{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/luk.htm","path":"bib/wb/got/luk.htm","source_url":"https://sacred-texts.com/bib/wb/got/luk.htm","text":"1:0 [CA] Aiwaggeljo \u00feairh Lukan anastodei\u00fe.\n1:1 [CA] Unte raihtis managai dugunnun meljan insaht bi \u00feos gafullaweisidons in uns waihtins,\n1:2 [CA] swaswe anafulhun unsis \u00feaiei fram frumistin silbasiunjos jah andbahtos wesun \u00feis waurdis;\n1:3 [CA] galeikaida jah mis [jah ahmin weihamma] fram anastodeinai allaim glaggwuba afarlaistjandin gahahjo \u00feus meljan, batista \u00deaiaufeilu,\n1:4 [CA] ei gakunnais \u00feize bi \u00feoei galaisi\u00fes is waurde [a]sta\u00fe.\n1:5 [CA] was in dagam Herodes \u00feiudanis Iudaias gudja namin Zakarias, us afar Abijins, jah qeins is us dauhtrum Aharons, jah namo izos Aileisabai\u00fe.\n1:6 [CA] wesunuh \u00fean garaihta ba in andwair\u00feja gudis, gaggandona in allaim anabusnim jah garaihteim fraujins unwaha.\n1:7 [CA] jah ni was im barne, unte was Aileisabai\u00fe stairo, jah ba framaldra dage seinaize wesun.\n1:8 [CA] war\u00fe \u00fean, mi\u00fe\u00feanei gudjinoda is in wikon kunjis seinis in andwair\u00feja gudis,\n1:9 [CA] bi biuhtja gudjinassaus hlauts imma urrann du saljan, atgaggands in alh fraujins,\n1:10 [CA] jah alls hiuhma was manageins beidandans uta hveilai \u00fewmiamins.\n1:11 [CA] war\u00fe \u00fean imma in siunai aggilus fraujins standands af taihswon hunslastadis \u00fewmiamins.\n1:12 [CA] jah gadrobnoda Zakarias gasaihvands, jah agis disdraus ina.\n1:13 [CA] qa\u00fe \u00fean du imma sa aggilus: ni ogs \u00feus, Zakaria, du\u00fee ei andhausida ist bida \u00feeina, jah qens \u00feeina Aileisabai\u00fe gabairid sunu \u00feus, jah haitais namo is Iohannen.\n1:14 [CA] jah wair\u00fei\u00fe \u00feus faheds jah swegni\u00fea, jah managai in gabaur\u00feai is faginond.\n1:15 [CA] wair\u00fei\u00fe auk mikils in andwair\u00feja fraujins jah wein jah lei\u00feu ni drigkid jah ahmins weihis gafulljada nauh\u00fean in wambai ai\u00feeins seinaizos,\n1:16 [CA] jah managans suniwe Israelis gawandei\u00fe du fraujin guda ize.\n1:17 [CA] jah silba fauraqimid in andwair\u00feja is in ahmin jah mahtai Haileiins gawandjan hairtona attane du barnam jah untalans in frodein garaihtaize, manwjan fraujin managein gafahrida.\n1:18 [CA] jah qa\u00fe Zakarias du \u00feamma aggilau: bihve kunnum \u00feata? ik raihtis im sineigs, jah qens meina framaldrozei in dagam seinaim.\n1:19 [CA] jah andhafjands sa aggilus qa\u00fe du imma: ik im Gabriel sa standands in andwair\u00feja gudis, jah insandi\u00fes im rodjan du \u00feus jah wailamerjan \u00feus \u00feata.\n1:20 [CA] jah sijais \u00feahands jah ni magands rodjan und \u00feana dag ei wair\u00feai \u00feata, du\u00fee ei ni galaubides waurdam meinaim, \u00feoei usfulljanda in mela seinamma.\n1:21 [CA] jah was managei beidandans Zakariins, jah sildaleikidedun hva latidedi ina in \u00feizai alh.\n1:22 [CA] usgaggands \u00fean ni mahta du im rodjan, jah fro\u00feun \u00feammei siun gasahv in alh; jah silba was bandwjands im jah was dumbs.\n1:23 [CA] jah war\u00fe, bi\u00fee usfullnodedun dagos andbahteis is, galai\u00fe du garda seinamma.\n1:24 [CA] afaruh \u00fean \u00feans dagans inkil\u00feo war\u00fe Aileisabai\u00fe qens is jah galaugnida sik meno\u00fes fimf, qi\u00feandei:\n1:25 [CA] \u00featei swa mis gatawida frauja in dagam \u00feaimei insahv afniman idweit mein in mannam.\n1:26 [CA] \u00feanuh \u00fean in meno\u00fe saihstin insandi\u00fes was aggilus Gabriel fram guda in baurg Galeilaias sei haitada Nazarai\u00fe,\n1:27 [CA] du maga\u00feai in fragibtim abin, \u00feizei namo Iosef, us garda Daweidis, jah namo \u00feizos maga\u00feais Mariam.\n1:28 [CA] jah galei\u00feands inn sa aggilus du izai qa\u00fe: fagino, anstai audahafta, frauja mi\u00fe \u00feus; \u00feiu\u00feido \u00feu in qinom.\n1:29 [CA] i\u00fe si gasaihvandei ga\u00felahsnoda bi innatgahtai is jah \u00feahta sis hveleika wesi so goleins [\u00featei swa \u00feiu\u00feida izai].\n1:30 [CA] jah qa\u00fe aggilus du izai: ni ogs \u00feus, Mariam, bigast auk anst fram guda.\n1:31 [CA] jah sai, ganimis in kil\u00feein jah gabairis sunu jah haitais namo is Iesu.\n1:32 [CA] sah wair\u00fei\u00fe mikils jah sunus hauhistins haitada, jah gibid imma frauja gu\u00fe stol Daweidis attins is.\n1:33 [CA] jah \u00feiudano\u00fe ufar garda Iakobis in ajukdu\u00fe, jah \u00feiudinassaus is ni wair\u00fei\u00fe andeis.\n1:34 [CA] qa\u00fe \u00fean Mariam du \u00feamma aggilau: hvaiwa sijai \u00feata, \u00feandei aban ni kann?\n1:35 [CA] jah andhafjands sa aggilus qa\u00fe du izai: ahma weihs atgaggi\u00fe ana \u00feuk, jah mahts hauhistins ufarskadweid \u00feus, du\u00fee ei saei gabairada weihs haitada sunus gudis.\n1:36 [CA] jah sai, Aileisabai\u00fe ni\u00fejo \u00feeina, jah so inkil\u00feo sunau in aldomin seinamma, jah sa meno\u00fes saihsta ist izai sei haitada stairo,\n1:37 [CA] unte nist unmahteig guda ainhun waurde.\n1:38 [CA] qa\u00fe \u00fean Mariam: sai, \u00feiwi fraujins, wair\u00feai mis bi waurda \u00feeinamma. jah galai\u00fe fairra izai sa aggilus.\n1:39 [CA] usstandandei \u00fean Mariam in \u00feaim dagam iddja in bairgahein sniumundo in baurg Iudins,\n1:40 [CA] jah galai\u00fe in gard Zakariins jah golida Aileisabai\u00fe.\n1:41 [CA] jah war\u00fe, swe hausida Aileisabai\u00fe golein Mariins, lailaik barn in qi\u00feau izos, jah gafullnoda ahmins weihis Aileisabai\u00fe,\n1:42 [CA] jah ufwopida stibnai mikilai jah qa\u00fe: \u00feiu\u00feido \u00feu in qinom, jah \u00feiu\u00feido akran qi\u00feaus \u00feeinis.\n1:43 [CA] jah hva\u00fero mis \u00feata, ei qemi ai\u00feei fraujins meinis at mis?\n1:44 [CA] sai allis, sunsei war\u00fe stibna goleinais \u00feeinaizos in ausam meinaim, lailaik \u00feata barn in swigni\u00feai in wambai meinai.\n1:45 [CA] jah audaga so galaubjandei \u00featei wair\u00fei\u00fe ustauhts \u00feize rodidane izai fram fraujin.\n1:46 [CA] jah qa\u00fe Mariam: mikileid saiwala meina fraujan,\n1:47 [CA] jah swegneid ahma meins du guda nasjand meinamma.\n1:48 [CA] unte insahv du hnaiweinai \u00feiujos seinaizos; sai allis, fram himma nu audagjand mik alla kunja.\n1:49 [CA] unte gatawida mis mikilein sa mahteiga, jah weih namo is.\n1:50 [CA] jah armahairtei is in aldins alde \u00feaim ogandam ina.\n1:51 [CA] gatawida swin\u00feein in arma seinamma, distahida mikil\u00feuhtans gahugdai hairtins seinis;\n1:52 [CA] gadrausida mahteigans af stolam jah ushauhida gahnaiwidans;\n1:53 [CA] gredagans gaso\u00feida \u00feiu\u00fee jah gabignandans insandida lausans.\n1:54 [CA] hleibida Israela \u00feiumagu seinamma, gamunands armahairteins,\n1:55 [CA] swaswe rodida du attam unsaraim Abrahama jah fraiwa is und aiw.\n1:56 [CA] gasto\u00fe \u00fean Mariam mi\u00fe izai swe meno\u00fe(s) \u00ferins jah gawandida sik du garda seinamma.\n1:57 [CA] i\u00fe Aileisabai\u00fe usfullnoda mel du bairan jah gabar sunu.\n1:58 [CA] jah hausidedun bisitands jah gani\u00fejos izos, unte gamikilida frauja armahairtein seina bi izai, jah mi\u00fefaginodedun izai.\n1:59 [CA] jah war\u00fe in daga ahtudin, qemun bimaitan \u00feata barn jah haihaitun ina afar namin attins is Zakarian.\n1:60 [CA] jah andhafjandei so ai\u00feei is qa\u00fe: ne, ak haitaidau Iohannes.\n1:61 [CA] jah qe\u00feun du izai \u00featei ni ainshun ist in kunja \u00feeinamma saei haitaidau \u00feamma namin.\n1:62 [CA] gabandwidedun \u00fean attin is, \u00feata hvaiwa wildedi haitan ina.\n1:63 [CA] i\u00fe is sokjands spilda [nam] ga[h]melida qi\u00feands: Iohannes ist namo is; jah sildaleikidedun allai.\n1:64 [CA] usluknoda \u00fean mun\u00fes is suns jah tuggo is, jah rodida \u00feiu\u00fejands gu\u00fe.\n1:65 [CA] jah war\u00fe ana allaim agis \u00feaim bisitandam ina, jah in allai bairgahein Iudaias merida wesun alla \u00feo waurda.\n1:66 [CA] jah galagidedun allai \u00feai hausjandans in hairtin seinamma qi\u00feandans: hva skuli \u00feata barn wair\u00fean? jah \u00fean handus fraujins was mi\u00fe imma.\n1:67 [CA] jah Zakarias, atta is, gafullnoda ahmins weihis jah praufetida jah qa\u00fe:\n1:68 [CA] \u00feiu\u00feeigs frauja gu\u00fe Israelis, unte gaweisoda jah gawaurhta uslausein managein seinai,\n1:69 [CA] jah urraisida haurn naseinais unsis in garda Daweidis \u00feiumagaus seinis,\n1:70 [CA] swaswe rodida \u00feairh mun\u00fe weihaize \u00feize fram anastodeinai aiwis praufete seinaize,\n1:71 [CA] giban nasein us fijandam unsaraim jah us handau allaize \u00feize hatandane unsis,\n1:72 [CA] taujan armahairti\u00fea bi attam unsaraim jah gamunan triggwos weihaizos seinaizos,\n1:73 [CA] ai\u00feis \u00feanei swor wi\u00fera Abraham attan unsarana, ei gebi unsis\n1:74 [CA] unagein us handau fijande unsaraize galausidaim skalkinon imma\n1:75 [CA] in sunjai jah garaihtein in andwair\u00feja is allans dagans unsarans.\n1:76 [CA] jah \u00feu, barnilo, praufetus hauhistins haitaza; fauragaggis auk faura andwair\u00feja fraujins, manwjan wigans imma,\n1:77 [CA] du giban kun\u00fei naseinais managein is in afleta frawaurhte ize,\n1:78 [CA] \u00feairh infeinandein armahairtein gudis unsaris, in \u00feammei gaweiso\u00fe unsara urruns us hauhi\u00feai,\n1:79 [CA] gabairhtjan \u00feaim in riqiza jah skadau dau\u00feus sitandam, du garaihtjan fotuns unsarans in wig gawair\u00fejis.\n1:80 [CA] i\u00fe \u00feata barn wohs jah swin\u00fenoda ahmin jah was ana au\u00feidom und dag ustaikneinais seinaizos du Israela.\n2:1 [CA] War\u00fe \u00fean in dagans jainans, urrann gagrefts fram kaisara Agustau, gameljan allana midjungard.\n2:2 [CA] soh \u00fean gilstrameleins frumista war\u00fe at [wisandin kindina Swriais] raginondin Saurim Kwreinaiau.\n2:3 [CA] jah iddjedun allai, ei melidai weseina, hvarjizuh in seinai baurg.\n2:4 [CA] Urrann \u00fean jah Iosef us Galeilaia, us baurg Nazarai\u00fe, in Iudaian, in baurg Daweidis sei haitada Be\u00felahaim, du\u00fee ei was us garda fadreinais Daweidis,\n2:5 [CA] anameljan mi\u00fe Mariin sei in fragiftim was imma qeins, wisandein inkil\u00feon.\n2:6 [CA] war\u00fe \u00fean, mi\u00fe\u00feanei \u00feo wesun jainar, usfullnodedun dagos du bairan izai.\n2:7 [CA] jah gabar sunu seinana \u00feana frumabaur jah biwand ina jah galagida ina in uzetin, unte ni was im rumis in stada \u00feamma.\n2:8 [CA] jah hairdjos wesun in \u00feamma samin landa, \u00feairhwakandans jah witandans wahtwom nahts ufaro hairdai seinai.\n2:9 [CA] i\u00fe aggilus fraujins anaqam ins jah wul\u00feus fraujins biskain ins, jah ohtedun agisa mikilamma.\n2:10 [CA] jah qa\u00fe du im sa aggilus: ni ogei\u00fe, unte sai, spillo izwis faheid mikila, sei wair\u00fei\u00fe allai managein,\n2:11 [CA] \u00featei gabaurans ist izwis himma daga nasjands, saei ist Xristus frauja, in baurg Daweidis.\n2:12 [CA] jah \u00feata izwis taikns: bigitid barn biwundan jah galagid in uzetin.\n2:13 [CA] jah anaks war\u00fe mi\u00fe \u00feamma aggilau managei harjis himinakundis hazjandane gu\u00fe jah qi\u00feandane:\n2:14 [CA] wul\u00feus in hauhistjam guda jah ana air\u00feai gawair\u00fei in mannam godis wiljins.\n2:15 [CA] jah war\u00fe, bi\u00fee gali\u00feun fairra im in himin \u00feai aggiljus, jah \u00feai mans \u00feai hairdjos qe\u00feun du sis misso: \u00feairhgaggaima ju und Be\u00felahaim jah saihvaima waurd \u00feata waur\u00feano, \u00featei frauja gakannida unsis.\n2:16 [CA] jah qemun sniumjandans jah bigetun Marian jah Iosef jah \u00feata barn ligando in uzetin.\n2:17 [CA] gasaihvandans \u00fean gakannidedun bi \u00feata waurd \u00featei rodi\u00fe was du im bi \u00feata barn.\n2:18 [CA] jah allai \u00feai gahausjandans sildaleikidedun bi \u00feo rodidona fram \u00feaim hairdjam du im.\n2:19 [CA] i\u00fe Maria alla gafastaida \u00feo waurda, \u00feagkjandei in hairtin seinamma.\n2:20 [CA] jah gawandidedun sik \u00feai hairdjos mikiljandans jah hazjandans gu\u00fe in allaize \u00feizeei gahausidedun jah gasehvun swaswe rodi\u00fe was du im.\n2:21 [CA] jah bi\u00fee usfulnodedun dagos ahtau du bimaitan ina, jah haitan was namo is Iesus, \u00feata qi\u00feano fram aggilau faur\u00feizei ganumans wesi in wamba.\n2:22 [CA] jah bi\u00fee usfulnodedun dagos hraineinais ize bi witoda Mosezis, brahtedun ina in Iairusalem, atsatjan faura fraujin,\n2:23 [CA] swaswe gamelid ist in witoda fraujins: \u00featei hvazuh gumakundaize uslukands qi\u00feu weihs fraujins haitada,\n2:24 [CA] jah ei gebeina fram imma hunsl, swaswe qi\u00fean ist in witoda fraujins, gajuk hraiwadubono ai\u00fe\u00feau twos juggons ahake.\n2:25 [CA] \u00fearuh was manna in Iairusalem, \u00feizei namo Swmaion, jah sa manna was garaihts jah gudafaurhts, beidands la\u00feonais Israelis, jah ahma weihs was ana imma.\n2:26 [CA] jah was imma gataihan fram ahmin \u00feamma weihin ni saihvan dau\u00feu, faur\u00feize sehvi Xristu fraujins.