{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/co2.htm","path":"bib/wb/kab/co2.htm","source_url":"https://sacred-texts.com/bib/wb/kab/co2.htm","text":"1:1 Nekk Bulus amcegge\u025b n Sidna \u0190isa Lmasi\u1e25 s leb\u0263i n Sidi \u1e5aebbi, akk-d gma-tne\u0263 Timuti, i watmaten n tejma\u025bt n Sidi \u1e5aebbi yellan di temdint n Kurintus akk-d wid me\u1e5b\u1e5ba i gexta\u1e5b Sidi \u1e5aebbi di mkul amkan n tmurt n Akaya.\n1:2 \u1e5a\u1e5be\u1e25ma \u021b-\u021balwit a wen-d \u021b\u021bunefkent s \u0263u\u1e5b Sidi \u1e5aebbi Baba tne\u0263 akk-d Sidna \u0190isa Lmasi\u1e25.\n1:3 Ad i\u021b\u021bubarek Sidi \u1e5aebbi, Baba-s n Ssid-nne\u0263 \u0190isa Lmasi\u1e25 yellan di yal taswi\u025bt d Bab n le\u1e25nana d \u1e63\u1e63be\u1e5b.\n1:4 I\u021b\u1e63ebbi\u1e5b-a\u0263 di lem\u1e25ayen-nne\u0263 iwakken s \u1e63\u1e63be\u1e5b i \u0263-d-ifka, a nizmir ula d nukni a n\u1e63ebbe\u1e5b wid yellan di lem\u1e25ayen.\n1:5 Axa\u1e6der am akken i d-\u021be\u0263layent fell-a\u0263 lem\u1e25ayen \u0263ef ddemma n Lmasi\u1e25, akken da\u0263en i \u0263-d-i\u021b\u021bas \u1e63\u1e63be\u1e5b s \u0263u\u1e5b-es.\n1:6 Nukni ma nen\u025be\u021b\u021bab di lme\u1e25nat, n\u021ben\u025be\u021b\u021bab iwakken a\u021b-\u021be\u021b\u021busebb\u1e5bem yerna a\u021b-\u021be\u021b\u021buselkem. Ma ne\u021b\u021bu\u1e63ebbe\u1e5b nukni, a\u021b-\u021be\u021b\u021bu\u1e63ebb\u1e5bem ula d kunwi iwakken a\u021b-\u021bes\u025bum \u1e63\u1e63be\u1e5b di lem\u1e25ayen i deg te\u021b\u025beddayem am nukni.\n1:7 Ihi \u0263ef wayen i kkun-ye\u025bnan ne\u021bkel, nekkes anezgum, axa\u1e6der ne\u1e93ra akken i te\u021b\u021bekkim di lem\u1e25ayen-nne\u0263, ara te\u021b\u021bekkim da\u0263en di \u1e63\u1e63be\u1e5b i \u0263-d i\u021b\u021bunefken.\n1:8 Neb\u0263a a\u021b-\u021be\u1e93rem ay atmaten lme\u1e25na i nes\u025bedda di tmurt n Asya; \u0263lint-ed fell-a\u0263 lem\u1e25ayen iwumi ur nezmir, ne\u025bteb armi n\u0263il a nemmet.\n1:9 Ne\u021bwali deg iman-nne\u0263 belli \u1e25ekmen fell-a\u0263 s lmut, iwakken ur ne\u021bkal ara \u0263ef yiman-nne\u0263 lame\u025bna a ne\u021bkel \u0263ef \u1e5aebbi i d-i\u1e25eggun lmegtin.\n1:10 D ne\u021b\u021ba i \u0263-d-isellken si lmut am tagi yerna ne\u021bkel belli mazal a \u0263-isellek sya \u0263er zdat.\n1:11 Ula d kunwi te\u021b\u025bawanem-a\u0263 m'ara tde\u025b\u025bum \u0263er Sidi \u1e5aebbi fell-a\u0263. S wakka, \u0263ef ddemma n t\u1e93allit n wa\u1e6das n watmaten, a \u0263-d-\u021b\u021bunefkent lba\u1e5bakat s \u0263u\u1e5b Sidi \u1e5aebbi ; imiren a\u1e6das ara i\u1e25emden Sidi \u1e5aebbi \u0263ef ddemma nne\u0263.\n1:12 A\u021bah sebba s wayes i nef\u1e5be\u1e25 s yiman-nne\u0263 yerna ulawen-nne\u0263 thennan : nel\u1e25a d yemdanen me\u1e5b\u1e5ba s wul ye\u1e63fan d neyya, abe\u025bda yid wen kunwi. Ayagi yusa-ya\u0263-d s \u0263u\u1e5b \u1e5aebbi, axa\u1e6der ma\u010d\u010di s l\u025beqliya n yemdanen i n\u021beddu me\u025bna d \u1e5b\u1e5be\u1e25ma n Sidi \u1e5aebbi i \u0263-i\u021bwellihen.\n1:13 Ayen i wen-nura di teb\u1e5batin- nne\u0263, nenna-t-id s wul ye\u1e63fan d neyya, ulac deg-sent lme\u025bna nni\u1e0den anagar ayen i te\u0263\u1e5bam d wayen i tfehmem deg-sent. Ssarame\u0263 a\u021b-\u021bfehmem ayagi akken ilaq am akken i tebdam tfehmem-t, ye\u025bni ass n tu\u0263alin n Ssid-nne\u0263 \u0190isa Lmasi\u1e25 a nili d sebba n lfe\u1e5b\u1e25-nwen, kunwi a\u021b-\u021bilim d sebba n lfe\u1e5b\u1e25-nne\u0263.\n1:15 Imi t\u1e25eqqeqe\u0263 belli akka i gella l\u1e25al, ssarme\u0263 a n-\u025beddi\u0263 di tazwara \u0263u\u1e5b-wen iwakken a\u021b-\u021bfe\u1e5b\u1e25em snat n tikkal.\n1:16 Qesde\u0263 ad \u025beddi\u0263 fell-awen m'ara \u1e5bu\u1e25e\u0263 \u0263er tmurt n Masidunya, syinna a d-u\u0263ale\u0263 \u0263u\u1e5b-wen iwakken a yi-t\u025biwnem ad kemmle\u0263 abrid-iw \u0263er tmurt n Yahuda.\n1:17 Mi qesde\u0263 ad xedme\u0263 annect-agi, e\u025bni ur xemmeme\u0263 ara ? Ne\u0263 m'ara qesde\u0263 ad xedme\u0263 kra, ma nni\u0263-ed an\u025bam ne\u0263 ala u\u0263ale\u0263 beddle\u0263 \u1e5b\u1e5bay, e\u025bni d leb\u0263i-inu i \u021bnadi\u0263 ?\n1:18 \u1e5aebbi ye\u1e93ra belli ayen i wen-d-neqqa\u1e5b ma\u010d\u010di d an\u025bam akk-d ala \u0263ef yiwet n tikkelt ;\n1:19 axa\u1e6der \u0190isa Lmasi\u1e25 Mmi-s n \u1e5aebbi i nbecce\u1e5b gar-awen nekk d watmaten Silwan akk-d Timuti, ur d-yusi ara iwakken ad yili d an\u025bam akk-d ala, me\u025bna anagar an\u025bam i gellan deg-s.\n1:20 Axa\u1e6der yis i d-iqqa\u1e5b Sidi \u1e5aebbi an\u025bam i wayen me\u1e5b\u1e5ba i gew\u025bed. Ihi s yisem n \u0190isa Lmasi\u1e25 i d-neqqa\u1e5b da\u0263en amin i Sidi \u1e5aebbi iwakken a t-ne\u1e25med a t-ncekke\u1e5b.\n1:21 D Sidi \u1e5aebbi s yiman-is i \u0263 is\u01e7ehden yid-wen di tikli-nne\u0263 akk-d Lmasi\u1e25, d ne\u021b\u021ba i \u0263-ixta\u1e5ben.\n1:22 Yessers fell-a\u0263 \u1e6d\u1e6dabe\u025b-ines yerna yefka-ya\u0263-d deg ulawen-nne\u0263 \u1e5a\u1e5bu\u1e25-is iqedsen yellan d a\u025be\u1e5bbun n lba\u1e5bakat i \u0263-iw\u025bed.\n1:23 Atan Sidi \u1e5aebbi ye\u1e93ra belli \u021b-\u021bide\u021b i d-qqa\u1e5be\u0263 : mi qesde\u0263 ur \u021b\u021bu\u0263ale\u0263 ara \u0263er temdint n Kurintus, d a\u1e25ader i b\u0263i\u0263 a kkun-\u1e25adre\u0263.\n1:24 Ur ne\u021bnadi ara a wen-d-nesken ayen s wayes ara tamnem axa\u1e6der ne\u1e93ra t\u01e7ehdem di liman, lame\u025bna neb\u0263a a nexdem yid-wen iwakken a ndukkel di lfe\u1e5b\u1e25.\n2:1 Ihi qesde\u0263 ur n-\u021bu\u0263ale\u0263 ara \u0263u\u1e5b wen, imi ur b\u0263i\u0263 ara a kkun s\u1e25ezne\u0263 da\u0263en.\n2:2 Axa\u1e6der ma s\u1e25ezne\u0263 kkun, anwa ara yi-isfe\u1e5b\u1e25en ma yella ma\u010d\u010di d kunwi ?\n2:3 Uggade\u0263 a yi-is\u1e25eznen kra seg wid i glaq a yi-isfe\u1e5b\u1e25en, daymi i wen-d-zzewre\u0263 tab\u1e5ba\u021b-nni, axa\u1e6der \u1e93ri\u0263 ma yella fe\u1e5b\u1e25e\u0263 a\u021b-\u021bfe\u1e5b\u1e25em ula d kunwi.\n2:4 Uri\u0263-awen tab\u1e5ba\u021b-nni s ime\u1e6d\u1e6dawen d le\u1e25zen ameqqran akk-d wul yetqelqen, ma\u010d\u010di iwakken a\u021b \u021b\u1e25eznem lame\u025bna iwakken a\u021b-\u021be\u1e93rem ac\u1e25al i kkun-\u1e25emmle\u0263.\n2:5 Ma yella gar-awen win yellan d sebba n le\u1e25zen, ma\u010d\u010di d nekk i gesse\u1e25zen lame\u025bna d kunwi me\u1e5b\u1e5ba i gesse\u1e25zen, ye\u025bni b\u0263i\u0263 a d-ini\u0263 amur ameqqran deg-wen.