{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/mar.htm","path":"bib/wb/got/mar.htm","source_url":"https://sacred-texts.com/bib/wb/got/mar.htm","text":"1:0 [CA] Aiwaggeljo \u00feairh Marku anastodei\u00fe.\n1:1 [CA] Anastodeins aiwaggeljons Iesuis Xristaus sunaus gudis.\n1:2 [CA] swe gameli\u00fe ist in Esa\u00efin praufetau: sai, ik insandja aggilu meinana faura \u00feus, saei gamanwei\u00fe wig \u00feeinana faura \u00feus.\n1:3 [CA] Stibna wopjandins in au\u00feidai: manwei\u00fe wig fraujins, raihtos waurkei\u00fe staigos gudis unsaris.\n1:4 [CA] was Iohannes daupjands in au\u00feidai jah merjands daupein idreigos du aflageinai frawaurhte.\n1:5 [CA] jah usiddjedun du imma all Iudaialand jah Iairusaulwmeis, jah daupidai wesun allai in Iaurdane ahvai fram imma, andhaitandans frawaurhtim seinaim.\n1:6 [CA] wasu\u00fe~\u00fean Iohannes gawasi\u00fes taglam ulbandaus jah gairda filleina bi hup seinana jah matida \u00feramsteins jah mili\u00fe hai\u00feiwisk.\n1:7 [CA] jah merida qi\u00feands: qimi\u00fe swin\u00feoza mis sa afar mis, \u00feizei ik ni im wair\u00fes anahneiwands andbindan skaudaraip skohe is.\n1:8 [CA] a\u00fe\u00fean ik daupja izwis in watin, i\u00fe is daupei\u00fe izwis in ahmin weihamma.\n1:9 [CA] jah war\u00fe in jainaim dagam, qam Iesus fram Nazarai\u00fe Galeilaias jah daupi\u00fes was fram Iohanne in Iaurdane.\n1:10 [CA] jah suns usgaggands us \u00feamma watin gasahv usluknans himinans jah ahman swe ahak atgaggandan ana ina.\n1:11 [CA] jah stibna qam us himinam: \u00feu is sunus meins sa liuba, in \u00feuzei waila galeikaida.\n1:12 [CA] jah suns sai, ahma ina ustauh in au\u00feida.\n1:13 [CA] jah was in \u00feizai au\u00feidai dage fidwor tiguns fraisans fram Satanin, jah was mi\u00fe diuzam, jah aggileis andbahtidedun imma.\n1:14 [CA] i\u00fe afar \u00featei atgibans war\u00fe Iohannes, qam Iesus in Galeilaia merjands aiwaggeljon \u00feiudangardjos gudis,\n1:15 [CA] qi\u00feands \u00featei usfullnoda \u00feata mel jah atnehvida sik \u00feiudangardi gudis: idreigo\u00fe jah galaubei\u00fe in aiwaggeljon.\n1:16 [CA] jah hvarbonds faur marein Galeilaias gasahv Seimonu jah Andraian bro\u00fear is, \u00feis Seimonis, wairpandans nati in marein; wesun auk fiskjans.\n1:17 [CA] jah qa\u00fe im Iesus: hirjats afar mis, jah gatauja igqis wair\u00fean nutans manne.\n1:18 [CA] jah suns afletandans \u00feo natja seina laistidedun afar imma.\n1:19 [CA] jah jain\u00fero inngaggands framis leita gasahv Iakobu \u00feana Zaibaidaiaus jah Iohanne bro\u00fear is, jah \u00feans in skipa manwjandans natja.\n1:20 [CA] jah suns haihait ins. jah afletandans attan seinana Zaibaidaiu in \u00feamma skipa mi\u00fe asnjam, gali\u00feun afar imma.\n1:21 [CA] jah gali\u00feun in Kafarnaum, jah suns sabbato daga galei\u00feands in swnagogen laisida ins.\n1:22 [CA] jah usfilmans waur\u00feun ana \u00feizai laiseinai is; unte was laisjands ins swe waldufni habands jah ni swaswe \u00feai bokarjos.\n1:23 [CA] jah was in \u00feizai swnagogen ize manna in unhrainjamma ahmin jah ufhropida\n1:24 [CA] qi\u00feands: fralet, hva uns jah \u00feus, Iesu Nazorenai, qamt fraqistjan uns? kann \u00feuk, hvas \u00feu is, sa weiha gudis.\n1:25 [CA] jah andbait ina Iesus qi\u00feands: \u00feahai jah usgagg ut us \u00feamma, ahma unhrainja.\n1:26 [CA] jah tahida ina ahma sa unhrainja jah hropjands stibnai mikilai usiddja us imma.\n1:27 [CA] jah afslau\u00fenodedun allai sildaleikjandans, swaei sokidedun mi\u00fe sis misso qi\u00feandans: hva sijai \u00feata? hvo so laiseino so niujo, ei mi\u00fe waldufnja jah ahmam \u00feaim unhrainjam anabiudi\u00fe jah ufhausjand imma?\n1:28 [CA] usiddja \u00fean meri\u00fea is suns and allans bisitands Galeilaias.\n1:29 [CA] jah suns us \u00feizai swnagogen usgaggandans qemun in garda Seimonis jah Andraiins mi\u00fe Iakobau jah Iohannen.\n1:30 [CA] i\u00fe swaihro Seimonis lag in brinnon: jah suns qe\u00feun imma bi ija.\n1:31 [CA] jah duatgaggands urraisida \u00feo undgreipands handu izos, jah aflailot \u00feo so brinno suns, jah andbahtida im.\n1:32 [CA] andanahtja \u00fean waur\u00feanamma, \u00fean gasaggq sauil, berun du imma allans \u00feans ubil habandans jah unhul\u00feons habandans.\n1:33 [CA] jah so baurgs alla garunnana was at daura.\n1:34 [CA] jah gahailida managans ubil habandans missaleikaim sauhtim jah unhul\u00feons managos uswarp jah ni fralailot rodjan \u00feos unhul\u00feons, unte kun\u00feedun ina.\n1:35 [CA] jah air uhtwon usstandands usiddja jah galai\u00fe ana au\u00fejana sta\u00fe jah jainar ba\u00fe.\n1:36 [CA] jah galaistans waur\u00feun imma Seimon jah \u00feai mi\u00fe imma.\n1:37 [CA] jah bigitandans ina qe\u00feun du imma \u00featei allai \u00feuk sokjand.\n1:38 [CA] jah qa\u00fe du im: gaggam du \u00feaim bisunjane haimom jah baurgim, ei jah jainar merjau, unte du\u00fee qam.\n1:39 [CA] jah was merjands in swnagogim ize and alla Galeilaian jah unhul\u00feons uswairpands.\n1:40 [CA] jah qam at imma \u00ferutsfill habands, bidjands ina jah kniwam knussjands jah qi\u00feands du imma \u00featei jabai wileis, magt mik gahrainjan.\n1:41 [CA] i\u00fe Iesus infeinands, ufrakjands handu seina attaitok imma jah qa\u00fe imma: wiljau, wair\u00fe hrains.\n1:42 [CA] jah bi\u00fee qa\u00fe \u00feata Iesus, suns \u00feata \u00ferutsfill aflai\u00fe af imma, jah hrains war\u00fe.\n1:43 [CA] jah gahvotjands imma suns ussandida ina\n1:44 [CA] jah qa\u00fe du imma: saihv ei mannhun ni qi\u00feais waiht; ak gagg \u00feuk silban ataugjan gudjin jah atbair fram gahraineinai \u00feeinai \u00featei anabau\u00fe Moses du weitwodi\u00feai im.\n1:45 [CA] i\u00fe is usgaggands dugann merjan filu jah usqi\u00fean \u00feata waurd, swaswe is ju\u00fean ni mahta andaugjo in baurg galei\u00fean, ak uta ana au\u00fejaim stadim was; jah iddjedun du imma alla\u00fero.\n2:1 [CA] Jah galai\u00fe aftra in Kafarnaum afar dagans, jah gafrehun \u00featei in garda ist.\n2:2 [CA] jah suns gaqemun managai, swaswe ju\u00fean ni gamostedun nih at daura, jah rodida im waurd.\n2:3 [CA] jah qemun at imma usli\u00fean bairandans, hafanana fram fidworim.\n2:4 [CA] jah ni magandans nehva qiman imma faura manageim, andhulidedun hrot \u00fearei was Iesus jah usgrabandans insailidedun \u00feata badi [jah fralailotun] ana \u00feammei lag sa usli\u00fea.\n2:5 [CA] gasaihvands \u00fean Iesus galaubein ize qa\u00fe du \u00feamma usli\u00fein: barnilo, afletanda \u00feus frawaurhteis \u00feeinos.\n2:6 [CA] wesunuh \u00fean sumai \u00feize bokarje jainar sitandans jah \u00feagkjandans sis in hairtam seinaim:\n2:7 [CA] hva sa swa rodei\u00fe naiteinins? hvas mag afletan frawaurhtins, niba ains gu\u00fe?\n2:8 [CA] jah suns ufkunnands Iesus ahmin seinamma \u00featei swa \u00feai mitodedun sis, qa\u00fe du im: duhve mito\u00fe \u00feata in hairtam izwaraim?\n2:9 [CA] hva\u00fear ist azetizo du qi\u00fean \u00feamma usli\u00fein: afletanda \u00feus frawaurhteis \u00feeinos, \u00feau qi\u00fean: urreis jah nim \u00feata badi \u00feeinata jah gagg?\n2:10 [CA] a\u00fe\u00fean ei witei\u00fe \u00featei waldufni habai\u00fe sunus mans ana air\u00feai afletan frawaurhtins, qa\u00fe du \u00feamma usli\u00fein:\n2:11 [CA] \u00feus qi\u00fea: urreis nimuh \u00feata badi \u00feein jah gagg du garda \u00feeinamma.\n2:12 [CA] jah urrais suns jah ushafjands badi usiddja faura andwair\u00feja allaize, swaswe usgeisnodedun allai jah hauhidedun mikiljandans gu\u00fe, qi\u00feandans \u00featei aiw swa ni gasehvun.\n2:13 [CA] jah galai\u00fe aftra faur marein, jah all manageins iddjedun du imma, jah laisida ins.\n2:14 [CA] jah hvarbonds gasahv Laiwwi \u00feana Alfaiaus sitandan at motai jah qa\u00fe du imma: gagg afar mis. Jah usstandands iddja afar imma.\n2:15 [CA] jah war\u00fe, bi\u00fee is anakumbida in garda is, jah managai motarjos jah frawaurhtai mi\u00feanakumbidedun Iesua jah siponjam is; wesun auk managai jah iddjedun afar imma.\n2:16 [CA] jah \u00feai bokarjos jah Fareisaieis gasaihvandans ina matjandan mi\u00fe \u00feaim motarjam jah frawaurhtaim, qe\u00feun du \u00feaim siponjam is: hva ist \u00featei mi\u00fe motarjam jah frawaurhtaim matji\u00fe jah driggki\u00fe?\n2:17 [CA] jah gahausjands Iesus qa\u00fe du im: ni \u00feaurbun swin\u00feai lekeis, ak \u00feai ubilaba habandans; ni qam la\u00feon uswaurhtans, ak frawaurhtans.\n2:18 [CA] jah wesun siponjos Iohannis jah Fareisaieis fastandans; jah atiddjedun jah qe\u00feun du imma: duhve siponjos Iohannes jah Fareisaieis fastand, i\u00fe \u00feai \u00feeinai siponjos ni fastand?\n2:19 [CA] jah qa\u00fe im Iesus: ibai magun sunjus bru\u00fefadis, und \u00featei mi\u00fe im ist bru\u00fefa\u00fes, fastan? swa lagga hveila swe mi\u00fe sis haband bru\u00fefad, ni magun fastan.\n2:20 [CA] a\u00fe\u00fean atgaggand dagos \u00fean afnimada af im sa bru\u00fefa\u00fes, jah \u00fean fastand in jainamma daga.\n2:21 [CA] ni manna plat fanins niujis siuji\u00fe ana snagan fairnjana; ibai afnimai fullon af \u00feamma sa niuja \u00feamma fairnjin, jah wairsiza gataura wair\u00fei\u00fe.\n2:22 [CA] ni manna giuti\u00fe wein juggata in balgins fairnjans; ibai aufto distairai wein \u00feata niujo \u00feans balgins, jah wein usgutni\u00fe, jah \u00feai balgeis fraqistnand; ak wein juggata in balgins niujans giutand.\n2:23 [CA] jah war\u00fe \u00feairhgaggan imma sabbato daga \u00feairh atisk, jah dugunnun siponjos is skewjandans raupjan ahsa.\n2:24 [CA] jah Fareisaieis qe\u00feun du imma: sai, hva taujand siponjos \u00feeinai sabbatim \u00featei ni skuld ist?\n2:25 [CA] jah is qa\u00fe du im: niu ussuggwu\u00fe aiw hva gatawida Daweid, \u00fean \u00feaurfta jah gredags was, is jah \u00feai mi\u00fe imma?\n2:26 [CA] hvaiwa galai\u00fe in gard gudis uf Abia\u00feara gudjin jah hlaibans faurlageinais matida, \u00feanzei ni skuld ist matjan niba ainaim gudjam, jah gaf jah \u00feaim mi\u00fe sis wisandam?\n2:27 [CA] jah qa\u00fe im: sabbato in mans war\u00fe gaskapans, ni manna in sabbato dagis;\n2:28 [CA] swaei frauja ist sa sunus mans jah \u00feamma sabbato.