{"collection":"Bible & Christianity","html_url":"https://unchartedknowledge.5gfusion.net/browse/bib/wb/kab/mat.htm","path":"bib/wb/kab/mat.htm","source_url":"https://sacred-texts.com/bib/wb/kab/mat.htm","text":"1:1 A ten-an izu\u1e5ban n \u0190isa Lmasi\u1e25 yellan si dderya n Sidna Dawed akk-d Sidna Ib\u1e5bahim :\n1:2 Sidna Ib\u1e5bahim ye\u01e7\u01e7a-d Is\u1e25aq, Is\u1e25aq ye\u01e7\u01e7a-d Ye\u025bqub, Ye\u025bqub ye\u01e7\u01e7a-d Yahuda d watmaten-is.\n1:3 Yahuda akk-d Tama\u1e5b \u01e7\u01e7an-d Fares, akk-d Zira\u1e25 ; Fares ye\u01e7\u01e7a-d \u1e24esrun, \u1e24esrun ye\u01e7\u01e7a-d Aram.\n1:4 Aram ye\u01e7\u01e7a-d \u0190aminadab, \u0190aminadab ye\u01e7\u01e7a-d Na\u1e25sun, Na\u1e25sun ye\u01e7\u01e7a-d Salmun.\n1:5 Salmun d Ra\u1e25ab \u01e7\u01e7an-d Bu\u025baz, Bu\u025baz akk-d Rut s\u025ban-d \u0190ubed, \u0190ubed ye\u01e7\u01e7a-d Yassa.\n1:6 Yassa ye\u01e7\u01e7a-d Sidna Dawed, Sidna Dawed yu\u0263al d agellid, ye\u01e7\u01e7a-d \u0263er tme\u1e6d\u1e6dut n Urya\u1e25 Sidna Sliman.\n1:7 Sidna Sliman ye\u01e7\u01e7a-d Ra\u1e25ab\u025bam, Ra\u1e25ab\u025bam ye\u01e7\u01e7a-d Abiya, Abiya ye\u01e7\u01e7a-d Asaf,\n1:8 Asaf ye\u01e7\u01e7a-d Yehucafat ; Yehucafat ye\u01e7\u01e7a-d Yihuram ; Yihuram ye\u01e7\u01e7a-d \u0190uzya ;\n1:9 \u0190uzya ye\u01e7\u01e7a-d Yu\u1e6dam ; Yu\u1e6dam ye\u01e7\u01e7a-d A\u1e25az ; A\u1e25az ye\u01e7\u01e7a-d \u1e24izeqya ;\n1:10 \u1e24izeqya ye\u01e7\u01e7a-d Mennac ; Mennac ye\u01e7\u01e7a-d \u0190amun ; \u0190amun ye\u01e7\u01e7a-d Yuciya ;\n1:11 Yuciya ye\u01e7\u01e7a-d Yixunya akk-d watmaten-is, di lweqt i deg iqaldiyen wwin at Is\u1e5bail d ime\u1e25bas \u0263er tmurt n Babilun.\n1:12 Mbe\u025bd lweqt n usgi\u01e7\u01e7i \u0263er tmurtn Babilun, Yixunya ye\u01e7\u01e7a-d Calatyel ; Calatyel ye\u01e7\u01e7a-d Zurubabil .\n1:13 Zurubabil ye\u01e7\u01e7a-d Abihud. Abihud ye\u01e7\u01e7a-d Ilyaqim ; Ilyaqim ye\u01e7\u01e7a-d \u0190azu\u1e5b ;\n1:14 \u0190azu\u1e5b ye\u01e7\u01e7a-d Saduq ; Saduq ye\u01e7\u01e7a-d Yaxin ; Yaxin ye\u01e7\u01e7a-d Ilihud.\n1:15 Ilhud ye\u01e7\u01e7a-d Il\u025baza\u1e5b ; Il\u025baza\u1e5b ye\u01e7\u01e7a-d Mattan ; Mattan ye\u01e7\u01e7a-d Ye\u025bqub.\n1:16 Ye\u025bqub ye\u01e7\u01e7a-d Yusef, d Yusef agi i d argaz n Meryem i d-ye\u01e7\u01e7an Sidna \u0190isa i ge\u021b\u021busemman Lmasi\u1e25.\n1:17 Si lweqt n Sidna Ib\u1e5bahim armi d lweqt n Sidna Dawed, \u025beddan \u1e5bbe\u025b\u1e6dac n le\u01e7yal. \u0190eddan da\u0263en \u1e5bbe\u025b\u1e6dac n le\u01e7yal si lweqt n Sidna Dawed armi d lweqt n usgi\u01e7\u01e7i \u0263er tmurt n Babilun. Si lweqt-agi n usgi\u01e7\u01e7i armi d lweqt n Lmasi\u1e25 \u025beddan da\u0263en \u1e5bbe\u025b\u1e6dac n le\u01e7yal.\n1:18 Atan wamek i d-ilul Sidna \u0190isa : yemma-s Meryem tella te\u021bwax\u1e0deb i yiwen wergaz i\u021b\u021busemman Yusef. S tezmert n \u1e5a\u1e5bu\u1e25 iqedsen, terfed s tadist uqbel a\u021b-\u021beddu \u021b-\u021bislit.\n1:19 Yusef ax\u1e0dib-is, yellan d argaz n \u1e63\u1e63wab, ur yeb\u0263i ara a \u021b-\u021bicemmet, d\u0263a yeqsed ad imsef\u1e5baq yid-es s tuffra.\n1:20 Akken ye\u021bxemmim i waya, yers-ed \u0263u\u1e5b-es lmelk n \u1e5aebbi di targit yenna-yas : A Yusef ! A mmi-s n Dawed ! Ur \u021b\u021baggad ara a\u021b-\u021bes\u025bu\u1e0d Meryem \u021b-\u021bame\u1e6d\u1e6dut-ik, axa\u1e6der llufan yellan di t\u025bebbu\u1e6d-is, yusa-yas-d s \u1e5a\u1e5bu\u1e25 iqedsen.\n1:21 A d-tes\u025bu aqcic, a s-tsemmi\u1e0d \u0190isa, axa\u1e6der d ne\u021b\u021ba ara iselken lumma-s si ddnubat-nsen.\n1:22 Ayagi akk yed\u1e5ba iwakken ad i\u021bwakemmel wayen i d-yenna Sidi \u1e5aebbi seg imi n nnbi Ice\u025bya :\n1:23 A\u021ban t\u025bezrit a\u021b-\u021berfed tadist, a d-tes\u025bu aqcic ad i\u021b\u021busemmi Imanuwil ye\u025bni :\u00ab \u1e5aebbi yid-nne\u0263.\u00bb\n1:24 Mi i d-yuki Yusef, ixdem ayen i s-d-yenna lmelk n Sidi \u1e5aebbi, yeqbel Meryem a\u021b-\u021bili \u021b-\u021bame\u1e6d\u1e6dut-is ; yewwi-\u021b-id \u0263er wexxam-is.\n1:25 Me\u025bna ur \u021b-innul ara armi i d-tes\u025ba mmi-s iwumi isemma \u0190isa.\n2:1 Sidna \u0190isa ilul di taddart n Bitel\u1e25em, di tmurt n Yahuda di lweqt n ugellid Hi\u1e5budus ameqqran, kra n imusnawen usan-d si cce\u1e5bq \u0263er temdint n Lquds, iwakken ad steqsin :\n2:2 anda ilul llufan-nni ara yilin d agellid n wat Is\u1e5bail ? Axa\u1e6der nwala-d itri-ines si cce\u1e5bq, nusa-d a t-ne\u025bbed.\n2:3 Agellid Hi\u1e5budus akk-d imezda\u0263 n temdint n Lquds me\u1e5b\u1e5ba dehcen, yerwi lxa\u1e6der-nsen mi slan s lexba\u1e5b-agi.\n2:4 Hi\u1e5budus yesnejma\u025b-ed akk lmuqedmin d l\u025bulama n wegdud, isteqsa-ten \u0263ef wemkan anda ara d-ilal Lmasi\u1e25 ara d-yasen.\n2:5 Nnan-as : Ahat di tmurt n Yahuda di taddart n Bitel\u1e25em ! Axa\u1e6der atan wayen i gura nnbi Mixa :\n2:6 I kemm a taddart n Bitel\u1e25em, ur telli\u1e0d ara \u021b-\u021baneggarut ger temdinin n Yahuda, axa\u1e6der seg-em ara d-iffe\u0263 ugellid ara yeksen at Is\u1e5bail agdud-iw.\n2:7 Hi\u1e5budus yessawel i imusnawen nni s tuffra, isteqsa-ten si melmi i walan itri-nni.\n2:8 D\u0263a icegge\u025b-iten \u0263er Bitel\u1e25em, yenna-yasen : Nadit lexba\u1e5b n \u1e63\u1e63e\u1e25 \u0263ef weqcic-agi, m'ara t-tafem, init-iyi-d iwakken ad \u1e5bu\u1e25e\u0263 ula d nekk a t-\u025babde\u0263.\n2:9 Mi slan i ugellid, \u1e5bu\u1e25en. AAkken kan i ff\u0263en, walan itri-nni i \u1e93ran di cce\u1e5bq yezwar, iteddu zdat-sen. MMi gewwe\u1e0d sennig wemkan anda yella weqcic-nni, ye\u1e25bes.\n2:10 Fe\u1e5b\u1e25en a\u1e6das mi walan itri-nni.\n2:11 Kecmen \u0263er wexxam-nni, walan llufan akk-d yemma-s Meryem ; t\u025be\u01e7ben s weqcic-nni d\u0263a se\u01e7\u01e7den zdat-es. FFsin tiyemmusin-nsen, fkan-as tirezfin : ddheb, lebxu\u1e5b akk-d le\u025b\u1e6de\u1e5b \u0263layen.\n2:12 Sidi \u1e5aebbi ixebbe\u1e5b-iten-id di targit ur \u021b\u021bu\u0263alen ara \u0263er Hi\u1e5budus, d\u0263a u\u0263alen \u0263er tmurt-nsen seg ubrid nni\u1e0den.\n2:13 Mi \u1e5bu\u1e25en, lmelk n Sidi \u1e5aebbi idhe\u1e5b-as-ed i Yusef di targit, yenna-yas-ed :-- Kker, ddem aqcic akk-d yemma-s, rewlet \u0263er tmurt n Ma\u1e63e\u1e5b, qqimet dinna alamma nni\u0263-ak-ed a d-tu\u0263ale\u1e0d, axa\u1e6der Hi\u1e5budus ad iqelleb \u0263ef weqcic-agi iwakken a t-ine\u0263.\n2:14 Yusef ikker yewwi aqcic-nni akk-d yemma-s deg i\u1e0d, yerwel \u0263er tmurt n Ma\u1e63e\u1e5b.\n2:15 Yeqqim dinna armi yemmut Hi\u1e5budus, iwakken ad id\u1e5bu wayen i d-yenna Sidi \u1e5aebbi seg imi n nnbi Huce\u025b : Ssawle\u0263-as i Mmi a d-iffe\u0263 si tmurt n Ma\u1e63er.\n2:16 Mi gwala Hi\u1e5budus belli kelxen-t imusnawen-nni, ikcem-it zz\u025baf d ameqqran, icegge\u025b \u0263er taddart n Bitel\u1e25em akk-d \u021b-\u021bmura i s-d-izzin, ad n\u0263en arrac me\u1e5b\u1e5ba yes\u025ban si sin iseggasen d akessar, s wakken yella le\u1e25sab i s-d-fkan imusnawen-nni.\n2:17 D\u0263a ye\u021bwakemmel wayen i d yenna nnbi Irmiya :\n2:18 Yekker le\u025bya\u1e0d di taddart n Rama, nesla i ime\u1e6d\u1e6dawen d ume\u01e7\u01e7ed, d \u1e5aa\u1e25il i ge\u021brun \u0263ef warraw-is, tegguma a\u021b-\u021besbe\u1e5b fell-asen, axa\u1e6der mmuten.\n2:19 Mi gemmut Hi\u1e5budus ameqqran, lmelk n Sidi \u1e5aebbi iwe\u1e25\u1e25a-d i Yusef di targit mi gella di tmurt n Ma\u1e63er,\n2:20 yenna-yas : Kker, ddem aqcic d yemma-s tu\u0263ale\u1e0d \u0263er tmurt n wat Is\u1e5bail, axa\u1e6der wid yeb\u0263an ad n\u0263en aqcic-nni, mmuten.\n2:21 Yusef iddem aqcic-nni d yemma-s, yu\u0263al \u0263er tmurt n wat Is\u1e5bail\n2:22 Me\u025bna mi gesla belli d A\u1e5bxilyus mmi-s n Hi\u1e5budus, i gellan d agellid \u0263ef tmurt n Yahuda, yuggad. SSidi \u1e5aebbi i\u025beggen-as-ed di targit, i\u1e5bu\u1e25 \u0263er tmurt n Jlili,\n2:23 izde\u0263 deg yiwet n taddart i\u021b\u021busemman Na\u1e63aret, iwakken ad yed\u1e5bu wayen i d-nnan lenbiya : Ad i\u021b\u021busemmi Ana\u1e63ari.\n3:1 Deg wussan-nni, iban-ed Ye\u1e25ya a\u0263e\u1e6d\u1e6das, ye\u021bbecci\u1e5b deg unez\u1e5buf n tmurt n Yahuda,\n3:2 iqqa\u1e5b-ed : Tubet, beddlet tikli, axa\u1e6der tagelda n igenwan tqe\u1e5b\u1e5beb-ed.\n3:3 Fell-as i d-immeslay nnbi Ice\u025bya mi d-yenna : \u021a-\u021ba\u0263ect n win i\u021b\u025beggi\u1e0den di lxali : Heggit abrid n Sidi \u1e5aebbi, ssemsawit iberdan-is.\n3:4 Ye\u1e25ya yelsa llebsa ye\u021bwaxedmen s cc\u025be\u1e5b n wel\u0263em, tabagust n weglim \u0263ef wammas-is, tam\u025bict-is d ib\u1e93a\u1e93 akk-d tament n lexla.\n3:5 Imezda\u0263 me\u1e5b\u1e5ba n temdint n Lquds, tamurt n Yahuda akk-d tmura i d-yezzin i wasif n Urdun, \u021b\u021basen-d \u0263u\u1e5b-es\n3:6 iwakken a d-qi\u1e5b\u1e5ben s ddnubat nsen, ne\u021b\u021ba yesse\u0263\u1e0das-iten deg wasif nni n Urdun.\n3:7 Mi gwala a\u1e6das n at ifariziyen d isaduqiyen i d-i\u021basen ad \u021bwa\u0263e\u1e0dsen, yenna-yasen : A ccetla n izerman, anwa i kkun isfaqen belli tzemrem a\u021b-\u021brewlem i l\u1e25isab i d-iteddun ?\n3:8 Sbeggnet-ed s lec\u0263al-nwen belli tettubem, tbeddlem tikli.\n3:9 Ur qqa\u1e5bet ara i yiman-nwen : \u00ab Sidna Ib\u1e5bahim d jeddi-tne\u0263 \u00bb ! Axa\u1e6der, a wen-ini\u0263 : SSidi \u1e5aebbi yezmer a d-yefk dderya i Ib\u1e5bahim seg id\u0263a\u0263en-agi.\n3:10 A\u021ban ihi tcaqu\u1e5bt thegga \u0263er izu\u1e5ban n ttju\u1e5b, yal ttej\u1e5ba ur d-ne\u021b\u021bak ara lfakya l\u025bali, a\u021b-\u021be\u021bwagzem, a\u021b-\u021be\u021bwa\u1e0degge\u1e5b \u0263er tmes.\n3:11 Nekk sse\u0263\u1e0dase\u0263-kkun deg waman iwakken a\u021b-\u021betubem, lame\u025bna a d-yas yiwen yes\u025ban tazmert akte\u1e5b-iw, ur uklale\u0263 ara a s-fsi\u0263 ula d arkasen is. Ne\u021b\u021ba a kkun-yesse\u0263\u1e0des s \u1e5a\u1e5bu\u1e25 iqedsen \u021b-\u021bmes.\n3:12 Tazzert deg ufus-is, ad yebrez annar-is, ad ijme\u025b irden-is \u0263er ikuffan, ma d alim a t-yesse\u1e5b\u0263 di tmes ur nxe\u021b\u021bi.\n3:13 Sidna \u0190isa yusa-d si tmurt n Jlili \u0263er wasif n Urdun iwakken a t- yesse\u0263\u1e0des Ye\u1e25ya.\n3:14 Ye\u1e25ya yugi, yenna-yas : D nekk i ge\u1e25wa\u01e7en ad iyi- tes\u0263e\u1e0dse\u1e0d, ke\u010d\u010d tusi\u1e0d-ed \u0263u\u1e5b-i iwakken a k-s\u0263e\u1e0dse\u0263 !\n3:15 Sidna \u0190isa yerra-yas : Anef tura ! Akkagi i glaq a nexdem leb\u0263i n Sidi \u1e5aebbi ! DD\u0263a Ye\u1e25ya yunef-as.\n3:16 Mi ge\u021bwa\u0263\u1e0des Sidna \u0190isa, yeffe\u0263-ed seg waman ; imiren kan ldin igenwan, yers-ed fell-as \u1e5a\u1e5bu\u1e25 n Sidi \u1e5aebbi s \u1e63\u1e63ifa n tetbirt.\n3:17 Tekka-d yiwet n ta\u0263ect seg igenwan, tenna-d : \u00ab` Wagi d Mmi ame\u025bzuz, deg-s i gella lfe\u1e5b\u1e25-iw ! \u00bb\n4:1 Imiren \u1e5a\u1e5bu\u1e25 iqedsen yewwi Sidna \u0190isa \u0263er unez\u1e5buf iwakken a t-ije\u1e5b\u1e5beb Cci\u1e6dan.\n4:2 Mi gu\u1e93am \u1e5beb\u025bin wussan d \u1e5beb\u025bin wu\u1e0dan, yu\u0263al yellu\u1e93.\n4:3 Iqe\u1e5b\u1e5beb \u0263u\u1e5b-es Yeblis yenna-yas : Ma d Mmi-s n \u1e5aebbi i telli\u1e0d, ini-yasen i yed\u0263a\u0263en-agi ad u\u0263alen d a\u0263\u1e5bum.\n4:4 Sidna \u0190isa yerra-yas : Yura di tira iqedsen : Ma\u010d\u010di s we\u0263\u1e5bum kan ara i\u025bic wemdan, lame\u025bna s mkul awal i d-i\u021basen s \u0263u\u1e5b Sidi \u1e5aebbi.\n4:5 Cci\u1e6dan yewwi-t \u0263er temdint n Lquds issers-it \u0263ef yixef n l\u01e7ame\u025b iqedsen,\n4:6 yenna-yas : Ma d Mmi-s n \u1e5aebbi i telli\u1e0d, \u1e0degge\u1e5b iman-ik d akessar, ana\u0263 yura : Sidi \u1e5aebbi ad yefk lame\u1e5b i lmalayekkat-is fell-ak, aa k-awint ger ifassen-nsent iwakken ad \u1e25adrent a\u1e0dar-ik \u0263ef yed\u0263a\u0263e n .\n4:7 Sidna \u0190isa yerra-yas : Yura da\u0263en : Ur te\u021bje\u1e5b\u1e5bibe\u1e0d ara Sidi \u1e5aebbi IIllu-inek .\n4:8 Cci\u1e6dan yewwi-t da\u0263en \u0263ef wedrar \u025blayen, isken-as-ed tigeldiwin me\u1e5b\u1e5ba n ddunit d l\u025ba\u1e0dima-nsent, yenna-yas :\n4:9 A k-tent-fke\u0263 me\u1e5b\u1e5ba ma yella tse\u01e7\u01e7de\u1e0d zdat-i a yi-t\u025bebde\u1e0d.\n4:10 Sidna \u0190isa yenna-yas : Be\u025b\u025bed akkin fell-i a Cci\u1e6dan, axa\u1e6der yura : Anagar Sidi \u1e5aebbi-inek ara t\u025bebde\u1e0d , i ne\u021b\u021ba kan iwumi ara tse\u01e7de\u1e0d .\n4:11 D\u0263a Cci\u1e6dan i\u1e6d\u1e6daxe\u1e5b fell-as. Imiren usant-ed lmalayekkat \u0263u\u1e5b-es, iwakken a s-qedcent.\n4:12 Mi gesla s Ye\u1e25ya ye\u021bwa\u1e25bes, Sidna \u0190isa yu\u0263al \u0263er tmurt n Jlili.\n4:13 Iffe\u0263 si taddart n Na\u1e63aret, i\u1e5bu\u1e25 ad izde\u0263 di Kaferna\u1e25um ; \u021b-\u021bamdint yyellan rrif n leb\u1e25e\u1e5b di le\u01e7wahi n tmura n Zabulun d Nef\u1e6dali,\n4:14 iwakken ad yed\u1e5bu wayen yenna nnbi Ice\u025bya :\n4:15 A tamurt n Zabulun akk-d Nef\u1e6dali, a timura iqe\u1e5bben leb\u1e25e\u1e5b akkin i wasif n Urdun , a tamurt n Jlili i deg zed\u0263en le\u01e7nas ur nelli ara n wat Is\u1e5bail,\n4:16 agdud-nni yezgan di \u1e6d\u1e6dlam, iwala tafat tameqqrant, wid ized\u0263en di \u1e6d\u1e6dlam n lmut, tce\u1e5bq-ed fell-asen tafat !\n4:17 Seg imiren, Sidna \u0190isa yebda ye\u021bbecci\u1e5b yeqqa\u1e5b : Tubet, u\u0263alet-ed \u0263er webrid, axa\u1e6der tagelda n igenwan tqe\u1e5b\u1e5beb-ed.\n4:18 Mi g\u021beddu Sidna \u0190isa \u0263ef rrif n leb\u1e25e\u1e5b n Jlili, iwala sin i\u1e25ewwaten : SSem\u025bun i\u021b\u021busemman Bu\u1e6drus akk-d gma-s Andriyus. Llan \u1e6deggi\u1e5ben icebbaken-nsen \u0263er leb\u1e25e\u1e5b, \u021b\u1e63eggi\u1e0den.\n4:19 Yenna-yasen : Ddut-ed yid-i, a kkun-rre\u0263 d i\u1e63egga\u1e0den n yemdanen.\n4:20 D\u0263a imiren kan, \u01e7\u01e7an icebbaken nsen, ddan yid-es.\n4:21 Mi gerna yel\u1e25a kra, iwala sin watmaten nni\u1e0den : Ye\u025bqub d Yu\u1e25enna yellan d arraw n Zabadi. LLlan akk-d baba-tsen di teflukt, \u021bxi\u1e0din icebbaken-nsen.\n4:22 Yessawel-asen, imiren kan \u01e7\u01e7an dinna baba-tsen, taflukt-nni, \u1e5bu\u1e25en ddan yid-es.\n4:23 Syenna, Sidna \u0190isa yekka-d tamurt n Jlili me\u1e5b\u1e5ba, yesselmad di le\u01e7wame\u025b n wat Is\u1e5bail, ye\u021bbecci\u1e5b lexba\u1e5b n lxi\u1e5b n tgeldit n \u1e5aebbi, isse\u1e25lay yal a\u1e6dan d yal le\u025byubat n l\u0263aci.\n4:24 Slan yis ula di tmurt n Surya me\u1e5b\u1e5ba ; \u021b\u021bawin-as-ed imu\u1e0dan i ghelken si mkul a\u1e6dan : wid i\u021bwamelken, wid iwumi ye\u021b\u1e5bu\u1e25u le\u025bqel akk-d wukrifen. Sidna \u0190isa isse\u1e25la-ten akk.\n4:25 D izumal n l\u0263aci i t-id-iteb\u025ben si tmurt n Jlili, si \u025bec\u1e5ba n temdinin-nni, si temdint n Lquds, si tmurt n Yahuda akk-d le\u01e7wahi yellan agemma\u1e0d i wasif n Urdun.\n5:1 Mi gwala annect-nni n l\u0263aci, Sidna \u0190isa yuli \u0263er wedrar iqqim. Inelmaden-is qe\u1e5b\u1e5bben \u0263u\u1e5b-es,\n5:2 d\u0263a ibda isselmad-iten :\n5:3 D ise\u025bdiyen wid i\u021beddun s neyya, aaxa\u1e6der tagelda n igenwan d ayla-nsen !\n5:4 D ise\u025bdiyen wid i\u021brun, axa\u1e6der ad \u021bwa\u1e63ebb\u1e5ben !\n5:5 D ise\u025bdiyen wid \u1e25ninen, aaxa\u1e6der ad we\u1e5bten tamurt i sen-iw\u025bed Sidi \u1e5aebbi !\n5:6 D ise\u025bdiyen wid illu\u1e93en, iffuden l\u1e25eqq, axa\u1e6der ad \u1e5bwun !\n5:7 D ise\u025bdiyen wid yes\u025ban \u1e5b\u1e5be\u1e25ma deg wulawen-nsen, aaxa\u1e6der ad i\u1e25unn fell-asen Sidi \u1e5aebbi !\n5:8 D ise\u025bdiyen wid iwumi ye\u1e63fa wul, axa\u1e6der ad walin Sidi \u1e5aebbi !\n5:9 D ise\u025bdiyen wid i d-isrusun talwit, aad \u021b\u021busemmin d arraw n Sidi \u1e5aebbi !\n5:10 D ise\u025bdiyen wid i\u021b\u021buqeh\u1e5ben \u0263ef l\u1e25eqq, aaxa\u1e6der ddewla igenwan d ayla-nsen !\n5:11 D ise\u025bdiyen ara tilim, m'ara kkun-regmen, mm'ara te\u021bwaqeh\u1e5bem, m'ara xedmen deg-wen lba\u1e6del \u0263ef ddemma-w.\n5:12 Fe\u1e5b\u1e25et, ilit di lfe\u1e5b\u1e25, axa\u1e6der \u1e5b\u1e5bezq-nwen d ameqqran deg igenwan, aakka i \u021bwaqeh\u1e5ben lenbiya i kkun-id izwaren.\n5:13 D kunwi i d lmel\u1e25 n ddunit, lame\u025bna ma t\u1e5bu\u1e25-as lbenna i lmel\u1e25, s wacu ara s-\u021b-id-nerr ? Yelha kan ma n\u1e0degge\u1e5b-it \u0263er be\u1e5b\u1e5ba a t-rekk\u1e0den yemdanen.\n5:14 D kunwi i \u021b-\u021bafat n ddunit ; taddart yellan \u0263ef wudrar ulamek ara teffer !\n5:15 Akken da\u0263en, ur nce\u025b\u025bel ara taftilt iwakken a \u021b-n\u0263umm s kra, me\u025bna a \u021b-nessers \u0263ef lme\u1e63be\u1e25, iwakken a\u021b-\u021bfe\u01e7\u01e7e\u01e7 i wid akk yellan deg wexxam.\n5:16 Akka i glaq a\u021b-\u021becce\u025bce\u025b tafat-nwen zdat yemdanen, iwakken ad walin lec\u0263al-nwen ilhan, yerna ad \u1e25emden Baba-twen yellan deg igenwan.\n5:17 \u0194u\u1e5b-wat a\u021b-\u021b\u0263ilem usi\u0263-ed ad sse\u0263li\u0263 ayen i d-tenna ccari\u025ba d wayen i d-nnan lenbiya ! Ur d-usi\u0263 ara ad sse\u0263li\u0263, lame\u025bna usi\u0263-ed ad snekmale\u0263.\n5:18 A wen-ini\u0263 tide\u021b : skud mazal igenwan d lqa\u025ba, ula d yiwen wawal ne\u0263 usekkil n ccari\u025ba ur ime\u1e25\u1e25u, alamma yed\u1e5ba wayen akk yuran deg-s.\n5:19 Win ur nqude\u1e5b ara ula d yiwen n lame\u1e5b amec\u1e6du\u1e25 n ccari\u025ba, yerna isselmad i wiya\u1e0d ad xedmen am ne\u021b\u021ba, ad i\u021bwa\u1e25seb d amec\u1e6du\u1e25 akk di tgelda n igenwan. MMa d win ixeddmen ayen i d-tenna ccari\u025ba, yerna isselmad i wiya\u1e0d ad xedmen akken, ad yili d ameqqran di tgelda n igenwan.\n5:20 Axa\u1e6der a wen-ini\u0263, ma yella ur tu\u0263em ara awal i Sidi \u1e5aebbi akte\u1e5b n wakken te\u021b\u021ba\u0263em awal i yimusnawen n ccari\u025ba d ifariziyen, ur tke\u010d\u010dmem ara tagelda n igenwan.\n5:21 Teslam da\u0263en s leqwanen i d- i\u021b\u021bunefken i lejdud-nne\u0263 : Ur tneqqe\u1e0d ara tamge\u1e5bt, WWin ara yen\u0263en tamge\u1e5b\u1e6d, ad i\u025beddi di cc\u1e5be\u025b, ad i\u021bwa\u1e25kem fell-as.\n5:22 Ma d nekk a wen-ini\u0263 : kra n win ara ize\u025bfen \u0263ef gma-s, ad i\u025beddi di cc\u1e5be\u025b. Win ara yinin i gma-s : \u00ab ay abuhal, \u00bb ad ibedd zdat wesqamu n ccra\u025b. Win ara yinin i gma-s : \u00ab ay amehbul, \u00bb yuklal ad ikcem \u0263er \u01e7ahennama.\n5:23 M'ara t\u021beddu\u1e0d a\u021b-\u021befke\u1e0d lwe\u025bda i Sidi \u1e5aebbi, temmekta\u1e0d-ed zdat n wemkan n iseflawen belli gma-k i\u1e6d\u1e6def-ak cce\u1e25na,\n5:24 e\u01e7\u01e7 dinna lwe\u025bda-nni, t\u1e5bu\u1e25e\u1e0d uqbel a\u021b-\u1e0delbe\u1e0d ssma\u1e25 i gma-k, d wamek ara tefke\u1e0d lwe\u025bda-k i Sidi \u1e5aebbi.\n5:25 Ma yella i\u1e0dlem-ik yiwen, tedduklem di sin \u0263er wexxam n cc\u1e5be\u025b, \u0263iwel msefham ke\u010d\u010d yid-es deg ubrid, m'ulac ax\u1e63im-ik a k-yawi \u0263er l\u1e25akem, l\u1e25akem a k-yefk i w\u025bessas, a\u025bessas-nni, a k-yerr \u0263er l\u1e25ebs.\n5:26 A k-ini\u0263 tide\u021b : ur d-\u021beff\u0263e\u1e0d ara syenna alamma txell\u1e63e\u1e0d a\u1e63urdi aneggaru n \u1e6d\u1e6dlaba-inek.\n5:27 Teslam belli qqa\u1e5ben-d : ur xeddem ara asekkak ye\u025bni zzna.\n5:28 Lame\u025bna, nekkini a wen-d-ini\u0263 : win ara imuqlen tame\u1e6d\u1e6dut, imenna deg ul-is ad iznu yid-es, atan am akken izna yid-es.\n5:29 Daymi ma yella \u021b-\u021bi\u1e6d-ik tayeffust i k-i\u021bawin \u0263er le\u1e25\u1e5bam, qle\u025b-i\u021b, \u1e0degge\u1e5b-i\u021b akkin fell-ak. Axa\u1e6der axi\u1e5b-ak a k-i\u1e5bu\u1e25 yiwen si lemfa\u1e63el-ik wala a\u021b-\u021bkecme\u1e0d s lekmal-ik \u0263er \u01e7ahennama.\n5:30 Ma yella s ufus-ik ayeffus i txeddme\u1e0d le\u1e25\u1e5bam, gzem-it, t\u1e0deg\u1e5be\u1e0d-t akkin fell-ak, axi\u1e5b-ak a k-ixa\u1e63 ufus wala ma tkecme\u1e0d s lekmal-ik \u0263er \u01e7ahennama.\n5:31 Qqa\u1e5ben-d da\u0263en : Win ara yebrun i tme\u1e6d\u1e6dut-is, a s-yefk lka\u0263e\u1e0d n berru .\n5:32 Lame\u025bna nekkini a wen-ini\u0263 : win ara yebrun i tme\u1e6d\u1e6dut-is, yili ur tezni ara, d ne\u021b\u021ba i \u021b-iwelhen \u0263er zzna ma tezwe\u01e7 d waye\u1e0d. Da\u0263en win yu\u0263en tame\u1e6d\u1e6dut innebran, ula d ne\u021b\u021ba yezna.\n5:33 Teslam da\u0263en s wayen i d-nnan i lejdud-nne\u0263 : Ur \u1e25ennet ara, lame\u025bna ayen i t\u025buhde\u1e0d s limin zdat Sidi \u1e5aebbi, ilaq a t-txedme\u1e0d.\n5:34 Me\u025bna nekk a wen-ini\u0263 : ur \u021bgallat ara ma\u1e0di ! Ur \u021bgallat s igenni, axa\u1e6der d amkan n l\u1e25ekma n Sidi \u1e5aebbi,\n5:35 ur \u021bgallat s lqa\u025ba axa\u1e6der fell-as i gesrusu i\u1e0da\u1e5b\u1e5ben-is, ne\u0263 s Lquds imi \u021b-\u021bamdint n ugellid ameqqran.\n5:36 Ur \u021bgallat ara da\u0263en : \u00ab s yixef n uqe\u1e5b\u1e5buy-nwen \u00bb axa\u1e6der ur tezmirem ara a\u021b-\u021berrem ula d yiwen wen\u1e93ad d aberkan ne\u0263 d amellal.\n5:37 Init \u00ab ih \u00bb ma ilaq a\u021b-\u021binim ih, ne\u0263 \u00ab xa\u1e6di \u00bb ma ilaq a\u021b-\u021binim xa\u1e6di ; ayen akk ara ternum d zzyada, s \u0263u\u1e5b Cci\u1e6dan i d-i\u021bas.\n5:38 Teslam s wayen i d-qqa\u1e5ben : Ti\u1e6d s ti\u1e6d, tu\u0263mest s tu\u0263mest.