{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/heb.htm","path":"bib/wb/kab/heb.htm","source_url":"https://sacred-texts.com/bib/wb/kab/heb.htm","text":"1:1 Zik-nni, ac\u1e25al iberdan i d-ihde\u1e5b Sidi \u1e5aebbi seg yimi n lenbiya s \u021bebcirat yemxalafen ;\n1:2 ma deg ussan-agi yellan d ussan ineggura, yemmeslay-a\u0263-d s Mmi-s, yerra kullec ger ifassen-is, yis i d-ixleq ddunit me\u1e5b\u1e5ba.\n1:3 D ne\u021b\u021ba i d-isbeggnen ccbiha n tide\u021b akk-d tmanegt tameqqrant n Sidi \u1e5aebbi akken tella, s tezmert n wawal-is i gbedd lsas n ddunit me\u1e5b\u1e5ba. Mi gessazdeg imdanen si ddnubat-nsen, ye\u1e6d\u1e6def amkan n l\u1e25ekma deg igenwan \u0263er tama tayeffust n Sidi \u1e5aebbi ;\n1:4 yekka-d sennig n lmalayekkat, axa\u1e6der Sidi \u1e5aebbi yefka-yas isem yugaren isem-nsent.\n1:5 Anwa lmelk iwumi yenna Sidi \u1e5aebbi : Ke\u010d\u010d d Mmi, d nekk i k-id-yefkan \u0263er ddunit ass-a . Anwa lmelk i \u0263ef i d-yenna : Nekk ad ili\u0263 d Baba-s, ne\u021b\u021ba ad yili d Mm i.\n1:6 Asmi i d-yefka amenzu \u0263er ddunit yenna-d : L malayekkat me\u1e5b\u1e5ba n Sidi \u1e5aebbi ad se\u01e7\u01e7dent zdat-es a t-\u025bebdent.\n1:7 Yenna-d da\u0263en \u0263ef lmalayekkat : Yesseqdac lmalayekkat-is am a\u1e0du, iqeddacen-is am u\u1e25e\u01e7\u01e7a\u01e7u n tmes .\n1:8 Ma \u0263ef Mmi-s yenna-d : Amkan n l\u1e25ekma-k a \u1e5aebbi ibedd i dayem, t azmert n tgeldit-ik, \u021b-\u021bazmert ta\u1e25eqqit.\n1:9 T\u1e25emmle\u1e0d l\u1e25eqq tke\u1e5bhe\u1e0d lba\u1e6del, daymi a \u1e5aebbi, Illu-inek , idhen aqe\u1e5b\u1e5buy-ik s zzit n lfe\u1e5b\u1e25, isbedd-ik d agellid, d k e\u010d\u010d i gexta\u1e5b ger ye\u1e5bfiqen-ik.\n1:10 Yerna yenna : D ke\u010d\u010d a \u1e5aebbi i gessersen lsas n ddunit si tazwara, d ifassen-ik i gfe\u1e63\u1e63len igenwan ;\n1:11 nutni ad fnun ma d ke\u010d\u010d a\u021b-\u021bdume\u1e0d , ad u\u0263alen me\u1e5b\u1e5ba d iqdime n am llebsa taqdimt,\n1:12 a ten-tbeddle\u1e0d a m akken te\u021bwabeddal llebsa, a ten-te\u021ble\u1e0d am ube\u1e5bnus, ma d ke\u010d\u010d ur te\u021bbeddile\u1e0d ar a, ussan-ik ur \u021bfakan ara .\n1:13 Anwa lmelk iwumi yenna : ?\u1e6def amkan n l\u1e25ekma \u0263er tama-w tayeffust, alamma rri\u0263-ed i\u025bdawen-ik seddaw n i\u1e0da\u1e5b\u1e5ben-ik ?\n1:14 D acu-tent lmalayekkat ? D le\u1e5bwa\u1e25 iqeddcen \u0263ef Sidi \u1e5aebbi, i d-i\u021bceggi\u025b iwakken ad \u025biwnent wid iwumi i d-ye\u021b\u021bunefk leslak n Sidi \u1e5aebbi, d lwe\u1e5bt !\n2:1 ?ef wayagi, ilaq a ne\u1e6d\u1e6def deg uselmed n tide\u021b i nesla, a t ne\u1e25rez iwakken ur n\u021beffe\u0263 ara i webrid.\n2:2 Imeslayen i d-wwint lmalayekkat s\u025ban azal, kra n win ur neqbil ara, ur netbi\u025b ara imeslayen-agi yuklal l\u025biqab,\n2:3 amek ara nemne\u025b ma yella ur ne\u1e25sib ara leslak ameqqran yecban wagi ? Leslak-agi i d-ibecce\u1e5b Ssid-nne\u0263 si tazwara, \u025bawden-a\u0263-t-id da\u0263en wid i s-yeslan.\n2:4 Sidi \u1e5aebbi ibeggen-ed tide\u021b n cchada-nsen s lica\u1e5bat d lbe\u1e5bhanat d wa\u1e6das n le\u025b\u01e7ayeb akk-d tezmert n \u1e5a\u1e5bu\u1e25 iqedsen, akken yella di leb\u0263i-ines.\n2:5 Ma\u010d\u010di i lmalayekkat iwumi yefka Sidi \u1e5aebbi l\u1e25ekma \u0263ef ddunit i d-iteddun i \u0263ef d-ne\u021bmeslay.\n2:6 Yella win i d-icehden \u0263ef wayagi di tira iqedsen, yenna-d : D acu-t wemdan iwakken a t-id-temmekti\u1e0d , a d-terre\u1e0d ddehn-ik \u0263u\u1e5b-es ; d acu-t mmi-s n wemdan iwakken a d-telhi\u1e0d yid-es ?\n2:7 Terri\u1e0d-t seddaw n lmalayekkat i kra n lweqt , mbe\u025bd tefki\u1e0d-as lqima d l\u025bezz,\n2:8 terri\u1e0d kullec seddaw i\u1e0da\u1e5b\u1e5ben-is. Mi gerra Sidi \u1e5aebbi kullec seddaw i\u1e0da\u1e5b\u1e5ben-is, yefka-yas ad i\u1e25kem \u0263ef kullec ; lad\u0263a ur\u025bad nwala tura ye\u1e25kem \u0263ef kullec.\n2:9 Lame\u025bna \u0190isa, win akken yerra Sidi \u1e5aebbi seddaw n lmalayekkat i kra n lweqt, ne\u021bwali-t tura di tmanegt-is ye\u010d\u010du\u1e5b d l\u025bezz \u0263ef ddemma n le\u025btab n lmut-is ; s \u1e5b\u1e5be\u1e25ma n Sidi \u1e5aebbi i gemmut \u0263ef yemdanen me\u1e5b\u1e5ba.\n2:10 Sidi \u1e5aebbi i d-ixelqen kullec yerna kullec d ayla-s, yehwa-yas ad issiwe\u1e0d ccan n \u0190isa amsellek n yemdanen \u0263er lekmal, mi t-id is\u025bedda si le\u025btab ameqqran, iwakken a d-yawi a\u1e6das n yemdanen \u0263er l\u025ba\u1e0dima-s ;\n2:11 axa\u1e6der Sidna \u0190isa i g\u1e63effun si ddnub akk-d wid i ge\u021bwa\u1e63effan, yiwen i ten-id-ifkan. Daymi ur yesset\u1e25a ara yis-sen, isemma-yasen \u00ab atmaten-is \u00bb\n2:12 mi genna : A d becc\u1e5be\u0263 isem-ik i watmaten-iw, a k-\u1e25emde\u0263 di tlemmast n tejma\u025bt n watmaten .\n2:13 Yenna da\u0263en : Ad \u021bekle\u0263 \u0263ef Sidi \u1e5aebbi . Yerna yenna : Aql-iyi nekk d warrac i yi-d-ifka Sidi \u1e5aebbi.\n2:14 Imi arrac-agi \u021bwaxelqen s weksum d idammen, ula d ne\u021b\u021ba yusa-d s \u1e63\u1e63ifa n wemdan iwakken ad i\u0263leb s lmut-is Cci\u1e6dan, win akken i\u1e25ekkmen \u0263ef lmut,\n2:15 ad ikkes lxuf i wid akk yezgan d aklan seddaw uzaglu n lmut, a ten-isellek ;\n2:16 axa\u1e6der ur d-yusi ara ad i\u025biwen lmalayekkat me\u025bna yusa-d ad i\u025biwen tarwa n Sidna Ib\u1e5bahim.\n2:17 Daymi i s-ilaq a d-yas s \u1e63\u1e63ifa n wemdan am atmaten-is iwakken ad yu\u0263al d lmuqeddem ameqqran i \u0263ef yella le\u021bkal, ye\u010d\u010du\u1e5ben d \u1e5b\u1e5be\u1e25ma, ad iqdec \u0263ef Sidi \u1e5aebbi seg ul yerna ad ikkes ddnubat n yemdanen me\u1e5b\u1e5ba.\n2:18 Imi ne\u021b\u021ba s yiman-is yenne\u025btab deg uje\u1e5b\u1e5beb, yezmer ad i\u025biwen wid ara ye\u021b\u021buje\u1e5bben.\n3:1 Ihi ay atmaten ye\u021bwaxta\u1e5ben, a wid iwumi i d-yessawel Sidi \u1e5aebbi a\u021b-\u021bwe\u1e5btem tageldit n igenwan, sserset tamu\u0263li-nwen \u0263ef \u0190isa, lmuqeddem ameqqran i d-icegge\u025b Sidi \u1e5aebbi i \u0263ef ne\u021bcehhid.\n3:2 Yexdem leb\u0263i n win i t-id icegg\u025ben am akken i gexdem Sidna Musa i wexxam n Sidi \u1e5aebbi.\n3:3 ?-\u021bide\u021b Sidna \u0190isa yes\u025ba ccan akte\u1e5b n Sidna Musa, imi win yebnan axxam, d ne\u021b\u021ba i ges\u025ban ccan akte\u1e5b n wexxam yebna.\n3:4 Axa\u1e6der yal axxam yella win i t-yebnan, ma d win i d-ixelqen kra yellan, d Sidi \u1e5aebbi.\n3:5 Sidna Musa yexdem ayen i glaqen a t-yexdem, yella am uqeddac \u0263ef wexxam n Sidi \u1e5aebbi iwakken a d ibeggen ayen ara d-i\u021b\u021bubecc\u1e5ben sya \u0263er zdat.