{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/co1.htm","path":"bib/wb/got/co1.htm","source_url":"https://sacred-texts.com/bib/wb/got/co1.htm","text":"1:12 [A] . . . . ik im Pawlus, i\u00fe ik Apaullons, i\u00fe ik Kefins, i\u00fe ik Xristaus.\n1:13 [A] disdaili\u00fes ist Xristus? ibai Pawlus ushrami\u00fes war\u00fe in izwara, ai\u00fe\u00feau in namin Pawlus daupidai wesei\u00fe?\n1:14 [A] awiliudo guda ei ainnohun izwara ni daupida niba Krispu jah Ga\u00efu,\n1:15 [A] ei hvas ni qi\u00feai \u00featei in meinamma namin daupidedjau.\n1:16 [A] ik daupida auk ja\u00fe~\u00feans Staifanaus gadaukans; \u00feata an\u00fear ni wait ei ainnohun daupidedjau.\n1:17 [A] ni\u00fe~\u00fean insandida mik Xristus daupjan, ak wailamerjan; ni in snutrein waurdis, ei ni lausjaidau galga Xristaus.\n1:18 [A] unte \u00feata waurd galgins \u00feaim fralusnandam dwali\u00fea ist, i\u00fe \u00feaim ganisandam mahts gudis ist.\n1:19 [A] gameli\u00fe ist auk: fraqistja snutrein \u00feize snutrane jah frodein \u00feize frodane uskiusa.\n1:20 [A] hvar handugs? hvar bokareis? hvar sokareis \u00feis aiwis? nih dwala gatawida gu\u00fe handugein \u00feis fairhvaus?\n1:21 [A] unte auk in handugein gudis ni ufkunnaida sa fairhvus \u00feairh handugein gu\u00fe, galeikaida guda \u00feairh \u00feo dwali\u00fea \u00feizos wailamereinais ganasjan \u00feans galaubjandans.\n1:22 [A] unte Iudaieis taikne bidjand, i\u00fe Krekos handugein sokjand;\n1:23 [A] i\u00fe weis merjam Iesu ushramidana, Iudaium gamarzein, i\u00fe \u00feiudom dwali\u00fea;\n1:24 [A] i\u00fe \u00feaim gala\u00feodam Iudaie jah \u00feiudo Xristu, gudis maht jah gudis handugein.\n1:25 [A] unte so dwali\u00fea gudis handugo(ze)i mannam . . . .\n4:2 [A] . . . . ei hvas triggws bigitaidau.\n4:3 [A] a\u00fe\u00fean mis in minnistin ist, ei fram izwis ussokjaidau ai\u00fe\u00feau fram manniskamma daga; akei nih mik silban ussokja.\n4:4 [A] nih waiht auk mis silbin mi\u00fewait; akei ni in \u00feamma garaihti\u00fes im, i\u00fe saei ussokei\u00fe mik, frauja ist.\n4:5 [A] \u00feannu nu ei faur mel ni stojai\u00fe, unte qimai frauja, saei jah galiuhtei\u00fe analaugn riqizis jah gabairhtei\u00fe runos hairtane; ja\u00fe~\u00fean hazeins wair\u00fei\u00fe hvarjammeh fram guda.\n4:6 [A] a\u00fe\u00fean , bro\u00ferjus, \u00feairhgaleiko[n]da in mis jah Apaullon in izwara, ei in ugkis ganimai\u00fe ni ufar \u00featei gameli\u00fe ist fra\u00fejan, ei ains faur ainana ana an\u00fearana ufblesans ni sijai.\n4:7 [A] hvas auk \u00feuk ussokei\u00fe? hvau\u00fe~\u00fean habais \u00featei ni namt? ai\u00fe\u00feau jabai andnamt, hva hvopis swe ni nemeis?\n4:8 [A] ju sadai siju\u00fe, ju gabigai waur\u00feu\u00fe, inu uns \u00feiudanodedu\u00fe; jah wainei \u00feiudanodedei\u00fe, ei jah weis izwis mi\u00fe\u00feiudanoma.\n4:9 [A] man auk \u00feei gu\u00fe uns apaustauluns spedistans ustaiknida, swaswe dau\u00feubljans, unte fairweitl waur\u00feum \u00feizai manasedai jah aggilum jah mannam.\n4:10 [A] weis dwalai in Xristaus, i\u00fe jus frodai in Xristau; weizu\u00fe~\u00fean unmahteigai, i\u00fe jus swin\u00feai; juzu\u00fe~\u00fean wul\u00feagai, i\u00fe weis unswerai.\n4:11 [A] und \u00feo nu hveila jah huggridai jah \u00feaursidai jah naqadai jah kaupatidai jah ungasto\u00feai.\n4:12 [A] jah . . . .\n5:3 [A] . . . . ju gastauida swe andwair\u00fes \u00feana swa \u00feata gataujandan,\n5:4 [A] in namin fraujins unsaris Iesuis Xristaus, sama\u00fe gagaggandam izwis jah meinamma ahmin, mi\u00fe mahtai fraujins unsaris Iesuis Xristaus,\n5:5 [A] atgiban \u00feana swaleikana unhul\u00fein du qisteinai leikis, ei ahma ganisai in daga fraujins Iesuis.\n5:6 [A] ni goda so hvoftuli izwara; niu witu\u00fe \u00featei leitil beistis allana daig gabeistei\u00fe?\n5:7 [A] ushrainei\u00fe \u00feata fairnjo beist, ei sijai\u00fe niujis daigs, swaswe sijai\u00fe unbeistjodai; jah auk paska unsara ufsni\u00feans ist faur uns Xristus.