{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/jo1.htm","path":"bib/wb/kab/jo1.htm","source_url":"https://sacred-texts.com/bib/wb/kab/jo1.htm","text":"1:1 \u0194ef wayen ye\u025bnan win yellan d awal n tudert, i gellan si tazwara : nesla-yas yerna ne\u1e93ra-t s wallen-nne\u0263, nnulent ifassen-nne\u0263 yerna nerra ddehn-nne\u0263 \u0263u\u1e5b-es.\n1:2 Tudert tban-ed, nwala-\u021b, ne\u021bcehhid fell-as, yerna ne\u021bbecci\u1e5b-awen-d tudert n dayem yellan \u0263er tama n Sidi \u1e5aebbi, tura tban-a\u0263-ed.\n1:3 Ayen nwala d wayen nesla nxebbe\u1e5b-awen-t-id, iwakken ula d kunwi a\u021b-\u021bekkim di tdukkli-nne\u0263, akken nella nukni d Baba-tne\u0263 \u1e5aebbi akk-d Mmi-s, \u0190isa Lmasi\u1e25.\n1:4 Uri\u0263-awen ayagi iwakken lfe\u1e5b\u1e25 nne\u0263 ad innekmal.\n1:5 Ayen nesla s \u0263u\u1e5b \u0190isa Lmasi\u1e25 newwi-yawen-t-id : Sidi \u1e5aebbi \u021b-\u021bafat, ur yelli ara deg-s \u1e6d\u1e6dlam.\n1:6 Ma neqqa\u1e5b deg webrid n \u1e5aebbi i nella yili mazal-a\u0263 nteddu di \u1e6d\u1e6dlam, neskaddeb nex\u1e0da i webrid n tide\u021b.\n1:7 Me\u025bna ma yella nteddu di tafat am akken i gella ne\u021b\u021ba di tafat, ad ddukklen wulawen-nne\u0263, yerna ddnubat-nne\u0263 ad iriden s idammen n Mmi-s \u0190isa Lmasi\u1e25.\n1:8 Ma neqqa\u1e5b ur yelli deg-nne\u0263 ddnub, atan neskaddeb \u0263ef yiman-nne\u0263, tide\u021b ur telli deg-nne\u0263.\n1:9 Me\u025bna ma ne\u021bqi\u1e5b\u1e5bi s ddnubat-nne\u0263 i Sidi \u1e5aebbi, ne\u021b\u021ba yellan d a\u1e25eqqi, nezmer a ne\u021bkel fell-as a \u0263-isame\u1e25 ddnubat-nne\u0263, a \u0263-isellek si lba\u1e6del.\n1:10 Ma neqqa\u1e5b ma\u010d\u010di d imednuben i nella, nerra Sidi \u1e5aebbi d akeddab, awal-is ur yelli ara deg-nne\u0263.\n2:1 Ay arraw-iw ime\u1e93yanen, uri\u0263 awen ayagi iwakken a\u021b-\u021bex\u1e0dum i ddnub, me\u025bna ma ye\u0263li yiwen di ddnub, nes\u025ba win ye\u021b\u1e25uddun fell-a\u0263 \u0263er Baba \u1e5aebbi, d \u0190isa Lmasi\u1e25 yellan d a\u1e25eqqi.\n2:2 Ma\u010d\u010di \u0263ef ddemma n ddnubat nne\u0263 kan i gefka iman-is d asfel me\u025bna ula \u0263ef ddemma n ddnubat n yemdanen n ddunit me\u1e5b\u1e5ba.\n2:3 Ihi ma ne\u021b\u021ba\u0263 awal i Sidi \u1e5aebbi yerna n\u1e25errez lumu\u1e5bat-is, d ayagi ara d-isbeggnen belli nessen-it.\n2:4 Win ara yinin : ssne\u0263 \u1e5aebbi yili ur ye\u1e6d\u1e6dif ara di lumu\u1e5bat-is, d akeddab, ulac deg-s tide\u021b.\n2:5 Ma d win ye\u021b\u021ba\u0263en awal-is, i\u1e25emmel Sidi \u1e5aebbi seg-wul-is. S wakka ara d-iban belli d ayla n Sidi \u1e5aebbi i nella.