{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/th1.htm","path":"bib/wb/got/th1.htm","source_url":"https://sacred-texts.com/bib/wb/got/th1.htm","text":"2:10 [B] . . . . jah gu\u00fe, hvaiwa weihaba jah garaihtaba jah unfairinodaba izwis \u00feaim galaubjandam wesum,\n2:11 [B] swaswe witu\u00fe ainhvarjanoh izwara, swe atta barna seina, bidjandans izwis jah ga\u00felaihandans,\n2:12 [B] jah weitwodjandans du gaggan izwis wair\u00feaba gudis, saei la\u00feoda izwis du seinai \u00feiudangardjai jah wul\u00feau.\n2:13 [B] du\u00fee jah weis awiliudom guda unsweibandans, unte nimandans at uns waurd hauseinais gudis andnemu\u00fe ni swaswe waurd manne, ak swaswe ist sunjaba waurd gudis, \u00featei jah waurkei in izwis juzei galaubei\u00fe.\n2:14 [B] jus auk galeikondans waur\u00feu\u00fe, bro\u00ferjus, aikklesjom gudis \u00feaim wisandeim in Iudaia in Xristau Iesu, unte \u00feata samo wunnu\u00fe jah jus fram izwaraim inkunjam swaswe jah weis fram Iudaium,\n2:15 [B] \u00feaiei jah fraujin usqemun Iesua jah swesaim praufetum jah uns frawrekun jah guda ni galeikandans jah allaim mannam andanei\u00feans sind,\n2:16 [B] warjandans uns du \u00feiudom rodjan ei ganisaina, akei du usfulljan seinos frawaurhtins sinteino; a\u00fe\u00fean snauh ana ins hatis gudis und andi.\n2:17 [B] a\u00fe\u00fean weis, bro\u00ferjus, gaain[an]aidai af izwis du mela hveilos, andwair\u00feja ni hairtin, ufarassau sniumidedum andaugi izwar[a] gasaihvan in managamma lustau.\n2:18 [B] unte wildedum qiman at izwis, ik raihtis Pawlus jah ainamma sin\u00fea jah twaim, jah analatida uns Satana.\n2:19 [B] hva auk ist unsara wens ai\u00fe\u00feau fahe\u00fes ai\u00fe\u00feau waips hvoftuljos, niu jus in andwair\u00feja fraujins unsaris Iesuis Xristaus in is quma?\n2:20 [B] jus auk siu\u00fe wul\u00feus unsar jah fahe\u00fes.\n3:1 [B] In \u00feizei ju ni us\u00feulandans \u00feanamais, galeikaida uns ei bili\u00feanai weseima in A\u00feeinim ainai.\n3:2 [B] jah insandidedum Teimau\u00feaiu, bro\u00fear unsarana jah andbaht gudis in aiwaggeljon Xristaus, ei izwis gatulgjai jah bidjai bi galaubein izwara,\n3:3 [B] ei ni ainshun afagjaidau in \u00feaim aggwi\u00feom; silbans auk witu\u00fe \u00featei du \u00feamma satidai sijum.\n3:4 [B] jah auk \u00fean wesum at izwis, fauraqe\u00feum izwis \u00featei anawair\u00fe was uns du winnan agli\u00feos, swaswe jah war\u00fe jah witu\u00fe.\n3:5 [B] du\u00fe\u00fee jah ik ju ni us\u00feulans insandida du ufkunnan galaubein izwara, ibai aufto usfaifraisi izwis sa fraisands jah sware wair\u00feai arbai\u00fes unsara.\n3:6 [B] a\u00fe\u00fean nu at qimandin Teimau\u00feaiu at unsis fram izwis jah gateihandin uns galaubein fria\u00fewa izwara, jah \u00featei gamin\u00fei unsar habai\u00fe god sinteino, gairnjandans uns gasaihvan, swaswe jah weis izwis,\n3:7 [B] inuh \u00feis ga\u00ferafstidai sijum, bro\u00ferjus, fram izwis ana allai nau\u00feai jah aglon unsarai in izwaraizos galaubeinais;\n3:8 [B] unte sai libam, jabai jus gastandi\u00fe in fraujin.\n3:9 [B] hva auk awiliude magum usgildan [fraujin] guda bi izwis ana allai fahedai \u00feizaiei faginom in izwara faura guda unsaramma,\n3:10 [B] naht jah daga ufarassau bidjandans ei gasaihvaima andwair\u00feja izwara jah ustiuhaima waninassu galaubeinais izwaraizos?