{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/col.htm","path":"bib/wb/kab/col.htm","source_url":"https://sacred-texts.com/bib/wb/kab/col.htm","text":"1:1 Nekk Bulus, amcegge\u025b n \u0190isa Lmasi\u1e25 s leb\u0263i n Sidi \u1e5aebbi akk-d gma-tne\u0263 Timuti,\n1:2 i watmaten yellan di temdint n Kulus, wid iteddun s \u1e63\u1e63fa deg webrid n Lmasi\u1e25. \u1e5a\u1e5be\u1e25ma \u021b-\u021balwit a wen-d-\u021b\u021bunefkent s \u0263u\u1e5b \u1e5aebbi Baba-tne\u0263 !\n1:3 Ne\u021b\u1e25emmid Sidi \u1e5aebbi Baba-s n Ssid-nne\u0263 \u0190isa Lmasi\u1e25 yerna nde\u025b\u025bu fell-awen ;\n1:4 axa\u1e6der nesla s liman i tes\u025bam di \u0190isa Lmasi\u1e25 d wamek i t\u1e25emmlem agdud n Sidi \u1e5aebbi,\n1:5 \u0263ef ddemma n usirem i wen-i\u021b\u021buheggan deg igenwan, asirem nni i wen-d-i\u021b\u021buxebb\u1e5ben s wawal n tide\u021b n lexba\u1e5b n lxi\u1e5b.\n1:6 Lexbe\u1e5b-agi n lxi\u1e5b yew\u1e0den armi d \u0263u\u1e5b-wen, ye\u021bnerni di ddunit me\u1e5b\u1e5ba ; akken da\u0263en i ge\u021bnerni deg-wen ula d kunwi seg wasmi i teslam yerna tessnem tide\u021b \u0263ef \u1e5b\u1e5be\u1e25ma n Sidi \u1e5aebbi,\n1:7 akken i wen-\u021b-isselmed Ibafras, a\u1e5bfiq-nne\u0263 e\u025bzizen di leqdic ; ne\u021b\u021ba iqeddcen \u0263ef Lmasi\u1e25 s wul ye\u1e63fan,\n1:8 ixebbe\u1e5b-a\u0263-ed \u0263ef le\u1e25mala s wayes i kkun-ye\u010d\u010du\u1e5b \u1e5a\u1e5bu\u1e25 iqedsen.\n1:9 Daymi nezga nde\u025b\u025bu fell-awen \u0263er Sidi \u1e5aebbi seg wasmi nesla yis-wen, nessutur-as a wen-d-yefk amek ara tissinem akken ilaq leb\u0263i ines, s l\u025beqliya d lefhama i d-i\u021b\u021bak \u1e5a\u1e5bu\u1e25 iqedsen.\n1:10 S wakka, a\u021b-\u021ble\u1e25\u1e25um s tikli yeb\u0263a Sidi \u1e5aebbi iwakken a s t\u025be\u01e7bem di kullec, a d-tefkem lfakya yelhan, yerna a\u021b-\u021bnernim di tmusni n Sidi \u1e5aebbi,\n1:11 Nde\u025b\u025bu \u0263er \u1e5aebbi akken a kkun-isse\u01e7hed s tezmert-is tameqqrant iwakken a\u021b-t\u1e63eb\u1e5bem i kullec alamma \u021b-\u021baggara.\n1:12 \u1e24emmdet, cekk\u1e5bet s lfe\u1e5b\u1e25 Sidi \u1e5aebbi Baba-tne\u0263 i wen-d-yefkan amur di lwe\u1e5bt i d-ihegga i warraw n tafat.\n1:13 Ikkes-a\u0263-d si tezmert n \u1e6d\u1e6dlam, iwakken a \u0263-yessiwe\u1e0d \u0263er tgelda n Mmi-s e\u025bzizen,\n1:14 s wayes ne\u021bwasellek yerna nes\u025ba le\u025bfu n ddnubat-nne\u0263.\n1:15 Lmasi\u1e25, d \u1e63\u1e63ifa n Sidi \u1e5aebbi ur nezmir a nwali, d ne\u021b\u021ba i d amezwaru n txelqit me\u1e5b\u1e5ba.\n1:16 Yis i ge\u021bwaxleq wayen ne\u021bwali d wayen ur ne\u021bwali ara ama deg igenwan ama di lqa\u025ba, tigeldiwin d igelliden, l\u1e25ekmat akk-d tezmar yellan deg igenwan ; kullec ye\u021bwaxleq yis, kullec ye\u021bwaxleq i ne\u021b\u021ba.