{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/ti1.htm","path":"bib/wb/got/ti1.htm","source_url":"https://sacred-texts.com/bib/wb/got/ti1.htm","text":"1:0 [A] Du T(ei)m(au)\u00fe(aiau) \u00b7(a)\u00b7 d(ustod)ei(\u00fe).\n1:0 [B] Du Teimau\u00feaiau frumei dustodei\u00fe.\n1:1 [A] Pawlus apaustaulus Xristaus Iesuis bi anabusnim gudis nasjandis unsaris jah Xristaus Iesuis, wenais unsaraizos,\n1:1 [B] Pawlus apaustaulus Xristaus Iesuis bi anabusnim gudis nasjandis unsaris jah Xristaus Iesuis, wenais unsaraizos,\n1:2 [A] Teimau\u00feaiau, walisin barna in galaubeinai: ansts, armaio, gawair\u00fei fram guda attin jah Xristau Iesu fraujin unsaramma.\n1:2 [B] Teimau\u00feaiau, walisin barna in galaubeinai: ansts, armaio, gawair\u00fei fram guda attin jah Xristau Iesu fraujin unsaramma.\n1:3 [A] swaswe ba\u00fe \u00feuk saljan in Aifaison galei\u00feands Makedonais, ei faurbiudais sumaim ei an\u00fearleiko ni laisjaina,\n1:3 [B] swaswe ba\u00fe \u00feuk saljan in Aifaison galei\u00feans Makidonais, ei faurbiudais sumaim ei an\u00fearlei(ko) ni laisjaina,\n1:4 [A] ni\u00fe~\u00fean atsaihvaina spille jah gabaur\u00feiwaurde andalausaize, \u00feoei soknim andstaldand mais \u00feau timreinai gudis \u00feizai wisandin in galaubeinai.\n1:4 [B] ni\u00fe~\u00fean atsa(ihv)aina spille jah gabaur\u00feiwaurde andilausaize, \u00feoei soknim andstaldand mais \u00feau timreinai gudis \u00feizai wisandein in galaubeinai.\n1:5 [A] a\u00fe\u00fean andeis ist anabusnais fria\u00fewa us hrainjamma hairtin jah mi\u00fewissein godai jah galaubeinai unhindarweisai,\n1:5 [B] a\u00fe\u00fean deis ist anabusnais fria\u00fewa us hrainjamma hairtin jah mi\u00fewissein godai jah galaubeinai unhindarweisai,\n1:6 [A] af \u00feaimei sumai afairzidai uswandidedun du lausawaurdein,\n1:6 [B] af \u00feaimei sumai afairzidai uswandidedun du lausawaurdein,\n1:7 [A] wiljandans wisan witodalaisarjos, nih fra\u00fejandans nih hva rodjand nih bi hva stiurjand.\n1:7 [B] wiljandans wisan witodalaisarjos, ni fra\u00fejandans ni hva rodjand nih bi hva stiurjand.\n1:8 [A] a\u00fe\u00fean witum \u00featei go\u00fe ist wito\u00fe, jabai hvas is witoda brukei\u00fe,\n1:8 [B] a\u00fe\u00fean witu\u00fe \u00featei god ist wito\u00fe, jabai hvas is witodeigo brukei\u00fe,\n1:9 [A] witands \u00featei garaihtamma nist wito\u00fe sati\u00fe, ak witodalausaim jah untalaim jah unsibjaim jah frawaurhtaim jah unairknaim jah usweihaim, attans bliggwandam jah ai\u00feeins . . . .\n1:9 [B] witans \u00featei garaihtamma wito\u00fe nist sati\u00fe, ak witodalausaim jah untalaim jah uns(i)bjaim jah frawaurhtaim jah unairknaim jah usweihaim, attans bliggwandam jah ai\u00feeins bliggwandam, mannans maur\u00ferjandam,\n1:10 [B] horam, mannans ga\u00feiwandam, liugnjam, ufarswaram, jah jabai hva aljis \u00feizai hailon laiseinai andstandi\u00fe,\n1:11 [B] sei ist bi aiwaggeli wul\u00feaus \u00feis audagins gudis \u00featei gatrauai\u00fe ist mis.