{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/jam.htm","path":"bib/wb/kab/jam.htm","source_url":"https://sacred-texts.com/bib/wb/kab/jam.htm","text":"1:1 Nekk Ye\u025bqub aqeddac n Sidi \u1e5aebbi akk-d Sidna \u0190isa Lmasi\u1e25, sslam-iw i tnac le\u025b\u1e5bac n wegdud n Sidi \u1e5aebbi yenwezza\u025ben di ddunit me\u1e5b\u1e5ba !\n1:2 Ay atmaten, fe\u1e5b\u1e25et m'ara \u021b\u025beddayent fell-awen teswi\u025bin uje\u1e5b\u1e5beb,\n1:3 axa\u1e6der te\u1e93ram belli aje\u1e5b\u1e5beb n liman nwen ye\u021b\u021bawi-d \u1e63\u1e63be\u1e5b.\n1:4 Me\u025bna ilaq \u1e63\u1e63be\u1e5b-nwen a kkun issiwe\u1e0d a\u021b-\u021bxedmem lec\u0263al yelhan iwakken a\u021b-\u021bilim d wid yennekmalen, a\u021b-\u021b\u01e7ehdem ur kkun-ye\u021bxa\u1e63\u1e63a ula d acemma.\n1:5 Ma yella yiwen deg-wen ixu\u1e63\u1e63 di lefhama, a \u021b-yessuter i Sidi \u1e5aebbi i d-ye\u021b\u021baken i yemdanen me\u1e5b\u1e5ba mbla cce\u1e25\u1e25a d ulummu, a s-\u021b-id-yefk.\n1:6 Lame\u025bna Ilaq a \u021b-yessuter s liman mbla ccekk ; axa\u1e6der win ye\u021bcukkun icuba \u0263er lemwaji n leb\u1e25e\u1e5b i greffed yesrusu wa\u1e0du.\n1:7 Amdan am wagi \u0263as ur i\u1e6d\u1e6dama\u025b ara di Sidi \u1e5aebbi a s-d-yefk kra,\n1:8 axa\u1e6der d amdan ur nes\u025bi ara yiwen n \u1e5b\u1e5bay, lec\u0263al-is ur se\u1e25\u1e25an ara.\n1:9 Lame\u025bna igellil ilaq ad if\u1e5be\u1e25 imi i t-irfed Sidi \u1e5aebbi ;\n1:10 ma d ame\u1e5bkanti ad if\u1e5be\u1e25 imi t-id-issers Sidi \u1e5aebbi axa\u1e6der ad ifnu akken ifennu uje\u01e7\u01e7ig n lexla.\n1:11 M'ara d-yali yi\u1e6dij s le\u1e25mu-ines yesse\u1e5b\u0263ayen, im\u0263i ad iqqa\u1e5b, aje\u01e7\u01e7ig-is ad i\u0263li, ccba\u1e25a-ines a s-t\u1e5bu\u1e25. Akka ara ted\u1e5bu d ume\u1e5bkanti , ad i\u1e5bu\u1e25 a d-ye\u01e7\u01e7 deffir-es wayen akk yes\u025ba.\n1:12 D ase\u025bdi wemdan i gte\u1e6d\u1e6dfen deg uje\u1e5b\u1e5beb ur i\u0263elli ara ; axa\u1e6der m'ara i\u025beddi seg uje\u1e5b\u1e5beb, a s-d-te\u021b\u021bunefk t\u025be\u1e63\u1e63abt n tudert i gew\u025bed Sidi \u1e5aebbi i wid i t-i\u1e25emmlen.\n1:13 M'ara te\u021bwa\u0263u\u1e5b\u1e5bem, \u0263u\u1e5b-wat a\u021b-\u021binim : d \u1e5aebbi i \u0263-i\u0263u\u1e5b\u1e5ben axa\u1e6der \u1e5aebbi ur yezmir ara a t-i\u0263u\u1e5b\u1e5b wemcum yerna Ne\u021b\u021ba s yiman-is ur ye\u021b\u0263u\u1e5b\u1e5bu ula yiwen.