\n5:8 [A] \u00feannu dul\u00fejam ni in beista fairnjamma ni\u00fe~\u00fean in beista balwaweseins jah unseleins, ak in unbeistein unwammeins jas~sunjos.\n5:9 [A] gamelida izwis ana \u00feizai aipistaulein: ni blandai\u00fe izwis horam,\n5:10 [A] ni \u00feaim horam \u00feis fairhvaus, ai\u00fe\u00feau [jabai] \u00feaim faihufrikam jah wilwam ai\u00fe\u00feau galiugam skalkinondam, unte skuldedei\u00fe \u00fean us \u00feamma fairhvau usgaggan.\n5:11 [A] i\u00fe nu gamelida izwis ni blandan, jabai hvas bro\u00fear namnids sijai hors ai\u00fe\u00feau faihufriks ai\u00fe\u00feau galiugam skalkinonds ai\u00fe\u00feau ubilwaurds ai\u00fe\u00feau afdrugkja ai\u00fe\u00feau wilwa, \u00feamma swaleikamma ni mi\u00fematjan.\n5:12 [A] hva mik jah \u00feans uta stojan? niu \u00feans inna jus stoji\u00fe?\n5:13 [A] i\u00fe \u00feans uta gu\u00fe stoji\u00fe. usnimi\u00fe \u00feana ubilan us izwis silbam.\n6:1 [A] Gadars hvas izwara, wi\u00fera an\u00fearana staua habands stojan fram inwindaim jah ni fram . . . .\n7:5 [A] . . . . izwara misso, niba \u00feau us gaqissai hvo hveilo, ei uhteigai sijai\u00fe fastan jah bidan; \u00fea\u00fero\u00fe~\u00fean sama\u00fe gawandjai\u00fe, ei ni fraisai izwara Satana in ungahobainais izwaraizos.\n7:6 [A] \u00featu\u00fe~\u00fean qi\u00fea gakunnands, ni bi haitjai.\n7:7 [A] i\u00fe wiljau allans mans wisan swe mik silban; akei hvarjizuh swesa giba habai\u00fe fram guda, sums swa, sumsuh swa.\n7:8 [A] a\u00fe\u00fean qi\u00fea \u00feaim unqenidam jah widuwom: go\u00fe ist im, jabai sind swe ik.\n7:9 [A] i\u00fe jabai ni gahabaina sik, liugandau; batizo ist auk liugan \u00feau intundnan.\n7:10 [A] i\u00fe \u00feaim liugom haftam anabiuda, ni ik, ak frauja, qenai fairra abin ni skaidan.\n7:11 [A] i\u00fe jabai gaskaidnai, wisan unliugaida[i], ai\u00fe\u00feau du abin seinamma aftra gagawair\u00fejan, jah aban qen ni fraletan.\n7:12 [A] i\u00fe \u00feaim an\u00fearaim ik qi\u00fea, ni frauja: jabai hvas bro\u00fear qen aigi ungalaubjandein, jah so gawilja ist bauan mi\u00fe imma, ni afletai \u00feo qen;\n7:13 [A] jah qens soei aigi aban ungalaubjandan, jah sa gawilja ist bauan mi\u00fe izai, ni afletai \u00feana aban.\n7:14 [A] weihaida ist qens so ungalaubjandei in abin, jah gaweihaids ist aba sa ungalaubjands in qenai; ai\u00fe\u00feau barna izwara unhrainja weseina, i\u00fe nu weiha sind.\n7:15 [A] i\u00fe jabai sa ungalaubjands skaidi\u00fe sik, skaidai; nist ga\u00feiwaids bro\u00fear ai\u00fe\u00feau swistar in \u00feaim swaleikaim; a\u00fe\u00fean in gawair\u00feja la\u00feoda uns gu\u00fe.\n7:16 [A] hva nuk~kannt \u00feu, qino[n], ei aban ganasjais? ai\u00fe\u00feau hva kannt, guma, \u00featei qen \u00feeina ganasjais?\n7:17 [A] ni ei, hvarjammeh swaswe gadailida gu\u00fe, ainhvarjatoh swaswe gala\u00feoda gu\u00fe, swa gaggai; jah swa in allaim aikklesjom anabiuda.\n7:18 [A] bimaitans gala\u00feoda war\u00fe hvas, ni ufrakjai; mi\u00fe faurafillja gala\u00feo\u00fes war\u00fe hvas, ni bimaitai.\n7:19 [A] \u00feata bimait ni waihts ist jah \u00feata faurafilli ni waihts ist, ak fastubnja anabusne gudis.\n7:20 [A] hvarjizuh in la\u00feonai \u00feizaiei la\u00feo\u00fes was, in \u00feizai sijai.\n7:21 [A] skalks gala\u00feo\u00fes wast, ni karos; akei \u00feauhjabai magt freis wair\u00fean, mais brukei.\n7:22 [A] saei auk in fraujin haitans ist skalks, fralets fraujins ist; samaleiko saei freis haitada, skalks ist Xristaus.\n7:23 [A] wair\u00fea galaubamma usbauhtai siju\u00fe; ni wair\u00feai\u00fe skalkos mannam.\n7:24 [A] hvarjizuh in \u00feammei atla\u00feo\u00fes was, bro\u00ferjus, in \u00feamma gastandai at guda.\n7:25 [A] a\u00fe\u00fean bi maujos anabusn fraujins ni haba; i\u00fe ragin giba swe gaarmai\u00fes fram fraujin du triggws wisan.\n7:26 [A] man nu \u00feata go\u00fe wisan in \u00feizos andwair\u00feons \u00feaurftais, \u00featei go\u00fe ist mann swa wisan:\n7:27 [A] gabundans is qenai, ni sokei lausjan; galausi\u00fes is qenai, ni sokei qen.