\n3:11 [B] a\u00fe\u00fean silba gu\u00fe jah atta unsar jah frauja unsar Iesus Xristus garaihtjai wig unsarana du izwis.\n3:12 [B] a\u00fe\u00fean izwis frauja managjai jah ganohnan gataujai fria\u00fewai in izwis misso jah allans swaswe jah weis in izwis,\n3:13 [B] du tulgjan hairtona izwara u(n)fairinona in weihi\u00feai faura guda jah attin unsaramma in quma fraujins unsaris Iesuis Xristaus mi\u00fe allaim \u00feaim weiham seinaim.\n4:1 [B] \u00deannu nu, bro\u00ferjus, anahaitam bidai izwis jah bidjam in fraujin Iesua, ei swaswe andnemu\u00fe at uns hvaiwa skulu\u00fe gaggan jah galeikan guda, swa[swe] jah gaggai\u00fe jah gaaukai\u00fe mais.\n4:2 [B] witu\u00fe auk hvarjos anabusnins atgebum izwis \u00feairh fraujan Iesu Xristu.\n4:3 [B] \u00feata auk ist wilja gudis, weihi\u00fea izwara, ei gahabai\u00fe izwis af kalkinassau[s],\n4:4 [B] ei witi hvarjizuh izwara gastaldan sein kas in weihi\u00feai jah sweri\u00feai,\n4:5 [B] ni in gairunja lustaus, swaswe jah \u00feiudos \u00feozei ni kunnun gu\u00fe,\n4:6 [B] ei hvas ni ufargaggai nih bi faihu _ol_ bro\u00fear seinana, unte fraweitands frauja ist allaize, swaswe jah fauraqe\u00feum izwis jah weitwodidedum.\n4:7 [B] unte ni la\u00feoda uns gu\u00fe du unhraini\u00feai, ak in weihi\u00fea.\n4:8 [B] inuh \u00feis nu saei ufbriki\u00fe, ni mann ufbriki\u00fe, ak guda, saei gaf ahman seinana weihana izwis.\n4:9 [B] a\u00fe\u00fean bi bro\u00ferulubon ni \u00feaurbum meljan izwis, unte silbans jus at guda uslaisidai siju\u00fe du frijon izwis misso.\n4:10 [B] jah auk tauji\u00fe \u00feata in allans bro\u00feruns in allai Makidonai; a\u00fe\u00fean bidjam izwis, bro\u00ferjus, biauknan mais\n4:11 [B] jah biarbaidjan anaqal jah taujan swesa jah waurkjan handum izwaraim, swaswe jah izwis anabudum,\n4:12 [B] ei gaggai\u00fe gafehaba du \u00feaim \u00feaiei uta sind jah ni ainishun hvis \u00feaurbei\u00fe.\n4:13 [B] a\u00fe\u00fean ni wileima izwis unweisans, bro\u00ferjus, bi \u00feans anaslepandans, ei ni saurgai\u00fe swe \u00feai an\u00fearai \u00feaiei ni haband wen.\n4:14 [B] unte jabai galaubjam \u00featei Iesus gaswalt jah ussto\u00fe, swa jah gu\u00fe \u00feans \u00feaiei anasaislepun \u00feairh Iesu tiuh[a]i\u00fe mi\u00fe imma.\n4:15 [B] \u00featu\u00fe~\u00fean izwis qi\u00feam in waurda fraujins, \u00featei weis \u00feai libandans, \u00feai bilaibidans in quma fraujins ni bisniwam faur \u00feans anaslepandans;\n4:16 [B] unte silba frauja in haitjai, in stibnai arkaggilaus jah in \u00feuthaurna gudis dala\u00fe atsteigi\u00fe af himina jah dau\u00feans \u00feai in Xristau usstandand faur\u00feis.\n4:17 [B] \u00fea\u00fero \u00fean weis \u00feai libandans, \u00feai aflifnandans suns mi\u00fe imma frawilwanda in milhmam du gamotjan fraujin in luftau jah framwigis mi\u00fe fraujin wair\u00feam.\n4:18 [B] swaei nu \u00ferafstei\u00fe izwis misso in \u00feaim waurdam.\n5:1 [B] A\u00fe\u00fean bi \u00feo \u00feeihsa jah mela, bro\u00ferjus, ni \u00feaurbum ei izwis meljaima;\n5:2 [B] unte silbans glaggwo witu\u00fe \u00featei dags fraujins swe \u00feiubs in naht swa qimi\u00fe.\n5:3 [B] \u00fean qi\u00feand: gawair\u00fei jah tulgi\u00fea, \u00feanuh unweniggo ins biqimi\u00fe fralusts swaswe sair qi\u00feuhafton, jah ni un\u00fea\u00feliuhand.