\n3:6 Ma d Lmasi\u1e25 yexdem ayen i glaq a t-yexdem, yesbedd-it am Mmi-s, d aqe\u1e5b\u1e5buy n wexxam-is ; d nukni i d axxam-is ma yella ne\u1e6d\u1e6def, ne\u1e63be\u1e5b yerna ne\u021bkel deg wayen i nessaram.\n3:7 ?ef wannect-a i d-yenna \u1e5a\u1e5bu\u1e25 iqedsen : Ass-a ma yella teslam i ta\u0263ect n Sidi \u1e5aebbi,\n3:8 ur s\u0263a\u1e5bayet ara ulawen-nwen am wasmi i jehlen lejdud-nwen m'akken i yi-sserfan deg unez\u1e5buf\n3:9 anda \u025be\u1e5bden ad iyi-je\u1e5b\u1e5bben \u0263as akken walan lec\u0263al akk i xedme\u0263 di \u1e5beb\u025bin iseggasen.\n3:10 ?ef wayagi i rfi\u0263 \u0263ef l\u01e7il-agi , d\u0263a nni\u0263 : Ulawen-nsen be\u025bden fell-i, zgan \u025be\u1e5bqen, ugin ad fehmen iberdan-iw.\n3:11 Seg wakken i rfi\u0263, gulle\u0263 ur kcimen aste\u025bfu-inu.\n3:12 Ay atmaten, \u1e25adret ad yili gar-awen win ara yesse\u0263\u1e5ben ul-is, ara ye\u01e7\u01e7en cce\u1e5b ad izde\u0263 deg-s alamma issufe\u0263-it i webrid n Sidi \u1e5aebbi yeddren.\n3:13 ?emyenhut wway gar-awen yal ass, skud nezmer a d-nini \u00ab ass-a \u00bb am akken i gura di tira iqedsen iwakken yiwen deg-wen ur t-i\u021bkellix ddnub, ur yes\u0263a\u1e5bay ul-is.\n3:14 Ma yella ne\u1e6d\u1e6def alamma \u021b-\u021baggara di liman-nni i nes\u025ba di tazwara, akka ara n\u021bekki di Lmasi\u1e25,\n3:15 akken yura di tira iqedsen : Ass-a ma yella teslam i ta\u0263ect n Sidi \u1e5aebbi, ur s\u0263a\u1e5bayet ara ulawen-nwen am asmi i jehlen lejdud-nwen deg unez\u1e5buf.\n3:16 Anwa-ten wid i gjehlen \u0263er Sidi \u1e5aebbi mi slan i ta\u0263ect-is, ma\u010d\u010di d wid i d-yessufe\u0263 Sidna Musa si tmurt n Ma\u1e63er ?\n3:17 Anwi i \u0263ef yerfa Sidi \u1e5aebbi azal n \u1e5beb\u025bin n iseggasen, ma\u010d\u010di d wid idenben i gessenger deg unez\u1e5buf ?\n3:18 Anwa-ten wid i \u0263ef yeggul ur kcimen amkan anda ara ste\u025bfun, ma\u010d\u010di d wid i t-i\u025bu\u1e63an ?\n3:19 Nwala ur kcimen ara \u0263er weste\u025bfu n Sidi \u1e5aebbi axa\u1e6der ugin ad amnen yis.\n4:1 Skud mazal nezmer a nekcem \u0263er weste\u025bfu i \u0263-yew\u025bed Sidi \u1e5aebbi, ilaq a naggad ur a\u0263-i\u021bfat ara l\u1e25al, iwakken yiwen deg-wen ur s-yeqqa\u1e5b \u1e0delme\u0263, i\u025bedda lweqt ur zmire\u0263 ara ad kecme\u0263.\n4:2 Axa\u1e6der lexba\u1e5b-agi n lxi\u1e5b i \u0263-d i\u021b\u021bubecc\u1e5ben, d lexba\u1e5b-nni i d i\u021b\u021bubecc\u1e5ben i lejdud-nne\u0263, lame\u025bna ur stenf\u025ben ara seg-s axa\u1e6der mi s-slan ur t-qbilen ara.\n4:3 Ma d nukni i t-iqeblen a nekcem \u0263er weste\u025bfu-yagi i \u0263ef d-yenna Sidi \u1e5aebbi : Deg wurrif i deg lli\u0263, gulle\u0263 ur kcimen aste\u025bfu-inu . Sidi \u1e5aebbi yenna-d akka \u0263as akken ifuk lec\u0263al-is seg wasmi i gexleq ddunit,\n4:4 akken yura di tira iqedsen \u0263ef wass wis seb\u025ba : Sidi \u1e5aebbi yeste\u025bfa deg wass wis seb\u025ba seg wayen akk yexdem .\n4:5 Yura da\u0263en : D lmu\u1e25al ad kecmen \u0263er weste\u025bfu-inu.\n4:6 Imezwura i geslan i lexba\u1e5b-agi n lxi\u1e5b ur kcimen ara \u0263er weste\u025bfu yagi axa\u1e6der ur t-qbilen ara, me\u025bna yella wamek ara kecmen wiya\u1e0d.\n4:7 A\u1e6das n leq\u1e5bun mbe\u025bd, Sidi \u1e5aebbi yemmeslay-ed \u0263ef wass nni\u1e0den iwumi i gsemma \u00ab ass-a \u00bb mi d-yenna seg yimi n Sidna Dawed : ( am akken yura iwsawen ) Ass-a ma yella teslam i ta\u0263ect-is ur s\u0263a\u1e5bayet ara ulawen-nwen.\n4:8 Lemmer nnbi Yacu\u025ba yessawe\u1e0d lejdud-nne\u0263 \u0263er wemkan n weste\u025bfu, tili Sidi \u1e5aebbi ur d-ye\u021bmeslay ara \u0263ef wass nni\u1e0den n weste\u025bfu.\n4:9 Ar ass-a yeqqim-ed wass n weste\u025bfu i wegdud n Sidi \u1e5aebbi.\n4:10 Axa\u1e6der win ara ikecmen deg weste\u025bfu n Sidi \u1e5aebbi ad iste\u025bfu da\u0263en si lec\u0263al-is am akken yeste\u025bfa ne\u021b\u021ba.\n4:11 A newwet ihi amek ara nekcem \u0263er weste\u025bfu-agi, a n\u1e25ader akken ur i\u0263elli yiwen am wegdud n wat Is\u1e5bail i\u025bu\u1e63an Sidi \u1e5aebbi deg unez\u1e5buf.\n4:12 Axa\u1e6der awal n Sidi \u1e5aebbi d awal n tudert yes\u025ban tazmert, qe\u1e6d\u1e6di\u025b akte\u1e5b n ujenwi yes\u025ban snat n le\u01e7wahi qe\u1e6d\u1e6di\u025ben, ike\u010d\u010dem armi d lqa\u025b n te\u1e5bwi\u1e25t d \u1e5b\u1e5bu\u1e25, armi d ger lemfa\u1e63el d wadif, ye\u021bbeggin-ed ixemmimen n wul d wayen ye\u021b\u1e25ussu wemdan.\n4:13 Ulac ayen yeffren zdat Sidi \u1e5aebbi deg wayen akk i d-ixleq, kullec iban-ed \u025binani zdat win ara \u0263-i\u1e25asben.\n4:14 Imi d \u0190isa Mmi-s n \u1e5aebbi i nes\u025ba d lmuqeddem ameqqran, ne\u021b\u021ba i gzemren i kullec, i gzegren igenwan \u0263er Sidi \u1e5aebbi, ilaq-a\u0263 ihi a ne\u1e25rez ayen i ne\u021bbecci\u1e5b \u0263ef liman-nne\u0263.\n4:15 Axa\u1e6der lmuqeddem ameqqran i nes\u025ba ma\u010d\u010di d win ur nezmir ara a d-yi\u1e25nin fell-ane\u0263 m'ara \u0263-iwali necce\u1e0d, imi ne\u021b\u021ba da\u0263en ye\u021b\u021buje\u1e5b\u1e5beb deg wayen yellan, am nukni, me\u025bna ur ye\u0263li ara di ddnub.\n4:16 A ne\u021bkel ihi, a nqe\u1e5b\u1e5beb \u0263er Sidi \u1e5aebbi anda tella \u1e5b\u1e5be\u1e25ma iwakken a naf ssma\u1e25, a \u0263-i\u025biwen di lweqt ilaqen.\n5:1 Yal lmuqeddem ameqqran ye\u021bwaxta\u1e5b-ed iwakken ad iqdec \u0263ef Sidi \u1e5aebbi \u0263ef ddemma n yemdanen, ad ye\u021bqeddim lew\u025badi d iseflawen \u0263ef ddemma n ddnubat nsen.\n5:2 Yezmer ad ifhem wid ur nessin ara akk-d wid i\u1e0da\u025ben, imi ula d ne\u021b\u021ba s yiman-is ur ye\u01e7hid ara, yezmer ad ye\u0263le\u1e0d.\n5:3 Ihi \u0263ef l\u01e7ehd-agi i t-ixu\u1e63\u1e63en i glaq ad yefk iseflawen \u0263ef yiman-is ne\u021b\u021ba akk-d yemdanen nni\u1e0den \u0263ef ddemma n ddnubat-nsen.\n5:4 Yiwen ur izmir ad ye\u1e6d\u1e6def amkan n lmuqeddem ameqqran ma yella ma\u010d\u010di d Sidi \u1e5aebbi i t-id-isbedden, am akken i gesbedd nnbi Ha\u1e5bun.\n5:5 Akka da\u0263en Lmasi\u1e25, ma\u010d\u010di d ne\u021b\u021ba i gesbedden iman-is d lmuqeddem ameqqran lame\u025bna d Sidi \u1e5aebbi i t-isbedden mi s-yenna : Ke\u010d\u010d d Mmi, d nekk i k-id-yefkan \u0263er ddunit ass-a .\n5:6 Yenna-yas da\u0263en : Sbedde\u0263-k a\u021b-\u021bili\u1e0d d lmuqeddem i dayem am akken i sbedde\u0263 Malxisadeq.\n5:7 Asm'akken yella Lmasi\u1e25 di ddunit s \u1e63\u1e63ifa n wemdan, ac\u1e25al i ged\u025ba, ac\u1e25al i g\u1e25ellel s nnhati d ime\u1e6d\u1e6dawen Sidi \u1e5aebbi i gzemren a t-isellek si lmut. ?ef ddemma n \u1e6d\u1e6da\u025ba-ines, ye\u021bwaqbel.\n5:8 ?as akken d Mmi-s n \u1e5aebbi i gella, yelmed \u1e6d\u1e6da\u025ba s le\u025btab i g\u025beddan fell-as.