{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/luk.htm","path":"bib/wb/kab/luk.htm","source_url":"https://sacred-texts.com/bib/wb/kab/luk.htm","text":"1:1 Imi a\u1e6das i gebdan tira \u0263ef wayen yed\u1e5ban gar-ane\u0263,\n1:2 akken i \u0263-t-id \u025bawden wid yellan d inigan si tazwara, iwalan kullec s wallen-nsen ; u\u0263alen d iqeddacen n wawal n Sidi \u1e5aebbi.\n1:3 Steqsa\u0263 ula d nekk akken ilaq \u0263ef wayen akk yed\u1e5ban seg wass amezwaru, ufi\u0263 d ayen yelhan a k-t-id aru\u0263 a Tawfilus,\n1:4 iwakken a\u021b-\u021bissine\u1e0d tide\u021b \u0263ef wayen i tesli\u1e0d me\u1e5b\u1e5ba.\n1:5 Di zzman n Hi\u1e5budus, agellid n tmurt n Yahuda, yella yiwen n lmuqeddem si tejma\u025bt n Abya, isem-is Zakarya. Tame\u1e6d\u1e6dut-is Ilicaba, seg izu\u1e5ban n Ha\u1e5bun.\n1:6 D i\u1e25eqqiyen i llan i sin, \u1e25erzen yerna \u1e0du\u025ben awal n Sidi \u1e5aebbi.\n1:7 Ur s\u025bin ara dderya, meqq\u1e5bit i sin di le\u025bme\u1e5b yerna Ilicaba \u021b-\u021bi\u025biqe\u1e5bt.\n1:8 Mi d-tewwe\u1e0d nnuba n leqdic n wedrum n Zakarya di l\u01e7ame\u025b iqedsen\n1:9 akken i tella di l\u025badda n lmuqedmin, gren tas\u0263a\u1e5bt, t\u1e63a\u1e25-ed Zakarya iwakken ad ikcem \u0263er wemkan iqedsen ad isse\u1e5b\u0263 lebxu\u1e5b.\n1:10 Mi gella isse\u1e5b\u0263ay lebxu\u1e5b di l\u01e7ame\u025b, l\u0263aci me\u1e5b\u1e5ba yeqqimen di be\u1e5b\u1e5ba de\u025b\u025bun \u0263er Sidi \u1e5aebbi.\n1:11 I\u1e0dhe\u1e5b-as-d yiwen lmelk n Sidi \u1e5aebbi, ibedd \u0263er tama tayeffust n udekkan-nni anda sse\u1e5b\u0263ayen lebxu\u1e5b.\n1:12 Mi t-iwala Zakarya, yedhec ikcem-it lxuf.\n1:13 Lmelk-nni yenna yas -ed : Ur \u021b\u021bagad ara a Zakarya, ayen i tessutre\u1e0d \u0263er Sidi \u1e5aebbi ye\u021bwaqbel. Tame\u1e6d\u1e6dut-ik Ilicaba ad a k-d-tes\u025bu aqcic, a s-tsemmi\u1e0d Ye\u1e25ya.\n1:14 A\u021b-\u021bfe\u1e5b\u1e25e\u1e0d yis, a k-yili d sebba n sse\u025bd ; imdanen me\u1e5b\u1e5ba ad fe\u1e5b\u1e25en s tlalit-is.\n1:15 Ad yes\u025bu ccan d ameqqran \u0263er Sidi \u1e5aebbi, a d-i\u010d\u010da\u1e5b d \u1e5a\u1e5bu\u1e25 iqedsen si t\u025bebbu\u1e6d n yemma-s, ur itess cc\u1e5bab, ur itess ayen nni\u1e0den isekk\u1e5ben.\n1:16 A d-yerr a\u1e6das n wat Is\u1e5bail \u0263er webrid n Sidi \u1e5aebbi.\n1:17 Ad il\u1e25u s le\u025bnaya n Sidi \u1e5aebbi, s \u1e5b\u1e5bu\u1e25 \u021b-\u021bezmert n nnbi Ilyas. Ad issemlil imawlan d warraw-nsen, a d-yerr wid ijehlen \u0263er webrid n i\u1e25eqqiyen, akken ad iheggi i Sidi \u1e5aebbi agdud ara t-i\u1e0du\u025ben.\n1:18 Zakarya yenna i lmelk : Amek ara \u025beqle\u0263 belli ayen akka i d-tenni\u1e0d \u021b-\u021bide\u021b ? Nekk d am\u0263a\u1e5b, ula \u021b-\u021bame\u1e6d\u1e6dut-iw meqq\u1e5bet di le\u025bme\u1e5b !\n1:19 Lmelk-nni yerra-yas-d : Nekk d Jebrayil, d aqeddac n Sidi \u1e5aebbi ; usi\u0263-ed s \u0263u\u1e5b-es iwakken a k-d-awi\u0263 lexba\u1e5b-agi n lxi\u1e5b.\n1:20 Lame\u025bna imi ur tumine\u1e0d ara s yimeslayen-iw atan a\u021b-\u021beggugme\u1e0d, ur d-i\u021beffe\u0263 ara wawal seg yimi-k alamma d asmi ara d-yed\u1e5bu wannect-agi. Me\u025bna \u1e25\u1e63u belli ayen akka i k-d-nni\u0263 ad yed\u1e5bu deg wass-is.\n1:21 L\u0263aci-nni ye\u021b\u1e5ba\u01e7un Zakarya deg ufrag, wehmen acu\u0263e\u1e5b i\u025be\u1e6d\u1e6del deg umkan iqedsen n l\u01e7ame\u025b.\n1:22 Mi d-iffe\u0263, yeggugem, ur izmir ara a d-yessufe\u0263 awal ; l\u0263aci-nni fehmen belli iwe\u1e25\u1e25a-yas-ed kra Sidi \u1e5aebbi. Yebda i\u021bwehhi-yasen-d s ifassen-is, yeqqim d agugam.\n1:23 Mi kfan wussan n lxedma-s di l\u01e7ame\u025b, Zakarya yu\u0263al \u0263er wexxam-is.\n1:24 \u0190eddan kra n wussan, tame\u1e6d\u1e6dut-is Ilicaba terfed tadist ; d\u0263a tesse\u1e25jeb iman-is xemsa wagguren, teqqa\u1e5b :\n1:25 Atan Sidi \u1e5aebbi yerra-d ddehn-is \u0263u\u1e5b-i, ikkes-iyi l\u025bib zdat yemdanen.\n1:26 Aggur wis se\u021b\u021ba, Sidi \u1e5aebbi icegge\u025b-d lmelk Jebrayil \u0263er taddart n Na\u1e63aret, di tmurt n Jlili.\n1:27 Icegge\u025b-it-id \u0263er yiwet n tlem\u1e93it i gex\u1e0deb yiwen wergaz isem-is Yusef, yellan seg izu\u1e5ban n Sidna Dawed. Tilem\u1e93it-agi isem-is Meryem.\n1:28 Ikcem lmelk \u0263u\u1e5b-es yenna-yas : Sslam fell-am a tin iburek Sidi \u1e5aebbi ! Sidi \u1e5aebbi yella yid-em.\n1:29 Meryem tedhec, tenna : D acu i d lme\u025bna n imeslayen agi ?\n1:30 Lmelk yenna-yas : Ur \u021b\u021baggad ara a Meryem ! S \u1e5b\u1e5be\u1e25ma-s tameqqrant, Sidi \u1e5aebbi yexta\u1e5b-ikem.\n1:31 Atan a\u021b-\u021brefde\u1e0d tadist, a d-tes\u025bu\u1e0d aqcic, semmi-yas \u0190isa, (ye\u025bni : \u00ab Amsellek \u00bb)\n1:32 Ad yes\u025bu ccan d ameqqran, ad i\u021b\u021busemmi Mmi-s n Sidi \u1e5aebbi \u025blayen. Sidi \u1e5aebbi a t-yerr d agellid akken i t-yella Sidna Dawed, yiwen si lejdud-is.\n1:33 Ad i\u1e25kem \u0263ef tarwa n Ye\u025bqub i dayem, tageldit-is ur tfennu ara.\n1:34 Meryem tenna i lmelk-nni : Amek ara d-id\u1e5bu yid-i wayagi nekk ur nezwi\u01e7 ara ?\n1:35 Lmelk yerra-yas : Atan a d-yers fell-am \u1e5a\u1e5bu\u1e25 iqedsen ; tazmert n Sidi \u1e5aebbi \u025blayen a kem-t\u0263umm am tili, daymi aqcic-agi imqeddes ara d-ilalen ad i\u021b\u021bsemmi \u00ab Mmi-s n \u1e5aebbi \u00bb.\n1:36 Ilicaba i m-i\u021b\u021bilin, ula d ne\u021b\u021bat a\u021ban s tadist a d-tes\u025bu aqcic \u0263as akken meqq\u1e5bet di le\u025bme\u1e5b. Tin akken iwumi semman ti\u025biqe\u1e5bt, a\u021ban deg waggur wis se\u021b\u021ba,\n1:37 imi ulac wayen iwumi ur izmir Sidi \u1e5aebbi.\n1:38 Meryem tenna : Aql-i \u021b-\u021baqeddact n Sidi \u1e5aebbi, ad id\u1e5bu yid-i wayen i d-tenni\u1e0d. Imiren Lmelk-nni ye\u01e7\u01e7a-\u021b, i\u1e5bu\u1e25.\n1:39 Deg wussan-nni, Meryem tekker t\u1e5bu\u1e25 s lem\u0263awla \u0263er yiwet n taddart yellan deg idurar n tmurt n Yahuda.\n1:40 Tekcem \u0263er wexxam n Zakarya, tsellem \u0263ef Ilicaba.\n1:41 Akken i tesla Ilicaba i sslam n Meryem, yefrawes llufan yellan di t\u025bebbu\u1e6d-is ; imiren te\u010d\u010du\u1e5b d \u1e5a\u1e5bu\u1e25 iqedsen,\n1:42 t\u025begge\u1e0d tenna : A Meryem, te\u021b\u021bubarke\u1e0d ger tilawin me\u1e5b\u1e5ba, i\u021b\u021bubarek da\u0263en win yellan di t\u025bebbu\u1e6d-im.\n1:43 D acu-yi, iwakken a d-terzef \u0263u\u1e5b-i yemma-s n Ssid-iw ?\n1:44 Akken kan i sli\u0263 i sslam-im, llufan yellan di t\u025bebbu\u1e6d-iw yefrawes s lfe\u1e5b\u1e25.\n1:45 ?-\u021base\u025bdit kemm yumnen s wayen i m-d-yenna Sidi \u1e5aebbi !\n1:46 Meryem tenna : Ta\u1e5bwi\u1e25t-iw te\u1e25med Sidi \u1e5aebbi,\n1:47 ul-iw ye\u010d\u010du\u1e5b d lfe\u1e5b\u1e25 imi d ne\u021b\u021ba i d amsellek-iw,\n1:48 axa\u1e6der iwala-yi-d nekk taqeddact-is tame\u0263bunt ur nes\u025bi azal. Sya d asawen si l\u01e7il \u0263er l\u01e7il a yi-qqa\u1e5ben : \u00ab \u021b-\u021base\u025bdit \u00bb,\n1:49 imi Sidi \u1e5aebbi Bab n tezmert, yexdem yis-i ayen issewhamen. Isem-is d imqeddes.\n1:50 \u1e5a\u1e5be\u1e25ma-s te\u021bdum si l\u01e7il \u0263er l\u01e7il \u0263ef wid akk i t-i\u1e0du\u025ben.\n1:51 Isken-ed tazmert n yi\u0263il-is, isse\u025b\u1e5beq iberdan i wid ye\u021bzuxxun ;\n1:52 yessers-ed imeqqranen seg imukan e\u025blayen, yerfed wid ye\u021bwa\u1e25eq\u1e5ben ;\n1:53 yesse\u1e5bwa-yasen le\u1e5b\u1e93aq i wid yellu\u1e93en, ma d ime\u1e5bkantiyen yerra-ten ifassen d ilmawen.\n1:54 Isellek tarwa n wat Is\u1e5bail yellan d iqeddacen-is, ur i\u021b\u021bu ara \u1e5a\u1e5be\u1e25ma-s,\n1:55 i gew\u025bed i Sidna Ib\u1e5bahim d warraw-is i dayem akken i t-yenna i lejdud-nne\u0263.\n1:56 Meryem teqqim \u0263er Ilicaba azal n tlata wagguren d wamek i tu\u0263al \u0263er taddart-is.\n1:57 Yewwe\u1e0d-ed lweqt i deg ara d-tarew Ilicaba, tes\u025ba-d aqcic.\n1:58 Imawlan-is d l\u01e7iran-is fe\u1e5b\u1e25en a\u1e6das mi slan s \u1e5b\u1e5behma i d-issers fell-as Sidi \u1e5aebbi.\n1:59 Mi ww\u1e0den tmanya n wussan \u0263ef weqcic-nni, usan-d a s-s\u1e0deh\u1e5ben, b\u0263an a s-semmin s yisem n baba-s : Zakarya.\n1:60 D\u0263a ten\u1e6deq-ed yemma-s tenna-yasen : Xa\u1e6di ! A s-nsemmi Ye\u1e25ya !\n1:61 Nnan-as : Ula d yiwen deg wedrum-nwen ur yes\u025bi isem-agi.\n1:62 Steqsan baba-s s uwehhi amek yeb\u0263a ad isemmi i mmi-s.\n1:63 Issuter asen-d talwi\u1e25t, yura-yasen-d deg-s : \u00ab Ye\u1e25ya i d isem-is \u00bb. D\u0263a wehmen me\u1e5b\u1e5ba.\n1:64 Imiren kan iserre\u1e25 yiles-is, yebda ihedde\u1e5b, ye\u021b\u1e25emmid \u1e5aebbi i\u021bcekki\u1e5b-it.\n1:65 Imezda\u0263 n l\u01e7iha-nni me\u1e5b\u1e5ba wehmen, t\u025be\u01e7\u01e7ben. Deg idurar n tmurt n Yahuda \u021bmeslayen akk \u0263ef wayen yed\u1e5ban.\n1:66 Wid akk yeslan imeslayen-nni, \u1e25erzen-ten deg wulawen-nsen, qqa\u1e5ben : d acu ara d-iffe\u0263 weqcic-agi ? Axa\u1e6der s tide\u021b afus n Sidi \u1e5aebbi yella fell-as.\n1:67 Zakarya, baba-s n weqcic-nni, i\u010d\u010du\u1e5b d \u1e5a\u1e5bu\u1e25 iqedsen, icar-ed s imeslayen-agi :\n1:68 Ad i\u021b\u021bubarek Sidi \u1e5aebbi, Illu n wat Is\u1e5bail imi d-yerra ddehn-is \u0263er wegdud-is iwakken a t-isellek.\n1:69 Yefka-ya\u0263-d yiwen wemsellek d ameqqran seg izu\u1e5ban n Sidna Dawed aqeddac-is,\n1:70 am akken i t-id-ixebbe\u1e5b Sidi \u1e5aebbi si zzman i\u025beddan, seg yimi n lenbiya iqedsen :\n1:71 Ad yili d amsellek ara \u0263-imen\u025ben seg yi\u025bdawen-nne\u0263, si ger ifassen n wid akk i \u0263-ike\u1e5bhen.\n1:72 Isbeggen \u1e5b\u1e5be\u1e25ma-s i lejdud-nne\u0263, yemmekta-d lem\u025bahda-s iqedsen\n1:73 i gefka i jeddi-tne\u0263 Sidna Ib\u1e5bahim.\n1:74 M'ara ne\u021b\u021busellek seg ufus n ye\u025bdawen-nne\u0263, a ne\u025bbed Sidi \u1e5aebbi mbla lxuf,\n1:75 s l\u1e25eqq, s \u1e6d\u1e6da\u025ba d wannuz deg wussan n ddunit-nne\u0263 me\u1e5b\u1e5ba.\n1:76 Ma d ke\u010d\u010d a mmi, a\u021b-\u021be\u021b\u021busemmi\u1e0d d nnbi n Sidi \u1e5aebbi e\u025blayen axa\u1e6der a\u021b-\u021beddu\u1e0d zdat-es iwakken a\u021b-\u021bheggi\u1e0d iberdan-is,\n1:77 a\u021b-\u021besfehme\u1e0d agdud-is \u0263ef leslak n Sidi \u1e5aebbi s le\u025bfu n ddnubat-nsen.\n1:78 Axa\u1e6der \u1e5aebbi-nne\u0263 d a\u1e25nin, s \u1e5a\u1e5be\u1e25ma-ines a d-ic\u1e5beq fell-a\u0263 tafat-is am tin n yi\u1e6dij seg yigenwan.\n1:79 Tafat-is a d-tec\u1e5beq \u0263ef wid yellan di \u1e6d\u1e6dlam n lmut, ad a\u0263-yawi deg webrid n lehna.\n1:80 Aqcic-nni i\u021b\u021bim\u0263u\u1e5b ye\u021bnerni di le\u025bqel. I\u025bac deg unez\u1e5buf armi d ass i deg i d-ibeggen iman-is i wat Is\u1e5bail.\n2:1 Deg ussan-nni, yeffe\u0263-ed yiwen n lqanun s \u0263u\u1e5b Qay\u1e63e\u1e5b ameqqran ; yefka lame\u1e5b ad \u021b\u021bujerrden imezda\u0263 me\u1e5b\u1e5ba yellan di tmura-ines.\n2:2 Ajerred-agi amezwaru yed\u1e5ba asmi yella Kirinyus d l\u1e25akem n tmurt n Surya.\n2:3 Imdanen me\u1e5b\u1e5ba \u1e5bu\u1e25en ad \u021b\u021bujerden mkul yiwen di taddart n lejdud-is.\n2:4 Yusef yellan seg izu\u1e5ban n Sidna Dawed, yuli ula d ne\u021b\u021ba si taddart n Na\u1e63aret n tmurt n Jlili \u0263er Bitel\u1e25em, taddart n lejdud-is yellan di tmurt n Yahuda.\n2:5 I\u1e5bu\u1e25 ad i\u021b\u021bujerred ne\u021b\u021ba \u021b-\u021bxedibt-is Meryem yellan s tadist.\n2:6 Mi ten-yu\u0263 l\u1e25al dinna, yewwe\u1e0d-d lweqt i deg ara terbu ( tarew ) Meryem.\n2:7 Tes\u025ba-d mmi-s amenzu, te\u021b\u021bel-it, tessegen-it di lmedwed, imi ur ufin ara amkan deg wexxam n yemsafren.\n2:8 Di tmurt-nni, llan imeksawen i\u021bnusun di lexlawi, \u021b\u025bassan lmal-nsen deg yi\u1e0d.\n2:9 Ataya lmelk n Sidi \u1e5aebbi i\u1e0dhe\u1e5b-asen-d, tamanegt n Sidi \u1e5aebbi tecce\u025bce\u025b tezzi-yasen-d, ikcem-iten lxuf d ameqqran.\n2:10 Lmelk yenna-yasen : Ur \u021b\u021bagadet ! Aql-i wwi\u0263-awen-d lexba\u1e5b lxi\u1e5b ara isfe\u1e5b\u1e25en wugdud me\u1e5b\u1e5ba.\n2:11 Ass-agi di taddart n Sidna Dawed, ilul-awen-d yiwen wemsellek, d ne\u021b\u021ba i d Lmasi\u1e25 n Sidi \u1e5aebbi !\n2:12 Atan wamek ara t-t\u025beqlem : a\u021b-\u021bafem llufan ye\u021b\u021bel, ye\u1e6d\u1e6des di lmedwed.\n2:13 Imiren kan, \u021b-\u021birebba\u025b n lmalayekkat i d-yernan \u0263er lmelk nni, cennunt \u021b\u1e25emmident Sidi \u1e5aebbi, qqa\u1e5bent :\n2:14 L\u1e25emd i Sidi \u1e5aebbi deg imukan e\u025blayen, lehna di ddunit \u0263ef yemdanen e\u025bzizen fell-as.\n2:15 Akken u\u0263alent lmalayekkat-nni \u0263er yigenni, imeksawen nnan wway gar-asen : Kkret a n\u1e5bu\u1e25et \u0263er Bitel\u1e25em, a n\u1e93er ayen i ged\u1e5ban, d wayen akka s wayes i \u0263-d-ixebbe\u1e5b Sidi \u1e5aebbi.\n2:16 Imiren kan \u1e5bu\u1e25en, ufan dinna Meryem d Yusef akk-d llufan-nni ye\u1e6d\u1e6des di lmedwed.\n2:17 Mi walan aqcic-nni, \u1e25kan-d wayen i sen-d-yenna lmelk fell-as.\n2:18 Wid akk yeslan s wayen i d-\u1e25kan imeksawen-nni, dehcen.\n2:19 Meryem te\u1e25rez imeslayen-nni deg wul-is, te\u021bxemmim fell-asen.\n2:20 Mi u\u0263alen imeksawen-nni, \u021b\u1e25emmiden \u021bcekki\u1e5ben Sidi \u1e5aebbi \u0263ef wayen slan d wayen \u1e93ran, imi ufan kullec akken i sen-d-i\u021b\u021buxebbe\u1e5b.\n2:21 Yewwe\u1e0d-ed wass wis tmanya i deg ara s-s\u1e0deh\u1e5ben i weqcic-nni ; semman-as \u0190isa, isem-nni i s-yefka lmelk uqbel ad yili di t\u025bebbu\u1e6d n yemma-s.\n2:22 Asmi ww\u1e0den \u1e5beb\u025bin wussan \u0263ef tlalit n weqcic-nni, Yusef d Meryem wwin-t \u0263er temdint n Lquds iwakken ad i\u021b\u021buqeddem i Sidi \u1e5aebbi,\n2:23 akken yura di ccari\u025ba n Sidna Musa : yal aqcic amenzu, ilaq ad i\u021b\u021buqeddem i Sidi \u1e5aebbi.\n2:24 Yerna \u1e5bu\u1e25en iwakken ad fken d asfel snat n tmilliwin ne\u0263 sin yetbiren ime\u1e93yanen akken yella di ccari\u025ba n Sidna Musa.\n2:25 Di temdint n Lquds yella yiwen wergaz isem-is Sem\u025bun. Argaz-agi d a\u1e25eqqi, i\u1e0du\u025b Sidi \u1e5aebbi, ye\u021b\u1e5ba\u01e7u amsellek n wat Is\u1e5bail, \u1e5a\u1e5bu\u1e25 iqedsen ye\u021b\u021bili yid-es.\n2:26 Iwe\u1e25\u1e25a-yas-ed belli ur i\u021bme\u021b\u021bat ara alamma ye\u1e93ra Lmasi\u1e25 n Sidi \u1e5aebbi.\n2:27 \u1e5a\u1e5bu\u1e25 n Sidi \u1e5aebbi iwelleh Sem\u025bun ad i\u1e5bu\u1e25 \u0263er l\u01e7ame\u025b iqedsen.Atnaya kecmen-d Yusef d Meryem, wwin-d llufan-nni iwakken ad xedmen wayen i d-tenna ccari\u025ba n Musa fell-as.\n2:28 Sem\u025bun ye\u1e6d\u1e6def aqcic-nni ger ifassen-is, i\u1e25med Sidi \u1e5aebbi yenna :\n2:29 Tura a Sidi \u1e5aebbi \u0263as ad mmte\u0263 aql-i di lehna imi amsellek i \u0263-twe\u025bde\u1e0d,\n2:30 yewwe\u1e0d-ed yerna wala\u0263-t s wallen-iw :\n2:31 win akken i thegga\u1e0d i le\u01e7nas me\u1e5b\u1e5ba,\n2:32 d ne\u021b\u021ba ara yessalin ccan n wat Is\u1e5bail agdud-ik, ara yilin \u021b-\u021bafat ara d-icce\u025bce\u025ben ula \u0263ef le\u01e7nas nni\u1e0den.\n2:33 Baba-s d yemma-s n weqcic-nni t\u025be\u01e7\u01e7ben \u0263ef wayen i d-qqa\u1e5ben fell-as.\n2:34 Sem\u025bun iburek-iten, yenna i Meryem, yemma-s n weqcic-nni : Atan weqcic-agi ad yili i kra seg wat Is\u1e5bail d sebba n tucc\u1e0da, ma d wiya\u1e0d a ten-id-yerr \u0263er webrid. ?ef ddemma-s ara yili lxilaf ger yemdanen ;\n2:35 s wakka ara d-banen ixemmimen n diri deg wulawen, ma d kemm a\u021b-\u021bejre\u1e25 tasa-m, am akken te\u021bwet s ujenwi.\n2:36 Tella da\u0263en yiwet n tme\u1e6d\u1e6dut isem-is ?anna, meqq\u1e5bet di le\u025bme\u1e5b, ula d ne\u021b\u021bat si lenbiya, d yelli-s n Fanwil n wedrum n Azir. Seg wasmi i tedda \u021b-\u021bislit, t\u025bac d wergaz is seb\u025ba n yiseggasen\n2:37 d\u0263a te\u01e7\u01e7el. Di le\u025bme\u1e5b-is \u1e5beb\u025ba utmanyin n yiseggasen. Am yi\u1e0d am ass ur te\u1e6d\u1e6dixi\u1e5b si l\u01e7ame\u025b iqedsen, t\u025bebbed Sidi \u1e5aebbi, te\u021b\u021bu\u1e93um, te\u021b\u1e93alla.\n2:38 Ula d ne\u021b\u021bat tewwe\u1e0d-ed di teswi\u025bt-nni, te\u1e25med Sidi \u1e5aebbi, thedde\u1e5b \u0263ef weqcic-nni i wid akk ye\u021b\u1e5ba\u01e7un leslak n temdint n Lquds.\n2:39 Mi fukken imawlan n \u0190isa ayen akk i d-tenna ccari\u025ba n Sidi \u1e5aebbi, u\u0263alen \u0263er taddart-nsen Na\u1e63aret yellan di tmurt n Jlili.\n2:40 Aqcic-nni ye\u021b\u021bim\u0263u\u1e5b ye\u021bnerni di tmusni, lba\u1e5baka n Sidi \u1e5aebbi tella fell-as.\n2:41 Imawlan n Sidna \u0190isa \u021b\u1e5bu\u1e25un mkul aseggas \u0263er temdint n Lquds iwakken ad s\u025beddin Tafaska n izimer n leslak.\n2:42 Asmi yes\u025ba \u0190isa tnac yiseggasen, yedda akk-d imawlan-is \u0263er temdint n Lquds, akken tella di l\u025badda n l\u025bid.\n2:43 Mi t\u025bedda Tafaska, l\u0263aci \u021b\u021bu\u0263alen \u0263er yexxamen-nsen, ma d \u0190isa yeqqim di temdint Lquds, imawlan-is ur d-wwin ara s lexba\u1e5b,\n2:44 \u0263ilen yedda-d \u021b-\u021berba\u025bt nni\u1e0den. L\u1e25an ass kamel d\u0263a bdan \u021bqelliben fell-as. Steqsan wid akk i sen-ye\u021b\u021bilin d wid me\u1e5b\u1e5ba ssnen,\n2:45 lame\u025bna ur t-ufin ara. U\u0263alen \u0263er temdint n Lquds iwakken ad qellben fell-as.\n2:46 Ass wis tlata, ufan-t di l\u01e7ame\u025b iqedsen yeqqim ger lecyux, isme\u1e25sis asen, isteqsay-iten.\n2:47 Wid akk i s isellen wehmen di lefhama-s d wayen i d-i\u021barra i yesteqsiyen-nsen.\n2:48 Mi t-walan imawlan-is, qqimen wehmen, d\u0263a tenna-yas yemma-s : A mmi, acu\u0263e\u1e5b i \u0263-txedme\u1e0d akka ? Nekk d baba-k ne\u1e5bwa a\u1e25ebbe\u1e5b, ac\u1e25al i nqelleb fell-ak !\n2:49 Ne\u021b\u021ba yenna-yasen : Acu\u0263e\u1e5b i te\u021bqellibem fell-i ? E\u025bni ur te\u1e93rim ara ilaq-iyi ad xedme\u0263 lec\u0263al n baba ?\n2:50 Lame\u025bna nutni ur fhimen ara ayen i sen-d-yenna.\n2:51 \u0190isa yedda d imawlan-is \u0263er temdint n Na\u1e63aret, ye\u021b\u021ba\u0263-asen awal. Yemma-s te\u1e25rez annect-agi me\u1e5b\u1e5ba deg wul-is.\n2:52 \u0190isa i\u021b\u021bim\u0263u\u1e5b, yet\u025beqqil ; e\u025bziz \u0263er \u1e5aebbi, e\u025bziz \u0263er yemdanen.\n3:1 Deg wuseggas wis xemse\u1e6d\u1e6dac n tgeldit n Qay\u1e63er Tibe\u1e5byus, llan \u1e5beb\u025ba l\u1e25ekkam di tmurt n Falis\u1e6din. Bun\u1e6dus Bila\u1e6dus d l\u1e25akem n tmurt n Yahuda, Hi\u1e5budus Antifas ye\u1e25kem \u0263ef tmurt n Jlili, Filbas gma-s n Hi\u1e5budus, \u0263ef tmura n Iturya akk-d T\u1e5baxunit, ma d Lisanyas ye\u1e25kem \u0263ef tmurt n Abilan.\n3:2 Di lweqt-nni, ?ennan akk-d Qayif llan d lmuqedmin imeqqranen. Awal n Sidi \u1e5aebbi i\u021bwaxebbe\u1e5b-as-ed i Ye\u1e25ya, mmi-s n Zakarya, deg unez\u1e5buf.\n3:3 I\u1e5bu\u1e25 i\u021bnadi timura i d-izzin i wasif n Urdun, ye\u021bberri\u1e25 yeqqa\u1e5b : Beddlet tikli, u\u0263alet-ed \u0263er webrid, aset-ed a\u021b-\u021be\u021bwa\u0263e\u1e0dsem iwakken Sidi \u1e5aebbi a wen-isemme\u1e25 ddnubat-nwen !\n3:4 Akken i d-i\u021b\u021buxebe\u1e5b di tektabt n nnbi Ice\u025bya : ?-\u021ba\u0263ect n win i\u021b\u025beggi\u1e0den deg wunez\u1e5buf : Heggit abrid n Sidi \u1e5aebbi, ssemsawit iberdan-is !\n3:5 I\u0263ez\u1e5ban, idurar \u021b-\u021b\u0263altin ad u\u0263alen d izu\u0263a\u1e5b ! Iberdan i\u025bewjen ad \u021b\u021buseggmen, wid ixes\u1e5ben ad qe\u025bden .\n3:6 Imdanen me\u1e5b\u1e5ba ad \u1e93ren leslak n Sidi \u1e5aebbi.\n3:7 Ye\u1e25ya yeqqa\u1e5b i l\u0263aci i d-i\u021b\u021basen iwakken ad \u021bwa\u0263e\u1e0dsen deg waman : A ccetla n yizerman, anwa i kkun-isfaqen belli tzemrem a\u021b- \u021brewlem i l\u025biqab i d-iteddun ?\n3:8 Deg wayen akk txeddmem, sbeggnet-ed belli \u1e63fan wulawen nwen ! Ur qqa\u1e5bet ara kan deg yiman-nwen : jeddi-tne\u0263 d Sidna Ib\u1e5bahim, axa\u1e6der a wen-ini\u0263 : seg id\u0263a\u0263en-agi, Sidi \u1e5aebbi yezmer a d-issufe\u0263 dderya i Ib\u1e5bahim.\n3:9 A\u021ban ihi tcaqu\u1e5bt thegga \u0263er izu\u1e5ban n ttju\u1e5b, yal ttej\u1e5ba ur d-ne\u021b\u021bak ara lfakya l\u025bali, a\u021b-\u021be\u021bwagzem, a\u021b-\u021be\u021bwa\u1e0degge\u1e5b \u0263er tmes.\n3:10 L\u0263aci steqsan-t nnan-as : D acu i \u0263-ilaqen a t-nexdem ihi ?\n3:11 Yerra-yasen : Win yes\u025ban sin iqendya\u1e5b ad yefk yiwen i win ur nes\u025bi ara ; win yes\u025ban ayen ara ye\u010d\u010d, ad yefk i win ur nes\u025bi ara.\n3:12 Usan-d ula d imekkasen ite\u021b\u021ben ayla n medden iwakken ad \u021bwa\u0263e\u1e0dsen deg wasif, nnan-as : A Sidi, i nukkni yellan d imekkasen n tebzert ( le\u0263\u1e5bama ) d acu ara nexdem ?\n3:13 Yenna-yasen : Ur \u021bnadit ara sennig wayen i d-yenna lqanun.\n3:14 I\u025besk\u1e5biwen da\u0263en steqsan-t : I nukkni, d acu ara nexdem ? Yerra-yasen : Ur xeddmet ara lba\u1e6del, ur \u021b\u021ba\u1e6d\u1e6dafet ara taj\u025belt, setqen\u025bet kan s lexla\u1e63 nwen.\n3:15 Yu\u0263 l\u1e25al l\u0263aci me\u1e5b\u1e5ba llan \u021b\u1e5ba\u01e7un qqa\u1e5ben deg ulawen-nsen : Ahat d ne\u021b\u021ba i d Lmasi\u1e25 !\n3:16 Ye\u1e25ya yenna-yasen : Nekk sse\u0263\u1e0dase\u0263-kkun deg waman, me\u025bna a d-yas win yes\u025ban tazmert akte\u1e5b-iw ; ur uklale\u0263 ara ad fsi\u0263 ula d lexyu\u1e0d n warkasen-is. Ne\u021b\u021ba a kkun-isse\u0263\u1e0des s \u1e5a\u1e5bu\u1e25 iqedsen \u021b-\u021bmes.\n3:17 Ye\u1e6d\u1e6def tazzart deg wufus-is, ad yessizdeg tirect deg wennar-is, a d-ijme\u025b irden \u0263er yikufan, ma d alim a t-isse\u1e5b\u0263 di tmes ur nxe\u021b\u021bi.\n3:18 Ye\u1e25ya i\u021bbecci\u1e5b i l\u0263aci lexba\u1e5b n lxi\u1e5b, inehhu-ten s wa\u1e6das n yimeslayen nni\u1e0den.\n3:19 Yesse\u1e0dlem ula d agellid Hi\u1e5budus, yeqqa\u1e5b-as : ma\u010d\u010di d l\u1e25eqq fell-ak a\u021b-\u021ba\u0263e\u1e0d Hi\u1e5budyad tame\u1e6d\u1e6dut n gma-k ! Ilumm-it da\u0263en \u0263ef lec\u0263al nni\u1e0den n diri i gxeddem.\n3:20 Hi\u1e5budus ikemmel di txe\u1e63\u1e63arin-is, yessekcem Ye\u1e25ya \u0263er l\u1e25ebs !\n3:21 Mi \u021bwa\u0263e\u1e0dsen l\u0263aci deg waman, Sidna \u0190isa ye\u021bwa\u0263\u1e0des ula d ne\u021b\u021ba. Akken i gde\u025b\u025bu \u0263er Sidi \u1e5aebbi, igenni yeldi-d,\n3:22 \u1e5a\u1e5bu\u1e25 iqedsen yers-ed fell-as s \u1e63\u1e63ifa icuban titbirt. Yiwet n ta\u0263ect tekka-d seg yigenni tenna-d : Ke\u010d\u010d, d mmi e\u025bzizen, deg-k i gella lfe\u1e5b\u1e25-iw.