{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/joh.htm","path":"bib/wb/kab/joh.htm","source_url":"https://sacred-texts.com/bib/wb/kab/joh.htm","text":"1:1 Di tazwara yella win yellan d Awal n \u1e5aebbi, yella akk-d \u1e5aebbi, d ne\u021b\u021ba i d \u1e5aebbi.\n1:2 Si tazwara, yella akk-d \u1e5aebbi,\n1:3 kullec ye\u021bwaxleq seg-s ; deg wayen me\u1e5b\u1e5ba ye\u021bwaxelqen, ulac ayen ur d-nekki ara s \u0263u\u1e5b-es.\n1:4 Deg-s i tella tudert ; tudert-agi tella \u021b-\u021bafat i yemdanen.\n1:5 Tafat te\u021bfe\u01e7\u01e7i\u01e7 di \u1e6d\u1e6dlam, yerna \u1e6d\u1e6dlam ur \u021b-iqbil ara.\n1:6 Yella yiwen wergaz ye\u021bwacegge\u025b ed s \u0263u\u1e5b \u1e5aebbi, argaz-agi isem-is Ye\u1e25ya ;\n1:7 yusa-d ad yili d inigi n tafat iwakken imdanen me\u1e5b\u1e5ba ad amnen s cchada-ines.\n1:8 Ma\u010d\u010di d ne\u021b\u021ba i \u021b-\u021bafat, ne\u021b\u021ba yusa-d d inigi n tafat.\n1:9 Tafat-agi \u021b-\u021bafat n tide\u021b, tusa-d \u0263er ddunit iwakken a\u021b-\u021bec\u1e5beq \u0263ef yal amdan.\n1:10 Win yellan d Awal n \u1e5aebbi yella yakan si tazwara di ddunit, imi d ne\u021b\u021ba i \u021b-ixelqen lame\u025bna ddunit ur t- te\u025bqil ara.\n1:11 Yusa-d \u0263er lumma-s lame\u025bna ne\u021b\u021bat ur t-teqbil ara.\n1:12 Ma d wid i t-iqeblen yumnen yis, widak i\u025buzz-iten, u\u0263alen d arraw n \u1e5aebbi,\n1:13 ma\u010d\u010di seg wemdan i d-lulen, ma\u010d\u010di s leb\u0263i n tnefsit ne\u0263 s leb\u0263i n wemdan, lame\u025bna d \u1e5aebbi i sen-yefkan tudert tajdi\u1e6d.\n1:14 Win akken yellan d Awal, yu\u0263al-ed d amdan, i\u025bac gar-ane\u0263, ye\u010d\u010du\u1e5b \u021b-\u021bide\u021b akk-d \u1e5b\u1e5be\u1e25ma. Ne\u021bwe\u1e25\u1e25id di lqe\u1e0dra i d-yefka Baba \u1e5aebbi i Mmi-s aw\u1e25id.\n1:15 Ye\u1e25ya iched-ed fell-as zdat l\u0263aci yeqqa\u1e5b : D ne\u021b\u021ba \u0263ef i wen-d-nni\u0263 : win ara d-yasen deffir-iw yezwar-iyi-d axa\u1e6der yella uqbel ad ili\u0263.\n1:16 Yesse\u1e5bwa-ya\u0263 s lxi\u1e5bat-is, lba\u1e5baka \u0263ef taye\u1e0d.\n1:17 ccari\u025ba tusa-d s ufus n Sidna Musa, ma d \u1e5b\u1e5be\u1e25ma \u021b-\u021bide\u021b usant-ed s Sidna \u0190isa Lmasi\u1e25\n1:18 Yiwen ur ye\u1e93ri Sidi \u1e5aebbi, Mmi-s aw\u1e25id yellan \u0263u\u1e5b-es, d ne\u021b\u021ba i \u0263-t-id isbeggnen.\n1:19 Atah wamek i geched Ye\u1e25ya asmi i d-cegg\u025ben \u0263u\u1e5bes l\u1e25ekkam n wudayen si temdint n Lquds. Cegg\u025ben-d \u0263u\u1e5bes tajma\u025bt n lmu-qedmin akk-d yem\u1e5bab\u1e0den n at Lewwi akken a t-steqsin, nnan-as : Anwa-k ke\u010d\u010dini ?\n1:20 Yenna-yasen tide\u021b mbla tuffra : Ma\u010d\u010di d nekk i d Lmasi\u1e25 !\n1:21 Rnan steqsan-t : Anwa-k ihi ? D ke\u010d\u010d i d nnbi Ilyas ? Ye\u1e25ya yenna-yasen : Xa\u1e6di ma\u010d\u010di d nekk. Nutni rnan nnan-as : D nnbi i telli\u1e0d ? Ne\u021b\u021ba yerra-yasen : Xa\u1e6di !\n1:22 Rnan \u1e25e\u1e5bsen-t nnan-as : Anwa-k ihi ? Ilaq a nerr lexba\u1e5b i wid i \u0263-d-icegg\u025ben. D acu i teqqa\u1e5be\u1e0d \u0263ef yiman-ik ?\n1:23 Ye\u1e25ya yenna-yasen : Nekk d win akken \u0263ef i d-yenna nnbi Ice\u025bya : \u021b-\u021ba\u0263ect te\u021b\u025beggi\u1e0d deg unez\u1e5buf : Heggit abrid i Sidi \u1e5aebbi !\n1:24 Wid i d-yusan \u0263u\u1e5b-es i gellan di tejma\u025bt n ifariziyen,\n1:25 rnan steqsan-t nnan-as : Imi ur telli\u1e0d ara d Lmasi\u1e25 ne\u0263 d nnbi Ilyas ne\u0263 d nnbi nni\u1e0den, iwacu ihi i tesse\u0263\u1e0dase\u1e0d l\u0263aci deg waman ?\n1:26 Ye\u1e25ya yerra-yasen : Nekk sse\u0263\u1e0dase\u0263-kkun deg waman ; yella gar-awen yiwen ur t-tessinem ara,\n1:27 usi\u0263-ed uqbel-is, lame\u025bna ur uklale\u0263 ara ad fsi\u0263 ulamma d lexyu\u1e0d n warkasen-is.\n1:28 Annect-agi me\u1e5b\u1e5ba yed\u1e5ba di taddart n Bitanya \u0263er tama n cce\u1e5bq n wasif n Urdun anda i gesse\u0263\u1e0das Ye\u1e25ya l\u0263aci.\n1:29 Azekka-nni, Ye\u1e25ya iwala Sidna \u0190isa iteddu-d \u0263u\u1e5b-es, yen\u1e6deq s \u1e63\u1e63ut \u025blayen : Atan Izimer n \u1e5aebbi, d win i\u021bekksen ddnub n ddunit.\n1:30 Fell-as i wen-d-nni\u0263 : \u00ab a d-yas yiwen, zware\u0263-t-id me\u025bna yella uqbel a d ili\u0263.\u00bb\n1:31 Nekk s yiman-iw ur \u1e93ri\u0263 ara anwa-t me\u025bna usi\u0263-ed ad s\u0263e\u1e0dse\u0263 deg waman akken a t-issinen wat Is\u1e5bail .\n1:32 Atan wayen i d-yenna Ye\u1e25ya A\u0263e\u1e6d\u1e6das fell-as : Wala\u0263 \u1e5a\u1e5bu\u1e25 iqedsen i\u1e63ubb-ed seg igenni s \u1e63\u1e63ifa n tetbirt yers-ed fell-as.\n1:33 Nekk ur \u1e93ri\u0263 ara belli d ne\u021b\u021ba, me\u025bna Sidi \u1e5aebbi i yi-d icegg\u025ben iwakken ad s\u0263e\u1e0dse\u0263 deg waman, yenna-yi-d : \u00ab A\u021b-\u021bwali\u1e0d \u1e5a\u1e5bu\u1e25 i\u1e63ubb-ed seg igenni, a d-yers \u0263ef yiwen wergaz, d ne\u021b\u021ba ara yes\u0263e\u1e0dsen imdanen s \u1e5a\u1e5bu\u1e25 iqedsen. \u00bb\n1:34 Ayagi d ayen i \u1e93rant wallen-iw, daymi i d-cehde\u0263 fell-as qqa\u1e5be\u0263 : \u00ab Argaz-agi d Mmi-s n \u1e5aebbi.\u00bb\n1:35 Azekka-nni, Ye\u1e25ya mazal-it dinna ne\u021b\u021ba d sin seg inelmaden-is.\n1:36 Akken i gwala Sidna \u0190isa i\u025bedda-d, yenna-yasen : Atan izimer n \u1e5aebbi !\n1:37 Mi slan i imeslayen-agi, inelmaden-nni teb\u025ben Sidna \u0190isa.\n1:38 Sidna \u0190isa mi ge\u1e93ra teb\u025ben-t-id, yezzi-d \u0263u\u1e5b-sen, yenna-yasen : D acu teb\u0263am ? Nutni nnan-as : \u1e5aabi ( ye\u025bni : a Sidi ), anda tzed\u0263e\u1e0d ?\n1:39 Yenna-yasen : Ddut yid-i a\u021b-\u021be\u1e93rem. Inelmaden-nni ddan yid-es, \u1e93ran anda yezde\u0263. A\u021b-\u021bili d \u1e5beb\u025ba n tmeddit, qqimen yid-es armi yekfa wass.\n1:40 Andriyus, gma-s n Sem\u025bun Bu\u1e6drus d yiwen seg inelmaden-nni i gteb\u025ben Sidna \u0190isa m'akken i sen-d-yehde\u1e5b fell-as Ye\u1e25ya ;\n1:41 i\u1e5bu\u1e25 uqbel \u0263er gma-s Sem\u025bun, yenna-yas : Nufa Lmasi\u1e25 ! Win i gexta\u1e5b \u1e5aebbi.\n1:42 Andriyus yewwi Sem\u025bun \u0263er Sidna \u0190isa. Akken i t-iwala Sidna \u0190isa, imuqel-it yenna-yas : Ke\u010d\u010d i d Sem\u025bun mmi-s n Yunes. Sya d asawen a\u021b-te\u021b\u021busemmi\u1e0d Sifas ye\u025bni : Bu\u1e6drus.\n1:43 Azekka-nni, Sidna \u0190isa yeqsed ad i\u1e5bu\u1e25 \u0263er tmurt n Jlili. Deg ubrid yemmuger-ed Filibus, yenna-yas : Ddu-d yid-i !\n1:44 Filibus, d yiwen si taddart n Bitsayda, anda akken zed\u0263en Bu\u1e6drus d Andriyus.\n1:45 Syenna Filibus ye\u1e93ra-d Natanahil, yenna-yas : Nufa win \u0263ef i d-yehde\u1e5b Sidna Musa di ccari\u025ba, win akken i \u0263ef d-xebb\u1e5ben lenbiya. D \u0190isa, mmi-s n Yusef n taddart n Na\u1e63aret.\n1:46 Natanahil yerra-yas : Amek, yezmer a d-iffe\u0263 wayen yelhan si taddart n Na\u1e63aret ? Filibus yerra-yas : Eyya-d a\u021b-\u021bwali\u1e0d s wallen-ik !\n1:47 Sidna \u0190isa mi gwala Natanahil iteddu-d \u0263u\u1e5b-es, yenna : Atah yiwen n wat Is\u1e5bail n tide\u021b, ulac deg-s le\u0263de\u1e5b.\n1:48 Natanahil yenna i Sidna \u0190isa : Anda i yi-tesne\u1e0d ? Sidna \u0190isa yerra-yas : Uqbel a k-d-yessiwel Filibus, mi telli\u1e0d ddaw n tneqle\u021b, wala\u0263-k-in !\n1:49 D\u0263a Natanahil yenna-yas : A Sidi, ke\u010d\u010d d Mmi-s n \u1e5aebbi ! D agellid n wat Is\u1e5bail !\n1:50 Sidna \u0190isa yerra-yas : Tumne\u1e0d imi i k-d-nni\u0263 wala\u0263 k-in seddaw n tneqle\u021b ; sya \u0263er zdat a\u021b-\u021be\u1e93red ayen yugaren annect-a !\n1:51 S tide\u021b qqa\u1e5be\u0263-awen : a\u021b-\u021bwalim igenni yeldi, lmalayekkat n Sidi \u1e5aebbi \u021b\u021balint \u021b\u1e63ubbunt sennig Mmi-s n bunadem.\n2:1 Mi \u025beddan sin wussan, tella-d tme\u0263\u1e5ba di tmurt n Jlili di taddart Kana, tella dinna yemma-s n Sidna \u0190isa.\n2:2 Ula d Sidna \u0190isa ye\u021bwa\u025b\u1e5bed ne\u021b\u021ba d inelmaden-is \u0263er tme\u0263\u1e5ba-nni.\n2:3 Imi i ten-ixu\u1e63\u1e63 cc\u1e5bab, yemma-s n Sidna \u0190isa tusa-d \u0263u\u1e5b-es tenna-yas : Ifuk-asen cc\u1e5bab !\n2:4 Sidna \u0190isa yerra-yas : D nekk ne\u0263 d kemm i te\u025bna temsalt-agi a tame\u1e6d\u1e6dut ? Taswi\u025bt-iw ur\u025bad i d-tusi.\n2:5 D\u0263a yemma-s tenna i iqeddacen : Xedmet ayen akk ara wen-d yini !\n2:6 Llant dinna se\u021b\u021ba n tsebbalin ( icmuxen ) ye\u021bwaxedmen s wed\u0263a\u0263, \u021b\u021bawint si tmanyin ar meyya u\u025becrin n litrat, seg-sent i d-\u021b\u025bemmi\u1e5ben wat Is\u1e5bail aman i lu\u1e0du.\n2:7 Sidna \u0190isa yenna i iqeddacen nni : ?\u010da\u1e5bet ticbayliyin-agi d aman. ?\u010du\u1e5ben-tent armi d imi.\n2:8 D\u0263a yenna-asen : \u0190emm\u1e5bet-ed tura kra n waman seg-sent tawim-ten i bab n tme\u0263\u1e5ba. Kkren xedmen akken i sen-d-yenna.\n2:9 Win i\u1e0debb\u1e5ben di leqdic n tme\u0263\u1e5ba ye\u025b\u1e5be\u1e0d aman-nni i gu\u0263alen d cc\u1e5bab. Ne\u021b\u021ba ur ye\u1e93ri ansi i d-yekka cc\u1e5bab-agi, ma d iqeddacen-is \u1e93ran axa\u1e6der d nutni i ten-id-yewwin. I\u1e5bu\u1e25 yessawel i yesli,\n2:10 yenna-yas : Di tme\u0263\u1e5biwin, medden srusun-d uqbel cc\u1e5bab yelhan, mi \u1e25man inebgawen rennun-asen-d win \u1e5bqiqen, ke\u010d\u010d te\u01e7\u01e7i\u1e0d cc\u1e5bab yelhan armi \u021b-\u021bura !\n2:11 D wagi i d lbe\u1e5bhan amezwaru i gexdem Sidna \u0190isa di taddart n Kana di tmurt n Jlili. S wakka i d-ibeggen tamanegt-is i inelmaden-is, d\u0263a umnen yis.\n2:12 Deffir wayagi Sidna \u0190isa i\u1e63ubb \u0263er temdint n Kaferna\u1e25um. Tedda yid-es yemma-s, atmaten-is akk-d inelmaden-is ; qqimen dinna anagar kra n wussan.\n2:13 Akken i d-yeq\u1e5beb wass n Tfaska n izimer n leslak yellan d l\u025bid n wat Is\u1e5bail, Sidna \u0190isa yuli \u0263er temdint n Lquds.\n2:14 Yufa deg wefrag n l\u01e7ame\u025b iqedsen wid yeznuzun izgaren, ulli d yetbiren, yufa da\u0263en dinna wid ye\u021bbeddilen idrimen ; rran l\u01e7ame\u025b iqedsen d ssuq.\n2:15 Ixdem-ed ajelkwa\u1e0d ( acelli\u1e6d ) s wemrar, yebda itellif-iten s nutni s wulli-nsen akk-d yezgaren-nsen, iqleb-asen ( i\u021b\u021bi-yasen ) da\u0263en \u1e6d\u1e6dwabel i wid ye\u021bbeddilen idrimen, i\u1e0degge\u1e5b asen kullec \u0263er lqa\u025ba, issufe\u0263-iten me\u1e5b\u1e5ba seg ufrag n l\u01e7ame\u025b iqedsen ,\n2:16 yerna yenna i wid yeznuzun itbiren : Kkset syagi ssuq-nwen ! Wagi d axxam n Baba, ur t-\u021barrat ara d ssuq !\n2:17 inelmaden-is mmektan-d ayen yuran di tektabt n ?abur : Le\u1e25mala i s\u025bi\u0263 \u0263ef wexxam-ik am tmes ite\u021b\u021ben ul-iw !\n2:18 Kkren wudayen nnan-as : D acu n lbe\u1e5bhan ara \u0263-d-tbeggne\u1e0d akken a ne\u025bqel l\u1e25ekma s wayes i txeddme\u1e0d annect-agi ?\n2:19 Sidna \u0190isa yerra-yasen : Huddet l\u01e7ame\u025b-agi iqedsen, a t-id-sbedde\u0263 di tlata wussan.\n2:20 At Is\u1e5bail nnan-as : Wid yebnan l\u01e7ame\u025b-agi qqimen deg-s se\u021b\u021ba u\u1e5beb\u025bin iseggasen, ke\u010d\u010d tzemre\u1e0d a s-t\u025biwde\u1e0d lebni di tlata wussan !\n2:21 Lame\u025bna \u00ab L\u01e7ame\u025b \u00bb i \u0263ef d-yehde\u1e5b Sidna \u0190isa d l\u01e7e\u021b\u021ba-s.\n2:22 Asmi i d-ye\u1e25ya Sidna \u0190isa si lmut \u0263er tudert, inelmaden-is mmektan-d awal-agi i d-yenna, d\u0263a umnen s wayen yuran di tira iqedsen d wayen i d-yenna Sidna \u0190isa.\n2:23 Mi gella Sidna \u0190isa di temdint n Lquds di lweqt n l\u025bid n Tfaska, a\u1e6das i gumnen yis mi \u1e93ran lbe\u1e5bhanat i gxeddem.\n2:24 Lame\u025bna Sidna \u0190isa ur yes\u025bi ara deg-sen laman axa\u1e6der yessen-iten akken ma llan.\n2:25 Ur ye\u1e25wa\u01e7 ara a s-d-\u1e25kun \u0263ef yemdanen imi yessen ayen yellan deg wulawen-nsen.\n3:1 Yella yiwen wergaz isem-is Nikudem i gellan si tejma\u025bt n ifariziyen, d yiwen seg imeqqranen n wat Is\u1e5bail.\n3:2 I\u1e5bu\u1e25-ed deg i\u1e0d \u0263er Sidna \u0190isa yenna-yas : A Sidi ne\u1e93ra belli d Sidi \u1e5aebbi i k-id-icegg\u025ben iwakken a \u0263-teslemde\u1e0d, axa\u1e6der yiwen ur izmir ad yexdem lbe\u1e5bhanat i txeddme\u1e0d m'ur yelli ara \u1e5aebbi yid-es.\n3:3 Sidna \u0190isa yerra-yas : S tide\u021b a k-d-ini\u0263 : yiwen ur izmir ad i\u1e93er tagelda n \u1e5aebbi m'ur d-i\u025bawed ara talalit.\n3:4 Nikudem yenna-yas : Amek i gezmer yiwen a d i\u025biwed talalit ma yella d am\u0263a\u1e5b ? Izmer ad yu\u0263al \u0263er t\u025bebbu\u1e6d n yemma-s a d i\u025biwed talalit ?\n3:5 Sidna \u0190isa yerra-yas : Nni\u0263-ak s tide\u021b : m'ur d-ilul ara yiwen seg waman akk-d \u1e5a\u1e5bu\u1e25, ur i\u021b\u021bizmir ara ad ikcem tagelda n \u1e5aebbi.\n3:6 Win i d-ilulen seg wemdan \u021b-\u021ba\u1e5bwi\u1e25t n wemdan, win i d-ilulen s \u1e5a\u1e5bu\u1e25 iqedsen d \u1e5a\u1e5bu\u1e25.\n3:7 Ur \u021b\u021bawham ara imi i k-d-nni\u0263 \u00ab ilaq a d-t\u025biwdem talalit.\u00bb\n3:8 A\u1e0du ye\u021bsu\u1e0du \u0263er wanda i s-yehwa, tselle\u1e0d i \u1e63\u1e63ut-is lame\u025bna ur t\u1e93erre\u1e0d ara ansi d-yekka ne\u0263 anda iteddu. Akka da\u0263en i gella \u0263ef kra n win i d-ilulen s \u1e5a\u1e5bu\u1e25 iqedsen.\n3:9 Nikudem yenna-yas : Amek ara yed\u1e5bu wayagi ?\n3:10 Sidna \u0190isa yerra-yas : Tesselmade\u1e0d ccari\u025ba i wat Is\u1e5bail ur tessine\u1e0d ara annect-agi ?\n3:11 A k- ini\u0263 tide\u021b: neqqa\u1e5b-ed ayen kan i nessen, ne\u021bcehhid-ed s wayen i nwala, lame\u025bna kunwi ur teqbilem ara cchada-nne\u0263.\n3:12 M'ur tuminem ara mi wen-d-hed\u1e5be\u0263 \u0263ef temsalin n ddunit-agi amek ara tamnem s tid n igenwan ?\n3:13 Yiwen ur yuli \u0263er igenwan anagar Mmi-s n bunadem i d-i\u1e63ubben seg igenwan.\n3:14 Akken i g\u025belleq Musa azrem n nn\u1e25as \u0263ef tgejdit deg unez\u1e5buf, i glaq ad i\u021b\u021bu\u025belleq da\u0263en Mmi-s n bunadem\n3:15 iwakken kra n win yumnen yis, ad yes\u025bu tudert n dayem.\n3:16 Sidi \u1e5aebbi i\u1e25emmel imdanen n ddunit me\u1e5b\u1e5ba armi i d-yefka Mmi-s aw\u1e25id iwakken kra n win yumnen yis ur ye\u021bme\u021b\u021bat ara me\u025bna ad yes\u025bu tudert n dayem.\n3:17 Sidi \u1e5aebbi ur d-icegge\u025b ara Mmi-s \u0263er ddunit iwakken ad i\u1e25aseb imdanen me\u025bna iwakken a ten-isellek.\n3:18 Win yumnen yis ur ye\u021b\u021bu\u1e25aseb ara, ma d win ur numin ara atan ye\u021b\u021bu\u1e25aseb yakan, imi ur yumin ara s Mmi-s aw\u1e25id n Sidi \u1e5aebbi.\n3:19 Atah l\u1e25isab yellan fell-as : \u00ab tafat tusa-d \u0263er ddunit me\u025bna imdanen \u1e25emmlen \u1e6d\u1e6dlam axi\u1e5b n tafat, axa\u1e6der lec\u0263al-nsen diri-ten. \u00bb\n3:20 Kra n win ixeddmen cce\u1e5b, yek\u1e5beh tafat yerna ur i\u021bqe\u1e5b\u1e5bib ara \u0263u\u1e5b-es, i\u021b\u021baggad a d-tessedhe\u1e5b yir lec\u0263al-is.\n3:21 Ma d win iteddun di tide\u021b ye\u021b\u021bas-ed \u0263er tafat akken a d-iban belli kra n wayen ixeddem, ixeddem it di leb\u0263i n Sidi \u1e5aebbi.\n3:22 Syenna Sidna \u0190isa d inelmaden is \u1e5bu\u1e25en \u0263er tmurt n Yahuda, qqimen dinna kra n wussan, sse\u0263\u1e0dasen l\u0263aci deg waman.\n3:23 Ye\u1e25ya da\u0263en yella yesse\u0263\u1e0das l\u0263aci di \u0190inun \u021b-\u021bama n Salim imi qwan waman dinna. A\u1e6das l\u0263aci i d-i\u021basen \u0263u\u1e5b-es iwakken a ten-isse\u0263\u1e0des.\n3:24 Di lweqt-nni ur\u025bad i skecmen Ye\u1e25ya \u0263er l\u1e25ebs.\n3:25 Yiwen wass kra seg inelmaden n Ye\u1e25ya hed\u1e5ben d yiwen wergaz n wat Is\u1e5bail \u0263ef lu\u1e0du.\n3:26 \u1e5au\u1e25en \u0263er Ye\u1e25ya, nnan-as : A Sidi, win yellan yid-ek mi telli\u1e0d agemma\u1e0d i wasif n Urdun, win akken i \u0263ef d-tcehde\u1e0d, atan yesse\u0263\u1e0das ula d ne\u021b\u021ba, l\u0263aci me\u1e5b\u1e5ba \u021b\u1e5bu\u1e25un \u0263u\u1e5b-es.\n3:27 Ye\u1e25ya yerra-yasen : Yiwen ur izmir ad ixdem cc\u0263el nni\u1e0den sennig wayen i s-d-yefka Sidi \u1e5aebbi.\n3:28 Aql-ikkun s yiman-nwen d inigan, ac\u1e25al d abrid i wen-d nni\u0263 : ma\u010d\u010di d nekk i d Lmasi\u1e25, \u021bwacegg\u025be\u0263 d kan uqbel-is .\n3:29 Iwumi tewjed teslit ? Ana\u0263 i yesli ! Ma d a\u1e25bib n yesli d win ye\u021b\u0263imin \u0263er tama-s, ife\u1e5b\u1e5be\u1e25 m'ara isel i \u1e63\u1e63ut n yesli. Ula d nekk tura lfe\u1e5b\u1e25-iw yennekmal.\n3:30 Ilaq ne\u021b\u021ba ad ye\u021b\u021bim\u0263u\u1e5b nekk ad \u021b\u021bim?iye\u0263.\n3:31 Win i d-yusan seg igenni yella nnig n wayen yellan me\u1e5b\u1e5ba, ma d win yellan n ddunit-agi ihedde\u1e5b anagar \u0263ef wayen yellan di ddunit. Win i d-yusan seg igenni yella sennig-nsen me\u1e5b\u1e5ba.\n3:32 Icehhed-ed \u0263ef wayen ye\u1e93ra d wayen yesla, lame\u025bna yiwen ur iqbil cchada-ines.\n3:33 Win ara iqeblen cchada-ines, yet\u1e25eqqeq belli Sidi \u1e5aebbi yeqqa\u1e5b tide\u021b.\n3:34 S tide\u021b amcegge\u025b n \u1e5aebbi ihedde\u1e5b imeslayen i s-d-yefka \u1e5aebbi, imi i t-ye\u010d\u010du\u1e5b s \u1e5a\u1e5bu\u1e25 iqedsen.\n3:35 Baba \u1e5aebbi i\u1e25emmel Mmi-s, yerra kullec ger ifassen-is.\n3:36 Win yumnen s Mmi-s yes\u025ba tudert ur nfennu ; ma d win ur numin ara s Mmi-s ur ye\u021bwali ara tudert, urrif n \u1e5aebbi yezga fell-as.\n4:1 Ifariziyen slan s Sidna \u0190isa yes\u025ba a\u1e6das n inelmaden yerna yesse\u0263\u1e0das imdanen akte\u1e5b n Ye\u1e25ya.