\n5:4 [B] a\u00fe\u00fean jus, bro\u00ferjus, ni siju\u00fe in riqiza, ei sa dags izwis swe \u00feiubs gafahai;\n5:5 [B] unte allai jus sunjus liuhadis siju\u00fe jah sunjus dagis; ni siu\u00fe nahts ni riqizis.\n5:6 [B] \u00feannu nu ni slepaima swe \u00feai an\u00fearai, ak wakaima jah warai sijaima;\n5:7 [B] unte \u00feaiei slepand, naht slepand, jah \u00feaiei drugkanai wair\u00feand, nahts drugkanai wair\u00feand.\n5:8 [B] i\u00fe weis dagis wisandans usskawai sijaima, gahamodai brunjon galaubeinais jah fria\u00fewos jah hilma wenai nas[s]einais.\n5:9 [B] unte ni satida uns gu\u00fe in hatis, ak du gafreideinai ganistais, \u00feairh fraujan unsarana Iesu Xristu,\n5:10 [B] saei gaswalt faur uns, ei, ja\u00fe\u00fee slepaima ja\u00fe\u00fee wakaima, samana mi\u00fe imma libaima.\n5:11 [B] inuh \u00feis \u00ferafstei\u00fe izwis misso jah timrjai\u00fe ainhvarjizuh an\u00fear an\u00fearana, swaswe jah tauji\u00fe.\n5:12 [B] a\u00fe\u00fean bidjam izwis, bro\u00ferjus, kunnan \u00feans arbaidjandans in izwis jah faurstassjans izwarans in fraujin\n5:13 [B] swerai\u00fe ins ufarassau in fria\u00fewai in waurstwis ize jah gawair\u00fei habai\u00fe in izwis.\n5:14 [B] bidjamu\u00fe~\u00fean izwis, bro\u00ferjus, talzjai\u00fe \u00feans ungatassans, \u00ferafstjai\u00fe \u00feans grindafra\u00fejans, us\u00feulai\u00fe \u00feans siukans, usbeisneigai sijai\u00fe wi\u00fera allans.\n5:15 [B] saihvi\u00fe ibai hvas ubil und ubilamma hvamma usgildai, ak sinteino \u00feiu\u00fe laistjai\u00fe mi\u00fe izwis misso jah wi\u00fera allans.\n5:16 [B] sinteino fagino\u00fe in fraujin.\n5:17 [B] unsweiband(ans) bidjai\u00fe;\n5:18 [B] in allamma awili(udo\u00fe). \u00feata auk ist wilja gudis in Xristau Iesu in izwis.\n5:19 [B] ahman ni afhvapjai\u00fe.\n5:20 [B] praufetjam ni frakunnei\u00fe.\n5:21 [B] a\u00fe\u00fean all uskiusai\u00fe; \u00featei god sijai, gahabai\u00fe.\n5:22 [A] . . . . ubilaizo afhabai\u00fe izwis.\n5:22 [B] af allamma waihte ubilaizo afhabai\u00fe izwis.\n5:23 [A] a\u00fe\u00fean silba gu\u00fe gawair\u00fejis gaweihai izwis allandjo jah gahailana izwarana ahman, jah saiwala jah leik unfairinona in quma fraujins unsaris Iesuis Xristaus gafastaindau.\n5:23 [B] a\u00fe\u00fean silba gu\u00fe gawair\u00fejis gaweihai izwis allandjo jah gahailana izwarana ahman, jah saiwala jah leik usfairinona in quma fraujins unsaris Iesuis Xristaus gafastaindau.\n5:24 [A] triggws saei la\u00feoda izwis, saei jah tauji\u00fe.\n5:24 [B] triggws saei la\u00feoda izwis, saei jah tauji\u00fe.\n5:25 [A] bro\u00ferjus, bidjai\u00feu\u00fe~\u00fean jah bi uns.\n5:25 [B] bro\u00ferjus, bidjai\u00feu\u00fe~\u00fean jah bi uns.\n5:26 [A] goljai\u00fe bro\u00feruns allans in gafrijonai weihai.\n5:26 [B] goljai\u00fe bro\u00feruns allans in gafrijonai weihai.\n5:27 [A] biswara izwis in fraujin ei ussiggwaidau so aipistaule allaim \u00feaim weiham bro\u00ferum.\n5:27 [B] biswara izwis in fraujin ei ussiggwaidau so aipistaule \u00feaim weiham bro\u00ferum.\n5:28 [A] ansts fraujins unsaris Iesuis Xristaus mi\u00fe izwis. amen.\n5:28 [B] ansts fraujins unsaris Iesuis Xristaus mi\u00fe izwis. amen.\n5:255 [A] Du \u00dea(issalauneikai)um \u00b7a\u00b7 (us)tauh.","title":"Gothic Bible (partial): 1 Thessalonians","type":"page"}