{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/mat.htm","path":"bib/wb/got/mat.htm","source_url":"https://sacred-texts.com/bib/wb/got/mat.htm","text":"5:15 [CA] . . . . ak ana lukarnasta\u00fein, jah liutei\u00fe allaim \u00feaim in \u00feamma garda.\n5:16 [CA] swa liuhtjai liuha\u00fe izwar in andwair\u00feja manne, ei gasaihvaina izwara goda waurstwa jah hauhjaina attan izwarana \u00feana in himinam.\n5:17 [CA] ni hugjai\u00fe ei qemjau gatairan wito\u00fe ai\u00fe\u00feau praufetuns; ni qam gatairan, ak usfulljan.\n5:18 [CA] amen auk qi\u00fea izwis: und \u00featei uslei\u00fei\u00fe himins jah air\u00fea, jota ains ai\u00fe\u00feau ains striks ni uslei\u00fei\u00fe af witoda, unte allata wair\u00fei\u00fe.\n5:19 [CA] i\u00fe saei nu gatairi\u00fe aina anabusne \u00feizo minnistono jah laisjai swa mans, minnista haitada in \u00feiudangardjai himine; i\u00fe saei tauji\u00fe jah laisjai swa, sah mikils haitada in \u00feiudangardjai himine.\n5:20 [CA] qi\u00fea auk izwis \u00featei nibai managizo wair\u00fei\u00fe izwaraizos garaihteins \u00feau \u00feize bokarje jah Fareisaie, ni \u00feau qimi\u00fe in \u00feiudangardjai himine.\n5:21 [CA] hausidedu\u00fe \u00featei qi\u00fean ist \u00feaim airizam: ni maur\u00ferjais; i\u00fe saei maur\u00ferei\u00fe skula wair\u00fei\u00fe stauai.\n5:22 [CA] a\u00fe\u00fean ik qi\u00fea izwis \u00featei hvazuh modags bro\u00fer seinamma sware, skula wair\u00fei\u00fe stauai; i\u00fe saei qi\u00fei\u00fe bro\u00fer seinamma raka, skula wair\u00fei\u00fe gaqum\u00feai; a\u00fe\u00fean saei qi\u00fei\u00fe dwala, skula wair\u00fei\u00fe in gaiainnan funins.\n5:23 [CA] jabai nu bairais aibr \u00feein du hunslastada jah jainar gamuneis \u00featei bro\u00fear \u00feeins habai\u00fe hva bi \u00feuk,\n5:24 [CA] aflet jainar \u00feo giba \u00feeina in andwair\u00feja hunslastadis jah gagg faur\u00feis gasibjon bro\u00fer \u00feeinamma, jah bi\u00fee atgaggands atbair \u00feo giba \u00feeina.\n5:25 [CA] sijais waila hugjands andastauin \u00feeinamma sprauto, und \u00featei is in wiga mi\u00fe imma, ibai hvan atgibai \u00feuk sa andastaua stauin, jah sa staua \u00feuk atgibai andbahta, jah in karkara galagjaza.\n5:26 [CA] amen qi\u00fea \u00feus: ni usgaggis jain\u00fero, unte usgibis \u00feana minnistan kintu.\n5:27 [CA] hausidedu\u00fe \u00featei qi\u00fean ist: ni horinos.\n5:28 [CA] a\u00fe\u00fean ik qi\u00fea izwis, \u00featei hvazuh saei saihvi\u00fe qinon du luston izos, ju gahorinoda izai in hairtin seinamma.\n5:29 [CA] i\u00fe jabai augo \u00feein \u00feata taihswo marzjai \u00feuk, usstagg ita jah wairp af \u00feus; batizo ist auk \u00feus ei fraqistnai ains li\u00feiwe \u00feeinaize, jah ni allata leik \u00feein gadriusai in gaiainnan.\n5:30 [CA] jah jabai taihswo \u00feeina handus marzjai \u00feuk, afmait \u00feo jah wairp af \u00feus; batizo ist auk \u00feus ei fraqistnai ains li\u00feiwe \u00feeinaize, jah ni allata leik \u00feein gadriusai in gaiainnan.\n5:31 [CA] qi\u00feanuh \u00fean ist \u00featei hvazuh saei afletai qen, gibai izai afstassais bokos.\n5:32 [CA] i\u00fe ik qi\u00fea izwis \u00featei hvazuh saei afleti\u00fe qen seina, inuh fairina kalkinassaus, tauji\u00fe \u00feo horinon; jah sa ize afsatida liugai\u00fe, horino\u00fe.\n5:33 [CA] aftra hausidedu\u00fe \u00featei qi\u00fean ist \u00feaim airizam: ni ufarswarais, i\u00fe usgibais fraujin ai\u00feans \u00feeinans.\n5:34 [CA] a\u00fe\u00fean ik qi\u00fea izwis ni swaran allis, ni bi himina, unte stols ist gudis;\n5:35 [CA] nih bi air\u00feai, unte fotubaurd ist fotiwe is; nih bi Iairusaulwmai, unte baurgs ist \u00feis mikilins \u00feiudanis;\n5:36 [CA] nih bi haubida \u00feeinamma swarais, unte ni magt ain tagl hveit ai\u00fe\u00feau swart gataujan.\n5:37 [CA] sijai\u00fe~\u00fean waurd izwar: ja, ja; ne, ne; i\u00fe \u00feata managizo \u00feaim us \u00feamma ubilin ist.\n5:38 [CA] hausidedu\u00fe \u00featei qi\u00fean ist: augo und augin, jah tun\u00feu und tun\u00feau.\n5:39 [CA] i\u00fe ik qi\u00fea izwis ni andstandan allis \u00feamma unseljin; ak jabai hvas \u00feuk stautai bi taihswon \u00feeina kinnu, wandei imma jah \u00feo an\u00feara.\n5:40 [CA] jah \u00feamma wiljandin mi\u00fe \u00feus staua jah paida \u00feeina niman, aflet imma jah wastja.\n5:41 [CA] jah jabai hvas \u00feuk ananau\u00fejai rasta aina, gaggais mi\u00fe imma twos.\n5:42 [CA] \u00feamma bidjandin \u00feuk gibais, jah \u00feamma wiljandin af \u00feus leihvan sis ni uswandjais.\n5:43 [CA] hausidedu\u00fe \u00featei qi\u00fean ist: frijos nehvundjan \u00feeinana, jah fiais fiand \u00feeinana.