{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/co1.htm","path":"bib/wb/kab/co1.htm","source_url":"https://sacred-texts.com/bib/wb/kab/co1.htm","text":"1:1 Nekk Bulus, iwumi i d-issawel Sidi \u1e5aebbi s leb\u0263i-ines iwakken ad ili\u0263 d amcegge\u025b n \u0190isa Lmasi\u1e25 akk-d gma-tne\u0263 Sustin,\n1:2 i tejma\u025bt n Sidi \u1e5aebbi i gellan di temdint n Kurintus, i wid i d-yexta\u1e5b Sidi \u1e5aebbi s \u0190isa Lmasi\u1e25 ad ilin d imqedsen, d wid akk yellan di mkul amkan ineddhen s yisem n Sidna \u0190isa Lmasi\u1e25, i gellan d Ssid-nsen d Ssid nne\u0263 :\n1:3 \u1e5b\u1e5be\u1e25ma \u021b-\u021balwit a wen-d \u021b\u021bunefkent s \u0263u\u1e5b \u1e5aebbi Baba-tne\u0263 akk-d Sidna \u0190isa Lmasi\u1e25.\n1:4 Zgi\u0263 \u021b\u1e25emmide\u0263 Sidi \u1e5aebbi fell-awen \u0263ef \u1e5b\u1e5be\u1e25ma i wen-d-yefka s \u0190isa Lmasi\u1e25,\n1:5 axa\u1e6der yis i kkun-id ye\u1e5bzeq s mkul lxi\u1e5b, ama s wawal-is ama s tmusni-ines,\n1:6 imi cchada \u0263ef Lmasi\u1e25 t\u1e5be\u1e63\u1e63a nezzeh deg-wen.\n1:7 Daymi ur kkun-ixu\u1e63\u1e63 wacemma n lxi\u1e5b s \u0263u\u1e5b \u1e5aebbi, kunwi ye\u021b\u1e5ba\u01e7un ass i deg ara d-yu\u0263al Ssid-nne\u0263.\n1:8 A kkun isse\u01e7hed alamma \u021b-\u021baggara iwakken a d-tbanem mbla l\u025bib ass n tu\u0263alin n \u0190isa Lmasi\u1e25.\n1:9 Sidi \u1e5aebbi ye\u021b\u021ba\u1e6daf deg wawal-is ; d ne\u021b\u021ba i wen-d-issawlen iwakken a\u021b-\u021b\u025bicem s tdukli akk-d Mmi-s, \u0190isa Lmasi\u1e25 Ssid-nne\u0263.\n1:10 Ay atmaten, a kkun-nhu\u0263 s yisem n Ssid-nne\u0263 \u0190isa Lmasi\u1e25 : msefhamet wway gar-awen, ur ilaq ara a d-yili be\u1e6d\u1e6du gar-awen, ddukklet, s\u025but yiwen uxemmem d yiwen n \u1e5b\u1e5bay.\n1:11 Axa\u1e6der ay atmaten, irgazen n wexxam n Kluwi \u1e63\u1e63aw\u1e0den-iyi-d lexba\u1e5b belli i\u021b\u021bili-d umennu\u0263 gar-awen.\n1:12 Ayen b\u0263i\u0263 a d-ini\u0263 : sli\u0263 belli llan gar-awen wid yeqqa\u1e5ben :\u00ab nekk ddi\u0263 d Bulus \u00bb, ma d waye\u1e0d yeqqa\u1e5b : \u00ab nekk \u021bekki\u0263 d Abulus \u00bb, waye\u1e0d da\u0263en : \u00ab nekk ddi\u0263 d Bu\u1e6drus \u00bb, llan da\u0263en wid yeqqa\u1e5ben : \u00ab nekk \u021bekki\u0263 di Lmasi\u1e25 \u00bb.\n1:13 Amek akka, t\u0263ilem Lmasi\u1e25 yeb\u1e0da ? E\u025bni d Bulus i ge\u021bwasemm\u1e5ben fell-awen ne\u0263 s yisem n Bulus i te\u021bwa\u0263e\u1e0dsem ?\n1:14 Ad \u1e25emmde\u0263 \u1e5aebbi imi ur s\u0263e\u1e0dse\u0263 ula d yiwen deg-wen anagar Krisbus d Gayus.\n1:15 Akka, yiwen deg-wen ur izmir a d-yini belli ye\u021bwa\u0263\u1e0des s yisem-iw.\n1:16 Tella da\u0263en twacult n Stifanas, d nekk i \u021b-is\u0263e\u1e0dsen me\u025bna ur \u1e25si\u0263 ara s\u0263e\u1e0dse\u0263 yiwen nni\u1e0den dinna.\n1:17 Lmasi\u1e25 ur iyi-d-icegge\u025b ara iwakken ad s\u0263e\u1e0dse\u0263 me\u025bna icegge\u025b iyi-d ad becc\u1e5be\u0263 lexba\u1e5b n lxi\u1e5b ; ma\u010d\u010di s yimeslayen i d-yekkan si lefhama n wemdan iwakken ur tekkse\u0263 ara lqima i lmut n Lmasi\u1e25 \u0263ef wumidag.\n1:18 \u021a-\u021bide\u021b, abecce\u1e5b n lmut n Lmasi\u1e25 \u0263ef wumidag \u021b-\u021bidderwect i wid i\u1e0da\u025ben ; me\u025bna \u0263u\u1e5b-nne\u0263 nukni yellan deg webrid n leslak, \u021b-\u021bazmert n \u1e5aebbi.\n1:19 Atan wayen i d-nnant tira iqedsen : Ad snegre\u0263 tamusni n imusnawen, ad rre\u0263 d ula+ c lefhama n wid ifehmen+ .\n1:20 Anda-t u\u025beqli ? Anda-t umusnaw ? Anda-t u\u1e25\u1e5bic ara d-isfehmen ayen ide\u1e5b\u1e5bun di l\u01e7il-agi ? Ur d-isbeggen ara Sidi \u1e5aebbi belli tamusni n ddunit-agi d lehbala ?\n1:21 Imi at ddunit s lefhama-nsen ur \u025bqilen ara tamusni n Sidi \u1e5aebbi, ne\u021b\u021ba yeb\u0263a ad isellek wid yumnen yis s lexba\u1e5b-agi n lxi\u1e5b i \u1e25esben wiya\u1e0d d lehbala.\n1:22 At Is\u1e5bail ssuturen lbe\u1e5bhanat, iyunaniyen \u021bnadin tamusni ;\n1:23 ma d nukni ne\u021bbecci\u1e5b Lmasi\u1e25, win akken ye\u021b\u021busemm\u1e5ben \u0263ef wumidag, yellan d \u021bbehdila i wat Is\u1e5bail, d lehbala \u0263er iyunaniyen.\n1:24 Me\u025bna wid iwumi i d-yessawel Sidi \u1e5aebbi, ama d at Is\u1e5bail ama d iyunaniyen, umnen belli d ne\u021b\u021ba i d Lmasi\u1e25, i \u021b-\u021bazmert n \u1e5aebbi akk-d tmusni-ines.\n1:25 Axa\u1e6der ayen akken \u1e25esben yemdanen d lehbala n Sidi \u1e5aebbi, \u021b-\u021bamusni i\u1e63e\u1e25\u1e25an akte\u1e5b n tmusni n yemdanen, ayen \u1e25esben da\u0263en d feccal n Sidi \u1e5aebbi, ye\u0263leb l\u01e7ehd n yemdanen.\n1:26 Walit ay atmaten, kunwi iwumi d-yessawel Sidi \u1e5aebbi : ur llin gar-awen a\u1e6das n wid yes\u025ban tamusni n ddunit, ur llin a\u1e6das n wid yes\u025ban imukan \u025blayen, ur llin da\u0263en a\u1e6das ina\u1e63liyen yes\u025ban lqima tameqqrant ;\n1:27 me\u025bna Sidi \u1e5aebbi yexta\u1e5b ayen yellan d lehbala \u0263er wemdan iwakken ad isne\u1e25cam imusnawen, yexta\u1e5b ayen ur nes\u025bi tazmert di ddunit iwakken ad isne\u1e25cam wid i\u01e7ehden.\n1:28 Sidi \u1e5aebbi yexta\u1e5b ayen ur nes\u025bi azal, ye\u021bwa\u1e25eq\u1e5ben di ddunit akk-d wayen ye\u021bwa\u1e25esben d ulac, iwakken ad isse\u0263li lqima n wayen yes\u025ban azal \u0263er yemdanen.\n1:29 Akka, yiwen ur izmir ad izuxx zdat Sidi \u1e5aebbi.\n1:30 Imi d Sidi \u1e5aebbi i kkun-isdukklen d \u0190isa Lmasi\u1e25, d ne\u021b\u021ba i \u0263-yu\u0263alen d lefhama i d yekkan s \u0263u\u1e5b Sidi \u1e5aebbi. Yis i \u0263 yerra Sidi \u1e5aebbi d i\u1e25eqqiyen, i\u1e63effa tikli-nne\u0263, yefda-ya\u0263-d si ddnub.\n1:31 Am akken yura di tira iqedsen : Win yeb\u0263an ad izuxx, ad izuxx s lec\u0263al n \u1e5aebbi.\n2:1 Daymi ay atmaten mi n-\u1e5bu\u1e25e\u0263 \u0263u\u1e5b wen iwakken a wen mmeslaye\u0263 \u0263ef lba\u1e0dna n Sidi \u1e5aebbi, ur a wen mmeslaye\u0263 ara s yimeslayen ye\u010d\u010du\u1e5ben d zzux ne\u0263 s tmusni yessewhamen.\n2:2 Axa\u1e6der ur nuda\u0263 ara a d mmeslaye\u0263 gar-awen \u0263ef wayen nni\u1e0den anagar \u0263ef \u0190isa Lmasi\u1e25 ; \u0190isa Lmasi\u1e25 i ge\u021bwa\u1e63emm\u1e5ben \u0263ef wumidag.\n2:3 Ula d nekk asmi lli\u0263 \u0263u\u1e5b-wen, lli\u0263 fecle\u0263, kukra\u0263 yerna tekcem-iyi tugdi.\n2:4 Ayen i wen-slemde\u0263 d wayen i wen-becc\u1e5be\u0263 ur yebni ara \u0263ef tmusni n wemdan, lame\u025bna d ayen yebnan \u0263ef tezmert n \u1e5a\u1e5bu\u1e25 iqedsen.\n2:5 Akka, liman-nwen ur ye\u021brus ara \u0263ef tmusni n yemdanen, me\u025bna \u0263ef tezmert n Sidi \u1e5aebbi.\n2:6 Nesselmad tamusni-agi i wid yes\u025ban liman i\u01e7ehden ; tamusni-agi, ma\u010d\u010di \u021b-\u021bamusni n ddunit-agi ne\u0263 \u021b-\u021bin n tezmar n igelliden n ddunit-agi iteddun \u0263er nnger.\n2:7 Ne\u021bbecci\u1e5b tamusni n Sidi \u1e5aebbi yellan d lba\u1e0dna yeffren \u0263ef yemdanen, i ghegga si zik i l\u025bezz-nne\u0263.\n2:8 Ula d yiwen deg igelliden n zzman-agi ur \u021b-yessin, lemmer ssnen-\u021b tili ur semm\u1e5ben ara Bab n tmanegt \u0263ef wumidag.\n2:9 Am akken i t-id-nnant tira iqedsen : Ayen ur twala ti\u1e6d, ayen ur yesli ume\u1e93\u1e93u\u0263+ , ayen \u0263ef ur ixemmem ara wemdan,+ d ayen i ghegga Sidi \u1e5aebbi i wid i t-i\u1e25emmlen+ .\n2:10 Sidi \u1e5aebbi ibeggen-a\u0263-t-id i nukni s \u1e5a\u1e5bu\u1e25 iqedsen. Axa\u1e6der \u1e5a\u1e5bu\u1e25 iqedsen yezmer ad i\u1e93er ulamma d lec\u0263al yeffren n Sidi \u1e5aebbi.\n2:11 Anwa i ge\u1e93ran ayen yellan deg wul n wemdan ? Anagar \u1e5b\u1e5bu\u1e25-ines i ge\u1e93ran ayen yellan deg wul-is. Yiwen ur yessin da\u0263en ixemmimen n \u1e5aebbi anagar \u1e5a\u1e5bu\u1e25 n Sidi \u1e5aebbi.\n2:12 Nukni ma\u010d\u010di d \u1e5b\u1e5bu\u1e25 n ddunit i neqbel, me\u025bna d \u1e5a\u1e5bu\u1e25 i d-yekkan s \u0263u\u1e5b Sidi \u1e5aebbi, iwakken a nissin ayen akk i \u0263-d-yefka s \u1e5b\u1e5be\u1e25ma-ines.\n2:13 Nukni ur ne\u021bmeslay ara s yimeslayen i tesselmad tmusni n wemdan, me\u025bna ne\u021bmeslay s yimeslayen i \u0263-isselmad \u1e5a\u1e5bu\u1e25 n Sidi \u1e5aebbi. Akka i nessefham tide\u021b n \u1e5a\u1e5bu\u1e25 iqedsen i wid yes\u025ban \u1e5a\u1e5bu\u1e25-agi.\n2:14 Amdan i\u021beddun s l\u025beqliya n ddunit ur iqebbel ara ayen i d-i\u021b\u021basen s \u0263u\u1e5b \u1e5a\u1e5bu\u1e25 n Sidi \u1e5aebbi imi \u0263u\u1e5b-es ayagi d lehbala ; ur yezmir ara a t-yissin axa\u1e6der s \u1e5a\u1e5bu\u1e25 n Sidi \u1e5aebbi i nezmer a t-nefhem.\n2:15 Amdan yes\u025ban \u1e5a\u1e5bu\u1e25 iqedsen n Sidi \u1e5aebbi yezmer ad ifhem kullec, ma d ne\u021b\u021ba, yiwen ur izmir a t-i\u1e25aseb.\n2:16 Akken yura di tira iqedsen : Anwa i gessnen ixemmimen n+ Sidi \u1e5aebbi,+ anwa i gzemren a t-yenhu + ? Ma d nukni, nes\u025ba axemmem n Lmasi\u1e25.\n3:1 Ay atmaten, ur ufi\u0263 ara amek ara wen-mmeslaye\u0263 am akken \u021bmeslaye\u0263 i yemdanen yes\u025ban \u1e5a\u1e5bu\u1e25 iqedsen, me\u025bna mmeslaye\u0263-awen am yemdanen n ddunit, am wid yellan d arrac deg ubrid n Lmasi\u1e25.\n3:2 Fki\u0263-awen ayefki ma\u010d\u010di d a\u0263\u1e5bum axa\u1e6der a\u0263\u1e5bum ur as-tezmirem ara, yerna ar tura ur as-tezmirem ara, mazal-ikkun te\u021b\u025bicim s leb\u0263i n tnefsit nwen.\n3:3 Imi mazal gar-awen tismin d umce\u010d\u010dew, tbeggnem-d belli mazal ikkun te\u021b\u025bicim s l\u025beqliya-nwen yerna tle\u1e25\u1e25um am yemdanen n ddunit.\n3:4 M'ara yini yiwen deg-wen : \u00ab nekk ddi\u0263 d Bulus \u00bb, waye\u1e0d ad yini : \u00ab Nekk \u021bekki\u0263 d Abulus \u00bb ; e\u025bni ayagi ma\u010d\u010di d l\u025beqliya n ddunit ?\n3:5 D acu-t Abulus, d acu-t Bulus ? D iqeddacen kan i kkun-id-yewwin a\u021b-\u021bamnem s Lmasi\u1e25 ! Yal yiwen deg-nne\u0263 ixeddem ayen i s-d-yefka Sidi \u1e5aebbi a t-yexdem.\n3:6 Nekk \u1e93\u1e93i\u0263 im\u0263i, Abulus issew-it, me\u025bna d Sidi \u1e5aebbi i t-issegman.\n3:7 Ihi ma\u010d\u010di d win i\u021be\u1e93\u1e93un ne\u0263 d win yesswayen i ges\u025ban azal me\u025bna d Sidi \u1e5aebbi yessegmuyen.