\n3:23 Mi gebda Sidna \u0190isa aselmed, ad yili yes\u025ba tlatin iseggasen di le\u025bme\u1e5b-is. ?er yemdanen yella : d mmi-s n Yusef atnan lejdud-is : Heli,\n3:24 Matta, Lewwi, Melki, Yennay, Yusef,\n3:25 Matatya, \u0190amus, Na\u1e25un, ?esli, Naggay,\n3:26 Ma\u1e25at, Matatya, Cam\u025bi, Yusef, Yuda,\n3:27 Yu\u1e25anan, Rica, Zurubabil, Calatyel, Niri,\n3:28 Melki, Addi, Qusam, Elmudan, \u0190ir,\n3:29 Yusa, Elyazer, Yurim, Matta, Lewwi,\n3:30 Sem\u025bun, Yahuda, Yusef, Yuna, Elyaqim,\n3:31 Melya, Menna, Mattata, Natan, Dawed,\n3:32 Yassa, \u0190ubed, Bu\u025baz, Salmun, Na\u1e25sun,\n3:33 \u0190aminadab, Admin, Aram, ?es\u1e5bun, Fares, Yahuda,\n3:34 Ye\u025bqub, Is\u1e25aq, Ib\u1e5bahim, Tera\u1e25, Na\u1e25ur,\n3:35 Saru\u01e7, Ra\u025bu, Fale\u01e7, \u0190aber, Sala\u1e25,\n3:36 Kenan, Arfaksad, Cam, Nu\u1e25, Lamek,\n3:37 Matusala\u1e25, ?anux, Yared, Mahalalyel, Kenam,\n3:38 Inuc, Cit, Adem illan d mmi-s n \u1e5aebbi.\n4:1 Mi d- yu\u0263al Sidna \u0190isa seg wasif n Urdun, \u1e5a\u1e5bu\u1e25 iqedsen yewwi-t \u0263er unez\u1e5buf.\n4:2 \u1e5aeb\u025bin wussan ur ye\u010d\u010di, Cci\u1e6dan ye\u021bje\u1e5b\u1e5bib deg-s. Mi \u025beddan wussan-nni, yu\u0263al illu\u1e93.\n4:3 Cci\u1e6dan yenna-yas : Ma d Mmi-s n \u1e5aebbi i telli\u1e0d, ini-yas i wed\u0263a\u0263-agi a d-yu\u0263al d a\u0263\u1e5bum.\n4:4 Sidna \u0190isa yerra-yas : Yura di tektabt iqedsen : amdan ur ye\u021b\u025bic ara s we\u0263\u1e5bum kan me\u025bna s mkul awal i d-i\u021b\u021basen s \u0263u\u1e5b Sidi \u1e5aebbi.\n4:5 Yu\u0263al Cci\u1e6dan yewwi-t \u0263er yiwen wemkan e\u025blayen, deg yiwet n teswi\u025bt yesken-as-ed akk tigeldiwin n ddunit,\n4:6 yenna-yas : Ad a k-d-fke\u0263 l\u1e25ekma d ccan n ddewlat-agi me\u1e5b\u1e5ba, axa\u1e6der \u021b\u021bunefkent iyi-d. Zemre\u0263 a tent-fke\u0263 i win i yi-ihwan ;\n4:7 ma tse\u01e7\u01e7de\u1e0d zdat-i ad u\u0263alent akk d ayla-k.\n4:8 Sidna \u0190isa yerra-yas : Yura : Anagar Sidi \u1e5aebbi Illu-inek ara t\u025bebde\u1e0d, i ne\u021b\u021ba kan iwumi ara tse\u01e7\u01e7de\u1e0d.\n4:9 Cci\u1e6dan yewwi-t da\u0263en \u0263er temdint n Lquds, yessers-it \u0263ef yixef n l\u01e7ame\u025b iqedsen, yenna-yas : Ma d Mmi-s n \u1e5aebbi i telli\u1e0d, \u1e0degge\u1e5b iman-ik d akessar,\n4:10 axa\u1e6der yura : Ad yefk lame\u1e5b i lmalayekkat-is iwakken ad \u1e25arbent fell-ak,\n4:11 yerna a k-awint ger ifassen-nsent, ad \u1e25adrent i\u1e0da\u1e5b\u1e5ben-ik \u0263ef wed\u0263a\u0263.\n4:12 Sidna \u0190isa yerra-yas : Yura da\u0263en : Ur \u021bje\u1e5b\u1e5bib ara Sidi \u1e5aebbi, Illu-inek.\n4:13 Mi i t-ije\u1e5b\u1e5beb s wa\u1e6das n t\u1e25ila ur s-yufi ara abrid, Iblis ye\u1e6d\u1e6daxe\u1e5b fell-as alamma \u021b-\u021bikkelt nni\u1e0den.\n4:14 Sidna \u0190isa yu\u0263al \u0263er tmurt n Jlili ye\u010d\u010du\u1e5b \u021b-\u021bazmert n \u1e5a\u1e5bu\u1e25 iqedsen, slan yis di mkul tama n tmurt-agi.\n4:15 Ike\u010d\u010dem \u0263er le\u01e7wame\u025b n wat Is\u1e5bail yesselmad, imdanen me\u1e5b\u1e5ba \u021bcekki\u1e5ben-t.\n4:16 I\u1e5bu\u1e25 \u0263er taddart n Na\u1e63aret anda ye\u021b\u021bu\u1e5bebba ; akken innum, ikcem \u0263er l\u01e7ame\u025b deg wass n weste\u025bfu.\n4:17 Mi gekker a d-i\u0263e\u1e5b, fkan-as-d taktabt n nnbi Ice\u025bya, yeldi-\u021b, yufa amkan anda yura :\n4:18 \u1e5a\u1e5bu\u1e25 n Sidi \u1e5aebbi yers-ed fell-i, axa\u1e6der yexta\u1e5b-iyi iwakken ad becc\u1e5be\u0263 lexba\u1e5b n lxi\u1e5b i yime\u0263ban, ad becc\u1e5be\u0263 i yime\u1e25bas tilelli, iwakken a d-rre\u0263 i\u1e93ri i yider\u0263alen , a d kkse\u0263 l\u1e25if \u0263ef wid i\u021bwa\u1e0delmen,\n4:19 ad becc\u1e5be\u0263 \u0263ef wuseggas i deg ara d-issers Sidi \u1e5aebbi \u1e5b\u1e5be\u1e25ma ines .\n4:20 Ijme\u025b taktabt-nni, yerra-\u021b i uqeddac, imiren yeqqim. Wid akk yellan di l\u01e7ame\u025b \u010d\u010dan-t s wallen.\n4:21 D\u0263a yenna-yasen : Ayen i wen-d-\u0263\u1e5bi\u0263 akka, atan yed\u1e5ba-d gar-awen ass-agi !\n4:22 Wehmen atas, t\u025be\u01e7\u01e7ben deg yimeslayen i d-i\u021beff\u0263en seg yimi-s, qqa\u1e5ben : Amek ? Ma\u010d\u010di d mmi-s n Yusef wagi ?\n4:23 D\u0263a yenna-yasen : ?ri\u0263 belli a yi-d-tinim lemtel-agi : \u00ab A \u1e6d\u1e6dbib sse\u1e25lu iman-ik,\u00bb ne\u0263 \u00ab xdem dagi di tmurt-ik ayen i nesla txedme\u1e0d-t di temdint n Kaferna\u1e25um.\u00bb\n4:24 Yenna-yasen da\u0263en : S tide\u021b a wen-ini\u0263 : ulac nnbi ye\u021bwaqeblen di tmurt-is.\n4:25 A wen-ini\u0263 tide\u021b : Di zzman n nnbi Ilyas, tlata yiseggasen d wezgen ur d-tewwit lehwa d\u0263a ye\u0263li-d la\u1e93 d ameqqran \u0263ef tmurt me\u1e5b\u1e5ba. Deg wussan-nni, a\u1e6das n tu\u01e7\u01e7al i gellan di tmurt n wat Is\u1e5bail.\n4:26 ?as akken, Sidi \u1e5aebbi ur icegge\u025b ara nnbi Ilyas \u0263er yiwet deg-sent, anagar \u0263 er yiwet n ta\u01e7\u01e7alt yellan di taddart n ?urfat di tmurt n Sidun .\n4:27 Llan da\u0263en a\u1e6das n wid ihelken lbe\u1e5bs di tmurt n wat Is\u1e5bail di zzman n nnbi Ilyace\u025b , me\u025bna ula d yiwen deg-sen ur i\u1e25li anagar Ne\u025bman n tmurt n Surya.\n4:28 Mi slan imeslayen-agi, l\u0263aci me\u1e5b\u1e5ba yellan di l\u01e7ame\u025b yen\u0263a-ten l\u0263ecc.\n4:29 Kkren \u0263u\u1e5b-es, ssuf\u0263en-t si taddart, ssaw\u1e0den-t armi d ixef n wedrar i \u0263ef tebna taddart-nsen iwakken a t-ssegrirben d akessar ;\n4:30 lame\u025bna ne\u021b\u021ba i\u025bedda gar-asen, i\u1e5bu\u1e25.\n4:31 Sidna \u0190isa i\u1e63ubb \u0263er tamdint n Kaferna\u1e25um, illan n at Jlili, anda yesselmad l\u0263aci deg wass n weste\u025bfu.\n4:32 Imdanen wehmen a\u1e6das deg wuselmed-ines axa\u1e6der imeslayen-is s\u025ban tissas.\n4:33 Di l\u01e7ame\u025b, yella yiwen wergaz izde\u0263-it u\u1e5bu\u1e25ani, i\u025begge\u1e0d s l\u01e7ehd n ta\u0263ect-is :\n4:34 D acu i teb\u0263i\u1e0d \u0263u\u1e5b-nne\u0263 a \u0190isa Ana\u1e63ari ? Tusi\u1e0d-ed iwakken ad a\u0263 tesnegre\u1e0d ? ?ri\u0263 d acu-k , ke\u010d\u010d d Imqeddes n \u1e5aebbi !\n4:35 Sidna \u0190isa yen\u1e6deq \u0263u\u1e5b-es yenna-yas : Ssusem ! Effe\u0263 seg wergaz-agi ! A\u1e5bu\u1e25ani i\u1e0degge\u1e5b argaz-nni \u0263er lqa\u025ba di tlemmast-nsen, d\u0263a iffe\u0263 seg-s mbla ma i\u1e0du\u1e5b\u1e5b-it.\n4:36 L\u0263aci ikcem-iten akk lxuf, qqa\u1e5ben wway gar-asen : D acu-ten yimeslayen-agi ? Yes\u025ba tazmert s wayes i\u1e25ekkem ula \u0263ef le\u01e7nun ! Akken kan ara sen-yefk lame\u1e5b ad ff\u0263en !\n4:37 Di yal tama n tmurt slan s lexba\u1e5b n Sidna \u0190isa.\n4:38 Iffe\u0263-ed si l\u01e7ame\u025b, yerra \u0263er wexxam n Sem\u025bun. Yu\u0263 l\u1e25al ta\u1e0deggalt n Sem\u025bun tu\u0263-i\u021b tawla \u021b-\u021bameqqrant, \u1e25ellelen Sidna \u0190isa iwakken a \u021b-yesse\u1e25lu.\n4:39 Yekna \u0263u\u1e5b-es, yume\u1e5b i tawla a\u021b-\u021beffe\u0263 seg-s, d\u0263a teffe\u0263-i\u021b ; imiren kan tekker teqdec-asen-d.\n4:40 Tameddit mi ge\u0263li yi\u1e6dij, kra n win yes\u025ban amu\u1e0din n mkul a\u1e6dan, yewwi-yas-t-id. Mkul win i \u0263ef yessers afus-is ye\u1e25la ! Yesse\u1e25la-ten me\u1e5b\u1e5ba !\n4:41 Llan da\u0263en le\u01e7nun i d-i\u021beff\u0263en seg wa\u1e6das n yemdanen, \u021b\u025beggi\u1e0den qqa\u1e5ben : \u00ab Ke\u010d\u010d d Mmi-s n \u1e5aebbi ! \u00bb Lame\u025bna Sidna \u0190isa i\u021b\u025beggi\u1e0d fell- asen, ur ten-i\u021b\u021baga ara a d-hed\u1e5ben, axa\u1e6der nutni \u1e93ran d ne\u021b\u021ba i d Lmasi\u1e25.\n4:42 Mi guli wass, iffe\u0263 si temdint, yerra \u0263er yiwen wemkan yexlan. A\u1e6das n l\u0263aci \u1e5bu\u1e25en \u021bqelliben fell-as. Mi t-ufan, \u1e25ellelen-t iwakken ad yeqqim \u0263u\u1e5b-sen, ur i\u021b\u1e5bu\u1e25u ara.\n4:43 Lame\u025bna ne\u021b\u021ba yenna-yasen : Ilaq-iyi ad \u1e5bu\u1e25e\u0263 ad becc\u1e5be\u0263 lexba\u1e5b n lxi\u1e5b n tgeldit n \u1e5aebbi i temdinin nni\u1e0den ! ?ef wayagi i d \u021b\u021bucegg\u025be\u0263 !\n4:44 Imiren i\u1e5bu\u1e25 i\u021bbecci\u1e5b di le\u01e7wame\u025b n tmurt n Yahuda.\n5:1 Yiwen wass, Sidna \u0190isa yella \u0263ef rrif n leb\u1e25e\u1e5b n Jini\u1e63aret. L\u0263aci me\u1e5b\u1e5ba zzin-as-d, m\u010du\u010d\u010da\u025ben-d akken ad slen i wawal n \u1e5aebbi.\n5:2 Iwala snat n teflukin rrif n leb\u1e25e\u1e5b, i\u1e25ewwaten rsen-d iwakken ad ssirden icebbaken nsen.\n5:3 Sidna \u0190isa yuli \u0263er yiwet si teflukin-nni, tin yellan n Sem\u025bun, yenna-yas ad ib\u025bed acemma \u0263ef rrif. Yeqqim , yebda yesselmad-ed l\u0263aci syenna.\n5:4 Mi gfukk aselmed yenna i Sem\u025bun : Sbe\u025bdet taflukt \u0263er wemkan lqayen, t\u1e0degg\u1e5bem icebbaken-nwen a\u021b-\u021b\u1e63eggdem.\n5:5 Sem\u025bun yenna-yas : A Sidi, i\u1e0d kamel nukni d a\u1e63egge\u1e0d ur d-ne\u1e6d\u1e6dif acemma ; lame\u025bna \u0263ef wawal-ik a nexdem akken i d-tenni\u1e0d, a n\u1e0degge\u1e5b icebbaken.\n5:6 Mi xedmen akken i sen-yenna Sidna \u0190isa, \u1e6d\u1e6dfen-d a\u1e6das n iselman ( l\u1e25ut ), armi q\u1e5bib ad qe\u1e5bsen icebbaken nsen.\n5:7 Ssawalen, \u021bwehhin i yemdukkal nsen yellan di teflukt nni\u1e0den a d-asen a ten-\u025biwnen. Mi d-usan, \u010d\u010du\u1e5ben snat-nni n teflukin armi q\u1e5bib ad \u0263e\u1e5bqent.\n5:8 Sem\u025bun-Bu\u1e6drus, mi gwala ayagi, yu\u0263al \u0263ef tgecrar zdat Sidna \u0190isa, yenna-yas : Be\u025b\u025bed fell-i a Sidi axa\u1e6der d amednub i lli\u0263.\n5:9 Ikcem-it lxuf ne\u021b\u021ba d wid yellan yid-es, dehcen imi i d-\u1e6d\u1e6dfen annect-nni n yiselman.\n5:10 Ula d Ye\u025bqub akk-d Yu\u1e25enna, arraw n Zabadi yellan d imdukkal n Sem\u025bun wehmen. Sidna \u0190isa yen\u1e6deq \u0263er Sem\u025bun yenna-yas : Ur \u021b\u021bagad ara, sya d asawen ma\u010d\u010di d iselman ara d-\u021b\u1e63eggide\u1e0d, me\u025bna d imdanen.\n5:11 Imiren rran-d tiflukin-nsen \u0263er rrif, \u01e7\u01e7an kullec dinna, ddan d Sidna \u0190isa.\n5:12 Mi gella Sidna \u0190isa deg yiwet n taddart n at Jlili, yusa-d yiwen wergaz ihelken lbe\u1e5bs, mi gwala Sidna \u0190isa, yuzzel \u0263u\u1e5b-es ye\u0263li \u0263er i\u1e0da\u1e5b\u1e5ben-is, yenna-yas : A Sidi, ma teb\u0263i\u1e0d, tzemre\u1e0d a yi-tesse\u1e25lu\u1e0d.\n5:13 Sidna \u0190isa issers afus-is fell-as, yenna-yas : B\u0263i\u0263 ! Ili-k te\u1e25li\u1e0d ! Imiren kan, argaz-nni ikkes-as lbe\u1e5bs, ye\u1e63fa weglim-is.\n5:14 Sidna \u0190isa iwe\u1e63\u1e63a-t ur iqqa\u1e5b i yiwen ayen yed\u1e5ban yid-es. Yenna-yas : \u1e5au\u1e25 \u0263er lmuqeddem a k-iwali, tefke\u1e0d lwe\u025bda \u0263ef \u1e63effu-inek, akken yura di ccari\u025ba n Musa. Lwe\u025bda-nni a sen-tili d \u021bbut \u0263ef \u1e25ellu-inek.\n5:15 Simmal i\u021bwassen Sidna \u0190isa, simmal \u021bnejma\u025ben-d \u0263u\u1e5b-es l\u0263aci iwakken ad slen i wawal-is yerna a ten-isse\u1e25lu si lehlakat-nsen ;\n5:16 me\u025bna ne\u021b\u021ba i\u1e6de\u1e5b\u1e5bif iman-is, i\u021b\u1e5bu\u1e25u \u0263er yimukan yexlan iwakken ad i\u1e93\u1e93all.\n5:17 Yiwen wass Sidna \u0190isa yella yesselmad. Llan dinna ifariziyen d l\u025bulama n ccari\u025ba, usan-d si tuddar n at Jlili, n at Yahuda akk \u021b-\u021bemdint n Lquds, qqimen sme\u1e25sisen-as. Tazmert n Sidi \u1e5aebbi yellan yid-es tesse\u1e25lay imu\u1e0dan.\n5:18 Atnaya kra n yemdanen wwin-d yiwen wukrif akken deg wusu-ines. ?qelliben amek ara t-skecmen iwakken a t-ssersen zdat Sidna \u0190isa.\n5:19 Imi a\u1e6das n l\u0263aci i gellan, ur ufin ara ansi ara t-s\u025beddin ; ulin \u0263ef ssqef, kksen kra n iqermuden, \u1e63ubben-t-id s wusu-ines \u0263er tlemmast n l\u0263aci, zdat Sidna \u0190isa.\n5:20 Mi gwala liman-nsen, yenna i umu\u1e0din-nni : Ay argaz, \u021bwa\u025beffan-ak ddnubat ik !\n5:21 L\u025bulama akk-d ifariziyen bdan \u021bxemmimen qqa\u1e5ben : Amek yezmer a d-yini imeslayen agi ? Wagi d lekfe\u1e5b ! Anwa i gzemren ad i\u025bfu ddnubat anagar Sidi \u1e5aebbi ?\n5:22 Sidna \u0190isa ye\u1e93ran ayen i \u021bxemmimen, yenna-yasen : Acu\u0263e\u1e5b te\u021bxemmimem akka deg ulawen-nwen ?\n5:23 D acu i gsehlen a s-t-ini\u0263 ? \u00ab ?wa\u025beffan-ak ddnubat-ik\u00bb ne\u0263 \u00ab ekker tel\u1e25u\u1e0d ? \u00bb\n5:24 Ilaq-awen a\u021b-\u021be\u1e93rem belli Mmi-s n bunadem yes\u025ba tazmert ad ye\u025bfu ddnubat di ddunit-agi ! Yezzi \u0263er wukrif-nni, yenna-yas : Kker ddem usu-inek tu\u0263ale\u1e0d \u0263er wexxam-ik !\n5:25 Imiren kan ukrif-nni yekker zdat-sen, yeddem usu i deg ye\u1e0dleq, yu\u0263al \u0263er wexxam-is, i\u021b\u1e25emmid Sidi \u1e5aebbi.\n5:26 Wehmen me\u1e5b\u1e5ba l\u0263aci, \u021b\u1e25emmiden Sidi \u1e5aebbi, ikcem-iten lxuf qqa\u1e5ben : Ass-agi ne\u1e93ra ayen wer\u01e7in ne\u1e93ri !\n5:27 Mi geffe\u0263 Sidna \u0190isa, iwala yiwen umekkas isem-is Lewwi yeqqim di texxamt anda \u021bxelli\u1e63en tabzert ( le\u0263\u1e5bama ), iqe\u1e5b\u1e5beb \u0263u\u1e5b-es yenna-yas : Ddu yid-i.\n5:28 Lewwi yekker, ye\u01e7\u01e7a kullec yedda yid-es.\n5:29 Lewwi ye\u025b\u1e5be\u1e0d Sidna \u0190isa \u0263er wexxam-is, ihegga-yas imensi. A\u1e6das n yimekkasen d yemdanen nni\u1e0den i geqqimen yid-sen ad \u010d\u010den.\n5:30 Ifariziyen d l\u025bulama n ukabar-nsen i\u0263a\u1e0d-iten l\u1e25al, nnan i yinelmaden is : Acu\u0263e\u1e5b i te\u021b\u021bem, tessem akk-d imekkasen imakaren d imednuben ?\n5:31 Sidna \u0190isa yerra-yasen : Ma\u010d\u010di d wid i\u1e63e\u1e25\u1e25an i ge\u1e25wa\u01e7en \u1e6d\u1e6dbib, i t-i\u1e25wa\u01e7en d imu\u1e0dan.\n5:32 Ur d-usi\u0263 ara ad ssiwle\u0263 i i\u1e25eqqiyen, usi\u0263-ed \u0263er yimednuben iwakken a d-u\u0263alen \u0263er webrid.\n5:33 Nnan-as da\u0263en : Inelmaden n Ye\u1e25ya d wid n ifariziyen \u021b\u021bu\u1e93ummen ac\u1e25al d abrid yerna \u021b\u1e93allan, ma d inelmaden-ik te\u021b\u021ben tessen.\n5:34 Sidna \u0190isa yenna yasen : E\u025bni tzemrem a sen-tinim i yinebgawen n yesli ad u\u1e93ummen ass n tme\u0263\u1e5ba ? Ur tezmirem ara !\n5:35 Ad asen wussan i deg ara sen-i\u021bwakkes yesli, ass-nni ad u\u1e93ummen.\n5:36 Yerna-yasen-d lemtel-agi : Yiwen ur d-itekkes tafawe\u021b si llebsa tajdi\u1e6d iwakken a \u021b-ixi\u1e0d \u0263ef llebsa taqdimt , ne\u0263 m'ulac llebsa-nni tajdi\u1e6d a\u021b-\u021bcerreg ; tafawe\u021b-nni tajdi\u1e6d ur d-\u021bezgay ara \u0263ef llebsa-nni taqdimt.\n5:37 Da\u0263en yiwen ur ismaray cc\u1e5bab ajdid \u0263er yiyeddiden iqdimen , ne\u0263 m'ulac cc\u1e5bab-nni ajdid ad icerreg iyeddiden nni ; ur d-i\u021b\u0263imi cc\u1e5bab ur d-\u021b\u0263imin iyeddiden.\n5:38 Ihi cc\u1e5bab ajdid, ilaq a t-nesmir \u0263er iyeddiden ijdiden.\n5:39 Akken da\u0263en win yennumen d cc\u1e5bab aqdim ur issutur ara ajdid axa\u1e6der yeqqa\u1e5b \u00ab d aqdim i gelhan. \u00bb\n6:1 Yiwen wass, Sidna \u0190isa akk-d inelmaden-is zegren igran n yirden deg wass n weste\u025bfu. Tekksen d tigedrin, \u021b\u1e25ukkun-tent ger ifassen nsen, te\u021b\u021ben-tent.\n6:2 Kra n ifariziyen nnan-asen : Acu\u0263e\u1e5b i txeddmem ayen ur ne\u1e25lil deg wass n weste\u025bfu ?\n6:3 Sidna \u0190isa yerra-yasen : Ur te\u0263\u1e5bim ara ayen yexdem ugellid Dawed asmi yellu\u1e93 ne\u021b\u021ba d imdukkal-is,\n6:4 d wamek i gekcem \u0263er wexxam iqedsen anda ke\u010d\u010dmen anagar lmuqedmin ! Iddem-ed a\u0263\u1e5bum n lwe\u025bda, ye\u010d\u010da yerna yefka i wid yellan yid-es \u0263as akken a\u0263\u1e5bum-nni i lmuqedmin kan iwumi ye\u1e25lel !\n6:5 Sidna \u0190isa yerna-yasen-d : Mmi-s n bunadem, d ne\u021b\u021ba i g\u1e25ekkmen \u0263ef wass n weste\u025bfu !\n6:6 Ass n weste\u025bfu nni\u1e0den, Sidna \u0190isa yekcem \u0263er l\u01e7ame\u025b, yebda yesselmad. Yella dinna yiwen wergaz iwumi yekref ufus ayeffus.\n6:7 L\u025bulama n ccari\u025ba d ifariziyen \u021b\u025bassan Sidna \u0190isa, ad \u1e93ren ma ad isse\u1e25lu deg wass n weste\u025bfu iwakken a s-d-afen sebba s wacu ara ccetkin fell-as.\n6:8 Lame\u025bna Sidna \u0190isa yessnen ixemmimen-nsen, yekker yenna i wergaz-nni iwumi yekref ufus : Ekker tbedde\u1e0d dagi di tlemmast n l\u0263aci. Argaz-nni yekker ibedd.\n6:9 Sidna \u0190isa yenna : A kkun-steqsi\u0263 : d acu yellan d le\u1e25lal deg wass n weste\u025bfu, a nexdem lxi\u1e5b ne\u0263 a nexdem cce\u1e5b ? A nsellek amdan ne\u0263 a t-ne\u01e7\u01e7 ad immet ?\n6:10 Yerfed allen-is \u0263er wid akk i s-d-yezzin , d\u0263a yenna i wergaz nni : E\u1e0dleq afus-ik ! Ukrif-nni ye\u1e0dleq afus-is, ye\u1e25la.\n6:11 Nutni yen\u0263a-ten l\u0263ecc, bdan \u021bemcawa\u1e5ben wway gar-asen amek ara xedmen i Sidna \u0190isa.\n6:12 Deg ussan-nni, Sidna \u0190isa yuli \u0263er wedrar akken ad i\u1e93\u1e93all. Yeqqim i\u1e0d kamel ne\u021b\u021ba ide\u025b\u025bu \u0263er Sidi \u1e5aebbi.\n6:13 Mi yuli wass, yessawel i yinelmaden is, yexta\u1e5b seg-sen tnac iwumi isemma \u00ab \u1e5b\u1e5busul\u00bb ye\u025bni \u00ab imcegg\u025ben.\u00bb\n6:14 Yella Sem\u025bun iwumi isemma Bu\u1e6drus akk-d gma-s Andriyus, Ye\u025bqub, Yu\u1e25enna, Filbas, Bartelmay,\n6:15 Matta, ?uma, Ye\u025bqub mmi-s n ?alfi, Sem\u025bun iwumi qqa\u1e5ben awa\u1e6dani,\n6:16 Yahuda mmi-s n Ye\u025bqub d Yudas n taddart n Qe\u1e5byut win yu\u0263alen d axedda\u025b.\n6:17 Sidna \u0190isa i\u1e63ubb-ed yid-sen seg wedrar, \u1e25ebsen di lu\u1e0da anda nnejma\u025ben a\u1e6das n yinelmaden-is d wa\u1e6das n l\u0263aci i d-yusan si tmurt n Yahuda, si temdint n Lquds, si temdinin n ?ur akk-d Sidun yellan rrif n leb\u1e25e\u1e5b.\n6:18 Usan-d iwakken ad slen i wawal-is yerna a ten-isse\u1e25lu si lehlakat-nsen ; wid akk zed\u0263en le\u01e7nun, \u1e25lan.\n6:19 L\u0263aci me\u1e5b\u1e5ba \u021bqelliben a t-nalen ( a t-massen ) axa\u1e6der te\u021b\u021beffe\u0263-ed seg-s tezmert i ten-isse\u1e25layen akk.\n6:20 Sidna \u0190isa yerfed allen-is \u0263er inelmaden-is yenna : Amarezg-nwen kunwi yellan d i\u1e93awaliyen, tagelda n Sidi \u1e5aebbi d ayla-nwen.\n6:21 Amarezg-nwen kunwi yellu\u1e93en tura, a d-yas wass i deg ara te\u1e5bwum. Amarezg-nwen kunwi ye\u021brun tura, a d-yas wass i deg ara tilim di lfe\u1e5b\u1e25.\n6:22 D ise\u025bdiyen ara tilim m'ara kkun-ke\u1e5bhen yemdanen, m'ara kkun-qec\u025ben, m'ara kkun-regmen, ad rren isem-nwen amzun d l\u025ba\u1e5b \u0263ef ddemma n Mmi-s n bunadem.\n6:23 Ass-nni ilit di lfe\u1e5b\u1e25, friwset s lfe\u1e5b\u1e25 axa\u1e6der d \u1e5b\u1e5bezq ameqqran i kkun-i\u021b\u1e5ba\u01e7un deg igenni ! Imi akka i xedmen lejdud-nsen i lenbiya.\n6:24 Ma d kunwi ay ime\u1e5bkantiyen, a tawa\u0263it-nwen axa\u1e6der rrbe\u1e25-nwen tes\u025bam-t tura.\n6:25 A tawa\u0263it-nwen kunwi ye\u1e5bwan tura, a\u021b-\u021bu\u0263alem a\u021b-\u021bella\u1e93em. A tawa\u0263it-nwen kunwi ye\u021b\u021ba\u1e0d\u1e63an tura axa\u1e6der a\u021b-\u021bilim di le\u1e25zen d yime\u1e6d\u1e6dawen.\n6:26 A tawa\u0263it nwen asm'ara kkun-cekk\u1e5ben yemdanen, axa\u1e6der akka i xedmen lejdud-nsen i lenbiya n lekdeb.\n6:27 Ma d nekk a wen-ini\u0263 i kunwi i d-i\u021b\u1e25essisen : \u1e25emmlet i\u025bdawen-nwen, xedmet lxi\u1e5b i wid i kkun-ike\u1e5bhen.\n6:28 Barket wid i kkun-ine\u025blen, d\u025but s lxi\u1e5b i wid i kkun-i\u1e0delmen.\n6:29 Ma yewwet-ik yiwen \u0263er l\u1e25enk, sendi-yas l\u1e25enk nni\u1e0den. Ma yekkes-ak yiwen abe\u1e5bnus-ik, anef-as ad yernu ula d aqendu\u1e5b-ik.\n6:30 Efk-as ayen yu\u1e25waj i win i k-id-yessutren ; win i k-ikksen kra, ur \u021b\u1e5ba\u01e7u ara a k-t-id-yerr.\n6:31 Xedmet i wiya\u1e0d ayen i teb\u0263am a wen-t xedmen i kunwi.\n6:32 Ma yella t\u1e25emmlem kan wid i kkun-i\u1e25emmlen, d acu n lxi\u1e5b i txedmem ? Ula d imcumen \u1e25emmlen wid i ten-i\u1e25emmlen.\n6:33 Ma yella txeddmem lxi\u1e5b i wid kan i wen ixeddmen lxi\u1e5b, d acu n lxi\u1e5b i txedmem ? Ula d imcumen xeddmen akka.\n6:34 Ma yella t\u1e5be\u1e6d\u1e6dlem i wid kan i te\u1e93ram a wen-d-rren, d acu i treb\u1e25em \u0263er Sidi \u1e5aebbi ? Imcumen da\u0263en \u1e5be\u1e6d\u1e6dlen i imddukal-nsen iwakken ad afen a\u1e5be\u1e6d\u1e6dal ula d nutni.\n6:35 Lame\u025bna kunwi : \u1e25emmlet i\u025bdawen-nwen, xedmet lxi\u1e5b, \u1e5be\u1e0dlet mbla \u1e6d\u1e6dme\u025b, akka ara tes\u025bum lfayda tameqqrant, ara tilim d arraw n Sidi \u1e5aebbi \u025blayen. Axa\u1e6der \u1e5aebbi d a\u1e25nin ula \u0263ef yemcumen akk-d wid inekk\u1e5ben lxi\u1e5b.\n6:36 I\u1e25ninet, s\u025but \u1e5b\u1e5be\u1e25ma akken i \u021b-is\u025ba Baba-twen.\n6:37 Ur \u021b\u1e25asabet ara wiya\u1e0d iwakken Sidi \u1e5aebbi ur kkun-i\u021b\u1e25asab ara. Ur \u1e25ekkmet ara \u0263ef wiya\u1e0d iwakken Sidi \u1e5aebbi ur i\u1e25ekkem ara fell-awen. Semm\u1e25et i wiya\u1e0d iwakken a wen isame\u1e25 Sidi \u1e5aebbi.\n6:38 Seddqet, a wen d-yu\u0263al s \u0263u\u1e5b \u1e5aebbi. Ma tseddqem mbla lkil, a wen-d yu\u0263al s \u0263u\u1e5b \u1e5aebbi mbla lkil ; axa\u1e6der a wen-d-i\u021bwaktal s lkil s wacu tektalem.\n6:39 Yewwi-yasen-d lemtel nni\u1e0den, yenna-yasen : Ader\u0263al ur izmir ara ad i\u1e6d\u1e6def afus i uder\u0263al nni\u1e0den, ne\u0263 m'ulac ad grirben i sin \u0263er ye\u0263ze\u1e5b ;\n6:40 anelmad wer\u01e7in yugar ccix-is, lame\u025bna anelmad ara yaw\u1e0den am ccix-is di tmusni, ad yili am ne\u021b\u021ba.\n6:41 Acu\u0263e\u1e5b te\u021bwali\u1e0d axeclaw yellan di ti\u1e6d n gma-k ur te\u021bwali\u1e0d ara tigejdit yellan di ti\u1e6d-ik ?\n6:42 Amek ara tini\u1e0d i gma-k : e\u01e7\u01e7-iyi ad kkse\u0263 axeclaw yellan di ti\u1e6d-ik ke\u010d\u010d ur ne\u1e93ri tigejdit yellan di ti\u1e6d-ik ? A bu sin wudmawen, ekkes uqbel tigejdit yellan di ti\u1e6d-ik, imiren a\u021b-\u021bwali\u1e0d amek ara tekkse\u1e0d axeclaw yellan di ti\u1e6d n gma-k.\n6:43 Ulac ttej\u1e5ba l\u025bali i d-i\u021b\u021baken lfakya n diri. Ulac da\u0263en ttej\u1e5ba n diri i d-i\u021b\u021baken lfakya l\u025bali.\n6:44 Ihi mkul ttej\u1e5ba, te\u021bwa\u025bqal s lfakya-ines. Ur d-ntekkes ara lex\u1e5bif seg isennanen, ur d-ntekkes ara da\u0263en ti\u1e93urin seg inijel.\n6:45 Argaz yelhan issufu\u0263-ed ayen yelhan seg wugerruj yellan deg wul-is, ma d amcum d ayen n diri yellan deg ul-is i d-issufu\u0263. Axa\u1e6der d ayen yellan deg wul n wemdan i d-i\u021beff\u0263en seg imi-s.\n6:46 Acu\u0263er i yi-d-tessawalem \u00ab A Sidi, a Sidi \u00bb, ur txeddmem ara ayen i wen-d-qqa\u1e5be\u0263 ?