\n1:14 Lame\u025bna yal yiwen deg-nne\u0263 ye\u021b\u025bedday deg uje\u1e5b\u1e5beb axa\u1e6der d ccehwat n tnefsit-nne\u0263 i \u0263-i\u021b\u0263u\u1e5b\u1e5bun.\n1:15 Leb\u0263i n tnefsit ye\u021b\u021bawi-d ddnub, ddnub mi ge\u021bwaxdem, ye\u021b\u021bawi-d lmut.\n1:16 Ay atmaten-iw e\u025bzizen ur \u0263ell\u1e6det ara deg wayagi :\n1:17 kra n tikci yelhan te\u021b\u021bas-ed seg igenwan, s \u0263u\u1e5b baba \u1e5aebbi i d-ixelqen tafat n igenwan, win akken ur ne\u021bbeddil, ur ne\u021b\u0263ab am yi\u1e6dij iwakken a d-ye\u01e7\u01e7 \u1e6d\u1e6dlam.\n1:18 Yehwa-yas a \u0263-d-yefk tudert s wawal-is n tide\u021b, iwakken a nili d imezwura deg wayen akk i d-yexleq.\n1:19 Ay atmaten-iw e\u025bzizen, te\u1e93ram belli yal yiwen deg-wen ilaq ad yesme\u1e25sis, ur ilaq ara ad ireffu ne\u0263 ad ye\u021b\u1e25awal ameslay ;\n1:20 axa\u1e6der amdan ireffun ur ixeddem ara ayen yellan d l\u1e25eqq \u0263er Sidi \u1e5aebbi.\n1:21 Daymi i glaq a\u021b-\u021b\u1e0degg\u1e5bem seg ulawen-nwen ayen akk ur nzeddig ara, d wayen yellan d cce\u1e5b deg-wen ; me\u025bna qeblet s wannuz awal i ge\u1e93\u1e93an deg-wen i gzemren ad isellek lerwa\u1e25 nwen.\n1:22 Ma\u010d\u010di d asme\u1e25ses kan n wawal n Sidi \u1e5aebbi i \u0263er tella, lame\u025bna sbeggnet-\u021b-id di lec\u0263al-nwen ; ne\u0263 m'ulac \u021b-\u021bikellax kan i te\u021bkellixem iman-nwen.\n1:23 Axa\u1e6der win yesme\u1e25sisen i wawal n Sidi \u1e5aebbi ur t-yexdim ara, icuba \u0263er wemdan ye\u021bwalin udem-is di lemri akken yella.\n1:24 Mi gwala iman-is, i\u1e5bu\u1e25, ye\u021b\u021bu imiren kan amek akken i gella.\n1:25 Ma d win ye\u021bmeyyizen akken ilaq ccari\u025ba i\u1e63e\u1e25\u1e25an, ccari\u025ba i d ye\u021b\u021baken tilelli, ite\u1e6d\u1e6dfen deg-s ma\u010d\u010di s usme\u1e25ses kan ad yu\u0263al a \u021b-ye\u021b\u021bu, me\u025bna ixeddem ayen i d-tenna, wagi ad yili d ase\u025bdi di lec\u0263al-is me\u1e5b\u1e5ba.\n1:26 Ma yella win i\u1e25esben iman-is yetbe\u025b abrid n Sidi \u1e5aebbi yili ur ye\u021b\u021ba\u1e6d\u1e6daf ara iles-is, yesse\u0263la\u1e0d deg iman-is, abrid-agi i gewwi ur i\u1e63e\u1e25\u1e25a ara.\n1:27 Atan webrid i\u1e63e\u1e25\u1e25an yellan \u021b-\u021bide\u021b zdat Sidi \u1e5aebbi baba-tne\u0263 : d m'ara terzum \u0263ef igujilen \u021b-\u021bu\u01e7\u01e7al m'ara ilin di lme\u1e25na, d u\u1e25ader n yiman-nwen \u0263ef wayen n diri ara d-yekken si ddunit.