{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/gal.htm","path":"bib/wb/kab/gal.htm","source_url":"https://sacred-texts.com/bib/wb/kab/gal.htm","text":"1:1 Nekk Bulus, yellan d \u1e5b\u1e5basul, ma\u010d\u010di s ufus ne\u0263 s leb\u0263i n yemdanen, lame\u025bna s leb\u0263i n \u0190isa Lmasi\u1e25 akk-d Baba \u1e5aebbi i t-id isse\u1e25yan si ger lmegtin.\n1:2 Uri\u0263 tab\u1e5ba\u021b-agi nekk d watmaten me\u1e5b\u1e5ba yellan yid-i, i tejmuya\u025b n watmaten n tmurt n Galasya :\n1:3 \u1e5b\u1e5be\u1e25ma d lehna a wen-d-\u021b\u021bunefkent s \u0263u\u1e5b Baba-tne\u0263 \u1e5aebbi akk-d Sidna \u0190isa Lmasi\u1e25.\n1:4 Lmasi\u1e25 isebbel iman-is \u0263ef ddnubat-nne\u0263, iwakken a \u0263-isellek si yir l\u01e7il-agi, s leb\u0263i n Baba-tne\u0263 \u1e5aebbi.\n1:5 I ne\u021b\u021ba tamanegt si l\u01e7il \u0263er l\u01e7il ! Amin !\n1:6 Wehme\u0263 imi twexx\u1e5bem s lem\u0263awla \u0263ef win i wen-d-issawlen s \u1e5b\u1e5be\u1e25ma n Lmasi\u1e25, iwakken a\u021b-\u021b\u1e0def\u1e5bem lexba\u1e5b n lxi\u1e5b nni\u1e0den.\n1:7 Ur wen-d-nni\u0263 ara akka am akken yella lexba\u1e5b n lxi\u1e5b nni\u1e0den , lame\u025bna qqa\u1e5be\u0263-awen-d akka, axa\u1e6der llan kra l\u0263aci i kkun-icewwlen yerna b\u0263an ad s\u025bewjen lexba\u1e5b n lxi\u1e5b ye\u025bnan Lmasi\u1e25.\n1:8 ?as a lukan d nukni, ne\u0263 d lmelk ara d-yasen seg igenni a wen-d ibbecce\u1e5b lexba\u1e5b n lxi\u1e5b yemxalafen \u0263ef win i wen-d-nbecce\u1e5b si tazwara, atan ad ye\u021bwan\u025bel !\n1:9 Nenna-yawen-t-id si zik, a s-d \u025biwde\u0263 tura : ye\u021bwan\u025bel win ara wen-d ibecc\u1e5ben lexba\u1e5b n lxi\u1e5b yemxalafen \u0263ef win i tqeblem !\n1:10 Ihi tura, e\u025bni d lemziya n yemdanen i \u021bnadi\u0263 ? Xa\u1e6di ! D lemziya n Sidi \u1e5aebbi i \u021bnadi\u0263. Ne\u0263 e\u025bni \u021bnadi\u0263 ad \u025be\u01e7be\u0263 i yemdanen ? Lemmer i mazal \u021bnadi\u0263 ad \u025be\u01e7be\u0263 i yemdanen, tili ur \u021b\u021billi\u0263 ara d aqeddac n Lmasi\u1e25.\n1:11 A wen-d-ini\u0263 ay atmaten belli lexba\u1e5b-agi n lxi\u1e5b i wen-d-becc\u1e5be\u0263 ma\u010d\u010di s \u0263u\u1e5b wemdan i d-yekka ;\n1:12 axa\u1e6der, nekk s yiman-iw ma\u010d\u010di d amdan i yi-t-id-issaw\u1e0den ne\u0263 i yi t-islemden, lame\u025bna d Sidna \u0190isa Lmasi\u1e25 i yi-t-id-iwe\u1e25\u1e25an.\n1:13 Teslam \u0263ef tikli-inu n zik asmi lli\u0263 ttaba\u025be\u0263 ddin n wat Is\u1e5bail ; teslam amek i qeh\u1e5be\u0263 tajma\u025bt n imasi\u1e25iyen d wamek b\u0263i\u0263 a ten-snegre\u0263.\n1:14 Asmi lli\u0263 \u1e0def\u1e5be\u0263 ddin d le\u025bwayed n wat Is\u1e5bail, ife\u0263 akk tizyiwin-iw akk-d wid n la\u1e63el-iw, axa\u1e6der \u1e6d\u1e6dfe\u0263 di le\u025bwayed n lejdud-iw akken ilaq.\n1:15 Lame\u025bna s \u1e5b\u1e5be\u1e25ma-s, Sidi \u1e5aebbi ixta\u1e5b-iyi-d uqbel a d-lale\u0263 yerna yessawel-iyi-d iwakken ad qedce\u0263 fell-as.\n1:16 Asmi i yi-d-ibeggen Sidi \u1e5aebbi Mmi-s iwakken ad becc\u1e5be\u0263 lexba\u1e5b n lxi\u1e5b i t-i\u025bnan ger wid ur nelli ara n wat Is\u1e5bail, ur caw\u1e5be\u0263 ula d yiwen ;\n1:17 yerna ur uli\u0263 ara \u0263er temdint Lquds \u0263er wid yellan d \u1e5b\u1e5busul uqbel-iw, lame\u025bna \u1e5bu\u1e25e\u0263 \u0263er tmurt n wa\u025b\u1e5baben ; syenna u\u0263ale\u0263-ed da\u0263en \u0263er temdint n Dimacq.