\n3:1 [CA] Jah galai\u00fe aftra in swnagogen, jah was jainar manna ga\u00feaursana habands handu.\n3:2 [CA] jah witaidedun imma hailidediu sabbato daga, ei wrohidedeina ina.\n3:3 [CA] jah qa\u00fe du \u00feamma mann \u00feamma ga\u00feaursana habandin handu: urreis in midumai.\n3:4 [CA] jah qa\u00fe du im: skuldu ist in sabbatim \u00feiu\u00fe taujan ai\u00fe\u00feau un\u00feiu\u00fe taujan, saiwala nasjan ai\u00fe\u00feau usqistjan? i\u00fe eis \u00feahaidedun.\n3:5 [CA] jah ussaihvands ins mi\u00fe moda, gaurs in daubi\u00feos hairtins ize qa\u00fe du \u00feamma mann: ufrakei \u00feo handu \u00feeina! jah ufrakida, jah gasto\u00fe aftra so handus is.\n3:6 [CA] jah gaggandans \u00fean Fareisaieis sunsaiw mi\u00fe \u00feaim Herodianum garuni gatawidedun bi ina, ei imma usqemeina.\n3:7 [CA] jah Iesus aflai\u00fe mi\u00fe siponjam seinaim du marein, jah filu manageins us Galeilaia laistidedun afar imma,\n3:8 [CA] jah us Iudaia jah us Iairusaulwmim jah us Idumaia jah hindana Iaurdanaus; jah \u00feai bi Twra jah Seidona, manageins filu, gahausjandans hvan filu is tawida, qemun at imma.\n3:9 [CA] jah qa\u00fe \u00feaim siponjam seinaim ei skip habai\u00fe wesi at imma in \u00feizos manageins, ei ni \u00feraiheina ina.\n3:10 [CA] managans auk gahailida, swaswe drusun ana ina ei imma attaitokeina, jah swa managai swe habaidedun wundufnjos\n3:11 [CA] jah ahmans unhrainjans, \u00feaih \u00fean ina gasehvun, drusun du imma jah hropidedun qi\u00feandans \u00featei \u00feu is sunus gudis.\n3:12 [CA] jah filu andbait ins ei ina ni gaswikun\u00feidedeina.\n3:13 [CA] jah ustaig in fairguni jah athaihait \u00feanzei wilda is, jah gali\u00feun du imma.\n3:14 [CA] jah gawaurhta twalif du wisan mi\u00fe sis, jah ei insandidedi ins merjan\n3:15 [CA] jah haban waldufni du hailjan sauhtins jah uswairpan unhul\u00feons.\n3:16 [CA] jah gasatida Seimona namo Paitrus;\n3:17 [CA] jah Iakobau \u00feamma Zaibaidaiaus jah Iohanne bro\u00fer Iakobaus jah gasatida im namna Bauanairgais, \u00featei ist: sunjus \u00feeihvons;\n3:18 [CA] jah Andraian jah Filippu jah Bar\u00feaulaumaiu jah Mat\u00feaiu jah \u00deoman jah Iakobu \u00feana Alfaiaus jah \u00deaddaiu jah Seimona \u00feana Kananeiten\n3:19 [CA] jah Iudan Iskarioten, saei jah galewida ina.\n3:20 [CA] jah atiddjedun in gard, jah ga\u00efddja sik managei, swaswe ni mahtedun nih hlaif matjan.\n3:21 [CA] jah hausjandans fram imma bokarjos jah an\u00fearai usiddjedun gahaban ina; qe\u00feun auk \u00featei usgaisi\u00fes ist.\n3:22 [CA] jah bokarjos \u00feai af Iairusaulwmai qimandans qe\u00feun \u00featei Baiailzaibul habai\u00fe, jah \u00featei in \u00feamma reikistin unhul\u00feono uswairpi\u00fe \u00feaim unhul\u00feom.\n3:23 [CA] jah athaitands ins in gajukom qa\u00fe du im: hvaiwa mag Satanas Satanan uswairpan?\n3:24 [CA] jah jabai \u00feiudangardi wi\u00fera sik gadailjada, ni mag standan so \u00feiudangardi jaina.\n3:25 [CA] jah jabai gards wi\u00fera sik gadailjada, ni mag standan sa gards jains.\n3:26 [CA] jah jabai Satana ussto\u00fe ana sik silban jah gadaili\u00fes war\u00fe, ni mag gastandan, ak andi habai\u00fe.\n3:27 [CA] ni manna mag kasa swin\u00feis galei\u00feands in gard is wilwan, niba faur\u00feis \u00feana swin\u00fean gabindi\u00fe; jah \u00feana gard is diswilwai.\n3:28 [CA] amen, qi\u00fea izwis, \u00featei allata afletada \u00feata frawaurhte sunum manne, jah naiteinos swa managos swaswe wajamerjand;\n3:29 [CA] a\u00fe\u00fean saei wajamerei\u00fe ahman weihana ni habai\u00fe fralet aiw, ak skula ist aiweinaizos frawaurhtais.\n3:30 [CA] unte qe\u00feun: ahman unhrainjana habai\u00fe.\n3:31 [CA] jah qemun \u00fean ai\u00feei is jah bro\u00ferjus is jah uta standandona insandidedun du imma, haitandona ina.\n3:32 [CA] jah setun bi ina managei; qe\u00feun \u00fean du imma: sai, ai\u00feei \u00feeina jah bro\u00ferjus \u00feeinai jah swistrjus \u00feeinos uta sokjand \u00feuk.\n3:33 [CA] jah andhof im qi\u00feands: hvo ist so ai\u00feei meina ai\u00fe\u00feau \u00feai bro\u00ferjus meinai?\n3:34 [CA] jah bisaihvands bisunjane \u00feans bi sik sitandans qa\u00fe: sai, ai\u00feei meina jah \u00feai bro\u00ferjus meinai.\n3:35 [CA] saei allis waurkei\u00fe wiljan gudis, sa jah bro\u00fear meins jah swistar jah ai\u00feei ist.\n4:1 [CA] Jah aftra [Iesus] dugann laisjan at marein, jah galesun sik du imma manageins filu, swaswe ina galei\u00fean in skip gasitan in marein; jah alla so managei wi\u00fera marein ana sta\u00fea was.\n4:2 [CA] jah laisida ins in gajukom manag jah qa\u00fe im in laiseinai seinai:\n4:3 [CA] hausei\u00fe! sai, urrann sa saiands du saian fraiwa seinamma.\n4:4 [CA] jah war\u00fe, mi\u00fe\u00feanei saiso, sum raihtis gadraus faur wig, jah qemun fuglos jah fretun \u00feata.\n4:5 [CA] an\u00fearu\u00fe~\u00fean gadraus ana stainahamma, \u00fearei ni habaida air\u00fea managa, jah suns urrann, in \u00feizei ni habaida diupaizos air\u00feos;\n4:6 [CA] at sunnin \u00fean urrinnandin ufbrann, jah unte ni habaida waurtins, ga\u00feaursnoda.\n4:7 [CA] jah sum gadraus in \u00feaurnuns; jah ufarstigun \u00feai \u00feaurnjus jah afhvapidedun \u00feata, jah akran ni gaf.\n4:8 [CA] jah sum gadraus in air\u00fea goda jah gaf akran urrinnando jah wahsjando, jah bar ain \u00b7l\u00b7 jah ain \u00b7j\u00b7 jah ain \u00b7r\u00b7\n4:9 [CA] jah qa\u00fe: saei habai ausona hausjandona, gahausjai.\n4:10 [CA] i\u00fe bi\u00fee war\u00fe sundro, frehun ina \u00feai bi ina mi\u00fe \u00feaim twalibim \u00feizos gajukons.\n4:11 [CA] jah qa\u00fe im: izwis atgiban ist kunnan runa \u00feiudangardjos gudis, i\u00fe jainaim \u00feaim uta in gajukom allata wair\u00fei\u00fe,\n4:12 [CA] ei saihvandans saihvaina jah ni gaumjaina, jah hausjandans hausjaina jah ni fra\u00fejaina, ibai hvan gawandjaina sik jah afletaindau im frawaurhteis.\n4:13 [CA] jah qa\u00fe du im: ni witu\u00fe \u00feo gajukon, jah hvaiwa allos \u00feos gajukons kunnei\u00fe?\n4:14 [CA] sa saijands waurd saiji\u00fe.\n4:15 [CA] a\u00fe\u00fean \u00feai wi\u00fera wig sind, \u00fearei saiada \u00feata waurd, jah \u00fean gahausjand unkarjans, suns qimi\u00fe Satanas jah usnimi\u00fe waurd \u00feata insaiano in hairtam ize.\n4:16 [CA] jah sind samaleiko \u00feai ana stainahamma saianans, \u00feaiei \u00fean hausjand \u00feata waurd, suns mi\u00fe fahedai nimand ita\n4:17 [CA] jah ni haband waurtins in sis, ak hveilahvairbai sind; \u00fea\u00feroh, bi\u00fee qimi\u00fe aglo ai\u00fe\u00feau wrakja in \u00feis waurdis, suns gamarzjanda.\n4:18 [CA] jah \u00feai sind \u00feai in \u00feaurnuns saianans, \u00feai waurd hausjandans,\n4:19 [CA] jah saurgos \u00feizos libainais jah afmarzeins gabeins jah \u00feai bi \u00feata an\u00fear lustjus innatgaggandans afhvapjand \u00feata waurd, jah akranalaus wair\u00fei\u00fe.\n4:20 [CA] jah \u00feai sind \u00feai ana air\u00feai \u00feizai godon saianans, \u00feaiei hausjand \u00feata waurd jah andnimand jah akran bairand, ain \u00b7l\u00b7 jah ain \u00b7j\u00b7 jah ain \u00b7r\u00b7\n4:21 [CA] jah qa\u00fe du im: ibai lukarn qimi\u00fe du\u00fee ei uf melan satjaidau ai\u00fe\u00feau undar ligr? niu ei ana lukarnasta\u00fean satjaidau?\n4:22 [CA] nih allis ist hva fulginis \u00featei ni gabairhtjaidau: nih war\u00fe analaugn, ak ei swikun\u00fe wair\u00feai.\n4:23 [CA] jabai hvas habai ausona hausjandona, gahausjai.\n4:24 [CA] jah qa\u00fe du im: saihvi\u00fe, hva hausei\u00fe! in \u00feizaiei mita\u00fe miti\u00fe, mitada izwis jah biaukada izwis \u00feaim galaubjandam.\n4:25 [CA] unte \u00feishvammeh saei habai\u00fe gibada imma; jah saei ni habai\u00fe jah \u00featei habai\u00fe afnimada imma.\n4:26 [CA] jah qa\u00fe: swa ist \u00feiudangardi gudis, swaswe jabai manna wairpi\u00fe fraiwa ana air\u00fea.\n4:27 [CA] jah slepi\u00fe jah urreisi\u00fe naht jah daga, jah \u00feata fraiw keini\u00fe jah liudi\u00fe swe ni wait is.\n4:28 [CA] silbo auk air\u00fea akran bairi\u00fe: frumist gras, \u00fea\u00feroh ahs, \u00fea\u00feroh fulli\u00fe kaurnis in \u00feamma ahsa.\n4:29 [CA] \u00feanuh bi\u00fee atgibada akran, suns insandei\u00fe gil\u00fea, unte atist asans.\n4:30 [CA] jah qa\u00fe: hve galeikom \u00feiudangardja gudis, ai\u00fe\u00feau in hvileikai gajukon gabairam \u00feo?\n4:31 [CA] swe kaurno sinapis, \u00featei \u00fean saiada ana air\u00fea, minnist allaize fraiwe ist \u00feize ana air\u00feai;\n4:32 [CA] jah \u00fean saiada, urrinni\u00fe jah wair\u00fei\u00fe allaize grase maist jah gatauji\u00fe astans mikilans, swaswe magun uf skadau is fuglos himinis gabauan.\n4:33 [CA] jah swaleikaim managaim gajukom rodida du im \u00feata waurd, swaswe mahtedun hausjon.\n4:34 [CA] i\u00fe inuh gajukon ni rodida im, i\u00fe sundro siponjam seinaim andband allata.\n4:35 [CA] jah qa\u00fe du im in jainamma daga at andanahtja \u00fean waur\u00feanamma: uslei\u00feam jainis stadis.\n4:36 [CA] jah afletandans \u00feo managein andnemun ina swe was in skipa; jah \u00fean an\u00feara skipa wesun mi\u00fe imma.\n4:37 [CA] jah war\u00fe skura windis mikila jah wegos waltidedun in skip, swaswe ita ju\u00fean gafullnoda.\n4:38 [CA] jah was is ana notin ana waggarja slepands, jah urraisidedun ina jah qe\u00feun du imma: laisari, niu kara \u00feuk \u00feizei fraqistnam?\n4:39 [CA] jah urreisands gasok winda jah qa\u00fe du marein: gaslawai, afdumbn! jah anasilaida sa winds jah war\u00fe wis mikil.\n4:40 [CA] jah qa\u00fe du im: duhve faurhtai siju\u00fe swa? hvaiwa ni nauh habai\u00fe galaubein?\n4:41 [CA] jah ohtedun sis agis mikil jah qe\u00feun du sis misso: hvas \u00feannu sa sijai, unte jah winds jah marei ufhausjand imma?\n5:1 [CA] Jah qemun hindar marein in landa Gaddarene.\n5:2 [CA] jah usgaggandin imma us skipa suns gamotida imma manna us aurahjom in ahmin unhrainjamma,\n5:3 [CA] saei bauain habaida in aurahjom: jah ni naudibandjom eisarneinaim manna mahta ina gabindan.\n5:4 [CA] unte is ufta eisarnam bi fotuns gabuganaim jah naudibandjom eisarneinaim gabundans was jah galausida af sis \u00feos naudibandjos jah \u00feo ana fotum eisarna gabrak, jah manna ni mahta ina gatamjan.