\n1:12 [B] jah awiliudo \u00feamma inswin\u00fejandin mik Xristau Iesu fraujin unsaramma, unte triggwana mik rahnida, gasatjands in andbahtja,\n1:13 [B] ikei faura was wajamerjands jah wraks jah ufbrikands, akei gaarmai\u00fes was, unte unwitands gatawida in ungalaubeinai.\n1:14 [B] i\u00fe ufarassi\u00fe ansts fraujins mi\u00fe galaubeinai jah fria\u00fewai \u00feizai in Xristau Iesu.\n1:15 [B] triggw \u00feata waurd jah allaizos andanumtais wair\u00fe, \u00featei Xristus Iesus qam in \u00feamma fairhvau frawaurhtans nasjan, \u00feizeei frumists im ik.\n1:16 [B] akei du\u00fe\u00fee gaarmai\u00fes war\u00fe, ei in mis frumistamma ataugidedi Xristaus Iesus alla usbeisnein du frisahtai \u00feaim ize anawair\u00feai wesun du galaubjan imma du libainai aiweinon.\n1:17 [B] a\u00fe\u00fean \u00feiudana aiwe, u(nriur)jamma, ungasaihvanamma, ainamma, fr(o)damma guda sweri\u00fea jah wul\u00feus in aldins aiwe. amen.\n1:18 [A] . . . . faura faursniwandam ana \u00feuk praufetjam, ei driugais in \u00feaim \u00feata godo drauhtiwito\u00fe,\n1:18 [B] \u00feo anabusn anafilha \u00feus, barnilo Teimau\u00feaiu, bi \u00feaim faura faursniwandam ana \u00feuk praufetjam, ei driugais in \u00feaim \u00feata godo drauhtiwito\u00fe,\n1:19 [A] habands galaubein jah goda mi\u00fewissein, \u00feizaiei sumai afskiubandans bi galaubein naqadai waur\u00feun,\n1:19 [B] habands galaubein jah goda mi\u00fewissein, \u00feizaiei sumai afskiubandans bi galaubein naqadai waur\u00feun,\n1:20 [A] \u00feizeei ist Hwmainaius jah Alaiksandrus, \u00feanzei anafalh Satanin, ei gatalzjaindau [(j)ah] ni wajamerjan.\n1:20 [B] \u00feizeei ist Hwmainaius jah Alaiksandrus, \u00feanzei anafalh Satanin, ei gatalzjaindau ni wajamerjan.\n2:1 [A] Bidja nu frumist allis taujan bidos, aihtronins, liteinins, awiliuda fram allaim mannam,\n2:1 [B] Bidja nu frumist allis taujan bidos, aihtronins, liteinins, awiliuda fram allaim mannam,\n2:2 [A] fram \u00feiudanam jah fram allaim \u00feaim in ufarassau wisandam, ei slawandein jas~sutja ald bauaima in allai gagudein jag~gariudja.\n2:2 [B] fram \u00feiudanam jah fram allaim \u00feaim in ufarassau wisandam, ei slawandein jah sutja ald bauaima in allai gagudein jah gariudja.\n2:3 [A] \u00featu\u00fe~\u00fean ist god jah andanem in andwair\u00feja nasjandis unsaris gudis,\n2:3 [B] \u00featu\u00fe~\u00fean ist god jah andanem in andwair\u00feja nasjandis unsaris gudis,\n2:4 [A] saei allans mans wili ganisan jah in ufkun\u00feja sunjos qiman.\n2:4 [B] saei allans mans [ga]wili ganisan jah in ufkun\u00feja sunjos qiman.