\n2:6 Amdan-agi tlumm-it me\u1e5b\u1e5ba tejma\u025bt, be\u1e5bka-t !\n2:7 Tura, ilaq-awen kan a s-tsam\u1e25em yerna a t-tes\u01e7ehdem, ne\u0263 m'ulac a d i\u0263li fell-as le\u1e25zen d ameqqran ara t-isfeclen.\n2:8 Ihi a kkun-nhu\u0263 a s-d-beggnem belli t\u1e25emmlem-t.\n2:9 Uri\u0263-awen ayagi iwakken ad \u1e93re\u0263 ma te\u021b\u021ba\u0263em awal di kullec.\n2:10 Win iwumi ara tsam\u1e25em, a s-sam\u1e25e\u0263 ula d nekk ; ma yella wayen i \u0263ef ara sam\u1e25e\u0263 i yiwen, \u0263ef ddemma-nwen i s-sum\u1e25e\u0263 zdat Lmasi\u1e25 ;\n2:11 s wakka ur ne\u021b\u021ba\u01e7a ara Cci\u1e6dan a \u0263-i\u0263leb, axa\u1e6der nessen lmeq\u1e63ud-is.\n2:12 Mi ww\u1e0de\u0263 \u0263er temdint n Truwas iwakken ad becc\u1e5be\u0263 lexba\u1e5b n lxi\u1e5b n Lmasi\u1e25, Sidi \u1e5aebbi yeldi-yi-d tiwwura iwakken ad becc\u1e5be\u0263.\n2:13 Lame\u025bna ur yethenna ara wul-iw imi ur ufi\u0263 ara dinna gma-tne\u0263 Tit ; daymi \u01e7\u01e7i\u0263 atmaten n temdint n Truwas, imiren \u1e5bu\u1e25e\u0263 \u0263er tmurt n Masidunya.\n2:14 A ne\u1e25med Sidi \u1e5aebbi a t-ncekke\u1e5b imi s Lmasi\u1e25 i n\u0263elleb kullec yerna yerra-ya\u0263 d iqeddacen-is iwakken a nbecce\u1e5b Lmasi\u1e25 di mkul amkan am rri\u1e25a ta\u1e93i\u1e0dant.\n2:15 ?er Sidi \u1e5aebbi, d nukni i d rri\u1e25a ta\u1e93i\u1e0dant n Lmasi\u1e25 ger wid i\u021bwasellken yellan deg webrid n Sidna \u0190isa akk-d wid i\u1e0da\u025ben.\n2:16 I wid i\u1e0da\u025ben, d \u1e5b\u1e5bi\u1e25a n lmut i d-i\u021b\u021baken lmut ; i wid yellan deg webrid n leslak, d rri\u1e25a n tudert i d i\u021b\u021baken tudert. Anwa ihi i gzemren ad ixdem cc\u0263el am wagi ?\n2:17 Nukni ur ne\u021b\u1e25errif ara awal n Sidi \u1e5aebbi iwakken a netja\u1e5b yis am akken xeddmen wa\u1e6das n yemdanen, lame\u025bna zdat Sidi \u1e5aebbi, \u021b-\u021bide\u021b i d-neqqa\u1e5b mi ne\u021bbecci\u1e5b lexba\u1e5b n lxi\u1e5b n Lmasi\u1e25 i \u0263-d-yekkan s \u0263u\u1e5b Sidi \u1e5aebbi.\n3:1 D acekke\u1e5b i neb\u0263a a d-ncekke\u1e5b iman-nne\u0263 mi d-nenna imeslayen agi ? E\u025bni ne\u1e25wa\u01e7 ula d nukni a wen-nawi tib\u1e5batin n lew\u1e63aya ne\u0263 a tent-id-nawi s \u0263u\u1e5b-wen am akken xeddmen kra n yemdanen ?\n3:2 Tab\u1e5ba\u021b-nne\u0263, d kunwi s yiman nwen ; \u021b-\u021bab\u1e5ba\u021b yuran deg ulawen nne\u0263, te\u021bwassen yerna \u0263\u1e5ban-\u021b akk yemdanen.\n3:3 Iban belli tab\u1e5ba\u021b-agi yura-\u021b Lmasi\u1e25 s yiman-is mi wen-d nbecce\u1e5b lexba\u1e5b n lxi\u1e5b ; ma\u010d\u010di s lmidad i \u021b-yura lame\u025bna s \u1e5a\u1e5bu\u1e25 n \u1e5aebbi yeddren, ma\u010d\u010di \u0263ef tebla\u1e0din n wez\u1e5bu i \u021b-ijerred lame\u025bna deg ulawen-nwen.\n3:4 Le\u021bkal-agi i nes\u025ba deg wayen i d-nenna, yekka-d s \u0263u\u1e5b Sidi \u1e5aebbi, s Lmasi\u1e25.\n3:5 Ur nezmir ara a d-nini belli d nukni i gxeddmen cc\u0263el-agi s tezmert-nne\u0263 lame\u025bna d Sidi \u1e5aebbi i \u0263-d-i\u021b\u021baken tazmert deg wayen akk i nxeddem.\n3:6 D ne\u021b\u021ba i \u0263-d-ifkan tazmert s wayes i nu\u0263al d iqeddacen n le\u025bqed ajdid . Le\u025bqed-agi ur d-yekki ara seg wayen yuran di ccari\u025ba lame\u025bna s \u0263u\u1e5b \u1e5a\u1e5bu\u1e25 iqedsen. Axa\u1e6der ccari\u025ba te\u021b\u021bawi \u0263er lmut, ma d \u1e5a\u1e5bu\u1e25 iqedsen ye\u021b\u021bak-ed tudert.\n3:7 Ccari\u025ba ye\u021bwajerden \u0263ef tebla\u1e0din n wez\u1e5bu tesban-ed tamanegt n Sidi \u1e5aebbi deg udem n Sidna Musa, ye\u021bfe\u01e7\u01e7i\u01e7 wudem-is almi ur zmiren ara wat Is\u1e5bail ad muqlen \u0263u\u1e5b-es ; \u0263as akken, afe\u01e7\u01e7e\u01e7-nni ur i\u021bdum ara.\n3:8 Ma yella ccari\u025ba i ge\u021b\u021bawin \u0263er lmut tban-ed s l\u025ba\u1e0dima am tin, ac\u1e25al ihi ara tili meqq\u1e5bet tmanegt i d-yewwi \u1e5a\u1e5bu\u1e25 iqedsen i d-i\u021bakken tudert !\n3:9 Ma yella leqdic \u0263ef ccari\u025ba ye\u021b\u021bawin \u0263er lmut yes\u025ba ccan, ac\u1e25al meqqe\u1e5b akte\u1e5b ccan n leqdic \u0263ef \u1e5a\u1e5bu\u1e25 iqedsen i ge\u021b\u021barran imdanen d i\u1e25eqqiyen.\n3:10 Nezmer a d-nini : anda ara d tban tmanegt icce\u025bce\u025ben zik-nni zdat tin n tura ? Tu\u0263al d ulac !\n3:11 Ma yella ayen ur ne\u021bdum ara yes\u025ba ccan, ac\u1e25al ihi i t-yugar di ccan wayen ye\u021bdumun.\n3:12 ?ef ddemma n wusirem-agi, i nes\u025ba le\u021bkal d ameqqran ;\n3:13 nukni ur nelli ara am Sidna Musa ye\u021b\u0263ummun udem-is iwakken ur \u021bwalin ara wat Is\u1e5bail l\u025ba\u1e0dima-nni ur ne\u021bdum ara.\n3:14 Ar ass-a qqu\u1e5ben iqe\u1e5b\u1e5bay-nsen, gguman ad fehmen ; imi le\u1e25jab-nni ur yekkis ara m'ara d-\u0263\u1e5ben di tira iqedsen n le\u025bqed aqdim, axa\u1e6der le\u1e25djab-agi itekkes anagar s \u0190isa Lmasi\u1e25.\n3:15 Ar ass-a, le\u1e25jab-agi i\u021b\u0263ummu ulawen-nsen m'ara qqa\u1e5ben ccari\u025ba n Musa ;\n3:16 me\u025bna m'ara d-yu\u0263al wul n wemdan \u0263er Sidi \u1e5aebbi, le\u1e25jab-nni itekkes ;\n3:17 axa\u1e6der \u1e5a\u1e5bu\u1e25 iqedsen, d \u1e5a\u1e5bu\u1e25 n Sidi \u1e5aebbi. Anda yella \u1e5a\u1e5bu\u1e25 n Sidi \u1e5aebbi, tella tlelli.\n3:18 Nukni ur nes\u025bi ara le\u1e25jab \u0263ef wudmawen-nne\u0263, tamanegt n Sidi \u1e5aebbi te\u021bban-ed deg-nne\u0263 am akken di lemri, Sidi \u1e5aebbi ye\u021bbeddil-a\u0263 dayem iwakken a necbu \u0263u\u1e5b-es s tmanegt ye\u021bnernin.\n4:1 Ihi, ur ilaq ara a nefcel imi s \u1e5a\u1e5be\u1e25ma n Sidi \u1e5aebbi i \u0263-d i\u021b\u021bunefk leqdic-agi \u0263ef Lmasi\u1e25.\n4:2 Ur neqbil ara ayen yellan d l\u025bib d wayen ye\u021bwaxedmen s tuffra, ur nteddu s t\u1e25ila, ur ne\u021b\u1e25errif awal n \u1e5aebbi. Me\u025bna ne\u021bbeggin-ed awal n Sidi \u1e5aebbi s tide\u021b, iwakken imdanen me\u1e5b\u1e5ba ad slen i wawal n \u1e5aebbi, a t-fehmen akken yella.\n4:3 Ma mazal lexba\u1e5b n lxi\u1e5b i wen nbecce\u1e5b ur i\u021bwafhem ara, lme\u025bna-ines te\u021bwaffer kan \u0263ef wid i\u1e0da\u025ben,\n4:4 ur numin ara s \u1e5aebbi ; axa\u1e6der Cci\u1e6dan yerran iman is d \u1e5bebbi n ddunit-agi , yesder\u0263el ixemmimen nsen, daymi ur walan ara tafat yellan di lexba\u1e5b n lxi\u1e5b ye\u025bnan tamanegt n Lmasi\u1e25, ne\u021b\u021ba yellan d \u1e63\u1e63ifa n Sidi \u1e5aebbi.