\n2:1 Ay atmaten, ur xeddmet ara lxilaf ger watmaten, d ayen ur nlaq ara ad yili \u0263er wid ye\u021b\u021bamnen s Ssid-nne\u0263 ameqqran, \u0190isa Lmasi\u1e25.\n2:2 Yezmer l\u1e25al a d-kecmen \u0263er tejma\u025bt-nwen sin yemdanen, yiwen d ame\u1e5bkanti yelsa llebsa ifazen yeqqen taxatemt n ddheb, waye\u1e0d d igellil llebsa-ines tcerreg ;\n2:3 ma yella tuzzlem \u0263er ume\u1e5bkanti-nni yelsan llebsa ifazen tefkam-as lqima tennam-as : eyya-d a\u021b-\u021beqqime\u1e0d dagi, d amkan n l\u025bali ; ma d igellil-nni tennam-as : ke\u010d\u010d bedd kan dagi ne\u0263 qqim-ed dagi \u0263er i\u1e0da\u1e5b\u1e5ben-nne\u0263.\n2:4 Ma yella akka, atan txeddmem lxilaf wway gar-awen, e\u025bni ma\u010d\u010di d lba\u1e6del i d itekken seg yir ixemmimen-nwen ?\n2:5 Ay atmaten-iw e\u025bzizen, \u1e25esset-ed : Sidi \u1e5aebbi yexta\u1e5b igellilen n ddunit agi iwakken a ten-yerr d ime\u1e5bkantiyen di liman, yerna ad we\u1e5bten tagelda i gwe\u025b\u025bed i wid akk i t-i\u1e25emmlen.\n2:6 Ma d kunwi t\u1e25eq\u1e5bem igellil ! Tqud\u1e5bem ime\u1e5bkantiyen, wid i kkun ye\u1e6d\u1e6dalamen i kkun-ye\u1e93\u1e93u\u0263u\u1e5ben \u0263er yexxamen n cc\u1e5be\u025b.\n2:7 D nutni da\u0263en i greggmen isem e\u025bzizen s wayes i tneddhem \u0263er Sidi \u1e5aebbi.\n2:8 Ma yella txeddmem ayen i d-tenna ccari\u025ba n Sidi \u1e5aebbi : ?emmel wiya\u1e0d am yiman-ik, d ayen yelhan i txedmem.\n2:9 Me\u025bna ma yella txeddmem lxilaf ger yemdanen, tdenbem yerna ccari\u025ba n Sidi \u1e5aebbi te\u1e25kem fell-awen axa\u1e6der t\u025bu\u1e63am-\u021b.\n2:10 Ma yella win i gteddun deg webrid n ccari\u025ba, ixulef ulamma d yiwen si lumu\u1e5bat-is, ihi yer\u1e93a akk lumu\u1e5bat n ccari\u025ba.\n2:11 Win i d-yennan : Ur zennu ara, yenna-d da\u0263en : Ur tneqqe\u1e0d ara tamge\u1e5b\u1e6d. Ihi ma yella ur tezni\u1e0d ara me\u025bna ten\u0263i\u1e0d tamger\u1e6d, atan te\u1e5b\u1e93i\u1e0d ccari\u025ba n Sidi \u1e5aebbi.\n2:12 Ilaq a\u021b-\u021be\u1e93rem belli Sidi \u1e5aebbi a kkun-i\u1e25aseb s ccari\u025ba-ines ye\u021b\u021baken tilelli \u0263ef kra n wayen i te\u021bmeslayem d wayen i txeddmem ;\n2:13 Sidi \u1e5aebbi ur ye\u021b\u1e25unnu ara \u0263ef win ur ne\u021b\u1e25unnu \u0263ef wiya\u1e0d me\u025bna win ye\u021b\u1e25unnun \u0263ef wiya\u1e0d, ur ye\u021b\u021bagad ara ass n l\u1e25isab.