\n4:2 Lame\u025bna Sidna \u0190isa ma\u010d\u010di d ne\u021b\u021ba s yiman-is i gesse\u0263\u1e0dasen l\u0263aci, cc\u0263el-agi ye\u01e7\u01e7a-t i inelmaden-is. Mi ge\u1e93ra Sidna \u0190isa belli slan yis,\n4:3 yeffe\u0263 si tmurt n at Yahuda. Iwakken ad yu\u0263al \u0263er tmurt n Jlili,\n4:4 ilaq-as ad i\u025beddi \u0263ef tmurt n Samarya.\n4:5 Yel\u1e25eq \u0263er taddart n Sicar iqe\u1e5bben akal i d-ye\u01e7\u01e7a Sidna Ye\u025bqub i mmi-s Yusef ;\n4:6 dinna i gella lbir n Sidna Ye\u025bqub. Sidna \u0190isa yeqqim \u0263ef yiri n lbir akken ad yeste\u025bfu. A\u021b-\u021bili d tnac n wass.\n4:7 Yiwet n tme\u1e6d\u1e6dut n Samarya tusa-d a\u021b-\u021bagem ; Sidna \u0190isa ilu\u025ba-\u021b, yenna yas : A tame\u1e6d\u1e6dut, ma ulac a\u0263ilif efk- yi-d ad swe\u0263 !\n4:8 Yu\u0263 l\u1e25al inelmaden-is \u1e5bu\u1e25en \u0263er temdint a d-a\u0263en ayen ara \u010d\u010den.\n4:9 Tame\u1e6d\u1e6dut-nni tasamarit tenna-yas : Amek, ke\u010d\u010d yellan n wat Is\u1e5bail tessutre\u1e0d-iyi-d a\u021b-\u021beswe\u1e0d i nekk yellan \u021b-\u021basamarit ? (axa\u1e6der at Is\u1e5bail ur \u021bemsa\u025baden ara yerna ur \u021bemxala\u1e0den ara d isamariyen).\n4:10 Sidna \u0190isa yerra-yas : Lemmer te\u1e93ri\u1e0d ayen i geb\u0263a \u1e5aebbi a m-t-id yefk akk-d win i m-d-yessutren aman, tili d kemm ara s-yessutren a m-d-yefk a\u021b \u021beswe\u1e0d ; ne\u021b\u021ba, d aman yessidiren ara m-d-yefk.\n4:11 Tame\u1e6d\u1e6dut-nni tenna-yas : A Sidi, ur tes\u025bi\u1e0d ara s wacu ara d-tessali\u1e0d aman yerna lbir-agi lqay. Ansi ara k-d-kken waman-agi yessidiren ?\n4:12 Teb\u0263i\u1e0d e\u025bni a d-tini\u1e0d t\u025bedda\u1e0d jeddi-tne\u0263 Ye\u025bqub i \u0263-d ye\u01e7\u01e7an lbir-agi, i geswan seg-s ne\u021b\u021ba d warraw-is akk \u021bqe\u1e0d\u025biyin-is ?\n4:13 Sidna \u0190isa yerra-yas : Kra n win ara yeswen seg waman-agi ad yu\u0263al ad iffad,\n4:14 lame\u025bna win ara yeswen seg waman ara s-d-fke\u0263 ur ye\u021b\u021bu\u0263al ara ad iffad. Yerna aman ara s-d-fke\u0263 ad u\u0263alen deg-s \u021b-\u021ba\u025bwint ur ne\u021b\u0263a\u1e5b ara, a d-te\u021bfeggi\u1e0d seg-s tudert n dayem.\n4:15 Tame\u1e6d\u1e6dut-nni tenna-yas : A Sidi, efk-iyi-d seg waman-agi iwakken ur \u021b\u021bu\u0263ale\u0263 ara ad ffade\u0263 ne\u0263 a d-ase\u0263 \u0263er lbir-agi ad agme\u0263.\n4:16 Sidna \u0190isa yenna-yas : \u1e5au\u1e25 ssiwel-as i wergaz-im tu\u0263ale\u1e0d-ed \u0263er dagi !\n4:17 Tame\u1e6d\u1e6dut-nni terra-yas : Ur s\u025bi\u0263 ara argaz ! Sidna \u0190isa yenna-yas : Tes\u025bi\u1e0d l\u1e25eqq imi d-tenni\u1e0d ur s\u025bi\u0263 ara argaz.\n4:18 Axa\u1e6der xemsa iberdan i tzew\u01e7e\u1e0d, win yellan yid-em tura ma\u010d\u010di d argaz-im ; deg wannect-agi \u021b-\u021bide\u021b i d-tenni\u1e0d !\n4:19 Ne\u021b\u021bat tenna-yas : A Sidi, \u025beqle\u0263-k d nnbi i telli\u1e0d.\n4:20 Ini-yi-d anwa i ges\u025ban l\u1e25eqq : lejdud nne\u0263 isamariyen \u025bebbden \u1e5aebbi \u0263ef wudrar-agi, ma d kunwi s wat Is\u1e5bail teqqa\u1e5bem amkan anda i glaq a ne\u025bbed \u1e5aebbi, d Lquds.\n4:21 Sidna \u0190isa yenna-yas : A tame\u1e6d\u1e6dut, amen s wayen ara m-d-ini\u0263 ! Iteddu-d lweqt anda ma\u010d\u010di \u0263ef wedrar-agi ne\u0263 di Lquds ara ye\u021bwa\u025bbed Baba \u1e5aebbi.\n4:22 Kunwi s isamariyen t\u025bebbdem ayen ur tessinem ara, ma d nukkni n\u025bebbed ayen nessen axa\u1e6der leslak i\u021bekk-ed seg wegdud n Is\u1e5bail.\n4:23 Lame\u025bna iteddu-d lweqt yerna yewwe\u1e0d-ed, anda lmumnin n \u1e63\u1e63e\u1e25 ad \u025bebbden Baba \u1e5aebbi s \u1e5a\u1e5bu\u1e25, s tide\u021b, axa\u1e6der d lmumnin-agi n \u1e63\u1e63e\u1e25 i geb\u0263a Baba \u1e5aebbi.\n4:24 Imi \u1e5aebbi d \u1e5a\u1e5bu\u1e25 i gella, ilaq wid ara t-i\u025bebden a t-\u025bebden s \u1e5a\u1e5bu\u1e25 \u021b-\u021bide\u021b.\n4:25 Tame\u1e6d\u1e6dut-nni tenna-yas : ?ri\u0263 a d-yas win i gexta\u1e5b Sidi \u1e5aebbi, win i\u021b\u021busemman \u00ab Lmasi\u1e25 \u00bb. Asm'ara d-yas a \u0263-d-yessefhem kra yellan.\n4:26 Sidna \u0190isa yerra-yas : Lmasi\u1e25, d nekk s yiman-iw !\n4:27 Imiren kan ww\u1e0den-d inelmaden is. Wehmen imi i t-id-ufan ye\u021bmeslay \u021b-\u021bme\u1e6d\u1e6dut ; lame\u025bna yiwen deg-sen ur s-yenni : d acu i teb\u0263i\u1e0d \u0263u\u1e5b-es, ne\u0263 iwacu i te\u021bmeslaye\u1e0d yid-es ?\n4:28 D\u0263a tame\u1e6d\u1e6dut-nni te\u01e7\u01e7a tacmuxt-is dinna, tuzzel \u0263er taddart tenna i l\u0263aci :\n4:29 Eyyaw a\u021b-\u021be?rem yiwen yenna-yi-d akk ayen xedme\u0263 ! Ad yili d ne\u021b\u021ba i d Lmasi\u1e25 !\n4:30 L\u0263aci ff\u0263en-d si taddart \u1e5bu\u1e25en ad \u1e93ren Sidna \u0190isa.\n4:31 Uqbel a d-yawe\u1e0d l\u0263aci, inelmaden-is \u1e25e\u1e5bsen-t ad ye\u010d\u010d, nnan-as : A Sidi \u025beddi-d a\u021b-\u021be\u010d\u010de\u1e0d !\n4:32 Yenna-yasen : S\u025bi\u0263 lqut ara \u010d\u010de\u0263 me\u025bna kunwi ur te\u1e93rim ara d acu-t.\n4:33 Inelmaden qqa\u1e5ben wway gar asen : Ahat yella win i s-d-yewwin ad ye\u010d\u010d.\n4:34 Sidna \u0190isa yenna : Lqut-iw, d m'ara xedme\u0263 leb\u0263i n win i yi-d-icegg\u025ben akken ad kemmle\u0263 cc\u0263el i \u0263ef i yi-iwekkel.\n4:35 Kunwi teqqa\u1e5bem mazal \u1e5beb\u025ba wagguren i tmegra ma d nekk a wen-d-ini\u0263: ldit allen-nwen a\u021b-\u021bwalim igran we\u1e5b\u1e5ba\u0263-it, wejden i tmegra !\n4:36 Win imeggren yewwi lexla\u1e63-is, ijemme\u025b l\u0263ella i tudert n dayem. Akka lfe\u1e5b\u1e25 yesdukkel win izerr\u025ben d win imeggren.\n4:37 Axa\u1e6der \u021b-\u021bide\u021b lemtel-agi i d-yeqqa\u1e5ben : \u00ab Yiwen izerre\u025b waye\u1e0d imegger \u00bb !\n4:38 Nekk cegg\u025be\u0263-kkun a\u021b-\u021bmegrem anda ur tezri\u025bem ara, anda i n\u025be\u021b\u021baben wiya\u1e0d ; nutni n\u025be\u021b\u021baben, kunwi t\u0263elltem l\u0263ella n le\u025btab-nsen.\n4:39 A\u1e6das n isamariyen n taddart-nni i gumnen s Sidna \u0190isa mi d-tcehhed fell-as tme\u1e6d\u1e6dut-nni s imeslayen-agi : \u00abyenna-yi-d akk ayen i xedme\u0263 !\u00bb\n4:40 Mi ww\u1e0den \u0263u\u1e5b-es isamariyen-nni, \u1e25ellelen Sidna \u0190isa ad iqqim yid-sen. D\u0263a yeqqim yid-sen sin wussan.\n4:41 A\u1e6das nni\u1e0den i gumnen yis mi slan i imeslayen-is.\n4:42 Nnan-as i tme\u1e6d\u1e6dut-nni : Tura numen yis ma\u010d\u010di kan \u0263ef wayen i \u0263-d-tenni\u1e0d fell-as, nesla yas s yiman-nne\u0263, ne\u1e93ra belli d ne\u021b\u021ba i d amcafe\u025b n ddunit.\n4:43 Mi \u025beddan sin wussan, Sidna \u0190isa i\u1e5bu\u1e25 syenna \u0263er tmurt n Jlili.\n4:44 Yenna-yasen : \u00ab Ulac nnbi yes\u025ban leqde\u1e5b di tmurt-is. \u00bb\n4:45 Mi gewwe\u1e0d \u0263er tmurt n Jlili, l\u0263aci s\u1e6dre\u1e25ben yis s lfe\u1e5b\u1e25 d ameqqran imi ula d nutni \u1e25ed\u1e5ben i l\u025bid n Tfaska di temdint n Lquds, \u1e93ran akk lbe\u1e5bhanat i gexdem dinna.\n4:46 Yu\u0263al i\u025bedda \u0263ef taddart n Kana di tmurt n Jlili anda akken i gerra aman d cc\u1e5bab. Yella yiwen l\u1e25akem n ddewla n temdint n Kaferna\u1e25um yes\u025ba mmi-s yu\u1e0den yen\u1e6der.\n4:47 Mi gesla s Sidna \u0190isa yu\u0263al-ed si tmurt n Yahuda \u0263er tmurt n Jlili, i\u1e5bu\u1e25-ed \u0263u\u1e5b-es, i\u1e25ellel-it iwakken a d yas ad yesse\u1e25lu mmi-s ye\u021bme\u021b\u021baten.\n4:48 Sidna \u0190isa yenna-yas : M'ur twalam ara lica\u1e5bat d lbe\u1e5bhanat ur te\u021b\u021bamnem ara ?\n4:49 L\u1e25akem n ddewla yenna-yas : A Sidi, di le\u025bnaya-k \u0263iwel uqbel ad yemmet mmi !\n4:50 Sidna \u0190isa yerra-yas : \u1e5au\u1e25, atan mmi-k ye\u1e25la ! Argaz-nni yumen s wayen i s-d yenna Sidna \u0190isa, d\u0263a yu\u0263al\n4:51 \u0263er wexxam-is. Mi gteddu \u0263er wexxam, mmugren-t-id iqeddacen-is nnan-as : Mmi-k ye\u1e25la !\n4:52 Yesteqsa-ten anta ssa\u025ba i deg ye\u1e25la, rran-as-ed : I\u1e0delli \u0263ef lwe\u1e25da n tmeddit i t-teffe\u0263 tawla.\n4:53 Baba-s n weqcic-nni yewwi-d s lexba\u1e5b belli di ssa\u025ba-nni i s-d-yenna Sidna \u0190isa \u00ab Mmi-k ye\u1e25la \u00bb i ge\u1e25la mmi-s, seg imiren yumen ne\u021b\u021ba d wat wexxam-is me\u1e5b\u1e5ba.\n4:54 D wagi i d lbe\u1e5bhan wis sin i gexdem Sidna \u0190isa di tmurt n Jlili mi d-yu\u0263al si tmurt n Yahuda.\n5:1 \u0190eddan kra n wussan, Sidna \u0190isa yuli \u0263er temdint n Lquds akken ad ye\u1e25de\u1e5b i l\u025bid n wat Is\u1e5bail.\n5:2 Di temdint-agi, zdat n tewwurt ye\u021b\u021busemman \u00ab tawwurt n wulli, \u00bbtella yiwet n temda n waman qqa\u1e5ben-as s t\u025bib\u1e5banit : \u00ab Bitesda \u00bb. Zzin-as-d xemsa ifragen yes\u025ban ssqef.\n5:3 Deg ifragen-agi a\u1e6das n imu\u1e0dan i g\u1e0delqen, ider\u0263alen, i\u025bibanen d wukrifen \u021b\u1e5ba\u01e7un akk ad \u1e25errken waman.\n5:4 Axa\u1e6der tiswi\u025bin ye\u021b\u1e63ubbu-d yiwen n lmelk \u0263er temda, ye\u021b\u1e25errik aman-nni ; win ara ikecmen d amezwaru \u0263er temda m'ara \u1e25errken waman ad ye\u1e25lu si lehlak-is akken yeb\u0263u yili.\n5:5 Yella dinna yiwen wergaz tmanya utlatin iseggasen ne\u021b\u021ba di lehlak.\n5:6 Sidna \u0190isa mi t-iwala ye\u1e0dleq, ye\u1e93ra belli a\u1e6das aya segmi yu\u1e0den, yenna-yas: Teb\u0263i\u1e0d a\u021b-\u021be\u1e25lu\u1e0d ?\n5:7 Amu\u1e0din-nni yerra-yas-ed : A Sidi, ur s\u025bi\u0263 ara win ara yi gren \u0263er temda m'ara \u1e25erken waman ; m'ara \u025be\u1e5bde\u0263 ad kecme\u0263 waye\u1e0d a yi-izwir.\n5:8 Sidna \u0190isa yenna-yas : Ekker fell-ak, ddem tagertilt-ik tel\u1e25u\u1e0d !\n5:9 Imiren kan argaz-nni ye\u1e25la, yeddem tagertilt-is yebda tikli. Ayagi yed\u1e5ba deg wass n ssebt yellan d ass n weste\u025bfu.\n5:10 Lecyux n wat Is\u1e5bail nnan-as i wergaz-nni ye\u1e25lan : Ass-agi d ass n weste\u025bfu, d le\u1e25\u1e5bam fell-ak a\u021b-\u021bebbibe\u1e0d tagertilt-ik !\n5:11 Ne\u021b\u021ba yerra-yasen : Win i yi-sse\u1e25lan d ne\u021b\u021ba i yi-d yennan : \u00ab Ddem tagertilt-ik tel\u1e25u\u1e0d. \u00bb\n5:12 Steqsan-t nnan-as : Anwa i k-d-yennan akka ?\n5:13 Lame\u025bna argaz-nni ye\u1e25lan ur ye\u1e93ri ara anwa-t, axa\u1e6der Sidna \u0190isa yekcem ger l\u0263aci i\u021bemde\u1e25\u1e25asen dinna.\n5:14 Taswi\u025bt kan, Sidna \u0190isa yemlal-it-id deg wefrag n l\u01e7ame\u025b iqedsen yenna yas : Aql-ik te\u1e25li\u1e0d, sya d asawen x\u1e0du i ddnub iwakken ur ide\u1e5b\u1e5bu ara yid-ek akte\u1e5b n wannect-nni !\n5:15 Argaz-nni i\u1e5bu\u1e25 ad ixebbe\u1e5b lecyux n wat Is\u1e5bail belli d Sidna \u0190isa i t-yesse\u1e25lan.\n5:16 Lecyux n wat Is\u1e5bail bdan accetki \u0263ef Sidna \u0190isa imi i gexdem ayagi deg wass n weste\u025bfu.\n5:17 Sidna \u0190isa yenna yasen : Baba \u1e5aebbi ixeddem ar tura, nekk da\u0263en aql-i xeddme\u0263 !\n5:18 ?ef wawal-agi lecyux-nni ufan-as-ed sebba nni\u1e0den, \u021bqelliben amek ara t-n\u0263en, ma\u010d\u010di kan imi ur iqude\u1e5b ara ass n weste\u025bfu me\u025bna imi gerra \u1e5aebbi d Baba-s yerna yesse\u025bdel iman-is d \u1e5aebbi.\n5:19 Sidna \u0190isa yerra-yasen : S tide\u021b qqa\u1e5be\u0263-awen : Mmi-s n \u1e5aebbi ur ixeddem acemma s yiman is, ixeddem ala ayen ye\u1e93ra ixeddem-it Baba-s. Kra n wayen ixeddem Baba-s ixeddem-it Mmi-s da\u0263en.\n5:20 Axa\u1e6der Baba-s i\u1e25emmel Mmi-s, yesbeggin-as-d lec\u0263al-is me\u1e5b\u1e5ba. Ad as-yernu tazmert s wacu ara yexdem ayen yugaren kra n wayen te\u1e93ram ar ass-a, a\u021b-\u021bwehmem di lec\u0263al-is.\n5:21 Akken Baba \u1e5aebbi yeskkaray-ed lmegtin i\u021b\u021barra-yasen tudert, akken da\u0263en Mmi-s ye\u021b\u021bak tudert i win yeb\u0263a.\n5:22 Baba \u1e5aebbi ur i\u1e25ekkem \u0263ef yiwen, lame\u025bna yerra l\u1e25ekma ger ifassen n Mmi-s\n5:23 iwakken imdanen me\u1e5b\u1e5ba ad qad\u1e5ben Mmi-s akken \u021bqada\u1e5ben Baba-s. Win ur nqude\u1e5b ara Mmi-s ur iqude\u1e5b ara Baba-s i t-id icegg\u025ben.\n5:24 S tide\u021b nni\u0263-awen : \u00ab kra n win yesme\u1e25sisen i wawal-iw, yumnen s win i yi-d-icegg\u025ben yes\u025ba tudert n dayem yerna ulac fell-as l\u1e25isab, lame\u025bna i\u025bedda yakan si lmut \u0263er tudert.\n5:25 S tide\u021b nni\u0263-awen : \u00ab iteddu-d lweqt yerna yewwe\u1e0d-ed anda lmegtin ad slen i \u1e63\u1e63ut n Mmi-s n \u1e5aebbi, yerna wid akk ara s-yeslen ad idiren.\n5:26 Akken yes\u025ba Baba \u1e5aebbi tudert deg yiman-is i gefka da\u0263en i Mmi-s ad yes\u025bu tudert deg yiman-is.\n5:27 Yerra ger ifassen-is l\u1e25ekma imi d Mmi-s n bunadem i gella.\n5:28 Ur \u021b\u021bawhamet ara, axa\u1e6der lweqt iteddu-d, wid akk yellan deg i?ekwan ad slen i \u1e63\u1e63ut n Mmi-s n bunadem,\n5:29 imiren a d-kkren ; wid ixedmen lxi\u1e5b a d-\u1e25yun \u0263er tudert n dayem ma d wid ixedmen cce\u1e5b a d-\u1e25yun iwakken ad \u021b\u021bu\u1e25asben.\n5:30 Ur xeddme\u0263 acemma s leb\u0263i-w lame\u025bna \u1e25ekkme\u0263 s leb\u0263i n Baba \u1e5aebbi. L\u1e25ekma-inu d l\u1e25eqq axa\u1e6der ur \u021bqellibe\u0263 ara ad xedme\u0263 leb\u0263i-w, lame\u025bna leb\u0263i n win i yi-d-icegg\u025ben. \u00bb\n5:31 Ma yella d nekk kan i d icehden \u0263ef yiman-iw cchada-inu ur te\u021bwaqbal ara.\n5:32 Lame\u025bna s\u025bi\u0263 inigi nni\u1e0den, yerna cchada-ines t\u1e63e\u1e25\u1e25a.\n5:33 Tcegg\u025bem \u0263er Ye\u1e25ya testeqsam-t, ne\u021b\u021ba icehhed-ed \u0263ef tide\u021b.\n5:34 Nekk ur \u021bkile\u0263 ara \u0263ef cchada n wemdan, nni\u0263-awen-d annect-agi akken a\u021b-\u021be\u021bwasellkem.\n5:35 Ye\u1e25ya yusa-d \u021b-\u021baftilt ye\u021bfe\u01e7\u01e7i\u01e7en ger yemdanen, ma d kunwi teb\u0263am a\u021b-\u021bfer\u1e25em taswi\u025bt kan di tafat-is.\n5:36 Tella fell-i cchada nni\u1e0den yugaren tin n Ye\u1e25ya : d lec\u0263al i yi d-yefka Baba \u1e5aebbi a ten-xedme\u0263. Lec\u0263al-agi \u021bcehhiden-d fell-i belli d Baba \u1e5aebbi i yi-d-icegg\u025ben.\n5:37 Ula d Baba \u1e5aebbi i yi d-icegg\u025ben icehhed-ed fell-i, me\u025bna kunwi le\u025bme\u1e5b ur teslim i \u1e63\u1e63ut-is, ur te\u1e93rim udem-is.\n5:38 Awal-is ur yezdi\u0263 ara deg wulawen nwen imi ur tuminem ara s win i d-icegge\u025b.\n5:39 Te\u021bnadim di tektabin iqedsen t\u0263ilem a\u021b-\u021bafem deg-sent tudert n dayem. Tiktabin-agi d nutenti i-d-icehden fell-i.\n5:40 Lame\u025bna kunwi tugim a d-tasem \u0263u\u1e5b-i a\u021b-\u021bes\u025bum tudert.\n5:41 Ur \u021bqellibe\u0263 ara ad s\u025bu\u0263 cci\u025ba \u0263er yemdanen,\n5:42 ?ri\u0263 belli deg wulawen-nwen ur t\u1e25emmlem ara \u1e5aebbi.\n5:43 Nekk usi\u0263-ed s yisem n Baba \u1e5aebbi, kunwi ur iyi-teqbilem ara. Lemmer a d-yas waye\u1e0d a d-icehhed \u0263ef yiman-is a t-tqeblem !\n5:44 Amek ara tes\u025bum liman ma yella te\u021bnadim a\u021b-\u021bemye\u025b\u01e7abem wway gar awen wala a\u021b-\u021b\u025be\u01e7bem kan i \u1e5aebbi ?\n5:45 ?adret a\u021b-\u021b\u0263ilem d nekk ara iccetkin fell-awen zdat Baba \u1e5aebbi ! D Musa ara iccetkin fell-awen, d Musa-nni \u0263ef i te\u021b\u021beklem.\n5:46 Lemmer \u021b-\u021bide\u021b tumnem s Musa tili tumnem yis-i, axa\u1e6der yura-d fell-i di tira iqedsen.\n5:47 Ma yella ur tuminem ara s wayen i d-yura, amek ara tamnem s wawal-iw ?\n6:1 Syenna, Sidna \u0190isa yezger leb\u1e25e\u1e5b n Jlili ( iwumi qqa\u1e5ben da\u0263en leb\u1e25e\u1e5b n Tiberyas ).\n6:2 A\u1e6das n yemdanen i geddan yid-es mi walan yesse\u1e25lay imu\u1e0dan.\n6:3 Daymi Sidna \u0190isa yuli \u0263er wedrar ad innejma\u025b d inelmaden-is.\n6:4 L\u025bid n wat Is\u1e5bail iwumi qqa\u1e5ben Tafaska n izimer n leslak tqe\u1e5bb-ed.\n6:5 Akken i gwala l\u0263aci iteddu-d \u0263u\u1e5b-es, Sidna \u0190isa yen\u1e6deq \u0263er Filibus yenna-yas : Ansi ara d-na\u0263 a\u0263\u1e5bum i wannect agi n l\u0263aci ?\n6:6 Yesteqsa-t kan iwakken ad i?er d acu ara s-d-yini, axa\u1e6der ne\u021b\u021ba ye\u1e93ra yakan d acu ara yexdem.\n6:7 Filibus yerra-yas : A Sidi ur d-keffunt ara mitin alef iwakken mkul yiwen deg-sen a t-id-i\u1e63a\u1e25 ci\u1e6d\u1e6du\u1e25 n we\u0263\u1e5bum.\n6:8 Andriyus gma-s n Sem\u025bun Bu\u1e6drus, yellan seg inelmaden, yen\u1e6deq \u0263er Sidna \u0190isa yenna-yas :\n6:9 Yella dagi yiwen weqcic yes\u025ba xemsa n te\u1e25bulin n we\u0263\u1e5bum n tem?in akk-d sin iselman (i\u1e25utiwen), lame\u025bna d acu ara d-xedmen i wannect-agi n l\u0263aci ?\n6:10 Sidna \u0190isa issendeh-iten ad s\u0263imen l\u0263aci. Deg wemkan-nni yeqwa le\u1e25cic, l\u0263aci yeqqim \u0263er lqa\u025ba, ad ilin azal n xemsa alaf n yergazen.\n6:11 Sidna \u0190isa yeddem-ed ti\u1e25bulin-nni n we\u0263\u1e5bum, ye\u1e25med \u1e5aebbi icekke\u1e5b-it, if\u1e5beq-itent i l\u0263aci yeqqimen \u0263ef le\u1e25cic, yefreq-asen da\u0263en iselman nni, \u010d\u010dan akk armi \u1e5bwan.\n6:12 Mi \u010d\u010dan \u1e5bwan, Sidna \u0190isa ilu\u025ba inelmaden-is yenna-yasen : Jem\u025bet-ed ayen i d-yeqqimen akken ur ixe\u021b\u021be\u1e5b ula d acemma.\n6:13 Ayen i d-yegran si xemsa n te\u1e25bulin-nni n we\u0263\u1e5bum n tem\u1e93in, jem\u025ben-t-id \u010d\u010du\u1e5ben yis tnac n i\u1e0della\u025ben (tiquftin).\n6:14 L\u0263aci-nni mi walan lbe\u1e5bhan-agi n Sidna \u0190isa, \u021b\u025beggi\u1e0den qqa\u1e5ben : Mbla ccekk argaz-agi d ne\u021b\u021ba i d nnbi-nni ara d-yasen \u0263er ddunit.\n6:15 Sidna \u0190isa mi ge\u1e93ra l\u0263aci b\u0263an a t-rren d agellid fell-asen, i\u1e0de\u1e5b\u1e5bef iman-is, yuli \u0263er wedrar.\n6:16 Mi ge\u0263li yi\u1e6dij, inelmaden-is u\u0263alen \u1e63ubben \u0263er rrif n leb\u1e25e\u1e5b.