\n5:44 [CA] a\u00fe\u00fean ik qi\u00fea izwis: frijo\u00fe fijands izwarans, \u00feiu\u00fejai\u00fe \u00feans wrikandans izwis, waila taujai\u00fe \u00feaim hatjandam izwis, jah bidjai\u00fe bi \u00feans us\u00feriutandans izwis,\n5:45 [CA] ei wair\u00feai\u00fe sunjus attins izwaris \u00feis in himinam, unte sunnon seina urrannei\u00fe ana ubilans jah godans, jah rignei\u00fe ana garaihtans jah ana inwindans.\n5:46 [CA] jabai auk frijo\u00fe \u00feans frijondans izwis ainans, hvo mizdono habai\u00fe? niu jah \u00feai \u00feiudo \u00feata samo taujand?\n5:47 [CA] jah jabai golei\u00fe \u00feans frijonds izwarans \u00featainei, hve managizo tauji\u00fe? niu jah motarjos \u00feata samo taujand?\n5:48 [CA] sijai\u00fe nu jus fullatojai, swaswe atta izwar sa in himinam fullatojis ist.\n6:1 [CA] Atsaihvi\u00fe armaion izwara ni taujan in andwair\u00feja manne du saihvan im; ai\u00fe\u00feau laun ni habai\u00fe fram attin izwaramma \u00feamma in himinam.\n6:2 [CA] \u00fean nu taujais armaion, ni haurnjais faura \u00feus, swaswe \u00feai liutans taujand in gaqum\u00feim jah in garunsim, ei hauhjaindau fram mannam; amen qi\u00fea izwis: andnemun mizdon seina.\n6:3 [CA] i\u00fe \u00feuk taujandan armaion ni witi hleidumei \u00feeina, hva tauji\u00fe taihswo \u00feeina,\n6:4 [CA] ei sijai so armahairti\u00fea \u00feeina in fulhsnja, jah atta \u00feeins saei saihvi\u00fe in fulhsnja, usgibi\u00fe \u00feus in bairhtein.\n6:5 [CA] jah \u00fean bidjai\u00fe, ni sijai\u00fe swaswe \u00feai liutans, unte frijond in gaqum\u00feim jah waihstam plapjo standandans bidjan, ei gaumjaindau mannam. Amen, qi\u00fea izwis \u00featei haband mizdon seina.\n6:6 [CA] i\u00fe \u00feu \u00fean bidjais, gagg in he\u00fejon \u00feeina jah galukands haurdai \u00feeinai bidei du attin \u00feeinamma \u00feamma in fulhsnja, jah atta \u00feeins saei saihvi\u00fe in fulhsnja, usgibi\u00fe \u00feus in bairhtein.\n6:7 [CA] bidjandansu\u00fe~\u00fean ni filuwaurdjai\u00fe, swaswe \u00feai \u00feiudo; \u00feugkei\u00fe im auk ei in filuwaurdein seinai andhausjaindau.\n6:8 [CA] ni galeiko\u00fe nu \u00feaim; wait auk atta izwar \u00feizei jus \u00feaurbu\u00fe, faur\u00feizei jus bidjai\u00fe ina.\n6:9 [CA] swa nu bidjai\u00fe jus: atta unsar \u00feu in himinam, weihnai namo \u00feein.\n6:10 [CA] qimai \u00feiudinassus \u00feeins. wair\u00feai wilja \u00feeins, swe in himina jah ana air\u00feai.\n6:11 [CA] hlaif unsarana \u00feana sinteinan gif uns himma daga.\n6:12 [CA] jah aflet uns \u00featei skulans sijaima, swaswe jah weis afletam \u00feaim skulam unsaraim.\n6:13 [CA] jah ni briggais uns in fraistubnjai, ak lausei uns af \u00feamma ubilin; unte \u00feeina ist \u00feiudangardi jah mahts jah wul\u00feus in aiwins. amen.\n6:14 [CA] unte jabai afleti\u00fe mannam missadedins ize, afleti\u00fe jah izwis atta izwar sa ufar himinam.\n6:15 [CA] i\u00fe jabai ni afleti\u00fe mannam missadedins ize, ni \u00feau atta izwar afleti\u00fe missadedins izwaros.\n6:16 [CA] a\u00fe\u00fean bi\u00fee fastai\u00fe, ni wair\u00feai\u00fe swaswe \u00feai liutans gaurai; frawardjand auk andwair\u00feja seina, ei gasaihvaindau mannam fastandans. amen, qi\u00fea izwis, \u00featei andnemun mizdon seina.\n6:17 [CA] i\u00fe \u00feu fastands salbo haubi\u00fe \u00feein jah ludja \u00feeina \u00fewah,\n6:18 [CA] ei ni gasaihvaizau mannam fastands, ak attin \u00feeinamma \u00feamma in fulhsnja, jah atta \u00feeins saei saihvi\u00fe in fulhsnja, usgibi\u00fe \u00feus.\n6:19 [CA] ni huzdjai\u00fe izwis huzda ana air\u00feai, \u00fearei malo jah nidwa frawardei\u00fe, jah \u00fearei \u00feiubos ufgraband jah hlifand.\n6:20 [CA] i\u00fe huzdjai\u00fe izwis huzda in himina, \u00fearei nih malo nih nidwa frawardei\u00fe, jah \u00fearei \u00feiubos ni ufgraband nih stiland.\n6:21 [CA] \u00fearei auk ist huzd izwar, \u00fearuh ist jah hairto izwar.\n6:22 [CA] lukarn leikis ist augo: jabai nu augo \u00feein ainfal\u00fe ist, allata leik \u00feein liuhadein wair\u00fei\u00fe;\n6:23 [CA] i\u00fe jabai augo \u00feein unsel ist, allata leik \u00feein riqizein wair\u00fei\u00fe. jabai nu liuha\u00fe \u00feata in \u00feus riqiz ist, \u00feata riqiz hvan filu!\n6:24 [CA] ni manna mag twaim fraujam skalkinon; unte jabai fijai\u00fe ainana, jah an\u00fearana frijo\u00fe; ai\u00fe\u00feau ainamma ufhausei\u00fe, i\u00fe an\u00fearamma frakann. ni magu\u00fe guda skalkinon jah mammonin.\n6:25 [CA] Du\u00fe\u00fee qi\u00fea izwis: ni maurnai\u00fe saiwalai izwarai hva matjai\u00fe jah hva drigkai\u00fe, nih leika izwaramma hve wasjai\u00fe; niu saiwala mais ist fodeinai jah leik wastjom?\n6:26 [CA] insaihvi\u00fe du fuglam himinis, \u00feei ni saiand nih snei\u00feand, nih lisand in banstins, jah atta izwar sa ufar himinam fodei\u00fe ins. niu jus mais wul\u00ferizans siju\u00fe \u00feaim?\n6:27 [CA] i\u00fe hvas izwara maurnands mag anaaukan ana wahstu seinana aleina aina?