{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/rom.htm","path":"bib/wb/got/rom.htm","source_url":"https://sacred-texts.com/bib/wb/got/rom.htm","text":"6:23 [A] \u00feo auk launa frawaurhtais dau\u00feus; i\u00fe ansts gudis libains aiweino in Xristau Iesu, fraujin unsaramma.\n7:1 [A] \u00deau niu witu\u00fe, bro\u00ferjus kunnandam auk wito\u00fe rodja, \u00featei wito\u00fe fraujino\u00fe mann, s lagga hveila swe libai\u00fe?\n7:2 [A] jah auk ufwaira qens at libandin abin gabundana ist witoda; a\u00fe\u00fean jabai gaswilti\u00fe aba, galausjada af \u00feamma witoda abins.\n7:3 [A] \u00feannu \u00fean at libandin abin haitada horinondei, jabai wair\u00fei\u00fe waira an\u00fearamma; (i\u00fe) jabai gaswilti\u00fe wair, frija ist \u00feis witodis, ei ni sijai horinondei waur\u00feana abin an\u00fearamma.\n7:4 [A] swaei nu jah jus, bro\u00ferjus meinai, afdau\u00feidai waur\u00feu\u00fe witoda \u00feairh leik Xristaus, ei wair\u00feai\u00fe an\u00fearamma, \u00feamma us dau\u00feaim urreisandin, ei akran bairaima guda.\n7:5 [A] \u00fean auk wesum in leika, winnons frawaurhti \u00feos \u00feairh wito\u00fe waurhtedun in li\u00feum unsaraim du akran bairan dau\u00feau;\n7:6 [A] i\u00fe nu, sai, andbundanai waur\u00feum af witoda, gadau\u00fenandans in \u00feammei gahabaidai wesum, swaei skalkinoma in niuji\u00feai ahmins jah ni fairni\u00feai bokos.\n7:7 [A] hva nu qi\u00feam? wito\u00fe frawaurhts ist? nis~sijai! ak frawaurht ni ufkun\u00feedjau nih \u00feairh wito\u00fe, unte lustu nih wissedjau, nih wito\u00fe qe\u00fei: ni gairnjais.\n7:8 [A] i\u00fe lew nimandei frawaurhts \u00feairh anabusn gawaurhta in mis allana lustu; unte inu wito\u00fe frawaurhts was nawis.\n7:9 [A] i\u00fe ik qius inu wito\u00fe siml(e), i\u00fe qimandein anabusnai frawaurhts gaqiunoda;\n7:10 [A] i\u00fe ik gadau\u00fe(noda), jah bigitana war\u00fe mis anabusns, sei was du libainai, wisan du dau\u00feau.\n7:11 [A] unte frawaurhts lew nimandei \u00feairh anabusn uslutoda mik, jah \u00feairh \u00feo usqam.\n7:12 [A] a\u00fe\u00fean nu swe\u00feauh wito\u00fe weihata jah anabusns weiha jah garaihta jah \u00feiu\u00feeiga.\n7:13 [A] \u00feata nu \u00feiu\u00feeigo war\u00fe mis dau\u00feus? nis~sijai! ak frawaurhts ei uskun\u00fea waur\u00fei frawaurhts, \u00feairh \u00feata \u00feiu\u00feeigo mis gawaurkjandei dau\u00feu, ei waur\u00fei ufarassau frawaurhta frawaurhts \u00feairh anabusn.\n7:14 [A] witum auk \u00featei wito\u00fe ahmein ist; i\u00fe ik leikeins im, frabauhts uf frawaurht.\n7:15 [A] \u00featei waurkja, ni fra\u00feja; unte ni \u00featei wiljau tauja, ak \u00featei fija \u00feata tauja.\n7:16 [A] i\u00fe jabai \u00featei ni wiljau \u00feata tauja, gaqiss im witoda \u00featei go\u00fe.\n7:17 [A] i\u00fe nu ju ni ik waurkja \u00feata, ak so bauandei in mis frawaurhts.\n7:18 [A] wait auk \u00featei ni baui\u00fe in mis, \u00feat~ist in leika meinamma, \u00feiu\u00fe; unte wiljan atligi\u00fe mis, i\u00fe gawaurkjan go\u00fe ni.\n7:19 [A] unte ni \u00featei wiljau waurkja go\u00fe, ak \u00featei ni wiljau ubil tauja.\n7:20 [A] jabai nu \u00featei ni wiljau ik \u00feata tauja, ju ni ik waurkja ita, ak sei baui\u00fe in mis frawaurhts.