{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/joh.htm","path":"bib/wb/got/joh.htm","source_url":"https://sacred-texts.com/bib/wb/got/joh.htm","text":"5:45 [CA] . . . . \u00featei ik wrohidedjau izwis du attin; ist saei wrohida izwis, Moses, du \u00feammei jus wenei\u00fe.\n5:46 [CA] jabai allis Mose galaubidedei\u00fe, ga~\u00feau~laubidedei\u00fe mis; bi mik auk jains gamelida.\n5:47 [CA] \u00feande nu jainis melam ni galaubei\u00fe, hvaiwa meinaim waurdam galaubjai\u00fe?\n6:1 [CA] Afar \u00feata galai\u00fe Iesus ufar marein \u00feo Galeilaie jah Tibairiade.\n6:2 [CA] jah laistida ina manageins filu, unte gasehvun taiknins \u00feozei gatawida bi siukaim.\n6:3 [CA] usiddja \u00fean ana fairguni Iesus jah jainar gasat mi\u00fe siponjam seinaim.\n6:4 [CA] wasuh \u00fean nehva pasxa, so dul\u00fes Iudaie.\n6:5 [CA] \u00fearuh ushof augona Iesus jah gaumida \u00feammei manageins filu iddja du imma, qa\u00feuh du Filippau: hva\u00fero bugjam hlaibans, ei matjaina \u00feai?\n6:6 [CA] \u00featuh \u00fean qa\u00fe fraisands ina; i\u00fe silba wissa \u00featei habaida taujan.\n6:7 [CA] andhof imma Filippus: twaim hundam skatte hlaibos ni ganohai sind \u00feaim, \u00feei nimai hvarjizuh leitil.\n6:8 [CA] qa\u00fe ains \u00feize siponje is, Andraias, bro\u00fear Paitraus Seimonaus:\n6:9 [CA] ist magula ains her, saei habai\u00fe \u00b7e\u00b7 hlaibans barizeinans jah \u00b7b\u00b7 fiskans; akei \u00feata hva ist du swa managaim?\n6:10 [CA] i\u00fe Iesus qa\u00fe: waurkei\u00fe \u00feans mans anakumbjan. wasuh \u00fean hawi manag ana \u00feamma stada. \u00fearuh anakumbidedun wairos ra\u00fejon swaswe fimf \u00feusundjos.\n6:11 [CA] namuh \u00fean \u00feans hlaibans Iesus jah awiliudonds gadailida \u00feaim anakumbjandam; samaleiko jah \u00feize fiske, swa filu swe wildedun.\n6:12 [CA] \u00feanuh, bi\u00fee sadai waur\u00feun, qa\u00fe du siponjam seinaim: galisi\u00fe \u00feos aflifnandeins drauhsnos, \u00feei waihtai ni fraqistnai.\n6:13 [CA] \u00feanuh galesun jah gafullidedun \u00b7ib\u00b7 tainjons gabruko us fimf hlaibam \u00feaim barizeinam, \u00featei aflifnoda \u00feaim matjandam.\n6:14 [CA] \u00fearuh \u00feai mans gasaihvandans \u00feoei gatawida taikn Iesus, qe\u00feun \u00featei sa ist bi sunjai praufetus sa qimanda in \u00feo manase\u00fe.\n6:15 [CA] i\u00fe Iesus kunnands \u00featei munaidedun usgaggan jah wilwan ei tawidedeina ina du \u00feiudana, afiddja aftra in fairguni is ains.\n6:16 [CA] i\u00fe swe sei\u00feu war\u00fe, atiddjedun siponjos is ana marein,\n6:17 [CA] jah usstigun in skip, iddjedunuh ufar marein in Kafarnaum. jah riqis ju\u00fean war\u00fe jah ni atiddja nauh\u00fean du im Iesus.\n6:18 [CA] i\u00fe marei winda mikilamma waiandin urraisida was.\n6:19 [CA] \u00fearuh farjandans swe spaurde \u00b7k\u00b7 jah \u00b7e\u00b7 ai\u00fe\u00feau \u00b7l\u00b7 gasaihvand Iesu gaggandan ana marein jah nehva skipa qimandan jah ohtedun sis.\n6:20 [CA] \u00fearuh is qa\u00fe : ik im, ni ogei\u00fe izwis.\n6:21 [CA] \u00fearuh wildedun ina niman in skip, jah sunsaiw \u00feata skip war\u00fe ana air\u00feai ana \u00feoei eis iddjedun.\n6:22 [CA] iftumin daga managei sei sto\u00fe hindar marein, sehvun \u00featei skip an\u00fear ni was jainar alja ain, jah \u00featei mi\u00fe~ni~qam siponjam seinaim Iesus in \u00feata skip, ak ainai siponjos is gali\u00feun.\n6:23 [CA] an\u00feara \u00fean skipa qemun us Tibairiadau nehva \u00feamma stada, \u00fearei matidedun hlaif, ana \u00feammei awiliudoda frauja.\n6:24 [CA] \u00fearuh \u00fean gasahv managei \u00featei Iesus nist jainar nih siponjos is, gastigun in skipa jah qemun in Kafarnaum sokjandans Iesu.\n6:25 [CA] jah bigetun ina hindar marein qe\u00feunuh du imma: rabbei, hvan her qamt?\n6:26 [CA] andhof im Iesus jah qa\u00fe: amen amen qi\u00fea izwis, sokei\u00fe mik, ni \u00featei sehvu\u00fe taiknins jah fauratanja, ak \u00featei matidedu\u00fe \u00feize hlaibe jah sadai waur\u00feu\u00fe.\n6:27 [CA] waurkjai\u00fe ni \u00feana mat \u00feana fralusanan, ak mat \u00feana wisandan du libainai aiweinon, \u00feanei sunus mans gibi\u00fe izwis; \u00feanuh auk atta gasiglida gu\u00fe.\n6:28 [CA] \u00fearuh qe\u00feun du imma: hva taujaima, ei waurkjaima waurstwa gudis?\n6:29 [CA] andhof Iesus jah qa\u00fe du im: \u00feat~ist waurstw gudis, ei galaubjai\u00fe \u00feammei insandida jains.\n6:30 [CA] qe\u00feun du imma: a\u00fe\u00fean hva taujis \u00feu taikne, ei saihvaima jah galaubjaima \u00feus? hva waurkeis?\n6:31 [CA] attans unsarai manna matidedun ana au\u00feidai, swaswe ist gameli\u00fe: hlaif us himina gaf im du matjan.\n6:32 [CA] \u00fearuh qa\u00fe im Iesus: amen amen qi\u00fea izwis, ni Moses gaf izwis hlaif us himina, ak atta meins gaf izwis hlaif us himina \u00feana sunjeinan.\n6:33 [CA] sa auk hlaifs gudis ist, saei atstaig us himina jah gaf libain \u00feizai manasedai.\n6:34 [CA] \u00feanuh qe\u00feun du imma: frauja, framwigis gif unsis \u00feana hlaif.\n6:35 [CA] jah qa\u00fe du im Iesus: ik im sa hlaifs libainais; \u00feana gaggandan du mis ni huggrei\u00fe jah \u00feana galaubjandan du mis ni \u00feaursei\u00fe hvanhun.\n6:36 [CA] akei qa\u00fe izwis \u00featei gasehvu\u00fe mik jah ni galaubei\u00fe.\n6:37 [CA] all \u00featei gaf mis atta, du mis qimi\u00fe, jah \u00feana gaggandan du mis ni uswairpa ut;\n6:38 [CA] unte atstaig us himina, nih \u00feeei taujau wiljan meinana, ak wiljan \u00feis sandjandins mik.\n6:39 [CA] . . . .\n6:40 [CA] \u00featuh \u00fean ist wilja \u00feis sandjandins mik, ei hvazuh saei saihvi\u00fe \u00feana sunu jah galaubei\u00fe du imma, aigi libain aiweinon, jah urraisja ina ik in spedistin daga.\n6:41 [CA] birodidedun \u00fean Iudaieis bi ina, unte qa\u00fe: ik im hlaifs sa atsteigands us himina,\n6:42 [CA] jah qe\u00feun: niu sa ist Iesus sa sunus Iosefis, \u00feizei weis kun\u00feedum attan jah ai\u00feein? hvaiwa nu qi\u00fei\u00fe sa \u00featei us himina atstaig?\n6:43 [CA] andhof \u00fean Iesus jah qa\u00fe du im: ni birodei\u00fe mi\u00fe izwis misso.\n6:44 [CA] ni manna mag qiman at mis, nibai atta saei sandida mik at\u00feinsi\u00fe ina, jah ik urraisja ina in \u00feamma spedistin daga.\n6:45 [CA] ist gameli\u00fe ana praufetum: jah wair\u00feand allai laisidai gudis. hvazuh nu sa gahausjands at attin jah ganam gaggi\u00fe du mis.\n6:46 [CA] ni \u00featei attan sehvi hvas, nibai saei was fram attin, sa sahv attan.\n6:47 [CA] amen amen qi\u00fea izwis: saei galaubei\u00fe du mis aih libain aiweinon.\n6:48 [CA] ik im sa hlaifs libainais.\n6:49 [CA] attans izwarai matidedun manna in au\u00feidai jah gaswultun.\n6:50 [CA] sa ist hlaifs saei us himina atstaig, ei saei \u00feis matjai, ni gadau\u00fenai.\n6:51 [CA] ik im hlaifs sa libanda, sa us himina qumana; jabai hvas matji\u00fe \u00feis hlaibis, libai\u00fe in ajukdu\u00fe; jah \u00fean sa hlaifs \u00feanei ik giba, leik mein ist \u00featei ik giba in \u00feizos manasedais libainais.\n6:52 [CA] \u00feanuh sokun mi\u00fe sis misso Iudaieis qi\u00feandans: hvaiwa mag sa unsis leik giban du matjan?\n6:53 [CA] \u00fearuh qa\u00fe du im Iesus: amen amen qi\u00fea izwis, nibai matji\u00fe leik \u00feis sunaus mans jah driggkai\u00fe is blo\u00fe, ni habai\u00fe libain in izwis silbam.\n6:54 [CA] saei matji\u00fe mein leik jah driggki\u00fe mein blo\u00fe, aih libain aiweinon, jah ik urraisja ina in \u00feamma spedistin daga.\n6:55 [CA] \u00feata auk leik meinata bi sunjai ist mats, jah \u00feata blo\u00fe mein bi sunjai ist draggk.\n6:56 [CA] saei matji\u00fe mein leik jah driggki\u00fe mein blo\u00fe, in mis wisi\u00fe jah ik in imma.\n6:57 [CA] swaswe insandida mik libands atta, jah ik liba in attins, jah saei matji\u00fe mik, jah sa libai\u00fe in meina.\n6:58 [CA] sa ist hlaifs saei us himina atstaig, ni swaswe matidedun attans izwarai manna jah gadau\u00fenodedun; i\u00fe saei matji\u00fe \u00feana hlaif libai\u00fe in ajukdu\u00fe.\n6:59 [CA] \u00feata qa\u00fe in swnagoge laisjands in Kafarnaum.\n6:60 [CA] \u00feanuh managai gahausjandans \u00feize siponje is qe\u00feun: hardu ist \u00feata waurd, hvas mag \u00feis hausjon?\n6:61 [CA] i\u00fe witands Iesus in sis silbin \u00featei birodidedun \u00feata \u00feai siponjos is, qa\u00fe du im: \u00feata izwis gamarzei\u00fe?\n6:62 [CA] jabai nu gasaihvi\u00fe sunu mans ussteigan, \u00feadei was faur\u00feis?\n6:63 [CA] ahma ist saei liban tauji\u00fe, \u00feata leik ni botei\u00fe waiht. \u00feo waurda \u00feoei ik rodida izwis, ahma ist jah libains ist,\n6:64 [CA] akei sind izwara sumai, \u00feaiei ni galaubjand. wissuh \u00fean us frumistja Iesus hvarjai sind \u00feai ni galaubjandans, jah hvas ist saei galeiwei\u00fe ina.\n6:65 [CA] jah qa\u00fe: du\u00fee qa\u00fe izwis \u00featei ni ainshun mag qiman at mis, nibai ist atgiban imma fram attin meinamma.\n6:66 [CA] uzuh \u00feamma mela managai gali\u00feun siponje is ibukai jah \u00feanasei\u00fes mi\u00fe imma ni iddjedun.\n6:67 [CA] \u00fearuh qa\u00fe Iesus du \u00feaim twalibim: ibai jah jus wilei\u00fe galei\u00fean?\n6:68 [CA] \u00feanuh andhof imma Seimon Paitrus: frauja, du hvamma galei\u00feaima? waurda libainais aiweinons habais.