{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/act.htm","path":"bib/wb/kab/act.htm","source_url":"https://sacred-texts.com/bib/wb/kab/act.htm","text":"1:1 A Tawfilus, di tektabt-inu tamezwarut, \u1e25ki\u0263-ed ayen ixdem Sidna \u0190isa d wayen yesselmed seg wass amezwaru armi d ass i deg ye\u021bwarfed \u0263er igenni.\n1:2 Uqbel ad i\u021bwarfed, yefka lumu\u1e5bat-is s \u1e5a\u1e5bu\u1e25 iqedsen i wid i gexta\u1e5b ad ilin d \u1e5b\u1e5busul.\n1:3 Mi d-i\u1e25ya si ger lmegtin, i nutni da\u0263en iwumi i d-isban iman-is belli yedder ; \u1e5beb\u025bin wussan ne\u021b\u021ba i\u021bban asen-d yerna i\u021bmeslay-asen-d \u0263ef wayen ye\u025bnan tagelda n Sidi \u1e5aebbi.\n1:4 Yiwen wass, mi gella ite\u021b\u021b yid-sen, yefka-yasen lame\u1e5b-agi : Ur \u021beff\u0263et ara si temdint n Lquds, lame\u025bna e\u1e5b\u01e7ut lem\u025bahda n Baba \u1e5aebbi, tin akken i wen-d nni\u0263 ;\n1:5 \u00ab Ye\u1e25ya isse\u0263\u1e0das imdanen deg aman, ma d kunwi, di kra n wussan a\u021b-\u021be\u021bwa\u0263e\u1e0dsem s \u1e5a\u1e5bu\u1e25 iqedsen.\u00bb\n1:6 Mi llan \u1e5b\u1e5busul nnejma\u025ben yid-es, steqsan-t : A Sidi, deg ussan-agi ara d terre\u1e0d tageldit i wegdud n wat Is\u1e5bail ?\n1:7 Yerra-yasen : Ur \u021bnadit ara a\u021b-\u021be\u1e93rem ayen ye\u025bnan lewqat d wussan i ghegga Baba \u1e5aebbi s l\u1e25ekma-ines si zik, ayagi ma\u010d\u010di d cc\u0263el-nwen.\n1:8 Kunwi a wen-d-te\u021b\u021bunefk tezmert n \u1e5a\u1e5bu\u1e25 iqedsen ara d-yersen fell-awen, imiren a\u021b-\u021bilim d inigan-iw di temdint n Lquds, di tmurt n Yahuda \u021b-\u021bmurt n Samarya, a\u021b-\u021baw\u1e0dem alamma d ixfawen n ddunit.\n1:9 Akken i d-yenna imeslayen-agi, Sidna \u0190isa ye\u021bwarfed \u0263er igenni nutni \u021bmuqulen deg-s armi i t-t\u0263umm tagut.\n1:10 Mazal \u1e5be\u1e63\u1e63an allen-nsen deg-s \u0263er tegnaw, mi sen-d-deh\u1e5ben sin yergazen s llebsa tamellalt, nnan-asen :\n1:11 Ay imezda\u0263 n tmurt n Jlili, acu\u0263e\u1e5b mazal-ikkun te\u021bmuqqulem \u0263er tegnaw ? Akken i twalam Sidna \u0190isa yuli \u0263er igenni, akken da\u0263en ara t-twalim asmi ara d-yu\u0263al.\n1:12 Seg i\u0263il uzemmur, u\u0263alen \u0263er temdint n Lquds ibe\u025bden azal n tikli n wass n weste\u025bfu.\n1:13 Mi ww\u1e0den \u0263er temdint n Lquds, ulin \u0263er texxamt anda nnumen \u021bnejma\u025ben. Yella gar-asen Bu\u1e6drus, Yu\u1e25enna, Ye\u025bqub, Andriyus, Filibas, Suma, Bartelmay, Matta, Ye\u025bqub mmi-s n \u1e24alfi, Sem\u025bun awa\u1e6dani akk-d Yahuda mmi-s n Ye\u025bqub.\n1:14 \u021anejma\u025ben s yiwen n \u1e5b\u1e5bay iwakken ad de\u025b\u025bun \u0263er Sidi \u1e5aebbi nutni d kra n tlawin, llan yid-sen da\u0263en watmaten n Sidna \u0190isa akk-d yemma-s, Meryem.\n1:15 Deg ussan-nni, llan nnejma\u025ben azal n meyya u\u025becrin n wayetmaten, yekker-ed Bu\u1e6drus gar-asen, yenna-d :\n1:16 Ay atmaten, ilaq a d-yed\u1e5bu wayen i d-yenna \u1e5a\u1e5bu\u1e25 iqedsen si zik seg yimi n Sidna Dawed, \u0263ef wayen ye\u025bnan Yudas i d-yezwaren zdat n wid i ge\u1e6d\u1e6dfen Sidna \u0190isa.\n1:17 Yudas-agi yella d yiwen seg ne\u0263, yerna i\u021bekki di leqdic-nne\u0263 \u0263ef Sidi \u1e5aebbi.\n1:18 Argaz-agi yu\u0263 akal s yedrimen-nni n lexde\u025b, yu\u0263al ye\u0263li \u0263ef wudem, ifelleq u\u025bebbu\u1e0d-is, mmaren-d akk iju\u0263dan-is.\n1:19 Imezda\u0263 n temdint n Lquds slan akk s wannect-agi, daymi i semman i wemkan-nni s tmeslayt-nsen : \u1e24aqel damma , ye\u025bni iger n idammen.\n1:20 Am akken yura di tektabt n Sabur : Axxam-is ad yexlu, ur t-izedde\u0263 yiwen. Yura da\u0263en : Waye\u1e0d ad ye\u1e6d\u1e6def amkan-is.\n1:21 Ilaq-a\u0263 ihi a d-nexti\u1e5b yiwen seg wid yellan yid-nne\u0263 mi n\u021beddu d Sidna \u0190isa di mkul amkan,\n1:22 seg wasmi i t-isse\u0263\u1e0des Ye\u1e25ya a\u0263e\u1e6d\u1e6das armi d ass i deg ye\u021bwarfed \u0263er igenni ; iwakken ad yili am nukkni d inigi n \u1e25eggu-ines.\n1:23 Sbedden-d sin yergazen : Yusef ye\u021b\u021busemman Barsaba iwumi qqa\u1e5ben da\u0263en \u00ab A\u1e25eqqi \u00bb akk-d Matyas.\n1:24 D\u025ban \u0263er Sidi \u1e5aebbi s imeslayen agi : A Sidi \u1e5aebbi, ke\u010d\u010d yesnen ulawen n yemdanen me\u1e5b\u1e5ba, sbeggen a\u0263-ed anwa deg-sen i gwulmen\n1:25 iwakken ad i\u1e6d\u1e6def amkan di lec\u0263al n \u1e5b\u1e5busul i \u0263ef ye\u1e6d\u1e6daxe\u1e5b Yudas, imi ne\u021b\u021ba i\u1e5bu\u1e25 \u0263er wemkan i s-ilaqen.\n1:26 Gren tas\u0263a\u1e5bt, t\u1e63a\u1e25-ed i Matyas ; d\u0263a rnan-t-id \u0263er \u1e25dac-nni n \u1e5b\u1e5busul.\n2:1 Ass n L\u025bid n wass wis xemsin, inelmaden llan nnejma\u025ben akk deg yiwen n wemkan.\n2:2 Taswi\u025bt kan, yekka-d yiwen n l\u1e25ess ameqqran seg igenni am wa\u1e0du i\u01e7ehden, ye\u010d\u010du\u1e5b akk axxam-nni anda qqimen.\n2:3 Seh\u1e5ben-asen-d am akken d ilsawen n tmes i\u021bemfa\u1e5baqen wway gar-asen, rsen-d \u0263ef yal yiwen deg sen.\n2:4 S\u010du\u1e5ben akk s \u1e5a\u1e5bu\u1e25 iqedsen, bdan \u021bmeslayen s tutlayin nni\u1e0den, yal yiwen seg-sen ihedde\u1e5b s tutlayt i s-d-yefka \u1e5a\u1e5bu\u1e25 iqedsen.\n2:5 Deg ussan-nni, di temdint n Lquds, llan yemdanen n wat Is\u1e5bail ye\u021b\u1e0du\u025bun Sidi \u1e5aebbi, i d-yusan si mkul tamurt n ddunit.\n2:6 Mi slan i l\u1e25ess-nni, l\u0263aci uzzlen d me\u1e5b\u1e5ba ; dehcen, axa\u1e6der sellen-asen \u021bmeslayen-d s tutlayt n tmurt i deg \u021b\u025bicin.\n2:7 Wehmen, \u021b\u025be\u01e7ben, qqa\u1e5ben wway gar-asen : Imdanen-agi ye\u021bmeslayen ma\u010d\u010di n tmurt n Jlili ?\n2:8 Amek armi yal yiwen deg-nne\u0263 isell-asen \u021bmeslayen s tmeslayt-is ?\n2:9 Llan gar-ane\u0263 yemdanen i d yusan si tmurt n Bartas, si tmurt n Midyas, si tmurt n Ilam, kra nni\u1e0den si tmurt n Mizubu\u1e6damya, si tmurt n Yahuda akk-d tmurt n Kafadusya, wiya\u1e0d si tmurt n Tqen\u1e6dert, si tmurt n Asya,\n2:10 si tmurt n Frijya akk-d Bamfilya. Usan-d da\u0263en si tmurt n Ma\u1e63er, si le\u01e7wahi n Qi\u1e5bwan di tmurt n Libya, widak i d-yusan si temdint n \u1e5auma ;\n2:11 llan da\u0263en wat Is\u1e5bail akk-d wid itaba\u025ben di ddin nsen, llan wid n tegzirt n Kritus akk-d wa\u025b\u1e5baben. Amek armi i sen-nesla \u021bmeslayen s tutlayin-nne\u0263 me\u1e5b\u1e5ba \u0263ef le\u025b\u01e7ayeb n Sidi \u1e5aebbi ?\n2:12 Dehcen akk, ur \u1e93rin d acu ara xemmemen, qqa\u1e5ben wway gar-asen : D acu-t wayagi ?\n2:13 Ma d wiya\u1e0d stehzayen fell-asen qqa\u1e5ben : D aska\u1e5b i sekk\u1e5ben !\n2:14 Bu\u1e6drus yellan akk-d \u1e25dac n \u1e5b\u1e5busul-nni, issa\u025bli ta\u0263ect-is yenna i l\u0263aci : Ay imezda\u0263 n temdint n Lquds akk-d kunwi me\u1e5b\u1e5ba is\u025beddayen ussan di temdint-agi, slet-ed mli\u1e25 i wayen ara wen-d-ini\u0263, ilaq a\u021b-\u021be\u1e93rem ayagi :\n2:15 irgazen-agi ur ski\u1e5ben ara am akken i \u0263ilen kra seg-wen, axa\u1e6der a\u021ban d \u021bes\u025ba n \u1e63\u1e63be\u1e25 kan !\n2:16 Lame\u025bna ayagi yed\u1e5ban d ayen i d-icar nnbi Yuwil :\n2:17 Sidi \u1e5aebbi yenna-d : Deg ussan ineggura a d-sserse\u0263 \u1e5a\u1e5bu\u1e25-iw \u0263ef yemdanen me\u1e5b\u1e5ba ; arrac-nwen d yessi-twen a d-\u021bcirin ayen ara sen-d-\u021bxebbi\u1e5be\u0263, ilme\u1e93yen-nwen a sen-d-\u021bwe\u1e25\u1e25i\u0263, im\u0263a\u1e5ben-nwen a sen-d-mmeslaye\u0263 di tirga.\n2:18 An\u025bam, deg ussan-nni a d-smire\u0263 \u1e5a\u1e5bu\u1e25-iw \u0263ef yiqeddacen-iw \u021b-\u021bqeddacin-iw, a d-ciren s wayen ara sen-d-\u021bxebbi\u1e5be\u0263.\n2:19 Deg igenni ad xedme\u0263 le\u025b\u01e7ayeb, di lqa\u025ba a d-sekne\u0263 lica\u1e5bat yessewhamen : idammen, times d usigna n ddexxan.\n2:20 I\u1e6dij ad yu\u0263al d \u1e6d\u1e6dlam, aggur ad yu\u0263al am idammen uqbel a d-yas wass n Sidi \u1e5aebbi ; ass-nni d ass ameqqran, ye\u010d\u010du\u1e5ben d l\u025ba\u1e0dima.\n2:21 Imiren kra n win ineddhen s yisem n Sidi \u1e5aebbi ad i\u021b\u021busellek.\n2:22 Ay imdanen n wat Is\u1e5bail, \u1e25esset-ed mli\u1e25 i wayen ara wen-d ini\u0263 : \u0263ef wayen ye\u025bnan \u0190isa ana\u1e63ari, te\u1e93ram akk belli Sidi \u1e5aebbi isbeggen ed tazmert-is mi gexdem zdat-wen lbe\u1e5bhanat, lica\u1e5bat d le\u025b\u01e7ubat, am akken i te\u1e93ram s yiman-nwen.\n2:23 Akken yella si zik di leqsed n Sidi \u1e5aebbi ; argaz-agi tezzenzem-t, d kunwi i t-yen\u0263an mi t-tsellmem ger ifassen n ikafriwen i t-isemm\u1e5ben \u0263ef llu\u1e25.\n2:24 Lame\u025bna Sidi \u1e5aebbi yesse\u1e25ya t-id, isellek-it-id si tesraft n lmut axa\u1e6der d lmu\u1e25al a t-te\u1e6d\u1e6def \u0263u\u1e5b-es.\n2:25 Sidna Dawed yenna-d fell-as : \u021awali\u0263 kull ass Sidi \u1e5aebbi zdat-i axa\u1e6der ye\u021b\u021bili \u0263er uyeffus-iw iwakken ur \u0263elli\u0263 ara ;\n2:26 daymi i gef\u1e5be\u1e25 wul-iw, i tcennu ta\u0263ect-iw ; ula d i\u0263san-iw ad \u1e5bti\u1e25en di laman ;\n2:27 axa\u1e6der ur iyi-te\u021b\u021ba\u01e7\u01e7a\u1e0d ara di laxe\u1e5bt,ur te\u021b\u021ba\u01e7a\u1e0d ara win i k-i\u1e0du\u025ben ad yerku deg u\u1e93ekka.\n2:28 Teldi\u1e0d-iyi iberdan n tudert ; ul-iw ye\u010d\u010du\u1e5b d lfe\u1e5b\u1e25 imi te\u021b\u021bili\u1e0d yid-i.\n2:29 Ay atmaten ilaq-iyi a wen d-mmeslaye\u0263 \u025binani \u0263ef tide\u021b ye\u025bnan jeddi-tne\u0263 Sidna Dawed. Te\u1e93ram belli yemmut, ye\u021bwam\u1e0del, yerna a\u1e93ekka ines mazal-it ar ass-a gar-ane\u0263.\n2:30 Lame\u025bna imi d nnbi i gella, ye\u1e93ra belli Sidi \u1e5aebbi ad i\u1e6d\u1e6def di lem\u025bahda i s-d-yefka mi s-d-yenna : D yiwen si tarwa-k ara sbedde\u0263 d agellid deg wemkan-ik.\n2:31 \u0194ef \u1e25eggu n Lmasi\u1e25 i d-icar mi d-yenna lehdu\u1e5b-agi ; axa\u1e6der \u021b-\u021bide\u021b, ur t-ye\u01e7\u01e7i di laxe\u1e5bt, ur t-ye\u01e7\u01e7i ad yerku.+\n2:32 Win \u0263ef i wen-d-\u021bmeslaye\u0263, d \u0190isa-agi i d-isse\u1e25ya Sidi \u1e5aebbi si ger lmegtin, aql-a\u0263 akk d inagan.\n2:33 Mi ge\u021bwarfed \u0263er uyeffus n Sidi \u1e5aebbi, ye\u021b\u021bunefk-as \u1e5a\u1e5bu\u1e25 iqedsen i s-yew\u025bed Baba \u1e5aebbi, ne\u021b\u021ba ismar-it-id fell-a\u0263 ; d ayen i teslam, i twalam.\n2:34 Ma\u010d\u010di d Sidna Dawed i gulin \u0263er igenni, axa\u1e6der d ne\u021b\u021ba i d-yennan : Sidi \u1e5aebbi yenna-d i Ssid-iw :\n2:35 S\u1e6def amkan n l\u1e25ekma \u0263er uyeffus-iw alamma rri\u0263 i\u025bdawen-ik seddaw ida\u1e5b\u1e5ben-ik.+ +\n2:36 Ilaq ihi at Is\u1e5bail me\u1e5b\u1e5ba ad \u1e93ren s tide\u021b belli \u0190isa-nni i tsemm\u1e5bem \u0263ef llu\u1e25, d ne\u021b\u021ba i gerra Sidi \u1e5aebbi d Agellid ameqqran, d Lmasi\u1e25.\n2:37 Mi slan i wayen i d-yenna Bu\u1e6drus, l\u0263aci me\u1e5b\u1e5ba saxen wulawen-nsen, nnan i Bu\u1e6drus d \u1e5b\u1e5busul nni\u1e0den : Ay atmaten, d acu ara nexdem ?\n2:38 Bu\u1e6drus yerra-yasen : Tubet, beddlet tikli ! Mkul yiwen deg-wen ad ye\u021bwa\u0263\u1e0des s yisem n Sidna \u0190isa Lmasi\u1e25 iwakken a wen-\u021bwasemm\u1e25en ddnubat-nwen, yerna a wen-d ye\u021b\u021bunefk \u1e5a\u1e5bu\u1e25 iqedsen.\n2:39 Axa\u1e6der lwe\u025bd-agi n Sidi \u1e5aebbi, ye\u021b\u021bunefk-ed i kunwi d warraw-nwen akk-d wid me\u1e5b\u1e5ba n le\u01e7nas nni\u1e0den iwumi ara d-issiwel Sidi \u1e5aebbi Illu-nne\u0263.\n2:40 Bu\u1e6drus inehhu-ten s wa\u1e6das n yimeslayen nni\u1e0den, iwakken ad amnen, yeqqa\u1e5b-asen : X\u1e0dut i l\u01e7il-agi i\u025bewjen iwakken a\u021b-\u021be\u021b\u021busellkem !\n2:41 Wid iqeblen ayen i d-yenna Bu\u1e6drus, qeblen ad \u021bwa\u0263ed\u1e63en. Ass-nni rnan-d wazal n tlata alaf n yemdanen i gumnen.\n2:42 Seg imiren, zgan \u021bnejma\u025ben am atmaten iwakken ad slen i wselmed n \u1e5b\u1e5busul ; be\u1e6d\u1e6dun a\u0263\u1e5bum n usmekti n Lmasi\u1e25, yerna de\u025b\u025bun \u0263er Sidi \u1e5aebbi s yiwen n wul.\n2:43 T\u025be\u01e7\u01e7ben, tekcem-iten akk tugdi mi \u021bwalin \u1e5b\u1e5busul xeddmen a\u1e6das n lbe\u1e5bhanat d le\u025b\u01e7ayeb.\n2:44 Wid akk yumnen, \u021b\u025bicin s tdukli yerna be\u1e6d\u1e6dun wway gar-asen ayen akk s\u025ban.\n2:45 Znuzun ayla-nsen me\u1e5b\u1e5ba, ayen akken i d-jem\u025ben, fe\u1e5bqen-t wway gar-asen mkul yiwen \u0263ef le\u1e25sab n wakken ye\u1e25wa\u01e7.\n2:46 Kull ass, s yiwen \u1e5b\u1e5bay, \u021bnejma\u025ben di l\u01e7ame\u025b iqedsen, \u021bnejma\u025ben da\u0263en deg ixxamen-nsen, be\u1e6d\u1e6dun a\u0263\u1e5bum iwakken ad mektin Lmasi\u1e25, te\u021b\u021ben lqut-nsen s nneya d lfe\u1e5b\u1e25 ;\n2:47 \u021b\u1e25emmiden Sidi \u1e5aebbi, imdanen me\u1e5b\u1e5ba \u021bqada\u1e5ben-ten ; Sidi \u1e5aebbi irennu-d kull ass \u0263er tejma\u025bt-nsen wid i\u021b\u021busellken.\n3:1 A\u021b-\u021bili d le\u01e7wahi n tlata n tmeddit, Bu\u1e6drus d Yu\u1e25enna ddukklen, ulin \u0263er l\u01e7ame\u025b iqedsen iwakken ad d\u025bun \u0263er Sidi \u1e5aebbi.\n3:2 \u021a\u021bawin-d mkul ass yiwen n wergaz i d-ilulen d aqu\u1e0dar \u0263er zdat n tewwurt n l\u01e7ame\u025b, tin iwumi qqa\u1e5ben \u00ab tawwurt tucbi\u1e25t \u00bb; ye\u021b\u0263imi dinna iwakken ad issuter tin n \u1e5aebbi i wid i gke\u010d\u010dmen \u0263er l\u01e7ame\u025b-nni.\n3:3 Mi gwala Bu\u1e6drus d Yu\u1e25enna \u021beddun ad kecmen, issuter-asen tin n \u1e5aebbi.\n3:4 Bu\u1e6drus d Yu\u1e25enna, \u1e5be\u1e63\u1e63an allen-nsen fell-as, nnan-as : Muqel-ed \u0263u\u1e5b-nne\u0263 !\n3:5 Argaz-nni imuqel-iten, i\u1e0dme\u025b deg-sen a s-d-fken kra.\n3:6 D\u0263a Bu\u1e6drus yenna-yas : Ur s\u025bi\u0263 idrimen n lfe\u1e6d\u1e6da, ur s\u025bi\u0263 wid n ddheb, lame\u025bna ayen s\u025bi\u0263 a k-t-fke\u0263 : s yisem n Sidna \u0190isa Lmasi\u1e25 ana\u1e63ari, ekker tel\u1e25u\u1e0d !\n3:7 I\u1e6d\u1e6def-it-id seg ufus ayeffus, issekker-it-id. Imiren kan i\u1e0da\u1e5b\u1e5ben-is \u021b-\u021bke\u025bburin n ida\u1e5b\u1e5ben-is \u1e25lan.\n3:8 Ibedd \u0263ef yida\u1e5b\u1e5ben-is, ineggez, yebda ile\u1e25\u1e25u. Ikcem yid-sen \u0263er l\u01e7ame\u025b, ile\u1e25\u1e25u i\u021bjellib, i\u021b\u1e25emmid Sidi \u1e5aebbi.\n3:9 L\u0263aci akk walan-t mi gle\u1e25\u1e25u i\u021b\u1e25emmid Sidi \u1e5aebbi.\n3:10 Mi t-\u025beqlen qqa\u1e5ben : Ma\u010d\u010di d win akken ye\u021b\u0263imin \u0263er tewwurt tucbi\u1e25t n l\u01e7ame\u025b iqedsen win akken issuturen tin n \u1e5aebbi ? Dehcen me\u1e5b\u1e5ba, wehmen deg wayen yed\u1e5ban yid-es.\n3:11 Argaz-nni iteddu d Bu\u1e6drus akk-d Yu\u1e25enna, ur ye\u1e6d\u1e6dixi\u1e5b ara fell-asen, l\u0263aci-nni me\u1e5b\u1e5ba wehmen, uzzlen-d \u0263u\u1e5b-sen \u0263er usqif iwumi qqa\u1e5ben \u00ab Asqif n Sidna Sliman \u00bb.\n3:12 Bu\u1e6drus mi gwala ayagi, yen\u1e6deq \u0263er l\u0263aci yenna : Ay at Is\u1e5bail, acu\u0263e\u1e5b akka twehmem deg wayen yed\u1e5ban ? Acu\u0263e\u1e5b i d-\u021bmuqulem \u0263u\u1e5b-nne\u0263, am akken d nukkni i gessel\u1e25an argaz-agi s tezmert-nne\u0263 ne\u0263 s \u1e6d\u1e6da\u025ba-nne\u0263 ?\n3:13 D Sidi \u1e5aebbi Illu n Sidna Ib\u1e5bahim, n Is\u1e25aq d Ye\u025bqub, \u1e5aebbi n lejdud-nne\u0263, d ne\u021b\u021ba i d-isbeggnen l\u025ba\u1e0dima n Sidna \u0190isa aqeddac-is, win akken i tnek\u1e5bem, i tsellmem i l\u1e25akem Bila\u1e6dus i geb\u0263an a s-d-iserre\u1e25.\n3:14 Kunwi tnek\u1e5bem win akken yellan d azedgan, d a\u1e25eqqi ; tessutrem a d-serr\u1e25en i bu tmeg\u1e5ba\u1e0d deg umkan-is.\n3:15 Ten\u0263am Mmi-s n ugellid n tudert, me\u025bna Sidi \u1e5aebbi yesse\u1e25ya-t-id si ger lmegtin , aql-a\u0263 d inigan.\n3:16 \u021a-\u021bazmert yellan deg isem n Sidna \u0190isa i d-yerran l\u01e7ehd i wergaz agi i te\u021bwalim, yerna tessnem-t. D Sidna \u0190isa s wayes numen i t-isse\u1e25lan zdat-wen me\u1e5b\u1e5ba.\n3:17 Ay atmaten, \u1e93ri\u0263 s lqella n lefhama i txedmem annect-nni, am kunwi am imeqranen-nwen.\n3:18 Me\u025bna s wakka i gesnekmal Sidi \u1e5aebbi ayen i d-yenna si zik seg imawen n lenbiya me\u1e5b\u1e5ba : yenna-d belli Lmasi\u1e25-ines ad in\u025be\u021b\u021bab.\n3:19 Ndemmet ihi, beddlet tikli iwakken ad m\u1e25un ddnubat-nwen,\n3:20 iwakken a kkun-id-asen wussan n \u1e5b\u1e5ba\u1e25a s \u0263u\u1e5b Sidi \u1e5aebbi, a wen-d icegge\u025b \u0190isa Lmasi\u1e25, win akken i wen-ihegga.\n3:21 Tura atan deg igenni alamma yusa-d lweqt i deg ara tu\u0263al txelqit me\u1e5b\u1e5ba \u021b-\u021baj\u1e0di\u1e6d, akken i t-id-yenna Sidi \u1e5aebbi si zik seg imawen n lenbiya.\n3:22 Sidna Musa yenna i wat Is\u1e5bail : Sidi \u1e5aebbi Illu-nwen a wen-d icegge\u025b si ger watmaten-nwen,+ yiwen n nnbi am nekk, a s-t\u1e25essem deg wayen akk ara wen-d-yini.+\n3:23 Kra n win ur ne\u021b\u1e25essis ara i nnbi-yagi, ad ye\u021bwakkes si ddunit ger watmaten-is.\n3:24 Lenbiya me\u1e5b\u1e5ba, si zzman n nnbi Samwil d wid me\u1e5b\u1e5ba i d-yernan deffir-es, caren-d da\u0263en \u0263ef wussan agi i deg ne\u021b\u025bici.\n3:25 D kunwi i d arraw n lenbiya, i d arraw n le\u025bqed-nni i gexdem Sidi \u1e5aebbi d lejdud-nne\u0263, mi s-yenna i Sidna Ib\u1e5bahim : S dderya n dderya-k ara barke\u0263 tiwaculin me\u1e5b\u1e5ba n ddunit+ .\n3:26 I kunwi d imezwura iwumi i d icegge\u025b Sidi \u1e5aebbi aqeddac-is, isse\u1e25ya t-id iwakken a kkun-ibarek yerna a d-isseb\u025bed mkul yiwen deg-wen seg yir n lec\u0263al-is.\n4:1 Bu\u1e6drus d Yu\u1e25enna mazal-iten hedd\u1e5ben i l\u0263aci mi d-ww\u1e0den kra n lmuqedmin, yedda-d yid-sen umeqqran n i\u025bessasen n l\u01e7ame\u025b iqedsen akk-d kra n yergazen si tejma\u025bt n isaduqiyen\n4:2 Ze\u025bfen mi walan \u1e5b\u1e5busul sselmaden l\u0263aci yerna ssefhamen-ten \u0263ef \u1e25eggu n lmegtin qqa\u1e5ben-asen : -- Akken i d-ye\u1e25ya Sidna \u0190isa si ger lmegtin, akken da\u0263en ara d-\u1e25yun lmegtin.\n4:3 S\u1e6dfen-ten, rran-ten \u0263er l\u1e25ebs armi d azekka-nni axa\u1e6der imiren ye\u0263li-d yi\u1e0d.\n4:4 Lame\u025bna a\u1e6das seg wid yeslan i wawal, umnen. Ad ilin azal n xemsa alaf n yemdanen i gumnen.\n4:5 Azekka-nni, l\u1e25ukkam, lecyux akk-d l\u025bulama n ccari\u025ba yellan di temdint n Lquds, nnejma\u025ben.\n4:6 Yella lmuqeddem ameqqran i\u021busemman Hannan akk-d wid i s-ye\u021b\u021bilin, \u1e25ed\u1e5ben da\u0263en : Kayef, Yu\u1e25enna d Alixandru.\n4:7 Wwin-d Bu\u1e6drus d Yu\u1e25enna, sbedden-ten di tlemmast-nsen akken a ten-be\u1e25ten, qqa\u1e5ben-asen : Ansi i wen-d-tekka tezmert-agi, anwa isem s wayes i tneddhem armi txedmem ayagi ?\n4:8 D\u0263a Bu\u1e6drus ye\u010d\u010du\u1e5ben d \u1e5a\u1e5bu\u1e25 iqedsen, yenna-yasen :\n4:9 A l\u1e25ukkam d lecyux n wat Is\u1e5bail ! Imi \u0263ef lxi\u1e5b i nexdem i wergaz-agi a\u025biban d wamek i ge\u1e25la i \u0263-d-testeqsayem ass-agi,\n4:10 ilaq a\u021b-\u021be\u1e93rem kunwi d wat Is\u1e5bail me\u1e5b\u1e5ba, belli s yisem n Sidna \u0190isa ana\u1e63ari, win akken i tsemm\u1e5bem \u0263ef wumidag, win akken i d-yesse\u1e25ya Sidi \u1e5aebbi si ger lmegtin, s tezmert-is i gbedd wergaz agi tura zdat-wen ye\u1e25la.\n4:11 D ne\u021b\u021ba i \u0263ef d-nnant tira iqedsen : D az\u1e5bu-nni i t\u1e0degg\u1e5bem kunwi ay ibennayen, i gu\u0263alen d az\u1e5bu i ge\u1e6d\u1e6dfen lebni. +\n4:12 Deg-s i gella leslak ; ulac di ddunit me\u1e5b\u1e5ba isem nni\u1e0den s wayes i nezmer a ne\u021b\u021busellek.\n4:13 Mi walan belli Bu\u1e6drus d Yu\u1e25enna hedd\u1e5ben s laman mbla akukru, wehmen axa\u1e6der \u1e93ran d imdanen ur ne\u0263\u1e5bi ara ; \u025beqlen-ten seg wid yeddan d Sidna \u0190isa.\n4:14 Lame\u025bna imi walan argaz-nni ye\u1e25lan ibedd zdat-sen, ur ufin d acu ara d-inin.\n4:15 Um\u1e5ben-ten ad ff\u0263en seg unejma\u025b n cc\u1e5be\u025b iwakken ad mcawa\u1e5ben wway gar-asen,\n4:16 nnan : D acu ara nexdem s yemdanen agi ? Imezda\u0263 n temdint n Lquds akk wwin-d s lexba\u1e5b belli xedmen lbe\u1e5bhan yerna \u021b-\u021bide\u021b ur nezmir ara a nenke\u1e5b ayagi.\n4:17 Lame\u025bna iwakken lexba\u1e5b-agi ur iteffe\u0263 ara ger l\u0263aci, a neggal deg-sen ur \u021b\u021bu\u0263alen ara ad mmeslayen ula i yiwen s yisem-agi.\n4:18 U\u0263alen ssawlen-asen, gullen deg-sen iwakken ur \u021b\u021bu\u0263alen ara ad mmeslayen ne\u0263 ad slemden s yisem-agi n \u0190isa.\n4:19 Lame\u025bna Bu\u1e6drus d Yu\u1e25enna nnan-asen : D acu i d l\u1e25eqq zdat \u1e5aebbi, a wen-na\u0263 awal i kunwi ne\u0263 a na\u0263 awal i Sidi \u1e5aebbi ?\n4:20 Walit s yiman nwen ! Nukni ur nezmir ara a nessusem \u0263ef wayen ne\u1e93ra d wayen nesla.\n4:21 Rnan gullen deg-sen, lame\u025bna serr\u1e25en-asen imi ur d-ufin ara sebba s wayes ara ten-\u025baqben, yerna l\u0263aci akk \u021b\u1e25emmiden Sidi \u1e5aebbi \u0263ef wayen yed\u1e5ban,\n4:22 axa\u1e6der argaz-agi i ge\u1e25lan s lbe\u1e5bhan di le\u025bme\u1e5b-is akte\u1e5b n \u1e5beb\u025bin iseggasen.\n4:23 Mi sen-serr\u1e25en, \u1e5bu\u1e25en \u0263er watmaten, \u1e25kan-asen akk ayen i sen-d-nnan lmuqedmin imeqqranen d lecyux.\n4:24 Mi slan watmaten-nni i wayen i d-yenna Bu\u1e6drus, akken ma llan serr\u1e25en i ta\u0263ect-nsen, nedhen \u0263er Sidi \u1e5aebbi nnan : A Sidi \u1e5aebbi, ke\u010d\u010d i gxelqen igenni, lqa\u025ba, leb\u1e25e\u1e5b d wayen akk yellan.\n4:25 D ke\u010d\u010d i d-ine\u1e6dqen s \u1e5a\u1e5bu\u1e25-ik iqedsen seg yimi n jeddi-tne\u0263 Dawed aqeddac-ik, mi d-yenna : Acu\u0263e\u1e5b ccwal-agi ger le\u01e7nas, acu\u0263e\u1e5b igduden ggaren-d anagar yir ixemmimen ?\n4:26 Igelliden n ddunit heggan iman nsen, imeqqranen ddukklen akk, ff\u0263en-d d i\u025bdawen n Sidi \u1e5aebbi akk-d Lmasi\u1e25-ines.\n4:27 Axa\u1e6der \u021b-\u021bide\u021b, di temdint-agi, Hi\u1e5budus d Bila\u1e6dus mcawa\u1e5ben, ddukklen nutni d ibe\u1e5b\u1e5baniyen akk-d wat Is\u1e5bail, u\u0263alen d i\u025bdawen n Sidna \u0190isa imqeddes i texta\u1e5be\u1e0d d Lmasi\u1e25.\n4:28 Ayen akka xedmen, d ayen akken i tqesde\u1e0d ke\u010d\u010dini di leb\u0263i-inek, s tezmert-ik, si zik.\n4:29 I tura, a Sidi \u1e5aebbi, wali-d amek akka i \u0263 ssaggaden ; efk-a\u0263-d a Sidi \u1e5aebbi tazmert s wayes ara nbecce\u1e5b awal-ik s \u1e6d\u1e6dmana mbla akukru.\n4:30 Ssers-ed afus-ik iwakken ad \u1e25lun imu\u1e0dan, iwakken a d-ilint lica\u1e5bat d lbe\u1e5bhanat s yisem n Sidna \u0190isa aqeddac-ik imqeddes.\n4:31 Mi fukken ta\u1e93allit, amkan-nni anda nnejma\u025ben yergagi ; \u010d\u010du\u1e5ben akk s \u1e5a\u1e5bu\u1e25 iqedsen, bdan \u021bbecci\u1e5ben awal n Sidi \u1e5aebbi s \u1e6d\u1e6dmana mbla tugdi.\n4:32 Wid akk yumnen s Lmasi\u1e25, ddukklen akk s yiwen n wul, s yiwen n \u1e5b\u1e5bu\u1e25, ula d yiwen deg-sen ur ye\u1e25sib ayen yes\u025ba d ayla-s i yiman-is kan, me\u025bna cerken kullec wway gar-asen.