\n5:39 Me\u025bna nekk a wen-ini\u0263 : ma yella win i wen-ixedmen cce\u1e5b ur \u021b\u021barat ara \u021b\u021ba\u1e5b. Ma iwwet-ik yiwen \u0263er l\u1e25enk ayeffus, sken-as l\u1e25enk nni\u1e0den.\n5:40 Ma yeb\u0263a yiwen a k-isiwe\u1e0d \u0263er cc\u1e5be\u025b iwakken a k-ikkes aqendu\u1e5b-ik, rnu-yas ula d abe\u1e5bnus-ik.\n5:41 Ma yella i\u1e25\u1e5bes-ik waleb\u025ba\u1e0d a s-tbibbe\u1e0d ta\u025bkumt azgen webrid-is, ke\u010d\u010d awi-yas-\u021b armi d axxam.\n5:42 Efk-as ayen ye\u1e25wa\u01e7 i win i k-d-issutren, ur reggel ara \u0263ef win ib\u0263an ad yer\u1e0del s \u0263u\u1e5b-ek.\n5:43 Teslam i wayen i d-qqa\u1e5ben : \u1e24emmel amdakkel-ik, tke\u1e5bhe\u1e0d a\u025bdaw ik.\n5:44 Nekk a wen-ini\u0263 : \u1e25emmlet i\u025bdawen-nwen i kkun i\u021bqehhi\u1e5ben. BBarket wid i kkun-ine\u025blen, xedmet lxi\u1e5b i wid i kkun-ike\u1e5bhen, d\u025but s lxi\u1e5b i wid i kkun-i\u1e0delmen, akk-d wid i kkun-i\u021bqehhi\u1e5ben.\n5:45 S wakka ara d-tbanem d arraw n Baba-twen yellan deg igenwan, axa\u1e6der ne\u021b\u021ba ic\u1e5beq-ed i\u1e6dij-is ama \u0263ef wid yelhan ama \u0263ef yemcumen, ye\u021b\u021bak-ed ageffur ( lehwa ) ama i wid ixeddmen lxi\u1e5b, ama i wid ixeddmen cce\u1e5b.\n5:46 Ma yella t\u1e25emmlem kan wid i kkun-i\u1e25emmlen, d acu n lfayda ara tes\u025bum ? Ula d imekkasen n tebzert ( le\u0263\u1e5bama ) xeddmen akenni.\n5:47 Ma yella te\u021b\u021bemsalamem d watmaten-nwen kan, d acu n lxi\u1e5b i txedmem ? Ula d imednuben xeddmen akken.\n5:48 Sfut ihi akken ye\u1e63fa Baba-twen n igenwan.\n6:1 Ayen txeddmem i Sidi \u1e5aebbi, ur t-id-sbegginet ara iwakken a kkun-walin medden, m'ulac ur tse\u025b\u025bum ara lfayda \u0263er Baba-twen yellan deg igenwan.\n6:2 M'ara tseddqe\u1e0d, ur \u021bberri\u1e25 ara am akken xeddmen at sin wudmawen di le\u01e7wame\u025b ne\u0263 deg iberdan, iwakken ad s\u025bun ccan \u0263er yemdanen. A wen ini\u0263 tide\u021b : d ayagi kan i d lfayda-nsen.\n6:3 Ma d ke\u010d\u010d m'ara tseddqe\u1e0d, ilaq afus-ik ayeffus ur i\u021bwali ara wayen ixeddem ufus-ik azelma\u1e0d ;\n6:4 iwakken ssadaqa-inek a\u021b-\u021beqqim di sser, akka ara te\u021bwaqeble\u1e0d \u0263er Baba \u1e5aebbi ye\u021bwalin ayen txeddme\u1e0d di sser.\n6:5 M'ara te\u021b\u1e93allam, ur xeddmet ara am at sin wudmawen i\u1e25emmlen ad \u1e93allen s ibeddi di le\u01e7wame\u025b ne\u0263 deg iberdan iwakken a ten-walin medden. AA wen-ini\u0263 tide\u021b : d ayagi kan i d lfayda-nsen.\n6:6 Ma d ke\u010d\u010d m'ara teb\u0263u\u1e0d a\u021b-\u021b\u1e93alle\u1e0d, \u1e5bu\u1e25 ekcem \u0263er texxamt-ik, sekke\u1e5b tawwurt, ted\u025bu\u1e0d di sser \u0263er Baba \u1e5aebbi, ne\u021b\u021ba ye\u021bwalin ayen yellan di sser, a k-id-iqbel.\n6:7 M'ara te\u021b\u1e93allam, ur s\u1e6duqqutet ara lehdu\u1e5b am akken xeddmen at ddunit, \u0263ilen s lket\u1e5ba n imeslayen ara d \u021bwaqeblen.\n6:8 Ur ten-\u021b\u025banadet ara, axa\u1e6der Baba \u1e5aebbi ye\u1e93ra d acu te\u1e25wa\u01e7em uqbel a s-t-tessutrem.\n6:9 Atah wamek ilaq a\u021b-\u021be\u021b\u1e93allam : AA Baba-tne\u0263 yellan deg igenwan, iisem-ik ad i\u021bwaqeddes,\n6:10 l\u1e25ekma n tgeldit-ik a d-tass, lleb\u0263i-k ad id\u1e5bu di lqa\u025ba aakken yed\u1e5ba deg igenwan.\n6:11 Efk-a\u0263-d mkul ass tam\u025bict-nne\u0263.\n6:12 Semme\u1e25-a\u0263 ddnubat-nne\u0263 aakken i ne\u021bsama\u1e25 i wid i \u0263-i\u1e0delmen.\n6:13 Sseb\u025bed fell-a\u0263 aje\u1e5b\u1e5beb, ssellek-a\u0263 si t\u1e25ila n Cci\u1e6dan. AAxa\u1e6der \u0263u\u1e5b-ek i tella tgeldit, ttazmert d l\u025ba\u1e0dima i dayem. Amin !\n6:14 Ma yella te\u021bsama\u1e25em i yemdanen ii wen-ixeddmen cce\u1e5b, Baba \u1e5aebbi yyellan deg igenwan a wen-isame\u1e25 uula i kunwi.\n6:15 Lame\u025bna ma yella kkunwi ur te\u021bsama\u1e25em ara i wiya\u1e0d, aatan Baba \u1e5aebbi ur a wen-i\u021bsama\u1e25 aara ula i kunwi ddnubat-nwen.\n6:16 Asmi ara tu\u1e93ummem, ur d tesbegginet ara iman-nwen t\u1e25eznem am at sin wudmawen issexsa\u1e5ben udmawen-nsen iwakken a ten-\u021bwalin yemdanen belli u\u1e93amen. A wen-ini\u0263 tide\u021b : d ayagi kan i d lfayda-nsen.\n6:17 Ma d ke\u010d\u010d, m'ara tu\u1e93ume\u1e0d, ssired udem-ik, tdehne\u1e0d aqe\u1e5b\u1e5buy-ik s rri\u1e25a,\n6:18 iwakken yiwen ur k-i\u025beqqel belli tu\u1e93ame\u1e0d. Ilaq ayagi ad iqqim gar-ak d Baba \u1e5aebbi i\u021bwalin ayen yellan di sser, ne\u021b\u021ba a k-id-iqbel.\n6:19 Ur ssexzanet ara igerrujen di ddunit anda ara ten-ye\u010d\u010d ube\u025b\u025buc d \u1e63\u1e63di\u1e0d, anda ara ten-akren wid ifettken le\u1e25yu\u1e0d.\n6:20 Me\u025bna sxeznet axi\u1e5b igerrujen deg igenwan anda ur llin ibe\u025b\u025bac d \u1e63\u1e63di\u1e0d isserkuyen, anda ur zmiren ara imakaren ad fetken ne\u0263 ad akren.\n6:21 Axa\u1e6der anda yella ugerruj-ik, dinna ara yili wul-ik.\n6:22 Allen, \u021b-\u021biftilin n l\u01e7e\u021b\u021ba, ma yella se\u1e25\u1e25ant wallen-ik, a\u021b-\u021billi\u1e0d s lekmal-ik di tafat.\n6:23 Lame\u025bna, ma yella allen-ik ur se\u1e25\u1e25ant ara, a\u021b-\u021bili\u1e0d di \u1e6d\u1e6dlam. Ma yella d\u0263a allen-ik ur se\u1e25\u1e25ant ara, tafat yellan deg-k d \u1e6d\u1e6dlam, ac\u1e25al ihi berrik \u1e6d\u1e6dlam i deg telli\u1e0d.\n6:24 Ur izmir yiwen ad iqdec \u0263ef sin im\u025bellmen deg yiwet n tikkelt. Ma i\u1e25emmel yiwen, ad ik\u1e5beh waye\u1e0d ; ma ye\u1e6d\u1e6def deg yiwen, ad i\u1e25qe\u1e5b waye\u1e0d. Ur tezmirem ara ihi a\u021b-\u021b\u025bebdem \u1e5aebbi akk-d idrimen !\n6:25 Daymi i wen-d-qqa\u1e5be\u0263 : ur \u021b\u1e25ebbi\u1e5bet ara i tudert-nwen, \u0263ef wayen ara te\u010d\u010dem d wayen ara teswem akk-d wayen ara telsem. Acu i ges\u025ban azal, \u021b-\u021budert ne\u0263 d lqut ? D l\u01e7e\u021b\u021ba ne\u0263 d llebsa ? Tudert tugar lqut, l\u01e7e\u021b\u021ba tugar llebsa !\n6:26 Walit ig\u1e6da\u1e6d ( if\u1e5bax ) deg igenwan : ur zerr\u025ben, ur meggren, ur jemm\u025ben ula d acemma \u0263er ikuffan, me\u025bna Baba-twen yellan deg igenwan, ye\u021b\u021bak-asen-d tam\u025bict-nsen. E\u025bni ur teswim ara akte\u1e5b n yef\u1e5bax ?\n6:27 Anwa i gzemren s u\u1e25ebbe\u1e5b, ad yernu kra n wussan i le\u025bme\u1e5b-is ?\n6:28 Iwacu ara t\u1e25ebb\u1e5bem \u0263ef llebsa ? Walit amek i gemmun ije\u01e7\u01e7igen n lexla : ur ze\u1e6d\u1e6den, ur \u021bellmen,\n6:29 lame\u025bna a wen-ini\u0263 : ula d agellid Sliman s yiman-is di ccan-is ameqqran, ur yelsi am yiwen seg-sen.\n6:30 Ma yella \u1e5aebbi islusuy akka le\u1e25cic yellan di lexla ass-agi, azekka ad i\u021bwadegge\u1e5b \u0263er tmes, amek ur kkun-islusu ara ula d kunwi ay imdanen ixu\u1e63\u1e63en di liman ?\n6:31 Kkset anezgum i yiman-nwen, ur qqa\u1e5bet ara : d acu ara ne\u010d\u010d, d acu ara nsew ne\u0263 d acu ara nels ?\n6:32 Axa\u1e6der ayagi d imejhal i ge\u021b\u1e25ebbi\u1e5ben fell-as. Ma d Baba-twen yellan deg igenwan, ye\u1e93ra ayen akk te\u1e25wa\u01e7em !\n6:33 Nadit uqbel \u0263ef tgeldit n Sidi \u1e5aebbi d wayen yellan d l\u1e25eqq, ayen nni\u1e0den me\u1e5b\u1e5ba d ne\u021b\u021ba ara wen-t-id yefken.\n6:34 Ur \u021b\u1e25ebbi\u1e5bet ara ihi i uzekka, axa\u1e6der azekka s unezgum-is we\u1e25d-es. Yal ass s le\u025btab-ines !\n7:1 Ur \u021b\u1e25asabet ara wiya\u1e0d iwakken ur kkun-i\u021b\u1e25asab ula d yiwen.\n7:2 Akken te\u021b\u1e25asabem wiya\u1e0d ara kkun-i\u1e25aseb Sidi \u1e5aebbi. A wen-d-iktil s lkil s wayes te\u021b\u021bektilim i wiya\u1e0d.\n7:3 Acu\u0263e\u1e5b te\u021bmuqqule\u1e0d axeclaw yellan di ti\u1e6d n gma-k, ke\u010d\u010d ur ne\u021bwali ara tigejdit yellan di ti\u1e6d-ik ?\n7:4 Amek ara tini\u1e0d i gma-k : \u00ab E\u01e7\u01e7-iyi ad kkse\u0263 axeclaw-nni yellan di ti\u1e6d-ik, \u00bb ke\u010d\u010d yes\u025ban tigejdit di ti\u1e6d-ik ?\n7:5 A bu sin wudmawen ! Ekkes uqbel tigejdit yellan di ti\u1e6d-ik, imiren a\u021b-\u021bwali\u1e0d amek ara d-tekkse\u1e0d axeclaw yellan di ti\u1e6d n gma-k.\n7:6 Ur \u021b\u021baket ara ayen ye\u1e63fan i yeqjan, ur \u1e6deggi\u1e5bet ara ti\u025beqcin \u0263layen zdat yilfan, m'ulac a ten \u1e5bek\u1e0den yerna a d-zzin fell-awen a kkun-gezren.\n7:7 Ssutret, a wen-d-i\u021bunefk ! Nadit, a\u021b-\u021bafem ! Sqerbebbet, a wen-d-ldin !\n7:8 Axa\u1e6der kra n win ara issutren, a s-d-i\u021b\u021bunefk ! Win i\u021bnadin, ad yaf ! A s-d-teldi tewwurt i win ara is\u1e6deb\u1e6dben.\n7:9 Anwa deg-wen ara yefken abla\u1e0d i mmi-s ma yessuter-as-d a\u0263\u1e5bum ?\n7:10 Ne\u0263, anwa deg-wen ara yefken azrem i mmi-s ma yella yessuter-as-d aslem ?\n7:11 Ma yella kunwi yellan d imcumen tessnem a\u021b-\u021befkem ayen yelhan i warraw-nwen, amek Baba twen yellan deg igenwan ur d-i\u021b\u021bak ara ayen yelhan i wid ara s-t-issutren ?\n7:12 Ihi, xedmet i wiya\u1e0d ayen i teb\u0263am a wen-t-xedmen i kunwi, axa\u1e6der akka i \u0263-d-twe\u1e63\u1e63a ccari\u025ba n Musa akk-d lenbiya.\n7:13 Kecmet si tewwurt i\u1e0deyqen ! Axa\u1e6der ac\u1e25al tewse\u025b tewwurt, ac\u1e25al yeshel webrid ye\u021b\u021bawin \u0263er nnger, yerna a\u1e6das i ge\u021b\u025beddayen syenna.\n7:14 Me\u025bna ac\u1e25al te\u1e0dyeq tewwurt, ac\u1e25al yew\u025be\u1e5b webrid ye\u021b\u021bawin \u0263er tudert yerna drus i ge\u021b\u025beddayen syenna.\n7:15 \u1e24adret iman-nwen si lenbiya n lekdeb ! \u021a\u021basen-d \u0263u\u1e5b-wen am izamaren, nutni \u0263er daxel d uccanen.\n7:16 A ten-t\u025beqlem s lec\u0263al-nsen. UUr d-n\u021bekkes ara ti\u1e93urin seg inijel, ne\u0263 lex\u1e5bif seg isennanen.\n7:17 Ttej\u1e5ba yelhan, te\u021b\u021bak-ed lfakya yelhan, yir ttej\u1e5ba te\u021b\u021bak-ed lfakya n diri.\n7:18 Ttej\u1e5ba yelhan ur tezmir ara a d-tefk yir lfakya, akken da\u0263en yir ttej\u1e5ba ur tezmir ara a d-tefk lfakya yelhan.\n7:19 Yal ttej\u1e5ba ur d-ne\u021b\u021bak ara lfakya l\u025bali a\u021b-\u021be\u021bwagzem, a\u021b-\u021be\u021bwa\u1e0degge\u1e5b \u0263er tmes.\n7:20 S wakka, s lec\u0263al-nsen ara t\u025beqlem lenbiya n lekdeb.\n7:21 Ma\u010d\u010di d wid kan i yi-d-iqqa\u1e5ben : \u00ab A Sidi, a Sidi \u00bb ara ikecmen \u0263er tgelda n igenwan, me\u025bna d wid ixeddmen leb\u0263i n Baba yellan deg igenwan.\n7:22 A\u1e6das ara yi-d-yinin ass n l\u1e25isab : \u00ab a Sidi a Sidi, s yisem-ik i nbecce\u1e5b imeslayen s \u0263u\u1e5b \u1e5aebbi, s yisem-ik i nessufe\u0263 le\u01e7nun, s yisem-ik i nexdem a\u1e6das n lbe\u1e5bhanat ! \u00bb\n7:23 D\u0263a a sen-d-rre\u0263 : be\u025bdet akkin fell-i a wid ixeddmen cce\u1e5b, ur kkun ssine\u0263 ara !\n7:24 Akka, s kra n win yesme\u1e25sisen i wawal-iw yerna ixeddem-it, i\u021bemcabi \u0263er wemdan a\u025beqli yebnan lsas n wexxam-is \u0263ef wez\u1e5bu.\n7:25 Ageffur ( lehwa ) ye\u0263li-d, isaffen \u1e25emlen-d, a\u1e0du ihubb-ed \u0263ef wexxam-nni, me\u025bna ur ye\u0263li ara, axa\u1e6der lsas-is yers \u0263ef wez\u1e5bu.\n7:26 Ma d win isme\u1e25sisen i wawal iw, ur nxeddem ara wayen i d-qqa\u1e5be\u0263, icuba \u0263er wemdan ur ne\u021bxemmim ara, i gebnan axxam-is \u0263ef \u1e5b\u1e5bmel ;\n7:27 ye\u0263li-d ugeffur, \u1e25emlen-d isaffen, ihubb-ed wa\u1e0du \u0263ef wexxam-nni, imiren ye\u0263li. Lexsa\u1e5ba-s \u021b-\u021bameqqrant !\n7:28 Mi gfukk Sidna \u0190isa aselmed, l\u0263aci akk wehmen deg imeslayen-ines,\n7:29 axa\u1e6der isselmad-iten s tissas, ma\u010d\u010di am lecyux-nsen.\n8:1 Mi d-yuder Sidna \u0190isa seg udrar, a\u1e6das n l\u0263aci i t-id-iteb\u025ben.\n8:2 Ataya yiwen wemdan ihelken lbe\u1e5bs yusa-d \u0263u\u1e5b-es, ise\u01e7\u01e7ed zdat-es, yenna-yas : A Sidi, ma yella teb\u0263i\u1e0d, tzemre\u1e0d a yi-tse\u1e25lu\u1e0d.\n8:3 Sidna \u0190isa yessers afus-is fell-as, yenna-yas : B\u0263i\u0263 ! Ili-k te\u1e25li\u1e0d ! IImiren kan i\u1e25la wergaz-nni si lbe\u1e5bs-ines, ye\u1e63fa weglim-is.\n8:4 D\u0263a Sidna \u0190isa yenna-yas : \u1e24ader a\u021b-\u021be\u1e25ku\u1e0d ula i yiwen \u0263ef wayagi, me\u025bna \u1e5bu\u1e25 \u0263er yiwen si lmuqedmin a k-i\u1e93er, ad iwali belli te\u1e63fi\u1e0d, tefke\u1e0d lwe\u025bda-nni n tezdeg s wayes i wen-d-yume\u1e5b nnbi Musa, iwakken ayagi a sen-yili d \u021bbut.\n8:5 Akken i gekcem Sidna \u0190isa \u0263er temdint n Kaferna\u1e25um, ataya yiwen umeqqran n l\u025beske\u1e5b n \u1e5auman iqe\u1e5b\u1e5beb ed \u0263u\u1e5b-es, i\u1e25ellel-it, yenna yas :\n8:6 A Sidi, aqeddac-iw yen\u1e6der, atan i\u1e0dleq deg wexxam, yekref !\n8:7 Sidna \u0190isa yenna-yas : Ad \u1e5bu\u1e25e\u0263 a t-sse\u1e25lu\u0263.\n8:8 Ameqqran n l\u025beske\u1e5b yerra-yas : A Sidi, ur uklale\u0263 ara a\u021b-\u021bkecme\u1e0d \u0263er wexxam-iw, me\u025bna ini-d kan yiwen n wawal, aqeddac-iw ad i\u1e25lu.\n8:9 Axa\u1e6der nekk s yiman-iw akken s\u025bi\u0263 wid i\u1e25ekmen fell-i, i s\u025bi\u0263 wid yellan seddaw n l\u1e25ekma-w. Ad ini\u0263 i yiwen \u1e5bu\u1e25 ad i\u1e5bu\u1e25, ad ini\u0263 i waye\u1e0d a\u1e5bwa\u1e25 a d-yas, ad ini\u0263 da\u0263en i uqeddac-iw : xdem aya, a t-ixdem.\n8:10 Mi gesla Sidna \u0190isa imeslayen-agi it\u025be\u01e7\u01e7eb, yenna i wid yellan dinna : A wen-ini\u0263 tide\u021b, ger wat Is\u1e5bail me\u1e5b\u1e5ba ur ufi\u0263 ara liman am wagi.\n8:11 A wen-ini\u0263 da\u0263en : a\u1e6das ara d-yasen si cce\u1e5bq d l\u0263e\u1e5bb, ad \u1e6d\u1e6dfen imukan \u0263er tama n Ib\u1e5bahim, n Is\u1e25aq akk-d Ye\u025bqub di tgelda n igenwan.\n8:12 Me\u025bna a\u1e6das seg wid i g\u0263ilen ad we\u1e5bten tagelda ara ye\u021bwa\u1e0degg\u1e5ben \u0263er be\u1e5b\u1e5ba, \u0263er \u1e6d\u1e6dlam anda ara ilin ime\u1e6d\u1e6dawen, nndama tameqqrant akk-d weq\u1e5bac n tu\u0263mas.\n8:13 Sidna \u0190isa yenna i umeqqran-nni n l\u025beske\u1e5b : \u1e5au\u1e25, imi tumne\u1e0d atan wayen i t\u1e0delbe\u1e0d a k-id-yawe\u1e0d ! DDi teswi\u025bt-nni, ye\u1e25la uqeddac-is.\n8:14 Sidna \u0190isa i\u1e5bu\u1e25 \u0263er wexxam n Bu\u1e6drus, yufa ta\u1e0deggalt n Bu\u1e6drus deg usu tu\u0263-i\u021b tawla.\n8:15 Innul afus-is, d\u0263a teffe\u0263-i\u021b tawla-nni. Imiren kan tekker-ed, tebda tqeddec-asen.\n8:16 Mi ge\u0263li yi\u1e6dij, wwin-d i Sidna \u0190isa a\u1e6das n yemdanen i\u021bwamelken. S wawal-is, issufe\u0263 seg-sen le\u01e7nun yerna yesse\u1e25la imu\u1e0dan me\u1e5b\u1e5ba.\n8:17 Ixdem ayagi iwakken ad i\u021bwakemmel wawal i d-yenna nnbi Ice\u025bya : Yewwi le\u025byub-nne\u0263 , i\u025bebba lehlakat-nne\u0263 .\n8:18 Sidna \u0190isa mi gwala annect-nni n l\u0263aci yezzi-yas-d, yume\u1e5b i inelmaden-is ad zegren \u0263er ugemma\u1e0d n leb\u1e25e\u1e5b.\n8:19 Yiwen l\u025balem n ccari\u025ba iqe\u1e5b\u1e5beb \u0263er Sidna \u0190isa, yenna-yas : A Sidi, anda teddi\u1e0d ad ddu\u0263.\n8:20 Sidna \u0190isa yerra-yas : Uccanen s\u025ban l\u0263i\u1e5ban, if\u1e5bax n igenni s\u025ban le\u025bcuc, ma d Mmi-s n bunadem ur yes\u025bi ara anda ara yessers aqe\u1e5b\u1e5buy-is.\n8:21 Yiwen seg inelmaden-is, yenna-yas : A Sidi, semme\u1e25-iyi ad \u1e5bu\u1e25e\u0263 ad me\u1e0dle\u0263 baba.\n8:22 Sidna \u0190isa yerra-yas : Ddu yid-i e\u01e7\u01e7 wid yemmuten ad me\u1e0dlen lmegtin-nsen.\n8:23 Sidna \u0190isa yuli \u0263er teflukt, ddan yid-es inelmaden-is.\n8:24 Deg yiwet n teswi\u025bt, tekker-ed tbuci\u1e0dant di leb\u1e25e\u1e5b armi t\u0263umm teflukt-nni s lemwaji. Sidna \u0190isa yella i\u1e6d\u1e6des.\n8:25 Qe\u1e5b\u1e5bben-d \u0263u\u1e5b-es inelmaden-is, ssakin-t-id, nnan-as : A Sidi, sellek-a\u0263 m'ulac a nemmet !\n8:26 Yenna-yasen : Acimi tuggadem, a wid iwumi ixu\u1e63\u1e63 liman ! IImiren ikker, yume\u1e5b i wa\u1e0du d leb\u1e25e\u1e5b ad rsen d\u0263a ters-ed talwit \u021b-\u021bameqqrant.\n8:27 Wid i\u1e25ed\u1e5ben, t\u025be\u01e7\u01e7ben qqa\u1e5ben : Anwa-t wagi ? Ula d a\u1e0du d leb\u1e25e\u1e5b \u021b\u021ba\u0263en-as awal !\n8:28 Mi gewwe\u1e0d Sidna \u0190isa agemma\u1e0d i leb\u1e25e\u1e5b, \u0263er tmurt n at Gada\u1e5ba, a ten-aya sin yergazen ye\u021bwazed\u0263en, ff\u0263en-d si tmeqbe\u1e5bt, mmugren-t-id. Yiwen ur izmir ad i\u025beddi seg webrid-nni axa\u1e6der we\u025b\u1e5ben a\u1e6das.\n8:29 Bdan \u021b\u025beggi\u1e0den : D acu i teb\u0263i\u1e0d \u0263u\u1e5b-nne\u0263 a Mmi-s n \u1e5aebbi ? Tusi\u1e0d-ed iwakken a \u0263-t\u025be\u021bbe\u1e0d uqbel lweqt ?\n8:30 Di le\u01e7wahi-nni, tella yiwet n tqe\u1e0d\u025bit tameqqrant n yilfan i gkessen dinna.\n8:31 Le\u01e7nun-nni \u021b\u1e25ellilen Sidna \u0190isa, qqa\u1e5ben-as : Ma tessuf\u0263e\u1e0d-a\u0263, cegge\u025b-a\u0263 \u0263er tqe\u1e0d\u025bit-ihina n yilfan.\n8:32 Sidna \u0190isa yenna-yasen : \u1e5au\u1e25et ! FFf\u0263en-d si sin-nni n yemdanen, kecmen deg yilfan-nni. IImiren kan, grarben \u0263er daxel n leb\u1e25e\u1e5b, \u0263e\u1e5bqen, mmuten akk.\n8:33 Imeksawen-nni rewlen, \u1e5bu\u1e25en \u0263er temdint ad \u1e25kun ayen akk yed\u1e5ban d yergazen-nni ye\u021bwamelken.\n8:34 Imezda\u0263 akk n temdint ff\u0263en-d \u0263er Sidna \u0190isa ; mi d-ww\u1e0den \u0263u\u1e5b-es, \u1e25ellelen-t ad iffe\u0263 si tmurt-nsen.\n9:1 Sidna \u0190isa yuli \u0263er teflukt, yezger leb\u1e25e\u1e5b yu\u0263al \u0263er temdint n Kaferna\u1e25um.\n9:2 Wwin-as-d yiwen wukrif i\u1e0dleq \u0263ef wusu. MMi gwala liman n yemdanen-agi, yenna i wukrif-nni : Ur \u021b\u021baggad ara a mmi, \u021bwa\u025beffan ak ddnubat-ik.\n9:3 Llan dinna kra si l\u025bulama \u021bxemmimen deg wulawen-nsen qqa\u1e5ben : Argaz-agi yekfe\u1e5b !\n9:4 D\u0263a Sidna \u0190isa ye\u1e93ran ayen \u021bxemmimen, yenna-yasen : Acu\u0263e\u1e5b yir axemmem-agi deg ulawen-nwen ?\n9:5 D acu i gsehlen a t-id-ini\u0263 : \u00ab \u021awa\u025bfan-ak ddnubat-ik ne\u0263 kker tel\u1e25u\u1e0d \u00bb ?\n9:6 Me\u025bna iwakken a\u021b-\u021be\u1e93rem belli Mmi-s n bunadem yes\u025ba tazmert di ddunit-agi ad ye\u025bfu ddnubat... YYenna i wukrif-nni : Ekker, ddem usu-inek t\u1e5bu\u1e25e\u1e0d \u0263er wexxam-ik !\n9:7 Imiren, argaz-nni yekker, i\u1e5bu\u1e25 \u0263er wexxam-is.\n9:8 Mi walan ayagi, l\u0263aci akk ikcem-iten lxuf, \u021b\u1e25emmiden Sidi \u1e5aebbi, imi i d-ifka tazmert am tagi i yemdanen.\n9:9 Mi g\u025bedda zdat wexxam anda \u021bxelli\u1e63en tabzert, ( le\u0263\u1e5bama ) Sidna \u0190isa iwala yiwen umekkas isem-is Matta, yenna-yas : Ddu-d yid-i ! IImiren kan ikker Matta, yedda yid-es.\n9:10 Mi llan te\u021b\u021ben deg wexxam n Matta, a\u1e6das n imekkasen akk-d yir imdanen i d-yusan, qqimen akk-d Sidna \u0190isa d inelmaden-is, te\u021b\u021ben yid-sen.\n9:11 Ifariziyen mi walan ayagi nnan i inelmaden-is : Acu\u0263e\u1e5b Ssid-nwen ite\u021b akk-d imekkasen d yir imdanen ?\n9:12 Sidna \u0190isa yesla i wayen i d nnan, yerra-yasen : Ma\u010d\u010di d wid ise\u1e25\u1e25an i ge\u1e25wa\u01e7en \u1e6d\u1e6dbib, me\u025bna d wid ihelken.\n9:13 Meyzet \u0263ef lme\u025bna n wawal-agi yellan di tira iqedsen : D ulawen ye\u1e63fan i b\u0263i\u0263 ma\u010d\u010di d iseflawen n lmal. AAxa\u1e6der ur d-usi\u0263 ara ad ssiwle\u0263 i i\u1e25eqqiyen iwakken a d u\u0263alen \u0263er webrid, me\u025bna i imednuben.\n9:14 Inelmaden n Ye\u1e25ya a\u0263e\u1e6d\u1e6das usan-d \u0263er Sidna \u0190isa nnan-as : Acu\u0263e\u1e5b nukkni akk-d ifariziyen ne\u021b\u021bu\u1e93um ma d inelmaden-ik ur \u021b\u021bu\u1e93umen ara ?\n9:15 Sidna \u0190isa yerra-yasen : E\u025bni inebgawen n tme\u0263\u1e5ba zemren ad ilin di le\u1e25zen skud yella yesli yid-sen ? A d-yas wass i deg ara sen-i\u021bwakkes yesli, imiren ad u\u1e93ummen.\n9:16 Ur nezmir ara a nxi\u1e0d tafawe\u021b taj\u1e0di\u1e6d i uce\u1e6d\u1e6di\u1e0d aqdim, axa\u1e6der tafawe\u021b-nni taj\u1e0di\u1e6d a\u021b-\u021bejbed ace\u1e6d\u1e6di\u1e0d-nni aqdim, acerrig-nni ad innerni.\n9:17 Ur ne\u021b\u025bemmi\u1e5b ara da\u0263en iyeddiden iqdimen s cc\u1e5bab ajdid, ne\u0263 m'ulac ad fellqen, cc\u1e5bab ad in\u0263el, iyeddiden ad xes\u1e5ben ; me\u025bna a nerr cc\u1e5bab ajdid deg yeddiden ijdiden, s wakkenni cc\u1e5bab d uyeddid ad \u021bwa\u1e25erzen.\n9:18 Mazal Sidna \u0190isa i\u021bmeslay, yusa-d yiwen n ccix n l\u01e7ame\u025b ise\u01e7\u01e7ed zdat-es, yenna-yas : Tura kan i temmut yelli, di le\u025bnaya-k as-ed a\u021b-\u021bserse\u1e0d afus-ik fell-as, a d-te\u1e25yu !\n9:19 Sidna \u0190isa ikker yedda yid-es ne\u021b\u021ba d inelmaden-is.\n9:20 A\u021baya yiwet n tme\u1e6d\u1e6dut yu\u1e0dnen ssiq tnac iseggasen aya, tekka-yas-d si deffir, tennul tac\u1e0da\u1e6d n ube\u1e5bnus-is,\n9:21 axa\u1e6der teqqa\u1e5b deg ul-is : \u00ab lemmer zemre\u0263 ad nnale\u0263 \u0263as ula \u021b-\u021bac\u1e0da\u1e6d n ube\u1e5bnus-is, ad \u1e25lu\u0263. \u00bb\n9:22 Sidna \u0190isa yezzi \u0263er deffir, mi \u021b-iwala yenna-yas : Ur \u021b\u021baggad a yell-i, liman-im isse\u1e25la-kkem. SSeg imiren tame\u1e6d\u1e6dut-nni te\u1e25la.\n9:23 Mi gewwe\u1e0d Sidna \u0190isa \u0263er wexxam n ccix-nni, yufa l\u0263aci \u021bme\u01e7\u01e7iden, yerna nhewwalen me\u1e5b\u1e5ba. Yenna-yasen :\n9:24 Ff\u0263et syagi, taqcict ur temmut ara, d i\u1e0des kan i te\u1e6d\u1e6des. DD\u0263a \u021bmesxi\u1e5ben fell-as.\n9:25 Mi ssuf\u0263en l\u0263aci, ikcem, ye\u1e6d\u1e6def-ed taqcict-nni seg ufus, d\u0263a tekker-ed.