\n6:69 [CA] jah weis galaubidedum jah ufkun\u00feedum \u00featei \u00feu is Xristus, sunus gudis libandins.\n6:70 [CA] andhof im Iesus: niu ik izwis \u00b7ib\u00b7 gawalida jah izwara ains diabaulus ist?\n6:71 [CA] qa\u00feuh \u00fean \u00feana Iudan Seimonis, Iskariotu, sa auk habaida ina galewjan, ains wisands \u00feize twalibe.\n7:1 [CA] Jah hvarboda Iesus afar \u00feata in Galeilaia; ni auk wilda in Iudaia gaggan, unte sokidedun ina \u00feai Iudaieis usqiman.\n7:2 [CA] wasuh \u00fean nehva dul\u00fes Iudaie, so hle\u00ferastakeins.\n7:3 [CA] \u00feanuh qe\u00feun du imma bro\u00ferjus is: uslei\u00fe \u00fea\u00fero jah gagg in Iudaian, ei jah \u00feai siponjos saihvaina waurstwa \u00feeina \u00feoei \u00feu taujis.\n7:4 [CA] ni manna auk in analaugnein hva tauji\u00fe jah sokei\u00fe sik uskun\u00feana wisan. jabai \u00feata taujis, bairhtei \u00feuk silban \u00feizai manasedai.\n7:5 [CA] ni auk \u00feai bro\u00ferjus is galaubidedun imma.\n7:6 [CA] \u00fearuh qa\u00fe im Iesus: mel mein ni nauh ist, i\u00fe mel izwar sinteino ist manwu.\n7:7 [CA] ni mag so manase\u00fes fijan izwis, i\u00fe mik fijai\u00fe; unte ik weitwodja bi ins \u00featei waurstwa ize ubila sind.\n7:8 [CA] jus galei\u00fei\u00fe in dul\u00fe \u00feo, i\u00fe ik ni nauh galei\u00fea in \u00feo dul\u00fe, unte meinata mel ni nauh usfulli\u00fe ist.\n7:9 [CA] \u00featuh \u00fean qa\u00fe du im wisands in Galeilaia.\n7:10 [CA] i\u00fe bi\u00fee gali\u00feun \u00feai bro\u00ferjus is, \u00feanuh jah is galai\u00fe in \u00feo dul\u00fe ni andaugjo, ak swe analaugniba.\n7:11 [CA] \u00feanuh Iudaieis sokidedun ina in \u00feizai dul\u00feai jah qe\u00feun: hvar ist jains?\n7:12 [CA] jah birodeins mikila was in managein: sumaih qe\u00feun \u00featei sunjeins ist; an\u00fearai qe\u00feun: ne, ak airzei\u00fe \u00feo managein.\n7:13 [CA] nih \u00fean ainshun swe\u00feauh bal\u00feaba rodida bi ina in agisis Iudaie.\n7:14 [CA] i\u00fe ju\u00fean ana midjai dul\u00fe usstaig Iesus in alh jah laisida.\n7:15 [CA] jah sildaleikidedun manageins qi\u00feandans: hvaiwa sa bokos kann unuslaisi\u00fes?\n7:16 [CA] andhof \u00fean Iesus jah qa\u00fe: so meina laiseins nist meina, ak \u00feis sandjandins mik.\n7:17 [CA] jabai hvas wili wiljan is taujan, ufkunnai\u00fe bi \u00feo laisein framuh guda sijai, \u00feau iku fram mis silbin rodja.\n7:18 [CA] saei fram sis silbin rodei\u00fe, hauhi\u00fea seina sokei\u00fe; i\u00fe saei sokei\u00fe hauhi\u00fea \u00feis sandjandins sik, sah sunjeins ist jah inwindi\u00fea in imma nist.\n7:19 [CA] niu Moses gaf izwis wito\u00fe? jah ni ainshun izwara tauji\u00fe \u00feata wito\u00fe; hva mik sokei\u00fe usqiman?\n7:20 [CA] andhof so managei jah qe\u00feun: unhul\u00feon habais; hvas \u00feuk sokei\u00fe usqiman?\n7:21 [CA] andhof Iesus jah qa\u00fe du im: ain waurstw gatawida, jah allai sildaleikei\u00fe.\n7:22 [CA] du\u00fe\u00fee Moses atgaf izwis bimait, ni \u00featei fram Mose sijai, ak us attam, jah in sabbato bimaiti\u00fe mannan.\n7:23 [CA] jabai bimait nimi\u00fe manna in sabbato, ei ni gatairaidau wito\u00fe \u00feata Mosezis; i\u00fe mis hatizo\u00fe, unte allana mannan hailana gatawida in sabbato?\n7:24 [CA] ni stojai\u00fe bi siunai, ak \u00feo garaihton staua stojai\u00fe.\n7:25 [CA] qe\u00feunuh \u00fean sumai \u00feize Iairusaulwmeite: niu sa ist \u00feammei sokjand usqiman?\n7:26 [CA] jah sai, andaugiba rodei\u00fe jah waiht du imma ni qi\u00feand; ibai aufto bi sunjai ufkun\u00feedun \u00feai reiks \u00featei sa ist bi sunjai Xristus?\n7:27 [CA] akei \u00feana kunnum, hva\u00fero ist; i\u00fe Xristus, bi\u00fee qimi\u00fe, ni manna wait hva\u00fero ist.\n7:28 [CA] hropida \u00fean in alh laisjands Iesus jah qi\u00feands: jah mik kunnu\u00fe jah witu\u00fe hva\u00fero im; jah af mis silbin ni qam, ak ist sunjeins saei sandida mik, \u00feanei jus ni kunnu\u00fe.\n7:29 [CA] i\u00fe ik kann ina, unte fram imma im, jah is mik insandida.\n7:30 [CA] sokidedun \u00fean ina gafahan, jah ni ainshun uslagida ana ina handu, unte nauh\u00feanuh ni atiddja hveila is.\n7:31 [CA] i\u00fe managai \u00feizos manageins galaubidedun imma jah qe\u00feun: Xristus, \u00fean qimi\u00fe, ibai [ei] managizeins taiknins taujai \u00feaimei sa tawida?\n7:32 [CA] hausidedun \u00fean Fareisaieis \u00feo managein birodjandein bi ina \u00feata. inuhsandidedun andbahtans \u00feai Fareisaieis jah \u00feai auhumistans gudjans, ei gafaifaheina ina.\n7:33 [CA] \u00feanuh qa\u00fe Iesus: nauh leitila hveila mi\u00fe izwis im, jah \u00fean gagga du \u00feamma sandjandin mik.\n7:34 [CA] sokei\u00fe mik jah ni bigiti\u00fe, jah \u00fearei im ik, jus ni magu\u00fe qiman.\n7:35 [CA] \u00fearuh qe\u00feun \u00feai Iudaieis du sis misso: hvadre sa skuli gaggan, \u00feei weis ni bigitaima ina? nibai in distahein \u00feiudo skuli gaggan jah laisjan \u00feiudos?\n7:36 [CA] hva sijai \u00feata waurd, \u00featei qa\u00fe: sokei\u00fe mik jah ni bigiti\u00fe, jah \u00fearei im ik, jus ni magu\u00fe qiman?\n7:37 [CA] i\u00fe in spedistin daga \u00feamma mikilin dul\u00feais sto\u00fe Iesus jah hropida qi\u00feands: jabai hvana \u00feaursjai, gaggai du mis jah driggkai.\n7:38 [CA] saei galaubei\u00fe du mis, swaswe qa\u00fe gameleins, ahvos us wambai is rinnand watins libandins.\n7:39 [CA] \u00featuh \u00fean qa\u00fe bi ahman \u00feanei skuldedun niman \u00feai galaubjandans du imma; unte ni nauh\u00feanuh was ahma sa weiha ana im, unte Iesus nauh\u00feanuh ni hauhi\u00fes was.\n7:40 [CA] managai \u00fean \u00feizos manageins hausjandans \u00feize waurde qe\u00feun: sa ist bi sunjai sa praufetes.\n7:41 [CA] sumaih qe\u00feun: sa ist Xristus. sumaih qe\u00feun: ibai \u00feau us Galeilaia Xristus qimi\u00fe?\n7:42 [CA] niu gameleins qa\u00fe \u00featei us fraiwa Daweidis jah us Be\u00felaihaim weihsa, \u00fearei was Daweid, Xristus qimi\u00fe?\n7:43 [CA] \u00feanuh missaqiss in \u00feizai managein war\u00fe bi ina.\n7:44 [CA] sumaih \u00fean ize wildedun fahan ina; akei ni ainshun uslagida ana ina handuns.\n7:45 [CA] gali\u00feun \u00fean \u00feai andbahtos du \u00feaim auhumistam gudjam jah Fareisaium; \u00fearuh qe\u00feun du im jainai: duhve ni attauhu\u00fe ina?\n7:46 [CA] andhofun \u00feai andbahtos: ni hvanhun aiw rodida manna, swaswe sa manna.\n7:47 [CA] andhofun \u00fean im \u00feai Fareisaieis: ibai jah jus afairzidai siju\u00fe?\n7:48 [CA] sai, jau ainshun \u00feize reike galaubidedi imma ai\u00fe\u00feau Fareisaie?\n7:49 [CA] alja so managei, \u00feaiei ni kunnun wito\u00fe, fraqi\u00feanai sind.\n7:50 [CA] qa\u00fe Nikaudemus du im, saei atiddja du imma in naht, sums wisands izei:\n7:51 [CA] ibai wito\u00fe unsar stoji\u00fe mannan, nibai faur\u00feis hausei\u00fe fram imma jah ufkunnai\u00fe hva taujai?\n7:52 [CA] andhofun jah qe\u00feun du imma: ibai jah \u00feu us Galeilaia is? ussokei jah saihv \u00featei praufetus us Galeilaia ni urreisi\u00fe.\n8:12 [CA] Aftra du im Iesus rodida qa\u00feuh: ik im liuha\u00fe manasedais; saei laistei\u00fe mik ni gaggi\u00fe in riqiza, ak habai\u00fe liuha\u00fe libainais.\n8:13 [CA] \u00feanuh qe\u00feun du imma \u00feai Fareisaieis: \u00feu bi \u00feuk silban weitwodeis; so weitwodi\u00fea \u00feeina nist sunjeina.\n8:14 [CA] andhof Iesus jah qa\u00fe du im: jah jabai ik weitwodja bi mik silban, sunja ist so weitwodi\u00fea meina, unte wait hva\u00fero qam jah hva\u00fe galei\u00fea, i\u00fe jus ni witu\u00fe hva\u00fero qima, ai\u00fe\u00feau hva\u00fe galei\u00fea.\n8:15 [CA] jus bi leika stoji\u00fe, i\u00fe ik ni stoja ainnohun.\n8:16 [CA] ja\u00fe~\u00fean jabai stoja ik, staua meina sunjeina ist, unte ains ni im, ak ik jah saei sandida mik atta.\n8:17 [CA] jah \u00fean in witoda izwaramma gameli\u00fe ist \u00featei twaddje manne weitwodi\u00fea sunja ist.\n8:18 [CA] ik im saei weitwodja bi mik silban, jah weitwodei\u00fe bi mik saei sandida mik atta.\n8:19 [CA] qe\u00feun \u00fean du imma: hvar ist sa atta \u00feeins? andhof Iesus: ni mik kunnu\u00fe nih attan meinana; i\u00fe mik kun\u00feedei\u00fe, jah \u00feau attan meinana kun\u00feedei\u00fe.\n8:20 [CA] \u00feo waurda rodida in gazaufwlakio, laisjands in alh; jah ainshun ni faifah ina, unte nauh\u00feanuh ni qam hveila is.\n8:21 [CA] \u00feanuh qa\u00fe aftra du im Iesus: ik galei\u00fea, jah sokei\u00fe mik, jah in frawaurhtai izwarai gadau\u00feni\u00fe. \u00feadei ik gagga, jus ni magu\u00fe qiman.\n8:22 [CA] qe\u00feun \u00fean Iudaieis: nibai usqimai sis silbin, ei qi\u00fei\u00fe: \u00feadei ik gagga, jus ni magu\u00fe qiman?\n8:23 [CA] jah qa\u00fe du im Iesus: jus us \u00feaim dala\u00fero siju\u00fe, i\u00fe ik us \u00feaim iupa\u00fero im; jus us \u00feamma fairhvau siju\u00fe, i\u00fe ik ni im us \u00feamma fairhvau.\n8:24 [CA] qa\u00fe nu izwis \u00featei gadau\u00feni\u00fe in frawaurhtim izwaraim; jabai auk ni galaubei\u00fe \u00featei ik im, gadau\u00feni\u00fe in frawaurhtim izwaraim.\n8:25 [CA] \u00fearuh qe\u00feun du imma: \u00feu hvas is? jah qa\u00fe du im Iesus: anastodeins, \u00featei jah rodja du izwis.\n8:26 [CA] manag skal bi izwis rodjan jah stojan; akei saei sandida mik sunjeins ist; jah ik \u00featei hausida at imma \u00feata rodja in \u00feamma fairhvau.