{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/phi.htm","path":"bib/wb/got/phi.htm","source_url":"https://sacred-texts.com/bib/wb/got/phi.htm","text":"1:14 [B] . . . . (managis)tans bro\u00fere in fraujin gatrauandans bandjom meinaim mais gadaursan unagandans waurd gudis rodjan.\n1:15 [B] sumai raihtis jah in nei\u00feis jah haiftais, sumai \u00fean in godis wiljins Xristu merjand,\n1:16 [B] sumai \u00fean us fria\u00fewai, witandans \u00featei du sunjonai aiwaggeljons gasati\u00fes im;\n1:17 [B] i\u00fe \u00feaiei us haifstai Xristu merjand, ni swiknaba, munandans sik aglons urraisjan bandjom meinaim.\n1:18 [B] hva auk? \u00feandei allaim haidum, ja\u00fe\u00fee inilon ja\u00fe\u00fee sunjai, Xristus merjada; jah in \u00feamma fagino, akei jah faginon duginna.\n1:19 [B] unte wait ei \u00feata mis gagaggi\u00fe du ganistai \u00feairh izwara bida jah andstald ahmins Xristaus Iesuis,\n1:20 [B] bi usbeisnai jah wenai meinaim, unte ni in waihtai gaaiwisko\u00fes wair\u00fea, ak in allai trauainai, swe sinteino jah nu, mikiljada Xristus in leika meinamma, ja\u00fe\u00fee \u00feairh libain ja\u00fe\u00fee \u00feairh dau\u00feu.\n1:21 [B] a\u00fe\u00fean mis liban Xristus ist jah gaswiltan gawaurki.\n1:22 [B] i\u00fe jabai liban in leika, \u00feata mis akran waurstwis ist, jah hva\u00fear waljau ni kann.\n1:23 [B] a\u00fe\u00fean dishabai\u00fes us \u00feaim twaim: \u00feanuh lustu habands andletnan jah mi\u00fe Xristau wisan, und filu mais batizo ist;\n1:24 [B] a\u00fe\u00fean du wisan in leika \u00feaurftozo in izwara.\n1:25 [B] jah \u00feata triggwaba wait \u00featei wisa jah \u00feairhwisa at allaim izwis du izwarai framgahtai jah fahedai galaubeinais izwaraizos,\n1:26 [B] ei hvoftuli izwara biauknai in Xristau Iesu in mis \u00feairh meinana qum aftra du izwis.\n1:27 [B] hveh [\u00featainei] wair\u00feaba aiwaggeljons Xristaus usmitai\u00fe, ei ja\u00fe\u00fee qimau jah gasaihvau izwis, ja\u00fe\u00fee alja\u00fero gahausjau bi izwis, \u00featei standi\u00fe in ainamma ahmin, ainai saiwalai samana arbaidjandans galaubeinai aiwaggeljons,\n1:28 [B] jah ni in waihtai afagidai fram \u00feaim andasta\u00fejam, \u00featei ist im ustaikneins fralustais, i\u00fe izwis ganistais, jah \u00feata fram guda.\n1:29 [B] izwis fragiban ist faur Xristu ni \u00featainei du imma galaubjan, ak jah \u00feata faur ina winnan,\n1:30 [B] \u00feo samon haifst habandans, \u00feoei gasaihvi\u00fe in mis jah nu hausei\u00fe in mis.\n2:1 [B] Jabai hvo nu ga\u00ferafsteino in Xristau, jabai hvo ga\u00felaihte fria\u00fewos, jabai hvo gamaindu\u00fee ahmins, jabai hvo mildi\u00feo jah gablei\u00feeino,\n2:2 [B] usfullei\u00fe meina fahed, ei \u00feata samo hugjai\u00fe, \u00feo samon fria\u00fewa habandans, samasaiwalai, samafra\u00fejai;\n2:3 [B] ni waiht bi haifstai ai\u00fe\u00feau lausai hauheinai, ak in allai hauneinai gahugdais an\u00fear an\u00fearana munands sis auhuman;\n2:4 [B] ni \u00feo seina hvarjizuh mitondans, ak jah \u00feo an\u00fearaize hvarjizuh.