\n7:21 [A] bigita nu wito\u00fe, wiljandin mis go\u00fe taujan, unte mis atist ubil.\n7:22 [A] gawizneigs im auk witoda gudis bi \u00feamma innumin mann;\n7:23 [A] a\u00fe\u00fean gasaihva an\u00fear wito\u00fe in li\u00feum meinaim, andwaihando witoda ahmins meinis jah frahin\u00feando mik in witoda frawaurhtais \u00feamma wisandin in li\u00feum meinaim.\n7:24 [A] waina(h)s ik manna! hvas mik lausei\u00fe us \u00feamma leika dau\u00feaus \u00feis?\n7:25 [A] awiliudo guda \u00feairh Iesu Xristu, fraujan unsarana; jau nu silba i(k) skalkino gahugdai witoda gudis, i\u00fe leika witoda frawaurhtais.\n8:1 [A] Ni waiht \u00feannu nu wargi\u00feos \u00feaim in Xristau Iesu ni gaggandam bi leika.\n8:2 [A] unte wito\u00fe ahmins libainais in Xristau Iesu frijana brahta mik witodis frawaurhtais jah dau\u00feaus.\n8:3 [A] unte \u00feata unmahteigo witodis, in \u00feammei siuks was \u00feairh leik, gu\u00fe seinana sunu insandjands in galeikja leikis frawaurhtais jah bi frawaurht gawargida frawaurht in leika,\n8:4 [A] ei garaihtei witodis usfulljaidau in uns \u00feaim ni bi leika gaggandam, ak bi ahmin.\n8:5 [A] unte \u00feai bi leika wisandans \u00feo \u00feoei leikis sind, mitond; i\u00fe \u00feai bi ahmin \u00feo \u00feoei ahmins.\n8:6 [A] a\u00fe\u00fean fra\u00fei leikis dau\u00feus, i\u00fe fra\u00fei ahmins libains jah gawair\u00fei;\n8:7 [A] unte fra\u00fei leikis fijands du guda; witoda gudis ni ufhausei\u00fe, i\u00fe ni mag:\n8:8 [A] a\u00fe\u00fean \u00feai in leika wisandans guda galeikan ni magun.\n8:9 [A] i\u00fe jus ni siju\u00fe in leika, ak in ahmin, swe\u00feauh jabai ahma gudis baui\u00fe in izwis. i\u00fe jabai hvas ahman Xristaus ni habai\u00fe, sa nist is.\n8:10 [A] jabai auk Xristus in izwis, leik raihtis . . . .\n8:34 [A] . . . . saei ist in taihswon gudis, saei jah bidji\u00fe faur uns.\n8:35 [A] hvas uns afskaidai af fria\u00fewai Xristaus? aglo? \u00feau aggwi\u00fea? \u00feau wrakja? \u00feau huhrus? \u00feau naqadei? \u00feau slei\u00feei? \u00feau hairus?\n8:36 [A] swaswe gameli\u00fe ist \u00featei in \u00feuk gadau\u00fejanda all dagis, rahnidai wesum swe lamba slauhtais.\n8:37 [A] akei in \u00feaim allaim jiukam \u00feairh \u00feana frijondan uns.\n8:38 [A] gatraua auk \u00featei ni dau\u00feus nih aggeljus ni (reikja) ni mahteis nih andwair\u00feo nih anawair\u00feo,\n8:39 [A] nih hauhi\u00fea nih diupi\u00fea nih gaskafts (an\u00feara) magi uns afskaidan af fria\u00fewai gudis \u00feizai in Xristau Iesu, fraujin unsaramma.\n9:1 [A] Sunja qi\u00fea ni waiht liuga, mi\u00feweitwodjandein mis mi\u00fewissein meinai in ahmin weihamma,\n9:2 [A] \u00featei saurga mis ist mikila jah unhveilo aglo hairtin meinamma.\n9:3 [A] usbida auk ana\u00feaima wisan silba ik af Xristau faur bro\u00feruns meinans \u00feans samakunjans bi leika,\n9:4 [A] \u00feaiei sind Israeleitai, \u00feizeei ist frastisibja jah wul\u00feus jah witodis garaideins jah triggwos jah skalkinassus jah gahaita,\n9:5 [A] \u00feizeei attans, jah us \u00feaimei Xristus bi leika, saei ist ufar allaim gu\u00fe \u00feiu\u00fei\u00fes in aiwam, amen.