\n2:5 [A] ains allis gu\u00fe, ains jah midumonds gudis jah manne, manna Xristus Iesus,\n2:5 [B] ains allis gu\u00fe, ains jah midumonds gudis jah manne, manna Xristus Iesus,\n2:6 [A] sa gibands sik silban andabauht faur allans, \u00feizei weitwodein melam swesaim,\n2:6 [B] sa gibands sik silban andabauht faur allans, weitwodein melam swesaim,\n2:7 [A] du \u00feammei gasati\u00fes im ik merjands jah apaustaulus, sunja qi\u00fea in Xristau, ni liuga, laisareis \u00feiudo in galaubeinai jas~sunjai.\n2:7 [B] du \u00feammei gasati\u00fes im ik merjands jah apaustaulus, sunja qi\u00fea in Xristau, ni liuga, laisareis \u00feiudo in galaubeinai jah sunjai.\n2:8 [A] wiljau nu wairans bidjan in allaim stadim, ushafjandans swiknos handuns inuh \u00fewairhein jah tweiflein.\n2:8 [B] wiljau nu wairans bidjan in allaim stadim, ushafjandans swiknos handuns inuh \u00fewairhein jah tweiflein.\n2:9 [A] samaleiko jah qinons in gafeteinai hrainjai mi\u00fe gariud_n jah inahein fetjandeins sik, ni in flahtom ai\u00fe\u00feau gul\u00fea ai\u00fe\u00feau marikreitum ai\u00fe\u00feau wastjom galaubaim,\n2:9 [B] samaleiko jah qinons in gafeteinai hrainjai mi\u00fe gariudein jah inahein fetjandeins sik, ni in flahtom ai\u00fe\u00feau gul\u00fea ai\u00fe\u00feau marikreitum ai\u00fe\u00feau wastjom galubaim,\n2:10 [A] ak \u00featei gadob ist qinom gahaitandeim gu\u00fe blotan \u00feairh waurstwa goda.\n2:10 [B] ak \u00featei gadob ist qinom gahaitandeim gu\u00fe blotan \u00feairh waurstwa goda.\n2:11 [A] qino in hauni\u00feai galaisjai sik in allai ufhauseinai;\n2:11 [B] qino in hau(n)i\u00feai galaisjai sik in allai ufhauseinai;\n2:12 [A] i\u00fe galaisjan qinon ni uslaubja, nih fraujinon faura waira, ak wisan in \u00feahainai.\n2:12 [B] i\u00fe galaisjan qinon ni uslaubja, ni fraujinon faura waira, ak wisan in \u00feahainai.\n2:13 [A] Adam auk fruma gadigans war\u00fe, \u00fea\u00feroh Aiwwa;\n2:13 [B] Adam auk fruma gadigan[d]s war\u00fe, \u00fea\u00feroh Aiwwa;\n2:14 [A] jah Adam ni war\u00fe usluto\u00fes, i\u00fe qino uslutoda in missadedai war\u00fe.\n2:14 [B] jah Adam ni war\u00fe usluto\u00fes, i\u00fe qino uslutoda in missadedai war\u00fe.\n2:15 [A] i\u00fe ganisi\u00fe \u00feairh barne gabaur\u00fe, jabai gastandand in galaubeinai jah frija\u00fewai jah weihi\u00feai mi\u00fe gafra\u00fejein.\n2:15 [B] i\u00fe ganisi\u00fe \u00feairh barne gabaur\u00fe, jabai gastandand in galaubeinai jah fria\u00fewai jah weihi\u00feai mi\u00fe gafra\u00fejein.\n3:1 [A] Triggw \u00feata waurd: jabai hvas aipiskaupeins gairnei\u00fe, godis waurstwis gairnei\u00fe.\n3:1 [B] Triggw \u00feata waurd: jabai hvas aipiskaupeins gairnei\u00fe, godis waurstwis gairnei\u00fe.