\n8:27 [CA] ni fro\u00feun \u00featei attan im qa\u00fe.\n8:28 [CA] qa\u00feuh \u00fean du im Iesus: \u00fean ushauhei\u00fe \u00feana sunu mans, \u00feanuh ufkunnai\u00fe \u00featei ik im, jah af mis silbin tauja ni waiht, ak swaswe laisida mik atta meins, \u00feata rodja.\n8:29 [CA] jah saei sandida mik mi\u00fe mis ist; ni bilai\u00fe mis ainamma atta, unte ik \u00featei leikai\u00fe imma tauja sinteino.\n8:30 [CA] \u00feata imma rodjandin managai galaubidedun imma.\n8:31 [CA] \u00feanuh qa\u00fe Iesus du \u00feaim galaubjandam sis Iudaium: jabai jus gastandi\u00fe in waurda meinamma, bi sunjai siponjos meinai siju\u00fe,\n8:32 [CA] jah ufkunnai\u00fe sunja, jah so sunja frijans izwis briggi\u00fe.\n8:33 [CA] andhofun imma: fraiw Abrahamis sijum jah ni mannhun skalkinodedum aiw hvanhun; hvaiwa \u00feu qi\u00feis \u00featei frijai wair\u00fei\u00fe?\n8:34 [CA] andhof im Iesus: amen amen, qi\u00fea izwis \u00featei hvazuh saei tauji\u00fe frawaurht, skalks ist frawaurhtai.\n8:35 [CA] sah \u00fean skalks ni wisi\u00fe in garda du aiwa, sunus wisi\u00fe du aiwa.\n8:36 [CA] jabai nu sunus izwis frijans briggi\u00fe, bi sunjai frijai siju\u00fe.\n8:37 [CA] wait \u00featei fraiw Abrahamis siju\u00fe; akei sokei\u00fe mis usqiman, unte waurd mein ni gamot in izwis.\n8:38 [CA] ik \u00featei gasahv at attin meinamma rodja, jah jus \u00featei hausidedu\u00fe fram attin izwaramma tauji\u00fe.\n8:39 [CA] andhofun jah qe\u00feun du imma: atta unsar Abraham ist. qa\u00fe im Iesus: i\u00fe barna Abrahamis wesei\u00fe, waurstwa Abrahamis tawidedei\u00fe.\n8:40 [CA] i\u00fe nu sokei\u00fe mik usqiman, mannan izei sunja izwis rodida, \u00feoei hausida fram guda; \u00featuh Abraham ni tawida.\n8:41 [CA] jus tauji\u00fe toja attins izwaris. \u00feanuh qe\u00feun imma: weis us horinassau ni sijum gabauranai; ainana attan aigum, gu\u00fe.\n8:42 [CA] qa\u00fe du im Iesus: jabai gu\u00fe atta izwar wesi, friodedei\u00fe \u00feau mik, unte ik fram guda urrann jah qam; nih \u00fean auk fram mis silbin ni qam, ak is mik insandida.\n8:43 [CA] duhve ma\u00felein meina ni kunnu\u00fe? unte ni magu\u00fe hausjan waurd mein.\n8:44 [CA] jus us attin diabaulau siju\u00fe jah lustuns \u00feis attins izwaris wilei\u00fe taujan. jains manamaur\u00ferja was fram frumistja jah in sunjai ni gasto\u00fe; unte nist sunja in imma. \u00fean rodei\u00fe liugn, us seinaim rodei\u00fe, unte liugnja ist jah atta is.\n8:45 [CA] i\u00fe ik, \u00featei sunja rodida, ni galaubei\u00fe mis.\n8:46 [CA] hvas izwara gasaki\u00fe mik bi frawaurht? \u00feande sunja qi\u00fea, duhve ni galaubei\u00fe mis?\n8:47 [CA] sa wisands us guda waurda gudis hausei\u00fe; du\u00fee jus ni hausei\u00fe, unte us guda ni siju\u00fe.\n8:48 [CA] andhofun \u00fean \u00feai Iudaieis jah qe\u00feun du imma: niu waila qi\u00feam weis \u00featei Samareites is \u00feu jah unhul\u00feon habais?\n8:49 [CA] andhof Iesus: ik unhul\u00feon ni haba, ak swera attan meinana, jah jus unswerai\u00fe mik.\n8:50 [CA] ik ni sokja hauhein meina; ist saei sokei\u00fe jah stoji\u00fe.\n8:51 [CA] amen amen qi\u00fea izwis: jabai hvas waurd mein fastai\u00fe, dau\u00feu ni gasaihvi\u00fe aiwa dage.\n8:52 [CA] \u00feanuh qe\u00feun du imma \u00feai Iudaieis: nu ufkun\u00feedum \u00featei unhul\u00feon habais. Abraham gadau\u00fenoda jah praufeteis, jah \u00feu qi\u00feis: jabai hvas mein waurd fastai, ni kausjai dau\u00feau aiwa dage.\n8:53 [CA] ibai \u00feu maiza is attin unsaramma Abrahama, saei gadau\u00fenoda? jah praufeteis gadau\u00fenodedun. hvana \u00feuk silban taujis \u00feu?\n8:54 [CA] andhof Iesus: jabai ik hauhja mik silban, so hauheins meina ni waihts ist; ist atta meins saei hauhei\u00fe mik, \u00feanei jus qi\u00fei\u00fe \u00featei gu\u00fe unsar ist.\n8:55 [CA] jah ni kunnu\u00fe ina; i\u00fe ik kann ina; jah jabai qe\u00fejau \u00featei ni kunnjau ina, sijau galeiks izwis liugnja; ak kann ina jah waurd is fasta.\n8:56 [CA] Abraham atta izwar sifaida ei gasehvi dag meinana, jah gasahv jah faginoda.\n8:57 [CA] \u00feanuh qe\u00feun \u00feai Iudaieis du imma: fimf tiguns jere nauh ni habais jah Abraham sahvt?\n8:58 [CA] qa\u00fe im Iesus: amen amen qi\u00fea izwis: faur\u00feizei Abraham waur\u00fei, im ik.\n8:59 [CA] \u00feanuh nemun stainans, ei waurpeina ana ina; i\u00fe Iesus \u00fean gafalh sik jah usiddja us alh uslei\u00feands \u00feairh midjans ins, jah hvarboda swa.\n9:1 [CA] Jah \u00feairhgaggands gaumida mann blindamma us gabaur\u00feai.\n9:2 [CA] \u00fearuh frehun ina siponjos is qi\u00feandans: rabbei, hvas frawaurhta, sau \u00feau fadrein is, ei blinds gabaurans war\u00fe?\n9:3 [CA] andhof Iesus: nih sa frawaurhta nih fadrein is, ak ei bairhta waur\u00feeina waurstwa gudis ana imma.\n9:4 [CA] ik skal waurkjan waurstwa \u00feis sandjandins mik, unte dags ist; qimi\u00fe nahts, \u00fea(n)ei ni manna mag waurkjan.\n9:5 [CA] \u00fean in \u00feamma fairhvau im, liuha\u00fe im \u00feis fairhvaus.\n9:6 [CA] \u00feata qi\u00feands gaspaiw dala\u00fe, jah gawaurhta fani us \u00feamma spaiskuldra, jah gasmait imma ana augona \u00feata fani \u00feamma blindin,\n9:7 [CA] jah qa\u00fe du imma: gagg \u00fewahan in swumsl Siloamis, \u00featei gaskeirjada insandi\u00fes. galai\u00fe jah af\u00fewoh jah qam saihvands.\n9:8 [CA] \u00feanuh garaznans jah \u00feai saihvandans ina faur\u00feis, \u00featei is bidagwa was, qe\u00feun: niu sa ist saei sat aihtronds?\n9:9 [CA] sumaih qe\u00feun: \u00featei sa ist; sumaih \u00featei galeiks \u00feamma ist; i\u00fe is qa\u00fe: \u00featei ik im.\n9:10 [CA] \u00feanuh qe\u00feun du imma: hvaiwa usluknodedun \u00feus \u00feo augona?\n9:11 [CA] andhof jains jah qa\u00fe: manna haitans Iesus fani gawaurhta jah bismait mis augona jah qa\u00fe mis: gagg af\u00fewahan in \u00feata swumfsl Siloamis; i\u00fe ik galai\u00fe jah bi\u00fewahands ussahv.\n9:12 [CA] qe\u00feun \u00fean du imma: hvar ist sa? i\u00fe is qa\u00fe: ni wait.\n9:13 [CA] gatiuhand ina du Fareisaium, \u00feana saei was blinds.\n9:14 [CA] wasuh \u00fean sabbato, \u00fean \u00feata fani gawaurhta Iesus jah uslauk imma augona.\n9:15 [CA] aftra \u00fean frehun ina jah \u00feai Fareisaieis hvaiwa ussahv; i\u00fe is qa\u00fe jah \u00feaim: fani galagida mis ana augona jah af\u00fewoh, jah saihva.\n9:16 [CA] qe\u00feun \u00fean sumai \u00feize Fareisaie: sa manna nist fram guda, \u00feande sabbate daga ni witai\u00fe. sumaih qe\u00feun: hvaiwa mag manna frawaurhts swaleikos taiknins taujan? jah missaqiss war\u00fe mi\u00fe im.\n9:17 [CA] qe\u00feunuh du \u00feamma faur\u00feis blindin aftra: \u00feu hva qi\u00feis bi \u00feana ei uslauk \u00feus augona? i\u00fe is qa\u00feuh: \u00featei praufetus ist.\n9:18 [CA] ni galaubidedun \u00fean Iudaieis bi ina \u00featei is blinds wesi jah ussehvi, unte atwopidedun \u00feans fadrein is, \u00feis ussaihvandins.\n9:19 [CA] jah frehun ins qi\u00feandans: sau ist sa sunus izwar \u00feanei jus qi\u00fei\u00fe \u00featei blinds gabaurans waur\u00fei? hvaiwa nu saihvi\u00fe?\n9:20 [CA] andhofun \u00fean im \u00feai fadrein is jah qe\u00feun: witum \u00featei sa ist sunus unsar, jah \u00featei blinds gabaurans war\u00fe;\n9:21 [CA] i\u00fe hvaiwa nu saihvi\u00fe ni witum, ai\u00fe\u00feau hvas uslauk imma \u00feo augona weis ni witum; silba uswahsans ist, ina fraihni\u00fe, silba bi sik rodjai.\n9:22 [CA] \u00feata qe\u00feun \u00feai fadrein is, unte ohtedun sis Iudaiuns; ju\u00fean auk gaqe\u00feun sis Iudaieis, ei, jabai hvas ina andhaihaiti Xristu, utana swnagogais wair\u00feai.\n9:23 [CA] duh\u00fee \u00feai berusjos is qe\u00feun \u00featei uswahsans ist, silban fraihni\u00fe.\n9:24 [CA] atwopidedun \u00fean an\u00fearamma sin\u00fea \u00feana mannan saei was blinds, jah qe\u00feun du imma: gif hauhein guda! weis witum \u00featei sa manna frawaurhts ist.\n9:25 [CA] \u00feanuh andhof jains: jabai frawaurhts ist, ik ni wait; \u00feat~ain wait ei blinds was, i\u00fe nu saihva.\n9:26 [CA] \u00feanuh qe\u00feun aftra: hva gatawida \u00feus? hvaiwa uslauk \u00feus augona?\n9:27 [CA] andhof im: qa\u00fe izwis ju jah ni hausidedu\u00fe; hva aftra wilei\u00fe hausjan? ibai jah jus wilei\u00fe \u00feamma siponjos wair\u00fean?\n9:28 [CA] \u00feanuh lailoun imma jah qe\u00feun: \u00feu is siponeis \u00feamma, i\u00fe weis Mose siponjos sijum.\n9:29 [CA] weis witum \u00featei du Mose rodida gu\u00fe, i\u00fe \u00feana ni kunnum, hva\u00fero ist.\n9:30 [CA] andhof sa manna jah qa\u00fe du im: auk in \u00feamma sildaleik ist, \u00featei jus ni witu\u00fe hva\u00fero ist, jah uslauk mis augona.\n9:31 [CA] witumuh \u00fean \u00featei gu\u00fe frawaurhtaim ni andhausei\u00fe, ak jabai hvas gudblostreis ist jah wiljan is tauji\u00fe, \u00feamma hausei\u00fe.\n9:32 [CA] fram aiwa ni gahausi\u00fe was \u00featei usluki\u00fe hvas augona blindamma gabauranamma.\n9:33 [CA] nih wesi sa fram guda, ni mahtedi taujan ni waiht.\n9:34 [CA] andhofun jah qe\u00feun du imma: in frawaurhtim \u00feu gabaurans warst alls jah \u00feu laiseis unsis? jah uswaurpun imma ut.\n9:35 [CA] hausida Iesus \u00featei uswaurpun imma ut, jah bigat ina qa\u00feuh du imma: \u00feu ga~u~laubeis du sunau gudis?