{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/eph.htm","path":"bib/wb/kab/eph.htm","source_url":"https://sacred-texts.com/bib/wb/kab/eph.htm","text":"1:1 Nekk Bulus yellan d amcegge\u025b n \u0190isa Lmasi\u1e25 s leb\u0263i n Sidi \u1e5aebbi, uri\u0263-ed tab\u1e5ba\u021b-agi i watmaten yellan di temdint n Ifasus i gumnen s \u0190isa Lma\u1e63i\u1e25.\n1:2 \u1e5a\u1e5be\u1e25ma d lehna a wen-d \u021b\u021bunefkent s \u0263u\u1e5b Sidi \u1e5aebbi baba-tne\u0263 akk-d Ssid-nne\u0263 \u0190isa Lmasi\u1e25.\n1:3 Ad i\u021b\u021bubarek Sidi \u1e5aebbi, baba-s n Ssid-nne\u0263 \u0190isa Lmasi\u1e25, i \u0263-d-ifkan deg igenwan mkul lba\u1e5bakat n \u1e5a\u1e5bu\u1e25 iqedsen, s \u0190isa Lmasi\u1e25.\n1:4 Yis i \u0263-d-ixta\u1e5b Sidi \u1e5aebbi uqbel a d-ixleq ddunit, iwakken a nili zdat-es d izedganen mbla l\u025bib.\n1:5 Sidi \u1e5aebbi i\u1e25emmel-a\u0263, daymi i geqsed si zik s leb\u0263i-ines a \u0263-yerr d arraw-is s \u0190isa Lmasi\u1e25,\n1:6 iwakken a t-ne\u1e25med a t-ncekke\u1e5b \u0263ef \u1e5b\u1e5be\u1e25ma-s tameqqrant i \u0263-d-ifka s Mmi-s e\u025bzizen.\n1:7 S lmut n Sidna \u0190isa i \u0263-d-icufe\u025b Sidi \u1e5aebbi, s idammen-is yuzzlen i \u0263-\u021bwa\u025bfan ddnubat-nne\u0263 ; s wakka isbeggen-a\u0263-d ac\u1e25al meqq\u1e5bet \u1e5b\u1e5be\u1e25ma ines\n1:8 i d-issers fell-a\u0263 s tuge\u021b yerna ifka-ya\u0263-d lefhama \u021b-\u021bmusni.\n1:9 Sidi \u1e5aebbi isbeggen-a\u0263-ed leb\u0263i-s yellan d lba\u1e0dna, lemziya-nni i geqsed a \u021b-ixdem si tazwara s Lmasi\u1e25,\n1:10 ara yessiwe\u1e0d \u0263er lekmal-is di lweqt i gexta\u1e5b : ad isdukkel ayen akk yellan ama deg igenwan ama di lqa\u025ba, seddaw l\u1e25ekma n Lmasi\u1e25.\n1:11 S \u0190isa Lmasi\u1e25 i \u0263-yerra Sidi \u1e5aebbi d ayla-s, am akken i t-iqsed si tazwara di leb\u0263i-ines,\n1:12 iwakken nukni yessarmen di Lmasi\u1e25 d imezwura, a ne\u1e25med Sidi \u1e5aebbi \u0263ef tmanegt-is.\n1:13 Kunwi da\u0263en mi teslam s lexba\u1e5b n lxi\u1e5b i wen-d-yewwin leslak, tumnem s Lmasi\u1e25 ; d\u0263a Sidi \u1e5aebbi i\u1e0dbe\u025b-ikkun s \u1e6d\u1e6dabe\u025b-ines yellan d \u1e5a\u1e5bu\u1e25 iqedsen i gew\u025bed a wen-t-id yefk.\n1:14 \u1e5a\u1e5bu\u1e25 iqedsen d a\u025be\u1e5bbun n lwe\u1e5bt-nne\u0263, alamma yewwe\u1e0d \u0263er lekmal-is leslak n wid akk yexta\u1e5b Sidi \u1e5aebbi. A ne\u1e25med ihi Sidi \u1e5aebbi \u0263ef tmanegt-agi-ines ( l\u025ba\u1e0dima-s ).\n1:15 Daymi mi sli\u0263 s liman-nwen ye\u1e5bsan di \u0190isa Lmasi\u1e25 d wamek i t\u1e25emmlem wid akk i gexta\u1e5b Sidi \u1e5aebbi,\n1:16 kull ass \u021b\u1e25emmide\u0263 rennu\u0263 Sidi \u1e5aebbi \u0263ef ddemma-nwen, \u021b\u021badre\u0263-kkun-id dayem di t\u1e93allit-iw\n1:17 iwakken Sidi \u1e5aebbi, Illu n Ssid nne\u0263 \u0190isa Lmasi\u1e25 yellan d bab n tmanegt, a wen-d-yefk s \u1e5a\u1e5bu\u1e25 iqedsen tamusni d lefhama s wayes ara t-tissinem akken ilaq ;\n1:18 a wen-ildi le\u025bqel iwakken a\u021b \u021bfehmem d acu n usirem i \u0263er wen-d issawel, d acu n lba\u1e5bakat timeqqranin i ghegga i wid yumnen yis ;\n1:19 a\u021b-\u021bwalim tazmert-is tameqqrant i \u0263-d-ibeggen i nukni s wid yumnen yis.