\n2:6 Win ara yinin \u1e6d\u1e6dfe\u0263 di Sidi \u1e5aebbi, ilaq ad il\u1e25u am akken yel\u1e25a Lmasi\u1e25.\n2:7 A wid e\u025bzizen, di teb\u1e5ba\u021b-agi ma\u010d\u010di d lame\u1e5b ajdid i wen-d-wwi\u0263, me\u025bna d lexba\u1e5b-nni i kkun-id-iw\u1e0den si tazwara ; lame\u1e5b-agi d awal-nni i wumi teslam yakan.\n2:8 Me\u025bna zemre\u0263 a d-ini\u0263 belli lame\u1e5b-agi d ajdid. Tide\u021b-agi tban-ed di Lmasi\u1e25, tban-ed da\u0263en deg-wen ; imi \u1e6d\u1e6dlam i\u021bwexxi\u1e5b, tafat n tide\u021b tfe\u01e7\u01e7e\u01e7 yakan.\n2:9 Win yeqqa\u1e5ben le\u1e25\u1e25u\u0263 di tafat, yili ne\u021b\u021ba yek\u1e5beh gma-s, mazal-it di \u1e6d\u1e6dlam.\n2:10 Win i\u1e25emmlen gma-s, di tafat i ge\u021b\u021bili, ur yelli ara deg-s wayen ara t-isse\u0263lin.\n2:11 Ma d win ike\u1e5bhen gma-s, di \u1e6d\u1e6dlam i gella ; iteddu di \u1e6d\u1e6dlam ur ye\u1e93ri anda ile\u1e25\u1e25u, axa\u1e6der \u1e6d\u1e6dlam isder\u0263el-as allen.\n2:12 Uri\u0263-awen ayagi ay ilme\u1e93yen imi i wen-\u021bwa\u025bfan ddnubat-nwen \u0263ef ddemma n yisem-is.\n2:13 Uri\u0263-awen ay ibabaten, axa\u1e6der tesnem win yellan si tazwara. Uri\u0263-awen ay ilme\u1e93yen, axa\u1e6der t\u0263elbem amcum. Akken i wen-d-nni\u0263 yakan ay ilme\u1e93yen, uri\u0263-awen axa\u1e6der tesnem Baba \u1e5aebbi.\n2:14 Uri\u0263-awen ay ibabaten, axa\u1e6der tesnem win yellan si tazwara. Uri\u0263-awen ay ilme\u1e93yen, axa\u1e6der t\u01e7ehdem, awal n Sidi \u1e5aebbi yezde\u0263 deg-wen yerna t\u0263elbem amcum.\n2:15 Ur \u1e25emmlet ara ddunit d wayen yellan deg-s. Ma yella waleb\u025ba\u1e0d ihemmel ddunit, le\u1e25mala n baba \u1e5aebbi ur telli ara deg-s ;\n2:16 axa\u1e6der ayen akk yellan di ddunit, leb\u0263i n tnefsit, \u1e6d\u1e6dme\u025b di kra n wayen i g\u025be\u01e7ben i wallen akk-d zzux i d i\u021bekken si cci n ddunit, ma\u010d\u010di s \u0263u\u1e5b Baba \u1e5aebbi i d-kkan lame\u025bna si ddunit.\n2:17 Ddunit d wayen yellan deg-s ad i\u025beddi, kullec ad ikfu ; ma d win ixeddmen leb\u0263i n Sidi \u1e5aebbi ad yidir i dayem.\n2:18 Ay arrac ime\u1e93yanen, \u021b-\u021baswi\u025bt taneggarut ; am akken teslam belli a\u025bdaw n Lmasi\u1e25 iteddu-d, atan tura a\u1e6das n ye\u025bdawen n Lmasi\u1e25 i d-ibanen ; s wakka ara ne\u025bqel belli d lweqt aneggaru.\n2:19 S\u1e6dax\u1e5ben fell-a\u0263 axa\u1e6der ur llin ara seg-ne\u0263 ; lemmer llin seg-ne\u0263, tili qqimen yid-nne\u0263 ; \u1e6d\u1e6dax\u1e5ben fell-ane\u0263 iwakken a d-iban belli ur llin ara seg-ne\u0263.\n2:20 Ma d kunwi, yesmar-ed fell awen Lmasi\u1e25 \u1e5a\u1e5bu\u1e25 iqedsen, yerna tessnem akk tide\u021b.