\n4:33 \u1e5a\u1e5busul \u021bcehhiden-d \u0263ef \u1e25eggu n Sidna \u0190isa s tezmert tameqqrant yerna \u1e5b\u1e5be\u1e25ma n Sidi \u1e5aebbi txeddem deg-sen s l\u01e7ehd.\n4:34 Ulac gar-asen win ixu\u1e63\u1e63en ; wid akk yes\u025ban igran ne\u0263 ixxamen zzenzen-ten,\n4:35 idrimen-nni i d-\u021b\u021bawin deg-sen, \u021b\u021bawin-ten \u0263er ifassen n \u1e5b\u1e5busul i ten-ife\u1e5b\u1e5bqen i mkul yiwen \u0263ef le\u1e25sab n wakken ye\u1e25wa\u01e7.\n4:36 Yusef illan n at Lewwi iwumi semman \u1e5b\u1e5busul Barnabas, ( ye\u025bni argaz inehhun ) i glulen di tegzirt n Qub\u1e5bus,\n4:37 yes\u025ba yiwen n yiger, izzenz-it, yewwi-d idrimen-nni, yefka-ten i \u1e5b\u1e5busul.\n5:1 Yiwen wergaz isem-is Ananyas, ne\u021b\u021ba \u021b-\u021bme\u1e6d\u1e6dut-is Safira zzenzen yiwen n we\u1e25ric seg wakal-nsen ; msefhamen ad kksen yiwen n umur si ssuma n lbi\u025b-nni ;\n5:2 amur nni\u1e0den yewwi-t-id \u0263er ifassen n \u1e5b\u1e5busul.\n5:3 Bu\u1e6drus in\u1e6deq \u0263u\u1e5b-es yenna : Ay Ananyas, acu\u0263e\u1e5b i te\u01e7\u01e7i\u1e0d Cci\u1e6dan ye\u010d\u010du\u1e5b ul-ik ? Acu\u0263e\u1e5b i teskadbe\u1e0d i \u1e5a\u1e5bu\u1e25 iqedsen mi tekkse\u1e0d yiwen umur n yedrimen n wakal i tezzenze\u1e0d ? Uqbel a t- tezzenze\u1e0d, akal-nni yella d ayla-k !\n5:4 Mi t-tezzenze\u1e0d, idrimen-nni da\u0263en d ayla-k ! Amek armi i te\u1e63\u1e63aw\u1e0ded a\u021b-\u021bxe\u1e0dme\u1e0d yiwet l\u1e25a\u01e7a am tagi ? Ihi ma\u010d\u010di i yemdanen iwumi teskadbe\u1e0d, lame\u025bna i Sidi \u1e5aebbi !\n5:5 Mi gesla i yimeslayen-nni, Ananyas ye\u0263li, yeffe\u0263-it \u1e5b\u1e5bu\u1e25, yemmut. Wid akk yellan dinna, ikcem-iten akk lxuf, \u021bergigin.\n5:6 Kkren ilme\u1e93yen kefnen-t, wwin-t a t-me\u1e0dlen.\n5:7 \u0190eddant wazal n tlata sswaye\u025b, mi d-tekcem tme\u1e6d\u1e6dut n Ananyas, ne\u021b\u021bat ur tesli ara s wayen yed\u1e5ban.\n5:8 Bu\u1e6drus yen\u1e6deq \u0263u\u1e5b-es yenna-yas : Ini-yi-d, ma s ssuma-yagi i tezzenzem akal-nwen ? Terra-yas-d : Ih, s ssuma-yagi i t-nezzenz.\n5:9 D\u0263a Bu\u1e6drus yenna-yas : Amek armi i temsefhamem iwakken a\u021b-\u021bje\u1e5b\u1e5bbem \u1e5a\u1e5bu\u1e25 n Sidi \u1e5aebbi ? Wid ime\u1e0dlen argaz-im atnan \u0263er tewwurt, a kkem-awin ula d kemm !\n5:10 Imiren kan te\u0263li \u0263er ida\u1e5b\u1e5ben-is yeffe\u0263-i\u021b \u1e5b\u1e5bu\u1e25, temmut. Ilme\u1e93yen-nni mi d-kecmen ufan-\u021b-id temmut, wwin-\u021b me\u1e0dlen-\u021b \u0263er tama n wergaz-is.\n5:11 Ye\u0263li-d \u1e5b\u1e5b\u025bac ( lxuf ) d ameqqran \u0263ef tejma\u025bt n watmaten d wid akk yeslan s wayen yed\u1e5ban.\n5:12 A\u1e6das n lbe\u1e5bhanat d lmu\u025b\u01e7izat i xeddmen \u1e5b\u1e5busul ger l\u0263aci. Wid yumnen \u021bnejma\u025ben akk s yiwen \u1e5b\u1e5bay deg wesqif n Sidna Sliman.\n5:13 L\u0263aci me\u1e5b\u1e5ba \u021bcekki\u1e5ben-ten me\u025bna kukran akk a d-rnun \u0263u\u1e5b-sen.\n5:14 Le\u1e25sab n yergazen \u021b-\u021bilawin yumnen s Sidna \u0190isa ye\u021bzad irennu.\n5:15 \u021a\u021bawin-d imu\u1e0dan \u0263er iberdan, srusun-ten \u0263ef tgertyal iwakken m'ara d-i\u025beddi Bu\u1e6drus, ad innal yiwen seg-sen ulamma s tili-ines.\n5:16 L\u0263aci \u021b\u021bazzalen-d da\u0263en ula si temdinin nni\u1e0den iqe\u1e5bben tamdint n Lquds ; \u021b\u021bawin-d imu\u1e0dan akk-d wid ye\u021bwazed\u0263en, \u1e25ellun akken ma llan.\n5:17 \u0194ef ddemma n wayen ide\u1e5b\u1e5bun kkrent-asen-d tismin i lmuqeddem ameqqran akk-d isaduqiyen-nni yellan yid-es,\n5:18 \u1e6d\u1e6dfen \u1e5b\u1e5busul, rran-ten \u0263er l\u1e25ebs n baylek.\n5:19 Lame\u025bna deg yi\u1e0d-nni, yiwen lmelk n Sidi \u1e5aebbi yeldi tiwwura n l\u1e25ebs, issufe\u0263-iten-id, yenna-yasen :\n5:20 \u1e5au\u1e25et becc\u1e5bet di l\u01e7ame\u025b iqedsen, slemdet i l\u0263aci awal n tudert.\n5:21 Mi slan i wayen i sen-d-yenna lmelk-nni, \u1e5bu\u1e25en \u1e63\u1e63be\u1e25 zik \u0263er l\u01e7ame\u025b iqedsen, bdan sselmaden. Ma d lmuqeddem ameqqran d wid akk yellan yid-es, snejma\u025ben-d lecyux akk-d imeqqranen n wat Is\u1e5bail \u0263er unejma\u025b n cc\u1e5be\u025b ; imiren cegg\u025ben a d-awin \u1e5b\u1e5busul-nni si l\u1e25ebs.\n5:22 Mi ww\u1e0den i\u025bessasen \u0263er l\u1e25ebs, ur ten-ufin ara dinna ; u\u0263alen-d \u0263er unejma\u025b, nnan-asen :\n5:23 Nufa l\u1e25ebs isekke\u1e5b, i\u025bessasen bedden zdat n tewwurt, lame\u025bna mi nekcem, ur nufi ula d yiwen zdaxel.\n5:24 Mi ten-yewwe\u1e0d lexba\u1e5b-agi, lqeb\u1e6dan n l\u01e7ame\u025b akk-d lmuqedmin imeqqranen \u025bewqen ! Ur \u1e93rin ara \u0263er wanda ara tawe\u1e0d temsalt-agi.\n5:25 I\u1e5bu\u1e25-ed \u0263u\u1e5b-sen yiwen yenna yasen : Irgazen-nni i terram \u0263er l\u1e25ebs, atnan deg ufrag n l\u01e7ame\u025b iqedsen yerna sselmaden l\u0263aci.\n5:26 Lqeb\u1e6dan n l\u01e7ame\u025b d i\u025bessasen \u1e5bu\u1e25en wwin-ten-id lame\u025bna \u1e25udren ten axa\u1e6der uggaden a ten-\u1e5bejmen l\u0263aci.\n5:27 Mi ten-id-wwin \u0263er zdat usqamu n cc\u1e5be\u025b, lmuqeddem ameqqran isteqsa ten yenna-yasen :\n5:28 Neggul deg-wen ur te\u021b\u021bu\u0263alem a\u021b-\u021beslemdem s yisem-agi ; lame\u025bna kunwi tessuf\u0263em aselmed nwen di temdint n Lquds me\u1e5b\u1e5ba ! Tura teb\u0263am a d-terrem \u0263er yirawen nne\u0263 tamge\u1e5b\u1e6d n wergaz-agi !\n5:29 Bu\u1e6drus d \u1e5b\u1e5busul nni\u1e0den erran asen : Ilaq a na\u0263 awal i Sidi \u1e5aebbi, ma\u010d\u010di i yemdanen !\n5:30 \u1e5aebbi, Illu n lejdud-nne\u0263 yesse\u1e25ya-d Sidna \u0190isa, win akken i ten\u0263am, i tsemm\u1e5bem \u0263ef llu\u1e25.\n5:31 D ne\u021b\u021ba i gessuli Sidi \u1e5aebbi \u0263er uyeffus-is d Agellid, d Amsellek, iwakken a d-yefk i wat Is\u1e5bail le\u025bfu n ddnubat m'ara beddlen tikli.\n5:32 Aql-a\u0263 d inagan \u0263ef wayagi, nukkni akk-d \u1e5a\u1e5bu\u1e25 iqedsen i d-yefka Sidi \u1e5aebbi i wid i t-i\u1e0du\u025ben.\n5:33 Mi sen-slan, ikcem-iten wurrif d ameqqran armi b\u0263an a ten-n\u0263en.\n5:34 Me\u025bna Gamalyel, yiwen n l\u025balem n ccari\u025ba yellan d afarizi, \u1e25emmlen-t akk l\u0263aci ; ikker-ed deg unejma\u025b-nni, yefka lame\u1e5b ad ssuf\u0263en \u1e5b\u1e5busul-nni kra n lweqt.\n5:35 D\u0263a yen\u1e6deq yenna : Ay at Is\u1e5bail, \u1e25adret iman-nwen \u0263ef wayen akka teb\u0263am a t-txedmem i yemdanen-agi !\n5:36 Mmektit-ed, ma\u010d\u010di a\u1e6das aya ikker-ed yiwen ye\u021b\u021buseman Tudas yerran iman-is d ameqqran. Azal n \u1e5beb\u025ba meyya n yergazen i ddan yid-es; asmi i t-n\u0263an, wid akk i geddan yid-es mfa\u1e5baqen, ur d-yeqqim late\u1e5b-nsen.\n5:37 Deffir Tudas, ikker-ed da\u0263en Yahuda ajlili di lweqt-nni n ujerred n wegdud ; a\u1e6das da\u0263en n wid i geddan yid-es, me\u025bna ula d ne\u021b\u021ba mi gemmut, wid akk yeddan yid-es mfa\u1e5baqen.\n5:38 Ihi tura a wen-d-ini\u0263 : ur ce\u0263let ara d yemdanen-agi, anfet-asen ad \u1e5bu\u1e25en. Ma yella aselmed-agi-nsen yekka-d s \u0263u\u1e5b-sen, ur ye\u021bdumu ara ;\n5:39 ma yella s \u0263u\u1e5b Sidi \u1e5aebbi i d-ikka, ur te\u021b\u021bizmirem ara a t-tekksem ! \u1e24adret iman-nwen ihi, ne\u0263 m'ulac a\u021b-\u021bu\u0263alem d i\u025bdawen n Sidi \u1e5aebbi !\n5:40 Mi mcawa\u1e5ben, u\u0263en \u1e5b\u1e5bay-is. U\u0263alen skecmen \u1e5b\u1e5busul-nni, fkan lame\u1e5b a ten-wwten s i\u025bekkzan, rnan gullen deg-sen ur \u021b\u021bu\u0263alen ara ad mmeslayen s yisem-agi n \u0190isa, d\u0263a serr\u1e25en-asen.\n5:41 Mi d-ff\u0263en \u1e5b\u1e5busul seg unejma\u025b n cc\u1e5be\u025b, fe\u1e5b\u1e25en imi \u021bwa\u1e25esben d wid yuklalen ad \u021bewten, ad \u021bwaregmen \u0263ef ddemma n yisem n Sidna \u0190isa.\n5:42 D\u0263a kull ass sselmaden \u021bbecci\u1e5ben di l\u01e7ame\u025b iqedsen akk-d ixxamen, lexba\u1e5b n lxi\u1e5b ye\u025bnan \u0190isa Lmasi\u1e25.\n6:1 Deg ussan-nni, le\u1e25sab n widak yumnen s Sidna \u0190isa ye\u021bzid irennu. At Is\u1e5bail i d-yusan si tmura nni\u1e0den, ye\u021bmeslayen s tyunanit, ccetkan \u0263ef wat Is\u1e5bail yellan di tmurt, axa\u1e6der m'ara fe\u1e5bqen lmakla, ur d-\u021belhayen ara \u021b-\u021bu\u01e7\u01e7al-nsen.\n6:2 Tnac \u1e5b\u1e5busul-nni snejma\u025ben-d inelmaden me\u1e5b\u1e5ba, nnan-asen : Ma\u010d\u010di d l\u1e25eqq a ne\u01e7\u01e7 Awal n Sidi \u1e5aebbi di rrif iwakken a nelhi d wef\u1e5baq n lqut i mkul yiwen.\n6:3 Ihi ay atmaten, xti\u1e5bet-ed si gar-awen seb\u025ba yergazen i deg s\u025ban laman yemdanen n tmurt me\u1e5b\u1e5ba, ye\u010d\u010du\u1e5ben d \u1e5a\u1e5bu\u1e25 iqedsen akk-d le\u025bqel, d nutni ara nwekkel \u0263ef cc\u0263el-agi.\n6:4 Ma d nukkni, lweqt-nne\u0263 a t-nes\u025beddi di t\u1e93allit akk-d uselmed n wawal n Sidi \u1e5aebbi.\n6:5 Tajma\u025bt akk i\u025be\u01e7\u01e7eb-as \u1e5b\u1e5bay-agi. Kkren xta\u1e5ben-d Stifan yellan d argaz ye\u010d\u010du\u1e5ben d liman akk-d \u1e5a\u1e5bu\u1e25 iqedsen. Xta\u1e5ben da\u0263en Filbas, Brukurus, Nikanur, Timun, Barmenas, akk-d Nikulus n temdint n Antyuc, i gkecmen si zik di ddin n wat Is\u1e5bail.\n6:6 Wwin-ten-id, sbedden-ten zdat n \u1e5b\u1e5busul. \u1e5a\u1e5busul ssersen ifassen-nsen fell-asen, d\u025ban-asen s lxi\u1e5b \u0263er Sidi \u1e5aebbi.\n6:7 Yu\u0263al, awal n Sidi \u1e5aebbi iffe\u0263 ye\u021bwassen, le\u1e25sab n wid yumnen s Lmasi\u1e25 ye\u021bzid irennu di temdint n Lquds yerna a\u1e6das n lmuqedmin i gumnen, qeblen abrid n Lmasi\u1e25.\n6:8 Stifan ye\u010d\u010du\u1e5ben d \u1e5b\u1e5be\u1e25ma \u021b-\u021bezmert n Sidi \u1e5aebbi, ixeddem lbe\u1e5bhanat d le\u025b\u01e7ayeb timeqqranin ger l\u0263aci.\n6:9 Kra n yemdanen n tejma\u025bt n i\u1e25e\u1e5b\u1e5biyen i d-yusan si tmurt n Qi\u1e5bwan, si tmurt n Skandriya, si tmurt n Silisya akk-d wid i d-yusan si tmurt n Asya, usan-d ad mjadalen nutni d Stifan ;\n6:10 lame\u025bna ur zmiren ara a t-\u0263elben deg awal axa\u1e6der i\u021bmeslay s \u1e63\u1e63wab d le\u025bqel i s-d-yefka \u1e5a\u1e5bu\u1e25 iqedsen.\n6:11 Imiren fkan taj\u025belt i kra n yergazen iwakken a d-inin : \u00ab Nesla yas yekfe\u1e5b \u0263ef Sidna Musa akk-d Sidi \u1e5aebbi ! \u00bb\n6:12 Sekkren ccwal ger l\u0263aci d lecyux akk-d l\u025bulama n ccari\u025ba , d\u0263a \u1e6d\u1e6dfen Stifan ewwtent, wwin-t \u0263er unejma\u025b n usqamu n cc\u1e5be\u025b.\n6:13 Sbedden-d inigan i d-icehden fell-as s \u1e93\u1e93ur, nnan-d : Argaz-agi, yezga yekkat deg wemkan-agi iqedsen akk-d ccari\u025ba n Sidna Musa !\n6:14 Nesla-yas mi geqqa\u1e5b : \u00ab \u0190isa-nni Ana\u1e63ari, ad ihudd amkan agi yerna ad ibeddel l\u025baddat i \u0263-d ye\u01e7\u01e7a Sidna Musa. \u00bb\n6:15 Wid akk yellan deg unejma\u025b n cc\u1e5be\u025b, \u1e5be\u1e63\u1e63an allen-nsen \u0263ef Stifan ; \u021bwalin udem-is am akken d udem n lmalayekkat.\n7:1 Lmuqeddem ameqqran isteqsa Stifan yenna-yas : \u021a-\u021bide\u021b wayen akka i d-nnan ?\n7:2 Stifan yerra-yas : Ay atmaten, ay im\u0263a\u1e5ben n wat Is\u1e5bail, \u1e25esset-iyi-d ! Sidi \u1e5aebbi di l\u025ba\u1e0dima-s tameqqrant, yesbeggen-ed iman-is i jeddi-tne\u0263 Sidna Ib\u1e5bahim, mi gella di tmurt n Mizubu\u1e6damya uqbel ad yezde\u0263 di temdint n Haran.\n7:3 Yenna-yas : Ffe\u0263 si tmurt-ik, si tmurt n imawlan-ik, t\u1e5bu\u1e25e\u1e0d \u0263er tmurt ara k-d-ssekne\u0263.\n7:4 Iffe\u0263 ihi si tmurt n iqaldiyen, i\u1e5bu\u1e25 ad izde\u0263 di temdint n Haran. Mi gemmut baba-s, Sidi \u1e5aebbi yewwi-t-id \u0263er tmurt-agi i deg tzed\u0263em tura.\n7:5 Sidi \u1e5aebbi ur s-yefki ara di tmurt-agi ula d azal n terdast i deg ara yesres a\u1e0dar-is ; me\u025bna iw\u025bed-as a s-yefk tamurt-agi i ne\u021b\u021ba d dderya n dderya-s \u0263as akken imiren mazal ur yes\u025bi ara dderya, Sidi \u1e5aebbi yenna-yas :\n7:6 Dderya n dderya-k a\u021b-\u021bezde\u0263 deg yiwet n tmurt tabe\u1e5b\u1e5banit, dinna a ten-erren d aklan, ad s\u025beddin fell-asen l\u1e25if azal n \u1e5beb\u025ba meyya iseggasen.\n7:7 Lame\u025bna Sidi \u1e5aebbi yenna-d : Ad u\u0263alen a d-ff\u0263en si tmurt-nni, ad iyi-\u025bebden deg wemkan-agi ; ma d l\u01e7ens-nni i ten-yerran d aklan, d nekk ara ten-i\u1e25asben.\n7:8 D\u0263a Sidi \u1e5aebbi yefka-d i Sidna Ib\u1e5bahim le\u025bqed ye\u025bnan \u1e6d\u1e6dha\u1e5ba. S wakka, mi d-yes\u025ba mmi-s Is\u1e25aq, Sidna Ib\u1e5bahim i\u1e6de\u1e25he\u1e5b-as deg wass wis tmanya n tlalit-is. Is\u1e25aq da\u0263en yexdem akken i mmi-s ye\u025bqub ; ula d Ye\u025bqub i\u1e6de\u1e25he\u1e5b i tnac-nni warraw-is yellan d lejdud-nne\u0263.\n7:9 Ihi arraw-agi n ye\u025bqub usmen \u0263ef gma-tsen Yusef, kkren zenzen-t \u0263er tmurt n Ma\u1e63er anda yu\u0263al d akli.\n7:10 Lame\u025bna Sidi \u1e5aebbi yella yid-es, i\u021bsellik-it si tegnatin n ccedda ; issers-ed fell-as \u1e5b\u1e5be\u1e25ma yerna-yas-d le\u025bqel s wayes ara ye\u025bziz \u0263er Fer\u025bun agellid n tmurt n Ma\u1e63e\u1e5b. Fer\u025bun isbedd-it d l\u1e25akem \u0263ef tmurt-is akk-d wexxam-is me\u1e5b\u1e5ba.\n7:11 Ye\u0263li-d la\u1e93 \u0263ef tmurt n Ma\u1e63e\u1e5b akk \u021b-\u021bmurt n Ken\u025ban, d lweqt n cedda tameqqrant ; lejdud-nne\u0263 ur ufin ara ayen ara \u010d\u010den.\n7:12 Mi gesla Ye\u025bqub belli llan yirden di tmurt n Ma\u1e63er, icegge\u025b \u0263er dinna tikkelt tamezwarut, arraw-is yellan d lejdud-nne\u0263.\n7:13 Mi u\u0263alen tikkelt tis snat, Yusef isbeggen-ed iman-is \u0263er watmaten-is, \u025beqlen-t d ne\u021b\u021ba. Yu\u0263al Fer\u025bun ye\u1e93ra la\u1e63el n Yusef ansi-t.\n7:14 Yusef icegge\u025b a d-awin baba-s Ye\u025bqub akk-d wat wexxam-is me\u1e5b\u1e5ba i gellan di xemsa useb\u025bin yid-sen.\n7:15 Ye\u025bqub i\u1e63ubb \u0263er tmurt n Ma\u1e63er ikemmel dinna ussan-is armi yemmut, am ne\u021b\u021ba am lejdud-nne\u0263.\n7:16 Wwin-d i\u0263san-nsen \u0263er taddart n Sicem, me\u1e0dlen-ten deg u\u1e93ekka i gu\u0263 Sidna Ib\u1e5bahim s yedrimen \u0263ef warraw n Hamur n taddart n Sicem.\n7:17 Mi d-yewwe\u1e0d lweqt i deg ara yed\u1e5bu wayen i gew\u025bed Sidi \u1e5aebbi i Sidna Ib\u1e5bahim s limin, agdud-nne\u0263 yufa-t-id l\u1e25al innerna s wa\u1e6das di tmurt n Ma\u1e63er ;\n7:18 imiren ikker-ed ugellid nni\u1e0den ur nessin ara Yusef.\n7:19 Agellid-nni i\u1e25qe\u1e5b l\u0263aci-nne\u0263, ye\u021bqehhi\u1e5b lejdud nne\u0263, ye\u1e63\u1e63awe\u1e0d armi i gefka lame\u1e5b ad \u01e7\u01e7en arraw-nsen i cce\u1e5b akken kan ara d-lalen, iwakken ur \u021bidiren ara.\n7:20 Di lweqt-nni i d-ilul Sidna Musa ; icbe\u1e25 yerna e\u025bziz \u0263er Sidi \u1e5aebbi. Ye\u021b\u021bu\u1e5bebba deg wexxam n imawlan-is tlata wagguren s tuffra ;\n7:21 u\u0263alen rran-t zdaxel n tqecwalt, serr\u1e25en-as deg wasif ; d yelli-s n Fer\u025bun i t-id-ijem\u025ben, t\u1e5bebba-t-id am mmi-s.\n7:22 Ikker-ed ger ima\u1e63riyen, yelmed akk tamusni-nsen ifazen. Yu\u0263al d argaz amusnaw, izew\u1e5ben ama deg yimeslayen ama di lec\u0263al.\n7:23 Mi ge\u1e63\u1e63awe\u1e0d \u1e5beb\u025bin iseggasen di le\u025bme\u1e5b-is, yemmekta-d atmaten-is at Is\u1e5bail, i\u1e5bu\u1e25 ad i\u1e93er acu n l\u1e25ala i deg \u021b\u025bicin.\n7:24 Yiwen wass iwala s wallen-is yiwen uma\u1e63ri ikkat yiwen seg wat Is\u1e5bail ; ikker a t-i\u1e25udd, yerra-as-d \u021b\u021bar ; yewwet ama\u1e63ri-nni, yen\u0263a-t.\n7:25 Yenwa ad fehmen watmaten-is belli s ufus-is ara ten-isellek Sidi \u1e5aebbi ; lame\u025bna nutni ur fhimen ara.\n7:26 Azekka-nni iwala sin yergazen n wat Is\u1e5bail \u021bna\u0263en wway gar-asen, iger iman-is, ye\u025b\u1e5bed a ten-ifru, yenna-yasen : E\u025bni ma\u010d\u010di d atmaten i tellam ? Acimi i te\u021b\u021bna\u0263em wway gar-awen ?\n7:27 Lame\u025bna win akken i\u1e0delmen waye\u1e0d idemmer Musa yenna-yas : Anwa i k-yerran d aqe\u1e5b\u1e5buy ne\u0263 d l\u1e25akem fell-a\u0263 ?\n7:28 E\u025bni teb\u0263i\u1e0d a yi-ten\u0263e\u1e0d akken ten\u0263i\u1e0d i\u1e0delli ama\u1e63ri-nni ?\n7:29 \u0194ef ddemma n yimeslayen-agi Sidna Musa yerwel, i\u1e5bu\u1e25 ad izde\u0263 di tmurt n Madyan. Dinna i ges\u025ba sin n warrac.\n7:30 Mi \u025beddan \u1e5beb\u025bin n iseggasen, idhe\u1e5b-as-ed yiwen n lmelk deg yiwen u\u1e25e\u01e7\u01e7a\u01e7u n tmes ice\u025blen deg inijel, mi gella deg unez\u1e5buf n wedrar n Sinay.\n7:31 Sidna Musa yewhem deg wayen ye\u021bwali ; akken kan iqe\u1e5b\u1e5beb \u0263u\u1e5b-es, Sidi \u1e5aebbi yessawel-as-d seg u\u1e25e\u01e7\u01e7a\u01e7u-nni n tmes, yenna-yas-d :\n7:32 D nekk i d Illu n lejdud-ik, d Illu n Ib\u1e5bahim, n Is\u1e25aq akk-d Ye\u025bqub. Sidna Musa yeqqim i\u021bergigi, yuggad ad yerfed ula d allen-is.\n7:33 Sidi \u1e5aebbi yenna-yas : Kkes arkasen seg i\u1e0da\u1e5b\u1e5ben-ik axa\u1e6der amkan-agi anda tbedde\u1e0d d amkan iqedsen.\n7:34 Wala\u0263 lba\u1e6del ide\u1e5b\u1e5bun d wegdud-iw di tmurt n Ma\u1e63er ; sli\u0263-ed i unaze\u025b-nsen ; \u1e63ubbe\u0263-d iwakken a ten-sellke\u0263. \u1e5au\u1e25 tura a k-cegg\u025be\u0263 \u0263er tmurt n Ma\u1e63e\u1e5b.\n7:35 Musa-nni i nek\u1e5ben m'akken i s-nnan : Anwa i k-yerran d amdebbar ne\u0263 d l\u1e25akem ? D ne\u021b\u021ba i d-icegge\u025b Sidi \u1e5aebbi d aqe\u1e5b\u1e5buy, d amcafe\u025b n wegdud ; s lem\u025bawna n lmelk i s-d-ideh\u1e5ben deg udarnu ireqqen.\n7:36 D ne\u021b\u021ba i ten-id-issuf\u0263en si tmurt n Ma\u1e63er. Yexdem a\u1e6das n lbe\u1e5bhanat d le\u025b\u01e7ayeb di tmurt-nni, di leb\u1e25e\u1e5b azegga\u0263, deg unez\u1e5buf n Sinay, anda akken qqimen \u1e5beb\u025bin iseggasen.\n7:37 D ne\u021b\u021ba da\u0263en i gennan i wat Is\u1e5bail : Sidi \u1e5aebbi a wen-d-yefk si ger watmaten-nwen yiwen n nnbi am nekk.\n7:38 Asm'akken i gennejma\u025b wegdud deg unez\u1e5buf, d ne\u021b\u021ba iwumi d yemmeslay lmelk-nni deg wedrar n Sinay, d ne\u021b\u021ba iwumi d-yefka Sidi \u1e5aebbi awal n tudert iwakken a \u0263-t-id issiwe\u1e0d.\n7:39 Lame\u025bna lejdud-nne\u0263 ugin a s-a\u0263en awal ; ur t-qbilen ara axa\u1e6der deg ulawen-nsen b\u0263an ad u\u0263alen \u0263er tmurt n Ma\u1e63er.\n7:40 Nnan i Ha\u1e5bun gma-s n Sidna Musa : Xdem-a\u0263-d i\u1e5bebbiten am wid n ima\u1e63riyen, ara nezzwer zdat-nne\u0263, axa\u1e6der Musa-agi i \u0263-d-yessuf\u0263en si tmurt n Ma\u1e63e\u1e5b, ur ne\u1e93ri ara d acu i ged\u1e5ban yid-es.\n7:41 D\u0263a deg ussan-nni, jem\u025ben-d ddheb, ssefsin-t xedmen yis yiwen ugenduz. Imiren zlan-as asfel, xedmen-as tame\u0263\u1e5ba, fe\u1e5b\u1e25en s wayen xedmen yifassen-nsen.\n7:42 Sidi \u1e5aebbi ye\u1e6d\u1e6daxe\u1e5b fell-asen, ye\u01e7\u01e7a-ten ad \u025bebden itran n yigenni , d ayen i guran di tektabt n lenbiya : Ay agdud n wat Is\u1e5bail, e\u025bni i nekk iwumi d-tefkam lew\u025badi d iseflawen, di \u1e5beb\u025bin iseggasen-nni i tes\u025beddam deg unez\u1e5buf ?\n7:43 Xa\u1e6di me\u025bna tbubbem aqi\u1e0dun n Mulux akk-d itri n Rufan i t\u1e25esbem d i\u1e5bebbiten-nwen ;+ lme\u1e63nu\u025bat nni i txedmem iwakken a ten-t\u025bebdem ! Daymi ara kkun-nfu\u0263 \u0263er leb\u025bid, akkin i temdint n Babilun !\n7:44 Deg unez\u1e5buf, lejdud-nne\u0263 s\u025ban aqi\u1e0dun i deg yella le\u025bqed n Sidi \u1e5aebbi ; aqi\u1e0dun-nni i\u021bwaxedmen akken i s-t-id-yemla Sidi \u1e5aebbi i Sidna Musa mi s-d-yenna : Xdem-it am akken i t-twala\u1e0d di lemtel i k-d-ssekne\u0263.\n7:45 Mi d-yewwe\u1e0d uqi\u1e0dun-nni \u0263er ifassen n lejdud-nne\u0263 , wwin-t-id yid-sen mi i ten-issekcem Yacu\u025ba \u0263er tmurt-nni i sen-yew\u025bed Sidi \u1e5aebbi , mi ssuf\u0263en imezda\u0263-is s tezmert n Sidi \u1e5aebbi. Aqi\u1e0dun-nni yeqqim dinna armi d zzman n Sidna Dawed.\n7:46 Sidna Dawed e\u025bzizen \u0263er Sidi \u1e5aebbi, yed\u025ba \u0263u\u1e5b-es yenna : A Sidi \u1e5aebbi ! A Yillu n jeddi-tne\u0263 Ye\u025bqub ! E\u01e7\u01e7-iyi ad a k-bnu\u0263 l\u01e7ame\u025b iqedsen ara yilin \u021b-\u021banezdu\u0263t-ik !\n7:47 Lame\u025bna d Sidna Sliman i s yebnan l\u01e7ame\u025b-nni !\n7:48 \u0194as akken Sidi \u1e5aebbi \u025blayen ur izedde\u0263 ara deg ixxamen i\u021bwabnan s ufus n wemdan, akken i d-yenna nnbi Ice\u025bya :\n7:49 Igenni d amkan n l\u1e25ekma-w, ma d lqa\u025ba \u021b-\u021ba\u1e25si\u1e5bt i \u0263ef srusu\u0263 ida\u1e5b\u1e5ben-iw. Sidi \u1e5aebbi yenna-d : Acu n wexxam i tzemrem a yi-tebnum, ne\u0263 anda-t wemkan i deg zemre\u0263 ad ste\u025bfu\u0263 ?\n7:50 E\u025bni ma\u010d\u010di d afus-iw i d-ixelqen kullec ?\n7:51 A wid isbeddayen i\u025benqiqen nsen ! Tes\u0263a\u1e5bayem ulawen-nwen, tqeflem ime\u1e93\u1e93u\u0263en-nwen, te\u021b\u021beddum di nneqma i \u1e5a\u1e5bu\u1e25 iqedsen am kunwi am lejdud-nwen !\n7:52 Anwa nnbi ur qhi\u1e5ben ara lejdud-nwen ? N\u0263an wid akk i\u021bbecci\u1e5ben si zik \u0263ef U\u1e25eqqi ara d-yasen ; tura d kunwi i t-ixed\u025ben yerna ten\u0263am-t.\n7:53 Tewwe\u1e0d-ikkun-id ccari\u025ba n Sidi \u1e5aebbi s ufus n lmalayekkat, lame\u025bna kunwi tugim a s-ta\u0263em awal !\n7:54 Mi slan i yemslayen-agi, lmuqedmin iffe\u0263-iten le\u025bqel, qe\u1e5bcen tu\u0263mas-nsen fell-as.\n7:55 Lame\u025bna Stifan ye\u010d\u010du\u1e5ben d \u1e5a\u1e5bu\u1e25 iqedsen, yerfed allen-is \u0263er igenni, iwala tamanegt n Sidi \u1e5aebbi akk-d Sidna \u0190isa ibedden \u0263er uyeffus-is.\n7:56 Imiren i\u025begge\u1e0d, yenna : Atan \u021bwali\u0263 igenwan ldin, \u021bwali\u0263 Mmi-s n bunadem ibedd \u0263er tama tayeffust n \u1e5aebbi !\n7:57 Qeflen ime\u1e93\u1e93u\u0263en-nsen, bdan \u021b\u025beggi\u1e0den, \u1e93edmen fell-as akken ma llan.\n7:58 Zzu\u0263\u1e5ben-t be\u1e5b\u1e5ba n temdint, \u1e5bejmen-t s ibla\u1e0den iwakken a t-n\u0263en. Inigan \u01e7\u01e7an le\u1e25waye\u01e7-nsen \u0263er yiwen ilem\u1e93i isem-is Ca\u025bul, iwakken a ten-i\u025bas.\n7:59 M'akken i t-\u1e5be\u01e7men, Stifan ide\u025b\u025bu \u0263er Sidi \u1e5aebbi yeqqa\u1e5b : A Sidna \u0190isa, atan \u1e5b\u1e5bu\u1e25-iw ger ifassen-ik !\n7:60 Imiren ye\u0263li \u0263ef tgecrar, i\u025begge\u1e0d s l\u01e7ehd-is : A baba \u1e5aebbi ur ten-\u021b\u1e25asab ara \u0263ef ddnub-agi ! Akken kan i d-yenna imeslayen agi, iffe\u0263-it \u1e5b\u1e5bu\u1e25.\n8:1 Ca\u025bul, d yiwen seg wid iqeblen lmut n Stifan. Ass-nni kkren-d wid ibdan \u021bqehhi\u1e5ben tajma\u025bt n wid ye\u021b\u021bamnen s Lmasi\u1e25 yellan di temdint n Lquds. Wid akk yumnen s Lmasi\u1e25 rewlen \u0263er tudrin n tmurt n Yahuda armi \u021b-\u021bamurt n Samarya ; anagar \u1e5b\u1e5busul i d-yeqqimen di temdint n Lquds.