\n9:36 [CA] andhof jains jah qa\u00fe: an hvas ist, frauja, ei galaubjau du imma?\n9:37 [CA] qa\u00fe \u00fean imma Iesus: jah gasahvt ina jah saei rodei\u00fe mi\u00fe \u00feus, sa ist.\n9:38 [CA] i\u00fe is qa\u00feuh: galaubja, frauja; jah inwait ina.\n9:39 [CA] jah qa\u00fe Iesus: du stauai ik in \u00feamma fairhvau qam, ei \u00feai unsaihvandans saihvaina jah \u00feai saihvandans blindai wair\u00feaina.\n9:40 [CA] jah hausidedun \u00feize Fareisaie sumai \u00feata, \u00feai wisandans mi\u00fe imma, jah qe\u00feun du imma: ibai jah weis blindai sijum?\n9:41 [CA] qa\u00fe im Iesus: i\u00fe blindai wesei\u00fe, ni \u00feau habaidedei\u00fe frawaurhtais; i\u00fe nu qi\u00fei\u00fe \u00featei gasaihvam; ei\u00fean frawaurhts izwara \u00feairhwisi\u00fe.\n10:1 [CA] Amen amen qi\u00fea izwis, saei inn ni atgaggi\u00fe \u00feairh daur in gardan lambe, ak steigi\u00fe alja\u00fero, sah hliftus ist jah waidedja.\n10:2 [CA] i\u00fe sa inngaggands \u00feairh daur hairdeis ist lambe.\n10:3 [CA] \u00feammuh daurawards usluki\u00fe, jah \u00feo lamba stibnai is hausjand, jah \u00feo swesona lamba haiti\u00fe bi namin jah ustiuhi\u00fe \u00feo.\n10:4 [CA] jah \u00fean \u00feo swesona ustiuhi\u00fe, faura im gaggi\u00fe, jah \u00feo lamba ina laistjand, unte kunnun stibna is.\n10:5 [CA] i\u00fe frama\u00fejana ni laistjand, ak \u00feliuhand faura imma, unte ni kunnun \u00feize frama\u00fejane stibna.\n10:6 [CA] \u00feo gajukon qa\u00fe im Iesus: i\u00fe jainai ni fro\u00feun hva was, \u00featei rodida du im.\n10:7 [CA] \u00feanuh qa\u00fe aftra du im Iesus: amen amen, qi\u00fea izwis \u00featei ik im daur \u00feize lambe.\n10:8 [CA] allai swa managai swe qemun, \u00feiubos sind jah waidedjans; akei ni hausidedun im \u00feo lamba.\n10:9 [CA] ik im \u00feata daur. \u00feairh mik jabai hvas inngaggi\u00fe, ganisi\u00fe, jah inngaggi\u00fe jah utgaggi\u00fe jah winja bigiti\u00fe.\n10:10 [CA] \u00feiubs ni qimi\u00fe, nibai ei stilai jah ufsnei\u00feai jah fraqistjai; i\u00fe ik qam, ei libain aigeina jah managizo aigeina.\n10:11 [CA] ik im hairdeis gods. hairdeis sa goda saiwala seina lagji\u00fe faur lamba.\n10:12 [CA] i\u00fe asneis jah saei nist hairdeis, \u00feizei ni sind lamba swesa, gasaihvi\u00fe wulf qimandan jah bilei\u00fei\u00fe \u00feaim lambam jah \u00feliuhi\u00fe, jah sa wulfs frawilwi\u00fe \u00feo jah distahji\u00fe \u00feo lamba.\n10:13 [CA] i\u00fe sa asneis af\u00feliuhi\u00fe, unte asneis ist jah ni kar~ist ina \u00feize lambe.\n10:14 [CA] ik im hairdeis sa goda jah kann meina jah kunnun mik \u00feo meina,\n10:15 [CA] swaswe kann mik atta jah ik kann attan, jah saiwala meina lagja faur \u00feo lamba.\n10:16 [CA] jah an\u00feara lamba aih \u00feoei ni sind \u00feis awistris, jah \u00feo skal briggan, jah stibnos meinaizos hausjand, jah wair\u00feand ain awe\u00fei, ains hairdeis.\n10:17 [CA] duh\u00fee atta mik frijo\u00fe, unte ik lagja saiwala meina, ei aftra nimau \u00feo.\n10:18 [CA] ni hvashun nimi\u00fe \u00feo af mis silbin; waldufni haba aflagjan \u00feo, jah waldufni haba aftra niman \u00feo. \u00feo anabusn nam at attin meinamma.\n10:19 [CA] \u00feanuh missaqiss aftra war\u00fe mi\u00fe Iudaium in \u00feize waurde.\n10:20 [CA] qe\u00feunuh managai ize: unhul\u00feon habai\u00fe jah dwalmo\u00fe; hva \u00feamma hausei\u00fe?\n10:21 [CA] sumaih qe\u00feun: \u00feo waurda ni sind unhul\u00feon habandins; ibai mag unhul\u00feo blindaim augona uslukan?\n10:22 [CA] war\u00fe \u00fean inniuji\u00fea in Iairusaulwmai, jah wintrus was.\n10:23 [CA] jah hvarboda Iesus in alh in ubizwai Saulaumonis.\n10:24 [CA] \u00feanuh birunnun ina Iudaieis jah qe\u00feun du imma: und hva saiwala unsara hahis? jabai \u00feu sijais Xristus, qi\u00fe unsis andaugiba.\n10:25 [CA] andhof Iesus: qa\u00fe izwis, jah ni galaubei\u00fe; waurstwa \u00feoei ik tauja in namin attins meinis, \u00feo weitwodjand bi mik;\n10:26 [CA] akei jus ni galaubei\u00fe, unte ni siju\u00fe lambe meinaize, swaswe qa\u00fe izwis.\n10:27 [CA] lamba meina stibnai meinai hausjand, jah ik kann \u00feo, jah laistjand mik.\n10:28 [CA] jah ik libain aiweinon giba im, jah ni fraqistnand aiw; jah ni frawilwi\u00fe hvashun \u00feo us handau meinai.\n10:29 [CA] atta meins \u00featei fragaf mis, maizo allaim ist, jah ni aiw ainshun mag frawilwan \u00feo us handau attins meinis.\n10:30 [CA] ik jah atta meins ain siju.\n10:31 [CA] nemun aftra stainans \u00feai Iudaieis, ei waurpeina ana ina.\n10:32 [CA] andhof im Iesus: managa goda waurstwa ataugida izwis us attin meinamma, in hvarjis \u00feize waurstwe stainei\u00fe mik?\n10:33 [CA] andhofun imma \u00feai Iudaieis: in godis waurstwis ni stainjam \u00feuk, ak in wajamereins, jah \u00featei \u00feu manna wisands taujis \u00feuk silban du guda.\n10:34 [CA] andhof im Iesus: niu ist gameli\u00fe in witoda izwaramma: ik qa\u00fe, guda siju\u00fe?\n10:35 [CA] jabai jainans qa\u00fe guda, du \u00feaimei waurd gudis war\u00fe, jah ni maht ist gatairan \u00feata gamelido;\n10:36 [CA] \u00feanei atta gaweihaida jah insandida in \u00feana fairhvu, jus qi\u00fei\u00fe \u00featei wajamerjau, unte qa\u00fe: sunus gudis im?\n10:37 [CA] niba taujau waurstwa attins meinis, ni galaubei\u00fe mis;\n10:38 [CA] i\u00fe jabai taujau, niba mis galaubjai\u00fe, \u00feaim waurstwam galaubjai\u00fe, ei ufkunnai\u00fe jah galaubjai\u00fe \u00featei in mis atta jah ik in imma.\n10:39 [CA] sokidedun ina aftra gafahan, jah usiddja us handum ize.\n10:40 [CA] jah galai\u00fe aftra ufar Iaurdanu in \u00feana stad \u00fearei was Iohannes frumist daupjands, jah salida jainar.\n10:41 [CA] jah managai qemun at imma jah qe\u00feun \u00featei Iohannes gatawida taikne ni ainohun; i\u00fe allata \u00featei qa\u00fe Iohannes bi \u00feana, sunja was.\n10:42 [CA] jah galaubidedun managai du imma jainar.\n11:1 [CA] Wasuh \u00fean sums siuks, Lazarus af Be\u00feanias, us haimai Marjins jah Mar\u00feins, swistrs izos.\n11:2 [CA] wasuh \u00fean Marja, soei salboda fraujan balsana jah biswarb fotuns is skufta seinamma, \u00feizozei bro\u00fear Lazarus siuks was.\n11:3 [CA] insandidedun \u00fean \u00feos swistrjus is du imma qi\u00feandeins: frauja, sai, \u00feanei frijos siuks ist.\n11:4 [CA] i\u00fe is gahausjands qa\u00fe: so siukei nist du dau\u00feau, ak in hauheinais gudis, ei hauhjaidau sunus gudis \u00feairh \u00feata.\n11:5 [CA] frijoduh \u00fean Iesus Mar\u00fean jah swistar izos jah Lazaru.\n11:6 [CA] swe hausida \u00featei siuks was, \u00feanuh \u00fean salida in \u00feammei was stada twans dagans.\n11:7 [CA] \u00fea\u00feroh \u00fean afar \u00feata qa\u00fe du siponjam: gaggam in Iudaian aftra.\n11:8 [CA] qe\u00feun du imma \u00feai siponjos: rabbei, nu sokidedun \u00feuk afwairpan stainam Iudaieis, jah aftra gaggis jaind?\n11:9 [CA] andhof Iesus: niu twalif sind hveilos dagis? jabai hvas gaggi\u00fe in dag, ni gastiggqi\u00fe, unte liuha\u00fe \u00feis fairhvaus gasaihvi\u00fe;\n11:10 [CA] a\u00fe\u00fean jabai hvas gaggi\u00fe in naht, gastiggqi\u00fe, unte liuhad nist in imma.\n11:11 [CA] \u00feo qa\u00fe jah afar \u00feata qi\u00fei\u00fe du im: Lazarus, frijonds unsar, gasaizlep; akei gaggam, ei uswakjau ina.\n11:12 [CA] \u00feanuh qe\u00feun \u00feai siponjos is: frauja, jabai slepi\u00fe, hails wair\u00fei\u00fe.\n11:13 [CA] qa\u00feuh \u00fean Iesus bi dau\u00feu is; i\u00fe jainai hugidedun \u00featei is bi slep qe\u00fei.\n11:14 [CA] \u00feanuh \u00fean qa\u00fe du im Iesus swikun\u00feaba: Lazarus gaswalt,\n11:15 [CA] jah fagino in izwara, ei galaubjai\u00fe, unte ni was jainar; akei gaggam du imma.\n11:16 [CA] \u00feanuh qa\u00fe \u00deomas saei haitada Didimus \u00feaim gahlaibam seinaim: gaggam jah weis, ei gaswiltaima mi\u00fe imma.\n11:17 [CA] qimands \u00fean Iesus bigat ina ju\u00fean fidwor dagans habandan in hlaiwa.\n11:18 [CA] wasuh \u00fean Be\u00feania nehva Iairusaulwmi[a]m, swaswe ana spaurdim fimftaihunim.\n11:19 [CA] jah managai Iudaie gaqemun bi Mar\u00fean jah Marjan, ei ga\u00ferafstidedeina ijos bi \u00feana bro\u00fear izo.\n11:20 [CA] i\u00fe Mar\u00fea, sunsei hausida \u00featei Iesus qimi\u00fe, wi\u00fera\u00efddja ina; i\u00fe Marja in garda sat.\n11:21 [CA] \u00feanuh qa\u00fe Mar\u00fea du Iesua: frauja, i\u00fe weseis her, ni \u00feau gadau\u00fenodedi bro\u00fear meins.\n11:22 [CA] akei jah nu wait, ei \u00feishvah \u00feei bidjis gu\u00fe, gibi\u00fe \u00feus gu\u00fe.\n11:23 [CA] qa\u00fe izai Iesus: usstandi\u00fe bro\u00fear \u00feeins.\n11:24 [CA] qa\u00fe du imma Mar\u00fea: wait \u00featei usstandi\u00fe in usstassai in \u00feamma spedistin daga.\n11:25 [CA] qa\u00fe \u00fean Iesus: ik im so usstass jah libains; saei galaubei\u00fe du mis, \u00feauh ga~ba~dau\u00feni\u00fe, libaid;\n11:26 [CA] jah hvazuh saei libai\u00fe jah galaubei\u00fe du mis, ni gadau\u00feni\u00fe aiw. galaubeis \u00feata?\n11:27 [CA] qa\u00fe imma: jai, frauja, ik galaubida \u00featei \u00feu is Xristus, sunus gudis, sa in \u00feana fairhvu qimanda.\n11:28 [CA] jah \u00feata qi\u00feandei galai\u00fe jah wopida Marjan, swistar seina, \u00feiubjo qi\u00feandei: laisareis qam jah haiti\u00fe \u00feuk.