\n1:17 Yella-d uqbel a d-ye\u021bwaxleq kra yellan, d ne\u021b\u021ba i d lsas n txelqit,\n1:18 d aqe\u1e5b\u1e5buy n tejma\u025bt n imasi\u1e25iyen yellan d l\u01e7e\u021b\u021ba-s. Yella si tazwara, d ne\u021b\u021ba i d amenzu i d-i\u1e25yan si ger lmegtin iwakken ad yili d amezwaru di kullec.\n1:19 Axa\u1e6der Sidi \u1e5aebbi yufa lfe\u1e5b\u1e25-is s lekmal di Mmi-s,\n1:20 s Lmasi\u1e25 i gem\u1e63ala\u1e25 akk-d txelqit, yessers-ed lehna ama di lqa\u025ba ama deg igenwan s idammen n Mmi-s yuzzlen \u0263ef wumidag.\n1:21 Kunwi yellan zik-nni d ibe\u1e5b\u1e5baniyen, d i\u025bdawen n Sidi \u1e5aebbi s ixemmimen-nwen d yir lec\u0263al nwen\n1:22 Tura issem\u1e63ale\u1e25-ikkun yid-es s lmut n Mmi-s iwakken a d-tbanem zdat-es te\u1e63fam, mbla l\u025bib.\n1:23 Ma yella te\u1e6d\u1e6dfem di liman-nwen s tide\u021b, ma yella tbeddem, t\u1e5be\u1e63\u1e63am. \u0194u\u1e5b-wat a\u021b-\u021b\u021bwexx\u1e5bem \u0263ef wusirem i wen-d-yewwi lexba\u1e5b n lxi\u1e5b iwumi teslam, lexba\u1e5b-agi n lxi\u1e5b i ge\u021b\u021bubecc\u1e5ben i yemdanen n ddunit me\u1e5b\u1e5ba, i \u0263ef u\u0263ale\u0263 nekk d aqeddac.\n1:24 Tura fe\u1e5b\u1e25e\u0263 a\u1e6das imi n\u025be\u021b\u021babe\u0263 fell-awen, axa\u1e6der \u021bkemmile\u0263 ayen ixu\u1e63\u1e63en i le\u025btab n Lmasi\u1e25 \u0263ef ddemma n imasi\u1e25iyen me\u1e5b\u1e5ba, yellan d l\u01e7e\u021b\u021ba-s, i \u0263ef u\u0263ale\u0263 d aqeddac.\n1:25 Icegge\u025b-iyi-d Sidi \u1e5aebbi iwakken a wen-d-becc\u1e5be\u0263 awal-is s lekmal.\n1:26 Lba\u1e0dna yeffren si zik, si l\u01e7il \u0263er l\u01e7il, ibeggen-i\u021b-id tura i wid yellan d ayla-s.\n1:27 Yeb\u0263a a d-yesken ccan n lba\u1e0dna agi ifazen i le\u01e7nas nni\u1e0den ur nelli ara n wat Is\u1e5bail, iwakken ad walin Lmasi\u1e25 deg-wen, ne\u021b\u021ba yellan d lsas n l\u025ba\u1e0dima i \u0263er nessaram.\n1:28 D Lmasi\u1e25 agi i ne\u021bbecci\u1e5b i yemdanen, ne\u021bwe\u1e63\u1e63i-ten, nesselmad iten s tmusni d le\u025bqel, iwakken yal amdan ad innekmal di Lmasi\u1e25 zdat Sidi \u1e5aebbi.\n1:29 \u0194ef wayagi i qeddce\u0263 s tezmert n Lmasi\u1e25 yellan deg-i.\n2:1 B\u0263i\u0263 a\u021b-\u021be\u1e93rem ac\u1e25al meqqe\u1e5b imen\u0263i i deg lli\u0263 \u0263ef ddemma nwen, \u0263ef watmaten n temdint n Ludikus akk-d wid me\u1e5b\u1e5ba i geslan yis-i me\u025bna le\u025bme\u1e5b ur \u1e93rin udem-iw.\n2:2 Qeble\u0263 imen\u0263i-agi iwakken ad theddnen wulawen-nsen, ad ddukklen s le\u1e25mala, ad \u010d\u010da\u1e5ben d lefhama iwakken ad issinen lba\u1e0dna n Sidi \u1e5aebbi \u1e5aebbi yellan di Lmasi\u1e25 ;\n2:3 deg-s i ffren igerrujen n lefhama \u021b-\u021bmusni.