\n1:20 Tazmert nni i d-ibeggen s \u0190isa Lmasi\u1e25, mi t-id-yesse\u1e25ya si ger lmegtin, yerna yes\u0263im-it \u0263er tama-s tayeffust deg igenwan iwakken ad ye\u1e25kem,\n1:21 sennig igelliden me\u1e5b\u1e5ba n ddunit, sennig imdebb\u1e5ben \u021b-\u021bnezmarin, sennig tgeldiwin akk-d yismawen me\u1e5b\u1e5ba yellan ma\u010d\u010di kan di l\u01e7il-agi me\u025bna ula di l\u01e7il i d-iteddun.\n1:22 Sidi \u1e5aebbi yerra kullec seddaw i\u1e0da\u1e5b\u1e5ben n Lmasi\u1e25, yerra-t da\u0263en d aqe\u1e5b\u1e5buy n tejma\u025bt n imasi\u1e25iyen\n1:23 yellan d l\u01e7e\u021b\u021ba n Lmasi\u1e25 ; deg-s i ge\u021b\u021bili yerna d ne\u021b\u021ba i d kullec di ddunit me\u1e5b\u1e5ba.\n2:1 Zik-nni, tellam am wid yemmuten \u0263ef ddemma n tucc\u1e0da-nwen akk-d ddnubat-nwen ;\n2:2 te\u021b\u025bicim di ddnub, tewwi-kkun ddunit, t\u1e0def\u1e5bem Cci\u1e6dan, ssel\u1e6dan n ddunit-agi i g\u021bekellixen ar tura wid ur n\u1e0du\u025b ara Sidi \u1e5aebbi.\n2:3 Nukni da\u0263en, zik-nni am nutni i nella ; nettaba\u025b ixemmimen-nne\u0263, ccehwat-nne\u0263, nxeddem leb\u0263i n tnefsit-nne\u0263, nella nuklal urrif n Sidi \u1e5aebbi am wiya\u1e0d.\n2:4 Lame\u025bna imi i ge\u010d\u010du\u1e5b Sidi \u1e5aebbi d \u1e5b\u1e5be\u1e25ma, yerna le\u1e25mala-ines \u0263u\u1e5b-nne\u0263 \u021b-\u021bameqqrant,\n2:5 yerra-ya\u0263-d \u0263er tudert akk-d Lmasi\u1e25, nukni yellan am wid yemmuten \u0263ef sebba n ddnubat-nne\u0263. S \u1e5b\u1e5be\u1e25ma n Sidi \u1e5aebbi i te\u021bwasellkem.\n2:6 S tdukli-nne\u0263 akk-d \u0190isa Lmasi\u1e25, Sidi \u1e5aebbi isse\u1e25ya-\u0263-ed akk-d Lmasi\u1e25 yerna yes\u0263im-a\u0263 yid-es deg igenwan,\n2:7 iwakken di leq\u1e5bun i d-iteddun, a d-tban ac\u1e25al meqq\u1e5bit \u1e5b\u1e5be\u1e25ma-ines akk-d le\u1e25nana-s i \u0263-d-isbeggen s \u0190isa Lmasi\u1e25.\n2:8 S \u1e5b\u1e5be\u1e25ma n Sidi \u1e5aebbi kan i te\u021bwasellkem, mi tumnem. Ayagi ma\u010d\u010di d ayen i d-ikan s \u0263u\u1e5b-wen lame\u025bna \u021b-\u021bukci n Sidi \u1e5aebbi.\n2:9 Ma\u010d\u010di s l\u1e25asanat-nwen i te\u021bwasellkem akken yiwen ur i\u021bzuxxu s yiman is ;\n2:10 axa\u1e6der ayen i nella tura s \u0263u\u1e5b Sidi \u1e5aebbi i \u0263-d-yekka, ixleq-a\u0263-ed di \u0190isa Lmasi\u1e25 iwakken a nexdem di tudert-nne\u0263 lec\u0263al yelhan i-\u0263-d ihegga si tazwara.\n2:11 Kunwi ur nelli ara seg wegdud n wat Is\u1e5bail, iwumi qqa\u1e5ben wat Is\u1e5bail : \u00ab A wid ur ne\u1e0dhi\u1e5b \u00bb axa\u1e6der nutni \u1e25esben iman-nsen \u1e0deh\u1e5ben \u0263ef ddemma n \u1e6d\u1e6dha\u1e5ba-nni i s\u025ban di l\u025badda-nsen,\n2:12 mmektit-ed amek i tellam zik : di lweqt-nni tellam tbe\u025bdem \u0263ef Lmasi\u1e25, d ibe\u1e5b\u1e5baniyen ur nelli ara seg ugdud i gexta\u1e5b Sidi \u1e5aebbi, ur te\u021b\u021bekkam di lem\u025bahdat i sen-iw\u025bed, ur tes\u025bim asirem, ur tessinem Sidi \u1e5aebbi.\n2:13 Me\u025bna imi tumnem s \u0190isa Lmasi\u1e25, kunwi yellan zik tbe\u025bdem fell-as, tura tqe\u1e5b\u1e5bbem-d \u0263u\u1e5b-es s idammen-is yuzzlen \u0263ef ddemma-nwen.