\n6:47 A wen-d-ini\u0263 ar wu\u0263u\u1e5b i\u021bemcabi wemdan i d-i\u021b\u021basen \u0263u\u1e5b-i, isellen i wawal-iw yerna ye\u1e6d\u1e6dafa\u1e5b-it :\n6:48 i\u021bemcabi \u0263er yiwen n wemdan yebnan axxam. Ye\u0263za, ye\u0263za deg wakal iwakken ad issers lsas-is \u0263ef wez\u1e5bu ; i\u1e25mel-ed wasif, infel-ed \u0263ef wexxam-nni, me\u025bna ur t-issenhezz ara imi lsas-is yer\u1e63a, yebna \u0263ef wez\u1e5bu akken ilaq.\n6:49 Ma d win isellen i wawal-iw ur netbi\u025b ara ayen i d-nni\u0263, i\u021bemcabi \u0263er wemdan yebnan axxam \u0263ef \u1e5b\u1e5bmel mbla lsas : i\u1e25mel-ed wasif, infel-ed \u0263ef wexxam-nni, imiren kan ye\u0263li , lexsa\u1e5ba-s \u021b-\u021bameqqrant !\n7:1 Mi gekfa awal zdat widak i s-d-isme\u1e25sisen, yekcem \u0263er temdint n Kaferna\u1e25um.\n7:2 Yiwen lqeb\u1e6dan a\u1e5bumani yes\u025ba aqeddac i g\u1e25emmel a\u1e6das ; aqeddac-agi yu\u1e0den, i\u021bme\u021b\u021bat.\n7:3 Mi gesla s Sidna \u0190isa, icegge\u025b \u0263u\u1e5b-es kra seg yimeqqranen n wat Is\u1e5bail iwakken a d-yas ad isse\u1e25lu aqeddac-is.\n7:4 Mi ww\u1e0den \u0263er Sidna \u0190isa, \u1e25ellelen-t nnan-as : A Sidi ! Yuklal a s-txedme\u1e0d lxi\u1e5b agi,\n7:5 axa\u1e6der i\u1e25emmel agdud nne\u0263 ; d ne\u021b\u021ba i gebnan l\u01e7ame\u025b-nne\u0263.\n7:6 Sidna \u0190isa yedda yid-sen. Mi q\u1e5bib ad yawe\u1e0d \u0263er wexxam, lqeb\u1e6dan-nni icegge\u025b imdukkal-is a s-inin : A Sidi, ur \u021b\u025be\u021b\u021bib ara iman-ik, ur uklale\u0263 ara a d-tkecme\u1e0d axxam-iw.\n7:7 Nekk s yiman-iw da\u0263en wala\u0263 ur uklale\u0263 ara a n-ase\u0263 \u0263u\u1e5b-ek ; ini-d kan yiwen wawal, aqeddac-iw ad i\u1e25lu.\n7:8 Axa\u1e6der s\u025bi\u0263 wid i g\u1e6debbi\u1e5ben fell-i, s\u025bi\u0263 da\u0263en l\u025beske\u1e5b seddaw l\u1e25ekma-w. Ad ini\u0263 i yiwen \u1e5bu\u1e25 ad i\u1e5bu\u1e25 ; i waye\u1e0d as-ed, a d-yas ; ad ini\u0263 i wqeddac-iw xdem ayagi, a t-ixdem.\n7:9 Mi gesla Sidna \u0190isa i yimeslayen-agi, it\u025be\u01e7\u01e7eb deg-sen. Yezzi \u0263er l\u0263aci yeddan yid-es, yenna-yasen : A wen-d-ini\u0263 : di tmurt n wat Is\u1e5bail me\u1e5b\u1e5ba ur ufi\u0263 ara liman yecban wagi.\n7:10 Widak-nni i d-i\u021bwacegg\u025ben, mi u\u0263alen \u0263er wexxam ufan aqeddac-nni ye\u1e25la.\n7:11 Azekka-nni, Sidna \u0190isa i\u1e5bu\u1e25 \u0263er yiwet n taddart isem-is Na\u025bim. Ddan yid-es inelmaden-is d wa\u1e6das n l\u0263aci.\n7:12 Mi gewwe\u1e0d \u0263er tewwurt n taddart, atnaya l\u0263aci wwin-d lmegget a t-me\u1e0dlen, d mmi-s n yiwet n ta\u01e7\u01e7alt, anagar ne\u021b\u021ba i tes\u025ba. A\u1e6das n imezda\u0263 n taddart-nni i d-iddan yid-es.\n7:13 Mi \u021b-iwala Sidna \u0190isa, t\u0263a\u1e0d-it, yenna-yas : Ur \u021bru ara !\n7:14 Iqe\u1e5b\u1e5beb \u0263er usenduq n lmegget nni, i\u1e0dleq afus-is innul-it, d\u0263a widak i t-irefden \u1e25ebsen. Yenna : Ay aqcic ! Ekker !\n7:15 D\u0263a lmegget-nni ikker-ed, yebda ihedde\u1e5b. Sidna \u0190isa yerra aqcic-nni i yemma-s.\n7:16 Ikcem-iten akk lxuf, bdan \u021b\u1e25emmiden \u1e5aebbi qqa\u1e5ben : \u00ab Sidi \u1e5aebbi yerra-d ddehn-is \u0263er wegdud is, nnbi ameqqran ikker-ed gar-ane\u0263. \u00bb\n7:17 Slan s wannect-agi di tmurt n Yahuda me\u1e5b\u1e5ba akk \u021b-\u021bmura i s-d izzin.\n7:18 Inelmaden n Ye\u1e25ya xebb\u1e5ben-t \u0263ef wayen akk yed\u1e5ban.\n7:19 Ye\u1e25ya icegge\u025b sin seg yinelmaden-is \u0263er Sidna \u0190isa iwakken a s-inin ma d ne\u021b\u021ba i d win akken ara d-yasen, ne\u0263 ilaq ad \u1e5b\u01e7un waye\u1e0d.\n7:20 Eww\u1e0den \u0263er Sidna \u0190isa nnan-as : Icegge\u025b-a\u0263-ed \u0263u\u1e5b-ek Ye\u1e25ya a\u0263e\u1e6d\u1e6das iwakken a k-nesteqsi ma d ke\u010d\u010d i d win akken ara d-yasen ne\u0263 ilaq a ne\u1e5b\u01e7u waye\u1e0d.\n7:21 Di teswi\u025bt-nni ufan Sidna \u0190isa isse\u1e25la a\u1e6das n yemdanen si lehlakat nsen d le\u025byubat-nsen, issufe\u0263 le\u01e7nun seg wid ye\u021bwamelken, yerra-d i\u1e93ri i wa\u1e6das n yider\u0263alen.\n7:22 Sidna \u0190isa yenna i yinelmaden n Ye\u1e25ya : \u1e5au\u1e25et erret lexba\u1e5b i Ye\u1e25ya \u0263ef wayen te\u1e93ram d wayen teslam : ider\u0263alen \u021bwalin, wid ikerfen teddun, wid ihelken lbe\u1e5bs \u1e63effun, i\u025be\u1e93\u1e93ugen sellen, lmegtin \u1e25eggun-d, le xba\u1e5b n lxi\u1e5b i\u021bwabecce\u1e5b i yigellilen .\n7:23 D ase\u025bdi win iwumi ur \u021b\u021bili\u0263 ara d ugur.\n7:24 Mi \u1e5bu\u1e25en inelmaden-nni i d-icegge\u025b Ye\u1e25ya, Sidna \u0190isa yebda ihedde\u1e5b i l\u0263aci \u0263ef Ye\u1e25ya yenna : D acu i t\u1e5bu\u1e25em a d-te\u1e93rem deg unez\u1e5buf ? D a\u0263anim ye\u021bhuzzu wa\u1e0du ?\n7:25 D acu i t\u1e5bu\u1e25em a d-te\u1e93rem ? D amdan yelsan llebsa ifazen ? Wid ye\u021blusun llebsa ifazen, ye\u021b\u025bicin di rrbe\u1e25 atnan di leb\u1e5buj n yigelliden !\n7:26 Anwa i t\u1e5bu\u1e25em a t-id-te\u1e93rem ihi ? D nnbi ? A wen-d-ini\u0263 ... yugar nnbi !\n7:27 Ye\u1e25ya d win i \u0263ef yura di tira iqedsen : Atan ad zzewre\u0263 amcegge\u025b-inu zdat-ek iwakken a k-iheggi abrid.\n7:28 Nni\u0263-awen, ulac di ddunit amdan yugaren Ye\u1e25ya a\u0263e\u1e6d\u1e6das. Lame\u025bna amec\u1e6du\u1e25 ma\u1e0di di tgelda n Sidi \u1e5aebbi, d ameqqran fell-as.\n7:29 L\u0263aci me\u1e5b\u1e5ba mi slan i Ye\u1e25ya, set\u025be\u1e5bfen s l\u1e25eqq n Sidi \u1e5aebbi, qeblen ad \u021bwa\u0263e\u1e0dsen deg waman, llan gar-asen ula d imekkasen n tebzert ( n le\u0263\u1e5bama ).\n7:30 Ma d ifariziyen d l\u025bulama n ccari\u025ba, ur qbilen ara ayen i sen yeb\u0263a Sidi \u1e5aebbi, ugin a ten yesse\u0263\u1e0des Ye\u1e25ya.\n7:31 ?er wacu ara metle\u0263 imdanen n l\u01e7il-agi ? ?er wu\u0263u\u1e5b i \u021bemcabin ?\n7:32 ?emcabin \u0263er warrac yeqqimen di tejma\u025bt, \u021bemsawalen wway gar-asen qqa\u1e5ben : Newwet-awen-d ajewwaq ur tec\u1e0di\u1e25em ara, nerna newwi-yawen-d acewwiq n le\u1e25zen ur trum ara.\n7:33 Ye\u1e25ya a\u0263e\u1e6d\u1e6das yusa-d ur ite\u021b\u021b a\u0263\u1e5bum ur itess cc\u1e5bab, teqqa\u1e5bem i\u021bwamlek.\n7:34 Mmi-s n bunadem yusa-d ite\u021b\u021b itess, teqqa\u1e5bem : i\u021bxemmim kan ad ye\u010d\u010d ad isew, d amdakkul n yimekkasen akk-d yemcumen.\n7:35 Lame\u025bna l\u1e25eqq n Sidi \u1e5aebbi \u025beqlen-t warraw-is, nutni qeblen-t.\n7:36 Yiwen ufarizi yusa-d ad i\u025b\u1e5br\u1e0d Sidna \u0190isa ad ye\u010d\u010d \u0263u\u1e5b-es. Idda yid-es, ikcem \u0263er wexxam-is, yeqqim ad ye\u010d\u010d.\n7:37 Di taddart-nni tella yiwet n tme\u1e6d\u1e6dut yellan d yir tame\u1e6d\u1e6dut ; mi tesla s Sidna \u0190isa yella deg wexxam n wufarizi-nni, tekcem tewwi yid-es tabuqalt n le\u025b\u1e6der.\n7:38 Tekka-d deffir Sidna \u0190isa, te\u0263li \u0263er ida\u1e5b\u1e5ben-is te\u021bru. Tessebzeg (tesselxes) i\u1e0da\u1e5b\u1e5ben n Sidna \u0190isa s yime\u1e6d\u1e6dawen-is, tesfe\u1e0d-iten s ucebbub-is, tessudun-iten yerna tdehhin-iten s le\u025b\u1e6de\u1e5b-nni.\n7:39 Afarizi-nni mi gwala annect-nni, ixemmem deg iman-is yenna : Lemmer argaz-agi d nnbi i gella, yili ye\u025bqel belli tame\u1e6d\u1e6dut-agi i t-i\u021bnalen d yir tame\u1e6d\u1e6dut i tella.\n7:40 Sidna \u0190isa yenna i ufarizi-nni : A Sem\u025bun ! B\u0263i\u0263 a k-d-ini\u0263 yiwen wawal ! Afarizi yerra-yas-d : Ini-d a Sidi !\n7:41 Sidna \u0190isa yenna-yas : Illa yiwen ume\u1e5bkanti issekray idrimen. I\u021b\u021balas i sin yergazen, yiwen ye\u021b\u021balas-as xemsmeyyat alef, waye\u1e0d xemsin.\n7:42 Imi ur s\u025bin ara i sin s wacu ara xel\u1e63en, isemme\u1e25-asen. Anwa deg-sen ara t-i\u1e25emmlen akte\u1e5b ?\n7:43 Sem\u025bun afarizi yerra-yas : Ahat d win iwumi i gsume\u1e25 \u1e6d\u1e6dlaba tameqqrant. Sidna \u0190isa yenna-yas : Tes\u025bi\u1e0d l\u1e25eqq !\n7:44 D\u0263a iwehha \u0263er tme\u1e6d\u1e6dut-nni, yenna i Sem\u025bun : Twala\u1e0d tame\u1e6d\u1e6dut-agi ? Kecme\u0263-d \u0263er wexxam-ik, ur iyi-d-tefki\u1e0d ara aman ad ssirde\u0263 i\u1e0da\u1e5b\u1e5ben-iw, ne\u021b\u021bat tessared-iten s yime\u1e6d\u1e6dawen-is terna tesfe\u1e0d-iten s ucebbub-is.\n7:45 Ke\u010d\u010d ur d-tselme\u1e0d ara fell-i, ne\u021b\u021bat segmi i d-tekcem tessudun deg i\u1e0da\u1e5b\u1e5ben-iw.\n7:46 Ke\u010d\u010d ur tedhine\u1e0d ara aqe\u1e5b\u1e5buy-iw ula s zzit, ma d ne\u021b\u021bat tesmar-ed le\u025b\u1e6de\u1e5b \u0263ef yi\u1e0da\u1e5b\u1e5ben-iw.\n7:47 A k-ini\u0263 : ddnubat-is me\u1e5b\u1e5ba \u021bwa\u025bfan as daymi i d-tbeggen le\u1e25mala tameqqrant. Ma d win iwumi ye\u021bwa\u025bfa ci\u1e6du\u1e25, le\u1e25mala-ines \u021b-\u021bamec\u1e6du\u1e25t.\n7:48 Sidna \u0190isa yenna i tme\u1e6d\u1e6dut-nni : Atan \u021bwa\u025beffan-am ddnubat-im !\n7:49 Inebgawen nni\u1e0den bdan qqa\u1e5ben deg yiman-nsen : \u00ab d acu-t wergaz-agi i gessaw\u1e0den iman-is ad ye\u025bfu ula d ddnubat ? \u00bb\n7:50 Sidna \u0190isa yenna i tme\u1e6d\u1e6dut-nni : Imi tumne\u1e0d yis-i te\u021b\u021busellke\u1e0d, \u1e5bu\u1e25 di lehna.\n8:1 Sidna \u0190isa iteddu ye\u021bbecci\u1e5b lexba\u1e5b n lxi\u1e5b n tgeldit n \u1e5aebbi si temdint \u0263er taye\u1e0d, si taddart \u0263er taye\u1e0d. Tnac-nni yinelmaden-is ddan yid-es,\n8:2 ddant da\u0263en kra n tilawin i gesse\u1e25la si lehlakat-nsent, tid iwumi yessufe\u0263 le\u01e7nun. Tella gar-asent Meryem iwumi qqa\u1e5ben tamagdalit i\u021bwasellken si seb\u025ba le\u01e7nun,\n8:3 akk-d Yunna tame\u1e6d\u1e6dut n Cuza lewkil n ugellid Hi\u1e5budus, Suzana akk \u021b-\u021bilawin nni\u1e0den i ten-i\u021b\u025bawanen s wayen s\u025bant.\n8:4 L\u0263aci usan-d seg wa\u1e6das n tudrin. Mi d-nnejma\u025ben \u0263u\u1e5b-es, Sidna \u0190isa yewwi-yasen-d lemtel-agi :\n8:5 Yiwen ufella\u1e25 iffe\u0263 ad izre\u025b irden. Mi gzerre\u025b, kra n i\u025beqqayen \u0263lin \u0263er webrid , \u021bwa\u1e5bek\u1e0den yerna \u010d\u010dan-ten yef\u1e5bax n igenni.\n8:6 Amur nni\u1e0den n zzerri\u025ba ye\u0263li ger yed\u0263a\u0263en , mi d-tem\u0263i teqqu\u1e5b imi xu\u1e63\u1e63en waman.\n8:7 Amur nni\u1e0den ye\u0263li da\u0263en ger isennanen , mi d-tem\u0263i zzerri\u025ba m\u0263in-d yid-es isennanen, \u0263ummen-\u021b.\n8:8 Amur nni\u1e0den da\u0263en ye\u0263li deg wakal l\u025bali ; mi d-m\u0263in, mkul a\u025beqqa yefka-d meyya. Mi d-yenna ayagi, i\u025begge\u1e0d yenna : Win yes\u025ban ime\u1e93\u1e93u\u0263en isel-ed !\n8:9 Inelmaden-is ssutren-as d acu i d lme\u025bna n lemtel-agi.\n8:10 Yerra-yasen : Kunwi ye\u021b\u021bunefk-awen-d a\u021b \u021bissinem lba\u1e0dna n tgeldit n \u1e5aebbi, ma d wiya\u1e0d i\u021b\u021bunefk-asen-d a \u021b-issinen s lemtul kan iwakken \u0263as ad \u1e93ren s wallen-nsen ur \u021bwalin ara, \u0263as ma slan ur fehhmen ara.\n8:11 Atah lme\u025bna n lemtel-agi : zzerri\u025ba d awal n \u1e5aebbi.\n8:12 Llan kra n yemdanen \u021bemcabin \u0263er webrid-nni anda te\u0263li zzerri\u025ba, m'ara slen i wawal, Cci\u1e6dan a d-yas a t-iqle\u025b seg ulawen-nsen iwakken ur \u021b\u021bamnen ur \u021bwasellaken.\n8:13 Wiya\u1e0d \u021bemcabin \u0263er wakal ye\u010d\u010du\u1e5ben d id\u0263a\u0263en. M'ara slen i wawal a t-qeblen s lfe\u1e5b\u1e25 lame\u025bna ur t-\u021ba\u01e7\u01e7an ara ad iger izu\u1e5ban ; imiren kan ad amnen, m'ara d-yas lweqt n uje\u1e5b\u1e5beb \u021b\u021bu\u0263alen \u0263er deffir.\n8:14 Ayen ye\u0263lin ger isennanen, d wid isellen i wawal me\u025bna m'ara d-im\u0263i ur igemmu ara deg-sen axa\u1e6der \u021b\u021ba\u01e7an anezgum d rrbe\u1e25 akk-d zzhu n ddunit ad i\u0263umm awal-nni.\n8:15 Ma d ayen ye\u021bwazer\u025ben deg wakal l\u025bali, d wid isellen i wawal s wul ye\u1e63fan d neyya \u1e25erzen-t yerna \u021b\u021ba\u01e7an-d lxi\u1e5b s \u1e63\u1e63be\u1e5b-nsen.\n8:16 Yiwen ur ice\u025b\u025bel taftilt iwakken a \u021b-i\u0263um s l\u1e25ila ne\u0263 a \u021b-issedreg; lame\u025bna a \u021b-issers \u0263ef lme\u1e63be\u1e25 iwakken kra n win ara d-ikecmen ad iwali tafat.\n8:17 Kra n wayen yeffren a d-iban, kra n wayen yellan di \u1e6d\u1e6dlam a t-id-tesban tafat.\n8:18 \u0190asset iman-nwen ihi \u0263ef wayen i tsellem, axa\u1e6der win i g\u1e25erzen ayen yes\u025ba a s-nernu, ma d win ur n\u1e25errez ara a s-i\u021bwakkes ula d ayen i g\u0263il yes\u025ba-t.\n8:19 Yemma-s d watmaten n Sidna \u0190isa usan-d a t-\u1e93ren, me\u025bna ur zmiren ara ad qe\u1e5b\u1e5bben \u0263u\u1e5b-es imi a\u1e6das n l\u0263aci i gellan dinna.\n8:20 Ssaw\u1e0den-as lexba\u1e5b nnan-as : A Sidi, yemma-k d watmaten-ik atnan di be\u1e5b\u1e5ba, b\u0263an a k-\u1e93ren.\n8:21 Sidna \u0190isa yerra-yasen : Yemma d watmaten-iw d widak isme\u1e25sisen i wawal n \u1e5aebbi yerna ttaba\u025ben-t.\n8:22 Yiwen wass, Sidna \u0190isa yuli \u0263er yiwet n teflukt ne\u021b\u021ba d yinelmaden-is. Yenna-yasen : Eyyaw a nzegret \u0263er tama nni\u1e0den n leb\u1e25e\u1e5b n Jlili. D\u0263a \u1e5bu\u1e25en.\n8:23 Mi teddun \u0263ef waman, Sidna \u0190isa ye\u1e6d\u1e6des. Yekker-ed wa\u1e0du i\u01e7ehden di leb\u1e25e\u1e5b, taflukt tebda te\u021b\u021ba\u010da\u1e5b d aman, ikcem-iten lxuf ameqqran.\n8:24 Inelmaden qe\u1e5b\u1e5bben \u0263u\u1e5b-es, sekkren-t-id nnan-as : A Sidi, a Sidi, atan a ne\u0263\u1e5beq. Yekker-ed, d\u0263a yume\u1e5b i wa\u1e0du d lemwaji ad \u1e25ebsen, imiren kan ters-ed talwit.\n8:25 Sidna \u0190isa yenna-yasen : Anida-t liman-nwen ? T\u025be\u01e7\u01e7ben, \u021bergigin, qqa\u1e5ben wway gar-asen : Anwa-t wagi ? Izmer ad yefk lame\u1e5b i wa\u1e0du d leb\u1e25e\u1e5b yerna \u021b\u021ba\u0263en as awal !\n8:26 Ww\u1e0den \u0263er tama nni\u1e0den n leb\u1e25e\u1e5b, \u0263er tmurt n iji\u1e5baziyen iqublen tamurt n Jlili.\n8:27 Mi d-yers Sidna \u0190isa, ataya yusa-d \u0263u\u1e5b-es yiwen wergaz n taddart nni, melken-t wa\u1e6das n le\u01e7nun ; ac\u1e25al ur yelsi llebsa, ur yezdi\u0263 axxam, ye\u021b\u025bici di tmeqbe\u1e5bt ger i\u1e93ekwan.\n8:28 Mi gwala Sidna \u0190isa, ye\u0263li \u0263er i\u1e0da\u1e5b\u1e5ben-is i\u025begge\u1e0d yenna : D acu i teb\u0263i\u1e0d \u0263u\u1e5b-i a \u0190isa Mmi-s n \u1e5aebbi \u025blayen ? Di le\u025bnaya-k ur iyi-\u021b\u025be\u021b\u021bib ara.\n8:29 Yenna-yas-d akka axa\u1e6der Sidna \u0190isa yefka lame\u1e5b i u\u1e5bu\u1e25ani i t-ized\u0263en ad iffe\u0263 seg-s. Ac\u1e25al d abrid i s-cudden ifassen d i\u1e0da\u1e5b\u1e5ben s ssnasel, ne\u021b\u021ba isse\u0263\u1e5bas-itent yerna a\u1e5bu\u1e25ani-nni yezzu\u0263u\u1e5b-it \u0263er yimukan yexlan.\n8:30 Sidna \u0190isa isteqsa-t yenna-yas : Isem-ik ? yerra-yas : Tarba\u025bt. Yenna-yas-d akka axa\u1e6der a\u1e6das n le\u01e7nun i t-ized\u0263en.\n8:31 ?\u1e25ellilen Sidna \u0190isa ur ten-i\u021bceggi\u025b ara \u0263er yimukan n \u1e6d\u1e6dlam.\n8:32 Tella dinna yiwet n tqe\u1e0d\u025bit tameqqrant n yilfan kessen deg yiwet n ti\u0263ilt. Le\u01e7nun-nni \u021b\u1e25ellilen Sidna \u0190isa a ten-ye\u01e7\u01e7 ad kecmen deg yilfan-nni ; Sidna \u0190isa iserre\u1e25-asen.\n8:33 Imiren ff\u0263en seg wergaz-nni, kecmen deg yilfan, grarben seg ixef n ti\u0263ilt \u0263er leb\u1e25e\u1e5b, \u0263e\u1e5bqen.\n8:34 Imeksawen-nsen mi walan ayen yed\u1e5ban uzzlen \u0263er taddart d lexlawi ad ssiw\u1e0den lexba\u1e5b.\n8:35 Usan-d l\u0263aci \u0263er Sidna \u0190isa, ufan-d argaz-nni i seg d-ff\u0263en le\u01e7nun yeqqim \u0263er i\u1e0da\u1e5b\u1e5ben-is, yu\u0263al-ed \u0263er le\u025bqel-is, yelsa llebsa. Wehmen akk, tekcem-iten tugdi.\n8:36 Wid i\u1e25ed\u1e5ben i wayen yed\u1e5ban, \u1e25kan amek ye\u021bwasellek ume\u01e7nun-nni.\n8:37 Imezda\u0263 n tmurt uggaden, d\u0263a ssutren i Sidna \u0190isa ad ib\u025bed fell-asen. Sidna \u0190isa yuli \u0263er teflukt iwakken ad i\u1e5bu\u1e25.\n8:38 Argaz-nni i seg d-ff\u0263en le\u01e7nun, issuter a t-ye\u01e7\u01e7 ad yeddu yid-es, me\u025bna Sidna \u0190isa yenna-yas :\n8:39 U\u0263al \u0263er wexxam-ik, te\u1e25ku\u1e0d ayen akk i k-ixdem \u1e5aebbi. Argaz-nni i\u1e5bu\u1e25, ikcem \u0263er taddart, ye\u1e25ka me\u1e5b\u1e5ba wayen i s-ixdem Sidna \u0190isa.\n8:40 Mi d-yu\u0263al Sidna \u0190isa, l\u0263aci me\u1e5b\u1e5ba i t-i\u021b\u1e5ba\u01e7un mmugren-t-id.\n8:41 Yewwe\u1e0d-ed yiwen wergaz isem-is Jayrus, d ameqqran n l\u01e7ame\u025b, ye\u0263li \u0263er i\u1e0da\u1e5b\u1e5ben n Sidna \u0190isa, ye\u021b\u1e25ellil deg-s iwakken ad iddu \u0263er wexxam is\n8:42 axa\u1e6der yes\u025ba yelli-s tnac yiseggasen di le\u025bme\u1e5b-is, te\u021bme\u021b\u021bat yerna anagar ne\u021b\u021bat i ges\u025ba. Akken i\u021beddu Sidna \u0190isa \u0263er dinna, \u1e25e\u1e5bsen-t-id l\u0263aci si mkul l\u01e7iha.\n8:43 Tella dinna yiwet n tme\u1e6d\u1e6dut ihelken, tnac iseggasen ne\u021b\u021bat tessaq d idammen. Tex\u1e63e\u1e5b ayen akk i tes\u025ba \u0263er \u1e6d\u1e6debba, yiwen ur \u021b-isse\u1e25la.\n8:44 Tekka-d deffir Sidna \u0190isa, te\u1e0dleq afus-is, tennul iri n ube\u1e5bnus-is, imiren kan te\u1e25la \u1e25ebsen idammen-nni.\n8:45 Sidna \u0190isa yen\u1e6deq yenna : Anwa akka i yi-d-innulen ? Imi ssusmen me\u1e5b\u1e5ba, Bu\u1e6drus yenna yas : A Sidi, l\u0263aci yezzi-yak-d yerna i\u1e25\u1e5bes-ik-id si mkul tama, ke\u010d\u010d teqqa\u1e5be\u1e0d anwa i k-id-innulen !\n8:46 Sidna \u0190isa yerra-yas : Yella yiwen i yi-d-innulen axa\u1e6der \u1e25usse\u0263 i kra n tezmert teffe\u0263 seg-i.\n8:47 Tame\u1e6d\u1e6dut-nni imi twala ulamek ara teffer, tusa-d te\u021b\u021bergigi te\u0263li \u0263er yi\u1e0da\u1e5b\u1e5ben n Sidna \u0190isa, te\u1e25ka-d zdat l\u0263aci me\u1e5b\u1e5ba acu\u0263e\u1e5b i t-tennul d wamek te\u1e25la imiren kan si lehlak-is.\n8:48 Sidna \u0190isa yenna-yas : A yell-i, imi tumne\u1e0d yis-i te\u1e25li\u1e0d ! \u1e5au\u1e25 di talwit.\n8:49 Mazal-it ihedde\u1e5b, ataya yiwen wergaz yusa-d seg wexxam n Jay\u1e5bus, yewwi-yas-d lexba\u1e5b-agi : Yelli-k temmut ! Ur \u021b\u025be\u021b\u021bib ara Sidna \u0190isa.\n8:50 Sidna \u0190isa mi s-yesla i wergaz-nni, yenna i Jay\u1e5bus : Ur \u021b\u021bagad ara ! Amen kan, yelli-k a\u021b-\u021beslek.\n8:51 Mi gewwe\u1e0d \u0263er wexxam, ur ye\u01e7\u01e7i yiwen ad ikcem yid-es anagar Bu\u1e6drus, Yu\u1e25enna, Ye\u025bqub akk-d baba-s d yemma-s n teqcict-nni.\n8:52 Wid yellan dinna \u021brun akk, \u021b\u0263erriden ( \u021bme\u01e7\u01e7iden ) fell-as. Sidna \u0190isa yenna-yasen : Be\u1e5bka-kkun ime\u1e6d\u1e6dawen ! taqcict ur temmut ara ! D i\u1e0des i te\u1e6d\u1e6des.\n8:53 Nutni ugin a s-d-\u1e25essen imi \u1e93ran taqcict temmut.\n8:54 Sidna \u0190isa ye\u1e6d\u1e6def-i\u021b-id seg wufus yenna-yas s ta\u0263ect \u025blayen : A taqcict, ekker !\n8:55 Imiren kan yu\u0263al-i\u021b-id \u1e5b\u1e5bu\u1e25, tekker-ed. Sidna \u0190isa yume\u1e5b a s-fken ayen ara te\u010d\u010d.\n8:56 Imawlan-is wehmen. Sidna \u0190isa iwe\u1e63\u1e63a-ten ur \u021b\u025bawaden i yiwen ayen yed\u1e5ban.\n9:1 Sidna \u0190isa isnejma\u025b-ed tnac yinelmaden-is, yefka-yasen tazmert d l\u1e25ekma s wacu ara ssuf\u0263en le\u01e7nun, ara sse\u1e25lun imu\u1e0dan.\n9:2 Icegge\u025b-iten ad becc\u1e5ben tageldit n \u1e5aebbi, yerna ad sse\u1e25lun imu\u1e0dan.\n9:3 Yenna-yasen : Ur \u021b\u021bawit acemma yid-wen d a\u025bwin, ur \u021b\u021bawit a\u025bekkaz ne\u0263 agrab (aqwrab), ur \u021b\u021bawit a\u0263\u1e5bum ne\u0263 idrimen, ur \u021b\u021bawit ara da\u0263en sin yiqendya\u1e5b.\n9:4 Kra n win ara yest\u1e5be\u1e25ben yis wen, qqimet deg wexxam-is alamma t\u1e5bu\u1e25em.\n9:5 Ma d anda ur st\u1e5be\u1e25ben ara yis-wen, m'ara teff\u0263em si taddart-nni, zwit ula d a\u0263ebba\u1e5b-is seg yi\u1e0da\u1e5b\u1e5ben nwen, iwakken a\u021b-\u021bcehdem fell-asen belli d nutni i kkun-yugin.\n9:6 \u1e5au\u1e25en, \u021beddun si taddart \u0263er taye\u1e0d, \u021bbecci\u1e5ben lexba\u1e5b n lxi\u1e5b, sse\u1e25layen imu\u1e0dan di mkul amkan.\n9:7 Hi\u1e5budus l\u1e25akem n tmurt n Jlili, ye\u025bweq mi gesla s wayen yed\u1e5ban me\u1e5b\u1e5ba, axa\u1e6der kra n yemdanen qqa\u1e5ben : \u00ab d Ye\u1e25ya i d-i\u1e25yan si ger lmegtin ! \u00bb\n9:8 Wiya\u1e0d qqa\u1e5ben : \u00ab d Sidna Ilyas i d-yu\u0263alen ! \u00bb Ne\u0263 : \u00ab ahat d yiwen si lenbiya n zik i d-i\u1e25yan ! \u00bb\n9:9 Lame\u025bna Hi\u1e5budus yeqqa\u1e5b : \u00ab Ye\u1e25ya kkse\u0263-as aqe\u1e5b\u1e5buy ! Anwa-t ihi wagi i \u0263ef selle\u0263 annect-agi ? \u00bb D\u0263a i\u021bqellib ad i\u1e93er Sidna \u0190isa.\n9:10 Mi d-u\u0263alen \u1e5b\u1e5busul n Sidna \u0190isa, bdan \u1e25ekkun-as ayen akk i xedmen. Yewwi-ten yid-es \u0263er yiwen wemkan, \u0263er tama n taddart n Bitsayda akken ad qqimen we\u1e25\u1e25ed-sen.\n9:11 Mi slan anda yella l\u0263aci teb\u025ben-t. Ne\u021b\u021ba yeste\u1e5b\u1e25eb yis-sen, yebda ihedde\u1e5b-asen \u0263ef tgeldit n \u1e5aebbi, yesse\u1e25la da\u0263en wid ihelken.\n9:12 Akken q\u1e5bib ad ye\u0263li yi\u1e6dij, tnac-nni n \u1e5b\u1e5busul usan-d \u0263er Sidna \u0190isa nnan-as : Serre\u1e25 i l\u0263aci ad \u1e5bu\u1e25en \u0263er temdinin \u021b-\u021budrin iqe\u1e5bben iwakken ad afen ayen ara \u010d\u010den d wanda ara \u1e6dsen, axa\u1e6der aql-a\u0263 deg wemkan yexlan.\n9:13 Sidna \u0190isa yenna-yasen : Fket-asen kunwi s yiman-nwen ayen ara \u010d\u010den. Erran-as : ?u\u1e5b-nne\u0263 anagar xemsa te\u1e25bulin n we\u0263\u1e5bum d sin yiselman. Ne\u0263 teb\u0263i\u1e0d a n\u1e5bu\u1e25 nukni a d-na\u0263 ayen ara \u010d\u010den l\u0263aci-agi ?\n9:14 Llan dinna azal n xemsa alaf n yergazen. Sidna \u0190isa yenna i yinelmaden-is : Fe\u1e5bqet l\u0263aci \u021b-\u021birebba\u025b n xemsin xemsin, tes\u0263imem-ten.\n9:15 \u1e5au\u1e25en s\u0263imen-ten akken i sen-d yenna.\n9:16 Sidna \u0190isa yerfed allen-is \u0263er yigenni, ye\u1e25med \u1e5aebbi icekke\u1e5b-it, yeddem-ed xemsa-nni te\u1e25bulin n we\u0263\u1e5bum d sin-nni iselman yeb\u1e0da-ten, yefka-ten i inelmaden-is a ten- fe\u1e5bqen i l\u0263aci.\n9:17 ?\u010dan akk armi \u1e5bwan, yerna \u010d\u010du\u1e5ben tnac yi\u1e0della\u025ben s wayen i d-yugran.\n9:18 Yiwen wass Sidna \u0190isa yeqqim we\u1e25d-es ye\u021b\u1e93alla. Inelmaden-is qe\u1e5b\u1e5bben \u0263u\u1e5b-es d\u0263a isteqsa-ten yenna-yasen : D acu-yi \u0263er l\u0263aci ?