\n5:5 [CA] jah sinteino nahtam jah dagam in aurahjom jah in fairgunjam was hropjands jah bliggwands sik stainam.\n5:6 [CA] gasaihvands \u00fean Iesu fairra\u00fero rann jah inwait ina\n5:7 [CA] jah hropjands stibnai mikilai qa\u00fe: hva mis jah \u00feus, Iesu, sunau gudis \u00feis hauhistins? biswara \u00feuk bi guda, ni balwjais mis!\n5:8 [CA] unte qa\u00fe imma: usgagg, ahma unhrainja, us \u00feamma mann!\n5:9 [CA] jah frah ina: hva namo \u00feein? jah qa\u00fe du imma: namo mein Laigaion, unte managai sijum.\n5:10 [CA] jah ba\u00fe ina filu ei ni usdrebi im us landa.\n5:11 [CA] wasuh \u00fean jainar hairda sweine haldana at \u00feamma fairgunja.\n5:12 [CA] jah bedun ina allos \u00feos unhul\u00feons qi\u00feandeins: insandei unsis in \u00feo sweina, ei in \u00feo galei\u00feaima.\n5:13 [CA] jah uslaubida im Iesus suns. jah usgaggandans ahmans \u00feai unhrainjans gali\u00feun in \u00feo sweina, jah rann so hairda and driuson in marein; wesunu\u00fe~\u00fean swe twos \u00feusundjos, jah afhvapnodedun in marein.\n5:14 [CA] jah \u00feai haldandans \u00feo sweina ga\u00felauhun jah gataihun in baurg jah in haimom, jah qemun saihvan hva wesi \u00feata waur\u00feano.\n5:15 [CA] jah atiddjedun du Iesua jah gasaihvand \u00feana wodan sitandan jah gawasidana jah fra\u00fejandan \u00feana saei habaida laigaion, jah ohtedun.\n5:16 [CA] jah spillodedun im \u00feaiei gasehvun, hvaiwa war\u00fe bi \u00feana wodan jah bi \u00feo sweina.\n5:17 [CA] jah dugunnun bidjan ina galei\u00fean hindar markos seinos.\n5:18 [CA] jah inngaggandan ina in skip ba\u00fe ina, saei was wods, ei mi\u00fe imma wesi.\n5:19 [CA] jah ni lailot ina, ak qa\u00fe du imma: gagg du garda \u00feeinamma du \u00feeinaim jah gateih im, hvan filu \u00feus frauja gatawida jah gaarmaida \u00feuk.\n5:20 [CA] jah galai\u00fe jah dugann merjan in Daikapaulein, hvan filu gatawida imma Iesus; jah allai sildaleikidedun.\n5:21 [CA] jah uslei\u00feandin Iesua in skipa aftra hindar marein, gaqemun sik manageins filu du imma, jah was faura marein.\n5:22 [CA] jah sai, qimi\u00fe ains \u00feize swnagogafade namin Jaeirus; jah saihvands ina gadraus du fotum Iesuis\n5:23 [CA] jah ba\u00fe ina filu, qi\u00feands \u00featei dauhtar meina aftumist habai\u00fe, ei qimands lagjais ana \u00feo handuns, ei ganisai jah libai.\n5:24 [CA] jah galai\u00fe mi\u00fe imma, jah iddjedun afar imma manageins filu jah \u00feraihun ina.\n5:25 [CA] jah qinono suma wisandei in runa blo\u00feis jera twalif\n5:26 [CA] jah manag ga\u00feulandei fram managaim lekjam jah fraqimandei allamma seinamma jah ni waihtai botida, ak mais wairs habaida,\n5:27 [CA] gahausjandei bi Iesu, atgaggandei in managein aftana attaitok wastjai is.\n5:28 [CA] unte qa\u00fe \u00featei jabai wastjom is atteka, ganisa.\n5:29 [CA] jah sunsaiw ga\u00feaursnoda sa brunna blo\u00feis izos, jah ufkun\u00fea ana leika \u00featei gahailnoda af \u00feamma slaha.\n5:30 [CA] jah sunsaiw Iesus ufkun\u00fea in sis silbin \u00feo us sis maht usgaggandein; gawandjands sik in managein qa\u00fe: hvas mis taitok wastjom?\n5:31 [CA] jah qe\u00feun du imma siponjos is: saihvis \u00feo managein \u00fereihandein \u00feuk jah qi\u00feis: hvas mis taitok?\n5:32 [CA] jah wlaitoda saihvan \u00feo \u00feata taujandein.\n5:33 [CA] i\u00fe so qino ogandei jah reirandei, witandei \u00featei war\u00fe bi ija, qam jah draus du imma jah qa\u00fe imma alla \u00feo sunja.\n5:34 [CA] i\u00fe is qa\u00fe du izai: dauhtar, galaubeins \u00feeina ganasida \u00feuk, gagg in gawair\u00fei jah sijais haila af \u00feamma slaha \u00feeinamma.\n5:35 [CA] nauh\u00feanuh imma rodjandin qemun fram \u00feamma swnagogafada, qi\u00feandans \u00featei dauhtar \u00feeina gaswalt; hva \u00feanamais draibeis \u00feana laisari?\n5:36 [CA] i\u00fe Iesus sunsaiw gahausjands \u00feata waurd rodi\u00fe, qa\u00fe du \u00feamma swnagogafada: ni faurhtei, \u00featainei galaubei.\n5:37 [CA] jah ni fralailot ainohun ize mi\u00fe sis afargaggan, nibai Paitru jah Iakobu jah Iohannen bro\u00fear Iakobis.\n5:38 [CA] jah galai\u00fe in gard \u00feis swnagogafadis jah gasahv auhjodu jah gretandans jah waifairhvjandans filu.\n5:39 [CA] jah innatgaggands qa\u00fe du im: hva auhjo\u00fe jah greti\u00fe? \u00feata barn ni gadau\u00fenoda, ak slepi\u00fe.\n5:40 [CA] jah bihlohun ina. i\u00fe is uswairpands allaim ganimi\u00fe attan \u00feis barnis jah ai\u00feein jah \u00feans mi\u00fe sis jah galai\u00fe inn \u00fearei was \u00feata barn ligando.\n5:41 [CA] jah fairgraip bi handau \u00feata barn qa\u00feuh du izai: talei\u00fea kumei, \u00featei ist gaskeiri\u00fe: mawilo, du \u00feus qi\u00fea: urreis.\n5:42 [CA] jah suns urrais so mawi jah iddja; was auk jere twalibe; jah usgeisnodedun faurhtein mikilai.\n5:43 [CA] jah anabau\u00fe im filu ei manna ni fun\u00fei \u00feata; jah haihait izai giban matjan.\n6:1 [CA] Jah ussto\u00fe jain\u00fero jah qam in landa seinamma, jah laistidedun afar imma siponjos is.\n6:2 [CA] jah bi\u00fee war\u00fe sabbato, dugann in swnagoge laisjan, jah managai hausjandans sildaleikidedun qi\u00feandans: hva\u00fero \u00feamma \u00feata, jah hvo so handugeino so gibano imma, ei mahteis swaleikos \u00feairh handuns is wair\u00feand?\n6:3 [CA] niu \u00feata ist sa timrja, sa sunus Marjins, i\u00fe bro\u00fear Iakoba jah Iuse jah Iudins jah Seimonis? jah niu sind swistrjus is her at unsis? jah gamarzidai waur\u00feun in \u00feamma.\n6:4 [CA] qa\u00fe \u00fean im Iesus \u00featei nist praufetus unswers, niba in gabaur\u00feai seinai jah in gani\u00fejam jah in garda seinamma.\n6:5 [CA] jah ni mahta jainar ainohun mahte gataujan, niba fawaim siukaim handuns galagjands gahailida.\n6:6 [CA] jah sildaleikida in ungalaubeinais ize jah bitauh weihsa bisunjane laisjands.\n6:7 [CA] jah athaihait \u00feans twalif jah dugann ins insandjan twans hvanzuh jah gaf im waldufni ahmane unhrainjaize.\n6:8 [CA] jah faurbau\u00fe im ei waiht ni nemeina in wig, niba hrugga aina, nih matibalg nih hlaif nih in gairdos aiz,\n6:9 [CA] ak gaskohai suljom: jah ni wasjai\u00fe twaim paidom.\n6:10 [CA] jah qa\u00fe du im: \u00feishvaduh \u00feei gaggai\u00fe in gard, \u00fear saljai\u00fe, unte usgaggai\u00fe jain\u00fero.\n6:11 [CA] jah swa managai swe ni andnimaina izwis nih hausjaina izwis, usgaggandans jain\u00fero ushrisjai\u00fe mulda \u00feo undaro fotum izwaraim du weitwodi\u00feai im. amen, qi\u00fea izwis: sutizo ist Saudaumjam ai\u00fe\u00feau Gaumaurjam in daga stauos \u00feau \u00feizai baurg jainai.\n6:12 [CA] jah usgaggandans meridedun ei idreigodedeina.\n6:13 [CA] jah unhul\u00feons managos usdribun jah gasalbodedun alewa managans siukans jah gahailidedun.\n6:14 [CA] jah gahausida \u00feiudans Herodes, swikun\u00fe allis war\u00fe namo is, jah qa\u00fe \u00featei Iohannis sa daupjands us dau\u00feaim urrais, du\u00fe\u00fee waurkjand \u00feos mahteis in imma.\n6:15 [CA] an\u00fearai \u00fean qe\u00feun \u00featei Helias ist; an\u00fearai \u00fean qe\u00feun \u00featei praufetes ist swe ains \u00feize praufete.\n6:16 [CA] gahausjands \u00fean Herodes qa\u00fe \u00featei \u00feammei ik haubi\u00fe afmaimait Iohanne, sa ist: sah urrais us dau\u00feaim.\n6:17 [CA] sa auk raihtis Herodes insandjands gahabaida Iohannen jah gaband ina in karkarai in Hairodiadins qenais Filippaus bro\u00fers seinis, unte \u00feo galiugaida.\n6:18 [CA] qa\u00fe auk Iohannes du Heroda \u00featei ni skuld ist \u00feus haban qen bro\u00fers \u00feeinis.\n6:19 [CA] i\u00fe so Herodia naiw imma jah wilda imma usqiman jah ni mahta;\n6:20 [CA] unte Herodis ohta sis Iohannen, kunnands ina wair garaihtana jah weihana, jah witaida imma jah hausjands imma manag gatawida jah gabaurjaba imma andhausida.\n6:21 [CA] jah waur\u00feans dags gatils, \u00fean Herodis mela gabaur\u00feais seinaizos nahtamat waurhta \u00feaim maistam seinaize jah \u00feusundifadim jah \u00feaim frumistam Galeilaias,\n6:22 [CA] jah atgaggandein inn dauhtar Herodiadins jah plinsjandein jah galeikandein Heroda jah \u00feaim mi\u00feanakumbjandam, qa\u00fe \u00feiudans du \u00feizai maujai: bidei mik \u00feishvizuh \u00feei wileis, jah giba \u00feus.\n6:23 [CA] jah swor izai \u00featei \u00feishvah \u00feei bidjais mik, giba \u00feus und halba \u00feiudangardja meina.\n6:24 [CA] i\u00fe si usgaggandei qa\u00fe du ai\u00feein seinai: hvis bidjau? i\u00fe si qa\u00fe: haubidis Iohannis \u00feis daupjandins.\n6:25 [CA] jah atgaggandei sunsaiw sniumundo du \u00feamma \u00feiudana ba\u00fe qi\u00feandei: wiljau ei mis gibais ana mesa haubi\u00fe Iohannis \u00feis daupjandins.\n6:26 [CA] jah gaurs waur\u00feans sa \u00feiudans in \u00feize ai\u00fee jah in \u00feize mi\u00feanakumbjandane ni wilda izai ufbrikan.\n6:27 [CA] jah suns insandjands sa \u00feiudans spaikulatur, anabau\u00fe briggan haubi\u00fe is. i\u00fe is galei\u00feands afmaimait imma haubi\u00fe in karkarai\n6:28 [CA] jah atbar \u00feata haubi\u00fe is ana mesa jah atgaf ita \u00feizai maujai, jah so mawi atgaf ita ai\u00feein seinai.\n6:29 [CA] jah gahausjandans siponjos is qemun jah usnemun leik is jah galagidedun ita in hlaiwa.\n6:30 [CA] jah ga\u00efddjedun apaustauleis du Iesua jah gataihun imma allata jah swa filu swe gatawide(dun) . . . .\n6:53 [CA] . . . . jah duatsniwun.\n6:54 [CA] jah usgaggandam im us skipa, sunsaiw ufkunnandans ina,\n6:55 [CA] birinnandans all \u00feata gawi dugunnun ana badjam \u00feans ubil habandans bairan, \u00feadei hausidedun ei is wesi.\n6:56 [CA] jah \u00feishvaduh \u00feadei iddja in haimos ai\u00fe\u00feau baurgs ai\u00fe\u00feau in weihsa, ana gagga lagidedun siukans jah bedun ina ei \u00feau skauta wastjos is attaitokeina; jah swa managai swe attaitokun imma, ganesun.\n7:1 [CA] Jah gaqemun sik du imma Fareisaieis jah sumai \u00feize bokarje, qimandans us Iairusaulwmim.