{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/ti2.htm","path":"bib/wb/got/ti2.htm","source_url":"https://sacred-texts.com/bib/wb/got/ti2.htm","text":"1:0 [A] D(u) Teim(au\u00fe)ai(au) a(n)\u00fe(ar)a.\n1:1 [A] Pawlus, apaustaulus Iesuis Xristaus \u00feairh wiljan gudis bi gahaitam libainais sei ist in Xristau Iesu\n1:2 [A] Teimau\u00feaiau, liubin barna, ansts, armaio, gawair\u00fei fram guda attin jah Xristau Iesu fraujin unsaramma.\n1:3 [A] awiliudo guda meinamma, \u00feammei skalkino fram fadreinam in hrainjai gahugdai, hvaiwa unsweibando haba bi \u00feuk gamin\u00fei in bidom meinaim naht jah daga,\n1:4 [A] gairnjands \u00feuk gasaihvan, gamunands tagre \u00feeinaize, ei fahedais usfullnau,\n1:5 [A] gamaudein andnimands \u00feizos sei ist in \u00feus unliutons galaubeinais sei bauaida faur\u00feis in awon \u00feeinai Lau(idj)a(i) jah ai\u00feein \u00feeinai Aiwneikai, ga\u00fe~\u00fean~traua \u00featei jah in \u00feus.\n1:5 [B] . . . . ga\u00fe~\u00fean~traua \u00featei jah in \u00feus.\n1:6 [A] in \u00feizozei waihtais gamaudja \u00feuk anaqiujan anst gudis, sei ist in \u00feus \u00feairh analagein handiwe meinaizo.\n1:6 [B] in \u00feizozei waihtais gamaudja \u00feuk anaqiujan anst gudis, sei ist in \u00feus \u00feairh analagein handiwe meinaizo.\n1:7 [A] unte ni gaf unsis gu\u00fe ahman faurhteins, ak mahtais jah frija\u00fewos jah inaheins.\n1:7 [B] unte ni gaf unsis gu\u00fe ahman faurhteins, ak mahtais jah fria\u00fewos jah inaheins.\n1:8 [A] ni nunu skamai \u00feuk weitwodi\u00feos fraujins unsaris Iesuis nih meina, bandjins is, ak mi\u00fearbaidei aiwaggeljon bi mahtai gudis,\n1:8 [B] ni nunu skamai \u00feuk weitwodi\u00feos fraujins unsaris Iesuis nih meina, bandjins is, ak mi\u00fearbaidei aiwaggeljon bi mahtai gudis,\n1:9 [A] \u00feis nasjandins uns jah la\u00feondins uns la\u00feonai weihai, ni bi waurstwam unsaraim, ak bi seinai leikainai jah anstai sei gibana ist unsis in Xristau Iesu faur mela aiweina,\n1:9 [B] \u00feis nasjandins uns jah la\u00feondins la\u00feonai weihai, ni bi waurstwam unsaraim, ak bi seinai leikainai jah anstai sei gibana ist unsis in Xristau Iesu faur mela aiweina,\n1:10 [A] i\u00fe gaswikun\u00feida nu \u00feairh gabairhtein nasjandis unsaris Iesuis Xristaus gatairandins raihtis dau\u00feau, i\u00fe galiuhtjandins libain jah unriurein \u00feairh aiwaggeljon,\n1:10 [B] i\u00fe gaswikun\u00feida nu \u00feairh gabairhtein nasjandis unsaris Iesuis Xrista(us) , gatairandins raihtis dau\u00feau, i\u00fe galiuhtjandins libain jah unriurein \u00feairh aiwaggejon,\n1:11 [A] in \u00feoei gasati\u00fes im ik merjands jah apaustaulus jah laisareis \u00feiudo,\n1:11 [B] in \u00feoei gasati\u00fes im ik merjands jah apaustaulus jah laisareis \u00feiudo,\n1:12 [A] in \u00feizozei fairinos jah \u00feata winna; akei nih skama mik, unte wait hvamma galaubida, jah gatraua \u00feammei mahteigs ist \u00feata anafilh mein fastan in jainana dag.\n1:12 [B] in \u00feizozei fairinos jah \u00feata winna; akei nih skama mik, unte wait hvamma galaubida, jah gatraua \u00feammei mahteigs ist \u00feata anafilh mein fastan in jainana dag.