\n6:17 Rekben taflukt ad zegren \u0263er ugemma\u1e0d, \u0263er Kaferna\u1e25um. Ye\u0263li-d yakan \u1e6d\u1e6dlam, Sidna \u0190isa ur\u025bad yel\u1e25iq \u0263u\u1e5b-sen.\n6:18 Yekker-ed yiwen wa\u1e0du i\u01e7ehden, leb\u1e25e\u1e5b yerwi.\n6:19 Inelmaden-is yu\u0263-iten l\u1e25al ww\u1e0den \u0263er tlemmast n leb\u1e25e\u1e5b. Walan Sidna \u0190isa iteddu-d \u0263u\u1e5b-sen, ile\u1e25\u1e25u-d \u0263ef wu\u1e0dar s ufella n waman. Mi d-iqe\u1e5b\u1e5beb \u0263er teflukt nsen, xel\u025ben.\n6:20 Sidna \u0190isa yenna yasen : Ur \u021b\u021baggadet ara, d nekk !\n6:21 B\u0263an a t-srekben yid-sen di tefluk me\u025bna ufan-d iman-nsen ww\u1e0den \u0263er wemkan anda \u021beddun.\n6:22 Azekka-nni, l\u0263aci yeqqimen agumma\u1e0d i leb\u1e25e\u1e5b wwin-d s lexba\u1e5b belli anagar yiwet n teflukt i gellan dinna, yerna Sidna \u0190isa ur yeddi ara d inelmaden-is mi \u1e5bu\u1e25en di teflukt.\n6:23 D\u0263a tiflukin nni\u1e0den i d-yusan si temdint n Tiberyas, ww\u1e0dent-ed \u0263er wemkan-nni anda akken i sen-yeb\u1e0da Sidna \u0190isa a\u0263\u1e5bum mi ge\u1e25med \u1e5aebbi.\n6:24 Mi walan l\u0263aci ulac dinna Sidna \u0190isa akk-d inelmaden-is, rekben tiflukin, zegren \u0263er Kaferna\u1e25um ad qellben fell-as.\n6:25 Mi t-ufan dinna, nnan-as : A Sidi, melmi d-tusi\u1e0d \u0263er dagi ?\n6:26 Sidna \u0190isa yerra-yasen : S tide\u021b a wen-d-ini\u0263 : imi te\u010d\u010dam a\u0263\u1e5bum armi te\u1e5bwam i te\u021bqellibem fell-i ma\u010d\u010di imi tfehmem lbe\u1e5bhanat-iw.\n6:27 Ur \u021b\u1e25ebbi\u1e5bet ara \u0263ef yi\u025bebba\u1e0d-nwen, \u1e25ebb\u1e5bet \u0263ef tudert ye\u021bdumun i dayem. Tudert-agi, d Mmi-s n bunadem ara wen-\u021b-id-yefken, Baba \u1e5aebbi yefka-yas tazmert imi i t-i\u025bellem s \u1e6d\u1e6dabe\u025b-ines.\n6:28 Nnan-as : D acu ara nexdem ihi, d acu i ge\u021b\u1e5ba\u01e7u \u1e5aebbi deg-nne\u0263 ?\n6:29 Sidna \u0190isa yenna-yasen : Sidi \u1e5aebbi ye\u021b\u1e5ba\u01e7u deg-wen a\u021b-\u021bamnem s win i d-icegge\u025b !\n6:30 Nutni nnan-as : Ihi acu n lbe\u1e5bhan ara \u0263-d-tessekne\u1e0d akken a namen yis-ek ? D acu ara txedme\u1e0d ?\n6:31 Lejdud-nne\u0263 \u010d\u010dan tamanna deg unez\u1e5buf, akken yura di ccari\u025ba n Musa : Yefka-yasen \u010d\u010dan a\u0263\u1e5bum i d-yekkan seg igenni.\n6:32 D\u0263a Sidna \u0190isa yenna-yasen : S tide\u021b nni\u0263-awen, ma\u010d\u010di d Musa i wen-d-yefkan a\u0263\u1e5bum i d-yekkan seg igenni, lame\u025bna d Baba \u1e5aebbi ! D ne\u021b\u021ba i wen-d-ye\u021b\u021baken a\u0263\u1e5bum n \u1e63\u1e63e\u1e25 i d-itekken seg igenni.\n6:33 Axa\u1e6der a\u0263\u1e5bum i d-yekkan s \u0263u\u1e5b \u1e5aebbi, d win i d-i\u1e63ubben seg igenni, d ne\u021b\u021ba i d-ye\u021b\u021baken tudert n \u1e63\u1e63e\u1e25 i yemdanen.\n6:34 Nutni nnan-as : A Sidi \u021b\u021bak-a\u0263-d mkul ass seg we\u0263\u1e5bum-agi.\n6:35 Sidna \u0190isa yenna-yasen : D Nekk i d a\u0263\u1e5bum ye\u021b\u021baken tudert. Win i d-yusan \u0263u\u1e5b-i ur ye\u021b\u021bu\u0263al ara ad illa\u1e93, win yumnen yis-i ur ye\u021b\u021bu\u0263al ara ad iffad.\n6:36 Nni\u0263-awen-t-id yakan : twalam yerna tugim a\u021b-\u021bamnem !\n6:37 Wid akk ara yi-d-yefk Baba \u1e5aebbi a d-asen \u0263u\u1e5b-i ; win ara d-yasen \u0263u\u1e5b-i ur t-\u021barra\u0263 ara \u0263ef tewwurt.\n6:38 Ur d-\u1e63ubbe\u0263 ara seg igenni akken ad xedme\u0263 leb\u0263i-w, \u1e63ubbe\u0263-d ad xedme\u0263 leb\u0263i nwin i yi-d-icegg\u025ben.\n6:39 Win i yi-d icegg\u025ben ur yeb\u0263i ara ad ye\u025b\u1e5beq ula d yiwen seg wid i yi-d-yefka, lame\u025bna a ten-id-sse\u1e25yu\u0263 si lmut deg wass aneggaru.\n6:40 D wagi i d leb\u0263i n Baba \u1e5aebbi: \u00ab kra n win ye\u021bmuqulen \u0263er Mmi-s, yumen yis, ad yes\u025bu tudert n dayem yerna a t-id-sse\u1e25yu\u0263 si lmut ass aneggaru.\u00bb\n6:41 L\u0263aci bdan smermugen gar-asen \u0263ef Sidna \u0190isa imi d yenna: \u00ab d nekk i d a\u0263\u1e5bum i d yekkan seg igenni.\u00bb\n6:42 Qqa\u1e5ben : \u00ab Ma\u010d\u010di d \u0190isa mmi-s n Yusef wagi ? Nessen baba-s nessen yemma-s, amek i gezmer a d-yini tura : \u1e63ubbe\u0263-d seg igenni ? \u00bb\n6:43 Sidna \u0190isa yenna-yasen : Be\u1e5bkat asmermeg gar-awen !\n6:44 Ulac win i gzemren a d-yas \u0263u\u1e5b-i ma yella ma\u010d\u010di d Baba \u1e5aebbi i s-d yessawlen, yerna nekk a t-id-sse\u1e25yu\u0263 si lmut ass aneggaru.\n6:45 Akken yura deg idlisen n lenbiya : \u00ab Ad lemden akk s \u0263u\u1e5b \u1e5aebbi. \u00bb Kra n win isellen i wawal n Baba \u1e5aebbi, ilemden s \u0263u\u1e5b-es, a d-yas \u0263u\u1e5b-i.\n6:46 Ulac win ye\u1e93ran Baba \u1e5aebbi ala win i d-yusan s \u0263u\u1e5b-es, ne\u021b\u021ba ye\u1e93ra Baba \u1e5aebbi.\n6:47 S tide\u021b nni\u0263-awen : kra n win yumnen, yes\u025ba tudert n dayem,\n6:48 axa\u1e6der d nekk i d a\u0263\u1e5bum i d ye\u021b\u021baken tudert.\n6:49 ?as akken lejdud nwen \u010d\u010dan tamanna deg unez\u1e5buf, mmuten.\n6:50 Atan we\u0263\u1e5bum i d-yekkan seg igenni : win ara ye\u010d\u010den seg-s ur ye\u021bme\u021b\u021bat ara.\n6:51 D nekk i d a\u0263\u1e5bum n tudert i d yekkan seg igenni. Kra n win ara ye\u010d\u010den seg we\u0263\u1e5bum-agi ad yidir i dayem. A\u0263\u1e5bum ara d-fke\u0263 d l\u01e7e\u021b\u021ba w, yis ara t\u025bic ddunit.\n6:52 Mi slan wat Is\u1e5bail i wannect-agi bdan \u021bemjadalen qqa\u1e5ben wway gar asen : Amek akka i gezmer a \u0263-d-yefk aksum-is a t-ne\u010d\u010d ?\n6:53 Sidna \u0190isa yenna-yasen da\u0263en : S tide\u021b a wen-d-ini\u0263: m'ur te\u010d\u010dim ara si l\u01e7e\u021b\u021ba n Mmi-s n bunadem, m'ur teswim ara seg idammen-is ur te\u021b\u021bili ara deg-wen tudert.\n6:54 Win ara ye\u010d\u010den si l\u01e7e\u021b\u021ba-w, ara yeswen seg idammen-iw ad yes\u025bu tudert n dayem, yerna a t-id-sse\u1e25yu\u0263 si lmut ass aneggaru.\n6:55 Axa\u1e6der l\u01e7e\u021b\u021ba-w d lqut n \u1e63\u1e63e\u1e25, idammen-iw \u021b-\u021bissit n \u1e63\u1e63e\u1e25.\n6:56 Win ara ye\u010d\u010den si l\u01e7e\u021b\u021ba-w, ara yeswen seg idammen-iw ad yili deg-i nekk ad ili\u0263 deg-s.\n6:57 Baba \u1e5aebbi i yi-d-icegg\u025ben deg-s i tella tudert, d ne\u021b\u021ba i yi ssidiren. Akken da\u0263en win ara ye\u010d\u010den seg-i ad yidir yis-i.\n6:58 D wagi i d a\u0263\u1e5bum i d-yekkan seg igenni. Ma\u010d\u010di am we\u0263\u1e5bum-nni i \u010d\u010dan lejdud-nwen ; nutni mmuten, ma d win ara ye\u010d\u010den a\u0263\u1e5bum-agi ad yidir i dayem.\n6:59 D imeslayen-agi i d-yenna Sidna \u0190isa asmi i gesselmed di l\u01e7ame\u025b n wat Is\u1e5bail di temdint n Kaferna\u1e25um.\n6:60 Mi s-slan inelmaden-is, a\u1e6das deg-sen nnan : Imeslayen-agi we\u025b\u1e5ben, anwa i gzemren a ten-yeqbel ?\n6:61 Sidna \u0190isa, mi ge\u1e93ra inelmaden is sgermuden wway gar-asen \u0263ef wayen i d-yenna, yenna-yasen : Iq\u1e5be\u1e25-ikkun l\u1e25al ?\n6:62 D acu ara tinim ihi m'ara te\u1e93rem Mmi-s n bunadem yu\u0263al \u0263er wanda yella di tazwara ?\n6:63 D \u1e5a\u1e5bu\u1e25 i d-ye\u021b\u021baken tudert amdan ur ye\u021b\u021bawe\u1e0d \u0263er wacemma ma ye\u021bkel \u0263ef yiman-is. Imeslayen-agi i wen-d-nni\u0263, d wigi i d \u1e5a\u1e5bu\u1e25, d wigi i \u021b-\u021budert.\n6:64 Lexsa\u1e5ba : llan kra gar awen ur numin ara ! Si tazwara Sidna \u0190isa ye\u1e93ra anwi deg-sen ur numin ara, ye\u1e93ra da\u0263en anwa ara t-ixed\u025ben.\n6:65 Yenna-yasen da\u0263en : Daymi i wen-d-nni\u0263 : ulac win i gzemren a d-yas \u0263u\u1e5b-i ma yella ma\u010d\u010di d Baba \u1e5aebbi i s-d-issawlen. \u00bb\n6:66 Seg imiren, a\u1e6das i t-ye\u01e7\u01e7an seg inelmaden-is , rewlen fell-as.\n6:67 Sidna \u0190isa yezzi \u0263er tnac inelmaden-is, yenna-yasen : Ur teb\u0263im ara a\u021b-\u021b\u1e5bu\u1e25em ula d kunwi ?\n6:68 Sem\u025bun Bu\u1e6drus yerra-yas : A Sidi, anwa i \u0263er ara n\u1e5bu\u1e25 ? ?u\u1e5b-ek i gella wawal n tudert.\n6:69 Nukni nes\u025ba laman deg-k, yerna ne\u1e93ra belli d ke\u010d\u010d i d Imqeddes i d-icegge\u025b Sidi \u1e5aebbi.\n6:70 Sidna \u0190isa yenna-yasen : Ma\u010d\u010di d nekk i kkun-ixta\u1e5ben di tnac yid-wen ? ?as akken yiwen gar awen d Cci\u1e6dan .\n6:71 Yenna-d annect-agi \u0263ef Yudas, mmi-s n Sem\u025bun n taddart n Qe\u1e5byut, yiwen ger tnac inelmaden-is ara t-ixed\u025ben.\n7:1 Deffir wayagi, Sidna \u0190isa ikemmel abrid-is iteddu di tmurt n Jlili. Ur yeb\u0263i ara ad i\u1e5bu\u1e25 \u0263er tmurt n Yahuda, axa\u1e6der imeqqranen n wat Is\u1e5bail \u021bqelliben fell-as iwakken a t n\u0263en.\n7:2 L\u025bid i deg xeddmen wat Is\u1e5bail ti\u025becciwin iqe\u1e5b\u1e5beb-ed.\n7:3 D\u0263a atmaten is nnan-as : Kker a\u021b-\u021b\u1e5bu\u1e25e\u1e0d \u0263er tmurt n Yahuda akken inelmaden-ik yellan dinna ad \u1e93ren ayen i txeddme\u1e0d.\n7:4 Win yeb\u0263an ad ye\u021bwassen, ur ilaq ara ad iffer wayen i gxeddem. Imi tzemre\u1e0d i lec\u0263al imeqqranen, sbeggen-ed iman-ik a k-walin akk yemdanen.\n7:5 Atmaten-is s yiman-nsen ur uminen ara yis.\n7:6 Sidna \u0190isa yenna-yasen : Ma yella \u0263u\u1e5b-wen iwwe\u1e0d-ed lweqt, nekk \u0263u\u1e5b-i mazal.\n7:7 Medden ur s\u025bin ara sebba s wayes ara kkun ke\u1e5bhen, ke\u1e5bhen-iyi nekk imi d-sbeggne\u0263 yir lec\u0263al-nsen.\n7:8 Kunwi \u1e5bu\u1e25et a\u021b-\u021b\u025beggdem, ma d nekk ur teddu\u0263 ara, imi lweqt-iw ur\u025bad i d-yusi.\n7:9 Mi sen-d-yenna ayagi, ye\u01e7\u01e7a-ten \u1e5bu\u1e25en, ne\u021b\u021ba yeqqim di tmurt n Jlili.\n7:10 Mi \u1e5bu\u1e25en watmaten-is ad \u025beggden, i\u1e5bu\u1e25 ula d ne\u021b\u021ba mbla ma yesse\u025blem yiwen.\n7:11 Deg ussan n l\u025bid, imeqqranen n wat Is\u1e5bail \u021bnadin fell-as, steqsayen anda yella.\n7:12 L\u0263aci i d-yusan ad \u025beggden, bdan \u021bmeslayen fell-as. Kra deg-sen qqa\u1e5ben : D argaz n lxi\u1e5b ! Wiya\u1e0d qqa\u1e5ben : Awah ! Ye\u021bkellix kan \u0263ef l\u0263aci !\n7:13 Yiwen ur d-yehdi\u1e5b fell-as \u025binani axa\u1e6der uggaden imeqqranen n wat Is\u1e5bail.\n7:14 Mi gne\u1e63\u1e63ef l\u025bid n i\u025becciwen, Sidna \u0190isa yuli \u0263er l\u01e7ame\u025b iqedsen, yebda yesselmad.\n7:15 At Is\u1e5bail wehmen, qqa\u1e5ben : Ur ye\u0263\u1e5bi ara d l\u025bulama yerna yessen tira iqedsen, ansi i s-d-tekka tmusni-yagi ?\n7:16 Sidna \u0190isa yenna yasen : Ayen i sselmade\u0263 ma\u010d\u010di s \u0263u\u1e5b-i i d-yekka, yekka-d s \u0263u\u1e5b win i yi-d icegg\u025ben.\n7:17 Win iqesden ad yexdem leb\u0263i n \u1e5aebbi ad ye\u025bqel ma yella wayen i sselmade\u0263 yekka-d s \u0263u\u1e5b \u1e5aebbi ne\u0263 d imeslayen-iw kan.\n7:18 Win ihedd\u1e5ben s yisem-is ye\u021bqellib ad yawi cci\u025ba i yiman-is. Ma d win ye\u021bqelliben a d-yawi cci\u025ba i win i t-id icegg\u025ben yeqqa\u1e5b tide\u021b, ulac deg-s lexde\u025b.\n7:19 Nnbi Musa ye\u01e7\u01e7a-yawen-d ccari\u025ba, lame\u025bna ulac gar-awen win i \u021b-iteb\u025ben ! Acu\u0263e\u1e5b i te\u021bqellibem a yi ten\u0263em ?\n7:20 L\u0263aci nnan-as : Anwa akka i geb\u0263an a k-ine\u0263 ? Waqila ikcem-ik l\u01e7en !\n7:21 Sidna \u0190isa yenna-yasen : ?ef wayen akka xedme\u0263 i twehmem ?\n7:22 Meyzet \u0263ef wayagi : nnbi Musa ye\u01e7\u01e7a-yawen-d lextana (\u1e6d\u1e6dha\u1e5ba), l\u025badda-agi ma\u010d\u010di s \u0263u\u1e5b-es i d-tekka me\u025bna s \u0263u\u1e5b lejdud-is. Atan tqeblem tessextanem deg wass n weste\u025bfu.\n7:23 Ma yella tqeblem a\u021b-\u021besxetnem i weqcic deg ass n weste\u025bfu, iwakken ur te\u021bxalafem ara ccari\u025ba n Musa, acu\u0263e\u1e5b terfam fell-i imi sse\u1e25la\u0263 amdan s lekmal-is deg wass n weste\u025bfu ?\n7:24 Be\u1e5bkat ! Ur \u1e25ekkmet ara s wayen kan i \u021bwalint wallen-nwen, lemdet a\u021b-\u021b\u1e25ekmem s l\u1e25eqq.\n7:25 Kra n imezda\u0263 n temdint n Lquds wehmen, qqa\u1e5ben : Ma\u010d\u010di d win akken i \u021bqelliben a t-n\u0263en ?\n7:26 Atan ihedde\u1e5b \u025binani zdat l\u0263aci, yiwen ur s-yenni acemma ! \u0190eqlen-t l\u025bulama-nne\u0263 d ne\u021b\u021ba i d Lmasi\u1e25 ?\n7:27 Argaz-agi ne\u1e93ra ansi-t, lame\u025bna Lmasi\u1e25 asm'ara d-yas yiwen ur i\u1e93err ansi ara d-yekk.\n7:28 Sidna \u0190isa yen\u1e6deq s \u1e63\u1e63ut \u025blayen, slan-as-d akk deg wefrag n L\u01e7ame\u025b iqedsen, yenna : Tessnem-iyi yerna te\u1e93ram ansi i d-kki\u0263 ! Ur d-usi\u0263 ara s leb\u0263i-w, lame\u025bna d Bab n l\u1e25eqq i yi-d icegg\u025ben; kunwi ur t-tessinem ara.\n7:29 Nekkini ssne\u0263-t axa\u1e6der s \u0263u\u1e5b-es i d-usi\u0263 yerna d ne\u021b\u021ba i yi-d-icegg\u025ben.\n7:30 B\u0263an a t-\u1e6d\u1e6dfen imiren, me\u025bna yiwen ur yesris afus-is fell-as imi ass-is ur\u025bad d-yewwi\u1e0d.\n7:31 A\u1e6das n l\u0263aci si terba\u025bt-nni i gumnen yis, qqa\u1e5ben : M'ara d-yas Lmasi\u1e25, e\u025bni ad ixdem lbe\u1e5bhanat yugaren wigi ?\n7:32 Ifariziyen wwin-d s lexba\u1e5b s wayen hedd\u1e5ben l\u0263aci \u0263ef Sidna \u0190isa, d\u0263a lmuqedmin imeqqranen akk-d ifariziyen cegg\u025ben i\u025bessasen a t-id \u1e6d\u1e6dfen.\n7:33 Sidna \u0190isa yenna i l\u0263aci : Mazal-iyi kra n lweqt yid-wen, syin akkin ad u\u0263ale\u0263 \u0263er win i yi-d icegg\u025ben.\n7:34 A\u021b-\u021bqellbem fell-i ur iyi-te\u021b\u021bafem ara imi ur tezmirem ara a d-tasem \u0263er wanda ara yili\u0263.\n7:35 At Is\u1e5bail qqa\u1e5ben wway gar-asen : Anda akka ara i\u1e5bu\u1e25 armi ur ne\u021b\u021bizmir ara a t-naf ? E\u025bni ad i\u1e5bu\u1e25 \u0263er wat Is\u1e5bail i\u021bwazer\u025ben ger le\u01e7nas ? Ne\u0263 ib\u0263a ad isselmed le\u01e7nas nni\u1e0den ?\n7:36 D acu i geb\u0263a a d-yini mi d-iqqa\u1e5b : \u00ab a\u021b-\u021bqellbem fell-i, ur iyi-te\u021b\u021bafem ara axa\u1e6der ur tezmirem ara a d-tasem \u0263er wanda ara yili\u0263.\u00bb\n7:37 Ass aneggaru n l\u025bid, yellan d ass yes\u025ban a\u1e6das n lqima ; Sidna \u0190isa ibedden ger l\u0263aci i\u025begge\u1e0d, yenna : Win iffuden a d-yas \u0263u\u1e5b-i ad isew ; win yumnen yis-i a d-yas ad isew.\n7:38 Akken yura di lkutub : D isaffen n waman ara d-i\u021bfeggi\u1e0den seg-s.\n7:39 Sidna \u0190isa yenna-d ayagi \u0263ef \u1e5a\u1e5bu\u1e25 iqedsen ara ye\u010d\u010da\u1e5ben ulawen n wid yumnen yis. Di lweqt-nni, \u1e5a\u1e5bu\u1e25 iqedsen mazal ur d-i\u021b\u021bunefk ara axa\u1e6der Sidna \u0190isa wer\u025bad yekcim tamanegt-is.\n7:40 Ger l\u0263aci i s-d-yeslan, llan wid yeqqa\u1e5ben : Argaz-agi mbla ccekk d ne\u021b\u021ba i d nnbi-nni ara d-yasen !\n7:41 Wiya\u1e0d qqa\u1e5ben : D ne\u021b\u021ba i d Lmasi\u1e25 ! Ma d kra nni\u1e0den qqa\u1e5ben : Yezmer Lmasi\u1e25 a d-iffe\u0263 si tmurt n Jlili ?\n7:42 Ur yuri ara di tira iqedsen : Lmasi\u1e25 a d-yeffe\u0263 si dderya n Sidna Dawed, si taddart n Bitl\u1e25em ?\n7:43 S wakka i gebda ye\u021b\u021bim\u0263u\u1e5b lxilaf ger l\u0263aci \u0263ef Sidna \u0190isa.\n7:44 Kra deg-sen b\u0263an a t-\u1e25ebsen lame\u025bna yiwen ur yesris afus-is fell-as.\n7:45 Mi yu\u0263alen i\u025bessasen i d-ye\u021bwacegg\u025ben a t-\u1e6d\u1e6dfen, lmuqedmin imeqqranen d ifariziyen nnan-asen : Iwacu ur t-id-tewwim ara ?\n7:46 Nutni rran-asen : Di le\u025bme\u1e5b ur nesli i yiwen ihedde\u1e5b am ne\u021b\u021ba.\n7:47 Ifariziyen nnan-asen : Ise\u1e25\u1e25er-ikkun ula d kunwi ?\n7:48 Te\u1e93ram yiwen si lecyux-nne\u0263, ne\u0263 seg ifariziyen i gumnen yis ?\n7:49 Anagar l\u0263aci-agi ur nessin ara ccari\u025ba... a ten-in\u025bel \u1e5aebbi !\n7:50 Nikudem yellan d yiwen seg-sen, win akken i g\u1e5bu\u1e25en deg i\u1e0d \u0263er Sidna \u0190isa, yenna-yasen :\n7:51 Tserre\u1e25-a\u0263 ccari\u025ba-nne\u0263 a ne\u1e25kem \u0263ef yiwen uqbel a s-nsel ne\u0263 uqbel a n\u1e93er d acu n cce\u1e5b i gexdem ?\n7:52 Nutni rran-as : Ula d ke\u010d\u010d d ajlili ? Qelleb mli\u1e25 di tira iqedsen a\u021b-\u021bafe\u1e0d : \u00ab Ulac nnbi ara d-yekken si tmurt n Jlili.\u00bb\n7:53 Imiren, mkul yiwen yu\u0263al \u0263er wexxam-is.\n8:1 Sidna \u0190isa yuli s yi\u0263il uzemmur ;\n8:2 azekka-nni, ssbe\u1e25 zik yu\u0263al \u0263er l\u01e7ame\u025b iqedsen. L\u0263aci me\u1e5b\u1e5ba uzzlen-d \u0263u\u1e5b-es. Sidna \u0190isa yeqqim gar-asen, yebda yesselmad iten deg ufrag n l\u01e7ame\u025b.\n8:3 Atnaya l\u025bulama n ccari\u025ba akk-d ifariziyen wwin-as-d yiwet n tme\u1e6d\u1e6dut \u1e6d\u1e6dfen-\u021b txeddem zzna. Sbedden-\u021b ger l\u0263aci akken a \u021b iwali Sidna \u0190isa.\n8:4 Nnan-as : A Sidi, ne\u1e6d\u1e6def tame\u1e6d\u1e6dut-agi mi txeddem zzna.\n8:5 Di ccari\u025ba, Sidna Musa yume\u1e5b-a\u0263-d a ne\u1e5bjem s yed\u0263a\u0263en tame\u1e6d\u1e6dut am tagi alamma temmut. I ke\u010d\u010dini d acu ara d-tini\u1e0d ?\n8:6 Steqsan-t iwakken a t-je\u1e5b\u1e5bben, \u021bnadin sebba s wacu ara ccetkin fell-as. Sidna \u0190isa yekna, ye\u021b\u021baru s u\u1e0dad-is di lqa\u025ba.\n8:7 Imi t-\u1e25e\u1e5b\u1e63en s usteqsi, yekker yenna-yasen : Win deg-wen wer\u01e7in yednib a \u021b-ye\u1e5bjem d amezwaru !\n8:8 Yekna da\u0263en ye\u021b\u021baru di lqa\u025ba.\n8:9 L\u0263aci-nni, mi slan annect-agi, bdan tixxi\u1e5ben yiwen yiwen, seg um\u0263a\u1e5b armi d ame\u1e93yan. ?\u01e7an dinna Sidna \u0190isa we\u1e25d-es di tlemmast n wefrag n l\u01e7ame\u025b iqedsen, ne\u021b\u021ba \u021b-\u021bme\u1e6d\u1e6dut-nni.