\n5:9 S wakka i gewwe\u1e0d \u0263er tmanegt tameqqrant, yu\u0263al d abrid n leslak n dayem i wid akk i s-ye\u021b\u021ba\u0263en awal.\n5:10 Sidi \u1e5aebbi isbedd-it ad yili d lmuqeddem ameqqran am akken i t-yella Malxisadeq.\n5:11 Nezmer a d-nernu a\u1e6das \u0263ef wannect-agi me\u025bna d ayen i we\u025b\u1e5ben i wsefhem, axa\u1e6der twe\u025b\u1e5bem i lefhama.\n5:12 Ilaq ac\u1e25al ayagi segmi i tu\u0263alem d iselmaden, kunwi atan mazal te\u1e25wa\u01e7em win ara wen-islemden lumu\u1e5b imezwura n wawal n \u1e5aebbi ; ur tezmirem ara i we\u0263\u1e5bum, mazal-ikkun te\u1e25wa\u01e7em ayefki.\n5:13 S kra n win mazal i te\u1e6d\u1e6de\u1e0d, d llufan i gella, ur yessin ara ad yexti\u1e5b ger wayen yelhan d wayen n diri.\n5:14 Ma d win meqqren yezmer ad ye\u010d\u010d ayen yese\u1e25\u1e25an, imi i gje\u1e5b\u1e5beb, yessen ad yexti\u1e5b ger wayen yelhan d wayen n diri.\n6:1 Ur ilaq ara a neqqim kan deg wayen nelmed di tazwara \u0263ef wawal n Lmasi\u1e25. Ilaq-a\u0263 a neddu \u0263er zdat a nesnekmal almud-nne\u0263, mbla ma n\u025bawed-ed i lsas s wadda \u0263ef wayen ye\u025bnan : nndama \u0263ef lec\u0263al n diri i ge\u021b\u021bawin \u0263er lmut, liman di Sidi \u1e5aebbi,\n6:2 ayen ye\u025bnan a\u0263\u1e0das akk-d \u021brusi n ifassen, \u1e25eggu n lmegtin ne\u0263 l\u1e25isab aneggaru.\n6:3 D ayen ara nexdem ma iserre\u1e25-a\u0263 Sidi \u1e5aebbi.\n6:4 Ma d wid i d-yusan \u0263er tafat, i gessefhem \u1e5a\u1e5bu\u1e25 iqedsen, i g\u025ber\u1e0den lba\u1e5bakat n \u1e5aebbi,\n6:5 lbenna n wawal-is akk-d tezmert n ddunit i d-iteddun,\n6:6 ma yella \u1e6d\u1e6dax\u1e5ben i webrid n \u1e5aebbi ulamek ara d-u\u0263alen imi \u021b\u025bawaden asemme\u1e5b i Mmi-s n \u1e5aebbi, sse\u0263layen di lqima-s zdat yemdanen.\n6:7 Akal ye\u1e5bwan aman i d-ye\u021b\u021baken ler\u1e93aq i wid i t-izer\u025ben, lba\u1e5baka n Sidi \u1e5aebbi te\u021brusu-d fell-as.\n6:8 Me\u025bna ma yella yefka-d isennanen d ubuneqqa\u1e5b, d akal ur nes\u025bi azal, ad i\u021bwan\u025bel yerna q\u1e5bib a s-ce\u025blen times.\n6:9 ?as ma ne\u021bmeslay-ed akka a wid e\u025bzizen, ne\u021bkel fell-awen d abrid yelhan i tewwim, d win ara kkun isellken.\n6:10 Sidi \u1e5aebbi d bab n l\u1e25eqq, ur ite\u021b\u021bu ara lec\u0263al-nwen d le\u1e25mala nwen \u0263ef ddemma n yisem-is akk-d lxi\u1e5b i mazal txeddmem-t i watmaten di liman.\n6:11 Neb\u0263a ihi yal yiwen deg-wen ad i\u1e6d\u1e6def deg webrid-agi alamma \u021b-\u021baggara iwakken a\u021b-\u021baw\u1e0dem \u0263er wayen i tessaramem.\n6:12 Ur \u021b\u021bilit ara d ime\u025bdazen me\u025bna \u025bandet wid iwe\u1e5bten s liman d \u1e63\u1e63be\u1e5b nsen lwe\u1e5bt i gew\u025bed Sidi \u1e5aebbi.\n6:13 Asmi i gefka Sidi \u1e5aebbi l\u025bahed i Sidna Ib\u1e5bahim, yeggul s yixef-is, axa\u1e6der ulac win yellan sennig-es,\n6:14 d\u0263a yenna : Gulle\u0263 a k-barke\u0263, ad ssefti\u0263 dderya-k.\n6:15 Akka ihi Sidna Ib\u1e5bahim ye\u1e63be\u1e5b yu\u1e5b\u01e7a armi i t-id-yewwe\u1e0d wayen i s-yew\u025bed Sidi \u1e5aebbi.\n6:16 Imdanen \u021bgallan s wayen i ten-yugaren, s limin i ferrun tilufa ;\n6:17 daymi i geggul Sidi \u1e5aebbi i wid ara iwe\u1e5bten ayen i sen-yew\u025bed, iwakken a d-ibeggen belli ur ye\u021bbeddil ara \u1e5b\u1e5bay.\n6:18 L\u025bahed-agi i d-yefka Sidi \u1e5aebbi akk-d limin i geggul d ayen ur ne\u021bbeddil yerna ur yezmir ara a ten-inkke\u1e5b. Ma d nukni yeddurin \u0263u\u1e5b-es, d annect-agi i \u0263-isse\u01e7haden a ne\u1e6d\u1e6def mli\u1e25 deg usirem i \u0263-d i\u021b\u021bunefken.\n6:19 Asirem-agi d ayen ye\u1e6d\u1e6dfen tudert-nne\u0263 am umextaf ( tnejga ) ye\u1e6d\u1e6dfen lbabu\u1e5b, ye\u021b\u025bedday akkin i le\u1e25jab \u0263er wemkan iqedsen,\n6:20 anda akken yekcem Ssid-nne\u0263 \u0190isa d amezwaru, \u0263ef ddemma-nne\u0263 yu\u0263al d lmuqeddem ameqqran i dayem akken yella Malxisadeq.\n7:1 Malxisadeq-agi yella d agellid n Salem, d lmuqeddem n Sidi \u1e5aebbi \u025blayen. D ne\u021b\u021ba i gemmugren Sidna Ib\u1e5bahim mi d-yu\u0263al seg umen\u0263i i deg ye\u0263leb igelliden nni\u1e0den, iwakken a t-ibarek.\n7:2 I ne\u021b\u021ba i gefka Sidna Ib\u1e5bahim amur wis \u025bec\u1e5ba n wayen akk i d-yerbe\u1e25 seg umen\u0263i. Malxisadeq lme\u025bna n yisem-is \u00ab agellid n l\u1e25eqq \u00bb, ye\u021b\u021busemma da\u0263en agellid n Salem ye\u025bni \u00ab agellid n lehna \u00bb.\n7:3 Ur ne\u1e93ri ara anwa i d baba-s ne\u0263 anta i d yemma-s, ur nessin tajaddit-is, ur ne\u1e93ri melmi i glul ne\u0263 melmi i gemmut. Yella d lemtel n Mmi-s n \u1e5aebbi, yeqqim d lmuqeddem i dayem.\n7:4 Walit ac\u1e25al meqqe\u1e5b ccan n win iwumi yefka Sidna Ib\u1e5bahim le\u025bcu\u1e5b seg wayen i d-yerbe\u1e25 deg umen\u0263i.\n7:5 At Lewwi yellan d lmuqedmin, \u021b\u021bawin le\u025bcu\u1e5b \u0263ef wat Is\u1e5bail yellan d atmaten-nsen akken i d-tenna ccari\u025ba, \u0263as akken ula d nutni \u021b-\u021barwa n Sidna Ib\u1e5bahim.\n7:6 Ma d Malxisadeq ur nelli ara n at Lewwi, yewwi le\u025bcu\u1e5b s \u0263u\u1e5b Sidna Ib\u1e5bahim yerna iburek-it.\n7:7 Mbla ccekk win ye\u021bbaraken yugar win ye\u021b\u021bubarken.\n7:8 At Lewwi-agi ye\u021b\u021bawin le\u025bcu\u1e5b, d imdanen ye\u021bme\u021b\u021baten, ma d Malxisadeq d win i \u0263ef d-nnant tira iqedsen : Mazal idder.\n7:9 Nezmer ihi a d-nini belli Lewwi ye\u021b\u021bawin le\u025bcu\u1e5b \u0263ef wat Is\u1e5bail, yefka le\u025bcu\u1e5b i Malxisadeq uqbel a d-ilal s ufus n Sidna Ib\u1e5bahim yellan si lejdud-is ;\n7:10 axa\u1e6der asmi yemmuger Malxisadeq Sidna Ib\u1e5bahim, Lewwi ur\u025bad d-ilul.\n7:11 Cc\u0263el i xeddmen lmuqedmin n at Lewwi, d lsas n ccari\u025ba ye\u021b\u021bunefken i wegdud n wat Is\u1e5bail ; me\u025bna lemmer yennekmal cc\u0263el-agi, acu\u0263e\u1e5b ihi ara d-yili lmuqeddem nni\u1e0den am Malxisadeq ma\u010d\u010di am Ha\u1e5bun n at Lewwi ?\n7:12 Ma yella cc\u0263el i xeddmen lmuqeddmin n at Lewwi yu\u0263al di rrif, ihi ula d ccari\u025ba a\u021b-\u021bu\u0263al di rrif.\n7:13 Axa\u1e6der Ssid-nne\u0263, ur d-yekki ara seg wedrum n at Lewwi, me\u025bna yekka-d seg wedrum nni\u1e0den. Adrum-nni ulac deg-s ula d yiwen n lmuqeddem i gqedcen deg wudekkan n iseflawen.\n7:14 Ihi ne\u1e93ra belli Ssid-nne\u0263 yeffe\u0263 ed seg wedrum n Yahuda, yerna Sidna Musa ur d-yenni ara a d-yeffe\u0263 lmuqeddem seg wedrum agi.\n7:15 Yella wayen i d-ibeggnen annect agi, axa\u1e6der yeffe\u0263-ed lmuqeddem nni\u1e0den yecban Malxisadeq.\n7:16 Ma\u010d\u010di d ccari\u025ba i t-yerran d lmuqeddem me\u025bna yu\u0263al d lmuqeddem s tezmert n tudert ur ne\u021bfaka ;\n7:17 imi yura fell-as : Ke\u010d\u010d d lmuqeddem i dayem am Malxisadeq.