\n8:2 Kra yergazen i\u1e0du\u025ben Sidi \u1e5aebbi, wwin-d Stifan me\u1e0dlen-t, \u1e25eznen a\u1e6das, \u021brun fell-as.\n8:3 Ma d Ca\u025bul ixeddem akk lmejhud-is iwakken ad ihudd tajma\u025bt n wid yumnen s Sidna \u0190isa ; issufu\u0263 ed seg ixxamen-nsen, irgazen \u021b-\u021bilawin yumnen s Lmasi\u1e25, issekcam iten \u0263er l\u1e25ebs.\n8:4 Ihi wid akk i grewlen, mfa\u1e5baqen, \u021b\u1e5bu\u1e25un seg wemkan \u0263er waye\u1e0d, \u021bbecci\u1e5ben lexba\u1e5b n lxi\u1e5b n wawal n Sidi \u1e5aebbi.\n8:5 Filbas i\u1e63ubb \u0263er temdint n Samarya, ibecce\u1e5b dinna lexba\u1e5b n lxi\u1e5b ye\u025bnan Lmasi\u1e25.\n8:6 L\u0263aci me\u1e5b\u1e5ba rran ddehn-nsen \u0263er Filbas, mi slan i wayen i d-yeqqa\u1e5b yerna walan lbe\u1e5bhanat i gxeddem ;\n8:7 axa\u1e6der le\u01e7nun \u021beff\u0263en s le\u025bya\u1e0d seg wa\u1e6das n yemdanen i\u021b\u021bumelken, a\u1e6das da\u0263en n iqu\u1e0da\u1e5ben akk-d wid ikerfen i ge\u1e25lan.\n8:8 D\u0263a imezda\u0263 n temdint-nni me\u1e5b\u1e5ba fe\u1e5b\u1e25en ma\u010d\u010di d kra.\n8:9 Yu\u0263 l\u1e25al di temdint-nni yella yiwen wergaz isem-is Sem\u025bun, issewham imezda\u0263 n tmurt n Samarya s ss\u1e25ur i gxeddem ; i\u1e25e\u021b\u021beb iman-is d win yes\u025ban tazmert.\n8:10 Imdanen akk am ume\u1e93yan am umeqqran, \u021b\u021baran ddehn-nsen \u0263u\u1e5b-es qqa\u1e5ben : \u00ab Argaz-agi \u021b-\u021bazmert n \u1e5aebbi s yiman-is ; \u021b-\u021bazmert-nni iwumi neqqa\u1e5b tazmert yessewhamen ! \u00bb\n8:11 \u021a\u021bamnen yis axa\u1e6der si zik i ten-issewham s ss\u1e25ur i gxeddem ;\n8:12 lame\u025bna, asmi umnen s wayen i sen-ibecce\u1e5b Filbas \u0263ef wayen ye\u025bnan tagelda n Sidi \u1e5aebbi d yisem n Sidna \u0190isa Lmasi\u1e25, usan-d akk ad \u021bwa\u0263e\u1e0dsen deg waman am yergazen am tlawin.\n8:13 Sem\u025bun s yiman-is yumen ; ula d ne\u021b\u021ba ye\u021bwa\u0263\u1e0des deg waman, seg wass-nni ur yettixi\u1e5b ara \u0263ef Filbas ; i\u021b\u021bawham deg-s mi ge\u021bwali le\u025b\u01e7ayeb d lbe\u1e5bhanat timeqqranin i gxeddem.\n8:14 Mi slan belli l\u0263aci n tmurt n Samarya qeblen awal n Sidi \u1e5aebbi, \u1e5b\u1e5busul yeqqimen di temdint n Lquds cegg\u025ben-asen Bu\u1e6drus d Yu\u1e25enna.\n8:15 Mi ww\u1e0den \u0263u\u1e5b-sen, d\u025ban fell asen \u0263er Sidi \u1e5aebbi iwakken a sen-d-yefk \u1e5a\u1e5bu\u1e25 iqedsen ;\n8:16 axa\u1e6der mazal ur d-iris ula \u0263ef yiwen deg-sen, \u021bwa\u0263e\u1e0dsen kan deg aman s yisem n Sidna \u0190isa.\n8:17 Bu\u1e6drus akk-d Yu\u1e25enna ssersen ifassen-nsen fell-asen, d\u0263a ye\u021b\u021bunefk asen-d \u1e5a\u1e5bu\u1e25 iqedsen.\n8:18 Mi gwala Sem\u025bun ye\u021b\u021bunefk-ed \u1e5a\u1e5bu\u1e25 iqedsen i l\u0263aci imi ssersen \u1e5b\u1e5busul ifassen-nsen fell-asen, yewwi-yasen-d idrimen yenna-yasen :\n8:19 Ffket-iyi ula d nekk tazmert agi iwakken kra n win i \u0263ef ara sserse\u0263 ifassen-iw, a t-ikcem \u1e5a\u1e5bu\u1e25 iqedsen.\n8:20 Lame\u025bna Bu\u1e6drus yenna-yas : Ad negren yedrimen-ik ad glun yis-ek imi t\u0263ile\u1e0d \u1e5a\u1e5bu\u1e25 iqedsen n Sidi \u1e5aebbi ye\u021bnuzu s idrimen !\n8:21 Ul-ik ur ye\u1e63fi ara \u0263er Sidi \u1e5aebbi ! Ur k-id-i\u1e63a\u1e25 umur, ur tes\u025bi\u1e0d lwe\u1e5bt di cc\u0263el-agi.\n8:22 Endem di yir \u1e5b\u1e5bay-ik, ted\u025bu\u1e0d \u0263er Sidi \u1e5aebbi iwakken ma yella wamek, a k-ye\u025bfu \u0263ef yir axemmem-agi i d-yeff\u0263en seg ul-ik !\n8:23 Atan wala\u0263 te\u010d\u010du\u1e5be\u1e0d d dd\u0263el, imlek-ik lba\u1e6del !\n8:24 Sem\u025bun yerra-yasen : D\u025but kunwi s yiman-nwen fell-i \u0263er Sidi \u1e5aebbi iwakken ur d-ide\u1e5b\u1e5bu ara yid-i wayen akka i d-tennam.\n8:25 Bu\u1e6drus d Yu\u1e25enna kemmlen cehden \u0263ef Sidna \u0190isa, becc\u1e5ben awal n Sidi \u1e5aebbi, mbe\u025bd u\u0263alen \u0263er temdint n Lquds. Deg webrid-nsen, \u021bbecci\u1e5ben lexba\u1e5b n lxi\u1e5b deg wa\u1e6das n tudrin n tmurt n Samarya.\n8:26 Yiwen lmelk n Sidi \u1e5aebbi in\u1e6deq-ed \u0263er Filbas yenna-yas : Kker, \u1e5bu\u1e25 \u0263er l\u01e7iha n usammer, \u025beddi seg webrid-nni yexlan i ge\u021b\u1e63ubbun si temdint n Lquds \u0263er tmurt n \u0194aza.\n8:27 Ikker, i\u1e5bu\u1e25. Immuger-ed deg webrid yiwen n wergaz, d ane\u0263laf n Kendyas tagellit n tmurt n Ityubya ; d ne\u021b\u021ba i d lewkil \u0263ef lmelk-is me\u1e5b\u1e5ba , lame\u025bna d argaz ur nes\u025bi ddunit ; yusa-d \u0263er temdint n Lquds iwakken ad i\u025bbed Sidi \u1e5aebbi.\n8:28 Mi g\u021beddu \u0263ef tke\u1e5b\u1e5bust-is iwakken ad yu\u0263al \u0263er wexxam-is, yufa-t-id l\u1e25al yeqqa\u1e5b di tektabt n nnbi Ice\u025bya.\n8:29 \u1e5a\u1e5bu\u1e25 iqedsen yenna i Filbas : \u1e5au\u1e25 qe\u1e5b\u1e5beb \u0263er tke\u1e5b\u1e5bust-ihina.\n8:30 Filbas yuzzel \u0263u\u1e5b-es, yesla i une\u0263laf-nni n tmurt n Ityubya yeqqa\u1e5b di tektabt n nnbi Ice\u025bya. Yenna-yas : Tfehme\u1e0d ayen akka i teqqa\u1e5be\u1e0d ?\n8:31 Yerra-yas : Amek ara fehme\u0263 ma ulac win ara yi-d-isfehmen ? D\u0263a yesserkeb-ed Filbas \u0263er tama-s.\n8:32 Atah wayen akken yella yeqqa\u1e5b di tektabt-nni : Am izimer m'ara t-awin a t-zlun, am tixsi iggugmen zdat win i \u021b-i\u021bellsen, ur d-yeldi imi-is.\n8:33 Ye\u021bwa\u1e25qe\u1e5b, i\u021bwa\u010d\u010d l\u1e25eqq-is ! Anwa ara d-ye\u1e25kun \u0263ef wayen yed\u1e5ban di l\u01e7il-ines ? Anwa ara d-ye\u1e25kun \u0263ef tudert-is ye\u021bwakksen si ddunit ?\n8:34 Ane\u0263laf-nni yenna-yas i Filbas : Di le\u025bnaya-k ssefhem-iyi-d \u0263ef wanwa i d-i\u021bmeslay nnbi-yagi, \u0263ef yiman-is ne\u0263 \u0263ef waye\u1e0d ?\n8:35 D\u0263a Filbas s wawal-agi i gebda a s-i\u021bbecci\u1e5b lexba\u1e5b n lxi\u1e5b ye\u025bnan Sidna \u0190isa.\n8:36 Mi teddun deg webrid-nsen, ww\u1e0den \u0263er yiwen wemkan i deg llan waman. Ane\u0263laf-nni yenna-yas : Atnan waman ! D acu ara yi-d i\u1e25ebsen iwakken ad \u021bwa\u0263ed\u1e63e\u0263 ?\n8:37 Filbas yenna-yas : Ma tumne\u1e0d seg ul-ik, tzemre\u1e0d a\u021b-te\u021bwa\u0263e\u1e0dse\u1e0d. Ane\u0263laf-nni yerra-yas : Umne\u0263 belli Sidna \u0190isa Lmasi\u1e25 d Mmi-s n \u1e5aebbi.\n8:38 Imiren yume\u1e5b ad \u1e25ebsen take\u1e5b\u1e5bust-is. Filbas d une\u0263laf-nni rsen-d, kecmen i sin \u0263er waman, d\u0263a Filbas isse\u0263\u1e0des-it.\n8:39 Mi d-ff\u0263en seg waman, \u1e5a\u1e5bu\u1e25 n Sidi \u1e5aebbi yerfed Filbas, yexfa ger wallen une\u0263laf-nni. Ane\u0263laf-nni ikemmel abrid-is s lfe\u1e5b\u1e25 ;\n8:40 ma d Filbas yufa-d iman-is di temdint n Acdud ; syenna ikemmel abrid-is, i\u021beddu i\u021bbecci\u1e5b awal n tudert di tudrin me\u1e5b\u1e5ba i \u0263ef i\u025bedda, armi i gewwe\u1e0d \u0263er temdint n Qi\u1e63arya.\n9:1 Ca\u025bul mazal i\u021bqehhi\u1e5b inelmaden n Sidna \u0190isa, i\u021bgalla deg-sen a ten-ine\u0263. I\u1e5bu\u1e25 \u0263er lmuqeddem ameqqran,\n9:2 issuter-as a s-d-ixdem lka\u0263e\u1e0d ara yawi \u0263er le\u01e7wame\u025b me\u1e5b\u1e5ba n temdint n Dimecq, iwakken ma yufa deg-sen wid ittaba\u025ben abrid n \u0190isa Lmasi\u1e25, ama d argaz ama \u021b-\u021bame\u1e6d\u1e6dut, a ten-id-yawi \u021bwarzen \u0263er temdint n Lquds.\n9:3 Yella iteddu deg webrid, q\u1e5bib ad yawe\u1e0d \u0263er temdint n Dimecq. Taswi\u025bt kan, tekka-d yiwet n tafat seg igenni tfe\u01e7\u01e7e\u01e7-ed fell-as, tezzi yas-d.\n9:4 Ye\u0263li \u0263er lqa\u025ba, yesla i yiwen n \u1e63\u1e63ut i s-d-yeqqa\u1e5ben : Ca\u025bul ! A Ca\u025bul ! Acu\u0263e\u1e5b i yi te\u021bqehhi\u1e5be\u1e0d ?\n9:5 Yenna-yas : Anwa-k a Sidi ? S\u1e63ut-nni yerra-yas-d : D nekk i d \u0190isa, win akken i te\u021bqehhi\u1e5be\u1e0d !\n9:6 Kker fell-ak ! \u1e5au\u1e25 \u0263er temdint n Dimecq, dinna ara k-d-inin acu ara txedme\u1e0d.\n9:7 Irgazen i geddan yid-es bedden, dehcen, ggugmen ; slan i ta\u0263ect-nni lame\u025bna ur walan ula d yiwen.\n9:8 Ca\u025bul ikker-ed si lqa\u025ba, \u0263as akken ldint wallen-is, ur ye\u021bwali ara. S\u1e6dfen-as afus, wwin-t \u0263er temdint n Dimecq.\n9:9 Yeqqim tlata wussan ur iwala, ur i\u010d\u010di, ur yeswi. Ca\u025bul yumen s \u0190isa Lmasi\u1e25\n9:10 Di temdint n Dimecq, yella yiwen unelmad isem-is Ananyas ; Sidi \u1e5aebbi yessawel-as-d deg uwe\u1e25\u1e25i, Ananyas yerra-yas : Aql-iyi a Sidi.\n9:11 Sidi \u1e5aebbi yenna-yas : Kker t\u1e5bu\u1e25e\u1e0d \u0263er webrid i\u021busemman \u00ab Abrid ayeffus \u00bb, \u0263er wexxam n Yuda ; dinna steqsi \u0263ef yiwen wergaz isem-is Ca\u025bul n temdint n Sars. Atan ide\u025b\u025bu \u0263er Sidi \u1e5aebbi,\n9:12 ye\u021bwali deg uwe\u1e25\u1e25i ikcem \u0263u\u1e5b-es yiwen wergaz isem-is Ananyas, yessers ifassen-is fell-as iwakken a t-id-yu\u0263al ye\u1e93ri.\n9:13 Ananyas yerra-yas : A Sidi, ac\u1e25al n yemdanen i d ye\u1e25kan fell-as i\u021bqehhi\u1e5b inelmaden-ik imqedsen di temdint n Lquds !\n9:14 Yusa-d \u0263er dagi da\u0263en s \u021b\u021besri\u1e25 n lmuqedmin imeqqranen iwakken ad yerr \u0263er l\u1e25ebs wid akk ineddhen s yisem-ik.\n9:15 Lame\u025bna Sidna \u0190isa yenna-yas : \u1e5au\u1e25, axa\u1e6der argaz-agi d nekk i t-yexta\u1e5ben iwakken ad ibecce\u1e5b isem-iw i wat Is\u1e5bail, i le\u01e7nas nni\u1e0den akk-d igelliden-nsen.\n9:16 Yerna a s ssekne\u0263 ac\u1e25al ara ye\u025bteb \u0263ef ddemma n yisem-iw.\n9:17 Ananyas i\u1e5bu\u1e25 ; mi gewwe\u1e0d \u0263er wexxam-nni, yessers ifassen-is \u0263ef Ca\u025bul yenna-yas : A Ca\u025bul a gma, d Sidna \u0190isa-nni i k-d-i\u1e0deh\u1e5ben deg-webrid ansi i d-tusi\u1e0d, i yi-d-icegg\u025ben iwakken a k-id-yu\u0263al ye\u1e93ri yerna a\u021b-\u021be\u010d\u010da\u1e5be\u1e0d d \u1e5a\u1e5bu\u1e25 iqedsen.\n9:18 Imiren kan \u0263lin-d seg wallen-is am akken d iqec\u1e5ban, d\u0263a yu\u0263al-it-id ye\u1e93ri ; yekker, ye\u021bwa\u0263\u1e0des.\n9:19 Mi ge\u010d\u010da, yu\u0263al-it-id l\u01e7ehd ; is\u025bedda kra wussan \u0263er inelmaden i gellan di temdint n Dimecq.\n9:20 Ur i\u025be\u1e6d\u1e6del ara, yebda ye\u021bbecci\u1e5b di le\u01e7wame\u025b n wat Is\u1e5bail belli Sidna \u0190isa d Mmi-s n \u1e5aebbi.\n9:21 Wid akk i s isellen, wehmen qqa\u1e5ben : E\u025bni ma\u010d\u010di d win akken i ge\u021bqehhi\u1e5ben di temdint n Lquds wid ineddhen s yisem-agi n \u0190isa ? E\u025bni ur d-yusi ara \u0263er dagi iwakken a ten-yawi \u021bwarzen \u0263er lmuqedmin imeqqranen ?\n9:22 Lame\u025bna Ca\u025bul simmal ye\u021bnerni di liman ; isse\u025bweq at Is\u1e5bail ized\u0263en di temdint n Dimecq mi sen-d-i\u021bbeggin belli d \u0190isa i d Lmasi\u1e25.\n9:23 Mi \u0190eddan kra wussan, at Is\u1e5bail mcawa\u1e5ben akken a t-n\u0263en ;\n9:24 lame\u025bna Ca\u025bul yesla s txazabit i b\u0263an a s xedmen, am yi\u1e0d am ass \u021b\u025bassan ula \u021b-\u021biwura n temdint iwakken a t-n\u0263en.\n9:25 Yiwen yi\u1e0d, inelmaden gren-t zdaxel n uqecwal, \u1e63ubben-t-id si \u1e63\u1e63u\u1e5b i d-izzin i temdint.\n9:26 Mi i d-yusa \u0263er temdint n Lquds, Ca\u025bul inuda \u0263ef yinelmaden, lame\u025bna kukran-t akk axa\u1e6der ur uminen ara belli yu\u0263al d anelmad n Sidna \u0190isa.\n9:27 D\u0263a Barnabas yewwi-t \u0263er \u1e5b\u1e5busul, ye\u1e25ka-yasen amek i s-d-iban Sidna \u0190isa deg webrid, amek i s-d-ih\u1e0de\u1e5b d wamek i gbecce\u1e5b s yisem n Sidna \u0190isa \u025binani mbla akukru di temdint n Dimecq.\n9:28 Seg imiren ye\u021b\u1e5bu\u1e25u ye\u021b\u021bu\u0263al yid-sen di temdint n Lquds, ye\u021bbecci\u1e5b \u025binani s yisem n Sidna \u0190isa.\n9:29 Ihedde\u1e5b da\u0263en ne\u021b\u021ba d wat Is\u1e5bail i d-yusan si tmura i ge\u021bmeslayen tayunanit, ye\u021b\u021bemjadal yid-sen, me\u025bna ula d nutni \u021bqelliben a t-n\u0263en.\n9:30 Mi slan watmaten s wannect-agi, srewlen-t \u0263er temdint n Qi\u1e63arya iwakken ad i\u1e5bu\u1e25 syenna \u0263er temdint n Sars.\n9:31 Tajma\u025bt n watmaten yellan di tmura n Yahuda d Jlili akk-d Samarya tethenna, te\u021b\u021bim\u0263u\u1e5b di liman, te\u021b\u021beddu s tugdi n Sidi \u1e5aebbi, te\u021bnerni s lem\u025bawna n \u1e5a\u1e5bu\u1e25 iqedsen.\n9:32 Bu\u1e6drus i d-inudan tijma\u025bin me\u1e5b\u1e5ba, i\u1e5bu\u1e25 da\u0263en \u0263er watmaten ized\u0263en di temdint n Lud.\n9:33 Yufa dinna yiwen wergaz isem-is Inyas ; argaz-agi tmanya iseggasen ne\u021b\u021ba deg usu axa\u1e6der ikref.\n9:34 Yen\u1e6deq \u0263u\u1e5b-es Bu\u1e6drus yenna-yas : Ay Inyas ! \u0190isa Lmasi\u1e25 yesse\u1e25la- k ! Kker fell-ak tekkse\u1e0d usu-inek ! Imiren kan yekker.\n9:35 Mi t-walan ye\u1e25la, imezda\u0263 akk n temdint n Lud d wid n uza\u0263a\u1e5b n tmurt n Sarun beddlen tikli, qeblen abrid n Sidna \u0190isa.\n9:36 Di temdint n Jafa, tella yiwet n tme\u1e6d\u1e6dut isem-is Tabita ; te\u021bseddiq, te\u021b\u025bawan igellilen.\n9:37 Di lweqt-nni, ye\u0263li-d fell-as lehlak d\u0263a temmut. Ssarden-\u021b, ssersen-\u021b di t\u0263u\u1e5bfe\u021b.\n9:38 Mi slan inelmaden belli Bu\u1e6drus di temdint n Jafa i gella, yerna \u021b-\u021bamdint ur neb\u025bid ara \u0263ef temdint n Lud, cegg\u025ben \u0263u\u1e5b-es sin yergazen iwakken a t-\u1e25ellelen a d-yas \u0263u\u1e5b-sen s lem\u0263awla.\n9:39 Bu\u1e6drus ikker yedda yid-sen imiren kan. Mi gewwe\u1e0d, ssulin-t \u0263er t\u0263u\u1e5bfe\u021b-nni. Tu\u01e7\u01e7al akk \u021brunt, zzint-as-d i Bu\u1e6drus, sseknent-as-d tiqendya\u1e5b d ibe\u1e5bnyas i tze\u1e6d\u1e6d Durka uqbel a\u021b-\u021bemmet.\n9:40 Bu\u1e6drus issufe\u0263 \u0263er be\u1e5b\u1e5ba wid akk yellan dinna, yeqqim \u0263ef tgecrar, yed\u025ba \u0263er Sidi \u1e5aebbi ; izzi \u0263er lmegget-nni yenna-yas : Tabita, ekker ! D\u0263a teldi-d allen-is, twala-d Bu\u1e6drus, imiren teqqim-ed.\n9:41 Bu\u1e6drus yefka-yas afus-is iskker-i\u021b-id, d\u0263a issawel i inelmaden nni akk-d tu\u01e7\u01e7al, ufan-\u021b-id tedder.\n9:42 Imezda\u0263 me\u1e5b\u1e5ba n temdint n Jafa slan s wayen yed\u1e5ban, daymi a\u1e6das i gumnen s Sidna \u0190isa.\n9:43 Bu\u1e6drus yeqqim kra n wussan di temdint n Jafa, \u0263er yiwen wergaz isem-is Sem\u025bun, d axeddam deg u\u0263erruz ( aglim ).\n10:1 Di temdint n Qi\u1e63arya, yella yiwen wergaz iwumi qqa\u1e5ben Kurnilyus, d lqeb\u1e6dan n yiwet n terba\u025bt isem-is \u00ab tarba\u025bt n Selyan \u00bb.\n10:2 Am ne\u021b\u021ba am wexxam-is \u1e0du\u025ben Sidi \u1e5aebbi ; i\u021bseddiq i igellilen, yerna am i\u1e0d am ass yezga ide\u025b\u025bu \u0263er Sidi \u1e5aebbi.\n10:3 Yiwen wass, le\u01e7wahi n tlata n tmeddit, iwe\u1e25\u1e25a-yas-ed Sidi \u1e5aebbi, iwala yiwen lmelk ikcem-ed \u0263u\u1e5b-es yenna-yas-d : A Kurnilyus !\n10:4 Kurnilyus yerfed allen-is \u0263u\u1e5b-es, tekcem-it tugdi, i\u021bergigi, yerra-yas : D acu, a Sidi ? Lmelk yenna-yas-d : Sidi \u1e5aebbi yeqbel ta\u1e93allit-ik akk-d lew\u025badi i te\u021b\u021bake\u1e0d i ime\u0263ban ;\n10:5 Tura cegge\u025b irgazen \u0263er temdint n Jafa, \u0263er Sem\u025bun, win iwumi qqa\u1e5ben But\u1e5bus, iwakken a d-yas.\n10:6 A t-tafe\u1e0d \u0263er yiwen wergaz i gxeddmen deg u\u0263erruz, ula d ne\u021b\u021ba isem-is Sem\u025bun ; axxam-is yezga-d \u0263ef rrif n leb\u1e25e\u1e5b.\n10:7 Mi g\u1e5bu\u1e25 lmelk-nni i s-d-ihed\u1e5ben, Kurnilyus yessawel i sin seg iqeddacen-is akk-d yiwen u\u025besk\u1e5bi n terb\u025bat-is i gellan d argaz i\u1e0du\u025ben Sidi \u1e5aebbi.\n10:8 i\u1e25ka-yasen-d ayen akk yed\u1e5ban; d\u0263a icegge\u025b-iten \u0263er temdint n Jafa.\n10:9 Azekka-nni, mi q\u1e5bib ad aw\u1e0den wid i gcegge\u025b Kurnilyus \u0263er temdint n Jafa, Bu\u1e6drus yu\u0263-it l\u1e25al yuli \u0263ef ss\u1e0de\u1e25 iwakken ad id\u025bu \u0263er Sidi \u1e5aebbi, a\u021b-\u021bili d le\u01e7wahi n tnac n wass,\n10:10 ye\u1e6d\u1e6def-it la\u1e93 yeb\u0263a ad ye\u010d\u010d. Llan \u021bheggin-as-ed lqut, taswi\u025bt kan iwe\u1e25\u1e25a-yas-ed Sidi \u1e5aebbi ;\n10:11 iwala igenni yeldi, yiwet l\u1e25a\u01e7a icuban \u0263er t\u1e93e\u1e5bbit tameqqrant icudden si \u1e5beb\u025ba t\u0263emma\u1e5b, te\u021b\u1e63ubbu-d \u0263er lqa\u025ba.\n10:12 Llan deg-s lew\u1e25uc at \u1e5beb\u025ba ida\u1e5b\u1e5ben n mkul \u1e63\u1e63ifa, wid iteddun \u0263ef wu\u025bebbu\u1e0d, akk-d yef\u1e5bax n igenni s mkul \u1e63\u1e63ifa.\n10:13 Yesla i yiwen n \u1e63\u1e63ut yenna yas-d : A Bu\u1e6drus, ekker ! Ezlu te\u010d\u010de\u1e0d !\n10:14 Lame\u025bna But\u1e5bus yenna-yas : Ala a Sidi, di le\u025bme\u1e5b-iw ur \u010d\u010di\u0263 ayen i\u1e25e\u1e5bmen ne\u0263 ayen ur ne\u1e63fi.\n10:15 S\u1e63ut-nni in\u1e6deq-ed tikkelt tis snat yenna-yas-d : Ayen i\u1e25seb Sidi \u1e5aebbi d le\u1e25lal, ur k-id-i\u1e63a\u1e25 ara a t-t\u1e25esbe\u1e0d d le\u1e25\u1e5bam !\n10:16 Ayagi, iwe\u1e25\u1e25a-yas-t-id Sidi \u1e5aebbi tlata n tikkal ; imiren kan, l\u1e25a\u01e7a-nni te\u021bwarfed \u0263er igenni.\n10:17 Akken mazal Bu\u1e6drus ye\u021bxemmim \u0263ef lme\u025bna n uwe\u1e25\u1e25i-nni, ww\u1e0den-d yergazen-nni i d-icegge\u025b Kurnilyus steqsayen \u0263ef wexxam n Sem\u025bun.\n10:18 Mi d-ww\u1e0den \u0263er tewwurt, ssawlen, steqsan ma deg wexxam-nni i ge\u021b\u021bili Sem\u025bun iwumi qqa\u1e5ben But\u1e5bus.\n10:19 Mazal Bu\u1e6drus i\u021bxemmim \u0263ef wuwe\u1e25\u1e25i-nni, mi s-d-yenna \u1e5a\u1e5bu\u1e25 iqedsen : Atnaya tlata yergazen \u021bnadin fell-ak.\n10:20 Ur \u021bkukru ara, kker, ddu yid-sen axa\u1e6der d nekk i ten-id icegg\u025ben.\n10:21 But\u1e5bus i\u1e63ubb-ed \u0263u\u1e5b-sen, yenna yasen : Aql-i ! D nekk i d Bu\u1e6drus ! D acu akka i kkun-id-yewwin \u0263u\u1e5b-i ?\n10:22 Nutni rran-as : D lqeb\u1e6dan-nne\u0263 Kurnilyus, i \u0263-d icegg\u025ben \u0263u\u1e5b-ek ! D argaz \u021bcekki\u1e5ben akk wat Is\u1e5bail yerna \u1e25emmlen-t axa\u1e6der d amdan a\u1e25eqqi i\u1e0du\u025ben Sidi \u1e5aebbi. Ibedd-ed \u0263u\u1e5b-es lmelk n Sidi \u1e5aebbi yenna-yas-d a d-icegge\u025b \u0263u\u1e5b-ek, a d-tase\u1e0d \u0263er wexxam-is iwakken ad isel i wayen i tes\u025bi\u1e0d a s-t-id-tini\u1e0d.\n10:23 Bu\u1e6drus issekcem-iten ad nsen \u0263u\u1e5b-es. Azekka-nni ikker yedda yid-sen ne\u021b\u021ba d kra n watmaten n Jafa.\n10:24 Sellazekka-nni, ww\u1e0den \u0263er temdint n Qi\u1e63arya. Kurnilyus ye\u021b\u1e5ba\u01e7u ten deg wexxam-is ne\u021b\u021ba d le\u1e25bab-is akk-d imawlan-is i d-ye\u025b\u1e5be\u1e0d.\n10:25 Akken iteddu But\u1e5bus ad yekcem, immuger-it-id Kurnilyus \u0263er tewwurt n wefrag, ye\u0263li \u0263er ida\u1e5b\u1e5ben-is, yekna zdat-es iwakken ad is\u1e6der\u1e25eb yis s leqde\u1e5b ameqqran.\n10:26 Me\u025bna But\u1e5bus issekker-it-id yenna-yas : Kker fell-ak ! D amdan am ke\u010d\u010d i lli\u0263.\n10:27 Le\u1e25\u1e25un, \u021bmeslayen armi kecmen \u0263er wexxam, yufa dinna a\u1e6das n yemdanen i gennejma\u025ben.\n10:28 Bu\u1e6drus yenna-yasen : Yak te\u1e93ram d le\u1e25\u1e5bam i wemdan n wat Is\u1e5bail ad ixale\u1e0d abe\u1e5b\u1e5bani ne\u0263 ad ikcem \u0263er wexxam-is. Lame\u025bna Sidi \u1e5aebbi yessefhem-iyi-d belli ur ilaq ara a d-nini \u0263ef waleb\u025ba\u1e0d belli ur zeddig ara ne\u0263 ur i\u1e63fi ara ;\n10:29 daymi i qeble\u0263 a d-ase\u0263 mi yi-d-tessawlem. Init-iyi-d tura sebba \u0263ef wacu i d-tcegg\u025bem \u0263u\u1e5b-i.\n10:30 Kurnilyus yerra-yas : \u1e5aeb\u025ba wussan aya, le\u01e7wahi n tlata n tmeddit, lli\u0263 de\u025b\u025bu\u0263 \u0263er Sidi \u1e5aebbi deg wexxam-iw ; ataya ibedd-ed zdat-i yiwen wergaz s llebsa ye\u021bfe\u01e7\u01e7i\u01e7en,\n10:31 yenna-yi-d : \u00ab A Kurnilyus ! Sidi \u1e5aebbi yeqbel ta\u1e93allit-ik akk-d lew\u025badi i te\u021b\u021bake\u1e0d i igellilen.\n10:32 Cegge\u025b \u0263er temdint n Jafa \u0263erSem\u025bun i\u021busemman But\u1e5bus iwakken a d-yas ; a t-tafe\u1e0d \u0263er yiwen i gxeddmen igelman, ula d ne\u021b\u021ba isem-is Sem\u025bun ; axxam-is yezga-d \u0263ef rrif n leb\u1e25e\u1e5b.\n10:33 Imiren cegg\u025be\u0263-en \u0263u\u1e5b-ek ; tanemmirt-ik imi d-tusi\u1e0d. Tura ihi aql-a\u0263 akk dagi zdat Sidi \u1e5aebbi iwakken a nsel s \u0263u\u1e5b-ek, ayen akk i k-d-yume\u1e5b Sidi \u1e5aebbi a \u0263-t-id-tini\u1e0d.\n10:34 But\u1e5bus yebda ameslay yenna : Armi \u021b-\u021bura i fehme\u0263 belli \u021b-\u021bide\u021b, Sidi \u1e5aebbi ur ixeddem ara lxilaf ger yemdanen.\n10:35 Lame\u025bna di mkul l\u01e7ens, yal amdan i t-ye\u021b\u1e0du\u025bun, ixeddmen ayen yellan d l\u1e25eqq, i\u025b\u01e7eb-as i \u1e5aebbi i gellan d Illu n yemdanen me\u1e5b\u1e5ba ; teslam belli icegge\u025b-ed awal-is i wat Is\u1e5bail, ibecce\u1e5b-asen-d lehna s \u0190isa Lmasi\u1e25.\n10:37 Ahat teslam s wayen yed\u1e5ban di tmurt n Yahuda me\u1e5b\u1e5ba ; yebda-d si tmurt n Jlili seg wasmi i\u021bbecci\u1e5b Ye\u1e25ya a\u0263e\u1e6d\u1e6das, a\u0263\u1e0das n waman.\n10:38 Teslam s \u0190isa Ana\u1e63ari amek i t-i\u010d\u010du\u1e5b Sidi \u1e5aebbi s tezmert akk-d \u1e5a\u1e5bu\u1e25 iqedsen, amek i gteddu seg umkan \u0263er waye\u1e0d, ixeddem lxi\u1e5b, amek isse\u1e25lay wid akk i gemlek Cci\u1e6dan, axa\u1e6der Sidi \u1e5aebbi i\u021b\u021bili yid-es.\n10:39 Aql-a\u0263 d inigan n wayen akk i gexdem di tmurt n wat Is\u1e5bail \u021b-\u021bemdint n Lquds anda i t-n\u0263an mi t-semm\u1e5ben \u0263ef wumidag,\n10:40 me\u025bna ass wis tlata Sidi \u1e5aebbi isse\u1e25ya-t-id si ger lmegtin ; yefka-yas tazmert s wayes i d-isbeggen iman-is,\n10:41 ma\u010d\u010di i yemdanen me\u1e5b\u1e5ba me\u025bna i nukkni kan i gexta\u1e5b Sidi \u1e5aebbi a nili d inagan-is ; nukkni ye\u010d\u010dan, yeswan yid-es mi d-i\u1e25ya si ger lmegtin.\n10:42 Sidna \u0190isa iwe\u1e63\u1e63a-ya\u0263 a nbecce\u1e5b i yemdanen me\u1e5b\u1e5ba, belli d ne\u021b\u021ba i gexta\u1e5b Sidi \u1e5aebbi iwakken ad i\u1e25aseb wid yeddren akk-d wid yemmuten.\n10:43 Lenbiya akk cehden-d fell-as belli kra n win ara yamnen yis, a s-\u021bwa\u025beffun ddnubat-is s yisem-is.\n10:44 Ur\u025bad ifuk Bu\u1e6drus ameslay mi d-yers \u1e5a\u1e5bu\u1e25 iqedsen \u0263ef wid akk yellan dinna, i gesme\u1e25sisen i wawal n Sidi \u1e5aebbi.\n10:45 Wid i geddan d But\u1e5bus, yellan d at Is\u1e5bail yumnen s Lmasi\u1e25, dehcen, wehmen imi d-ye\u021b\u021bunefk \u1e5a\u1e5bu\u1e25 iqedsen ula i wid ur nelli ara n wat Is\u1e5bail.\n10:46 Axa\u1e6der sellen-asen hedd\u1e5ben yerna \u021b\u1e25emmiden Sidi \u1e5aebbi s tutlayin ur ne\u021bwassen ara. D\u0263a But\u1e5bus yenna :\n10:47 E\u025bni nezmer a n\u1e25e\u1e5b\u1e5bem seg we\u0263\u1e0das deg waman wid iwumi i d-ye\u021b\u021bunefk \u1e5a\u1e5bu\u1e25 iqedsen am nukkni ?