{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/jde.htm","path":"bib/wb/kab/jde.htm","source_url":"https://sacred-texts.com/bib/wb/kab/jde.htm","text":"1:1 Nekk Yuda yellan d gma-s n Ye\u025bqub, aqqedac n \u0190isa Lmasi\u1e25, i wid i wumi d-issawel Sidi \u1e5aebbi Baba-tne\u0263, yerna ihegga-ten i \u0190isa Lmasi\u1e25 ;\n1:2 \u1e5b\u1e5be\u1e25ma, talwit d le\u1e25mala a wen-d-te\u021b\u021bunefkent s tuge\u021b !\n1:3 A wid e\u025bzizen, ac\u1e25al aya segmi i b\u0263i\u0263 a wen-n-aru\u0263 \u0263ef wayen ye\u025bnan leslak i \u0263-icerken, wala\u0263 belli ilaq-iyi a kkun-nhu\u0263 iwakken a\u021b-\u021bes\u025bum tazmert a\u021b-\u021b\u1e25adrem \u0263ef liman, liman i d-ye\u021b\u021bunefken yiwet n tikkelt i wid i gexta\u1e5b Sidi \u1e5aebbi.\n1:4 Axa\u1e6der kra n yemdanen skecmen-d iman-nsen gar-awen, sse\u025bwajen lme\u025bna n \u1e5b\u1e5be\u1e25ma n Sidi \u1e5aebbi iwakken ad ffren yir tikli-nsen, nek\u1e5ben ula d \u0190isa Lmasi\u1e25, win yellan d Ssid-nne\u0263 ; l\u025biqab i ten-ye\u021b\u1e5ba\u01e7un d ameqqran akken i d-i\u021bwaxebbe\u1e5b si zik di tira iqedsen.\n1:5 ?as akken te\u1e93ram ayagi me\u1e5b\u1e5ba, b\u0263i\u0263 a kkun-id-smekti\u0263 belli asmi i d-isellek Sidi \u1e5aebbi agdud-is si tmurt n Ma\u1e63er yessenger gar-asen wid akk yugin ad amnen yis ;\n1:6 da\u0263en, lmalayekkat-nni ur ne\u1e6d\u1e6dif ara di ccan i sent-id-i\u021b\u021bunefken, me\u025bna \u01e7\u01e7ant imukan-nsent e\u025blayen, Sidi \u1e5aebbi yeqqen-itent di \u1e6d\u1e6dlam i dayem alamma d ass ameqqran n l\u1e25isab.\n1:7 Akken da\u0263en i ted\u1e5ba d imezda\u0263 n temdinin n Sudum d Gumu\u1e5b akk-d tudrin i sent-id-yezzin, ixeddmen anagar ticmatin d zzna, qqiment-ed d lemtel mi tent-yessenger Sidi \u1e5aebbi s tmes yecban times n \u01e7ahennama ;\n1:8 imdanen-agi da\u0263en i d-ikecmen gar-ane\u0263 xeddmen am nutni, tirga-nsen ssawa\u1e0dent-\u021ben ad xedmen ticmatin, ur set\u025be\u1e5bfen ara s l\u1e25ekma n Sidi \u1e5aebbi, reggmen ula d lmalayekkat yellan deg igenwan.\n1:9 Ula d lmelk Mixayel ur yexdim ara annect-agi asm'akken i gennu\u0263 akk-d Cci\u1e6dan \u0263ef l\u01e7e\u021b\u021ba n Sidna Musa ; yegguma a t-yergem ula d rregmat me\u025bna yenna-yas kan : a k-i\u025baqeb Sidi \u1e5aebbi.\n1:10 Me\u025bna imdanen-agi reggmen ayen ur ssinen ara, ula d ayen akken ssnen i gessen ula d lmal ur nefhim ara, ye\u021b\u021bawi-ten anagar \u0263er nnger-nsen.\n1:11 A tawa\u0263it-nsen ! Axa\u1e6der teb\u025ben l\u01e7e\u1e5b\u1e5ba n Kahin, s\u1e5bu\u1e25en iman-nsen di le\u0263la\u1e0d, yewwi-ten \u1e6d\u1e6dme\u025b n yedrimen am Bel\u025bam, negren am akken yenger Kuri asm'akken i d-yekker \u0263er ccwal.