\n2:21 Uri\u0263-awen ma\u010d\u010di imi ur tessinem ara tide\u021b, lame\u025bna imi \u021b-tesnem axa\u1e6der ulac lekdeb i d itekken si tide\u021b.\n2:22 Anwa i d akeddab anagar win inekk\u1e5ben belli \u0190isa d Lmasi\u1e25. A\u025bdaw n Lmasi\u1e25, d winna i gnekk\u1e5ben Baba \u1e5aebbi akk-d Mmi-s.\n2:23 Win ara inek\u1e5ben Mmi-s n \u1e5aebbi yenke\u1e5b da\u0263en Baba \u1e5aebbi, ma d win iqeblen Mmi-s n \u1e5aebbi yeqbel Baba \u1e5aebbi.\n2:24 Ma d kunwi, ayen teslam si tazwara ilaq a\u021b-\u021be\u1e6d\u1e6dfem deg-s ; ma yella tjem\u025bem-t deg ulawen-nwen, ula d kunwi a\u021b-\u021bilim di tdukkli akk-d Baba \u1e5aebbi d Mmi-s.\n2:25 Atan lwe\u025bd i \u0263-d-ifka Lmasi\u1e25 : \u021b-\u021budert ye\u021bdumun.\n2:26 Uri\u0263-awen ayagi \u0263ef wid ye\u021bnadin a kkun-\u0263u\u1e5b\u1e5ben.\n2:27 Ma d kunwi, \u1e5a\u1e5bu\u1e25 iqedsen i d-yesmar fell-awen Lmasi\u1e25 yezga deg-wen, ur te\u1e25wa\u01e7em ara win ara kkun-islemden ; axa\u1e6der d \u1e5a\u1e5bu\u1e25 iqedsen i d-immaren fell-awen i kkun-isselmaden. Ayen i wen-yesselmad \u021b-\u021bide\u021b, ur yeskiddib ara. S\u1e6dfet ihi di Lmasi\u1e25 am akken i wen-t-isselmed \u1e5a\u1e5bu\u1e25 iqedsen.\n2:28 Ihi tura ay arrac ime\u1e93yanen \u1e6d\u1e6dfet di Lmasi\u1e25 iwakken asm'ara d-iban a nes\u025bu le\u021bkal, ur n\u021beffer ara fell-as si l\u1e25ecma ass n tu\u0263alin-is.\n2:29 Imi te\u1e93ram belli Lmasi\u1e25 d a\u1e25eqqi, ilaq a\u021b-\u021be\u1e93rem da\u0263en kra n win ixeddmen l\u1e25eqq s \u0263u\u1e5b-es i d-ikka.\n3:1 Walit ac\u1e25al i \u0263-i\u1e25emmel Baba \u1e5aebbi, armi ne\u021b\u021busemma d arraw-is ! yerna \u021b-\u021bide\u021b d arraw-is i nella. Ddunit ur a\u0263-te\u025bqil ara d arraw n \u1e5aebbi imi ur tessin ara Sidi \u1e5aebbi.\n3:2 A wid e\u025bzizen, aql-a\u0263 tura d arraw n \u1e5aebbi, ayen akken ara nu\u0263al wer\u025bad i d-yed\u1e5bi, lame\u025bna ne\u1e93ra belli m'ara d-yed\u1e5bu, a nili am ne\u021b\u021ba, axa\u1e6der a t-nwali akken yella.\n3:3 Kra n win yessaramen deg-s ad ye\u1e63fu akken ye\u1e63fa Lmasi\u1e25.\n3:4 Kra n win idenben yer\u1e93a ccari\u025ba n Sidi \u1e5aebbi, axa\u1e6der ddnub \u021b-\u021ba\u1e5bu\u1e93i n ccari\u025ba.\n3:5 Te\u1e93ram belli Lmasi\u1e25 yusa-d iwakken ad ikkes ddnub ne\u021b\u021ba ur nes\u025bi ddnub.\n3:6 Kra n win ye\u1e6d\u1e6dfen deg-s ixe\u1e6d\u1e6du i ddnub ; kra n win ye\u021b\u025bicin di ddnub ur t-iwala ur t-yessin.\n3:7 Ay arrac ime\u1e93yanen, \u0263u\u1e5b-wat win ara kkun-i\u0263u\u1e5b\u1e5ben. Win iteddun s l\u1e25eqq d a\u1e25eqqi akken yella Sidna \u0190isa d a\u1e25eqqi.