\n2:4 Nni\u0263-d akka iwakken ur kkun i\u021bkellix yiwen s imeslayen ye\u021b\u0263u\u1e5b\u1e5bun.\n2:5 \u0194as akken ur lli\u0263 ara yid-wen, le\u025bqel-iw atan \u0263u\u1e5b-wen ; fe\u1e5b\u1e25e\u0263 a\u1e6das mi \u1e93ri\u0263 ac\u1e25al i te\u1e6d\u1e6dfem di liman-nwen di Lmasi\u1e25 yerna tsedduyem kullec akken ilaq.\n2:6 Ihi imi tqeblem \u0190isa Lmasi\u1e25 d Ssid-nwen, ddut di leb\u0263i-ines.\n2:7 Sbeddet lsas n tudert-nwen fell-as, s\u01e7ehdet liman-nwen akken i kkun nesselmed, \u021b\u1e25emmidet daymen Sidi \u1e5aebbi.\n2:8 \u1e24adret a kkun-kellxen wid i\u021bfelsifen, wid yessexdamen ti\u1e25ila \u021b-\u021bi\u1e25e\u1e5bci ; ayagi d lekdubat i gebnan \u0263ef le\u025bwayed n yemdanen akk \u021b-\u021bizemmar n ddunit, ma\u010d\u010di \u0263ef uselmed n Lmasi\u1e25.\n2:9 Axa\u1e6der ayen akk yellan di Sidi \u1e5aebbi yezde\u0263 s lekmal di Lmasi\u1e25,\n2:10 kunwi tes\u025bam kullec deg-s, ne\u021b\u021ba yellan sennig l\u1e25ekmat \u021b-\u021bzemmar.\n2:11 S\u1e6dha\u1e5ba-nwen tekka-d si tikli nwen akk-d Lmasi\u1e25, ma\u010d\u010di am tin ye\u021bwaxedmen s ufus n wemdan, lame\u025bna s \u0263u\u1e5b Lmasi\u1e25 i d-tekka iwakken a kkun-isellek si tezmert n l\u01e7e\u021b\u021ba tamednubt.\n2:12 S we\u0263\u1e0das-nwen te\u021bwame\u1e0dlem akk-d Lmasi\u1e25, lame\u025bna te\u1e25yam-d da\u0263en yid-es si lmut imi tumnem s tezmert n Sidi \u1e5aebbi i t-id-isse\u1e25yan si ger lmegtin.\n2:13 Kunwi ur ne\u1e0dhi\u1e5b ara, tellam temmutem \u0263ef ddemma n ddnubat nwen ; tura Sidi \u1e5aebbi yerra-kkun-id \u0263er tudert s Lmasi\u1e25. Sidi \u1e5aebbi ye\u025bfa-ya\u0263 ddnubat-nne\u0263 me\u1e5b\u1e5ba.\n2:14 Yem\u1e25a le\u025bqed-nni i \u0263-isse\u1e0dlamen, imi ur nezmir ara a nexdem ayen d-teqqa\u1e5b ccari\u025ba ; yem\u1e25a-t mi t-isemme\u1e5b \u0263ef wumidag.\n2:15 Sidi \u1e5aebbi yekkes tazmert i l\u1e25ekmat \u021b-\u021bzemmar n igenwan, ikcef itent-id zdat txelqit me\u1e5b\u1e5ba, i\u0263leb-itent s lmut n Mmi-s \u0263ef wumidag.\n2:16 Ihi ur \u021b\u021ba\u01e7at ara win ara kkun-i\u1e25asben \u0263ef wayen ara te\u010d\u010dem d wayen ara teswem ne\u0263 imi ur tettaba\u025bem ara ayen ye\u025bnan le\u025byudat, talalit n waggur d wussan n weste\u025bfu ;\n2:17 ayagi akk yezwar-ed d lemtel kan n wayen i d-iteddun, axa\u1e6der tide\u021b di Lmasi\u1e25 i tella.\n2:18 \u0194u\u1e5b-wat a wen-kellxen yemdanen i\u021b\u021barran iman-nsen d wid yunzen, \u021b\u025bebbiden lmalayekkat, a kkun-id-awin \u0263er webrid-nsen iwakken ur te\u021b\u021baw\u1e0dem ara \u0263er lmeq\u1e63ud-nwen ; imdanen am wigi ttaba\u025ben kan ixemmimen-nsen yerna xeddmen ccan i yiman-nsen.