\n7:2 [CA] jah gasaihvandans sumans \u00feize siponje is gamainjaim handum, \u00feat~ist un\u00fewahanaim, matjandans hlaibans;\n7:3 [CA] i\u00fe Fareisaieis jah allai Iudaieis, niba ufta \u00fewahand handuns, ni matjand, habandans anafilh \u00feize sinistane,\n7:4 [CA] jah af ma\u00fela niba daupjand ni matjand, jah an\u00fear ist manag \u00featei andnemun du haban: daupeinins stikle jah aurkje jah katile jah ligre;\n7:5 [CA] \u00fea\u00feroh \u00fean frehun ina \u00feai Fareisaieis jah \u00feai bokarjos: duhve \u00feai siponjos \u00feeinai ni gaggand bi \u00feammei anafulhun \u00feai sinistans, ak un\u00fewahanaim handum matjand hlaif?\n7:6 [CA] i\u00fe is andhafjands qa\u00fe du im \u00featei waila praufetida Esa\u00efas bi izwis \u00feans liutans, swe gameli\u00fe ist: so managei wairilom mik swerai\u00fe, i\u00fe hairto ize fairra habai\u00fe sik mis.\n7:7 [CA] i\u00fe sware mik blotand, laisjandans laiseinins, anabusnins manne;\n7:8 [CA] afletandans raihtis anabusn gudis habai\u00fe \u00featei anafulhun mannans, daupeinins aurkje jah stikle jah an\u00fear galeik swaleikata manag tauji\u00fe.\n7:9 [CA] jah qa\u00fe du im: waila inwidi\u00fe anabusn gudis, ei \u00feata anafulhano izwar fastai\u00fe.\n7:10 [CA] Moses auk raihtis qa\u00fe: swerai attan \u00feeinana jah ai\u00feein \u00feeina; jah: saei ubil qi\u00feai attin seinamma ai\u00fe\u00feau ai\u00feein seinai, dau\u00feau afdau\u00fejaidau.\n7:11 [CA] i\u00fe jus qi\u00fei\u00fe: jabai qi\u00feai manna attin seinamma ai\u00fe\u00feau ai\u00feein: kaurban, \u00featei ist mai\u00fems, \u00feishvah \u00featei us mis gabatnis;\n7:12 [CA] jah ni fraleti\u00fe ina ni waiht taujan attin seinamma ai\u00fe\u00feau ai\u00feein seinai,\n7:13 [CA] blau\u00fejandans waurd gudis \u00feizai anabusnai izwarai, \u00feoei anafulhu\u00fe; jah galeik swaleikata manag tauji\u00fe.\n7:14 [CA] jah athaitands alla \u00feo managein qa\u00fe im: hausei\u00fe mis allai jah fra\u00fejai\u00fe.\n7:15 [CA] ni waihts ist uta\u00fero mans inngaggando in ina \u00featei magi ina gamainjan; ak \u00feata utgaggando us mann \u00feata ist \u00feata gamainjando mannan.\n7:16 [CA] jabai hvas habai ausona hausjandona, gahausjai.\n7:17 [CA] jah \u00fean galai\u00fe in gard us \u00feizai managein, frehun ina siponjos is bi \u00feo gajukon.\n7:18 [CA] jah qa\u00fe du im: swa jah jus unwitans siju\u00fe? ni fra\u00feji\u00fe \u00feammei all \u00feata uta\u00fero inngaggando in mannan ni mag ina gamainjan:\n7:19 [CA] unte ni galei\u00fei\u00fe imma in hairto, ak in wamba, jah in urrunsa usgaggi\u00fe, gahrainei\u00fe allans matins.\n7:20 [CA] qa\u00feu\u00fe~\u00fean \u00featei \u00feata us mann usgaggando \u00feata gamainei\u00fe mannan.\n7:21 [CA] inna\u00fero auk us hairtin manne mitoneis ubilos usgaggand: kalkinassjus, horinassjus, maur\u00fera,\n7:22 [CA] \u00feiubja, faihufrikeins, unseleins, liutei, aglaitei, augo unsel, wajamereins, hauhhairtei, unwiti.\n7:23 [CA] \u00feo alla ubilona inna\u00fero usgaggand jah gagamainjand mannan.\n7:24 [CA] jah jain\u00fero usstandands galai\u00fe in markos Twre jah Seidone jah galei\u00feands in gard ni wilda witan mannan jah ni mahta galaugnjan.\n7:25 [CA] gahausjandei raihtis qino bi ina, \u00feizozei habaida dauhtar ahman unhrainjana, qimandei draus du fotum is.\n7:26 [CA] wasu\u00fe~\u00fean so qino hai\u00feno, Saurini fwnikiska gabaur\u00feai, jah ba\u00fe ina ei \u00feo unhul\u00feon uswaurpi us dauhtr izos.\n7:27 [CA] i\u00fe Iesus qa\u00fe du izai: let faur\u00feis sada wair\u00fean barna, unte ni go\u00fe ist niman hlaib barne jah wairpan hundam.\n7:28 [CA] i\u00fe si andhof imma jah qa\u00fe du imma: jai frauja; jah auk hundos undaro biuda matjand af drauhsnom barne.\n7:29 [CA] jah qa\u00fe du izai: in \u00feis waurdis gagg, usiddja unhul\u00feo us dauhtr \u00feeinai.\n7:30 [CA] jah galei\u00feandei du garda seinamma bigat unhul\u00feon usgaggana jah \u00feo dauhtar ligandein ana ligra.\n7:31 [CA] jah aftra galei\u00feands af markom Twre jah Seidone qam at marein Galeilaie mi\u00fe tweihnaim markom Daikapaulaios.\n7:32 [CA] jah berun du imma baudana stammana jah bedun ina ei lagidedi imma handau.\n7:33 [CA] jah afnimands ina af managein sundro, lagida figgrans seinans in ausona imma jah spewands attaitok tuggon is\n7:34 [CA] jah ussaihvands du himina gaswogida jah qa\u00fe du imma: aiffa\u00fea, \u00featei ist: uslukn.\n7:35 [CA] jah sunsaiw usluknodedun imma hliumans, jah andbundnoda bandi tuggons is jah rodida raihtaba.\n7:36 [CA] jah anabau\u00fe im ei mann ni qe\u00feeina. hvan filu is im anabau\u00fe, mais \u00feamma eis meridedun\n7:37 [CA] jah ufarassau sildaleikidedun qi\u00feandans: waila allata gatawida jah baudans gatauji\u00fe gahausjan jah unrodjandans rodjan.\n8:1 [CA] In jainaim \u00fean dagam aftra at filu managai managein wisandein jah ni habandam hva matidedeina, athaitands siponjans qa\u00feuh du im:\n8:2 [CA] infeinoda du \u00feizai managein, unte ju dagans \u00ferins mi\u00fe mis wesun jah ni haband hva matjaina;\n8:3 [CA] jah jabai fraleta ins lausqi\u00ferans du garda ize, ufligand ana wiga; sumai raihtis ize fairra\u00fero qemun.\n8:4 [CA] jah andhofun imma siponjos is: hva\u00fero \u00feans mag hvas gaso\u00fejan hlaibam ana au\u00feidai?\n8:5 [CA] jah frah ins: hvan managans habai\u00fe hlaibans? i\u00fe eis qe\u00feun: sibun.\n8:6 [CA] jah anabau\u00fe \u00feizai managein anakumbjan ana air\u00feai; jah nimands \u00feans sibun hlaibans jah awiliudonds gabrak jah atgaf siponjam seinaim, ei atlagidedeina faur; jah atlagidedun faur \u00feo managein.\n8:7 [CA] jah habaidedun fiskans fawans, jah \u00feans ga\u00feiu\u00fejands qa\u00fe ei atlagidedeina jah \u00feans.\n8:8 [CA] gamatidedun \u00fean jah sadai waur\u00feun; jah usnemun laibos gabruko sibun spwreidans.\n8:9 [CA] wesunu\u00fe~\u00fean \u00feai matjandans swe fidwor \u00feusundjos; jah fralailot ins.\n8:10 [CA] jah galai\u00fe sunsaiw in skip mi\u00fe siponjam seinaim, jah qam ana fera Magdalan.\n8:11 [CA] jah urrunnun Fareisaieis jah dugunnun mi\u00fesokjan imma sokjandans du imma taikn us himina, fraisandans ina.\n8:12 [CA] jah ufswogjands ahmin seinamma qa\u00fe: hva \u00feata kuni taikn sokei\u00fe? amen, qi\u00fea izwis: jabai gibaidau kunja \u00feamma taikne.\n8:13 [CA] jah afletands ins, galei\u00feands aftra in skip uslai\u00fe hindar marein.\n8:14 [CA] jah ufarmunnodedun niman hlaibans jah niba ainana hlaif ni habaidedun mi\u00fe sis in skipa.\n8:15 [CA] jah anabau\u00fe im qi\u00feands: saihvi\u00fe ei atsaihvi\u00fe izwis \u00feis beistis Fareisaie jah beistis Herodis.\n8:16 [CA] jah \u00feahtedun mi\u00fe sis misso qi\u00feandans: unte hlaibans ni habam.\n8:17 [CA] jah fra\u00fejands Iesus qa\u00fe du im: hva \u00feaggkei\u00fe unte hlaibans ni habai\u00fe? ni nauh fra\u00feji\u00fe nih witu\u00fe, unte daubata habai\u00fe hairto izwar.\n8:18 [CA] augona habandans ni gasaihvi\u00fe, jah ausona habandans ni gahausei\u00fe jah ni gamunu\u00fe.\n8:19 [CA] \u00fean \u00feans fimf hlaibans gabrak fimf \u00feusundjom, hvan managos tainjons fullos gabruko usnemu\u00fe? qe\u00feun du imma: twalif.\n8:20 [CA] a\u00fe\u00fean \u00fean \u00feans sibun hlaibans fidwor \u00feusundjom, hvan managans spwreidans fullans gabruko usnemu\u00fe? i\u00fe eis qe\u00feun: sibun.\n8:21 [CA] jah qa\u00fe du im: hvaiwa ni nauh fra\u00feji\u00fe?\n8:22 [CA] jah qemun in Be\u00feaniin jah berun du imma blindan jah bedun ina ei imma attaitoki.\n8:23 [CA] jah fairgreipands handu \u00feis blindins ustauh ina utana weihsis jah speiwands in augona is, atlagjands ana handuns seinos frah ina ga~u~hva~sehvi?\n8:24 [CA] jah ussaihvands qa\u00fe: gasaihva mans, \u00featei swe bagmans gasaihva gaggandans.\n8:25 [CA] \u00fea\u00feroh aftra galagida handuns ana \u00feo augona is jah gatawida ina ussaihvan; jah aftra gasati\u00fes war\u00fe jah gasahv bairhtaba allans.\n8:26 [CA] jah insandida ina du garda is qi\u00feands: ni in \u00feata weihs gaggais, ni mannhun qi\u00feais in \u00feamma wehsa.\n8:27 [CA] jah usiddja Iesus jah siponjos is in wehsa Kaisarias \u00feizos Filippaus: jah ana wiga frah siponjans seinans qi\u00feands du im: hvana mik qi\u00feand mans wisan?\n8:28 [CA] i\u00fe eis andhofun: Iohannen \u00feana daupjand, jah an\u00fearai Helian: sumaih \u00fean ainana praufete.\n8:29 [CA] jah is qa\u00fe du im: a\u00fe\u00fean jus, hvana mik qi\u00fei\u00fe wisan? andhafjands \u00fean Paitrus qa\u00fe du imma: \u00feu is Xristus.\n8:30 [CA] jah faurbau\u00fe im ei mannhun ni qe\u00feeina bi ina.\n8:31 [CA] jah dugann laisjan ins \u00featei skal sunus mans filu winnan jah uskiusan skulds ist fram \u00feaim sinistam jah \u00feaim auhumistam gudjam jah bokarjam jah usqiman jah afar \u00ferins dagans usstandan.\n8:32 [CA] jah swikun\u00feaba \u00feata waurd rodida; jah aftiuhands ina Paitrus dugann andbeitan ina;\n8:33 [CA] i\u00fe is gawandjands sik jah gasaihvands \u00feans siponjans seinans andbait Paitru qi\u00feands: gagg hindar mik, Satana, unte ni fra\u00fejis \u00feaim gudis, ak \u00feaim manne.\n8:34 [CA] jah athaitands \u00feo managein mi\u00fe siponjam seinaim qa\u00fe du im: saei wili afar mis laistjan, inwidai sik silban jah nimai galgan seinana jah laistjai mik.\n8:35 [CA] saei allis wili saiwala seina ganasjan, fraqistei\u00fe izai: i\u00fe saei fraqistei\u00fe saiwalai seinai in meina jah in \u00feizos aiwaggeljons, ganasji\u00fe \u00feo.\n8:36 [CA] hva auk botei\u00fe mannan, jabai gageigai\u00fe \u00feana fairhvu allana jah gaslei\u00feei\u00fe sik saiwalai seinai?\n8:37 [CA] ai\u00fe\u00feau hva gibi\u00fe manna inmaidein saiwalos seinaizos?\n8:38 [CA] unte saei skamai\u00fe sik meina jah waurde meinaize in gabaur\u00feai \u00feizai horinondein jah frawaurhton, jah sunus mans skamai\u00fe sik is, \u00fean qimi\u00fe in wul\u00feau attins seinis mi\u00fe aggilum \u00feaim weiham.\n9:1 [CA] Jah qa\u00fe du im: amen, qi\u00fea izwis \u00featei sind sumai \u00feize her standandane, \u00feai ize ni kausjand dau\u00feaus, unte gasaihvand \u00feiudinassu gudis qumanana in mahtai.\n9:2 [CA] jah afar dagans saihs ganam Iesus Paitru jah Iakobu jah Iohannen jah ustauh ins ana fairguni hauh sundro ainans: jah inmaidida sik in andwair\u00feja ize.