\n9:6 [A] a\u00fe\u00fean swe\u00feauh ni usdraus waurd gudis; ni auk allai \u00feai us Israela sind Israel,\n9:7 [A] ni\u00fe~\u00featei sijaina fraiw Abrahamis, allai barna, ak: in Isaka haitada \u00feus fraiw,\n9:8 [A] \u00feat~ist: ni \u00feo barna leikis barna gudis, ak barna gahaitis rahnjanda du fraiwa.\n9:9 [A] gahaitis auk waurd \u00feat~ist: bi \u00feamma mela qima, jah wair\u00fei\u00fe Sarrin sunus;\n9:10 [A] a\u00fe\u00fean ni \u00feat~ain, ak jah Raibaikka us ainamma galigrja habandei Isakis, attins unsaris.\n9:11 [A] a\u00fe\u00fean nauh\u00feanuh gabauranai wesun, ai\u00fe\u00feau tawidedeina hva \u00feiu\u00feis ai\u00fe\u00feau un\u00feiu\u00feis, ei bi gawaleinai muns gudis wisai,\n9:12 [A] ni us waurstwam, ak us \u00feamma la\u00feondin qi\u00fean ist izai \u00featei sa maiza skalkino\u00fe \u00feamma minnizin,\n9:13 [A] swaswe gameli\u00fe ist: Iakob frijoda, i\u00fe Esaw fijaida.\n9:14 [A] hva nu qi\u00feam? ibai inwindi\u00fea fram guda? nis~sijai!\n9:15 [A] du Mose auk qi\u00fei\u00fe: gaarma \u00feanei arma, jah gablei\u00feja (\u00feanei) (blei\u00feja).\n9:16 [A] \u00feannu nu ni wiljandins ni rinnandins, ak armandins gudis.\n9:17 [A] qi\u00fei\u00fe auk \u00feata gamelido du Faraoni, (unte) (in) (\u00feize) (jah) (raisida) \u00feuk, ei gabairhtjau bi \u00feus maht meina jah gateihaidau namo mein and alla air\u00fea.\n9:18 [A] \u00feannu nu jai \u00feanei wili armai\u00fe, i\u00fe \u00feanei wili gahardei\u00fe.\n9:19 [A] qi\u00feis mis nu: a\u00fe\u00fean hva nauh faianda? unte wiljin is hvas andstandi\u00fe?\n9:20 [A] \u00feannu nu jai, manna, \u00feu hvas is, ei andwaurdjais guda? ibai qi\u00fei\u00fe gadikis du \u00feamma digandin: hva mik gatawides swa?\n9:21 [A] \u00feau niu habai\u00fe kasja waldufni \u00feahons us \u00feamma samin daiga tau(jan) sum du galaubamma kasa, sumu\u00fe~\u00fean du ungalubamma?\n9:22 [A] i\u00fe jabai wiljands gu\u00fe ustaiknjan \u00fewairhein jah uskannjan \u00feata mahteigo usbeidands in managai laggamodein bi kasam \u00fewairheins gamanwidaim du fralustai,\n9:23 [A] ei gakannidedi gabein wul\u00fe(a)us seinis bi kasam armaions \u00feoei fauragamanwida du wul\u00feau;\n9:24 [A] \u00feanzei jah la\u00feoda uns ni \u00feataine(i) us Iudaium, ak jah us \u00feiudom,\n9:25 [A] swaswe jah in Osaiin qi\u00fei\u00fe: haita \u00feo ni managein meina managein meina, jah \u00feo unliubon liubon;\n9:26 [A] jah wair\u00fei\u00fe in \u00feamma stada \u00fearei qi\u00feada im: ni managei meina jus, \u00feai haitanda sunjus gudis libandins.\n9:27 [A] i\u00fe Esa\u00efas hropei\u00fe bi Israel: jabai wesi ra\u00fejo suniwe Israelis swaswe malma mareins, laibos ganisand.\n9:28 [A] waurd auk ustiuhands jah gamaurgjands in garaihtein, unte waurd gamaurgi\u00fe tauji\u00fe frauja ana air\u00feai.\n9:29 [A] jah swaswe fauraqa\u00fe Esa\u00efas: nih frauja Sabao\u00fe bili\u00fei unsis fraiwa, swe Saudauma \u00feau waur\u00feeima jah swe Gaumaurra \u00feau galeikai waur\u00feeima.\n9:30 [A] hva nu qi\u00feam? \u00featei \u00feiudos \u00feos ni laistjandeins garaihtein gafaifahun garaihtein, a\u00fe\u00fean garaihtein \u00feo us galaubei(nai);\n9:31 [A] i\u00fe Israel laistjands wito\u00fe garaihteins bi wito\u00fe garaihteins ni gasnau.