\n6:28 [CA] jah bi wastjos hva saurgai\u00fe? gakunnai\u00fe blomans hai\u00fejos, hvaiwa wahsjand; nih arbaidjand nih spinnand.\n6:29 [CA] qi\u00feuh \u00fean izwis \u00featei nih Saulaumon in allamma wul\u00feau seinamma gawasida sik swe ains \u00feize.\n6:30 [CA] jah \u00feande \u00feata hawi hai\u00fejos himma daga wisando jah gistradagis in auhn galagi\u00fe gu\u00fe swa wasji\u00fe, hvaiwa mais izwis leitil galaubjandans?\n6:31 [CA] ni maurnai\u00fe nu qi\u00feandans: hva matjam ai\u00fe\u00feau hva drigkam ai\u00fe\u00feau hve wasjaima?\n6:32 [CA] all auk \u00feata \u00feiudos sokjand; waituh \u00fean atta izwar sa ufar himinam \u00featei \u00feaurbu\u00fe . . . .\n7:12 [CA] . . . . (tau)jaina izwis mans, swa jah jus taujai\u00fe im: \u00feata auk ist wito\u00fe jah praufeteis.\n7:13 [CA] inngaggai\u00fe \u00feairh aggwu daur, unte braid daur jah rums wigs sa brigganda in fralustai, jah managai sind \u00feai inngalei\u00feandans \u00feairh \u00feata.\n7:14 [CA] hvan aggwu \u00feata daur jah \u00feraihans wigs sa brigganda in libainai, jah fawai sind \u00feai bigitandans \u00feana.\n7:15 [CA] atsaihvi\u00fe swe\u00feauh faura liugnapraufetum \u00feaim izei qimand at izwis in wastjom lambe, i\u00fe inna\u00fero sind wulfos wilwandans.\n7:16 [CA] bi akranam ize ufkunnai\u00fe ins. ibai lisand[a] af \u00feaurnum weinabasja ai\u00fe\u00feau af wigadeinom smakkans?\n7:17 [CA] swa all bagme godaize akrana goda gatauji\u00fe, i\u00fe sa ubila bagms akrana ubila gatauji\u00fe.\n7:18 [CA] ni mag bagms \u00feiu\u00feeigs akrana ubila gataujan, nih bagms ubils akrana \u00feiu\u00feeiga gataujan.\n7:19 [CA] all bagme ni taujandane akran god usmaitada jah in fon atlagjada.\n7:20 [CA] \u00feannu bi akranam ize ufkunnai\u00fe ins.\n7:21 [CA] ni hvazuh saei qi\u00fei\u00fe mis: frauja, frauja! inngalei\u00fei\u00fe in \u00feiudangardja himine, ak sa taujands wiljan attins meinis \u00feis in himinam.\n7:22 [CA] managai qi\u00feand mis in jainamma daga: frauja, frauja! niu \u00feeinamma namin praufetidedum, jah \u00feeinamma namin unhul\u00feons uswaurpum, jah \u00feeinamma namin mahtins mikilos gatawidedum?\n7:23 [CA] jah \u00fean andhaita im \u00featei ni hvanhun kun\u00fea izwis: aflei\u00fei\u00fe fairra mis, jus waurkjandans unsibjona.\n7:24 [CA] hvazuh nu saei hausei\u00fe waurda meina jah tauji\u00fe \u00feo, galeiko ina waira frodamma, saei gatimrida razn sein ana staina.\n7:25 [CA] jah atiddja dala\u00fe rign jah qemun ahvos jah waiwoun windos jah bistugqun bi \u00feamma razna jainamma, jah ni gadraus, unte gasuli\u00fe was ana staina.\n7:26 [CA] jah hvazuh saei hausei\u00fe waurda meina jah ni tauji\u00fe \u00feo, galeikoda mann dwalamma, saei gatimrida razn sein ana malmin.\n7:27 [CA] jah atiddja dala\u00fe rign jah qemun ahvos jah waiwoun windos jah bistugqun bi jainamma razna, jah gadraus, jah was drus is mikils.\n7:28 [CA] jah war\u00fe, \u00fean ustauh Iesus \u00feo waurda, biabridedun manageins ana laiseinai is.\n7:29 [CA] was auk laisjands ins swe waldufni habands, jah ni swaswe bokarjos.\n8:1 [CA] Dala\u00fe \u00fean atgaggandin imma af fairgunja, laistidedun afar imma iumjons managos.\n8:2 [CA] jah sai, manna \u00ferutsfill habands durinnands inwait ina qi\u00feands: frauja, jabai wileis, magt mik gahrainjan.\n8:3 [CA] jah ufrakjands handu attaitok imma qi\u00feands: wiljau, wair\u00fe hrains! jah suns hrain war\u00fe \u00feata \u00ferutsfill is.\n8:4 [CA] jah qa\u00fe imma Iesus: saihv ei mann ni qi\u00feais, ak gagg, \u00feuk silban ataugei gudjin jah atbair giba \u00feoei anabau\u00fe Moses du weitwodi\u00feai im.\n8:5 [CA] afaruh \u00fean \u00feata innatgaggandin imma in Kafarnaum, duatiddja imma hundafa\u00fes bidjands ina\n8:6 [CA] jah qi\u00feands: frauja, \u00feiumagus meins ligi\u00fe in garda usli\u00fea, harduba balwi\u00fes.\n8:7 [CA] jah qa\u00fe du imma Iesus: ik qimands gahailja ina.\n8:8 [CA] jah andhafjands sa hundafa\u00fes qa\u00fe: frauja, ni im wair\u00fes ei uf hrot mein inngaggais, ak \u00featainei qi\u00fe waurda jah gahailni\u00fe sa \u00feiumagus meins.\n8:9 [CA] jah auk ik manna im habands uf waldufnja meinamma gadrauhtins jah qi\u00fea du \u00feamma: gagg, jah gaggi\u00fe; jah an\u00fearamma: qim, jah qimi\u00fe; jah du skalka meinamma: tawei \u00feata, jah tauji\u00fe.\n8:10 [CA] gahausjands \u00fean Iesus sildaleikida jah qa\u00fe du \u00feaim afarlaistjandam: amen, qi\u00fea izwis, ni in Israela swalauda galaubein bigat.\n8:11 [CA] a\u00fe\u00fean qi\u00fea izwis \u00featei managai fram urrunsa jah saggqa qimand, jah anakumbjand mi\u00fe Abrahama jah Isaka jah Iakoba in \u00feiudangardjai himine:\n8:12 [CA] i\u00fe \u00feai sunjus \u00feiudangardjos uswairpanda in riqis \u00feata hindumisto; jainar wair\u00fei\u00fe grets jah krusts tun\u00feiwe.