\n4:5 Axa\u1e6der ma\u010d\u010di \u0263ef yiman-nne\u0263 i ne\u021bbecci\u1e5b, lame\u025bna ne\u021bbecci\u1e5b \u0263ef \u0190isa Lmasi\u1e25 Ssid-nne\u0263 ; ma d nukni, nu\u0263al d iqeddacen-nwen \u0263ef ddemma n Sidna \u0190isa.\n4:6 \u1e5aebbi i d-yennan : Tafat a\u021b-\u021becce\u025bce\u025b di \u1e6d\u1e6dlam, d ne\u021b\u021ba da\u0263en i d-ifkan tafat tfe\u01e7\u01e7e\u01e7 deg ulawen-nne\u0263 iwakken a \u0263-d ibeggen tamanegt-is ye\u021bfe\u01e7\u01e7i\u01e7en \u0263ef wudem n Lmasi\u1e25.\n4:7 Nukni ye\u021b\u021bawin deg iman-nne\u0263 agerruj-agi, necba ticmuxin n wakal, iwakken tazmert-agi tameqqrant a d-tban belli tusa-d s \u0263u\u1e5b Sidi \u1e5aebbi ma\u010d\u010di s \u0263u\u1e5b-nne\u0263.\n4:8 Ne\u021bwa\u1e25\u1e5bes si mkul tama me\u025bna ur nefcil ara ; nella di teswi\u025bt n \u1e6d\u1e6diq me\u025bna ur ne\u0263li ara ;\n4:9 ne\u021bwaqhe\u1e5b me\u025bna Sidi \u1e5aebbi ur a\u0263-ye\u01e7\u01e7i ara ; ne\u021bwarke\u1e0d me\u025bna ur a\u0263-n\u0263in ara.\n4:10 Ne\u021b\u021bawi daymen di l\u01e7e\u021b\u021bat-nne\u0263 lmut n Sidna \u0190isa iwakken a d-tban da\u0263en deg-nne\u0263 tudert-is.\n4:11 Nukni yeddren, ne\u021bqabal daymen lmut \u0263ef ddemma n Sidna \u0190isa, iwakken a d-tban tudert n Sidna \u0190isa di l\u01e7e\u021b\u021bat nne\u0263 ifennun.\n4:12 S wakka lmut txeddem deg-nne\u0263, ma \u021b-\u021budert txeddem deg-wen.\n4:13 Am akken yura di tira iqedsen : umne\u0263, daymi i d-hed\u1e5be\u0263 ; nukni da\u0263en nes\u025ba liman-agi, daymi i d nhedde\u1e5b.\n4:14 Axa\u1e6der ne\u1e93ra belli Sidi \u1e5aebbi i d-isse\u1e25yan Sidna \u0190isa si ger lmegtin, a \u0263-d-isse\u1e25yu ula d nukni akk-d Sidna \u0190isa, iwakken a \u0263 issemlil yid-wen m'ara nu\u0263al \u0263u\u1e5b-es.\n4:15 Ayen akk ide\u1e5b\u1e5bun yid-nne\u0263, ide\u1e5b\u1e5bu \u0263ef ddemma-nwen, iwakken \u1e5b\u1e5be\u1e25ma n Sidi \u1e5aebbi a\u021b-\u021bawe\u1e0d \u0263er wa\u1e6das n yemdanen ; s wakka a\u1e6das ara iket\u1e5ben di le\u1e25mada n Sidi \u1e5aebbi, a t-cekk\u1e5ben \u0263ef tmanegt-is.\n4:16 Daymi ur ilaq ara a nefcel ; axa\u1e6der \u0263as akken l\u01e7e\u021b\u021ba-nne\u0263 tfennu seg wass \u0263er waye\u1e0d, \u1e5b\u1e5bu\u1e25 yellan deg-nne\u0263 ye\u021bnerni seg wass \u0263er waye\u1e0d.\n4:17 Le\u025btab-agi i nes\u025bedday tura xfif yerna ur i\u021bdum ara ; i\u021bheggi-ya\u0263-ed tamanegt tameqqrant ur nfennu.\n4:18 Axa\u1e6der nukni ur ne\u021bnadi ara \u0263ef wayen \u021bwalint wallen, lame\u025bna ne\u021bnadi \u0263ef le\u1e25waye\u01e7 ur \u021bwalint ara ; axa\u1e6der le\u1e25waye\u01e7 i \u021bwalint wallen fennunt, ma d ayen ur \u021bwalint ara, ye\u021bdumu i dayem.\n5:1 L\u01e7e\u021b\u021bat i nes\u025ba di ddunit-agi am iqi\u1e0dunen ara yefnun, me\u025bna ne\u1e93ra belli Sidi \u1e5aebbi ihegga-ya\u0263 deg igenwan tinezdu\u0263in n dayem, ma\u010d\u010di d ayen yexdem ufus n wemdan, me\u025bna d ayen yexdem ne\u021b\u021ba s yiman-is.\n5:2 Aql-a\u0263 nen\u025be\u021b\u021bab zdaxel uqi\u1e0dun agi, ne\u021b\u1e5ba\u01e7u s l\u1e25ir melmi ara nawe\u1e0d \u0263er tnezdu\u0263in n dayem yellan deg igenwan ;\n5:3 lame\u025bna ilaq a nili nhegga iman-nne\u0263 di ddunit-agi, ma\u010d\u010di alamma tusa-d lmut a \u0263-tawi.\n5:4 Skud mazal-a\u0263 deg uqi\u1e0dun n ddunit-agi, ye\u025bni l\u01e7e\u021b\u021bat-nne\u0263, ne\u021bnaza\u025b am akken nbub ta\u025bekkumt \u1e93\u1e93ayen ; ma\u010d\u010di d lmut i neb\u0263a a nemmet, lame\u025bna nessaram a nels l\u01e7e\u021b\u021ba n igenwan iwakken ad ye\u021bwakkes seg-ne\u0263 wayen ifennun.\n5:5 D Sidi \u1e5aebbi i \u0263-iheggan \u0263er tudert-agi, ifka-ya\u0263-d \u1e5a\u1e5bu\u1e25 iqedsen d a\u025be\u1e5bbun n lba\u1e5bakat ara \u0263-d i\u021b\u021bunefken.\n5:6 S wakka nes\u025ba daymen le\u021bkal deg wulawen-nne\u0263. Ne\u1e93ra belli skud mazal-a\u0263 di l\u01e7e\u021b\u021ba n ddunit-agi, aql-a\u0263 mazal neb\u025bed \u0263ef Sidi \u1e5aebbi ;\n5:7 axa\u1e6der tura aql-a\u0263 n\u021beddu s liman, wer\u025bad nwala s wallen.\n5:8 S tide\u021b nes\u025ba le\u021bkal deg wulawen nne\u0263, lame\u025bna a wi-yufan a neffe\u0263 si ddunit-agi iwakken a nili \u0263er tama n Sidi \u1e5aebbi.\n5:9 Ama nella di ddunit-agi ama neffe\u0263 seg-s, ne\u021bnadi kan a ne\u025b\u01e7eb i Sidi \u1e5aebbi.\n5:10 Axa\u1e6der a n\u025beddi me\u1e5b\u1e5ba di cc\u1e5be\u025b n Lmasi\u1e25, iwakken mkul yiwen ad i\u021b\u021bu\u1e25aseb \u0263ef lxi\u1e5b ne\u0263 cce\u1e5b i gexdem asmi yella di ddunit.\n5:11 Ne\u1e93ra d acu i d lme\u025bna n tugdi n Sidi \u1e5aebbi, daymi i ne\u021bnadi a d nehdu wiya\u1e0d. Sidi \u1e5aebbi yessen ulawen-nne\u0263 akken ilaq, ssarame\u0263 ula d kunwi tessnem-a\u0263, te\u1e93ram ayen yellan deg ulawen-nne\u0263.\n5:12 Ma\u010d\u010di d zzux i neb\u0263a a nzux s yiman-nne\u0263 \u0263u\u1e5b-wen, neb\u0263a kan a nili d sebba n lfe\u1e5b\u1e25-nwen. S wakka a\u021b-\u021bissinem amek ara terrem awal i wid ixedmen ccan i wayen i d i\u021bbanen s ufella kan, ma\u010d\u010di i wayen yellan deg wulawen.\n5:13 Ma yella llant teswi\u025bin i deg n\u025bedda tilas deg uselmed-nne\u0263, n\u025bedda tilas iwakken a d-tban tmanegt n Sidi \u1e5aebbi ; m'ara net\u025bqqel, i nnfe\u025b-nwen i net\u025beqqel.\n5:14 Ne\u021bwa\u1e25\u1e5bes s le\u1e25mala n Lmasi\u1e25 ye\u010d\u010du\u1e5ben ulawen-nne\u0263, axa\u1e6der ne\u1e93ra imi yemmut yiwen wemdan \u0263ef yemdanen me\u1e5b\u1e5ba, ihi mmuten me\u1e5b\u1e5ba.\n5:15 Yemmut \u0263ef medden me\u1e5b\u1e5ba, iwakken wid yeddren ur \u021b\u025bicin ara i yiman nsen, lame\u025bna ad \u025bicen i win yemmuten yerna ye\u1e25ya-d \u0263ef ddemma-nsen.\n5:16 Sya d asawen ur ne\u021bwali yiwen s l\u025beqliya n yemdanen ; \u0263as akken zik-nni uqbel a namen nella ne\u021bwali Lmasi\u1e25 s l\u025beqliya n yemdanen, tura ma\u010d\u010di akenni i t-ne\u021bwali.\n5:17 Ihi win iteddun deg webrid n Lmasi\u1e25, i\u025bawed ed talalit, yu\u0263al d amdan ajdid : ayen yellan d aqdim i\u025bedda, kullec yu\u0263al d ajdid.\n5:18 Ayagi me\u1e5b\u1e5ba yekka-d s \u0263u\u1e5b Sidi \u1e5aebbi i gessem\u1e63ala\u1e25en imdanen yid-es s Lmasi\u1e25, yerna iwe\u1e63\u1e63a-ya\u0263-ed a nbecce\u1e5b am\u1e63ale\u1e25-agi i yemdanen me\u1e5b\u1e5ba n ddunit,\n5:19 axa\u1e6der s Lmasi\u1e25 i gessem\u1e63ale\u1e25 Sidi \u1e5aebbi imdanen yid-es mbla ma imuqel \u0263er ddnubat-nsen yerna iwe\u1e63\u1e63a-ya\u0263 a nbecce\u1e5b am\u1e63ale\u1e25-agi.