\n10:48 D\u0263a Yefka lame\u1e5b ad \u021bwa\u0263e\u1e0dsen s yisem n Sidna \u0190isa Lmasi\u1e25 ; imiren \u1e25ellelen-t ad yeqqim yid-sen kra n wussan.\n11:1 \u1e5a\u1e5busul d watmaten yellan di tmurt n Yahuda slan belli ula d le\u01e7nas ur nelli ara n wat Is\u1e5bail qeblen awal n \u1e5aebbi.\n11:2 Mi gu\u0263al But\u1e5bus \u0263er temdint n Lquds, at Is\u1e5bail yumnen s \u0190isa Lmasi\u1e25 ur ten-i\u025b\u01e7ib ara l\u1e25al ; lummen fell-as, nnan-as :\n11:3 Amek armi tkecme\u1e0d \u0263er wexxam n wid ur ne\u1e0dhi\u1e5b ara yerna te\u010d\u010di\u1e0d yid-sen ?\n11:4 D\u0263a But\u1e5bus yebda a sen-d-i\u1e25ekku ayen akk yed\u1e5ban, yenna-yasen :\n11:5 Mi lli\u0263 di temdint n Jafa, lli\u0263 de\u025b\u025bu\u0263 \u0263er Sidi \u1e5aebbi ; taswi\u025bt kan, i\u1e5bu\u1e25 le\u025bqel-iw, iwe\u1e25\u1e25a-yi-d Sidi \u1e5aebbi , wala\u0263 ta\u1e93e\u1e5bbit tameqqrant tcudd si \u1e5beb\u025ba n t\u0263emma\u1e5b, te\u021b\u1e63ubbu-d seg igenni, tewwe\u1e0d-ed armi d \u0263u\u1e5b-i.\n11:6 Re\u1e63\u1e63a\u0263 allen-iw fell-as, wala\u0263 deg-s mkul \u1e63\u1e63ifa n lew\u1e25uc at \u1e5beb\u025ba ida\u1e5b\u1e5ben d wid iteddun \u0263ef wu\u025bebbu\u1e0d akk-d yef\u1e5bax n igenni n mkul \u1e63\u1e63enf.\n11:7 D\u0263a sli\u0263 i yiwen n \u1e63\u1e63ut i yi-d iqqa\u1e5ben : a Bu\u1e6drus ! Ekker, ezlu te\u010d\u010de\u1e0d !\n11:8 Lame\u025bna nni\u0263-as : ala a Sidi ! Le\u025bme\u1e5b yekcim \u0263er yimi-w wayen i\u1e25e\u1e5bmen ne\u0263 wayen ur ne\u1e63fi.\n11:9 Tikkelt tis snat, \u1e63\u1e63ut-nni i d-yusan seg igenni yenna-yi-d : ayen i\u1e25seb Sidi \u1e5aebbi d le\u1e25lal, ur k-id i\u1e63a\u1e25 ara a t-t\u1e25esbe\u1e0d d le\u1e25\u1e5bam !\n11:10 Ayagi yed\u1e5ba-d tlata n tikkal, d\u0263a kullec i\u021bwarfed \u0263er igenni.\n11:11 Imiren kan ww\u1e0den-d tlata yergazen \u0263er wexxam i deg lli\u0263, \u021bwacegg\u025ben-d \u0263u\u1e5b-i si temdint n Qi\u1e63arya.\n11:12 \u1e5a\u1e5bu\u1e25 iqedsen yenna-yi-d : ddu kan yid-sen ur \u021b\u021baggad ara. Wwi\u0263 yid-i se\u021b\u021ba watmaten-agi i te\u021bwalim, d\u0263a n\u1e5bu\u1e25.\n11:13 Nekcem \u0263er wexxam n Kurnilyus, ye\u1e25ka-ya\u0263-d ayen i s yenna lmelk n Sidi \u1e5aebbi i d ibedden \u0263u\u1e5b-es, mi s-yenna : cegge\u025b \u0263er temdint n Jafa a d-awin Sem\u025bun i\u021busemman But\u1e5bus,\n11:14 a k-d-yini amek ara te\u021bwasellke\u1e0d ke\u010d\u010d d wat wexxam-ik.\n11:15 Mi bdi\u0263 ameslay, \u1e5a\u1e5bu\u1e25 iqedsen yers-ed fell-asen, akken i d-yers fell-a\u0263 ass amezwaru.\n11:16 Imiren mmekta\u0263-ed awal-nni i d-yenna Sidna \u0190isa : \u00ab Ye\u1e25ya isse\u0263\u1e0das deg aman, lame\u025bna kunwi a\u021b-\u021be\u021bwa\u0263e\u1e0dsem di \u1e5a\u1e5bu\u1e25 iqedsen. \u00bb\n11:17 Ihi imi sen-d yefka Sidi \u1e5aebbi tikci am nukkni yumnen s Sidna \u0190isa Lmasi\u1e25, d acu-yi nekk iwakken ad xalfe\u0263 leb\u0263i n Sidi \u1e5aebbi ?\n11:18 Mi slan i wannect-nni, yethedden wul-nsen, \u1e25emden \u1e5aebbi nnan : A ne\u1e25med Sidi \u1e5aebbi i geldin abrid n \u021b\u021buba ula i wat le\u01e7nas ur nelli ara n wat Is\u1e5bail, iwakken ad s\u025bun tudert !\n11:19 Asmi gemmut Stifan, yekker uqehhe\u1e5b i gessemfa\u1e5baqen inelmaden \u0263er mkul amkan ; \u1e5bu\u1e25en armi \u021b-\u021bamurt n Finisya, armi \u021b-\u021bigzirt n Qub\u1e5bus \u021b-\u021bemdint n Antyuc, \u021bbecci\u1e5ben awal n \u1e5aebbi i wat Is\u1e5bail kan ;\n11:20 lame\u025bna llan gar-asen kra n yergazen n tegzirt n Qub\u1e5bus akk-d kra nni\u1e0den n temdint n Qi\u1e5bwan, usan-d \u0263er temdint n Antyuc, \u021bmeslayen i iyunaniyen, \u021bbecci\u1e5ben-asen lexba\u1e5b n lxi\u1e5b ye\u025bnan Sidna \u0190isa.\n11:21 Tazmert n Sidi \u1e5aebbi te\u021b\u021bili yid-sen ; a\u1e6das n yemdanen i gumnen beddlen tikli, teb\u025ben abrid n Sidna \u0190isa.\n11:22 Mi gewwe\u1e0d lexba\u1e5b-agi \u0263er tejma\u025bt n watmaten n temdint n Lquds, cegg\u025ben Barnabas armi d Antyuc.\n11:23 Mi gewwe\u1e0d, iwala ayen i texdem dinna \u1e5b\u1e5be\u1e25ma n Sidi \u1e5aebbi d\u0263a ye\u010d\u010du\u1e5b d lfe\u1e5b\u1e25. Yenha-ten akk iwakken ad \u1e6d\u1e6dfen seg wul di liman s\u025ban di Lmasi\u1e25.\n11:24 Axa\u1e6der Barnabas d argaz ixeddmen lxi\u1e5b, i\u010d\u010du\u1e5b d \u1e5a\u1e5bu\u1e25 iqedsen akk-d liman. S wakka, a\u1e6das n yemdanen i d-yernan \u0263er Sidna \u0190isa.\n11:25 Barnabas i\u1e5bu\u1e25 \u0263er temdint n Sars iwakken ad inadi \u0263ef Ca\u025bul.\n11:26 Mi t-yufa, yewwi-t-id yid-es \u0263er temdint n Antyuc. Di tejma\u025bt-nni, s\u025beddan aseggas kamel, xeddmen s tdukli, sselmaden a\u1e6das n yemdanen. Di temdint n Antyuc i\u021b\u021busemman inelmaden n Sidna \u0190isa tikkelt tamezwarut : \u00ab imasi\u1e25iyen \u00bb\n11:27 Deg ussan-nni, \u1e63ubben-d kra n lenbiya si temdint n Lquds \u0263er temdint n Antyuc.\n11:28 Yiwen seg-sen isem-is Agabus, ikker icar-ed s \u1e5a\u1e5bu\u1e25 iqedsen belli a d-ye\u0263li la\u1e93 d ameqqran di ddunit me\u1e5b\u1e5ba ; \u021b-\u021bide\u021b, la\u1e93-agi ye\u0263li-d di zzman n ugellid ameqqran : Kludyus\n11:29 Inelmaden n temdint n Antyuc, msefhamen belli mkul yiwen deg-sen a d-yefk ayen iwumi yezmer, iwakken ad \u025biwnen atmaten ized\u0263en di tmurt n Yahuda.\n11:30 D ayen i xedmen ; cegg\u025ben Barnabas d Ca\u025bul ad awin i imeqqranen n tejma\u025bin n tmurt n Yahuda, ayen akk i d-jem\u025ben.\n12:1 Di lweqt-nni, agellid Hi\u1e5budus yebda i\u021bqehhi\u1e5b inelmaden n tejma\u025bt yellan di temdint n Lquds.\n12:2 Yefka lame\u1e5b, ad n\u0263en s usekkin Ye\u025bqub gma-s n Yu\u1e25enna.\n12:3 Mi gwala d ayen isfe\u1e5b\u1e25en at Is\u1e5bail, yerna da\u0263en isse\u1e25bes But\u1e5bus, deg wussan n l\u025bid n leslak.\n12:4 Mi t-id-\u1e6d\u1e6dfen, rran-t \u0263er l\u1e25ebs. Isbedd-as ta\u025bessast n \u1e5beb\u025ba trebba\u025b n l\u025beske\u1e5b, mkul tarba\u025bt deg-s \u1e5beb\u025ba i\u025besk\u1e5biwen ; yeb\u0263a a t-ica\u1e5be\u025b zdat l\u0263aci me\u1e5b\u1e5ba, m'ara t\u025beddi Tfaska n yizimer.\n12:5 But\u1e5bus ihi yella di l\u1e25ebs ; ma \u021b-\u021bajma\u025bt n watmaten tezga di t\u1e93allit, tde\u025b\u025bu fell-as \u0263er Sidi \u1e5aebbi.\n12:6 I\u1e0d-nni uqbel a t-ica\u1e5be\u025b Hi\u1e5budus, But\u1e5bus i\u021bwarzen s snat snasel, yella i\u1e6d\u1e6des ger sin i\u025besk\u1e5biwen , wiya\u1e0d \u025bussen tawwurt n l\u1e25ebs.\n12:7 Taswi\u025bt kan, ataya lmelk n Sidi \u1e5aebbi i\u1e0dhe\u1e5b-as-d ; yiwet n tafat tameqqrant tce\u025bce\u025b-ed di l\u1e25ebs-nni. Lmelk-nni yennul idis n Bu\u1e6drus, issendekwal-it-id yenna-yas : \u0194iwel Kker ! Imiren kan, qqe\u1e5bsent snasel-nni \u0263lint-ed seg ifassen-is.\n12:8 Lmelk-nni yenna-yas : Els-ed arkasen-ik tbeggse\u1e0d \u0263ef yiman-ik ! Bu\u1e6drus ixdem akken i s-d-yenna, lmelk yenna-yas-d da\u0263en : Sburr-ed abe\u1e5bnus-ik tetteb\u025be\u1e0d-iyi-d !\n12:9 But\u1e5bus ikker itbe\u025b-it ; ur ifaq ara belli lmelk nni \u021b-\u021bide\u021b i\u1e0dhe\u1e5b-as-ed, inwa d awe\u1e25\u1e25i n Sidi \u1e5aebbi.\n12:10 \u0190eddan zdat t\u025bessast tamezwarut, rnan tis snat, ww\u1e0den \u0263er tewwurt n wuzzal yessufu\u0263en \u0263er temdint, teldi we\u1e25d-es ; ff\u0263en \u025beddan deg yiwet n tezniqt, imiren lmelk yexfa ger wallen n Bu\u1e6drus.\n12:11 Mi d-yufa iman-is di be\u1e5b\u1e5ba, ifaq belli \u021b-\u021bide\u021b, Sidi \u1e5aebbi icegge\u025b-d lmelk-is, isellek-it-id seg-ufus n Hi\u1e5budus akk-d lba\u1e6del i b\u0263an a s-t xedmen wat Is\u1e5bail.\n12:12 Mi gefhem l\u1e25ala i deg yella, ikker i\u1e5bu\u1e25 \u0263er wexxam n Meryem yemma-s n Yu\u1e25enna iwumi qqa\u1e5ben da\u0263en Ma\u1e5bqus, nnejma\u025ben dinna wa\u1e6das n watmaten, de\u025b\u025bun \u0263er Sidi \u1e5aebbi.\n12:13 Mi gesqe\u1e5bbeb di tewwurt n be\u1e5b\u1e5ba, tusa-d yiwet n tqeddact isem-is Rudya, tqe\u1e5b\u1e5beb \u0263er tewwurt a\u021b-\u021besme\u1e25ses ;\n12:14 mi te\u025bqel ta\u0263ect n Bu\u1e6drus, di lfe\u1e5b\u1e25-nni i deg tella ur teldi ara tawwurt, tuzzel a\u021b-\u021bissiwe\u1e0d lexba\u1e5b belli But\u1e5bus atan ibedd zdat tewwurt.\n12:15 Nnan-as : Waqila iffe\u0263-ikem le\u025bqel ! Lame\u025bna te\u1e6d\u1e6def deg wayen i d tenna.\n12:16 Nnan-as : Ahat d lexyal-is ihi ! Llan \u021bemsteqsayen, ma d But\u1e5bus mazal-it isqe\u1e5bbub-ed ; mi d-ldin tawwurt wehmen mi t-walan.\n12:17 Bu\u1e6drus iwehha-yasen s ufus-is ad ssusmen, ye\u1e25ka-yasen amek i t-id issufe\u0263 Sidi \u1e5aebbi si l\u1e25ebs, yenna yasen : S\u1e63iw\u1e0det lexba\u1e5b-agi i Ye\u025bqub d watmaten. D\u0263a i\u1e5bu\u1e25 ibeddel amkan.\n12:18 Mi guli wass, l\u025beske\u1e5b i\u025bussen But\u1e5bus tqelqen, \u021bmesteqsayen amek i geffe\u0263 si l\u1e25ebs, anwa i t-yessuf\u0263en ?\n12:19 Hi\u1e5budus icegge\u025b a t-id-qellben, me\u025bna ur t-ufin ara. Yeb\u1e25et i\u025bessasen-nni, d\u0263a yefka lame\u1e5b a ten-n\u0263en ; imiren i\u1e5bu\u1e25 si tmurt n Yahuda \u0263er tmurt n Qi\u1e63arya, anda yes\u025bedda kra n wussan.\n12:20 Hi\u1e5budus yerfa \u0263ef yimezda\u0263 n temdinin n Sur akk d Sidun, lame\u025bna nutni mcawa\u1e5ben, msefhamen akk-d Blastus yellan d lewkil-is ; d\u0263a cegg\u025ben wid ara s-issutren lehna, axa\u1e6der tamurt-nsen te\u021b\u025bic seg wayen i d-itekken si tmurt n ugellid Hi\u1e5budus.\n12:21 Yewwe\u1e0d-ed wass i deg ara d-yini Hi\u1e5budus lxe\u1e6dba i l\u0263aci. Mi d-yewwe\u1e0d wass n temlilit, Hi\u1e5budus yelsa llebsa n ugellid, yuli \u0263er wemkan n lxe\u1e6dba ad immeslay i l\u0263aci.\n12:22 Mi gebda ameslay, l\u0263aci me\u1e5b\u1e5ba qqa\u1e5ben : D \u1e5aebbi i d-i\u021bmeslayen, ma\u010d\u010di d amdan !\n12:23 Imiren kan lmelk n Sidi \u1e5aebbi yesse\u0263li-d fell-as a\u1e6dan, axa\u1e6der yeqbel a t-\u1e25esben yemdanen am \u1e5aebbi, icegge\u025b-as-d abe\u025b\u025buc i t-ye\u010d\u010dan d\u0263a yemmut ;\n12:24 ma d awal n Sidi \u1e5aebbi \u021bbecci\u1e5ben-t, yewwe\u1e0d \u0263er mkul amkan.\n12:25 Barnabas akk-d Ca\u025bul mi fukken lxedma-nsen di temdint n Lquds u\u0263alen, wwin yid-sen Yu\u1e25enna i\u021busemman Ma\u1e5bqus.\n13:1 Di tejma\u025bt n temdint n Antyuc llan lenbiya d l\u025bulama : Barnabas, Sem\u025bun i\u021busemman Aberkan, Lusyus n temdint n Qi\u1e5bwan, Manahen i d-i\u021b\u021bu\u1e5bebban d Hi\u1e5budus Antibas, akk-d Ca\u025bul.\n13:2 Yiwen wass atmaten nnejma\u025ben iwakken ad u\u1e93ummen yerna ad d\u025bun \u0263er Sidi \u1e5aebbi. \u1e5a\u1e5bu\u1e25 iqedsen yenna-yasen-d : Swejdet-iyi-d Barnabas akk-d Ca\u025bul i cc\u0263el-nni iwumi i ten-hegga\u0263.\n13:3 Mi \u1e93ummen, ssersen ifassen-nsen fell-asen, rnan d\u025ban \u0263er Sidi \u1e5aebbi, d\u0263a \u01e7\u01e7an-ten ad \u1e5bu\u1e25en.\n13:4 Barnabas akk-d Ca\u025bul i gcegge\u025b \u1e5a\u1e5bu\u1e25 iqedsen, \u1e63ubben \u0263er lme\u1e5b\u1e63a n Slukya ; syenna rekben di lbabu\u1e5b \u0263er tegzirt n Qub\u1e5bus.\n13:5 Mi ww\u1e0den \u0263er lme\u1e5b\u1e63a n Salamin, becc\u1e5ben awal n \u1e5aebbi di le\u01e7wame\u025b n wat Is\u1e5bail ; Yu\u1e25enna yella yid-sen, ye\u021b\u025bawan-iten.\n13:6 Mi zegren akk tigzirt-nni, ww\u1e0den \u0263er temdint n Bafus, mlalen-d d yiwen use\u1e25\u1e25ar n wat Is\u1e5bail i ge\u021b\u021barran iman-is d nnbi, isem-is Bar\u025bisa.\n13:7 I\u021b\u021bili \u0263er l\u1e25akem Serjyus Bulus, yellan d argaz ifehmen. Serjyus icegge\u025b \u0263er Barnabas d Ca\u025bul, axa\u1e6der yeb\u0263a ad isel i wawal n \u1e5aebbi.\n13:8 Me\u025bna Ilimas ase\u1e25\u1e25ar-nni, ( akkagi i ge\u021bwa\u1e6derjem yisem-is s tyunanit ) ye\u021bxa\u1e63am-iten, ye\u021bnadi ad isse\u025b\u1e5beq abrid n liman i l\u1e25akem-nni.\n13:9 Ca\u025bul, i\u021busemman da\u0263en Bulus, ye\u010d\u010du\u1e5ben d \u1e5a\u1e5bu\u1e25 iqedsen, issers allen-is fell-as,\n13:10 yenna-yas : A mmi-s n Cci\u1e6dan ye\u010d\u010du\u1e5ben \u021b-\u021bi\u1e25ila d lexde\u025b ! Ay a\u025bdaw n l\u1e25eqq ! Ar melmi ara tesse\u025bwaje\u1e0d akka iberdan n lewqam n Sidi \u1e5aebbi ?\n13:11 Tura atan ufus n Sidi \u1e5aebbi fell-ak : a\u021b-\u021bedder\u0263le\u1e0d, a\u021b-\u021beqqime\u1e0d kra n wussan ur te\u021bwali\u1e0d ara tafat n yi\u1e6dij. Imiren kan, Ilimas idder\u0263el, ye\u0263li-d fell-as \u1e6d\u1e6dlam ; yeqqim isferfud, i\u021bnadi anwa ara s-ye\u1e6d\u1e6dfen afus.\n13:12 L\u1e25akem-nni mi gwala ayen yed\u1e5ban, it\u025be\u01e7\u01e7eb deg wawal n Sidi \u1e5aebbi d\u0263a yumen.\n13:13 Bulus d ye\u1e5bfiqen-is zegren tigzirt n Qub\u1e5bus, ww\u1e0den \u0263er temdint n Bafus, syenna rekben di lbabu\u1e5b iwakken ad zegren \u0263er temdint n Barja yellan di tmurt n Bamfilya.\n13:14 Mi ww\u1e0den \u0263er dinna, Yu\u1e25enna ye\u01e7\u01e7a-ten yu\u0263al \u0263er temdint n Lquds ; ma d nutni kemmlen abrid-nsen si temdint n Barja, ww\u1e0den \u0263er temdint n Antyuc yellan di tmurt n Bisidya. Deg wass n weste\u025bfu, i deg \u021bnejma\u025ben wat Is\u1e5bail di le\u01e7wame\u025b, kecmen \u0263er l\u01e7ame\u025b, qqimen.\n13:15 Mi d-\u0263\u1e5ban tiktabin n Sidna Musa akk-d Lenbiya, imeqqranen n l\u01e7ame\u025b nni nnan-asen : Ay atmaten, ma yella tes\u025bam kra n wawal s wayes ara tenhum l\u0263aci-agi, \u025beddit-ed a\u021b-\u021bhed\u1e5bem !\n13:16 Bulus ikker-ed, iwehha-yasen s ufus-is, yenna : Ay at Is\u1e5bail ! A kunwi i\u1e0du\u025ben \u1e5aebbi, \u1e25esset-iyi-d !\n13:17 Sidi \u1e5aebbi Illu n wat Is\u1e5bail, yexta\u1e5b lejdud-nne\u0263, yessefti-ten mi llan di tmurt n Ma\u1e63e\u1e5b, yessufe\u0263 iten id s tezmert-is tameqqrant.\n13:18 I\u1e25uder-iten azal n \u1e5beb\u025bin iseggasen deg unez\u1e5buf n Sinay.\n13:19 Issenger seb\u025ba le\u01e7nas di tmurt n Ken\u025ban, iwakken a sen-yefk tamurt-nni i lejdud-nne\u0263.\n13:21 D\u0263a ssutren i Sidi \u1e5aebbi a sen-d-yefk agellid ; yefka-yasen-d Ca\u025bul, mmi-s n Qic n wedrum n Benyamin, yu\u0263al d agellid fell-asen azal n \u1e5beb\u025bin iseggasen.\n13:22 Lame\u025bna Sidi \u1e5aebbi yekkes le\u1e25kum i Ca\u025bul, yerra Sidna Dawed d agellid deg umkan-is. Atan wayen i d-yenna fell-as : Ufi\u0263 Dawed, mmi-s n Yassa, d argaz yellan akken i t-yeb\u0263a wul-iw, ara ixedmen leb\u0263i-w.\n13:23 Tura, si dderya n Sidna Dawed i d-ifka Sidi \u1e5aebbi amsellek i wat Is\u1e5bail akken i t-id-yew\u025bed ; amsellek-agi d \u0190isa.\n13:24 Uqbel a d-yas Sidna \u0190isa, Ye\u1e25ya ibecce\u1e5b \u021b\u021buba s we\u0263\u1e0das n waman i wegdud n wat Is\u1e5bail.\n13:25 Uqbel a t-\u1e6d\u1e6dfen \u0263er l\u1e25ebs iwakken a t-n\u0263en, Ye\u1e25ya yenna i l\u0263aci : Nekk ur lli\u0263 ara d win akken i t\u0263ilem ; lame\u025bna a d-yas deffir-i yiwen, ur uklale\u0263 ara ad fsi\u0263 ula d lexyu\u1e0d n warkasen-is.\n13:26 Ay atmaten ! Ay arraw n Sidna Ib\u1e5bahim d wid akk i\u021b\u021baggaden Sidi \u1e5aebbi ! I nukkni iwumi i d-i\u021b\u021bucegge\u025b wawal-agi n leslak.\n13:27 Axa\u1e6der imezda\u0263 n temdint n Lquds d imeqqranen-nsen, ur fhimen ara d acu-t \u0190isa-agi, ur fhimen ara da\u0263en imeslayen i d qqa\u1e5ben di tektabt n lenbiya mkul ass n weste\u025bfu ; lame\u025bna xedmen akken i gura di tira iqedsen, mi \u1e25ekmen \u0263ef Sidna \u0190isa s lmut.\n13:28 \u0194as akken ur s-d-ufin ara sebba s wayes ara \u1e25ekmen fell-as s lmut, ssutren i Bila\u1e6dus ad yefk lame\u1e5b iwakken a t-semm\u1e5ben \u0263ef llu\u1e25.\n13:29 Mi ged\u1e5ba wayen akk i\u021bwaketben fell-as, \u1e63ubben-t-id seg umidag, rran-t \u0263er u\u1e93ekka.\n13:30 Lame\u025bna Sidi \u1e5aebbi isse\u1e25ya-t-id si ger lmegtin.\n13:31 Ac\u1e25al wussan ne\u021b\u021ba i\u021bbeggin-ed iman-is i widak-nni i d-yeddan yid-es si tmurt n Jlili armi \u021b-\u021bamdint n Lquds ; tura d nutni i d inigan-is zdat n yemdanen me\u1e5b\u1e5ba.\n13:32 Daymi, nukkni tura newwi yawen-d lexba\u1e5b-agi n lxi\u1e5b. Ayen akken i gew\u025bed Sidi \u1e5aebbi i lejdud nne\u0263, yed\u1e5ba-d tura gar-ane\u0263, nukkni yellan d dderya-nsen.\n13:33 Mi d-yesse\u1e25ya Sidi \u1e5aebbi Sidna \u0190isa, akken yura di Sabur wis-sin : Ke\u010d\u010d d mmi, d nekk i k-id-yefkan \u0263er ddunit ass-a !\n13:34 Ihi Sidi \u1e5aebbi isse\u1e25ya-t-id si ger lmegtin iwakken ur irekku ara, akken i t-id-yenna di tira iqedsen : Si Dawed ara wen-d-fke\u0263 lba\u1e5bakat ye\u1e63fan, lba\u1e5bakat n tide\u021b i wen we\u025bde\u0263. +\n13:35 Yura da\u0263en : Ur te\u021b\u021ba\u01e7\u01e7a\u1e0d ara ame\u025bzuz-ik ad yerku zdaxel n u\u1e93ekka .\n13:36 Di lweqt-is, Sidna Dawed yexdem leb\u0263i n Sidi \u1e5aebbi ; mi gemmut, ye\u021bwam\u1e0del ger lejdud-is, tura l\u01e7e\u021b\u021ba-s terka deg u\u1e93ekka.\n13:37 Lame\u025bna win i d-yesse\u1e25ya Sidi \u1e5aebbi, ur t-ye\u01e7\u01e7i ara ad yerku deg u\u1e93ekka.\n13:38 Ilaq ihi a\u021b-\u021be\u1e93rem ay atmaten, belli s yisem-is i wen-d-i\u021b\u021bubecce\u1e5b le\u025bfu n ddnubat.\n13:39 Kra n win yumnen yis, a s-\u021bwasemm\u1e25en ddnubat-is, ddnubat-nni i \u0263ef ur tezmirem ara a\u021b-\u021be\u021bwasemm\u1e25em s ccari\u025ba n Musa.\n13:40 Ihi \u0263u\u1e5b-wat a d-yed\u1e5bu yid-wen wayen i d-nnan lenbiya :\n13:41 Ay imdanen ye\u010d\u010du\u1e5ben d zzux, i\u1e25eqq\u1e5ben wiya\u1e0d, dehcet, tenfum syagi ! Axa\u1e6der atan ad xedme\u0263 di zzman-nwen yiwet l\u1e25a\u01e7a s wayes ur te\u021b\u021bamnem ara ma yella \u1e25kan awen-\u021b-id.\n13:42 Mi kkren ad ff\u0263en si l\u01e7ame\u025b, \u1e25ellelen Bulus d Barnabas iwakken a d-u\u0263alen ass n ssebt i d-iteddun a d-rnun a d-mmeslayen \u0263ef wannect nni.\n13:43 Mi mfa\u1e5baqen, a\u1e6das n wat Is\u1e5bail akk-d wid i gkecmen ddin-nsen, teb\u025ben-d Bulus akk-d Barnabas i sen-i\u021bmeslayen, i ten-inehhun ad \u1e6d\u1e6dfen di \u1e5b\u1e5be\u1e25ma n Sidi \u1e5aebbi.\n13:44 Ass n weste\u025bfu nni\u1e0den, q\u1e5bib tamdint me\u1e5b\u1e5ba i d-innejma\u025ben iwakken ad slen i wawal n \u1e5aebbi.\n13:45 Mi walan annect-nni n l\u0263aci, at Is\u1e5bail usmen, sse\u025bwajen s rregmat ayen i d-yeqqa\u1e5b Bulus.\n13:46 Lame\u025bna Bulus d Barnabas nnan-asen \u025binani : I kunwi d imezwura iwumi ilaq ad i\u021b\u021bubecce\u1e5b wawal n Sidi \u1e5aebbi, me\u025bna imi ur t-teqbilem ara, t\u1e25usbem iman-nwen ur tuklalem ara tudert n dayem, ihi a nezzi \u0263er wid ur nelli ara n wat Is\u1e5bail.\n13:47 Axa\u1e6der atah wayen i d-yenna Sidi \u1e5aebbi : Sbedde\u0263-k a\u021b-\u021bili\u1e0d \u021b-\u021bafat i le\u01e7nas, a\u021b-\u021bessiw\u1e0de\u1e0d leslak alamma d ixfawen n ddunit.\n13:48 Le\u01e7nas ur nelli ara n wat Is\u1e5bail fe\u1e5b\u1e25en mi slan s wannect-agi, \u021b\u1e25emmiden awal n \u1e5aebbi ; wid akk ye\u021b\u021buheggan i tudert n dayem umnen.\n13:49 Awal n Sidi \u1e5aebbi ye\u021b\u021bubecce\u1e5b di mkul amkan n tmurt.\n13:50 Lame\u025bna at Is\u1e5bail s\u1e25e\u1e5bcen imeqqranen n temdint akk-d d kra n tilawin time\u1e5bkantiyin i gettaba\u025ben ddin n wat Is\u1e5bail ; sekkren-d aqehhe\u1e5b ameqqran \u0263ef Bulus d Barnabas, ssuf\u0263en-ten si tmurt-nsen.\n13:51 Bulus d Barnabas zwin a\u0263ebba\u1e5b n i\u1e0da\u1e5b\u1e5ben-nsen , \u1e5bu\u1e25en \u0263er temdint n Ikunyum.\n13:52 Ma d inelmaden ijdiden, \u010d\u010du\u1e5ben d lfe\u1e5b\u1e25 akk-d \u1e5a\u1e5bu\u1e25 iqedsen.\n14:1 Di temdint n Ikunyum, Bulus d Barnabas kecmen da\u0263en \u0263er l\u01e7ame\u025b n wat Is\u1e5bail, becc\u1e5ben-asen lexba\u1e5b n lxi\u1e5b ; a\u1e6das n Iyunaniyen akk-d wat Is\u1e5bail i gumnen.\n14:2 Lame\u025bna kra seg wat Is\u1e5bail i gugin ad amnen, \u025bem\u1e5ben-asen aqe\u1e5b\u1e5buy i wat n le\u01e7nas ni\u1e0den s\u1e25e\u1e5bcen-ten iwakken ad xedmen lba\u1e6del i watmaten ;\n14:3 \u0263as akken, Bulus d Barnabas \u025be\u1e6d\u1e6dlen di temdint n Ikunyum , \u021beklen \u0263ef Sidi \u1e5aebbi, hedd\u1e5ben s \u021b\u021bbut mbla akukru \u0263ef \u1e5b\u1e5be\u1e25ma-ines. Sidi \u1e5aebbi i\u021bbeggin-ed s lbe\u1e5bhanat d lica\u1e5bat belli ayen \u021bbecci\u1e5ben \u021b-\u021bide\u021b.\n14:4 Imezda\u0263 n temdint mfa\u1e5baqen : kra deg-sen teb\u025ben at Is\u1e5bail, ma d wiya\u1e0d ddan d \u1e5b\u1e5busul.\n14:5 At Is\u1e5bail d iyunaniyen akk-d imeqqranen-nsen \u025bewlen ad xedmen lba\u1e6del i \u1e5b\u1e5busul, b\u0263an a ten n\u0263en s we\u1e5bjam.\n14:6 Bulus d Barnabas mi ten-yewwe\u1e0d lexba\u1e5b, beddlen amkan \u1e5bu\u1e25en \u0263er tmurt n Likawnya, \u0263er temdinin n Listra, d Derba akk-d tudrin i sent-id yezzin ;\n14:7 \u021bbecci\u1e5ben dinna lexba\u1e5b n lxi\u1e5b n Sidi \u1e5aebbi.\n14:8 Di temdint n Listra, yella yiwen wergaz ikerfen seg-wasmi i d-ilul, di le\u025bme\u1e5b-is ur yel\u1e25i.\n14:9 Yesme\u1e25sis i wayen i d-yeqqa\u1e5b Bulus ; Bulus i\u1e5be\u1e63\u1e63a allen-is fell-as, iwala belli yes\u025ba liman iwakken ad ye\u1e25lu,\n14:10 d\u0263a yen\u1e6deq \u0263ur-es s \u1e63\u1e63ut \u025blayen yenna-yas : Ekker, bedd \u0263ef yida\u1e5b\u1e5ben-ik ! Imiren kan yekker, yebda i\u021beddu.\n14:11 Mi walan ayen yexdem Bulus, l\u0263aci n tmurt n Likawnya \u021b\u025beggi\u1e0den s tutlayt nsen : I\u1e5bebbiten \u1e63ubben-d \u0263u\u1e5b-nne\u0263 s \u1e63\u1e63ifa n yemdanen !\n14:12 Semman-as i Barnabas \u00ab SSus \u00bb, ma d Bulus \u00ab Hermas \u00bb axa\u1e6der d ne\u021b\u021ba i d-i\u021bmeslayen.\n14:13 Lmuqeddem n l\u01e7ame\u025b n SSus yellan \u0263er tewwurt n temdint, yewwi-d izgaren akk-d ije\u01e7\u01e7igen zdat tewwura n l\u01e7ame\u025b ; yeb\u0263a a ten-yezlu d asfel ne\u021b\u021ba d l\u0263aci i Bulus akk-d Barnabas.\n14:14 \u1e5a\u1e5busul mi slan s wannect nni cerrgen llebsa-nsen, uzzlen \u0263er tlemmast n l\u0263aci, \u021b\u025beggi\u1e0den :\n14:15 Ay irgazen, acu\u0263e\u1e5b i txeddmem akka ? Nukni d imdanen kan i nella am kunwi ! D lexba\u1e5b n lxi\u1e5b i wen-d newwi iwakken a\u021b-\u021be\u1e6d\u1e6dix\u1e5bem i le\u025bbada n wayen ur nes\u025bi lme\u025bna ; a\u021b-teb\u025bem abrid n Sidi \u1e5aebbi, Bab n tudert i d-ixelqen igenni d lqa\u025ba, leb\u1e25e\u1e5b d wayen akk yellan deg-s.\n14:16 \u0194as akken di zzmanat i\u025beddan ye\u01e7\u01e7a imdanen n le\u01e7nas me\u1e5b\u1e5ba ad teb\u025ben abrid i sen-yehwan ;\n14:17 ne\u021b\u021ba ye\u021bbeggin-ed iman-is s lxi\u1e5bat i gxeddem : d ne\u021b\u021ba i wen-d-i\u021b\u021baken ageffur ( lehwa ), d ne\u021b\u021ba i wen-d i\u021b\u021baken l\u0263ellat di lweqt-nsent, d ne\u021b\u021ba da\u0263en i wen-d-i\u021bakken tam\u025bict-nwen, ula d ulawen-nwen d ne\u021b\u021ba i ten issef\u1e5ba\u1e25en.