\n1:18 Mi \u025beddan tlata iseggasen, uli\u0263 \u0263er temdint Lquds iwakken ad issine\u0263 Bu\u1e6drus, qqime\u0263 \u0263u\u1e5b-es xemse\u1e6d\u1e6dac wussan.\n1:19 Lame\u025bna ur \u1e93ri\u0263 ula d yiwen nni\u1e0den si \u1e5b\u1e5busul, anagar Ye\u025bqub, gma-s n Ssid-nne\u0263.\n1:20 Ayen i wen-d-uri\u0263 akka \u021b-\u021bide\u021b, zdat \u1e5aebbi ur skiddibe\u0263 ara.\n1:21 Syenna, \u1e5bu\u1e25e\u0263 \u0263er tmura n Surya d Silisya ;\n1:22 kra wayen kki\u0263 dinna, imasi\u1e25iyen n tejmuya\u025b n tmurt n Yahuda le\u025bme\u1e5b \u1e93rin udem-iw.\n1:23 Slan kan qqa\u1e5ben fell-i : win akken yellan i\u021bqehhi\u1e5b deg-nne\u0263, atan tura i\u021bbecci\u1e5b liman i geb\u0263a zik-nni a t-issenger.\n1:24 D\u0263a \u021b\u1e25emmiden \u1e5aebbi \u0263ef ddemma-w.\n2:1 Mi \u025beddan \u1e5bbe\u025b\u1e6dac iseggasen, \u025bawde\u0263 uli\u0263 \u0263er temdint n Lquds akk-d Barnabas, wwi\u0263 da\u0263en yid-i gma-tne\u0263 Tit.\n2:2 Uli\u0263, axa\u1e6der d Sidi \u1e5aebbi i yi-t-id yum\u1e5ben deg uwe\u1e25\u1e25i. Sfehme\u0263-asen lexba\u1e5b n lxi\u1e5b i \u021bbecci\u1e5be\u0263 ger wid ur nelli ara n wat Is\u1e5bail ; mli\u0263-asen-t we\u1e25\u1e25ed-sen i yimeqqranen n tejma\u025bt iwakken ayen xedme\u0263 armi d ass-a ur i\u021b\u1e5bu\u1e25 ara ba\u1e6del.\n2:3 Tit, a\u1e5bfiq-iw yellan d ayunani, yiwen ur i\u1e25ettem fell-as ad i\u1e0dhe\u1e5b,\n2:4 \u0263as akken llan yir watmaten i d-ikecmen gar-ane\u0263 s tuffra, b\u0263an a t-\u1e25e\u1e5bsen ad i\u1e0dhe\u1e5b. Kecmen-d gar-ane\u0263 iwakken ad walin tilelli i nes\u025ba di tikli-nne\u0263 akk-d \u0190isa Lmasi\u1e25, b\u0263an a \u0263-rren d aklan-nsen.\n2:5 Ula d yiwet n tikkelt ur nekni zdat-sen, iwakken tide\u021b yellan di lexba\u1e5b n lxi\u1e5b a\u021b-\u021beqqim gar-awen.\n2:6 Ma d wid yes\u025ban lqima gar-awen, [ ur iyi-tewqi\u025b ara lme\u025bna d acu i llan zik, axa\u1e6der Sidi \u1e5aebbi ur ixeddem ara lxilaf ger yemdanen ] ; wid-nni yes\u025ban lqima ur \u1e25e\u021b\u021bmen ara fell-i ad xedme\u0263 ayen nni\u1e0den.\n2:7 Lame\u025bna walan belli Sidi \u1e5aebbi iwekkel-iyi iwakken ad becc\u1e5be\u0263 lexba\u1e5b n lxi\u1e5b i wid ur nelli ara n wat Is\u1e5bail, am akken i gcegge\u025b Bu\u1e6drus ad ibecce\u1e5b lexba\u1e5b n lxi\u1e5b i wat Is\u1e5bail.\n2:8 Axa\u1e6der, Sidi \u1e5aebbi i gerran Bu\u1e6drus d \u1e5b\u1e5basul n wid yellan n wat Is\u1e5bail, yerra-yi ula d nekk d \u1e5b\u1e5basul n wid ur nelli ara n wat Is\u1e5bail.\n2:9 Ye\u025bqub, Bu\u1e6drus akk-d Yu\u1e25enna ye\u021bwa\u1e25esben d imeqqranen n tejma\u025bt, set\u025be\u1e5bfen belli d Sidi \u1e5aebbi i yi-d ifkan cc\u0263el-agi, d\u0263a selmen fell-ane\u0263 afus deg ufus iwakken a \u0263-d-beggnen belli qeblen ayagi. Imiren nemsefham : nutni ad \u1e5bu\u1e25en ad becc\u1e5ben i wat Is\u1e5bail, ma d nekk akk-d Barnabas, a n\u1e5bu\u1e25 a nbecce\u1e5b i wid ur nelli ara n wat Is\u1e5bail ;\n2:10 acu kan, we\u1e63\u1e63an-a\u0263 iwakken ur nte\u021b\u021bu ara igellilen n tejmuya\u025b-nsen yellan di temdint n Lquds, ayagi ur stehza\u0263 ara deg-s, xedme\u0263-t seg-wul.\n2:11 Asmi i d-yusa Bu\u1e6drus \u0263er temdint n Antyuc, quble\u0263-t \u0263er wudem-is zdat l\u0263aci, axa\u1e6der ye\u0263le\u1e0d.