{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/jo2.htm","path":"bib/wb/kab/jo2.htm","source_url":"https://sacred-texts.com/bib/wb/kab/jo2.htm","text":"1:1 Nekk yellan d ameqqran n tejma\u025bt, i Kirya i gexta\u1e5b Sidi \u1e5aebbi akk-d warraw-is i \u1e25emmle\u0263 s tide\u021b. Ma\u010d\u010di d nekk kan i kkun i\u1e25emmlen, me\u025bna ula d wid akk yesnen tide\u021b ;\n1:2 \u0263ef ddemma n tide\u021b yellan deg-nne\u0263 ara yeqqimen deg-nne\u0263 i dayem.\n1:3 Ssma\u1e25, \u1e5b\u1e5be\u1e25ma \u021b-\u021balwit a \u0263-d \u021b\u021bunefken s \u0263u\u1e5b Baba \u1e5aebbi d Mmi-s \u0190isa Lmasi\u1e25, iwakken a n\u025bic di tide\u021b akk-d le\u1e25mala.\n1:4 Ac\u1e25al fe\u1e5b\u1e25e\u0263 imi ufi\u0263 kra seg warraw-im teddun deg webrid n tide\u021b, akken i \u0263-t-id-yume\u1e5b Baba \u1e5aebbi.\n1:5 Ihi tura a tajma\u025bt n Kirya, ayen i ne\u021b\u1e5ba\u01e7u deg-wen : a nemye\u1e25mal wway gar-ane\u0263, ma\u010d\u010di d lame\u1e5b ajdid i wen-d-wwi\u0263 lame\u025bna d lame\u1e5b yellan yakan si tazwara.\n1:6 Le\u1e25mala, d m'ara n\u021beddu deg webrid n Sidi \u1e5aebbi n\u1e25errez lumu\u1e5bat-is. S lame\u1e5b-agi i teslam si tazwara i glaq a\u021b-\u021beddum.\n1:7 A\u1e6das n wid yesselmaden lekdeb i d-innulfan di ddunit, ur set\u025be\u1e5bfen ara belli \u0190isa Lmasi\u1e25 yusa-d \u0263er ddunit s \u1e63\u1e63ifa n wemdan. D wigi i ge\u021b\u0263u\u1e5b\u1e5bun, i d i\u025bdawen n Lmasi\u1e25.\n1:8 ?adret iman-nwen iwakken ur a wen-ye\u021b\u1e5bu\u1e25u ara wayen akk i wen-nesselmed lame\u025bna a\u021b-\u021b\u0263elltem lfayda tameqqrant.\n1:9 Kra n win ara i\u025beddin tilas deg wayen yesselmed Lmasi\u1e25, ur ye\u1e6d\u1e6dif ara di \u1e5aebbi ; ma d win ye\u1e6d\u1e6dfen deg uselmed n Lmasi\u1e25 ye\u1e6d\u1e6def di Baba \u1e5aebbi akk-d Mmi-s.\n1:10 Kra n win ara d-yasen \u0263u\u1e5b-wen m'ur wen-d-yewwi ara aselmed-agi n Lmasi\u1e25 ur s\u1e6der\u1e25ibet ara yis \u0263er yexxamen-nwen, ur \u021bsellimet ara ula d sslam fell-as !\n1:11 Axa\u1e6der win i ges\u1e6der\u1e25ben yis, ye\u021b\u021bekki di lec\u0263al-is n diri.\n1:12 Mazal-iyi a\u1e6das n lec\u0263al i \u0263ef b\u0263i\u0263 a wen-d-hed\u1e5be\u0263 lame\u025bna ma\u010d\u010di di teb\u1e5ba\u021b, ssarame\u0263 a n-ase\u0263 \u0263u\u1e5b-wen, a wen-mmeslaye\u0263 s yimi-w, iwakken lfe\u1e5b\u1e25-nne\u0263 ad innekmal.\n1:13 Arraw n weltma-m yexta\u1e5b \u1e5aebbi, \u021bsellimen fell-am.","title":"Kabyle Bible (NT): 2 John","type":"page"}