\n9:19 Rran-as : Kra qqa\u1e5ben d Ye\u1e25ya a\u0263e\u1e6d\u1e6das ; wiya\u1e0d d Sidna Ilyas i d-yu\u0263alen ; ma d kra nni\u1e0den qqa\u1e5ben d yiwen si lenbiya n zik i d-i\u1e25yan si ger lmegtin.\n9:20 Yenna-yasen : I kunwi, d acu-yi \u0263u\u1e5b-wen ? Yen\u1e6deq Bu\u1e6drus yenna-yas : D ke\u010d\u010d i d Lmasi\u1e25 n \u1e5aebbi.\n9:21 Sidna \u0190isa iwe\u1e63\u1e63a-ten ur qqa\u1e5ben i yiwen belli d ne\u021b\u021ba i d Lmasi\u1e25.\n9:22 Yenna-yasen da\u0263en : Ilaq Mmi-s n bunadem ad ye\u025bteb a\u1e6das. A t-nekk\u1e5ben lecyux d lmuqedmin imeqqranen akk-d l\u025bulama n ccari\u025ba yerna a t-n\u0263en, lame\u025bna ass wis tlata a d-i\u1e25yu si ger lmegtin.\n9:23 Yenna da\u0263en i l\u0263aci : Win yeb\u0263an ad iddu yid-i ur ilaq ara ad ixemmem \u0263ef tudert-is ; ilaq ad iqbel ad yen\u025be\u021b\u021bab yal ass \u0263ef ddemma n yisem-iw yerna ad yetbe\u025b abrid-iw.\n9:24 Axa\u1e6der win yeb\u0263an ad isellek tudert-is a s-t\u1e5bu\u1e25. Ma d win iwumi ara t\u1e5bu\u1e25 \u0263ef ddemma-w ad yu\u0263al a \u021b-yaf.\n9:25 D acu i d lfayda n wemdan ara ireb\u1e25en ddunit me\u1e5b\u1e5ba ma yes\u1e5bu\u1e25 tudert-is ne\u0263 issenger iman-is ?\n9:26 Atan win isset\u1e25an yis-i ne\u0263 s yimeslayen iw, ad isset\u1e25i yis Mmi-s n bunadem m'ara d-yas di tmanegt-is \u021b-\u021bmanegt n Baba \u1e5aebbi akk-d lmalayekkat iqedsen.\n9:27 A wen-d-ini\u0263 tide\u021b, llan gar-awen wid ur ne\u021bme\u021b\u021bat ara alamma walan Tageldit n \u1e5aebbi.\n9:28 \u0190eddan azal n tmanya wussan segmi i d-yenna imeslayen-agi. Sidna \u0190isa yewwi yid-es Bu\u1e6drus, Yu\u1e25enna d Ye\u025bqub, yuli \u0263er wedrar ad i\u1e93\u1e93all.\n9:29 Mi gella ide\u025b\u025bu yenbeddal wudem-is, llebsa-s tu\u0263al \u021b-\u021bamellalt te\u021bfe\u01e7\u01e7i\u01e7 am yi\u1e6dij.\n9:30 Taswi\u025bt kan bedden-d \u0263u\u1e5b-es sin yergazen hedd\u1e5ben yid-es : d Sidna Musa akk-d Sidna Ilyas.\n9:31 Banen-ed di tafat tameqqrant, \u021bmeslayen yid-es \u0263ef lmut-is ara yed\u1e5bun di temdint n Lquds.\n9:32 Bu\u1e6drus d yimdukkal-is yewwi ten yi\u1e0des. Mi d-endekwalen, walan tamanegt n Sidna \u0190isa akk-d wid yellan yid-es.\n9:33 Mi kkren ad \u1e5bu\u1e25en sin-nni yergazen, yen\u1e6deq Bu\u1e6drus \u0263er Sidna \u0190isa yenna : A Sidi, ac\u1e25al yelha m'akka nella dagi ! Ma teb\u0263i\u1e0d a nesbedd tlata yiqi\u1e0dunen, yiwen i ke\u010d\u010d, yiwen i Sidna Musa waye\u1e0d i Sidna Ilyas. Yenna-d akka, axa\u1e6der ur ye\u1e93ri d acu i d-iqqa\u1e5b !\n9:34 Mazal-it ihedde\u1e5b mi ten-id-t\u0263umm yiwet n tagut. Bu\u1e6drus d imdukkal-is ikcem-iten lxuf d ameqqran.\n9:35 Iffe\u0263-ed yiwen n \u1e63\u1e63ut si tagut-nni yenna-d : Wagi d Mmi, d ne\u021b\u021ba i xta\u1e5be\u0263, sme\u1e25siset-as.\n9:36 Mi ge\u1e25bes \u1e63\u1e63ut-nni, walan anagar Sidna \u0190isa. Deg ussan-nni, inelmaden ur \u1e25kin i yiwen ayen \u1e93ran.\n9:37 Azekka-nni mi d-\u1e63ubben seg wedrar, a\u1e6das n l\u0263aci i d-immugren Sidna \u0190isa.\n9:38 Atah yiwen wergaz i\u025begge\u1e0d-ed si ger l\u0263aci yenna : A Sidi, di le\u025bnaya-k muqel-ed \u0263er mmi, ala ne\u021b\u021ba i s\u025bi\u0263 !\n9:39 Ikcem-it u\u1e5bu\u1e25ani, tiswi\u025bin m'ara t-i\u021bhuccu, ye\u021b\u025beggi\u1e0d alamma ff\u0263ent-ed tkufta seg imi-s, ur as-i\u021bserri\u1e25 ara alamma yer\u1e93a-t akk.\n9:40 ?ellele\u0263 inelmaden-ik a t-ssuf\u0263en seg-s, lame\u025bna ur zmiren ara.\n9:41 Sidna \u0190isa yen\u1e6deq yenna : A l\u01e7il ijehlen i\u025bewjen, ar melmi ara yili\u0263 yid-wen, ara wen-seb\u1e5be\u0263 ? Awi-d mmi-k \u0263er dagi !\n9:42 Akken i d-iqe\u1e5b\u1e5beb weqcic-nni, a\u1e5bu\u1e25ani isseglallez-it di lqa\u025ba armi i d-\u021beff\u0263ent tkufta seg yimi-s. Sidna \u0190isa yefka lame\u1e5b i u\u1e5bu\u1e25ani-nni iwakken a t-iffe\u0263. Aqcic-nni ye\u1e25la, Sidna \u0190isa yerra-t i baba-s.\n9:43 L\u0263aci me\u1e5b\u1e5ba wehmen di tezmert n Sidi \u1e5aebbi. Imi t\u025be\u01e7\u01e7ben akk s wayen i gxeddem, Sidna \u0190isa yen\u1e6deq \u0263er yinelmaden-is yenna :\n9:44 ?esset-ed mli\u1e25 i wayen ara wen-d-ini\u0263 tura : \u00ab Mmi-s n bunadem ad i\u021b\u021busellem ger ifassen n yemdanen. \u00bb\n9:45 Inelmaden-is ur fhimen ara imeslayen-agi, lme\u025bna-ines te\u021bwaffer fell-asen iwakken ur t-fehmen ara yerna kukran a t-steqsin.\n9:46 Inelmaden \u021bmeslayen wway gar-asen, \u021bmesteqsayen anwa i d ameqqran deg-sen.\n9:47 Sidna \u0190isa ye\u1e93ran ayen \u021bxemmimen deg ulawen-nsen, ikker yeddem-ed yiwen weqcic isbedd-it zdat-es,\n9:48 yenna-yasen : Win iqeblen aqcic am wagi \u0263ef ddemma n yisem-iw d nekk i geqbel, win i yi-qeblen, yeqbel win i yi-d icegg\u025ben. Win yessim\u1e93iyen iman-is gar-awen d ne\u021b\u021ba i d ameqqran.\n9:49 Yu\u1e25enna yenna i Sidna \u0190isa : A Sidi, ne\u1e93ra yiwen wergaz yessuffu\u0263 le\u01e7nun s yisem-ik, neb\u0263a a s-neq\u1e0de\u025b imi ur k-itbi\u025b ara am nukni.\n9:50 Sidna \u0190isa yerra-yas : Ur s-\u021b\u021bagit ara ! Win ur wen-d neffi\u0263 ara d a\u025bdaw, yid-wen i gella !\n9:51 Mi q\u1e5bib a d-aw\u1e0den wussan i deg ara ye\u021bwarfed \u0263er igenwan, Sidna \u0190isa yeqsed ad i\u1e5bu\u1e25 \u0263er temdint n Lquds.\n9:52 Yessezwer imcegg\u025ben zdat-es iwakken a s-heggin ayen ilaqen. Kecmen \u0263er yiwet n taddart n yisamariyen,\n9:53 lame\u025bna ugin ad st\u1e5be\u1e25ben yis imi slan \u0263er temdint n Lquds i gteddu.\n9:54 Ye\u025bqub d Yu\u1e25enna mi \u1e93ran ayagi, nnan : A Sidi, teb\u0263i\u1e0d a nefk lame\u1e5b i tmes n yigenni a d-te\u0263li fell-asen a ten tessenger ?\n9:55 Sidna \u0190isa yezzi \u0263u\u1e5b-sen, i\u025begge\u1e0d fell-asen yenna : Acu\u0263e\u1e5b i te\u021bxemmimem akka ?\n9:56 Mmi-s n bunadem ur d-yusi ara ad issenger imdanen lame\u025bna yusa-d a ten-isellek. D\u0263a \u1e5bu\u1e25en \u0263er taddart nni\u1e0den.\n9:57 Mi teddun deg webrid, yiwen wergaz yenna i Sidna \u0190isa : A Sidi, anda teddi\u1e0d ad ddu\u0263 !\n9:58 Sidna \u0190isa yerra-yas : Uccanen \u0263u\u1e5b-sen l\u0263i\u1e5ban, if\u1e5bax n yigenni s\u025ban le\u025bcuc, ma d Mmi-s n bunadem ur yes\u025bi ara anda ara yessers aqe\u1e5b\u1e5buy-is.\n9:59 D\u0263a yenna i yiwen nni\u1e0den : Eyya-d a\u021b-\u021beddu\u1e0d yid-i. Yerra-yas : A Sidi, serre\u1e25-iyi uqbel ad \u1e5bu\u1e25e\u0263 ad me\u1e0dle\u0263 baba.\n9:60 Sidna \u0190isa yenna-yas : E\u01e7\u01e7 wid yemmuten ad me\u1e0dlen lmegtin-nsen, ma d ke\u010d\u010d eyya-d a\u021b-\u021bbec\u1e5be\u1e0d tageldit n \u1e5aebbi.\n9:61 Waye\u1e0d yen\u1e6deq yenna-yas : Ad ddu\u0263 yid-ek a Sidi, lame\u025bna e\u01e7\u01e7-iyi ad \u1e5bu\u1e25e\u0263 ad sellme\u0263 \u0263ef wat wexxam-iw.\n9:62 Sidna \u0190isa yerra-yas : Kra n win ye\u1e6d\u1e6dfen lma\u025bun, ye\u021bmuqul \u0263er deffir, ur yenfi\u025b ara i tgelda n \u1e5aebbi.\n10:1 Syenna, Sidna \u0190isa yexta\u1e5b-ed tnin useb\u025bin yinelmaden nni\u1e0den, icegge\u025b-iten sin sin ad \u1e5bu\u1e25en \u0263er mkul taddart d mkul amkan anda ilaq ad i\u1e5bu\u1e25 ula d ne\u021b\u021ba.\n10:2 Yenna-yasen : Tamegra meqq\u1e5bet me\u025bna drus yixeddamen i gellan. D\u025but ihi \u0263er Bab n tmegra iwakken a d-icegge\u025b ixeddamen \u0263er yigran-is.\n10:3 Atan a kkun-cegg\u025be\u0263 am izamaren ger wuccanen.\n10:4 Ur \u021b\u021bawit yid-wen idrimen, ur \u021b\u021bawit a\u025bwin ne\u0263 tayuga nni\u1e0den n yerkasen. Deg webrid-nwen ur s\u1e5bu\u1e25uyet ara lweqt di sslam.\n10:5 Kra n wexxam ara tkecmem init : sslam n \u1e5aebbi fell-awen ay at wexxam !\n10:6 Ma yella dinna waleb\u025ba\u1e0d d imhenni, sslam-nwen ad yers fell-as, ne\u0263 m'ulac lehna-nwen a\u021b-\u021beqqim \u0263u\u1e5b-wen.\n10:7 Qqimet deg wexxam-nni, \u010d\u010det swet ayen ara wen-d-fken, axa\u1e6der axeddam yuklal lexla\u1e63-is. Ur \u021b\u1e5bu\u1e25ut ara seg wexxam \u0263er waye\u1e0d.\n10:8 Mkul taddart ara tkecmem, ma st\u1e5be\u1e25ben yis-wen \u010d\u010det ayen ara wen-d-ssersen.\n10:9 Sse\u1e25lut imu\u1e0dan-nsen, init-asen : tageldit n \u1e5aebbi tewwe\u1e0d-ed \u0263u\u1e5b-wen.\n10:10 Lame\u025bna mkul taddart ara tkecmem m'ur st\u1e5be\u1e25ben ara yis-wen, eff\u0263et \u0263er yizenqan-nsen init :\n10:11 \u00ab a nezwi ula d a\u0263ebba\u1e5b n taddart-nwen i d-ine\u1e6d\u1e0den deg yi\u1e0da\u1e5b\u1e5ben nne\u0263, me\u025bna \u1e25\u1e63ut belli tageldit n \u1e5aebbi tewwe\u1e0d-ed \u0263u\u1e5b-wen.\n10:12 Aql-i nni\u0263-awen, ass n l\u1e25isab taddart-agi a\u021b-\u021be\u021b\u021bu\u025baqeb akte\u1e5b n temdint n ?udum.\n10:13 A nnger-im a tamdint n Kurazim, a nnger-im a Bitsayda ! A lukan lbe\u1e5bhanat ye\u021bwaxedmen deg kkunt \u021bwaxedmen di temdinin n ?ur akk-d Sidun, tili imezda\u0263-nsent ac\u1e25al aya segmi sburren ticekka\u1e5bin n le\u1e25zen, sexnunnsen iman-nsen deg i\u0263i\u0263den iwakken a d-beggnen belli ndemmen, u\u0263alen-d \u0263er webrid.\n10:14 ?ef wannect-agi, ass n l\u1e25isab a \u021b-\u021be\u021b\u021bu\u025baqbemt akte\u1e5b n temdinin n ?ur d Sidun.\n10:15 I kemmini a tamdint n Kaferna\u1e25um, t\u0263ile\u1e0d a\u021b-\u021bali\u1e0d \u0263er yigenni ? Xa\u1e6di ! ?er tesraft lqayen n laxe\u1e5bt ara te\u021bwa\u1e0degg\u1e5be\u1e0d.\n10:16 Win i wen-isme\u1e25sisen isme\u1e25sis-iyi-d i nekk. Win ur kkun-neqbil d nekk ur geqbil ara, win ur iyi-neqbil ara, ur iqbil ara Win i yi-d-icegg\u025ben.\n10:17 Tnin useb\u025bin-nni yinelmaden u\u0263alen-d \u010d\u010du\u1e5ben d lfe\u1e5b\u1e25, nnan-as : A Sidi, ula d le\u01e7nun \u021b\u021bagaden-a\u0263 s yisem-ik.\n10:18 Yenna-yasen : Wala\u0263 Cci\u1e6dan ye\u0263li-d am leb\u1e5baq seg yigenni.\n10:19 Slet-ed i wayen ara wen-ini\u0263 : \u021b-\u021bide\u021b fki\u0263-awen tazmert s wayes ara t\u1e5bek\u1e0dem izerman \u021b-\u021b\u0263erdmiwin, a\u021b-\u021bme\u1e25qem l\u01e7ehd n we\u025bdaw yerna ulac ayen ara wen-izemren ;\n10:20 lame\u025bna ur fe\u1e5b\u1e5b\u1e25et ara imi i t\u1e25ekkmem \u0263ef le\u01e7nun, fe\u1e5b\u1e25et imi ismawen-nwen \u021bwajerden deg igenwan.\n10:21 Imiren kan, Sidna \u0190isa ye\u010d\u010du\u1e5b-it \u1e5a\u1e5bu\u1e25 iqedsen s lfe\u1e5b\u1e25, yen\u1e6deq yenna : Tanemmirt a Baba, ke\u010d\u010d yellan d Bab n yigenwan d lqa\u025ba, imi ayen akk i teffre\u1e0d \u0263ef l\u025buqal d yimusnawen tbeggne\u1e0d-t-id i yimec\u1e6du\u1e25en. Tanemmirt a Baba \u1e5aebbi a\u1e25nin axa\u1e6der d wagi i d leb\u0263i-k.\n10:22 Baba yerra kullec ger ifassen-iw. Yiwen ur ye\u1e93ri d acu-yi anagar Baba \u1e5aebbi, yiwen ur issin Baba \u1e5aebbi anagar Mmi-s akk-d win iwumi yeb\u0263a Mmi-s a t-id-isbeggen.\n10:23 D\u0263a yezzi \u0263er yinelmaden-is yenna-yasen : Amarezg n wid iwalan ayen te\u021bwalim !\n10:24 Aql-i nni\u0263-awen : a\u1e6das n lenbiya d wa\u1e6das n yigelliden i geb\u0263an ad \u1e93ren ayen i t\u1e93errem ur t-\u1e93rin, i geb\u0263an ad slen ayen i tsellem ur t-slin.\n10:25 Ikred yiwen umusnaw n ccari\u025ba yeb\u0263an ad ije\u1e5b\u1e5beb Sidna \u0190isa, yenna yas : A Sidi, d acu ara xedme\u0263 iwakken ad s\u025bu\u0263 tudert n dayem ?\n10:26 Sidna \u0190isa yerra-yas : D acu yuran di ccari\u025ba n Musa ? D acu i tfehme\u1e0d deg-s mi \u021b-te\u0263ri\u1e0d ?\n10:27 Yerra-yas-d : A\u021b-\u021b\u1e25emmle\u1e0d Sidi \u1e5aebbi s wul-ik d \u1e5b\u1e5bu\u1e25-ik, s wayen yellan di tezmert-ik akk-d l\u025beqliya-k. A\u021b-\u021b\u1e25emmle\u1e0d da\u0263en wiya\u1e0d am yiman-ik .\n10:28 Sidna \u0190isa yenna-yas : Ayen akka i d-tenni\u1e0d \u021b-\u021bide\u021b, exdem akka a\u021b-\u021bes\u025bu\u1e0d tudert n dayem !\n10:29 L\u025balem-nni n ccari\u025ba yeb\u0263an ad yefk l\u1e25eqq i yiman-is, yenna i Sidna \u0190isa : Anwa-ten wiya\u1e0d-agi ?\n10:30 Sidna \u0190isa yerra-yas : Yiwen wergaz i\u1e63ubb-ed si temdint n Lquds \u0263er temdint n Yiriku ; sqa\u1e6d\u025ben-as yimakaren \u025berran-t rnan wten-t, \u1e5bu\u1e25en \u01e7\u01e7an-t ur yemmut ur iddir.\n10:31 I\u025bedda-d syenna yiwen lmuqeddem n ccari\u025ba ; mi t-iwala iwwet i\u025bedda si tama nni\u1e0den.\n10:32 I\u025bedda-d da\u0263en seg webrid-nni yiwen wem\u1e5babe\u1e0d n at Lewwi, iwala-t, ikemmel abrid-is i\u1e5bu\u1e25.\n10:33 Ataya yiwen wube\u1e5b\u1e5bani n tmurt n Samarya, iwwe\u1e0d-ed \u0263u\u1e5b-es, mi t-iwala i\u0263a\u1e0d-it.\n10:34 Iqe\u1e5b\u1e5beb \u0263u\u1e5b-es, idhen le\u01e7ru\u1e25-is s zzit d cc\u1e5bab, icudd iten ; isserkeb-it \u0263ef zzayla-s, yewwi-t \u0263er yiwen wexxam n yemsafren, ilha-d yid-es.\n10:35 Azekka-nni yefka sin yi\u1e63urdiyen i bab n wexxam-nni, yenna-yas : \u00ab Bedd \u0263u\u1e5b-es, ayen ara t\u1e63e\u1e5b\u1e5bfe\u1e0d n zzyada fell-as, a k-t-id-kemmle\u0263 asm'ara d-u\u0263ale\u0263. \u00bb\n10:36 Di tlata-agi, anwa i g\u1e25emmlen am yiman-is argaz-agi ye\u021b\u021bu\u025berran ?\n10:37 Amusnaw n ccari\u025ba yerra-yas : D win akken i\u1e25unnen fell-as, i s ixedmen lxi\u1e5b. Sidna \u0190isa yenna-yas : \u1e5au\u1e25 ula d ke\u010d\u010d exdem akken.\n10:38 Deg webrid-nsen \u0263er temdint n Lquds, Sidna \u0190isa yekcem \u0263er yiwet n taddart. Yiwet n tme\u1e6d\u1e6dut isem is Mar\u1e6da te\u025b\u1e5be\u1e0d-it \u0263er wexxam-nsen.\n10:39 Tes\u025ba weltma-s isem-is Meryem, teqqim-ed \u0263er i\u1e0da\u1e5b\u1e5ben n Sidna \u0190isa, tesme\u1e25sis i wawal-is.\n10:40 Mar\u1e6da tqeddec ye\u010d\u010da-\u021b cc\u0263el, tusa-d \u0263er Sidna \u0190isa tenna-yas : A Sidi, ur ak-tewqi\u025b ara lme\u025bna imi iyi-te\u01e7\u01e7a weltma ad qedce\u0263 we\u1e25d-i ? Ini-yas a\u021b-\u021bekker a yi-t\u025biwen.\n10:41 Sidna \u0190isa yerra-yas : A Ma\u1e5bta, te\u021b\u1e25ebbi\u1e5be\u1e0d te\u021bqelliqe\u1e0d iman-im \u0263ef wa\u1e6das n t\u0263awsiwin ;\n10:42 lame\u025bna yiwet kan i g\u1e63e\u1e25\u1e25an ! Meryem texta\u1e5b ayen ilaqen yerna yiwen ur as-t-i\u021bekkes.\n11:1 Yiwen wass, Sidna \u0190isa ye\u021b\u1e93alla deg yiwen wemkan. Mi gfukk, yiwen seg yinelmaden-is yenna-yas : A Sidi, selmed-a\u0263 amek ara ne\u1e93\u1e93al akken yesselmed Ye\u1e25ya i yinelmaden-is.\n11:2 Yenna-yasen : M'ara t\u1e93allem, init : A Baba \u1e5aebbi, isem-ik ad i\u021bwaqeddes, l\u1e25ekma n tgeldit-ik a d-tas.\n11:3 Yal ass efk-a\u0263-d a\u0263\u1e5bum-nne\u0263.\n11:4 Semme\u1e25-a\u0263 ddnubat-nne\u0263 akken i ne\u021bsama\u1e25 ula d nukkni i wid i \u0263-ixedmen cce\u1e5b, ur a\u0263-\u021ba\u01e7\u01e7a ara a ne\u0263li deg wuje\u1e5b\u1e5beb.\n11:5 Yenna-yasen da\u0263en : Ma yella yiwen deg-wen yes\u025ba a\u1e25bib, i\u1e5bu\u1e25 \u0263u\u1e5b-es di \u021bna\u1e63fa n yi\u1e0d a s-yini : \u00ab Ay a\u1e25bib \u1e5b\u1e0del-iyi-d tlata te\u1e25bulin n we\u0263\u1e5bum ,\n11:6 atan yusa-yi-d yiwen we\u1e25bib i ge\u1e6d\u1e6def webrid, ur s\u025bi\u0263 d acu ara s-d-sserse\u0263. \u00bb\n11:7 Ma yerra-yas-d si zdaxel n wexxam : \u00ab Ur iyi-\u021b\u025be\u021b\u021bib ara, tawwurt tsekke\u1e5b, nekk d warraw-iw aql-a\u0263 ne\u1e6d\u1e6des, ur zmire\u0263 ara a d-kkre\u0263 iwakken a k-d-fke\u0263 a\u0263\u1e5bum. \u00bb\n11:8 A wen-d-ini\u0263 : ma ye\u025bdez ur yeb\u0263i ara a d-yekker \u0263u\u1e5b-es \u0263as akken d a\u1e25bib-is, a d-ikker a s-d-yefk ayen akk i s-issuter axa\u1e6der yusa-d \u0263u\u1e5b es di \u021bna\u1e63fa n yi\u1e0d ye\u1e5b\u1e5bez-as aqe\u1e5b\u1e5buy-is.\n11:9 Ma d nekk nni\u0263-awen : ssutret a wen-d-i\u021bunefk, qellbet a\u021b-\u021bafem, sqerbebbet di tewwurt a wen-d-ldin.\n11:10 Axa\u1e6der kra n win yessuturen a s-d i\u021bunefk, win i\u021bqelliben ad yaf, win yes\u1e6deb\u1e6duben a s-d-ldin tawwurt.\n11:11 Anwa deg-wen ara yefken i mmi-s ad\u0263a\u0263 ma yessuter-as a\u0263\u1e5bum ? Ne\u0263 a s-yefk azrem ma yessuter-as aslem ?\n11:12 Ne\u0263 ma yessuter-as tamellalt a s-yefk ti\u0263irdemt ?\n11:13 Ma yella kunwi yellan d imcumen tessnem a\u021b-\u021befkem ayen yelhan i warraw-nwen, amek Baba-twen yellan deg igenni ur d-i\u021b\u021bak ara \u1e5a\u1e5bu\u1e25 iqedsen i wid i s-t-issuturen ?\n11:14 Yiwen wass ikker Sidna \u0190isa yessuffe\u0263 l\u01e7en yesgugmen yiwen wergaz. Mi t-iffe\u0263 l\u01e7en, argaz-nni yebda ihedde\u1e5b ; l\u0263aci me\u1e5b\u1e5ba wehmen.\n11:15 Lame\u025bna kra deg-sen nnan : \u00ab D Balzabul i\u1e25ekmen \u0263ef le\u01e7nun i s-yefkan tazmert akken a ten issuffe\u0263. \u00bb\n11:16 Kra nni\u1e0den b\u0263an a t-je\u1e5b\u1e5bben, ssutren-as yiwen n lbe\u1e5bhan ara d-yasen seg yigenni.\n11:17 Sidna \u0190isa yessnen ixemmimen-nsen yenna yasen : Yal tagelda i deg ara \u021bna\u0263en imezda\u0263-is wway gar-asen te\u021b\u021beddu \u0263er nnger, ixxamen-is ad \u0263lin.\n11:18 Ma yella Cci\u1e6dan ye\u021bna\u0263 d yiman-is amek ara tdum tgelda-s ? Teqqa\u1e5bem s Balzabul i ssufu\u0263e\u0263 le\u01e7nun !\n11:19 Ma yella nekk s Balzabul i ten-ssufu\u0263e\u0263, anwa ihi i sen-i\u021b\u021baken tazmert i yinelmaden-nwen iwakken a ten-ssuffu\u0263en ? Daymi d nutni ara kkun-i\u1e25asben.\n11:20 Lame\u025bna ma yella s ufus n \u1e5aebbi i ten-ssuffu\u0263e\u0263, a\u021ban ihi tageldit n \u1e5aebbi tewwe\u1e0d-ed \u0263u\u1e5b-wen.\n11:21 Argaz i\u01e7ehden yes\u025ban lesla\u1e25, i\u021b\u025bassan \u0263ef wexxam-is, \u1e5b\u1e5bezq-is ad yili di laman.\n11:22 Ma yusa-d \u0263u\u1e5b-es yiwen i\u01e7ehden akte\u1e5b-is i\u0263leb-it, a s-ikkes lesla\u1e25 \u0263ef wacu ye\u021bkel, ad yernu ad if\u1e5beq i wiya\u1e0d ayen akk yes\u025ba.\n11:23 Win ur nelli ara yid-i, d ax\u1e63im-iw ; win ur njemme\u025b ara yid-i, ye\u021b\u1e0deggi\u025b.\n11:24 M'ara yeffe\u0263 u\u1e5bu\u1e25ani seg yiwen wergaz, ad i\u1e5bu\u1e25 \u0263er yimukan yexlan akken ad iqelleb \u0263ef \u1e5b\u1e5ba\u1e25a. M'ur yufi ara, ad yini : \u00ab ad u\u0263ale\u0263 \u0263er tnezdu\u0263t-iw ansi i d-ff\u0263e\u0263. \u00bb\n11:25 M'ara yawe\u1e0d \u0263er tnezdu\u0263t-nni, a \u021b-yaf zeddiget, tqe\u025b\u025bed ;\n11:26 imiren ad i\u1e5bu\u1e25 a d-yawi seb\u025ba yi\u1e5bu\u1e25aniyen nni\u1e0den iwe\u025b\u1e5ben akte\u1e5b-is, ad kecmen ad zed\u0263en deg-s ; s wakka l\u1e25ala n wergaz-nni a\u021b-\u021ben\u1e6de\u1e5b akte\u1e5b n tikkelt tamezwarut.\n11:27 Mi d-yenna Sidna \u0190isa ayagi, yiwet n tme\u1e6d\u1e6dut ten\u1e6deq-ed s \u1e63\u1e63ut \u025blayen si ger n l\u0263aci tenna-yas : ?-\u021base\u025bdit tme\u1e6d\u1e6dut i k-id-yurwen, i k-issu\u1e6d\u1e6d\u1e0den !\n11:28 Lame\u025bna ne\u021b\u021ba yerra-yas : Ise\u025bdiyen, d wid isme\u1e25sisen i wawal n \u1e5aebbi, yerna \u1e25erzen-t.\n11:29 Mi d-innejma\u025b \u0263u\u1e5b-es wa\u1e6das n l\u0263aci, Sidna \u0190isa yekker yenna-yasen : L\u01e7il-agi d l\u01e7il amcum, yessutur lbe\u1e5bhan ! Ur as-d-i\u021bunefkay ara lbe\u1e5bhan anagar win n nnbi Yunes !\n11:30 Axa\u1e6der akken yella nnbi Yunes d lbe\u1e5bhan i yimezda\u0263 n temdint n Ninebi, ara yili Mmi-s n bunadem d lbe\u1e5bhan i l\u01e7il-agi.\n11:31 Ass n l\u1e25isab tagellit n tmurt n usammer a d-tekker \u0263er yemdanen n l\u01e7il-agi a ten-tesse\u1e0dlem imi ne\u021b\u021bat tusa-d seg yixef n ddunit iwakken a\u021b-\u021bsel i tmusni n ugellid Sliman. Atah yella gar-awen win yugaren agellid Sliman !\n11:32 Ass n l\u1e25isab a d-kkren da\u0263en imezda\u0263 n temdint n Ninebi \u0263er l\u01e7il-agi a ten-s\u1e0delmen, axa\u1e6der nutni u\u0263alen-d \u0263er webrid mi sen-ibecce\u1e5b nnbi Yunes. Kunwi tes\u025bam dagi gar-awen win yugaren nnbi Yunes !\n11:33 Yiwen ur ice\u025b\u025bel taftilt iwakken a \u021b-iffer ne\u0263 akken a \u021b-i\u0263umm s l\u1e25ila, lame\u025bna a \u021b-issers \u0263ef lme\u1e63be\u1e25 iwakken kra n win ara d-ikecmen ad iwali tafat.\n11:34 Ti\u1e6d \u021b-\u021baftilt n wemdan. Ma yella ti\u1e6d-ik t\u1e63e\u1e25\u1e25a a\u021b-\u021bili\u1e0d di tafat, me\u025bna ma tedder\u0263el a\u021b-\u021bili\u1e0d di \u1e6d\u1e6dlam.\n11:35 ?ader ihi a\u021b-\u021bu\u0263al tafat yellan deg-k d \u1e6d\u1e6dlam.\n11:36 Ma telli\u1e0d di tafat s lekmal-ik, ur ye\u021b\u021bili ara deg-k \u1e6d\u1e6dlam, a\u021b-\u021bili\u1e0d di tafat am teftilt m'ara d-cce\u025bce\u025b fell-ak.\n11:37 Mi gfukk Sidna \u0190isa ameslay, i\u025bre\u1e0d-it yiwen wufarizi \u0263e\u1e5b imensi.\n11:38 Afarizi-nni yewhem mi gwala Sidna \u0190isa ur issared ara uqbel ad ye\u010d\u010d, akken tella di l\u025badda-nsen.\n11:39 Sidna \u0190isa yenna-yas : Kunwi s yifariziyen tessiridem taqbuct d u\u1e0deb\u1e63i s wufella kan ma zdaxel n wulawen te\u010d\u010du\u1e5bem d \u1e6d\u1e6dme\u025b akk-d dd\u0263el.\n11:40 A wid i\u0263eflen ! E\u025bni win i d ixelqen ayen yellan s wufella, ma\u010d\u010di d ne\u021b\u021ba i d-ixelqen ayen n daxel ?\n11:41 Fket lwe\u025bda s wulawen-nwen, imiren kullec ad awen-ye\u1e63fu.\n11:42 A nnger-nwen ay ifariziyen ! Kunwi ye\u021b\u025becci\u1e5ben nne\u025bne\u025b d uwermi d wayen i d-i\u021bem\u0263ayen di teb\u1e25irt, ma d l\u1e25eqq d le\u1e25mala n Sidi \u1e5aebbi te\u021b\u021barram-ten \u0263er deffir ; d annect-agi i gezwaren mbla ma te\u021b\u021bum ayen nni\u1e0den.\n11:43 A nnger-nwen ay ifariziyen ! T\u1e25emmlem imukan imezwura di le\u01e7wame\u025b, t\u1e25emmlem ad \u021bsellimen fell-awen yemdanen deg iberdan.\n11:44 A nnger-nwen, kunwi yecban i\u1e93ekwan i g\u0263umm wakal, ur d-ne\u021bban ara, \u025beffsen-ten yemdanen ur d-wwin s lexba\u1e5b.\n11:45 Yen\u1e6deq yiwen l\u025balem n ccari\u025ba, yenna-yas : A Sidi, atan tregme\u1e0d-a\u0263 ula d nukkni s wayen i d-tenni\u1e0d akka !\n11:46 Sidna \u0190isa yerra-yas : A nnger-nwen ula d kunwi a l\u025bulama n ccari\u025ba ! Te\u021b\u025bebbim i wiya\u1e0d ti\u025bekkmin \u1e93\u1e93ayen, ma d kunwi ur tent-te\u021bnalem ara ula s yiwen u\u1e0da\u1e0d.\n11:47 A tawa\u0263it-nwen ! Lejdud-nwen n\u0263an lenbiya, kunwi tbennum-asen i\u1e93ekwan.\n11:48 S wakka i d-tesbegnem belli tqeblem ayen i xedmen yerna te\u021bkemmilem di tikli-nsen ; axa\u1e6der nutni n\u0263an-ten, kunwi tbennum-asen i\u1e93ekwan.\n11:49 ?ef wayagi Sidi \u1e5aebbi ye\u1e93ran kullec yenna : a sen-cegg\u025be\u0263 lenbiya d \u1e5b\u1e5busul, kra a ten-n\u0263en kra a ten qeh\u1e5ben.