{"collection":"Bible & Christianity","html_url":"https://unchartedknowledge.5gfusion.net/browse/bib/wb/got/tit.htm","path":"bib/wb/got/tit.htm","source_url":"https://sacred-texts.com/bib/wb/got/tit.htm","text":"1:0 [B] Du Teitau a(na)st(ode)i\u00fe.\n1:1 [B] Pawlus, skalks gudis, i\u00fe apaustaulus Iesuis Xristaus bi galaubeinai gawalidaize gudis jah ufkun\u00feja sunjos sei bi gagudein ist,\n1:2 [B] du wenai libainais aiweinons \u00feoei gahaihait unliugands gu\u00fe[a] faur mela aiweina,\n1:3 [B] i\u00fe ataugida mela swesamma waurd sein in mereinai, sei gatrauaida ist mis bi anabusnai nasjandis unsaris gudis,\n1:4 [B] Teitau, walisin barna bi gamainjai galaubeinai, ansts jah gawair\u00fei fram guda attin jah Xristau Iesu nasjand unsaramma.\n1:5 [B] in \u00feizozei waihtais bilai\u00fe \u00feus in Kretai, in \u00feize ei wanata atgaraihtjais jah gasatjais and baurgs praizbwtairein, swaswe ik \u00feus garaidida,\n1:6 [B] jabai hvas ist ungafairinonds, ainaizos qenais aba, barna habands galaubeina, ni in usqissai usstiureins ai\u00fe\u00feau ungahvairba.\n1:7 [B] skalu\u00fe~\u00fean aipiskaupus ungafairino\u00fes wisan, swe gudis fauragaggja, ni hauhhairts, [ni bihaitja,] ni \u00fewairhs, ni weinnas, ni slahals, ni aglaitgastalds;\n1:8 [B] ak gastigods, blei\u00fes, anda\u00feahts, garaihts, weihs, ga\u00feaurbs,\n1:9 [A] . . . . waurdis triggws, ei mahteigs sijai jah ga\u00felaihan in laiseinai hailai ja\u00fe~\u00feans andstandandans gasakan.\n1:9 [B] andanemeigs bi laiseinai waurdis triggwis, ei mahteigs sijai jah ga\u00felaihan in laiseinai hailai jah \u00feans andstandandans gasakan.\n1:10 [A] sind auk managai ungahvairbai, lausaiwaurdai, lutondans, \u00feishun \u00feai us bimaita,\n1:10 [B] sind auk managai ungahvairbai, lausawaurdai, lutondans, \u00feis(hun) . . . .\n1:11 [A] \u00feanzei skal gasakan, \u00feaiei gardins allans uswaltjand laisjandans \u00featei ni skuld ist, in faihugairneins.\n1:12 [A] qa\u00fe auk sums ize, swes ize praufetus: Kretes sinteino liugnjans, ubila u(n)biarja, wambos latos.\n1:13 [A] so ist weitwodei sunjeina. in \u00feizozei fairinos gasak ins (hv)assaba, ei hailai sijaina in galaubeinai,\n1:14 [A] ni atsaihvandans judaiwiskaize spilli jah anabusne manne afwandjandane sis sunja.\n1:15 [A] a\u00fe\u00fean all hrain hrainjaim, i\u00fe bisaulidaim jah ungalaubjandam ni waiht hrain, ak bisaulida sind ize jah aha jah mi\u00fewissei.\n1:16 [A] gu\u00fe andhaitand kunnan, i\u00fe waurstwam inwidand, andasetjai wisandans jah ungalaubjandans, jah du allamma waurstwe godaize uskusanai.\n2:1 [A] I\u00fe \u00feu rodei \u00featei gadof ist \u00feizai hailon laiseinai . . . .","title":"Gothic Bible (partial): Titus","type":"page"}