\n2:27 [CA] jah qam in ahmin in \u00feizai alh; jah mi\u00fe\u00feanei innattauhun berusjos \u00feata barn Iesu, ei tawidedeina bi biuhtja witodis bi ina,\n2:28 [CA] jah is andnam ina ana armins seinans jah \u00feiu\u00feida guda jah qa\u00fe:\n2:29 [CA] nu fraleitais skalk \u00feeinana, [fraujinond] frauja, bi waurda \u00feeinamma in gawair\u00feja;\n2:30 [CA] \u00feande sehvun augona meina nasein \u00feeina,\n2:31 [CA] \u00feoei manwides in andwair\u00feja allaizo manageino,\n2:32 [CA] liuha\u00fe du andhuleinai \u00feiudom jah wul\u00feu managein \u00feeinai Israela.\n2:33 [CA] jah was Iosef jah ai\u00feei is sildaleikjandona ana \u00feaim \u00feoei rodida wesun bi ina.\n2:34 [CA] jah \u00feiu\u00feida ina Swmaion jah qa\u00fe du Mariin, ai\u00feein is: sai, sa ligi\u00fe du drusa jah usstassai managaize in Israela jah du taiknai andsakanai.\n2:35 [CA] jah \u00fean \u00feeina silbons saiwala \u00feairhgaggi\u00fe hairus, ei andhuljaindau us managaim hairtam mitoneis.\n2:36 [CA] jah was Anna praufeteis, dauhtar Fanuelis, us kunja Aseris; soh framaldra dage managaize libandei mi\u00fe abin jera sibun fram maga\u00feein seinai,\n2:37 [CA] soh \u00fean widuwo jere ahtautehund jah fidwor, soh ni afiddja fairra alh fastubnjam jah bidom blotande fraujan nahtam jah dagam.\n2:38 [CA] soh \u00feizai hveilai atstandandei andhaihait fraujin jah rodida bi ina [in] allaim \u00feaim usbeidandam la\u00feon Iairusaulwmos.\n2:39 [CA] jah bi\u00fee ustauhun allata bi witoda fraujins, gawandidedun sik in Galeilaian, in baurg seina Nazarai\u00fe.\n2:40 [CA] i\u00fe \u00feata barn wohs jah swin\u00fenoda ahmins fullnands jah handugeins, jah ansts gudis was ana imma.\n2:41 [CA] jah wratodedun \u00feai birusjos is jera hvammeh in Iairusalem at dul\u00fe paska.\n2:42 [CA] jah bi\u00fee war\u00fe twalibwintrus, usgaggandam \u00fean im in Iairusaulwma bi biuhtja dul\u00feais,\n2:43 [CA] jah ustiuhandam \u00feans dagans, mi\u00fe\u00feane gawandidedun sik aftra, gasto\u00fe Iesus sa magus in Iairusalem, jah ni wissedun Iosef jah ai\u00feei is.\n2:44 [CA] hugjandona in gasin\u00fejam ina wisan qemun dagis wig jah sokidedun ina in gani\u00fejam jah in kun\u00feam.\n2:45 [CA] jah ni bigitandona ina gawandidedun sik in Iairusalem sokjandona ina.\n2:46 [CA] jah war\u00fe afar dagans \u00ferins, bigetun ina in alh sitandan in midjaim laisarjam jah hausjandan im jah fraihnandan ins.\n2:47 [CA] usgeisnodedun \u00fean allai \u00feai hausjandans is ana frodein jah andawaurdjam is.\n2:48 [CA] jah gasaihvandans ina sildaleikidedun, jah qa\u00fe du imma so ai\u00feei is: magau, hva gatawides uns swa? sai, sa atta \u00feeins jah ik winnandona sokidedum \u00feuk.\n2:49 [CA] jah qa\u00fe du im: hva \u00featei sokidedu\u00fe mik? niu wissedu\u00fe \u00featei in \u00feaim attins meinis skulda wisan?\n2:50 [CA] jah ija ni fro\u00feun \u00feamma waurda \u00featei rodida du im.\n2:51 [CA] jah iddja mi\u00fe im jah qam in Nazarai\u00fe, jah was ufhausjands im; jah ai\u00feei is gafastaida \u00feo waurda alla in hairtin seinamma.\n2:52 [CA] jah Iesus \u00feaih frodein jah wahstau jah anstai at guda jah mannam.\n3:1 [CA] In jera \u00fean fimftataihundin \u00feiudinassaus Teibairiaus kaisaris, raginondin Puntiau Peilatau Iudaia, jah fidurraginja \u00feis Galeilaias Herodeis, Filippauzuh \u00fean bro\u00fers is fidurraginja \u00feis Ituraias jah Trakauneitidaus landis, jah Lwsaniaus Abeilenes fidurraginja,\n3:2 [CA] at auhmistam gudjam Annin jah Kajafin, war\u00fe waurd gudis at Iohannen, Zaxariins sunau, in au\u00feidai.\n3:3 [CA] jah qam and allans gaujans Iaurdanaus merjands daupein idreigos du fraleta frawaurhte,\n3:4 [CA] swaswe gamelid ist in bokom waurde Esaeiins praufetaus qi\u00feandins: stibna wopjandins in au\u00feidai, manweid wig fraujins, raihtos waurkei\u00fe staigos is;\n3:5 [CA] all dalei usfulljada jah all fairgunje jah hlaine gahnaiwjada, jah wair\u00fei\u00fe \u00feata wraiqo du raihtamma jah usdrusteis du wigam slaihtaim.\n3:6 [CA] jah gasaihvi\u00fe all leike nasein gudis.\n3:7 [CA] qa\u00fe \u00fean du \u00feaim atgaggandeim manageim daupjan fram sis: kuni nadre, hvas gataiknida izwis \u00feliuhan faura \u00feamma anawair\u00fein hatiza?\n3:8 [CA] waurkjai\u00fe nu akran wair\u00feata idreigos jah ni duginnai\u00fe qi\u00fean in izwis: attan aigum Abraham; qi\u00fea auk izwis \u00featei mag gu\u00fe us stainam \u00feaim urraisjan barna Abrahama.\n3:9 [CA] a\u00fe\u00fean ju so aqizi at waurtim bagme ligi\u00fe: all nu bagme unbairandane akran god usmaitada jah in fon galagjada.\n3:10 [CA] jah frehun ina manageins qi\u00feandans: an hva taujaima?\n3:11 [CA] andhafjands \u00fean qa\u00fe : sa habands twos paidos gibai \u00feamma unhabandin, jah saei habai matins, samaleiko taujai.\n3:12 [CA] qemun \u00fean motarjos daupjan jah qe\u00feun du imma: laisari, hva taujaima?\n3:13 [CA] \u00fearuh qa\u00fe du im: ni waiht ufar \u00featei garaid sijai izwis, lausjai\u00fe.\n3:14 [CA] frehun \u00fean ina jah \u00feai militondans qi\u00feandans: jah weis hva taujaima? jah qa\u00fe du im: ni mannanhun holo\u00fe, ni mannanhun anamahtjaid jah waldai\u00fe annom izwaraim.\n3:15 [CA] at wenjandein \u00fean allai managein jah \u00feagkjandam allaim in hairtam seinaim bi Iohannein, niu aufto sa wesi Xristus,\n3:16 [CA] andhof \u00fean Iohannes allaim qi\u00feands: ik allis izwis watin daupja, i\u00fe gaggi\u00fe swin\u00feoza mis, \u00feizei ik ni im wair\u00fes andbindan skaudaraip skohis is; sah izwis daupei\u00fe in ahmin weihamma jah funin.\n3:17 [CA] habands win\u00feiskauron in handau seinai jah gahrainei\u00fe ga\u00ferask sein jah briggi\u00fe kaurn in bansta seinamma, i\u00fe ahana intandei\u00fe funin unhvapnandin.\n3:18 [CA] managu\u00fe~\u00fean jah an\u00fear \u00ferafstjands \u00feiu\u00fespilloda managein.\n3:19 [CA] i\u00fe Herodes sa taitrarkes gasakans fram imma bi Herodiadein, qen bro\u00fers is, jah bi alla \u00feoei gawaurhta ubila Herodes.\n3:20 [CA] anaaiauk jah \u00feata ana alla jah galauk Iohannen in karkarai.\n3:21 [CA] war\u00fe \u00fean, bi\u00fee daupida alla managein, jah at Iesu ufdaupidamma jah bidjandin usluknoda himins,\n3:22 [CA] jah atiddja ahma sa weiha leikis siunai swe ahaks ana ina, jah stibna us himina war\u00fe qi\u00feandei: \u00feu is sunus meins sa liuba, in \u00feuzei waila galeikaida.\n3:23 [CA] jah silba was Iesus swe jere \u00ferije tigiwe uf gakun\u00feai, swaei sunus munds was Iosefis, sunaus Heleis,\n3:24 [CA] sunaus Mat\u00featis, sunaus Laiwweis, sunaus Mailkeis, sunaus Jannins, sunaus Iosefis,\n3:25 [CA] sunaus Matta\u00feiwis, sunaus Ammons, sunaus Naumis, sunaus Aizleimis, sunaus Naggais,\n3:26 [CA] sunaus Maha\u00feis, sunaus Matta\u00feiaus, sunaus Saimaieinis, sunaus Iosefis, sunaus Iodins,\n3:27 [CA] sunaus Iohannins, sunaus Resins, sunaus Zauraubabilis, sunaus Sala\u00feielis, sunaus Nerins,\n3:28 [CA] sunaus Mailkeins, sunaus Addeins, sunaus Kosamis, sunaus Airmodamis, sunaus Heris,\n3:29 [CA] sunaus Iosezis, sunaus Aileiaizairis, sunaus Ioreimis, sunaus Matta\u00feanis, sunaus Laiwweis,\n3:30 [CA] sunaus Swmaions, sunaus Iudins, sunaus Iosefis, sunaus Iohannins, sunaus Aileiakeimis,\n3:31 [CA] sunaus Mailaianis, sunaus Maeinanis, sunaus Matta\u00feanis, sunaus Na\u00feanis, sunaus Daweidis,\n3:32 [CA] sunaus Iaissaizis, sunaus Obeidis, sunaus Bauauzis, sunaus Salmonis, sunaus Nahassonis,\n3:33 [CA] sunaus Ameinadabis, sunaus Aramis, sunaus Aizoris, sunaus Faraizis, sunaus Iudins,\n3:34 [CA] sunaus Iakobis, sunaus Isakis, sunaus Abrahamis, sunaus \u00dearins, sunaus Nakoris,\n3:35 [CA] sunaus Sairokis, sunaus Ragawis, sunaus Falaigis, sunaus Aibairis, sunaus Salamis,\n3:36 [CA] sunaus Kaeinanis, sunaus Arfaksadis, sunaus Semis, sunaus Nauelis, sunaus Lamaikis,\n3:37 [CA] sunaus Ma\u00feusalis, sunaus Ainokis, sunaus Iaredis, sunaus Malailaielis, sunaus Kaeinanis,\n3:38 [CA] sunaus Ainosis, sunaus Sedis, sunaus Adamis, sunaus gudis.\n4:1 [CA] I\u00fe Iesus, ahmins weihis fulls, gawandida sik fram Iaurdanau jah tauhans was in ahmin in au\u00feidai\n4:2 [CA] dage fidwor tiguns, fraisans fram diabulau. jah ni matida waiht in dagam jainaim, jah at ustauhanaim \u00feaim dagam, bi\u00fee gredags war\u00fe.\n4:3 [CA] jah qa\u00fe du imma diabulus: jabai sunaus sijais gudis, qi\u00fe \u00feamma staina ei wair\u00feai hlaibs.\n4:4 [CA] jah andhof Iesus wi\u00fera ina qi\u00feands: gamelid ist \u00featei ni bi hlaib ainana libaid manna, ak bi all waurde gudis.\n4:5 [CA] jah ustiuhands ina diabulaus ana fairguni hauhata, ataugida imma allans \u00feiudinassuns \u00feis midjungardis in stika melis.\n4:6 [CA] jah qa\u00fe du imma sa diabulus: \u00feus giba \u00feata waldufni \u00feize allata jah wul\u00feu ize, unte mis atgiban ist, jah \u00feishvammeh \u00feei wiljau, giba \u00feata.\n4:7 [CA] \u00feu nu jabai inweitis mik in andwair\u00feja meinamma, wair\u00fei\u00fe \u00feein all.\n4:8 [CA] jah andhafjands imma Iesus qa\u00fe: gamelid ist, fraujan gu\u00fe \u00feeinana inweitais jah imma ainamma fullafahjais.\n4:9 [CA] \u00fea\u00feroh gatauh ina in Iairusalem jah gasatida ina ana giblin alhs jah qa\u00fe du imma: jabai sunus sijais gudis, wairp \u00feuk \u00fea\u00fero dala\u00fe;\n4:10 [CA] gamelid ist auk \u00featei aggilum seinaim anabiudi\u00fe bi \u00feuk du gafastan \u00feuk,\n4:11 [CA] jah \u00featei ana handum \u00feuk ufhaband, ei hvan ni gastagqjais bi staina fotu \u00feeinana.\n4:12 [CA] jah andhafjands qa\u00fe imma Iesus \u00featei qi\u00fean ist: ni fraisais fraujan gu\u00fe \u00feeinana.\n4:13 [CA] jah ustiuhands all fraistobnjo diabulus, afsto\u00fe fairra imma und mel.\n4:14 [CA] jah gawandida sik Iesus in mahtai ahmins in Galeilaian, jah meri\u00fea urrann and all gawi bisitande bi ina.\n4:15 [CA] jah is laisida in gaqum\u00feim ize, mikilids fram allaim.\n4:16 [CA] jah qam in Nazarai\u00fe, \u00fearei was fodi\u00fes, jah galai\u00fe inn bi biuhtja seinamma in daga sabbato in swnagogein jah ussto\u00fe siggwan bokos.\n4:17 [CA] jah atgibanos wesun imma bokos Eisaeiins praufetus, jah uslukands \u00feos bokos bigat stad, \u00fearei was gamelid:\n4:18 [CA] ahma fraujins ana mis, in \u00feizei gasalboda mik du wailamerjan unledaim, insandida mik du ganasjan \u00feans gamalwidans hairtin,\n4:19 [CA] merjan frahun\u00feanaim fralet jah blindaim siun, fraletan gamaidans in ga\u00ferafstein, merjan jer fraujins andanem.\n4:20 [CA] jah faifal\u00fe \u00feos bokos jah usgibands andbahta gasat. jah allaim in \u00feizai swnagogein wesun augona fairweitjandona du imma.\n4:21 [CA] dugann \u00fean rodjan du im \u00featei himma daga usfullnodedun mela \u00feo in ausam izwaraim.\n4:22 [CA] jah allai alakjo weitwodidedun imma jah sildaleikidedun bi \u00feo waurda anstais \u00feo usgaggandona us mun\u00fea is jah qe\u00feun: niu sa ist sunus Iosefis?\n4:23 [CA] jah qa\u00fe du im: aufto qi\u00fei\u00fe mis \u00feo gajukon: \u00feu leiki, hailei \u00feuk silban; hvan filu hausidedum waur\u00fean in Kafarnaum, tawei jah her in gabaur\u00feai \u00feeinai.\n4:24 [CA] qa\u00fe \u00fean: amen izwis qi\u00fea, \u00featei ni ainshun praufete andanems ist in gabaur\u00feai seinai:\n4:25 [CA] a\u00fe\u00fean bi sunjai qi\u00fea izwis \u00featei managos widuwons wesun in dagam Heleiins in Israela, \u00fean galuknoda himins du jeram \u00ferim jah meno\u00fes saihs, swe war\u00fe huhrus mikils and alla air\u00fea:\n4:26 [CA] jah ni du ainaihun \u00feizo insandi\u00fes was Helias, alja in Saraipta Seidonais du qinon widuwon.\n4:27 [CA] jah managai \u00ferutsfillai wesun uf Haileisaiu praufetau in Israela, jah ni ainshun ize gahrainids was, alja Naiman sa Saur.\n4:28 [CA] jah fullai waur\u00feun allai modis in \u00feizai swnagogein hausjandans \u00feata.\n4:29 [CA] jah usstandans uskusun imma ut us baurg jah brahtedun ina und auhmisto \u00feis fairgunjis ana \u00feammei so baurgs ize gatimrida was, du afdrausjan ina \u00fea\u00fero.\n4:30 [CA] i\u00fe is \u00feairhlei\u00feands \u00feairh midjans ins iddja.\n4:31 [CA] jah galai\u00fe in Kafarnaum, baurg Galeilaias jah was laisjands ins in sabbatim.\n4:32 [CA] jah sildaleikidedun bi \u00feo laisein is, unte in waldufnja was waurd is.\n4:33 [CA] jah in \u00feizai swnagogein was manna habands ahman unhul\u00feons unhrainjana jah ufhropida,\n4:34 [CA] qi\u00feands: let! hva uns jah \u00feus, Iesu Nazorenu? qamt fraqistjan unsis? kann \u00feuk, hvas is, sa weiha gudis.\n4:35 [CA] jah gahvotida imma Iesus qi\u00feands: afdobn jah usgagg us \u00feamma. jah gawairpands ina sa unhul\u00fea in midjaim urrann af imma, ni waihtai gaska\u00fejands imma.\n4:36 [CA] jah war\u00fe afslau\u00fenan allans, jah rodidedun du sis misso qi\u00feandans: hva waurde \u00feata, \u00featei mi\u00fe waldufnja jah mahtai anabiudi\u00fe \u00feaim unhrainjam ahmam jah usgaggand?\n4:37 [CA] jah usiddja meri\u00fea fram imma and allans stadins \u00feis bisunjane landis.\n4:38 [CA] usstandands \u00fean us \u00feizai swnagogai galai\u00fe in gard Seimonis. swaihro \u00fean \u00feis Seimonis was anahabaida brinnon mikilai, jah bedun ina bi \u00feo.