\n2:14 Axa\u1e6der d Lmasi\u1e25 s yiman-is i d lehna-nne\u0263, imi i gesdukkel at Is\u1e5bail d le\u01e7nas nni\u1e0den yerra-ten d yiwen n wegdud. Mi gefka iman-is d asfel, ihudd l\u1e25i\u1e0d-nni i ten-ife\u1e5bqen, i ten-yerran d i\u025bdawen ;\n2:15 yesse\u0263li tazmert n ccari\u025ba yerna lew\u1e63ayat akk-d leqwanen-ines, iwakken a d-issufe\u0263 si snat ccetlat-agi, yiwen kan n wegdud ajdid ara yamnen yis ; s wakka i d-issers lehna.\n2:16 S lmut-is \u0263ef wumidag i ten-issem\u1e63ale\u1e25 d Sidi \u1e5aebbi, ikkes ti\u025bdawit yellan gar-asen, isdukkel sin le\u01e7nas-agi yerra-ten d yiwen wegdud.\n2:17 Yusa-d a wen-ibecce\u1e5b lexba\u1e5b n lxi\u1e5b , yewwi-awen-d lehna ama i kunwi yellan tbe\u025bdem \u0263ef \u1e5aebbi, ama i wat Is\u1e5bail iqe\u1e5bben \u0263u\u1e5b-es ;\n2:18 axa\u1e6der yis i nezmer am kunwi am nukni, a nqe\u1e5b\u1e5beb me\u1e5b\u1e5ba \u0263er Baba \u1e5aebbi, s yiwen n \u1e5a\u1e5bu\u1e25 iqedsen.\n2:19 Ihi tura, kunwi ur nelli ara seg wat Is\u1e5bail, ur tellim ara d ibe\u1e5b\u1e5baniyen ne\u0263 d imsebriden, me\u025bna te\u021b\u021bekkam di tejma\u025bt n wegdud n Sidi \u1e5aebbi, tu\u0263alem d i\u025beyyalen n twacult-is.\n2:20 Tu\u0263alem d axxam yebnan \u0263ef lsas i ssersen \u1e5b\u1e5busul akk-d lenbiya, \u0190isa Lmasi\u1e25 s yiman-is i d az\u1e5bu alemmas ye\u1e6d\u1e6dfen lebni.\n2:21 D ne\u021b\u021ba i gessalayen lebni, yesse\u01e7had-it iwakken ad yu\u0263al d l\u01e7ame\u025b iqedsen n Sidi \u1e5aebbi.\n2:22 S tdukli-nwen akk-d Lmasi\u1e25, ula d kunwi te\u021b\u021bekkam di lebni-agi, iwakken a\u021b-\u021bilim d axxam anda yezde\u0263 Sidi \u1e5aebbi s \u1e5a\u1e5bu\u1e25-is.\n3:1 Daymi nekk Bulus, aql-i d ame\u1e25bus n Lmasi\u1e25 \u0263ef ddemma nwen kunwi ur nelli ara n wat Is\u1e5bail.\n3:2 Ahat teslam s lxedma i yi-d i\u021b\u021bunefken s \u1e5b\u1e5be\u1e25ma n Sidi \u1e5aebbi \u0263ef wayen i kkun-ye\u025bnan.\n3:3 Sidi \u1e5aebbi ildi-yi-d allen iwakken ad fehme\u0263 lba\u1e0dna-ines, am akken i t-id-uri\u0263 s kra imeslayen ;\n3:4 m'ara ten-te\u0263\u1e5bem, a\u021b-\u021be\u1e93rem ayen fehme\u0263 \u0263ef lba\u1e0dna n Lmasi\u1e25.\n3:5 Sidi \u1e5aebbi ur d-ibeggen ara lba\u1e0dna-agi i lejdud-nne\u0263, lame\u025bna tura ibeggen-i\u021b-id s \u1e5a\u1e5bu\u1e25-is iqedsen i imcegg\u025ben-ines akk-d lenbiya.\n3:6 A\u021bah lba\u1e0dna-agi : imi umnen le\u01e7nas ur nelli ara n wat Is\u1e5bail s lexba\u1e5b n lxi\u1e5b n Lmasi\u1e25 i sen-d i\u021b\u021bubecc\u1e5ben, ad \u021bekkin di l\u025bahed i d-i\u021b\u021bunefken i wat Is\u1e5bail, ad we\u1e5bten yid-sen lba\u1e5bakat yerna ad u\u0263alen me\u1e5b\u1e5ba d yiwet n l\u01e7e\u021b\u021ba.\n3:7 U\u0263ale\u0263 d aqeddac n lexba\u1e5b-agi n lxi\u1e5b n Lmasi\u1e25 s \u1e5b\u1e5be\u1e25ma n Sidi \u1e5aebbi \u021b-\u021bezmert-is ixeddmen deg-i ;\n3:8 nekk yellan d ulac ger imasi\u1e25iyen me\u1e5b\u1e5ba, ye\u021b\u021bunefk-iyi-d s \u1e5b\u1e5be\u1e25ma n Sidi \u1e5aebbi ad becc\u1e5be\u0263 i wid ur nelli ara n wat Is\u1e5bail, lexba\u1e5b n lxi\u1e5b ye\u025bnan lba\u1e5bakat ur nkeffu yellan di Lmasi\u1e25\n3:9 yerna a d-sfehme\u0263 lme\u025bna n lba\u1e0dna agi i geffer Sidi \u1e5aebbi si lebda, ne\u021b\u021ba i gxelqen kullec.