\n9:32 [A] Duhve? unte ni us galaubeinai, ak us waurstwam witodis; bistuggqun du staina bistuggqis,\n9:33 [A] swaswe gameli\u00fe ist: sai, galagja in Sion stain bistuggqis jah hallu gamarzeinais, jah galaubjands du imma ni gaaiwiskoda.\n10:1 [A] Bro\u00ferjus, sa raihtis wilja meinis hairtins jah bida du guda bi ins du naseinai.\n10:2 [A] weitwodja auk im \u00featei aljan gudis haband, akei ni bi kun\u00feja.\n10:3 [A] unkunnandans auk gudis garaihtein jah seina garaihtein sokjandans stiurjan, garaihtein gudis ni ufhausidedun.\n10:4 [A] ustauhts auk witodis Xristus du garaihtein allaim \u00feaim galaubjandam.\n10:5 [A] Moses auk melei\u00fe \u00feo garaihtein us witoda, \u00featei sa taujands \u00feo manna libai\u00fe in izai.\n10:6 [A] i\u00fe so us galaubeinai garaihtei swa qi\u00fei\u00fe: ni qi\u00feais in hairtin \u00feeinamma: hvas ussteigi\u00fe in himin? \u00feat~ist Xristu dala\u00fe attiuhan;\n10:7 [A] ai\u00fe\u00feau: hvas gasteigi\u00fe in afgrundi\u00fea? \u00feat~ist Xristu us dau\u00feaim iup ustiuhan.\n10:8 [A] akei hva qi\u00fei\u00fe? nehva \u00feus \u00feata waurd ist in mun\u00fea \u00feeinamma jah in hairtin \u00feeinamma, \u00feat~ist waurd galaubeinais \u00featei merjam.\n10:9 [A] \u00feei jabai andhaitis in mun\u00fea \u00feeinamma fraujin Iesu jah galaubeis in hairtin \u00feeinamma \u00featei gu\u00fe ina urraisida us dau\u00feaim, ganisi(s).\n10:10 [A] hairto auk galaubei\u00fe du garaihti\u00feai, i\u00fe mun\u00fea andhaitada du ganistai.\n10:11 [A] qi\u00fei\u00fe auk \u00feata gameli\u00fe: hvazuh sa galaubjands du imma ni gaaiwiskoda.\n10:12 [A] ni auk ist gaskaideins Iudaiaus jah Krekis; sa sama auk frauja allaize, gabigs in allans \u00feans bidjandans sik.\n10:13 [A] hvazuh auk saei anahaiti\u00fe bidai namo fraujins, ganisi\u00fe.\n10:14 [A] hvaiwa nu bidjand du \u00feammei ni galaubidedun? ai\u00fe\u00feau hvaiwa galaubjand \u00feammei ni hausidedun? i\u00fe hvaiwa hausjand inu merjandan?\n10:15 [A] i\u00fe hvaiwa merjand, niba insandjanda? swaswe gameli\u00fe ist: hvaiwa skaunjai fotjus \u00feize spillondane gawair\u00fei, \u00feize spillondane \u00feiu\u00fe.\n10:16 [A] akei ni allai ufhausidedun aiwaggeljon: Esa\u00efas auk qi\u00fei\u00fe: frauja, hvas galaubida hauseinai unsarai?\n10:17 [A] \u00feannu galaubeins us gahauseinai, i\u00fe gahauseins \u00feairh waurd Xristaus.\n10:18 [A] akei qi\u00fea: ibai ni hausidedun? raihtis: and alla air\u00fea galai\u00fe drunjus ize jah and andins midjungardis waurda ize.\n10:19 [A] akei qi\u00fea: ibai Israel ni fan\u00fe? frumist Moses qi\u00fei\u00fe: ik in aljana izwis brigga in un\u00feiudom, in \u00feiudai unfra\u00fejandein in \u00fewairhein izwis brigga.\n10:20 [A] i\u00fe Esa\u00efas ananan\u00feei\u00fe jah qi\u00fei\u00fe: bigitans war\u00fe \u00feaim mik ni gasokjandam, swikun\u00fes war\u00fe \u00feaim mik ni gafraihnandam.\n10:21 [A] i\u00fe du Israela qi\u00fei\u00fe: allana dag usbraidida (\u00feos) handuns meinos du managein ungalaubjandein jah andstandandein.\n11:1 [A] Qi\u00fea nu: ibai afskauf gu\u00fe a(r)bja seinamma? nis~sijai! jah auk ik Israeleites im . . . .\n11:11 [A] . . . . ei gadruseina? nis~sijai! ak \u00feizai ize missadedai ganists \u00feiudom du in aljana briggan ins.