\n4:39 [CA] jah atstandands ufar ija gasok \u00feizai brinnon, jah aflailot ija. sunsaiw \u00fean usstandandei andbahtida im.\n4:40 [CA] mi\u00fe\u00feanei \u00fean sagq sunno, allai swa managai swe habaidedun siukans sauhtim missaleikaim, brahtedun ins at imma: i\u00fe is ainhvarjammeh ize handuns analagjands gahailida ins.\n4:41 [CA] usiddjedun \u00fean jah unhul\u00feons af managaim hropjandeins jah qi\u00feandeins \u00featei \u00feu is Xristus, sunus gudis. jah gasakands im ni lailot \u00feos rodjan, unte wissedun [silban] Xristu ina wisan.\n4:42 [CA] bi\u00feeh \u00fean war\u00fe dags, usgaggands galai\u00fe ana au\u00fejana stad, jah manageins sokidedun ina jah qemun und ina jah gahabaidedun ina, ei ni afli\u00fei fairra im.\n4:43 [CA] \u00fearuh is qa\u00fe du im \u00featei jah \u00feaim an\u00fearaim baurgim wailamerjan ik skal bi \u00feiudangardja gudis, unte du\u00fee mik insandida.\n4:44 [CA] jah was merjands in swnagogim Galeilaias.\n5:1 [CA] Jah war\u00fe, mi\u00fe\u00feanei managei anatramp ina du hausjan waurd gudis, jah is silba was standands nehva saiwa Gainnesarai\u00fe,\n5:2 [CA] jah gasahv twa skipa standandona at \u00feamma saiwa, i\u00fe fiskjans afgaggandans af im us\u00fewohun natja.\n5:3 [CA] galai\u00fe \u00fean in ain \u00feize skipe, \u00featei was Seimonis; haihait ina aftiuhan fairra sta\u00fea leitil jah gasitands laisida us \u00feamma skipa manageins.\n5:4 [CA] bi\u00feeh \u00fean gaandida rodjands, qa\u00fe du Seimonau: brigg ana diupi\u00fea, jah athahid \u00feo natja izwara du fiskon.\n5:5 [CA] jah andhafjands Seimon qa\u00fe du imma: talzjand, alla naht \u00feairharbaidjandans waiht ni nemum; i\u00fe afar waurda \u00feeinamma wairpam natja.\n5:6 [CA] jah \u00feata taujandans galukun manageins fiske filu, swe natja dishnupnodedun ize.\n5:7 [CA] jah bandwidedun gamanam \u00feoei wesun in an\u00fearamma skipa, ei atiddjedeina hilpan ize. jah qemun jah gafullidedun ba \u00feo skipa, swe sugqun.\n5:8 [CA] gaumjands \u00fean Seimon Paitrus draus du kniwam Iesuis qi\u00feands: [bidja \u00feuk] usgagg fairra mis, unte manna frawaurhts im, frauja.\n5:9 [CA] sildaleik auk dishabaida ina jah allans \u00feans mi\u00fe imma in gafahis \u00feize fiske \u00feanzei ganutun;\n5:10 [CA] samaleikoh \u00fean jah Iakobau jah Iohannen, sununs Zaibaidaiaus, \u00feaiei wesun gadailans Seimona. jah qa\u00fe du Seimona Iesus: ni ogs \u00feus, fram himma nu manne sind nutans.\n5:11 [CA] jah gatiuhandans \u00feo skipa ana air\u00fea afleitandans allata laistidedun afar imma.\n5:12 [CA] jah war\u00fe, mi\u00fe\u00feanei was is in ainai baurge, jah sai, manna fulls \u00ferutsfillis jah gasaihvands Iesu driusands ana andwair\u00fei bad ina qi\u00feands: frauja, jabai wileis, magt mik gahrainjan.\n5:13 [CA] jah ufrakjands handu attaitok imma qi\u00feands: wiljau, wair\u00fe hrains. jah suns \u00feata \u00ferutsfill aflai\u00fe af imma.\n5:14 [CA] jah is faurbaud imma ei mann ni qe\u00fei; ak gagg jah ataugei \u00feuk silban gudjin jah atbair imma fram \u00feizai gahraineinai \u00feeinai \u00featei anabaud Moses du weitwodi\u00feai im.\n5:15 [CA] usmernoda \u00fean \u00feata waurd mais bi ina, jah garunnun hiuhmans managai hausjon jah leikinon fram imma sauhte seinaizo.\n5:16 [CA] i\u00fe is was aflei\u00feands ana au\u00feidos jah bidjands.\n5:17 [CA] jah war\u00fe in ainamma dage, jah is was laisjands. jah wesun sitandans Fareisaieis jah witodalaisarjos, \u00feaiei wesun gaqumanai us allamma haimo Galeilaias jah Iudaias jah Iairusaulwmon; jah mahts fraujins was du hailjan ins.\n5:18 [CA] jah sai mans bairandans ana ligra mannan saei was usli\u00fea, jah sokidedun hvaiwa ina innatbereina jah galagidideina in andwair\u00feja is.\n5:19 [CA] jah ni bigitandans hvaiwa innatbereina ina in manageins, ussteigandans ana hrot and skaljos, gasatidedun ina mi\u00fe \u00feamma badja in midjaim faura Iesua.\n5:20 [CA] jah gasaihvands galaubein ize qa\u00fe du \u00feamma usli\u00fein: manna, afleitanda \u00feus frawaurhteis \u00feeinos.\n5:21 [CA] jah dugunnun \u00feagkjan \u00feai bokarjos jah Fareisaieis qi\u00feandans: hvas ist sa, saei rodei\u00fe naiteinins? hvas mag afletan frawaurhtins, alja ains gu\u00fe?\n5:22 [CA] ufkunnands \u00fean Iesus mitonins ize andhafjands qa\u00fe du im: hva bi\u00feagkei\u00fe in hairtam izwaraim?\n5:23 [CA] hva\u00fear ist azetizo qi\u00fean: afletanda \u00feus frawaurhteis, \u00feau qi\u00fean: urreis jah gagg?\n5:24 [CA] a\u00fe\u00fean ei witeid \u00featei waldufni habaid sa sunus mans ana air\u00feai afletan frawaurhtins, qa\u00fe du \u00feamma usli\u00fein: du \u00feus qi\u00fea, urreis jah ushafjands \u00feata badi \u00feeinata gagg in gard \u00feeinana.\n5:25 [CA] jah sunsaiw usstandands in andwair\u00feja ize, ushafjands ana \u00feammei lag, galai\u00fe in gard seinana mikiljands gu\u00fe.\n5:26 [CA] jah usfilmei dissat allans, jah mikilidedun gu\u00fe jah fullai waur\u00feun agisis qi\u00feandans \u00featei gasaihvam wul\u00feaga himma daga.\n5:27 [CA] jah afar \u00feata usiddja jah gasahv motari, namin Laiwwi, sitandan ana motastada, jah qa\u00fe du imma: laistei afar mis.\n5:28 [CA] jah bilei\u00feands allaim, usstandands iddja afar imma.\n5:29 [CA] jah gawaurhta dauht mikila Laiwweis imma in garda seinamma, jah was managei motarje mikila jah an\u00fearaize, \u00feaiei wesun mi\u00fe im anakumbjandans.\n5:30 [CA] jah birodidedun bokarjos ize jah Fareisaieis du siponjam is qi\u00feandans: duhve mi\u00fe \u00feaim motarjam jah frawaurhtaim matjid jah drigkid?\n5:31 [CA] jah andhafjands Iesus qa\u00fe du im: ni \u00feaurbun hailai leikeis, ak \u00feai unhailans.\n5:32 [CA] ni qam la\u00feon garaihtans, ak frawaurhtans in idreiga.\n5:33 [CA] i\u00fe eis qe\u00feun du imma: duhve siponjos Iohannes fastand ufta jah bidos taujand, samaleiko jah Fareisaiei, i\u00fe \u00feai \u00feeinai siponjos matjand jah drigkand?\n5:34 [CA] \u00fearuh is qa\u00fe du im: ni magud sununs bru\u00fefadis, unte sa bru\u00fefads mi\u00fe im ist, gataujan fastan.\n5:35 [CA] a\u00fe\u00fean qimand dagos, jah \u00fean afnimada af im sa bru\u00fefads, jah \u00fean fastand in jainaim dagam.\n5:36 [CA] qa\u00feuh \u00fean jah gajukon du im, \u00featei ainshun plat snagins niujis ni lagjid ana snagan fairnjana, ai\u00fe\u00feau jah sa niuja aftaurnid, jah \u00feamma fairnjin ni gatimid \u00feata af \u00feamma niujin.\n5:37 [CA] jah ainshun ni giutid wein niujata in balgins fairnjans, ai\u00fe\u00feau distairid \u00feata niujo wein \u00feans balgins jah silbo usgutni\u00fe, jah \u00feai balgeis fraqistnand;\n5:38 [CA] ak wein juggata in balgins niujans giutand, jah bajo\u00fes gafastanda.\n5:39 [CA] jah ainshun drigkandane fairni, ni suns wili jugg; qi\u00fei\u00fe auk: \u00feata fairnjo batizo ist.\n6:1 [CA] Jah war\u00fe in sabbato an\u00fearamma frumin gaggan imma \u00feairh atisk, jah raupidedun ahsa siponjos is jah matidedun bnauandans handum.\n6:2 [CA] i\u00fe sumai Fareisaie qe\u00feun du im: hva taujid \u00featei ni skuld ist taujan in sabbato dagam?\n6:3 [CA] jah andhafjands wi\u00fera ins Iesus qa\u00fe: ni \u00feata ussuggwud \u00featei gatawida Daweid, \u00fean gredags was, silba jah \u00feaiei mi\u00fe imma wesun?\n6:4 [CA] hvaiwa inngalai\u00fe in gard gudis jah hlaibans faurlageinais usnam jah matida jah gaf \u00feaim mi\u00fe sis wisandam, \u00feanzei ni skuld ist matjan, nibai ainaim gudjam?\n6:5 [CA] jah qa\u00fe du im \u00featei frauja ist sa sunus mans jah \u00feamma sabbato daga.\n6:6 [CA] jah war\u00fe \u00fean in an\u00fearamma daga sabbato galei\u00fean imma in swnagogein jah laisjan. jah was jainar manna, jah handus is so taihswo was \u00feaursus.\n6:7 [CA] witaidedunuh \u00fean \u00feai bokarjos jah Fareisaieis, jau in sabbato daga leikinodedi, ei bigeteina til du wrohjan ina.\n6:8 [CA] i\u00fe is wissuh mitonins ize jah qa\u00fe du \u00feamma mann, \u00feamma \u00feaursja habandin handu: urreis jah stand in midjaim. \u00fearuh is urreisands gasto\u00fe.\n6:9 [CA] qa\u00fe \u00fean Iesus du im: fraihna izwis hva skuld ist sabbato dagam, \u00feiu\u00fe taujan \u00feau un\u00feiu\u00fe taujan, saiwala ganasjan \u00feau usqistjan?\n6:10 [CA] jah ussaihvands allans ins qa\u00fe du imma: ufrakei \u00feo handu \u00feeina. \u00fearuh is ufrakida, jah gasto\u00fe so handus is, swaswe so an\u00feara.\n6:11 [CA] i\u00fe eis fullai waur\u00feun unfrodeins jah rodidedun du sis misso hva tawidideina \u00feamma Iesua.\n6:12 [CA] jah war\u00fe in dagam \u00feaim, ei usiddja Iesus in fairguni bidjan; jah was naht \u00feairwakands in bidai gudis.\n6:13 [CA] jah bi\u00fee war\u00fe dags, atwopida siponjans seinans jah gawaljands us im twalib, \u00feanzei jah apaustuluns namnida:\n6:14 [CA] Seimon \u00feanei jah namnida Paitru, jah Andraian bro\u00fear is; Iakobu jah Iohannen, Filippu jah Bar\u00feulomaiu;\n6:15 [CA] Ma\u00fe\u00feaiu jah \u00deoman, Iakobu \u00feana Alfaius jah Seimon \u00feana haitanan Zeloten;\n6:16 [CA] Iudan Iakobaus jah Iudan Iskarioten, saei jah war\u00fe galewjands ina.\n6:17 [CA] jah atgaggands dala\u00fe mi\u00fe im gasto\u00fe ana stada ibnamma jah hiuma siponje is jah hansa mikila manageins af allamma Iudaias jah Iairusalem jah \u00feize faur marein Twre jah Seidone [jah an\u00fearaizo baurge],\n6:18 [CA] \u00feaiei qemun hausjan imma jah hailjan sik sauhte seinaizo; jah \u00feai anahabaidans fram ahmam unhrainjaim, jah gahailidai waur\u00feun.\n6:19 [CA] jah alla managei sokidedun attekan imma, unte mahts af imma usiddja jah ganasida allans.\n6:20 [CA] jah is ushafjands augona seina du siponjam seinaim qa\u00fe: audagai jus unledans ahmin, unte izwara ist \u00feiudangardi himine.\n6:21 [CA] audagai jus gredagans nu, unte sadai wair\u00fei\u00fe. audagai jus gretandans nu, unte ufhlohjanda.\n6:22 [CA] audagai siju\u00fe, \u00fean fijand izwis mans jah afskaidand izwis jah idweitjand jah uswairpand namin izwaramma swe ubilamma in sunaus mans;\n6:23 [CA] faginod in jainamma daga jah laikid, unte sai, mizdo izwara managa in himinam; bi \u00feamma auk tawidedun praufetum attans ize.\n6:24 [CA] a\u00fe\u00fean wai izwis \u00feaim gabeigam, unte ju habaid ga\u00felaiht izwara.\n6:25 [CA] wai izwis, jus sadans nu, unte gredagai wair\u00fei\u00fe; wai izwis, jus hlahjandans nu, unte gaunon jah gretan duginnid.\n6:26 [CA] wai, \u00fean waila izwis qi\u00feand allai mans; samaleiko allis tawidedun galiugapraufetum attans ize.\n6:27 [CA] akei izwis qi\u00fea \u00feaim hausjandam: frijod \u00feans hatandans izwis; waila taujaid \u00feaim fijandam izwis.\n6:28 [CA] \u00feiu\u00fejai\u00fe \u00feans fraqi\u00feandans izwis; bidjaid fram \u00feaim anamahtjandam izwis.\n6:29 [CA] \u00feamma stautandin \u00feuk bi kinnu, galewei imma jah an\u00feara; jah \u00feamma nimandin af \u00feus wastja, jah paida ni warjais.\n6:30 [CA] hvammeh \u00fean bidjandane \u00feuk gif jah af \u00feamma nimandin \u00feein ni lausei.\n6:31 [CA] jah swaswe wileid ei taujaina izwis mans, jah jus taujaid im samaleiko.\n6:32 [CA] a\u00fe\u00fean jabai frijod \u00feans frijondans izwis, hva izwis laune ist? jah auk \u00feai frawaurhtans \u00feans frijondans sik frijond.\n6:33 [CA] jah jabai \u00feiu\u00fe taujaid \u00feaim \u00feiu\u00fe taujandam izwis, hva izwis laune ist? jah auk \u00feai frawaurhtans \u00feata samo taujand.\n6:34 [CA] jah jabai leihvid fram \u00feaimei weneid andniman, hva izwis laune ist? jah auk frauwaurhtai frawaurhtaim leihvand, ei andnimaina samalaud.\n6:35 [CA] swe\u00feauh frijod \u00feans fijands izwarans, \u00feiu\u00fe taujaid jah leihvaid ni waihtais uswenans, jah wair\u00fei\u00fe mizdo izwara managa, jah wair\u00fei\u00fe sunjus hauhistins, unte is gods ist \u00feaim unfagram jah unseljam.\n6:36 [CA] wair\u00feaid blei\u00fejandans, swaswe jah atta izwar blei\u00fes ist.\n6:37 [CA] jah ni stojid, ei ni stojaindau; ni afdomjaid, jah ni afdomjanda; fraletaid, jah fraletanda.\n6:38 [CA] gibaid, jah gibada izwis, mitads goda jah ufarfulla jah gawigana jah ufargutana gibada in barm izwarana; \u00feizai auk samon mitadjon \u00feizaiei mitid mitada izwis.\n6:39 [CA] qa\u00feuh \u00fean gajukon im: ibai mag blinds blindana tiuhan? niu bai in dal gadriusand?\n6:40 [CA] nist siponeis ufar laisari seinana; i\u00fe gamanwids hvarjizuh wair\u00feai swe laisaris is.\n6:41 [CA] a\u00fe\u00fean hva gaumeis gramsta in augin bro\u00fers \u00feeinis, i\u00fe anza in \u00feeinamma augin ni gaumeis?\n6:42 [CA] ai\u00fe\u00feau hvaiwa magt qi\u00fean du bro\u00fer \u00feeinamma: bro\u00fear let, ik uswairpa gramsta \u00feamma in augin \u00feeinamma, silba in augin \u00feeinamma anza ni gaumjands? liuta, uswairp faur\u00feis \u00feamma anza us augin \u00feeinamma, jah \u00fean gaumjais uswairpan gramsta \u00feamma in augin bro\u00fers \u00feeinis.\n6:43 [CA] ni auk ist bagms gods taujands akran ubil, nih \u00fean bagms ubils taujands akran god.\n6:44 [CA] hvarjizuh raihtis bagme us swesamma akrana uskun\u00fes ist; ni auk us \u00feaurnum lisand[a] smakkans, nih \u00fean us aihvatundjai trudand[a] weinabasja.