\n2:5 [B] \u00feata auk fra[i]\u00fejaidau in izwis, \u00featei jah in Xristau Iesu,\n2:6 [B] saei in gudaskaunein wisands ni wulwa rahnida wisan sik galeiko guda,\n2:7 [B] ak sik silban uslausida, wlit skalkis nimands, in galeikja manne waur\u00feans,\n2:8 [B] jah manaulja bigitans swe manna. gahaunida sik silban, waur\u00feans ufhausjands attin und . . . .\n2:22 [B] . . . . \u00featei swe attin barn mi\u00feskalkinoda mis in aiwaggeljon.\n2:23 [B] \u00feanuh nu wenja sandjan, bi\u00fee gasaihva hva bi mik ist, suns.\n2:24 [B] a\u00fe\u00fean gatraua in fraujin, \u00feammei jah silba sprauto qima.\n2:25 [B] a\u00fe\u00fean \u00fearb munda, Aipafraudeitu bro\u00fear jah gawaurstwan jah gahlaiban meinana, i\u00fe izwana apaustulu jah andbaht \u00feaurftais meinaizos sandjan du izwis;\n2:26 [A] . . . . in \u00feize hausidedu\u00fe ina siukan.\n2:26 [B] unte gairnjands was allaize izwara jah unwunands, in \u00feizei hausidedu\u00fe ina siukan.\n2:27 [A] jah auk siuks was nehva dau\u00feau, akei gu\u00fe ina gaarmaida; a\u00fe\u00fean ni \u00featainei ina, ak jah mik, ei gaurein ana gaurein ni habau.\n2:27 [B] jah auk siuks was nehva dau\u00feau, akei gu\u00fe ina gaarmaida; a\u00fe\u00fean ni \u00featainei ina, ak jah mik, ei gaurein ana gaurein ni habau.\n2:28 [A] sniumundos nu insandida ina, ei gasaihvandans ina aftra fagino\u00fe jah ik hlasoza sijau [uf(kun)nands hva bi izwis ist].\n2:28 [B] sniumundos nu insandida ina, ei gasaihvandans ina aftra fag(ino)\u00fe jah ik hlasoza sijau [uf(kun)nands hva bi izwis ist].\n2:29 [A] andnimai\u00fe nu ina in fraujin mi\u00fe allai fahedai jah \u00feans swaleikans swerans habai\u00fe,\n2:29 [B] andnimai\u00fe nu ina in fraujin mi\u00fe allai fahedai jah \u00feans swaleikans swerans ha[i]bai\u00fe,\n2:30 [A] unte in waurstwis Xristaus und dau\u00feu atnehvida, ufarmunnonds saiwalai seinai, ei usfullidedi izwar gaidw bi mein andbahti.\n2:30 [B] unte in waurstwis Xristaus und dau\u00feu atnehvida, ufarmunnonds saiwalai seinai, ei usfullidedi izwar gaidw bi mein andbahti.\n3:1 [A] \u00deata an\u00fear, bro\u00ferjus meinai, fagino\u00fe in fraujin; \u00feo samona izwis meljan mis swe\u00feauh ni latei, i\u00fe izwis \u00fewasti\u00fea.\n3:1 [B] \u00deata an\u00fear, bro\u00ferjus meinai, fagino\u00fe in fraujin; \u00feo samona izwis meljan mis swe\u00feauh ni latei, i\u00fe izwis \u00fewasti\u00fea.\n3:2 [A] saihvi\u00fe \u00feans hundans, saihvi\u00fe \u00feans ubilans waurstwjans, saihvi\u00fe \u00feo gamaitanon.\n3:2 [B] saihvi\u00fe \u00feans hundans, saihvi\u00fe \u00feans ubilans waurstwjans, saihvi\u00fe \u00feo gamaitanon.