ya janafa\u00f1aga y tribon Israel gui jalom y tienda\u00f1ija.\n78:56 Lao sija trabia jatietentaja, yan manmanembebesteja contra y Gueftaquilo na Yuus, yan ti jaadaje y tinago\u00f1a.\n78:57 Lao manalo tate, yan manmafatinas dinague taeg\u00fcije y tata\u00f1ija: ya manmabira sija gui un banda taeg\u00fcije y dacon na atco.\n78:58 Sa macase g\u00fce ya mannalalalo pot y saga\u00f1ija ni taquilo ya masuog g\u00fce ya manafanugo ni y image\u00f1ija ni tinaga.\n78:59 Anae jajungog este si Yuus, ninabubo, yan jagoschatlie iya Israel.\n78:60 Ya pot ayo na jadingo y tabetnaculo guiya Silo, yan y tienda ni y japolo gui entalo taotao sija.\n78:61 Ya janae ni y minetgot\u00f1a y cautibo, ya y minalag\u00f1a gui canae y contrario.\n78:62 Janae y espada ni y taotao\u00f1a: yan ninabubo ni y erensia\u00f1a.\n78:63 Linachae ni y guafe y manpatgon na lalaje; ya y manpatgon na famalaoan taya cantan umasagua.\n78:64 Ya y mamale\u00f1ija manmodong gui espada; ya y manbiuda sija ti ninafantriste.\n78:65 Ya y Se\u00f1ot magmata taeg\u00fcije y uno ni y guinin mamaego, yan taeg\u00fcije y matat\u00f1ga na taotao ni y ninaaagang pot rason di y bino.\n78:66 Ya japuno y enimigu\u00f1a sija ni y ma\u00f1asaga gui santate: yan japolo sija g\u00fci taejinecog na minamajlao.\n78:67 Ademas jarechasa y tabetnaculo gui as Jos\u00e9, ya ti jaayeg y tribon Efraim.\n78:68 Lao jaayeg tribon Juda, ayo ogso Sion ni y g\u00fcinaeya\u00f1a.\n78:69 Ya jafatinas y sinantos na saga\u00f1a taeg\u00fcije y manaquilo na sagayan sija, taeg\u00fcije y tano na japlanta para taejinecog.\n78:70 Jaayeg si David locue na tentago\u00f1a, yan jacone g\u00fce guinin y quelat y quinilo,\n78:71 Chinile g\u00fce ni guinin jatatitiye y manmanago na quinilo ya jacone para unafa\u00f1ocho y taotao\u00f1a gui as Jacob yan y erensia\u00f1a guiya Israel.\n78:72 Ya taeg\u00fcije janafa\u00f1ocho sija segun y tininas y corason\u00f1a; yan jaesgaejon sija pot y tiningon y canae\u00f1a.\n79:1 O Yuus, y nasion ni ti manjonggue manmato ya manjalom gui erensiamo: ya manataelaye y santos na templomo; ya mayulang ya mapolo y Jerusalem pot mont\u00f3n sija.\n79:2 Ya y tataotao y manmatae na tentagomo manmanae na\u00f1ija y pajaro gui langet: ya y catnen y ma\u00f1antosmo y g\u00e2g\u00e2 gui tano.\n79:3 Y j\u00e2g\u00e2\u00f1ija manmachuda taeg\u00fcije y janom, gui oriyan Jerusalem; sa taya jaye ufanjinafog.\n79:4 Manafanmamamajlaojam ni y tiguangmame: manmamofeajam yan manmabotleajam ni y ma\u00f1asaga gui oriyanmame.\n79:5 Asta ngaean, O Se\u00f1ot, unlalalo para taejinecog? ya y inigomo sinenggue taeg\u00fcije y guafe?\n79:6 Chuda juyong y binibumo gui jilo y nasion ni y ti tumungojao, yan y jilo y raeno sija ni y ti umaagan y naanmo.\n79:7 Sa sija lumachae si Jacob, yan jayulang y saga\u00f1ija.\n79:8 Chamo jumajaso contra jame y tinaelayen y tatamname: Polo y minauleg minaasemo ya uchadig insedajam; sa manafangostagpapjamam.\n79:9 Ayudajam, O Yuus, gui satbasionmame pot y minalag y naanmo; yan nafanlibrejam, yan fagase y isaomame pot y naanmo.\n79:10 Sa jafa ileg\u00f1ija y nasion ni ti manmanjonggue: Mangue y Yuus\u00f1ija? Polo y inemog y j\u00e2g\u00e2 y tentagomo sija ni y manmachuda ya umatungo ni y nasion ni ti manmanjonggue, gui menan y matanmame.\n79:11 Polo ya y inigon y manmapreso mato gui menamo; segun y dinangculo y ninasi\u00f1amo adaje ayo sija y esta manmatancho para ufanmatae.\n79:12 Ya apase gui tiguangmame siete mas gui jalom y pecho\u00f1ija, y linalatde\u00f1ija, sa sija lumalatdejao, O Se\u00f1ot.\n79:13 Ayo nae jame y taotaomo yan y quinilo gui pastajimo, bae inalaba jao para taejinecog; ya infanmamanue ni y alabansamo para todo y generasion.\n80:1 ECUNGOG, O Pastot guiya Israel, jago ni y umesgagaejon si Jos\u00e9 taeg\u00fcije y manadan quinilo; jago ni y sumasaga gui entalo y querubin sija manina mona.\n80:2 Y menan Efraim, yan Benjamin, yan Manases, nacajulo y minatatngamo, ya maelajao para usatbajam.\n80:3 Birajam talo, O Yuus; ya nafanina y matamo ya infansatbo.\n80:4 O Jeova, Yuus y inetnon sendalo, asta ngaean unl\u00e1lalaloja contra y tinayuyut y taotaomo?\n80:5 Unafa\u00f1ochocho sija ni y pan lago; yan unnae sija ni y lago para ujaguinem gui dangculo na medida.\n80:6 Unnafanmumojam yan y tiguangmame: yan y enimigonmame manmachachatgue jam gui entalo\u00f1ija.\n80:7 Birajam talo, O Yuus y inetnon sendalo, ya nafanina y matamo; ya infansatbo.\n80:8 Jago chumule juyong y trongcon ubas guiya Egipto: ya jagasja unyute juyong y nasion, ya untanme g\u00fce.\n80:9 Jago fumamauleg y saga gui mena\u00f1a, ya g\u00fciya y natadodong y jale\u00f1a, yan nabula y tano.\n80:10 Ya sabana sija mantinampe ni y anineng\u00f1a, yan y ramas\u00f1a taeg\u00fcije y sedro Yuus na trongcon jayo.\n80:11 Jatago juyong y ramas\u00f1a gui tase; yan y manlodo na siniso gui sadog.\n80:12 Sa jafa unjulog papa y quelat\u00f1a: ya todo y manmalolofan gui chalan matitife g\u00fce?\n80:13 Y balaco guinin y jalomtano machuchule ya may\u00fayulang, yan y manmachaleg na g\u00e2g\u00e2 gui fangualuan cumacano.\n80:14 Birajao talo, O Yuus inentnon sendalo, ingagagao jao: ya talag papa guinin y langet ya unlie yan unbisita este na trongcon ubas,\n80:15 Ya y fangualuan ni y tinanom y agapa na canaemo, yan y ramas ni jago munafitme para jagoja namaesa,\n80:16 Masinenggue ni y guafe, ya mautut papa esta; ya manmalingo pot y chinema gui menamo.\n80:17 Polo y canaemo gui jilo y taotao gui agapa na canaemo, gui jilo y lajin y taotao ni unnametgot para jago.\n80:18 Ayo nae ti infanalo tate guinin jago: nafanl\u00e2l\u00e2jam ya bae inagang y naanmo.\n80:19 Birajam talo, O Jeova, Yuus y inetnon sendalo, ya nafanina y matamo; ya infansatbo.\n81:1 FANGANTA agang gui as Yuus ni y minetgotta: fatinas y magof na boruca gui as Yuus Jacob.\n81:2 Entona y salmo, yan chule mague y pandireta; yan y magof na atpa yan y guitala.\n81:3 Guaefe y trompeta gui tiempo y nuebo na pulan, gui tiempon gualafon na pulan, gui jaanen y guipot magas.\n81:4 Sa este lay guiya Israel: yan y tinago Yuus Jacob.\n81:5 Jafatinas este as Jos\u00e9 para untestimonio anae jumanao juyong gui inanaco y tano Egipto: anae jujungog y finijo na ti si\u00f1a jutungo.\n81:6 Janajanao y apaga\u00f1a guinin y catga: yan y canae\u00f1a manalibre guinin y lauya.\n81:7 Jago umaagan gui chinatsaga, ya guajo munalibrejao: guajo umopejao gui umatog na sagayan julo: ya juchaguejao gui oriyan janom guiya Meriba. Sila.\n81:8 Jungog, O taotaojo, ya guajo junae jao testimonio, O Israel, yaguin malagojao unecungogyo!\n81:9 Munga otro yuus, guiya jago; ni unadora otro yuus.\n81:10 Sa guajo y Jeova Yuusmo, ni y chumule jao juyong gui tano Egipto: baba y pachotmo, ya bae nabula.\n81:11 Lao y taotaojo ti jajungog y inagangjo; ya iya Israel ti malago ni guajo.\n81:12 Ayo nae jupolo sija ya jumanao ni y minajetog y corason\u00f1ija: para ufanmamomocat ni y pinagat\u00f1ija.\n81:13 O yaguin y taotaojo majungog yo, ya iya Israel manmamocat gui chalanjo!\n81:14 Si\u00f1a guse juchoma y enimigo\u00f1ija, ya jubira y canaejo contra y contrario\u00f1ija.\n81:15 Ya y umanmachatlie ni y Jeova, mojon mansujeto sija guiya g\u00fciya: y tiempo\u00f1ija usaga para taejinecog.\n81:16 G\u00fciya unafa\u00f1ocho sija locue ni y mas mauleg na trigo: yan y miet ni jumujuyong gui acho anae junajaspog jao.\n82:1 SI Yuus tumotojgue gui inetnon Yuus; ya jajusga gui entalo yuus sija.\n82:2 Asta ngaean nae unjusga ti tunas, yan unresibe y taotao sija ni y manaelaye? Sila.\n82:3 Jusga y mamoble yan y manaesaena: ya nafanunas y manpinite yan y mannesesitao.\n82:4 Rescata mamoble yan y mannesesitao: nafanlibre sija gui canae y manaelaye.\n82:5 Sa ti jatungo ni ujaquetungo: manmamomocatja gui jalom jomjom: ya todo y plinantan tano manalamten.\n82:6 Guajo ileco: Jamyo yuus; yan todo jamyo y famaguon y Gueftaquilo.\n82:7 Lao infanmataeja taeg\u00fcije y taotao sija, yan infanbasnag taeg\u00fcije y uno gui prinsipe sija.\n82:8 Cajulo, O Yuus, jusga y tano: sa jago umerensia todo y nasion.\n83:1 CHAMO famatquiquilo, O Yuus: ya chamo tiumaagan yan chamo quequeto, O Yuus.\n83:2 Sa, estag\u00fce, enimigumo na manpalalangpang: yan ayo sija y chumatlie jao jajatsa y ilo\u00f1ija.\n83:3 Sa manpinagat ni y dinague consejo contra y taotaomo, yan manafaesen entre sija contra y ninafanatogmo.\n83:4 Sa guinin ileg\u00f1ija: Maela, ya nije tautut sija ni y guinin y nasion; para y naan Israel munga majaso mas.\n83:5 Sa sija manafaesen entre sija ni y unoja corason; ya managog\u00fce contra jago.\n83:6 Y tiendan Edom yan Ismaelita sija: Moab yan Agareno sija.\n83:7 Gebal yan Ammon yan Amaleg; Filistia yan y ma\u00f1asaga guiya Tiro.\n83:8 Asur locue manda\u00f1a yan sija: sa maninayuda ni y famaguon Lot. Sila.\n83:9 Fatinas guiya sija taeg\u00fcije unfatinas iya Madian yan taeg\u00fcije iya Sisara taeg\u00fcije iya Jabin jijot gui sadog Sison:\n83:10 Ni y manmalingo guiya Endor: manjuyong manaeg\u00fcije y estiecot para y tano.\n83:11 Fatinas y magas\u00f1ija ya parejo yan Oreb yan Seeb; magajet na todo y prinsipe\u00f1ija parejo yan Sebah yan Salmuna:\n83:12 Ni y ileg\u00f1ija: Nije jitaja tachule y sagayan para iyotaja.\n83:13 O Yuusso, fatinas sija ya ufanparejo yan y petbos ni y remol\u00edlino; parejo yan y ngasan trigo gui menan y manglo;\n83:14 Taeg\u00fcije y guafe anae jasonggue y jalomtano, yan taeg\u00fcije y ma\u00f1ila anae finali\u00f1ag\u00fce y sabana.\n83:15 Taeg\u00fcijija petsigue sija ni y pagyomo, yan nafanmaa\u00f1ao sija ni y dangculon pinagyomo.\n83:16 Nabula y mata\u00f1ija ni y dinesonra: para sija ujaaligao y naanmo, O Jeova.\n83:17 Polo sija ya ufanmamajlao yan ufanmaa\u00f1ao para taejinecog: magajet na sija ufandesonrao, ya ufanmalingo.\n83:18 Para ujatungo na jagoja y naanmo si Jeova, na jagoja y Gueftaquilo gui jilo todo y tano.\n84:1 NAG\u00dcINAEYAYON y sagamo, O Se\u00f1ot y inetnon sendalo!\n84:2 Y antijo tumatanga, magajet na asta ninamalango pot y sagan y Jeova: y corasonjo yan y catneco agagange y l\u00e2l\u00e2l\u00e2 na Yuus.\n84:3 Magajet y gorri\u00f3n ma\u00f1oda guma\u00f1a, yan y golondrina chenchon\u00f1a para g\u00fciya, anae si\u00f1a mapolo y famaguon\u00f1a, esta y jalom y attatmo, O Se\u00f1ot y inetnon sendalo, Rayjo yan Yuusso.\n84:4 Mandichoso ayo sija y ma\u00f1asaga gui jalom y guimamo; sa sigueja di malabajao:\n84:5 Dichoso y taotao ni y minetgot\u00f1a gaegue guiya jago: yan y chalan para jago gaegue gui corason\u00f1a.\n84:6 Ni y anae janafanmalofan gui inanaco bayen tinangis jafatinase tupo sija; ya y taftaf na ichan locue tinampe ni y bendision.\n84:7 Manjanao guinin y manasi\u00f1a minetgot asta y otro minetgot cada uno guiya sija manmalie gui menan Yuus guiya Sion.\n84:8 O Jeova, Yuus y inetnon sendalo, jungog y tinayuyutto: ecungog, O Yuus Jacob. Sila.\n84:9 Lie, O Yuus, patangmame: ya atan y matan y pinalaemo.\n84:10 Sa y un jaane gui sagamo mas mauleg qui un mit. Ga\u00f1acoja na jupottero gui guima y Yuusso, qui jusaga gui jalom y sagan y manaelaye.\n84:11 Sa y Jeova Yuus, g\u00fciya y atdao yan y patang: si Jeova unfannae grasia yan minalag: ti jachoma y manmauleg na g\u00fcinaja ni y mammamomocat gui tininas.\n84:12 O Se\u00f1ot y inetnon sendalo, dichoso y taotao ni y umangoco g\u00fce guiya jago.\n85:1 JEOVA, jago guinin ninamagof jao ni y tanomo: sa unnafanalo mague y manmacautiba sija gui as Jacob.\n85:2 Jago guinin umasie y tinaelayen y taotaomo: yan untampe todo y isao\u00f1ija. Sila.\n85:3 Guinin unnajanao todo y binibumo: ya unbirajao talo guinin y finijom y binibumo.\n85:4 Birajam, O Yuus, gui satbasionmame, yan nabasta y binibumo guiya jame.\n85:5 Ada unlalalaloja nu jame para taejinecog? Ada unnajujuyong y lin\u00e2l\u00e2lomo para todo y generasion?\n85:6 Ada ti unnal\u00e2l\u00e2jam talo: para y taotaomo ufanmagof ni jago?\n85:7 Fanuejam ni y minaasemo, O Jeova, ya unnaejam ni y satbasionmo.\n85:8 Guajo jujungog jafa usangan si Yuus Jeova: sa g\u00fciya usangan y pas gui taotao\u00f1a, yan y ma\u00f1antos sija: lao cha\u00f1ija natalo guato gui binaba.\n85:9 Magajet na y satbasion\u00f1a esta jijot g\u00fcije sija ni manmaa\u00f1ao nu g\u00fciya: para y minalag usaga gui tanomame.\n85:10 Minaase yan minagajet man\u00e1soda ya manda\u00f1a: y tininas yan y pas manachico.\n85:11 Y minagajet lacho julo gui tano; yan y tininas jaatan papa guinin y langet.\n85:12 Magajet na si Jeova numae ni y minauleg: ya y tanota manae minegae\u00f1a.\n85:13 Tininas jumajanao gui mena\u00f1a; yan japolo y pinecat\u00f1a y chalan para ufamocat.\n86:1 NAEGUENG papa y talangamo, O Jeova, ya unopeyo: sa pobleyo yan nesesitaoyo.\n86:2 Adaje y antijo; sa debotoyo: O jago ni y Yuusso, nalibre y tentagomo sa jaangoco gue guiya jago.\n86:3 Gaease nu guajo, O Jeova: sa juaagang jao todot dia.\n86:4 Namagof y anten y tentagomo; sa iya jago, O Jeova, nae jujatsa julo y antijo.\n86:5 Sa jago, Jeova, y mauleg yan y chadig manasie; yan dangculo y minaasemo g\u00fcije todo gui umaagangjao.\n86:6 Jungog, O Se\u00f1ot y tinayuyutto: yan ecungog y inagang y guinagagaojo.\n86:7 Sa y jaanen y chinatsagaco juagangjao: ya jago y unopeyo.\n86:8 Sa y entalo y yuus sija, taya taeg\u00fcenao iya jago, O Jeova; ni jafa na chocho parejo yan y chechomo.\n86:9 Todo y nasion sija ni y finatinasmo, manmato y manmanadora gui menamo, O Jeova; yan ufanalaba y naanmo.\n86:10 Sa jago dangculojao yan unfatitinas y manmaman na g\u00fcinaja: jagoja na maesa Yuus.\n86:11 Fanag\u00fceyo ni y chalanmo, O Se\u00f1ot: ya bae jufamocat gui minagajetmo: ya naetnon y jinason corasonjo para umaa\u00f1ao ni y naanmo.\n86:12 Sa bae jualaba jao, O Jeova, Yuusso, contodo y corasonjo: yan junamalag y naanmo para taejinecog.\n86:13 Sa sendangculo y minaasemo para guajo; sa guinin unnalibre y antijo guinin iya papapa guiya sasalaguan.\n86:14 O Yuus, y mansobetbio mangajulo contra guajo, yan y inetnon y managuaguat na taotao jagasja maaliligao y antijo: yan ti mapolo jao gui mena\u00f1ija.\n86:15 Lao jago, O Jeova, si Yuus jao ni y bila minaase yan cari\u00f1oso, \u00f1ateng para binibo yan dangculo na minaase yan minagajet.\n86:16 O birajao, guiya guajo ya gaease nu guajo: nae ni y minetgotmo y tentagomo, yan nalibre y lajin y tentagomo palaoan.\n86:17 Fanueyo ni y se\u00f1at para y mauleg: para ujalie ayo sija y chumatliiyo ya ufanmamajlao: sa jago, Jeova, y umayudayo yan cumonsuelayo.\n87:1 YPLINANTA\u00d1A gaegue gui santos na ogso.\n87:2 Jaguaeya\u00f1a si Jeova y trangca Sion mas que todo y saga sija gui as Jacob.\n87:3 Manmalag na g\u00fcinaja y manmasasangan guiya jago, O siuda Yuus. Sila.\n87:4 Guajo bae jusangan ni y Rahab yan Babilonia gui entalo ayo sija ni y tumunogyo: Sa, estag\u00fce, Palestina yan Tiro yan Etiopia: este na taotao mafa\u00f1agon g\u00fcije.\n87:5 Yan iya Sion ualog: Este yan ayo na taotao mafa\u00f1agon iya g\u00fciya: yan y Gueftaquilo namaesa unafitmeg\u00fce.\n87:6 Si Jeovaja tumufong anae jatugue sija y taotao, na esta na taotao mafa\u00f1agon g\u00fcije. Sila.\n87:7 Parejo y mangacanta yan y madadandan ufangaegue g\u00fcije: ya todo y beb\u00f4co gaegue guiya jago. Sila.\n88:1 O Jeova, Yuus satbasionjo, g\u00fcajo guinin umaagan jaane yan puenge gui menamo:\n88:2 Polo y tinayuyutto ya ufato gui menamo: naegueng y talangamo gui inagangjo.\n88:3 Sa y antijo bula chinatsaga sija: ya y lin\u00e2l\u00e2jo esta jijot gui para y naftan.\n88:4 Estayo matufong yan ayo sija y manjajanao papa gui joyo: sa taeg\u00fcije yo y taotao ni y taya ayuda\u00f1a.\n88:5 Mayute esta gui entalo y manmatae, taeg\u00fcije y manmapuno ni y manaason jalom y naftan; ni y ti unjajaso mas: ni y manmautut guinin y canaemo.\n88:6 Jago pumoloyo guiya papapa na joyo, gui jalom jomjom na lugat gui jalom y tinadong.\n88:7 Y binibumo sumasaga macat guiya g\u00fcajo, ya unachatsagayo nu y todo napomo. Sila.\n88:8 Jago munafanjanao lachago y manatungojo guiya guajo; unpoloyo na jumachatlie nu sija: mapongleyo ya ti si\u00f1ayo manajanao.