\n14:18 \u0194as akken \u1e5b\u1e5busul nnan asen imeslayen-agi, s l\u1e25if ameqqran i \u1e25ebsen l\u0263aci-nni iwakken ur sen zellun ara asfel.\n14:19 D\u0263a usan-d kra seg wat Is\u1e5bail si temdinin n Antyuc akk-d Ikunyum, sekkren ccwal ger l\u0263aci, s\u1e25e\u1e5bcen-ten ad \u1e5bejmen Bulus iwakken a t-n\u0263en. Mi t-\u1e5bejmen, zzu\u0263\u1e5ben-t \u0263er be\u1e5b\u1e5ba n temdint, axa\u1e6der \u0263ilen yemmut.\n14:20 Lame\u025bna nnejma\u025ben-d \u0263u\u1e5b-es inelmaden, \u1e6d\u1e6dfen-as afus, yu\u0263al yekker yekcem \u0263er temdint. Azekka-nni, ne\u021b\u021ba d Barnabas \u1e5bu\u1e25en \u0263er temdint n Derba.\n14:21 Mi becc\u1e5ben lexba\u1e5b n lxi\u1e5b di temdint-nni n Derba, a\u1e6das inelmaden i d-yernan ; d\u0263a u\u0263alen \u0263er temdinin n Listra, Ikunyum d Antyuc\n14:22 iwakken ad s\u01e7ehden ulawen n inelmaden. Nehhun-ten ad \u1e6d\u1e6dfen di liman, qqa\u1e5ben-asen : S wa\u1e6das n le\u025btab ara nekcem \u0263er ddewla n Sidi \u1e5aebbi.\n14:23 Sbedden im\u1e0debb\u1e5ben di mkul tajma\u025bt ; mi u\u1e93amen, rnan d\u025ban \u0263er Sidi \u1e5aebbi, \u01e7\u01e7an-ten seddaw le\u025bnaya n Sidi \u1e5aebbi s wayes umnen.\n14:24 Zegren si tmurt n Bisidya, ww\u1e0den-d \u0263er tmurt n Bamfilya,\n14:25 becc\u1e5ben awal n \u1e5aebbi di temdint n Barja, imiren \u1e63ubben-d \u0263er temdint n A\u1e6dalya.\n14:26 Syenna rekben lbabu\u1e5b, u\u0263alen \u0263er temdint n Antyuc ansi i ten wekklen i \u1e5a\u1e5be\u1e25ma n Sidi \u1e5aebbi \u0263ef cce\u0263l-nni xedmen.\n14:27 Mi ww\u1e0den, snejma\u025ben-d atmaten, \u1e25kan-asen ayen akk i gexdem Sidi \u1e5aebbi yis-sen, d wamek i d-wwin \u0263er webrid n Sidi \u1e5aebbi at le\u01e7nas ur nelli ara n wat Is\u1e5bail.\n14:28 S\u025beddan a\u1e6das n wussan akk-d inelmaden.\n15:1 Kra n yemdanen i d-yusan si tmurt n Yahuda \u0263er temdint n Antyuc, b\u0263an ad slemden atmaten, qqa\u1e5ben-asen : Ma yella ur te\u1e0dhi\u1e5bem ara am akken i d-tenna ccari\u025ba n Musa, ur tezmirem ara a\u021b-\u021be\u021bwasellkem\n15:2 Bulus d Barnabas ur qbilen ara ayen i sselmaden yergazen-agi i d-yusan si tmurt n Yahuda d\u0263a yekker lxilaf ameqqran gar-asen. Cegg\u025ben Bulus d Barnabas akk-d kra seg-sen, ad alin \u0263er \u1e5b\u1e5busul akk-d imeqqranen yellan di temdint n Lquds iwakken ad msefhamen \u0263ef temsalt-agi n \u1e6d\u1e6dha\u1e5ba.\n15:3 Tajma\u025bt-nni n watmaten n temdint n Antyuc t\u025bawen-iten deg wayen ara \u1e25wi\u01e7en deg webrid-nsen ; d\u0263a \u1e5bu\u1e25en, \u025beddan si tmura n Finisya akk-d Samarya, \u1e25ekkun di mkul amkan amek umnen s Sidna \u0190isa le\u01e7nas ur nelli ara n wat Is\u1e5bail. Mi slan i wannect-agi, fe\u1e5b\u1e25en a\u1e6das watmaten.\n15:4 Mi ww\u1e0den \u0263er temdint n Lquds, tes\u1e6der\u1e25eb yis-sen tejma\u025bt n watmaten d \u1e5b\u1e5busul akk-d imeqqranen n tejma\u025bt ; nutni \u1e25kan-asen lec\u0263al imeqqranen i gexdem Sidi \u1e5aebbi gar-asen.\n15:5 Kra si terba\u025bt n ifariziyen i gumnen s Sidna \u0190isa kkren-d nnan : Ilaq a\u021b-\u1e0dehh\u1e5bem i watmaten ur nelli ara n wat Is\u1e5bail yerna a sen tam\u1e5bem ad teb\u025ben ccari\u025ba n Sidna Musa.\n15:6 D\u0263a \u1e5b\u1e5busul akk-d imeqqranen n tejma\u025bt nnejma\u025ben iwakken ad frun taluft-agi.\n15:7 Mi ket\u1e5ben deg wawal, ikker-ed But\u1e5bus yenna-yasen : Ay atmaten, te\u1e93ram belli Sidi \u1e5aebbi yexta\u1e5b-iyi-d gar-awen seg wass amezwaru iwakken ad becc\u1e5be\u0263 lexba\u1e5b n lxi\u1e5b i le\u01e7nas ur nelli ara n wat Is\u1e5bail, akken ad amnen.\n15:8 Sidi \u1e5aebbi yessnen ulawen, ibeggen-ed belli iqbel-iten imi i sen-yefka \u1e5a\u1e5bu\u1e25 iqedsen am akken i \u0263-t-id-yefka i nukkni ;\n15:9 ur yexdim ara lxilaf gar-a\u0263 d yid-sen, imi i g\u1e63effa ulawen-nsen s liman ula d nutni.\n15:10 Ihi tura acu\u0263e\u1e5b i te\u021bje\u1e5b\u1e5bibem Sidi \u1e5aebbi, mi teb\u0263am a\u021b-\u021bessersem \u0263ef tuyat n wid yumnen azaglu ur nerfid nukkni, ur rfiden lejdud-nne\u0263 ;\n15:11 lame\u025bna s \u1e5b\u1e5be\u1e25ma n Sidna \u0190isa swayes i numen, i ne\u021b\u021busellek am akken \u021b\u021busellken ula d nutni.\n15:12 Akken ma llan di tejma\u025bt ssusmen, d\u0263a sme\u1e25sisen i Bulus d Barnabas i d-i\u1e25ekkun lica\u1e5bat d le\u025b\u01e7ayeb i gexdem Sidi \u1e5aebbi yis-sen ger le\u01e7nas ur nelli ara n wat Is\u1e5bail.\n15:13 Mi kfan ameslay, in\u1e6deq Ye\u025bqub yenna-d : Ay atmaten, \u1e25esset-iyi-d : Tura\n15:14 Sem\u025bun ye\u1e25ka-d amek i d-ixta\u1e5b Sidi \u1e5aebbi si ger le\u01e7nas si tazwara, lumma ara yeddun s yisem-is.\n15:15 S wakka, yed\u1e5ba-d wayen i d nnan lenbiya am akken yura di tektabt iqedsen :\n15:16 Deg ussan-nni, a d-u\u0263ale\u0263 a s-\u025biwde\u0263 lebni i wexxam n Dawed ; axxam-nni ye\u0263lin, ad sbedde\u0263 le\u1e25yu\u1e0d-is ihudden,\n15:17 iwakken ayen i d-iqqimen seg imdanen akk-d le\u01e7nas me\u1e5b\u1e5ba i geslan s yisem-iw, ad nadin \u0263ef Sidi \u1e5aebbi.\n15:18 Akka i d-yenna Sidi \u1e5aebbi i gxeddmen lec\u0263al-agi i d-ihegga si zik.\n15:19 Ihi a wen-d-ini\u0263 : lemmer ufi\u0263, ur nrennu ara a\u0263ilif i wid ur nelli ara n wat Is\u1e5bail, i gumnen s Sidna \u0190isa.\n15:20 Lame\u025bna a sen-naru tab\u1e5ba\u021b iwakken ad \u1e6d\u1e6dix\u1e5ben \u0263ef wu\u010d\u010di n weksum immezlen i lme\u1e63nu\u025bat d ssadat. Ad ttix\u1e5ben da\u0263en i yir tikli, i wu\u010d\u010di n lmal immur\u1e0dsen akk-d tissit n idammen,\n15:21 axa\u1e6der si zzman aqdim llan yemdanen i\u021bbecci\u1e5ben ccari\u025ba n Musa di mkul tamdint, yerna mkul ass n weste\u025bfu qqa\u1e5ben taktabt-is di le\u01e7wame\u025b n wat Is\u1e5bail.\n15:22 Ihi \u1e5b\u1e5busul, imeqqranen n tejma\u025bt akk-d watmaten me\u1e5b\u1e5ba walan belli d \u1e5b\u1e5bay yelhan ma yella xta\u1e5ben-d kra n watmaten si gar-asen, iwakken a ten-cegg\u025ben \u0263er temdint n Antyuc nutni d Bulus akk-d Barnabas. Xta\u1e5ben Yuda, i\u021busemman Barsaba akk-d Silas ; d irgazen i \u021bqada\u1e5ben watmaten.\n15:23 Fkan asen tab\u1e5ba\u021b i deg uran : Ay atmaten ur nelli ara n wat Is\u1e5bail, i gzed\u0263en di temdinin n Antyuc, n Surya akk-d Silisya, \u021bsellimen-d fell-awen \u1e5b\u1e5busul akk-d imeqqranen n tejma\u025bt akk-d watmaten n temdint n Lquds.\n15:24 Nesla belli kra n watmaten-nne\u0263 \u1e5bu\u1e25en-d \u0263u\u1e5b-wen mbla ma nefka-yasen lame\u1e5b, rwin-kkun s yimeslayen-nsen, skecmen-awen ccekk.\n15:25 Tura mi nemcawa\u1e5b, neqsed s yiwen \u1e5b\u1e5bay a d-nexti\u1e5b kra n watmaten, ara wen-ncegge\u025b nutni d watmaten nne\u0263 e\u025bzizen Bulus d Barnabas ;\n15:26 nutni i gsebblen tudert nsen \u0263ef yisem n Sidna \u0190isa Lmasi\u1e25. +\n15:27 Ncegge\u025b-awen ihi Yuda akk-d Silas ara wen-d-ye\u1e63\u1e63iw\u1e0den s yiman nsen imeslayen-agi :\n15:28 \u1e5a\u1e5bu\u1e25 iqedsen akk-d nukkni, nwala d ayen yelhan m'ur n\u1e25ettem ara fell-awen ayen nni\u1e0den sennig wayen ilaqen,\n15:29 ye\u025bni a\u021b-\u021bettix\u1e5bem i wu\u010d\u010di n iseflawen yemmezlen i lme\u1e63nu\u025bat, i tissit n idammen, i lmal yemmu\u1e5bdsen d zzna. D ayen yelhan ma t\u1e25udrem iman-nwen \u0263ef wannect-agi. Qqimet di lehna.\n15:30 Imiren wid-nni ye\u021bwaxta\u1e5ben \u01e7\u01e7an atmaten di lehna, \u1e5bu\u1e25en \u0263er temdint n Antyuc. Dinna jem\u025ben-d atmaten, fkan-asen tab\u1e5ba\u021b-nni.\n15:31 Mi \u021b-id-\u0263\u1e5ban, fe\u1e5b\u1e25en a\u1e6das s lew\u1e63ayat yellan deg-s d yimeslayen i ten-is\u01e7ehden.\n15:32 Yuda d Silas iwumi ye\u021b\u021bunefk a d-\u021bxebbi\u1e5ben s \u0263u\u1e5b Sidi \u1e5aebbi, nhan atmaten-nni, s\u01e7ehden-ten s wa\u1e6das n yimeslayen.\n15:33 Mi s\u025beddan dinna kra n wussan, serr\u1e25en-asen watmaten ad u\u0263alen di lehna \u0263er wid i ten-id-icegg\u025ben ;\n15:34 ma d Silas i\u025b\u01e7eb-as l\u1e25al yeb\u0263a ad yernu kra n wussan dinna.\n15:35 Bulus d Barnabas qqimen di temdint-agi n Antyuc , sselmaden, \u021bbecci\u1e5ben awal n Sidi \u1e5aebbi nutni d wa\u1e6das n watmaten nni\u1e0den.\n15:36 Mi \u025beddan kra n wussan, Bulus yenna-yas i Barnabas : Eyya a nu\u0263al a nesteqsi \u0263ef watmaten yellan di temdinin anda nbecce\u1e5b awal n Sidi \u1e5aebbi, iwakken a n\u1e93er amek i \u021bilin.\n15:37 Barnabas yeb\u0263a ad yawi yid-sen Yu\u1e25enna i\u021busemman Ma\u1e5bqus,\n15:38 lame\u025bna Bulus ur yeqbil ara ad awin yid-sen win akken i ten ye\u01e7\u01e7an di tmurt n Bamfilya, yerna ur ten-i\u025bawen ara di cc\u0263el-nsen.\n15:39 Ikker yiwen lxilaf gar-asen armi mfa\u1e5baqen. Barnabas yewwi yid-es Ma\u1e5bqus, rekben di lbabu\u1e5b \u0263er tegzirt n Qub\u1e5bus,\n15:40 ma d Bulus yexta\u1e5b Silas ad iddu yid-es. Atmaten n tejma\u025bt wekklen-t i \u1e5b\u1e5be\u1e25ma n Sidi \u1e5aebbi, d\u0263a i\u1e5bu\u1e25.\n15:41 Yekka-d ne\u021b\u021ba d Silas si tmura n Surya akk-d Silisya, isse\u01e7had tijma\u025bin n watmaten.\n16:1 Bulus d Silas ww\u1e0den \u0263er temdinin n Derba d Listra ; ufan dinna yiwen unelmad isem-is Timuti, baba-s d ayunani, ma d yemma-s n wat Is\u1e5bail, ne\u021b\u021bat da\u0263en tumen s Lmasi\u1e25.\n16:2 Atmaten yellan di temdint n Listra \u021b-\u021bemdint n Ikunyum \u1e25emmlen-t yerna \u021bcekki\u1e5ben-t.\n16:3 Bulus yeb\u0263a ad yawi yid-es Timuti, daymi i s-i\u1e0dehhe\u1e5b \u0263ef ddemma n wat Is\u1e5bail yellan dinna, axa\u1e6der \u1e93ran akk belli baba-s d ayunani.\n16:4 Di yal tamdint i deg \u025beddan, \u021bxebbi\u1e5ben atmaten s lew\u1e63ayat yellan di teb\u1e5ba\u021b i d-fkan \u1e5b\u1e5busul d imeqqranen n temdint n Lquds, nehhun-ten ad teb\u025ben lew\u1e63ayat-agi.\n16:5 Tijma\u025bin n watmaten \u021bim\u0263u\u1e5bent di liman, le\u1e25sab n widak yumnen s Lmasi\u1e25 ye\u021bnerni kull ass.\n16:6 \u1e5a\u1e5bu\u1e25 iqedsen ur sen-iserre\u1e25 ara ad \u1e5bu\u1e25en ad becc\u1e5ben awal n Sidi \u1e5aebbi di tmurt n Asya, d\u0263a zegren timura n Frijya d Galasya.\n16:7 Mi ww\u1e0den \u0263er tmurt n Misya, \u025be\u1e5bden ad \u1e5bu\u1e25en \u0263er tmurt n Bitinya ; lame\u025bna \u1e5a\u1e5bu\u1e25 n Sidna \u0190isa ur sen-iserre\u1e25 ara da\u0263en ad \u1e5bu\u1e25en \u0263er dinna.\n16:8 \u0190eddan si tmurt n Misya, \u1e63ubben \u0263er temdint n Truwas.\n16:9 Deg i\u1e0d, iwe\u1e25\u1e25a-yas-ed \u1e5aebbi i Bulus, iwala yiwen umezda\u0263 n Masidunya ibedd-ed \u0263u\u1e5b-es, i\u021b\u1e25ellil-it ad i\u025beddi \u0263u\u1e5b-sen \u0263er tmurt n Masidunya a ten-i\u025biwen.\n16:10 Mbe\u025bd ayen i s-d-iwe\u1e25\u1e25a Sidi \u1e5aebbi i Bulus, nennuda amek ara n\u1e5bu\u1e25 \u0263er tmurt n Masidunya, axa\u1e6der nefhem belli d Sidi \u1e5aebbi i \u0263-d yessawlen iwakken a nbecce\u1e5b Lexbe\u1e5b n lxi\u1e5b di tmurt-nni.\n16:11 Mi nerkeb di lbabu\u1e5b si temdint n Truwas, n\u1e5bu\u1e25 qbala \u0263er tegzirt n Samutras. Azekka-nni nkemmel \u0263er temdint n Nabulis.\n16:12 Syenna n\u1e5bu\u1e25 \u0263er temdint n Filibus, illan \u021bamdint tamezwarut n Masidunya i geste\u025bme\u1e5b \u1e5auman ; nes\u025bedda kra n wussan dinna.\n16:13 Ass n weste\u025bfu, neffe\u0263 si temdint n\u1e5bu\u1e25 \u0263er rrif n wasif, n\u0263il a naf amkan anda \u021bnejma\u025ben i t\u1e93allit. Nufa dinna kra n tilawin nnejma\u025bent, neqqim iwakken a nemmeslay yid sent.\n16:14 Tella dinna yiwet n tme\u1e6d\u1e6dut isem-is Lidya n temdint n Tyatir, teznuzu lke\u021b\u021ban azegga\u0263 \u0263layen ; \u021b-\u021bame\u1e6d\u1e6dut i\u1e0du\u025ben Sidi \u1e5aebbi. M'akken i d-tesme\u1e25sis, Sidi \u1e5aebbi yeldi-yas ul-is iwakken a\u021b-\u021berr ddehn is \u0263er wayen i d-yeqqa\u1e5b Bulus.\n16:15 Mi te\u021bwa\u0263\u1e0des deg waman ne\u021b\u021bat d wat wexxam-is, te\u025b\u1e5be\u1e0d-a\u0263, tenna-d : ma twalam umne\u0263 seg ul-iw s Sidi \u1e5aebbi, eyyaw a\u021b-\u021bes\u025beddim kra n wussan deg wexxam-iw. D\u0263a te\u1e25re\u1e63-a\u0263 iwakken a nekcem.\n16:16 Yiwen wass mi nteddu \u0263er wemkan-nni n t\u1e93allit, temmuger-a\u0263-d yiwet n tqeddact i\u021bwamelken, \u021b- \u021baderwict, te\u021b\u021bawi-d a\u1e6das n lfayda i yem\u025bellmen i \u0263ef txeddem.\n16:17 Tettaba\u025b-a\u0263-d nekk d Bulus, te\u021b\u025beggi\u1e0d teqqa\u1e5b : Imdanen-agi d iqeddacen n \u1e5aebbi \u025blayen, \u021bbecci\u1e5ben-awen abrid n leslak.\n16:18 Ac\u1e25al n wussan ne\u021b\u021bat tettaba\u025b deg-nne\u0263, yu\u0263al Bulus ye\u025bya deg-s, yezzi \u0263u\u1e5b-es, yenna i u\u1e5bu\u1e25ani i \u021b-imelken : Um\u1e5be\u0263-k s yisem n \u0190isa Lmasi\u1e25, effe\u0263 si tme\u1e6d\u1e6dut-agi ! Imiren kan, yeffe\u0263-it u\u1e5bu\u1e25ani-nni.\n16:19 Im\u025bellmen-is mi walan dayen ur sen-d-te\u021b\u021bawi ara lfayda, \u1e6d\u1e6dfen Bulus d Silas, zzu\u0263\u1e5ben-ten \u0263er wezniq n temdint anda \u021bnejma\u025ben l\u0263aci zdat l\u1e25ukkam.\n16:20 Wwin-ten \u0263er l\u1e25akem n tmurt n \u1e5auman nnan : Imdanen-agi-nni n wat Is\u1e5bail cewwlen tamdint-nne\u0263.\n16:21 Sselmaden l\u025baddat ur nezmir a tent-neqbel ne\u0263 a tent-netbe\u025b nukkni yellan d i\u1e5bumaniyen.\n16:22 L\u0263aci kkren-d \u0263u\u1e5b-sen s le\u025bya\u1e0d, d\u0263a l\u1e25ukkam n \u1e5auman um\u1e5ben a sen-cerrgen llebsa-nsen, a ten wwten s ujelkka\u1e0d ( s ucelli\u1e6d ).\n16:23 Mi sen-sse\u1e5bwan tiyitiwin, rran-ten \u0263er l\u1e25ebs, um\u1e5ben i w\u025bessas n l\u1e25ebs a ten-i\u025bas akken ilaq.\n16:24 Akken i t-yewwe\u1e0d lame\u1e5b-agi, a\u025bessas-nni yerra-ten \u0263er l\u1e25ebs yellan seddaw tmurt, yerna yurez-asen ida\u1e5b\u1e5ben s snasel.\n16:25 Di \u021bna\u1e63fa n yi\u1e0d, Bulus d Silas de\u025b\u025bun \u0263er Sidi \u1e5aebbi, cennun, \u021b\u1e25emmiden-t, ime\u1e25bas nni\u1e0den sme\u1e25sisen-asen.\n16:26 Taswi\u025bt kan, tezlez tmurt armi yenhezz ula d lsas n l\u1e25ebs ; imiren kan ldint tewwura n l\u1e25ebs, snasel icudden ime\u1e25bas me\u1e5b\u1e5ba qel\u025bent-ed.\n16:27 A\u025bessas-nni ikker-ed ; mi gwala tiwwura n l\u1e25ebs ldint, ijbed-ed asekkin is iwakken ad ine\u0263 iman-is ; yenwa rewlen ime\u1e25bas-nni.\n16:28 Lame\u025bna Bulus i\u025begge\u1e0d s l\u01e7ehd is, yenna-yas : E\u1e25bes ! \u1e24ader a\u021b-\u021ben\u0263e\u1e0d iman ik ! Aql-a\u0263 akk dagi.\n16:29 D\u0263a a\u025bessas yume\u1e5b a s-d-ce\u025blen tafat, yuzzel \u0263er daxel n l\u1e25ebs ; ye\u0263li \u0263er ida\u1e5b\u1e5ben n Bulus d Silas, i\u021bergigi.\n16:30 Yessufe\u0263-iten-id si l\u1e25ebs, yenna yasen : A ssyad-i, d acu i glaqen a t xedme\u0263 iwakken ad \u021b\u021busellke\u0263 ?\n16:31 Rran-as : Amen s Sidna \u0190isa, a\u021b-\u021be\u021busellke\u1e0d s ke\u010d\u010d s wat wexxam-ik.\n16:32 D\u0263a becc\u1e5ben-as awal n Sidi \u1e5aebbi i ne\u021b\u021ba d wat wexxam-is me\u1e5b\u1e5ba.\n16:33 Deg yi\u1e0d-nni kan, a\u025bessas-nni yewwi-ten anda ara sen-yessired lejru\u1e25-nsen ; imiren-nni s\u0263e\u1e0dsen-t deg aman s ne\u021b\u021ba s twacult-is.\n16:34 Yu\u0263al ne\u021b\u021ba d Bulus d Silas \u0263er wexxam-is, issers-asen-d ad \u010d\u010den. Yef\u1e5be\u1e25 a\u1e6das ne\u021b\u021ba d wat wexxam-is imi umnen s Sidi \u1e5aebbi.\n16:35 Akken yuli wass, l\u1e25ukkam n \u1e5auman cegg\u025ben wid ara yinin i u\u025bessas n l\u1e25ebs : Serre\u1e25-asen i ime\u1e25bas-nni !\n16:36 A\u025bessas ixebbe\u1e5b Bulus yenna yas : L\u1e25ukkam um\u1e5ben-iyi-d a wen serr\u1e25e\u0263 ; tura tzemrem a\u021b-\u021bef\u0263em, \u1e5bu\u1e25et di lehna !\n16:37 Lame\u025bna Bulus yenna-yas : Amek ! Ewten-a\u0263 zdat medden s ujelka\u1e0d ( s ucelli\u1e0d ) mbla ma n\u025bedda di cc\u1e5be\u025b nukni yellan d i\u1e5bumaniyen yerna skecmen-a\u0263 \u0263er l\u1e25ebs tura b\u0263an a \u0263-ssuf\u0263en s tuffra ? Awah ! A d-asen nutni s yiman-nsen a \u0263-serr\u1e25en.\n16:38 Wid-nni i d-i\u021b\u021bucegg\u025ben ssaw\u1e0den imeslayen-nni i l\u1e25ukkam n \u1e5auman. L\u1e25ukkam ikcem-iten lxuf mi slan belli Bulus d Silas d i\u1e5bumaniyen i llan. Usan-d \u1e0delben deg-sen ssma\u1e25, serr\u1e25en-asen si l\u1e25ebs,\n16:39 \u1e25ellelen-ten ad ff\u0263en si temdint.\n16:40 Mi ff\u0263en si l\u1e25ebs, Bulus d Silas \u1e5bu\u1e25en \u0263er wexxam n Lidya, anda nnejma\u025ben d watmaten, nhan-ten, imiren \u1e5bu\u1e25en.\n17:1 Bulus d Silas \u025beddan si temdinin n Anfibulis akk-d Abulunis, ww\u1e0den \u0263er temdint n Ti\u1e63alunik anda s\u025ban wat Is\u1e5bail l\u01e7ame\u025b.\n17:2 Akken yennum, Bulus yekcem \u0263er l\u01e7ame\u025b ; tlata smanat, mkul ass n weste\u025bfu, i\u021bmeslay yid-sen \u0263ef wawal n \u1e5aebbi.\n17:3 Issefham-asen, i\u021bbeggin-asen-d di Tira belli Lmasi\u1e25 ilaq ad ye\u025bteb yerna a d-ye\u1e25yu si ger lmegtin, iqqa\u1e5b-asen : \u0190isa-yagi \u0263ef i wen-d-hed\u1e5be\u0263, d ne\u021b\u021ba i d Lmasi\u1e25.\n17:4 Kra deg-sen umnen ; a\u1e6das n iyunaniyen i\u1e0du\u025ben Sidi \u1e5aebbi d wa\u1e6das n tilawin n la\u1e63el i geddan da\u0263en d Bulus akk-d Silas.\n17:5 Lame\u025bna at Is\u1e5bail usmen, d\u0263a wwin yid-sen kra n yergazen n diri i\u021bmen\u1e6da\u1e5ben deg iberdan, sekkren ccwal ger l\u0263aci, cewwlen tamdint me\u1e5b\u1e5ba, ze\u1e0dmen \u0263er wexxam n Yazun, qellben \u0263ef Bulus d Silas iwakken a ten-ca\u1e5b\u025ben zdat l\u0263aci.\n17:6 Imi ur ten-ufin ara, zu\u0263\u1e5ben-d Yazun d kra n watmaten \u0263er l\u1e25ukkam n temdint, bdan \u021b\u025beggi\u1e0den : D irgazen-agi i gerwin ddunit, atan usan-d armi d \u0263u\u1e5b-nne\u0263,\n17:7 Yazun is\u1e6der\u1e25eb yis-sen. Xulfen lumu\u1e5b n Qay\u1e63er, qqa\u1e5ben belli yella ugellid nni\u1e0den i\u021busemman \u0190isa.\n17:8 S yimeslayen-agi, s\u1e25e\u1e5bcen l\u0263aci akk-d l\u1e25akem n temdint.\n17:9 Ugin a sen-serr\u1e25en i Yazun d watmaten nni\u1e0den armi xell\u1e63en lex\u1e6diya.\n17:10 Mi d-yewwe\u1e0d yi\u1e0d, atmaten srewlen Bulus d Silas \u0263er temdint n Biri. Mi ww\u1e0den, kecmen \u0263er l\u01e7ame\u025b n wat Is\u1e5bail.\n17:11 L\u0263aci n dinna s\u1e6der\u1e25ben yis-sen axi\u1e5b n wid n temdint n Ti\u1e63alunik , qeblen awal n \u1e5aebbi s wul ye\u1e63fan. Kull ass \u021bnadin di Tira iqedsen iwakken ad walin ma yella \u021b-\u021bide\u021b, yella di tira wayen i d-qqa\u1e5ben.\n17:12 A\u1e6das seg-sen i gumnen ; ger iyunaniyen, a\u1e6das n tilawin n la\u1e63el d yergazen nni\u1e0den i gumnen da\u0263en.\n17:13 Lame\u025bna mi slan wat Is\u1e5bail n Ti\u1e63alunik belli Bulus i\u021bbecci\u1e5b awal n \u1e5aebbi di temdint n Biri, uzzlen-d ad rwin l\u0263aci, a ten-cewwlen.\n17:14 D\u0263a atmaten srewlen imiren Bulus \u0263er l\u01e7iha n leb\u1e25e\u1e5b, ma d Silas d Timuti qqimen di temdint n Biri.\n17:15 Widak yewwin Bulus, ssaw\u1e0den-t armi \u021b-\u021bamdint n Atinya, syenna u\u0263alen-d \u0263er temdint n Biri. Iwe\u1e63\u1e63a-ten Bulus ad inin i Silas d Timuti, ur \u021b\u025be\u1e6d\u1e6dilen ara a t-le\u1e25qen.\n17:16 M'akken i ge\u021b\u1e5ba\u01e7u Silas akk-d Timuti di temdint n Atinya, Bulus i\u0263a\u1e0d-it l\u1e25al mi gwala tamdint-nni te\u010d\u010du\u1e5b d lme\u1e63nu\u025bat i \u021b\u025bebbiden imezda\u0263-is.\n17:17 Di l\u01e7ame\u025b, yebda i\u021bmeslay d wat Is\u1e5bail akk-d iyunaniyen i\u1e0du\u025ben Sidi \u1e5aebbi. I\u021bmeslay da\u0263en akk-d wid i d-i\u021bemlili kull ass di tejma\u025bt n temdint.\n17:18 Kra n l\u025bulama ye\u021bfelsifen, ye\u025bni wid i\u021bekkin di tejma\u025bt n Ibikur akk-d Stuwis, bdan \u021bmeslayen yid-es. Kra qqa\u1e5ben : D acu i geb\u0263a ad yini bu lehdu\u1e5b agi ? Wiya\u1e0d qqa\u1e5ben : Waqila ye\u021bbecci\u1e5b i\u1e5bebbiten ibe\u1e5b\u1e5baniyen ! Axa\u1e6der Bulus yella i\u021bbecci\u1e5b-asen \u0263ef Sidna \u0190isa akk-d \u1e25eggu n lmegtin.\n17:19 D\u0263a wwin-t yid-sen \u0263eryiwen wemkan n cc\u1e5be\u025b n temdint-nni iwumi qqa\u1e5ben Laryufaj, nnan-as : Nezmer a n\u1e93er d acu-t uselmed agi ajdid i \u0263-d-tewwi\u1e0d ?\n17:20 Axa\u1e6der nesla-yak te\u021bmeslaye\u1e0d-ed \u0263ef temsalin yessewhamen. Neb\u0263a a nissin lme\u025bna-nsent.\n17:21 Imezda\u0263 n temdint n Atinya akk-d ibe\u1e5b\u1e5baniyen i gzed\u0263en dinna, \u1e25emmlen ad s\u025beddin lweqt-nsen anagar deg umeslay d usme\u1e25ses i lexba\u1e5bat ijdiden i d-i\u021beff\u0263en.\n17:22 Bulus ibedd di tlemmast n Laryufaj yenna : Ay irgazen n temdint n Atinya, \u1e93ri\u0263-kkun t\u1e93ew\u1e5bem yerna tettaba\u025bem ddin di mkul \u1e25a\u01e7a;\n17:23 axa\u1e6der \u1e25ewwse\u0263 akk tamdint-nwen, wala\u0263 lme\u1e63nu\u025bat akk i t\u025bebdem ; ufi\u0263 da\u0263en yiwen n idebder anda yura : \u00ab I \u1e5aebbi-nni ur ne\u021bwassen ara. \u00bb Win akken i t\u025bebbdem mbla ma tessnem-t, d ne\u021b\u021ba i wen-\u021bbecci\u1e5be\u0263.\n17:24 D ne\u021b\u021ba i d-ixelqen ddunit d wayen yellan deg-s, d Bab igenwan d lqa\u025ba, ur yezdi\u0263 ara di le\u01e7wame\u025b i bnan ifassen n yemdanen.\n17:25 Ur ye\u1e25wa\u01e7 ara ad xedmen fell-as yemdanen am akken yella wayen i t-ixu\u1e63\u1e63en, ne\u021b\u021ba i d-i\u021b\u021baken i yemdanen me\u1e5b\u1e5ba tudert, \u1e5b\u1e5bu\u1e25 d wayen akk yellan.\n17:26 Seg yiwen wemdan i d-ixleq akk le\u01e7nas, ye\u025bme\u1e5b yis-sen ddunit ; yefka-yasen lewqat i tudert-nsen akk-d tilisa i tmura-nsen.\n17:27 Sidi \u1e5aebbi ixdem annect-agi me\u1e5b\u1e5ba iwakken ad nadin fell-as ; ahat a t-afen s usferfed, ne\u021b\u021ba ur neb\u025bid ara \u0263ef mkul yiwen deg-nne\u0263.\n17:28 Yis i nes\u025ba tudert, i nteddu, i ne\u021b\u021bili ; d ayen i d-nnan da\u0263en kra seg imedyazen-nwen : \u00ab ula d nukkni, darraw-is ! \u00bb\n17:29 Ihi imi nella d arraw n Sidi \u1e5aebbi, ur ilaq ara a n\u0263il belli \u1e5aebbi ye\u021b\u021bemcabi \u0263er lme\u1e63nu\u025b n ddheb, ne\u0263 n lfe\u1e6d\u1e6da, ne\u0263 n wez\u1e5bu ye\u021bwanej\u1e5ben s ufus \u021b-\u021bmusni n wemdan.\n17:30 Sidi \u1e5aebbi isemme\u1e25-asen i yemdanen asmi akken ur t-ssinen ara; tura issawel-asen-d akk di mkul amkan iwakken ad beddlen tikli, a d-u\u0263alen \u0263u\u1e5b-es.\n17:31 Axa\u1e6der yexta\u1e5b ass i deg ara i\u1e25aseb imdanen s l\u1e25eqq, s wemdan i gexta\u1e5b yerna yefka-ya\u0263-d akk \u021b\u021bbut mi t-id-isse\u1e25ya si ger lmegtin.