\n11:29 [CA] i\u00fe jaina, sunsei hausida, urrais sprauto jah iddja du imma.\n11:30 [CA] ni\u00fe~\u00fean nauh\u00feanuh qam Iesus in weihsa, ak was nauh\u00feanuh in \u00feamma stada \u00fearei gamotida imma Mar\u00fea.\n11:31 [CA] Iudaieis \u00fean \u00feai wisandans mi\u00fe izai in garda \u00ferafstjandans ija, gasaihvandans Marjan \u00featei sprauto ussto\u00fe jah usiddja, iddjedunuh afar izai qi\u00feandans \u00featei gaggi\u00fe du hlaiwa, ei greitai jainar.\n11:32 [CA] i\u00fe Marja, sunsei qam \u00fearei was Iesus, gasaihvandei ina draus imma du fotum qi\u00feandei du imma: frauja, i\u00fe weiseis her, ni \u00feauh gaswulti meins bro\u00fear.\n11:33 [CA] \u00feanuh Iesus, sunsei gasahv ija greitandein jah Iudaiuns \u00feaiei qemun mi\u00fe izai gretandans, inrauhtida ahmin jah inwagida sik silban.\n11:34 [CA] jah qa\u00fe: hvar lagidedu\u00fe ina? qe\u00feun du imma: frauja, hiri jah saihv.\n11:35 [CA] jah tagrida Iesus.\n11:36 [CA] \u00fearuh qe\u00feun \u00feai Iudaieis: sai, hvaiwa frioda ina.\n11:37 [CA] sumai \u00fean ize qe\u00feun: niu mahta sa izei uslauk augona \u00feamma blindin gataujan ei jah sa ni gadau\u00fenodedi?\n11:38 [CA] \u00feanuh Iesus aftra inrauhti\u00fes in sis silbin gaggi\u00fe du \u00feamma hlaiwa. wasuh \u00fean hulundi jah staina ufarlagida was ufaro.\n11:39 [CA] qa\u00fe Iesus: afnimi\u00fe \u00feana stain. qa\u00fe du imma swistar \u00feis dau\u00feins Mar\u00fea: frauja, ju fuls ist; fidurdogs auk ist.\n11:40 [CA] qa\u00fe izai Iesus: niu qa\u00fe \u00feus \u00featei jabai galaubeis, gasaihvis wul\u00feu gudis?\n11:41 [CA] ushofun \u00fean \u00feana stain \u00fearei was. i\u00fe Iesus uzuhhof augona iup jah qa\u00fe: atta, awiliudo \u00feus, unte andhausides mis;\n11:42 [CA] jah \u00fean ik wissa \u00featei sinteino mis andhauseis; akei in manageins \u00feizos bistandandeins qa\u00fe, ei galaubjaina \u00featei \u00feu mik insandides.\n11:43 [CA] jah \u00feata qi\u00feands stibnai mikilai hropida: Lazaru, hiri ut!\n11:44 [CA] jah urrann sa dau\u00fea gabundans handuns jah fotuns faskjam, jah wlits is auralja bibundans. qa\u00fe du im Iesus: andbindi\u00fe ina jah leti\u00fe gaggan.\n11:45 [CA] \u00feanuh managai \u00feize Judaiei \u00feai qimandans at Marjin jah saihvandans \u00featei gatawida, galaubidedun imma.\n11:46 [CA] sumai\u00fe~\u00fean ize gali\u00feun du Fareisaium jah qe\u00feun du im \u00featei gatawida Iesus.\n11:47 [CA] galesun \u00fean \u00feai auhumistans gudjans jah \u00feai Farei(saieis) . . . .\n12:1 [CA] . . . . in Be\u00feanijin, \u00fearei was Lazarus sa dau\u00fea, \u00feanei urraisida us dau\u00feaim Iesus.\n12:2 [CA] \u00fearuh gawaurhtedun imma nahtamat jainar, jah Mar\u00fea andbahtida; i\u00fe Lazarus was sums \u00feize anakumbjandane mi\u00fe imma.\n12:3 [CA] i\u00fe Marja nam pund balsanis nardaus pistikeinis filugalaubis jah gasalboda fotuns Iesua jah biswarb fotuns is skufta seinamma; i\u00fe sa gards fulls war\u00fe daunais \u00feizos salbonais.\n12:4 [CA] qa\u00fe \u00fean ains \u00feize siponje is, Judas Seimonis sa Iskariotes, izei skaftida sik du galewjan ina:\n12:5 [CA] duhve \u00feata balsan ni frabauht was in \u00b7t\u00b7 skatte jah fradaili\u00fe wesi \u00fearbam?\n12:6 [CA] \u00featu\u00fe~\u00fean qa\u00fe, ni \u00feeei ina \u00feize \u00fearbane kara wesi, ak unte \u00feiubs was jah arka habaida jah \u00feata innwaurpano bar.\n12:7 [CA] qa\u00fe \u00fean Iesus: let ija; in dag gafilhis meinis fastaida \u00feata.\n12:8 [CA] i\u00fe \u00feans unledans sinteino habai\u00fe mi\u00fe izwis, i\u00fe mik ni sinteino habai\u00fe.\n12:9 [CA] fan\u00fe \u00fean manageins filu Iudaie \u00featei Iesus jainar ist, jah qemun, ni in Iesuis ainis, ak ei jah Lazaru sehveina, \u00feanei urraisida us dau\u00feaim.\n12:10 [CA] munaidedunu\u00fe~\u00fean auk \u00feai auhumistans gudjans, ei jah Lazarau usqemeina,\n12:11 [CA] unte managai in \u00feis garunnun Iudaiei jah galaubidedun Iesua.\n12:12 [CA] iftumin daga manageins filu sei qam at dul\u00feai, gahausjandans \u00featei qimi\u00fe Iesus in Iairausaulwmai,\n12:13 [CA] nemun astans peikabagme jah urrunnun wi\u00feragamotjan imma jah hropidedun: osanna, \u00feiu\u00feida sa qimanda in namin fraujins, \u00feiudans Israelis.\n12:14 [CA] bigat \u00fean Iesus asilu, gasat ana ina, swaswe ist gameli\u00fe:\n12:15 [CA] ni ogs \u00feus, dauhtar Sion, sai, \u00feiudans \u00feeins qimi\u00fe sitands ana fulin asilaus.\n12:16 [CA] \u00featu\u00fe~\u00fean ni kun\u00feedun siponjos is frumist; ak bi\u00fee gaswerai\u00fes was Iesus, \u00feanuh gamundedun \u00featei \u00feata was du \u00feamma gameli\u00fe, jah \u00feata gatawidedun imma.\n12:17 [CA] weitwodida \u00fean so managei, sei was mi\u00fe imma, \u00fean Lazaru wopida us hlaiwa jah urraisida ina us dau\u00feaim.\n12:18 [CA] du\u00fe\u00fee iddjedun gamotjan imma managei, unte hausidedun ei gatawidedi \u00feo taikn.\n12:19 [CA] \u00feanuh \u00feai Fareisaieis qe\u00feun du sis misso: saihvi\u00fe \u00featei ni botei\u00fe waiht; sai, so manaseds afar imma galai\u00fe.\n12:20 [CA] wesunu\u00fe~\u00fean sumai \u00feiudo \u00feize urrinnandane, ei inwiteina in \u00feizai dul\u00feai.\n12:21 [CA] \u00feai atiddjedun du Filippau, \u00feamma fram Be\u00fesaeida Galeilaie, jah bedun ina qi\u00feandans: frauja, wileima Iesu gasaihvan.\n12:22 [CA] gaggi\u00fe Filippus jah qi\u00fei\u00fe du Andraiin, jah aftra Andraias jah Filippus qe\u00feun du Iesua.\n12:23 [CA] i\u00fe Iesus andhof im qi\u00feands: qam hveila ei sweraidau sunus mans.\n12:24 [CA] amen amen qi\u00fea izwis: nibai kaurno hvaiteis gadriusando in air\u00fea gaswilti\u00fe, silbo ainata aflifni\u00fe: i\u00fe jabai gaswilti\u00fe, manag akran bairi\u00fe.\n12:25 [CA] saei frijo\u00fe saiwala seina, fraqistei\u00fe izai, jah saei fiai\u00fe saiwala seina in \u00feamma fairhvau, in libainai aiweinon bairgi\u00fe izai.\n12:26 [CA] jabai mis hvas andbahtjai, mik laistjai: jah \u00fearei im ik, \u00fearuh sa andbahts meins wisan habai\u00fe; jah jabai hvas mis andbahti\u00fe, swerai\u00fe ina atta.\n12:27 [CA] nu saiwala meina gadrobnoda, jah hva qi\u00feau? atta, nasei mik us \u00feizai hveilai. akei du\u00fe\u00fee qam in \u00feizai hveilai.\n12:28 [CA] atta, hauhei namo \u00feeinata! qam \u00fean stibna us himina: jah hauhida jah aftra hauhja.\n12:29 [CA] managei \u00fean sei sto\u00fe gahausjandei, qe\u00feun \u00feeihvon wair\u00fean; sumaih qe\u00feun: aggilus du imma rodida.\n12:30 [CA] andhof Iesus jah qa\u00fe: ni in meina so stibna war\u00fe, ak in izwara.\n12:31 [CA] nu staua ist \u00feizai manasedai, nu sa reiks \u00feis fairhvaus uswairpada ut.\n12:32 [CA] jah ik jabai ushauhjada af air\u00feai, alla at\u00feinsa du mis.\n12:33 [CA] \u00featu\u00fe~\u00fean qa\u00fe bandwjands hvileikamma dau\u00feau skulda gadau\u00fenan.\n12:34 [CA] andhof imma so managei: weis hausidedum ana witoda \u00featei Xristus sijai du aiwa; jah hvaiwa \u00feu qi\u00feis \u00featei skulds ist ushauhjan sa sunus mans? hvas ist sa sunus mans?\n12:35 [CA] qa\u00fe \u00fean du im Iesus: nauh leitil mel liuha\u00fe in izwis ist. gaggi\u00fe \u00feande liuha\u00fe habai\u00fe, ei riqiz izwis ni gafahai; jah saei gaggi\u00fe in riqiza, ni wait hva\u00fe gaggi\u00fe.\n12:36 [CA] \u00feande liuha\u00fe habai\u00fe, galaubei\u00fe du liuhada, ei sunjus liuhadis wair\u00feai\u00fe. \u00feata rodida Iesus, jah galai\u00fe jah gafalh sik faura im.\n12:37 [CA] swa filu imma taikne gataujandin in andwair\u00feja ize, ni galaubidedun imma,\n12:38 [CA] ei \u00feata waurd Esaeiins praufetaus usfullnodedi \u00featei qa\u00fe: frauja, hvas galaubida hauseinai unsarai? jah arms fraujins hvamma andhuli\u00fes war\u00fe?\n12:39 [CA] du\u00fe\u00fee ni mahtedun galaubjan; unte aftra qa\u00fe Esaeias:\n12:40 [CA] gablindida ize augona jah gadaubida ize hairtona, ei ni gaumidedeina augam jah fro\u00feeina hairtin jah gawandidedeina jah ganasidedjau ins.\n12:41 [CA] \u00feata qa\u00fe Esaeias, \u00fean sahv wul\u00feu is jah rodida bi ina.\n12:42 [CA] \u00feanuh \u00fean swe\u00feauh jah us \u00feaim reikam managai galaubidedun du imma, akei faura Fareisaium ni andhaihaitun, ei us swnagogei ni uswaurpanai waur\u00feeina.\n12:43 [CA] frijodedun auk mais hauhein manniska \u00feau hauhein gudis.\n12:44 [CA] i\u00fe Iesus hropida jah qa\u00fe: saei galaubei\u00fe du mis ni galaubei\u00fe du mis, ak du \u00feamma sandjandin mik.\n12:45 [CA] jah saei saihvi\u00fe mik, saihvi\u00fe \u00feana sandjandan mik.\n12:46 [CA] ik liuhad in \u00feamma fairhvau qam, ei hvazuh saei galaubjai du mis, in riqiza ni wisai.\n12:47 [CA] jah jabai hvas meinaim hausjai waurdam jah galaubjai, ik ni stoja ina; nih \u00fean qam ei stojau manased, ak ei ganasjau manased.\n12:48 [CA] saei frakann mis jah ni andnimi\u00fe waurda meina, habaid \u00feana stojandan sik. waurd \u00featei rodida, \u00feata stoji\u00fe ina in spedistin daga.\n12:49 [CA] unte ik us mis silbin ni rodida, ak saei sandida mik atta, sah mis anabusn at(gaf) . . . .\n13:11 [CA] . . . . qa\u00fe: ni allai hrainjai siju\u00fe.\n13:12 [CA] Bi\u00feeh \u00fean us\u00fewoh fotuns ize jah nam wastjos seinos, anakumbjands aftra qa\u00fe du im: witudu hva gatawida izwis?