\n8:13 [CA] jah qa\u00fe Iesus \u00feamma hundafada: gagg, jah swaswe galaubides wair\u00feai \u00feus. jah gahailnoda sa \u00feiumagus is in jainai hveilai.\n8:14 [CA] jah qimands Iesus in garda Paitraus, jah gasahv swaihron is ligandein in heitom.\n8:15 [CA] jah attaitok handau izos jah aflailot ija so heito; jah urrais jah andbahtida imma.\n8:16 [CA] at andanahtja \u00fean waur\u00feanamma, atberun du imma daimonarjans managans, jah uswarp \u00feans ahmans waurda jah allans \u00feans ubil habandans gahailida,\n8:17 [CA] ei usfullnodedi \u00feata gamelido \u00feairh Esa\u00efan praufetu qi\u00feandan: sa unmahtins unsaros usnam jah sauhtins usbar.\n8:18 [CA] gasaihvands \u00fean Iesus managans hiuhmans bi sik, haihait galei\u00fean siponjans hindar marein.\n8:19 [CA] jah duatgaggands ains bokareis qa\u00fe du imma: laisari, laistja \u00feuk, \u00feishvaduh \u00feadei gaggis.\n8:20 [CA] jah qa\u00fe du imma Iesus: fauhons grobos aigun, jah fuglos himinis sitlans, i\u00fe sunus mans ni habai\u00fe hvar haubi\u00fe sein anahnaiwjai.\n8:21 [CA] an\u00fearuh \u00fean siponje is qa\u00fe du imma: frauja, uslaubei mis frumist galei\u00fean jah gafilhan attan meinana.\n8:22 [CA] i\u00fe Iesus qa\u00fe du imma: laistei afar mis jah let \u00feans dau\u00feans filhan seinans dau\u00feans.\n8:23 [CA] jah innatgaggandin imma in skip, afariddjedun imma siponjos is.\n8:24 [CA] jah sai, wegs mikils war\u00fe in marein, swaswe \u00feata skip gahuli\u00fe wair\u00fean fram wegim; i\u00fe is saislep.\n8:25 [CA] jah duatgaggandans siponjos is urraisidedun ina qi\u00feandans: frauja, nasei unsis, fraqistnam.\n8:26 [CA] jah qa\u00fe du im Iesus: hva faurhtei\u00fe, leitil galaubjandans! \u00feanuh urreisands gasok windam jah marein, jah war\u00fe wis mikil.\n8:27 [CA] i\u00fe \u00feai mans sildaleikidedun qi\u00feandans: hvileiks ist sa, ei jah windos jah marei ufhausjand imma?\n8:28 [CA] jah qimandin imma hindar marein in gauja Gairgaisaine, gamotidedun imma twai daimonarjos us hlaiwasnom rinnandans, sleidjai filu, swaswe ni mahta manna uslei\u00fean \u00feairh \u00feana wig jainana.\n8:29 [CA] jah sai, hropidedun qi\u00feandans: hva uns jah \u00feus, Iesu, sunau gudis? qamt her faur mel balwjan unsis?\n8:30 [CA] Wasuh \u00fean fairra im hairda sweine managaize haldana.\n8:31 [CA] i\u00fe \u00feo skohsla bedun ina qi\u00feandans: jabai uswairpis uns, uslaubei uns galei\u00fean in \u00feo hairda sweine.\n8:32 [CA] jah qa\u00fe du im: gaggi\u00fe! i\u00fe eis usgaggandans gali\u00feun in hairda sweine; jah sai, run gawaurhtedun sis alla so hairda and driuson in marein jah gadau\u00fenodedun in watnam.\n8:33 [CA] i\u00fe \u00feai haldandans ga\u00felauhun jah galei\u00feandans gataihun in baurg all bi \u00feans daimonarjans.\n8:34 [CA] jah sai, alla so baurgs usiddja wi\u00fera Iesu, jah gasaihvandans ina bedun ei usli\u00fei hindar markos ize.\n9:1 [CA] Jah atsteigands in skip ufarlai\u00fe jah qam in seinai baurg.\n9:2 [CA] \u00feanuh atberun du imma usli\u00fean ana ligra ligandan. jah gasaihvands Iesus galaubein ize qa\u00fe du \u00feamma usli\u00fein: \u00ferafstei \u00feuk, barnilo! afletanda \u00feus frawaurhteis \u00feeinos.\n9:3 [CA] \u00fearuh sumai \u00feize bokarje qe\u00feun in sis silbam: sa wajamerei\u00fe.\n9:4 [CA] jah witands Iesus \u00feos mitonins ize qa\u00fe: duhve jus mito\u00fe ubila in hairtam izwaraim?\n9:5 [CA] hva\u00fear ist raihtis azetizo qi\u00fean: afletanda \u00feus frawaurhteis, \u00feau qi\u00fean: urreis jah gagg?\n9:6 [CA] A\u00fe\u00fean ei witei\u00fe \u00featei waldufni habai\u00fe sa sunus mans ana air\u00feai afleitan frawaurhtins, \u00feanuh qa\u00fe du \u00feamma usli\u00fein: urreisands nim \u00feana ligr \u00feeinana jah gagg in gard \u00feeinana.\n9:7 [CA] jah urreisands galai\u00fe in gard seinana.\n9:8 [CA] gasaihvandeins \u00fean manageins ohtedun sildaleikjandans jah mikilidedun gu\u00fe \u00feana gibandan waldufni swaleikata mannam.\n9:9 [CA] jah \u00feairhlei\u00feands Iesus jain\u00fero gasahv mannan sitandan at motai, Ma\u00fe\u00feaiu haitanana, jah qa\u00fe du imma: laistei afar mis. jah usstandands iddja afar imma.\n9:10 [CA] jah war\u00fe, bi\u00fee is anakumbida in garda, jah sai, managai motarjos jah frawaurhtai qimandans mi\u00feanakumbidedun Iesua jah siponjam is.\n9:11 [CA] jah gaumjandans Fareisaieis qe\u00feun du \u00feaim siponjam is: duhve mi\u00fe motarjam jah frawaurhtaim matji\u00fe sa laisareis izwar?\n9:12 [CA] i\u00fe Iesus gahausjands qa\u00fe du im: ni \u00feaurbun hailai lekeis, ak \u00feai unhaili habandans.\n9:13 [CA] A\u00fe\u00fean gaggai\u00fe, ganimi\u00fe hva sijai: armahairti\u00fea wiljau jah ni hunsl; ni\u00fe~\u00fean qam la\u00feon uswaurhtans, ak frawaurhtans.