\n3:8 Win i\u021be\u1e93\u1e93un d win yesswayen \u025bedlen ; mkul yiwen a s-yerr Sidi \u1e5aebbi s wakken yuklal di lxedma-s.\n3:9 Axa\u1e6der aql-a\u0263 neddukkel d iqeddacen \u0263ef lec\u0263al n Sidi \u1e5aebbi. Kunwi d iger i gxeddem Sidi \u1e5aebbi, d axxam i gbennu.\n3:10 S \u1e5b\u1e5be\u1e25ma i yi-d-yefka Sidi \u1e5aebbi, am umusnaw n lebni, nekk sserse\u0263 lsas, waye\u1e0d yebna fell-as ; me\u025bna yal yiwen ad i\u1e25ader amek ara yebnu.\n3:11 Yiwen ur izmir ad issers lsas nni\u1e0den deg wemkan n win yersen yakan : \u0190isa Lmasi\u1e25.\n3:12 Ma yella win yebnan \u0263ef lsas-agi ama s ddheb, ama s lfe\u1e6d\u1e6da, ama s ye\u1e93ra \u0263layen, ama s wes\u0263a\u1e5b ne\u0263 s wusa\u0263u\u1e5b d walim,\n3:13 mkul yiwen a d-iban cc\u0263el-is ass n l\u1e25isab, axa\u1e6der mkul cc\u0263el ad i\u025beddi di tmes ; \u021b-\u021bimes ara d-ibeggnen lec\u0263al n yal yiwen ma se\u1e25\u1e25an ne\u0263 ur \u1e63e\u1e25\u1e25an ara.\n3:14 Win yebnan \u0263ef lsas, ur t-te\u010d\u010di ara tmes wayen akken yebna, a t-id-yawe\u1e0d lxi\u1e5b ameqqran ;\n3:15 ma d win iwumi te\u010d\u010da tmes wayen yexdem, a s-i\u1e5bu\u1e25 lxi\u1e5b-is ; ma d ne\u021b\u021ba ad i\u021b\u021busellek, am win izegren times imne\u025b.\n3:16 Ur te\u1e93rim ara belli kunwi d l\u01e7ame\u025b n Sidi \u1e5aebbi i tellam ? Ur te\u1e93rim ara belli \u1e5a\u1e5bu\u1e25-is yezde\u0263 deg-wen ?\n3:17 Ihi win yesse\u0263lin axxam n Sidi \u1e5aebbi, Sidi \u1e5aebbi a t-isse\u0263li axa\u1e6der axxam n Sidi \u1e5aebbi d imqeddes, d kunwi i d axxam-is.\n3:18 \u1e24adret ad yili win ara i\u0263u\u1e5b\u1e5ben iman-is ! Ma yella gar-awen win i\u1e25esben iman-is d a\u025beqli di ddunit-a, ilaq ad yu\u0263al d amehbul iwakken ad yili d a\u025beqli.\n3:19 Axa\u1e6der tamusni n ddunit-agi, \u0263er Sidi \u1e5aebbi d lehbala. Tira iqedsen nnant-ed : Sidi \u1e5aebbi ye\u021b\u021be\u1e6d\u1e6def imusnawen di t\u1e25ila-nsen.\n3:20 Yura da\u0263en : Sidi \u1e5aebbi yessen ixemmimen n imusnawen, ye\u1e93ra belli d ixemmimen ur nes\u025bi azal.\n3:21 \u1e24adret ad yili win ara izuxxen s yemdanen, axa\u1e6der kullec d ayla nwen ;\n3:22 Bulus, Abulus ne\u0263 Bu\u1e6drus, ddunit, tudert, lmut, lweqt-a d lweqt i d-iteddun, kullec d ayla-nwen ;\n3:23 kunwi d ayla n Lmasi\u1e25, Lmasi\u1e25 d ayla n Sidi \u1e5aebbi.\n4:1 Ilaq a \u0263-\u1e25esben yemdanen belli d iqeddacen kan n Lmasi\u1e25 i nella, d wid i gwekkel Sidi \u1e5aebbi i wessefhem n lba\u1e0dna-ines.\n4:2 Acu i ne\u021b\u1e5ba\u01e7u deg win i nwekkel \u0263ef l\u1e25a\u01e7a ? Ne\u021b\u1e5ba\u01e7u a ne\u021bkel fell-as !\n4:3 Nekk, ur iyi-d-tewqi\u025b ara ma yella tes\u1e0delmem-iyi kunwi ne\u0263 ma isse\u1e0dlem-iyi cc\u1e5be\u025b n yemdanen ; nekk da\u0263en ur s\u1e0delme\u0263 ara iman-iw,\n4:4 \u0263as akken ur iyi-isse\u1e0dlem ara wul-iw, ma\u010d\u010di d ayagi ara d-isbeggnen belli d a\u1e25eqqi i lli\u0263, axa\u1e6der d Sidi \u1e5aebbi ara yi-\u1e25asben.\n4:5 Daymi ur \u021b\u1e25asabet ara uqbel lweqt, uqbel tu\u0263alin n Ssid-nne\u0263 ; d ne\u021b\u021ba ara d-isbeggnen s tafat-is ayen yeffren di \u1e6d\u1e6dlam, ara d-ibeggnen da\u0263en ayen yeffren deg wulawen. Imiren yal yiwen ad is\u025bu ccan yuklal \u0263er Sidi \u1e5aebbi.\n4:6 Ay atmaten, ayen akka i d-nni\u0263 fell-i akk-d Abulus nni\u0263-t-id iwakken a\u021b-\u021bfehmem lme\u025bna n lemtel-agi : \u00ab Ur \u021b\u025beddit ara akkin i tilas n wayen yuran \u00bb ; ilaq yiwen ur ixeddem lxilaf ger yemdanen, iwakken ad izuxx s yiwen deg-sen.\n4:7 Ihi anwa i k-yessulin ccan sennig wiya\u1e0d ? Acu ur k-d-nekki ara s \u0263u\u1e5b \u1e5aebbi deg wayen akk tes\u025bi\u1e0d ? Imi d ne\u021b\u021ba i k-d-yefkan, acu\u0263e\u1e5b i te\u021bcekki\u1e5be\u1e0d iman-ik am akken ma\u010d\u010di s \u0263u\u1e5b-es i k-d-yekka ?\n4:8 Atan te\u1e5bwam yakan, tu\u0263alem d ime\u1e5bkantiyen ! Tu\u0263alem d im\u1e0debb\u1e5ben mbla nukni, ac\u1e25al b\u0263i\u0263 lemmer \u021b-\u021bide\u021b tzemrem i yiman-nwen iwakken a n\u1e0debbe\u1e5b s tdukli !\n4:9 Nukni yellan d imcegg\u025ben n Lmasi\u1e25, yefka-ya\u0263 \u1e5aebbi imukan ineggura ; aql-a\u0263 am wid ibu\u1e63an, am wid i te\u021b\u025bassa lmut, tfe\u1e5b\u1e5be\u01e7 deg-nne\u0263 ddunit me\u1e5b\u1e5ba, am lmalayekkat, am yemdanen.\n4:10 Nukni d imehbal \u0263ef ddemma n Lmasi\u1e25, ma d kunwi d i\u025beqliyen di tikli-nwen akk-d Lmasi\u1e25 ! Nukni nefcel, kunwi tes\u025bam tazmert ; nukni ne\u021bwa\u1e25qe\u1e5b ma d kunwi tes\u025bam ccan !\n4:11 Ar tura, aql-a\u0263 neqqim i la\u1e93 d fad, ne\u025bra, ne\u021bwet, ne\u021bmen\u1e6dar si tama \u0263er taye\u1e0d ;\n4:12 ne\u021b\u025be\u021b\u021bib iman nne\u0263 a nexdem iwakken a d-nawi a\u0263\u1e5bum-nne\u0263 s ifassen-nne\u0263. M'ara \u0263-reggmen nukni ne\u021bbarak-iten, m'ara \u0263-\u021bqehhi\u1e5ben nukni ne\u021b\u021bawi-yasen,\n4:13 m'ara d-inin ayen n diri fell-ane\u0263 nenehhu-ten. Ar tura \u1e25esben-a\u0263 am i\u1e0dumman n ddunit, am ineggura n yemdanen.\n4:14 Ur wen-d-uri\u0263 ara ayagi iwakken a kkun-sne\u1e25came\u0263, me\u025bna iwakken a kkun-sfehme\u0263 am arraw iw i \u1e25emmle\u0263.\n4:15 \u0194as ma llan \u025bec\u1e5ba alaf yemdanen i kkun isselmaden deg webrid n Lmasi\u1e25, yiwen n baba-twen kan i tes\u025bam di Lmasi\u1e25, imi d nekk i kkun-id-yewwin \u0263er webrid n Lmasi\u1e25 s Lexba\u1e5b n lxi\u1e5b.\n4:16 A kkun-we\u1e63\u1e63i\u0263 ihi a\u021b-\u021beddum am akken ddi\u0263 nekkini.\n4:17 \u0194ef wayagi i wen-cegg\u025be\u0263 Timuti, mmi e\u025bzizen di Lmasi\u1e25, i\u1e0du\u025ben Sidi \u1e5aebbi iwakken a wen-d-yesmekti amek i le\u1e25\u1e25u\u0263 deg webrid n Lmasi\u1e25, akken i t-sselmade\u0263 di mkul tajma\u025bt n watmaten.\n4:18 Kra deg-wen ikcem-iten zzux, \u0263ilen ur n-\u021b\u1e5bu\u1e25u\u0263 ara a kkun-\u1e93re\u0263 ?\n4:19 Me\u025bna ma yeb\u0263a Sidi \u1e5aebbi, q\u1e5bib a n-ase\u0263 \u0263u\u1e5b-wen. Ad \u1e93re\u0263 widak-agi ye\u021bzuxxun, ma\u010d\u010di d imeslayen-nsen kan iwumi ara \u1e25esse\u0263 me\u025bna ad wali\u0263 ayen iwumi izemren.\n4:20 Axa\u1e6der tazmert n tgeldit n Sidi \u1e5aebbi ma\u010d\u010di d imeslayen kan ara \u021b-id-isbeggnen, me\u025bna d lec\u0263al.\n4:21 D acu i teb\u0263am ? A n-ase\u0263 \u0263u\u1e5b wen s u\u025bekkaz, ne\u0263 s wul ye\u010d\u010du\u1e5ben d le\u1e25mala akk-d le\u1e25nana ?\n5:1 Di mkul amkan nesla yed\u1e5ba le\u1e25\u1e5bam d ameqqran gar-awen, d ayen ur ne\u021b\u021baf ara ulamma ger le\u01e7nas nni\u1e0den, tessaw\u1e0dem armi yiwen deg-wen ye\u021b\u025bic di le\u1e25\u1e5bam akk \u021b-\u021bme\u1e6d\u1e6dut n baba-s !\n5:2 Yerna mazal-ikkun te\u021bzuxxum ! Ilaq-awen a\u021b-\u021bilim di le\u1e25zen, argaz i gxeddmen annect-agi ilaq a t tessuf\u0263em si gar-awen ;\n5:3 ma d nekk, \u0263as be\u025bde\u0263 fell-awen le\u025bqel-iw yella yid-wen ; atan s\u1e0delme\u0263 win ixedmen l\u025ba\u1e5b-agi am akken lli\u0263 yid-wen.\n5:4 S yisem n Sidna \u0190isa, s tezmert is, nnejma\u025bet aql-i yid-wen :\n5:5 ssuf\u0263et akkin argaz am wagi, sellmet-e\u021b i tezmert n Cci\u1e6dan ad issenger l\u01e7e\u021b\u021ba-s iwakken \u1e5b\u1e5bu\u1e25-is ad i\u021bwasellek ass n tu\u0263alin n Ssid-nne\u0263 \u0190isa.\n5:6 A wen-d-ini\u0263 : zzux-agi-nwen ur im\u025bin ara ! E\u025bni ur tessinem ara lemtel i d-yeqqa\u1e5ben belli cwi\u1e6d n yi\u0263es n temtunt yessalay arukti me\u1e5b\u1e5ba ?\n5:7 Ssizdeget iman-nwen, kkset si gar-awen tamtunt ( i\u0263es ) taqdimt n ddnub iwakken a\u021b-\u021bilim d arukti ajdid ye\u1e63fan. \u021a-\u021bide\u021b d arukti ajdid ye\u1e63fan i tellam, axa\u1e6der Tafaska-nne\u0263 tebda, imi Lmasi\u1e25 yellan d izimer nne\u0263 n leslak yefka iman-is d asfel.\n5:8 Tura ihi a nkemmel l\u025bid we\u0263\u1e5bum mbla tamtunt ( i\u0263es ), ma\u010d\u010di s temtunt-nni ixes\u1e5ben yellan d ddnub akk-d cce\u1e5b, me\u025bna s we\u0263\u1e5bum ur nes\u025bi tamtunt ( i\u0263es ) yellan d \u1e63\u1e63fa akk-d tide\u021b.\n5:9 Di teb\u1e5ba\u021b-nni i wen-n-uri\u0263, nni\u0263 awen-d ur \u021beddut ara d wid ye\u021b\u025bicin di le\u1e25\u1e5bam.\n5:10 Ur wen-d-nni\u0263 ara annect-agi \u0263ef wat ddunit ye\u021b\u025bicin di le\u1e25\u1e5bam, ye\u010d\u010du\u1e5ben d \u1e6d\u1e6dme\u025b, d lexde\u025b \u021b-\u021buke\u1e5bda, ye\u021b\u025bebbiden lme\u1e63nu\u025bat am \u1e5aebbi, ne\u0263 m'ulac ilaq-awen a\u021b-\u021beff\u0263em si ddunit-agi.\n5:11 Me\u025bna nni\u0263-awen-d : ur \u021bemxala\u1e0det ara d win ye\u021b\u021barran iman-is d amasi\u1e25i yili ne\u021b\u021ba ye\u021b\u025bici di le\u1e25\u1e5bam, ye\u010d\u010du\u1e5b d \u1e6d\u1e6dme\u025b, d lexde\u025b, ihedde\u1e5b \u0263ef wiya\u1e0d, i\u025bebbed lme\u1e63nu\u025bat, d asek\u1e5ban, d amakar. Ur \u021b\u0263imit ara d wergaz am agi ulamma \u0263er lqut.\n5:12 Acu ara \u0263-yawin a n\u1e25aseb wid n be\u1e5b\u1e5ba ? E\u025bni ma\u010d\u010di d wid yellan gar-awen i glaq a\u021b-\u021b\u1e25asbem ?\n5:13 Wid n be\u1e5b\u1e5ba d \u1e5aebbi ara ten-i\u1e25asben. Me\u025bna akken yura di tira iqedsen : Stix\u1e5bet amcum si gar-awen.\n6:1 Ma yella yiwen deg-wen yeb\u0263a ad iccetki \u0263ef gma-s, amek ara i\u1e5bu\u1e25 a t-ica\u1e5be\u025b zdat wid ur numin ara s Lmasi\u1e25, ma\u010d\u010di zdat wid yumnen am ne\u021b\u021ba ?\n6:2 E\u025bni ur te\u1e93rim ara d wid yumnen s Lmasi\u1e25 ara i\u1e25asben at ddunit ? Ma yella ihi d kunwi ara i\u1e25asben at ddunit, amek ur te\u021b\u021bizmirem ara a\u021b-\u021befrum timsalin timec\u1e6du\u1e25in ?\n6:3 Ur te\u1e93rim ara belli a n\u1e25aseb lmalayekkat ? Anda ara d-banent temsalin n ddunit-agi !\n6:4 Ma d kunwi m'ara yili lxilaf gar-awen, te\u021b\u1e5bu\u1e25um \u0263er wid ur numin ara s Lmasi\u1e25 iwakken ad frun tilufa-nwen !\n6:5 Ur te\u021bne\u1e25camem ara ! E\u025bni ulac ula d yiwen n wergaz ifehmen gar awen, i gzemren ad ifru timsalin ger watmaten ?\n6:6 Me\u025bna kunwi atan wa ye\u021bcetki \u0263ef wa, yerna \u0263er wid ur numin ara s Lmasi\u1e25 !