\n3:8 Win ye\u021b\u025bicin di ddnub yedda d Cci\u1e6dan, axa\u1e6der d ne\u021b\u021ba i d amednub amezwaru. \u0194ef ddemma n wayagi i d-yusa Mmi-s n \u1e5aebbi iwakken ad yessenger lec\u0263al n Cci\u1e6dan.\n3:9 Kra n wid yellan d arraw n \u1e5aebbi ur \u021b\u025bicin ara di ddnub, axa\u1e6der tudert i d-itekken s \u0263u\u1e5b Sidi \u1e5aebbi tella deg-sen ; ur zmiren ara ad \u025bicen di ddnub imi s \u0263u\u1e5b \u1e5aebbi i d-\u025bawden talalit.\n3:10 Atah wayen i d-i\u021bbegginen lxilaf yellan ger warraw n Sidi \u1e5aebbi d wid n Cci\u1e6dan : kra n win ur nteddu ara s l\u1e25eqq ne\u0263 ur n\u1e25emmel ara gma-s ur yelli ara si tarwa n Sidi \u1e5aebbi.\n3:11 Atan lame\u1e5b i wumi teslam si tazwara : ilaq a nemye\u1e25mal wway gar-ane\u0263.\n3:12 Ma\u010d\u010di am Kahin yellan d amcum yen\u0263a gma-s, yezla-t axa\u1e6der ne\u021b\u021ba lec\u0263al-is diri-ten, ma d gma-s iteddu s l\u1e25eqq. f+\n3:13 Ur wehhmet ara ay atmaten ma yella ke\u1e5bhen-kkun wat ddunit.\n3:14 Nukni n\u025bedda-d si lmut \u0263er tudert axa\u1e6der n\u1e25emmel atmaten. Win ur n\u1e25emmel ara, mazal-it di lmut.\n3:15 Kra n win ike\u1e5bhen gma-s d aqettal, yerna te\u1e93ram belli win ineqqen, ulac deg-s tudert n dayem.\n3:16 Le\u1e25mala n tide\u021b, nessen-i\u021b s \u0190isa Lmasi\u1e25 yefkan tudert-is fell-ane\u0263. Ilaq-a\u0263 ula d nukni, a nefk tudert nne\u0263 \u0263ef watmaten-nne\u0263.\n3:17 Ma yella waleb\u025ba\u1e0d yes\u025ban cci, iwala gma-s di lex\u1e63a\u1e63 ur d-i\u1e25unn ara fell-as, amek ara tezde\u0263 le\u1e25mala n Sidi \u1e5aebbi deg wul-is.\n3:18 Ay arrac ime\u1e93yanen, ur \u1e25emmlet ara s wawal kan d yiles a\u1e93idan, lame\u025bna le\u1e25mala n tide\u021b a d-tban s lec\u0263al-nwen.\n3:19 S wakka ara n\u1e93er belli di tide\u021b i nella, yerna ad yethedden wul-nne\u0263 zdat Sidi \u1e5aebbi,\n3:20 \u0263as yesse\u1e0dlem-a\u0263 wul-nne\u0263 : Sidi \u1e5aebbi sennig wul nne\u0263 i gella yerna ye\u1e93ra kullec.\n3:21 A wid e\u025bzizen, ma yella ur a\u0263-isse\u1e0dlem ara wul-nne\u0263, nes\u025ba le\u021bkal zdat Sidi \u1e5aebbi.\n3:22 Kra n wayen ara nessuter, i\u021b\u021bak-a\u0263-t-id axa\u1e6der ne\u1e25rez lumu\u1e5bat-is yerna nxeddem leb\u0263i-s.\n3:23 Atan wayen i \u0263-d-yume\u1e5b : a namen s yisem n Mmi-s \u0190isa Lmasi\u1e25 yerna a nemye\u1e25mal wway gar-ane\u0263 am akken yella di lame\u1e5b i \u0263-d-yefka. f+\n3:24 Win ye\u021b\u021ba\u1e6d\u1e6dafen di Sidi \u1e5aebbi, i\u1e25erzen lumu\u1e5bat-is, Sidi \u1e5aebbi ye\u021b\u021bili deg wul-is ; yerna a ne\u025bqel belli Sidi \u1e5aebbi yella deg ul-nne\u0263 s \u1e5a\u1e5bu\u1e25 iqedsen i \u0263-d-yefka.