\n9:14 [CA] \u00feanuh atiddjedun siponjos Iohannes qi\u00feandans: duhve weis jah Fareisaieis fastam filu, i\u00fe \u00feai siponjos \u00feeinai ni fastand?\n9:15 [CA] jah qa\u00fe du im Iesus: ibai magun sunjus bru\u00fefadis qainon und \u00feata hveilos \u00feei mi\u00fe im ist bru\u00fefa\u00fes? i\u00fe atgagggand dagos, \u00fean afnimada af im sa bru\u00fefa\u00fes, jah \u00fean fastand.\n9:16 [CA] a\u00fe\u00fean ni hvashun lagji\u00fe du plata fanan \u00fearihis ana snagan fairnjana, unte afnimi\u00fe fullon af \u00feamma snagin, jah wairsiza gataura wair\u00fei\u00fe.\n9:17 [CA] Ni\u00fe~\u00fean giutand wein niujata in balgins fairnjans, ai\u00fe\u00feau distaurnand balgeis; bi\u00feeh \u00fean jah wein usgutni\u00fe jah balgeis fraqistnand; ak giutand wein juggata in balgins niujans, jah bajo\u00feum gabairgada.\n9:18 [CA] mi\u00fe\u00feanei is rodida \u00feata du im, \u00fearuh reiks ains qimands inwait ina, qi\u00feands \u00featei dauhtar meina nu gaswalt; akei qimands atlagei handu \u00feeina ana ija, jah libai\u00fe.\n9:19 [CA] jah urreisands Iesus iddja afar imma jah siponjos is.\n9:20 [CA] jah sai, qino blo\u00fearinnandei \u00b7ib\u00b7 wintruns duatgaggandei aftaro attaitok skauta wastjos is;\n9:21 [CA] qa\u00feuh auk in sis: jabai \u00featainei atteka wastjai is, ganisa.\n9:22 [CA] i\u00fe Iesus gawandjands sik jah gasaihvands \u00feo qa\u00fe: \u00ferafstei \u00feuk dauhtar! galaubeins \u00feeina ganasida \u00feuk. jah ganas so qino fram \u00feizai hveilai jainai.\n9:23 [CA] jah qimands Iesus in garda \u00feis reikis jah gasaihvands swigljans [jah haurnjans haurnjandans] jah managein auhjondein, qa\u00fe du im:\n9:24 [CA] aflei\u00fei\u00fe, unte ni gaswalt so mawi, ak slepi\u00fe. jah bihlohun ina.\n9:25 [CA] \u00feanuh \u00fean usdribana war\u00fe so managei, atgaggands inn habaida handu izos, jah urrais so mawi.\n9:26 [CA] jah usiddja meri\u00fea so and alla jaina air\u00fea.\n9:27 [CA] jah hvarbondin Iesua jain\u00fero, laistidedun afar imma twai blindans, hropjandans jah qi\u00feandans: armai uggkis, sunau Daweidis!\n9:28 [CA] Qimandin \u00fean in garda duatiddjedun imma \u00feai blindans jah qa\u00fe im Iesus: ga~u~laubjats \u00featei magjau \u00feata taujan? Qe\u00feun du imma: jai, frauja!\n9:29 [CA] \u00feanuh attaitok augam ize qi\u00feands: bi galaubeinai iggqarai wair\u00feai iggqis.\n9:30 [CA] jah usluknodedun im augona, jah inagida ins Iesus qi\u00feands: saihvats ei manna ni witi.\n9:31 [CA] i\u00fe eis usgaggandans usmeridedun ina in allai air\u00feai jainai.\n9:32 [CA] \u00feanuh bi\u00fee utusiddjedun eis, sai, atberun imma mannan baudana daimonari.\n9:33 [CA] jah bi\u00fee usdribans war\u00fe unhul\u00feo, rodida sa dumba, jah sildaleikidedun manageins qi\u00feandans: ni aiw swa uskun\u00fe was in Israela.\n9:34 [CA] i\u00fe Fareisaieis qe\u00feun: in faurama\u00felja unhul\u00feono usdreibi\u00fe unhul\u00feons.\n9:35 [CA] jah bitauh Iesus baurgs allos jah haimos laisjands in gaqum\u00feim ize, jah merjands aiwaggeljon \u00feiudangardjos jah hailjands allos sauhtins jah alla unhailja.\n9:36 [CA] gasaihvands \u00fean \u00feos manageins infeinoda in ize, unte wesun afdauidai jah frawaurpanai swe lamba ni habandona hairdeis.\n9:37 [CA] \u00feanuh qa\u00fe du siponjam seinaim: asans raihtis managa, i\u00fe waurstwjans fawai.\n9:38 [CA] bidji\u00fe nu fraujan asanais ei ussandjai waurstwjans in asan seina.\n10:1 [CA] Jah athaitands \u00feans twalif si(ponjans) . . . .\n10:23 [CA] . . . . \u00feizai baurg, \u00feliuhai\u00fe in an\u00feara: amen auk qi\u00fea izwis, ei ni ustiuhi\u00fe baurgs Israelis, unte qimi\u00fe sa sunus mans.\n10:24 [CA] nist siponeis ufar laisarja nih skalks ufar fraujin seinamma.\n10:25 [CA] Ganah siponi ei wair\u00feai swe laisareis is jah skalks swe frauja is; jabai gardawaldand Baiailzaibul haihaitun, und hvan filu mais \u00feans innakundans is.\n10:26 [CA] ni nunu ogei\u00fe izwis ins; ni waiht auk ist gahuli\u00fe, \u00featei ni andhuljaidau, jah fulgin, \u00featei ni ufkunnaidau.\n10:27 [CA] \u00featei qi\u00fea izwis in riqiza, qi\u00feai\u00fe in liuhada, jah \u00featei in auso gahausei\u00fe, merjai\u00fe ana hrotam.\n10:28 [CA] jah ni ogei\u00fe izwis \u00feans usqimandans leika \u00featainei, i\u00fe saiwalai ni magandans usqiman, i\u00fe ogei\u00fe mais \u00feana magandan jah saiwalai jah leika fraqistjan in gaiainnan.\n10:29 [CA] niu twai sparwans assarjau bugjanda? jah ains ize ni gadriusi\u00fe ana air\u00fea inuh attins izwaris wiljan.\n10:30 [CA] a\u00fe\u00fean izwara jah tagla haubidis alla gara\u00feana sind.\n10:31 [CA] ni nunu ogei\u00fe; managaim sparwam batizans siju\u00fe jus.