\n9:26 Yeffe\u0263 lexba\u1e5b-agi di tmurt me\u1e5b\u1e5ba.\n9:27 Mi g\u1e5bu\u1e25 Sidna \u0190isa syenna, teb\u025ben-t sin ider\u0263alen, \u021b\u025beggi\u1e0den : A mmi-s n Sidna Dawed, \u1e25unn fell-a\u0263 !\n9:28 Mi gewwe\u1e0d \u0263er wexxam, ider\u0263alen-nni kecmen \u0263u\u1e5b-es, d\u0263a Sidna \u0190isa yenna-yasen : Tumnem belli zemre\u0263 a wen xedme\u0263 ayen i yi-d-tessutrem ? RRran-as : Ih a Sidi numen !\n9:29 Innul allen-nsen, yenna : A wen-i\u021bwaxdem s wakken yella liman-nwen !\n9:30 D\u0263a yu\u0263al-asen-d ye\u1e93ri. Sidna \u0190isa yeggul deg-sen : \u0194u\u1e5b-wat ad iffe\u0263 lexba\u1e5b \u0263ef wayagi !\n9:31 Me\u025bna akken kan ff\u0263en, bdan aberre\u1e25, lexba\u1e5b-nni yekka-d me\u1e5b\u1e5ba tamurt.\n9:32 Mi \u1e5bu\u1e25en sin-nni, a ten-aya wiya\u1e0d wwin-as-d yiwen wergaz i gesgugem u\u1e5bu\u1e25ani.\n9:33 Akken issufe\u0263 Sidna \u0190isa a\u1e5bu\u1e25ani-nni, agugam-nni yebda i\u021bmeslay. L\u0263aci akk t\u025be\u01e7ben, qqa\u1e5ben : Le\u025bme\u1e5b ne\u1e93ri ayagi di tmurt n wat Is\u1e5bail !\n9:34 Lame\u025bna ifariziyen qqa\u1e5ben : S tezmert n ugellid n le\u01e7nun i ten-issufu\u0263.\n9:35 Sidna \u0190isa yekka-d \u0263ef temdinin \u021b-\u021budrin me\u1e5b\u1e5ba, yesselmad di le\u01e7wame\u025b nsen, ye\u021bbecci\u1e5b lexba\u1e5b n lxi\u1e5b n tgeldit n Sidi \u1e5aebbi, isse\u1e25lay mkul a\u1e6dan d mkul l\u025bib.\n9:36 Sidna \u0190isa tegzem tasa-s mi gwala annect-nni n l\u0263aci \u025byan, feclen, \u1e25eznen am ulli ur nes\u025bi ameksa .\n9:37 D\u0263a yenna i inelmaden-is : Tamegra meqq\u1e5bet, me\u025bna drus ifella\u1e25en i gellan.\n9:38 \u1e24ellelet ihi bab n tmegra a d icegge\u025b ixeddamen \u0263er tmegra-s.\n10:1 Sidna \u0190isa yessawel i tnac inelmaden-is, yefka-yasen tazmert s wayes ara ssufu\u0263en le\u01e7nun, ara se\u1e25luyen mkul a\u1e6dan d mkul l\u025bib.\n10:2 Atnan yismawen n tnac-nni inelmaden n Sidna \u0190isa :Amezwaru d Sem\u025bun i\u021b\u021busemman Bu\u1e6drus akk-d gma-s Andriyus, Ye\u025bqub mmi-s n Zabadi akk-d gma-s Yu\u1e25enna,\n10:3 Filibus d Bartelmay, Suma akk-d Matta amekkas n tebzert, Ye\u025bqub mmi-s n \u1e24alfi akk-d Taddi ;\n10:4 Sem\u025bun awa\u1e6dani, Yudas n Qe\u1e5byut, win akken ixed\u025ben Sidna \u0190isa.\n10:5 Sidna \u0190isa icegge\u025b tnac inelmaden-is, iwe\u1e63\u1e63a-ten : Ur \u021b\u1e5bu\u1e25ut ara \u0263er tmura tibe\u1e5b\u1e5baniyin, ur ke\u010d\u010dmet ara \u0263er temdinin n at Samarya ;\n10:6 \u1e5bu\u1e25et axi\u1e5b \u0263er wat Is\u1e5bail yellan am ulli i\u1e0da\u025ben.\n10:7 M'ara te\u021b\u021beddum, \u021bbecci\u1e5bet qqa\u1e5bet : \u00ab A\u021baya tgeldit n igenwan tqe\u1e5b\u1e5beb-ed \u00bb !\n10:8 Sse\u1e25lut imu\u1e0dan, sse\u1e25yut-ed lmegtin, ssizdeget wid ihelken lbe\u1e5bs, ssuf\u0263et le\u01e7nun. Akken i wen-d-i\u021b\u021bunefk mbla idrimen, fket ula d kunwi mbla idrimen.\n10:9 Ur \u021b\u021bawit yid-wen ama d ddheb, ama d lfe\u1e6d\u1e6da, ama d idrimen ;\n10:10 ur \u021b\u021bawit yid-wen agrab ne\u0263 sin iqendya\u1e5b, ur \u021b\u021bawit irkasen ne\u0263 a\u025bekkaz, axa\u1e6der axeddam yuklal lqut-is.\n10:11 Di yal tamdint ne\u0263 taddart anda ara tkecmem, steqsit ma yella win ara yes\u1e6der\u1e25ben yis-wen, qqimet \u0263u\u1e5b-es alamma tekkrem a\u021b-\u021b\u1e5bu\u1e25em.\n10:12 M'ara tkecmem \u0263er yiwen wexxam, sellmet fell-asen,\n10:13 ma s\u1e6der\u1e25ben yis-wen, lehna-nwen a\u021b-\u021bers fell-asen ; ma yella ur s\u1e6der\u1e25ben ara yis-wen, lehna-nwen a\u021b-\u021beqqim \u0263u\u1e5b-wen.\n10:14 M'ur qbilen ara ad s\u1e6dre\u1e25ben yis-wen ne\u0263 ad sem\u1e25essen i wawal, ff\u0263et seg wexxam-nni ne\u0263 si temdint nni, zwit ula d a\u0263ebba\u1e5b seg i\u1e0da\u1e5b\u1e5ben nwen.\n10:15 A wen-ini\u0263 tide\u021b : ass n l\u1e25isab, imezda\u0263 n temdint-agi ad \u021b\u021bu\u025baqben akte\u1e5b n temdinin n Sudum akk-d Gumu\u1e5b.\n10:16 Atan, a kkun-cegg\u025be\u0263 am ulli ger wuccanen, \u1e25e\u1e5bcet ihi am izerman, s\u025but neyya am yetbiren.\n10:17 \u1e24adret \u0263ef yiman-nwen, axa\u1e6der kra n yemdanen a kkun-sbedden \u0263er cc\u1e5be\u025b; yerna a kkun-wten s ujelka\u1e0d di le\u01e7wame\u025b-nsen.\n10:18 \u0194ef ddemma n yisem-iw, a kkun-sbedden zdat l\u1e25ekkam akk-d igelliden, iwakken am nutni am at le\u01e7nas nni\u1e0den, ad slen s yisem-iw.\n10:19 M'ara kkun-\u1e6d\u1e6dfen, ur \u021b\u1e25ebbi\u1e5bet ara \u0263ef wamek ara temmeslayem, ne\u0263 \u0263ef wayen ara d-tinim, imeslayen ara d-tinim, a wen-d-\u021b\u021bunefken di teswi\u025bt nni kan.\n10:20 Axa\u1e6der ma\u010d\u010di d kunwi ara imeslayen, me\u025bna d \u1e5a\u1e5bu\u1e25 n Baba \u1e5aebbi ara d-imeslayen seg-wen.\n10:21 Amdan ad yefk gma-s \u0263er lmut, ababat ad yefk mmi-s, dderya a d kkren \u0263er imawlan-nsen, a ten ssiw\u1e0den \u0263er lmut.\n10:22 A kkun-ke\u1e5bhen irkul \u0263ef ddemma n yisem-iw, me\u025bna win ara ye\u1e6d\u1e6dfen alamma \u021b-\u021baggara, ad i\u021b\u021busellek.\n10:23 M'ara te\u021bwaqeh\u1e5bem deg yiwet n temdint, rewlet \u0263er taye\u1e0d. A wen-ini\u0263 tide\u021b : Mmi-s n bunadem a d-yu\u0263al uqbel a d-tekkem tudrin me\u1e5b\u1e5ba n tmurt n wat Is\u1e5bail.\n10:24 Ulac anelmad yugaren ccix-is ne\u0263 aqeddac yellan sennig um\u025bellem is.\n10:25 Akken i\u021bwa\u1e25seb ccix ara ye\u021bwa\u1e25seb unelmad-is. Da\u0263en akken yella wem\u025bellem ara yili uqeddac-is. MMa semman i bab n wexxam Balzabul i\u1e25ekkmen \u0263ef le\u01e7nun, amek ur \u021bsemmin ara akkenni i wat wexxam-is !\n10:26 Ur ten-\u021baggadet ara ihi ! Axa\u1e6der kra n wayen yeffren a d-i\u1e0dhe\u1e5b, kra n lba\u1e0dna yellan a d-tban.\n10:27 Ayen i wen-qqa\u1e5be\u0263 deg i\u1e0d, init-e\u021b \u025binani deg wass, ayen slan ime\u1e93\u1e93u\u0263en-nwen di sser, berr\u1e25et-e\u021b deg iberdan.\n10:28 Ur \u021b\u021baggadet ara wid ineqqen l\u01e7e\u021b\u021ba lame\u025bna ur zmiren ara ad nn\u0263en \u1e5b\u1e5bu\u1e25, aggadet win izemren ad i\u1e0degge\u1e5b \u1e5b\u1e5bu\u1e25 akk-d l\u01e7e\u021b\u021ba \u0263er \u01e7ahennama.\n10:29 E\u025bni ur znuzun ara sin i\u1e93iwcen s u\u1e63u\u1e5bdi ? Me\u025bna ula d yiwen deg-sen ur d-i\u0263elli \u0263er lqa\u025ba mbla leb\u0263i n Baba \u1e5aebbi.\n10:30 Ula d an\u1e93aden uqe\u1e5b\u1e5buy-nwen \u021bwa\u1e25esben irkulli.\n10:31 Ihi ur \u021b\u021baggadet ara : tes\u025bam azal akte\u1e5b n wa\u1e6das n i\u1e93iwcen !\n10:32 Kra win ara yesset\u1e25in s yisem-iw zdat yemdanen, ula d nekk, ad sset\u1e25i\u0263 yis zdat Baba yellan deg igenwan.\n10:33 Kra win ara yi-nek\u1e5ben zdat yemdanen, a t-nekk\u1e5be\u0263 ula d nekk zdat Baba yellan deg igenwan.\n10:34 \u0194u\u1e5b-wat a\u021b-\u021b\u0263ilem d lehna i d wwi\u0263 \u0263er ddunit ; ma\u010d\u010di d lehna i d-wwi\u0263, me\u025bna d ccwal i d-wwi\u0263.\n10:35 Axa\u1e6der wwi\u0263-d lfi\u1e5baq ger weqcic d baba-s, ger teqcict d yemma-s, ger teslit \u021b-\u021bem\u0263a\u1e5bt-is,\n10:36 a d-kkren ye\u025bdawen seg at wexxam.\n10:37 Win i\u1e25emmlen baba-s d yemma-s ne\u0263 mmi-s d yelli-s akte\u1e5b iw ur yuklal ara ad yili d anelmad-iw.\n10:38 Kra win ur neqbil ara ad in\u025be\u021b\u021bab \u0263ef ddemma n yisem-iw iwakken ad iyi-itbe\u025b, ur yuklal ara ad yili d anelmad-iw.\n10:39 Win i\u1e25erzen ta\u1e5bwi\u1e25t-is, a s-t\u1e5bu\u1e25, ma d win ara isebblen ta\u1e5bwi\u1e25t-is \u0263ef ddemma-w ad yu\u0263al a \u021b-yaf.\n10:40 Win is\u1e6der\u1e25ben yis-wen, yis-i i ges\u1e6der\u1e25eb, win is\u1e6der\u1e25ben yis-i, is\u1e6der\u1e25eb s win i yi-d-icegg\u025ben.\n10:41 Win is\u1e6der\u1e25ben s nnbi imi s \u0263u\u1e5b \u1e5aebbi i d-yusa a s-d-i\u021b\u021bunefk wayen yuklal nnbi, win is\u1e6der\u1e25ben s u\u1e25eqqi imi d a\u1e25eqqi i gella, a s-d-i\u021bunefk wayen yuklal u\u1e25eqqi.\n10:42 Kra win ara yefken lkas n waman isemma\u1e0den i yiwen seg imec\u1e6du\u1e25en-agi imi d anelmad-iw i gella, a wen-ini\u0263 tide\u021b : ur a s-i\u021b\u1e5bu\u1e25 ara l\u1e25eqq yuklal.\n11:1 Mi gwe\u1e63\u1e63a tnac-nni inelmaden is, Sidna \u0190isa i\u1e5bu\u1e25 syenna ad ibecce\u1e5b di tudrin n le\u01e7wahi-nni.\n11:2 Ye\u1e25ya yellan di l\u1e25ebs, yesla s lec\u0263al n Lmasi\u1e25, icegge\u025b \u0263u\u1e5b-es inelmaden is iwakken a s-inin :\n11:3 D ke\u010d\u010d i d win akken ara d yasen ne\u0263 ilaq-a\u0263 a ner\u01e7u waye\u1e0d ?\n11:4 Sidna \u0190isa yerra-yasen-d : \u1e5au\u1e25et ssiw\u1e0det-as lexba\u1e5b i Ye\u1e25ya \u0263ef wayen twalam d wayen teslam :\n11:5 Ider\u0263alen \u021bwalin, iqu\u1e0daren le\u1e25\u1e25un, ibe\u1e5bsiyen \u1e63effun, i\u025be\u1e93\u1e93ugen sellen, lmegtin \u1e25eggun-d, lexba\u1e5b n lxi\u1e5b i\u021b\u021bubecce\u1e5b i yime\u0263ban.\n11:6 D ase\u025bdi win iwumi ur \u021b\u021bili\u0263 ara d sebba n tucc\u1e0da ( ugur ) !\n11:7 Mi \u1e5bu\u1e25en inelmaden-is, Sidna \u0190isa yebda ihedde\u1e5b i l\u0263aci \u0263ef Ye\u1e25ya : D acu i t\u1e5bu\u1e25em a t-id-te\u1e93rem deg unez\u1e5buf ? D a\u0263anim ye\u021bhuzzu wa\u1e0du ?\n11:8 \u0194er wacu i t\u1e5bu\u1e25em a\u021b-\u021bfe\u1e5b\u01e7em ? \u0194\u0194er yiwen wergaz yelsan llebsa ifazen ? Wid ye\u021blusun llebsa ifazen, deg ixxamen n igelliden i \u021b\u021bilin.\n11:9 Anwa i \u0263er t\u1e5bu\u1e25em a t-id-te\u1e93rem ihi ? D yiwen n nnbi ? \u021aide\u021b ih, d nnbi ! A wen-ini\u0263 : yugar nnbi.\n11:10 Axa\u1e6der d ne\u021b\u021ba i \u0263ef yura : Atan zewwre\u0263 zdat-ek amcegge\u025b-inu, iwakken ad iheggi abrid zdat-ek.\n11:11 A wen-ini\u0263 tide\u021b : ulac mmi-s n tme\u1e6d\u1e6dut yugaren Ye\u1e25ya a\u0263e\u1e6d\u1e6das. Lame\u025bna, amec\u1e6du\u1e25 ma\u1e0di di tgelda n igenwan, meqqe\u1e5b akte\u1e5b-is.\n11:12 Seg wussan-nni i deg i\u021bbecci\u1e5b Ye\u1e25ya a\u0263e\u1e6d\u1e6das armi \u021b-\u021bura, imdanen \u021bna\u0263en \u0263ef tgelda n igenwan, b\u0263an a \u021b-\u021bkecmen s ddre\u025b.\n11:13 Axa\u1e6der ccari\u025ba n Musa d lenbiya hed\u1e5ben-d \u0263ef tgelda n igenwan armi d lweqt n Ye\u1e25ya a\u0263e\u1e6d\u1e6das.\n11:14 Ma teb\u0263am a\u021b-\u021bfehmem, d ne\u021b\u021ba i d Ilyas-nni ilaqen a d-yas.\n11:15 Win yes\u025ban ime\u1e93\u1e93u\u0263en, isel-ed !\n11:16 \u0194er wu\u0263u\u1e5b ara metle\u0263 l\u01e7il-agi ? Icuba \u0263er warrac yeqqimen deg uzniq, ssawalen i warrac nni\u1e0den, qqa\u1e5ben asen :\n11:17 Newwet ajewwaq uur tec\u1e0di\u1e25em ara, nnecna cnawi n le\u1e25zen uur tme\u01e7dem ara.\n11:18 Axa\u1e6der Ye\u1e25ya yusa-d, ur ite\u021b ur itess, tennam : \u00ab izde\u0263-it u\u1e5bu\u1e25ani. \u00bb\n11:19 Mmi-s n bunadem yusa-d, ite\u021b, itess am wiya\u1e0d, teqqa\u1e5bem : \u00ab` I\u021bxemmim kan \u0263ef wu\u010d\u010di \u021b-\u021bissit, d amdakkul n imekkasen ixedda\u025ben akk-d yir imdanen \u00bb lame\u025bna tide\u021b tban-ed s lec\u0263al-is.\n11:20 Sidna \u0190isa ibda i\u021blumu timdinin nni i deg ixdem a\u1e6das n lbe\u1e5bhanat, axa\u1e6der imezda\u0263-is ur d-u\u0263alen ara \u0263er webrid n \u1e5aebbi.\n11:21 A nnger-im a tamdint n Kurazim ! A nnger-im a tamdint n Bitsayda ! Axa\u1e6der lemmer lbe\u1e5bhanat yed\u1e5ban deg-kkunt d\u1e5ban di temdinin n Sur akk-d Sidun, tili imezda\u0263-nsent a\u1e6das aya i sburren tacekka\u1e5bt n le\u1e25zen, qqimen \u0263ef yi\u0263i\u0263den iwakken a d sbegnen belli ndemmen u\u0263alen-d \u0263er ubrid n \u1e5aebbi.\n11:22 Daymi, imezda\u0263 n temdinin-agi ad \u021bu\u025baqben akte\u1e5b n wid n temdinin n Sur akk-d Sidun.\n11:23 Ula d kemm a tamdint n Kaferna\u1e25um, t\u0263ile\u1e0d a\u021b-\u021bali\u1e0d \u0263er igenni ? Xa\u1e6di ! A\u021b-\u021be\u021bwa\u1e0deggre\u1e0d \u0263er laxe\u1e5bt ; axa\u1e6der lemmer di temdint n Sudum i d\u1e5ban lbe\u1e5bhanat i ged\u1e5ban \u0263u\u1e5b-em, tili mazal-i\u021b ar ass-a !\n11:24 Daymi, ass n l\u1e25isab anegaru a\u021b-\u021be\u021b\u021bu\u025baqbe\u1e0d akte\u1e5b n tmurt n Sudum.\n11:25 Di lweqt-nni, Sidna \u0190isa in\u1e6deq yenna : \u1e24emmde\u0263-k a Baba \u1e5aebbi, a Bab igenwan d lqa\u025ba, imi i d tessekne\u1e0d i imec\u1e6da\u1e25 ayen i teffre\u1e0d i imusnawen d l\u025buqal.\n11:26 Ih a Baba \u1e5aebbi ! \u1e24emmde\u0263-k imi d wagi i d leb\u0263i-k.\n11:27 Baba \u1e5aebbi yerra-d kullec ger ifassen-iw. YYiwen ur yessin Mmi-s n \u1e5aebbi anagar Baba \u1e5aebbi ! Yiwen ur issin da\u0263en Baba \u1e5aebbi anagar Mmi-s akk-d win iwumi yeb\u0263a Mmi-s a s-t-id-isken.\n11:28 Aset-ed \u0263u\u1e5b-i a wid akk ye\u025byan, i\u025bebban ta\u025bekkumt \u1e93\u1e93ayen, a wen-fke\u0263 talwit d weste\u025bfu.\n11:29 Refdet \u0263ef tuyat-nwen azaglu inu tlemdem s \u0263u\u1e5b-i, axa\u1e6der ul-iw ye\u010d\u010du\u1e5b d \u1e5b\u1e5be\u1e25ma yerna d a\u1e25nin, a\u021b-\u021bafem talwit i te\u1e5bwi\u1e25in-nwen.\n11:30 Azaglu-inu yeshel, ta\u025bekkumt-iw fsuset.\n12:1 Yiwet n tikkelt, deg wass n ssebt yellan d ass n weste\u025bfu, Sidna \u0190isa izger igran n yirden. Inelmaden-is llu\u1e93en, bdan \u021bekksen-d tigedrin, te\u021b\u021ben-tent.\n12:2 Ifariziyen mi ten-walan, nnan i Sidna \u0190isa : Acu\u0263e\u1e5b inelmaden-ik xeddmen ayen i\u1e25e\u1e5bmen deg wass n weste\u025bfu ?\n12:3 Me\u025bna Sidna \u0190isa yerra-yasen : E\u025bni ur te\u0263\u1e5bim ara wayen yexdem ugellid Dawed, mi gellu\u1e93 ne\u021b\u021ba d wid yellan yid-es ?\n12:4 Mi gekcem \u0263er wexxam iqedsen, ye\u010d\u010da seg we\u0263\u1e5bum-nni ye\u021b\u021bunefken d lwe\u025bda i lmuqedmin yerna yefka seg-s i imdukkal-is !\n12:5 E\u025bni ur te\u0263\u1e5bim ara di tektabt n ccari\u025ba n Musa belli lmuqedmin xeddmen \u0263as akken d ass n weste\u025bfu yerna ma\u010d\u010di d le\u1e25\u1e5bam fell-asen ?\n12:6 Ihi a wen-d-ini\u0263 : yella dagi win yugaren axxam iqedsen.\n12:7 Lemmer tfehmem d acu i d lme\u025bna n wawal-agi : D ulawen yes\u025ban \u1e5b\u1e5be\u1e25ma i b\u0263i\u0263 ma\u010d\u010di d isflawen n lmal ttili ur t\u1e25ekkmem ara s lmut \u0263ef wid ur ne\u1e0dlim ara !\n12:8 Axa\u1e6der Mmi-s n bunadem, d ne\u021b\u021ba i g\u1e25ekmen \u0263ef wass n weste\u025bfu.\n12:9 Syenna, yerra \u0263er yiwen n l\u01e7ame\u025b,\n12:10 yella dinna yiwen wergaz iwumi yekref ufus. Ifariziyen steqsan-t nnan-as : E\u025bni i\u1e25lel use\u1e25lu deg wass n weste\u025bfu ? SSteqsan-t akka, iwakken a s-d-afen sebba s wayes ara t-s\u1e0delmen.\n12:11 Yerra-yasen : Anwa deg-wen yes\u025ban yiwet n tixsi kan, ma yella te\u0263li \u0263er tesraft deg wass n weste\u025bfu ur \u021b-id-issalay ara ?\n12:12 E\u025bni tixsi teswa akte\u1e5b n wemdan ? Ihi, ye\u1e25lel a nexdem lxi\u1e5b deg wass n weste\u025bfu !\n12:13 Imiren Sidna \u0190isa yenna-yas i wergaz-nni : Sleq-ed afus-ik ! YYe\u1e0dleq afus-is, d\u0263a yu\u0263al i\u1e63e\u1e25\u1e25a am ufus nni\u1e0den.\n12:14 Ifariziyen ff\u0263en, \u1e5bu\u1e25en mcawa\u1e5ben wway gar-asen amek ara a s-d-afen sebba s wayes ara t-n\u0263en.\n12:15 Mi gesla b\u0263an a t-n\u0263en, Sidna \u0190isa i\u1e5bu\u1e25 syenna. A\u1e6das i geddan yid-es, yesse\u1e25lay imu\u1e0dan me\u1e5b\u1e5ba,\n12:16 iqqa\u1e5b-asen : \u0194u\u1e5b-wat a\u021b-\u021bessuf\u0263em lexba\u1e5b !\n12:17 Iwakken ad id\u1e5bu wayen yenna nnbi Ice\u025bya :\n12:18 Ataya uqeddac-iw i xta\u1e5be\u0263, win e\u025bzizen fell-i, deg-s i gella lfe\u1e5b\u1e25-iw. A d-yers \u1e5a\u1e5bu\u1e25-iw fell-as, ad ibecce\u1e5b l\u1e25eqq i le\u01e7nas.\n12:19 Ur iskkaray ara ccwal, ur i\u021b\u025beggi\u1e0d ara, ur i\u021b\u1e25ettim ara iman-is \u0263ef wiya\u1e0d.\n12:20 Ur i\u021bkemmil ara i u\u0263anim iceqqeqen, ur isnusuy ara taftilt ye\u021bme\u021b\u021baten, alamma yesbedd l\u1e25eqq.\n12:21 Imiren le\u01e7nas me\u1e5b\u1e5ba ad ssirmen \u0263u\u1e5b-es, fell-as ara \u021beklen.\n12:22 Wwin-d i Sidna \u0190isa yiwen wergaz i gesgugem, i gesder\u0263el u\u1e5bu\u1e25ani. Yesse\u1e25la-t, yu\u0263al wergaz-nni ihedde\u1e5b, ye\u021bwali.\n12:23 L\u0263aci me\u1e5b\u1e5ba wehmen di Sidna \u0190isa qqa\u1e5ben : Ma\u010d\u010di d wagi i d mmi-s n Sidna Dawed, win akken ara d-yasen ?\n12:24 Mi sen-slan ifariziyen nnan : Argaz-agi yessufu\u0263 le\u01e7nun s tezmert n Balzabul i\u1e25ekkmen \u0263ef le\u01e7nun.\n12:25 Sidna \u0190isa ye\u1e93ran ayen i \u021bxemmimen, yenna-yasen : Yal tagelda anda \u021bna\u0263en l\u0263aci wway gar-asen, a\u021b-\u021bu\u0263al a\u021b-\u021benger. YYal taddart ne\u0263 yal axxam i deg \u021bna\u0263en imezda\u0263 wway gar-asen, ur d-ye\u021b\u0263imi ara.\n12:26 Ma yella Cci\u1e6dan issufu\u0263 Cci\u1e6dan, atan yeb\u1e0da d yiman-is ! Amek ihi ara d-tdum ddewla-s ?\n12:27 Ma yella nekkini ssufu\u0263e\u0263 le\u01e7nun s tezmert n Balzabul, i warraw nwen s wacu i ten ssufu\u0263en ? Daymi, d arraw-nwen ara kkun-i\u1e25asben !\n12:28 Me\u025bna ma yella nekkini s \u1e5a\u1e5bu\u1e25 n \u1e5aebbi i ssufu\u0263e\u0263 le\u01e7nun, ihi tagelda n \u1e5aebbi a\u021ban tewwe\u1e0d-ed armi d \u0263u\u1e5b-wen.\n12:29 Yiwen ur yezmir ad ikcem \u0263er wexxam n wergaz i\u01e7ehden iwakken a s-iddem ayla-as ma yella ur t-yuriz ara uqbel, me\u025bna m'ara t-yarez, imiren ad yizmir ad iddem ayen akk yellan deg wexxam-is.\n12:30 Win ur nelli ara yid-i, ixulef-iyi ; win ur d-njemme\u025b ara yid-i i\u021b\u1e0deggi\u025b !\n12:31 Daymi i wen-qqa\u1e5be\u0263 : Mkul ddnub d mkul rregmat zemren ad \u021bwasemm\u1e25en i yemdanen, ma d rregmat \u0263ef \u1e5a\u1e5bu\u1e25 iqedsen ur \u021bwasemma\u1e25ent ara !\n12:32 Yal win ara iregmen di Mmi-s n bunadem, a s-i\u021bwasame\u1e25, ma d win ara iregmen \u1e5a\u1e5bu\u1e25 iqedsen, ur s-i\u021bwasama\u1e25 ara ama di lweqt-agi, ama di lweqt i d-iteddun.\n12:33 \u0190eqlet ttej\u1e5ba \u0263er lfakya-s : ma telha ttej\u1e5ba, a d-tefk lfakya yelhan, ma yella diri-\u021b, a d-tefk lfakya n diri !\n12:34 A ccetla n izerman, amek ara d-tinim ayen yelhan ma yella kunwi diri-kkun ? Axa\u1e6der d ayen yellan deg ul i d-i\u021beff\u0263en seg imi !\n12:35 Argaz l\u025bali yessufu\u0263-ed ayen yelhan seg ugerruj yellan deg ul-is ma d amcum yessufu\u0263-ed ayen n diri si lexzin n diri yellan deg ul-is !\n12:36 Aql-i nni\u0263-awen-t : ass n l\u1e25isab, ad \u021b\u021bu\u1e25asben yemdanen \u0263ef yal awal ur nes\u025bi lme\u025bna i d-iff\u0263en seg yimi-nsen ;\n12:37 axa\u1e6der \u0263ef le\u1e25sab n imeslayen-ik ara te\u021b\u021bu\u1e25asbe\u1e0d, d imeslayen-ik ara d-isbeggnen ma d a\u1e25eqqi i telli\u1e0d ne\u0263 d amcum.\n12:38 D\u0263a kra n l\u025bulama n ccari\u025ba akk-d ifariziyen nnan i Sidna \u0190isa : A Sidi, neb\u0263a a k-nwali txedme\u1e0d yiwen n lbe\u1e5bhan.\n12:39 Sidna \u0190isa yerra yasen : L\u01e7il am-agi ijehlen ixed\u025ben \u1e5aebbi, yessutur lbe\u1e5bhan, ur a sen d-ye\u021b\u021bunefkay ara lbe\u1e5bhan nni\u1e0den anagar win n nnbi Yunes.\n12:40 Axa\u1e6der akken yes\u025bedda nnbi Yunes tlata wussan d tlata wu\u1e0dan deg u\u025bebbu\u1e0d n u\u1e25ewtiw ameqqran di leb\u1e25e\u1e5b, akken da\u0263en ara yes\u025beddi Mmi-s n bunadem tlata wussan d tlata wu\u1e0dan zdaxel n wakal.\n12:41 Ass n l\u1e25isab, imezda\u0263 n temdint n Ninebi a d-kkren \u0263er yemdanen n l\u01e7il-agi ad ccetkin fell-asen iwakken ad \u021b\u021bu\u1e25asben, axa\u1e6der nutni u\u0263alen-d \u0263er webrid mi slan i ubecce\u1e5b n nnbi Yunes. AA wen-d-ini\u0263 : atan yella dagi win yugaren nnbi Yunes !\n12:42 Ass n l\u1e25isab, tagellit n tmurt n \u1e24abac a d-tekker \u0263er yemdanen n l\u01e7il-agi a\u021b-\u021beccetki fell-asen iwakken ad \u021b\u021bu\u1e25asben, axa\u1e6der tusa-d seg yixef n ddunit iwakken a\u021b-\u021bsel i tmusni n ugellid Sliman. AAtan nni\u0263-awen yella dagi win yugaren agellid Sliman !\n12:43 M'ara ye\u021bwaqecce\u025b u\u1e5bu\u1e25ani seg yiwen wemdan, ad i\u021bezzi deg imukan yexlan, ad i\u021bqellib anda ara yaf \u1e5b\u1e5ba\u1e25a ur ye\u021b\u021baf ara.\n12:44 D\u0263a ad yini : Ad u\u0263ale\u0263 \u0263er umkan ansi i d-ff\u0263e\u0263 ! MMi gu\u0263al \u0263er wemdan-nni, ad yaf amkan d ilem, zeddig yerna iseggem.\n12:45 Imiren ad i\u1e5bu\u1e25 a d-yawi seb\u025ba i\u1e5bu\u1e25aniyen nni\u1e0den i gwe\u025b\u1e5ben akte\u1e5b-is, ad kecmen \u0263er dinna, ad zed\u0263en. L\u1e25ala n wergaz-nni a\u021b-\u021ben\u1e6da\u1e5b akte\u1e5b n tikkelt tamezwarut. Akka ara ted\u1e5bu d l\u01e7il-agi ijehlen.\n12:46 Mazal Sidna \u0190isa ye\u021bmeslay i l\u0263aci, mi d-yusa yiwen wergaz yenna-yas : Yemma-k d watmaten-ik atnan di be\u1e5b\u1e5ba, b\u0263an a k-\u1e93ren.\n12:48 Sidna \u0190isa yerra-yas : Anta i d yemma, anwi i d atmaten-iw ?\n12:49 Iwehha s ufus-is \u0263er inelmaden is yenna : D wigi i d yemma d watmaten-iw !\n12:50 Axa\u1e6der win ixeddmen leb\u0263i n Baba yellan deg igenwan, d winna i d gma, i d weltma, i d yemma.