\n11:12 [A] i\u00fe jabai missadeds ize gabei fairhvau jah wanains ize gabei \u00feiudom, hvan mais fullo ize?\n11:13 [A] izwis auk qi\u00fea \u00feiudom: swa lagga swe ik im \u00feiudo apaustaulus, andbahti mein mikilja,\n11:14 [A] ei hvaiwa in aljana briggau leik mein jah ganasjau sumans us im.\n11:15 [A] jabai auk uswaurpa ize gabei fairhvaus, hva so andanumts, nibai libains us dau\u00feaim?\n11:16 [A] \u00feandei ufarskafts weiha, jah daigs, jah jabai waurts weiha, jah astos.\n11:17 [A] i\u00fe jabai sumai \u00feize aste usbruknodedun, i\u00fe \u00feu wil\u00feeis alewabagms wisands intrusgi\u00fes warst in ins jah gamains \u00feizai waur(htai) jah smair\u00fera alewabagmis warst,\n11:18 [A] ni hvop ana \u00feans a[n]stans; i\u00fe jabai hvopis, ni \u00feu \u00feo waurt[s] bairis, ak so waurts \u00feuk.\n11:19 [A] qi\u00feais nu: usbruknodedun astos, ei ik intrusgjaidau.\n11:20 [A] waila! ungalaubeinai usbruknodedun, i\u00fe \u00feu galaubeinai gastost; ni hugei hauhaba, ak ogs.\n11:21 [A] \u00feandei gu\u00fe \u00feans us gabaur\u00feai astans ni freidida, ibai aufto ni \u00feuk freidjai.\n11:22 [A] sai nu selein jah hvassein [garaihta] gudis; a\u00fe\u00fean ana \u00feaim \u00feaiei gadrusun, hvassein, i\u00fe ana \u00feus selein, jabai \u00feairhwisis in selein; ai\u00fe\u00feau jah \u00feu usmaitaza,\n11:23 [A] jah jainai, niba gatulgjand sik in ungalaubeinai, intrusgjanda; mahteigs auk ist gu\u00fe aftra intrusgjan ins.\n11:24 [A] jabai auk \u00feu us wistai usmaitans \u00feis wil\u00feeis alewabagmis jah aljakuns wisands, intrusgans warst in g(o)dana alewabagm, hvan filu mais \u00feai bi wistai intrusgjanda in swesana alewabagm?\n11:25 [A] ni auk wiljau izwis unw(eisa)ns, bro\u00ferjus, \u00feizos runos, ei ni sijai\u00fe in izwis silbam frodai, unte daubei sumata Israela war\u00fe, und \u00featei fullo \u00feiudo inngalei\u00feai.\n11:26 [A] jah swa allai Israel ganisand, swaswe gameli\u00fe ist: urrinni\u00fe us Sion sa lausjands du afwandjan afgudein af Iakoba.\n11:27 [A] jah so im fram mis triggwa, \u00fean afnima frawaurhtins ize.\n11:28 [A] a\u00fe\u00fean bi aiwaggeljon fijandans in izwara, i\u00fe bi gawaleinai liubai ana attans.\n11:29 [A] inu idreiga sind auk gibos jah la\u00feons gudis.\n11:30 [A] swaswe raihtis jus suman ni galaubidedu\u00fe guda, i\u00fe nu gaarmaidai waur\u00feu\u00fe \u00feizai ize ungalaubeinai,\n11:31 [A] swa jah \u00feai nu ni galaubidedun izwarai armaion, ei jah eis gaarmaindau.\n11:32 [A] galauk auk gu\u00fe allans in ungalaubeinai, ei allans gaarmai.\n11:33 [A] o diupi\u00fea gabeins handugeins . . . .\n11:33 [Car] . . . . jah witubnjis gudis! hvaiwa unusspilloda sind stauos is jah unbilaistidai wigos is!\n11:34 [Car] hvas auk ufkun\u00fea fra\u00fei fraujins ai\u00fe\u00feau hvas imma ragineis was?\n11:35 [Car] ai\u00fe\u00feau hvas imma fruma gaf, jah fragildaidau imma?\n11:36 [Car] unte us imma jah \u00feairh ina jah in imma alla; immuh wul\u00feus du aiwam, amen.\n12:1 [Car] Bidja nu izwis, bro\u00ferjus, \u00feairh blei\u00feein gudis, usgiban leika izwara saud qiwana, weihana, waila galeikaidana guda, anda\u00feahtana blotinassu izwarana.