\n6:7 Ihi amennu\u0263 i d-ye\u021b\u021bilin gar awen, i\u021bbeggin-ed l\u025bib-nwen. Acu\u0263e\u1e5b ur t\u1e63ebb\u1e5bem ara axi\u1e5b ad i\u025beddi fell-awen lba\u1e6del, acu\u0263e\u1e5b ur te\u021b\u021ba\u01e7\u01e7am ara iman-nwen a\u021b-\u021be\u021b\u021bu\u025berrim ?\n6:8 Me\u025bna d kunwi i d imesba\u1e6dliyen, te\u021b\u025berrim wiya\u1e0d \u0263as akken d atmaten-nwen !\n6:9 E\u025bni ur te\u1e93rim ara belli wid ixeddmen lba\u1e6del ur ke\u010d\u010dmen ara \u0263er tgelda n Sidi \u1e5aebbi ? Ur \u021b\u0263u\u1e5b\u1e5but ara iman-nwen axa\u1e6der kra n win ye\u021b\u025bicin di le\u1e25\u1e5bam ne\u0263 wid i\u025bebbden lme\u1e63nu\u025bat, wid ixeddmen zzna, at le\u025b\u1e5bu\u1e5b,\n6:10 wid ye\u021b\u021bakren, wid ite\u021b\u021ben ayla n medden, wid ireggmen, ixedda\u025ben akk-d isek\u1e5banen, ur ke\u010d\u010dmen ara tagelda n Sidi \u1e5aebbi.\n6:11 Akka i llan yakan kra deg-wen uqbel ad amnen. Me\u025bna ddnub-nwen yurad, te\u021bwaxta\u1e5bem iwakken a\u021b-\u021bilim d ayla n Sidi \u1e5aebbi, tu\u0263alem d i\u1e25eqqiyen zdat \u1e5aebbi s yisem n Ssid-nne\u0263 \u0190isa Lmasi\u1e25 akk-d \u1e5a\u1e5bu\u1e25 iqedsen n Sidi \u1e5aebbi, Illu-nne\u0263.\n6:12 Kra deg-wen qqa\u1e5ben : \u00ab \u0194u\u1e5b-i kullec d le\u1e25lal \u00bb, me\u025bna ma\u010d\u010di d kullec i kkun-inef\u025ben ; zemre\u0263 a d-ini\u0263 : kullec d le\u1e25lal \u0263u\u1e5b-i, me\u025bna ur \u021b\u021ba\u01e7a\u0263 ara l\u1e25a\u01e7a a yi-temlek.\n6:13 Lqut yella-d i w\u025bebbu\u1e0d, a\u025bebbu\u1e0d yella-d i lqut ; a d-yas wass i deg ara ten-yessenger Sidi \u1e5aebbi i sin. Me\u025bna l\u01e7e\u021b\u021ba ur d-te\u021bwaxleq ara i yir tikli, te\u021bwaxleq-ed iwakken a\u021b-\u021bqeddec \u0263ef Sidi \u1e5aebbi i \u021b-isedduyen.\n6:14 Sidi \u1e5aebbi i d-yessekren Sidna \u0190isa si ger lmegtin, a \u0263-d-isse\u1e25yu ula d nukni s tezmert-is.\n6:15 Ur te\u1e93rim ara belli l\u01e7e\u021b\u021bat-nwen d lemfa\u1e63el n Lmasi\u1e25 ? E\u025bni zemre\u0263 a d-ddme\u0263 lemfa\u1e63el n Lmasi\u1e25 iwakken a ten-erre\u0263 d lemfa\u1e63el n tme\u1e6d\u1e6dut ixeddmen asekkak ye\u025bni zzna ? Ur zmire\u0263 ara !\n6:16 Ur te\u1e93rim ara belli win ara yeznun ne\u021b\u021ba akk-d yir tame\u1e6d\u1e6dut ad yu\u0263al yid-es d yiwen ? Akken yura di tira iqedsen : Di sin ad u\u0263alen d yiwet n l\u01e7e\u021b\u021ba.\n6:17 Akka da\u0263en win ara i\u1e25emmlen Lmasi\u1e25 ad yili yid-es s yiwen n \u1e5a\u1e5bu\u1e25.\n6:18 X\u1e0dut i yir tikli ! Kra n ddnub i gezmer a t-ixdem wemdan i\u021b\u0263imi be\u1e5b\u1e5ba n l\u01e7e\u021b\u021ba-s, ma d win ara ixedmen zzna yessewsex l\u01e7e\u021b\u021ba-s.\n6:19 Ur te\u1e93rim ara da\u0263en belli \u1e5a\u1e5bu\u1e25 iqedsen yezde\u0263 di l\u01e7e\u021b\u021bat-nwen ? \u1e5a\u1e5bu\u1e25-nni i wen-d-i\u021b\u021bunefken s \u0263u\u1e5b Sidi \u1e5aebbi ? Ur te\u1e93rim ara belli ur te\u021b\u021balasem ara deg yiman-nwen ?\n6:20 Axa\u1e6der yella win i kkun-id-ifdan s wazal d ameqqran, \u0263layen. \u0190uzzet ihi Sidi \u1e5aebbi di l\u01e7e\u021b\u021bat-nwen.\n7:1 A n\u025beddit tura \u0263er isteqsiyen i yi-d-tefkam di teb\u1e5ba\u021b-nwen teqqa\u1e5bem : \u00ab D ayen yelhan i wergaz m'ur yezwi\u01e7 ara \u00bb.\n7:2 \u021a-\u021bide\u021b, me\u025bna iwakken ur d-ye\u021b\u021bili ara le\u1e25\u1e5bam, axi\u1e5b-as i wergaz ad yes\u025bu tame\u1e6d\u1e6dut-is, axi\u1e5b-as i tme\u1e6d\u1e6dut a\u021b-\u021bes\u025bu argaz-is.\n7:3 Argaz ilaq ad ixdem leb\u0263i i tme\u1e6d\u1e6dut-is, tame\u1e6d\u1e6dut da\u0263en ilaq a\u021b-\u021bexdem leb\u0263i i wergaz-is.\n7:4 Tame\u1e6d\u1e6dut ur tezmir ara a\u021b-\u021bexdem ayen teb\u0263a s l\u01e7e\u021b\u021ba-s, axa\u1e6der l\u01e7e\u021b\u021ba-s d ayla n wergaz-is ; argaz da\u0263en ur yezmir ara ad yexdem ayen i geb\u0263a s l\u01e7e\u021b\u021ba-s, axa\u1e6der l\u01e7e\u021b\u021ba-s d ayla n tme\u1e6d\u1e6dut-is.\n7:5 Ur \u021bemyagit ara gar-awen anagar ma yella temsefhamem iwakken a\u021b-\u021be\u01e7\u01e7em kra n wussan i t\u1e93allit ; imiren ddukklet da\u0263en ; \u1e25adret a wen-yaf Cci\u1e6dan abrid a kkun-i\u0263u\u1e5b\u1e5b ma yella ur tezmirem ara a\u021b-\u021be\u1e6d\u1e6dfem iman-nwen.\n7:6 Ayagi ma\u010d\u010di d lame\u1e5b i wen-fki\u0263, me\u025bna d awe\u1e63\u1e63i kan i kkun-we\u1e63\u1e63a\u0263.\n7:7 Lemmer ufi\u0263 medden akk ad ilin am nekk, me\u025bna mkul yiwen d acu i s-d-ifka Sidi \u1e5aebbi, wa yefka-yas-d aya, waye\u1e0d yefka-yas-d ayen nni\u1e0den.\n7:8 I wid ur nezwi\u01e7 ara akk-d tu\u01e7\u01e7al a sen-ini\u0263 : yelha-yasen ma qqimen am nekk.\n7:9 Me\u025bna m'ur zmiren ara ad \u1e6d\u1e6dfen iman-nsen, ad zew\u01e7en axi\u1e5b. Axi\u1e5b-asen ad zew\u01e7en wala a\u021b-\u021bec\u025bel tmes deg wulawen-nsen.\n7:10 A d-fke\u0263 lame\u1e5b i imasi\u1e25iyen izew\u01e7en ; lame\u1e5b-agi ma\u010d\u010di s \u0263u\u1e5b-i i d-yekka me\u025bna s \u0263u\u1e5b Sidi \u1e5aebbi : tame\u1e6d\u1e6dut izew\u01e7en ur ilaq ara a\u021b-\u021be\u01e7\u01e7 argaz-is :\n7:11 ma yella te\u01e7\u01e7a-t, ur s-ilaq ara a\u021b-\u021b\u025bawed zzwa\u01e7. Ne\u0263 ma teb\u0263a, tezmer a\u021b-\u021bem\u1e63ala\u1e25 yid-es a\u021b-\u021bu\u0263al \u0263u\u1e5b-es. Argaz da\u0263en ur s-ilaq ara ad yebru i tme\u1e6d\u1e6dut-is.\n7:12 \u0194ef wayen ye\u025bnan wiya\u1e0d atan wayen zemre\u0263 a d-ini\u0263 ( ayagi s \u0263u\u1e5b-i ma\u010d\u010di s \u0263u\u1e5b Sidi \u1e5aebbi ) : ma yella yiwen seg watmaten yes\u025ba tame\u1e6d\u1e6dut ur numin ara s Lmasi\u1e25 yili teqbel a\u021b-\u021beqqim d wergaz-is, ur ilaq ara a s-yebru ;\n7:13 akken da\u0263en, tame\u1e6d\u1e6dut tamasi\u1e25it yes\u025ban argaz ur numin ara s Lmasi\u1e25 yili yeqbel ad i\u025bic yid-es, ur ilaq ara a\u021b-\u021berwel fell-as.\n7:14 Axa\u1e6der argaz ur numin ara s Lmasi\u1e25 yella seddaw le\u025bnaya n Sidi \u1e5aebbi s tme\u1e6d\u1e6dut-is yumnen ; da\u0263en tame\u1e6d\u1e6dut ur numin ara s Lmasi\u1e25, tella seddaw le\u025bnaya n Sidi \u1e5aebbi s wergaz-is yumnen ; ne\u0263 m'ulac dderya-nsen ad \u021bwa\u1e25esben d dderya n le\u1e25\u1e5bam nutni yellan d dderya n le\u1e25lal.\n7:15 Ma yella win ur numin ara s Lmasi\u1e25 yeb\u0263a ad imfa\u1e5baq akk-d tme\u1e6d\u1e6dut-is i gumnen, ne\u0263 tame\u1e6d\u1e6dut ur numin ara s Lmasi\u1e25 teb\u0263a a\u021b-\u021bemfa\u1e5baq akk-d wergaz-is i gumnen, zemren ad mfa\u1e5baqen ; argaz-nni ne\u0263 tame\u1e6d\u1e6dut-nni yellan d imasi\u1e25iyen ur d-yeqqim wayen i ten-icerken, axa\u1e6der Sidi \u1e5aebbi yessawel a\u0263-d iwakken a n\u025bic di lehna.\n7:16 Yerna amek i te\u1e93ri\u1e0d kemm a tame\u1e6d\u1e6dut tamasi\u1e25it belli tzem\u1e5be\u1e0d a\u021b-\u021bselke\u1e0d argaz-im ? Ne\u0263 amek i te\u1e93ri\u1e0d ke\u010d\u010d ay argaz amasi\u1e25i belli tzemre\u1e0d a\u021b-\u021bselke\u1e0d tame\u1e6d\u1e6dut-ik ?\n7:17 Ilaq yal yiwen ad yel\u1e25u s wayen i s-d-yefka Sidi \u1e5aebbi, yerna ad yeqqim di l\u1e25ala i deg yella asmi i s-d-yessawel. Akka i \u021bwe\u1e63\u1e63i\u0263 tijmuya\u025b n watmaten me\u1e5b\u1e5ba.\n7:18 Ma yella waleb\u025ba\u1e0d yu\u0263-it l\u1e25al yexten mi s-d-yessawel Sidi \u1e5aebbi, ilaq ad yeqqim akken yella ; ma yella waleb\u025ba\u1e0d ur yextin ara asmi i s-d-yessawel Sidi \u1e5aebbi, ur ilaq ara ad yexten.\n7:19 Yexten waleb\u025ba\u1e0d ne\u0263 ur yextin ara ulac deg-s ; ayen yes\u025ban azal d \u1e6d\u1e6da\u025ba n lumu\u1e5bat n Sidi \u1e5aebbi.\n7:20 Ilaq yal yiwen ad iqqim akken i t-id-yufa l\u1e25al asmi i s-d-yessawel Sidi \u1e5aebbi.\n7:21 D akli i telli\u1e0d asmi i k-d yessawel Sidi \u1e5aebbi ? Ur \u021bxemmim ara, me\u025bna ma tusa-yak-ed teswi\u025bt i deg tzemre\u1e0d a\u021b-\u021bes\u025bu\u1e0d tilelli, fa\u1e5bes-i\u021b.\n7:22 Axa\u1e6der akli iwumi d-yessawel Sidi \u1e5aebbi yu\u0263al d win yes\u025ban tilelli \u0263er Sidi \u1e5aebbi ; da\u0263en amdan a\u1e25u\u1e5b\u1e5bi iwumi d-yessawel Sidi \u1e5aebbi yu\u0263al d akli n Lmasi\u1e25.\n7:23 Yella win ixel\u1e63en fell-awen iwakken a\u021b-\u021bilim d i\u1e25u\u1e5b\u1e5biyen, ihi ur \u021b\u021bu\u0263alet ara d aklan n yemdanen.\n7:24 Ihi ay atmaten, ilaq yal yiwen ad yeqqim zdat \u1e5aebbi di l\u1e25ala i deg yella asmi s-d-yessawel.\n7:25 \u0194ef wayen ye\u025bnan wid ur nezwi\u01e7 ara, Sidi \u1e5aebbi ur d-yenni kra fell-asen, me\u025bna a wen-d-fke\u0263 \u1e5b\u1e5bay-iw, nekk yerra Sidi \u1e5aebbi s \u1e5b\u1e5be\u1e25ma-ines tameqqrant d argaz yuklalen le\u021bkal.\n7:26 \u0194u\u1e5b-i d ayen yelhan i wergaz ma yeqqim akken yella \u0263ef ddemma n lweqt-agi iwe\u025b\u1e5ben.\n7:27 Ma txe\u1e0dbe\u1e0d tame\u1e6d\u1e6dut, ur \u021bnadi ara a \u021b-te\u01e7\u01e7e\u1e0d ; m'ur tezwi\u01e7e\u1e0d ara, ur \u021bnadi ara a\u021b-\u021bzew\u01e7e\u1e0d.\n7:28 Tura ma yella ilem\u1e93i ne\u0263 tilem\u1e93it zew\u01e7en, ur wwin ara ddnub ; me\u025bna wid ara izew\u01e7en ad \u1e5bwun l\u1e25if di tudert-nsen ; nekk ma\u010d\u010di d ayen i wen-menna\u0263.\n7:29 Atan wayen ara d-ini\u0263 ay atmaten : lweqt i\u021b\u021bazal, drus i d iqqimen, wid izew\u01e7en ilaq ad ilin am akken ur zwi\u01e7en ara,\n7:30 wid ye\u021brun ad ilin am akken ur \u021brun ara, wid ife\u1e5b\u1e25en am akken ur f\u1e5bi\u1e25en ara, wid ye\u021b\u021ba\u0263en am akken ur s\u025bin ara.\n7:31 Wid yes\u025ban nnfe\u025b di ddunit-agi am akken ur t-s\u025bin ara axa\u1e6der ddunit-agi ur te\u021bdum ara.\n7:32 Ur b\u0263i\u0263 ara a\u021b-\u021bes\u025bum i\u0263eblan. Win ur nezwi\u01e7 ara i\u021bxemmim i lec\u0263al n Sidi \u1e5aebbi, ye\u021bnadi kan ad ye\u025b\u01e7eb Sidi \u1e5aebbi ;\n7:33 me\u025bna win izew\u01e7en ye\u021bxemmim \u0263ef lec\u0263al n ddunit, ye\u021bnadi ad ye\u025b\u01e7eb i tme\u1e6d\u1e6dut-is ; ul-is yeb\u1e0da \u0263ef sin.