\n6:45 [CA] \u00feiu\u00feeigs manna us \u00feiu\u00feeigamma huzda hairtins seinis usbairid \u00feiu\u00fe, jah ubils manna us ubilamma hairtins seinis usbairid ubil: uzuh allis ufarfullein hairtins rodeid mun\u00fes is.\n6:46 [CA] a\u00fe\u00fean hva mik haitid frauja, frauja! jah ni taujid \u00featei qi\u00fea?\n6:47 [CA] hvazuh sa gaggands du mis jah hausjands waurda meina jah taujands \u00feo, ataugja izwis hvamma galeiks ist.\n6:48 [CA] galeiks ist mann timrjandin razn, saei grob jah gadiupida jah gasatida grunduwaddjau ana staina. at garunjon \u00fean waur\u00feanai bistagq ahva bi jainamma razna jah ni mahta gawagjan ita; gasulid auk was ana \u00feamma staina.\n6:49 [CA] i\u00fe sa hausjands jah ni taujands galeiks ist mann timrjandin razn ana air\u00feai inuh grunduwaddju, \u00featei bistagq flodus, jah suns gadraus, jah war\u00fe so uswalteins \u00feis raznis mikila.\n7:1 [CA] Bi\u00fee \u00fean usfullida alla \u00feo waurda seina in hliumans manageins, galai\u00fe in Kafarnaum.\n7:2 [CA] hundafade \u00fean sumis skalks siukands swultawair\u00feja , saei was imma swers.\n7:3 [CA] gahausjands \u00fean bi Iesu insandida du imma sinistans Iudaie, bidjands ina ei qimi jah ganasidedi \u00feana skalk is.\n7:4 [CA] i\u00fe eis qimandans at Iesua bedun ina usdaudo, qi\u00feandans \u00featei wair\u00fes ist, \u00feammei fragibis \u00feata;\n7:5 [CA] unte frijo\u00fe \u00feiuda unsara, jah swnagogein is gatimrida unsis.\n7:6 [CA] i\u00fe Iesus iddjuh mi\u00fe im. jah ju\u00fean ni fairra wisandin imma \u00feamma garda, insandida du imma sa hundafads frijonds, qi\u00feands du imma: frauja, ni draibei \u00feuk, unte ni im wair\u00fes ei uf hrot mein inngaggais.\n7:7 [CA] du\u00feei ni mik silban wair\u00feana rahnida at \u00feus qiman; ak qi\u00fe waurda, jah gahailnid sa \u00feiumagus meins.\n7:8 [CA] jah \u00fean auk ik manna im uf waldufnja gasatids, habands uf mis silbin gadrauhtins; jah qi\u00fea du \u00feamma: gagg, jah gaggid; jah an\u00fearamma: qim her, jah qimid; jah du skalka meinamma: tawei \u00feata, jah taujid.\n7:9 [CA] gahausjands \u00fean \u00feata Iesus sildaleikida ina jah wandjands sik du \u00feizai afarlaistjandein sis managein qa\u00fe: amen, qi\u00fea izwis, ni in Israela swalauda galaubein bigat.\n7:10 [CA] jah gawandjandans sik \u00feai insandidans du garda bigetun \u00feana siukan skalk hailana.\n7:11 [CA] jah war\u00fe in \u00feamma afardaga, iddja in baurg namnida Naem; jah mididdjedun imma siponjos is ganohai jah manageins filu.\n7:12 [CA] bi\u00feeh \u00fean nehva was daura \u00feizos baurgs, \u00fearuh sai, utbaurans was naus, sunus ainaha ai\u00feein seinai, jah si silbo widowo, jah managei \u00feizos baurgs ganoha mi\u00fe izai.\n7:13 [CA] jah gasaihvands \u00feo frauja [Iesus] infeinoda du izai jah qa\u00fe du izai: ni gret!\n7:14 [CA] jah duatgaggands attaitok hvilftrjom; i\u00fe \u00feai bairandans gasto\u00feun; jah qa\u00fe: juggalaud, du \u00feus qi\u00fea: urreis!\n7:15 [CA] jah ussat sa naus jah dugann rodjan. jah atgaf ina ai\u00feein is.\n7:16 [CA] dissat \u00fean allans agis, jah mikilidedun gu\u00fe, qi\u00feandans \u00featei praufetus mikils urrais in unsis, jah \u00featei gaweisoda gu\u00fe manageins seinaizos.\n7:17 [CA] jah usiddja \u00feata waurd and alla Iudaia bi ina jah and allans bisitands.\n7:18 [CA] jah gataihun Iohannen siponjos is bi alla \u00feo.\n7:19 [CA] jah athaitands twans siponje seinaize Iohannes insandida ins du Iesua qi\u00feands: \u00fe\u00fb is sa qimanda \u00feau an\u00fearanu wenjaima?\n7:20 [CA] qimandans \u00fean at imma \u00feai wairos qe\u00feun: Iohannes sa daupjands insandida ugkis du \u00feus, qi\u00feands: \u00fe\u00fb is sa qimanda \u00feau an\u00fearanu wenjaima?\n7:21 [CA] inuh \u00fean \u00feizai hveilai gahailida managans af sauhtim jah slahim jah ahmane ubilaize jah blindaim managaim fragaf siun.\n7:22 [CA] jah andhafjands Iesus qa\u00fe du im: gaggandans gateihats Iohannen \u00featei gasehvuts jah gahausideduts, \u00featei blindai ussaihvand, haltai gaggand, \u00ferutsfillai gahrainjanda, baudai gahausjand, naweis urreisand, unledai wailamerjanda;\n7:23 [CA] jah audags ist sahvazuh saei ni gamarzjada in mis.\n7:24 [CA] at galei\u00feandam \u00fean \u00feaim airum Iohannes dugann rodjan du manageim bi Iohannen: hva usiddjedu\u00fe in au\u00feida saihvan? raus fram winda wagid?\n7:25 [CA] akei hva usiddjedu\u00fe saihvan? mannan in hnasqjaim wastjom gawasidana? sai, \u00feai in wastjom wul\u00feagaim jah fodeinai wisandans in \u00feiudangardjom sind.\n7:26 [CA] akei hva usiddjedu\u00fe saihvan? praufetu? jai, qi\u00fea izwis, jah mais praufetu.\n7:27 [CA] sa ist, bi \u00feanei gamelid ist: sai, ik insandja aggilu meinana faura andwair\u00feja \u00feeinamma, saei gamanweid wig \u00feeinana faura \u00feus.\n7:28 [CA] qi\u00fea allis izwis, maiza in baurim qinono praufetus Iohanne \u00feamma daupjandin ainshun nist; i\u00fe sa minniza [imma] in \u00feiudangardjai gudis maiza imma ist.\n7:29 [CA] jah alla managei gahausjandei jah motarjos garaihtana domidedun gu\u00fe, ufdaupidai daupeinai Iohannis.\n7:30 [CA] i\u00fe Fareisaieis jah witodafastjos runa gudis fraqe\u00feun ana sik, ni daupidai fram imma.\n7:31 [CA] hve nu galeiko \u00feans mans \u00feis kunjis, jah hve sijaina galeikai?\n7:32 [CA] galeikai sind barnam \u00feaim in garunsai sitandam jah wopjandam seina misso jah qi\u00feandam: swiglodedum izwis jah ni plinsidedu\u00fe, gaunodedum izwis jan~ni gaigrotu\u00fe.\n7:33 [CA] urrann raihtis Iohannes sa daupjands, nih hlaif matjands nih wein drigkands, jah qi\u00fei\u00fe: unhul\u00feon habai\u00fe.\n7:34 [CA] urrann sunus mans matjands jah drigkands, jah qi\u00fei\u00fe: sai, manna afetja jah weindrugkja, frijonds motarje jah frawaurhtaize.\n7:35 [CA] jah gasunjoda war\u00fe handugei fram barnam seinaim allaim.\n7:36 [CA] ba\u00fe \u00fean ina sums Fareisaie ei matidedi mi\u00fe imma; jah atgaggands in gard \u00feis Fareisaiaus anakumbida.\n7:37 [CA] \u00fearuh sai, qino in \u00feizai baurg, sei was frawaurhta, jah ufkunnandei \u00featei anakumbida in razna \u00feis Fareisaiaus, briggandei alabalstraun balsanis\n7:38 [CA] jah standandei faura fotum is aftaro greitandei, dugann natjan fotuns is tagram jah skufta haubidis seinis biswarb jah kukida fotum is jah gasalboda \u00feamma balsana.\n7:39 [CA] gasaihvands \u00fean sa Fareisaius, saei haihait ina, rodida sis ains qi\u00feands: sa i\u00fe wesi praufetus, ufkun\u00feedi \u00feau, hvo jah hvileika so qino sei teki\u00fe imma, \u00featei frawaurhta ist.\n7:40 [CA] jah andhafjands Iesus qa\u00fe du Paitrau: Seimon, skal \u00feus hva qi\u00fean. i\u00fe is qa\u00fe: laisari, qi\u00fe!\n7:41 [CA] twai dulgis skulans wesun dulgahaitjin sumamma; ains skulda skatte fimf hunda, i\u00fe an\u00fear fimf tiguns.\n7:42 [CA] ni habandam \u00fean hva\u00fero usgebeina, baim fragaf. hva\u00fear nu \u00feize, qi\u00fe, mais ina frijod?\n7:43 [CA] andhafjands \u00fean Seimon qa\u00fe: \u00feana gawenja \u00feammei managizo fragaf. \u00fearuh is qa\u00fe du imma: raihtaba stauides.\n7:44 [CA] jah gawandjands sik du \u00feizai qinon qa\u00fe du Seimona: gasaihvis \u00feo qinon? atgaggandin in gard \u00feeinana wato mis ana fotuns meinans ni gaft; i\u00fe si tagram seinaim ganatida meinans fotuns jah skufta seinamma biswarb.\n7:45 [CA] ni kukides mis; i\u00fe si, fram \u00feammei innatiddja, ni swaif bikukjan fotuns meinans.\n7:46 [CA] alewa haubid meinata ni salbodes; i\u00fe si balsana gasalboda fotuns meinans.\n7:47 [CA] in \u00feizei qi\u00fea \u00feus: afletanda frawaurhteis izos \u00feos managons, unte frijoda filu; i\u00fe \u00feammei leitil fraletada, leitil frijod.\n7:48 [CA] qa\u00feuh \u00fean du izai: afletanda \u00feus frawaurhteis \u00feeinos.\n7:49 [CA] jah dugunnun \u00feai mi\u00feanakumbjandans qi\u00fean in sis silbam: hvas sa ist saei frawaurhtins afletai?\n7:50 [CA] i\u00fe is qa\u00fe \u00fean du \u00feizai qinon: galaubeins \u00feeina ganasida \u00feuk, gagg in gawair\u00fei.\n8:1 [CA] Jah war\u00fe bi\u00fee [afar \u00feata], ei jah is wratoda and baurgs jah haimos merjands jah wailaspillonds \u00feiudangardja gudis, jah \u00feai twalib mi\u00fe imma,\n8:2 [CA] jah qinons \u00feozei wesun galeikinodos ahmane ubilaize jah sauhte, jah Marja sei haitana was Magdalene, us \u00feizaiei usiddjedun unhul\u00feons sibun,\n8:3 [CA] jah Iohanna, qens Kusins, fauragaggjins Herodes, jah Susanna jah an\u00fearos managos, \u00feozei andbahtededun im us aiginam seinaim.\n8:4 [CA] gaqumanaim \u00fean hiumam managaim jah \u00feaim \u00feaiei us baurgim ga\u00efddjedun du imma, qa\u00fe \u00feairh gajukon:\n8:5 [CA] urrann saiands du saian fraiwa seinamma; jah mi\u00fe\u00feanei saiso, sum gadraus faur wig jah gatrudan war\u00fe, jah fuglos himinis fretun \u00feata.\n8:6 [CA] jah an\u00fear gadraus ana staina jah uskijanata ga\u00feaursnoda, in \u00feizei ni habaida qrammi\u00fea.\n8:7 [CA] jah sum gadraus in midumai \u00feaurniwe, jah mi\u00feuskeinandans \u00feai \u00feaurnjus afhvapidedun \u00feata.\n8:8 [CA] jah an\u00fear gadraus ana air\u00feai godai jah uskeinoda jah tawida akran taihuntaihundfal\u00fe. \u00feata \u00fean qi\u00feands ufwopida: saei habai ausona du hausjan, gahausjai.\n8:9 [CA] frehun \u00fean ina siponjos is qi\u00feandans, hva sijai so gajuko.\n8:10 [CA] i\u00fe is qa\u00fe: izwis atgiban ist kunnan runos \u00feiudinassaus gudis; i\u00fe \u00feaim an\u00fearaim in gajukom, ei saihvandans ni gasaihvaina, jah gahausjandans ni fra\u00fejaina.\n8:11 [CA] a\u00fe\u00fean \u00feata ist so gajuko: \u00feata fraiw ist waurd gudis.\n8:12 [CA] i\u00fe \u00feai wi\u00fera wig sind \u00feai hausjandans; \u00fea\u00feroh qimi\u00fe diabulus jah usnimi\u00fe \u00feata waurd af hairtin ize, ei galaubjandans ni ganisaina.\n8:13 [CA] i\u00fe \u00feai ana \u00feamma staina, ize \u00fean hausjand, mi\u00fe faheidai andnimand \u00feata waurd, jah \u00feai waurtins ni haband, \u00feaiei du mela galaubjand jah in mela fraistubnjos afstandand.\n8:14 [CA] i\u00fe \u00feata in \u00feaurnuns gadriusando \u00feai sind \u00feai[ei] gahausjandans jah af saurgom jah gabein jah gabaurjo\u00feum \u00feizos libainais gaggandans afhvapnand jah ni gawrisqand.\n8:15 [CA] i\u00fe \u00feata ana \u00feizai godon air\u00feai \u00feai sind \u00feai ize in hairtin godamma jah seljamma gahausjandans \u00feata waurd gahaband jah akran bairand in \u00feulainai.\n8:16 [CA] a\u00fe\u00fean ni manna lukarn tandjands dishulji\u00fe ita kasa ai\u00fe\u00feau uf ligr [ga]satji\u00fe, ak ana lukarnasta\u00fein satji\u00fe, ei \u00feai inngaggandans saihvaina liuhad.\n8:17 [CA] ni auk ist analaugn, \u00featei swikun\u00fe ni wair\u00feai, nih fulgin, \u00featei ni gakunnaidau jah in swekun\u00feamma qimai.\n8:18 [CA] saihvi\u00fe nu hvaiwa hausei\u00fe; unte saei habai\u00fe, gibada imma, jah saei ni habai\u00fe, jah \u00featei \u00feugkei\u00fe haban, afnimada af imma.\n8:19 [CA] atiddjedun \u00fean du imma ai\u00feei jah bro\u00ferjus is jah ni mahtedun andqi\u00fean imma faura managein.\n8:20 [CA] jah gataihan war\u00fe imma \u00featei ai\u00feei \u00feeina jah bro\u00ferjus \u00feeinai standand uta gasaihvan \u00feuk gairnjandona.\n8:21 [CA] i\u00fe is andhafjands qa\u00fe du im: ai\u00feei meina jah bro\u00ferjus meinai \u00feai sind, \u00feai waurd gudis gahausjandans jah taujandans.\n8:22 [CA] war\u00fe \u00fean in ainamma \u00feize dage, jah is galai\u00fe in skip jah siponjos is, jah qa\u00fe du im: galei\u00feam hindar \u00feana marisaiw! jah gali\u00feun.\n8:23 [CA] \u00fearuh \u00fean swe faridedun, anasaislep; jah atiddja skura windis in \u00feana marisaiw, jah gafullnodedun jah birekjai waur\u00feun.\n8:24 [CA] duatgaggandans \u00fean urraisidedun ina qi\u00feandans: talzjand, fraqistnam! i\u00fe is urreisands gasok winda jah \u00feamma wega watins; jah anaslawaidedun jah war\u00fe wis.\n8:25 [CA] qa\u00fe \u00fean du im: hvar ist galaubeins izwara? ogandans \u00fean sildaleikidedun qi\u00feandans du sis misso: hvas siai sa, ei jah windam faurbiudi\u00fe jah watnam, jah ufhausjand imma?\n8:26 [CA] jah atfaridedun in gawi Gaddarene, \u00featei ist wi\u00ferawair\u00fe Galeilaia.\n8:27 [CA] usgaggandin \u00fean imma ana air\u00fea, gamotida imma wair sums us baurg saei habaida unhul\u00feons mela lagga jah wastjom ni gawasi\u00fes was jah in garda ni gawas, ak in hlaiwasnom.\n8:28 [CA] gasaihvands \u00fean Iesu jah ufhropjands draus du imma jah stibnai mikilai qa\u00fe: hva mis jah \u00feus, Iesu, sunau gudis hauhistins? bidja \u00feuk, ni balwjais mis.\n8:29 [CA] unte anabaud ahmin \u00feamma unhrainjin usgaggan af \u00feamma mann; manag auk mel frawalw ina, jah bundans was eisarnabandjom jah fotubandjom fastai\u00fes was, jah dishniupands \u00feos bandjos draibi\u00fes was fram \u00feamma unhul\u00fein ana au\u00feidos.\n8:30 [CA] frah \u00fean ina Iesus qi\u00feands: hva ist namo \u00feein? \u00fearuh qa\u00fe: harjis; unte unhul\u00feons managos gali\u00feun in ina.