\n2:12 Uqbel a d-asen kra n yemdanen i d-icegge\u025b Ye\u025bqub, yella ite\u021b\u021b akk-d watmaten ur nelli ara n wat Is\u1e5bail, lame\u025bna akken kan i d-ww\u1e0den, i\u1e25bes lmakla yid-sen iwexxe\u1e5b fell-asen, axa\u1e6der yuggad wid i\u1e6d\u1e6dfen di l\u025baddat n wat Is\u1e5bail.\n2:13 Atmaten nni\u1e0den n wat Is\u1e5bail xedmen am ne\u021b\u021ba, wexx\u1e5ben ula d nutni, yu\u0263al armi ula d Barnabas i\u025buned-iten.\n2:14 Mi wala\u0263 ur teddun ara akken ilaq am akken i d-yeqqa\u1e5b lexba\u1e5b n lxi\u1e5b , nni\u0263 i Bu\u1e6drus zdat l\u0263aci me\u1e5b\u1e5ba : ma yella ke\u010d\u010d yellan seg wat Is\u1e5bail te\u021b\u025bice\u1e0d am wid ur nelli ara n wat Is\u1e5bail, amek ara t\u1e25e\u1e5b\u1e63e\u1e0d wid ur nelli ara n wat Is\u1e5bail ad \u025bicen am wat Is\u1e5bail ?\n2:15 Nukni ur nelli ara d imednuben am le\u01e7nas nni\u1e0den, la\u1e63el-nne\u0263 seg wat Is\u1e5bail.\n2:16 Lame\u025bna ne\u1e93ra belli amdan ye\u021b\u021bu\u0263al d a\u1e25eqqi zdat Sidi \u1e5aebbi s liman-ines di \u0190isa Lmasi\u1e25, ma\u010d\u010di imi gxeddem ayen i d-teqqa\u1e5b ccari\u025ba ; daymi ula d nukni numen s \u0190isa Lmasi\u1e25, iwakken a nu\u0263al d i\u1e25eqqiyen zdat Sidi \u1e5aebbi s liman di \u0190isa Lmasi\u1e25, ma\u010d\u010di imi nxeddem ayen i d-teqqa\u1e5b ccari\u025ba n Musa. Axa\u1e6der ula d yiwen ur izmir ad yu\u0263al d a\u1e25eqqi zdat \u1e5aebbi imi i gettaba\u025b ccari\u025ba n Musa.\n2:17 Nukni ne\u021bnadi a nu\u0263al d i\u1e25eqqiyen s liman di Lmasi\u1e25 ; ma nufa iman-nne\u0263 d imednuben ula d nukni am le\u01e7nas nni\u1e0den, e\u025bni d Lmasi\u1e25 i \u0263-i\u021b\u021bawin \u0263er ddnub ? Xa\u1e6di !\n2:18 Axa\u1e6der ma u\u0263ale\u0263 \u0263er ccari\u025ba nni i \u01e7\u01e7i\u0263, ihi rri\u0263 iman-iw d am\u025ba\u1e63i ;\n2:19 \u0263ef wayen ye\u025bnan ccari\u025ba aql-iyi mmute\u0263, yerna d ne\u021b\u021bat i yi-wwin \u0263er lmut ; ayagi yed\u1e5ba-d iwakken ad s\u025bu\u0263 tudert di Sidi \u1e5aebbi ; aql-iyi \u021bwasemm\u1e5be\u0263 \u0263ef wumidag akk-d Lmasi\u1e25.\n2:20 Tura ma\u010d\u010di d nekk i ge\u021b\u021bidiren, d Lmasi\u1e25 i ge\u021b\u021bidiren deg-i ; axa\u1e6der tudert-iw di ddunit, \u021b\u025bice\u0263-\u021b s liman di Mmi-s n Sidi \u1e5aebbi i yi-\u1e25emmlen yerna isebbel iman-is fell-i.\n2:21 Ur sse\u0263laye\u0263 ara lqima n \u1e5b\u1e5be\u1e25ma n Sidi \u1e5aebbi, axa\u1e6der ma nezmer a nu\u0263al d i\u1e25eqqiyen zdat \u1e5aebbi s ccari\u025ba n Musa, ihi Lmasi\u1e25 yemmut \u0263ef wulac !\n3:1 Ay at Galasya ur nessin le\u1e63la\u1e25 nsen ! Anwa i kkun-ise\u1e25\u1e25ren kunwi iwumi i d-nessefhem akken ilaq lmut n \u0190isa Lmasi\u1e25 \u0263ef wumidag ?\n3:2 ?ef wayagi kan i b\u0263i\u0263 a kkun steqsi\u0263 : amek i wen-d-i\u021b\u021bunefk \u1e5a\u1e5bu\u1e25 iqedsen, imi i txeddmem ayen i d-teqqa\u1e5b ccari\u025ba ne\u0263 imi teslam yerna tumnem s lexba\u1e5b n lxi\u1e5b n Lmasi\u1e25 ?\n3:3 E\u025bni ixu\u1e63\u1e63-ikkun le\u025bqel ? Amek, di tazwara te\u021b\u021beklem \u0263ef \u1e5a\u1e5bu\u1e25 iqedsen, tura teb\u0263am a\u021b-\u021be\u021b\u021beklem \u0263ef yiman-nwen ?\n3:4 E\u025bni ayen akk i ten\u025be\u021b\u021babem i\u1e5bu\u1e25 ba\u1e6del ? Ur \u1e25si\u0263 ara i\u1e5bu\u1e25 ba\u1e6del !\n3:5 Win i wen-d-ifkan \u1e5a\u1e5bu\u1e25 iqedsen, ixeddmen lbe\u1e5bhanat gar-awen, e\u025bni ixeddem-iten imi i tettaba\u025bem ccari\u025ba ne\u0263 imi tumnem s lexba\u1e5b n lxi\u1e5b iwumi teslam ?