\n7:18 Lame\u1e5b aqdim ye\u025bnan lmuqedmin ye\u021bwabeddel, axa\u1e6der ixu\u1e63\u1e63 yerna ur yenfi\u025b ara.\n7:19 Ccari\u025ba n Musa ur tezmir ara a \u0263-terr d i\u1e25eqqiyen zdat Sidi \u1e5aebbi, me\u025bna yella yiwen usirem s wayes ara nqe\u1e5b\u1e5beb \u0263u\u1e5b-es ;\n7:20 yerna ayagi yed\u1e5ba-d s limin n Sidi \u1e5aebbi, ma\u010d\u010di am at Lewwi yu\u0263alen d lmuqedmin mbla limin ;\n7:21 ma d Sidna \u0190isa yesbedd-it Sidi \u1e5aebbi s limin mi s-yenna : Sidi \u1e5aebbi yeggul ur ye\u1e25nit a\u021b-\u021bili\u1e0d d lmuqeddem i dayem .\n7:22 \u0190isa, d ne\u021b\u021ba i \u0263-i\u1e0demnen l\u025bahed yifen amezwaru.\n7:23 A\u1e6das seg wat Lewwi i gellan d lmuqedmin axa\u1e6der lmut ur ten-te\u021b\u021ba\u01e7a ara ad dumen di cc\u0263el-nsen ;\n7:24 ma d Sidna \u0190isa, d win ye\u021bdumun, ur yu\u1e25wa\u01e7 ara a d-ye\u01e7\u01e7 lxedma-s n lmuqeddem i waye\u1e0d.\n7:25 Daymi i gezmer ad isellek di mkul lweqt wid akk ye\u021bqe\u1e5b\u1e5biben \u0263er \u1e5aebbi s yisem-is, imi ne\u021b\u021ba yedder i dayem, ide\u025b\u025bu fell-asen \u0263er Sidi \u1e5aebbi.\n7:26 D wagi i d lmuqeddem ameqqran i \u0263-ilaqen, d imqeddes, d azedgan, ur yes\u025bi ara l\u025bib, yemxalaf d imdanen idenben yerna i\u021bwarfed sennig igenwan.\n7:27 Ur ye\u1e25wa\u01e7 ara ad yefk iseflawen am lmuqedmin nni\u1e0den \u0263ef ddnubat-is ne\u0263 \u0263ef wid n wegdud, lame\u025bna yefka iman-is d asfel yiwet n tikkelt kan \u0263ef ddemma n ddnubatnne\u0263.\n7:28 Lmuqedmin imeqqranen i d tesbeddad ccari\u025ba, d irgazen ixu\u1e63\u1e63en di l\u01e7ehd, ma d win i gesbedd Sidi \u1e5aebbi s limin deffir ccari\u025ba, d Mmi-s i gessawe\u1e0d \u0263er tezmert tameqqrant i dayem.\n8:1 Deg wayen akk i d-nenna atan wayen yes\u025ban azal : Lmuqeddem nne\u0263 ameqqran ye\u1e6d\u1e6def amkan n l\u1e25ekma \u0263er tama tayeffust n Sidi \u1e5aebbi di tgelda n igenwan.\n8:2 Ixeddem cc\u0263el-is n lmuqeddem ameqqran deg wemkan iqedsen n tide\u021b i gebna Sidi \u1e5aebbi, ma\u010d\u010di d win i bnan yemdanen.\n8:3 Yal lmuqeddem sbedden-t iwakken ad ye\u021bqeddim lew\u025badi d iseflawen, daymi i s-ilaq ula d ne\u021b\u021ba ad yes\u025bu ayen ara iqeddem ;\n8:4 lemmer Lmuqeddem-nne\u0263 ameqqran di ddunit i gella, ur yezmir ara ad yili d lmuqeddem ne\u021b\u021ba ur nelli ara seg wat Lewwi, imi llan wid ye\u021bqeddimen lew\u025badi akken i d-tenna ccari\u025ba.\n8:5 Cc\u0263el i xeddmen lmuqedemin agi d lemtel, d ccbiha n wayen yellan deg igenwan. Mi gekker Sidna Musa ad isbedd aqi\u1e0dun n temlilit, Sidi \u1e5aebbi yenna yas : -- Muqel ! Xdem kullec am lemtel i k-d-ssekne\u0263 deg wedrar.\n8:6 Me\u025bna tura Lmasi\u1e25 ye\u021b\u021bunefk as-d cc\u0263el yugaren wagi s wa\u1e6das, d ne\u021b\u021ba i d amcafe\u025b-nne\u0263 \u0263er Sidi \u1e5aebbi di le\u025bqed yifen amezwaru, ibedden \u0263ef lwe\u025bd i\u1e63e\u1e25\u1e25an.\n8:7 Lemmer le\u025bqed amezwaru ur ixu\u1e63\u1e63 ara tili ur d-ye\u021b\u021bili ara waye\u1e0d.\n8:8 Axa\u1e6der asmi i glum Sidi \u1e5aebbi \u0263ef wegdud-is yenna : A d-asen wussan i deg ara sbedde\u0263 le\u025bqed ajdid akk-d wegdud n Is\u1e5bail d wegdud n Yahuda.\n8:9 Ur ye\u021b\u021bili ara am le\u025bqed-nni i xedme\u0263 d lejdud-nsen asmi i sen-\u1e6d\u1e6dfe\u0263 afus s suf\u0263e\u0263-ten-id si tmurt n Ma\u1e63er , imi nutni ur \u1e6d\u1e6difen ara di le\u025bqed-inu ula d nekk \u01e7\u01e7i\u0263-ten.\n8:10 Atan le\u025bqed ara sbedde\u0263 gar-i d wegdud n Is\u1e5bail. A wen-ini\u0263 : M 'ara \u025beddin wussan-agi, a sen-sfehme\u0263 lumu\u1e5bat-inu, a ten-skecme\u0263 deg wulawen-nsen, ad ili\u0263 d Illu-nsen, ad ilin d agdud-iw.\n8:11 Deg ussan-nni, yiwen ur yeqqa\u1e5b i waye\u1e0d ne\u0263 i gma-s \u00ab issin Sidi \u1e5aebbi \u00bb axa\u1e6der ad iyi-issinen me\u1e5b\u1e5ba seg ume\u1e93yan ar umeqqran.\n8:12 A sen-semm\u1e25e\u0263 ddnubat-nsen, ur ten-id-\u021bmektaye\u0263 ara.\n8:13 Imi d-yehde\u1e5b \u0263ef le\u025bqed ajdid, le\u025bqed amezwaru yu\u0263al d aqdim ; ayen yellan d aqdim q\u1e5bib ad i\u021bwakkes.\n9:1 Le\u025bqed amezwaru yes\u025ba leqwanen yes\u025ban da\u0263en amkan anda \u025bebbden \u1e5aebbi.\n9:2 Axa\u1e6der sbedden yiwen uqi\u1e0dun n temlilit i deg llan sin imukan : Deg umkan amezwaru ye\u021b\u021busemman amkan iqedsen, yella lme\u1e63be\u1e25 akk-d \u1e6d\u1e6dabla anda ye\u021brusu we\u0263\u1e5bum ye\u021b\u021bunefken d lwe\u025bda.\n9:3 Deg umkan-agi iqedsen yella yiwen n le\u1e25jab ife\u1e5bqen amkan iqedsen d umkan iqedsen nezzeh,\n9:4 tella dinna l\u1e25ila n ddheb i deg sse\u1e5b\u0263ayen lebxu\u1e5b akk-d usenduq n le\u025bqed i\u1e5buccen s ddheb. Zdaxel n usenduq-agi yella u\u025bekkaz-nni n Ha\u1e5bun ye\u01e7\u01e7u\u01e7gen, illa da\u0263en aqbuc i\u010d\u010du\u1e5ben \u021b-\u021bamanna akk-d tebla\u1e0din i deg uran lumu\u1e5bat n Sidi \u1e5aebbi.\n9:5 Sufella n usenduq-agi rsent snat n lme\u1e63nu\u025bat imetlen lmalayekkat, \u0263umment s tili n wafriwen-nsent amkan-nni i \u021b\u1e5buccun s idammen n iseflawen i le\u025bfu n ddnubat. Ma\u010d\u010di tura i d lweqt i deg ara d-nemmeslay \u0263ef wayagi me\u1e5b\u1e5ba.\n9:6 Akka i gers kullec deg wemkan-agi iqedsen, lmuqedmin ke\u010d\u010dmen \u0263u\u1e5b-es mkul lweqt iwakken ad xedmen cc\u0263el-nsen ;\n9:7 ma d amkan iqedsen nezzeh, anagar lmuqeddem ameqqran i gke\u010d\u010dmen \u0263u\u1e5b-es yiwet n tikkelt i useggas, iwakken ad iqeddem idammen n iseflawen \u0263ef ddemma n ddnubat-is akk-d wid n wegdud.\n9:8 \u1e5a\u1e5bu\u1e25 iqedsen issefhem-a\u0263-d belli ulac abrid \u0263er wemkan iqedsen nezzeh skud mazal aqi\u1e0dun n temlilit.\n9:9 Ayagi yella d lemtel i lweqt-agi i deg nella ; lew\u025badi d iseflawen i \u021b\u021baken medden i Sidi \u1e5aebbi ur zmiren ara ad ssiw\u1e0den \u0263er \u1e63\u1e63fa n wul.\n9:10 D ayen ye\u025bnan kan l\u025baddat n ccari\u025ba \u0263ef wu\u010d\u010di \u021b-\u021bissit akk-d lu\u1e0du ; l\u025baddat-agi llant-ed d lemtel kan armi d asmi yerra Sidi \u1e5aebbi kullec d ajdid.\n9:11 Lmasi\u1e25 yusa-d d lmuqeddem ameqqran n lxi\u1e5b i d-iteddun, yezger i wemkan iqedsen yugaren kra n wayen yebna wemdan, yes\u025ban azal meqq\u1e5ben, ur nelli ara n ddunit-agi.\n9:12 Yekcem yiwet n tikkelt kan \u0263er wemkan iqedsen nezzeh, ma\u010d\u010di d idammen n i\u025bejmiyen ne\u0263 n iqelwacen i gewwi yid-es lame\u025bna d idammen-is ne\u021b\u021ba, s wannect-a i \u0263-d-yefda i dayem.