\n17:32 Mi slan ihedde\u1e5b-ed \u0263ef \u1e25eggu n lmegtin, kra \u021bmesxi\u1e5ben, wiya\u1e0d qqa\u1e5ben-as : A k-n\u1e25ess \u0263ef wannect-agi tikkelt nni\u1e0den...\n17:33 Imiren, Bulus i\u1e5bu\u1e25 ye\u01e7\u01e7a-ten.\n17:34 \u0194as akken a\u1e6das i ge\u021bmesxi\u1e5ben, llan kra deg-sen umnen, ddan yid-es . Yella gar-asen Dunisus i g\u021bekkin di tejma\u025bt n Laryufaj, yiwet n tme\u1e6d\u1e6dut isem-is Damaris akk-d wiya\u1e0d.\n18:1 Bulus i\u1e5bu\u1e25 si temdint n Atinya \u0263er temdint n Kurintus.\n18:2 Yufa dinna yiwen wergaz n wat Is\u1e5bail, isem-is Akilas, la\u1e63el-is n tmurt n Tqen\u1e6dert ; yewwe\u1e0d-ed deg ussan-nni kan si tmurt n Selyan ne\u021b\u021ba \u021b-\u021bme\u1e6d\u1e6dut-is Brisila, axa\u1e6der Qay\u1e63er Kludyus yume\u1e5b i wat Is\u1e5bail me\u1e5b\u1e5ba ad ff\u0263en si temdint n \u1e5auma.\n18:3 Imi Brisila d Akilas xeddmen iqi\u1e0dunen am Bulus, yeqqim \u0263u\u1e5b-sen xeddmen s tdukli.\n18:4 Mkul ass n weste\u025bfu, Bulus i\u021bmeslay di l\u01e7ame\u025b, i\u021bbecci\u1e5b i wat Is\u1e5bail akk-d iyunaniyen ttaba\u025ben ddin n wat Is\u1e5bail, iwakken ad amnen.\n18:5 Mi d-usan Silas d Timuti si tmurt n Masidunya, Bulus yu\u0263al i\u021b\u021belhay kan d ubecce\u1e5b n wawal n \u1e5aebbi, i\u021bbeggin ed i wat Is\u1e5bail belli d \u0190isa i d Lmasi\u1e25.\n18:6 Imi i t-xulfen yerna regmen-t, Bulus yezwi icu\u1e0da\u1e0d-is, yenna-yasen : Cfut ur teqbilem ara leslak-agi, ddnub i yirawen-nwen ! Nekk ayen i yi-d-yewwi l\u1e25al xedme\u0263-t. Ihi sya d asawen, ad \u1e5bu\u1e25e\u0263 \u0263er wat le\u01e7nas ur nelli ara seg warraw n wat Is\u1e5bail.\n18:7 Mi d-iffe\u0263 syenna, ikcem \u0263er wexxam n Tit Justus, i gellan d amdan i\u1e0du\u025ben Sidi \u1e5aebbi ; axxam-is yezga-d tama n l\u01e7ame\u025b n wat Is\u1e5bail.\n18:8 Krisbus, ameqqran n l\u01e7ame\u025b yumen s \u0190isa Lmasi\u1e25 ne\u021b\u021ba d wat wexxam-is me\u1e5b\u1e5ba ; a\u1e6das n wat kurintus da\u0263en i gumnen mi slan s wayen i d-yenna Bulus, d\u0263a \u021bwa\u0263e\u1e0dsen deg waman.\n18:9 Yiwen n yi\u1e0d, Sidi \u1e5aebbi iwe\u1e25\u1e25a yas-ed di targit i Bulus yenna-yas-d : Ur \u021b\u021baggad ara, kemmel ehde\u1e5b ur \u021bsusum ara !\n18:10 Axa\u1e6der aqli-n yid-ek ! Yiwen ur izmir ad issers afus-is fell-ak iwakken a k-yexdem cce\u1e5b, axa\u1e6der a\u1e6das i gellan d ayla-w di temdint-agi.\n18:11 Bulus yeqqim aseggas d se\u021b\u021ba wagguren ger wat kurintus, isselmad asen awal n Sidi \u1e5aebbi.\n18:12 Di lweqt-nni i deg yella Galyun d l\u1e25akem \u0263ef tmurt n Lakaya, at Is\u1e5bail msefhamen, ddukklen \u0263ef Bulus, wwin-t \u0263er wexxam n cc\u1e5be\u025b, nnan :\n18:13 Argaz-agi issama\u1e5b l\u0263aci ad \u025bebden \u1e5aebbi s webrid ixulfen ccari\u025ba.\n18:14 Mi gekker Bulus ad ihde\u1e5b, in\u1e6deq Galyun yenna i wat Is\u1e5bail : Lemmer d lba\u1e6del ne\u0263 d ayen n diri i gexdem, zemre\u0263 a wen \u1e25esse\u0263 am akken yella di lqanun ay at Is\u1e5bail ;\n18:15 me\u025bna imi d amjadel \u0263ef yimeslayen, \u0263ef yismawen akk-d ccari\u025ba n Musa, ayagi d cc\u0263el-nwen ! Ur b\u0263i\u0263 ara ad \u1e25ekme\u0263 \u0263ef wannect-a.\n18:16 Imiren issufe\u0263-iten-id syenna.\n18:17 D\u0263a l\u0263aci mm\u0263en \u0263ef Sustin, ameqqran n l\u01e7ame\u025b n wat Is\u1e5bail, ewten-t zdat wexxam n cc\u1e5be\u025b , Galyun ur s-tewqi\u025b ara lme\u025bna.\n18:18 Bulus yerna a\u1e6das n wussan di temdint n Kurintus ; syenna ye\u01e7\u01e7a atmaten di lehna, yerkeb lbabu\u1e5b \u0263er tmurt n Surya ; Brisila d Akilas ddan yid-es. Uqbel ad i\u1e5bu\u1e25 si lme\u1e5b\u1e63a n temdint n Senkriya, ise\u1e6d\u1e6del aqe\u1e5b\u1e5buy-is axa\u1e6der yefka lem\u025bahda i Sidi \u1e5aebbi.\n18:19 Mi ww\u1e0den \u0263er temdint n Ifasus, mfa\u1e5baqen : Bulus ye\u01e7\u01e7a i\u1e5bfiqen-is Akilas d Brisila, ma d ne\u021b\u021ba ikcem \u0263er l\u01e7ame\u025b n wat Is\u1e5bail, i\u021bmeslay yid-sen.\n18:20 \u1e24ellelen-t ad yernu kra wussan yid-sen, lame\u025bna ur yeqbil ara.\n18:21 Yenna-yasen : A d-u\u0263ale\u0263 \u0263u\u1e5b-wen ma yeb\u0263a \u1e5aebbi.\n18:22 Yerkeb di lbabu\u1e5b si temdint n Ifasus \u0263er temdint n Qi\u1e63arya ; syenna i\u1e5bu\u1e25 a d-i\u1e93er tajma\u025bt n watmaten yellan di temdint n Lquds ; imiren i\u1e63ubb \u0263er temdint n Antyuc.\n18:23 Mi ges\u025bedda kra n wussan di temdint n Antyuc, yu\u0263al ye\u1e6d\u1e6def abrid \u0263er tmura n Galasya d Frijya, di mkul amkan yesse\u01e7had inelmaden di Liman.\n18:24 Di lweqt-nni, yiwen wergaz n wat Is\u1e5bail ye\u021b\u021busemman Abulus, ilulen di temdint n Skandriya yellan di tmurt n Ma\u1e63e\u1e5b, yusa-d \u0263er temdint n Ifasus ; yezwe\u1e5b deg wawal yerna yessen mli\u1e25 tira iqedsen.\n18:25 Argaz-agi yelmed abrid n Sidi \u1e5aebbi, i\u01e7hed di liman, i\u021bbecci\u1e5b, yesselmad s te\u1e25qiq ayen i d-qqa\u1e5bent tira iqedsen \u0263ef \u0190isa Lmasi\u1e25 , \u0263as akken d a\u0263\u1e0das n Ye\u1e25ya kan i gessen.\n18:26 Yebda i\u021bmeslay \u025binani di l\u01e7ame\u025b n wat Is\u1e5bail. Akilas d Brisila mi s-slan wwin-t yid-sen, sfehmen-as tide\u021b n webrid n Sidi \u1e5aebbi akken tella.\n18:27 Imi i geb\u0263a Abulus ad i\u025beddi \u0263er tmurt n Akaya, atmaten kksen-as akukru, uran tab\u1e5ba\u021b i inelmaden n temdint n Kurintus iwakken ad st\u1e5be\u1e25ben yis. Mi gewwe\u1e0d \u0263er dinna, s \u1e5b\u1e5be\u1e25ma n Sidi \u1e5aebbi i\u025bawen a\u1e6das widak yumnen ;\n18:28 axa\u1e6der ye\u021b\u1e5bu\u1e93u \u025binani awal n lecyux n wat Is\u1e5bail zdat l\u0263aci me\u1e5b\u1e5ba ; yerna i\u021bbeggin-ed s tira iqedsen belli d \u0190isa i d Lmasi\u1e25.\n19:2 Yers-ed fell-awen \u1e5a\u1e5bu\u1e25 iqedsen asmi i tumnem ? Rran-as : Le\u025bme\u1e5b nesli s \u1e5a\u1e5bu\u1e25-agi iqedsen.\n19:3 Yenna-yasen : Anwa a\u0263\u1e0das i-s-te\u021bwa\u0263e\u1e0dsem ihi ? Rran-as : S we\u0263\u1e0das n Ye\u1e25ya.\n19:4 Bulus yenna-yasen : Ye\u1e25ya yesse\u0263\u1e0des wid akk iqeblen ad beddlen tikli, yeqqa\u1e5b i wegdud ad amnen s win ara d-yasen deffir-es, ye\u025bni s Sidna \u0190isa.\n19:5 Mi slan i yimeslayen-agi, \u021bwa\u0263e\u1e0dsen s yisem n Sidna \u0190isa.\n19:6 Akken yessers Bulus ifassen-is fell-asen, ikcem-iten \u1e5a\u1e5bu\u1e25 iqedsen, bdan hedd\u1e5ben s tutlayin ur ne\u021bwassen ara, yerna \u021bcaren-d ayen i sen-d-yusan s \u0263u\u1e5b Sidi \u1e5aebbi.\n19:7 Imdanen-agi ad ilin di tnac yid-sen.\n19:8 D\u0263a Bulus ikcem \u0263er l\u01e7ame\u025b n wat Is\u1e5bail. Azal n tlata wagguren i\u021bmeslay yid-sen, i\u021bqenni\u025b-iten iwakken ad amnen s wayen ye\u025bnan tagelda n Sidi \u1e5aebbi.\n19:9 Lame\u025bna kra deg-sen yeqqu\u1e5b wul-nsen ugin ad amnen, rnan kkaten deg webrid n Sidna \u0190isa zdat l\u0263aci. Mi gwala annect-agi, Bulus i\u1e6d\u1e6daxe\u1e5b-asen, yewwi yid-es inelmaden, isselmad-iten kull ass deg wexxam n yiwen wergaz isem-is Tiranus.\n19:10 Yeqqim dinna sin iseggasen armi imezda\u0263 me\u1e5b\u1e5ba n tmurt n Asya, ama d at Is\u1e5bail ama d iyunaniyen, slan i wawal n Sidi \u1e5aebbi.\n19:11 Sidi \u1e5aebbi ixeddem lbe\u1e5bhanat imeqqranen s ifassen n Bulus ;\n19:12 l\u0263aci ww\u1e0den armi srusun \u0263ef yimu\u1e0dan ula \u021b-\u021bimucwa\u1e5bin ne\u0263 ice\u1e6d\u1e6di\u1e0den yennulen Bulus, d\u0263a imu\u1e0dan \u1e25ellun, wid akk ye\u021b\u021bumelken \u021beff\u0263en ten le\u01e7nun.\n19:13 Kra ise\u1e25\u1e25aren n wat Is\u1e5bail, ile\u1e25\u1e25un seg wemkan \u0263er waye\u1e0d, \u025berden ad ssuff\u0263en le\u01e7nun seg wid ye\u021bwamelken, qqa\u1e5ben-asen : S yisem n Sidna \u0190isa, win akken i ge\u021bbecci\u1e5b Bulus, eff\u0263et seg-es !\n19:14 Widak ixeddmen annect-agi llan di seb\u025ba yid-sen, d arraw n Ciba yellan d yiwen si lmuqedmin imeqqranen n at Is\u1e5bail.\n19:15 L\u01e7en-nni yerra-yasen-d : \u0190isa ssne\u0263-t, ssne\u0263 da\u0263en anwa i d Bulus, ma d kunwi d acu-kkun ?\n19:16 Argaz-nni i gezde\u0263 l\u01e7en, iz\u1e0dem fell-asen yekkat-iten armi rewlen seg wexxam d i\u025beryanen, yerna jer\u1e25en.\n19:17 At Is\u1e5bail akk-d iyunaniyen me\u1e5b\u1e5ba ized\u0263en tamdint n Ifasus slan s wayagi, ikcem-iten me\u1e5b\u1e5ba lxuf, \u1e25emmden isem n Sidna \u0190isa.\n19:18 A\u1e6das seg wid i gumnen, usan-d ad qi\u1e5b\u1e5ben zdat wiya\u1e0d, \u1e25kan-d ayen xedmen.\n19:19 A\u1e6das seg wid yellan xeddmen ss\u1e25ur, wwin-d tiktabin-nsen s wayes xeddmen ss\u1e25ur, sse\u1e5b\u0263en-tent zdat medden. Ufan belli azal n xemsin alef n twiztin i d ssuma-nsent.\n19:20 S wakka i gewwe\u1e0d wawal n Sidi \u1e5aebbi \u0263er mkul amkan, i\u021bnerni s tezmert n Sidi \u1e5aebbi.\n19:21 Mi g\u025bedda wayagi akk, Bulus yeqsed ad i\u1e5bu\u1e25 \u0263er temdint n Lquds, ad i\u025beddi si tmura n Masidunya akk-d Akaya ; ixemmem deg iman-is yenna : \u00ab M'ara aw\u1e0de\u0263 \u0263er dinna, ilaq-iyi da\u0263en ad \u1e5bu\u1e25e\u0263 \u0263er temdint n \u1e5auma.\u00bb\n19:22 Icegge\u025b \u0263er tmurt n Masidunya sin seg im\u025bawnen-is, Timuti d Irastus ; ma d ne\u021b\u021ba yerna kra n wussan di tmurt n Asya.\n19:23 Di lweqt-nni, \u0263ef ddemma n webrid n Sidi \u1e5aebbi ikker ccwal d ameqqran di temdint n Ifasus.\n19:24 Yella yiwen u\u1e25eddad isem-is Dimitriyus, i\u1e63enne\u025b s lfe\u1e6d\u1e6da le\u01e7wame\u025b imec\u1e6da\u1e25 i d-ye\u021bmettilen l\u01e7ame\u025b n Artimis, yesserbe\u1e25 a\u1e6das ixeddamen-is.\n19:25 Isnejma\u025b-iten nutni d wid i gxeddmen lfe\u1e6d\u1e6da am ne\u021b\u021ba, yenna yasen : Ay atmaten ! Te\u1e93ram belli rrbe\u1e25-nne\u0263 itekk-ed si lxedma-agi ;\n19:26 te\u1e93ram yerna teslam da\u0263en \u0263ef Bulus-agi issamnen a\u1e6das n l\u0263aci di temdint n Ifasus d wa\u1e6das n tmura n Asya. Yessamen l\u0263aci, yewwi-ten d webrid-is mi sen-iqqa\u1e5b : \u00ab I\u1e5bebbiten agi i\u021bwaxedmen s ifassen n wemdan ma\u010d\u010di d i\u1e5bebbiten n tide\u021b \u00bb ;\n19:27 ur nuggad ara kan a\u021b-\u021be\u0263li \u1e63\u1e63en\u025ba-nne\u0263, lame\u025bna nuggad ad sse\u0263lin lqima i l\u01e7ame\u025b n Artimis tameqqrant, ta\u1e5bebbi\u021b-nne\u0263, q\u1e5bib a s-kksen l\u025ba\u1e0dima s wayes te\u021bwa\u025bbed di tmurt n Asya d ddunit me\u1e5b\u1e5ba.\n19:28 Mi slan i lehdu\u1e5b-agi, ikcem-iten wurrif, bdan \u021b\u025beggi\u1e0den : \u021a-\u021bameqqrant Artimis, ta\u1e5bebbi\u021b n at Ifasus !\n19:29 Te\u021b\u021bucewwel akk temdint, l\u0263aci uzzlen \u0263er wexxam n umezgun, seddan yid-sen Gayus akk-d Aristark yellan d imasiduniyen, d i\u1e5bfiqen n Bulus, i\u021b\u1e63afa\u1e5ben yid-es.\n19:30 Bulus yeb\u0263a ad ikcem di tlemmast n l\u0263aci-nni, lame\u025bna ugin-as inelmaden.\n19:31 Ula d kra n l\u1e25ukkam imeqqranen n tmurt n Asya yellan d imdukkal-is, cegg\u025ben \u0263u\u1e5b-es iwakken a t-\u1e25ellelen ur i\u021b\u1e5bu\u1e25 ara \u0263er wexxam n umezgun.\n19:32 Anejma\u025b-nni yex\u1e5beb, kra \u021b\u025beggi\u1e0den akka, wiya\u1e0d akken nni\u1e0den yerna a\u1e6das deg-sen ur \u1e93rin ara acu i d sebba n unejma\u025b-nni.\n19:33 At Is\u1e5bail sbedden-d Alixandru ad immeslay i l\u0263aci. Iwehha-yasen ufus-is ad ssusmen, iwakken a d-ihde\u1e5b,\n19:34 lame\u025bna mi t-\u025beqlen n wat Is\u1e5bail i gella, bdan \u021b\u025beggi\u1e0den me\u1e5b\u1e5ba \u0263ef tikkelt azal n snat sswaye\u025b : \u021a-\u021bameqqrant Artimis n at Ifasus !\n19:35 Lame\u025bna lamin n temdint ihedden l\u0263aci, yenna-yasen : Ay at Ifasus, anwa ur ne\u1e93ri ara belli tamdint n Ifasus \u021b-\u021ba\u025bessast n l\u01e7ame\u025b Artimis tameqqrant akk-d lme\u1e63nu\u025b-ines i d-i\u0263lin seg igenni ?\n19:36 Imi ayagi yiwen ur yezmir a t-yenke\u1e5b, ilaq ihi a\u021b-\u021bhennim iman-nwen, ur xeddmet acemma s tuff\u0263a n le\u025bqel !\n19:37 Axa\u1e6der irgazen-agi i d-tewwim ur ukiren l\u01e7ame\u025b, ur rgimen Artimis ta\u1e5bebbi\u021b-nne\u0263.\n19:38 Ihi ma yella Dimitriyus d imdukkal-is s\u025ban sebba n uccetki \u0263ef yiwen, llan wussan n cc\u1e5be\u025b am akken llan l\u1e25ukkam ara ten-ica\u1e5b\u025ben , ad \u1e5bu\u1e25en ad ccetkin fell-asen.\n19:39 Ma yella wayen nni\u1e0den i tessuturem deg-sen, ad \u1e25ekmen fell-asen deg unejma\u025b zdat l\u1e25ukkam.\n19:40 Atan nuggad ad ccetkin fell-a\u0263 \u0263ef wayen yed\u1e5ban ass-agi imi ulac sebba ara nefk \u0263ef wunejma\u025b-agi. Mi gfukk ameslay, iserre\u1e25 i l\u0263aci, yefra unejma\u025b.\n20:1 Mi tethedden l\u1e25ala ifuk ccwal, imiren Bulus isnejma\u025b-ed inelmaden, yenha-ten, d\u0263a ye\u01e7\u01e7a-ten di lehna, ye\u1e6d\u1e6def abrid \u0263er tmurt n Masidunya.\n20:2 Mi gezger tamurt n Masidunya, inehhu inelmaden, isse\u01e7had-iten s wa\u1e6das yimeslayen ; syenna ikemmel abrid \u0263er tmurt n iyunaniyen anda yeqqim tlata wagguren.\n20:3 Mi g\u021beddu ad yerkeb di lbabu\u1e5b \u0263er tmurt n Surya, yesla belli at Is\u1e5bail mcawa\u1e5ben iwakken a t-xed\u025ben ; d\u0263a ibeddel \u1e5b\u1e5bay, i\u1e6d\u1e6def abrid ad yu\u0263al \u0263er tmurt n Masidunya.\n20:4 Ddan yid-es : Subatir, mmi-s n Birus si temdint n Biri ; Aris\u1e6dark akk-d Skundus n temdint n Ti\u1e63alunik, Gayus n temdint n Derba ; yedda da\u0263en Timuti, Tucik akk-d Trufim n tmurt n Asya.\n20:5 Wigi zwaren \u0263er zdat, e\u1e5b\u01e7an-a\u0263 di temdint n Truwas,\n20:6 ma d nukni mi g\u025bedda L\u025bid n we\u0263\u1e5bum mbla i\u0263es ( tamtunt ), nerkeb lbabu\u1e5b si temdint n Filibus ; xemsa wussan mbe\u025bd, nel\u1e25eq-iten \u0263er temdint n Truwas, anda nes\u025bedda seb\u025ba wussan.\n20:7 Ass amezwaru n ddu\u1e5bt nennejma\u025b a neb\u1e0du a\u0263\u1e5bum iwakken ad nemekti Lmasi\u1e25, Bulus i\u021bmeslay ne\u021b\u021ba d inelmaden. Imi ilaq ad i\u1e5bu\u1e25 azekka-nni, ikemmel yid-sen awal armi i gne\u1e63\u1e63ef yi\u1e0d ;\n20:8 ta\u0263u\u1e5bfe\u021b anda i nennejma\u025b, ce\u025blent deg-s a\u1e6das n teftilin.\n20:9 Yiwen ilem\u1e93i, isem-is Utikus, yella yeqqim \u0263ef yiri n \u1e6d\u1e6daq. Imi i g\u025be\u1e6d\u1e6del Bulus deg umeslay, Utikus yewwi-t nuddam ; ye\u0263li-d si le\u025bli wis tlata armi d lqa\u025ba, mi t-id-refden, ufan-t yemmut.\n20:10 Bulus i\u1e63ubb-ed, yekna \u0263u\u1e5b-es, iddem-it ger i\u0263allen-is yenna : Ur \u021b\u021baggadet ara, mazal deg-s ta\u1e5bwi\u1e25t, idder.\n20:11 Syenna yu\u0263al yuli ar t\u0263u\u1e5bfe\u021b, yeb\u1e0da a\u0263\u1e5bum ; mi \u010d\u010dan, ikemmel yid-sen ameslay armi d lefjer, d\u0263a i\u1e5bu\u1e25.\n20:12 Ilem\u1e93i-nni, wwin-t yedder ; d\u0263a yers-ed lfe\u1e5b\u1e25 deg ulawen-nsen.\n20:13 Nukni nerkeb lbabu\u1e5b, nezwar Bulus \u0263er temdint n Assus anda ara nemyagar yid-es axa\u1e6der yeb\u0263a ad i\u1e5bu\u1e25 \u0263ef wu\u1e0da\u1e5b.\n20:14 Mi i \u0263-d-yel\u1e25eq di temdint n Assus, yerkeb yid-nne\u0263 di lbabu\u1e5b \u0263er temdint n Mitilan ;\n20:15 syenna nkemmel abrid di leb\u1e25e\u1e5b, newwe\u1e0d azekka-nni zdat temdint n Ciyu, sellazekka-nni newwe\u1e0d \u0263er temdint n Samus ; ass wis \u1e5beb\u025ba newwe\u1e0d \u0263er temdint n Mili.\n20:16 Bulus yeb\u0263a ad i\u025beddi rrif n temdint n Ifasus mbla ma ye\u1e25bes, iwakken ur is\u1e5bu\u1e25uy ara lweqt di tmurt n Asya. I\u021b\u0263awal iwakken ma yella wamek, ad yawe\u1e0d \u0263er temdint n Lquds ass n l\u025bid n wass wis xemsin.\n20:17 Si temdint n Mili, Bulus icegge\u025b \u0263er imeqqranen n tejma\u025bt n temdint n Ifasus iwakken a d-asen.\n20:18 Mi d-ww\u1e0den \u0263u\u1e5b-es, yenna-yasen : Tesnem si zik tikli-inu yid-wen seg wass amezwaru mi d-kecme\u0263 tamurt n Asya.\n20:19 Qedce\u0263 \u0263ef Sidi \u1e5aebbi s wannuz d ime\u1e6d\u1e6dawen ger i\u0263eblan d lem\u1e25ayen i yi-sse\u1e5bwan wat Is\u1e5bail.\n20:20 \u021abecci\u1e5be\u0263-awen rni\u0263 slemde\u0263 kkun ama zdat l\u0263aci ama deg ixxamen-nwen, mbla ma ffre\u0263 acemma seg wayen i kkun-inef\u025ben.\n20:21 \u021abecci\u1e5be\u0263 i wat Is\u1e5bail d iyunaniyen a d-u\u0263alen \u0263er webrid n Sidi \u1e5aebbi yerna ad amnen s Sidna \u0190isa.\n20:22 Tura, \u1e5a\u1e5bu\u1e25 iqedsen i\u1e25\u1e5bes-iyi ad \u1e6d\u1e6dfe\u0263 abrid \u0263er temdint n Lquds, ur \u1e93ri\u0263 ara d acu ara yed\u1e5bun yid-i.\n20:23 Si temdint \u0263er taye\u1e0d, \u1e5a\u1e5bu\u1e25 iqedsen i\u021bxebbi\u1e5b-iyi-d belli \u021b\u1e5ba\u01e7un-iyi le\u1e25bus d wussan n ddiq.\n20:24 Lame\u025bna tudert-iw ur s-fki\u0263 ara lqima, ur \u021b-\u1e25sibe\u0263 ara e\u025bzizet fell-i ; a wi yufan kan ad kemmle\u0263 tikli-inu akk-d \u1e5aebbi, ad xedme\u0263 s lfe\u1e5b\u1e25 ayen i yi-d-ifka Sidna \u0190isa, iwakken ad becc\u1e5be\u0263 lexba\u1e5b n lxi\u1e5b n \u1e5b\u1e5be\u1e25ma n Sidi \u1e5aebbi.\n20:25 Tura \u1e93ri\u0263 belli ur te\u021b\u021bu\u0263alem ara a\u021b-\u021be\u1e93rem udem-iw, kunwi iwumi becc\u1e5be\u0263 tageldit n Sidi \u1e5aebbi.\n20:26 Daymi i wen-d-qqa\u1e5be\u0263 ass-agi, ma yella yiwen yeffe\u0263 i webrid n Sidi \u1e5aebbi, ddnub i yiri-s,\n20:27 imi i wen-becc\u1e5be\u0263 ayen akk yellan di leqsed n Sidi \u1e5aebbi, ur ffire\u0263 ula d acemma fell-awen.\n20:28 \u0190asset \u0263ef yiman-nwen, \u025basset \u0263ef tqe\u1e0d\u025bit \u0263ef i kkun-iwekkel \u1e5a\u1e5bu\u1e25 iqedsen. Ilit d i\u025bessasen \u0263ef tejma\u025bt n \u1e5aebbi i d-i\u1e25err s idammen n Mmi-s.\n20:29 Sri\u0263 belli m'ara \u1e5bu\u1e25e\u0263, a d-kecmen gar-awen wuccanen iwe\u025b\u1e5ben, wid ur ne\u021bsama\u1e25 ara i tqe\u1e0d\u025bit ;\n20:30 a d-kkren da\u0263en gar-awen yergazen ara islemden le\u1e25waye\u01e7 i\u025bewjen iwakken ad jebden inelmaden \u0263u\u1e5b-sen.\n20:31 \u0194u\u1e5b-wat ihi, \u025basset iman-nwen ! Mmektit-ed belli azal n tlata iseggasen, ur \u1e25bise\u0263 am yi\u1e0d am ass, nehhu\u0263 mkul yiwen seg-wen s ime\u1e6d\u1e6dawen.\n20:32 Tura a kkun-\u01e7\u01e7e\u0263 ger ifassen n Sidi \u1e5aebbi d \u1e5b\u1e5be\u1e25ma n wawal-is; D ne\u021b\u021ba i gzemren a kkun-isse\u01e7hed, a wen-d-yefk lwe\u1e5bt i kunwi akk yellan d ayla-s.\n20:33 Ur \u1e0dmi\u025be\u0263, ama d ddheb ama d idrimen ne\u0263 le\u1e25waye\u01e7 n yiwen deg-wen.\n20:34 Te\u1e93ram s yiman-nwen belli s ifassen-iw i xeddme\u0263 iwakken ad \u025beyyce\u0263 iman-iw akk-d wid yellan yid-i.\n20:35 Di mkul l\u1e25a\u01e7a, ssekne\u0263-awen amek ara txedmem iwakken a\u021b-\u021b\u025biwnem wid ur nezmir ara. Mmektit-ed imeslayen n Sidna \u0190isa mi d-yenna : \u00ab Win i\u021bseddiqen i\u021b\u021bubarek akte\u1e5b n win ite\u1e6d\u1e6dfen ssadaqa \u00bb.\n20:36 Mbe\u025bd imeslayen-agi, yu\u0263al \u0263ef tgecrar, yed\u025ba \u0263er Sidi \u1e5aebbi yid-sen.\n20:37 S\u1e6de\u1e5b\u1e0dqen s ime\u1e6d\u1e6dawen, \u1e6d\u1e6dfen-t ger i\u0263allen-nsen, selmen akk fell-as ;\n20:38 \u1e25eznen a\u1e6das imi i sen-d-yenna : \u00ab Ur te\u021b\u021bu\u0263alem ara a\u021b-\u021be\u1e93rem udem- iw. \u00bb Syenna ddan yid-es armi d lbabu\u1e5b.\n21:1 Mi nemfa\u1e5baq yid-sen, nerkeb lbabu\u1e5b n\u1e5bu\u1e25 qbala \u0263er temdint n Kus, azekka-nni \u0263er temdint n \u1e5audus ; syenna nkemmel abrid \u0263er temdint n Batara.\n21:2 Mi nufa lbabu\u1e5b ara izegren \u0263er tmurt n Finisya, nerkeb deg-s n\u1e5bu\u1e25.\n21:3 Mi nqubel tigzirt n Qub\u1e5bus, ne\u01e7\u01e7a-\u021b \u0263er tama tazelma\u1e6d, nkemmel abrid nne\u0263 \u0263er tmurt n Surya, newwe\u1e0d \u0263er temdint n Sur imi dinna ara yessers lbabu\u1e5b ssel\u025ba-s.\n21:4 Mi nufa dinna inelmaden, nes\u025bedda seb\u025ba wussan yid-sen ; s \u1e5a\u1e5bu\u1e25 iqedsen, inelmaden-nni nnan-as i Bulus : Ur \u021b\u021bali ara \u0263er temdint n Lquds.\n21:5 Mi \u025beddan wussan-nni, nekker a n\u1e5bu\u1e25, ddan yid-nne\u0263 armi neffe\u0263 i temdint, nutni \u021b-\u021bilawin-nsen d warraw-nsen. Mi newwe\u1e0d \u0263er rrif n leb\u1e25e\u1e5b nu\u0263al \u0263ef tgecrar, ned\u025ba \u0263er Sidi \u1e5aebbi.\n21:6 Mi nemsalam yid-sen, nerkeb di lbabu\u1e5b n\u1e5bu\u1e25 ; nutni u\u0263alen \u0263er yexxamen-nsen,\n21:7 nukkni nkemmel abrid s lbabu\u1e5b si temdint n Sur armi \u021b-\u021bamdint n B\u1e6dulimays, ne\u1e93ra dinna atmaten, neqqim yid-sen yiwen wass.\n21:8 Azekka-nni n\u1e5bu\u1e25, newwe\u1e0d \u0263er Qi\u1e63arya ; nekcem \u0263er wexxam n Filbas, win i\u021bbecci\u1e5ben lexba\u1e5b n lxi\u1e5b, ne\u021b\u021ba yellan d yiwen si seb\u025ba-nni i\u021bwaxta\u1e5ben di temdint n Lquds ; neqqim \u0263u\u1e5b-es.\n21:9 Filbas-nni, \u0263u\u1e5b-es \u1e5beb\u025ba yessi-s ur\u025bad zwi\u01e7ent, \u021bxebbi\u1e5bent-ed s wayen i tent-id-i\u021b\u021basen s \u0263u\u1e5b Sidi \u1e5aebbi.\n21:10 \u0190eddan kra n wussan, mi d yewwe\u1e0d yiwen seg watmaten isem-is Agabus, ula d ne\u021b\u021ba i\u021bxebbi\u1e5b-ed s \u0263u\u1e5b Sidi \u1e5aebbi, i\u1e63ubb-ed si tmurt n Yahuda, yusa-d \u0263u\u1e5b-nne\u0263.\n21:11 Iddem tabagust n Bulus, icudd ida\u1e5b\u1e5ben-is d ifassen-is, yenna : Atan wayen i d-iqqa\u1e5b \u1e5a\u1e5bu\u1e25 iqedsen : akka ara cidden wat Is\u1e5bail di temdint n Lquds bab n tbagust-agi, a t-sellmen ger ifassen n ikafriwen.\n21:12 Mi nesla annect-agi, nukkni d watmaten n Sizari n\u1e25ellel Bulus iwakken ur i\u021b\u021bali ara \u0263er temdint n Lquds.\n21:13 D\u0263a Bulus yerra-yasen : Acu i kkun-yu\u0263en mi te\u021brum akka armi tgezmem tasa-w ? Nekk qeble\u0263 ma\u010d\u010di kan ad \u021bwacudde\u0263, lame\u025bna qeble\u0263 ula d lmut di temdint n Lquds \u0263ef ddemma n yisem n Sidna \u0190isa.\n21:14 Imi yugi ad ya\u0263 awal-nne\u0263, ur nkette\u1e5b ara fell-as lehdu\u1e5b nenna : A ne\u01e7\u01e7 leb\u0263i n Sidi \u1e5aebbi ad yed\u1e5bu !\n21:15 Akken \u025beddan wussan-nni, nhegga iman-nne\u0263 a nali \u0263er temdint n Lquds.\n21:16 Kra inelmaden n Qi\u1e63arya ddan yid-nne\u0263, wwin-a\u0263 \u0263er yiwen wergaz wu\u0263u\u1e5b ara nili, isem-is Mansun, n tegzirt n Qub\u1e5bus, d yiwen seg inelmaden imezwura.\n21:17 Mi newwe\u1e0d \u0263er temdint n Lquds, s\u1e6dre\u1e25ben yis-nne\u0263 watmaten s lfe\u1e5b\u1e25.\n21:18 Azekka-nni, yedda yid-nne\u0263 Bulus \u0263er wexxam n Ye\u025bqub anda nnejma\u025ben imeqqranen n tejma\u025bt.\n21:19 Mi gsellem fell-asen, Bulus ye\u1e25ka-yasen ayen akk ixdem yis Sidi \u1e5aebbi ger le\u01e7nas ur nelli ara n wat Is\u1e5bail.\n21:20 Mi slan ayagi, \u1e25emmden Sidi \u1e5aebbi nnan-as : Twala\u1e0d a gma-tne\u0263 ac\u1e25al n luluf n wat Is\u1e5bail i gumnen s Sidna \u0190isa yerna \u1e6d\u1e6dfen akk di ccari\u025ba n Musa.