\n8:31 [CA] jah bad ina ei ni anabudi im in afgrundi\u00fea galei\u00fean.\n8:32 [CA] wasu\u00fe~\u00fean jainar hairda sweine managaize haldanaize in \u00feamma fairgunja; jah bedun ina ei uslaubidedi im in \u00feo galei\u00fean. jah uslaubida im.\n8:33 [CA] usgaggandans \u00fean suns \u00feai unhul\u00feans af \u00feamma mann gali\u00feun in \u00feo sweina, jah rann sa wri\u00feus and driuson in \u00feana marisaiw jah afhvapnodedun.\n8:34 [CA] gasaihvandans \u00fean \u00feai haldandans \u00feata waur\u00feano ga\u00felauhun jah gataihun in baurg jah in weihsa.\n8:35 [CA] usiddjedun \u00fean saihvan \u00feata waur\u00feano jah qemun at Iesua jah bigetun sitandan \u00feana mannan af \u00feammei unhul\u00feons usiddjedun, gawasidana jah fra\u00fejandan faura fotum Iesuis, jah ohtedun.\n8:36 [CA] gataihun \u00fean im jah \u00feai gasaihvandans hvaiwa ganas sa daimonareis.\n8:37 [CA] jah bedun ina allai gaujans \u00feize Gaddarene galei\u00fean fairra sis, unte agisa mikilamma dishabaidai wesun. i\u00fe is galei\u00feands in skip gawandida sik.\n8:38 [CA] ba\u00fe \u00fean ina sa wair af \u00feammei \u00feos unhul\u00feons usiddjedun, ei wesi mi\u00fe imma; fralailot \u00fean ina Iesus qi\u00feands:\n8:39 [CA] gawandei \u00feuk du garda \u00feeinamma jah usspillo hvan filu gatawida \u00feus gu\u00fe. jah galai\u00fe and baurg alla merjands hvan filu gatawida imma Iesus.\n8:40 [CA] war\u00fe \u00fean, mi\u00fe\u00feanei gawandida sik Iesus, andnam ina managei; wesun auk allai beidandans is.\n8:41 [CA] jah sai, qam wair \u00feizei namo Iaeirus, sah faurama\u00feleis swnagogais was, jah driusands faura fotum Iesuis bad ina gaggan in gard seinana;\n8:42 [CA] unte dauhtar ainoho was imma swe wintriwe twalibe, jah so swalt. mi\u00fe\u00feanei \u00fean iddja is, manageins \u00feraihun ina.\n8:43 [CA] jah qino wisandei in runa blo\u00feis jera twalif, soei in lekjans fraqam allamma aigina seinamma, jah ni mahta was fram ainomehun galeikinon,\n8:44 [CA] atgaggandei du aftaro attaitok skauta wastjos is, jah suns gasto\u00fe sa runs blo\u00feis izos.\n8:45 [CA] jah qa\u00fe Iesus: hvas sa tekands mis? laugnjandam \u00fean allaim qa\u00fe Paitrus jah \u00feai mi\u00fe imma: talzjand, manageins bihvairband \u00feuk jah \u00fereihand, jah qi\u00feis: hvas sa tekands mis?\n8:46 [CA] \u00fearuh is qa\u00fe: taitok mis sums; ik auk ufkun\u00fea maht usgaggandein af mis.\n8:47 [CA] gasaihvandei \u00fean so qino \u00featei ni galaugnida, reirandei jah atdriusandei du imma, in \u00feizei attaitok imma, gataih imma in andwair\u00feja allaizos manageins jah hvaiwa gahailnoda suns.\n8:48 [CA] i\u00fe Iesus qa\u00fe du izai: \u00ferafstei \u00feuk, dauhtar: galaubeins \u00feeina ganasida \u00feuk; gagg in gawair\u00feja.\n8:49 [CA] nauh\u00fean imma rodjandin gaggi\u00fe sums manne fram \u00feis faurama\u00feleis swnagogais, qi\u00feands du imma \u00featei gadau\u00fenoda dauhtar \u00feeina; ni draibei \u00feana laisari.\n8:50 [CA] i\u00fe is gahausjands andhof imma qi\u00feands: ni faurhtei; \u00featainei galaubei, jah ganasjada.\n8:51 [CA] qimands \u00fean in garda ni fralailot ainohun inngaggan, alja Paitru jah Iakobu jah Iohannen jah \u00feana attan \u00feizos maujos jah ai\u00feein.\n8:52 [CA] gaigrotun \u00fean allai jah faiflokun \u00feo. \u00fearuh qa\u00fe: ni greti\u00fe, unte ni gaswalt, ak slepi\u00fe.\n8:53 [CA] jah bihlohun ina gasaihvandans \u00featei gaswalt.\n8:54 [CA] \u00feanuh is usdreibands allans ut jah fairgreipands handu izos wopida qi\u00feands: mawi, urreis!\n8:55 [CA] jah gawandida ahman izos, jah usto\u00fe suns. jah anabaud izai giban mat.\n8:56 [CA] jah usgeisnodedun fadrein izos; i\u00fe is faurbaud im ei mann ni qi\u00feeina \u00feata waur\u00feano.\n9:1 [CA] Gahaitands \u00fean \u00feans twalif apaustauluns atgaf im maht jah waldufni ufar allaim unhul\u00feom jah sauhtins gahailjan.\n9:2 [CA] jah insandida ins merjan \u00feiudangardja gudis jah gahailjan allans \u00feans unhailans.\n9:3 [CA] jah qa\u00fe du im: ni waiht nimai\u00fe in wig; nih waluns nih matibalg nih hlaib nih skattans, nih \u00fean tweihnos paidos haban.\n9:4 [CA] jah in \u00feanei gard gaggai\u00fe, \u00fear salji\u00fe jah \u00fea\u00feroh usgaggai\u00fe.\n9:5 [CA] jah swa managai swe ni andnimaina izwis, usgaggandans us \u00feizai baurg jainai jah mulda af fotum izwaraim afhrisjai\u00fe du weitwodi\u00feai ana ins.\n9:6 [CA] usgaggandans \u00fean \u00feairhiddjedun and haimos wailamerjandans jah leikinondans and all.\n9:7 [CA] gahausida \u00fean Herodis sa taitrarkes \u00feo waur\u00feanona fram imma alla jah \u00feahta, unte qe\u00feun sumai \u00featei Iohannes urrais us dau\u00feaim.\n9:8 [CA] sumai \u00fean qe\u00feun Helias ataugida sik; sumaiu\u00fe~\u00fean \u00featei praufetus sums \u00feize airizane ussto\u00fe.\n9:9 [CA] jah qa\u00fe Herodes: Iohannau ik haubi\u00fe afmaimait, i\u00fe hvas ist sa, bi \u00feanei ik hausja swaleik? jah sokida ina gasaihvan.\n9:10 [CA] jah gawandjandans sik apaustauleis usspillodedun imma, swa filu swe gatawidedun. jah andnimands ins afiddja sundro ana sta\u00fe au\u00fejana baurgs namnidaizos Baidsai\u00efdan.\n9:11 [CA] i\u00fe \u00feos manageins fin\u00feandeins laistidedun afar imma, jah andnimands ins rodida du im \u00feo bi \u00feiudangardja gudis jah \u00feans \u00fearbans leikinassaus gahailida.\n9:12 [CA] \u00feanuh dags ju\u00fean dugann hneiwan. atgaggandans \u00fean du imma \u00feai twalif qe\u00feun du imma: fralet \u00feo managein, ei galei\u00feandans in \u00feos bisunjane haimos jah weihsa saljaina jah bugjaina sis matins, unte her in au\u00fejamma stada sium.\n9:13 [CA] \u00feanuh qa\u00fe du im: gibi\u00fe im jus matjan. i\u00fe eis qe\u00feun du imma: nist hindar uns maizo fimf hlaibam, jah fiskos twai, niba \u00feau \u00featei weis gaggandans bugjaima allai \u00feizai manaseidai matins.\n9:14 [CA] wesun auk swe fimf \u00feusundjos waire. qa\u00fe \u00fean du siponjam seinaim: gawaurkei\u00fe im anakumbjan kubituns, ana hvarjanoh fimf tiguns.\n9:15 [CA] jah gatawidedun swa jah gatawidedun anakumbjan allans.\n9:16 [CA] nimands \u00fean \u00feans fimf hlaibans jah twans fiskans, insaihvands du himina ga\u00feiu\u00feida ins jah gabrak jah gaf siponjam du faurlagjan \u00feizai managein.\n9:17 [CA] jah matidedun jah sadai waur\u00feun allai; jah ushafan war\u00fe, \u00featei aflifnoda im gabruko, tainjons twalif.\n9:18 [CA] jah war\u00fe, mi\u00fe\u00feanei was is bidjands sundro, gamotidedun imma siponjos is, jah frah ins qi\u00feands: hvana mik qi\u00feand wisan \u00feos manageins?\n9:19 [CA] i\u00fe eis andhafjandans qe\u00feun: Iohannen \u00feana daupjand, an\u00fearai \u00fean Heleian, sumai \u00fean \u00featei praufetus sums \u00feize airizane ussto\u00fe.\n9:20 [CA] qa\u00fe \u00fean du im: a\u00fe\u00fean jus hvana mik qi\u00fei\u00fe wisan? andhafjands \u00fean Paitrus qa\u00fe: \u00feu is Xristus, sunus gudis.\n9:21 [CA] i\u00fe is \u00fean gahvotjands im faurbau\u00fe ei mann ni qi\u00feeina \u00feata;\n9:22 [CA] qi\u00feands \u00featei skal sunus mans manag winnan jah uskusans fram sinistam wair\u00fean jah gudjam jah bokarjam jah usqiman jah \u00feridjin daga urreisan.\n9:23 [CA] qa\u00fe \u00fean du allaim: jabai hvas wili afar mis gaggan, afaikai sik silban jah nimai galgan seinana dag hvanoh jah laistjai mik.\n9:24 [CA] saei allis wili saiwala seina nasjan, fraqistei\u00fe izai; a\u00fe\u00fean saei fraqistei\u00fe saiwalai seinai in meina, ganasji\u00fe \u00feo.\n9:25 [CA] hvo allis \u00feaurfte gatauji\u00fe sis manna, gageigands \u00feo manased alla, i\u00fe sis silbin fraqistjands ai\u00fe\u00feau gaslei\u00fejands?\n9:26 [CA] saei allis skamai\u00fe sik meina ai\u00fe\u00feau meinaize waurde, \u00feizuh sunus mans skamaid sik, bi\u00fee qimi\u00fe in wul\u00feu seinamma jah attins jah \u00feize weihane aggele.\n9:27 [CA] qi\u00feuh \u00fean izwis sunja: sind sumai \u00feize her standandane, \u00feaiei ni kausjand dau\u00feau, unte gasaihvand \u00feiudinassau gudis.\n9:28 [CA] waur\u00feun \u00fean afar \u00feo waurda swe dagos ahtau, ganimands Paitru jah Iakobu jah Iohannen usiddja in fairguni bidjan.\n9:29 [CA] jah war\u00fe, mi\u00fe\u00feanei ba\u00fe is, siuns andwair\u00fejis is an\u00feara jah gawaseins is hveita skeinandei.\n9:30 [CA] jah sai, wairos twai mi\u00ferodidedun imma, \u00feaiei wesun Moses jah Helias;\n9:31 [CA] \u00feai gasaihvanans in wul\u00feau qe\u00feun urruns is, \u00feoei skulda usfulljan in Iairusalem.\n9:32 [CA] i\u00fe Paitrus jah \u00feai mi\u00fe imma wesun kauridai slepa: gawaknandans \u00fean gasehvun wul\u00feu is jah \u00feans twans wairans \u00feans mi\u00festandandans imma.\n9:33 [CA] jah war\u00fe, mi\u00fe\u00feanei afskaiskaidun sik af imma, qa\u00fe Paitrus du Iesua: talzjand, god ist unsis her wisan, jah gawaurkjaima hlei\u00feros \u00ferins, aina \u00feus jah aina Mose jah aina Helijin, ni witands hva qi\u00fei\u00fe.\n9:34 [CA] \u00feata \u00fean imma qi\u00feandin war\u00fe milhma jah ufarskadwida ins; faurhtidedun \u00fean in \u00feammei jainai qemun in \u00feamma milhmin.\n9:35 [CA] jah stibna war\u00fe us \u00feamma milhmin qi\u00feandei: sa ist sunus meins sa liuba, \u00feamma hausjai\u00fe.\n9:36 [CA] jah mi\u00fe\u00feanei war\u00fe so stibna, bigitans war\u00fe Iesus ains. jah eis \u00feahaidedun jah mann ni gataihun in jainaim dagam ni waiht \u00feizei gasehvun.\n9:37 [CA] war\u00fe \u00fean in \u00feamma daga, dala\u00fe atgaggandam im af fairgunja, gamotida imma manageins filu.\n9:38 [CA] jah sai, manna us \u00feizai managein ufwopida qi\u00feands: laisari, bidja \u00feuk insaihvan du sunu meinamma, unte ainaha mis ist.\n9:39 [CA] jah sai, ahma nimi\u00fe ina unhrains jah anaks hropei\u00fe jah tahji\u00fe ina mi\u00fe hva\u00feon jah halisaiw aflinni\u00fe af imma gabrikands ina.\n9:40 [CA] jah ba\u00fe siponjans \u00feeinans ei usdribeina imma, jah ni mahtedun.\n9:41 [CA] andhafjands \u00fean Iesus qa\u00fe: o kuni ungalaubjando jah inwindo, und hva siau at izwis jah \u00feulau izwis? attiuh \u00feana sunu \u00feeinana hidrei.\n9:42 [CA] \u00fearuh nauh\u00fean duatgaggandin imma, gabrak ina sa unhul\u00fea jah tahida. gahvotida \u00fean Iesus ahmin \u00feamma unhrainjin jah gahailida \u00feana magu jah atgaf ina attin is.\n9:43 [CA] usfilmans \u00fean waur\u00feun allai ana \u00feizai mikilein gudis. at allaim \u00fean sildaleikjandam bi alla \u00feoei gatawida Iesus [qa\u00fe Paitrus: frauja, duhve weis ni mahtedum usdreiban \u00feamma? i\u00fe Iesus qa\u00fe: \u00feata kuni ni usgaggi\u00fe, nibai in bidom jah in fastubnja.] qa\u00fe \u00fean du siponjam seinaim:\n9:44 [CA] lagji\u00fe jus in ausona izwara \u00feo waurda, unte sunus mans skulds ist atgiban in handuns manne.\n9:45 [CA] i\u00fe eis ni fro\u00feun \u00feamma waurda, jah was gahuli\u00fe faura im, ei ni fro\u00feeina imma; jah ohtedun fraihnan ina bi \u00feata waurd.\n9:46 [CA] galai\u00fe \u00fean mitons in ins, \u00feata hvarjis \u00feau ize maists wesi.\n9:47 [CA] i\u00fe Iesus gasaihvands \u00feo miton hairtins ize, fairgreipands barn gasatida faura sis\n9:48 [CA] jah qa\u00fe du im: sahvazuh saei andnimi\u00fe \u00feata barn ana namin meinamma, mik andnimi\u00fe; jah sahvazuh saei mik andnimi\u00fe, andnimi\u00fe \u00feana sandjandan mik; unte sa minnista wisands in allaim izwis, sa wair\u00fei\u00fe mikils.\n9:49 [CA] andhafjands \u00fean Iohannes qa\u00fe: talzjand, gasehvum sumana ana \u00feeinamma namin usdreibandan unhul\u00feons jah waridedun imma, unte ni laistei\u00fe mi\u00fe unsis.\n9:50 [CA] jah qa\u00fe du im Iesus: ni warji\u00fe, unte saei nist wi\u00fera izwis, faur izwis ist. [ni ainshun auk ist manne, saei ni gawaurkjai maht in namin meinamma.]\n9:51 [CA] war\u00fe \u00fean in \u00feammei usfulnodedun dagos andanumtais is, jah is andwair\u00fei seinata gatulgida du gaggan in Iairusalem.\n9:52 [CA] jah insandida airuns faura sis, jah gaggandans gali\u00feun in haim Samareite, swe manwjan imma.\n9:53 [CA] jah ni andnemun ina, unte andwair\u00fei is was gaggando du Iairusalem.\n9:54 [CA] gasaihvandans \u00fean siponjos is Iakobus jah Iohannes qe\u00feun: frauja, wileizu ei qi\u00feaima, fon atgaggai us himina jah fraqimai im, swe jah Heleias gatawida?\n9:55 [CA] gawandjands \u00fean gasok im jah qa\u00fe du im: niu witu\u00fe hvis ahmane siju\u00fe?\n9:56 [CA] unte sunus mans ni qam saiwalom qistjan, ak nasjan. jah iddjedun in an\u00feara haim.\n9:57 [CA] war\u00fe \u00fean gaggandam im in wiga qa\u00fe sums du imma: laistja \u00feuk \u00feishvaduh \u00feadei gaggis, frauja.\n9:58 [CA] jah qa\u00fe du imma Iesus: fauhons grobos aigun jah fuglos himinis sitlans; i\u00fe sunus mans ni habai\u00fe hvar haubi\u00fe galagjai.\n9:59 [CA] qa\u00fe \u00fean du an\u00fearamma: laistei mik; i\u00fe is qa\u00fe: frauja, uslaubei mis galei\u00fean faur\u00feis jah usfilhan attan meinana.