\n3:10 S wakka, l\u1e25ekmat \u021b-\u021bnezmarin n igenwan ad issinent tamusni n Sidi \u1e5aebbi di mkul \u1e63\u1e63ifat-ines, s tejma\u025bt n imasi\u1e25iyen\n3:11 akken yella di leqsed n Sidi \u1e5aebbi si lebda ; leqsed-agi yessawe\u1e0d-it \u0263er lekmal-is s \u0190isa Lmasi\u1e25 Ssid-nne\u0263.\n3:12 S liman-nne\u0263 di Sidna \u0190isa i nezmer a nqe\u1e5b\u1e5beb \u0263er Sidi \u1e5aebbi s le\u021bkal.\n3:13 Daymi i wen-qqa\u1e5be\u0263 tura : ur \u021b\u021ba\u01e7at ara uguren i d-\u021bmagare\u0263 \u0263ef ddemma-nwen a kkun-sfeclen axa\u1e6der d ayen ara kkun-iqe\u1e5b\u1e5bben \u0263er Sidi \u1e5aebbi.\n3:14 \u0194ef wayagi i kerfe\u0263 tigecrar, se\u01e7\u01e7de\u0263 zdat Sidi \u1e5aebbi baba-tne\u0263,\n3:15 seg i d-tekka yal tawacult yellan ama deg igenwan ama di lqa\u025ba,\n3:16 \u1e6d\u1e6dalabe\u0263-as iwakken s l\u025ba\u1e0dima-s tameqqrant, a kkun-isse\u01e7hed s tezmert n \u1e5a\u1e5bu\u1e25-is iqedsen.\n3:17 Ssuture\u0263-as ad izde\u0263 Lmasi\u1e25 deg wulawen-nwen s liman, a\u021b-\u021bes\u025bum izu\u1e5ban ara i\u1e5be\u1e63\u1e63in di le\u1e25mala,\n3:18 iwakken kunwi akk-d wid yumnen me\u1e5b\u1e5ba, a\u021b-\u021bzemrem a\u021b-\u021bfehmem ac\u1e25al hraw, ac\u1e25al \u0263ezzif, ac\u1e25al lqay, ac\u1e25al \u025blay le\u1e25mala n Lmasi\u1e25,\n3:19 yerna a\u021b-\u021bissinem le\u1e25mala-agi yugaren yal tamusni yellan di ddunit, alamma yezde\u0263 \u1e5a\u1e5bu\u1e25 n Sidi \u1e5aebbi deg-wen s lekmal.\n3:20 Sidi \u1e5aebbi ixeddem deg-nne\u0263 s tezmert-is, ye\u021b\u021bak-a\u0263-d akte\u1e5b n wayen akk i s-ne\u1e6d\u1e6dalab d wayen akk i ne\u021bxemmim ;\n3:21 ad i\u021b\u021bubarek yisem-is si l\u01e7il \u0263er l\u01e7il di tejma\u025bt n imasi\u1e25iyen akk-d \u0190isa Lmasi\u1e25 i dayem, Amin !\n4:1 Nekk yellan d aqeddac n Lmasi\u1e25, a kkun-nhu\u0263 ihi a\u021b-\u021beddum akken yeb\u0263a Sidi \u1e5aebbi mi wen-d-issawel.\n4:2 Ddut s l\u1e25enna d wannuz akk-d \u1e63\u1e63be\u1e5b, \u021bemyawit wway gar-awen s lma\u1e25ibba.\n4:3 \u1e24e\u1e5bset iman-nwen a\u021b-\u021be\u1e6d\u1e6dfem di tdukkli n \u1e5a\u1e5bu\u1e25 iqedsen, s lehna wway gar-awen.\n4:4 Yiwet n l\u01e7e\u021b\u021ba kan akk-d yiwen n \u1e5a\u1e5bu\u1e25 iqedsen i gellan, am akken da\u0263en i wen-d-issawel Sidi \u1e5aebbi \u0263er yiwen usirem kan.\n4:5 Yiwen kan i d Ssid-nne\u0263, yiwen n liman akk-d yiwen n we\u0263\u1e0das i gellan,\n4:6 yiwen n \u1e5aebbi kan i gellan, d ne\u021b\u021ba i d baba-tne\u0263 me\u1e5b\u1e5ba ; yella sennig kullec, yella ger yemdanen me\u1e5b\u1e5ba, yella da\u0263en deg-sen me\u1e5b\u1e5ba.\n4:7 Me\u025bna mkul yiwen deg-nne\u0263 te\u021b\u021bunefk-as-d \u1e5b\u1e5be\u1e25ma n Sidi \u1e5aebbi s wakken yella umur i s-d-yefka Lmasi\u1e25.\n4:8 Akken yura di tira iqedsen+ : Mi yuli \u0263er igenwan, + yewwi yid-es ime\u1e25bas, ifka-d tikciwin i yemdanen.+ +\n4:9 D acu i d lme\u025bna : \u00ab Yuli \u0263er igenni ? \u00bb Ayagi, ye\u025bni : uqbel ad yali Lmasi\u1e25 \u0263er igenni, i\u1e63ubb \u0263er imukan lqayen n ddaw tmurt.