\n2:14 Ay atmaten, d acu n lfayda ara yes\u025bu wemdan ma yenna-d umne\u0263 s \u1e5aebbi, m'ur t-id-isbeggen ara s lec\u0263al-is ? E\u025bni liman am wagi a t-isellek ?\n2:15 Yezmer l\u1e25al ad yili yiwen seg watmaten ne\u0263 si tyessetmatin xu\u1e63\u1e63en di llebsa, llu\u1e93en ur s\u025bin ara ayen ara \u010d\u010den ;\n2:16 ma yella yiwen deg-wen yenna-yasen kan : \u00ab qqimet di lehna, sse\u1e25mut te\u010d\u010dem a\u021b-\u021be\u1e5bwum \u00bb yili ne\u021b\u021ba ur sen-yefki ara ayen \u1e25wa\u01e7en, d acu n lfayda yellan deg imeslayen-agi ?\n2:17 Liman \u0263er \u1e5aebbi akka i gella : ma yella ur t-id-sbeggnen ara lec\u0263al nwen, liman-agi yemmut\n2:18 Me\u025bna ma yenna waleb\u025ba\u1e0d : ke\u010d\u010d tes\u025bi\u1e0d liman ma d nekk xeddme\u0263 lec\u0263al ; nekk a s-rre\u0263 i wagi : sken-iyi-d liman-inek mbla lec\u0263al, nekk a k-ed ssekne\u0263 liman-iw s lec\u0263al-iw yelhan.\n2:19 Tumne\u1e0d belli yiwen n \u1e5aebbi kan i gellan ? d ayen yelhan ; ula d ccwa\u1e6den umnen yis yerna \u021bergigin seg-s.\n2:20 Teggumam a\u021b-\u021bfehmem ay imdanen ! Ilaq a\u021b-\u021be\u1e93rem belli liman mbla lec\u0263al n l\u025bali, ur infi\u025b ara.\n2:21 Mmektit-ed Ib\u1e5bahim baba-tne\u0263 ye\u021bwa\u1e25esben d a\u1e25eqqi \u0263ef ddemma n lec\u0263al-is m'akken i d-iddem mmi-s Is\u1e25aq a t-yezlu d asfel i Sidi \u1e5aebbi.\n2:22 Twalam belli liman-is d lec\u0263al is ddukklen, s lec\u0263al-is i gennekmal liman-is.\n2:23 Akka i ged\u1e5ba wayen d-nnant tira iqedsen fell-as : Ib\u1e5bahim yes\u025ba liman di \u1e5aebbi, daymi yenne\u1e25sab d a\u1e25eqqi ; ye\u021b\u021busemma d a\u1e25bib n \u1e5aebbi.\n2:24 Twalam ihi ! Amdan ye\u021bban-ed d a\u1e25eqqi zdat Sidi \u1e5aebbi s lec\u0263al yelhan ma\u010d\u010di kan s liman-is.\n2:25 Ula d Ra\u1e25ab yellan d yir tame\u1e6d\u1e6dut, te\u021bwa\u1e25seb \u021b-\u021ba\u1e25eqqit zdat Sidi \u1e5aebbi \u0263ef ddemma n cc\u0263el-nni n l\u025bali i texdem asm'akken i tes\u1e6der\u1e25eb s yemcegg\u025ben n at Is\u1e5bail mi sen-temla abrid nni\u1e0den ara yawin iwakken ad \u1e5bu\u1e25en.\n2:26 L\u01e7e\u021b\u021ba ur nes\u025bi ara \u1e5a\u1e5bu\u1e25, temmut, akken da\u0263en, liman ur nes\u025bi ara lec\u0263al yelhan yemmut.