\n13:1 Ass-nni kan, Sidna \u0190isa yeffe\u0263-ed seg wexxam, i\u1e5bu\u1e25 ad iqqim rrif n leb\u1e25e\u1e5b,\n13:2 d izumal n l\u0263aci i s-d-izzin, d\u0263a yuli \u0263er teflukt, yeqqim. LL\u0263aci ibedd \u0263ef rrif n leb\u1e25e\u1e5b,\n13:3 ne\u021b\u021ba yebda isselmad-iten s lemtul iqqa\u1e5b-asen : Yiwen ufella\u1e25 yeffe\u0263 ad izre\u025b.\n13:4 Mi gzerre\u025b, \u0263lin-as kra n i\u025beqqayen rrif n webrid, usan-d ig\u1e6da\u1e6d ( if\u1e5bax igenni ) \u010d\u010dan-ten.\n13:5 Kra i\u025beqqayen nni\u1e0den \u0263lin deg wakal ye\u010d\u010du\u1e5ben d iz\u1e5ba, m\u0263in-d s lem\u0263awla axa\u1e6der ulac a\u1e6das n wakal.\n13:6 Mi gebda wez\u0263al, yezlef im\u0263an nni d\u0263a qqu\u1e5ben, axa\u1e6der ur s\u025bin ara izu\u1e5ban lqayen.\n13:7 Kra i\u025beqqayen nni\u1e0den \u0263lin ger isennanen. Isennanen-nni gman d\u0263a \u0263ummen-ten.\n13:8 Me\u025bna kra i\u025beqqayen \u0263lin deg wakal yelhan : fkan-d tigedrin, ta tefka-d meyya i\u025beqqayen, ta se\u021b\u021bin, taye\u1e0d tlatin.\n13:9 Win yes\u025ban ime\u1e93\u1e93u\u0263en isel-ed !\n13:10 Inelmaden-is qe\u1e5b\u1e5bben \u0263u\u1e5b-es, nnan-as : Acimi i sen-thedd\u1e5be\u1e0d s lemtul ?\n13:11 Yerra-yasen : Kunwi ye\u021b\u021bunefk-awen-d a\u021b \u021bissinem lba\u1e0dna n tgelda igenwan, ma d wiya\u1e0d, ur sen-d-i\u021b\u021bunefk ara.\n13:12 Axa\u1e6der win yes\u025ban a s-d-nernu alamma yella di tawant, ma d win ur nes\u025bi ara, a s-nekkes ula d ayen yes\u025ba.\n13:13 Daymi i sen-\u021bmeslaye\u0263 s lemtul, axa\u1e6der \u021bmuqulen ur \u021bwalin, \u021b\u1e25essisen ur sellen, ur fehhmen.\n13:14 S wakka, yed\u1e5ba-d yid-sen wayen i d-ixebbe\u1e5b fell-asen nnbi Ice\u025bya : A\u021b-\u021bsellem s ime\u1e93\u1e93u\u0263en-nwen, ur tfehhmem ara, a\u021b-\u021bmuqulem s wallen-nwen, ur te\u021bwalim ara,\n13:15 Imi agdud-agi qqu\u1e5ben wulawen-nsen, qeflen ime\u1e93\u1e93u\u0263en- sen, qqnen allen-nsen, iwakken ur \u021bwalin, ur sellen ; sse\u0263\u1e5ben ulawen nsen, ugin ad fehmen, axa\u1e6der lemmer tuben, u\u0263alen-d \u0263er webrid, tili sse\u1e25la\u0263 ten.\n13:16 Ma d kunwi amarezg-nwen ! Axa\u1e6der allen-nwen \u021bwalint, ime\u1e93\u1e93u\u0263en nwen sellen.\n13:17 Aql-i nni\u0263-awen tide\u021b, a\u1e6das si lenbiya akk-d imdanen i\u1e25eqqiyen i geb\u0263an ad walin ayen te\u021bwalim, ur t-walan, ad slen ayen tsellem, ur t-slin.\n13:18 A wen-d-ini\u0263 lme\u025bna n lemtel n win izerr\u025ben :\n13:19 m'ara isel wemdan i wawal ye\u025bnan tageldit n igenwan, ur t-yefhim ara, i\u021bemcabi \u0263er yiri n webrid i \u0263er t\u0263elli zzerri\u025ba ; d Cci\u1e6dan i d-i\u021basen ad iqle\u025b ayen izer\u025ben deg ul-is.\n13:20 Waye\u1e0d i\u021bemcabi \u0263er wakal-nni ye\u010d\u010du\u1e5ben d iz\u1e5ba anda te\u0263li zzerri\u025ba. M'ara isel i wawal n \u1e5aebbi, iqebbel-it s lfe\u1e5b\u1e25,\n13:21 me\u025bna ur t-ye\u021b\u021ba\u01e7\u01e7a ara ad iger izu\u1e5ban deg-s, ur ye\u021b\u021ba\u1e6d\u1e6daf ara. MM'ara d-tass lme\u1e25na ne\u0263 aqehhe\u1e5b \u0263ef ddemma n wawal n \u1e5aebbi, ad ye\u01e7\u01e7 imiren kan liman-is.\n13:22 Waye\u1e0d da\u0263en i\u021bemcabi \u0263er zzerri\u025ba ye\u0263lin ger isennanen. M'ara isel i wawal n \u1e5aebbi, i\u0263eblan n ddunit d \u1e6d\u1e6dme\u025b n rrbe\u1e25 \u021b\u0263ummun awal-nni, d\u0263a ur d-i\u021b\u021bak ara lfakya.\n13:23 Waye\u1e0d icuba da\u0263en \u0263er zzerri\u025ba ye\u0263lin deg wakal yelhan, m'ara isel i wawal n \u1e5aebbi, ifehhem-it, daymi i d-i\u021b\u021bak lfakya ! YYal a\u025beqqa i\u021b\u021bak-ed : wa tlatin, wa se\u021b\u021bin, wa meyya n t\u025beqqayin.\n13:24 Sidna \u0190isa yefka-yasen-d lemtel nni\u1e0den : Tagelda n igenwan tcuba \u0263er yiwen wergaz i gzer\u025ben irden deg iger-is.\n13:25 Yiwen yi\u1e0d mi \u1e6d\u1e6dsen akk medden, yusa-d we\u025bdaw-is izre\u025b a\u1e93ekkun ger yirden, imiren i\u1e5bu\u1e25.\n13:26 Mi d-gman yirden-nni fkan-d tigedrin, a\u1e93ekkun-nni ula d ne\u021b\u021ba igma-d.\n13:27 Iqeddacen n bab n iger-nni, usan-d \u0263u\u1e5b-es nnan-as : A Sidi, e\u025bni ma\u010d\u010di d irden i tzer\u025be\u1e0d deg iger-ik ? Ansi i d-ikka ihi u\u1e93ekkun-agi ?\n13:28 Yerra-yasen : D yiwen we\u025bdaw i gxedmen akka ! IIqeddacen-nni nnan-as : Ihi teb\u0263i\u1e0d a n\u1e5bu\u1e25 a neqle\u025b a\u1e93ekkun-agi ?\n13:29 Yerra-yasen : Xa\u1e6di ! Axa\u1e6der m'ara tekksem a\u1e93ekkun, tzemrem a d-teglum s yirden.\n13:30 Anfet-asen ad gmun di sin alamma \u021b-\u021bamegra. Ass-nni, a sen ini\u0263 i wid imeggren : qel\u025bet-ed uqbel a\u1e93ekkun, cuddet-e\u021b \u021b-\u021badliwin iwakken a tent-nesse\u1e5b\u0263 ma d irden jem\u025bet \u021ben-id \u0263er ikuffan-iw.\n13:31 Sidna \u0190isa yefka-yasen-d lemtel nni\u1e0den : Tagelda n igenwan tcuba \u0263er yiwen u\u025beqqa n uxer\u1e0del i d-iddem yiwen wergaz iwakken a t-izre\u025b deg iger-is.\n13:32 A\u025beqqa-yagi d ne\u021b\u021ba i d amec\u1e6du\u1e25 me\u1e5b\u1e5ba ger zzerri\u025bat yellan, lame\u025bna mi ge\u021bwazre\u025b, igemmu ye\u021b\u021bali alamma yekka-d sennig akk yem\u0263an n teb\u1e25irt, yeggar-ed ifurkawen d imeqqranen, ula d if\u1e5bax n igenni , bennun le\u025bcuc-nsen s ufella-s.\n13:33 Sidna \u0190isa yenna-yasen-d lemtel nni\u1e0den : Tagelda n igenwan te\u021b\u021bemcabi \u0263er temtunt ( yi\u0263es n temtunt ) ara d-teddem tme\u1e6d\u1e6dut a t-tsexle\u1e0d i tlata lkilat n uwren, s wakka arukti-nni me\u1e5b\u1e5ba ad yali.\n13:34 Sidna \u0190isa i\u021bmeslay-ed i l\u0263aci anagar s lemtul.\n13:35 I\u021bmeslay-asen-d akka iwakken ad yed\u1e5bu wayen i d-nnan lenbiya : A sen-mmeslaye\u0263 s lemtul, a sen-becc\u1e5be\u0263 ti\u0263awsiwin yeffren seg wasmi i d-texleq ddunit. cc\n13:36 Mi gekfa Sidna \u0190isa ameslay, l\u0263aci \u1e5bu\u1e25en, ne\u021b\u021ba ikcem \u0263er wexxam. Inelmaden-is qe\u1e5b\u1e5bben \u0263u\u1e5b-es nnan-as : Ssefru-ya\u0263-d lemtel n u\u1e93ekkun deg iger.\n13:37 Yerra-yasen-d : Win izerr\u025ben irden d Mmi-s n bunadem ;\n13:38 iger, d ddunit ; irden, d wid i\u021bekkan di tgelda n igenwan ; ma d a\u1e93ekkun, d widak i\u021bekkan d Cci\u1e6dan ;\n13:39 a\u025bdaw i gzerr\u025ben a\u1e93ekkun, d Cci\u1e6dan ; tamegra , \u021b-\u021baggara nddunit ; ma d wid imeggren, d lmalayekkat.\n13:40 Akken ara qell\u025ben a\u1e93ekkun \u1e6deggi\u1e5ben-t \u0263er tmes, ara ted\u1e5bu di taggara n ddunit.\n13:41 Mmi-s n bunadem a d-icegge\u025b lmalayekkat-is, ad ssuf\u0263en si tgelda-s wid akk yesse\u0263layen wiya\u1e0d di ddnub akk-d wid ixeddmen cce\u1e5b,\n13:42 d\u0263a a ten-\u1e0degg\u1e5ben \u0263er tmes anda ara yilin ime\u1e6d\u1e6dawen d nndama tameqqrant ;\n13:43 ma d wid i\u1e0du\u025ben \u1e5aebbi ad fe\u01e7\u01e7e\u01e7en am yi\u1e6dij di tgelda n Baba \u1e5aebbi. Win yes\u025ban ime\u1e93\u1e93u\u0263en isel-ed !\n13:44 Tagelda n igenwan te\u021b\u021bemcabi \u0263er ugerruj yeffren deg yiwen n yiger. Yiwen wergaz yufa-t, yu\u0263al iffer-it. Si lfe\u1e5b\u1e25-nni i gef\u1e5be\u1e25, i\u1e5bu\u1e25 izzenz ayen akk yes\u025ba iwakken ad ya\u0263 iger-nni.\n13:45 Tagelda n igenwan te\u021b\u021bemcabi da\u0263en \u0263er yiwen umetja\u1e5b i\u021bqelliben ti\u025beqcin ifazen.\n13:46 Mi gufa yiwet ifazen \u0263ef tiya\u1e0d, i\u1e5bu\u1e25 izzenz ayen akk yes\u025ba, yu\u0263al-ed yu\u0263-i\u021b.\n13:47 Tagelda n igenwan te\u021b\u021bemcabi da\u0263en \u0263er ucebbak i\u021bwadegg\u1e5ben \u0263er leb\u1e25e\u1e5b, iwakken a d-i\u1e6d\u1e6def iselman ( l\u1e25ut ) n mkul \u1e63\u1e63enf.\n13:48 M'ara ye\u010d\u010da\u1e5b, i\u1e25ewwaten a t-id-jebden \u0263er rrif n leb\u1e25e\u1e5b, d\u0263a ad qqimen iwakken ad fernen iselman, ad jem\u025ben wid yelhan, ad \u1e0degg\u1e5ben wid n diri.\n13:49 Akka ara ted\u1e5bu di taggara n ddunit : lmalayekkat a d-asent a d ddment imcumen si ger i\u1e25eqqiyen,\n13:50 iwakken a ten-\u1e0degg\u1e5bent \u0263er tmes anda llan ime\u1e6d\u1e6dawen d nndama tameqqrant.\n13:51 D\u0263a Sidna \u0190isa yenna-yasen : Tfehmem ayagi me\u1e5b\u1e5ba ? RRran-as : An\u025bam a Sidi, nefhem !\n13:52 Yerna-yasen : Ihi, yal amusnaw n ccari\u025ba ara ifehmen tagelda n igenwan, icuba \u0263er bab n wexxam i d-i\u021bekksen seg ugerruj-is ti\u0263awsiwin tijdidin, akk-d \u021b-\u021b\u0263awsiwin tiqdimin.\n13:53 Mi d-yenna lemtul-agi, Sidna \u0190isa i\u1e5bu\u1e25 syenna.\n13:54 Yerra \u0263er taddart i deg i\u021b\u021bu\u1e5bebba. Isselmad di l\u01e7ame\u025b nsen, l\u0263aci akk i\u1e25ed\u1e5ben wehmen, qqa\u1e5ben : Ansi i s-d-tekka tmusni-yagi akk d tezmert s wayes ixeddem lbe\u1e5bhanat agi ?\n13:55 Ma\u010d\u010di d ne\u021b\u021ba i d mmi-s n win ine\u01e7\u1e5ben ijegwa ? E\u025bni yemma-s ma\u010d\u010di \u021b-\u021bin iwumi qqa\u1e5ben Meryem ? AAtmaten-is ma\u010d\u010di d Ye\u025bqub, Yusef, Sem\u025bun akk-d Yuda ?\n13:56 Yessetma-s da\u0263en, ma\u010d\u010di gar ane\u0263 i llant ? Ansi i s-d-ikka ihi wannect-agi ?\n13:57 \u0194ef wayagi akk i sen-yella d sebba n tucc\u1e0da, ugin ad amnen yis. DD\u0263a Sidna \u0190isa yenna-yasen : Nnbi ye\u021bwa\u1e25qe\u1e5b anagar di tmurt-is akk-d wexxam-is.\n13:58 Sidna \u0190isa ur yexdim ara a\u1e6das n lbe\u1e5bhanat dinna, axa\u1e6der ugin ad amnen.\n14:2 yenna i iqeddacen-is : D Ye\u1e25ya a\u0263e\u1e6d\u1e6das ! D ne\u021b\u021ba i-d i\u1e25yan si ger lmegtin, daymi i ges\u025ba tazmert s wayes ixeddem lbe\u1e5bhanat.\n14:3 D agellid Hi\u1e5budus i gefkan yakan lame\u1e5b ad qnen Ye\u1e25ya s ssnasel, a t-rren \u0263er l\u1e25ebs. Ayagi \u0263ef sebba n Hi\u1e5budyad, tame\u1e6d\u1e6dut n Filibus yellan d gma-s n Hi\u1e5budus.\n14:4 Axa\u1e6der Ye\u1e25ya yella yeqqa\u1e5b i Hi\u1e5budus : D le\u1e25\u1e5bam fell-ak a\u021b-\u021bes\u025bu\u1e0d Hi\u1e5budyad \u021b-\u021bame\u1e6d\u1e6dut-ik !\n14:5 Seg imiren, Hi\u1e5budus i\u021bqellib ad ine\u0263 Ye\u1e25ya, me\u025bna ikukra agdud n wat Is\u1e5bail axa\u1e6der \u1e25esben-t akk d nnbi.\n14:6 Ass n l\u025bid n umulli n Hi\u1e5budus, yelli-s n Hi\u1e5budyad tec\u1e0de\u1e25 zdat inebgawen, te\u025b\u01e7eb-as a\u1e6das i Hi\u1e5budus,\n14:7 armi i s-i\u025buhed, a s-yefk ayen ara s-d tessuter.\n14:8 Twe\u1e63\u1e63a-\u021b yemma-s a s-tini : Awi-yi-d \u0263er dagi aqe\u1e5b\u1e5buy n Ye\u1e25ya a\u0263e\u1e6d\u1e6das deg u\u1e0debsi.\n14:9 Agellid Hi\u1e5budus i\u1e25zen a\u1e6das, yemmu\u0263ben, lame\u025bna \u0263ef ddemma n limin i geggul zdat inebgawen-is, issendeh a s-t-id-awin.\n14:10 Icegge\u025b a s-d-gezmen aqe\u1e5b\u1e5buy i Ye\u1e25ya a\u0263e\u1e6d\u1e6das di l\u1e25ebs ;\n14:11 wwin-as-t-id i teqcict-nni deg u\u1e0debsi, ne\u021b\u021bat tefka-t i yemma-s.\n14:12 Inelmaden n Ye\u1e25ya usan-d ad awin l\u01e7e\u021b\u021ba-s iwakken a \u021b-me\u1e0dlen ; imiren \u1e5bu\u1e25en ssaw\u1e0den-as lexba\u1e5b i Sidna \u0190isa.\n14:13 Mi gesla s lexba\u1e5b n lmut n Ye\u1e25ya, Sidna \u0190isa yuli \u0263er teflukt, i\u1e5bu\u1e25 iwakken ad i\u1e0de\u1e5b\u1e5bef iman-is. Akken slan l\u0263aci s wemkan i \u0263er iteddu, ff\u0263en-d si tudrin, teb\u025ben-t \u0263ef wu\u1e0dar.\n14:14 Sidna \u0190isa yers-ed si teflukt, iwala annect-nni n l\u0263aci, d\u0263a gezmen tasa-s ; ibda yesse\u1e25lay imu\u1e0dan-nsen.\n14:15 Mi ge\u0263li yi\u1e6dij, inelmaden n Sidna \u0190isa qe\u1e5b\u1e5bben \u0263u\u1e5b-es, nnan-as : Amkan-agi yexla yerna i\u1e5bu\u1e25 l\u1e25al ; ini-yasen i l\u0263aci-yagi ad \u1e5bu\u1e25en \u0263er tudrin iwakken a d-a\u0263en ayen ara \u010d\u010den.\n14:16 Sidna \u0190isa yerra-yasen : Acu\u0263e\u1e5b ara \u1e5bu\u1e25en, fket-asen kunwi ad \u010d\u010den !\n14:17 Nnan-as : \u0194u\u1e5b-nne\u0263 anagar xemsa te\u1e25bulin n we\u0263\u1e5bum, d sin iselman ( i\u1e25utiwen ).\n14:18 Yerra-yasen : Awit-\u021ben-id \u0263er dagi !\n14:19 Yenna i l\u0263aci ad qqimen \u0263ef le\u1e25cic, iddem-ed xemsa te\u1e25bulin-nni n we\u0263\u1e5bum d sin iselman-nni, yerfed allen-is \u0263er igenni, i\u1e25med \u1e5aebbi. YYeb\u1e0da a\u0263\u1e5bum-nni, yefka-t i inelmaden-is, fe\u1e5bqen-t i l\u0263aci.\n14:20 S\u010dan akk armi \u1e5bwan, yerna inelmaden-is \u010d\u010du\u1e5ben-d tnac iqecwalen n wayen i d-yegran.\n14:21 Ad ilin azal n xemsa alaf n yergazen i ge\u010d\u010dan, mbla tilawin d warrac.\n14:22 Imiren kan, Sidna \u0190isa i\u1e25\u1e5bes inelmaden-is ad alin \u0263er teflukt iwakken ad zwiren \u0263er rrif nni\u1e0den n leb\u1e25e\u1e5b, ma d ne\u021b\u021ba ad yerr l\u0263aci-nni.\n14:23 Mi \u1e5bu\u1e25en akk l\u0263aci-nni, yuli we\u1e25d-es \u0263er wedrar iwakken ad i\u1e93\u1e93all, d\u0263a ye\u0263li-d yi\u1e0d.\n14:24 Taflukt-nni tella di tlemmast n leb\u1e25e\u1e5b, lemwaji kkatent-e\u021b axa\u1e6der a\u1e0du iqubel-iten-id.\n14:25 Mi q\u1e5bib ad yali wass, ataya Sidna \u0190isa iteddu-d \u0263ef wu\u1e0dar s ufella n waman.\n14:26 Akken i t-walan ile\u1e25\u1e25u \u0263ef waman, inelmaden-is xel\u025ben qqa\u1e5ben : D lexyal ! BBdan \u021b\u025beggi\u1e0den s lxuf.\n14:27 Me\u025bna imiren kan Sidna \u0190isa yenna-yasen-d : Ur xell\u025bet ara, d nekk ! Ur \u021b\u021baggadet ara !\n14:28 D\u0263a Bu\u1e6drus yenna-yas : A Sidi, ma yella d ke\u010d\u010dini, efk-ed lame\u1e5b a n-ase\u0263 \u0263u\u1e5b-ek \u0263ef wu\u1e0dar s ufella n waman.\n14:29 Sidna \u0190isa yenna-yas : As-ed ! BBu\u1e6drus yers-ed si teflukt, ile\u1e25\u1e25u \u0263ef waman, iteddu \u0263er Sidna \u0190isa.\n14:30 Me\u025bna mi gwala yekker-ed wa\u1e0du, ikcem-it lxuf, yebda izedder, d\u0263a i\u025begge\u1e0d : A Sidi, sellek-iyi !\n14:31 Imiren kan, Sidna \u0190isa ye\u1e0dleq afus-is, ijbed-it-id yenna-yas : A win iwumi ixu\u1e63\u1e63 liman ! Acu\u0263e\u1e5b i k-ikcem ccekk ?\n14:32 Ulin \u0263er teflukt di sin, d\u0263a yers wa\u1e0du-nni.\n14:33 Inelmaden-nni yellan di teflukt se\u01e7\u01e7den zdat Sidna \u0190isa nnan-as : \u021a-\u021bide\u021b, d ke\u010d\u010d i d Mmi-s n \u1e5aebbi !\n14:34 Zegren leb\u1e25e\u1e5b-nni, armi ww\u1e0den \u0263er tmurt n Jini\u1e63aret.\n14:35 Imezda\u0263 n l\u01e7iha nni \u025beqlen Sidna \u0190isa, d\u0263a cegg\u025ben \u0263er yal l\u01e7iha n tmurt, wwin-as-d imu\u1e0dan nsen me\u1e5b\u1e5ba.\n14:36 \u1e24ellelen-t iwakken a ten-ye\u01e7\u01e7 ad nalen \u0263as ula \u021b-\u021bac\u1e0da\u1e6d uqendu\u1e5b-is. Wid akk i t-innulen, \u1e25lan.\n15:2 Acu\u0263e\u1e5b inelmaden-ik \u021b\u1e5bu\u1e93un l\u025badda i d-\u01e7\u01e7an lejdud-nne\u0263 ? M'ara qe\u1e5b\u1e5bben \u0263er lqut, ur ssiriden ara ifassen-nsen.\n15:3 Sidna \u0190isa yerra-yasen : I kunwi, acimi te\u021b\u1e5bu\u1e93um lumu\u1e5bat n \u1e5aebbi iwakken a\u021b-\u021bxedmem \u1e5b\u1e5bay nwen ?\n15:4 Yak d \u1e63\u1e63e\u1e25, \u1e5aebbi yenna-d : Qade\u1e5b baba-k d yemma-k, yyenna da\u0263en : Kra win ara ine\u025blen baba-s d yemma-s, ad ye\u021bwa\u1e25kem fell-as s lmut.\n15:5 Me\u025bna kunwi teqqa\u1e5bem : win yefkan d lwe\u025bda i \u1e5aebbi ayen s wacu i glaq ad i\u025biwen imawlan-is,\n15:6 am akken d imawlan-is i g\u025bawen. SS wakka, tbeddlem awal n \u1e5aebbi, iwakken a\u021b-\u021bes\u025beddim l\u025baddat-nwen.\n15:7 Ay at sin wudmawen ! \u021a-\u021bide\u021b i d-yenna nnbi Ice\u025bya mi d-icar fell awen :\n15:8 Y enna-d \u1e5aebbi : agdud-agi, i\u021b\u025buzzu-yi s wawal kan, ma d ul-is yeb\u025bed fell-i.\n15:9 L e\u025bbada-nsen ur tes\u025bi ara azal axa\u1e6der sselmaden ayen i d-yekkan seg imdanen.\n15:10 D\u0263a Sidna \u0190isa yessawel i l\u0263aci yenna-yasen : Sem\u1e25esset-d tfehmem ayagi :\n15:11 ma\u010d\u010di d ayen i gke\u010d\u010dmen seg imi n wemdan i t-yessamasen, me\u025bna d ayen i d-i\u021beff\u0263en seg-s.\n15:12 Inelmaden qe\u1e5b\u1e5bben-d \u0263er Sidna \u0190isa nnan-as : Ifariziyen i\u0263a\u1e0d-iten l\u1e25al \u0263ef yimeslayen-nni i d-tenni\u1e0d !\n15:13 Yerra-yasen : Yal im\u0263i ur ye\u1e93\u1e93i ara Baba yellan deg igenwan, ad ye\u021bwaqle\u025b.\n15:14 Anfet-asen, d ider\u0263alen ite\u1e6d\u1e6dfen afus i ider\u0263alen nni\u1e0den ; ma yella ader\u0263al ye\u1e6d\u1e6def afus i waye\u1e0d, ad \u0263lin i sin \u0263er tesraft.\n15:15 Bu\u1e6drus yen\u1e6deq-ed yenna-yas : Ssefhem-a\u0263-d lemtel-agi.\n15:16 Sidna \u0190isa yenna i inelmaden-is : E\u025bni ula d kunwi txu\u1e63\u1e63-ikkun lefhama ?\n15:17 Ur tefhimem ara belli ayen ike\u010d\u010dmen seg imi n wemdan ye\u021b\u021bara \u0263er u\u025bebbu\u1e0d-is, mbe\u025bd ad i\u021bwadegge\u1e5b \u0263er be\u1e5b\u1e5ba.\n15:18 Lame\u025bna ayen i d-iteff\u0263en seg imi itekk-ed seg wul, d annect-agi i gessen\u01e7asen amdan.\n15:19 Axa\u1e6der seg wul i d-tekken : yir ixemmimen, timeg\u1e5ba\u1e0d, zzna ( l\u025ba\u1e5b ), yir tikli, tuker\u1e0da, cchada n \u1e93\u1e93u\u1e5b akk-d rregmat.\n15:20 Atan wayen yessen\u01e7asen amdan, ma\u010d\u010di d u\u010d\u010di mbla tarda n ifassen i t-yessen\u01e7asen.\n15:21 Sidna \u0190isa i\u1e5bu\u1e25 syenna, iteddu \u0263er tmura n Sur akk-d Sidun.\n15:22 Yiwet n tme\u1e6d\u1e6dut n at Ken\u025ban i gzed\u0263en dinna tusa-d \u0263u\u1e5b-es te\u021b\u025beggi\u1e0d : A Sidi, a mmi-s n Sidna Dawed, \u1e25unn fell-i ! A\u021ban yelli izde\u0263-i\u021b u\u1e5bu\u1e25ani, i\u025be\u021b\u021beb-i\u021b a\u1e6das.\n15:23 Sidna \u0190isa ur as-d-yerri ula d yiwen wawal. Inelmaden-is qe\u1e5b\u1e5bben \u0263u\u1e5b-es nnan-as : Err-as awal, axa\u1e6der tugi a\u021b-\u021be\u1e25bes le\u025bya\u1e0d deffir-nne\u0263.\n15:24 Sidna \u0190isa yerra-yasen : \u021a\u021bucegg\u025be\u0263-ed anagar \u0263er wulli i\u1e0da\u025ben n wat Is\u1e5bail !\n15:25 Lame\u025bna tame\u1e6d\u1e6dut-nni te\u0263li \u0263er i\u1e0da\u1e5b\u1e5ben n Sidna \u0190isa tenna-yas : A Sidi \u025biwen-iyi di le\u025bnaya-k !\n15:26 Yenna-yas : Ur ilaq ara ad i\u021bwakkes we\u0263\u1e5bum i warrac, ad i\u021bwadegge\u1e5b i yeqjan.\n15:27 Tenna-yas : \u021a-\u021bide\u021b a Sidi, lame\u025bna ula d iqjan te\u021b\u021ben tife\u021b\u021bitin i d-i\u0263ellin si \u1e6d\u1e6dabla n imawlan-nsen.\n15:28 Imiren Sidna \u0190isa yerra-yas : Liman-inem d ameqqran a tame\u1e6d\u1e6dut ! A m-ye\u021bwaxdem wayen teb\u0263i\u1e0d ! IImiren kan yelli-s te\u1e25la.\n15:29 Sidna \u0190isa i\u1e5bu\u1e25 syenna, yerra \u0263er le\u01e7wahi n leb\u1e25e\u1e5b n Jlili, yuli \u0263er wedrar yeqqim.\n15:30 Usan-d \u0263u\u1e5b-es l\u0263aci d izumal, wwin-as-d iqu\u1e0daren, ider\u0263alen, ine\u025byuba, igugamen d wa\u1e6das imu\u1e0dan nni\u1e0den. Ssersen-ten \u0263er zdat i\u1e0da\u1e5b\u1e5ben-is d\u0263a isse\u1e25la-ten.\n15:31 Imdanen me\u1e5b\u1e5ba t\u025be\u01e7ben mi walan igugamen hedd\u1e5ben, ine\u025byuba \u1e25lan, iqu\u1e0daren le\u1e25\u1e25un, ider\u0263alen \u021bwalin, d\u0263a bdan \u021b\u1e25emmiden Sidi \u1e5aebbi Illu n wat Is\u1e5bail.\n15:32 Sidna \u0190isa yessawel-asen i inelmaden-is yenna-yasen : \u0194a\u1e0den-iyi l\u0263aci-agi axa\u1e6der tlata wussan aya segmi llan yid-i, yerna ur s\u025bin d acu ara \u010d\u010den. Ur b\u0263i\u0263 ara a ten-rre\u0263 akka llu\u1e93en ne\u0263 m'ulac ad feclen deg webrid.\n15:33 Inelmaden nnan-as : Ansi ara \u0263-d-yekk deg umkan-agi yexlan, we\u0263\u1e5bum ara isse\u1e5bwun annect agi n l\u0263aci ?\n15:34 Sidna \u0190isa yenna-yasen : Ac\u1e25al n te\u1e25bulin n we\u0263\u1e5bum i tes\u025bam \u0263u\u1e5b-wen ? RRran-as : Seb\u025ba n te\u1e25bulin akk-d kra n iselman ( i\u1e25utiwen ).\n15:35 Imiren yenna i l\u0263aci ad qqimen \u0263er lqa\u025ba.\n15:36 Yeddem-ed ti\u1e25bulin-nni n we\u0263\u1e5bum d iselman-nni, i\u1e25med \u1e5aebbi, yeb\u1e0da-ten, yefka-ten i inelmaden-is iwakken a ten-fe\u1e5bqen i l\u0263aci.\n15:37 S\u010dan akk armi \u1e5bwan, yerna \u010d\u010du\u1e5ben seb\u025ba n tqecwalin n wayen i d-yegran.\n15:38 Ger wid ye\u010d\u010dan, llan azal n \u1e5beb\u025ba alaf n yergazen mbla tilawin d warrac.\n15:39 Mi gerra l\u0263aci, Sidna \u0190isa yerkeb di teflukt, i\u1e5bu\u1e25 \u0263er tmurt n Magadan.\n16:1 Ifariziyen d isaduqiyen qe\u1e5b\u1e5bben \u0263er Sidna \u0190isa, ssutren-as lbe\u1e5bhan iwakken a t-je\u1e5bben.\n16:2 Sidna \u0190isa yerra-yasen : M'ara ye\u0263li yi\u1e6dij, twalam igenni d azegga\u0263, teqqa\u1e5bem ad yelhu l\u1e25al.\n16:3 Akken da\u0263en ta\u1e63eb\u1e25it, teqqa\u1e5bem a d-iwwet ugeffur ( lehwa ) axa\u1e6der yella usigna. AAmek ! Tesnem a\u021b-\u021bfehmem l\u1e25ala n igenni, ur tezmirem ara a\u021b-\u021bfehmem lica\u1e5bat ye\u025bnan lweqt-agi !\n16:4 L\u01e7il am agi ijehlen ixed\u025ben \u1e5aebbi, yessutur lbe\u1e5bhan ! Me\u025bna ur as-d-i\u021b\u021bunefkay ara lbe\u1e5bhan nni\u1e0den anagar win n nnbi Yunes ! DD\u0263a i\u1e5bu\u1e25, ye\u01e7\u01e7a-ten.\n16:5 Mi zegren agumma\u1e0d i leb\u1e25e\u1e5b, inelmaden-is \u021b\u021bun ur wwin ara yid-sen a\u0263\u1e5bum.\n16:6 D\u0263a Sidna \u0190isa yenna-yasen : \u1e24adret iman-nwen seg i\u0263es n temtunt n ifariziyen d isaduqiyen !\n16:7 Inelmaden xemmemen deg yiman-nsen, nnan : Ahat imi ur d-newwi ara yid-nne\u0263 a\u0263\u1e5bum i \u0263-d-yenna akka !