\n10:32 [CA] Sahvazuh nu saei andhaiti\u00fe mis in andwair\u00feja manne, andhaita jah ik imma in andwair\u00feja attins meinis saei in himinam ist.\n10:33 [CA] i\u00fe \u00feishvanoh saei afaiki\u00fe mik in andwair\u00feja manne, afaika jah ik ina in andwair\u00feja attins meinis \u00feis saei in himinam ist.\n10:34 [CA] nih ahjai\u00fe \u00featei qemjau lagjan gawair\u00fei ana air\u00fea; ni qam lagjan gawair\u00fei, ak hairu.\n10:35 [CA] qam auk skaidan mannan wi\u00fera attan is jah dauhtar wi\u00fera ai\u00feein izos jah bru\u00fe wi\u00fera swaihron izos;\n10:36 [CA] jah fijands mans innakundai is.\n10:37 [CA] saei frijo\u00fe attan ai\u00fe\u00feau ai\u00feein ufar mik, nist meina wair\u00fes; jah saei frijo\u00fe sunu ai\u00fe\u00feau dauhtar ufar mik, nist meina wair\u00fes.\n10:38 [CA] jah saei ni nimi\u00fe galgan seinana jah laistjai afar mis, nist meina wair\u00fes.\n10:39 [CA] saei bigiti\u00fe saiwala seina, fraqistei\u00fe izai; jah saei fraqistei\u00fe saiwalai seinai in meina, bigiti\u00fe \u00feo.\n10:40 [CA] sa andnimands izwis mik andnimi\u00fe, jah sa mik andnimands andnimi\u00fe \u00feana sandjandan mik.\n10:41 [CA] sa andnimands praufetu in namin praufetaus mizdon praufetaus nimi\u00fe, jah sa andnimands garaihtana in namin garaihtis mizdon garaihtis nimi\u00fe.\n10:42 [CA] jah saei gadragkei\u00fe ainana \u00feize minnistane stikla kaldis watins \u00featainei in namin siponeis, amen qi\u00fea izwis, ei ni fraqistei\u00fe mizdon seinai.\n11:1 [CA] Jah war\u00fe, bi\u00fee usfullida Iesus anabiudands \u00feaim twalif siponjam seinaim, ushof sik jain\u00fero du laisjan jah merjan and baurgs ize.\n11:2 [CA] i\u00fe Iohannes gahausjands in karkarai waurstwa Xristaus, insandjands bi siponjam seinaim qa\u00fe du imma:\n11:3 [CA] \u00fe\u00fb is sa qimanda \u00feau an\u00fearizuh beidaima?\n11:4 [CA] jah andhafjands Iesus qa\u00fe du im: gaggandans gateihi\u00fe Iohanne \u00featei gahausei\u00fe jah gasaihvi\u00fe.\n11:5 [CA] blindai ussaihvand, jah haltai gaggand, \u00ferutsfillai hrainjai wair\u00feand, jah baudai gahausjand, jah dau\u00feai urreisand, jah unledai wailamerjanda:\n11:6 [CA] jah audags ist hvazuh saei ni gamarzjada in mis.\n11:7 [CA] at \u00feaim \u00fean afgaggandam, dugann Iesus qi\u00fean \u00feaim manageim bi Iohannen: hva usiddjedu\u00fe ana au\u00feida saihvan? raus fram winda wagidata?\n11:8 [CA] akei hva usiddjedu\u00fe saihvan? mannan hnasqjaim wastjom gawasidana? sai, \u00feaiei hnasqjaim wasidai sind, in gardim \u00feiudane sind.\n11:9 [CA] akei hva usiddjedu\u00fe saihvan? praufetu? jai, qi\u00fea izwis: jah managizo praufetau.\n11:10 [CA] sa ist auk bi \u00feanei gameli\u00fe ist: sai, ik insandja aggilu meinana faura \u00feus, saei gamanwei\u00fe wig \u00feeinana faura \u00feus.\n11:11 [CA] amen, qi\u00fea izwis: ni urrais in baurim qinono maiza Iohanne \u00feamma daupjandin; i\u00fe sa minniza in \u00feiudangardjai himine maiza imma ist.\n11:12 [CA] framuh \u00fean \u00feaim dagam Iohannis \u00feis daupjandins und hita \u00feiudangardi himine anamahtjada, jah anamahtjandans frawilwand \u00feo.\n11:13 [CA] allai auk praufeteis jah wito\u00fe und Iohanne fauraqe\u00feun;\n11:14 [CA] jah jabai wildedei\u00fe mi\u00feniman, sa ist Helias, saei skulda qiman.\n11:15 [CA] saei habai au(sona) (hausjandona), (ga)hausja(i).\n11:16 [CA] (hve) (nu) (galeiko) \u00feata ku(ni)? (Galeik) (ist) (barnam) sitandam (in) (garunsim) (jah) (wopjan)dam an\u00fear an\u00fea(ris),\n11:17 [CA] (jah) (qi\u00fean)dam: swiglodedum izw(is) (jah) ni plinsidedu\u00fe; huf(um) (jah) ni qainodedu\u00fe.\n11:18 [CA] qam raihtis Iohan(nes) (nih) (mat)jands nih drigkan(ds) (jah) (qi)\u00feand: unhul\u00fe(on) (habai\u00fe).\n11:19 [CA] (qam) sa sunus mans (matjands) (jah) drigkands j(ah) (qi\u00feand): (sai), (man)na afetja jah af(drug)kja, (mo)tarje frijonds jah frawaurhtaize. jah uswaurhta gadomida war\u00fe handugei fram barnam seinaim.\n11:20 [CA] \u00feanuh dugann idweitjan baurgim, in \u00feaimei waur\u00feun \u00feos managistons mahteis is, (\u00featei) (ni) (idreigodedun) sik.\n11:21 [CA] (wai) (\u00feus) (Kaurazein), (wai) (\u00fe)us Be\u00fe(sa\u00efdan); (unte) (i\u00fe) (wa)ur\u00feeina (in) (Twre) (jah) (Seidon)e landa mah(teis) (\u00feos) (waur)\u00feanons in izwis, (airis) (\u00fe)au in sakkau jah azgon (idreig)odedeina.\n11:22 [CA] swe\u00feauh qi(\u00fea) (izwis): Twrim jah Seidonim (sutizo) (wa)ir\u00fei\u00fe in daga stau(os) (\u00feau) (izwis).\n11:23 [CA] jah \u00feu Kafarna(um), (\u00feu) (und) (hi)min ushauhida, (dala\u00fe) (und) (halj)a galei\u00feis: (unte) (jabai) (in) (S)audaumjam (waur)\u00fee(ina) (m)ahteis \u00feos waur\u00feanons in izwis, ai\u00fe\u00feau eis weseina und hina dag.\n11:24 [CA] swe\u00feauh qi\u00fea izwis \u00featei air\u00feai Saudaumje sutizo wair\u00fei\u00fe in daga stauos \u00feau \u00feus.