\n7:34 Akken da\u0263en tame\u1e6d\u1e6dut ur nezwi\u01e7 ara akk-d \u021blem\u1e93it ; \u021bxemmiment kan \u0263ef lec\u0263al n Sidi \u1e5aebbi iwakken ad ilint \u021b-\u021biqeddacin-ines s l\u01e7e\u021b\u021bat-nsent d \u1e5b\u1e5bu\u1e25-nsent ; me\u025bna tin izew\u01e7en te\u021bxemmim kan \u0263ef lec\u0263al n ddunit d wamek ara te\u025b\u01e7eb i wergaz-is.\n7:35 Ur wen-d-nni\u0263 ara ayagi iwakken a kkun-kellxe\u0263 me\u025bna nni\u0263 awen-t-id i nnfe\u025b-nwen axa\u1e6der b\u0263i\u0263 a\u021b-\u021beddum s tikli yelhan, ye\u1e63fan iwakken a\u021b-\u021be\u1e6d\u1e6dfem deg webrid n Lmasi\u1e25 ma\u010d\u010di deg wayen nni\u1e0den.\n7:36 Ma yella yiwen deg-wen ix\u1e0deb tilem\u1e93it, i\u1e25ar ur yezmir ara ad ye\u1e5b\u01e7u ib\u0263a ad yezwe\u01e7, ma\u010d\u010di d ddnub ma yella yezwe\u01e7.\n7:37 Ma d win iqesden s leb\u0263i-ines ur izeggej ara, ma yella ye\u1e93ra iman-is yezmer ad i\u1e63be\u1e5b, d ayen yelhan i gexdem m'ur yezwi\u01e7 ara.\n7:38 Ihi win izew\u01e7en d ayen yelhan i gexdem, win ur nezwi\u01e7 ara d ayen yelhan nezzeh.\n7:39 Tame\u1e6d\u1e6dut izew\u01e7en ur tezmir ara a\u021b-\u021be\u01e7\u01e7 argaz-is skud mazal-it yedder, ma yella yemmut, tezmer a\u021b-\u021b\u025biwed zzwa\u01e7 d win teb\u0263a, acu kan ilaq ad yili d win yumnen s Lmasi\u1e25 am ne\u021b\u021bat.\n7:40 Me\u025bna \u0263ef wakken wala\u0263 ma teqqim akken tella axi\u1e5b-as, akken ara tes\u025bu lehna. Wagi d \u1e5b\u1e5bay-iw nekk, \u1e93ri\u0263 ula d nekk s\u025bi\u0263 \u1e5a\u1e5bu\u1e25 n Sidi \u1e5aebbi.\n8:1 \u0194ef wayen ye\u025bnan aksum n iseflawen i zellun i ssada\u021b, \u021b-\u021bide\u021b nes\u025ba akk tamusni, d acu kan tamusni te\u021b\u021bawi-d zzux i wemdan ma d le\u1e25mala tesnernay deg-nne\u0263 laman \u0263er Sidi \u1e5aebbi.\n8:2 Win i g\u0263ilen yessen kra, ur\u025bad yessin akken i glaq ad yissin.\n8:3 Me\u025bna win i\u1e25emmlen Sidi \u1e5aebbi, Sidi \u1e5aebbi yessen-it.\n8:4 \u0194ef wayen ye\u025bnan u\u010d\u010di n weksum n iseflawen immezlen i lme\u1e63nu\u025bat, ne\u1e93ra belli lme\u1e63nu\u025bat-agi \u021b-\u021bikellax di ddunit axa\u1e6der anagar yiwen n \u1e5aebbi i gellan.\n8:5 \u0194as qqa\u1e5ben a\u1e6das n i\u1e5bebbiten i gellan ama deg igenni ama di lqa\u025ba, ( axa\u1e6der \u021b-\u021bide\u021b ! \u0194u\u1e5b-sen a\u1e6das n i\u1e5bebbiten akk-d ssada\u021b i gellan)\n8:6 me\u025bna \u0263u\u1e5b-nne\u0263 nukni yiwen kan n \u1e5aebbi i gellan, d baba-tne\u0263 \u1e5aebbi i d-ixelqen kullec, ula d nukni d ayla-s. Anagar yiwen n Ssid i gellan : d \u0190isa Lmasi\u1e25, yis i d-yella kullec, yis da\u0263en i nedder ula d nukni.\n8:7 A\u1e6das ur nessin ara tide\u021b-agi. Kra deg-sen i gu\u0263en tannumi te\u021b\u021ben asfel n ssada\u021b, tura m'ara te\u021b\u021ben aksum-nni mazal \u1e25esben-t belli \u021b-\u021bide\u021b d asfel i ssada\u021b, neyya-nsen tenquqel, \u1e25ussen am akken denben.\n8:8 Ma\u010d\u010di d ayen ye\u021bma\u010d\u010dan ara \u0263-iqe\u1e5b\u1e5bben \u0263er \u1e5aebbi. Ma ne\u010d\u010da ur nerbi\u1e25 acemma, m'ur ne\u010d\u010di ara, ur a\u0263-i\u1e5bu\u1e25 wacemma.\n8:9 Ihi, \u025basset iman-nwen, \u0263u\u1e5b-wat tilelli-agi i tes\u025bam a\u021b-\u021bili d ugur n u\u0263elluy i wid ur ne\u01e7hid ara di liman.\n8:10 Axa\u1e6der ma iwala-k-id waleb\u025ba\u1e0d ur ne\u01e7hid ara di liman, teqqime\u1e0d a\u021b-\u021be\u010d\u010de\u1e0d di lemqam ke\u010d\u010d yessnen, amek teb\u0263i\u1e0d ur ye\u021b\u1e5bu\u1e25u ara ula d ne\u021b\u021ba ad ye\u010d\u010d seg iseflawen-agi yemmezlen i ssada\u021b ?\n8:11 S wakka ihi, gma-k-agi ur ne\u01e7hid ara di liman, i \u0263ef yemmut Lmasi\u1e25 , \u0263ef ddemma n tmusni-nni inek i ge\u0263li.\n8:12 Imi te\u021b\u021bawim ddnub \u0263ef watmaten-nwen, tessex\u1e5babem neyya-nsen, tdenbem \u0263er Lmasi\u1e25.\n8:13 Ihi ma yella ayen ara \u010d\u010de\u0263 izmer ad isse\u0263li gma di ddnub, ur \u021b\u021bu\u0263ale\u0263 ara ma\u1e0di ad \u010d\u010de\u0263 lmakla-nni iwakken ur i\u0263elli ara.\n9:1 E\u025bni ur zmire\u0263 ara ad xedme\u0263 akken b\u0263i\u0263 ? Ma\u010d\u010di d amcegge\u025b n Lmasi\u1e25 i lli\u0263 ? Ur \u1e93ri\u0263 ara Sidna \u0190isa s wallen-iw ? Ma\u010d\u010di d nekk i kkun-id-yewwin \u0263er webrid n Lmasi\u1e25 ?\n9:2 \u0194as wiya\u1e0d ur iyi-\u1e25siben ara d amcegge\u025b n Lmasi\u1e25, kunwi ur tezmirem ara a yi-tnekk\u1e5bem axa\u1e6der \u021b-\u021bikli-nwen akk-d Lmasi\u1e25 i d \u021bbut belli d Lmasi\u1e25 i yi-d-icegg\u025ben.\n9:3 Atan wamek \u021b\u021bara\u0263 i wid i yi-sse\u1e0dlamen :\n9:4 E\u025bni ur a\u0263-d-i\u1e63a\u1e25 ara a ne\u010d\u010d, a nsew nukni s imcegg\u025ben n Lmasi\u1e25 ?\n9:5 Ur s\u025bi\u0263 ara l\u1e25eqq ad a\u0263e\u0263 tame\u1e6d\u1e6dut yumnen a\u021b-\u021be\u021b\u021beddu yid-i am akken xeddmen imcegg\u025ben nni\u1e0den n Lmasi\u1e25 d watmaten n Ssid-nne\u0263 akk-d Bu\u1e6drus ?\n9:6 Ne\u0263 d nekk kan akk-d Barnabas i glaqen a nexdem iwakken a d-nawi a\u0263\u1e5bum nne\u0263 ?\n9:7 Yella wass i deg teslam belli a\u025besk\u1e5bi ilaq ad ixelle\u1e63 m'ara d-is\u025beddi l\u025beske\u1e5b ? Anwa ara ye\u1e93\u1e93un tara ur ite\u021b\u021b ara si t\u1e93u\u1e5bin-is ? Ulac ameksa ara yeksen taqe\u1e0d\u025bit n lmal ur itess ara seg uyefki-ines !\n9:8 T\u0263ilem ayen akka i d-nni\u0263 d l\u025baddat kan n yemdanen ? Ula d ccari\u025ba n Musa tenna-t-id !\n9:9 Axa\u1e6der yura deg-s : Ur \u021b\u021barat ara takmamt i wezger isserwaten nne\u025bma. E\u025bni \u0263ef yezgaren i g\u1e25ebbe\u1e5b Sidi \u1e5aebbi ?\n9:10 Ma\u010d\u010di \u0263ef ddemma-nne\u0263 i d-yenna akka ? \u021a-\u021bide\u021b, d nukni iwumi i d-yenna imeslayen-agi ! Ilaq win ikerrzen akk-d win yesserwaten ad ssirmen ad s\u025bun amur di l\u0263ella nsen.\n9:11 Ma yella nezre\u025b gar-awen lba\u1e5bakat n Sidi \u1e5aebbi, d acu yellan ma nemger-ed s \u0263u\u1e5b-wen tam\u025bict nne\u0263 ?\n9:12 Ma twalam d l\u1e25eqq ad meggren wiya\u1e0d s \u0263u\u1e5b-wen, e\u025bni ma\u010d\u010di d nukni i gezwaren ? Me\u025bna nukni ur d-newwi acemma s \u0263u\u1e5b-wen, ne\u1e63be\u1e5b i kullec iwakken ur d-ye\u021b\u021bili ara wugur i lexba\u1e5b n lxi\u1e5b n Lmasi\u1e25.\n9:13 Ur te\u1e93rim ara belli wid ixeddmen di l\u01e7ame\u025b \u021b\u021bawin-d lqut-nsen si l\u01e7ame\u025b ? Ur te\u1e93rim ara da\u0263en lmuqeddem izellun i \u1e5aebbi iseflawen i d-\u021b\u021bawin medden, ye\u021b\u021bawi amur-is seg-sen ?\n9:14 Akka da\u0263en i d-yenna Sidi \u1e5aebbi \u0263ef wid ye\u021bbecci\u1e5ben lexba\u1e5b n lxi\u1e5b : di lexba\u1e5b n lxi\u1e5b ara afen tam\u025bict-nsen.\n9:15 Nekk ur d-wwi\u0263 acemma s \u0263u\u1e5b wen, yerna ur d-uri\u0263 ara tab\u1e5ba\u021b-agi iwakken a d-ssutre\u0263 l\u1e25eqq-iw. Axi\u1e5b-iyi lmut wala a yi-te\u021bwakkes sebba-agi s wayes zemre\u0263 ad zuxxe\u0263 !\n9:16 Ur \u021bzuxxu\u0263 ara s yiman-iw imi \u021bbecci\u1e5be\u0263 lexba\u1e5b n lxi\u1e5b, axa\u1e6der \u021bwa\u1e25e\u1e5bse\u0263 ad becc\u1e5be\u0263. A nnger-iw ma yella ur becc\u1e5be\u0263 ara lexba\u1e5b-agi n lxi\u1e5b.\n9:17 Lemmer xedme\u0263 ayagi s leb\u0263i w s\u025bi\u0263 l\u1e25eqq ad ssutre\u0263 lexla\u1e63, me\u025bna d \u1e5aebbi i g\u1e25ettmen fell-i cc\u0263el-agi.\n9:18 Ihi, d acu i d lexla\u1e63-iw ? D lfe\u1e5b\u1e25 i se\u025b\u025bu\u0263 m'ara \u021bbecci\u1e5be\u0263 lexba\u1e5b n lxi\u1e5b mbla lexla\u1e63, mbla ma ssutre\u0263 l\u1e25eqq-iw.\n9:19 \u0194as akken ur iyi-i\u021b\u021balas yiwen kra ; rri\u0263 iman-iw d aqeddac n mkul yiwen iwakken a d-reb\u1e25e\u0263 a\u1e6das n yemdanen \u0263er webrid n Lmasi\u1e25.\n9:20 \u0194er wat Is\u1e5bail rri\u0263 iman-iw am nutni iwakken a ten-id-reb\u1e25e\u0263 ; \u0263er wid yettaba\u025ben ccari\u025ba n Musa teb\u025be\u0263-\u021b am nutni iwakken a ten id reb\u1e25e\u0263, \u0263as akken nekk ur lli\u0263 ara seddaw le\u1e25kum n ccari\u025ba.\n9:21 Akka da\u0263en, m'ara ili\u0263 d wid ur nes\u025bi ara ccari\u025ba, \u021b\u021bara\u0263 iman-iw am akken ur s\u025bi\u0263 ara ccari\u025ba iwakken a ten-id-reb\u1e25e\u0263, \u0263as akken nekk s\u025bi\u0263 ccari\u025ba n \u1e5aebbi imi d Lmasi\u1e25 i d ccari\u025ba-inu.\n9:22 Akk-d wid ur ne\u01e7hid ara deg webrid n \u1e5aebbi, u\u0263ale\u0263 am nutni, iwakken a ten-id-reb\u1e25e\u0263. Ddi\u0263 di leb\u0263i i mkul yiwen iwakken a d-sellke\u0263 ulamma kra deg-sen.\n9:23 Ayagi akk xedme\u0263-t \u0263ef ddemma n lexba\u1e5b n lxi\u1e5b iwakken ad s\u025bu\u0263 yid-sen amur.\n9:24 Di temzizla, te\u1e93ram belli deg wid akk ye\u021b\u021bazalen deg wannar, yiwen kan ara ireb\u1e25en. Azzlet ihi iwakken a\u021b-\u021breb\u1e25em.\n9:25 Wid akk ye\u021b\u021bazzalen, m'ara heggin iman-nsen i tazzla, \u021b\u025be\u021b\u021biben iman-nsen ; nutni \u021ben\u025be\u021b\u021baben iwakken a d-reb\u1e25en cci\u025ba ur ne\u021bdum ara ; lame\u025bna nukni, ne\u021b\u025be\u021b\u021bib iman-nne\u0263 iwakken a nerbe\u1e25 cci\u025ba ara idumen.\n9:26 Nekk ur \u021b\u021bazzale\u0263 ara am win ur nes\u025bi ara lmeqsud, ur kkate\u0263 ara deg ube\u1e25ri m'ara \u021bna\u0263e\u0263 ;\n9:27 me\u025bna \u021b\u025be\u021b\u021bibe\u0263 l\u01e7e\u021b\u021ba-inu, \u021b\u025bassa\u0263 \u0263ef yiman-iw, axa\u1e6der uggade\u0263 nekk i gbecc\u1e5ben i wiya\u1e0d ad \u0263li\u0263, ad u\u0263ale\u0263 \u0263er deffir.\n10:2 \u021awa\u0263e\u1e0dsen me\u1e5b\u1e5ba di tagut-nni akk-d leb\u1e25e\u1e5b mi ddan d Sidna Musa,\n10:3 \u010d\u010dan me\u1e5b\u1e5ba seg yiwen lqut n Sidi \u1e5aebbi,\n10:4 swan me\u1e5b\u1e5ba si l\u025binse\u1e5b n Sidi \u1e5aebbi i d-iteff\u0263en seg wez\u1e5bu iteddun yid-sen ; az\u1e5bu-agi, d Lmasi\u1e25.\n10:5 \u0194as akken, a\u1e6das seg-sen ur ne\u025b\u01e7ib ara i Sidi \u1e5aebbi ; daymi i ten-tesse\u0263li lmut yiwen yiwen mi teddun deg unez\u1e5buf.\n10:6 Ayen akken yed\u1e5ban yid-sen yeqqim-ed d lemtel i nukni, iwakken ur ne\u1e6d\u1e6dama\u025b ara ayen n diri am akken i t-\u1e6d\u1e6dama\u025ben nutni.