\n16:8 Sidna \u0190isa i\u1e93ra \u0263ef wacu i \u021bxemmimen yenna-yasen : A wid i gxu\u1e63\u1e63en di liman ! T\u0263ilem imi ur d-tewwim ara a\u0263\u1e5bum i wen-d-nni\u0263 akka ?\n16:9 Mazal ur tefhimem ara ? E\u025bni te\u021b\u021bum yakan xemsa te\u1e25bulin-nni n we\u0263\u1e5bum i b\u1e0di\u0263 i xemsa alaf n yergazen ? D wac\u1e25al n tqecwalin i d-yegran ?\n16:10 Ur tecfim ara da\u0263en \u0263ef seb\u025ba te\u1e25bulin-nni n we\u0263\u1e5bum i b\u1e0di\u0263 i \u1e5beb\u025ba alaf n yemdanen, d wac\u1e25al n tqecwalin i d-yegran ?\n16:11 Amek akka ur tefhimem ara belli ma\u010d\u010di \u0263ef we\u0263\u1e5bum i wen-d-\u021bmeslaye\u0263 ? \u1e24\u1e24adret iman-nwen seg i\u0263es n temtunt n ifariziyen d isaduqiyen !\n16:12 Imiren inelmaden-is fehmen belli ma\u010d\u010di \u0263ef yi\u0263es n temtunt i sen-d-immeslay, lame\u025bna ad \u1e25adren iman-nsen \u0263ef wuselmed n ifariziyen d isaduqiyen.\n16:13 Mi gewwe\u1e0d Sidna \u0190isa \u0263er tmurt n Qi\u1e63arya n Filibus, isteqsa inelmaden is, yenna-yasen : D acu i-d-qqa\u1e5ben medden \u0263ef Mmi-s n bunadem ?\n16:14 Rran-as : Kra qqa\u1e5ben d Ye\u1e25ya a\u0263e\u1e6d\u1e6das, wiya\u1e0d qqa\u1e5ben d nnbi Ilyas, wiya\u1e0d da\u0263en d nnbi Irmiya ne\u0263 d yiwen ger lenbiya.\n16:15 I kunwi, d acu-yi \u0263u\u1e5b-wen ?\n16:16 Bu\u1e6drus yerra-yas : Ke\u010d\u010d d Lmasi\u1e25, Mmi-s n Sidi \u1e5aebbi yeddren !\n16:17 Yen\u1e6deq \u0263u\u1e5b-es yenna-yas : Amarezg-ik, a Bu\u1e6drus a mmi-s n Yunes, axa\u1e6der ma\u010d\u010di s tmusni-inek i tfehme\u1e0d ayagi, me\u025bna d Baba \u1e5aebbi yellan deg igenwan i k-t-id-isbegnen.\n16:18 Ihi nekk a k-ini\u0263 : ke\u010d\u010d a Bu\u1e6drus d az\u1e5bu, yerna \u0263ef wez\u1e5bu-agi ara bnu\u0263 tajma\u025bt-iw, ula \u021b-\u021binezmarin n lmut ur \u021b\u021ba\u1e6d\u1e6dafent ara zdat-es !\n16:19 Ad a k-fke\u0263 tisura n tgelda n igenwan, ayen ara teqne\u1e0d ne\u0263 ayen iwumi ara tserr\u1e25e\u1e0d di ddunit, ad ye\u021bwaqbel deg igenwan.\n16:20 Imiren yume\u1e5b i yinelmaden-is ur qqa\u1e5ben ula i yiwen belli d ne\u021b\u021ba i d Lmasi\u1e25.\n16:21 Seg imiren, Sidna \u0190isa yebda issefham i inelmaden-is belli ilaq ad yali \u0263er temdint n Lquds, anda ara yenne\u025btab a\u1e6das ger ifassen n lmuqedmin akk-d l\u025bulama n ccari\u025ba ad \u1e25ekmen fell-as s lmut, ass wis tlata a d-i\u1e25yu si ger lmegtin.\n16:22 Bu\u1e6drus ijbed-it we\u1e25d-es, yenna yas : A k-imne\u025b \u1e5aebbi a Sidi, a wer d-yed\u1e5bu wayagi yid-ek !\n16:23 Sidna \u0190isa idewwe\u1e5b \u0263u\u1e5b-es, yenna-yas : Be\u025b\u025bed akkin fell-i a Cci\u1e6dan ! Teb\u0263i\u1e0d a\u021b-\u021bili\u1e0d d ugur deg webrid-iw ! Ixemmimen-ik ur d-kkan ara s \u0263u\u1e5b \u1e5aebbi, lame\u025bna d ixemmimen n yemdanen.\n16:24 Imiren Sidna \u0190isa yenna i inelmaden-is : Kra win yeb\u0263an ad iddu yid-i, ilaq-as ur ye\u021b\u1e25ebbi\u1e5b ara \u0263ef yiman-is, ad iqbel ad in\u025be\u021b\u021bab \u0263ef ddemma n yisem-iw, a yi-d-itbe\u025b.\n16:25 Kra win yeb\u0263an ad isellek ta\u1e5bwi\u1e25t-is, a s-t\u1e5bu\u1e25 ; ma d win iseblen ta\u1e5bwi\u1e25t-is \u0263ef ddemma-w ad yu\u0263al a \u021b-yaf.\n16:26 D acu n lfayda ara yes\u025bu wemdan di rrbe\u1e25 n ddunit me\u1e5b\u1e5ba, ma yella yes\u1e5bu\u1e25 ta\u1e5bwi\u1e25t-is ? Ne\u0263 d acu i gezmer a t-yefk wemdan iwakken a d-ifdu ta\u1e5bwi\u1e25t-is ?\n16:27 Axa\u1e6der Mmi-s n bunadem a d-yas ne\u021b\u021ba d lmalayekkat-is di l\u025ba\u1e0dima n Baba-s, ad yefk i yal yiwen ayen yuklal, yal yiwen \u0263ef le\u1e25sab n lef\u025bayel-is.\n16:28 A wen-ini\u0263 tide\u021b : llan kra seg wid yellan dagi, ur \u021bme\u021b\u021baten ara alamma \u1e93ran Mmi-s n bunadem yusa-d am ugellid.\n17:1 Mi \u025beddan se\u021b\u021ba wussan, Sidna \u0190isa yewwi yid-es Bu\u1e6drus, Ye\u025bqub akk-d gma-s Yu\u1e25enna, ulin \u0263er wedrar e\u025blayen, anda qqimen \u1e0de\u1e5bfen iman-nsen.\n17:2 Taswi\u025bt kan ibeddel \u1e63\u1e63ifa zdat sen, walan udem-is ye\u021bfe\u01e7\u01e7i\u01e7 am yi\u1e6dij, llebsa-s tu\u0263al \u021b-\u021bamellalt, tecce\u025bce\u025b am tafat.\n17:3 A ten-aya deh\u1e5ben-asen-d Sidna Musa akk-d Sidna Ilyas \u021bmeslayen d Sidna \u0190isa.\n17:4 Bu\u1e6drus in\u1e6deq yenna i Sidna \u0190isa : A Sidi, yelha ma neqqim dagi, ma teb\u0263i\u1e0d ad sbedde\u0263 tlata iqi\u1e0dunen : yiwen i ke\u010d\u010d, yiwen i Sidna Musa, waye\u1e0d i Sidna Ilyas.\n17:5 Mazal-it i\u021bmeslay mi d-ters yiwet n tagut i\u021bfe\u01e7\u01e7i\u01e7en t\u0263umm-iten. Si tagut-nni ten\u1e6deq-ed yiwet n ta\u0263ect, tenna-d : Wagi d Mmi e\u025bzizen deg-s i gella lfe\u1e5b\u1e25-iw, sme\u1e25siset-as !\n17:6 Mi slan i ta\u0263ect-nni, inelmaden ikcem-iten lxuf, \u0263lin \u0263ef wudem.\n17:7 Sidna \u0190isa yessers afus-is fell-asen, yenna-yasen : Ur \u021b\u021baggadet ara, kkret !\n17:8 Mi refden allen-nsen, ur walan ula d yiwen nni\u1e0den anagar Sidna \u0190isa.\n17:9 Akken i d-\u021badren seg wedrar, Sidna \u0190isa yume\u1e5b-iten yenna-yasen : Ur qqa\u1e5bet i yiwen wayen akka twalam alamma ye\u1e25ya-d Mmi-s n bunadem si ger lmegtin.\n17:10 Inelmaden steqsan Sidna \u0190isa nnan-as : Iwacu imusnawen n ccari\u025ba qqa\u1e5ben-d : \u00ab Ilaq a d-yas nnbi Ilyas d amezwaru ? \u00bb\n17:11 Yerra-yasen : \u021a-\u021bide\u021b ilaq a d-yas nnbi Ilyas d amezwaru, iwakken ad iseggem kullec.\n17:12 Ma d nekk aql-i nni\u0263 awen-d : nnbi Ilyas yusa-d yakan, lame\u025bna imdanen ur t-\u025bqilen ara yerna xedmen deg-s akken i sen ihwa. Akka da\u0263en ara in\u025be\u021b\u021bab Mmi-s n bunadem ger ifassen-nsen !\n17:13 Inelmaden fehmen imiren belli i\u021bmeslay-asen-d \u0263ef Ye\u1e25ya a\u0263e\u1e6d\u1e6das.\n17:14 Mi ww\u1e0den \u0263er wanda llan l\u0263aci, yiwen wergaz iqe\u1e5b\u1e5beb-ed \u0263er Sidna \u0190isa, ye\u0263li \u0263ef tgecrar zdat-es yenna yas :\n17:15 A Sidi, \u1e25unn \u0263ef mmi ! Atan kkaten-t imsigman, yenne\u025btab a\u1e6das ! Ac\u1e25al d abrid i ge\u0263li \u0263er tmes ne\u0263 \u0263er waman,\n17:16 wwi\u0263-t-id i inelmaden-ik, me\u025bna ur zmiren ara a t-sse\u1e25lun.\n17:17 In\u1e6deq Sidna \u0190isa yenna-yasen : A l\u01e7il ijehlen, i\u025bewjen ! Ar melmi ara yili\u0263 yid-wen ? Ar melmi ara wen-seb\u1e5be\u0263 ? Awit-iyi-d aqcic-agi \u0263er dagi !\n17:18 Sidna \u0190isa i\u025begge\u1e0d \u0263ef l\u01e7en-nni, yume\u1e5b-as ad iffe\u0263 seg weqcic-nni. Imiren kan, aqcic-nni ye\u1e25la.\n17:19 Mi llan inelmaden iman-nsen, qe\u1e5b\u1e5bben \u0263er Sidna \u0190isa nnan-as : Acu\u0263e\u1e5b nukkni ur nezmir ara a t-nessufe\u0263 ?\n17:20 Sidna \u0190isa yerra-yasen : Axa\u1e6der txu\u1e63\u1e63em di liman ! Aql-i nni\u0263-awen, lemmer tes\u025bim liman annect n u\u025beqqa n uxer\u1e0del, tili a s tinim i wedrar-agi, qle\u025b iman-ik sya \u0263er dihin ad iqle\u025b. Ulac wayen iwumi ur te\u021b\u021bizmirem ara.\n17:21 S\u1e63enf-agi n le\u01e7nun \u021beff\u0263en anagar s t\u1e93allit d u\u1e93ummu.\n17:22 Mi llan di tmurt n Jlili, Sidna \u0190isa yenna-yasen : Mmi-s n bunadem ad i\u021b\u021busellem ger ifassen n yemdanen ;\n17:23 a t-n\u0263en, me\u025bna ass wis tlata a d-i\u1e25yu si ger lmegtin. DD\u0263a inelmaden ikcem-iten le\u1e25zen d ameqqran.\n17:24 Mi gewwe\u1e0d Sidna \u0190isa akk-d inelmaden-is \u0263er Kaferna\u1e25um, imekkasen n l\u01e7ame\u025b qe\u1e5b\u1e5bben-d \u0263er Bu\u1e6drus nnan-as : E\u025bni Ssid-nwen ur i\u021bxelli\u1e63 ara tabzert n l\u01e7ame\u025b ?\n17:25 Yerra-yasen Bu\u1e6drus : Ih, ad ixelle\u1e63 ! Imiren kan mi gekcem Bu\u1e6drus \u0263er wexxam, Sidna \u0190isa ilu\u025ba-t, yenna-yas : D acu twala\u1e0d a Bu\u1e6drus ? Anwa i glaqen ad ixelle\u1e63 tabzert i igelliden n ddunit-a , d arraw-nsen ne\u0263 d ibe\u1e5b\u1e5baniyen ?\n17:26 Bu\u1e6drus yerra-yas : D ibe\u1e5b\u1e5baniyen ! DD\u0263a Sidna \u0190isa yerra-yas-d : Ihi arraw n tmurt ur \u021bxelli\u1e63en ara !\n17:27 Lame\u025bna iwakken ur ten-ye\u021b\u0263a\u1e0d ara l\u1e25al, \u1e5bu\u1e25, \u1e0degge\u1e5b tasenna\u1e5bt \u0263er leb\u1e25e\u1e5b, aslem ( a\u1e25ewtiw ) amezwaru ara d-te\u1e6d\u1e6dfe\u1e0d, ldi-yas imi, a\u021b-\u021bafe\u1e0d deg-s a\u1e63urdi n lfe\u1e6d\u1e6da, efk-asen-t d lexla\u1e63 n tebzert-nne\u0263 nekk yid-ek.\n18:1 Di lweqt-nni, inelmaden n Sidna \u0190isa qe\u1e5b\u1e5bben \u0263u\u1e5b-es nnan-as : -- Anwa i d ameqqran di tgelda n igenwan ?\n18:2 Sidna \u0190isa yessawel i yiwen weqcic isbedd-it di tlemmast-nsen, yenna :\n18:3 A wen-d-ini\u0263 tide\u021b ; ma yella ur d-tu\u0263alem ara \u0263er webrid, m'ur teqbilem ara a\u021b-\u021bilim .am arrac imec\u1e6du\u1e25en, ur tke\u010d\u010dmem ara \u0263er tgelda n igenwan !\n18:4 Daymi, win ara ye\u1e63\u1e63em\u1e93in iman-is am weqcic-agi amec\u1e6du\u1e25, d ne\u021b\u021ba ara yilin d ameqqran di tgelda n igenwan.\n18:5 Kra win ara yest\u1e5be\u1e25ben s weqcic am-agi \u0263ef ddemma n yisem-iw, yis-i i ges\u1e6der\u1e25eb.\n18:6 Win ara yesse\u0263lin di ddnub ula d yiwen seg imec\u1e6du\u1e25en-agi yumnen yis-i, axi\u1e5b-as a s-cudden a\u0263a\u1e5bef n tsirt \u0263er temge\u1e5b\u1e6d-is, a t-\u1e0degg\u1e5ben \u0263er leb\u1e25e\u1e5b ad i\u0263\u1e5beq.\n18:7 A tawa\u0263it n ddunit-a, imi qwant tsebbiwin n tucc\u1e0da ! Axa\u1e6der tisebbiwin n tucc\u1e0da ulamek ur d-\u021bilint ara. Me\u025bna a nnger n win ara yilin d sebba-nsent.\n18:8 Ma yella d afus-ik ne\u0263 d a\u1e0da\u1e5b-ik ara k-yesse\u0263lin di ddnub, gzem-iten, \u1e0degge\u1e5b-iten akkin fell-ak, axi\u1e5b-ak a\u021b-\u021bili\u1e0d di ddunit d a\u025biban wala a\u021b-\u021bes\u025bu\u1e0d sin i\u1e0da\u1e5b\u1e5ben ne\u0263 sin ifassen, a\u021b-\u021bwa\u1e0degg\u1e5be\u1e0d \u0263er tmes ur nxe\u021b\u021bi.\n18:9 Ma yella da\u0263en \u021b-\u021bi\u1e6d-ik ara k-yawin \u0263er ddnub, qle\u025b-i\u021b \u1e0degge\u1e5b-i\u021b akkin fell-ak ; axi\u1e5b-ik a\u021b-\u021bili\u1e0d di ddunit s yiwet n ti\u1e6d wala a\u021b-\u021bes\u025bu\u1e0d snat wallen, a\u021b- \u021bwa\u1e0degg\u1e5be\u1e0d \u0263er tmes n \u01e7ahennama.\n18:10 \u0194u\u1e5b-wat a\u021b-\u021b\u1e25eq\u1e5bem yiwen seg imec\u1e6du\u1e25en-agi axa\u1e6der aql-i nni\u0263 awen-t : lmalayekkat-nsen deg igenwan, zgant daymen zdat Baba \u1e5aebbi.\n18:11 [ Axa\u1e6der Mmi-s n bunadem yusa-d ad isellek wid i g\u1e0da\u025ben ! ]\n18:12 D acu twalam ? Ma yella win yes\u025ban meyya wulli d\u0263a te\u025b\u1e5beq-as yiwet deg-sent, ur i\u021b\u021ba\u01e7a ara \u021bes\u025ba u\u021bes\u025bin-nni nni\u1e0den di lexla iwakken a d-inadi \u0263ef tin i s-i\u025be\u1e5bqen ?\n18:13 A wen-ini\u0263 tide\u021b : ma yufa-\u021b, ad if\u1e5be\u1e25 yis akte\u1e5b n \u021bes\u025ba u\u021bes\u025bin-nni nni\u1e0den ur ne\u025b\u1e5biq ara.\n18:14 Akken da\u0263en Baba-twen \u1e5aebbi yellan deg igenwan, ur yeb\u0263i ara a s-i\u1e5bu\u1e25 ula d yiwen seg imec\u1e6du\u1e25en-agi.\n18:15 Ma yella twala\u1e0d gma-k idneb, \u1e5bu\u1e25 \u1e6d\u1e6def-it we\u1e25d-es, nhu-t. Ma yu\u0263-ak awal, atan treb\u1e25e\u1e0d-ed gma-k !\n18:16 Me\u025bna ma igumma a k-d-isel, awi yiwen ne\u0263 sin yemdanen yid-ek, iwakken ad ilin d inigan m'ara tefru temsalt , akken i d-tenna ccari\u025ba.\n18:17 Ma yugi a sen-isel, ssiwe\u1e0d tamsalt \u0263er tejma\u025bt n watmaten, m'ur i\u1e25ess ara ula i tejma\u025bt-nni, \u1e25seb-it am akken d akafriw ne\u0263 d amekkas axabit !\n18:18 A wen-ini\u0263 tide\u021b : ayen akk ara teqnem ne\u0263 iwumi ara tserr\u1e25em di ddunit, ad ye\u021bwaqbel deg igenwan.\n18:19 A wen-ini\u0263 da\u0263en s tide\u021b : ma yella sin seg-wen ddukklen iwakken ad ssutren kra di t\u1e93allit, Baba \u1e5aebbi yellan deg igenwan, a sen-t-id-yefk.\n18:20 Axa\u1e6der anda ara dduklen sin ne\u0263 tlata s yisem-iw, ad \u1e25ed\u1e5be\u0263 gar-asen !\n18:21 Imiren Bu\u1e6drus iqe\u1e5b\u1e5beb \u0263u\u1e5b-es yenna-yas : A Sidi, ac\u1e25al n tikkal ilaq ad sem\u1e25e\u0263 i gma ma ye\u1e0dlem-iyi, armi d seb\u025ba n tikkal ? SSidna \u0190isa yerra yas :\n18:22 Xa\u1e6di ! Ur k-d-nni\u0263 ara alamma d seb\u025ba tikkal, me\u025bna alamma d seb\u025bin iberdan seb\u025ba tikkal !\n18:23 Daymi, tagelda n igenwan te\u021b\u021bemcabi \u0263er yiwen ugellid yeb\u0263an ad im\u1e25asab ne\u021b\u021ba d iqeddacen-is.\n18:24 Akken yebda le\u1e25sab, wwin-as-d yiwen uqeddac iwumi ye\u021b\u021balas imelyunen.\n18:25 Imi ur yes\u025bi ara s wacu ara ixelle\u1e63, agellid-nni ifka lame\u1e5b a ten-zzenzen d aklan, s ne\u021b\u021ba s tme\u1e6d\u1e6dut-is, s warraw-is d wayen akk yes\u025ba, iwakken ad ixelle\u1e63 \u1e6d\u1e6dlaba-ines.\n18:26 Aqeddac-nni ye\u0263li \u0263er i\u1e0da\u1e5b\u1e5ben n ugellid, i\u1e25ellel-it yenna-yas : \u00ab` A Sidi, \u1e63\u1e63be\u1e5b kra wussan, ad u\u0263ale\u0263 a k-xell\u1e63e\u0263 ayen akk i yi te\u021b\u021balase\u1e0d. \u00bb\n18:27 Imi i t-i\u0263a\u1e0d a\u1e6das, agellid-nni isume\u1e25-as \u1e6d\u1e6dlaba-ines iserre\u1e25-as ad i\u1e5bu\u1e25.\n18:28 Akken kan i d-iffe\u0263 uqeddac-nni immuger-ed yiwen seg imdukkal-is ixeddmen yid-es, iwumi ye\u021b\u021balas kra n i\u1e63urdiyen. IIkker \u0263u\u1e5b-es ye\u1e6d\u1e6def-it si temge\u1e5b\u1e6d yeqqa\u1e5b-as : \u00ab Err-iyi-d ayen i k \u021b\u021balase\u0263 ! \u00bb\n18:29 Amdakkel-is ye\u0263li \u0263er i\u1e0da\u1e5b\u1e5ben-is i\u1e25ellel-it, yenna-yas : \u00ab S\u1e63be\u1e5b kra n wussan, ad u\u0263ale\u0263 a k-xell\u1e63e\u0263 ! \u00bb\n18:30 Lame\u025bna ur yeqbil ara ad isbe\u1e5b, yerra-t \u0263er l\u1e25ebs, alamma te\u021bwaxelle\u1e63 \u1e6d\u1e6dlaba-ines.\n18:31 Iqeddacen nni\u1e0den mi walan ayen yed\u1e5ban, i\u0263a\u1e0d-iten l\u1e25al, d\u0263a \u1e5bu\u1e25en \u1e63\u1e63aw\u1e0den lexba\u1e5b i ugellid.\n18:32 Agellid icegge\u025b \u0263er uqeddac-nni akken a d-yas, d\u0263a yenna-yas : \u00ab A yir amdan ! Mi te\u021b\u1e25ellile\u1e0d deg-i, e\u025bni ur k-sum\u1e25e\u0263 ara akk \u1e6d\u1e6dlaba-inek ?\n18:33 Acu\u0263e\u1e5b ihi ur as-tsum\u1e25e\u1e0d ara i wemdakkel-ik akken i k-sum\u1e25e\u0263 nekkini ? \u00bb\n18:34 Agellid-nni yez\u025bef a\u1e6das, yerra aqeddac-nni \u0263er l\u1e25ebs, iwakken ad in\u025be\u021b\u021bab alamma te\u021bwaxelle\u1e63 \u1e6d\u1e6dlaba ines.\n18:35 Akken da\u0263en ara wen-yexdem Baba \u1e5aebbi yellan deg igenwan ma ur te\u021bsama\u1e25em ara i watmaten-nwen seg ul.\n19:1 Mi gekfa lew\u1e63ayat-agi, Sidna \u0190isa i\u1e5bu\u1e25 si tmurt n Jlili \u0263er tmurt n Yahuda \u0263er le\u01e7wahi n wasif n Urdun.\n19:2 A\u1e6das n l\u0263aci i t-i\u1e0def\u1e5ben \u0263er dinna, d\u0263a yesse\u1e25la wid akk ihelken.\n19:3 Kra ifariziyen qe\u1e5b\u1e5bben-d \u0263u\u1e5b-es iwakken a t-je\u1e5bben, nnan-as : E\u025bni ccari\u025ba-nne\u0263 tsume\u1e25-as i wergaz ad yebru i tme\u1e6d\u1e6dut-is \u0263ef yal sebba yellan ?\n19:4 Yerra-yasen : Ur te\u0263\u1e5bim ara ayen i d-teqqa\u1e5b ccari\u025ba : di tazwara Sidi \u1e5aebbi ixleq-ed argaz \u021b-\u021bme\u1e6d\u1e6dut,\n19:5 yenna-d : AArgaz ad ye\u01e7\u01e7 baba-s d yemma-s, iiwakken ad i\u025bic ne\u021b\u021ba \u021b-\u021bme\u1e6d\u1e6dut-is, dd\u0263a di sin yid-sen, ad u\u0263alen d yiwen.\n19:6 S wakka ur llin ara d sin, me\u025bna u\u0263alen d yiwen. Ur as-ilaq ara ihi i wemdan ad if\u1e5beq ayen yesdukkel Sidi \u1e5aebbi !\n19:7 Nnan-as : Acu\u0263e\u1e5b ihi Sidna Musa ye\u01e7\u01e7a ya\u0263-d lqanun belli m'ara yebru wergaz i tme\u1e6d\u1e6dut-is, a s-yefk lka\u0263e\u1e0d n berru ?\n19:8 Sidna \u0190isa yerra-yasen : \u0194ef ddemma n wulawen-nwen yeqqu\u1e5ben i wen-iserre\u1e25 nnbi Musa a\u021b-\u021bebrum i tilawin-nwen. Me\u025bna di tazwara ma\u010d\u010di akka i gella l\u1e25al.\n19:9 Ma d nekk a wen-d-ini\u0263 : kra n win ara yebrun i tme\u1e6d\u1e6dut-is yili ur tezni ara, iwakken ad ya\u0263 taye\u1e0d, d ne\u021b\u021ba i geznan !\n19:10 Inelmaden nnan-as : Ma yella akka i d l\u1e25ala n wergaz \u0263er tme\u1e6d\u1e6dut, ulac lfayda di zzwa\u01e7 !\n19:11 Sidna \u0190isa yerra-yasen : Ma\u010d\u010di d imdanen me\u1e5b\u1e5ba i gzemren ad qeblen aselmed agi lame\u025bna anagar wid iwumi i d-ifka Sidi \u1e5aebbi lefhama i gzemren ad qeblen annect-agi.\n19:12 A\u1e6das n sebbat i gqe\u1e0d\u025ben zzwa\u01e7 i wemdan. Llan wid i d-ilulen si t\u025bebbu\u1e6d n yemma-tsen ur s\u025bin ara ddunit, wiya\u1e0d d imdanen i sen-\u021b-ikksen. LLlan da\u0263en wid i\u1e25e\u1e5bmen iman-nsen \u0263ef zwa\u01e7, \u0263ef ddemma n tgelda n igenwan. Win i gzemren ad ifhem aselmed agi a t-yefhem !\n19:13 Kra yemdanen \u021bawin-d i Sidna \u0190isa arrac imec\u1e6du\u1e25en iwakken ad issers afus-is fell-asen a ten-ibarek, me\u025bna inelmaden-is \u021b\u021baran-ten.\n19:14 Sidna \u0190isa yenna-yasen : Anfet-asen i warrac a d-asen \u0263u\u1e5b-i, ur sen-qe\u1e6d\u1e6d\u025bet ara abrid, axa\u1e6der tagelda n igenwan thegga i nutni akk-d wid yellan am nutni !\n19:15 Yessers afus-is fell-asen, iburek iten, d\u0263a i\u1e5bu\u1e25 syenna.\n19:16 Imiren yiwen wergaz iqe\u1e5b\u1e5beb-ed \u0263er Sidna \u0190isa, yenna-yas : A Sidi, d acu i yi-ilaqen a t xedme\u0263 n wayen yelhan iwakken ad s\u025bu\u0263 tudert n dayem ?\n19:17 Sidna \u0190isa yerra-yas : Acu\u0263e\u1e5b i yi-testeqsaye\u1e0d \u0263ef wayen yelhan ? AAnagar yiwen i gelhan ! Ma teb\u0263i\u1e0d a\u021b-\u021bes\u025bu\u1e0d tudert-agi, xdem lumu\u1e5bat yellan di ccari\u025ba. YYerra-yas-ed weqcic-nni : Anwi i d lumu\u1e5bat ara teb\u025be\u0263 ?\n19:18 Sidna \u0190isa yerra-yas : Ur tneqqe\u1e0d ara tamge\u1e5b\u1e6d, ur tzennu\u1e0d ara, ur te\u021b\u021bcehhide\u1e0d ara s \u1e93\u1e93ur, ur te\u021b\u021bakk\u1e5bre\u1e0d ara,\n19:19 qade\u1e5b baba-k d yemma-k, t\u1e25emmle\u1e0d l\u0263i\u1e5b-ik am yiman-ik !\n19:20 Aqcic-nni yerra-yas-ed : Ayagi akk xedme\u0263-t, d acu i yi-ixu\u1e63\u1e63en ?\n19:21 Sidna \u0190isa yenna-yas : Ma teb\u0263i\u1e0d ihi a\u021b-\u021bkemle\u1e0d deg webrid n Sidi \u1e5aebbi , \u1e5bu\u1e25, zzenz akk ayen i tes\u025bi\u1e0d, tefke\u1e0d idrimen-nni i yime\u0263ban, s wakka a\u021b-\u021bes\u025bu\u1e0d agerruj deg igenwan ! Imiren as-ed, a\u021b-\u021beddu\u1e0d yid-i.\n19:22 Mi gesla i yimeslayen-agi, ilem\u1e93i-nni ye\u1e25zen a\u1e6das d\u0263a i\u1e5bu\u1e25, axa\u1e6der d ame\u1e5bkanti ameqqran i gella.\n19:23 Sidna \u0190isa yenna i inelmaden-is : A wen-ini\u0263 s tide\u021b : iw\u025be\u1e5b a\u1e6das i ume\u1e5bkanti ad ikcem \u0263er tgelda n igenwan !\n19:24 A wen-ini\u0263 da\u0263en : ma yella iw\u025be\u1e5b i wel\u0263em ad i\u025beddi di ti\u1e6d n tissegnit, iw\u025be\u1e5b akte\u1e5b i ume\u1e5bkanti ad ikcem \u0263er tgelda n igenwan !\n19:25 Mi slan i imeslayen-agi, inelmaden-is dehcen a\u1e6das, nnan-as : Anwa i gzemren ad i\u021b\u021busellek ihi ?\n19:26 D\u0263a Sidna \u0190isa imuqel-iten, yenna : Imdanen s yiman-nsen ur zmiren ara, me\u025bna Sidi \u1e5aebbi yezmer i kullec.\n19:27 Bu\u1e6drus in\u1e6deq, yenna-yas : Aql-a\u0263 nukkni ne\u01e7\u01e7a kullec iwakken a k-netbe\u025b, d acu ara yed\u1e5bun yid-nne\u0263 ?\n19:28 Sidna \u0190isa yerra-yasen : A wen-ini\u0263 s tide\u021b, asm'ara d-\u1e25yun lmegtin \u0263er ddunit taj\u1e0di\u1e6d, asm'ara yeqqim Mmi-s n bunadem \u0263ef wukersi n l\u1e25ekma di l\u025ba\u1e0dima-s, ula d kunwi yeddan yid-i, a\u021b-\u021beqqimem di tnac yid-wen \u0263ef yikersiyen n l\u1e25ekma iwakken a\u021b-\u021b\u1e25asbem tnac n le\u025b\u1e5bac n wat Is\u1e5bail.\n19:29 Yerna, kra win ara ye\u01e7\u01e7en \u0263ef ddemma n yisem-iw axxam-is ne\u0263 atmaten-is, yessetma-s ne\u0263 baba-s, yemma-s, arraw-is ne\u0263 tiferkiwin-is, ad as-d-ye\u021b\u021bunefk akte\u1e5b n wayen ye\u01e7\u01e7a, yerna a t-id-t\u1e63a\u1e25 tudert n dayem.\n19:30 A\u1e6das seg wid yellan d imezwura ad u\u0263alen d ineggura, a\u1e6das da\u0263en seg wid yellan d ineggura ad u\u0263alen d imezwura.\n20:2 Imsefham yid-sen a ten-ixelle\u1e63 s twize\u021b n lfe\u1e6d\u1e6da i wass, d\u0263a icegge\u025b-iten \u0263er tfe\u1e5b\u1e5bant-is.\n20:3 Iffe\u0263 da\u0263en \u0263ef \u021bes\u025ba n \u1e63\u1e63be\u1e25, iwala wiya\u1e0d qqimen di be\u1e5b\u1e5ba mbla lxedma.\n20:4 yenna-yasen : \u1e5au\u1e25et ula d kunwi a\u021b-\u021bxedmem di tfe\u1e5b\u1e5bant-iw, a wen-fke\u0263 ayen tuklalem.\n20:5 D\u0263a \u1e5bu\u1e25en. Bab n tfe\u1e5b\u1e5bant-nni yexdem akken da\u0263en \u0263ef tnac n wass akk-d \u021b-\u021blata n tmeddit.\n20:6 Iffe\u0263 da\u0263en \u0263ef lxemsa n tmeddit, yufa wiya\u1e0d qqimen di be\u1e5b\u1e5ba yenna-yasen : Acu\u0263e\u1e5b i te\u021b\u0263imim ass kamel mbla lxedma ?\n20:7 Nnan-as-ed : Ulac win i \u0263-d-ifkan lxedma ! YYenna-yasen : \u1e5au\u1e25et ula d kunwi a\u021b-\u021bxedmem di tfe\u1e5b\u1e5bant-iw !\n20:8 Mi i d-tewwe\u1e0d tmeddit, bab n tfe\u1e5b\u1e5bant yenna i lewkil-is : Ssiwel i ixeddamen txellse\u1e0d-ten yiwen yiwen. Zwir seg ineggura tessegri\u1e0d imezwura.