\n9:60 [CA] qa\u00fe \u00fean du imma Iesus: let \u00feans dau\u00feans usfilhan seinans nawins: i\u00fe \u00feu gagg jah gaspillo \u00feiudangardja gudis.\n9:61 [CA] qa\u00fe \u00fean jah an\u00fear: laistja \u00feuk, frauja; i\u00fe faur\u00feis uslaubei mis andqi\u00fean \u00feaim \u00feaiei sind in garda meinamma.\n9:62 [CA] qa\u00fe \u00fean du imma Iesus: ni manna uslagjands handu seina ana hohan jah saihvands aftra, gatils ist in \u00feiudangardja gudis.\n10:1 [CA] Afaru\u00fe~\u00fean \u00feata ustaiknida frauja jah an\u00fearans sibuntehund jah insandida ins twans hvanzuh faura andwair\u00feja seinamma in all baurge jah stade, \u00feadei munaida is gaggan.\n10:2 [CA] qa\u00feuh \u00fean du im: asans managa, i\u00fe waurstwjans fawai; bidji\u00fe nu fraujan asanais ei ussatjai waurstwjans in \u00feo asan seina.\n10:3 [CA] gaggi\u00fe, sai ik insandja izwis swe lamba in midumai wulfe.\n10:4 [CA] ni bairai\u00fe pugg nih matibalg nih gaskohi; ni mannanhun bi wig goljai\u00fe.\n10:5 [CA] in \u00feane gardei inngaggai\u00fe, frumist qi\u00feai\u00fe: gawair\u00fei \u00feamma garda.\n10:6 [CA] jah jabai sijai jainar sunus gawair\u00fejis, gahveilai\u00fe sik ana imma gawair\u00fei izwar; i\u00fe jabai ni, du izwis gawandjai.\n10:7 [CA] inuh \u00fean \u00feamma garda wisai\u00fe matjandans jah driggkandans \u00feo at im; wair\u00fes auk ist waurstwja mizdons seinaizos. ni farai\u00fe us garda in gard.\n10:8 [CA] jah in \u00feoei baurge gaggai\u00fe jah andnimaina izwis, matjai\u00fe \u00feata faurlagido izwis.\n10:9 [CA] jah lekino\u00fe \u00feans in izai siukans jah qi\u00fei\u00fe du im: atnehvida ana izwis \u00feiudangardi gudis.\n10:10 [CA] i\u00fe in \u00feoei baurge inngaggai\u00fe jah ni andnimaina izwis, usgaggandans ana fauradaurja izos qi\u00feai\u00fe:\n10:11 [CA] jah stubju \u00feana gahaftnandan unsis us \u00feizai baurg izwarai ana fotuns unsarans afhrisjam izwis; swe\u00feauh \u00feata witei\u00fe \u00featei atnehvida sik ana izwis \u00feiudangardi gudis.\n10:12 [CA] qi\u00fea izwis \u00featei Saudaumjam in jainamma daga sutizo wair\u00fei\u00fe \u00feau \u00feizai baurg jainai.\n10:13 [CA] wai \u00feus Kaurazein, wai \u00feus Bai\u00fesa\u00efdan! Unte i\u00fe in Twrai jah Seidonai waur\u00feeina mahteis \u00feozei waur\u00feun in izwis, airis \u00feau in sakkum jah azgon sitandeins ga\u00efdreigodedeina.\n10:14 [CA] swe\u00feauh Twrai jah Seidonai sutizo wair\u00fei\u00fe in daga stauos \u00feau izwis.\n10:15 [CA] jah \u00feu Kafarnaum, \u00feu und himin ushauhido, und halja gadrausjaza.\n10:16 [CA] saei hausei\u00fe izwis, mis hausei\u00fe, jah saei ufbriki\u00fe izwis, mis ufbriki\u00fe; i\u00fe saei ufbriki\u00fe mis, ufbriki\u00fe \u00feamma sandjandin mik.\n10:17 [CA] gawandidedun \u00fean sik \u00feai sibuntehund mi\u00fe fahedai qi\u00feandans: frauja, jah unhul\u00feons ufhausjand unsis in namin \u00feeinamma.\n10:18 [CA] qa\u00fe \u00fean du im: gasahv Satanan swe lauhmunja driusandan us himina.\n10:19 [CA] sai, atgaf izwis waldufni trudan ufaro waurme jah skaurpjono jah ana allai mahtai fijandis, jah waihte ainohun izwis ni gaska\u00feji\u00fe.\n10:20 [CA] swe\u00feauh \u00feamma ni fagino\u00fe, ei \u00feai ahmans izwis ufhausjand: i\u00fe faginod in \u00feammei namna izwara gamelida sind in himinam.\n10:21 [CA] inuh \u00feizai hveilai swegnida ahmin Iesus jah qa\u00fe: andhaita \u00feus, atta, frauja himinis jah air\u00feos, unte affalht \u00feo faura snutraim jah frodaim jah andhulides \u00feo niuklahaim. Jai, atta, unte swa war\u00fe galeikai\u00fe in andwair\u00feja \u00feeinamma. jah gawandi\u00fes du siponjam seinaim qa\u00fe:\n10:22 [CA] all mis atgiban ist fram attin meinamma, jah ni hvashun kann hvas ist sunus, alja atta, jah hvas ist atta, alja sunus, jah \u00feammei wili sunus andhuljan.\n10:23 [CA] jah gawandi\u00fes du siponjam seinaim sundro qa\u00fe: audaga augona, \u00feoei saihvand \u00feoei jus saihvi\u00fe.\n10:24 [CA] qi\u00fea auk izwis \u00featei managai praufeteis jah \u00feiudanos wildedun saihvan \u00featei jus saihvi\u00fe jah ni gasehvun, jah hausjan \u00featei jus [ga]hausei\u00fe jah ni hausidedun.\n10:25 [CA] jah sai, witodafasteis sums usto\u00fe fraisands ina jah qi\u00feands: laisari, hva taujands libainais aiweinons arbja wair\u00fea?\n10:26 [CA] \u00fearuh qa\u00fe du imma: in witoda hva gameli\u00fe ist? hvaiwa ussiggwis?\n10:27 [CA] i\u00fe is andhafjands qa\u00fe: frijos fraujan gu\u00fe \u00feeinana us allamma hairtin \u00feeinamma jah us allai saiwalai \u00feeinai jah us allai mahtai \u00feeinai jah us allai gahugdai \u00feeinai, jah nehvundjan \u00feeinana swe \u00feuk silban.\n10:28 [CA] \u00feanuh qa\u00fe du imma: raihtaba andhoft; \u00feata tawei jah libais.\n10:29 [CA] i\u00fe is wiljands uswaurhtana sik domjan qa\u00fe du Iesua: an hvas ist mis nehvundja?\n10:30 [CA] andhafjands \u00fean Iesus qa\u00fe: manna galai\u00fe af Iairusalem in Iaireikon jah in waidedjans frarann, \u00feaiei jah biraubodedun ina jah banjos analag(jandans) . . . .\n14:9 [CA] . . . . (\u00fea)na aftumistan haban sta\u00fe.\n14:10 [CA] ak \u00fean haitaizau, atgaggands anakumbei ana \u00feamma aftumistin stada, ei bi\u00fee qimai saei haihait \u00feuk, qi\u00feai du \u00feus: frijond, usgagg hauhis. \u00feanuh ist \u00feus hauhi\u00fea faura \u00feaim mi\u00feanakumbjandam \u00feus.\n14:11 [CA] unte hvazuh saei hauhei\u00fe sik silba, gahnaiwjada, jah saei hnaiwei\u00fe sik silban, ushauhjada.\n14:12 [CA] qa\u00feu\u00fe~\u00fean jah \u00feamma haitandin sik: \u00fean waurkjais undaurnimat ai\u00fe\u00feau nahtamat, ni haitais frijonds \u00feeinans nih bro\u00feruns \u00feeinans nih ni\u00fejans \u00feeinans nih garaznans gabeigans, ibai aufto jah eis aftra haitaina \u00feuk jah wair\u00fei\u00fe \u00feus usguldan;\n14:13 [CA] ak \u00fean waurkjais dauht, hait unledans, gamaidans, haltans, blindans.\n14:14 [CA] jah audags wair\u00feis, unte eis ni haband usgildan \u00feus; usgildada auk \u00feus in ustassai \u00feize uswaurhtane.\n14:15 [CA] gahausjands \u00fean sums \u00feizei anakumbjandane \u00feata qa\u00fe du imma: audags saei matji\u00fe hlaif in \u00feiudangardjai gudis.\n14:16 [CA] \u00fearuh qa\u00fe imma frauja: manna sums gawaurhta nahtamat mikilana jah haihait managans.\n14:17 [CA] jah insandida skalk seinana hveilai nahtamatis qi\u00fean \u00feaim haitanam: gaggi\u00fe, unte ju manwu ist allata.\n14:18 [CA] jah dugunnun suns faurqi\u00fean allai. sa frumista qa\u00fe: land bauhta jah \u00fearf galei\u00fean jah saihvan \u00feata; bidja \u00feuk, habai mik faurqi\u00feanana.\n14:19 [CA] jah an\u00fear qa\u00fe: juka auhsne usbauhta fimf jah gagga kausjan \u00feans; bidja \u00feuk, habai mik faurqi\u00feanana.\n14:20 [CA] jah sums qa\u00fe: qen liugaida jah du\u00fee ni mag qiman.\n14:21 [CA] jah qimands sa skalks gataih fraujin seinamma \u00feata. \u00feanuh \u00fewairhs sa gardawaldands qa\u00fe du skalka seinamma: usgagg sprauto in gatwons jah staigos baurgs jah unledans jah gamaidans jah blindans jah haltans attiuh hidre.\n14:22 [CA] jah qa\u00fe sa skalks: frauja, war\u00fe swe anabaust, jah nauh stads ist.\n14:23 [CA] jah qa\u00fe sa frauja du \u00feamma skalka: usgagg and wigans jah fa\u00feos jah nau\u00feei innatgaggan, ei usfulnai gards meins.\n14:24 [CA] qi\u00fea allis izwis \u00featei ni ainshun manne jainaize \u00feize faura haitanane kausei\u00fe \u00feis nahtamatis meinis.\n14:25 [CA] mi\u00feiddjedun \u00fean imma hiuhmans managai, jah gawandjands sik qa\u00fe du im:\n14:26 [CA] jabai hvas gaggi\u00fe du mis jah ni fijai\u00fe attan seinana jah ai\u00feein jah qen jah barna jah bro\u00feruns jah swistruns, nauhu\u00fe~\u00fean seina silbins saiwala, ni mag meins siponeis wisan.\n14:27 [CA] jah saei ni bairi\u00fe galgan seinana jah gaggai afar mis, ni mag wisan meins siponeis.\n14:28 [CA] izwara hvas raihtis wiljands kelikn timbrjan, niu frumist gasitands rahnei\u00fe manwi\u00feo habaiu du ustiuhan;\n14:29 [CA] ibai aufto, bi\u00fee gasatidedi grunduwaddju jah ni mahtedi ustiuhan, allai \u00feai gasaihvandans duginnaina bilaikan ina,\n14:30 [CA] qi\u00feandans \u00featei sa manna dustodida timbrjan jah ni mahta ustiuhan.\n14:31 [CA] ai\u00fe\u00feau hvas \u00feiudans gaggands stigqan wi\u00fera an\u00fearana \u00feiudan du wigan na, niu gasitands faur\u00feis \u00feankei\u00fe, siaiu mahteigs mi\u00fe taihun \u00feusundjom gamotjan \u00feamma mi\u00fe twaim tigum \u00feusundjo gaggandin ana sik?\n14:32 [CA] ai\u00fe\u00feau [jabai nist mahteigs] nauh\u00feanuh fairra imma wisandin insandjands airu bidji\u00fe gawair\u00fejis.\n14:33 [CA] swah nu hvarjizuh izwara saei ni afqi\u00fei\u00fe allamma aigina seinamma, ni mag wisan meins siponeis.\n14:34 [CA] god salt; i\u00fe jabai salt baud wair\u00fei\u00fe, hve gasupoda?\n14:35 [CA] nih du air\u00feai, ni du maihstau fagr ist; ut uswairpand imma. saei habai ausona [ga]hausjandona, gahausjai.\n15:1 [CA] Wesunu\u00fe~\u00fean imma nehvjandans sik allai motarjos jah frawaurhtai hausjan imma.\n15:2 [CA] jah birodidedun Fareisaieis jah bokarjos, qi\u00feandans \u00featei sa frawaurhtans andnimi\u00fe jah mi\u00fematji\u00fe im.\n15:3 [CA] qa\u00fe \u00fean du im \u00feo gajukon qi\u00feands:\n15:4 [CA] hvas manna izwara aigands taihuntehund lambe jah fraliusands ainamma \u00feize, niu bilei\u00fei\u00fe \u00feo niuntehund jah niun ana au\u00feidai jah gaggi\u00fe afar \u00feamma fralusanin, unte bigiti\u00fe \u00feata?\n15:5 [CA] Jah bigitands uslagji\u00fe ana amsans seinans faginonds,\n15:6 [CA] jah qimands in garda gala\u00feo\u00fe frijonds jah garaznans qi\u00feands du im: fagino\u00fe mi\u00fe mis \u00feammei bigat lamb mein \u00feata fralusano.\n15:7 [CA] qi\u00fea izwis \u00featei swa faheds wair\u00fei\u00fe in himina in ainis frawaurhtis idreigondins \u00feau in niuntehundis jah niune garaihtaize \u00feaiei ni \u00feaurbun idreigos.\n15:8 [CA] ai\u00fe\u00feau suma qino drakmans habandei taihun, jabai fraliusi\u00fe drakmin ainamma, niu tandei\u00fe lukarn jah usbaugei\u00fe razn jah sokei\u00fe glaggwaba, unte bigiti\u00fe?\n15:9 [CA] jah bigitandei gahaiti\u00fe frijondjos jah garaznons qi\u00feandei: fagino\u00fe mi\u00fe mis, unte bigat drakman \u00feammei fralaus.\n15:10 [CA] swa qi\u00fea izwis, faheds wair\u00fei\u00fe in andwair\u00feja aggele gudis in ainis idreigondins frawaurhtis.\n15:11 [CA] qa\u00feu\u00fe~\u00fean: manne sums aihta twans sununs.\n15:12 [CA] jah qa\u00fe sa juhiza ize du attin: atta, gif mis, sei undrinnai mik dail aiginis; jah disdailida im swes sein.\n15:13 [CA] jah afar ni managans dagans brahta samana allata sa juhiza sunus jah aflai\u00fe in land fairra wisando jah jainar distahida \u00feata swes seinata libands usstiuriba.\n15:14 [CA] bi\u00fee \u00fean frawas allamma, war\u00fe huhrus abrs and gawi jainata, jah is dugann ala\u00fearba wair\u00fean.\n15:15 [CA] jah gaggands gahaftida sik sumamma baurgjane jainis gaujis, jah insandida ina hai\u00fejos seinaizos haldan sweina.\n15:16 [CA] jah gairnida sad itan haurne, \u00feoei matidedun sweina, jah manna imma ni gaf.\n15:17 [CA] qimands \u00fean in sis qa\u00fe: hvan filu asnje attins meinis ufarassau haband hlaibe, i\u00fe ik huhrau fraqistna.\n15:18 [CA] usstandands gagga du attin meinamma jah qi\u00fea du imma: atta, frawaurhta mis in himin jah in andwair\u00feja \u00feeinamma;\n15:19 [CA] ju \u00feanasei\u00fes ni im wair\u00fes ei haitaidau sunus \u00feeins; gatawei mik swe ainana asnje \u00feeinaize.\n15:20 [CA] jah usstandands qam at attin seinamma. nauh\u00feanuh \u00fean fairra wisandan gasahv ina atta is jah infeinoda jah \u00feragjands draus ana hals is jah kukida imma.\n15:21 [CA] jah qa\u00fe imma sa sunus: atta, frawaurhta in himin jah in andwair\u00feja \u00feeinamma, ju \u00feanasei\u00fes ni im wair\u00fes ei haitaidau sunus \u00feeins.\n15:22 [CA] qa\u00fe \u00fean sa atta du skalkam seinaim: sprauto bringi\u00fe wastja \u00feo frumiston jah gawasji\u00fe ina jah gibi\u00fe figgragul\u00fe in handu is jah gaskohi ana fotuns is;\n15:23 [CA] jah bringandans stiur \u00feana alidan ufsnei\u00fei\u00fe, jah matjandans wisam waila;\n15:24 [CA] unte sa sunus meins dau\u00fes was jah gaqiunoda, jah fralusans was jah bigitans war\u00fe; jah dugunnun wisan.\n15:25 [CA] wasu\u00fe~\u00fean sunus is sa al\u00feiza ana akra; jah qimands atiddja nehv razn jah gahausida saggwins jah laikins.\n15:26 [CA] jah athaitands sumana magiwe frahuh hva wesi \u00feata.\n15:27 [CA] \u00fearuh is qa\u00fe du imma \u00featei bro\u00fear \u00feeins qam, jah ufsnai\u00fe atta \u00feeins stiur \u00feana alidan, unte hailana ina andnam.\n15:28 [CA] \u00feanuh modags war\u00fe jah ni wilda inngaggan, i\u00fe atta is usgaggands ut bad ina.\n15:29 [CA] \u00fearuh is andhafjands qa\u00fe du attin: sai, swa filu jere skalkinoda \u00feus jah ni hvanhun anabusn \u00feeina ufariddja, jah mis ni aiw atgaft gaitein, ei mi\u00fe frijondam meinaim biwesjau;\n15:30 [CA] i\u00fe \u00fean sa sunus \u00feeins, saei fret \u00feein swes mi\u00fe kalkjom, qam, ufsnaist imma stiur \u00feana alidan.