\n1:13 [A] frisaht habands hailaize waurde, \u00feoei at mis hausides in galaubeinai jah frija\u00fewai in Xristau Iesu,\n1:13 [B] frisaht habands hailaize waurde, \u00feoei at mis hausides in galaubeinai jah fria\u00fewai in Xristau Iesu,\n1:14 [A] \u00feata godo anafilh fastai \u00feairh ahman weihana saei baui\u00fe in uns.\n1:14 [B] \u00feat(a) godo anafilh fastai \u00feairh ahman weihana saei baui\u00fe in uns.\n1:15 [A] waist \u00featei afwandidedun sik af mis allai \u00feaiei sind in Asiai, \u00feizeei ist Fwgailus jah Hairmaugaineis.\n1:15 [B] waist \u00featei afwandidedun sik af mis allai \u00feaiei sind in Asiai, \u00feizei ist Fwgailus jah Airmogaineis.\n1:16 [A] gibai armaion frauja Auneiseifauraus garda, unte ufta mik ana\u00ferafstida jah naudibandjo meinaizo ni skamaida sik;\n1:16 [B] gibai armaion frauja Auneiseifauraus garda, unte ufta mik ana\u00ferafstida jah naudibandjo meinaizo ni skamaida sik;\n1:17 [A] ak qimands in Rumai usdaudo sokida mik jah bigat.\n1:17 [B] ak qimands in Rumai usdaudo sokida mik jah bigat.\n1:18 [A] gibai frauja imma bigitan armahairtein at fraujin in jainamma daga; jah hvan filu [mais] in Aifaison andbahtida mis, waila \u00feu kant.\n1:18 [B] gibai frauja imma bigitan armahairtein at fraujin in jainamma daga; jah hvan filu [mais] in Aifaison andbahtida mis, waila \u00feu kant.\n2:1 [B] \u00deu nu, barn mein waliso, inswin\u00feei \u00feuk in anstai \u00feizai in Xristau Iesu,\n2:2 [B] jah \u00feoei hausides at mis \u00feairh managa weitwodja [waurda gudis] \u00feo anafilh triggwai mannam, \u00feaiei wair\u00feai sijaina jah an\u00fearans laisjan.\n2:3 [B] \u00feu nu arbaidei swe gods gadrauhts Xristaus Iesuis.\n2:4 [B] ni ainshun drauhtinonds fraujin dugawindi\u00fe sik gawaurkjam \u00feizos aldais, ei galeikai \u00feammei drauhtino\u00fe.\n2:5 [B] jah \u00fean jabai haifstei\u00fe hvas, ni weipada, niba witodeigo briki\u00fe.\n2:6 [B] arbaidjands air\u00feos waurstwja skal frumist akrane andniman.\n2:7 [B] fra\u00feei \u00featei qi\u00fea; gibi\u00fe auk \u00feus frauja fra\u00fei us allaim.\n2:8 [B] Gamuneis Xristu Iesu urrisanana us dau\u00feaim us fraiwa Daweidis bi aiwaggeljon meinai,\n2:9 [B] in \u00feizaiei arbaidja und bandjos swe ubiltojis; akei waurd gudis nist gabundan.\n2:10 [B] inuh \u00feis all ga\u00feula bi \u00feans gawalidans, ei jah \u00feai ganist gatilona, sei ist in Xristau Iesu mi\u00fe wul\u00feau aiweinamma.\n2:11 [B] triggw \u00feata waurd: jabai mi\u00fegadau\u00fenodedum, jah mi\u00felibam;\n2:12 [B] jabai ga\u00feulam, jah mi\u00fe\u00feiudanom; jabai afaikam, jah is afaiki\u00fe uns;\n2:13 [B] jabai ni galaubjam, jains triggws wisi\u00fe; afaikan sik silban ni mag.\n2:14 [B] \u00feizei gamaudei, weitwodjands in andwair\u00feja fraujins; waurdam weihan du ni waihtai daug, niba uswalteinai \u00feaim hausjondam.\n2:15 [B] usdaudei \u00feuk silban gakusanana usgiban guda waurstwjan unaiwiskana, raihtaba raidjandan waurd sunjos.\n2:16 [B] i\u00fe \u00feo dwalona usweihona lausawaurdja biwandei; unte filu gaggand du afgudein,\n2:17 [B] jah waurd ize swe gund wuli\u00fe; \u00feizeei ist Wmainaius jah Filetus,\n2:18 [B] \u00feaiei bi sunjai uswissai usmetun, qi\u00feandans usstass ju waur\u00feana, jah galaubein sumaize uswaltidedun.