\n88:9 Y atadogjo ninalachae pot y pinitijo: ya juagangjajao, O Jeova, cada jaane, jujuto juyong y canaejo guiya jago.\n88:10 Ada unnamalie y ninamanman gui manmatae? Si\u00f1a y manmatae mangajulo ya unmaalaba? Sila.\n88:11 Si\u00f1a y minauleg g\u00fcinaeyamo masangan gui jalom y naftan? pat y minagajetmo gui yinilang?\n88:12 Si\u00f1a y ninamanmanmo matungo gui jalom jomjom? yan y tininasmo gui jalom tano ni y manmalefa?\n88:13 Lao guajo iya jago, O Jeova, umaagangyo: yan ogaan tinayuyutto ufato gui menamo.\n88:14 Sajafa, O Jeova, na unyute y antijo? Sajafa na unnaatog y matamo guinin iya guajo?\n88:15 Gofchatsaga tristeyo yan cana yo matae, desde y pinatgonjo: mientras jususungon y minamaa\u00f1aomo, ya janagosestotbayo.\n88:16 Ya y fijom na binibumo malofan guiya guajo: ya y minamaa\u00f1aomo umututyo.\n88:17 Sa manmato gui oriyajo todot dia taeg\u00fcije y janom: manda\u00f1a gui oriyajo.\n88:18 Y g\u00fcinaeyaco yan y amigujo unnafa\u00f1ago guiya guajo, yan y manatungojo gui jalom jomjom.\n89:1 BAE jucanta y minaase Jeova para taejinecog: ya y pachotto nae junamatungo y minagajetmo gui todo y generasion.\n89:2 Sa ileco: Y minaase umanacajulo para taejinecog: ya y minagajetmo unnafitme todo gui langet.\n89:3 Ya jufatinas y trato gui inayegco, yan manjulayo gui as David ni y tentagojo.\n89:4 Ya y semiyamo junafitme para taejinecog: ya jufatinas julo y tronumo gui todo y generasion. Sila.\n89:5 Ya y langet sija ufanmanalaba ni y ninamanmanmo, O Jeova: y minagajetmo locue gui inetnon y ma\u00f1antos.\n89:6 Sa jaye gui langet sija si\u00f1a pareju\u00f1a si Jeova? Jaye gui lajin y gaeninasi\u00f1a upareju\u00f1a si Jeova?\n89:7 Si Yuus, gosnamaa\u00f1ao gui pinagat y ma\u00f1antos, yan umamaanaog\u00fce g\u00fce mas qui todo ni ayo sija y mangaegue gui oriya\u00f1a.\n89:8 O Jeova, Yuus y inetnon sendalo, jaye matatnga parejo yan jago, O YAH? ya y minagajetmo ni y gaegue gui oriyamo?\n89:9 Jago umaregla y sobetbian tase: anae y napo mangajulo, jago pumoca sija.\n89:10 Jago yumamag iya Rahab ya unfapidaso taeg\u00fcije y uno ni y mapuno; jago chumalapon y enimigumo ni y canae y minetgotmo.\n89:11 Y langet sija iyomo, yan yo tano locue iyomo: y tano yan y binilan sinajguan\u00f1a ni y plinantamo sija.\n89:12 Y sanlago yan y sanjaya, jago fumatinas sija: Tabor yan Hermon manmagof ni y naanmo.\n89:13 Gaegue guiya jago y canae ni y matatnga: sa y canaemo metgot, ya taquilo y agapa na canaemo.\n89:14 Y tininas yan y juisio y plinantan tronumo: minaase yan minagajet manjajanao gui menan metamo.\n89:15 Mandichoso ayo na taotao y tumungo y magof na inagang: sa manmamocat gui mananan y matamo, O Jeova.\n89:16 Sa y naanmo nae manmamagof todot dia: yan y tininasmo nae munafangajulo.\n89:17 Sa jago y minalag y minetgot\u00f1ija: yan pot y finaboresimo na injatsajulo y canggelonmame.\n89:18 Sa iyon Jeova y patangta: yan y rayta iyon Ayo na Santos guiya Israel.\n89:19 Ayonae unsangan gui guinig\u00fcife gui ma\u00f1antosmo, ya ilegmo: guajo jupolo y inayuda gui jilo y uno ni y matatnga: yan junacajulo y uno na y maayeg gui taotao.\n89:20 Jusoda si David na tentagojo; ya jupalae g\u00fce nu y santos na la\u00f1ajo.\n89:21 Guiya y canaejo munafitme: yan y canaejoja locue munametgot g\u00fce:\n89:22 Ya y enimigo taeinamot guiya g\u00fciya: ni y lajin y manaelaye ti umanalamen g\u00fce.\n89:23 Sa bae juyute papa y contrario\u00f1a gui mena\u00f1a yan jucastiga ayo sija y chumatlie g\u00fce.\n89:24 Lao y minagajetto yan y minaasejo usaga guiya g\u00fciya: yan pot y naanjo na umanacajulo y canggelon\u00f1a.\n89:25 Ya bae jupolo y canae\u00f1a locue gui jalom tase, yan y agapa na canae\u00f1a gui jalom sadog.\n89:26 Sa g\u00fciya umalog ni guajo: Jago y tatajo, Yuusso, yan y acho gui satbasionjo.\n89:27 Bae jupolo g\u00fce locue pot finenana na fina\u00f1agujo, mas taquilo\u00f1a qui y ray sija gui tano.\n89:28 Y minaasejo bae juadaje pot g\u00fciya para taejinecog, yan y tratujo ufitme guiya g\u00fciya.\n89:29 Y semiya\u00f1a locue junasaga para ugaegue taejinecog, yan y tronu\u00f1a taeg\u00fcije y jaanen y langet.\n89:30 Yaguin famaguon\u00f1a dumingo y tinagojo, yan ti manmamomocat gui juisioco,\n89:31 Yaguin maquebranta y layjo yan ti maadaje y tinagojo;\n89:32 Ayo nae jufatoeg\u00fce gui inaguaguat\u00f1ija yan y bara, ya jusaulag gui tinaelaye\u00f1ija.\n89:33 Lao y minaasejo ti junajanao todo guiya g\u00fciya: ya ti jupolo na ufatta y minagajetto.\n89:34 Y tratujo ti juquebranta ni jutolaeca y sinanganjo ni jumuyong gui labiosso.\n89:35 Un biajeja jufanjula pot y sinantosso ya ti judague si David.\n89:36 Y semiya\u00f1a gagaegue para taejinecog, yan y tronu\u00f1a taeg\u00fcijeja y atdao gui menajo.\n89:37 Ya maplanta para taejinecog taeg\u00fcije y pilan, ya taeg\u00fcije y gosmagajet na testigo gui langet. Sila.\n89:38 Lao jago jagasja unyute yan unrechasa, jago jagasja lalalojao ni y pinalaemo.\n89:39 Sa unchatlie y traton y tentagomo; ya unnaale y corona\u00f1a asta papa gui jilo oda.\n89:40 Unyamag papa todo y quelat\u00f1a; yan unyulang y minetgot na castiya\u00f1a.\n89:41 Ya todo y manmalolofan gui ayo na chalan mayute\u00f1ae\u00f1aejon: g\u00fciya manamamamajlao ni y tiguang\u00f1a.\n89:42 Jago jumatsa julo y agapa na canae y contrariu\u00f1a sija; yan jago munafanmagof todo y enimigu\u00f1a.\n89:43 Magajet na jago locue bumira y filon y espada\u00f1a, ya ti unnafitme g\u00fce gui guera.\n89:44 Jago jagasja munabasta y minalag\u00f1a, yan unyute y tronu\u00f1a papa gui jilo oda.\n89:45 Ya y jaanen y pinatgon\u00f1a jago jagasja munacadada: jago jagasja tumampe g\u00fce ni y minamajlao. Sila.\n89:46 Asta ngaean, O Jeova, ada unatogjao para taejinecog? Asta ngaean ufa\u00f1ila y binibumo taag\u00fcije y guafe?\n89:47 O, jaso na quinadada y tiempoco esta: pot jafa na taesetbe jagas unfatinas todo y famaguan taotao?\n89:48 Jaye na taotao enao y lal\u00e2l\u00e2 ya ti ulie finatae, ni y ujanalibre y anti\u00f1a gui ninasi\u00f1an y naftan? Sila.\n89:49 Jeova, mangue y minaasemo sija ni y ampmam, ni y jinilamo as David gui minagajetmo?\n89:50 Jaso, Jeova, y minamajlao y tentagomo sija: ni y jucatgaja gui jalom pechoco, y minamamajlao y taotao todo ni y matatnga:\n89:51 Ni y enimigumo mannanamamajlao, O Jeova: ni y enimigumo munamamajlao y pinecat y pinalaemo.\n89:52 Bendito si Jeova para taejinecog: Amen yan Amen.\n90:1 JEOVA jago guinin saganmamame yan todo y generasion.\n90:2 Antes de najuyong y egso sija ya unfatinas y tano todo yan y ma\u00f1asaga: sa desde y tutujon\u00f1a yan asta y taejinecog, jagoja si Yuus.\n90:3 Jago bumira y taotao para y yinilang; ya ilelegmo: Fanalo guato, jamyo famaguon taotao.\n90:4 Sa y mit a\u00f1os gui menamo taeg\u00fcijeja y nigapja anae malofan esta, yan taeg\u00fcijeja y ora gui bumebela gui puenge.\n90:5 Jago chumule sija taeg\u00fcije y minilag y janom; manaeg\u00fcije y minaego: ya y egaan manaeguije y chaguan ni y manlacho julo.\n90:6 Ya y egaan, mumegae ya manlacho julo; lao y pupuenge manmautut yan ufanmalayo.\n90:7 Sa y linalalomo nae lumachaejam, yan y binibumo nae munafa\u00f1atsagajam.\n90:8 Sa unpolo y tinaelayenmame gui menamo, yan y ti matungo na isaomame gui minananan y matamo.\n90:9 Sat odo y jaaninmame manmalofan gui binibumo: inlachae y sacanmame ni y taeg\u00fcijeja cuentos ni y masangan esta.\n90:10 Y jaanen y sacanmame setenta a\u00f1os, ya y pot y minetgot si\u00f1a gagaegue asta ochenta a\u00f1os; lao y sobetbia\u00f1ija y checho yan y trineste; sa munaguse manmapos: yan jame mangupo.\n90:11 Jaye tumungo y ninasi\u00f1an y linalalomo, ya y binibumo segun y ninamaa\u00f1ao guiya jago.\n90:12 Ya fanag\u00fcejam tumufong y jaaninmame, para mojon usi\u00f1a guajajam un corason ni y malate.\n90:13 Talo mague, O Jeova: asta ngaean? ya polo ya unfa\u00f1otsot pot y tentagomo.\n90:14 O nafannajong jam taftaf ni y minaasemo: ya insi\u00f1a manmagof yan infansenmagof todo gui jaaninmame.\n90:15 Nafanmagof jam, segun na jaane anae unnafanpinite jam, yan y sacan anae inlie y taelaye:\n90:16 Polo y chechomo umalie gui tentagomo sija, yan y minalagmo gui famaguon\u00f1a.\n90:17 Ya y guinatbon Jeova ni y Yuusta ugaegue guiya jame; ya unnafitme guiya jame y checho y canaeta: magajet, y checho y canaemame unnafitme.\n91:1 YA y sumasaga gui umatog na sagayan y Gueftaquilo, g\u00fciya usaga gui papa y anineng y Todojajanasi\u00f1a.\n91:2 Bae jusangan as Jeova, g\u00fciya y umamparayo yan y castiyujo: Yuusso, iya g\u00fciya nae juangocoyo.\n91:3 Sa g\u00fciya unninalibre guinin y lason y tiradot, yan guinin y yinilang peste.\n91:4 G\u00fciya untinampe ni y pilu\u00f1a, yan y papa y papa\u00f1a nae unangoco jao: y minagajet\u00f1a uguinog\u00fcemo yan upatangmo.\n91:5 Jago ti unmaa\u00f1ao ni y minamaa\u00f1ao y puenge; ni y flecha ni mangugupo gui jaane;\n91:6 Ni pot y peste ni manmamomocat gui jalom jomjom; ni pot y yinilang ni y lumachae y taloane.\n91:7 Y mit ufanbasnag gui oriyamo, yan y dies mit gui agapa na canaemo: lao ti si\u00f1a mato jijot guiya jago.\n91:8 Sa y atadogmoja umatan, yan lumie y apas y manaelaye.\n91:9 Jagoja, O Jeova, y umamparayo! Sa jagasja unfatinas y Gueftaquilo na sagamo.\n91:10 Taya taelaye ufato guiya jago, ni jafa na chetnot ujijot gui sagamo.\n91:11 Sa jaencatga y angjet\u00f1a sija nu jago, para uninadaje todo gui jinanaomo.\n91:12 Ya unmajatsa julo ni y canae\u00f1ija, ya ti umanafannotpe acho y adengmo.\n91:13 Ya unfamgacha gui jilo y leon yan y culebla: y patgon leon yan y serpiente ungagacha gui papa adeng sija.\n91:14 Sa japolo y g\u00fcinaeya\u00f1a guiya guajo, enao mina junalibre g\u00fce: guajo pumolo g\u00fce gui taquilo, sa g\u00fciya guinin tumungo y naanjo.\n91:15 G\u00fciya umagangyo ya guajo umopeg\u00fce: sa jumajame gui chinatsaga; junalibre g\u00fce yan juonra g\u00fce.\n91:16 Ya y inanaco y lin\u00e2l\u00e2\u00f1a junanajong g\u00fce, yan jufanue g\u00fce ni y satbasionjo.\n92:1 MAULEG para umannae grasias si Jeova ya umacanta y alabansa sija gui naanmo, O Jago, Gueftaquilo:\n92:2 Para infamamanue ni y minauleg g\u00fcinaeyamo gui egaan yan y minagajetmo cada puenge.\n92:3 Gui dandan ni y dies cuetdas\u00f1a; yan gui guitala; yan gui atpa yan y mames na inagang.\n92:4 Sa jago, Jeova, unnamagofyo nu y chechomo: ya bae junagana pot y checho y canaemo.\n92:5 O Jeova, namandinangculo sija y chechomo! yan jinasomo mansentadong:\n92:6 Sa y taotao ni y aguaguat ti jatungo: ni y caduco ti jatutungo este.\n92:7 Anae y manaelaye lachog taeg\u00fcije y chaguan, yan anae todo y chumog\u00fce y tinaelaye manlajyan: ayo mina ufanmayulang para taejinecog:\n92:8 Lao jago, O Jeova, para taejinecog gagaegue y tinaquilo.\n92:9 Sa, estag\u00fce, y enimigumo, O Jeova, sa, estag\u00fce, y enimigumo na ufanmalingo; yan todo y chumochog\u00fce y tinaelaye ufanmachalapon.\n92:10 Lao y canggelonjo, jago munacajulo taeg\u00fcije y canggelon y titogcha na nubiyo: ya mapalaeyo ni y la\u00f1an nuebo.\n92:11 Sa y atadogcoja lumie y g\u00fcinaeyaco gui enimigujo sija yan y talangajoja jumungog y g\u00fcinaeyaco ni chumog\u00fce y taelaye ni y mangajulo contra guajo.\n92:12 Sa y tinas l\u00e2l\u00e2 taeg\u00fcije y trongcon palma: lumadangculo g\u00fce taeg\u00fcije y trongcon sedro gui Libano.\n92:13 Ayo sija y manmatanme gui guima Jeova, manl\u00e2l\u00e2 gui jalom y sagan y Yuusta.\n92:14 Sigueja di manmanogcha asta que manbijo: manmesgo yan manbetde.\n92:15 Para ufanmamanue na si Jeova goftunas: g\u00fciya y achojo ya taya tinaelaye guiya g\u00fciya.\n93:1 SI Jeova jagobiebietna mabeste g\u00fce ni y ninasifia; si Jeova numabeste g\u00fce, ni y minetgot dinidog g\u00fce: y tano locue ninafitme ya ti si\u00f1a manacalamten.\n93:2 Y tronumo mafatinas desde di ampmam na tiempo: jago guinin y taejinecog.\n93:3 Mangajulo y minalag sija, O Jeova, ya y minalag sija mangajulo y inangang\u00f1ija; y minalag sija mangajulo y napo\u00f1ija.\n93:4 Mastaquilo y inagang sija y minegae y janom sija, yan y fijom na napo gui tase, si Jeova gui sanjilo gaesisi\u00f1a.\n93:5 Y testimoniomo sija mansenmagajet: sinantosja conbiene gui jalom guimamo, O Jeova, para taejinecog.\n94:1 O Jeova, Yuus Jao, ni y inemog iyomo; O Yuus Jao, ni y inemog iyomo, famanuen maesajao ni y minalag.\n94:2 Jatsa jao julo, jago y jues y tano: nae ni y apas\u00f1ija y mansobetbio.\n94:3 Jeova, asta ngaean y manaelaye, asta ngaean y manaelaye nae ufanmagana?\n94:4 Sija manmefno, sija sumangan sinaguat yan todo y chumochog\u00fce y tinaelaye manbanidoso.\n94:5 Sa sija yumamag ya japedasitos y taotaomo, O Jeova, yan janafanpinite y erensiamo.\n94:6 Sija pumuno y biuda yan taotao juyong, yan japuno y manaetata.\n94:7 Sa ileg\u00f1ija: Si Jeova ti ujalie, ni si Yuus Jacob ti ufanatituye.\n94:8 Fanatituye, jamyo managuaguat gui taotao: yan jamyo mangaduco, ngaean nae infanmalate?\n94:9 Ya ayo y plumanta y talanga, ada ti ujungog? ya ayo y fumatinas y atadog, ada ti ulie?\n94:10 Ya ayo y cumastiga y taotao sija ada ti ujanafanunas? ayoja y fumanag\u00fce y taotao ni y tiningo?\n94:11 Si Jeova jatungo y jinason y taotao, na sija puro jinaja.\n94:12 Dichoso y taotao ni y unnaregla g\u00fce, O Jeova, yan ufanag\u00fce g\u00fce ni y tinagomo;\n94:13 Sa jago si\u00f1a numae gui descanso guinin y jaanin y chinatsaga, asta qui y joyo maguadog para y manaelaye.\n94:14 Sa si Jeova ti janasuja y taotao\u00f1a, ni ti udingo y erensia\u00f1a.\n94:15 Lao y jinisga utalo guato gui tininas: yan todo y manunas na corason ujadalalag.\n94:16 Jaye malago cajulo para guajo contra y chumochog\u00fce y da\u00f1o? Jaye malago tumojgue julo para guajo contra y chumochog\u00fce y taelaye?\n94:17 Yanguin si Jeova guinin ti umayudayo, y antijo gusija guinin sumaga gui finatquilo.\n94:18 Anae ileco: Sulong y adengjo: y minaasemo, O Jeova, mumantieneyo.\n94:19 Anae juguaja y manadan jinasoco gui sanjalomjo, y quinensuelamo sija ninasenmagof y antijo.\n94:20 Y tronon tinaelaye uguaja comunion yan jago, ni y fumatinas da\u00f1o pot y tinago?\n94:21 Sija manda\u00f1a contra y anten y manunas, yan ja sentensia y j\u00e2g\u00e2 y taeisao.\n94:22 Lao si Jeova guinin y leca na torijo: yan Yuusso y achon y guineg\u00fceco.\n94:23 Ya g\u00fciya chumule gui jilo\u00f1ija y isao\u00f1ija, yan ujautut sija gui da\u00f1o\u00f1ijaja; ya si Jeova, ni y Yuusta, umutut sija.\n95:1 O maela, ya tacantaye si Jeova: nije tafatinas y minagof na inagang para y acho y satbasionta.\n95:2 Nije taufanmato gui mena\u00f1a yan y grasias, ya tafatinas y minagof na inagang nu y salmos.\n95:3 Sa si Jeova y dangculo na Yuus, yan y dangculo na Ray gui jilo todo yuus.\n95:4 Y jalom y canae\u00f1a nae mangaegue y manadong na sagayan gui tano: y minetgot y beca sija iyo\u00f1a locue.\n95:5 Y tase iyo\u00f1a yan g\u00fciya fumatinas: yan y canae\u00f1aja fumatinas y anglo na tano.\n95:6 O maela nije taadora ya tafanecon papa, nije tafandimo gui menan Jeova ni y fumatinasjit.\n95:7 Sa g\u00fciya y Yuusta; yan jita y taotao gui pastaji\u00f1a, yan y quinilo gui canae\u00f1a. Pago na jaane yaguin injingog y inagang\u00f1a,\n95:8 Chamiyo munafanmajejetog y corasonmiyo, taeg\u00fcije guiya Meriba, taeg\u00fcije y jaanin y tentasion gui desierto.\n95:9 Anae y tatanmiyo tumientayo, machagueyo, yan malie y chechojo.\n95:10 Cuarenta a\u00f1os inapmam\u00f1a nae tristeyo pot este na generasion, ya ileco: Sija na taotao ni y manlache gui corason\u00f1ija, yan jagasja ti jatungo y chalanjo.\n95:11 Pot ayo na manjulayo gui binibujo, ya sija ti si\u00f1a majalom gui descansoco.\n96:1 O cantaye si Jeova ni y nuebo na canta: cantaye si Jeova todo y tano.\n96:2 Cantaye si Jeova, bendise y naan\u00f1a; fanmamanue ni y satbasion\u00f1a guinin y jaane yan y jaane.\n96:3 Sangan claro y minalag\u00f1a gui nasion sija ya y nin\u00e1manman\u00f1a gui entalo todo y taotao sija.