\n15:31 [CA] \u00fearuh qa\u00fe du imma: barnilo, \u00feu sinteino mi\u00fe mis [wast jah] is, jah all \u00feata mein \u00feein ist;\n15:32 [CA] waila wisan jah faginon skuld was, unte bro\u00fear \u00feeins dau\u00fes was jah gaqiunoda, jah fralusans jah bigitans war\u00fe.\n16:1 [CA] Qa\u00feu\u00fe~\u00fean du siponjam seinaim: manne sums was gabeigs, saei aihta fauragaggjan, jah sa frawrohi\u00fes war\u00fe du imma ei distahidedi aigin is.\n16:2 [CA] jah atwopjands ina qa\u00fe du imma: duhve \u00feata hausja fram \u00feus? usgif ra\u00fejon fauragaggjis \u00feeinis, ni magt auk ju \u00feanamais fauragaggja wisan.\n16:3 [CA] qa\u00fe \u00fean in sis sa fauragaggja: hva taujau, \u00feandei frauja meins afnimi\u00fe fauragaggi af mis? graban ni mag, bidjan skama mik.\n16:4 [CA] and\u00feahta mik hva taujau, ei \u00fean, bi\u00fee afsatjaidau us fauragaggja, andnimaina mik in gardins seinans.\n16:5 [CA] jah athaitands ainhvarjanoh faihuskulane fraujins seinis qa\u00fe \u00feamma frumistin: hvan filu skalt fraujin meinamma?\n16:6 [CA] \u00fearuh qa\u00fe: taihuntaihund kase alewis. jah qa\u00fe du imma: nim \u00feus bokos jah gasitands sprauto gamelei fim tiguns.\n16:7 [CA] \u00fea\u00feroh \u00fean du an\u00fearamma qa\u00fe: a\u00fe\u00fean \u00feu, hvan filu skalt? i\u00fe is qa\u00fe: taihuntaihund mitade kaurnis. jah qa\u00fe du imma: nim \u00feus bokos jah melei ahtautehund.\n16:8 [CA] jah hazida sa frauja \u00feana fauragaggjan inwindi\u00feos, unte frodaba gatawida; unte \u00feai sunjos \u00feis aiwis frodozans sunum liuhadis in kunja seinamma sind.\n16:9 [CA] jah ik izwis qi\u00fea: taujai\u00fe izwis frijonds us faihu\u00feraihna inwindi\u00feos, ei \u00fean ufligai\u00fe, andnimaina izwis in aiweinos hlei\u00feros.\n16:10 [CA] saei triggws ist in leitilamma jah in managamma triggws ist; jah sa in leitilamma untriggwa jah in managamma untriggws ist.\n16:11 [CA] jabai nu in inwindamma faihu\u00feraihna triggwai ni waur\u00feu\u00fe, \u00feata sunjeino hvas izwis galaubei\u00fe?\n16:12 [CA] jah jabai in \u00feamma frama\u00fejin triggwai ni waur\u00feu\u00fe, \u00feata izwar hvas izwis gibi\u00fe?\n16:13 [CA] ni ainshun \u00feiwe mag twaim fraujam skalkinon; andizuh ainana fijai\u00fe jah an\u00fearana frijo\u00fe, ai\u00fe\u00feau ainamma andtilo\u00fe, i\u00fe an\u00fearamma frakann; ni magu\u00fe guda skalkinon jah faihu\u00feraihna.\n16:14 [CA] gahausidedun \u00fean \u00feo alla jah \u00feai Fareisaieis, faihufrikai wisandans, jah bimampidedun ina.\n16:15 [CA] jah qa\u00fe du im: jus siju\u00fe juzei garaihtans domei\u00fe izwis silbans in andwair\u00feja manne; i\u00fe gu\u00fe kann hairtona izwara, unte \u00feata hauho in mannam andaset in andwair\u00feja gudis.\n16:16 [CA] wito\u00fe jah praufeteis und Iohannen; \u00fea\u00feroh \u00feiudangardi gudis wailamerjada jah hvazuh in izai nau\u00fejada.\n16:17 [CA] i\u00fe azetizo ist himin jah air\u00fea hindarlei\u00fean \u00feau witodis ainana writ gadriusan.\n16:18 [CA] hvazuh sa afletands qen seina jah liugands an\u00feara horino\u00fe, jah hvazuh saei afleitana liugai\u00fe, horino\u00fe.\n16:19 [CA] a\u00fe\u00fean manne sums was gabigs jah gawasids was paurpaurai jah bwssaun jah waila wisands daga hvammeh bairhtaba.\n16:20 [CA] i\u00fe unleds sums was namin haitans Lazarus; sah atwaurpans was du daura is, banjo fulls.\n16:21 [CA] jah gairnida sa\u00fe itan drauhsno \u00feizo driusandeino af biuda \u00feis gabeigins, akei jah hundos atrinnandans bilaigodedun banjos is.\n16:22 [CA] war\u00fe \u00fean gaswiltan \u00feamma unledin jah briggan fram aggilum in barma Abrahamis; gaswalt \u00fean jah sa gabeiga jah gafulhans war\u00fe.\n16:23 [CA] jah in haljai ushafjands augona seina wisands in balweinim gasahv \u00fean Abraham fairra\u00fero jah Lazzaru in barmim is.\n16:24 [CA] jah is ufhropjands . . . .\n17:3 [CA] . . . . jabai frawaurkjai bro\u00fear \u00feeins, gasak imma; jah \u00fean jabai idreigo sik, fraletais imma.\n17:4 [CA] jah jabai sibun sin\u00feam ana dag frawaurkjai du \u00feus, jah sibun sin\u00feam ana dag gawandjai sik qi\u00feands: idreigo mik, fraletais imma.\n17:5 [CA] jah qe\u00feun apaustauleis du fraujin: biauk uns galaubein.\n17:6 [CA] qa\u00fe \u00fean frauja: jabai habaidedei\u00fe galaubein swe kaurno sinapis, ai\u00fe\u00feau jus [jabai] qi\u00feei\u00fe du bairabagma \u00feamma: uslausei \u00feuk us waurtim jah ussatei \u00feuk in marein, jah andhausidedi \u00feau izwis.\n17:7 [CA] hvas \u00fean izwara skalk aigands arjandan ai\u00fe\u00feau haldandan, saei atgaggandin af hai\u00fejai qi\u00feai: suns hindarlei\u00fe anuhkumbei?\n17:8 [CA] ak niu qi\u00fei\u00fe du imma: manwei hva du naht matjau jah bigaurdans andbahtei mis, unte matja jah drigka, jah bi\u00fee gamatjis jah gadrigkais \u00feu?\n17:9 [CA] iba \u00feank \u00feu fairhaitis skalka jainamma, unte gatawida \u00featei anabudan was? ni man.\n17:10 [CA] swa jah jus, \u00fean taujai\u00fe alla \u00feo anabudanona izwis, qi\u00feai\u00fe \u00featei skalkos unbrukjai sijum, unte \u00featei skuldedum taujan gatawidedum.\n17:11 [CA] jah war\u00fe, mi\u00fe\u00feanei iddja is in Iairusalem, jah is \u00feairhiddja \u00feairh midja Samarian jah Galeilaian.\n17:12 [CA] jah inngaggandin imma in suma haimo, gamotidedun imma taihun \u00ferutsfillai mans, \u00feaih gasto\u00feun fairra\u00fero.\n17:13 [CA] jah silbans ushofon stibna qi\u00feandans: Iesu, talzjand, armai unsis!\n17:14 [CA] jah gaumjands qa\u00fe du im: gaggandans ataugei\u00fe izwis gudjam. jah war\u00fe, mi\u00fe\u00feanei gali\u00feun, gahrainidai waur\u00feun.\n17:15 [CA] i\u00fe ains \u00fean ize gaumjands \u00feammei hrains war\u00fe, gawandida sik mi\u00fe stibnai mikilai hauhjands gu\u00fe\n17:16 [CA] jah draus ana andawleizn faura fotum is awiliudonds imma; sah was Samareites.\n17:17 [CA] andhafjands \u00fean Iesus qa\u00fe: niu taihun \u00feai gahrainidai waur\u00feun? i\u00fe \u00feai niun hvar?\n17:18 [CA] ni bigitanai waur\u00feun gawandjandans giban wul\u00feu guda, niba sa aljakunja?\n17:19 [CA] jah qa\u00fe du imma: usstandands gagg, galaubeins \u00feeina ganasida \u00feuk.\n17:20 [CA] fraihans \u00fean fram Fareisaium: hvan qimi\u00fe \u00feiudangardi gudis? andhof im jah qa\u00fe: ni qimi\u00fe \u00feiudangardi gudis mi\u00fe atwitainai;\n17:21 [CA] nih qi\u00feand: sai her, ai\u00fe\u00feau sai jainar; sai auk, \u00feiudangardi gudis in izwis ist.\n17:22 [CA] qa\u00fe \u00fean du siponjam: a\u00fe\u00fean qimand dagos, \u00fean gairnei\u00fe ainana \u00feize dage sunaus mans gasaihvan jah ni gasaihvi\u00fe.\n17:23 [CA] jah qi\u00feand izwis: sai her, ai\u00fe\u00feau sai jainar; ni galei\u00feai\u00fe nih laistjai\u00fe.\n17:24 [CA] swaswe raihtis lauhmoni lauhatjandei us \u00feamma uf himina in \u00feata uf himina skeini\u00fe, swa wair\u00fei\u00fe sunus mans in daga seinamma.\n17:25 [CA] a\u00fe\u00fean faur\u00feis skal manag ga\u00feulan jah uskiusada fram \u00feamma kunja.\n17:26 [CA] jah swaswe war\u00fe in dagam Nauelis, swah wair\u00fei\u00fe jah in dagam sunaus mans.\n17:27 [CA] etun jah drugkun, liugaidedun jah liugaidos wesun, und \u00feanei dag galai\u00fe Nauel in arka; jah qam midjasweipains jah fraqistida allans.\n17:28 [CA] samaleiko jah swe war\u00fe in dagam Lodis; etun jah drugkun, bauhtedun jah frabauhtedun, satidedun, timridedun;\n17:29 [CA] i\u00fe \u00feammei daga usiddja Lod us Saudaumim, rignida swibla jah funin us himina jah fraqistida allaim.\n17:30 [CA] bi \u00feamma wair\u00fei\u00fe \u00feamma daga, ei sunus mans andhuljada.\n17:31 [CA] in jainamma daga, saei sijai ana hrota jah kasa is in razna, ni atsteigai dala\u00fe niman \u00feo; jah saei ana hai\u00fejai, samaleiko ni gawandjai sik ibukana.\n17:32 [CA] gamunei\u00fe qenais Lodis.\n17:33 [CA] saei sokei\u00fe saiwala seina ganasjan, fraqistei\u00fe izai, jah saei fraqistei\u00fe izai in meina, ganasji\u00fe \u00feo.\n17:34 [CA] qi\u00fea izwis \u00featei \u00feizai naht twai wair\u00feand ana ligra samin, ains usnimada jah an\u00fear bilei\u00feada;\n17:35 [CA] twos wair\u00feand malandeins samana, aina usnimada jah an\u00feara bilei\u00feada.\n17:37 [CA] jah andhafjandans qe\u00feun du imma: hvar, frauja? i\u00fe is qa\u00fe im: \u00fearei leik, jaindre galisand sik arans.\n18:1 [CA] Qa\u00feu\u00fe~\u00fean jah gajukon im du \u00feammei sinteino skulun bidjan jah ni wair\u00fean usgrudjans,\n18:2 [CA] qi\u00feands: staua was sums in sumai baurg, gu\u00fe ni ogands jah mannan ni aistands.\n18:3 [CA] wasu\u00fe~\u00fean jah widuwo in \u00feizai baurg jainai jah atiddja du imma qi\u00feandei: fraweit mik ana andasta\u00feja meinamma.\n18:4 [CA] jah ni wilda laggai hveilai. Afaru\u00fe~\u00fean \u00feata qa\u00fe in sis silbin: jabai jah gu\u00fe ni og jah mannan ni aista,\n18:5 [CA] i\u00fe in \u00feizei us\u00feriuti\u00fe mis so widuwo, fraweita \u00feo, ibai und andi qimandei usagljai mis.\n18:6 [CA] qa\u00fe \u00fean frauja: hausei\u00fe hva staua inwindi\u00feos qi\u00fei\u00fe.\n18:7 [CA] i\u00fe gu\u00fe niu gawrikai \u00feans gawalidans seinans, \u00feans wopjandans du sis dagam jah nahtam, jah usbeidands ist ana im?\n18:8 [CA] a\u00fe\u00fean qi\u00fea izwis \u00featei gawriki\u00fe ins sprauto. i\u00fe swe\u00feauh sunus mans qimands bi~u~gitai galaubein ana air\u00feai?\n18:9 [CA] qa\u00fe \u00fean du sumaim, \u00feaiei silbans trauaidedun sis ei weseina garaihtai jah frakunnandans \u00feaim an\u00fearaim, \u00feo gajukon:\n18:10 [CA] mans twai usiddjedun in alh bidjan, ains Fareisaius jah an\u00fear motareis.\n18:11 [CA] sa Fareisaius standands sis \u00feo bad: gu\u00fe, awiliudo \u00feus, unte ni im swaswe \u00feai an\u00fearai mans, wilwans, inwindai, horos, ai\u00fe\u00feau swaswe sa motareis.\n18:12 [CA] fasta twaim sin\u00feam sabbataus jah afdailja taihundon dail allis \u00feize gastalda.\n18:13 [CA] jah sa motareis fairra\u00fero standands ni wilda nih augona seina ushafjan du himina, ak sloh in brusts seinos qi\u00feands: gu\u00fe, hul\u00fes sijais mis frawaurhtamma.\n18:14 [CA] qi\u00fea izwis: atiddja sa garaihtoza gataihans du garda seinamma \u00feau raihtis jains; unte sahvazuh saei hauhei\u00fe sik silba, gahnaiwjada, i\u00fe saei hnaiwei\u00fe sik silba, ushauhjada.\n18:15 [CA] berun \u00fean du imma barna, ei im attaitoki. gasaihvandans \u00fean siponjos andbitun ins.\n18:16 [CA] i\u00fe Iesus athaitands ins qa\u00fe: leti\u00fe \u00feo barna gaggan du mis jah ni warji\u00fe \u00feo, unte \u00feize swaleikaize ist \u00feiudangardi gudis.\n18:17 [CA] amen, qi\u00fea izwis, saei ni andnimi\u00fe \u00feiudangardja gudis swe barn, ni qimi\u00fe in izai.\n18:18 [CA] jah frah ina sums reike qi\u00feands: laisari \u00feiu\u00feeiga, hva taujands libainais aiweinons arbja wair\u00feau?\n18:19 [CA] qa\u00fe \u00fean du imma Iesus: hva mik qi\u00feis \u00feiu\u00feeigana? ni ainshun \u00feiu\u00feeigs niba ains gu\u00fe.\n18:20 [CA] \u00feos anabusnins kant: ni horinos; ni maur\u00ferjais; ni hlifais; ni galiugaweitwods sijais; swerai attan \u00feeinana jah ai\u00feein.\n18:21 [CA] i\u00fe is qa\u00feuh: \u00feata allata gafastaida us jundai meinai.\n18:22 [CA] gahausjands \u00fean \u00feata Iesus qa\u00fe du imma: nauh ainis \u00feus wan ist: all \u00featei habais frabugei jah gadailei unledaim, jah habais huzd in himina, jah hiri laistjan mik.\n18:23 [CA] i\u00fe is gahausjands \u00feata gaurs war\u00fe; was auk gabeigs filu.\n18:24 [CA] gasaihvands \u00fean ina Iesus gaurana waur\u00feanana qa\u00fe: hvaiwa agluba \u00feai faihu habandans inngalei\u00feand in \u00feiudangardja gudis!\n18:25 [CA] ra\u00feizo allis ist ulbandau \u00feairh \u00feairko ne\u00felos \u00feairhlei\u00fean \u00feau gabigamma in \u00feiudangardja gudis galei\u00fean.\n18:26 [CA] qe\u00feun \u00fean \u00feai gahausjandans: an hvas mag ganisan?\n18:27 [CA] i\u00fe is qa\u00fe: \u00feata unmahteigo at mannam mahteig ist at guda.\n18:28 [CA] qa\u00fe \u00fean Paitrus: sai, weis aflailotum allata jah laistidedum \u00feuk.\n18:29 [CA] i\u00fe is qa\u00feuh du im: amen, qi\u00fea izwis \u00featei ni ainshun ist \u00feize afletandane gard ai\u00fe\u00feau fadrein ai\u00fe\u00feau bro\u00feruns ai\u00fe\u00feau qen ai\u00fe\u00feau barna in \u00feiudangardjos gudis,\n18:30 [CA] saei ni andnimai managfal\u00fe in \u00feamma mela jah in aiwa \u00feamma qimandin libain aiweinon.\n18:31 [CA] ganimands \u00fean \u00feans \u00b7ib\u00b7 qa\u00fe du im: sai, usgaggam in Iairusalem, jah ustiuhada all \u00feata gamelido \u00feairh praufetuns bi sunu mans.\n18:32 [CA] atgibada auk \u00feiudom jah bilaikada jah anamahtjada jah bispeiwada,\n18:33 [CA] jah usbliggwandans usqimand imma, jah \u00feridjin daga usstandi\u00fe.\n18:34 [CA] jah eis ni waihtai \u00feis fro\u00feun, jah was \u00feata waurd gafulgin af im, jah ni wissedun \u00feo qi\u00feanona.