\n7:28 [A] a\u00fe\u00fean jabai nimis qen, ni frawaurhtes, jah jabai liugada mawi, ni frawaurhta, i\u00fe aglon leikis gastaldand \u00feo swaleika. i\u00fe ik izwis freidja . . . .\n8:9 [A] . . . . wair\u00feai \u00feaim unmahteigam.\n8:10 [A] jabai auk hvas gasaihvi\u00fe \u00feuk \u00feana habandan kun\u00fei in galiuge stada anakumbjandan, niu mi\u00fewissei is siukis wisandins timrjada du galiugagudam gasali\u00fe matjan?\n8:11 [A] fraqistni\u00fe auk sa unmahteiga ana \u00feeinamma witubnja bro\u00fear in \u00feize Xristus gaswalt.\n8:12 [A] swa\u00fe~\u00fean frawaurkjandans wi\u00fera bro\u00feruns, slahandans ize gahugd siuka, du Xristau frawaurkei\u00fe.\n8:13 [A] du\u00fe\u00fee jabai mats gamarzei\u00fe bro\u00fear, ni matja mimz aiw, ei ni gamarzjau bro\u00fear meinana.\n9:1 [A] Niu im apaustaulus? niu im freis? niu Iesu Xristau fraujan unsarana sahv? niu waurstw meinata jus siju\u00fe in fraujin?\n9:2 [A] jabai an\u00fearaim ni im apaustaulus, ai\u00fe\u00feau izwis im; unte sigljo meinaizos apaustauleins jus siju\u00fe.\n9:3 [A] meina andahafts wi\u00fera \u00feans mik ussokjandans \u00feat~ist.\n9:4 [A] ibai ni habam waldufni matjan jah drigkan?\n9:5 [A] ibai ni habam waldufni swistar qinon bitiuhan, swaswe \u00feai an\u00fearai apaustauleis jah bro\u00ferjus fraujins jah Kefas?\n9:6 [A] \u00feau ainzu ik jah Barnabas ni habos waldufni du ni waurkjan?\n9:7 [A] hvas drauhtino\u00fe swesaim annom hvan? hvas satji\u00fe weinatriwa jah akran \u00feize ni matjai? hvas haldi\u00fe awe\u00fei jah miluks \u00feis awe\u00fejis ni matjai?\n9:8 [A] ibai bi mannam \u00feata qi\u00fea, ai\u00fe\u00feau jah wito\u00fe \u00feata qi\u00fei\u00fe?\n9:9 [A] in witoda auk Mosezis gameli\u00fe ist: ni faurmuljais auhsau \u00feriskandan. ni \u00featei bi auhsum us . . . .\n9:19 [A] . . . . ei managizans gageigaidedjau.\n9:20 [A] jah war\u00fe Iudaium swe Judaius, ei Judaiuns gageigaidau; \u00feaim uf witoda swe uf witoda, ni wisands silba uf witoda, ak uf anstai, ei \u00feans uf witoda gageig[g]aidedjau;\n9:21 [A] \u00feaim witodalausam swe witodalaus, ni wisands witodis laus gudis, ak inwito\u00fe Xristaus, ei gageig[g]au witodalausans.\n9:22 [A] was \u00feaim unmahteigam swe unmahteigs, ei unmahteigans gageig[g]aidedjau; allaim was all, ei hvaiwa sumans ganasjau.\n9:23 [A] \u00featu\u00fe~\u00fean tauja in aiwaggeljis, ei gadaila is wair\u00feau.\n9:24 [A] niu witu\u00fe \u00featei \u00feai in spaurd rinnandans allai rinnand, i\u00fe ains nimi\u00fe sigislaun? swa rinnai\u00fe, ei garinnai\u00fe.\n9:25 [A] i\u00fe hvazuh saei haifstjan sniwi\u00fe, allis sik ga\u00fearbi\u00fe; a\u00fe\u00fean eis, ei riurjana waip nimaina, i\u00fe weis unriurjana.\n9:26 [A] a\u00fe\u00fean ik nu swa rinna, ni du unwisamma; swa jiuka, ni swe luftu bliggwands;\n9:27 [A] ak leik mein wlizja jah ana\u00feiwa, ibai an\u00fearaim merjands silba uskusans wair\u00feau.\n10:1 [A] Ni wiljau izwis unwitans, bro\u00ferjus, \u00featei attans unsarai allai uf milhmin wesun, jah allai marein \u00feairhiddjedun,\n10:2 [A] jah allai in Mose daupidai wesun, in milhmin jah in marein,\n10:3 [A] jah allai \u00feana saman mat ahmeinan matidedun,\n10:4 [A] jah \u00feata samo dragk ahmeino drugkun . . . .\n10:15 [A] . . . . (fro)daim qi\u00fea; domei\u00fe jus \u00featei qi\u00fea.\n10:16 [A] stikls \u00feiu\u00feiqissais \u00feanei gaweiham, niu gamaindu\u00fes blo\u00feis fraujins ist? hlaifs \u00feanei brikam, niu gamaindu\u00fes leikis fraujins ist?\n10:17 [A] unte ains hlaifs, ain leik \u00feai managans sium, \u00feaiei auk allai ainis hlaibis jah ainis stiklis brukjam.\n10:18 [A] saihvi\u00fe Israel bi leika: niu \u00feai matjandans hunsla gamainjandans hunslastada sind?\n10:19 [A] hva nu qi\u00feam? \u00featei \u00feo galiugaguda hva sijaina ai\u00fe\u00feau \u00featei galiugam saljada hva sijai?