\n10:7 Ur \u021b\u021bilit ara am wid i\u025bebbden ssada\u021b akken xeddmen kra seg-sen, axa\u1e6der am akken yura di tira iqedsen : Yeqqim wegdud ad ye\u010d\u010d ad isew, mi gfukk yekker ad yezhu, ad yec\u1e0de\u1e25.\n10:8 Ur ilaq ara da\u0263en a nxeddem le\u025b\u1e5bu\u1e5b akken xeddmen kra seg-sen ; daymi deg yiwen n wass, lmut te\u010d\u010da tlata u\u025becrin alef deg-sen.\n10:9 Ur ilaq ara a nje\u1e5b\u1e5beb Sidi \u1e5aebbi akken i xedmen kra seg-sen, d\u0263a qqsen-ten izerman mmuten.\n10:10 Ur ilaq ara da\u0263en a\u021b-\u021besmermugem \u0263ef wiya\u1e0d akken i smermugen kra deg-sen armi i ten-issenger lmelk n lmut.\n10:11 Timsalin-agi akk i sen-yed\u1e5ban, qqiment-ed d lemtel, uran-tent di tektabin, iwakken a nelmed nukni i\u021b\u025bicin di taggara n lweqt.\n10:12 Ihi win i\u1e25esben iman-is ibedd, ad i\u025bass iman-is ur i\u0263elli ara !\n10:13 Ayen akk s wayes i te\u021bwaje\u1e5bbem, d ayen iwumi yezmer wemdan. Sidi \u1e5aebbi d bab n l\u1e25eqq, ur ye\u021b\u025bemmid ara a\u021b-\u021ben\u025be\u021b\u021babem sennig n tezmert nwen ; lame\u025bna m'ara te\u021bwaje\u1e5bbem, a wen-d-yefk tazmert s wayes ara t\u1e63eb\u1e5bem d wamek ara teff\u0263em si tegni\u021b n le\u025btab.\n10:14 A wid e\u025bzizen fell-i, x\u1e0dut i we\u025bbad n ssada\u021b.\n10:15 \u021ameslaye\u0263 awen-d am akken \u021bmeslayen i wid ifehmen ; meyyzet kunwi s yiman nwen \u0263ef wayen i d-qqa\u1e5be\u0263.\n10:16 Taqbuct n lba\u1e5baka i \u0263ef ne\u021b\u1e25emmid Sidi \u1e5aebbi, e\u025bni ur a\u0263-tecrik ara d idammen n Lmasi\u1e25 ? Ne\u0263 a\u0263\u1e5bum i nbe\u1e6d\u1e6du, ur a\u0263-yecrik ara d l\u01e7e\u021b\u021ba n Lmasi\u1e25 ?\n10:17 Imi yiwen n we\u0263\u1e5bum kan i gellan, ula d nukni nu\u0263al d yiwet n l\u01e7e\u021b\u021ba \u0263as akken deg wa\u1e6das yid-nne\u0263 i nella, axa\u1e6der nte\u021b\u021b me\u1e5b\u1e5ba seg yiwen n we\u0263\u1e5bum.\n10:18 Walit at Is\u1e5bail : wid ite\u021b\u021ben seg weksum n iseflawen s we\u025bbad-nsen, e\u025bni ur criken ara d wemkan-nni anda i zellun iseflawen ?\n10:19 E\u025bni b\u0263i\u0263 a d-ini\u0263 belli asfel nni i zellun i ssada\u021b ne\u0263 ssada\u021b-nni i \u021b\u025bebbiden, s\u025ban lqima ? Xa\u1e6di !\n10:20 Me\u025bna ayen akka i zellun, zellun-t i le\u01e7nun ma\u010d\u010di i \u1e5aebbi ; nekk ur b\u0263i\u0263 ara a\u021b-\u021bcerkem akk-d le\u01e7nun.\n10:21 Ur tezmirem ara a\u021b-\u021beswem si teqbuct n Sidi \u1e5aebbi ma yella te\u021b\u021bessem si \u021beqbuct n le\u01e7nun ; ur tezmirem ara da\u0263en a\u021b-\u021be\u010d\u010dem seg we\u0263\u1e5bum n Sidi \u1e5aebbi ma yella te\u021b\u021be\u021b\u021bem seg we\u0263\u1e5bum n le\u01e7nun.\n10:22 E\u025bni neb\u0263a a nejre\u1e25 ul n Sidi \u1e5aebbi a d-neskker tismin-is ? T\u0263ilem tazmert-nne\u0263 te\u0263leb tazmert-is ?\n10:23 Llan wid i d-iqqa\u1e5ben : kullec d le\u1e25lal fell-a\u0263 ; \u021b-\u021bide\u021b, lame\u025bna ur a\u0263-yenfi\u025b ara kullec. Kullec ye\u021b\u021busemme\u1e25-a\u0263 a t-nexdem, me\u025bna ma\u010d\u010di d kullec i \u0263-yesnernayen di liman.\n10:24 Ur \u021bnadit ara \u0263ef nnfe\u025b-nwen kan kunwi, me\u025bna nadit \u0263ef nnfe\u025b n wiya\u1e0d.\n10:25 Tzemrem a\u021b-\u021be\u010d\u010dem kra n wayen i ge\u021bnuzun di ssuq mbla asteqsi, mbla ma t\u1e25ebb\u1e5bem,\n10:26 axa\u1e6der ddunit d wayen akk yellan deg-s d ayla n Sidi \u1e5aebbi.\n10:27 Ma ye\u025b\u1e5be\u1e0d-ikkun waleb\u025bad ur numin ara s Lmasi\u1e25, ma t\u1e5bu\u1e25em, \u010d\u010det s neyya mbla asteqsi seg wayen akk ara wen-d-issers.\n10:28 Lame\u025bna ma yella win i wen-d yennan : ayagi ye\u021b\u021bunefk d asfel i ssada\u021b, ur te\u021b\u021bet ara imi i kkun-id ixebbe\u1e5b iwakken ad yethedden wul nwen.\n10:29 Ma\u010d\u010di \u0263ef neyya-nwen i d-nni\u0263 akka, lame\u025bna \u0263ef neyya n win i kkun-i\u025ber\u1e0den. Ihi, acimi ara \u01e7\u01e7e\u0263 waye\u1e0d ad idebbe\u1e5b deg ixemmimen-iw ?\n10:30 Ma yella \u1e25emde\u0263 Sidi \u1e5aebbi \u0263ef wayen i te\u021b\u021be\u0263, acimi ara \u01e7\u01e7e\u0263 iman-iw ad wwten deg-i \u0263ef lqut i \u0263ef \u1e25emde\u0263 Sidi \u1e5aebbi ?\n10:31 Ama te\u010d\u010dam ne\u0263 teswam, ne\u0263 kra n wayen ara txedmem, xedmet-e\u021b i tmanegt n Sidi \u1e5aebbi.\n10:32 Ur \u021b\u021bilit ara d sebba n u\u0263elluy ama i wat Is\u1e5bail, ama i iyunaniyen, ama i tejma\u025bt n Sidi \u1e5aebbi,\n10:33 am akken xeddme\u0263 nekk, \u021bnadi\u0263 a wen-\u025be\u01e7be\u0263 me\u1e5b\u1e5ba di kullec, ur \u021bqellibe\u0263 ara \u0263ef nnfe\u025b-inu, me\u025bna \u021bqellibe\u0263 \u0263ef nnfe\u025b n umur ameqqran deg-wen iwakken ad \u021bwaselken.\n11:1 \u0190andet-iyi am akken \u021b\u025banade\u0263 Lmasi\u1e25.\n11:2 A kkun-ibarek \u1e5aebbi imi i yi-d-te\u021bmektayem di yal taswi\u025bt yerna te\u1e6d\u1e6dafa\u1e5bem lew\u1e63ayat-iw akken i wen-tent-slemde\u0263.\n11:3 Me\u025bna, tura b\u0263i\u0263 a\u021b-\u021bissinem ayagi : Lmasi\u1e25 d aqe\u1e5b\u1e5buy \u0263ef yemdanen me\u1e5b\u1e5ba, argaz d aqe\u1e5b\u1e5buy \u0263ef tme\u1e6d\u1e6dut-is, ma d \u1e5aebbi d aqe\u1e5b\u1e5buy \u0263ef Lmasi\u1e25.\n11:4 Ihi argaz ara yesburren \u0263ef wuqe\u1e5b\u1e5buy-is m'ara ide\u025b\u025bu \u0263er Sidi \u1e5aebbi ne\u0263 m'ara d-ye\u021bxebbi\u1e5b ayen i s-d-yusan s \u0263u\u1e5b Sidi \u1e5aebbi, yekkes l\u1e25e\u1e5bma \u0263ef Ssid-is.\n11:5 Lame\u025bna tame\u1e6d\u1e6dut ara ide\u025b\u025bun \u0263er Sidi \u1e5aebbi ne\u0263 ara ye\u021bxebbi\u1e5ben s wayen i s-d-ye\u021b\u021basen s \u0263u\u1e5b \u1e5aebbi aqe\u1e5b\u1e5buy-is \u025beryan, tekkes l\u1e25e\u1e5bma \u0263ef wergaz-is, am akken d aqe\u1e5b\u1e5buy-is i tse\u1e6d\u1e6del.\n11:6 Axa\u1e6der ma yella tame\u1e6d\u1e6dut ur tesburr ara, a\u021b-\u021begzem kan ihi acebbub-is am wergaz ; lame\u025bna ma yella d l\u025bib i tme\u1e6d\u1e6dut a\u021b-\u021begzem ne\u0263 a\u021b-\u021b\u1e63e\u1e6d\u1e6del acebbub-is, ilaq ihi a\u021b-\u021b\u0263um aqe\u1e5b\u1e5buy-is.\n11:7 Argaz ur ilaq ara ad yesburr i wqe\u1e5b\u1e5buy-is axa\u1e6der d ne\u021b\u021ba i gmetlen Sidi \u1e5aebbi d l\u025ba\u1e0dima-ines ; ma \u021b-\u021bame\u1e6d\u1e6dut d ne\u021b\u021bat i d l\u1e25e\u1e5bma n wergaz.\n11:8 Axa\u1e6der ma\u010d\u010di d argaz i d- ye\u021bwaxelqen si tme\u1e6d\u1e6dut me\u025bna \u021b- \u021bame\u1e6d\u1e6dut i d-i\u021bwaxelqen seg wergaz.\n11:9 Da\u0263en argaz ur d-ye\u021bwaxleq ara i tme\u1e6d\u1e6dut, lame\u025bna \u021b-\u021bame\u1e6d\u1e6dut i d ye\u021bwaxelqen i wergaz.\n11:10 Daymi \u0263ef ddemma n lmalayekkat, tame\u1e6d\u1e6dut ilaq a\u021b-\u021besbur i uqe\u1e5b\u1e5buy-is iwakken a d-tbeggen belli seddaw l\u1e25ekma n wergaz-is i tella.\n11:11 \u0194er Sidi \u1e5aebbi, ur d-te\u021b\u021bili tme\u1e6d\u1e6dut mbla argaz, ur d-ye\u021b\u021bili wergaz mbla tame\u1e6d\u1e6dut.\n11:12 Axa\u1e6der akken i d-te\u021bwaxleq tme\u1e6d\u1e6dut seg wergaz, akken da\u0263en i d-ye\u021blal wergaz si tme\u1e6d\u1e6dut, ayagi akk s \u0263u\u1e5b Sidi \u1e5aebbi i d-yekka.\n11:13 Meyzet kunwi s yiman-nwen : e\u025bni yelha-yas i tme\u1e6d\u1e6dut a\u021b-\u021bde\u025b\u025bu \u0263er Sidi \u1e5aebbi mbla ma tesburr \u0263ef wuqe\u1e5b\u1e5buy-is ?\n11:14 Ula d l\u025badda n yemdanen tesselmed awen belli d l\u025bib i wergaz ma i\u1e5bebba acebbub-is.\n11:15 Lame\u025bna d ccan ameqqran i tme\u1e6d\u1e6dut ma t\u1e5bebba acebbub-is axa\u1e6der ye\u021b\u021bunefk-as-d iwakken a s-yili d asburru.\n11:16 Ma yella win yeb\u0263an ad i\u0263anen \u0263ef wannect-agi, ilaq ad i\u1e93er belli nukni ur nes\u025bi ara tannumi-agi, ur telli ara da\u0263en di tejmuya\u025b n Sidi \u1e5aebbi.\n11:17 A n\u025beddi tura \u0263er wayen nni\u1e0den. \u0194ef wayen ye\u025bnan tijmuya\u025b-nwen ur kkun-\u021bcekki\u1e5be\u0263 ara, axa\u1e6der ayen i deg ilaq a\u021b-\u021beddum \u0263er zdat, kunwi te\u021b\u021bu\u0263alem \u0263er deffir.\n11:18 Sli\u0263 belli m'ara te\u021bnejma\u025bem ye\u021b\u021bili lxilaf gar-awen yerna umne\u0263 belli tella kra n tide\u021b deg wayagi.\n11:19 Ilaq a d-yili lxilaf-agi gar-awen iwakken a d-banen wid ye\u1e6d\u1e6dfen di liman seg wul.\n11:20 M'ara tedduklem \u0263er imensi n usmekti, ur txeddmem ara akken yeb\u0263a Sidi \u1e5aebbi !\n11:21 Axa\u1e6der wa ye\u021b\u1e25iri ad ye\u010d\u010d lqut-is, wa mazal-it yellu\u1e93 waye\u1e0d ye\u1e5bwa, yeskke\u1e5b.\n11:22 Amek ! Ur tes\u025bim ara ixxamen nwen iwakken a\u021b-\u021be\u010d\u010dem a\u021b-\u021beswem ? Ne\u0263 teb\u0263am a\u021b-\u021besse\u0263lim lqima n tejma\u025bt n Sidi \u1e5aebbi, a\u021b-\u021besne\u1e25camem wid ur nes\u025bi acemma ? D acu ara wen-d-ini\u0263, a kkun cekk\u1e5be\u0263 ? Ur kkun-\u021bcekki\u1e5be\u0263 ara \u0263ef wayagi !\n11:23 D ayen i yi-d-i\u021b\u021bunefken s \u0263u\u1e5b Sidi \u1e5aebbi i wen-slemde\u0263 nekkini. Deg i\u1e0d-nni i deg ye\u021b\u021buzenz Sidna \u0190isa, yeddem-ed a\u0263\u1e5bum,\n11:24 ye\u1e25med Sidi \u1e5aebbi yeb\u1e0da-t yenna : \u00ab Wagi d lge\u021b\u021ba-w ye\u021b\u021bunefken fell awen, xeddmet ayagi iwakken a yi-d \u021bmektayem. \u00bb\n11:25 Da\u0263en, mi fukken u\u010d\u010di, yeddem ed taqbuct yenna : \u00ab Taqbuct-agi d lem\u025bahda taj\u1e0di\u1e6d s idammen-iw ; xeddmet ayagi iwakken a yi-d-te\u021bmektayem. \u00bb\n11:26 Axa\u1e6der kra n tikkelt i deg ara te\u010d\u010dem seg we\u0263\u1e5bum-agi, i deg ara teswem si teqbuct agi, te\u021bxebbi\u1e5bem s lmut n Lmasi\u1e25 alamma d ass i deg ara d-yu\u0263al.\n11:27 Daymi win ara ye\u010d\u010den seg we\u0263\u1e5bum-agi, ara yeswen si teqbuct-agi n usmekti n Lmasi\u1e25, m'ur sen-yefki ara lqima, yewwi ddnub \u0263er yiri-s \u0263ef ddemma n l\u01e7e\u021b\u021ba akk-d idammen n Lmasi\u1e25.\n11:28 Ihi mkul yiwen ad ixemmem deg yiman-is uqbel ad ye\u010d\u010d seg we\u0263\u1e5bum-nni ne\u0263 ad isew si teqbuct-nni.