\n5:20 Ihi nukni d imcegg\u025ben n Lmasi\u1e25, am akken d \u1e5aebbi s yiman-is i wen-d-issawalen yis nne\u0263 : Ne\u021b\u1e25ellil-ikkun s yisem n Lmasi\u1e25 a\u021b-\u021bem\u1e63ala\u1e25em akk-d \u1e5aebbi.\n5:21 Win akken yellan d azedgan le\u025bme\u1e5b yednib, Sidi \u1e5aebbi ye\u1e25kem fell-as deg umkan-nne\u0263 am akken d amednub i gella iwakken s tikli-nne\u0263 akk-d Lmasi\u1e25, a nili d i\u1e25eqqiyen zdat Sidi \u1e5aebbi.\n6:1 Imi d iqeddacen n Sidi \u1e5aebbi i nella, b\u0263i\u0263 a kkun-nenhu ur te\u021b\u1e0deggi\u025bem ara \u1e5b\u1e5be\u1e25ma i wen-d i\u021b\u021bunefken s \u0263u\u1e5b-es.\n6:2 Axa\u1e6der Sidi \u1e5aebbi yenna-d : Di lweqt ilaqen, qeble\u0263-ed ta\u1e93allit-ik, di lweqt n leslak, sellke\u0263-k. Ihi tura, atan yewwe\u1e0d-ed lweqt ilaqen, yewwe\u1e0d-ed wass n leslak.\n6:3 Di yal l\u1e25a\u01e7a, ur neb\u0263i ara a nili d ugur ula i yiwen deg-wen iwakken ur d-te\u021b\u021bekksem ara kra n diri di lxedma-nne\u0263,\n6:4 me\u025bna ne\u021bbeggin-ed belli d iqeddacen n Sidi \u1e5aebbi i nella deg wayen akk nxeddem : n\u1e63ebbe\u1e5b i teswi\u025bin n ceddat, i l\u1e25if, i tugdi,\n6:5 i tiytiwin ; ne\u1e63be\u1e5b mi nella di le\u1e25bus, di teswi\u025bin n ccwal, le\u025btab, a\u025bawez akk-d la\u1e93 ;\n6:6 nedda s wul ye\u1e63fan, s tmusni, s \u1e63\u1e63be\u1e5b, s le\u1e25nana, s \u1e5a\u1e5bu\u1e25 iqedsen, s le\u1e25mala n \u1e63\u1e63e\u1e25,\n6:7 s wawal n tide\u021b, s tezmert n Sidi \u1e5aebbi, s lesla\u1e25 n l\u1e25eqq s wayes ne\u021bna\u0263 yerna ne\u021bdafa\u025b \u0263ef yiman-nne\u0263 ;\n6:8 ama di teswi\u025bin n ccan ne\u0263 n l\u025ba\u1e5b, ama mi hedd\u1e5ben fell-a\u0263 medden s lxi\u1e5b ne\u0263 s cce\u1e5b. Ne\u021bwa\u1e25seb d ikeddaben \u0263as akken \u021b-\u021bide\u021b i d neqqa\u1e5b,\n6:9 ne\u021bwanke\u1e5b, \u0263as akken ne\u021bwassen \u0263er yemdanen me\u1e5b\u1e5ba ; \u1e25esben-a\u0263 nemmut, nukni nedder ; \u021bqehhi\u1e5ben-a\u0263 lame\u025bna ur nemmut ara ;\n6:10 sse\u0263layen-d fell-a\u0263 le\u1e25zen, lame\u025bna ne\u021b\u021bili daymen di lfe\u1e5b\u1e25. ?esben-a\u0263 d igellilen, lame\u025bna nesserba\u1e25 a\u1e6das n yemdanen, \u0263ilen ur nes\u025bi acemma, lame\u025bna nukni ur a\u0263-ixu\u1e63\u1e63 ula d kra.\n6:11 Ay imezda\u0263 n temdint n Kurintus, nemmeslay-awen-d, neldi-yawen mli\u1e25 ulawen-nne\u0263,\n6:12 ur ten-ne\u0263liq ara \u0263u\u1e5b wen, d kunwi i g\u0263elqen ulawen-nwen \u0263u\u1e5b-nne\u0263.\n6:13 ?meslaye\u0263-awen-d am akken d arraw-iw i tellam : xedmet am nukni, swes\u025bet ulawen-nwen ula d kunwi !\n6:14 Ur cerrket ara d wid ur ne\u021b\u021bamen ara s Sidi \u1e5aebbi iwakken a\u021b-\u021bxedmem am nutni. E\u025bni l\u1e25eqq d lba\u1e6del, zemren ad cerken ? Tafat akk-d \u1e6d\u1e6dlam, zemren ad ddukklen ?\n6:15 Amek ! Yezmer Lmasi\u1e25 ad imsefham akk-d Cci\u1e6dan ? Acu n tdukli yellan ger win ye\u021b\u021bamnen s \u1e5aebbi d win ur ne\u021b\u021bamen ara ?\n6:16 D acu icerken l\u01e7ame\u025b iqedsen n Sidi \u1e5aebbi akk-d lme\u1e63nu\u025bat ? Axa\u1e6der d nukni i d l\u01e7ame\u025b iqedsen n \u1e5aebbi yeddren. Sidi \u1e5aebbi yenna-t-id di tira iqedsen : Ad zed\u0263e\u0263 yerna ad l\u1e25u\u0263 gar-asen, A d ili\u0263 d Illu-nsen, ad ilin d agdud iw\n6:17 ?ef wannect-agi i d-yenna Sidi \u1e5aebbi : Mfa\u1e5baqet d yemdanen-agi, be\u025bdet fell-asen ; ur \u021bnalet ara ayen i\u1e25e\u1e5bmen, nekk ad s\u1e6der\u1e25be\u0263 yis-wen ;\n6:18 ad ili\u0263 d baba-twen, kunwi a\u021b-\u021bilim d arraw-iw, d yess-i ; akka i d-yenna \u1e5aebbi Bab n tezmert.\n7:1 A wid e\u025bzizen, imi i \u0263-d \u021b\u021bunefkent lem\u025bahdat-agi, ilaq a nessizdeg iman-nne\u0263 seg wayen akk issen\u01e7asen l\u01e7e\u021b\u021ba-nne\u0263 akk-d wulawen-nne\u0263 iwakken a nkemmel tezdeg n tikli-nne\u0263 akk-d Sidi \u1e5aebbi, s \u1e6d\u1e6da\u025ba d wannuz.\n7:2 Qeblet-a\u0263 deg wulawen-nwen ! Ur ne\u1e0dlim yiwen, ur nexdim cce\u1e5b ula i yiwen, ur ne\u010d\u010di l\u1e25eqq n yiwen.\n7:3 Ur d-nni\u0263 ara annect-agi iwakken a kkun-s\u1e0delme\u0263 ; axa\u1e6der nni\u0263-awen t-id yakan : ama nedder ama newwe\u1e0d \u0263er lmut, tellam deg wulawen-nne\u0263 .\n7:4 Le\u021bkal-iw fell-awen meqqe\u1e5b, \u021bzuxxu\u0263 a\u1e6das yis-wen ; yethedden wul-iw yerna ye\u010d\u010du\u1e5b d lfe\u1e5b\u1e25 \u0263as akken nes\u025bedda a\u1e6das n le\u025btab.\n7:5 Seg wasmi i d-nekcem tamurt n Masidunya ur neste\u025bfa, ne\u021bwa\u1e25\u1e5bes si mkul tama : ccwal di be\u1e5b\u1e5ba, tugdi deg ulawen-nne\u0263.\n7:6 Lame\u025bna Sidi \u1e5aebbi ye\u021b\u1e63ebbi\u1e5ben wid ye\u021bwa\u1e25eq\u1e5ben, i\u1e63ebbe\u1e5b a\u0263 s gma-tne\u0263 Titus mi d-yewwe\u1e0d.\n7:7 Ma\u010d\u010di kan mi d-yewwe\u1e0d gma tne\u0263 Titus i ne\u021b\u021bu\u1e63ebbe\u1e5b, lame\u025bna ne\u021b\u021bu\u1e63ebbe\u1e5b da\u0263en s \u1e63\u1e63be\u1e5b i d-yewwi s \u0263u\u1e5b-wen. Ye\u1e25ka-ya\u0263-d ac\u1e25al te\u021bmennim a yi-te\u1e93rem, ac\u1e25al t\u1e25eznem d wamek teb\u0263am a yi-t\u025biwnem seg ul. ?ef wayagi i gzad lfe\u1e5b\u1e25-iw.\n7:8 ?ri\u0263 belli s\u1e25ezne\u0263-kkun s teb\u1e5ba\u021b iw tamezwarut, lame\u025bna ur ndime\u0263 ara ; \u0263as akken ndemme\u0263, ndemme\u0263 kan mi \u1e93ri\u0263 s\u1e25ezne\u0263-kkun kra n lweqt.\n7:9 Tura aql-i fe\u1e5b\u1e25e\u0263, ma\u010d\u010di imi i kkun-s\u1e25ezne\u0263, me\u025bna imi s le\u1e25zen-agi tettubem yerna tbeddlem tikli. Axa\u1e6der le\u1e25zen-nni i d-ye\u0263lin fell awen yusa-d s \u0263u\u1e5b Sidi \u1e5aebbi, s wakka ur d-yekki wacemma n diri s \u0263u\u1e5b-nne\u0263.\n7:10 Le\u1e25zen i d-itekken s \u0263u\u1e5b Sidi \u1e5aebbi i\u021bbeddil tikli n wemdan, ye\u021b\u021bawi \u0263er leslak yerna ur n\u021bendemmay ara deg-s ; ma d le\u1e25zen i d-itekken si ddunit, ye\u021b\u021bawi \u0263er lmut.\n7:11 Le\u1e25zen-agi-nwen ye\u025b\u01e7eb a\u1e6das Sidi \u1e5aebbi, walit ac\u1e25al i gexdem deg-wen : ac\u1e25al i tenne\u1e25camem d wamek i t\u1e0delbem ssma\u1e25 ! Ac\u1e25al tendemmem, tekcem-ikkun tugdi n Sidi \u1e5aebbi ; ac\u1e25al tcedham a yi te\u1e93rem yerna teb\u0263am a yi t\u025biwnem ; amek da\u0263en t\u025buqbem wid ixeddmen cce\u1e5b ! Deg wayagi me\u1e5b\u1e5ba tesbeggnem-d belli te\u1e63fam di taluft-agi.