\n10:20 [A] [ni \u00featei \u00feo galiugaguda waihts sijaina,] ak \u00featei saljand \u00feiudos, skohslam saljand, jan~ni guda. Ni wiljau auk izwis skohslam gadailans wair\u00fean.\n10:21 [A] ni magu\u00fe stikl fraujins drigkan jah stikl skohsle; ni magu\u00fe biudis fraujins fairaihan jab~biudis skohsle.\n10:22 [A] \u00feau inaljanom fraujin? ibai swin\u00feozans imma sium?\n10:23 [A] all binah, akei ni all daug; all mis binauht ist, akei ni all timrei\u00fe.\n10:24 [A] ni ainshun sein sokjai, ak an\u00fearis hvarjizuh.\n10:25 [A] all \u00featei at skiljam frabugjaidau matjai\u00fe, ni waiht andhruskandans in mi\u00fewisseins.\n10:26 [A] fraujins ist auk air\u00fea jah fullo izos.\n10:27 [A] i\u00fe jabai hvas la\u00feo izwis \u00feize ungalaubjandane jah wilei\u00fe gaggan, all \u00featei faurlagjaidau izwis matjai\u00fe, ni waiht andsitandans bi gahugdai.\n10:28 [A] i\u00fe jabai hvas qi\u00feai \u00featei galiugam gasali\u00fe ist, ni matjai\u00fe in ja(i)nis \u00feis bandwjandins jah \u00feuhta: fraujins ist auk air\u00fea jah fullo izos;\n10:29 [A] \u00feuhtu\u00fe~\u00fean qi\u00fea ni silbins, ak an\u00fearis. duhve auk frijei meina stojada \u00feairh ungalaubjandins \u00feuhtu?\n10:30 [A] jabai ik anstai andnima, duhve anaqi\u00feaidau in \u00feize ik awiliudo?\n10:31 [A] ja\u00fe\u00fee nu matjai\u00fe ja\u00fe\u00fee drigkai\u00fe ja\u00fe\u00fee hva tauji\u00fe, allata du wul\u00feau gudis taujai\u00fe.\n10:32 [A] unufbrikandans sijai\u00fe jah Iudaium jah \u00feiudom jah aikklesjon gudis,\n10:33 [A] swaswe ik allaim all leika, ni sokjands \u00featei mis bruk sijai, ak \u00featei \u00feaim managam, ei ganisaina.\n11:1 [A] Galeikondans meinai wair\u00feai\u00fe, swaswe ik Xristaus.\n11:2 [A] hazju\u00fe~\u00fean izwis, bro\u00ferjus, \u00feei allata mein gamunandans siju\u00fe, jas~swaswe anafalh izwis, anabusnins gafastai\u00fe.\n11:3 [A] wiljau\u00fe~\u00fean izwis witan \u00featei allaize abne haubi\u00fe Xristus ist; i\u00fe haubi\u00fe qinons aba; i\u00fe haubi\u00fe Xristaus gu\u00fe.\n11:4 [A] hvazuh abne bidjands ai\u00fe\u00feau praufetjands gahulidamma haubida gaaiwisko\u00fe haubi\u00fe sein.\n11:5 [A] i\u00fe hvoh qinono bidjandei ai\u00fe\u00feau praufetjandei andhulidamma haubida gaaiwisko\u00fe haubi\u00fe sein; ain auk ist jah \u00feata samo \u00feizai biskabanon.\n11:6 [A] unte jabai ni huljai sik qino, skabaidau; i\u00fe jabai agl ist qinon du kapillon ai\u00fe\u00feau skaban, gahuljai . . . .\n11:21 [A] . . . . (seinam)ma faursniwi\u00fe du matjan, jah \u00fean sums gredags sumzu\u00fe~\u00fean drugkans ist.\n11:22 [A] ibai auk gardins ni habai\u00fe du matjan jah drigkan? \u00feau aikklesjon gudis frakunnu\u00fe, jah gaaiwisko\u00fe \u00feans unhabandans? hva qi\u00feau izwis? hazjau izwis? in \u00feamma ni hazja.\n11:23 [A] unte ik andnam at fraujin \u00featei jah anafalh izwis, \u00featei frauja Iesus in \u00feizaiei naht galewi\u00fes was, nam hlaif\n11:24 [A] jah awiliudonds gabrak jah qa\u00fe: nimi\u00fe, matji\u00fe, \u00feata ist leik mein, \u00feata in izwara gabrukano; \u00feata waurkjai\u00fe du meinai gamundai.\n11:25 [A] swah samaleiko jah stikl afar nahtamat qi\u00feands: sa stikls so niujo triggwa ist in meinamma blo\u00fea; \u00feata waurkjai\u00fe, swa ufta swe drigkai\u00fe, du meinai gamundai.\n11:26 [A] swa ufta auk swe matjai\u00fe \u00feana hlaif ja\u00fe~\u00feana stikl drigkai\u00fe, dau\u00feau fraujins gakannjai\u00fe, unte qimai.\n11:27 [A] ei\u00fean hvazuh saei matji\u00fe \u00feana hlaif ai\u00fe\u00feau drigkai \u00feana stikl fraujins unwair\u00feaba fraujins, skula wair\u00fei\u00fe leikis jah blo\u00feis fraujins.\n11:28 [A] a\u00fe\u00fean gakiusai sik silban manna jah swa \u00feis hlaibis matjai ja\u00fe~\u00feis stiklis drigkai.\n11:29 [A] saei auk matji\u00fe jah drigki\u00fe unwair\u00feaba, staua sis silbin matji\u00fe , ni domjands leik fraujins.\n11:30 [A] du\u00fe\u00fee in izwis managai siukai jah unhailai, jag~gaslepand ganohai.