\n11:25 [CA] inuh jainamma mela andhaf(jands) . . . .\n25:38 [C] hvanuh \u00fean \u00feuk sehvum gast jah gala\u00feodedum? ai\u00fe\u00feau naqadana jah wasidedum?\n25:39 [C] hvanuh \u00fean \u00feuk sehvum siukana ai\u00fe\u00feau in karkarai jah atiddjedum du \u00feus?\n25:40 [C] jah andhafjands sa \u00feiudans qi\u00fei\u00fe du im: amen, qi\u00fea izwis: jah \u00feanei tawidedu\u00fe ainamma \u00feize minnistane bro\u00fere meinaize, mis tawidedu\u00fe.\n25:41 [C] \u00feanuh qi\u00fei\u00fe jah \u00feaim af hleidumein ferai: gaggi\u00fe fairra mis, jus fraqi\u00feanans, in fon \u00feata aiweino, \u00feata manwido unhul\u00fein jah aggilum is.\n25:42 [C] unte gredags was jan~ni gebu\u00fe mis matjan; af\u00feaursi\u00fes was jan~ni dragkidedu\u00fe mik;\n25:43 [C] gasts jan~ni gala\u00fe(ode)du\u00fe mik; naqa\u00fes jan~ni waside(du\u00fe) mik; siuks jah in karkarai jan~ni gaweisodedu\u00fe meina.\n25:44 [C] \u00feanuh andhafjand jah \u00feai qi\u00feandans: frauja, hvan \u00feuk sehvum gredagana ai\u00fe\u00feau af\u00feaursidana ai\u00fe\u00feau gast ai\u00fe\u00feau naqadana ai\u00fe\u00feau siukana ai\u00fe\u00feau in karkarai jan~ni andbahtidedeima \u00feus?\n25:45 [C] \u00feanuh andhafji\u00fe im qi\u00feands: amen, qi\u00fea izwis, jah \u00feanei ni tawidedu\u00fe ainamma \u00feize leitilane, mis ni tawidedu\u00fe.\n25:46 [C] jah galei\u00feand \u00feai in balwein aiweinon, i\u00fe \u00feai garaihtans in libain aiweinon.\n26:1 [C] Jah war\u00fe, bi\u00fee ustauh Iesus alla \u00feo waurda, qa\u00fe siponjam sein(aim):\n26:2 [C] witu\u00fe \u00featei afar twans dagans p(aska) wair\u00fei\u00fe, jas~sa sunus mans atg(iba)da du ushramjan.\n26:3 [C] \u00feanuh . . . .\n26:65 [C] . . . . \u00feaurbum weitwode? sai, nu gahausidedu\u00fe \u00feo wajamerein is.\n26:66 [C] hva izwis \u00feugkei\u00fe? i\u00fe eis andhafjandans qe\u00feun: skula dau\u00feaus ist.\n26:67 [C] \u00feanuh spiwun ana andawleizn is jah kaupastedun ina; sumai\u00fe~\u00fean lofam slohun\n26:68 [C] qi\u00feandans: praufetei unsis, Xristu, hvas ist sa slahands \u00feuk?\n26:69 [C] i\u00fe Paitrus uta sat ana rohsnai, jah duatiddja imma aina \u00feiwi qi\u00feandei: jah \u00feu wast mi\u00fe Iesua \u00feamma Galeilaiau.\n26:70 [CA] . . . . hva qi\u00feis.\n26:70 [C] i\u00fe is laugnida faura \u00feaim allaim qi\u00feands: ni wait hva qi\u00feis.\n26:71 [CA] usgaggandan \u00fean ina in daur, gasahv ina an\u00feara jah qa\u00fe du \u00feaim jainar: jah sa was mi\u00fe Iesua \u00feamma Nazoraiau.\n26:71 [C] usgaggandan \u00fean ina in daur, gasahv ina an\u00feara jah qa\u00fe du \u00feaim jainar: jas~sa was mi\u00fe Iesua \u00feamma Nazoraiau.\n26:72 [CA] jah aftra afaiaik mi\u00fe ai\u00fea swarands \u00featei ni kann \u00feana mannan.\n26:72 [C] jah aftra laugnida mi\u00fe ai\u00fea swarands \u00featei ni kann \u00feana mannan.\n26:73 [CA] afar leitil \u00fean atgaggandans \u00feai standandans qe\u00feun Paitrau: bi sunjai, jah \u00feu \u00feize is; jah auk razda \u00feeina bandwei\u00fe \u00feuk.\n26:73 [C] afar leitil \u00fean atgaggandans \u00feai standans qe\u00feun Paitrau: bi sunjai, jah \u00feu \u00feize is; jah auk razda \u00feeina bandwei\u00fe \u00feuk.\n26:74 [CA] \u00feanuh dugann afdomjan jah swaran \u00featei ni kann \u00feana mannan. jah suns hana hrukida.\n26:74 [C] \u00feanuh dugann afdomjan jah swaran \u00featei ni kann \u00feana mannan. jah suns hana hrukida.\n26:75 [CA] jah gamunda Paitrus waurdis Iesuis qi\u00feanis du sis: \u00featei faur hanins hruk \u00ferim sin\u00feam afaikis mik. jah usgaggands ut gaigrot baitraba.\n26:75 [C] jah gamunda Paitrus waurdis Iesuis qi\u00feanis du sis: \u00featei faur hanins hruk \u00ferim sin\u00feam inwidis mik. jah usgaggands ut gaigrot baitraba.\n27:1 [CA] At maurgin \u00fean waur\u00feanana, runa nemun allai gudjans jah \u00feai sinistans manageins bi Iesu, ei afdau\u00feidedeina ina.\n27:1 [C] At maurgin \u00fean waur\u00feanana, garuni nemun allai \u00feai gudjans jah \u00feai . . . .\n27:2 [CA] jah gabindandans ina gatauhun jah anafulhun ina Pauntiau Peilatau kindina.\n27:3 [CA] \u00feanuh gasaihvands Iudas sa galewjands ina \u00featei du stauai gatauhans war\u00fe, idreigonds gawandida \u00feans \u00ferins tiguns silubrinaize gudjam jah sinistam\n27:4 [CA] qi\u00feands: frawaurhta mis galewjands blo\u00fe swikn. i\u00fe eis qe\u00feun: hva kara unsis? \u00feu witeis.\n27:5 [CA] jah atwairpands \u00feaim silubram in alh aflai\u00fe, jah galei\u00feands ushaihah sik.\n27:6 [CA] i\u00fe \u00feai gudjans nimandans \u00feans skattans qe\u00feun: ni skuld ist lagjan \u00feans in kaurbaunan, unte andawair\u00fei blo\u00feis ist.