\n12:2 [Car] ni galeiko\u00fe izwis \u00feamma aiwa, ananiuji\u00feai fra\u00fejis izwaris du gakiusan hva sijai wilja gudis, \u00featei go\u00fe jah galeikai\u00fe jah ustauhan.\n12:3 [Car] qi\u00fea auk \u00feairh anst gudis sei gibana ist mis, allaim wisandam in izwis, ni mais fra\u00fejan \u00feau skuli fra\u00fejan, ak fra\u00fejan du waila fra\u00fejan, hvarjammeh swaswe gu\u00fe gadailida mita\u00fe galaubeinais.\n12:4 [Car] swaswe raihtis in ainamma leika li\u00feuns managans habam, \u00feai\u00fe~\u00fean li\u00fejus allai ni \u00feata samo taui haband;\n12:5 [Car] swa managai ain leik sijum in Xristau, a\u00fe\u00fean ainhvarjizuh an\u00fear . . . .\n12:8 [A] . . . . sa dailjands in allawerein, sa faurastandands in usdaudein, sa armands in hlasein.\n12:9 [A] fria\u00fewa unliuta; fiandans u(b)i(l)a, haftjandans godamma;\n12:10 [A] bro\u00feralubon in izwis misso fria\u00fewamildjai; sweri\u00feai izwis misso faurarahnjandans;\n12:11 [A] usdaudein ni latai; ahmin wulandans; fraujin skalkinondans;\n12:12 [A] wenai faginondans; aglons us\u00feulandans; bidai haftjandans;\n12:13 [A] andawiznim weihaize gamainjandans; gastigodein galaistjandans;\n12:14 [A] \u00feiu\u00fejai\u00fe \u00feans wrikandans izwis: \u00feiu\u00fejai\u00fe jah ni un\u00feiu\u00fejai\u00fe;\n12:15 [A] faginon mi\u00fe faginondam, gretan mi\u00fe gretandam.\n12:16 [A] \u00feata samo in izwis misso fra\u00fejandans; ni hauhaba hugjandans, ak \u00feaim hnaiwam mi\u00fegawisandans; ni wair\u00feai\u00fe inahai bi izwis silbam.\n12:17 [A] ni ainummehun ubil und ubilamma usgibandans; bisaihvandans godis ni \u00featainei in andwair\u00feja gudis, ak jah in andwair\u00feja manne allaize.\n12:17 [Car] . . . . in andwair\u00feja gudis, ak jah in andwair\u00feja manne allaize.\n12:18 [A] jabai magi wair\u00fean us izwis, mi\u00fe allaim mannam gawair\u00fei habandans.\n12:18 [Car] jabai magi wair\u00fean us izwis, mi\u00fe allaim mannam gawair\u00fei habandans.\n12:19 [A] ni izwis silbans gawrikandans, liubans, ak gibi\u00fe sta\u00fe \u00fewairhein; gameli\u00fe ist auk: mis fraweit leitaidau, ik fragilda, qi\u00fei\u00fe frauja.\n12:19 [Car] ni izwis silbans gawrikandans, liubans, ak gibi\u00fe sta\u00fe \u00fewairhein; gameli\u00fe ist auk: mis fraweit leitaidau, ik fragilda, qi\u00fei\u00fe frauja.\n12:20 [A] jabai gredo fijand \u00feeinana, mat gif imma; i\u00fe jabai \u00feaursjai, dragkei ina; \u00feata auk taujands haurja funins rikis ana haubi\u00fe is.\n12:20 [Car] jabai gredo fijand \u00feeinana, mat gif imma; i\u00fe jabai \u00feaursjai, dragkei ina; \u00feata auk taujands haurja funins rikis ana haubi\u00fe is.\n12:21 [A] ni gajiukaizau af un\u00feiu\u00fea, ak gajiukais [af] \u00feiu\u00fea un\u00feiu\u00fe.\n12:21 [Car] ni gajiukaizau af un\u00feiu\u00fea, ak gajiukais [af] \u00feiu\u00fea un\u00feiu\u00fe.\n13:1 [A] All saiwalo waldufnjam ufarwisandam ufhausjai; unte nist waldufni alja fram guda, i\u00fe \u00feo wisandona fram guda gasatida sind.\n13:1 [Car] All saiwalo waldufnjam ufarwisandam ufhausjai; unte nist waldufni alja fram guda, i\u00fe \u00feo wisandona fram guda gasatida sind.