\n96:4 Sa si Jeova dangculo, yan sendangculo para umaalaba: g\u00fciya umamaa\u00f1aog\u00fce mas qui todo yuus.\n96:5 Sa todo y yuus y nasion sija manidolo: lao si Jeova fumatinas y langet sija.\n96:6 Onra yan minagas mangaegue gui mena\u00f1a: minetgot yan guinatbo mangaegue gui jalom y santos na saga\u00f1a.\n96:7 Nae si Jeova, O familian gui taotao sija, nae si Jeova minalag yan minetgot.\n96:8 Nae si Jeova ni y minalag sa uiyon y naan\u00f1a: chule y ninae ya maela sanjalom gui saga\u00f1a.\n96:9 O adora si Jeova gui guinatbon y sinantos\u00f1a: fanlaolao gui mena\u00f1a todo y tano.\n96:10 Sangan gui nasion sija na si Jeova jagobiebietna: y tano maplanta locue ni y ti si\u00f1a manacalamten: guiya jumusga y taotao gui tininas.\n96:11 Manmagof y langet sija, yan senmagof y tano; ya y tase palalangpang, yan y binila\u00f1a.\n96:12 Ya y fangualuan senmagof yan todo y mangaegue gui sanjalom\u00f1a: ayonae todo y trongco sija gui jalomtano mangantapot y minagof.\n96:13 Gui menan Jeova, sa g\u00fciya umamamaela; sa guiya umamamaela para ujusga y tano: ujusga y tano gui tininas, yan y taotao sija gui minagajet\u00f1a.\n97:1 SI Jeova jagobiebietna, polo ya y tano umagof; polo ya y minegae y isla ufansenmagof.\n97:2 Y mapagajes yan y jemjom sija mangaegue gui oriya\u00f1a: tininas yan juisio y plinantan y tronu\u00f1a.\n97:3 Y guafe manjanao gui mena\u00f1a, yan mausinesenggue y enimigu\u00f1a gui oriya.\n97:4 Y lamlam\u00f1a maninina y tano: ya y tano malie ya ninalaolao.\n97:5 Y egso sija manmadirite taeg\u00fcije y danges gui menan Jeova, gui menan y Se\u00f1ot y tano todo.\n97:6 Y langet sumangan claro y tininas\u00f1a, yan todo y taotao guinin malie y minalag\u00f1a.\n97:7 Nafanmamajlao todo ayo sija y sumesetbe y imagen sija ni tinaga, ni y tunanmaesaja sija y \u00eddolo sija: Adora g\u00fce todo jamyo ni y yuus.\n97:8 Yya Sion jajungog ya ninamagof, yan y jagan Juda sija ninafansenmagof; sa pot y juisiomo sija, O Jeova.\n97:9 Sa jago Jeova, mas taquilo gui jilo todo y tano: ya jago umanacajulo chago gui jilo todo y yuus.\n97:10 O jamyo y gumaeya si Jeova, jachatlie y da\u00f1o: g\u00fciya umadaje y anten y ma\u00f1antos\u00f1a: g\u00fciya munafanlibre sija juyong gui canae y manaelaye.\n97:11 Manana matanme para y manunas, yan minagof para y manunas na corason.\n97:12 Fanmagof as Jeova jamyo ni y manunas; nae grasias y santos na naa\u00f1a.\n98:1 CANTAYE si Jeova ni y nuebo na canta; sa g\u00fciya fumatinas y mannamanman na g\u00fcinaja: sa y agapa na canae\u00f1a, yan y santos na canae\u00f1a fumatinas y satbasion para g\u00fciya.\n98:2 Si Jeova janamatungo y satbasion\u00f1a: y tininas\u00f1a jafanue gui menan y nasion sija.\n98:3 Jagasja jajaso y minaase\u00f1a yan y minagajet\u00f1a para y guima Israel: ya todo sija y uttimon y tano, guinin malie y satbasion y Yuusta.\n98:4 Fatinas y minagof na inagang as Jeova, todo y tano: agang yan fanganta, nu y minagof, junggan, fanganta alabansa sija.\n98:5 Cantayo si Jeova y alabansa sija, nu y atpa; y atpa yan y inagang y guinatbon musica.\n98:6 Yan y trompeta sija yan y sonidon y cotneta; fatinas y minagof na inagang gui menan y Ray Jeova.\n98:7 Polo ya y tase upalalangpang yan y binila\u00f1a; y tano yan y ma\u00f1asaga gui sanjalom\u00f1a;\n98:8 Polo ya y manadan janom ujanafamapagpag canae\u00f1ija: polo ya y egso sija manganta pot y minagof.\n98:9 Gui menan Jeova: sa g\u00fciya umamamaela para ujusga y tano: ujusga y tano, gui tininas yan y taotao sija gui minagajet.\n99:1 SI Jeova jagobiebietna; polo ya y taotao sija ufanlaolao; matatachong g\u00fce guijilo y querubin: polo ya y tano ufangalamten.\n99:2 Si Jeova dangculo guiya Sion: yan g\u00fciya mas taquilo gui jilo todo y taotao.\n99:3 Polo ya sija ufanalaba y dinagculon yan y namaa\u00f1ao na naanmo; sa santos g\u00fce.\n99:4 Y ninasi\u00f1an y ray locue jaguaeya y juisio: jago pumolo y tininas; jago fumatinas y juisio yan y tininas gui as Jacob.\n99:5 Nacajulo si Jeova ni y Yuusta, yan adora gui fa\u00f1ajangan y adeng\u00f1a; sa santos g\u00fce.\n99:6 Si Moises yan Aaron gui entalo mamale, yan si Samuel manisija yan ayo y umaagang y naan\u00f1a; sija umaagang si Jeova, ya g\u00fciya umope sija.\n99:7 G\u00fciya cumuentutuse sija gui jalom y jaliguen y mapagajes: sija umadaje y tinago\u00f1a, yan y otden ni y mannae sija.\n99:8 Jago umope sija, O Jeova Yuusmame: jago si Yuus ni y umasie sija, achogja jago chumule y inemog gui checho\u00f1ija.\n99:9 Nacajulo si Jeova ni y Yuusta, yan adora g\u00fce gui santos na ogso\u00f1a: sa si Jeova, ni y Yuusta, santos g\u00fce.\n100:1 FATINAS y minagof na inagang as Jeova: jamyo tano todos.\n100:2 Setbe si Jeova ni y minagof: maela gui mena\u00f1a ya fanganta.\n100:3 Tingo na si Jeova, g\u00fciya si Yuus: g\u00fciyaja y fumatinas jit, yan jita iyo\u00f1a; jita y taotao\u00f1a yan y quinilo sija gui pastaji\u00f1a.\n100:4 Fanjalom gui trangca\u00f1a yan y inefresen grasias, ya y jalom y saga\u00f1a yan y alabansa: nae g\u00fce grasias, yan bendise y naan\u00f1a.\n100:5 Sa si Jeova mauleg; y minaase\u00f1a ugagaegue para taejinecog; yan y minagajet para todo y generasion sija.\n101:1 BAE jucanta y minaase yan y juisio: iyajago nae O Jeova, bae jucanta.\n101:2 Bae juadajeyo ni y malate gui cabales na jinanao. O ngaean nae unfato jao guiya guajo? bae jufamocat gui jalom guimajo yan y cabales na corason.\n101:3 Mungayo pumolo y taelaye na g\u00fcinaja gui menan atadogjo: juchatlie y checho\u00f1ija ayo y manabag sija: tiucheton guiya guajo.\n101:4 Y chatpayon na corason junafanjanao guiya guajo; ti yajo tumungo y manaelaye na g\u00fcinaja.\n101:5 Ayo y secreto na finajiyunge y tiguang\u00f1a, g\u00fciya bae juyulang: ya ayo y taquilo y inatan\u00f1a yan y sobetbio na corason ti si\u00f1a jusungon.\n101:6 Y atadogjo bae janameton y manmanjonggue gui tano, para ufa\u00f1aga sija guiya guajo: ya ayo y mamomocat gui cabales na jinanao, g\u00fciya siempre sumesetbeyo.\n101:7 Ya ayo y chumochog\u00fce y dinague ti si\u00f1a sumaga gui jalom guimajo: ya ayo y sumasagan y mandague ti si\u00f1a numafitme gui menan y atadogjo.\n101:8 Y egaan yan y egaan bae juyulang todo y manaelaye gui tano; para uutot todo y chumochog\u00fce ni y taelaye gui siuda Jeova.\n102:1 JUNGOG y tinayuyutto, O Jeova, polo y inagangjo ya ufato guiya Jago.\n102:2 Chamo munaatog y matamo guiya guajo gui jaanen anae chatsagayo: naegueng y talangamo guiya guajo; y jaane anae juagangjao, opeyo guse.\n102:3 Sa y jaanijo linachae taeg\u00fcije y aso, ya y telangjo janon taeg\u00fcije y falot.\n102:4 Y corasonjo manetnot, yan anglo taeg\u00fcije chaguan; sa malefayo jucano y najo pan.\n102:5 Ya pot y inagang y inigongjo y telangjo mafachet yan y catneco.\n102:6 Parejoyo yan y pelicano na p\u00e1jaro gui desierto: yan taeg\u00fcijeyo y memo gui lugat na mayulang.\n102:7 Jupulan, yan jumuyong yo taeg\u00fcije y gorrion na pajaro g\u00fcig\u00fciyaja gui jilo y atof y guima.\n102:8 Y enimigujo lumalatdeyo todot dia; yan ayo sija y manlalalo contra guajo manmanjula pot guajo.\n102:9 Sa jagasja jucano y apo taeg\u00fcije y pan, yan manada\u00f1a y guimenjo yan y tanges.\n102:10 Sa pot y linalalomo yan y binibumo: sa jago jumatsayo yan yumuteyo.\n102:11 Y jaanijo taeg\u00fcije y anineng ni y umaso; yan angloyo taeg\u00fcije y chaguan.\n102:12 Lao jago, O Jeova, gagaegue jao para taejinecog: yan y memoriasmo asta todo y generasion.\n102:13 Jago ucajulo, yan umaase ni iya Sion: sa y tiempo para unmaase nu g\u00fciya, magajet na mato y tiempo ni y matancho.\n102:14 Sa y tentagomo ninafanmagof ni y acho\u00f1a: yan ninafanmaase ni y petbos\u00f1a.\n102:15 Enao mina y nasion sija ufanmaa\u00f1ao ni y naan Jeova, yan todo y ray sija gui tano ni y minalagmo.\n102:16 Sa si Jeova jafatinas y Sion, umanog g\u00fce gui jalom y minalag\u00f1a.\n102:17 Jagoflamen y tinayuyut y mannesesitao; yan ti jachatlie y tinayuyut\u00f1ija.\n102:18 Utugue este para y generasion ni y manm\u00e1mamaela: yan y taotao ni y ufanmafatinas ujaalaba si Jeova.\n102:19 Sa g\u00fciya jagasja jaatan papa gui y tinaquilo y santos na saga\u00f1a; guinin y langet nae si Jeova jaatan y tano.\n102:20 Para ujungog y inigong y manmaprereso: yan para upula ayo sija y manmatancho para ufanmapuno.\n102:21 Para umasangan claro y naan Jeova guiya Sion, yan y alabansa\u00f1a guiya Jerusalem;\n102:22 Anae y taotao sija manetnon ya manda\u00f1a, yan y raeno sija para ujasetbe si Jeova.\n102:23 Janadafe y minetgotto gui chalan; g\u00fciya munacadada y jaanijo.\n102:24 Guajo ileco: O Yuusso chamo yo chumuchule gui lamita na jaanijo: y sacanmo sija para todoja y generasion.\n102:25 Sa desde y ampmam na tiempo jago pumolo y plinantan tano: yan y langet sija y checho y canaemo.\n102:26 Sija ufanmalingo, lao jago ungagaegueja: magajet na todo sija ufanguesbijo taeg\u00fcije y magago: taeg\u00fcije y bestido untolaeca sija, ya sija manmatalaeca.\n102:27 Lao jago y mismojajao, yan y sacanmo sija ti ufanjocog.\n102:28 Y famaguon y tentagomo ufangagaegue, yan y semiyan\u00f1ija ufanmaplanta gui menamo.\n103:1 BENDISE si Jeova, O antijo: yan todo y sanjalomjo, bendise y santos na naan\u00f1a.\n103:2 Bendise si Jeova, O antijo, yan chamo malelefa todo ni y minauleg\u00f1a:\n103:3 Ni y umasie todo tinaelayemo; ni y munamagong todo y chetnotmo;\n103:4 Ni y munalibre y lin\u00e2l\u00e2mo guinin y yinilang: ni y comorona jao ni g\u00fcinaeyan mauleg yan y manadan minaase:\n103:5 Ni y munanajong y pachotmo ni y manmauleg na g\u00fcinaja: ya y pinatgonmo jananuebo taeg\u00fcije y aguila.\n103:6 Si Jeova fumatinas y tinas na chocho sija, yan y juisio sija para todo ayo sija y manmachiguet.\n103:7 G\u00fciya munatungo si Moises ni y chalan\u00f1a, ya y checho\u00f1a gui famaguon Israel.\n103:8 Si Jeova bula y minaase yan cari\u00f1oso, \u00f1ateng y binibu\u00f1a yan gofmegae y minaase\u00f1a.\n103:9 G\u00fciya ti ufanlalatde para siempre: ni umantiene y binibu\u00f1a para taejinecog.\n103:10 Ti guinin jafatinas guiya jita segun y isaota; ni uapasejit segun y tinaelayeta.\n103:11 Sa taeg\u00fcije y langet goftaquilo gui jilo y tano, taeg\u00fcijeja sendangculo y minaase\u00f1a para ayo sija y manmaa\u00f1ao nu g\u00fciya.\n103:12 Taemanoja chinago\u00f1a desde y sancatan, yan asta y sanlichan, taeg\u00fcijeja chinago\u00f1a nae janajanao guiya jita y isaota.\n103:13 Parejoja yan y tata ni jaguaeya y famaguon\u00f1a, taeg\u00fcenaoja si Jeova jaguaeya ayo sija y manmaa\u00f1ao nu g\u00fciya.\n103:14 Sa g\u00fciya tumungo y jechurata; jajaso na jita y petbos.\n103:15 Sa y taotao, y jaani\u00f1a taeg\u00fcijeja y chaguan; taeg\u00fcijeja y flores gui fangualuan lalachog.\n103:16 Sa y manglo manmalofan gui jilo\u00f1a, yan g\u00fciya mapos: yan y sagayan ti si\u00f1a jatungo mas.\n103:17 Lao y minaase Jeova, guinin taejinecog asta taejinecog guijilo ayo sija y manmaa\u00f1ao nu g\u00fciya, yan y tininas\u00f1a gui famaguon y famaguon;\n103:18 Yya sija y umadadaje y tratu\u00f1a, yan ayo sija y jumajaso y finanag\u00fce\u00f1a para ufatinas.\n103:19 Si Jeova japlanta y tronu\u00f1a gui langet sija; yan y raeno\u00f1a y naregla y jilo todoja.\n103:20 Bendise si Jeova, jamyo ni angjet\u00f1a sija, ni y manmatatnga gui minetgot, ni y cumumple y sinangan\u00f1a, ni y umecungog y inagang y fino\u00f1a.\n103:21 Bendise si Jeova todo jamyo ni y inetnon sendalo\u00f1a: jamyo ni y ministro\u00f1a ni y fumatitinas y minalago\u00f1a.\n103:22 Bendise si Jeova, todo y finatinas\u00f1a, gui todo y sagayan anae jagobiebietna: bendise si Jeova, O antijo.\n104:1 BENDISE si Jeova, O antijo: O Jeova Yuusso, jago y sendangculo; jago minagagago ni y onra, yan y minagas.\n104:2 Ni y untampen maesajao ni y manana taeg\u00fcije y bestido: ni y jumuto juyong y langet sija taeg\u00fcije y cottina.\n104:3 Ni y plumanta y jayo y aposentu\u00f1a gui jalom janom: ni y fumatinas y mapagajes para caruaje\u00f1a: ni y mamomocat gui jilo y papan y manglo.\n104:4 Ni y fumatinas y manglo sija para tentago\u00f1a: y ministro\u00f1a y ma\u00f1ila y guafe.\n104:5 Ni y pumolo y plinantan tano, ya ti si\u00f1a manacalamten para taejinecog.\n104:6 Ya tumampe g\u00fce ni y tinadong taeg\u00fcije y bestido: y janom sija manotojgue gui sanjilo y beca sija.\n104:7 Ya pot y linalatdemo, sija manjanao; ya pot y inagang y julumo ma\u00f1adig manjanao.\n104:8 Sija manjanao julo gui beca sija, sija apan papa gui oriyan y bayesija, gui sagayan ni y jago fumamauleg para sija.\n104:9 Jago pumolo y uttimon\u00f1ija ya ti si\u00f1a manmalofan guato; para ti si\u00f1a jabira sija talo para utampe y tano.\n104:10 Jatago y tutujon y janom gui jalom y bayesija; ni y manmalalago gui entalo y egso sija.\n104:11 Sija numae guimen\u00f1ija y todo g\u00e2g\u00e2 sija gui fangualuan: y manmachaleg na asno sija manmagong y majo\u00f1ija.\n104:12 Ya iya sija nae y pajaron y langet guaja saga\u00f1ija ya mangacanta gui entalo y ramas sija.\n104:13 G\u00fciya numaye janom y egso sija guinin y aposentu\u00f1a sija: y tano jaspog ni y tinegcha y chechomo.\n104:14 G\u00fciya y chaguan munafanl\u00e2l\u00e2 para y guaca sija, yan y tinanom para usinetbe y taotao: para ufa\u00f1ule nengcano gui tano;\n104:15 Yan y bino ni y munamamagof y corason y taotao, yan y la\u00f1a para ulamlam y mata\u00f1a, yan y pan ni y munamemetgot y corason y taotao.\n104:16 Y trongcon jayo Jeova manbula chugo; y sedro sija gui Libano ni y tinanom\u00f1a;\n104:17 Anae y pajaro jafatitinas y checho\u00f1ija; ya y chuchuco, y trongcon pino guima\u00f1a.\n104:18 Y taquilo na ogso sija para y manmachaleg na chiba: yan y acho sija guineg\u00fce para y conejo.\n104:19 Jatancho y pilan para y tiempo: y atdao tumungo y jinanao\u00f1a papa.\n104:20 Jago fumatinas y jemjom yan puenge; anae todo y g\u00e2g\u00e2 gui jalomtano mangucunanaf mona.\n104:21 Y manfamaguon na leon sija manaagang ni y manmacone\u00f1ija yan jaaliligao y na\u00f1ija guinin as Yuus.\n104:22 Y atdao cajulo, sija manmapos, yan manason sija papa gui jalom y liyang\u00f1ija.\n104:23 Y taotao jumajanao mona gui finatinas\u00f1a yan gui checho\u00f1a, asta qui puenge.\n104:24 O Jeova, manminegae sija y chechomo! y minenajlom, jago fumatinas sija todo: y tano senbula ni y rinicumo.\n104:25 Ayo guato gaegue y tase, dangculo yan ancho, anae y sanjalom\u00f1a sija y g\u00fcinaja na mangucunanaf ni ti si\u00f1a matufong, todoja mandangculo yan mandiquique sija na g\u00e2g\u00e2.\n104:26 Ayo nae manjajanao y batco sija: ayo nae gaegue y lebiatan ni y finatinasmo para y jumugando gui sanjalom\u00f1a.\n104:27 Este sija todo mumananggajao; sa jago si\u00f1a unnae sija na\u00f1ija gui tiempo ni matancho.\n104:28 Sa ayo y jago numae, sija naufanda\u00f1a: unbaba y canaemo ya sija mannajong ni y minauleg.\n104:29 Unnaatog y matamo, sija ma\u00f1atsaga: unchule y jinagon\u00f1ija, sija manmatae, yan manalo guato gui petbos\u00f1ija.\n104:30 Untago mona y espiritumo, sija manfinatinas: yan jago munanuebo y inatan gui sanjilo y tano.\n104:31 Polo ya y minalag Jeova ugagaegue para taejinecog: Polo ya si Jeova umagof gui chechona:\n104:32 Ni y jaatan y jilo y tano yan jayengyong: ni y japacha y egso sija yan janaasgon.\n104:33 Bae jucantaye si Jeova taemenoja y inanaco y lin\u00e2l\u00e2jo: bae jucantaye tinina y Yuusso mientras lal\u00e2l\u00e2yo.\n104:34 Polo ya y jinasoco iya g\u00fciya usenmames: bae jugofmagof as Jeova.\n104:35 Polo y manisao ya ufanlinachae gui tano, polo y manaelaye ya utaya. Bendise si Jeova, O antijo. Alaba si Jeova.\n105:1 O nae grasias si Jeova; agang y naan\u00f1a; namatungo y checho\u00f1a gui entalo taotao sija.\n105:2 Cantaye g\u00fce, cantaye g\u00fce ni y alabansa sija; fanadingan ni y todo y checho\u00f1a ni y mannamanman.\n105:3 Manmalag jamyo ni y santos na naan\u00f1a: umanmagof ayo sija na corason y umaliligao si Jeova.\n105:4 Aligao si Jeova yan y minetgot\u00f1a: Aligao y mata\u00f1a para taejinecog.