\n3:1 Ay atmaten-iw, ur \u021bnadit ara a\u021b-\u021bu\u0263alem me\u1e5b\u1e5ba d wid yesselmaden, axa\u1e6der te\u1e93ram belli d nukni s wid yesselmaden, ara ye\u021b\u021bu\u1e25asben akte\u1e5b n wiya\u1e0d,\n3:2 axa\u1e6der n\u0263elle\u1e0d me\u1e5b\u1e5ba, yal yiwen deg-nne\u0263 amek i g\u0263elle\u1e0d. Win ur n\u0263elle\u1e0d ara deg umeslay-is d amdan ikemlen, ula d l\u01e7e\u021b\u021ba-s yezmer ad i\u1e25kem deg-s.\n3:3 Ma yella nerra aleggam deg yimi n u\u025bewdiw iwakken a \u0263-ya\u0263 awal, l\u01e7e\u021b\u021ba-ines me\u1e5b\u1e5ba txeddem akken neb\u0263a.\n3:4 Walit da\u0263en lbabu\u1e5b, \u0263as d ameqqran, ye\u021bsu\u1e0du deg-s wa\u1e0du i\u01e7ehden, me\u025bna s yiwen ujeggu d ame\u1e93yan, lqeb\u1e6dan-ines issedduy-it \u0263er wanda yeb\u0263a.\n3:5 Akken da\u0263en ula d iles ; \u0263as mec\u1e6du\u1e25 deg yiman-is, ye\u021bzuxxu s lec\u0263al imeqqranen. Walit times tamec\u1e6du\u1e25t i gzemren a\u021b-\u021besse\u1e5b\u0263 ti\u1e93gi tameqqrant.\n3:6 Iles da\u0263en \u021b-\u021bimes, d bab n lba\u1e6del, yes\u025ba amkan di l\u01e7e\u021b\u021ba-nne\u0263 yerna yessamas akk ta\u1e5bwi\u1e25t-nne\u0263, yesse\u1e5b\u0263ay akk tudert-nne\u0263 s tmes n \u01e7ahennama i seg d-yu\u0263 a\u1e93ar.\n3:7 Amdan yezmer ad i\u1e25e\u1e5b\u1e5beb yal \u1e63\u1e63enf n lew\u1e25uc : ama d wid iteddun \u0263ef \u1e5beb\u025ba i\u1e0da\u1e5b\u1e5ben, ama d if\u1e5bax, ama d izerman ama d lew\u1e25uc n leb\u1e25e\u1e5b yerna \u021b-\u021bide\u021b i\u0263leb-iten me\u1e5b\u1e5ba.\n3:8 Ma d iles, ulac amdan i gzemren a t-ye\u0263leb. Ye\u010d\u010du\u1e5b d ssem ineqqen ; d lehlak ur nes\u025bi ddwa.\n3:9 Yis i n\u1e25emmed Sidi \u1e5aebbi baba tne\u0263, yis da\u0263en i nenne\u025b\u025bel imdanen i d-ixleq Sidi \u1e5aebbi \u0263er ccbiha-s.\n3:10 Seg yimi-agi i d-\u021beff\u0263ent dde\u025bwat n lxi\u1e5b d nne\u025blat. Ay atmaten-iw, ur ilaq ara ad yili wakka.\n3:11 E\u025bni yezmer yiwen n l\u025binse\u1e5b a d-yefk aman \u1e25lawen akk-d wid \u1e5b\u1e93agen ?\n3:12 Ay atmaten-iw, ulac taneqle\u021b ara d-yefken azemmur, ne\u0263 tara ara d-yefken tibexsisin, l\u025binse\u1e5b me\u1e5b\u1e5bi\u0263en ur yezmir ara a d-yefk aman yelhan.\n3:13 Ma yella yiwen deg-wen yefhem yet\u025beqqel, ilaq a t-id-isbeggen s tikli-ines yelhan akk-d lec\u0263al i gxeddem s tmusni d wannuz.