\n11:50 Daymi l\u01e7il-agi ad i\u021b\u021bu\u1e25aseb \u0263ef tazzla n yidammen n lenbiya seg wasmi i d-texleq ddunit ;\n11:51 seg yidammen n Habil mmi-s n Adem armi d idammen n Zakarya i n\u0263an ger udekkan n iseflawen d l\u01e7ame\u025b iqedsen. L\u01e7il-agi ad i\u021b\u021bu\u1e25aseb \u0263ef ayagi me\u1e5b\u1e5ba.\n11:52 A tawa\u0263it-nwen a l\u025bulama n ccari\u025ba ! Te\u1e6d\u1e6dfem tasaru\u021b n tmusni, ur tekcimem kunwi, ur te\u01e7\u01e7im ad kecmen wid yeb\u0263an.\n11:53 Mi geffe\u0263 Sidna \u0190isa, l\u025bulama n ccari\u025ba d ifariziyen \u1e25e\u1e5bsen-t iwakken a d-immeslay \u0263ef wa\u1e6das n t\u0263awsiwin nni\u1e0den,\n11:54 \u021bqelliben amek ara t-id-sse\u0263lin deg wawal.\n12:1 Di teswi\u025bt-nni kan, l\u0263aci yennejma\u025b-ed s luluf armi \u021bemye\u025bfasen. Sidna \u0190isa yenna i yinelmaden-is : ?adret iman-nwen \u0263ef temtunt ( i\u0263es ) n yifariziyen, axa\u1e6der d at sin wudmawen.\n12:2 Kra n wayen i\u0263ummen a d-iban, kra n wayen yeffren ad yem\u1e93er.\n12:3 Ayen i thed\u1e5bem di \u1e6d\u1e6dlam a t-slen di tafat, ayen i tennam \u0263er ume\u1e93\u1e93u\u0263 di texxamt ad i\u021b\u021buberre\u1e25 deg yizenqan.\n12:4 A wen-d-ini\u0263 i kunwi yellan d i\u1e25biben-iw : ur \u021b\u021bagadet ara wid ineqqen l\u01e7e\u021b\u021ba, sennig lmut ur zmiren ad xedmen acemma nni\u1e0den.\n12:5 A wen-d-ini\u0263 anwa i glaq a\u021b- \u021baaggadem : aggadet win izemren a kkun-ikkes si ddunit yerna a kkun-i\u1e0degge\u1e5b \u0263er \u01e7ahennama. Atan nni\u0263-awen-t-id, d ne\u021b\u021ba i glaq a\u021b- \u021baggadem.\n12:6 D acu i swan xemsa i\u1e93iwcen ? Ana\u0263 sin i\u1e63urdiyen kan ! Lame\u025bna Sidi \u1e5aebbi ur ite\u021b\u021bu ula d yiwen deg-sen.\n12:7 Ula d an\u1e93aden n iqe\u1e5b\u1e5bay-nwen \u021bwa\u1e25esben yiwen yiwen. Ur \u021b\u021bagadet ara ihi, teswam akte\u1e5b n i\u1e93iwcen.\n12:8 A wen-d-ini\u0263 : kra n win ara d-icehden zdat yemdanen belli yumen yis-i, Mmi-s n bunadem ur t-inekke\u1e5b ara zdat lmalayekkat,\n12:9 ma d win ara yi-nek\u1e5ben zdat yemdanen, ula d nekk a t-nekk\u1e5be\u0263 zdat lmalayekkat n \u1e5aebbi.\n12:10 Kra n win ara yewten di Mmi-s n bunadem a s-i\u021busemme\u1e25, ma d win ara iregmen \u1e5a\u1e5bu\u1e25 iqedsen ulac fell-as ssma\u1e25.\n12:11 M'ara kkun-awin ad \u1e25ekmen fell-awen di le\u01e7wame\u025b zdat lecyux d l\u1e25ekkam, ur \u021bxemmimet ara amek ara tsellkem iman-nwen ne\u0263 \u0263ef wayen ara d-tinim,\n12:12 axa\u1e6der d \u1e5a\u1e5bu\u1e25 iqedsen ara wen-d-ifken di teswi\u025bt-nni ayen ilaqen a t-id-tinim.\n12:13 Yiwen wergaz in\u1e6deq-ed si ger n l\u0263aci yenna i Sidna \u0190isa : A Sidi, ini-yas i gma ad ib\u1e0du yid-i lwe\u1e5bt i d-i\u01e7\u01e7a baba-tne\u0263.\n12:14 Sidna \u0190isa yerra-yas : Ay argaz, anwa i yi-sbedden iwakken ad b\u1e0du\u0263 gar-awen ?\n12:15 D\u0263a yenna i l\u0263aci : ?adret iman-nwen \u0263ef \u1e6d\u1e6dme\u025b imi tudert n wemdan ur d-tekki ara seg wayen yes\u025ba \u0263as akken di rrbe\u1e25 ameqqran i gella.\n12:16 Imiren yewwi-yasen-d lemtel agi : Yiwen ume\u1e5bkanti, yes\u025ba tamurt tefka-d a\u1e6das n l\u0263ella.\n12:17 Ixemmem deg iman-is, yenna : \u00ab amek ara xedme\u0263 imi ur s\u025bi\u0263 ara amkan anda ara jem\u025be\u0263 le\u1e5b\u1e93aq-iw ?\n12:18 Ad hudde\u0263 ikuffan-iw, ad bnu\u0263 wiya\u1e0d d imeqqranen iwakken ad jem\u025be\u0263 irden-iw d le\u1e5b\u1e93aq-iw me\u1e5b\u1e5ba.\n12:19 Imiren ad ini\u0263 i yiman-iw : \u00ab atan tesxezne\u1e0d le\u1e5b\u1e93aq i wa\u1e6das n iseggasen ; ste\u025bfu tura, e\u010d\u010d, sew tezhu\u1e0d. \u00bb\n12:20 Lame\u025bna Sidi \u1e5aebbi yenna yas-d : \u00ab a win i\u0263eflen ! I\u1e0d-agi ad a k-ddme\u0263 \u1e5b\u1e5bu\u1e25-ik ! Ayen me\u1e5b\u1e5ba i tjem\u025be\u1e0d, iwumi ara d-yeqqim ? \u00bb\n12:21 Akka i tde\u1e5b\u1e5bu d win ijem\u025ben le\u1e5b\u1e93aq i yiman-is, wala ad ixdem \u0263ef laxe\u1e5bt-is, ad yili d ame\u1e5bkanti \u0263er \u1e5aebbi.\n12:22 Sidna \u0190isa yenna da\u0263en i yinelmaden-is : ?ef wayagi i wen-d-qqa\u1e5be\u0263 ur \u021b\u1e25ebbi\u1e5bet ara \u0263ef tudert-nwen, \u0263ef wayen ara te\u010d\u010dem d wayen ara telsem.\n12:23 Axa\u1e6der tudert-nwen tugar lqut, l\u01e7e\u021b\u021ba-nwen tugar llebsa.\n12:24 Walit tigerfiwin , ur zerr\u025bent ur meggrent , ur s\u025bint akufi ur s\u025bint acbayli me\u025bna Sidi \u1e5aebbi i\u021b\u025beyyic itent. Ac\u1e25al teswam akte\u1e5b n yef\u1e5bax n igenni !\n12:25 Anwa deg-wen i gzemren s u\u1e25ebbe\u1e5b ad yessi\u0263zef le\u025bme\u1e5b-is ula s yiwen n wass ?\n12:26 Imi ur tezmirem ara i t\u0263awsiwin timec\u1e6du\u1e25in, acu\u0263e\u1e5b i te\u021b\u1e25ebbi\u1e5bem \u0263ef wayen nni\u1e0den ?\n12:27 Walit amek gemmun ije\u01e7\u01e7igen n lexla ! Ur \u021bellmen ur \u1e93e\u1e6d\u1e6den ! Atan qqa\u1e5be\u0263-awen : ula d agellid Sliman s yiman-is di ccan-is, ur yelsi am yiwen seg yije\u01e7\u01e7igen-agi.\n12:28 Ma yella Sidi \u1e5aebbi yeslusu akka le\u1e25cic yellan ass-agi di lexla, azekka ad i\u1e5be\u0263 di tmes, amek ur kkun-islusu ara kunwi, ay imdanen ixu\u1e63\u1e63en di liman !\n12:29 Ur \u021b\u1e25ebbi\u1e5bet ara ihi ! Ur \u021bqellibet ara \u0263ef wayen ara te\u010d\u010dem d wayen ara teswem,\n12:30 axa\u1e6der d imdanen ur ne\u021b\u021bamen ara s \u1e5aebbi i ge\u021bqelliben \u0263ef wayagi me\u1e5b\u1e5ba. Baba-twen yellan deg yigenwan ye\u1e93ra ayen te\u1e25wa\u01e7em.\n12:31 Qellbet axi\u1e5b \u0263ef tgeldit n \u1e5aebbi, ayen nni\u1e0den me\u1e5b\u1e5ba d ne\u021b\u021ba ara wen-t-id ifken.\n12:32 Ur \u021b\u021bagad ara a taqe\u1e0d\u025bit illan tamec\u1e6du\u1e25t, axa\u1e6der i\u025b\u01e7eb-as i Baba \u1e5aebbi a wen-d-yefk tageldit-is.\n12:33 Zzenzet ayen tes\u025bam, tsedqem-t. Heggit i yiman-nwen deg yigenwan agerruj ur nkeffu, ur nrekku, dinna ulac imakaren ara t-yakren, ulac ibe\u025b\u025bac ara t-i\u010d\u010den.\n12:34 Axa\u1e6der anda yella ugerruj-ik, dinna ara yili wul-ik.\n12:35 Heggit iman-nwen, \u025biwzet, beggset \u0263ef yiman-nwen tce\u025blem tiftilin-nwen !\n12:36 Ilit am wid ye\u021b\u1e5ba\u01e7un am\u025bellem nsen ara d-yu\u0263alen si tme\u0263\u1e5ba ; akken kan ara d-yesqe\u1e5bbeb a s-ldin tawwurt.\n12:37 Amarezg n yiqeddacen-agi ara d-yaf wem\u025bellem-nsen \u025bawzen. A wen-d ini\u0263 tide\u021b, ad ibeddel llebsa, a ten is\u0263im \u0263er \u1e6d\u1e6dabla iwakken a sen-yefk ad \u010d\u010den.\n12:38 Ma yewwe\u1e0d-ed di \u021bna\u1e63fa n yi\u1e0d ne\u0263 akte\u1e5b, amarezg-nsen ma yufa-ten-id mazal \u021b\u1e5ba\u01e7un-t !\n12:39 Fehmet ayagi : lemmer ye\u1e93ra bab n wexxam lweqt i deg ara d-yas umakar, tili a t-i\u025bass ur t-i\u021b\u021ba\u01e7a ara ad ikcem axxam-is.\n12:40 Heggit iman-nwen ula d kunwi imi di lweqt i \u0263ef ur tebnim (tedmim) ara a d-yas Mmi-s n bunadem.\n12:41 Bu\u1e6drus in\u1e6deq yenna-yas : A Sidi, i nukkni iwumi d-tenni\u1e0d lemtel-agi ne\u0263 i l\u0263aci me\u1e5b\u1e5ba ?\n12:42 Sidna \u0190isa yerra-yas : Anwa i d lewkil i\u1e25e\u1e5bcen i \u0263ef yella le\u021bkal, ara iwekkel bab n wexxam \u0263ef wayla-s, iwakken ad if\u1e5beq i yiqeddacen amur-nsen n yirden di lweqt ilaqen ?\n12:43 Amarezg n wuqeddac agi ara d-yaf bab-is ibedd \u0263er cce\u0263l-is !\n12:44 A wen-d-ini\u0263 tide\u021b, a t iwekkel \u0263ef wayen akk yes\u025ba.\n12:45 Lame\u025bna aqeddac-nni ma yeqqa\u1e5b deg wul-is : \u00ab am\u025bellem-iw i\u025be\u1e6d\u1e6del ur d yu\u0263al ara\u00bb ! Yebda i\u1e25eqqe\u1e5b iqeddacen \u021b-\u021bqeddacin, yekkat-iten, ite\u021b itess alamma yeskke\u1e5b.\n12:46 A d-yas um\u025bellem-is deg wass i \u0263ef ur yebni ara, di lweqt ur yessin ara, a t-i\u025baqeb s lmut akken \u021b\u021bu\u025baqben wid i\u025bu\u1e63an \u1e5aebbi.\n12:47 Aqeddac yessnen leb\u0263i n bab-is yerna ur t-ixdim ara, ad ye\u010d\u010d ti\u0263\u1e5bit tameqqrant,\n12:48 ma d win ur nessin ara leb\u0263i n bab-is, ixdem ayen yuklalen ti\u0263\u1e5bit, ad ye\u010d\u010d ti\u0263\u1e5bit tamec\u1e6du\u1e25t. Win iwumi nefka a\u1e6das a s-nessuter a\u1e6das, ma d win i \u0263ef ne\u021bkel a\u1e6das a ne\u1e5b\u01e7u deg-s akte\u1e5b.\n12:49 Usi\u0263-ed a d-awi\u0263 yiwet n tmes \u0263er ddunit ! Ac\u1e25al \u0263e\u1e63be\u0263 melmi ara tec\u025bel !\n12:50 Yella yiwen n we\u0263\u1e0das i yi-\u021b\u1e5ba\u01e7un... D le\u025btab ameqqran yerna \u0263e\u1e63be\u0263 melmi ara d-yas wass-nni !\n12:51 T\u0263ilem d lehna i d-wwi\u0263 \u0263er ddunit ? Xa\u1e6di, d be\u1e6d\u1e6du i d-wwi\u0263 !\n12:52 Sya \u0263er zdat ma llan xemsa deg yiwen wexxam, ad b\u1e0dun ; tlata a d-kkren \u0263er sin, sin a d-kkren \u0263er tlata.\n12:53 Ababat a d-inna\u0263 d mmi-s, mmi-s a d-yekker \u0263er baba-s ; tayemma\u021b a\u021b-\u021benna\u0263 d yelli-s, yelli-s akk-d yemma-s ; tam\u0263a\u1e5bt a\u021b-\u021benna\u0263 \u021b-\u021beslit-is, tislit akk-d tem\u0263a\u1e5bt-is.\n12:54 Sidna \u0190isa yenna da\u0263en i l\u0263aci : M'ara twalim asigna yekka-d si l\u0263e\u1e5bb, teqqa\u1e5bem atan a d-tewwet lehwa ; d ayen i gde\u1e5b\u1e5bun.\n12:55 M'ara d-i\u1e63u\u1e0d wa\u1e0du seg usammer teqqa\u1e5bem ad i\u1e25mu l\u1e25al ; d ayen i d-ide\u1e5b\u1e5bun da\u0263en.\n12:56 Ay at sin wudmawen ! Imi tessnem a\u021b-\u021b\u025beqlem l\u1e25al n yigenni d lqa\u025ba, amek ur tezmirem ara a\u021b-\u021b\u025beqlem zzman-agi ?\n12:57 Acu\u0263e\u1e5b ur te\u021bmeyyizem ara s yiman-nwen \u0263ef wayen yellan d l\u1e25eqq ?\n12:58 M'ara k-yessiwe\u1e0d wex\u1e63im-ik \u0263er cc\u1e5be\u025b, e\u025b\u1e5be\u1e0d a \u021b-tefru\u1e0d yid-es uqbel a\u021b-\u021baw\u1e0dem \u0263er dinna, ne\u0263 m'ulac a k-yawi \u0263er l\u1e25akem, l\u1e25akem a k-yefk i u\u025bessas, a\u025bessas a k-i\u1e0degge\u1e5b \u0263er l\u1e25ebs.\n12:59 A k-d-ini\u0263 : ur d-te\u021b\u021beff\u0263e\u1e0d ara syenna alamma txell\u1e63e\u1e0d a\u1e63urdi aneggaru n \u1e6dlaba-inek.\n13:1 Di lweqt-nni, kra n yemdanen usan-d a s-\u1e25kun i Sidna \u0190isa \u0263ef kra n yergazen n tmurt n Jlili i gen\u0263a Bila\u1e6dus, d wamek issexle\u1e0d dammen-nsen d idammen n iseflawen nsen.\n13:2 Sidna \u0190isa yenna-yasen : T\u0263ilem belli imezda\u0263-agi n Jlili i\u021b\u021bu\u025betben akka d imednuben akte\u1e5b n wiya\u1e0d ?\n13:3 Xa\u1e6di, me\u025bna a wen-d-ini\u0263 : m'ur tbeddlem ara tikli a\u021b-\u021bemtem ula d kunwi.\n13:4 Ne\u0263 am tmen\u1e6dac-nni yergazen yemmuten mi d-ye\u0263li fell-asen \u1e63\u1e63u\u1e5b n Silwi, t\u0263ilem d imednuben akte\u1e5b n imezda\u0263 nni\u1e0den n temdint n Lquds ?\n13:5 Xa\u1e6di, me\u025bna nni\u0263-awen : m'ur tbeddlem ara tikli a\u021b-\u021bemtem ula d kunwi.\n13:6 Yewwi-yasen-d lemtel-agi : Yiwen wergaz yes\u025ba taneqle\u021b te\u1e93\u1e93a deg yiger n t\u1e93urin. Yusa-d iwakken a d-ikkes tibexsisin lame\u025bna ur yufi ara.\n13:7 Yenna i uxeddam n yiger-nni : tlata n yiseggasen aya nekk \u021b\u021base\u0263 ed iwakken a d-kkse\u0263 lex\u1e5bif si tneqle\u021b agi me\u025bna ur d-\u021b\u021bafe\u0263 ara, gzem-i\u021b ihi ! Acu\u0263e\u1e5b ara te\u1e6d\u1e6def akal mbla nnfe\u025b ?\n13:8 Axeddam-nni yerra-yas : a Sidi, e\u01e7\u01e7-i\u021b a\u021b-\u021bernu aseggas-a ; a\u021b-\u021bneqce\u0263, a s-rre\u0263 le\u0263ba\u1e5b,\n13:9 sya d asawen ma tefka-d lfakya e\u01e7\u01e7-i\u021b, m'ulac qele\u025b -i\u021b.\n13:10 Sidna \u0190isa yesselmad deg yiwen n l\u01e7ame\u025b deg wass n weste\u025bfu.\n13:11 Tella dinna yiwet n tme\u1e6d\u1e6dut ihelken tmen\u1e6dac yiseggasen aya ; d yiwen u\u1e5bu\u1e25ani i \u021b-ikerfen ur tezmir ara a\u021b-\u021besbedd lqedd-is.\n13:12 Mi \u021b-iwala Sidna \u0190isa, ilu\u025ba-\u021b yenna-yas : A tame\u1e6d\u1e6dut, te\u1e25li\u1e0d seg wekraf-im.\n13:13 Issers ifassen-is fell-as , imiren kan tesbedd lqedd-is, te\u1e25med Sidi \u1e5aebbi.\n13:14 Ccix-nni n l\u01e7ame\u025b i\u0263a\u1e0d-it l\u1e25al imi i \u021b-isse\u1e25la Sidna \u0190isa deg wass n weste\u025bfu, yenna i l\u0263aci : Llan se\u021b\u021ba wussan i deg ilaq a nexdem ; aset-ed ihi deg ussan-nni iwakken a kkun-isse\u1e25lu ma\u010d\u010di deg wass n weste\u025bfu !\n13:15 Sidna \u0190isa yerra-yas : Ay at sin wudmawen ! Anwa deg-wen ur d-ne\u021bserri\u1e25 i wezger-ines ne\u0263 i we\u0263yul-is iwakken a t-yawi a d-isew \u0263as deg wass n weste\u025bfu ?\n13:16 I tme\u1e6d\u1e6dut-agi yellan si dderya n Ib\u1e5bahim, i gekref Cci\u1e6dan tmen\u1e6dac n yiseggasen aya, e\u025bni ur ilaq ara a s-nekkes akraf \u0263as akka d ass n weste\u025bfu ?\n13:17 Mi d-yenna imeslayen-agi, ix\u1e63imen-is me\u1e5b\u1e5ba nne\u1e25camen ma d l\u0263aci fe\u1e5b\u1e25en s le\u025b\u01e7ayeb i gxeddem.\n13:18 Yenna da\u0263en : ?er wacu i te\u021b\u021bemcabi tgeldit n \u1e5aebbi ? ?er wacu ara \u021b-metle\u0263 ?\n13:19 Te\u021b\u021bemcabi \u0263er u\u025beqqa amec\u1e6du\u1e25 n zerri\u025ba n uxer\u1e0del i ge\u1e93\u1e93a yiwen wergaz di teb\u1e25irt-is. Mi d-im\u0263i yu\u0263al d ttej\u1e5ba, if\u1e5bax n igenni bnan le\u025bcuc deg ifurkawen-is.\n13:20 Yenna da\u0263en : ?er wacu i zemre\u0263 ad metle\u0263 tageldit n \u1e5aebbi ?\n13:21 Te\u021b\u021bemcabi \u0263er ci\u1e6d\u1e6du\u1e25 yi\u0263es n temtunt i d-teddem tme\u1e6d\u1e6dut, tger-it di tlata lkilat n uwren d\u0263a te\u01e7\u01e7a-t armi yuli me\u1e5b\u1e5ba.\n13:22 Deg webrid-is \u0263er temdint n Lquds, Sidna \u0190isa i\u021b\u025bedday \u0263ef temdinin \u021b-\u021budrin, isselmad.\n13:23 Isteqsa-t yiwen yenna-yas : A Sidi, drus n yemdanen ara ye\u021b\u021buselken ?\n13:24 Yenna-yasen : Qellbet amek ara tkecmem si tewwurt i\u1e0deyqen ; a wen-d-ini\u0263 : a\u1e6das ara yeb\u0263un ad kecmen lame\u025bna ur \u021b\u021bizmiren ara.\n13:25 M'ara d-yekker bab n wexxam ad isekke\u1e5b tawwurt, wid i d-yufa l\u1e25al di be\u1e5b\u1e5ba a d-bdun asqe\u1e5bbeb ad qqa\u1e5ben : \u00ab A Sidi ! A Sidi ! Ldi-ya\u0263 tawwurt\u00bb ! Ne\u021b\u021ba a wen-d-yerr : ur kkun-ssine\u0263 ur \u1e93ri\u0263 ansi i d-tekkam !?\n13:26 Kunwi ad as-tinim : \u00ab ana\u0263 ne\u010d\u010da neswa yid-ek, teslemde\u1e0d deg yizenqan nne\u0263 ! \u00bb\n13:27 Ne\u021b\u021ba a wen-d-yerr : Nni\u0263-awen ur kkun-ssine\u0263 ara, be\u025bdet akkin fell-i a kunwi ixeddmen cce\u1e5b !\n13:28 Dinna ara yilin yime\u1e6d\u1e6dawen d nndama tameqqrant m'ara twalim Ib\u1e5bahim, Is\u1e25aq, Ye\u025bqub akk-d lenbiya di tgelda n yigenwan, ma d kunwi a\u021b-\u021beqqimem di be\u1e5b\u1e5ba.\n13:29 A d-asen si cce\u1e5bq d l\u0263e\u1e5bb, seg umalu d usammer, ad \u1e6d\u1e6dfen imukan di tme\u0263\u1e5ba n tgelda n igenwan.\n13:30 Imiren ad ilin ineggura ara yu\u0263alen d imezwura, am akken da\u0263en ara yilin imezwura ara yu\u0263alen d ineggura.\n13:31 Di teswi\u025bt-nni, kra n ifariziyen usan-d \u0263er Sidna \u0190isa nnan-as : \u1e5au\u1e25 tixxe\u1e5b syagi, atan Hi\u1e5budus i\u021bqellib a k-ine\u0263.\n13:32 Yenna-yasen : \u1e5au\u1e25et init-as i wuccen-agi : ass-a d uzekka ad ssuf\u0263e\u0263 le\u01e7nun, ad sse\u1e25lu\u0263 imu\u1e0dan , ass wis tlata ad fake\u0263 cce\u0263l-iw.\n13:33 Lame\u025bna ilaq ad kemmle\u0263 tikli-inu ass-a, azekka d sellazekka, axa\u1e6der ur s-ilaq ara i nnbi ad immet be\u1e5b\u1e5ba n temdint n Lquds.\n13:34 A tamdint n Lquds ! A tamdint n Lquds ineqqen lenbiya, i\u1e5be\u01e7\u01e7men wid i m-d-i\u021bwacegg\u025ben s \u0263u\u1e5b \u1e5aebbi ! Ac\u1e25al d abrid i \u025ber\u1e0de\u0263 a d-jem\u025be\u0263 arraw-im am tyazi\u1e6d i d-ijem\u025ben if\u1e5bax-is seddaw wafriwen-is, lame\u025bna ur teb\u0263im ara.\n13:35 Atan ihi, axxam-nwen ad ixlu yerna nni\u0263-awen, ur iyi-t\u1e93errem ara alamma d asmi ara tinim : Ad i\u021b\u021bubarek win i d-yusan s yisem n Sidi \u1e5aebbi.\n14:1 Yiwen wass yellan d ass n weste\u025bfu, Sidna \u0190isa illa ye\u021bwa\u025bre\u1e0d \u0263er wexxam n yiwen seg yimeqqranen n yifariziyen iwakken ad yefte\u1e5b. Wid yellan dinna \u021b\u025bassan-t d acu ara yexdem.\n14:2 Yella dinna yiwen wergaz yes\u025ban lehlak n ubezzug.\n14:3 Sidna \u0190isa yen\u1e6deq \u0263er l\u025bulama n ccari\u025ba d yifariziyen yenna-yasen : D acu twalam ? D le\u1e25lal win ara isse\u1e25lun deg wass n weste\u025bfu ne\u0263 ala ?\n14:4 Imi yiwen deg-sen ur d-yen\u1e6diq, Sidna \u0190isa iqe\u1e5b\u1e5beb \u0263er umu\u1e0din-nni, yesse\u1e25la-t, iserre\u1e25-as ad i\u1e5bu\u1e25.\n14:5 D\u0263a yenna i wiya\u1e0d : Anwa deg-wen ma ye\u0263li-yas mmi-s ne\u0263 wezger-ines \u0263er lbir, ur t-id-i\u021bekkes ara \u0263as ma d ass n weste\u025bfu ?\n14:6 Yiwen ur izmir a s-d-yerr awal.\n14:7 Mi gwala wid ye\u021bwa\u025ber\u1e0den bdan \u021bexti\u1e5bin imukan imezwura, Sidna \u0190isa yewwi-yasen-d lemtel-agi yenna yasen :\n14:8 M'ara k-id-ye\u025bre\u1e0d yiwen \u0263er tme\u0263\u1e5ba, \u0263urek ur \u021b\u021ba\u1e6d\u1e6daf ara amkan amezwaru ! Axa\u1e6der yezmer ad yili yiwen ger inebgawen yes\u025ban leqde\u1e5b akte\u1e5b-ik ,\n14:9 a d-yas win i kkun-i\u025ber\u1e0den i sin a k-yini : \u00ab e\u01e7\u01e7-as amkan-nni i wagi ! \u00bb Imiren a\u021b-\u021benne\u1e25came\u1e0d, a\u021b-\u021b\u1e5bu\u1e25e\u1e0d a\u021b-\u021be\u1e6d\u1e6dfe\u1e0d amkan aneggaru.\n14:10 Lame\u025bna m'ara te\u021bwa\u025be\u1e5b\u1e0de\u1e0d, \u1e6d\u1e6def amkan aneggaru iwakken m'ara d-yas win i k-id-i\u025ber\u1e0den, a k-yini : \u00ab ay a\u1e25bib \u025beddi-d \u0263er zdat ! \u00bb Imiren a\u021b-\u021bes\u025bu\u1e0d leqde\u1e5b zdat inebgawen me\u1e5b\u1e5ba.\n14:11 Axa\u1e6der kra n win yessalayen iman-is a t-id-yessers \u1e5aebbi , ma d win yesrusuyen iman-is a t-yerfed.\n14:12 Yenna da\u0263en i win i t-id i\u025be\u1e5b\u1e0den : M'ara teb\u0263u\u1e0d a\u021b-\u021bse\u010d\u010de\u1e0d, ur d-\u025be\u1e5b\u1e5be\u1e0d ara imdukkal-ik ne\u0263 atmaten ik, ur d-\u025be\u1e5b\u1e5be\u1e0d ara imawlan-ik ne\u0263 l\u01e7iran-ik ime\u1e5bkantiyen ; m'ulac a k \u025ber\u1e0den ula d nutni iwakken a k-d-rren lxi\u1e5b-ik.\n14:13 Lame\u025bna m'ara txedme\u1e0d tame\u0263\u1e5ba, \u025b\u1e5be\u1e0d-ed igellilen, ine\u025byuba, iqu\u1e0daren d yider\u0263alen.\n14:14 Ili-k di lfe\u1e5b\u1e25 imi ur zmiren ara a k-d-rren lxi\u1e5b-ik, axa\u1e6der lxi\u1e5b-ik a k-id-yu\u0263al asm'ara d-\u1e25yun wid yellan d i\u1e25eqqiyen \u0263er \u1e5aebbi.\n14:15 Mi gesla i imeslayen-agi, yiwen seg inebgawen in\u1e6deq-ed yenna i Sidna \u0190isa : Amasse\u025bd n win ara ye\u010d\u010den tiremt di tgelda n yigenwan!\n14:16 Sidna \u0190isa yerra-yas : Yiwen wergaz ixdem imensi, i\u025bre\u1e0d-ed a\u1e6das l\u0263aci.\n14:17 Lweqt n imensi, icegge\u025b aqeddac-is iwakken ad yini i inebgawen : aset-ed ! Kullec iwjed !\n14:18 Akken ma llan ufan-d sebba. Amezwaru yenna-yas : \u00ab aql-i u\u0263e\u0263 iger, ilaq ad \u1e5bu\u1e25e\u0263 a t-id-\u1e93re\u0263 , di le\u025bnaya-k semme\u1e25-iyi \u00bb.\n14:19 Waye\u1e0d yenna-yas : \u00ab aql-i u\u0263e\u0263-d xemsa n tyugiwin n yezgaren b\u0263i\u0263 ad \u1e5bu\u1e25e\u0263 a tent-\u025ber\u1e0de\u0263, di le\u025bnaya-k semme\u1e25 iyi \u00bb.\n14:20 Waye\u1e0d da\u0263en yenna-yas : \u00ab tura kan i zew\u01e7e\u0263, ulamek ara d ase\u0263 \u00bb.\n14:21 Mi d-yu\u0263al uqeddac \u0263er um\u025bellem-is, ye\u1e25ka-yas ayen akk i s-d-nnan. Bab n wexxam yerfa, yenna i uqeddac-is : \u00ab azzel, \u1e5bu\u1e25 \u0263er yiberdan d yizenqan n temdint, t\u025be\u1e5b\u1e0de\u1e0d-ed i\u1e93awaliyen, ine\u025byuba, ider\u0263alen d iqu\u1e0daren \u00bb.\n14:22 Mi d-yu\u0263al uqeddac-nni yenna-yas : a Sidi, ayen i yi-d-tenni\u1e0d xedme\u0263-t yerna mazal llan imukan.\n14:23 Am\u025bellem yenna i uqeddac is : \u00ab effe\u0263 \u0263er iberdan n tudrin d lexlawi ; wid akk ara tafe\u1e0d, \u1e25\u1e5be\u1e63-iten a d asen iwakken ad i\u010d\u010da\u1e5b wexxam-iw. \u00bb\n14:24 Atan nni\u0263-awen : ula d yiwen seg wid-nni ye\u021bwa\u025ber\u1e0den d imezwura ur i\u025berre\u1e0d imensi-inu.\n14:25 A\u1e6das n l\u0263aci i geddan d Sidna \u0190isa. Yezzi \u0263u\u1e5b-sen yenna-yasen :\n14:26 Kra n win ara d-yasen \u0263u\u1e5b-i, ma i\u1e25emmel baba-s d yemma-s ne\u0263 tame\u1e6d\u1e6dut-is d warraw-is ne\u0263 ayetma-s d yessetma-s ne\u0263 i\u1e25emmel iman-is akte\u1e5b-iw, ur izmir ara ad yili d anelmad-iw.\n14:27 Kra n win ur neqbil ara ad ye\u025bteb \u0263ef ddemma n yisem-iw yerna ur iyi-d-itbi\u025b ara, ur izmir ara ad yili d anelmad-iw.\n14:28 Anwa deg-wen ma yeb\u0263a ad ibnu lbe\u1e5b\u01e7, ur ye\u021b\u0263imi ara ad ixdem uqbel le\u1e25sab-is, iwakken ad i\u1e93er ma yezmer a t-ifak ?\n14:29 Axa\u1e6der ma yebda lsas ye\u01e7\u01e7a-t akken, kra n wid ara t-i\u1e93ren ad stehzin fell-as ad inin :\n14:30 argaz-agi yebda lsas ur izmir ad ikemmel lebni.\n14:31 Ne\u0263 anwa agellid ara yekkren ad inna\u0263 d ugellid nni\u1e0den, ur ixeddem ara uqbel le\u1e25sab iwakken ad i\u1e93er ma yezmer ad iqabel s \u025bec\u1e5ba alaf i\u025bsek\u1e5biwen win i d-iteddun \u0263u\u1e5b-es s \u025becrin alef i\u025bsekriwen ?\n14:32 Ma iwala ur s-izmir ara, ad icegge\u025b \u0263u\u1e5b-es uqbel a d-yawe\u1e0d, iwakken ad ifru yid-es tamsalt s lehna.\n14:33 S wakka, yiwen ur yezmir ad yili d anelmad-iw m'ur yeqbil ara ad ye\u01e7\u01e7 ayen akk yes\u025ba.\n14:34 Lmel\u1e25 d ayen yelhan, lame\u025bna ma t\u1e5bu\u1e25-as lbenna-s amek ara s-\u021b-id-nerr ?\n14:35 Ur yelhi i wakal, ur yelhi i le\u0263ba\u1e5b, ilaq kan a t-n\u1e0degge\u1e5b \u0263er be\u1e5b\u1e5ba. Win yes\u025ban ime\u1e93\u1e93u\u0263en isellen, isel-ed !..\n15:1 Imekkasen n tebzert akk-d yir imdanen \u021b\u021basen-d \u0263er Sidna \u0190isa iwakken a s-slen.\n15:2 Ifariziyen d l\u025bulama n ccari\u025ba i\u0263a\u1e0d-iten l\u1e25al qqa\u1e5ben wway garasen : \u00ab argaz-agi yes\u1e6der\u1e25ib s imednuben yerna ye\u021b\u0263imi yid-sen \u0263er lmakla \u00bb.\n15:3 D\u0263a Sidna \u0190isa yewwi-yasen-d lemtel-agi :\n15:4 Anwa deg-wen ma yes\u025ba meyya wulli t\u1e5bu\u1e25-as yiwet deg-sent, ur ye\u021b\u021ba\u01e7a ara di lexla \u021bes\u025ba u\u021bes\u025bin nni\u1e0den akken ad i\u1e5bu\u1e25 a d-inadi \u0263ef tin i s-i\u025be\u1e5bqen alamma yufa-\u021b ?