\n3:6 Akken yura : Ib\u1e5bahim yumen s \u1e5aebbi, ye\u021bkel fell-as, daymi i t-i\u1e25seb Sidi \u1e5aebbi d a\u1e25eqqi.\n3:7 Ilaq a\u021b-\u021bfehmem ihi, wid iteddun s liman, d nutni i d arraw n tide\u021b n Sidna Ib\u1e5bahim.\n3:8 Si zik i d-ixebbe\u1e5b Sidi \u1e5aebbi di tira iqedsen belli ad yerr le\u01e7nas ur nelli ara n wat Is\u1e5bail d i\u1e25eqqiyen \u0263ef ddemma n liman nsen, mi genna i Sidna Ib\u1e5bahim lexba\u1e5b-agi n lxi\u1e5b : Le\u01e7nas me\u1e5b\u1e5ba n ddunit ad \u021b\u021bubarken yis-ek ;\n3:9 ihi kra n win yumnen s \u1e5aebbi akken yumen yis Ib\u1e5bahim, ad i\u021b\u021bubarek am ne\u021b\u021ba.\n3:10 Axa\u1e6der wid yettaba\u025ben ccari\u025ba iwakken ad \u021bwaqeblen \u0263er \u1e5aebbi, de\u025bwessu tezga fell-asen imi yura : ad i\u021bwan\u025bel kra n win yettaba\u025ben ccari\u025ba, ur nxeddem ara ayen akk yuran deg-s.\n3:11 Ula d yiwen ur izmir ad yu\u0263al d a\u1e25eqqi zdat \u1e5aebbi s ccari\u025ba, ayagi d ayen ibanen imi yura : A\u1e25eqqi ad yidir s liman.\n3:12 Abrid n ccari\u025ba d webrid n liman mxalafen, imi yura : d win ara ixedmen ayen akk i d-teqqa\u1e5b ccari\u025ba ara yes\u025bun tudert n dayem.\n3:13 Lmasi\u1e25 icufe\u025b-a\u0263-d si de\u025bwessu n ccari\u025ba, d ne\u021b\u021ba i ge\u021bwane\u025blen deg umkan-nne\u0263 ; axa\u1e6der yura : i\u021bwan\u025bel kra n win i\u021bwa\u025belqen \u0263er ttej\u1e5ba.\n3:14 Ayagi yed\u1e5ba-d iwakken s \u0190isa Lmasi\u1e25, le\u01e7nas ur nelli ara n wat Is\u1e5bail ad we\u1e5bten lba\u1e5baka i gefka Sidi \u1e5aebbi i Ib\u1e5bahim ; s liman ara \u0263-d i\u021b\u021bunefk \u1e5a\u1e5bu\u1e25 iqedsen i \u0263-iw\u025bed Sidi \u1e5aebbi.\n3:15 Ay atmaten, a wen-d-fke\u0263 lemtel yellan di l\u025baddat-nne\u0263 : m'ara yexdem yiwen le\u025bqed akken ilaq, yiwen ur izmir a t-inke\u1e5b ne\u0263 a s-yernu kra.\n3:16 Ihi, Sidi \u1e5aebbi yefka lem\u025bahda i Ib\u1e5bahim akk-d win ara d-ilalen seg-s, ( ur d-yenni ara : i wid ara d-ilalen seg-s am akken a\u1e6das i gellan ). Di tira iqedsen yura : i win ara d-ilalen seg-k ; win i \u0263ef yura wayagi, d Lmasi\u1e25.\n3:17 Atah wayen b\u0263i\u0263 a d-ini\u0263 : di tazwara Sidi \u1e5aebbi yesbedd le\u025bqed akken ilaq, ccari\u025ba i d-yusan \u1e5beb\u025ba meyya utlatin iseggasen deffir-es, ur tezmir ara a\u021b-\u021bem\u1e25u le\u025bqed-agi, ne\u0263 m'ulac a\u021b-\u021be\u0263li lqima n lem\u025bahda n Sidi \u1e5aebbi.\n3:18 Lemmer si ccari\u025ba ara new\u1e5bet leslak, acu\u0263e\u1e5b lem\u025bahda ? Axa\u1e6der s lem\u025bahda-agi i d-ibeggen Sidi \u1e5aebbi \u1e5b\u1e5be\u1e25ma-s i Ib\u1e5bahim.\n3:19 Acu\u0263e\u1e5b ihi i d-te\u021b\u021bunefk ccari\u025ba ? Te\u021b\u021bunefk-ed iwakken a d-tesbeggen belli n\u025bu\u1e63a lumu\u1e5b n Sidi \u1e5aebbi, alamma yusa-d win akken ara d ilalen si dderya n Ib\u1e5bahim iwumi d te\u021b\u021bunefk lem\u025bahda. D lmalayekkat i d-yewwin ccari\u025ba \u0263er ufus n Sidna Musa iwakken a \u021b-id-issiwe\u1e0d i yemdanen.\n3:20 Sidi \u1e5aebbi icegge\u025b-ed amdan iwakken a d-yessiwe\u1e0d ccari\u025ba i wiya\u1e0d, me\u025bna ur i\u1e25wa\u01e7 ara amdan iwakken ad isbedd le\u025bqed yid-sen.\n3:21 E\u025bni ccari\u025ba txulef lem\u025bahdat n Sidi \u1e5aebbi ? Xa\u1e6di ! Lemmer ccari\u025ba tezmer a d-tefk tudert i wemdan, tili yezmer wemdan ad yu\u0263al d a\u1e25eqqi zdat \u1e5aebbi s ccari\u025ba.