\n11:31 [A] i\u00fe jabai silbans uns stauidedeima, ni \u00feau . . . .\n12:10 [A] . . . . sumammuh skeireins razdo.\n12:11 [A] \u00featu\u00fe~\u00fean all waurkei\u00fe ains jah sa sama ahma, dailei\u00fe sundro hvarjammeh swaswe wili.\n12:12 [A] swe leik raihtis ain ist, i\u00fe li\u00feuns habai\u00fe managans, \u00feai\u00fe~\u00fean li\u00fejus allai us leika \u00feamma ainamma, managai wisandans, ain ist leik, swa jah Xristus.\n12:13 [A] jah auk in ainamma ahmin weis allai du ainamma leika daupidai sium, ja\u00fe\u00fee Judaieis ja\u00fe\u00fee \u00feiudos, ja\u00fe\u00fee skalkos ja\u00fe\u00fee frijai, jah allai ainamma ahmin dragkidai sijum.\n12:14 [A] ja\u00fe~\u00fean leik nist ains li\u00feus, ak managai.\n12:15 [A] jabai qi\u00feai fotus \u00featei ni im handus, ni im \u00feis leikis, nih at \u00feamma leika; nist us \u00feamma leika?\n12:16 [A] jabai qi\u00feai auso \u00featei ni im augo, ni im \u00feis leikis, ni at \u00feamma leika; nist us \u00feamma leika?\n12:17 [A] jabai all leik augo, hvar hliuma? jabai all hliuma, hvar dauns?\n12:18 [A] i\u00fe nu gu\u00fe gasatida li\u00feuns ainhvarjanoh ize in leika, swaswe wilda.\n12:19 [A] i\u00fe weseina \u00feo alla ains li\u00feus, hvar leik?\n12:20 [A] i\u00fe nu managai li\u00fejus, i\u00fe ain leik.\n12:21 [A] ni\u00fe~\u00fean mag augo qi\u00fean du handau: \u00feeina ni \u00fearf, ai\u00fe\u00feau aftra haubi\u00fe du fotum: iggqara ni \u00fearf;\n12:22 [A] ak filu mais \u00feaie(i) \u00feugkjand li\u00feiwe leikis lasiwostai wisan, \u00feaurftai sin(d) . . . .\n13:1 [A] . . . . ai\u00fe\u00feau klismo klismjandei.\n13:2 [A] jah jabai habau praufetjans jah witjau allaize runos jah all kun\u00fei jah habau alla galaubein, swaswe fairgunja mi\u00fesatjau, i\u00fe fria\u00fewa ni habau, ni waihts im.\n13:3 [A] jah jabai fraatjau allos aihtins meinos, jah jabai atgibau leik mein ei gabrannjaidau, i\u00fe fria\u00fewa habau, ni waiht botos mis taujau.\n13:4 [A] fria\u00fewa usbeisneiga ist, sels ist: fria\u00fewa ni aljano\u00fe; fria\u00fewa ni flautei\u00fe, ni ufblesada,\n13:5 [A] ni aiwisko\u00fe, ni sokei\u00fe sein ain, ni ingramjada, nih mito\u00fe ubil,\n13:6 [A] nih fagino\u00fe inwindi\u00feai, mi\u00fefagino\u00fe sunjai;\n13:7 [A] allata \u00feulai\u00fe, allata galaubei\u00fe, all wenei\u00fe, all gabeidi\u00fe.\n13:8 [A] fria\u00fewa aiw ni gadriusi\u00fe, i\u00fe ja\u00fe\u00fee praufetja gatairanda ja\u00fe\u00fee razdos gahveiland ja\u00fe\u00fee kun\u00fei gataurni\u00fe.\n13:9 [A] suman kunnum jah suman praufetjam.\n13:10 [A] bi\u00fee qimi\u00fe \u00featei ustauhan ist, gataurni\u00fe \u00featei us dailai ist.\n13:11 [A] i\u00fe \u00fean was niuklahs, swe niuklahs rodida, swe niuklahs fro\u00fe, swe niuklahs mitoda; bi\u00fee war\u00fe wair, barniskeins aflagida.\n13:12 [A] saihvam nu \u00feairh skuggwan in frisahtai, i\u00fe \u00fean andwair\u00fei wi\u00fera andwair\u00fei; nu wait us dailai, i\u00fe \u00fean ufkunna . . . .\n14:20 [A] . . . . barniskai sijai\u00fe, ei fra\u00fejam fullaweisai sijai\u00fe.\n14:21 [A] in witoda gameli\u00fe ist \u00featei in an\u00fearaim razdom jah wairilom an\u00fearaim rodja managein \u00feizai, jan~ni swa andhausjand mis, qi\u00fei\u00fe frauja.\n14:22 [A] swaei nu razdos du bandwai sind ni \u00feaim galaubjandam, ak \u00feaim ungalaubjandam; i\u00fe praufetja ni \u00feaim ungalaubjandam, ak \u00feaim galaubjandam.\n14:23 [A] jabai gaqimi\u00fe alla aikklesjo samana jah rodjand razdom allai, atu\u00fe~\u00fean~gaggand inn jah unweisai ai\u00fe\u00feau ungalaubjandans, niu qi\u00feand \u00featei dwalmo\u00fe?\n14:24 [A] i\u00fe jabai allai praufetjand, i\u00fe innatgaggai hvas ungalaubjands ai\u00fe\u00feau unweis, gasakada fram allaim, ussokjada fram allaim,\n14:25 [A] \u00feo analaugnjona hairtins is swikun\u00fea wair\u00feand, \u00feanuh driusands ana andawleizn inweiti\u00fe gu\u00fe, gateihands \u00featei bi sunjai gu\u00fe in izwis ist.