\n2:19 [B] a\u00fe\u00fean tulgus grunduwaddjus gudis standi\u00fe, habands sigljo \u00feata: kun\u00fea frauja \u00feans \u00feaiei sind is, jah: afstandai af unselein hvazuh saei namnjai namo fraujins.\n2:20 [B] a\u00fe\u00fean in mikilamma garda ni sind \u00featainei kasa gul\u00feeina jah silubreina, ak jah triweina jah digana, jah suma du sweraim, sumu\u00fe~\u00fean du unsweraim.\n2:21 [A] . . . . du allamma waurstwe godaize gamanwi\u00fe.\n2:21 [B] a\u00fe\u00fean jabai hvas gahrainjai sik \u00feizei, wair\u00fei\u00fe kas du sweri\u00feai, gaweihai\u00fe, bruk fraujin, du allamma waurstwe godaize gamanwi\u00fe.\n2:22 [A] a\u00fe\u00fean juggans lustuns \u00feliuh; i\u00fe laistei garaihtein, galaubein, frija\u00fewa, gawair\u00fei mi\u00fe \u00feaim bidai anahaitandam fraujan us hrainjamma hairtin.\n2:22 [B] a\u00fe\u00fean juggans lustuns \u00feliuh; i\u00fe laistei garaihtein, galaubein, fria\u00fewa, gawair\u00fei mi\u00fe \u00feaim bidai anahaitandam frauja us hrainjamma hairtin.\n2:23 [A] i\u00fe \u00feos dwalons jah untalons soknins biwandei, witands \u00featei gabairand sakjons.\n2:23 [B] i\u00fe \u00feos dwalons jah untalons soknins biwandei, witands \u00featei gabairand sakjons.\n2:24 [A] i\u00fe skalks fraujins ni skal sakan, ak qairrus wisan wi\u00fera allans, laiseigs, us\u00feulands,\n2:24 [B] i\u00fe skalks fraujins ni skal sakan, ak qairrus wisan wi\u00fera allans, laiseigs, us\u00feulands,\n2:25 [A] in qairrein talzjands \u00feans andstandandans, niu hvan gibai im gu\u00fe idreiga du ufkun\u00feja sunjos,\n2:25 [B] in qairrein talzjands \u00feans andstandandans, niu hvan gibai im gu\u00fe idreiga du ufkun\u00feja sunjos,\n2:26 [A] jah usskarjaindau us unhul\u00feins wruggon, fram \u00feammei gafahanai habanda afar is wiljin.\n2:26 [B] jah usskarjaindau us unhul\u00feins wruggon, fram \u00feammei gafahanai tiuhanda afar is wiljin.\n3:1 [A] A\u00fe\u00fean \u00feata kunneis ei in spedistaim dagam atgaggand jera sleidja,\n3:1 [B] A\u00fe\u00fean \u00feata kunneis ei in spedistaim dagam atgaggand jera sleidja,\n3:2 [A] jah wair\u00feand mannans sik frijondans, faihugairnai, bihaitjans, hauhhairtai, wajamerjandans, fadreinam ungahvairbai, launawargos, unairknans,\n3:2 [B] jah wair\u00feand mannans sik friondans, faihugairnai, bihaitjans, hauhhairtai, wajamerjandans, fadreinam ungahvairbai, launawargos, unairknai,\n3:3 [A] unhunslagai, unmildjai, fairinondans, ungahabandans sik, unmanarigwai, unseljai,\n3:3 [B] unhunslagai, unmildjai, fairinondans, ungahabandans sik, unmanariggwai, unseljai,\n3:4 [A] fralewjandans, untilamalskai, ufbaulidai, frijondans wiljan seinana mais \u00feau gu\u00fe,\n3:4 [B] fralewjandans, untilamalskai, ufbaulidai, frijondans wiljan seinana mais \u00feau gu\u00fe,\n3:5 [A] habandans hiwi gagudeins, i\u00fe maht izos inwidandans; ja\u00fe~\u00feans afwandei.\n3:5 [B] habandans hiwi gagudeins, i\u00fe maht izos inwidandans; jah \u00feans afwandei.