\n20:9 Usan-d wid yebdan lxedma \u0263ef lxemsa n tmeddit, ixelle\u1e63-iten s ssuma n yiwen wass,\n20:10 mi i d-tewwe\u1e0d nnuba n wid ibdan lxedma \u0263ef \u021bes\u025ba n \u1e63\u1e63be\u1e25, \u0263ilen ad \u021bwaxel\u1e63en akte\u1e5b n wiya\u1e0d, me\u025bna ula d nutni \u021bwaxell\u1e63en s ssuma n yiwen wass.\n20:11 Mi \u1e6d\u1e6dfen lexla\u1e63-nsen, i\u0263a\u1e0d-iten l\u1e25al, nnan i bab n tfe\u1e5b\u1e5bant-nni :\n20:12 Ixeddamen-agi ineggura xedmen yiwet n ssa\u025ba kan, txell\u1e63e\u1e0d ten am nukkni yen\u025be\u021b\u021baben ass kamel i wez\u0263al ?\n20:13 Me\u025bna yerra-yas i yiwen seg sen : Ay amdakkel, acu\u0263e\u1e5b i k-i\u0263a\u1e0d l\u1e25al ? E\u025bni ur nemsefham ara \u0263ef lexla\u1e63-nwen ad yili tawize\u021b n lfe\u1e6d\u1e6da d ssuma n yiwen wass ?\n20:14 Awi l\u1e25eqq-ik t\u1e5bu\u1e25e\u1e0d. I ma yella b\u0263i\u0263 ad fke\u0263 i uneggaru annect i k-fki\u0263 i ke\u010d\u010d ?\n20:15 E\u025bni ur zmire\u0263 ara ad xedme\u0263 akken b\u0263i\u0263 s idrimen-iw ? Ne\u0263 i\u0263a\u1e0d-ik l\u1e25al imi ur lli\u0263 ara d amec\u1e25a\u1e25 ?\n20:16 S wakka a\u1e6das ineggura ara yu\u0263alen d imezwura, a\u1e6das n imezwura ara yu\u0263alen d ineggura.\n20:17 Mi \u021beddun ad alin \u0263er temdint n Lquds, Sidna \u0190isa i\u1e6d\u1e6def tnac-nni inelmaden-is we\u1e25\u1e25ed-sen, yenna yasen :\n20:18 \u1e24esset-ed : atan a nali \u0263er temdint n Lquds, anda ara i\u021b\u021busellem Mmi-s n bunadem ger ifassen n lmuqedmin imeqqranen akk-d l\u025bulama n ccari\u025ba. Ad \u1e25ekmen fell-as s lmut,\n20:19 yerna a t-sellmen ger ifassen nn ikafriwen iwakken ad stehzin fell-as, a t-jelk\u1e0den ( a t-cell\u1e6den ), a t-semm\u1e5ben \u0263ef wumidag, ass wis tlata a d-i\u1e25yu si ger lmegtin.\n20:20 Imiren yemma-s n Ye\u025bqub d Yu\u1e25enna, arraw n Zabadi, tqe\u1e5b\u1e5beb-ed \u0263er Sidna \u0190isa ne\u021b\u021bat d warraw-is, tse\u01e7\u01e7ed \u0263er i\u1e0da\u1e5b\u1e5ben-is.\n20:21 Sidna \u0190isa yenna-yas : D acu i teb\u0263i\u1e0d ? Tenna-yas : Di le\u025bnaya-k a Sidi, efk-asen imukan i sin-agi n warraw-iw di tgelda-inek, iwakken ad qqimen wa \u0263er uyeffus-ik, wa \u0263er uzelma\u1e0d-ik.\n20:22 Sidna \u0190isa yerra-yasen : Ur te\u1e93rim ara ayen akka i d tessutrem ! E\u025bni tzemrem a\u021b-\u021beswem si tbuqalt-agi n lem\u1e5ba\u1e5b ara swe\u0263 ? NNnan-as : Ih a Sidi, nezmer !\n20:23 Yerra-yasen : \u021a-\u021bide\u021b, a\u021b-\u021beswem si tbuqalt-agi, me\u025bna \u0263ef wayen ye\u025bnan imukan \u0263er tama-w tayeffust ne\u0263 tazelma\u1e6d, ma\u010d\u010di d nekk ara ten-ifken, ad \u021b\u021bunefken i wid iwumi i ten-ihegga Baba \u1e5aebbi.\n20:24 \u0190ec\u1e5ba n inelmaden-nni mi slan ayagi, ikcem-iten zz\u025baf \u0263ef ddemma n sin-nni watmaten.\n20:25 Sidna \u0190isa yessawel-asen, yenna-yasen : Walit igelliden n yegduden nni\u1e0den akk-d imeqqranen-nsen amek \u1e25e\u1e5bsen yerna \u1e25eq\u1e5ben l\u0263aci-nsen !\n20:26 Ur ilaq ara ad yili wannect-agi gar-awen. Ma yella yiwen seg-wen yeb\u0263a ad yu\u0263al d ameqqran, ilaq ad yili d aqeddac-nwen.\n20:27 Akken da\u0263en, win yeb\u0263an ad yili d amezwaru, ilaq ad yu\u0263al d akli-nwen.\n20:28 Daymi Mmi-s n bunadem ur d-yusi ara iwakken ad qedcen fell-as, me\u025bna yusa-d iwakken ad yili d aqeddac, yerna ad isebbel tudert-is iwakken ad isellek a\u1e6das n yemdanen.\n20:29 Mi d-ff\u0263en si temdint n Yiriku, a\u1e6das n l\u0263aci i d-i\u1e0def\u1e5ben Sidna \u0190isa.\n20:30 Llan sin ider\u0263alen qqimen rrif n webrid, mi slan belli d Sidna \u0190isa i d-i\u025beddan bdan \u021b\u025beggi\u1e0den : A Sidi ! A mmi-s n Sidna Dawed ! \u1e24unn fell-a\u0263 !\n20:31 L\u0263aci-nni \u021blumun-ten, qqa\u1e5ben asen ad ssusmen, ma d nutni \u021bkemmilen le\u025bya\u1e0d : \u1e24unn fell-a\u0263 a Sidi, a mmi-s n Sidna Dawed !\n20:32 Sidna \u0190isa i\u1e25bes, issawel-asen, yenna-yasen : D acu i teb\u0263am a wen-t- xedme\u0263 ?\n20:33 Rran-as : Neb\u0263a a \u0263-d-yu\u0263al ye\u1e93ri a Sidi !\n20:34 \u0194a\u1e0den a\u1e6das Sidna \u0190isa, yennul allen-nsen, imiren kan yu\u0263al-iten-id ye\u1e93ri, d\u0263a ddan yid-es.\n21:1 Mi q\u1e5bib ad kecmen \u0263er temdint n Lquds, ww\u1e0den \u0263er yi\u0263il n uzemmur yellan tama n taddart n Bitfaji, Sidna \u0190isa icegge\u025b sin inelmaden-is,\n21:2 yenna-yasen : \u1e5au\u1e25et \u0263er taddart yellan \u0263er zdat, dinna a\u021b-\u021bafem ta\u0263yult akk-d mmi-s, brut-asen-d, tawim-iyi-ten-id.\n21:3 Ma yella win i wen-d-yennan kra, init-as : d Ssid-nne\u0263 i ten-i\u1e25wa\u01e7en, imiren a sen-d-iserre\u1e25.\n21:4 Ayagi yed\u1e5ba-d am akken i t-id yenna nnbi Zakarya di tira iqedsen :\n21:5 Init i wat wedrar n Siyun : AA taya ugellid-nwen iteddu-d \u0263u\u1e5b-wen s wannuz, irkeb-ed \u0263ef we\u0263yul amec\u1e6du\u1e25 mmi-s n te\u0263yult.\n21:6 Inelmaden-nni \u1e5bu\u1e25en, xedmen ayen i sen-d-yenna Sidna \u0190isa.\n21:7 Wwin-d ta\u0263yult-nni d mmi-s, sburren-asen llebsa-nsen, d\u0263a srekben Sidna \u0190isa.\n21:8 A\u1e6das n l\u0263aci ssan ice\u1e6d\u1e6di\u1e0den-nsen deg ubrid, wiya\u1e0d \u021b\u1e5bu\u1e93un-d tise\u1e0dwa si ttju\u1e5b, \u021bessun-tent ula d nutni deg ubrid.\n21:9 L\u0263aci yezwaren zdat Sidna \u0190isa d wid i t-id-i\u1e0def\u1e5ben, \u021b\u025beggi\u1e0den s lfe\u1e5b\u1e25 qqa\u1e5ben : \u1e24usana i mmi-s n Sidna Dawed ! I\u021b\u021bubarek win i d-yusan s yisem n Sidi \u1e5aebbi ! \u1e24usana deg imukan e\u025blayen.\n21:10 Mi gekcem Sidna \u0190isa \u0263er temdint n Lquds, imezda\u0263 me\u1e5b\u1e5ba nhewwalen, qqa\u1e5ben : Anwa-t wagi ?\n21:11 L\u0263aci-nni \u021b\u021baran-asen : D Sidna \u0190isa, nnbi-nni n taddart n Na\u1e63aret i d-yusan si tmurt n Jlili !\n21:12 Sidna \u0190isa yekcem \u0263er l\u01e7ame\u025b iqedsen, iqecce\u025b me\u1e5b\u1e5ba wid ye\u021b\u021ba\u0263en znuzun dinna deg ufrag n l\u01e7ame\u025b. Iqleb-asen \u1e6d\u1e6dwabel i wid ye\u021bbeddilen idrimen akk-d wid yeznuzun itbiren.\n21:13 d\u0263a yenna-yasen : Yura : Axxam-iw ad i\u021b\u021busemmi d axxam n t\u1e93allit, ma d kunwi terram-t d l\u0263a\u1e5b n imakaren.\n21:14 Di l\u01e7ame\u025b-nni, qe\u1e5b\u1e5bben-d \u0263u\u1e5b-es ider\u0263alen d iqu\u1e0daren, d\u0263a yesse\u1e25la ten.\n21:15 Lmuqedmin imeqqranen d l\u025bulama n ccari\u025ba rfan mi walan le\u025b\u01e7ayeb i gxeddem akk-d warrac i\u021b\u025beggi\u1e0den di l\u01e7ame\u025b : \u1e24usana i mmi-s n Sidna Dawed !\n21:16 Imiren nnan i Sidna \u0190isa : Tesli\u1e0d d acu i d-qqa\u1e5ben ? SSidna \u0190isa yerra-yasen : Sli\u0263 ih ! E\u025bni ur te\u0263\u1e5bim ara imeslayen-agi yuran di tira iqedsen : Tessuf\u0263e\u1e0d-ed le\u1e25madi seg imawen n warrac akk-d wid n llufanat ite\u1e6d\u1e6d\u1e0den .\n21:17 Imiren ye\u01e7\u01e7a-ten dinna, yeffe\u0263 si temdint, i\u1e5bu\u1e25 \u0263er taddart n Bitanya, dinna i gensa.\n21:18 Azekka-nni ta\u1e63eb\u1e25it mi d-yu\u0263al \u0263er temdint, Sidna \u0190isa yellu\u1e93 ;\n21:19 iwala yiwet n tneqle\u021b rrif n webrid, iqe\u1e5b\u1e5beb \u0263u\u1e5b-es, ur yufi deg-s acemma anagar afriwen ; d\u0263a yenna-yas : Seg wass-a, ur te\u021b\u021bu\u0263ale\u1e0d ara a d-tefke\u1e0d lfakya ! IImiren kan, taneqle\u021b-nni teqqu\u1e5b.\n21:20 Inelmaden-is mi walan ayagi t\u025be\u01e7ben, nnan : Amek akka teqqu\u1e5b tneqle\u021b-agi deg yiwet n teswi\u025bt ?\n21:21 Sidna \u0190isa yerra-yasen : A wen-ini\u0263 tide\u021b, ma yella tes\u025bam liman ur te\u021bcukkum ara, a\u021b-\u021bizmirem a\u021b-\u021bxedmem akte\u1e5b n wayen xedme\u0263 i tneqle\u021b-agi ! AA\u021b-\u021binim i wedrar-agi qle\u025b iman-ik syagi t\u1e0degg\u1e5be\u1e0d iman-ik \u0263er leb\u1e25e\u1e5b, ayagi a d-yed\u1e5bu !\n21:22 Ayen akk ara tessutrem s liman di t\u1e93allit, a wen-d-i\u021bunefk !\n21:23 Sidna \u0190isa yekcem \u0263er l\u01e7ame\u025b ibda yesselmad. Lmuqedmin akk-d imeqqranen n wegdud qe\u1e5b\u1e5bben \u0263u\u1e5b-es nnan-as : Ansi i k-d-tekka tezmert s wayes i txeddme\u1e0d ayagi ? Anwa i k-d-yefkan tazmert-agi ?\n21:24 Sidna \u0190isa yerra-yasen : A wen-fke\u0263 asteqsi ula d nekk, yiwen kan ; ma t\u01e7awbem-iyi-d, ula d nekk a wen-ini\u0263 ansi i yi-d-tekka tezmert-agi.\n21:25 A\u0263\u1e0das n Ye\u1e25ya, s \u0263u\u1e5b \u1e5aebbi i d-ikka ne\u0263 s \u0263u\u1e5b yemdanen ? DD\u0263a bdan qqa\u1e5ben wway gar-asen : Ma nenna-yas seg igenwan, a \u0263-d-yini acu\u0263e\u1e5b ihi ur tuminem ara yis,\n21:26 ma nenna-yas da\u0263en seg imdanen, nuggad l\u0263aci-agi, axa\u1e6der \u1e25esben akk Ye\u1e25ya d nnbi.\n21:27 D\u0263a nnan-as i Sidna \u0190isa : Ur ne\u1e93ri ara ! YYerra-yasen : Ihi ula d nekk ur wen-d-qqa\u1e5be\u0263 ara ansi i yi-d-tekka tezmert s wayes i xeddme\u0263 ayagi !\n21:28 D acu twalam ? Yiwen wergaz yes\u025ba sin warraw-is, yen\u1e6deq \u0263er umezwaru, yenna-yas : A mmi, \u1e5bu\u1e25 a\u021b-\u021bxedme\u1e0d ass-agi di tfe\u1e5b\u1e5bant-iw.\n21:29 Yerra-yas : Ur \u021b\u1e5bu\u1e25u\u0263 ara ! MMe\u025bna yu\u0263al yendem, i\u1e5bu\u1e25 ad ixdem di tfe\u1e5b\u1e5bant.\n21:30 Yenna-yas da\u0263en i mmi-s wi sin ad i\u1e5bu\u1e25 ad ixdem, yerra-yas-d : Ih a baba ad \u1e5bu\u1e25e\u0263 ! MMe\u025bna ur i\u1e5bu\u1e25 ara.\n21:31 Anwa deg sen i gxedmen leb\u0263i n baba-s ? RRran-as-ed : D amezwaru a Sidi ! SSidna \u0190isa yenna-yasen : A wen-d-ini\u0263 tide\u021b, imekkasen imakaren akk-d yir tilawin a kkun zwiren \u0263er tgelda n igenwan !\n21:32 Axa\u1e6der Ye\u1e25ya yusa-d \u0263u\u1e5b-wen yesken-awen-d abrid n tide\u021b, me\u025bna ur t-tuminem ara ; ma d imekkasen d yir tilawin umnen yis. Yerna \u0263as akken twalam ayagi, ur d-tu\u0263alem ara \u0263er webrid teggumam a\u021b-\u021bamnem yis.\n21:33 A wen-d-rnu\u0263 da\u0263en lemtel nni\u1e0den : yella yiwen um\u025bellem, ye\u1e93\u1e93a tafe\u1e5b\u1e5bant, izzi-yas-ed s zze\u1e5bb, ye\u0263za amkan i t\u025be\u1e63\u1e63art n t\u1e93urin, yebna ta\u025brict i t\u025bessast, issekra tafe\u1e5b\u1e5bant-is i ixemmasen, imiren i\u1e5bu\u1e25 \u0263er l\u0263e\u1e5bba.\n21:34 Mi d-yewwe\u1e0d lweqt n t\u1e93urin, icegge\u025b iqeddacen-is \u0263er ixemmasen nni iwakken a s-d-fken amur-is n l\u0263ella.\n21:35 Me\u025bna ixemmasen-nni \u1e6d\u1e6dfen iqeddacen-nni, wa wten-t, wa n\u0263an-t, waye\u1e0d \u1e5bejmen-t.\n21:36 Icegge\u025b-asen da\u0263en tarba\u025bt nni\u1e0den n iqeddacen yugaren tamezwarut. Me\u025bna ted\u1e5ba yid-sen am imezwura-nni.\n21:37 Taggara, icegge\u025b-asen mmi-s, yenna : Ahat imi d mmi a t-qad\u1e5ben !\n21:38 Lame\u025bna mi walan mmi-s, ixemmasen-nni nnan wway gar-asen : Ataya win ara iwe\u1e5bten, kkret a t-nenne\u0263 iwakken a nawi lwe\u1e5bt-is.\n21:39 S\u1e6dfen-t, \u1e0degg\u1e5ben-t \u0263er be\u1e5b\u1e5ba n tfe\u1e5b\u1e5bant, d\u0263a n\u0263an-t.\n21:40 Sidna \u0190isa yenna i l\u0263aci : Ihi tura, m'ara d-yas bab n tfe\u1e5b\u1e5bant-nni, d acu ara sen-yexdem i ixemmasen-agi ?\n21:41 Rran-as-ed : Ad ine\u0263 ixemmasen imcumen, ma \u021b-\u021bafe\u1e5b\u1e5bant a \u021b-issekru i ixemmasen nni\u1e0den ara s-d-ifken amur-is di lweqt n l\u0263ella.\n21:42 Sidna \u0190isa yenna-yasen : Le\u025bme\u1e5b te\u0263\u1e5bim imeslayen-agi i d-nnant tira iqedsen : Ad\u0263a\u0263-nni i \u1e0degg\u1e5ben wid ibennun, d ne\u021b\u021ba i gu\u0263alen d az\u1e5bu alemmas , WWin ye\u1e6d\u1e6dfen lebni. AA yagi yekka-d s \u0263u\u1e5b \u1e5aebbi, d ayen i \u0263-ist\u025be\u01e7ben .\n21:43 Daymi i wen-qqa\u1e5be\u0263 : Tagelda n igenwan a wen te\u021bwakkes, a\u021b-\u021be\u021b\u021bunefk i le\u01e7nas nni\u1e0den ara d-ifken l\u0263ella.\n21:44 Win ara ye\u0263lin \u0263ef wusalas-agi ad yerre\u1e93, da\u0263en win i \u0263ef ara d-ye\u0263li usalas-agi ad ye\u021bwam\u1e25eq.\n21:45 Mi slan i imeslayen-agi, ifariziyen d lmuqedmin imeqqranen fehmen belli fell-asen i d-ihedde\u1e5b Sidna \u0190isa.\n21:46 Me\u025bna \u0263as akken b\u0263an a t-\u1e6d\u1e6dfen, ur zmiren ara axa\u1e6der uggaden l\u0263aci-nni i t-i\u1e25esben d nnbi.\n22:1 Sidna \u0190isa imeslay-asen-d da\u0263en s lemtel, yenna-yasen : --\n22:2 Tagelda n igenwan tcuba \u0263er yiwen ugellid i gxedmen tame\u0263\u1e5ba i mmi-s.\n22:3 Icegge\u025b iqeddacen-is ad ssiwlen i wid ye\u021bwa\u025be\u1e5bden, me\u025bna ugin a d-asen.\n22:4 Yerna icegge\u025b-asen iqeddacen nni\u1e0den a sen-inin : Hegga\u0263 imensi, zli\u0263 izgaren-iw d wakraren-iw, kullec ihegga, aset-ed \u0263er tme\u0263\u1e5ba !\n22:5 Me\u025bna widak-nni i\u021bwa\u025be\u1e5b\u1e0den ur s-fkin ara azal, yal yiwen yelha d cc\u0263el-is, wa i\u1e5bu\u1e25 \u0263er yiger-is, wa \u0263er ssuq-is.\n22:6 Wiya\u1e0d \u1e6d\u1e6dfen iqeddacen-nni, regmen-ten, n\u0263an-ten.\n22:7 Agellid-nni ikcem-it zz\u025baf d ameqqran, d\u0263a icegge\u025b l\u025beske\u1e5b-is n\u0263an iqettalen-nni, sse\u1e5b\u0263en tamdint-nsen.\n22:8 Imiren yenna i iqeddacen-is : Imensi n tme\u0263\u1e5ba ihegga, me\u025bna widak-nni i\u021bwa\u025be\u1e5b\u1e0den ur t-uklalen ara ;\n22:9 \u1e5bu\u1e25et \u0263er izenqan, t\u025be\u1e5b\u1e0dem-d \u0263er tme\u0263\u1e5ba wid akk ara tafem deg iberdan.\n22:10 Iqeddacen-nni \u1e5bu\u1e25en \u0263er izenqan jem\u025ben-d wid akk ufan, ama d amcum ama d win yelhan, s wakka axxam n tme\u0263\u1e5ba ye\u010d\u010du\u1e5b-ed d l\u0263aci.\n22:11 Mi d-ikcem ugellid ad iwali inebgawen, iwala yiwen wergaz ur yelsi ara llebsa n tme\u0263\u1e5ba.\n22:12 yenna-yas : Ay amdakkel, amek i d-tkecme\u1e0d \u0263er dagi mbla llebsa n tme\u0263\u1e5ba ye\u021bwaheggan i yinebgawen ? AArgaz-nni yessusem, ur yufi d acu ara s-yini.\n22:13 Agellid-nni yefka lame\u1e5b i iqeddacen-is yenna-yasen : Cuddet-as ifassen d i\u1e0da\u1e5b\u1e5ben, t\u1e0degg\u1e5bem-t \u0263er \u1e6d\u1e6dlam n be\u1e5b\u1e5ba, anda llan ime\u1e6d\u1e6dawen d nndama tameqqrant.\n22:14 Axa\u1e6der a\u1e6das i ge\u021bwa\u025ber\u1e0den, me\u025bna drus ara ye\u021bwaqeblen.\n22:15 Imiren \u1e5bu\u1e25en ifariziyen ad mcawa\u1e5ben amek ara d-sse\u0263lin Sidna \u0190isa deg wawal.\n22:16 Cegg\u025ben-as kra seg inelmaden-nsen akk-d kra si terba\u025bt n Hi\u1e5budus, nnan-as : A Sidi, ne\u1e93ra-k d bab n l\u1e25eqq i telli\u1e0d, tesselmade\u1e0d iberdan n \u1e5aebbi s tide\u021b, ur tuggade\u1e0d ula d yiwen, ur txeddme\u1e0d ara lxilaf ger yemdanen.\n22:17 Ini-ya\u0263-d ihi d acu twala\u1e0d : d le\u1e25lal ne\u0263 d le\u1e25\u1e5bam a nxelle\u1e63 tabzert ( le\u0263\u1e5bama ) i ugellid Qay\u1e63ar (yest\u025bem\u1e5ben tamurt-nne\u0263) ?\n22:18 Me\u025bna Sidna \u0190isa ye\u1e93ran ayen i \u021bxemmimen, yenna-yasen : Ay at sin wudmawen ! Acu\u0263e\u1e5b teb\u0263am a yi-tje\u1e5bbem ?\n22:19 Seknet-iyi-d a\u1e63urdi s wacu \u021bxelli\u1e63en tabzert ! FFkan-as-d a\u1e63urdi n lfe\u1e6d\u1e6da.\n22:20 D\u0263a isteqsa-ten : Udem akk-d tira yellan deg u\u1e63u\u1e5bdi-agi, wi ten-ilan ?\n22:21 Rran-as : N Qay\u1e63er ! IImiren yenna-yasen : Erret ihi i Qay\u1e63er ayen yellan n Qay\u1e63er, terrem i \u1e5aebbi ayen yellan n \u1e5aebbi !\n22:22 Mi slan i imeslayen-agi, wehmen, d\u0263a \u1e5bu\u1e25en \u01e7\u01e7an-t.\n22:23 Ass-nni, isaduqiyen i gellan d imdanen ur ne\u021b\u021bamen ara s \u1e25eggu n lmegtin, usan-d \u0263er Sidna \u0190isa, steqsan-t, nnan-as :\n22:24 A Sidi, Sidna Musa yenna-d : ma yella yemmut wergaz d amengur, ilaq gma-s ad ya\u0263 ta\u01e7\u01e7alt-nni iwakken a d-is\u025bu yid-es dderya ara iwe\u1e5bten gma-s-nni yemmuten.\n22:25 Yu\u0263 l\u1e25al llan \u0263u\u1e5b-nne\u0263 seb\u025ba watmaten, amezwaru izew\u01e7en yemmut ur d-ye\u01e7\u01e7i dderya, d\u0263a gma-s yerra ( yu\u0263a ) tame\u1e6d\u1e6dut-nni.\n22:26 Akkenni i ted\u1e5ba d wis sin, d wis tlata, armi d wis seb\u025ba.\n22:27 Mi mmuten irkulli, temmut ula \u021b-\u021bame\u1e6d\u1e6dut-nni ;\n22:28 ass n \u1e25eggu n lmegtin anwa deg-sen ara \u021b-yes\u025bun \u021b-\u021bame\u1e6d\u1e6dut-is imi i \u021b-u\u0263en di seb\u025ba yid-sen ?\n22:29 Sidna \u0190isa yerra-yasen : T\u0263el\u1e6dem ! Axa\u1e6der ur tefhimem tira iqedsen, ur tessinem tazmert n \u1e5aebbi.\n22:30 Ass n \u1e25eggu n lmegtin, irgazen \u021b-\u021bilawin ur zeggjen ara, me\u025bna ad u\u0263alen am lmalayekkat deg igenni.\n22:31 \u0194ef wayen ye\u025bnan \u1e25eggu n lmegtin, ur te\u0263\u1e5bim ara acu i d-yenna Sidi \u1e5aebbi ? :\n22:32 D nekk i d Illu n Ib\u1e5bahim, n Is\u1e25aq, n Ye\u025bqub. Sidi \u1e5aebbi ma\u010d\u010di d \u1e5aebbi n lmegtin, me\u025bna d \u1e5aebbi n wid yeddren.\n22:33 Mi s-slan, l\u0263aci qqimen \u021bwe\u1e25\u1e25iden deg imeslayen-is !\n22:34 Mi slan ifariziyen belli Sidna \u0190isa ye\u0263leb isaduqiyen deg wawal, nnejma\u025ben wway gar-asen.\n22:35 Yiwen seg-sen d l\u025balem n ccari\u025ba, isteqsa-t iwakken a t-ije\u1e5b\u1e5beb :\n22:36 A Sidi, anwa i d lame\u1e5b ameqqran me\u1e5b\u1e5ba di ccari\u025ba ?\n22:37 Sidna \u0190isa yerra-yas : -- A\u021b-\u021b\u1e25emle\u1e0d Illu Sidi \u1e5aebbi-inek seg wul-ik, s te\u1e5bwi\u1e25t-ik, s wayen yellan di tezmert-ik.\n22:38 D wagi i d lame\u1e5b yellan d amezwaru yerna d ameqqran akk di ccari\u025ba.\n22:39 Atan waye\u1e0d yes\u025ban azal annect umezwaru-agi : A\u021b-\u021b\u1e25emle\u1e0d l\u0263i\u1e5b-ik am yiman-ik.\n22:40 D sin lumu\u1e5bat-agi i d lsas n ccari\u025ba akk-d lenbiya.\n22:41 Mi llan ifariziyen nnejma\u025ben, Sidna \u0190isa isteqsa-ten yenna :\n22:42 D acu ara d-tinim \u0263ef Lmasi\u1e25 ? Ansi ara d-yekk, ye\u025bni anwi i d lejdud-is ? NNnan-as : D mmi-s n Sidna Dawed.\n22:43 Sidna \u0190isa yenna-yasen : Amek ihi i s-isemma Dawed s tezmert n \u1e5a\u1e5bu\u1e25 iqedsen \u00ab Sidi \u00bb mi genna :\n22:44 Sidi \u1e5aebbi yenna i Ssid-iw : \u1e6d\u1e6def amkan \u0263er tama-w tayeffust, alamma rri\u0263 i\u025bdawen-ik seddaw i\u1e0da\u1e5b\u1e5ben-ik.\n22:45 Ma yella ihi Dawed yessawel-as \u00ab Sidi \u00bb amek ara yili ihi d mmi-s ?\n22:46 Yiwen deg-sen ur izmir a s-d yerr awal, seg wass-nni \u021b\u021baggaden a t-steqsin.\n23:1 Imiren Sidna \u0190isa yen\u1e6deq \u0263er l\u0263aci d inelmaden-is yenna yasen :\n23:2 L\u025bulama d ifariziyen sselmaden ccari\u025ba n Musa.\n23:3 Xedmet ayen akk ara wen-d-inin, me\u025bna ur xeddmet ara wayen xeddmen nutni, axa\u1e6der ayen i d-qqa\u1e5ben ur t-xeddmen ara.\n23:4 \u021acuddun ti\u025bekkmin \u1e93\u1e93ayen \u021b\u025bebbin-tent \u0263ef tuyat n yemdanen, ma d nutni \u021b\u021bagin a ten-\u025biwnen ula s yixef n i\u1e0du\u1e0dan-nsen.\n23:5 Ayen akk i xeddmen, xeddmen-t iwakken a ten-walin yemdanen, \u021b\u025belliqen ti\u1e25erztin \u021b-\u021be\u0263\u1e5bisin \u0263ef yiman-nsen.\n23:6 \u1e24emmlen ad \u1e6d\u1e6dfen imukan imezwura ama di tme\u0263\u1e5biwin ama di le\u01e7wame\u025b, \u1e25emmlen m'ara \u021bsellimen fell-asen yemdanen di tejmuya\u025b akk-d leswaq ;\n23:7 \u1e25emmlen da\u0263en m'ara sen-qqa\u1e5ben yemdanen : \u00ab a Sidi \u00bb.\n23:8 Ma d kunwi \u0263u\u1e5b-wat a wen qqa\u1e5ben : \u00ab a Sidi \u00bb axa\u1e6der d atmaten i tellam yerna yiwen kan i d Ssid-nwen.\n23:9 Ur qqa\u1e5bet ula i yiwen di ddunit : \u00ab Baba \u00bb axa\u1e6der anagar yiwen i d baba-wen, d Baba \u1e5aebbi yellan deg igenwan.\n23:10 Ur qebblet ara a\u021b-\u021be\u021b\u021busemmim : \u00ab imeqqranen \u00bb axa\u1e6der anagar yiwen i d ameqqran : d Lmasi\u1e25 !\n23:11 Ameqqran deg-wen, d win iqeddcen fell-awen.\n23:12 Kra n win issim\u0263u\u1e5ben iman-is a d-yers, ma d win issim\u1e93iyen iman is ad i\u021bwarfed !\n23:13 A nnger-nwen ay ifariziyen d l\u025bulama n ccari\u025ba, ay at sin wudmawen ! AAxa\u1e6der tmeddlem tiwwura n igenwan i yemdanen, ur tke\u010d\u010dmem kunwi, ur te\u021b\u021ba\u01e7\u01e7am ad kecmen wid yeb\u0263an !\n23:14 A nnger-nwen ay ifariziyen d l\u025bulama n ccari\u025ba, ay at sin wudmawen ! Axa\u1e6der tette\u021b\u021bem ayla n tu\u01e7\u01e7al, tes\u1e6duqqutem awal di t\u1e93allit-nwen iwakken a d-tesbegnem iman-nwen telham. \u0194ef wayagi, l\u025biqab i kkun-i\u021b\u1e5ba\u01e7un d ameqqran !\n23:15 A nnger-nwen ay ifariziyen d l\u025bulama n ccari\u025ba, ay at sin udmawen ! Te\u021bnadim timura, tzeggrem leb\u1e25u\u1e5b iwakken a d-reb\u1e25em \u0263as ula d yiwen \u0263er ddin i tettaba\u025bem; mi t-id-rnam \u0263u\u1e5b-wen, te\u021b\u021baram-t d win yuklalen \u01e7ahennama akte\u1e5b-nwen !\n23:16 A nnger-nwen ay ider\u0263alen ite\u1e6d\u1e6dfen afus i wiya\u1e0d ! Teqqa\u1e5bem : \u00ab Ma yella yeggul bunadem s l\u01e7ame\u025b iqedsen, \u0263as ye\u1e25net ulac fell-as ; ma d win ara yegallen s ddheb yellan di l\u01e7ame\u025b, ur s-ilaq ara ad i\u1e25net, ilaq ad i\u1e6d\u1e6def di limin-ines ! \u00bb\n23:17 Ay imehbal, ay ider\u0263alen ! D acu i ges\u025ban azal, d ddheb ne\u0263 d l\u01e7ame\u025b i ge\u021b\u021barran ddheb-nni d imqeddes ?\n23:18 Teqqa\u1e5bem da\u0263en : \u00ab Win ara yegallen s udekkan n iseflawen, \u0263as i\u1e25net ulac fell-as, ma d win ara yegallen s iseflawen nni, ur s-ilaq ara ad i\u1e25net, ilaq ad i\u1e6d\u1e6def di limin-ines.