\n14:26 [A] hva nu ist, bro\u00ferjus? \u00fean sama\u00fe garinnai\u00fe, hvarjizuh izwara psalmon habai\u00fe, laisein habai\u00fe, andhulein habai\u00fe, razda habai\u00fe, skerein habai\u00fe, allata du timreinai wair\u00feai.\n14:27 [A] ja\u00fe\u00fee razdai hvas rodjai, bi twans ai\u00fe\u00feau maist \u00ferins, jah . . . .\n15:1 [A] A\u00fe\u00fean kannja izwis, bro\u00ferjus, \u00featei aiwaggeli \u00featei merida izwis, \u00featuh jah andnemu\u00fe, in \u00feammei jah standi\u00fe,\n15:2 [A] \u00feairh \u00featei jah ganisi\u00fe: in hvo sau\u00feo wailamerida izwis, skulu\u00fe gamunan, niba sware galaubidedu\u00fe.\n15:3 [A] atgaf auk izwis in frumistjam \u00featei andnam, ei Xristus gaswalt faur frawaurhtins unsaros afar bokom,\n15:4 [A] ja\u00fe~\u00featei ganawistro\u00fes was, ja\u00fe \u00featei urrais \u00feridjin daga afar bokom\n15:5 [A] ja\u00fe~\u00featei ataugids ist Kefin, jah afar \u00feata \u00feaim ainlibim;\n15:6 [A] \u00fea\u00feroh gasaihvans ist managizam \u00feau fimf hundam [taihuntewjam] bro\u00fere suns, \u00feizeei \u00feai managistans sind und hita, sumai\u00fe~\u00fean gasaizlepun.\n15:7 [A] \u00fea\u00feroh \u00fean ataugida sik Iakobau, \u00fea\u00fero\u00fe~\u00fean apaustaulum allaim;\n15:8 [A] i\u00fe spedistamma allaize, swaswe uswaurpai, ataugida sik jah mis.\n15:9 [A] ik auk im sa smalista apaustaule, ikei ni im wair\u00fes ei haitaidau apaustaulus, du\u00fee ei wrak aikklesjon gudis.\n15:10 [A] a\u00fe\u00fean anstai gudis im saei im, jas~so ansts is in mis halka ni war\u00fe, ak managizo im allaim [arbaidida jah] usaiwida, a\u00fe\u00fean ni ik, ak ansts gudis mi\u00fe mis.\n15:11 [A] i\u00fe ja\u00fe\u00fee ik ja\u00fe\u00fee jainai, swa merjam, jah swa galaubidedu\u00fe.\n15:12 [A] \u00feande nu Xristus merjada \u00featei urrais us dau\u00feaim, hvaiwa qi\u00feand sumai in izwis \u00featei usstass dau\u00feaim nist?\n15:13 [A] i\u00fe jabai usstass dau\u00feaim nist, nih Xristus urrais.\n15:14 [A] a\u00fe\u00fean jabai Xristus ni urrais, sware \u00feau jas~so mereins unsara, jah so galaubeins unsara lausa.\n15:15 [A] bi\u00fe~\u00fean~gitanda galiugaweitwods gudis, unte weitwodidedum bi gu\u00fe \u00featei urraisida Xristu, \u00feanei ni urraisida.\n15:16 [A] jah jabai auk dau\u00feans ni urreisand, nih Xristus urrais.\n15:17 [A] i\u00fe jabai Xristus ni urrais, sware jah so galaubeins izwara ist; jan~nauh siju\u00fe in frawaurhtim izwaraim.\n15:18 [A] \u00feanuh ja\u00fe~\u00feai gaslepandans in Xristau fraqistnodedun.\n15:19 [A] jabai in \u00feizai libainai [ainai] in Xristau wenjandans sijum \u00featainei, armostai sium allaize manne.\n15:20 [A] i\u00fe nu [\u00feande] Xristus urrais us dau\u00feaim, anastodeins gaslepandane waur\u00feans;\n15:21 [A] unte auk \u00feairh mannan dau\u00feus, jah \u00feairh mannan usstass dau\u00feaize;\n15:22 [A] unte swaswe in Adama allai gadau\u00fenand, swah in Xristau allai gaqiunand.\n15:23 [A] a\u00fe\u00fean hvarjizuh in seinai tewai: anastodeins Xristus, \u00fea\u00fero\u00fe~\u00fean \u00feai Xristaus [\u00feaiei] in quma is.\n15:24 [A] \u00fea\u00fero\u00fe~\u00fean andeis, \u00fean[a] anafilhi\u00fe \u00feiudinassu guda jah attin, \u00fean gatairi\u00fe all reikjis jah waldufnjis jah mahtais.\n15:25 [A] skal auk is \u00feiudanon und \u00featei galagji\u00fe [gu\u00fe] allans fijands is uf fotuns imma.\n15:26 [A] alluh auk ufhnaiwida uf fotuns imma; aftumista fijands gatairada dau\u00feus.\n15:27 [A] i\u00fe bi\u00fee qi\u00fei\u00fe: alla ufhnaiwida sind, bairht \u00featei inu \u00feana izei ufhnaiwida uf ina \u00feo alla.\n15:28 [A] \u00feanuh bi\u00fee alla gakunnun sik faura imma, \u00feanu\u00fe~\u00fean is silba sunus gakann sik faura \u00feamma ufhnaiwjandin uf ina \u00feo alla, ei sijai gu\u00fe alla in allaim.\n15:29 [A] ai\u00fe\u00feau hva waurkjand \u00feai daupjandans faur dau\u00feans, jabai allis dau\u00feans ni urreisand? duhve \u00feau daupjand faur ins?