\n4:10 D win akken i\u1e63ubben, i gulin da\u0263en \u0263er igenwan iwakken ad ye\u025bme\u1e5b ddunit me\u1e5b\u1e5ba ;\n4:11 d ne\u021b\u021ba i d-ife\u1e5bqen tukciwin i yemdanen : kra yefka-yasen ad ilin d \u1e5b\u1e5busul, kra d lenbiya, kra nni\u1e0den ad becc\u1e5ben lexba\u1e5b n lxi\u1e5b, wiya\u1e0d d imeksawen n tejma\u025bt n imasi\u1e25iyen ne\u0263 d wid yesselmaden agdud n Sidi \u1e5aebbi.\n4:12 S tukciwin-agi, Sidna \u0190isa ad iheggi wid yexta\u1e5b Sidi \u1e5aebbi, ad s\u025bun tazmert s wayes ara xedmen cc\u0263el i sen-d-ifka iwakken a\u021b-\u021begmu tejma\u025bt n watmaten yellan d l\u01e7e\u021b\u021ba n Lmasi\u1e25 ;\n4:13 s wakka a ndukkel deg yiwen n liman akk-d yiwet n tmusni \u0263ef wayen ye\u025bnan Mmi-s n Sidi \u1e5aebbi, alamma nu\u0263al d imeqqranen di liman, imiren s tdukli-nne\u0263 a nawe\u1e0d \u0263er lekmal yellan di Lmasi\u1e25.\n4:14 S wakka ur ne\u021b\u0263imi ara d arrac ime\u1e93yanen i \u021b\u021bawint lemwaji, i gekkat wa\u1e0du \u0263er mkul l\u01e7iha, iwumi \u021bkellixen yemdanen s t\u1e25ila-nsen d uselmed-nsen.\n4:15 Me\u025bna m'ara d-nini tide\u021b s lma\u1e25ibba, a nennerni di kullec di tikli-nne\u0263 akk-d Lmasi\u1e25 yellan d aqe\u1e5b\u1e5buy n tejma\u025bt n watmaten.\n4:16 L\u01e7e\u021b\u021ba tebna s le\u025b\u1e0dam i cuddent lemfa\u1e63el yal yiwen deg umkan-is ; s Lmasi\u1e25 i te\u021b\u021bim\u0263u\u1e5b te\u021bnerni di lma\u1e25ibba m'ara xeddmen le\u025b\u1e0dam cc\u0263el-nsen akken ilaq.\n4:17 Atah ihi wayen i d-nni\u0263 d wayen i d-qqa\u1e5be\u0263 s yisem n Lmasi\u1e25 : ur \u021b\u025bicit ara am wid ur nessin ara Sidi \u1e5aebbi, imi nutni ttaba\u025ben ixemmimen-nsen ur nes\u025bi lme\u025bna.\n4:18 Lefhama-nsen i\u0263umm-i\u021b \u1e6d\u1e6dlam, sbe\u025bden iman-nsen \u0263ef tudert i d i\u021b\u021bak Sidi \u1e5aebbi axa\u1e6der jehlen, qqu\u1e5ben wulawen-nsen.\n4:19 Ur \u021bset\u1e25in ur \u021bne\u1e25camen, xeddmen anagar le\u025b\u1e5bu\u1e5b yerna ur s\u025bin ara leqni\u025ba.\n4:20 Me\u025bna kunwi, ma\u010d\u010di d ayagi i tlemdem \u0263ef wayen ye\u025bnan Lmasi\u1e25.\n4:21 Ma yella d \u1e63\u1e63e\u1e25 teslam yis yerna slemden awen tide\u021b ye\u025bnan Lmasi\u1e25,\n4:22 e\u01e7\u01e7et ihi tikli d l\u025beqliyat-nwen tiqdimin i ssefsadent ccehwat-nni ye\u021b\u0263u\u1e5b\u1e5bun,\n4:23 iwakken a\u021b-\u021bes\u025bum lefhama tajdi\u1e6d i d-ye\u021b\u021bak \u1e5a\u1e5bu\u1e25 iqedsen ;\n4:24 a\u021b-\u021bu\u0263alem d imdanen ijdiden akken yella di leb\u0263i n Sidi \u1e5aebbi, iwakken a\u021b-\u021beddum deg webrid n l\u1e25eqq akk-d \u1e63\u1e63fa i \u0263er tessufu\u0263 tide\u021b.\n4:25 Daymi, x\u1e0dut i lekdeb, ilaq mkul yiwen deg-wen ad immeslay s tide\u021b i l\u0263i\u1e5b-is, axa\u1e6der d le\u025b\u1e0dam n yiwet n l\u01e7e\u021b\u021ba i nella.\n4:26 Ma yella terfam ur dennbet ara, ilaq a wen-yekkes wurrif uqbel ad ye\u0263li yi\u1e6dij ;\n4:27 ur \u021b\u021ba\u01e7at ara abrid i Cci\u1e6dan ad ikcem ulawen nwen.\n4:28 Win yellan ye\u021b\u021bakar ilaq ad ye\u01e7\u01e7 tuker\u1e0da, ad ixdem s i\u0263allen-is iwakken a d-isewwe\u1e5b a\u0263\u1e5bum-is s le\u1e25lal, s wakka ad izmir ad i\u025biwen wid ye\u1e25wa\u01e7en.