\n105:5 Jaso y ninamanman checho ni y monjayan jachog\u00fce; ninamanman\u00f1a yan y juision y pachot\u00f1a;\n105:6 O Jamyo, ni y semiyan Abraham tentago\u00f1a, jamyo ni y famaguon Jacob inayeg\u00f1a sija.\n105:7 G\u00fciya si Jeova Yuusta: y juisio\u00f1asija mangaegue todo gui tano.\n105:8 Jagasja jaso y tratu\u00f1a para taejinecog, y finijo ni y tinago\u00f1a para mit na generasion.\n105:9 Ayo na trato ni y jafatinas gui as Abraham, yan y jinila\u00f1a gui as Ysaac.\n105:10 Yan ayoja janafitme gui as Jacob para otden, yan as Israel para taejinecog na trato.\n105:11 Yleleg\u00f1a: Yya jago guajo junaejao y tano Cananea, y facae y erensiamo.\n105:12 Anae sija mandidideja na numeron taotao: junggan, senmandidide yan taotao juyong g\u00fcije;\n105:13 Ya sija manjanao guinin y un nasion asta y otro nasion, guinin y un raeno asta otro taotao;\n105:14 Ti japolo ni un taotao na ujafatinas da\u00f1o guiya sija: magajet na jalalatde y ray sija pot causa\u00f1ija:\n105:15 Yleg\u00f1a: Chamo pumapacha y pinalaejo, yan chamo munafanlalamen y profetajo sija.\n105:16 Ya jatago y \u00f1inalang gui jilo y tano: ya jayulang todo y minetgot y agon.\n105:17 Ya jatago un taotao gui mena\u00f1ija, si Jos\u00e9 ni y mabende para tentago.\n105:18 Ayo sija na adeng\u00f1a y ninafanlamen ni y cadena: g\u00fciya mapolo guientalo y lilog.\n105:19 Asta y tiempo anae macumple y fino\u00f1a: ya y fino Jeova chumague g\u00fce,\n105:20 Y ray matago ya pinila g\u00fce, ayo y magas taotao sija yan pinelo g\u00fce na ujanao libre.\n105:21 Pinelo g\u00fce magas gui guima\u00f1a yan gobietnon todo y g\u00fcinaja\u00f1a:\n105:22 Para upreso y prinsipe\u00f1a ni y minagof\u00f1a; yan ufanag\u00fce y manamco ni y manp\u00e1pagat.\n105:23 Si Israel locue jumalom guiya Egipto; yan si Jacob taotao juyong sumasaga gui tano Cam.\n105:24 Yan janafansenmegae y taotao\u00f1a; yan janafanmetgot mas que y enimigo\u00f1ija.\n105:25 Jabira y corason\u00f1ija para ujachatlie y taotao\u00f1a sija, para ufanmatinas ni y finaye gui tentago\u00f1a sija.\n105:26 Jatago si Moises ni y tentago\u00f1a; yan si Aaron ni y guinin inayeg\u00f1a.\n105:27 Sija japolo ni y se\u00f1at\u00f1a guiya sija, yan ninamanman gui tano Cam.\n105:28 Jatago y jemjom, ya ninajomjom; yan sija ti ninafanaguaguat contra y fino\u00f1a.\n105:29 Jatolaeca y janom\u00f1ija jafaj\u00e2g\u00e2, yan japuno y g\u00fcijan\u00f1ija.\n105:30 Y tano\u00f1ija janae manadan ranas, ya megae gui jalom y aposenton y ray\u00f1ija sija.\n105:31 G\u00fciya sumasangan, yan manmato manadan dina\u00f1a lalo, yan juto sija gui todo y oriyan y tano\u00f1ija.\n105:32 G\u00fciya numae sija uchan graniso, yan ma\u00f1ila guafe gui tano\u00f1ija.\n105:33 Jasaolag y trongcon ubas\u00f1ija locue, yan y trongcon ygos\u00f1ija; yan jajulog y trongcon jayo sija gui oriyan tano\u00f1ija.\n105:34 G\u00fciya y sumangan, yan y apacha sija manmato, yan uruga na ulo sija yan ayo taya numero\u00f1ija,\n105:35 Ya sija jacano todo y tinanom gui jalom y tano\u00f1ija, yan jalachae sija y tinegcha gui tano\u00f1ija.\n105:36 Ya japuno locue todo y finenana na fina\u00f1agon laje gui tano\u00f1ija, y magas todo y ninasi\u00f1a\u00f1ija.\n105:37 Ya jacone sija juyong locue yan y salape yan y oro; yan taya ni un taotao malango gui tribo\u00f1ija.\n105:38 Yya Egipto manmagof anae sija manjanao: pot minaa\u00f1ao\u00f1ija guinin podong guiya sija.\n105:39 Jajuto y mapagajes para ufantinampe; yan y guafe janae para ufaninina gui puenge.\n105:40 Manmangagao y taotao, yan jaconie pajaro ni calang palumo sija; yan ninafanjaspog ni y pan langet.\n105:41 Jababa y acho yan y janom milalag juyong; manmalalago gui anglo na sagayan taeg\u00fcije y sadog.\n105:42 Sa jajaso y santos na sinangan\u00f1a, yan Abraham ni y tentago\u00f1a.\n105:43 Ya jacone juyong y taotao\u00f1a yan y minagof, yan y inayeg\u00f1a gui cantasion sija.\n105:44 Yan janae sija ni y tano y nasion sija: yan sija jachule para iyo\u00f1ija ni y checho y taotao sija:\n105:45 Para usi\u00f1a adaje y otden\u00f1a, yan ufatinas y lay\u00f1a. Alaba jamyo si Jeova.\n106:1 ALABA jamyo si Jeova. O nae grasias si Jeova; sa g\u00fciya mauleg: sa y minaase\u00f1a gagaegueja para taejinecog.\n106:2 Jaye si\u00f1a sumangan y gaesisi\u00f1an y checho Jeova? pot mamanue todo ni y alabansa\u00f1a?\n106:3 Dichoso ayo sija y umadadaje y juisio, yan ayo y fumatitinas y tininas todo y tiempo.\n106:4 Jasoyo, O Jeova, nu y finaborese ni y unnae y taotaomo; O bisitayo nu y satbasionmo;\n106:5 Para jusi\u00f1a lumie y minauleg gui inayegmo, para jusi\u00f1a mumagof gui minagof y nasionmo, para jusi\u00f1a mumalag gui erensiamo.\n106:6 Guinin manisaojam yan y tatanmame, infatinas y tinaelaye yan incheg\u00fce y inechong.\n106:7 Y tatanmame ti jatungo y ninamanmanmo guiya Egipto; ti jajaso y manadan y minaasemo; lao manmanembeste gui tase, junggan gui Tasen Agaga.\n106:8 Lao jasatbaja sija pot y naan\u00f1a, para usi\u00f1a janamatungo y dangculon y ninasi\u00f1a\u00f1a.\n106:9 Jalalatde y Tasen Agaga locue yan janaanglo: lao jaesgaejon sija inanaco y todo gui tinadong, taeg\u00fcije todo inanaco y desierto.\n106:10 Yan janafanlibre sija guinin y canae ayo y chumatlie sija, yan jarescata sija guinin y canae y enimigo.\n106:11 Yan y janom sija tumampe y contrario\u00f1ija: ya taya ni uno guiya sija sebla.\n106:12 Ayo nae jajonggue y sinangan\u00f1a sija; jacanta y tinina\u00f1a.\n106:13 Ya guse manmalefa ni y checho\u00f1a: ti janangga y pinagat\u00f1a:\n106:14 Lao manmalago megae gui jalomtano, yan matienta si Yuus gui desierto.\n106:15 Ya g\u00fciya numae sija ni y guinagao\u00f1ija; lao janamanae ni y minasogsog gui jalom y ante\u00f1ija.\n106:16 Ya manmanugo as Moises gui fangualuan; yan si Aaron ni y santos Jeova.\n106:17 Y tano mababa ya pina\u00f1ot si Datan, yan mantinampe y mangachong Abirom.\n106:18 Yan y guafe manafa\u00f1ila gui mangachong\u00f1ija; ya y ma\u00f1ila sumonggue y manaelaye.\n106:19 Ya manmamatinas tatnero guiya Horeb, yan maadora y diniriten y imagen.\n106:20 Taeg\u00fcije, jatulaeca y minalag\u00f1ija para nu jechuran guaca ni y chumochocho chaguan.\n106:21 Manmalefa as Yuus ni y satbadot\u00f1ija, ni y fumatinas y mandangculo na g\u00fcinaja guiya Egipto;\n106:22 Mannamanman na checho gui tano Cam, yan mannamaa\u00f1ao na g\u00fcinaja gui Tasen Agaga.\n106:23 Enao mina ileg\u00f1a g\u00fciya, na uyunilang sija, yaguin ti si Moises ni y inayeg\u00f1a ti tumogue gui mena\u00f1a gui finapetta, para ubira y binibu\u00f1a para cha\u00f1a yumuyulang sija.\n106:24 Magajet na jachatlie y g\u00fcaeyayon na tano, ya ti jajonggue y fino\u00f1a.\n106:25 Lao mangonggong gui sa tienda\u00f1\u00edja; ya ti jaecungog y inagang Jeova.\n106:26 Enao mina jajatsa y canae\u00f1a contra sija; para uyute sija gui jalom y desierto:\n106:27 Para uyute y semiya\u00f1ija locue gui nasion sija, yan para uchalapon sija gui jalom y tano sija.\n106:28 Ya manda\u00f1a sija gui Baal-peor; ya jacano y inefresen y manmatae.\n106:29 Taeg\u00fcine sija mannalalalo g\u00fce nu y checho\u00f1ija: ya derepente mato gui jilo\u00f1ija sija chetnot.\n106:30 Ya janatojgue julo si Finees, ya jafatinas y juisio: ya y chetnot pumara.\n106:31 Yan ayo nae jatufong iya g\u00fciya y tininas, gui todo y generasion sija para taejinecog.\n106:32 Ya sija mannalalalo g\u00fce locue gui janom guiya Meriba: ya jumuyong da\u00f1o para si Moises pot causa\u00f1ija.\n106:33 Sa sija chumoma y espiritu\u00f1a; sa jasangan sin jinaso pot labios\u00f1a.\n106:34 Ya ti jayulang y nasion sija, taeg\u00fcije si Jeova ni y mantinago sija.\n106:35 Lao manda\u00f1a sija yan y nasion sija, yan jaeyag y checho\u00f1ija:\n106:36 Yan jasetbe y idolos\u00f1ija: jumuyong un laso para sija.\n106:37 Magajet na jaofrese y laje\u00f1ija yan y jaga\u00f1ija gui anite,\n106:38 Yan jachuda y j\u00e2g\u00e2 y manaeisao, magajet na y j\u00e2g\u00e2 y laje\u00f1ija yan y jaga\u00f1ija ni jaofrese gui idolos guiya Cananea: yan y tano ni y nina\u00e1placha ni y j\u00e2g\u00e2.\n106:39 Ya taeg\u00fcije munafan\u00e1placha pot y checho\u00f1ijaja, yan ninafan\u00e1bale ni y finatinas\u00f1ija.\n106:40 Enao mina y binibon Jeova sinenggue contra y taotao\u00f1a, ya jaguefchatlie y erensia\u00f1ija.\n106:41 Ya janae nu sija gui canae y nasion sija; yan ayo y chumatlie sija janafanmagas gui jilo\u00f1ija.\n106:42 Ya y enimigo\u00f1ija locue chumiguet sija, yan sija chumule asta y jalom inesgue gui papa y canae\u00f1ija.\n106:43 Megae na biaje nae janafanlibre sija; lao sija maembeste g\u00fce ni y pinagat\u00f1ija, yan manmachile papa gui tatpapa ni y tinaelaye\u00f1ija.\n106:44 Lao jaatan y piniti\u00f1ija, anae jajungog y inagang\u00f1ija.\n106:45 Ya jajaso para sija y tratu\u00f1a, yan ninafanma\u00f1otsot seg\u00fan y minegae y minaase\u00f1a.\n106:46 Janafangaease locue ni ayo y cumone sija preso.\n106:47 Nafanlibrejam, O Jeova, Yuusmame, yan nafanda\u00f1ajam gui entalo y nasion sija, para unae grasias y santos na naanmo, yan ufangana gui alabansamo.\n106:48 Bendito si Jeova ni Yuus Israel guinin y taejinecog para y taejinecog. Polo ya todo taotao ileg\u00f1ija. Amen. Alaba jamyo si Jeova.\n107:1 O nae grasias si Jeova, sa g\u00fciya mauleg: sa y minaase\u00f1a gagaegue para taejinecog.\n107:2 Polo y ninafanlibre as Jeova ya ujasangan, anae janafanlibre guinin y canae y contrario;\n107:3 Yan janafanda\u00f1a sija juyong gui tano sija, guinin y sancatan, yan guinin y sanlichan, guinin y san lago, yan guinin y san jaya.\n107:4 Manaabag gui jalomtano gui chalan desierto; ya ti manma\u00f1oda siuda para ufa\u00f1aga.\n107:5 Man\u00f1alang yan minajo sija, y ante\u00f1ija manlalango gui sanjalom\u00f1ija.\n107:6 Ayo nae maagang si Jeova gui chinatsaga\u00f1ija, ya g\u00fciya munalibre sija gui pinadese\u00f1ija.\n107:7 Ya maninesgaejon sija mona, gui tinas na chalan, para usi\u00f1a manjanao para y siuda anae ma\u00f1asaga.\n107:8 O, para y taotao sija mojon ufanmanalaba si Jeova pot y minauleg\u00f1a, yan pot y ninamanman na checho\u00f1a gui famaguon taotao sija.\n107:9 Sa jananajong y malago na ante, yan janabula y \u00f1alang na ante ni y minauleg.\n107:10 Ayo sija y manmatatachong gui jemjom yan y jalom y anineng y finatae, ni y guinin jagode nu y pinite yan lulog;\n107:11 Sa manembeste contra y fino Yuus, yan jachatlie y pinagat y Gueftaquilo:\n107:12 Enao mina jachule papa y corason\u00f1ija gui checho; manbasnag papa ya taya para ufaninayuda.\n107:13 Ayo nae maagang si Jeova gui chinatsaga\u00f1ija, ya g\u00fciya munalibre sija gui pinadese\u00f1ija.\n107:14 Jachule sija juyong gui jemjom yan y anineng y finatae, yan jagutos y manmagode\u00f1ija.\n107:15 O para y taotao sija mojon ufanmanalaba si Jeova pot y minauleg\u00f1a, yan pot y ninamanman na checho\u00f1a gui famaguon y taotao sija!\n107:16 Sa g\u00fciya yumamag y trangcan bronse, yan janapedaso y rejas lulog.\n107:17 Mangaduco, sa pot y tinaelaye\u00f1ija yan pot y inechong\u00f1ija fanmanmamadese.\n107:18 Y ante\u00f1ija jachatlie todo y clasen nengcano; yan manjijot gui trangcan y finatae.\n107:19 Ya maagang si Jeova gui chinatsaga\u00f1ija ya g\u00fciya munalibre sija gui pinadese\u00f1ija.\n107:20 Manninae y fino\u00f1a ya manninajomlo sija, yan manninalibre sija guinin y yinilang\u00f1ija.\n107:21 O para y taotao sija mojon ufanmanalaba si Jeova pot y minauleg\u00f1a, yan pot y ninamanman na checho\u00f1a gui fumaguon y taotao sija!\n107:22 Ya polo sija ya ujaofrese y inefresen grasias sija, yan jasangan claro y checho\u00f1a gui cantan minagof.\n107:23 Sija ni manjanao papa gui tase gui jalom y batco, ni y fumatinas checho\u00f1ija gui jilo manadan janom sija;\n107:24 Estesija lumie y checho Jeova, yan y ninamanman\u00f1a gui jalom y tinadong.\n107:25 Sa jatago\u00f1a, ya janacajulo y pagyon manglo, ni y jumatsa julo y napo sija.\n107:26 Mangajulo para y langet, manjanao talo papa para y tinadong: y ante\u00f1ija manmaderite pot y chinatsaga.\n107:27 Manmatulaejon mona an tate, yan manmamangag taeg\u00fcije y bulacho na taotao, yan manmalingo y jinaso\u00f1ija.\n107:28 Ya maagang si Jeova gui chinatsaga\u00f1ija, ya g\u00fciya munalibre sija gui pinadese\u00f1ija.\n107:29 Janabasta y pagyo, yan y napo sija manmamatquilo.\n107:30 Ayo nae manmagof sa mangieto, ya taeg\u00fcije jacone sija asta y minalago\u00f1ija na puetto.\n107:31 O para y taotao sija mojon ufanmanalaba si Jeova pot y minauleg\u00f1a, yan pot y ninamanman na checo\u00f1a gui famaguon y taotao sija!\n107:32 Polo ya sija umanacajulo g\u00fce locue gui y inetnon y taotao yan ufanmanalaba nu g\u00fciya gui tachong y manamco.\n107:33 Jafasadog y desierto, yan jafaanglo na oda y tutujon janom;\n107:34 Jafadesierton asiga y mauleg na tano, pot y tinaelayen ayo sija y ma\u00f1asaga gui sanjalom.\n107:35 Jafajagoen janom y desierto, yan janafamimichao y janom y anglo na oda.\n107:36 Yan ayo na janafa\u00f1aga y man\u00f1alang, ya sija si\u00f1a jafamauleg y siuda para ufa\u00f1aga;\n107:37 Yan matanme y fangualuan, yan manmananom gui fangualuan ubas, ya ufanmarecoge y tinegchan y aumento.\n107:38 Jabendise sija locue, para ufangosmegae; yan ti upolo y ga\u00f1ija g\u00e2g\u00e2 na udidide.\n107:39 Tumalo sija mandidide yan mannecon papa, pot y chiniguet, chinatsaga, yan triniste.\n107:40 Jachuda sinala gui jilo y prinsepe sija, yan janafanabag sija gui jalomtano anae taya chalan.\n107:41 Lao japolo y mannesesitao julo guinin y pinadese, yan manda\u00f1a gui familia sija taeg\u00fcije y inetnon quinilo.\n107:42 Y manunas ujalie ayo yan ufanmagof; yan todo y tinaelaye ujinichom y pachot\u00f1a.\n107:43 Masquesea jaye na manmalate, ujaadaje este sija na g\u00fcinaja; ya sija ujajaso y minaase gui as Jeova.\n108:1 O Yuus, y corasonjo esta meton; bae jucanta, magajetja na jucanta alabansa sija yan todo y minalagjo.\n108:2 Fatmata guitala, yan atpa: guajoja na maesa magmatayo taftaf.\n108:3 Bae junae jao grasias, Jeova gui entalo y taotao sija: yan jucantaye alabansa, sija gui entalo y nasion sija.\n108:4 Sa y dangculon y minaasemo gui san jilo y langet: yan y minagajetmo tinacaja y mapagajes sija.\n108:5 Nadangculojao, O Yuus, gui jilo y langet: yan y minalagomo gui san jilo todo y tano.\n108:6 Para usi\u00f1a ayo y g\u00fcinaeyamo manlibre ni y agapa na canaemo, yan opejam.\n108:7 Si Yuus ileg\u00f1a gui sinantos\u00f1a: Guajo jumagof, guajo jupatte Siquem, yan jumide juyong y bayen Sucot.\n108:8 Yyoco Gilaad; iyoco Manases: Efrain locue y minetgot y ilujo; Juda y bastonjo;\n108:9 Moab y palanganajo anae jufagase adeng sija: y jilo Edom nae juyute y sapatoso: y jilo Filistia nae juagang.\n108:10 Jaye uconeyo asta y jalom y fitme na siuda? Jaye uinesgaejonyo asta y jalom Idumea?\n108:11 Ti jago, O Yuus, ni y yumute jam? yan jago, O Yuus, ti jumanao yan y inetnon sendalonmame.\n108:12 Naejam linibre gui chinatsaga: sa taesetbe y inayudan y taotao.\n108:13 As Yuus nae utafanmatatnga: sa g\u00fciyaja uguinacha papa y enimiguta.\n109:1 CHAMO famatquiquilo, O Yuus, gui alabansajo;\n109:2 Sa y pachot y manaelaye yan y pachot y dinague manmababa contra guajo: sa manguecuentos contra guajo yan y mandacon na jula.\n109:3 Sija umoriyayayeyo locue ni y finijo chinatlie; yan manmumo contra guajo sin jafa.\n109:4 Sa y apas y g\u00fcinaeyaco, sija contrariujo: lao guajo siempre manayuyutyo.\n109:5 Yan sija jaapaseyo taelaye pot mauleg, yan chinatlie pot y guinaeyaco.\n109:6 Polo jao y taelaye na taotao guiya g\u00fciya: ya polo un contrario ya utojgue gui agapa na canae\u00f1a.\n109:7 Yaguin majusga g\u00fce, polo ya umasentensia: yan y tinaetae\u00f1a ufamaisao.\n109:8 Ya y jaani\u00f1a udidide: yan otro uchinile ofisio\u00f1a.\n109:9 Y famaguon\u00f1a ufanaetata yan y asagua\u00f1a ubiuda.\n109:10 Polo ya y famaguon\u00f1a ufanlaong yan ufanmangagao: ya polo sija ya umaliligao y na\u00f1ija g\u00fcije gui chago gui saga\u00f1ija na mayulang.