\n9:3 [CA] jah wastjos is waur\u00feun glitmunjandeins, hveitos swe snaiws, swaleikos swe wullareis ana air\u00feai ni mag gahveitjan.\n9:4 [CA] jah ataugi\u00fes war\u00fe im Helias mi\u00fe Mose; jah wesun rodjandans mi\u00fe Iesua.\n9:5 [CA] jah andhafjands Paitrus qa\u00fe du Iesua: rabbei, go\u00fe ist unsis her wisan, jah gawaurkjam hlijans \u00ferins, \u00feus ainana jah Mose ainana jah ainana Helijin.\n9:6 [CA] ni auk wissa hva rodidedi; wesun auk usagidai.\n9:7 [CA] jah war\u00fe milhma ufarskadwjands im, jah qam stibna us \u00feamma milhmin: sa ist sunus meins sa liuba, \u00feamma hausjai\u00fe.\n9:8 [CA] jah anaks insaihvandans ni \u00feanasei\u00fes ainohun gasehvun, alja Iesu ainana mi\u00fe sis.\n9:9 [CA] dala\u00fe \u00fean atgaggandam im af \u00feamma fairgunja, anabau\u00fe im ei mannhun ni spillodedeina \u00featei gasehvun, niba bi\u00fee sunus mans us dau\u00feaim ussto\u00fei.\n9:10 [CA] jah \u00feata waurd habaidedun du sis misso sokjandans: hva ist \u00feata us dau\u00feaim usstandan?\n9:11 [CA] jah frehun ina qi\u00feandans: unte qi\u00feand \u00feai bokarjos \u00featei Helias skuli qiman faur\u00feis?\n9:12 [CA] i\u00fe is andhafjands qa\u00fe du im: Helias swe\u00feauh qimands faur\u00feis aftra gabotei\u00fe alla; jah hvaiwa gameli\u00fe ist bi sunu mans, ei manag winnai jah frakun\u00fes wair\u00feai.\n9:13 [CA] akei qi\u00fea izwis \u00featei ju Helias qam jah gatawidedun imma swa filu swe wildedun, swaswe gameli\u00fe ist bi ina.\n9:14 [CA] jah qimands at siponjam gasahv filu manageins bi ins jah bokarjans sokjandans mi\u00fe im.\n9:15 [CA] jah sunsaiw alla managei gasaihvandans ina usgeisnodedun jah durinnandans inwitun ina.\n9:16 [CA] jah frah \u00feans bokarjans: hva sokei\u00fe mi\u00fe \u00feaim?\n9:17 [CA] jah andhafjands ains us \u00feizai managein qa\u00fe: laisari, brahta sunu meinana du \u00feus habandan ahman unrodjandan.\n9:18 [CA] jah \u00feishvaruh \u00feei ina gafahi\u00fe, gawairpi\u00fe ina, jah hva\u00feji\u00fe jah kriusti\u00fe tun\u00feuns seinans jah gastaurkni\u00fe; jah qa\u00fe siponjam \u00feeinaim ei usdreibeina ina, jah ni mahtedun.\n9:19 [CA] i\u00fe is andhafjands im qa\u00fe: o kuni ungalaubjando! und hva at izwis sijau? und hva \u00feulau izwis? bairi\u00fe ina du mis.\n9:20 [CA] jah brahtedun ina at imma. jah gasaihvands ina sunsaiw sa ahma tahida ina; jah driusands ana air\u00fea walwisoda hva\u00fejands.\n9:21 [CA] jah frah \u00feana attan is: hvan lagg mel ist ei \u00feata war\u00fe imma? i\u00fe is qa\u00fe: us barniskja.\n9:22 [CA] jah ufta ina jah in fon atwarp jah in wato, ei usqistidedi imma; akei jabai mageis, hilp unsara, gablei\u00fejands unsis.\n9:23 [CA] i\u00fe Iesus qa\u00fe du imma \u00feata jabai mageis galaubjan; allata mahteig \u00feamma galaubjandin.\n9:24 [CA] jah sunsaiw ufhropjands sa atta \u00feis barnis mi\u00fe tagram qa\u00fe: galaubja; hilp meinaizos ungalaubeinais!\n9:25 [CA] gasaihvands \u00fean Iesus \u00featei sama\u00fe rann managei, gahvotida ahmin \u00feamma unhrainjin, qi\u00feands du imma: \u00feu ahma, \u00feu unrodjands jah bau\u00fes, ik \u00feus anabiuda: usgagg us \u00feamma jah \u00feanasei\u00fes ni galei\u00feais in ina.\n9:26 [CA] jah hropjands jah filu tahjands ina usiddja; jah war\u00fe swe dau\u00fes, swaswe managai qe\u00feun \u00featei gaswalt.\n9:27 [CA] i\u00fe Iesus undgreipands ina bi handau urraisida ina; jah ussto\u00fe.\n9:28 [CA] jah galei\u00feandan ina in gard, siponjos is frehun ina sundro: duhve weis ni mahtedum usdreiban \u00feana?\n9:29 [CA] jah qa\u00fe du im: \u00feata kuni in waihtai ni mag usgaggan, niba in bidai jah fastubnja.\n9:30 [CA] jah jain\u00fero usgaggandans iddjedun \u00feairh Galeilaian, jah ni wilda ei hvas wissedi,\n9:31 [CA] unte laisida siponjans seinans jah qa\u00fe du im \u00featei sunus mans atgibada in handuns manne, jah usqimand imma, jah usqisti\u00fes \u00feridjin daga usstandi\u00fe.\n9:32 [CA] i\u00fe eis ni fro\u00feun \u00feamma waurda jah ohtedun ina fraihnan.\n9:33 [CA] jah qam in Kafarnaum. jah in garda qumans frah ins: hva in wiga mi\u00fe izwis misso mitodedu\u00fe?\n9:34 [CA] i\u00fe eis slawaidedun; du sis misso andrunnun, hvarjis maists wesi.\n9:35 [CA] jah sitands atwopida \u00feans twalif jah qa\u00fe du im: jabai hvas wili frumists wisan, sijai allaize aftumists jah allaim andbahts.\n9:36 [CA] jah nimands barn gasatida ita in midjaim im jah ana armins nimands ita qa\u00fe du im:\n9:37 [CA] saei ain \u00feize swaleikaize barne andnimi\u00fe ana namin meinamma, mik andnimi\u00fe; jah sahvazuh saei mik andnimi\u00fe, ni mik andnimi\u00fe, ak \u00feana sandjandan mik.\n9:38 [CA] andhof \u00fean imma Iohannes qi\u00feands: laisari! sehvum sumana in \u00feeinamma namin usdreibandan unhul\u00feons, saei ni laistei\u00fe unsis, jah waridedum imma, unte ni laistei\u00fe unsis.\n9:39 [CA] i\u00fe is qa\u00fe: ni warji\u00fe imma; ni mannahun auk ist saei tauji\u00fe maht in namin meinamma jah magi sprauto ubilwaurdjan mis;\n9:40 [CA] unte saei nist wi\u00fera izwis, faur izwis ist.\n9:41 [CA] saei auk allis gadragkjai izwis stikla watins in namin meinamma, unte Xristaus siju\u00fe, amen qi\u00fea izwis ei ni fraqistei\u00fe mizdon seinai.\n9:42 [CA] jah sahvazuh saei gamarzjai ainana \u00feize leitilane \u00feize galaubjandane du mis, go\u00fe ist imma mais ei galagjaidau asiluqairnus ana halsaggan is jah frawaurpans wesi in marein.\n9:43 [CA] jah jabai marzjai \u00feuk handus \u00feeina, afmait \u00feo; go\u00fe \u00feus ist hamfamma in libain galei\u00fean, \u00feau twos handuns habandin galei\u00fean in gaiainnan, in fon \u00feata unhvapnando,\n9:44 [CA] \u00fearei ma\u00fea ize ni gaswilti\u00fe jah fon ni afhvapni\u00fe.\n9:45 [CA] jah jabai fotus \u00feeins marzjai \u00feuk, afmait ina; go\u00fe \u00feus ist galei\u00fean in libain haltamma, \u00feau twans fotuns habandin gawairpan in gaiainnan, in fon \u00feata unhvapnando,\n9:46 [CA] \u00fearei ma\u00fea ize ni gaswilti\u00fe jah fon ni afhvapni\u00fe.\n9:47 [CA] jah jabai augo \u00feein marzjai \u00feuk, uswairp imma; go\u00fe \u00feus ist haihamma galei\u00fean in \u00feiudangardja gudis, \u00feau twa augona habandin atwairpan in gaiainnan funins,\n9:48 [CA] \u00fearei ma\u00fea ize ni gadau\u00feni\u00fe jah fon ni afhvapni\u00fe.\n9:49 [CA] hvazuh auk funin saltada jah hvarjatoh hunsle salta saltada.\n9:50 [CA] go\u00fe salt; i\u00fe jabai salt unsaltan wair\u00fei\u00fe, hve supuda? habai\u00fe in izwis salt jah gawair\u00feeigai sijai\u00fe mi\u00fe izwis misso.\n10:1 [CA] Jah jain\u00fero usstandands qam in markom Iudaias hindar Iaurdanau; jah gaqemun sik aftra manageins du imma, jah, swe biuhts , aftra laisida ins.\n10:2 [CA] jah duatgaggandans Fareisaieis frehun ina, skuldu sijai mann qen afsatjan, fraisandans ina.\n10:3 [CA] i\u00fe is andhafjands qa\u00fe: hva izwis anabau\u00fe Moses?\n10:4 [CA] i\u00fe eis qe\u00feun: Moses uslaubida unsis bokos afsateinais meljan jah afletan.\n10:5 [CA] jah andhafjands Iesus qa\u00fe du im: wi\u00fera harduhairtein izwara gamelida izwis \u00feo anabusn.\n10:6 [CA] i\u00fe af anastodeinai gaskaftais gumein jah qinein gatawida gu\u00fe.\n10:7 [CA] inuh \u00feis bilei\u00feai manna attin seinamma jah ai\u00feein seinai,\n10:8 [CA] jah sijaina \u00feo twa du leika samin, swaswe \u00feanasei\u00fes ni sind twa, ak leik ain.\n10:9 [CA] \u00featei nu gu\u00fe gawa\u00fe, manna \u00feamma ni skaidai.\n10:10 [CA] jah in garda aftra siponjos is bi \u00feata samo frehun ina.\n10:11 [CA] jah qa\u00fe du im: sahvazuh saei afleti\u00fe qen seina jah liugai\u00fe an\u00feara, horino\u00fe du \u00feizai.\n10:12 [CA] jah jabai qino afleti\u00fe aban seinana jah liugada an\u00fearamma, horino\u00fe.\n10:13 [CA] \u00feanuh atberun du imma barna, ei attaitoki im: i\u00fe \u00feai siponjos is sokun \u00feaim bairandam du.\n10:14 [CA] gasaihvands \u00fean Iesus unwerida jah qa\u00fe du im: leti\u00fe \u00feo barna gaggan du mis jah ni warji\u00fe \u00feo, unte \u00feize ist \u00feiudangardi gudis.\n10:15 [CA] amen, qi\u00fea izwis: saei ni andnimi\u00fe \u00feiudangardja gudis swe barn, ni \u00feauh qimi\u00fe in izai.\n10:16 [CA] jah ga\u00felaihands im, lagjands handuns ana \u00feo \u00feiu\u00feida im.\n10:17 [CA] jah usgaggandin imma in wig, duatrinnands ains jah knussjands ba\u00fe ina qi\u00feands: laisari \u00feiu\u00feeiga, hva taujau ei libainais aiweinons arbja wair\u00feau?\n10:18 [CA] i\u00fe is qa\u00fe du imma: hva mik qi\u00feis \u00feiu\u00feeigana? ni hvashun \u00feiu\u00feeigs, alja ains gu\u00fe.\n10:19 [CA] \u00feos anabusnins kant: ni horinos; ni maur\u00ferjais; ni hlifais; ni sijais galiugaweitwods; ni anamahtjais; swerai attan \u00feeinana jah ai\u00feein \u00feeina.\n10:20 [CA] \u00fearuh andhafjands qa\u00fe du imma: laisari, \u00feo alla gafastaida us jundai meinai.\n10:21 [CA] i\u00fe Iesus insaihvands du imma frijoda ina jah qa\u00fe du imma: ainis \u00feus wan ist; gagg, swa filu swe habais frabugei jah gif \u00fearbam, jah habais huzd in himinam; jah hiri laistjan mik nimands galgan.\n10:22 [CA] i\u00fe is gahnipnands in \u00feis waurdis galai\u00fe gaurs; was auk habands faihu manag.\n10:23 [CA] jah bisaihvands Iesus qa\u00fe siponjam seinaim: sai, hvaiwa agluba \u00feai faiho gahabandans in \u00feiudangardja gudis galei\u00feand.\n10:24 [CA] i\u00fe \u00feai siponjos afslau\u00fenodedun in waurde is. \u00fearuh Iesus aftra andhafjands qa\u00fe im: barnilona, hvaiwa aglu ist \u00feaim hugjandam afar faihau in \u00feiudangardja gudis galei\u00fean.\n10:25 [CA] azitizo ist ulbandau \u00feairh \u00feairko ne\u00felos galei\u00fean, \u00feau gabigamma in \u00feiudangardja gudis galei\u00fean.\n10:26 [CA] i\u00fe eis mais usgeisnodedun qi\u00feandans du sis misso: jah hvas mag ganisan?\n10:27 [CA] insaihvands du im Iesus qa\u00fe: [akei] fram mannan unmahteig ist, ni fram guda; allata auk mahteig ist fram guda.\n10:28 [CA] dugann \u00fean Paitrus qi\u00fean du imma: sai, weis aflailotum alla jah laistidedum \u00feuk.