\u00bb\n23:19 Ay ider\u0263alen ! Anwa i ges\u025ban azal, d iseflawen ne\u0263 d udekkan-nni i gerran iseflawen d imqedsen ?\n23:20 Win ara yegallen s udekkan n iseflawen, yeggul s udekkan-nni d wayen akk yersen fell-as.\n23:21 Win ara yegallen da\u0263en s l\u01e7ame\u025b, yeggul s l\u01e7ame\u025b akk-d Win i gellan deg-s.\n23:22 Win ara yegallen s igenwan, yeggul da\u0263en s igenwan akk-d Sidi \u1e5aebbi i\u1e25ekkmen deg-sen.\n23:23 A nnger-nwen ay ifariziyen d l\u025bulama n ccari\u025ba, ay at sin udmawen ! te\u021b\u021bakem le\u025bcu\u1e5b \u0263ef nne\u025bne\u025b, abesbas d lkemmun, lame\u025bna te\u021b\u021ba\u01e7\u01e7am \u0263er deffir l\u1e25eqq, \u1e5b\u1e5be\u1e25ma d laman. DD annect-agi i ge\u021b\u1e5ba\u01e7u deg-wen Sidi \u1e5aebbi a\u021b-\u021bezwirem deg-sen a ten-txedmem, mbla ma terram deg idis ayen nni\u1e0den.\n23:24 Ay ider\u0263alen ite\u1e6d\u1e6dfen afus i wiya\u1e0d ! Te\u021b\u1e63effim tissit-nwen \u0263ef yizi, tessebla\u025bem al\u0263em.\n23:25 A nnger-wen ay ifariziyen d l\u025bulama n ccari\u025ba, ay at sin wudmawen ! Axa\u1e6der tessizdigem taqbuct d u\u1e0debsi s ufella kan, me\u025bna \u0263er daxel-nsen \u010d\u010du\u1e5ben \u021b-\u021buke\u1e5bdiwin d \u1e6d\u1e6dme\u025b.\n23:26 Ay afarizi ader\u0263al ! Ssizdeg uqbel daxel n teqbuct d u\u1e0debsi, iwakken ula s ufella-nsen ad izdigen !\n23:27 A nnger-nwen ay ifariziyen d l\u025bulama n ccari\u025ba, ay at sin udmawen ! TTe\u021b\u021bemcabim \u0263er i\u1e93ekwan iseb\u0263en s l\u01e7ir ; s ufella ceb\u1e25en, \u0263er daxel \u010d\u010du\u1e5ben d i\u0263san n lmegtin d rekku.\n23:28 Akka ula d kunwi, te\u021bbegginem-d iman-nwen telham \u0263er yemdanen, lame\u025bna zdaxel te\u010d\u010du\u1e5bem d le\u0263ru\u1e5b d cce\u1e5b.\n23:29 A nnger-nwen ay ifariziyen d l\u025bulama n ccari\u025ba, ay at sin wudmawen ! Tbennum i\u1e93ekwan n lenbiya, te\u021bcebbi\u1e25em i\u1e93ekwan n wid i\u1e0du\u025ben Sidi \u1e5aebbi,\n23:30 teqqa\u1e5bem lemmer i n\u025bac di zzman n lejdud-nne\u0263, tili ur neqbil ara a n\u021bekki yid-sen deg ussizel n idammen n lenbiya.\n23:31 S wakka te\u021bcehhidem belli kunwi \u021b-\u021barwa n wid ineqqen lenbiya\n23:32 yerna kunwi te\u021bkemmilem ayen xedmen lejdud-nwen !\n23:33 A ccetla n izerman ! Amek ara tmen\u025bem si l\u025biqab n \u01e7ahennama ?\n23:34 Daymi ara wen-d-cegg\u025be\u0263 lenbiya, imusnawen akk-d l\u025bulama. KKra seg-sen a ten-ten\u0263em, kra a ten-tsemm\u1e5bem \u0263ef wumidag, kra nni\u1e0den a ten-tejlek\u1e0dem di le\u01e7wame\u025b nwen yerna a ten-te\u021bqehhi\u1e5bem si temdint \u0263er taye\u1e0d.\n23:35 Ihi, idammen n i\u1e25eqqiyen yuzzlen di lqa\u025ba, si Habil a\u1e25eqqi mmi-s n Adem armi d Zakarya mmi-s n Birikya, i ten\u0263am ger l\u01e7ame\u025b iqedsen d udekkan iseflawen, a d-u\u0263alen \u0263er yiri-nwen.\n23:36 A wen-d-ini\u0263 tide\u021b : ayagi me\u1e5b\u1e5ba a d-ye\u0263li \u0263ef l\u01e7il-agi !\n23:37 A tamdint n Lquds ! A tamdint n Lquds ineqqen lenbiya, ire\u01e7\u01e7men wid i m-d-i\u021bucegg\u025ben s \u0263u\u1e5b \u1e5aebbi, ac\u1e25al n tikkal i b\u0263i\u0263 a d-jem\u025be\u0263 arraw-im akken tjemme\u025b tyazi\u1e6d if\u1e5bax-is ddaw wafriwen-is, me\u025bna tegumma\u1e0d !\n23:38 Ihi atan wexxam-im ad yexlu !\n23:39 Axa\u1e6der aql-i a wen-ini\u0263 : ur te\u021b\u021bu\u0263alem ara a yi-twalim, alamma d ass i deg ara d-tinim : Ye\u021b\u021bubarek win i d-yusan s yisem n Sidi \u1e5aebbi !\n24:1 Mi d-iffe\u0263 si l\u01e7ame\u025b iqedsen, Sidna \u0190isa iteddu ad i\u1e5bu\u1e25. Inelmaden-is qe\u1e5b\u1e5bben-d \u0263u\u1e5b-es, \u021bwehhin-as iwakken ad yerr ddehn-is \u0263er cba\u1e25a akk-d lebni n l\u01e7ame\u025b iqedsen.\n24:2 Me\u025bna Sidna \u0190isa yenna-yasen : Twalam annect-agi me\u1e5b\u1e5ba ? A wen-ini\u0263 tide\u021b : ur d-ye\u021b\u0263imi wez\u1e5bu \u0263ef waye\u1e0d, kullec ad ihudd.\n24:3 Yuli \u0263er yi\u0263il n uzemmur iqqim we\u1e25d-es, inelmaden-is usan-d a t-steqsin nnan-as : Melmi ara d-id\u1e5bu wayen i d tenni\u1e0d, amek ara ne\u025bqel ass ameqqran n tu\u0263alin-ik akk-d taggara n ddunit ?\n24:4 Sidna \u0190isa yenna-yasen : \u0194u\u1e5b-wat win ara wen-ikellxen !\n24:5 Axa\u1e6der a\u1e6das n yemdanen ara d-yasen s yisem-iw, a d-inin : \u00ab` D nekk i d Lmasi\u1e25 ! \u00bb Yerna ad kellxen a\u1e6das n l\u0263aci.\n24:6 A\u021b-\u021beslem s \u1e6dradat \u021b-\u021begrawliwin, me\u025bna \u0263u\u1e5b-wat a kkun-iffe\u0263 le\u025bqel. Ur \u021b\u021baggadet ara, axa\u1e6der ilaq a d-yed\u1e5bu wannect-a, me\u025bna mazal ma\u010d\u010di d nnger n ddunit.\n24:7 Agdud ad yenna\u0263 d waye\u1e0d, tagelda a\u021b-\u021be\u1e93dem \u0263ef taye\u1e0d, a d-yili la\u1e93 d zzelzlat deg wa\u1e6das n imukan.\n24:8 Ayagi akk ara yed\u1e5bun, ad yili am lqe\u1e5b\u1e25 amezwaru n tme\u1e6d\u1e6dut i\u1e6d\u1e6dfen addud.\n24:9 Imiren a kkun-fken iwakken a\u021b-\u021be\u021b\u021bu\u025betbem, a kkun-n\u0263en, le\u01e7nas me\u1e5b\u1e5ba a kkun-ke\u1e5bhen \u0263ef ddemma n yisem-iw.\n24:10 A\u1e6das ara ye\u01e7\u01e7en liman-nsen, ad msek\u1e5bahen, ad \u021bemyexda\u025ben wway gar-asen.\n24:11 A d-nnulfun lenbiya n lekdeb, ad \u0263u\u1e5b\u1e5ben a\u1e6das n l\u0263aci,\n24:12 simmal ad ye\u021bzad lba\u1e6del, simmal lma\u1e25ibba n wa\u1e6das n yemdanen a\u021b-\u021benqes.\n24:13 Ma d win ara ye\u1e6d\u1e6dfen di liman-is alamma \u021b-\u021baggara, ad i\u021b\u021busellek.\n24:14 Lexba\u1e5b-agi n lxi\u1e5b \u0263ef tgelda n Sidi \u1e5aebbi, ad i\u021b\u021bubecce\u1e5b di ddunit me\u1e5b\u1e5ba iwakken le\u01e7nas ad slen yis. Imiren ara d-tawe\u1e0d taggara n ddunit.\n24:15 M'ara twalim deg wemkan iqedsen win iwumi semman lmu\u1e63iba issengaren i \u0263ef d-ih\u1e0de\u1e5b nnbi Danyel ; ( win ara ye\u0263\u1e5ben taktabt-agi n nnbi Danyel ad ifhem !)\n24:16 Imiren, wid ara yilin di tmurt n Yahuda ilaq ad rewlen \u0263er idurar,\n24:17 win ara yilin s ufella n ssqef, ur ilaq ara ad ikcem \u0263er wexxam iwakken a d-iddem lqecc-is,\n24:18 win da\u0263en ara yilin di lexla, ur ilaq ara ad yu\u0263al \u0263er deffir iwakken a d-iddem abe\u1e5bnus-is !\n24:19 A tawa\u0263it n tilawin ara yilin s tadist akk-d \u021bid ara yessu\u1e6du\u1e0den deg ussan-nni !\n24:20 D\u025but \u0263er \u1e5aebbi iwakken tarewla agi-nwen ur d-tde\u1e5b\u1e5bu ara di ccetwa ne\u0263 deg wass n weste\u025bfu.\n24:21 Axa\u1e6der \u00ab ad yili yiwen n le\u025btab ur d-nelli seg wasmi d-tebda ddunit ar ass-a yerna ur i\u021b\u021bu\u0263al ara a d-yili ! \u00bb\n24:22 Lemmer ur issenqes ara Sidi \u1e5aebbi deg wussan-nni, tili yiwen ur imenne\u025b, me\u025bna \u0263ef ddemma n wid yexta\u1e5b ara ye\u1e63\u1e63enqes i wussan-agi.\n24:23 Imiren ma yenna-yawen-d yiwen : Lmasi\u1e25 atan dagi ne\u0263 atan, dihin, ur \u021b\u021bamnet ara !\n24:24 Axa\u1e6der a d-asen wid ara yerren iman-nsen d Lmasi\u1e25 ne\u0263 d lenbiya, ad xedmen lbe\u1e5bhanat d le\u025b\u01e7ayeb akk-d lica\u1e5bat iwakken ad kelxen ma zemren ula d wid yexta\u1e5b Sidi \u1e5aebbi.\n24:25 Atan nni\u0263-awen-t-id ihi :\n24:26 ma nnan-awen Lmasi\u1e25 atan deg unez\u1e5buf, ur \u021b\u1e5bu\u1e25ut ara, ne\u0263 ma nnan-awen walit, atan deg umkan-ihin yeffren, ur \u021b\u021bamnet ara.\n24:27 Axa\u1e6der asm'ara d-yas Mmi-s n bunadem, ad yili am tafat n lbe\u1e5beq m'ara d-tfe\u01e7\u01e7e\u01e7 si cce\u1e5bq alamma d l\u0263e\u1e5bb.\n24:28 Anda yella umu\u1e5b\u1e0dus ( l\u01e7ifa ), dinna ara nnejma\u025ben igudar.\n24:29 M'ara \u025beddin wussan-nni n le\u025btab, i\u1e6dij ad inqes, aggur ur d-i\u021b\u021bak ara tiziri-ines, itran a d-\u0263lin seg igenni, tizmar n igenwan ad rgagint.\n24:30 Imiren a d-iban Mmi-s n bunadem deg igenni, le\u025b\u1e5bac me\u1e5b\u1e5ba n ddunit ad me\u01e7den, a d wwten deg idmaren-nsen m'ara walin Mmi-s n bunadem deg igenwan, yusa-d \u0263ef wusigna s tezmert akk-d l\u025ba\u1e0dima tameqqrant.\n24:31 A d-icegge\u025b lmalayekkat-is ad berr\u1e25ent s \u1e63\u1e63ut n lbuq, a d snejma\u025bent wid akk yexta\u1e5b Sidi \u1e5aebbi, si yal amkan, seg ixef n ddunit \u0263er waye\u1e0d.\n24:32 Meyzet \u0263ef lemtel n tneqle\u021b : mi lqaqit isegman-is, fsan wafriwen-is, te\u1e25sam yewwe\u1e0d-d unebdu !\n24:33 Ula d kunwi, m'ara twalim yewwe\u1e0d-ed wannect-agi me\u1e5b\u1e5ba, \u1e25\u1e63ut belli Mmi-s n bunadem i\u021beddu-d, atan \u0263er tewwurt.\n24:34 A wen-d-ini\u0263 tide\u021b : l\u01e7il-agi ur i\u021b\u025bedday ara alamma ide\u1e5b\u1e5bu-d wannect agi me\u1e5b\u1e5ba.\n24:35 Igenni d lqa\u025ba ad fnun, ma d imeslayen-iw ur fennun ara !\n24:36 Me\u025bna \u0263ef wayen ye\u025bnan ass ne\u0263 ssa\u025ba n wannect-agi me\u1e5b\u1e5ba, yiwen ur ten-issin, ama d lmalayekkat n igenwan, ama d Mmi-s n \u1e5aebbi, anagar Baba \u1e5aebbi i ge\u1e93ran.\n24:37 Am akken i ted\u1e5ba di zzman n nnbi Nu\u1e25, akken da\u0263en ara ted\u1e5bu di lweqt n Mmi-s n bunadem.\n24:38 Axa\u1e6der deg ussan-nni uqbel a d-neflen waman \u0263ef ddunit, imdanen llan te\u021b\u021ben, tessen, \u021bemyezwa\u01e7en, zeggjen i warraw-nsen, armi d ass i deg yekcem nnbi Nu\u1e25 \u0263er lbabu\u1e5b.\n24:39 Yiwen ur ifaq s wacemma armi d-\u1e25emlen waman i ten-yewwin, snegren-ten akk. AAkken ara ted\u1e5bu di lweqt n tu\u0263alin n Mmi-s n bunadem !\n24:40 Imiren, ger sin yergazen ara yilin deg iger, yiwen ad i\u021bwarfed waye\u1e0d a d-iqqim.\n24:41 Ger snat n tilawin ye\u1e93\u1e93aden s tsirt, yiwet a\u021b-\u021be\u021bwarfed taye\u1e0d a d-teqqim !\n24:42 \u0190asset ihi ur \u0263efflet ara ! Axa\u1e6der ur te\u1e93rim ara lweqt i deg ara d-yas Ssid-nwen !\n24:43 Rret ddehn-nwen \u0263er wayagi : lemmer ye\u1e93ri bab n wexxam lweqt i deg ara d-yas umakar, tili ad i\u025biwez ur iggan ara, iwakken ur t-\u021b\u021bakren ara.\n24:44 Daymi ula d kunwi heggit iman-nwen axa\u1e6der di lweqt i \u0263ef ur tebnim ara, ara d-yas Mmi-s n bunadem.\n24:45 Anwa i d aqeddac a\u025beqli i \u0263ef ara ye\u021bkel bab n wexxam ? D win ara iwekkel \u0263ef wat wexxam-is me\u1e5b\u1e5ba, iwakken a sen-yefk lqut-nsen di lawan.\n24:46 Amarezg n uqeddac-agi ara d-yaf bab n wexxam m'ara d-yawe\u1e0d, yelha d cc\u0263el-nni.\n24:47 A wen-ini\u0263 tide\u021b : a t-yerr d lewkil \u0263ef wayla-s me\u1e5b\u1e5ba !\n24:48 Me\u025bna ma yella axeddam-agi diri-t, ad yini deg ul-is : bab n wexxam i\u025be\u1e6d\u1e6del, mazal ur d-i\u021bas ara ;\n24:49 d\u0263a ad ibdu ad ikkat iqeddacen n wexxam-nni, ad ite\u021b, ad itess ne\u021b\u021ba d isek\u1e5banen.\n24:50 Bab n wexxam a d-yas deg wass i \u0263ef ur ibni ara uqeddac-nni, di lawan ur ye\u1e93ri.\n24:51 A t-iqecce\u025b, a t-i\u025baqeb akken \u021bwa\u025baqben at sin udmawen : imiren ara yilin ime\u1e6d\u1e6dawen d nndama tameqqrant.\n25:1 Daymi deg wussan-nni, tagelda n igenwan a\u021b-\u021becbu \u0263er \u025bec\u1e5ba telme\u1e93yin i geddmen tiftilin-nsent iwakken ad \u1e5bu\u1e25ent ad mmagrent isli.\n25:2 Xemsa seg-sent \u021b-\u021bu\u1e25\u1e5bicin, xemsa nni\u1e0den \u021b-\u021bungifin.\n25:3 Mi d-ddment tungifin-nni tiftilin nsent, ur d-wwint ara zzit yid-sent.\n25:4 Ma \u021b-\u021bu\u1e25\u1e5bicin-nni, wwint-ed yid-sent tiqbucin n zzit.\n25:5 Imi i g\u025be\u1e6d\u1e6del yesli, tilme\u1e93yin-nni nuddment d\u0263a \u1e6dsent.\n25:6 Di tlemmast n yi\u1e0d, yiwet n ta\u0263ect t\u025begge\u1e0d-ed : Ataya yesli iteddu-d, ff\u0263emt a t-temmagremt !\n25:7 Imiren kan ukint-ed akk telme\u1e93yin-nni, heggant tiftilin-nsent.\n25:8 Tungifin-nni nnant i tu\u1e25\u1e5bicin : Fkemt-a\u0263-d kra si zzit-nkunt, tiftilin-nne\u0263 q\u1e5bib ad xsint.\n25:9 Tu\u1e25\u1e5bicin rrant-asent : Ulamek, ur a\u0263-d-tkeffu ara i nekkunti d kunemti, \u1e5bu\u1e25emt a d ta\u0263emt i yiman-nkunt \u0263er wid yeznuzun.\n25:10 Mi \u1e5bu\u1e25ent a d-a\u0263ent, isli yewwe\u1e0d-ed, tu\u1e25\u1e5bicin-nni iheggan iman-nsent kecment yid-es \u0263er wexxam n tme\u0263\u1e5ba, d\u0263a rran-d tawwurt.\n25:11 Mi i d-ww\u1e0dent tungifin-nni, bdant \u021b\u025beggi\u1e0dent : A Sidi, a Sidi ldi-ya\u0263-d tawwurt.\n25:12 Me\u025bna ne\u021b\u021ba yerra-yasent-ed : A kunt-ini\u0263 tide\u021b : ur kkunt ssine\u0263 ara !\n25:13 Daymi a wen-ini\u0263 : \u0190asset, imi ur te\u1e93rim ass, ur te\u1e93rim lweqt.\n25:14 Ass n tu\u0263alin n Mmi-s n bunadem ad yili da\u0263en am yiwen wergaz i g\u021beddun ad i\u1e5bu\u1e25 \u0263er l\u0263e\u1e5bba, yesnejma\u025b-ed iqeddacen-is, iwekkel iten \u0263ef wayen akk yes\u025ba.\n25:15 Ifka i umezwaru xemsmeyya twiztin n ddheb, wi sin yefka-yas mitin, wis tlata yefka-yas meyya ; yefka i yal yiwen s wakken tella tezmert-is, d\u0263a i\u1e5bu\u1e25.\n25:16 Imiren kan, aqeddac-nni iwumi yefka xemsmeyya twiztin, i\u1e5bu\u1e25 yetje\u1e5b yis-sent, irbe\u1e25-ed xemsmeyya nni\u1e0den.\n25:17 Ula d win iwumi yefka mitin, ixdem akken, irbe\u1e25-ed mitin nni\u1e0den.\n25:18 Ma d win iwumi yefka meyya, i\u1e5bu\u1e25 ye\u0263za di lqa\u025ba, yeffer tiwiztin-nni i s-d-ifka um\u025bellem-is.\n25:19 Mi g\u025bedda lweqt, yu\u0263al-ed um\u025bellem-nni, isnejma\u025b-iten-id iwakken ad im\u1e25asab yid-sen.\n25:20 Win akken iwumi yefka xemsmeyya twiztin, yusa-d yewwi-d yid-es xemsmeyya twiztin nni\u1e0den, yenna-yas : A Sidi tefki\u1e0d-iyi-d xemsmeyya twiztin n ddheb, a tent-ih xemsmeyya nni\u1e0den i d-reb\u1e25e\u0263 yis-sent.\n25:21 Am\u025bellem-is yenna-yas : D ayen yelhan i txedme\u1e0d ay aqeddac un\u1e63i\u1e25, imi deg-ek laman \u0263ef t\u0263awsiwin timec\u1e6du\u1e25in, sya d asawen a k-wekkle\u0263 \u0263ef timeqqranin ! Ili-k di lfe\u1e5b\u1e25 yid-i !\n25:22 Aqeddac-nni iwumi yefka mitin twiztin n ddheb, iqe\u1e5b\u1e5beb-ed ula d ne\u021b\u021ba, yenna-yas : A Sidi tefki\u1e0d-iyi mitin twiztin n ddheb, a tent-ih mitin nni\u1e0den i d-reb\u1e25e\u0263 yis-sent.\n25:23 Am\u025bellem-is yenna-yas : D ayen yelhan i txedme\u1e0d, ay aqeddac un\u1e63i\u1e25imi deg-k laman \u0263ef t\u0263awsiwin timec\u1e6du\u1e25in, sya d asawen a k-wekkle\u0263 \u0263ef timeqqranin ! Ili-k di lfe\u1e5b\u1e25 yid-i !\n25:24 Iwwe\u1e0d-ed win akken iwumi yefka meyya twiztin, yenna yas : A Sidi \u1e93ri\u0263-k d argaz iwe\u025b\u1e5ben, tmeggre\u1e0d anda ur tezri\u025be\u1e0d, tjemm\u025be\u1e0d seg wennar ayen ur tesrewte\u1e0d ,\n25:25 d\u0263a uggade\u0263-k, daymi i \u1e5bu\u1e25e\u0263 ffre\u0263 deg wakal tiwiztin-nni i yi-tefki\u1e0d. Atan wayla-k, ddem-it !\n25:26 Am\u025bellem-is yenna-yas : Ay aqeddac amcum, ame\u025bdaz ! Imi iyi-te\u1e93ri\u1e0d meggre\u0263-d anda ur zri\u025be\u0263, jemm\u025be\u0263-ed da\u0263en anda ur srewte\u0263,\n25:27 acu\u0263e\u1e5b ihi ur tessekra\u1e0d ara idrimin-iw iwakken m'ara d-u\u0263ale\u0263 a ten-id-erre\u0263 s lfayda.\n25:28 Imiren am\u025bellem-nni yume\u1e5b i iqeddacen-is yenna-yasen : Kkset-as meyya-nni twiztin ternum-tent i win yes\u025ban \u025bec\u1e5ba alef n twiztin !\n25:29 Axa\u1e6der kra win yes\u025ban, a s-nernu ad yili di tawant, ma d win ur nes\u025bi ara, a s-nekkes ula d ayen yes\u025ba.\n25:30 Ma d aqeddac-agi ur nem\u025bin, \u1e0degg\u1e5bet-e\u021b \u0263er \u1e6d\u1e6dlam n be\u1e5b\u1e5ba anda ara yilin ime\u1e6d\u1e6dawen d nndama tameqqrant.\n25:31 Asm'ara d-yas Mmi-s n bunadem di tmanegt-is ne\u021b\u021ba d lmalayekkat me\u1e5b\u1e5ba, ad i\u1e25kem di l\u025ba\u1e0dima-s ;\n25:32 le\u01e7nas me\u1e5b\u1e5ba a d-nnejma\u025ben zdat-es, a ten-if\u1e5beq am umeksa i\u025beSlen ulli \u0263ef t\u0263e\u1e6d\u1e6den.\n25:33 Ad yerr ulli \u0263er uyeffus-is, ti\u0263e\u1e6d\u1e6den \u0263er uzelma\u1e0d-is.\n25:34 Imiren agellid ad yini i wid yellan \u0263er uyeffus-is : Aset-ed a kunwi iburek Baba, a\u021b-\u021bwe\u1e5btem tagelda i wen-i\u021b\u021buheggan seg wasmi i tebda ddunit.\n25:35 Axa\u1e6der lli\u0263 llu\u1e93e\u0263 tefkam-iyi \u010d\u010di\u0263, ffude\u0263 tefkam-iyi swi\u0263, usi\u0263-ed d abe\u1e5b\u1e5bani teste\u1e5b\u1e25bem yis-i,\n25:36 lli\u0263 d a\u025beryan tesselsem-iyi, d amu\u1e0din telham-d yid-i, lli\u0263 da\u0263en d ame\u1e25bus tusam-d te\u1e93ram-iyi.\n25:37 Imiren i\u1e25eqqiyen a s-d-rren : A Sidi melmi i k-ne\u1e93ra tellu\u1e93e\u1e0d, nefka-yak te\u010d\u010di\u1e0d ? Ne\u0263 ne\u1e93ra-k teffu\u1e0de\u1e0d nefka-yak teswi\u1e0d ?\n25:38 Melmi da\u0263en i d-tusi\u1e0d d abe\u1e5b\u1e5bani nes\u1e6de\u1e5b\u1e25eb yis-ek, ne\u0263 melmi i k-nwala d a\u025beryan, nessels-ik ?\n25:39 Melmi i k-ne\u1e93ra d amu\u1e0din ne\u0263 di l\u1e25ebs nusa-d \u0263u\u1e5b-ek ?\n25:40 Agellid a sen-d-yerr : A wen-ini\u0263 tide\u021b, yal tikkelt i deg txedmem ayagi i yiwen seg imec\u1e6du\u1e25en-agi yellan d atmaten-iw, i nekk iwumi t-txedmem.\n25:41 Imiren ad yini i wid yellan \u0263er u\u1e93elma\u1e0d-is : Be\u025bdet akkin fell-i a kunwi ye\u021bwane\u025blen, \u1e5bu\u1e25et \u0263er tmes n dayem ye\u021bwaheggan i Cci\u1e6dan d wid i t- teb\u025ben.\n25:42 Axa\u1e6der lli\u0263 llu\u1e93e\u0263 ur iyi tesse\u010d\u010dem ara, ffude\u0263 ur iyi-tefkim ara ad swe\u0263,\n25:43 usi\u0263-ed d abe\u1e5b\u1e5bani ur tes\u1e6der\u1e25bem ara yis-i, lli\u0263 d a\u025beryan ur iyi tesselsem ara, lli\u0263 da\u0263en d amu\u1e0din, d ame\u1e25bus, ur d-tusim ara a\u021b-\u021besteqsim fell-i.\n25:44 Imiren ula d nutni a s-d-rren : A Sidi, melmi i k-ne\u1e93ra tellu\u1e93e\u1e0d ne\u0263 teffude\u1e0d d abe\u1e5b\u1e5bani ne\u0263 d a\u025beryan, d amu\u1e0din ne\u0263 d ame\u1e25bus, ur d-nelhi ara yid-ek ?\n25:45 Ne\u021b\u021ba a sen-d-yerr : A wen-ini\u0263 tide\u021b : yal tikkelt i deg ur texdimem ara ayagi i yiwen seg imec\u1e6du\u1e25en-agi, i nekk iwumi ur t-texdimem ara.\n25:46 Imiren widak-agi ad kecmen \u0263er l\u025biqab ur nfennu, ma d i\u1e25eqqiyen ad kecmen \u0263er tudert n dayem !\n26:1 Mi gfukk Sidna \u0190isa imeslayen-agi, yenna i inelmaden-is : --\n26:2 Mazal sin wussan i l\u025bid n Tuff\u0263a, Mmi-s n bunadem ad i\u021b\u021buzenz iwakken ad i\u021bu\u1e63emmer \u0263ef wumidag.\n26:3 D\u0263a lmuqedmin imeqqranen akk-d imeqqranen n wegdud nnejma\u025ben deg ufrag n Kayef, i gellan d lmuqeddem ameqqran.\n26:4 Msefhamen ad \u1e6d\u1e6dfen Sidna \u0190isa s t\u1e25ila iwakken a t-n\u0263en.\n26:5 Me\u025bna nnan : \u00ab ma\u010d\u010di deg ussan-agi n l\u025bid n Tuff\u0263a ara t-ne\u1e25bes, ne\u0263 m'ulac ad yekker ccwal ger l\u0263aci .\u00bb\n26:6 Mi gella Sidna \u0190isa di taddart n Bitanya, deg wexxam n Sem\u025bun abe\u1e5bsi,\n26:7 a\u021baya yiwet n tme\u1e6d\u1e6dut tewwi-d tabuqalt ye\u021bwaxedmen s wed\u0263a\u0263 amellal, te\u010d\u010du\u1e5b d le\u025b\u1e6de\u1e5b \u0263layen. Mi geqqim Sidna \u0190isa \u0263er \u1e6d\u1e6dabla, tame\u1e6d\u1e6dut-nni tusa-d tesmar le\u025b\u1e6de\u1e5b-nni \u0263ef wuqe\u1e5b\u1e5buy-is.\n26:8 Mi walan ayagi, inelmaden i\u0263a\u1e0d-iten l\u1e25al, nnan : Iwumi lexsa\u1e5ba-yagi ?\n26:9 Lemmer nezzenz le\u025b\u1e6de\u1e5b-nni, tili yewwi-d ssuma tameqqrant ara nef\u1e5beq i igellilen !\n26:10 Sidna \u0190isa ye\u1e93ran wayen nnan wway-gar-asen, yenna-yasen : Acu\u0263e\u1e5b i tes\u1e25eznem tame\u1e6d\u1e6dut agi ? D ayen yelhan i yi-texdem !\n26:11 Axa\u1e6der a\u021b-\u021bes\u025bum daymen igellilen yid-wen, me\u025bna nekk ur \u021b\u021bili\u0263 ara daymen yid-wen.\n26:12 Mi d-tesmar le\u025b\u1e6de\u1e5b-agi fell-i, d l\u01e7e\u021b\u021ba-w i thegga i tem\u1e0delt-iw.\n26:13 A wen-ini\u0263 tide\u021b : di yal amkan n ddunit i deg ara i\u021b\u021bubecce\u1e5b lexba\u1e5b n lxi\u1e5b, a d \u021bmektayen tame\u1e6d\u1e6dut-agi d wayen texdem.\n26:14 Imiren Yudas n Qe\u1e5byut, yiwen si tnac-nni inelmaden n Sidna \u0190isa, i\u1e5bu\u1e25 \u0263er lmuqedmin imeqqranen,\n26:15 yenna yasen : Ma wwi\u0263-kkun \u0263u\u1e5b-es a t-id te\u1e6d\u1e6dfem, d acu ara yi-tefkem ? FFkan-as tlatin i\u1e63urdiyen n lfe\u1e6d\u1e6da.\n26:16 Seg imiren, Yudas ye\u021b\u025bassa tagni\u021b i deg ara yizmir ad izzenz Sidna \u0190isa.\n26:17 Ass amezwaru n l\u025bid n we\u0263\u1e5bum mbla i\u0263es n temtunt , inelmaden usan-d \u0263er Sidna \u0190isa nnan-as : A Sidi, anda teb\u0263i\u1e0d a k-nheggi imensi n l\u025bid n Izimer n leslak ?\n26:18 Yerra-yasen : \u1e5au\u1e25et \u0263er temdint, \u0263er leflani, init-as : yenna-yak Ssid-nne\u0263, lweqt-iw yewwe\u1e0d-ed, deg uxxam-ik ara s\u025beddi\u0263 l\u025bid n Izimer n leslak nekk d inelmaden-iw.\n26:19 Inelmaden-nni xedmen ayen i sen-yenna Sidna \u0190isa, heggan imensi n l\u025bid n Izimer n leslak.\n26:20 Mi d-te\u0263li tmeddit, Sidna \u0190isa yeqqim ad ye\u010d\u010d ne\u021b\u021ba d inelmaden-is.\n26:21 Mi llan te\u021b\u021ben yenna-yasen : A wen-ini\u0263 tide\u021b : yiwen seg-wen ad iyi-izzenz.\n26:22 Mi d-yenna ayagi, ikcem-iten akk le\u1e25zen d ameqqran, bdan qqa\u1e5ben as yiwen yiwen : Ne\u0263 ma\u010d\u010di d nekk a Sidi ?