\n15:5 M'ara \u021b-yaf, a \u021b-id-ibibb \u0263ef tuyat-is s lfe\u1e5b\u1e25.\n15:6 M'ara d-yawe\u1e0d \u0263er wexxam, ad issiwel i imdukkal-is d l\u01e7iran-is, a sen-yini : fe\u1e5b\u1e25et yid-i, atan ufi\u0263 tixsi-nni i yi-i\u025be\u1e5bqen.\n15:7 S wakka nni\u0263-awen : ad yili lfe\u1e5b\u1e25 d ameqqran deg igenni \u0263ef yiwen umednub i d-yu\u0263alen \u0263er webrid wala \u0263ef \u021bes\u025ba u\u021bes\u025bin nni\u1e0den ur ne\u025b\u1e5biq ara.\n15:8 Ne\u0263 anta tame\u1e6d\u1e6dut ma tes\u025ba \u025bec\u1e5ba n twiztin t\u1e5bu\u1e25-as yiwet, ur tce\u025b\u025bel ara taftilt, ur tberrez ara axxam akken a\u021b-\u021bqelleb fell-as alamma tufa-\u021b ?\n15:9 Mi \u021b-tufa a\u021b-\u021bessiwel i tmeddukal-is \u021b-\u021b\u01e7iratin-is a sent-tini : ufi\u0263 tawize\u021b-nni i yi-\u1e5bu\u1e25en ! Fe\u1e5b\u1e25emt yid-i !\n15:10 S wakka a wen-d-ini\u0263 : ye\u021b\u021bili lfe\u1e5b\u1e25 d ameqqran \u0263er lmalayekkat \u0263ef yiwen umednub i d-yu\u0263alen \u0263er webrid.\n15:11 Yenna-yasen da\u0263en : Yiwen wergaz yes\u025ba sin warrac.\n15:12 Ame\u1e93yan deg-sen yenna i baba-s : a baba, efk-iyi-d amur i yi-d-i\u1e63a\u1e25en deg wayla-k. D\u0263a baba-s yefka-yas amur-is.\n15:13 Mi \u0190eddan kra n wussan, ikker ame\u1e93yan-nni ijme\u025b-ed akk amur-is, izzenz-it, ibeddel tamurt, i\u1e5bu\u1e25 \u0263er yiwet n tmurt ibe\u025bden. Dinna yewwi-t zzhu, yes\u1e5bu\u1e25 ayen akk yes\u025ba.\n15:14 Mi i g\u1e63e\u1e5b\u1e5bef akk idrimen is, ye\u0263li-d la\u1e93 d ameqqran di tmurt nni, ula d ne\u021b\u021ba yu\u0263al yellu\u1e93.\n15:15 Yufa lxedma \u0263er yiwen umezda\u0263 n tmurt nni, icegge\u025b-it ad yeks taqe\u1e0d\u025bit n yilfan.\n15:16 Ac\u1e25al imenna ad ye\u010d\u010d ulamma d axe\u1e5b\u1e5bub-nni i te\u021b\u021ben yilfan-nni, me\u025bna yiwen ur as-d-yefki.\n15:17 Ihi yebda ye\u021bxemmim deg iman-is yenna : \u00ab ac\u1e25al n ixeddamen yellan \u0263er baba \u1e5bwan a\u0263\u1e5bum, nekk yen\u0263a-yi la\u1e93 dagi.\n15:18 Ad kkre\u0263 kan ad u\u0263ale\u0263 \u0263er baba, a s-ini\u0263 : a baba \u025bu\u1e63a\u0263 \u1e5aebbi erni\u0263-k ke\u010d\u010dini ;\n15:19 ur uklale\u0263 ara ad ili\u0263 d mmi-k, \u1e25seb-iyi am yiwen seg ixeddamen-ik \u00bb\n15:20 Ikker i\u1e5bu\u1e25 \u0263er baba-s. Akken q\u1e5bib ad yawe\u1e0d \u0263er wexxam, baba-s i\u025bqel-it-id si leb\u025bid, i\u0263a\u1e0d-it, yuzzel-ed \u0263u\u1e5b-es. Ye\u1e6d\u1e6def-it ger i\u0263allen-is isellem fell-as.\n15:21 Mmi-s yenna-yas : \u00ab a baba, \u025bu\u1e63a\u0263 \u1e5aebbi rni\u0263-k ke\u010d\u010dini, ur uklale\u0263 ara a yi-t\u1e25esbe\u1e0d d mmi-k \u00bb.\n15:22 Lame\u025bna baba-s ikker yenna i iqeddacen-is : \u00ab \u0263iwlet awit-ed abe\u1e5bnus-nni n le\u1e25rir selset-as-t, qnet-as taxatemt i u\u1e0da\u1e0d-is ternum-as isebba\u1e0den i i\u1e0da\u1e5b\u1e5ben-is.\n15:23 Awit-ed agenduz-nni ye\u1e6d\u1e6duqten tezlum-t a t-ne\u010d\u010d, a nexdem tame\u0263\u1e5ba ;\n15:24 axa\u1e6der mmi-nni i \u1e25esbe\u0263 yemmut yu\u0263al-ed idder, yella ye\u025b\u1e5beq tura iban-ed \u00bb. D\u0263a bdan tame\u0263\u1e5ba.\n15:25 Mmi-s amenzu yella di lexla. Mi d-yu\u0263al, akken q\u1e5bib a d-yawe\u1e0d \u0263er wexxam, yesla i ccna d cc\u1e0de\u1e25.\n15:26 Yessawel i yiwen seg iqeddacen, isteqsa-t \u0263ef wayen yed\u1e5ban.\n15:27 Aqeddac nni yenna-yas : \u00ab d gma-k i d-yu\u0263alen, baba-k if\u1e5be\u1e25 a\u1e6das imi i d-yu\u0263al di lehna, yezla-yas agenduz-nni ye\u1e6d\u1e6duqten.\n15:28 Mi gesla i yimeslayen-nni, yerfa yugi ad ikcem \u0263er wexxam. Baba-s yeffe\u0263 a t-i\u1e25ellel iwakken ad ikcem,\n15:29 lame\u025bna ne\u021b\u021ba yenna-yas : \u00ab ac\u1e25al iseggasen nekk qeddce\u0263 fell-ak, ula d yiwen webrid ur \u025bu\u1e63a\u0263 awal-ik, le\u025bme\u1e5b ur iyi-tefki\u1e0d ula d yiwen yi\u0263id a t-zlu\u0263 iwakken ad fe\u1e5b\u1e25e\u0263 d imdukkal-iw.\n15:30 ma d mmi-k-agi i ges\u1e5bu\u1e25en ayen akk yes\u025ba \u0263ef yir tilawin, i ne\u021b\u021ba tezli\u1e0d agenduz-nni ye\u1e6d\u1e6duqten ! \u00bb\n15:31 Ikker baba-s yenna-yas : A mmi, ke\u010d\u010d kull ass te\u021b\u021bili\u1e0d yid-i, ayen akk s\u025bi\u0263 d ayla-k.\n15:32 Lame\u025bna ilaq-a\u0263 a nef\u1e5be\u1e25 axa\u1e6der gma-k i \u1e25esbe\u0263 yemmut atan yu\u0263al-ed idder, yella ija\u1e25, tura iban-ed.\n16:1 Sidna \u0190isa yenna da\u0263en i inelmaden-is : -- Yiwen wergaz d ame\u1e5bkanti yes\u025ba lewkil ; lewkil-agi ccetkan fell-as \u0263er um\u025bellem-is nnan-as : \u00ab lewkil-ik i\u021b\u1e0deggi\u025b ayla-k \u00bb.\n16:2 Am\u025bellem-is issawel-as yenna yas : \u00ab d acu-ten imeslayen-agi i sli\u0263 fell-ak ? Efk-iyi-d le\u1e25sab \u0263ef wayen akk i d-teskecme\u1e0d d wayen i tessuf\u0263e\u1e0d, axa\u1e6der sya d asawen ur te\u021b\u021bili\u1e0d ara d lewkil-iw \u00bb.\n16:3 Lewkil-agi ixemmem deg iman-is yenna : d acu ara xedme\u0263 imi am\u025bellem-iw ad iyi ikkes amkan-iw ? Ad xedme\u0263 akal... Ur zmire\u0263 ara ! Ad \u021bre\u0263.... sset\u1e25a\u0263 !\n16:4 ?ri\u0263 d acu ara xedme\u0263, iwakken m'ara yi-istixxe\u1e5b um\u025bellem-iw, ad afe\u0263 wid ara yi-i\u025biwnen !\n16:5 Yessawel-asen yiwen yiwen i wid akk yes\u025ban \u1e6d\u1e6dlaba \u0263er um\u025bellem-is. Yenna i umezwaru : \u00ab Ac\u1e25al i k-i\u021balas um\u025bellem-iw ? \u00bb\n16:6 Argaz-nni yerra-yas-d : \u00ab Meyya yecbuyla n zzit uzemmur. \u00bb Yenna-yas : \u00ab sellek awi-d le\u1e25sab ik, qqim taru\u1e0d xemsin \u00bb.\n16:7 Yenna da\u0263en i waye\u1e0d : \u00ab i ke\u010d\u010dini, ac\u1e25al i k-i\u021balas ? \u00bb Yenna-yas-d : \u00ab meyya tcekka\u1e5bin n yirden. \u00bb Yenna-yas : \u00ab awi-d le\u1e25sab-ik, qqim taru\u1e0d tmanyin\u00bb.\n16:8 Am\u025bellem n lewkil-nni axedda\u025b icekke\u1e5b-it \u0263ef ti\u1e25e\u1e5bci-ines axa\u1e6der arraw n ddunit-agi \u1e25e\u1e5bcen di lec\u0263al wway gar-asen akte\u1e5b n warraw n tafat.\n16:9 Ma d nekk atan a wen-d ini\u0263: sxedmet adrim n ddunit-agi iwakken a\u021b-\u021bes\u025bum imdukkal, s wakka asm'ara yefnu cci n ddunit, a\u021b-\u021be\u021b\u021buqeblem di tmezdu\u0263in n dayem.\n16:10 Ma nes\u025ba laman deg yiwen \u0263ef t\u0263awsiwin timec\u1e6du\u1e25in, a ne\u021bkel fell-as ula \u0263ef tmeqqranin ; win yellan d axedda\u025b di t\u0263awsiwin timec\u1e6du\u1e25in, ad yili d axedda\u025b ula di tmeqqranin.\n16:11 Ma yella te\u021b\u1e0deggi\u025bem le\u1e5b\u1e93aq n ddunit-agi, anwa ara kkun-iwekklen \u0263ef le\u1e5b\u1e93aq n tide\u021b ?\n16:12 Ma yella ulac da\u0263en laman deg-wen \u0263ef wayen i wen-iwekkel waleb\u025ba\u1e0d, amek ara wen-d-yefk Sidi \u1e5aebbi ayen i wen-ihegga i kunwi ?\n16:13 Ulac aqeddac ara iqedcen \u0263ef sin yem\u025bellmen : ma i\u1e25emmel yiwen ad ik\u1e5beh waye\u1e0d ne\u0263 ma ye\u1e6d\u1e6def deg yiwen ur ye\u021b\u021bak ara lqima i waye\u1e0d. Ur tezmirem ara a\u021b-\u021bqedcem \u0263ef \u1e5aebbi ma yella tettaba\u025bem le\u1e5b\u1e93aq n ddunit agi.\n16:14 Ifariziyen i gesme\u1e25sisen i wayen i d-iqqa\u1e5b Sidna \u0190isa, stehzayen fell-as axa\u1e6der nutni \u1e25emmlen idrimen ;\n16:15 ma d ne\u021b\u021ba yenna-yasen : Tesbegginem-d iman-nwen d i\u1e25eqqiyen zdat medden, me\u025bna Sidi \u1e5aebbi yessen ulawen-nwen ; ayen yes\u025ban ccan \u0263er yemdanen di ddunit-agi, d ayen ye\u021bwake\u1e5bhen \u0263er Sidi \u1e5aebbi.\n16:16 Uqbel lweqt n Ye\u1e25ya a\u0263e\u1e6d\u1e6das, kullec iteddu s ccari\u025ba n Musa d wayen i d-xebb\u1e5ben lenbiya. Tura, lexba\u1e5b n lxi\u1e5b ye\u025bnan tgelda n \u1e5aebbi i\u021b\u021bubecce\u1e5b ; mkul yiwen yekkat amek ara \u021b-ikcem s ddre\u025b.\n16:17 Yeshel i igenni d lqa\u025ba ad fnun, ma d ccari\u025ba n Sidi \u1e5aebbi ur i\u021b\u021banqas seg-s ula d yiwen n usekkil.\n16:18 Kra n win ara yebrun i tme\u1e6d\u1e6dut-is i\u025bawed zzwa\u01e7, yezna ; kra n win ara ya\u0263en tame\u1e6d\u1e6dut yennebran, yezna da\u0263en.\n16:19 Yiwen wergaz d ame\u1e5bkanti, i\u021blusu anagar llebsa ifazen n le\u1e25rir a\u1e5bqaq ; mkul ass ixeddem tame\u0263\u1e5ba, i\u021b\u025bici di zzhu d lfe\u1e5b\u1e25.\n16:20 Yiwen igellil isem-is La\u025b\u1e93ar, i\u010d\u010du\u1e5b d ideddiyen, i\u021b\u0263imi \u0263er tewwurt n ume\u1e5bkanti-nni,\n16:21 i\u1e6d\u1e6dama\u025b deg-s ad ye\u010d\u010d \u0263as d ayen i g\u0263ellin \u0263er lqa\u025ba ; ula d iqjan \u021b\u021basen-d ad mec\u1e25en ideddiyen-is.\n16:22 Asmi yemmut u\u1e93awali-nni, ddment-e\u021b lmalayekkat wwint-e\u021b \u0263er igenni \u0263er wanda yella Ib\u1e5bahim. Ame\u1e5bkanti-nni yemmut ula d ne\u021b\u021ba, me\u1e0dlen-t.\n16:23 Di laxe\u1e5bt yen\u025be\u021b\u021bab a\u1e6das, yerfed allen-is, iwala meb\u025bid Ib\u1e5bahim akk-d La\u025b\u1e93ar \u0263er tama-s.\n16:24 I\u025begge\u1e0d yenna-yas : \u00ab A baba Ib\u1e5bahim, \u1e25unn fell-i cegge\u025b-ed La\u025b\u1e93ar ad iger ulamma d ixef n u\u1e0dad-is deg waman ad issisme\u1e0d iles-iw, aql-i nne\u025btabe\u0263 a\u1e6das deg u\u1e25\u01e7a\u01e7u-yagi n tmes. \u00bb\n16:25 Ib\u1e5bahim yerra-yas : A mmi, mmekti-d belli tewwi\u1e0d amur-ik di ddunit ; ma d La\u025b\u1e93ar ye\u1e5bwa lehmum. Tura ne\u021b\u021ba ye\u021b\u021bu\u1e63ebbe\u1e5b yufa dagi lfe\u1e5b\u1e25, ke\u010d\u010d i\u1e63a\u1e25-ik-id lqe\u1e5b\u1e25.\n16:26 Yerna yella gar-ane\u0263 yiwen ye\u0263ze\u1e5b annect ila-t, wid yeb\u0263an ad zegren sya \u0263u\u1e5b-wen, ur zmiren ara ; kunwi da\u0263en ur tezmirem ara a d-zegrem \u0263u\u1e5b-nne\u0263.\n16:27 Ame\u1e5bkanti-nni yenna-yas : Ihi a baba Ib\u1e5bahim di le\u025bnaya-k cegge\u025b La\u025b\u1e93ar \u0263er wexxam n baba ;\n16:28 ad i\u025beggen i xemsa-nni wayetma, iwakken ur d-\u021b\u021basen ara ula d nutni \u0263er wemkan-agi n le\u025btab.\n16:29 Ib\u1e5bahim yerra-yas : Atmaten-ik \u0263u\u1e5b-sen ccari\u025ba n Musa d lenbiya, a ten-teb\u025ben !\n16:30 Ame\u1e5bkanti-nni yenna-yas-d : A baba Ib\u1e5bahim, ur \u021b\u1e25essisen ara i ccari\u025ba d lenbiya lame\u025bna ma yu\u0263al \u0263u\u1e5b-sen yiwen syagi, ad beddlen tikli.\n16:31 Ib\u1e5bahim yerra-yas : M'ur sem\u1e25essen ara i ccari\u025ba n Musa d lenbiya, atan \u0263as ma yu\u0263al yiwen si lmegtin ur as-sme\u1e25sisen ara.\n17:1 Sidna \u0190isa yenna i inelmaden is imeslayen-agi : -- D lmu\u1e25al ur d-\u021bilint ara sebbat ara yesse\u0263lin imdanen di ddnub. A nnger n win ara yilin d sebba n u\u0263elluy ;\n17:2 axi\u1e5b a s-\u025belqen a\u0263a\u1e5bef n tsirt \u0263er temge\u1e5b\u1e6d-is, a t-\u1e0degg\u1e5ben \u0263er leb\u1e25e\u1e5b wala ad yesse\u0263li di ddnub yiwen seg imec\u1e6du\u1e25en-agi.\n17:3 ?adret \u0263ef yiman-nwen ! Ma ye\u1e0dlem gma-k ssefhem-it, ma yendem deg wayen ixdem semme\u1e25 as.\n17:4 ?as ma ye\u1e0dlem-ik seb\u025ba iberdan deg wass, ma yusa-d \u0263u\u1e5b-ek seb\u025ba tikkal a k-d-yini : \u00ab aql-i ndemme\u0263 deg wayen xedme\u0263 \u00bb, ilaq a s tsemm\u1e25e\u1e0d.\n17:5 \u1e5a\u1e5busul n Sidna \u0190isa nnan-as : A Sidi ssem\u0263e\u1e5b liman-nne\u0263 !\n17:6 Sidna \u0190isa yerra-yasen : Lemmer tes\u025bam liman ulamma annect n u\u025beqqa n yired, a\u021b-\u021bizmirem a\u021b-\u021binim i ttej\u1e5ba-yagi n \u021but qle\u025b sya t\u1e5bu\u1e25e\u1e0d a\u021b-\u021be\u1e93\u1e93u\u1e0d iman-im di leb\u1e25e\u1e5b, a wen-ta\u0263 awal.\n17:7 Anwa deg-wen ara yes\u025bun axeddam ikerrzen ne\u0263 ikessen lmal, ara s-yinin m'ara d-yu\u0263al si lexla : \u00ab l\u025beslama-inek, qqim a\u021b-\u021beste\u025bfu\u1e0d, tura a k-d-awi\u0263 a\u021b-\u021be\u010d\u010de\u1e0d \u00bb.\n17:8 Ma\u010d\u010di akka ara s-yini, me\u025bna a s-yini : \u00ab \u0263iwel beddel lqecc-ik tawi\u1e0d-iyi-d ad \u010d\u010de\u0263 ad swe\u0263, mi \u010d\u010di\u0263 \u1e5bwi\u0263, imiren a\u021b-\u021be\u010d\u010de\u1e0d a\u021b-\u021beswe\u1e0d ula d ke\u010d\u010dini. \u00bb\n17:9 E\u025bni ad icekke\u1e5b axeddam-is imi gexdem ayen i s-yume\u1e5b ?\n17:10 Kunwi da\u0263en m'ara txedmem ayen i wen-d ye\u021bwam\u1e5ben, init : d iqeddacen kan i nella, nexdem ayen ilaqen a t-nexdem.\n17:11 Deg webrid-is \u0263er temdint n Lquds, Sidna \u0190isa i\u025bedda ger tmurt n Samarya akk \u021b-\u021bmurt n Jlili.\n17:12 Mi gekcem \u0263er yiwet n taddart, mmugren t-id \u025bec\u1e5ba imu\u1e0dan ihelken lbe\u1e5bs, bedden meb\u025bid\n17:13 \u025begg\u1e0den nnan-as : A Sidna \u0190isa ! A Sidi \u1e25unn fell-a\u0263 !\n17:14 Mi ten-iwala, Sidna \u0190isa yenna yasen : \u1e5au\u1e25et a kkun-walin lmuqedmin, a d-cehden belli te\u1e25lam. Deg webrid-nsen mi \u1e5bu\u1e25en, akken walan iman-nsen \u1e25lan \u1e63fan,\n17:15 yiwen deg-sen yu\u0263al-ed seg webrid-nni ye\u021b\u1e25emmid \u1e5aebbi s kra yellan di ta\u0263ect-is.\n17:16 Yusa-d ye\u0263li \u0263er i\u1e0da\u1e5b\u1e5ben n Sidna \u0190isa, ise\u01e7\u01e7ed zdat-es, icekke\u1e5b-it, yerna argaz-agi d a\u1e63amari i gella.\n17:17 Sidna \u0190isa yenna i l\u0263aci : E\u025bni ur \u1e25lin ara di \u025bec\u1e5ba yid-sen ? I \u021bes\u025ba nni\u1e0den anda llan ?\n17:18 Anagar abe\u1e5b\u1e5bani-agi i d-yu\u0263alen ad ye\u1e25med \u1e5aebbi !\n17:19 D\u0263a yenna i usamari-nni : Kker fell-ak u\u0263al \u0263er wexxam ik, imi tumne\u1e0d yis-i, te\u021b\u021busellke\u1e0d.\n17:20 Ifariziyen steqsan Sidna \u0190isa melmi ara d-tas l\u1e25ekma n tgeldit n Sidi \u1e5aebbi. Sidna \u0190isa yerra-yasen : L\u1e25ekma n Sidi \u1e5aebbi ma\u010d\u010di d ayen \u021bwalint wallen.\n17:21 Ur nezmir ara a d-nini : a\u021ban dagi ne\u0263 a\u021ban dihin, axa\u1e6der l\u1e25ekma n Sidi \u1e5aebbi a\u021ban gar-wen.\n17:22 Sidna \u0190isa yenna i inelmaden-is : A d-yas lweqt i deg ara tmennim a\u021b-\u021be\u1e93rem Mmi-s n bunadem ulamma d yiwen wass lame\u025bna ur kkun-id-i\u021b\u1e63a\u1e25 ara.\n17:23 Imiren ma nnan-awen-d : atah dagi ne\u0263 atan dihin ur \u021b\u1e5bu\u1e25ut ara, ur \u021b\u021bazzalet ara,\n17:24 axa\u1e6der am leb\u1e5baq m'ara yewwet seg yixef n igenni \u0263er waye\u1e0d, akken ara yili Mmi-s n bunadem ass n tu\u0263alin-is.\n17:25 Tazwara ilaq ad ye\u025bteb a\u1e6das, yerna l\u01e7il-agi ur t-iqebbel ara.\n17:26 D ayen yed\u1e5ban di zzman n Nu\u1e25 ara yed\u1e5bun deg ussan n tu\u0263alin n Mmi-s n bunadem.\n17:27 Imdanen llan te\u021b\u021ben, \u021bessen, \u021bemyezwa\u01e7en, zeggjen i dderya-nsen, armi d asmi yekcem Nu\u1e25 \u0263er lbabu\u1e5b ; yewwet-ed u\u1e25emmal, neflen-d waman \u0263ef ddunit, imdanen me\u1e5b\u1e5ba mmuten.\n17:28 D ayen yed\u1e5ban di zzman n Lu\u1e6d ara yed\u1e5bun da\u0263en : imdanen te\u021b\u021ben tessen, \u021b\u021ba\u0263en znuzun, \u021be\u1e93\u1e93un, bennun ;\n17:29 asmi d-yeffe\u0263 Lu\u1e6d si temdint n ?udum, te\u0263li-d seg igenni tmes d ukebri i ten-isnegren akk.\n17:30 Akken ara d-ted\u1e5bu asm'ara d-iban Mmi-s n bunadem.\n17:31 Ass-nni win ara yilin sufella n wexxam ur ilaq ara ad yekcem a d-iddem lqecc-is ; win i d-yufa l\u1e25al di lexla ur ilaq ara ad yu\u0263al \u0263er deffir ;\n17:32 mmektit-ed tame\u1e6d\u1e6dut n Lu\u1e6d.\n17:33 Win ara yeb\u0263un ad isellek tudert-is ad a s-t\u1e5bu\u1e25, win iwumi ara t\u1e5bu\u1e25 \u0263ef ddemma n yisem-iw a \u021b-isellek.\n17:34 Qqa\u1e5be\u0263-awen : deg i\u1e0d-nni, ger sin ara yilin deg yiwen wusu, yiwen ad i\u021bwarfed waye\u1e0d a d-yeqqim.\n17:35 Ger snat n tilawin ye\u1e93\u1e93aden, yiwet a\u021b-\u021be\u021bwarfed taye\u1e0d a d-teqqim.\n17:36 Ger sin yergazen ara yilin di lexla, yiwen ad i\u021bwarfed waye\u1e0d a d-yeqqim.\n17:37 Inelmaden-is steqsan-t nnan-as : Anda ara yed\u1e5bu wayagi a Sidi ? Yenna-yasen : Anda yella umur\u1e0dus, dinna ara a d-nejma\u025ben igudar.\n18:1 Sidna \u0190isa yewwi-yasen-d lemtel-agi iwakken ad de\u025b\u025bun daymen \u0263er Sidi \u1e5aebbi ur fe\u010d\u010dlen ara.\n18:2 Yenna-yasen : Deg yiwet n temdint yella yiwen lqa\u1e0di, ur i\u021b\u021bagad \u1e5aebbi ur ye\u021bqada\u1e5b imdanen.\n18:3 Di temdint-nni tella da\u0263en yiwet n ta\u01e7\u01e7alt te\u021b\u1e5bu\u1e25u \u0263u\u1e5b-es, teqqa\u1e5b-as : \u00ab e\u1e25kem s l\u1e25eqq gar-i d wex\u1e63im-iw. \u00bb\n18:4 A\u1e6das i geqqim yegguma a s-yefk l\u1e25eqq, me\u025bna ixemmem deg yiman-is yenna : \u00ab ta\u01e7\u01e7alt-agi e\u025byi\u0263 deg-es ! ?as ur \u021b\u021baggade\u0263 \u1e5aebbi ur \u1e25sibe\u0263 yiwen\n18:5 a s-fke\u0263 l\u1e25eqq akken ur d-te\u021b\u021bu\u0263al ara a yi-te\u1e5b\u1e5be\u1e93 aqe\u1e5b\u1e5buy-iw. \u00bb\n18:6 D\u0263a Sidna \u0190isa yenna : Twalam ayen i d-yenna lqa\u1e0di agi amesba\u1e6dli !\n18:7 Amek Sidi \u1e5aebbi ur d-ye\u021b\u021bak ara l\u1e25eqq i wid i gexta\u1e5b, i ge\u021b\u025beggi\u1e0den \u0263u\u1e5b-es am yi\u1e0d am ass ? A wen-d-ini\u0263 : ur ye\u021b\u025be\u1e6d\u1e6dil ara iwakken a ten-i\u025biwen, a sen-yefk l\u1e25eqq.\n18:8 Me\u025bna Mmi-s n bunadem asm'ara d-yas, wissen ma d-yaf liman di ddunit ?\n18:9 Yenna-d da\u0263en lemtel-agi \u0263ef kra n yemdanen i\u1e25esben iman-nsen d i\u1e25eqqiyen \u0263er \u1e5aebbi, i\u1e25eqq\u1e5ben wiya\u1e0d :\n18:10 Sin yergazen ulin \u0263er l\u01e7ame\u025b ad \u1e93allen ; yiwen (d ccix n l\u01e7ame\u025b) n ukabar n ifariziyen, waye\u1e0d d amekkas (ixeddmen \u0263er i\u1e5bumaniyen ist\u025bem\u1e5ben tamurt).\n18:11 Afarizi ibedd ye\u021b\u1e93alla yeqqa\u1e5b deg iman-is : a k-\u1e25emde\u0263 a k-cekk\u1e5be\u0263 a Sidi \u1e5aebbi imi ur lli\u0263 ara am wid yellan d imcumen, d ixedda\u025ben, ye\u021b\u025bicin di zzna ; a k-cekk\u1e5be\u0263 da\u0263en imi ur lli\u0263 ara am umekkas-agi.\n18:12 ?\u021bu\u1e93ume\u0263 sin wussan di ddu\u1e5bt, \u021b\u021bake\u0263 le\u025bcu\u1e5b seg wayen s\u025bi\u0263.\n18:13 Amekkas-nni ibedd meb\u025bid, isset\u1e25a ad yerfed ula d allen-is \u0263er igenni, yekkat deg idmaren-is yeqqa\u1e5b : \u00ab a Sidi \u1e5aebbi, \u1e25unn fell-i nekk yellan d amednub ! \u00bb\n18:14 A wen-d-ini\u0263 : amekkas-nni yu\u0263al \u0263er wexxam-is di lehna, ye\u021bwaqbel \u0263er Sidi \u1e5aebbi, ma d afarizi-nni ur ye\u021bwaqbel ara. Kra n win yessim\u0263u\u1e5ben iman-is a t-id-isres Sidi \u1e5aebbi ; ma d win yessim\u1e93iyen iman-is a t-issa\u025bli.\n18:15 L\u0263aci \u021b\u021bawin-as-ed ula d llufanat iwakken ad issers afus-is fell-asen a ten-ibarek. Inelmaden-is mi walan ayagi, \u021bna\u0263en-ten.\n18:16 Sidna \u0190isa issawel asen-d yenna : Anfet-asen i warrac ime\u1e93yanen a d-asen \u0263u\u1e5b-i ur ten-\u021b\u021barrat ara, axa\u1e6der tagelda n \u1e5aebbi te\u021bwahegga i wid yellan am nutni.\n18:17 A wen-ini\u0263 tide\u021b : kra n win ur neqbil ara tageldit n Sidi \u1e5aebbi am weqcic ame\u1e93yan, ur \u021b-ike\u010d\u010dem ara.\n18:18 Yiwen ume\u1e5bkanti isteqsa Sidna \u0190isa yenna-yas : Ay argaz n l\u025bali, d acu i yi ilaqen a t-xedme\u0263 iwakken ad s\u025bu\u0263 tudert n dayem ?\n18:19 Sidna \u0190isa yenna-yas : Acu\u0263e\u1e5b i yi-d-tenni\u1e0d \u00ab ay argaz l\u025bali \u00bb ? Ulac win yellan d l\u025bali-t anagar Sidi \u1e5aebbi !\n18:20 Tessne\u1e0d ayen i d-tenna ccari\u025ba n Musa : ur xeddem ara zzna, ur neqq ara, ur \u021b\u021baker ara, ur \u021bcehhid ara s \u1e93\u1e93ur, qade\u1e5b baba-k d yemma-k.\n18:21 Argaz-nni yenna-yas : Ayagi akk xeddme\u0263-t seg wasmi lli\u0263 d ame\u1e93yan.\n18:22 Mi gesla Sidna \u0190isa i imeslayen agi, yenna-yas : Ihi txu\u1e63\u1e63-ik yiwet l\u1e25a\u01e7a kan : \u1e5bu\u1e25 zzenz ayen akk tes\u025bi\u1e0d, seddeq-it i yigellilen iwakken a\u021b-\u021bes\u025bu\u1e0d agerruj deg igenni, tu\u0263ale\u1e0d-ed a\u021b-\u021beddu\u1e0d yid-i.\n18:23 Argaz-nni mi gesla i yimeslayen-agi ye\u0263li-d fell-as le\u1e25zen imi d ame\u1e5bkanti i gella.\n18:24 Mi t-iwala ye\u1e25zen, Sidna \u0190isa yenna : Ac\u1e25al i sen-yew\u025be\u1e5b i wid yes\u025ban cci ad kecmen \u0263er tgelda n Sidi \u1e5aebbi !\n18:25 Ishel i wel\u0263em ad i\u025beddi di ti\u1e6d n tissegnit wala i ume\u1e5bkanti ad yekcem \u0263er tgelda n Sidi \u1e5aebbi.\n18:26 Wid i s-yeslan, nnan-as : Anwa i gzemren ad i\u021b\u021busellek ?\n18:27 Sidna \u0190isa yerra-yasen : Ayen yellan d lmu\u1e25al i wemdan yeshel \u0263er Sidi \u1e5aebbi.\n18:28 Bu\u1e6drus yenna-yas : I nukkni ye\u01e7\u01e7an kullec iwakken a neddu yid-ek ?\n18:29 Sidna \u0190isa yenna-yasen : A wen-ini\u0263 tide\u021b : kra n win ye\u01e7\u01e7an axxam-is, tame\u1e6d\u1e6dut-is, ayetma- s, imawlan-is ne\u0263 arraw-is \u0263ef ddemma n tgeldit n \u1e5aebbi,\n18:30 a s-d-i\u021bunefk di ddunit-agi akte\u1e5b n wayen ye\u01e7\u01e7a yerna \u0263er zdat, ad yes\u025bu tudert n dayem.\n18:31 Sidna \u0190isa ijme\u025b-ed \u0263u\u1e5b-es tnac-nni inelmaden-is yenna-yasen : Aql-a\u0263 a nali \u0263er temdint n Lquds, ad id\u1e5bu wayen akk i d-uran lenbiya \u0263ef wayen ye\u025bnan Mmi-s n bunadem.\n18:32 Ad i\u021b\u021busellem ger ifassen n lkeffa\u1e5b, ad \u1e0dsen fell-as, ad kksen fell-as sser, a t-ssusfen.\n18:33 A t-wwten s ujelkka\u1e0d ( s ucelli\u1e6d ), a t-en\u0263en ; ass wis tlata a d-i\u1e25yu si ger lmegtin.\n18:34 Inelmaden-is ur fhimen acemma deg wayen i sen-d-yenna, lme\u025bna n imeslayen-agi te\u021bwaffer fell-asen. Ur \u1e93rin ara d acu i geb\u0263a a t-id-yini.\n18:35 Akken q\u1e5bib ad yawe\u1e0d Sidna \u0190isa \u0263er temdint n Yiriku, yiwen uder\u0263al yeqqim rrif n webrid yessutur tin n \u1e5aebbi.\n18:36 Mi gesla i l\u0263aci \u021b\u025beddayen, yesteqsa d acu i ged\u1e5ban ;\n18:37 nnan-as belli d \u0190isa Ana\u1e63ari i d-i\u025beddan.\n18:38 D\u0263a i\u025begge\u1e0d yenna : A \u0190isa, a mmi-s n Sidna Dawed, \u1e25unn fell-i !\n18:39 Wid yezwaren \u021bdemmiren-t \u0263er deffir qqa\u1e5ben-as : Ssusem a k-ihdu \u1e5aebbi ! Me\u025bna ne\u021b\u021ba ye\u021b\u025beggi\u1e0d akte\u1e5b : A mmi-s n Sidna Dawed, \u1e25unn fell-i !\n18:40 Sidna \u0190isa ye\u1e25bes, yefka lame\u1e5b a s-t-id-awin. Mi d-yewwe\u1e0d \u0263u\u1e5b-es, yenna-yas :\n18:41 D acu teb\u0263i\u1e0d a k-t-xedme\u0263 ? Yerra-yas-d : A Sidi, b\u0263i\u0263 a yi-d-yu\u0263al ye\u1e93ri !