\n4:1 A wid e\u025bzizen, \u1e25adret iman-nwen \u0263ef kra n win ara wen-d-yinin hedd\u1e5be\u0263 s \u1e5a\u1e5bu\u1e25 n Sidi \u1e5aebbi, lame\u025bna je\u1e5b\u1e5bbet-\u021ben iwakken a\u021b-\u021be\u1e93rem ma yella s \u0263u\u1e5b Sidi \u1e5aebbi i d-kkan axa\u1e6der, a\u1e6das n lenbiya n lekdeb i gellan di ddunit.\n4:2 Atan wamek ara t\u025beqlem ma yella yiwen yes\u025ba \u1e5a\u1e5bu\u1e25 n Sidi \u1e5aebbi : kra n win ara icehden belli \u0190isa Lmasi\u1e25 yusa-d \u0263er ddunit s \u1e63\u1e63ifa n wemdan, s \u0263u\u1e5b Sidi \u1e5aebbi i d-yusa.\n4:3 Ma d win ara inekk\u1e5ben ayagi \u0263ef Sidna \u0190isa, ma\u010d\u010di s \u0263u\u1e5b \u1e5aebbi i d-yekka lame\u025bna yekka-d si \u1e5a\u1e5bu\u1e25 n we\u025bdaw n Lmasi\u1e25 i \u0263ef teslam a d-yas \u0263er ddunit, atan tura yella yakan di ddunit.\n4:4 Kunwi ay arrac ime\u1e93yanen, d arraw n Sidi \u1e5aebbi i tellam, t\u0263elbem wid yesselmaden lekdeb, axa\u1e6der \u1e5a\u1e5bu\u1e25 yellan deg-wen yugar win yellan di ddunit.\n4:5 Nutni n ddunit, daymi i \u021bmeslayen s l\u025beqliya n wat ddunit, yerna at ddunit sme\u1e25sisen-asen.\n4:6 Nukni d ayla n Sidi \u1e5aebbi ; win yeb\u0263an ad yissin Sidi \u1e5aebbi yesme\u1e25sis-a\u0263-d ; win ur nelli ara n Sidi \u1e5aebbi ur a \u0263-d-isme\u1e25sis ara : s wakka ara ne\u025bqel \u1e5a\u1e5bu\u1e25 n tide\u021b akk-d \u1e5a\u1e5bu\u1e25 n lekdeb.\n4:7 A wid e\u025bzizen, ilaq a nemye\u1e25mal wway gar-ane\u0263 axa\u1e6der Sidi \u1e5aebbi s yiman-is, d le\u1e25mala ; kra n wid yes\u025ban le\u1e25mala deg ulawen-nsen, d arraw n Sidi \u1e5aebbi i llan yerna ssnen Sidi \u1e5aebbi.\n4:8 Kra n win ur nes\u025bi ara le\u1e25mala deg wul-is ur yessin ara Sidi \u1e5aebbi, axa\u1e6der le\u1e25mala s \u0263u\u1e5b-es i d-tekk.\n4:9 Atah wamek i d-isban Sidi \u1e5aebbi belli i\u1e25emmel-a\u0263 : Sidi \u1e5aebbi icegge\u025b-ed Mmi-s aw\u1e25id \u0263er ddunit iwakken yis a nes\u025bu tudert.\n4:10 A\u021bah d acu i d le\u1e25mala : ma\u010d\u010di d nukni i g\u1e25emmlen Sidi \u1e5aebbi lame\u025bna d ne\u021b\u021ba i \u0263-i\u1e25emmlen armi i d icegge\u025b Mmi-s ad yefk iman-is d asfel i le\u025bfu n ddnubat-nne\u0263.\n4:11 A wid e\u025bzizen, ma yella Sidi \u1e5aebbi i\u1e25emmel-a\u0263 annect-agi, ilaq ula d nukni a nemye\u1e25mal wway gar-ane\u0263.