\n4:29 Ur ilaq ara a d-iffe\u0263 yir wawal seg imi nwen, me\u025bna init-ed kan imeslayen i\u1e63el\u1e25en s wayes ara sfaydin wid ara sen-islen yerna ad nnernin di liman.\n4:30 Ur sse\u1e25zanet ara \u1e5a\u1e5bu\u1e25 iqedsen, axa\u1e6der yis i kkun-i\u1e0dbe\u025b Sidi \u1e5aebbi i wass i deg ara innekmal leslak-nwen.\n4:31 Ekkset si gar-awen : dd\u0263el, ta\u025bdawit, zz\u025baf, urrif, le\u025bya\u1e0d, rregmat d wayen akk n diri.\n4:32 Ilit d i\u1e25ninen msama\u1e25et wway gar-awen, akken i wen-isemme\u1e25 Sidi \u1e5aebbi s Lmasi\u1e25.\n5:1 Cbut Sidi \u1e5aebbi baba-twen imi tellam d arraw-is e\u025bzizen ;\n5:2 ddut di tudert-nwen s le\u1e25mala am akken i \u0263-i\u1e25emmel Lmasi\u1e25 i gefkan iman-is \u0263ef ddemma-nne\u0263 d asfel i Sidi \u1e5aebbi, am lwe\u025bda yes\u025ban rri\u1e25a i\u025be\u01e7ben i Sidi \u1e5aebbi.\n5:3 Kunwi s imasi\u1e25iyen x\u1e0dut i zzna, i wayen ur ne\u1e63fi ara, i \u1e6d\u1e6dme\u025b ; ayagi me\u1e5b\u1e5ba ur ilaq ara a d-i\u021bwabdar gar-awen ulamma d abdar ;\n5:4 ur qebb\u1e25et, ur d-qqa\u1e5bet imeslayen ur nes\u025bi lme\u025bna, ur stehzayet ara \u0263ef wiya\u1e0d, ayagi d ayen n diri ; me\u025bna d imeslayen ara i\u1e25emden Sidi \u1e5aebbi i glaqen a d-ff\u0263en seg imi-nwen ;\n5:5 axa\u1e6der ilaq a\u021b-\u021be\u1e93rem belli wid izennun ne\u0263 wid ixeddmen ayen ur ne\u1e63fi akk-d wid ur nesteqni\u025b ara, imi wid ur nesteqni\u025b ara cban wid i\u025bebbden lme\u1e63nu\u025bat, widak-agi me\u1e5b\u1e5ba ur \u021bekkayen ara di tgeldit n Lmasi\u1e25 akk-d Sidi \u1e5aebbi.\n5:6 \u1e24adret ad yili win ara kkun-ikellxen s lehdu\u1e5b ur nes\u025bi lme\u025bna ; axa\u1e6der \u0263ef wayagi i d-i\u021brusu wurrif n Sidi \u1e5aebbi \u0263ef wid i t i\u021b\u025bu\u1e63un.\n5:7 \u0194u\u1e5b-wat ad yili wayen ara kkun icerken yid-sen.\n5:8 \u021a-\u021bide\u021b, zik-nni tellam di \u1e6d\u1e6dlam, me\u025bna tura s tikli nwen deg ubrid n Lmasi\u1e25, teff\u0263em \u0263er tafat. Ddut ihi di tafat imi tellam d arraw n tafat ;\n5:9 axa\u1e6der tafat te\u021b\u021bawi \u0263er wayen yelhan, \u0263er l\u1e25eqq akk-d tide\u021b.\n5:10 Meyyzet a\u021b-\u021bfehmem ayen i\u025be\u01e7ben i Sidi \u1e5aebbi ;\n5:11 ur \u021bekkayet ara di lec\u0263al n \u1e6d\u1e6dlam ur nes\u025bi lfayda, me\u025bna kecfet-ed lec\u0263al-agi \u0263er tafat.\n5:12 S tide\u021b ayen xeddmen imdanen agi s tuffra, d l\u1e25ecma a t-id-nebder ;\n5:13 lame\u025bna m'ara d-nekcef ayen xeddmen, lec\u0263al-nsen \u021bbanen-d di tafat imi anda tella tafat, kullec ye\u021bban di tafat.\n5:14 Axa\u1e6der yura : Ddekwal a ke\u010d\u010d ye\u1e6d\u1e6dsen, ekker-ed si ger lmegtin, imiren a d-tec\u1e5beq fell-ak tafat n Lmasi\u1e25.+\n5:15 Ihi \u1e25adret mli\u1e25 tikli-nwen, ur le\u1e25\u1e25ut ara am imehbal, me\u025bna am wid it\u025beqlen ;\n5:16 fa\u1e5bset lweqt axa\u1e6der ussan d ixedda\u025ben.\n5:17 Daymi, ur smuhbulet ara, me\u025bna nadit a\u021b-\u021bissinem leb\u0263i n Sidi \u1e5aebbi.