\n109:11 Polo ya umaamot ya unnachule todo y g\u00fcinaja\u00f1a, yan y taotao juyong chumoleguan ni y finachocho\u00f1a.\n109:12 Polo ya taya ni jaye umaase ni g\u00fciya; yan ni uno ufinaborese y manaetata na famaguon\u00f1a.\n109:13 Polo ya y famaguon\u00f1a ufanmautut; yan gui generasion ni y jadalalalag, umafagas\u00f1aejon y naan\u00f1ija.\n109:14 Poly ya y tinaelayen y tata\u00f1a sija umajaso gui as Jeova: ya y isao nana\u00f1a ti umafagas\u00f1aejon.\n109:15 Polo ya sija siempre ufangaegue gui menan Jeova, sa g\u00fciya si\u00f1a umutut y jinaso\u00f1ija guinin y tano.\n109:16 Sa ti jajaso mamanue minaase, lao japetsigue y peble yan y nesesitao na taotao, yan y mayulang na corason ujapuno sija.\n109:17 Magajet na jaguaeya y matdision, ya ayo na mato guiya g\u00fciya; ya ti ninamagof ni y bendision, ya ayo na chago guiya g\u00fciya.\n109:18 Ya g\u00fciya mumagago g\u00fce ni y matdision taeg\u00fcije y bestidu\u00f1a, ya ayo na jumalom gui jalom y tiyan\u00f1a taeg\u00fcije y janom, yan taeg\u00fcije y la\u00f1a gui jalom tolang\u00f1a.\n109:19 Polo ya ayo guiya g\u00fciya, taeg\u00fcije y magago ni y jatatampeg\u00fce, yan para sinturon ni y jadudog g\u00fce siempre.\n109:20 Ya este apas y contrariujo sija guinin as Jeova, yan ayo sija ni y manguecuentos taelaye contra y antijo.\n109:21 Lao fatinas para guajo, O Yuus Jeova, pot y naanmo: sa mauleg na minaasemo, enao mina nalibreyo.\n109:22 Sa pobleyo, yan nesesitaoyo, yan y corasonjo ma\u00f1etnot gui sanjalomjo.\n109:23 Mapos yo taeg\u00fcije y anineng yaguin malofan: matafye yo julo yan papa taeg\u00fcije y apacha.\n109:24 Y timoco mandafe pot y inayunat; yan y catneco manmasogsog, sa ti jataca y iinemog.\n109:25 Jumuyong yo locue taeg\u00fcije linalatde guiya sija: anae maaatanyo jayeyengyong y ilo\u00f1ija.\n109:26 Ayudayo, O Jeova Yuusso; O satbayo segun y minaasemo:\n109:27 Para sija ujatungo na este y canaemo: na jago, Jeova, fumatinas este.\n109:28 Polo ya sija manmamatdise, lao jago manbendise: yaguin sija mangajulo, ufanmamajlao; lao y tentagomo umagof.\n109:29 Ya y contrariojo ufanminagago ni y desonra; yan ufantinampe sija ni y minamajlao\u00f1ija taeg\u00fcije y capa.\n109:30 Jeova bae junae sendangculo na grasias nu y pachotto; junggan, jualabag\u00fce gui linajyan taotao.\n109:31 Sa g\u00fciya utojg\u00fce gui agapa na canae y nesesitao, para usinatba g\u00fce guinin ayo sija y jumusga y anti\u00f1a.\n110:1 SI Jeova ileg\u00f1a ni y se\u00f1otto, fatachong gui agapa na canaejo, asta qui jupolo y enimigo para fa\u00f1ajangan adengmo.\n110:2 Si Jeova uninamannae y baran minetgotmo guinin Sion: gobietna gui entalo y enimigumo sija.\n110:3 Y taotaomo ufanmalago na ufanmanofrese nu sija gui jaanen y ninasi\u00f1amo: gui guinatbon sija y sinantos, guinin y tiyan y agaan, ungae serenon y pinatgonmo.\n110:4 Si Jeova manjula ya tima\u00f1otsot, jago y pale para taejinecog segun y otden Melquisedec.\n110:5 Si Jeova, gui agapa na canaemo, upanag todo y ray sija gui jaanin y binibu\u00f1a.\n110:6 G\u00fciya ufanjusga gui entalo y nasion sija, janabula y sagayan sija ni y tataotao y manmatae; unamagomgom y ilo gui jilo y megae na tano sija.\n110:7 Unaguimen y sadog gui chalan: enaomina g\u00fciya jumatsa julo y ilo.\n111:1 FANMANALABA jamyo as Jeova. Guajo junae si Jeova grasias contodo y corasonjo, gui jalom y pinagat manunas, yan y jalom y inetnon taotao.\n111:2 Y checho Jeova mansendangculo, ya maaliligao ni ayo sija todo y ninafanmamagof nu estesija.\n111:3 Y checho\u00f1a y onra yan minagas: yan y tininas\u00f1a gagaegue para taejinecog.\n111:4 Jafatinas y mannamanman na checho\u00f1a para umajajaso: si Jeova cari\u00f1oso yan bula ni y minaase.\n111:5 G\u00fciya guinin munae nengcano ayo sija y manmaa\u00f1ao nu g\u00fciya: ya g\u00fciya siempre jajasoja tratu\u00f1a.\n111:6 Jagasja jafanue y taotao\u00f1a ni y ninasi\u00f1an y checho\u00f1a, anae janae sija ni y erensian y nasion sija.\n111:7 Y checho sija y canae\u00f1a y minagajet yan juisio; ya todo y sinangan\u00f1a sija manseguro.\n111:8 Manfitme sija para taejinecog yan taejinecog, yan mamafatinas gui minagajet yan y tininas.\n111:9 Janamannae y linibre para y taotao\u00f1a; ya jatago y tratu\u00f1a para taejinecog: sinantos yan inenra y naan\u00f1a.\n111:10 Y minaa\u00f1ao as Jeova y tutujon y minalate y mauleg na tiningo mangaegue g\u00fcije todo gui fumatitinas y tinago\u00f1a: y alabansa\u00f1a gagaegue para taejinecog.\n112:1 FANMANALABA jamyo as Jeova. Dichoso y taotao ni maa\u00f1ao as Jeova, yan ninasendangculo y minagof\u00f1a ni y tinago\u00f1a sija.\n112:2 Ya y semiya\u00f1a manmatatnga gui jilo y tano: ya y generasion manunas ufandichoso.\n112:3 G\u00fcinaja yan rinico mangaegue gui guima\u00f1a: ya y tininas\u00f1a gagaegueja para taejinecog.\n112:4 Ya y manunas nae cajulo y manana gui jalom jomjom: g\u00fciya cari\u00f1oso g\u00fce yan bula minaase, yan tunasg\u00fce.\n112:5 Y mauleg para ayo na taotao ni y fumatitinas y cari\u00f1o, yan numanaayao: g\u00fciya umantiene y causa\u00f1a gui juisio.\n112:6 Sa g\u00fciya ti umanacalamten para taejinecog: y manunas para taejinecog: ufanmajajasoja.\n112:7 G\u00fciya ti umaa\u00f1ao ni y manaelaye na notisia sija: y corason\u00f1a meton ya jaangoco si Jeova.\n112:8 Y corason\u00f1a fitme ya g\u00fciya ti umaa\u00f1ao, asta qui jalie y dinisea\u00f1a gui jilo y contrariu\u00f1a sija.\n112:9 Guiya tumalapon, g\u00fciya numae ni y mamoble; ya y tininas\u00f1a gagaegue para taejinecog, y canggelon\u00f1a umajatsa ni y inenra.\n112:10 Y taelaye na taotao jalie ayo yan ninapinite: yan janachechegcheg y nifen\u00f1a, yan maderite ya mapos: ya y dinisea\u00f1a y taelaye umalingo.\n113:1 FANMANALABA jamyo as Jeova. Fanmanalaba, O tentago Jeova sija. Fanmanalaba y naan Jeova.\n113:2 Bendito y naan Jeova, desde este na tiempo yan para taejinecog.\n113:3 Desde y quinajulo y atdao asta y minachom\u00f1a papa, y naan Jeova para umaalaba.\n113:4 Si Jeova gueftaquilo gui jilo todo y nasion yan y minalag\u00f1a gui jilo y langet sija.\n113:5 Jaye pareju\u00f1a si Jeova ni y Yuusta, ni y japolo y tachong\u00f1a gui sanjilo.\n113:6 Ni y muna umitde g\u00fce para uatan y g\u00fcinaja sija ni y mangaegue gui langet yan y tano.\n113:7 G\u00fciya jumatsa julo y mamoble gui petbos, yan jajatsa y mananesitao gui monton estietcot.\n113:8 Para unafanmatachong yan y prinsepe sija magajet, yan y prinsepen y taotao\u00f1a sija.\n113:9 Ya janafamulan guma y ti fafa\u00f1ago na palaoan, ya jumuyong gofmagof na nanan famaguon. Fanmanalaba jamyo as Jeova.\n114:1 ANAE si Israel jumanao juyong Egipto, y guima Jacob guinin y taotao y finijo na ti matungo.\n114:2 Juda jumuyong y santos na saga\u00f1a, yan Israel y gobietno\u00f1a.\n114:3 Y tase jalie ayo, yan malago; Jordan masugon tate.\n114:4 Y beca sija manayog taeg\u00fcije y quinilo laje yan y mandiquique ogso sija taeg\u00fcije y manpatgon na quinilo sija.\n114:5 Jafa guaja guiya jago, O tase, na malagojao? Jago Jordan ni y masugon tate?\n114:6 Jamyo ni y beca sija ni y manayog taeg\u00fcije y quinilo laje; yan jamyo di quique na ogso sija taeg\u00fcije y manpatgon na quinilo sija?\n114:7 Mayeyengyong, jago tano, gui menan Jeova, gui menan y Yuus Jacob;\n114:8 Ni y jafaacho y jagoe janom, ya jafagagot y tutujon janom sija.\n115:1 AJE ti iyajame, O Jeova, aje ti iyajame, lao iya naanmo, nae uminalag pot y minaasemo, yan pot y minagajetmo.\n115:2 Pot jafa mojon y nasion ileg\u00f1ija: Mangue pago y Yuus\u00f1ija?\n115:3 Lao si Yuusmame gaegue gui langet: guinin jafatinas jafaja y minalago\u00f1a.\n115:4 Y idolos\u00f1ija sija salape yan oro, finatinas y canae y taotao sija.\n115:5 Guaja pachot\u00f1ija lao ti manguecuentos: guaja atadog\u00f1ija lao ti manmanlilie;\n115:6 Guaja talanga\u00f1ija lao ti manmanjujungog: guaja g\u00fcieng\u00f1ija lao ti manmannginginge:\n115:7 Guaja canae\u00f1ija lao ti manmangogote: guaja adeng\u00f1ija lao ti manmamomocat: ni ufanguentos ni y g\u00fcetg\u00fcero\u00f1ija.\n115:8 Ya ayo y fumatinas sija manparejoja yan sija: magajet na jayeja y umangoco g\u00fce guiya sija,\n115:9 O Israel, angoco si Jeova: sa g\u00fciya y ayuda\u00f1ija yan y patang\u00f1ija.\n115:10 O guma Aaron, angoco si Jeova: sa g\u00fciya y ayuda\u00f1ija yan y patang\u00f1ija.\n115:11 Jamyo ni y manmaa\u00f1ao as Jeova, angoco si Jeova: sa g\u00fciya y ayuda\u00f1ija yan y patang\u00f1ija.\n115:12 Si Jeova guinin jajaso jita: guiya bumendisijit; g\u00fciya bumendise y guima Israel; g\u00fciya bumendise y guima Aaron.\n115:13 G\u00fciya bumendise ayo sija y manmaa\u00f1ao as Jeova, todo y mandiquique yan y mandangculo.\n115:14 Si Jeova unninamegae mas yan mas, jago yan y famaguon\u00f1ija.\n115:15 Jamyo manbinendise as Jeova ni y fumatinas y langet yan y tano.\n115:16 Y langet sija ni y langet Jeova sija: lao y tano mannae para y famaguon y taotao sija.\n115:17 Y manmatae ti manmanalaba as Jeova, ni jaye g\u00fcije gui manjajanao papa gui jalom y manmamatquiquiloja.\n115:18 Lao jita, tabendise si Jeova, desde pago na tiempo mona yan para taejinecog. Fanmanalaba jamyo as Jeova.\n116:1 JUGUAEYA si Jeova sa jajungog y inagangjo yan y tinayuyutto sija.\n116:2 Sa janaegueng y talanga\u00f1a guiya guajo, enao mina na juaagangja g\u00fce mientras l\u00e2l\u00e2l\u00e2yo.\n116:3 Y cuetdas y finatae umoriyayeyo, yan y piniten y naftan sumoda yo: ya jusoda chinatsaga yan triniste.\n116:4 Ayo nae juagang y naan Jeova; O Jeova, jugagagaojao, nalibre y antijo.\n116:5 Guaeyayon si Jeova yan tunas; junggan, y Yuusta senyoase.\n116:6 Si Jeova jaadadaje y taeisao: guajo estaba macone tagpapa, yan g\u00fciya sumatbayo.\n116:7 Talo guato gui descansomo, O antijo; sa si Jeova uchalapon megae guiya jago.\n116:8 Sa unalibre y antijo guinin y finatae, y atadogco guinen y lagosija, yan y adengjo guinin y pinedong.\n116:9 Bae jufamocat gui menan Jeova gui tano y manlalala.\n116:10 Jujojonggue, enao mina jusangan sa estaba gosdangculo y pinitijo.\n116:11 Yleco gui chinadigco, todo y taotao sija mandacon.\n116:12 Jafa juapase si Jeova pot todo y minauleg\u00f1a guiya guajo.\n116:13 Bae juchule y copan satbasion, yan juagang y naan Jeova.\n116:14 Bae juapase y promesajo as Jeova, pago gui menan todo y taotao\u00f1a sija.\n116:15 Guaelaye gui linie Jeova, y finatae y ma\u00f1antos\u00f1a.\n116:16 O Jeova, magajet na guajo tentagomo; guajo y tentagomo, yan y lajin y tentagomo palaoan: jago pumula y magodeco.\n116:17 Bae juofrese jao ni y inefresen grasias, yan juaagang y naan Jeova.\n116:18 Bae juapase y promesajo as Jeova, pago gui menan todo y taotao\u00f1a sija.\n116:19 Gui jalom y p\u00e1teo y guima Jeova, gui talo guiya jago, O Jerusalem. Fanmanalaba jamyo as Jeova.\n117:1 O fanmanalaba as Jeova, jamyo todo y nasion sija: fanmanalaba nu g\u00fciya jamyo todo y taotao sija.\n117:2 Sa y minaase\u00f1a dangculo guiya jita; yan y minagajet Jeova gagaegue para taejinecog. Fanmanalaba jamyo as Jeova.\n118:1 O nae gracias si Jeova; sa g\u00fciya mauleg: sa y minaase\u00f1a gagaegue para taejinecog.\n118:2 Polo ya si Israel ileg\u00f1a pago, na y minaase\u00f1a gagaegue para taejinecog.\n118:3 Polo ya y guima Aaron ileg\u00f1a pago, na y minaase\u00f1a gagaegue para taejinecog.\n118:4 Polo ya ayo sija y manmaa\u00f1ao pago as Jeova ileg\u00f1ija, na minaase\u00f1a gagaegue para taejinecog.\n118:5 Juagang si Jeova gui chinatsagaco: ya si Jeova umopeyo, yan japoloyo g\u00fci dangculo na sagayan.\n118:6 Si Jeova para guajo; ya ti jumaa\u00f1ao: jafa si\u00f1a y taotao ufatinas guiya guajo.\n118:7 Si Jeova para guajo gui entalo g\u00fcije sija y umayuyudayo: enao mina julie y dineseajo g\u00fcije sija ni y chumatliiyo.\n118:8 Mas mauleg umaangoco si Jeova qui umapolo y inangoco gui taotao.\n118:9 Mas mauleg umaangoco si Jeova qui umapolo y inangoco y prinsipe sija.\n118:10 Todo y nasion umoriyayeyo: lao pot y naan Jeova juutut sija.\n118:11 Sija umoriyayeyo; junggan, sija umoriyayeyo: lao pot y naan Jeova juutut sija.\n118:12 Sija umoriyayeyo taeg\u00fcije y obeja sija; sija manmapuno taeg\u00fcije y guafen tituca: pot y naan Jeova na juutut sija.\n118:13 Jago chumonegyo para jupodongyo, lao si Jeova umayudayo.\n118:14 Si Jeova y minetgotto yan y cantaco, yan g\u00fciya jumuyong y satbasionjo.\n118:15 Y inagang y minagof yan y satbasion gaegue gui jalom y tiendan y manunas: y agapa na canae Jeova fumatitinas y minatatnga.\n118:16 Y agapa na canae Jeova majatsa julo; y agapa na canae Jeova fumatitinas y minatatnga.\n118:17 Ti jumatae, lao bae jul\u00e2l\u00e2, yan jusangan claro y checho Jeova sija.\n118:18 Si Jeova jacastigayo megae: lao ti janaeyo guato gui finatae.\n118:19 Babayeyo ni y trangcan tininas sija: ya bae jujalom guiya sija, bae junae grasias si Jeova.\n118:20 Este na trangcan Jeova; anae, manjajalom y manunas.\n118:21 Guajo junae jao grasias: sa jago jagasja umopeyo, yan jago jumuyong y satbasionjo.\n118:22 Y acho ni y marechasa ni y manmanjajatsa y guima, jumuyong mumagas na acho gui esquina.\n118:23 Este si Jeova checho\u00f1a; ya namanman gui atadogta.\n118:24 Este na jaane si Jeova fumatinas; tafanmagof yan tafansenmagof ni ayo.\n118:25 Satba pago, jugagagaojao, O Jeova: O Jeova, jugagagaojao, pago namannae minegae.\n118:26 Dichoso ayo y mamamaela gui naan Jeova; inbendisijao guinin y guima Jeova.\n118:27 Yuus si Jeova, guinin fumanuejit ny y inina: funot y inefresen ni y cuetdas asta gui canggelon y attat.\n118:28 Jago y Yuusso, yan bae junaejao grasias: jago y Yuusso, bae jujatsajao julo.\n118:29 O nae grasias si Jeova; sa g\u00fciya mauleg: sa y minaase\u00f1a gagaegueja para taejinecog. Amen.\n119:1 ALEPH MANDICHOSO ayo sija y mangabales gui chalan ni y manmamomocat segun y lay Jeova.\n119:2 Mandichoso ayo sija y umadadaje y testimonio\u00f1a, yan y umaliligao g\u00fce contodo y corason\u00f1ija.\n119:3 Magajet na sija ti manmatitinas jafa ni ti tunas; sija manjajanao gui jinanao\u00f1a sija.\n119:4 Guinin untagojamja ni y finanag\u00fcemo para inguesadaje sija.\n119:5 O mojon ya ufitme y jinanaojo sija, para juadaje y laymo.\n119:6 Ya ayonae ti jumamajlao, yanguin esta jurespeta todo y tinagomo.\n119:7 Bae junaejao grasias, yan y tininas y corason, yanguin jueyag y tinas na juisiomo.\n119:8 Bae juadaje y laymo; chamoyo sumesendingo.\n119:9 BETH Pot jafa y patgon na laje nae unagasgas y jinanao\u00f1a? Yanguin jaguesadaje jaftaemano y sinanganmo.\n119:10 Jagasja jualiligaojao contodo y corasonjo; chamoyo munaabag gui tinagomo sija.\n119:11 Y sinanganmo junaatog gui jalom y corasonjo, para chajo umiisao contra jago.\n119:12 Dichosojao O Jeova; fanag\u00fceyo ni y laymo sija.\n119:13 Contodo y labiosso jagasja jusangan claro todo y juisio sija y pachotmo.\n119:14 Jagasja magofyo gui chalan y testimoniomo; taeg\u00fcije magofyo gui todo y g\u00fcinaja sija.\n119:15 Bae jujaso y finanag\u00fcemo, ya jurespeta y jinanaomo sija.\n119:16 Bae jumagofyo ni y laymo sija: ti jumalefa ni y sinanganmo.\n119:17 GIMEL Guefayuda y tentagomo, para jul\u00e2l\u00e2; ayonae juadaje y sinanganmo.\n119:18 Baba y atadogco, ya julie y mannamanman sija gui tinagomo.\n119:19 Guajo taotao juyongyo gui tano: chamo naaatog y tinagomo sija guiya guajo.\n119:20 Y antijo mayamag pot y minalago\u00f1a ni y guaja gui juisiomo sija todo y tiempo.\n119:21 Unlalatde y sobetbio sija ni y manmatdito, ni y manabag gui tinagomo sija.\n119:22 Nafa\u00f1uja guiya guajo y minamajlao, yan y dinespresia; sa jagasja juadaje y testimoniomo.\n119:23 Y prinsipe sija locue manmatachong yan manguecuentos contra guajo: lao y tentagomo jajajasoja y laymo sija.\n119:24 Y testimoniomo y minagofjo sija yan y taotaojo na p\u00e1pagat sija.\n119:25 DALETH Y antijo mafachet yan y petbos: nal\u00e2l\u00e2yo jaftaemano y sinanganmo.\n119:26 Jusangan claro y jinanaojo sija, ya unopeyo: fanag\u00fceyo ni y laymo sija.\n119:27 Natungoyo ni y chalan y finanag\u00fcemo sija; ayo nae jusangan y namanman y chechomo sija.