\n9:13 Axa\u1e6der ma yella idammen n i\u025bejmiyen d iqelwacen akk-d yi\u0263ed n tgenduzt ye\u1e5b\u0263an d asfel \u021b\u1e63effin l\u01e7e\u021b\u021ba n wid idenben m'ara ten \u1e5buccen yis-sen,\n9:14 amek ur a\u0263-\u021b\u1e63effin ara idammen n Lmasi\u1e25 yefkan iman-is i \u1e5aebbi d asfel s tezmert n \u1e5a\u1e5bu\u1e25 n dayem, ne\u021b\u021ba ur nes\u025bi l\u025bib ? Amek ur yessizdig ara ulawen-nne\u0263 si lec\u0263al ur nem\u025bin ye\u021b\u021bawin \u0263er lmut iwakken a nu\u0263al d iqeddacen n Sidi \u1e5aebbi yeddren.\n9:15 ?ef wannect-agi i gella d amcafe\u025b gar-a\u0263 d \u1e5aebbi s le\u025bqed agi ajdid, iwakken wid iwumi d-yessawel Sidi \u1e5aebbi ad we\u1e5bten lxi\u1e5bat n dayem i sen-yew\u025bed. Zemren ad we\u1e5bten ayagi s lmut-is i d-yed\u1e5ban, lmut-is i gtekksen \u0263ef yemdanen ddnubat-nsen n wasmi i llan seddaw n le\u025bqed amezwaru.\n9:16 Ma yella waleb\u025ba\u1e0d ye\u01e7\u01e7a-d lew\u1e63aya weqbel ad yemmet akken ad fe\u1e5bqen ayla-s, ilaq ad a\u1e5b\u01e7un alamma yemmut.\n9:17 Lew\u1e63aya-agi ur t\u1e63e\u1e25\u1e25a ara ma yella mazal bab-is yedder lame\u025bna m'ara yemmet a\u021b-\u021bu\u0263al t\u1e63e\u1e25\u1e25a.\n9:18 Daymi le\u025bqed amezwaru da\u0263en yebda s tazzla n idammen.\n9:19 Ula d Sidna Musa mi i d-ye\u0263\u1e5ba lumu\u1e5b akken llan di Taw\u1e5bat, yeddem-ed taci\u1e6da akk-d ta\u1e0du\u1e6d tazegga\u0263t, yebbe\u0263-iten deg idammen n i\u025bejmiyen d iqelwacen akk-d waman, i\u1e5bucc yis-sen taktabt iqedsen akk-d wegdud me\u1e5b\u1e5ba,\n9:20 yenna : Wigi d idammen n le\u025bqed i gesbedd Sidi \u1e5aebbi yid-wen.\n9:21 I\u1e5bucc da\u0263en s idammen-nni aqi\u1e0dun akk-d wayen yellan deg-s.\n9:22 Axa\u1e6der ccari\u025ba teqqa\u1e5b-ed kullec ad ye\u1e63fu s idammen, ulac le\u025bfu mbla tazzla n idammen.\n9:23 Imi ayagi akk i gmetlen ayen yellan deg igenwan ilaq ad i\u021bwa\u1e63effi s idammen n iseflawen, ula d ayen yellan deg igenwan ilaq ad i\u021bwa\u1e63effi s idammen n wesfel yifen iseflawen imezwura.\n9:24 Axa\u1e6der Lmasi\u1e25 ur yekcim ara \u0263er wemkan iqedsen i bnan ifasen n yemdanen, yellan d lemtel n win n tide\u021b, me\u025bna yuli \u0263er igenni anda yella tura d amcafe\u025b-nne\u0263 zdat Sidi \u1e5aebbi.\n9:25 Lmuqeddem ameqqran ike\u010d\u010dem mkul aseggas \u0263er wemkan iqedsen nezzeh, iwakken ad iqeddem idammen n lmal, ma d Lmasi\u1e25 ur ikcim ara iwakken ad isebbel iman-is a\u1e6das n tikkal ;\n9:26 ne\u0263 m'ulac, yili ye\u025bteb a\u1e6das n iberdan seg wasmi i d-texleq ddunit. Lame\u025bna yusa-d di zzman-agi aneggaru yiwet n tikkelt kan, isebbel iman-is d asfel iwakken ad ikkes ddnub.\n9:27 Lmut te\u021b\u021bawi imdanen yiwet n tikkelt kan imiren a d-yili l\u1e25isab.\n9:28 Ula d Lmasi\u1e25 yefka iman-is yiwet n tikkelt kan iwakken ad i\u025bebbi ddnubat n wa\u1e6das n yemdanen, a d yu\u0263al tikkelt tis snat, ma\u010d\u010di iwakken ad yekkes da\u0263en ddnubat n yemdanen me\u025bna iwakken ad isellek wid i t-ye\u021b\u1e5ba\u01e7un\n10:1 Ccari\u025ba n Musa ur d-\u021bbeggin ara tide\u021b akken tella, me\u025bna d lemtel n lxi\u1e5bat i d-iteddun, daymi ur tezmir ara a\u021b-\u021bessiwe\u1e0d \u0263er tezdeg ikemlen wid ye\u021bqe\u1e5b\u1e5biben \u0263er \u1e5aebbi s iseflawen i \u021bqeddimen seg useggas \u0263er useggas.\n10:2 Ihi tura lemmer wid ye\u021bqeddimen iseflawen-agi, \u021bwa\u1e63effan si ddnubat nsen, tili ur \u021b\u021bu\u0263alen ara ad fken iseflawen \u0263ef ddnubat-nsen, imi ad \u1e25\u1e63un deg wulawen-nsen belli \u1e63fan.\n10:3 Me\u025bna s iseflawen-agi \u021bmektayen-d yal aseggas belli mazal-iten d imednuben.\n10:4 Imi d lmu\u1e25al idammen n i\u025bejmiyen d iqelwacen ad kksen ddnubat.\n10:5 Daymi mi i g\u021beddu a d-yas Lmasi\u1e25 \u0263er ddunit yenna i Sidi \u1e5aebbi : Ur teb\u0263i\u1e0d iseflawen, ur teb\u0263i\u1e0d lew\u025badi ; lame\u025bna tefki\u1e0d-iyi-d \u0263er ddunit s \u1e63\u1e63ifa n wemdan.\n10:6 Ur teqbile\u1e0d iseflawen n lmal i te\u021b\u021be\u021b tmes, ur teqbile\u1e0d iseflawen itekksen ddnub ;\n10:7 D\u0263a nni\u0263 : Aql-iyi-n ay Illu-yiw, usi\u0263-ed ad xedme\u0263 leb\u0263i-k, akken yura fell-i di tektabt iqedsen.\n10:8 Teslam d acu i d-yenna Lmasi\u1e25 ! Yenna : Ur teb\u0263i\u1e0d iseflawen d lew\u025badi, ur teqbile\u1e0d iseflawen n lmal i te\u021b\u021be\u021btmes ur teqbile\u1e0d iseflawen itekksen ddnub, \u0263as akken iseflawen-agi \u021b\u021bunefken akken yura di ccari\u025ba.\n10:9 Yerna yenna : Aql-iyi usi\u0263-ed iwakken ad xedme\u0263 leb\u0263i-k . S wakka Sidi \u1e5aebbi yekkes akk iseflawen imezwura, yerra-d deg wemkan-nsen asfel n Lmasi\u1e25.\n10:10 \u0190isa Lmasi\u1e25 yexdem leb\u0263i n Sidi \u1e5aebbi, isebbel iman-is d asfel, i\u1e63effa-ya\u0263 si ddnub \u0263ef yiwet n tikkelt.\n10:11 Lmuqedmin \u021bqeddimen mkul ass iseflawen n lmal ur nezmir ad kksen ddnub.\n10:12 Ma d ne\u021b\u021ba yefka yiwen wesfel kan i dayem \u0263ef ddemma n ddnubat ; d\u0263a ye\u1e6d\u1e6def amkan n l\u1e25ekma \u0263er tama tayeffust n Sidi \u1e5aebbi,\n10:13 alamma u\u0263alen ye\u025bdawen-is seddaw i\u1e0da\u1e5b\u1e5ben-is.\n10:14 S yiwen wesfel kan yessazdeg i dayem wid ye\u021bwaxta\u1e5ben.\n10:15 Ula d \u1e5a\u1e5bu\u1e25 iqedsen ibeggen-it-id imi gura di tira iqedsen :\n10:16 Sidi \u1e5aebbi yenna : atan le\u025bqed ara sbedde\u0263 gar-i yid-sen, M 'ara \u025beddin wussan-agi ad skecme\u0263 lumu\u1e5b-inu deg wulawen-nsen, a ten-aru\u0263 di l\u025beqliya-nsen\n10:17 Yenna da\u0263en : Ur d-\u021bmektaye\u0263 ara ddnubat akk-d yir lec\u0263al-nsen.\n10:18 Ma yella Sidi \u1e5aebbi ye\u025bfa-ya\u0263 ddnubat-nne\u0263, acu\u0263e\u1e5b ihi i ne\u1e25wa\u01e7 tura iseflawen n lmal \u0263ef ddnub.\n10:19 Ay atmaten, imi uzzlen idammen n \u0190isa Lmasi\u1e25 fell-ane\u0263, ne\u021bkel a nekcem \u0263er wemkan iqedsen,\n10:20 axa\u1e6der yeldi-ya\u0263 abrid ajdid \u0263er tudert mi gcerreg le\u1e25jab, ye\u025bni l\u01e7e\u021b\u021ba-s i\u021b\u021busemm\u1e5ben.\n10:21 Nes\u025ba lmuqeddem ameqqran yellan d aqe\u1e5b\u1e5buy \u0263ef wexxam n Sidi \u1e5aebbi.\n10:22 A nqe\u1e5b\u1e5beb ihi \u0263er \u1e5aebbi s wul d liman ikemlen, s wulawen-nne\u0263 zeddigen seg yir ixemmimen, s l\u01e7e\u021b\u021bat-nne\u0263 yuraden s waman ye\u1e63fan.\n10:23 Ilaq a ne\u1e6d\u1e6def deg usirem-nne\u0263 s wayes i ne\u021bcehhid, axa\u1e6der win i \u0263-i\u025buhden ite\u1e6d\u1e6def deg wawal-is.\n10:24 A n\u021bem\u1e25adar wway gar-ane\u0263, a n\u021bemwe\u1e63\u1e63i \u0263ef le\u1e25mala d lec\u0263al yelhan.