\n1:12 D ugur ameqqran m'ara \u1e6d\u1e6dfen imukan gar-awen \u0263er imensi n tegma\u021b, zehhun mbla l\u1e25ecma, \u021bxemmimen kan \u0263ef yiman-nsen. Cban asigna ye\u021b\u021bawi wa\u1e0du, ur d-ye\u021b\u021bak lehwa ; cban ttju\u1e5b ur d-ne\u021b\u021bak ara lfakya di lawan-nsent, mmutent, qqu\u1e5bent d\u0263a \u021bwaqel\u025bent.\n1:13 Akken i d-\u1e6d\u1e6deggi\u1e5bent lemwaji timeqqranin tikufta-nsent n lewsex, i d-ssufu\u0263en nutni tikufta n le\u025b\u1e5bu\u1e5b-nsen. Cban itran ixe\u021b\u021bin, i\u0263ellin \u0263er dderb n \u1e6d\u1e6dlam i sen i\u021bwaheggan.\n1:14 Fell-asen i d-icar Hinux i\u025bacen di l\u01e7il wis seb\u025ba deffir Adem, mi d-yenna : atan a d-yas Sidi \u1e5aebbi ne\u021b\u021ba d luluf n lmalayekkat-is\n1:15 iwakken ad i\u1e25aseb imdanen me\u1e5b\u1e5ba, ad i\u025baqeb imcumen ur ten-t\u1e0du\u025b ara, \u0263ef yir lec\u0263al-nsen, \u0263ef rregmat i d-ssufu\u0263en yemcumen-agi seg yimawen-nsen .\n1:16 Imdanen-agi ur steqni\u025ben ara deg wayen xeddmen, teddun s leb\u0263i n tnefsit-nsen ; imeslayen-nsen \u010d\u010du\u1e5ben d zzux, sqizziben i yemdanen \u0263ef ddemma n nnfe\u025b-nsen.\n1:17 Ma d kunwi a wid e\u025bzizen, mmektit-ed ayen i wen-d-nnan yakan \u1e5b\u1e5busul n Ssid-nne\u0263 \u0190isa Lmasi\u1e25\n1:18 asm'akken i wen-d-qqa\u1e5ben : di zzman aneggaru ad ilin wid ara ye\u021bmesxi\u1e5ben fell-awen, ara il\u1e25un s leb\u0263i n tnefsit-nsen.\n1:19 Ihi, d wigi i d-ye\u021b\u021bawin lxilaf ger yemdanen, \u021bxemmimen anagar \u0263ef wayen ye\u025bnan ddunit, ur s\u025bin ara \u1e5a\u1e5bu\u1e25 iqedsen n Sidi \u1e5aebbi deg wulawen-nsen.\n1:20 Ma d kunwi ay i\u1e25biben-iw, snernit liman-nwen ye\u1e63fan, de\u025b\u025but s tezmert n \u1e5a\u1e5bu\u1e25 iqedsen.\n1:21 ?\u1e6dfet di le\u1e25mala n Sidi \u1e5aebbi, \u021beklet \u0263ef \u1e5b\u1e5be\u1e25ma n Sidna \u0190isa Lmasi\u1e25, ara wen-d-yefken tudert ye\u021bdumun.\n1:22 ?unnet \u0263ef wid ye\u021bcukkun sfehmet\u021ben\n1:23 iwakken ad \u021b\u021buselken, jebdet-\u021ben-id si tmes. Llan da\u0263en wiya\u1e0d ilaq a\u021b-\u021b\u1e25unnem fell-asen me\u025bna \u0263u\u1e5b-wat a\u021b-\u021bennalem ulamma d llebsa-nsen i tessen\u01e7es l\u01e7e\u021b\u021ba-nsen.\n1:24 Tanemmirt tameqqrant i win yes\u025ban tazmert ad i\u1e25ader fell-awen iwakken ur te\u021b\u021bec\u1e0dem ara, a kkun-id isbedd zdat-es mbla l\u025bib di tmanegt- ines s lfe\u1e5b\u1e25 ameqqran.\n1:25 Tamanegt tameqqrant i Sidi \u1e5aebbi aw\u1e25id i gellan d amsellek-nne\u0263 s \u0190isa Lmasi\u1e25 Ssid-nne\u0263 ; i Yillu nne\u0263 lhiba, tazmert, l\u1e25ekma akk-d l\u025ba\u1e0dima, uqbel a d-texleq ddunit, di lweqt-agi akk-d lweqat i d-iteddun ! Amin !","title":"Kabyle Bible (NT): Jude","type":"page"}