\n3:2 [A] skal nu aipiskaupus ungafairinonds wisan, ainaizos qenais aba, anda\u00feahts, [gariuds], fro\u00fes, gafaurs, gastigods, laiseigs,\n3:2 [B] skal nu aipiskaupus ungafairinonds wisan, ainaizos qenais aba, anda\u00feahts, [gariuds], fro\u00fes, gafaurs, gastigods, laiseigs,\n3:3 [A] ni wein_s, nis~slahuls, ak sutis, [(qairrus)], ni sakuls, ni faihufriks,\n3:3 [B] nih weinnas, ni slahals, ak sutis, [airkn[i]s], ni sakuls, ni faihufriks,\n3:4 [A] seinamma garda waila fauragaggands, barna habands ufhausjan[jan]dona mi\u00fe allai anawiljein.\n3:4 [B] seinamma garda waila fauragaggans, barna habands ufhausjandona . . . .\n3:5 [A] i\u00fe jabai hvas seinamma garda fauragaggan ni mag, hvaiwa aikklesjon gudis gakaro\u00fe?\n3:6 [A] nih niujasatidana, ibai aufto ufarhauhi\u00fes in stauai atdriusai unhul\u00feins.\n3:7 [A] skal auk is weitwodi\u00fea goda haban fram \u00feaim uta, ei ni atdriusai in idweit jah hlamma unhul\u00feins.\n3:8 [A] jah swa diakaununs gariudans, nih faihufrikans, ni weina filu haftjandans, nih aglaitgastaldans,\n3:9 [A] habandans runa galaubeinais in hrainjai gahugdai.\n3:10 [A] ja\u00fe~\u00feai \u00fean gakiusaindau frumist jas~swa andbahtjaina ungafairinodai wisandans.\n3:11 [A] qinons samaleiko gariudos, ni diabulos, gafaurjos, triggwos in allamma.\n3:12 [A] diakaunjus sijaina ainaizos qenais abans, barnam waila fauragaggandans jah seinaim gardim.\n3:13 [A] \u00feai auk waila andbahtjandans grid goda sis fairwaurkjand jah managa bal\u00feein galaubeinai \u00feizai in Xristau Iesu.\n3:14 [A] \u00feata \u00feus melja, wenjands qiman at \u00feus sprauto;\n3:15 [A] a\u00fe\u00fean jabai sainjau, ei witeis hvaiwa skuld ist in garda gudis usmitan, saei ist aikklesjo gudis libandins, sauls jah tulgi\u00fea sunjos.\n3:16 [A] jah unsahtaba mikils ist gagudeins runa s(a)ei gabairhti\u00fes war\u00fe in leika, garaihts gadomi\u00fes war\u00fe in ahmin, ataugids war\u00fe \u00feaim aggilum, merids war\u00fe in \u00feiudom, galaubi\u00fes war\u00fe in fairhvau, andnumans war\u00fe in wul\u00feau.\n4:1 [A] A\u00fe\u00fean ahma swikun\u00feaba qi\u00fei\u00fe \u00featei in spedistaim dagam afstandand sumai galaubeinai atsaihvandans ahmane airzi\u00feos jah laiseino unhul\u00feono,\n4:1 [B] A\u00fe\u00fean ahma swikun\u00feaba qi\u00fei\u00fe \u00featei in spidistaim dagam afstandand sumai galaubeinai atsaihvandans ahmane airzi\u00feos jah laiseino unhul\u00feono,\n4:2 [A] in liutein liugnawaurde jah gatandida habandane swesa mi\u00fewissein,\n4:2 [B] in liutein liugnawaurde jah gatandida habandane swesa mi\u00fewissein,\n4:3 [A] warjandane liugos, ga\u00fearban mate, \u00feanzei gu\u00fe gaskop du andniman mi\u00fe awiliudam galaubjandam jah ufkunnandam sunja.\n4:3 [B] warjandane liugos, ga\u00fearban mate, \u00feanzei gu\u00fe gaskop du andniman mi\u00fe awiliudam galaubjandam jah ufkunnandam sunja.