\n10:25 Ur ilaq ara a ne\u1e6d\u1e6dixe\u1e5b si tejma\u025bt n watmaten akken u\u0263en tannumi kra nni\u1e0den, me\u025bna a n\u021bemyenhut wway gar-ane\u0263 imi ass n tu\u0263alin n Ssid nne\u0263 iqe\u1e5b\u1e5beb-ed.\n10:26 Ma yella ne\u021bkemmil ne\u021b\u025bici di ddnub s leb\u0263i-nne\u0263 yili nukni nessen tide\u021b, ur d-yeqqim ara wesfel ara \u0263-yekksen ddnub-nne\u0263,\n10:27 yeqqim-a\u0263-ed kan a ne\u1e5b\u01e7u s lxuf ameqqran l\u1e25isab i d-i\u021beddun \u021b-\u021bmes i\u1e5beqqen ara ye\u010d\u010den wid i\u025bu\u1e63an \u1e5aebbi.\n10:28 Kra n win i gxulfen ccari\u025ba n Musa, ma yella cehden-d fell-as sin ne\u0263 tlata inigan belli yuklal lmut ad immet mbla \u1e5b\u1e5be\u1e25ma ;\n10:29 amek ihi ara ted\u1e5bu d win ara yewten di Mmi-s n \u1e5aebbi, ur ne\u1e25sib ara idammen n le\u025bqed i t-i\u1e63effan, ara iregmen \u1e5a\u1e5bu\u1e25 iqedsen i \u0263-d-yewwin \u1e5b\u1e5be\u1e25ma n Sidi \u1e5aebbi.\n10:30 Axa\u1e6der ne\u1e93ra anwa i d-yennan : ?\u021ba\u1e5b d ayla-w, d nekk ara ten-ixel\u1e63en akken uklalen Yenna da\u0263en : D ne\u021b\u021ba ara i\u1e25asben agdud-is.\n10:31 A nnger n win ara d-ye\u0263lin ger ifassen n Sidi \u1e5aebbi yeddren !\n10:32 Mmektit-ed ussan imezwura i deg twalam tafat n Sidi \u1e5aebbi d wamek tqublem le\u025btab di tegni\u021b n ccedda :\n10:33 seg yiwet n tama reggmen-kkun, kksen fell-awen sser, si tama nni\u1e0den tbeddem \u0263er wid iwumi yed\u1e5ba wayagi.\n10:34 ?-\u021bide\u021b t\u1e25unnem \u0263ef yime\u1e25bas yerna tqeblem s lfe\u1e5b\u1e25 a wen-kksen ayla nwen, axa\u1e6der te\u1e93ram belli tes\u025bam ayen yugaren ayagi yerna d ayen ye\u021bdumun.\n10:35 Ihi \u1e25adret a wen-i\u1e5bu\u1e25 laman i tes\u025bam \u0263er \u1e5aebbi axa\u1e6der a wen-d-yawi rrbe\u1e25 d ameqqran.\n10:36 Ilaq-awen a\u021b-\u021bes\u025bum \u1e63\u1e63be\u1e5b iwakken a\u021b-\u021bxedmem leb\u0263i n \u1e5aebbi iwakken a wen-d-yefk ayen i wen yew\u025bed.\n10:37 Drus i mazal, di kra n lweqt a d-yawe\u1e0d win akken ara d-yasen, ur ye\u021b\u025be\u1e6d\u1e6dil ara.\n10:38 A\u1e25eqqi \u0263er \u0263u\u1e5b-i d win i g\u021beklen fell-i, yes\u025ban liman deg wul-is me\u025bna ma iwexxe\u1e5b fell-i ad zzi\u0263 udem-iw fell-as.\n10:39 Ma d nukni ur nelli ara seg wid ye\u1e6d\u1e6dixi\u1e5ben i webrid n \u1e5aebbi, ur nelli ara seg wid ye\u021b\u021bu\u0263alen \u0263er deffir, ye\u021b\u1e0di\u025ben, lame\u025bna nukni seg wid yes\u025ban liman, ne\u021b\u021beddu deg ubrid n leslak.\n11:1 Liman \u0263er \u1e5aebbi, d le\u021bkal nes\u025ba belli a \u0263-d-yawe\u1e0d wayen i ne\u021b\u1e5ba\u01e7u, \u0263as ur t-nwala ara s wallen-nne\u0263 ne\u1e93ra \u021b-\u021bide\u021b yella.\n11:2 Si zik wid i g\u025be\u01e7ben i Sidi \u1e5aebbi, d wid yes\u025ban liman deg-s.\n11:3 S liman i nefhem belli ddunit te\u021bwaxleq s wawal n \u1e5aebbi ; ihi ayen ne\u021bwali yekka-d seg wayen ur ne\u021bwali ara.\n11:4 S liman i gqeddem Habil asfel i Sidi \u1e5aebbi axi\u1e5b n wesfel n gma-s Kahin, \u0263ef ddemma n liman-ines Sidi \u1e5aebbi yeqbel asfel-ines yerna i\u1e25seb-it d a\u1e25eqqi ; daymi \u0263as yemmut yeqqim-ed d lemtel \u0263ef liman.\n11:5 S liman, Hanux ye\u021bwarfed \u0263er igenni mbla ma t\u025bedda fell-as lmut, i\u0263ab \u0263ef wallen, ur d-iban ara axa\u1e6der irfed-it Sidi \u1e5aebbi \u0263u\u1e5b-es. Uqbel ad ye\u021bwarfed ye\u1e93ra belli ye\u025b\u01e7eb i Sidi \u1e5aebbi.\n11:6 Ihi, mbla liman d lmu\u1e25al ad ye\u025b\u01e7eb yiwen i \u1e5aebbi, axa\u1e6der win ara iqe\u1e5b\u1e5bben \u0263u\u1e5b-es ilaq ad yamen belli yella yerna iqebbel-ed wid ye\u021bnadin fell-as.\n11:7 S liman, i gumen nnbi Nu\u1e25 ayen i s-d-iwe\u1e25\u1e25a Sidi \u1e5aebbi \u0263ef wayen ara yed\u1e5bun, \u0263as akken mazal ur iwala acemma s wallen-is, yebna lbabu\u1e5b iwakken ad isellek at wexxam-is. S wakka i g\u1e25useb at ddunit imi yu\u0263 awal i Sidi \u1e5aebbi, yu\u0263al d a\u1e25eqqi \u0263u\u1e5b-es \u0263ef ddemma n liman yes\u025ba.\n11:8 S liman i gu\u0263 Ib\u1e5bahim awal i Sidi \u1e5aebbi mi s-d-yessawel ad i\u1e5bu\u1e25 \u0263er yiwet n tmurt ara s-yefk d lwe\u1e5bt ; i\u1e5bu\u1e25 \u0263as akken ur ye\u1e93ri ara \u0263er wanda i\u021beddu.\n11:9 S liman da\u0263en i g\u025bac am ube\u1e5b\u1e5bani di tmurt i s-yew\u025bed Sidi \u1e5aebbi, yezde\u0263 deg iqi\u1e0dunen am ne\u021b\u021ba am warraw-is Is\u1e25aq akk-d Ye\u025bqub iwe\u1e5bten yid-es ayen akken i s-yew\u025bed Sidi \u1e5aebbi.\n11:10 Ye\u021b\u1e5ba\u01e7u tamdint ibedden \u0263ef lsas i\u01e7ehden, tin akken yebna Sidi \u1e5aebbi s yiman-is.\n11:11 S liman, ?ara tes\u025ba-d dderya \u0263as akken \u021b-\u021bi\u025biqe\u1e5bt yerna meqqe\u1e5bt di le\u025bme\u1e5b, tumen belli win i s-yefkan l\u025bahed, ad i\u1e6d\u1e6def deg wawal-is.\n11:12 Daymi seg yiwen wergaz iwumi kkawen ifadden teffe\u0263-ed dderya s wa\u1e6das dderya n dderya-k ad ilin am yitran n igenni, am \u1e5b\u1e5bmel yellan \u0263ef rrif n leb\u1e25e\u1e5b, ur yezmir yiwen a ten ye\u1e25seb.\n11:13 Di liman, i mmuten akk yemdanen-agi uqbel a ten-id-yawe\u1e0d wayen i sen-yew\u025bed Sidi \u1e5aebbi, lame\u025bna walan-t si leb\u025bid fe\u1e5b\u1e25en yis yerna set\u025be\u1e5bfen belli d ibe\u1e5b\u1e5baniyen, d imsebriden di ddunit.\n11:14 Wid ihedd\u1e5ben akka, iban \u021bnadin tamurt i yiman-nsen.\n11:15 Lemmer ndemmen imi \u01e7\u01e7an tamurt-nsen tili u\u0263alen \u0263u\u1e5b-es,\n11:16 me\u025bna nutni \u021bqelliben \u0263ef tmurt ifazen ye\u025bni tin n igenwan, daymi Sidi \u1e5aebbi ur isset\u1e25a ara ad i\u021b\u021busemmi d Illu-nsen axa\u1e6der ihegga yasen tamurt.\n11:17 S liman i gefka Ib\u1e5bahim mmi-s Is\u1e25aq d asfel mi i t-ije\u1e5b\u1e5beb Sidi \u1e5aebbi, ne\u021b\u021ba iwumi d-\u021bunefkent lem\u025bahdat, yeqbel ad yefk mmi-s aw\u1e25id d asfel,\n11:18 ne\u021b\u021ba iwumi i d-yenna Sidi \u1e5aebbi : Seg Is\u1e25aq ara k-d-fke\u0263 dderya ara irefden isem-ik.\n11:19 Ye\u021bkel \u0263ef \u1e5aebbi bab n tezmert belli yezmer a d-isse\u1e25yu ula si ger lmegtin daymi i s-d-yerra mmi-s : ayagi yella-d d lemtel.\n11:20 S liman, Is\u1e25aq iburek arraw-is Ye\u025bqub akk-d Ica\u025bu \u0263ef ddemma n wayen i d-iteddun.\n11:21 S liman da\u0263en i gburek Ye\u025bqub arraw n Yusef uqbel ad yemmet, s liman i gsenned \u0263ef wu\u025bekkaz iwakken ad i\u025bbed \u1e5aebbi.\n11:22 S liman i gcar Sidna Yusef uqbel ad immet \u0263ef tuff\u0263a n wat Is\u1e5bail si tmurt n Ma\u1e63er, i gwe\u1e63\u1e63a ad awin i\u0263san-is yid-sen.