\n13:13 [CA] jus wopeid mik: laisareis jah frauja. waila qi\u00fei\u00fe, im auk.\n13:14 [CA] jabai nu us\u00fewoh izwis fotuns, frauja jah laisareis, jah jus skulu\u00fe izwis misso \u00fewahan fotuns.\n13:15 [CA] du frisahtai auk atgaf izwis, ei swaswe ik gatawida izwis, swa jus taujai\u00fe.\n13:16 [CA] amen amen qi\u00fea izwis: nist skalks maiza fraujin seinamma, nih apaustaulus maiza \u00feamma sandjandin sik.\n13:17 [CA] \u00feande \u00feata witu\u00fe, audagai siju\u00fe, jabai tauji\u00fe \u00feata.\n13:18 [CA] ni bi allans izwis qi\u00fea. ik wait hvarjans gawalida; ak ei usfulli\u00fe waur\u00fei \u00feata gamelido: saei matida mi\u00fe mis hlaib, ushof ana mik fairzna seina.\n13:19 [CA] fram himma qi\u00fea izwis, faur\u00feizei waur\u00fei, ei bi\u00fee wair\u00feai, galaubjai\u00fe \u00featei ik im.\n13:20 [CA] amen amen qi\u00fea izwis: saei andnimi\u00fe \u00feana \u00feanei ik insandja, mik andnimi\u00fe; i\u00fe saei mik andnimi\u00fe, andnimi\u00fe \u00feana sandjandan mik.\n13:21 [CA] \u00feata qi\u00feands Iesus indrobnoda ahmin jah weitwodida jah qa\u00fe: amen amen, qi\u00fea izwis \u00featei ains izwara galewei\u00fe mik.\n13:22 [CA] \u00feanuh sehvun du sis misso \u00feai siponjos, \u00feagkjandans bi hvarjana qe\u00fei.\n13:23 [CA] wasuh \u00fean anakumbjands ains \u00feize siponje is in barma Iesuis, \u00feanei frijoda Iesus.\n13:24 [CA] bandwiduh \u00fean \u00feamma Seimon Paitrus du fraihnan hvas wesi, bi \u00feanei qa\u00fe.\n13:25 [CA] anakumbida \u00fean jains swa ana barma Iesuis qa\u00feuh imma: frauja, hvas ist?\n13:26 [CA] andhof Iesus: sa ist \u00feammei ik ufdaupjands \u00feana hlaif giba. jah ufdaupjands \u00feana hlaif gaf Iudin Seimonis, Skariotau.\n13:27 [CA] jah afar \u00feamma hlaiba \u00fean galai\u00fe in jainana Satana. qa\u00fe \u00fean du imma Iesus: \u00featei taujis, tawei sprauto.\n13:28 [CA] \u00featuh \u00fean ainshun ni wissa \u00feize anakumbjandane, duhve qa\u00fe imma.\n13:29 [CA] sumai mundedun, ei unte arka habaida Iudas, \u00featei qe\u00fei imma Iesus: bugei \u00feizei \u00feaurbeima du dul\u00feai, ai\u00fe\u00feau \u00feaim unledam ei hva gibau.\n13:30 [CA] bi\u00fee andnam \u00feana hlaib jains, suns galai\u00fe ut. wasuh \u00fean nahts, \u00fean galai\u00fe ut.\n13:31 [CA] qa\u00fe \u00fean Iesus: nu gasweraids war\u00fe sunus mans, jah gu\u00fe hauhi\u00fes ist in imma.\n13:32 [CA] jabai nu gu\u00fe hauhi\u00fes ist in imma, jah gu\u00fe hauhei\u00fe ina in sis jah suns hauhida ina.\n13:33 [CA] barnilona, nauh leitil mel mi\u00fe izwis im. sokei\u00fe mik, jah swaswe qa\u00fe du Iudaium, ei \u00feadei ik gagga, jus ni magu\u00fe qiman, jah izwis qi\u00fea nu.\n13:34 [CA] anabusn niuja giba izwis, ei frijo\u00fe izwis misso swe ik frijoda izwis, \u00feei jah jus frijo\u00fe misso izwis.\n13:35 [CA] bi \u00feamma ufkunnand allai, \u00feei meinai siponjos siju\u00fe, jabai fria\u00fewa habaid mi\u00fe izwis misso.\n13:36 [CA] \u00feanuh qa\u00fe du imma Seimon Paitrus: frauja, hvad gaggis? andhafjands Iesus qa\u00fe: \u00feadei ik gagga, ni magt mik nu laistjan; i\u00fe bi\u00fee laisteis.\n13:37 [CA] \u00fearuh Paitrus qa\u00fe du imma: frauja, duhve ni mag \u00feuk laistjan nu? saiwala meina faur \u00feuk lagja.\n13:38 [CA] andhof Iesus: saiwala \u00feeina faur mik lagjis? amen amen qi\u00fea \u00feus, \u00feei hana ni hrukei\u00fe, unte \u00feu mik afaikis kunnan \u00ferim sin\u00feam.\n14:1 [CA] Ni indrobnai izwar hairto; galaubei\u00fe du guda jah du mis galaubei\u00fe.\n14:2 [CA] in garda attins meinis sali\u00fewos managos sind; a\u00fe\u00fean niba weseina, ai\u00fe\u00feau qe\u00fejau du izwis: gagga manwjan stad izwis.\n14:3 [CA] jah \u00fean jabai gagga, manwja izwis stad, aftra qima jah franima izwis du mis silbin, ei \u00fearei im ik, \u00fearuh siju\u00fe jah jus.\n14:4 [CA] jah \u00feadei ik gagga kunnu\u00fe jah \u00feana wig kunnu\u00fe.\n14:5 [CA] \u00fearuh qa\u00fe imma \u00deomas: frauja, ni witum hva\u00fe gaggis, jah hvaiwa magum \u00feana wig kunnan?\n14:6 [CA] qa\u00fe imma Iesus: ik im sa wigs jah sunja jah libains. ainshun ni qimi\u00fe at attin, niba \u00feairh mik.\n14:7 [CA] i\u00fe kun\u00feedei\u00fe mik, ai\u00fe\u00feau kun\u00feedei\u00fe jah attan meinana; jah \u00fean fram himma kunnu\u00fe ina jah gasaihvi\u00fe ina.\n14:8 [CA] i\u00fe Filippus qa\u00feuh du imma: frauja, augei unsis \u00feana attan; \u00featuh ganah unsis.\n14:9 [CA] \u00fearuh qa\u00fe imma Iesus: swalaud melis mi\u00fe izwis was, jah ni ufkun\u00fees mik, Filippu? saei gasahv mik, gasahv attan, jah hvaiwa \u00feu qi\u00feis: augei unsis \u00feana attan?\n14:10 [CA] niu galaubeis \u00featei ik in attin jah atta in mis ist? \u00feo waurda \u00feoei ik rodja izwis, af mis silbin ni rodja, ak atta saei in mis ist, sa tauji\u00fe \u00feo waurstwa.\n14:11 [CA] Galaubei\u00fe mis \u00featei ik in attin jah atta in mis; i\u00fe jabai , in \u00feize waurstwe [ni] galaubei\u00fe mis.\n14:12 [CA] amen amen qi\u00fea izwis, saei galaubeid mis: \u00feo waurstwa \u00feoei ik tauja, jah is tauji\u00fe jah maizona \u00feaim tauji\u00fe; unte ik du attin gagga.\n14:13 [CA] jah \u00featei hva bidji\u00fe in namin meinamma, \u00feata tauja, ei hauhjaidau atta in sunau.\n14:14 [CA] jabai hvis bidji\u00fe mik in namin meinamma, ik tauja.\n14:15 [CA] jabai mik frijo\u00fe, anabusnins meinos fastaid.\n14:16 [CA] jah ik bidja attan, jah an\u00fearana parakletu gibi\u00fe izwis, ei sijai mi\u00fe izwis du aiwa,\n14:17 [CA] ahma sunjos, \u00feanei so manasei\u00fes ni mag niman, unte ni saihvi\u00fe ina, nih kann ina; i\u00fe jus kunnu\u00fe ina, unte is mi\u00fe izwis wisi\u00fe jah in izwis ist.\n14:18 [CA] ni leta izwis widuwairnans; qima at izwis.\n14:19 [CA] nauh leitil, jah so manasei\u00fes mik ni \u00feanasei\u00fes saihvi\u00fe; i\u00fe jus saihvi\u00fe mik, \u00featei ik liba, jah jus libai\u00fe.\n14:20 [CA] in jainamma daga ufkunnai\u00fe jus \u00featei ik in attin meinamma jah jus in mis jah ik in izwis.\n14:21 [CA] Saei habaid anabusnins meinos jah fastai\u00fe \u00feos, sa ist saei frijo\u00fe mik: jah \u00fean saei frijo\u00fe mik, frijoda fram attin meinamma, jah ik frijo ina jah gabairhtja imma mik silban.\n14:22 [CA] \u00fearuh qa\u00fe imma Iudas, ni sa Iskarjotes: frauja, hva war\u00fe, ei unsis munais gabairhtjan \u00feuk silban, i\u00fe \u00feizai manasedai ni?\n14:23 [CA] andhof Iesus jah qa\u00fe du imma: jabai hvas mik frijo\u00fe, [jah] waurd mein fastai\u00fe, jah atta meins frijo\u00fe ina, jah du imma galei\u00feos jah sali\u00fewos at imma gataujos.\n14:24 [CA] i\u00fe saei ni frio\u00fe mik, \u00feo waurda meina ni fastai\u00fe; jah \u00feata waurd \u00featei hausei\u00fe nist mein, ak \u00feis sandjandins mik attins.\n14:25 [CA] \u00feata rodida izwis at izwis wisands.\n14:26 [CA] a\u00fe\u00fean sa parakletus, ahma sa weiha, \u00feanei sandei\u00fe atta in namin meinamma, sa izwis laisei\u00fe allata jah gamaudei\u00fe izwis allis \u00featei qa\u00fe du izwis.\n14:27 [CA] gawair\u00fei bilei\u00fea izwis, gawair\u00fei mein giba izwis; ni swaswe so manase\u00fes gibi\u00fe, ik giba izwis. ni indrobnaina izwara hairtona nih faurhtjaina.\n14:28 [CA] Hausidedu\u00fe ei ik qa\u00fe izwis: galei\u00fea jah qima at izwis; jabai frijodedei\u00fe mik, ai\u00fe\u00feau jus faginodedei\u00fe ei ik gagga du attin: unte atta meins maiza mis ist.\n14:29 [CA] jah nu qa\u00fe izwis, faur\u00feizei waur\u00fei, ei bi\u00fee wair\u00feai, galaubjai\u00fe.\n14:30 [CA] \u00feanasei\u00fes filu ni ma\u00felja mi\u00fe izwis; qimi\u00fe saei \u00feizai manasedai reikino\u00fe, jah in mis ni bigiti\u00fe waiht.\n14:31 [CA] ak ei ufkunnai so manase\u00fes \u00featei ik frijoda attan meinana, jah swaswe anabaud mis atta, swa tauja. urreisi\u00fe, gaggam \u00fea\u00fero.\n15:1 [CA] Ik im weinatriu \u00feata sunjeino, jah atta meins waurstwja ist.\n15:2 [CA] all taine in mis unbairandane akran go\u00fe, usnimi\u00fe ita: jah all akran bairandane, gahrainei\u00fe ita, ei managizo akran bairaina.\n15:3 [CA] ju jus hrainjai siju\u00fe in \u00feis waurdis \u00featei rodida du izwis.\n15:4 [CA] wisai\u00fe in mis jah ik in izwis. swe sa weinatains ni mag akran bairan af sis silbin, niba ist ana weinatriwa, swah nih jus, niba in mis siju\u00fe.\n15:5 [CA] ik im \u00feata weinatriu, i\u00fe jus weinatainos; saei wisi\u00fe in mis jah ik in imma, swa bairi\u00fe akran manag, \u00featei inuh mik ni magu\u00fe taujan ni waiht.\n15:6 [CA] niba saei wisi\u00fe in mis, uswairpada ut swe weinatains, jah ga\u00feaursni\u00fe jah galisada, jah in fon galagjand jah inbrannjada.\n15:7 [CA] a\u00fe\u00fean jabai siju\u00fe in mis, jah waurda meina in izwis sind, \u00featahvah \u00feei wilei\u00fe bidji\u00fe, jah wair\u00fei\u00fe izwis.\n15:8 [CA] in \u00feamma hauhi\u00fes ist atta meins, ei akran manag bairai\u00fe jah wair\u00feai\u00fe meinai siponjos.\n15:9 [CA] swaswe frijoda mik atta, swah ik frijoda izwis; wisai\u00fe in fria\u00fewai meinai.\n15:10 [CA] jabai anabusnins meinos fastaid, siju\u00fe in fria\u00fewai meinai, swaswe ik anabusnins attins meinis fastaida, jah wisa in fria\u00fewai is.