\n2:19 Ur qbilen ara ad \u1e6d\u1e6dfen di Lmasi\u1e25 yellan d aqe\u1e5b\u1e5buy, i gesdukklen l\u01e7e\u021b\u021ba s lemfa\u1e63el me\u1e5b\u1e5ba d i\u1e93uran i d-icudden \u0263u\u1e5b-es ; yis i te\u021bnerni l\u01e7e\u021b\u021ba, i te\u021b\u021bim\u0263u\u1e5b s wakken yella di leb\u0263i n Sidi \u1e5aebbi.\n2:20 Ma yella temmutem akk-d Lmasi\u1e25, te\u1e6d\u1e6dax\u1e5bem \u0263ef wayen akk ye\u025bnan tudert n ddunit, acimi ihi am akken di ddunit i tellam, tqebblem ad \u1e25e\u021b\u021bmen fell-awen le\u025bwayed n ddunit m'ara wen-qqa\u1e5ben :\n2:21 \u00ab Ur teddmet ara ne\u0263 ur \u025be\u1e5b\u1e5bdet ara ne\u0263 ur \u021bnalet ara !\u00bb\n2:22 Lumu\u1e5bat-agi me\u1e5b\u1e5ba i nxeddem d ayen ara yefnun, d leqwanen d uselmed n yemdanen ;\n2:23 \u021b-\u021bide\u021b, lumu\u1e5bat-agi sselmaden le\u025bbada, annuz akk-d u\u025be\u021b\u021beb n l\u01e7e\u021b\u021bat nne\u0263, \u021bbanen-d amakken d ayen yelhan, lame\u025bna d ayen ur nezmir ad i\u025bawen bunadem ad i\u1e6d\u1e6def iman-is.\n3:1 Kunwi ihi, imi i d-te\u1e25yam akk-d Lmasi\u1e25, nadit \u0263ef le\u1e25waye\u01e7 n igenwan anda yella Lmasi\u1e25 i g\u1e25ekmen \u0263er tama tayeffust n Sidi \u1e5aebbi.\n3:2 \u021a\u1e25ebbi\u1e5bet \u0263ef wayen yellan deg igenwan ma\u010d\u010di \u0263ef wayen yellan di ddunit-agi,\n3:3 axa\u1e6der \u0263er ddunit te\u021b\u021busemmam temmutem, me\u025bna \u0263er Sidi \u1e5aebbi tudert-nwen teffer akk-d Lmasi\u1e25.\n3:4 M'ara d-iban Lmasi\u1e25 yellan \u021b-\u021budert-nwen, kunwi da\u0263en a d tbanem yid-es.\n3:5 \u0194ef ddemma n wayagi, x\u1e0dut i yir tikli n ddunit-agi s wayes te\u021b\u021beddum zik : le\u1e25\u1e5bam, ayen i\u025befnen, leb\u0263i n tnefsit, ccehwat n diri akk-d \u1e6d\u1e6dme\u025b, ayagi me\u1e5b\u1e5ba am win i\u021b\u025bebbiden ayen ixulfen Sidi \u1e5aebbi.\n3:6 D annect-agi i d-isse\u0263layen urrif n Sidi \u1e5aebbi \u0263ef wid i t-i\u021b\u025ba\u1e63in.\n3:7 Ula d kunwi akka i tellam zik-nni mi te\u021b\u025bicim di ddnub.\n3:8 Me\u025bna tura sbe\u025bdet iman-nwen \u0263ef wannect-agi me\u1e5b\u1e5ba : urrif, zz\u025baf, dd\u0263el ; \u1e25adret a d-ff\u0263en seg imawen-nwen rregmat ne\u0263 yir lehdu\u1e5b.\n3:9 Ur skiddibet ara wway gar-awen imi tura te\u01e7\u01e7am yir tikli-nwen n zik.\n3:10 Tu\u0263alem d ijdiden, te\u021bnernim di tmusni n Sidi \u1e5aebbi iwakken a\u021b \u021bemcabim \u0263u\u1e5b-es, ne\u021b\u021ba i kkun-d-ixelqen.\n3:11 Di tudert-agi tajdi\u1e6d ulac lxilaf ger wat Is\u1e5bail d le\u01e7nas nni\u1e0den, ger win i\u1e0deh\u1e5ben d win ur ne\u1e0dhi\u1e5b, ger wid itqeddmen d wid ur netqeddem, ne\u0263 ger wakli d u\u1e25e\u1e5b\u1e5bi, imi d Lmasi\u1e25 i gellan d kullec di mkul yiwen.