\n5:18 Ur sekk\u1e5bet ara, axa\u1e6der ssek\u1e5ban yessufu\u0263 i webrid, lame\u025bna \u01e7\u01e7et \u1e5a\u1e5bu\u1e25 iqedsen ad i\u010d\u010da\u1e5b ulawen-nwen ;\n5:19 \u021bemse\u01e7hadet wway-gar-awen s isefra n Zabu\u1e5b, cnut \u0263ef Sidi \u1e5aebbi, \u021b\u1e25emmidet-e\u021b s wulawen-nwen.\n5:20 \u1e24emmdet Sidi \u1e5aebbi baba-tne\u0263 \u0263ef kullec, di mkul lweqt, s yisem n Sidna \u0190isa Lmasi\u1e25.\n5:21 \u021aemqada\u1e5bet wway gar-awen i lmend n Lmasi\u1e25.\n5:22 A tilawin, \u1e0du\u025bemt irgazen-nkunt am akken i glaq a\u021b \u021b\u1e0du\u025bemt Sidi \u1e5aebbi !\n5:23 Axa\u1e6der argaz d aqe\u1e5b\u1e5buy \u0263ef tme\u1e6d\u1e6dut-is, am akken yella Lmasi\u1e25 d aqe\u1e5b\u1e5buy \u0263ef tejma\u025bt n imasi\u1e25iyen ; Lmasi\u1e25 d amsellek n tejma\u025bt-agi yellan d l\u01e7e\u021b\u021ba-s.\n5:24 Am akken i te\u021b\u1e0du\u025bu tejma\u025bt n imasi\u1e25iyen Lmasi\u1e25, tilawin da\u0263en ilaq ad \u1e0du\u025bent irgazen-nsent di kullec.\n5:25 Ay irgazen, mkul yiwen deg-wen ilaq ad i\u1e25emmel tame\u1e6d\u1e6dut-is akken i\u1e25emmel Lmasi\u1e25 tajma\u025bt n imasi\u1e25iyen yerna isebbel tudert-is fell-as ;\n5:26 s we\u0263\u1e0das n waman d wawal n Sidi \u1e5aebbi yerra-\u021b te\u1e63fa iwakken a \u021b-iqeddem i Sidi \u1e5aebbi ;\n5:27 yeb\u0263a a d-tban tejma\u025bt-agi n imasi\u1e25iyen zdat-es, te\u1e63fa mbla ccwami, mbla akmac, mbla l\u025bib, a\u021b-\u021bili \u021b \u021bimqeddest, ulac deg-s ayen ara s-d-nessukkes.\n5:28 Akken da\u0263en, irgazen ilaq ad \u1e25emmlen tilawin-nsen am l\u01e7e\u021b\u021bat-nsen. Win i\u1e25emmlen tame\u1e6d\u1e6dut-is d iman-is i g\u1e25emmel.\n5:29 Ulac win ike\u1e5bhen l\u01e7e\u021b\u021ba-s, lame\u025bna i\u021b\u025beyyic-i\u021b, i\u021b\u1e25adar-i\u021b am akken i gxeddem Lmasi\u1e25 i tejma\u025bt n imasi\u1e25iyen,\n5:30 axa\u1e6der d le\u025b\u1e0dam n l\u01e7e\u021b\u021ba-s i nella ; am akken yura :\n5:31 daymi argaz ilaq ad ye\u01e7\u01e7 baba-s d yemma-s iwakken ad i\u025bic \u021b-\u021bme\u1e6d\u1e6dut-is, d\u0263a di sin yid-sen ad u\u0263alen d yiwen.\n5:32 B\u0263i\u0263 a wen-d-ini\u0263 belli ayagi d lba\u1e0dna tameqqrant ye\u025bnan Lmasi\u1e25 akk-d tejma\u025bt n imasi\u1e25iyen.\n5:33 Ihi, mkul yiwen deg-wen ilaq ad i\u1e25emmel tame\u1e6d\u1e6dut-is am yiman-is, ma \u021b-\u021bame\u1e6d\u1e6dut ilaq a\u021b-\u021bqade\u1e5b argaz-is.\n6:1 A dderya, \u1e0du\u025bet imawlan-nwen akken yeb\u0263a Sidi \u1e5aebbi, axa\u1e6der ayagi d ayen yellan d l\u1e25eqq.\n6:2 Di ccari\u025ba i d-yefka Sidi \u1e5aebbi i Sidna Musa, d wagi i d lame\u1e5b amezwaru yes\u025ban lem\u025bahda :\n6:3 Qade\u1e5b baba-k d yemma-k iwakken a\u021b-\u021b\u025bice\u1e0d di lehna yerna ad yi\u0263zif le\u025bme\u1e5b-ik di ddunit.+\n6:4 Ma d kunwi ay imawlan, ur sserfayet ara dderya-nwen, me\u025bna \u1e5bebbit-\u021ben akken i kkun-id-iwe\u1e63\u1e63a Sidi \u1e5aebbi.\n6:5 Ay aklan, \u1e0du\u025bet im\u025bellmen n ddunit-agi, s leqde\u1e5b, s wul ye\u1e63fan d neyya am akken d Lmasi\u1e25 i te\u021b\u1e0du\u025bum .\n6:6 Ayagi ur t-xeddmet ara kan m'ara kkun-\u021b\u025bassan am akken te\u021bnadim a\u021b-\u021b\u025be\u01e7bem i yemdanen, lame\u025bna ilit am iqeddacen n Lmasi\u1e25 i gxeddmen leb\u0263i n Sidi \u1e5aebbi seg ul.