\n8:10 D\u0263a yerfed allen-is, yenna-yas : A tame\u1e6d\u1e6dut, anda-ten widak-nni i d-icetkan fell-am ? Ulac win i\u1e25ekmen fell-am ?\n8:11 Tenna-yas : Ulac a Sidi ! Sidna \u0190isa yenna-yas : Ula d nekk ur \u1e25ekkme\u0263 ara fell-am. \u1e5au\u1e25, me\u025bna sya d asawen x\u1e0du i ddnub.\n8:12 Sidna \u0190isa ihedde\u1e5b i l\u0263aci yenna yasen : D nekk i \u021b-\u021bafat n ddunit, win ara yi-teb\u025ben ur iteddu ara di \u1e6d\u1e6dlam, lame\u025bna ad yes\u025bu tafat n tudert.\n8:13 Ifariziyen nnan-as : Te\u021bcehhi\u1e0de\u1e0d \u0263ef yiman-ik, cchada-inek ur t\u1e63e\u1e25\u1e25a ara.\n8:14 Sidna \u0190isa yenna-yasen : ?-\u021bide\u021b, \u021bcehhide\u0263 \u0263ef yiman-iw, lame\u025bna cchada-inu t\u1e63e\u1e25\u1e25a, axa\u1e6der ?ri\u0263 ansi d-kki\u0263, \u1e93ri\u0263 da\u0263en \u0263er wanda teddu\u0263. Ma d kunwi ur te?rim ansi d-kki\u0263 ur te\u1e93rim anda teddu\u0263.\n8:15 Kunwi t\u1e25ekkmem \u0263ef wiya\u1e0d s l\u025beqliya n wemdan, ma d nekk ur \u1e25ekkme\u0263 \u0263ef yiwen.\n8:16 Ma yella yewwi-d l\u1e25al ad \u1e25ekme\u0263, ad \u1e25ekkme\u0263 s l\u1e25eqq axa\u1e6der ur lli\u0263 ara we\u1e25d-i, Baba \u1e5aebbi i yi-d-icegg\u025ben yella yid-i.\n8:17 Yura di ccari\u025ba-nwen belli ma ddukklen sin inigan \u0263ef yiwet n cchada, cchada-nsen te\u021bwaqbel.\n8:18 Atan nekk cehde\u0263-ed \u0263ef yiman-iw, Baba i yi-d-icegg\u025ben d inigi fell-i.\n8:19 Nutni nnan-as : Anda yella Baba-k ? Yerra-yasen : Ur iyi-tessinem, ur tessinem Baba. Lemmer i yi-tessinem, tili tesnem Baba.\n8:20 Sidna \u0190isa yenna-d annect-agi mi gesselmad deg wefrag n l\u01e7ame\u025b iqedsen, zdat wemkan anda srusun lwe\u025bdat. Ula d yiwen ur yesris afus-is fell-as axa\u1e6der ur\u025bad d-yewwi\u1e0d wass-is.\n8:21 Sidna \u0190isa yerna yenna-yasen : Atan ad \u1e5bu\u1e25e\u0263, a\u021b-\u021bqellbem fell-i lame\u025bna a\u021b-\u021bemtem di ddnub-nwen, ur tezmirem ara a d-tasem \u0263er wanda ara \u1e5bu\u1e25e\u0263.\n8:22 At Is\u1e5bail qqa\u1e5ben wway gar-asen : Ahat yeb\u0263a ad ine\u0263 iman-is imi \u0263-d-yenna ur tezmirem ara a d-tasem \u0263er wanda ara \u1e5bu\u1e25e\u0263 ?\n8:23 Sidna \u0190isa yerra-yasen : Kunwi n lqa\u025ba nekk n igenwan ; kunwi n ddunit-agi nekk ma\u010d\u010di-yines.\n8:24 Daymi i wen-d-nni\u0263 a\u021b-\u021bemtem di ddnub-nwen. Atan m'ur tuminem ara belli nekk \u00ab d Win yellan, \u00bb a\u021b-\u021bemtem di ddnub-nwen.\n8:25 Nnan-as : Anwa-k ke\u010d\u010dini ? Sidna \u0190isa yerra-yasen : D win akken i wen-d-qqa\u1e5be\u0263 si tazwara.\n8:26 ?ef wayen i kkun-ye\u025bnan s\u025bi\u0263 a\u1e6das ara d-ini\u0263, a\u1e6das ara \u1e25asbe\u0263 ; win i yi-d-icegg\u025ben d Bab n tide\u021b, d ayen i sli\u0263 \u0263u\u1e5b-es i d-\u021b\u025bawade\u0263 di ddunit.\n8:27 Imi ur fhimen ara belli \u0263ef Baba \u1e5aebbi i sen-d-ihedde\u1e5b,\n8:28 yenna-yasen da\u0263en : Asm'ara tessa\u025blim Mmi-s n bunadem, imiren a\u021b-\u021bfiqem belli nekk \u00ab d Win yellan !\u00bb A\u021b-\u021b\u025beqlem belli ur xeddme\u0263 acemma s yiman-iw, lame\u025bna qqa\u1e5be\u0263-ed ayen i yi-iselmed Baba \u1e5aebbi.\n8:29 Win i yi-d-icegg\u025ben yella yid-i, ur yi-\u021b\u021ba\u01e7a ara we\u1e25d-i imi dayem xeddme\u0263 leb\u0263i-s.\n8:30 Mi d-yenna imeslayen-agi, a\u1e6das i gumnen yis.\n8:31 Sidna \u0190isa yenna i wat Is\u1e5bail i gumnen yis : Ma te\u1e6d\u1e6dfem s tide\u021b deg awal-iw a\u021b-\u021bilim d inelmaden-iw n \u1e63\u1e63e\u1e25.\n8:32 A\u021b-\u021bissinem tide\u021b, tide\u021b ara kkun isuff\u0263en \u0263er tlelli.\n8:33 Nnan-as : Nukni \u021b-\u021barwa n Sidna Ib\u1e5bahim. Di le\u025bme\u1e5b ur nelli d aklan n waleb\u025ba\u1e0d ; amek i tzemre\u1e0d a d-tini\u1e0d : \u00ab A\u021b-\u021bes\u025bum tilelli \u00bb?\n8:34 Sidna \u0190isa yerra-yasen : S tide\u021b qqa\u1e5be\u0263-awen : kra n win ixeddmen ddnub d akli n ddnub.\n8:35 Aklan ur \u021bwa\u1e25saben ara n at wexxam ma d mmi-s n wexxam ye\u021bwa\u1e25seb dayem n at wexxam.\n8:36 Ma yella d Mmi-s i wen-d-yefkan tilelli, a\u021b-\u021bilim s tide\u021b di tlelli.\n8:37 ?ri\u0263 belli kunwi \u021b-\u021barwa n Ib\u1e5bahim, lame\u025bna te\u021bnadim a yi ten\u0263em axa\u1e6der awal-iw ur ike\u010d\u010dem ara ulawen-nwen.\n8:38 Nekk qqa\u1e5be\u0263-ed ayen \u1e93ri\u0263 \u0263er Baba, ma d kunwi txeddmem ayen i tlemdem s \u0263u\u1e5b Baba-twen !\n8:39 At Is\u1e5bail rran-as : Baba-tne\u0263 nukkni, d Sidna Ib\u1e5bahim. Sidna \u0190isa yenna-yasen : Lemmer \u021b-\u021bide\u021b d arraw n Ib\u1e5bahim i tellam , tili txeddmem lec\u0263al i gxeddem Ib\u1e5bahim ;\n8:40 kunwi te\u021bqellibem a yi-ten\u0263em, acu\u0263e\u1e5b ? Axa\u1e6der qqa\u1e5be\u0263-awen-d tide\u021b akken i \u021b-sli\u0263 \u0263er Baba \u1e5aebbi. Ib\u1e5bahim di le\u025bme\u1e5b ur yexdim am kunwi !\n8:41 Kunwi txeddmem akken i gxeddem Baba twen ! Nutni rran-as : Ur nelli ara d arraw n le\u1e25\u1e5bam ; nes\u025ba yiwen n Baba-tne\u0263 kan : d \u1e5aebbi !\n8:42 Sidna \u0190isa yenna-yasen : Lemmer \u021b-\u021bide\u021b d \u1e5aebbi i d Baba twen tili t\u1e25emmlem-iyi axa\u1e6der s \u0263u\u1e5b-es i d-kki\u0263, s \u0263u\u1e5b-es i d-usi\u0263 \u0263u\u1e5b-wen. Ur d-usi\u0263 ara s yiman-iw lame\u025bna d ne\u021b\u021ba i yi-d-icegg\u025ben.\n8:43 Acu\u0263e\u1e5b ur tfehhmem ara ayen i wen-d-qqa\u1e5be\u0263 ? Axa\u1e6der ur tezmirem ara a\u021b-\u021bqeblem imeslayen-iw.\n8:44 Baba-twen d Cci\u1e6dan yerna teb\u0263am a\u021b-\u021bxedmem leb\u0263i-s. Ne\u021b\u021ba d bu-tmeg\u1e5ba\u1e0d si tazwara, ur ye\u1e6d\u1e6dif ara di tide\u021b axa\u1e6der ulac deg-s tide\u021b. M'ara yeskiddib, ye\u021bmeslay-ed seg ul-is imi d ameskaddab i gella ; d ne\u021b\u021ba i d bab n lekdeb.\n8:45 Lame\u025bna nekk qqa\u1e5be\u0263-d tide\u021b, daymi ur iyi-te\u021b\u021bamnem ara.\n8:46 Anwa deg-wen ara yi-d-issuksen ula yiwet n l\u0263el\u1e6da ? Ma nni\u0263-ed tide\u021b, iwacu ur iyi-te\u021b\u021bamnem ara ?\n8:47 Win yellan n \u1e5aebbi yesme\u1e25sis i wawal n \u1e5aebbi. Kunwi ur tellim ara n \u1e5aebbi, daymi ur tesme\u1e25sisem ara i wawal-is.\n8:48 At Is\u1e5bail nnan-as : Nes\u025ba l\u1e25eqq mi d-nenna ke\u010d\u010d d asamari, yerna izde\u0263-ik u\u1e5bu\u1e25ani !\n8:49 Sidna \u0190isa yerra-yasen : Ur iyi-izdi\u0263 ara u\u1e5bu\u1e25ani. Nekk \u021b\u025buzzu\u0263 Baba \u1e5aebbi, kunwi t\u1e25eq\u1e5bem-iyi.\n8:50 Ur \u021bqellibe\u0263 ara ccan i yiman-iw, yella win ye\u021b\u1e25ebbi\u1e5ben fell-i, d ne\u021b\u021ba ara yi-d-yefken l\u1e25eqq.\n8:51 A wen-ini\u0263 tide\u021b : win i\u1e25erzen awal-iw ur ye\u021bme\u021b\u021bat ara ma\u1e0di.\n8:52 At Is\u1e5bail nnan-as : Atan tura iban izde\u0263-ik u\u1e5bu\u1e25ani ! Sidna Ib\u1e5bahim yemmut, lenbiya mmuten, ke\u010d\u010d teqqa\u1e5be\u1e0d : win i\u1e25erzen awal-iw ur ye\u021bme\u021b\u021bat ara ma\u1e0di !\n8:53 Tugare\u1e0d baba-tne\u0263 Ib\u1e5bahim ne\u0263 lenbiya me\u1e5b\u1e5ba i gemmuten ? D acu i t\u1e25esbe\u1e0d iman-ik ?\n8:54 Sidna \u0190isa yerra-yasen : Ma fki\u0263 ccan i yiman-iw, ccan-iw ur yes\u025bi ara azal. Win i yi-d-ye\u021b\u021baken ccan d Baba, win akken i teqqa\u1e5bem \u00ab d \u1e5aebbi-nne\u0263.\u00bb\n8:55 Kunwi ur t-tessinem ara, nekkini ssne\u0263-t. Ma nni\u0263-ed ur t-ssine\u0263 ara ad u\u0263ale\u0263 d akeddab am kunwi. Lame\u025bna ssne\u0263-t yerna xeddme\u0263 leb\u0263i-s.\n8:56 Baba-twen Ib\u1e5bahim yef\u1e5be\u1e25 mi ge\u1e93ra iteddu-d wass-iw, tura mi t-ye\u1e93ra yef\u1e5be\u1e25 a\u1e6das.\n8:57 At Is\u1e5bail nnan-as : Amek, ur\u025bad tes\u025bi\u1e0d xemsin iseggasen teqqa\u1e5be\u1e0d wala\u0263 Ib\u1e5bahim ?\n8:58 Sidna \u0190isa yenna-yasen : Uqbel a d-ilal Ib\u1e5bahim, lli\u0263 !\n8:59 ?ef wannect-agi i d-ddmen wat Is\u1e5bail ibla\u1e0den iwakken a t-\u1e5be\u01e7men. Sidna \u0190isa yekcem ger l\u0263aci, yeffe\u0263 seg wefrag n l\u01e7ame\u025b iqedsen.\n9:1 Deg ubrid-is, Sidna \u0190isa iwala yiwen wergaz, d ader\u0263al seg wasmi i d-ilul.\n9:2 Inelmaden-is steqsan-t nnan-as : A Sidi, iwacu i d-ilul wergaz-agi d ader\u0263al ? Anwa i gdenben d ne\u021b\u021ba ne\u0263 d imawlan-is ?\n9:3 Sidna \u0190isa yerra-yasen : Tidder\u0263elt-agi ur d-tekki ara si ddnub-is ne\u0263 si ddnub n imawlan-is, lame\u025bna iwakken medden me\u1e5b\u1e5ba ad \u1e93ren ayen i gezmer \u1e5aebbi a t-ixdem.\n9:4 Skud mazal tafat n wass, ilaq-a\u0263 a nexdem lec\u0263al n win i yi-d icegg\u025ben ; iteddu-d yi\u1e0d anda yiwen ur yezmir ad ixdem.\n9:5 Skud mazal lli\u0263 di ddunit d nekk i \u021b-\u021bafat n ddunit.\n9:6 Mi d-yenna imeslayen-agi, Sidna \u0190isa yessusef \u0263er lqa\u025ba, yexle\u1e0d akal s tsusaf-is, ye\u1e0dla-t \u0263ef wallen n uder\u0263al-nni,\n9:7 yenna-yas : \u1e5au\u1e25 a\u021b-\u021bessirde\u1e0d di tala n Silwi (Silwi lme\u025bna-ines \u00abamcegge\u025b\u00bb). Ader\u0263al-nni i\u1e5bu\u1e25 a d-issired, mi d-yu\u0263al, ye\u021bwali.\n9:8 L\u01e7iran-is akk-d wid i t-yessnen ite\u021b\u021ber, qqa\u1e5ben : Argaz-agi ma\u010d\u010di d win akken ye\u021b\u0263imin \u0263er lqa\u025ba yezga yessutur tin n \u1e5aebbi ?\n9:9 Kra qqa\u1e5ben : D ne\u021b\u021ba. Wiya\u1e0d qqa\u1e5ben : Ma\u010d\u010di d ne\u021b\u021ba, d waye\u1e0d i g\u021bemcabin \u0263u\u1e5b-es. Ma d ne\u021b\u021ba yeqqa\u1e5b : D nekk s yiman-iw.\n9:10 Nnan-as : Ihi amek i d-ldint wallen ik ?\n9:11 Ne\u021b\u021ba yerra-yasen : Argaz-nni iwumi qqa\u1e5ben \u0190isa yexle\u1e0d akal s tsusaf-is, ye\u1e0dla-t i wallen-iw, yenna-yi-d : \u00ab \u1e5au\u1e25 a\u021b-\u021bessirde\u1e0d di tala n Silwi.\u00bb Mi \u1e5bu\u1e25e\u0263 ssarde\u0263, imiren kan yu\u0263al iyi-d ye\u1e93ri.\n9:12 Nutni nnan-as : Anda-t wergaz-agi ? Yenna-yasen : Ur \u1e93ri\u0263 ara anda yerra\n9:13 Wwin argaz-nni yellan zik d ader\u0263al \u0263er ifariziyen.\n9:14 Yu\u0263 l\u1e25al deg wass n weste\u025bfu i gexle\u1e0d Sidna \u0190isa akal s tsusaf-is, i s-d-yerra i\u1e93ri i uder\u0263al-nni.\n9:15 Ifariziyen steqsan-t amek armi i t-id-yu\u0263al ye\u1e93ri. Ne\u021b\u021ba yenna-yasen : Yexle\u1e0d akal s tsusaf-is, ye\u1e0dla-t \u0263ef wallen-iw, \u1e5bu\u1e25e\u0263 ssarde\u0263 udem-iw, imiren kan u\u0263ale\u0263 \u021bwali\u0263.\n9:16 ?ef wakka i nnan kra seg ifariziyen : Argaz-agi ur yezmir ara a d-yekk s \u0263u\u1e5b \u1e5aebbi, imi ur ye\u021bqada\u1e5b ara lqanun n wass n weste\u025bfu. Ma d wiya\u1e0d qqa\u1e5ben : Lemmer d amednub i gella amek i gezmer ad ixdem lbe\u1e5bhanat am wigi ? Yekker lxilaf ger l\u0263aci-nni,\n9:17 ifariziyen rnan steqsan da\u0263en ader\u0263al-nni : I ke\u010d\u010d d acu ara d-tini\u1e0d deg wergaz-agi i k-d-yeldin allen ? Ne\u021b\u021ba yenna-yasen : Nekk a d-ini\u0263, argaz-agi \u021b-\u021bide\u021b d nnbi.\n9:18 Lame\u025bna imeqqranen n wat Is\u1e5bail ugin ad amnen belli argaz-nni yella si zik d ader\u0263al, yu\u0263al ye\u021bwali. U\u0263alen cegg\u025ben \u0263er imawlan-is, usan-d.\n9:19 Steqsan-ten nnan-asen : Argaz-agi, \u021b-\u021bide\u021b d mmi-twen ? D \u1e63\u1e63e\u1e25 ilul-ed d ader\u0263al ? Amek armi i gu\u0263al ye\u021bwali tura ?\n9:20 Imawlan n uder\u0263al-nni nnan asen : ?-\u021bide\u021b, d mmi-tne\u0263 yerna ilul-ed d ader\u0263al.\n9:21 Me\u025bna amek i gu\u0263al ye\u021bwali tura ne\u0263 anwa i s-d-yerran i?ri... ur ne\u1e93ri ara ! Steqsit-e\u021b ne\u021b\u021ba, d argaz i gella, izmer a d-yerr s yiman-is.\n9:22 Imawlan-is nnan-asen akka, axa\u1e6der uggaden lecyux n wat Is\u1e5bail i gqesden ad s\u1e6dix\u1e5ben si l\u01e7ame\u025b-nsen kra n win ara icehden belli \u0190isa d Lmasi\u1e25.\n9:23 Daymi i sen-nnan imawlan is : \u00ab D argaz i gella, yezmer ad yerr s yiman-is.\u00bb\n9:24 Ifariziyen ssawlen tikkelt tis snat i wergaz-nni iwumi d-yu\u0263al ye\u1e93ri nnan-as : \u0190uzz Sidi \u1e5aebbi, ini-d tide\u021b. Nukni ne\u1e93ra belli argaz-agi d amednub.\n9:25 Ne\u021b\u021ba yerra-yasen : Ur \u1e93ri\u0263 ara ma d amednub i gella ; nekk \u1e93ri\u0263 yiwet l\u1e25a\u01e7a : \u00ab Lli\u0263 d ader\u0263al, tura \u021bwali\u0263 \u00bb.\n9:26 Nnan-as da\u0263en : D acu i k-ixdem ? Amek i k-d-yeldi allen-ik ?\n9:27 Yerra-yasen : Nni\u0263-awen-t-id yakan me\u025bna ur iyi-d-sem\u1e25essem ara. Iwacu teb\u0263am a wen-t-id-\u025biwde\u0263 ? Ula d kunwi teb\u0263am a\u021b-\u021bu\u0263alem d inelmaden-is ?\n9:28 Regmen-t, nnan-as : D ke\u010d\u010d i d anelmad-is, nukkni d inelmaden n Sidna Musa.\n9:29 Ne\u1e93ra belli \u1e5aebbi ih\u1e0de\u1e5b-ed i Sidna Musa, ma d wagi ur ne\u1e93ri ara ansi i d-yekka.\n9:30 Argaz-nni yerra-yasen : D ayen yessewhamen ! Argaz yeldi-yi-d allen, kunwi ur te?rim ara ansi i d-yekka !\n9:31 Medden akk \u1e93ran belli \u1e5aebbi ur d-iqebbel ara dde\u025bwat n yemcumen, lame\u025bna iqebbel-ed win i t-i\u1e0du\u025ben, ixeddmen lb\u0263i-is.\n9:32 Seg wasmi i d-texleq ddunit wer\u01e7in nesli s yiwen yeldi-d allen i win i d-ilulen d ader\u0263al.\n9:33 Lemmer argaz-agi ma\u010d\u010di s \u0263u\u1e5b \u1e5aebbi i d-yekka tili ur yezmir ad yexdem acemma.\n9:34 Rran-as : Amek ! Seg wasmi i d-lule\u1e0d ke\u010d\u010d di ddnub seg i\u1e0da\u1e5b\u1e5ben armi d aqe\u1e5b\u1e5buy, tura tusi\u1e0d-ed a \u0263 tesfehme\u1e0d ? D\u0263a qec\u025ben-t ( \u1e0derqen-t ) \u0263er be\u1e5b\u1e5ba.\n9:35 Sidna \u0190isa yesla belli qec\u025ben argaz-nni \u0263er be\u1e5b\u1e5ba. I\u1e5bu\u1e25 \u0263u\u1e5b-es, yenna-yas : Ini-yi-d, tumne\u1e0d s Mmi-s n bunadem ?\n9:36 Yerra-yas : Anwa-t a Sidi ? Ini-yi-t-id iwakken ad amne\u0263 yis.\n9:37 Sidna \u0190isa yenna-yas : Aql-ik te\u021bwali\u1e0d-t s wallen-ik, d ne\u021b\u021ba s yiman-is i d-ye\u021bmeslayen yid-ek tura.\n9:38 Argaz-nni yenna-yas : Umne\u0263 a Sidi ! D\u0263a ye\u0263li \u0263ef tgecrar zdat-es.\n9:39 Sidna \u0190isa yenna : D wagi i d l\u1e25isab \u0263ef wacu i d-usi\u0263 \u0263er ddunit : wid ur ne\u021bwali ara ad walin, wid ye\u021bwalin ad u\u0263alen d ider\u0263alen.\n9:40 Kra n ifariziyen i geslan i imeslayen-is steqsan-t, nnan-as : Ihi ula d nukkni d ider\u0263alen ?\n9:41 Sidna \u0190isa yerra-yasen : Lemmer \u021b-\u021bide\u021b d ider\u0263alen i tellam tili ulac ddnub fell-awen, lame\u025bna tura imi teqqa\u1e5bem ne\u021bwali, ddnub i yirawen-nwen.\n10:1 -- S tide\u021b a wen-d-ini\u0263, win ur nke\u010d\u010dem ara si tewwurt \u0263er wem\u1e5ba\u1e25 ( le\u025bzib ) n wulli, i\u025bedda si \u1e93\u1e93e\u1e5bb, winna d amakar yerna d aqe\u1e6d\u1e6da\u025b.\n10:2 Ma d win ike\u010d\u010dmen si tewwurt d ne\u021b\u021ba i d ameksa n wulli.\n10:3 A\u025bessas n wem\u1e5ba\u1e25 ileddi tawwurt i umeksa, ulli sellent i \u1e63\u1e63ut-is, issawal-asent s yismawen-nsent, yessufu\u0263-itent \u0263er be\u1e5b\u1e5ba.\n10:4 Mi gessufe\u0263 tid akk yellan-ines, izeggir zdat-sent, ulli ttaba\u025bent-e\u021b axa\u1e6der ssnent \u1e63\u1e63ut-is.\n10:5 D lmu\u1e25al ad teb\u025ben-t abe\u1e5b\u1e5bani, ad rewlent fell-as imi ur ssinent ara \u1e63\u1e63ut n ibe\u1e5b\u1e5baniyen.\n10:6 Sidna \u0190isa yenna-yasen lemtel agi, lame\u025bna ur fhimen ara ayen yeb\u0263a a sen-yini.\n10:7 Yenna yasen da\u0263en : S tide\u021b qqa\u1e5be\u0263-awen, d nekk i \u021b-\u021bawwurt ansi \u021b\u025beddayent wulli.\n10:8 Wid me\u1e5b\u1e5ba i d-yusan uqbel-iw d imakaren d iqe\u1e6d\u1e6da\u025ben. Lame\u025bna ulli ur sen-\u1e25essent ara.\n10:9 D nekk i \u021b-\u021bawwurt. Win ara ikecmen yis-i ad ye\u021b\u021busellek : ad ikcem ad yeffe\u0263 akken i s-ihwa, ad yaf ayen ara ye\u010d\u010d.\n10:10 Amakar ye\u021b\u021bas-ed kan iwakken ad yaker, ad yezlu, ad yessenger. Nekk usi\u0263-ed iwakken ad fke\u0263 tudert i wulli-inu, tudert s tuge\u021b (\u1e6daqa).\n10:11 D nekk i d ameksa n \u1e63\u1e63e\u1e25. Ameksa n \u1e63\u1e63e\u1e25 ye\u021b\u021bsebbil tudert-is \u0263ef wulli-ines.\n10:12 Ma d win ur nelli ara d ameksa n wulli ur nelli ara d bab-nsent, d ameksa kan ye\u021bwaxel\u1e63en, ireggel, i\u021ba\u01e7\u01e7a ulli m'ara iwali uccen. Imiren uccen a d-yez\u1e0dem \u0263ef wulli, ad yawi kra seg-sent yerna ad yesserwel akk taqe\u1e0d\u025bit.\n10:13 Argaz-agi ixeddem akka imi d ameksa kan ye\u021bwaxel\u1e63en, ur as tewqi\u025b ara deg wulli.\n10:14 Nekk d ameksa n \u1e63\u1e63e\u1e25, ssne\u0263 ulli-inu nutenti ssnent-iyi,\n10:15 akken i yi-issen Baba \u1e5aebbi i t-ssne\u0263 ula d nekk. ?sebbile\u0263 tudert-iw \u0263ef wulli-inu.\n10:16 S\u025bi\u0263 da\u0263en ulli nni\u1e0den ur nelli ara seg wem\u1e5ba\u1e25 agi. Tigi da\u0263en ilaq a tent-id-awi\u0263, a d-\u1e25essent i \u1e63\u1e63ut-iw, s wakka a\u021b-\u021bili anagar yiwet n tqe\u1e0d\u025bit s yiwen umeksa.\n10:17 Baba i\u1e25emmel-iyi imi \u021bsebbile\u0263 tudert-iw me\u025bna syin akkin a \u021b-id-rre\u0263.\n10:18 Yiwen ur izmir a yi-ikkes tudert, \u021bsebbile\u0263-\u021b s leb\u0263i-inu. S\u025bi\u0263 tazmert a \u021b-sebble\u0263, s\u025bi\u0263 da\u0263en tazmert a \u021b-id-rre\u0263. D wagi i d lame\u1e5b i yi-d yefka Baba \u1e5aebbi.\n10:19 Mi d-yenna imeslayen-agi, yekker da\u0263en lxilaf ger l\u0263aci.\n10:20 A\u1e6das deg-sen qqa\u1e5ben : Argaz-agi yezde\u0263-it l\u01e7en, yedderwec, acu\u0263e\u1e5b i s-tesme\u1e25sisem ?