\n10:29 [CA] andhafjands im Iesus qa\u00fe: amen, qi\u00fea izwis: ni hvashun ist saei aflailoti gard ai\u00fe\u00feau bro\u00feruns ai\u00fe\u00feau ai\u00feein ai\u00fe\u00feau attan ai\u00fe\u00feau qen ai\u00fe\u00feau barna ai\u00fe\u00feau haimo\u00felja in meina jah in \u00feizos aiwaggeljons,\n10:30 [CA] saei ni andnimai \u00b7r\u00b7 fal\u00fe nu in \u00feamma mela gardins jah bro\u00feruns jah swistruns jah attan jah ai\u00feein jah barna jah haimo\u00felja mi\u00fe wrakom jah in aiwa \u00feamma anawair\u00fein libain aiweinon.\n10:31 [CA] a\u00fe\u00fean managai wair\u00feand frumans aftumans, jah aftumans frumans.\n10:32 [CA] wesunu\u00fe~\u00fean ana wiga gaggandans du Iairusaulwmai jah faurbigaggands ins Iesus, jah sildaleikidedun jah afarlaistjandans faurhtai waur\u00feun. jah andnimands aftra \u00feans twalif dugann im qi\u00fean \u00feoei habaidedun ina gadaban.\n10:33 [CA] \u00featei sai, usgaggam in Iairusaulwma jah sunus mans atgibada \u00feaim ufargudjam jah bokarjam, jah gawargjand ina dau\u00feau\n10:34 [CA] jah bilaikand ina jah bliggwand ina jah speiwand ana ina jah usqimand imma, jah \u00feridjin daga ustandi\u00fe.\n10:35 [CA] jah athabaidedun sik du imma Iakobus jah Iohannes, sunjus Zaibaidaiaus, qi\u00feandans: laisari, wileima ei \u00featei \u00feuk bidjos, taujais uggkis.\n10:36 [CA] i\u00fe Iesus qa\u00fe im: hva wileits taujan mik igqis?\n10:37 [CA] i\u00fe eis qe\u00feun du imma: fragif ugkis ei ains af taihswon \u00feeinai jah ains af hleidumein \u00feeinai sitaiwa in wul\u00feau \u00feeinamma.\n10:38 [CA] i\u00fe Iesus qa\u00feuh du im: ni wituts hvis bidjats: magutsu driggkan stikl \u00feanei ik driggka, jah daupeinai \u00feizaiei ik daupjada, ei daupjaindau?\n10:39 [CA] i\u00fe eis qe\u00feun du imma: magu. i\u00fe Iesus qa\u00feuh du im: swe\u00feauh \u00feana stikl \u00feanei ik driggka, driggkats jah \u00feizai daupeinai \u00feizaiei ik daupjada ;\n10:40 [CA] i\u00fe \u00feata du sitan af taihswon meinai ai\u00fe\u00feau af hleidumein nist mein du giban, alja \u00feaimei manwi\u00fe was.\n10:41 [CA] jah gahausjandans \u00feai taihun dugunnun unwerjan bi Iakobu jah Iohannen.\n10:42 [CA] i\u00fe is athaitands ins qa\u00fe du im: witu\u00fe \u00featei \u00feuggkjand reikinon \u00feiudom, gafraujinond im, i\u00fe \u00feai mikilans ize gawaldand im.\n10:43 [CA] i\u00fe ni swa sijai in izwis; ak sahvazuh saei wili wair\u00fean mikils in izwis, sijai izwar andbahts;\n10:44 [CA] jah saei wili izwara wair\u00fean frumists, sijai allaim skalks.\n10:45 [CA] jah auk sunus mans ni qam at andbahtjam, ak andbahtjan jah giban saiwala seina faur managans lun.\n10:46 [CA] jah qemun in Iairikon. jah usgaggandin imma jain\u00fero mi\u00fe siponjam seinaim jah managein ganohai, sunus Teimaiaus, Barteimai[a]us blinda, sat faur wig du aihtron.\n10:47 [CA] jah gahausjands \u00featei Iesus sa Nazoraius ist, dugann hropjan jah qi\u00fean: sunau Daweidis, Iesu, armai mik!\n10:48 [CA] jah hvotidedun imma managai ei ga\u00feahaidedi; i\u00fe is filu mais hropida: sunau Daweidis, armai mik!\n10:49 [CA] jah gastandands Iesus haihait atwopjan ina. jah wopidedun \u00feana blindan, qi\u00feandans du imma: \u00ferafstei \u00feuk; urreis, wopei\u00fe \u00feuk.\n10:50 [CA] i\u00fe is afwairpands wastjai seinai ushlaupands qam at Iesu.\n10:51 [CA] jah andhafjands qa\u00fe du imma Iesus: hva wileis ei taujau \u00feus? i\u00fe sa blinda qa\u00fe du imma: rabbaunei, ei ussaihvau.\n10:52 [CA] i\u00fe Iesus qa\u00fe du imma: gagg, galaubeins \u00feeina ganasida \u00feuk. jah sunsaiw ussahv jah laistida in wiga Iesu.\n11:1 [CA] Jah bi\u00fee nehva wesun Iairusalem, in Be\u00fesfagein jah Bi\u00feaniin at fairgunja alewjin, insandida twans siponje seinaize\n11:2 [CA] jah qa\u00fe du im: gaggats in haim \u00feo wi\u00ferawair\u00feon iggqis, jah sunsaiw inngaggandans in \u00feo [baurg] bigitats fulan gabundanana, ana \u00feammei nauh ainshun manne ni sat; andbindandans ina attiuhats.\n11:3 [CA] jah jabai hvas iggqis qi\u00feai: duhve \u00feata taujats? qi\u00feaits: \u00featei frauja \u00feis gairnei\u00fe; jah sunsaiw ina insandei\u00fe hidre.\n11:4 [CA] gali\u00feun \u00fean jah bigetun fulan gabundanana at daura uta ana gagga; jah andbundun ina.\n11:5 [CA] jah sumai \u00feize jainar standandane qe\u00feun du im: hva taujats andbindandans \u00feana fulan?\n11:6 [CA] i\u00fe eis qe\u00feun du im swaswe anabau\u00fe im Iesus, jah lailotun ins.\n11:7 [CA] jah brahtedun \u00feana fulan at Iesua jah galagidedun ana wastjos seinos, jah gasat ana ina.\n11:8 [CA] managai \u00fean wastjom seinaim strawidedun ana wiga; sumai astans maimaitun us bagmam jah strawidedun ana wiga.\n11:9 [CA] jah \u00feai fauragaggandans hropidedun qi\u00feandans: osanna, \u00feiu\u00feida sa qimanda in namin fraujins!\n11:10 [CA] \u00feiu\u00feido so qimandei \u00feiudangardi in namin attins unsaris Daweidis, osanna in hauhistjam!\n11:11 [CA] jah galai\u00fe in Iairusaulwma Iesus jah in alh; jah bisaihvands alla, at andanahtja ju\u00fean wisandin hveilai usiddja in Be\u00feanian mi\u00fe \u00feaim twalibim.\n11:12 [CA] jah iftumin daga usstandandam im us Be\u00feaniin gredags was.\n11:13 [CA] jah gasaihvands smakkabagm fairra\u00fero habandan lauf atiddja, ei aufto bigeti hva ana imma; jah qimands at imma ni waiht bigat ana imma niba lauf; ni auk was mel smakkane.\n11:14 [CA] jah usbairands qa\u00fe du imma: ni \u00feanasei\u00fes us \u00feus aiw manna akran matjai. jah gahausidedun \u00feai siponjos is.\n11:15 [CA] jah iddjedun du Iairusaulwmai. jah atgaggands Iesus in alh dugann uswairpan \u00feans frabugjandans jah bugjandans in alh jah mesa skattjane jah sitlans \u00feize frabugjandane ahakim uswaltida.\n11:16 [CA] jah ni lailot ei hvas \u00feairhberi kas \u00feairh \u00feo alh.\n11:17 [CA] jah laisida qi\u00feands du im: niu gameli\u00fe ist \u00featei razn mein razn bido haitada allaim \u00feiudom? i\u00fe jus gatawidedu\u00fe ita du filigrja waidedjane.\n11:18 [CA] jah gahausidedun \u00feai bokarjos jah gudjane auhumistans jah sokidedun, hvaiwa imma usqistidedeina: ohtedun auk ina, unte alla managei sildaleikidedun in laiseinais is.\n11:19 [CA] jah bi\u00fee andanahti war\u00fe, usiddja ut us \u00feizai baurg.\n11:20 [CA] jah in maurgin faurgaggandans gasehvun \u00feana smakkabagm \u00feaursjana us waurtim.\n11:21 [CA] jah gamunands Paitrus qa\u00fe du imma: rabbei, sai, smakkabagms \u00feanei fraqast ga\u00feaursnoda.\n11:22 [CA] jah andhafjands Iesus qa\u00fe du im: habai\u00fe galaubein gudis!\n11:23 [CA] amen auk qi\u00fea izwis, \u00feishvazuh ei qi\u00feai du \u00feamma fairgunja: ushafei \u00feuk jah wairp \u00feus in marein, jah ni tuzwerjai in hairtin seinamma, ak galaubjai \u00feata, ei \u00featei qi\u00fei\u00fe gagaggi\u00fe, wair\u00fei\u00fe imma \u00feishvah \u00feei qi\u00fei\u00fe.\n11:24 [CA] du\u00fe\u00fee qi\u00fea izwis: allata \u00feishvah \u00feei bidjandans sokei\u00fe, galaubei\u00fe \u00featei nimi\u00fe, jah wair\u00fei\u00fe izwis.\n11:25 [CA] jah \u00fean standai\u00fe bidjandans, afletai\u00fe, jabai hva habai\u00fe wi\u00fera hvana, ei jah atta izwar sa in himinam afletai izwis missadedins izwaros.\n11:26 [CA] i\u00fe jabai jus ni afleti\u00fe, ni \u00feau atta izwar sa in himinam afleti\u00fe izwis missadedins izwaros.\n11:27 [CA] jah iddjedun aftra du Iairusaulwmai. jah in alh hvarbondin imma, atiddjedun du imma \u00feai auhumistans gudjans jah bokarjos jah sinistans.\n11:28 [CA] jah qe\u00feun du imma: in hvamma waldufnje \u00feata taujis? jah hvas \u00feus \u00feata waldufni atgaf, ei \u00feata taujis?\n11:29 [CA] i\u00fe Iesus andhafjands qa\u00fe du im: fraihna jah ik izwis ainis waurdis jah andhafji\u00fe mis, jah qi\u00fea izwis in hvamma waldufnje \u00feata tauja.\n11:30 [CA] daupeins Iohannis uzuh himina was \u00feau uzuh mannam? andhafji\u00fe mis.\n11:31 [CA] jah \u00feahtedun du sis misso qi\u00feandans, jabai qi\u00feam: us himina, qi\u00fei\u00fe: a\u00fe\u00fean duhve ni galaubidedu\u00fe imma?\n11:32 [CA] ak qi\u00feam: us mannam, uhtedun \u00feo managein. allai auk alakjo habaidedun Iohannen \u00featei bi sunjai praufetes was.\n11:33 [CA] jah andhafjandans qe\u00feun du Iesua: ni witum. jah andhafjands Iesus qa\u00fe du im: nih ik izwis qi\u00fea in hvamma waldufnje \u00feata tauja.\n12:1 [CA] Jah dugann im in gajukom qi\u00fean: weinagard ussatida manna jah bisatida ina fa\u00feom jah usgrof dal uf mesa jah gatimrida kelikn jah anafalh ina waurstwjam jah aflai\u00fe alja\u00fe.\n12:2 [CA] jah insandida du \u00feaim waurstwjam at mel skalk, ei at \u00feaim waurstwjam nemi akranis \u00feis weinagardis.\n12:3 [CA] i\u00fe eis nimandans ina usbluggwun jah insandidedun laushandjan.\n12:4 [CA] jah aftra insandida du im an\u00fearana skalk; jah \u00feana stainam wairpandans [gaaiwiskodedun jah] haubi\u00fewundan brahtedun jah insandidedun ganaitidana.\n12:5 [CA] jah aftra insandida an\u00fearana; jah jainana afslohun jah managans an\u00fearans, sumans usbliggwandans, sumanzuh \u00fean usqimandans.\n12:6 [CA] \u00feanuh nauh\u00feanuh ainana sunu aigands liubana sis, insandida jah \u00feana du im spedistana, qi\u00feands \u00featei gaaistand sunu meinana.\n12:7 [CA] i\u00fe jainai \u00feai waurstwjans qe\u00feun du sis misso \u00featei sa ist sa arbinumja; hirji\u00fe, usqimam imma, jah unsar wair\u00fei\u00fe \u00feata arbi.\n12:8 [CA] jah undgreipandans ina usqemun jah uswaurpun imma ut us \u00feamma weinagarda.\n12:9 [CA] hva nuh taujai frauja \u00feis weinagardis? qimi\u00fe jah usqistei\u00fe \u00feans waurstwjans jah gibi\u00fe \u00feana weinagard an\u00fearaim.\n12:10 [CA] nih \u00feata gamelido ussuggwu\u00fe: stains \u00feammei uswaurpun \u00feai timrjans, sah war\u00fe du haubida waihstins?\n12:11 [CA] fram fraujin war\u00fe sa jah ist sildaleiks in augam unsaraim.\n12:12 [CA] jah sokidedun ina undgreipan jah ohtedun \u00feo managein; fro\u00feun auk \u00featei du im \u00feo gajukon qa\u00fe. jah afletandans ina gali\u00feun.\n12:13 [CA] jah insandidedun du imma sumai \u00feize Fareisaie jah Herodiane, ei ina ganuteina waurda.