\n21:21 Atan slan wat Is\u1e5bail n temdint n Lquds belli tesselmade\u1e0d i wat Is\u1e5bail yellan ger le\u01e7nas ad \u01e7\u01e7en ccari\u025ba n Musa ; slan da\u0263en teqqa\u1e5be\u1e0d asen : \u00ab ur se\u1e0dha\u1e5bet ara i warrac nwen, ur ttaba\u025bet ara le\u025bwayed i \u0263-d-\u01e7\u01e7an lejdud \u00bb.\n21:22 Acu ara nexdem tura ? Mbla ccekk ad slen belli tusi\u1e0d-ed ;\n21:23 ihi exdem ayen ara k-d-nini : llan gar-ane\u0263 \u1e5beb\u025ba yergazen i gefkan lem\u025bahda i Sidi \u1e5aebbi,\n21:24 awi-ten yid-ek, ssizdeg iman-ik yid-sen, se\u1e5b\u1e5bef fell-asen iwakken ad se\u1e6d\u1e6dlen iqe\u1e5b\u1e5bay-nsen ; s wakkagi ad \u1e93ren belli ayen akk slan fell-ak d lekdeb yerna ad walin mazal te\u1e6d\u1e6dfe\u1e0d di ccari\u025ba n Musa.\n21:25 Ma d at le\u01e7nas i gumnen s Sidna \u0190isa, nura-yasen : Ad \u1e6d\u1e6dix\u1e5ben i wu\u010d\u010di n weksum i\u021b\u021bunefken d asfel i lme\u1e63nu\u025bat d ssadat, i tissit n idammen, i lmal yemmu\u1e5b\u1e0dsen akk-d yir tikli.\n21:26 Azekka-nni, Bulus yewwi yid-es \u1e5beb\u025ba yergazen-nni, issazdeg iman-is yid-sen, ikcem yid-sen \u0263er wefrag n l\u01e7ame\u025b iqedsen iwakken ad ixebbe\u1e5b lmuqeddem \u0263ef lweqt i deg ara fakken wussan n uzizdeg-nsen, ye\u025bni ass i deg ara yefk mkul yiwen seg-sen lwe\u025bda-ines.\n21:27 Mi q\u1e5bib ad fakken seb\u025ba wussan-nni n usizdeg, at Is\u1e5bail n tmurt n Asya walan Bulus di l\u01e7ame\u025b iqedsen. Sekkren ccwal ger l\u0263aci d\u0263a \u1e6d\u1e6dfen-t.\n21:28 Bdan \u021b\u025beggi\u1e0den : Ay at Is\u1e5bail, \u025biwnet-a\u0263 ! Atah wergaz-nni i\u021bbecci\u1e5ben di mkul amkan i yemdanen me\u1e5b\u1e5ba. Ihedde\u1e5b ayen n diri \u0263ef wegdud-nne\u0263, \u0263ef wemkan-agi iqedsen, isselmad ayen ur teqbil ara ccari\u025ba-nne\u0263, yewwi-d iyunaniyen \u0263er l\u01e7ame\u025b, issen\u01e7es amkan-agi iqedsen !\n21:29 Nnan-d ayagi axa\u1e6der walan yid-es Trufim di temdint, \u0263ilen issekcem-it \u0263er daxel n l\u01e7ame\u025b iqedsen.\n21:30 Ikker ccwal di temdint me\u1e5b\u1e5ba ; uzzlen-d yemdanen si mkul tama. S\u1e6dfen Bulus, zzu\u0263\u1e5ben-t be\u1e5b\u1e5ba n wefrag n l\u01e7ame\u025b iqedsen, sekk\u1e5ben-d tiwwura.\n21:31 Mi \u021beddun l\u0263aci a t-n\u0263en, yewwe\u1e0d lexba\u1e5b \u0263er lqeb\u1e6dan n l\u025beske\u1e5b n \u1e5auman tamdint n Lquds me\u1e5b\u1e5ba tenhewwal.\n21:32 Imiren kan yessawel i ifesyanen d l\u025beske\u1e5b-nsen, uzzlen \u0263er l\u0263aci. Mi walan lqeb\u1e6dan akk-d l\u025beske\u1e5b-is, ttax\u1e5ben-as i Bulus.\n21:33 D\u0263a lqeb\u1e6dan iqe\u1e5b\u1e5beb \u0263er Bulus, yefka lame\u1e5b a t-\u1e6d\u1e6dfen, a t-cudden s snat snasel ; d\u0263a isteqsa anwa-t, d acu i gexdem.\n21:34 Me\u025bna l\u0263aci-nni, kra \u021b\u025beggi\u1e0den akka, wiya\u1e0d akken nni\u1e0den. Imi ur ifhim ara wayen i s-d-nnan si le\u025bya\u1e0d-nni, yume\u1e5b a t-awin \u0263er lbe\u1e5bj.\n21:35 Mi gewwe\u1e0d Bulus \u0263er tsedda\u1e5bin, refden-t l\u025beske\u1e5b iwakken a t-sellken si ger ifassen n l\u0263aci.\n21:36 Axa\u1e6der l\u0263aci-nni ttaba\u025ben-t \u021b\u025beggi\u1e0den : \u00ab En\u0263-it ! En\u0263-it !... \u00bb\n21:37 Mi q\u1e5bib a t-skecmen \u0263er zdaxel n lbe\u1e5bj, Bulus yenna-yas i lqeb\u1e6dan : Semme\u1e25-iyi, zemre\u0263 a k-d-ini\u0263 yiwen n wawal ? Yerra-yas : Tessne\u1e0d a\u021b-\u021bhed\u1e5be\u1e0d tayunanit ?\n21:38 Ma\u010d\u010di d ke\u010d\u010d i d ama\u1e63ri-nni i gsekkren ccwal ussan-agi i\u025beddan, i gessuf\u0263en yid-es \u1e5beb\u025ba alaf n iqettalen \u0263er lxali ?\n21:39 Bulus yenna-yas : Xa\u1e6di ! Nekk n wat Is\u1e5bail, lule\u0263 di temdint n Sars yellan di tmurt n Silisya ; d amezda\u0263 n temdint mechu\u1e5ben. Di le\u025bnaya-k serre\u1e25-iyi ad hed\u1e5be\u0263 i l\u0263aci-yagi.\n21:40 Lqeb\u1e6dan i\u025bemmed-as, d\u0263a Bulus ibedd \u0263ef tsedda\u1e5bin, iwehha i l\u0263aci s ufus-is, d\u0263a ssusmen. Yen\u1e6deq s t\u025bib\u1e5banit, yenna-yasen :\n22:1 Ay atmaten akken ma tellam dagi me\u1e93\u1e93i meqqe\u1e5b, sem\u1e25esset ed tura a wen-d-ini\u0263 ayen s wayes ara daf\u025be\u0263 \u0263ef yiman-iw !\n22:2 Mi slan ihedde\u1e5b-asen-d s t\u025bib\u1e5banit, ssusmen me\u1e5b\u1e5ba iwakken a s-slen. D\u0263a yenna :\n22:3 Nekk n wat Is\u1e5bail, \u021b-\u021bide\u021b lule\u0263 di temdint n Sars n tmurt n Silisya, lame\u025bna \u021b\u021bu\u1e5bebba\u0263 di temdint-agi n Lquds. Lli\u0263 d anelmad n ccix Gamalyel s yiman-is ; yesselmed-iyi akken ilaq amek ara teb\u025be\u0263 ccari\u025ba i d-\u01e7\u01e7an lejdud-nne\u0263. Ttaba\u025be\u0263 seg ul-iw abrid n Sidi \u1e5aebbi, am kunwi ass-agi.\n22:4 Qeh\u1e5be\u0263 armi d lmut wid ittaba\u025ben abrid-agi ajdid n Sidna \u0190isa, am yergazen am tlawin, \u021b\u021bawi\u0263-ten-id \u0263er le\u1e25bus \u021bwarzen.\n22:5 Lmuqeddem ameqqran \u021b-\u021bejma\u025bt n l\u025buqal atnan d inigan ma b\u0263an a d-cehden ; d nutni s yiman-nsen i yi-d-yefkan tib\u1e5batin i watmaten n Dimecq, syenna a d-awi\u0263 \u021bwarzen \u0263er temdint n Lquds, wid akk yumnen s webrid-agi, iwakken a ten-\u025baqben.\n22:6 Lli\u0263 teddu\u0263 deg webrid, q\u1e5bib ad aw\u1e0de\u0263 \u0263er temdint n Dimecq. A\u021b-\u021bili d \u021bna\u1e63fa n wass, taswi\u025bt kan, yiwet n tafat tameqqrant tewwet-ed seg igenni, te\u021bfe\u01e7\u01e7i\u01e7, tezzi-yi-d.\n22:7 \u0194li\u0263 \u0263er lqa\u025ba, sli\u0263 i yiwen n \u1e63\u1e63ut i yi-d-iqqa\u1e5ben : Ca\u025bul, a Ca\u025bul, acu\u0263e\u1e5b i yi te\u021bqehhi\u1e5be\u1e0d ?\n22:8 Nni\u0263-as : Anwa-k, a Sidi ? Yenna-yi-d : Nekk d \u0190isa Ana\u1e63ari, win akken i te\u021bqehhi\u1e5be\u1e0d.\n22:9 Wid yellan yid-i walan tafat-nni, lame\u025bna ur slin ara i \u1e63\u1e63ut i yi-d ihedd\u1e5ben, d\u0263a nni\u0263 : Acu i teb\u0263i\u1e0d a t-xedme\u0263 a Sidi ?\n22:10 Sidna \u0190isa yenna-yi-d : Ekker, \u1e5bu\u1e25 \u0263er Dimecq, dinna ara k-d-inin ayen akk ilaqen a t-txedme\u1e0d.\n22:11 Imi iyi-tesder\u0263el tafat-nni s ufe\u01e7\u01e7e\u01e7-ines, d imdukkal-iw i yi \u1e6d\u1e6dfen afus armi ww\u1e0de\u0263 \u0263er Dimecq.\n22:12 Yella dinna yiwen wergaz isem-is Ananyas, d argaz i\u1e0du\u025ben Sidi \u1e5aebbi, yerna yettaba\u025b ccari\u025ba ; at Is\u1e5bail me\u1e5b\u1e5ba ized\u0263en di temdint n Dimecq \u021bcehhiden fell-as s lxi\u1e5b.\n22:13 Yusa-d \u0263u\u1e5b-i yenna-yi-d : A Ca\u025bul a gma, Sidi \u1e5aebbi yerra-yak-d i\u1e93ri ! Di teswi\u025bt-nni, yu\u0263al-iyi-d yez\u1e5bi, d\u0263a wala\u0263-t.\n22:14 Ananyas yenna-yi-d : Sidi \u1e5aebbi n lejdud-nne\u0263 yexta\u1e5b ik a\u021b-\u021bissine\u1e0d leb\u0263i-ines, a\u021b-\u021bwali\u1e0d s wallen-ik win yellan d A\u1e25eqqi, a\u021b-\u021besle\u1e0d imeslayen seg yimi-is .\n22:15 axa\u1e6der a\u021b-\u021bu\u0263ale\u1e0d d inigi-ines zdat yemdanen me\u1e5b\u1e5ba \u0263ef wayen akk i te\u1e93ri\u1e0d d wayen iwumi tesli\u1e0d.\n22:16 Tura d acu i te\u021b\u1e5ba\u01e7u\u1e0d ? Kker a\u021b-te\u021bwa\u0263e\u1e0dse\u1e0d, a\u021b-\u021bizdige\u1e0d seg ddnubat-ik m'ara ted\u025bu\u1e0d s yisem-is.\n22:17 Asmi u\u0263ale\u0263 \u0263er temdint n Lquds, yiwen n wass lli\u0263 \u021b\u1e93alla\u0263 deg wefrag n l\u01e7ame\u025b iqedsen, iwe\u1e25\u1e25a-yi-d Sidi \u1e5aebbi,\n22:18 wala\u0263 Sidna \u0190isa yenna-yi-d : Ffe\u0263 s lem\u0263awla si temdint n Lquds, axa\u1e6der ur qebblen ara ayen s wayes ara tcehde\u1e0d fell-i.\n22:19 Nni\u0263 : A Sidi, ssnen-iyi ! Sran s yiman nsen belli ttaba\u025be\u0263 si l\u01e7ame\u025b \u0263er waye\u1e0d wid yumnen yis-ek iwakken a ten-erre\u0263 \u0263er l\u1e25ebs ad \u021bewten.\n22:20 Ula d Stifan inigi-inek, mi ssuzlen idammen-is lli\u0263 dinna, qeble\u0263 at n\u0263en yerna \u025busse\u0263 le\u1e25waye\u01e7 n wid i t-yen\u0263an.\n22:21 D\u0263a Sidi \u1e5aebbi yenna-yi-d : \u1e5au\u1e25 a k-cegg\u025be\u0263 \u0263er leb\u025bid \u0263er wat le\u01e7nas ur nelli ara n wat Is\u1e5bail.\n22:22 Sme\u1e25sisen-as armi d awal-agi imiren \u025begg\u1e0den nnan : Ekkset si ddunit argaz am wagi ! Ur t-\u021ba\u01e7\u01e7at ara ad yidir !\n22:23 \u021a\u025beggi\u1e0den, \u1e6deggi\u1e5ben le\u1e25waye\u01e7 nsen, ssafagen a\u0263ebba\u1e5b \u0263er igenni.\n22:24 Lqeb\u1e6dan n \u1e5auman yume\u1e5b ad skecmen Bulus \u0263er lbe\u1e5bj, a t-ewten s ujelkka\u1e0d ( s ucelli\u1e6d ) iwakken ad issinen sebba \u0263ef wacu \u021b\u025beggi\u1e0den fell-as.\n22:25 Mi t-cudden s t\u0263eggadin, Bulus yenna i lqeb\u1e6dan yellan dinna : E\u025bni iserre\u1e25-awen lqanun a\u021b \u021bewtem a\u1e5bumani s ujelkka\u1e0d uqbel ad i\u025beddi di cc\u1e5be\u025b ?\n22:26 \u0194ef yimeslayen-agi, lqeb\u1e6dan-nni i\u1e5bu\u1e25 \u0263er wemdebbar ameqqran yenna-yas : \u1e24ader a\u021b-\u021bewte\u1e0d argaz-agi ! D a\u1e5bumani !\n22:27 Amdebbar ameqqran mi d-yusa \u0263er Bulus, yenna-yas : \u021a-\u021bide\u021b ke\u010d\u010d d a\u1e5bumani ? Ih, d a\u1e5bumani i lli\u0263 !\n22:28 Amdebbar ameqqran yenna : Nekk a\u1e6das n yedrimen i fki\u0263 iwakken ad u\u0263ale\u0263 d a\u1e5bumani. Bulus yerra-yas : Nekk, seg wasmi i d-lule\u0263 i rse\u0263 di lekwa\u0263e\u1e0d d a\u1e5bumani.\n22:29 Imiren widak i d-ikkren a t wten, \u1e6d\u1e6dax\u1e5ben-as. Lqeb\u1e6dan ameqqran s yiman-is yuggad mi ge\u1e93ra Bulus d a\u1e5bumani yerna icudd-it.\n22:30 Azekka-nni, imi i geb\u0263a ad yissin wemdebbar ameqqran \u0263ef wacu i d-ccetkan fell-as wat Is\u1e5bail, iserre\u1e25 i Bulus, yume\u1e5b i lmuqedmin akk-d usqamu n cc\u1e5be\u025b ad nnejma\u025ben. D\u0263a yewwi-d Bulus isbedd-it-id zdat-nsen.\n23:2 Lmuqeddem ameqqran Ananyas yume\u1e5b i wid yellan zdat-es, a t-wten \u0263er yimi.\n23:3 D\u0263a Bulus yenna : A k-id-iwet \u1e5aebbi a bu sin wudmawen ! Teqqime\u1e0d a\u021b-\u021b\u1e25ekme\u1e0d fell-i s ccari\u025ba, lame\u025bna ke\u010d\u010d s yiman-ik txulfe\u1e0d-\u021b imi tumre\u1e0d ad iyi wten.\n23:4 Widak yellan zdat-es nnan-as : Tregme\u1e0d lmuqeddem ameqqran n \u1e5aebbi !\n23:5 Bulus yenna-yasen : Ur \u1e93ri\u0263 ara ay atmaten belli d ne\u021b\u021ba i d lmuqeddem ameqqran, axa\u1e6der yura di ccari\u025ba : Ur \u021bekkes ara leqde\u1e5b \u0263ef l\u1e25akem n wegdud-ik.\n23:6 Bulus, mi gwala deg unejma\u025b-nni azgen deg-sen d isaduqiyen, azgen nni\u1e0den d ifariziyen, i\u025begge\u1e0d gar-asen, yenna : Ay atmaten, nekk d afarizi, d mmi-s n ufarizi ; \u0263ef ddemma n usirem i nes\u025ba di \u1e25eggu n lmegtin i d-bedde\u0263 \u0263er cc\u1e5be\u025b ass-agi !\n23:7 Mi d-yenna ayagi, ikker umennu\u0263 ger ifariziyen d isaduqiyen ; d\u0263a yeb\u1e0da unejma\u025b-nni.\n23:8 Axa\u1e6der isaduqiyen qqa\u1e5ben ulac \u1e25eggu, ulac lmalayekkat, ulac le\u1e5bwa\u1e25 ; ma d ifariziyen, nutni umnen s wannect agi.\n23:9 Ikker umennu\u0263 gar-asen ; kra n l\u025bulama n ccari\u025ba n tejma\u025bt n ifariziyen kkren iwakken ad \u1e25udden Bulus, nnan : Ur nufi ara ayen n diri deg wemdan-agi. Yezmer l\u1e25al ihde\u1e5b-as-d \u1e5aebbi ne\u0263 lmelk !\n23:10 Imi i\u021b\u021bim\u0263u\u1e5b umen\u0263i, lqeb\u1e6dan ameqqran yugad ad fe\u1e5bqen Bulus d iftaten. Yume\u1e5b i l\u025beske\u1e5b ad \u1e5bu\u1e25en a t-id-kksen si tlemmast-nsen, a t awin \u0263er lbe\u1e5bj.\n23:11 Azekka-nni deg i\u1e0d, Sidna \u0190isa i\u1e0dhe\u1e5b-as-d i Bulus yenna-yas : Ur \u021b\u021baggad ara, axa\u1e6der am akken tcehde\u1e0d fell-i di temdint n Lquds, ilaq da\u0263en a\u021b-\u021bcehde\u1e0d fell-i di temdint n \u1e5auma.\n23:12 Mi guli wass, at Is\u1e5bail xedmen ti\u1e25ile\u021b, msefhamen, gullen ur \u010d\u010din ur swin alamma n\u0263an Bulus.\n23:13 Wid akk i s-ixedmen taxazabit agi, llan akte\u1e5b n \u1e5beb\u025bin yid-sen.\n23:14 \u1e5au\u1e25en ad \u1e93ren imeqqranen d lmuqedmin akk-d l\u025buqal nnan asen : Neggul s limin ameqqran, ur ne\u010d\u010di acemma alamma nen\u0263a Bulus.\n23:15 Tura ihi, init-as i lqeb\u1e6dan ameqqran a t-id-yawi \u0263er unejma\u025b n cc\u1e5be\u025b zdat-wen, amzun teb\u0263am a s-t\u025biwdem abe\u1e25\u1e25et ; ma d nukkni, a nheggi iman-nne\u0263 a t-nen\u0263 uqbel a d-yawe\u1e0d \u0263er dagi.\n23:16 Lame\u025bna mmi-s n weltma-s n Bulus imi gesla s t\u1e25ile\u021b-nni i s heggan, i\u1e5bu\u1e25 \u0263er lbe\u1e5bj anda ye\u021bwa\u1e25bes Bulus, a s-yessiwe\u1e0d lexba\u1e5b.\n23:17 Bulus yessawel-ed i yiwen si lfesyanat, yenna-yas : Awi aqcic-agi \u0263er lqeb\u1e6dan ameqqran, axa\u1e6der yes\u025ba awal ara s-yini.\n23:18 Lfesyan yewwi yid-es aqcic-nni \u0263er lqeb\u1e6dan ameqqran, yenna-yas : Bulus ame\u1e25bus-nni yessawel iyi-d i\u1e25ellel-iyi iwakken a k-d-awi\u0263 aqcic-agi, yes\u025ba awal ara k-d-yini.\n23:19 Lqeb\u1e6dan ameqqran iddem aqcic-nni seg ufus, \u025bezlen iman-nsen \u0263er \u1e6d\u1e6de\u1e5bf ; yenna-yas : D acu i teb\u0263i\u1e0d a yi-t-id-tini\u1e0d ?\n23:20 Yerra-yas : At Is\u1e5bail msefhamen a k-d \u1e0delben a\u021b-\u021bawi\u1e0d Bulus azekka \u0263er zdat unejma\u025b n cc\u1e5be\u025b, ufan-d sebba a s-\u025biwden abe\u1e25\u1e25et \u0263ef temsalt-is.\n23:21 Ur \u021b\u021ba\u0263 ara awal-nsen, axa\u1e6der akte\u1e5b n \u1e5beb\u025bin deg-sen \u1e25eyylen-as, gullen s limin ameqqran ur te\u021b\u021ben ur tessen alamma n\u0263an-t. Tura heggan iman-nsen, \u021b\u1e5ba\u01e7un anagar leb\u0263i-k.\n23:22 Amdebbar ameqqran iserre\u1e25-as i weqcic-nni ad i\u1e5bu\u1e25, yenna-yas : Ur qqa\u1e5b i yiwen belli tessawe\u1e0ded iyi-d lexba\u1e5b-agi.\n23:23 Yu\u0263al issawel i sin lfesyanat, yenna-yasen : Heggit mitin i\u025besk\u1e5biwen, seb\u025bin yemnayen akk-d mitin i\u025besk\u1e5biwen i gteddun s imez\u1e5bagen, ad \u1e5bu\u1e25en \u0263ef tes\u025ba n yi\u1e0d \u0263er Qi\u1e63arya.\n23:24 Heggit da\u0263en i\u025bewdiwen iwakken ad ssiw\u1e0den Bulus di laman \u0263er l\u1e25akem Filiks.\n23:25 Yura tab\u1e5ba\u021b-agi i l\u1e25akem Filiks :\n23:26 \u00ab Nekk Kludyus Lizyas i l\u1e25akem ameqqran Filiks, sslam fell-ak !\n23:27 At Is\u1e5bail \u1e6d\u1e6dfen argaz-agi teddun a t-n\u0263en, mi ww\u1e0de\u0263 nekk d l\u025beske\u1e5b-iw, sellke\u0263-t-id si ger ifassen-nsen. Imi sli\u0263 la\u1e63el-is d a\u1e5bumani,\n23:28 b\u0263i\u0263 ad \u1e93re\u0263 sebba \u0263ef wacu ccetkan fell-as ; wwi\u0263-t \u0263er zdat unejma\u025b nsen.\n23:29 Ufi\u0263 belli sebba \u0263ef wacu i ccetkan fell-as, d ayen ye\u025bnan ccari\u025ba-nsen, lame\u025bna ur ixdim acemma yuklalen lmut ne\u0263 l\u1e25ebs.\n23:30 Mi sli\u0263 \u1e25eyylen-as wat Is\u1e5bail, cegg\u025be\u0263-t-in \u0263u\u1e5b-ek. Ma d ix\u1e63imen-is nni\u0263-asen a n-\u1e5bu\u1e25en \u0263u\u1e5b-ek ad ccetkin fell-as. S\u01e7i\u0263-k di lehna !\n23:31 Akken i ten-d-yewwe\u1e0d lame\u1e5b, i\u025besk\u1e5biwen wwin Bulus deg yi\u1e0d \u0263er temdint n Antibatris.\n23:32 Azekka-nni u\u0263alen \u0263er lbe\u1e5bj, \u01e7\u01e7an imnayen ad kemmlen abrid yid-es.\n23:33 Mi ww\u1e0den \u0263er temdint n Qi\u1e63arya, wwin Bulus \u0263er l\u1e25akem Filiks, rnan fkan-as tab\u1e5ba\u021b-nni.\n23:34 L\u1e25akem ye\u0263\u1e5ba tab\u1e5ba\u021b-nni, isteqsa anta i \u021b-\u021bamurt n Bulus. Mi gesla si tmurt n Silisya i gella,\n23:35 yenna-yas : M'ara d-aw\u1e0den yex\u1e63imen iccetkan fell-ak, a k-sle\u0263 . D\u0263a yume\u1e5b a t-\u025bassen di lbe\u1e5bj n Hi\u1e5budus. At Is\u1e5bail cccetkan \u0263ef Bulus\n24:1 Mi \u025beddan xemsa wussan, lmuqeddem ameqqran Ananyas i\u1e63ubb-ed \u0263er Qi\u1e63arya ne\u021b\u021ba d kra n l\u025buqal n wat Is\u1e5bail akk-d yiwen ubuga\u1e6du isem-is Tertulus ; usan-d \u0263er l\u1e25akem ad ccetkin \u0263ef Bulus.\n24:2 Mi d-ssawlen i Bulus, Tertulus yebda accetki fell-as s yimeslayen agi :\n24:3 A l\u1e25akem ameqqran ! S u\u1e0debba\u1e5b-ik yelhan i d-yers lxi\u1e5b d lehna \u0263ef tmurt-agi ! \u0194ef wayagi, a Filiks ameqqran, ncekke\u1e5b-ik me\u1e5b\u1e5ba di mkul amkan ;\n24:4 lame\u025bna iwakken ur k-ne\u021b\u025be\u1e6d\u1e6dil ara a\u1e6das, di le\u025bnaya-k sem\u1e25ess-ed i kra n yimeslayen-agi ara k-d-nini :\n24:5 Argaz-agi d \u021berka, iskker ccwal ger wat Is\u1e5bail n ddunit me\u1e5b\u1e5ba, d ne\u021b\u021ba i d ameqqran n tejma\u025bt n ina\u1e63ariyen.\n24:6 Ye\u025b\u1e5bed ad issen\u01e7es ula d l\u01e7ame\u025b iqedsen. Mi t-ne\u1e6d\u1e6def, neb\u0263a a ne\u1e25kem fell-as s ccari\u025ba-nne\u0263,\n24:7 lame\u025bna yewwe\u1e0d-ed lqeb\u1e6dan ameqqran Lizyas, ikkes-a\u0263-t s ddre\u025b si ger ifassen-nne\u0263,\n24:8 yerna yume\u1e5b i wid iccetkan fell-as a d-asen ad ccetkin \u0263u\u1e5b-ek. Tura tzemre\u1e0d s yiman-ik a t-tbe\u1e25te\u1e0d, iwakken a\u021b-\u021besle\u1e0d seg yimi-s wayen akk i \u0263ef neccetka fell-as.\n24:9 At Is\u1e5bail yellan dinna, cehden akk belli akka i gella l\u1e25al.\n24:10 Mi i s-iwehha l\u1e25akem i Bulus iwakken a d-ihde\u1e5b, Bulus yenna : Sri\u0263 a\u1e6das iseggasen aya i telli\u1e0d d l\u1e25akem \u0263ef wegdud-agi ; ihi s laman ara d-qeddme\u0263 tamsalt-iw zdat-ek.\n24:11 Ur wwi\u1e0den ara tnac wussan segmi uli\u0263 \u0263er temdint n Lquds iwakken ad \u025bebde\u0263 \u1e5aebbi, tzemre\u1e0d a\u021b-\u021besteqsi\u1e0d s yiman-ik.\n24:12 Ulac win i yi-d-yufan deg wefrag n l\u01e7ame\u025b iqedsen \u021bemjadale\u0263 nekk d waleb\u025ba\u1e0d, ulac da\u0263en win i yi-d-yufan di le\u01e7wame\u025b n wat Is\u1e5bail ne\u0263 di temdint sekkre\u0263 ccwal ger l\u0263aci.\n24:13 Ur zmiren ara a d-awin \u021b\u021bbut n wayen akka i \u0263ef d-ccetkan fell-i.\n24:14 Zemre\u0263 a d-ini\u0263 zdat-ek a l\u1e25akem Filiks : \u1e5aebbi i \u025bebbde\u0263, d win akken \u025bebden lejdud-iw ; s tide\u021b umne\u0263 s webrid-agi ajdid i \u0263ef d-qqa\u1e5ben : \u00ab ixulef abrid-nsen \u00bb ; lame\u025bna umne\u0263 s wayen akk yuran di ccari\u025ba n Musa akk-d lenbiya.\n24:15 S\u025bi\u0263 asirem \u0263er Sidi \u1e5aebbi -- am akken i t-s\u025ban ula d nutni -- belli a d-\u1e25yun yemdanen me\u1e5b\u1e5ba ama d i\u1e25eqqiyen ama d wid ixedmen cce\u1e5b.\n24:16 Daymi \u021b\u025bassa\u0263 iman-iw kull ass, iwakken ad s\u025bu\u0263 ul ye\u1e63fan zdat \u1e5aebbi akk-d yemdanen.\n24:17 Ac\u1e25al n iseggasen, nekk \u025bace\u0263 di l\u0263e\u1e5bba ; usi\u0263-ed iwakken a d-awi\u0263 kra n yedrimen i d-jem\u025be\u0263 d lem\u025bawna i igellilen n tmurt-iw yerna wwi\u0263-ed da\u0263en lwe\u025bdat i Sidi \u1e5aebbi.\n24:18 Atan wamek i yi-d-ufan deg wefrag n l\u01e7ame\u025b iqedsen : ufan-iyi-d akken kan i ssezdege\u0263 iman-iw akken i d-tenna ccari\u025ba; ur iyi-d zzin imdanen ur yelli ccwal\n24:19 yerna d at Is\u1e5bail n tmurt n Asya i gellan dinna, d nutni i glaq ad bedden zdat-ek ma s\u025ban kra \u0263ef wacu ara ccetkin fell-i.\n24:20 Ne\u0263 m'ulac wid yellan dagi, a d-inin d acu ufan deg-i n diri mi bedde\u0263 zdat unejma\u025b-nsen n cc\u1e5be\u025b ;\n24:21 anagar ma yella \u0263ef wawal-nni i d-nni\u0263 s le\u025bya\u1e0d gar-asen : \u00ab imi umne\u0263 s \u1e25eggu n lmegtin, i d-bedde\u0263 ass-agi \u0263er cc\u1e5be\u025b zdat-wen ! \u00bb\n24:22 Filiks yesnen akken ilaq abrid n Lmasi\u1e25, yenna-yasen : U\u0263alet-ed m'ara d-yawe\u1e0d lqeb\u1e6dan Lizyas, imiren ad \u1e93re\u0263 tamsalt-nwen.\n24:23 Yefka lame\u1e5b i yiwen n lfesyan ad i\u025bass Bulus, lame\u025bna a s-ye\u01e7\u01e7 kra n \u021besri\u1e25, yerna ad ye\u01e7\u01e7 imdukkal-is a d-reSSun fell-ass.\n24:24 Mi \u025beddan kra wussan, yusa-d Filiks akk-d \u021bme\u1e6d\u1e6dut-is Drusila, ne\u021b\u021bat yellan n wat Is\u1e5bail, icegge\u025b a d-awin Bulus, iwakken a sen-d-ihde\u1e5b \u0263ef wayen ye\u025bnan liman di \u0190isa Lmasi\u1e25.\n24:25 Mi gebda Bulus ihedde\u1e5b \u0263ef l\u1e25eqq, \u0263ef wamek ilaq ad i\u1e25kem wemdan deg iman-is, \u0263ef wass n l\u1e25isab i d-iteddun, Filiks ikcem-it lxuf, yenna-yas : Dayen, tzemre\u1e0d a\u021b-\u021b\u1e5bu\u1e25e\u1e0d tura. M'ara d-stife\u0263, a k-d-ssiwle\u0263.\n24:26 Imi i ge\u1e0dme\u025b di Bulus a s-yefk idrimen, si teswi\u025bt \u0263er taye\u1e0d issawal-as-ed iwakken ad ihde\u1e5b yid-es.\n24:27 \u0190eddan sin n iseggasen ; d\u0263a Bursyus Fistus yu\u0263al d l\u1e25akem deg wemkan n Filiks. Filiks-nni imi i geb\u0263a ad i\u025b\u01e7eb i wat Is\u1e5bail, ye\u01e7\u01e7a Bulus di l\u1e25ebs.\n25:1 Mi \u025beddan tlata wussan segmi yu\u0263al d l\u1e25akem, Fistus yuli si temdint n Qi\u1e63arya \u0263er temdint n Lquds.\n25:2 D\u0263a lmuqedmin imeqqranen akk-d imeqqranen n wat Is\u1e5bail, ccetkan \u0263u\u1e5b-es \u0263ef Bulus.\n25:3 Ssutren i Fistus a sen-ixdem lemziya, a sen-d-yawi Bulus \u0263er temdint n Lquds, nutni heggan-as-d taxazabit iwakken a t-n\u0263en deg webrid.\n25:4 Lame\u025bna Fistus yerra-yasen : Bulus i\u021bwa\u1e25bes di Qi\u1e63arya, nekk s yiman-iw q\u1e5bib ad u\u0263ale\u0263 \u0263er dinna.\n25:5 Xti\u1e5bet-ed si gar-awen wid ara yeddun yid-i ; ma yella kra n wayen n diri i gexdem wergaz-agi, ad ccetkin fell-as.\n25:6 Fistus is\u025bedda azal n tmanya ne\u0263 \u025bec\u1e5ba wussan gar-asen, taggara yu\u0263al \u0263er Qi\u1e63arya. Azekka-nni, i\u1e6d\u1e6def amkan \u0263ef wukersi n cc\u1e5be\u025b, icegge\u025b a d-awin Bulus.\n25:7 Mi d-yewwe\u1e0d Bulus, at Is\u1e5bail i d-yusan si temdint n Lquds zzin-as, gren-d fell-as lba\u1e6del, lame\u025bna ur zmiren ara a d-tebten wayen i d qqa\u1e5ben.\n25:8 Bulus i\u1e25udd iman-is yenna : Ur \u025bu\u1e63a\u0263 ccari\u025ba n wat Is\u1e5bail, ur skecme\u0263 le\u1e25\u1e5bam \u0263er l\u01e7ame\u025b iqedsen, ur xulfe\u0263 Qay\u1e63er.\n25:9 Imi geb\u0263a ad issef\u1e5be\u1e25 at Is\u1e5bail, Fistus yenna i Bulus : Teb\u0263i\u1e0d a\u021b-\u021bali\u1e0d \u0263er temdint n Lquds iwakken a\u021b-\u021b\u025beddi\u1e0d di cc\u1e5be\u025b dinna zdat-i ?\n25:10 Lame\u025bna Bulus yenna : \u0194er cc\u1e5be\u025b n Qay\u1e63er i bedde\u0263, \u0263u\u1e5b-es ara \u021b\u021buca\u1e5b\u025be\u0263. Ur xdime\u0263 ula d acemma i g\u1e0du\u1e5b\u1e5ben at Is\u1e5bail, akken te\u1e93ri\u1e0d ke\u010d\u010d s yiman-ik.\n25:11 Ma yella xedme\u0263 lba\u1e6del ne\u0263 ayen yuklalen lmut, ur \u021b\u021baggade\u0263 ara ad mmte\u0263. Lame\u025bna ma yella lec\u0263al-agi \u0263ef i d-ccetkan fell-i ur se\u1e25\u1e25an ara, yiwen ur izmir a yi-isellem ger ifassen-nsen. Ad r\u1e93e\u0263 cc\u1e5be\u025b \u0263er Qay\u1e63er !