\n11:29 Axa\u1e6der ma yella yiwen deg-wen ye\u010d\u010da ne\u0263 yeswa tiremt n usmekti n Lmasi\u1e25, mbla ma yefka lqima i l\u01e7e\u021b\u021ba n Lmasi\u1e25, yewwi-d l\u025biqab i yiman-is.\n11:30 \u0194ef wayagi i llan gar-awen a\u1e6das n wid ihelken akk-d ine\u025byuba, yerna a\u1e6das deg-sen i gemmuten.\n11:31 Lemmer ne\u021b\u1e25adar \u0263ef yiman nne\u0263, tili ur d-ne\u021b\u021bawi ara l\u025biqab n Sidi \u1e5aebbi fell-ane\u0263.\n11:32 S wakka m'ara \u0263-i\u025baqeb Sidi \u1e5aebbi, ye\u021b\u1e5bebbi-ya\u0263 iwakken ur a\u0263 ye\u021b\u1e25asab ara d wat n ddunit.\n11:33 Ihi ay atmaten, asmi ara tennejma\u025bem iwakken a\u021b-\u021be\u010d\u010dem, mye\u1e5b\u01e7ut wway gar-awen.\n11:34 Ma llan wid yellu\u1e93en, ad \u010d\u010den uqbel deg wexxam-nsen iwakken ur d-tesse\u0263layem ara l\u025biqab n Sidi \u1e5aebbi fell-awen m'ara tennejma\u025bem. Timsalin nni\u1e0den a tent-fru\u0263 m'ara n-ase\u0263.\n12:1 Ay atmaten, ur b\u0263i\u0263 ara a\u021b-\u021beqqimem mbla tamusni \u0263ef wayen ye\u025bnan ayen i d-ye\u021b\u021bak \u1e5a\u1e5bu\u1e25 iqedsen.\n12:2 Te\u1e93ram belli asm'akken ur tuminem ara s Lmasi\u1e25, \u021b\u021bawwin kkun wiya\u1e0d t\u025bebbdem lme\u1e63nu\u025bat ur nene\u1e6d\u1e6deq ara.\n12:3 Tura ilaq a\u021b-\u021be\u1e93rem belli yiwen ur izmir a d-yini : \u00ab ad ye\u021bwan\u025bel \u0190isa Lmasi\u1e25 \u00bb ma yella s \u1e5a\u1e5bu\u1e25 iqedsen i ge\u021bmeslay. Da\u0263en yiwen ur izmir ad iched belli \u0190isa Lmasi\u1e25 d Ssid-is, ma yella ma\u010d\u010di s \u1e5a\u1e5bu\u1e25 iqedsen i t-id-yenna.\n12:4 Llan a\u1e6das n le\u1e63naf n tukciwin n \u1e5aebbi, lame\u025bna yiwen n \u1e5a\u1e5bu\u1e25 kan i gellan ;\n12:5 a\u1e6das n le\u1e63naf n leqdic i gellan me\u025bna yiwen n Ssid-nne\u0263 kan i nes\u025ba ;\n12:6 a\u1e6das n le\u1e63naf n lec\u0263al i gellan, me\u025bna \u1e5aebbi d yiwen, d ne\u021b\u021ba i ten-isedduyen akk deg-nne\u0263 me\u1e5b\u1e5ba.\n12:7 Yal yiwen te\u021b\u021bunefk-as-d tukci n \u1e5a\u1e5bu\u1e25 iqedsen i nnfe\u025b-nne\u0263 me\u1e5b\u1e5ba.\n12:8 Ihi \u1e5a\u1e5bu\u1e25 iqedsen yefka-d i yiwen ad immeslay s \u1e63\u1e63wab d lefhama, yefka-d i waye\u1e0d ad immeslay s tmusni.\n12:9 \u1e5a\u1e5bu\u1e25-agi yefka da\u0263en i waye\u1e0d liman i\u01e7ehden, i waye\u1e0d tazmert s wayes ara yesse\u1e25lu imu\u1e0dan ;\n12:10 yefka da\u0263en i waye\u1e0d tazmert ad ixdem lbe\u1e5bhanat, ma d waye\u1e0d ad i\u021bxebbi\u1e5b s wayen i s-d-ye\u021b\u021bassen s \u0263u\u1e5b Sidi \u1e5aebbi ; waye\u1e0d da\u0263en yefka-yas-ed tazmert s wayes ara ye\u025bqel ayen i d-i\u021b\u021basen s \u0263u\u1e5b \u1e5a\u1e5bu\u1e25 n Sidi \u1e5aebbi d wayen i d-i\u021b\u021basen s \u0263u\u1e5b le\u1e5bwa\u1e25 n diri ; waye\u1e0d ye\u021b\u021bunefk-as-d ad immeslay timeslayin ur ne\u021bwassen ara ; waye\u1e0d da\u0263en ye\u021b\u021bunefk-as-d a d-yessefhem timeslayin-agi ur ne\u021bwassen ara.\n12:11 Ayagi akk itekk-ed seg yiwen n \u1e5a\u1e5bu\u1e25. \u1e5a\u1e5bu\u1e25 iqedsen ye\u021b\u021bak-ed ayagi me\u1e5b\u1e5ba akken yeb\u0263a, i yal yiwen deg nne\u0263.\n12:12 L\u01e7e\u021b\u021ba n wemdan d yiwet, \u0263as akken tes\u025ba a\u1e6das n lemfa\u1e63el. Lemfa\u1e63el-agi \u0263as deg wa\u1e6das yid-sen, d yiwet n l\u01e7e\u021b\u021ba i llan ; akken da\u0263en i gella Lmasi\u1e25.\n12:13 Axa\u1e6der s yiwen n \u1e5a\u1e5bu\u1e25 kan i ne\u021bwa\u0263\u1e0des me\u1e5b\u1e5ba iwakken a nili d yiwet n l\u01e7e\u021b\u021ba ; ama d at Is\u1e5bail ne\u0263 d iyunaniyen, ama d aklan ne\u0263 d i\u1e25e\u1e5b\u1e5biyen, seg yiwen n \u1e5a\u1e5bu\u1e25 i neswa me\u1e5b\u1e5ba.\n12:14 L\u01e7e\u021b\u021ba ur tebni ara \u0263ef yiwen n lmef\u1e63el, lame\u025bna tebna \u0263ef wa\u1e6das n lemfa\u1e63el.\n12:15 Ma yenna-d u\u1e0dar : nekk ma\u010d\u010di d afus ur \u021bekki\u0263 ara di l\u01e7e\u021b\u021ba, e\u025bni imi ur yelli ara d afus ur i\u021bekka ara ula d ne\u021b\u021ba di l\u01e7e\u021b\u021ba ?\n12:16 Ma yella yenna-d ume\u1e93\u1e93u\u0263 : nekk ma\u010d\u010di \u021b-\u021bi\u1e6d, ur \u021bekki\u0263 ara di l\u01e7e\u021b\u021ba, e\u025bni \u021b-\u021bide\u021b m'ur yelli ara \u021b-\u021bi\u1e6d ur i\u021bekka ara ula d ne\u021b\u021ba di l\u01e7e\u021b\u021ba ?\n12:17 Ma yella l\u01e7e\u021b\u021ba me\u1e5b\u1e5ba \u021b-\u021bi\u1e6d, amek ara tili tmesliwt ? Ne\u0263 ma yella d ame\u1e93\u1e93u\u0263 kan i tella, amek ara yili wesri\u1e25i ?\n12:18 Sidi \u1e5aebbi yebna mkul lmef\u1e63el di l\u01e7e\u021b\u021ba akken i s-yehwa.\n12:19 Ma yella l\u01e7e\u021b\u021ba me\u1e5b\u1e5ba d yiwen n lmef\u1e63el, anda-\u021b ihi l\u01e7e\u021b\u021ba ?\n12:20 S wakka ihi a\u1e6das n lemfa\u1e63el i gellan, me\u025bna l\u01e7e\u021b\u021ba yiwet.\n12:21 Ti\u1e6d ur tezmir ara a\u021b-\u021bini i ufus : ur k-u\u1e25wa\u01e7e\u0263 ara ! Aqe\u1e5b\u1e5buy ur yezmir ara ad yini i u\u1e0da\u1e5b : ur k-u\u1e25wa\u01e7e\u0263 ara.\n12:22 Lemfa\u1e63el-nni n l\u01e7e\u021b\u021ba i d-ye\u021bbanen d imec\u1e6da\u1e25, nef\u025ben a\u1e6das.\n12:23 Lemfa\u1e63el n l\u01e7e\u021b\u021ba iwumi ur nefki ara lqima, d nutni i ne\u021b\u1e25adar akte\u1e5b n wiya\u1e0d ; ihi d lemfa\u1e63el ur nezmir ara a d-nebder i ne\u021b\u1e25adar a\u1e6das,\n12:24 ma d wid yes\u025ban lqima, ur u\u1e25wa\u01e7en ara lem\u1e25adra. Sidi \u1e5aebbi yebna l\u01e7e\u021b\u021ba akken ara izegged lqima i lemfa\u1e63el ixu\u1e63\u1e63en,\n12:25 iwakken ur d-ye\u021b\u021bili ara lxilaf ger lemfa\u1e63el, me\u025bna ad \u021bem\u1e25adaren wway gar-asen.\n12:26 Ma yella yiwen n lmef\u1e63el ye\u021bwaq\u1e5be\u1e25, wiya\u1e0d me\u1e5b\u1e5ba ad \u021bwaqe\u1e5b\u1e25en yid-es ; ma yella ye\u021b\u021bunefk-as ccan i waye\u1e0d, wiya\u1e0d akk ad fe\u1e5b\u1e25en yid-es.\n12:27 Kunwi me\u1e5b\u1e5ba d l\u01e7e\u021b\u021ba n Lmasi\u1e25, yal yiwen deg-wen d lmef\u1e63el di l\u01e7e\u021b\u021ba-s, mkul yiwen deg umkan-is.\n12:28 Di tejma\u025bt n Lmasi\u1e25, Sidi \u1e5aebbi yesbedd uqbel \u1e5b\u1e5busul, deffir-nsen wid i d-ye\u021bxebbi\u1e5ben s \u0263u\u1e5b Sidi \u1e5aebbi, rnan-d wid yesselmaden, rnan-d da\u0263en wid yes\u025ban tazmert ad xedmen lbe\u1e5bhanat, wid yes\u025ban tazmert ad sse\u1e25lun imu\u1e0dan, wid ara i\u025biwnen wiya\u1e0d, wid ara yilin d imdebb\u1e5ben akk-d wid ara yemmeslayen timeslayin ur ne\u021bwassen ara.\n12:29 E\u025bni \u021b\u021bucegg\u025ben-d me\u1e5b\u1e5ba d \u1e5b\u1e5busul ? Ne\u0263 \u021bxebbi\u1e5ben-d akk s \u0263u\u1e5b Sidi \u1e5aebbi ? Sselmaden me\u1e5b\u1e5ba ? Xeddmen me\u1e5b\u1e5ba lbe\u1e5bhanat ?\n12:30 E\u025bni s\u025ban me\u1e5b\u1e5ba tazmert ad sse\u1e25lun imu\u1e0dan, ne\u0263 ad mmeslayen me\u1e5b\u1e5ba timeslayin ur ne\u021bwassen ara ? Ne\u0263 zemren akk a d-sfehmen timeslayin-agi ?\n12:31 Ihi a wen-d-ini\u0263 : nadit axi\u1e5b \u0263ef tikciwin-nni inef\u025ben a\u1e6das. A wen d-mle\u0263 tura abrid yifen akk iberdan.\n13:1 \u0194as zemre\u0263 ad mmeslaye\u0263 timeslayin n ddunit me\u1e5b\u1e5ba, ad rnu\u0263 tid n lmalayekkat, m'ur s\u025bi\u0263 ara le\u1e25mala n tide\u021b, ad ili\u0263 am \u1e6d\u1e6dbel yeddendunen ne\u0263 nnaqus ye\u1e6d\u1e6den\u1e6dunen.\n13:2 \u0194as ma ye\u021b\u021bunefk-iyi-d ad \u021bxebbi\u1e5be\u0263 s \u0263u\u1e5b \u1e5aebbi, ad fehme\u0263 kra yellan d lba\u1e0dna, ad s\u025bu\u0263 tamusni di mkul l\u1e25a\u01e7a, \u0263as ad s\u025bu\u0263 liman s wayes i zemre\u0263 ad ini\u0263 i wedrar qle\u025b iman-ik syagi t\u1e5bu\u1e25e\u1e0d \u0263er wemkan ihina, m'ur s\u025bi\u0263 ara le\u1e25mala \u0263er wiya\u1e0d, nekk d ulac.\n13:3 \u0194as da\u0263en ad fe\u1e5bqe\u0263 ayen akk s\u025bi\u0263 i wid yellu\u1e93en, ad rnu\u0263 ad sebble\u0263 tudert-iw alamma d lmut \u0263ef ddemma n wiya\u1e0d, m'ur s\u025bi\u0263 ara le\u1e25mala deg ul-iw, ayagi ur iyi-infi\u025b ara.\n13:4 Le\u1e25mala n tide\u021b te\u021b\u021bawi-d \u1e63\u1e63be\u1e5b, le\u1e25mala te\u021b\u025bawan, le\u1e25mala ur tes\u025bi ara tismin, ur tes\u025bi ara zzux, win yes\u025ban le\u1e25mala deg ul-is ur ye\u021bcekki\u1e5b ara iman-is,\n13:5 Win yes\u025ban le\u1e25mala n tide\u021b ur i\u021bnadi ara ad ixdem cce\u1e5b, ur ye\u021bnadi ara \u0263ef nnfe\u025b-ines, ur ize\u025b\u025bef ur ye\u021b\u021ba\u1e6d\u1e6daf cce\u1e25nat ;\n13:6 Win yes\u025ban le\u1e25mala ur ife\u1e5b\u1e5be\u1e25 ara s lba\u1e6del me\u025bna ife\u1e5b\u1e5be\u1e25 s l\u1e25eqq;\n13:7 le\u1e25mala te\u021bsama\u1e25 kullec, te\u021b\u021bamen, tessaram tsebbe\u1e5b i kullec.\n13:8 Axebbe\u1e5b n wayen i d-ye\u021b\u021basen s \u0263u\u1e5b \u1e5aebbi ad ifak, timeslayin ur ne\u021bwassen ara ad \u1e25ebsent, tamusni a\u021b-\u021befnu, ma d le\u1e25mala n tide\u021b wer\u01e7in a\u021b-\u021bfak ;\n13:9 axa\u1e6der tamusni-nne\u0263 txu\u1e63\u1e63, ayen ne\u021bbecci\u1e5b s \u0263u\u1e5b Sidi \u1e5aebbi ur innekmal ara,\n13:10 me\u025bna m'ara d-yawe\u1e0d wayen innekmalen, ayen ixu\u1e63\u1e63en me\u1e5b\u1e5ba ad im\u1e25u.\n13:11 Asmi lli\u0263 d aqcic, \u021bmeslaye\u0263 am weqcic, \u021bxemmime\u0263, \u021bmeyyize\u0263 sl\u025beqliya n weqcic ; asmi u\u0263ale\u0263 d argaz, \u01e7\u01e7i\u0263 l\u025beqliya n weqcic.\n13:12 Ass-agi, ne\u021bwali am akken di lemri yumsen, me\u025bna imiren a nu\u0263al a nwali akken ilaq ; ass-agi tamusni inu mazal txu\u1e63\u1e63 lame\u025bna ad u\u0263ale\u0263 ad issine\u0263 akken i yi-issen Sidi \u1e5aebbi.\n13:13 Tura ihi tlata n le\u1e25waye\u01e7-agi i ges\u025ban lqima : liman, asirem d le\u1e25mala ; lame\u025bna di tlata-agi, d lehmala i \u021b-\u021bameqqrant.\n14:1 Qbel kullec nadit a\u021b-\u021bes\u025bum le\u1e25mala n tide\u021b. Nadit da\u0263en \u0263ef tukciwin n \u1e5a\u1e5bu\u1e25 iqedsen, lame\u025bna nadit axi\u1e5b a d-\u021bxebbi\u1e5bem s wayen i d-i\u021b\u021basen s \u0263u\u1e5b Sidi \u1e5aebbi.\n14:2 Win ye\u021bmeslayen tutlayin ur ne\u021bwassen ara, ma\u010d\u010di i yemdanen i ge\u021bmeslay lame\u025bna i \u1e5aebbi, imi yiwen ur ifehhem acu i d-yeqqa\u1e5b ; axa\u1e6der s tezmert n \u1e5a\u1e5bu\u1e25 iqedsen i d-iqqa\u1e5b ayen ur nezmir a t-nefhem.