\n7:12 Ihi ma uri\u0263-awen-d, ma\u010d\u010di \u0263ef ddemma n win i\u1e0delmen ne\u0263 win ye\u021bwa\u1e0delmen, lame\u025bna iwakken a d-iban gar-awen zdat Sidi \u1e5aebbi, ac\u1e25al meqqe\u1e5b le\u1e25mala-nwen \u0263u\u1e5b-nne\u0263.\n7:13 ?ef wannect-agi i theddnen wulawen-nne\u0263. Sennig \u1e63\u1e63be\u1e5b-agi, lfe\u1e5b\u1e25-nne\u0263 yennerna mi nwala ac\u1e25al yef\u1e5be\u1e25 yis-wen gma-tne\u0263 Titus, axa\u1e6der tekksem-as anezgum.\n7:14 ?ide\u021b zuxxe\u0263 yis-wen zdat-es, lame\u025bna ur nne\u1e25came\u0263 ara, axa\u1e6der anagar tide\u021b i wen-d-nhedde\u1e5b yal ass imi ayen akken s wayes nzuxx yis-wen zdat gma-tne\u0263 Titus, iban-ed belli \u021b-\u021bide\u021b ;\n7:15 lem\u1e25ibba-s \u0263u\u1e5b-wen te\u021bnerni mkul m'ara d-immekti amek i tes\u1e6der\u1e25bem yis s leqde\u1e5b d wannuz.\n7:16 Fe\u1e5b\u1e25e\u0263 imi zemre\u0263 ad \u021bekle\u0263 fell-awen di kullec.\n8:1 Neb\u0263a a kkun-nesse\u025blem ay atmaten \u0263ef wayen ye\u025bnan \u1e5b\u1e5be\u1e25ma i d-yefka Sidi \u1e5aebbi i tejmuya\u025b n imasi\u1e25iyen yellan di tmurt n Masidunya ;\n8:2 \u021bwaje\u1e5bben s wa\u1e6das n lme\u1e25nat, lame\u025bna lfe\u1e5b\u1e25-nsen ye\u021bnerni. ?as akken d igellilen i llan yerna xu\u1e63\u1e63en a\u1e6das, seddqen mbla cce\u1e25\u1e25a ;\n8:3 fkan-d ayen iwumi zemren ; aql-iyi d inigi, zemre\u0263 a d-ini\u0263 fkan-d nnig n tezmert-nsen yerna xedmen ayagi s leb\u0263i-nsen.\n8:4 Ssutren-a\u0263-d s u\u1e25ellel iwakken a sen-nexdem lemziya a d-fken ula d nutni amur-nsen n ssadaqa-agi i njemme\u025b iwakken a \u021b-\u021bnawi i watmaten n tmurt n Yahuda yellan di lex\u1e63as.\n8:5 Zwaren deg iman-nsen mi fkan tudert-nsen i \u1e5aebbi, imiren s leb\u0263i n Sidi \u1e5aebbi, rnan qeddcen fell-a\u0263 seg ul ; ayagi sennig wayen nessaram !\n8:6 S wakka ihi, nwe\u1e63\u1e63a gma-tne\u0263 Titus ad ikemmel lxedma-nni i gebda \u0263u\u1e5b-wen \u0263ef wayen ye\u025bnan ssadaqa agi.\n8:7 Am akken i t\u1e93ew\u1e5bem di kullec, ama di liman ne\u0263 deg wawal, ama di tmusni ne\u0263 di lem\u1e25ibba i tes\u025bam \u0263u\u1e5b-nne\u0263, \u1e93ew\u1e5bet da\u0263en di temsalt ye\u025bnan ssadaqa.\n8:8 Ma\u010d\u010di d lame\u1e5b i b\u0263i\u0263 a wen-d fke\u0263 ; \u1e25ki\u0263-awen amek i zew\u1e5ben wiya\u1e0d, iwakken a kkun-je\u1e5b\u1e5bbe\u0263 ma tes\u025bam le\u1e25mala n tide\u021b ne\u0263 ala.\n8:9 Tessnem \u1e5b\u1e5be\u1e25ma n Ssid-nne\u0263 \u0190isa Lmasi\u1e25 yellan d Bab n lerba\u1e25 n ddunit me\u1e5b\u1e5ba, yu\u0263al d igellil \u0263ef ddemma-nwen iwakken a kkun isserbe\u1e25 s tigellelt-ines.\n8:10 A wen-d-fke\u0263 \u1e5b\u1e5bay-iw deg wayagi axa\u1e6der d ayen i wen-ilhan : aseggas i\u025beddan, d kunwi i d imezwura i geb\u0263an a\u021b-\u021b\u025biwnem atmaten n tmurt n Yahuda yellan di lex\u1e63a\u1e63, d kunwi da\u0263en i d imezwura i gebdan tjemm\u025bem-d ssadaqa-agi ;\n8:11 ihi tura kemmlet cc\u0263el-agi i tebdam, s wayen iwumi tzemrem ; am akken i t-tebdam seg ul, kemmlet-e\u021b s wul.\n8:12 Sidi \u1e5aebbi iqebbel ssadaqa-nne\u0263, lame\u025bna s wakken tella tezmert-nne\u0263, ma\u010d\u010di sennig wayen nezmer.\n8:13 Ur neb\u0263i ara a d-nini xlut ixxamen-nwen iwakken a\u021b-\u021b\u025biwnem wiya\u1e0d, lame\u025bna iwakken a\u021b-\u021bem\u025badalem ;\n8:14 ayen tes\u025bam d zzyada ad yenfe\u025b wid ixu\u1e63\u1e63en tura, iwakken asm'ara txu\u1e63\u1e63em kunwi, a kkun-\u025biwnen s wayen s\u025ban d zzyada ; s wakka ihi a\u021b-\u021bem\u025badalem,\n8:15 akken yura di tira iqedsen : Win yes\u025ban a\u1e6das ur yes\u025bi ara zzyada, ma d win yes\u025ban cwi\u1e6d ur t-ixu\u1e63\u1e63 kra .\n8:16 A ne\u1e25med Sidi \u1e5aebbi \u0263ef gma tne\u0263 Titus imi ye\u021b\u1e25ebbi\u1e5b fell-awen am nukni.\n8:17 Yeqbel mi t-in-ncegge\u025b, yerna uqbel a s-nini yella iqsed a n-iru\u1e25 \u0263u\u1e5b wen s lfe\u1e5b\u1e25 d ameqqran.\n8:18 A ncegge\u025b yid-es yiwen seg watmaten-nne\u0263 i cekk\u1e5bent akk tejmuya\u025b n watmaten \u0263ef lxedma-ines deg ubecce\u1e5b n lexba\u1e5b n lxi\u1e5b ;\n8:19 ur ye\u021bwaxta\u1e5b ara kan d a\u1e5bfiq, lame\u025bna \u021b-\u021bijmuya\u025b n watmaten i t-ixta\u1e5ben iwakken a \u0263-i\u025biwen di cc\u0263el agi ye\u025bnan ssadaqa \u0263ef ddemma n tmanegt n Sidi \u1e5aebbi, s wakka da\u0263en a d-nbeggen ac\u1e25al neb\u0263a a n\u025biwen wiya\u1e0d.\n8:20 Ne\u021b\u1e25adar iman-nne\u0263 iwakken ur hedd\u1e5ben ara fell-a\u0263 l\u0263aci \u0263ef wayen ye\u025bnan a\u1e0debbe\u1e5b i ne\u021b\u1e0debbi\u1e5b di ssadaqa agi, axa\u1e6der a\u1e6das n yedrimen i d nejme\u025b ;\n8:21 ne\u021bqellib ayen yelhan ama zdat Sidi \u1e5aebbi ama zdat yemdanen.\n8:22 Ncegge\u025b yid-sen gma-tne\u0263 agi i nje\u1e5b\u1e5beb ac\u1e25al d abrid di yal taswi\u025bt, nwala amek yeb\u0263a ad iqdec seg ul ; tikkelt-agi \u1e93\u1e93wa\u1e5ba-ines di leqdic \u0263ef Sidi \u1e5aebbi tban-ed akte\u1e5b, axa\u1e6der ye\u021bkel fell-awen.\n8:23 ?ef wayen ye\u025bnan gma-tne\u0263 Titus, d arfiq-iw yerna ixeddem yid-i \u0263ef ddemma-nwen, ma d atmaten nni\u1e0den, d imcegg\u025ben n tejmuya\u025b n watmaten ; qeddcen iwakken a d tban tmanegt n Lmasi\u1e25.\n8:24 Sbeggnet-ed ihi belli t\u1e25emmlem ten s tide\u021b iwakken tijmuya\u025b n watmaten ad \u1e93rent belli nes\u025ba l\u1e25eqq imi ne\u021bzuxxu yis-wen.\n9:1 ?ef wayen ye\u025bnan lem\u025bawna n watmaten, fi\u1e25el ma uri\u0263 awen-d.\n9:2 ?ri\u0263 ac\u1e25al teb\u0263am a\u021b \u021bqedcem, daymi i \u021bzuxxu\u0263 yis-wen zdat n tejmuya\u025b n Masidunya qqa\u1e5be\u0263 asen : atmaten n tmurt n Akaya heggan iman-nsen ad \u025biwnen seg useggas i\u025beddan. ?\u1e93wa\u1e5ba-nwen di leqdic tessaki a\u1e6das deg-sen.\n9:3 Cegg\u025be\u0263 atmaten-agi iwakken ad iban belli \u021b-\u021bide\u021b, tuklalem a nzux yis-wen yerna theggam iman-nwen am akken i t-id-nni\u0263.\n9:4 Ma yella ddan yid-i kra seg watmaten n Masidunya ilaq a kkun-in-afen theggam iman nwen iwakken zzux-nni i \u021bzuxxu\u0263 yis wen ur iyi-\u021b\u021bu\u0263al ara d l\u1e25ecma, b\u0263i\u0263 a d-ini\u0263 d l\u1e25ecma nwen kunwi !\n9:5 ?ef ddemma n wannect-agi i wen-cegg\u025be\u0263 kra seg watmaten a n-zwiren \u0263u\u1e5b-wen iwakken a d jem\u025ben ssadaqa-nni i \u0263-twe\u025bdem. S wakka m'ara n-aw\u1e0de\u0263 ad afe\u0263 theggam kullec yerna a d-iban belli ayen i tseddqem tefkam-t-id seg ul, ur kkun-i\u1e25ettem yiwen.