\n10:21 Wiya\u1e0d qqa\u1e5ben : Win i\u021bwamelken ur ye\u021bmeslay ara akka. Qqa\u1e5ben da\u0263en : Izmer l\u01e7en a d-yerr i\u1e93ri i ider\u0263alen ?\n10:22 Yewwe\u1e0d-ed lweqt anda i \u021b\u025beggiden di temdint n Lquds l\u025bid n we\u025bzal n L\u01e7ame\u025b iqedsen ; imiren d ccetwa.\n10:23 Sidna \u0190isa yella ye\u021b\u1e5bu\u1e25u i\u021b\u021bu\u0263al deg wefrag n L\u01e7ame\u025b iqedsen seddaw n wesqif n Sidna Sliman.\n10:24 Yezzi-yas-d l\u0263aci, nnan-as : Ar melmi ara \u0263-te\u01e7\u01e7e\u1e0d di ccekk ? Ma d Lmasi\u1e25 i telli\u1e0d ini-a\u0263 t-id \u025binani !\n10:25 Sidna \u0190isa yerra-yasen : Nni\u0263-awen-t-id ur tuminem ara, yerna twalam lec\u0263al i xeddme\u0263 s yisem n Baba : d lec\u0263al-agi i d ye\u021bcehhiden fell-i.\n10:26 Kunwi ur te\u021b\u021bamnem ara axa\u1e6der ur tellim ara seg ulli-inu.\n10:27 Ulli-inu sme\u1e25sisent i \u1e63\u1e63ut-iw, ssne\u0263-tent yerna ttaba\u025bent iyi-d.\n10:28 ?\u021bake\u0263-asent tudert n dayem, ur \u021bme\u021b\u021batent ara ma\u1e0di, yiwen ur izmir a tent-yekkes seg ufus-iw.\n10:29 Baba i yi-tent-id-yefkan yugar kullec, win yellan ger ifassen is, yiwen ur izmir a s-t-id-yekkes\n10:30 axa\u1e6der nekk d Baba, d yiwen.\n10:31 Jem\u025ben-d da\u0263en id\u0263a\u0263en akken a t-n\u0263en.\n10:32 Yekker Sidna \u0190isa yenna-yasen : Xedme\u0263 zdat-wen a\u1e6das n lec\u0263al yelhan yessewhamen, s tezmert n Baba ; \u0263ef wanwa deg-sen i teb\u0263am a yi-ten\u0263em s ibla\u1e0den ?\n10:33 At Is\u1e5bail nnan-as : Ma\u010d\u010di \u0263ef cc\u0263el yelhan i neb\u0263a a k-ne\u1e5bjem, lame\u025bna imi i tkeffre\u1e0d ! Axa\u1e6der ke\u010d\u010d yellan d amdan terri\u1e0d iman-ik d \u1e5aebbi.\n10:34 Sidna \u0190isa yerra-yasen : E\u025bni ur yuri ara di ccari\u025ba nwen : Nekk, Sidi \u1e5aebbi nni\u0263-awen : Kunwi d i\u1e5bebbiten !\n10:35 Yiwen ur yezmir ad inke\u1e5b ayen i d-nnant tira iqedsen. Ma yella ccari\u025ba-nwen tsemma \u00abi\u1e5bebbiten\u00bb wid iwumi i d-i\u021b\u021bucegge\u025b wawal n \u1e5aebbi,\n10:36 amek armi teqqa\u1e5bem fell-i keff\u1e5be\u0263 mi d-nni\u0263 \u00ab nekk d Mmi-s n \u1e5aebbi, \u00bb e\u025bni ma\u010d\u010di d Baba i yi-ixta\u1e5ben, i yi-d-icegg\u025ben \u0263er ddunit ?\n10:37 Lemmer ur xeddme\u0263 ara lec\u0263al n Baba tili ur te\u1e25wa\u01e7em ara a\u021b \u021bamnem yis-i.\n10:38 Lame\u025bna ma xeddme\u0263-ten, \u0263as akken ur teb\u0263im ara a\u021b-\u021bamnem yis-i, amnet s lec\u0263al-iw akken a\u021b \u021be\u1e93rem, a\u021b-\u021bfehmem belli Baba yella deg-i nekk lli\u0263 di Baba.\n10:39 ?ef yimeslayen-agi, lecyux n at Is\u1e5bail \u025be\u1e5bden a t-\u1e6d\u1e6dfen lame\u025bna yemne\u025b si ger ifassen-nsen.\n10:40 Syenna Sidna \u0190isa i\u1e5bu\u1e25 \u0263er tama nni\u1e0den n wasif n Urdun, \u0263er wemkan nni anda i gesse\u0263\u1e0des Ye\u1e25ya l\u0263aci, yeqqim dinna kra n wussan.\n10:41 A\u1e6das i d-yusan \u0263u\u1e5b-es, qqa\u1e5ben wway gar-asen : Ye\u1e25ya ur yexdim ula d yiwen lbe\u1e5bhan, lame\u025bna ayen akk i d-yenna \u0263ef wergaz-agi \u021b-\u021bide\u021b.\n10:42 Dinna, a\u1e6das n l\u0263aci i gumnen yis.\n11:1 Di taddart n Bitanya, llant snat n tyestmatin, Mar\u1e6da d Meryem akk-d gma-tsent La\u025b\u1e93ar ;\n11:2 Meryem, \u021b-\u021bin akken i gdehnen i\u1e0da\u1e5b\u1e5ben n Sidna \u0190isa s zzit n le\u025b\u1e6de\u1e5b terna te\u1e63fe\u1e0d-iten s ucebbub-is ; tes\u025ba gma-s La\u025b\u1e93ar, yehlek yen\u1e6der.\n11:3 Yessetma-s cegg\u025bent \u0263er Sidna \u0190isa a s-inin : A Sidi, atan we\u1e25bib-ik yu\u1e0den.\n11:4 Mi gesla Sidna \u0190isa s lexba\u1e5b-agi yenna : Lehlak-agi ur ye\u1e63\u1e63awa\u1e0d ara \u0263er lmut, lame\u025bna a d-yesbeggen tamanegt n \u1e5aebbi ; yis da\u0263en ara d-tban tmanegt n Mmi-s n \u1e5aebbi.\n11:5 Sidna \u0190isa i\u1e25emmel a\u1e6das Mar\u1e6da, Meryem akk-d La\u025b\u1e93ar.\n11:6 ?as akken yesla s La\u025b\u1e93ar yu\u1e0den , yerna sin wussan deg wemkan-nni anda yella.\n11:7 D\u0263a yenna i inelmaden-is : Eyyaw a nu\u0263alet \u0263er tmurt n Yahuda.\n11:8 Nnan-as : A Sidi, ma\u010d\u010di a\u1e6das aya segmi \u021bnadin wat Is\u1e5bail a k-n\u0263en s ibla\u1e0den, tura teb\u0263i\u1e0d a\u021b-\u021bu\u0263ale\u1e0d \u0263er dinna ?\n11:9 Sidna \u0190isa yerra-yasen : E\u025bni ur llint ara tnac n swaye\u025b deg wass ? Ma ile\u1e25\u1e25u yiwen deg wass ur t-kkaten ara wuguren axa\u1e6der tella tafat, ye\u021bwali abrid.\n11:10 Lame\u025bna ma ile\u1e25\u1e25u deg i\u1e0d ad im\u1e0derkal axa\u1e6der ulac tafat.\n11:11 Mi d-yenna ayagi, yerna yenna yasen : A\u1e25bib-nne\u0263 La\u025b\u1e93ar tewwi-t tnafa, ad \u1e5bu\u1e25e\u0263 a t-id-ssaki\u0263.\n11:12 ?ef wayagi inelmaden-is nnan as : A Sidi, ma \u021b-\u021baguni i ge\u1e6d\u1e6des ihi a d-yekker.\n11:13 Sidna \u0190isa yenna-d ayagi \u0263ef lmut n La\u025b\u1e93ar, nutni nwan \u0263ef tguni i d-yemmeslay.\n11:14 D\u0263a yenna-yasen \u025binani : La\u025b\u1e93ar yemmut,\n11:15 yerna fe\u1e5b\u1e25e\u0263 \u0263ef ddemma-nwen imi ur lli\u0263 ara dinna di teswi\u025bt-nni, axa\u1e6der ayagi d ayen ara yernun di liman-nwen. Eyyaw tura a n\u1e5bu\u1e25et \u0263u\u1e5b-es.\n11:16 ?uma iwumi qqa\u1e5ben Akniw, yenna i inelmaden nni\u1e0den : Eyyaw a neddut ula d nukkni iwakken a nemmet yid-es.\n11:17 Mi q\u1e5bib ad yawe\u1e0d \u0263er dinna, Sidna \u0190isa yesla belli \u1e5beb\u025ba wussan aya segmi i me\u1e0dlen La\u025b\u1e93ar.\n11:18 Ad ilin wazal n tlata alaf kilumitrat ger taddart n Bitanya \u021b-\u021bemdint n Lquds.\n11:19 Daymi a\u1e6das n l\u0263aci i d-yusan \u0263er Mar\u1e6da d Meryem a tent-\u1e63ebb\u1e5ben \u0263ef lmut n gma-tsent.\n11:20 Akken kan i tesla Mar\u1e6da belli Sidna \u0190isa iteddu-d \u0263er taddart, tuzzel \u0263u\u1e5b-es a t-temmager. Ma d Meryem teqqim deg wexxam.\n11:21 Mar\u1e6da tenna i Sidna \u0190isa : A Sidi, lemmer dagi i telli\u1e0d, tili gma ur yemmut ara.\n11:22 Lame\u025bna \u1e93ri\u0263 ula \u021b-\u021bura, ayen akk ara tessutre\u1e0d i \u1e5aebbi a k-t-id-yeqbel.\n11:23 Sidna \u0190isa yenna-yas : Gma-m a d-yu\u0263al \u0263er tudert.\n11:24 Mar\u1e6da terra-yas : ?ri\u0263 a d-yu\u0263al \u0263er tudert ass aneggaru, ass n \u1e25eggu n lmegtin.\n11:25 Sidna \u0190isa yenna-yas : D nekk i d \u1e25eggu, d nekk i \u021b-\u021budert. Win ara yes\u025bun laman deg-i, ad yidir \u0263as ma yemmut.\n11:26 Yal amdan yeddren, yumnen yis-i, ur ye\u021bme\u021b\u021bat ara ma\u1e0di. Tumne\u1e0d s wannect-agi ?\n11:27 Mar\u1e6da tenna-yas : Umne\u0263 a Sidi, d ke\u010d\u010d i d Lmasi\u1e25, d ke\u010d\u010d i d Mmi-s n \u1e5aebbi, win akken ara d-yasen \u0263er ddunit.\n11:28 Syenna, Mar\u1e6da t\u1e5bu\u1e25 tessawel i weltma-s Meryem tenna-yas s tuffra : Sidna \u0190isa yewwe\u1e0d-ed, yeb\u0263a a kem-i\u1e93er.\n11:29 Mi tesla s lexba\u1e5b-agi, tekker Meryem tuzzel \u0263er Sidna \u0190isa.\n11:30 Yu\u0263 l\u1e25al ur\u025bad i d-yekcim \u0263er taddart, mazal-it deg umkan-nni anda akken i t-temmuger Mar\u1e6da.\n11:31 Wid yellan \u021b\u1e63ebbi\u1e5ben deg-s deg wexxam, mi \u021b-walan tekker teffe\u0263 s tazzla, \u1e0def\u1e5ben-\u021b, nwan \u0263er u?ekka i t\u1e5bu\u1e25 iwakken a\u021b-\u021be\u021bru \u0263ef gma-s.\n11:32 Mi tewwe\u1e0d Meryem \u0263er wemkan anda yella Sidna \u0190isa, akken kan i t-twala, te\u0263li \u0263er i\u1e0da\u1e5b\u1e5ben-is tenna : A Sidi, lemmer dagi i telli\u1e0d tili gma ur yemmut ara.\n11:33 Mi \u021b-iwala te\u021bru ne\u021b\u021bat d wid yellan yid-es, Sidna \u0190isa ijre\u1e25 wul-is, tergagi tasa-s.\n11:34 Yenna-yasen : Anda i t-tme\u1e0dlem ? Nutni rran-as : Eyya-d a\u021b-\u021bwali\u1e0d a Sidi.\n11:35 D\u0263a Sidna \u0190isa ye\u021bru.\n11:36 Mi t-walan ye\u021bru, nnan : Walit ac\u1e25al i t-i\u1e25emmel !\n11:37 Ma d kra deg-sen qqa\u1e5ben : Ne\u021b\u021ba i d-yerran i\u1e93ri i uder\u0263al, ur yezmir ara ad issemne\u025b La\u025b\u1e93ar si lmut !\n11:38 Sidna \u0190isa tejre\u1e25 tasa-s tikkelt tis snat. Mi ww\u1e0den \u0263er u?ekka yellan d l\u0263a\u1e5b imedlen s yiwen wez\u1e5bu d ameqqran,\n11:39 Sidna \u0190isa yenna : Kkset az\u1e5bu-yagi ! Mar\u1e6da weltma-s n lmegget-nni tenna : A Sidi, \u1e5beb\u025ba wussan aya segmi ye\u021bwam\u1e0del, ad yili yebda ye\u021bri\u1e25 !\n11:40 Sidna \u0190isa yerra-yas : Ur am-d-nni\u0263 ara ma tumne\u1e0d a\u021b-\u021bwali\u1e0d tamanegt n \u1e5aebbi ?\n11:41 Kksen az\u1e5bu-nni, d\u0263a Sidna \u0190isa yerfed allen-is \u0263er igenni yenna : Tanemmirt-ik a Baba \u1e5aebbi axa\u1e6der tqeble\u1e0d ta\u1e93allit-iw.\n11:42 Nekkini \u1e93ri\u0263 tqebble\u1e0d-iyi daymen, lame\u025bna nni\u0263-ed akka \u0263ef ddemma n wid i yi-d-yezzin dagi iwakken ad amnen belli d ke\u010d\u010d i yi-d-icegg\u025ben.\n11:43 Imiren kan i\u025begge\u1e0d s l\u01e7ehd yenna : A La\u025b\u1e93ar, effe\u0263-ed syenna !\n11:44 Ataya lmegget-nni yeffe\u0263-ed seg u\u1e93ekka, ida\u1e5b\u1e5ben-is d ifassen-is \u021b\u021blen, udem-is i\u0263umm s lekfen. Sidna \u0190isa yenna i wid yellan dinna : Kkset-as lekfen, te\u01e7\u01e7em-t ad i\u1e5bu\u1e25 !\n11:45 A\u1e6das seg widak-nni i d-yeddan d Meryem umnen s Sidna \u0190isa mi walan ayen yexdem.\n11:46 Kra deg-sen \u1e5bu\u1e25en \u0263er ifariziyen \u1e63\u1e63aw\u1e0den-asen lexba\u1e5b.\n11:47 Lmuqedmin imeqqranen d ifariziyen nnejma\u025ben deg wexxam n cc\u1e5be\u025b, nnan : D acu ara nexdem ? Argaz-agi yexdem a\u1e6das n lbe\u1e5bhanat,\n11:48 ma ne\u01e7\u01e7a-t ad ikemmel akka, l\u0263aci akk ad amnen yis ; a d-asen i\u1e5bumaniyen a \u0263-hudden l\u01e7ame\u025b-nne\u0263 \u021b-\u021bmurt-nne\u0263.\n11:49 Kayef yellan aseggas-nni d lmuqeddem ameqqran fell-asen,\n11:50 yen\u1e6deq yenna-yasen : Ur te\u1e93rim ara belli ad yemmet axi\u1e5b yiwen \u0263ef lumma wala ad yenger wegdud-nne\u0263 ?\n11:51 Ayagi ma\u010d\u010di s \u0263u\u1e5b-es i d-yekka me\u025bna imi i gella d lmuqeddem ameqqran aseggas-nni. Daymi i s-d-iwe\u1e25\u1e25a Sidi \u1e5aebbi belli ilaq ad immet Sidna \u0190isa \u0263ef wegdud.\n11:52 Ma\u010d\u010di kan \u0263ef wegdud-is ara yemmet me\u025bna akken ad isdukkel arraw n \u1e5aebbi i gemzerwa\u025ben di ddunit me\u1e5b\u1e5ba, a ten-yejme\u025b d yiwen wegdud.\n11:53 Ass-nni d\u0263a i \u025bewwlen ( qesden ) lmuqedmin imeqqranen ad n\u0263en Sidna \u0190isa.\n11:54 Seg wass-nni, Sidna \u0190isa yejbed iman-is \u0263ef l\u0263aci. I\u1e5bu\u1e25 Syenna \u0263er taddart n If\u1e5bahim i d-yezgan \u021b-\u021bama unez\u1e5buf, yes\u025bedda dinna kra n wussan ne\u021b\u021ba d inelmaden is.\n11:55 Akken i d-iqe\u1e5b\u1e5beb l\u025bid n Tfaska, a\u1e6das n l\u0263aci i d-i\u021basen si mkul tamurt \u0263er temdint n Lquds akken ad ssizedegen iman-nsen.\n11:56 L\u0263aci-nni \u021bqelliben \u0263ef Sidna \u0190isa, \u021bmesteqsayen deg ufrag n l\u01e7ame\u025b, qqa\u1e5ben : D acu i twalam ? A d-yas ad i\u025begge\u1e0d ?\n11:57 Yu\u0263 l\u1e25al lmuqedmin imeqqranen d ifariziyen nebhen-d nnan : Win ye\u1e93ran anda yella \u0190isa-nni, ilaq a d-yessiwe\u1e0d lexba\u1e5b i yi\u025bessasen akken a t-\u1e6d\u1e6dfen.\n12:1 Se\u021b\u021ba wussan uqbel l\u025bid n Tfaska, Sidna \u0190isa i\u1e5bu\u1e25 \u0263er Bitani, taddart n La\u025b\u1e93ar win akken i d-yesse\u1e25ya si lmut.\n12:2 At wexxam n La\u025b\u1e93ar heggan-as imensi. Mar\u1e6da tqeddec, La\u025b\u1e93ar yeqqim \u0263er imensi akk-d Sidna \u0190isa.\n12:3 Meryem teddem-ed azgen n litra n le\u025b\u1e6de\u1e5b ye\u1e63fan \u0263layen nezzeh, tesmar-it \u0263ef yi\u1e0da\u1e5b\u1e5ben n Sidna \u0190isa, tesfe\u1e0d-iten s ucebbub-is ; axxam me\u1e5b\u1e5ba ye\u010d\u010du\u1e5b d rri\u1e25a n le\u025b\u1e6de\u1e5b-nni.\n12:4 Yudas n Qe\u1e5byut, yiwen seg inelmaden-is, win akken ara t-ixed\u025ben in\u1e6deq-ed yenna :\n12:5 Acu\u0263e\u1e5b ur nezzenz ara le\u025b\u1e6de\u1e5b agi ? Lemmer nezzenz-it tili yewwi-d azal n telt meyya twiztin n lfe\u1e6d\u1e6da ara nef\u1e5beq i igellilen.\n12:6 Mi d-yenna annect-agi ma\u010d\u010di d igellilen i t-i\u0263a\u1e0den me\u025bna yeb\u0263a ad yawi idrimen-nni, axa\u1e6der d amakar i gella. D ne\u021b\u021ba i d amdebbe\u1e5b \u0263ef yidrimen-nsen, ye\u021b\u021baker-iten.\n12:7 D\u0263a Sidna \u0190isa yenna-yas : Anfet-as ! Le\u025b\u1e6de\u1e5b-agi thegga-t i wass n tem\u1e0delt-iw.\n12:8 Igellilen a ten-tes\u025bum daymen gar-awen ! Ma d nekk, ur iyi-tse\u025b\u025bum ara daymen yid-wen.\n12:9 Yu\u0263 l\u1e25al l\u0263aci slan belli Sidna \u0190isa di taddart n Bitanya i gella. D\u0263a \u021b-\u021birebba\u025b i d-i\u1e5bu\u1e25en \u0263u\u1e5b-es, ma\u010d\u010di kan iwakken a t-\u1e93ren ne\u021b\u021ba, me\u025bna b\u0263an ad \u1e93ren La\u025b\u1e93ar i d yesse\u1e25ya si lmut.\n12:10 ?ef wannect-a, lmuqedmin imeqqranen qesden ad n\u0263en ula d La\u025b\u1e93ar.\n12:11 Axa\u1e6der \u0263ef ddemma-ines a\u1e6das n l\u0263aci i sen iwexx\u1e5ben u\u0263alen umnen s Sidna \u0190isa.\n12:12 Azekka-nni, a\u1e6das n l\u0263aci i d yusan ad \u025beggden di temdint n Lquds. Slan belli Sidna \u0190isa iteddu-d \u0263er temdint.\n12:13 Kksen-d tise\u1e0dwa ( tici\u1e6dwin ) n tezdayt, \u1e5bu\u1e25en a t-mmagren, \u021beddun \u021b\u025beggi\u1e0den : ?usana ! Ye\u021b\u021bubarek win i d-yusan s yisem n Sidi \u1e5aebbi ! Ye\u021b\u021bubarek ugellid n wat Is\u1e5bail !\n12:14 Sidna \u0190isa yufa yiwen we\u0263yul d amec\u1e6du\u1e25, yerkeb fell-as akken yura di tira iqedsen :\n12:15 Ur \u021b\u021baggad a tamdint n Siyun, atan ugellid-im yusa-d, irkeb-ed \u0263ef we\u0263yul amec\u1e6du\u1e25.\n12:16 Imiren inelmaden is ur fhimen ara ayen ide\u1e5b\u1e5bun, lame\u025bna asmi i gekcem Sidna \u0190isa di tamanegt-is, mmektan-d belli ayen akk yuran fell-as yed\u1e5ba yerna ye\u021bwakemmel.\n12:17 Wid akk i g\u1e25ed\u1e5ben akk-d Sidna \u0190isa asmi i gessawel i La\u025b\u1e93ar a d-iffe\u0263 seg u?ekka mi i t-id-yesse\u1e25ya si lmut, cehden-d \u0263ef wayen \u1e93ran ;\n12:18 \u0263ef wannect-agi a\u1e6das n l\u0263aci i d-yusan \u0263u\u1e5b-es imi slan s lbe\u1e5bhan i gexdem.\n12:19 Imi walan akkenni, ifariziyen nnan wway gar-asen : Twalam tura : ur nezmir i wacemma, l\u0263aci akk ttaba\u025ben-t !\n12:20 Ger widak-nni i d-yusan ad \u025beggden di temdint n Lquds, llan kra n iyunaniyen.\n12:21 Iyunaniyen-agi \u1e5bu\u1e25en \u0263er Filibus ajlili n taddart n Bitsayda, nnan-as : Neb\u0263a a n\u1e93er Sidna \u0190isa !\n12:22 Filibus ixebbe\u1e5b Andriyus, d\u0263a ddukklen i sin a s-inin i Sidna \u0190isa.\n12:23 Ne\u021b\u021ba yerra-yasen-d : Yewwe\u1e0d-ed lweqt i Mmi-s n bunadem ad ikcem di tmanegt-is.\n12:24 S tide\u021b, nni\u0263-awen : a\u025beqqa n yired ye\u0263lin deg wakal m'ur yemmut ara ad iqqim we\u1e25d-es, lame\u025bna ma yemmut ad yefti, a d-yefk a\u1e6das n i\u025beqqayen.\n12:25 Win ye\u021b\u1e25adaren \u0263ef tudert-is ad as-t\u1e5bu\u1e25, ma d win ur ne\u021b\u1e25ebbi\u1e5b ara fell-as di ddunit-agi a \u021b-yaf i tudert n dayem.\n12:26 Win yeb\u0263an ad iqdec fell-i, a yi-d-yetbe\u025b. Anda b\u0263u\u0263 ili\u0263, aqeddac-iw ad yili yid-i. Win iqeddcen fell-i, \u1e5aebbi a t-i\u025buzz.\n12:27 Atan tura ul-iw yet\u1e25eyye\u1e5b ; d acu ara d-ini\u0263 ? A Baba sellek-iyi si teswi\u025bt-agi ? Nekk \u1e93ri\u0263 \u0263ef teswi\u025bt agi i d-usi\u0263 iwakken a \u021b-qable\u0263 !\n12:28 A Baba, sbeggen-ed tamanegt-ik ! D\u0263a ten\u1e6deq-ed yiwet n ta\u0263ect seg igenni, tenna-d : Sbeggne\u0263-d yakan tamanegt-iw yerna mazal a \u021b-id-sbeggne\u0263.\n12:29 Wid yu\u0263 l\u1e25al dinna slan i \u1e63\u1e63ut nni, \u0263ilen d \u1e5b\u025bud. Wiya\u1e0d qqa\u1e5ben d lmalayekkat i s-d yemmeslayen.\n12:30 Sidna \u0190isa yenna-yasen : Ma\u010d\u010di \u0263u\u1e5b-i i d-ten\u1e6deq ta\u0263ect agi, ten\u1e6deq-ed \u0263u\u1e5b-wen.\n12:31 Tura ara yed\u1e5bu l\u1e25isab n ddunit. Tura ara ye\u021bwaqce\u025b umesba\u1e6dli n ddunit-a.\n12:32 Ma d nekk m'ara \u021bwarefde\u0263 sennig lqa\u025ba, a d-awi\u0263 imdanen me\u1e5b\u1e5ba \u0263u\u1e5b-i.\n12:33 S imeslayen-agi, Sidna \u0190isa yeb\u0263a a d-isbeggen amek ara yemmet.\n12:34 L\u0263aci nnan-as : Ccari\u025ba tenna-d belli Lmasi\u1e25 ad yidir i dayem. Amek i d-tenni\u1e0d \u00ab Mmi-s n bunadem ilaq ad ye\u021bwarfed sennig lqa\u025ba \u00bb ? Ini-ya\u0263-d ihi anwa i d Mmi-s n bunadem ?\n12:35 Sidna \u0190isa yenna-yasen : Tafat mazal-i\u021b gar-awen i kra n lweqt kan, l\u1e25ut skud tella uqbel a kkun-i\u1e6d\u1e6def \u1e6d\u1e6dlam, axa\u1e6der win ile\u1e25\u1e25un di \u1e6d\u1e6dlam ur ye\u1e93ri ara anda iteddu.\n12:36 Skud tes\u025bam tafat, amnet yis akken a\u021b-\u021bu\u0263alem d arraw n tafat. Mi d-yenna imeslayen-agi, Sidna \u0190isa i\u1e0de\u1e5b\u1e5bef iman-is anda ulac l\u0263aci.\n12:37 ?as akken a\u1e6das n lbe\u1e5bhanat i gexdem Sidna \u0190isa zdat-sen, nutni ugin ad amnen.\n12:38 S wakka i ge\u021bwakemmel wayen i d-yenna nnbi Ice\u025bya : A \u1e5aebbi, anwa i gumnen s wayen i d-nbecce\u1e5b, iwumi i d-te\u021bwabeggen tezmert-ik ?