\n15:30 [A] duhve \u00feau weis bireikjai sijum hveilo hvoh?\n15:31 [A] daga hvammeh gaswiltandans in izwaraizos hvoftuljos, bro\u00ferjus, \u00feoei haba in Xristau Iesu fraujin unsaramma.\n15:32 [A] jabai bi manna(m) du diuzam waih in Aifaison, hvo mis boto jabai dau\u00feans ni urreisand? matjam jah drigkam, unte du maurgina gaswiltam.\n15:33 [A] ni afairzjaindau: riurjand sidu godana gawaurdja ubila.\n15:34 [A] usska(r)ji\u00fe izwis garaihtaba jan~ni frawaurkjaid; unkun\u00fei gudis sumai haband; du aiwiskja izwis rodja.\n15:35 [A] akei qi\u00fei\u00fe sums: hvaiwa urreisand dau\u00feans? . . . .\n15:46 [A] . . . . ahmeino.\n15:47 [A] sa fruma manna us air\u00feai muldeins, sa an\u00fear manna, frauja, us himina.\n15:48 [A] hvileiks sa muldeina, swaleikai jah \u00feai muldeinans; hvileiks sa ufarhiminakunda, swaleikai jah \u00feai ufarhiminakundans.\n15:48 [B] . . . . hvileiks sa ufarhiminakunda, (sw)aleikai jah \u00feai ufarhiminakundans.\n15:49 [A] jah swaswe berum mannleikan \u00feis air\u00feeinins, bairaima jah frisaht \u00feis himinakundins.\n15:49 [B] jah swaswe berum (m)anleikan \u00feis air\u00feeinins, swa bairaima jah frisaht \u00feis himinakundins.\n15:50 [A] \u00feata auk qi\u00fea, bro\u00ferjus, \u00feei leik jah blo\u00fe \u00feiudinassu gudis ganiman ni magun, nih riurei unriureins arbjo wair\u00fei\u00fe.\n15:50 [B] \u00feata auk qi\u00fea, bro\u00ferjus, \u00feei leik jah blo\u00fe \u00feiudinassu gudis ganiman ni magun, nih riurei unriureins arbjo wair\u00fei\u00fe.\n15:51 [A] sai, runa izwis qi\u00fea: allai auk ni gaswiltam, i\u00fe allai inmaidjanda.\n15:51 [B] sai, runa izwis qi\u00fea: allai auk ni gaswiltam, i\u00fe allai inmaidjanda.\n15:52 [A] suns, in brahva augins, in spedistin \u00feuthaurna; \u00feuthaurnei\u00fe auk, jah dau\u00feans usstandand unriurjai, jah weis inmaidjanda.\n15:52 [B] suns, in (b)rahva augins, in spedistin \u00feuthaurna; \u00feuthaurnei\u00fe auk, jah dau\u00feans usstandand unriurjai, jah weis inmaidjanda.\n15:53 [A] skuld auk ist \u00feata riurjo gahamon unriurein, jah \u00feata diwano gahamon undiwanein.\n15:53 [B] skuld ist auk \u00feata riurjo ga(ham)on unriurein, jah \u00feata diwano gahamon undiwanein.\n15:54 [A] \u00feanu\u00fe~\u00fean \u00feata diwano gawasjada undiwanein, \u00feanuh wair\u00fei\u00fe waurd \u00feata gamelido: ufsagqi\u00fes war\u00fe dau\u00feus in sigis.\n15:54 [B] \u00feanuh wair(\u00fe)i\u00fe waurd \u00feata gamelido: ufsaggqi\u00fes war\u00fe dau\u00feu(s) (i)n sigis.\n15:55 [A] hvar ist gazds \u00feeins, dau\u00feu? hvar ist sigis \u00feein, halja?\n15:55 [B] hvar ist gazds \u00feei(ns), dau\u00feu? hvar ist sigis \u00feein, halja?\n15:56 [A] a\u00fe\u00fean gazds dau\u00feaus frawaurhts, i\u00fe mahts frawaurhtais wito\u00fe.\n15:56 [B] a\u00fe\u00fean gazds dau\u00feaus frawaurhts, i\u00fe mahts frawaurhtais wito\u00fe.\n15:57 [A] i\u00fe guda awiliu\u00fe ize gaf unsis sigis \u00feairh fraujan unsarana Iesu Xristau.\n15:57 [B] i\u00fe guda awiliud izei gaf unsis sigis \u00feairh fraujan unsarana Iesu Xristu.\n15:58 [A] swaei nu, bro\u00ferjus meinai liubans, tulgjai wair\u00fei\u00fe, ungawagidai, ufarfulljandans in waurstwa fraujins sinteino, witandans \u00featei arbai\u00fes izwara nist lausa in fraujin.\n15:58 [B] swaei nu, bro\u00ferjus meinai liubans, tulgjai wair\u00feai\u00fe, ungawagidai, ufarfulljandans in waurstwa fraujins sinteino, witandans \u00featei arbai\u00fes izwara nist lausa in fraujin.\n16:1 [A] I\u00fe bi gabaur \u00feata \u00feaim weiham, swaswe garaidida aikklesjom Galat[i]e, swa jah jus tauji\u00fe.\n16:1 [B] I\u00fe bi gabaur \u00feata \u00feaim weiham, swaswe garaidida aikklesjom Gala(ti)ais, swa jah jus taujai(\u00fe).\n16:2 [A] ainhvarjanoh sabbate hvarjizuh izwara fram sis silbin lagjai huhjands \u00featei wili, ei ni, bi\u00fee qimau, \u00fean gabaur wair\u00feai.