\n14:3 Ma d win i d-i\u021bxebbi\u1e5ben s \u0263u\u1e5b Sidi \u1e5aebbi, i\u021bmeslay-ed i yemdanen, yesnernay liman-nsen, inehhu-ten, ye\u021b\u1e63ebbi\u1e5b-iten.\n14:4 Win ye\u021bmeslayen tutlayin ur ne\u021bwassen ara, yesse\u01e7had iman-is di liman, ma d win i d-i\u021bxebbi\u1e5ben s wayen i d-i\u021b\u021basen s \u0263u\u1e5b Sidi \u1e5aebbi, yesse\u01e7had tajma\u025bt n Sidi \u1e5aebbi me\u1e5b\u1e5ba.\n14:5 B\u0263i\u0263 a\u021b-\u021bemmeslayem me\u1e5b\u1e5ba s tutlayin ur ne\u021bwassen ara, lame\u025bna b\u0263i\u0263 axi\u1e5b ma te\u021bxebbi\u1e5bem s \u0263u\u1e5b Sidi \u1e5aebbi. Win ye\u021bxebbi\u1e5ben s \u0263u\u1e5b Sidi \u1e5aebbi yenfe\u025b akte\u1e5b n win ye\u021bmeslayen tutlayin-agi, anagar ma yella izmer a d-yessefhem ayen i d-yenna, iwakken tajma\u025bt me\u1e5b\u1e5ba a\u021b-\u021bestenfe\u025b.\n14:6 Tura ay atmaten, lemmer a n-ase\u0263 \u0263u\u1e5b-wen a wen-d mmeslaye\u0263 s tutlayt ur ne\u021bwassen ara, deg wacu ara kkun-nef\u025be\u0263 ? A kkun-nef\u025be\u0263 ma wwi\u0263-awen-d ayen i yi-d-i\u021b\u021buwe\u1e25\u1e25an d wayen i yi-d-ye\u021b\u021buxeb\u1e5ben s \u0263u\u1e5b Sidi \u1e5aebbi, ne\u0263 \u021bamusni akk-d uselmed !\n14:7 A d-nefk lemtel n dduzan n lmusiqa am tjewwaqt d snitra : ma yella ur yemxalaf ara \u1e63\u1e63ut-nsent, amek ara ne\u025bqel \u1e63\u1e63ut n tjewaqt ne\u0263 win n snitra ?\n14:8 Ne\u0263 da\u0263en m'ur ne\u025bqil ara mli\u1e25 \u1e63\u1e63ut n lbuq s wayes i \u021bheggin imnayen iman-nsen \u0263er imen\u0263i, anwa ara iheggin iman-is \u0263er umen\u0263i ?\n14:9 Kunwi da\u0263en, ma yella tne\u1e6dqem-d s tutlayt ur ne\u021bwassen ara, amek ara nefhem d acu i d-teqqa\u1e5bem ? Am akken te\u021bmeslayem i wa\u1e0du !\n14:10 Llant a\u1e6das n tutlayin yemxalafen di ddunit, lame\u025bna s\u025bant akk lme\u025bna.\n14:11 Ma yella ur fhime\u0263 ara tameslayt n waleb\u025ba\u1e0d, ad ili\u0263 d abe\u1e5b\u1e5bani ar \u0263u\u1e5b-es, ne\u021b\u021ba da\u0263en ad yili \u0263u\u1e5b-i d abe\u1e5b\u1e5bani.\n14:12 Kunwi da\u0263en, imi te\u021bnadim a\u021b-\u021bes\u025bum tukciwin i d-ye\u021b\u021bak \u1e5a\u1e5bu\u1e25 iqedsen, nadit axi\u1e5b a\u021b-\u021bes\u025bum ayen ara inef\u025ben tajma\u025bt n Sidi \u1e5aebbi.\n14:13 Daymi, win ye\u021bmeslayen tutlayt ur netwassen ara ilaq ad issuter i \u1e5aebbi a s-d-yefk ad yessefhem ayen i d-iqqa\u1e5b.\n14:14 Axa\u1e6der ma yella de\u025b\u025bu\u0263 s tutlayt ur ne\u021bwassen ara, d \u1e5b\u1e5bu\u1e25-iw i gde\u025b\u025bun \u0263er Sidi \u1e5aebbi ma\u010d\u010di d lefhama-inu.\n14:15 D acu ara xedme\u0263 ihi ? Ad d\u025bu\u0263 s \u1e5b\u1e5bu\u1e25, lame\u025bna ad d\u025bu\u0263 da\u0263en s lefhama-inu ; ad cnu\u0263 s \u1e5b\u1e5bu\u1e25, ad cnu\u0263 da\u0263en s lefhama-inu.\n14:16 Axa\u1e6der ma yella t\u1e25emde\u1e0d \u1e5aebbi s \u1e5b\u1e5bu\u1e25-ik kan s tutlayt ur ne\u021bwassen ara, win yeqqimen gar-awen, ur nessin ara, amek ara d-yini \u00ab amin \u00bb i yimeslayen-ik, m'ur yefhim ara d acu i d-teqqa\u1e5be\u1e0d ?\n14:17 \u0194as yimeslayen-ik s wayes i t\u1e25emde\u1e0d \u1e5aebbi gerrzen a\u1e6das, ur nfi\u025ben ara win ur nefhim ara d acu i d-teqqa\u1e5be\u1e0d.\n14:18 Ad \u1e25emde\u0263 \u1e5aebbi imi \u021bmeslaye\u0263 tutlayin ur ne\u021bwassen ara akte\u1e5b-nwen me\u1e5b\u1e5ba.\n14:19 Me\u025bna di tejma\u025bt, axi\u1e5b-iyi a d-ini\u0263 xemsa yimeslayen ye\u021bwafehmen iwakken ad lemden wiya\u1e0d, wala \u025bec\u1e5ba alaf imeslayen s tutlayt ur ne\u021bwassen ara.\n14:20 Ay atmaten, ur \u021b\u021bilit ara am arrac m'ara tmeyyzem \u0263ef kra, lame\u025bna s\u025but l\u025beqliya n imeqqranen ; ma \u0263ef wayen ye\u025bnan cce\u1e5b, ilit am arrac.\n14:21 Atan wayen yuran di tira : Sidi \u1e5aebbi yenna-d : A d-mmeslaye\u0263 i wegdud-agi+ seg imawen n ibe\u1e5b\u1e5baniyen + s tutlayin nni\u1e0den+ , me\u025bna ur iyi-d-sme\u1e25sisen ara.+ +\n14:22 Ihi tutlayin-agi ur ne\u021bwassen ara, d lica\u1e5ba i wid ur numin ara ma\u010d\u010di i wid yumnen ; ma d win i d i\u021bxebbi\u1e5ben s \u0263u\u1e5b \u1e5aebbi, d lica\u1e5ba i wid yumnen ma\u010d\u010di i wid ur numin ara.\n14:23 Ma yella nnejma\u025ben imasi\u1e25iyen me\u1e5b\u1e5ba deg yiwen wemkan, bdan \u021b\u1e25emmiden akk Sidi \u1e5aebbi s tutlayin ur ne\u021bwassen ara, ma kecmen-d yemdanen ur nessin ara ayagi ne\u0263 wid ur numin ara s Lmasi\u1e25, e\u025bni ur d-qqa\u1e5ben ara tedrewcem ?\n14:24 Me\u025bna ma yella \u021bxebbi\u1e5ben-d akk s \u0263u\u1e5b Sidi \u1e5aebbi, ma ikcem-ed win ur numin ara ne\u0263 win ur nessin ara, a d-yawi s lexba\u1e5b belli d amednub i gella \u0263ef ddemma n wayen yesla, ad i\u1e25uss deg iman-is belli ad i\u021b\u021bu\u1e25aseb ;\n14:25 ayen yeffren deg ul-is a d-iban, d\u0263a ad ye\u0263li \u0263er lqa\u025ba \u0263ef wudem, ad ye\u025bbed Sidi \u1e5aebbi ad yini : \u021b-\u021bide\u021b \u1e5aebbi gar-awen i gella !\n14:26 D acu ihi i glaqen ay atmaten ? M'ara tennejma\u025bem akken tellam : wa a d-yawi ccna, waye\u1e0d d aselmed, waye\u1e0d d awe\u1e25\u1e25i, waye\u1e0d timeslayin ur ne\u021bwassen ara, waye\u1e0d a tent-id issefhem ; kullec ad ye\u021bwaxdem i wesnerni n tejma\u025bt.\n14:27 Ma llan wid ye\u021bmeslayen timeslayin ur ne\u021bwassen ara, sin ne\u0263 tlata a d-mmeslayen me\u025bna yal yiwen s nnuba-s, yerna ilaq ad yili win ara d-yesfehmen ayen i d-qqa\u1e5ben.\n14:28 Ma ulac win ara d-yesfehmen, ad ssusmen axi\u1e5b di tejma\u025bt, ad mmeslayen deg iman-nsen kan akk-d Sidi \u1e5aebbi.\n14:29 Ma llan wid i d-i\u021bxebbi\u1e5ben s wayen i d-i\u021b\u021basen s \u0263u\u1e5b Sidi \u1e5aebbi, sin ne\u0263 tlata a d-mmeslayen, wiya\u1e0d ad meyzen \u0263ef wayen i d-nnan.\n14:30 Ma yella gar-awen win iwumi i d-iwe\u1e25\u1e25a Sidi \u1e5aebbi kra, ilaq ad i\u025bass alamma yessusem win akken yellan ye\u021bmeslay.\n14:31 Tzemrem akk a d te\u021bxebbi\u1e5bem s \u0263u\u1e5b Sidi \u1e5aebbi, me\u025bna wa deffir wa, iwakken atmaten me\u1e5b\u1e5ba ad lemden, ad innerni liman-nsen.\n14:32 Win i d-i\u021bxebbi\u1e5ben s \u0263u\u1e5b Sidi \u1e5aebbi ye\u1e25kem deg wayen i d-iqqa\u1e5b,\n14:33 axa\u1e6der Sidi \u1e5aebbi ma\u010d\u010di d \u1e5aebbi n ussex\u1e5beb, me\u025bna d win i\u1e25emmlen lehna.\n14:34 Am akken xeddmen di tejmuya\u025b n wid i\u1e0du\u025ben Sidi \u1e5aebbi, ilaq tilawin ad ssusment di tejma\u025bt, ur ilaq ara a d-grent iman-nsent ; me\u025bna ad qad\u1e5bent tajma\u025bt, ad a\u0263ent awal akken i t-id-tenna ccari\u025ba.\n14:35 Ma yella b\u0263ant ad steqsint \u0263ef wayen ur fhiment ara, ad steqsint irgazen-nsent deg wexxam ; axa\u1e6der ur yessefk ara i tme\u1e6d\u1e6dut a d-ger iman-is di tejma\u025bt.\n14:36 E\u025bni s \u0263u\u1e5b-wen i d-yekka wawal n \u1e5aebbi ? Ne\u0263 \u0263u\u1e5b-wen kan i gella ?\n14:37 Ma yella yiwen deg-wen iwala iman-is ye\u021bwe\u1e25\u1e25i-yas-d Sidi \u1e5aebbi ne\u0263 ye\u021bxebbi\u1e5b-ed s \u0263u\u1e5b-es, ilaq ad i\u025bqel belli ayen akka i wen-d-uri\u0263 d lame\u1e5b n Sidi \u1e5aebbi ;\n14:38 me\u025bna ma yella inke\u1e5b-it, iban belli ur ye\u021bwaqbel ara \u0263er Sidi \u1e5aebbi.\n14:39 Akka ihi ay atmaten, ssirmet a d-te\u021bxebbi\u1e5bem s \u0263u\u1e5b \u1e5aebbi. Ur qe\u1e6d\u1e6d\u025bet ara i win yeb\u0263an ad immeslay s tutlayin ur ne\u021bwassen ara,\n14:40 acu kan x\u1e0dut i ussex\u1e5beb, xedmet kullec s \u021b\u021bawil.\n15:1 Ay atmaten, b\u0263i\u0263 a wen-d smekti\u0263 tura lexba\u1e5b n lxi\u1e5b i wen-d-ssaw\u1e0de\u0263, win akken i tqeblem yerna t\u1e25erzem-t ;\n15:2 s Lexba\u1e5b agi n lxi\u1e5b i te\u021bwasellkem ma yella tetteb\u025bem-t akken i wen-t-id-nni\u0263, ne\u0263 m'ulac liman-nwen am akken d a\u1e0du.\n15:3 Slemde\u0263-awen di tazwara ayen i lemde\u0263 nekkini : Lmasi\u1e25 yemmut \u0263ef ddnubat-nne\u0263 akken yura ;\n15:4 ye\u021bwam\u1e0del, yu\u0263al-ed \u0263er tudert ass wis tlata, akken i t-id-nnant tira iqedsen.\n15:5 Iwala-t Bu\u1e6drus, walan-t da\u0263en \u1e5b\u1e5busul di tnac yid-sen.\n15:6 Rnan walan-t da\u0263en akte\u1e5b n xemsmeyya n watmaten deg yiwet n teswi\u025bt ; a\u1e6das deg-sen mazal-iten ddren ar tura, ma d kra deg-sen mmuten.\n15:7 Yerna iwala-t Ye\u025bqub akk-d \u1e5b\u1e5busul me\u1e5b\u1e5ba.\n15:8 Mi t-walan akk, wala\u0263-t idhe\u1e5b-iyi-d da\u0263en i nekkini yellan d ulac.\n15:9 Nekk, yellan d aneggaru akk di \u1e5b\u1e5busul, ur uklale\u0263 ara ad \u021b\u021busemmi\u0263 d \u1e5b\u1e5basul axa\u1e6der lli\u0263 \u021bqehhi\u1e5be\u0263 tajma\u025bt n warraw n \u1e5aebbi.\n15:10 S \u1e5b\u1e5be\u1e25ma n Sidi \u1e5aebbi i ww\u1e0de\u0263 \u0263er wayen akka i lli\u0263 tura ; \u1e5b\u1e5be\u1e25ma i yi-d-ifka ur t\u1e5bu\u1e25 ara deg ulac, lame\u025bna u\u0263ale\u0263 xedme\u0263 akte\u1e5b-nsen me\u1e5b\u1e5ba, ma\u010d\u010di s yiman-iw, me\u025bna s \u1e5b\u1e5be\u1e25ma n Sidi \u1e5aebbi yellan yid-i.\n15:11 S wakka ihi, ama d nekk ama d nutni, atah wayen i ne\u021bbecci\u1e5b yerna d ayen s wayes i tumnem.\n15:12 Ma neqqa\u1e5b belli Lmasi\u1e25 ye\u1e25ya-d si ger lmegtin, amek ihi kra deg-wen qqa\u1e5ben ulac \u1e25eggu n lmegtin ?\n15:13 Ma yella ulac \u1e25eggu n lmegtin, ihi Lmasi\u1e25 da\u0263en ur d-i\u1e25yi ara.\n15:14 Ma yella ihi Lmasi\u1e25 ur d-i\u1e25yi ara, ayen i ne\u021bbecci\u1e5b d a\u1e0du, ayen s wayes tumnem da\u0263en d a\u1e0du.\n15:15 Lemmer \u021b-\u021bide\u021b lmegtin ur d \u1e25eggun ara, neskaddeb \u0263ef Sidi \u1e5aebbi nukni i d-icehden belli yesse\u1e25ya-d Lmasi\u1e25 si ger lmegtin. Lemmer ur t-id-isse\u1e25yi ara, ihi lmegtin ur d-\u1e25eggun ara ;\n15:16 axa\u1e6der ma yella lmegtin ur d-\u1e25eggun ara, Lmasi\u1e25 da\u0263en ur d-i\u1e25yi ara.\n15:17 Ma yella Lmasi\u1e25 ur d-i\u1e25yi ara, ihi liman-nwen am akken d a\u1e0du, mazal-ikkun di ddnub-nwen,\n15:18 ula d imasi\u1e25iyen yemmuten negren, liman-nsen i\u1e5bu\u1e25 d ulac.