\n4:4 [A] unte all gaskaftais gudis go\u00fe jah ni waiht du uswaurpai mi\u00fe awiliudam andnuman;\n4:4 [B] unte all gaskaftais gudis go\u00fe jah ni waiht du uswaurpai mi\u00fe awiliudam andnuman;\n4:5 [A] gaweihada auk \u00feairh waurd gudis jah bida.\n4:5 [B] gaweihada auk \u00feairh waurd gudis jah bida.\n4:6 [A] \u00feata insakands bro\u00ferum go\u00fes wair\u00feis andbahts Xristaus Iesuis, alands waurdam galaubeinais jah godaizos laiseinais \u00feoei galaistides.\n4:6 [B] \u00feata insakands bro\u00ferum go\u00fes wair\u00feis andbahts Xristaus Iesuis, alands waurdam galaubeinais jah godaizos laiseinais \u00feoei galaistides.\n4:7 [A] i\u00fe \u00feo usweihona swe usal\u00feanaizo spilla biwandei, i\u00fe \u00fero\u00feei \u00feuk silban du gagudein.\n4:7 [B] i\u00fe \u00feo usweihona swe usal\u00feanaizo spilla biwandei, \u00fero\u00feei \u00feuk silban du gagudein.\n4:8 [A] a\u00fe\u00fean leikeina us\u00fero\u00feeins du fawamma ist bruks, i\u00fe gagudei du allamma ist bruks, gahaita habandei libainais \u00feizos nu jah \u00feizos anawair\u00feons.\n4:8 [B] a\u00fe\u00fean leikeina us\u00fero\u00feeins du fawamma ist bruks, i\u00fe gagudein du allamma ist bruks, gahaita habandei libainais \u00feizos nu jah \u00feizos anawair\u00feons.\n4:9 [B] triggw \u00feata waurd jah allaizos andanumtais wair\u00fe.\n4:10 [B] du\u00fe\u00fee allis arbaidjam jah idweitjanda, unte wenidedum du guda libandin, saei ist nasjands allaize manne, \u00feishun galaubjandane.\n4:11 [B] anabiud \u00feata jah laisei.\n4:12 [B] ni manna \u00fee(in)ai jundai frakunni, ak frisahts sijais \u00feaim galaubjandam in waurda, in usmeta, in fria\u00fewai, in galaubeinai, in swikni\u00feai.\n4:13 [B] unte qima, gaumei saggwa boko, ga\u00felaihtai, laiseinai.\n4:14 [B] ni sijais unkarja \u00feizos in \u00feus anstais, sei gibana war\u00fe \u00feus \u00feairh praufetjans afar analageinai handiwe praizbwtaireis.\n4:15 [B] \u00feo sido \u00feus, inu\u00fe~\u00feaim sijais, ei \u00featei \u00feeihais \u00feu, swikun\u00fe sijai allaim.\n4:16 [B] atsaihv du \u00feus silbin jah du laiseinai usdaudo, \u00feairhwis in \u00feaim; \u00featuh auk taujands jah \u00feuk silban ganasjis jah hausjandans \u00feus.\n5:1 [B] Seneigana ni andbeitais, ak ga\u00felaih swe attin, juggans swe bro\u00feruns;\n5:2 [B] sineigos swe ai\u00feeins, juggos swe (s)wistruns in allai swiknein.\n5:3 [B] widuwons swerai, \u00feozei bi sunjai sijaina widuwons.\n5:4 [A] . . . . galaisjaina sik faur\u00feis swesana gard barusnjan jah andalauni usgiban fadreinam; \u00feata auk ist andanem in andwair\u00feja gudis.\n5:4 [B] i\u00fe jabai hvo widuwono barna ai\u00fe\u00feau barne barna habai, galaisjaina faur\u00feis swesana gard barusnjan jah andalauni usgiban fadreinam; \u00feata auk ist [god jah] andanem in andwair\u00feja gudis.