\n15:11 [CA] \u00feata rodida izwis, ei fahe\u00fes meina in izwis sijai, jah faheds izwara usfulljaidau.\n15:12 [CA] \u00feata ist anabusns meina, ei frijo\u00fe izwis misso, swaswe ik frijoda izwis.\n15:13 [CA] maizein \u00feizai fria\u00fewa[i] manna ni habai\u00fe, ei hvas saiwala seina lagji\u00fe faur frijonds seinans.\n15:14 [CA] jus frijonds meinai siju\u00fe, jabai tauji\u00fe \u00featei ik anabiuda izwis.\n15:15 [CA] \u00feanasei\u00fes izwis ni qi\u00fea skalkans; unte skalks ni wait hva tauji\u00fe is frauja, i\u00fe ik izwis qa\u00fe frijonds, unte all \u00featei hausida at attin meinamma, gakannida izwis.\n15:16 [CA] ni jus mik gawalidedu\u00fe, ak ik gawalida izwis ei jus sniwai\u00fe jah akran bairai\u00fe, jah akran izwar du aiwa sijai, ei \u00featahvah \u00feei bidjai\u00fe attan in namin meinamma, gibi\u00fe izwis.\n15:17 [CA] \u00feata anabiuda izwis ei frijo\u00fe izwis misso.\n15:18 [CA] jabai so manaseds izwis fijai, kunnei\u00fe ei mik fruman izwis fijaida.\n15:19 [CA] jabai \u00feis fairhvaus wesei\u00fe, ai\u00fe\u00feau so manaseds swesans frijodedi; a\u00fe\u00fean unte us \u00feamma fairhvau ni siju\u00fe, ak ik gawalida izwis us \u00feamma fairhvau, du\u00fe\u00fee fijaid izwis so manase\u00fes.\n15:20 [CA] gamunei\u00fe \u00feis waurdis \u00featei ik qa\u00fe du izwis: nist skalks maiza fraujin seinamma. jabai mik wrekun, jah izwis wrikand; jabai mein waurd fastaidedeina, jah izwar fastaina.\n15:21 [CA] ak \u00feata allata taujand izwis in namins meinis, unte ni kunnun \u00feana sandjandan mik.\n15:22 [CA] nih qemjau jah rodidedjau du im, frawaurht ni habaidedeina: i\u00fe nu inilons ni haband bi frawaurht seina.\n15:23 [CA] saei mik fijai\u00fe, jah attan meinana fijai\u00fe.\n15:24 [CA] i\u00fe \u00feo waurstwa ni gatawidedjau in im \u00feoei an\u00fear ainshun ni gatawida, frawaurht ni habaidedeina; i\u00fe nu jah gasehvun mik jah fijaidedun jah mik jah attan meinana.\n15:25 [CA] ak ei usfullnodedi waurd \u00feata gamelido in witoda ize: ei fijaidedun mik arwjo.\n15:26 [CA] a\u00fe\u00fean \u00fean qimi\u00fe parakletus \u00feanei ik insandja izwis fram attin, ahman sunjos izei fram attin urrinni\u00fe, sa weitwodei\u00fe bi mik.\n15:27 [CA] jah \u00fean jus weitwodei\u00fe, unte fram fruma mi\u00fe mis siju\u00fe.\n16:1 [CA] \u00deata rodida izwis, ei ni afmarzjaindau.\n16:2 [CA] us gaqum\u00feim dreiband izwis; akei qimi\u00fe hveila, ei sahvazuh izei usqimi\u00fe izwis, \u00feuggkei\u00fe hunsla saljan guda.\n16:3 [CA] jah \u00feata taujand, unte ni ufkun\u00feedun attan nih mik.\n16:4 [CA] akei \u00feata rodida izwis, ei bi\u00fee qimai so hveila ize, gamunei\u00fe \u00feize \u00featei ik qa\u00fe izwis. i\u00fe \u00feata izwis fram fruma ni qa\u00fe, unte mi\u00fe izwis was.\n16:5 [CA] I\u00fe nu gagga du \u00feamma sandjandin mik, jah ainshun us izwis ni fraihni\u00fe mik: hva\u00fe gaggis?\n16:6 [CA] akei unte \u00feata rodida izwis, gauri\u00fea gadaubida izwar hairto.\n16:7 [CA] akei ik sunja izwis qi\u00fea: batizo ist izwis ei ik galei\u00feau; unte jabai ik ni galei\u00fea, parakletus ni qimi\u00fe at izwis; a\u00fe\u00fean jabai gagga, sandja ina du izwis.\n16:8 [CA] jah qimands is gasaki\u00fe \u00feo manase\u00fe bi frawaurht jah bi garaihti\u00fea jah bi staua;\n16:9 [CA] bi frawaurht raihtis, [\u00feata] \u00featei ni galaubjand du mis;\n16:10 [CA] i\u00fe bi garaihti\u00fea, \u00featei du attin meinamma gagga, jah ni \u00feanasei\u00fes saihvi\u00fe mik;\n16:11 [CA] i\u00fe bi staua, \u00featei sa reiks \u00feis fairhvaus afdomi\u00fes war\u00fe.\n16:12 [CA] Nauh ganoh skal qi\u00fean izwis, akei ni magu\u00fe frabairan nu.\n16:13 [CA] i\u00fe \u00fean qimi\u00fe jains, ahma sunjos, briggi\u00fe izwis in allai sunjai; nih \u00fean rodei\u00fe af sis silbin ak swa filu swe hausei\u00fe rodei\u00fe, jah \u00feata anawair\u00feo gateihi\u00fe izwis.\n16:14 [CA] jains mik hauhei\u00fe, unte us meinamma nimi\u00fe jah gateihi\u00fe izwis.\n16:15 [CA] all \u00featei aih atta, mein ist; duh\u00fee qa\u00fe \u00featei us meinamma nimi\u00fe jah gateihi\u00fe izwis.\n16:16 [CA] Leitil nauh jah ni saihvi\u00fe mik; jah aftra leitil jah gasaihvi\u00fe mik, unte ik gagga du attin.\n16:17 [CA] \u00fearuh qe\u00feun us \u00feaim siponjam du sis misso: hva ist \u00feata \u00featei qi\u00fei\u00fe unsis: leitil ei ni saihvi\u00fe mik, jah aftra leitil jah gasaihvi\u00fe mik, jah \u00featei ik gagga du attin?\n16:18 [CA] qe\u00feunuh: \u00feata hva sijai \u00featei qi\u00fei\u00fe: leitil, ni witum hva qi\u00fei\u00fe.\n16:19 [CA] i\u00fe Iesus wissuh \u00featei wildedun ina fraihnan jah qa\u00fe im: bi \u00feata sokei\u00fe mi\u00fe izwis misso \u00featei qa\u00fe: leitil jah ni saihvi\u00fe mik, jah aftra leitil jah gasaihvi\u00fe mik.\n16:20 [CA] amen, amen, qi\u00fea izwis \u00feei greiti\u00fe jah gauno\u00fe jus, i\u00fe manase\u00fes fagino\u00fe; jus saurgandans wair\u00fei\u00fe, akei so saurga izwara du fahedai wair\u00fei\u00fe.\n16:21 [CA] qino, \u00fean bairi\u00fe, saurga habaid, unte qam hveila izos; i\u00fe bi\u00fee gabauran ist barn, ni \u00feanasei\u00fes ni gaman \u00feizos aglons faura fahedai, unte gabaurans war\u00fe manna in fairhvau.\n16:22 [CA] jah \u00fean jus auk nu saurga habai\u00fe, i\u00fe aftra saihva izwis jah fagino\u00fe izwar hairto, jah \u00feo fahed izwara ni ainshun nimi\u00fe af izwis.\n16:23 [CA] jah in jainamma daga mik ni fraihni\u00fe waihtais. amen amen, qi\u00fea izwis \u00featei \u00feishvah \u00feei bidji\u00fe attan in namin meinamma, gibi\u00fe izwis.\n16:24 [CA] und hita ni bedu\u00fe ni waihtais in namin meinamma; bidjai\u00fe jah nimi\u00fe, ei fahe\u00fes izwara sijai usfullida.\n16:25 [CA] \u00feata in gajukom rodida izwis; akei qimi\u00fe hveila, \u00feanuh izwis ni \u00feanasei\u00fes in gajukom rodja, ak andaugiba bi attan gateiha izwis.\n16:26 [CA] in jainamma daga in namin meinamma bidji\u00fe, jah ni qi\u00fea izwis \u00feei ik bidjau attan bi izwis;\n16:27 [CA] ak silba atta frijo\u00fe izwis, unte jus mik frijodedu\u00fe jah galaubidedu\u00fe \u00featei ik fram guda urrann.\n16:28 [CA] uzuhiddja fram attin jah atiddja in \u00feana fairhvu; aftra bilei\u00fea \u00feamma fairhvau jah gagga du attin.\n16:29 [CA] \u00fearuh qe\u00feun \u00feai siponjos is: sai, nu andaugiba rodeis jah gajukono ni ainohun qi\u00feis.\n16:30 [CA] nu witum ei \u00feu kant alla, jah ni \u00fearft ei \u00feuk hvas fraihnai; bi \u00feamma galaubjam \u00featei \u00feu fram guda urrant.\n16:31 [CA] andhof im Iesus: nu galaubei\u00fe?\n16:32 [CA] sai, qimi\u00fe hveila jah nu qam, ei distahjada hvarjizuh du seinaim, jah mik ainana bilei\u00fei\u00fe; jah ni im ains, unte atta mi\u00fe mis ist.\n16:33 [CA] \u00feata rodida izwis, \u00feei in mis gawair\u00fei aigei\u00fe. in \u00feamma fairhvau aglons habaid; akei \u00ferafstei\u00fe izwis, ik gajiukaida \u00feana fairhvu.\n17:1 [CA] \u00deata rodida Iesus uzuhhof augona seina du himina jah qa\u00fe: atta, qam hveila, hauhei \u00feeinana sunu, ei sunus \u00feeins hauhjai \u00feuk;\n17:2 [CA] swaswe atgaft imma waldufni allaize leike, ei all \u00featei atgaft imma, gibai im libain aiweinon.\n17:3 [CA] soh \u00fean ist so aiweino libains, ei kunneina \u00feuk ainana sunjana gu\u00fe jah \u00feanei insandides, Iesu Xristu.\n17:4 [CA] ik \u00feuk hauhida ana air\u00feai; waurstw ustauh \u00featei atgaft mis du waurkjan.\n17:5 [CA] jah nu hauhei mik, \u00feu atta, at \u00feus silbin \u00feamma wul\u00feau, \u00feanei habaida at \u00feus, faur\u00feizei sa fairhvus wesi.\n17:6 [CA] gabairhtida \u00feeinata namo mannam \u00feanzei atgaft mis us \u00feamma fairhvau. \u00feeinai wesun jah mis atgaft ins, jah \u00feata waurd \u00feeinata gafastaidedun.\n17:7 [CA] nu ufkun\u00fea ei alla \u00feoei atgaft mis, at \u00feus sind;\n17:8 [CA] unte \u00feo waurda \u00feoei atgaft mis, atgaf im, jah eis nemun bi sunjai \u00featei fram \u00feus urrann, jah galaubidedun \u00featei \u00feu mik insandides.\n17:9 [CA] ik bi ins bidja; ni bi \u00feo manase\u00fe bidja, ak bi \u00feans \u00feanzei atgaft mis, unte \u00feeinai sind.\n17:10 [CA] jah meina alla \u00feeina sind jah \u00feeina meina, jah hauhi\u00fes im in \u00feaim.\n17:11 [CA] ni \u00feanasei\u00fes im in \u00feamma fairhvau; i\u00fe \u00feai in \u00feamma fairhvau sind, jah ik du \u00feus gagga. atta weiha, fastai ins in namin \u00feeinamma, \u00feanzei atgaft mis, ei sijaina ain swaswe wit.\n17:12 [CA] \u00fean was mi\u00fe im in \u00feamma fairhvau, ik fastaida ins in namin \u00feeinamma. \u00feanzei atgaft mis gafastaida, jah ainshun us im ni fraqistnoda, niba sa sunus fralustais, ei \u00feata gamelido usfulli\u00fe waur\u00fei.\n17:13 [CA] i\u00fe nu du \u00feus gagga, jah \u00feata rodja in manasedai, ei habaina fahed meina usfullida in sis.\n17:14 [CA] ik atgaf im waurd \u00feeinata; jah so manase\u00fes fijaida ins, unte ni sind us \u00feamma fairhvau, swaswe ik us \u00feamma fairhvau ni im.\n17:15 [CA] ni bidja ei usnimais ins us \u00feamma fairhvau, ak ei bairgais im faura \u00feamma unseljin.