\n13:2 [A] swaei sa andstandands waldufnja gudis garaideinai andsto\u00fe; i\u00fe \u00feai andstandandans silbans sis wargi\u00fea nimand.\n13:2 [Car] swaei sa andstandands waldufnja gudis garaideinai andsto\u00fe; i\u00fe \u00feai andstandandans silbans sis wargi\u00fea nimand.\n13:3 [A] \u00feai auk reiks ni sind agis godamma waurstwa, ak ubilamma; a\u00fe\u00fean wileis ei ni ogeis waldufni, \u00feiu\u00fe taujais jah habais hazein us \u00feamma;\n13:3 [Car] \u00feai auk reiks ni sind agis godamma waurstwa, ak ubilamma; a\u00fe\u00fean wileis ei ni ogeis waldufni, \u00feiu\u00fe taujais jah habais hazein us \u00feamma;\n13:4 [A] unte gudis andbahts ist \u00feus in godamma. i\u00fe jabai ubil taujis, ogs; unte ni sware \u00feana hairau bairi\u00fe; gudis auk andbahts ist, fraweitands in \u00fewairhein \u00feamma ubil taujandin.\n13:4 [Car] unte gudis andbahts ist \u00feus in godamma. i\u00fe jabai ubil taujis, ogs; unte ni sware \u00feana hairu bairi\u00fe; gudis auk andbahts ist, fraweitands in \u00fewairhein \u00feamma ubil taujandin.\n13:5 [A] du\u00fe\u00fee ufhausjai\u00fe ni \u00featainei in \u00fewairheins, ak jah in mi\u00fewisseins.\n13:5 [Car] du\u00fe\u00fee ufhausjai\u00fe . . . .\n13:6 [A] inu\u00fe~\u00feis auk jah gilstra ustiuhai\u00fe; unte andbahtos gudis sind in \u00feamma silbin skalkinondans.\n13:7 [A] usgibi\u00fe nu allaim skuldo: \u00feammei gabaur gabaur, \u00feammei mota mota, \u00feammei agis agis, \u00feammei sweri\u00fea sweri\u00fea.\n13:8 [A] ni ainummehun waihtais skulans sijai\u00fe, niba \u00featei i(z)wi(s) misso frijo\u00fe; unte saei frijo\u00fe nehvundjan, wito\u00fe usfullida.\n13:9 [A] \u00feata auk: ni horinos, ni maur\u00ferjais, ni hlifais, nih faihugeigais, jah jabai hvo an\u00fearaizo anabusne ist, in \u00feamma waurda usfulljada, \u00feamma: frijos nehvundjan \u00feeinana swe \u00feuk silban.\n13:10 [A] fria\u00fewa nehvundjins ubil ni waurkei\u00fe; usfulleins nu witodis ist fria\u00fewa.\n13:11 [A] jah \u00feata witandans \u00feata \u00feeihs, \u00featei mel ist uns ju us slepa urreisan; unte nu nehvis ist naseins unsara \u00feau \u00fean galaubidedum.\n13:12 [A] nahts framis galai\u00fe, i\u00fe dags atnehvida; uswairpam nu waurstwam riqizis, i\u00fe gawasjam sarwam liuhadis.\n13:13 [A] swe in daga garedaba gaggaima, ni gabauram jah drugkaneim, ni ligram jah aglaitjam ni haifstai jah aljana;\n13:14 [A] ak gahamo\u00fe fraujin unsaramma Xristau Iesua jah leikis mun ni taujai\u00fe in lustuns.\n14:1 [A] I\u00fe unmahteigana galaubeinai andnimai\u00fe, ni du tweifleinai mitone.\n14:2 [A] sums raihtis galaubei\u00fe matjan allata; i\u00fe saei unmahteigs ist, gras matji\u00fe.\n14:3 [A] sa matjands \u00feamma ni matjandin ni frakuni, i\u00fe sa ni matjands \u00feana matjandan ni stojai; gu\u00fe auk ina andnam.\n14:4 [A] \u00feu hvas is, \u00feuei stojis frama\u00fejana skalk? seinamma fraujin standi\u00fe ai\u00fe\u00feau driusi\u00fe; a\u00fe\u00fean standi\u00fe; mahteigs auk ist frauja gasto\u00fe[an]an ina.\n14:5 [A] sums raihtis stoji\u00fe dag hindar daga . . . .\n14:9 [Car] . . . . jah qiwaim jah dau\u00feaim fraujino\u00fe.