\n15:19 Ma yella asirem-nne\u0263 di Lmasi\u1e25 di ddunit-agi kan i gella, d nukni i ge\u021b\u0263i\u1e0den akte\u1e5b n yemdanen n ddunit me\u1e5b\u1e5ba.\n15:20 Me\u025bna Lmasi\u1e25 i\u1e25ya-d si lmut, d ne\u021b\u021ba i d amezwaru i d-i\u1e25yan \u0263ef wid akk yemmuten ;\n15:21 axa\u1e6der, am akken i d-tekcem lmut \u0263er ddunit s yiwen wergaz, s yiwen wergaz da\u0263en i d-yusa \u1e25eggu n lmegtin.\n15:22 Am akken i we\u1e5bten me\u1e5b\u1e5ba yemdanen lmut imi d-kkan s \u0263u\u1e5b Adam, akken da\u0263en wid akk yumnen s Lmasi\u1e25 a d-\u1e25yun si ger lmegtin imi umnen yis,\n15:23 \u1e25eggu-agi ilaq a d-id\u1e5bu di lweqt-is : Lmasi\u1e25 i\u1e25ya-d d amezwaru, ass n tu\u0263alin-is a d-\u1e25yun me\u1e5b\u1e5ba wid yellan d ayla-s.\n15:24 Imiren a d-tawe\u1e0d taggara, Lmasi\u1e25 ad issenger tizmar, l\u1e25ekmat d wid i\u1e25ekmen ; ad yerr tagelda i Sidi \u1e5aebbi Baba-tne\u0263.\n15:25 Axa\u1e6der ilaq Lmasi\u1e25 ad ye\u1e25kem alamma yerra i\u025bdawen-is seddaw i\u1e0da\u1e5b\u1e5ben-is.\n15:26 A\u025bdaw aneggaru ara yessenger, d lmut.\n15:27 Axa\u1e6der am akken yura : Sidi \u1e5aebbi yerra kullec seddaw yi\u1e0da\u1e5b\u1e5ben-is+ . Me\u025bna mi gura belli kullec yu\u0263al seddaw yi\u1e0da\u1e5b\u1e5ben-is, iban belli Win yerran kullec seddaw yida\u1e5b\u1e5ben-is ur i\u021bekki ara.\n15:28 M'ara yu\u0263al kullec ger ifassen n Lmasi\u1e25, imiren ne\u021b\u021ba yellan d mmi-s, ad yu\u0263al seddaw n l\u1e25ekma n win i s-d-yefkan kullec ; iwakken Sidi \u1e5aebbi ad ye\u1e25kem \u0263ef kullec.\n15:29 Kra n yemdanen \u021bnadin ad \u021bwa\u0263ed\u1e63en \u0263as lukan ad aw\u1e0den \u0263er lmut,f+ lemmer \u021b-\u021bide\u021b lmegtin ur d-\u1e25eggun ara, acu\u0263e\u1e5b ihi i \u021bnadin ad \u021bwa\u0263ed\u1e63en ?\n15:30 I nukni, acimi i ne\u021bqabal lmut kull ass ?\n15:31 Ay atmaten, yal ass \u021bwali\u0263 lmut ger wallen-iw ; s tide\u021b i wen-d-nni\u0263 ayagi axa\u1e6der tellam d sebba n zzux-iw imi tedduklem d Ssid-nne\u0263 \u0190isa Lmasi\u1e25.\n15:32 Ma yella \u0263ef ddemma n ccan n yemdanen i nnu\u0263e\u0263 d lew\u1e25uc di temdint n Ifasus, acu n lfayda i s\u025bi\u0263 ? Ihi m'ur d-\u1e25eggun ara lmegtin : a n\u1e5bu\u1e25 kan a ne\u010d\u010d, a nsew axa\u1e6der azekka a nemmet akken i t-id-iqqa\u1e5b yiwen n lemtel.\n15:33 \u1e24adret a\u021b-\u021be\u021bwakellxem, axa\u1e6der tikli d yemcumen tessufu\u0263 i webrid.\n15:34 U\u0263alet-ed \u0263er le\u025bqel nwen, x\u1e0dut i yir abrid ; axa\u1e6der kra deg-wen \u021beddun am akken ur ssinen ara \u1e5aebbi ; ayagi nni\u0263-t-id iwakken a\u021b-\u021benne\u1e25camem.\n15:35 Me\u025bna aleb\u025ba\u1e0d a d-yini : \u00ab amek ara d-\u1e25yun lmegtin ? Amek ara tili l\u01e7e\u021b\u021ba s wayes ara d-u\u0263alen ? \u00bb\n15:36 A win ur nefhim ! Ayen ara tzer\u025be\u1e0d m'ur yemmut ara deg wakal, ur d-i\u021bam\u0263ay ara.\n15:37 Ayen akken i tzer\u025be\u1e0d ma\u010d\u010di d ayen i d-yem\u0263in me\u025bna d a\u025beqqa kan n yired ne\u0263 n zerri\u025ba nni\u1e0den.\n15:38 Imiren Sidi \u1e5aebbi a s-yefk l\u01e7e\u021b\u021ba akken yeb\u0263a, yal zzerri\u025ba a s-yefk \u1e63\u1e63ifa i s-ilaqen.\n15:39 Seg wayen akk ye\u021b\u021bidiren ur s\u025bin ara irkul yiwet n \u1e63\u1e63ifa ; \u1e63\u1e63ifa n wemdan we\u1e25d-es, tin n lmal we\u1e25d-es, tin n yef\u1e5bax we\u1e25d-es, tin n iselman da\u0263en we\u1e25d-es.\n15:40 Llant da\u0263en \u1e63\u1e63ifat n igenwan akk-d \u1e63\u1e63ifat n ddunit, yal yiwet s tafat-is ;\n15:41 tafat n yi\u1e6dij we\u1e25d-es, tafat n waggur we\u1e25d-es, tafat n yitran da\u0263en we\u1e25d-es ; ula seg itri \u0263er waye\u1e0d temxalaf tafat-nsen.\n15:42 Akka ara ted\u1e5bu asm'ara d-\u1e25yun lmegtin. L\u01e7e\u021b\u021ba m'ara tekcem akal, trekku ; me\u025bna m'ara d-te\u1e25yu ur te\u021b\u021bu\u0263al ara a\u021b-\u021berku.\n15:43 M'ara \u021b-\u021berren \u0263er wakal te\u021b\u021bu\u0263al d ulac, me\u025bna m'ara d-te\u1e25yu, a d-te\u1e25yu s ccan d ameqqran. M'ara \u021b-\u021berren \u0263er wakal teffe\u0263-i\u021b tezmert, m'ara d-te\u1e25yu a d-te\u1e25yu s l\u01e7ehd d ameqqran.\n15:44 Tekcem \u0263er wakal s yiwet n \u1e63\u1e63ifa, a d-te\u1e25yu s \u1e63\u1e63ifa nni\u1e0den ; akken tella l\u01e7e\u021b\u021ba n wemdan, tella da\u0263en l\u01e7e\u021b\u021ba n \u1e5a\u1e5bu\u1e25.\n15:45 Daymi i d-nnant tira iqedsen : Adem yellan d amdan amezwaru yu\u0263al d amdan yeddren, me\u025bna Adam aneggaru, d \u1e5a\u1e5bu\u1e25 i d-ye\u021b\u021baken tudert.\n15:46 Ma\u010d\u010di d amdan n \u1e5b\u1e5bu\u1e25 i d-yusan d amezwaru, me\u025bna d amdan n ddunit, amdan n \u1e5b\u1e5bu\u1e25 yerna-d deffir-es.\n15:47 Amdan amezwaru yekka-d seg wakal, d amdan n ddunit ; amdan wis sin yusa-d seg igenni.\n15:48 Akken yella wemdan n ddunit, ara yilin yemdanen n ddunit ; da\u0263en akken yella wemdan n igenwan ara yilin yemdanen n igenwan.\n15:49 Akken i ncuba \u0263er wemdan n ddunit ara ncabi \u0263er wemdan n igenwan.\n15:50 Ay atmaten, atan wayen b\u0263i\u0263 a d-ini\u0263 : l\u01e7e\u021b\u021ba n weksum d idammen ur twe\u1e5b\u1e5bet ara tageldit n \u1e5aebbi. Ayen ara yemten ur yezmir ara ad yew\u1e5bet ayen ur ne\u021bme\u021b\u021bat ara.\n15:51 A wen-d-ini\u0263 yiwet n lba\u1e0dna : ur ne\u021b\u025bedday ara akk si lmut me\u025bna l\u01e7e\u021b\u021bat-nne\u0263 ad nbeddalent.\n15:52 Deg yiwet n teswi\u025bt, qqen ti\u1e6d-ik teldi\u1e0d-\u021b, m'ara d-in\u1e6deq lbuq aneggaru, axa\u1e6der lbuq a d-in\u1e6deq, lmegtin a d-\u1e25yun ur \u021b\u021bu\u0263alen ara ad mmten, ma d wid i d-yufa l\u1e25al mazal-iten ddren, ad beddlen \u1e63\u1e63ifa.\n15:53 Ilaq l\u01e7e\u021b\u021ba-yagi irekkun a\u021b-\u021bels ayen ur nrekku ara, l\u01e7e\u021b\u021ba ara yemten a\u021b-\u021bels ayen ur ne\u021bme\u021b\u021bat ara.\n15:54 Asm'ara tels l\u01e7e\u021b\u021ba-agi irekkun ayen ur nrekku, asmi ara tels l\u01e7e\u021b\u021ba-agi ara yemten ayen ur ne\u021bme\u021b\u021bat, ad yed\u1e5bu wawal-nni yuran di tira iqedsen : Tazmert n Sidi \u1e5aebbi te\u0263leb lmut, tesseble\u025b-i\u021b. +\n15:55 A lmut, anida-\u021b tezmert-im ? A lmut, anda-\u021b tsiqest-im + ?\n15:56 Tisiqest n lmut, d ddnub ; ma d ddnub, d ccari\u025ba i d-isbeggnen tazmert-is.\n15:57 A ne\u1e25med Sidi \u1e5aebbi i \u0263-d-yefkan tazmert-is s Ssid-nne\u0263 \u0190isa Lmasi\u1e25 !\n15:58 S wakka ay atmaten e\u025bzizen, \u01e7ehdet ur \u0263ellit ara. \u021anernit kul ass di lec\u0263al n Ssid-nne\u0263, \u1e93ret belli le\u025btab-nwen \u0263ef ddemma n Ssid-nne\u0263 ur ye\u021b\u021bili ara mbla lfayda.\n16:1 \u0194ef wayen ye\u025bnan ajma\u025b n yedrimen i watmaten n temdint n Lquds yellan di lex\u1e63a\u1e63, xedmet akken i we\u1e63\u1e63a\u0263 ad xedmen di tejmuya\u025b n tmurt n Galasya.\n16:2 Mkul ass amezwaru n ddu\u1e5bt, ilaq yal yiwen deg-wen ad yerr di rrif ayen iwumi yezmer n yedrimen, ur \u021b\u1e5ba\u01e7ut ara a n-aw\u1e0de\u0263 d wamek ara ten-id jem\u025bem.\n16:3 M'ara n-aw\u1e0de\u0263, ad cegg\u025be\u0263 wid ara d-texti\u1e5bem, a sen-fke\u0263 tib\u1e5batin, ad \u1e5bu\u1e25en ad awin ayen akken i d-tjem\u025bem \u0263er temdint n Lquds.\n16:4 Ma yella twalam ilaq ad \u1e5bu\u1e25e\u0263 nekk s yiman-iw, ad ddun yid-i.\n16:5 Ad zegre\u0263 qbel tamurt n Masidunya d wamek ara n-ase\u0263 \u0263u\u1e5b-wen, axa\u1e6der ilaq-iyi a n-\u025beddi\u0263 syenna.\n16:6 Ad qqime\u0263 kra n wussan, ne\u0263 ahat ad s\u025beddi\u0263 ccetwa \u0263u\u1e5b-wen, s wakka a\u021b-\u021bzemrem a yi-t\u025biwnem iwakken ad kemle\u0263 abrid-iw.\n16:7 Tikkelt-agi, ur b\u0263i\u0263 ara a n-\u025beddi\u0263 d abrid kan, me\u025bna ssarame\u0263 ad qqime\u0263 kra n lweqt \u0263u\u1e5b-wen, ma yeb\u0263a Sidi \u1e5aebbi.\n16:8 Tura, aql-i ad qqime\u0263 dagi di temdint n Ifasus, alamma d ass n l\u025bid n wass wis xemsin.\n16:9 Axa\u1e6der ldint iyi-d tewwura iwakken ad xedme\u0263 yiwen cc\u0263el d ameqqran, \u0263as akken a\u1e6das n ye\u025bdawen i gellan.\n16:10 M'ara n-i\u025beddi \u0263u\u1e5b-wen gma tne\u0263 Timuti, lhit-ed yid-es a s-ikkes ukukru axa\u1e6der d aqeddac n Sidi \u1e5aebbi i gella am nekk.\n16:11 \u1e24adret ad yili win ara t-i\u1e25eq\u1e5ben. \u0190iwnet-e\u021b ad ikemmel abrid-is iwakken a d-yawe\u1e0d \u0263u\u1e5b-i di lehna ; aql-a\u0263 ne\u021b\u1e5ba\u01e7u-t nekk d watmaten.\n16:12 Ma d gma-tne\u0263 Abulus, nhi\u0263-t a\u1e6das iwakken a n-iddu d watmaten nni\u1e0den ara n-yu\u0263alen \u0263u\u1e5b-wen, me\u025bna ur yeb\u0263i ara a n-i\u1e5bu\u1e25 tura ; a n-yas m'ara s-iserre\u1e25 l\u1e25al.\n16:13 \u0190asset, \u1e6d\u1e6dfet di liman, ilit d irgazen, \u01e7ehdet.\n16:14 Xedmet kullec s le\u1e25mala.\n16:15 Tessnem Stifanas \u021b-\u021bwacult-is, te\u1e93ram belli di tmurt n Akaya d nutni i gumnen d imezwura, yerna u\u0263alen d iqeddacen \u0263ef wegdud n Sidi \u1e5aebbi. Ad ssutre\u0263 deg-wen ay atmaten,\n16:16 a\u021b-\u021ba\u0263em awal i yergazen am wigi, a\u021b-\u021bqad\u1e5bem wid akk ye\u021b\u021bekkin di leqdic yid-sen.\n16:17 Aql-i fe\u1e5b\u1e25e\u0263 mi d-usan Stifanas, Furtunatus akk-d Axaykus ; fe\u1e5b\u1e25e\u0263 yis-sen am akken d kunwi.\n16:18 axa\u1e6der hednen ul-iw d wulawen nwen. Ilaq a nissin a nefk lqima i yergazen am wigi.\n16:19 Tijmuya\u025b n tmura n Asya \u021bselliment-ed fell-awen. Akilas akk-d Brisila d wid ye\u021bnejma\u025ben deg wexxam-nsen \u021bsellimen-d fell-awen s yisem n Ssid-nne\u0263.\n16:20 Atmaten akk yellan dagi \u021bsellimen-d fell-awen. Msalamet wway gar-awen s sslam n tegma\u021b.\n16:21 Nekk Bulus, s ufus-iw i d-uri\u0263 imeslayen-agi n sslam.\n16:22 Win ur n\u1e25emmel ara Ssid-nne\u0263 atan ad ye\u021bwan\u025bel ! Marana-ta, Ssid-nne\u0263 iteddu-d.\n16:23 \u1e5a\u1e5be\u1e25ma n Sidna \u0190isa a\u021b-\u021bili fell-awen !\n16:24 \u1e24emmle\u0263-kkun me\u1e5b\u1e5ba s yisem n \u0190isa Lmasi\u1e25.","title":"Kabyle Bible (NT): 1 Corinthians","type":"page"}