\n17:16 [CA] us \u00feamma fairhvau ni sind, swaswe ik us \u00feamma fairhvau ni im.\n17:17 [CA] weihai ins in sunjai; waurd \u00feeinata sunja ist.\n17:18 [CA] swaswe mik insandides in manase\u00fe, swah ik insandida ins in \u00feo manased.\n17:19 [CA] jah fram im ik weiha mik silban, ei sijaina jah eis weihai in sunjai.\n17:20 [CA] a\u00fe\u00fean ni bi \u00feans bidja ainans, ak bi \u00feans galaubjandans \u00feairh waurda ize du mis,\n17:21 [CA] ei allai ain sijaina, swaswe \u00feu, atta, in mis jah ik in \u00feus, ei jah \u00feai in uggkis ain sijaina, ei so manase\u00fes galaubjai \u00featei \u00feu mik insandides.\n17:22 [CA] jah ik wul\u00feu \u00feanei gaft mis, gaf im, ei sijaina ain, swaswe wit ain siju.\n17:23 [CA] ik in im jah \u00feu in mis, ei sijaina ustauhanai du ainamma, jah kunnei so manase\u00fes \u00featei \u00feu mik insandides jah frijodes ins, swaswe mik frijodes.\n17:24 [CA] atta, \u00featei atgaft mis, wiljau ei \u00fearei im ik, jah \u00feai sijaina mi\u00fe mis, ei saihvaina wul\u00feu meinana \u00feanei gaft mis, unte frijodes mik faur gaskaft fairhvaus.\n17:25 [CA] atta garaihta, jah so manase\u00fes \u00feuk ni ufkun\u00fea; i\u00fe ik \u00feuk kun\u00fea. jah \u00feai ufkun\u00feedun \u00featei \u00feu mik insandides.\n17:26 [CA] jah gakannida im namo \u00feeinata jah kannja, ei fria\u00fewa \u00feoei frijodes mik, in im sijai jah ik in im.\n18:1 [CA] \u00deata qi\u00feands Iesus usiddja mi\u00fe siponjam seinaim ufar rinnon \u00feo Kaidron, \u00fearei was aurtigards, in \u00feanei galai\u00fe Iesus jah siponjos is.\n18:2 [CA] wissuh \u00fean jah Iudas sa galewjands ina \u00feana stad, \u00featei ufta ga\u00efddja Iesus jainar mi\u00fe siponjam seinaim.\n18:3 [CA] i\u00fe Iudas nam hansa jah \u00feize gudjane jah Fareisaie andbahtans, iddjuh jaindwair\u00fes mi\u00fe skeimam jah haizam jah wepnam.\n18:4 [CA] i\u00fe Iesus witands alla \u00feoei qemun ana ina, usgaggands ut qa\u00fe im: hvana sokei\u00fe?\n18:5 [CA] andhafjandans imma qe\u00feun: Iesu, \u00feana Nazoraiu. \u00fearuh qa\u00fe im Iesus: ik im. sto\u00feuh \u00fean jah Iudas sa lewjands ina mi\u00fe im.\n18:6 [CA] \u00fearuh swe qa\u00fe im \u00featei ik im, gali\u00feun ibukai jah gadrusun dala\u00fe.\n18:7 [CA] \u00fea\u00feroh \u00fean ins aftra frah: hvana sokei\u00fe? i\u00fe eis qe\u00feun: Iesu, \u00feana Nazoraiu.\n18:8 [CA] andhof Iesus: qa\u00fe izwis \u00featei ik im; jabai nu mik sokei\u00fe, leti\u00fe \u00feans gaggan.\n18:9 [CA] ei usfullnodedi \u00feata waurd \u00featei qa\u00fe, ei \u00feanzei atgaft mis, ni fraqistida ize ainummehun.\n18:10 [CA] i\u00fe Seimon Paitrus habands hairu, uslauk ina jah sloh \u00feis auhumistins gudjins skalk jah afmaimait imma auso taihswo; sah \u00fean haitans was namin Malkus.\n18:11 [CA] \u00fearuh qa\u00fe Iesus du Paitrau: lagei \u00feana hairu in fodr. stikl \u00feanei gaf mis atta, niu drigkau \u00feana?\n18:12 [CA] \u00fearuh hansa jah sa \u00feusundifa\u00fes jah andbahtos Iudaie undgripun Iesu jah gabundun ina,\n18:13 [CA] jah gatauhun ina du Annin frumist; sa was auk swaihra Kajafin, saei was auhumists weiha \u00feis ata\u00fenjis.\n18:14 [CA] wasuh \u00fean Kajafa, saei garaginoda Iudaium \u00featei batizo ist ainana mannan fraqistjan faur managein.\n18:15 [CA] \u00fearuh laistida Iesu Seimon Paitrus jah an\u00fear siponeis. sah \u00fean siponeis was kun\u00fes \u00feamma gudjin jah mi\u00feinngalai\u00fe mi\u00fe Iesua in rohsn \u00feis gudjins.\n18:16 [CA] i\u00fe Paitrus sto\u00fe at daurom uta. \u00fearuh usiddja ut sa siponeis an\u00fear, saei was kun\u00fes \u00feamma gudjin, jah qa\u00fe daurawardai jah attauh inn Paitru.\n18:17 [CA] \u00fearuh qa\u00fe jaina \u00feiwi, so daurawardo, du Paitrau: ibai jah \u00feu \u00feize siponje is \u00feis mans? i\u00fe is qa\u00fe: ni im.\n18:18 [CA] \u00fearuh sto\u00feun skalkos jah andbahtos haurja waurkjandans, unte kald was, jah warmidedun sik; jah \u00fean was mi\u00fe im Paitrus standands jah warmjands sik.\n18:19 [CA] i\u00fe sa auhumista gudja frah Iesu bi siponjans is jah bi laisein is.\n18:20 [CA] andhof imma Iesus: ik andaugjo rodida manasedai; ik sinteino laisida in gaqum\u00feai jah in gudhusa, \u00fearei sinteino Iudaieis gaqimand, jah \u00feiubjo ni rodida waiht.\n18:21 [CA] hvis mik fraihnis? fraihn \u00feans hausjandans hva rodidedjau du im; sai, \u00feai witun \u00featei qa\u00fe ik.\n18:22 [CA] i\u00fe \u00feata qi\u00feandin imma, sums andbahte standands gaf slah lofin Iesua qa\u00feuh: swau andhafjis \u00feamma reikistin gudjin?\n18:23 [CA] andhof Iesus: jabai ubilaba rodida, weitwodei bi \u00feata ubil, ai\u00fe\u00feau jabai waila, duhve mik slahis?\n18:24 [CA] \u00feanuh insandida ina Annas gabundanana du Kajafin, \u00feamma maistin gudjin.\n18:25 [CA] i\u00fe Seimon Paitrus was standands jah warmjands sik. \u00fearuh qe\u00feun du imma: niu jah \u00feu \u00feize siponje \u00feis is? i\u00fe is afaiaik jah qa\u00fe: ne, ni im.\n18:26 [CA] qa\u00fe sums \u00feize skalke \u00feis maistins gudjins, sah ni\u00fejis was \u00feammei afmaimait Paitrus auso: niu \u00feuk sahv ik in aurtigarda mi\u00fe imma?\n18:27 [CA] \u00fearuh aftra afaiaik Paitrus, jah suns hana hrukida.\n18:28 [CA] i\u00fe eis tauhun Iesu fram Kajafin in praitoriaun. \u00feanuh was maurgins. i\u00fe eis ni iddjedun in praitoria, ei ni bisaulnodedeina, ak matidedeina pasxa.\n18:29 [CA] \u00fearuh atiddja ut Peilatus du im jah qa\u00fe: hvo wrohe bairi\u00fe ana \u00feana mannan?\n18:30 [CA] andhofun jah qe\u00feun du imma: nih wesi sa ubiltojis, ni \u00feau weis atgebeima \u00feus ina.\n18:31 [CA] \u00fearuh qa\u00fe im Peilatus: nimi\u00fe ina jus jah bi witoda izwaramma stoji\u00fe ina. i\u00fe eis qe\u00feunuh du imma Iudaieis: unsis ni skuld ist usqiman manne ainummehun.\n18:32 [CA] ei waurd fraujins usfullnodedi, \u00featei qa\u00fe, bandwjands hvileikamma dau\u00feau skulda gaswiltan.\n18:33 [CA] galai\u00fe in praitauria aftra Peilatus jah wopida Iesu qa\u00feuh imma: \u00feu is \u00feiudans Iudaie?\n18:34 [CA] andhof Iesus: abu \u00feus silbin \u00feu \u00feata qi\u00feis \u00feau an\u00fearai \u00feus qe\u00feun bi mik?\n18:35 [CA] andhof Peilatus: waitei ik Iudaius im? so \u00feiuda \u00feeina jah gudjans anafulhun \u00feuk mis; hva gatawides?\n18:36 [CA] andhof Iesus: \u00feiudangardi meina nist us \u00feamma fairhvau; i\u00fe us \u00feamma fairhvau wesi meina \u00feiudangardi, ai\u00fe\u00feau andbahtos meinai usdaudidedeina, ei ni galewi\u00fes wesjau Iudaium. i\u00fe nu \u00feiudangardi meina nist \u00fea\u00fero.\n18:37 [CA] \u00fearuh qa\u00fe imma Peilatus: an nuh \u00feiudans is \u00feu? andhafjands Iesus : \u00feu qi\u00feis ei \u00feiudans im ik. ik du \u00feamma gabaurans im jah du \u00feamma qam in \u00feamma fairhvau ei weitwodjau sunjai. hvazuh saei ist sunjos, hausei\u00fe stibnos meinaizos.\n18:38 [CA] \u00feanuh qa\u00fe imma Peilatus: hva ist so sunja! jah \u00feata qi\u00feands galai\u00fe ut du Iudaium jah qa\u00fe im: ik ainohun fairino ni bigita in \u00feamma.\n18:39 [CA] i\u00fe ist biuhti izwis ei ainana izwis fraletau in pasxa; wileidu nu ei fraletau izwis \u00feana \u00feiudan Iudaie?\n18:40 [CA] i\u00fe eis hropidedun aftra allai qi\u00feandans: ne \u00feana, ak Barabban; sah \u00fean was sa Barabba waidedja.\n19:1 [CA] \u00deanuh \u00fean nam Peilatus Iesu jah usblaggw.\n19:2 [CA] jah \u00feai gadrauhteis uswundun wipja us \u00feaurnum jah galagidedun imma ana haubid jah wastjai paurpurodai gawasidedun ina,\n19:3 [CA] jah qe\u00feun: hails \u00feiudans Iudaie! jah gebun imma slahins lofin.\n19:4 [CA] atiddja aftra ut Peilatus jah qa\u00fe im: sai, attiuha izwis ina ut, ei witei\u00fe \u00featei in imma ni ainohun fairino bigat.\n19:5 [CA] \u00fearuh usiddja ut Iesus bairands \u00feana \u00feaurneinan waip jah \u00feo paurpurodon wastja. jah qa\u00fe im: sa ist sa manna.\n19:6 [CA] \u00fearuh bi\u00fee sehvun ina \u00feai maistans gudjans jah andbahtos, hropidedun qi\u00feandans: ushramei, ushramei ina! qa\u00fe im Peilatus: nimi\u00fe ina jus jah hramji\u00fe. i\u00fe ik fairina in imma ni bigita.\n19:7 [CA] andhofun imma Iudaieis: weis wito\u00fe aihum, jah bi \u00feamma witoda unsaramma skal gaswiltan, unte sik silban gudis sunu gatawida.\n19:8 [CA] bi\u00fee gahausida Peilatus \u00feata waurd, mais ohta sis.\n19:9 [CA] jah galai\u00fe in praitauria aftra jah qa\u00fe du Iesua: hva\u00fero is \u00feu? i\u00fe Iesus andawaurdi ni gaf imma.\n19:10 [CA] \u00fearuh qa\u00fe imma Peilatus: du mis ni rodeis? niu waist \u00featei waldufni aih ushramjan \u00feuk jah waldufni aih fraletan \u00feuk?\n19:11 [CA] andhof Iesus: ni aihtedeis waldufnje ainhun ana mik, nih wesi \u00feus atgiban iupa\u00fero; duh\u00fee sa galewjands mik \u00feus maizein frawaurht habaid.\n19:12 [CA] Framuh \u00feamma sokida Peilatus fraletan ina. i\u00fe Iudaieis hropidedun qi\u00feandans: jabai \u00feana fraletis, ni is frijonds kaisara; sahvazuh izei \u00feiudan sik silban tauji\u00fe, andstandi\u00fe kaisara.\n19:13 [CA] \u00feanuh Peilatus hausjands \u00feize . . . .","title":"Gothic Bible (partial): John","type":"page"}