\n3:12 Sidi \u1e5aebbi i\u1e25emmel-ikkun, yexta\u1e5b-ikkun a\u021b-\u021bilim d agdud-is. S\u025but ihi \u1e5b\u1e5be\u1e25ma deg wulawen-nwen, le\u1e25nana, lxi\u1e5b, \u1e63\u1e63be\u1e5b d wannuz.\n3:13 \u021aemyawit wway gar-awen, ma yella win yes\u025ban accetki \u0263ef waye\u1e0d msama\u1e25et axi\u1e5b wway gar-awen, akken i wen-isemme\u1e25 Lmasi\u1e25, msama\u1e25et ula d kunwi.\n3:14 Nnig n wayagi me\u1e5b\u1e5ba s\u025but le\u1e25mala, \u021b-\u021bin i gesdukkulen ulawen.\n3:15 S\u025but lehna n Lmasi\u1e25 deg ulawen nwen iwakken a\u021b-\u021bilim d yiwen, \u1e25emmdet Sidi \u1e5aebbi imi \u0263er lehna-agi i wen-d-yessawel.\n3:16 Awal n Lmasi\u1e25 ad izde\u0263 gar-awen s lba\u1e5bakat-is me\u1e5b\u1e5ba iwakken wa ad isselmad wa, wa ad inehhu waye\u1e0d s \u1e63\u1e63wab. Ccnut s wulawen-nwen, \u1e25emmdet Sidi \u1e5aebbi s isefra n Zabu\u1e5b akk-d ccnawi i d-i\u021b\u021bak \u1e5a\u1e5bu\u1e25 iqedsen.\n3:17 Ama deg imeslayen ama di lec\u0263al ara txedmem, xedmet kullec s yisem n Ssid-nne\u0263 \u0190isa, s yisem-is \u021b\u1e25emmidet Sidi \u1e5aebbi baba-tne\u0263.\n3:18 A tilawin, \u1e0du\u025bemt irgazen-nkunt, ayagi d ayen ilaqen i tid i ge\u021b\u1e0du\u025bun Sidi \u1e5aebbi.\n3:19 Ma d kunwi ay irgazen, ilaq a\u021b-\u021b\u1e25emmlem tilawin-nwen, ur se\u025b\u025but ara ulawen iqes\u1e25en \u0263u\u1e5b-sent.\n3:20 Ay arrac \u021b\u021ba\u0263et awal i imawlan nwen di kullec, axa\u1e6der akka ara t\u025be\u01e7bem i Sidi \u1e5aebbi.\n3:21 Lame\u025bna kunwi ay imawlan ur sserfuyet ara dderya-nwen ne\u0263 m'ulac ad feclen.\n3:22 Ma d kunwi ay iqeddacen, \u021b\u021ba\u0263et awal i im\u025bellmen-nwen di ddunit-agi ma\u010d\u010di kan zdat-nsen akken a sen t\u025be\u01e7bem me\u025bna \u0263as ulac-iten xedmet cc\u0263el-nwen seg wul, am akken i Sidi \u1e5aebbi.\n3:23 Kra n wayen ara txedmem, xedmet-e\u021b s wul ye\u1e63fan am akken i Sidi \u1e5aebbi i t-txeddmem ma\u010d\u010di i yemdanen,\n3:24 mmektit-ed lwe\u1e5bt i kkun i\u021b\u1e5ba\u01e7un s \u0263u\u1e5b Sidi \u1e5aebbi akken i t-id-yew\u025bed ; axa\u1e6der am\u025bellem n tide\u021b i \u0263ef tqeddcem, d Lmasi\u1e25.\n3:25 Win ixeddmen cce\u1e5b a d-i\u0263ellet ayen yexdem ; axa\u1e6der \u0263er Sidi \u1e5aebbi ulac lxilaf.\n4:1 Ay im\u025bellmen ddut s l\u1e25eqq, ur xeddmet ara lxilaf ger iqeddacen nwen, axa\u1e6der te\u1e93ram belli ula d kunwi tes\u025bam am\u025bellem deg igenwan.\n4:2 Ur \u0263efflet ara, me\u025bna de\u025b\u025but \u021b\u1e25emmidet daymen Sidi \u1e5aebbi.