\n18:42 Sidna \u0190isa yenna-yas : Wali ! Imi tumne\u1e0d yis-i atan te\u021b\u021busellke\u1e0d.\n18:43 Imiren kan yu\u0263al-it-id ye\u1e93ri ye\u021bwali, yedda d Sidna \u0190isa, i\u1e25emmed \u1e5aebbi. Mi walan ayagi, l\u0263aci me\u1e5b\u1e5ba \u1e25emden \u1e5aebbi.\n19:1 Sidna \u0190isa i\u025bedda si temdint n Yiriku.\n19:2 Yella dinna yiwen ume\u1e5bkanti isem-is Zaci, d ameqqran n imekkasen n ddewla.\n19:3 Yeb\u0263a ad i\u1e93er anwa i d Sidna \u0190isa lame\u025bna ur yezmir ara a t-iwali imi a\u1e6das l\u0263aci i gellan, yerna ne\u021b\u021ba d awezlan.\n19:4 Yuzzel \u0263er zdat, yuli \u0263ef ttej\u1e5ba iwakken a t-iwali m'ara d-i\u025beddi syenna.\n19:5 Mi gewwe\u1e0d Sidna \u0190isa \u0263er wemkan-nni, yerfed allen-is yenna i Zaci : A Zaci, \u0263iwel ers-ed syenna, \u0263u\u1e5b-ek ara nse\u0263 ass-agi.\n19:6 Zaci yers-ed s lem\u0263awla ad yeste\u1e5b\u1e25eb s Sidna \u0190isa.\n19:7 L\u0263aci mi walan ayagi smermugen wway gar asen qqa\u1e5ben : \u00ab \u0263er yiwen umekkas (axedda\u025b) am wagi ara yens ! \u00bb\n19:8 Zaci iqe\u1e5b\u1e5beb-ed \u0263er Sidna \u0190isa, yenna-yas : A Sidi, atan ad fke\u0263 i igellilen azgen n wayen s\u025bi\u0263, yerna ma \u1e0delme\u0263 yiwen a s-rre\u0263 \u1e5beb\u025ba imuren.\n19:9 Sidna \u0190isa yenna-yas : Ass-agi leslak ikcem-ed axxam agi, imi argaz-agi ula d ne\u021b\u021ba d mmi-s n Ib\u1e5bahim.\n19:10 Axa\u1e6der Mmi-s n bunadem yusa-d ad inadi \u0263ef wid i\u1e0da\u025ben, a ten-isellek.\n19:11 Sidna \u0190isa yerna-d yiwen n lemtel i wid i s isme\u1e25sisen, axa\u1e6der q\u1e5bib ad aw\u1e0den \u0263er temdint n Lquds, l\u0263aci \u0263ilen imiren kan ara d-tas tgeldit n Sidi \u1e5aebbi.\n19:12 Yenna yasen : Yiwen wergaz imawlan-is muce\u025ben, i\u021beddu ad i\u1e5bu\u1e25 \u0263er yiwet n tmurt ibe\u025bden iwakken a t-sbedden d agellid \u0263ef tmurt-is , imiren a d-yu\u0263al.\n19:13 Qbel ad i\u1e5bu\u1e25, yessawel i \u025bec\u1e5ba seg iqeddacen-is ; yefka tawize\u021b i mkul yiwen deg-sen, yenna-yasen : \u00ab xedmet yis-sent tja\u1e5ba alamma u\u0263ale\u0263-ed \u00bb.\n19:14 Arraw n tmurt-is i t-ike\u1e5bhen, cegg\u025ben deffir-es kra n yemdanen ara yinin : \u00ab ur neb\u0263i ara ad yili wergaz agi d agellid fell-ane\u0263. \u00bb\n19:15 Mi t-sbedden d agellid, yu\u0263al ed \u0263er tmurt-is ; yessawel i iqeddacen nni iwumi yefka tiwiztin iwakken ad isteqsi mkul yiwen deg-sen d acu i d-yerbe\u1e25 yis-sent.\n19:16 Amezwaru yusa-d, yenna : A Sidi, s twize\u021b-nni i yi-d-tefki\u1e0d reb\u1e25e\u0263-ed \u025bec\u1e5ba nni\u1e0den.\n19:17 Agellid yenna-yas : D ayen yelhan ay aqeddac l\u025bali, imi deg-ek laman \u0263ef l\u1e25a\u01e7a tamec\u1e6du\u1e25t, a k-fke\u0263 a\u021b-\u021b\u1e25ekme\u1e0d \u0263ef \u025bec\u1e5ba n tudrin.\n19:18 Aqeddac wis sin yusa-d yenna : A Sidi, reb\u1e25e\u0263-ed xemsa n twiztin s twize\u021b i yi-d-tefki\u1e0d.\n19:19 Agellid yenna-yas : Ula d ke\u010d\u010d a k-sbedde\u0263 d l\u1e25akem \u0263ef xemsa tudrin.\n19:20 Yusa-d uqeddac wis tlata yenna : A Sidi, a\u021bah twize\u021b-inek ! Fre\u0263-\u021b deg yiwen uce\u1e6d\u1e6di\u1e0d ;\n19:21 uggade\u0263-k axa\u1e6der twe\u025b\u1e5be\u1e0d, te\u021b\u021beddme\u1e0d ayen ur tesrise\u1e0d, tmeggre\u1e0d ayen ur tezri\u025be\u1e0d.\n19:22 Agellid yerra-yas : ?ef yimeslayen-ik ara k-\u1e25asbe\u0263 ay aqeddac amcum ! Te\u1e93ri\u1e0d we\u025b\u1e5be\u0263, \u021beddme\u0263 ayen ur srise\u0263, meggre\u0263 ayen ur zri\u025be\u0263 ;\n19:23 acu\u0263e\u1e5b ihi ur tefki\u1e0d ara idrimen-iw i wid ara ten-isxedmen, iwakken m'ara d-u\u0263ale\u0263 a ten-id jebde\u0263 s lfayda ?\n19:24 D\u0263a yenna i widak yellan dinna : Kkset-as tawize\u021b-nni, rnut-as-\u021b i win yes\u025ban \u025bec\u1e5ba.\n19:25 Nnan-as : A Sidi, yes\u025ba yakan \u025bec\u1e5ba !\n19:26 Yerra-yasen : Nni\u0263-awen : win yes\u025ban a s nernu, ma d win ur nes\u025bi ara a s nekkes ula d ayen i g\u0263il yes\u025ba-t.\n19:27 Ma d i\u025bdawen-nni-inu ur neqbil ara ad ili\u0263 d agellid fell-asen, awit-\u021ben-id \u0263er dagi tezlum-ten zdat-i.\n19:28 Mi gekfa ameslay, Sidna \u0190isa yezwar \u0263er zdat l\u0263aci iwakken ad yali \u0263er temdint n Lquds.\n19:29 Mi q\u1e5bib ad yawe\u1e0d \u0263er tuddar n Bitfaji akk-d Bitani, \u0263er tama n yiwen yi\u0263il i\u021b\u021busemman \u00ab I\u0263il Uzemmur, \u00bb Sidna \u0190isa icegge\u025b sin seg inelmaden-is,\n19:30 yenna-yasen : \u1e5au\u1e25et \u0263er taddart ihin i \u0263-d iqublen, a\u021b-\u021bafem aj\u1e25i\u1e25 yeqqen, le\u025bme\u1e5b ur yerkib fell-as yiwen ; brut-as-ed, tawim-t-id.\n19:31 Ma yella win i wen-d yennan : \u00ab acu\u0263e\u1e5b i s-d-tebram ? \u00bb Init-as : ye\u1e25wa\u01e7-it Ssid-nne\u0263.\n19:32 Imcegg\u025ben-nni \u1e5bu\u1e25en, ufan kullec akken i sen-d-yenna Sidna \u0190isa.\n19:33 Mi s-d-bran i wej\u1e25i\u1e25-nni, bab-is yenna-yasen : I wacu i s-d-tebram ?\n19:34 Rran-as : Ye\u1e25wa\u01e7-it Ssid-nne\u0263.\n19:35 Wwin-d aj\u1e25i\u1e25-nni, ssersen fell-as ibe\u1e5bnyas-nsen, srekben Sidna \u0190isa.\n19:36 Akken i gteddu, l\u0263aci tessun-as-d ibe\u1e5bnyas-nsen deg webrid.\n19:37 Mi q\u1e5bib ad aw\u1e0den \u0263er temdint n Lquds, di tkessart-nni n yi\u0263il n uzemmur, inelmaden-is d l\u0263aci me\u1e5b\u1e5ba \u010d\u010du\u1e5ben d lfe\u1e5b\u1e25, \u021b\u1e25emmiden Sidi \u1e5aebbi s \u1e63\u1e63ut e\u025blayen \u0263ef lbe\u1e5bhanat akk i walan.\n19:38 Qqa\u1e5ben : Ye\u021b\u021bubarek ugellid i d-yusan s yisem n Sidi \u1e5aebbi ! Lehna deg igenwan, tamanegt i Sidi \u1e5aebbi deg imukan \u025blayen.\n19:39 Kra ifariziyen di tlemmast l\u0263aci nnan i Sidna \u0190isa : A Sidi, ini-yasen i inelmaden-ik ad ssusmen.\n19:40 Yenna-yasen : A wen-ini\u0263 : ma ssusmen nutni, d id\u0263a\u0263en ara d-i\u025begg\u1e0den.\n19:41 Mi q\u1e5bib ad yawe\u1e0d \u0263er temdint n Lquds, akken i \u021b-iwala, Sidna \u0190isa ye\u021bru fell-as,\n19:42 yenna : A tamdint n Lquds ! Lemmer te\u1e93ri\u1e0d ass-agi ayen ara m-d-ifken lehna ! Lame\u025bna tura ayagi yeffer \u0263ef wallen-im !\n19:43 A d-asen wussan anda ara d-ze\u1e0dmen fell-am ye\u025bdawen-im, a d-kecmen a m-d-zzin si mkul tama, a kem-\u1e25e\u1e5bsen ;\n19:44 a kem-snegren kemm d warraw-im, ur \u021b\u021ba\u01e7an deg-m az\u1e5bu \u0263ef waye\u1e0d ; axa\u1e6der ur te\u025bqile\u1e0d ara usan i deg i d-yusa leslak n Sidi \u1e5aebbi \u0263u\u1e5b-em.\n19:45 Sidna \u0190isa yekcem \u0263er wefrag n l\u01e7ame\u025b iqedsen, yebda i\u021bqecci\u025b wid yeznuzun,\n19:46 yeqqa\u1e5b-asen : Yura di tira iqedsen : Axxam-iw ad yili d axxam n t\u1e93allit, kunwi terram-t d axxam n imakaren.\n19:47 Sidna \u0190isa yesselmad mkul ass di l\u01e7ame\u025b iqedsen. Lmuqedmin imeqqranen, l\u025bulama d imeqqranen n wegdud \u021bnadin a t-n\u0263en,\n19:48 lame\u025bna ur s-ufin ara abrid axa\u1e6der l\u0263aci me\u1e5b\u1e5ba sme\u1e25sisen-as, yerna t\u025be\u01e7\u01e7ben deg yimeslayen-is.\n20:1 Yiwen wass deg ussan-nni, Sidna \u0190isa yella yesselmad l\u0263aci deg wefrag n l\u01e7ame\u025b iqedsen ye\u021bbecci\u1e5b lexba\u1e5b n lxi\u1e5b ; le\u1e25qen-d lmuqedmin d l\u025bulama n ccari\u025ba akk d imeqqranen n wegdud,\n20:2 nnan-as : Di le\u025bnaya-k ! ansi i k-d-tekka l\u1e25ekma s wacu i txeddme\u1e0d annect agi ? Anwa i k-\u021b-id-yefkan ?\n20:3 Yerra-yasen : A kkun-steqsi\u0263 ula d nekkini, init-iyi-d :\n20:4 anwa i d-icegn, d \u1e5aebbi ne\u0263 d imdanen ?\n20:5 Bdan \u021bemcawa\u1e5ben wway gar-asen, qqa\u1e5ben : Ma nenna-yas d \u1e5aebbi, a \u0263-d yini iwacu ihi ur tuminem ara yis ?\n20:6 Ma nenna-yas d imdanen, l\u0263aci akk a \u0263-\u1e5bejmen axa\u1e6der umnen me\u1e5b\u1e5ba belli Ye\u1e25ya d nnbi.\n20:7 D\u0263a nnan i Sidna \u0190isa : Atan ur ne\u1e93ri ara anwa i t-id icegg\u025ben.\n20:8 Sidna \u0190isa yenna-yasen : Ula d nekk ur awen-d-qqa\u1e5be\u0263 ara ansi i yi-d-tekka l\u1e25ekma s wacu i xeddme\u0263 annect-agi.\n20:9 D\u0263a yewwi-d lemtel-agi i l\u0263aci : Yiwen wergaz ye\u1e93\u1e93a tafe\u1e5b\u1e5bant ( iger n t\u1e93urin ) issekra-\u021b i ixemmasen, i\u1e5bu\u1e25 \u0263er l\u0263e\u1e5bba, i\u025be\u1e6d\u1e6del dinna.\n20:10 Mi d-yewwe\u1e0d lweqt n t\u1e93urin, icegge\u025b \u0263u\u1e5b-sen aqeddac iwakken a s-d-fken amur-is ; lame\u025bna ixemmasen-nni wwten-t, rrant-id ifassen d ilmawen.\n20:11 Icegge\u025b da\u0263en aqeddac nni\u1e0den, lame\u025bna ula d ne\u021b\u021ba ewten-t, regmen-t, rrant-id ifassen d ilmawen.\n20:12 Icegge\u025b-asen da\u0263en wis tlata, jer\u1e25en-t rnan qec\u025ben-t-id syenna.\n20:13 Am\u025bellem-nni n tfe\u1e5b\u1e5bant yenna : \u00ab d acu ara xedme\u0263 tura ? A sen cegg\u025be\u0263 mmi ame\u025bzuz , ahat ne\u021b\u021ba a t-qad\u1e5ben ! \u00bb\n20:14 Lame\u025bna ixemmasen nni mi t-walan, mcawa\u1e5ben wway gar asen nnan : \u00ab ataya win ara iwe\u1e5bten ! Kkret a t-nenne\u0263 iwakken a\u021b-\u021bu\u0263al tfe\u1e5b\u1e5bant d ayla-nne\u0263. \u00bb\n20:15 ?egg\u1e5ben-t be\u1e5b\u1e5ba n tfe\u1e5b\u1e5bant, n\u0263an-t. D acu ara sen-yexdem tura bab n tfe\u1e5b\u1e5bant-agi ?\n20:16 A d-yas ad ine\u0263 ixemmasen-nni, ad yefk tafe\u1e5b\u1e5bant i wiya\u1e0d. L\u0263aci mi slan annect-agi, nnan : A \u0263-imne\u025b \u1e5aebbi !\n20:17 Lame\u025bna Sidna \u0190isa imuqel-iten yenna : D acu i d lme\u025bna n wawal-agi yuran : ad\u0263a\u0263 i \u1e0degg\u1e5ben wid ibennun, yu\u0263al d win ye\u1e6d\u1e6dfen lebni .\n20:18 Kra n win ara ye\u0263lin \u0263ef wed\u0263a\u0263-agi ad ye\u1e5b\u1e5bez ; ma d win i \u0263ef ara d-ye\u0263li, ad i\u021bwan\u0263ed.\n20:19 L\u025bulama n ccari\u025ba d imeqqranen n lmuqedmin \u021bqelliben a t-\u1e6d\u1e6dfen imiren kan, axa\u1e6der fehmen fell-asen i d-yenna lemtel-agi, lame\u025bna uggaden l\u0263aci.\n20:20 Bdan \u021b\u025bassan Sidna \u0190isa iwakken ma ye\u0263li-d deg wawal a t-\u1e6d\u1e6dfen. Fkan taj\u025belt i kra n yemdanen yerran iman-nsen d wid i\u1e0du\u025ben \u1e5aebbi iwakken a t-zenzen \u0263er l\u1e25akem n tmurt.\n20:21 Steqsan-t ihi s imeslayen-agi : A Sidi, ne\u1e93ra ayen i d-teqqa\u1e5be\u1e0d d wayen i tesselmade\u1e0d d l\u1e25eqq, yerna ur txeddme\u1e0d ara lxilaf ger yemdanen, tesselmade\u1e0d abrid n \u1e5aebbi s tide\u021b.\n20:22 Ini-ya\u0263-d ma d le\u1e25lal a nxelle\u1e63 tabzert i Qay\u1e63er (iste\u025bm\u1e5ben tamurt)?\n20:23 Sidna \u0190isa ifaqen i t\u1e25ila-nsen, yerra-yasen : Seknet-iyi-d a\u1e63urdi.\n20:24 Udem-agi d wayen yuran \u0263ef wu\u1e63u\u1e5bdi-agi wi ten-ilan ? Rran-as : D udem n Qay\u1e63er!\n20:25 D\u0263a yenna-yasen : Ihi erret i Qay\u1e63er ayen yellan n Qay\u1e63er, terrem i \u1e5aebbi ayen yellan n \u1e5aebbi.\n20:26 Wehmen s wayen i sen-d-yerra d\u0263a ssusmen irkul, axa\u1e6der ur ufin ara amek ara t-id-sse\u0263lin deg wawal zdat l\u0263aci.\n20:27 Kra n isaduqiyen ur ne\u021b\u021bamen ara s \u1e25eggu n lmegtin, qe\u1e5b\u1e5bben-d \u0263er Sidna \u0190isa, steqsan-t nnan-as :\n20:28 A Sidi, atah wayen i d-teqqa\u1e5b ccari\u025ba n Musa : Ma yemmut yiwen wergaz ye\u01e7\u01e7a-d tame\u1e6d\u1e6dut-is mbla dderya, ilaq gma-s ad ya\u0263 tame\u1e6d\u1e6dut-nni, ad yes\u025bu yid-es dderya iwakken a d-ixlef isem n gma-s yemmuten.\n20:29 Ihi llan seb\u025ba watmaten : amezwaru yezwe\u01e7, yemmut ur d ye\u01e7\u01e7i dderya.\n20:30 Wis sin yu\u0263 ta\u01e7\u01e7alt-nni, yemmut ula d ne\u021b\u021ba.\n20:31 Yu\u0263-i\u021b da\u0263en wis tlata, akken armi d wis seb\u025ba ; mmuten me\u1e5b\u1e5ba, yiwen ur d-ye\u01e7\u01e7i yid-es dderya.\n20:32 ?er taggara temmut tme\u1e6d\u1e6dut-nni ula d ne\u021b\u021bat.\n20:33 Ass n \u1e25eggu n lmegtin, anwa ara \u021b-yes\u025bun \u021b-\u021bame\u1e6d\u1e6dut-is imi \u021b-u\u0263en yiwen yiwen di seb\u025ba yid-sen ?\n20:34 Sidna \u0190isa yerra-yasen : Irgazen akk-d tilawin n ddunit agi \u021bemyezwa\u01e7en wway gar-asen.\n20:35 Lame\u025bna wid ara yuklalen a d-\u1e25yun si lmut \u0263er tudert n dayem, ur \u021bemyezwa\u01e7en ara,\n20:36 axa\u1e6der ur \u021b\u021bu\u0263alen ara ad mmten, ad ilin am lmalayekkat ; Sidi \u1e5aebbi a ten-yerr d arraw-is imi i d-\u1e25yan si ger lmegtin.\n20:37 ?ef wayen ye\u025bnan \u1e25eggu n lmegtin ula d nnbi Musa ih\u1e0de\u1e5b-ed fell-as mi gessawel i Sidi \u1e5aebbi zdat udarnu i\u1e5beqqen : a \u1e5aebbi, Illu n Ib\u1e5bahim, Illu n Is\u1e25aq, Illu n Ye\u025bqub.\n20:38 \u1e5aebbi ma\u010d\u010di d \u1e5aebbi n wid yemmuten me\u025bna d \u1e5aebbi n wid yeddren imi \u0263u\u1e5b-es ddren irkulli \u0263as akken mmuten.\n20:39 Kra n imusnawen n ccari\u025ba ne\u1e6dqen-d nnan-as : A Sidi, d awal n l\u025bali i d-tenni\u1e0d.\n20:40 Kukran a s-rnun ula d yiwen usteqsi.\n20:41 Sidna \u0190isa yenna-yasen : Amek armi qqa\u1e5ben Lmasi\u1e25 d mmi-s n Dawed ?\n20:42 Dawed s yiman-is yenna-d di tektabt n ?abur : Sidi \u1e5aebbi yenna i Ssid-iw : qqim a\u021b-\u021b\u1e25ekme\u1e0d \u0263er tama- w tayeffust\n20:43 alamma rri\u0263 i\u025bdawen-ik seddaw i\u1e0da\u1e5b\u1e5ben-ik.\n20:44 Ma yella Dawed isemma i Lmasi\u1e25 \u00ab Sidi \u00bb, amek i gezmer ad yili d mmi-s ?\n20:45 L\u0263aci me\u1e5b\u1e5ba llan sme\u1e25sisen, Sidna \u0190isa yenna i inelmaden-is :\n20:46 ?adret iman-nwen \u0263ef l\u025bulama n ccari\u025ba i g\u1e25emmlen ad \u021b\u1e25ewwisen s ijellaben i\u0263ezfanen, \u1e25emmlen ad \u021bsellimen fell-asen yemdanen di leswaq, ad \u1e6d\u1e6dfen imukan imezwura di le\u01e7wame\u025b d imukan l\u025bali di tme\u0263\u1e5ba.\n20:47 Te\u021b\u021ben ayla n tu\u01e7\u01e7al, ssi\u0263zifen ta\u1e93allit iwakken a ten-id-walin wiya\u1e0d. ?ef wannect-agi, Sidi \u1e5aebbi ihegga-yasen-d l\u025biqab d ameqqran.\n21:1 Sidna \u0190isa yerfed allen-is, iwala ime\u1e5bkantiyen srusun lew\u025badi deg usenduq n l\u01e7ame\u025b.\n21:2 A\u021baya yiwet n ta\u01e7\u01e7alt ta\u1e93awalit tger sin i\u1e63urdiyen \u0263er usenduq-nni,\n21:3 d\u0263a yenna : A wen-ini\u0263 tide\u021b : lwe\u025bda n ta\u01e7\u01e7alt-agi ta\u1e93awalit tugar akk tiya\u1e0d ;\n21:4 axa\u1e6der wiya\u1e0d fkan seg wayen s\u025ban d zzyada ma d ne\u021b\u021bat tefka ci\u1e6d\u1e6du\u1e25-nni s wacu ara t\u025bic.\n21:5 Kra n yemdanen \u021bmeslayen \u0263ef l\u01e7ame\u025b iqedsen qqa\u1e5ben wway gar-asen : Ac\u1e25al yecbe\u1e25 lebni n l\u01e7ame\u025b-agi akk-d \u021b\u0263awsiwin i s-d-ye\u021b\u021bunefken d lwe\u025bda ! Sidna \u0190isa yenna-yasen :\n21:6 Deg wayen akka i te\u021bwalim, a d-aw\u1e0den wussan anda kullec ad ihudd, ur d-ye\u021b\u0263imi wed\u0263a\u0263 \u0263ef waye\u1e0d.\n21:7 Steqsan-t nnan-as : A Sidi, melmi ara d-yed\u1e5bu wannect-a ? Anta lica\u1e5ba ara d isbegnen belli q\u1e5bib a d-yed\u1e5bu waya ?\n21:8 Yenna-yasen : ?u\u1e5b-wat a kkun-kellxen, axa\u1e6der a\u1e6das ara d-yasen s yisem-iw a d inin : d nekk i d Lmasi\u1e25 ! Ne\u0263 a wen-d-inin : lweqt yewwe\u1e0d-ed ! Ur ten-\u021b\u021bamnet ara !\n21:9 M'ara teslem hedd\u1e5ben \u0263ef tegrawliwin d \u1e6dradat ur \u021b\u021bagadet ara, axa\u1e6der ilaq a d-yed\u1e5bu uqbel wayagi, lame\u025bna ma\u010d\u010di imiren i \u021b-\u021baggara n ddunit.\n21:10 Yenna-yasen da\u0263en : A d-yekker wegdud \u0263er waye\u1e0d, a d-tekker tagelda \u0263er taye\u1e0d.\n21:11 A d-tilint zzelzlat timeqqranin, a d-\u0263lin di yal lehlakat i gderr\u025ben ( i gne\u1e6d\u1e6d\u1e0den) akk-d la\u1e93, a d-tilint le\u025b\u01e7ubat yessexla\u025ben akk-d lica\u1e5bat timeqqranin deg igenni.\n21:12 Lame\u025bna uqbel a d-yed\u1e5bu wannect-a, kunwi s inelmaden-iw a kkun-\u1e6d\u1e6dfen, a kkun qeh\u1e5ben, ad \u1e25ekmen fell-awen di le\u01e7wame\u025b, a kkun-\u1e0degg\u1e5ben \u0263er le\u1e25bus, a kkun-sbedden zdat igelliden d l\u1e25ekkam \u0263ef ddemma n yisem-iw.\n21:13 A d-yed\u1e5bu wannect-a yid-wen iwakken a\u021b-\u021bilim d inigan-iw zdat-sen.\n21:14 Ur \u021b\u1e25ebbi\u1e5bet ara amek ara tsellkem iman-nwen,\n21:15 axa\u1e6der a wen-d-fke\u0263 imeslayen d le\u025bqel s wacu ara tqablem i\u025bdawen nwen, ur \u021bizmiren ara ad bedden zdat-wen ne\u0263 a kkun-xalfen.\n21:16 Ula d imawlan-nwen akk-d atmaten-nwen d imdukkal-nwen a kkun-zzenzen yerna ad n\u0263en a\u1e6das seg-wen.\n21:17 A kkun-ke\u1e5bhen yemdanen me\u1e5b\u1e5ba \u0263ef ddemma-w,\n21:18 lame\u025bna yiwen wen\u1e93ad n uqe\u1e5b\u1e5buy-nwen ur ye\u021b\u1e5bu\u1e25u.\n21:19 ?eb\u1e5bet, axa\u1e6der s \u1e63\u1e63be\u1e5b-nwen ara tsellkem ti\u1e5bwi\u1e25in-nwen.\n21:20 M'ara te\u1e93rem tamdint n Lquds zzin-as-d l\u025beske\u1e5b n ye\u025bdawen-is, \u1e25\u1e63ut belli nnger-is yewwe\u1e0d-ed.\n21:21 Ass-nni ilaq wid ara yilin di temdint n Lquds ad ff\u0263en, wid ara yilin di lexla ur ke\u010d\u010dmen ara \u0263er temdint, wid ara yilin di tmurt n Yahuda ad rewlen \u0263er idurar.\n21:22 Axa\u1e6der ussan-nni d ussan n twa\u0263it deg wacu ara yed\u1e5bu me\u1e5b\u1e5ba wayen yuran.\n21:23 A nnger n tilawin ara yilin s tadist ne\u0263 tid ara yessu\u1e6du\u1e0den deg ussan-nni axa\u1e6der a d-te\u0263li cedda \u021b-\u021bameqqrant \u0263ef tmurt, a d-ye\u0263li wurrif n Sidi \u1e5aebbi \u0263ef wegdud,\n21:24 imezda\u0263-is ad mmten s ujenwi, a ten-awin d ime\u1e25bas \u0263er tmura nni\u1e0den. Tamdint n Lquds a \u021b-\u1e5bek\u1e0den le\u01e7nas ur ne\u021b\u021bamen ara s Sidi \u1e5aebbi, alamma ye\u021bwakemmel lweqt i sen-d-yefka Sidi \u1e5aebbi, imiren ad yezzi \u0263ef le\u01e7nas-nni, a ten-i\u025baqeb.\n21:25 A d-tbanent lica\u1e5bat deg i\u1e6dij, deg waggur d yitran. Di ddunit, imdanen me\u1e5b\u1e5ba a ten-iffe\u0263 le\u025bqel, ur \u1e93erren ara d acu ara xedmen m'ara slen i \u1e63\u1e63ut n lemwaji d leb\u1e25u\u1e5b.\n21:26 Ad ilin wid ara yemten si lxuf m'ara walin lmu\u1e63ibat ara d-ye\u0263lin \u0263ef ddunit ; igenwan d kra yellan deg-sen ad rgagin.\n21:27 Imiren imdanen ad walin Mmi-s n bunadem iteddu-d \u0263ef wusigna s tezmert d l\u025ba\u1e0dima tameqqrant.\n21:28 M'ara yebdu wannect-agi i\u1e0de\u1e5b\u1e5bu, sbeddet lqedd-nwen trefdem iqe\u1e5b\u1e5bay-nwen axa\u1e6der leslak-nwen yewwe\u1e0d-ed.\n21:29 Yewwi-yasen-d lemtel-agi : Walit taneqle\u021b ne\u0263 ttju\u1e5b nni\u1e0den !\n21:30 M'ara bdunt fessunt, te\u1e93ram q\u1e5bib a d-yawe\u1e0d unebdu.\n21:31 Kunwi da\u0263en m'ara twalim yewwe\u1e0d-ed wannect-agi \u1e25\u1e63ut belli tageldit n \u1e5aebbi teq\u1e5beb-ed.\n21:32 A wen-ini\u0263 tide\u021b: l\u01e7il-agi ur ye\u021bme\u021b\u021bat ara alamma yed\u1e5ba wannect-agi me\u1e5b\u1e5ba.\n21:33 Igenni d lqa\u025ba ad fnun ma d awal-iw ur ifennu ara.\n21:34 \u0190asset \u0263ef yiman-nwen, \u1e25adret a kkun-i\u0263u\u1e5b\u1e5b zzhu n ddunit ; \u025basset iman-nwen \u0263ef tissit n cc\u1e5bab d i\u0263eblan, ne\u0263 m'ulac a d-ye\u0263li fell awen wass-nni ur tebnim fell-as.\n21:35 Ass-nni a d-ye\u0263li am ucebbak \u0263ef yemdanen n ddunit me\u1e5b\u1e5ba.\n21:36 \u0190iwzet ihi, de\u025b\u025but dayem \u0263er Sidi \u1e5aebbi a wen-d-yefk tazmert ara kkun-imen\u025ben seg wayen i d-iteddun, s wayes ara tbeddem zdat Mmi-s n bunadem.\n21:37 Deg wass, Sidna \u0190isa yesselmad di l\u01e7ame\u025b iqedsen ma deg i\u1e0d, ye\u021b\u1e5bu\u1e25u ad yens deg yiwen yi\u0263il i\u021b\u021busemman : \u00abI\u0263il n uzemmur \u00bb.\n21:38 ?\u1e63be\u1e25 zik, l\u0263aci me\u1e5b\u1e5ba \u021b\u1e5bu\u1e25un \u0263u\u1e5b-es \u0263er l\u01e7ame\u025b iqedsen iwakken ad slen i wawal-is.\n22:1 L\u025bid i deg xedmen a\u0263\u1e5bum mbla i\u0263es n temtunt i\u021b\u021busemman \u00ab Tafaska n izimer n leslak \u00bb tqe\u1e5bb-ed.\n22:2 Lmuqedmin imeqqranen d l\u025bulama n ccari\u025ba \u021bqelliben amek ara n\u0263en Sidna \u0190isa lame\u025bna uggaden l\u0263aci.\n22:3 Yudas n Qe\u1e5byut yiwen si tnac-nni n inelmadenis, ikcem-it Cci\u1e6dan.\n22:4 I\u1e5bu\u1e25 ad yemcawa\u1e5b d lmuqedmin imeqqranen akk-d l\u1e25ekkam i\u025bessasen n l\u01e7ame\u025b iqedsen, iwakken a sen izzenz Sidna \u0190isa.\n22:5 Nutni fe\u1e5b\u1e25en yerna \u025buhden-t a s-fken idrimen.\n22:6 Yudas yefra awal yid-sen syenna yebda ye\u021bqellib amek ara sen-t-yezzenz s tuffra \u0263ef l\u0263aci.\n22:7 Yewwe\u1e0d-ed wass n Tfaska n we\u0263\u1e5bum mbla i\u0263es n tamtunt i deg ilaq ad zlun izimer n leslak.\n22:8 Sidna \u0190isa icegge\u025b Bu\u1e6drus d Yu\u1e25enna, yenna-yasen : \u1e5au\u1e25et a \u0263-theggim imensi n Tfaska.\n22:9 Nnan-as : Anda teb\u0263i\u1e0d a t-nheggi a Sidi ?\n22:10 Yerra-yasen : M'ara tkecmem \u0263er temdint, a d-temmagrem yiwen wergaz yerfed tacmuxt n waman ; teb\u025bet-e\u021b \u0263er wexxam anda ara yekcem.\n22:11 Init i bab n wexxam-nni : yeqqa\u1e5b-ak-d Ssid nne\u0263, anda ara ne\u010d\u010d imensi n Tfaska nekk d inelmaden-iw ?\n22:12 A wen-d-isken yiwet n t\u0263u\u1e5bfe\u021b tameqqrant iwejden, dinna ara theggim imensi n Tfaska.\n22:13 Mi \u1e5bu\u1e25en, ufan kullec akken i sen-t-id-yenna, d\u0263a heggan imensi n Tfaska.\n22:14 Mi d-yewwe\u1e0d lweqt n imensi, Sidna \u0190isa yeqqim ad ye\u010d\u010d ne\u021b\u021ba d \u1e5a\u1e5busul-is,\n22:15 yenna-yasen : Ac\u1e25al i menna\u0263 ad \u010d\u010de\u0263 imensi n Tfaska-agi yid-wen uqbel ad nne\u025btabe\u0263 !\n22:16 A wen-d-ini\u0263 : atan ur \u021b\u021bu\u0263ale\u0263 ara ma\u1e0di a t-\u010d\u010de\u0263 alamma te\u021bwakemmel lme\u025bna-ines di tgelda n Sidi \u1e5aebbi.\n22:17 Yeddem-d tabuqalt n waman n t\u1e93urin, ye\u1e25med Sidi \u1e5aebbi yenna : Axet tabuqalt-agi, fe\u1e5bqet-e\u021b wway gar-awen,\n22:18 a wen-d-ini\u0263 : sya d asawen ur \u021b\u021bu\u0263ale\u0263 ara ad swe\u0263 seg waman-agi n t\u1e93urin alamma tewwe\u1e0d ed tgeldit n Sidi \u1e5aebbi.\n22:19 Yeddem-ed da\u0263en a\u0263\u1e5bum, i\u1e25med Sidi \u1e5aebbi, yeb\u1e0da-t yefka-yasen-t, yenna : A\u0263\u1e5bum-agi d l\u01e7e\u021b\u021ba-w ara fke\u0263 fell-awen, fe\u1e5bqet-e\u021b gar-awen. Sya d asawen xeddmet akkagi akken ad iyi-d-te\u021bmektayem.\n22:20 Mi gfukk imensi, yeddem-ed tabuqalt n waman n t\u1e93urin, yefka yasen-\u021b yenna : Tabuqalt-agi, d le\u025bqed ajdid s idammen-iw ara yazzlen fell-awen.