\n9:6 Ilaq a\u021b-\u021be\u1e93rem belli win i gzer\u025ben cwi\u1e6d a d-imger cwi\u1e6d ; ma d win izer\u025ben a\u1e6das, a d-imger a\u1e6das.\n9:7 Mkul yiwen ilaq ad iseddeq akken yenwa deg ul-is, ma\u010d\u010di s u\u1e25ettem ne\u0263 s nndama axa\u1e6der Sidi \u1e5aebbi i\u1e25emmel win i\u021bseddiqen s lfe\u1e5b\u1e25.\n9:8 Sidi \u1e5aebbi yes\u025ba tazmert a kkun id ye\u1e5bzeq s lba\u1e5bakat n mkul \u1e63\u1e63enf, ur kkun-i\u021bxa\u1e63\u1e63a wacemma deg wayen akk te\u1e25wa\u01e7em yerna a\u021b-\u021bes\u025bum s zzyada iwakken a\u021b-\u021bizmirem a\u021b-\u021bseddqem.\n9:9 Axa\u1e6der yura di tira iqedsen : Ye\u021b\u021bak-ed lba\u1e5bakat-is mbla cce\u1e25\u1e25a, ir\u1e93eq-ed ime\u0263ban, \u1e5b \u1e5be\u1e25ma-ines te\u021bdumu i dayem .\n9:10 Win i d-ye\u021b\u021baken i ufella\u1e25 zzerri\u025ba akk-d we\u0263\u1e5bum ara ye\u010d\u010d , a wen-d-yefk ula i kunwi s lket\u1e5ba yerna ad issefti lba\u1e5bakat n wayen te\u021bseddiqem .\n9:11 Sidi \u1e5aebbi ad issefti le\u1e5bzaq-nwen, s wakka a\u021b-\u021bizmirem a\u021b-\u021bseddqem mbla cce\u1e25\u1e25a ; imiren a\u1e6das ara i\u1e25emden Sidi \u1e5aebbi a t-cekk\u1e5ben \u0263ef wayen i sen-tseddqem.\n9:12 Axa\u1e6der ssadaqa-agi, ur te\u021b\u021bili ara kan d lem\u025bawna i watmaten, lame\u025bna iwakken a d-ilin da\u0263en wa\u1e6das n yemdanen ara i\u1e25emden Sidi \u1e5aebbi.\n9:13 Imi i d-tbeggnem belli tqeddcem \u0263ef lexba\u1e5b n lxi\u1e5b n Lmasi\u1e25 yerna tfe\u1e5b\u1e5bqem ayen akk tes\u025bam akk-d watmaten nni\u1e0den, \u021b\u1e25emmiden Sidi \u1e5aebbi \u021bcekki\u1e5ben-t \u0263ef liman d \u1e6d\u1e6da\u025ba nwen.\n9:14 De\u025b\u025bun \u0263er Sidi \u1e5aebbi fell-awen \u0263ef ddemma n \u1e5b\u1e5be\u1e25ma tameqqrant i wen-i\u021b\u021bunefken s \u0263u\u1e5b-es, axa\u1e6der \u1e25emmlen-kkun.\n9:15 Ad i\u021b\u021bubarek Sidi \u1e5aebbi \u0263ef \u1e5b\u1e5be\u1e25ma-ines ur nes\u025bi lemtel !\n10:1 Nekk Bulus i \u0263ef qqa\u1e5ben \u021bset\u1e25i\u0263 m'ara ili\u0263 zdat-wen me\u025bna m'ara be\u025bde\u0263 fell-awen we\u025b\u1e5be\u0263 \u0263u\u1e5b-wen, b\u0263i\u0263 a kkun-nhu\u0263 s le\u1e25nana d \u1e5b\u1e5be\u1e25ma n Lmasi\u1e25.\n10:2 Di le\u025bnaya-nwen, ur iyi-\u1e25e\u1e5b\u1e5bset ara ad iw\u025bi\u1e5be\u0263 m'ara ili\u0263 yid-wen ! Axa\u1e6der lew\u025ba\u1e5ba-inu a \u021b-id-sbeggne\u0263 s le\u021bkal yerna mbla l\u1e25ecma \u0263er wid i \u0263-i\u1e25esben n\u021beddu s l\u025beqliya n ddunit.\n10:3 ?-\u021bide\u021b d imdanen i nella, lame\u025bna ur ne\u021bna\u0263 ara s lesla\u1e25 s wayes \u021bna\u0263en yemdanen ;\n10:4 axa\u1e6der lesla\u1e25-nne\u0263, ma\u010d\u010di d wid i ssexdamen yemdanen lame\u025bna ne\u021bna\u0263 s lesla\u1e25 n Sidi \u1e5aebbi i gzemren ad hudden ula d leswa\u1e5b i\u01e7ehden.\n10:5 Ne\u021b\u1e5bu\u1e93u awal n kra n wid yeb\u0263an a d-kken sennig n tmusni n Sidi \u1e5aebbi ; neb\u0263a a nessiwe\u1e0d imdanen me\u1e5b\u1e5ba ad beddlen ixemmimen-nsen iwakken ad \u1e0du\u025ben Lmasi\u1e25.\n10:6 Asm'ara tessaw\u1e0dem \u1e6d\u1e6da\u025ba-nwen \u0263er lekmal-is, imiren a n\u025baqeb kra n win i\u025bu\u1e63an Sidi \u1e5aebbi.\n10:7 Walit tide\u021b akken ilaq l\u1e25al : ma yella win it\u1e25eqqeqen belli d ayla n Lmasi\u1e25 i gella, ilaq ad i\u1e93er belli akken yella ne\u021b\u021ba d ayla n Lmasi\u1e25 i nella ula d nukni.\n10:8 ?as ma zuxxe\u0263 s tissas i yi-d-ifka Sidi \u1e5aebbi, ur sset\u1e25a\u0263 ara axa\u1e6der tissas-agi ur sse\u0263layent ara, lame\u025bna ad ssem\u0263u\u1e5bent tijmuya\u025b n watmaten di liman.\n10:9 Ur b\u0263i\u0263 ara a\u021b-\u021b\u0263ilem belli b\u0263i\u0263 a kkun-sxel\u025be\u0263 s teb\u1e5batin-iw.\n10:10 Axa\u1e6der llan wid yeqqa\u1e5ben : tib\u1e5batin n Bulus qe\u1e5b\u1e5b\u1e25ent, s\u025bant tissas lame\u025bna m'ara yili gar-ane\u0263 ur yes\u025bi lhiba ur yes\u025bi tissas di lehdu\u1e5b-is.\n10:11 Win i d-yennan annect-a, ilaq ad i\u1e93er belli akken new\u025be\u1e5b m'ara wen naru tib\u1e5batin ara new\u025be\u1e5b da\u0263en m'ara nili gar-awen.\n10:12 Ur nezmir ara a nesse\u025bdel ne\u0263 a nmettel iman-nne\u0263 \u0263er wid ye\u021bcekki\u1e5ben iman-nsen. ?mettilen iman-nsen \u0263er yiman-nsen, \u1e25esben ulac win yellan sennig-nsen ; xu\u1e63\u1e63en di lefhama.\n10:13 Nukni, ur netzuxxu ara sennig wayen ilaqen, lame\u025bna ne\u021bzuxxu kan s cc\u0263el i \u0263-d-iwekkel Sidi \u1e5aebbi ; d cc\u0263el-agi i \u0263-issaw\u1e0den armi d \u0263u\u1e5b wen.\n10:14 Asmi i d-nusa \u0263u\u1e5b-wen, ur n\u025bedda ara tilas n cc\u0263el-nne\u0263 axa\u1e6der d nukni i wen-ibecc\u1e5ben d imezwura lexba\u1e5b n lxi\u1e5b n Lmasi\u1e25.\n10:15 Ur ne\u021bzuxxu ara sennig wayen ilaqen, ur ne\u021b\u021bawi ara ccan n lxedma n wiya\u1e0d lame\u025bna nessaram d kunwi ara yessim\u0263u\u1e5ben ccan n lxedma-nne\u0263 m'ara tim\u0263u\u1e5bem di liman ;\n10:16 iwakken mbla ma n\u025bedda i tlisa n cc\u0263el-nne\u0263 , a nbecce\u1e5b da\u0263en lexba\u1e5b n lxi\u1e5b i tmura nni\u1e0den, ma\u010d\u010di d zzux ara nzuxx s cc\u0263el i xedmen wiya\u1e0d. Yura di tira iqedsen :\n10:17 Win yeb\u0263an ad izuxx, ad izuxx s wayen ixeddem Sidi \u1e5aebbi.\n10:18 Axa\u1e6der ma\u010d\u010di d win ye\u021bzuxxun s yiman-is i ge\u021bwaqeblen lame\u025bna d win yexta\u1e5b Sidi \u1e5aebbi.\n11:1 Ah ! A lukan a\u021b-\u021bqeblem kra n timmuhbelt si l\u01e7iha-w ! Lame\u025bna qeblet-e\u021b kan !\n11:2 Imi i kkun-\u1e25emmle\u0263, \u021b\u021basme\u0263 fell-awen s tismin i d-yekkan s \u0263u\u1e5b Sidi \u1e5aebbi ; axa\u1e6der xe\u1e0dbe\u0263-kkun i yiwen n yesli kan : d Lmasi\u1e25 ; iwakken a kkun-qeddme\u0263 \u0263u\u1e5b-es am tlem\u1e93it le\u025bme\u1e5b nezwi\u01e7 le\u025bme\u1e5b.\n11:3 Uggade\u0263 a wen-sxe\u1e5bben ixemmimen nwen, a\u021b-\u021bettix\u1e5bem i neyya d \u1e63\u1e63fa n wul-nwen di Lmasi\u1e25, a\u021b-\u021bed\u1e5bu yid-wen am ?ewwa i gexde\u025b wezrem s t\u1e25ila-ines.\n11:4 Amek armi t\u1e25essem i wid i wen-ibecc\u1e5ben \u0190isa nni\u1e0den ur nelli d win akken i wen-nbecce\u1e5b nukni ; amek tqeblem \u1e5b\u1e5bu\u1e25 iqedsen nni\u1e0den ur nelli ara d win s wayes i tes\u1e6der\u1e25bem di tazwara ne\u0263 lexba\u1e5b n lxi\u1e5b nni\u1e0den ixulfen win akken i wen-nbecce\u1e5b ?