\n26:23 Yerra-yasen : Win igren afus-is yid-i deg u\u1e0debsi, d ne\u021b\u021ba ara yi-izzenzen.\n26:24 Ad yed\u1e5bu d Mmi-s n bunadem akken yura fell-as ; mme\u025bna a nnger n win ara t-izzenzen, lemmer ur d-ilul ara axi\u1e5b-is.\n26:25 Yudas ara t-ixed\u025ben yen\u1e6deq yenna-yas : E\u025bni d nekk a Sidi ? SSidna \u0190isa yerra-yas : Atan tenni\u1e0d-t-id !\n26:26 Mi llan te\u021b\u021ben, Sidna \u0190isa yeddem-d a\u0263\u1e5bum, i\u1e25med \u1e5aebbi, icekke\u1e5b-it, d\u0263a yeb\u1e0da-t, if\u1e5beq-it i inelmaden-is, yenna-yasen : E\u010d\u010det a\u0263\u1e5bum-agi : d l\u01e7e\u021b\u021ba-w.\n26:27 Iddem-ed da\u0263en taqbuct, i\u1e25med \u1e5aebbi, icekke\u1e5b-it, yefka-yasen-\u021b, yenna-yasen : Swet akk si teqbuct-agi,\n26:28 axa\u1e6der ayagi d idammen-iw, d idammen n lem\u025bahda ara yazzlen \u0263ef yizumal n l\u0263aci \u0263ef ddemma n le\u025bfu n ddnubat-nsen.\n26:29 A wen-d-ini\u0263 : ur \u021b\u021bu\u0263ale\u0263 ara ad swe\u0263 seg waman-agi n t\u1e93urin alamma d ass i deg ara ten-swe\u0263 d ijdiden yid-wen, di tgelda n Baba \u1e5aebbi.\n26:30 Mi \u1e25emden Sidi \u1e5aebbi s ccnawi d isefra, \u1e5bu\u1e25en ulin \u0263er yi\u0263il n uzemmur,\n26:31 dinna Sidna \u0190isa yenna-yasen : I\u1e0d-agi ad a wen-ili\u0263 akk d sebba n tucc\u1e0da, axa\u1e6der yura di tira iqedsen ad wwte\u0263 ameksa, ulli n tqe\u1e0d\u025bit-is ad rewlent \u0263er yal tama .\n26:32 Me\u025bna m'ara d-\u1e25yu\u0263 si ger lmegtin, ad iyi-tafem zware\u0263 \u0263er tmurt n Jlili.\n26:33 Bu\u1e6drus yen\u1e6deq, yenna : \u0194as a sen-tili\u1e0d d sebba n tucc\u1e0da i wiya\u1e0d akk, nekk d lmu\u1e25al ad cc\u1e0de\u0263.\n26:34 Sidna \u0190isa yenna-yas : A k-ini\u0263 tide\u021b : deg i\u1e0d-agi uqbel ad iskku\u025b uyazi\u1e0d, ad iyi-tnek\u1e5be\u1e0d tlata iberdan.\n26:35 Bu\u1e6drus yerra-yas : \u0194as lukan d lmut ara mmte\u0263 yid-ek, d lmu\u1e25al a k-nekk\u1e5be\u0263 ! UUla d inelmaden nni\u1e0den, nnan-as am ne\u021b\u021ba.\n26:36 Imiren Sidna \u0190isa i\u1e5bu\u1e25 yid-sen \u0263er yiwen wemkan i\u021b\u021busemman Jitsimani, yenna i inelmaden-is : Qqimet dagi, nekk ad \u1e5bu\u1e25e\u0263 ad d\u025bu\u0263 \u0263er Sidi \u1e5aebbi.\n26:37 Yewwi yid-es Bu\u1e6drus akk-d sin warraw-nni n Zabadi ; yebda ikcem-it le\u1e25zen d le\u0263ben d ameqqran.\n26:38 D\u0263a yenna-yasen : \u1e24usse\u0263 s le\u1e25zen n lmut, qqimet dagi, \u025biwzet yid-i !\n26:39 I\u1e5bu\u1e25 ye\u0263li \u0263ef wudem, ibda ye\u021b\u1e93alla yeqqa\u1e5b : A Baba \u1e5aebbi, ma yella wamek , sseb\u025bed fell-i le\u025btab-agi ! Me\u025bna akken teb\u0263i\u1e0d ke\u010d\u010dini, ma\u010d\u010di akken b\u0263i\u0263 nekkini.\n26:40 Yu\u0263al-ed \u0263er inelmaden-is, yufa-ten-id \u1e6d\u1e6dsen, yenna i Bu\u1e6drus : Ur tezmirem ara a\u021b-\u021b\u025biwzem yid-i ula d yiwet n ssa\u025ba ?\n26:41 \u0190iwzet, \u1e93allet, iwakken ur t\u0263ellim ara deg uje\u1e5b\u1e5beb ! Axa\u1e6der \u1e5b\u1e5bu\u1e25 n wemdan ye\u01e7hed ma d l\u01e7e\u021b\u021ba ur tezmir ara !\n26:42 Ib\u025bed akkin tikkelt tis snat iwakken ad i\u1e93\u1e93al, yenna : A Baba, ma yella ulamek ara tesbe\u025bde\u1e0d fell-i le\u025btab-agi , ma ilaq ad iyi-d-yawe\u1e0d ! Ad yed\u1e5bu leb\u0263i-k !\n26:43 Mi d-yu\u0263al, yufa-ten-id da\u0263en \u1e6d\u1e6dsen, i\u0263leb-iten nuddam.\n26:44 Ye\u01e7\u01e7a-ten, isseb\u025bed iman-is da\u0263en fell-asen, yed\u025ba tikkelt tis tlata am tikkelt-nni tamezwarut.\n26:45 Mi d-yu\u0263al \u0263er inelmaden-is, yufa-ten-id mazal-iten \u1e6d\u1e6dsen ; yenna yasen : Lweqt i deg ara ye\u021bwasellem Mmi-s n bunadem \u0263er ifassen n yemcumen iwwe\u1e0d-ed, kunwi mazal ikkun te\u1e6d\u1e6dsem ?\n26:46 D\u0263a yenna-yasen : Ekkret fell-awen, ataya iteddu-d win i yi-izzenzen !\n26:47 Mazal-it i\u021bmeslay mi d-iwwe\u1e0d Yudas yellan d yiwen si tnac-nni inelmaden. Ddan-d yid-es a\u1e6das n l\u0263aci s i\u025bekkzan d ijenwiyen, cegg\u025ben ten-id imeqqranen n lmuqedmin akk-d imeqqranen n wegdud.\n26:48 Win akken i t-izzenzen, imsefham yid-sen, yenna-yasen : Win i \u0263ef ara selme\u0263, d win ara te\u1e6d\u1e6dfem !\n26:49 Imiren, iqe\u1e5b\u1e5beb \u0263er Sidna \u0190isa yenna-yas : Sslam fell-ak a Sidi ! DD\u0263a isellem fell-as.\n26:50 Sidna \u0190isa yenna-yas : Ay amdakkel , ayen \u0263ef i d-tusi\u1e0d a t-txedme\u1e0d, xdem-it ! DD\u0263a l\u0263aci-nni qe\u1e5b\u1e5bben \u0263er Sidna \u0190isa \u1e6d\u1e6dfen-t.\n26:51 Yiwen seg wid yeddan d Sidna \u0190isa ijbed-ed ajenwi-ines, yewwet aqeddac n lmuqeddem ameqqran, igzem-as-d ame\u1e93\u1e93u\u0263-is.\n26:52 Sidna \u0190isa yen\u1e6deq yenna-yas : Err ajenwi-inek \u0263er wemkan-is, axa\u1e6der kra win ara irefden ajenwi, ad immet s ujenwi !\n26:53 E\u025bni t\u0263ile\u1e0d ur zmire\u0263 ara ad ssutre\u0263 i Baba ad iyi-d-icegge\u025b luluf n lmalayekkat ?\n26:54 Amek ihi ara \u021bwakemlent tira iqedsen i d-ixebb\u1e5ben belli ilaq a d-yed\u1e5bu wayagi me\u1e5b\u1e5ba ?\n26:55 Imiren Sidna \u0190isa yenna i l\u0263aci : Kull ass \u021b\u021bili\u0263 yid-wen di l\u01e7ame\u025b sselmade\u0263, ur iyi-te\u1e6d\u1e6difem ara, ass-agi tusam-d \u0263u\u1e5b-i s i\u025bekkzan d ijenwiyen am akken d bu tmeg\u1e5ba\u1e0d i lli\u0263 !\n26:56 Me\u025bna annect-agi me\u1e5b\u1e5ba yed\u1e5ba-d iwakken ad \u021bwakemlent tira n lenbiya. IImiren, inelmaden me\u1e5b\u1e5ba \u01e7\u01e7an-t, yal yiwen \u0263er wanda yerwel.\n26:57 Wid ye\u1e6d\u1e6dfen Sidna \u0190isa wwin-t \u0263er Kayef, ameqqran n lmuqedmin, anda i nnejma\u025ben l\u025bulama n ccari\u025ba d imeqqranen n wegdud.\n26:58 Bu\u1e6drus i\u1e0dfe\u1e5b-it, ikcem \u0263er wefrag n lmuqeddem ameqqran, yeqqim akk-d i\u025bessasen n l\u01e7ame\u025b iwakken ad i\u1e93er amek ara tefru temsalt.\n26:59 Imiren lmuqedmin imeqqranen akk-d usqamu n imeqqranen n ccari\u025ba, \u021bnadin inigan ara icehden fell-as s \u1e93\u1e93u\u1e5b, iwakken ad \u1e25ekmen fell-as s lmut,\n26:60 me\u025bna ur s-d-ufin ara sebba, \u0263as akken a\u1e6das i d-icehden fell-as.\n26:61 A ten-aya sin yergazen qe\u1e5b\u1e5bben d nnan : D wagi i d-yennan : \u00ab zemre\u0263 ad hudde\u0263 l\u01e7ame\u025b iqedsen n Sidi \u1e5aebbi, a s-\u025biwde\u0263 lebni di tlata wussan.\u00bb\n26:62 Ameqqran n lmuqedmin ikker, yenna-yas : Ulac ayen ara d-terre\u1e0d \u0263ef wayen akka i d-ccetkan fell-ak ?\n26:63 Sidna \u0190isa yessusem. D\u0263a ameqqran n lmuqedmin yenna-yas : Wekkle\u0263-ak Sidi \u1e5aebbi yeddren, m'ur a\u0263-d-tenni\u1e0d ma d ke\u010d\u010d i d Lmasi\u1e25, Mmi-s n Sidi \u1e5aebbi !\n26:64 Sidna \u0190isa yerra-yas : Tenni\u1e0d-t-id ! Yerna a wen-ini\u0263, ssya d asawen : Mmi-s n bunadem aa d i\u1e25kem \u0263\u0263 er uyeffus n Bab n tezmert, a t-twalim iteddu-d \u0263ef wusigna seg yigenni.\n26:65 Imiren ameqqran n lmuqedmin icerreg aqendu\u1e5b-is yenna : Ikfe\u1e5b ! Iwumi ne\u1e25wa\u01e7 inigan tura ? Teslam akk d acu i d-yenna ! D acu tennam ?\n26:66 Rran-as-d : Yuklal lmut !\n26:67 D\u0263a bdan ssusufen-t, \u021b\u021baken-as tiyitiwin d ibeqqayen,\n26:68 qqa\u1e5ben-as : E\u025bqel a Lmasi\u1e25, ini-ya\u0263-d anwa i k-iwwten !\n26:69 Bu\u1e6drus yella yeqqim deg ufrag, tqe\u1e5b\u1e5beb-ed \u0263u\u1e5b-es yiwet n tqeddact tenna-yas : Ula d ke\u010d\u010d telli\u1e0d d \u0190isa ajlili !\n26:70 Me\u025bna yenke\u1e5b zdat-sen me\u1e5b\u1e5ba yenna-yas : Ur \u1e93ri\u0263 ara d acu teb\u0263i\u1e0d a d tini\u1e0d !\n26:71 Akken i\u021beddu \u0263er tewwurt, twala-t tqeddact nni\u1e0den, tenna i wid akk yellan dinna : Wagi yella akk-d \u0190isa ana\u1e63ari !\n26:72 Inke\u1e5b da\u0263en s limin : Qqa\u1e5be\u0263-awen ur ssine\u0263 ara argaz-agi !\n26:73 Taswi\u025bt kan, wid yellan dinna qe\u1e5b\u1e5bben da\u0263en \u0263er Bu\u1e6drus nnan-as : Mbla ccekk, ke\u010d\u010d telli\u1e0d seg-sen, tameslayt-ik tbeggen-ed belli d ajlili i telli\u1e0d !\n26:74 Ibda ye\u021bgalla irennu : Di le\u025bme\u1e5b ur ssine\u0263 argaz-agi ! IImiren kan yeskku\u025b uyazi\u1e0d.\n26:75 D\u0263a Bu\u1e6drus immekta-d imeslayen-nni i s-d-yenna Sidna \u0190isa : uqbel ad iskku\u025b uyazi\u1e0d, ad iyi-tnek\u1e5be\u1e0d tlata n tikkal . Yeffe\u0263 \u0263er be\u1e5b\u1e5ba s nndama tameqqrant, i\u1e6d\u1e6der\u1e0deq d ime\u1e6d\u1e6dawen.\n27:1 Ta\u1e63eb\u1e25it, nnejma\u025ben-d akk imeqqranen n lmuqedmin akk-d imeqqranen n wegdud, mcawa\u1e5ben iwakken ad n\u0263en Sidna \u0190isa.\n27:2 D\u0263a urzen-t, wwin-t i Bila\u1e6dus, yellan d l\u1e25akem n \u1e5auman yeste\u025bem\u1e5ben tamurt.\n27:3 Mi gwala \u1e25ekmen \u0263ef Sidna \u0190isa, Yudas-nni i t-ixed\u025ben yendem. DDi nndama-nni-ines tameqqrant, i\u1e5bu\u1e25 \u0263er imeqqranen n lmuqedmin d imeqqranen n wegdud, yerra-yasen tlatin-nni twiztin n lfe\u1e6d\u1e6da, d\u0263a\n27:4 yenna yasen : Denbe\u0263, nekk i wen-d-izzenzen amdan a\u1e25eqqi. RRran-as-d : Ur a\u0263-d-tewqi\u025b ara lme\u025bna, wagi d cc\u0263el-ik.\n27:5 Yudas i\u1e0degge\u1e5b tiwiztin-nni di l\u01e7ame\u025b iqedsen, imiren i\u1e5bu\u1e25 i\u025belleq iman-is.\n27:6 Imeqqranen n lmuqedmin leq\u1e0den-d tiwiztin-nni n lfe\u1e6d\u1e6da, nnan : Ur ye\u1e25lil ara a tent-nerr \u0263er usenduq n l\u01e7ame\u025b iqedsen, imi d lexla\u1e63 n temge\u1e5bt.\n27:7 Mi mcawa\u1e5ben d acu ara xedmen s twiztin-nni, msefhamen iwakken ad a\u0263en iger n yiwen wergaz ixeddmen afexxa\u1e5b, iwakken a t-erren \u021b-\u021bimeqbe\u1e5bt i ibe\u1e5b\u1e5baniyen.\n27:8 Daymi iger-agi i\u021b\u021busemma ar ass-a : \u00ab Iger n idammen \u00bb.\n27:9 S wakka i ged\u1e5ba wayen i d-yenna nnbi Irmiya : Ddmen-d tlatin n twiztin n lfe\u1e6d\u1e6da, d wagi i d azal i s-fkan warraw n wat Is\u1e5bail ;\n27:10 u\u0263en-d yis iger \u0263er win ixeddmen afexxa\u1e5b, akken i yi-d-yume\u1e5b Sidi \u1e5aebbi.\n27:11 Sidna \u0190isa ibedd zdat l\u1e25akem Bila\u1e6dus. Yesteqsa-t l\u1e25akem-nni yenna-yas : D ke\u010d\u010d i d agellid n wat Is\u1e5bail ? SSidna \u0190isa yerra-yas : Tenni\u1e0d-t-id !\n27:12 Lmuqedmin imeqqranen akk-d imeqqranen n wegdud sse\u1e0dlamen deg-s, ma d ne\u021b\u021ba ur sen-d-yerri ula d acemma.\n27:13 Bila\u1e6dus yenna i Sidna \u0190isa : E\u025bni ur tesli\u1e0d ara ayen akk \u0263ef i d-\u021bcetkin fell-ak ?\n27:14 Sidna \u0190isa yessusem, ur as-d yerri ula d yiwen wawal, ayagi d ayen iswehmen l\u1e25akem.\n27:15 L\u1e25akem yennum di mkul l\u025bid n Tuff\u0263a i\u021bserri\u1e25-ed i yiwen ume\u1e25bus i gexta\u1e5b l\u0263aci.\n27:16 Yella yakan yiwen ume\u1e25bus mechu\u1e5ben, i\u021b\u021busemman Barabas.\n27:17 Mi d-nnejma\u025ben akk l\u0263aci, Bila\u1e6dus isteqsa-ten : Anwa i teb\u0263am a s-d-serr\u1e25e\u0263 : i Barabas ne\u0263 i \u0190isa i\u021b\u021busemman Lmasi\u1e25 ?\n27:18 Axa\u1e6der ye\u1e93ra s tismin i s-d-wwin \u0190isa.\n27:19 Mi gella Bila\u1e6dus i\u021bca\u1e5ba\u025b, tcegge\u025b-as-d tme\u1e6d\u1e6dut-is, tenna-yas-d : Ur ssekcam ara iman-ik di temsalt n u\u1e25eqqi-agi, axa\u1e6der ass-agi targit urga\u0263 fell-as terwi-yi.\n27:20 Imeqqranen n lmuqedmin akk-d imeqqranen n wegdud s\u1e25e\u1e5bcen-d l\u0263aci iwakken ad ssutren a d-serr\u1e25en i Barabas, ad n\u0263en Sidna \u0190isa.\n27:21 L\u1e25akem yenna-yasen : Anwa ger sin-agi iwumi teb\u0263am ad serr\u1e25e\u0263 ? RRran-as : I Barabas ! Serre\u1e25-ed i Barabas !\n27:22 Bila\u1e6dus yenna-yasen : D acu ara xedme\u0263 ihi i \u0190isa i\u021b\u021busemman Lmasi\u1e25 ? RRran-as-d akk : Ad i\u021b\u021busemme\u1e5b \u0263ef wumidag !\n27:23 L\u1e25akem yenna : D acu i gexdem n diri ? RRnan \u021b\u025beggi\u1e0den : Semme\u1e5b-it \u0263ef wumidag !\n27:24 Mi gwala l\u0263aci ugin a s-d \u1e25essen, yerna ccwal simmal ye\u021b\u021bim\u0263u\u1e5b, Bila\u1e6dus yeddem-ed aman, issared ifassen-is zdat l\u0263aci, yenna : Nekk ur \u021bekki\u0263 ara di tazzla n idammen n u\u1e25eqqi-agi, wagi d cc\u0263el-nwen.\n27:25 L\u0263aci me\u1e5b\u1e5ba nnan-as : Tazzla n idammen-is a d-tu\u0263al \u0263ef yirawen-nne\u0263 d yirawen n warraw-nne\u0263.\n27:26 Imiren Bila\u1e6dus iserre\u1e25-ed i Barabas, jelk\u1e0den Sidna \u0190isa, d\u0263a yefka lame\u1e5b a t-semm\u1e5ben \u0263ef wumidag.\n27:27 I\u025bsek\u1e5biyen n l\u1e25akem ssuf\u0263en Sidna \u0190isa \u0263er ufrag, snejma\u025ben-d akk i\u025bsek\u1e5biyen nni\u1e0den, zzin-as.\n27:28 Imiren kksen-as llebsa-s, sselsen as abe\u1e5bnus azegga\u0263.\n27:29 Z\u1e0dan ta\u025be\u1e63\u1e63abt s isennanen, ssersen-as-\u021b \u0263ef wuqe\u1e5b\u1e5buy is, fkan-as a\u0263anim \u0263er ufus-is ayeffus. Bdan kennun zdat-es, stehzayen fell-as, qqa\u1e5ben-as : Sslam fell-ak ay agellid n wat Is\u1e5bail !\n27:30 Ssusufen-t, kkaten-t s u\u0263anim \u0263er uqe\u1e5b\u1e5buy.\n27:31 Mi \u025byan deg ustehzi fell-as, kksen-as abe\u1e5bnus-nni, rran-as llebsa-s, wwin-t a t-semm\u1e5ben \u0263ef wumidag.\n27:32 Mi d-ff\u0263en, mlalen-d yiwen wergaz n tmurt n Qi\u1e5bwan, isem-is sem\u025bun, \u1e25ettmen fell-as ad ibbib amidag n Sidna \u0190isa.\n27:33 Mi ww\u1e0den \u0263er yiwen wemkan i\u021b\u021busemman Gulgu\u1e6da, ye\u025bni \u00ab amkan n uxecxuc \u00bb,\n27:34 fkan-as ad isew cc\u1e5bab i deg yexle\u1e0d yiwen u\u025beqqa\u1e5b a\u1e5bzagan. I\u025bre\u1e0d-it, yugi a t-isew.\n27:35 Mi t-semm\u1e5ben \u0263ef wumidag, gren tas\u0263a\u1e5bt iwakken ad fe\u1e5bqen llebsa-ines, s wakka, yed\u1e5ba-d wayen yuran di tira iqedsen : fe\u1e5bqen llebsa-w, gren tas\u0263art \u0263ef wuqendu\u1e5b-iw.\n27:36 Imiren qqimen a t-\u025bassen,\n27:37 \u025belqen sennig uqe\u1e5b\u1e5buy-is talwi\u1e25t i \u0263ef uran sebba n lmut-is : Wagi d \u0190isa, agellid n wat Is\u1e5bail\n27:38 \u021awasemm\u1e5ben yid-es sin imcumen, yiwen \u0263er uyeffus-is waye\u1e0d \u0263er u\u1e93elma\u1e0d-is.\n27:39 Imsebriden \u021bhuzzun iqe\u1e5b\u1e5bay-nsen reggmen-t,\n27:40 qqa\u1e5ben-as : A win i\u021bhuddun l\u01e7ame\u025b iqedsen ibennu-t di tlata wussan, sellek iman-ik ma d Mmi-s n \u1e5aebbi i telli\u1e0d, ers-ed seg umidag-nni.\n27:41 Imeqqranen n lmuqedmin, l\u025bulama n ccari\u025ba akk-d imeqqranen n wegdud, stehzayen fell-as ula d nutni, qqa\u1e5ben :\n27:42 Isellek wiya\u1e0d ur yezmir ad isellek iman-is ! Ma d agellid n wat Is\u1e5bail i gella, a d-yers ihi seg umidag iwakken a namen yis.\n27:43 Ye\u021bkel \u0263ef \u1e5aebbi, a t-isellek ihi \u1e5aebbi ma i\u1e25emmel-it aaxa\u1e6der yenna-d : \u00ab Nekk d Mmi-s n \u1e5aebbi.\u00bb\n27:44 Ula d imcumen-nni i\u021b\u021busemm\u1e5ben yid-es, regmen-t am wiya\u1e0d.\n27:45 Deg uzzal si tnac armi d \u021blata n tmeddit, ye\u0263li-d \u1e6d\u1e6dlam \u0263ef ddunit me\u1e5b\u1e5ba.\n27:46 \u0194ef le\u01e7wahi n \u021blata, Sidna \u0190isa i\u025begge\u1e0d s t\u025bib\u1e5banit, yenna : Ilya, Ilya, lama sabaqtani ? Ye\u025bni : Illu-iw, Illu-iw, acu\u0263e\u1e5b i yi-te\u01e7\u01e7i\u1e0d ?\n27:47 Kra seg wid i\u1e25ed\u1e5ben dinna slan d acu i genna, qqa\u1e5ben : Issawal i nnbi Ilyas !\n27:48 Imiren kan yiwen seg-sen yuzzel yeddem-ed ame\u010d\u010dim n ta\u1e0du\u1e6d isselxes-it di lxell, icudd-it \u0263ef wu\u0263anim yefka-yas ad isew.\n27:49 Wiya\u1e0d qqa\u1e5ben : Anfet-as, a nwali ma yella a d-yas nnbi Ilyas a t-isellek.\n27:50 Sidna \u0190isa i\u025begge\u1e0d tikkelt nni\u1e0den, d\u0263a iffe\u0263-it \u1e5a\u1e5bu\u1e25.\n27:51 Imiren kan abe\u1e25nuq n le\u1e25jab yellan di l\u01e7ame\u025b iqedsen icerreg \u0263ef sin, seg ixef ufella armi d akessar. Lqa\u025ba tergagi, idurar ceqqeqen,\n27:52 i\u1e93ekwan ldin, a\u1e6das seg i\u1e25eqqiyen yemmuten, \u1e25yan-d\n27:53 ff\u0263en-d seg i\u1e93ekwan-nsen. Mi d-i\u1e25ya Sidna \u0190isa, kecmen \u0263er temdint iqedsen, a\u1e6das n l\u0263aci iwumi i d-\u1e0deh\u1e5ben.\n27:54 L\u1e25akem yellan d aqe\u1e5b\u1e5buy \u0263ef meyya i\u025bsek\u1e5biyen akk-d i\u025bsek\u1e5biyen i\u025bussen Sidna \u0190isa, tekcem-iten tugdi mi walan tergagi lqa\u025ba d wayen akk yed\u1e5ban, nnan : \u021a-\u021bide\u021b, argaz-agi d Mmi-s n \u1e5aebbi !\n27:55 A\u1e6das n tilawin i gellan dinna, \u021bmuqulent-ed si leb\u025bid. \u021a-\u021biggad-nni i d-yeddan d Sidna \u0190isa si tmurt n Jlili iwakken a s-qedcent.\n27:56 Tella gar-asent Meryem tamagdalit, Meryem yemma-s n Ye\u025bqub d Yusef akk-d d yemma-s n warraw n Zabadi.\n27:57 Mi d-tewwe\u1e0d tmeddit, yusa-d yiwen ume\u1e5bkanti n temdint n Arimati isem-is Yusef, ula d ne\u021b\u021ba d anelmad n Sidna \u0190isa.\n27:58 I\u1e5bu\u1e25 \u0263er Bila\u1e6dus yessuter-as l\u01e7e\u021b\u021ba n Sidna \u0190isa. Bila\u1e6dus yume\u1e5b ad a s-\u021b-id-fken.\n27:59 Yusef yeddem-ed l\u01e7e\u021b\u021ba n Sidna \u0190isa, i\u021b\u021bel-i\u021b di lekfen zeddigen,\n27:60 issers-i\u021b deg yiwen u\u1e93ekka ajdid, i ge\u0263za deg uz\u1e5bu. Ye\u0263leq tawwurt n u\u1e93ekka-nni s webla\u1e0d ameqqran, d\u0263a i\u1e5bu\u1e25.\n27:61 Meryem tamagdalit akk-d Meryem-nni nni\u1e0den, llant dinna qqiment, qublent-ed a\u1e93ekka.\n27:62 Azekka nni yellan d ass n uheggi n wass n weste\u025bfu, imeqqranen n lmuqedmin d ifariziyen \u1e5bu\u1e25en \u0263er Bila\u1e6dus\n27:63 nnan-as : A Sidi, necfa \u0263ef wayen i d-yenna ukeddab-agi asmi yedder, yenna-d : Ad \u025beddin tlata wussan, a d-\u1e25yu\u0263 si ger lmegtin .\n27:64 Cegge\u025b i\u025bessasen ad \u025bassen a\u1e93ekka-s alamma d ass wis tlata, iwakken inelmaden-is ur d-\u021basen ara ad akren l\u01e7e\u021b\u021ba-s, ad inin i wegdud : \u00ab i\u1e25ya-d si ger lmegtin. \u00bb Ne\u0263 m'ulac lekdeb-agi aneggaru ad yaggar amezwaru.\n27:65 Bila\u1e6dus yenna-yasen-d : Awit i\u025bessasen, \u1e5bu\u1e25et \u025basset-\u021b akken teb\u0263am.\n27:66 \u1e5au\u1e25en, zemmemen aken ilaq tawwurt n u\u1e93ekka-nni s webla\u1e0d, imiren sbedden ta\u025bessast zdat-es.\n28:1 Mi g\u025bedda wass n weste\u025bfu, ta\u1e63eb\u1e25it n wass amezwaru n ddu\u1e5bt, Meryem tamagdalit akk-d meryem-nni nni\u1e0den, \u1e5bu\u1e25ent a d-\u1e93u\u1e5bent a\u1e93ekka n Sidna \u0190isa.\n28:2 Deg yiwet n teswi\u025bt, tergagi lqa\u025ba ; ataya yiwen n lmelk n Sidi \u1e5aebbi, i\u1e63ubb-ed seg igenni, iqe\u1e5b\u1e5beb \u0263er u\u1e93ekka, iswexxe\u1e5b abla\u1e0d-nni, yeqqim fell-as.\n28:3 I\u021bfe\u01e7\u01e7i\u01e7 am leb\u1e5baq, llebsa-s \u021b-\u021bamellalt am udfel.\n28:4 I\u025bessasen yellan dinna, ikcem-iten lxuf d ameqqran, qqu\u1e5ben amzun mmuten.\n28:5 Yen\u1e6deq lmelk \u0263er tilawin-nni, yenna-yasent : Kunemti ur \u021b\u021baggademt ara, axa\u1e6der \u1e93ri\u0263 \u0263ef \u0190isa i ye\u021b\u021busemm\u1e5ben \u0263ef wumidag i te\u021bnadimt.\n28:6 Ulac-it dagi, i\u1e25ya-d si ger lmegtin akken i t-id-yenna. Asemt-ed a\u021b-\u021bwalimt amkan anda akken ye\u1e0dleq !\n28:7 Azlemt a\u021b-\u021binimt i inelmaden-is belli ye\u1e25ya-d si ger lmegtin. Atan a kkun-yezwir \u0263er tmurt n Jlili ; dinna ara t-te\u1e93rem. AAtan nni\u0263-akunt-\u021b-id !\n28:8 Imiren kan, \u1e5bu\u1e25ent seg u\u1e93ekka-nni s lfe\u1e5b\u1e25 d ameqqran \u0263as akken uggadent. Uzzlent ad awint lexba\u1e5b i inelmaden n Sidna \u0190isa.\n28:9 Ataya Sidna \u0190isa imuger-itent-id, yenna-yasent : Sslam fell-akunt ! QQe\u1e5b\u1e5bbent, se\u01e7\u01e7dent zdat-es, ssudnent i\u1e0da\u1e5b\u1e5ben-is.\n28:10 Imiren Sidna \u0190isa yenna-yasent : Ur \u021b\u021baggademt ! \u1e5au\u1e25emt inimt i watmaten-iw ad \u1e5bu\u1e25en \u0263er tmurt n Jlili, dinna ara yi-\u1e93ren.\n28:11 Mi \u021beddunt deg ubrid, kra seg i\u025bessasen-nni n u\u1e93ekka kecmen \u0263er temdint, xebb\u1e5ben imeqqranen n lmuqedmin \u0263ef wayen akk yed\u1e5ban.\n28:12 Mi nnejma\u025ben imeqqranen n wegdud akk-d imeqqranen n lmuqedmin, msefhamen ad fken i i\u025bessasen-nni ssuma tameqqrant n yedrimen,\n28:13 nnan-asen : Init belli d inelmaden-is i d-yusan deg yi\u1e0d, ukren l\u01e7e\u021b\u021ba-s mi nella ne\u1e6d\u1e6des.\n28:14 Ma yella yewwe\u1e0d lexba\u1e5b-agi \u0263er l\u1e25akem, d nukkni ara t-iqablen iwakken ur awen-ixeddem ula d acemma.\n28:15 I\u025bsek\u1e5biyen-nni \u1e6d\u1e6dfen idrimen-nni, xedmen ayen akk i sen-d-nnan lmuqedmin. Tamsalt-agi \u021b\u025bawaden-\u021b-id wat Is\u1e5bail ar ass-a.\n28:16 \u1e24dac inelmaden-nni \u1e5bu\u1e25en \u0263er tmurt n Jlili, \u0263er wedrar-nni anda i sen-yenna Sidna \u0190isa ad mlilen.\n28:17 Mi t-walan se\u01e7\u01e7den zdat-es, me\u025bna kra seg-sen mazal \u021bcukkuten.\n28:18 Sidna \u0190isa iqe\u1e5b\u1e5beb-ed \u0263u\u1e5b-sen, yenna-yasen : Te\u021b\u021bunefk-iyi-d tezmert ama di lqa\u025ba ama deg igenwan.\n28:19 \u1e5au\u1e25et \u0263er tmura me\u1e5b\u1e5ba n ddunit, slemdet imdanen iwakken ad u\u0263alen d inelmaden-iw, ad \u021bwa\u0263ed\u1e63en s yisem n Baba \u1e5aebbi, s yisem n Mmi-s akk-d yisem n \u1e5a\u1e5bu\u1e25 iqedsen.\n28:20 Slemdet-asen ad teb\u025ben ayen akk i wen-slemde\u0263. MMa d nekk ad ili\u0263 yid-wen yal ass alamma \u021b-\u021baggara n ddunit.","title":"Kabyle Bible (NT): Matthew","type":"page"}