\n3:3 [A] a\u00fe\u00fean weis sium bimait, weis ahmin guda skalkinondans jah hvopandans in Xristau Iesu, jan~ni in leika (gatrauam),\n3:3 [B] a\u00fe\u00fean weis sijum bimait, weis ahmin guda skalkinondans jah hvopandans in Xristau Iesu, jah ni in leika gatrauam,\n3:4 [A] jah \u00fean ik habands trauain jah in leika. jabai hvas an\u00fear \u00feugkei\u00fe trauan in leika, ik mais:\n3:4 [B] jah \u00fean ik habands trauain jah in leika. jabai (hvas) an\u00fear \u00feugkei\u00fe trauan in l(eika), ik mais:\n3:5 [A] bimait ahtaudogs, us knodai Israelis, kunjis Bainiameinis, Haibraius us Haibraium, bi witoda Fareisaius,\n3:5 [B] bimait ahtaudogs, us knodai Israelis, kunjis Baineiameinis, Haibraius us Haibraium, bi witoda Fareisaius,\n3:6 [A] bi aljana wrakjands aikklesjon, bi garaihtein \u00feizai sei in witoda ist, wisands usfairina.\n3:6 [B] bi aljana wrakjands aikklesjon, bi garaihtein \u00feizai sei in witoda ist, wisands usfairina.\n3:7 [A] akei \u00featei was mis gawaurki, \u00featuh rahnida in Xristaus slei\u00fea wisan.\n3:7 [B] akei \u00featei was mis gawaurki, \u00featuh rahnida in Xristaus slei\u00fea wisan.\n3:8 [A] a\u00fe\u00fean swe\u00feauh all domja slei\u00fea wisan in ufarassaus kun\u00fejis Xristaus Iesuis fraujins meinis, in \u00feizei allamma gaslei\u00fei\u00fes im jah domja smarnos wisan allata, ei Xristau du gawaurkja habau,\n3:8 [B] a\u00fe\u00fean swe\u00feauh all domja slei\u00fea wisan in ufarassaus kun\u00fejis Iesuis Xristaus fraujins meinis, in \u00feizei allamma gaslei\u00fei\u00fes im jah domja smarnos wisan allata, ei Xristau du gawaurkja habau,\n3:9 [A] jah bigitaidau in imma ni habands meina garaihtein, \u00feo us witoda, akei \u00feo \u00feairh galaubein Xristaus Iesuis, sei us guda ist garaihtei ana galaubeinai,\n3:9 [B] jah bigitaidau in imma ni habands meina garaihtein, \u00feo us witoda, ak \u00feairh galaubein Iesuis Xristaus, sei us guda ist garaihtei ana galaubeinai,\n3:10 [A] du kunnan ina jah maht usstassais is jah gamaindu\u00fe \u00feulaine is, mi\u00fekauri\u00fes was dau\u00feau is,\n3:10 [B] du kunnan ina jah maht usstassais is jah gamaindu\u00fe \u00feulaine is, mi\u00fekauri\u00fes was dau\u00feau is,\n3:11 [A] ei hvaiwa gaqimau in usstassai us dau\u00feaim.\n3:11 [B] ei hvaiwa gaqimau in usstassai us dau\u00feaim.\n3:12 [A] ni \u00featei ju andnemjau ai\u00fe\u00feau ju garaihts gadomi\u00fes sijau, a\u00fe\u00fean afargagga, ei gafahau in \u00feammei gafahans war\u00fe fram Xristau.\n3:12 [B] ni \u00featei ju andnemjau ai\u00fe\u00feau ju garaihts gadomi\u00fes sijau, a\u00fe\u00fean ik afargagga, ei gafahau in \u00feammei gafahans war\u00fe fram Xristau.