\n119:28 Y antijo maderite sa macat; nametgotyo jaftaemano y sinanganmo.\n119:29 Nasuja guiya guajo y chalan mandacon; ya naeyo, pot y grasiasmo, y tinagomo.\n119:30 Jagasja juayeg y chalan y minagajet: y juisiomo jagasja jupolo gui menajo.\n119:31 Jusisigue y testimoniomo sija: O Jeova, chamo namamamajlaoyo.\n119:32 Bae jufalalag\u00fce y chalan tinagomo sija, yanguin unnadangculo y corasonjo.\n119:33 HE Fanag\u00fceyo, O Jeova, ni y chalan y laymo sija; ya juadaje asta y uttimo.\n119:34 Naeyo tiningo, ya bae juadaje y laymo: junggan bae juadaje contodo y corasonjo.\n119:35 Nafalofanyo gui chalan y tinagomo, sa ayoyo nae mamagof.\n119:36 Namangag guato y corasonjo gui testimoniomo, ya munga gui linatga.\n119:37 Bira y atadogco ni guinin manlilie banida; ya nal\u00e2t\u00e2yo gui jinanaomo sija.\n119:38 Nafitme y sinanganmo gui tentagomo, ni y deboto nu jago.\n119:39 Bira y minamajlaojo ni y janamaaa\u00f1aoyo; sa y juisiomo sija manmauleg.\n119:40 Liija na minajalangyo ni y finanag\u00fcemo sija: nal\u00e2l\u00e2yo gui tininasmo.\n119:41 VAU Namamaela locue y minaasemo guiya guajo, O Jeova, asta y satbasionmo jaftaemano y sinanganmo.\n119:42 Ayo nae uguaja para juope y munamamamajlaoyo; sa juangocoyo ni y sinanganmo.\n119:43 Ya chamo todo chumuchule gui pachotto y sinangan y minagajetmo; sa jagasja junangga y juisiomo.\n119:44 Ayo nae juadaje y laymo todo y tiempo, para taejinecog yan taejinecog.\n119:45 Ya julibre jumanao; sa jagasja jualigao y finanag\u00fcemo sija.\n119:46 Ya bae jusangan locue y testimoniomo sija gui menan y ray sija, ya ti jumamajlao.\n119:47 Ya bae jumagofyo gui tinagomo sija, ni y juguaeya.\n119:48 Bae jujatsa julo locue y canaejo sija gui tinagomo sija, ni y juguaeya; ya bae jujaso y laymo sija.\n119:49 ZAIN Jaso y sinangan gui tentagomo, ni y unfatinasyo na junangga.\n119:50 Este munamamagofyo gui trinisteco; sa y sinanganmo jagasja munal\u00e2l\u00e2yo.\n119:51 Gogosmachatg\u00fceyo ni y mansobetbio: lao trabia ti juabag guinin y laymo.\n119:52 Jagasja jujajaso y juisiomo sija ni y guinin ampmam na tiempo, O Jeova, ya jagasja juconseulan maesayo.\n119:53 Jaguotyo y maepe na binibo, sa pot y manaelaye ni y madingo y laymo.\n119:54 Y lay sija cantaco sija gui guima anae taotao tumanoyo.\n119:55 Jagasja jujajaso y naanmo, O Jeova qui puenge, ya juadadajeja y laymo.\n119:56 Este guajayo, sa juadaje y finanag\u00fcemo.\n119:57 CHETH Si Jeova y patteco guinin jusangan na juadaje y sinanganmo sija.\n119:58 Jugagao y finaboresemo contodo y corasonjo: magaease nu guajo jaftaemano y sinanganmo.\n119:59 Jujaso gui jinanaojo sija, ya jubira y adengjo guato gui testimoniomo sija.\n119:60 Inalululayo, ya ti sumagayo, para juadaje y tinagomo sija.\n119:61 Y cuetdas manaelaye jafunutyo; lao ti malefayo ni y laymo.\n119:62 Bae jucajulo gui tatalopuenge, ya junaejao grasias, sa pot y tinas na juisiomo.\n119:63 Guajo gachong ayo sija y manmaa\u00f1ao nu jago, yan ayo sija y umadadaje y finanag\u00fcemo.\n119:64 Y tano, O Jeova, bula ni y minaasemo: fanag\u00fceyo ni y laymo sija.\n119:65 TETH Mauleg finatinasmo ni y tentagomo, O Jeova, jaftaemano y sinanganmo.\n119:66 Fanag\u00fceyo mauleg na juisio yan tiningo: sa jagasja jujonggue y tinagomo.\n119:67 Antes di jutriste, umabagyo; lao pago juadaje y sinanganmo.\n119:68 Jago maulegjao, ya unfatinas mauleg; fanag\u00fceyo ni y laymo sija.\n119:69 Y sobetbio jafatinas un dinague contra guajo: bae juadadajeja y finanag\u00fcemo sija contodo y corasonjo.\n119:70 Y corason\u00f1ija, manmantica calang sebo: lao jumagofyo ni y laymo.\n119:71 Mauleg para guajo, na guinin ninatristeyo; para jueyag y laymo sija.\n119:72 Y lay y pachotmo, mauleg\u00f1a para guajo, qui ni mit na oro yan salape.\n119:73 JOD Y canaemo sija fumatinasyo yan fumajechurayo; naeyo tiningo, para jueyag y tinagomo sija.\n119:74 Ayo sija y manmaa\u00f1ao nu jago ujalieyo ya ufanmagof; sa jagasja junangga y sinanganmo.\n119:75 O Jeova, jutungoja na y juisiomo tunas, yan pot y minagajetmo na unnatristeyo.\n119:76 Polo jutayuyutjao ya y minauleg y minaasemo unamagofyo, jaftaemano y sinanganmo gui tentagomo.\n119:77 Polo ya ufato guiya guajo y cari\u00f1oso na minaasemo sija, para ul\u00e2l\u00e2yo; sa y tinagomo y minagofjo.\n119:78 Polo ya manmamajlao y mansobetbio; sa manapodong yo nu y dinague: lao jujajasoja y finanag\u00fce sija.\n119:79 Polo ya umabira iyaguajo ayo sija y manmaa\u00f1ao nu jago, yan sija ujatungo y testimonio sija.\n119:80 Polo ya fitme y corasonjo gui laymo, ya chajo mamamajlao.\n119:81 CAPH Y antijo lalango pot y satbasionmo, lao junananggaja y sinanganmo.\n119:82 Y atadogco ninalachae pot y sinanganmo mientras ileleco: Ngaean nae unconsuelayo.\n119:83 Sa jumuyongyo calang y boteya gui jalom aso; lao trabia ti malelefayo ni y laymo sija.\n119:84 Cuanto sija y jaanen y tentagomo? Asta ngaean nae unjusga ayo sija y pumetsisigueyo?\n119:85 Y mansobetbio manmanguadog joyo para guajo, ni y ti taeg\u00fcije laymo.\n119:86 Todo y tinagomo sija manunas: ayudayo sa sija mapetsisigueyo ni y dinague.\n119:87 Canaja malalachaeyo gui jilo y tano; lao ti judingo y finanag\u00fcemo sija.\n119:88 Nal\u00e2l\u00e2yo pot y cari\u00f1oso na g\u00fcinaeyamo, ayo nae juadaje y testimonion pachotmo.\n119:89 LAMED O Jeova, para taejinecog y sinanganmo fitme gui langet.\n119:90 Y minagajetmo gagaegue asta todo y generasion sija; jago plumanta y tano ya sumaga.\n119:91 Sija jasisigueja asta pago na jaane jaftaemano y otdenmo; sa todos sija tentagomo.\n119:92 Yaguin ti jagas janamagofyo y laymo, jagas malingo ni y trinisteco.\n119:93 Ti jumalefa ni y finanag\u00fcemo sija para taejinecog: sa pot sija na unnal\u00e2l\u00e2yo.\n119:94 Guajo iyomoyo, satbayo; sa jualiligao y finanag\u00fcemo sija.\n119:95 Y manaelaye manananggayo para umayulang; lao jugueguesjasoja y testimoniomo sija.\n119:96 Guinin julie y uttimon y todo quinabales; ya y tinagomo gosfeda.\n119:97 MEM O jafa muna juguaeyo y tinagomo! esteja jinasosoco todot dia.\n119:98 Y tinagomo janafanungo\u00f1ayo qui enemigujo sija; sa sija siempre infanjajameja.\n119:99 Megae\u00f1a tiningojo qui todo y maestronomo sija: sa y testimoniomo sija, y jinasojo.\n119:100 Manungo\u00f1ayo qui y manbijo; sa juadadaje y finanag\u00fcemo sija.\n119:101 Junapara y adengjo guato gui todo chalan tinaelaye, para juadaje y sinangan.\n119:102 Ti jubirayo gui juisiomo: sa jagasja unfanag\u00fceyo.\n119:103 Na minames y sinanganmo ni y chinaguijo, junggan mames\u00f1a qui y miet para y pachotto.\n119:104 Guinin y finanag\u00fcemo sija nae ma\u00f1uleyo tiningo: enaomina juchatlie todo y chalan mandacon.\n119:105 NUN Y sinanganmo y candet para y adengjo, yan manana gui chalanjo.\n119:106 Manjulayo ya junafitme na juadaje y tinas na juisiomo sija.\n119:107 Gospiniteyo; nal\u00e2l\u00e2yo, O Jeova, jaftaemano y sinanganmo.\n119:108 O Jeova, jutatayuyut jao: chajlao y libren y inefresen pachotto sija, ya fanag\u00fceyo ni y juisiomo.\n119:109 Antijo siempre gaegue g\u00fci canaejo; lao ti malelefayo ni y laymo.\n119:110 Y manaelaye maplantayeyo laso; lao ti sumujayo gui finanag\u00fcemo.\n119:111 Juchule erensiaco para siempre y testimoniomo sija; sa sija y minagof y corasonjo.\n119:112 Jumangag y corasonjo para jucumple y laymo sija; para taejinecog asta y uttimo.\n119:113 SAMECH Juchatlie y mangaejinaso dobble: lao y tinagomo juguaeya.\n119:114 Jago y fanatogco na lugat yan y patangjo: junanangga, y sinanganmo.\n119:115 Fa\u00f1uja guiya guajo jamyo ni y chumog\u00fce manaelaye: para juadadaje y tinago Yuusso.\n119:116 Mantieneyo jaftaemano y sinanganmo, para jul\u00e2l\u00e2: ya chamoyo na mamamajlao ni y ninanggaco.\n119:117 Mantieneyo ya juseguro: ya jurespeta y tinagomo sija siempre.\n119:118 Unpolo pot taya todo ayo sija y manaba gui laymo: sa y finababa\u00f1ija taebale.\n119:119 Unnafa\u00f1uja todo ayo sija y manaelaye gui tano calang basula: enao mina juguaeya y testimoniomo sija.\n119:120 Y catneco lalaolao pot y maa\u00f1ao\u00f1a nu jago: ya maa\u00f1aoyo ni y juisiomo sija.\n119:121 AIN Jufatinas juisio yan tininas: chamoyo dumidingo gui minafa\u00f1atsagayo.\n119:122 Jago unaseguro y tentagomo para mauleg; chamo pum\u00f3polo y sobetbio na unachatsagayo.\n119:123 y atadogco yafae pot y satbasionmo, yan pot y tinas na sinanganmo.\n119:124 Fatinas gui tentagomo jaftaemano y minaasemo, yan fanag\u00fceyo ni y laymo sija.\n119:125 Guajo tentagomoyo; naeyo tiningo, ya jutungo y tinagomo sija.\n119:126 Esta tiempo para si Jeova ufachocho: na sija manataebale y laymo.\n119:127 Enao mina juguaeya y tinagomo sija, mas qui y oro, junggan, mas qui y fino na oro.\n119:128 Enao mina junaguaelaye todo y finanag\u00fcemo sa tunas pot todo g\u00fcinaja: ya juchatlie y cada chalan dacon.\n119:129 PE Y tinagomo sija mann\u00e1manman: enao mina maninadadaje ni y antijo.\n119:130 Y binaban y sinanganmo numae manana: jananae tinago\u00f1a y manaetiningo.\n119:131 Juguefbaba y pachotto, ya sumuspirosyo: sa majalangyo ni y tinagomo sija.\n119:132 Birajao guiya guajo, y unmaase nu guajo, taeg\u00fcije y costumbremo ni unfatinas ni ayo sija ni gumaeya y naanmo.\n119:133 Naregla y pinecatto ni y sinanganmo: ya chamo na fangagae ninasi\u00f1a y jafa na isao guiya guajo.\n119:134 Nalibreyo gui chiniguet y taotao, ayo nae juadaje y finanag\u00fcemo.\n119:135 Nafanina y matamo gui jilo y tentagomo; ya unfanag\u00fceyo ni y laymo.\n119:136 Janom sadog manmalalago papa gui atadogco sija sa sija ti maadaje y tinagomo.\n119:137 TZADE Tunasjao, O Jeova, yan tunas y juisiomo sija.\n119:138 Jagasja untago y testimoniomo sija gui tininas, yan minagajetja.\n119:139 Y inigojo jalachaeyo, sa y contrariujo sija manmalefa ni y sinanganmo sija.\n119:140 Y sinanganmo sengasgas: enao mina jaguaeya y tentagomo.\n119:141 Diquiqueyo, ya madespresiayo, lao ti malelefayo ni y finanag\u00fcemo sija.\n119:142 Y tininasmo taejinecog na tininas ya y tinagomo minagajet.\n119:143 Chinatsaga yan pinite sumodayo: lao y tinagomo sija minagofjo.\n119:144 Y testimoniomo sija manunas para taejinecog: naeyo tiningo ya jul\u00e2l\u00e2.\n119:145 KOPH Umaagangyo contodo y corasonjo; opeyo, O Jeova; bae juadaje y laymo sija.\n119:146 Jagasja juagangjao; satbayo, ya juadaje y testimoniomo sija.\n119:147 Taftaf\u00f1ayo qui y egaan ya umagangyo: junangga guiya jago.\n119:148 Y atadogco tafta\u00f1a qui y bumela gui puenge para jujajasoja y sinanganmo.\n119:149 Jungog y inagangjo jaftaemano y minauleg g\u00fcinaeyamo: O Jeova, nal\u00e2l\u00e2yo, jaftaemano y juisiomo.\n119:150 Manjijot ayo sija y tumatitiye y tinaelaye: sija ma\u00f1ago gui tinagomo.\n119:151 Jago jijot jao, O Jeova; yan todo y tinagomo sija minagajet.\n119:152 Pot guinin ampmam na tiempo jutungo y testimoniomo sija, ni y unplanta sija para siempre.\n119:153 RESH Jaso y trinisteco, ya nalibreyo; sa ti malefayo ni y laymo.\n119:154 Plaitea y causaco, ya nalibreyo ni apasmo: nal\u00e2l\u00e2yo jaftaemano y sinanganmo.\n119:155 Chago y satbasion gui manaelaye, sa ti maaliligao y laymo sija.\n119:156 Dangculo y cari\u00f1oso na minaasemo, O Jeova, nal\u00e2l\u00e2yo jaftaemano y juisiomo sija.\n119:157 Megae pumetsisigueyo yan contrariujo; lao ti sumususujayo gui testimoniomo sija.\n119:158 Julie y fumatinas dinague, ya tristeyo, sa ti maadaje y sinanganmo.\n119:159 Jaso jafa muna juguaeya y finanag\u00fcemo sija: nal\u00e2l\u00e2yo, O Jeova, jaftaemano y munamauleg g\u00fcinaeyamo.\n119:160 Y resumen sinanganmo minagajet; ya cada uno tunas na juisiomo sija gagaegue para taejinecog.\n119:161 SHIN Y prinsipe sija mapetsisigueyo sin causa: lao y corasonjo maaa\u00f1aoja ni y sinanganmo.\n119:162 Jumagofyo ni y sinanganmo, taeg\u00fcije y manma\u00f1oda dangculo na inamot.\n119:163 Jugoschatlie ya juingin y dinague; lao y laymo juguaeya.\n119:164 Siete maje gui un jaane jualabajao, sa pot y tinas na juisiomo.\n119:165 Dangculo na pas guaja para ayo sija y gumaeya y laymo, ya taya lugat\u00f1ija para ufanmatompo.\n119:166 O Jeova, jagasja junangga y satbasionmo, ya esta juchog\u00fce y tinagomo sija.\n119:167 Y antijo esta jaadaje y tinagomo sija: ya sija mangosyajo.\n119:168 Esta juadaje y finanag\u00fcemo sija yan y testimoniomo sija; sa todo y jinanaojo mangaegue gui menamo.\n119:169 TAU Polo ya y inagangjo ufato jijot gui menamo, O Jeova: naeyo tiningojo jaftaemano y sinanganmo.\n119:170 Polo y tinayuyutto ya ufato gui menamo: nalibreyo jaftaemano y sinanganmo.\n119:171 Polo y labiosso ya umasangan alabansa sija; sa unfanag\u00fceyo ni y laymo sija.\n119:172 Polo ya y jilajo ucanta y sinanganmo: sa todo y tinagomo manunas.\n119:173 Polo ya ulisto y canaemo para uinayudayo; sa y tinagomo jagasja juayeg.\n119:174 Jagasja majalangyo ni y satbasionmo, O Jeova: ya y laymo minagofjo.\n119:175 Palo ya ul\u00e2l\u00e2 y antijo, ya ualabajao: polo ya juisiomo sija uinayudayo.\n119:176 Juabagyo, parejo yan y malingo na quinilo: aligao y tentagomo; sa ti malelefayo ni y tiningomo sija.\n120:1 Y Cantan Quinajulo. JUAGANG si Jeova gui anae chatsagayo, ya jaopeyo.\n120:2 Nalibre y antijo, O Jeova, gui mandacon na labios, yan y maf\u00e1fababa na jula.\n120:3 Jafa unmannae jao, pat jafa mas unmafatinas guiya jago y dacon: na jula?\n120:4 Y cadidug y flechan y matatnga, yan y pinigan gago.\n120:5 Ae ae guajo, ni taotao tumanoyo guiya Meseg, ya sumagayo gui tiendan Kedar.\n120:6 Y antijo sumaga apmam, yan ayo y chumatlie y pas.\n120:7 Guajo para pas, lao, anae cumuentosyo, sija para guera.\n121:1 Y Cantan Quinajulo. JUJATSA julo y atadogco gui sabana: guinin mamano mague y umayuyudayo?\n121:2 Y umayuyudayo guinin as Jeova, ni y fumatinas y langet yan y tano.\n121:3 Ti upolo y adengmo na umanacalamten: ayo y umadadajejao ti umatujog.\n121:4 Estag\u00fce, y umadadaje Israel ti umatujog ni ti umaego.\n121:5 Si Jeova y umadadajejao: si Jeova nujongmo gui agapa na canaemo.\n121:6 Y atdao ti unninasague gui jaane, ni y pilan gui puenge.\n121:7 Si Jeova uninadaje gui todo tinaelaye: g\u00fciya uadaje y antimo.\n121:8 Si Jeova uninadaje yan jumujuyongjao yan jumajalomjao, desde pago na tiempo yan para taejinecog.\n122:1 Y Cantan Quinajulo. MAGOFYO anae ileg\u00f1ija nu guajo, nije tafanmalag y guima Jeova.\n122:2 Y adengta ufanojgue gui jalom y trangcamo, O Jerusalem.\n122:3 Jerusalem, mafatinas jago calang y siuda ni y mafatinas mafnot:\n122:4 Sa ayo nae mangajulo y tribosija, magajet na y tribon y Jeova, pot y testimonio guiya Israel, para ujanae grasias y naan Jeova.\n122:5 Sa ayonae mapolo y trono sija para ufanmanjusga, y trono sija gui guima David.\n122:6 Fanmanayuyut para upas iyon Jerusalem: sa mumegae ayo sija y gumaeyajao.\n122:7 Pas ugaegue gui jalom y quelatmo, yan guinefsaga gui jalom palasyomo.\n122:8 Pot causan y ma\u00f1elujo yan y mangachongjo, jualog pago: Pas ugaegue gui sanjalommo.\n122:9 Pot causan guma Jeova Yuusso nae jualigao y minaulegmo.\n123:1 Y Cantan Quinajulo. YYAJAGO nae jujatsa y atadogco, O jago ni y matatachong gui langet sija.\n123:2 Estag\u00fce, parejo yan y atadog tentago sija ni y jaaatan y canae y amu\u00f1ija, yan y atadog sija y palaoan jaaatan y canae y amafia; parejoja y atadogmame jaaatan locue si Jeova Yuusmame, asta qui ugaemaase nu jame.\n123:3 Gaease nu jame, O Jeova, gaease nu jame: sa guesmanbulajam ni y iningen.\n123:4 Y antita senbula ni y binitlean ayo sija y taepinite, yan y denespresian y mansobetbio.\n124:1 Y Cantan Quinajulo; iyon David. YANGUIN si Jeova ti guinin estaba gui bandata, pago Israel ualog;\n124:2 Yanguin si Jeova ti guinin estaba gui bandata, anae y taotao sija mangajulo contra jita:\n124:3 Ayo nae japa\u00f1otjit lal\u00e2l\u00e2, yanguin mangosbubu contra jita.\n124:4 Ayo nae janafanmachuchudajit y janom, yan y diquique na sadog malofan gui jilo y antita:\n124:5 Ayo nae y mansobetbio na janom manmalofan gui jilo y antita.\n124:6 Dichoso si Jeova, sa ti mannae nu jita para g\u00fcinaja y nifen\u00f1ija.