\n5:5 [A] a\u00fe\u00fean soei bi sunjai widuwo jah ainakla, wenida du guda jah \u00feairhwisi\u00fe in bidom nahtam jah dagam.\n5:5 [B] a\u00fe\u00fean soei bi sunjai widuwo ist jah ainakla, wenida du guda jah \u00feairhwisi\u00fe in bidom nahtam jah dagam.\n5:6 [A] i\u00fe so wizondei in azetjam jah libandei dau\u00fea ist.\n5:6 [B] i\u00fe so wizondei in azetjam jah libandei dau\u00fea ist.\n5:7 [A] jah \u00feata anabiud ei ungafairinodos sijaina.\n5:7 [B] jah \u00feata anabiud ei ungafairidos sijaina.\n5:8 [A] a\u00fe\u00fean jabai hvas swesaim \u00feishun ingardjam ni ga\u00felaihi\u00fe, galaubein inwidi\u00fe jah ist ungalaubjandin wairsiza.\n5:8 [B] a\u00fe\u00fean jabai hvas swesaim \u00feishun ingardjam ni ga\u00felaihi\u00fe, galaubein inwidi\u00fe jah ist ungalaubjandin wairsiza.\n5:9 [A] widuwo gawaljaidau ni mins saihs tigum jere, sei wesi ainis abins qens,\n5:9 [B] widuwo gawaljaidau ni mins saihs tigum (j)ere, sei wesi ainis abins qens,\n5:10 [A] in waurstwam godaim weitwodi\u00fea habandei, ja(h) barna fodidedi, ja(h) gastins andnemi, jah weihaim fotuns \u00fewohi, jah aglons winnandam andbahtidedi, ja(h) allamma waurstwe godaize afarlaistidedi.\n5:10 [B] in waurstwam godaim weitwodi\u00fea habandei, jau barna fodidedi, jau gastins andnemi, jau weihaim fotuns \u00fewohi, jau aglons winnandam andbahtidedi, jau allamma . . . .\n5:11 [A] (i\u00fe) (juggos) (widuwons) (biwandei); (\u00fean) (auk) (gairnidedeina) (wi\u00fera) (Xristu), (liugan) (wileina),\n5:12 [A] (habandeins) (staua), (unte) (frumein) (galaubein) (wana) (gatawidedun).\n5:13 [A] a\u00fe\u00fean samana jah unwaurstwons laisjand sik \u00feairhgaggan gardins, a\u00fe\u00fean ni \u00featain unwaurstwons, ak jah unfaurjos jah fairweitjandeins, rodjandeins (\u00feoei) (ni) (skulda) (sind).\n5:14 [A] (wiljau) (nu) (juggos) (liugan), (barna) (bairan), (garda) (waldan) . . . .\n5:16 [A] . . . . (widuwons), (andbahtjai) (im), (jah) (ni) (kaurjaidau) (aikklesjo), (ei) (\u00feaim) (bi) (sunjai) . . . .\n5:17 [A] . . . . in waurda jah in laiseinai.\n5:18 [A] qa\u00fe auk gameleins: auhs(au) \u00feriskandin mun\u00fe ni faurwaipjais; jah: wair\u00fes sa waurstwa mizdons is.\n5:19 [A] bi praizbwtairein wroh ni andnimais, niba in andwair\u00feja twadje ai\u00fe\u00feau \u00ferije weitwode.\n5:20 [A] i\u00fe \u00feans frawaurhtans in andwair\u00feja allaize gasak, ei jah \u00feai an\u00fearai agis habaina.\n5:21 [A] weitwodja in andwair\u00feja gudis jah fraujins unsaris Iesuis Xristaus jah \u00feize gawalidane aggile, ei \u00feata fastais inu faurdomein, ni waiht taujands bi wiljahal\u00feein.\n5:21 [B] . . . . wiljahal\u00feein.\n5:22 [A] handuns sprauto ni mannhun lagjais, ni gamainja siais frawaurhtim frama\u00fejaim; \u00feuk silban swiknana fastais.