\n11:5 Akken wala\u0263, \u1e5b\u1e5busul-nni i t\u1e25esbem d imeqqranen ur iyi-yifen deg wacemma.\n11:6 ?as akken ur ssine\u0263 ara ad mmeslaye\u0263, lame\u025bna ssne\u0263 Sidi \u1e5aebbi akken ilaq yerna nbeggen awen-t-id ac\u1e25al n tikkal di mkul l\u1e25a\u01e7a !\n11:7 Asmi i wen-becc\u1e5be\u0263 lexba\u1e5b n lxi\u1e5b n Lmasi\u1e25, e\u025bni \u1e0delme\u0263 mi ssanze\u0263 iman-iw iwakken a kkun ssa\u025bli\u0263 kunwi ?\n11:8 \u0190erra\u0263 tijmuya\u025b nni\u1e0den imi i yi-d-\u021bceggi\u025ben idrimen iwakken ad qedce\u0263 fell-awen.\n11:9 Asmi lli\u0263 \u0263u\u1e5b-wen, \u0263as akken xu\u1e63\u1e63e\u0263 ur lli\u0263 \u021b-\u021ba\u025bkumt \u0263ef yiwen, axa\u1e6der atmaten i d-yusan si tmurt n Masidunya fkan-iyi-d ayen akk i \u1e25wa\u01e7e\u0263. Di yal l\u1e25a\u01e7a, \u1e25udre\u0263 iman-iw iwakken ur \u021b\u021bili\u0263 ara \u021b-\u021ba\u025bekkumt fell-awen, yerna mazal ad \u1e25adre\u0263 iman-iw.\n11:10 S tide\u021b n Lmasi\u1e25 yellan deg-i, a d-ini\u0263 : yiwen ur iyi-tekkes sebba agi n zzux i s\u025bi\u0263 di tmura n Akaya.\n11:11 Acu\u0263e\u1e5b ? E\u025bni ur te\u025bzizem ara fell-i ? Atan Sidi \u1e5aebbi yez\u1e5ba !\n11:12 Ayen akka xeddme\u0263, mazal a t-xedme\u0263 iwakken ur sen-\u021ba\u01e7\u01e7a\u0263 ara abrid i wid yeb\u0263an ad zuxxen belli xeddmen am nukni.\n11:13 Imdanen-agi, d \u1e5b\u1e5busul n lekdeb, d ixedda\u025ben, \u021b\u021baran iman-nsen d imcegg\u025ben n Lmasi\u1e25.\n11:14 Annect-a ma\u010d\u010di d ayen issewhamen, imi ula d Cci\u1e6dan yezmer ad yerr iman-is d lmelk ye\u021bfe\u01e7\u01e7i\u01e7en am tafat.\n11:15 Ihi da\u0263en, ma\u010d\u010di d ayen yessewhamen ma yella iqeddacen-is \u021b\u021baran iman-nsen d iqeddacen n webrid n l\u1e25eqq ; lame\u025bna taggara-nsen a\u021b-\u021bili akken llan lec\u0263al nsen.\n11:16 A t-id-\u025biwde\u0263, \u0263u\u1e5b-wat a yi t\u1e25esbem d amehbul ; ne\u0263 qeblet-iyi am akken d amehbul iwakken ula d nekk ad zuxxe\u0263 cwi\u1e6d.\n11:17 Ayen akka ara d-ini\u0263, ma\u010d\u010di s \u0263u\u1e5b \u1e5aebbi i d-yekka lame\u025bna a d-hed\u1e5be\u0263 s timmuhbelt, yerna \u021bekle\u0263 axa\u1e6der s\u025bi\u0263 ayen s wayes ara zuxxe\u0263.\n11:18 Imi a\u1e6das i ge\u021bzuxxun s l\u025beqliya n ddunit-agi, ula d nekk ad zuxxe\u0263.\n11:19 Axa\u1e6der t\u1e63eb\u1e5bem i yimehbal kunwi yes\u025ban le\u025bqel !\n11:20 ?as akken \u1e25esben-kkun am aklan, \u010d\u010dan l\u1e25eqq-nwen, \u025berran-kkun, bbehdlen-kkun, \u1e25eq\u1e5ben-kkun, me\u025bna t\u1e63eb\u1e5bem-asen.\n11:21 Sset\u1e25a\u0263 a t-id-ini\u0263 me\u025bna a t-id ini\u0263 : nukni ur nezmir ara a nexdem akka, me\u025bna s timmuhbelt zemre\u0263 a d-ini\u0263 : ma yella win yes\u025ban sebba s wayes ara izuxx, ula d nekk ad zuxxe\u0263 :\n11:22 d i\u025beb\u1e5baniyen i llan ? Ula d nekk d a\u025bib\u1e5bani ; seg wat Is\u1e5bail i llan ? Ula d nekk n wat Is\u1e5bail ; \u021b-\u021barwa n Sidna Ib\u1e5bahim ? Ula d nekk si tarwa-s ;\n11:23 d iqeddacen n Lmasi\u1e25 i llan ? ?ef wannect-agi da\u0263en a d hed\u1e5be\u0263 am umdan yeffe\u0263 le\u025bqel : nekk ugare\u0263-ten s wa\u1e6das, xedme\u0263 akte\u1e5b-nsen, kecme\u0263 le\u1e25bus ac\u1e25al n tikkal, \u021bewwte\u0263 akte\u1e5b-nsen, ac\u1e25al d abrid i ww\u1e0de\u0263 \u0263er lmut !\n11:24 Xemsa yiberdan i \u010d\u010di\u0263 tiyita s \u0263u\u1e5b wudayen ; mkul tikkelt s \u1e5beb\u025bin tiyita \u0263i\u1e5b yiwet ;\n11:25 tlata iberdan i yi-wten i\u1e5bumaniyen s ujelka\u1e0d ; yiwen webrid q\u1e5bib i yi-n\u0263an s we\u1e5bjam ; \u0263e\u1e5bqe\u0263 tlata iberdan di leb\u1e25e\u1e5b, s\u025bedda\u0263 yiwen wass d yiwen yi\u1e0d deg waman.\n11:26 Mmugre\u0263-ed ac\u1e25al n wuguren m'ara tsafa\u1e5be\u0263 : isaffen iwe\u025b\u1e5ben, imakaren deg iberdan, lxuf di temdinin, deg imukan yexlan, m'ara zegre\u0263 i leb\u1e25u\u1e5b ; lxuf ger wat n tmurt-iw akk-d wid ur numin ara s \u1e5aebbi, lxuf ger watmaten n lekdeb.\n11:27 Xedme\u0263 yerna nne\u025btabe\u0263 a\u1e6das, ac\u1e25al d abrid \u021b\u021bu\u1e93ume\u0263, zgi\u0263 deg u\u025bawez, di la\u1e93 akk-d fad, deg usemmi\u1e0d akk-d \u025berru.\n11:28 Mbla ma nni\u0263-ed ayen nni\u1e0den : a\u1e25ebbe\u1e5b yal ass \u0263ef tejmuya\u025b n watmaten,\n11:29 anwa i gfeclen di liman ur iyi-issefcel ara ? Anwa i ge\u0263lin di ddnub ur tec\u025bil deg-i tmes ?\n11:30 Ma ilaq ad zuxxe\u0263, ad zuxxe\u0263 s wayen i d-i\u021bbegginen belli ur s\u025bi\u0263 ara tazmert.\n11:31 Sidi \u1e5aebbi yellan d baba-s n Ssid-nne\u0263 \u0190isa Lmasi\u1e25, ye\u021b\u021bubarken i dayem, ye\u1e93ra belli ur skiddibe\u0263 ara !\n11:32 Di temdint n Dimecq, ameqqran n ine\u0263lafen n ugellid Ari\u1e6das yesbedd ta\u025bessast \u0263ef tewwurt n temdint iwakken a yi-\u1e6d\u1e6dfen,\n11:33 lame\u025bna \u1e63ubben iyi-d si \u1e6d\u1e6daq, zdaxel u\u1e0della\u025b, l\u1e25i\u1e0d l\u1e25i\u1e0d ; s wakka i d-men\u025be\u0263 seg ifassen-is.\n12:1 E\u025bni ilaq ad zuxxe\u0263 ? Ayagi ur infi\u025b ara ! Lame\u025bna a d-\u1e25ku\u0263 \u0263ef kra n le\u1e25waye\u01e7 i yi-d-iwe\u1e25\u1e25a Sidi \u1e5aebbi.\n12:2 Ssne\u0263 yiwen wergaz yumnen s Lmasi\u1e25, ye\u021bwarfed alamma d igenni wis tlata \u1e5bbe\u025b\u1e6dac iseggasen aya ; ur \u1e93ri\u0263 ma yella ye\u021bwarfed ne\u021b\u021ba s yiman is ne\u0263 d awe\u1e25\u1e25i kan i s-d-i\u021b\u021buwe\u1e25\u1e25a, anagar Sidi \u1e5aebbi i ge\u1e93ran.\n12:3 ?ri\u0263 belli argaz-agi ye\u021bwarfed \u0263er l\u01e7ennet, me\u025bna ur \u1e93ri\u0263 ma yella ye\u021bwarfed ne\u021b\u021ba s yiman-is ne\u0263 d awe\u1e25\u1e25i kan i s-d-i\u021b\u021buwe\u1e25\u1e25a, anagar Sidi \u1e5aebbi i ge\u1e93ran ; yesla i yimeslayen iwumi ur yezmir yiwen a ten-id-yini, axa\u1e6der ur ilaq i wemdan a ten-id-i\u025bawed.\n12:5 Argaz am wagi zemre\u0263 ad zuxxe\u0263 yis, ma d nekk ur s\u025bi\u0263 ara s wayes ara zuxxe\u0263 anagar s lqella n l\u01e7ehd-iw.\n12:6 Lemmer b\u0263i\u0263 ad zuxxe\u0263, ur \u021b\u021bili\u0263 ara d amehbul axa\u1e6der anagar tide\u021b ara d-ini\u0263 ; lame\u025bna ad ssusme\u0263, imi ur b\u0263i\u0263 ara imdanen a yi-ssalin ccan sennig n wayen \u021bwalin xeddme\u0263-t ne\u0263 ayen sellen qqa\u1e5be\u0263 t-id.