\n25:12 Mi gemcawa\u1e5b Fistus ne\u021b\u021ba \u021b-\u021bejma\u025bt-nni n cc\u1e5be\u025b, yenna i Bulus : Tessutre\u1e0d-ed cc\u1e5be\u025b n Qay\u1e63er, a\u021b-\u021be\u021b\u021bucar\u025be\u1e0d zdat Qay\u1e63er !\n25:13 Mi \u025beddan kra wussan, agellid A\u0263ribas akk-d weltma-s Birinis, usan-d \u0263er Qi\u1e63arya ad sellmen \u0263ef l\u1e25akem Fistus.\n25:14 Imi qqimen dinna kra wussan, Fistus i\u1e25ka-yas i ugellid-nni taqsi\u1e6d n Bulus, yenna-yas : Yella yiwen wergaz i ge\u01e7\u01e7a Filiks dagi d ame\u1e25bus.\n25:15 Mi lli\u0263 di temdint n Lquds, ccetkan fell-as imeqqranen n lmuqedmin d l\u025buqal n wat Is\u1e5bail ; ssutren-iyi-d ad \u1e25ekme\u0263 fell-as.\n25:16 Nni\u0263-asen ma\u010d\u010di di l\u025badda n i\u1e5bumaniyen ad \u1e25ekmen \u0263ef wemdan uqbel a t-semqabalen ne\u021b\u021ba d wid i d-iccetkan fell-as, iwakken ad yaf abrid amek ara idafe\u025b \u0263ef yiman-is.\n25:17 Ihi usan-d \u0263er dagi. Ur \u025be\u1e6d\u1e6dle\u0263 ara, azekka-nni fki\u0263 lame\u1e5b a d-awin argaz-nni iwakken a t-s\u025beddi\u0263 di cc\u1e5be\u025b ;\n25:18 wid iccetkan fell-as ur d-nnin acemma seg wayen \u021braju\u0263 a t-id-inin.\n25:19 \u021aemjadalen anagar \u0263ef ddin akk-d yiwen i\u021busemman \u0190isa. \u0190isa-agi yemmut, me\u025bna Bulus yeqqa\u1e5b-ed yedder.\n25:20 Imi ur \u1e93ri\u0263 ara acu ara xedme\u0263 di temsalt-agi, nni\u0263-as i Bulus ma yeb\u0263a ad i\u1e5bu\u1e25 \u0263er temdint n Lquds iwakken ad i\u021b\u021buca\u1e5be\u025b dinna,\n25:21 lame\u025bna yer\u1e93a cc\u1e5be\u025b iwakken ad i\u021b\u021buca\u1e5be\u025b zdat Qay\u1e63er ; d\u0263a fki\u0263 lame\u1e5b a t-\u025bassen alamma d ass i deg ara t-cegg\u025be\u0263 \u0263er Qay\u1e63er.S\n25:22 Agellid A\u0263ribas yenna i Fistus : B\u0263i\u0263 ula d nekk ad sle\u0263 i wergaz-agi. Fistus yenna-yas : Azekka a s-tesle\u1e0d !\n25:23 Azekka-nni agellid A\u0263ribas d weltma-s Birinis usan-d, cebb\u1e25en-d iman-nsen, \u1e6d\u1e6dfen amkan deg wexxam n cc\u1e5be\u025b nutni d lqeb\u1e6danat akk-d imeqqranen n temdint ; l\u1e25akem Fistus yefka lame\u1e5b a d-skecmen Bulus,\n25:24 d\u0263a yenna : Ay agellid A\u0263ribas akk-d kunwi i g\u1e25ed\u1e5ben dagi ! Argaz-agi, d win akken i \u0263ef d-ccetkan wat Is\u1e5bail ama di temdint n Lquds ama dagi ; \u021b\u025beggi\u1e0den qqa\u1e5ben : \u00ab ilaq ad immet \u00bb!\n25:25 Ma d nekk, idhe\u1e5b-iyi-d l\u1e25al ur ixdim ula d acemma yuklalen lmut ; imi ne\u021b\u021ba s yiman-is yer\u1e93a cc\u1e5be\u025b \u0263er Qay\u1e63er, qeble\u0263 a s-t-cegg\u025be\u0263.\n25:26 Ur ufi\u0263 ula d yiwet n sebba ise\u1e25\u1e25an i \u0263ef ara ketbe\u0263 fell-as i Qay\u1e63er ; daymi i t-id-sbedde\u0263 zdat wen, ula zdat-ek ay agellid A\u0263ribas, iwakken m'ara t-be\u1e25ten ad yili wayen ara ketbe\u0263 fell-as.\n25:27 Axa\u1e6der wala\u0263 ma\u010d\u010di d \u1e63\u1e63wab ma cegg\u025be\u0263 yiwen ume\u1e25bus \u0263er temdint n \u1e5auma mbla ma fki\u0263-asen sebba s wayes i d ccetkan fell-as.\n26:1 A\u0263ribas yenna i Bulus : -- Atan \u0263u\u1e5b-ek wawal, tzemre\u1e0d a\u021b-\u021bdaf\u025be\u1e0d \u0263ef yiman-ik. Bulus yerfed afus-is iwakken ad idafe\u025b \u0263ef yiman-is, yenna :\n26:2 Fe\u1e5b\u1e25e\u0263 a\u1e6das ay agellid A\u0263ribas imi zdat-ek ara \u025beddi\u0263 di cc\u1e5be\u025b ass-agi \u0263ef wayen akk i ccetkan fell-i wat Is\u1e5bail,\n26:3 axa\u1e6der tesne\u1e0d akken ilaq le\u025bwayed akk-d yimeslayen-nsen ; di le\u025bnaya-k ihi sem\u1e25ess-iyi-d s le\u025bqel.\n26:4 At Is\u1e5bail ssnen tikli-inu si tem\u1e93i-w, axa\u1e6der \u021b\u021bu\u1e5bebba\u0263 di temdint n Lquds ger warraw n tmurt-iw.\n26:5 Ssnen-iyi si zik ma b\u0263an ad cehden fell-i. Lli\u0263 d afarizi, teb\u025be\u0263 leqwanen iwe\u025b\u1e5ben ye\u025bnan ddin-nne\u0263 di tejma\u025bt n ifariziyen.\n26:6 Bedde\u0263 ass-agi di cc\u1e5be\u025b axa\u1e6der ssarme\u0263 a\u021b-\u021bwakmel lem\u025bahda-nni i gefka Sidi \u1e5aebbi i lejdud-nne\u0263.\n26:7 Tnac le\u025b\u1e5bac-nne\u0263 i g\u025bebden \u1e5aebbi am yi\u1e0d am ass, \u021b\u1e5ba\u01e7un a d-tawe\u1e0d lem\u025bahda-agi i ssaramen. \u0194ef wusirem-agi i ccetkan wat Is\u1e5bail fell-i.\n26:8 Ay agellid A\u0263ribas, acu\u0263e\u1e5b i t\u0263ilem d lmu\u1e25al a d-isse\u1e25yu Sidi \u1e5aebbi lmegtin ?\n26:9 Ma d nekkini, di tazwara \u025be\u1e5bde\u0263 ad xa\u1e63me\u0263 s wayen yellan di tezmert-iw, isem-agi n \u0190isa Ana\u1e63ari ;\n26:10 d ayen i xedme\u0263 di temdint n Lquds, rri\u0263 a\u1e6das imasi\u1e25iyen \u0263er l\u1e25ebs, yerna d lmuqedmin imeqqranen i yi-d-yefkan \u021besri\u1e25-agi. M'ara \u1e25ekkmen fell-asen s lmut, nekkini qebble\u0263 ;\n26:11 qeh\u1e5be\u0263-ten ac\u1e25al d abrid si l\u01e7ame\u025b \u0263er waye\u1e0d, \u1e25e\u1e5bse\u0263-ten ad \u1e6d\u1e6dix\u1e5ben i webrid-agi n \u0190isa ; deg urrif-iw ameqqran, \u021b\u1e5bu\u1e25e\u0263 armi \u021b-\u021bimdinin tibe\u1e5b\u1e5baniyin iwakken a ten-qehh\u1e5be\u0263.\n26:12 \u0194ef wannect-nni lmuqedmin imeqqranen fkan-iyi tazmert s wayes \u1e5bu\u1e25e\u0263 \u0263er temdint n Dimecq.\n26:13 Taswi\u025bt kan di \u021bna\u1e63fa wass ay agellid, wala\u0263 deg webrid yiwet n tafat i d-yekkan seg igenni, te\u021bfe\u01e7\u01e7i\u01e7 akte\u1e5b n yi\u1e6dij, tezzi-yi-d i nekk akk-d wid yellan yid-i,\n26:14 ne\u0263li akk \u0263er lqa\u025ba. Sli\u0263 i \u1e63\u1e63ut i d-iqqa\u1e5ben s tmeslayt ta\u025bib\u1e5banit : A Ca\u025bul, a Ca\u025bul ! Acu\u0263e\u1e5b i yi te\u021bqehhi\u1e5be\u1e0d ? Yew\u025be\u1e5b fell-ak a\u021b-\u021b\u025ba\u1e63i\u1e0d inezlan.\n26:15 Rri\u0263-as : Anwa-k a Sidi ? Yenna-yi-d : Nekkini d \u0190isa-nni i te\u021bqehhi\u1e5be\u1e0d ;\n26:16 kker fell-ak, bedd \u0263ef yida\u1e5b\u1e5ben-ik, \u1e0deh\u1e5be\u0263-ak-d iwakken a k-rre\u0263 d aqeddac-iw, d inigi \u0263ef wayen twala\u1e0d ass-agi d wayen ara k-d-sekne\u0263 sya d asawen.\n26:17 Xta\u1e5be\u0263-k-id si ger wat Is\u1e5bail akk-d le\u01e7nas nni\u1e0den u\u0263u\u1e5b ara k cegg\u025be\u0263. A sen-teldi\u1e0d allen\n26:18 iwakken a d ff\u0263en si \u1e6d\u1e6dlam \u0263er tafat, si tezmert n Cci\u1e6dan \u0263er tezmert n \u1e5aebbi, ad amnen yis-i, iwakken a sen-ne\u025bfu\u0263 ddnubat-nsen, ad s\u025bun amkan ger wid i gexta\u1e5b Sidi \u1e5aebbi.\n26:19 Daymi, ay agellid A\u0263ribas, ur \u025bu\u1e63a\u0263 ara awe\u1e25\u1e25i i yi-d-yusan seg igenni.\n26:20 Bdi\u0263 abecce\u1e5b di temdint n Dimecq akk-d \u021b-\u021bemdint n Lquds, becc\u1e5be\u0263 da\u0263en di tmurt n Yahuda me\u1e5b\u1e5ba, di taggara, becc\u1e5be\u0263 i wat le\u01e7nas ur nelli ara seg wat Is\u1e5bail, nhi\u0263-ten ad tuben, a d-u\u0263alen \u0263er webrid n \u1e5aebbi, ad xedmen lec\u0263al i d-i\u021bbegginen belli tuben s wul-nsen.\n26:21 \u0194ef wannect-agi i yi-\u1e6d\u1e6dfen wat Is\u1e5bail deg wefrag n l\u01e7ame\u025b iqedsen, \u025be\u1e5bden ad iyi-n\u0263en.\n26:22 Lame\u025bna s lem\u025bawna n Sidi \u1e5aebbi, ddre\u0263 armi d ass-a, \u021bbecci\u1e5be\u0263 i yemdanen me\u1e5b\u1e5ba, ama d ame\u0263bun ama d ame\u1e5bkanti ; yerna ayen i d-qqa\u1e5be\u0263, d ayen akken i \u0263ef d-caren lenbiya akk-d Sidna Musa :\n26:23 ye\u025bni Lmasi\u1e25 ad i\u025bteb, d ne\u021b\u021ba i d amezwaru ara d-i\u1e25yun si ger lmegtin, ad ibecce\u1e5b tafat i wegdud n wat Is\u1e5bail akk-d le\u01e7nas nni\u1e0den.\n26:24 Akken yella Bulus ye\u021bdafa\u025b \u0263ef yiman-is, Fistus yen\u1e6deq-ed s le\u025bya\u1e0d, yenna : Iffe\u0263-ik le\u025bqel a Bulus ! Lket\u1e5ba n tmusni-inek tessufe\u0263-ak le\u025bqel !\n26:25 Bulus yerra-yas : Ur iyi-iffi\u0263 ara le\u025bqel a Fistus ameqqran ! Ayen akka i d-qqa\u1e5be\u0263 d imeslayen n tide\u021b yes\u025ban \u1e63\u1e63wab.\n26:26 Ula d agellid A\u0263ribas, ye\u025blem s wayagi ; daymi i d-mmeslaye\u0263 zdat-es \u025binani, imi ma\u010d\u010di s tuffra i ged\u1e5ba wannect-a.\n26:27 Ay agellid, tumne\u1e0d s wayen i d-nnan lenbiya ? Sri\u0263 tumne\u1e0d yis-sen !\n26:28 A\u0263ribas yenna i Bulus : Lemmer a yi-d ternu\u1e0d kra yimeslayen ahat ad iyi-tqen\u025be\u1e0d ad u\u0263ale\u0263 d amasi\u1e25i !\n26:29 Bulus yenna-yas : A wi-yufan a \u1e5aebbi, ma\u010d\u010di d ke\u010d\u010dini kan, lame\u025bna ula d wid akk i yi-d-isme\u1e25sisen ass-agi, a\u021b-\u021bu\u0263alem am nekk tura ne\u0263 deg ussan i d-iteddun, \u1e25aca snasel-agi i yi cudden !\n26:30 D\u0263a agellid A\u0263ribas, l\u1e25akem Fistus, Birinis d wid akk yeqqimen yid-sen, kkren-d.\n26:31 Mi kkren ad \u1e5bu\u1e25en, nnan wway gar-asen : Argaz-agi ur ixdim ula d acemma yuklalen lmut ne\u0263 l\u1e25ebs.\n26:32 A\u0263ribas yenna i Fistus : Argaz-agi izmer ad i\u021b\u021buserre\u1e25 lemmer ur yer\u1e93i ara cc\u1e5be\u025b \u0263er Qay\u1e63er.\n27:1 Mi fkan lame\u1e5b a nerkeb lbabu\u1e5b \u0263er tmurt n Selyan, \u01e7\u01e7an Bulus akk-d kra n ime\u1e25bas nni\u1e0den i yiwen ufesyan n terba\u025bt n Qay\u1e63er, isem-is Xulyus.\n27:2 Nerkeb deg yiwen lbabu\u1e5b n temdint n Adramit, ara i\u1e5bu\u1e25en rrif n tmura n Asya ; n\u1e5bu\u1e25, yedda yid-nne\u0263 Arista\u1e5bk yellan d amasiduni n temdint n Ti\u1e63alunik.\n27:3 Azekka-nni, newwe\u1e0d \u0263er temdint n Sidun , Xulyus ye\u021bqada\u1e5ben Bulus, ixdem-as lemziya, iserre\u1e25-as ad i\u1e5bu\u1e25 \u0263er imdukkal-is iwakken a s-d-fken ayen ye\u1e25wa\u01e7.\n27:4 Mi neqle\u025b syenna, n\u025bedda rrif rrif n tegzirt n Qub\u1e5bus axa\u1e6der i\u1e63be\u1e25-a\u0263-d wa\u1e0du i\u01e7ehden si zdat.\n27:5 Nezger leb\u1e25e\u1e5b n Silisya akk-d Bamfilya, newwe\u1e0d \u0263er lme\u1e5b\u1e63a n Mira yellan di tmurt n Lizya.\n27:6 Afesyan-nni yufa dinna lbabu\u1e5b n Skandriya ara i\u1e5bu\u1e25en \u0263er tmurt n Selyan, isserkeb-a\u0263 deg-s.\n27:7 Lbabu\u1e5b nni yewwi-ya\u0263 kra n wussan s \u021b\u021bawil ; armi ne\u1e5bwa le\u025btab i newwe\u1e0d \u0263er tama n temdint n Knidus, imi ur a\u0263-ye\u01e7\u01e7i ara wa\u1e0du a nqe\u1e5b\u1e5beb, n\u025bedda rrif n tegzirt n Kritus, \u0263er tama n Salmuni.\n27:8 Nkemmel rrif rrif s le\u025btab, armi newwe\u1e0d \u0263er yiwen wemkan isem-is \u00ab Lemra\u1e63i iceb\u1e25en \u00bb, zdat temdint n Lazaya.\n27:9 Nes\u1e5bu\u1e25 a\u1e6das n lweqt, lweqt n usafer di leb\u1e25e\u1e5b yu\u0263al yew\u025be\u1e5b a\u1e6das, imi ass i deg \u021b\u021bu\u1e93ummen wat Is\u1e5bail di taggara n lex\u1e5bif i\u025bedda.\n27:10 Daymi i sen-i\u025beggen Bulus yenna-yasen : Ay atmaten, \u1e93ri\u0263 belli tikkelt-agi ma nkemmel a\u1e63afe\u1e5b-nne\u0263, a d-tili lexsa\u1e5ba ma\u010d\u010di kan i lbabu\u1e5b d ssel\u025ba yellan deg-s, lame\u025bna tezmer a\u021b-\u021beglu ula yis-nne\u0263.\n27:11 Afesyan-nni a\u1e5bumani yu\u0263 awal i bab n lbabu\u1e5b akk-d win i t-ineh\u1e5ben wala ad ya\u0263 awal i Bulus.\n27:12 Imi lme\u1e5b\u1e63a-nni ur telhi ara iwakken ad s\u025beddin deg-s ccetwa, azgen ameqqran n ibe\u1e25riyen b\u0263an ad \u1e5bu\u1e25en, iwakken ma yella wamek, ad aw\u1e0den \u0263er lme\u1e5b\u1e63a n Finikus yellan di tegzirt n Kritus ; lme\u1e5b\u1e63a-yagi tqubel l\u01e7iha ta\u0263e\u1e5bbit, b\u0263an ad s\u025beddin deg-s ccetwa.\n27:13 Akken i d-yekker yiwen ube\u1e25ri xfifen, \u0263ilen ad aw\u1e0den \u0263er leqsed nsen. Refden amextaf n lbabu\u1e5b, \u1e5bu\u1e25en rrif rrif n tegzirt n Kritus.\n27:14 Lame\u025bna ur t\u025be\u1e6d\u1e6del ara tekker-ed yiwet n tbuci\u1e0dant iwumi qqa\u1e5ben Erakilun i d-ikkan seg idurar n tegzirt-nni.\n27:15 Imi lbabu\u1e5b ur s-izmir ara i tbuci\u1e0dant-nni, ne\u01e7\u01e7a-t a t-yawi wa\u1e0du \u0263er wanda i s-yehwa,\n27:16 n\u025bedda seddaw yiwet n tegzirt tamec\u1e6du\u1e25t yeddurin \u0263ef wa\u1e0du, isem-is Kluda. Mi \u0263-te\u0263li teflukt-nni n leslak, s le\u025btab ameqqran i \u021b-id-nessuli \u0263er lbabu\u1e5b.\n27:17 Imi nuggad a \u0263-yawi wa\u1e0du \u0263er leryuf iwe\u025b\u1e5ben n tmurt n Libya, ncudd lbabu\u1e5b s imurar ; nerna n\u1e63ubb-ed lbac-nni s wayes i t-ye\u021b\u021bawi wa\u1e0du, ne\u01e7\u01e7a iman-nne\u0263 a \u0263-yawi \u0263er wanda yeb\u0263a.\n27:18 Azekka-nni, imi mazal leb\u1e25e\u1e5b yenhewwal, nessenqes kra n ssel\u025ba yellan deg-s n\u1e0degge\u1e5b-i\u021b \u0263er leb\u1e25e\u1e5b.\n27:19 Ass wis tlata, ixeddamen n lbabu\u1e5b rnan \u1e0degg\u1e5ben ssel\u025ba-nni i d-iqqimen.\n27:20 Ac\u1e25al n wussan ur d-iban yi\u1e6dij ur d-banen itran, leb\u1e25e\u1e5b mazal-it yerwi, ur numin ara a n\u021bwasellek.\n27:21 A\u1e6das wussan i neqqim mbla lmakla ; d\u0263a Bulus ibedd-ed gar-asen yenna : Ay irgazen, lemmer i yi-tu\u0263em awal m'akken i wen-d-nni\u0263 : a neqqim axi\u1e5b di lme\u1e5b\u1e63a n Kritus, tili ur d-tde\u1e5b\u1e5bu ara lexsa\u1e5ba akk-d lxuf-agi !\n27:22 Tura ur \u021b\u021bagadet ara, s\u01e7ehdet iman-nwen axa\u1e6der ula d yiwen deg-wen ur i\u021bme\u021b\u021bat ; ur d-te\u021b\u021bili lexsa\u1e5ba anagar lbabu\u1e5b-agi ara i\u0263e\u1e5bqen.\n27:23 I\u1e0d i\u025beddan, Sidi \u1e5aebbi i \u025bebbde\u0263 icegge\u025b-ed yiwen lmelk ibedd-ed \u0263u\u1e5b-i\n27:24 yenna-yi-d : \u00ab a Bulus, ur \u021b\u021baggad ara ! Ilaq a\u021b-\u021bbedde\u1e0d zdat Qay\u1e63er, atan Sidi \u1e5aebbi a kkun isellek s ke\u010d\u010d s wid yellan yid-ek \u00bb.\n27:25 Sew\u1e5bet ihi ay atmaten ! \u021aekle\u0263 \u0263ef \u1e5aebbi ad id\u1e5bu am akken i d-yenna ;\n27:26 mbla ccekk ihi a \u0263-\u1e0degg\u1e5bent lemwaji \u0263er yiwet n tegzirt.\n27:27 I\u1e0d wis \u1e5bbe\u025b\u1e6dac, mazal a\u1e0du ye\u021bhuccu-ya\u0263 i\u021b\u021bawi-ya\u0263 akkin akka \u0263ef leb\u1e25e\u1e5b Agrakal ; di \u021bna\u1e63fa n yi\u1e0d, ibe\u1e25\u1e5biyen \u1e25ussen belli ur b\u025biden ara \u0263ef lberr.\n27:28 Ktalen lqa\u025b n leb\u1e25e\u1e5b s wemrar, ufan llant\n27:29 Imi uggaden lbabu\u1e5b a t-id-i\u1e25az kra seddaw-as, \u1e0degg\u1e5ben \u1e5beb\u025ba imextafen \u0263er deffir n lbabu\u1e5b, tqelqen melmi ara yali wass.\n27:30 Lame\u025bna ixeddamen n lbabu\u1e5b \u021bqelliben ad rewlen ; \u1e63ubben taflukt n leslak \u0263er leb\u1e25e\u1e5b, ste\u025bmilen am akken d amextaf ara \u1e0degg\u1e5ben \u0263er zdat lbabu\u1e5b.\n27:31 D\u0263a Bulus yenna i lqeb\u1e6dan d l\u025beske\u1e5b-is : M'ur qqimen ara yergazen-agi di lbabu\u1e5b, ur tezmirem ara a\u021b-\u021bmen\u025bem ! S\n27:32 Imiren l\u025beske\u1e5b gezmen imurar n teflukt, \u01e7\u01e7an-\u021b a\u021b-\u021be\u0263li \u0263er leb\u1e25e\u1e5b.\n27:33 Weqbel ad yali wass, Bulus inha-ten akk ad \u010d\u010den cwi\u1e6d n lqut, yenna : Ass-agi d ass wis \u1e5bbe\u025b\u1e6dac ur te\u025b\u1e5bi\u1e0dem lqut.\n27:34 Tura nhi\u0263-kkun ihi a\u021b-\u021be\u010d\u010dem iwakken a\u021b-\u021be\u021b\u021busellkem, ula d yiwen deg-wen ur s-i\u021b\u1e5bu\u1e25 wen\u1e93ad seg uqe\u1e5b\u1e5buy.\n27:35 Mi d-yenna ayagi, iddem-ed a\u0263\u1e5bum, i\u1e25med \u1e5aebbi zdat-sen me\u1e5b\u1e5ba, yeb\u1e0da-t, yebda ite\u021b\u021b.\n27:36 Yekkes-asen akk lxuf d\u0263a \u010d\u010dan.\n27:38 Mi \u010d\u010dan armi \u1e5bwan, \u1e0degg\u1e5ben \u0263er leb\u1e25e\u1e5b ticekka\u1e5bin n yirden, iwakken ad yifsus lbabu\u1e5b.\n27:39 Mi guli wass, ur e\u025bqilen ara ma\u1e0di tamurt-nni anda ww\u1e0den. Lame\u025bna walan yiwen wemkan iqe\u1e5bben, iban-ed deg-s \u1e5b\u1e5bmel, b\u0263an ad rren lbabu\u1e5b \u0263er dinna ma yella wamek.\n27:40 Fsin imurar i imextafen bran asen \u0263er leb\u1e25e\u1e5b, fsin da\u0263en imurar i imeqdafen s wacu neh\u1e5ben lbabu\u1e5b ; d\u0263a ssulin yiwen ube\u1e25nuq yellan \u0263er zdat n lbabu\u1e5b iwakken a ten-yawi wa\u1e0du \u0263er rrif n leb\u1e25e\u1e5b.\n27:41 Lame\u025bna ww\u1e0den \u0263er yiwen wemkan n \u1e5b\u1e5bmel iwumi d-izzi leb\u1e25e\u1e5b ; rran \u0263er dinna lbabu\u1e5b-nni, l\u01e7iha n zdat te\u1e25\u1e63el di \u1e5b\u1e5bmel te\u1e25bes ma d l\u01e7iha n deffir tebda te\u021b\u1e5bu\u1e93u si lqewwa n lemwaji.\n27:42 L\u025beske\u1e5b b\u0263an ad n\u0263en ime\u1e25bas-nni axa\u1e6der uggaden a sen-rewlen s l\u025bum.\n27:43 Lqeb\u1e6dan-nni i geb\u0263an ad isellek Bulus, ur ten-ye\u01e7\u01e7i ara ad xedmen leb\u0263i-nsen. Yefka lame\u1e5b i wid yessnen ad \u025bummen, ad \u1e0degg\u1e5ben iman-nsen d imezwura \u0263er waman iwakken ad aw\u1e0den \u0263er rrif.\n27:44 Ma d wiya\u1e0d a ten-teb\u025ben, ad \u1e6d\u1e6dfen di telwi\u1e25in ne\u0263 deg iceqfan n lbabu\u1e5b. S wakka, ww\u1e0den me\u1e5b\u1e5ba \u0263er rrif n leb\u1e25e\u1e5b di laman.\n28:1 Mi d-nemne\u025b si leb\u1e25e\u1e5b, nesla belli tigzirt-nni isem-is Mal\u1e6da.\n28:2 Imezda\u0263-is set\u1e5be\u1e25ben yis-nne\u0263, xedmen-a\u0263 lxi\u1e5b d ameqqran ; ce\u025blen times axa\u1e6der yekkat ugeffur ( lehwa ), yerna d asemmi\u1e0d.\n28:3 Bulus ijme\u025b-ed kra n yes\u0263a\u1e5ben a ten-iger \u0263er tmes, si le\u1e25mu-nni n tmes yeffe\u0263-ed yiwen n wezrem yen\u1e6ded deg ufus-is.\n28:4 L\u0263aci mi walan azrem-nni yecken\u1e6de\u1e0d deg ufus-is, qqa\u1e5ben wway gar-asen : \u00ab Argaz-agi iban d bu tmeg\u1e5ba\u1e0d, axa\u1e6der \u0263as akken yemne\u025b-ed si leb\u1e25e\u1e5b, Sidi \u1e5aebbi yellan d Bab n l\u1e25eqq ur t-ye\u021b\u021ba\u01e7a ara ad yidir. \u00bb\n28:5 Lame\u025bna Bulus yezwi azrem-nni \u0263er tmes, ur t-yu\u0263 ula d acemma ;\n28:6 l\u0263aci-nni \u021b\u1e5ba\u01e7un a t-walin ibzeg ne\u0263 ad yemmet imiren kan. \u0190ussen-t, mi walan ur t-yu\u0263 wacemma, beddlen \u1e5b\u1e5bay, \u1e25esben-t d yiwen seg i\u1e5bebbiten s wayes \u021b\u021bamnen.\n28:7 Di le\u01e7wahi-nni i gezde\u0263 Bubliyus l\u1e25akem ameqqran n tegzirt-nni ; yes\u025ba a\u1e6das n wakal, yes\u1e6der\u1e25eb yis-nne\u0263, yerna yessens-a\u0263 \u0263u\u1e5b-es tlata wussan.\n28:8 Deg ussan-nni, baba-s n Bubliyus yella deg usu yehlek, tu\u0263-it tawla yerna tuzzel t\u025bebbu\u1e6d-is. Bulus i\u1e5bu\u1e25 \u0263u\u1e5b-es, issers ifassen-is fell-as, yed\u025ba \u0263er Sidi \u1e5aebbi d\u0263a ye\u1e25la.\n28:9 Mi slan yis imu\u1e0dan n tegzirt-nni usan-d \u0263u\u1e5b-es isse\u1e25la-ten ula d nutni.\n28:10 \u0194ef wayagi, qud\u1e5ben-a\u0263 a\u1e6das ; mi nekker a n\u1e5bu\u1e25, fkan-a\u0263-d ayen akk ne\u1e25wa\u01e7 i webrid.\n28:11 Mi \u025beddan tlata waguren, nerkeb yiwen lbabu\u1e5b n temdint n Skandriya iwumi qqa\u1e5ben Dyusku\u1e5b, is\u025beddan ccetwa di tegzirt-nni ;\n28:12 newwe\u1e0d \u0263er temdint n Sirakuz, anda neqqim tlata wussan.\n28:13 Syenna nkemmel rrif rrif n leb\u1e25e\u1e5b armi \u021b-\u021bamdint n \u1e5aejyu, azekka-nni yekker-ed yiwen n wa\u1e0du i d-yekkan seg usamer, sin wussan mbe\u025bd, newwe\u1e0d \u0263er temdint n Buzul.\n28:14 Nufa dinna atmaten i \u0263 i\u1e25ellelen a neqqim yid-sen seb\u025ba wussan, syenna nkemmel abrid \u0263er temdint n \u1e5auma.\n28:15 Mi slan yis-nne\u0263 watmaten n temdint n \u1e5auma, usan-d armi d ssuq n Abyus akk-d wemkan ye\u021b\u021busemman \u00ab Tlata \u021abernat \u00bb iwakken a \u0263-d-mmagren. Mi ten iwala Bulus, yef\u1e5be\u1e25 ye\u1e25med \u1e5aebbi yerna yu\u0263al-it-id l\u01e7ehd.\n28:16 Mi newwe\u1e0d \u0263er temdint n \u1e5auma, serr\u1e25en-as i Bulus ad izde\u0263 deg yiwen wexxam, ne\u021b\u021ba d yiwen u\u025besk\u1e5bi i t ye\u021b\u025bassan.\n28:17 Mi \u025beddan tlata wussan, Bulus yessawel i imeqqranen n wat Is\u1e5bail. Mi d-nnejma\u025ben, Bulus yenna yasen : Ay atmaten, \u0263as akken ur xdime\u0263 acemma i gxulfen agdud d le\u025bwayed n lejdud-nne\u0263, \u1e6d\u1e6dfen-iyi \u0263er l\u1e25ebs di temdint n Lquds, sellmen-iyi ger ifassen n l\u025beske\u1e5b n \u1e5auman.\n28:18 Mi yi-be\u1e25ten, b\u0263an ad iyi serr\u1e25en axa\u1e6der ur ufin ara deg-i sebba s wayes ara \u1e25ekmen fell-i s lmut.\n28:19 Imi ur qbilen ara wat Is\u1e5bail ad iyi-d-serr\u1e25en i\u1e5bumaniyen, i\u1e25ettem-iyi l\u1e25al ad r\u1e93e\u0263 cc\u1e5be\u025b \u0263er Qay\u1e63er ; lame\u025bna ma\u010d\u010di d acetki i b\u0263i\u0263 ad ccetki\u0263 \u0263ef wegdud-iw.\n28:20 Daymi i b\u0263i\u0263 a kkun-\u1e93re\u0263, ad mmeslaye\u0263 yid-wen axa\u1e6der \u0263ef ddemma n usirem n wat Is\u1e5bail i \u021bwarze\u0263 s snasel-agi.\n28:21 Imeqqranen n wat Is\u1e5bail nnan-as : Ur d-ne\u1e6d\u1e6dif ula d yiwet n teb\u1e5ba\u021b si tmurt n Yahuda \u0263ef wayen ye\u025bnan tamsalt-ik, ula d yiwen seg watmaten ur d-yusi ad iccetki ne\u0263 a \u0263-d-yini ayen n diri fell-ak.\n28:22 Lame\u025bna neb\u0263a a nsel s \u0263u\u1e5b-ek ayen akka s wacu i tumne\u1e0d, ma d ayen ye\u025bnan tajma\u025bt-agi seg i d-tekki\u1e0d, ne\u1e93ra belli di yal amkan te\u021bmagar-ed uguren.\n28:23 D\u0263a msefhamen \u0263ef wass nni\u1e0den i deg ara mlilen. Mi d yewwe\u1e0d wass-nni, usan-d deg wa\u1e6das yid-sen \u0263er wexxam n Bulus. Si \u1e63\u1e63be\u1e25 armi \u021b-\u021bameddit, Bulus ye\u021bbecci\u1e5b-asen \u0263ef tgeldit n \u1e5aebbi s ccari\u025ba n Musa \u021b-\u021bektabin n lenbiya, ye\u021bqellib a ten-iqenne\u025b iwakken ad amnen s Sidna \u0190isa.\n28:24 Kra umnen s wayen i d-yenna, ma d wiya\u1e0d ugin ad amnen.\n28:25 Mi \u021beddun ad \u1e5bu\u1e25en mazal lxilaf gar-asen, d\u0263a Bulus yerna-yasen imeslayen-agi : \u021a-\u021bide\u021b ayen i d-yenna \u1e5a\u1e5bu\u1e25 iqedsen i lejdud-nwen s yimi n nnbi Ice\u025bya\n28:26 mi d-yenna : \u1e5au\u1e25 \u0263er wegdud-agi tini\u1e0d-asen : \u0263as a\u021b-\u021beslem s ime\u1e93\u1e93u\u0263en-nwen ur tfehmem ara ; a\u021b-\u021bemmuqlem s wallen-nwen ur te\u021bwalim ara,\n28:27 imi ul n wegdud-agi yu\u0263al d az\u1e5bu ; qeflen ime\u1e93\u1e93u\u0263en-nsen, qemcen allen-nsen ; ur b\u0263in ara ad walin s wallen-nsen, d slen s ime\u1e93\u1e93u\u0263en-nsen, ad fehmen s wul-nsen, iwakken a d-u\u0263alen \u0263u\u1e5b-i ad beddlen tikli akken a ten-sse\u1e25lu\u0263 !\n28:28 Atan ihi tura leslak n Sidi \u1e5aebbi ad i\u021b\u021bunefk i le\u01e7nas nni\u1e0denur nelli ara n wat Is\u1e5bail axa\u1e6der nutni a s-sem\u1e25essen yerna a t-qeblen.\n28:29 Mi d-yenna Bulus ayagi, ff\u0263en-d imeqqranen n wat Is\u1e5bail, le\u1e25\u1e25un \u021bemjadalen wway gar-asen.\n28:30 Bulus yeqqim sin iseggasen deg wexxam-nni i gekra. Is\u1e6der\u1e25ib s kra n win i d-ye\u021b\u021basen a t-i\u1e93er.\n28:31 Ye\u021bbecci\u1e5b tageldit n \u1e5aebbi s tlelli, isselmad-asen ayen akk ye\u025bnan Sidna \u0190isa Lmasi\u1e25, ulac win i t-i\u1e25ebsen.","title":"Kabyle Bible (NT): Acts","type":"page"}