\n11:23 S liman, imawlan n Sidna Musa ffren-t tlata n wagguren mi d-ilul axa\u1e6der walan aqcic yecbe\u1e25 d\u0263a ur uggaden ara lame\u1e5b n ugellid.\n11:24 S liman, mi meqqe\u1e5b Sidna Musa ur yeqbil ara ad i\u021b\u021busemmi d mmi-s n yelli-s n Fer\u025bun,\n11:25 yexta\u1e5b ad ye\u025bteb d wegdud n \u1e5aebbi wala ad iqqim di zzhu n ddunit-agi ye\u021b\u021bawin \u0263er ddnub.\n11:26 Yefhem belli le\u025btab n Lmasi\u1e25, d s\u025baya tameqqrant yugaren igerrujen n tmurt n Ma\u1e63er axa\u1e6der iwala \u0263er zdat lerba\u1e25 i t-ye\u021b\u1e5ba\u01e7un.\n11:27 S liman i d-iffe\u0263 si tmurt n Ma\u1e63er ur yuggad ara agellid iwe\u025b\u1e5ben, ye\u1e6d\u1e6def di liman am win iwalan win akken ur ye\u021bwali yiwen.\n11:28 S liman i gefka lame\u1e5b ad zlun izimer n leslak, i g\u1e5bucc tiwwura s idammen n izimer-nni iwakken m'ara d-i\u025beddi win yessengaren ur ye\u021bnal ara imenza i d-ilulen \u0263er wat Is\u1e5bail.\n11:29 S liman, agdud n Is\u1e5bail yezger \u0263ef wu\u1e0dar i leb\u1e25e\u1e5b azegga\u0263, ma d ima\u1e63riyen mi \u025be\u1e5bden ad zegren am nutni, ye\u010d\u010da-ten.\n11:30 S liman i \u0263lin leswa\u1e5b n temdint n Yeriku mi i s-yezzi wegdud n Is\u1e5bail seb\u025ba wussan.\n11:31 S liman, \u1e5aa\u1e25ab yellan d yir tame\u1e6d\u1e6dut ur temmut ara akk-d wid ur numin ara s \u1e5aebbi axa\u1e6der teste\u1e5b\u1e25eb akken ilaq s wid i d-yusan ad ssiw\u1e0den lexba\u1e5b i wat Is\u1e5bail a sen-awin lexba\u1e5b.\n11:32 D acu ara d-ini\u0263 da\u0263en ? A\u1e6das n lweqt i glaqen iwakken a d-hed\u1e5be\u0263 \u0263ef Gid\u025bun, \u0263ef Baraq, \u0263ef Samsun, \u0263ef Jifti, \u0263ef Sidna Dawed, \u0263ef Camwil ne\u0263 \u0263ef lenbiya me\u1e5b\u1e5ba.\n11:33 Wid i greb\u1e25en deg umen\u0263i tigeldiwin nni\u1e0den s liman, xedmen anagar l\u1e25eqq, \u021b\u021bunefkent-asen-d lem\u025bahdat, zemmemen imawen n yizmawen,\n11:34 \u0263elben tazmert n tmes, men\u025ben i ujenwi qe\u1e6d\u1e6di\u025ben, \u1e25lan si lehlakat-nsen, zew\u1e5ben deg umen\u0263i, l\u025beske\u1e5b n tmura nni\u1e0den rewlen zdat-sen.\n11:35 Kra n tilawin walant wid i sent-yemmuten u\u0263alen-d si ger lmegtin, wiya\u1e0d \u021bwaqeh\u1e5ben me\u025bna ur qbilen ara \u1e5b\u1e5be\u1e25ma n yemdanen iwakken ad s\u025bun \u1e25eggu n tide\u021b.\n11:36 Wiya\u1e0d da\u0263en \u021bwaqeh\u1e5ben s ustehzi, s ujelkka\u1e0d, s snasel d le\u1e25bus.\n11:37 ?wa\u1e5bejmen, \u021bwaje\u1e5bben, \u021bwagezmen s umenca\u1e5b, mmuten s ujenwi, teddun sya \u0263er da, llebsa nsen d ib\u1e0danen n wulli \u021b-\u021b\u0263e\u1e6d\u1e6den, ye\u021bwakkes-asen kullec, \u021bwa\u1e25eq\u1e5ben, \u021bwaqeh\u1e5ben.\n11:38 Nutni ur tuklal ara ddunit, \u021bmen\u1e6daren deg unez\u1e5buf, deg idurar, deg ifran d mkul amkan n ddunit.\n11:39 Widak-agi me\u1e5b\u1e5ba ye\u021bwaqeblen \u0263er \u1e5aebbi s liman-nsen ur\u025bad i ten-id yewwe\u1e0d wayen i sen-yew\u025bed,\n11:40 Axa\u1e6der Sidi \u1e5aebbi ihegga-ya\u0263 ayen yifen ayen akken i sen-yew\u025bed i nutni, iwakken ur \u021b\u021baw\u1e0den ara \u0263er wayen akken ikemlen mbla ma n\u021bekka yid-sen.\n12:1 Ula d nukni ihi imi i \u0263-d zwaren wa\u1e6das inagan agi, a n\u1e0degge\u1e5b ta\u025bkumt-nne\u0263 akk-d ddnub i \u0263-i\u0263ummen, a nexdem s \u1e63\u1e63be\u1e5b cc\u0263el-agi i \u0263-d-i\u021b\u021bunefken.\n12:2 A n\u1e5be\u1e63\u1e63i tamu\u0263li-nne\u0263 di \u0190isa Lmasi\u1e25, ne\u021b\u021ba i \u0263-d-ildin abrid n liman yerna yessawa\u1e0d-it \u0263er lekmal ; mi ge\u1e93ra lfe\u1e5b\u1e25 i t-ye\u021b\u1e5ba\u01e7un, yeqbel le\u025btab \u0263ef wumidag, yeqbel tam\u1e25eq\u1e5banit akk-d l\u1e25ecma, d\u0263a ye\u1e6d\u1e6def amkan n l\u1e25ekma \u0263er tama tayeffust n Sidi \u1e5aebbi.\n12:3 Xemmemet ihi \u0263u\u1e5b-es a\u021b-\u021bwalim amek i geqbel le\u025btab n yemdanen imednuben, iwakken ur t\u025beggum ara, ur tfe\u010d\u010dlem ara ;\n12:4 axa\u1e6der kunwi mazal ur tennu\u0263em ara akk-d ddnub armi d lmut,\n12:5 yerna te\u021b\u021bum lew\u1e63ayat i wen-d-i\u021b\u021bak am warraw-is. A mmi ur \u1e25eqqe\u1e5b ara tiyita n Sidi \u1e5aebbi, ur fe\u010d\u010del ara m'ara d-izzem fell-ak\n12:6 axa\u1e6der Sidi \u1e5aebbi ye\u021bqassa wid i g\u1e25emmel, ye\u021b\u021bak ti\u0263\u1e5bit i wid i ge\u1e25seb d arraw-is .\n12:7 Qeblet le\u025btab, imi Sidi \u1e5aebbi i\u1e25seb-ikkun d arraw-is ; axa\u1e6de\u1e5b ulac argaz ur ne\u021bqassa ara mmi-s ;\n12:8 lame\u025bna ma yella tmen\u025bem i tiyita-agi i ge\u021b\u1e25azen imdanen me\u1e5b\u1e5ba, atan ihi ur tellim ara d dderya n le\u1e25lal, me\u025bna te\u021b\u021busemmam d arraw n le\u1e25\u1e5bam.\n12:9 Imi ibabaten-nne\u0263 i \u0263-d-is\u025ban \u021b\u021baken-a\u0263 tiyita yerna nqude\u1e5b-iten, amek ur ne\u021bqada\u1e5b ara \u1e5aebbi yellan d Baba-tne\u0263 s \u1e5a\u1e5bu\u1e25 iqedsen, iwakken a nes\u025bu tudert ?\n12:10 Imawlan-nne\u0263 \u021b\u1e5bebbin-a\u0263 dagi di ddunit akken i sen yehwa, lame\u025bna Baba-tne\u0263 n igenwan ye\u021b\u021bak-a\u0263 ti\u0263\u1e5bit di nnfe\u025b-nne\u0263 iwakken a nu\u0263al d izedganen am ne\u021b\u021ba.\n12:11 S tide\u021b m'ara \u0263-\u021b\u1e5bebbin ye\u021b\u0263i\u1e0d a\u0263 l\u1e25al lame\u025bna m'ara t\u025beddi teswi\u025bt-nni, a naf belli d ayen yelhan i tudert-nne\u0263.\n12:12 S\u01e7ehdet ihi i\u0263allen-nwen ye\u025byan akk \u021b-\u021bgecrar-nwen ifeclen.\n12:13 \u1e5ae\u1e63\u1e63it i\u1e0da\u1e5b\u1e5ben-nwen, ddut deg ubrid n lewqam, iwakken win isqu\u1e0du\u1e5ben ur i\u0263elli ara me\u025bna ad ibedd.\n12:14 Nadit amek ara tilim di lehna d medden me\u1e5b\u1e5ba, nadit \u0263ef \u1e63\u1e63fa axa\u1e6der win ur ne\u1e63fi ara ur izmir ara ad iwali Sidi \u1e5aebbi.\n12:15 ?adret ad yili gar-awen win ara ye\u1e6d\u1e6dix\u1e5ben \u0263ef \u1e5b\u1e5be\u1e25ma n Sidi \u1e5aebbi, ara yes\u025bun l\u0263ecc, a t-ye\u01e7\u01e7 ad yefk ixulaf deg wul-is alamma yu\u0263al d ugur ara i\u1e0du\u1e5b\u1e5ben wiya\u1e0d.\n12:16 ?u\u1e5b-wat ad yili gar-awen win ara ijehlen, ad iffe\u0263 i iberdan n \u1e5aebbi am Ica\u025bu yezzenzen l\u1e25eqq-is n umenzu s u\u1e0debsi n lmakla.\n12:17 Te\u1e93ram mbe\u025bd, mi geb\u0263a ad iw\u1e5bet lba\u1e5baka s \u0263u\u1e5b baba-s ur ye\u021bwaqbel ara \u0263as akken ye\u021b\u1e25ellil-it s ime\u1e6d\u1e6dawen, ur s-yufi ara abrid amek ara s-ibeddel \u1e5b\u1e5bay.