\n3:14 Me\u025bna ma yella ul-nwen ye\u010d\u010du\u1e5b \u021b-\u021bismin tir\u1e93aganin yerna teb\u0263am a d-tekkem sennig wiya\u1e0d ; ur xeddmet ara ccan i yiman-nwen, ur skiddibet ara, ur nekk\u1e5bet ara tide\u021b.\n3:15 Lefhama am tagi ur d-tekki ara s \u0263u\u1e5b \u1e5aebbi me\u025bna d lefhama n ddunit akk-d yemdanen, tekka-d da\u0263en s \u0263u\u1e5b Cci\u1e6dan.\n3:16 Axa\u1e6der anda llant tismin d wem\u1e25izwer, yella ussex\u1e5beb d mkul cc\u0263el n diri yellan.\n3:17 Lefhama n bab igenwan uqbel kullec te\u1e63fa, \u021b-\u021bamhennit, \u021b-\u021bu\u1e5b\u1e93int, te\u010d\u010du\u1e5b d le\u1e25nana akk-d lec\u0263al yelhan, ur tes\u025bi timrurit ur tes\u025bi sin wudmawen.\n3:18 Imawlan n lehna \u021be\u1e93\u1e93un s lehna ayen i d-issem\u0263ayen ayen yellan d l\u1e25eqq \u0263er Sidi \u1e5aebbi.\n4:1 Seg uxemmem i te\u021bxemmimem \u0263ef yiman-nwen kan i d-itekk umennu\u0263 akk-d imen\u0263i gar-awen.\n4:2 Te\u021bmennim a\u1e6das le\u1e25waye\u01e7 lame\u025bna ur tezmirem ara tent-tes\u025bum ; tneqqem, te\u021b\u021basmem ur d-te\u021b\u021bawim ayen teb\u0263am ; te\u021bna\u0263em yerna te\u021b\u021bemyen\u0263am, ur kkun-id-i\u021b\u021bawe\u1e0d ara wayen teb\u0263am axa\u1e6der ur tessuturem ara \u0263er Sidi \u1e5aebbi.\n4:3 M'ara tessutrem kra ur a wen-d- \u021bunefk ara, axa\u1e6der ur tessutrem ara akken ilaq, tessutrem kan wayen yellan d nnfe\u025b-nwen.\n4:4 Ay at le\u025b\u1e5bu\u1e5b ! Ur te\u1e93rim ara belli win i\u1e25emmlen ddunit yek\u1e5beh Sidi \u1e5aebbi ? Ihi, win i\u1e25emmlen ddunit-agi d a\u025bdaw n Sidi \u1e5aebbi.\n4:5 T\u0263ilem ayen akken yuran di tira iqedsen ur yes\u025bi ara lqima : belli Sidi \u1e5aebbi i\u1e25emmel \u1e5a\u1e5bu\u1e25 iqedsen i d-icegge\u025b ad izde\u0263 deg-wen armi ye\u021b\u021basem seg win ara i\u1e6d\u1e6dfen amkan-is ?\n4:6 Lame\u025bna Sidi \u1e5aebbi ye\u021b\u021bak-ed \u1e5b\u1e5be\u1e25ma tameqqrant, akken yura di tira iqedsen : S idi \u1e5aebbi ur iqebbel ara wid yessem\u0263a\u1e5ben iman-nsen me\u025bna ye\u021b\u021bak-ed \u1e5b\u1e5be\u1e25ma-s i wid yessanazen iman-nsen.\n4:7 Ihi \u1e0du\u025bet Sidi \u1e5aebbi, ur \u021ba\u01e7\u01e7at ara Cci\u1e6dan a kkun-ye\u0263leb d\u0263a ad yerwel fell-awen.\n4:8 Qe\u1e5b\u1e5bbet \u0263er Sidi \u1e5aebbi, ne\u021b\u021ba a d-iqe\u1e5b\u1e5beb \u0263u\u1e5b-wen. Ssizdeget ifassen-nwen ay imednuben, \u1e63\u1e63fut ulawen-nwen, ay at sin udmawen.