\n3:22 Lame\u025bna tira iqedsen nnant-ed : ddunit me\u1e5b\u1e5ba tella seddaw tezmert n ddnub ; iwacu ? Iwakken lem\u025bahda n Sidi \u1e5aebbi a\u021b-\u021be\u021b\u021bunefk i yemdanen me\u1e5b\u1e5ba \u0263ef ddemma n liman-nsen di \u0190isa Lmasi\u1e25.\n3:23 Uqbel a d-yas lweqt i deg ara namen s Lmasi\u1e25, nella seddaw le\u1e25kum n ccari\u025ba, armi d ass i deg i d-yedhe\u1e5b webrid n liman.\n3:24 S wakka, ne\u021b\u021bu\u1e5bebba-d s ccari\u025ba armi d asmi d-yusa Lmasi\u1e25 iwakken a \u0263-yerr d i\u1e25eqqiyen zdat \u1e5aebbi s liman.\n3:25 Tura yusa-d lweqt i deg ara namen s Lmasi\u1e25, ifuk fell-ane\u0263 le\u1e25kum n ccari\u025ba.\n3:26 Axa\u1e6der tu\u0263alem akk d arraw n Sidi \u1e5aebbi s liman di \u0190isa Lmasi\u1e25.\n3:27 Kunwi akk ye\u021bwa\u0263e\u1e0dsen s yisem n Lmasi\u1e25, te\u021b\u025bicim tudert taj\u1e0di\u1e6d yellan di Lmasi\u1e25.\n3:28 Tura ulac lxilaf ger wat Is\u1e5bail d iyunaniyen, ger waklan d i\u1e25e\u1e5b\u1e5biyen, ger yergazen \u021b-\u021bilawin, axa\u1e6der kunwi akk tu\u0263alem d yiwen di \u0190isa Lmasi\u1e25.\n3:29 Yerna ma tellam d ayla n Lmasi\u1e25, aql-ikkun si dderya n Ib\u1e5bahim, wid ara iwe\u1e5bten akken i t-id-iw\u025bed Sidi \u1e5aebbi.\n4:1 Atah wayen i b\u0263i\u0263 a t-id-ini\u0263 : qqa\u1e5be\u0263-awen skud win ara iwe\u1e5bten mazal-it me\u1e93\u1e93i, ur yemxalaf ara ne\u021b\u021ba d win yellan d akli, \u0263as akken d ne\u021b\u021ba ara yu\u0263alen d bab n kullec ;\n4:2 lame\u025bna ilaq-as ad ya\u0263 awal i wid i\u021belhayen yid-es, iseddayen lec\u0263al-is, alamma yessawe\u1e0d le\u025bme\u1e5b akken i d-iwe\u1e63\u1e63a baba-s.\n4:3 Akken da\u0263en ula d nukni asmi nella me\u1e93\u1e93iyit, n\u025bac seddaw le\u1e25kum n leqwanen n ddunit,\n4:4 me\u025bna asmi i d-yewwe\u1e0d lweqt i \u0263-iwe\u025b\u025bed Sidi \u1e5aebbi, icegge\u025b-ed Mmi-s i d-ilulen si tme\u1e6d\u1e6dut, i\u025bac seddaw le\u1e25kum n ccari\u025ba,\n4:5 iwakken a d-ifdu wid yellan seddaw le\u1e25kum n ccari\u025ba, iwakken a nu\u0263al d arraw-is.\n4:6 Tura imi nu\u0263al d arraw n Sidi \u1e5aebbi, ifka-ya\u0263-d \u0263er wulawen-nne\u0263 \u1e5a\u1e5bu\u1e25 n Mmi-s s wayes i nessawal i \u1e5aebbi : \u00ab Abba \u00bb ! Ye\u025bni : a Baba !\n4:7 S wakka, ikkes fell-awen uzaglu n tkelwa, tu\u0263alem seg warraw-is ; ma tellam seg warraw-is, d kunwi ara iwe\u1e5bten ayen i wen-iw\u025bed Sidi \u1e5aebbi s \u1e5b\u1e5be\u1e25ma-ines.\n4:8 Zik-nni ur tessinem ara \u1e5aebbi yerna te\u021b\u025bebbidem lemqamat d ssada\u021b deg umkan n \u1e5aebbi.\n4:9 Lame\u025bna tura mi tessnem \u1e5aebbi, yerna ne\u021b\u021ba i\u1e25seb ikkun d arraw-is, amek armi teb\u0263am a\u021b-\u021bu\u0263alem \u0263er l\u025baddat n zik ur nes\u025bi lme\u025bna iwakken a\u021b-\u021bilim seddaw uzaglu-nsent ?\n4:10 Te\u021b\u021bakem lqima i le\u025byudat n kra wussan, kra wagguren, kra lewqat d kra yiseggasen !\n4:11 Uggade\u0263 ayen i n\u025be\u021b\u021babe\u0263 akk fell-awen i\u1e5bu\u1e25 ba\u1e6del.\n4:12 Ay atmaten di le\u025bnaya-nwen, u\u0263alet am nekkini, imi ula d nekk lli\u0263 am kunwi. Ur iyi-texdimem acemma n diri.\n4:13 Ur tecfim ara belli d lehlak i yi-\u1e6d\u1e6dfen \u0263u\u1e5b-wen mi wen-becc\u1e5be\u0263 lexba\u1e5b n lxi\u1e5b ass amezwaru.