\n6:7 Qedcet fell-asen am akken d Lmasi\u1e25 s yiman-is i \u0263ef tqeddcem ma\u010d\u010di \u0263ef yemdanen.\n6:8 Te\u1e93ram belli win ixedmen lxi\u1e5b, ama d akli ne\u0263 d a\u1e25e\u1e5b\u1e5bi, a t-yaf \u0263er Sidi \u1e5aebbi.\n6:9 Ma d kunwi ay im\u025bellmen, xedmet da\u0263en i iqeddacen-nwen akken yella di leb\u0263i n Sidi \u1e5aebbi ; ur xeddmet ara deg-sen lba\u1e6del, imi te\u1e93ram belli am\u025bellem-nsen yellan da\u0263en d am\u025bellem-nwen, deg igenwan i gella yerna ne\u021b\u021ba ur ixeddem ara lxilaf ger yemdanen.\n6:10 S\u01e7ehdet ihi iman-nwen s tezmert tameqqrant n Sidi \u1e5aebbi.\n6:11 Refdet lesla\u1e25 me\u1e5b\u1e5ba i d-ye\u021b\u021bak Sidi \u1e5aebbi, iwakken ur kkun-i\u0263elleb ara Cci\u1e6dan s t\u1e25ila-ines ;\n6:12 axa\u1e6der imen\u0263i-nne\u0263 ma\u010d\u010di akk d yemdanen i gella, lame\u025bna ne\u021bna\u0263 \u021b-\u021bgeldiwin akk-d tnezmarin n \u1e6d\u1e6dlam i\u1e25ekmen di ddunit-agi, akk-d le\u1e5bwa\u1e25 imcumen yellan deg igenwan.\n6:13 \u0194ef wayagi, refdet lesla\u1e25 n Sidi \u1e5aebbi, iwakken a\u021b-\u021bizmirem a\u021b-\u021bqablem tiswi\u025bin iwe\u025b\u1e5ben, s wakka \u0263er taggara n umenu\u0263 a kkun-id-yaf l\u1e25al mazal tbeddem.\n6:14 Heggit iman-nwen am i\u025bsek\u1e5biwen, beggset tide\u021b, lset l\u1e25eqq \u0263ef yidmaren-nwen am tidemmar n wuzzal.\n6:15 S\u025but zzwa\u1e5ba am warkasen deg yida\u1e5b\u1e5ben-nwen, daymen theggam i ubecce\u1e5b n lexba\u1e5b n lxi\u1e5b.\n6:16 Di yal taswi\u025bt, s\u025but liman am tseddarit s wayes ara tizmirem a\u021b-\u021bsensem isufa n tmes n Cci\u1e6dan ;\n6:17 cuddet leslak am tcacit n wuzzal \u0263ef wuqe\u1e5b\u1e5buy-nwen, sxedmet asekkin n \u1e5a\u1e5bu\u1e25 iqedsen yellan d awal n Sidi \u1e5aebbi.\n6:18 Di yal taswi\u025bt de\u025b\u025but \u0263er Sidi \u1e5aebbi s \u1e5a\u1e5bu\u1e25 iqedsen s yal ta\u1e93allit d u\u1e25ellel. \u0190iwzet ihi, kett\u1e5bet di t\u1e93allit, de\u025b\u025but \u0263er Sidi \u1e5aebbi \u0263ef watmaten me\u1e5b\u1e5ba ;\n6:19 de\u025b\u025but da\u0263en fell-i iwakken a yi-d-yefk Sidi \u1e5aebbi imeslayen s wayes ara becc\u1e5be\u0263 lba\u1e0dna n lexba\u1e5b n lxi\u1e5b mbla tugdi.\n6:20 \u021a\u021bucegg\u025be\u0263-d ad becc\u1e5be\u0263 lexba\u1e5b n lxi\u1e5b ; \u0263ef ddemma-s i lli\u0263 d ame\u1e25bus ; d\u025but ihi iwakken a t-becc\u1e5be\u0263 akken ilaq, mbla tugdi.\n6:21 B\u0263i\u0263 a\u021b-\u021be\u1e93rem ula d kunwi ayen i yi-ye\u025bnan d wayen i xeddme\u0263, daymi i n-cegg\u025be\u0263 gma-tne\u0263 ame\u025bzuz Tucik iqeddcen seg ul \u0263ef Sidna \u0190isa, d ne\u021b\u021ba ara kkun-is\u025belmen \u0263ef kullec.\n6:22 Cegg\u025be\u0263-t-in iwakken a\u021b-\u021be\u1e93rem ayen akk i \u0263-i\u025bnan, yerna ad isse\u01e7hed ulawen-nwen.\n6:23 Ay atmaten, lehna, le\u1e25mala akk-d liman a wen-d-\u021b\u021bunefken s \u0263u\u1e5b Sidi \u1e5aebbi baba-tne\u0263 akk-d Sidna \u0190isa Lmasi\u1e25.\n6:24 \u1e5a\u1e5be\u1e25ma n Sidi \u1e5aebbi a d-ters \u0263ef wid akk i\u1e25emmlen Sidna \u0190isa Lmasi\u1e25 s lma\u1e25ibba ur nfennu !","title":"Kabyle Bible (NT): Ephesians","type":"page"}