\n4:12 Ulac win iwalan Sidi \u1e5aebbi s wallen-is, me\u025bna ma yella nemye\u1e25mal wway gar-ane\u0263, Baba \u1e5aebbi ye\u021b\u021bili deg-nne\u0263, le\u1e25mala-s te\u021bban-ed deg-nne\u0263.\n4:13 Atah wamek ara ne\u025bqel nukni ne\u021b\u021bili deg-s ne\u021b\u021ba ye\u021b\u021bili deg-nne\u0263 : imi i \u0263-d-yefka \u1e5a\u1e5bu\u1e25-ines.\n4:14 Nukni s yiman-nne\u0263 net\u025be\u01e7\u01e7eb deg-s, daymi nezmer a d-neched belli Baba-tne\u0263 \u1e5aebbi icegge\u025b-ed Mmi-s, i leslak n ddunit.\n4:15 Kra n win ara icehden belli \u0190isa d Mmi-s n \u1e5aebbi, \u1e5aebbi ad ye\u021b\u021bili deg wul-is, ne\u021b\u021ba ad i\u1e6d\u1e6def di Sidi \u1e5aebbi.\n4:16 Nukni nessen le\u1e25mala i \u0263-i\u1e25emmel Sidi \u1e5aebbi, yerna numen yis. Sidi \u1e5aebbi, d le\u1e25mala ; win yes\u025ban le\u1e25mala deg wul-is ye\u1e6d\u1e6def di Sidi \u1e5aebbi, Sidi \u1e5aebbi yezde\u0263 deg ul-is.\n4:17 Ma yella tennekmal le\u1e25mala deg ulawen-nne\u0263, a nes\u025bu le\u021bkal i wass n l\u1e25isab, axa\u1e6der ayen ye\u021b\u025beddin fell-a\u0263 di ddunit-a, d ayen yes\u025bedda Lmasi\u1e25 s yiman-is.\n4:18 Win yes\u025ban le\u1e25mala n tide\u021b ur t-tke\u010d\u010dem ara tugdi ; le\u1e25mala n tide\u021b tessufu\u0263 tugdi, axa\u1e6der tugdi te\u021b\u021bas-ed si lxuf n l\u025biqab, win ye\u021b\u025bicin di tugdi wer\u025bad yessawe\u1e0d \u0263er le\u1e25mala n tide\u021b.\n4:19 Ma d nukni, n\u1e25emmel Sidi \u1e5aebbi axa\u1e6der d ne\u021b\u021ba i \u0263-i\u1e25emmlen d amezwaru.\n4:20 Kra n win yeqqa\u1e5ben : \u1e25emmle\u0263 Sidi \u1e5aebbi yili yek\u1e5beh gma-s, d akeddab, axa\u1e6der win ur n\u1e25emmel ara gma-s i ge\u021bwali, ur izmir ara ad i\u1e25emmel Sidi \u1e5aebbi ur ye\u021bwali ara.\n4:21 Atan ihi lame\u1e5b i \u0263-d-i\u01e7\u01e7a Lmasi\u1e25 : win i\u1e25emmlen Sidi \u1e5aebbi ad i\u1e25emmel da\u0263en gma-s. f+\n5:1 Kra n wid yumnen belli d \u0190isa i d Lmasi\u1e25, u\u0263alen d arraw n \u1e5aebbi ; da\u0263en wid i\u1e25emmlen Baba \u1e5aebbi, \u1e25emmlen ula d arraw-is.\n5:2 Atah wamek ara n\u1e93er belli n\u1e25emmel arraw n \u1e5aebbi : ma n\u1e25emmel Sidi \u1e5aebbi yerna nxeddem lumu\u1e5bat-is.\n5:3 Axa\u1e6der ma n\u1e25emmel Sidi \u1e5aebbi ilaq a ne\u1e25rez lumu\u1e5bat-is ; lumu\u1e5bat-is ur \u1e93\u1e93ayit ara,\n5:4 axa\u1e6der arraw n Sidi \u1e5aebbi \u0263elben ddunit, ayen s wacu i ne\u0263leb ddunit, d liman-nne\u0263 di Sidna \u0190isa.\n5:5 Anwa i g\u0263elben ddunit ? D wid yumnen belli \u0190isa d Mmi-s n \u1e5aebbi.