\n14:10 [Car] i\u00fe \u00feu, hva stojis bro\u00fear \u00feeinana? ai\u00fe\u00feau jah \u00feu, hva frakant bro\u00fer \u00feeinamma? allai auk gasatjanda faura stauastola Xristaus.\n14:11 [Car] gameli\u00fe ist auk: liba ik, qi\u00fei\u00fe frauja, \u00featei mis all kniwe biugi\u00fe jah andhaiti\u00fe all razdo guda.\n14:12 [Car] \u00feannu nu hvarjizuh unsara fram sis ra\u00fejon usgibi\u00fe guda.\n14:13 [Car] ni \u00feanamais nu uns misso stojaima, ak \u00feata stojai\u00fe mais, ei ni satjai\u00fe bistugq bro\u00fer ai\u00fe\u00feau gamarzein.\n14:14 [Car] wait jag~gatraua in fraujin Iesua, \u00featei ni waiht gawamm \u00feairh sik silbo, niba \u00feamma munandin , \u00feamma gamain ist.\n14:15 [Car] i\u00fe jabai in matis bro\u00fear \u00feeins gaurjada, ju ni bi fria\u00fewai gaggis. ni nunu mata \u00feeinamma jainamma fraqistjais, faur \u00feanei Xristus gaswalt.\n14:16 [Car] ni wajamerjaidau unsar \u00feiu\u00fe.\n14:17 [Car] nist auk \u00feiudangardi gudis mats jah dragk, ak garaihtei jah gawair\u00fei jah fahe\u00fes in ahmin weihamma.\n14:18 [Car] saei auk in \u00feaim skalkino\u00fe Xristau, waila galeikai\u00fe guda jah gakusans ist mannam.\n14:19 [Car] \u00feannu nu \u00feoei gawair\u00fejis sind, laistjaima, jah \u00feoei timreinais sind in uns misso.\n14:20 [Car] ni nunu in matis gatair waurstw gudis . . . .\n15:3 [Car] . . . . \u00feize idweitjandane \u00feuk gadrusun ana mik.\n15:4 [Car] swa filu auk swe fauragameli\u00fe war\u00fe, du unsarai laiseinai gameli\u00fe war\u00fe, ei \u00feairh \u00feulain jah ga\u00ferafstein boko wen habaima.\n15:5 [Car] i\u00fe gu\u00fe \u00feulainais jah \u00ferafsteinais gibai izwis \u00feata samo fra\u00fejan in izwis misso bi Xristu Iesu,\n15:6 [Car] ei gawiljai ainamma mun\u00fea hauhjai\u00fe gu\u00fe jah attan fraujins unsaris Iesuis Xristaus.\n15:7 [Car] in \u00feizei andnimai\u00fe izwis misso, swaswe jah Xristus andnam izwis du wul\u00feau gudis.\n15:8 [Car] qi\u00fea auk Xristu Iesu andbaht waur\u00feanana fram sunjai gudis du gatulgjan gahaita attane,\n15:9 [Car] i\u00fe \u00feiudos in armahairteins hauhjan gu\u00fe, swaswe gameli\u00fe ist: du\u00fe\u00fee andhaita \u00feus in \u00feiudom, frauja, jah namin \u00feeinamma liu\u00feo.\n15:10 [Car] jah aftra qi\u00fei\u00fe: sifai\u00fe \u00feiudos mi\u00fe managein is.\n15:11 [Car] jah aftra qi\u00fei\u00fe: hazji\u00fe allos \u00feiudos fraujan jah hazjaina ina allos manageins.\n15:12 [Car] jah aftra Esaeias qi\u00fei\u00fe: wair\u00fei\u00fe waurts Iaissaizis, jah sa usstandands reikino\u00fe \u00feiudom; du imma \u00feiudos wenjand.\n15:13 [Car] i\u00fe gu\u00fe lubainais fulljai izwis allaizos fahedais . . . .\n16:21 [A] . . . . jah Lukius jah Iasson jah Soseipatrus, \u00feai ni\u00fejos meinai;\n16:22 [A] golja izwis ik Tairtius sa meljands \u00feo aipistaulein in fraujin;\n16:23 [A] golei\u00fe izwis Ga\u00efus, wairdus meins jah allaizos aikklesjons. golei\u00fe izwis Airastus, fauragaggja baurgs, jah Qartus sa bro\u00fear.\n16:24 [A] ansts fraujins unsaris Iesuis Xristaus mi\u00fe ahmin izwaramma. Amen.\n16:255 [A] Du Rumonim ustauh. Du Rumonim meli\u00fe ist us Kaurin\u00feon.","title":"Gothic Bible (partial): Romans","type":"page"}