\n4:14 ?as akken lehlak-iw ye\u025bfen, ur te\u025byim deg-i, ur iyi-te\u1e25qi\u1e5bem, lame\u025bna telham yis-i am akken d lmelk n Sidi \u1e5aebbi ne\u0263 d \u0190isa Lmasi\u1e25 s yiman-is i lli\u0263.\n4:15 Anda-t lfe\u1e5b\u1e25-nni-nwen n zik ? Acu i ged\u1e5ban yid-wen ? Zemre\u0263 ad cehde\u0263 fell-awen belli, lemmer d ayen iwumi tzemrem a t-txedmem, tili tekksem-d allen-nwen iwakken a yi-tent-id-tefkem.\n4:16 E\u025bni u\u0263ale\u0263 awen tura d a\u025bdaw imi i wen-d qqa\u1e5be\u0263 tide\u021b ?\n4:17 Imdanen-agi \u021bbegginen-awen-d belli \u1e25emmlen-kkun, lame\u025bna nutni \u010d\u010du\u1e5ben \u021b-\u021bi\u1e25ila ; b\u0263an kan a kkun sbe\u025bden fell-i iwakken a ten-tetteb\u025bem nutni.\n4:18 Yelha ma ixeddem yiwen lxi\u1e5b, ma\u010d\u010di kan m'ara ili\u0263 gar-awen lame\u025bna di mkul lweqt.\n4:19 Ay arraw-iw, aql-i n\u025be\u021b\u021babe\u0263 tura da\u0263en \u0263ef ddemma-nwen am tme\u1e6d\u1e6dut ye\u1e6d\u1e6dfen addud, alamma iban-ed Lmasi\u1e25 deg-wen.\n4:20 Ac\u1e25al menna\u0263 ad ili\u0263 gar-awen di teswi\u025bt-agi i wakken a wen-d mmeslaye\u0263 akken nni\u1e0den, axa\u1e6der aql-iyi t\u1e25eyy\u1e5be\u0263 \u0263ef ddemma-nwen.\n4:21 Init-iyi-d, kunwi yeb\u0263an a\u021b-\u021bilim seddaw le\u1e25kum n ccari\u025ba, e\u025bni ur teslim ara i wayen i d-teqqa\u1e5b ccari\u025ba ?\n4:22 Atah wayen i d-teqqa\u1e5b : Sidna Ib\u1e5bahim yes\u025ba sin warraw-is, yiwen seg Ha\u01e7i\u1e5ba yellan \u021b-\u021baklit, waye\u1e0d seg Sa\u1e5ba yellan \u021b-\u021ba\u1e25e\u1e5b\u1e5bit.\n4:23 Lame\u025bna mmi-s n taklit-nni, ilul-ed s leb\u0263i n wemdan, ma d mmi-s n t\u1e25e\u1e5b\u1e5bit-nni, ilul-ed \u0263ef ddemma n lem\u025bahda n Sidi \u1e5aebbi.\n4:24 Taqsi\u1e6d-agi tes\u025ba lme\u025bna nni\u1e0den : snat n tilawin-agi \u021busemmant d sin le\u025bqud : yiwen n le\u025bqed d win n wedrar n Sinay i d-i\u021ba\u01e7\u01e7an aklan, ye\u025bni : d Ha\u01e7i\u1e5ba.\n4:25 Ha\u01e7i\u1e5ba, d adrar n Sinay yellan di tmurt n wa\u025b\u1e5baben, te\u021bmettil-ed tamdint n Lquds n tura, i gellan \u021b-\u021baklit s ne\u021b\u021bat s warraw-is.\n4:26 Lame\u025bna tamdint n Lquds yellan deg igenwan \u021b-\u021ba\u1e25e\u1e5b\u1e5bit, d ne\u021b\u021bat i d yemma-tne\u0263.\n4:27 Axa\u1e6der yura : Ef\u1e5be\u1e25 kemm a ti\u025biqe\u1e5bt ur ne\u021b\u021barew ara ! \u0190egge\u1e0d s lfe\u1e5b\u1e25 kemm ur nessin lewja\u025b n tarrawt ! Axa\u1e6der tame\u1e6d\u1e6dut ye\u021bwa\u1e25eq\u1e5ben, a\u021b-\u021bes \u025bu dderya akte\u1e5b n tin yes\u025ban argaz-is .\n4:28 Ma d kunwi ay atmaten, d arraw n lem\u025bahda i tellam am Is\u1e25aq.\n4:29 Zik-nni, win i d-ilulen s leb\u0263i n wemdan i\u021bqehhi\u1e5b win i d-ilulen s leb\u0263i n \u1e5a\u1e5bu\u1e25 n \u1e5aebbi, akka i gella l\u1e25al ar ass-a.\n4:30 Lame\u025bna d acu yuran di tira iqedsen ? Enfu taklit d mmi-s ;axa\u1e6der mmi-s n taklit ur ilaq ara ad iw\u1e5bet akk-d mmi-s n tme\u1e6d\u1e6dut ta\u1e25e\u1e5b\u1e5bit .\n4:31 Akka ay atmaten, ur nelli ara d arraw n taklit lame\u025bna d arraw n tme\u1e6d\u1e6dut ta\u1e25e\u1e5b\u1e5bit.\n5:1 \u0190isa Lmasi\u1e25 isellek-a\u0263 iwakken a nes\u025bu tilleli n tide\u021b. Ihi \u1e25erzet tilelli-agi, \u1e25adret a\u021b-\u021bu\u0263alem d aklan !\n5:2 ?esset-iyi-d ! Nekk Bulus, nni\u0263 awen-d : ma yella t\u1e0deh\u1e5bem, Lmasi\u1e25 ur kkun-infi\u025b ara.