\n5:6 \u0190isa Lmasi\u1e25, d win akken i d-yusan \u0263er ddunit s waman d idammen, ma\u010d\u010di kan s waman n we\u0263\u1e0das-is lame\u025bna s waman akk-d idammen-is yuzzlen mi gemmut fell-ane\u0263 ; yerna d \u1e5a\u1e5bu\u1e25 iqedsen i d-icehden fell-as axa\u1e6der \u1e5a\u1e5bu\u1e25 iqedsen, d \u1e5a\u1e5bu\u1e25 n tide\u021b.\n5:7 \u1e5a\u1e5bu\u1e25 iqedsen, aman d idammen, di tlata yid-sen beggnen-d tide\u021b-agi.\n5:9 Ma yella cchada n yemdanen te\u021bwaqbel, cchada n Sidi \u1e5aebbi tugar tin n yemdanen ; axa\u1e6der d Sidi \u1e5aebbi s yiman-is i d-icehden \u0263ef Mmi-s.\n5:10 Win yumnen s Mmi-s n \u1e5aebbi, yes\u025ba \u021bbut deg wul-is, ma d win ur numin ara, yerra Sidi \u1e5aebbi d akeddab imi ur yumin ara s wayen i d-iched \u1e5aebbi \u0263ef Mmi-s.\n5:11 Cchada-yagi \u021b-\u021budert n dayem i \u0263-d-yefka Sidi \u1e5aebbi, tudert-agi di Mmi-s i tella.\n5:12 Win yumnen s Mmi-s n \u1e5aebbi yes\u025ba tudert ; win ur numin ara s Mmi-s n \u1e5aebbi ur yes\u025bi ara tudert.\n5:13 Ayagi uri\u0263-awen-t-id iwakken a\u021b-\u021be\u1e93rem belli tes\u025bam tudert n \u1e63\u1e63e\u1e25 ye\u021bdumun, kunwi yumnen s Mmi-s n \u1e5aebbi.\n5:14 Tura atah le\u021bkal i nes\u025ba \u0263u\u1e5b-es : ma nessuter-as kra yellan di leb\u0263i-s, ye\u021b\u1e25essis-a\u0263-d ;\n5:15 ma yella ne\u1e93ra belli ye\u021b\u1e25essis-a\u0263-d, kra n wayen ara s nessuter, ne\u1e25sa belli yewwe\u1e0d-a\u0263-d.\n5:16 Ma yella win ye\u1e93ran gma-s yedneb yili ddnub-is ur ye\u021b\u021bawi ara \u0263er lmut, ilaq ad yed\u025bu \u0263er Sidi \u1e5aebbi, ne\u021b\u021ba a s-d-yefk tudert ; nni\u0263-ed ayagi \u0263ef wid ixeddmen ddnub ur ne\u021b\u021bawi ara \u0263er lmut. Yella ddnub ye\u021b\u021bawin \u0263er lmut lame\u025bna ma\u010d\u010di \u0263ef wid ixeddmen ddnub-agi i wen-d-nni\u0263 a\u021b-\u021bed\u025bum.\n5:17 Kra yellan d lba\u1e6del, d ddnub, me\u025bna llan ddnubat ur ne\u021b\u021bawi ara \u0263er lmut.\n5:18 Ne\u1e93ra belli kra n wid yellan d arraw n Sidi \u1e5aebbi ur \u021b\u025bicin ara di ddnub ; me\u025bna Mmi-s n \u1e5aebbi ye\u021b\u025bassa fell-asen yerna Cci\u1e6dan ur yezmir ara a ten-yennal.\n5:19 Ne\u1e93ra belli d arraw n Sidi \u1e5aebbi i nella, ma d ddunit te\u0263li ger ifassen n wemcum.\n5:20 Ne\u1e93ra da\u0263en Mmi-s n \u1e5aebbi yusa-d \u0263er ddunit yefka-ya\u0263-d lefhama s wayes ara nissin \u1e5aebbi n \u021bide\u021b. Deg-s i ne\u1e6d\u1e6def s yisem n Mmi-s \u0190isa Lmasi\u1e25 ; d ne\u021b\u021ba i d \u1e5aebbi n \u1e63\u1e63e\u1e25, i \u021b-\u021budert ye\u021bdumun.\n5:21 Ay ilme\u1e93yen, \u1e25adret a\u021b-\u021b\u025bebdem i\u1e5bebbiten n lekdeb.","title":"Kabyle Bible (NT): 1 John","type":"page"}