\n12:39 Acu\u0263e\u1e5b ugin ad amnen ? D nnbi Ice\u025bya i d-yennan da\u0263en :\n12:40 \u1e5aebbi yesder\u0263el-iten , yes\u0263e\u1e5b ulawen-nsen, daymi allen-nsen ur \u021bwalint ara, lefhama-nsen teqfel , ugin a d-u\u0263alen \u0263er webrid, a kken a ten-sse\u1e25lu\u0263.\n12:41 Nnbi Ice\u025bya yenna-d ayagi \u0263ef Sidna \u0190isa mi gwala tamanegt-is.\n12:42 Ula seg imeqqranen n wat Is\u1e5bail a\u1e6das i gumnen yis ; lame\u025bna \u0263ef ddemma n ifariziyen, ur b\u0263in ara a d-sbeggnen liman-nsen, axa\u1e6der uggaden a ten-s\u1e6dixx\u1e5ben si l\u01e7ame\u025b.\n12:43 \u1e25emmlen ad s\u025bun ccan \u0263er yemdanen wala \u0263er \u1e5aebbi.\n12:44 Sidna \u0190isa yessa\u025bli ta\u0263ect-is yenna : Win yes\u025ban laman deg-i ma\u010d\u010di yis-i kan i gumen, me\u025bna yumen ula s win i yi-d-icegg\u025ben.\n12:45 Win i yi iwalan, iwala win i yi-d-icegg\u025ben.\n12:46 Nekk usi\u0263-ed \u021b-\u021bafat \u0263er ddunit, kra n win yumnen yis-i, ur ye\u021b\u0263imi ara di \u1e6d\u1e6dlam.\n12:47 Win yeslan i wawal-iw ur nexdim ara ayen i d-nni\u0263 ma\u010d\u010di d nekk ara t-i\u1e25asben, axa\u1e6der ur d-usi\u0263 ara akken ad \u1e25asbe\u0263 ddunit, me\u025bna usi\u0263-ed a \u021b-sellke\u0263.\n12:48 Kra n win i yi-\u1e25eq\u1e5ben ur ne\u1e25sib ara imeslayen-iw, i\u021b\u021bu\u1e25aseb yakan : d awal-agi i d-nni\u0263 ara t-i\u1e25asben ass aneggaru.\n12:49 Imeslayen-agi ma\u010d\u010di s \u0263u\u1e5b-i i d-kkan : Baba i yi-d-icegg\u025ben, d ne\u021b\u021ba i yi-d-yefkan ayen i glaqen a t-id-ini\u0263 d wayen ara slemde\u0263.\n12:50 Daymi nni\u0263-awen : aselmed \u0263ef i yi-d-iwe\u1e63\u1e63a Baba \u021b-\u021budert n dayem. Nekk sselmade\u0263 kan ayen i yi-d-yenna Baba.\n13:1 Uqbel l\u025bid n Tfaska n Izimer n leslak, Sidna \u0190isa ye\u1e93ra belli tewwe\u1e0d-ed teswi\u025bt i deg ara yeffe\u0263 si ddunit, akken ad i\u1e5bu\u1e25 \u0263er Baba-s. ?ef wannect-agi, isbeggen-ed le\u1e25mala-ines i inelmaden-is yellan di ddunit, yerna ye\u01e7\u01e7a-yasen-d lme\u025bna \u021b-\u021bameqqrant.\n13:2 Llan te\u021b\u021ben imensi n Tfaska, Cci\u1e6dan yekcem yakan deg wul n Yudas, mmi-s n Sem\u025bun n Qe\u1e5byut, iwelleh-it ad ixde\u025b Sidna \u0190isa, a t-yezzenz.\n13:3 Sidna \u0190isa ye\u1e93ra belli Baba \u1e5aebbi yerra kullec ger ifassen-is, ye\u1e93ra s \u0263u\u1e5b \u1e5aebbi i d-yusa, \u0263u\u1e5b-es ara yu\u0263al.\n13:4 Yekker \u0263ef yimensi, yekkes abe\u1e5bnus-is, yeddem-ed yiwen ube\u1e25nuq (ucetti\u1e0d) yebges yis.\n13:5 Syenna, yesmar-ed aman \u0263er yiwet n tbaqit, yebda yessirid i\u1e0da\u1e5b\u1e5ben n inelmaden-is, yesfe\u1e0d-iten s ube\u1e25nuq-nni i gcudd \u0263ef wammas-is.\n13:6 Mi gewwe\u1e0d \u0263er Sem\u025bun Bu\u1e6drus yenna-yas-d : A Sidi d ke\u010d\u010d ara yi-ssirden i\u1e0da\u1e5b\u1e5ben ?\n13:7 Sidna \u0190isa yerra-yas : Ayen xedme\u0263 akka ur t-tfehhme\u1e0d ara tura, \u0263er zdat ara t-tfehme\u1e0d.\n13:8 Bu\u1e6drus yenna-yas : Ala ! D lmu\u1e25al a yi-tessirde\u1e0d i\u1e0da\u1e5b\u1e5ben-iw ! Sidna \u0190isa yenna-yas : M'ur k-ssarde\u0263 ara i\u1e0da\u1e5b\u1e5ben-ik ur d-yeqqim wacemma i \u0263-icerken.\n13:9 Sem\u025bun Bu\u1e6drus yenna-yas : Ihi ur iyi-issirid ara i\u1e0da\u1e5b\u1e5ben kan, ssired-iyi ula d ifassen d uqe\u1e5b\u1e5buy-iw.\n13:10 Sidna \u0190isa yenna-yas : Win yessarden yakan d azedgan, anagar ida\u1e5b\u1e5ben-is i ge\u1e25wa\u01e7 a ten yessired axa\u1e6der zeddig me\u1e5b\u1e5ba. Kunwi aql-ikkun zeddigit lame\u025bna ma\u010d\u010di akken ma tellam dagi.\n13:11 Sidna \u0190isa ye\u1e93ra yakan win akken ara t-ixed\u025ben, daymi i genna i inelmaden-is : \u00ab kunwi ur zeddigit ara irkul. \u00bb\n13:12 Mi sen-issared i\u1e0da\u1e5b\u1e5ben-nsen, yerra abe\u1e5bnus-is, yu\u0263al \u0263er wemkan is yenna-yasen : Tfehmem wayen akka i wen xedme\u0263 ne\u0263 ala ?\n13:13 Tessawalem-iyi \u00ab a Sidi \u00bb ; tes\u025bam l\u1e25eqq axa\u1e6der \u021b-\u021bide\u021b !\n13:14 Ma yella nekk yellan d Ssid-nwen ssarde\u0263-awen i\u1e0da\u1e5b\u1e5ben-nwen, ilaq awen a\u021b-\u021be\u021b\u021bemsiridem i\u1e0da\u1e5b\u1e5ben wway gar-awen.\n13:15 Fki\u0263-awen-d lemtel iwakken ula d kunwi a\u021b-\u021bxedmem akken i wen-xedme\u0263.\n13:16 S tide\u021b nni\u0263 awen : aqeddac ur yugar ara Ssid-is, amcegge\u025b ur yugar ara win i t-id icegg\u025ben.\n13:17 Amarezg-nwen ma tessnem ayagi, awi-d kan a t-txedmem.\n13:18 Ma\u010d\u010di fell-awen me\u1e5b\u1e5ba i d-nni\u0263 ayagi : ssne\u0263 widak i xta\u1e5be\u0263. Lame\u025bna ayen yuran ad ye\u021bwakemmel : \u00ab Win ye\u010d\u010dan a\u0263\u1e5bum yid-i, yu\u0263al-iyi-d d a\u025bdaw.\u00bb\n13:19 Nni\u0263-awen-t-id si tura uqbel a d-yawe\u1e0d, iwakken asm'ara d-yed\u1e5bu a\u021b-\u021bamnem belli nekk \u00abd Win yellan.\u00bb\n13:20 A wen-ini\u0263 tide\u021b : win iqeblen win ara d-cegg\u025be\u0263 d nekk i geqbel, win ara yi-qeblen yeqbel win i yi-d-icegg\u025ben.\n13:21 Segmi i d-yenna annect-agi, Sidna \u0190isa yet\u1e25eyye\u1e5b, d\u0263a yenna \u025binani : A wen-d-ini\u0263 s tide\u021b, yiwen deg-wen ad iyi-ixde\u025b.\n13:22 Inelmaden-is t\u1e25eyy\u1e5ben, qqimen \u021bemyex?a\u1e5ben wway gar-asen. Kull yiwen yeqqa\u1e5b deg wul-is : ?ef anwa i d-yenna imeslayen-agi ?\n13:23 Yiwen deg-sen, anelmad-nni i g\u1e25emmel Sidna \u0190isa, yeqqim \u0263er lmakla \u0263er tama-s.\n13:24 Sem\u025bun Bu\u1e6drus iwehha-yas akken a t-yesteqsi \u0263ef wanwa i d-i\u021bmeslay.\n13:25 Anelmad-nni yekna \u0263er Sidna \u0190isa, yenna-yas : A Sidi, \u0263ef wanwa deg-nne\u0263 i d-tmeslaye\u1e0d ?\n13:26 Sidna \u0190isa yerra-yas : Ad ssisne\u0263 ( seyyi\u0263 ) talqimt n we\u0263\u1e5bum di te\u1e5bbut-agi, win iwumi ara \u021b-fke\u0263, d winna ara yi-ixed\u025ben. Sidna \u0190isa yessasen talqimt n we\u0263\u1e5bum, d\u0263a yefka-\u021b i Yudas mmi-s n Sem\u025bun n Qe\u1e5byut.\n13:27 Akken kan i ge\u1e6d\u1e6def Yudas talqimt-nni, Cci\u1e6dan yekcem ul-is. Sidna \u0190isa yenna-yas : Ayen ara txedme\u1e0d \u0263iwel xdem-it !\n13:28 Ger wid yellan yid-es, yiwen ur yefhim acu\u0263e\u1e5b i s-yenna ayagi.\n13:29 Imi d Yudas i g\u021bsewwiqen fell-asen, kra seg inelmaden nwan iwekkel-it akken a d-iq\u1e0du i l\u025bid ne\u0263 ad iseddeq i igellilen.\n13:30 Akken kan i ge\u1e6d\u1e6def talqimt-nni, Yudas yeffe\u0263 seg wexxam ; yu\u0263 l\u1e25al ye\u0263li-d yi\u1e0d.\n13:31 Mi geffe\u0263 Yudas, Sidna \u0190isa yenna : Tura ara d-tban tmanegt n Mmi-s n bunadem, yis ara ye\u021bwa\u025buzz \u1e5aebbi.\n13:32 Imi yis ara ye\u021bwa\u025buzz, \u1e5aebbi da\u0263en ad i\u025buzz Mmi-s n bunadem yerna q\u1e5bib a d-yed\u1e5bu.\n13:33 Ay arrac \u025bzizen, aql-i mazal-iyi gar-awen me\u025bna ur \u021b\u025be\u1e6d\u1e6dile\u0263 ara. A\u021b-\u021bnadim fell-i, atan ayen i nni\u0263 i l\u0263aci tura a wen-t-id-ini\u0263 da\u0263en i kunwi : \u00abUr tezmirem ara a\u021b \u021beddum \u0263er wanda ara \u1e5bu\u1e25e\u0263 \u00bb !\n13:34 A wen-d-fke\u0263 yiwen n lame\u1e5b d ajdid : \u00ab mye\u1e25malet wway gar awen. Akken i kkun-\u1e25emmle\u0263, mye\u1e25malet wway gar-awen.\u00bb\n13:35 Ma temye\u1e25malem wway gar awen, l\u0263aci me\u1e5b\u1e5ba a kkun-\u025beqlen belli d inelmaden-iw i tellam.\n13:36 Sem\u025bun Bu\u1e6drus yesteqsa-t yenna-yas : A Sidi, \u0263er wanda ara t\u1e5bu\u1e25e\u1e0d ? Sidna \u0190isa yenna-yas : Anda ara \u1e5bu\u1e25e\u0263 ur tezmire\u1e0d ara a\u021b-\u021beddu\u1e0d tura, lame\u025bna \u0263er zdat a yi-d-teb\u025be\u1e0d.\n13:37 Bu\u1e6drus yenna-yas : A Sidi, acu\u0263e\u1e5b ur zmire\u0263 ara ad ddu\u0263 tura ? Aql-iyi wejde\u0263 ad sebble\u0263 iman-iw fell-ak.\n13:38 Sidna \u0190isa yerra-yas : Tqeble\u1e0d a\u021b-\u021bsebble\u1e0d iman-ik fell-i ? Tide\u021b a k-ini\u0263 : uqbel ad iskku\u025b uyazi\u1e0d a yi-tnekk\u1e5be\u1e0d tlata iberdan.\n14:1 -- Kkset anezgum seg ulawen nwen. Amnet s \u1e5aebbi, amnet da\u0263en yis-i.\n14:2 Deg wexxam n Baba a\u1e6das n tmezdu\u0263in i gellan, ad \u1e5bu\u1e25e\u0263 a wen-heggi\u0263 amkan ; lemmer ulac, tili nni\u0263-awen-t-id.\n14:3 M'ara wen-heggi\u0263 amkan, a d u\u0263ale\u0263 a kkun-awi\u0263 yid-i akken anda lli\u0263 a\u021b-\u021bilim ula d kunwi.\n14:4 Tessnem abrid ye\u021b\u021bawin \u0263er wanda i \u021beddu\u0263.\n14:5 ?uma yenna-yas : A Sidi, ur ne\u1e93ri ara \u0263er wanda ara t\u1e5bu\u1e25e\u1e0d, amek i teb\u0263i\u1e0d a nissin abrid ?\n14:6 Sidna \u0190isa yenna-yas : D nekk i d abrid axa\u1e6der d nekk i \u021b-\u021bide\u021b, d nekk i \u021b-\u021budert. Yiwen ur yezmir ad i\u1e5bu\u1e25 \u0263er Baba m'ur yekki ara seg-i.\n14:7 Ma tessnem-iyi, a\u021b-\u021bissinem ula d Baba. Atan tura tessnem-t yakan yerna te\u1e93ram-t.\n14:8 Filibus in\u1e6deq-ed, yenna-yas : A Sidi, sken-a\u0263-ed kan Baba \u1e5aebbi be\u1e5bka-ya\u0263.\n14:9 Sidna \u0190isa yenna-yas : Amek, ayen akk i s\u025bedda\u0263 yid-wen mazal ur iyi-tessine\u1e0d ara a Filibus ! Win i yi-iwalan iwala Baba. Amek armi teqqa\u1e5be\u1e0d : \u00abSken-a\u0263-ed kan Baba \u1e5aebbi \u00bb\n14:10 Mazal ur tumine\u1e0d ara belli nekk lli\u0263 di Baba, Baba yella deg-i ? Ayen i wen-d qqa\u1e5be\u0263 ur d-yekki ara s \u0263u\u1e5b-i : Baba yella deg-i, d ne\u021b\u021ba i gxeddmen lec\u0263al-agi-ines.\n14:11 Amnet-iyi, nekk lli\u0263 di Baba, Baba yella deg-i ; ne\u0263 m'ulac, amnet xe\u1e5bsum \u0263ef ddemma n lec\u0263al i twalam xedme\u0263-ten.\n14:12 A wen-ini\u0263 tide\u021b : win yumnen yis-i, ad ixdem ula d ne\u021b\u021ba lec\u0263al i xedme\u0263, yerna ad ixdem akte\u1e5b axa\u1e6der ad \u1e5bu\u1e25e\u0263 \u0263er Baba.\n14:13 Ayen akk ara tessutrem s yisem-iw a t-xedme\u0263 iwakken tamanegt n Baba \u1e5aebbi a d-tban s Mmi-s.\n14:14 A wen-t-id \u025biwde\u0263 : ma tessutrem kra s yisem-iw a t-xedme\u0263.\n14:15 Ma t\u1e25emmlem-iyi, \u1e25erzet lew\u1e63ayat-iw.\n14:16 Nekk ad ssutre\u0263 i Baba a wen-d-yefk Am\u025biwen nni\u1e0den ara yilin yid-wen i dayem :\n14:17 d \u1e5a\u1e5bu\u1e25 n tide\u021b, win akken ur tezmir ddunit a t-teqbel axa\u1e6der ur t-twala ur t-tessin. Kunwi tessnem-t axa\u1e6der yella yid-wen yerna ad yili deg-wen.\n14:18 Ur kkun-\u021b\u021ba\u01e7\u01e7a\u0263 ara d igujilen, a d-u\u0263ale\u0263 \u0263u\u1e5b-wen.\n14:19 Drus i yi-d iqqimen di ddunit ; ddunit ur te\u021b\u025bawad ara a yi-t\u1e93er, ma d kunwi a yi-twalim axa\u1e6der ddre\u0263 yerna ula d kunwi a\u021b-\u021bidirem.\n14:20 Ass-nni a\u021b-\u021bfehmem belli nekk lli\u0263 di Baba, a\u021b-\u021be\u1e93rem da\u0263en belli kunwi tellam deg-i nekk lli\u0263 deg-wen.\n14:21 Win i yi-\u1e25emmlen s tide\u021b, d win i ge\u1e6d\u1e6dfen lew\u1e63ayat-iw yerna i\u1e25rez-itent. Win i yi-\u1e25emmlen a t-i\u1e25emmel Baba, nekk da\u0263en a t-\u1e25emmle\u0263 yerna a d-sbeggne\u0263 iman-iw \u0263u\u1e5b-es.\n14:22 Yuda (ma\u010d\u010di Yudas n Qe\u1e5byut), yenna-yas : A Sidi, acu\u0263e\u1e5b i nukkni kan i teb\u0263i\u1e0d a d-sbeggne\u1e0d iman-ik, ma\u010d\u010di i ddunit me\u1e5b\u1e5ba ?\n14:23 Sidna \u0190isa yerra-yas : Win i yi-\u1e25emmlen ad ixdem ayen i d-nni\u0263, ula d Baba a t i\u1e25emmel ! A d-nas i sin \u0263u\u1e5b-es, a nezde\u0263 \u0263u\u1e5b-es.\n14:24 Ma d win ur iyi-n\u1e25emmel ara ur ixeddem ara ayen i d-nni\u0263. Awal-agi i teslam ma\u010d\u010di s \u0263u\u1e5b-i i d-yekka me\u025bna d awal n Baba i yi-d-icegg\u025ben.\n14:25 Qqa\u1e5be\u0263-awen-d akk annect-agi skud mazal-iyi yid-wen.\n14:26 Lame\u025bna Am\u025biwen, \u1e5a\u1e5bu\u1e25 iqedsen ara d-icegge\u025b Baba s yisem-iw, a wen-isselmed kullec yerna a wen-d-ismekti ayen akk i wen-d-nni\u0263.\n14:27 Ad \u1e5bu\u1e25e\u0263 me\u025bna a wen-d \u01e7\u01e7e\u0263 lehna, d lehna-w ara wen-d fke\u0263. Lehna ara wen-d-fke\u0263 ma\u010d\u010di am lehna i d-te\u021b\u021bak ddunit. Daymi i wen-d-qqa\u1e5be\u0263 ur \u021b\u021baggadet ara, kkset anezgum seg wulawen-nwen.\n14:28 Teslam-d mi wen-d-nni\u0263 ad \u1e5bu\u1e25e\u0263 me\u025bna a d-u\u0263ale\u0263 \u0263u\u1e5b-wen. Lemmer t\u1e25emmlem-iyi, tili tfe\u1e5b\u1e25em imi te\u1e93ram \u0263er Baba ara \u1e5bu\u1e25e\u0263, axa\u1e6der Baba yugar-iyi.\n14:29 Xebb\u1e5be\u0263-kkun-id \u0263ef wannect-agi tura uqbel ad yed\u1e5bu iwakken m'ara d-yed\u1e5bu a\u021b-\u021bamnem.\n14:30 Sya d asawen, ur se\u025b\u025bu\u0263 ara lweqt ad meslaye\u0263 yid-wen imi Amesba\u1e6dli n ddunit-agi atan iteddu-d. Ur ye\u1e25kim ara deg-i,\n14:31 me\u025bna ilaq imdanen n ddunit-a ad \u025beqlen belli \u1e25emmle\u0263 Baba yerna xeddme\u0263 akken i yi-d-yume\u1e5b. Ayaw kkret a n\u1e5bu\u1e25et syagi.\n15:1 -- D nekk i \u021b-\u021bara n tide\u021b, yerna d Baba i \u021b-ixeddmen.\n15:2 Yal isegmi ye\u1e6d\u1e6dfen deg-i ur d-ne\u021b\u021bak ara lfakya, ige??em-it, ma d isegman i d-i\u021bakken lfakya, iferres iten akken a d-efken lfakya s wa\u1e6das.\n15:3 Akka ula d kunwi i te\u1e63fam s uselmed i wen-d-fki\u0263.\n15:4 Ilit deg-i, nekk ad ili\u0263 deg-wen. Isegmi ur yezmir ara a d-yefk lfakya we\u1e25d-es m'ur ye\u1e6d\u1e6dif ara \u0263er tara. Akken da\u0263en kunwi, m'ur te\u1e6d\u1e6difem ara deg-i ur te\u021b\u021bizmirem ara a d-tefkem lfakya.\n15:5 Nekk \u021b-\u021bara, kunwi d isegman-is. Win yellan deg-i nekk lli\u0263 deg-s, a d-yefk lfakya s wa\u1e6das, axa\u1e6der mbla nekk ur te\u021b\u021bizmirem a\u021b-\u021bxedmem acemma.\n15:6 Win ur ne\u1e6d\u1e6dif ara deg-i ad ye\u021bwa\u1e0degge\u1e5b \u0263er be\u1e5b\u1e5ba n tfe\u1e5b\u1e5bant am isegmi ye\u021bwagezmen. M'ara qqa\u1e5ben isegman, ad \u021bwajem\u025ben iwakken a sen-ce\u025blen times ad \u1e5b\u0263en.\n15:7 Ma te\u1e6d\u1e6dfem deg-i yerna awal-iw yezde\u0263 deg-wen, ssutret ayen i teb\u0263am a kkun-id-yawe\u1e0d.\n15:8 Ma te\u021b\u021bakem-d lfakya s tuge\u021b tesbegginem-d belli \u021b-\u021bide\u021b d inelmaden-iw i tellam ; akka ara d-tban tmanegt n Baba i yemdanen.\n15:9 Akken i yi-i\u1e25emmel Baba i kkun \u1e25emmle\u0263 ula d nekk ; dumet di tayri-inu.\n15:10 Ma t\u1e25erzem lumu\u1e5bat-iw a\u021b \u021bdumem di tayri-w, akken \u1e25erze\u0263 lumu\u1e5b n Baba yerna dume\u0263 di tayri-s.\n15:11 Nni\u0263-awen-d akk ayagi iwakken lfe\u1e5b\u1e25-iw a kkun-ye\u010d\u010da\u1e5b ula d kunwi, d\u0263a lfe\u1e5b\u1e25-nwen ad yennekmal.\n15:12 Atan ihi lame\u1e5b ara wen-d-fke\u0263 : \u00ab Mye\u1e25malet wway gar-awen akken i kkun-\u1e25emmle\u0263 nekkini.\u00bb\n15:13 Ulac tayri yugaren tin n win ara isebblen tudert-is \u0263ef ye\u1e25biben-is.\n15:14 Aql-ikkun d i\u1e25biben-iw ma txeddmem ayen i wen d-um\u1e5be\u0263.\n15:15 Sya \u0263er zdat ur kkun-\u1e25e\u021b\u021bbe\u0263 ara d iqeddacen, axa\u1e6der aqeddac ur ye\u1e93ri ara d acu i gxeddem Bab-is. Tura aql-ikkun d i\u1e25biben-iw axa\u1e6der slemde\u0263-awen ayen akk i d-lemde\u0263 \u0263er Baba.\n15:16 Ma\u010d\u010di d kunwi i yi-ixta\u1e5ben me\u025bna d nekk i kkun ixta\u1e5ben ; cegg\u025be\u0263-kkun iwakken a d-tefkem lfakya, lfakya ara idumen. S wakka, Baba \u1e5aebbi a wen-yeqbel kra n wayen ara s-tessutrem s yisem-iw.\n15:17 Atan ihi lame\u1e5b ara wen-d-fke\u0263 : \u00ab Mye\u1e25malet wway gar-awen\u00bb.\n15:18 Ma yella tek\u1e5beh-ikkun ddunit ilaq a\u021b-\u021be\u1e93rem belli tek\u1e5beh-iyi uqbel-nwen.\n15:19 Lemmer n ddunit i tellam tili t\u1e25emmel-ikkun imi d ayla-s. Lame\u025bna kunwi ma\u010d\u010di n ddunit, axa\u1e6der d nekk i kkun-id yexta\u1e5ben si tlemmast n ddunit, daymi i kkun-tek\u1e5beh.\n15:20 Mmektit-ed ayen i wen-d nni\u0263 : aqeddac wer\u01e7in yugar Bab-is. Ma qeh\u1e5ben-iyi a kkun-qeh\u1e5ben ula d kunwi ; ma \u1e25erzen imeslayen-iw ad \u1e25erzen imeslayen-nwen.\n15:21 ?ef ddemma-w ara xedmen akka, axa\u1e6der ur ssinen ara win i yi-d-icegg\u025ben.\n15:22 Lemmer ur d-usi\u0263 ara, lemmer ur sen-d-mmeslaye\u0263 ara tili ulac ddnub fell-asen lame\u025bna tura ddnub i yirawen-nsen.\n15:23 Win i yi-ke\u1e5bhen yek\u1e5beh da\u0263en Baba.\n15:24 Lemmer ur xdime\u0263 ara gar-asen ayen we\u1e5b\u01e7in yexdem yiwen, tili ulac ddnub fell-asen. Me\u025bna tura, \u0263as akken \u1e93ran kullec, \u021bkemmilen ke\u1e5bhen-iyi am nekk am Baba.\n15:25 Axa\u1e6der ilaq ad ye\u021bwakemmel wayen yuran di ccari\u025ba : Ke\u1e5bhen-iyi mbla sebba.\n15:26 M'ara d-yas um\u025biwen, win akken ara wen-d-cegg\u025be\u0263 s \u0263u\u1e5b Baba \u1e5aebbi, \u1e5a\u1e5bu\u1e25 n tide\u021b ara d-yasen s \u0263u\u1e5b-es, ne\u021b\u021ba s yiman-is ara d-icehden fell-i.\n15:27 Kunwi da\u0263en a\u021b-\u021bu\u0263alem d inigan-iw imi tellam yid-i si tazwara.\n16:1 Nni\u0263-awen-d akk annect-agi iwakken ur t\u0263ellim ara.\n16:2 Axa\u1e6der, a kkun-stix\u1e5ben si l\u01e7wame\u025b, yerna a d-yas lweqt anda wid ara kkun-in\u0263en ad \u0263ilen d asfel i fkan i \u1e5aebbi.\n16:3 Ad ssiw\u1e0den \u0263er wannect-agi imi ur iyi-ssinen nekk, ur ssinen Baba.\n16:4 Nni\u0263-awen-d akk ayagi tura iwakken asm'ara ssiw\u1e0den \u0263er wannect-agi, a d-mektim belli nni\u0263-awen-t-id uqbel a d-yed\u1e5bu. Ur a wen-t-id-nni\u0263 ara si tazwara axa\u1e6der mazal-iyi lli\u0263 yid-wen.\n16:5 Tura ad \u1e5bu\u1e25e\u0263 \u0263er win i yi-d icegg\u025ben ; atan yiwen deg-wen ur iyi-d-isteqsa \u0263er wanda ara \u1e5bu\u1e25e\u0263.\n16:6 Imi i wen-d-nni\u0263 akka, le\u1e25zen ye\u010d\u010du\u1e5b ulawen-nwen.