\n27:7 [CA] garuni \u00fean nimandans usbauhtedun us \u00feaim \u00feana akr kasjins, du usfilhan ana gastim.\n27:8 [CA] du\u00fe\u00fee haitans war\u00fe akrs jains akrs blo\u00feis und hina dag.\n27:9 [CA] \u00feanuh usfullnoda \u00feata qi\u00feano \u00feairh Iairaimian praufetu qi\u00feandan: jah usnemun \u00ferins tiguns silubreinaize andawair\u00fei \u00feis wair\u00feodins, \u00featei garahnidedun fram sunum Israelis,\n27:10 [CA] jah atgebun ins und akra kasjins, swaswe anabau\u00fe mis frauja.\n27:11 [CA] i\u00fe Iesus sto\u00fe faura kindina, jah frah ina sa kindins qi\u00feands: \u00feu is \u00feiudans Iudaie? i\u00fe Iesus qa\u00fe du imma: \u00feu qi\u00feis.\n27:12 [CA] jah mi\u00fe\u00feanei wrohi\u00fes was fram \u00feaim gudjam jah sinistam, ni waiht andhof.\n27:13 [CA] \u00feanuh qa\u00fe du imma Peilatus: niu hauseis hvan filu ana \u00feuk weitwodjand?\n27:14 [CA] jah ni andhof imma wi\u00fera ni ainhun waurde, swaswe sildaleikida sa kindins filu.\n27:15 [CA] and dul\u00fe \u00fean hvarjoh biuhts was sa kindins fraletan ainana \u00feizai managein bandjan, \u00feanei wildedun.\n27:16 [CA] habaidedunuh \u00fean bandjan gatarhidana Barabban.\n27:17 [CA] gaqumanaim \u00fean im, qa\u00fe im Peilatus: hvana wilei\u00fe ei fraletau izwis? Barabban \u00feau Iesu, saei haitada Xristus?\n27:18 [CA] wissa auk \u00featei in nei\u00feis atgebun ina.\n27:19 [CA] sitandin \u00fean imma ana stauastola, insandida du imma qens is qi\u00feandei: ni waiht \u00feus jah \u00feamma garaihtin . . . .\n27:42 [CA] . . . . Israelis ist, atsteigadau nu af \u00feamma galgin [ei gasaihvaima] jah galaubjam imma.\n27:43 [CA] trauaida du guda; lausjadau nu ina, jabai wili ina; qa\u00fe auk \u00featei gudis im sunus.\n27:44 [CA] \u00featuh samo jah \u00feai waidedjans \u00feai mi\u00feushramidans imma idweitidedun imma.\n27:45 [CA] fram saihston \u00fean hveilai war\u00fe riqis ufar allai air\u00feai und hveila niundon.\n27:46 [CA] i\u00fe \u00fean bi hveila niundon ufhropida Iesus stibnai mikilai qi\u00feands: helei, helei, lima sibak\u00feani, \u00featei ist: gu\u00fe meins, gu\u00fe meins, duhve mis bilaist?\n27:47 [CA] i\u00fe sumai \u00feize jainar standandane gahausjandans qe\u00feun \u00featei Helian wopei\u00fe sa.\n27:48 [CA] jah suns \u00feragida ains us im jah nam swamm fulljands aketis, jah lagjands ana raus draggkida ina.\n27:49 [CA] i\u00fe \u00feai an\u00fearai qe\u00feun: let, ei saihvam, qimaiu Helias nasjan ina.\n27:50 [CA] i\u00fe Iesus aftra hropjands stibnai mikilai aflailot ahman.\n27:51 [CA] jah \u00fean faurhah alhs diskritnoda in twa, iupa\u00fero und dala\u00fe, jah air\u00fea inreiraida, jah stainos disskritnodedun,\n27:52 [CA] jah hlaiwasnos usluknodedun, jah managa leika \u00feize ligandane weihaize urrisun.\n27:53 [CA] jah usgaggandans us hlaiwasnom afar urrist is innatgaggandans in \u00feo weihon baurg jah ataugidedun sik managaim.\n27:54 [CA] i\u00fe hundafa\u00fes jah \u00feai mi\u00fe imma witandans Iesua, gasaihvandans \u00feo reiron jah \u00feo waur\u00feanona, ohtedun abraba, qi\u00feandans: bi sunjai gudis sunus ist sa.\n27:55 [CA] wesunuh \u00fean jainar qinons managos fairra\u00fero saihvandeins, \u00feozei laistidedun afar Iesua fram Galeilaia, andbahtjandeins imma,\n27:56 [CA] in \u00feaimei was Marja so Magdalene, jah Marja so Iakobis jah Iosezis ai\u00feei, jah ai\u00feei suniwe Zaibaidaiaus.\n27:57 [CA] i\u00fe \u00fean sei\u00feu war\u00fe, qam manna gabigs af Areima\u00feaias \u00feizuh namo Iosef, saei jah silba siponida Iesua.\n27:58 [CA] sah atgaggands du Peilatau ba\u00fe \u00feis leikis Iesuis. \u00feanuh Peilatus uslaubida giban \u00feata leik.\n27:59 [CA] jah nimands \u00feata leik Iosef biwand ita sabana hrainjamma\n27:60 [CA] jah galagida ita in niujamma seinamma hlaiwa \u00featei ushuloda ana staina jah faurwalwjands staina mikilamma daurons \u00feis hlaiwis galai\u00fe.\n27:61 [CA] wasuh \u00fean jainar Marja Magdalene jah so an\u00feara Marja sitandeins andwair\u00feis \u00feamma hlaiwa.\n27:62 [CA] iftumin \u00fean daga, saei ist afar paraskaiwein, gaqemun auhumistans gudjans jah Fareisaieis du Peilatau\n27:63 [CA] qi\u00feandans: frauja, gamundedum \u00featei jains airzjands qa\u00fe nauh libands: afar \u00ferins dagans urreisa.\n27:64 [CA] hait nu witan \u00feamma hlaiwa und \u00feana \u00feridjan dag, ibai ufto qimandans \u00feai siponjos is binimaina imma jah qi\u00feaina du managein: urrais us dau\u00feaim, jah ist so speidizei airzi\u00fea wairsizei \u00feizai frumein.\n27:65 [CA] qa\u00fe im Peilatus: habai\u00fe wardjans, gaggi\u00fe witaiduh swaswe kunnu\u00fe.\n27:66 [CA] i\u00fe eis gaggandans galukun \u00feata hlaiw, faursigljandans \u00feana . . . .","title":"Gothic Bible (partial): Matthew","type":"page"}