\n5:22 [B] handuns sprauto ni manhun lagjais, ni gamainja sijais frawaurhtim frama\u00fejaim; \u00feuk silban swiknana fastais.\n5:23 [A] ju ni drigkais \u00feanamais wato, ak weinis leitil brukjais in qi\u00feaus \u00feeinis jah \u00feizo ufta sauhte \u00feeinaizo.\n5:23 [B] ju ni drigkais \u00feanamais wato, ak weinis leitil brukjais in qi\u00feaus \u00feeinis jah \u00feizo ufta sauhte \u00feeinaizo.\n5:24 [A] sumaize manne frawaurhteis swikun\u00feos sind faurbisniwandeins du stauai; sumaizeh \u00fean jah afargaggand.\n5:24 [B] sumaize manne frawaurhteis swikun\u00feos sind faurbisniwandeins du stauai; sumaize \u00fean jah afargaggand.\n5:25 [A] samaleiko \u00fean jah waurstwa goda swikun\u00fea sind, jah \u00feoei aljaleikos sik habandona filhan ni mahta sind.\n5:25 [B] samaleiko \u00fean jah waurstwa goda swikun\u00fea sind, jah \u00feo(ei) aljaleikos sik habandona filhan ni mahta sind.\n6:1 [A] Swa managai swe sijaina uf jukuzjai (skalkans), seinans fraujans allaizos sweri\u00feos wair\u00feans rahnjaina, ei namo fraujins jah laiseins ni wajamerjaidau.\n6:1 [B] Swa managai swe sijaina uf jukuzjai skalkans, seinans fraujans allaizos sweri\u00feos wair\u00feans rahnjaina, ei namo fraujins jah laiseins ni wajamerjaidau.\n6:2 [A] a\u00fe\u00fean \u00feaiei galaubjandans haband fraujans, ni frakunneina, unte bro\u00ferjus sind, ak mais skalkinona, unte galaubjandans sind jah liubai, \u00feaiei wailadedais gadailans sind. \u00feata laisei jah ga\u00felaih.\n6:2 [B] a\u00fe\u00fean \u00feaiei galaubjandans haband fraujans, ni frakunneina, unte bro\u00ferjus sind, ak mais skalkinona, unte galaubjandans sind jah liubai, \u00feaiei wailadedais gadailans sind. \u00feata laisei jah ga\u00felaih.\n6:3 [A] jabai hvas aljaleiko(s) laisjai jan~ni atgaggi\u00fe du hailaim waurdam \u00feaim fraujins unsaris Iesuis Xristaus jah \u00feizai bi gagudein laiseinai,\n6:3 [B] jabai hvas aljaleiko laisjai jah ni atgaggai du hailaim waurdam \u00feaim fraujins unsaris Iesuis Xristaus jah \u00feizai bi gagudein laiseinai,\n6:4 [A] i\u00fe hauh\u00feuhts, ni waiht witands, ak siukands bi soknins jah waurdajiukos, us \u00feaimei wair\u00feand nei\u00fea, [maur\u00fera] haifsteis, anaqisseis, anamindeis ubilos,\n6:4 [B] i\u00fe hauh\u00feuhts, ni waiht witands, ak siukands bi soknins jah waurdajiukos, us \u00feaimei wair\u00feand nei\u00fea, [maur\u00fera] , haifteis, anaqisseis, anamindeis ubilos,\n6:5 [A] usbal\u00feeins frawardidaize manne ahin, at \u00feaimei gatarni\u00fe ist sunja, hugjandane faihugawaurki wisan gagudein ; afstand af \u00feaim swaleikaim.\n6:5 [B] usbal\u00feeins frawardidaize manne ahin, at \u00feaimei gatarni\u00fe ist sunja, hugjandane faihugawaurki wisan gagudein.\n6:6 [A] a\u00fe\u00fean ist gawaurki mikil gagudei mi\u00fe ganauhin.