\n18:35 [CA] war\u00fe \u00fean, mi\u00fe\u00feanei nehva was is Iaireikon, blinda sums sat faur wig du aihtron.\n18:36 [CA] gahausjands \u00fean managein faurgaggandein frah hva wesi \u00feata.\n18:37 [CA] gataihun \u00fean imma \u00featei Iesus Nazoraius \u00feairhgaggi\u00fe.\n18:38 [CA] i\u00fe is ubuhwopida qi\u00feands: Iesu, sunu Daweidis, armai mik!\n18:39 [CA] jah \u00feai faurgaggandans andbitun ina ei \u00feahaidedi: i\u00fe is und filu mais hropida: sunau Daweidis, armai mik!\n18:40 [CA] gastandands \u00fean Iesus haihait ina tiuhan du sis. bi\u00fee nehva was \u00fean imma, frah ina\n18:41 [CA] qi\u00feands: hva \u00feus wileis ei taujau? i\u00fe is qa\u00fe: frauja, ei ussaihvau.\n18:42 [CA] jah Iesus qa\u00fe du imma: ussaihv, galaubeins \u00feeina ganasida \u00feuk.\n18:43 [CA] jah suns ussahv jah laistida ina awiliudonds guda. jah alla managei gasaihvandei gaf hazein guda.\n19:1 [CA] Jah inngalei\u00feands \u00feairhlai\u00fe Iaireikon.\n19:2 [CA] jah sai, guma namin haitans Zakkaius, sah was faurama\u00feleis motarje jah was gabigs,\n19:3 [CA] jah sokida gasaihvan Iesu, hvas wesi, jah ni mahta faura managein, unte wahstau leitils was.\n19:4 [CA] jah bi\u00feragjands faur usstaig ana smakkabagm, ei gasehvi ina, unte is and \u00feata munaida \u00feairhgaggan.\n19:5 [CA] jah bi\u00fee qam ana \u00feamma stada, insaihvands iup Iesus gasahv ina jah qa\u00fe du imma: Zakkaiu, sniumjands dala\u00fe atsteig: himma daga auk in garda \u00feeinamma skal ik wisan.\n19:6 [CA] jah sniumjands atstaig jah andnam ina faginonds.\n19:7 [CA] jah gasaihvandans allai birodidedun, qi\u00feandans \u00featei du frawaurhtis mans galai\u00fe [in gard] ussaljan.\n19:8 [CA] standands \u00fean Zakkaius qa\u00fe du fraujin: sai, halbata aiginis meinis, frauja, gadailja unledaim, jah jabai hvis hva afholoda, fidurfal\u00fe fragilda.\n19:9 [CA] qa\u00fe \u00fean du imma Iesus \u00featei himma daga naseins \u00feamma garda war\u00fe, unte jah sa sunus Abrahamis ist;\n19:10 [CA] qam auk sunus mans sokjan jah nasjan \u00feans fralusanans.\n19:11 [CA] at gahausjandam \u00fean im \u00feata, biaukands qa\u00fe gajukon, bi \u00featei nehva Iairusalem was, jah \u00feuhta im ei suns skulda wesi \u00feiudangardi gudis gaswikun\u00fejan.\n19:12 [CA] qa\u00fe \u00fean: manna sums godakunds gaggida landis franiman sis \u00feiudangardja jah gawandida sik.\n19:13 [CA] athaitands \u00fean taihun skalkans seinans atgaf im taihun dailos jah qa\u00fe du im: kaupo\u00fe, unte ik qimau.\n19:14 [CA] i\u00fe baurgjans is fijaidedun ina jah insandidedun airu afar imma qi\u00feandans: ni wileima \u00feana \u00feiudanon ufar unsis.\n19:15 [CA] jah war\u00fe, bi\u00fee atwandida sik aftra, andnimands \u00feiudangardja jah haihait wopjan du sis \u00feans skalkans \u00feaimei atgaf \u00feata silubr, ei gakunnaidedi hva hvarjizuh gawaurhtedi.\n19:16 [CA] qam \u00fean sa frumista qi\u00feands: frauja, skatts \u00feeins gawaurhta taihun skattans.\n19:17 [CA] jah qa\u00fe du imma: waila, goda skalk, unte in leitilamma wast triggws, sijais waldufni habands ufar taihun baurgim.\n19:18 [CA] jah qam an\u00fear qi\u00feands: frauja, skatts \u00feeins gawaurhta fimf skattans.\n19:19 [CA] qa\u00fe \u00fean jah du \u00feamma: jah \u00feu sijais ufaro fimf baurgim.\n19:20 [CA] jah sums qam qi\u00feands: frauja, sai, sa skatts \u00feeins \u00feanei habaida galagidana in fanin;\n19:21 [CA] ohta mis auk \u00feuk, unte manna hardus is. nimis \u00featei ni lagides jah snei\u00feis \u00featei ni saisost.\n19:22 [CA] jah qa\u00fe du imma: us mun\u00fea \u00feeinamma stoja \u00feuk, unselja skalk jah lata. wisseis \u00featei ik manna hardus im, nimands \u00featei ni lagida jah snei\u00feands \u00featei ni saiso;\n19:23 [CA] jah duhve ni atlagides \u00feata silubr mein du skattjam? jah qimands mi\u00fe wokra galausidedjau \u00feata.\n19:24 [CA] jah du \u00feaim faurastandandam qa\u00fe: nimi\u00fe af imma \u00feana skatt jah gibi\u00fe \u00feamma \u00feos taihun dailos habandin.\n19:25 [CA] jah qe\u00feun du imma: frauja, habai\u00fe taihun dailos.\n19:26 [CA] qi\u00fea allis izwis \u00featei hvarjammeh habandane gibada, i\u00fe af \u00feamma unhabandin jah \u00featei habai\u00fe afnimada af imma.\n19:27 [CA] a\u00fe\u00fean swe\u00feauh fijands meinans jainans, \u00feaiei ni wildedun mik \u00feiudanon ufar sis, briggi\u00fe her jah usqimi\u00fe faura mis.\n19:28 [CA] jah qi\u00feands \u00feata iddja fram, usgaggands in Iairusaulwma.\n19:29 [CA] jah war\u00fe, bi\u00fee nehva was Be\u00fesfagein jah Be\u00feanijin, at fairgunja \u00featei haitada alewjo, insandida twans siponje seinaize\n19:30 [CA] qi\u00feands: gaggats in \u00feo wi\u00ferawair\u00feon haim, in \u00feizaiei inngaggandans bigitats fulan asilaus gabundanana, ana \u00feammei ni ainshun aiw manne sat; andbindandans ina attiuhi\u00fe.\n19:31 [CA] jah jabai hvas inqis fraihnai: duhve andbindi\u00fe? swa qi\u00feaits du imma \u00featei frauja \u00feis gairnei\u00fe.\n19:32 [CA] galei\u00feandans \u00fean \u00feai insandidans bigetun, swaswe qa\u00fe du im.\n19:33 [CA] andbindandam \u00fean im qe\u00feun \u00feai fraujans \u00feis du im: duhve andbindats \u00feana fulan?\n19:34 [CA] i\u00fe eis qe\u00feun: fraujin \u00feaurfts \u00feis ist.\n19:35 [CA] jah attauhun \u00feana fulan Iesua jah uswairpandans wastjos seinos ana \u00feana fulan ussatidedun Iesu.\n19:36 [CA] gaggandin \u00fean imma ufstrawidedun wastjom seinaim ana wiga.\n19:37 [CA] bi\u00fee \u00fean is nehva was, ju\u00fean at ibdaljin \u00feis fairgunjis alewabagme, dugunnun alakjo managei siponje faginondans hazjan gu\u00fe stibnai mikilai in allaizo \u00feoze sehvun mahte,\n19:38 [CA] qi\u00feandans: \u00feiu\u00feida sa qimanda \u00feiudans in namin fraujins; gawair\u00fei in himina jah wul\u00feus in hauhistjam.\n19:39 [CA] jah sumai Fareisaie us \u00feizai managein qe\u00feun du imma: laisari, sak \u00feaim siponjam \u00feeinaim.\n19:40 [CA] jah andhafjands qa\u00fe du im: qi\u00fea izwis \u00featei jabai \u00feai slawand, stainos hropjand.\n19:41 [CA] jah sunsei nehva was, gasaihvands \u00feo baurg gaigrot bi \u00feo, qi\u00feands:\n19:42 [CA] \u00featei i\u00fe wissedeis jah \u00feu in \u00feamma daga \u00feeinamma \u00feo du gawair\u00feja \u00feeinamma! i\u00fe nu gafulgin ist faura augam \u00feeinaim,\n19:43 [CA] \u00featei qimand dagos ana \u00feus, jah bigraband fijands \u00feeinai grabai \u00feuk jah bistandand \u00feuk jah biwaibjand \u00feuk alla\u00fero.\n19:44 [CA] jah air\u00feai \u00feuk ga\u00efbnjand jah barna \u00feeina in \u00feus jah ni letand in \u00feus stain ana staina, in \u00feizei ni ufkun\u00fees \u00feata mel niuhseinais \u00feeinaizos.\n19:45 [CA] jah galei\u00feands in alh dugann uswairpan \u00feans frabugjandans in izai jah bugjandans,\n19:46 [CA] qi\u00feands du im: gameli\u00fe ist \u00featei gards meins gards bido ist; i\u00fe jus ina gatawidedu\u00fe du filegrja \u00feiube.\n19:47 [CA] jah was laisjands daga hvammeh in \u00feizai alh: i\u00fe \u00feai auhmistans gudjans jah bokarjos sokidedun ina usqistjan jah \u00feai frumistans manageins.\n19:48 [CA] jah ni bigetun hva gatawidedeina; managei auk alakjo hahaida du hausjan imma.\n20:1 [CA] Jah war\u00fe in sumamma dage jainaize at laisjandin imma \u00feo managein in alh jah wailamerjandin, atsto\u00feun \u00feai gudjans jah bokarjos mi\u00fe \u00feaim sinistam\n20:2 [CA] jah qe\u00feun du imma qi\u00feandans: qi\u00fe unsis, in hvamma waldufnje \u00feata taujis, ai\u00fe\u00feau hvas ist saei gaf \u00feus \u00feata waldufni?\n20:3 [CA] andhafjands \u00fean qa\u00fe du im: fraihna izwis jah ik ainis waurdis jah qi\u00fei\u00fe mis:\n20:4 [CA] daupeins Iohannis uzuh himina was \u00feau uzuh mannam?\n20:5 [CA] i\u00fe eis \u00feahtedun mi\u00fe sis misso qi\u00feandans \u00featei jabai qi\u00feam: us himina, qi\u00fei\u00fe: a\u00fe\u00fean duhve ni galaubidedu\u00fe imma?\n20:6 [CA] i\u00fe jabai qi\u00feam: us mannam, alla so managei stainam afwairpi\u00fe unsis; triggwaba galaubjand auk allai Iohannen praufetu wisan.\n20:7 [CA] jah andhofun ei ni wissedeina hva\u00fero.\n20:8 [CA] jah Iesus qa\u00fe im: ni ik izwis qi\u00fea, in hvamma waldufnje \u00feata tauja.\n20:9 [CA] dugann \u00fean du managein qi\u00fean \u00feo gajukon: manna ussatida weinagard, jah anafalh ina waurstwjam jah aflai\u00fe jera ganoha.\n20:10 [CA] jah in mela insandida du \u00feaim aurtjam skalk, ei akranis \u00feis weinagardis gebeina imma. i\u00fe \u00feai aurtjans usbliggwandans ina insandidedun lausana.\n20:11 [CA] jah anaaiauk sandjan an\u00fearana skalk; i\u00fe eis jah jainana bliggwandans jah unswerandans insandidedun lausana.\n20:12 [CA] jah anaaiauk sandjan \u00feridjan; i\u00fe eis jah \u00feana gawondondans uswaurpun.\n20:13 [CA] qa\u00fe \u00fean sa frauja \u00feis weinagardis: hva taujau? sandja sunu meinana \u00feana liuban; aufto \u00feana gasaihvandans aistand.\n20:14 [CA] gasaihvandans \u00fean ina \u00feai aurtjans \u00feahtedun mi\u00fe sis misso qi\u00feandans, sa ist sa arbinumja; afslaham ina, ei uns wair\u00feai \u00feata arbi.\n20:15 [CA] jah uswairpandans ina ut us \u00feamma weinagarda usqemun. hva nu taujai im frauja \u00feis weinagardis?\n20:16 [CA] qimi\u00fe jah usqistei\u00fe aurtjam \u00feaim jah gibi\u00fe \u00feana weinagard an\u00fearaim. gahausjandans qe\u00feun \u00fean: nis~sijai.\n20:17 [CA] i\u00fe is insaihvands du im qa\u00fe: a\u00fe\u00fean hva ist \u00feata gamelido: stains \u00feammei uskusun timrjans, sah war\u00fe du haubida waihstins?\n20:18 [CA] hvazuh saei driusi\u00fe ana \u00feana stain, gakrotuda; i\u00fe ana \u00feanei driusi\u00fe, diswin\u00feei\u00fe ina.\n20:19 [CA] jah sokidedun \u00feai bokarjos jah auhumistans gudjans uslagjan ana ina handuns in \u00feizai hveilai jah ohtedun \u00feo managein; fro\u00feun auk \u00featei du im \u00feo gajukon qa\u00fe.\n20:20 [CA] jah aflei\u00feandans insandidedun ferjans, \u00feans us liutein taiknjandans sik garaihtans wisan, ei gafaifaheina is waurdei jah atgebeina ina reikja jah waldufnja kindinis.\n20:21 [CA] jah frehun ina qi\u00feandans: laisari, witum \u00featei raihtaba rodeis jah laiseis jah ni andsaihvis andwair\u00fei, ak bi sunjai wig gudis laiseis:\n20:22 [CA] skuldu ist unsis kaisara gild giban \u00feau niu?\n20:23 [CA] bisaihvands \u00fean ize unselein Iesus qa\u00fe du im: hva mik fraisi\u00fe?\n20:24 [CA] ataugei\u00fe mis skatt: hvis habai\u00fe manleikan jah ufarmeli? andhafjandans \u00fean qe\u00feun: kaisaris.\n20:25 [CA] i\u00fe is qa\u00feuh du im: us~nu~gibi\u00fe \u00feo kaisaris kaisara jah \u00feo gudis guda.\n20:26 [CA] jah ni mahtedun gafahan is waurde in andwair\u00feja manageins jah sildaleikjandans andawaurde is ga\u00feahaidedun.\n20:27 [CA] du atgaggandans \u00fean sumai Saddukaie, \u00feaiei qi\u00feand usstass ni wisan, frehun ina\n20:28 [CA] qi\u00feandans: laisari, Moses gamelida uns, jabai hvis bro\u00fear gadau\u00fenai aigands qen, jah sa unbarnahs gadau\u00fenai, ei nimai bro\u00fear is \u00feo qen jah urraisjai fraiw bro\u00fer seinamma.\n20:29 [CA] sibun nu bro\u00ferjus wesun, jah sa frumista nimands qen gadau\u00fenoda unbarnahs.\n20:30 [CA] jah nam an\u00fear \u00feo qen, jah sa gaswalt unbarnahs.\n20:31 [CA] jah \u00feridja nam \u00feo samaleiko; samaleiko \u00fean jah \u00feai sibun, jah ni bili\u00feun barne jah gaswultun.\n20:32 [CA] Spedista allaize gadau\u00fenoda jah so qens.\n20:33 [CA] in \u00feizai usstassai nu, hvarjis \u00feize wair\u00fei\u00fe qens? \u00feai auk sibun aihtedun \u00feo du qenai.\n20:34 [CA] jah andhafjands qa\u00fe du im Iesus: \u00feai sunjus \u00feis aiwis liugand jah liuganda;\n20:35 [CA] i\u00fe \u00feaiei wair\u00feai sind jainis aiwis niutan jah usstassais us dau\u00feaim, ni liugand ni liuganda;\n20:36 [CA] nih allis gaswiltan \u00feanasei\u00fes magun, ibnans aggilum auk sind jah sunjus sind gudis, usstassais sunjus wisandans.\n20:37 [CA] a\u00fe\u00fean \u00featei urreisand dau\u00feans, jah Moses bandwida ana aihvatundjai, swe qi\u00fei\u00fe: sahv fraujan gu\u00fe Abrahamis jah gu\u00fe Isakis jah gu\u00fe Iakobis.\n20:38 [CA] a\u00fe\u00fean gu\u00fe nist dau\u00feaize, ak qiwaize; allai auk imma liband.\n20:39 [CA] andhafjandans \u00fean sumai \u00feize bokarje qe\u00feun: laisari, waila qast.\n20:40 [CA] ni\u00fe~\u00fean \u00feanasei\u00fes gadaurstedun fraihnan ina ni waihtais.\n20:41 [CA] qa\u00fe \u00fean du im: hvaiwa qi\u00feand Xristu sunu Daweidis wisan?\n20:42 [CA] jah silba Daweid qi\u00fei\u00fe in bokom psalmo: qa\u00fe frauja du fraujin meinamma: sit af taihswon meinai,\n20:43 [CA] unte ik galagja fijands \u00feeinans fotubaurd fotiwe \u00feeinaize.\n20:44 [CA] Daweid ina fraujan haiti\u00fe, jah hvaiwa sunus imma ist?\n20:45 [CA] at gahausjandein \u00fean allai managein qa\u00fe du siponjam seinaim:\n20:46 [CA] atsaihvi\u00fe faura bokarjam \u00feaim wiljandam gaggan in hveitaim . . . .","title":"Gothic Bible (partial): Luke","type":"page"}