\n16:2 [B] ainhvarjanoh sabbate hvarjizuh izwara fram sis silbin taujai huhjands \u00featei wili, ei ni, bi\u00fee qimau, \u00fean gabaur wair\u00feai.\n16:3 [A] a\u00fe\u00fean bi\u00fee qima, \u00feanzei gakiusi\u00fe \u00feairh bokos \u00feans sandja briggan anst izwara in Iairusalem.\n16:3 [B] a\u00fe\u00fean bi\u00fee qima, \u00feanzei gakiusi\u00fe \u00feairh bokos \u00feans sandja briggan anst izwara in Iairusalem.\n16:4 [A] jah \u00fean jabai ist mis wair\u00fe galei\u00fean, galei\u00feand mi\u00fe mis.\n16:4 [B] jah \u00fean jabai ist mis wair\u00fe galei\u00fean, galei\u00feand mi\u00fe mis.\n16:5 [A] a\u00fe\u00fean qima at izwis \u00fean Makidonja uslei\u00fea; Makidonja auk \u00feairhgagga.\n16:5 [B] a\u00fe\u00fean qima at izwis \u00fean Makidonja uslei\u00fea; Makidonja auk \u00feairhgagga.\n16:6 [A] i\u00fe at izwis waitei salja ai\u00fe\u00feau jah wintru wisa, ei jus mik gasandjai\u00fe \u00feishvaduh \u00feei ik wrato.\n16:6 [B] i\u00fe at izwis waitei salja ai\u00fe\u00feau jah wintru wisa, ei jus mik gasandjai\u00fe \u00feishvaduh \u00fee ik wrato.\n16:7 [A] ni wiljau auk izwis nu \u00feairhlei\u00feands saihvan; unte wenja[n] mik hvo hveilo saljan at izwis, jabai frauja fraleti\u00fe.\n16:7 [B] ni wiljau auk izwis nu \u00feairhlei\u00feands saihvan; unte wenja mik hvo hveilo saljan at izwis, jabai frauja fraleti\u00fe.\n16:8 [A] wisu\u00fe~\u00fean in Aifaison und paintekusten.\n16:8 [B] wisuh \u00fean in Aifaison und paintekusten.\n16:9 [A] haurds auk mis usluknoda mikila jah waurstweiga, jah andasta\u00fejos managai.\n16:9 [B] haurds auk mis usluknoda mikila jah waurstweiga, jah andasta\u00fejos managai.\n16:10 [A] a\u00fe\u00fean jabai qimai Teimau\u00feaius, saihvi\u00fe ei unagans sijai at izwis, unte waurstw fraujins waurkei\u00fe, swaswe jah ik.\n16:10 [B] a\u00fe\u00fean jabai qimai Teimau\u00feaius, saihvai\u00fe ei unagands sijai at izwis, unte waurstw fraujins waurkei\u00fe, swaswe jah ik.\n16:11 [A] ni hvashun imma frakunni . . . .\n16:11 [B] ni hvashun imma frakunni , i\u00fe insandjai\u00fe ina in gawair\u00feja, ei qimai at mis; usbeida auk ina mi\u00fe bro\u00ferum.\n16:12 [B] a\u00fe\u00fean bi Apaullon \u00feana bro\u00fear bandwja izwis \u00featei filu ina bad ei is qemi at izwis mi\u00fe bro\u00ferum, jah aufto ni was wilja ei nu qemi; i\u00fe qimi\u00fe, bi\u00fee uhtiug.\n16:13 [B] wakai\u00fe standaiduh in galaubeinai, wairaleiko taujai\u00fe, ga\u00fewastid(ai) sijai\u00fe.\n16:14 [B] allata izwar in fria\u00fewai wair\u00feai.\n16:15 [B] bidja izwis, bro\u00ferjus, witu\u00fe gard Staifanaus, \u00featei sind anastodeins Aka\u00efje jah du andbahtja \u00feaim weiham gasatidedun sik,\n16:16 [B] ei nu jah jus ufhausjai\u00fe \u00feaim swaleikaim jah allaim \u00feaim gawaurstwam jah arbaidjandam.\n16:17 [B] a\u00fe\u00fean fagino in qumis Staifanaus jah Faurtunataus jah Aka\u00efkaus, unte izwarana waninassu \u00feai usfullidedun.\n16:18 [B] ga\u00ferafstidedun auk jah meinana ahman jah izwarana; ufkunnai\u00fe nu \u00feans swaleikans.\n16:19 [B] goljand izwis aikklesjons Asiais. golei\u00fe izwis in fraujin filu Akwla jah Priska mi\u00fe ingardjon seinai aikklesjon, at \u00feaimei jah salja.\n16:20 [B] golei\u00fe izwis misso in frijonai weihai.\n16:21 [B] goleins meinai handau Pawlus.\n16:22 [B] jabai hvas ni frijo\u00fe fraujan Iesu Xristu, ana\u00feaima: maran a\u00fea.\n16:23 [A] ansts fraujins Iesuis mi\u00fe izwis.\n16:23 [B] ansts fraujins Iesuis mi\u00fe izwis.\n16:24 [A] frija\u00fewa meina mi\u00fe allaim izwis in Xristau Iesu. amen.\n16:24 [B] fria\u00fewa meina mi\u00fe allaim izwis in Xristau Iesu. amen.\n16:255 [A] Du Kaurin\u00feium \u00b7a\u00b7 ustauh. Du Kaurin\u00feium frume melida ist us Filippai, swe qe\u00feun sumai; i\u00fe mais \u00feugkei\u00fe bi silbins apaustaulaus insahtai melida wisan us Asiai.","title":"Gothic Bible (partial): 1 Corinthians","type":"page"}