\n124:7 Y antijo umescapa taeg\u00fcije y pajaro yan umescapa g\u00fce gui lason y tiradot: magtos y laso, ya manescapajam.\n124:8 Y naan Jeova umayuyudajam, ni y fumatinas y langet yan y tano.\n125:1 Y Cantan Quinajulo. TODO ayo y umangogoco sija gui as Jeova ufanaeg\u00fcije y egso Sion, ni y ti si\u00f1a manacalamten, ya usaga para taejinecog.\n125:2 Taemanoja y egso sija gui oriyan Jerusalem, taeg\u00fcijeja si Jeova gui oriyan y taotao\u00f1a sija, desde pago para taejinecog.\n125:3 Sa y baran y manaelaye ti usaga gui jilo y fottuna y manunas; sa noseaja ujajuto mona canae\u00f1ija y manunas gui tinaelaye.\n125:4 Fatinas mauleg g\u00fcije sija gui manmauleg, O Jeova, yan ayo sija y manunas corason\u00f1ija.\n125:5 Lao ayo sija y bumira sija ya malag y echong na chalan\u00f1ija, si Yuus ufaninesgaejon yan ayo sija y manmamatitinas tinaelaye. Pas ugaegue guiya Israel.\n126:1 Y Cantan Quinajulo. ANAE jabira talo si Jeova y quinautiba iyon Sion, manparejojit yan ayo sija y manmang\u00fcife.\n126:2 Ayonae y pachotto bula chinaleg, ya y jilata canta: ya ayonae ujaalog gui entalo y nasion sija: si Jeova jafatinas dangculo na g\u00fcinaja para sija.\n126:3 Si Jeova jafatinas dangculo na g\u00fcinaja para jita; enaomina tafanmagof.\n126:4 Bira talo y quinautibanmame, O Jeova, taeg\u00fcije y sadog gui sumanjaya.\n126:5 Ayo sija y manmananom yan lago: ufanmangoco yan minagof.\n126:6 Achogja jumajanao mona ya tuma tanges, ma\u00f1u\u00f1ule bonito na semiya; ufato talo yan y minagof\u00f1a, jachuchuleja y manojon quineco\u00f1a.\n127:1 Y Cantan Quinajulo; iyon Salomon. YANGUIN ti si Jeova y jumatsa y guima, taebale y finatinas\u00f1ija y manmachocho: yanguin ti si Jeova y umadaje y siuda, y guatdia magmamataja lao taebale.\n127:2 Taebale y uncajulo taftaf, ya undescansa atrasao, ya uncano y pan pinite: sa jananaeja ni y g\u00fcinaeya\u00f1a y mamaego.\n127:3 Estag\u00fce, y famaguon erensian Jeova: ya yi tinegcha y tiyan, apasi\u00f1a.\n127:4 Jaftaemanoja y flecha gui canae y matatnga na taotao; taeg\u00fcijeja locue y famaguon y manpatgon.\n127:5 Magof y taotao yanguin bula y questat y flecha\u00f1a nu sija: ti ufanmamajlao, lao ufanguentos yan y enemigo sija gui trangca.\n128:1 Y Cantan Quinajulo. DICHOSO ayo y maa\u00f1ao as Jeova; ni y mamomocat, gui chalan\u00f1a sija.\n128:2 Sa uncano y finachocho y canaemo: siempre unmagof yan umauleg para jago.\n128:3 Y asaguamo utaeg\u00fcije y trongcon ubas ni y bula tinegcha gui jalom guimamo: y famaguonmo manparejo yan y tinanom olibo gui oriyan y lamasamo.\n128:4 Estag\u00fce, taeg\u00fcijeja y bendision\u00f1a ni y maa\u00f1ao as Jeova.\n128:5 Si Jeova ubinendisejao gui Sion; ya unlie y minauleg guiya Jerusalem todo y jaanin y lin\u00e2l\u00e2mo.\n128:6 Magajet na unlie y famaguon y famaguonmo. Pas ugaegue guiya Israel.\n129:1 Y Cantan Quinajulo. MEGAE na tiempo nae manapiniteyo desde y pinatgonjo: polo ya ualog Israel pago:\n129:2 Megae na tiempo nae manapiniteyo desde y pinatgonjo: lao trabia ti mangana ni y ninasi\u00f1a\u00f1ija contra guajo.\n129:3 Y manmanalado jaalado gui jilo y tatalojo: janafananaco y sutco\u00f1ija.\n129:4 Si Jeova tunaeg\u00fce: g\u00fciya umutut y cuetdas y manaelaye.\n129:5 Polo ya ufanmamajlao todo ayo y bumira sija tate, todo sija y chumatlie Sion.\n129:6 Polo ya ufantaeg\u00fcije y chaguan gui jilo guma, ni y anglo antes di udoco:\n129:7 Ya cha\u00f1a y manuutut chaguan munabubula y canae\u00f1a, ni y pechon\u00f1a y manmanonojo.\n129:8 Ni ujaalog ayo sija y manmalolofan, Y bendision Jeova usaga gui jilomo; jame bumendise jao pot y naan Jeova.\n130:1 Y Cantan Quinajulo. Y sumanjiyong y tinadong nae juagang jao, O Jeova.\n130:2 Jeova, ecungog y inagangjo: polo ya talangamo sija uegueng gui inagang y guinagaojo.\n130:3 Yanguin mojon unmatca y tinaelaye sija; Jeova, jaye utojg\u00fce?\n130:4 Lao guaja inasie guiya jago, para unmamaa\u00f1ag\u00fce.\n130:5 Junanangga si Jeova, y antijo mannanangga, ya y sinangan\u00f1a junanangga.\n130:6 Y antijo jananangga si Jeova, mas qui y guatdia sija ni manmannanangga y egaan: magajet na mas qui y guatdia sija manmannananangga y egaan.\n130:7 O Israel nangga si Jeova; sa gui as Jeova guaja minaase, ya iya guiya nae megae na inalibre.\n130:8 Ya g\u00fciya unalibre Israel todo gui tinaelaye\u00f1a.\n131:1 Y Cantan Quinajulo; iyon David. JEOVA, ti sobetbio y corasojo, ni ti taglajiyon y atadogco: ni comequegaechecho yo ni y dangculo na g\u00fcinaja; ni mas nin\u00e1manman para guajo.\n131:2 Magajet na jufamatquilo yo yan junaquietoyo; taeg\u00fcije y patgon yan ninasusu as nana\u00f1a: y antijo guiya guajo parejo yan y patgon ni y sumususu.\n131:3 O Israel nangga si Jeova, desde pago ya para taejinecog.\n132:1 Y Cantan Quinajulo. JEOVA jaso para si David, todo y triniste\u00f1a;\n132:2 Jaftaemano na manjula gui as Jeova yan japromete y Gaesisi\u00f1a gui as Jacob;\n132:3 Magajet na ti jujalom gui tabetnaculon y guimajo, ni jufalag gui camajo:\n132:4 Ti junamatujog y atadogco; ni junamaego y lasas y atadogco,\n132:5 Asta qui jusodayo y lugat para si Jeova, y tabetnaculo para y Gaesisi\u00f1a gui as Jacob.\n132:6 Estag\u00fce na injingog masangang\u00fce guiya Efrata ya inseda gui fangualuan qui jalomtano.\n132:7 Infanjalom gui tabetnaculu\u00f1a: inadora gui menan y fa\u00f1ajangan adeng\u00f1a.\n132:8 Cajulo, O Jeova, gui lugat y descansomo: jago yan y atcan y minetgotmo.\n132:9 Polo y mamalemo sija ya ufanminagago ni y tininas: ya y ma\u00f1antosmo sija ufanagang ni y minagof.\n132:10 Pot y naan y tentagomo as David, chamo bumibira y matan y pinalaemo.\n132:11 Si Jeova manjula minagajet gui as, David; ti ubira g\u00fce; y tinegcha y tataotaomo, juplanta gui jilo tronumo.\n132:12 Yaguin jaadaje y famaguonmo y tratujo, yan y testimoniojo ni y jufanag\u00fce sija, asta y famaguon\u00f1ija locue ufanmatachong gui tronumo para taejinecog.\n132:13 Sa si Jeova guinin jaayeg Sion; este jadesea para saga\u00f1a.\n132:14 Este y lugat y descansoco para taejinecog: este nae jusaga; sa este judesea.\n132:15 Bae jubendise dangculo y prebension\u00f1a: ya bae junafannajong y mamoble\u00f1a ni y pan.\n132:16 Junafanminagago locue y mamale\u00f1a sija ni y satbasion: yan y ma\u00f1antos\u00f1a sija ufanagang managang ni y minagof.\n132:17 Ayonae junadoco y canggelon David: guinin jufamauleg y candit para y pinalaejo.\n132:18 Bae junafanminagago y enemigu\u00f1a sija ni y minamajlao; lao y jilo\u00f1a nae unamagas y corona\u00f1a.\n133:1 Y Cantan Quinajulo; iyon David. ESTAG\u00dcE, jafa munamauleg, yan jafa munamagof y ma\u00f1elo ufa\u00f1aga ma\u00f1isija gui unoja.\n133:2 Este parejo yan y mauleg na la\u00f1a gui ilo, ni y mimilalag gui batbas, asta y batbas Aaron; ya jumajnanao papa asta y cueyon magagu\u00f1a;\n133:3 Taeg\u00fcije serenon Hermon, ni y mamopodong gui jilo ogso guiya Sion; sa ayo nae ma\u00f1ago si Jeova y bendision, g\u00fciya taejinecog na lin\u00e2l\u00e2.\n134:1 Y Cantan Quinajulo. ESTAG\u00dcE, fanmanbendise as Jeova, todo jamyo ni y tentago Jeova, ni y manotojgue gui jalom y guima Jeova gui puenge.\n134:2 Jatsa julo y canaemiyo gui sinantos na sagayan, ya fanmanbendise jamyo as Jeova.\n134:3 Si Jeova ni y fumatinas y langet yan y tano, bumendise jao guiya Sion.\n135:1 FANMANALABA jamyo as Jeova. Fanmanalaba jamyo y naan Jeova: fanmanalaba g\u00fce, O jamyo, ni y tentago Jeova sija.\n135:2 Jamyo ni y manotojgue gui jalom guma Jeova, y jalom pateo y guimayuus.\n135:3 Fanmanalaba as Jeova; sa si Jeova mauleg g\u00fce: fanganta y alabansa sija ni y naan\u00f1a; sa magof este.\n135:4 Sa si Jeova jaayeg si Jacob para g\u00fciya, ya Israel para y g\u00fcinaja\u00f1aja namaesa.\n135:5 Sa jutungo na si Jeova dangculo g\u00fce: ya y Se\u00f1otta taquilo\u00f1a qui todo y Yuus.\n135:6 Jafaja y malago\u00f1a si Jeova, esteja jafatinas, gui langet yan y tano, yan y tase, yan todo y manadong na lugat.\n135:7 Janafangajujulo y asgon sija guinin y uttimon y tano; janalalamlam para uuchan; janachinile y manglo gui g\u00fcinaja\u00f1a.\n135:8 Ni y janalamen y finenana na fina\u00f1ago guiya Egipto, todo y taotao yan y g\u00e2g\u00e2.\n135:9 Ya manago se\u00f1at sija yan mannamanman gui talo guiya jago, O Egipto: gui as Faraon yan todo y tentago\u00f1a.\n135:10 Ya janalamen y mandangculo na nasion, yan japuno y manmatat\u00f1ga na ray sija.\n135:11 Si Seh\u00f3n ray y Amorreo yan si Og ray Bas\u00e1n, yan todo y raeno sija guiya Cananea:\n135:12 Ya mannae para erensia ni y tano\u00f1ija: para erensian y taotao na guiya Israel.\n135:13 Y naanmo O Jeova, gagaegue para taejinecog; y majasomo, O Jeova, para todo y generasion sija.\n135:14 Sa si Jeova ujusga y taotao\u00f1a, ya ugaease ni y tentago\u00f1a sija.\n135:15 Y idolos y nasion sija, salape yan oro, y checho y canae y taotao sija.\n135:16 Guaja pachot\u00f1ija, lao ti manguecuentos: guaja atadog\u00f1ija, lao ti manmanlilie;\n135:17 Guaja talanga\u00f1ija; lao ti manmanjujungog; ni uguaja jinagong gui pachot\u00f1ija.\n135:18 Ayo sija y fumatinas estesija ujafanparejoja yan sija: magajet na cada uno ni y umangoco sija ni ayosija.\n135:19 O guma Israel, bendise si Jeova: O guma Aaron, bendise si Jeova.\n135:20 O guma Levi, bendise si Jeova: jamyo ni y manmaa\u00f1ao as Jeova, bendise si Jeova.\n135:21 Bendito si Jeova guinin Sion ni y sumaga guiya Jerusalem. Fanmanalaba jamyo as Jeova.\n136:1 O nae si Jeova grasias; sa g\u00fciya mauleg: sa y minaase\u00f1a gagaegue para taejinecog.\n136:2 O nae grasias y Yuus y yuus sija: sa y minaase\u00f1a gagaegue para taejinecog.\n136:3 O nae grasias y Se\u00f1ot y se\u00f1ot sija: sa y minaase\u00f1a gagaegue para taejinecog.\n136:4 Para ayo y g\u00fciyaja namaesa fumatinas y dangculo namanman: sa y minaase\u00f1a gagaegue para taejinecog.\n136:5 Para g\u00fciya ni y pot y tiningo jafatinas y langet: sa y minaase\u00f1a gagaegue para taejinecog.\n136:6 Para g\u00fciya ni y jajuto y tano gui jilo janom sija: sa y minaase\u00f1a gagaegue para taejinecog.\n136:7 Para guiya ni y jafatinas y mandangculo na candet sija: sa y minaase\u00f1a gagaegue para taejinecog.\n136:8 Y atdao para ufangobietna gui jaane: sa y minaase\u00f1a gagaegue para taejinecog.\n136:9 Y pilan yan y pution sija para ufanmangobietna gui puenge: sa y minaase\u00f1a gagaegue para taejinecog.\n136:10 Para g\u00fciya ni y munalamen Egipto gui finenana na fina\u00f1ago\u00f1ija: sa y minaase\u00f1a gagaegue para taejinecog.\n136:11 Ya jacone juyong Israel gui entalo\u00f1ija: sa y minaase\u00f1a gagaegue para taejinecog.\n136:12 Yan y metgot na jataf canae yan y canae na majala: sa y minaase\u00f1a gagaegue para taejinecog.\n136:13 Para g\u00fciya ni y japatten dos y Tasen Agaga: sa y minaase\u00f1a gagaegue para taejinecog.\n136:14 Ya janafalofan Israel gui entalo\u00f1a: sa y minaase\u00f1a gagaegue para taejinecog.\n136:15 Ya jayute si Faraon yan todo y sendalu\u00f1a sija gui Tasen Agaga: sa y minaase\u00f1a gagaegue para taejinecog.\n136:16 Para g\u00fciya ni y jaosgaejon y taotao\u00f1a y inanaco y desierto: sa y minaase\u00f1a gagaegue para taejinecog.\n136:17 Para g\u00fciya ni y janalamen y mandangculo na ray sija: sa y minaase\u00f1a gagaegue para taejinecog.\n136:18 Yan japuno y mangaeninasi\u00f1a sija na ray: sa y minaase\u00f1a gagaegue para taejinecog.\n136:19 Si Seh\u00f3n ray y Amorreo: sa y minaase\u00f1a gagaegue para taejinecog.\n136:20 Yan si Og ray Bas\u00e1n: sa y minaase\u00f1a gagaegue para taejinecog.\n136:21 Ya mannae erensia ni y tano\u00f1ija: sa y minaase\u00f1a gagaegue para taejinecog.\n136:22 Magajet na para erensian y tentago\u00f1a guiya Israel: sa y minaase\u00f1a gagaegue para taejinecog.\n136:23 Ni y jajasojit gui managpapata: sa y minaase\u00f1a gagaegue para taejinecog.\n136:24 Ya janalibrejit gui coutrariuta: sa y minaase\u00f1a gagaegue para taejinecog.\n136:25 Ni y mannae nengcano para todo y catne: sa y minaase\u00f1a gagaegue para taejinecog.\n136:26 O nae grasias y Yuus y langet: sa y minaase\u00f1a gagaegue para taejinecog.\n137:1 Y oriyan y sadog Babilonia nae infanmatachong, magajet na manangesjit yanguin injaso Sion.\n137:2 Incana y atpanmame gui trongcon sauses gui entalo\u00f1a g\u00fcije.\n137:3 Sa g\u00fcije ayo sija y cumonejit, jatagojit na tafanganta: ya ayo sija y lumachaejit, jatagojit na tafanmagof, ileg\u00f1ija: Cantayejit uno ni y cantan Sion.\n137:4 Jaftaemano incanta y cantan Jeova gui ti tanomame?\n137:5 Yanguin malefayo nu jago, O Jerusalem! polo ya umalefa y agapa na canaejo ni y tiningo\u00f1a.\n137:6 Yanguin ti jujaso jao, polo ya unacheton y jilajo gui paladatto; yanguin ti juguaeyajao, Jerusalem, mas qui y prinsipat na minagofjo.\n137:7 Jaso O Jeova contra y famaguon Edom gui jaanin Jerusalem; ni ileg\u00f1ija: Funas, funas asta y simiento\u00f1a.\n137:8 O jagan Babilonia ni y para unmayulang; umagof ayo y para uninapase taeg\u00fcije ni y unsetbejam.\n137:9 Umagof ayo, y uquenene na uyinite y famaguonmo contra y acho.\n138:1 Y Salmon David. BAE junae jao grasias contodo y corasonjo: gui menan yuus sija, jucantaye jao ni y alabansa sija.\n138:2 Jufanadora para y santos na templomo, ya junae y naanmo grasias pot y cari\u00f1oso na g\u00fcinaeyamo, yan pot y minagajetmo: sa unnadangculo y sinanganmo mas qui y naanmo.\n138:3 Y jaane anae juagang, jago umopeyo, ya unanimayo, ni y minetgot y antijo.\n138:4 Todo y ray gui tano unmannae jao grasias, O Jeova, sa jagasja majungog y sinangan y pachotmo.\n138:5 Magajet na ufanganta ni y chalan Jeova; sa dangculo y minalag Jeova.\n138:6 Masquesea taquilo si Jeova, lao jarespetaja y managpapa: lao y sobetbio jatungoja desde y chago.\n138:7 Masquesea mamocatyo gui entalo y chinatsaga, unnal\u00e2l\u00e2yo: unestira mona y canaemo contra y binibun y enimigujo sija, ya y agapa na canaemo usatbayo.\n138:8 Si Jeova unacabales y gaegue guiya guajo: y minaasemo, O Jeova, gagaegue para taejinecog: chamo dumidingo y checo y canaemo.\n139:1 Y Salmon David. O Jeova, guinin unrejistrayo, ya guinin untungoyo.\n139:2 Untutungoja y finatachongjo yan y quinajulojo; untutungoja y jinasoco desde y chagogo.\n139:3 Unlilicue y finaposo yan y fanasonjo, ya untutungo todo y chalanjo.\n139:4 Sa taya ni un sinangan gui jilajo: jao, estag\u00fce, na untungoja todo, O Jeova.\n139:5 Unoriyayeyo gui menajo, yan y tateco: yan unpolo y canaemo gui jilojo.\n139:6 Gosn\u00e1manman este na tiningo para guajo; gostaquilo, ti si\u00f1a jucomprende.\n139:7 Manoyo guato taeg\u00fce y espiritumo? pat manoyo jufalag\u00fce taeg\u00fce yo gui menamo?\n139:8 Yaguin cumajuloyo gui langet gaegueja jao g\u00fcije; yanguin jujuto y camajo guiya sasalaguan, gaegueja jao locue g\u00fcije.\n139:9 Yanguin juchule y papan y egaan, ya jusaga gui uttimon y tase;\n139:10 Asta ayo gaegueja y canaemo na jaosgagaejonyo, ya y agapa na canaemo umantieneyo.\n139:11 Yanguin jualog: Magajet na utampeyo y jemjom: asta y puenge uinayo.\n139:12 Asta y jemjom ti uninatog\u00fce: lao y puenge ufanina taeg\u00fcije y jaane: y jemjom yan y mananana manparejoja para jago.\n139:13 Jago tumungo yo, sa jago magas y sumanjalomjo; guinin untampeyo gui jalom tiyan nanajo.\n139:14 Junae jao grasias: sa gosnamaa\u00f1ao yan gosnamanman y mafatinasso: mannamanman y chechomo; ya y antijo jagostungo este.\n139:15 Y tataotaojo ti umatog guiya jago, anae mafatinasyo gui secreto; ya matufog yo ni namanman, gui mas tagpapa na lugat gui tano.\n139:16 Y atadogmo lumie y tataotaojo ya ti cabales: ya y lebblomo nae manmatugue todo y pedason tataotaojo, ya taya ufatta.\n139:17 Jafa muna guaguan y jinasomo guiya guajo, O Yuus! Jafa muna megae suma\u00f1a!\n139:18 Yanguin jutufong sija, manmegae\u00f1a y numero\u00f1a qui y inae: yanguin magmatayo, gaeguejayo trabia guiya jago.\n139:19 Seguro na unpuno y taelaye, O Yuus: enaomina ma\u00f1uja guiya guajo y manmejga na taotao sija.\n139:20 Sa manguentos taelaye contra jago, ya y enimigumo sija machule y naanmo pot taya.