\n12:14 [CA] i\u00fe eis qimandans qe\u00feun du imma: laisari, witum \u00featei sunjeins is jah ni kara \u00feuk manshun; ni auk saihvis in andwair\u00feja manne, ak bi sunjai wig gudis laiseis: skuldu ist kaisaragild giban kaisara, \u00feau niu gibaima?\n12:15 [CA] i\u00fe Iesus gasaihvands ize liutein qa\u00fe du im: hva mik fraisi\u00fe? atbairi\u00fe mis skatt, ei gasaihvau.\n12:16 [CA] i\u00fe eis atberun, jah qa\u00fe du im: hvis ist sa manleika jah so ufarmeleins? i\u00fe eis qe\u00feun du imma: kaisaris.\n12:17 [CA] jah andhafjands Iesus qa\u00fe du im: usgibi\u00fe \u00feo kaisaris kaisara jah \u00feo gudis guda. jah sildaleikidedun ana \u00feamma.\n12:18 [CA] jah atiddjedun Saddukaieis du imma \u00feaiei qi\u00feand usstass ni wisan, jah frehun ina qi\u00feandans:\n12:19 [CA] laisari, Moses gamelida unsis \u00featei jabai hvis bro\u00fear gadau\u00fenai jah bilei\u00feai qenai jah barne ni bilei\u00feai, ei nimai bro\u00fear is \u00feo qen is jah ussatjai barna bro\u00fer seinamma.\n12:20 [CA] sibun bro\u00ferahans wesun; jah sa frumista nam qen jah gaswiltands ni bilai\u00fe fraiwa.\n12:21 [CA] jah an\u00fear nam \u00feo jah gadau\u00fenoda jah ni sa bilai\u00fe fraiwa. jah \u00feridja samaleiko.\n12:22 [CA] jah nemun \u00feo samaleiko \u00feai sibun jah ni bili\u00feun fraiwa. spedumista allaize gaswalt jah so qens.\n12:23 [CA] in \u00feizai usstassai, \u00fean usstandand, hvarjamma ize wair\u00fei\u00fe qens? \u00feai auk sibun aihtedun \u00feo du qenai.\n12:24 [CA] jah andhafjands Iesus qa\u00fe du im: niu du\u00fee airzjai siju\u00fe, ni kunnandans mela nih maht gudis?\n12:25 [CA] allis \u00fean usstandand us dau\u00feaim, ni liugand ni liuganda, ak sind swe aggiljus \u00feai in himinam.\n12:26 [CA] a\u00fe\u00fean bi dau\u00feans, \u00featei urreisand, niu gakunnaidedu\u00fe ana bokom Mosezis ana aihvatundjai, hvaiwa imma qa\u00fe gu\u00fe qi\u00feands: ik im gu\u00fe Abrahamis jah gu\u00fe Isakis jah Iakobis?\n12:27 [CA] nist gu\u00fe dau\u00feaize, ak qiwaize. a\u00fe\u00fean jus filu airzjai siju\u00fe.\n12:28 [CA] jah duatgaggands ains \u00feize bokarje, gahausjands ins samana sokjandans, gasaihvands \u00featei waila im andhof, frah ina: hvarja ist allaizo anabusne frumista?\n12:29 [CA] i\u00fe Iesus andhof imma \u00featei frumista allaizo anabusns: hausei, Israel, frauja gu\u00fe unsar frauja ains ist.\n12:30 [CA] jah frijos fraujan gu\u00fe \u00feeinana us allamma hairtin \u00feeinamma jah us allai saiwalai \u00feeinai jah us allai gahugdai \u00feeinai jah us allai mahtai \u00feeinai. so frumista anabusns.\n12:31 [CA] jah an\u00feara galeika \u00feizai: frijos nehvundjan \u00feeinana swe \u00feuk silban. Maizei \u00feaim an\u00feara anabusns nist.\n12:32 [CA] jah qa\u00fe du imma sa bokareis: waila, laisari, bi sunjai qast \u00featei ains ist, jah nist an\u00fear alja imma;\n12:33 [CA] jah \u00feata du frijon ina us allamma hairtin jah us allamma fra\u00feja jah us allai saiwalai jah us allai mahtai, jah \u00feata du frijon nehvundjan swe sik silban managizo ist allaim \u00feaim alabrunstim jah saudim.\n12:34 [CA] jah Iesus gasaihvands ina \u00featei frodaba andhof, qa\u00fe du imma: ni fairra is \u00feiudangardjai gudis. jah ainshun \u00feanasei\u00fes ni gadaursta ina fraihnan.\n12:35 [CA] jah andhafjands Iesus qa\u00fe laisjands in alh: hvaiwa qi\u00feand \u00feai bokarjos \u00featei Xristus sunus ist Daweidis?\n12:36 [CA] silba auk Daweid qa\u00fe in ahmin weihamma: qi\u00fei\u00fe frauja du fraujin meinamma, sit af taihswon meinai, unte ik galagja fijands \u00feeinans fotubaurd fotiwe \u00feeinaize.\n12:37 [CA] silba raihtis Daweid qi\u00fei\u00fe ina fraujan, jah hva\u00fero imma sunus ist? jah alla so managei hausidedun imma gabaurjaba.\n12:38 [CA] jah qa\u00fe du im in laiseinai seinai: saihvi\u00fe faura bo(karjam) . . . .\n13:16 [CA] . . . . wastja seina.\n13:17 [CA] a\u00fe\u00fean wai \u00feaim qi\u00feuhaftom jah daddjandeim in jainaim dagam.\n13:18 [CA] a\u00fe\u00fean bidjai\u00fe ei ni wair\u00feai sa \u00felauhs izwar wintrau.\n13:19 [CA] wair\u00feand auk \u00feai dagos jainai aglo swaleika, swe ni was swaleika fram anastodeinai gaskaftais \u00feoei gaskop gu\u00fe, und hita, jah ni wair\u00fei\u00fe.\n13:20 [CA] jah ni frauja gamaurgidedi \u00feans dagans, ni \u00feauh ganesi ainhun leike; akei in \u00feize gawalidane, \u00feanzei gawalida, gamaurgida \u00feans dagans.\n13:21 [CA] jah \u00fean jabai hvas izwis qi\u00feai: sai, her Xristus, ai\u00fe\u00feau sai, jainar, ni galaubjai\u00fe;\n13:22 [CA] unte urreisand galiugaxristjus jah galiugapraufeteis jah giband taiknins jah fauratanja du afairzjan, jabai mahteig sijai, jah \u00feans gawalidans.\n13:23 [CA] i\u00fe jus saihvi\u00fe: sai, fauragataih izwis allata.\n13:24 [CA] akei in jainans dagans afar \u00feo aglon jaina sauil riqizei\u00fe jah mena ni gibi\u00fe liuha\u00fe sein.\n13:25 [CA] jah stairnons himinis wair\u00feand driusandeins jah mahteis \u00feos in himinam gawagjanda.\n13:26 [CA] jah \u00fean gasaihvand sunu mans qimandan in milhmam mi\u00fe mahtai managai jah wul\u00feau.\n13:27 [CA] jah \u00fean insandei\u00fe aggiluns seinans jah galisi\u00fe \u00feans gawalidans seinans af fidwor windam fram andjam air\u00feos und andi himinis.\n13:28 [CA] a\u00fe\u00fean af smakkabagma ganimi\u00fe \u00feo gajukon. \u00fean \u00feis ju\u00fean asts \u00felaqus wair\u00fei\u00fe, jah uskeinand laubos, kunnu\u00fe \u00featei nehva ist asans.\n13:29 [CA] swah jah jus, \u00fean gasaihvi\u00fe \u00feata wair\u00fean, kunnei\u00fe \u00featei nehva siju\u00fe a(t) . . . .\n14:4 [CA] . . . . _teins \u00feis balsanis war\u00fe?\n14:5 [CA] maht wesi auk \u00feata balsan frabugjan in managizo \u00feau \u00ferija hunda skatte jah giban unledaim. jah andstaurraidedun \u00feo.\n14:6 [CA] i\u00fe Iesus qa\u00fe: leti\u00fe \u00feo; duhve izai us\u00feriuti\u00fe? \u00feannu go\u00fe waurstw waurhta bi mis.\n14:7 [CA] sinteino auk \u00feans unledans habai\u00fe mi\u00fe izwis, jah \u00fean wilei\u00fe, magu\u00fe im waila taujan; i\u00fe mik ni sinteino habai\u00fe.\n14:8 [CA] \u00featei habaida so gatawida; faursnau salbon mein leik du usfilha.\n14:9 [CA] amen, qi\u00fea izwis: \u00feishvaruh \u00feei merjada so aiwaggeljo and alla manase\u00fe, jah \u00featei gatawida so rodjada du gamundai izos.\n14:10 [CA] jah Iudas Iskarioteis, ains \u00feize twalibe, galai\u00fe du \u00feaim gudjam, ei galewidedi ina im.\n14:11 [CA] i\u00fe eis gahausjandans faginodedun jah gahaihaitun imma faihu giban; jah sokida hvaiwa gatilaba ina galewidedi.\n14:12 [CA] jah \u00feamma frumistin daga azwme, \u00fean paska salidedun, qe\u00feun du imma \u00feai siponjos is: hvar wileis ei galei\u00feandans manwjaima, ei matjais paska?\n14:13 [CA] jah insandida twans siponje seinaize qa\u00feuh du im: gaggats in \u00feo baurg, jah gamotei\u00fe igqis manna kas watins bairands: gaggats afar \u00feamma,\n14:14 [CA] jah \u00feadei inngalei\u00feai, qi\u00feaits \u00feamma heiwafraujin \u00featei laisareis qi\u00fei\u00fe: hvar sind sali\u00fewos \u00fearei paska mi\u00fe siponjam meinaim matjau?\n14:15 [CA] jah sa izwis taiknei\u00fe kelikn mikilata, gastrawi\u00fe, manwjata; jah jainar manwjai\u00fe unsis.\n14:16 [CA] jah usiddjedun \u00feai sipon(jos) . . . .\n14:41 [CA] . . . . sai, galewjada sunus mans in handuns frawaurhtaize.\n14:42 [CA] urreisi\u00fe, gaggam! sai, sa lewjands mik atnehvida.\n14:43 [CA] jah sunsaiw nauh\u00feanuh at imma rodjandin qam Iudas, sums \u00feize twalibe, jah mi\u00fe imma managei mi\u00fe hairum jah triwam fram \u00feaim auhumistam gudjam jah bokarjam jah sinistam.\n14:44 [CA] at~uh~\u00fean~gaf sa lewjands im bandwon qi\u00feands: \u00feammei kukjau, sa ist: greipi\u00fe \u00feana jah tiuhi\u00fe arniba.\n14:45 [CA] jah qimands sunsaiw, atgaggands du imma qa\u00fe: rabbei, rabbei! jah kukida imma.\n14:46 [CA] i\u00fe eis uslagidedun handuns ana ina jah undgripun ina.\n14:47 [CA] i\u00fe ains sums \u00feize atstandandane imma uslukands hairu sloh skalk auhumistins gudjins jah afsloh imma auso \u00feata taihswo.\n14:48 [CA] jah andhafjands Iesus qa\u00fe du im: swe du waidedjin urrunnu\u00fe mi\u00fe hairum jah triwam greipan mik.\n14:49 [CA] daga hvammeh was at izwis in alh laisjands jah ni gripu\u00fe mik: ak ei usfullnodedeina bokos.\n14:50 [CA] jah afletandans ina ga\u00felauhun allai.\n14:51 [CA] jah ains sums juggalau\u00fes laistida afar imma biwaibi\u00fes leina ana naqadana; jah gripun is \u00feai juggalaudeis.\n14:52 [CA] i\u00fe is bilei\u00feands \u00feamma leina naqa\u00fes ga\u00felauh faura im.\n14:53 [CA] jah gatauhun Iesu du auhumistin gudjin; jah garunnun mi\u00fe imma auhumistans gudjans allai jah \u00feai sinistans jah bokarjos.\n14:54 [CA] jah Paitrus fairra\u00fero laistida afar imma, unte qam in garda \u00feis auhumistins gudjins; jah was sitands mi\u00fe andbahtam jah warmjands sik at liuhada.\n14:55 [CA] i\u00fe \u00feai auhumistans gudjans jah alla so gafaurds sokidedun ana Iesu weitwodi\u00fea du afdau\u00fejan ina jah ni bigetun.\n14:56 [CA] managai auk galiug weitwodidedun ana ina, jah samaleikos \u00feos weitwodi\u00feos ni wesun.\n14:57 [CA] jah sumai usstandandans galiug weitwodidedun ana ina qi\u00feandans:\n14:58 [CA] \u00featei weis gahausidedum qi\u00feandan ina \u00featei ik gataira alh \u00feo handuwaurhton jah bi \u00ferins dagans an\u00feara unhanduwaurhta gatimrja.\n14:59 [CA] jah ni swa samaleika was weitwodi\u00fea ize.\n14:60 [CA] jah usstandands sa auhumista gudja in midjaim frah Iesu qi\u00feands: niu andhafjis waiht, hva \u00feai ana \u00feuk weitwodjand?\n14:61 [CA] i\u00fe is \u00feahaida jah waiht ni andhof. aftra sa auhumista gudja frah ina jah qa\u00fe du imma: \u00feu is Xristus sa sunus \u00feis \u00feiu\u00feeigins?\n14:62 [CA] i\u00fe is qa\u00feuh: ik im; jah gasaihvi\u00fe \u00feana sunu mans af taihswon sitandan mahtais jah qimandan mi\u00fe milhmam himinis.\n14:63 [CA] i\u00fe sa auhumista gudja disskreitands wastjos seinos qa\u00fe: hva \u00feanamais \u00feaurbum weis weitwode?