\n5:3 Yerna ad \u025bawde\u0263 a d-ini\u0263 i yal argaz i g\u1e0deh\u1e5ben, belli ilzem ad ixdem ayen akk i d-tenna ccari\u025ba.\n5:4 Kunwi ye\u021bnadin a\u021b-\u021bu\u0263alem d i\u1e25eqqiyen zdat \u1e5aebbi s ccari\u025ba, ur d-yeqqim wacemma gar-awen d Lmasi\u1e25, te\u021bwa\u1e25e\u1e5bmem si \u1e5b\u1e5be\u1e25ma n Sidi \u1e5aebbi.\n5:5 Ma d nukni, nessaram a \u0263-yerr Sidi \u1e5aebbi d i\u1e25eqqiyen zdat-es ; ayagi ne\u021b\u1e5ba\u01e7u-t s \u1e5a\u1e5bu\u1e25 iqedsen akk-d liman.\n5:6 Axa\u1e6der, di tikli-nne\u0263 akk-d \u0190isa Lmasi\u1e25, ne\u1e0dhe\u1e5b ne\u0263 ur ne\u1e0dhi\u1e5b ara, ayagi ur yes\u025bi ara azal ; ayen yes\u025ban azal, d liman i d-\u021bbegginen lec\u0263al i nxeddem s le\u1e25mala.\n5:7 Di tazwara tewwim abrid ilaqen, anwa i kkun-issuf\u0263en i webrid n tide\u021b ?\n5:8 \u1e5a\u1e5bay-agi ur d-yekki ara s \u0263u\u1e5b Sidi \u1e5aebbi i wen-d-issawlen.\n5:9 Akken qqa\u1e5ben : \u00ab Ci\u1e6d\u1e6du\u1e25 n temtunt ( i\u0263es n temtunt ) yessalay akk arukti.\u00bb\n5:10 Lame\u025bna Sidi \u1e5aebbi ihedden ul-iw fell-awen, \u021bekle\u0263 belli ur te\u021bxemmimem ara akken nni\u1e0den. Lame\u025bna win i kkun-icewwlen, akken ib\u0263u yili, a t-i\u025baqeb Sidi \u1e5aebbi.\n5:11 Lemmer mazal nehhu\u0263 ar tura \u0263ef \u1e6d\u1e6dha\u1e5ba, iwacu i yi-mazal \u021bwaqeh\u1e5be\u0263 ? Tili lexba\u1e5b i ne\u021bbecci\u1e5b \u0263ef Lmasi\u1e25 i\u021bwasemm\u1e5ben \u0263ef wumidag, ur ye\u021b\u021bili d ugur ula i yiwen.\n5:12 Wid-nni i kkun-icewwlen \u0263ef \u1e6d\u1e6dha\u1e5ba ad \u1e5bu\u1e25en ihi ad \u025begben iman-nsen.\n5:13 Ay atmaten, Sidi \u1e5aebbi ifka yawen tilelli, ur d-\u021bafet ara sebba s wayes ara txedmem s tlelli-agi leb\u0263i n tnefsit-nwen ; lame\u025bna beggnet-ed lma\u1e25ibba yellan gar-awen.\n5:14 Axa\u1e6der lame\u1e5b i gesdukklen me\u1e5b\u1e5ba ccari\u025ba d wagi : \u1e25emmel l\u0263i\u1e5b-ik am yiman-ik .\n5:15 Ma yella te\u021b\u021bemkerracem am lew\u1e25uc yerna wa ite\u021b\u021b wa, \u1e25adret iman-nwen ne\u0263 m'ulac yiwen ad issenger waye\u1e0d.\n5:16 Ddut ihi s leb\u0263i n \u1e5a\u1e5bu\u1e25 iqedsen, iwakken ur txeddmem ara leb\u0263i n tnefsit-nwen.\n5:17 Axa\u1e6der leb\u0263i n tnefsit ixulef leb\u0263i n \u1e5a\u1e5bu\u1e25 iqedsen, akken da\u0263en leb\u0263i n \u1e5a\u1e5bu\u1e25 iqedsen ixulef leb\u0263i n tnefsit ; d i\u025bdawen wway gar-asen, daymi ur tezmirem ara a\u021b-\u021bxedmem akken teb\u0263am.\n5:18 Lame\u025bna ma yella tle\u1e25\u1e25um s leb\u0263i n \u1e5a\u1e5bu\u1e25 iqedsen, atan ihi ur tellim ara seddaw le\u1e25kum n ccari\u025ba.\n5:19 Axa\u1e6der, lef\u025bayel n tnefsit \u021bbanen : zzna, le\u1e25\u1e5bam, lefsad,\n5:20 zzya\u1e5ba n lemqamat, ss\u1e25ur, lke\u1e5bh, ccwal, tismin, zz\u025baf, wid yeb\u0263an a d-kken sennig wiya\u1e0d, assex\u1e5beb, wid ife\u1e5bqen \u021b-\u021birebba\u025b,\n5:21 \u1e6d\u1e6dme\u025b, ssek\u1e5ban, at i\u025bebba\u1e0d ur nes\u025bi lqa\u025b d wayen akk i\u021bemcabin \u0263er wayagi me\u1e5b\u1e5ba. \u0190eggne\u0263-awen-d am akken i wen-d-nni\u0263 yakan : wid i gxeddmen lec\u0263al-agi ur se\u025b\u025bun ara amkan di tgelda n Sidi \u1e5aebbi.\n5:22 Lame\u025bna atan wayen i d-itekken si \u1e5a\u1e5bu\u1e25 iqedsen : le\u1e25mala, lfe\u1e5b\u1e25, lehna, \u1e63\u1e63be\u1e5b, lehhu, le\u1e25nana, liman,\n5:23 ul ye\u1e63fan, a\u0263lab n tnefsit ; e\u025bni ccari\u025ba tugi annect-agi ?