\n3:13 [A] bro\u00ferjus, ik mik silban ni nauh man gafahan;\n3:13 [B] bro\u00ferjus, ik mik silban ni nauh man gafahan;\n3:14 [A] a\u00fe\u00fean ain swe\u00feauh , \u00feaim a(ftra) ufarmunnonds, i\u00fe du \u00feaim \u00feoei faura sind, mik uf\u00feanjands, bi mundrein afargagga afar sigislauna \u00feizos iupa la\u00feonais gudis in Xristau Iesu.\n3:14 [B] a\u00fe\u00fean ain swe\u00feauh \u00feaim afta ufarmunnonds, i\u00fe du \u00feaim \u00feoei faura sind, mik uf\u00feanjands, bi mundrein afargagga afar sigislauna \u00feizos iupa la\u00feonais gudis in Xristau Iesu.\n3:15 [A] swa managai nu swe sijaima fullawitans, \u00feata hugjaima; jah jabai hva aljaleikos hugji\u00fe, jah \u00feata izwis gu\u00fe andhulji\u00fe.\n3:15 [B] swa managai nu swe sijaima fullawitans, \u00feata hugjaima; jah jabai aljaleikos hugji\u00fe, jah \u00feata izwis gu\u00fe andhulji\u00fe.\n3:16 [A] a\u00fe\u00fean swe\u00feauh du \u00feammei gasnewum, ei samo hugjaima [jah samo fra\u00fejaima], samon gaggan garaideinai.\n3:16 [B] a\u00fe\u00fean swe\u00feauh du \u00feammei gasnewum, ei samo hugjaima [jah samo fra\u00fejaima].\n3:17 [A] mi\u00fegaleikondans meinai wair\u00feai\u00fe, bro\u00ferjus, jam~mundo\u00fe izwis \u00feans swa gaggandans, swaswe habai\u00fe frisaht unsis.\n3:17 [B] mi\u00fegaleikondans meinai wair\u00feai\u00fe, bro\u00ferjus, jah mundo\u00fe izwis \u00feans swa gaggandans, swaswe habai\u00fe frisaht unsis.\n3:18 [A] unte managai gaggand \u00feanzei ufta qa\u00fe izwis, i\u00fe nu jag~gretands qi\u00fea \u00feans fijands galgins Xristaus,\n3:18 [B] unte managai gaggand \u00feanzei ufta qa\u00fe izwis, i\u00fe nu jah gretands qi\u00fea \u00feans fijands galgins Xristaus,\n3:19 [A] \u00feizeiei andeis wair\u00fei\u00fe fralusts, \u00feizeiei gu\u00fe wamba ist jah wul\u00feaus in skandai ize, \u00feaiei air\u00feeinaim fra\u00fejand.\n3:19 [B] \u00feizeei andeis wair\u00fei\u00fe fralusts, \u00feize gu\u00fe wamba ist jah wul\u00feus in skandai ize, \u00feaiei air\u00feeinaim fra\u00fejand.\n3:20 [A] i\u00fe unsara bauains in himinam ist, \u00fea\u00feroei jah nasjand usbeidam fraujan Iesu Xristu,\n3:20 [B] i\u00fe unsara bauains in himinam ist, \u00fea\u00feroei jah nasjand usbeidam fraujan Iesu Xristu,\n3:21 [A] saei inmaidei\u00fe leika hauneinais unsaraizos du ibnaskaunjamma leika wul\u00feaus seinis bi waurstwa, unte mag jah ufhnaiwjan sis alla.\n3:21 [B] saei inmaidei\u00fe leika hauneinais unsaraizos du ibnaskaunjamma leika wul\u00feaus seinis bi waurstwa, unte mag jah ufhnaiwjan sis alla.\n4:1 [A] Swaei nu, bro\u00ferjus meinai liubans jah lustusamans, fahe\u00fes jah waips meins, swa standai\u00fe in fraujin.\n4:1 [B] Swaei nu, bro\u00ferjus meinai liubans jah lustusamans, fahe\u00fes jah waips meins, swa standai\u00fe in fraujin.\n4:2 [A] Aiodian bidja jas~Swntwkein bidja \u00feata samo fra\u00fejan in fraujin.\n4:2 [B] Aiodian bidja jah Swntwkein bidja \u00feata samo fra\u00fejan in fraujin.