\n16:7 A wen-ini\u0263 tide\u021b, yelha-yawen ma \u1e5bu\u1e25e\u0263 axa\u1e6der m'ur \u1e5bu\u1e25e\u0263 ara, am\u025biwen ur d-ye\u021b\u021bas ara \u0263u\u1e5b-wen, me\u025bna ma \u1e5bu\u1e25e\u0263 a wen t-id-cegg\u025be\u0263.\n16:8 M'ara d-yas, a d-isbeggen i yemdanen belli \u0263el\u1e6den \u0263ef wayen ye\u025bnan ddnub, l\u1e25eqq, d l\u1e25isab n \u1e5aebbi.\n16:9 ?el\u1e6den \u0263ef wayen ye\u025bnan ddnub, imi ugin ad amnen yis-i ;\n16:10 \u0263ef wayen yellan d l\u1e25eqq imi teddu\u0263 \u0263er Baba yerna ur te\u021b\u021bu\u0263alem ara a yi-twalim ;\n16:11 \u0263el\u1e6den \u0263ef wayen ye\u025bnan l\u1e25isab n \u1e5aebbi, imi amesba\u1e6dli n ddunit-agi ye\u021b\u021bu\u1e25aseb yakan.\n16:12 A\u1e6das n lew\u1e63ayat i mazal a wen tent-id-ini\u0263, lame\u025bna di teswi\u025bt-agi ur sent-tezmirem ara.\n16:13 Asm'ara d-yas \u1e5a\u1e5bu\u1e25 n tide\u021b, a kkun-iseddu di tide\u021b akken tella, ayen ara wen-d-yini ma\u010d\u010di s \u0263u\u1e5b-es i d-yekka me\u025bna a d-immeslay \u0263ef wayen akk i gesla yerna a kkun id-ixebbe\u1e5b \u0263ef wayen akk ara yed\u1e5bun \u0263er zdat.\n16:14 A d-isbeggen tamanegt-iw axa\u1e6der s \u0263u\u1e5b-i ara d-yawi wayen akk ara wen-d-yini.\n16:15 Ayla n Baba d ayla-w ula d nekk. Daymi i wen-d-nni\u0263 s \u0263u\u1e5b-i ara d-yawi wayen akk ara wen-d-yini.\n16:16 Di kra n lweqt ur iyi-te\u021bwalim ara, kra n lweqt da\u0263en a\u021b-\u021bu\u0263alem a yi-twalim.\n16:17 D\u0263a kra seg inelmaden-is \u021bmesteqsayen, qqa\u1e5ben : D acu i geb\u0263a a \u0263-d-yini mi i d-yeqqa\u1e5b : \u00ab Kra n lweqt ur iyi te\u021bwalim ara, kra n lweqt da\u0263en a\u021b-\u021bu\u0263alem a yi-twalim \u00bb, ne\u0263 mi \u0263-d yenna : \u00abAd \u1e5bu\u1e25e\u0263 \u0263er Baba\u00bb?\n16:18 Nnan da\u0263en : D acu i d lme\u025bna n \u00abKra n tallit kan\u00bb i \u0263ef i \u0263-d-yemmeslay ? Ur nefhim ara d acu i geb\u0263a a d-yini !\n16:19 Sidna \u0190isa yefhem belli b\u0263an a t-steqsin, d\u0263a yenna-yasen : Te\u021bmesteqsayem \u0263ef wayen i b\u0263i\u0263 a d-ini\u0263 s imeslayen-agi : \u00ab Tallit kan i mazal ur yi-te\u021bwalim ara, tallit da\u0263en a yi-twalim \u00bb ;\n16:20 nni\u0263-awen s tide\u021b : kunwi a\u021b-\u021be\u021brum, a\u021b-\u021bme\u01e7dem, ma d imdanen n ddunit-a ad fe\u1e5b\u1e25en a\u1e6das. Kunwi a\u021b-\u021be\u1e5bwum lqe\u1e5b\u1e25 me\u025bna lqe\u1e5b\u1e25-nwen ad yu\u0263al d lfe\u1e5b\u1e25.\n16:21 M'ara d-tarew tme\u1e6d\u1e6dut te\u021b\u021ben\u025be\u021b\u021bab a\u1e6das di teswi\u025bt-nni, lame\u025bna akken kan ara twali llufan-is ilul-ed te\u021b\u021bu lqe\u1e5b\u1e25-is imi lfe\u1e5b\u1e25-is d ameqqran.\n16:22 Kunwi da\u0263en aql-ikkun te\u021bwaqe\u1e5b\u1e25em tura me\u025bna a d-u\u0263ale\u0263 a kkun-z\u1e5be\u0263, imiren ulawen-nwen ad \u010d\u010da\u1e5ben d lfe\u1e5b\u1e25 ; lfe\u1e5b\u1e25-agi yiwen ur izmir a wen t-yekkes.\n16:23 M'ara d-yas wass-nni ur te\u021b\u021bu\u0263alem ara a yi-testeqsim. A wen ini\u0263 s tide\u021b : ayen akk ara tessutrem i Baba s yisem-iw a wen-t-id-yeqbel.\n16:24 Ar tura ur tessutrem acemma s yisem-iw. Ssutret a wen-d-ye\u021b\u021bunefk akken lfe\u1e5b\u1e25-nwen ad ye\u021bwakemmel.\n16:25 Ayen akk i wen-d-nni\u0263, nni\u0263 awen-t-id s lemtul. A d-yas lweqt ur a wen-d-\u021bmeslaye\u0263 ara akka, a wend hed\u1e5be\u0263 \u025binani \u0263ef wayen ye\u025bnan Baba.\n16:26 Ass-nni a\u021b-\u021bde\u025b\u025bum \u0263er Baba s yisem-iw, yerna ur wen-d-qqa\u1e5be\u0263 ara belli ad d\u025bu\u0263 \u0263er Baba fell-awen.\n16:27 Axa\u1e6der Baba i\u1e25emmel-ikkun imi iyi-t\u1e25emmlem, yerna tumnem belli s \u0263u\u1e5b-es i d-kki\u0263.\n16:28 ?-\u021bide\u021b usi\u0263-ed s \u0263u\u1e5b Baba, usi\u0263-ed \u0263er ddunit, ma \u021b-\u021bura ad \u01e7\u01e7e\u0263 ddunit ad u\u0263ale\u0263 \u0263er Baba.\n16:29 Inelmaden-is nnan-as : Atan tura te\u021bmeslaye\u1e0d-a\u0263-d \u025binani ma\u010d\u010di s lemtul.\n16:30 Tura ne\u1e93ra belli tessne\u1e0d kullec imi uqbel a d-nehde\u1e5b te\u1e93ri\u1e0d \u0263ef wacu i neb\u0263a a k-nesteqsi. ?ef wayagi i numen belli s \u0263u\u1e5b \u1e5aebbi i d-tusi\u1e0d.\n16:31 Sidna \u0190isa yerra-yasen : Tura tumnem !\n16:32 Atan iteddu-d lweqt yerna yewwe\u1e0d-ed, a\u021b \u021bemfa\u1e5baqem \u0263er mkul tama a yi te\u01e7\u01e7em iman-iw. Lame\u025bna ur lli\u0263 ara we\u1e25d-i axa\u1e6der Baba yella yid-i.\n16:33 Ilaq-iyi a wen-d-ini\u0263 da\u0263en annect-agi akken a\u021b-\u021bafem deg-i talwit. A\u021b-\u021b\u025beddim si teswi\u025bin n ddiq di ddunit, a\u021b-\u021bne\u025btabem me\u025bna \u1e63eb\u1e5bet ! Nekk \u0263elbe\u0263 ddunit.\n17:1 Mi d-yenna imeslayen-agi, Sidna \u0190isa yerfed allen-is \u0263er igenni, yenna : -- A Baba, yewwe\u1e0d-ed lweqt ! Sbeggen-ed tamanegt n Mmi-k iwakken ula d ne\u021b\u021ba a d-isbeggen tamanegt-ik !\n17:2 Tefki\u1e0d-as tazmert \u0263ef yemdanen n ddunit me\u1e5b\u1e5ba akken ad yefk tudert n dayem i wid akk i s-d-tefki\u1e0d.\n17:3 Tudert n dayem : d asm'ara issinen yemdanen belli d ke\u010d\u010d i d \u1e5aebbi aw\u1e25id, Illu n tide\u021b, ad issinen da\u0263en \u0190isa Lmasi\u1e25, win akken i d-tcegg\u025be\u1e0d.\n17:4 Sbeggne\u0263-ed tamanegt-ik di ddunit mi kfi\u0263 cc\u0263el-nni i \u0263ef iyi-twekkle\u1e0d.\n17:5 Tura a Baba, \u025buzz-iyi s tmanegt-ik, tin akken i s\u025bi\u0263 asmi lli\u0263 \u0263u\u1e5b-ek uqbel a d-texleq ddunit !\n17:6 Sbeggne\u0263-d isem-ik i yemdanen akk i yi-d-tefki\u1e0d si ddunit. Llan d ayla-k, tu\u0263ale\u1e0d tefki\u1e0d-iyi-ten-id ; nutni \u1e25erzen awal-ik.\n17:7 Tura \u1e93ran belli ayen akk i yi-d-tefki\u1e0d s \u0263u\u1e5b-ek i d-yekka ;\n17:8 axa\u1e6de\u1e5b \u1e63\u1e63aw\u1e0de\u0263-asen-d awal-ik akken yella, yerna qeblen-t. ?ran \u021b-\u021bide\u021b s \u0263u\u1e5b-ek i d-kki\u0263 yerna umnen d ke\u010d\u010d i yi-d-icegg\u025ben.\n17:9 De\u025b\u025bu\u0263 \u0263u\u1e5b-ek fell-asen. Ur de\u025b\u025bu\u0263 ara \u0263ef yemdanen nni\u1e0den lame\u025bna \u0263ef wid i yi-d-tefki\u1e0d, axa\u1e6der nutni d ayla-k.\n17:10 Ayen yellan d ayla-w inek, ayen yellan d ayla-k inu. Tamanegt-iw te\u021bfe\u01e7\u01e7i\u01e7 deg-sen.\n17:11 Q\u1e5bib tura ad ff\u0263e\u0263 si ddunit, a n-\u1e5bu\u1e25e\u0263 \u0263u\u1e5b-ek me\u025bna nutni ad qqimen di ddunit. A Baba, ay Imqeddes ! ?erz-iten s tezmert n yisem-ik, isem-nni i yi-d-tefki\u1e0d iwakken ad u\u0263alen d yiwen, akken nella nekk yid-ek d yiwen.\n17:12 Seg wasmi lli\u0263 gar-asen, \u1e25erze\u0263-ten s tezmert n yisem-ik, isem-agi i yi-d-tefki\u1e0d. ?erze\u0263-ten, yiwen deg-sen ur ye\u025b\u1e5biq anagar win i glaqen ad ye\u025b\u1e5beq, iwakken tira iqedsen ad nnekmalent.\n17:13 Tura a n-u\u0263ale\u0263 \u0263u\u1e5b-ek, qqa\u1e5be\u0263-ed akk annect-agi skud mazal-iyi di ddunit, akken ad \u010d\u010da\u1e5ben wulawen-nsen d lfe\u1e5b\u1e25 am lfe\u1e5b\u1e25-iw ikemlen.\n17:14 Fki\u0263-asen awal-ik me\u025bna at ddunit ke\u1e5bhen-ten axa\u1e6der am nekk am inelmaden-iw ur nelli ara n at ddunit.\n17:15 Ur k-d-ssutre\u0263 ara akken a ten tekkse\u1e0d si ddunit, me\u025bna a ten tmen\u025be\u1e0d si Cci\u1e6dan.\n17:16 Nutni ma\u010d\u010di n ddunit, akken ula d nekk ur lli\u0263 ara n ddunit.\n17:17 ?erz-iten di tide\u021b ; d awal-ik i \u021b-\u021bide\u021b.\n17:18 Akken i yi-d-tcegg\u025be\u1e0d \u0263er ddunit, nekk da\u0263en a ten-cegg\u025be\u0263.\n17:19 ?ef yisem-ik ad sebble\u0263 iman-iw fell-asen, iwakken ula d nutni ad sebblen iman-nsen \u0263ef tide\u021b.\n17:20 Ma\u010d\u010di fell-asen kan i de\u025b\u025bu\u0263, de\u025b\u025bu\u0263 da\u0263en \u0263ef wid akk ara yamnen yis-i s cchada n inelmaden-iw.\n17:21 A k-ssutre\u0263 a Baba ad u\u0263alen akk d yiwen. Akken telli\u1e0d deg-i a Baba nekk da\u0263en lli\u0263 deg-k, ad u\u0263alen d yiwen iwakken at ddunit ad amnen belli d ke\u010d\u010d i yi-d-icegg\u025ben.\n17:22 Fki\u0263-asen tamanegt i yi-d-tefki\u1e0d iwakken ad u\u0263alen d yiwen, akken nella nekk yid-ek d yiwen :\n17:23 nekk deg-sen, ke\u010d\u010d deg-i. Ad u\u0263alen akk d yiwen, iwakken at ddunit me\u1e5b\u1e5ba ad set\u025be\u1e5bfen belli d ke\u010d\u010d i yi-d-icegg\u025ben, yerna t\u1e25emmle\u1e0d-ten akken i yi t\u1e25emmle\u1e0d !\n17:24 A Baba b\u0263i\u0263 wid me\u1e5b\u1e5ba i yi-d tefki\u1e0d ad ilin yid-i anda ara yili\u0263, ad walin tamanegt i yi-d-tefki\u1e0d axa\u1e6der t\u1e25emmle\u1e0d-iyi uqbel a d-texleq ddunit.\n17:25 A Baba, Ke\u010d\u010d yellan d a\u1e25eqqi at ddunit ur k-ssinen ara ma d nekk ssne\u0263-k, wigi \u1e93ran belli d ke\u010d\u010d i yi-d-icegg\u025ben.\n17:26 Sbeggne\u0263-k-id \u0263u\u1e5b-sen yerna mazal a k-id-sbeggne\u0263, iwakken tayri akk i yi-d-tefki\u1e0d a\u021b-\u021bili deg-sen, nekk da\u0263en ad ili\u0263 deg-sen.\n18:1 Mi gfukk ta?allit, Sidna \u0190isa yekker i\u1e5bu\u1e25 ne\u021b\u021ba d inelmaden is, zegren i\u0263zer n Sid\u1e5bun. Dinna tella yiwet n tmazirt kecmen \u0263u\u1e5b-es.\n18:2 Yudas ara t-ixed\u025ben yessen mli\u1e25 amkan-nni, axa\u1e6der Sidna \u0190isa yennum i\u021b\u1e5bu\u1e25u \u0263er dinna ne\u021b\u021ba d inelmaden-is.\n18:3 Yudas yewwi-d yid-es tarba\u025bt n l\u025beske\u1e5b akk-d i\u025bessasen n l\u01e7ame\u025b ; cegg\u025ben-ten-id lmuqedmin imeqqranen d ifariziyen, ww\u1e0den-d \u0263er tmazirt-nni. Wwin-d yid-sen tiftilin, isufa akk-d lesla\u1e25.\n18:4 Sidna \u0190isa ye\u1e93ran akk ayen ara yed\u1e5bun yid-es, iqe\u1e5b\u1e5beb \u0263u\u1e5b-sen yenna yasen : ?ef wanwa i te\u021bnadim ?\n18:5 Nutni rran-as : Ne\u021bnadi \u0263ef \u0190isa ana\u1e63ari ! Sidna \u0190isa yenna-yasen : D nekkini. Yudas, win akken ara t-ixed\u025ben yu\u0263-it l\u1e25al gar-asen.\n18:6 Imi i sen-yenna Sidna \u0190isa \u00ab d nekkini \u00bb, u\u0263alen akk \u0263er deffir, \u0263lin \u0263er lqa\u025ba.\n18:7 Sidna \u0190isa yesteqsa-ten da\u0263en yenna : ?ef wanwa i te\u021bnadim ? Nutni rran-as : ?ef \u0190isa ana\u1e63ari !\n18:8 Sidna \u0190isa yerna yenna-yasen : Nni\u0263-awen-d d nekk ! Ma d nekk i \u0263ef te\u021bnadim, \u01e7\u01e7et widak-agi ad \u1e5bu\u1e25en.\n18:9 Akka i ged\u1e5ba wawal-nni i d yenna yakan : \u00ab Ur sru\u1e25e\u0263 ula d yiwen seg widak i yi-d-tefki\u1e0d. \u00bb\n18:10 Sem\u025bun Bu\u1e6drus yejbed-ed ajenwi, yewwet yis aqeddac n lmuqeddem ameqqran, igzem-as ame??u\u0263 ayeffus. Aqeddac-agi isem-is Ma\u1e5bxus.\n18:11 Sidna \u0190isa yenna i Bu\u1e6drus : Err ajenwi-inek \u0263er titar-is (te\u0263laft-is). E\u025bni ur ilaq ara ad swe\u0263 taqbuct n le\u025btab i yi-d-yefka Baba ?\n18:12 L\u025beske\u1e5b akk-d i\u025bessasen n l\u01e7ame\u025b \u1e6d\u1e6dfen Sidna \u0190isa,\n18:13 wwin-t ye\u021bwarez \u0263er wexxam n ?anna a\u1e0deggal n Kayef yellan d lmuqeddem ameqqran aseggas-nni.\n18:14 Kayef d win akken i sen-yennan i wat Is\u1e5bail : \u00ab Axi\u1e5b ad immet yiwen kan \u0263ef lumma.\u00bb\n18:15 Sem\u025bun Bu\u1e6drus, ne\u021b\u021ba d yiwen unelmad nni\u1e0den teb\u025ben Sidna \u0190isa. Anelmad-agi yessen lmuqeddem ameqqran s yiman-is ; itbe\u025b Sidna \u0190isa mi t-wwin \u0263er wefrag n wexxam n lmuqeddem ameqqran,\n18:16 ma d Bu\u1e6drus yeqqim di be\u1e5b\u1e5ba \u0263er tama n tewwurt. Anelmad-nni yessnen lmuqeddem ameqqran yu\u0263al yeffe\u0263 ed, yehde\u1e5b-as i t\u025bessast n tewwurt, d\u0263a tessekcem Bu\u1e6drus.\n18:17 Taqeddact-nni ye\u021b\u025bassan tawwurt, tenna i Bu\u1e6drus : Ur telli\u1e0d ara ula d ke\u010d\u010d seg inelmaden n wergaz-agi ? Bu\u1e6drus yerra-yas : Xa\u1e6di, ur lli\u0263 ara seg-sen !\n18:18 Iqeddacen akk-d i\u025bessasen ce\u025blen times di lkanun, zzin-as iwakken ad sse\u1e25mun axa\u1e6der d asemmi\u1e0d. Bu\u1e6drus iqe\u1e5b\u1e5beb \u0263u\u1e5b-sen ad ye\u1e93\u1e93i\u1e93en ( ad isse\u1e25mu ) ula d ne\u021b\u021ba.\n18:19 Lmuqeddem ameqqran yebda yesteqsay Sidna \u0190isa \u0263ef wayen ye\u025bnan inelmaden-is d uselmed-ines.\n18:20 Sidna \u0190isa yenna-yas : Hed\u1e5be\u0263 \u025binani zdat l\u0263aci, slemde\u0263 di le\u01e7wame\u025b n wat Is\u1e5bail, slemde\u0263 da\u0263en deg wefrag n l\u01e7ame\u025b iqedsen anda i ge\u021bnejma\u025b l\u0263aci, ur hdi\u1e5be\u0263 ara s tuffra.\n18:21 Iwacu i yi testeqsaye\u1e0d ? Steqsi widak i yi-slan amek i sen-hed\u1e5be\u0263, nutni \u1e93ran akk ayen i d-nni\u0263.\n18:22 Mi d-yenna ayagi, yiwen u\u025bessas yellan zdat-es, yewwet it s use\u1e5bfiq, yenna-yas : Akka ara d-thed\u1e5be\u1e0d i lmuqeddem ameqqran ?\n18:23 Sidna \u0190isa yenna-yas : Ma nni\u0263-ed ayen ixes\u1e5ben, ini yi-d d acu-t ; ma yella \u021b-\u021bide\u021b i d nni\u0263, acu\u0263e\u1e5b i yi-tewte\u1e0d ?\n18:24 Imiren ?anna icegge\u025b Sidna \u0190isa ye\u021bwarez \u0263er Kayef, lmuqeddem ameqqran.\n18:25 Sem\u025bun Bu\u1e6drus mazal-it yeqqim ye\u1e93\u1e93i\u1e93in deg wemkan-nni, ilu\u025ba-t-id yiwen yenna-yas : I ke\u010d\u010d, ur telli\u1e0d ara d yiwen seg inelmaden n wergaz-agi ? Bu\u1e6drus inke\u1e5b yenna-yas : Xa\u1e6di, ur lli\u0263 ara seg-sen !\n18:26 Yiwen seg iqeddacen n lmuqeddem ameqqran, ye\u021b\u021bilin i win akken iwumi yegzem Sem\u025bun Bu\u1e6drus ame??u\u0263, iwehha-d \u0263u\u1e5b-es yenna-yas : Ur k-\u1e93ri\u0263 ara yid-es di tmazirt ?\n18:27 Lame\u025bna Bu\u1e6drus yenke\u1e5b da\u0263en. Imiren kan iskku\u025b uyazi\u1e0d.\n18:28 Mi d-ff\u0263en s \u0263u\u1e5b Kayef, lecyux n wat Is\u1e5bail wwin Sidna \u0190isa \u0263er l\u1e25akem Bila\u1e6dus ; yu\u0263 l\u1e25al d lefjer. Wid i t-yewwin ur kcimen ara \u0263er daxel n lbe\u1e5bj (s\u1e5baya) n Bila\u1e6dus, iwakken ad qqimen d izedganen m'ara \u010d\u010den imensi n l\u025bid n Tfaska.\n18:29 Daymi i d-iffe\u0263 \u0263u\u1e5b-sen Bila\u1e6dus, yesteqsa-ten yenna : D acu i gexdem wergaz-agi ?\n18:30 Rran-as : Lemmer ur yexdim ara ayen n diri, tili ur k-t-id-ne\u021b\u021bawi ara.\n18:31 Bila\u1e6dus yenna-yasen : Atan \u0263u\u1e5b-wen, \u1e25ekmet fell-as s ccari\u025ba-nwen ! Nutni nnan-as : Nukni ur nezmir ara a ne\u1e25kem \u0263ef yiwen s lmut !\n18:32 Ayagi, iwakken ad yed\u1e5bu wayen i d-yenna Sidna \u0190isa \u0263ef lmut i t-ye\u021b\u1e5ba\u01e7un.\n18:33 Bila\u1e6dus yekcem \u0263er wexxam n cc\u1e5be\u025b akken ad ica\u1e5be\u025b Sidna \u0190isa ; yesteqsa-t, yenna-yas : D ke\u010d\u010d i d agellid n wat Is\u1e5bail ?\n18:34 Sidna \u0190isa yerra-yas : Yella win i k-t-id-yennan ne\u0263 d ke\u010d\u010d i t-id-yennan s yiman-ik ?\n18:35 Bila\u1e6dus yerra-yas : T\u1e25esbe\u1e0d-iyi n wat Is\u1e5bail nekkini ? D lmuqedmin imeqqranen d wat n tmurt-ik i k-id-yewwin \u0263u\u1e5b-i ! D acu i txedme\u1e0d ?\n18:36 Sidna \u0190isa yerra-yas : Tagelda-w ma\u010d\u010di n ddunit-agi. Lemmer tagelda-w n ddunit-agi tili iqeddacen-iw nnu\u0263en akken ur d-\u0263elli\u0263 ara ger ifassen n imeqqranen n wat Is\u1e5bail. S tide\u021b tagelda-w ma\u010d\u010di n dagi.\n18:37 Bila\u1e6dus yenna-yas : Ihi d agellid i telli\u1e0d ? Sidna \u0190isa yerra-yas : Tenni\u1e0d-t-id s yiman-ik, d agellid i lli\u0263 ! Lule\u0263-d yerna usi\u0263-ed \u0263er ddunit-agi akken a d-cehde\u0263 \u0263ef tide\u021b. Win i\u1e25emmlen tide\u021b, yesme\u1e25sis i wayen i d-qqa\u1e5be\u0263.\n18:38 Bila\u1e6dus yenna-yas : D acu i \u021b-\u021bide\u021b ? Mi s-d-yenna ayagi, Bila\u1e6dus yu\u0263al \u0263er wat Is\u1e5bail yenna-yasen : Nekk, ur ufi\u0263 ara sebba s wayes ara \u1e25ekme\u0263 \u0263ef wergaz-agi.\n18:39 Me\u025bna akken i tella l\u025badda, di mkul l\u025bid n Tfaska \u021bserri\u1e25e\u0263-awen-d i yiwen ume\u1e25bus ; teb\u0263am ihi a d-serr\u1e25e\u0263 i ugellid n wat Is\u1e5bail ?\n18:40 D\u0263a nutni bdan \u021b\u025beggi\u1e0den, qqa\u1e5ben : Ala ! Ur as-d-\u021bserri\u1e25 ara i ne\u021b\u021ba ! Serre\u1e25-ed i Ba\u1e5babas ! Ba\u1e5babas-agi, d argaz bu tmeg\u1e5ba\u1e0d.\n19:1 Bila\u1e6dus yefka lame\u1e5b ad awin Sidna \u0190isa a t-wten s ujelkka\u1e0d.\n19:2 L\u025beske\u1e5b z\u1e0dan ta\u025be\u1e63\u1e63abt s isennanen, ssersen-as-\u021b \u0263ef wuqe\u1e5b\u1e5buy, selsen-as da\u0263en abe\u1e5bnus azegga\u0263,\n19:3 imiren \u021bqe\u1e5b\u1e5biben \u0263er zdat-es qqa\u1e5ben : Azul fell-ak ay agellid n wat Is\u1e5bail ! Rnan kkaten-t s i\u1e63e\u1e5bfiqen ( ibeqqayen ).\n19:4 Bila\u1e6dus yeffe\u0263-ed da\u0263en \u0263er imeqqranen n wat Is\u1e5bail yenna-yasen : Atan a wen-t-id-awi\u0263 \u0263er dagi akken a\u021b-\u021be\u1e93rem belli ur ufi\u0263 ara deg-s sebba s wayes ara \u1e25ekme\u0263 fell-as.\n19:5 Ssuf\u0263en-d Sidna \u0190isa \u0263er be\u1e5b\u1e5ba s t\u025be\u1e63\u1e63abt-nni n isennanen akk-d ibidi ( abe\u1e5bnus ) azegga\u0263. Bila\u1e6dus yenna-yasen : Atan \u0263u\u1e5b-wen !\n19:6 Mi t-walan imeqqranen n wat Is\u1e5bail d i\u025bessasen, bdan \u021b\u025beggi\u1e0den : Semme\u1e5b-it \u0263ef wumidag ! Semme\u1e5b-it \u0263ef llu\u1e25 ! Bila\u1e6dus yenna yasen : Ma teb\u0263am a t-tsemm\u1e5bem \u0263ef wumidag, atan \u0263u\u1e5b-wen ! Ma d nekk, ur ufi\u0263 ara sebba s wayes ara \u1e25ekme\u0263 fell-as.