\n3:6 [A] unte us \u00feaim sind \u00feaiei sliupand in gardins jah frahun\u00feana tiuhand qineina afhla\u00feana frawaurhtim, \u00feoei tiuhanda du lus[lus]tum missaleikaim,\n3:6 [B] unte us \u00feaim sind \u00feaiei sliupand in gardins jah frahun\u00feana tiuhand qineina afhla\u00feana frawaurhtim, \u00feoe(i) tiuhanda lustum missaleikaim,\n3:7 [A] sinteino laisjandona sik jan~ni aiw hvanhun in ufkun\u00feja sunjos qiman mahteiga.\n3:7 [B] sinteino laisjandona sik ni aiw hvanhun in ufkun\u00feja sunjos qiman mahteiga.\n3:8 [A] a\u00fe\u00fean \u00feamma haidau ei Jannes jah Mamres andsto\u00feun Moseza, swa jah \u00feai andstandand sunjai, mannans frawaur\u00feanai ahin, uskusanai bi galaubein;\n3:8 [B] a\u00fe\u00fean \u00feamma haidau ei Jannis jah Mambres andsto\u00feun Moseza, swa jah \u00feai andstandand sunjai, mannans frawaur\u00feanai ahin, uskusanai bi galaubein;\n3:9 [A] akei ni \u00feeihand du filusnai, unte unwiti ize swikun\u00fe wair\u00fei\u00fe allaim, swaswe jah jainaize was.\n3:9 [B] akei ni \u00feeihand du filusnai, unte unwiti ize swikun\u00fe wair\u00fei\u00fe allaim, swaswe jainaize was.\n3:10 [A] i\u00fe \u00feu galaista is laiseinai meinai, usmeta, muna, [sidau,] galaubeinai, usbeisnai, frija\u00fewai, \u00feulainai,\n3:10 [B] i\u00fe \u00feu galaista is laiseinai meinai, usmeta, muna, [sidau,] galaubeinai, usbeisnai, fria\u00fewai, \u00feulainai,\n3:11 [A] wrakjom, wunnim, hvileika mis waur\u00feun in Antiaukiai, in Eikaunion, in Lwstrws, hvileikos wrakjos us\u00feulida, jah us allaim mik galausida frauja.\n3:11 [B] wrakjom, wunnim, hvileika mis waur\u00feun in Antiaukiai, in Eikaunion, in Lwstrws, hvileikos wrakos us\u00feulaida, jah us allaim mik galausida frauja.\n3:12 [A] jah \u00fean allai \u00feaiei wileina gagudaba liban in Xristau Iesu, wrakos winnand.\n3:12 [B] jah \u00fean allai \u00feaiei wileina gagudaba liban in Xristau Iesu, wrakos winnand.\n3:13 [A] i\u00fe ubilai mannans jah liutai \u00feeihand du wairsizin, airzjai jah airzjandans.\n3:13 [B] i\u00fe ubilai mans jah liutai \u00feeihand du wairsizin, airzjai jah airzjandans.\n3:14 [A] i\u00fe \u00feu framwair\u00feis wisais in \u00feaimei galaisides \u00feuk jah gatrauaida sind \u00feus, witand(s) at hvamma ganamt,\n3:14 [B] i\u00fe \u00feu framwair\u00feis wisais in \u00feaimei galaisides \u00feuk jah gatrauaida sind \u00feus, witands at hvamma ganamt,\n3:15 [A] jah \u00featei us barniskja weihos bokos kun\u00fees, \u00feos mahteigons \u00feuk usfratwjan du ganistai \u00feairh galaubein \u00feo in Xristau Iesu.\n3:15 [B] jah \u00featei us barniskja weihos bokos kun\u00fees, \u00feos mahteigons \u00feuk usfratwjan du ganistai \u00feairh galaubein \u00feo in Xristau Iesu.\n3:16 [A] all[l] boko gudiskaizos ahmateinais jah \u00feaurftos du laiseinai, du gasahtai, du garaihteinai, du talzeinai in garaihtein,\n3:16 [B] all boko gudiskaizo ahmateinais jah \u00feaurftos du laiseinai, du gasahtai, du garaihteinai, du talzeinai in garaihtein,\n3:17 [A] ei ustauhans sijai manna gudis, du allamma waurstwe godaize gamanwi\u00fes.\n3:17 [B] ei ustauhans sijai manna gudis, du allamma waurstwe godaize gamanwi\u00fes.