\n139:21 Ada ti juchatlie ayo sija, O Jeova, y chumatlie jao? yan ada ti unatristeyo pot ayo sija y mangajulo contra jago?\n139:22 Juchatlie sija ni y cabales na chinatlie: jutufong sija pot y enemigujo.\n139:23 Rejistrayo O Yuus, ya untungo y corasonjo: chagueyo ya untungo y jinasoco sija.\n139:24 Ya unlie cao guaja taelaye gui sumanjalomjo, ya unchachalaneyo gui chalan taejinecog.\n140:1 Y Salmon David. NALIBREYO O Jeova gui taelaye na taotao: adajeyo gui fette na taotao:\n140:2 Ni y manmanjaso taelaye gui corason\u00f1ija: cada jaane manda\u00f1a para y guera.\n140:3 Janafanmalagtos y jila\u00f1ija taeg\u00fcije y serpiente; binenon y culebbla guaja gui jalom y labios\u00f1ija. Sila.\n140:4 Adajeyo O Jeova, gui canae y taelaye; adajeyo gui fette na taotao: ni y manmadetetmina para unasuja y pinecatto.\n140:5 Y sobetbio sija janaatog y laso yan y cuetdas para guajo: matiende y lagua gui oriyan chalan; manmanplanta ocodo para guajo. Sila.\n140:6 Ilegco as Jeova: Jago y Yuusso: ecungog y inagang y tinayuyutto, O Jeova.\n140:7 O Yuus, Jeova, ni y minetgot y satbasionjo, jago tumampe y ilujo gui jaanin y guera.\n140:8 Chamo numanae y taelaye ni y dinesea\u00f1a, O Jeova; chamo umayuyuda y taelaye jinaso\u00f1a; na noseaja unafannaquilo maesa sija. Sila.\n140:9 Ya y ilun ayo sija y umoriyayeyo, polo ya utinampe sija ni y taelayen labios\u00f1ija.\n140:10 Polo ya ufamodog y pinigan guafe gui jilo\u00f1ija: polo ya ufanmayute sija guato gui jalom guafe; y jalom y tadong na joyo ya cha\u00f1ija fangajujulo talo.\n140:11 Ti ufitme gui tano y cumuecuentos ni y taelaye: y tinaelaye jaaliligao y taelaye na taotao para uninaatlibes g\u00fce.\n140:12 Jutungo na si Jeova umantiene y causan y manpinite, yan y tininas y pebble.\n140:13 Magajet na umanae grasia y naanmo, ni y manunas: y manunas ufa\u00f1aga gui menamo.\n141:1 Y Salmon David. JEOVA jagasja juaagangjao; chadig para iya guajo: ecungog y inagangjo, yanguin juagang jao.\n141:2 Polo y tinayuyutto ya umaplanta gui menamo taeg\u00fcije y insensio; ya y jinatsaco julo ni y canaejo utaeg\u00fcije y inefresen pupuenge.\n141:3 Polo y guatdia O Jeova gui menan pachotjo; adaje y pettan y labiosso.\n141:4 Chamo nafalag y tataelaye na g\u00fcinaja y corasonjo, ya ufatinas y taelaye na chocho yan ayo sija na taotao y chumog\u00fce tinaelaye: ya chamo na jucanoyo ni y mannge na na\u00f1ija.\n141:5 Polo y tininas ya unalamenyo, este y minauleg; ya ureprendeyo, ya utaeg\u00fcije y la\u00f1a gui jilo y ilujo: chamo na ilujo urechasa: sa asta anae manaelaye sija, y tinayuyutto ugagaegueja.\n141:6 Manmayute papa y jues\u00f1ija gui anae acho na lugat; ya ujajungog y sinanganjo sija, sa manmames.\n141:7 Y telangmame manmachalapon gui pachot y naftan; taeg\u00fcije anae un taotao jaalado ya japuta y tano.\n141:8 Lao y atadogco, mangaegue guiya jago, O Yuus Jeova: iya jago nae gagaegueja y inangococo: chamo dumidingo y antijo namaesa.\n141:9 Adajeyo gui laso ni y maplanta para guajo, yan y ecodon y chumag\u00fce y taelaye.\n141:10 Polo ya ufamodong y manaelaye gui jalom y lagua\u00f1ija, mientras umescacapayo.\n142:1 Cantan David anae Gagaegue gue gui Liyang; un Tinayuyut. JUAGANG si Jeova gui inagangjo; gui inagangjo si Jeova nae jutayuyut.\n142:2 Jubasia y quejaco gui mena\u00f1a, jufanue gui mena\u00f1a ni y chinatsagaco.\n142:3 Yanguin y espiritujo lalango gui sumanjalomjo, untungoja y finaposso. Y chalan gui anae mamocatyo, manaatog y laso para guajo.\n142:4 Atan y agapa na canaejo ya lie; lao taya ni un taotao tumungoyo: y guine g\u00fceco esta malingo; taya ni un taotao umadaje y antijo.\n142:5 Juagang jao O Jeova; ilegco: Jago guineg\u00fceco yan y patteco gui tano y manlal\u00e2l\u00e2.\n142:6 Atituye y inagangjo; sa sen lumalagpapayo; nalibreyo gui pumetsisigueyo, sa manmetgot\u00f1a qui guajo.\n142:7 Najuyong y antijo gui calaboso, ya junae grasias y naanmo: ujaoriyayeyo y manunas; sa unfatinas pot guajo gosmegae.\n143:1 Y Salmon David. JUNGOG y tinayuyutto, O Jeova; ecungog y guinagaojo sija: opeyo pot y minagajetmo yan y tininasmo.\n143:2 Ya chamo jumajalom gui juisio yan y tentagomo: sa taya taotao lal\u00e2l\u00e2 umajustifica gui menamo.\n143:3 Sa y enimigo guinin japetsigue y antijo; guinin jasaulag papa gui jilo oda y jaanijo: janasagayo gui anae jomjom na lugat sija, taeg\u00fcije sija y guinin apmam na manmatae.\n143:4 Enaomina y espiritujo, lalango gui sumanjalomjo: y corasonjo gui sumanjalomjo triste.\n143:5 Jujaso sija y apmam na jaane; jujaso todo y chechomo; jujajaso y checho y canaemo.\n143:6 Jujuto mona y canaejo guiya jago: y antijo majo nu jago, taeg\u00fcije y anglo na tano. Sila.\n143:7 Jungogyo enseguidas, O Jeova: sa malayo y antijo: chamo na naaatog y matamo guiya guajo; sa noseaja juparejo yan ayo sija y mannunog gui jalom joyo.\n143:8 Na jungogyo ni y cari\u00f1oso na g\u00fcinaeyamo gui egaan; sa jagoja nae juangocoyo: natungoyo ni y chalan anae para jufamocat; sa jujatsa julo y antijo guiya jago.\n143:9 Nalibreyo, O Jeova, gui enemigujo sija: jufalag\u00fce jao, ya unnaatogyo.\n143:10 Fanag\u00fceyo ya jufatinas y minalagomo: sa jago y Yuusso: y espiritumo mauleg; osgaejonyo gui tano y manunas.\n143:11 Nal\u00e2l\u00e2yo, O Jeova, pot y naanmo: pot y tininasmo, chule y antijo gui chinatsaga.\n143:12 Yan pot y cari\u00f1oso na g\u00fcinaeyamo utut y enemigujo sija, ya unyulang todo sija y munapinite y antijo: sa guajo tentagomo.\n144:1 Y Salmon David. BENDITO si Yuus y achojo, ni y jafanag\u00fce y canaejo para uguera, yan y calalotjo para umumo.\n144:2 Y minaaseco yan y guimeg\u00fceco y iyoco tore na taquilo, yan y munalibreyo; y patangjo, yan y anae juangocoyo; ni y pumolo y taotaojo gui papajo.\n144:3 Jeova, jafa y taotao na unatituye y tiningo\u00f1a? pat y lajin taotao na uncuecuenta g\u00fce?\n144:4 Y taotao parejoja yan y jinaja; y jaani\u00f1a parejoja yan y anineng ni y malofan.\n144:5 Natalagpapa, y langetmo, O Yuus, ya tunogjao papa: pacha y egso sija ya ufanaso.\n144:6 Fanyute ni y lamlam ya ufanchinalapon sija: nafanogcha y flechamo, ya ufaninestotba sija.\n144:7 Estira y canaemo guinin jilo; rescatayo yan nalibreyo gui manadan janom, gui canae y manaotao juyong.\n144:8 Ni y pachot\u00f1ija manguecuentos banida, ya y agapa na canae\u00f1ija, y dacon na canae agapa.\n144:9 Jucantaye jao ni y nuebo na canta, O Yuus: y guitala, ni y dies cuetdas\u00f1a nae jucantaye jao ni y alabansa sija.\n144:10 G\u00fciya ayo y mannae satbasion gui ray sija: ni janalibre si David ni y tentago\u00f1a gui gosnalamen na espada.\n144:11 Rescatayo ya nalibreyo gui canae y manaotao juyong, ni y pachot\u00f1ija manguecuentos banida, ya y agapa na canae\u00f1ija y dacon na canae agapa.\n144:12 Ya y famaguonmame lalaje ufantaeg\u00fcije y tinanom yanguin mandoco ya mangajulo gui pinatgon\u00f1ija; ya y jaganmame ufantaeg\u00fcije y mapopolo gui punta na acho, ni y malabla taeg\u00fcije y palasyo.\n144:13 Ya y lanchonmame bula, mannae todo clasen g\u00fcinaja: ya gamame quinilo ufanma\u00f1ago mit yan dies mit gui fangualuanmame.\n144:14 Ya y gamame nobiyo sija ufanmangotga mauleg; ya cha\u00f1ija rumorompe jalom ni juyong, ya taya inagang pot pinite gui cayenmame.\n144:15 Mandichoso ayo sija na taotao y manguaja ni este: Junggan, mandichoso ayo sija na taotao ni y Yuus\u00f1ija si Jeova.\n145:1 Y Salmon Alabansa; iyon David. JUNADANGCULO jao Yuusso, O Ray; jubendise y naanmo para taejinecog yan taejinecog.\n145:2 Cada jaane jubendise jao; ya bae jualaba y naanmo para taejinecog yan taejinecog.\n145:3 Dangculo si Jeova, ya sumendangculo para umaalaba; ya y dinangculo\u00f1a ti comprediyon.\n145:4 Un generasion ualaba y chechomo gui otro generasion, yan ujadeclara y matatnga na finatinasmo sija.\n145:5 Jujajaso ni y minalag na minagas y inenramo, yan y mannamanman y chechomo.\n145:6 Ya y taotao sija ujasangan y ninasi\u00f1an y namaa\u00f1ao na finatinasmo sija; ya guajo bae judeclara y dinangculomo.\n145:7 Ujasangan y majason dinangculon y minaulegmo, ya ufanganta ni y tininasmo.\n145:8 Si Jeova, cari\u00f1osog\u00fce, yan bula minaase; \u00f1ateng para ulalalo, ya dangculo minaase\u00f1a.\n145:9 Si Jeova mauleg para todo: ya y cari\u00f1oso na minaase\u00f1a gui jilo todo y checho\u00f1a.\n145:10 Todo y chechomo uninalaba jao, O Jeova; ya y ma\u00f1antosmo unmabendise jao.\n145:11 Ujasangan y minalag y raenomo, yan ufanguentos ni y ninasi\u00f1amo.\n145:12 Para ujanamatungo y matatnga na finatinas\u00f1a sija gui lalajen taotao, yan y minalag y minagas\u00f1a gui raeno\u00f1a.\n145:13 Y raenomo, taejinecog na raeno, ya y gobietnomo gagaegueja para todo y generasion.\n145:14 Si Jeova mumantiene todo ayo sija y mamodong, yan jajatsa todo ayo y manetecon.\n145:15 Todo y atadog sija numanangga jao; ya jago numae sija na\u00f1ija gui mauleg na tiempo.\n145:16 Unbaba y canaemo, ya unnafannajong todo y minalago y manl\u00e2l\u00e2l\u00e2 na g\u00fcinaja.\n145:17 Si Jeova tunas g\u00fce gui todo y chalan\u00f1a; ya cari\u00f1oso gui todo y checho\u00f1a.\n145:18 Si Jeova jijot gui todo ayo sija y umaagang gue; gui todo ayo y umaagang g\u00fce ni y minagajet.\n145:19 G\u00fciya unafanbula y minalago ayo sija y manmaa\u00f1ao nu g\u00fciya: ujungog locue y inagang\u00f1ija, ya usatba sija.\n145:20 Si Jeova jaadadaje todo ayo sija y gumaeya g\u00fce: lao todo y manaelaye uyulang.\n145:21 Y pachotto usangan y tinina as Jeova: ya polo todo y catne, ya utinina y santos na naan\u00f1a, para taejinecog yan taejinecog.\n146:1 FANMANALABA jamyo as Jeova. O antijo, alaba si Jeova.\n146:2 Mientras lal\u00e2l\u00e2yo, bae jualaba si Jeova: jucantaye alabansa sija gui Yuusso mientras guajayo sustansiaco.\n146:3 Chamo pumopolo y inangocomo gui prinsipe sija, ni y lajin taotao, gui anae taya inayuda.\n146:4 Y jinagong\u00f1a jumanao, ya g\u00fciya tumalo guato gui eda\u00f1a: ayoja na jaane malingo y jinaso\u00f1a.\n146:5 Magof ayo y uguaja ni y Yuus Jacob para innayuda g\u00fce, ni y inangoco\u00f1a gaegue gui as Jeova Yuus\u00f1a:\n146:6 Ni y jafatinas y langet yan y tano, yan y tase, yan todo y mangaegue gui sumanjalom\u00f1ija, ni y jaadaje y minagajet para taejinecog.\n146:7 Ni y jafatitinas juisio gui manmachiguet; ni y jananae nengcano y man\u00f1alang: si Jeova japupula y manmaprereso:\n146:8 Si Jeova bumababa y atadog\u00f1ija y bachet: si Jeova jumajatsa ayo sija y manetecon; si Jeova jaguaeguaeya y manunas.\n146:9 Si Jeova jaadadaje y taotao juyong sija; jamantietiene y taya tata\u00f1ija yan y manbiuda; lao y chalan y tinaelaye, janaopop.\n146:10 Si Jeova ufangobietna para taejinecog; y Yuusmo, O Sion, para todo y generasion. Fanmanalaba jamyo as Jeova.\n147:1 FANMANALABA jamyo as Jeova: sa mauleg na utacantaye alabansa sija gui Yuusta; sa magof este; ya y alabansa respetao.\n147:2 Si Jeova jumajatsa Jerusalem: ja fandada\u00f1a y manmayute juyong guiya Israel.\n147:3 Janafanjomlo y manmayulang na corason, ya jabee y chetnot\u00f1ija.\n147:4 Jasangan y numeron y pution sija; jafanaan todo sija ni y naan\u00f1ija.\n147:5 Dangculo y Yuusta, yan matatnga gui ninasi\u00f1a; tiningo\u00f1a taeuttimo.\n147:6 Si Jeova jumajatsa y manmanso: ya jachule papa y manaelaye gui jilo oda.\n147:7 Cantaye si Jeova ni y finatinas grasias; cantaye alabansa sija gui atpa, para y Yuusta.\n147:8 Ni y jatatampe y langet ni y mapagages, ya jalilisto y ichan para y tano, ya janafandodoco y chaguan gui jilo ogso sija.\n147:9 G\u00fciya numannae y g\u00e2g\u00e2 sija na\u00f1ija, yan y fumaguon y aga sija ni y manaagang.\n147:10 G\u00fciya ti ninamamagof ni y ninasi\u00f1an y cabayo: ni ti ninamamagof g\u00fce ni y adeng y taotao.\n147:11 Si Jeova ninamamagof g\u00fce ni y manmaa\u00f1ao nu g\u00fciya, ni y umangoco sija gui minaase\u00f1a.\n147:12 Alaba si Jeova, O Jerusalem; alaba si Yuusmo, O Sion.\n147:13 Sa janafanfitme y rejas y trangcamo: jabendise y famaguonmo gui sumanjalommo.\n147:14 Jafatinas pas gui jalom uttimomo, ya ninabula jao ni y guesmauleg na trigo.\n147:15 Janajanao y tinago\u00f1a gui jilo tano: y sinangan\u00f1a malalago goschadig.\n147:16 Mannae niebe calang pulo: jachalapon y manengjeng na sereno calang apo.\n147:17 Jayute y aes\u00f1a calang andesmorona sija: jaye si\u00f1a tumojgue gui menan y manengjeng\u00f1a?\n147:18 Janajanao y sinangan\u00f1a, ya jadirite: janafanguaefe y manglo\u00f1a, ya y janom sija manmilalag.\n147:19 Jafanue si Jacob ni y sinangan\u00f1a, ya y lay\u00f1a sija yan y juisio\u00f1a sija y Israel.\n147:20 Ti jafatinas taeg\u00fcine gui un nasion: ya y juisio\u00f1a, sija ti manmatungo sija. Fanmanalaba jamyo as Jeova.\n148:1 FANMANALABA jamyo as Jeova. Fanmanalaba jamyo as Jeova desde y langet: Fanmalaba nu g\u00fciya guiya jululo.\n148:2 Fanmanalaba jamyo nu g\u00fciya, todo y angjet\u00f1a: fanmanalaba jamyo nu g\u00fciya todo y inetnon sendalu\u00f1a.\n148:3 Fanmanalaba jamyo nu g\u00fciya, atdao an pulan: fanmanalaba jamyo nu g\u00fciya todo y pution ni y maniina.\n148:4 Fanmanalaba jamyo nu g\u00fciya, langet sija y langet sija, yan y janom sija ni y mangaegue gui jilo y langet.\n148:5 Polo sija ya ujaalaba y naan Jeova: sa manago, ya sija manfatinas.\n148:6 G\u00fciya guinin plumanta sija locue para taejinecog yan taejinecog: jafatinas y tinago na tu ufalofan.\n148:7 Fanmanalaba jamyo as Jeova desde y tano, jamyo ni y mandadao gui tinadong tase, yan todo y manadong.\n148:8 Y guafe yan graniso; niebe yan asgon: manglo pagyo ni y cumumple y sinangan\u00f1a:\n148:9 Ogso sija yan todo y sabana; manmanogcha na trongcon jayo yan todo y sedrosija;\n148:10 G\u00e2g\u00e2 yan todo y guaca; mangucunanas na g\u00e2g\u00e2, yan y mangugupo na pajaro.\n148:11 Ray sija y tano yan todo y taotao sija. Prinsipe sija, yan todo y jues y tano:\n148:12 Y manfamaguon na lalaje, yan famalaoan: y manamco na taotao, yan famaguon:\n148:13 Polo sija ya ujaalaba y naan Jeova: sa y naan\u00f1aja guefmanataquilo: y minalag\u00f1a gui jilo tano yan y langet.\n148:14 Jagasja jajatsa julo locue y canggelon taotao\u00f1a; y tininan todo y ma\u00f1antos\u00f1a sija; magajet na sija y famaguon Israel, y taotao sija ni y manjijot guiya g\u00fciya. Fanmanalaba jamyo as Jeova.\n149:1 FANMANALABA jamyo as Jeova. Cantaye si Jeova ni y nuebo na canta, ya y tinina\u00f1a gui inetnon y ma\u00f1antos.\n149:2 Polo Israel ya umagof ni y fumatinas g\u00fce: polo y famaguon Sion ya ufanmagof ni y Ray\u00f1ija.\n149:3 Polo sija ya ujaalaba y naa\u00f1a ni y dansa: ya umacantaye g\u00fce gui atpa yan pandireta.\n149:4 Sa si Jeova janamagof g\u00fce gui taotao\u00f1a: g\u00fciya janagatbo y manmanso ni y satbasion.\n149:5 Polo y ma\u00f1antos y ufanmagof gui minalag; polo ya ufanganta pot y minagof gui jilo y cama\u00f1ija.\n149:6 Polo y taquilo na alabansa gui as Yuus ya ugaegue gui pachot\u00f1ija, yan y espada ni y malagtos dos banda gui canae\u00f1ija;\n149:7 Para ujafatinas y inemog gui nasion sija, yan y castigo gui taotao sija;\n149:8 Para ujagode y ray\u00f1ija, ni y cadena sija; yan y manmagas\u00f1ija ni y goden lulug.\n149:9 Para ujafatinas gui jilo\u00f1ija y matugue na juisio: este na inenra para todo y ma\u00f1antos\u00f1a. Fanmanalaba jamyo as Jeova.\n150:1 FANMANALABA jamyo as Jeova. Alaba si Yuus gui sinantos na saga\u00f1a: alaba gue gui feneda y ninasi\u00f1a\u00f1a.\n150:2 Alaba g\u00fce ni y matatnga na finatinas\u00f1a sija: alaba g\u00fce jaftaemanoja y minagas dinangculo\u00f1a.\n150:3 Alaba g\u00fce ni y sonidon y trompeta: alaba g\u00fce ni y guitala yan y atpa.\n150:4 Alaba g\u00fce ni y pandireta, yan y dansa: alaba g\u00fce ni y gaecuetdas na dandan yan y flauta.\n150:5 Alaba g\u00fce ni y agang na batingting: alaba g\u00fce ni gosagang na sonidon batingting.\n150:6 Polo todo y g\u00fcinaja ni y mangaejinagong ya ujaalaba si Jeova. Fanmanalaba jamyo as Jeova.","title":"Chamorro Bible (partial): Psalms","type":"page"}