\n4:9 Walit l\u0263el\u1e6dat-nwen, me\u01e7det, ilaq ta\u1e0dsa-nwen a\u021b-\u021bu\u0263al d ime\u1e6d\u1e6di, lfe\u1e5b\u1e25 nwen ad yu\u0263al d le\u1e25zen.\n4:10 Anzet i Sidi \u1e5aebbi, ne\u021b\u021ba a kkun yerfed.\n4:11 Ay atmaten, ur kkatet ara wa deg wa, win ara yewten di gma-s ne\u0263 i\u1e25useb-it, yewwet-ed di ccari\u025ba yerna i\u1e25useb-i\u021b. Ihi ma yella tewtem di ccari\u025ba, ur tellim ara seg wid ixeddmen wayen i d-tenna, me\u025bna seg wid yekkaten deg-s.\n4:12 Ke\u010d\u010d ye\u021b\u1e25asaben gma-k d acu i t\u1e25esbe\u1e0d iman-ik ? D Sidi \u1e5aebbi kan i ge\u021b\u1e25asaben i d-yefkan ccari\u025ba, d ne\u021b\u021ba kan i ge\u021bselliken i ge\u021b\u021ba\u01e7an i lmut.\n4:13 Slet-ed tura kunwi i geqqa\u1e5ben : ass-a ne\u0263 azekka a n\u1e5bu\u1e25 \u0263er temdint ihina, a neqqim aseggas, a netja\u1e5b iwakken a d-nerbeh idrimen !\n4:14 Kunwi ur ne\u1e93ri ara d acu ara wen-yed\u1e5bun azekka ! Kunwi yecban tagut i d-i\u021balin t\u0263elli !\n4:15 Me\u025bna ilaq a\u021b-\u021beqqa\u1e5bem : ma yeb\u0263a Sidi \u1e5aebbi, a n\u025bic am akka, ma yeb\u0263a da\u0263en, a nexdem aya ne\u0263 aya.\n4:16 Me\u025bna kunwi tes\u025bam ixemmimen n zzux deg ulawen-nwen. Kra yellan d zzux am wagi diri-t.\n4:17 Ma yella win yessnen ad ixdem ayen yelhan ur t-yexdim ara, yedneb.\n5:1 Slet-ed tura ula d kunwi ay ime\u1e5bkantiyen : me\u01e7det \u0263ef ddemma n txe\u1e63\u1e63arin ara d-ye\u0263lin fell-awen !\n5:2 Cci-nwen yerka, llebsa-nwen te\u010d\u010da-\u021b tume\u1e6d !\n5:3 Ddheb d lfe\u1e6d\u1e6da-nwen \u1e63edde\u1e0den ; d \u1e63\u1e0di\u1e0d-nsen ara icehden fell-awen, ara kkun-i\u010d\u010den am tmes. Tjemm\u025bem cci deg ussan-agi ineggura n ddunit !\n5:4 Te\u010d\u010dam l\u1e25eqq n wid imegren igran-nwen, slet-asen i wigi i\u021bcetkin \u0263ef lba\u1e6del-nwen, Sidi \u1e5aebbi Bab n tezmert yesla-d i le\u025bya\u1e0d-nsen.\n5:5 Ddunit-nwen tes\u025beddam-\u021b di lxi\u1e5b, txedmem ayen akk mennan wulawen nwen ; t\u1e5bebbam tassemt i wass aneggaru.\n5:6 T\u1e25ekmem, ten\u0263am i\u1e25eqqiyen yerna ur kkun-xu\u1e63men ara.\n5:7 Ay atmaten, \u1e63eb\u1e5bet ihi alamma d asm' ara d-yu\u0263al Ssid-nne\u0263. Walit amek i ge\u021b\u1e5ba\u01e7u ufella\u1e25 l\u0263ella n wakal-is, i\u1e63ebbe\u1e5b alamma yewwet-ed ugeffur n lex\u1e5bif \u021b-\u021befsut.