\n4:3 De\u025b\u025but da\u0263en fell-a\u0263 \u0263er Sidi \u1e5aebbi iwakken a \u0263-d-ildi tiwwura a nbecce\u1e5b awal-is, a nxebbe\u1e5b \u0263ef lba\u1e0dna n Lmasi\u1e25 i \u0263ef lli\u0263 di l\u1e25ebs,\n4:4 d\u025but iwakken ad sfehme\u0263 akken ilaq lba\u1e0dna-agi i yemdanen.\n4:5 Ddut s \u1e63\u1e63wab zdat wid ur numin ara s \u0190isa Lmasi\u1e25 ; fa\u1e5bset tagni\u021b, \u021bbecci\u1e5bet awal n \u0190isa Lmasi\u1e25.\n4:6 S\u025but iles a\u1e93idan, imeslayen yes\u025ban lfayda, iwakken a\u021b-\u021be\u021b\u021barram awal i yal yiwen s \u1e63\u1e63wab.\n4:7 Tucik, gma-tne\u0263 e\u025bzizen i \u0263ef \u021bekle\u0263, a\u1e5bfiq-nne\u0263 di leqdic \u0263ef Ssid-nne\u0263, a wen-n-yawi lexba\u1e5b-iw.\n4:8 \u0194ef wannect-agi i wen-t-in cegg\u025be\u0263 iwakken a wen-n-yawi lexba\u1e5b-nne\u0263 yerna ad ihedden ulawen-nwen.\n4:9 A d-yas ne\u021b\u021ba d gma-tne\u0263 e\u025bzizen Unizim i \u0263ef ne\u021bkel, yellan d yiwen seg-wen ; d nutni ara wen-n-yawin lexba\u1e5b \u0263ef wayen me\u1e5b\u1e5ba ide\u1e5b\u1e5bun dagi.\n4:10 I\u021bsellim-ed fell-awen Aris\u1e6dark a\u1e5bfiq-iw yellan yid-i di l\u1e25ebs akk-d Ma\u1e5bqus ye\u021b\u021bilin i Barnabas, win i \u0263ef kkun-we\u1e63\u1e63a\u0263 a\u021b-\u021bester\u1e25bem yis ma yusa-d \u0263u\u1e5b-wen.\n4:11 I\u021bsellim-ed da\u0263en fell-awen \u0190isa iwumi qqa\u1e5ben Yustus. Ger wat Is\u1e5bail anagar tlata watmaten-agi i gxeddmen yid-i i tgeldit n Sidi \u1e5aebbi, d nutni kan i yufi\u0263 \u0263er tama-w.\n4:12 Gma-tne\u0263 Ibafras n tmurt-nwen, yellan d aqeddac n \u0190isa Lmasi\u1e25 i\u021bsellim-ed fell-awen ; yezga ide\u025b\u025bu \u0263er \u1e5aebbi fell-awen iwakken a\u021b-\u021be\u1e6d\u1e6dfem, a\u021b-\u021bennernim di liman yerna a\u021b-\u021bilim twejdem a\u021b-\u021bxedmem leb\u0263i n Sidi \u1e5aebbi.\n4:13 A d-cehde\u0263 fell-as ac\u1e25al in\u025be\u021b\u021bab fell-awen, \u0263ef watmaten n tejma\u025bt n Ludikus akk-d wid n Yirabulis.\n4:14 Luqa a\u1e25bib-nne\u0263 e\u025bzizen yellan d \u1e6d\u1e6dbib akk-d Dimas, \u021bsellimen-d fell-awen.\n4:15 Sellmet \u0263ef watmaten yellan di Ludikus, \u0263ef Nimfa akk d wid i\u021bnejma\u025ben deg wexxam-is.\n4:16 M'ara te\u0263\u1e5bem tab\u1e5ba\u021b-agi, fket-e\u021b i watmaten n tejma\u025bt n Ludikus a \u021b-\u0263\u1e5ben, kunwi da\u0263en \u0263\u1e5bet tab\u1e5ba\u021b ara kkun-id-yaw\u1e0den s \u0263u\u1e5b-sen.\n4:17 Init i Arcibus ad ibedd i cc\u0263el nni i \u0263ef t-iwekkel Ssid-nne\u0263, a t-ixdem akken ilaq.\n4:18 Nekk Bulus, s ufus-iw i wen-n uri\u0263. Sslam fell-awen ! Ur te\u021b\u021but ara belli d ame\u1e25bus i lli\u0263. \u1e5a\u1e5be\u1e25ma n Sidi \u1e5aebbi a\u021b-\u021bili yid-wen.","title":"Kabyle Bible (NT): Colossians","type":"page"}