\n4:3 [A] jai jah \u00feuk waliso bidja gajuko, ni\u00feais \u00feos \u00feozei mi\u00fearbaididedun mis in aiwaggeljon mi\u00fe Klaimaintau jah an\u00fearaim gawaurstwam meinaim, \u00feizeei namna sind in bokom libainais.\n4:3 [B] jai jah \u00feuk waliso bidja gajuko, ni\u00feais \u00feos \u00feozei mi\u00fearbaididedun mis in aiwaggeljon mi\u00fe Klemaintau jah an\u00fearaim gawaurstwam meinaim, \u00feizeei namna sind in bokom libainais.\n4:4 [A] nunu nu fagino\u00fe in fraujin sinteino; aftra qi\u00fea, fagino\u00fe!\n4:4 [B] nunu nu fagino\u00fe in fraujin sinteino; aftra qi\u00fea, fagino\u00fe!\n4:5 [A] anawilje(i) izwara kun\u00fea sijai allaim mannam; frauja nehva ist.\n4:5 [B] anawilje izwara kun\u00fea siai allaim mannam; frauja nehva ist.\n4:6 [A] ni waihtai maurnai\u00fe, ak in allai bidai jah aihtronai mi\u00fe awiliudam bidos izwaros kun\u00feos sijaina . . . .\n4:6 [B] ni waihtai maurnai\u00fe, ak in allai bidai jah aihtronai mi\u00fe awiliudam bidos izwaros kun\u00feos sijaina at guda.\n4:7 [B] jah gawair\u00fei gudis, \u00featei ufar ist all ahane, fastai\u00fe hairtona jah leika izwara in Xristau Iesu.\n4:8 [B] \u00feata an\u00fear, bro\u00ferjus, \u00feishvah \u00featei ist sunjein, \u00feishvah \u00featei gariud, \u00feishvah \u00featei garaiht, \u00feishvah \u00featei weih, \u00feishvah \u00featei liubaleik, \u00feishvah \u00featei wailameri, jabai hvo godeino, jabai hvo hazeino, \u00feata mito\u00fe;\n4:9 [B] \u00featei jah galaisidedu\u00fe izwis jah ganemu\u00fe jah gahausidedu\u00fe jah gasehvu\u00fe in mis, \u00feata taujai\u00fe, jah gu\u00fe gawair\u00feeis sijai mi\u00fe izwis.\n4:10 [B] a\u00fe\u00fean faginoda in fraujin mikilaba, unte ju hvan ga\u00feaihu\u00fe du faur mik fra\u00fe(j)an, ana \u00feammei jah fro\u00feu\u00fe; a\u00fe\u00fean analatidai waur\u00feu\u00fe.\n4:11 [B] ni \u00featei bi \u00fearbai qi\u00feau, unte ik galaisida mik in \u00feaimei im ganohi\u00fes wisan.\n4:12 [B] lais jah haunjan mik, lais jah ufarassu haban; in allamma jah in allaim us\u00fero\u00fei\u00fes im, jah sads wair\u00fean jah gredags, jah ufarassau haban jah \u00fearbos \u00feulan.\n4:13 [B] all mag in \u00feamma inswin\u00fejandin mik Xristau.\n4:14 [B] a\u00fe\u00fean swe\u00feauh waila gatawidedu\u00fe gamainja briggandans meina aglon.\n4:15 [B] a\u00fe\u00fean witu\u00fe jah jus, Filippisius, \u00featei in anastodeinai aiwaggeljons, \u00fean usiddja af Makidonai, ni ain[n]ohun aikklesjono mis gamainida in ra\u00fejon gibos jah andanemis, alja jus ainai.\n4:16 [B] unte jah in \u00deaissalauneikai jah ainamma sin\u00fea jah twaim andawizn mis insandidedu\u00fe.\n4:17 [B] ni \u00featei gasokjau giba, ak gasokja ak(ran) . . . .","title":"Gothic Bible (partial): Philippians","type":"page"}