\n5:8 Ula d kunwi \u1e63eb\u1e5bet, s\u01e7ehdet iman nwen, axa\u1e6der tu\u0263alin n Ssid-nne\u0263 teq\u1e5beb-ed.\n5:9 Ur \u021bemcetkayet ara wway gar-awen iwakken ur kkun-i\u021b\u1e25asab ara Sidi \u1e5aebbi ; axa\u1e6der Bab n l\u1e25isab, ibedd-ed \u0263er tewwurt !\n5:10 Ay atmaten-iw, mmektit-ed lenbiya i d-icegge\u025b Sidi \u1e5aebbi tecbum-d \u1e63\u1e63be\u1e5b akk-d liman i s\u025ban di teswi\u025bin n le\u025btab.\n5:11 Ihi amarezg n wid ye\u1e6d\u1e6dfen ur fcilen ara. Teslam ayen i d-qqa\u1e5ben \u0263ef \u1e63\u1e63be\u1e5b n Sidna Yub, yerna twalam da\u0263en d acu i geqsed Sidi \u1e5aebbi a s-t-id-yefk, axa\u1e6der Sidi \u1e5aebbi ye\u010d\u010du\u1e5b d le\u1e25nana akk-d \u1e5b\u1e5be\u1e25ma.\n5:12 Ay atmaten-iw, ur \u021bgallat s igenni, ur \u021bgallat s lqa\u025ba ne\u0263 s wayen nni\u1e0den, me\u025bna init kan ih ne\u0263 ala, iwakken ur kkun-i\u021b\u1e25asab ara Sidi \u1e5aebbi.\n5:13 Ma yella yenne\u025btab yiwen deg-wen, ad yed\u025bu \u0263er Sidi \u1e5aebbi. Ma yella win yellan di lfe\u1e5b\u1e25, ad ye\u1e25med Sidi \u1e5aebbi s ccnawi.\n5:14 Ma yella yiwen deg-wen yehlek, ad issiwel i imeqqranen n tejma\u025bt, ad d\u025bun \u0263er \u1e5aebbi fell-as, ad dehnen aqe\u1e5b\u1e5buy-is s zzit s yisem n Sidi \u1e5aebbi ;\n5:15 ma yella d\u025ban \u0263er Sidi \u1e5aebbi s liman, \u021beklen fell-as, amu\u1e0din-nni ad ye\u021b\u021busellek ; Sidi \u1e5aebbi a t-yesse\u1e25lu yerna a s-isemme\u1e25 ddnubat-is.\n5:16 ?emqi\u1e5bit ddnubat-nwen wway gar-awen, wa ad yed\u025bu i wa s lxi\u1e5b \u0263er Sidi \u1e5aebbi iwakken a\u021b-\u021be\u1e25lum. Dde\u025bwat n win yellan d a\u1e25eqqi zdat Sidi \u1e5aebbi, s\u025bant tazmert tameqqrant.\n5:17 Nnbi Ilyas yella d argaz am nukni : me\u025bna mi gessuter \u0263er Sidi \u1e5aebbi s wul-is iwakken ur d-t\u0263elli ara lehwa, ur d-te\u0263li ara tlata iseggasen d se\u021b\u021ba waguren\n5:18 Yessuter da\u0263en a d-te\u0263li lehwa d\u0263a te\u0263li-d, lqa\u025ba tefka-d le\u1e5b\u1e93aq-is.\n5:19 Ay atmaten-iw, ma yella yiwen deg-wen i\u025b\u1e5beq-as webrid n Sidi \u1e5aebbi, yerra-t-id waye\u1e0d \u0263er webrid,\n5:20 ilaq a\u021b-\u021be\u1e93rem belli win ara d-yerren yiwen umednub \u0263er webrid, isellek-it-id si lmut yerna a\u1e6das si ddnubat-is ara ye\u021b\u021busem\u1e25en.","title":"Kabyle Bible (NT): James","type":"page"}