\n5:24 Wid yellan n \u0190isa Lmasi\u1e25, semm\u1e5ben \u0263ef wumidag leb\u0263i n tnefsit-nsen, s ccehwat-is d umenni ines.\n5:25 Imi d \u1e5a\u1e5bu\u1e25 iqedsen i \u0263-d ifkan tudert, ilaq-a\u0263 ihi a neddu di leb\u0263i ines.\n5:26 Ur ilaq a nessim\u0263u\u1e5b iman nne\u0263, ur ilaq a ne\u021bna\u0263 ne\u0263 a ne\u021b\u021bemyasam wway-gar-ane\u0263.\n6:1 Ay atmaten, kunwi ile\u1e25\u1e25un s \u1e5a\u1e5bu\u1e25 iqedsen, ma te\u1e6d\u1e6dfem yiwen ye\u0263le\u1e0d, erret-\u021b-id \u0263er webrid s le\u1e25nana ; \u1e25adret \u0263ef yiman-nwen, axa\u1e6der tzemrem a\u021b-\u021be\u0263lim ula d kunwi deg uje\u1e5b\u1e5beb.\n6:2 ?em\u025bawanet deg unerfud n t\u025bekkmin nwen, s wakka ara t\u1e0du\u025bem ayen i d-tenna ccari\u025ba n Lmasi\u1e25.\n6:3 Ma ye\u1e25seb yiwen iman-is yes\u025ba lqima ne\u021b\u021ba ur yeswi kra, \u0263ef yiman-is i ge\u021bkellix.\n6:4 Ilaq mkul yiwen ad imeyyez tikli-ines, imiren ma yufa ayen s wayes ara izux, ad izux i yiman-is kan ma\u010d\u010di alamma imettel iman-is \u0263er wiya\u1e0d.\n6:5 Axa\u1e6der mkul yiwen ad yerfed ta\u025bkumt-is we\u1e25d-es.\n6:6 Win iwumi sselmaden awal n \u1e5aebbi ilaq ad ye\u01e7\u01e7 amur deg wayen akk yes\u025ba i win i t-isselmaden.\n6:7 ?adret a\u021b-\u021b\u0263el\u1e6dem : yiwen ur yezmir ad istehzi \u0263ef \u1e5aebbi ; ayen yezre\u025b wemdan, a t-id-imger.\n6:8 Win yettaba\u025ben leb\u0263i n tnefsit-is, a t-tessiwe\u1e0d \u0263er lmut ; ma d win iteddun s \u1e5a\u1e5bu\u1e25 iqedsen ad is\u025bu tudert n dayem.\n6:9 Ilaq a nxeddem lxi\u1e5b mbla \u025beyyu ; axa\u1e6der m'ur nefcil ara, a d-nemger m'ara d-yawe\u1e0d lweqt.\n6:10 Ihi, skud yella wamek, a nexdem lxi\u1e5b i yemdanen me\u1e5b\u1e5ba, abe\u025bda atmaten di liman !\n6:11 Walit tira-agi : s ufus-iw i wen tent-id-uri\u0263.\n6:12 Wid me\u1e5b\u1e5ba i geb\u0263an ad \u1e25e\u021b\u021bmen fell-awen \u1e6d\u1e6dha\u1e5ba, b\u0263an a d-sbeggnen iman-nsen zdat imdanen belli \u1e6d\u1e6dfen di le\u025bwayed, iwakken ur \u021bwaqehha\u1e5ben ara \u0263ef ddemma n umidag n Lmasi\u1e25.\n6:13 Widak-agi i\u1e0deh\u1e5ben, nutni s yiman nsen ur ttaba\u025ben ara ccari\u025ba ; lame\u025bna b\u0263an a\u021b-\u021b\u1e0deh\u1e5bem iwakken ad zuxxen imi \u1e25ettmen fell-awen \u1e6d\u1e6dha\u1e5ba-agi.\n6:14 Ma d nekk ur b\u0263i\u0263 ad zuxxe\u0263 s wacemma, anagar s lmut n \u0190isa Lmasi\u1e25 \u0263ef wumidag ; axa\u1e6der s lmut n Lmasi\u1e25 \u0263ef wumidag u\u0263ale\u0263 ur \u1e25sibe\u0263 ara ddunit-agi, akken da\u0263en ddunit ur iyi-te\u1e25sib ara ula d nekk.\n6:15 Axa\u1e6der ayen yes\u025ban azal, ma\u010d\u010di d \u1e6d\u1e6dha\u1e5ba, lame\u025bna \u021b-\u021balalit taj\u1e0di\u1e6d i d-itekken s \u0263u\u1e5b Sidi \u1e5aebbi.\n6:16 I wid akk iteb\u025ben abrid-agi , a sen-ini\u0263: lehna d \u1e5b\u1e5be\u1e25ma n Sidi \u1e5aebbi a wen-d \u021b\u021bunefkent i kunwi d wegdud n Sidi \u1e5aebbi me\u1e5b\u1e5ba !\n6:17 Sya \u0263er zdat, ur \u1e25wa\u01e7e\u0263 yiwen a yi-isse\u1e25zen ; axa\u1e6der ccwami yellan di l\u01e7e\u021b\u021ba-w \u021bbegginent-ed belli d aqeddac n Sidna \u0190isa i lli\u0263.\n6:18 Ay atmaten, \u1e5b\u1e5be\u1e25ma n Ssid-nne\u0263 \u0190isa Lmasi\u1e25 a\u021b-\u021bili yid-wen me\u1e5b\u1e5ba ! Amin !","title":"Kabyle Bible (NT): Galatians","type":"page"}