\n6:6 [B] a\u00fe\u00fean ist gawaurki mikil gagudei mi\u00fe ganauhin.\n6:7 [A] ni waiht auk brahtedum in \u00feamma fairhvau; bi sunjai \u00featei ni usbairan hva magum.\n6:7 [B] ni waiht auk brahtedum in \u00feamma fairhvau; bi sunjai \u00featei ni usbairan hva magum.\n6:8 [A] a\u00fe\u00fean habandans usfodein jah gaskadwein \u00feaimuh ganohidai sijaima.\n6:8 [B] a\u00fe\u00fean habandans usfodein jah gaskadwein \u00feaimuh ganohidai sijaima.\n6:9 [A] a\u00fe\u00fean \u00feaiei wileina gabigai wair\u00fean atdriusand in fraistubnja jah hlamma unhul\u00feins jah lustuns managans unnutjans ja(h) ska\u00feulans, \u00feaiei saggqjand mans in frawardein jah fralust.\n6:9 [B] a\u00fe\u00fean \u00feaiei wileina gabigai wair\u00fean atdriusand in fraistubnja jah hlamma unhul\u00feins jah lustuns managans unnutjans jah ska\u00feulans, \u00feaiei saggqjand mans in frawardein jah fralust.\n6:10 [A] waurts allaize ubilaize ist faihugeiro, \u00feizozei sumai gairnjandans afairzidai waur\u00feun af galaubeinai jas~sik silbans ga\u00feiwaidedun sairam managaim.\n6:10 [B] waurts allaize ubilaize ist faihugei_o, \u00feizozei sumai gairnjandans afairzidai waur\u00feun af galaubeinai jah sik silbans ga\u00feiwaidedun sairam managaim.\n6:11 [A] i\u00fe \u00feu, jai manna gudis, \u00feata \u00feliuhais, i\u00fe laistjais garaihtein, gagudein, galaubein, frija\u00fewa, \u00feulain, qairrein.\n6:11 [B] i\u00fe \u00feu, jai manna gudis, \u00feata \u00feliuhais, i\u00fe laistjais garaihtein, gagudein, galaubein, fria\u00fewa, \u00feulain, qairrein.\n6:12 [A] haifstei \u00feo godon haifst galaubeinais, undgreip libain aiweinon du \u00feizaiei la\u00feo\u00fes is jah andhaihaist \u00feamma godin andahaita in andwair\u00fe(ja) . . . . weitwode.\n6:12 [B] haifstei \u00feo godon haifst galaubeinais, undgreip libain aiweinon du \u00feizaiei la\u00feo\u00fes is jah andhaihaist \u00feamma godin andahaita in andwair\u00feja managaize weitwode.\n6:13 [A] . . . . _biuda (andwai)r\u00feja gudis . . . . (ga)qiu_ . . . . Iesuis . . . . uf Paunteau . . . . _tau \u00fea_ . . . . _do . . . . _hait,\n6:13 [B] anabiuda in andwair\u00feja gudis \u00feis gaqiujandins alla jah Xristaus Iesuis \u00feis weitwodjandins uf Paunteau Peilatau \u00feata godo andahait,\n6:14 [A] . . . . _gafair_ . . . .\n6:14 [B] fastan \u00feuk \u00feo anabusn unwamma, ungafairinoda und qum fraujins unsaris Iesuis Xristaus,\n6:15 [B] \u00feanei in melam swesaim taiknei\u00fe sa audaga jah ains mahteiga jah \u00feiudans \u00feiudanondane jah frauja fraujinondane,\n6:16 [B] saei ains aih undiwanein jah liuha\u00fe baui\u00fe unatgaht, \u00feanei sahv manne ni ainshun nih sai(hvan) (mag) . . . .","title":"Gothic Bible (partial): 1 Timothy","type":"page"}