\n22:21 Ma d win ara yi-zzenzen atan yeqqim-ed yid-i \u0263er lmakla.\n22:22 Mmi-s n bunadem ad immet akken yura fell-as di tira iqedsen, lame\u025bna a nnger n wemdan agi ara t-izzenzen !\n22:23 \u1e5a\u1e5busul bdan \u021bmesteqsayen wway gar-asen anwa-t wagi ara t-ixed\u025ben.\n22:24 Inelmaden bdan \u021bemjadalen wway gar-asen iwakken ad \u1e93ren anwa deg-sen ara i\u021bwa\u1e25esben d ameqqran.\n22:25 Sidna \u0190isa yenna yasen : Imeqqranen n ddunit \u1e25ekmen s ddre\u025b \u0263ef yigduden-nsen yerna \u021b\u021busemman d at lxi\u1e5b.\n22:26 Kunwi x\u1e0dut i wannect-agi. Ameqqran deg-wen ad yili am ume\u1e93yan, win i\u1e25ekmen ad yili am win iqeddcen.\n22:27 Anwa i d ameqqran , d am\u025belem yeqqimen ad ye\u010d\u010d ne\u0263 d win i s iqeddcen ? Yak d win yeqqimen ad ye\u010d\u010d ! Ma d nekk, aql-i gar-awen am win iqeddcen.\n22:28 Kunwi aql-ikkun t\u1e63eb\u1e5bem yid-i di lme\u1e25nat-iw.\n22:29 Akken i yi-d-ihegga Baba tagelda, ula d nekk a wen-\u021b-id heggi\u0263 i kunwi\n22:30 iwakken a\u021b-\u021be\u010d\u010dem a\u021b-\u021beswem yid-i di tgelda-inu. A\u021b-\u021beqqimem \u0263ef yikursiyen n l\u1e25ekma, a\u021b-\u021b\u1e25ekmem \u0263ef tnac le\u025b\u1e5bac n wat Is\u1e5bail.\n22:31 Sidna \u0190isa yenna : A Sem\u025bun sel-iyi-d ! Cci\u1e6dan yessuter a kkun-isserwet am yirden,\n22:32 lame\u025bna d\u025bi\u0263 \u0263er Sidi \u1e5aebbi fell-ak akken ur tfe\u010d\u010dle\u1e0d ara di liman. Ma d ke\u010d\u010d m'ara d-tu\u0263ale\u1e0d \u0263u\u1e5b-i, sse\u01e7hed atmaten-ik.\n22:33 Bu\u1e6drus yenna-yas : Aql-i hegga\u0263 iman-iw ad kecme\u0263 yid-ek \u0263er l\u1e25ebs, ad ddu\u0263 yid-ek ula \u0263er lmut.\n22:34 Sidna \u0190isa yenna-yas : A k-d-ini\u0263 a Bu\u1e6drus , ass-a uqbel ad iskku\u025b uyazi\u1e0d ad iyi-tnek\u1e5be\u1e0d tlata iberdan, a\u021b-\u021bini\u1e0d ur iyi-tessine\u1e0d ara !\n22:35 Yenna-yasen da\u0263en : M'akken i kkun-cegg\u025be\u0263 mbla idrimen, mbla agrab, mbla arkasen, yella kra i kkun-ixu\u1e63\u1e63en ? Rran-as : Ur a\u0263-ixu\u1e63\u1e63 wacemma !\n22:36 Yenna-yasen : Ihi tura win yes\u025ban idrimen ne\u0263 agrab yawi-ten, win ur nes\u025bi ara ajenwi ad izzenz abe\u1e5bnus-is iwakken a d-ya\u0263 yiwen.\n22:37 Axa\u1e6der qqa\u1e5be\u0263 awen : Ilaq ad yed\u1e5bu yid-i wayen yuran. \u00ab I\u021b\u021bune\u1e25sab seg yemba\u1e63iyen, \u00bb yerna ayen yuran fell-i, atan yewwe\u1e0d ed.\n22:38 Inelmaden-is nnan-as : A Sidi , atnan sin ijenwiyen ! Yenna-yasen : D ayen tura, be\u1e5bka !\n22:39 Akken yu\u0263 tannumi, Sidna \u0190isa yeffe\u0263, i\u1e5bu\u1e25 \u0263er yi\u0263il n uzemmur ; inelmaden-is teb\u025ben-t.\n22:40 Mi gewwe\u1e0d \u0263er wemkan-nni, yenna-yasen : D\u025but \u0263er \u1e5aebbi akken ur t\u0263ellim ara deg uje\u1e5b\u1e5beb.\n22:41 D\u0263a yesseb\u025bed iman-is fell-asen azal n kra n lmitrat, yeqqim \u0263ef tgecrar ide\u025b\u025bu i \u1e5aebbi yeqqa\u1e5b :\n22:42 A Baba, ma teb\u0263i\u1e0d sseb\u025bed fell-i le\u025btab-agi i yi-\u021b\u1e5ba\u01e7un ; lame\u025bna d leb\u0263i-k ara yed\u1e5bun ma\u010d\u010di d leb\u0263i inu.\n22:43 Yiwen n lmelk n Sidi \u1e5aebbi i\u1e0dhe\u1e5b-as-d a t-yesse\u01e7hed.\n22:44 I\u1e0daq wul-is, ike\u021b\u021be\u1e5b di t\u1e93allit armi tu\u0263al tidi-ines d idammen ye\u021bqi\u1e6d\u1e6diren \u0263er lqa\u025ba.\n22:45 Mi gekfa, yu\u0263al-ed \u0263er inelmaden-is, yufa-ten-id yewwi-ten yi\u1e0des axa\u1e6der ye\u0263li-d fell-asen le\u1e25zen ameqqran ;\n22:46 d\u0263a yenna-yasen : Acu\u0263e\u1e5b i tegnem ? Kkret, d\u025but \u0263er \u1e5aebbi akken ur t\u0263ellim ara deg uje\u1e5b\u1e5beb.\n22:47 Mazal-it ihedde\u1e5b, atnaya ww\u1e0den d l\u0263aci. Yudas, yiwen si tnac-nni inelmaden-is yezwar-ed zdat-sen, iqe\u1e5b\u1e5beb \u0263er Sidna \u0190isa ad isellem fell-as.\n22:48 Sidna \u0190isa yenna yas : A Yudas, s sslam ara txed\u025be\u1e0d Mmi-s n bunadem !\n22:49 Wid yellan d Sidna \u0190isa, mi walan ayen ara yed\u1e5bun nnan-as : A Sidi, a newwet s ijenwiyen ?\n22:50 Yiwen deg-sen yewwet aqeddac n lmuqeddem ameqqran, igzem-as ame\u1e93\u1e93u\u0263 ayeffus.\n22:51 Sidna \u0190isa yenna yasen : ?ebset ! Dayen tura ! Yessers afus-is \u0263ef wemkan n ume\u1e93\u1e93u\u0263 n uqeddac-nni, yerra-yas-t akken yella.\n22:52 D\u0263a yezzi \u0263er wid i d-yusan a t-\u1e25ebsen, \u0263er lmuqedmin imeqqranen d l\u025buqal akk-d l\u1e25ekkam n i\u025bessasen n l\u01e7ame\u025b iqedsen yenna yasen : Tusam-d \u0263u\u1e5b-i s ijenwiyen d i\u025bekzan am akken d amakar i lli\u0263.\n22:53 Mkul ass \u021b\u021bili\u0263 yid-wen di l\u01e7ame\u025b iqedsen yiwen ur d-yerfid afus-is \u0263u\u1e5b-i. Lame\u025bna taswi\u025bt-agi \u021b-\u021baswi\u025bt nwen, \u021b-\u021baswi\u025bt n tezmert n \u1e6d\u1e6dlam.\n22:54 Mi \u1e6d\u1e6dfen Sidna \u0190isa, wwin-t \u0263er wexxam n lmuqeddem ameqqran. Bu\u1e6drus itbe\u025b-iten s leb\u025bid.\n22:55 Ce\u025blen times di tlemmast n wefrag, qqimen. Bu\u1e6drus yella yid-sen.\n22:56 Yiwet n tqeddact twala-t-id yeqqim ye\u1e93\u1e93i\u1e93in, tmuqel-it tenna : Argaz-agi da\u0263en yella yid-es.\n22:57 Lame\u025bna Bu\u1e6drus yenke\u1e5b, yenna : Ur t-ssine\u0263 ara a tame\u1e6d\u1e6dut !\n22:58 Cwi\u1e6d akka, iwala-t-id yiwen nni\u1e0den, yenna : Ke\u010d\u010d da\u0263en d yiwen seg-sen. Bu\u1e6drus yerra-yas, yenna : Ur lli\u0263 ara seg-sen ay argaz !\n22:59 I\u025bedda wazal n ssa\u025ba, yen\u1e6deq-ed yiwen nni\u1e0den yenna : Mbla ccekk argaz-agi yella yid-es axa\u1e6der d ajlili.\n22:60 Bu\u1e6drus yerra-yas : Ur \u1e93ri\u0263 ara d acu i d-teqqa\u1e5be\u1e0d ay argaz ! Wer\u025bad yekfi ameslay... yeskku\u025b uyazi\u1e0d.\n22:61 Sidna \u0190isa yezzi \u0263u\u1e5b-es, immuqel-it. D\u0263a Bu\u1e6drus yemmekta-d wayen i s-d-yenna Sidna \u0190isa : \u00ab Ass-agi, uqbel ad iskku\u025b uyazi\u1e0d ad iyi-tnek\u1e5be\u1e0d tlata iberdan.\u00bb\n22:62 Yeffe\u0263 \u0263er be\u1e5b\u1e5ba i\u1e6d\u1e6der\u1e0deq s ime\u1e6d\u1e6dawen axa\u1e6der yendem.\n22:63 Irgazen-nni i g\u025bussen Sidna \u0190isa, stehzayen fell-as kkaten-t.\n22:64 ?\u0263ummun-as udem-is, rnan qqa\u1e5ben-as \u00ab e\u025bqel ihi anwa i k-id yewten \u00bb.\n22:65 Rnan regmen-t s mkul rregmat yellan.\n22:66 Mi guli wass, tajma\u025bt n l\u025buqal n wegdud, lmuqedmin imeqqranen d l\u025bulama n ccari\u025ba nnejma\u025ben. Wwin-d Sidna \u0190isa \u0263er usqamu n cc\u1e5be\u025b.\n22:67 Steqsan-t nnan-as : Ma d ke\u010d\u010d i d Lmasi\u1e25, ini ya\u0263 t-id. Yerra-yasen : Atan ma nni\u0263-awen-t-id ur iyi te\u021b\u021bamnem ara,\n22:68 ma steqsa\u0263-kkun-id ur iyi-d-\u021barram ara.\n22:69 Lame\u025bna a wen-d-ini\u0263, sya \u0263er zdat, Mmi-s n bunadem ad ye\u1e25kem \u0263er tama tayeffust n Sidi \u1e5aebbi Bab n tezmert.\n22:70 Kkren-d akken ma llan nnan : Ihi ke\u010d\u010d d Mmi-s n \u1e5aebbi ? Ne\u021b\u021ba yerra-yasen : Tennam-t-id, d nekk !\n22:71 Imiren \u025begg\u1e0den nnan : Dayen ur ne\u1e25wa\u01e7 ara inigan, yenna-t-id s yimi-s, nesla-yas s ime\u1e93\u1e93u\u0263en-nne\u0263.\n23:1 Tajma\u025bt me\u1e5b\u1e5ba tekker, wwin Sidna \u0190isa \u0263er l\u1e25akem Bila\u1e6dus.\n23:2 Bdan \u021bcetkin fell-as, qqa\u1e5ben : -- Nufa argaz-agi yeskker ccwal ger l\u0263aci-nne\u0263, yeqqa\u1e5b-asen : \u00ab ur \u021bxelli\u1e63et ara le\u0263\u1e5bama i Qay\u1e63er \u00bb, yeqqa\u1e5b da\u0263en : \u00ab d ne\u021b\u021ba i d Lmasi\u1e25, i d agellid \u00bb.\n23:3 Bila\u1e6dus isteqsa-t s imeslayen-agi : D ke\u010d\u010d i d agellid n wat Is\u1e5bail ? Sidna \u0190isa yerra-yas : Tenni\u1e0d-t-id.\n23:4 Bila\u1e6dus yenna i lmuqedmin imeqqranen d l\u0263aci : Ur s-d-ssukkse\u0263 acemma i wergaz-agi.\n23:5 Nutni \u021bkemmilen qqa\u1e5ben : Yeskker ccwal ger l\u0263aci s wayen yesselmad ; yebda-d si tmurt n Jlili, yu\u0263al \u0263er tmurt n Yahuda me\u1e5b\u1e5ba, tura yewwe\u1e0d-ed \u0263er dagi.\n23:6 Bila\u1e6dus, mi gesla bedren-d tamurt n Jlili, yesteqsa \u0263ef Sidna \u0190isa ma d ajlili i gella.\n23:7 Mi ge\u1e93ra belli Sidna \u0190isa ajlili, n tmurt i \u0263ef ye\u1e25kem Hi\u1e5budus, icegge\u025b-as-t i Hi\u1e5budus yellan ula d ne\u021b\u021ba di temdint n Lquds ussan-nni.\n23:8 Hi\u1e5budus if\u1e5be\u1e25 a\u1e6das mi ge\u1e93ra Sidna \u0190isa, axa\u1e6der ac\u1e25al segmi yeb\u0263a a t-i\u1e93er \u0263ef ddemma n wayen yesla fell-as. Ye\u021bmenni a t-iwali yexdem lbe\u1e5bhan,\n23:9 isteqsa-t a\u1e6das, lame\u025bna Sidna \u0190isa ur as-d-yerri acemma.\n23:10 Lmuqedmin imeqqranen akk-d l\u025bulama n ccari\u025ba yellan dinna \u021bcetkayen fell-as s l\u0263ecc.\n23:11 Hi\u1e5budus d l\u025beske\u1e5b-is \u1e25eq\u1e5ben-t, stehzayen fell as, selsen-as yiwen ube\u1e5bnus ifazen, imiren rran-t i Bila\u1e6dus.\n23:12 Seg wass-nni, Bila\u1e6dus d Hi\u1e5budus u\u0263alen d imdukkal nutni yellan zik d i\u025bdawen.\n23:13 Imiren Bila\u1e6dus yesnejma\u025b-ed lmuqedmin imeqqranen d l\u025bulama akk-d l\u0263aci,\n23:14 yenna-yasen : Tewwim-iyi-d argaz-agi, tennam d yeskker ccwal ger l\u0263aci ; atan steqsa\u0263-t zdat-wen ur ufi\u0263 ara deg-s ayen akka s wayes i d-teccetkam fell as.\n23:15 Ula d Hi\u1e5budus ur s-d yessukkes acemma imi i \u0263-t-id-yerra. Ihi argaz-agi ur yexdim ara ayen yuklalen lmut.\n23:16 A s-fke\u0263 ti\u0263\u1e5bit imiren a s-serr\u1e25e\u0263.\n23:17 Mkul Tafaska n izimer n leslak Bila\u1e6dus ye\u021bserri\u1e25-ed i yiwen ume\u1e25bus.\n23:18 L\u0263aci me\u1e5b\u1e5ba \u021b\u025beggi\u1e0den qqa\u1e5ben : En\u0263-it , tser\u1e25e\u1e0d-ed i Barabas !\n23:19 Barabas-agi ye\u021bwa\u1e25bes \u0263ef ccwal i gexdem di temdint-nni akk \u021b-\u021bemge\u1e5b\u1e6d i gen\u0263a.\n23:20 Bila\u1e6dus yeb\u0263an a d-iserre\u1e25 i Sidna \u0190isa ih\u1e0de\u1e5b-ed tikkelt nni\u1e0den i l\u0263aci,\n23:21 lame\u025bna nutni \u021b\u025beggi\u1e0den qqa\u1e5ben : Semme\u1e5b-it, semme\u1e5b-it \u0263ef wumidag.\n23:22 Bila\u1e6dus in\u1e6deq-ed tikkelt tis tlata, yenna-yasen : D acu n cce\u1e5b i gexdem ? Ur ufi\u0263 ara deg-s ayen yuklalen lmut. Atan ihi a s-fke\u0263 ti\u0263\u1e5bit, imiren a s-serr\u1e25e\u0263.\n23:23 Lame\u025bna nutni \u1e25e\u1e5bsen-t s le\u025bya\u1e0d qqa\u1e5ben : Semme\u1e5b-it \u0263ef llu\u1e25 ! ?elben-t s le\u025bya\u1e0d-nsen\n23:24 d\u0263a Bila\u1e6dus yeqbel ayen i s-ssutren.\n23:25 Iserre\u1e25-as-d i ume\u1e25bus-nni issekren ccwal yerna yen\u0263a tamge\u1e5b\u1e6d ; ma d Sidna \u0190isa yefka-yasen-t ad xedmen yis ayen b\u0263an.\n23:26 Mi wwin Sidna \u0190isa, mmugren-d yiwen wergaz n temdint n Qi\u1e5bwan i\u021b\u021busemman Sem\u025bun, yu\u0263al-ed si lexla ; \u1e25ettmen fell-as ad ibbib amidag-nni, ad iddu deffir Sidna \u0190isa.\n23:27 A\u1e6das n l\u0263aci i d-iteb\u025ben deffir nsen, llant gar-asen tilawin kkatent deg idmaren-nsent, \u021brunt fell-as.\n23:28 Sidna \u0190isa yezzi-d \u0263u\u1e5b-sent yenna-yasent : A yessi-s n temdint n Lquds ur \u021brumt ara fell-i, \u021brumt \u0263ef yiman-nkunt d warraw-nkunt,\n23:29 axa\u1e6der atan a d-asen wussan i deg ara yinin : \u00ab \u021b-\u021bise\u025bdiyin tid ur nezmir ara a d-s\u025bunt dderya, \u021b-\u021bise\u025bdiyin tid ur d-nuriw ara, ur nessu\u1e6de\u1e0d ara.\u00bb\n23:30 Imiren imdanen ad bdun ad qqa\u1e5ben : ay idurar \u0263lit-ed fell-a\u0263, a ti\u0263altin ffremt-a\u0263.\n23:31 Axa\u1e6der ma xedmen annect-a i wes\u0263a\u1e5b akken d azegzaw amek ara ted\u1e5bu d uqu\u1e5ban ?\n23:32 Wwin da\u0263en sin n yemcumen iwakken a ten-semm\u1e5ben akk-d Sidna \u0190isa.\n23:33 Mi ww\u1e0den \u0263er yiwen wemkan i\u021b\u021busemman \u00ab I\u0263il Uqe\u1e5b\u1e5buy\u00bb, semm\u1e5ben Sidna \u0190isa \u0263ef llu\u1e25, ne\u021b\u021ba d sin-nni yemba\u1e63iyen, yiwen \u0263er tama-s tayeffust waye\u1e0d \u0263er tama-s tazelma\u1e6d.\n23:34 D\u0263a Sidna \u0190isa yen\u1e6deq-ed yenna : A Baba e\u025bfu-yasen imi ur \u1e93rin ara d acu i xeddmen. I\u025bsek\u1e5biwen-nni gren tas\u0263a\u1e5bt ad fe\u1e5bqen gar-asen llebsa-ines.\n23:35 L\u0263aci i gbedden dinna \u021bfe\u1e5b\u1e5bi\u01e7en ; lmuqedmin \u021bmesxi\u1e5ben fell-as qqa\u1e5ben : Isellek wiya\u1e0d, ad isellek iman-is tura ma yella \u021b-\u021bide\u021b d Lmasi\u1e25 i gexta\u1e5b \u1e5aebbi.\n23:36 I\u025bsek\u1e5biwen da\u0263en \u021bmesxi\u1e5ben fell as, qe\u1e5b\u1e5bben \u0263u\u1e5b-es b\u0263an a s-sswen lxell,\n23:37 qqa\u1e5ben-as : Ma d agellid n wat Is\u1e5bail i telli\u1e0d, sellek iman-ik.\n23:38 Ddmen-d da\u0263en yiwet n telwi\u1e25t, semm\u1e5ben-\u021b sennig uqe\u1e5b\u1e5buy-is, uran deg-s : \u00ab wagi d agellid n wat Is\u1e5bail \u00bb.\n23:39 Yiwen seg seg imba\u1e63iyen-nni i\u021b\u021busemm\u1e5ben \u0263ef llu\u1e25, ireggem Sidna \u0190isa, yeqqa\u1e5b-as : Ma d Lmasi\u1e25 i telli\u1e0d sellek iman ik tsellke\u1e0d-a\u0263 ula d nukkni.\n23:40 Lame\u025bna waye\u1e0d ilumm-it yenna yas : Ur tuggade\u1e0d ara \u1e5aebbi, ke\u010d\u010d i\u021b\u021busemm\u1e5ben am ne\u021b\u021ba ?\n23:41 Nukni ma \u1e25ekmen fell-a\u0263 d l\u1e25eqq axa\u1e6der nuklal lmut s wayen i nexdem ; lame\u025bna ne\u021b\u021ba ur yexdim acemma n wayen n diri.\n23:42 Yezzi \u0263er Sidna \u0190isa yenna-yas : A \u0190isa, mmekti-yi-d m'ara d-tas l\u1e25ekma n tgeldit-ik.\n23:43 Sidna \u0190isa yerra-yas : A k-ini\u0263 tide\u021b, ass-agi a\u021b-\u021bili\u1e0d yid-i di l\u01e7ennet.\n23:44 A\u021b-\u021bili d le\u01e7wahi n tnac, ye\u0263li-d \u1e6d\u1e6dlam \u0263ef tmurt me\u1e5b\u1e5ba armi d \u021blata n tmeddit.\n23:45 Le\u1e25jab yellan deg umkan iqedsen di l\u01e7ame\u025b, icerreg di tlemmast.\n23:46 Sidna \u0190isa i\u025begge\u1e0d s \u1e63\u1e63ut \u025blayen : A Baba \u1e5aebbi, atan \u1e5b\u1e5bu\u1e25-iw ger ifassen-ik. Mi genna imeslayen-agi, yeffe\u0263-it \u1e5b\u1e5bu\u1e25.\n23:47 Lqeb\u1e6dan mi ge\u1e93ra ayen yed\u1e5ban ye\u021bwe\u1e25\u1e25id \u1e5aebbi yenna : ?-\u021bide\u021b, amdan-agi d a\u1e25eqqi.\n23:48 L\u0263aci akk i g\u1e25ed\u1e5ben dinna, mi walan ayen yed\u1e5ban \u1e25eznen, u\u0263alen syenna kkaten deg idmaren-nsen.\n23:49 Wid akk i\u1e25emmlen Sidna \u0190isa qqimen deg leb\u025bid \u021bmuqulen ayen yed\u1e5ban, llant gar-asen tilawin i d yeddan yid-es si tmurt n Jlili.\n23:50 Yella yiwen wergaz ger lmuqedmin imeqqranen n usqamu n cc\u1e5be\u025b, isem-is Yusef, n taddart n Arimati n at Yahuda. Ur iqbil \u1e5b\u1e5bay-nsen, ur iqbil lec\u0263al-nsen, d argaz n l\u025bali yerna d a\u1e25eqqi, ye\u021b\u1e5ba\u01e7u tageldit n \u1e5aebbi.\n23:52 I\u1e5bu\u1e25 \u0263er Bila\u1e6dus yessuter-as l\u01e7e\u021b\u021ba n Sidna \u0190isa.\n23:53 I\u1e63ubb-it-id seg umidag, ye\u021b\u021bel-it di lekfen, yessers-it deg u\u1e93ekka ye\u0263zan deg wez\u1e5bu anda ur yem\u1e0dil ula d yiwen.\n23:54 Ass-nni d ass n l\u01e7em\u025ba i deg \u021bheggin l\u0263aci iman-nsen i wass n ssebt yellan d ass n weste\u025bfu.\n23:55 Tilawin-nni i d-yeddan d Sidna \u0190isa si tmurt n Jlili, ddant d Yusef \u0263er u\u1e93ekka, walant amek i ssersen l\u01e7e\u021b\u021ba-s.\n23:56 Syenna u\u0263alent \u0263er yexxamen nsent iwakken ad heggint le\u025b\u1e6de\u1e5b d wayen xeddmen i lmegtin, i l\u01e7e\u021b\u021ba n Sidna \u0190isa. Azekka-nni n ssebt, ste\u025bfant akken i d-tenna ccari\u025ba.\n24:1 Ass n l\u1e25edd \u1e63\u1e63be\u1e25 zik, tilawin nni \u1e5bu\u1e25ent \u0263er u\u1e93ekka, wwint yid-sent le\u025b\u1e6de\u1e5b i d-heggant.\n24:2 Ufant az\u1e5bu-nni iqeflen a\u1e93ekka, yegrareb akkin.\n24:3 Mi kecment \u0263er daxel, ur ufint ara l\u01e7e\u021b\u021ba n Sidna \u0190isa ;\n24:4 qqiment wehment. Atnaya \u1e0deh\u1e5ben-asent-id sin yergazen s llebsa ye\u021bfe\u01e7\u01e7i\u01e7en.\n24:5 Ikcem itent lxuf, brant i wallen nsent \u0263er lqa\u025ba ; irgazen-nni nnan-asent : Acu\u0263e\u1e5b te\u021bqellibemt deg u\u1e93ekka win yeddren ?\n24:6 Ulac-it dagi, ye\u1e25ya-d si ger lmegtin. Ur tecfimt ara \u0263ef wayen i wen-d-yenna di tmurt n Jlili ?\n24:7 \u00ab Ilaq Mmi-s n bunadem ad i\u021bwasellem ger ifassen n yemcumen, ad i\u021busemme\u1e5b \u0263ef wumidag, ass wis tlata a d-i\u1e25yu si ger lmegtin. \u00bb\n24:8 D\u0263a mmektant-ed imeslayen n Sidna \u0190isa.\n24:9 F\u0263ent seg u\u1e93ekka iwakken ad ssiw\u1e0dent lexba\u1e5b \u0263ef wayen yed\u1e5ban, i \u1e25dac-nni yinelmaden d wid yellan yid-sen.\n24:10 Llant gar-asent Meryem-nni tamagdalit, Yunna, Meryem yemma-s n Ye\u025bqub akk-d tidak nni\u1e0den yeddan yid-sent ; \u1e25kant kullec i inelmaden.\n24:11 Lame\u025bna ayen i sen-\u1e25kant iban asen-d am tmacahu\u021b, ur tent-uminen ara.\n24:12 D\u0263a Bu\u1e6drus yekker yuzzel \u0263er u\u1e93ekka. Mi gewwe\u1e0d, imuqel \u0263er daxel, iwala anagar lekfen di lqa\u025ba. Yu\u0263al syenna, iwhem deg wayen yed\u1e5ban.\n24:13 Ass-nni, sin inelmaden teddun \u0263er yiwet n taddart isem-is Amawes, taddart-agi teb\u025bed \u0263ef temdint n Lquds azal n snat sswaye\u025b n tikli.\n24:14 ?eddun \u021bmeslayen wway gar-asen \u0263ef wayen akk yed\u1e5ban.\n24:15 Akken llan \u021bmeslayen, Sidna \u0190isa iqe\u1e5b\u1e5beb \u0263u\u1e5b-sen, yedda yid-sen.\n24:16 Lame\u025bna nutni ur t-e\u025bqilen ara.\n24:17 Yenna-yasen : ?ef wacu i te\u021bmeslayem akka deg webrid ? D acu i d yesse\u0263lin fell-awen le\u1e25zen ?\n24:18 Yiwen deg-sen, isem-is Klufas, yenna-yas : E\u025bni anagar ke\u010d\u010d ur ne\u1e93ri ara ayen yed\u1e5ban ussan-agi di temdint n Lquds ?\n24:19 Ne\u021b\u021ba yenna-yasen : D acu yed\u1e5ban akka ? Rran-as : Ayen yed\u1e5ban d \u0190isa ana\u1e63ari nnbi-nni, yes\u025ban tazmert tameqqrant deg wayen ixeddem d wayen i d-iqqa\u1e5b zdat \u1e5aebbi akk-d yemdanen.\n24:20 Lmuqedmin imeqqranen d l\u1e25ekkam-nne\u0263 sellmen-t \u0263er ifassen n i\u1e5bumaniyen, \u1e25ekmen fell-as s lmut, semm\u1e5ben-t \u0263ef wumidag.\n24:21 Nukni ne\u1e0dme\u025b d ne\u021b\u021ba ara isellken wat Is\u1e5bail ; ass-agi d ass wis tlata segmi yed\u1e5ba wannect-a.\n24:22 ?-\u021bide\u021b, kra si tilawin-nne\u0263 swehment-a\u0263 ! Mi \u1e5bu\u1e25ent \u1e63\u1e63be\u1e25 zik \u0263er u\u1e93ekka\n24:23 ur ufint ara l\u01e7e\u021b\u021ba-s. U\u0263alent-ed nnant-a\u0263-ed belli \u1e0deh\u1e5ben asent-ed snat n lmalayekkat i sent id-yennan \u00ab atan yedder. \u00bb\n24:24 Kra seg-ne\u0263 \u1e5bu\u1e25en \u0263er u\u1e93ekka ufan kullec akken i t-id-nnant tilawin nni ; lame\u025bna ne\u021b\u021ba ur t-\u1e93rin ara.\n24:25 D\u0263a Sidna \u0190isa yenna-yasen : A wid i\u0263eflen ! Acimi te\u021b\u025be\u1e6d\u1e6dilem a\u021b-\u021bamnem s wayen i d-nnan lenbiya ?\n24:26 E\u025bni ur ilaq ara ad yen\u025be\u021b\u021bab Lmasi\u1e25 akka uqbel ad yekcem di tmanegt-is ?\n24:27 D\u0263a yessefhem-asen ayen me\u1e5b\u1e5ba yuran fell-as di tira iqedsen ; yebda-d si tektabin n Sidna Musa, armi \u021b-\u021bid n lenbiya me\u1e5b\u1e5ba.\n24:28 Mi q\u1e5bib ad aw\u1e0den \u0263er taddart i \u0263er teddun, Sidna \u0190isa yerra iman-is am akken yeb\u0263a ad ikemmel abrid-is.\n24:29 Lame\u025bna nutni \u1e25ellelen-t nnan-as : Qqim yid-nne\u0263, atan \u021b-\u021bameddit, q\u1e5bib a d-ye\u0263li yi\u1e0d. Sidna \u0190isa ikcem ad yeqqim yid-sen.\n24:30 Mi qqimen \u0263er imensi, yeddem ed a\u0263\u1e5bum, ye\u1e25med \u1e5aebbi, yeb\u1e0da-t, if\u1e5beq-asen-t.\n24:31 D\u0263a ldint-ed wallen nsen, \u025beqlen-t, imiren kan ye\u021bwa\u1e5bfe\u025b gar-asen.\n24:32 Bdan qqa\u1e5ben wway gar-asen : Ur n\u1e25uss ara i kra i\u1e5beqqen deg wulawen-nne\u0263 mi \u0263-d-ihedde\u1e5b deg ubrid yerna yessefham-a\u0263-d ayen yellan di tira iqedsen ?\n24:33 Imiren kan, kkren-d u\u0263alen \u0263er temdint n Lquds. Ufan \u1e25dac-nni inelmaden akk-d imdukkal-nsen nnejma\u025ben.\n24:34 Nnan-asen-d : ?-\u021bide\u021b Sidna \u0190isa i\u1e25ya-d, yesban ed iman-is i Sem\u025bun.\n24:35 Nutni da\u0263en bdan \u1e25ekkun-asen ayen yed\u1e5ban yid-sen deg webrid d wamek i t-\u025beqlen mi sen-if\u1e5beq a\u0263\u1e5bum.\n24:36 Mazal-iten \u021bmeslayen, Sidna \u0190isa s yiman-is ibedd-ed gar-asen. Yenna yasen : Sslam fell-awen.\n24:37 Ikcem-iten akk lxuf, \u0263ilen d lexyal i d-ibedden \u0263u\u1e5b-sen.\n24:38 Ne\u021b\u021ba yenna-yasen : Acu\u0263e\u1e5b i tuggadem ? D acu-t ccekk-agi deg ulawen-nwen ?\n24:39 Walit ifassen-iw akk-d i\u1e0da\u1e5b\u1e5ben iw, d nekk s yiman-iw ! Nnalet-iyi-d, walit ! Lexyal ur yes\u025bi aksum ur yes\u025bi i\u0263san, akken te\u021bwalim s\u025bi\u0263-ten !\n24:40 Mi sen-yenna ayagi, yesken-asen ifassen-is d i\u1e0da\u1e5b\u1e5ben-is.\n24:41 Wehmen, \u010d\u010du\u1e5ben wulawen-nsen d lfe\u1e5b\u1e25 armi ur zmiren ara ad amnen ayen \u021bwalin, d\u0263a yenna-yasen : Yella dagi wayen ara \u010d\u010de\u0263 ?\n24:42 Fkan-as-d aftat n l\u1e25ut ikenfen.\n24:43 Iddem-it-id, ye\u010d\u010da-t zdat-sen.\n24:44 Yenna yasen : Atah wayen i wen-d-nni\u0263 mi lli\u0263 yid-wen : \u00ab ilaq ad yed\u1e5bu wayen akk yuran fell-i di ccari\u025ba n Musa, d lenbiya akk-d ?abur \u00bb.\n24:45 D\u0263a yeldi-yasen le\u025bqel iwakken ad fehmen tira iqedsen,\n24:46 yenna yasen : Atah wayen yuran tira iqedsen: \u00ab ilaq Lmasi\u1e25 ad ye\u025bteb, a d-i\u1e25yu ass wis tlata si ger lmegtin,\n24:47 \u021b\u021buba d le\u025bfu n ddnubat ad \u021bwabecc\u1e5ben s yisem-is i le\u01e7nas me\u1e5b\u1e5ba, a d-bdun si temdint n Lquds \u00bb.\n24:48 Aql-ikkun d inigan-iw.\n24:49 Atan a d-cegg\u025be\u0263 fell-awen wayen i wen yew\u025bed Baba \u1e5aebbi. Qqimet di temdint-agi alamma ters-ed fell-awen tezmert n \u1e5aebbi ara d-yasen seg igenni.\n24:50 Sidna \u0190isa yewwi inelmaden-is armi d le\u01e7wahi n taddart n Bitani. Yerfed ifassen-is, iburek-iten.\n24:51 Di teswi\u025bt-nni yemfa\u1e5baq yid-sen, ye\u021bwarfed \u0263er igenni,\n24:52 ma d nutni \u0263lin \u0263ef tgecrar, \u021b\u1e25emmiden-t ; imiren u\u0263alen \u0263er temdint n Lquds s lfe\u1e5b\u1e25.\n24:53 Yal ass \u021b\u021bilin deg wufrag n l\u01e7ame\u025b iqedsen, \u021b\u1e25emmiden Sidi \u1e5aebbi.","title":"Kabyle Bible (NT): Luke","type":"page"}