\n4:1 [A] Weitwodja in andwair\u00feja gudis jah fraujins Xristaus Iesuis, saei skal stojan qiwans jah dau\u00feans bi qum is \u00feiudinassu is:\n4:1 [B] Weitwodja in andwair\u00feja gudis jah fraujins Xristaus Iesuis, saei skal stojan qiwans jah dau\u00feans bi qum is \u00feiudinassu is:\n4:2 [A] merei waurd, instand uhteigo unuhteigo, gasak, ga\u00felaih, gahvotei in allai usbeisnai jah laiseinai.\n4:2 [B] merei waurd, stand ohteigo unuhteigo, gasak, ga\u00felaih, gahvotei in allai usbeisnai jah laiseinai.\n4:3 [A] wair\u00fei\u00fe mel \u00fean haila laisein ni us\u00feuland, ak du seinaim lustum gadragand sis laisarjans, su\u00fejandans hausein;\n4:3 [B] wair\u00fei\u00fe mel \u00fean haila laisein ni us\u00feuland, ak du seinaim lustum dragand sis laisarjans, su\u00fejondans hausein;\n4:4 [A] a\u00fe\u00fean af sunjai hausein afwandjand, i\u00fe du spillam gawandjand sik.\n4:4 [B] a\u00fe\u00fean af sunjai hausein afwandjand, i\u00fe du spillam gawandjand sik.\n4:5 [A] i\u00fe \u00feu anda\u00feahts sijais in allaim, arbaidei, waurstw waurkei aiwaggelistins, andbahti \u00feein usfullei.\n4:5 [B] i\u00fe \u00feu anda\u00feahts sijais in allaim, arbaidei, waurstw waurkei aiwaggelistins, andbahti \u00feein usfullei.\n4:6 [A] a\u00fe\u00fean ik ju hunsljada jah mel meinaizos diswissais atist.\n4:6 [B] a\u00fe\u00fean ik ju hunsljada jah mel meinaizos diswissais atist.\n4:7 [A] haifst \u00feo godon haifstida, run ustauh, galaubein gafastaida;\n4:7 [B] haifst \u00feo godon haifstida, run ustauh, galaubein gafastaida;\n4:8 [A] \u00fea\u00feroh galagi\u00fes ist mis waips garaihteins, \u00feanei usgibi\u00fe mis frauja in jainamma daga, sa garaihta staua; a\u00fe\u00fean ni \u00featainei mis, ak jah allaim \u00feaiei frijond qum is.\n4:8 [B] \u00fea\u00fero \u00fean galagi\u00fes ist mis waips garaihteins, \u00feanei usgibi\u00fe mis frauja in jainamma daga, sa raihta staua; a\u00fe\u00fean ni \u00featainei mis, ak jah allaim \u00feaiei frijond qum is.\n4:9 [A] sniumei qiman at mis sprauto;\n4:9 [B] sniumei qiman at mis sprauto;\n4:10 [A] unte Demas mis bilai\u00fe, frijonds \u00feo nu ald, jag~galai\u00fe du \u00deaissalauneikai, Xreskus du Galatiai, Teitus du Dalmatiai.\n4:10 [B] unte Demas mis bilai\u00fe, frijonds \u00feo nu ald, jah galai\u00fe du \u00deaissalauneikai, Krispus du Galatiai,\n4:11 [A] Lukas ist mi\u00fe mis ains. Marku andnimands brigg mi\u00fe \u00feus silbin, unte ist mis bruks du andbahtja.\n4:11 [B] Lukas ist mi\u00fe mis ains. Marku andnimands brigg mi\u00fe \u00feus silbin, unte ist mis bruks du and(bahtja).\n4:12 [A] a\u00fe\u00fean Twkeiku insandida in Aifaison.\n4:13 [A] hakul \u00feanei bilai\u00fe in Trauadai at Karpau qimands atbair jah bokos, \u00feishun maimbranans.\n4:14 [A] Alai[ai]ksandrus aizasmi\u00fea managa mis un\u00feiu\u00fea ustaiknida; usgildi\u00fe imma frauja bi waurstwam is;\n4:15 [A] \u00feammei jah \u00feu witai, filu auk andsto\u00fe unsaraim waurdam.\n4:16 [A] in frumiston meinai sunjonai ni manna mis mi\u00fewas. ak allai mis bili\u00feun, ni rahnjai(dau) (im) . . . .","title":"Gothic Bible (partial): 2 Timothy","type":"page"}