\n19:7 Lecyux n wat Is\u1e5bail rran-as : Nukni nes\u025ba ccari\u025ba ; ccari\u025ba nne\u0263 teqqa\u1e5b-ed : Argaz am agi ilaq ad yemmet axa\u1e6der yenna-d : \u00ab Nekk d Mmi-s n \u1e5aebbi.\u00bb\n19:8 Imeslayen-agi sxel\u025ben Bila\u1e6dus.\n19:9 Yu\u0263al yekcem \u0263er wexxam n cc\u1e5be\u025b yesteqsa da\u0263en Sidna \u0190isa, yenna-yas : Ansi i d-tekki\u1e0d ? Sidna \u0190isa ur s-d-yerri ara awal.\n19:10 Bila\u1e6dus yenna-yas : Amek ! Ur iyi-d-\u021barra\u1e0d ara awal ? Ur te\u1e93ri\u1e0d ara belli zemre\u0263 a k-ser\u1e25e\u0263, zemre\u0263 da\u0263en ad fke\u0263 lame\u1e5b a k-semm\u1e5be\u0263 \u0263ef wumidag ?\n19:11 Sidna \u0190isa yenna-yas : Ur tezmire\u1e0d i wacemma fell-i anagar ayen i k-d-ye\u021b\u021bunefken seg igenni. Daymi win i yi-d-yewwin ger ifassen-ik yewwi ddnub akte\u1e5b-ik.\n19:12 Seg imiren Bila\u1e6dus ye\u021bqellib amek ara d-iserre\u1e25 i Sidna \u0190isa lame\u025bna lecyux n wat Is\u1e5bail sekkren le\u025bya\u1e0d, qqa\u1e5ben-as : Ma tserr\u1e25e\u1e0d-as i wergaz-agi ur telli\u1e0d ara d a\u1e25bib n Qay\u1e63er, axa\u1e6der win yerran iman-is d agellid, d a\u025bdaw n Qay\u1e63er.\n19:13 Mi gesla i imeslayen-agi, Bila\u1e6dus yessufe\u0263-ed Sidna \u0190isa \u0263er be\u1e5b\u1e5ba, yeqqim \u0263ef wukursi n cc\u1e5be\u025b deg umkan iwumi qqa\u1e5ben s t\u025bib\u1e5banit \u00abGabba\u1e6da\u00bb ye\u025bni \u00abafrag yessan s yebla\u1e0den\u00bb.\n19:14 Ass-nni, d ass uqbel l\u025bid n Tfaska ; a\u021b-\u021bili d le\u01e7wahi n tnac, Bila\u1e6dus yenna i lecyux n at Is\u1e5bail : Atan ugellid-nwen !\n19:15 Me\u025bna nutni rnan \u025begg\u1e0den : En\u0263-it ! En\u0263-it ! Semme\u1e5b-it \u0263ef wumidag ! Bila\u1e6dus yenna-yasen : Amek ! Ad semm\u1e5be\u0263 agellid nwen ? Lecyux n wat Is\u1e5bail rran-as : D Qay\u1e63er i d agellid-nne\u0263, ur nes\u025bi ara agellid nni\u1e0den.\n19:16 D\u0263a Bila\u1e6dus yefka-yasen-t akken a t-semm\u1e5ben \u0263ef wumidag. ?\u1e6dfen-d Sidna \u0190isa\n19:17 sbubben-as amidag, ff\u0263en si temdint, ulin \u0263er wemkan ye\u021b\u021busemman \u00ab ti\u0263ilt n uqe\u1e5b\u1e5buy \u00bb ( iwumi qqa\u1e5ben s t\u025bib\u1e5banit \u00ab Gulgu\u1e6da \u00bb).\n19:18 Dinna i t-semm\u1e5ben \u0263ef llu\u1e25 ne\u021b\u021ba akk-d sin nni\u1e0den. Sbedden imidagen yiwen sya waye\u1e0d sya, Sidna \u0190isa di tlemmast.\n19:19 Bila\u1e6dus yume\u1e5b ad semm\u1e5ben yiwet n telwi\u1e25t sennig uqe\u1e5b\u1e5buy n Sidna \u0190isa, yura deg-s : \u00ab \u0190isa ana\u1e63ari, agellid n wat Is\u1e5bail.\u00bb\n19:20 Imi amkan-nni anda i t-semm\u1e5ben ur yeb\u025bid ara \u0263ef temdint, a\u1e6das n wat Is\u1e5bail i ge\u0263\u1e5ban talwi\u1e25t-nni yuran s t\u025bib\u1e5banit, s tlatinit \u021b-\u021byunanit.\n19:21 Lecyux n wat Is\u1e5bail ccetkan \u0263er Bila\u1e6dus, nnan-as : Ur ilaq ara a\u021b-\u021baru\u1e0d \u0263ef telwi\u1e25t nni \u00abAgellid n wat Is\u1e5bail,\u00bb lame\u025bna ilaq a\u021b-\u021baru\u1e0d \u00abArgaz-agi yenna d : nekk d agellid n wat Is\u1e5bail.\u00bb\n19:22 Bila\u1e6dus yerra-yasen : Ayen uri\u0263 ad yeqqim akken i t-uri\u0263.\n19:23 Mi semm\u1e5ben Sidna \u0190isa \u0263ef wumidag, l\u025beske\u1e5b ddmen-d lqecc-is b\u1e0dan-ten \u0263ef \u1e5beb\u025ba, yal yiwen yewwi amur-is ; yeqqim-ed ujellab-is ur nef\u1e63il ur nxa\u1e0d, mazal-it akken yez\u1e0da seg yixef \u0263er waye\u1e0d.\n19:24 Hedd\u1e5ben wway gar-asen, nnan : Acu\u0263e\u1e5b ara t-ncerreg, eyyaw axi\u1e5b a nger tas\u0263a\u1e5bt fell-as a n\u1e93er anwa ara t-yawin. S wakka i gennekmal wayen yuran di tira iqedsen : Fe\u1e5bqen lqecc-iw, gren tas\u0263a\u1e5bt \u0263ef wube\u1e5bnus-iw.\u00bb Akka i xedmen i\u025bsek\u1e5biyen-nni.\n19:25 Zdat umidag, tbedd yemma-s n Sidna \u0190isa, weltma-s n yemma-s, Meryem tame\u1e6d\u1e6dut n Klufas akk-d Meryem tamagdalit.\n19:26 Mi gwala Sidna \u0190isa yemma-s tbedd \u0263er tama n unelmad-nni i g\u1e25emmel, yenna-yas : A tame\u1e6d\u1e6dut, atan mmi-m.\n19:27 Yenna da\u0263en i unelmad-nni : A\u021ban yemma-k. Seg imiren anelmad-nni yewwi-\u021b \u0263er wexxam-is.\n19:28 Mi ge\u1e93ra Sidna \u0190isa dayen kullec ifuk, yenna iwakken ad nnekmalent tira iqedsen : Ffude\u0263 !\n19:29 Yella dinna ubuqal ye\u010d\u010du\u1e5ben d lxell. Dmen-d ame\u010d\u010dim n ta\u1e0du\u1e6d cudden-t \u0263er yixef n u\u0263anim, sbezgen t-id s lxell-nni, ssaw\u1e0den-as-t \u0263er yimi-s.\n19:30 Akken kan i ge\u025b\u1e5be\u1e0d lxell-nni, Sidna \u0190isa yenna : Kullec ye\u021bwakemmel ! Yessekna aqe\u1e5b\u1e5buy-is, yessufe\u0263 \u1e5b\u1e5bu\u1e25.\n19:31 Tafaska n izimer n leslak ye\u0263li-d deg wass n weste\u025bfu. Tameddit n wass uqbel ass n weste\u025bfu, lecyux n wat Is\u1e5bail ur b\u0263in ara ad \u01e7\u01e7en l\u01e7e\u021b\u021bat-nni \u0263ef yimidagen di le\u025bwace\u1e5b. \u1e5au\u1e25en ad ssutren i Bila\u1e6dus a sen-\u1e5b\u1e93en i\u1e0da\u1e5b\u1e5ben i widak-nni ye\u021bwasemm\u1e5ben ; iwakken ad kksen l\u01e7e\u021b\u021bat-nsen.\n19:32 L\u025beske\u1e5b \u1e5bu\u1e25en, \u1e5b\u1e93an i\u1e0da\u1e5b\u1e5ben i yiwen seg widak-nni ye\u021bwasemm\u1e5ben \u021b-\u021bama n Sidna \u0190isa, syenna u\u0263alen \u0263er waye\u1e0d.\n19:33 Mi ww\u1e0den \u0263er Sidna \u0190isa, ufan-t yemmut yakan, daymi ur s-\u1e5bzin ara i\u1e0da\u1e5b\u1e5ben-is.\n19:34 Yiwen u\u025besk\u1e5bi yessenta yas isekkin deg idis, imiren ff\u0263en-d waman akk-d idammen seg-s.\n19:35 Win i d-ye\u1e25kan \u0263ef wannect-agi d inigi n \u1e63\u1e63e\u1e25, axa\u1e6der d ayen i ge\u1e93ra s wallen-is. Yez\u1e5ba \u021b-\u021bide\u021b i d-yenna, yenna-t-id akken a\u021b-\u021bamnem ula d kunwi.\n19:36 Ayagi me\u1e5b\u1e5ba yed\u1e5ba iwakken ad ye\u021b\u021bukemmel wayen yuran di tira iqedsen : Ula d yiwen seg ye\u0263san-is ur ye\u021b\u1e5buz.\n19:37 Yura da\u0263en : Ad ssersen tamu\u0263li \u0263ef win i fetken.\n19:38 Deffir wannect-agi me\u1e5b\u1e5ba, Yusef n taddart n Arimati i\u1e5bu\u1e25 yessuter i Bila\u1e6dus a t-ye\u01e7\u01e7 ad yawi l\u01e7e\u021b\u021ba n Sidna \u0190isa. Ne\u021b\u021ba da\u0263en yella d anelmad-is, lame\u025bna yeffer iman-is axa\u1e6der i\u021b\u021baggad lecyux n wat Is\u1e5bail. Bila\u1e6dus yeqbel wayen i s-d yessuter ; d\u0263a Yusef i\u1e5bu\u1e25 a d-yawi l\u01e7e\u021b\u021ba n Sidna \u0190isa ne\u021b\u021ba d Nikudem,\n19:39 win akken i g\u1e5bu\u1e25en deg yi\u1e0d \u0263er Sidna \u0190isa. Nikudem yewwi-d yid-es azal n tlatin litrat n le\u025b\u1e6de\u1e5b ixeddmen i lmegtin.\n19:40 Di sin yid-sen, wwin-d l\u01e7e\u021b\u021ba n Sidna \u0190isa xedmen-as le\u025b\u1e6de\u1e5b akken i tella l\u025badda n wat Is\u1e5bail, imiren \u021b\u021blen-t s lekfen.\n19:41 Zdat wemkan anda semm\u1e5ben Sidna \u0190isa, tella deg yiwet n tmazirt yiwen n yefri ye\u021bwaheggan d a\u1e93ekka, ulac win i gme\u1e0dlen deg-s.\n19:42 Imi i geq\u1e5beb yefri-nni, rran l\u01e7e\u021b\u021ba n Sidna \u0190isa \u0263er daxel, axa\u1e6der ass i d-iteddun d ass n weste\u025bfu n wat Is\u1e5bail.\n20:1 Ass n l\u1e25edd, \u1e63\u1e63be\u1e25 zik qbel ad yali wass, Meryem tamagdalit t\u1e5bu\u1e25 \u0263er u?ekka. Twala az\u1e5bu-nni iqeflen imi n u?ekka ye\u021bwakkes.\n20:2 Imiren kan tuzzel a\u021b-\u021bessiwe\u1e0d lexba\u1e5b i Sem\u025bun Bu\u1e6drus akk-d unelmad-nni i g\u1e25emmel Sidna \u0190isa. Tenna-yasen : Kksen-d Ssid-nne\u0263 seg u?ekka, ur ne\u1e93ri ara anda i t-rran.\n20:3 Bu\u1e6drus d unelmad-nni ddukklen, \u1e5bu\u1e25en \u0263er u?ekka.\n20:4 Uzzlen i sin, lame\u025bna anelmad-nni ye\u01e7\u01e7a Bu\u1e6drus \u0263er deffir, yewwe\u1e0d d amezwaru.\n20:5 Imuqel \u0263er daxel n u?ekka, iwala lekfen di lqa\u025ba, lame\u025bna ur yekcim ara.\n20:6 Sem\u025bun Bu\u1e6drus i t-id-iteb\u025ben il\u1e25eq-ed. Yekcem \u0263er daxel u?ekka, iwala lekfen di lqa\u025ba,\n20:7 ma d ace\u1e6d\u1e6di\u1e0d s wayes ye\u021b\u021bel uqe\u1e5b\u1e5buy n Sidna \u0190isa ur yelli ara akk-d lekfen-nni, me\u025bna yers \u0263er rrif, mazal-it deg wemkan-is akken ye\u021b\u021bel.\n20:8 Anelmad-nni i geww\u1e0den d amezwaru, yekcem ula d ne\u021b\u021ba \u0263er u\u1e93ekka. Mi gwala, yumen.\n20:9 Axa\u1e6der armi d imiren, ur\u025bad fhimen belli Sidna \u0190isa ilaq a d ye\u1e25yu si ger lmegtin akken yura di tira iqedsen.\n20:10 Sin inelmaden-nni u\u0263alen \u0263er yexxamen-nsen.\n20:11 Yu\u0263 l\u1e25al Meryem tella di be\u1e5b\u1e5ba, te\u021bru tama n u?ekka. Mi tella te\u021bru, tmuqel \u0263er daxel,\n20:12 twala snat lmalayekkat s llebsa tamellalt, qqimen deg wemkan-nni anda akken i ssersen l\u01e7e\u021b\u021ba n Sidna \u0190isa, yiwen \u0263er uqe\u1e5b\u1e5buy waye\u1e0d \u0263er i\u1e0da\u1e5b\u1e5ben,\n20:13 nnan-as : Acu\u0263e\u1e5b i te\u021bru\u1e0d ? Meryem tenna-yasen : Wwin Ssid-iw, yerna ur \u1e93ri\u0263 ara anda i t-rran !\n20:14 Ur\u025bad d-tfuk ameslay tmuqel \u0263er deffir, twala Sidna \u0190isa ibedd-ed, lame\u025bna ur te\u025bqil ara belli d ne\u021b\u021ba.\n20:15 Sidna \u0190isa yenna-yas : Acu\u0263e\u1e5b i te\u021bru\u1e0d ? ?ef wanwa i te\u021bqellibe\u1e0d ? Meryem t\u0263il d a\u025bessas n tmazirt, tenna-yas : Ma yella d ke\u010d\u010d i t-iddmen, ini-yi-d \u0263er wanda i t-tewwi\u1e0d akken ad \u1e5bu\u1e25e\u0263 a t-id-awi\u0263.\n20:16 Sidna \u0190isa ilu\u025ba-\u021b-id yenna-yas : Meryem ! Tezzi \u0263u\u1e5b-es, d\u0263a tenna-yas s t\u025bib\u1e5banit : Rabuni ! ( ye\u025bni : a Sidi ! )\n20:17 Sidna \u0190isa yenna-yas : Ur yi-d-\u021bmassa ara, axa\u1e6der ur\u025bad uli\u0263 \u0263er Baba. Lame\u025bna \u1e5bu\u1e25 ini-yasen i watmaten-iw : aql-iyi ad ali\u0263 \u0263er Baba yellan d Baba-twen, \u0263er Yillu-yiw yellan d Illu-nwen.\n20:18 Meryem tamagdalit t\u1e5bu\u1e25 a\u021b \u021bessiwe\u1e0d lexba\u1e5b i inelmaden. Tenna yasen : ?ri\u0263 Ssid-nne\u0263, atah wayen i yi-d-yenna ...\n20:19 Ass n l\u1e25edd tameddit, inelmaden llan deg yiwen wexxam \u0263elqen tiwwura axa\u1e6der uggaden at Is\u1e5bail. Ataya Sidna \u0190isa ibedd-ed gar-asen, yenna-yasen : Sslam fell-awen !\n20:20 Akken i gsellem fell-asen isken asen-d ifassen-is akk-d yidis-is. Inelmaden fe\u1e5b\u1e25en a\u1e6das imi walan Ssid-nsen.\n20:21 Sidna \u0190isa yenna-yasen da\u0263en : Sslam fell-awen. Akken i yi-d icegge\u025b Baba, nekk da\u0263en a kkun cegg\u025be\u0263.\n20:22 Mi d-yenna annect-agi, isu\u1e0d \u0263ef yinelmaden-is, yerna yenna-yasen : St\u1e5be\u1e25bet s \u1e5a\u1e5bu\u1e25 iqedsen.\n20:23 Wid iwumi ara tsem\u1e25em ddnubat a sen \u021bwasem\u1e25en, ma d wid iwumi ur te\u021bsemmi\u1e25em ara ddnubat-nsen ad qqimen i yirawen-nsen.\n20:24 ?uma, iwumi qqa\u1e5ben Akniw, yellan d yiwen si tnac-nni, ur yelli ara yid-sen mi d-yusa Sidna \u0190isa.\n20:25 Inelmaden nni\u1e0den nnan-as : Ne\u1e93ra Sidna \u0190isa ! Me\u025bna ne\u021b\u021ba yerra-yasen : Ma yella ur wala\u0263 ara ccwami n imesma\u1e5ben deg ifassen-is, ma yella ur srise\u0263 ara a\u1e0dad-iw anda ntan imesma\u1e5ben, ma yella ur srise\u0263 ara afus-iw \u0263ef yidis-is, ur \u021bamne\u0263 ara.\n20:26 Mi \u025beddan tmanya n wussan, inelmaden nnejma\u025ben da\u0263en deg wexxam. Tikkelt-agi ?uma yella yid-sen. Ataya Sidna \u0190isa yekcem-ed \u0263u\u1e5b-sen \u0263as akken \u0263elqent tewwura. Ibedd gar-asen, yenna-yasen : Sslam fell-awen !\n20:27 Sidna \u0190isa yenna i ?uma : Awi-d a\u1e0dad-ik atnan ifassen-iw, qe\u1e5b\u1e5beb-ed afus-ik tserse\u1e0d-t \u0263ef yidis-iw. Ur jehhel ara, amen !\n20:28 ?uma yerra-yas : A Ssid-iw ! Ay Illu-yiw !\n20:29 Sidna \u0190isa yenna-yas : Armi i yi-twala\u1e0d i tumne\u1e0d ! Amarezg n win ara yamnen mbla ma iwala.\n20:30 A\u1e6das n lbe\u1e5bhanat i gexdem da\u0263en Sidna \u0190isa zdat inelmaden-is, ur d-temmeslay ara fell-asen tektabt-agi.\n20:31 Lame\u025bna ayen akk i d-ye\u021bwajem\u025ben deg-s yura-d iwakken a\u021b-\u021bamnem belli d \u0190isa i d Lmasi\u1e25, d Mmi-s n \u1e5aebbi yerna ma tumnem yis a\u021b-\u021bes\u025bum tudert s yisem-is.\n21:1 Syin akkin, Sidna \u0190isa isbeggen-ed iman-is da\u0263en i inelmaden-is \u0263ef rrif n leb\u1e25e\u1e5b n Tiberyas. Atah wamek i ted\u1e5ba :\n21:2 Sem\u025bun Bu\u1e6drus, ?uma iwumi qqa\u1e5ben Akniw, Natanahil n taddart n Kana yellan di tmurt n Jlili, arraw n Zabadi akk-d sin inelmaden nni\u1e0den ddukklen akken.\n21:3 Sem\u025bun Bu\u1e6drus yenna-yasen : Ad \u1e5bu\u1e25e\u0263 a d-\u1e63egg\u1e0de\u0263 iselman. Nutni nnan-as : Ula d nukkni a neddu yid-ek. D\u0263a \u1e5bu\u1e25en rekben taflukt, \u1e63eggden i\u1e0d kamel ur d-\u1e6d\u1e6difen ula d yiwen u\u1e25ewtiw.\n21:4 Akken yebda ye\u021b\u021bali wass, ataya Sidna \u0190isa ibedd-ed \u0263ef rrif n leb\u1e25e\u1e5b ; inelmaden ur t-e\u025bqilen ara d ne\u021b\u021ba.\n21:5 Sidna \u0190isa yessawel-asen : Ay arrac, te\u1e6d\u1e6dfem-d kra n l\u1e25ut ne\u0263 ala ? Nutni rran-as : Ur d-ne\u1e6d\u1e6dif ula d yiwen !\n21:6 Sidna \u0190isa yenna-yasen : ?egg\u1e5bet acebbak \u0263er tama tayeffust n teflukt a d-te\u1e6d\u1e6dfem. Degg\u1e5ben acebbak \u0263er wanda i sen-d-yenna, mi t-id-ssulin ye\u010d\u010du\u1e5b ed d l\u1e25ut armi ur zmiren ara a t-id refden.\n21:7 Anelmad-nni i g\u1e25emmel Sidna \u0190isa, yenna i Bu\u1e6drus : D Sidna \u0190isa !\u0263 Mi gesla belli d Sidna \u0190isa, Sem\u025bun Bu\u1e6drus yekksen aqendu\u1e5b-is mi gella ye\u021b\u1e63eggid, yelsa-t, d\u0263a i\u1e0degge\u1e5b iman-is \u0263er waman.\n21:8 Inelmaden nni\u1e0den u\u0263alen-d s teflukt \u0263er rrif, zzu\u0263\u1e5ben-d yid-sen acebbak nni ye\u010d\u010du\u1e5ben d iselman. Llan be\u025bden \u0263ef rrif azal n meyya n lmitrat.\n21:9 Mi d-rsen \u0263er lqa\u025ba, ufan-d a\u0263\u1e5bum akk-d l\u1e25ut s ufella n yirrij n tmes.\n21:10 Sidna \u0190isa yenna-yasen : Awit-ed kra n iselman seg wid i d-te\u1e6d\u1e6dfem.\n21:11 Sem\u025bun Bu\u1e6drus yuli \u0263er teflukt, ijebd-ed acebbak-nni, ye\u1e93\u1e93u\u0263er-it-id \u0263er lqa\u025ba. Ufan deg-s meyya utlata uxemsin iselman imeqqranen ; \u0263as akken ye\u010d\u010du\u1e5b ucebbak-nni ur iqqe\u1e5bs ara.\n21:12 Sidna \u0190isa yenna-yasen : Qe\u1e5b\u1e5bbet-ed a\u021b-\u021be\u010d\u010dem. Ula d yiwen seg inelmaden-nni ur yezmir a s-yini \u00ab anwa-k ? \u00bb ?ran akk belli d Sidna \u0190isa.\n21:13 Sidna \u0190isa iqe\u1e5b\u1e5beb \u0263u\u1e5b-sen, if\u1e5beq-asen a\u0263\u1e5bum-nni d iselman-nni.\n21:14 ?-\u021bikkelt tis tlata i d-yesken iman-is Sidna \u0190isa i inelmaden-is seg wasmi i d-ye\u1e25ya si lmut. Sidna \u0190isa akk-d Bu\u1e6drus\n21:15 Mi kfan u\u010d\u010di, Sidna \u0190isa yenna i Sem\u025bun Bu\u1e6drus : A Sem\u025bun mmi-s n Yunes, t\u1e25emmle\u1e0d-iyi akte\u1e5b n wigi ? Sem\u025bun Bu\u1e6drus yenna-yas : Ih a Sidi, te\u1e93ri\u1e0d \u1e25emmle\u0263-k. Sidna \u0190isa yenna-yas : ?\u1e25adar izamaren-iw.\n21:16 Sidna \u0190isa yenna-yas tikkelt tis snat : A Sem\u025bun mmi-s n Yunes, t\u1e25emmle\u1e0d-iyi ? Yerra-yas : Ih te\u1e93ri\u1e0d \u1e25emmle\u0263-k a Sidi ! Sidna \u0190isa yenna-yas : Kess ulli-inu.\n21:17 Sidna \u0190isa yesteqsa-t tikkelt tis tlata, yenna-yas : A Sem\u025bun mmi-s n Yunes, t\u1e25emmle\u1e0d-iyi ? Sem\u025bun Bu\u1e6drus i\u0263a\u1e0d-it l\u1e25al, axa\u1e6der \u021b-\u021bikkelt tis tlata i t-id-yesteqsa : \u00ab Ma t\u1e25emmle\u1e0d-iyi ?\u00bb. D\u0263a yenna-yas : A Sidi, te\u1e93ri\u1e0d kullec, te\u1e93ri\u1e0d belli \u1e25emmle\u0263-k ! Sidna \u0190isa yenna-yas : ?\u1e25adar ulli-inu.\n21:18 Qqa\u1e5be\u0263-ak s tide\u021b : asmi me??iye\u1e0d, te\u021bbeggise\u1e0d i yiman-ik we\u1e25d-ek, te\u021b\u1e5bu\u1e25u\u1e0d anda teb\u0263i\u1e0d. Lame\u025bna asm'ara tu\u0263ale\u1e0d d am\u0263a\u1e5b, a\u021b-\u021b\u1e0delqe\u1e0d i\u0263allen-ik i waye\u1e0d akken a k-yebges yerna a k yawi \u0263er wanda ur teb\u0263i\u1e0d ara a\u021b-\u021b\u1e5bu\u1e25e\u1e0d.\n21:19 S imeslayen-agi, issem\u025ben-ed amek ara yemmet Sem\u025bun Bu\u1e6drus \u0263ef ddemma n tmanegt n Sidi \u1e5aebbi. Mi d-yenna ayagi, yenna-yas da\u0263en : Ddu-d yid-i !\n21:20 Bu\u1e6drus yezzi \u0263er deffir, iwala anelmad-nni i g\u1e25emmel Sidna \u0190isa iteddu-d deffir-nsen. Anelmad-agi d win akken i geknan \u0263er Sidna \u0190isa asmi llan te\u021b\u021ben imensi, i s yennan : \u00abA Sidi, anwa ara k ixed\u025ben ?\u00bb\n21:21 Mi t-iwala, Bu\u1e6drus yesteqsa Sidna \u0190isa yenna-yas : I ne\u021b\u021ba a Sidi, d acu ara yed\u1e5bun yid-es ?\n21:22 Sidna \u0190isa yenna-yas : Ma b\u0263i\u0263 ad yidir alamma d asm'ara d-u\u0263ale\u0263, d acu i k yecqan ? Ke\u010d\u010d tbe\u025b-iyi-d !\n21:23 ?ef wannect-agi i geffe\u0263 lexba\u1e5b ger watmaten, qqa\u1e5ben : \u00ab Anelmad-agi ur ye\u021bme\u021b\u021bat ara \u00bb. S tide\u021b, Sidna \u0190isa ur d-yenni ara belli anelmad-agi ur ye\u021bme\u021b\u021bat ara lame\u025bna yenna-d kan : \u00ab Ma b\u0263i\u0263 ad yidir alamma asm'ara d u\u0263ale\u0263, d acu i k yecqan ? \u00bb\n21:24 D anelmad-agi i d-ixebb\u1e5ben \u0263ef wannect-agi yerna yura-t-id. Ne\u1e93ra belli cchada-ines t\u1e63e\u1e25\u1e25a.\n21:25 Sidna \u0190isa yexdem da\u0263en a\u1e6das n lec\u0263al nni\u1e0den. Lemmer a ten-id ne\u1e25ku yiwen yiwen, ur cukke\u0263 ara ddunit me\u1e5b\u1e5ba a\u021b-\u021bawi tiktabin ara naru.","title":"Kabyle Bible (NT): John","type":"page"}