\n12:7 Yenta-yi yiwen usennan s wayes i yi-\u021bme\u1e25\u1e25in Cci\u1e6dan iwakken ur ssim\u0263u\u1e5be\u0263 ara iman-iw yerna ur \u021bzuxxu\u0263 ara s uwe\u1e25\u1e25i-nni yeste\u025b\u01e7iben i yi-d-ibeggen Sidi \u1e5aebbi.\n12:8 Tlata iberdan i d\u025bi\u0263 \u0263er Sidi \u1e5aebbi iwakken ad isseb\u025bed fell-i lme\u1e25na-agi,\n12:9 lame\u025bna yenna-yi-d : \u00ab steqne\u025b kan s \u1e5b\u1e5be\u1e25ma-inu, axa\u1e6der m'ara tfecle\u1e0d imiren i d-te\u021bban deg-k tezmert-iw \u00bb. Ihi b\u0263i\u0263 ad zuxxe\u0263 axi\u1e5b s lqella n tezmert-iw iwakken tazmert n Lmasi\u1e25 a\u021b-\u021bezde\u0263 deg-i.\n12:10 ?ef wannect-agi, fe\u1e5b\u1e25e\u0263 m'ara fecle\u0263, m'ara ili\u0263 di l\u1e25e\u1e5bs, di leqhe\u1e5b, di le\u1e25zen, di ceddat ne\u0263 m'ara yi-regmen \u0263ef ddemma n Lmasi\u1e25, axa\u1e6der m'ara fecle\u0263 imiren i \u01e7ehde\u0263.\n12:11 D kunwi i yi-\u1e25e\u1e5bsen armi hedd\u1e5be\u0263 am umehbul ; d kunwi i glaqen a yi-tcekk\u1e5bem, axa\u1e6der \u0263as akken ur swi\u0263 acemma, ur iyi-ifen deg wacemma wid i\u1e25e\u021b\u021bben iman-nsen d \u1e5b\u1e5busul.\n12:12 Ayen akk i d-i\u021bbegginen belli d \u1e5b\u1e5basul i lli\u0263, yed\u1e5ba-d gar-awen : s \u1e63\u1e63be\u1e5b ameqqran, s tezmert, s be\u1e5bhanat d lica\u1e5bat.\n12:13 D acu i xedme\u0263 i tejmuya\u025b nni\u1e0den ur wen-t-xdime\u0263 ara i kunwi, anagar imi ugi\u0263 ad ili\u0263 \u021b-\u021ba\u025bkumt fell-awen ? Semm\u1e25et-iyi \u0263ef wannect agi !\n12:14 Aql-iyi \u021beddu\u0263 a n-ase\u0263 \u0263u\u1e5b wen tikkelt tis tlata, yerna ur \u021b\u021bili\u0263 ara \u021b-\u021ba\u025bekkumt fell-awen. Ma\u010d\u010di d idrimen-nwen i b\u0263i\u0263 lame\u025bna d kunwi ; axa\u1e6der ma\u010d\u010di d dderya i glaqen ad jem\u025ben i lwaldin-nsen, lame\u025bna d lwaldin i glaq ad jem\u025ben i dderya-nsen.\n12:15 Ma d nekkini, zemre\u0263 ad \u1e63e\u1e5b\u1e5bfe\u0263 fell-awen seg ul ayen s\u025bi\u0263, ad rnu\u0263 ad sebble\u0263 ula \u021b-\u021budert-iw \u0263ef ddemma-nwen. E\u025bni le\u1e25mala-nwen \u0263u\u1e5b-i a\u021b-\u021benqes imi i kkun-\u1e25emmle\u0263 a\u1e6das ?\n12:16 ?-\u021bide\u021b ur a wen-lli\u0263 ara \u021b \u021ba\u025bekkumt, lame\u025bna kra deg-wen qqa\u1e5ben, imi \u1e25e\u1e5bce\u0263, \u1e6d\u1e6dfe\u0263-kkun s t\u1e25ila !\n12:17 E\u025bni kellxe\u0263-awen mi wen-cegg\u025be\u0263 kra seg watmaten ?\n12:18 Asmi \u1e25ellele\u0263 Tit a n-yas \u0263u\u1e5b-wen akk-d gma-tne\u0263 nni\u1e0den, yella wayen i d-istenfe\u025b seg-wen Titus ? E\u025bni ur neddi ara nekk yid-es s yiwet n l\u025beqliya akk d yiwet n tikli ?\n12:19 Ac\u1e25al aya kunwi t\u0263ilem ne\u021bnadi amek ara ndafe\u025b \u0263ef yiman-nne\u0263 zdat-nwen. Lame\u025bna zdat Sidi \u1e5aebbi, nukni nhedde\u1e5b-awen-d s leb\u0263i n Lmasi\u1e25. Annect-agi me\u1e5b\u1e5ba a wid e\u025bzizen fell-a\u0263, nxeddem-it iwakken a\u021b-\u021bennernim di liman.\n12:20 Axa\u1e6der uggade\u0263 m'ara n-ase\u0263 \u0263u\u1e5b-wen, ur kkun-\u021b\u021bafe\u0263 ara akken b\u0263i\u0263, kunwi da\u0263en ur iyi-te\u021b\u021bafem ara akken tenwam ; uggade\u0263 a n-afe\u0263 gar-awen amennu\u0263, tismin, zz\u025baf, am\u1e25ezwer, zzux, ccwal, aqe\u1e5b\u1e5be\u1e0d, wid yekkaten deg wiya\u1e0d.\n12:21 Uggade\u0263 m'ara n-ase\u0263 \u0263u\u1e5b-wen, ad sset\u1e25i\u0263 yis-wen zdat Sidi \u1e5aebbi ; uggade\u0263 ad \u021bru\u0263 \u0263ef wa\u1e6das deg-wen i\u025bacen zik-nni di ddnub yerna ar ass-a ur tuben, ur rrin a\u1e0dar \u0263ef lefsed-nsen, \u0263ef yir tikli-nsen akk-d ticmatin i xeddmen.\n13:1 Atan a n-ase\u0263 \u0263u\u1e5b-wen tikkelt tis tlata, mkul taluft a\u021b-\u021befru s sin ne\u0263 tlata inigan akken yura di tira iqedsen.\n13:2 Asmi i n-usi\u0263 \u0263u\u1e5b-wen tikkelt tis snat nni\u0263-awen-t-id, tura da\u0263en \u0263as ur lli\u0263 ara yid-wen, a t-id-\u025biwde\u0263 ama i wid-nni ye\u0263lin di ddnub deg wayen i\u025beddan, ama i wiya\u1e0d : asm'ara n-ase\u0263 \u0263u\u1e5b-wen ur \u021bqile\u0263 ula d yiwen,\n13:3 imi teb\u0263am a\u021b-\u021bet\u1e25eqqeqem belli d Lmasi\u1e25 i d-ihedd\u1e5ben seg-i ; ne\u021b\u021ba ur nelli ara d win ifeclen \u0263u\u1e5b-wen lame\u025bna isbeggen-ed tazmert-is gar awen.\n13:4 ?-\u021bide\u021b ye\u021bwa\u1e63leb \u0263ef ddemma n wefcal-ines, lame\u025bna yedder s tezmert n Sidi \u1e5aebbi ; ula d nukni nefcel imi nella di Lmasi\u1e25 lame\u025bna a nidir yid-es s tezmert n Sidi \u1e5aebbi di leqdic-nne\u0263 gar-awen.\n13:5 Je\u1e5b\u1e5bbet tmeyyzem deg iman-nwen iwakken a\u021b-\u021bwalim ma te\u021b\u021beddum s liman ne\u0263 ala ; e\u025bni ur te\u025bqilem ara belli \u0190isa Lmasi\u1e25 yella deg-wen ? Ne\u0263 ahat tfeclem mi te\u021b\u021buje\u1e5bbem ?\n13:6 Lame\u025bna ssarame\u0263 a\u021b-\u021best\u025be\u1e5bfem belli nukni nbeggen-ed liman-nne\u0263 di teswi\u025bt n uje\u1e5b\u1e5beb !\n13:7 Nde\u025b\u025bu \u0263er Sidi \u1e5aebbi iwakken ur txeddmem ara cce\u1e5b, ma\u010d\u010di iwakken a d-nbeggen belli nes\u025ba l\u1e25eqq, lame\u025bna neb\u0263a kan a\u021b-\u021bxedmem lxi\u1e5b, \u0263as ma nban-ed belli nefcel deg uje\u1e5b\u1e5beb.\n13:8 Axa\u1e6der ur nes\u025bi ara tazmert iwakken a nxalef tide\u021b, lame\u025bna nes\u025ba kan tazmert s wayes ara neqdec \u0263ef tide\u021b.\n13:9 Nfe\u1e5b\u1e5be\u1e25 s wefcal-nne\u0263 ma yella kunwi t\u01e7ehdem ; m'ara nde\u025b\u025bu \u0263er Sidi \u1e5aebbi fell-awen, nessaram a\u021b-\u021bennernim di liman.\n13:10 Atah iwacu i wen-\u021baru\u0263 akkagi m'ara be\u025bde\u0263 fell-awen, iwakken asm'ara ili\u0263 gar-awen, ur \u021biw\u025bi\u1e5be\u0263 ara \u0263u\u1e5b-wen s tezmert i yi-d-ifka Sidi \u1e5aebbi, iwakken a kkun-s\u01e7ehde\u0263 ma\u010d\u010di iwakken a kkun-sse\u0263li\u0263.\n13:11 Tura ay atmaten ilit di lfe\u1e5b\u1e25, ssim\u0263u\u1e5bet liman-nwen, nadit amek ara taw\u1e0dem \u0263er lekmal, mse\u01e7hadet wway gar-awen, msefhamet, \u025bicet di lehna, imiren Sidi \u1e5aebbi Bab n talwit akk-d le\u1e25mala ad yili yid-wen.\n13:12 ?emsalamet wway gar-awen s sslam n tegma\u021b. Atmaten me\u1e5b\u1e5ba \u021bsellimen fell-awen.\n13:13 \u1e5a\u1e5be\u1e25ma n Sidna \u0190isa Lmasi\u1e25, le\u1e25mala n Sidi \u1e5aebbi \u021b-\u021bdukli i d-i\u021b\u021bak \u1e5a\u1e5bu\u1e25 iqedsen ad ilin yid-wen me\u1e5b\u1e5ba !","title":"Kabyle Bible (NT): 2 Corinthians","type":"page"}