\n12:18 Kunwi ur tqe\u1e5b\u1e5bbem ara am wegdud n Is\u1e5bail \u0263er wedrar i gezmer wemdan a t-yennal, i deg tec\u025bel tmes ; ur twalam ara am nutni asigna d \u1e6d\u1e6dlam akk-d \u021bbuci\u1e0dant,\n12:19 ur teslim ara am nutni i \u1e63\u1e63ut n lbuq ne\u0263 i \u1e5b\u1e5b\u025bud n leh\u1e0dur-nni armi e\u025bnan \u0263er \u1e5aebbi ur sen-d-irennu ula d yiwen n wawal.\n12:20 Axa\u1e6der ur qbilen ara imeslayen-agi : ?as d yiwen si lmal ara d-iqe\u1e5b\u1e5bben \u0263er wedrar-agi, ad immet s we\u1e5bjam.\n12:21 Ayagi d ayen yessexla\u025ben armi ula d Sidna Musa yenna : Tekcem-iyi tugdi armi i \u021bergigi\u0263.\n12:22 Lame\u025bna kunwi tqe\u1e5b\u1e5bbem \u0263er wedrar n Siyun, \u0263er temdint n Sidi \u1e5aebbi bab n tudert, \u0263er temdint n Lquds yellan deg igenwan anda llant luluf n lmalayekkat.\n12:23 Tqe\u1e5b\u1e5bbem \u0263er tejma\u025bt n wid yexta\u1e5b \u1e5aebbi d imezwura yes\u025ban ismawen-nsen uran deg igenwan. Tqe\u1e5b\u1e5bbem \u0263er \u1e5aebbi ne\u021b\u021ba i g\u1e25ekkmen \u0263ef yemdanen me\u1e5b\u1e5ba, tqe\u1e5b\u1e5bbem \u0263er le\u1e5bwa\u1e25 n i\u1e25eqqiyen i geww\u1e0den \u0263er lekmal.\n12:24 Tqe\u1e5b\u1e5bbem da\u0263en \u0263er \u0190isa i \u0263-ildin abrid \u0263er \u1e5aebbi s lem\u025bahda tajdi\u1e6d akk-d idammen-is yuzzlen, yes\u025ban azal akte\u1e5b n wid n Habil.\n12:25 ?u\u1e5b-wat ihi, sme\u1e25siset i win i wen-d-i\u021bmeslayen, ur xeddmet ara am wat Is\u1e5bail yugin ad sem\u1e25essen i win i sen-d-icegge\u025b Sidi \u1e5aebbi akken a d-u\u0263alen \u0263er webrid, axa\u1e6der ma yella nutni ye\u0263li-d fell-asen l\u025biqab n \u1e5aebbi amek ara nemne\u025b seg-s nukni, m'ur nu\u0263 ara awal i win i \u0263-d-i\u021bwe\u1e63\u1e63in seg igenwan.\n12:26 Zik-nni, s \u1e63\u1e63ut-is yessenhez lqa\u025ba, ma \u021b-\u021bura yefka-d lem\u025bahda-agi : Tikkelt nni\u1e0den ad senhezze\u0263 da\u0263en ma\u010d\u010di kan ddunit me\u025bna ula d igenwan .\n12:27 Imeslayen-agi \u00ab tikkelt nni\u1e0den da\u0263en \u00bb sbeggnen-d belli ayen ye\u021bwaxelqen ad yenhezz ad yenger iwakken a d-yeqqim kan wayen ye\u021bdumun.\n12:28 ?ef wannect-agi imi i \u0263-d te\u021b\u021bunefk tgeldit ibedden \u0263ef lsas i\u1e63e\u1e25\u1e25an a ne\u1e25med a ncekke\u1e5b Sidi \u1e5aebbi s we\u025bbad i s-i\u025be\u01e7ben, s liman \u021b-\u021bugdi.\n12:29 Axa\u1e6der Illu-nne\u0263 am tmes ite\u021b\u021ben.\n13:1 Kemmlet mye\u1e25malet wway gar-awen am atmaten,\n13:2 ur te\u021b\u021but ara da\u0263en belli ilaq-awen a\u021b-\u021bes\u1e6dre\u1e25bem s ibe\u1e5b\u1e5baniyen axa\u1e6der a\u1e6das i ges\u1e6d\u1e5be\u1e25ben s lmalayekkat mbla ma \u1e93ran.\n13:3 Xemmemet ihi \u0263ef yime\u1e25bas am akken yid-sen i te\u021bwa\u1e25ebsem, mmektit-ed wid yenne\u025btaben am akken ula d kunwi tenne\u025btabem yid-sen.\n13:4 Ilaq-awen a\u021b-\u021befkem azal i zzwa\u01e7, argaz \u021b-\u021bme\u1e6d\u1e6dut-is ur \u021bemyexda\u025ben ara axa\u1e6der Sidi \u1e5aebbi ad i\u025baqeb wid izennun ile\u1e25\u1e25un deg yir abrid.\n13:5 Ur \u021ba\u01e7\u01e7at ara iman-nwen a kkun \u0263u\u1e5b\u1e5ben yedrimen, setqen\u025bet s wayen tes\u025bam. Sidi \u1e5aebbi s yiman-is yenna d : U r k-\u021ba\u01e7\u01e7a\u0263 ara, ad ili\u0263 yid-ek.\n13:6 Daymi i ne\u021bkel, nezmer a d-nini : Sidi \u1e5aebbi d am\u025bawen-inu, ulac ayen ara aggade\u0263 ;d acu i gezmer a yi-t-ixdem wemdan ?\n13:7 Mmektit-ed wid i wen-yemlan abrid, i wen d-ibecc\u1e5ben awal n \u1e5aebbi ; meyzet amek tekfa tudert nsen, s\u025but liman am nutni.\n13:8 \u0190isa Lmasi\u1e25, d win yellan i\u1e0delli, i gellan ass-a, ara yilin i dayem.\n13:9 ?u\u1e5b-wat a\u021b-teb\u025bem ddyanat tibe\u1e5b\u1e5baniyin ; axa\u1e6der d ul ye\u010d\u010du\u1e5ben d \u1e5b\u1e5be\u1e25ma i gelhan ma\u010d\u010di d win ye\u010d\u010du\u1e5ben d leqwanen ye\u025bnan lmakla ; wid yettaba\u025ben ayagi ur stenf\u025ben acemma.\n13:10 ?u\u1e5b-nne\u0263 adekkan n tmezliwt anda ur zmiren ara lmuqedmin iqeddcen deg uqi\u1e0dun n temlilit ad \u010d\u010den ayen i d ye\u021b\u021bunefken d asfel.\n13:11 Te\u1e93ram belli lmuqeddem ameqqran ike\u010d\u010dem \u0263er wemkan iqedsen nezzeh, ye\u021b\u021bawi yid-es idammen n lmal iwakken a ten iqeddem \u0263ef ddnub, ma d l\u01e7e\u021b\u021bat yesse\u1e5b\u0263ay-itent be\u1e5b\u1e5ba n uqi\u1e0dun.\n13:12 ?ef wayagi Sidna \u0190isa da\u0263en yemmut be\u1e5b\u1e5ba n temdint iwakken s idammen-is, ad yessizdeg agdud me\u1e5b\u1e5ba.\n13:13 A n\u1e5bu\u1e25et ihi \u0263u\u1e5b-es \u0263er be\u1e5b\u1e5ba, a neqbel a ne\u021bwak\u1e5beh am ne\u021b\u021ba.\n13:14 Imi dagi di ddunit ur nes\u025bi ara tamezdu\u0263t n dayem, ne\u021bnadi \u0263ef tmezdu\u0263t n igenwan.\n13:15 A ne\u1e25med \u1e5aebbi di mkul lweqt, s yisem n Sidna \u0190isa ; d wagi i d asfel ara s-nqeddem i Sidi \u1e5aebbi, m'ara ne\u021bberri\u1e25 isem-is.\n13:16 Ur stehzayet ara, xedmet ayen yelhan, \u021bem\u025bawanet : d wigi i d iseflawen i\u025be\u01e7ben Sidi \u1e5aebbi.\n13:17 A\u0263et awal i wid i wen-immalen abrid, \u1e0du\u025bet-\u021ben axa\u1e6der \u021b\u025bassan fell awen, \u1e93ran a d-yas wass deg ara ten-i\u1e25aseb Sidi \u1e5aebbi \u0263ef lxedma nsen. Akka ara xedmen cc\u0263el-nsen akken ilaq s lfe\u1e5b\u1e25 ma\u010d\u010di s le\u1e25zen ne\u0263 m'ulac ur tse\u025b\u025bum ara lfayda.\n13:18 De\u025b\u025but \u0263er \u1e5aebbi s lxi\u1e5b fell ane\u0263, axa\u1e6der ne\u1e93ra nes\u025ba ul yethennan, n\u1e25emmel a neddu akken ilaq di mkul taswi\u025bt.\n13:19 Ad ssutre\u0263 deg-wen a\u021b-\u021bed\u025bum \u0263er \u1e5aebbi fell-i iwakken ur \u021b\u025be\u1e6d\u1e6dile\u0263 ara a n-u\u0263ale\u0263 \u0263u\u1e5b-wen.\n13:20 Ad ssutre\u0263 di Sidi \u1e5aebbi bab n talwit i d-isse\u1e25yan Ssid-nne\u0263 yellan d Ameksa ameqqran s idammen-is yuzzlen, i \u0263ef tbedd lem\u025bahda n dayem,\n13:21 a kkun-yawi d webrid yelhan, a\u021b-\u021bxedmem kra yellan d leb\u0263i-s. Ad yexdem deg-ne\u0263 leb\u0263i-s s yisem n \u0190isa Lmasi\u1e25, ne\u021b\u021ba yes\u025ban tamanegt i dayem. Amin.\n13:22 Ay atmaten, a wen-ssutre\u0263 a\u021b-\u021bqeblem s \u1e63\u1e63be\u1e5b ayagi akk i \u0263ef kkun-we\u1e63\u1e63a\u0263 ; atan tab\u1e5ba\u021b-agi i wen-uri\u0263 \u021b-\u021bamec\u1e6du\u1e25t.\n13:23 A kkun xebb\u1e5be\u0263 belli gma-tne\u0263 Timuti yeffe\u0263-ed si l\u1e25ebs, ma yella il\u1e25eq-ed zik, atan a d-n\u1e5bu\u1e25 \u0263u\u1e5b-wen nekk yid-es.\n13:24 Sellmet \u0263ef yimeqqranen akk n tejma\u025bt d watmaten me\u1e5b\u1e5ba. Atan \u021bsellimen-d fell-awen watmaten n ?elyan.\n13:25 \u1e5a\u1e5be\u1e25ma n Sidi \u1e5aebbi a\u021b-\u021bili yid-wen me\u1e5b\u1e5ba.","title":"Kabyle Bible (NT): Hebrews","type":"page"}