\n14:64 [CA] hausidedu\u00fe \u00feo wajamerein is: hva izwis \u00feugkei\u00fe? \u00fearuh eis allai gadomidedun ina skulan wisan dau\u00feau.\n14:65 [CA] jah dugunnun sumai speiwan ana wlit is jah huljan andwair\u00fei is jah kaupatjan ina; jah qe\u00feun du imma: praufetei! jah andbahtos [gabaurjaba] lofam slohun ina.\n14:66 [CA] jah wisandin Paitrau in rohsnai dala\u00fea [jah] atiddja aina \u00feiujo \u00feis auhumistins gudjins,\n14:67 [CA] jah gasaihvandei Paitru warmjandan sik, insaihvandei du imma qa\u00fe: jah \u00feu mi\u00fe Iesua \u00feamma Nazoreinau wast.\n14:68 [CA] i\u00fe is afaiaik qi\u00feands: ni wait, ni kann hva \u00feu qi\u00feis. jah galai\u00fe faur gard, jah hana wopida.\n14:69 [CA] jah \u00feiwi gasaihvandei ina aftra dugann qi\u00fean \u00feaim faurastandandam, \u00featei sa \u00feizei ist.\n14:70 [CA] i\u00fe is aftra laugnida. jah afar leitil aftra \u00feai atstandandans qe\u00feun du Paitrau: bi sunjai, \u00feizei is; jah auk razda \u00feeina galeika ist.\n14:71 [CA] i\u00fe is dugann afaikan jah swaran \u00featei ni kann \u00feana mannan \u00feanei qi\u00fei\u00fe.\n14:72 [CA] jah an\u00fearamma sin\u00fea hana wopida. jah gamunda Paitrus \u00feata waurd, swe qa\u00fe imma Iesus, \u00featei faur\u00feize hana hrukjai twaim sin\u00feam, inwidis mik \u00ferim sin\u00feam. jah dugann greitan.\n15:1 [CA] Jah sunsaiw in maurgin garuni taujandans \u00feai auhumistans gudjans mi\u00fe \u00feaim sinistam jah bokarjam, jah alla so gafaurds gabindandans Iesu brahtedun ina at Peilatau.\n15:2 [CA] jah frah ina Peilatus: \u00feu is \u00feiudans Iudaie? i\u00fe is andhafjands qa\u00fe du imma: \u00feu qi\u00feis.\n15:3 [CA] jah wrohidedun ina \u00feai auhumistans gudjans filu.\n15:4 [CA] i\u00fe Peilatus aftra frah ina qi\u00feands: niu andhafjis ni waiht? sai, hvan filu ana \u00feuk weitwodjand.\n15:5 [CA] i\u00fe Iesus \u00feanamais ni andhof, swaswe sildaleikida Peilatus.\n15:6 [CA] i\u00fe and dul\u00fe hvarjoh fralailot im ainana bandjan \u00feanei bedun.\n15:7 [CA] wasuh \u00fean sa haitana Barabbas mi\u00fe \u00feaim mi\u00fe imma drobjandam gabundans, \u00feaiei in auhjodau maur\u00fer gatawidedun.\n15:8 [CA] jah usgaggandei alla managei dugunnun bidjan, swaswe sinteino tawida im.\n15:9 [CA] i\u00fe Peilatus andhof im qi\u00feands: wileidu fraleitan izwis \u00feana \u00feiudan Iudaie?\n15:10 [CA] wissa auk \u00featei in nei\u00feis atgebun ina \u00feai auhumistans gudjans.\n15:11 [CA] i\u00fe \u00feai auhumistans gudjans inwagidedun \u00feo managein ei mais Barabban fralailoti im.\n15:12 [CA] i\u00fe Peilatus aftra andhafjands qa\u00fe du im: hva nu wilei\u00fe ei taujau \u00feammei qi\u00fei\u00fe \u00feiudan Iudaie?\n15:13 [CA] i\u00fe eis aftra hropidedun: ushramei ina.\n15:14 [CA] i\u00fe Peilatus qa\u00fe du im: hva allis ubilis gatawida? i\u00fe eis mais hropidedun: ushramei ina.\n15:15 [CA] i\u00fe Peilatus wiljands \u00feizai managein fullafahjan, fralailot im \u00feana Barabban, i\u00fe Iesu atgaf usbliggwands, ei ushrami\u00fes wesi.\n15:16 [CA] i\u00fe gadrauhteis gatauhun ina innana gardis, \u00featei ist praitoriaun, jah gahaihaitun alla hansa\n15:17 [CA] jah gawasidedun ina paurpurai jah atlagidedun ana ina \u00feaurneina wipja uswindandans\n15:18 [CA] jah dugunnun goljan ina: hails, \u00feiudan Iudaie!\n15:19 [CA] jah slohun is haubi\u00fe rausa jah bispiwun ina jah lagjandans kniwa inwitun ina.\n15:20 [CA] jah bi\u00fee bilailaikun ina andwasidedun ina \u00feizai paurpurai jah gawasidedun ina wastjom swesaim. jah ustauhun ina ei ushramidedeina ina.\n15:21 [CA] jah undgripun sumana manne, Seimona Kwreinaiu, qimandan af akra, attan Alaiksandraus jah Rufaus, ei nemi galgan is.\n15:22 [CA] jah attauhun ina ana Gaulgau\u00fea sta\u00fe, \u00featei ist gaskeiri\u00fe hvairneins sta\u00fes.\n15:23 [CA] jah gebun imma drigkan wein mi\u00fe smwrna; i\u00fe is ni nam.\n15:24 [CA] jah ushramjandans ina disdailjand wastjos is wairpandans hlauta ana \u00feos, hvarjizuh hva nemi.\n15:25 [CA] wasuh \u00fean hveila \u00feridjo, jah ushramidedun ina.\n15:26 [CA] jah was ufarmeli fairinos is ufarmeli\u00fe: sa \u00feiudans Iudaie.\n15:27 [CA] jah mi\u00fe imma ushramidedun twans waidedjans, ainana af taihswon jah ainana af hleidumein is.\n15:28 [CA] jah usfullnoda \u00feata gamelido \u00feata qi\u00feando: jah mi\u00fe unsibjaim rahni\u00fes was.\n15:29 [CA] jah \u00feai faurgaggandans wajameridedun ina, wi\u00feondans haubida seina jah qi\u00feandans: o sa gatairands \u00feo alh jah bi \u00ferins dagans gatimrjands \u00feo,\n15:30 [CA] nasei \u00feuk silban jah atsteig af \u00feamma galgin!\n15:31 [CA] samaleiko jah \u00feai auhumistans gudjans bilaikandans ina mi\u00fe sis misso mi\u00fe \u00feaim bokarjam qe\u00feun: an\u00fearans ganasida, i\u00fe sik silban ni mag ganasjan.\n15:32 [CA] sa Xristus, sa \u00feiudans Israelis, atsteigadau nu af \u00feamma galgin, ei gasaihvaima jah galaubjaima. jah \u00feai mi\u00feushramidans imma idweitidedun imma.\n15:33 [CA] jah bi\u00fee war\u00fe hveila saihsto, riqis war\u00fe ana allai air\u00feai und hveila niundon.\n15:34 [CA] jah niundon hveilai wopida Iesus stibnai mikilai qi\u00feands: ailoe ailoe, lima sibak\u00feanei, \u00featei ist gaskeiri\u00fe: gu\u00fe meins, gu\u00fe meins, duhve mis bilaist?\n15:35 [CA] jah sumai \u00feize atstandandane gahausjandans qe\u00feun: sai, Helian wopei\u00fe.\n15:36 [CA] \u00feragjands \u00fean ains jah gafulljands swam akeitis, galagjands ana raus, dragkida ina qi\u00feands: let, ei saihvam qimaiu Helias athafjan ina.\n15:37 [CA] i\u00fe Iesus aftra letands stibna mikila uzon.\n15:38 [CA] jah faur[a]hah als disskritnoda in twa iupa\u00fero und dala\u00fe.\n15:39 [CA] gasaihvands \u00fean sa hundafa\u00fes sa atstandands in andwair\u00feja is \u00featei swa hropjands uzon, qa\u00fe: bi sunjai, sa manna sa sunus was gudis.\n15:40 [CA] wesunu\u00fe~\u00fean qinons fairra\u00fero saihvandeins, in \u00feaimei was Marja so Magdalene jah Marja Iakobis \u00feis minnizins jah Iosezis ai\u00feei jah Salome.\n15:41 [CA] jah \u00fean was in Galeilaia, jah laistidedun ina jah andbahtidedun imma, jah an\u00fearos managos \u00feozei mi\u00feiddjedun imma in Iairusalem.\n15:42 [CA] jah ju\u00fean at andanahtja waur\u00feanamma, unte was paraskaiwe, saei ist fruma sabbato,\n15:43 [CA] qimands Iosef af Areima\u00feaias, gaguds ragineis, saei was silba beidands \u00feiudangardjos gudis, ananan\u00fejands galai\u00fe inn du Peilatau jah ba\u00fe \u00feis leikis Iesuis.\n15:44 [CA] i\u00fe Peilatus sildaleikida ei is ju\u00fean gaswalt; jah athaitands \u00feana hundafa\u00fe frah ina j\u00fb~\u00fean gadau\u00fenodedi.\n15:45 [CA] jah fin\u00feands at \u00feamma hundafada fragaf \u00feata leik Iosefa.\n15:46 [CA] jah usbugjands lein jah usnimands ita biwand \u00feamma leina jah galagida ita in hlaiwa, \u00featei was gadraban us staina, jah atwalwida stain du daura \u00feis hlaiwis.\n15:47 [CA] i\u00fe Marja so Magdalene jah Marja Iosezis sehvun hvar galagi\u00fes wesi.\n16:1 [CA] jah inwisandins sabbate dagis Marja so Magdalene jah Marja so Iakobis jah Salome usbauhtedun aromata, ei atgaggandeins gasalbodedeina ina.\n16:2 [CA] jah filu air \u00feis dagis afarsabbate atiddjedun du \u00feamma hlaiwa at urrinnandin sunnin.\n16:3 [CA] jah qe\u00feun du sis misso: hvas afwalwjai unsis \u00feana stain af daurom \u00feis hlaiwis?\n16:4 [CA] jah insaihvandeins gaumidedun \u00feammei afwalwi\u00fes ist sa stains; was auk mikils abraba.\n16:5 [CA] jah atgaggandeins in \u00feata hlaiw gasehvun juggalau\u00fe sitandan in taihswai biwaibidana wastjai hveitai; jah usgeisnodedun.\n16:6 [CA] \u00fearuh qa\u00fe du im: ni faurhtei\u00fe izwis, Iesu sokei\u00fe Nazoraiu \u00feana ushramidan; nist her, urrais, sai \u00feana sta\u00fe \u00fearei galagidedun ina.\n16:7 [CA] akei gaggi\u00fe qi\u00feiduh du siponjam is jah du Paitrau \u00featei faurbigaggi\u00fe izwis in Galeilaian; \u00fearuh ina gasaihvi\u00fe, swaswe qa\u00fe izwis.\n16:8 [CA] jah usgaggandeins af \u00feamma hlaiwa ga\u00felauhun; dizuh~\u00fean~sat ijos reiro jah usfilmei, jah ni qe\u00feun mannhun waiht; ohtedun sis auk.\n16:9 [CA] usstandands \u00fean in maurgin frumin sabbato ataugida frumist Marjin \u00feizai Magdalene, af \u00feizaiei uswarp sibun unhul\u00feons.\n16:10 [CA] soh gaggandei gataih \u00feaim mi\u00fe imma wisandam, qainondam jah gretandam.\n16:11 [CA] jah eis hausjandans \u00featei libai\u00fe jah gasaihvans war\u00fe fram izai, ni galaubidedun.\n16:12 [CA] afaruh \u00fean \u00feata . . . .\n16:12 [Speyer] . . . . twaim ize ataugi\u00fes war\u00fe in an\u00fearamma farwa, gaggandam du wehsa:\n16:13 [Speyer] jah jainai galei\u00feandans gataihun \u00feaim an\u00fearaim; ni\u00fe~\u00feaim galaubidedun.\n16:14 [Speyer] bi spedistin \u00fean anakumbjandam \u00feaim ainlibim ataugida, jah idweitida ungalaubein ize jah harduhairtein, unte \u00feaim gasaihvandam ina urrisanana, ni galaubidedun.\n16:15 [Speyer] jah qa\u00fe du im: gaggandans in \u00feo manase\u00fe alakjo, merjai\u00fe \u00feo aiwaggeljon allai \u00feizai gaskaftai.\n16:16 [Speyer] jah sa galaubjands ufdaupi\u00fes ganisi\u00fe; i\u00fe saei ni galaubei\u00fe, afdomjada.\n16:17 [Speyer] a\u00fe\u00fean taikns \u00feaim galaubjandam \u00feata afargaggi\u00fe: in namin meinamma unhul\u00feons uswairpand: razdom rodjand niujaim,\n16:18 [Speyer] waurmans nimand, jah jabai ingibe hva drigkaina, ni \u00feauh im agljai; ana unhailans handuns uslagjand, jah waila wair\u00fei\u00fe im.\n16:19 [Speyer] \u00feanuh \u00fean frauja Iesus afar \u00featei rodida du im, usnumans war\u00fe in himin jah gasat af taihswon gudis.\n16:20 [Speyer] i\u00fe jainai usgaggandans meridedun and allata mi\u00fe fraujin gawaurstwin jah \u00feata waurd tulgjandin \u00feairh \u00feos afargaggandeins taiknins. amen.\n16:255 [Speyer] Aiwaggeljo \u00feairh Marku ustauh. wul\u00feus \u00feus weiha gu\u00fe. amen.","title":"Gothic Bible (partial): Mark","type":"page"}